𑁪. 𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑀅𑀢𑁆𑀣𑀯𑀺𑀪𑀸𑀯𑀦𑀸

𑁧. 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁫. 𑀏𑀯𑀁 𑀳𑀸𑀭𑀸𑀤𑀬𑁄 𑀲𑀭𑀽𑀧𑀢𑁄 𑀆𑀘𑀭𑀺𑀬𑁂𑀦 𑀉𑀤𑁆𑀤𑁂𑀲𑀢𑁄 𑀉𑀤𑁆𑀤𑀺𑀝𑁆𑀞𑀸, 𑀦𑀺𑀤𑁆𑀤𑁂𑀲𑀢𑁄 𑀘 𑀦𑀺𑀤𑁆𑀤𑀺𑀝𑁆𑀞𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, 𑀅𑀣 𑀓𑀲𑁆𑀫𑀸 𑀧𑀼𑀦 ‘‘𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄’’𑀢𑀺𑀆𑀤𑀺𑀓𑁄 𑀆𑀭𑀤𑁆𑀥𑁄𑀢𑀺 𑀘𑁂? 𑀯𑁂𑀦𑁂𑀬𑁆𑀬𑀸𑀦𑀁 𑀢𑀺𑀯𑀺𑀥𑀢𑁆𑀢𑀸. 𑀯𑁂𑀦𑁂𑀬𑁆𑀬𑀸 𑀳𑀺 𑀅𑀢𑀺𑀢𑀺𑀓𑁆𑀔𑀧𑀜𑁆𑀜𑁄 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑁄 𑀫𑀦𑁆𑀤𑀧𑀜𑁆𑀜𑁄𑀢𑀺 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲𑀸𑀦𑀼𑀭𑀽𑀧𑀁 𑀳𑀸𑀭𑀸𑀤𑀬𑁄 𑀉𑀤𑁆𑀤𑁂𑀲𑀢𑁄 𑀉𑀤𑁆𑀤𑀺𑀝𑁆𑀞𑀸, 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀅𑀦𑀼𑀭𑀽𑀧𑀁 𑀦𑀺𑀤𑁆𑀤𑁂𑀲𑀢𑁄 𑀦𑀺𑀤𑁆𑀤𑀺𑀝𑁆𑀞𑀸, 𑀇𑀤𑀸𑀦𑀺 𑀫𑀦𑁆𑀤𑀧𑀜𑁆𑀜𑀲𑁆𑀲𑀸𑀦𑀼𑀭𑀽𑀧𑀁 𑀳𑀸𑀭𑀸𑀤𑀬𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄’’𑀢𑀺𑀆𑀤𑀺𑀓𑁄 𑀯𑀺𑀪𑀗𑁆𑀕𑀯𑀸𑀭𑁄 𑀆𑀭𑀤𑁆𑀥𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀳𑀸𑀭𑀸𑀤𑀬𑁄𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀳𑀸𑀭𑁂 𑀢𑀸𑀯 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 ‘𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫) 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑁂 𑀳𑀸𑀭𑀸𑀤𑀬𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀢𑁆𑀣 𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄𑀢𑀺 𑀘𑁂? 𑀬𑀸 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸 (𑀦𑁂𑀢𑁆𑀢𑀺. 𑁪) 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀕𑀸𑀣𑀸 𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑁂𑀲𑀦𑀸𑀳𑀸𑀭𑁄 𑀦𑀸𑀫, 𑀢𑀲𑁆𑀲 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑁪) 𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀓𑀺𑀁 𑀤𑁂𑀲𑀬𑀢𑀻’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀓𑀺𑀁 𑀤𑁂𑀲𑀬𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀧𑀼𑀘𑁆𑀙𑀁 𑀞𑀧𑁂𑀢𑁆𑀯𑀸 ‘‘𑀇𑀫𑀁 𑀤𑁂𑀲𑀬𑀢𑀻’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀓𑀺𑀁 𑀤𑁂𑀲𑀬𑀢𑀺? 𑀅𑀲𑁆𑀲𑀸𑀤𑀁 𑀆𑀤𑀻𑀦𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀓𑀺𑀁 𑀤𑁂𑀲𑀬𑀢𑀻𑀢𑀺 𑀘𑁂? 𑀅𑀲𑁆𑀲𑀸𑀤𑀁 𑀤𑁂𑀲𑀬𑀢𑀺 𑀲𑀁𑀯𑀡𑁆𑀡𑁂𑀢𑀺 𑀯𑀺𑀢𑁆𑀣𑀸𑀭𑁂𑀢𑀺, 𑀆𑀤𑀻𑀦𑀯𑀁 𑀤𑁂𑀲𑀬𑀢𑀺…𑀧𑁂… 𑀯𑀺𑀢𑁆𑀣𑀸𑀭𑁂𑀢𑀺, 𑀦𑀺𑀲𑁆𑀲𑀭𑀡𑀁 𑀤𑁂𑀲𑀬𑀢𑀺…𑀧𑁂… 𑀯𑀺𑀢𑁆𑀣𑀸𑀭𑁂𑀢𑀺, 𑀨𑀮𑀁 𑀤𑁂𑀲𑀬𑀢𑀺…𑀧𑁂… 𑀯𑀺𑀢𑁆𑀣𑀸𑀭𑁂𑀢𑀺, 𑀉𑀧𑀸𑀬𑀁 𑀤𑁂𑀲𑀬𑀢𑀺…𑀧𑁂… 𑀯𑀺𑀢𑁆𑀣𑀸𑀭𑁂𑀢𑀺, 𑀆𑀡𑀢𑁆𑀢𑀺𑀁 𑀤𑁂𑀲𑀬𑀢𑀺 𑀲𑀁𑀯𑀡𑁆𑀡𑁂𑀢𑀺 𑀯𑀺𑀢𑁆𑀣𑀸𑀭𑁂𑀢𑀻𑀢𑀺 𑀬𑁄𑀚𑀦𑁄.

𑀏𑀢𑁆𑀣 𑀘 ‘‘𑀅𑀬𑀁 𑀤𑁂𑀲𑀦𑀸𑀳𑀸𑀭𑁄’’𑀢𑀺 𑀲𑀤𑁆𑀤𑁄 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’𑀢𑀺𑀆𑀤𑀺𑀕𑀸𑀣𑀸𑀬𑀁 (𑀦𑁂𑀢𑁆𑀢𑀺. 𑁪) 𑀤𑀲𑁆𑀲𑀺𑀢𑀸 𑀇𑀫𑁂 𑀅𑀲𑁆𑀲𑀸𑀤𑀸𑀤𑀬𑁄 𑀓𑀢𑁆𑀣 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’𑀢𑀺𑀆𑀤𑀺𑀕𑀸𑀣𑀸𑀬𑀁 (𑀦𑁂𑀢𑁆𑀢𑀺. 𑁪) 𑀤𑀲𑁆𑀲𑀺𑀢𑀸 𑀇𑀫𑁂 𑀅𑀲𑁆𑀲𑀸𑀤𑀸𑀤𑀬𑁄 𑀓𑀢𑁆𑀣 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀢𑀩𑁆𑀩𑁂 𑀧𑀸𑀴𑀺𑀥𑀫𑁆𑀫𑁂 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀬𑁂 𑀅𑀲𑁆𑀲𑀸𑀤𑀸𑀤𑀬𑁄 𑀆𑀕𑀢𑀸, 𑀢𑁂 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀤𑁂𑀲𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀥𑀫𑁆𑀫𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀲𑀘𑁆𑀘𑀲𑀫𑀸𑀥𑀺𑀧𑀜𑁆𑀜𑀸𑀧𑀓𑀢𑀺𑀧𑀼𑀜𑁆𑀜𑀸𑀧𑀢𑁆𑀢𑀺𑀜𑁂𑀬𑁆𑀬𑀸𑀤𑀻𑀲𑀼 𑀩𑀳𑀽𑀲𑀼 𑀅𑀢𑁆𑀣𑁂𑀲𑀼 𑀧𑀯𑀢𑁆𑀢𑁄, 𑀢𑀣𑀸𑀧𑀺 𑀇𑀥 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀬𑁂𑀯 𑀧𑀯𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀢𑁆𑀣𑀼𑀤𑁆𑀤𑁂𑀲𑁄 𑀧𑀦 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫) 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀥 𑀫𑀬𑀸 𑀦 𑀯𑀼𑀢𑁆𑀢𑁄. 𑀯𑁄-𑀓𑀸𑀭𑁄𑀧𑀺 𑀉𑀧𑀬𑁄𑀕𑀓𑀭𑀡𑀧𑀤𑀧𑀽𑀭𑀡𑀲𑀫𑁆𑀧𑀤𑀸𑀦𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺 𑀘, 𑀢𑀣𑀸𑀧𑀺 𑀇𑀥 𑀲𑀫𑁆𑀧𑀤𑀸𑀦𑀢𑁆𑀣𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀦𑁆𑀢𑀺 𑀬𑀸𑀘𑀦𑁆𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄, 𑀧𑀘𑁆𑀘𑀬𑁂 𑀯𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀪𑀺𑀓𑁆𑀔𑀽, 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀻𑀢𑀺 𑀯𑀸 𑀪𑀺𑀓𑁆𑀔𑀽. 𑀪𑀺𑀓𑁆𑀔𑀯𑁂𑀢𑀺 𑀢𑁂 𑀪𑀺𑀓𑁆𑀔𑀽 𑀆𑀮𑀧𑀢𑀺, 𑀓𑀺𑀫𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀦𑁄 𑀫𑀼𑀔𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑁂 𑀅𑀢𑀺𑀉𑀲𑁆𑀲𑀸𑀳𑀦𑁂 𑀦𑀺𑀬𑁄𑀚𑁂𑀢𑀼𑀁 𑀆𑀮𑀧𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀦𑀸𑀳𑀁 𑀇𑀲𑁆𑀲𑀭𑀢𑀸𑀬 𑀢𑀼𑀫𑁆𑀳𑁂 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀭𑁂𑀬𑁆𑀬𑀸𑀫𑀺, 𑀥𑀫𑁆𑀫𑀁𑀬𑁂𑀯 𑀤𑁂𑀲𑁂𑀲𑁆𑀲𑀸𑀫𑀺, 𑀤𑁂𑀲𑁂𑀦𑁆𑀢𑁄 𑀘 𑀦 𑀅𑀜𑁆𑀜𑁂𑀲𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀼𑀢𑀫𑀬𑀜𑀸𑀡𑀸𑀦𑀼𑀲𑀸𑀭𑁂𑀦 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀦𑀸𑀯𑀭𑀡𑀜𑀸𑀡𑁂𑀦 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸𑀬 𑀇𑀤𑀸𑀦𑀺 𑀫𑀬𑀸𑀬𑁂𑀯 𑀧𑀯𑀢𑁆𑀢𑀺𑀬𑀫𑀸𑀦𑀁 𑀥𑀫𑁆𑀫𑀁 𑀅𑀳𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁 𑀆𑀤𑀺𑀓𑀮𑁆𑀬𑀸𑀡𑀁, 𑀆𑀤𑀺 𑀓𑀮𑁆𑀬𑀸𑀡𑀫𑁂𑀢𑀲𑁆𑀲𑀸𑀢𑀺 𑀯𑀸 𑀆𑀤𑀺𑀓𑀮𑁆𑀬𑀸𑀡𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀤𑀺𑀓𑀮𑁆𑀬𑀸𑀡𑀸𑀤𑀬𑁄 𑀘𑁂𑀢𑁆𑀣 𑀅𑀢𑁆𑀣𑀓𑀮𑁆𑀬𑀸𑀡𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 𑁋 ‘‘𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑀁, 𑀲𑀫𑀸𑀥𑀺𑀦𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀧𑀜𑁆𑀜𑀸𑀬 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁. 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀯𑀸 𑀆𑀤𑀺𑀓𑀮𑁆𑀬𑀸𑀡𑀁, 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁. 𑀅𑀣 𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀯𑀺𑀦𑀬𑀦𑁂𑀦 𑀆𑀤𑀺𑀓𑀮𑁆𑀬𑀸𑀡𑀁, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀯𑀺𑀦𑀬𑀦𑁂𑀦 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀺𑀦𑀬𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁. 𑀅𑀬𑀫𑁂𑀯𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫).

𑀅𑀭𑀻𑀬𑀢𑀺 𑀜𑀸𑀬𑀢𑀻𑀢𑀺 𑀅𑀢𑁆𑀣𑁄, 𑀅𑀭-𑀥𑀸𑀢𑀼𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀜𑀸𑀡𑀧𑁆𑀧𑀥𑀸𑀦𑁄 𑀆𑀭𑀫𑁆𑀫𑀡𑀺𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀢𑁆𑀣𑁄, 𑀞𑀸𑀦𑀽𑀧𑀘𑀸𑀭𑀢𑁄 𑀅𑀢𑁆𑀣𑀲𑁆𑀲 𑀜𑀸𑀢𑀩𑁆𑀩𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀢𑁆𑀢𑀺 𑀅𑀢𑁆𑀣𑁄, 𑀇𑀢𑀺-𑀲𑀤𑁆𑀤𑁂𑀦 𑀲𑀸𑀬𑁂𑀯 𑀲𑀢𑁆𑀢𑀺 𑀧𑀭𑀸𑀫𑀲𑀻𑀬𑀢𑀺, 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀢𑁆𑀢𑀺𑀲𑀳𑀺𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀗𑁆𑀔𑀸𑀢𑁄 𑀜𑀸𑀢𑀩𑁆𑀩𑁄 𑀅𑀢𑁆𑀣𑁄 𑀢-𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑁄𑀢𑀺 𑀥𑀸𑀢𑀼𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀅𑀲𑀢𑀺 𑀪𑀯𑀢𑀻𑀢𑀺 𑀯𑀸 𑀅𑀢𑁆𑀣𑁄, 𑀲𑀳 𑀅𑀢𑁆𑀣𑁂𑀦 𑀬𑁄 𑀥𑀫𑁆𑀫𑁄 𑀯𑀢𑁆𑀢𑀢𑀻𑀢𑀺 𑀲𑁄 𑀥𑀫𑁆𑀫𑁄 𑀲𑀸𑀢𑁆𑀣𑁄, 𑀅𑀢𑁆𑀣𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀸 𑀥𑀫𑁆𑀫𑁄 𑀲𑀸𑀢𑁆𑀣𑁄, 𑀲𑀗𑁆𑀓𑀸𑀲𑀦𑀸𑀤𑀺𑀙𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀯𑀸 𑀲𑀸𑀢𑁆𑀣𑁄. 𑀅𑀬𑀫𑁂𑀯𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄 𑀦𑁂𑀢𑁆𑀢𑀺𑀯𑀺𑀲𑀬𑀢𑁆𑀢𑀸. 𑀲𑀫𑁆𑀧𑀦𑁆𑀦𑀁 𑀩𑁆𑀬𑀜𑁆𑀚𑀦𑀁 𑀬𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀲𑀩𑁆𑀬𑀜𑁆𑀚𑀦𑁄. 𑀲𑀺𑀣𑀺𑀮𑀥𑀦𑀺𑀢𑀤𑀻𑀖𑀭𑀲𑁆𑀲𑀕𑀭𑀼𑀮𑀳𑀼𑀲𑀫𑁆𑀩𑀦𑁆𑀥𑀯𑀯𑀢𑁆𑀣𑀺𑀢𑀯𑀺𑀫𑀼𑀢𑁆𑀢𑀦𑀺𑀕𑁆𑀕𑀳𑀺𑀢𑀲𑀫𑁆𑀧𑀦𑁆𑀦𑀢𑁆𑀢𑀸, 𑀅𑀓𑀸𑀭𑀦𑁆𑀢𑀸𑀤𑀺𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀏𑀓𑀯𑀘𑀦𑀸𑀤𑀺𑀲𑀫𑁆𑀧𑀦𑁆𑀦𑀢𑁆𑀢𑀸, 𑀧𑀫𑀸𑀤𑀮𑁂𑀔𑀸𑀤𑀺𑀭𑀳𑀺𑀢𑀢𑁆𑀢𑀸 𑀘 𑀅𑀯𑀬𑀯𑁄 𑀲𑀫𑁆𑀧𑀦𑁆𑀦𑁄 𑀢𑀁𑀲𑀫𑀽𑀳𑀢𑁆𑀢𑀸 𑀥𑀫𑁆𑀫𑁄 𑀲𑀫𑁆𑀧𑀦𑁆𑀦𑀩𑁆𑀬𑀜𑁆𑀚𑀦𑁄 𑀦𑀸𑀫, 𑀅𑀓𑁆𑀔𑀭𑀸𑀤𑀺𑀙𑀩𑁆𑀬𑀜𑁆𑀚𑀦𑀧𑀤𑀲𑀫𑀸𑀬𑁄𑀕𑀸 𑀯𑀸 𑀲𑀩𑁆𑀬𑀜𑁆𑀚𑀦𑁄. 𑀅𑀬𑀫𑁂𑀯𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀇𑀫𑀲𑁆𑀫𑀺𑀁 𑀅𑀬𑀁 𑀊𑀦𑁄, 𑀲𑁄 𑀦𑁂𑀢𑀩𑁆𑀩𑁄 𑀧𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀉𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑁄, 𑀲𑀻𑀮𑀓𑁆𑀔𑀦𑁆𑀥𑀲𑀫𑀸𑀥𑀺𑀓𑁆𑀔𑀦𑁆𑀥𑀧𑀜𑁆𑀜𑀸𑀓𑁆𑀔𑀦𑁆𑀥- 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀧𑀸𑀭𑀺𑀧𑀽𑀭𑀺𑀬𑀸 𑀯𑀸 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑁄. 𑀇𑀥𑀸𑀬𑀁 𑀅𑀢𑀺𑀭𑁂𑀓𑁄, 𑀲𑁄 𑀅𑀧𑀦𑁂𑀢𑀩𑁆𑀩𑁄𑀢𑀺 𑀯𑀢𑁆𑀯𑀸 𑀅𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀧𑀭𑀺𑀲𑀼𑀤𑁆𑀥𑁄, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑀢𑀸𑀬 𑀧𑀯𑀢𑁆𑀢𑀺𑀬𑀫𑀸𑀦𑀢𑁆𑀢𑀸 𑀯𑀸 𑀧𑀭𑀺𑀲𑀼𑀤𑁆𑀥𑁄. 𑀲𑁂𑀝𑁆𑀞𑀢𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀩𑁆𑀭𑀳𑁆𑀫𑀸𑀦𑀁 𑀯𑀸 𑀲𑁂𑀝𑁆𑀞𑀸𑀦𑀁 𑀅𑀭𑀺𑀬𑀸𑀦𑀁 𑀘𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀧𑀩𑁆𑀩𑀚𑁆𑀚𑀩𑁆𑀭𑀳𑁆𑀫𑀘𑀭𑀺𑀬𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀸𑀤𑀻𑀲𑀼 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀺, 𑀧𑀭𑀺𑀤𑀻𑀧𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺…𑀧𑁂… 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀢𑀩𑁆𑀩𑁂 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑁂 𑀅𑀲𑁆𑀲𑀸𑀤𑀸𑀤𑀬𑁄 𑀤𑁂𑀲𑀦𑀸𑀳𑀸𑀭𑁄 𑀤𑁂𑀲𑀬𑀢𑀺 𑀲𑀁𑀯𑀡𑁆𑀡𑁂𑀢𑀺 𑀯𑀺𑀢𑁆𑀣𑀸𑀭𑁂𑀢𑀻𑀢𑀺 𑀆𑀘𑀭𑀺𑀬𑁂𑀦 𑀲𑀸𑀫𑀜𑁆𑀜𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑁂𑀲𑀦𑀸𑀳𑀸𑀭𑁄 𑀇𑀥 𑀧𑀸𑀴𑀺𑀬𑀁 𑀆𑀕𑀢𑀁 𑀇𑀫𑀁 𑀅𑀲𑁆𑀲𑀸𑀤𑀁 𑀤𑁂𑀲𑀬𑀢𑀺, 𑀇𑀥 𑀧𑀸𑀴𑀺𑀬𑀁 𑀆𑀕𑀢𑀁 𑀇𑀫𑀁 𑀆𑀤𑀻𑀦𑀯𑀁 𑀤𑁂𑀲𑀬𑀢𑀻𑀢𑀺𑀆𑀤𑀺 𑀯𑀺𑀲𑁂𑀲𑁄 𑀦 𑀯𑀺𑀜𑁆𑀜𑀸𑀢𑀩𑁆𑀩𑁄, ‘‘𑀓𑀣𑀁 𑀯𑀺𑀜𑁆𑀜𑀸𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀥 𑀧𑀸𑀴𑀺𑀬𑀁 𑀆𑀕𑀢𑁄 𑀅𑀬𑀁 𑀅𑀲𑁆𑀲𑀸𑀤𑁄, 𑀇𑀥 𑀧𑀸𑀴𑀺𑀬𑀁 𑀆𑀕𑀢𑁄 𑀅𑀬𑀁 𑀆𑀤𑀻𑀦𑀯𑁄’’𑀢𑀺 𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑁆𑀯𑀸 𑀉𑀧𑀮𑀓𑁆𑀔𑀡𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄? 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀯𑀺𑀲𑀬𑀯𑀺𑀲𑀬𑀺𑀪𑁂𑀤𑁂𑀲𑀼 𑀅𑀲𑁆𑀲𑀸𑀤𑁂𑀲𑀼 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑁄𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺. (𑀲𑀼. 𑀦𑀺. 𑁭𑁭𑁨; 𑀫𑀳𑀸𑀦𑀺. 𑁧) 𑁋

𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀬𑁄 𑀯𑀺𑀲𑀬𑀪𑀽𑀢𑁄 𑀅𑀲𑁆𑀲𑀸𑀤𑁄 𑀆𑀕𑀢𑁄, 𑀲𑁄 𑀅𑀬𑀁 𑀅𑀲𑁆𑀲𑀸𑀤𑁂𑀢𑀩𑁆𑀩𑁄 𑀅𑀲𑁆𑀲𑀸𑀤𑁄 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑁄𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀏𑀯𑀁 𑀪𑀕𑀯𑀢𑀸 𑀤𑁂𑀲𑀺𑀢𑁄, 𑀧𑀓𑀸𑀲𑀺𑀢𑁄 𑀘 𑀲𑀸𑀲𑀦𑀥𑀫𑁆𑀫𑁄 𑀬𑁂𑀲𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀢𑁂 𑀅𑀲𑁆𑀲𑀸𑀤𑀸𑀤𑀬𑁄 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀪𑀽𑀢𑀸 𑀬𑀢𑁆𑀣 𑀬𑀢𑁆𑀣 𑀧𑀸𑀞𑁂 𑀲𑀯𑀺𑀲𑁂𑀲𑀁 𑀯𑀼𑀢𑁆𑀢𑀸, 𑀢𑀢𑁄 𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀉𑀤𑀸𑀳𑀭𑀡𑀯𑀲𑁂𑀦 𑀇𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫) 𑀯𑀼𑀢𑁆𑀢𑀁.

𑀢𑀢𑁆𑀣 𑀅𑀲𑁆𑀲𑀸𑀤𑀻𑀬𑀢𑁂𑀢𑀺 𑀅𑀲𑁆𑀲𑀸𑀤𑁄, 𑀅𑀲𑁆𑀲𑀸𑀤𑁂𑀢𑀩𑁆𑀩𑁄 𑀯𑀢𑁆𑀣𑀼𑀓𑀸𑀫𑁄. 𑀓𑀸𑀫𑀻𑀬𑀢𑁂𑀢𑀺 𑀓𑀸𑀫𑁄, 𑀯𑀢𑁆𑀣𑀼𑀓𑀸𑀫𑁄 𑀘. 𑀢𑀁 𑀓𑀸𑀫𑀬𑀢𑀻𑀢𑀺 𑀓𑀸𑀫𑀬𑀫𑀸𑀦𑁄, 𑀲𑀢𑁆𑀢𑁄. 𑀢𑀲𑁆𑀲 𑀧𑀻𑀢𑀺𑀬𑀸 𑀬𑀼𑀢𑁆𑀢𑀁 𑀫𑀦𑁄 𑀏𑀢𑀲𑁆𑀲𑀸𑀢𑀺 𑀧𑀻𑀢𑀺𑀫𑀦𑁄. 𑀫𑀦𑀢𑀺 𑀚𑀸𑀦𑀸𑀢𑀻𑀢𑀺𑀆𑀤𑀺𑀯𑀘𑀦𑀢𑁆𑀣𑁂𑀦 𑀫𑀘𑁆𑀘𑁄. 𑀓𑀸𑀫𑀁 𑀓𑀸𑀫𑀺𑀢𑀩𑁆𑀩𑀁 𑀯𑀢𑁆𑀣𑀼 𑀓𑀸𑀫𑀬𑀫𑀸𑀦𑀲𑁆𑀲 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀏𑀢𑀁 𑀓𑀸𑀫𑀺𑀢𑀩𑁆𑀩𑀁 𑀯𑀢𑁆𑀣𑀼 𑀲𑀘𑁂 𑀲𑀫𑀺𑀚𑁆𑀛𑀢𑀺, 𑀏𑀯𑀁 𑀲𑀢𑀺 𑀲𑁄 𑀲𑀢𑁆𑀢𑁄 𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺. 𑀬𑁄 𑀫𑀘𑁆𑀘𑁄 𑀬𑀁 𑀯𑀢𑁆𑀣𑀼𑀁 𑀇𑀘𑁆𑀙𑀢𑀺, 𑀢𑀁 𑀯𑀢𑁆𑀣𑀼𑀁 𑀲𑁄 𑀫𑀘𑁆𑀘𑁄 𑀮𑀤𑁆𑀥𑀸 𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀻𑀢𑀺 𑀕𑀸𑀣𑀸𑀬𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀓𑀸𑀫𑀁 …𑀧𑁂… 𑀧𑀻𑀢𑀺𑀫𑀦𑁄 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀢𑁆𑀯𑀸 ‘‘𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀮𑁄𑀪𑀦𑀻𑀬𑀁 𑀯𑀢𑁆𑀣𑀼𑀁𑀬𑁂𑀯 𑀮𑀤𑁆𑀥𑀸 𑀧𑀻𑀢𑀺𑀫𑀦𑁄 𑀦 𑀳𑁄𑀢𑀺, 𑀅𑀣 𑀔𑁄 𑀧𑀢𑁆𑀣𑁂𑀢𑀩𑁆𑀩𑀁 𑀧𑀽𑀚𑁂𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀮𑀤𑁆𑀥𑀸 𑀫𑀘𑁆𑀘𑁄 𑀧𑀻𑀢𑀺𑀫𑀦𑁄 𑀘 𑀳𑁄𑀢𑀻𑀢𑀺 𑀅𑀢𑀺𑀭𑁂𑀓𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀲𑀬𑀪𑀽𑀢𑁄 𑀅𑀲𑁆𑀲𑀸𑀤𑁂𑀢𑀩𑁆𑀩𑁄 𑀅𑀲𑁆𑀲𑀸𑀤𑁄 𑀇𑀥 𑀧𑀸𑀴𑀺𑀬𑀁 𑀕𑀸𑀣𑀸𑀬𑀁 𑀆𑀕𑀢𑁄𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀤𑀺𑀪𑁂𑀤𑁂𑀲𑀼 𑀆𑀤𑀻𑀦𑀯𑁂𑀲𑀼 𑀓𑀢𑀫𑁄 𑀆𑀤𑀻𑀦𑀯𑁄 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄? 𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀤𑀻𑀲𑀼 𑀆𑀤𑀻𑀦𑀯𑁂𑀲𑀼 𑀓𑀢𑀫𑁄 𑀆𑀤𑀻𑀦𑀯𑁄 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑁄𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺. (𑀲𑀼. 𑀦𑀺. 𑁭𑁭𑁩; 𑀫𑀳𑀸𑀦𑀺. 𑁨) 𑁋

𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀬𑁄 𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑁄 𑀆𑀤𑀻𑀦𑀯𑁄 𑀆𑀕𑀢𑁄, 𑀲𑁄 𑀅𑀬𑀁 𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑁄 𑀆𑀤𑀻𑀦𑀯𑁄 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑁄𑀢𑀺.

𑀕𑀸𑀣𑀸𑀬𑀁 𑀧𑀦 𑀓𑀸𑀫𑀬𑀢𑀺 𑀇𑀘𑁆𑀙𑀢𑀻𑀢𑀺 𑀓𑀸𑀫𑀬𑀸𑀦𑁄. 𑀅𑀣 𑀯𑀸 𑀬𑀸𑀬𑀢𑀺 𑀕𑀘𑁆𑀙𑀢𑀻𑀢𑀺 𑀬𑀸𑀦𑁄, 𑀓𑀸𑀫𑁂𑀦 𑀬𑀸𑀦𑁄 𑀓𑀸𑀫𑀬𑀸𑀦𑁄, 𑀢𑀲𑁆𑀲. 𑀙𑀦𑁆𑀤𑁄 𑀚𑀸𑀢𑁄 𑀬𑀲𑁆𑀲 𑀲𑁄 𑀙𑀦𑁆𑀤𑀚𑀸𑀢𑁄, 𑀢𑀲𑁆𑀲. 𑀯𑀺𑀚𑁆𑀛𑀻𑀬𑀢𑁂𑀢𑀺 𑀯𑀺𑀤𑁆𑀥𑁄, 𑀲𑀮𑁆𑀮𑀢𑀺 𑀧𑀯𑀺𑀲𑀢𑀻𑀢𑀺 𑀲𑀮𑁆𑀮𑁄, 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀲𑀮𑁆𑀮𑀯𑀺𑀤𑁆𑀥𑁄. 𑀓𑀸𑀫𑀁 𑀓𑀸𑀫𑀬𑀸𑀦𑀲𑁆𑀲 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄 𑀬𑁂 𑀓𑀸𑀫𑀸 𑀮𑀪𑀺𑀢𑀩𑁆𑀩𑀸, 𑀢𑁂 𑀓𑀸𑀫𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀬𑀤𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀤𑀸 𑀲𑁄 𑀚𑀦𑁆𑀢𑀼 𑀭𑀼𑀧𑁆𑀧𑀢𑀺. 𑀓𑀻𑀤𑀺𑀲𑁄𑀯 𑀭𑀼𑀧𑁆𑀧𑀢𑀺? 𑀅𑀬𑁄𑀫𑀬𑀲𑀮𑁆𑀮𑀯𑀺𑀤𑁆𑀥𑁄 𑀫𑀺𑀕𑁄 𑀭𑀼𑀧𑁆𑀧𑀢𑀺 𑀇𑀯, 𑀧𑀭𑀺𑀳𑀻𑀦𑀓𑀸𑀫𑁄 𑀚𑀦𑁆𑀢𑀼 𑀭𑀼𑀧𑁆𑀧𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 ‘‘𑀭𑀼𑀧𑁆𑀧𑀢𑀻’’𑀢𑀺𑀯𑀘𑀦𑁂𑀦 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀤𑁄𑀫𑀦𑀲𑁆𑀲𑀪𑀽𑀢𑁄 𑀆𑀤𑀻𑀦𑀯𑁄 𑀇𑀥 𑀧𑀸𑀴𑀺𑀬𑀁 𑀆𑀕𑀢𑁄𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀫𑀕𑁆𑀕𑀦𑀺𑀩𑁆𑀩𑀸𑀦𑀯𑀲𑁂𑀦 𑀤𑀼𑀯𑀺𑀥𑁂𑀲𑀼 𑀦𑀺𑀲𑁆𑀲𑀭𑀡𑁂𑀲𑀼 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁 𑀓𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁? 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀫𑀕𑁆𑀕𑀦𑀺𑀩𑁆𑀩𑀸𑀦𑀯𑀲𑁂𑀦 𑀤𑀼𑀯𑀺𑀥𑁂𑀲𑀼 𑀦𑀺𑀲𑁆𑀲𑀭𑀡𑁂𑀲𑀼 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻’’𑀢𑀺. (𑀲𑀼. 𑀦𑀺. 𑁭𑁭𑁪; 𑀫𑀳𑀸𑀦𑀺. 𑁩) 𑁋

𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀬𑀁 𑀲𑀫𑀢𑀺𑀯𑀢𑁆𑀢𑀦𑀓𑀭𑀡𑀁 𑀫𑀕𑁆𑀕𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀭𑀡𑀁 𑀆𑀕𑀢𑀁, 𑀢𑀁 𑀇𑀤𑀁 𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑀫𑀢𑀺𑀯𑀢𑁆𑀢𑀦𑀓𑀭𑀡𑀁 𑀦𑀺𑀲𑁆𑀲𑀭𑀡𑀁 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀦𑁆𑀢𑀺.

𑀕𑀸𑀣𑀸𑀬𑀁 𑀬𑁄𑀢𑀺 𑀛𑀸𑀦𑀮𑀸𑀪𑀻 𑀯𑀸 𑀅𑀭𑀺𑀬𑁄 𑀯𑀸. 𑀓𑀸𑀫𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀯𑀢𑁆𑀣𑀼𑀓𑀸𑀫𑁄. 𑀢𑁂𑀲𑀼 𑀧𑀯𑀢𑁆𑀢𑀙𑀦𑁆𑀤𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑀸 𑀧𑀭𑀺𑀯𑀚𑁆𑀚𑁂𑀢𑀺. 𑀓𑀺𑀁 𑀧𑀭𑀺𑀯𑀚𑁆𑀚𑁂𑀢𑀺 𑀇𑀯 𑀯𑀚𑁆𑀚𑁂𑀢𑀺? 𑀲𑀧𑁆𑀧𑀲𑁆𑀲 𑀲𑀺𑀭𑁄 𑀲𑀺𑀭𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀤𑀺𑀲𑁆𑀯𑀸 𑀧𑀤𑀸 𑀧𑀸𑀤𑁂𑀦 𑀧𑀭𑀺𑀯𑀚𑁆𑀚𑁂𑀢𑀺 𑀇𑀯, 𑀏𑀯𑀁 𑀧𑀭𑀺𑀯𑀚𑁆𑀚𑁂𑀢𑀺. 𑀲𑀢𑁄 𑀲𑀢𑀺𑀲𑀫𑁆𑀧𑀦𑁆𑀦𑁄 𑀲𑁄 𑀧𑀼𑀕𑁆𑀕𑀮𑁄 𑀮𑁄𑀓𑁂 𑀭𑀽𑀧𑀸𑀤𑀻𑀲𑀼 𑀯𑀺𑀲𑀢𑁆𑀢𑀺𑀓𑀁 𑀇𑀫𑀁 𑀢𑀡𑁆𑀳𑀁 𑀬𑁂𑀦 𑀫𑀕𑁆𑀕𑁂𑀦 𑀲𑀫𑀢𑀺𑀯𑀢𑁆𑀢𑀢𑀺 𑀲𑀁 𑀲𑀼𑀝𑁆𑀞𑀼 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀢𑀺, 𑀇𑀤𑀁 𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑀫𑀢𑀺𑀯𑀢𑁆𑀢𑀦𑀓𑀭𑀡𑀁 𑀏𑀓𑀤𑁂𑀲𑀁 𑀦𑀺𑀲𑁆𑀲𑀭𑀡𑀁 𑀦𑀸𑀫𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀧𑀸𑀤𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀆𑀓𑀸𑀭𑀲𑁆𑀲 𑀭𑀲𑁆𑀲𑀁 𑀓𑀢𑁆𑀯𑀸 ‘‘𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀧𑀸𑀤𑀸𑀢𑀺 𑀘 𑀧𑀸𑀤𑁂𑀦 𑀬𑀣𑀸 ‘‘𑀅𑀫𑁄𑀳𑀪𑀸𑀯𑀸 𑀅𑀫𑁄𑀳𑀪𑀸𑀯𑁂𑀦𑀸’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀧𑀸𑀤𑁂𑀦𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫).

𑀏𑀓𑀤𑁂𑀲𑁄 𑀯𑀺𑀲𑀬𑀲𑀗𑁆𑀔𑀸𑀢𑁄 𑀅𑀲𑁆𑀲𑀸𑀤𑁄 𑀇𑀥 𑀧𑀸𑀴𑀺𑀬𑀁 𑀆𑀕𑀢𑁄𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀏𑀓𑀤𑁂𑀲𑁄 𑀯𑀺𑀲𑀬𑀺𑀲𑀗𑁆𑀔𑀸𑀢𑁄 𑀅𑀲𑁆𑀲𑀸𑀤𑁄 𑀓𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄? 𑀔𑁂𑀢𑁆𑀢𑀁 𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀣 𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄? 𑀔𑁂𑀢𑁆𑀢𑀁 𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺 𑀓𑀲𑁆𑀫𑀸 𑀏𑀯𑀁 𑀆𑀭𑀤𑁆𑀥𑀁, 𑀦𑀦𑀼 ‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄? 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀲𑁆𑀲𑀸𑀤𑁄 𑀯𑀺𑀪𑀢𑁆𑀢𑁄? 𑀲𑀘𑁆𑀘𑀁, 𑀅𑀲𑁆𑀲𑀸𑀤𑁄 𑀧𑀦 𑀤𑀼𑀯𑀺𑀥𑁄 𑀯𑀺𑀲𑀬𑀯𑀺𑀲𑀬𑀺𑀯𑀲𑁂𑀦, 𑀢𑀲𑁆𑀫𑀺𑀁 𑀯𑀺𑀲𑀬𑀲𑀗𑁆𑀔𑀸𑀢𑁄 𑀅𑀲𑁆𑀲𑀸𑀤𑁄 𑀧𑀼𑀩𑁆𑀩𑁂 𑀯𑀺𑀪𑀢𑁆𑀢𑁄, 𑀇𑀤𑀸𑀦𑀺 𑀯𑀺𑀲𑀬𑀺𑀲𑀗𑁆𑀔𑀸𑀢𑀁 𑀅𑀲𑁆𑀲𑀸𑀤𑀁 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄? 𑀔𑁂𑀢𑁆𑀢𑀁 𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀯𑀺𑀲𑀬𑀯𑀺𑀲𑀬𑀺𑀪𑁂𑀤𑁂𑀲𑀼 𑀅𑀲𑁆𑀲𑀸𑀤𑁂𑀲𑀼 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑁄𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀽 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻’’𑀢𑀺. (𑀲𑀼. 𑀦𑀺. 𑁭𑁭𑁫; 𑀫𑀳𑀸𑀦𑀺. 𑁪) 𑁋

𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀬𑁄 𑀅𑀦𑀼𑀕𑀺𑀚𑁆𑀛𑀦𑀲𑀗𑁆𑀔𑀸𑀢𑁄 𑀅𑀲𑁆𑀲𑀸𑀤𑁄 𑀆𑀕𑀢𑁄, 𑀲𑁄 𑀅𑀬𑀁 𑀅𑀦𑀼𑀕𑀺𑀚𑁆𑀛𑀦𑀲𑀗𑁆𑀔𑀸𑀢𑁄 𑀯𑀺𑀲𑀬𑀺𑀅𑀲𑁆𑀲𑀸𑀤𑁄 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑁄𑀢𑀺.

𑀕𑀸𑀣𑀸𑀬𑀁 𑀔𑁂𑀢𑁆𑀢𑀦𑁆𑀢𑀺 𑀔𑀺𑀧𑀻𑀬𑀦𑁆𑀢𑀺 𑀩𑀻𑀚𑀸𑀦𑀺 𑀏𑀢𑁆𑀣 𑀞𑀸𑀦𑁂𑀢𑀺 𑀔𑁂𑀢𑁆𑀢𑀁. 𑀔𑀺𑀧𑀦𑁆𑀢𑀸𑀦𑀁 𑀚𑀦𑀸𑀦𑀁 𑀔𑀺𑀧𑀦𑀓𑀺𑀭𑀺𑀬𑀸 𑀔𑀺𑀧-𑀥𑀸𑀢𑀼𑀬𑀸 𑀫𑀼𑀔𑁆𑀬𑀢𑁆𑀣𑁄, 𑀔𑀺𑀧𑀦𑀓𑀺𑀭𑀺𑀬𑀸𑀚𑀦𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀨𑀮𑀽𑀧𑀘𑀸𑀭𑀢𑁆𑀣𑁄, 𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑀲𑁆𑀲 𑀓𑁂𑀤𑀸𑀭𑀲𑁆𑀲 𑀯𑀺𑀭𑀼𑀴𑁆𑀳𑀸𑀧𑀦𑀲𑀢𑁆𑀢𑀺 𑀨𑀮𑀽𑀧𑀘𑀸𑀭𑀢𑁆𑀣𑁄, 𑀇𑀢𑀺-𑀲𑀤𑁆𑀤𑁂𑀦 𑀲𑀸 𑀯𑀺𑀭𑀼𑀴𑁆𑀳𑀸𑀧𑀦𑀲𑀢𑁆𑀢𑀺𑀬𑁂𑀯 𑀧𑀭𑀸𑀫𑀲𑀻𑀬𑀢𑀺, 𑀢𑀲𑁆𑀲𑀸 𑀲𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀁 𑀓𑁂𑀤𑀸𑀭𑀲𑀗𑁆𑀔𑀸𑀢𑀁 𑀞𑀸𑀦𑀁 𑀢-𑀧𑀘𑁆𑀘𑀬𑀢𑁆𑀣𑁄. 𑀏𑀲 𑀦𑀬𑁄 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀏𑀯𑀭𑀽𑀧𑁂𑀲𑀼 𑀘 𑀯𑀘𑀦𑀢𑁆𑀣𑁂𑀲𑀼 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀯𑀧𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼. 𑀅𑀧𑀭𑀡𑁆𑀡𑀸𑀤𑀻𑀦𑀁 𑀧𑀢𑀺𑀝𑁆𑀞𑀳𑀦𑀁 𑀯𑀧-𑀥𑀸𑀢𑀼𑀬𑀸 𑀫𑀼𑀔𑁆𑀬𑀢𑁆𑀣𑁄, 𑀞𑀸𑀦𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀲𑀢𑁆𑀢𑀺 𑀨𑀮𑀽𑀧𑀘𑀸𑀭𑀢𑁆𑀣𑁄, 𑀇𑀢𑀺-𑀲𑀤𑁆𑀤𑁂𑀦 𑀲𑀸 𑀧𑀢𑀺𑀝𑁆𑀞𑀸𑀧𑀦𑀲𑀢𑁆𑀢𑀺 𑀧𑀭𑀸𑀫𑀲𑀻𑀬𑀢𑀺. 𑀢𑀲𑁆𑀲𑀸 𑀲𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀝𑁆𑀞𑀸𑀦𑀁 𑀢-𑀧𑀘𑁆𑀘𑀬𑀢𑁆𑀣𑁄. 𑀔𑁂𑀢𑁆𑀢𑀁 𑀧𑀦 𑀧𑀼𑀩𑁆𑀩𑀡𑁆𑀡𑀯𑀺𑀭𑀽𑀳𑀦𑀝𑁆𑀞𑀸𑀦𑀁, 𑀯𑀢𑁆𑀣𑀼 𑀅𑀧𑀭𑀡𑁆𑀡𑀯𑀺𑀭𑀽𑀳𑀦𑀝𑁆𑀞𑀸𑀦𑀁.

𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀦𑁆𑀢𑀺 𑀳𑀺, 𑀓𑀺𑀁 𑀢𑀁? 𑀧𑀻𑀢𑀺𑀲𑁄𑀫𑀦𑀲𑁆𑀲𑀁, 𑀭𑀸𑀢𑀺 𑀧𑀯𑀢𑁆𑀢𑁂𑀢𑀺 𑀚𑀸𑀢𑀭𑀽𑀧𑀦𑁆𑀢𑀺 𑀭𑀁, 𑀓𑀺𑀁 𑀢𑀁? 𑀚𑀸𑀢𑀭𑀽𑀧𑀁, 𑀳𑀺𑀁 𑀭𑀦𑁆𑀢𑀺 𑀳𑀺𑀭𑀁, 𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄. 𑀜𑀸𑀧𑁂𑀢𑀺 𑀢𑁄𑀲𑁂𑀢𑀻𑀢𑀺 𑀜𑀁, 𑀓𑀺𑀁 𑀢𑀁? 𑀚𑀸𑀢𑀭𑀽𑀧𑀁. 𑀳𑀺𑀭𑀁 𑀳𑀼𑀢𑁆𑀯𑀸 𑀜𑀁 𑀳𑀺𑀭𑀜𑁆𑀜𑀁, 𑀧𑀯𑀢𑁆𑀢𑀫𑀸𑀦𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀯𑀢𑁆𑀢𑁂𑀢𑁆𑀯𑀸 𑀚𑀦𑁂 𑀯𑀺𑀲𑁂𑀲𑁂𑀦 𑀢𑁄𑀲𑁂𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀯𑀸-𑀲𑀤𑁆𑀤𑁄 𑀯𑀼𑀢𑁆𑀢𑀸𑀯𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑀢𑁆𑀣𑁄. 𑀕𑀘𑁆𑀙𑀦𑁆𑀢𑀺 𑀯𑀺𑀲𑁂𑀲𑁂𑀦𑀸𑀢𑀺 𑀕𑀸𑀯𑁄, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀲𑀦𑁆𑀢𑀺 𑀪𑀓𑁆𑀔𑀦𑁆𑀢𑀺 𑀯𑀺𑀲𑁂𑀲𑁂𑀦𑀸𑀢𑀺 𑀅𑀲𑁆𑀲𑀸, 𑀕𑀸𑀯𑁄 𑀘 𑀅𑀲𑁆𑀲𑀸 𑀘 𑀕𑀯𑀸𑀲𑁆𑀲𑀁. 𑀤𑀸𑀢𑀩𑁆𑀩𑀁 𑀧𑀞𑀫𑀁 𑀤𑁂𑀦𑁆𑀢𑀻𑀢𑀺 𑀤𑀸, 𑀅𑀲𑀦𑁆𑀢𑀺 𑀪𑀓𑁆𑀔𑀦𑁆𑀢𑀻𑀢𑀺 𑀅𑀲𑀸, 𑀤𑀢𑁆𑀯𑀸 𑀅𑀲𑀸 𑀤𑀸𑀲𑀸, 𑀲𑀸𑀫𑀺𑀓𑀸𑀦𑀁 𑀤𑀸𑀢𑀩𑁆𑀩𑀁 𑀧𑀞𑀫𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀅𑀲𑀦𑁆𑀢𑀺 𑀪𑀓𑁆𑀔𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀫𑀺𑀓𑁂𑀳𑀺 𑀯𑀸 𑀤𑀺𑀦𑁆𑀦𑀁 𑀅𑀲𑀦𑁆𑀢𑀺 𑀪𑀓𑁆𑀔𑀦𑁆𑀢𑀻𑀢𑀺 𑀤𑀸𑀲𑀸, 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀅𑀲𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀸 𑀤𑀸𑀲𑀸,. 𑀫𑀸𑀢𑀸𑀧𑀺𑀢𑀽𑀦𑀁 𑀳𑀤𑀬𑀁 𑀧𑀼𑀭𑁂𑀦𑁆𑀢𑀻𑀢𑀺 𑀧𑀼𑀭𑀺𑀲𑀸, 𑀧𑀼𑀭𑀁 𑀳𑀺𑀢𑀁 𑀯𑀸 𑀇𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀻𑀢𑀺 𑀧𑀼𑀭𑀺𑀲𑀸. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀁 𑀧𑀼𑀭𑁂𑀢𑀺 𑀓𑀫𑁆𑀫𑀦𑁆𑀢𑀺 𑀧𑀼𑀭𑀁, 𑀓𑀺𑀁 𑀢𑀁? 𑀩𑀮𑀯𑀓𑀫𑁆𑀫𑀁, 𑀧𑀼𑀭𑀁 𑀇𑀲𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀯𑀸 𑀧𑀼𑀭𑀺𑀲𑀸. 𑀧𑀼𑀭𑀺𑀲𑀸 𑀏𑀯 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. ‘‘𑀧𑀼𑀭𑀺 𑀉𑀘𑁆𑀘𑀝𑁆𑀞𑀸𑀦𑁂 𑀲𑁂𑀦𑁆𑀢𑀻𑀢𑀺 𑀯𑀸 𑀧𑀼𑀭𑀺𑀲𑀸. 𑀧𑀼𑀭𑀺𑀲𑀸 𑀳𑀺 𑀫𑀸𑀢𑀽𑀦𑀁 𑀧𑀺𑀢𑀼𑀝𑁆𑀞𑀸𑀦𑁂 𑀞𑀺𑀢𑀸’’𑀢𑀺 𑀇𑀫𑁂 𑀯𑀘𑀦𑀢𑁆𑀣𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀬𑀼𑀢𑁆𑀢𑀸𑀬𑁂𑀯 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀤𑀸𑀲𑀸 𑀘 𑀧𑀼𑀭𑀺𑀲𑀸 𑀘 𑀤𑀸𑀲𑀧𑁄𑀭𑀺𑀲𑀁, 𑀫𑀚𑁆𑀛𑁂 𑀯𑀼𑀤𑁆𑀥𑀺. 𑀏𑀢𑁆𑀣 𑀘 𑀤𑀸𑀲𑀕𑁆𑀕𑀳𑀡𑁂𑀦 𑀤𑀸𑀲𑀻𑀧𑀺 𑀕𑀳𑀺𑀢𑀸. 𑀤𑀸𑀲𑀸 𑀤𑀼𑀓𑁆𑀓𑀝𑀚𑀦𑀸, 𑀧𑀼𑀭𑀺𑀲𑀸 𑀲𑀼𑀔𑀺𑀢𑀚𑀦𑀸𑀢𑀺 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀞𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣 𑀫𑀸𑀢𑀼𑀕𑀸𑀫𑁂 𑀧𑀼𑀢𑁆𑀢𑀥𑀻𑀢𑀸𑀢𑀺 𑀣𑀺𑀬𑁄. 𑀦𑀭𑀲𑀤𑁆𑀤𑀲𑁆𑀲 𑀯𑀺𑀕𑁆𑀕𑀳𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯.

𑀏𑀓𑀤𑁂𑀲𑁄 𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑁄 𑀆𑀤𑀻𑀦𑀯𑁄 𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀆𑀕𑀢𑁄𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀤𑀼𑀓𑁆𑀔𑀲𑀗𑁆𑀔𑀸𑀢𑁄 𑀆𑀤𑀻𑀦𑀯𑁄 𑀓𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄? 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀣 𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄? 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀻’’𑀢𑀺𑀆𑀤𑀺 𑀓𑀲𑁆𑀫𑀸 𑀏𑀯𑀁 𑀆𑀭𑀤𑁆𑀥𑀁, 𑀦𑀦𑀼 ‘‘𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄? 𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀆𑀤𑀻𑀦𑀯𑁄 𑀯𑀺𑀪𑀢𑁆𑀢𑁄𑀢𑀺? 𑀲𑀘𑁆𑀘𑀁, 𑀆𑀤𑀻𑀦𑀯𑁄 𑀧𑀦 𑀩𑀳𑀼𑀯𑀺𑀥𑁄 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀤𑀺𑀯𑀲𑁂𑀦, 𑀢𑀲𑁆𑀫𑀺𑀁 𑀩𑀳𑀼𑀯𑀺𑀥𑁂 𑀆𑀤𑀻𑀦𑀯𑁂 𑀏𑀓𑀤𑁂𑀲𑁄 𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑁄 𑀆𑀤𑀻𑀦𑀯𑁄 𑀧𑀼𑀩𑁆𑀩𑁂 𑀯𑀺𑀪𑀢𑁆𑀢𑁄, 𑀇𑀤𑀸𑀦𑀺 𑀤𑀼𑀓𑁆𑀔𑀲𑀗𑁆𑀔𑀸𑀢𑀁 𑀆𑀤𑀻𑀦𑀯𑀁 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄? 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀤𑀻𑀲𑀼 𑀆𑀤𑀻𑀦𑀯𑁂𑀲𑀼 𑀓𑀢𑀫𑁄 𑀆𑀤𑀻𑀦𑀯𑁄 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑁄𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓’’𑀦𑁆𑀢𑀺. (𑀲𑀼. 𑀦𑀺. 𑁭𑁭𑁬; 𑀫𑀳𑀸𑀦𑀺. 𑁫) 𑁋

𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀬𑁄 𑀤𑀼𑀓𑁆𑀔𑀲𑀗𑁆𑀔𑀸𑀢𑁄 𑀏𑀓𑀤𑁂𑀲𑁄 𑀆𑀤𑀻𑀦𑀯𑁄 𑀆𑀕𑀢𑁄, 𑀲𑁄 𑀅𑀬𑀁 𑀤𑀼𑀓𑁆𑀔𑀲𑀗𑁆𑀔𑀸𑀢𑁄 𑀏𑀓𑀤𑁂𑀲𑁄 𑀆𑀤𑀻𑀦𑀯𑁄 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑁄𑀢𑀺.

𑀕𑀸𑀣𑀸𑀬𑀁 𑀦𑀢𑁆𑀣𑀺 𑀩𑀮𑀁 𑀏𑀢𑁂𑀲𑀁 𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀩𑀮𑀸. 𑀓𑀲𑁆𑀫𑀸 𑀓𑀺𑀮𑁂𑀲𑀸 𑀅𑀩𑀮𑀸 𑀳𑁄𑀦𑁆𑀢𑀻𑀢𑀺? 𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀦𑀭𑀦𑁆𑀢𑀺 𑀔𑁂𑀢𑁆𑀢𑀸𑀤𑀺𑀓𑀸𑀫𑁂 𑀅𑀦𑀼𑀕𑀺𑀚𑁆𑀛𑀦𑁆𑀢𑀁 𑀦𑀭𑀁, 𑀲𑀤𑁆𑀥𑀸𑀩𑀮𑀸𑀤𑀺𑀯𑀺𑀭𑀳𑀢𑁄 𑀯𑀸 𑀅𑀩𑀮𑀁 𑀢𑀁 𑀦𑀭𑀁 𑀩𑀮𑀻𑀬𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀓𑀺𑀮𑁂𑀲𑀸 𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀢𑁆𑀢𑀸 𑀅𑀩𑀮𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀓𑀸𑀫𑀫𑀦𑀼𑀕𑀺𑀚𑁆𑀛𑀦𑁆𑀢𑀁 𑀲𑀤𑁆𑀥𑀸𑀩𑀮𑀸𑀤𑀺𑀯𑀺𑀭𑀳𑀺𑀢𑀁 𑀅𑀪𑀺𑀪𑀯𑀺𑀢𑀼𑀁 𑀲𑀫𑀢𑁆𑀣𑀸 𑀪𑀯𑀦𑁆𑀢𑀺. 𑀫𑀤𑁆𑀤𑀦𑁆𑀢𑁂𑀦𑀁 𑀧𑀭𑀺𑀲𑁆𑀲𑀬𑀸𑀢𑀺 𑀓𑀸𑀫𑀕𑀺𑀤𑁆𑀥𑀁 𑀓𑀸𑀫𑁂 𑀧𑀭𑀺𑀬𑁂𑀲𑀦𑁆𑀢𑀁, 𑀓𑀸𑀫𑀁 𑀭𑀓𑁆𑀔𑀦𑁆𑀢𑀜𑁆𑀘 𑀏𑀦𑀁 𑀦𑀭𑀁 𑀧𑀭𑀺 𑀲𑀫𑀦𑁆𑀢𑀢𑁄 𑀧𑀭𑀺𑀧𑀻𑀴𑁂𑀢𑁆𑀯𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀘𑁂𑀯 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀫𑀤𑁆𑀤𑀦𑁆𑀢𑀺. 𑀢𑀢𑁄 𑀢𑁂𑀳𑀺 𑀧𑀭𑀺𑀲𑁆𑀲𑀬𑁂𑀳𑀺 𑀅𑀪𑀺𑀪𑀽𑀢𑀁 𑀦𑀁 𑀦𑀭𑀁 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺. 𑀓𑀺𑀫𑀺𑀯 𑀅𑀦𑁆𑀯𑁂𑀢𑀺? 𑀉𑀤𑀓𑀁 𑀪𑀺𑀦𑁆𑀦𑀦𑀸𑀯𑀁 𑀅𑀦𑁆𑀯𑁂𑀢𑀺 𑀇𑀯, 𑀏𑀯𑀁 𑀅𑀦𑁆𑀯𑁂𑀢𑀻𑀢𑀺 𑀅𑀢𑁆𑀣𑁄.

𑀏𑀓𑀤𑁂𑀲𑀁 𑀫𑀕𑁆𑀕𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀭𑀡𑀁 𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀆𑀕𑀢𑀦𑁆𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀢𑀺 𑀘 𑀯𑀺𑀜𑁆𑀜𑀸𑀢𑀁, ‘‘𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀏𑀓𑀤𑁂𑀲𑀁 𑀦𑀺𑀲𑁆𑀲𑀭𑀡𑀁 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁? 𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀣 𑀯𑀸 ‘‘𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁? 𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄’’𑀢𑀺𑀆𑀤𑀺 𑀓𑀲𑁆𑀫𑀸 𑀏𑀯𑀁 𑀆𑀭𑀤𑁆𑀥𑀁, 𑀦𑀦𑀼 ‘‘𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁? 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀲𑁆𑀲𑀭𑀡𑀁 𑀯𑀺𑀪𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀦𑀺𑀲𑁆𑀲𑀭𑀡𑀁 𑀧𑀦 𑀤𑀼𑀯𑀺𑀥𑀁 𑀫𑀕𑁆𑀕𑀦𑀺𑀩𑁆𑀩𑀸𑀦𑀯𑀲𑁂𑀦, 𑀢𑀢𑁆𑀣 𑀤𑀼𑀯𑀺𑀥𑁂 𑀦𑀺𑀲𑁆𑀲𑀭𑀡𑁂 𑀫𑀕𑁆𑀕𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀭𑀡𑀁 𑀧𑀼𑀩𑁆𑀩𑁂 𑀯𑀺𑀪𑀢𑁆𑀢𑀁, 𑀇𑀤𑀸𑀦𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀭𑀡𑀁 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁? 𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀫𑀕𑁆𑀕𑀦𑀺𑀩𑁆𑀩𑀸𑀦𑁂𑀲𑀼 𑀦𑀺𑀲𑁆𑀲𑀭𑀡𑁂𑀲𑀼 𑀏𑀓𑀤𑁂𑀲𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀭𑀡𑀁 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽’’𑀢𑀺. 𑁋

𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀬𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀭𑀡𑀁 𑀆𑀕𑀢𑀁, 𑀇𑀤𑀁 𑀦𑀺𑀲𑁆𑀲𑀭𑀡𑀁 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀦𑁆𑀢𑀺.

𑀕𑀸𑀣𑀸𑀬𑀁 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑀸𑀫𑀕𑀺𑀤𑁆𑀥𑀁 𑀦𑀭𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺, 𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀩𑁆𑀩𑀓𑀸𑀮𑁂 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑁂 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁂𑀦 𑀲𑀢𑁄 𑀲𑀢𑀺𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀓𑀸𑀫𑀸𑀦𑀺 𑀓𑀺𑀮𑁂𑀲𑀓𑀸𑀫𑁂 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀸 𑀧𑀭𑀺𑀯𑀚𑁆𑀚𑀬𑁂 𑀧𑀭𑀺𑀚𑀳𑁂𑀬𑁆𑀬. 𑀢𑁂 𑀓𑀸𑀫𑁂 𑀅𑀭𑀺𑀬𑀫𑀕𑁆𑀕𑁂𑀦 𑀧𑀳𑀸𑀬 𑀘𑀢𑀼𑀩𑁆𑀩𑀺𑀥𑀁 𑀑𑀖𑀁 𑀢𑀭𑁂𑀬𑁆𑀬 𑀢𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀓𑁄 𑀢𑀭𑀢𑀺 𑀇𑀯 𑀢𑀭𑁂𑀬𑁆𑀬? 𑀦𑀸𑀯𑀸𑀲𑀸𑀫𑀺𑀓𑁄 𑀦𑀸𑀯𑀁 𑀬𑀁 𑀧𑀯𑀺𑀲𑀦𑁆𑀢𑀁 𑀉𑀤𑀓𑀁 𑀲𑀺𑀢𑁆𑀯𑀸 𑀩𑀳𑀺 𑀲𑀺𑀜𑁆𑀘𑀺𑀢𑁆𑀯𑀸 𑀮𑀳𑀼𑀓𑀸𑀬 𑀦𑀸𑀯𑀸𑀬 𑀅𑀧𑁆𑀧𑀓𑀲𑀺𑀭𑁂𑀦 𑀢𑀭𑀺𑀢𑁆𑀯𑀸 𑀧𑀸𑀭𑀕𑀽 𑀧𑀸𑀭𑀁 𑀕𑀘𑁆𑀙𑀢𑀺 𑀇𑀯, 𑀏𑀯𑀁 𑀅𑀢𑁆𑀢𑀦𑀺 𑀧𑀯𑀢𑁆𑀢𑀁 𑀓𑀺𑀮𑁂𑀲𑀽𑀤𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀦𑀻𑀳𑀭𑀺𑀢𑁆𑀯𑀸 𑀮𑀳𑀼𑀓𑁂𑀦 𑀅𑀢𑁆𑀢𑀪𑀸𑀯𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀩𑁆𑀩𑀸𑀦𑁂𑀦 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀺𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀦𑀺𑀩𑁆𑀩𑀸𑀦𑀁 𑀓𑀲𑁆𑀫𑀸 𑀦𑀺𑀲𑁆𑀲𑀭𑀡𑀁 𑀳𑁄𑀢𑀺? 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀭𑀡𑀢𑁄 𑀦𑀺𑀲𑁆𑀲𑀭𑀡𑀁 𑀦𑀸𑀫.

𑀇𑀤𑀁 𑀦𑀺𑀲𑁆𑀲𑀭𑀡𑀁 𑀇𑀥 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀦𑁆𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀯𑀺𑀜𑁆𑀜𑀸𑀢𑀁, ‘‘𑀓𑀢𑀫𑀁 𑀨𑀮𑀁 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀨𑀮𑀁? 𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀭𑀓𑁆𑀔𑀦𑀦𑀺𑀧𑁆𑀨𑀸𑀤𑀦𑀫𑀘𑁆𑀘𑀼𑀢𑀭𑀡𑀸𑀤𑀻𑀲𑀼 𑀨𑀮𑁂𑀲𑀼 𑀓𑀢𑀫𑀁 𑀨𑀮𑀁 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺. (𑀲𑀼. 𑀦𑀺. 𑁧𑁦𑁨, 𑁧𑁦𑁩) 𑁋

𑀇𑀥 𑀧𑀸𑀴𑀺𑀕𑀸𑀣𑀸𑀬𑀁 𑀬𑀁 𑀅𑀦𑀢𑁆𑀣𑁂𑀳𑀺 𑀥𑀫𑁆𑀫𑀲𑁆𑀲 𑀭𑀓𑁆𑀔𑀦𑀨𑀮𑀁 𑀆𑀕𑀢𑀁, 𑀭𑀓𑁆𑀔𑀸𑀯𑀳𑀦𑀲𑁆𑀲 𑀅𑀩𑁆𑀪𑀼𑀤𑀬𑀲𑁆𑀲 𑀬𑀜𑁆𑀘 𑀦𑀺𑀧𑁆𑀨𑀸𑀤𑀦𑀁 𑀨𑀮𑀁 𑀆𑀕𑀢𑀁, 𑀇𑀤𑀁 𑀭𑀓𑁆𑀔𑀦𑀦𑀺𑀧𑁆𑀨𑀸𑀤𑀦𑀁 𑀨𑀮𑀁 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀦𑁆𑀢𑀺.

𑀕𑀸𑀣𑀸𑀬𑀁 𑀥𑀫𑁆𑀫𑁄𑀢𑀺 𑀬𑁂𑀦 𑀧𑀼𑀕𑁆𑀕𑀮𑁂𑀦 𑀬𑁄 𑀤𑀸𑀦𑀸𑀤𑀺𑀧𑁆𑀧𑀪𑁂𑀤𑁄 𑀧𑀼𑀜𑁆𑀜𑀥𑀫𑁆𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄, 𑀲𑁄 𑀥𑀫𑁆𑀫𑁄. 𑀥𑀫𑁆𑀫𑀘𑀸𑀭𑀺𑀁 𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑀁 𑀢𑀁 𑀧𑀼𑀕𑁆𑀕𑀮𑀁 𑀅𑀦𑀢𑁆𑀣𑁂𑀳𑀺 𑀭𑀓𑁆𑀔𑀢𑀺. 𑀓𑀺𑀫𑀺𑀯? 𑀯𑀲𑁆𑀲𑀓𑀸𑀮𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀲𑀢𑀺 𑀫𑀳𑀦𑁆𑀢𑀁 𑀓𑀼𑀲𑀮𑁂𑀦 𑀥𑀸𑀭𑁂𑀢𑀩𑁆𑀩𑀁 𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑀁 𑀓𑀼𑀲𑀮𑀁 𑀢𑀁 𑀚𑀦𑀁 𑀯𑀲𑁆𑀲𑀢𑁂𑀫𑀦𑀢𑁄 𑀭𑀓𑁆𑀔𑀢𑀺 𑀬𑀣𑀸, 𑀏𑀯𑀁 𑀭𑀓𑁆𑀔𑀺𑀢𑀩𑁆𑀩𑁄 𑀥𑀫𑁆𑀫𑁄𑀧𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑁂𑀦 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀲𑀼𑀝𑁆𑀞𑀼 𑀥𑀫𑁆𑀫𑀁 𑀭𑀓𑁆𑀔𑀦𑁆𑀢𑀁𑀬𑁂𑀯 𑀭𑀓𑁆𑀔𑀢𑀺, 𑀢𑀸𑀤𑀺𑀲𑁄 𑀥𑀫𑁆𑀫𑀘𑀸𑀭𑀻𑀬𑁂𑀯 𑀤𑀼𑀕𑁆𑀕𑀢𑀺𑀁 𑀦 𑀕𑀘𑁆𑀙𑀢𑀺. 𑀏𑀲𑁄 𑀆𑀦𑀺𑀲𑀁𑀲𑁄 𑀲𑀼𑀘𑀺𑀡𑁆𑀡𑁂 𑀲𑀼𑀘𑀺𑀡𑁆𑀡𑀲𑁆𑀲 𑀥𑀫𑁆𑀫𑁂 𑀥𑀫𑁆𑀫𑀲𑁆𑀲 𑀆𑀦𑀺𑀲𑀁𑀲𑁄𑀢𑀺 𑀅𑀢𑁆𑀣𑁄.

𑀏𑀓𑀤𑁂𑀲𑀁 𑀨𑀮𑀁 𑀇𑀥 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀦𑁆𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀢𑀫𑁄 𑀉𑀧𑀸𑀬𑁄 𑀓𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑁄? 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀦𑀺𑀩𑁆𑀩𑀺𑀤𑀸𑀤𑀻𑀲𑀼 𑀉𑀧𑀸𑀬𑁂𑀲𑀼 𑀓𑀢𑀫𑁄 𑀉𑀧𑀸𑀬𑁄 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑁄𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 ‘𑀅𑀦𑀺𑀘𑁆𑀘𑀸’𑀢𑀺…𑀧𑁂…;

𑀲𑀩𑁆𑀩𑁂 𑀥𑀫𑁆𑀫𑀸 ‘𑀅𑀦𑀢𑁆𑀢𑀸’𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺. (𑀥. 𑀧. 𑁨𑁭𑁭-𑁨𑁭𑁯) 𑁋

𑀇𑀥 𑀧𑀸𑀴𑀺𑀕𑀸𑀣𑀸𑀲𑀼 𑀬𑁄 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀦𑀺𑀩𑁆𑀩𑀺𑀤𑀸𑀜𑀸𑀡𑀲𑀗𑁆𑀔𑀸𑀢𑁄 𑀯𑀺𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀳𑁂𑀢𑀼𑀪𑀸𑀯𑀢𑁄 𑀫𑀕𑁆𑀕𑁄 𑀆𑀕𑀢𑁄, 𑀅𑀬𑀁 𑀉𑀧𑀸𑀬𑁄 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑁄𑀢𑀺.

𑀕𑀸𑀣𑀸𑀲𑀼 𑀲𑀩𑁆𑀩𑁂 𑀦𑀺𑀭𑀯𑀲𑁂𑀲𑀸 𑀓𑀫𑁆𑀫𑀘𑀺𑀢𑁆𑀢𑁄𑀢𑀼𑀆𑀳𑀸𑀭𑁂𑀳𑀺 𑀲𑀗𑁆𑀔𑀭𑀺𑀢𑀸 𑀲𑀗𑁆𑀔𑀢𑀲𑀗𑁆𑀔𑀸𑀭𑀸 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸 𑀇𑀢𑀺 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺, 𑀅𑀣 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀪𑀸𑀯𑁂 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀏𑀲𑁄 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑁄 𑀦𑀺𑀩𑁆𑀩𑀺𑀦𑁆𑀤𑀦𑀜𑀸𑀡𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀯𑀺𑀲𑀼𑀤𑁆𑀥𑀺𑀬𑀸 𑀫𑀕𑁆𑀕𑁄𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀻𑀲𑀼 𑀲𑀗𑁆𑀔𑀸𑀭𑀸𑀦𑀁 𑀲𑀗𑁆𑀔𑀢𑀥𑀫𑁆𑀫𑀪𑀸𑀯𑁄 𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲) 𑀯𑀼𑀢𑁆𑀢𑁄𑀯, 𑀢𑀁 𑀯𑀺𑀪𑀗𑁆𑀕𑀝𑁆𑀞𑀓𑀣𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀭𑀫𑁆𑀫𑀡𑀢𑁆𑀢𑀸 𑀢𑁂𑀪𑀽𑀫𑀓𑀥𑀫𑁆𑀫𑀸𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀦𑀺𑀘𑁆𑀘𑀸𑀤𑀺𑀪𑀸𑀯𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀦𑀼𑀭𑀽𑀧𑁄𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑁂𑀦 𑀤𑀼𑀓𑁆𑀔𑀸. 𑀅𑀦𑀢𑁆𑀢𑀸𑀢𑀺 𑀦𑀺𑀘𑁆𑀘𑀲𑀸𑀭𑀲𑀼𑀔𑀲𑀸𑀭𑀅𑀢𑁆𑀢𑀲𑀸𑀭𑀭𑀳𑀺𑀢𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦 𑀅𑀦𑀢𑁆𑀢𑀸, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀯𑀸 𑀅𑀦𑀢𑁆𑀢𑀸.

𑀏𑀓𑀤𑁂𑀲𑁄 𑀉𑀧𑀸𑀬𑁄 𑀇𑀥 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑁄𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑀸 𑀆𑀡𑀢𑁆𑀢𑀺 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺? 𑀘𑀓𑁆𑀔𑀼𑀫𑀸 𑀯𑀺𑀲𑀫𑀸𑀦𑀻𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺𑀆𑀤𑀺𑀕𑀸𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑀸𑀲𑀼 𑀧𑀸𑀧𑀤𑀼𑀘𑁆𑀘𑀭𑀺𑀢𑀧𑀭𑀺𑀯𑀚𑁆𑀚𑀦𑀸𑀡𑀢𑁆𑀢𑀺𑀓𑀮𑁆𑀬𑀸𑀡𑀲𑀼𑀘𑀭𑀺𑀢𑀘𑀭𑀡𑀸𑀡𑀢𑁆𑀢𑀺𑀆𑀤𑀻𑀲𑀼 𑀓𑀢𑀫𑀸𑀡𑀢𑁆𑀢𑀺 𑀢𑀢𑁆𑀣 𑀢𑁂𑀲𑀼 𑀧𑀸𑀴𑀺𑀥𑀫𑁆𑀫𑁂𑀲𑀼 𑀓𑀢𑁆𑀣 𑀧𑀸𑀴𑀺𑀥𑀫𑁆𑀫𑁂 𑀆𑀕𑀢𑀸𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀘𑀓𑁆𑀔𑀼𑀫𑀸 𑀯𑀺𑀲𑀫𑀸𑀦𑀻𑀯, 𑀯𑀺𑀚𑁆𑀚𑀫𑀸𑀦𑁂 𑀧𑀭𑀓𑁆𑀓𑀫𑁂;

𑀧𑀡𑁆𑀟𑀺𑀢𑁄 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑀬𑁂’’𑀢𑀺. (𑀉𑀤𑀸. 𑁪𑁩) 𑁋

𑀇𑀥 𑀧𑀸𑀴𑀺𑀥𑀫𑁆𑀫𑁂 𑀬𑀸 𑀧𑀸𑀧𑀤𑀼𑀘𑁆𑀘𑀭𑀺𑀢𑀧𑀭𑀺𑀯𑀚𑁆𑀚𑀦𑀸𑀡𑀢𑁆𑀢𑀺 𑀆𑀕𑀢𑀸, 𑀅𑀬𑀁 𑀧𑀸𑀧𑀤𑀼𑀘𑁆𑀘𑀭𑀺𑀢𑀧𑀭𑀺𑀯𑀚𑁆𑀚𑀦𑀸𑀡𑀢𑁆𑀢𑀺 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀸𑀢𑀺.

𑀕𑀸𑀣𑀸𑀬𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀚𑁆𑀚𑀫𑀸𑀦𑁂 𑀧𑀭𑀓𑁆𑀓𑀫𑁂 𑀆𑀯𑀳𑀺𑀢𑀁 𑀲𑀭𑀻𑀭𑀁 𑀆𑀯𑀳𑀦𑁆𑀢𑁄𑀯 𑀳𑀼𑀢𑁆𑀯𑀸 𑀯𑀺𑀲𑀫𑀸𑀦𑀺 𑀪𑀽𑀫𑀺𑀧𑁆𑀧𑀤𑁂𑀲𑀸𑀦𑀺 𑀯𑀸 𑀯𑀺𑀲𑀫𑁂 𑀳𑀢𑁆𑀣𑀺𑀆𑀤𑀬𑁄 𑀯𑀸 𑀧𑀭𑀺𑀯𑀚𑁆𑀚𑁂𑀢𑀺 𑀇𑀯, 𑀏𑀯𑀁 𑀚𑀻𑀯𑀮𑁄𑀓𑀲𑁆𑀫𑀺𑀁 𑀧𑀡𑁆𑀟𑀺𑀢𑁄 𑀧𑀸𑀧𑀸𑀦𑀺 𑀮𑀸𑀫𑀓𑀸𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀺. 𑀆𑀡𑀢𑁆𑀢𑀺 𑀦𑀸𑀫 𑀆𑀡𑀸𑀭𑀳𑀲𑁆𑀲 𑀥𑀫𑁆𑀫𑀭𑀸𑀚𑀲𑁆𑀲 𑀪𑀕𑀯𑀢𑁄 𑀆𑀡𑀸, 𑀲𑀸 𑀩𑀳𑀼𑀯𑀺𑀥𑀸, 𑀢𑀲𑁆𑀫𑀸 ‘‘𑀓𑀭𑁂𑀬𑁆𑀬 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬𑀁 𑀲𑀼𑀘𑀭𑀺𑀢𑀘𑀭𑀡𑀸 𑀆𑀡𑀢𑁆𑀢𑀺.

‘‘𑀉𑀧𑁂𑀣 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀣 𑀲𑀻𑀮𑀸𑀦𑀺, 𑀢𑀁 𑀯𑁄 𑀅𑀢𑁆𑀣𑀸𑀬 𑀳𑁂𑀳𑀺𑀢𑀻’’𑀢𑀺. (𑀣𑁂𑀭𑀻𑀕𑀸. 𑁨𑁪𑁯-𑁨𑁫𑁦, 𑁨𑁮𑁯-𑁨𑁯𑁦) 𑁋

𑀆𑀤𑀻𑀲𑀼 𑀕𑀸𑀣𑀸𑀲𑀼 𑀲𑀭𑀡𑀕𑀫𑀦𑀸𑀡𑀢𑁆𑀢𑀺𑀲𑀻𑀮𑀲𑀫𑀸𑀤𑀸𑀦𑀸𑀡𑀢𑁆𑀢𑀺𑀆𑀤𑀺 𑀆𑀕𑀢𑀸𑀢𑀺.

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺𑀆𑀤𑀺 𑀓𑀲𑁆𑀫𑀸 𑀏𑀯𑀁 𑀆𑀭𑀤𑁆𑀥𑀁, 𑀦𑀦𑀼 ‘‘𑀢𑀢𑁆𑀣 𑀓𑀢𑀫𑀁 𑀨𑀮𑀁? 𑀥𑀫𑁆𑀫𑁄 𑀳𑀯𑁂’’𑀢𑀺𑀆𑀤𑀺𑀦𑀸, ‘‘𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑁄? 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸, ‘‘𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺? 𑀘𑀓𑁆𑀔𑀼𑀫𑀸’’𑀢𑀺𑀆𑀤𑀺𑀦𑀸 𑀘 𑀨𑀮𑀽𑀧𑀸𑀬𑀸𑀡𑀢𑁆𑀢𑀺𑀬𑁄 𑀯𑀺𑀪𑀢𑁆𑀢𑀸𑀢𑀺? 𑀲𑀘𑁆𑀘𑀁, 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀦 𑀲𑀼𑀢𑁆𑀢𑁂𑀲𑀼 𑀆𑀕𑀢𑀸 𑀨𑀮𑀽𑀧𑀸𑀬𑀸𑀡𑀢𑁆𑀢𑀺𑀬𑁄 𑀯𑀺𑀪𑀢𑁆𑀢𑀸, 𑀇𑀤𑀸𑀦𑀺 𑀏𑀓𑀢𑁄 𑀆𑀕𑀢𑀸 𑀨𑀮𑀽𑀧𑀸𑀬𑀸𑀡𑀢𑁆𑀢𑀺𑀬𑁄 𑀯𑀺𑀪𑀚𑀺𑀢𑀼𑀁 ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽𑀢𑀺 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀸𑀭𑀮𑁄𑀓𑀁 𑀅𑀢𑁆𑀢𑀢𑁄 𑀲𑀼𑀜𑁆𑀜𑁄𑀢𑀺 𑀅𑀯𑀲𑀯𑀢𑁆𑀢𑀺𑀢𑀸𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀯𑀸 𑀢𑀼𑀘𑁆𑀙𑀪𑀸𑀯𑀲𑀫𑀦𑀼𑀧𑀲𑁆𑀲𑀦𑀯𑀲𑁂𑀦 𑀯𑀸 𑀧𑀲𑁆𑀲𑀸𑀢𑀺 𑀇𑀤𑀁 𑀪𑀕𑀯𑀢𑁄 𑀯𑀘𑀦𑀁 𑀯𑀺𑀥𑀸𑀦𑀪𑀸𑀯𑀢𑁄 𑀆𑀡𑀢𑁆𑀢𑀺 𑀦𑀸𑀫. 𑀦𑀺𑀘𑁆𑀘𑀲𑀸𑀭𑀲𑀼𑀔𑀲𑀸𑀭𑀅𑀢𑁆𑀢𑀲𑀸𑀭𑀸𑀤𑀺𑀭𑀳𑀺𑀢𑀢𑁆𑀢𑀸 ‘‘𑀫𑁄𑀖𑀭𑀸𑀚𑀸’’𑀢𑀺 𑀆𑀮𑀧𑀢𑀺, 𑀲𑀤𑁆𑀥𑀸𑀲𑀻𑀮𑀲𑀼𑀢𑀘𑀸𑀕𑀸𑀤𑀺𑀭𑀳𑀺𑀢𑀢𑁆𑀢𑀸 𑀯𑀸 𑀫𑁄𑀖𑁄.

‘‘𑀲𑀤𑀸 𑀲𑀢𑁄’’𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀯𑀼𑀢𑁆𑀢𑀸𑀬 𑀲𑀢𑀺𑀬𑀸 𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀲𑁆𑀲 𑀲𑀫𑁆𑀧𑀚𑀸𑀦𑀳𑁂𑀢𑀼𑀪𑀸𑀯𑀢𑁄 𑀲𑀢𑀺𑀬𑁂𑀯 𑀉𑀧𑀸𑀬𑁄, 𑀦 𑀲𑀢𑀺𑀫𑀸𑀢𑀺 𑀏𑀢𑁆𑀣 𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘𑀸𑀢𑀺 𑀏𑀢𑁆𑀣 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀫 ‘‘𑀭𑀽𑀧𑀁 𑀅𑀢𑁆𑀢𑀸, 𑀭𑀽𑀧𑀯𑀸 𑀅𑀢𑁆𑀢𑀸, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸, 𑀅𑀢𑁆𑀢𑀦𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀧𑁆𑀧𑀓𑀸𑀭𑀸 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀤𑀺𑀝𑁆𑀞𑀺. 𑀫𑀕𑁆𑀕𑁂𑀦 𑀊𑀳𑀘𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀯𑀺𑀥𑀺𑀦𑀸 𑀫𑀘𑁆𑀘𑀼𑀢𑀭𑁄 𑀫𑀘𑁆𑀘𑀼𑀦𑁄 𑀯𑀺𑀲𑀬𑀸𑀢𑀺𑀓𑁆𑀓𑀦𑁆𑀢𑁄 𑀲𑀺𑀬𑀸 𑀪𑀯𑁂𑀬𑁆𑀬. 𑀏𑀢𑁆𑀣 𑀬𑀁 𑀫𑀘𑁆𑀘𑀼𑀯𑀺𑀲𑀬𑀁 𑀢𑀭𑀡𑀁 𑀅𑀢𑀺𑀓𑁆𑀓𑀫𑀦𑀁, 𑀢𑀲𑁆𑀲 𑀅𑀢𑀺𑀓𑁆𑀓𑀫𑀦𑀲𑁆𑀲 𑀬𑀜𑁆𑀘 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀲𑀫𑁆𑀧𑀚𑁆𑀚𑀦𑀁, 𑀇𑀤𑀁 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀨𑀮𑀁 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀨𑀮𑀽𑀧𑀸𑀬𑀸𑀡𑀢𑁆𑀢𑀺𑀬𑁄 𑀯𑀺𑀪𑀢𑁆𑀢𑀸𑀧𑀺 𑁋

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸’’𑀢𑀺. (𑀲𑀼. 𑀦𑀺. 𑁧𑁧𑁨𑁫; 𑀫𑀳𑀸𑀦𑀺. 𑁧𑁮𑁬; 𑀘𑀽𑀴𑀦𑀺. 𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸 𑁧𑁪𑁪, 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁮) 𑁋

𑀏𑀓𑀕𑀸𑀣𑀸𑀬𑀁 𑀧𑀼𑀦 𑀏𑀓𑀢𑁄 𑀯𑀺𑀪𑀚𑀦𑀢𑁄 𑀨𑀮𑀸𑀤𑀻𑀲𑀼 𑀏𑀓𑀢𑁄 𑀤𑀲𑁆𑀲𑀺𑀢𑁂𑀲𑀼 𑀲𑀩𑁆𑀩𑀢𑁆𑀣 𑀲𑀼𑀢𑁆𑀢𑁂𑀲𑀼 𑀯𑀸 𑀲𑀩𑁆𑀩𑀢𑁆𑀣 𑀕𑀸𑀣𑀸𑀲𑀼 𑀯𑀸 𑀨𑀮𑀸𑀤𑀬𑁄 𑀤𑀲𑁆𑀲𑁂𑀢𑀩𑁆𑀩𑀸 𑀅𑀲𑁆𑀲𑀸𑀤𑀸𑀤𑀬𑁄 𑀯𑀺𑀬 𑀓𑀢𑁆𑀣𑀘𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸𑀢𑀺 𑀯𑀺𑀲𑁂𑀲𑁄 𑀯𑀺𑀚𑀸𑀦𑀺𑀢𑀩𑁆𑀩𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 ‘‘𑀬𑀣𑀸 𑀧𑀦…𑀧𑁂… 𑀏𑀓𑀢𑁄 𑀉𑀤𑀸𑀳𑀭𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫).

𑁬. 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀪𑀽𑀢𑀸 𑀅𑀲𑁆𑀲𑀸𑀤𑀸𑀤𑀬𑁄 ‘‘𑀇𑀥 𑀧𑀸𑀴𑀺𑀥𑀫𑁆𑀫𑁂 𑀅𑀬𑀁 𑀅𑀲𑁆𑀲𑀸𑀤𑁄 𑀆𑀕𑀢𑁄, 𑀇𑀥 𑀧𑀸𑀴𑀺𑀥𑀫𑁆𑀫𑁂 𑀅𑀬𑀁 𑀆𑀤𑀻𑀦𑀯𑁄 𑀆𑀕𑀢𑁄’’𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀢𑁄 𑀦𑀺𑀤𑀲𑁆𑀲𑀦𑀯𑀲𑁂𑀦 𑀲𑀭𑀽𑀧𑀢𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀢𑁂 𑀅𑀲𑁆𑀲𑀸𑀤𑀸𑀤𑀬𑁄 𑀢𑀺𑀡𑁆𑀡𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀸𑀫𑀜𑁆𑀜𑀢𑁄 𑀪𑀕𑀯𑀸 𑀓𑀺𑀁 𑀦𑀼 𑀔𑁄 𑀤𑁂𑀲𑁂𑀢𑀺, 𑀉𑀤𑀸𑀳𑀼 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑀣𑀸𑀮𑀸𑀪𑀁 𑀓𑀺𑀁 𑀦𑀼 𑀤𑁂𑀲𑁂𑀢𑀻𑀢𑀺 𑀅𑀦𑀼𑀬𑁄𑀕𑀲𑁆𑀲 𑀲𑀫𑁆𑀪𑀯𑀢𑁄 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀁 𑀤𑁂𑀲𑁂𑀢𑀺, 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀁 𑀤𑁂𑀲𑁂𑀢𑀻𑀢𑀺 𑀧𑀼𑀕𑁆𑀕𑀮𑀪𑁂𑀤𑁂𑀦 𑀅𑀲𑁆𑀲𑀸𑀤𑀸𑀤𑀬𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀲𑁆𑀲𑀸𑀤𑀸𑀤𑀻𑀲𑀼. 𑀦𑀺𑀲𑁆𑀲𑀭𑀡𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀕𑀯𑀸 𑀤𑁂𑀲𑁂𑀢𑀺, 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀇𑀫𑁂 𑀤𑁆𑀯𑁂 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀕𑀯𑀸 𑀤𑁂𑀲𑁂𑀢𑀺, 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀇𑀫𑁂 𑀢𑀬𑁄 𑀦𑁂𑀬𑁆𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀕𑀯𑀸 𑀤𑁂𑀲𑁂𑀢𑀻𑀢𑀺 𑀬𑁄𑀚𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀅𑀲𑁆𑀲𑀸𑀤𑀸𑀤𑀬𑁄 𑀉𑀤𑀸𑀳𑀭𑀡𑀯𑀲𑁂𑀦 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀧𑀼𑀕𑁆𑀕𑀮𑀯𑀺𑀪𑀸𑀕𑁂𑀦 𑀤𑁂𑀲𑀦𑀸𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘𑀢𑀢𑁆𑀣 𑀪𑀕𑀯𑀸’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲𑀸𑀢𑀺 𑀉𑀕𑁆𑀖𑀝𑀻𑀬𑀢𑁂 𑀧𑀝𑀺𑀯𑀺𑀚𑁆𑀛𑀻𑀬𑀢𑁂, 𑀞𑀧𑀻𑀬𑀢𑁂 𑀯𑀸 𑀲𑀧𑁆𑀧𑀪𑁂𑀤𑁄 𑀯𑀺𑀢𑁆𑀣𑀸𑀭𑁄 𑀅𑀢𑁆𑀣𑁄𑀢𑀺 𑀉𑀕𑁆𑀖𑀝𑀺𑀢𑁄, 𑀚𑀸𑀦𑀸𑀢𑀻𑀢𑀺 𑀜𑀽, 𑀉𑀕𑁆𑀖𑀝𑀺𑀢𑀁 𑀅𑀢𑁆𑀣𑀁 𑀜𑀽 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯 𑀲𑀧𑁆𑀧𑀪𑁂𑀤𑀁 𑀲𑀯𑀺𑀢𑁆𑀣𑀸𑀭𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀁 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀧𑀼𑀕𑁆𑀕𑀮𑁄 𑀉𑀤𑁆𑀤𑁂𑀲𑁂𑀦𑁂𑀯 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂𑀦𑁂𑀯 𑀅𑀢𑁆𑀣𑀁 𑀜𑀢𑁆𑀯𑀸 𑀅𑀢𑁆𑀣𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀲𑁄 𑀉𑀕𑁆𑀖𑀝𑀺𑀢𑀜𑁆𑀜𑀽 𑀦𑀸𑀫.

𑀯𑀺𑀧𑀜𑁆𑀘𑀻𑀬𑀢𑁂 𑀯𑀺𑀢𑁆𑀣𑀭𑀻𑀬𑀢𑁂 𑀅𑀢𑁆𑀣𑁄𑀢𑀺 𑀯𑀺𑀧𑀜𑁆𑀘𑀺𑀢𑁄, 𑀢𑀁 𑀚𑀸𑀦𑀸𑀢𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑁄 𑀧𑀼𑀕𑁆𑀕𑀮𑁄 𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀫𑀢𑁆𑀢𑀫𑁂𑀯 𑀅𑀢𑁆𑀣𑀁 𑀜𑀢𑁆𑀯𑀸 𑀅𑀢𑁆𑀣𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑁄, 𑀲𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑀸𑀫.

𑀧𑀝𑀺𑀦𑀺𑀤𑁆𑀤𑁂𑀲𑁂𑀦 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄 𑀧𑀸𑀧𑁂𑀢𑀩𑁆𑀩𑁄𑀢𑀺 𑀦𑁂𑀬𑁆𑀬𑁄. 𑀬𑁄 𑀧𑀼𑀕𑁆𑀕𑀮𑁄 𑀧𑀝𑀺𑀦𑀺𑀤𑁆𑀤𑁂𑀲𑁂𑀦 𑀯𑀸 𑀧𑀝𑀺𑀮𑁄𑀫𑁂𑀦 𑀯𑀸 𑀯𑀺𑀪𑀢𑁆𑀢𑀁 𑀏𑀯 𑀅𑀢𑁆𑀣𑀁 𑀜𑀢𑁆𑀯𑀸 𑀅𑀢𑁆𑀣𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑁄, 𑀲𑁄 𑀦𑁂𑀬𑁆𑀬𑁄 𑀦𑀸𑀫. 𑀦𑀺𑀲𑁆𑀲𑀭𑀡𑀤𑁂𑀲𑀦𑀸𑀬𑁂𑀯 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀝𑀺𑀯𑁂𑀥𑀸𑀪𑀺𑀲𑀫𑀬𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀆𑀤𑀻𑀦𑀯𑀤𑁂𑀲𑀦𑀸𑀬 𑀘𑁂𑀯 𑀦𑀺𑀲𑁆𑀲𑀭𑀡𑀤𑁂𑀲𑀦𑀸𑀬 𑀘 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀧𑀝𑀺𑀯𑁂𑀥𑀸𑀪𑀺𑀲𑀫𑀬𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀅𑀲𑁆𑀲𑀸𑀤𑀤𑁂𑀲𑀦𑀸𑀬 𑀘 𑀆𑀤𑀻𑀦𑀯𑀤𑁂𑀲𑀦𑀸𑀬 𑀘 𑀦𑀺𑀲𑁆𑀲𑀭𑀡𑀤𑁂𑀲𑀦𑀸𑀬 𑀘 𑀦𑁂𑀬𑁆𑀬𑀲𑁆𑀲 𑀧𑀝𑀺𑀯𑁂𑀥𑀸𑀪𑀺𑀲𑀫𑀬𑁄 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀇𑀥 𑀕𑀳𑁂𑀢𑀩𑁆𑀩𑁄.

𑀧𑀤𑀧𑀭𑀫𑁄 𑀧𑀦𑁂𑀢𑁆𑀣 𑀧𑀝𑀺𑀯𑁂𑀥𑀸𑀪𑀺𑀲𑀫𑀬𑀪𑀚𑀦𑀸𑀪𑀸𑀯𑀢𑁄 𑀦 𑀕𑀳𑀺𑀢𑁄. 𑀢𑀲𑁆𑀫𑀺𑀜𑁆𑀘 𑀅𑀕𑁆𑀕𑀳𑀺𑀢𑁂 𑀅𑀲𑁆𑀲𑀸𑀤𑁄, 𑀆𑀤𑀻𑀦𑀯𑁄, 𑀦𑀺𑀲𑁆𑀲𑀭𑀡𑀁, 𑀅𑀲𑁆𑀲𑀸𑀤𑀸𑀤𑀻𑀦𑀯𑀸, 𑀅𑀲𑁆𑀲𑀸𑀤𑀦𑀺𑀲𑁆𑀲𑀭𑀡𑀸𑀦𑀺, 𑀆𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀺, 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀺 𑀘𑀸𑀢𑀺 𑀲𑀢𑁆𑀢𑀲𑀼 𑀧𑀝𑁆𑀞𑀸𑀦𑀦𑀬𑁂𑀲𑀼 𑀢𑀢𑀺𑀬𑀙𑀝𑁆𑀞𑀲𑀢𑁆𑀢𑀫𑀸𑀯 𑀕𑀳𑀺𑀢𑀸, 𑀅𑀯𑀲𑁂𑀲𑀸 𑀘𑀢𑁆𑀢𑀸𑀭𑁄 𑀦𑀬𑀸 𑀦 𑀕𑀳𑀺𑀢𑀸. 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀸𑀪𑀸𑀯𑀢𑁄 𑀳𑀺 𑀕𑀳𑀡𑀸𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀯𑁂𑀦𑁂𑀬𑁆𑀬𑀯𑀺𑀦𑀬𑀜𑁆𑀘 𑀯𑁂𑀦𑁂𑀬𑁆𑀬𑀸𑀦𑀁 𑀲𑀦𑁆𑀢𑀸𑀦𑁂 𑀅𑀭𑀺𑀬𑀫𑀕𑁆𑀕𑀲𑁆𑀲𑀼𑀧𑁆𑀧𑀸𑀤𑀦𑀁, 𑀦 𑀲𑀸𑀲𑀦𑀯𑀺𑀦𑀬𑀦𑀫𑀢𑁆𑀢𑀁, 𑀅𑀭𑀺𑀬𑀫𑀕𑁆𑀕𑀼𑀧𑁆𑀧𑀸𑀤𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑁂𑀳𑀺 𑀏𑀯 𑀢𑀻𑀳𑀺 𑀧𑀤𑀝𑁆𑀞𑀸𑀦𑀦𑀬𑁂𑀳𑀺 𑀲𑀺𑀚𑁆𑀛𑀢𑀻𑀢𑀺 𑀇𑀢𑀭𑁂 𑀦𑀬𑀸 𑀇𑀥 𑀦 𑀯𑀼𑀢𑁆𑀢𑀸.

𑀬𑀲𑁆𑀫𑀸 𑀧𑀦 𑀧𑁂𑀝𑀓𑁂 (𑀧𑁂𑀝𑀓𑁄. 𑁨𑁩) 𑁋

‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘?

‘𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀸𑀦𑀺 𑀧𑀲𑁆𑀲𑀢𑀺 𑀅𑀢𑁆𑀢𑀦𑀺;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓’𑀦𑁆𑀢𑀺.

‘‘𑀢𑀢𑁆𑀣 𑀬𑀁 𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀬𑀁 𑀅𑀲𑁆𑀲𑀸𑀤𑁄. 𑀬𑀁 𑀧𑀸𑀧𑀓𑀸𑀭𑀻 𑀧𑀸𑀧𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀬𑀁 𑀆𑀤𑀻𑀦𑀯𑁄.

‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑀥𑀫𑁆𑀫𑀸. 𑀓𑀢𑀫𑁂 𑀅𑀝𑁆𑀞? ‘𑀮𑀸𑀪𑁄’𑀢𑀺𑀆𑀤𑀺 (𑀅. 𑀦𑀺. 𑁮.𑁬). 𑀢𑀢𑁆𑀣 𑀮𑀸𑀪𑁄 𑀬𑀲𑁄 𑀲𑀼𑀔𑀁 𑀧𑀲𑀁𑀲𑀸, 𑀅𑀬𑀁 𑀅𑀲𑁆𑀲𑀸𑀤𑁄. 𑀅𑀮𑀸𑀪𑁄 𑀅𑀬𑀲𑁄 𑀤𑀼𑀓𑁆𑀔𑀁 𑀦𑀺𑀦𑁆𑀤𑀸, 𑀅𑀬𑀁 𑀆𑀤𑀻𑀦𑀯𑁄.

‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

‘𑀲𑀼𑀔𑁄 𑀯𑀺𑀧𑀸𑀓𑁄 𑀧𑀼𑀜𑁆𑀜𑀸𑀦𑀁, 𑀅𑀥𑀺𑀧𑁆𑀧𑀸𑀬𑁄 𑀘 𑀇𑀚𑁆𑀛𑀢𑀺;

𑀔𑀺𑀧𑁆𑀧𑀜𑁆𑀘 𑀧𑀭𑀫𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀫𑀥𑀺𑀕𑀘𑁆𑀙𑀢𑀻’𑀢𑀺. 𑁋

𑀅𑀬𑀁 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

‘‘𑀤𑁆𑀯𑀢𑁆𑀢𑀺𑀁𑀲𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀬𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺…𑀧𑁂… 𑀯𑀺𑀯𑀝𑀘𑁆𑀙𑀤𑁄𑀢𑀺 𑀲𑀩𑁆𑀩𑀁 𑀮𑀓𑁆𑀔𑀡𑀲𑀼𑀢𑁆𑀢𑀁 (𑀤𑀻. 𑀦𑀺. 𑁩.𑁧𑁯𑁯) 𑀅𑀬𑀁 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

‘‘𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀪𑀸𑀭𑀳𑀸𑀭𑁄 𑀘 𑀧𑀼𑀕𑁆𑀕𑀮𑁄;

𑀪𑀸𑀭𑀸𑀤𑀸𑀦𑀁 𑀤𑀼𑀔𑀁 𑀮𑁄𑀓𑁂, 𑀪𑀸𑀭𑀦𑀺𑀓𑁆𑀔𑁂𑀧𑀦𑀁 𑀲𑀼𑀔𑀁.

‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀭𑀼𑀁 𑀪𑀸𑀭𑀁, 𑀅𑀜𑁆𑀜𑀁 𑀪𑀸𑀭𑀁 𑀅𑀦𑀸𑀤𑀺𑀬;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’𑀢𑀺. (𑀲𑀁. 𑀦𑀺. 𑁩.𑁨𑁨) 𑁋

𑀅𑀬𑀁 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀢𑀲𑁆𑀫𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄’𑀢𑀺. (𑀫. 𑀦𑀺. 𑁨.𑁩𑁦𑁭; 𑀣𑁂𑀭𑀕𑀸. 𑁭𑁮𑁭; 𑀧𑁂𑀝𑀓𑁄. 𑁨𑁩) 𑁋

𑀅𑀬𑀁 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑁂𑀧𑀺 𑀦𑀬𑀸 𑀇𑀥 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀸𑀤𑀻𑀲𑀼𑀧𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺𑀬𑁂𑀯.

𑀬𑀲𑁆𑀫𑀸 𑀧𑁂𑀝𑀓𑁂 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁧.𑁯) 𑁋 ‘‘𑀢𑀢𑁆𑀣 𑀓𑀢𑀫𑀁 𑀨𑀮𑀜𑁆𑀘 𑀉𑀧𑀸𑀬𑁄 𑀘? ‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑁆𑀧𑀜𑁆𑀜𑁄’𑀢𑀺 𑀕𑀸𑀣𑀸, 𑀇𑀤𑀁 𑀨𑀮𑀜𑁆𑀘 𑀉𑀧𑀸𑀬𑁄 𑀘.

‘‘𑀢𑀢𑁆𑀣 𑀓𑀢𑀫𑀁 𑀨𑀮𑀜𑁆𑀘 𑀆𑀡𑀢𑁆𑀢𑀺 𑀘?

‘𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄’𑀢𑀺. (𑀉𑀤𑀸. 𑁪𑁪) 𑁋

𑀇𑀤𑀁 𑀨𑀮𑀜𑁆𑀘 𑀆𑀡𑀢𑁆𑀢𑀺 𑀘.

‘‘𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑁄 𑀘 𑀆𑀡𑀢𑁆𑀢𑀺 𑀘?

‘𑀓𑀼𑀫𑁆𑀪𑀽𑀧𑀫𑀁 𑀓𑀸𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸, 𑀦𑀕𑀭𑀽𑀧𑀫𑀁 𑀘𑀺𑀢𑁆𑀢𑀫𑀺𑀤𑀁 𑀞𑀧𑁂𑀢𑁆𑀯𑀸;

𑀬𑁄𑀥𑁂𑀣 𑀫𑀸𑀭𑀁 𑀧𑀜𑁆𑀜𑀸𑀯𑀼𑀥𑁂𑀦, 𑀚𑀺𑀢𑀜𑁆𑀘 𑀭𑀓𑁆𑀔𑁂 𑀅𑀦𑀺𑀯𑁂𑀲𑀦𑁄 𑀲𑀺𑀬𑀸’𑀢𑀺. (𑀥. 𑀧. 𑁪𑁦) 𑁋

𑀅𑀬𑀁 𑀉𑀧𑀸𑀬𑁄 𑀘 𑀆𑀡𑀢𑁆𑀢𑀺 𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀯𑀁 𑀨𑀮𑀸𑀤𑀻𑀦𑀁 𑀤𑀼𑀓𑁆𑀔𑀯𑀲𑁂𑀦𑀸𑀧𑀺 𑀉𑀤𑀸𑀳𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀁 𑀤𑁂𑀲𑁂𑀢𑀺, 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀁 𑀤𑁂𑀲𑁂𑀢𑀻’’𑀢𑀺 𑀬𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀅𑀲𑁆𑀲𑀸𑀤𑀸𑀤𑀬𑁄 𑀬𑀣𑀸𑀭𑀳𑀁 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀢𑁂 𑀧𑀼𑀕𑁆𑀕𑀮𑀸 𑀬𑀸𑀳𑀺 𑀧𑀝𑀺𑀧𑀤𑀸𑀳𑀺 𑀪𑀺𑀦𑁆𑀦𑀸, 𑀢𑀸 𑀧𑀝𑀺𑀧𑀤𑀸 𑀓𑀺𑀢𑁆𑀢𑀺𑀓𑀸 𑀪𑀯𑀦𑁆𑀢𑀺, 𑀢𑀸𑀳𑀺 𑀪𑀺𑀦𑁆𑀦𑀸 𑀧𑀼𑀕𑁆𑀕𑀮𑀸 𑀘 𑀓𑀺𑀢𑁆𑀢𑀺𑀓𑀸𑀢𑀺 𑀯𑀺𑀘𑀸𑀭𑀡𑀸𑀬 𑀲𑀫𑁆𑀪𑀯𑀢𑁄 𑀢𑀸 𑀧𑀝𑀺𑀧𑀤𑀸, 𑀢𑁂 𑀘 𑀧𑀼𑀕𑁆𑀕𑀮𑀸 𑀏𑀢𑁆𑀢𑀓𑀸𑀢𑀺 𑀕𑀡𑀦𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀬𑁂 𑀧𑀼𑀕𑁆𑀕𑀮𑀸 𑀬𑀸𑀳𑀺 𑀧𑀝𑀺𑀧𑀤𑀸𑀳𑀺 𑀪𑀺𑀦𑁆𑀦𑀸, 𑀢𑀸 𑀧𑀝𑀺𑀧𑀤𑀸 𑀘𑀢𑀲𑁆𑀲𑁄 𑀪𑀯𑀦𑁆𑀢𑀺, 𑀢𑁂 𑀘 𑀧𑀼𑀕𑁆𑀕𑀮𑀸 𑀘𑀢𑁆𑀢𑀸𑀭𑁄𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀓𑀢𑀫𑀸 𑀘𑀢𑀲𑁆𑀲𑁄? 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸, 𑀲𑀼𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘𑀸𑀢𑀺 𑀘𑀢𑀲𑁆𑀲𑁄. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄 𑀧𑀼𑀕𑁆𑀕𑀮𑁄, 𑀢𑀡𑁆𑀳𑀸𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀼𑀕𑁆𑀕𑀮𑁄, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀫𑀦𑁆𑀤𑁄 𑀧𑀼𑀕𑁆𑀕𑀮𑁄, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀼𑀕𑁆𑀕𑀮𑁄 𑀘𑀸𑀢𑀺 𑀘𑀢𑁆𑀢𑀸𑀭𑁄.

𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀳𑀺 𑀓𑀢𑁄 𑀯𑀺𑀪𑀸𑀕𑁄𑀧𑀺 𑀧𑀝𑀺𑀧𑀤𑀸𑀳𑀺 𑀓𑀢𑁄 𑀯𑀺𑀪𑀸𑀕𑁄 𑀦𑀸𑀫 𑀳𑁄𑀢𑀺 𑀅𑀯𑀺𑀦𑀸𑀪𑀸𑀯𑀢𑁄𑀢𑀺 𑀫𑀦𑀲𑀺 𑀓𑀢𑁆𑀯𑀸 ‘‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸𑀪𑀺𑀜𑁆𑀜𑀸’’𑀢𑀺 𑀅𑀯𑀢𑁆𑀯𑀸 ‘‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺 𑀯𑀼𑀢𑁆𑀢𑀸. 𑀢𑀸 𑀧𑀦𑁂𑀢𑀸 𑀲𑀫𑀣𑀯𑀲𑁂𑀦𑀸𑀧𑀺 𑀪𑀺𑀦𑁆𑀦𑀸, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀧𑀺 𑀪𑀺𑀦𑁆𑀦𑀸. 𑀓𑀣𑀁 𑀲𑀫𑀣𑀯𑀲𑁂𑀦? 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀲𑀩𑁆𑀩𑀧𑀞𑀫𑀁 ‘‘𑀧𑀣𑀯𑀻 𑀧𑀣𑀯𑀻’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀛𑀸𑀦𑀲𑁆𑀲 𑀉𑀧𑀘𑀸𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀲𑀫𑀣𑀪𑀸𑀯𑀦𑀸 ‘‘𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀘𑀸𑀭𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀅𑀧𑁆𑀧𑀦𑀸, 𑀢𑀸𑀯 𑀧𑀯𑀢𑁆𑀢𑀸 𑀧𑀜𑁆𑀜𑀸 ‘‘𑀅𑀪𑀺𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺 𑀳𑁂𑀝𑁆𑀞𑀺𑀫𑀧𑀜𑁆𑀜𑀸𑀢𑁄 𑀅𑀥𑀺𑀕𑀢𑀧𑀜𑁆𑀜𑀸𑀪𑀸𑀯𑀢𑁄.

𑀲𑀸 𑀘 𑀧𑀝𑀺𑀧𑀤𑀸 𑀓𑀲𑁆𑀲𑀘𑀺 𑀤𑀼𑀓𑁆𑀔𑀸 𑀓𑀺𑀘𑁆𑀙𑀸 𑀳𑁄𑀢𑀺 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑀫𑀼𑀤𑀸𑀘𑀸𑀭𑀕𑁆𑀕𑀳𑀡𑀢𑀸𑀬, 𑀓𑀲𑁆𑀲𑀘𑀺 𑀢𑀤𑀪𑀸𑀯𑀢𑁄 𑀲𑀼𑀔𑀸 𑀅𑀓𑀺𑀘𑁆𑀙𑀸 𑀳𑁄𑀢𑀺, 𑀅𑀪𑀺𑀜𑁆𑀜𑀸𑀧𑀺 𑀓𑀲𑁆𑀲𑀘𑀺 𑀤𑀦𑁆𑀥𑀸 𑀅𑀲𑀻𑀖𑀧𑁆𑀧𑀯𑀢𑁆𑀢𑀺 𑀳𑁄𑀢𑀺 𑀅𑀯𑀺𑀲𑀤𑀜𑀸𑀡𑀢𑀸𑀬, 𑀓𑀲𑁆𑀲𑀘𑀺 𑀔𑀺𑀧𑁆𑀧𑀸 𑀲𑀻𑀖𑀧𑁆𑀧𑀯𑀢𑁆𑀢𑀺 𑀳𑁄𑀢𑀺 𑀯𑀺𑀲𑀤𑀜𑀸𑀡𑀢𑀸𑀬𑀸𑀢𑀺.

𑀓𑀣𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦? 𑀬𑁄 𑀭𑀽𑀧𑀸𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀅𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀭𑀽𑀧𑀸𑀭𑀽𑀧𑀁 𑀧𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀭𑀺𑀕𑁆𑀕𑀳𑀏𑀢𑀉𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀦𑀸𑀫 𑀳𑁄𑀢𑀺. 𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀽𑀧𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑁂 𑀫𑀕𑁆𑀕𑀧𑀸𑀢𑀼𑀪𑀸𑀯𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀇𑀢𑀭𑀸 𑀤𑁆𑀯𑁂 𑀳𑁄𑀦𑁆𑀢𑀺. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀦 𑀪𑀺𑀦𑁆𑀦𑀸𑀬𑁂𑀯 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀬𑁄 𑀇𑀥 𑀤𑀝𑁆𑀞𑀩𑁆𑀩𑀸 𑀅𑀪𑀺𑀲𑀫𑀬𑀸𑀥𑀺𑀓𑀸𑀭𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀤𑁂𑀲𑀦𑀸𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄, 𑀢𑁂 𑀧𑀼𑀕𑁆𑀕𑀮𑁂 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁬) 𑀯𑀼𑀢𑁆𑀢𑀁. 𑀬𑁄𑀚𑀦𑀸𑀦𑀬𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀘𑀢𑀽𑀳𑀺 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀳𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀩𑁆𑀩𑁂𑀯 𑀅𑀦𑀺𑀬𑀫𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀓𑀺𑀁 𑀦𑀼 𑀔𑁄 𑀦𑀺𑀬𑁆𑀬𑀦𑁆𑀢𑀺, 𑀉𑀤𑀸𑀳𑀼 ‘‘𑀇𑀫𑀸𑀬 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀬 𑀅𑀬𑀁 𑀧𑀼𑀕𑁆𑀕𑀮𑁄 𑀦𑀺𑀬𑁆𑀬𑀸𑀢𑀺, 𑀇𑀫𑀸𑀬 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀬 𑀅𑀬𑀁 𑀧𑀼𑀕𑁆𑀕𑀮𑁄 𑀦𑀺𑀬𑁆𑀬𑀸𑀢𑀻’’𑀢𑀺 𑀦𑀺𑀬𑀫𑀢𑁄 𑀘 𑀦𑀺𑀬𑁆𑀬𑀸𑀢𑀻𑀢𑀺 𑀯𑀺𑀘𑀸𑀭𑀡𑀸𑀬 𑀲𑀫𑁆𑀪𑀯𑀢𑁄 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀇𑀫𑁂𑀳𑀺 𑀦𑀺𑀲𑁆𑀲𑀬𑁂𑀳𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀇𑀫𑀸𑀬 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀬 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀢𑀻’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄 𑀧𑀼𑀕𑁆𑀕𑀮𑁄 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀲𑀢𑀺𑀦𑁆𑀤𑁆𑀭𑀺𑀬𑁂𑀦 𑀲𑀢𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀢𑀺, 𑀢𑀡𑁆𑀳𑀸𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀼𑀕𑁆𑀕𑀮𑁄 𑀛𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀢𑀺, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀫𑀦𑁆𑀤𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑁂𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀼𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀢𑀺, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀘𑁆𑀘𑁂𑀳𑀺 𑀦𑀺𑀲𑁆𑀲𑀬𑁂𑀳𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀼𑀔𑀸𑀧𑀝𑀺𑀧𑀤𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦𑁂𑀯 𑀘𑀢𑁆𑀢𑀸𑀭𑁄 𑀧𑀝𑀺𑀧𑀦𑁆𑀦𑀓𑀧𑀼𑀕𑁆𑀕𑀮𑀸, 𑀢𑀁 𑀧𑀦 𑀧𑀝𑀺𑀧𑀤𑀸𑀯𑀺𑀪𑀸𑀕𑀁 𑀲𑀤𑁆𑀥𑀺𑀁 𑀳𑁂𑀢𑀼𑀧𑀸𑀬𑀨𑀮𑁂𑀳𑀺 𑀤𑀲𑁆𑀲𑁂𑀢𑀼𑀁 ‘𑀢𑀡𑁆𑀳𑀸𑀘𑀭𑀺𑀢𑁄’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁬) 𑁋

𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀡𑁆𑀳𑀸𑀘𑀭𑀺𑀢𑁄𑀢𑀺 𑀢𑀡𑁆𑀳𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀁 𑀘𑀭𑀺𑀢𑀁 𑀏𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀢𑀡𑁆𑀳𑀸𑀘𑀭𑀺𑀢𑁄. 𑀫𑀦𑁆𑀤𑁄𑀢𑀺 𑀫𑀦𑁆𑀤𑀺𑀬𑀸𑀬 𑀅𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀫𑀦𑁆𑀤𑁄, 𑀫𑁄𑀳𑀸𑀥𑀺𑀓𑀧𑀼𑀕𑁆𑀕𑀮𑁄. 𑀉𑀤𑀢𑁆𑀢𑁄𑀢𑀺 𑀉𑀤𑀅𑀢𑁆𑀢𑁄, 𑀉𑀴𑀸𑀭𑀧𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀉𑀴𑀸𑀭𑀁 𑀨𑀮𑀁 𑀤𑁂𑀢𑀻𑀢𑀺 𑀉𑀤𑁄, 𑀓𑁄 𑀲𑁄? 𑀧𑀯𑀺𑀘𑀬𑁄, 𑀅𑀢𑁆𑀢𑀦𑀺 𑀦𑀺𑀩𑁆𑀩𑀢𑁆𑀢𑁄𑀢𑀺 𑀅𑀢𑁆𑀢𑁄, 𑀉𑀤𑁄 𑀅𑀢𑁆𑀢𑁄 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀉𑀤𑀢𑁆𑀢𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄.

𑀧𑀞𑀫𑀸𑀬 𑀧𑀝𑀺𑀧𑀤𑀸𑀬 𑀳𑁂𑀢𑀼 𑀦𑀸𑀫 𑀢𑀡𑁆𑀳𑀸𑀘𑀭𑀺𑀢𑀢𑀸, 𑀫𑀦𑁆𑀤𑀧𑀜𑁆𑀜𑀢𑀸 𑀘, 𑀉𑀧𑀸𑀬𑁄 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀩𑁆𑀩𑀸𑀲𑀫𑁆𑀧𑀺 𑀨𑀮𑀁 𑀦𑀺𑀬𑁆𑀬𑀸𑀦𑀫𑁂𑀯. 𑀤𑀼𑀢𑀺𑀬𑀸𑀬 𑀧𑀝𑀺𑀧𑀤𑀸𑀬 𑀳𑁂𑀢𑀼 𑀦𑀸𑀫 𑀢𑀡𑁆𑀳𑀸𑀘𑀭𑀺𑀢𑀢𑀸, 𑀉𑀤𑀢𑁆𑀢𑀧𑀜𑁆𑀜𑀢𑀸 𑀘, 𑀉𑀧𑀸𑀬𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀢𑀢𑀺𑀬𑀸𑀬 𑀧𑀝𑀺𑀧𑀤𑀸𑀬 𑀳𑁂𑀢𑀼 𑀦𑀸𑀫 𑀤𑀺𑀝𑁆𑀞𑀺𑀘𑀭𑀺𑀢𑀢𑀸, 𑀫𑀦𑁆𑀤𑀧𑀜𑁆𑀜𑀢𑀸 𑀘, 𑀉𑀧𑀸𑀬𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀘𑀢𑀼𑀢𑁆𑀣𑀺𑀬𑀸 𑀧𑀝𑀺𑀧𑀤𑀸𑀬 𑀳𑁂𑀢𑀼 𑀦𑀸𑀫 𑀤𑀺𑀝𑁆𑀞𑀺𑀘𑀭𑀺𑀢𑀢𑀸, 𑀉𑀤𑀢𑁆𑀢𑀧𑀜𑁆𑀜𑀢𑀸 𑀘, 𑀉𑀧𑀸𑀬𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀳𑁂𑀢𑀼𑀧𑀸𑀬𑀨𑀮𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀏𑀢𑁆𑀣 𑀘 𑀤𑀺𑀝𑁆𑀞𑀺𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽 𑀦𑀸𑀫, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀫𑀦𑁆𑀤𑁄 𑀘𑁂𑀯 𑀢𑀡𑁆𑀳𑀸𑀘𑀭𑀺𑀢𑁄 𑀉𑀤𑀢𑁆𑀢𑁄 𑀘 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑀸𑀫, 𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄 𑀦𑀸𑀫, 𑀢𑀲𑁆𑀫𑀸 ‘‘𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀲𑁆𑀲𑀭𑀡𑀁 𑀤𑁂𑀲𑀬𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀯𑁂𑀦𑁂𑀬𑁆𑀬𑀢𑁆𑀢𑀬𑀲𑁆𑀲 𑀪𑁂𑀤𑀤𑀲𑁆𑀲𑀦𑁂𑀦 𑀦𑀺𑀲𑁆𑀲𑀭𑀡𑀁 𑀤𑁂𑀲𑀬𑀢𑀺, ‘‘𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀤𑁂𑀲𑀬𑀢𑀺, 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀤𑁂𑀲𑀬𑀢𑀻’’𑀢𑀺 𑀤𑁂𑀲𑀦𑀸𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄. ‘‘𑀢𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀧𑀤𑀸𑀪𑁂𑀤𑀤𑀲𑁆𑀲𑀦𑁂𑀦 ‘‘𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄 𑀧𑀼𑀕𑁆𑀕𑀮𑁄, 𑀢𑀡𑁆𑀳𑀸𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀼𑀕𑁆𑀕𑀮𑁄, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀫𑀦𑁆𑀤𑁄 𑀧𑀼𑀕𑁆𑀕𑀮𑁄, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀼𑀕𑁆𑀕𑀮𑁄’’𑀢𑀺 𑀘𑀢𑀼𑀥𑀸 𑀪𑀺𑀦𑁆𑀦𑀁 𑀢𑀡𑁆𑀳𑀸𑀘𑀭𑀺𑀢𑀫𑀦𑁆𑀤𑀸𑀤𑀺𑀓𑀁 𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀁 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀘𑀢𑀽𑀳𑀺 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀳𑀺 𑀘𑀢𑀼𑀥𑀸 𑀪𑀺𑀦𑁆𑀦𑀁 𑀢𑀡𑁆𑀳𑀸𑀘𑀭𑀺𑀢𑀫𑀦𑁆𑀤𑀘𑀢𑀼𑀓𑁆𑀓𑀁 𑀅𑀢𑁆𑀣𑀦𑀬𑀬𑁄𑀚𑀦𑀸𑀬 𑀤𑀼𑀢𑀺𑀬𑀸𑀬 𑀯𑀺𑀲𑀬𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀉𑀪𑁄 𑀢𑀡𑁆𑀳𑀸𑀘𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀡𑁆𑀳𑀸𑀬 𑀲𑀫𑀸𑀥𑀺𑀧𑀝𑀺𑀧𑀓𑁆𑀔𑀢𑁆𑀢𑀸 𑀢𑀡𑁆𑀳𑀸𑀘𑀭𑀺𑀢𑀸 𑀫𑀦𑁆𑀤𑀉𑀤𑀢𑁆𑀢𑀸 𑀉𑀪𑁄 𑀧𑀼𑀕𑁆𑀕𑀮𑀸 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀧𑀲𑁆𑀲𑀦𑀸𑀬 𑀉𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀭𑀸𑀕𑀯𑀺𑀭𑀸𑀕𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀦𑀺𑀬𑁆𑀬𑀦𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑁂𑀓𑁆𑀔𑀨𑀮𑀪𑀸𑀯𑀸𑀬. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀳𑀺𑀢𑁂𑀦𑁂𑀯 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀦𑀺𑀬𑁆𑀬𑀸𑀦𑀁 𑀪𑀯𑀢𑀺, 𑀦 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀏𑀯, 𑀢𑀲𑁆𑀫𑀸 𑀤𑀺𑀝𑁆𑀞𑀺𑀘𑀭𑀺𑀢𑀸 𑀫𑀦𑁆𑀤𑀉𑀤𑀢𑁆𑀢𑀸 𑀉𑀪𑁄 𑀧𑀼𑀕𑁆𑀕𑀮𑀸 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀲𑀫𑀣𑁂𑀦 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀦𑀺𑀬𑁆𑀬𑀦𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀅𑀲𑁂𑀓𑁆𑀔𑀨𑀮𑀪𑀸𑀯𑀸𑀬𑀸𑀢𑀺 𑀘𑀢𑁆𑀢𑀸𑀭𑁄𑀧𑀺 𑀧𑀼𑀕𑁆𑀕𑀮𑀸 𑀤𑀼𑀯𑀺𑀥𑀸𑀬𑁂𑀯 𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀭𑀸𑀕𑀯𑀺𑀭𑀸𑀕𑀸𑀬𑀸𑀢𑀺 𑀭𑀜𑁆𑀚𑀢𑀻𑀢𑀺 𑀭𑀸𑀕𑁄, 𑀲𑁄 𑀯𑀺𑀭𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀯𑀺𑀭𑀸𑀕𑀸, 𑀭𑀸𑀕𑀲𑁆𑀲 𑀯𑀺𑀭𑀸𑀕𑀸 𑀭𑀸𑀕𑀯𑀺𑀭𑀸𑀕𑀸, 𑀢𑀸𑀬 𑀭𑀸𑀕𑀯𑀺𑀭𑀸𑀕𑀸𑀬. 𑀘𑁂𑀢𑁄𑀢𑀺 𑀘𑀺𑀢𑁆𑀢𑀧𑁆𑀧𑀪𑁂𑀤𑁂𑀦 𑀘 𑀲𑀫𑀸𑀥𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀫𑀺. 𑀧. 𑁨.𑁧.𑁯.). 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺, 𑀘𑁂𑀢𑀲𑀸 𑀘𑀺𑀢𑁆𑀢𑁂𑀦 𑀲𑀫𑀸𑀥𑀺𑀦𑀸 𑀯𑀺𑀫𑀼𑀘𑁆𑀘𑀢𑀻𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀘𑁂𑀢𑁄 𑀏𑀯 𑀯𑀸 𑀯𑀺𑀫𑀼𑀢𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀥𑀺. 𑀅𑀦𑀸𑀕𑀸𑀫𑀺𑀧𑀼𑀕𑁆𑀕𑀮𑁄 𑀳𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀦𑀺𑀬𑁆𑀬𑀸𑀢𑀺. 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀬𑀸𑀢𑀺 𑀅𑀯𑀺𑀦𑁆𑀤𑀺𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀯𑀺𑀦𑁆𑀤𑀺𑀬𑀁 𑀯𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀯𑀺𑀭𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀯𑀺𑀭𑀸𑀕𑀸, 𑀅𑀯𑀺𑀚𑁆𑀚𑀸𑀬 𑀯𑀺𑀭𑀸𑀕𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸, 𑀢𑀸𑀬 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀬. 𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺, 𑀧𑀜𑁆𑀜𑀸𑀬 𑀯𑀺𑀫𑀼𑀘𑁆𑀘𑀢𑀻𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺, 𑀧𑀜𑁆𑀜𑀸 𑀏𑀯 𑀯𑀸 𑀯𑀺𑀫𑀼𑀢𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺, 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸, 𑀢𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸.

‘‘𑀢𑁂𑀲𑀼 𑀓𑀢𑀫𑁂 𑀧𑀼𑀕𑁆𑀕𑀮𑀸 𑀓𑁂𑀦 𑀅𑀢𑁆𑀣𑀦𑀬𑁂𑀦 𑀳𑀸𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁄 ‘‘𑀢𑀢𑁆𑀣 𑀬𑁂 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 ‘‘𑀉𑀪𑁄 𑀢𑀡𑁆𑀳𑀸𑀘𑀭𑀺𑀢𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀢𑁆𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀬𑁂 𑀉𑀪𑁄 𑀢𑀡𑁆𑀳𑀸𑀘𑀭𑀺𑀢𑀸 𑀫𑀦𑁆𑀤𑀉𑀤𑀢𑁆𑀢𑀸 𑀧𑀼𑀕𑁆𑀕𑀮𑀸 𑀲𑀫𑀣…𑀧𑁂… 𑀦𑀺𑀬𑁆𑀬𑀦𑁆𑀢𑀺, 𑀢𑁂 𑀉𑀪𑁄 𑀢𑀡𑁆𑀳𑀸𑀘𑀭𑀺𑀢𑀸 𑀫𑀦𑁆𑀤𑀉𑀤𑀢𑁆𑀢𑀸 𑀧𑀼𑀕𑁆𑀕𑀮𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑁂𑀦 𑀦𑀬𑁂𑀦 𑀳𑀸𑀢𑀩𑁆𑀩𑀸 𑀕𑀫𑁂𑀢𑀩𑁆𑀩𑀸 𑀦𑁂𑀢𑀩𑁆𑀩𑀸. 𑀬𑁂 𑀉𑀪𑁄 𑀤𑀺𑀝𑁆𑀞𑀺𑀘𑀭𑀺𑀢𑀸 𑀫𑀦𑁆𑀤𑀉𑀤𑀢𑁆𑀢𑀸 𑀧𑀼𑀕𑁆𑀕𑀮𑀸 𑀯𑀺𑀧𑀲𑁆𑀲𑀦𑀸…𑀧𑁂… 𑀲𑀫𑀣𑁂𑀦 𑀦𑀺𑀬𑁆𑀬𑀦𑁆𑀢𑀺, 𑀢𑁂 𑀉𑀪𑁄 𑀤𑀺𑀝𑁆𑀞𑀺𑀘𑀭𑀺𑀢𑀸 𑀫𑀦𑁆𑀤𑀉𑀤𑀢𑁆𑀢𑀸 𑀧𑀼𑀕𑁆𑀕𑀮𑀸 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁂𑀦 𑀦𑀬𑁂𑀦 𑀳𑀸𑀢𑀩𑁆𑀩𑀸 𑀕𑀫𑁂𑀢𑀩𑁆𑀩𑀸 𑀦𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁭. ‘‘𑀢𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀳𑀸𑀭𑁂𑀦 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀪𑁂𑀤𑁂𑀦 𑀢𑀡𑁆𑀳𑀸𑀘𑀭𑀺𑀢𑀫𑀦𑁆𑀤𑀸𑀤𑀺𑀪𑁂𑀤𑁄 𑀧𑀼𑀕𑁆𑀕𑀮𑁄 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀢𑀲𑁆𑀲 𑀯𑀺𑀪𑀢𑁆𑀢𑀸𑀦𑀦𑁆𑀢𑀭𑀁 𑀲𑁆𑀯𑀸𑀬𑀁 𑀤𑁂𑀲𑀦𑀸𑀳𑀸𑀭𑁄 𑀓𑀢𑁆𑀣 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀥𑀫𑁆𑀫𑁂 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀫𑁆𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 ‘‘𑀲𑁆𑀯𑀸𑀬𑀁 𑀳𑀸𑀭𑁄 𑀓𑀢𑁆𑀣 𑀲𑀫𑁆𑀪𑀯𑀢𑀻’’𑀢𑀺𑀆𑀤𑀺𑀫𑀸𑀳. 𑀦𑀯𑀫𑀓𑁆𑀔𑀡𑀲𑀫𑁆𑀧𑀦𑁆𑀦𑀲𑁆𑀲 𑀲𑀢𑁆𑀣𑀸 𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀺𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀥𑀫𑁆𑀫𑁂 𑀬𑀸 𑀯𑀻𑀫𑀁𑀲𑀸𑀤𑀺𑀓𑀸 𑀲𑀼𑀢𑀫𑀬𑀸𑀤𑀺𑀓𑀸 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀯𑀺𑀪𑀢𑁆𑀢𑀸, 𑀢𑀸𑀳𑀺 𑀧𑀜𑁆𑀜𑀸𑀳𑀺 𑀬𑁂 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀬𑁄 𑀢𑀬𑁄 𑀧𑀼𑀕𑁆𑀕𑀮𑀸 𑀯𑀺𑀪𑀢𑁆𑀢𑀸, 𑀇𑀢𑀺 𑀯𑀺𑀪𑀢𑁆𑀢𑀸𑀓𑀸𑀭𑁂𑀦 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀲𑀢𑁆𑀣𑀸𑀭𑀸 𑀤𑁂𑀲𑁂𑀢𑀩𑁆𑀩𑁂 𑀥𑀫𑁆𑀫𑁂 𑀲𑀫𑁆𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀲𑁆𑀯𑀸𑀬𑀁 𑀳𑀸𑀭𑁄𑀢𑀺 𑀤𑁂𑀲𑀦𑀸𑀳𑀸𑀭𑁂𑀦 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄, 𑀲𑁄 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄. 𑀓𑀢𑁆𑀣 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀣 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀥𑀫𑁆𑀫𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀲𑀫𑁆𑀪𑀯𑀢𑀻𑀢𑀺. 𑀬𑀲𑁆𑀲𑀸𑀢𑀺 𑀬𑁄 𑀲𑁄 𑀯𑁂𑀦𑁂𑀬𑁆𑀬𑁄 𑀧𑀘𑁆𑀘𑀦𑁆𑀢𑀚𑀸𑀤𑀻𑀳𑀺 𑀅𑀝𑁆𑀞𑀳𑀺 𑀅𑀓𑁆𑀔𑀡𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀲𑀯𑀦𑀥𑀸𑀭𑀡𑀸𑀤𑀻𑀳𑀺 𑀘 𑀲𑀫𑁆𑀧𑀢𑁆𑀢𑀻𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀲 𑀯𑁂𑀦𑁂𑀬𑁆𑀬𑀲𑁆𑀲. 𑀲𑀢𑁆𑀣𑀸𑀢𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀸𑀲𑀢𑀺 𑀅𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸. 𑀥𑀫𑁆𑀫𑀦𑁆𑀢𑀺 𑀤𑁂𑀲𑀺𑀢𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀥𑀫𑁆𑀫𑀁. 𑀤𑁂𑀲𑀬𑀢𑀻𑀢𑀺 𑀲𑀗𑁆𑀔𑁂𑀧𑀦𑀬𑀯𑀺𑀢𑁆𑀣𑀸𑀭𑀦𑀬𑁂𑀳𑀺 𑀪𑀸𑀲𑀢𑀺. 𑀅𑀜𑁆𑀜𑀢𑀭𑁄𑀢𑀺 𑀪𑀕𑀯𑀢𑁄 𑀲𑀸𑀯𑀓𑁂𑀲𑀼 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑁄 𑀲𑀸𑀯𑀓𑁄. 𑀕𑀭𑀼𑀝𑁆𑀞𑀸𑀦𑀺𑀬𑁄𑀢𑀺 𑀕𑀸𑀭𑀯𑀲𑁆𑀲 𑀞𑀸𑀦𑀪𑀽𑀢𑁂𑀳𑀺 𑀲𑀻𑀮𑀲𑀼𑀢𑀘𑀸𑀕𑀸𑀤𑀺𑀕𑀼𑀡𑀯𑀺𑀲𑁂𑀲𑁂𑀳𑀺 𑀬𑀼𑀢𑁆𑀢𑁄 𑀫𑀸𑀦𑀺𑀢𑁄 𑀲𑀤𑁆𑀤𑀳𑀺𑀢𑀩𑁆𑀩𑀯𑀘𑀦𑁄. 𑀲𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀲𑀫𑀁, 𑀲𑀳 𑀯𑀸 𑀩𑁆𑀭𑀳𑁆𑀫𑀁 𑀲𑀢𑁆𑀣𑀼𑀲𑀸𑀲𑀦𑀁 𑀘𑀭𑀢𑀺 𑀧𑀝𑀺𑀧𑀚𑁆𑀚𑀢𑀻𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻. 𑀲𑀤𑁆𑀥𑀁 𑀮𑀪𑀢𑀺 ‘‘𑀬𑁄 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑁄 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑁄𑀢𑀻’’𑀢𑀺 𑀲𑀢𑁆𑀣𑀭𑀺, ‘‘𑀲𑁆𑀯𑀸𑀓𑁆𑀔𑀸𑀢𑁄 𑀯𑀢𑀸𑀬𑀁 𑀥𑀫𑁆𑀫𑁄 𑀲𑀸𑀢𑁆𑀣𑁄 𑀲𑀩𑁆𑀬𑀜𑁆𑀚𑀦𑁄 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑁄 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑁄 𑀅𑀢𑁆𑀣𑀸𑀯𑀳𑁄 𑀳𑀺𑀢𑀸𑀯𑀳𑁄 𑀲𑀼𑀔𑀸𑀯𑀳𑁄 𑀛𑀸𑀦𑀫𑀕𑁆𑀕𑀨𑀮𑀦𑀺𑀩𑁆𑀩𑀢𑁆𑀢𑀓𑁄, 𑀅𑀫𑁆𑀳𑁂𑀳𑀺 𑀘 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀘 𑀅𑀘𑀮𑀲𑀤𑁆𑀥𑀁 𑀮𑀪𑀢𑀺, 𑀲𑀤𑁆𑀤𑀳𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑁂𑀢𑀺. 𑀢𑀣𑀸 ‘‘𑀬𑁄 𑀲𑀸𑀯𑀓𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑁄 𑀲𑀸𑀯𑀓𑁄 𑀲𑀗𑁆𑀔𑁂𑀧𑀢𑁄 𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑁄 𑀯𑀢 𑀕𑀭𑀼𑀝𑁆𑀞𑀸𑀦𑀺𑀬𑁄 𑀲𑀩𑁆𑀭𑀳𑁆𑀫𑀘𑀸𑀭𑀻 𑀫𑀸𑀦𑀺𑀢𑁄 𑀲𑀤𑁆𑀤𑀳𑀺𑀢𑀩𑁆𑀩𑀯𑀘𑀦𑁄’’𑀢𑀺 𑀤𑁂𑀲𑀓𑁂 𑀲𑀸𑀯𑀓𑁂 𑀘 ‘‘𑀢𑀸𑀤𑀺𑀲𑁂𑀦 𑀲𑀸𑀯𑀓𑁂𑀦 𑀤𑁂𑀲𑀺𑀢𑁄 𑀬𑁄 𑀥𑀫𑁆𑀫𑁄, 𑀲𑁄 𑀥𑀫𑁆𑀫𑁄 𑀲𑀸𑀢𑁆𑀣𑁄 𑀲𑀩𑁆𑀬𑀜𑁆𑀚𑀦𑁄 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑁄 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑁄 𑀅𑀢𑁆𑀣𑀸𑀯𑀳𑁄 𑀳𑀺𑀢𑀸𑀯𑀳𑁄 𑀲𑀼𑀔𑀸𑀯𑀳𑁄 𑀛𑀸𑀦𑀫𑀕𑁆𑀕𑀨𑀮𑀦𑀺𑀩𑁆𑀩𑀢𑁆𑀢𑀓𑁄, 𑀅𑀫𑁆𑀳𑁂𑀳𑀺 𑀘 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀲𑀸𑀯𑀓𑁂𑀦 𑀤𑁂𑀲𑀺𑀢𑀥𑀫𑁆𑀫𑁂 𑀘 𑀲𑀤𑁆𑀥𑀁 𑀲𑀤𑁆𑀤𑀳𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀤𑁆𑀤𑀳𑀺𑀢𑀩𑁆𑀩𑁂 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀥𑀫𑁆𑀫𑁂 𑀘𑁂𑀯 𑀲𑀸𑀯𑀓𑁂𑀦 𑀤𑁂𑀲𑀺𑀢𑀥𑀫𑁆𑀫𑁂 𑀘 𑀲𑀤𑁆𑀤𑀳𑀦𑁆𑀢𑀲𑁆𑀲 𑀯𑁂𑀦𑁂𑀬𑁆𑀬𑀲𑁆𑀲 𑀬𑀸 𑀯𑀻𑀫𑀁𑀲𑀸, 𑀯𑀻𑀫𑀁𑀲𑀦𑁆𑀢𑀲𑁆𑀲 𑀬𑀸 𑀉𑀲𑁆𑀲𑀸𑀳𑀦𑀸, 𑀉𑀲𑁆𑀲𑀳𑀦𑁆𑀢𑀲𑁆𑀲 𑀬𑀸 𑀢𑀼𑀮𑀦𑀸, 𑀢𑀼𑀮𑀬𑀦𑁆𑀢𑀲𑁆𑀲 𑀬𑀸 𑀉𑀧𑀧𑀭𑀺𑀓𑁆𑀔𑀸, 𑀲𑀸 𑀅𑀬𑀁 𑀯𑀻𑀫𑀁𑀲𑀸𑀤𑀺𑀓𑀸 𑀧𑀜𑁆𑀜𑀸 𑀲𑀤𑁆𑀥𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀦𑀢𑁄 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀦𑀸𑀫. 𑀢𑀢𑁆𑀣 𑀯𑀻𑀫𑀁𑀲𑀦𑀁 𑀯𑀺𑀫𑀁𑀲𑀸, 𑀧𑀸𑀴𑀺𑀬𑀸, 𑀧𑀸𑀴𑀺𑀅𑀢𑁆𑀣𑀲𑁆𑀲 𑀘 𑀯𑀻𑀫𑀁𑀲𑀸. 𑀯𑀻𑀫𑀁𑀲𑀢𑀻𑀢𑀺 𑀯𑀸 𑀯𑀻𑀫𑀁𑀲𑀸, 𑀧𑀤𑀁 𑀧𑀤𑀦𑁆𑀢𑀭𑁂𑀦, 𑀧𑀤𑀢𑁆𑀣𑀁 𑀧𑀤𑀢𑁆𑀣𑀦𑁆𑀢𑀭𑁂𑀦 𑀯𑀺𑀘𑀸𑀭𑀡𑀓𑀸 𑀧𑀜𑁆𑀜𑀸. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀲𑁆𑀲𑀸𑀳𑀦𑀸𑀤𑀻𑀲𑀼𑀧𑀺 𑀪𑀸𑀯𑀲𑀸𑀥𑀦𑀓𑀢𑁆𑀢𑀼𑀲𑀸𑀥𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀉𑀲𑁆𑀲𑀸𑀳𑀦𑀸 𑀘 𑀉𑀲𑁆𑀲𑀸𑀳𑁂𑀦 𑀉𑀧𑀢𑁆𑀣𑀫𑁆𑀪𑀺𑀓𑀸 𑀥𑀫𑁆𑀫𑀲𑁆𑀲 𑀥𑀸𑀭𑀡𑀧𑀭𑀺𑀘𑀬𑀲𑀸𑀥𑀺𑀓𑀸 𑀧𑀜𑁆𑀜𑀸 𑀘, 𑀦 𑀯𑀻𑀭𑀺𑀬𑀁, 𑀏𑀢𑁆𑀣 𑀘 𑀬𑀸 𑀲𑀼𑀢𑀫𑀢𑁆𑀢𑁂𑀬𑁂𑀯 𑀧𑀯𑀢𑁆𑀢𑀸, 𑀯𑀻𑀫𑀁𑀲𑀸𑀤𑀺𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀦𑀺𑀯𑀢𑁆𑀢𑀸, 𑀲𑀸 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀦 𑀳𑁄𑀢𑀺. 𑀬𑀸 𑀘 𑀲𑀼𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸 𑀉𑀲𑁆𑀲𑀸𑀳𑀦𑀸𑀤𑀺𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀦𑀺𑀯𑀢𑁆𑀢𑀸, 𑀬𑀸 𑀘 𑀲𑀼𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸 𑀉𑀲𑁆𑀲𑀳𑀺𑀢𑁆𑀯𑀸 𑀢𑀼𑀮𑀦𑀸𑀤𑀺𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀦𑀺𑀯𑀢𑁆𑀢𑀸, 𑀬𑀸 𑀘 𑀲𑀼𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸 𑀉𑀲𑁆𑀲𑀳𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀦𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀦𑀺𑀯𑀢𑁆𑀢𑀸, 𑀲𑀸𑀧𑀺 𑀧𑀜𑁆𑀜𑀸 𑀦 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀸 𑀧𑀦 𑀲𑀼𑀢𑁆𑀯𑀸 𑀲𑀤𑁆𑀤𑀳𑀦𑁆𑀢𑀲𑁆𑀲 𑀯𑀻𑀫𑀁𑀲𑀸, 𑀯𑀻𑀫𑀁𑀲𑀦𑁆𑀢𑀲𑁆𑀲 𑀉𑀲𑁆𑀲𑀸𑀳𑀦𑀸, 𑀉𑀲𑁆𑀲𑀳𑀦𑁆𑀢𑀲𑁆𑀲 𑀢𑀼𑀮𑀦𑀸, 𑀢𑀼𑀮𑀬𑀦𑁆𑀢𑀲𑁆𑀲 𑀉𑀧𑀧𑀭𑀺𑀓𑁆𑀔𑀸 𑀳𑁄𑀢𑀺, 𑀅𑀬𑀁 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀦𑀸𑀫 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀼𑀢𑀫𑀬𑀻 𑀧𑀜𑁆𑀜𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑀸 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀲𑀼𑀢𑀫𑀬𑀺𑀬𑀸 𑀧𑀜𑁆𑀜𑀸𑀬 𑀯𑀺𑀪𑀚𑀦𑀸𑀦𑀦𑁆𑀢𑀭𑀁 𑀘𑀺𑀦𑁆𑀢𑀸𑀫𑀬𑀺𑀁 𑀧𑀜𑁆𑀜𑀁 𑀯𑀺𑀪𑀚𑀺𑀢𑀼𑀁 ‘‘𑀢𑀣𑀸 𑀲𑀼𑀢𑁂𑀦 𑀦𑀺𑀲𑁆𑀲𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀢𑀦𑁆𑀢𑀺 𑀲𑀼𑀬𑁆𑀬𑀢𑁂 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀢𑀺 𑀲𑀼𑀢𑁄, 𑀲𑀯𑀦𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀸𑀢𑀺 𑀯𑀸 𑀲𑀼𑀢𑀁, 𑀤𑀼𑀯𑀺𑀥𑀫𑁆𑀧𑀺 𑀲𑀼𑀢𑀁. 𑀦𑀺𑀲𑁆𑀲𑀬𑁂𑀦 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑁂𑀢𑀁 ‘‘𑀲𑀼𑀢𑁂𑀦 𑀦𑀺𑀲𑁆𑀲𑀬𑁂𑀦𑀸’’𑀢𑀺 𑀓𑀭𑀡𑀯𑀘𑀦𑀁. 𑀏𑀢𑁆𑀣 𑀧𑀦 ‘‘𑀇𑀤𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀫𑀦𑀁 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁, 𑀅𑀬𑀁 𑀏𑀓𑀕𑁆𑀕𑀢𑀸 𑀲𑀫𑀸𑀤𑀳𑀦𑀝𑁆𑀞𑁂𑀦 𑀲𑀫𑀸𑀥𑀺, 𑀇𑀫𑀸𑀦𑀺 𑀪𑀽𑀢𑀼𑀧𑀸𑀤𑀸𑀦𑀺 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀸𑀦𑀺, 𑀇𑀫𑁂 𑀨𑀲𑁆𑀲𑀸𑀤𑀬𑁄 𑀦𑀫𑀦𑀝𑁆𑀞𑁂𑀦 𑀦𑀸𑀫𑀸𑀦𑀺, 𑀇𑀫𑁂 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀸’’𑀢𑀺 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀻𑀴𑀦𑀸𑀤𑀺𑀲𑀪𑀸𑀯𑀲𑁆𑀲 𑀯𑀻𑀫𑀁𑀲𑀦𑀸𑀪𑀽𑀢𑀸 𑀧𑀜𑁆𑀜𑀸 𑀯𑀻𑀫𑀁𑀲𑀸 𑀦𑀸𑀫. 𑀢𑁂𑀲𑀁𑀬𑁂𑀯 𑀲𑀻𑀮𑀲𑀫𑀸𑀥𑀺𑀆𑀤𑀻𑀦𑀁 𑀲𑀻𑀮𑀢𑀺 𑀧𑀢𑀺𑀝𑁆𑀞𑀳𑀢𑀺 𑀏𑀢𑁆𑀣𑀸𑀢𑀺 𑀲𑀻𑀮𑀦𑁆𑀢𑀺𑀆𑀤𑀺𑀯𑀘𑀦𑀢𑁆𑀣𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀪𑀸𑀕𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀁 𑀢𑀼𑀮𑁂𑀢𑁆𑀯𑀸 𑀯𑀺𑀬 𑀕𑀳𑀡𑀧𑀜𑁆𑀜𑀸 𑀢𑀼𑀮𑀦𑀁 𑀦𑀸𑀫. 𑀢𑁂𑀲𑀁𑀬𑁂𑀯 𑀲𑀻𑀮𑀲𑀫𑀸𑀥𑀺𑀆𑀤𑀻𑀦𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀁 𑀅𑀯𑀺𑀚𑀳𑀺𑀢𑁆𑀯𑀸 𑀅𑀦𑀺𑀘𑁆𑀘𑀢𑀸𑀤𑀼𑀓𑁆𑀔𑀢𑀸𑀤𑀺𑀦𑀫𑀦𑀭𑀼𑀧𑁆𑀧𑀦𑀸𑀤𑀺𑀲𑀧𑁆𑀧𑀘𑁆𑀘𑀬𑀲𑀗𑁆𑀔𑀢𑀸𑀤𑀺𑀆𑀓𑀸𑀭𑁂 𑀯𑀺𑀢𑀓𑁆𑀓𑁂𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀡𑀧𑀜𑁆𑀜𑀸 𑀏𑀯 𑀉𑀧𑀧𑀭𑀺𑀓𑁆𑀔𑀸 𑀦𑀸𑀫𑀸𑀢𑀺 𑀯𑀺𑀲𑁂𑀲𑀢𑁄 𑀤𑀝𑁆𑀞𑀩𑁆𑀩𑁄. 𑀲𑀼𑀢𑀥𑀫𑁆𑀫𑀲𑁆𑀲 𑀥𑀸𑀭𑀡𑀧𑀭𑀺𑀘𑀬𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀉𑀲𑁆𑀲𑀸𑀳𑀦𑀸 𑀚𑀸𑀢𑀸 𑀯𑀺𑀬 𑀦 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀘𑀺𑀦𑁆𑀢𑀺𑀢𑀲𑁆𑀲 𑀥𑀸𑀭𑀡𑀧𑀭𑀺𑀘𑀬𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄𑀢𑀺 ‘‘𑀉𑀲𑁆𑀲𑀸𑀳𑀦𑀸’’𑀢𑀺 𑀦 𑀯𑀼𑀢𑁆𑀢𑀁.

𑀲𑀼𑀢𑀫𑀬𑀻 𑀧𑀜𑁆𑀜𑀸 𑀘𑁂𑀯 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀘 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑀸 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀓𑀸𑀭𑀡𑀪𑀽𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀼𑀢𑀫𑀬𑀺𑀘𑀺𑀦𑁆𑀢𑀸𑀫𑀬𑀺𑀧𑀜𑁆𑀜𑀸𑀦𑀁 𑀤𑀲𑁆𑀲𑀦𑀸𑀦𑀦𑁆𑀢𑀭𑀁 𑀨𑀮𑀪𑀽𑀢𑀁 𑀪𑀸𑀯𑀦𑀸𑀫𑀬𑀺𑀁 𑀧𑀜𑁆𑀜𑀁 𑀯𑀺𑀪𑀚𑀦𑁆𑀢𑁄 ‘‘𑀇𑀫𑀸𑀳𑀺 𑀤𑁆𑀯𑀻𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀫𑀸𑀳𑀺 𑀤𑁆𑀯𑀻𑀳𑀺 𑀧𑀜𑁆𑀜𑀸𑀳𑀻𑀢𑀺 𑀲𑀼𑀢𑀫𑀬𑀺𑀘𑀺𑀦𑁆𑀢𑀸𑀫𑀬𑀺𑀧𑀜𑁆𑀜𑀸𑀳𑀺 𑀓𑀸𑀭𑀡𑀪𑀽𑀢𑀸𑀳𑀺. 𑀲𑀼𑀢𑀫𑀬𑀺𑀧𑀜𑁆𑀜𑀸𑀬 𑀯𑀸 𑀘𑀺𑀦𑁆𑀢𑀸𑀫𑀬𑀺𑀧𑀜𑁆𑀜𑀸𑀬 𑀯𑀸 𑀉𑀪𑀬𑀢𑁆𑀣 𑀯𑀸 𑀞𑀺𑀢𑁄𑀬𑁂𑀯 𑀬𑁄𑀕𑀸𑀯𑀘𑀭𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑀻𑀢𑀺. 𑀫𑀦𑀲𑀺𑀓𑀸𑀭𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀸𑀢𑀺 𑀭𑀽𑀧𑀸𑀭𑀽𑀧𑁂𑀲𑀼 𑀧𑀭𑀺𑀕𑁆𑀕𑀳𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑁂𑀦 𑀲𑀫𑁆𑀫𑀸 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺- 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀦𑁆𑀢𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀲𑀦𑁆𑀢𑀸𑀦𑁂 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀁 𑀬𑀁 𑀅𑀭𑀺𑀬𑀫𑀕𑁆𑀕𑀜𑀸𑀡𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀤𑀲𑁆𑀲𑀦𑀪𑀽𑀫𑀺𑀬𑀁 𑀯𑀸 𑀪𑀸𑀯𑀦𑀸𑀪𑀽𑀫𑀺𑀬𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀺𑀧𑀺 𑀧𑀞𑀫𑀫𑀕𑁆𑀕𑀜𑀸𑀡𑀁 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀪𑀸𑀯𑀦𑀸𑀯𑀲𑁂𑀦 𑀧𑀦 𑀧𑀯𑀢𑁆𑀢𑀦𑀢𑁄 ‘‘𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀲𑁆𑀲𑀦𑀪𑀽𑀫𑀻𑀢𑀺 𑀧𑀞𑀫𑀫𑀕𑁆𑀕𑀨𑀮𑀸𑀦𑀺, 𑀲𑁂𑀲𑀸𑀦𑀺 ‘‘𑀪𑀸𑀯𑀦𑀸𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁮. 𑀅𑀫𑁆𑀳𑀸𑀓𑀸𑀘𑀭𑀺𑀬 𑀢𑀼𑀫𑁆𑀳𑁂𑀳𑀺 ‘‘𑀬𑀲𑁆𑀲 𑀲𑀢𑁆𑀣𑀸 𑀯𑀸’’𑀢𑀺𑀆𑀤𑀺𑀦𑀸 𑀲𑀼𑀢𑀫𑀬𑀺𑀧𑀜𑁆𑀜𑀸𑀤𑀺𑀓𑀸 𑀯𑀺𑀪𑀢𑁆𑀢𑀸, 𑀏𑀯𑀁 𑀲𑀢𑀺 𑀲𑀼𑀢𑁂𑀦 𑀯𑀺𑀦𑀸 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀦𑀸𑀫 𑀦 𑀪𑀯𑁂𑀬𑁆𑀬, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀲𑀼𑀢𑁂𑀦 𑀯𑀺𑀦𑀸 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀳𑁄𑀢𑁆𑀯𑁂𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀲𑀗𑁆𑀕𑀳𑁂𑀢𑁆𑀯𑀸 𑀧𑀓𑀸𑀭𑀦𑁆𑀢𑀭𑁂𑀦 𑀯𑀺𑀪𑀚𑀺𑀢𑀼𑀁 ‘‘𑀧𑀭𑀢𑁄𑀖𑁄𑀲𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀭𑀢𑁄𑀖𑁄𑀲𑀸𑀢𑀺 𑀧𑀭𑀢𑁄 𑀧𑀯𑀢𑁆𑀢𑁄 𑀤𑁂𑀲𑀦𑀸𑀖𑁄𑀲𑁄 𑀧𑀘𑁆𑀘𑀬𑁄 𑀏𑀢𑀺𑀲𑁆𑀲𑀸𑀢𑀺 𑀧𑀭𑀢𑁄𑀖𑁄𑀲𑀸. 𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑀸𑀢𑀺 𑀧𑀢𑀺 𑀯𑀺𑀲𑀼𑀁 𑀅𑀢𑁆𑀢𑀦𑀺𑀬𑁂𑀯 𑀲𑀫𑀼𑀝𑁆𑀞𑀺𑀢𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀁 𑀭𑀽𑀧𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀭𑀼𑀧𑁆𑀧𑀦𑀦𑀫𑀦𑀸𑀤𑀺𑀲𑀪𑀸𑀯𑀧𑀭𑀺𑀕𑁆𑀕𑀡𑁆𑀳𑀦𑀸𑀤𑀺𑀦𑀸 𑀉𑀧𑀸𑀬𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀸 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀦𑀸𑀫, 𑀇𑀫𑀺𑀦𑀸 𑀲𑀸𑀯𑀓𑀸𑀧𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀸, 𑀢𑀣𑀸𑀧𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁𑀬𑁂𑀯 𑀯𑀼𑀢𑁆𑀢𑀢𑁆𑀢𑀸 𑀲𑀸𑀯𑀓𑀸 𑀇𑀥 𑀕𑀳𑀺𑀢𑀸, 𑀢𑀲𑁆𑀫𑀸 𑀧𑀼𑀭𑀺𑀫𑀦𑀬𑁄 𑀬𑀼𑀢𑁆𑀢𑀢𑀭𑁄. 𑀧𑀭𑀢𑁄𑀢𑀺 𑀥𑀫𑁆𑀫𑀤𑁂𑀲𑀓𑀢𑁄 𑀧𑀯𑀢𑁆𑀢𑁂𑀦 𑀥𑀫𑁆𑀫𑀤𑁂𑀲𑀦𑀸𑀖𑁄𑀲𑁂𑀦 𑀳𑁂𑀢𑀼𑀦𑀸 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑁂𑀦, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀘 𑀳𑁂𑀢𑀼𑀦𑀸 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸 𑀦𑀸𑀫, 𑀇𑀫𑀺𑀦𑀸 𑀲𑀸𑀯𑀓𑀸𑀧𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀸, 𑀢𑀣𑀸𑀧𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁𑀬𑁂𑀯 𑀯𑀼𑀢𑁆𑀢𑀢𑁆𑀢𑀸 𑀲𑀸𑀯𑀓𑀸 𑀇𑀥 𑀕𑀳𑀺𑀢𑀸, 𑀢𑀲𑁆𑀫𑀸 𑀧𑀼𑀭𑀺𑀫𑀦𑀬𑁄 𑀬𑀼𑀢𑁆𑀢𑀢𑀭𑁄. 𑀧𑀭𑀢𑁄𑀢𑀺 𑀥𑀫𑁆𑀫𑀤𑁂𑀲𑀓𑀢𑁄 𑀧𑀯𑀢𑁆𑀢𑁂𑀦 𑀥𑀫𑁆𑀫𑀤𑁂𑀲𑀦𑀸𑀖𑁄𑀲𑁂𑀦 𑀳𑁂𑀢𑀼𑀦𑀸 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑁂𑀦, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀘 𑀳𑁂𑀢𑀼𑀦𑀸 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸 𑀦𑀸𑀫𑀸𑀢𑀺 𑀯𑀺𑀪𑀚𑀺𑀢𑁆𑀯𑀸 𑀧𑀡𑁆𑀟𑀺𑀢𑁂𑀳𑀺 𑀜𑁂𑀬𑁆𑀬𑀸𑀢𑀺 𑀯𑀺𑀢𑁆𑀣𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑀁 𑀜𑀸𑀢𑀼𑀁 𑀇𑀘𑁆𑀙𑀦𑁆𑀢𑁂𑀳𑀺 ‘‘𑀏𑀯𑀁 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦𑀸’’𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑀅𑀝𑁆𑀞. 𑁯) 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀚𑀸𑀦𑀺𑀢𑀩𑁆𑀩𑁄.

𑀲𑀼𑀢𑀫𑀬𑀺𑀧𑀜𑁆𑀜𑀸𑀤𑀺𑀓𑀸 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀆𑀘𑀭𑀺𑀬𑁂𑀦 𑀦𑀸𑀦𑀸𑀦𑀬𑁂𑀳𑀺 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀢𑀸𑀲𑀼 𑀬𑀲𑁆𑀲 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀧𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀧𑀼𑀕𑁆𑀕𑀮𑁄 𑀓𑁄𑀦𑀸𑀫𑁄, 𑀬𑀲𑁆𑀲 𑀏𑀓𑀸𑀧𑀺 𑀦𑀢𑁆𑀣𑀺, 𑀲𑁄 𑀧𑀼𑀕𑁆𑀕𑀮𑁄 𑀓𑁄𑀦𑀸𑀫𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 𑀬𑀲𑁆𑀲 𑀅𑀬𑀁 𑀧𑀜𑁆𑀜𑀸, 𑀇𑀫𑀸 𑀯𑀸 𑀅𑀢𑁆𑀣𑀺, 𑀲𑁄 𑀧𑀼𑀕𑁆𑀕𑀮𑁄 𑀇𑀢𑁆𑀣𑀦𑁆𑀦𑀸𑀫𑁄, 𑀬𑀲𑁆𑀲 𑀦𑀢𑁆𑀣𑀺, 𑀲𑁄 𑀧𑀼𑀕𑁆𑀕𑀮𑁄 𑀇𑀢𑁆𑀣𑀦𑁆𑀦𑀸𑀫𑁄𑀢𑀺 𑀧𑀝𑀺𑀧𑀤𑀸𑀧𑀜𑁆𑀜𑀸𑀧𑁆𑀧𑀪𑁂𑀤𑁂𑀦 𑀧𑀼𑀕𑁆𑀕𑀮𑀁 𑀯𑀺𑀪𑀚𑀺𑀢𑀼𑀁 ‘‘𑀬𑀲𑁆𑀲 𑀇𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑀲𑁆𑀲 𑀅𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀘𑁂𑀯 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀘 𑀇𑀫𑀸 𑀤𑁆𑀯𑁂 𑀧𑀜𑁆𑀜𑀸 𑀅𑀢𑁆𑀣𑀺, 𑀅𑀬𑀁 𑀅𑀢𑀺𑀢𑀺𑀓𑁆𑀔𑀧𑀜𑁆𑀜𑁄 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯 𑀚𑀸𑀦𑀦𑀢𑁄 𑀉𑀕𑁆𑀖𑀝𑀺𑀢𑀜𑁆𑀜𑀽 𑀦𑀸𑀫. 𑀬𑀲𑁆𑀲 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂𑀳𑀺 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀅𑀢𑁆𑀣𑀺, 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀦𑀢𑁆𑀣𑀺, 𑀅𑀬𑀁 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂𑀳𑀺 𑀚𑀸𑀦𑀦𑀢𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑀸𑀫. 𑀬𑀲𑁆𑀲 𑀫𑀦𑁆𑀤𑀧𑀜𑁆𑀜𑀲𑁆𑀲 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂𑀳𑀺 𑀦𑁂𑀯 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀅𑀢𑁆𑀣𑀺, 𑀦 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀘, 𑀅𑀬𑀁 𑀫𑀦𑁆𑀤𑀧𑀜𑁆𑀜𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑁂𑀳𑀺 𑀚𑀸𑀦𑀦𑀢𑁄 𑀦𑀺𑀭𑀯𑀲𑁂𑀲𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬 𑀦𑁂𑀢𑀩𑁆𑀩𑀢𑁄 𑀦𑁂𑀬𑁆𑀬𑁄 𑀦𑀸𑀫𑀸𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀤𑀸𑀦𑀺 𑀬𑀤𑀢𑁆𑀣𑀁 𑀇𑀫𑀸 𑀧𑀜𑁆𑀜𑀸 𑀉𑀤𑁆𑀥𑀝𑀸, 𑀢𑀫𑁂𑀯 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘𑀬𑀲𑁆𑀲𑀸’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁮) 𑀯𑀼𑀢𑁆𑀢𑀁.

𑁯. ‘‘𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀯𑀺𑀪𑀸𑀯𑁂𑀢𑀺, ‘‘𑀢𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀳𑀺, ‘‘𑀲𑁆𑀯𑀸𑀬𑀁 𑀳𑀸𑀭𑁄’’𑀢𑀺𑀆𑀤𑀺𑀦𑀸 𑀜𑀸𑀡𑀯𑀺𑀪𑀸𑀕𑁂𑀳𑀺 𑀘 𑀤𑁂𑀲𑀦𑀸𑀪𑀸𑀚𑀦𑀁 𑀯𑁂𑀦𑁂𑀬𑁆𑀬𑀢𑁆𑀢𑀬𑀁 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀬𑀸𑀬 𑀤𑁂𑀲𑀦𑀸𑀧𑀸𑀴𑀺𑀬𑀸 𑀤𑁂𑀲𑀦𑀸𑀳𑀸𑀭𑀁 𑀬𑁄𑀚𑁂𑀢𑀼𑀁 𑀧𑀼𑀩𑁆𑀩𑁂 ‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀬𑀸 𑀧𑀸𑀴𑀺𑀤𑁂𑀲𑀦𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀲𑀸 𑀧𑀸𑀴𑀺𑀤𑁂𑀲𑀦𑀸 𑀤𑁂𑀲𑀦𑀸𑀳𑀸𑀭𑁂𑀦 𑀦𑀺𑀤𑁆𑀥𑀸𑀭𑀺𑀢𑁂𑀲𑀼 𑀅𑀲𑁆𑀲𑀸𑀤𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 𑀓𑀺𑀫𑀢𑁆𑀣𑀁 𑀤𑁂𑀲𑀬𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑀁 𑀅𑀢𑁆𑀣𑀁 𑀤𑁂𑀲𑀬𑀢𑀻’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀬𑀁 𑀥𑀫𑁆𑀫𑀤𑁂𑀲𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀲𑀸𑀬𑀁 𑀥𑀫𑁆𑀫𑀤𑁂𑀲𑀦𑀸𑀢𑀺 𑀬𑀸 𑀥𑀫𑁆𑀫𑀤𑁂𑀲𑀦𑀸 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀓𑀸 𑀧𑀼𑀩𑁆𑀩𑁂 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀦𑀺𑀓𑁆𑀔𑀺𑀢𑁆𑀢𑀸, 𑀲𑀸𑀬𑀁 𑀥𑀫𑁆𑀫𑀤𑁂𑀲𑀦𑀸 𑀅𑀲𑁆𑀲𑀸𑀤𑀸𑀤𑀻𑀲𑀼 𑀓𑀺𑀫𑀢𑁆𑀣𑀁 𑀤𑁂𑀲𑀬𑀢𑀻𑀢𑀺 𑀓𑀣𑁂𑀢𑀼𑀓𑀸𑀫𑀢𑀸𑀬 𑀧𑀼𑀘𑁆𑀙𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑁂𑀲𑀬𑀢𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀯𑀢𑁆𑀢𑀺𑀧𑀯𑀢𑁆𑀢𑀓𑀦𑀺𑀯𑀢𑁆𑀢𑀺𑀦𑀺𑀯𑀢𑁆𑀢𑀦𑀼𑀧𑀸𑀬𑀪𑀸𑀯𑁂𑀦 𑀅𑀯𑀺𑀧𑀭𑀻𑀢𑀪𑀸𑀯𑀢𑁄 ‘‘𑀲𑀘𑁆𑀘𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺.

𑀬𑀲𑁆𑀲𑀁 𑀤𑁂𑀲𑀦𑀸𑀬𑀁 𑀲𑀘𑁆𑀘𑀸𑀦𑀺 𑀤𑁂𑀲𑀦𑀸𑀳𑀸𑀭𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, 𑀲𑀸 𑀤𑁂𑀲𑀦𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑁂𑀲𑀬𑀢𑀻𑀢𑀺 𑀬𑀼𑀢𑁆𑀢𑀁 𑀳𑁄𑀢𑀼. 𑀬𑀲𑁆𑀲𑀁 𑀤𑁂𑀲𑀦𑀸𑀬𑀁 𑀅𑀲𑁆𑀲𑀸𑀤𑀸𑀤𑀬𑁄 𑀦𑀺𑀤𑁆𑀥𑀸𑀭𑀺𑀢𑀸, 𑀲𑀸 𑀤𑁂𑀲𑀦𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑁂𑀲𑀬𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀳𑁂𑀝𑁆𑀞𑀸 𑀘 𑀅𑀲𑁆𑀲𑀸𑀤𑀸𑀤𑀬𑁄 𑀦𑀺𑀤𑁆𑀥𑀸𑀭𑀺𑀢𑀸, 𑀢𑀲𑁆𑀫𑀸 ‘‘𑀅𑀲𑁆𑀲𑀸𑀤𑀸𑀤𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀆𑀤𑀻𑀦𑀯𑁄 𑀨𑀮𑀜𑁆𑀘 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀲𑀦𑀸𑀳𑀸𑀭𑁂𑀦 𑀲𑀁𑀯𑀡𑁆𑀡𑀦𑀸𑀦𑀬𑁂𑀦 𑀤𑁂𑀲𑀦𑀸𑀬𑀁 𑀦𑀺𑀤𑁆𑀥𑀸𑀭𑀺𑀢𑁄 𑀆𑀤𑀻𑀦𑀯𑁄 𑀘𑁂𑀯 𑀨𑀮𑀜𑁆𑀘 𑀤𑀼𑀓𑁆𑀔𑀲𑀘𑁆𑀘𑀁 𑀳𑁄𑀢𑀺, 𑀅𑀲𑁆𑀲𑀸𑀤𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀉𑀧𑀸𑀬𑁄 𑀘𑁂𑀯 𑀆𑀡𑀢𑁆𑀢𑀺 𑀘 𑀫𑀕𑁆𑀕𑀲𑀘𑁆𑀘𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑁂𑀲𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺.

𑀢𑀡𑁆𑀳𑀸𑀯𑀚𑁆𑀚𑀸 𑀢𑁂𑀪𑀽𑀫𑀓𑀥𑀫𑁆𑀫𑀸 𑀤𑀼𑀓𑁆𑀔𑀁, 𑀢𑁂 𑀘 𑀅𑀦𑀺𑀘𑁆𑀘𑀸𑀤𑀻𑀳𑀺 𑀧𑀻𑀴𑀺𑀢𑀢𑁆𑀢𑀸 𑀆𑀤𑀻𑀦𑀯𑀸𑀬𑁂𑀯. 𑀨𑀮𑀦𑁆𑀢𑀺 𑀤𑁂𑀲𑀦𑀸𑀬 𑀨𑀮𑀁 𑀮𑁄𑀓𑀺𑀬𑀁, 𑀦 𑀮𑁄𑀓𑀼𑀢𑁆𑀢𑀭𑀁, 𑀢𑀲𑁆𑀫𑀸 𑀤𑀼𑀓𑁆𑀔𑀦𑁆𑀢𑀺 𑀯𑀢𑁆𑀢𑀩𑁆𑀩𑀫𑁂𑀯. 𑀅𑀲𑁆𑀲𑀸𑀤𑁄𑀢𑀺 𑀢𑀡𑁆𑀳𑀸𑀲𑁆𑀲𑀸𑀤𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀅𑀲𑁆𑀲𑀸𑀤𑁄 𑀲𑀫𑀼𑀤𑀬𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑀁. 𑀅𑀲𑁆𑀲𑀸𑀤𑁂𑀓𑀤𑁂𑀲𑁄 𑀤𑀼𑀓𑁆𑀔𑀫𑁂𑀯, 𑀅𑀲𑁆𑀲𑀸𑀤𑁂𑀓𑀤𑁂𑀲𑁄 𑀤𑀼𑀓𑁆𑀔𑀜𑁆𑀘𑁂𑀯 𑀲𑀫𑀼𑀤𑀬𑁄 𑀘. 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑁄 𑀘 𑀪𑀕𑀯𑀢𑁄 𑀆𑀡𑀢𑁆𑀢𑀺 𑀘 𑀤𑁂𑀲𑀦𑀸𑀬 𑀨𑀮𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 ‘‘𑀉𑀧𑀸𑀬𑁄, 𑀆𑀡𑀢𑁆𑀢𑀺 𑀘 𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁, 𑀦𑀺𑀲𑁆𑀲𑀭𑀡𑁂𑀓𑀤𑁂𑀲𑁄𑀧𑀺 𑀫𑀕𑁆𑀕𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀬𑀸 𑀤𑁂𑀲𑀦𑀸 𑀯𑀺𑀲𑁂𑀲𑀢𑁄 𑀤𑁂𑀲𑀬𑀢𑀺, 𑀓𑀢𑀫𑀸 𑀲𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀇𑀤𑀁 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀘𑁆𑀘𑀫𑀸𑀦𑀁 𑀥𑀫𑁆𑀫𑀘𑀓𑁆𑀓𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀲𑁂𑀲𑀢𑁄 𑀤𑁂𑀲𑀬𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀬𑀸 𑀤𑁂𑀲𑀦𑀸 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀲𑁂𑀲𑀢𑁄 𑀤𑁂𑀲𑀬𑀢𑀺, 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀥𑀫𑁆𑀫𑀘𑀓𑁆𑀓𑀪𑀸𑀯𑀁 𑀓𑀺𑀁 𑀪𑀕𑀯𑀸 𑀆𑀳𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁪) 𑀢𑀡𑁆𑀳𑀸𑀯𑀚𑁆𑀚𑀁 𑀚𑀸𑀢𑀺𑀆𑀤𑀺𑀓𑀁 𑀢𑁂𑀪𑀽𑀫𑀓𑀥𑀫𑁆𑀫𑀚𑀸𑀢𑀁 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦, 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀺𑀪𑀸𑀯𑁂𑀦 𑀘 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑁂𑀢𑀺 𑀫𑀬𑀸 𑀧𑀯𑀢𑁆𑀢𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀯𑁂𑀢𑀺 𑀲𑀯𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀼𑀁 𑀆𑀮𑀧𑀢𑀺. 𑀩𑀸𑀭𑀸𑀡𑀲𑀺𑀬𑀦𑁆𑀢𑀺 𑀩𑀸𑀭𑀸𑀡𑀲𑀻𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂. 𑀇𑀲𑀺𑀧𑀢𑀦𑁂𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀇𑀲𑀦𑀢𑁄 𑀕𑀯𑁂𑀲𑀦𑀢𑁄 ‘‘𑀇𑀲𑀻’’𑀢𑀺 𑀯𑁄𑀳𑀭𑀺𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀢𑀦𑀝𑁆𑀞𑀸𑀦𑁂. 𑀫𑀺𑀕𑀤𑀸𑀬𑁂𑀢𑀺 𑀫𑀺𑀕𑀸𑀦𑀁 𑀅𑀪𑀬𑀤𑀸𑀦𑀝𑁆𑀞𑀸𑀦𑁂 𑀓𑀸𑀭𑀺𑀢𑁂 𑀅𑀲𑁆𑀲𑀫𑁂𑀯.

𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀁 𑀅𑀦𑀢𑀺𑀲𑀬𑀁. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀓𑁂 𑀲𑀪𑀸𑀯𑀥𑀸𑀭𑀡𑀸𑀤𑀺𑀦𑀸 𑀅𑀢𑁆𑀣𑁂𑀦 𑀥𑀫𑁆𑀫𑁄 𑀘𑁂𑀯 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀅𑀧𑁆𑀧𑀝𑀺𑀲𑁂𑀥𑀦𑀻𑀬𑀁. 𑀓𑀲𑁆𑀫𑀸? 𑀚𑀦𑀓𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀺𑀲𑁆𑀲𑀭𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸, 𑀚𑀜𑁆𑀜𑀲𑁆𑀲 𑀘 𑀅𑀦𑀼𑀢𑁆𑀢𑀭𑀢𑁆𑀢𑀸 𑀓𑁄𑀡𑁆𑀟𑀜𑁆𑀜𑀸𑀤𑀻𑀦𑀜𑁆𑀘𑁂𑀯 𑀅𑀝𑁆𑀞𑀸𑀭𑀲𑀩𑁆𑀭𑀳𑁆𑀫𑀓𑁄𑀝𑀺𑀬𑀸 𑀘 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀲𑀸𑀥𑀦𑀢𑁄 𑀘. ‘‘𑀓𑁂𑀦 𑀅𑀧𑁆𑀧𑀝𑀺𑀯𑀢𑁆𑀢𑀺𑀬’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑀫𑀡𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀡𑁂𑀦𑀸𑀢𑀺 𑀧𑀩𑁆𑀩𑀚𑁆𑀚𑀫𑀢𑁆𑀢𑀽𑀧𑀕𑀢𑁂𑀦. 𑀩𑁆𑀭𑀸𑀳𑁆𑀫𑀡𑁂𑀦𑀸𑀢𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑁂𑀦. 𑀧𑀭𑀫𑀢𑁆𑀣𑀸𑀦𑀜𑁆𑀳𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀝𑀺𑀲𑁂𑀥𑀦𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀼𑀧𑁆𑀧𑀚𑁆𑀚𑀦𑀫𑁆𑀧𑀺 𑀦𑀢𑁆𑀣𑀺. 𑀤𑁂𑀯𑁂𑀦𑀸𑀢𑀺 𑀙𑀓𑀸𑀫𑀸𑀯𑀘𑀭𑀤𑁂𑀯𑁂𑀦. 𑀩𑁆𑀭𑀳𑁆𑀫𑀼𑀦𑀸𑀢𑀺 𑀭𑀽𑀧𑀩𑁆𑀭𑀳𑁆𑀫𑀸 𑀕𑀳𑀺𑀢𑀸. ‘‘𑀲𑀫𑀡𑁂𑀦 𑀯𑀸 …𑀧𑁂… 𑀩𑁆𑀭𑀳𑁆𑀫𑀼𑀦𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀢𑁆𑀯𑀸‘‘𑀓𑁂𑀦𑀘𑀻’’𑀢𑀺 𑀯𑀼𑀢𑁆𑀢𑀯𑀘𑀦𑁂𑀦 𑀅𑀯𑀲𑁂𑀲𑀔𑀢𑁆𑀢𑀺𑀬𑀕𑀳𑀧𑀢𑀺𑀧𑀭𑀺𑀲𑀚𑀦𑀸 𑀲𑀗𑁆𑀕𑀳𑀺𑀢𑀸. 𑀢𑀲𑁆𑀫𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀲𑀫𑀡𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀫𑀸𑀭𑀩𑁆𑀭𑀳𑁆𑀫𑀧𑀭𑀺𑀲𑀸 𑀅𑀝𑁆𑀞𑀯𑀺𑀥𑀸𑀧𑀺 𑀧𑀝𑀺𑀲𑁂𑀥𑁂𑀢𑀼𑀁 𑀅𑀲𑀫𑀢𑁆𑀣𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀲𑀫𑀽𑀳𑁂 𑀥𑀫𑁆𑀫𑀘𑀓𑁆𑀓𑀸𑀥𑀸𑀭𑁂.

‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢’’𑀦𑁆𑀢𑀺 𑀕𑀸𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑀘𑀓𑁆𑀓𑀲𑀼𑀢𑁆𑀢𑁂 𑀧𑀤𑀸𑀦𑀺 𑀯𑀺𑀪𑀚𑀦𑁆𑀢𑁄 ‘‘𑀢𑀢𑁆𑀣 𑀅𑀧𑀭𑀺𑀫𑀸𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀥𑀫𑁆𑀫𑀘𑀓𑁆𑀓𑀤𑁂𑀲𑀦𑀸𑀬𑀁 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩 𑀆𑀤𑀬𑁄; 𑀧𑀝𑀺. 𑀫. 𑁨.𑁩𑁦). ‘‘𑀅𑀧𑀭𑀺𑀫𑀸𑀡𑀸 𑀅𑀓𑁆𑀔𑀭𑀸 𑀅𑀧𑀭𑀺𑀫𑀸𑀡𑀸 𑀧𑀤𑀸’’𑀢𑀺 𑀅𑀯𑀢𑁆𑀯𑀸 ‘‘𑀅𑀧𑀭𑀺𑀫𑀸𑀡𑀸 𑀧𑀤𑀸 𑀅𑀧𑀭𑀺𑀫𑀸𑀡𑀸 𑀅𑀓𑁆𑀔𑀭𑀸’’𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀧𑀤𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀤𑀸, 𑀅𑀓𑁆𑀔𑀭𑀸, 𑀩𑁆𑀬𑀜𑁆𑀚𑀦𑀸𑀢𑀺 𑀘 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀏𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲𑀸𑀢𑀺 𑀯𑀢𑁆𑀢𑀩𑁆𑀩𑀸𑀓𑀸𑀭𑀲𑁆𑀲 𑀘𑀢𑀼𑀲𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲𑁂𑀯 𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸 𑀧𑀓𑀸𑀲𑀦𑀸𑀓𑀸𑀭𑁄 𑀧𑀜𑁆𑀜𑀢𑁆𑀢𑀸𑀓𑀸𑀭𑁄𑀢𑀺 𑀆𑀓𑀸𑀭𑀯𑀦𑁆𑀢𑀆𑀓𑀸𑀭𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀲𑀗𑁆𑀓𑀸𑀲𑀦𑀸𑀓𑀸𑀭𑁄𑀢𑀺 𑀘 𑀲𑀗𑁆𑀓𑀸𑀲𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀆𑀓𑀸𑀭𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀇𑀢𑀺𑀧𑀻𑀢𑀺 𑀇𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦𑀧𑀺, 𑀇𑀫𑀺𑀦𑀸 𑀧𑀓𑀸𑀭𑁂𑀦𑀧𑀺 𑀇𑀤𑀁 𑀚𑀸𑀢𑀺𑀆𑀤𑀺𑀓𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀦𑁆𑀢𑀺 𑀓𑀸𑀫𑀢𑀡𑁆𑀳𑀸𑀤𑀺𑀪𑁂𑀤𑀸 𑀅𑀬𑀁 𑀢𑀡𑁆𑀳𑀸. 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀦𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀅𑀬𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀢𑀢𑁄 𑀦𑀺𑀲𑁆𑀲𑀝𑀸 𑀅𑀬𑀁 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀚𑀸𑀢𑀺𑀆𑀤𑀺𑀧𑁆𑀧𑀪𑁂𑀤𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀅𑀬𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀺𑀓𑁄 𑀅𑀝𑁆𑀞𑀗𑁆𑀕𑀺𑀓𑁄 𑀅𑀭𑀺𑀬𑁄 𑀫𑀕𑁆𑀕𑁄. 𑀤𑀼𑀓𑁆𑀔𑀦𑀺𑀭𑁄𑀥𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀢𑀢𑁆𑀢𑀸, 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀤𑀸𑀪𑀸𑀯𑀢𑁄 𑀘 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

‘‘𑀢𑀢𑁆𑀣 𑀅𑀧𑀭𑀺𑀫𑀸𑀡𑀸’’𑀢𑀺𑀆𑀤𑀺𑀦𑀸 𑀩𑁆𑀬𑀜𑁆𑀚𑀦𑀧𑀤𑀅𑀢𑁆𑀣𑀧𑀤𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀬𑀺𑀯𑀺𑀲𑀬𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀪𑀕𑀯𑀸 𑀓𑀺𑀁 𑀲𑀸𑀫𑀜𑁆𑀜𑁂𑀳𑀺 𑀅𑀓𑁆𑀔𑀭𑀸𑀤𑀻𑀳𑀺 𑀲𑀗𑁆𑀓𑀸𑀲𑁂𑀢𑀺 𑀯𑀸 𑀧𑀓𑀸𑀲𑁂𑀢𑀺 𑀯𑀸, 𑀉𑀤𑀸𑀳𑀼 𑀬𑀣𑀸𑀭𑀳𑀁 𑀲𑀗𑁆𑀓𑀸𑀲𑁂𑀢𑀺 𑀧𑀓𑀸𑀲𑁂𑀢𑀻𑀢𑀺𑀆𑀤𑀺𑀯𑀺𑀘𑀸𑀭𑀡𑀸𑀬 𑀲𑀫𑁆𑀪𑀯𑀢𑁄 𑀯𑀺𑀲𑀬𑀯𑀺𑀲𑀬𑀺𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀪𑀸𑀯𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁, 𑀦𑀦𑀼 ‘‘𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀻𑀲𑀼 𑀧𑀤𑁂𑀦𑁂𑀯 𑀤𑀼𑀓𑁆𑀔𑀲𑀘𑁆𑀘𑀢𑁆𑀣𑀢𑁆𑀢𑀸𑀤𑀺𑀓𑁄 𑀲𑀗𑁆𑀓𑀸𑀲𑀺𑀢𑀩𑁆𑀩𑁄𑀢𑀺? 𑀲𑀘𑁆𑀘𑀁, 𑀧𑀤𑀸𑀯𑀬𑀯𑀲𑁆𑀲 𑀧𑀦 𑀅𑀓𑁆𑀔𑀭𑀲𑁆𑀲 𑀕𑀳𑀡𑀫𑀼𑀔𑁂𑀦𑁂𑀯 𑀅𑀓𑁆𑀔𑀭𑀲𑀫𑀼𑀤𑀸𑀬𑀲𑁆𑀲𑀧𑀺 𑀧𑀤𑀲𑁆𑀲 𑀕𑀳𑀡𑀁 𑀳𑁄𑀢𑀺, 𑀧𑀤𑁂 𑀕𑀳𑀺𑀢𑁂 𑀘 𑀤𑀼𑀓𑁆𑀔𑀲𑀘𑁆𑀘𑀢𑁆𑀣𑀸𑀤𑀺𑀓𑀸𑀯𑀩𑁄𑀥𑁄 𑀳𑁄𑀢𑁆𑀯𑁂𑀯, 𑀏𑀯𑀁 𑀲𑀢𑀺 𑀧𑀤𑁂𑀦𑁂𑀯 𑀲𑀺𑀚𑁆𑀛𑀦𑀢𑁄 𑀅𑀓𑁆𑀔𑀭𑁄 𑀯𑀺𑀲𑀼𑀁 𑀦 𑀕𑀳𑁂𑀢𑀩𑁆𑀩𑁄𑀢𑀺? 𑀦, 𑀤𑀼𑀓𑁆𑀔𑀲𑀘𑁆𑀘𑀢𑁆𑀣𑀸𑀤𑀺𑀓𑀸𑀯𑀩𑁄𑀥𑀲𑁆𑀲 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀪𑀸𑀯𑀢𑁄. 𑀤𑀼-𑀇𑀢𑀺 𑀅𑀓𑁆𑀔𑀭𑁂𑀦 𑀳𑀺 𑀅𑀦𑁂𑀓𑀼𑀧𑀤𑁆𑀤𑀯𑀸𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀓𑀼𑀘𑁆𑀙𑀺𑀢𑀢𑁆𑀣𑁄 𑀕𑀳𑀺𑀢𑁄, 𑀔-𑀇𑀢𑀺 𑀅𑀓𑁆𑀔𑀭𑁂𑀦 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑁂𑀦 𑀢𑀼𑀘𑁆𑀙𑀢𑁆𑀣𑁄𑀢𑀺 𑀏𑀯𑀫𑀸𑀤𑀺𑀓𑀸𑀯𑀩𑁄𑀥𑀲𑁆𑀲 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺 𑀪𑀯𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀤𑀢𑁆𑀣𑀕𑀳𑀡𑀲𑁆𑀲 𑀯𑀺𑀲𑁂𑀲𑀸𑀥𑀸𑀦𑀁 𑀚𑀸𑀬𑀢𑀻’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁯). 𑀧𑀤𑀧𑀭𑀺𑀬𑁄𑀲𑀸𑀦𑁂 𑀯𑀸𑀓𑁆𑀬𑀧𑀭𑀺𑀬𑁄𑀲𑀸𑀦𑀸𑀪𑀸𑀯𑀢𑁄 𑀅𑀓𑁆𑀔𑀭𑁂𑀳𑀺 𑀲𑀁𑀔𑀺𑀢𑁆𑀢𑁂𑀦 𑀤𑀻𑀧𑀺𑀬𑀫𑀸𑀦𑁄 𑀅𑀢𑁆𑀣𑁄 𑀧𑀤𑁂𑀳𑀺 𑀧𑀓𑀸𑀲𑀺𑀢𑁄𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀤𑁂𑀳𑀺 𑀧𑀓𑀸𑀲𑁂𑀢𑀻’’𑀢𑀺. 𑀯𑀸𑀓𑁆𑀬𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑀗𑁆𑀓𑀸𑀲𑀺𑀢𑁄 𑀧𑀓𑀸𑀲𑀺𑀢𑁄 𑀅𑀢𑁆𑀣𑁄 𑀯𑀺𑀯𑀭𑀺𑀢𑁄 𑀯𑀺𑀯𑀝𑁄 𑀓𑀢𑁄𑀯𑀸𑀢𑀺 𑀯𑀼𑀢𑁆𑀢𑀁. ‘‘𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀻’’𑀢𑀺. 𑀧𑀓𑀸𑀭𑁂𑀳𑀺 𑀘 𑀯𑀸𑀓𑁆𑀬𑀪𑁂𑀤𑁂 𑀓𑀢𑁂 𑀲𑁄 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀻’’𑀢𑀺. 𑀯𑀸𑀓𑁆𑀬𑀸𑀯𑀬𑀯𑀸𑀦𑀁 𑀧𑀤𑀸𑀦𑀁 𑀧𑀘𑁆𑀘𑁂𑀓𑀁 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑁂 𑀓𑀢𑁂 𑀲𑁄 𑀅𑀢𑁆𑀣𑁄 𑀧𑀸𑀓𑀝𑁄 𑀓𑀢𑁄𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀻’’𑀢𑀺. 𑀓𑀢𑀦𑀺𑀩𑁆𑀩𑀘𑀦𑁂𑀳𑀺 𑀯𑀸𑀓𑁆𑀬𑀸𑀯𑀬𑀯𑁂𑀳𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀦𑀺𑀭𑀯𑀲𑁂𑀲𑀢𑁄 𑀤𑁂𑀲𑀺𑀢𑁂𑀳𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑁂 𑀧𑀭𑀺𑀲𑀫𑀦𑁆𑀢𑀢𑁄 𑀢𑁄𑀲𑀦𑀁 𑀳𑁄𑀢𑀺, 𑀧𑀜𑁆𑀜𑀸𑀢𑁂𑀚𑀦𑀜𑁆𑀘𑀸𑀢𑀺 𑀆𑀳 ‘‘𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀢𑀻’’𑀢𑀺.

‘‘𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺𑀆𑀤𑀻𑀲𑀼 ‘‘𑀪𑀕𑀯𑀸 𑀏𑀯𑀸’’𑀢𑀺 𑀯𑀸 ‘‘𑀅𑀓𑁆𑀔𑀭𑁂𑀳𑀺 𑀏𑀯𑀸’’𑀢𑀺 𑀯𑀸 𑀅𑀯𑀥𑀸𑀭𑀡𑁂 𑀬𑁄𑀚𑀺𑀢𑁂 ‘‘𑀲𑀸𑀯𑀓𑁄 𑀦 𑀲𑀗𑁆𑀓𑀸𑀲𑁂𑀢𑀺, 𑀧𑀤𑀸𑀤𑀻𑀳𑀺 𑀦 𑀲𑀗𑁆𑀓𑀸𑀲𑁂𑀢𑀻’’𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀲𑀸𑀯𑀓𑁄 𑀘 𑀲𑀗𑁆𑀓𑀸𑀲𑁂𑀢𑀺, 𑀧𑀤𑀸𑀤𑀻𑀳𑀺 𑀘 𑀲𑀗𑁆𑀓𑀸𑀲𑁂𑀢𑀺. 𑀓𑀢𑁆𑀣 𑀅𑀯𑀥𑀸𑀭𑀡𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀘𑁂? ‘‘𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺𑀬𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀲𑀸𑀯𑀓𑁂𑀦 𑀲𑀗𑁆𑀓𑀸𑀲𑀺𑀢𑁄 𑀯𑀸 𑀧𑀤𑀸𑀤𑀻𑀳𑀺 𑀲𑀗𑁆𑀓𑀸𑀲𑀺𑀢𑁄 𑀯𑀸 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺. 𑀅𑀢𑁆𑀣𑀧𑀤𑀸𑀦𑀜𑁆𑀘 𑀅𑀓𑁆𑀔𑀭𑀸𑀤𑀺𑀦𑀸𑀦𑀸𑀯𑀺𑀲𑀬𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀢𑁂𑀦 𑀏𑀓𑀸𑀦𑀼𑀲𑀦𑁆𑀥𑀺𑀓𑁂 𑀲𑀼𑀢𑁆𑀢𑁂 𑀙𑀴𑁂𑀯 𑀅𑀢𑁆𑀣𑀧𑀤𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀺, 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑁂 𑀲𑀼𑀢𑁆𑀢𑁂 𑀅𑀦𑀼𑀲𑀦𑁆𑀥𑀺𑀪𑁂𑀤𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀙 𑀙 𑀅𑀢𑁆𑀣𑀧𑀤𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀺.

‘‘𑀙𑀲𑀼 𑀩𑁆𑀬𑀜𑁆𑀚𑀦𑀧𑀤𑁂𑀲𑀼 𑀓𑀢𑀫𑁂𑀦 𑀩𑁆𑀬𑀜𑁆𑀚𑀦𑀧𑀤𑁂𑀦 𑀓𑀢𑀫𑀁 𑀓𑀺𑀘𑁆𑀘𑀁 𑀲𑀸𑀥𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑀺𑀦𑀸 𑀇𑀤𑀁 𑀓𑀺𑀘𑁆𑀘𑀁, 𑀇𑀫𑀺𑀦𑀸 𑀇𑀤𑀁 𑀓𑀺𑀘𑁆𑀘𑀁 𑀲𑀸𑀥𑁂𑀢𑀻’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀘 𑀧𑀤𑁂𑀳𑀺 𑀘 𑀉𑀕𑁆𑀖𑀝𑁂𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀅𑀓𑁆𑀔𑀭𑀸𑀤𑀻𑀲𑀼 𑀩𑁆𑀬𑀜𑁆𑀚𑀦𑀧𑀤𑁂𑀲𑀼. 𑀉𑀕𑁆𑀖𑀝𑁂𑀢𑀻𑀢𑀺 𑀉𑀕𑁆𑀖𑀝𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀤𑁂𑀲𑀦𑀸𑀯 𑀉𑀕𑁆𑀖𑀝𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀪𑀕𑀯𑀸 𑀧𑀦 𑀤𑁂𑀲𑀦𑀸𑀚𑀦𑀓𑀢𑁆𑀢𑀸 𑀉𑀕𑁆𑀖𑀝𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀉𑀕𑁆𑀖𑀝𑀦𑀓𑀺𑀘𑁆𑀘𑀲𑀸𑀥𑀺𑀓𑀸 𑀤𑁂𑀲𑀦𑀸𑀬𑁂𑀯 𑀓𑀺𑀁 𑀯𑀺𑀧𑀜𑁆𑀘𑀦𑀯𑀺𑀢𑁆𑀣𑀸𑀭𑀡𑀓𑀺𑀘𑁆𑀘𑀲𑀸𑀥𑀺𑀓𑀸 𑀤𑁂𑀲𑀦𑀸𑀚𑀦𑀓𑀢𑁆𑀢𑀸, 𑀉𑀤𑀸𑀳𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀺𑀘𑁆𑀘𑀲𑀸𑀥𑀺𑀓𑀸 𑀅𑀜𑁆𑀜𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀺𑀘𑁆𑀘𑀲𑀸𑀥𑀺𑀓𑀸 𑀅𑀜𑁆𑀜𑀸 𑀤𑁂𑀲𑀦𑀸𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀉𑀕𑁆𑀖𑀝𑀦𑀸 𑀆𑀤𑀻’’𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 ‘‘𑀓𑀢𑀫𑀸 𑀉𑀕𑁆𑀖𑀝𑀦𑀸, 𑀓𑀢𑀫𑀸 𑀯𑀺𑀧𑀜𑁆𑀘𑀦𑀸, 𑀓𑀢𑀫𑀸 𑀯𑀺𑀢𑁆𑀣𑀸𑀭𑀡𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀉𑀕𑁆𑀖𑀝𑀦𑀸 𑀆𑀤𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀉𑀕𑁆𑀖𑀝𑀦𑀸𑀤𑀺𑀓𑀺𑀘𑁆𑀘𑀲𑀸𑀥𑀺𑀓𑀸𑀲𑀼 𑀤𑁂𑀲𑀦𑀸𑀲𑀼. 𑀉𑀕𑁆𑀖𑀝𑀦𑀸𑀢𑀺 𑀉𑀕𑁆𑀖𑀝𑀦𑀓𑀺𑀘𑁆𑀘𑀲𑀸𑀥𑀺𑀓𑀸 𑀤𑁂𑀲𑀦𑀸 𑀆𑀤𑀺𑀤𑁂𑀲𑀦𑀸 𑀳𑁄𑀢𑀺. 𑀯𑀺𑀧𑀜𑁆𑀘𑀦𑀸𑀢𑀺 𑀯𑀺𑀧𑀜𑁆𑀘𑀦𑀓𑀺𑀘𑁆𑀘𑀲𑀸𑀥𑀺𑀓𑀸 𑀤𑁂𑀲𑀦𑀸 𑀫𑀚𑁆𑀛𑁂𑀤𑁂𑀲𑀦𑀸 𑀳𑁄𑀢𑀺. 𑀯𑀺𑀢𑁆𑀣𑀸𑀭𑀡𑀸𑀢𑀺 𑀯𑀺𑀢𑁆𑀣𑀸𑀭𑀡𑀓𑀺𑀘𑁆𑀘𑀲𑀸𑀥𑀺𑀓𑀸 𑀤𑁂𑀲𑀦𑀸 𑀧𑀭𑀺𑀬𑁄𑀲𑀸𑀦𑀤𑁂𑀲𑀦𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀉𑀕𑁆𑀖𑀝𑀺𑀬𑀦𑁆𑀢𑁄 𑀉𑀤𑁆𑀤𑀺𑀲𑀺𑀬𑀫𑀸𑀦𑁄 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑁄 𑀥𑀫𑁆𑀫𑀯𑀺𑀦𑀬𑁄 𑀓𑀢𑀫𑀁 𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀯𑀺𑀧𑀜𑁆𑀘𑀺𑀬𑀦𑁆𑀢𑁄 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑁄 𑀥𑀫𑁆𑀫𑀯𑀺𑀦𑀬𑁄 𑀓𑀢𑀫𑀁 𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀯𑀺𑀢𑁆𑀣𑀸𑀭𑀺𑀬𑀦𑁆𑀢𑁄 𑀧𑀝𑀺𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑁄 𑀥𑀫𑁆𑀫𑀯𑀺𑀦𑀬𑁄 𑀓𑀢𑀫𑀁 𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄𑀬𑀁 𑀥𑀫𑁆𑀫𑀯𑀺𑀦𑀬𑁄’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 ‘𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’𑀢𑀺𑀆𑀤𑀻𑀦𑀁 𑀙𑀦𑁆𑀦𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀁 𑀩𑁆𑀬𑀸𑀧𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀣𑀧𑀤𑀸𑀦𑀁 𑀩𑁆𑀬𑀸𑀧𑀸𑀭𑀁 𑀤𑀲𑁆𑀲𑁂𑀢𑀼𑀁 ‘𑀲𑁄𑀬𑀁 𑀥𑀫𑁆𑀫𑀯𑀺𑀦𑀬𑁄’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁯) 𑀯𑀼𑀢𑁆𑀢𑀁.

𑀢𑀢𑁆𑀣 𑀉𑀕𑁆𑀖𑀝𑀺𑀬𑀦𑁆𑀢𑁄 𑀉𑀤𑁆𑀤𑀺𑀲𑀺𑀬𑀫𑀸𑀦𑁄 𑀉𑀤𑁆𑀤𑁂𑀲𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑁄 𑀲𑁄 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀢𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀦𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀦𑀬𑀦𑁂𑀦 𑀦𑀁 𑀉𑀕𑁆𑀖𑀝𑀺𑀬𑀦𑁆𑀢𑀁 𑀉𑀤𑁆𑀤𑀺𑀲𑀺𑀬𑀫𑀸𑀦𑀁 𑀉𑀤𑁆𑀤𑁂𑀲𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑀁 𑀯𑀺𑀦𑀬𑀁 ‘‘𑀆𑀤𑀺𑀓𑀮𑁆𑀬𑀸𑀡𑁄’’𑀢𑀺 𑀆𑀳𑀼. 𑀯𑀺𑀧𑀜𑁆𑀘𑀺𑀬𑀦𑁆𑀢𑁄 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄 𑀦𑀺𑀤𑁆𑀤𑁂𑀲𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑁄 𑀲𑁄 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀢𑁂𑀦 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀲𑁆𑀲 𑀯𑀺𑀦𑀬𑀦𑁂𑀦 𑀦𑀁 𑀯𑀺𑀧𑀜𑁆𑀘𑀺𑀬𑀦𑁆𑀢𑀁 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀁 𑀦𑀺𑀤𑁆𑀤𑁂𑀲𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑀁 𑀯𑀺𑀦𑀬𑀁 ‘‘𑀫𑀚𑁆𑀛𑁂𑀓𑀮𑁆𑀬𑀸𑀡𑁄’’𑀢𑀺 𑀆𑀳𑀼. 𑀯𑀺𑀢𑁆𑀣𑀸𑀭𑀺𑀬𑀦𑁆𑀢𑁄 𑀧𑀝𑀺𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄 𑀧𑀝𑀺𑀦𑀺𑀤𑁆𑀤𑁂𑀲𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑁄 𑀲𑁄 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀦𑁂𑀬𑁆𑀬𑀁 𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺 𑀯𑀺𑀦𑀬𑀦𑀁 𑀚𑀦𑁂𑀢𑀺, 𑀢𑁂𑀦 𑀦𑁂𑀬𑁆𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀦𑀬𑀦𑁂𑀦 𑀦𑀁 𑀯𑀺𑀢𑁆𑀣𑀸𑀭𑀺𑀬𑀦𑁆𑀢𑀁 𑀧𑀝𑀺𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀁 𑀧𑀝𑀺𑀦𑀺𑀤𑁆𑀤𑁂𑀲𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑀁 𑀯𑀺𑀦𑀬𑀁 ‘‘𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄’’𑀢𑀺 𑀆𑀳𑀽𑀢𑀺 𑀬𑁄𑀚𑀦𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀣 𑀯𑀸 ‘‘𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀙𑀦𑁆𑀦𑀁 𑀧𑀤𑀸𑀦𑀁 𑀩𑁆𑀬𑀸𑀧𑀸𑀭𑁄 𑀤𑀲𑁆𑀲𑀺𑀢𑁄, 𑀏𑀯𑀁 𑀲𑀢𑀺 𑀅𑀢𑁆𑀣𑁄 𑀦𑀺𑀩𑁆𑀬𑀸𑀧𑀸𑀭𑁄 𑀲𑀺𑀬𑀸, 𑀅𑀢𑁆𑀣𑁄 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀩𑁆𑀬𑀸𑀧𑀸𑀭𑁄𑀬𑁂𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀲𑁄𑀬𑀁 𑀥𑀫𑁆𑀫𑀯𑀺𑀦𑀬𑁄’’𑀢𑀺𑀆𑀤𑀺. 𑀏𑀢𑁂𑀦 𑀅𑀢𑁆𑀣𑁄𑀬𑁂𑀯 𑀫𑀼𑀔𑁆𑀬𑀢𑁄 𑀯𑁂𑀦𑁂𑀬𑁆𑀬𑀢𑁆𑀢𑀬𑀲𑁆𑀲 𑀯𑀺𑀦𑀬𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀅𑀢𑁆𑀣𑀯𑀸𑀘𑀓𑁄 𑀧𑀦 𑀲𑀤𑁆𑀤𑁄 𑀞𑀸𑀦𑀽𑀧𑀘𑀸𑀭𑀢𑁄 𑀯𑁂𑀦𑁂𑀬𑁆𑀬𑀢𑁆𑀢𑀬𑀲𑁆𑀲 𑀯𑀺𑀦𑀬𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀤𑀧𑀭𑀫𑀲𑁆𑀲 𑀧𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲 𑀧𑀢𑀺𑀝𑁆𑀞𑀸𑀦𑀸𑀪𑀸𑀯𑀢𑁄 𑀲𑁄 𑀇𑀥 𑀦 𑀯𑀼𑀢𑁆𑀢𑁄. 𑀲𑁂𑀓𑁆𑀔𑀕𑁆𑀕𑀳𑀡𑁂𑀦 𑀯𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀺𑀬 𑀦𑁂𑀬𑁆𑀬𑀕𑁆𑀕𑀳𑀡𑁂𑀦 𑀧𑀤𑀧𑀭𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀅𑀓𑁆𑀔𑀭𑁂𑀳𑀻𑀢𑀺𑀆𑀤𑀻𑀲𑀼 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀦 𑀳𑁂𑀢𑁆𑀯𑀢𑁆𑀣𑁂. 𑀅𑀓𑁆𑀔𑀭𑀸𑀤𑀻𑀦𑀜𑁆𑀳𑀺 𑀉𑀕𑁆𑀖𑀝𑀦𑀸𑀤𑀻𑀦𑀺 𑀧𑀬𑁄𑀚𑀦𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀦 𑀉𑀕𑁆𑀖𑀝𑀦𑀸𑀤𑀻𑀦𑀁 𑀅𑀓𑁆𑀔𑀭𑀸𑀤𑀻𑀦𑀺 𑀧𑀬𑁄𑀚𑀦𑀸𑀦𑀻𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀳𑁂𑀢𑀼𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀣 𑀳𑀺 𑀅𑀦𑁆𑀦𑁂𑀦 𑀳𑁂𑀢𑀼𑀦𑀸 𑀯𑀲𑀢𑀺, 𑀯𑀲𑀦𑁂𑀦 𑀳𑁂𑀢𑀼𑀦𑀸 𑀅𑀦𑁆𑀦𑀁 𑀮𑀤𑁆𑀥𑀦𑁆𑀢𑀺 𑀯𑀲𑀦𑀓𑀺𑀭𑀺𑀬𑀸𑀬 𑀨𑀮𑀁 𑀯𑀲𑀦𑀓𑀺𑀭𑀺𑀬𑀸𑀬 𑀳𑁂𑀢𑀼𑀪𑀸𑀯𑁂𑀦 𑀕𑀳𑀺𑀢𑀁. ‘‘𑀅𑀚𑁆𑀛𑁂𑀲𑀦𑁂𑀦 𑀯𑀲𑀢𑀻’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀬𑀤𑀢𑁆𑀣𑀸 𑀘 𑀓𑀺𑀭𑀺𑀬𑀸, 𑀲𑁄 𑀳𑁂𑀢𑀽’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁯). 𑀢𑀢𑁆𑀣 𑀬𑀤𑀢𑁆𑀣𑀸𑀢𑀺 𑀲𑁄 𑀅𑀦𑁆𑀦𑀸𑀤𑀺𑀓𑁄 𑀅𑀢𑁆𑀣𑁄 𑀬𑀲𑁆𑀲𑀸 𑀯𑀲𑀦𑀸𑀤𑀺𑀓𑀺𑀭𑀺𑀬𑀸𑀬𑀸𑀢𑀺 𑀬𑀤𑀢𑁆𑀣𑀸, 𑀯𑀲𑀦𑀸𑀤𑀺𑀓𑀺𑀭𑀺𑀬𑀸, 𑀲𑁄 𑀅𑀦𑁆𑀦𑀸𑀤𑀺𑀓𑁄 𑀅𑀢𑁆𑀣𑁄 𑀢𑀲𑁆𑀲𑀸 𑀯𑀲𑀦𑀸𑀤𑀺𑀓𑀺𑀭𑀺𑀬𑀸𑀬 𑀳𑁂𑀢𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁦. ‘‘𑀢𑀢𑁆𑀣 𑀅𑀧𑀭𑀺𑀫𑀸𑀡𑀸 𑀧𑀤𑀸’’𑀢𑀺𑀆𑀤𑀺𑀦𑀸 ‘‘𑀥𑀫𑁆𑀫𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀉𑀤𑁆𑀤𑀺𑀝𑁆𑀞𑀸𑀬 𑀧𑀸𑀴𑀺𑀬𑀸 𑀤𑁆𑀯𑀸𑀤𑀲𑀧𑀤𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀙𑀅𑀢𑁆𑀣𑀧𑀤𑀙𑀩𑁆𑀬𑀜𑁆𑀚𑀦𑀧𑀤𑀪𑁂𑀤𑁂𑀦 𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀧𑀤𑀩𑁆𑀬𑀜𑁆𑀚𑀦𑀧𑀤𑀓𑀮𑁆𑀬𑀸𑀡𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀙𑀧𑁆𑀧𑀤𑀸𑀦𑀺 𑀅𑀢𑁆𑀣𑁄’’𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀼𑀭𑀽𑀧𑀁 ‘‘𑀢𑀢𑁆𑀣 𑀅𑀧𑀭𑀺𑀫𑀸𑀡𑀸’’𑀢𑀺𑀆𑀤𑀺𑀦𑀸 ‘‘𑀥𑀫𑁆𑀫𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀉𑀤𑁆𑀤𑀺𑀝𑁆𑀞𑀸𑀬 𑀧𑀸𑀴𑀺𑀬𑀸 𑀤𑁆𑀯𑀸𑀤𑀲𑀧𑀤𑀢𑀸 𑀤𑀲𑁆𑀲𑁂𑀢𑁆𑀯𑀸 ‘‘𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀼𑀭𑀽𑀧𑀁 ‘‘𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀘𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲𑀸 𑀧𑀸𑀴𑀺𑀬𑀸 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸 𑀤𑀲𑁆𑀲𑀺𑀢𑀸, 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀼𑀭𑀽𑀧𑀁 𑀢𑀲𑁆𑀲𑀸 𑀧𑀸𑀴𑀺𑀬𑀸 𑀙𑀅𑀢𑁆𑀣𑀧𑀤𑀩𑁆𑀬𑀜𑁆𑀚𑀦𑀧𑀤𑀲𑀫𑁆𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀙𑀧𑁆𑀧𑀤𑀸𑀦𑀺 𑀅𑀢𑁆𑀣𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀤𑁂𑀲𑀦𑀸𑀳𑀸𑀭𑀯𑀺𑀲𑀬𑀲𑀗𑁆𑀔𑀸𑀢𑀸𑀬𑀁 𑀧𑀸𑀴𑀺𑀬𑀁 𑀙𑀧𑁆𑀧𑀤𑀸𑀦𑀺 𑀅𑀢𑁆𑀣𑁄. 𑀓𑀢𑀫𑀸𑀦𑀺 𑀙𑀧𑁆𑀧𑀤𑀸𑀦𑀺? 𑀲𑀗𑁆𑀓𑀸𑀲𑀦𑀸, 𑀧𑀓𑀸𑀲𑀦𑀸, 𑀯𑀺𑀯𑀭𑀡𑀸, 𑀯𑀺𑀪𑀚𑀦𑀸, 𑀉𑀢𑁆𑀢𑀸𑀦𑀻𑀓𑀫𑁆𑀫𑀁, 𑀧𑀜𑁆𑀜𑀢𑁆𑀢𑀺 𑀇𑀫𑀸𑀦𑀺 𑀙𑀧𑁆𑀧𑀤𑀸𑀦𑀺. 𑀅𑀢𑁆𑀣𑁄 𑀬𑀲𑁆𑀲 𑀅𑀢𑁆𑀣𑀺 𑀢𑀲𑁆𑀫𑀸 𑀲𑀸𑀢𑁆𑀣𑀁. 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀤𑁂𑀲𑀦𑀸𑀳𑀸𑀭𑀯𑀺𑀲𑀬𑀲𑀗𑁆𑀔𑀸𑀢𑀸𑀬𑀁 𑀧𑀸𑀴𑀺𑀬𑀁 𑀙𑀧𑁆𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀁. 𑀓𑀢𑀫𑀸𑀦𑀺 𑀙𑀧𑁆𑀧𑀤𑀸𑀦𑀺? 𑀅𑀓𑁆𑀔𑀭𑀁, 𑀧𑀤𑀁, 𑀩𑁆𑀬𑀜𑁆𑀚𑀦𑀁, 𑀆𑀓𑀸𑀭𑁄, 𑀦𑀺𑀭𑀼𑀢𑁆𑀢𑀺, 𑀦𑀺𑀤𑁆𑀤𑁂𑀲𑁄 𑀇𑀫𑀸𑀦𑀺 𑀙𑀧𑁆𑀧𑀤𑀸𑀦𑀺. 𑀩𑁆𑀬𑀜𑁆𑀚𑀦𑀁 𑀬𑀲𑁆𑀲 𑀅𑀢𑁆𑀣𑀻𑀢𑀺 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑁂𑀦𑀸𑀢𑀺 𑀢𑀲𑁆𑀲𑀸 𑀧𑀸𑀴𑀺𑀬𑀸 𑀢𑀺𑀯𑀺𑀥𑀓𑀮𑁆𑀬𑀸𑀡𑀙𑀅𑀢𑁆𑀣𑀧𑀤𑀲𑀫𑁆𑀧𑀦𑁆𑀦𑀙𑀩𑁆𑀬𑀜𑁆𑀚𑀦𑀧𑀤𑀲𑀫𑁆𑀧𑀦𑁆𑀦𑀝𑁆𑀞𑁂𑀦, ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂…𑀧𑁂… 𑀲𑀼𑀤𑁆𑀥’’𑀦𑁆𑀢𑀺 𑀪𑀕𑀯𑀸 𑀆𑀳𑀸𑀢𑀺 𑀅𑀢𑁆𑀣𑁄.

𑀓𑁂𑀯𑀮𑀲𑀤𑁆𑀤𑀲𑁆𑀲 𑀲𑀓𑀮𑀸𑀤𑀺𑀅𑀢𑁆𑀣𑀯𑀸𑀘𑀓𑀢𑁆𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀯𑀮𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁 𑀦 𑀫𑀺𑀲𑁆𑀲𑀁 𑀮𑁄𑀓𑀺𑀬𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑁂 𑀏𑀓𑁄𑀧𑀺 𑀅𑀢𑁆𑀣𑁄 𑀊𑀦𑁄 𑀦𑀢𑁆𑀣𑀺, 𑀯𑀸𑀘𑀓𑀲𑀤𑁆𑀤𑁂𑀲𑀼𑀧𑀺 𑀅𑀦𑀢𑁆𑀣𑀓𑁄 𑀏𑀓𑁄𑀧𑀺 𑀲𑀤𑁆𑀤𑁄 𑀅𑀥𑀺𑀓𑁄 𑀦𑀢𑁆𑀣𑀻𑀢𑀺 𑀧𑀭𑀺𑀧𑀼𑀡𑁆𑀡𑀁 𑀅𑀦𑀽𑀦𑀁 𑀅𑀦𑀢𑀺𑀭𑁂𑀓𑀁. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀲𑀤𑁆𑀤𑀤𑁄𑀲𑀅𑀢𑁆𑀣𑀤𑁄𑀲𑀸𑀤𑀺𑀯𑀺𑀭𑀳𑀢𑁄 𑀯𑀸 𑀧𑀭𑀺𑀲𑀼𑀤𑁆𑀥𑀁, 𑀭𑀸𑀕𑀸𑀤𑀺𑀫𑀮𑀯𑀺𑀭𑀳𑀢𑁄 𑀯𑀸 𑀧𑀭𑀺𑀬𑁄𑀤𑀸𑀢𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀺𑀲𑁂𑀲𑀸𑀦𑀁 𑀉𑀧𑀝𑁆𑀞𑀺𑀢𑀝𑁆𑀞𑀸𑀦𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁. 𑀦𑀺𑀕𑁆𑀕𑀢𑀁 𑀫𑀮𑀁 𑀏𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀦𑀺𑀫𑁆𑀫𑀮𑀁. 𑀲𑀤𑁆𑀤𑀤𑁄𑀲𑀸𑀤𑀺𑀯𑀺𑀭𑀳𑀢𑁄 𑀯𑀸 𑀭𑀸𑀕𑀸𑀤𑀺𑀯𑀺𑀭𑀳𑀢𑁄 𑀯𑀸 𑀲𑀩𑁆𑀩𑀫𑀮𑁂𑀳𑀺 𑀅𑀧𑀕𑀢𑀁 𑀧𑀭𑀺 𑀲𑀫𑀦𑁆𑀢𑀢𑁄 𑀑𑀤𑀸𑀢𑀦𑁆𑀢𑀺 𑀧𑀭𑀺𑀬𑁄𑀤𑀸𑀢𑀁. 𑀉𑀧𑀝𑁆𑀞𑀺𑀢𑀦𑁆𑀢𑀺 𑀉𑀧𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀯𑀺𑀲𑁂𑀲𑀸𑀢𑀺 𑀉𑀧𑀝𑁆𑀞𑀺𑀢𑀁 𑀬𑀣𑀸 ‘‘𑀧𑀤𑀓𑁆𑀓𑀦𑁆𑀢’’𑀦𑁆𑀢𑀺. 𑀧𑀤𑀓𑁆𑀓𑀦𑁆𑀢𑀁 𑀧𑀤𑀓𑁆𑀓𑀦𑁆𑀢𑀝𑁆𑀞𑀸𑀦𑀁. 𑀯𑀺𑀲𑀺𑀲𑀦𑁆𑀢𑀺 𑀫𑀦𑀼𑀲𑁆𑀲𑀥𑀫𑁆𑀫𑁂𑀳𑀻𑀢𑀺 𑀯𑀺𑀲𑁂𑀲𑀸, 𑀲𑀩𑁆𑀩𑁂 𑀯𑀺𑀲𑁂𑀲𑀸 𑀲𑀩𑁆𑀩𑀯𑀺𑀲𑁂𑀲𑀸, 𑀲𑀩𑁆𑀩𑀢𑁄 𑀯𑀸 𑀯𑀺𑀲𑁂𑀲𑀸𑀢𑀺 𑀲𑀩𑁆𑀩𑀯𑀺𑀲𑁂𑀲𑀸, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸. 𑀢𑁂𑀲𑀁 𑀲𑀩𑁆𑀩𑀯𑀺𑀲𑁂𑀲𑀸𑀦𑀁 𑀉𑀧𑀝𑁆𑀞𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀇𑀤𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀢𑀣𑀸𑀕𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀤𑀦𑁆𑀢𑀺 𑀢𑀣𑀸𑀕𑀢𑀧𑀤𑀁. 𑀧𑀤𑀦𑁆𑀢𑀺 𑀘 𑀧𑀝𑀺𑀧𑀢𑁆𑀢𑀺𑀕𑀫𑀦𑁂𑀦 𑀯𑀸 𑀤𑁂𑀲𑀦𑀸𑀕𑀫𑀦𑁂𑀦 𑀯𑀸 𑀓𑀺𑀮𑁂𑀲𑀕𑁆𑀕𑀳𑀡𑀁. 𑀑𑀢𑁆𑀣𑀭𑀺𑀢𑁆𑀯𑀸 𑀕𑀫𑀦𑀝𑁆𑀞𑀸𑀦𑀁 𑀇𑀢𑀺𑀧𑀺 𑀯𑀼𑀘𑁆𑀘𑀢𑀺 𑀧𑀯𑀼𑀘𑁆𑀘𑀢𑀺, 𑀢𑀣𑀸𑀕𑀢𑁂𑀦 𑀕𑁄𑀘𑀭𑀸𑀲𑁂𑀯𑀦𑁂𑀦 𑀯𑀸 𑀪𑀸𑀯𑀦𑀸𑀲𑁂𑀯𑀦𑁂𑀦 𑀯𑀸 𑀦𑀺𑀲𑁂𑀯𑀺𑀢𑀁 𑀪𑀚𑀺𑀢𑀁 𑀇𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀣𑀸𑀕𑀢𑀲𑁆𑀲 𑀫𑀳𑀸𑀯𑀚𑀺𑀭𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀤𑀦𑁆𑀢𑁂𑀳𑀺 𑀆𑀭𑀜𑁆𑀚𑀺𑀢𑀁 𑀆𑀭𑀜𑁆𑀚𑀺𑀢𑀝𑁆𑀞𑀸𑀦𑀁 𑀇𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀅𑀢𑁄 𑀢𑀣𑀸𑀕𑀢𑀧𑀤𑀸𑀤𑀺𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀏𑀢𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀢𑀺 𑀧𑀜𑁆𑀜𑀸𑀬𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀼𑀦𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀲𑁆𑀲 𑀪𑀕𑀯𑀢𑁄 𑀘𑀭𑀺𑀬𑀁, 𑀩𑁆𑀭𑀳𑁆𑀫𑀁 𑀯𑀸 𑀲𑀩𑁆𑀩𑀲𑁂𑀝𑁆𑀞𑀁 𑀘𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀧𑀜𑁆𑀜𑀸𑀬𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀧𑀓𑀸𑀭𑁂𑀳𑀺 𑀜𑀸𑀬𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀇𑀫𑀲𑁆𑀲 𑀲𑀺𑀓𑁆𑀔𑀢𑁆𑀢𑀬𑀲𑁆𑀲 𑀲𑀗𑁆𑀕𑀳𑀲𑁆𑀲 𑀲𑀸𑀲𑀦𑀲𑁆𑀲 𑀧𑀭𑀺𑀧𑀼𑀡𑁆𑀡𑀪𑀸𑀯𑀧𑀭𑀺𑀲𑀼𑀤𑁆𑀥𑀪𑀸𑀯𑀲𑀗𑁆𑀔𑀸𑀢𑀁 𑀢𑀣𑀸𑀕𑀢𑀧𑀤𑀪𑀸𑀯𑀁!𑀢𑀣𑀸𑀕𑀢𑀧𑀤𑀪𑀸𑀯𑀁, 𑀢𑀣𑀸𑀕𑀢𑀦𑀺𑀲𑁂𑀯𑀺𑀢𑀪𑀸𑀯𑀁, 𑀢𑀣𑀸𑀕𑀢𑀆𑀭𑀜𑁆𑀚𑀺𑀢𑀪𑀸𑀯𑀁, 𑀢𑁂𑀳𑀺 𑀧𑀓𑀸𑀭𑁂𑀳𑀺 𑀜𑀸𑀧𑀺𑀢𑀪𑀸𑀯𑀁 𑀓𑀣𑀁 𑀫𑀬𑀁 𑀦𑀺𑀓𑁆𑀓𑀗𑁆𑀔𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁄 ‘‘𑀢𑁂𑀦𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀩𑁆𑀪𑀸𑀯𑀤𑀻𑀧𑀓𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑁂𑀦 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀦𑀺𑀓𑁆𑀓𑀗𑁆𑀔𑁂𑀳𑀺 𑀚𑀸𑀦𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀤𑀺 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀘 𑀧𑀤𑁂𑀳𑀺 𑀘 𑀉𑀕𑁆𑀖𑀝𑁂𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀘 𑀆𑀓𑀸𑀭𑁂𑀳𑀺 𑀘 𑀯𑀺𑀧𑀜𑁆𑀘𑀬𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀘 𑀦𑀺𑀤𑁆𑀤𑁂𑀲𑁂𑀳𑀺 𑀘 𑀯𑀺𑀢𑁆𑀣𑀸𑀭𑁂𑀢𑀺, 𑀏𑀯𑀁 𑀲𑀢𑀺 𑀆𑀘𑀭𑀺𑀬𑁂𑀦 𑀭𑀘𑀺𑀢𑁂𑀦 𑀤𑁂𑀲𑀦𑀸𑀳𑀸𑀭𑁂𑀦 𑀧𑀬𑁄𑀚𑀦𑀁 𑀦 𑀪𑀯𑀢𑀺, 𑀤𑁂𑀲𑀦𑀸𑀳𑀸𑀭𑁂𑀦 𑀦 𑀯𑀺𑀦𑀸 𑀪𑀕𑀯𑀢𑁄 𑀤𑁂𑀲𑀦𑀸𑀬𑀫𑁂𑀯 𑀅𑀢𑁆𑀣𑀲𑀺𑀚𑁆𑀛𑀦𑀢𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀓𑁂𑀲𑀁 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁄𑀕𑀻𑀦’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑁄𑀕𑀻𑀦𑀦𑁆𑀢𑀺 𑀬𑀼𑀚𑁆𑀚𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬𑀦𑁆𑀢𑀺 𑀬𑁄𑀕𑀺𑀦𑁄, 𑀢𑁂𑀲𑀁 𑀬𑁄𑀕𑀻𑀦𑀁. 𑀢𑁂𑀦 𑀫𑀬𑀸 𑀭𑀘𑀺𑀢𑁂𑀦 𑀤𑁂𑀲𑀦𑀸𑀳𑀸𑀭𑁂𑀦 𑀲𑀁𑀯𑀡𑁆𑀡𑀺𑀢𑀸 𑀅𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀪𑀕𑀯𑀢𑁄 𑀤𑁂𑀲𑀦𑀸 𑀉𑀕𑁆𑀖𑀝𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀤𑁂𑀲𑀦𑀸𑀳𑀸𑀭𑁄 𑀬𑁄𑀕𑀻𑀦𑀁 𑀲𑀸𑀢𑁆𑀣𑀓𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀤𑁂𑀲𑀦𑀸𑀳𑀸𑀭𑀲𑁆𑀲 𑀅𑀲𑁆𑀲𑀸𑀤𑀸𑀤𑀺𑀤𑁂𑀲𑀦𑀸𑀳𑀸𑀭𑀪𑀸𑀯𑁄 𑀓𑁂𑀦 𑀅𑀫𑁆𑀳𑁂𑀳𑀺 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳 𑀆𑀬𑀲𑁆𑀫𑀸…𑀧𑁂… 𑀤𑁂𑀲𑀦𑀸𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦 𑀅𑀲𑁆𑀲𑀸𑀤𑀸𑀤𑀺𑀤𑁂𑀲𑀦𑀸𑀳𑀸𑀭𑀪𑀸𑀯𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸…𑀧𑁂… 𑀤𑁂𑀲𑀦𑀸𑀳𑀸𑀭𑁄’’𑀢𑀺 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀤𑁂𑀲𑀦𑀸𑀳𑀸𑀭𑀲𑁆𑀲 𑀬𑁄𑀕𑀻𑀦𑀁 𑀅𑀲𑁆𑀲𑀸𑀤𑀸𑀤𑀺𑀤𑁂𑀲𑀦𑀸𑀳𑀸𑀭𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀓𑀺𑀁 𑀧𑀦 𑀏𑀢𑁆𑀢𑀸𑀯𑀢𑀸 𑀤𑁂𑀲𑀦𑀸𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄, 𑀅𑀜𑁆𑀜𑁄 𑀦𑀺𑀬𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀤𑁂𑀲𑀦𑀸𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀲𑀁 𑀤𑁂𑀲𑀦𑀸𑀬𑀁 𑀅𑀲𑁆𑀲𑀸𑀤𑀸𑀤𑀬𑁄 𑀬𑁂𑀦 𑀤𑁂𑀲𑀦𑀸𑀳𑀸𑀭𑁂𑀦 𑀦𑀺𑀤𑁆𑀥𑀸𑀭𑀺𑀢𑀸, 𑀢𑀲𑁆𑀲𑀁 𑀤𑁂𑀲𑀦𑀸𑀬𑀁 𑀲𑁄 𑀤𑁂𑀲𑀦𑀸𑀳𑀸𑀭𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑀺𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺.

𑀇𑀢𑀺 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.

𑁨. 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁧𑁧. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁂𑀦 𑀅𑀲𑁆𑀲𑀸𑀤𑀸𑀤𑀬𑁄 𑀲𑀼𑀢𑁆𑀢𑀢𑁆𑀣𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀳𑀸𑀭𑁂𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑁄 𑀳𑀸𑀭𑁄 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘𑀸’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀕𑀸𑀣𑀸𑀬 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀅𑀬𑀁 𑀯𑀺𑀘𑀬𑁄 𑀳𑀸𑀭𑁄 𑀓𑀺𑀁 𑀯𑀺𑀘𑀺𑀦𑀢𑀻’’𑀢𑀺𑀆𑀤𑀺𑀓𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸.