𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀦𑁂𑀢𑁆𑀢𑀺𑀯𑀺𑀪𑀸𑀯𑀺𑀦𑀻

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀬𑀚𑀺𑀢𑀩𑁆𑀩𑀁 𑀬𑀚𑀺𑀢𑁆𑀯𑀸𑀦, 𑀦𑀫𑀺𑀢𑀩𑁆𑀩𑀁 𑀦𑀫𑀸𑀫𑀳𑀁;

𑀬𑀚𑀦𑀸𑀤𑁆𑀬𑀸𑀦𑀼𑀪𑀸𑀯𑁂𑀦, 𑀅𑀦𑁆𑀢𑀭𑀸𑀬𑁂 𑀚𑀳𑀁 𑀲𑀤𑀸.

𑀬𑁂𑀦 𑀬𑀸 𑀭𑀘𑀺𑀢𑀸 𑀦𑁂𑀢𑁆𑀢𑀺, 𑀬𑁂𑀦 𑀲𑀸 𑀅𑀦𑀼𑀫𑁄𑀤𑀺𑀢𑀸;

𑀬𑁂𑀳𑀺 𑀲𑀁𑀯𑀡𑁆𑀡𑀦𑀸 𑀓𑀢𑀸, 𑀢𑁂𑀲𑀸𑀦𑀼𑀪𑀸𑀯𑀦𑀺𑀲𑁆𑀲𑀺𑀢𑁄.

𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀲𑀭𑀺𑀢𑁆𑀯𑀸𑀦, 𑀮𑀻𑀦𑀸𑀮𑀻𑀦𑀸𑀦𑀼𑀲𑀦𑁆𑀥𑁆𑀬𑀸𑀤𑀺𑀁;

𑀓𑀭𑀺𑀲𑁆𑀲𑀁 𑀚𑀺𑀦𑀲𑀼𑀢𑁆𑀢𑀸𑀦𑀁, 𑀳𑀺𑀢𑀁 𑀦𑁂𑀢𑁆𑀢𑀺𑀯𑀺𑀪𑀸𑀯𑀦𑀁.

𑀅𑀧𑁆𑀧𑀫𑁂𑀬𑁆𑀬𑀕𑀼𑀡𑁄 𑀫𑀳𑀸𑀥𑀫𑁆𑀫𑀭𑀸𑀚𑀯𑁆𑀳𑀬𑁄 𑀪𑀯𑁂;

𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀬𑁄, 𑀩𑁄𑀥𑀺𑀲𑀫𑁆𑀪𑀸𑀭𑀧𑀽𑀭𑀡𑁄.

𑀦𑀸𑀦𑀸𑀭𑀝𑁆𑀞𑀺𑀲𑁆𑀲𑀭𑀺𑀲𑁆𑀲𑀭𑁄, 𑀲𑁂𑀝𑁆𑀞𑁄 𑀲𑀸𑀲𑀦𑀧𑀕𑁆𑀕𑀳𑁄;

𑀧𑀸𑀲𑀁𑀲𑀭𑀸𑀚𑀧𑀸𑀲𑀁𑀲𑁄, 𑀦𑀭𑀸𑀘𑀺𑀦𑁆𑀢𑁂𑀬𑁆𑀬𑀘𑀺𑀦𑁆𑀢𑀓𑁄.

𑀘𑀺𑀦𑁆𑀢𑀺𑀢𑀓𑀸𑀭𑀓𑁄 𑀭𑀸𑀚𑀸, 𑀲𑀺𑀭𑀝𑁆𑀞𑀺𑀫𑀸𑀮𑀧𑀸𑀮𑀓𑁄;

𑀅𑀚𑁂𑀬𑁆𑀬𑀚𑁂𑀬𑁆𑀬𑀓𑁄 𑀫𑀳𑀸𑀘𑁂𑀢𑁆𑀬𑀸𑀤𑀺𑀓𑀸𑀭𑀓𑁄 𑀲𑀤𑀸.

𑀅𑀲𑁆𑀲𑀸𑀫𑀘𑁆𑀘𑁂𑀦 𑀩𑁆𑀬𑀢𑁆𑀢𑁂𑀦, 𑀚𑀺𑀦𑀘𑀓𑁆𑀓𑀳𑀺𑀢𑀢𑁆𑀣𑀺𑀦𑀸;

𑀅𑀦𑀦𑁆𑀢𑀲𑀼𑀢𑀺𑀦𑀸𑀫𑁂𑀦, 𑀲𑀓𑁆𑀓𑀘𑁆𑀘𑀁 𑀅𑀪𑀺𑀬𑀸𑀘𑀺𑀢𑁄.

𑀓𑀸𑀫𑀁 𑀲𑀁𑀯𑀡𑁆𑀡𑀦𑀸 𑀓𑀢𑀸, 𑀣𑁂𑀭𑀸𑀲𑀪𑁂𑀳𑀺 𑀕𑀫𑁆𑀪𑀻𑀭𑀸;

𑀕𑀫𑁆𑀪𑀻𑀭𑀢𑁆𑀢𑀸 𑀢𑀼 𑀚𑀸𑀦𑀺𑀢𑀼𑀁, 𑀚𑀺𑀦𑀧𑀼𑀢𑁆𑀢𑁂𑀳𑀺 𑀤𑀼𑀓𑁆𑀓𑀭𑀸.

𑀢𑀲𑁆𑀫𑀸 𑀬𑀸𑀘𑀺𑀢𑀸𑀦𑀼𑀭𑀽𑀧𑁂𑀦, 𑀓𑀭𑀺𑀲𑁆𑀲𑀁 𑀲𑀸𑀤𑀭𑀁 𑀲𑀼𑀡;

𑀲𑀺𑀲𑁆𑀲𑀲𑀺𑀓𑁆𑀔𑀦𑀬𑀸𑀦𑀼𑀕𑀁, 𑀬𑁄𑀢𑁆𑀢𑀁 𑀦𑁂𑀢𑁆𑀢𑀺𑀯𑀺𑀪𑀸𑀯𑀦𑀦𑁆𑀢𑀺.

𑁧. 𑀲𑀗𑁆𑀕𑀳𑀯𑀸𑀭𑀅𑀢𑁆𑀣𑀯𑀺𑀪𑀸𑀯𑀦𑀸

𑀢𑀢𑁆𑀣 𑀬𑀲𑁆𑀲 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀲𑁆𑀲 𑀦𑀯𑀗𑁆𑀕𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀯𑀭𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀬𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀓𑀸𑀢𑀼𑀓𑀸𑀫𑁄, 𑀢𑀲𑁆𑀲 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀦𑀺𑀲𑁆𑀲𑀬𑀁 𑀯𑀺𑀲𑀬𑀪𑀽𑀢𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀳𑀺𑀢𑀁, 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀏𑀯 𑀯𑀸 𑀲𑀮𑁄𑀓𑀧𑀸𑀮𑁂𑀦 𑀢𑀺𑀮𑁄𑀓𑁂𑀦 𑀲𑀤𑀸 𑀧𑀽𑀚𑁂𑀢𑀩𑁆𑀩𑀲𑁆𑀲 𑀘𑁂𑀯 𑀦𑀫𑀲𑁆𑀲𑀺𑀢𑀩𑁆𑀩𑀲𑁆𑀲 𑀘 𑀦𑀭𑀼𑀢𑁆𑀢𑀫𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀲𑀦𑀯𑀭𑀁 𑀯𑀺𑀤𑀽𑀳𑁂𑀯 𑀜𑀸𑀢𑀩𑁆𑀩𑀁. 𑀏𑀢𑀁 𑀲𑀸𑀲𑀦𑀯𑀭𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑀢𑀁𑀚𑀦𑀓𑁂𑀦, 𑀢𑀁𑀯𑀺𑀚𑀸𑀦𑀓𑀯𑀺𑀤𑀽𑀳𑀺 𑀘 𑀦𑀺𑀬𑀫𑁂𑀢𑀼𑀁, 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀦𑀜𑁆𑀘 𑀓𑀸𑀢𑀼𑀁 𑁋

‘‘𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂, 𑀲𑀮𑁄𑀓𑀧𑀸𑀮𑁄 𑀲𑀤𑀸 𑀦𑀫𑀲𑁆𑀲𑀢𑀺 𑀘;

𑀢𑀲𑁆𑀲𑁂𑀢 𑀲𑀸𑀲𑀦𑀯𑀭𑀁, 𑀯𑀺𑀤𑀽𑀳𑀺 𑀜𑁂𑀬𑁆𑀬𑀁 𑀦𑀭𑀯𑀭𑀲𑁆𑀲𑀸’’𑀢𑀺. 𑁋 𑀧𑀞𑀫𑀕𑀸𑀣𑀫𑀸𑀳;

𑀇𑀫𑀸𑀬 𑀳𑀺 𑀧𑀞𑀫𑀕𑀸𑀣𑀸𑀬 ‘‘𑀏𑀢𑀁 𑀲𑀸𑀲𑀦𑀯𑀭𑀁 𑀜𑁂𑀬𑁆𑀬’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀏𑀓𑀦𑁆𑀢𑀢𑁄 𑀓𑀭𑀡𑀯𑀺𑀲𑁂𑀲𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀁. 𑀏𑀢𑁂𑀦𑁂𑀯 𑀯𑀺𑀲𑁂𑀲𑀓𑀭𑀡𑁂𑀦 𑀏𑀓𑀦𑁆𑀢𑀸𑀥𑀺𑀧𑁆𑀧𑁂𑀢𑀦𑁂𑀢𑁆𑀢𑀺𑀯𑀺𑀲𑀬𑀲𑀸𑀲𑀦𑀯𑀭𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀏𑀓𑀦𑁆𑀢𑀸𑀥𑀺𑀧𑁆𑀧𑁂𑀢𑀲𑀸𑀲𑀦𑀯𑀭𑀫𑁂𑀯 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀬 𑀲𑀁𑀯𑀡𑁆𑀡𑁂𑀢𑀩𑁆𑀩𑀢𑁆𑀢𑀸 𑀯𑀺𑀲𑀬𑀁 𑀢𑁂𑀦𑁂𑀯 𑀯𑀓𑁆𑀔𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑁋

‘‘𑀏𑀢𑀁 𑀇𑀤𑀸𑀦𑀺 𑀅𑀫𑁆𑀳𑁂𑀳𑀺 𑀯𑀺𑀪𑀚𑀺𑀢𑀩𑁆𑀩𑀳𑀸𑀭𑀦𑀬𑀧𑀝𑁆𑀞𑀸𑀦𑀯𑀺𑀘𑀸𑀭𑀡𑀯𑀺𑀲𑀬𑀪𑀽𑀢𑀁 𑀲𑀸𑀲𑀦𑀁 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀭𑀁 𑀅𑀕𑁆𑀕𑀁 𑀉𑀢𑁆𑀢𑀫𑀁 𑀦𑀺𑀧𑀼𑀡𑀜𑀸𑀡𑀕𑁄𑀘𑀭𑀢𑀸𑀬 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀫𑁂𑀯𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸) 𑀘,

‘‘𑀏𑀢𑀁 𑀢𑀺𑀯𑀺𑀥𑀫𑁆𑀧𑀺 ‘𑀲𑀸𑀲𑀦𑀯𑀭’𑀦𑁆𑀢𑀺 𑀧𑀤𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣 𑀬𑀁 𑀧𑀞𑀫𑀁, 𑀢𑀁 𑀇𑀢𑀭𑁂𑀲𑀁 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀲𑀩𑁆𑀩𑀲𑀸𑀲𑀦𑀫𑀽𑀮𑀪𑀽𑀢𑀁, 𑀅𑀢𑁆𑀢𑀦𑁄 𑀧𑀓𑀭𑀡𑀲𑁆𑀲 𑀘 𑀯𑀺𑀲𑀬𑀪𑀽𑀢𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀫𑁂𑀯𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸) 𑀘,

‘‘𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘𑀲𑀸𑀲𑀦𑀯𑀭𑀁 𑀯𑀺𑀤𑀽𑀳𑀺 𑀜𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀣 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀬 𑀯𑀺𑀲𑀬𑀪𑀽𑀢𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑁂𑀯 𑀧𑀓𑀸𑀭𑀦𑁆𑀢𑀭𑁂𑀦 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸) 𑀘.

𑀢𑀢𑁆𑀣 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲𑀸𑀧𑀺 𑀫𑀽𑀮𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀸𑀲𑀦𑀫𑀽𑀮𑀪𑀽𑀢’’𑀦𑁆𑀢𑀺. 𑀏𑀢𑁂𑀦 𑀓𑀫𑁆𑀫𑀲𑀸𑀥𑀦𑁂𑀦𑀧𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑁂 𑀲𑀺𑀤𑁆𑀥𑁂 𑀦𑀸𑀦𑀸𑀯𑀺𑀥𑀲𑀸𑀥𑀓𑀯𑀘𑀦𑀁 𑀦𑀸𑀦𑀸𑀯𑀸𑀤𑀸𑀦𑀁 𑀅𑀦𑁄𑀓𑀸𑀲𑀓𑀭𑀡𑀢𑁆𑀣𑀸𑀬 𑀓𑀢𑀁. 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀥𑀫𑁆𑀫𑀕𑀼𑀡𑀸 𑀧𑀦 𑀲𑀸𑀲𑀦𑀲𑁆𑀲 𑀯𑀺𑀲𑁂𑀲𑀤𑁂𑀲𑀓𑀦𑀭𑀯𑀭𑀲𑀤𑁆𑀤𑁂𑀦 𑀯𑀸 𑀧𑀭𑀺𑀤𑀻𑀧𑀓𑀢𑁆𑀣𑀪𑀸𑀯𑁂𑀦 𑀯𑀸 𑀤𑀻𑀧𑀺𑀢𑀸 𑀅𑀯𑀺𑀦𑀸𑀪𑀸𑀯𑀢𑁄. 𑀲𑀸𑀲𑀦𑀯𑀭𑀲𑁆𑀲 𑀧𑀦 𑀚𑀦𑀓𑀲𑀫𑁆𑀩𑀦𑁆𑀥𑀺𑀧𑁂𑀓𑁆𑀔𑀢𑁆𑀢𑀸 ‘‘𑀦𑀭𑀯𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀘 𑀅𑀕𑁆𑀕𑀧𑀼𑀕𑁆𑀕𑀮𑁄 𑀲𑀸𑀲𑀦𑀯𑀭𑀚𑀦𑀓𑁄 𑀯𑀸𑀘𑀓𑀢𑁆𑀣𑀲𑀫𑁆𑀩𑀦𑁆𑀥𑀺𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀅𑀦𑀜𑁆𑀜𑀲𑀸𑀥𑀸𑀭𑀡𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀸 𑀧𑀦 𑀚𑀦𑀓𑀲𑀫𑁆𑀩𑀦𑁆𑀥𑀺𑀪𑀽𑀢𑀲𑁆𑀲 𑀦𑀭𑀲𑁆𑀲 𑀯𑀺𑀲𑁂𑀲𑀓𑁂𑀦𑀯𑀭𑀲𑀤𑁆𑀤𑁂𑀦 𑀯𑀸 𑀧𑀭𑀺𑀤𑀻𑀧𑀓𑀢𑁆𑀣𑀪𑀸𑀯𑁂𑀦 𑀯𑀸 𑀤𑀻𑀧𑀺𑀢𑁄.

𑀓𑀺𑀁 𑀦𑀼 𑀲𑁄 𑀲𑀸𑀲𑀦𑀯𑀭𑀚𑀦𑀓𑁄 𑀦𑀭𑀯𑀭𑁄 𑀧𑀭𑀫𑀢𑁆𑀣𑁄𑀯, 𑀉𑀤𑀸𑀳𑀼 𑀧𑀽𑀚𑀦𑀻𑀬𑁄 𑀘𑁂𑀯 𑀦𑀫𑀲𑁆𑀲𑀦𑀻𑀬𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀬𑀁 𑀮𑁄𑀓𑁄…𑀧𑁂… 𑀦𑀫𑀲𑁆𑀲𑀢𑀺 𑀘𑀸’’𑀢𑀺, 𑀢𑁂𑀦 𑀲𑀸𑀲𑀦𑀯𑀭𑀚𑀦𑀓𑁄 𑀦𑀭𑀯𑀭𑁄 𑀧𑀭𑀫𑀢𑁆𑀣𑁄𑀯 𑀦 𑀳𑁄𑀢𑀺, 𑀅𑀣 𑀔𑁄 𑀲𑀮𑁄𑀓𑀧𑀸𑀮𑁂𑀦 𑀮𑁄𑀓𑁂𑀦 𑀲𑀤𑀸 𑀲𑀩𑁆𑀩𑀓𑀸𑀮𑁂𑀲𑀼 𑀧𑀽𑀚𑀦𑀻𑀬𑁄 𑀘𑁂𑀯 𑀦𑀫𑀲𑁆𑀲𑀦𑀻𑀬𑁄 𑀘𑀸𑀢𑀺 𑀯𑀺𑀲𑁂𑀲𑀺𑀢𑁄 𑀣𑁄𑀫𑀺𑀢𑁄𑀢𑀺.

𑀏𑀢𑁆𑀣 𑀘 𑀧𑀽𑀚𑀦𑀦𑀫𑀲𑁆𑀲𑀦𑀘𑁂𑀢𑀦𑀸𑀯𑀸𑀘𑀓𑁂𑀦 𑀯𑀸 𑀧𑀽𑀚𑀦𑀦𑀫𑀲𑁆𑀲𑀦𑀲𑀤𑁆𑀤𑁂𑀦 𑀨𑀮𑀽𑀧𑀘𑀸𑀭𑀢𑁆𑀣𑁄 𑀧𑀼𑀜𑁆𑀜𑀫𑀳𑀢𑁆𑀢𑀲𑀗𑁆𑀔𑀸𑀢𑁄 𑀧𑀽𑀚𑀦𑀻𑀬𑀪𑀸𑀯𑁄 𑀘𑁂𑀯 𑀆𑀲𑀯𑀓𑁆𑀔𑀬𑀜𑀸𑀡𑀧𑀤𑀝𑁆𑀞𑀸𑀦𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀕𑀼𑀡𑀲𑀗𑁆𑀔𑀸𑀢𑁄 𑀦𑀫𑀲𑁆𑀲𑀦𑀻𑀬𑀪𑀸𑀯𑁄 𑀘 𑀤𑀻𑀧𑀓𑀢𑁆𑀣𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀻𑀧𑀺𑀢𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 ‘‘𑀪𑀕𑀯𑀢𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀽𑀚𑀦𑀻𑀬𑀯𑀦𑁆𑀤𑀦𑀻𑀬𑀪𑀸𑀯𑁄, 𑀅𑀕𑁆𑀕𑀧𑀼𑀕𑁆𑀕𑀮𑀪𑀸𑀯𑁄 𑀘 𑀯𑀼𑀘𑁆𑀘𑀫𑀸𑀦𑁄 𑀕𑀼𑀡𑀯𑀺𑀲𑀺𑀝𑁆𑀞𑀢𑀁 𑀤𑀻𑀧𑁂𑀢𑀻’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸).

𑀢𑀸𑀤𑀺𑀲𑀲𑁆𑀲 𑀦𑀭𑀯𑀭𑀲𑁆𑀲 𑀢𑀸𑀤𑀺𑀲𑀁 𑀲𑀸𑀲𑀦𑀯𑀭𑀁 𑀓𑀺𑀁 𑀬𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀤𑀽𑀳𑀻’’𑀢𑀺. 𑀢𑁂𑀦 𑀢𑀺𑀧𑀺𑀝𑀓𑀥𑀭𑀸 𑀅𑀭𑀺𑀬𑀪𑀽𑀢𑀸 𑀧𑀡𑁆𑀟𑀺𑀢𑀸 𑀯𑀸𑀘𑀓𑀢𑁆𑀣𑀪𑀸𑀯𑁂𑀦 𑀕𑀳𑀺𑀢𑀸, 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀲𑀗𑁆𑀖𑀕𑀼𑀡𑀸 𑀧𑀦 𑀯𑀦𑁆𑀤𑀥𑀸𑀢𑀼𑀯𑀘𑀦𑁂𑀦 𑀯𑀸 𑀤𑀻𑀧𑀓𑀢𑁆𑀣𑀪𑀸𑀯𑁂𑀦 𑀯𑀸 𑀤𑀻𑀧𑀺𑀢𑀸𑀢𑀺. 𑀏𑀯𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀻𑀧𑀺𑀢𑁂 𑀭𑀢𑀦𑀢𑁆𑀢𑀬𑀕𑀼𑀡𑁂 𑀲𑀦𑁆𑀥𑀸𑀬 ‘‘𑀏𑀯𑀁 𑀧𑀞𑀫𑀕𑀸𑀣𑀸𑀬 𑀲𑀸𑀢𑀺𑀲𑀬𑀁 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀦𑀁 𑀓𑀢𑁆𑀯𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸) 𑀯𑀓𑁆𑀔𑀢𑀺, 𑀦 𑀕𑀸𑀣𑀸𑀬 𑀦𑀺𑀭𑀯𑀲𑁂𑀲𑀢𑁆𑀣𑁂. 𑀢𑀢𑁆𑀣 𑀏𑀯𑀦𑁆𑀢𑀺 𑀏𑀯𑀁 𑀲𑀸𑀲𑀦𑀯𑀭𑀤𑀲𑁆𑀲𑀦𑀪𑀽𑀢𑀸𑀬 𑀧𑀞𑀫𑀕𑀸𑀣𑀸𑀬𑀸𑀢𑀺 𑀅𑀢𑁆𑀣𑁄𑀯 𑀤𑀝𑁆𑀞𑀩𑁆𑀩𑁄. 𑀅𑀧𑀭𑁂 𑀧𑀦𑀸𑀘𑀭𑀺𑀬𑀸 ‘‘𑀇𑀫𑀸𑀬 𑀧𑀞𑀫𑀕𑀸𑀣𑀸𑀬 𑀏𑀓𑀦𑁆𑀢𑀢𑁄 𑀅𑀥𑀺𑀧𑁆𑀧𑁂𑀢𑀸𑀦𑀸𑀥𑀺𑀧𑁆𑀧𑁂𑀢𑀯𑀘𑀦𑀸𑀦𑀺 𑀘𑁂𑀯 𑀯𑀸𑀘𑀓𑀢𑁆𑀣𑀤𑀻𑀧𑀓𑀢𑁆𑀣𑀯𑀺𑀲𑁂𑀲𑀸𑀦𑀺 𑀘 𑀲𑀼𑀝𑁆𑀞𑀼 𑀅𑀯𑀺𑀘𑀸𑀭𑁂𑀢𑁆𑀯𑀸 ‘𑀏𑀯𑀁 𑀧𑀞𑀫𑀕𑀸𑀣𑀸𑀬 𑀲𑀸𑀢𑀺𑀲𑀬𑀁 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀦𑀁 𑀓𑀢𑁆𑀯𑀸’𑀢𑀺 𑀯𑀘𑀦𑀘𑁆𑀙𑀸𑀬𑀁 𑀦𑀺𑀲𑁆𑀲𑀸𑀬 𑀲𑀸𑀢𑀺𑀲𑀬𑀁 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀦𑀁 𑀓𑀸𑀢𑀼𑀁 ‘𑀬𑀁 𑀮𑁄𑀓𑁄𑀢𑁆𑀬𑀸𑀤𑀺𑀫𑀸𑀳𑀸’𑀢𑀺 𑀘 𑀲𑀸𑀢𑀺𑀲𑀬𑀭𑀢𑀦𑀢𑁆𑀢𑀬𑀕𑀼𑀡𑁂 𑀤𑀲𑁆𑀲𑁂𑀦𑁆𑀢𑁄 ‘𑀬𑀁 𑀮𑁄𑀓𑁄𑀢𑁆𑀬𑀸𑀤𑀺𑀫𑀸𑀳𑀸’𑀢𑀺’’ 𑀘 𑀯𑀤𑀦𑁆𑀢𑀺. 𑀢𑁂𑀲𑀁 𑀯𑀸𑀤𑁄 𑀅𑀫𑁆𑀳𑀸𑀓𑀁 𑀦𑀓𑁆𑀔𑀫𑀢𑀺. 𑀓𑀸𑀭𑀡𑀁 𑀧𑀦 𑀫𑀬𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀦𑁆𑀢𑀺 𑀅𑀬𑀁 𑀧𑀤𑀸𑀦𑀼𑀓𑁆𑀓𑀫𑀸𑀦𑀼𑀭𑀽𑀧𑀸𑀦𑀼𑀲𑀦𑁆𑀥𑁆𑀬𑀢𑁆𑀣𑁄.

𑀅𑀣 𑀯𑀸 𑀏𑀓𑀁 𑀲𑀫𑀬𑀁 𑀚𑀫𑁆𑀩𑀼𑀯𑀦𑀲𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀺𑀲𑁆𑀲𑀸𑀦𑀁 𑀳𑀺𑀢𑀁 𑀘𑀺𑀦𑁆𑀢𑁂𑀦𑁆𑀢𑁄, 𑀅𑀢𑁆𑀢𑀦𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀲𑀁𑀲𑀺𑀢𑁄, 𑀫𑀳𑀸𑀓𑀘𑁆𑀘𑀸𑀬𑀦𑁄 𑀲𑀢𑁆𑀣𑀸𑀭𑀸 𑀅𑀦𑀼𑀫𑁄𑀤𑀺𑀢𑀁 𑀲𑀸𑀲𑀦𑀸𑀬𑀢𑁆𑀢𑀁 𑀦𑀯𑀗𑁆𑀕𑀲𑁆𑀲𑀢𑁆𑀣𑀯𑀡𑁆𑀡𑀦𑀁 𑀲𑁄𑀴𑀲𑀳𑀸𑀭𑀸𑀤𑀺𑀅𑀦𑁂𑀓𑀢𑁆𑀣𑀯𑀺𑀥𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀆𑀭𑀪𑀦𑁆𑀢𑁄, ‘‘𑀬𑀁 𑀮𑁄𑀓𑁄’’𑀢𑁆𑀬𑀸𑀤𑀺𑀫𑀸𑀳. 𑀬𑀤𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀪𑀽𑀢𑀁 𑀲𑁄𑀴𑀲𑀳𑀸𑀭𑀸𑀢𑁆𑀬𑀸𑀤𑀺𑀓𑀁 𑀆𑀭𑀪𑀺𑀢𑀩𑁆𑀩𑀁, 𑀢𑀁 𑀅𑀦𑀸𑀭𑀪𑀺𑀢𑁆𑀯𑀸 𑀓𑀲𑁆𑀫𑀸 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀢𑁄 𑀩𑀳𑀺𑀪𑀽𑀢𑀁 ‘‘𑀬𑀁 𑀮𑁄𑀓𑁄’’𑀢𑁆𑀬𑀸𑀤𑀺𑀓𑀁 𑀆𑀭𑀪𑀺𑀢𑀩𑁆𑀩𑀁, 𑀲𑁂𑀬𑁆𑀬𑀣𑀸𑀧𑀺 𑀅𑀫𑁆𑀩𑀁 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀮𑀩𑀼𑀚𑀁 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀏𑀯𑀫𑁂𑀯 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀫𑀸𑀭𑀪𑀦𑁆𑀢𑁄 𑀅𑀜𑁆𑀜𑀁 𑀆𑀭𑀪𑀢𑀻𑀢𑀺? 𑀢𑀣𑀸𑀧𑀺 𑀬𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀸𑀲𑀦𑀯𑀭𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀬𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀓𑀸𑀢𑀼𑀓𑀸𑀫𑁄 𑀬𑀲𑁆𑀲 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀪𑀽𑀢𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀳𑀺𑀢𑀁, 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀏𑀯 𑀯𑀸 𑀢𑀁 𑀲𑀸𑀲𑀦𑀯𑀭𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑀢𑀁𑀚𑀦𑀓𑁂𑀦, 𑀢𑀁𑀯𑀺𑀚𑀸𑀦𑀓𑀯𑀺𑀤𑀽𑀳𑀺 𑀘 𑀦𑀺𑀬𑀫𑁂𑀢𑀼𑀁, 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀦𑀜𑁆𑀘 𑀓𑀸𑀢𑀼𑀁 ‘‘𑀬𑀁 𑀮𑁄𑀓𑁄’’𑀢𑁆𑀬𑀸𑀤𑀺𑀫𑀸𑀳. 𑀅𑀬𑀁 𑀮𑀻𑀦𑀦𑁆𑀢𑀭𑀘𑁄𑀤𑀦𑀸𑀲𑀳𑀺𑀢𑁄 𑀅𑀦𑀼𑀲𑀦𑁆𑀥𑁆𑀬𑀢𑁆𑀣𑁄.

‘‘𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂, 𑀲𑀮𑁄𑀓𑀧𑀸𑀮𑁄 𑀲𑀤𑀸 𑀦𑀫𑀲𑁆𑀲𑀢𑀺 𑀘;

𑀢𑀲𑁆𑀲𑁂𑀢 𑀲𑀸𑀲𑀦𑀯𑀭𑀁, 𑀯𑀺𑀤𑀽𑀳𑀺 𑀜𑁂𑀬𑁆𑀬𑀁 𑀦𑀭𑀯𑀭𑀲𑁆𑀲𑀸’’𑀢𑀺. 𑁋

𑀦𑀺𑀕𑁆𑀕𑀳𑀺𑀢𑀮𑁄𑀧𑀁 𑀓𑀢𑁆𑀯𑀸 𑀭𑀘𑀺𑀢𑀸 𑀕𑀸𑀣𑀸 𑀅𑀭𑀺𑀬𑀸𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦 𑀲𑀫𑁆𑀧𑀦𑁆𑀦𑀸. 𑀓𑀣𑀁? 𑀧𑀼𑀩𑁆𑀩𑀟𑁆𑀠𑁂 𑀢𑀺𑀁𑀲 𑀫𑀢𑁆𑀢𑀸, 𑀅𑀧𑀭𑀟𑁆𑀠𑁂 𑀲𑀢𑁆𑀢𑀯𑀻𑀲 𑀫𑀢𑁆𑀢𑀸. 𑀲𑀫𑁆𑀧𑀺𑀡𑁆𑀟𑀺𑀢𑀸 𑀲𑀢𑁆𑀢𑀧𑀜𑁆𑀜𑀸𑀲 𑀫𑀢𑁆𑀢𑀸𑀯 𑀪𑀯𑀦𑁆𑀢𑀺. 𑀅𑀓𑁆𑀔𑀭𑀸𑀦𑀁 𑀧𑀦 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁 𑀲𑀢𑁆𑀢𑀢𑀺𑀁𑀲. 𑀢𑁂𑀲𑀼 𑀕𑀭𑀼𑀓𑁆𑀔𑀭𑀸 𑀯𑀻𑀲𑀢𑀺, 𑀮𑀳𑀼𑀓𑁆𑀔𑀭𑀸 𑀲𑀢𑁆𑀢𑀭𑀲 𑀪𑀯𑀦𑁆𑀢𑀺. ‘‘𑀢𑀲𑁆𑀲𑁂𑀢𑀁 𑀲𑀸𑀲𑀦𑀯𑀭’’𑀦𑁆𑀢𑀺 𑀧𑀦 𑀲𑀸𑀦𑀼𑀦𑀸𑀲𑀺𑀓𑀁 𑀯𑀺𑀭𑀼𑀚𑁆𑀛𑀢𑀺.

𑀢𑀢𑁆𑀣 𑀦𑀺𑀤𑁆𑀤𑁂𑀲𑀢𑁆𑀣𑁄 𑀅𑀝𑁆𑀞𑀓𑀣𑀸𑀦𑀼𑀲𑀸𑀭𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑁄. 𑀲𑀮𑁄𑀓𑀧𑀸𑀮𑁄 𑀲𑀩𑁆𑀩𑁄 𑀲𑀢𑁆𑀢𑀮𑁄𑀓𑁄 𑀲𑀓𑁆𑀓𑀘𑁆𑀘𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀦𑁂𑀓𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀯𑀸 𑀧𑀽𑀚𑁂𑀢𑀩𑁆𑀩𑀧𑀽𑀚𑀦𑁂𑀦 𑀯𑀸 𑀧𑀝𑀺𑀧𑀢𑁆𑀢𑀺𑀧𑀽𑀚𑀦𑁂𑀦 𑀯𑀸 𑀲𑀤𑀸 𑀲𑀩𑁆𑀩𑀓𑀸𑀮𑁂𑀲𑀼 𑀲𑀓𑁆𑀓𑀘𑁆𑀘𑀁 𑀬𑀁 𑀦𑀭𑀯𑀭𑀁 𑀧𑀽𑀚𑀬𑀢𑁂 𑀘𑁂𑀯 𑀦𑀫𑀲𑁆𑀲𑀢𑀺 𑀘, 𑀢𑀲𑁆𑀲 𑀧𑀽𑀚𑁂𑀢𑀩𑁆𑀩𑀲𑁆𑀲 𑀘𑁂𑀯 𑀦𑀫𑀲𑁆𑀲𑀺𑀢𑀩𑁆𑀩𑀲𑁆𑀲 𑀘 𑀲𑀢𑁆𑀣𑀼𑀦𑁄 𑀦𑀭𑀯𑀭𑀲𑁆𑀲 𑀢𑀺𑀮𑁄𑀓𑀕𑁆𑀕𑀲𑁆𑀲 𑀫𑀬𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀳𑀺𑀢𑀁, 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀏𑀯 𑀯𑀸 𑀯𑀺𑀤𑀽𑀳𑁂𑀯 𑀜𑁂𑀬𑁆𑀬𑀁 𑀜𑀸𑀢𑀩𑁆𑀩𑀁. 𑀦𑀺𑀧𑀼𑀡𑀜𑀸𑀡𑀕𑁄𑀘𑀭𑀁 𑀏𑀢𑀁 𑀫𑀬𑀸 𑀩𑀼𑀤𑁆𑀥𑀺𑀬𑀁 𑀞𑀧𑀺𑀢𑀁 𑀲𑀸𑀲𑀦𑀯𑀭𑀁 𑀫𑀬𑀸 𑀆𑀭𑀪𑀺𑀢𑀩𑁆𑀩𑀲𑁆𑀲 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀦𑁆𑀢𑀺 𑀧𑀞𑀫𑀁 𑀚𑀸𑀦𑀺𑀢𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀽𑀢𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀅𑀳𑀁 𑀆𑀭𑀪𑀺𑀲𑁆𑀲𑀸𑀫𑀺, 𑀢𑀁 𑀢𑀼𑀫𑁆𑀳𑁂 𑀲𑀸𑀥𑀯𑁄 𑀲𑀼𑀡𑀸𑀣 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀲𑀫𑀼𑀤𑀸𑀬𑀬𑁄𑀚𑀦𑀸, 𑀅𑀯𑀬𑀯𑀬𑁄𑀚𑀦𑀸𑀧𑀺 𑀓𑀸𑀢𑀩𑁆𑀩𑀸.

𑀓𑀣𑀁? ‘‘𑀲𑀮𑁄𑀓𑀧𑀸𑀮𑁄 𑀮𑁄𑀓𑁄’’𑀢𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀬𑁄𑀚𑀦𑀸. 𑀮𑁄𑀓𑀧𑀸𑀮𑁄 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑁄 𑀮𑁄𑀓𑁄 𑀘 𑀦 𑀳𑁄𑀢𑀺, 𑀅𑀣 𑀔𑁄 𑀮𑁄𑀓𑀧𑀸𑀮𑀲𑀳𑀺𑀢𑁄 𑀮𑁄𑀓𑁄𑀢𑀺 𑀯𑀺𑀲𑁂𑀲𑁂𑀢𑀺. ‘‘𑀮𑁄𑀓𑁄 𑀧𑀽𑀚𑀬𑀢𑁂 𑀘𑁂𑀯 𑀦𑀫𑀲𑁆𑀲𑀢𑀺 𑀘𑀸’’𑀢𑀺 𑀓𑀢𑁆𑀢𑀼𑀓𑀸𑀭𑀓𑀆𑀔𑁆𑀬𑀸𑀢𑀓𑀺𑀭𑀺𑀬𑀸𑀪𑀸𑀯𑁂𑀦 𑀬𑁄𑀚𑀦𑀸 ‘‘𑀬𑁄 𑀓𑀭𑁄𑀢𑀺, 𑀲 𑀓𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑁄 𑀮𑁄𑀓𑁄 𑀓𑀸𑀭𑀓𑁄, 𑀲𑁄 𑀓𑀢𑁆𑀢𑀸 𑀳𑁄𑀢𑀼. 𑀬𑁄 𑀮𑁄𑀓𑁄 𑀧𑀽𑀚𑀬𑀢𑁂 𑀘𑁂𑀯 𑀦𑀫𑀲𑁆𑀲𑀢𑀺 𑀘, 𑀓𑀣𑀁 𑀲𑁄 𑀓𑀢𑁆𑀢𑀸𑀢𑀺? ‘‘𑀬𑁄 𑀓𑀭𑁄𑀢𑀺, 𑀲 𑀓𑀢𑁆𑀢𑀸’’𑀢𑀺 𑀲𑀼𑀢𑁆𑀢𑀲𑁆𑀲 ‘‘𑀬𑁄 𑀓𑀭𑁄𑀢𑀺 𑀓𑀺𑀭𑀺𑀬𑀁 𑀦𑀺𑀧𑁆𑀨𑀸𑀤𑁂𑀢𑀺, 𑀲𑁄 𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄 𑀓𑀢𑁆𑀢𑀸’’𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀲𑀬𑀦𑀪𑀼𑀜𑁆𑀚𑀦𑀸𑀤𑀺𑀲𑀩𑁆𑀩𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄 𑀓𑀢𑁆𑀢𑀸𑀬𑁂𑀯 𑀳𑁄𑀢𑀺. 𑀅𑀬𑀜𑁆𑀘 𑀮𑁄𑀓𑁄 𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄𑀬𑁂𑀯𑀸𑀢𑀺. 𑀓𑀣𑀁 𑀅𑀬𑀁 𑀮𑁄𑀓𑁄 𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄𑀢𑀺? ‘‘𑀮𑁄𑀓𑁄’’𑀢𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑀸𑀦𑁄 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀕𑀳𑁂𑀢𑀩𑁆𑀩𑁄, 𑀲𑁄 𑀬𑀣𑀸𑀭𑀳𑀁 𑀳𑁂𑀢𑀸𑀥𑀺𑀧𑀢𑀺𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦𑀺𑀧𑁆𑀨𑀸𑀤𑀓𑁄 𑀪𑀯𑁂. 𑀏𑀯𑀁 𑀮𑁄𑀓𑀲𑁆𑀲 𑀓𑀢𑁆𑀢𑀼𑀓𑀸𑀭𑀓𑀪𑀸𑀯𑁄 𑀯𑀺𑀚𑀸𑀦𑀺𑀢𑀩𑁆𑀩𑁄𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀬𑁄𑀚𑀦𑀸. 𑀏𑀲 𑀦𑀬𑁄 𑀢𑀻𑀲𑀼 𑀧𑀺𑀝𑀓𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼.

‘‘𑀬𑀁 𑀦𑀭𑀯𑀭𑀁 𑀧𑀽𑀚𑀬𑀢𑁂 𑀘𑁂𑀯 𑀦𑀫𑀲𑁆𑀲𑀢𑀺 𑀘𑀸’’𑀢𑀺 𑀓𑀫𑁆𑀫𑀓𑀸𑀭𑀓𑀆𑀔𑁆𑀬𑀸𑀢𑀓𑀺𑀭𑀺𑀬𑀸𑀪𑀸𑀯𑁂𑀦 𑀬𑁄𑀚𑀦𑀸 ‘‘𑀬𑀁 𑀓𑀭𑁄𑀢𑀺, 𑀢𑀁 𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀓𑀫𑁆𑀫𑀁 𑀳𑁄𑀢𑀼. 𑀬𑀁 𑀧𑀽𑀚𑀬𑀢𑀺 𑀘𑁂𑀯 𑀦𑀫𑀲𑁆𑀲𑀢𑀺 𑀘, 𑀓𑀣𑀁 𑀢𑀁 𑀓𑀫𑁆𑀫𑀦𑁆𑀢𑀺? ‘‘𑀬𑀁 𑀓𑀭𑁄𑀢𑀺, 𑀢𑀁 𑀓𑀫𑁆𑀫’’𑀦𑁆𑀢𑀺 𑀲𑀼𑀢𑁆𑀢𑀲𑁆𑀲 ‘‘𑀬𑀁 𑀓𑀭𑁄𑀢𑀺 𑀓𑀺𑀭𑀺𑀬𑀸𑀬 𑀲𑀫𑁆𑀩𑀚𑁆𑀛𑀢𑀺, 𑀓𑀺𑀭𑀺𑀬𑀸𑀬 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀓𑀭𑀡𑀯𑀸𑀘𑀓𑀯𑀘𑀦𑀻𑀬𑀸𑀤𑀺𑀲𑀩𑁆𑀩𑀓𑀺𑀭𑀺𑀬𑀸𑀬 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁 𑀓𑀫𑁆𑀫𑀁 𑀳𑁄𑀢𑁆𑀯𑁂𑀯. 𑀅𑀬𑀜𑁆𑀘 𑀦𑀭𑀯𑀭𑁄 𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀯𑀸𑀘𑀓𑀯𑀘𑀦𑀻𑀬𑀪𑀸𑀯𑁂𑀦 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑁄𑀬𑁂𑀯𑀸𑀢𑀺. 𑀓𑀣𑀁 𑀅𑀬𑀁 𑀦𑀭𑀯𑀭𑁄 𑀯𑀘𑀦𑀻𑀬𑁄𑀢𑀺? 𑀧𑀽𑀚𑀦𑀦𑀫𑀲𑁆𑀲𑀦𑀘𑁂𑀢𑀦𑀸𑀬 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀭𑀯𑀭𑁄 𑀯𑀘𑀦𑀻𑀬𑁄, 𑀘𑁂𑀢𑀦𑀸 𑀯𑀸𑀘𑀓𑀸, 𑀏𑀯𑀁 𑀯𑀸𑀘𑀓𑀯𑀘𑀺𑀢𑀩𑁆𑀩𑀪𑀸𑀯𑁄 𑀳𑁄𑀢𑁆𑀯𑁂𑀯. ‘‘𑀬𑀁 𑀦𑀭𑀯𑀭’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀬𑀸 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑁄 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀳𑀺𑀢𑁄 𑀔𑀦𑁆𑀥𑀧𑀜𑁆𑀘𑀓𑁄 𑀯𑀼𑀢𑁆𑀢𑁄, 𑀲𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑁂𑀢𑀦𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀬𑁄𑀚𑀦𑀸. 𑀏𑀲 𑀦𑀬𑁄 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼.

‘‘𑀢𑀲𑁆𑀲 𑀦𑀭𑀯𑀭𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀬𑁄𑀚𑀦𑀸. 𑀦𑀭𑀯𑀭𑁄 𑀦𑀸𑀫 𑀦𑀺𑀫𑀦𑁆𑀢𑀺𑀢𑀩𑁆𑀩𑀸𑀤𑀺𑀓𑁄 𑀦 𑀳𑁄𑀢𑀺, 𑀅𑀣 𑀔𑁄 𑀧𑀽𑀚𑁂𑀢𑀩𑁆𑀩𑁄 𑀦𑀫𑀲𑁆𑀲𑀺𑀢𑀩𑁆𑀩𑁄 𑀏𑀯𑀸𑀢𑀺 𑀯𑀺𑀲𑁂𑀲𑁂𑀢𑀺. 𑀢𑀲𑁆𑀲 𑀧𑀽𑀚𑁂𑀢𑀩𑁆𑀩𑀲𑁆𑀲 𑀘𑁂𑀯 𑀦𑀫𑀲𑁆𑀲𑀺𑀢𑀩𑁆𑀩𑀲𑁆𑀲 𑀘 𑀦𑀭𑀯𑀭𑀲𑁆𑀲 𑀲𑀸𑀲𑀦𑀯𑀭𑀦𑁆𑀢𑀺 𑀚𑀜𑁆𑀜𑀚𑀦𑀓𑀪𑀸𑀯𑁂𑀦 𑀬𑁄𑀚𑀦𑀸. 𑀲𑀸𑀲𑀦𑀯𑀭𑀁 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀩𑀼𑀤𑁆𑀥𑀭𑀸𑀚𑀭𑀸𑀚𑀸𑀤𑀻𑀦𑀁 𑀲𑀸𑀲𑀦𑀯𑀭𑀁 𑀦 𑀳𑁄𑀢𑀺, 𑀧𑀽𑀚𑁂𑀢𑀩𑁆𑀩𑀲𑁆𑀲 𑀘𑁂𑀯 𑀦𑀫𑀲𑁆𑀲𑀺𑀢𑀩𑁆𑀩𑀲𑁆𑀲 𑀘 𑀦𑀭𑀯𑀭𑀲𑁆𑀲 𑀢𑀺𑀮𑁄𑀓𑀲𑁆𑀲𑁂𑀯 𑀲𑀸𑀲𑀦𑀯𑀭𑀦𑁆𑀢𑀺 𑀦𑀺𑀬𑀫𑁂𑀢𑀺.

‘‘𑀯𑀺𑀤𑀽𑀳𑀺 𑀜𑁂𑀬𑁆𑀬’’𑀦𑁆𑀢𑀺 𑀓𑀢𑁆𑀢𑀼𑀓𑀸𑀭𑀓𑀓𑀺𑀢𑀓𑀺𑀭𑀺𑀬𑀸𑀪𑀸𑀯𑁂𑀦 𑀬𑁄𑀚𑀦𑀸. 𑀓𑀢𑁆𑀢𑀼𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. ‘‘𑀯𑀺𑀤𑀽𑀳𑀻’’𑀢𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑀸𑀦𑁄 𑀲𑀸𑀲𑀦𑀯𑀭𑁂 𑀲𑀫𑁆𑀫𑁄𑀳𑀥𑀁𑀲𑀓𑀜𑀸𑀡𑀲𑀳𑀺𑀢𑁄 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄, 𑀲𑁄 𑀬𑀣𑀸𑀭𑀳𑀁 𑀳𑁂𑀢𑀸𑀥𑀺𑀧𑀢𑀺𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦𑀺𑀧𑁆𑀨𑀸𑀤𑀓𑁄 𑀪𑀯𑁂. 𑀜𑀸-𑀇𑀢𑀺𑀥𑀸𑀢𑀼𑀬𑀸 𑀅𑀢𑁆𑀣𑀪𑀽𑀢𑀁 𑀜𑀸𑀡𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦𑀺𑀧𑁆𑀨𑀸𑀤𑁂𑀬𑁆𑀬𑀁 𑀪𑀯𑁂, 𑀏𑀯𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀬𑁄𑀚𑀦𑀸.

‘‘𑀜𑁂𑀬𑁆𑀬𑀁 𑀲𑀸𑀲𑀦𑀯𑀭’’𑀦𑁆𑀢𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀪𑀸𑀯𑁂𑀦 𑀬𑁄𑀚𑀦𑀸. 𑀲𑀸𑀲𑀦𑀯𑀭𑀁 𑀦𑀸𑀫 𑀦 𑀬𑁂𑀦 𑀓𑁂𑀦𑀘𑀺 𑀜𑁂𑀬𑁆𑀬𑀁, 𑀅𑀣 𑀔𑁄 𑀯𑀺𑀤𑀽𑀳𑁂𑀯 𑀲𑀡𑁆𑀳𑀲𑀼𑀔𑀼𑀫𑀜𑀸𑀡𑁂𑀦 𑀜𑁂𑀬𑁆𑀬𑀁 𑀲𑀸𑀲𑀦𑀯𑀭𑀦𑁆𑀢𑀺 𑀯𑀺𑀲𑁂𑀲𑁂𑀢𑀺.

‘‘𑀏𑀢𑀁 𑀲𑀸𑀲𑀦𑀯𑀭’’𑀦𑁆𑀢𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀪𑀸𑀯𑁂𑀦 𑀬𑁄𑀚𑀦𑀸. 𑀲𑀸𑀲𑀦𑀯𑀭𑀁 𑀦𑀸𑀫 𑀫𑀬𑀸 𑀩𑀼𑀤𑁆𑀥𑀺𑀬𑀁 𑀅𑀝𑁆𑀞𑀧𑀺𑀢𑀁 𑀅𑀧𑁆𑀧𑀯𑀢𑁆𑀢𑁂𑀢𑀩𑁆𑀩𑀁 𑀳𑁄𑀢𑀺, 𑀫𑀬𑀸 𑀇𑀤𑀸𑀦𑀺 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀩𑀼𑀤𑁆𑀥𑀺𑀬𑀁 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀁 𑀞𑀧𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀁 𑀲𑀸𑀲𑀦𑀯𑀭𑀦𑁆𑀢𑀺 𑀯𑀺𑀲𑁂𑀲𑁂𑀢𑀺. 𑀏𑀢𑀁 𑀲𑀸𑀲𑀦𑀯𑀭𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀏𑀢𑀁 𑀇𑀤𑀸𑀦𑀺 𑀅𑀫𑁆𑀳𑁂𑀳𑀺 𑀯𑀺𑀪𑀚𑀺𑀢𑀩𑁆𑀩𑀳𑀸𑀭𑀦𑀬𑀧𑀝𑁆𑀞𑀸𑀦𑀯𑀺𑀘𑀸𑀭𑀡𑀯𑀺𑀲𑀬𑀪𑀽𑀢𑀁 𑀲𑀸𑀲𑀦’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸). 𑀇𑀘𑁆𑀘𑁂𑀯𑀁 𑀦𑁂𑀢𑁆𑀢𑀺𑀬𑀸 𑀧𑀞𑀫𑀕𑀸𑀣𑀸𑀬 𑀲𑀗𑁆𑀔𑁂𑀧𑁂𑀦 𑀬𑁄𑀚𑀦𑀢𑁆𑀣𑁄 𑀲𑀫𑀢𑁆𑀢𑁄.

𑀢𑀢𑁆𑀣 𑀬𑀦𑁆𑀢𑀺 𑀅𑀦𑀺𑀬𑀫𑀦𑀭𑀯𑀭𑀲𑁆𑀲 𑀲𑀢𑁆𑀣𑀼𑀦𑁄 𑀯𑀸𑀘𑀓𑀁 𑀧𑀬𑁄𑀕𑀯𑀦𑁆𑀢𑀲𑀩𑁆𑀩𑀦𑀸𑀫𑀁. 𑀅𑀦𑀺𑀬𑀫𑁄 𑀘 𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀅𑀦𑀺𑀬𑀫𑀺𑀢𑀢𑁆𑀢𑀸 𑀯𑀼𑀢𑁆𑀢𑁄, 𑀦 𑀦𑀭𑀯𑀭𑀢𑁄 𑀅𑀜𑁆𑀜𑀲𑀢𑁆𑀢𑀲𑁆𑀲 𑀲𑀫𑁆𑀪𑀯𑀢𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑀸𑀦𑀺𑀬𑀢𑁂𑀲𑀼𑀧𑀺 𑀢𑀻𑀲𑀼 𑀧𑀺𑀝𑀓𑁂𑀲𑀼. 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺, 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄.𑀏𑀢𑁆𑀣 𑀲𑀢𑁆𑀢𑀦𑀺𑀓𑀸𑀬𑁂 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀮𑁄𑀓𑀺𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀩𑁆𑀩𑀺𑀧𑀸𑀓𑁄 𑀘 𑀮𑁄𑀓𑀺𑀬𑀢𑀺 𑀧𑀯𑀢𑁆𑀢𑀢𑀺, 𑀇𑀢𑀺 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀁, 𑀢𑀩𑁆𑀩𑀺𑀧𑀸𑀓𑀲𑁆𑀲 𑀘 𑀧𑀯𑀢𑁆𑀢𑀦𑀲𑁆𑀲 𑀆𑀥𑀸𑀭𑀪𑀸𑀯𑀢𑁄 ‘‘𑀏𑀢𑁆𑀣𑀸’’𑀢𑀺𑀧𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀲𑀢𑁆𑀢𑀦𑀺𑀓𑀸𑀬𑁄 𑀮𑁄𑀓𑁄𑀦𑀸𑀫. 𑀧𑀽𑀚𑀬𑀢𑁂𑀢𑀺 𑀯𑀺𑀕𑁆𑀕𑀳𑀯𑀺𑀭𑀳𑀺𑀢𑀁 𑀆𑀔𑁆𑀬𑀸𑀢𑀧𑀤𑀁, 𑀲𑀓𑁆𑀓𑀘𑁆𑀘𑀁 𑀧𑀽𑀚𑀦𑀁 𑀓𑀭𑁄𑀢𑀺.

𑀮𑁄𑀓𑀁 𑀧𑀸𑀮𑁂𑀦𑁆𑀢𑀻𑀢𑀺 𑀮𑁄𑀓𑀧𑀸𑀮𑀸, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀜𑁆𑀘𑁂𑀯 𑀢𑀩𑁆𑀩𑀺𑀧𑀸𑀓𑀲𑁆𑀲 𑀘 𑀧𑀯𑀢𑁆𑀢𑀦𑀸𑀥𑀸𑀭𑀢𑁆𑀢𑀸 𑀮𑁄𑀓𑀸 𑀘. 𑀓𑁂 𑀢𑁂? 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄, 𑀇𑀦𑁆𑀤𑀬𑀫𑀯𑀭𑀼𑀡𑀓𑀼𑀯𑁂𑀭𑀸 𑀯𑀸, 𑀔𑀢𑁆𑀢𑀺𑀬𑀘𑀢𑀼𑀫𑀳𑀸𑀭𑀸𑀚𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀲𑀼𑀦𑀺𑀫𑁆𑀫𑀺𑀢𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀫𑀳𑀸𑀩𑁆𑀭𑀳𑁆𑀫𑀸𑀤𑀬𑁄 𑀯𑀸. 𑀧𑀸𑀮𑀦𑀜𑁆𑀘𑁂𑀢𑁆𑀣 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑁂𑀦 𑀢𑀁𑀢𑀁𑀲𑀢𑁆𑀢𑀮𑁄𑀓𑀲𑁆𑀲 𑀅𑀜𑁆𑀜𑀫𑀜𑁆𑀜𑀯𑀺𑀳𑁂𑀲𑀦𑀦𑀺𑀯𑀸𑀭𑀡𑀸𑀤𑀺𑀆𑀡𑀸𑀧𑀯𑀢𑁆𑀢𑀸𑀧𑀦𑀬𑀲𑀧𑀭𑀺𑀯𑀸𑀭𑀝𑁆𑀞𑀸𑀦𑀦𑁆𑀢𑀭𑀸𑀤𑀺𑀦𑀺𑀬𑁆𑀬𑀸𑀤𑀦𑀸, 𑀲𑀳 𑀮𑁄𑀓𑀧𑀸𑀮𑁂𑀳𑀺 𑀬𑁄 𑀯𑀢𑁆𑀢𑀢𑀻𑀢𑀺 𑀲𑀮𑁄𑀓𑀧𑀸𑀮𑁄. 𑀅𑀣 𑀯𑀸 𑀬𑁂 𑀳𑀺𑀭𑁄𑀢𑁆𑀢𑀧𑁆𑀧𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺, 𑀇𑀢𑀺 𑀧𑀸𑀮𑀦𑀢𑁄 𑀢𑁂 𑀳𑀺𑀭𑁄𑀢𑁆𑀢𑀧𑁆𑀧𑀸 𑀮𑁄𑀓𑀧𑀸𑀮𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁨.𑁯; 𑀇𑀢𑀺𑀯𑀼. 𑁪𑁨). 𑀮𑁄𑀓𑀧𑀸𑀮𑁂𑀳𑀺 𑀳𑀺𑀭𑁄𑀢𑁆𑀢𑀧𑁆𑀧𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀮𑁄𑀓𑁄 𑀲𑀮𑁄𑀓𑀧𑀸𑀮𑁄 𑀦𑀸𑀫. 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀳𑀺 𑀲𑀧𑁆𑀧𑀼𑀭𑀺𑀲𑁄 𑀮𑁄𑀓𑁄 𑀲𑀓𑁆𑀓𑀘𑁆𑀘𑀁 𑀲𑀤𑀸 𑀲𑀩𑁆𑀩𑀓𑀸𑀮𑁂𑀲𑀼 𑀧𑀽𑀚𑀬𑀢𑀺 𑀘𑁂𑀯 𑀦𑀫𑀲𑁆𑀲𑀢𑀺 𑀘 𑀧𑀸𑀧𑀳𑀺𑀭𑀺𑀚𑀺𑀕𑀼𑀘𑁆𑀙𑀦𑀢𑁄, 𑀥𑀫𑁆𑀫𑀘𑁆𑀙𑀦𑁆𑀤𑀯𑀦𑁆𑀢𑀢𑀸𑀬 𑀘.

𑀅𑀜𑁆𑀜𑁂 𑀧𑀦 𑀧𑀽𑀚𑁂𑀦𑁆𑀢𑀸 𑀦𑀫𑀲𑁆𑀲𑀦𑁆𑀢𑀸𑀧𑀺 𑀓𑀤𑀸𑀘𑀺𑀬𑁂𑀯 𑀧𑀽𑀚𑁂𑀦𑁆𑀢𑀺 𑀦𑀫𑀲𑁆𑀲𑀦𑁆𑀢𑀺, 𑀦 𑀲𑀩𑁆𑀩𑀤𑀸𑀢𑀺. 𑀲𑀤𑀸𑀢𑀺 𑀧𑀽𑀚𑀦𑀦𑀫𑀲𑁆𑀲𑀦𑀓𑀸𑀮𑀯𑀸𑀘𑀓𑀯𑀺𑀕𑁆𑀕𑀳𑀯𑀺𑀭𑀳𑀺𑀢𑀁 𑀯𑀺𑀓𑀧𑁆𑀧𑀦𑀸𑀫𑀁, 𑀲𑀩𑁆𑀩𑀦𑀸𑀫𑀁 𑀯𑀸. 𑀦𑀫𑀲𑁆𑀲𑀢𑀻𑀢𑀺 𑀯𑀺𑀕𑁆𑀕𑀳𑀯𑀺𑀭𑀳𑀺𑀢𑀁 𑀆𑀔𑁆𑀬𑀸𑀢𑀧𑀤𑀁, 𑀲𑀓𑁆𑀓𑀘𑁆𑀘𑀁 𑀦𑀫𑀲𑁆𑀲𑀦𑀁 𑀓𑀭𑁄𑀢𑀺. 𑀢𑀲𑁆𑀲𑁂𑀢𑀸𑀢𑀺 𑀏𑀢𑁆𑀣 𑀢𑀲𑁆𑀲𑀸𑀢𑀺 𑀦𑀺𑀬𑀫𑀯𑀸𑀘𑀓𑀁 𑀧𑀬𑁄𑀕𑀯𑀦𑁆𑀢𑀲𑀩𑁆𑀩𑀦𑀸𑀫𑀁 𑀯𑀺𑀕𑁆𑀕𑀳𑀯𑀺𑀭𑀳𑀺𑀢𑀫𑁂𑀯. 𑀦𑀺𑀬𑀫𑁄 𑀘 𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀯𑀺𑀲𑁂𑀲𑀺𑀢𑁄. 𑀢𑀲𑁆𑀫𑀸 𑀢𑀲𑁆𑀲 𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀦𑀺𑀬𑀫𑀺𑀢𑀩𑁆𑀩𑀲𑁆𑀲 𑀧𑀽𑀚𑁂𑀢𑀩𑁆𑀩𑀲𑁆𑀲 𑀦𑀫𑀲𑁆𑀲𑀺𑀢𑀩𑁆𑀩𑀲𑁆𑀲 𑀦𑀭𑀯𑀭𑀲𑁆𑀲𑀸𑀢𑀺 𑀅𑀢𑁆𑀣𑁄 𑀬𑀼𑀢𑁆𑀢𑁄𑀯. 𑀲𑁂𑀲𑀦𑀺𑀬𑀫𑁂𑀲𑀼 𑀅𑀜𑁆𑀜𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑀦𑁆𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀚𑀺𑀢𑀩𑁆𑀩𑀳𑀸𑀭𑀦𑀬𑀧𑀝𑁆𑀞𑀸𑀦𑀯𑀺𑀘𑀸𑀭𑀡𑀯𑀺𑀲𑀬𑀪𑀽𑀢𑀲𑁆𑀲 𑀲𑀸𑀲𑀦𑀯𑀭𑀧𑀭𑀸𑀫𑀲𑀦𑀁 𑀧𑀬𑁄𑀕𑀯𑀦𑁆𑀢𑀲𑀩𑁆𑀩𑀦𑀸𑀫𑀁 𑀯𑀺𑀕𑁆𑀕𑀳𑀯𑀺𑀭𑀳𑀺𑀢𑀁.

𑀲𑀸𑀲𑀢𑀺 𑀏𑀢𑁂𑀦𑀸𑀢𑀺 𑀲𑀸𑀲𑀦𑀁, 𑀏𑀢𑁂𑀦 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑁂𑀦, 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀲𑀳𑀺𑀢𑁂𑀦 𑀯𑀸 𑀯𑀭𑁂𑀦 𑀲𑀩𑁆𑀩𑁂𑀦 𑀲𑀫𑀢𑁆𑀣𑁂 𑀯𑁂𑀦𑁂𑀬𑁆𑀬𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀢𑀺𑀯𑀺𑀥𑀬𑀸𑀦𑀫𑀼𑀔𑁂𑀦 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀲𑀸𑀲𑀢𑀺 𑀅𑀦𑀼𑀲𑀸𑀲𑀢𑀺 𑀯𑀺𑀦𑁂𑀢𑀺. 𑀇𑀢𑀺 𑀲𑀸𑀲𑀦𑀸𑀦𑀼𑀲𑀸𑀲𑀦𑀓𑀺𑀭𑀺𑀬𑀸𑀦𑀼𑀲𑀸𑀭𑁂𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀚𑀸𑀦𑀦𑀧𑀝𑀺𑀧𑀚𑁆𑀚𑀦𑀸𑀥𑀺𑀕𑀫𑀲𑁆𑀲 𑀓𑀸𑀭𑀡𑀓𑀭𑀡𑀢𑁆𑀢𑀸 ‘‘𑀏𑀢𑁂𑀦𑀸’’𑀢𑀺 𑀧𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀁 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀁, 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀲𑀳𑀺𑀢𑀁 𑀯𑀸 𑀯𑀭𑀁 𑀲𑀩𑁆𑀩𑀁 𑀲𑀸𑀲𑀦𑀁 𑀦𑀸𑀫. 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀚𑀸𑀦𑀦𑀁 𑀧𑀼𑀭𑀺𑀫𑀚𑀸𑀦𑀦𑁂𑀦 𑀧𑀘𑁆𑀙𑀺𑀫𑀚𑀸𑀦𑀦𑀁, 𑀚𑀸𑀦𑀦𑁂𑀦 𑀧𑀝𑀺𑀧𑀚𑁆𑀚𑀦𑁂𑀦 𑀧𑀘𑁆𑀙𑀺𑀫𑀧𑀝𑀺𑀧𑀚𑁆𑀚𑀦𑁂𑀦 𑀅𑀥𑀺𑀕𑀫𑁄, 𑀧𑀼𑀭𑀺𑀫𑀸𑀥𑀺𑀕𑀫𑁂𑀦 𑀧𑀘𑁆𑀙𑀺𑀫𑀸𑀥𑀺𑀕𑀫𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀤𑁆𑀥𑀸 𑀲𑀻𑀮𑀁 𑀲𑀼𑀢𑀁 𑀘𑀸𑀕𑁄 𑀧𑀜𑁆𑀜𑀸 𑀲𑀤𑁆𑀥𑀸𑀬 𑀲𑀻𑀮𑀲𑁆𑀲 𑀲𑀼𑀢𑀲𑁆𑀲 𑀘𑀸𑀕𑀲𑁆𑀲 𑀧𑀜𑁆𑀜𑀸𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀘 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲’’𑀢𑁆𑀬𑀸𑀤𑀺 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀘. 𑀲𑀸𑀲𑀥𑀸𑀢𑀼𑀬𑀸 𑀤𑁂𑀲𑀦𑀸𑀲𑀤𑁆𑀤𑁄 𑀘 𑀢𑀁𑀚𑀦𑀓𑁄 𑀤𑁂𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘 𑀫𑀼𑀔𑁆𑀬𑀢𑁆𑀣𑁄, 𑀢𑀁𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀯𑁂𑀦𑁂𑀬𑁆𑀬𑀸𑀦𑀁 𑀅𑀢𑁆𑀣𑀚𑀸𑀦𑀦𑀧𑀝𑀺𑀧𑀚𑁆𑀚𑀦𑀅𑀥𑀺𑀕𑀫𑀦𑀸𑀤𑀺 𑀓𑀸𑀭𑀡𑀽𑀧𑀘𑀸𑀭𑀢𑁆𑀣𑁄, ‘‘𑀏𑀢𑁂𑀦𑀸’’𑀢𑀺 𑀧𑀤𑁂𑀦 𑀯𑀼𑀢𑁆𑀢𑀸𑀬 𑀲𑀸𑀲𑀦𑀪𑀽𑀢𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀓𑀭𑀡𑀲𑀢𑁆𑀢𑀺𑀲𑀗𑁆𑀔𑀸𑀢𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑀢𑁆𑀢𑀺 𑀨𑀮𑀽𑀧𑀘𑀸𑀭𑀢𑁆𑀣𑁄. 𑀇𑀢𑀺-𑀲𑀤𑁆𑀤𑁄𑀧𑀺 𑀢𑀫𑁂𑀯 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑀢𑁆𑀢𑀺𑀁 𑀳𑁂𑀢𑀼𑀪𑀸𑀯𑁂𑀦 𑀧𑀭𑀸𑀫𑀲𑀢𑀺, 𑀢𑀲𑁆𑀲𑀸 𑀲𑀢𑁆𑀢𑀺𑀬𑀸 𑀆𑀥𑀸𑀭𑀪𑀽𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺 𑀬𑀼-𑀧𑀘𑁆𑀘𑀬𑀢𑁆𑀣𑁄. 𑀏𑀲𑁂𑀯 𑀦𑀬𑁄 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼.

𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀝𑁆𑀞𑁂𑀦, 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑀢𑀸𑀬 𑀘 𑀉𑀢𑁆𑀢𑀫𑀝𑁆𑀞𑁂𑀦 𑀯𑀭𑀁 𑀉𑀢𑁆𑀢𑀫𑀁, 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀫𑁆𑀳𑀺 𑀨𑀮𑀦𑀺𑀬𑁆𑀬𑀸𑀤𑀦𑀢𑁄, 𑀫𑀕𑁆𑀕𑀦𑀺𑀬𑁆𑀬𑀸𑀦𑀳𑁂𑀢𑀼𑀪𑀸𑀯𑀢𑁄 𑀘 𑀦𑀺𑀬𑁆𑀬𑀸𑀦𑀝𑁆𑀞𑁂𑀦, 𑀲𑀸𑀯𑀓𑀸𑀤𑀻𑀳𑀺 𑀅𑀚𑀦𑀺𑀬𑀢𑁆𑀢𑀸 𑀅𑀲𑀸𑀥𑀸𑀭𑀡𑀝𑁆𑀞𑁂𑀦 𑀘 𑀉𑀢𑁆𑀢𑀫𑀝𑁆𑀞𑁂𑀦 𑀯𑀭𑀁, 𑀯𑀭𑀺𑀢𑀩𑁆𑀩𑀦𑁆𑀢𑀺 𑀯𑀸 𑀯𑀭𑀁. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀸𑀲𑀦𑀲𑁆𑀲 𑀧𑀡𑁆𑀟𑀺𑀢𑁂𑀳𑀺 𑀅𑀪𑀺𑀧𑀢𑁆𑀣𑀺𑀢𑀲𑀫𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀯𑀭𑀺𑀢𑀩𑁆𑀩𑀢𑁆𑀢𑀸 𑀧𑀢𑁆𑀣𑁂𑀢𑀩𑁆𑀩𑀢𑁆𑀢𑀸 𑀲𑀸𑀲𑀦𑀯𑀭𑀁 𑀦𑀸𑀫, 𑀬𑀣𑀸𑀯𑀼𑀢𑁆𑀢𑀝𑁆𑀞𑁂𑀦 𑀯𑀸 𑀲𑀸𑀲𑀦𑀜𑁆𑀘 𑀢𑀁 𑀯𑀭𑀜𑁆𑀘𑀸𑀢𑀺 𑀲𑀸𑀲𑀦𑀯𑀭𑀁. 𑀘-𑀲𑀤𑁆𑀤𑁂𑀦 𑀲𑀢𑁆𑀢𑀺𑀪𑁂𑀤𑀁, 𑀢𑀁-𑀲𑀤𑁆𑀤𑁂𑀦 𑀅𑀢𑁆𑀣𑀸𑀪𑁂𑀤𑀁 𑀤𑁂𑀲𑁆𑀲𑁂𑀢𑀺.

𑀯𑀺𑀤𑀦𑁆𑀢𑀻𑀢𑀺 𑀯𑀺𑀤𑀽. 𑀬𑁂 𑀧𑀡𑁆𑀟𑀺𑀢𑀸 𑀬𑀣𑀸𑀲𑀪𑀸𑀯𑀢𑁄 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀺, 𑀓𑀼𑀲𑀮𑀸𑀤𑀺𑀪𑁂𑀤𑁂 𑀘 𑀥𑀫𑁆𑀫𑁂 𑀯𑀺𑀤𑀦𑁆𑀢𑀺, 𑀇𑀢𑀺 𑀯𑀺𑀤𑀦𑀢𑁄 𑀢𑁂 𑀧𑀡𑁆𑀟𑀺𑀢𑀸 𑀯𑀺𑀤𑀽 𑀦𑀸𑀫, 𑀢𑁂𑀳𑀺. 𑀜𑀸𑀢𑀩𑁆𑀩𑀦𑁆𑀢𑀺 𑀜𑁂𑀬𑁆𑀬𑀁. 𑀜𑀸-𑀥𑀸𑀢𑀼𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀆𑀭𑀫𑁆𑀫𑀡𑀺𑀓𑀁 𑀜𑀸𑀡𑀁 𑀯𑀼𑀢𑁆𑀢𑀁, 𑀞𑀸𑀦𑀽𑀧𑀘𑀸𑀭𑀢𑁄 𑀲𑀸𑀲𑀦𑀯𑀭𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀇𑀢𑀺-𑀲𑀤𑁆𑀤𑁂𑀦 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀧𑀭𑀸𑀫𑀲𑀺𑀢𑁄. 𑀢𑀲𑁆𑀲 𑀇𑀢𑀺-𑀲𑀤𑁆𑀤𑁂𑀦 𑀧𑀭𑀸𑀫𑀲𑀺𑀢𑀩𑁆𑀩𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀲𑁆𑀲 𑀆𑀥𑀸𑀭𑀁 𑀲𑀸𑀲𑀦𑀯𑀭𑀁 𑀡𑁆𑀬-𑀧𑀘𑁆𑀘𑀬𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀜𑀸𑀡𑀁 𑀅𑀭𑀳𑀢𑀻𑀢𑀺 𑀯𑀸 𑀜𑁂𑀬𑁆𑀬𑀁, 𑀯𑀺𑀤𑀽𑀦𑀁 𑀜𑀸𑀡𑀁 𑀚𑀸𑀦𑀦𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀦𑀬𑁂 𑀢𑀤𑁆𑀥𑀺𑀢𑀧𑀤𑀁 𑀤𑀝𑁆𑀞𑀩𑁆𑀩𑀁.

𑀦𑀭𑀢𑀺 𑀦𑁂𑀢𑀻𑀢𑀺 𑀦𑀭𑁄. 𑀬𑁄 𑀧𑀼𑀭𑀺𑀲𑁄 𑀅𑀢𑁆𑀢𑀸𑀦𑀁 𑀇𑀢𑁆𑀣𑀻𑀦𑀁 𑀉𑀘𑁆𑀘𑀝𑁆𑀞𑀸𑀦𑀁 𑀦𑀭𑀢𑀺 𑀦𑁂𑀢𑀺, 𑀇𑀢𑀺 𑀦𑀭𑀦𑀢𑁄 𑀦𑀬𑀦𑀢𑁄 𑀲𑁄 𑀧𑀼𑀭𑀺𑀲𑁄 𑀦𑀭𑁄 𑀦𑀸𑀫. 𑀲𑁄 𑀳𑀺 𑀧𑀼𑀢𑁆𑀢𑀪𑀽𑀢𑁄𑀧𑀺 𑀫𑀸𑀢𑀼𑀬𑀸 𑀧𑀺𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀓𑀦𑀺𑀝𑁆𑀞𑀪𑀸𑀢𑀼𑀪𑀽𑀢𑁄𑀧𑀺 𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀧𑀺𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀅𑀣 𑀯𑀸 𑀦𑀭𑀺𑀢𑀩𑁆𑀩𑁄 𑀦𑁂𑀢𑀩𑁆𑀩𑁄𑀢𑀺 𑀦𑀭𑁄. 𑀲𑁄 𑀳𑀺 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀢𑁆𑀢𑀸𑀦𑀁 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁄 𑀦 𑀳𑁄𑀢𑀺, 𑀢𑀸𑀯 𑀧𑀭𑁂𑀳𑀺 𑀦𑁂𑀢𑀩𑁆𑀩𑁄, 𑀦 𑀢𑀣𑀸 𑀅𑀜𑁆𑀜𑁄 𑀢𑀺𑀭𑀘𑁆𑀙𑀸𑀦𑀸𑀤𑀺𑀓𑁄𑀢𑀺. 𑀏𑀢𑁆𑀣 𑀧𑀦 𑀲𑀢𑁆𑀣𑀼𑀯𑀺𑀲𑀬𑀢𑀸𑀬 𑀦𑀭𑀢𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑁂𑀢𑀺 𑀦𑀭𑁄𑀢𑀺 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀢𑁆𑀣𑀸 𑀳𑀺 𑀲𑀢𑁆𑀢𑁂 𑀅𑀧𑀸𑀬𑀸𑀤𑀺𑀢𑁄 𑀲𑀼𑀕𑀢𑀺𑀁 𑀯𑀸 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀁 𑀯𑀸 𑀦𑁂𑀢𑀻𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀦𑁂𑀓𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀭𑁄 𑀉𑀢𑁆𑀢𑀫𑁄, 𑀯𑀭𑀺𑀢𑀩𑁆𑀩𑁄 𑀧𑀢𑁆𑀣𑁂𑀢𑀩𑁆𑀩𑁄𑀢𑀺 𑀯𑀸 𑀯𑀭𑁄, 𑀢𑀺𑀮𑁄𑀓𑀕𑁆𑀕𑁄. 𑀧𑀓𑀢𑀺𑀬𑀸 𑀉𑀘𑁆𑀘𑀝𑁆𑀞𑀸𑀦𑀝𑁆𑀞𑁄 𑀦𑀭𑁄 𑀕𑀼𑀡𑀼𑀢𑁆𑀢𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀭𑁄, 𑀦𑀭𑁄 𑀘 𑀲𑁄 𑀯𑀭𑁄 𑀘𑀸𑀢𑀺 𑀦𑀭𑀯𑀭𑁄. 𑀘-𑀢-𑀲𑀤𑁆𑀤𑀸𑀦𑀁 𑀅𑀢𑁆𑀣𑀪𑁂𑀤𑁄 𑀯𑀼𑀢𑁆𑀢𑁄𑀯, 𑀯𑀺𑀲𑁂𑀲𑀦𑀧𑀭𑀧𑀤𑀲𑀫𑀸𑀲𑁄𑀬𑀁. 𑀬𑁂𑀦 𑀯𑀼𑀢𑁆𑀢𑀁 ‘‘𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸). 𑀅𑀜𑁆𑀜𑁂 𑀧𑀦 ‘‘𑀦𑀭𑀸𑀦𑀁, 𑀦𑀭𑁂𑀲𑀼 𑀯𑀸 𑀯𑀭𑁄𑀢𑀺 𑀦𑀭𑀯𑀭𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀘𑀦𑀁 ‘‘𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸) 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺 𑀫𑀜𑁆𑀜𑁂. 𑀢𑀲𑁆𑀲 𑀦𑀭𑀯𑀭𑀲𑁆𑀲𑀸𑀢𑀺. 𑀇𑀘𑁆𑀘𑁂𑀯𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀆𑀤𑀺𑀕𑀸𑀣𑀸𑀬 𑀲𑀫𑀸𑀲𑁂𑀦 𑀘 𑀯𑀘𑀦𑀢𑁆𑀣𑁄 𑀲𑀫𑀢𑁆𑀢𑁄.

𑀲𑀭𑀽𑀧𑀢𑁆𑀣𑁄 𑀬𑁄𑀚𑀦𑀢𑁆𑀣𑀯𑀘𑀦𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑁄. 𑀢𑀣𑀸𑀧𑀺 𑀯𑀺𑀲𑀼𑀁 𑀲𑀼𑀝𑁆𑀞𑀼 𑀚𑀸𑀦𑀦𑀢𑁆𑀣𑀸𑀬 𑀧𑀼𑀦 𑀯𑀢𑁆𑀢𑀩𑁆𑀩𑁄. ‘‘𑀬’’𑀦𑁆𑀢𑀺 𑀧𑀤𑀲𑁆𑀲 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑁄 𑀲𑀮𑁄𑀓𑀧𑀸𑀮𑁂𑀦 𑀮𑁄𑀓𑁂𑀦 𑀧𑀽𑀚𑁂𑀢𑀩𑁆𑀩𑁄 𑀘𑁂𑀯 𑀦𑀫𑀲𑁆𑀲𑀺𑀢𑀩𑁆𑀩𑁄 𑀘 𑀲𑀸𑀲𑀦𑀯𑀭𑀤𑁂𑀲𑀓𑁄 𑀢𑀺𑀮𑁄𑀓𑀕𑁆𑀕𑁄 𑀲𑀭𑀽𑀧𑀢𑁆𑀣𑁄. ‘‘𑀮𑁄𑀓𑁄’’𑀢𑀺 𑀧𑀤𑀲𑁆𑀲 𑀬𑀣𑀸𑀯𑀼𑀢𑁆𑀢𑀮𑁄𑀓𑀧𑀸𑀮𑀲𑀳𑀺𑀢𑁄 𑀲𑀤𑁆𑀥𑀸𑀘𑀸𑀕𑀸𑀤𑀺𑀲𑀫𑁆𑀧𑀦𑁆𑀦𑁄 𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀲𑀭𑀽𑀧𑀢𑁆𑀣𑁄. 𑀮𑁄𑀓𑀲𑀤𑁆𑀤𑁄 𑀏𑀓𑀯𑀘𑀦𑀬𑀼𑀢𑁆𑀢𑁄𑀧𑀺 𑀚𑀸𑀢𑀺𑀲𑀤𑁆𑀤𑀢𑁆𑀢𑀸 𑀦𑀺𑀭𑀯𑀲𑁂𑀲𑀢𑁄 𑀲𑀢𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺 𑀬𑀣𑀸 ‘‘𑀫𑀳𑀸𑀚𑀦𑁄’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀮𑁄𑀓𑀲𑀤𑁆𑀤𑁄 ‘‘𑀮𑁄𑀓𑀯𑀺𑀤𑀽’’𑀢𑁆𑀬𑀸𑀤𑀻𑀲𑀼 𑀲𑀗𑁆𑀔𑀸𑀭𑀪𑀸𑀚𑀦𑁂𑀲𑀼𑀧𑀺 𑀧𑀯𑀢𑁆𑀢𑁄, 𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀲𑀸𑀥𑀦𑀢𑁆𑀢𑀸 𑀧𑀦 𑀲𑀢𑁆𑀢𑀮𑁄𑀓𑁂𑀯 𑀯𑀸𑀘𑀓𑀪𑀸𑀯𑁂𑀦 𑀧𑀯𑀢𑁆𑀢𑁄𑀢𑀺. 𑀢𑁂𑀦𑀸𑀳 ‘‘𑀧𑀽𑀚𑀦𑀓𑀺𑀭𑀺𑀬𑀸𑀬𑁄𑀕𑁆𑀬𑀪𑀽𑀢𑀢𑀸𑀯𑀲𑁂𑀦𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸).

𑀧𑀽𑀚𑀬𑀢𑁂𑀢𑀺 𑀏𑀢𑁆𑀣 𑀧𑀽𑀚𑀦𑀓𑀺𑀭𑀺𑀬𑀸𑀬 𑀫𑀼𑀔𑁆𑀬𑀢𑁄 𑀧𑀽𑀚𑀦𑀲𑀗𑁆𑀔𑀸𑀢𑁄 𑀧𑀽𑀚𑁂𑀦𑁆𑀢𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀽𑀧𑀢𑁆𑀣𑁄, 𑀨𑀮𑀽𑀧𑀘𑀸𑀭𑁂𑀦 𑀢𑀁𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀽𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀲𑀭𑀽𑀧𑀢𑁆𑀣𑀸. 𑀢𑁂-𑀯𑀺𑀪𑀢𑁆𑀢𑀺𑀧𑀘𑁆𑀘𑀬𑀲𑁆𑀲 𑀧𑀽𑀚𑀦𑀓𑀺𑀭𑀺𑀬𑀸𑀲𑀸𑀥𑀓𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀮𑁄𑀓𑁄 𑀘 𑀲𑀭𑀽𑀧𑀢𑁆𑀣𑁄, 𑀏𑀯𑀁 𑀲𑀢𑀺 𑀅𑀢𑁆𑀣𑀪𑁂𑀤𑀸𑀪𑀸𑀯𑀢𑁄 𑀤𑁆𑀯𑀻𑀲𑀼 𑀯𑀸𑀘𑀓𑁂𑀲𑀼 𑀏𑀓𑁄𑀯 𑀯𑀸𑀘𑀓𑁄 𑀯𑀢𑁆𑀢𑀩𑁆𑀩𑁄, 𑀓𑀲𑁆𑀫𑀸 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀤𑁆𑀯𑁂 𑀯𑀸𑀘𑀓𑀸 𑀯𑀼𑀢𑁆𑀢𑀸𑀢𑀺? 𑀦𑀸𑀬𑀁 𑀤𑁄𑀲𑁄 𑀤𑁆𑀯𑀺𑀦𑁆𑀦𑀁 𑀯𑀸𑀘𑀓𑀸𑀦𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀯𑀸𑀘𑀓𑀢𑁆𑀢𑀸. 𑀮𑁄𑀓𑀲𑀤𑁆𑀤𑁄 𑀳𑀺 𑀧𑀽𑀚𑀦𑀓𑀺𑀭𑀺𑀬𑀸𑀲𑀸𑀥𑀓𑁄, 𑀅𑀜𑁆𑀜𑀓𑀺𑀭𑀺𑀬𑀸𑀲𑀸𑀥𑀓𑁄 𑀘 𑀯𑀤𑀢𑀻𑀢𑀺 𑀲𑀸𑀫𑀜𑁆𑀜𑀯𑀸𑀘𑀓𑁄 𑀘 𑀳𑁄𑀢𑀺. 𑀧𑀽𑀚𑀬𑀢𑁂-𑀲𑀤𑁆𑀤𑁄 𑀮𑁄𑀓𑀧𑀽𑀚𑀦𑀇𑀢𑁆𑀣𑀺𑀧𑀽𑀚𑀦𑀧𑀼𑀭𑀺𑀲𑀧𑀽𑀚𑀦𑀢𑀺𑀭𑀘𑁆𑀙𑀸𑀦𑀧𑀽𑀚𑀦𑀸𑀤𑀺𑀓𑀺𑀭𑀺𑀬𑀸𑀲𑀸𑀥𑀓𑀜𑁆𑀘 𑀯𑀤𑀢𑀻𑀢𑀺 𑀲𑀸𑀫𑀜𑁆𑀜𑀯𑀸𑀘𑀓𑁄. 𑀢𑀲𑁆𑀫𑀸 𑀧𑀽𑀚𑀬𑀢𑁂-𑀲𑀤𑁆𑀤𑁄 𑀮𑁄𑀓𑀲𑀤𑁆𑀤𑀲𑁆𑀲 𑀲𑀭𑀽𑀧𑀢𑁆𑀣𑁄, 𑀧𑀽𑀚𑀦𑀓𑀺𑀭𑀺𑀬𑀸𑀲𑀸𑀥𑀓𑁄 𑀘 𑀦 𑀅𑀜𑁆𑀜𑀓𑀺𑀭𑀺𑀬𑀸𑀲𑀸𑀥𑀓𑁄𑀢𑀺 𑀦𑀺𑀬𑀫𑁂𑀢𑀺. 𑀮𑁄𑀓𑀲𑀤𑁆𑀤𑁄 𑀘 𑀧𑀽𑀚𑀬𑀢𑁂𑀲𑀤𑁆𑀤𑀲𑁆𑀲 𑀲𑀭𑀽𑀧𑀢𑁆𑀣𑁄 𑀧𑀽𑀚𑀦𑀓𑀺𑀭𑀺𑀬𑀸𑀲𑀸𑀥𑀓𑁄. 𑀮𑁄𑀓𑁄 𑀧𑀦 𑀧𑀽𑀚𑀦𑀓𑀺𑀭𑀺𑀬𑀸𑀲𑀸𑀥𑀓𑁄 𑀇𑀢𑁆𑀣𑀺𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀸𑀤𑀺𑀓𑁄𑀢𑀺 𑀦𑀺𑀬𑀫𑁂𑀢𑀺. 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄.

‘‘𑀲𑀮𑁄𑀓𑀧𑀸𑀮𑁄’’𑀢𑀺 𑀧𑀤𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁂𑀝𑁆𑀞𑀮𑁄𑀓𑀧𑀸𑀮𑀲𑀳𑀕𑀢𑁄, 𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀲𑀸𑀥𑀓𑁄 𑀘 𑀲𑀢𑁆𑀢𑀦𑀺𑀓𑀸𑀬𑁄 𑀲𑀭𑀽𑀧𑀢𑁆𑀣𑁄. ‘‘𑀲𑀤𑀸’’𑀢𑀺 𑀧𑀤𑀲𑁆𑀲 𑀭𑀢𑁆𑀢𑀺𑀤𑀺𑀯𑀲𑀓𑀸𑀮𑁄 𑀅𑀢𑀻𑀢𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁄 𑀢𑀢𑁄 𑀧𑀭𑀓𑀸𑀮𑁄 𑀅𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀓𑀸𑀮𑁄 𑀢𑀢𑁄 𑀧𑀭𑀓𑀸𑀮𑁄 𑀲𑀭𑀽𑀧𑀢𑁆𑀣𑁄. 𑀲𑁄 𑀧𑀦 𑀅𑀦𑀸𑀕𑀢𑀩𑀼𑀤𑁆𑀥𑀼𑀧𑁆𑀧𑀚𑁆𑀚𑀦𑀓𑀸𑀮𑁄 𑀅𑀢𑀻𑀢𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀇𑀤𑀸𑀦𑀺 𑀧𑀽𑀚𑀬𑀦𑁆𑀢𑀺 𑀦𑀫𑀲𑁆𑀲𑀦𑁆𑀢𑀺 𑀯𑀺𑀬 𑀧𑀽𑀚𑀬𑀺𑀲𑁆𑀲𑀢𑀺 𑀘𑁂𑀯 𑀦𑀫𑀲𑁆𑀲𑀺𑀲𑁆𑀲𑀢𑀺 𑀘. 𑀦𑀫𑀲𑁆𑀲𑀢𑀻𑀢𑀺 𑀏𑀢𑁆𑀣 𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀫𑀼𑀔𑁆𑀬𑀢𑁄 𑀦𑀫𑀲𑁆𑀲𑀦𑀲𑀗𑁆𑀔𑀸𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀽𑀧𑀢𑁆𑀣𑁄, 𑀨𑀮𑀽𑀧𑀘𑀸𑀭𑁂𑀦 𑀢𑀁𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀽𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀲𑀭𑀽𑀧𑀢𑁆𑀣𑁄. 𑀢𑀺-𑀯𑀺𑀪𑀢𑁆𑀢𑀺𑀧𑀘𑁆𑀘𑀬𑀲𑁆𑀲 𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀲𑀸𑀥𑀓𑁄 𑀬𑀣𑀸𑀯𑀼𑀢𑁆𑀢𑀲𑀢𑁆𑀢𑀦𑀺𑀓𑀸𑀬𑁄 𑀮𑁄𑀓𑁄 𑀘 𑀲𑀭𑀽𑀧𑀢𑁆𑀣𑁄, 𑀅𑀢𑁆𑀣𑀪𑁂𑀤𑀸𑀪𑀸𑀯𑁂𑀧𑀺 𑀤𑁆𑀯𑀺𑀦𑁆𑀦𑀁 𑀯𑀸𑀘𑀓𑀸𑀦𑀁 𑀧𑀯𑀢𑁆𑀢𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. ‘‘𑀘𑀸’’𑀢𑀺 𑀧𑀤𑀲𑁆𑀲 𑀇𑀥𑁂𑀓𑀘𑁆𑀘𑁄 𑀧𑀽𑀚𑁂𑀦𑁆𑀢𑁄𑀧𑀺 𑀦 𑀦𑀫𑀲𑁆𑀲𑀢𑀺, 𑀦𑀫𑀲𑁆𑀲𑀦𑁆𑀢𑁄𑀧𑀺 𑀦 𑀧𑀽𑀚𑁂𑀢𑀺 𑀘, 𑀅𑀬𑀁 𑀧𑀦 𑀲𑀢𑁆𑀢𑀦𑀺𑀓𑀸𑀬𑁄 𑀮𑁄𑀓𑁄 𑀧𑀽𑀚𑀬𑀢𑀺 𑀘𑁂𑀯 𑀦𑀫𑀲𑁆𑀲𑀢𑀺 𑀘𑀸𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄 𑀲𑀭𑀽𑀧𑀢𑁆𑀣𑁄.

𑀢𑀲𑁆𑀲𑀸𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀦𑁂𑀓𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀧𑀽𑀚𑁂𑀢𑀩𑁆𑀩𑁄 𑀦𑀫𑀲𑁆𑀲𑀺𑀢𑀩𑁆𑀩𑁄 𑀢𑀺𑀮𑁄𑀓𑀕𑁆𑀕𑁄 𑀲𑀢𑁆𑀣𑀸 𑀲𑀭𑀽𑀧𑀢𑁆𑀣𑁄, 𑀙𑀝𑁆𑀞𑀻𑀯𑀺𑀪𑀢𑁆𑀢𑀺𑀬𑀸 𑀚𑀦𑀓𑀲𑁆𑀲 𑀦𑀭𑀯𑀭𑀲𑁆𑀲 𑀚𑀜𑁆𑀜𑁂𑀦 𑀲𑀸𑀲𑀦𑀯𑀭𑁂𑀦 𑀲𑀫𑁆𑀩𑀦𑁆𑀥𑁄 𑀧𑀥𑀸𑀦𑀲𑀭𑀽𑀧𑀢𑁆𑀣𑁄, 𑀚𑀜𑁆𑀜𑀲𑀸𑀲𑀦𑀯𑀭𑀲𑁆𑀲 𑀚𑀦𑀓𑁂𑀦 𑀦𑀭𑀯𑀭𑁂𑀦 𑀲𑀫𑁆𑀩𑀦𑁆𑀥𑁄 𑀅𑀧𑀥𑀸𑀦𑀲𑀭𑀽𑀧𑀢𑁆𑀣𑁄. 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀏𑀯𑀭𑀽𑀧𑁂𑀲𑀼 𑀅𑀜𑁆𑀜𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

‘‘𑀏𑀢’’𑀦𑁆𑀢𑀺 𑀧𑀤𑀲𑁆𑀲 𑀆𑀘𑀭𑀺𑀬𑁂𑀦 𑀯𑀺𑀪𑀚𑀺𑀢𑀩𑁆𑀩𑀳𑀸𑀭𑀦𑀬𑀧𑀝𑁆𑀞𑀸𑀦𑀯𑀺𑀘𑀸𑀭𑀡𑀯𑀺𑀲𑀬𑀪𑀽𑀢𑀁 𑀲𑀸𑀲𑀦𑀁 𑀲𑀭𑀽𑀧𑀢𑁆𑀣𑁄. ‘‘𑀲𑀸𑀲𑀦𑀯𑀭’’𑀦𑁆𑀢𑀺 𑀧𑀤𑀲𑁆𑀲𑀸𑀧𑀺 𑀢𑀫𑁂𑀯 𑀲𑀭𑀽𑀧𑀢𑁆𑀣𑁄, 𑀏𑀢𑀁 𑀲𑀸𑀲𑀦𑀯𑀭𑀁 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀪𑁂𑀤𑁂𑀦 𑀢𑀺𑀯𑀺𑀥𑀫𑁆𑀧𑀺 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀫𑁂𑀯 𑀲𑀩𑁆𑀩𑀲𑀸𑀲𑀦𑀫𑀽𑀮𑀪𑀽𑀢𑀢𑁆𑀢𑀸, 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀪𑀽𑀢𑀢𑁆𑀢𑀸 𑀘 𑀯𑀺𑀲𑁂𑀲𑀢𑁄 𑀅𑀥𑀺𑀧𑁆𑀧𑁂𑀢𑀁 𑀢𑀲𑁆𑀲 𑀫𑀽𑀮𑀪𑀽𑀢𑀪𑀸𑀯𑀢𑁄 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀤𑀻𑀲𑀼 𑀩𑀳𑀽𑀧𑀓𑀸𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀅𑀫𑁆𑀳𑁂𑀳𑀺 𑀦 𑀯𑀢𑁆𑀢𑀩𑁆𑀩𑁄. 𑀯𑀤𑀦𑁆𑀢𑁄𑀧𑀺 𑀅𑀜𑁆𑀜𑀁 𑀭𑀘𑀺𑀢𑀩𑁆𑀩𑀁 𑀭𑀘𑀺𑀢𑀼𑀁 𑀅𑀲𑀫𑀢𑁆𑀣𑁄𑀯 𑀳𑀼𑀢𑁆𑀯𑀸 𑀯𑀤𑀢𑀻𑀢𑀺 𑀕𑀳𑀺𑀢𑀩𑁆𑀩𑁄 𑀯𑀤𑁂𑀬𑁆𑀬.

𑀢𑀁 𑀧𑀦 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁 𑀯𑀺𑀫𑀼𑀢𑁆𑀢𑀺𑀭𑀲𑀯𑀲𑁂𑀦 𑀏𑀓𑀯𑀺𑀥𑀁, 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁, 𑀯𑀺𑀦𑀬𑀧𑀺𑀝𑀓𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀅𑀪𑀺𑀥𑀫𑁆𑀫𑀧𑀺𑀝𑀓𑀯𑀲𑁂𑀦 𑀢𑀺𑀯𑀺𑀥𑀁, 𑀆𑀡𑀸𑀤𑁂𑀲𑀦𑀸𑀯𑁄𑀳𑀸𑀭𑀤𑁂𑀲𑀦𑀸𑀧𑀭𑀫𑀢𑁆𑀣𑀤𑁂𑀲𑀦𑀸𑀯𑀲𑁂𑀦 𑀢𑀺𑀯𑀺𑀥𑀁, 𑀬𑀣𑀸𑀧𑀭𑀸𑀥𑀲𑀸𑀲𑀦𑀸𑀬𑀣𑀸𑀦𑀼𑀮𑁄𑀫𑀲𑀸𑀲𑀦𑀸𑀬𑀣𑀸𑀥𑀫𑁆𑀫𑀲𑀸𑀲𑀦𑀸𑀪𑁂𑀤𑁂𑀦𑀧𑀺 𑀢𑀺𑀯𑀺𑀥𑀁, 𑀲𑀁𑀯𑀭𑀸𑀲𑀁𑀯𑀭𑀓𑀣𑀸𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀓𑀣𑀸𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀸𑀪𑁂𑀤𑁂𑀦𑀧𑀺 𑀢𑀺𑀯𑀺𑀥𑀁. 𑀏𑀢𑁆𑀣 𑀘 𑀤𑁂𑀲𑀦𑀸 𑀤𑁂𑀲𑀓𑀸𑀥𑀻𑀦𑀸, 𑀲𑀸𑀲𑀦𑀁 𑀲𑀸𑀲𑀺𑀢𑀩𑁆𑀩𑀸𑀬𑀢𑁆𑀢𑀁, 𑀓𑀣𑀸 𑀓𑀣𑁂𑀢𑀩𑁆𑀩𑀢𑁆𑀣𑀸𑀧𑁂𑀓𑁆𑀔𑀸𑀢𑀺 𑀯𑀺𑀲𑁂𑀲𑁄. 𑀤𑀻𑀖𑀦𑀺𑀓𑀸𑀬𑁄, 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀦𑀺𑀓𑀸𑀬𑀪𑁂𑀤𑁂𑀦 𑀧𑀦 𑀧𑀜𑁆𑀘𑀯𑀺𑀥𑀁; 𑀲𑀼𑀢𑁆𑀢𑀕𑁂𑀬𑁆𑀬𑀯𑁂𑀬𑁆𑀬𑀸𑀓𑀭𑀡𑀕𑀸𑀣𑀸𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓𑀚𑀸𑀢𑀓𑀅𑀩𑁆𑀪𑀼𑀢𑀥𑀫𑁆𑀫𑀯𑁂𑀤𑀮𑁆𑀮𑀪𑁂𑀤𑁂𑀦 𑀧𑀦 𑀦𑀯𑀯𑀺𑀥𑀁; 𑀥𑀫𑁆𑀫𑀓𑁆𑀔𑀦𑁆𑀥𑀪𑁂𑀤𑁂𑀦 𑀧𑀦 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀯𑀺𑀥𑀁; ‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀸𑀢𑀺 𑀅𑀫𑀺𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺; 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀦𑀺𑀩𑁆𑀩𑁂𑀥 𑀪𑀸𑀕𑀺𑀬𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀢𑀺 𑀫𑀺𑀲𑁆𑀲𑀓𑀤𑀼𑀓𑀸𑀦𑀺 𑀘𑀢𑁆𑀢𑀸𑀭𑀺; 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀯𑀸𑀲𑀦𑀸 𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀢𑀺 𑀫𑀺𑀲𑁆𑀲𑀓𑀢𑀺𑀓𑀸𑀦𑀺 𑀤𑁆𑀯𑁂; 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀢𑀡𑁆𑀳𑀸𑀯𑁄𑀤𑀸𑀦𑀪𑀸𑀕𑀺𑀬𑀤𑀺𑀝𑁆𑀞𑀺𑀯- 𑀉𑀤𑀸𑀦𑀪𑀸𑀕𑀺𑀬𑀤𑀼𑀘𑁆𑀘𑀭𑀺𑀢𑀯𑁄𑀤𑀸𑀦𑀪𑀸𑀕𑀺𑀬𑀸𑀢𑀺𑀙𑀸’’𑀢𑀺 (𑀦𑁂𑀢𑁆𑀢𑀺. 𑁮𑁯) 𑀲𑁄𑀴𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀪𑁂𑀤𑁂𑀦 𑀲𑁄𑀴𑀲𑀯𑀺𑀥𑀁; ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀲𑀢𑁆𑀢𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑀸𑀡𑀜𑁂𑀬𑁆𑀬- 𑀜𑀸𑀡𑀜𑁂𑀬𑁆𑀬𑀤𑀲𑁆𑀲𑀦𑀪𑀸𑀯𑀦𑀸𑀤𑀲𑁆𑀲𑀦𑀪𑀸𑀯𑀦𑀸𑀲𑀓𑀯𑀘𑀦𑀧𑀭𑀯𑀘𑀦𑀲𑀓𑀯𑀘𑀦𑀧𑀭𑀯𑀘𑀦 𑀯𑀺𑀲𑁆𑀲𑀚𑁆𑀚𑀦𑀻𑀬𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑀯𑀺𑀲𑁆𑀲𑀚𑁆𑀚𑀦𑀻𑀬𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑀓𑀫𑁆𑀫𑀯𑀺𑀧𑀸𑀓𑀓𑀫𑁆𑀫𑀯𑀺𑀧𑀸𑀓𑀓𑀼𑀲𑀮 𑀅𑀓𑀼𑀲𑀮𑀓𑀼𑀲𑀮𑀸𑀓𑀼𑀲𑀮𑀅𑀦𑀼𑀜𑁆𑀜𑀸𑀢𑀧𑀝𑀺𑀓𑁆𑀔𑀺𑀢𑁆𑀢𑀅𑀦𑀼𑀜𑁆𑀜𑀸𑀢𑀧𑀝𑀺𑀓𑁆𑀔𑀺𑀢𑁆𑀢𑀣𑀯𑀲𑁆𑀲 𑀪𑁂𑀤𑁂𑀦 𑀅𑀝𑁆𑀞𑀯𑀻𑀲𑀢𑀺𑀯𑀺𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑁧𑁧𑁨) 𑀏𑀯𑀫𑀸𑀤𑀺𑀩𑀳𑀼𑀯𑀺𑀥𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑁂𑀲𑀢𑁄 𑀯𑀺𑀲𑀬𑀁. 𑀢𑀲𑁆𑀲 𑀯𑀺𑀲𑀬𑀪𑀸𑀯𑁂 𑀲𑀢𑀺 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀁 𑀲𑀸𑀲𑀦𑀤𑁆𑀯𑀬𑀫𑁆𑀧𑀺 𑀢𑀫𑁆𑀫𑀽𑀮𑀓𑀢𑁆𑀢𑀸 𑀯𑀺𑀲𑀬𑀁 𑀳𑁄𑀢𑀺 𑀧𑀭𑀺𑀬𑀸𑀬𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀯𑀺𑀤𑀽𑀳𑀻’’𑀢𑀺 𑀧𑀤𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑀸𑀲𑀦𑀯𑀭𑀲𑁆𑀲 𑀲𑀧𑀭𑀲𑀦𑁆𑀢𑀸𑀦𑀧𑀯𑀢𑁆𑀢𑀦𑀧𑀯𑀢𑁆𑀢𑀸𑀧𑀦𑀸𑀤𑀺𑀯𑀲𑁂𑀦 𑀯𑀺𑀚𑀸𑀦𑀦𑀲𑀫𑀢𑁆𑀣𑁄 𑀲𑀡𑁆𑀳𑀲𑀼𑀔𑀼𑀫𑀜𑀸𑀡𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑁄 𑀧𑀼𑀕𑁆𑀕𑀮𑁄 𑀲𑀭𑀽𑀧𑀢𑁆𑀣𑁄. ‘‘𑀜𑁂𑀬𑁆𑀬’’𑀦𑁆𑀢𑀺 𑀧𑀤𑀲𑁆𑀲 𑀢𑀸𑀤𑀺𑀲𑁂𑀳𑀺 𑀯𑀺𑀤𑀽𑀳𑀺 𑀲𑀡𑁆𑀳𑀲𑀼𑀔𑀼𑀫𑀜𑀸𑀡𑀸𑀤𑀺𑀦𑀸 𑀯𑀺𑀚𑀸𑀦𑀺𑀢𑀩𑁆𑀩𑀁 𑀲𑀸𑀲𑀦𑀯𑀭𑀁 𑀲𑀭𑀽𑀧𑀢𑁆𑀣𑁄. ‘‘𑀦𑀭𑀯𑀭𑀲𑁆𑀲𑀸’’𑀢𑀺 𑀧𑀤𑀲𑁆𑀲 𑀏𑀓𑀯𑀺𑀥𑀸𑀤𑀺𑀪𑁂𑀤𑀲𑁆𑀲 𑀲𑀸𑀲𑀦𑀯𑀭𑀲𑁆𑀲 𑀚𑀦𑀓𑁄 𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑁄 𑀢𑀺𑀮𑁄𑀓𑀕𑁆𑀕𑁄 𑀲𑀭𑀽𑀧𑀢𑁆𑀣𑁄. 𑀇𑀘𑁆𑀘𑁂𑀯𑀁 𑀦𑁂𑀢𑁆𑀢𑀺𑀬𑀸 𑀆𑀤𑀺𑀕𑀸𑀣𑀸𑀬 𑀲𑀭𑀽𑀧𑀢𑁆𑀣𑁄 𑀲𑀗𑁆𑀔𑁂𑀧𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑁄.

𑀏𑀯𑀁 𑀢𑀲𑁆𑀲𑀸 𑀅𑀦𑀼𑀲𑀦𑁆𑀥𑁆𑀬𑀸𑀤𑀻𑀦𑀁 𑀚𑀸𑀦𑀺𑀢𑀩𑁆𑀩𑀪𑀸𑀯𑁂 𑀲𑀢𑀺𑀧𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀺𑀢𑁆𑀯𑀸 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀧𑀭𑀺𑀳𑀸𑀭𑀯𑀲𑁂𑀦𑀸𑀧𑀺 𑀕𑀫𑁆𑀪𑀻𑀭𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀓𑀼𑀮𑀲𑁆𑀲 𑀯𑀺𑀲𑁂𑀲𑀚𑀸𑀦𑀦𑀁 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀧𑀼𑀘𑁆𑀙𑀺𑀢𑁆𑀯𑀸 𑀤𑁄𑀲𑀁 𑀭𑁄𑀧𑁂𑀢𑁆𑀯𑀸 𑀧𑀭𑀺𑀳𑀸𑀭𑀯𑀲𑁂𑀦 𑀕𑀫𑁆𑀪𑀻𑀭𑀸𑀥𑀺𑀧𑁆𑀧𑀸𑀬𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀓𑀣𑀬𑀺𑀲𑁆𑀲𑀁. 𑀅𑀫𑁆𑀳𑀸𑀓𑀸𑀘𑀭𑀺𑀬 𑀓𑀺𑀫𑀢𑁆𑀣𑀁 ‘‘𑀬𑀁 𑀮𑁄𑀓𑁄’’𑀢𑁆𑀬𑀸𑀤𑀺𑀫𑀸𑀳? 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀓𑀸𑀢𑀼𑀁. 𑀏𑀯𑀁 𑀲𑀢𑀺 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀪𑀽𑀢𑀁 ‘‘𑀲𑁄𑀴𑀲𑀳𑀸𑀭𑀸 𑀦𑁂𑀢𑁆𑀢𑀺’’𑀢𑁆𑀬𑀸𑀤𑀺𑀓𑀁 𑀏𑀯 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 𑀢𑀁 𑀅𑀯𑀢𑁆𑀯𑀸 𑀢𑀢𑁄 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀢𑁄 𑀅𑀜𑁆𑀜𑀁 ‘‘𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂’’𑀢𑁆𑀬𑀸𑀤𑀺𑀫𑀸𑀳. 𑀲𑁂𑀬𑁆𑀬𑀣𑀸𑀧𑀺 𑀲𑀫𑀼𑀤𑁆𑀤𑀁 𑀕𑀘𑁆𑀙𑀦𑁆𑀢𑁄 𑀳𑀺𑀫𑀯𑀦𑁆𑀢𑀁 𑀕𑀘𑁆𑀙𑀢𑀺, 𑀳𑀺𑀫𑀯𑀦𑁆𑀢𑀁 𑀕𑀘𑁆𑀙𑀦𑁆𑀢𑁄 𑀲𑀫𑀼𑀤𑁆𑀤𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀓𑀭𑁄𑀦𑁆𑀢𑁄 𑀲𑀸𑀲𑀦𑀯𑀭𑀤𑀲𑁆𑀲𑀦𑀁 𑀓𑀭𑁄𑀢𑀻𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀬𑀲𑁆𑀲 𑀲𑀁𑀯𑀡𑁆𑀡𑀦𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀓𑀸𑀢𑀼𑀓𑀸𑀫𑁄 𑀢𑀁 𑀲𑀸𑀲𑀦𑀯𑀭𑀁 𑀧𑀞𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀮𑁄𑀓𑁄’’𑀢𑁆𑀬𑀸𑀤𑀺𑀫𑀸𑀳. 𑀏𑀯𑀁 𑀲𑀢𑀺 ‘‘𑀏𑀢𑀁 𑀲𑀸𑀲𑀦𑀯𑀭’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 ‘‘𑀬𑀁 𑀮𑁄𑀓𑁄’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀦𑁆𑀢𑀺? 𑀢𑀁 𑀲𑀸𑀲𑀦𑀯𑀭𑀁 𑀚𑀦𑀓𑁂𑀦 𑀦𑀭𑀯𑀭𑁂𑀦 𑀦𑀺𑀬𑀫𑁂𑀢𑁆𑀯𑀸 𑀣𑁄𑀫𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀣𑀸𑀧𑀺 ‘‘𑀢𑀲𑁆𑀲 𑀦𑀭𑀯𑀭𑀲𑁆𑀲𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 ‘‘𑀬𑀁 𑀮𑁄𑀓𑁄’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀦𑁆𑀢𑀺? 𑀢𑀁 𑀚𑀦𑀓𑀁 𑀦𑀭𑀯𑀭𑀁 𑀮𑁄𑀓𑀧𑀸𑀮𑁂𑀦 𑀮𑁄𑀓𑀲𑁂𑀝𑁆𑀞𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑁂𑀦 𑀮𑁄𑀓𑁂𑀦 𑀧𑀽𑀚𑀦𑀻𑀬𑀦𑀫𑀲𑁆𑀲𑀦𑀻𑀬𑀪𑀸𑀯𑁂𑀦 𑀣𑁄𑀫𑁂𑀢𑀼𑀁 ‘‘𑀬𑀁 𑀮𑁄𑀓𑁄’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀧𑀽𑀚𑁂𑀦𑁆𑀢𑀸𑀧𑀺 𑀯𑀦𑁆𑀤𑀺𑀢𑁆𑀯𑀸 𑀧𑀽𑀚𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀽𑀚𑀬𑀢𑁂’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀢𑀣𑀸𑀧𑀺 𑀓𑁂𑀘𑀺 𑀓𑁂𑀲𑀜𑁆𑀘𑀺 𑀧𑀽𑀚𑀸𑀲𑀓𑁆𑀓𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀧𑀺 𑀢𑁂𑀲𑀁 𑀅𑀧𑀸𑀓𑀝𑀕𑀼𑀡𑀢𑀸𑀬 𑀦𑀫𑀓𑁆𑀓𑀸𑀭𑀁 𑀦 𑀓𑀭𑁄𑀦𑁆𑀢𑀺. 𑀏𑀯𑀁 𑀪𑀕𑀯𑀢𑁄 𑀬𑀣𑀸𑀪𑀽𑀢𑀅𑀩𑁆𑀪𑀼𑀕𑁆𑀕𑀢𑀲𑀤𑁆𑀤𑀢𑀸𑀬 𑀧𑀦 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸𑀧𑀺 𑀯𑀦𑁆𑀤𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀫𑀲𑁆𑀲𑀢𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀧𑀽𑀚𑁂𑀦𑁆𑀢𑁄, 𑀦𑀫𑀲𑁆𑀲𑀦𑁆𑀢𑁄 𑀘 𑀦 𑀓𑀤𑀸𑀘𑀺𑀬𑁂𑀯, 𑀅𑀣 𑀔𑁄 𑀲𑀩𑁆𑀩𑀓𑀸𑀮𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀤𑀸’’𑀢𑀺 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀲𑁆𑀲 𑀦𑀭𑀯𑀭𑀲𑁆𑀲 𑀢𑀸𑀤𑀺𑀲𑀁 𑀲𑀸𑀲𑀦𑀯𑀭𑀁 𑀲𑀡𑁆𑀳𑀲𑀼𑀔𑀼𑀫𑀜𑀸𑀡𑀲𑀫𑁆𑀧𑀦𑁆𑀦𑁂𑀳𑀺 𑀯𑀺𑀤𑀽𑀳𑁂𑀯 𑀲𑀼𑀔𑀼𑀫𑀜𑀸𑀡𑁂𑀦𑁂𑀯 𑀜𑁂𑀬𑁆𑀬𑀦𑁆𑀢𑀺 𑀲𑀸𑀲𑀦𑀯𑀭𑀁 𑀣𑁄𑀫𑁂𑀢𑀼𑀁 ‘‘𑀯𑀺𑀤𑀽𑀳𑀺 𑀜𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 ‘‘𑀧𑀽𑀚𑀬𑀢𑁂, 𑀦𑀫𑀲𑁆𑀲𑀢𑀻’’𑀢𑀺 𑀏𑀢𑁂𑀳𑀺 𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀳𑁂𑀢𑀼𑀪𑀽𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀬𑁄 𑀅𑀦𑁂𑀓𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀸 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺 𑀢𑁂 𑀕𑀼𑀡𑁂 𑀆𑀕𑀫𑁆𑀫 𑀲𑀩𑁆𑀩𑀮𑁄𑀓𑀲𑁆𑀲 𑀧𑀽𑀚𑀦𑀦𑀫𑀲𑁆𑀲𑀦𑀘𑁂𑀢𑀦𑀸𑀬 𑀧𑀯𑀢𑁆𑀢𑀦𑀢𑁄. 𑀢𑁂𑀲𑀼 𑀳𑀺 𑀓𑀺𑀜𑁆𑀘𑀺 𑀲𑀭𑀽𑀧𑀢𑁄, 𑀓𑀺𑀜𑁆𑀘𑀺 𑀅𑀦𑀼𑀫𑀸𑀦𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀬𑁄 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀧𑀽𑀚𑁂𑀦𑁆𑀢𑀺, 𑀦𑀫𑀲𑁆𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀲𑁆𑀲𑀭𑁂𑀣 𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁪𑁯). 𑀏𑀓𑀤𑁂𑀲𑀕𑀼𑀡𑀸𑀧𑀺 𑀧𑀽𑀚𑀸𑀭𑀳𑀸 𑀦𑀫𑀲𑁆𑀲𑀦𑀸𑀭𑀳𑀸, 𑀓𑀲𑁆𑀫𑀸 𑀲𑀩𑁆𑀩𑁂𑀧𑀺 𑀕𑀼𑀡𑀸 𑀧𑀓𑀸𑀲𑀺𑀢𑀸𑀢𑀺? 𑀲𑀩𑁆𑀩𑀕𑀼𑀡𑀤𑀲𑁆𑀲𑀦𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀫𑀳𑀸𑀓𑀭𑀼𑀡𑀸𑀬𑁄𑀕𑀲𑀗𑁆𑀔𑀸𑀢𑀳𑁂𑀢𑀼𑀜𑀸𑀡𑀧𑀳𑀸𑀦- 𑀆𑀦𑀼𑀪𑀸𑀯𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀨𑀮𑀳𑀺𑀢𑀚𑁆𑀛𑀸𑀲𑀬𑀺𑀦𑁆𑀤𑁆𑀭𑀺𑀬- 𑀧𑀸𑀓𑀓𑀸𑀮𑀸𑀕𑀫𑀦𑀤𑁂𑀲𑀦𑀸𑀜𑀸𑀡𑀲𑀗𑁆𑀔𑀸𑀢𑀲𑀢𑁆𑀢𑀼- 𑀧𑀓𑀸𑀭𑀲𑀫𑁆𑀧𑀤𑀸𑀯𑀲𑁂𑀦 𑀣𑁄𑀫𑀦𑀸 𑀤𑀲𑁆𑀲𑀺𑀢𑀸. 𑀢𑁂𑀦 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀽𑀧𑀕𑀫𑀦𑀸𑀧𑀕𑀫𑀦𑀜𑁆𑀘 𑀮𑁄𑀓𑀲𑀫𑀜𑁆𑀜𑀸𑀦𑀼𑀧𑀧𑀯𑀢𑁆𑀢𑀺, 𑀢𑀤𑀦𑀢𑀺𑀥𑀸𑀯𑀦𑀜𑁆𑀘 𑀘𑀭𑀡𑀲𑀫𑁆𑀧𑀢𑁆𑀢𑀺, 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺 𑀘 𑀅𑀢𑁆𑀢𑀸𑀥𑀺𑀧𑀢𑀺𑀢𑀸, 𑀥𑀫𑁆𑀫𑀸𑀥𑀺𑀧𑀢𑀺𑀢𑀸 𑀘 𑀮𑁄𑀓𑀦𑀸𑀣𑀅𑀢𑁆𑀢𑀦𑀸𑀣𑀢𑀸 𑀘 𑀧𑀼𑀩𑁆𑀩𑀓𑀸𑀭𑀺𑀓𑀢𑀜𑁆𑀜𑀼𑀢𑀸 𑀘 𑀅𑀧𑀭𑀦𑁆𑀢𑀧𑀢𑀸, 𑀅𑀦𑀢𑁆𑀢𑀦𑁆𑀢𑀧𑀢𑀸 𑀘 𑀩𑀼𑀤𑁆𑀥𑀓𑀭𑀡𑀥𑀫𑁆𑀫𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺 𑀘 𑀧𑀭𑀢𑀸𑀭𑀡𑀅𑀢𑁆𑀢𑀢𑀸𑀭𑀡𑀜𑁆𑀘 𑀲𑀢𑁆𑀢𑀸𑀦𑀼𑀕𑁆𑀕𑀳𑀘𑀺𑀢𑁆𑀢𑀢𑀸, 𑀥𑀫𑁆𑀫𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀘 𑀧𑀓𑀸𑀲𑀺𑀢𑀸 𑀪𑀯𑀦𑁆𑀢𑀺. 𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀉𑀢𑁆𑀢𑀫𑀧𑀽𑀚𑀦𑀻𑀬𑀦𑀫𑀲𑁆𑀲𑀦𑀻𑀬𑀪𑀸𑀯𑀧𑀽𑀚𑀦𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀘 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀺. 𑀢𑁂𑀦 𑀧𑀽𑀚𑀦𑀓𑀦𑀫𑀲𑁆𑀲𑀦𑀓𑀸𑀦𑀁 𑀬𑀣𑀺𑀘𑁆𑀙𑀺𑀢𑀩𑁆𑀩𑀧𑀬𑁄𑀚𑀦𑀲𑀫𑁆𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀲𑀩𑁆𑀩𑀕𑀼𑀡𑀸 𑀧𑀓𑀸𑀲𑀺𑀢𑀸𑀢𑀺.

𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀭𑀁 𑀅𑀕𑁆𑀕𑀁 𑀉𑀢𑁆𑀢𑀫𑀁, 𑀦𑀺𑀧𑀼𑀡𑀜𑀸𑀡𑀕𑁄𑀘𑀭𑀢𑀸𑀬 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀜𑁆𑀘, 𑀢𑀲𑁆𑀫𑀸 ‘‘𑀯𑀭𑀁 𑀜𑁂𑀬𑁆𑀬’’𑀦𑁆𑀢𑀺 𑀯𑀘𑀦𑁂𑀳𑀺 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀬𑁄 𑀲𑀩𑁆𑀩𑁂 𑀥𑀫𑁆𑀫𑀕𑀼𑀡𑀸 𑀧𑀓𑀸𑀲𑀺𑀢𑀸. 𑀅𑀭𑀺𑀬𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀲𑀫𑀼𑀕𑁆𑀖𑀸𑀢𑀓𑀺𑀮𑁂𑀲𑀲𑀫𑁆𑀫𑁄𑀳𑀸𑀬𑁂𑀯 𑀧𑀭𑀫𑀢𑁆𑀣𑀢𑁄 𑀧𑀡𑁆𑀟𑀺𑀢𑀸 𑀩𑀸𑀮𑁆𑀬𑀸𑀤𑀺𑀲𑀫𑀢𑀺𑀓𑁆𑀓𑀫𑀦𑀢𑁄, 𑀢𑀲𑁆𑀫𑀸 𑀪𑀸𑀯𑀺𑀢𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀸, 𑀲𑀘𑁆𑀙𑀺𑀓𑀢𑀲𑀸𑀫𑀜𑁆𑀜𑀨𑀮𑀸 𑀘 𑀧𑀼𑀕𑁆𑀕𑀮𑀸 𑀯𑀺𑀲𑁂𑀲𑀢𑁄 ‘‘𑀯𑀺𑀤𑀽’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀳𑀺 𑀬𑀣𑀸𑀯𑀼𑀢𑁆𑀢𑀲𑀸𑀲𑀦𑀯𑀭𑀁 𑀅𑀯𑀺𑀧𑀭𑀻𑀢𑀢𑁄 𑀜𑀸𑀢𑀼𑀁, 𑀦𑁂𑀢𑀼𑀜𑁆𑀘 𑀲𑀧𑀭𑀲𑀦𑁆𑀢𑀸𑀦𑁂 𑀲𑀓𑁆𑀓𑀼𑀡𑀦𑁆𑀢𑀺. 𑀢𑀲𑁆𑀫𑀸 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀬𑁄 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀲𑀁𑀯𑀡𑁆𑀡𑀺𑀢𑀸, 𑀢𑁂 𑀅𑀭𑀺𑀬𑀲𑀗𑁆𑀖𑀕𑀼𑀡𑀸𑀧𑀺 𑀦𑀺𑀭𑀯𑀲𑁂𑀲𑀢𑁄 ‘‘𑀯𑀺𑀤𑀽𑀳𑀻’’𑀢𑀺 𑀧𑀤𑁂𑀦 𑀧𑀓𑀸𑀲𑀺𑀢𑀸𑀢𑀺. 𑀏𑀯𑀁 𑀦𑁂𑀢𑁆𑀢𑀺𑀬𑀸 𑀧𑀞𑀫𑀕𑀸𑀣𑀸𑀬 ‘‘𑀏𑀢𑀁 𑀲𑀸𑀲𑀦𑀯𑀭’’𑀦𑁆𑀢𑀺 𑀧𑀤𑁂𑀦 𑀲𑀸𑀲𑀦𑀢𑁆𑀢𑀬𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣 𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀥𑀺𑀕𑀫𑀽𑀧𑀸𑀬𑀪𑀸𑀯𑀢𑁄 𑀲𑀩𑁆𑀩𑀲𑀸𑀲𑀦𑀫𑀽𑀮𑀪𑀽𑀢𑀲𑁆𑀲, 𑀅𑀢𑁆𑀢𑀦𑁄 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀘 𑀯𑀺𑀲𑀬𑀪𑀽𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀯𑀭𑀲𑁆𑀲 𑀤𑀲𑁆𑀲𑀦𑀫𑀼𑀔𑁂𑀦 𑀲𑀩𑁆𑀩𑁂 𑀭𑀢𑀦𑀢𑁆𑀢𑀬𑀕𑀼𑀡𑀸𑀧𑀺 𑀣𑁄𑀫𑀦𑀸𑀯𑀲𑁂𑀦 𑀦𑀬𑀢𑁄𑀯 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺. 𑀦𑀬𑀢𑁄 𑀳𑀺 𑀤𑀲𑁆𑀲𑀺𑀢𑀸 𑀲𑀩𑁆𑀩𑁂 𑀕𑀼𑀡𑀸 𑀦𑀺𑀭𑀯𑀲𑁂𑀲𑀸 𑀕𑀳𑀺𑀢𑀸 𑀪𑀯𑀦𑁆𑀢𑀺, 𑀦 𑀲𑀭𑀽𑀧𑀢𑁄. 𑀢𑁂𑀦𑀸𑀳 𑀪𑀕𑀯𑀦𑁆𑀢𑀁 𑀞𑀧𑁂𑀢𑁆𑀯𑀸 𑀧𑀜𑁆𑀜𑀯𑀦𑁆𑀢𑀸𑀦𑀁 𑀅𑀕𑁆𑀕𑀪𑀽𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀫𑀦𑀼𑀬𑀼𑀢𑁆𑀢𑁄 ‘‘𑀅𑀧𑀺𑀘 𑀫𑁂 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 (𑀤𑀻. 𑀦𑀺. 𑁨.𑁧𑁪𑁬) 𑀪𑀕𑀯𑀢𑀸𑀧𑀺 𑁋

‘‘𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄’’𑀢𑀺. (𑀅𑀧. 𑀣𑁂𑀭 𑁧.𑁧.𑁮𑁨; 𑀦𑁂𑀢𑁆𑀢𑀺. 𑁯𑁫) 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀩𑀼𑀤𑁆𑀥𑀥𑀫𑁆𑀫𑀸𑀢𑀺 𑀩𑀼𑀤𑁆𑀥𑀕𑀼𑀡𑀸. 𑀅𑀫𑁆𑀳𑀸𑀓𑀁 𑀧𑀦 𑀬𑀸𑀯𑀚𑀻𑀯𑀁 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀦𑁂 𑀅𑀢𑀺𑀉𑀲𑁆𑀲𑀸𑀳𑀦𑁆𑀢𑀸𑀦𑀫𑁆𑀧𑀺 𑀲𑀭𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁄 𑀧𑀕𑁂𑀯 𑀧𑀡𑁆𑀟𑀺𑀢𑁂𑀳𑀺 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀇𑀘𑁆𑀘𑁂𑀯𑀁 𑁋

‘‘𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂, 𑀲𑀮𑁄𑀓𑀧𑀸𑀮𑁄 𑀲𑀤𑀸 𑀦𑀫𑀲𑁆𑀲𑀢𑀺 𑀘;

𑀢𑀲𑁆𑀲𑁂𑀢 𑀲𑀸𑀲𑀦𑀯𑀭𑀁, 𑀯𑀺𑀤𑀽𑀳𑀺 𑀜𑁂𑀬𑁆𑀬𑀁 𑀦𑀭𑀯𑀭𑀲𑁆𑀲𑀸’’𑀢𑀺. 𑁋

𑀦𑀺𑀕𑁆𑀕𑀳𑀺𑀢𑀮𑁄𑀧𑀯𑀲𑁂𑀦 𑀯𑀼𑀢𑁆𑀢𑀸𑀬 𑀕𑀸𑀣𑀸𑀬 𑀲𑀗𑁆𑀔𑁂𑀧𑁂𑀦 𑀓𑀣𑀺𑀢𑁄 𑀅𑀦𑀼𑀲𑀦𑁆𑀥𑁆𑀬𑀸𑀤𑀺𑀓𑁄 𑀲𑀫𑀢𑁆𑀢𑁄𑀢𑀺.

‘‘𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂, 𑀲 𑀮𑁄𑀓𑀧𑀸𑀮𑁄 𑀲𑀤𑀸 𑀦𑀫𑀲𑁆𑀲𑀢𑀺 𑀘;

𑀢𑀁 𑀢𑀲𑁆𑀲 𑀲𑀸𑀲𑀦𑀯𑀭𑀁, 𑀯𑀺𑀤𑀽𑀳𑀺 𑀜𑁂𑀬𑁆𑀬𑀁 𑀦𑀭𑀯𑀭𑀲𑁆𑀲𑀸’’𑀢𑀺. 𑁋

𑀕𑀸𑀣𑀁 𑀅𑀧𑀭𑁂 𑀧𑀞𑀦𑁆𑀢𑀺. 𑀢𑀲𑁆𑀲𑀸𑀧𑀺 𑀅𑀦𑀼𑀲𑀦𑁆𑀥𑁆𑀬𑀢𑁆𑀣𑁄 𑀯𑀼𑀢𑁆𑀢𑀦𑀬𑁄𑀯. 𑀬𑁄𑀚𑀦𑀢𑁆𑀣𑁄 𑀧𑀦 𑀯𑀺𑀲𑁂𑀲𑁄. 𑀢𑀢𑁆𑀣 𑀳𑀺 𑀲𑀮𑁄𑀓𑀧𑀸𑀮𑁄 𑀮𑁄𑀓𑁄 𑀬𑀲𑁆𑀲 𑀲𑀢𑁆𑀣𑀼𑀦𑁄 𑀦𑀭𑀯𑀭𑀲𑁆𑀲 𑀬𑀁 𑀲𑀸𑀲𑀦𑀯𑀭𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀳𑀺𑀢𑀁, 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀏𑀯 𑀯𑀸 𑀧𑀽𑀚𑀬𑀢𑁂 𑀘𑁂𑀯 𑀦𑀫𑀲𑁆𑀲𑀢𑀺 𑀘, 𑀢𑀲𑁆𑀲 𑀮𑁄𑀓𑀧𑀸𑀮𑀲𑁆𑀲 𑀲𑀢𑁆𑀣𑀼𑀦𑁄 𑀢𑀁 𑀧𑀽𑀚𑁂𑀢𑀩𑁆𑀩𑀁, 𑀦𑀫𑀲𑁆𑀲𑀺𑀢𑀩𑁆𑀩𑀜𑁆𑀘 𑀯𑀺𑀤𑀽𑀳𑁂𑀯 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀏𑀢𑀁 𑀲𑀸𑀲𑀦𑀯𑀭𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀦𑁆𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀬𑁄𑀚𑀦𑀸𑀓𑀸𑀭𑁄𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁄𑀯.

𑀯𑀺𑀕𑁆𑀕𑀳𑀢𑁆𑀣𑁄𑀧𑀺 𑀯𑀺𑀲𑁂𑀲𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀦𑀬𑁂 𑀮𑁄𑀓𑀁 𑀧𑀸𑀮𑁂𑀦𑁆𑀢𑀻𑀢𑀺 𑀮𑁄𑀓𑀧𑀸𑀮𑀸, 𑀬𑀣𑀸𑀯𑀼𑀢𑁆𑀢𑀘𑀢𑀼𑀫𑀳𑀸𑀭𑀸𑀚𑀸𑀤𑀬𑁄. 𑀢𑁂𑀳𑀺 𑀮𑁄𑀓𑀧𑀸𑀮𑁂𑀳𑀺 𑀲𑀳𑀺𑀢𑀁 𑀲𑀩𑁆𑀩𑀮𑁄𑀓𑀁 𑀧𑀸𑀮𑁂𑀢𑀺 𑀮𑁄𑀓𑀕𑁆𑀕𑀦𑀸𑀬𑀓𑀢𑁆𑀢𑀸𑀢𑀺 𑀮𑁄𑀓𑀧𑀸𑀮𑁄𑀢𑀺 𑀪𑀕𑀯𑀸𑀧𑀺 𑀮𑁄𑀓𑀧𑀸𑀮𑀲𑀤𑁆𑀤𑁂𑀦 𑀯𑀼𑀢𑁆𑀢𑁄. 𑀲𑁄 𑀳𑀺 ‘‘𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀧𑀭𑀸𑀫𑀲𑀻𑀬𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀮𑁄𑀓𑀧𑀸𑀮𑀲𑁆𑀲 𑀲𑀢𑁆𑀣𑀼𑀦𑁄 𑀦𑀭𑀯𑀭𑀲𑁆𑀲𑀸𑀢𑀺 𑀅𑀢𑁆𑀣𑁄 𑀕𑀳𑀺𑀢𑁄. 𑀬𑀤𑀺 𑀏𑀯𑀁 𑀮𑁄𑀓𑀧𑀸𑀮𑁄 𑀕𑀼𑀡𑀻𑀪𑀽𑀢𑁄 𑀅𑀧𑀥𑀸𑀦𑁄 𑀧𑀥𑀸𑀦𑀪𑀽𑀢𑀁 𑀮𑁄𑀓𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀺𑀦𑀺𑀯𑀢𑁆𑀢𑁄, 𑀓𑀣𑀁 𑀢𑀁-𑀲𑀤𑁆𑀤𑁂𑀦 𑀧𑀭𑀸𑀫𑀲𑀻𑀬𑀢𑀻𑀢𑀺? 𑀮𑁄𑀓𑀯𑀺𑀲𑁂𑀲𑀓𑁄 𑀲𑀫𑀸𑀦𑁄𑀧𑀺 𑀲𑀸𑀲𑀦𑀯𑀭𑀸𑀧𑁂𑀓𑁆𑀔𑀢𑀸𑀬 𑀚𑀦𑀓𑀲𑀸𑀫𑀺𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀺𑀯𑀺𑀲𑁂𑀲𑀪𑀽𑀢𑀢𑁆𑀢𑀸 𑀧𑀥𑀸𑀦𑀪𑀽𑀢𑁄 𑀯𑀺𑀬 𑀧𑀭𑀸𑀫𑀲𑀻𑀬𑀢𑀻𑀢𑀺. 𑀪𑀕𑀯𑀸 𑀲𑀸𑀲𑀦𑀯𑀭𑀲𑁆𑀲 𑀲𑀸𑀫𑀺𑀪𑀸𑀯𑁂𑀦 𑀕𑀳𑀺𑀢𑁄. 𑀓𑀣𑀁 𑀲𑀸𑀲𑀦𑀯𑀭𑀲𑁆𑀲 𑀲𑀸𑀫𑀻 𑀪𑀕𑀯𑀸 𑀲𑀸𑀲𑀦𑀯𑀭𑀁 𑀧𑀽𑀚𑀬𑀢𑀻𑀢𑀺? 𑀦 𑀘𑀸𑀬𑀁 𑀯𑀺𑀭𑁄𑀥𑁄. 𑀩𑀼𑀤𑁆𑀥𑀸 𑀳𑀺 𑀪𑀕𑀯𑀦𑁆𑀢𑁄 𑀥𑀫𑁆𑀫𑀕𑀭𑀼𑀦𑁄, 𑀢𑁂 𑀲𑀩𑁆𑀩𑀓𑀸𑀮𑀁 𑀥𑀫𑁆𑀫𑀫𑀧𑀘𑀬𑀫𑀸𑀦𑀸𑀯 𑀯𑀺𑀳𑀭𑀦𑁆𑀢𑀻𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀥𑀫𑁆𑀫𑀕𑀭𑀼𑀥𑀫𑁆𑀫𑀸𑀧𑀘𑀬𑀫𑀸𑀦𑀪𑀸𑀯𑁄 ‘‘𑀬𑀁𑀦𑀽𑀦𑀸𑀳𑀁…𑀧𑁂… 𑀢𑀫𑁂𑀯 𑀥𑀫𑁆𑀫𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 (𑀅. 𑀦𑀺. 𑁪.𑁨𑁧) 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀮𑁄𑀓𑀧𑀸𑀮𑁄 𑀪𑀕𑀯𑀸 𑀲𑀸𑀲𑀦𑀯𑀭𑀁 𑀧𑀽𑀚𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀲𑀢𑀺 𑀮𑁄𑀓𑀧𑀸𑀮𑁄 𑀪𑀕𑀯𑀸 𑀲𑀸𑀲𑀦𑀯𑀭𑀁 𑀧𑀽𑀚𑀬𑀢𑀻𑀢𑀺 𑀅𑀢𑁆𑀣𑁄 𑀬𑀼𑀢𑁆𑀢𑁄 𑀳𑁄𑀢𑀼, 𑀓𑀣𑀁 𑀮𑁄𑀓𑀧𑀸𑀮𑁄 𑀪𑀕𑀯𑀸 𑀲𑀸𑀲𑀦𑀯𑀭𑀁 𑀦𑀫𑀲𑁆𑀲𑀢𑀻𑀢𑀺 𑀬𑀼𑀢𑁆𑀢𑁄𑀢𑀺? 𑀬𑀼𑀢𑁆𑀢𑁄𑀯 ‘‘𑀦𑀫𑀲𑁆𑀲𑀢𑀻’’𑀢𑀺 𑀧𑀤𑀲𑁆𑀲 𑀕𑀭𑀼𑀓𑀭𑀡𑁂𑀦 𑀢𑀦𑁆𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑁄𑀢𑀺 𑀅𑀢𑁆𑀣𑀲𑁆𑀲𑀸𑀧𑀺 𑀮𑀩𑁆𑀪𑀦𑀢𑁄. 𑀪𑀕𑀯𑀸 𑀳𑀺 𑀥𑀫𑁆𑀫𑀕𑀭𑀼𑀢𑀸𑀬 𑀲𑀩𑁆𑀩𑀓𑀸𑀮𑀁 𑀥𑀫𑁆𑀫𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀯𑀺𑀳𑀭𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀲𑀁𑀯𑀡𑁆𑀡𑀦𑀸𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀜𑀸𑀢𑀩𑁆𑀩𑀦𑁆𑀢𑀺 𑀅𑀫𑁆𑀳𑁂𑀳𑀺 𑀦 𑀯𑀺𑀢𑁆𑀣𑀸𑀭𑀻𑀬𑀢𑀺.

𑀏𑀯𑀁 𑀧𑀞𑀫𑀕𑀸𑀣𑀸𑀬 ‘‘𑀲𑀸𑀲𑀦𑀯𑀭’’𑀦𑁆𑀢𑀺 𑀧𑀤𑁂𑀦 𑀢𑀺𑀯𑀺𑀥𑀫𑁆𑀧𑀺 𑀲𑀸𑀲𑀦𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀫𑁂𑀯 𑀅𑀢𑁆𑀢𑀦𑁄 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺’’𑀢𑁆𑀬𑀸𑀤𑀺𑀫𑀸𑀳. 𑀅𑀣 𑀯𑀸 𑀧𑀞𑀫𑀕𑀸𑀣𑀸𑀬 𑀭𑀢𑀦𑀢𑁆𑀢𑀬𑀣𑁄𑀫𑀦𑁂𑀦 𑀲𑀳 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀢𑀸𑀯𑀺𑀲𑀬𑀁 𑀲𑀸𑀲𑀦𑀯𑀭𑀁 𑀆𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑀁, ‘‘𑀢𑀲𑁆𑀲 𑀲𑀸𑀲𑀦𑀯𑀭𑀁 𑀓𑀺𑀁 𑀲𑀩𑁆𑀩𑀁𑀬𑁂𑀯 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀁, 𑀉𑀤𑀸𑀳𑀼 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀫𑁂𑀯𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀪𑀽𑀢𑀁 𑀲𑀼𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀲𑀸𑀲𑀦𑀯𑀭’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀫𑁆𑀧𑀺 𑀧𑀭𑀺𑀬𑀢𑁆𑀢𑀺𑀲𑀼𑀢𑁆𑀢𑀫𑁂𑀯 𑀲𑀸𑀲𑀦𑀯𑀭𑀦𑁆𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀁 𑀧𑀦 𑀓𑀢𑀺𑀯𑀺𑀥’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑀸𑀤𑀲 𑀧𑀤𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀲𑀗𑁆𑀔𑁂𑀧𑀢𑁄 𑀧𑀪𑁂𑀤𑁂𑀦 𑀤𑁆𑀯𑀸𑀤𑀲𑀯𑀺𑀥𑀦𑁆𑀢𑀺 𑀅𑀢𑁆𑀣𑁄. 𑀧𑀪𑁂𑀤𑀢𑁄 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀩𑁆𑀬𑀜𑁆𑀚𑀦𑀧𑀤𑀅𑀢𑁆𑀣𑀧𑀤𑀢𑁄 𑀧𑀦 𑀤𑀼𑀯𑀺𑀥𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀢𑀲𑁆𑀫𑀺𑀁 𑀤𑁆𑀯𑀬𑁂 𑀏𑀓𑀫𑁂𑀯 𑀲𑀭𑀽𑀧𑀢𑁄 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀉𑀤𑀸𑀳𑀼 𑀉𑀪𑀬’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀉𑀪𑀬𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀯𑀺𑀜𑁆𑀜𑁂𑀬𑁆𑀬𑀁 𑀉𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀘𑀦𑀯𑀘𑀦𑀻𑀬𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁂 𑀬𑀲𑁆𑀫𑀺𑀁 𑀩𑁆𑀬𑀜𑁆𑀚𑀦𑁂, 𑀅𑀢𑁆𑀣𑁂 𑀘 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑁄𑀳𑀸𑀭𑁄 𑀧𑀯𑀢𑁆𑀢𑁄, 𑀢𑀁 𑀉𑀪𑀬𑀁 𑀲𑀭𑀽𑀧𑀢𑁄 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀓𑀺𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀁 𑀓𑀢𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀙𑀩𑁆𑀬𑀜𑁆𑀚𑀦𑀧𑀤𑀙𑀅𑀢𑁆𑀣𑀧𑀤𑀪𑁂𑀤𑁂𑀦 𑀤𑁆𑀯𑀸𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀧𑀤𑀅𑀢𑁆𑀣𑀧𑀤𑀯𑀲𑁂𑀦 𑀤𑀼𑀯𑀺𑀥𑀁 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀼𑀢𑁆𑀢𑀁 𑀫𑀫 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀁 𑀲𑀸𑀲𑀦𑀯𑀭𑀦𑁆𑀢𑀺 𑀜𑀸𑀢𑀩𑁆𑀩𑀁. 𑀲𑀭𑀽𑀧𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀅𑀢𑁆𑀣𑀧𑀤𑀁, 𑀩𑁆𑀬𑀜𑁆𑀚𑀦𑀧𑀤𑀜𑁆𑀘 𑀲𑀭𑀽𑀧𑀢𑁄 𑀜𑀸𑀢𑀩𑁆𑀩𑀦𑁆𑀢𑀺.

𑀏𑀯𑀁 𑀧𑀞𑀫𑀕𑀸𑀣𑀸𑀬 ‘‘𑀲𑀸𑀲𑀦𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀪𑀸𑀯𑀜𑁆𑀘𑁂𑀯 𑀅𑀢𑁆𑀣𑀧𑀤𑀩𑁆𑀬𑀜𑁆𑀚𑀦𑀧𑀤𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀢𑁆𑀢𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀯𑀺𑀘𑀬𑀽𑀧𑀸𑀬𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀧𑀤𑀢𑁆𑀣𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀴𑀲𑀳𑀸𑀭𑀸’’𑀢𑁆𑀬𑀸𑀤𑀺𑀫𑀸𑀳. 𑀅𑀣 𑀯𑀸 𑀤𑀼𑀢𑀺𑀬𑀕𑀸𑀣𑀸𑀬 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀯𑀺𑀲𑀬𑀁 𑀲𑀸𑀲𑀦𑀯𑀭𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑀺𑀢𑀁, ‘‘𑀦𑁂𑀢𑁆𑀢𑀺 𑀦𑀸𑀫 𑀓𑀢𑀫𑀸, 𑀓𑀢𑀺𑀯𑀺𑀥𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀦𑁂𑀢𑁆𑀢𑀺𑀦𑀸𑀫 𑀏𑀢𑁆𑀢𑀺𑀓𑀸𑀢𑀺 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀴𑀲𑀳𑀸𑀭𑀸’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀲 𑀲𑀸𑀲𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀧𑀭𑀺𑀬𑁂𑀝𑁆𑀞𑀺 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀸 𑀫𑀬𑀸 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀦𑁂𑀢𑁆𑀢𑀺 𑀦𑀸𑀫 𑀲𑁄𑀴𑀲𑀳𑀸𑀭𑀲𑀫𑀼𑀤𑀸𑀬𑀸 𑀧𑀜𑁆𑀘𑀦𑀬𑀲𑀫𑀼𑀤𑀸𑀬𑀸 𑀅𑀝𑁆𑀞𑀸𑀭𑀲𑀫𑀽𑀮𑀧𑀤𑀲𑀫𑀼𑀤𑀸𑀬𑀸𑀢𑀺 𑀯𑀺𑀚𑀸𑀦𑀺𑀢𑀩𑁆𑀩𑀸𑀢𑀺.

𑀢𑁂 𑀳𑀸𑀭𑀸𑀤𑀬𑁄 𑀓𑁂𑀦𑀝𑁆𑀞𑁂𑀦 𑀦𑁂𑀢𑁆𑀢𑀺 𑀦𑀸𑀫? 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀅𑀭𑀺𑀬𑀥𑀫𑁆𑀫𑀁 𑀦𑁂𑀢𑀻𑀢𑀺 𑀦𑁂𑀢𑁆𑀢𑀻𑀢𑀺 𑀏𑀯𑀫𑀸𑀤𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀦𑀸𑀲𑀼 (𑀦𑁂𑀢𑁆𑀢𑀺. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀼𑀢𑁆𑀢𑁄𑀯. 𑀇𑀫𑀸𑀬 𑀢𑀢𑀺𑀬𑀕𑀸𑀣𑀸𑀬𑀧𑀺 ‘‘𑀫𑀳𑀸𑀓𑀘𑁆𑀘𑀸𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑀸’’𑀢𑀺 𑀧𑀸𑀞𑁄 𑀲𑀼𑀦𑁆𑀤𑀭𑁄. ‘‘𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑀸’’𑀢𑀺 𑀯𑀸 𑀧𑀸𑀞𑁄, 𑀦 𑀲𑀼𑀦𑁆𑀤𑀭𑁄. 𑀮𑀓𑁆𑀔𑀡𑀜𑁆𑀳𑀺 𑀫𑀬𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑁆𑀢𑀺. ‘‘𑀲𑁄𑀴𑀲𑀳𑀸𑀭𑀸𑀤𑀺𑀲𑀫𑀼𑀤𑀸𑀬𑀸 𑀦𑁂𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸, 𑀢𑁂 𑀳𑀸𑀭𑀸 𑀲𑀼𑀢𑁆𑀢𑀲𑁆𑀲 𑀩𑁆𑀬𑀜𑁆𑀚𑀦𑀯𑀺𑀘𑀬𑁄 𑀯𑀸 𑀳𑁄𑀦𑁆𑀢𑀺, 𑀅𑀢𑁆𑀣𑀯𑀺𑀘𑀬𑁄 𑀯𑀸, 𑀦𑀬𑀸 𑀘 𑀩𑁆𑀬𑀜𑁆𑀚𑀦𑀯𑀺𑀘𑀬𑁄 𑀯𑀸 𑀳𑁄𑀦𑁆𑀢𑀺, 𑀅𑀢𑁆𑀣𑀯𑀺𑀘𑀬𑁄 𑀯𑀸𑀢𑀺 𑀯𑀺𑀘𑀸𑀭𑀡𑀸𑀬𑀁 𑀲𑀢𑀺 ‘‘𑀇𑀫𑁂 𑀇𑀫𑀲𑁆𑀲 𑀯𑀺𑀘𑀬𑁄’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀳𑀸𑀭𑀸 𑀩𑁆𑀬𑀜𑁆𑀚𑀦𑀯𑀺𑀘𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀸𑀭𑀸 𑀲𑀼𑀢𑁆𑀢𑀲𑁆𑀲 𑀩𑁆𑀬𑀜𑁆𑀚𑀦𑀯𑀺𑀘𑀬𑁄 𑀳𑁄𑀦𑁆𑀢𑀺, 𑀦 𑀅𑀢𑁆𑀣𑀯𑀺𑀘𑀬𑁄 𑀲𑁄𑀴𑀲𑀳𑀸𑀭𑀸𑀦𑀁 𑀫𑀽𑀮𑀧𑀤𑀦𑀺𑀤𑁆𑀥𑀸𑀭𑀡𑀁 𑀯𑀚𑁆𑀚𑁂𑀢𑁆𑀯𑀸 𑀩𑁆𑀬𑀜𑁆𑀚𑀦𑀫𑀼𑀔𑁂𑀦𑁂𑀯 𑀲𑀁𑀯𑀡𑁆𑀡𑀦𑀸𑀪𑀸𑀯𑀢𑁄. 𑀢𑀬𑁄 𑀧𑀦 𑀦𑀬𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀺𑀘𑀬𑁄 𑀳𑁄𑀦𑁆𑀢𑀺, 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀫𑀽𑀮𑀧𑀤𑀲𑀗𑁆𑀔𑀸𑀢𑀅𑀯𑀺𑀚𑁆𑀚𑀸𑀤𑀺𑀲𑀪𑀸𑀯𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦𑁂𑀯 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀸𑀯𑀢𑁄𑀢𑀺.

‘‘𑀢𑀁 𑀉𑀪𑀬𑀁 𑀲𑀼𑀢𑁆𑀢𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀓𑁂𑀦𑀘𑀺 𑀓𑀢𑁆𑀣𑀘𑀺𑀬𑁂𑀯 𑀬𑁄𑀚𑁂𑀢𑀩𑁆𑀩𑀁, 𑀉𑀤𑀸𑀳𑀼 𑀲𑀩𑁆𑀩𑀣𑀸 𑀲𑀩𑁆𑀩𑀢𑁆𑀣 𑀬𑁄𑀚𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 𑀢𑀁 𑀉𑀪𑀬𑀁 𑀲𑀩𑁆𑀩𑀢𑁆𑀣 𑀲𑀼𑀢𑁆𑀢𑁂𑀲𑀼 𑀲𑀩𑁆𑀩𑀣𑀸 𑀬𑁄𑀚𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀪𑀬𑀁 𑀧𑀭𑀺𑀕𑁆𑀕𑀳𑀻𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀳𑀸𑀭𑀸 𑀘𑁂𑀯 𑀦𑀬𑀸 𑀘 𑀉𑀪𑀬𑀁 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀕𑀳𑀺𑀢𑀁 𑀲𑀩𑁆𑀩𑀣𑀸 𑀲𑀼𑀢𑁆𑀢𑁂𑀲𑀼 𑀬𑁄𑀚𑀺𑀢𑀦𑁆𑀢𑀺.

‘‘𑀳𑀸𑀭𑀸𑀤𑀺𑀲𑀫𑀼𑀤𑀸𑀬𑀪𑀽𑀢𑀁 𑀦𑁂𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀼𑀢𑁆𑀢𑀁 𑀓𑀣𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀁 𑀬𑀣𑀸𑀲𑀼𑀢𑁆𑀢’’𑀦𑁆𑀢𑀺. 𑀦𑁂𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀁𑀯𑀡𑁆𑀡𑀦𑀸𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀬𑀣𑀸 𑀬𑁂𑀦 𑀬𑁂𑀦 𑀤𑁂𑀲𑀦𑀸𑀳𑀸𑀭𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀁, 𑀢𑁂𑀦 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀁𑀯𑀡𑁆𑀡𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀦𑁂𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀼𑀢𑁆𑀢𑀁 𑀓𑀺𑀢𑁆𑀢𑀓𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀁 𑀬𑀣𑀸𑀲𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀬𑀣𑀸𑀲𑀼𑀢𑁆𑀢𑀁 𑀬𑀁 𑀬𑀁 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀢𑀁 𑀢𑀁 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀦𑁂𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀼𑀢𑁆𑀢𑀁 𑀯𑀼𑀘𑁆𑀘𑀢𑀺 𑀯𑀤𑀢𑀺 𑀅𑀲𑁆𑀲𑀸𑀤𑀸𑀤𑀻𑀦𑀯𑀤𑀲𑁆𑀲𑀦𑀯𑀲𑁂𑀦 𑀲𑀁𑀯𑀡𑁆𑀡𑁂𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑁂𑀢𑁆𑀢𑀺𑀦𑀬𑁂𑀦 𑀳𑀺 𑀲𑀁𑀯𑀡𑁆𑀡𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀦𑀢𑁆𑀣𑀻’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸).

‘‘𑀬𑀁 𑀬𑀁 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀲𑀼𑀢𑁆𑀢𑀁 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀬 𑀲𑀁𑀯𑀡𑁆𑀡𑀺𑀢𑀁, 𑀲𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀸 𑀤𑁂𑀲𑀦𑀸 𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀉𑀤𑀸𑀳𑀼 𑀤𑁂𑀲𑀺𑀢𑀩𑁆𑀩𑀜𑁆𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀬𑀸 𑀘𑁂𑀯 𑀤𑁂𑀲𑀦𑀸’’𑀢𑁆𑀬𑀸𑀤𑀺𑀫𑀸𑀳. 𑀬𑀸 𑀘𑁂𑀯 𑀤𑁂𑀲𑀦𑀸 𑀧𑀸𑀴𑀺 𑀲𑀁𑀯𑀡𑁆𑀡𑀺𑀢𑀸, 𑀲𑀸 𑀘, 𑀢𑀸𑀬 𑀤𑁂𑀲𑀦𑀸𑀬 𑀤𑁂𑀲𑀺𑀢𑀁 𑀬𑀁 𑀥𑀫𑁆𑀫𑀚𑀸𑀢𑀁, 𑀢𑀜𑁆𑀘 𑀉𑀪𑀬𑀁 𑀯𑀺𑀫𑀼𑀢𑁆𑀢𑀸𑀬𑀢𑀦𑀤𑁂𑀲𑀦𑀸𑀲𑀻𑀲𑁂𑀦 𑀧𑀭𑀺𑀘𑀬𑀁 𑀓𑀭𑁄𑀦𑁆𑀢𑁂𑀳𑀺 𑀏𑀓𑀦𑁆𑀢𑁂𑀦 𑀯𑀺𑀜𑁆𑀜𑁂𑀬𑁆𑀬𑀁 𑀉𑀪𑀬𑀲𑁆𑀲𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀸𑀦𑀁 𑀲𑀫𑁆𑀧𑀢𑁆𑀢𑀻𑀦𑀁 𑀳𑁂𑀢𑀼𑀪𑀸𑀯𑀢𑁄. ‘‘𑀢𑀲𑁆𑀲 𑀉𑀪𑀬𑀲𑁆𑀲 𑀯𑀺𑀚𑀸𑀦𑀦𑁂 𑀲𑀸𑀥𑁂𑀢𑀩𑁆𑀩𑁂 𑀲𑀸𑀥𑁂𑀢𑀩𑁆𑀩𑀲𑁆𑀲 𑀯𑀺𑀚𑀸𑀦𑀦𑀲𑁆𑀲 𑀳𑁂𑀢𑀼𑀪𑀽𑀢𑀸 𑀓𑀢𑀫𑀸 𑀅𑀦𑀼𑀧𑀼𑀩𑁆𑀩𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀢𑀢𑁆𑀭𑀸’’𑀢𑁆𑀬𑀸𑀤𑀺. 𑀢𑀢𑁆𑀣 𑀢𑀢𑁆𑀭 𑀯𑀺𑀚𑀸𑀦𑀦𑁂 𑀲𑀸𑀥𑁂𑀢𑀩𑁆𑀩𑁂 𑀲𑀼𑀢𑁆𑀢𑀸𑀤𑀺𑀦𑀯𑀗𑁆𑀕𑀲𑁆𑀲 𑀲𑀸𑀲𑀦𑀲𑁆𑀲 𑀅𑀢𑁆𑀣𑀧𑀭𑀺𑀬𑁂𑀲𑀦𑀸 𑀅𑀢𑁆𑀣𑀯𑀺𑀘𑀸𑀭𑀡𑀸 𑀳𑀸𑀭𑀦𑀬𑀸𑀦𑀁 𑀅𑀬𑀁 𑀅𑀦𑀼𑀧𑀼𑀩𑁆𑀩𑀻 𑀯𑀺𑀚𑀸𑀦𑀦𑀲𑁆𑀲 𑀲𑀸𑀥𑁂𑀢𑀩𑁆𑀩𑀲𑁆𑀲 𑀳𑁂𑀢𑀼𑀪𑀽𑀢𑀸 𑀅𑀦𑀼𑀧𑀼𑀩𑁆𑀩𑀻 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀲𑁆𑀲 𑀉𑀪𑀬𑀲𑁆𑀲 𑀯𑀺𑀚𑀸𑀦𑀦𑁂 𑀲𑀸𑀥𑁂𑀢𑀩𑁆𑀩𑁂 𑀲𑀼𑀢𑁆𑀢𑀸𑀤𑀺𑀦𑀯𑀗𑁆𑀕𑀲𑁆𑀲 𑀲𑀸𑀲𑀦𑀲𑁆𑀲 𑀅𑀢𑁆𑀣𑀧𑀭𑀺𑀬𑁂𑀲𑀦𑀸𑀬 𑀅𑀢𑁆𑀣𑀯𑀺𑀘𑀸𑀭𑀡𑀸𑀬 𑀅𑀬𑀁 𑀅𑀦𑀼𑀧𑀼𑀩𑁆𑀩𑀻 𑀯𑀺𑀚𑀸𑀦𑀦𑀲𑁆𑀲 𑀲𑀸𑀥𑁂𑀢𑀩𑁆𑀩𑀲𑁆𑀲 𑀳𑁂𑀢𑀼𑀪𑀽𑀢𑀸 𑀅𑀦𑀼𑀧𑀼𑀩𑁆𑀩𑀻 𑀦𑀸𑀫𑀸𑀢𑀺. 𑀅𑀣 𑀯𑀸 𑀯𑀓𑁆𑀔𑀫𑀸𑀦𑀸𑀬 𑀳𑀸𑀭𑀦𑀬𑀸𑀦𑀼𑀧𑀼𑀩𑁆𑀩𑀺𑀬𑀸 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀲𑀦𑀸 𑀯𑀺𑀚𑀸𑀦𑀦𑀲𑁆𑀲 𑀳𑁂𑀢𑀼𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀓𑀸𑀭𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑀢𑀺𑀥𑀸 𑀯𑀼𑀢𑁆𑀢𑀸𑀢𑀺.

𑀲𑀗𑁆𑀕𑀳𑀯𑀸𑀭𑀲𑁆𑀲 𑀅𑀢𑁆𑀣𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁆𑀤𑁂𑀲𑀯𑀸𑀭𑀅𑀢𑁆𑀣𑀯𑀺𑀪𑀸𑀯𑀦𑀸

𑁧. 𑀏𑀯𑀁 𑀲𑀗𑁆𑀕𑀳𑀯𑀸𑀭𑁂𑀦 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑀺𑀢𑁂 𑀳𑀸𑀭𑀸𑀤𑀬𑁄 𑀇𑀤𑀸𑀦𑀺 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸’’𑀢𑀺𑀆𑀤𑀺𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀅𑀣 𑀯𑀸 𑀲𑁄𑀴𑀲𑀳𑀸𑀭𑀸𑀤𑀺𑀲𑀫𑀼𑀤𑀸𑀬𑀸 𑀦𑁂𑀢𑁆𑀢𑀺 𑀦𑀸𑀫 𑀫𑀬𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀸, ‘‘𑀓𑀢𑀫𑁂 𑀢𑁂 𑀲𑁄𑀴𑀲 𑀳𑀸𑀭𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀲𑁄𑀴𑀲 𑀳𑀸𑀭𑀸’’𑀢𑁆𑀬𑀸𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑁄𑀴𑀲𑀳𑀸𑀭𑀸𑀤𑀻𑀲𑀼. 𑀤𑁂𑀲𑀦𑀸 𑀳𑀸𑀭𑁄, 𑀯𑀺𑀘𑀬𑁄 𑀳𑀸𑀭𑁄…𑀧𑁂… 𑀲𑀸𑀫𑀸𑀭𑁄𑀧𑀦𑁄 𑀳𑀸𑀭𑁄𑀢𑀺 𑀇𑀫𑁂 𑀲𑁄𑀴𑀲 𑀳𑀸𑀭𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀢𑀢𑁆𑀣 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀳𑀸𑀭𑀧𑀤𑀲𑁆𑀲 𑀯𑀘𑀦𑀢𑁆𑀣𑁄 𑀧𑀞𑀫𑀁 𑀯𑀢𑁆𑀢𑀩𑁆𑀩𑁄. 𑀓𑁂𑀦𑀝𑁆𑀞𑁂𑀦 𑀳𑀸𑀭𑀸𑀢𑀺? 𑀳𑀭𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀳𑀸𑀭𑀸. 𑀏𑀢𑁂𑀳𑀺 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀳𑀺 𑀲𑀁𑀯𑀡𑁆𑀡𑀺𑀬𑁂𑀲𑀼 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀻𑀲𑀼 𑀅𑀜𑁆𑀜𑀸𑀡𑀲𑀁𑀲𑀬𑀯𑀺𑀧𑀮𑁆𑀮𑀸𑀲𑀸 𑀳𑀭𑀻𑀬𑀦𑁆𑀢𑀺, 𑀇𑀢𑀺 𑀅𑀜𑁆𑀜𑀸𑀡𑀸𑀤𑀺𑀳𑀭𑀡𑀓𑀸𑀭𑀡𑀢𑁆𑀢𑀸 ‘‘𑀏𑀢𑁂𑀳𑀻’’𑀢𑀺 𑀧𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸 𑀳𑀸𑀭𑀸 𑀦𑀸𑀫, 𑀳𑀭-𑀥𑀸𑀢𑀼𑀬𑀸 𑀆𑀘𑀭𑀺𑀬𑀲𑁆𑀲 𑀯𑀘𑀻𑀪𑁂𑀤𑀲𑀤𑁆𑀤𑁄, 𑀢𑀁𑀲𑀫𑀼𑀝𑁆𑀞𑀸𑀧𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘 𑀫𑀼𑀔𑁆𑀬𑀢𑁆𑀣𑁄, 𑀯𑁂𑀦𑁂𑀬𑁆𑀬𑀸𑀦𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀚𑀸𑀦𑀦𑀸𑀤𑀺𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀓𑀸𑀭𑀡𑀽𑀧𑀘𑀸𑀭𑀢𑁆𑀣𑁄, 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑀸𑀦𑀁 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑀢𑁆𑀢𑀺 𑀨𑀮𑀽𑀧𑀘𑀸𑀭𑀢𑁆𑀣𑁄, 𑀇𑀢𑀺-𑀲𑀤𑁆𑀤𑁂𑀦 𑀲𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑀢𑁆𑀢𑀺𑀬𑁂𑀯 𑀧𑀭𑀸𑀫𑀲𑀻𑀬𑀢𑀺. 𑀢𑀁𑀲𑀢𑁆𑀢𑀺𑀲𑀫𑁆𑀧𑀦𑁆𑀦𑀸 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸 𑀡-𑀧𑀘𑁆𑀘𑀬𑀢𑁆𑀣𑀸 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼𑀧𑀺. 𑀯𑀺𑀢𑁆𑀣𑀸𑀭𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧) 𑀯𑀼𑀢𑁆𑀢𑁄 𑀏𑀯.

𑀅𑀲𑀸𑀥𑀸𑀭𑀡𑀢𑁄 𑀧𑀦 𑀤𑁂𑀲𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑁂𑀲𑀦𑀸. 𑀏𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀢𑁆𑀣𑁄 𑀤𑁂𑀲𑀻𑀬𑀢𑀺 𑀲𑀁𑀯𑀡𑁆𑀡𑀻𑀬𑀢𑀺 𑀲𑀁𑀯𑀡𑁆𑀡𑀦𑀸𑀦𑀼𑀲𑀸𑀭𑁂𑀦 𑀜𑀸𑀧𑀻𑀬𑀢𑀺, 𑀇𑀢𑀺 𑀜𑀸𑀧𑀦𑀓𑀸𑀭𑀡𑀢𑁆𑀢𑀸 ‘‘𑀏𑀢𑀸𑀬𑀸’’𑀢𑀺 𑀧𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀯𑀺𑀲𑁂𑀲𑀲𑀁𑀯𑀡𑁆𑀡𑀦𑀸 𑀤𑁂𑀲𑀦𑀸 𑀦𑀸𑀫, 𑀦 𑀧𑀸𑀴𑀺𑀤𑁂𑀲𑀦𑀸, 𑀧𑀸𑀴𑀺𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀲𑀳𑀘𑀭𑀡𑀢𑁄 𑀯𑀸 𑀤𑁂𑀲𑀦𑀸. 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑁂 𑀳𑀸𑀭𑀸 𑀤𑁂𑀲𑀦𑀸𑀧𑀸𑀴𑀺𑀲𑀗𑁆𑀔𑀸𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀸𑀯𑀢𑁄 𑀤𑁂𑀲𑀦𑀸𑀬 𑀲𑀳𑀘𑀸𑀭𑀺𑀦𑁄 𑀳𑁄𑀦𑁆𑀢𑀺, 𑀅𑀬𑀁 𑀧𑀦 𑀳𑀸𑀭𑁄 𑀬𑁂𑀪𑀼𑀬𑁆𑀬𑁂𑀦 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀧𑀸𑀴𑀺𑀤𑁂𑀲𑀦𑀸𑀬 𑀲𑀳 𑀘𑀭𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀦 𑀢𑀣𑀸 𑀧𑀭𑁂. 𑀦 𑀳𑀺 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀤𑀺𑀲𑀦𑁆𑀤𑀲𑁆𑀲𑀦𑀮𑀓𑁆𑀔𑀡𑀭𑀳𑀺𑀢𑀸 𑀧𑀸𑀴𑀺𑀤𑁂𑀲𑀦𑀸 𑀅𑀢𑁆𑀣𑀺, 𑀅𑀬𑀜𑁆𑀘 𑀳𑀸𑀭𑁄 𑀅𑀲𑁆𑀲𑀸𑀤𑀸𑀤𑀺𑀲𑀦𑁆𑀤𑀲𑁆𑀲𑀦𑀮𑀓𑁆𑀔𑀡𑁄𑀢𑀺.

𑀯𑀺𑀘𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀺𑀘𑀬𑁄. 𑀏𑀢𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀲𑀼𑀢𑁆𑀢𑁂 𑀧𑀤𑀧𑀜𑁆𑀳𑀸𑀤𑀬𑁄 𑀯𑀺𑀘𑀺𑀬𑀦𑁆𑀢𑀺, 𑀇𑀢𑀺 𑀯𑀺𑀘𑀸𑀭𑀡𑀓𑀸𑀭𑀡𑀢𑁆𑀢𑀸 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑁄 𑀦𑀸𑀫. 𑀓𑀢𑁆𑀯𑀢𑁆𑀣𑀸𑀥𑀺𑀓𑀭𑀡𑀢𑁆𑀣𑀸𑀧𑀺 𑀮𑀩𑁆𑀪𑀦𑁆𑀢𑀺. 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑁂𑀦 𑀧𑀤𑀧𑀜𑁆𑀳𑀸𑀤𑀺𑀯𑀺𑀘𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑁄 𑀳𑀸𑀭𑁄.

𑀬𑀼𑀢𑁆𑀢𑀸𑀬𑀼𑀢𑁆𑀢𑀺 𑀯𑀺𑀘𑀸𑀭𑀻𑀬𑀢𑀺 𑀏𑀢𑀸𑀬𑀸𑀢𑀺 𑀬𑀼𑀢𑁆𑀢𑀺. 𑀏𑀢𑀸𑀬 𑀯𑀺𑀲𑁂𑀲𑀲𑀁𑀯𑀡𑁆𑀡𑀦𑀸𑀬 𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁 𑀪𑀽𑀫𑀺𑀕𑁄𑀘𑀭𑀸𑀦𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀺 𑀯𑀺𑀘𑀸𑀭𑀻𑀬𑀢𑀺, 𑀇𑀢𑀺 𑀯𑀺𑀘𑀸𑀭𑀡𑀓𑀸𑀭𑀡𑀢𑁆𑀢𑀸 ‘‘𑀏𑀢𑀸𑀬𑀸’’𑀢𑀺 𑀧𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀯𑀺𑀲𑁂𑀲𑀲𑀁𑀯𑀡𑁆𑀡𑀦𑀸 𑀬𑀼𑀢𑁆𑀢𑀺 𑀦𑀸𑀫. 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀬𑀼𑀢𑁆𑀢𑀺𑀬𑀸 𑀯𑀺𑀘𑀸𑀭𑀡𑀸, 𑀯𑀺𑀘𑀸𑀭𑀡𑀻𑀬𑀪𑀸𑀯𑁂𑀦 𑀲𑀳𑀘𑀭𑀡𑀢𑁄 𑀯𑀸 𑀬𑀼𑀢𑁆𑀢𑀺. 𑀲𑀩𑁆𑀩𑀳𑀸𑀭𑀸𑀦𑀁 𑀪𑀽𑀫𑀺𑀕𑁄𑀘𑀭𑀸𑀦𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀬𑀼𑀢𑁆𑀢𑀺 𑀳𑀸𑀭𑁄.

𑀧𑀤𑀢𑀺 𑀧𑀯𑀢𑁆𑀢𑁂𑀢𑀺 𑀨𑀮𑀁 𑀏𑀢𑁂𑀦𑀸𑀢𑀺 𑀧𑀤𑀁, 𑀓𑀸𑀭𑀡𑀁. 𑀞𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀨𑀮𑀸𑀦𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀓𑀸𑀭𑀡𑀁. 𑀧𑀤𑀜𑁆𑀘 𑀢𑀁 𑀞𑀸𑀦𑀜𑁆𑀘𑀸𑀢𑀺 𑀧𑀤𑀝𑁆𑀞𑀸𑀦𑀁, 𑀆𑀲𑀦𑁆𑀦𑀓𑀸𑀭𑀡𑀁. 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀁 𑀯𑀺𑀘𑀸𑀭𑀻𑀬𑀢𑀺 𑀏𑀢𑀸𑀬𑀸𑀢𑀺 𑀧𑀤𑀝𑁆𑀞𑀸𑀦𑀸, 𑀯𑀺𑀲𑁂𑀲𑀲𑀁𑀯𑀡𑁆𑀡𑀦𑀸, 𑀯𑀺𑀘𑀸𑀭𑀡𑀮𑁄𑀧𑁄𑀯, 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀸𑀦𑀁, 𑀢𑁂𑀲𑀜𑁆𑀘 𑀧𑀤𑀝𑁆𑀞𑀸𑀦𑀸𑀦𑀁 𑀯𑀺𑀘𑀸𑀭𑀡𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄.

𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑀸𑀧𑀺 𑀲𑀫𑀸𑀦𑀮𑀓𑁆𑀔𑀡𑀸 𑀥𑀫𑁆𑀫𑀸 𑀮𑀓𑁆𑀔𑀻𑀬𑀦𑁆𑀢𑀺 𑀏𑀢𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦𑀸𑀢𑀺 𑀮𑀓𑁆𑀔𑀡𑁄, 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀦 𑀥𑀫𑁆𑀫𑁂𑀦 𑀲𑀫𑀸𑀦𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀮𑀓𑁆𑀔𑀡𑁄 𑀳𑀸𑀭𑁄.

𑀲𑀼𑀢𑁆𑀢𑁂 𑀤𑀲𑁆𑀲𑀺𑀬𑀫𑀸𑀦𑀸 𑀦𑀺𑀩𑁆𑀩𑀘𑀦𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀯𑀺𑀬𑀽𑀳𑀻𑀬𑀦𑁆𑀢𑀺 𑀯𑀺𑀪𑀸𑀕𑁂𑀦 𑀲𑀫𑁆𑀧𑀺𑀡𑁆𑀟𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀩𑁆𑀬𑀽𑀳𑁄, 𑀘𑀢𑀼𑀦𑁆𑀦𑀁 𑀦𑀺𑀩𑁆𑀩𑀘𑀦𑀸𑀤𑀻𑀦𑀁 𑀩𑁆𑀬𑀽𑀳𑁄 𑀘𑀢𑀼𑀩𑁆𑀬𑀽𑀳𑁄. 𑀦𑀺𑀩𑁆𑀩𑀘𑀦𑀸𑀥𑀺𑀧𑁆𑀧𑀸𑀬𑀩𑁆𑀬𑀜𑁆𑀚𑀦𑀸𑀦𑀜𑁆𑀘𑁂𑀯 𑀤𑁂𑀲𑀦𑀸𑀦𑀺𑀤𑀸𑀦𑀲𑁆𑀲 𑀘 𑀧𑀼𑀩𑁆𑀩𑀸𑀧𑀭𑁂𑀦 𑀲𑀤𑁆𑀥𑀺𑀁 𑀲𑀦𑁆𑀤𑀲𑁆𑀲𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀤𑁂𑀲𑀦𑀸𑀬 𑀕𑀳𑀺𑀢𑀥𑀫𑁆𑀫𑁂𑀦 𑀲𑀪𑀸𑀕𑀸, 𑀯𑀺𑀲𑀪𑀸𑀕𑀸 𑀘 𑀥𑀫𑁆𑀫𑀸 𑀆𑀯𑀝𑁆𑀝𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀆𑀯𑀝𑁆𑀝𑁄, 𑀤𑁂𑀲𑀦𑀸𑀬 𑀕𑀳𑀺𑀢𑀥𑀫𑁆𑀫𑀸𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀆𑀯𑀝𑁆𑀝𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀆𑀯𑀝𑁆𑀝𑁄 𑀳𑀸𑀭𑁄.

𑀅𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀸𑀦𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑁂, 𑀯𑁄𑀤𑀸𑀦𑀥𑀫𑁆𑀫𑁂 𑀘 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀢𑁄, 𑀧𑀤𑀝𑁆𑀞𑀸𑀦𑀢𑁄, 𑀪𑀽𑀫𑀺𑀢𑁄 𑀘 𑀯𑀺𑀪𑀚𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀪𑀢𑁆𑀢𑀺 𑀳𑀸𑀭𑁄.

𑀲𑀼𑀢𑁆𑀢𑁂 𑀦𑀺𑀤𑁆𑀤𑀺𑀝𑁆𑀞𑀸 𑀥𑀫𑁆𑀫𑀸 𑀧𑀝𑀺𑀧𑀓𑁆𑀔𑀯𑀲𑁂𑀦 𑀧𑀭𑀺𑀯𑀢𑁆𑀢𑀻𑀬𑀦𑁆𑀢𑀺 𑀇𑀫𑀺𑀦𑀸, 𑀏𑀢𑁆𑀣 𑀯𑀸𑀢𑀺 𑀧𑀭𑀺𑀯𑀢𑁆𑀢𑁄, 𑀲𑀼𑀢𑁆𑀢𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀢𑁄 𑀧𑀭𑀺𑀯𑀢𑁆𑀢𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄.

𑀲𑀼𑀢𑁆𑀢𑁂 𑀯𑀼𑀢𑁆𑀢𑀲𑁆𑀲 𑀏𑀓𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀯𑀸𑀘𑀓𑀁 𑀯𑀺𑀯𑀺𑀥𑀁 𑀯𑀘𑀦𑀁 𑀏𑀢𑁆𑀣 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀢𑀺 𑀯𑀺𑀯𑀘𑀦𑀁, 𑀯𑀺𑀯𑀘𑀦𑀫𑁂𑀯 𑀯𑁂𑀯𑀘𑀦𑀁, 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀅𑀦𑁂𑀓𑀧𑀭𑀺𑀬𑀸𑀬𑀲𑀤𑁆𑀤𑀬𑁄𑀚𑀦𑀸𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑁂𑀯𑀘𑀦𑁄 𑀳𑀸𑀭𑁄.

𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀅𑀢𑁆𑀣𑀸 𑀧𑀓𑀸𑀭𑁂𑀳𑀺 𑀜𑀸𑀧𑀻𑀬𑀦𑁆𑀢𑀺 𑀇𑀫𑀺𑀦𑀸, 𑀏𑀢𑁆𑀣 𑀯𑀸𑀢𑀺 𑀧𑀜𑁆𑀜𑀢𑁆𑀢𑀺, 𑀏𑀓𑁂𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑁂𑀓𑀸𑀳𑀺 𑀧𑀜𑁆𑀜𑀢𑁆𑀢𑀻𑀳𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀓𑀸𑀭𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄.

𑀲𑀼𑀢𑁆𑀢𑀸𑀕𑀢𑀸 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀲𑀼 𑀑𑀢𑀭𑀻𑀬𑀦𑁆𑀢𑀺 𑀅𑀦𑀼𑀧𑁆𑀧𑀯𑁂𑀲𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀑𑀢𑀭𑀡𑁄, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀫𑀼𑀔𑁂𑀳𑀺 𑀲𑀼𑀢𑁆𑀢𑀢𑁆𑀣𑀲𑁆𑀲 𑀑𑀢𑀭𑀡𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀑𑀢𑀭𑀡𑁄 𑀳𑀸𑀭𑁄.

𑀲𑀼𑀢𑁆𑀢𑁂 𑀧𑀤𑀧𑀤𑀢𑁆𑀣𑀧𑀜𑁆𑀳𑀸𑀭𑀫𑁆𑀪𑀸 𑀲𑁄𑀥𑀻𑀬𑀦𑁆𑀢𑀺 𑀲𑀫𑀸𑀥𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀲𑁄𑀥𑀦𑁄, 𑀲𑀼𑀢𑁆𑀢𑁂 𑀧𑀤𑀧𑀤𑀢𑁆𑀣𑀧𑀜𑁆𑀳𑀸𑀭𑀫𑁆𑀪𑀸𑀦𑀁 𑀲𑁄𑀥𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑁄𑀥𑀦𑁄 𑀳𑀸𑀭𑁄.

𑀲𑀸𑀫𑀜𑁆𑀜𑀯𑀺𑀲𑁂𑀲𑀪𑀽𑀢𑀸 𑀥𑀫𑁆𑀫𑀸 𑀯𑀺𑀦𑀸 𑀯𑀺𑀓𑀧𑁆𑀧𑁂𑀦 𑀅𑀥𑀺𑀝𑁆𑀞𑀻𑀬𑀦𑁆𑀢𑀺 𑀅𑀦𑀼𑀧𑁆𑀧𑀯𑀢𑁆𑀢𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑁄, 𑀲𑀼𑀢𑁆𑀢𑀸𑀕𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀓𑀧𑁆𑀧𑀦𑀯𑀲𑁂𑀦 𑀲𑀸𑀫𑀜𑁆𑀜𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑀬𑁄 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘 𑀨𑀮𑀁 𑀧𑀭𑀺𑀓𑀭𑁄𑀢𑀺 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀇𑀢𑀺 𑀲𑁄 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘 𑀧𑀭𑀺𑀓𑁆𑀔𑀸𑀭𑁄, 𑀬𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀢𑀁 𑀧𑀭𑀺𑀓𑁆𑀔𑀸𑀭𑀁 𑀳𑁂𑀢𑀼𑀜𑁆𑀘𑁂𑀯 𑀧𑀘𑁆𑀘𑀬𑀜𑁆𑀘 𑀆𑀘𑀺𑀓𑁆𑀔𑀢𑀺, 𑀇𑀢𑀺 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫. 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑁂 𑀳𑁂𑀢𑀼𑀧𑀘𑁆𑀘𑀬𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀁𑀯𑀡𑁆𑀡𑀦𑀸𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄.

𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸 𑀧𑀤𑀝𑁆𑀞𑀸𑀦𑀸𑀤𑀺𑀫𑀼𑀔𑁂𑀦 𑀲𑀫𑀸𑀭𑁄𑀧𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀲𑀫𑀸𑀭𑁄𑀧𑀦𑁄, 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀯𑁂𑀯𑀘𑀦𑀪𑀸𑀯𑀧𑀳𑀸𑀦𑀲𑀫𑀸𑀭𑁄𑀧𑀦𑀯𑀺𑀘𑀸𑀭𑀡𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄. 𑀪𑀸𑀯𑀲𑀸𑀥𑀦𑀯𑀲𑁂𑀦𑀸𑀧𑀺 𑀲𑀩𑁆𑀩𑀢𑁆𑀣 𑀯𑀘𑀦𑀢𑁆𑀣𑁄 𑀯𑀢𑁆𑀢𑀩𑁆𑀩𑁄𑀢𑀺 𑀢𑀲𑁆𑀲𑀸𑀧𑀺 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺. 𑀲𑁂𑀲𑀁 𑀲𑀁𑀯𑀡𑁆𑀡𑀦𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀦𑁆𑀢𑀺.

‘‘𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸 𑀤𑁂𑀲𑀦𑀸’’𑀢𑁆𑀬𑀸𑀤𑀺𑀦𑀸 𑀳𑀸𑀭𑀲𑀭𑀽𑀧𑀁 𑀯𑀼𑀢𑁆𑀢𑀁, 𑀓𑀺𑀫𑀢𑁆𑀣𑀁 ‘‘𑀢𑀲𑁆𑀲𑀸𑀦𑀼𑀕𑀻𑀢𑀺’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀦𑁆𑀢𑀺? 𑀅𑀦𑀼𑀕𑀻𑀢𑀺𑀕𑀸𑀣𑀸𑀬 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀧𑀼𑀦 ‘‘𑀢𑀲𑁆𑀲𑀸𑀦𑀼𑀕𑀻𑀢𑀺 𑀤𑁂𑀲𑀦𑀸 𑀯𑀺𑀘𑀬𑁄 𑀬𑀼𑀢𑁆𑀢𑀺’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀳𑀸𑀭𑀼𑀤𑁆𑀤𑁂𑀲𑀲𑁆𑀲. 𑀅𑀦𑀼𑀕𑀻𑀢𑀻𑀢𑀺 𑀅𑀦𑀼 𑀧𑀘𑁆𑀙𑀸 𑀕𑀸𑀬𑀦𑀕𑀸𑀣𑀸. 𑀧𑀜𑁆𑀘𑀤𑀲𑁄𑀢𑀺 𑀧𑀜𑁆𑀘𑀤𑀲𑀫𑁄. 𑀲𑁄𑀴𑀲𑁄𑀢𑀺 𑀲𑁄𑀴𑀲𑀫𑁄. 𑀅𑀢𑁆𑀣𑀢𑁄 𑀅𑀲𑀁𑀓𑀺𑀡𑁆𑀡𑀸𑀢𑀺 𑀤𑁂𑀲𑀦𑀸𑀤𑀺𑀧𑀤𑀢𑁆𑀣𑀢𑁄 𑀮𑀓𑁆𑀔𑀡𑀢𑁆𑀣𑀢𑁄 𑀲𑀗𑁆𑀓𑀭𑀢𑁄 𑀭𑀳𑀺𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁄 𑀘 𑀦𑁂𑀲𑀁 𑀅𑀲𑀗𑁆𑀓𑀭𑁄 𑀮𑀓𑁆𑀔𑀡𑀦𑀺𑀤𑁆𑀤𑁂𑀲𑁂 𑀲𑀼𑀧𑀸𑀓𑀝𑁄 𑀳𑁄𑀢𑀻’’𑀢𑀺. 𑀲𑁂𑀲𑀁 𑀲𑀁𑀯𑀡𑁆𑀡𑀦𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀦𑁆𑀢𑀺. ‘‘𑀓𑁂𑀘𑀺 𑀳𑀸𑀭𑀸 𑀓𑁂𑀳𑀺𑀘𑀺 𑀳𑀸𑀭𑁂𑀳𑀺 𑀲𑀁𑀓𑀺𑀡𑁆𑀡𑀸 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀓𑀲𑁆𑀫𑀸 𑀅𑀲𑀁𑀓𑀺𑀡𑁆𑀡𑀸𑀢𑀺 𑀜𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀢𑁂𑀲𑀜𑁆𑀘𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁂𑀲𑀜𑁆𑀘𑁂𑀯 𑀪𑀯𑀢𑀻𑀢𑀺 𑀏𑀢𑁂𑀲𑀁 𑀲𑁄𑀴𑀲𑀦𑁆𑀦𑀁 𑀳𑀸𑀭𑀸𑀦𑀁 𑀬𑀣𑀸 𑀬𑁂𑀦𑀸𑀓𑀸𑀭𑁂𑀦 𑀅𑀲𑀗𑁆𑀓𑀭𑁄 𑀳𑁄𑀢𑀺, 𑀢𑀣𑀸 𑀅𑀲𑀗𑁆𑀓𑀭𑀸𑀓𑀸𑀭𑁂𑀦 𑀪𑀯𑀢𑀺. 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀦𑀬𑀯𑀺𑀪𑀢𑁆𑀢𑀻𑀢𑀺 𑀅𑀬𑀸, 𑀯𑀺𑀢𑁆𑀣𑀸𑀭𑁂𑀦 𑀅𑀬𑀸𑀢𑀺 𑀯𑀺𑀢𑁆𑀣𑀸𑀭𑀢𑀬𑀸, 𑀢-𑀓𑀸𑀭𑁄 𑀫𑀺𑀲𑁆𑀲𑀓𑀤𑁄𑀲𑀸𑀧𑀕𑀫𑀢𑁆𑀣𑀸𑀬 𑀆𑀕𑀢𑁄, 𑀦𑀬𑀯𑀺𑀪𑀢𑁆𑀢𑀺𑀯𑀺𑀲𑁂𑀲𑀯𑀘𑀦𑀁. 𑀦𑀬𑁂𑀦 𑀜𑀸𑀬𑁂𑀦 𑀯𑀺𑀪𑀢𑁆𑀢𑀺 𑀦𑀬𑀯𑀺𑀪𑀢𑁆𑀢𑀺, 𑀦 𑀧𑀜𑁆𑀘𑀦𑀬𑀯𑀺𑀪𑀢𑁆𑀢𑀸𑀳𑀸𑀭𑀸𑀦𑀁 𑀯𑀺𑀢𑁆𑀣𑀸𑀭𑁂𑀦 𑀧𑀯𑀢𑁆𑀢𑀸 𑀜𑀸𑀬𑀯𑀺𑀪𑀢𑁆𑀢𑀺 𑀢𑀣𑀸 𑀅𑀲𑀗𑁆𑀓𑀭𑀸𑀓𑀸𑀭𑁂𑀦 𑀪𑀯𑀢𑀺 𑀢𑀲𑁆𑀫𑀺𑀁 𑀅𑀲𑀁𑀓𑀺𑀡𑁆𑀡𑀸𑀢𑀺 𑀜𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨. 𑀲𑁄𑀴𑀲 𑀳𑀸𑀭𑀸 𑀲𑀭𑀽𑀧𑀢𑁄 𑀯𑀼𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀯𑀺𑀜𑁆𑀜𑀸𑀢𑀸, ‘‘𑀓𑀢𑀫𑁂 𑀧𑀜𑁆𑀘 𑀦𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀢𑀣𑀸 𑀧𑀼𑀘𑁆𑀙𑀺𑀢𑁆𑀯𑀸 𑀲𑀭𑀽𑀧𑀢𑁄 𑀉𑀤𑁆𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁂 𑀧𑀜𑁆𑀘 𑀦𑀬𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀳𑀸𑀭𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑀬𑁂 𑀉𑀤𑁆𑀤𑀺𑀲𑀺𑀢𑀼𑀁 ‘𑀢𑀢𑁆𑀣 𑀓𑀢𑀫𑁂’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨) 𑀯𑀼𑀢𑁆𑀢𑀁. ‘‘𑀢𑀢𑁆𑀣 𑀦𑀬𑀦𑁆𑀢𑀺 𑀲𑀁𑀓𑀺𑀮𑁂𑀲𑁂, 𑀯𑁄𑀤𑀸𑀦𑁂 𑀘 𑀯𑀺𑀪𑀸𑀕𑀢𑁄 𑀜𑀸𑀧𑁂𑀦𑁆𑀢𑀻𑀢𑀺 𑀦𑀬𑀸, 𑀦𑀻𑀬𑀦𑁆𑀢𑀺 𑀯𑀸 𑀢𑀸𑀦𑀺 𑀏𑀢𑁆𑀣, 𑀏𑀢𑁂𑀳𑀺 𑀯𑀸𑀢𑀺 𑀦𑀬𑀸’’𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨) 𑀅𑀝𑁆𑀞𑀓𑀣𑀸𑀬𑀁 𑀯𑀺𑀢𑁆𑀣𑀸𑀭𑁂𑀦 𑀯𑀘𑀦𑀢𑁆𑀣𑁄 𑀯𑀼𑀢𑁆𑀢𑁄. 𑀦𑀻-𑀥𑀸𑀢𑀼𑀬𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀺𑀦𑀬𑀸𑀦𑀼𑀲𑀸𑀭𑁂𑀦 𑀲𑀁𑀓𑀺𑀮𑁂𑀲𑁂, 𑀯𑁄𑀤𑀸𑀦𑁂 𑀘 𑀆𑀮𑀫𑁆𑀩𑀺𑀢𑁆𑀯𑀸 𑀧𑀯𑀢𑁆𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀫𑀼𑀔𑁆𑀬𑀢𑁆𑀣𑁄, 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀺𑀦𑀬𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑀢𑁆𑀢𑀺 𑀨𑀮𑀽𑀧𑀘𑀸𑀭𑀢𑁄 𑀕𑀳𑀺𑀢𑀸, 𑀇𑀢𑀺-𑀲𑀤𑁆𑀤𑁄 𑀢𑀁 𑀨𑀮𑀽𑀧𑀘𑀸𑀭𑀢𑁄 𑀕𑀳𑀺𑀢𑀲𑀢𑁆𑀢𑀺𑀁 𑀧𑀭𑀸𑀫𑀲𑀺, 𑀢𑀁𑀲𑀢𑁆𑀢𑀺𑀲𑀳𑀺𑀢𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀺𑀦𑀬𑀸 𑀅-𑀧𑀘𑁆𑀘𑀬𑀢𑁆𑀣𑀸.

𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀲𑁆𑀲, 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀦𑀬𑁄. 𑀢𑀢𑁆𑀣 𑀘𑀢𑀼𑀲𑀘𑁆𑀘𑀦𑁆𑀢𑀺 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘 𑀪𑀯𑀫𑀽𑀮𑀢𑁆𑀢𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀯𑀲𑁂𑀲𑀸 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑀘𑁆𑀘𑀁, 𑀢𑁂𑀦 𑀧𑀢𑁆𑀢𑀩𑁆𑀩𑀸 𑀅𑀲𑀗𑁆𑀔𑀢𑀥𑀸𑀢𑀼 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺.

𑀢𑀻𑀳𑀺 𑀅𑀯𑀬𑀯𑁂𑀳𑀺 𑀮𑁄𑀪𑀸𑀤𑀻𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂, 𑀢𑀻𑀳𑀺 𑀅𑀯𑀬𑀯𑁂𑀳𑀺 𑀅𑀮𑁄𑀪𑀸𑀤𑀻𑀳𑀺 𑀘 𑀯𑁄𑀤𑀸𑀦𑀧𑀓𑁆𑀔𑁂 𑀧𑀼𑀓𑁆𑀔𑀮𑁄 𑀲𑁄𑀪𑀦𑁄𑀢𑀺 𑀢𑀺𑀧𑀼𑀓𑁆𑀔𑀮𑁄, 𑀅𑀓𑀼𑀲𑀮𑀫𑀽𑀮𑁂𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲, 𑀓𑀼𑀲𑀮𑀫𑀽𑀮𑁂𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀢𑀺𑀧𑀼𑀓𑁆𑀔𑀮𑁄.

𑀲𑀻𑀳𑀲𑁆𑀲 𑀪𑀕𑀯𑀢𑁄 𑀯𑀺𑀓𑁆𑀓𑀻𑀴𑀺𑀢𑀁 𑀏𑀢𑁆𑀣 𑀦𑀬𑁂𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄, 𑀲𑀼𑀪𑀲𑀜𑁆𑀜𑀸𑀤𑀻𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀓𑀮𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑁄.

𑀅𑀢𑁆𑀣𑀦𑀬𑀢𑁆𑀢𑀬𑀤𑀺𑀲𑀸𑀪𑀸𑀯𑁂𑀦 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀆𑀮𑁄𑀘𑀦𑀁 𑀤𑀺𑀲𑀸𑀮𑁄𑀘𑀦𑀁. 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀦𑀬𑀲𑁆𑀲 𑀬𑁄𑀚𑀦𑀢𑁆𑀣𑀁 𑀓𑀢𑁂𑀲𑀼 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀬𑁂 𑀯𑁄𑀤𑀸𑀦𑀸𑀤𑀬𑁄, 𑀲𑀁𑀓𑀺𑀮𑁂𑀲𑀺𑀓𑀸 𑀘 𑀢𑀲𑁆𑀲 𑀢𑀲𑁆𑀲 𑀦𑀬𑀲𑁆𑀲 𑀤𑀺𑀲𑀸𑀪𑀽𑀢𑀸 𑀥𑀫𑁆𑀫𑀸 𑀲𑀼𑀢𑁆𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀣𑀺𑀢𑀸, 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀘𑀺𑀢𑁆𑀢𑁂𑀦𑁂𑀯 ‘‘𑀅𑀬𑀁 𑀧𑀞𑀫𑀸 𑀤𑀺𑀲𑀸, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸’’𑀢𑀺𑀆𑀤𑀺𑀦𑀸 𑀆𑀮𑁄𑀘𑀦𑀁 𑀤𑀺𑀲𑀸𑀮𑁄𑀘𑀦𑀁.

𑀢𑀣𑀸 𑀆𑀮𑁄𑀘𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀦𑀬𑀢𑁆𑀢𑀬𑀬𑁄𑀚𑀦𑁂 𑀲𑀫𑀸𑀦𑀬𑀦𑀢𑁄 𑀅𑀗𑁆𑀓𑀼𑀲𑁄 𑀯𑀺𑀬𑀸𑀢𑀺 𑀅𑀗𑁆𑀓𑀼𑀲𑁄, 𑀢𑀲𑁆𑀲 𑀢𑀲𑁆𑀲 𑀦𑀬𑀲𑁆𑀲 𑀤𑀺𑀲𑀸𑀪𑀽𑀢𑀸𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀲𑀫𑀸𑀦𑀬𑀦𑀁 𑀅𑀗𑁆𑀓𑀼𑀲𑁄 𑀦𑀬𑁄.

𑀮𑀜𑁆𑀚𑁂𑀢𑀻𑀢𑀺 𑀮𑀜𑁆𑀚𑀓𑁄. 𑀬𑁄 𑀦𑀬𑁄 𑀲𑀼𑀢𑁆𑀢𑀢𑁆𑀣𑀁 𑀮𑀜𑁆𑀚𑁂𑀢𑀺 𑀧𑀓𑀸𑀲𑁂𑀢𑀺, 𑀇𑀢𑀺 𑀮𑀜𑁆𑀚𑀦𑀢𑁄 𑀧𑀓𑀸𑀲𑀦𑀢𑁄 𑀲𑁄 𑀦𑀬𑁄 𑀮𑀜𑁆𑀚𑀓𑁄 𑀦𑀸𑀫, 𑀦𑀬𑁄 𑀘 𑀲𑁄 𑀮𑀜𑁆𑀚𑀓𑁄 𑀘𑀸𑀢𑀺 𑀦𑀬𑀮𑀜𑁆𑀚𑀓𑁄. 𑀦𑀬𑀮𑀜𑁆𑀚𑀓𑁄 𑀧𑀞𑀫𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀦𑀸𑀫, 𑀦𑀬𑀮𑀜𑁆𑀚𑀓𑁄 𑀤𑀼𑀢𑀺𑀬𑁄 𑀢𑀺𑀧𑀼𑀓𑁆𑀔𑀮𑁄 𑀦𑀸𑀫, 𑀦𑀬𑀮𑀜𑁆𑀚𑀓𑁄 𑀢𑀢𑀺𑀬𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫𑀸𑀢𑀺 𑀬𑁄𑀚𑁂𑀢𑀩𑁆𑀩𑁄.

𑀉𑀕𑁆𑀕𑀢𑀸𑀦𑀁 𑀯𑀺𑀲𑁂𑀲𑁂𑀦 𑀉𑀕𑁆𑀕𑀢𑁄𑀢𑀺 𑀉𑀢𑁆𑀢𑀫𑁄, 𑀢𑀁 𑀉𑀢𑁆𑀢𑀫𑀁. 𑀕𑀢𑀸𑀢𑀺 𑀜𑀸𑀢𑀸, 𑀫𑀢𑀸𑀢𑀺 𑀅𑀢𑁆𑀣𑁄. ‘‘𑀫𑀢𑀸’’𑀢𑀺 𑀯𑀸 𑀧𑀸𑀞𑁄. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑀧𑀺 𑀲𑀁𑀯𑀡𑁆𑀡𑀦𑀸𑀦𑀼𑀲𑀸𑀭𑁂𑀦𑀧𑀺 𑀚𑀸𑀦𑀺𑀢𑀩𑁆𑀩𑀦𑁆𑀢𑀺.

𑀬𑀣𑀸𑀯𑀼𑀢𑁆𑀢𑀦𑀬𑀯𑀺𑀲𑁂𑀲𑀲𑀁𑀯𑀡𑁆𑀡𑀦𑀸𑀬 𑀝𑀻𑀓𑀸𑀬𑀁 𑁋

‘‘𑀲𑀫𑀽𑀳𑀸𑀤𑀺𑀁 𑀉𑀧𑀸𑀤𑀸𑀬 𑀮𑁄𑀓𑀲𑀗𑁆𑀓𑁂𑀢𑀲𑀺𑀤𑁆𑀥𑀸 𑀯𑁄𑀳𑀸𑀭𑀫𑀢𑁆𑀢𑀢𑀸 𑀲𑀫𑁆𑀫𑀼𑀢𑀺𑀲𑀪𑀸𑀯𑁄, 𑀧𑀣𑀯𑀻𑀨𑀲𑁆𑀲𑀸𑀤𑀻𑀦𑀁 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀁 𑀧𑀭𑀫𑀢𑁆𑀣𑀲𑀪𑀸𑀯𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀬𑀲𑁆𑀫𑀺𑀁 𑀪𑀺𑀦𑁆𑀦𑁂, 𑀇𑀢𑀭𑀸𑀧𑁄𑀳𑁂 𑀯𑀸 𑀘𑀺𑀢𑁆𑀢𑁂𑀦 𑀓𑀢𑁂 𑀦 𑀢𑀣𑀸 𑀩𑀼𑀤𑁆𑀥𑀺, 𑀇𑀤𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀬𑀣𑀸 𑀖𑀝𑁂, 𑀲𑀲𑀫𑁆𑀪𑀸𑀭𑀚𑀮𑁂 𑀘, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀧𑀭𑀫𑀢𑁆𑀣𑀲𑀘𑁆𑀘’’𑀦𑁆𑀢𑀺 𑁋

𑀯𑀘𑀦𑁂 𑀖𑀝𑀓𑀣𑀮𑀆𑀧𑀚𑀮𑀓𑀤𑁆𑀤𑀫𑀸𑀤𑀺𑀲𑀗𑁆𑀔𑀸𑀢𑀁 𑀲𑀫𑀽𑀳𑀸𑀤𑀺𑀁 𑀉𑀧𑀸𑀤𑀸𑀬 𑀮𑁄𑀓𑀲𑁆𑀲 𑀧𑀼𑀩𑁆𑀩𑁂 𑀖𑀝𑀓𑀣𑀮𑀆𑀧𑀚𑀮𑀓𑀤𑁆𑀤𑀫𑀸𑀤𑀺𑀲𑀗𑁆𑀓𑁂𑀢𑀲𑀺𑀤𑁆𑀥𑀸 𑀖𑀝𑀓𑀣𑀮𑀆𑀧𑀚𑀮𑀓𑀤𑁆𑀤𑀫𑀸𑀤𑀺𑀯𑁄𑀳𑀸𑀭𑀫𑀢𑁆𑀢𑀢𑀸 𑀲𑀫𑁆𑀫𑀼𑀢𑀺𑀲𑀪𑀸𑀯𑁄 𑀲𑀗𑁆𑀓𑁂𑀢𑀯𑀲𑁂𑀦 𑀅𑀯𑀺𑀢𑀣𑀢𑁆𑀢𑀸. 𑀧𑀣𑀯𑀻𑀆𑀤𑀻𑀦𑀁 𑀓𑀓𑁆𑀔𑀴𑀸𑀤𑀺𑀮𑀓𑁆𑀔𑀡𑀁, 𑀨𑀲𑁆𑀲𑀸𑀤𑀻𑀦𑀁 𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀁 𑀧𑀭𑀫𑀢𑁆𑀣𑀲𑀪𑀸𑀯𑁄. ‘‘𑀬𑀤𑀺 𑀏𑀯𑀁 𑀖𑀝𑀸𑀤𑀺𑀓𑁂 𑀅𑀪𑀺𑀦𑁆𑀦𑁂 𑀯𑀸 𑀆𑀧𑀸𑀤𑀺𑀓𑁂 𑀯𑀸 𑀅𑀦𑀼𑀭𑀽𑀧𑁂𑀦 𑀊𑀦𑀪𑀸𑀯𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑁂 𑀯𑀸 𑀲𑀢𑀺 𑀲𑀫𑁆𑀫𑀼𑀢𑀺𑀪𑀸𑀯𑁄 𑀳𑁄𑀢𑀼, 𑀪𑀺𑀦𑁆𑀦𑁂 𑀯𑀸 𑀊𑀦𑁂 𑀯𑀸 𑀓𑀣𑀁 𑀲𑀫𑁆𑀫𑀼𑀢𑀺𑀪𑀸𑀯𑁄 𑀪𑀯𑁂𑀬𑁆𑀬, 𑀧𑀣𑀯𑀻𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀪𑀺𑀚𑁆𑀚𑀫𑀸𑀦𑀢𑁆𑀢𑀸, 𑀓𑀓𑁆𑀔𑀴𑀨𑀼𑀲𑀦𑀸𑀤𑀻𑀦𑀜𑁆𑀘 𑀧𑀣𑀯𑀻𑀨𑀲𑁆𑀲𑀸𑀤𑀻𑀳𑀺 𑀅𑀦𑀜𑁆𑀜𑀢𑁆𑀢𑀸 𑀓𑀣𑀁 𑀧𑀭𑀫𑀢𑁆𑀣𑀲𑀪𑀸𑀯𑁄 𑀪𑀯𑁂𑀬𑁆𑀬, 𑀓𑀢𑀫𑁂𑀦 𑀲𑀗𑁆𑀔𑁂𑀧𑁂𑀦 𑀅𑀢𑁆𑀣𑁂𑀦 𑀲𑀫𑁆𑀫𑀼𑀢𑀺𑀲𑀪𑀸𑀯𑁄, 𑀧𑀭𑀫𑀢𑁆𑀣𑀲𑀪𑀸𑀯𑁄 𑀘 𑀅𑀫𑁆𑀳𑁂𑀳𑀺 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀲𑀫𑁆𑀫𑀼𑀢𑀺𑀲𑀪𑀸𑀯𑀧𑀭𑀫𑀢𑁆𑀣𑀲𑀪𑀸𑀯𑁂𑀲𑀼 𑀅𑀬𑀁 𑀦𑀬𑁄 𑀯𑀼𑀘𑁆𑀘𑀫𑀸𑀦𑁄 𑀲𑀗𑁆𑀔𑁂𑀧𑁄 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀲𑁆𑀫𑀺𑀁 𑀖𑀝𑀸𑀤𑀺𑀓𑁂 𑀪𑀺𑀦𑁆𑀦𑁂 𑀲𑀢𑀺 𑀢𑀢𑁄 𑀖𑀝𑀸𑀤𑀺𑀢𑁄 𑀇𑀢𑀭𑁄 𑀓𑀣𑀮𑀸𑀤𑀺𑀪𑀸𑀯𑁄 𑀘𑀺𑀢𑁆𑀢𑁂𑀦 𑀧𑀼𑀩𑁆𑀩𑁂 𑀓𑀢𑁂𑀦 𑀬𑀣𑀸 𑀬𑁂𑀦 𑀓𑀣𑀮𑀸𑀤𑀺𑀯𑁄𑀳𑀸𑀭𑁂𑀦 𑀪𑀯𑀢𑀺, 𑀬𑀲𑁆𑀫𑀺𑀁 𑀆𑀧𑀸𑀤𑀺𑀓𑁂 𑀲𑀫𑁆𑀪𑀸𑀭𑀚𑀮𑀸𑀤𑀺𑀓𑁂 𑀊𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁂 𑀲𑀢𑀺 𑀯𑀸 𑀢𑀢𑁄 𑀆𑀧𑀸𑀤𑀺𑀢𑁄 𑀇𑀢𑀭𑁄 𑀓𑀤𑁆𑀤𑀫𑀸𑀤𑀺𑀪𑀸𑀯𑁄 𑀘𑀺𑀢𑁆𑀢𑁂𑀦 𑀧𑀼𑀩𑁆𑀩𑁂 𑀓𑀢𑁂𑀦 𑀬𑀣𑀸 𑀬𑁂𑀦 𑀓𑀤𑁆𑀤𑀫𑀸𑀤𑀺𑀯𑁄𑀳𑀸𑀭𑁂𑀦 𑀪𑀯𑀢𑀺, 𑀢𑀣𑀸 𑀢𑁂𑀦 𑀯𑁄𑀳𑀸𑀭𑁂𑀦 𑀩𑀼𑀤𑁆𑀥𑀺 𑀓𑀣𑀮𑀸𑀤𑀺𑀲𑀪𑀸𑀯𑀚𑀸𑀦𑀦𑀁 𑀓𑀤𑁆𑀤𑀫𑀸𑀤𑀺𑀲𑀪𑀸𑀯𑀚𑀸𑀦𑀦𑀁 𑀪𑀯𑀢𑀺, 𑀇𑀤𑀁 𑀅𑀪𑀺𑀦𑁆𑀦𑁂 𑀖𑀝𑀸𑀤𑀺𑀓𑀁 𑀯𑀸 𑀪𑀺𑀦𑁆𑀦𑁂 𑀓𑀣𑀮𑀸𑀤𑀺𑀓𑀁 𑀯𑀸 𑀅𑀦𑀽𑀦𑁂 𑀆𑀧𑀸𑀤𑀺𑀓𑀁 𑀯𑀸 𑀊𑀦𑁂 𑀓𑀤𑁆𑀤𑀫𑀸𑀤𑀺𑀓𑀁 𑀯𑀸 𑀲𑀩𑁆𑀩𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀳𑁄𑀢𑁆𑀯𑁂𑀯. ‘‘𑀓𑀤𑁆𑀤𑀫𑀲𑁆𑀫𑀺𑀁 𑀪𑀺𑀦𑁆𑀦𑁂, 𑀓𑀤𑁆𑀤𑀫𑀲𑁆𑀫𑀺𑀁 𑀊𑀦𑁂 𑀯𑀸 𑀲𑀢𑀺 𑀇𑀢𑀭𑁄 𑀲𑀫𑁆𑀫𑀼𑀢𑀺𑀲𑀪𑀸𑀯𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 ‘‘𑀖𑀝𑁂, 𑀲𑀫𑁆𑀪𑀸𑀭𑀚𑀮𑁂 𑀘𑀸’’𑀢𑀺 𑀯𑀼𑀢𑁆𑀢𑀁.

𑀲𑀫𑁆𑀫𑀼𑀢𑀺𑀲𑀘𑁆𑀘𑀲𑀪𑀸𑀯𑁄 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀧𑀭𑀫𑀢𑁆𑀣𑀲𑀘𑁆𑀘𑀲𑀪𑀸𑀯𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀧𑀭𑀫𑀢𑁆𑀣𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀣𑀯𑀻𑀆𑀤𑀻𑀦𑀁 𑀓𑀓𑁆𑀔𑀴𑀸𑀤𑀺𑀮𑀓𑁆𑀔𑀡𑀢𑁄 𑀇𑀢𑀭𑀲𑁆𑀲 𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀨𑀲𑁆𑀲𑀸𑀤𑀻𑀦𑀜𑁆𑀘 𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀢𑁄 𑀇𑀢𑀭𑀲𑁆𑀲 𑀓𑀓𑁆𑀔𑀴𑀸𑀤𑀺𑀮𑀓𑁆𑀔𑀡𑀲𑁆𑀲 𑀅𑀲𑀫𑁆𑀪𑀯𑀢𑁄 𑀧𑀣𑀯𑀻𑀨𑀲𑁆𑀲𑀸𑀤𑀻𑀦𑀁 𑀮𑀓𑁆𑀔𑀴𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀁 𑀧𑀭𑀫𑀢𑁆𑀣𑀲𑀘𑁆𑀘𑀁 𑀳𑁄𑀢𑁆𑀯𑁂𑀯𑀸𑀢𑀺 𑀇𑀫𑀲𑁆𑀫𑀺𑀁 𑀲𑀗𑁆𑀔𑁂𑀧𑀢𑁆𑀣𑁂 𑀕𑀳𑀺𑀢𑁂 𑀓𑁄𑀘𑀺 𑀯𑀺𑀭𑁄𑀥𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺.

𑁩. 𑀧𑀜𑁆𑀘 𑀦𑀬𑀸 𑀲𑀭𑀽𑀧𑀢𑁄 𑀆𑀘𑀭𑀺𑀬𑁂𑀦 𑀉𑀤𑁆𑀤𑀺𑀝𑁆𑀞𑀸, 𑀅𑀫𑁆𑀳𑁂𑀳𑀺 𑀘 𑀯𑀺𑀜𑁆𑀜𑀸𑀢𑀸, ‘‘𑀬𑀸𑀦𑀺 𑀧𑀤𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀺, 𑀓𑀢𑀫𑀸𑀦𑀺 𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺’’𑀢𑁆𑀬𑀸𑀤𑀺𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀦𑀬𑁂𑀧𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀫𑀽𑀮𑀧𑀤𑀸𑀦𑀺 𑀉𑀤𑁆𑀤𑀺𑀲𑀺𑀢𑀼𑀁 ‘𑀢𑀢𑁆𑀣 𑀓𑀢𑀫𑀸𑀦𑀻’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀲𑀮𑀸𑀦𑀺 𑀦𑀯 𑀧𑀤𑀸𑀦𑀺, 𑀅𑀓𑀼𑀲𑀮𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀻𑀢𑀺 𑀬𑁄𑀚𑀦𑀸. 𑀫𑀽𑀮𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁂𑀳𑀺 𑀦𑀬𑀸, 𑀧𑀢𑀺𑀝𑁆𑀞𑀸𑀦𑀯𑀺𑀪𑀸𑀕𑀸 𑀘𑀸𑀢𑀺 𑀫𑀽𑀮𑀸𑀦𑀺, 𑀧𑀤𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣 𑀦𑀬𑀸, 𑀧𑀝𑁆𑀞𑀸𑀦𑀯𑀺𑀪𑀸𑀕𑀸, 𑀅𑀥𑀺𑀕𑀫𑀸 𑀘𑀸𑀢𑀺 𑀧𑀤𑀸𑀦𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀝𑁆𑀞𑁂𑀦 𑀫𑀽𑀮𑀸𑀦𑀺 𑀘 𑀢𑀸𑀦𑀺 𑀧𑀤𑀸𑀦𑀺 𑀘𑀸𑀢𑀺 𑀫𑀽𑀮𑀧𑀤𑀸𑀦𑀺. 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀦𑁆𑀢𑀻𑀢𑀺 𑀓𑀼𑀲𑀮𑀸𑀦𑀺, 𑀓𑀼𑀲𑁂 𑀭𑀸𑀕𑀸𑀤𑀬𑁄 𑀮𑀼𑀦𑀦𑁆𑀢𑀻𑀢𑀺 𑀓𑀼𑀲𑀮𑀸𑀦𑀺, 𑀓𑀼𑀲𑀸 𑀯𑀺𑀬 𑀮𑀼𑀦𑀦𑁆𑀢𑀻𑀢𑀺 𑀓𑀼𑀲𑀮𑀸𑀦𑀺, 𑀓𑀼𑀲𑁂𑀦 𑀜𑀸𑀡𑁂𑀦 𑀮𑀸𑀢𑀩𑁆𑀩𑀸𑀦𑀺 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀓𑀼𑀲𑀮𑀸𑀦𑀺. 𑀓𑀼𑀲𑀮𑀸𑀦𑀁 𑀧𑀝𑀺𑀧𑀓𑁆𑀔𑀸𑀦𑀻𑀢𑀺 𑀅𑀓𑀼𑀲𑀮𑀸𑀦𑀺 𑀅-𑀲𑀤𑁆𑀤𑁄 𑀘𑁂𑀢𑁆𑀣 𑀧𑀝𑀺𑀧𑀓𑁆𑀔𑀢𑁆𑀣𑁄𑀢𑀺.

𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺, 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀢𑁄, 𑀚𑀸𑀢𑀺𑀪𑁂𑀤𑀢𑁄 𑀘 𑀉𑀤𑁆𑀤𑀺𑀝𑁆𑀞𑀸𑀦𑀺, ‘‘𑀓𑀢𑀫𑀸𑀦𑀺 𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺 𑀧𑀘𑁆𑀘𑀸𑀲𑀢𑁆𑀢𑀺𑀦𑁆𑀬𑀸𑀬𑁂𑀦 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀏𑀯𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀢𑁄, 𑀚𑀸𑀢𑀺𑀪𑁂𑀤𑀢𑁄 𑀘 𑀫𑀽𑀮𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑀁𑀬𑁂𑀯 𑀧𑀞𑀫𑀁 𑀉𑀤𑁆𑀤𑀺𑀲𑀢𑀺 ‘𑀢𑀡𑁆𑀳𑀸’𑀢𑀺𑀆𑀤𑀺𑀦𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩) 𑁋

𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀽𑀧𑀸𑀤𑀺𑀓𑁂 𑀔𑀦𑁆𑀥𑁂 𑀢𑀲𑀢𑀺 𑀧𑀭𑀺𑀢𑀲𑀢𑀻𑀢𑀺 𑀢𑀡𑁆𑀳𑀸. 𑀅𑀯𑀺𑀦𑁆𑀤𑀺𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀯𑀺𑀦𑁆𑀤𑀺𑀬𑀁 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀯𑀺𑀚𑁆𑀚𑀸𑀬 𑀧𑀝𑀺𑀧𑀓𑁆𑀔𑀸𑀢𑀺 𑀯𑀸 𑀅𑀯𑀺𑀚𑁆𑀚𑀸. 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦𑀸𑀢𑀺 𑀮𑁄𑀪𑁄, 𑀮𑀼𑀩𑁆𑀪𑀢𑀻𑀢𑀺 𑀯𑀸 𑀮𑁄𑀪𑁄, 𑀮𑀼𑀩𑁆𑀪𑀦𑀁 𑀯𑀸 𑀮𑁄𑀪𑁄. 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀼𑀪𑁂 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑁂 ‘‘𑀲𑀼𑀪’’𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀲𑀼𑀪𑀲𑀜𑁆𑀜𑀸. 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀺𑀓𑁂 ‘‘𑀲𑀼𑀔’’𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀲𑀼𑀔𑀲𑀜𑁆𑀜𑀸. 𑀅𑀦𑀺𑀘𑁆𑀘𑁂 𑀲𑀗𑁆𑀔𑀸𑀭𑀥𑀫𑁆𑀫𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀦𑀺𑀘𑁆𑀘𑀲𑀜𑁆𑀜𑀸. 𑀅𑀦𑀢𑁆𑀢𑀲𑀪𑀸𑀯𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀔𑀦𑁆𑀥𑁂𑀲𑀼 ‘‘𑀅𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀅𑀢𑁆𑀢𑀲𑀜𑁆𑀜𑀸. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀧𑀤𑁂𑀲𑀼 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺, 𑀢𑀸𑀦𑀺 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀻𑀢𑀺 𑀬𑁄𑀚𑀦𑀸. 𑀲𑀗𑁆𑀕𑀳𑀁 𑀕𑀡𑀦𑀁. 𑀲𑀫𑁄𑀲𑀭𑀡𑀁 𑀲𑀫𑀸𑀭𑁄𑀧𑀦𑀁.

𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀉𑀤𑁆𑀥𑀘𑁆𑀘𑀸𑀤𑀺𑀓𑁂 𑀦𑀻𑀯𑀭𑀡𑁂 𑀲𑀫𑁂𑀢𑀺 𑀯𑀽𑀧𑀲𑀫𑁂𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑀸𑀢𑀺 𑀲𑀫𑀣𑁄. 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀤𑀻𑀳𑀺 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸. 𑀮𑁄𑀪𑀲𑁆𑀲 𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄. 𑀤𑁄𑀲𑀲𑁆𑀲 𑀧𑀝𑀺𑀧𑀓𑁆𑀔𑁄 𑀅𑀤𑁄𑀲𑁄. 𑀫𑁄𑀳𑀲𑁆𑀲 𑀧𑀝𑀺𑀧𑀓𑁆𑀔𑁄 𑀅𑀫𑁄𑀳𑁄. 𑀏𑀢𑁆𑀣𑀸𑀧𑀺 𑀅-𑀲𑀤𑁆𑀤𑁄 𑀧𑀝𑀺𑀧𑀓𑁆𑀔𑀢𑁆𑀣𑁄, 𑀦 𑀅𑀪𑀸𑀯𑀢𑁆𑀣𑀸𑀤𑀺𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀼𑀪𑁂 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑁂, 𑀘𑀓𑁆𑀔𑀸𑀤𑀺𑀫𑁆𑀳𑀺 𑀯𑀸 ‘‘𑀅𑀲𑀼𑀪’’𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸𑀧𑀥𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀲𑀼𑀪𑀲𑀜𑁆𑀜𑀸, 𑀯𑀺𑀲𑁂𑀲𑀢𑁄 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀻𑀲𑀼 ‘‘𑀤𑀼𑀓𑁆𑀔’’𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸𑀧𑀥𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀼𑀓𑁆𑀔𑀲𑀜𑁆𑀜𑀸, 𑀯𑀺𑀲𑁂𑀲𑀢𑁄 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁. 𑀅𑀦𑀺𑀘𑁆𑀘𑁂 𑀔𑀦𑁆𑀥𑀸𑀤𑀺𑀓𑁂 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸𑀧𑀥𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀯𑀺𑀲𑁂𑀲𑀢𑁄 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁. 𑀅𑀦𑀢𑁆𑀢𑀲𑀪𑀸𑀯𑁂 𑀔𑀦𑁆𑀥𑁂, 𑀘𑀓𑁆𑀔𑀸𑀤𑀺𑀫𑁆𑀳𑀺 𑀯𑀸 ‘‘𑀅𑀦𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸𑀧𑀥𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀦𑀢𑁆𑀢𑀲𑀜𑁆𑀜𑀸, 𑀯𑀺𑀲𑁂𑀲𑀢𑁄 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀥𑀸𑀦𑀁. 𑀧𑀜𑁆𑀜𑀸𑀲𑀢𑀺𑀲𑀻𑀲𑁂𑀦 𑀳𑀺 𑀧𑀯𑀢𑁆𑀢𑀸 𑀅𑀬𑀁 𑀤𑁂𑀲𑀦𑀸. 𑀢𑁂𑀦 𑀯𑀼𑀢𑁆𑀢𑀁 𑀪𑀕𑀯𑀢𑀸 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀢𑀺𑀩𑀮𑀁 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼, 𑀏𑀢𑁆𑀣 𑀲𑀢𑀺𑀩𑀮𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀧𑀤𑁂𑀲𑀼 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺, 𑀢𑀸𑀦𑀺 𑀧𑀤𑀸𑀦𑀺 𑀓𑀼𑀲𑀮𑀸𑀦𑀻𑀢𑀺 𑀬𑁄𑀚𑀦𑀸.

𑀉𑀤𑁆𑀤𑀸𑀦𑀦𑁆𑀢𑀺 𑀉𑀤𑁆𑀥𑀁 𑀤𑀸𑀦𑀁 𑀭𑀓𑁆𑀔𑀡𑀁 𑀉𑀤𑁆𑀤𑀸𑀦𑀁, 𑀲𑀗𑁆𑀕𑀳𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀤𑁆𑀤𑀸𑀦𑁂 𑀅𑀯𑀼𑀢𑁆𑀢𑁂 𑀲𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀧𑁆𑀧𑀓𑀺𑀡𑁆𑀡𑀪𑀸𑀯𑁄 𑀤𑀺𑀦𑁆𑀦𑁄 𑀯𑀺𑀬 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀯𑀺𑀧𑁆𑀧𑀓𑀺𑀡𑁆𑀡𑀪𑀸𑀯𑀲𑁆𑀲 𑀦𑀺𑀯𑀸𑀭𑀡𑀢𑁆𑀣𑀁 𑀉𑀤𑁆𑀤𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀢𑀼𑀭𑁄 𑀘 𑀯𑀺𑀧𑀮𑁆𑀮𑀸𑀲𑀸𑀢𑀺 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀲𑀜𑁆𑀜𑀸. 𑀓𑀺𑀮𑁂𑀲𑀸 𑀪𑀯𑀦𑁆𑀢𑀺 𑀏𑀢𑁆𑀣 𑀦𑀯𑀧𑀤𑁂𑀲𑀽𑀢𑀺 𑀪𑀽𑀫𑀻, 𑀓𑀺𑀮𑁂𑀲𑀸𑀦𑀁 𑀪𑀽𑀫𑀻𑀢𑀺 𑀓𑀺𑀮𑁂𑀲𑀪𑀽𑀫𑀻, 𑀓𑀺𑀮𑁂𑀲𑀧𑀯𑀢𑁆𑀢𑀦𑀝𑁆𑀞𑀸𑀦𑀸𑀦𑀺 𑀦𑀯 𑀧𑀤𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀘𑀢𑀼𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀅𑀲𑀼𑀪𑀤𑀼𑀓𑁆𑀔𑀅𑀦𑀺𑀘𑁆𑀘𑀅𑀦𑀢𑁆𑀢𑀲𑀜𑁆𑀜𑀸. 𑀇𑀦𑁆𑀤𑁆𑀭𑀺𑀬𑀪𑀽𑀫𑀻𑀢𑀺 𑀲𑀤𑁆𑀥𑀸𑀤𑀻𑀦𑀁 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀪𑀽𑀫𑀻 𑀧𑀯𑀢𑁆𑀢𑀦𑀝𑁆𑀞𑀸𑀦𑀸𑀦𑀺 𑀲𑀫𑁄𑀲𑀭𑀡𑀝𑁆𑀞𑀸𑀦𑀸𑀦𑀺.

𑀦𑀯𑀳𑀺 𑀓𑀼𑀲𑀮𑀧𑀤𑁂𑀳𑀺 𑀓𑀼𑀲𑀮𑀧𑀓𑁆𑀔𑀸 𑀬𑀼𑀚𑁆𑀚𑀦𑁆𑀢𑀺 𑀬𑁄𑀚𑀻𑀬𑀦𑁆𑀢𑀺, 𑀦𑀯𑀳𑀺 𑀅𑀓𑀼𑀲𑀮𑀧𑀤𑁂𑀳𑀺 𑀅𑀓𑀼𑀲𑀮𑀧𑀓𑁆𑀔𑀸 𑀬𑀼𑀚𑁆𑀚𑀦𑁆𑀢𑀺 𑀬𑁄𑀚𑀻𑀬𑀦𑁆𑀢𑀺. 𑀦𑀯𑀳𑀺 𑀓𑀼𑀲𑀮𑀧𑀤𑁂𑀳𑀺 𑀲𑀳 𑀓𑀼𑀲𑀮𑀧𑀓𑁆𑀔𑀸 𑀬𑀼𑀚𑁆𑀚𑀦𑁆𑀢𑀺 𑀬𑀼𑀚𑁆𑀚𑀦𑁆𑀢𑀸 𑀪𑀯𑀦𑁆𑀢𑀺, 𑀦𑀯𑀳𑀺 𑀅𑀓𑀼𑀲𑀮𑀧𑀤𑁂𑀳𑀺 𑀲𑀳 𑀅𑀓𑀼𑀲𑀮𑀧𑀓𑁆𑀔𑀸 𑀬𑀼𑀚𑁆𑀚𑀦𑁆𑀢𑀺 𑀬𑀼𑀚𑁆𑀚𑀦𑁆𑀢𑀸 𑀪𑀯𑀦𑁆𑀢𑀻𑀢𑀺 𑀉𑀤𑁆𑀤𑁂𑀲𑀯𑀸𑀭𑁂 𑀯𑀼𑀢𑁆𑀢𑀸𑀯𑀲𑁂𑀲𑁄 𑀲𑀁𑀯𑀡𑁆𑀡𑀦𑀸𑀦𑀼𑀲𑀸𑀭𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑁄.

𑀇𑀢𑀺 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀉𑀤𑁆𑀤𑁂𑀲𑀯𑀸𑀭𑀲𑁆𑀲 𑀅𑀢𑁆𑀣𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀤𑁆𑀤𑁂𑀲𑀯𑀸𑀭𑀅𑀢𑁆𑀣𑀯𑀺𑀪𑀸𑀯𑀦𑀸

𑀲𑁄𑀴𑀲𑀳𑀸𑀭𑀦𑀺𑀤𑁆𑀤𑁂𑀲𑀯𑀺𑀪𑀸𑀯𑀦𑀸

𑁪. 𑀳𑀸𑀭𑀸𑀤𑀻𑀲𑀼 𑀲𑀫𑀼𑀤𑀸𑀬𑀲𑁆𑀲 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀉𑀤𑁆𑀤𑁂𑀲𑁄 𑀉𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀉𑀤𑁆𑀤𑀺𑀝𑁆𑀞𑁂 𑀳𑀸𑀭𑀸𑀤𑀬𑁄 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀦𑁂𑀢𑁆𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀉𑀤𑁆𑀤𑀺𑀝𑁆𑀞𑁂 𑀳𑀸𑀭𑀸𑀤𑀬𑁄 𑀦𑀺𑀤𑁆𑀤𑀺𑀲𑀺𑀢𑀼𑀁 ‘𑀢𑀢𑁆𑀣 𑀲𑀗𑁆𑀔𑁂𑀧𑀢𑁄’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪) 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸? 𑀤𑁂𑀲𑀦𑀸 𑀯𑀺𑀘𑀬𑁄’’𑀢𑀺𑀆𑀤𑀺𑀉𑀤𑁆𑀤𑁂𑀲𑀧𑀸𑀞𑁂. 𑀲𑀗𑁆𑀔𑁂𑀧𑀢𑁄𑀢𑀺 𑀲𑀫𑀸𑀲𑀢𑁄. 𑀦𑁂𑀢𑁆𑀢𑀻𑀢𑀺 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁. 𑀓𑀺𑀢𑁆𑀢𑀺𑀢𑀸𑀢𑀺 𑀓𑀣𑀺𑀢𑀸, 𑀇𑀤𑀸𑀦𑀺 𑀦𑀺𑀤𑁆𑀤𑁂𑀲𑀢𑁄 𑀓𑀣𑁂𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧. ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸, 𑀦𑀺𑀲𑁆𑀲𑀭𑀡𑀫𑁆𑀧𑀺 𑀘 𑀨𑀮𑀁 𑀉𑀧𑀸𑀬𑁄 𑀘.

𑀆𑀡𑀢𑁆𑀢𑀻 𑀘 𑀪𑀕𑀯𑀢𑁄, 𑀬𑁄𑀕𑀻𑀦𑀁 𑀤𑁂𑀲𑀦𑀸𑀳𑀸𑀭𑁄’’𑀢𑀺. 𑁋

𑀕𑀸𑀣𑀸𑀬𑀁 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀲𑀼𑀢𑁆𑀢𑁂 𑀆𑀕𑀢𑀸 𑀅𑀲𑁆𑀲𑀸𑀤𑁄𑀧𑀺 𑀆𑀤𑀻𑀦𑀯𑀢𑀸 𑀆𑀤𑀻𑀦𑀯𑁄𑀧𑀺 𑀦𑀺𑀲𑁆𑀲𑀭𑀡𑀫𑁆𑀧𑀺 𑀨𑀮𑀫𑁆𑀧𑀺 𑀉𑀧𑀸𑀬𑁄𑀧𑀺 𑀬𑁄𑀕𑀻𑀦𑀁 𑀅𑀢𑁆𑀣𑀸𑀬 𑀪𑀕𑀯𑀢𑁄 𑀆𑀡𑀢𑁆𑀢𑀺𑀧𑀺 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀺𑀢𑀸 𑀲𑀁𑀯𑀡𑁆𑀡𑀺𑀢𑀸 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀜𑀸𑀧𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀯𑀘𑀦𑀢𑁆𑀣𑀸𑀤𑀬𑁄 𑀅𑀝𑁆𑀞𑀓𑀣𑀸𑀬𑀁 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸𑀯, 𑀢𑀲𑁆𑀫𑀸 𑀓𑀺𑀜𑁆𑀘𑀺𑀫𑀢𑁆𑀢𑀫𑁂𑀯 𑀓𑀣𑁂𑀲𑁆𑀲𑀸𑀫𑀺. 𑀅𑀲𑁆𑀲𑀸𑀤𑀻𑀬𑀢𑁂𑀢𑀺 𑀅𑀲𑁆𑀲𑀸𑀤𑁄, 𑀓𑁄 𑀲𑁄? 𑀲𑀼𑀔𑀁, 𑀲𑁄𑀫𑀦𑀲𑁆𑀲𑀁, 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀘. 𑀅𑀲𑁆𑀲𑀸𑀤𑁂𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀅𑀲𑁆𑀲𑀸𑀤𑁄, 𑀓𑁄 𑀲𑁄? 𑀢𑀡𑁆𑀳𑀸, 𑀯𑀺𑀧𑀮𑁆𑀮𑀸𑀲𑀸 𑀘. 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀳𑀺 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀅𑀦𑀺𑀝𑁆𑀞𑀫𑁆𑀧𑀺 𑀆𑀭𑀫𑁆𑀫𑀡𑀁 𑀇𑀝𑁆𑀞𑀸𑀓𑀸𑀭𑁂𑀦 𑀅𑀲𑁆𑀲𑀸𑀤𑁂𑀦𑁆𑀢𑀺.

𑀆𑀪𑀼𑀲𑀁 𑀓𑀫𑁆𑀫𑁂𑀦 𑀤𑀻𑀦𑀁 𑀤𑀼𑀓𑁆𑀔𑀸𑀤𑀺 𑀳𑀼𑀢𑁆𑀯𑀸 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀤𑀻𑀦𑀯𑁄, 𑀤𑀼𑀓𑁆𑀔𑀸𑀤𑀺. 𑀅𑀣 𑀯𑀸 𑀅𑀢𑀺𑀯𑀺𑀬 𑀆𑀤𑀻𑀦𑀁 𑀓𑀧𑀡𑀁 𑀳𑀼𑀢𑁆𑀯𑀸 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀤𑀻𑀦𑀯𑁄, 𑀓𑀧𑀡𑀫𑀦𑀼𑀲𑁆𑀲𑁄, 𑀢𑀣𑀸𑀪𑀸𑀯𑀸 𑀘 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀅𑀦𑀺𑀘𑁆𑀘𑀢𑀸𑀤𑀺𑀬𑁄𑀕𑀢𑁄.

𑀦𑀺𑀲𑁆𑀲𑀭𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀅𑀭𑀺𑀬𑀫𑀕𑁆𑀕𑁄. 𑀦𑀺𑀲𑁆𑀲𑀭𑀢𑀻𑀢𑀺 𑀯𑀸 𑀦𑀺𑀲𑁆𑀲𑀭𑀡𑀁, 𑀦𑀺𑀩𑁆𑀩𑀸𑀦𑀁. 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀦𑀺𑀲𑁆𑀲𑀭𑀡𑀪𑁂𑀤𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪 𑀳𑀸𑀭𑀲𑀗𑁆𑀔𑁂𑀧) 𑀩𑀳𑀼𑀥𑀸 𑀯𑀼𑀢𑁆𑀢𑁄𑀯.

𑀨𑀮𑀢𑀺 𑀧𑀯𑀢𑁆𑀢𑀢𑀻𑀢𑀺 𑀨𑀮𑀁, 𑀤𑁂𑀲𑀦𑀸𑀬 𑀨𑀮𑀁. 𑀬𑀤𑀺𑀧𑀺 𑀤𑁂𑀲𑀦𑀸 𑀨𑀮𑀦𑀺𑀧𑁆𑀨𑀸𑀤𑀺𑀓𑀸 𑀦 𑀳𑁄𑀢𑀺, 𑀢𑀣𑀸𑀧𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀸 𑀲𑀫𑁆𑀪𑀯𑀦𑁆𑀢𑀺, 𑀧𑀼𑀜𑁆𑀜𑀲𑀫𑁆𑀪𑀸𑀭𑀳𑁂𑀢𑀼𑀢𑁄 𑀨𑀮𑀁 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀤𑁂𑀲𑀦𑀸𑀬 𑀨𑀮𑀁 𑀦𑀸𑀫𑀸𑀢𑀺. 𑀓𑀢𑀫𑀁 𑀢𑀁? 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀬𑀲𑀧𑀭𑀺𑀯𑀸𑀭𑀅𑀥𑀺𑀧𑀢𑁂𑀬𑁆𑀬𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀤𑁂𑀯𑀭𑀚𑁆𑀚- 𑀲𑀺𑀭𑀺𑀘𑀢𑀼𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀲𑀻𑀮𑀲𑀫𑀸𑀥𑀺𑀲𑀫𑁆𑀧𑀤𑀸 𑀯𑀺𑀚𑁆𑀚𑀸𑀪𑀺𑀜𑁆𑀜𑀸 𑀧𑀝𑀺𑀲𑀫𑁆𑀪𑀺𑀤𑀸 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑁄.

𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀉𑀧𑀕𑀦𑁆𑀢𑁆𑀯𑀸 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀨𑀮𑀁 𑀏𑀢𑁂𑀦𑀸𑀢𑀺 𑀉𑀧𑀸𑀬𑁄, 𑀓𑁄 𑀲𑁄? 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸. 𑀧𑀼𑀭𑀺𑀫𑀸 𑀧𑀝𑀺𑀧𑀤𑀸 𑀳𑀺 𑀧𑀘𑁆𑀙𑀺𑀫𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀫𑀽𑀧𑀸𑀬𑁄, 𑀧𑀭𑀫𑁆𑀧𑀭𑀸𑀬 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀘 𑀉𑀧𑀸𑀬𑁄. 𑀓𑁂𑀘𑀺 ‘‘𑀫𑀕𑁆𑀕𑁄𑀧𑀺 𑀉𑀧𑀸𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀦𑀺𑀩𑁆𑀩𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. ‘‘𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀦𑁆𑀢𑀺 𑀇𑀤𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺 (𑀦𑁂𑀢𑁆𑀢𑀺. 𑁫) 𑀧𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀺𑀲𑁆𑀲𑀭𑀡𑀪𑀸𑀯𑀁 𑀯𑀓𑁆𑀔𑀢𑀺, 𑀢𑀲𑁆𑀫𑀸 𑀓𑁂𑀲𑀜𑁆𑀘𑀺 𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄.

𑀆𑀡𑀢𑁆𑀢𑀻𑀢𑀺 𑀆𑀡𑀸𑀭𑀳𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀺𑀤𑁆𑀥𑀺𑀬𑀸 ‘‘𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀸𑀳𑀺, 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀁 𑀫𑀸 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀯𑀺𑀥𑀸𑀦𑀁 𑀆𑀡𑀸𑀞𑀧𑀦𑀁 𑀆𑀡𑀢𑁆𑀢𑀺 𑀦𑀸𑀫.

𑀬𑀼𑀚𑁆𑀚𑀦𑁆𑀢𑀺 𑀧𑀬𑀼𑀚𑁆𑀚𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀲𑀽𑀢𑀺 𑀬𑁄𑀕𑀺𑀦𑁄, 𑀯𑁂𑀦𑁂𑀬𑁆𑀬𑀸, 𑀢𑁂𑀲𑀁 𑀬𑁄𑀕𑀻𑀦𑀁 𑀅𑀢𑁆𑀣𑀸𑀬𑀸𑀢𑀺 𑀯𑀘𑀦𑀲𑁂𑀲𑀁 𑀦𑀻𑀳𑀭𑀺𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑀼𑀢𑁆𑀢𑁂 𑀆𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀏𑀓𑀤𑁂𑀲𑀸𑀕𑀢𑀸𑀦𑀫𑁆𑀧𑀺 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 𑀯𑀺𑀪𑀚𑀦𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑁄𑀢𑀺 𑀦𑀺𑀤𑁆𑀤𑁂𑀲𑀢𑁄 𑀕𑀳𑁂𑀢𑀩𑁆𑀩𑁄, 𑀲𑁄 𑀘 𑀯𑀺𑀪𑀚𑀦𑀸𑀓𑀸𑀭𑁄 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁂 (𑀦𑁂𑀢𑁆𑀢𑀺. 𑁫) 𑀆𑀕𑀫𑀺𑀲𑁆𑀲𑀢𑀻𑀢𑀺 𑀇𑀥 𑀦 𑀤𑀲𑁆𑀲𑀺𑀢𑁄𑀢𑀺.

𑀤𑁂𑀲𑀦𑀸𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀯𑀺𑀘𑀬𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁨. ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀬𑀸 𑀘 𑀅𑀦𑀼𑀕𑀻𑀢𑀺.

𑀲𑀼𑀢𑁆𑀢𑀲𑁆𑀲 𑀬𑁄 𑀧𑀯𑀺𑀘𑀬𑁄, 𑀳𑀸𑀭𑁄 𑀯𑀺𑀘𑀬𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀼𑀢𑁆𑀢𑀲𑁆𑀲 𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀬𑀸 𑀧𑀼𑀘𑁆𑀙𑀸 𑀯𑀺𑀘𑀬𑀫𑀸𑀦𑀸 𑀘 𑀲𑀼𑀢𑁆𑀢𑀲𑁆𑀲 𑀬𑀁 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘 𑀬𑀸 𑀯𑀺𑀲𑁆𑀲𑀚𑁆𑀚𑀦𑀸 𑀯𑀺𑀘𑀬𑀫𑀸𑀦𑀸 𑀘 𑀲𑀼𑀢𑁆𑀢𑀲𑁆𑀲 𑀬𑁄 𑀧𑀤𑀸𑀤𑀺𑀯𑀺𑀘𑀬𑁄, 𑀅𑀲𑁆𑀲𑀸𑀤𑀸𑀤𑀺𑀯𑀺𑀘𑀬𑁄 𑀘 𑀅𑀢𑁆𑀣𑀺, 𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀺𑀘𑀬𑀫𑀸𑀦𑀸 𑀧𑀼𑀘𑁆𑀙𑀸𑀤𑀬𑁄 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀯𑀺𑀘𑀺𑀬𑀦𑁆𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑁄 𑀳𑀸𑀭𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀧𑀼𑀘𑁆𑀙𑀻𑀬𑀢𑁂 𑀧𑀼𑀘𑁆𑀙𑀺𑀢𑀁. 𑀯𑀺𑀲𑁆𑀲𑀚𑁆𑀚𑀻𑀬𑀢𑁂 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀪𑀸𑀯𑀲𑀸𑀥𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀦 𑀓𑀫𑁆𑀫𑀲𑀸𑀥𑀦𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑀝𑀻𑀓𑀸𑀬𑀁 ‘‘𑀪𑀸𑀯𑀢𑁆𑀣𑁂 𑀢𑁄𑀢𑀺 𑀆𑀳 𑁋 ‘𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀸’’’𑀢𑀺.

‘‘𑀲𑀼𑀢𑁆𑀢𑀲𑁆𑀲𑀸’’𑀢𑀺 𑀦𑀺𑀬𑀫𑀺𑀢𑀢𑁆𑀢𑀸 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁄 𑀯𑀺𑀘𑀬𑁄 𑀳𑀸𑀭𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪 𑀳𑀸𑀭𑀲𑀗𑁆𑀔𑁂𑀧) 𑀯𑀼𑀢𑁆𑀢𑁄𑀯. 𑀓𑀣𑀁? 𑁋

‘‘𑀅𑀬𑀁 𑀧𑀼𑀘𑁆𑀙𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀏𑀓𑀸𑀥𑀺𑀝𑁆𑀞𑀸𑀦𑀸 𑀅𑀦𑁂𑀓𑀸𑀥𑀺𑀝𑁆𑀞𑀸𑀦𑀸 𑀲𑀫𑁆𑀫𑀼𑀢𑀺𑀯𑀺𑀲𑀬𑀸 𑀧𑀭𑀫𑀢𑁆𑀣𑀯𑀺𑀲𑀬𑀸 𑀅𑀢𑀻𑀢𑀯𑀺𑀲𑀬𑀸 𑀅𑀦𑀸𑀕𑀢𑀯𑀺𑀲𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀸’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀺𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑀁𑀲𑀩𑁆𑀬𑀸𑀓𑀭𑀡𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀁 𑀞𑀧𑀦𑀁 𑀲𑀸𑀯𑀲𑁂𑀲𑀁 𑀦𑀺𑀭𑀯𑀲𑁂𑀲𑀁 𑀲𑀉𑀢𑁆𑀢𑀭𑀁 𑀦𑀺𑀭𑀼𑀢𑁆𑀢𑀭𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄.

‘‘𑀅𑀬𑀁 𑀧𑀼𑀘𑁆𑀙𑀸 𑀇𑀫𑀺𑀦𑀸 𑀲𑀫𑁂𑀢𑀺, 𑀏𑀢𑁂𑀦 𑀦 𑀲𑀫𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀢𑁆𑀣𑀁 𑀆𑀦𑁂𑀢𑁆𑀯𑀸, 𑀯𑀺𑀘𑀬𑁄 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀘 𑀯𑀺𑀘𑀬𑁄 𑀧𑀼𑀩𑁆𑀩𑀸𑀧𑀭𑀯𑀺𑀘𑀬𑁄. ‘‘𑀅𑀬𑀁 𑀅𑀦𑀼𑀕𑀻𑀢𑀺 𑀯𑀼𑀢𑁆𑀢𑀢𑁆𑀣𑀲𑀗𑁆𑀕𑀳𑀸 𑀅𑀯𑀼𑀢𑁆𑀢𑀢𑁆𑀣𑀲𑀗𑁆𑀕𑀳𑀸 𑀢𑀤𑀼𑀪𑀬𑀢𑁆𑀣𑀲𑀗𑁆𑀕𑀳𑀸 𑀓𑀼𑀲𑀮𑀢𑁆𑀣𑀲𑀗𑁆𑀕𑀳𑀸 𑀅𑀓𑀼𑀲𑀮𑀢𑁆𑀣𑀲𑀗𑁆𑀕𑀳𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀕𑀻𑀢𑀺𑀯𑀺𑀘𑀬𑁄. 𑀅𑀲𑁆𑀲𑀸𑀤𑀸𑀤𑀻𑀲𑀼 𑀲𑀼𑀔𑀯𑁂𑀤𑀦𑀸𑀬 ‘‘𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀢𑀡𑁆𑀳𑀸𑀬 ‘‘𑀆𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀯𑀺𑀧𑀮𑁆𑀮𑀸𑀲𑀸𑀦𑀁 ‘‘𑀯𑀺𑀧𑀭𑀻𑀢𑀕𑁆𑀕𑀳𑀡𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀅𑀯𑀲𑀺𑀝𑁆𑀞𑀸𑀦𑀁 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 ‘‘𑀬𑀣𑀸𑀲𑀓𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀜𑁆𑀘 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼, 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑁂 𑀘 𑀤𑀼𑀓𑀲𑀢𑁂 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀢𑀁𑀢𑀁𑀅𑀲𑁆𑀲𑀸𑀤𑀢𑁆𑀣𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀅𑀲𑁆𑀲𑀸𑀤𑀯𑀺𑀘𑀬𑁄.

𑀤𑀼𑀓𑁆𑀔𑀯𑁂𑀤𑀦𑀸𑀬 ‘‘𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀤𑀼𑀓𑁆𑀔𑀲𑀘𑁆𑀘𑀸𑀦𑀁 ‘‘𑀧𑀝𑀺𑀲𑀦𑁆𑀥𑀺𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀬 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑀸𑀬 𑀘 ‘‘𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀜𑁆𑀘 𑀮𑁄𑀓𑀺𑀬𑀥𑀫𑁆𑀫𑀸𑀦𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀳𑀸𑀦𑀪𑀸𑀕𑀺𑀬𑀢𑀸𑀤𑀺𑀯𑀲𑁂𑀦 𑀆𑀤𑀻𑀦𑀯𑀯𑀼𑀢𑁆𑀢𑀺𑀬𑀸 𑀑𑀓𑀸𑀭𑀦𑀺𑀤𑁆𑀥𑀸𑀭𑀡𑁂𑀦 𑀆𑀤𑀻𑀦𑀯𑀯𑀺𑀘𑀬𑁄. 𑀦𑀺𑀲𑁆𑀲𑀭𑀡𑀧𑀤𑁂 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀕𑀫𑀦𑀢𑁄 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀯𑀺𑀪𑀸𑀕𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦, 𑀦𑀺𑀩𑁆𑀩𑀸𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑀧𑀭𑀺𑀬𑀸𑀬𑀯𑀺𑀪𑀸𑀕𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦𑀸𑀢𑀺 𑀏𑀯𑀁 𑀦𑀺𑀲𑁆𑀲𑀭𑀡𑀯𑀺𑀘𑀬𑁄. 𑀨𑀮𑀸𑀤𑀻𑀦𑀁 𑀢𑀁𑀢𑀁𑀲𑀼𑀢𑁆𑀢𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀨𑀮𑀲𑁆𑀲 𑀢𑀤𑀼𑀧𑀸𑀬𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑀯𑀺𑀥𑀺𑀯𑀘𑀦𑀲𑁆𑀲 𑀘 𑀯𑀺𑀪𑀸𑀕𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀺𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀧𑀤𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀧𑀼𑀘𑁆𑀙𑀸𑀧𑀼𑀩𑁆𑀩𑀸𑀧𑀭𑀸𑀦𑀼𑀕𑀻𑀢𑀻𑀦𑀁, 𑀅𑀲𑁆𑀲𑀸𑀤𑀸𑀤𑀻𑀦𑀜𑁆𑀘 𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦𑁂𑀯 𑀯𑀺𑀘𑀬𑀮𑀓𑁆𑀔𑀡𑁄 ‘‘𑀯𑀺𑀘𑀬𑁄 𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑁋

𑀏𑀯𑀁 𑀯𑀼𑀢𑁆𑀢𑁄𑀯.

𑀯𑀺𑀲𑁆𑀲𑀚𑁆𑀚𑀦𑀯𑀺𑀲𑁂𑀲𑁄 𑀧𑀦 𑀝𑀻𑀓𑀸𑀬𑀁 𑀯𑀼𑀢𑁆𑀢𑁄. 𑀓𑀣𑀁? 𑁋

‘‘𑀘𑀓𑁆𑀔𑀼 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀆𑀫, 𑀘𑀓𑁆𑀔𑀼 𑀅𑀦𑀺𑀘𑁆𑀘𑀫𑁂𑀯𑀸’’𑀢𑀺 𑀏𑀓𑀦𑁆𑀢𑀢𑁄 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑀁𑀲𑀩𑁆𑀬𑀸𑀓𑀭𑀡𑀁, ‘‘𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀩𑁆𑀩𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀜𑁆𑀘𑀸’’𑀢𑀺 𑀧𑀼𑀝𑁆𑀞𑁂 ‘‘𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑀪𑀸𑀯𑁂𑀢𑀩𑁆𑀩𑀁, 𑀨𑀮𑀧𑀭𑀺𑀬𑀸𑀧𑀦𑁆𑀦𑀁 𑀲𑀘𑁆𑀙𑀺𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀺𑀪𑀚𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀁, ‘‘𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀓𑀼𑀲𑀮’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀓𑀺𑀁 𑀅𑀦𑀯𑀚𑁆𑀚𑀝𑁆𑀞𑁄 𑀓𑀼𑀲𑀮𑀢𑁆𑀣𑁄, 𑀉𑀤𑀸𑀳𑀼 𑀲𑀼𑀔𑀯𑀺𑀧𑀸𑀓𑀝𑁆𑀞𑁄’’𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀁, ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸, 𑀅𑀲𑀲𑁆𑀲𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀩𑁆𑀬𑀸𑀓𑀢𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀺𑀲𑁆𑀲𑀚𑁆𑀚𑀦𑀁 𑀞𑀧𑀦𑀁, ‘‘𑀓𑀺𑀁 𑀧𑀦𑁂𑀢𑁂 ‘𑀓𑀼𑀲𑀮𑀸’𑀢𑀺 𑀯𑀸 ‘𑀥𑀫𑁆𑀫𑀸’𑀢𑀺 𑀯𑀸 𑀏𑀓𑀢𑁆𑀣𑀸, 𑀉𑀤𑀸𑀳𑀼 𑀦𑀸𑀦𑀢𑁆𑀣𑀸’’𑀢𑀺 𑀇𑀤𑀁 𑀧𑀼𑀘𑁆𑀙𑀦𑀁 𑀲𑀸𑀯𑀲𑁂𑀲𑀁. 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀧𑀦 𑀲𑀸𑀯𑀲𑁂𑀲𑀢𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸𑀬𑀁 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀸𑀝𑀺𑀳𑀻𑀭𑀓𑀁 𑀲𑀉𑀢𑁆𑀢𑀭𑀁 𑀲𑀧𑁆𑀧𑀸𑀝𑀺𑀳𑀻𑀭𑀓𑀁 𑀦𑀺𑀭𑀼𑀢𑁆𑀢𑀭𑀁, 𑀲𑁂𑀲𑀁 𑀯𑀺𑀘𑀬𑀳𑀸𑀭𑀦𑀺𑀤𑁆𑀤𑁂𑀲𑁂 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑁋

𑀯𑀼𑀢𑁆𑀢𑁄𑀯. 𑀲𑀁𑀯𑀡𑁆𑀡𑀦𑀸𑀲𑀼 𑀯𑀼𑀢𑁆𑀢𑁄 𑀅𑀢𑁆𑀣𑁄 𑀅𑀦𑀸𑀓𑀼𑀮𑁄 𑀧𑀸𑀓𑀝𑁄 𑀬𑀢𑀺𑀧𑁄𑀢𑁂𑀳𑀺 𑀯𑀺𑀜𑁆𑀜𑀸𑀢𑁄, 𑀲𑁄 𑀲𑀩𑁆𑀩𑀢𑁆𑀣 𑀅𑀫𑁆𑀳𑁂𑀳𑀺 𑀦 𑀯𑀺𑀪𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀯𑀺𑀘𑀬𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋