𑁮. 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁩𑁩. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑁂𑀦 𑀆𑀯𑀝𑁆𑀝𑁂𑀢𑀩𑁆𑀩𑀸 𑀧𑀤𑀝𑁆𑀞𑀸𑀦𑀸𑀤𑀬𑁄 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀪𑀢𑁆𑀢𑀺𑀳𑀸𑀭𑁄 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀥𑀫𑁆𑀫𑀜𑁆𑀘 𑀧𑀤𑀝𑁆𑀞𑀸𑀦𑀁 𑀪𑀽𑀫𑀺𑀜𑁆𑀘𑀸’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀤𑁆𑀯𑁂 𑀲𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀪𑀽𑀢𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀪𑀢𑁆𑀢𑀺𑀳𑀸𑀭𑁄 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

‘‘𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀸 𑀥𑀫𑁆𑀫𑀧𑀤𑀝𑁆𑀞𑀸𑀦𑀪𑀽𑀫𑀺𑀬𑁄 𑀇𑀫𑀺𑀦𑀸 𑀯𑀺𑀪𑀢𑁆𑀢𑀺𑀳𑀸𑀭𑁂𑀦 𑀯𑀺𑀪𑀢𑁆𑀢𑀸, 𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀓𑀺𑀢𑁆𑀢𑀓𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀧𑀞𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂 𑀲𑀼𑀢𑁆𑀢𑀸𑀦𑀺 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀸𑀲𑀦𑀸𑀪𑀸𑀕𑀺𑀬𑀦𑁆𑀢𑀺 𑀧𑀼𑀜𑁆𑀜𑀪𑀸𑀯𑀦𑀸 𑀯𑀸𑀲𑀦𑀸 𑀦𑀸𑀫, 𑀯𑀸𑀲𑀦𑀸𑀬 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄 𑀯𑀸𑀲𑀦𑀸𑀪𑀸𑀕𑁄, 𑀯𑀸𑀲𑀦𑀸𑀪𑀸𑀕𑁂 𑀯𑀸𑀘𑀓𑀪𑀸𑀯𑁂𑀦 𑀦𑀺𑀬𑀼𑀢𑁆𑀢𑀁 𑀲𑀼𑀢𑁆𑀢𑀦𑁆𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑀁, 𑀓𑀢𑀫𑀁 𑀢𑀁? 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀻𑀡𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀪𑀕𑀯𑀢𑀸 𑀤𑁂𑀲𑀺𑀢𑀸𑀦𑀺, 𑀢𑀁 𑀲𑀼𑀢𑁆𑀢𑀁 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀦𑁆𑀢𑀺 𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀦𑀺𑀩𑁆𑀩𑀺𑀚𑁆𑀛𑀦𑀁 𑀧𑀤𑀸𑀮𑀦𑀁 𑀦𑀺𑀩𑁆𑀩𑁂𑀥𑁄, 𑀦𑀺𑀩𑁆𑀩𑁂𑀥𑀲𑁆𑀲 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄 𑀦𑀺𑀩𑁆𑀩𑁂𑀥𑀪𑀸𑀕𑁄, 𑀦𑀺𑀩𑁆𑀩𑁂𑀥𑀪𑀸𑀕𑁂 𑀯𑀸𑀘𑀓𑀪𑀸𑀯𑁂𑀦 𑀦𑀺𑀬𑀼𑀢𑁆𑀢𑀁 𑀲𑀼𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁, 𑀓𑀢𑀫𑀁 𑀢𑀁? 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀢𑀁 𑀲𑀼𑀢𑁆𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁.

‘‘𑀢𑁂𑀲𑀁 𑀲𑀼𑀢𑁆𑀢𑀸𑀦𑀁 𑀧𑀝𑀺𑀕𑁆𑀕𑀸𑀳𑀓𑀸 𑀧𑀼𑀕𑁆𑀕𑀮𑀸 𑀬𑀸𑀳𑀺 𑀧𑀝𑀺𑀧𑀤𑀸𑀳𑀺 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀢𑀸 𑀧𑀝𑀺𑀧𑀤𑀸 𑀓𑀺𑀢𑁆𑀢𑀺𑀓𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑁂 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀦𑀲𑀻𑀮𑀪𑀸𑀯𑀦𑀸𑀫𑀬𑀧𑀼𑀜𑁆𑀜𑀪𑀸𑀕𑁂 𑀪𑀯𑀸 𑀧𑀝𑀺𑀧𑀤𑀸𑀢𑀺 𑀧𑀼𑀜𑁆𑀜𑀪𑀸𑀕𑀺𑀬𑀸. 𑀨𑀮𑀪𑀸𑀕𑁂 𑀪𑀯𑀸 𑀧𑀝𑀺𑀧𑀤𑀸𑀢𑀺 𑀨𑀮𑀪𑀸𑀕𑀺𑀬𑀸. ‘‘𑀬𑁂𑀲𑀼 𑀲𑀻𑀮𑁂𑀲𑀼 𑀞𑀺𑀢𑀸 𑀧𑀝𑀺𑀕𑁆𑀕𑀸𑀳𑀓𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀲𑀻𑀮𑀸𑀦𑀺 𑀓𑀺𑀢𑁆𑀢𑀓𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑁂 𑀲𑀻𑀮𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀁𑀯𑀭𑀢𑀺 𑀏𑀢𑁂𑀦 𑀲𑀁𑀯𑀭𑁂𑀦𑀸𑀢𑀺 𑀲𑀁𑀯𑀭𑁄, 𑀲𑁄 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀲𑀩𑁆𑀩𑁄𑀧𑀺 𑀧𑀸𑀧𑀲𑀁𑀯𑀭𑀡𑀢𑁄 𑀲𑀁𑀯𑀭𑁄, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁆𑀢𑀸 𑀲𑀻𑀮𑀁 𑀦𑀸𑀫. 𑀧𑀚𑀳𑀢𑀺 𑀏𑀢𑁂𑀦 𑀧𑀳𑀸𑀢𑀩𑁆𑀩𑁂𑀢𑀺 𑀧𑀳𑀸𑀦𑀁, 𑀧𑀚𑀳𑀦𑀁 𑀯𑀸 𑀧𑀳𑀸𑀦𑀁, 𑀢𑀜𑁆𑀘 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁, 𑀧𑀝𑀺𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁, 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑀁. 𑀢𑀢𑁆𑀣 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀁 𑀯𑀚𑁆𑀚𑁂𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀁 𑀧𑀳𑀸𑀦𑀁 𑀯𑀼𑀢𑁆𑀢𑀦𑀬𑁂𑀦 𑀲𑀻𑀮𑀁 𑀦𑀸𑀫.

‘‘𑀢𑁂𑀲𑀼 𑀲𑀼𑀢𑁆𑀢𑀸𑀤𑀻𑀲𑀼 𑀪𑀕𑀯𑀸 𑀓𑀢𑀫𑀁 𑀲𑀼𑀢𑁆𑀢𑀁 𑀓𑀢𑀫𑀸𑀬 𑀧𑀝𑀺𑀧𑀤𑀸𑀬 𑀤𑁂𑀲𑀬𑀢𑀺, 𑀓𑀢𑀭𑀲𑁆𑀫𑀺𑀁 𑀲𑀻𑀮𑁂 𑀞𑀺𑀢𑁄 𑀧𑀼𑀕𑁆𑀕𑀮𑁄 𑀓𑀢𑀫𑁂𑀦 𑀲𑀻𑀮𑁂𑀦 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀣𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀼 𑀯𑀸𑀲𑀦𑀸𑀪𑀸𑀕𑀺𑀬𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀢𑀢𑁆𑀣 𑀢𑀸𑀲𑀼 𑀧𑀼𑀜𑁆𑀜𑀪𑀸𑀕𑀺𑀬𑀸𑀤𑀺𑀧𑀝𑀺𑀧𑀤𑀸𑀲𑀼 𑀧𑀼𑀜𑁆𑀜𑀪𑀸𑀕𑀺𑀬𑀸𑀬 𑀧𑀝𑀺𑀧𑀤𑀸𑀬 𑀪𑀕𑀯𑀸 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑁂𑀲𑀬𑀢𑀺, 𑀲𑁄 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀧𑀝𑀺𑀕𑁆𑀕𑀸𑀳𑀓𑁄 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀲𑀁𑀯𑀭𑀲𑀻𑀮𑀸𑀤𑀻𑀲𑀼 𑀲𑀁𑀯𑀭𑀲𑀻𑀮𑁂 𑀞𑀺𑀢𑁄 𑀳𑀼𑀢𑁆𑀯𑀸 𑀢𑁂𑀦 𑀲𑀁𑀯𑀭𑀲𑀻𑀮𑀲𑀗𑁆𑀔𑀸𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀲𑁂𑀝𑁆𑀞𑀘𑀭𑀺𑀬𑁂𑀦 𑀩𑁆𑀭𑀳𑁆𑀫𑀘𑀸𑀭𑀻 𑀲𑁂𑀝𑁆𑀞𑀸𑀘𑀸𑀭𑀧𑀽𑀭𑀓𑁄 𑀪𑀯𑀢𑀺. 𑀢𑀢𑁆𑀣 𑀢𑁂𑀲𑀼 𑀯𑀸𑀲𑀦𑀸𑀪𑀸𑀕𑀺𑀬𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀢𑀢𑁆𑀣 𑀢𑀸𑀲𑀼 𑀧𑀼𑀜𑁆𑀜𑀪𑀸𑀕𑀺𑀬𑀸𑀤𑀺𑀧𑀝𑀺𑀧𑀤𑀸𑀲𑀼 𑀨𑀮𑀪𑀸𑀕𑀺𑀬𑀸𑀬 𑀧𑀝𑀺𑀧𑀤𑀸𑀬 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀕𑀯𑀸 𑀤𑁂𑀲𑀬𑀢𑀺, 𑀲𑁄 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀧𑀝𑀺𑀕𑁆𑀕𑀸𑀳𑀓𑁄 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀲𑀁𑀯𑀭𑀲𑀻𑀮𑀸𑀤𑀻𑀲𑀼 𑀧𑀳𑀸𑀦𑀲𑀻𑀮𑁂 𑀲𑀫𑀼𑀘𑁆𑀙𑁂𑀤𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀯𑀲𑁂𑀦 𑀞𑀺𑀢𑁄 𑀳𑀼𑀢𑁆𑀯𑀸 𑀢𑁂𑀦 𑀧𑀳𑀸𑀦𑀲𑀻𑀮𑀲𑀗𑁆𑀔𑀸𑀢𑁂𑀦 𑀯𑀺𑀲𑁂𑀲𑀪𑀽𑀢𑁂𑀦 𑀫𑀕𑁆𑀕𑀲𑀗𑁆𑀔𑀸𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀸𑀤𑀻𑀲𑀼 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀸𑀤𑀻𑀲𑀼. 𑀤𑀸𑀦𑀓𑀣𑀸𑀢𑀺 𑀲𑀧𑁆𑀧𑀼𑀭𑀺𑀲𑀤𑀸𑀦𑀤𑀸𑀦𑀨𑀮𑀅𑀲𑀧𑁆𑀧𑀼𑀭𑀺𑀲𑀤𑀸𑀦𑀤𑀸𑀦𑀨𑀮𑀓𑀣𑀸. 𑀲𑀻𑀮𑀓𑀣𑀸𑀢𑀺 𑀧𑀜𑁆𑀘𑀲𑀻𑀮𑀸𑀤𑀺𑀲𑀻𑀮𑀨𑀮𑀓𑀣𑀸. 𑀲𑀕𑁆𑀕𑀓𑀣𑀸𑀢𑀺 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀲𑀼𑀔𑀓𑀣𑀸 𑀘𑁂𑀯 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀧𑀓𑀧𑀼𑀜𑁆𑀜𑀓𑀣𑀸 𑀘. 𑀆𑀤𑀻𑀦𑀯𑁄𑀢𑀺 𑀆𑀤𑀻𑀦𑀯𑀤𑀲𑁆𑀲𑀓𑁄 𑀲𑀼𑀢𑁆𑀢𑀦𑁆𑀢𑁄. 𑀆𑀦𑀺𑀲𑀁𑀲𑁄𑀢𑀺 𑀆𑀦𑀺𑀲𑀁𑀲𑀤𑀲𑁆𑀲𑀓𑁄 𑀲𑀼𑀢𑁆𑀢𑀦𑁆𑀢𑁄. 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸.

‘‘𑀢𑀢𑁆𑀣 𑀓𑀢𑀫’’𑀦𑁆𑀢𑀺𑀆𑀤𑀻𑀲𑀼 𑀅𑀦𑀼𑀲𑀦𑁆𑀥𑁆𑀬𑀢𑁆𑀣𑁄 𑀯𑀼𑀢𑁆𑀢𑀦𑀬𑁄𑀯. 𑀬𑀸 𑀤𑁂𑀲𑀦𑀸 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸, 𑀲𑀸 𑀤𑁂𑀲𑀦𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀯𑀜𑁆𑀘 𑀲𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀲𑁆𑀲𑀧𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀪𑀸𑀯𑁄 𑀆𑀧𑀚𑁆𑀚𑁂𑀬𑁆𑀬 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀢𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀯𑀸𑀲𑀦𑀸𑀪𑀸𑀕𑀺𑀬𑁂 𑀲𑀼𑀢𑁆𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀸𑀲𑀦𑀸𑀪𑀸𑀕𑀺𑀬𑁂 𑀲𑀼𑀢𑁆𑀢𑁂 𑀧𑀚𑀸𑀦𑀦𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀭𑀺𑀬𑀫𑀕𑁆𑀕𑀧𑀤𑀝𑁆𑀞𑀸𑀦𑀪𑀽𑀢𑀸 𑀧𑀜𑁆𑀜𑀸 𑀦𑀢𑁆𑀣𑀺, 𑀫𑀕𑁆𑀕𑁄 𑀅𑀭𑀺𑀬𑀫𑀕𑁆𑀕𑁄 𑀦𑀢𑁆𑀣𑀺, 𑀨𑀮𑀁 𑀅𑀭𑀺𑀬𑀨𑀮𑀁 𑀦𑀢𑁆𑀣𑀺. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀲𑀼𑀢𑁆𑀢𑁂 𑀧𑀦 𑀧𑀚𑀸𑀦𑀦𑀸𑀤𑀬𑁄 𑀅𑀢𑁆𑀣𑀺, 𑀯𑀸𑀲𑀦𑀸𑀪𑀸𑀕𑀺𑀬𑁂 𑀲𑀼𑀢𑁆𑀢𑁂 𑀦𑀢𑁆𑀣𑀺. ‘‘𑀧𑀚𑀸𑀦𑀦𑀸’’𑀢𑀺𑀆𑀤𑀺𑀦𑀸 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸 𑀤𑀸𑀦𑀓𑀣𑀸𑀤𑀺𑀓𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀲𑀼𑀢𑁆𑀢𑁂 𑀅𑀦𑁆𑀢𑁄𑀕𑀥𑀸, 𑀇𑀢𑀭𑀁𑀬𑁂𑀯 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀦𑁆𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀸 𑀥𑀫𑁆𑀫𑀧𑀤𑀝𑁆𑀞𑀸𑀦𑀪𑀽𑀫𑀺𑀬𑁄 𑀯𑀺𑀪𑀢𑁆𑀢𑀸, 𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑁆𑀯𑁂𑀬𑁂𑀯 𑀦 𑀳𑁄𑀦𑁆𑀢𑀺, 𑀓𑀲𑁆𑀫𑀸 ‘‘𑀤𑁆𑀯𑁂𑀬𑁂𑀯 𑀲𑀼𑀢𑁆𑀢𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀻’’𑀢𑀺 𑀘𑁂 𑀯𑀤𑁂𑀬𑁆𑀬𑀼𑀁? 𑀅𑀲𑀗𑁆𑀓𑀭𑀢𑁄 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀧𑀤𑀝𑁆𑀞𑀸𑀦𑀪𑀽𑀫𑀻𑀦𑀁 𑀯𑀺𑀪𑀚𑀺𑀢𑀩𑁆𑀩𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. ‘‘𑀬𑀤𑀺 𑀏𑀯𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑀸𑀦𑀺𑀧𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀺 𑀅𑀲𑀗𑁆𑀓𑀭𑀢𑁆𑀢𑀸’’𑀢𑀺 𑀘𑁂 𑀯𑀤𑁂𑀬𑁆𑀬𑀼𑀁? 𑀦𑁄 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑁂 𑀦𑀺𑀤𑁆𑀥𑀸𑀭𑀺𑀢𑁂 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑀼𑀢𑁆𑀢𑀫𑁆𑀧𑀺 𑀦𑀺𑀤𑁆𑀥𑀸𑀭𑀺𑀢𑀁, 𑀲𑀁𑀓𑀺𑀮𑁂𑀲𑀥𑀫𑁆𑀫𑀢𑁄 𑀦𑀺𑀲𑁆𑀲𑀝𑁆𑀞𑀥𑀫𑁆𑀫𑀸𑀦𑀁𑀬𑁂𑀯 𑀯𑀸𑀲𑀦𑀸𑀪𑀸𑀕𑀺𑀬𑀥𑀫𑁆𑀫𑀢𑁆𑀢𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑁂 𑀘 𑀦𑀺𑀤𑁆𑀥𑀸𑀭𑀺𑀢𑁂 𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑀫𑁆𑀧𑀺 𑀦𑀺𑀤𑁆𑀥𑀸𑀭𑀺𑀢𑀁 𑀅𑀦𑀜𑁆𑀜𑀢𑁆𑀢𑀸.

‘‘𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀸 𑀥𑀫𑁆𑀫𑀧𑀤𑀝𑁆𑀞𑀸𑀦𑀪𑀽𑀫𑀺𑀬𑁄 𑀯𑀺𑀪𑀢𑁆𑀢𑀺𑀳𑀸𑀭𑁂𑀦 𑀯𑀺𑀪𑀢𑁆𑀢𑀸, 𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀓𑀢𑀫𑁂𑀦 𑀨𑀮𑁂𑀦 𑀬𑁄𑀚𑀬𑀺𑀢𑀩𑁆𑀩𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀻𑀢𑀺 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀸𑀦𑀺 𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀸𑀦𑀺 𑀘𑁂𑀯 𑀢𑀁𑀦𑀺𑀤𑁆𑀥𑀸𑀭𑀡𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑀸𑀦𑀺 𑀘𑀸𑀢𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀤𑁂𑀲𑀦𑀸𑀬 𑀦𑀬𑁂𑀦 𑀦𑀻𑀢𑁂𑀦 𑀨𑀮𑁂𑀦 𑀲𑀩𑁆𑀩𑀢𑁄 𑀲𑀩𑁆𑀩𑀪𑀸𑀕𑁂𑀦 𑀲𑀁𑀯𑀭𑀲𑀻𑀮𑀧𑁆𑀧𑀳𑀸𑀦𑀲𑀻𑀮𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀬𑁄𑀚𑀬𑀺𑀢𑀩𑁆𑀩𑀸𑀦𑀺. 𑀬𑁄𑀚𑁂𑀦𑁆𑀢𑁂𑀦 𑀘 𑀲𑀩𑁆𑀩𑀢𑁄 𑀲𑀩𑁆𑀩𑀪𑀸𑀕𑁂𑀦 𑀘 𑀧𑀤𑀸𑀤𑀺𑀯𑀺𑀘𑀬𑁂𑀦 𑀳𑀸𑀭𑁂𑀦 𑀲𑀁𑀯𑀭𑀲𑀻𑀮𑀸𑀤𑀺𑀓𑀁 𑀨𑀮𑀁 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑀼𑀢𑁆𑀢𑀁 𑀨𑀮𑀁 𑀕𑀯𑁂𑀲𑀺𑀢𑁆𑀯𑀸 ‘‘𑀇𑀤𑀁 𑀨𑀮𑀁 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀨𑀮𑀁, 𑀇𑀤𑀁 𑀨𑀮𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀨𑀮’’𑀦𑁆𑀢𑀺 𑀲𑀼𑀢𑁆𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀨𑀮𑁂𑀦 𑀬𑁄𑀚𑀬𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

‘‘𑀓𑀺𑀢𑁆𑀢𑀓𑁂𑀦 𑀨𑀮𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀸𑀯𑀢𑀺𑀓𑀸 𑀜𑀸𑀡𑀲𑁆𑀲 𑀪𑀽𑀫𑀻’’𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀢𑀸 𑀤𑁂𑀲𑀺𑀢𑁂𑀦 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑁂𑀦 𑀲𑀺𑀤𑁆𑀥𑀸 𑀬𑀸𑀯𑀢𑀺𑀓𑀸 𑀧𑀼𑀜𑁆𑀜𑀪𑀸𑀕𑀺𑀬𑀸 𑀧𑀝𑀺𑀧𑀤𑀸𑀤𑀬𑁄 𑀯𑀺𑀪𑀚𑀦𑀜𑀸𑀡𑀲𑁆𑀲 𑀪𑀽𑀫𑀺 𑀆𑀭𑀫𑁆𑀫𑀡𑀸 𑀪𑀯𑀺𑀢𑀼𑀫𑀭𑀳𑀦𑁆𑀢𑀺, 𑀢𑀸𑀯𑀢𑀺𑀓𑀸𑀳𑀺 𑀪𑀽𑀫𑀻𑀳𑀺 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀁 𑀬𑁄𑀚𑀬𑀺𑀢𑀩𑁆𑀩𑀁. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑁂𑀦 𑀲𑀺𑀤𑁆𑀥𑀸 𑀬𑀸𑀯𑀢𑀺𑀓𑀸 𑀨𑀮𑀪𑀸𑀕𑀺𑀬𑀸 𑀧𑀝𑀺𑀧𑀤𑀸𑀤𑀬𑁄 𑀯𑀺𑀪𑀚𑀦𑀜𑀸𑀡𑀲𑁆𑀲 𑀪𑀽𑀫𑀺 𑀆𑀭𑀫𑁆𑀫𑀡𑀸 𑀪𑀯𑀺𑀢𑀼𑀫𑀭𑀳𑀦𑁆𑀢𑀺, 𑀢𑀸𑀯𑀢𑀺𑀓𑀸𑀳𑀺 𑀪𑀽𑀫𑀻𑀳𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀁 𑀬𑁄𑀚𑁂𑀢𑀩𑁆𑀩𑀁. 𑀇𑀢𑀭𑀤𑁆𑀯𑀬𑀫𑁆𑀧𑀺 𑀲𑀼𑀢𑁆𑀢𑀁 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁂𑀦 𑀜𑀸𑀡𑀲𑁆𑀲 𑀪𑀽𑀫𑀻𑀦𑀁 𑀲𑀼𑀢𑁆𑀢𑀢𑁆𑀣𑀸𑀦𑀁 𑀩𑀳𑀼𑀯𑀺𑀥𑀢𑁆𑀢𑀁 𑀤𑀲𑁆𑀲𑁂𑀢𑀺.

𑁩𑁪. 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀸 𑀥𑀫𑁆𑀫𑀸 𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀪𑀸𑀯𑁂𑀳𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀣𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀸𑀪𑀸𑀕𑀺𑀬𑀪𑀸𑀯𑁂𑀳𑀺 𑀅𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀪𑀸𑀯𑁂𑀳𑀺 𑀯𑀺𑀪𑀚𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀝𑁆𑀞𑀓𑀣𑀸𑀬 𑀧𑀦 𑁋

‘‘𑀏𑀯𑀁 𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀪𑀸𑀯𑁂𑀳𑀺 𑀥𑀫𑁆𑀫𑁂 𑀏𑀓𑀤𑁂𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀪𑀸𑀯𑁂𑀳𑀺 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀪𑀸𑀯𑁂𑀳𑀺 𑀯𑀺𑀪𑀚𑀺𑀢𑀼𑀁 ‘𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁪) 𑁋

𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀬𑁂 𑀥𑀫𑁆𑀫𑀸 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀯𑀺𑀪𑀢𑁆𑀢𑀺𑀳𑀸𑀭𑁂𑀦 𑀯𑀺𑀪𑀚𑀺𑀢𑀩𑁆𑀩𑀸, 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸𑀢𑀺 𑀧𑀼𑀘𑁆𑀙𑀢𑀺, 𑀤𑁆𑀯𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑁂 𑀤𑁆𑀯𑁂 𑀥𑀫𑁆𑀫𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀫𑀲𑀸𑀥𑀸𑀭𑀡𑀸, 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀫𑀲𑀸𑀥𑀸𑀭𑀡𑀸𑀢𑀺 𑀦𑀸𑀫𑁂𑀦 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑀸𑀭𑀡𑀸 𑀲𑀫𑀸𑀦𑀸, ‘‘𑀓𑀼𑀲𑀮𑀸’’𑀢𑀺 𑀦𑀸𑀫𑁂𑀦 𑀏𑀓𑀯𑀻𑀲𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀫𑀸𑀦𑀸, ‘‘𑀅𑀓𑀼𑀲𑀮𑀸’’𑀢𑁆𑀬𑀸𑀤𑀺𑀦𑀸𑀫𑁂𑀦 𑀤𑁆𑀯𑀸𑀤𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀫𑀸𑀦𑀸, 𑀓𑀼𑀲𑀮𑀸𑀤𑀺𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑀘𑀦𑁂𑀦 𑀯𑀘𑀦𑀻𑀬𑀸 𑀅𑀢𑁆𑀣𑀸 𑀓𑀼𑀲𑀮𑀸𑀤𑀺𑀦𑀸𑀫𑀲𑀸𑀥𑀸𑀭𑀡𑀸𑀢𑀺 𑀯𑀼𑀢𑁆𑀢𑀸. 𑀢𑁂𑀦 𑀝𑀻𑀓𑀸𑀬𑀁 𑁋

‘‘𑀦𑀸𑀫𑀁 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀢𑀁𑀫𑀼𑀔𑁂𑀦𑁂𑀯 𑀲𑀤𑁆𑀤𑀢𑁄 𑀢𑀤𑀢𑁆𑀣𑀸𑀯𑀕𑀫𑁄. 𑀲𑀤𑁆𑀤𑁂𑀦 𑀘 𑀲𑀸𑀫𑀜𑁆𑀜𑀭𑀽𑀧𑁂𑀦𑁂𑀯 𑀢𑀣𑀸𑀭𑀽𑀧𑀲𑁆𑀲 𑀅𑀢𑁆𑀣𑀲𑁆𑀲 𑀕𑀳𑀡𑀁, 𑀦 𑀯𑀺𑀲𑁂𑀲𑀭𑀽𑀧𑁂𑀦. 𑀢𑀲𑁆𑀫𑀸 𑀲𑀤𑁆𑀤𑀯𑀘𑀦𑀻𑀬𑀸 𑀅𑀢𑁆𑀣𑀸 𑀲𑀸𑀥𑀸𑀭𑀡𑀭𑀽𑀧𑀦𑀸𑀫𑀸𑀬𑀢𑁆𑀢𑀕𑀳𑀡𑀻𑀬𑀢𑀸𑀬 𑀦𑀸𑀫𑀲𑀸𑀥𑀸𑀭𑀡𑀸 𑀯𑀼𑀢𑁆𑀢𑀸’’𑀢𑀺 𑁋

𑀯𑀼𑀢𑁆𑀢𑀁. 𑀯𑀢𑁆𑀣𑀼𑀲𑀸𑀥𑀸𑀭𑀡𑀸𑀢𑀺 𑀧𑀢𑀺𑀝𑁆𑀞𑀸𑀦𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀲𑀸𑀥𑀸𑀭𑀡𑀸. 𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑁂 𑀲𑀦𑁆𑀢𑀸𑀦𑁂 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀫𑁆𑀳𑀺 𑀯𑀸 𑀬𑁂 𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀥𑀫𑁆𑀫𑀸 𑀢𑁂𑀦 𑀲𑀦𑁆𑀢𑀸𑀦𑁂𑀦 𑀯𑀸 𑀯𑀢𑁆𑀣𑀼𑀦𑀸 𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀦𑀸 𑀯𑀸 𑀲𑀸𑀥𑀸𑀭𑀡𑀸 𑀲𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀲𑀦𑁆𑀢𑀸𑀦𑁂 𑀧𑀢𑀺𑀢𑀢𑁆𑀢𑀸 𑀨𑀼𑀲𑀦𑀸𑀤𑀺𑀲𑀪𑀸𑀯𑀢𑁄 𑀪𑀺𑀦𑁆𑀦𑀸𑀧𑀺 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀲𑀫𑀸𑀦𑀯𑀢𑁆𑀣𑀼𑀓𑀸𑀬𑁂𑀯 𑀪𑀯𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀺𑀳𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀓𑀺𑀁 𑀦𑀸𑀫𑀲𑀸𑀥𑀸𑀭𑀡𑀯𑀢𑁆𑀣𑀼𑀲𑀸𑀥𑀸𑀭𑀡𑀸𑀬𑁂𑀯 𑀯𑀺𑀪𑀚𑀺𑀢𑀩𑁆𑀩𑀸, 𑀅𑀜𑁆𑀜𑀁 𑀯𑀺𑀪𑀚𑀺𑀢𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀁 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀸𑀫𑀲𑀸𑀥𑀸𑀭𑀡𑀯𑀢𑁆𑀣𑀼𑀲𑀸𑀥𑀸𑀭𑀡𑁂𑀳𑀺 𑀅𑀜𑁆𑀜𑀁 𑀬𑀁 𑀯𑀸 𑀧𑀦 𑀓𑀺𑀘𑁆𑀘𑀲𑀸𑀥𑀸𑀭𑀡𑀧𑀘𑁆𑀘𑀬𑀲𑀸𑀥𑀸𑀭𑀡𑀧𑀝𑀺𑀧𑀓𑁆𑀔𑀸𑀤𑀺𑀲𑀸𑀥𑀸𑀭𑀡𑀫𑁆𑀧𑀺 𑀥𑀫𑁆𑀫𑀚𑀸𑀢𑀁 𑀏𑀯𑀁𑀚𑀸𑀢𑀺𑀬𑀁 𑀲𑀸𑀥𑀸𑀭𑀡𑀚𑀸𑀢𑀺𑀬𑀁, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀘𑀬𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀕𑀯𑁂𑀲𑀺𑀢𑁆𑀯𑀸 𑀬𑀼𑀢𑁆𑀢𑀁 𑀲𑀸𑀥𑀸𑀭𑀡𑀁 𑀯𑀺𑀪𑀢𑁆𑀢𑀺𑀳𑀸𑀭𑁂𑀦 𑀯𑀺𑀪𑀚𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑁂𑀲𑀼 𑀦𑀸𑀫𑀲𑀸𑀥𑀸𑀭𑀡𑀸𑀤𑀻𑀲𑀼 𑀓𑀢𑀫𑁂 𑀦𑀸𑀫𑀲𑀸𑀥𑀸𑀭𑀡𑀸, 𑀓𑀢𑀫𑁂 𑀯𑀢𑁆𑀣𑀼𑀲𑀸𑀥𑀸𑀭𑀡𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀸𑀢𑀼𑀖𑀸𑀢𑀓𑀸𑀤𑀻𑀦𑀁 𑀙𑀦𑁆𑀦𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀓𑀫𑁆𑀫𑀓𑀭𑀸𑀦𑀁 𑀲𑀢𑁆𑀢𑀸𑀦𑀜𑁆𑀘 𑀤𑀼𑀕𑁆𑀕𑀢𑀺𑀅𑀳𑁂𑀢𑀼𑀓𑀲𑀼𑀕𑀢𑀺𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀸𑀦𑀁 𑀘𑀢𑀼𑀦𑁆𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀦𑀺𑀬𑀢𑀓𑀫𑁆𑀫𑀓𑀭𑀸𑀦𑀁 𑀲𑀢𑁆𑀢𑀸𑀦𑀜𑁆𑀘 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸 𑀓𑀺𑀮𑁂𑀲𑀸 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀦𑀸𑀫𑀲𑀸𑀥𑀸𑀭𑀡𑀸 𑀲𑀫𑀸𑀦𑀸 𑀪𑀯𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀲𑀦𑀯𑀲𑁂𑀦 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀦𑀸𑀫𑀦𑀸𑀢𑀺𑀯𑀢𑁆𑀢𑀦𑀢𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀦𑀺𑀬𑀢𑀸𑀦𑀺𑀬𑀢𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀢𑁆𑀣𑀼𑀪𑀸𑀯𑀢𑁄 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀘 𑀲𑀫𑀸𑀦𑀯𑀢𑁆𑀣𑀼𑀓𑀸𑀢𑀺 𑀅𑀢𑁆𑀣𑁄. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑀼𑀕𑁆𑀕𑀢𑀺𑀅𑀳𑁂𑀢𑀼𑀓𑀸𑀤𑀺𑀘𑀢𑀼𑀩𑁆𑀩𑀺𑀥𑀲𑀢𑁆𑀢𑀲𑁆𑀲, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀓𑀺𑀮𑁂𑀲𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀦𑀸𑀫𑀲𑀸𑀥𑀸𑀭𑀡𑀸 𑀲𑀫𑀸𑀦𑀸 𑀪𑀯𑀦𑁆𑀢𑀺 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀧𑁆𑀧𑀳𑀸𑀢𑀩𑁆𑀩𑀅𑀦𑀸𑀕𑀸𑀫𑀺𑀫𑀕𑁆𑀕𑀧𑁆𑀧𑀳𑀸𑀢𑀩𑁆𑀩𑀯𑀲𑁂𑀦 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀦𑀸𑀫𑀦𑀸𑀢𑀺𑀯𑀢𑁆𑀢𑀦𑀢𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀢𑁆𑀣𑀼𑀪𑀸𑀯𑀢𑁄 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀲𑀫𑀸𑀦𑀯𑀢𑁆𑀣𑀼𑀓𑀸𑀢𑀺 𑀅𑀢𑁆𑀣𑁄 𑀘 𑀕𑀳𑁂𑀢𑀩𑁆𑀩𑁄. 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀅𑀦𑀸𑀕𑀸𑀫𑀺𑀲𑁆𑀲 𑀘 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀉𑀤𑁆𑀥𑀁𑀪𑀸𑀕𑀺𑀬𑀸 𑀲𑀁𑀬𑁄𑀚𑀦𑀸 𑀉𑀤𑁆𑀥𑀫𑁆𑀪𑀸𑀕𑀺𑀬𑀦𑀸𑀫𑀲𑀸𑀥𑀸𑀭𑀡𑀸 𑀲𑀫𑀸𑀦𑀸 𑀪𑀯𑀦𑁆𑀢𑀺 𑀭𑀽𑀧𑀭𑀸𑀕𑀸𑀤𑀺𑀯𑀲𑁂𑀦 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀉𑀤𑁆𑀥𑀁𑀪𑀸𑀕𑀺𑀬𑀦𑀸𑀫𑀦𑀸𑀢𑀺𑀯𑀢𑁆𑀢𑀦𑀢𑁄. 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀅𑀦𑀸𑀕𑀸𑀫𑀺𑀲𑁆𑀲 𑀘 𑀉𑀤𑁆𑀥𑀁𑀪𑀸𑀕𑀺𑀬𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀢𑁆𑀣𑀼𑀪𑀸𑀯𑀢𑁄 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀲𑀫𑀸𑀦𑀯𑀢𑁆𑀣𑀼𑀓𑀸𑀢𑀺 𑀅𑀢𑁆𑀣𑁄 𑀘 𑀕𑀳𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑀝𑀻𑀓𑀸𑀬𑀁 𑁋 ‘‘𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀦𑀜𑁆𑀳𑀺 𑀬𑀣𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑀢𑁆𑀢𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀁, 𑀏𑀯𑀁 𑀅𑀦𑀺𑀬𑀢𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑁂𑀧𑀢𑁄 𑀧𑀦 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀳𑀸𑀦𑁂𑀓𑀝𑁆𑀞𑀸 𑀓𑀺𑀮𑁂𑀲𑀸 𑀦𑀸𑀫𑀲𑀸𑀥𑀸𑀭𑀡𑀸 𑀳𑁄𑀦𑁆𑀢𑀺, 𑀲𑀳𑀚𑁂𑀓𑀝𑁆𑀞𑀸 𑀓𑀺𑀮𑁂𑀲𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀲𑀸𑀥𑀸𑀭𑀡𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀣𑀁 𑀯𑁄𑀤𑀸𑀦𑀧𑀓𑁆𑀔𑁂 𑀲𑀸𑀥𑀸𑀭𑀡𑀸 𑀯𑀺𑀪𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀁 𑀓𑀺𑀜𑁆𑀘𑀺 𑀅𑀭𑀺𑀬𑀲𑀸𑀯𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀻𑀢𑀺 𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀆𑀤𑀺𑀓𑀸 𑀮𑁄𑀓𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑁂𑀯 𑀕𑀳𑀺𑀢𑀸. 𑀅𑀭𑀺𑀬𑀲𑀸𑀯𑀓𑁄𑀢𑀺 𑀅𑀭𑀺𑀬𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑁄 𑀅𑀭𑀺𑀬𑀲𑀸𑀯𑀓𑁄𑀢𑀺 𑀯𑀢𑁆𑀢𑀩𑁆𑀩𑁄, 𑀛𑀸𑀦𑀮𑀸𑀪𑀻 𑀘 𑀨𑀮𑀝𑁆𑀞𑁄 𑀘 𑀧𑀼𑀕𑁆𑀕𑀮𑁄, 𑀦 𑀫𑀕𑁆𑀕𑀝𑁆𑀞𑁄. 𑀫𑀕𑁆𑀕𑀝𑁆𑀞𑁄 𑀳𑀺 𑀮𑁄𑀓𑀺𑀬𑀁 𑀬𑀁 𑀓𑀺𑀜𑁆𑀘𑀺 𑀲𑀫𑀸𑀧𑀢𑁆𑀢𑀺𑀁 𑀦 𑀲𑀫𑀸𑀧𑀚𑁆𑀚𑀢𑀺. 𑀲𑀩𑁆𑀩𑀸 𑀲𑀸 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸 𑀤𑀺𑀩𑁆𑀩𑀯𑀺𑀳𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀻𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀸𑀥𑀸𑀭𑀡𑀸 𑀢𑀁𑀲𑀫𑀗𑁆𑀕𑀻𑀳𑀺 𑀯𑀻𑀢𑀭𑀸𑀕𑀸𑀯𑀻𑀢𑀭𑀸𑀕𑁂𑀳𑀺 𑀲𑀸𑀥𑀸𑀭𑀡𑀸 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀦𑀸𑀫𑀦𑀸𑀢𑀺𑀯𑀢𑁆𑀢𑀦𑀢𑁄 𑀘 𑀯𑀻𑀢𑀭𑀸𑀕𑀸𑀯𑀻𑀢𑀭𑀸𑀕𑁂𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀘. ‘‘𑀅𑀭𑀺𑀬𑀲𑀸𑀯𑀓𑁄 𑀘 𑀮𑁄𑀓𑀺𑀬𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀑𑀥𑀺𑀲𑁄 𑀑𑀥𑀺𑀲𑁄 𑀲𑀫𑀸𑀧𑀚𑁆𑀚𑀢𑀺, 𑀏𑀯𑀁 𑀲𑀢𑀺 𑀓𑀣𑀁 𑀯𑀻𑀢𑀭𑀸𑀕𑁂𑀳𑀺 𑀲𑀸𑀥𑀸𑀭𑀡𑀸𑀢𑀺 𑀲𑀤𑁆𑀤𑀳𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀸𑀥𑀸𑀭𑀡𑀸 𑀳𑀺 𑀥𑀫𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘𑀓𑀣𑀁 𑀢𑁂 𑀑𑀥𑀺𑀲𑁄 𑀕𑀳𑀺𑀢𑀸, 𑀅𑀣 𑀑𑀥𑀺𑀲𑁄 𑀕𑀳𑁂𑀢𑀩𑁆𑀩𑀸, 𑀓𑀣𑀁 𑀲𑀸𑀥𑀸𑀭𑀡𑀸𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀢𑀁 𑀯𑀺𑀲𑁄𑀥𑁂𑀦𑁆𑀢𑁄 𑀆𑀳 𑁋 ‘𑀲𑀸𑀥𑀸𑀭𑀡𑀸 𑀳𑀺 𑀥𑀫𑁆𑀫𑀸 𑀏𑀯𑀁 𑀅𑀜𑁆𑀜𑀫𑀜𑁆𑀜’𑀦𑁆𑀢𑀺𑀆𑀤𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀏𑀯𑀁 𑀯𑀻𑀢𑀭𑀸𑀕𑀸𑀯𑀻𑀢𑀭𑀸𑀕𑁂𑀳𑀺 𑀑𑀥𑀺𑀲𑁄 𑀑𑀥𑀺𑀲𑁄 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸 𑀥𑀫𑁆𑀫𑀸 𑀧𑀭𑀁 𑀧𑀭𑀁 𑀧𑀘𑁆𑀙𑀸 𑀧𑀘𑁆𑀙𑀸 𑀧𑀯𑀢𑁆𑀢𑀺𑀬𑀫𑀸𑀦𑀁 𑀥𑀫𑁆𑀫𑀚𑀸𑀢𑀁 𑀲𑀓𑀁 𑀲𑀓𑀁 𑀧𑀼𑀩𑁆𑀩𑁂 𑀧𑀼𑀩𑁆𑀩𑁂 𑀚𑀸𑀢𑀁 ‘‘𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀻’’𑀢𑀺 𑀦𑀸𑀫𑀁 𑀦𑀺𑀬𑀢𑀯𑀺𑀲𑀬𑀁 𑀅𑀜𑁆𑀜𑀫𑀜𑁆𑀜𑀁 𑀳𑀼𑀢𑁆𑀯𑀸 𑀳𑀺 𑀬𑀲𑁆𑀫𑀸 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀲𑀸𑀥𑀸𑀭𑀡𑀸𑀢𑀺 𑀲𑀤𑁆𑀤𑀳𑀺𑀢𑀩𑁆𑀩𑀸 𑀕𑀳𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. ‘‘𑀧𑀭𑀁 𑀧𑀭𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀓𑀣𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀦𑀸𑀢𑀺𑀯𑀢𑁆𑀢𑀦𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀬𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄 𑀅𑀭𑀺𑀬𑀲𑀸𑀯𑀓𑁄 𑀯𑀸 𑀅𑀯𑀻𑀢𑀭𑀸𑀕𑁄 𑀯𑀸. 𑀇𑀫𑁂𑀳𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀅𑀭𑀺𑀬𑀲𑀸𑀯𑀓𑁄 𑀯𑀸 𑀅𑀯𑀻𑀢𑀭𑀸𑀕𑁄 𑀯𑀸 𑀧𑀭𑀁 𑀧𑀭𑀁 𑀲𑀫𑀸𑀧𑀚𑁆𑀚𑀦𑁆𑀢𑁄𑀧𑀺 𑀢𑀁 𑀥𑀫𑁆𑀫𑀁 𑀮𑁄𑀓𑀺𑀬𑀁 𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀅𑀜𑁆𑀜𑀁 𑀉𑀧𑀕𑀦𑁆𑀢𑁆𑀯𑀸 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀳𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀇𑀫𑁂 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸𑀯𑀸𑀢𑀺 𑀤𑀝𑁆𑀞𑀩𑁆𑀩𑀸.

‘‘𑀯𑀸𑀲𑀦𑀸𑀪𑀸𑀕𑀺𑀬𑀸𑀤𑀺𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀸 𑀬𑁂 𑀥𑀫𑁆𑀫𑀸 𑀇𑀫𑀺𑀦𑀸 𑀯𑀺𑀪𑀢𑁆𑀢𑀺𑀳𑀸𑀭𑁂𑀦 𑀯𑀺𑀪𑀢𑁆𑀢𑀸, 𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑀫𑁂 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀼 𑀯𑀺𑀪𑀚𑀺𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑀫𑁂 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸𑀢𑀺 𑀧𑀼𑀘𑁆𑀙𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀬𑀸𑀯 𑀤𑁂𑀲𑀦𑀁 𑀉𑀧𑀸𑀤𑀸𑀬 𑀅𑀲𑀸𑀥𑀸𑀭𑀡𑀸 𑀥𑀫𑁆𑀫𑀸 𑀕𑀯𑁂𑀲𑀺𑀢𑀩𑁆𑀩𑀸, ‘‘𑀲𑁂𑀓𑁆𑀔𑀸𑀲𑁂𑀓𑁆𑀔𑀸’’𑀢𑀺 𑀯𑀸 𑀕𑀯𑁂𑀲𑀺𑀢𑀩𑁆𑀩𑀸, ‘‘𑀪𑀩𑁆𑀩𑀸𑀪𑀩𑁆𑀩𑀸’’𑀢𑀺 𑀯𑀸 𑀕𑀯𑁂𑀲𑀺𑀢𑀩𑁆𑀩𑀸. 𑀅𑀣 𑀯𑀸 𑀬𑀸𑀯 ‘‘𑀲𑁂𑀓𑁆𑀔𑀸𑀲𑁂𑀓𑁆𑀔𑀸 𑀪𑀩𑁆𑀩𑀸𑀪𑀩𑁆𑀩𑀸’’𑀢𑀺 𑀤𑁂𑀲𑀦𑀸 𑀯𑀼𑀢𑁆𑀢𑀸, 𑀢𑀸𑀯 𑀤𑁂𑀲𑀦𑀁 𑀉𑀧𑀸𑀤𑀸𑀬 𑀅𑀲𑀸𑀥𑀸𑀭𑀡𑀸 𑀕𑀯𑁂𑀲𑀺𑀢𑀩𑁆𑀩𑀸. 𑀓𑀣𑀁 𑀕𑀯𑁂𑀲𑀺𑀢𑀩𑁆𑀩𑀸? 𑀅𑀭𑀺𑀬𑁂𑀲𑀼 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑀯𑀲𑁂𑀦 ‘‘𑀲𑁂𑀓𑁆𑀔𑀸’’𑀢𑀺 𑀦𑀸𑀫𑀁 𑀅𑀲𑁂𑀓𑁆𑀔𑁂𑀦 𑀅𑀲𑀸𑀥𑀸𑀭𑀡𑀁, ‘‘𑀅𑀲𑁂𑀓𑁆𑀔𑀸’’𑀢𑀺 𑀦𑀸𑀫𑀁 𑀲𑁂𑀓𑁆𑀔𑁂𑀦 𑀅𑀲𑀸𑀥𑀸𑀭𑀡𑀦𑁆𑀢𑀺 𑀯𑀸, 𑀅𑀦𑀭𑀺𑀬𑁂𑀲𑀼 ‘‘𑀪𑀩𑁆𑀩𑀸’’𑀢𑀺 𑀦𑀸𑀫𑀁 𑀅𑀪𑀩𑁆𑀩𑁂𑀦 𑀅𑀲𑀸𑀥𑀸𑀭𑀡𑀁, ‘‘𑀅𑀪𑀩𑁆𑀩𑀸’’𑀢𑀺 𑀦𑀸𑀫𑀁 𑀪𑀩𑁆𑀩𑁂𑀦 𑀅𑀲𑀸𑀥𑀸𑀭𑀡𑀦𑁆𑀢𑀺 𑀯𑀸 𑀕𑀯𑁂𑀲𑀺𑀢𑀩𑁆𑀩𑀸. 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀁𑀬𑁄𑀚𑀦𑀸 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀦𑀼𑀲𑀬𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑁆𑀢𑀸 𑀅𑀝𑁆𑀞𑀫𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲 𑀘 𑀲𑁄𑀢𑀸𑀧𑀦𑁆𑀦𑀲𑁆𑀲 𑀨𑀮𑀝𑁆𑀞𑀲𑁆𑀲 𑀘 𑀲𑀸𑀥𑀸𑀭𑀡𑀸 𑀪𑀯𑀦𑁆𑀢𑀺, 𑀥𑀫𑁆𑀫𑀢𑀸 𑀥𑀫𑁆𑀫𑀲𑀪𑀸𑀯𑁄 𑀅𑀲𑀸𑀥𑀸𑀭𑀡𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀝𑁆𑀞𑀫𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀢𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀲𑀸𑀥𑀸𑀭𑀡𑀸, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀦𑁆𑀦𑀨𑀮𑀝𑁆𑀞𑀢𑀸 𑀘 𑀅𑀝𑁆𑀞𑀫𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲 𑀅𑀲𑀸𑀥𑀸𑀭𑀡𑀸. 𑀅𑀝𑁆𑀞𑀫𑀓𑀲𑁆𑀲 𑀯𑀸 𑀧𑀳𑀻𑀬𑀫𑀸𑀦𑀓𑀺𑀮𑁂𑀲𑀢𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀲𑀸𑀥𑀸𑀭𑀡𑀸, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀳𑀻𑀦𑀓𑀺𑀮𑁂𑀲𑀢𑀸 𑀘 𑀅𑀝𑁆𑀞𑀫𑀓𑀲𑁆𑀲 𑀅𑀲𑀸𑀥𑀸𑀭𑀡𑀸’’𑀢𑀺.

𑀉𑀤𑁆𑀥𑀫𑁆𑀪𑀸𑀕𑀺𑀬𑀸 𑀲𑀁𑀬𑁄𑀚𑀦𑀸 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀦𑀼𑀲𑀬𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑁆𑀢𑀸 𑀅𑀝𑁆𑀞𑀫𑀓𑀲𑁆𑀲 𑀫𑀕𑁆𑀕𑀝𑁆𑀞𑀪𑀸𑀯𑁂𑀦 𑀅𑀝𑁆𑀞𑀫𑀓𑀲𑀤𑀺𑀲𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑀲𑁆𑀲 𑀘 𑀅𑀦𑀸𑀕𑀸𑀫𑀺𑀲𑁆𑀲 𑀨𑀮𑀝𑁆𑀞𑀲𑁆𑀲 𑀘 𑀲𑀸𑀥𑀸𑀭𑀡𑀸, 𑀥𑀫𑁆𑀫𑀢𑀸 𑀥𑀫𑁆𑀫𑀲𑀪𑀸𑀯𑁄 𑀅𑀲𑀸𑀥𑀸𑀭𑀡𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀝𑁆𑀞𑀫𑀓𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑀢𑀸 𑀅𑀦𑀸𑀕𑀸𑀫𑀺𑀲𑁆𑀲 𑀨𑀮𑀝𑁆𑀞𑀲𑁆𑀲 𑀅𑀲𑀸𑀥𑀸𑀭𑀡𑀸, 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑀝𑁆𑀞𑀢𑀸 𑀘 𑀅𑀝𑁆𑀞𑀫𑀓𑀲𑁆𑀲 𑀅𑀲𑀸𑀥𑀸𑀭𑀡𑀸. 𑀅𑀝𑁆𑀞𑀫𑀓𑀲𑁆𑀲 𑀯𑀸 𑀧𑀳𑀻𑀬𑀫𑀸𑀦𑀓𑀺𑀮𑁂𑀲𑀢𑀸 𑀅𑀦𑀸𑀕𑀸𑀫𑀺𑀲𑁆𑀲 𑀅𑀲𑀸𑀥𑀸𑀭𑀡𑀸, 𑀅𑀦𑀸𑀕𑀸𑀫𑀺𑀲𑁆𑀲 𑀨𑀮𑀝𑁆𑀞𑀲𑁆𑀲 𑀧𑀳𑀻𑀦𑀓𑀺𑀮𑁂𑀲𑀢𑀸 𑀘 𑀅𑀝𑁆𑀞𑀫𑀓𑀲𑁆𑀲 𑀅𑀲𑀸𑀥𑀸𑀭𑀡𑀸’’𑀢𑀺. ‘‘𑀫𑀕𑁆𑀕𑀝𑁆𑀞𑀢𑀸 𑀨𑀮𑀝𑁆𑀞𑀢𑀸𑀬 𑀅𑀲𑀸𑀥𑀸𑀭𑀡𑀸, 𑀨𑀮𑀝𑁆𑀞𑀢𑀸 𑀘 𑀫𑀕𑁆𑀕𑀝𑁆𑀞𑀢𑀸𑀬 𑀅𑀲𑀸𑀥𑀸𑀭𑀡𑀸’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀸𑀫𑀁‘‘𑀲𑁂𑀓𑁆𑀔𑀸’’𑀢𑀺 𑀦𑀸𑀫𑀁 𑀲𑀸𑀥𑀸𑀭𑀡𑀁. 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀝𑁆𑀞𑀸𑀦𑀁 𑀢𑀁𑀢𑀁𑀫𑀕𑁆𑀕𑀝𑁆𑀞𑀢𑀸 𑀅𑀜𑁆𑀜𑀫𑀜𑁆𑀜𑀁 𑀫𑀕𑁆𑀕𑀝𑁆𑀞𑀸𑀦𑀁 𑀅𑀲𑀸𑀥𑀸𑀭𑀡𑀸. 𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀝𑁆𑀞𑀸𑀦𑀜𑁆𑀘 𑀅𑀲𑀸𑀥𑀸𑀭𑀡𑀸, 𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀝𑁆𑀞𑀸𑀦𑀁 𑀢𑀁𑀢𑀁𑀨𑀮𑀝𑁆𑀞𑀢𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀨𑀮𑀝𑁆𑀞𑀸𑀦𑀁 𑀅𑀲𑀸𑀥𑀸𑀭𑀡𑀸, 𑀘𑀢𑀼𑀦𑁆𑀦𑀁 𑀫𑀕𑁆𑀕𑀝𑁆𑀞𑀸𑀦𑀜𑁆𑀘 𑀅𑀲𑀸𑀥𑀸𑀭𑀡𑀸𑀢𑀺 𑀅𑀢𑁆𑀣𑁄. ‘‘𑀲𑁂𑀓𑁆𑀔𑀸𑀦𑀁 𑀢𑀁𑀢𑀁𑀫𑀕𑁆𑀕𑀝𑁆𑀞𑀢𑀸 𑀢𑀁𑀢𑀁𑀨𑀮𑀝𑁆𑀞𑀢𑀸𑀬 𑀅𑀲𑀸𑀥𑀸𑀭𑀡𑀸, 𑀢𑀁𑀢𑀁𑀨𑀮𑀝𑁆𑀞𑀢𑀸 𑀘 𑀢𑀁𑀢𑀁𑀫𑀕𑁆𑀕𑀝𑁆𑀞𑀢𑀸𑀬 𑀅𑀲𑀸𑀥𑀸𑀭𑀡𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀩𑁆𑀩𑁂𑀲𑀁 𑀧𑀝𑀺𑀧𑀦𑁆𑀦𑀓𑀸𑀦𑀦𑁆𑀢𑀺 𑀨𑀮𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀧𑀝𑀺𑀧𑀦𑁆𑀦𑀓𑀸, 𑀢𑁂𑀲𑀁 𑀫𑀕𑁆𑀕𑀲𑀫𑀗𑁆𑀕𑀻𑀦𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀸𑀫𑀁 ‘‘𑀧𑀝𑀺𑀧𑀦𑁆𑀦𑀓𑀸’’𑀢𑀺 𑀦𑀸𑀫𑀁 𑀲𑀸𑀥𑀸𑀭𑀡𑀁, 𑀥𑀫𑁆𑀫𑀢𑀸 𑀢𑀁𑀢𑀁𑀫𑀕𑁆𑀕𑀝𑁆𑀞𑀢𑀸 𑀅𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀲𑀁 𑀲𑁂𑀓𑁆𑀔𑀸𑀦𑀁 𑀲𑀢𑁆𑀢𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑁂𑀓𑁆𑀔𑀸𑀦𑀁 𑀲𑀻𑀮𑀁 𑀲𑀸𑀥𑀸𑀭𑀡𑀁, 𑀥𑀫𑁆𑀫𑀢𑀸 𑀢𑀁𑀢𑀁𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀢𑀸 𑀅𑀲𑀸𑀥𑀸𑀭𑀡𑀸𑀢𑀺. 𑀯𑀸𑀲𑀦𑀸𑀪𑀸𑀕𑀺𑀬𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀤𑀬𑁄 𑀘𑁂𑀯 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀸 𑀲𑁂𑀓𑁆𑀔𑀸𑀤𑀬𑁄 𑀘 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀪𑁂𑀤𑁂𑀦 𑀯𑀺𑀪𑀢𑁆𑀢𑀺𑀳𑀸𑀭𑁂𑀦 𑀯𑀺𑀪𑀚𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀝𑁆𑀞𑀫𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀭𑀺𑀬𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀅𑀲𑀸𑀥𑀸𑀭𑀡𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀣𑀁 𑀅𑀦𑀭𑀺𑀬𑁂𑀲𑀼 𑀅𑀲𑀸𑀥𑀸𑀭𑀡𑀸 𑀯𑀺𑀪𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀅𑀭𑀺𑀬𑁂𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀦𑀭𑀺𑀬𑁂𑀲𑀼𑀧𑀺 𑀯𑀺𑀪𑀚𑀺𑀢𑁆𑀯𑀸 𑀕𑀯𑁂𑀲𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘𑀏𑀯𑀁 ‘𑀅𑀝𑁆𑀞𑀫𑀓𑀲𑁆𑀲𑀸’𑀢𑀺𑀆𑀤𑀺𑀦𑀸 𑀅𑀭𑀺𑀬𑀧𑀼𑀕𑁆𑀕𑀮𑁂𑀲𑀼 𑀅𑀲𑀸𑀥𑀸𑀭𑀡𑀥𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑁂𑀲𑀼 𑀦𑀬𑀤𑀲𑁆𑀲𑀦𑀢𑁆𑀣𑀁 ‘𑀏𑀯𑀁 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀭𑀺𑀬𑁂𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀪𑀩𑁆𑀩𑀸𑀪𑀩𑁆𑀩𑁂𑀲𑀼 𑀅𑀦𑀭𑀺𑀬𑁂𑀲𑀼 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸 𑀅𑀲𑀸𑀥𑀸𑀭𑀡𑀢𑁄 𑀯𑀺𑀲𑁂𑀲𑀁 𑀅𑀲𑀸𑀥𑀸𑀭𑀡𑀁 𑀅𑀦𑀼𑀧𑀲𑁆𑀲𑀺𑀦𑀸 𑀕𑀯𑁂𑀲𑀓𑁂𑀦 𑀧𑀡𑁆𑀟𑀺𑀢𑁂𑀦 𑀪𑀩𑁆𑀩𑀸𑀪𑀩𑁆𑀩𑁂𑀲𑀼𑀧𑀺 𑀳𑀻𑀦𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀁 𑀉𑀧𑀸𑀤𑀸𑀬 𑀕𑀯𑁂𑀲𑀺𑀢𑀩𑁆𑀩𑀁. 𑀓𑀣𑀁? 𑀫𑀸𑀢𑀼𑀖𑀸𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀲𑀢𑁆𑀢𑀫𑀚𑀯𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀢𑀁𑀲𑀫𑀗𑁆𑀕𑀻𑀦𑀁 𑀯𑀸 𑀢𑀣𑀸𑀧𑀯𑀢𑁆𑀢𑀸 𑀧𑀞𑀫𑀚𑀯𑀦𑀘𑀺𑀢𑁆𑀢𑀼𑀧𑀸𑀤𑀸𑀤𑀬𑁄 𑀅𑀦𑀺𑀬𑀢𑀸 𑀥𑀫𑁆𑀫𑀸 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀪𑀸𑀯𑁂𑀦 𑀲𑀸𑀥𑀸𑀭𑀡𑀸, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁆𑀢𑀸 𑀅𑀲𑀸𑀥𑀸𑀭𑀡𑀸. 𑀬𑀣𑀸 𑀳𑀺 𑀘𑀺𑀢𑁆𑀢𑀁 ‘‘𑀘𑀺𑀢𑁆𑀢𑀲𑀁𑀲𑀝𑁆𑀞’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀧𑀺 ‘‘𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑀸𑀥𑀸𑀭𑀡𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀼𑀧𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀲𑀢𑁆𑀢𑀫𑀚𑀯𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀗𑁆𑀕𑀻𑀦𑀁 𑀅𑀦𑀺𑀬𑀢𑀸 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀧𑀞𑀫𑀚𑀯𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀬𑁄 𑀥𑀫𑁆𑀫𑀸 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀪𑀸𑀯𑁂𑀦 𑀲𑀸𑀥𑀸𑀭𑀡𑀸, 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀗𑁆𑀕𑀻𑀪𑀸𑀯𑀢𑁄 𑀅𑀲𑀸𑀥𑀸𑀭𑀡𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑁋

‘‘𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀅𑀦𑀺𑀬𑀢𑀸 𑀥𑀫𑁆𑀫𑀸 𑀲𑀸𑀥𑀸𑀭𑀡, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀼𑀧𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀅𑀦𑀺𑀬𑀢𑀸 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸, 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀲𑀸𑀥𑀸𑀭𑀡𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁪).

𑀢𑀢𑁆𑀣 ‘‘𑀇𑀫𑀺𑀦𑀸 𑀦𑀬𑁂𑀦𑀸’’𑀢𑀺 𑀇𑀫𑀺𑀦𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑀸 𑀅𑀦𑀺𑀬𑀢𑀸 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸, 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀪𑀩𑁆𑀩𑀸 𑀅𑀦𑀺𑀬𑀢𑀸 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸𑀢𑀺 𑀕𑀳𑀺𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀩𑁆𑀩𑀸𑀪𑀩𑁆𑀩𑀸’’𑀢𑀺. 𑀢𑀣𑀸 𑀳𑀻𑀦𑀲𑁆𑀲 𑀳𑀻𑀦𑁄 𑀳𑀻𑀦𑀪𑀸𑀯𑁂𑀦 𑀲𑀸𑀥𑀸𑀭𑀡𑁄, 𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑀸 𑀅𑀲𑀸𑀥𑀸𑀭𑀡𑀸. 𑀫𑀚𑁆𑀛𑀺𑀫𑀲𑁆𑀲 𑀫𑀚𑁆𑀛𑀺𑀫𑁄 𑀲𑀸𑀥𑀸𑀭𑀡𑁄, 𑀳𑀻𑀦𑀼𑀓𑁆𑀓𑀝𑁆𑀞𑀸 𑀅𑀲𑀸𑀥𑀸𑀭𑀡𑀸. 𑀉𑀓𑁆𑀓𑀝𑁆𑀞𑀲𑁆𑀲 𑀉𑀓𑁆𑀓𑀝𑁆𑀞𑁄 𑀉𑀓𑁆𑀓𑀝𑁆𑀞𑀪𑀸𑀯𑁂𑀦 𑀲𑀸𑀥𑀸𑀭𑀡𑁄, 𑀳𑀻𑀦𑀫𑀚𑁆𑀛𑀺𑀫𑀸 𑀅𑀲𑀸𑀥𑀸𑀭𑀡𑀸𑀢𑀺𑀧𑀺 𑀕𑀯𑁂𑀲𑀺𑀢𑀩𑁆𑀩𑀸. 𑀢𑁂𑀦𑀸𑀳 𑁋 ‘‘𑀳𑀻𑀦𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀁 𑀉𑀧𑀸𑀤𑀸𑀬 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺.

‘‘𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺𑀦𑀸 𑀦𑀸𑀦𑀸𑀯𑀺𑀥𑁂𑀦 𑀯𑀺𑀪𑀢𑁆𑀢𑀺𑀳𑀸𑀭𑀦𑀬𑁂𑀦 𑀥𑀫𑁆𑀫𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀣𑀁 𑀪𑀽𑀫𑀺𑀧𑀤𑀝𑁆𑀞𑀸𑀦𑀸𑀦𑀺 𑀯𑀺𑀪𑀢𑁆𑀢𑀺𑀳𑀸𑀭𑀦𑀬𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 𑀥𑀫𑁆𑀫𑀯𑀺𑀪𑀚𑀦𑀸𑀦𑀦𑁆𑀢𑀭𑀁 𑀪𑀽𑀫𑀺𑀧𑀤𑀝𑁆𑀞𑀸𑀦𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀲𑁆𑀲𑀦𑀪𑀽𑀫𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀲𑁆𑀲𑀦𑀪𑀽𑀫𑀻𑀢𑀺 𑀤𑀲𑁆𑀲𑀦𑀁 𑀪𑀯𑀢𑀺 𑀏𑀢𑁆𑀣 𑀧𑀞𑀫𑀫𑀕𑁆𑀕𑁂𑀢𑀺 𑀤𑀲𑁆𑀲𑀦𑀪𑀽𑀫𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄. 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀬𑀸𑀢𑀺 𑀦𑀺𑀬𑀫𑀦𑀁 𑀦𑀺𑀬𑀸𑀫𑁄, 𑀓𑁄 𑀲𑁄? 𑀲𑀫𑁆𑀧𑀢𑁆𑀢𑀦𑀺𑀬𑀸𑀫𑁄, 𑀅𑀯𑀓𑁆𑀓𑀦𑀁 𑀅𑀯𑀓𑁆𑀓𑀦𑁆𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀦𑀺𑀬𑀸𑀫𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺, 𑀢𑀸𑀬. 𑀤𑀲𑁆𑀲𑀦𑀪𑀽𑀫𑀺𑀦𑀸𑀫𑀓𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀦𑀸𑀫𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀧𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀧𑀞𑀫𑀫𑀕𑁆𑀕𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀳𑀺 𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑁄 𑀦𑀸𑀫, 𑀨𑀮𑀲𑀫𑀗𑁆𑀕𑀻 𑀧𑀦 𑀦𑀺𑀬𑀸𑀫𑀁 𑀑𑀓𑁆𑀓𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀲𑀤𑁆𑀤𑁂𑀦 𑀧𑀞𑀫𑀨𑀮𑀼𑀧𑁆𑀧𑀢𑁆𑀢𑀺 𑀕𑀳𑀺𑀢𑀸. 𑀪𑀸𑀯𑀦𑀸𑀪𑀽𑀫𑀻𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀁. 𑀉𑀢𑁆𑀢𑀭𑀺𑀓𑀸𑀦𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑀭𑀺𑀧𑀯𑀢𑁆𑀢𑀸𑀦𑀁 𑀢𑀁𑀢𑀁𑀨𑀮𑀸𑀦𑀁 𑀧𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀦𑁆𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁.

𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀫𑀦𑁆𑀤𑀧𑀜𑁆𑀜𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀲𑀫𑀣𑀁 𑀆𑀯𑀳𑀦𑁆𑀢𑀻 𑀳𑀼𑀢𑁆𑀯𑀸 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺, 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀜𑀸𑀡𑀸𑀥𑀺𑀓𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀯𑀺𑀧𑀲𑁆𑀲𑀦𑀸𑀯𑀳𑀦𑁆𑀢𑀻 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀁, 𑀅𑀯𑀲𑁂𑀲𑀸 𑀤𑁆𑀯𑁂 𑀧𑀝𑀺𑀧𑀤𑀸𑀧𑀺 𑀦𑀸𑀢𑀺𑀧𑀜𑁆𑀜𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀸. 𑀢𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑁋 ‘‘𑀇𑀢𑀭𑀸 𑀧𑀦 𑀢𑀺𑀲𑁆𑀲𑁄𑀧𑀺 𑀧𑀝𑀺𑀧𑀤𑀸 𑀲𑀫𑀣𑀁 𑀆𑀯𑀳𑀦𑁆𑀢𑀻’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁪). 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀲𑀬𑀫𑁂𑀯 𑀏𑀓𑀦𑁆𑀢𑁂𑀦 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀦 𑀳𑁄𑀢𑀺, 𑀯𑀦𑁆𑀤𑀦𑀬𑀸𑀘𑀦𑀧𑀜𑁆𑀳𑀸𑀧𑀼𑀘𑁆𑀙𑀦𑀸𑀤𑀬𑁄𑀧𑀺 𑀧𑀤𑀝𑁆𑀞𑀸𑀦𑀁 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀧𑀭𑀢𑁄𑀖𑁄𑀲𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺, 𑀧𑀭𑀢𑁄𑀖𑁄𑀲𑁄 𑀘 𑀥𑀫𑁆𑀫𑀲𑁆𑀲𑀯𑀦𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄. 𑀤𑀸𑀢𑀩𑁆𑀩𑀯𑀢𑁆𑀣𑀼𑀧𑀭𑀺𑀘𑁆𑀘𑀚𑀦𑀯𑀦𑁆𑀤𑀦𑀬𑀸𑀘𑀦𑀓𑀸𑀮𑁂𑀲𑀼 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀧𑀜𑁆𑀳𑀸𑀧𑀼𑀘𑁆𑀙𑀦𑀸𑀤𑀺𑀓𑀸𑀮𑁂𑀲𑀼 𑀘 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀧𑀝𑀺𑀧𑀼𑀘𑁆𑀙𑀲𑀸𑀓𑀘𑁆𑀙𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑀺. 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀧𑀸𑀫𑁄𑀚𑁆𑀚𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀼𑀔𑀲𑀫𑀸𑀥𑀻𑀳𑀺 𑀧𑀤𑀝𑁆𑀞𑀸𑀦𑀪𑀸𑀯𑁂𑀦 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀘𑀺𑀦𑁆𑀢𑀸𑀫𑀬𑀺𑀬𑀸 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀲𑀻𑀮𑀯𑀦𑁆𑀢𑀲𑁆𑀲 𑀳𑀺 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀸𑀤𑀬𑁄 𑀳𑁄𑀦𑁆𑀢𑀺, 𑀲𑀫𑀸𑀳𑀺𑀢𑁄 𑀘 𑀥𑀫𑁆𑀫𑀘𑀺𑀦𑁆𑀢𑀦𑁂 𑀲𑀫𑀢𑁆𑀣𑁄 𑀳𑁄𑀢𑀺.

𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀢𑀺 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀲𑀫𑀣𑀪𑀸𑀯𑀦𑀸 𑀘𑁂𑀯 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀘 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀤𑀸𑀦𑀲𑀻𑀮𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀪𑀸𑀯𑀦𑀸𑀫𑀬𑀺𑀬𑀸 𑀧𑀜𑁆𑀜𑀸𑀬 𑀧𑀘𑁆𑀙𑀺𑀫𑀸𑀬 𑀧𑀘𑁆𑀙𑀺𑀫𑀸𑀬 𑀲𑀫𑀣𑀪𑀸𑀯𑀦𑀸𑀬 𑀘𑁂𑀯 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀘 𑀧𑀤𑀝𑁆𑀞𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀲𑀸𑀥𑀸𑀭𑀡𑀦𑁆𑀢𑀺 𑀦 𑀩𑀻𑀚𑀁 𑀯𑀺𑀬 𑀅𑀗𑁆𑀓𑀼𑀭𑀲𑁆𑀲, 𑀤𑀲𑁆𑀲𑀦𑀪𑀽𑀫𑀺𑀆𑀤𑀬𑁄 𑀯𑀺𑀬 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀆𑀤𑀻𑀦𑀁 𑀆𑀯𑁂𑀡𑀺𑀓𑀁, 𑀅𑀣 𑀔𑁄 𑀲𑀸𑀥𑀸𑀭𑀡𑀁 𑀢𑀤𑀜𑁆𑀜𑀓𑀸𑀭𑀡𑁂𑀳𑀺𑀧𑀻’’𑀢𑀺. ‘‘𑀤𑀸𑀦𑀫𑀬𑀲𑀻𑀮𑀫𑀬𑀪𑀸𑀯𑀦𑀸𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀧𑀭𑀢𑁄𑀖𑁄𑀲𑀘𑀺𑀦𑁆𑀢𑀸𑀫𑀬𑀺𑀪𑀸𑀯𑀦𑀸𑀫𑀬𑀺𑀧𑀜𑁆𑀜𑀸𑀦𑀁 𑀧𑀤𑀝𑁆𑀞𑀸𑀦𑀪𑀸𑀯𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀏𑀯𑀁 𑀲𑀢𑀺 𑀢𑁂𑀲𑀁 𑀤𑀸𑀦𑀫𑀬𑀸𑀤𑀻𑀦𑀁 𑀬𑀣𑀸𑀓𑁆𑀓𑀫𑀁 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀁 𑀧𑀤𑀝𑁆𑀞𑀸𑀦𑀪𑀸𑀯𑁄 𑀦 𑀪𑀯𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀢𑀣𑀸𑀧𑀯𑀢𑁆𑀢𑀁 𑀧𑀤𑀝𑁆𑀞𑀸𑀦𑀪𑀸𑀯𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀧𑀭𑀢𑁄 𑀘 𑀖𑁄𑀲𑀲𑁆𑀲 𑀲𑀼𑀢𑀫𑀬𑀺𑀬𑀸 𑀘 𑀧𑀜𑁆𑀜𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀇𑀤𑀸𑀦𑀺 𑀬𑀲𑁆𑀫𑀸 𑀤𑀸𑀦𑀁, 𑀲𑀻𑀮𑀁, 𑀮𑁄𑀓𑀺𑀬𑀪𑀸𑀯𑀦𑀸 𑀘 𑀦 𑀓𑁂𑀯𑀮𑀁 𑀬𑀣𑀸𑀯𑀼𑀢𑁆𑀢𑀧𑀭𑀢𑁄𑀖𑁄𑀲𑀸𑀤𑀻𑀦𑀁𑀬𑁂𑀯, 𑀅𑀣 𑀔𑁄 𑀬𑀣𑀸𑀓𑁆𑀓𑀫𑀁 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀫𑁆𑀧𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀦𑀬𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘𑀤𑀸𑀦𑀫𑀬’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀯𑀟𑁆𑀠𑁂𑀲𑀻’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁪) 𑁋

𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀦𑁄 𑀧𑀭𑀢𑁄𑀖𑁄𑀲𑀲𑁆𑀲 𑀲𑀸𑀥𑀸𑀭𑀡𑀧𑀤𑀝𑁆𑀞𑀸𑀦𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀜𑀸𑀢𑀩𑁆𑀩𑁄. 𑀤𑀸𑀦𑀁 𑀧𑀦 𑀤𑀢𑁆𑀯𑀸 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀼𑀢𑀸𑀦𑀼𑀲𑀸𑀭𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀧𑀯𑀢𑁆𑀢𑀫𑀸𑀦𑀸𑀬 𑀲𑀼𑀢𑀫𑀬𑀺𑀬𑀸 𑀧𑀜𑁆𑀜𑀸𑀬 𑀯𑀦𑁆𑀤𑀦𑀬𑀸𑀘𑀦𑀸𑀤𑀻𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀲𑀻𑀮𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀦𑁄𑀧𑀺 𑀘𑀺𑀦𑁆𑀢𑀸𑀫𑀬𑀺𑀬𑀸 𑀧𑀜𑁆𑀜𑀸𑀬 𑀲𑀸𑀥𑀸𑀭𑀡𑀧𑀤𑀝𑁆𑀞𑀸𑀦𑀪𑀸𑀯𑁄 𑀯𑀼𑀢𑁆𑀢𑁄𑀬𑁂𑀯. 𑀧𑀭𑀺𑀲𑀼𑀤𑁆𑀥𑀲𑀻𑀮𑀁 𑀧𑀦 𑀦𑀺𑀲𑁆𑀲𑀸𑀬 ‘‘𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀫𑀕𑁆𑀕𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀯𑀢𑁆𑀢𑀫𑀸𑀦𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀧𑀸𑀫𑁄𑀚𑁆𑀚𑀸𑀤𑀻𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀪𑀸𑀯𑀦𑀸𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀦𑁄 𑀪𑀸𑀯𑀦𑀸𑀫𑀬𑀺𑀬𑀸 𑀧𑀜𑁆𑀜𑀸𑀬 𑀲𑀸𑀥𑀸𑀭𑀡𑀧𑀤𑀝𑁆𑀞𑀸𑀦𑀪𑀸𑀯𑁄𑀧𑀺 𑀯𑀼𑀢𑁆𑀢𑁄𑀬𑁂𑀯. 𑀲𑀫𑀣𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀧𑀦 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀸 𑀧𑀭𑀺𑀧𑀸𑀓𑀁 𑀯𑀺𑀧𑀲𑁆𑀲𑀦𑀸𑀪𑀸𑀯𑀁𑀬𑁂𑀯 𑀯𑀸 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀤𑀻𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺.

𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀆𑀤𑀻𑀦𑀁 𑀧𑀭𑀢𑁄𑀖𑁄𑀲𑀸𑀤𑀻𑀦𑀁 𑀧𑀤𑀝𑁆𑀞𑀸𑀦𑀪𑀸𑀯𑁄 𑀧𑀼𑀦𑀧𑁆𑀧𑀼𑀦𑀁 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀬𑁄𑀧𑀺 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀸𑀦𑀻𑀢𑀺 𑀬𑀣𑀸 𑀯𑀺𑀪𑀚𑀺𑀢𑀩𑁆𑀩𑀸, 𑀅𑀫𑁆𑀳𑁂𑀳𑀺 𑀘 𑀯𑀺𑀜𑁆𑀜𑀸𑀢𑀩𑁆𑀩𑀸, 𑀢𑀣𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀢𑁂𑀧𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀢𑀣𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀬𑁄 𑀓𑀸𑀬𑀯𑀺𑀯𑁂𑀓𑀘𑀺𑀢𑁆𑀢𑀯𑀺𑀯𑁂𑀓𑀸𑀤𑀻𑀦𑀁 𑀓𑀸𑀭𑀡𑀁 𑀳𑁄𑀦𑁆𑀢𑀻𑀢𑀺 𑀇𑀫𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄’𑀢𑀺𑀆𑀤𑀺𑀫𑀸𑀳𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁪) 𑀯𑀼𑀢𑁆𑀢𑀁. 𑀧𑀢𑀺𑀭𑀽𑀧𑀤𑁂𑀲𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀲𑁆𑀲 𑀓𑀸𑀬𑀯𑀺𑀯𑁂𑀓𑀘𑀺𑀢𑁆𑀢𑀯𑀺𑀯𑁂𑀓𑀯𑀟𑁆𑀠𑀦𑀢𑁄, 𑀲𑀫𑀸𑀥𑀺𑀯𑀟𑁆𑀠𑀦𑀢𑁄 𑀘 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑀲𑁆𑀲 𑀘 𑀉𑀧𑀘𑀸𑀭𑀲𑀫𑀸𑀥𑀺𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀘 𑀲𑀻𑀮𑀸𑀤𑀻𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀧𑀤𑀝𑁆𑀞𑀸𑀦𑀁. 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄𑀢𑀺 𑀲𑀧𑁆𑀧𑀼𑀭𑀺𑀲𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀆𑀮𑀫𑁆𑀩𑀺𑀢𑀩𑁆𑀩𑁄 𑀧𑀲𑀸𑀤𑁄, 𑀢𑀢𑁄 𑀯𑀸 𑀉𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀸𑀦𑀁 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑁄 𑀧𑀼𑀩𑁆𑀩𑀧𑀲𑀸𑀤𑁄 𑀬𑀣𑀸𑀯𑀺𑀥𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀧𑀬𑀺𑀭𑀼𑀧𑀸𑀲𑀦𑁆𑀢𑀲𑁆𑀲 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀲𑁆𑀲 𑀭𑀢𑀦𑀢𑁆𑀢𑀬𑁂 𑀢𑀺𑀡𑁆𑀡𑀁 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀦𑀁 𑀭𑀢𑀦𑀢𑁆𑀢𑀬𑀕𑀼𑀡𑀸𑀤𑀻𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀧𑀤𑀝𑁆𑀞𑀸𑀦𑀁, 𑀲𑀫𑀣𑀲𑁆𑀲 𑀮𑀪𑀦𑀦𑀺𑀫𑀺𑀢𑁆𑀢𑀤𑀸𑀬𑀓𑀁 𑀲𑀧𑁆𑀧𑀼𑀭𑀺𑀲𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀧𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀲𑀫𑀣𑀲𑁆𑀲 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀲𑀻𑀮𑀧𑀸𑀫𑁄𑀚𑁆𑀚𑀧𑀻𑀢𑀸𑀤𑀻𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀳𑀺𑀢𑀲𑁆𑀲 𑀧𑀸𑀧𑀚𑀺𑀕𑀼𑀘𑁆𑀙𑀸𑀤𑀻𑀦𑀁 𑀲𑀫𑁆𑀪𑀯𑀢𑁄 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁 𑀚𑀸𑀢𑀺𑀯𑀬𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀳𑀺𑀭𑀺𑀬𑀸 𑀘 𑀧𑀤𑀝𑁆𑀞𑀸𑀦𑀁, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀳𑀺𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀤𑀻𑀦𑀁 𑀲𑀫𑁆𑀪𑀯𑀢𑁄 𑀲𑀻𑀮𑀸𑀤𑀻𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀘 𑀧𑀤𑀝𑁆𑀞𑀸𑀦𑀁.

𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀭𑀺𑀘𑁆𑀘𑀸𑀕𑁄 𑀦𑀺𑀩𑁆𑀩𑀺𑀤𑀸𑀜𑀸𑀡𑀸𑀤𑀻𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀓𑀼𑀲𑀮𑀯𑀻𑀫𑀁𑀲𑀸𑀬 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀧𑀜𑁆𑀜𑀸𑀬 𑀘 𑀅𑀭𑀺𑀬𑀫𑀕𑁆𑀕𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁. 𑀥𑀫𑁆𑀫𑀲𑁆𑀯𑀸𑀓𑁆𑀔𑀸𑀢𑀢𑀸 𑀲𑁆𑀯𑀸𑀓𑁆𑀔𑀸𑀢𑀥𑀫𑁆𑀫𑀲𑁆𑀲𑀯𑀦𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀓𑀼𑀲𑀮𑀫𑀽𑀮𑀓𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀫𑀽𑀮𑀭𑁄𑀧𑀦𑀸 𑀦𑀸𑀫, 𑀢𑀸𑀬 𑀘 𑀢𑀣𑀸𑀯𑀺𑀥𑀓𑀼𑀲𑀮𑀫𑀽𑀮𑀓𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘 𑀧𑀤𑀝𑁆𑀞𑀸𑀦𑀁. 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀲𑀗𑁆𑀖𑀲𑁆𑀲 𑀉𑀧𑀝𑁆𑀞𑀸𑀓𑀸𑀦𑀁 𑀲𑀼𑀝𑁆𑀞𑀼𑀪𑀸𑀯𑀸𑀬 𑀲𑀧𑁆𑀧𑀢𑀺𑀲𑁆𑀲𑀯𑀸𑀬 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑀸𑀬 𑀧𑀤𑀝𑁆𑀞𑀸𑀦𑀁. 𑀲𑀢𑁆𑀣𑀼𑀲𑀫𑁆𑀧𑀤𑀸 𑀲𑀢𑁆𑀣𑀭𑀺 𑀘𑁂𑀯 𑀥𑀫𑁆𑀫𑀸𑀤𑀻𑀲𑀼 𑀘 𑀕𑀼𑀡𑀅𑀚𑀸𑀦𑀦𑀢𑀸𑀬 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀜𑁆𑀘 𑀅𑀧𑁆𑀧𑀫𑀢𑁆𑀢𑀓𑀧𑀲𑀸𑀤𑀸𑀦𑀜𑁆𑀘 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑀟𑁆𑀠𑀦𑀸𑀬 𑀧𑀤𑀝𑁆𑀞𑀸𑀦𑀁. 𑀅𑀧𑁆𑀧𑀝𑀺𑀳𑀢𑀧𑀸𑀢𑀺𑀫𑁄𑀓𑁆𑀔𑀢𑀸 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀧𑀭𑀺𑀲𑀫𑀚𑁆𑀛𑁂 𑀯𑀸 𑀤𑀼𑀫𑁆𑀫𑀗𑁆𑀓𑀽𑀦𑀁 𑀤𑀼𑀫𑁆𑀫𑀼𑀔𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀧𑁂𑀲𑀮𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀲𑀻𑀮𑀲𑀫𑁆𑀧𑀦𑁆𑀦𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬 𑀘 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀳𑁄𑀦𑁆𑀢𑁄 𑀧𑀦 𑀬𑀣𑀸𑀦𑀼𑀭𑀽𑀧𑁂𑀳𑀺 𑀅𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀲𑀸𑀥𑀸𑀭𑀡𑀁 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀥𑀫𑁆𑀫𑀪𑀽𑀫𑀺𑀧𑀤𑀝𑁆𑀞𑀸𑀦𑀸𑀦𑀁 𑀯𑀺𑀪𑀢𑁆𑀢𑀺𑀳𑀸𑀭𑁂𑀦 𑀯𑀺𑀪𑀚𑀺𑀢𑀩𑁆𑀩𑀪𑀸𑀯𑁄 𑀅𑀫𑁆𑀳𑁂𑀳𑀺 𑀓𑁂𑀦 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

‘‘𑀏𑀢𑁆𑀢𑀸𑀯𑀢𑀸 𑀘 𑀯𑀺𑀪𑀢𑁆𑀢𑀺𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄, 𑀅𑀜𑁆𑀜𑁄 𑀦𑀺𑀬𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀯𑀺𑀪𑀢𑁆𑀢𑀺𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀬𑀢𑁆𑀣 𑀲𑀼𑀢𑁆𑀢𑁂 𑀬𑁂 𑀬𑁂 𑀥𑀫𑁆𑀫𑀸𑀤𑀬𑁄 𑀯𑀼𑀢𑁆𑀢𑀸, 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀲𑀼 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑀸𑀤𑀻𑀲𑀼 𑀬𑀣𑀸𑀮𑀸𑀪𑀯𑀲𑁂𑀦 𑀬𑁄 𑀬𑁄 𑀯𑀺𑀪𑀢𑁆𑀢𑀺𑀳𑀸𑀭𑁄 𑀬𑁄𑀚𑀺𑀢𑁄, 𑀲𑁄 𑀲𑁄 𑀯𑀺𑀪𑀢𑁆𑀢𑀺𑀳𑀸𑀭𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀢𑁆𑀢𑁄 𑀬𑁄𑀚𑀺𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀇𑀢𑀺 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦𑁂𑀯 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.