𑁬. 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁨𑁫. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁂𑀦 𑀲𑀼𑀢𑁆𑀢𑀢𑁆𑀣𑁂𑀳𑀺 𑀲𑀫𑀸𑀦𑀢𑁆𑀣𑀸 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼. 𑀓𑀢𑀫𑁄𑀢𑀺 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄𑀢𑀺 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁫). ‘‘𑀇𑀫𑀺𑀦𑀸 𑀘𑀢𑀼𑀩𑁆𑀬𑀽𑀳𑀳𑀸𑀭𑁂𑀦 𑀓𑀢𑀫𑀲𑁆𑀲 𑀦𑁂𑀭𑀼𑀢𑁆𑀢𑀸𑀤𑀬𑁄 𑀕𑀯𑁂𑀲𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀩𑁆𑀬𑀜𑁆𑀚𑀦𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁆𑀬𑀜𑁆𑀚𑀦𑁂𑀦𑀸𑀢𑀺 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀢𑁄 𑀩𑁆𑀬𑀜𑁆𑀚𑀦𑀯𑀺𑀘𑀬𑀪𑀸𑀯𑀢𑁄 ‘‘𑀩𑁆𑀬𑀜𑁆𑀚𑀦𑀸’’𑀢𑀺 𑀯𑁄𑀳𑀸𑀭𑀺𑀢𑁂𑀦 𑀇𑀫𑀺𑀦𑀸 𑀘𑀢𑀼𑀩𑁆𑀬𑀽𑀳𑀳𑀸𑀭𑁂𑀦 𑀲𑀼𑀢𑁆𑀢𑀲𑁆𑀲 𑀦𑁂𑀭𑀼𑀢𑁆𑀢𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀘, 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺 𑀘 𑀲𑀁𑀯𑀡𑁆𑀡𑁂𑀦𑁆𑀢𑁂𑀳𑀺 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

‘‘𑀘𑀢𑀼𑀩𑁆𑀬𑀽𑀳𑀳𑀸𑀭𑁂𑀦 𑀕𑀯𑁂𑀲𑀺𑀢𑀩𑁆𑀩𑁂𑀲𑀼 𑀦𑁂𑀭𑀼𑀢𑁆𑀢𑀸𑀤𑀻𑀲𑀼 𑀓𑀢𑀫𑀁 𑀲𑀼𑀢𑁆𑀢𑀲𑁆𑀲 𑀕𑀯𑁂𑀲𑀺𑀢𑀩𑁆𑀩𑀁 𑀦𑁂𑀭𑀼𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀦𑁂𑀭𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀢𑀢𑁆𑀣 𑀢𑁂𑀲𑀼 𑀇𑀫𑀺𑀦𑀸 𑀘𑀢𑀼𑀩𑁆𑀬𑀽𑀳𑀳𑀸𑀭𑁂𑀦 𑀕𑀯𑁂𑀲𑀺𑀢𑀩𑁆𑀩𑁂𑀲𑀼 𑀦𑁂𑀭𑀼𑀢𑁆𑀢𑀸𑀤𑀻𑀲𑀼 𑀓𑀢𑀫𑀁 𑀲𑀼𑀢𑁆𑀢𑀲𑁆𑀲 𑀦𑁂𑀭𑀼𑀢𑁆𑀢𑀁 𑀦𑀺𑀩𑁆𑀩𑀘𑀦𑀁 𑀦𑀸𑀫𑀸𑀢𑀺 𑀘𑁂 𑀧𑀼𑀘𑁆𑀙𑁂𑀬𑁆𑀬? 𑀲𑀼𑀢𑁆𑀢𑀲𑁆𑀲 𑀬𑀸 𑀦𑀺𑀭𑀼𑀢𑁆𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸, 𑀇𑀤𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀽𑀢𑀁 𑀦𑀺𑀩𑁆𑀩𑀘𑀦𑀁 𑀦𑁂𑀭𑀼𑀢𑁆𑀢𑀁 𑀦𑀸𑀫𑀸𑀢𑀺. ‘‘𑀬𑀸 𑀦𑀺𑀭𑀼𑀢𑁆𑀢𑀺 𑀦𑁂𑀭𑀼𑀢𑁆𑀢𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀸, 𑀓𑀸 𑀧𑀦 𑀲𑀸 𑀦𑀺𑀭𑀼𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀤𑀲𑀁𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀤𑁂𑀲𑀼 𑀲𑀁𑀳𑀺𑀢𑀸 𑀬𑀼𑀢𑁆𑀢𑀸 𑀧𑀤𑀲𑀁𑀳𑀺𑀢𑀸. 𑀬𑀣𑀸 𑀬𑀣𑀸 𑀲𑀼𑀢𑁆𑀢𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀢𑀣𑀸 𑀢𑀣𑀸 𑀬𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀧𑀯𑀢𑁆𑀢𑀸, 𑀲𑀸 𑀧𑀯𑀢𑁆𑀢𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑁂𑀯 𑀦𑀺𑀭𑀼𑀢𑁆𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀓𑀸 𑀧𑀦 𑀲𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀘 ‘‘𑀬𑀁 𑀥𑀫𑁆𑀫𑀸𑀦𑀁 𑀦𑀸𑀫𑀲𑁄 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀬𑀸𑀬 𑀓𑀸𑀭𑀡𑀪𑀽𑀢𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀥𑀫𑁆𑀫𑀸𑀦𑀁 𑀦𑁂𑀬𑁆𑀬𑀸𑀦𑀁 𑀦𑀸𑀫𑀲𑁄 𑀧𑀣𑀯𑀻𑀦𑀸𑀫𑀸𑀤𑀺𑀦𑀸 𑀯𑀸 𑀨𑀲𑁆𑀲𑀦𑀸𑀫𑀸𑀤𑀺𑀦𑀸 𑀯𑀸 𑀔𑀦𑁆𑀥𑀦𑀸𑀫𑀸𑀤𑀺𑀦𑀸 𑀯𑀸 𑀯𑀺𑀯𑀺𑀥𑁂𑀦 𑀦𑀸𑀫𑁂𑀦 𑀅𑀢𑁆𑀣𑀥𑀫𑁆𑀫𑀸𑀤𑀻𑀲𑀼 𑀓𑀼𑀲𑀮𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀲𑀸 𑀓𑀸𑀭𑀡𑀪𑀽𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀺 𑀘 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄, 𑀬𑀸𑀬𑀸𑀢𑀺 𑀅𑀢𑁆𑀣𑁄. ‘‘𑀮𑀺𑀗𑁆𑀕𑀧𑀓𑀢𑀺𑀥𑀫𑁆𑀫𑀸𑀦𑀁 𑀦𑀸𑀫𑀲𑁄 𑀧𑀯𑀢𑁆𑀢𑀫𑀸𑀦𑀁 𑀜𑀸𑀡𑀁 𑀯𑀺𑀯𑀭𑀺𑀢𑁆𑀯𑀸 𑀓𑀣𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀤𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑀤𑀸 𑀳𑀺 𑀪𑀺𑀓𑁆𑀔𑀽𑀢𑀺𑀆𑀤𑀺𑀦𑀸 ‘𑀥𑀫𑁆𑀫𑀸𑀦𑀁 𑀦𑀸𑀫𑀲𑁄 𑀜𑀸𑀡’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀻’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁫) 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑁄𑀯𑀸𑀢𑀺 𑀦 𑀯𑀺𑀘𑀸𑀭𑀺𑀢𑁄.

𑁨𑁬. 𑀦𑁂𑀭𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁 ‘‘𑀓𑀢𑀫𑁄 𑀲𑀼𑀢𑁆𑀢𑁂 𑀕𑀯𑁂𑀲𑀺𑀢𑀩𑁆𑀩𑁄 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀅𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀧𑀸𑀓𑀝𑁄. 𑀅𑀧𑀺𑀘 ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀻’’𑀢𑀺𑀆𑀤𑀻𑀲𑀼 𑀬𑁂𑀦 𑀧𑀼𑀕𑁆𑀕𑀮𑁂𑀦 𑀅𑀢𑁆𑀢𑀦𑀸 𑀭𑀓𑁆𑀔𑀺𑀢𑁂𑀦 𑀥𑀫𑁆𑀫𑁂𑀦 𑀭𑀓𑁆𑀔𑀺𑀢𑀩𑁆𑀩𑀪𑀸𑀯𑁄 𑀇𑀘𑁆𑀙𑀺𑀢𑁄, 𑀲𑁄 𑀥𑀫𑁆𑀫𑀁 𑀭𑀓𑁆𑀔𑀺𑀲𑁆𑀲𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀬𑁄 𑀧𑀼𑀕𑁆𑀕𑀮𑁄 𑀤𑀼𑀕𑁆𑀕𑀢𑀺𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀲𑁄 𑀥𑀫𑁆𑀫𑀁 𑀭𑀓𑁆𑀔𑀺𑀲𑁆𑀲𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

𑀘𑁄𑀭𑁄 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀺𑀢𑁄𑀢𑀺𑀆𑀤𑀻𑀲𑀼 𑀬𑁄 𑀘𑁄𑀭𑁄 𑀖𑀸𑀢𑀦𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀲𑁄 𑀘𑁄𑀭𑀓𑀫𑁆𑀫𑀁 𑀦 𑀓𑀭𑀺𑀲𑁆𑀲𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀬𑁄 𑀧𑀼𑀕𑁆𑀕𑀮𑁄 𑀅𑀧𑀸𑀬𑀸𑀤𑀺𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀲𑁄 𑀧𑀸𑀧𑀓𑀫𑁆𑀫𑀁 𑀦 𑀓𑀭𑀺𑀲𑁆𑀲𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀔𑀓𑀸𑀫𑀸𑀦𑀻𑀢𑀺𑀆𑀤𑀻𑀲𑀼 𑀬𑁂 𑀧𑀼𑀕𑁆𑀕𑀮𑀸 𑀲𑀼𑀔𑀁 𑀇𑀘𑁆𑀙𑀦𑁆𑀢𑀺, 𑀢𑁂 𑀧𑀭𑀳𑀺𑀁𑀲𑀦𑀢𑁄 𑀯𑀺𑀯𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘𑀸𑀢𑀺𑀆𑀤𑀻𑀲𑀼 𑀬𑁂 𑀧𑀼𑀕𑁆𑀕𑀮𑀸 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀫𑀸𑀦𑀚𑀸𑀢𑀺𑀚𑀭𑀸𑀫𑀭𑀡𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀸, 𑀢𑁂 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀦𑁆𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀼𑀤𑁆𑀥𑀸𑀚𑀻𑀯𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑀫𑁆𑀧𑀦𑁆𑀦𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀢𑀦𑁆𑀤𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀺𑀧𑀲𑁆𑀲𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀦𑁆𑀢𑀺𑀆𑀤𑀻𑀲𑀼 𑀬𑁂 𑀧𑀼𑀕𑁆𑀕𑀮𑀸 𑀫𑀘𑁆𑀘𑀼𑀦𑁄 𑀪𑀸𑀬𑀦𑁆𑀢𑀺, 𑀦𑀺𑀩𑁆𑀩𑀸𑀦𑀫𑀺𑀘𑁆𑀙𑀦𑁆𑀢𑀺, 𑀢𑁂 𑀧𑀼𑀕𑁆𑀕𑀮𑀸 𑀤𑀸𑀦𑀲𑀻𑀮𑀪𑀸𑀯𑀦𑀸𑀓𑀫𑁆𑀫𑁂𑀲𑀼 𑀅𑀧𑁆𑀧𑀫𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

𑁨𑁭. 𑀲𑀼𑀢𑁆𑀢𑁂 𑀕𑀯𑁂𑀲𑀺𑀢𑀩𑁆𑀩𑁄 𑀅𑀥𑀺𑀧𑁆𑀧𑀸𑀬𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀯𑀺𑀜𑁆𑀜𑀸𑀢𑁄, ‘‘𑀓𑀢𑀫𑀁 𑀲𑀼𑀢𑁆𑀢𑀲𑁆𑀲 𑀕𑀯𑁂𑀲𑀺𑀢𑀩𑁆𑀩𑀁 𑀦𑀺𑀤𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀦𑀺𑀤𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀤𑀸𑀦𑀦𑁆𑀢𑀺 𑀨𑀮𑀁 𑀦𑀻𑀳𑀭𑀺𑀢𑁆𑀯𑀸 𑀤𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀓𑀺𑀁 𑀢𑀁? 𑀓𑀸𑀭𑀡𑀁. 𑀥𑀦𑀺𑀬𑁄𑀢𑀺 𑀥𑀦𑀯𑀟𑁆𑀠𑀦𑀓𑀸𑀭𑀡𑁂 𑀦𑀺𑀬𑀼𑀢𑁆𑀢𑁄𑀢𑀺 𑀥𑀦𑀺𑀬𑁄. 𑀕𑁄𑀧𑀸𑀮𑀓𑁄𑀢𑀺 𑀕𑀸𑀯𑁄 𑀇𑀲𑁆𑀲𑀭𑀪𑀸𑀯𑁂𑀦 𑀧𑀸𑀮𑁂𑀢𑀺 𑀭𑀓𑁆𑀔𑀢𑀻𑀢𑀺 𑀕𑁄𑀧𑀸𑀮𑀓𑁄. 𑀉𑀧𑀥𑀻𑀳𑀻𑀢𑀺 𑀧𑀼𑀢𑁆𑀢𑀕𑁄𑀡𑀸𑀤𑀻𑀳𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁩). 𑀦𑀭𑀲𑁆𑀲𑀸𑀢𑀺 𑀧𑀼𑀢𑁆𑀢𑀺𑀫𑀦𑁆𑀢𑀲𑁆𑀲 𑀯𑀸 𑀕𑁄𑀧𑀸𑀮𑀓𑀲𑁆𑀲 𑀯𑀸 𑀦𑀭𑀲𑁆𑀲𑀸𑀢𑀺 𑀘 𑀧𑀤𑀝𑁆𑀞𑀸𑀦𑀯𑀲𑁂𑀦 𑀯𑀸 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀸 𑀕𑀸𑀣𑀸𑀬𑀁 𑀆𑀕𑀢𑀯𑀲𑁂𑀦 𑀯𑀸 𑀯𑀼𑀢𑁆𑀢𑀁, 𑀦𑀸𑀭𑀺𑀬𑀸𑀧𑀺 𑀉𑀧𑀥𑀻𑀳𑀺 𑀦𑀦𑁆𑀤𑀦𑀸 𑀅𑀢𑁆𑀣𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸𑀢𑀺 𑀉𑀧𑀥𑀺𑀲𑀗𑁆𑀔𑀸𑀢𑁂𑀦 𑀇𑀫𑀺𑀦𑀸𑀯 𑀧𑀼𑀢𑁆𑀢𑀕𑀯𑀸𑀤𑀺𑀦𑀸 𑀯𑀢𑁆𑀣𑀼𑀦𑀸. 𑀯𑀲𑀢𑀺 𑀧𑀯𑀢𑁆𑀢𑀢𑀺 𑀦𑀦𑁆𑀤𑀦𑀸 𑀏𑀢𑁆𑀣 𑀧𑀼𑀢𑁆𑀢𑀕𑁄𑀡𑀸𑀤𑀺𑀓𑁂𑀢𑀺 𑀯𑀢𑁆𑀣𑀼. 𑀦𑀦𑁆𑀤𑀦𑀁 𑀦𑀻𑀳𑀭𑀺𑀢𑁆𑀯𑀸 𑀤𑁂𑀢𑀺 𑀧𑀼𑀢𑁆𑀢𑀕𑁄𑀡𑀸𑀤𑀺𑀓𑀦𑁆𑀢𑀺 𑀦𑀺𑀤𑀸𑀦𑀦𑁆𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀥𑀦𑀺𑀬𑁄 ‘‘𑀉𑀧𑀥𑀻𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸’’𑀢𑀺 𑀆𑀳. 𑀪𑀕𑀯𑀸 𑀧𑀦 ‘‘𑀯𑀲𑀢𑀺 𑀧𑀯𑀢𑁆𑀢𑀢𑀺 𑀲𑁄𑀘𑀦𑀸 𑀏𑀢𑁆𑀣 𑀧𑀼𑀢𑁆𑀢𑀕𑁄𑀡𑀸𑀤𑀺𑀓𑁂𑀳𑀺 𑀯𑀢𑁆𑀣𑀼, 𑀲𑁄𑀘𑀦𑀁 𑀦𑀻𑀳𑀭𑀺𑀢𑁆𑀯𑀸 𑀤𑁂𑀢𑀺 𑀧𑀼𑀢𑁆𑀢𑀕𑁄𑀡𑀸𑀤𑀺𑀓𑀦𑁆𑀢𑀺 𑀦𑀺𑀤𑀸𑀦’’𑀦𑁆𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀉𑀧𑀥𑀻𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸’’𑀢𑀺 𑀆𑀳. 𑀧𑀭𑀺𑀕𑁆𑀕𑀳𑀻𑀬𑀢𑁂𑀢𑀺 𑀧𑀭𑀺𑀕𑁆𑀕𑀳𑀁. 𑀓𑀺𑀁 𑀢𑀁? 𑀧𑀼𑀢𑁆𑀢𑀕𑁄𑀡𑀸𑀤𑀺𑀓𑀁, 𑀢𑀁 𑀧𑀭𑀺𑀕𑁆𑀕𑀳𑀁 ‘‘𑀉𑀧𑀥𑀻’’𑀢𑀺 𑀆𑀳, 𑀦 𑀓𑀺𑀮𑁂𑀲𑀽𑀧𑀥𑀺𑀓𑀸𑀬𑀔𑀦𑁆𑀥𑀽𑀧𑀥𑀺𑀦𑁆𑀢𑀺.

𑀉𑀧𑀥𑀻𑀲𑀽𑀢𑀺 𑀔𑀦𑁆𑀥𑀲𑀗𑁆𑀔𑀸𑀢𑁂𑀲𑀼 𑀓𑀸𑀬𑁂𑀲𑀼. 𑀓𑀸𑀬𑀁 ‘‘𑀉𑀧𑀥𑀻’’𑀢𑀺 𑀆𑀳, 𑀦 𑀧𑀼𑀢𑁆𑀢𑀕𑀯𑀸𑀤𑀺𑀓𑀁, 𑀦 𑀧𑀭𑀺𑀕𑁆𑀕𑀳𑀁.

𑀩𑀸𑀳𑀺𑀭𑁂𑀲𑀼 𑀯𑀢𑁆𑀣𑀽𑀲𑀽𑀢𑀺 𑀫𑀡𑀺𑀓𑀼𑀡𑁆𑀟𑀮𑀧𑀼𑀢𑁆𑀢𑀤𑀸𑀭𑀸𑀤𑀻𑀲𑀼 𑀯𑀢𑁆𑀣𑀽𑀲𑀼.

𑀓𑀸𑀫𑀲𑀼𑀔𑀦𑁆𑀢𑀺 𑀓𑀸𑀫𑀦𑀻𑀬𑁂𑀲𑀼 𑀅𑀲𑁆𑀲𑀸𑀤𑀲𑀼𑀔𑀯𑀲𑁂𑀦 𑀧𑀯𑀢𑁆𑀢𑀸 𑀢𑀡𑁆𑀳𑀸. 𑀩𑀸𑀳𑀺𑀭𑀯𑀢𑁆𑀣𑀼𑀓𑀸𑀬 𑀢𑀡𑁆𑀳𑀸𑀬𑀸𑀢𑀺 𑀓𑀸𑀫𑀦𑀻𑀬𑁂𑀲𑀼 𑀩𑀸𑀳𑀺𑀭𑀯𑀢𑁆𑀣𑀽𑀲𑀼 𑀅𑀲𑁆𑀲𑀸𑀤𑀲𑀼𑀔𑀯𑀲𑁂𑀦 𑀧𑀯𑀢𑁆𑀢𑀸𑀬 𑀢𑀡𑁆𑀳𑀸𑀬.

𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀬𑀸𑀢𑀺 𑀭𑀽𑀧𑀓𑀸𑀬𑀲𑀗𑁆𑀔𑀸𑀢𑁂 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀫𑁆𑀳𑀺 𑀅𑀪𑀺𑀦𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀸𑀬.

𑀧𑀼𑀦 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀬𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀫𑁆𑀳𑀺 𑀲𑀺𑀦𑁂𑀳𑀯𑀲𑁂𑀦 𑀧𑀯𑀢𑁆𑀢𑀸𑀬.

𑀕𑀯𑁂𑀲𑀺𑀢𑀩𑁆𑀩𑀁 𑀦𑀺𑀤𑀸𑀦𑀁 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀢𑀫𑁄 𑀕𑀯𑁂𑀲𑀺𑀢𑀩𑁆𑀩𑁄 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀢𑁆𑀣 𑀓𑀢𑀫𑁄 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑁂𑀭𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑀦𑀺𑀤𑀸𑀦𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀻𑀲𑀼. 𑀬𑀣𑀸𑀢𑀺 𑀬𑁂𑀦 𑀅𑀦𑁆𑀥𑀓𑀸𑀭𑀸𑀤𑀺𑀦𑀸 𑀲𑀪𑀸𑀯𑁂𑀦 ‘‘𑀓𑀸𑀫𑀦𑁆𑀥𑀸…𑀧𑁂… 𑀫𑀸𑀢𑀭’’𑀦𑁆𑀢𑀺 𑀬𑀁 𑀓𑀸𑀫𑀢𑀡𑁆𑀳𑀁 𑀪𑀕𑀯𑀸 𑀆𑀳, 𑀅𑀬𑀁 𑀓𑀸𑀫𑀢𑀡𑁆𑀳𑀸 𑀢𑀣𑀸 𑀢𑁂𑀦 𑀅𑀦𑁆𑀥𑀓𑀸𑀭𑀸𑀤𑀺𑀦𑀸 𑀲𑀪𑀸𑀯𑁂𑀦 ‘‘𑀓𑀸𑀫𑀦𑁆𑀥𑀸…𑀧𑁂… 𑀫𑀸𑀢𑀭’’𑀦𑁆𑀢𑀺 𑀕𑀸𑀣𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀕𑀸𑀣𑀸𑀢𑁆𑀣𑁄 𑀧𑀦 𑁋 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄, 𑀓𑀸𑀫𑀢𑀡𑁆𑀳𑀸, 𑀓𑀸𑀫𑁂𑀦 𑀅𑀢𑁆𑀣𑀲𑁆𑀲 𑀅𑀚𑀸𑀦𑀦𑀢𑀸𑀬 𑀥𑀫𑁆𑀫𑀲𑁆𑀲, 𑀅𑀧𑀲𑁆𑀲𑀦𑀢𑀸𑀬 𑀘 𑀅𑀦𑁆𑀥𑀸𑀢𑀺 𑀓𑀸𑀫𑀦𑁆𑀥𑀸. 𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀚𑀸𑀮𑁂𑀦 𑀅𑀢𑁆𑀣𑀥𑀫𑁆𑀫𑀸𑀦𑀁 𑀅𑀚𑀸𑀦𑀦𑀸𑀧𑀲𑁆𑀲𑀦𑁂𑀦 𑀲𑀜𑁆𑀙𑀦𑁆𑀦𑀸 𑀧𑀮𑀺𑀕𑀼𑀡𑁆𑀞𑀺𑀢𑀸𑀢𑀺 𑀚𑀸𑀮𑀲𑀜𑁆𑀙𑀦𑁆𑀦𑀸. 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀙𑀤𑀦𑁂𑀦 𑀢𑁂𑀲𑀁𑀬𑁂𑀯 𑀅𑀢𑁆𑀣𑀥𑀫𑁆𑀫𑀸𑀦𑀁 𑀅𑀚𑀸𑀦𑀦𑀸𑀧𑀲𑁆𑀲𑀦𑁂𑀦 𑀙𑀸𑀤𑀺𑀢𑀸 𑀧𑀺𑀳𑀺𑀢𑀸𑀢𑀺 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸. 𑀅𑀢𑁆𑀣𑀥𑀫𑁆𑀫𑁂𑀲𑀼 𑀧𑀫𑀢𑁆𑀢𑀲𑀗𑁆𑀔𑀸𑀢𑁂𑀦 𑀧𑀫𑀸𑀤𑁂𑀦 𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀩𑀦𑁆𑀥𑀺𑀢𑀩𑁆𑀩𑀸 𑀧𑀼𑀕𑁆𑀕𑀮𑀸 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀦𑁆𑀢𑀺, 𑀓𑀼𑀫𑀺𑀦𑀸𑀫𑀼𑀔𑁂 𑀧𑀯𑀢𑁆𑀢𑀸 𑀫𑀘𑁆𑀙𑀸 𑀫𑀭𑀡𑀁 𑀅𑀦𑁆𑀯𑁂𑀦𑁆𑀢𑀺 𑀇𑀯 𑀘, 𑀔𑀻𑀭𑀧𑀓𑁄 𑀯𑀘𑁆𑀙𑁄 𑀫𑀸𑀢𑀭𑀁 𑀅𑀦𑁆𑀯𑁂𑀢𑀺 𑀇𑀯 𑀘, 𑀢𑀣𑀸 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀦𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑁄.

‘‘𑀓𑀸𑀫𑀦𑁆𑀥𑀸…𑀧𑁂… 𑀫𑀸𑀢𑀭’𑀦𑁆𑀢𑀺 𑀬𑀸𑀬 𑀤𑁂𑀲𑀦𑀸𑀬, 𑀕𑀸𑀣𑀸𑀬 𑀯𑀸 𑀓𑀸𑀫𑀢𑀡𑁆𑀳𑀸 𑀯𑀼𑀢𑁆𑀢𑀸, 𑀲𑀸 𑀤𑁂𑀲𑀦𑀸, 𑀕𑀸𑀣𑀸 𑀯𑀸 𑀓𑀢𑀫𑁂𑀦 𑀤𑁂𑀲𑀦𑀸𑀪𑀽𑀢𑁂𑀦 𑀅𑀧𑀭𑁂𑀦 𑀬𑀼𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀣𑀸 𑀧𑀼𑀘𑁆𑀙𑀺𑀢𑁆𑀯𑀸 𑀇𑀫𑀸𑀬 𑀤𑁂𑀲𑀦𑀸𑀬, 𑀕𑀸𑀣𑀸𑀬 𑀯𑀸 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀓𑀢𑀫𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀢𑀺 ‘‘𑀓𑀸𑀫𑀦𑁆𑀥𑀸…𑀧𑁂… 𑀅𑀦𑁆𑀯𑁂𑀦𑁆𑀢𑀻’’𑀢𑀺 𑀤𑁂𑀲𑀦𑀸, 𑀕𑀸𑀣𑀸 𑀯𑀸. 𑀧𑀼𑀩𑁆𑀩𑀸𑀧𑀭𑁂𑀦𑀸𑀢𑀺 𑀢𑀢𑁄 𑀤𑁂𑀲𑀦𑀸𑀢𑁄 𑀧𑀼𑀩𑁆𑀩𑁂𑀦 𑀤𑁂𑀲𑀦𑀸𑀯𑀘𑀦𑁂𑀦, 𑀕𑀸𑀣𑀸𑀯𑀘𑀦𑁂𑀦 𑀯𑀸 𑀅𑀧𑀭𑁂𑀦 𑀤𑁂𑀲𑀦𑀸𑀯𑀘𑀦𑁂𑀦, 𑀕𑀸𑀣𑀸𑀯𑀘𑀦𑁂𑀦 𑀯𑀸. 𑀬𑀼𑀚𑁆𑀚𑀢𑀺 𑀬𑀼𑀚𑁆𑀚𑀦𑀁 𑀏𑀢𑀺 𑀲𑀫𑁂𑀢𑀻𑀢𑀺 𑀧𑀼𑀘𑁆𑀙𑀢𑀺.

𑀬𑀣𑀸𑀢𑀺 𑀬𑁂𑀦 𑀅𑀦𑁆𑀥𑀓𑀭𑀡𑀸𑀤𑀺𑀦𑀸. ‘‘𑀭𑀢𑁆𑀢𑁄…𑀧𑁂… 𑀦𑀭’’𑀦𑁆𑀢𑀺 𑀬𑀁 𑀕𑀸𑀣𑀸𑀯𑀘𑀦𑀁 𑀪𑀕𑀯𑀸 𑀆𑀳, 𑀢𑁂𑀦 𑀕𑀸𑀣𑀸𑀯𑀘𑀦𑁂𑀦 𑀢𑀣𑀸 𑀅𑀦𑁆𑀥𑀓𑀭𑀡𑀸𑀤𑀺𑀦𑀸 𑀬𑀼𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀕𑀸𑀣𑀸𑀢𑁆𑀣𑁄 𑀧𑀦 𑁋 𑀭𑀢𑁆𑀢𑁄 𑀭𑀜𑁆𑀚𑀦𑁆𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀣𑀁 𑀅𑀢𑁆𑀢𑀳𑀺𑀢𑀧𑀬𑁄𑀚𑀦𑀁 𑀧𑀭𑀳𑀺𑀢𑀧𑀬𑁄𑀚𑀦𑀁 𑀦 𑀚𑀸𑀦𑀸𑀢𑀺. 𑀭𑀢𑁆𑀢𑁄 𑀭𑀜𑁆𑀚𑀦𑁆𑀢𑁄 𑀥𑀫𑁆𑀫𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀳𑁂𑀢𑀼𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀦 𑀧𑀲𑁆𑀲𑀢𑀺. 𑀭𑀸𑀕𑁄 𑀬𑀁 𑀦𑀭𑀁 𑀬𑀤𑀸 𑀲𑀳𑀢𑁂, 𑀢𑀤𑀸 𑀢𑀲𑁆𑀲 𑀦𑀭𑀲𑁆𑀲 𑀅𑀦𑁆𑀥𑀁 𑀅𑀦𑁆𑀥𑀓𑀸𑀭𑀁 𑀢𑀫𑀁 𑀅𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑁄.

𑀇𑀢𑀻𑀢𑀺 𑀏𑀯𑀁. 𑀅𑀦𑁆𑀥𑀢𑀸𑀬 𑀅𑀦𑁆𑀥𑀓𑀭𑀡𑀢𑀸𑀬 𑀲𑀜𑁆𑀙𑀦𑁆𑀦𑀢𑀸𑀬 𑀲𑀜𑁆𑀙𑀦𑁆𑀦𑀓𑀭𑀡𑀢𑀸𑀬. 𑀲𑀸𑀬𑁂𑀯 𑀢𑀡𑁆𑀳𑀸𑀢𑀺 ‘‘𑀓𑀸𑀫𑀦𑁆𑀥𑀸…𑀧𑁂… 𑀫𑀸𑀢𑀭’’𑀦𑁆𑀢𑀺 𑀕𑀸𑀣𑀸𑀯𑀘𑀦𑁂𑀦 𑀬𑀸 𑀓𑀸𑀫𑀢𑀡𑁆𑀳𑀸 𑀯𑀼𑀢𑁆𑀢𑀸, 𑀲𑀸𑀬𑁂𑀯 𑀓𑀸𑀫𑀢𑀡𑁆𑀳𑀸. 𑀅𑀪𑀺𑀮𑀧𑀺𑀢𑀸𑀢𑀺 ‘‘𑀭𑀢𑁆𑀢𑁄…𑀧𑁂… 𑀦𑀭’’𑀦𑁆𑀢𑀺 𑀅𑀧𑀭𑁂𑀦 𑀕𑀸𑀣𑀸𑀯𑀘𑀦𑁂𑀦 𑀪𑀕𑀯𑀢𑀸 𑀯𑁄𑀳𑀸𑀭𑀺𑀢𑀸 𑀯𑁄𑀳𑀭𑀡𑁂𑀦 𑀜𑀸𑀧𑀺𑀢𑀸, 𑀅𑀪𑀺𑀮𑀧𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀫𑀸𑀦𑀢𑀸 𑀧𑀼𑀩𑁆𑀩𑀤𑁂𑀲𑀦𑀸 𑀅𑀧𑀭𑀤𑁂𑀲𑀦𑀸𑀬 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀤𑁆𑀯𑀻𑀲𑀼 𑀕𑀸𑀣𑀸𑀲𑀼 𑀓𑀢𑀫𑁂𑀳𑀺 𑀧𑀤𑁂𑀳𑀺 𑀲𑀸𑀬𑁂𑀯 𑀢𑀡𑁆𑀳𑀸 𑀅𑀪𑀺𑀮𑀧𑀺𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑁂𑀳𑀺 𑀅𑀪𑀺𑀮𑀧𑀺𑀢𑀸𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀜𑁆𑀘𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 ‘‘𑀓𑀸𑀫𑀦𑁆𑀥𑀸…𑀧𑁂… 𑀙𑀸𑀤𑀺𑀢𑀸’’𑀢𑀺 𑀬𑀜𑁆𑀘 𑀧𑀤𑀁 𑀆𑀳, 𑀤𑀼𑀢𑀺𑀬𑀕𑀸𑀣𑀸𑀬𑀜𑁆𑀘 ‘‘𑀭𑀢𑁆𑀢𑁄…𑀧𑁂… 𑀦 𑀧𑀲𑁆𑀲𑀢𑀻’’𑀢𑀺 𑀬𑀜𑁆𑀘 𑀧𑀤𑀁 𑀆𑀳. 𑀧𑀭𑀺𑀬𑀼𑀝𑁆𑀞𑀸𑀦𑁂𑀳𑀺 𑀧𑀭𑀺𑀬𑀼𑀝𑁆𑀞𑀸𑀦𑀤𑀻𑀧𑀓𑁂𑀳𑀺 𑀇𑀫𑁂𑀳𑀺 ‘‘𑀓𑀸𑀫𑀦𑁆𑀥𑀸…𑀧𑁂… 𑀧𑀲𑁆𑀲𑀢𑀻’’𑀢𑀺 𑀧𑀤𑁂𑀳𑀺 𑀲𑀸𑀬𑁂𑀯 𑀧𑀞𑀫𑀕𑀸𑀣𑀸𑀬 𑀯𑀼𑀢𑁆𑀢𑀸 𑀓𑀸𑀫𑀢𑀡𑁆𑀳𑀸 𑀘 𑀪𑀕𑀯𑀢𑀸 𑀅𑀪𑀺𑀮𑀧𑀺𑀢𑀸.

‘‘𑀬𑀁 𑀅𑀦𑁆𑀥𑀓𑀸𑀭𑀁 𑀯𑀼𑀢𑁆𑀢𑀁, 𑀓𑀢𑀫𑀁 𑀢𑀁? 𑀬𑀸 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 𑀯𑀼𑀢𑁆𑀢𑀸, 𑀓𑀢𑀫𑀸 𑀲𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀁 𑀅𑀦𑁆𑀥𑀓𑀸𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑁆𑀥𑀓𑀸𑀭𑀁 𑀬𑀁 𑀅𑀜𑁆𑀜𑀸𑀡𑀁 𑀯𑀼𑀢𑁆𑀢𑀁, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀪𑀯𑁂. 𑀬𑀸 𑀘 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 𑀯𑀼𑀢𑁆𑀢𑀸, 𑀅𑀬𑀜𑁆𑀘 𑀤𑀼𑀓𑁆𑀔𑀲𑀫𑀼𑀤𑀬𑁄 𑀪𑀯𑁂𑀢𑀺 𑀬𑁄𑀚𑀦𑀸.

‘‘𑀓𑀸𑀫𑀸’’𑀢𑀺 𑀬𑀜𑁆𑀘 𑀧𑀤𑀁 𑀪𑀕𑀯𑀸 𑀆𑀳, 𑀢𑁂𑀦 𑀧𑀤𑁂𑀦 𑀇𑀫𑁂 𑀓𑀺𑀮𑁂𑀲𑀓𑀸𑀫𑀸 𑀯𑀼𑀢𑁆𑀢𑀸. ‘‘𑀚𑀸𑀮𑀲𑀜𑁆𑀙𑀦𑁆𑀦𑀸’’𑀢𑀺 𑀬𑀜𑁆𑀘 𑀧𑀤𑀁 𑀪𑀕𑀯𑀸 𑀆𑀳, 𑀢𑁂𑀦 𑀧𑀤𑁂𑀦 𑀢𑁂𑀲𑀁𑀬𑁂𑀯 𑀓𑀺𑀮𑁂𑀲𑀓𑀸𑀫𑀸𑀦𑀁 𑀧𑀬𑁄𑀕𑁂𑀦 𑀲𑀫𑀼𑀤𑀸𑀘𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀁 𑀪𑀕𑀯𑀸 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀢𑀡𑁆𑀳𑀸 𑀉𑀧𑁆𑀧𑀦𑁆𑀦𑀸, 𑀢𑀁 𑀲𑀦𑁆𑀢𑀸𑀦𑀁 𑀲𑀁𑀲𑀸𑀭𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀅𑀤𑀢𑁆𑀯𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀳𑀺 𑀧𑀮𑁄𑀪𑀬𑀫𑀸𑀦𑀸 𑀳𑀼𑀢𑁆𑀯𑀸 𑀘𑀺𑀢𑁆𑀢𑀁 𑀓𑀺𑀮𑁂𑀲𑁂𑀳𑀺 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀢𑀡𑁆𑀳𑀸𑀬 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀲𑀦𑁆𑀢𑀸𑀦𑁂 𑀢𑀺𑀝𑁆𑀞𑀫𑀸𑀦𑀢𑁆𑀢𑀸. 𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀯𑀻𑀢𑀺𑀓𑁆𑀓𑀫𑀓𑀺𑀮𑁂𑀲𑀯𑀲𑁂𑀦. 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀯𑀻𑀢𑀺𑀓𑁆𑀓𑀫𑀦𑀁 𑀅𑀧𑁆𑀧𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀯𑀲𑁂𑀦. 𑀬𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑀡𑁆𑀳𑀸𑀲𑀳𑀺𑀢𑀧𑀼𑀕𑁆𑀕𑀮𑀲𑀤𑀺𑀲𑀸. 𑀢𑁂𑀢𑀺 𑀢𑁂 𑀢𑀡𑁆𑀳𑀸𑀩𑀦𑁆𑀥𑀦𑀩𑀤𑁆𑀥𑀸 𑀘 𑀏𑀤𑀺𑀲𑀓𑀸 𑀘 𑀧𑀼𑀕𑁆𑀕𑀮𑀸. 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀦𑁆𑀢𑀺 𑀚𑀭𑀸𑀫𑀭𑀡𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑀼𑀡𑀦𑁆𑀢𑀺. 𑀅𑀬𑀦𑁆𑀢𑀺 𑀚𑀭𑀸𑀫𑀭𑀡𑀸𑀦𑀼𑀧𑁆𑀧𑀯𑀢𑁆𑀢𑀺 ‘‘𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀪𑀕𑀯𑀢𑀸 𑀤𑀲𑁆𑀲𑀺𑀢𑀸𑀢𑀺 𑀬𑁄𑀚𑀦𑀸.

‘‘𑀓𑀸𑀫𑀦𑁆𑀥𑀸’’𑀢𑀺𑀆𑀤𑀺𑀕𑀸𑀣𑀸𑀬 𑀘𑁂𑀯 ‘‘𑀭𑀢𑁆𑀢𑁄’’𑀢𑀺𑀆𑀤𑀺𑀕𑀸𑀣𑀸𑀬 𑀘 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀣𑀁 ‘𑀬𑀲𑁆𑀲 𑀧𑀧𑀜𑁆𑀘𑀸 𑀞𑀺𑀢𑀻 𑀘𑀸’𑀢𑀺𑀆𑀤𑀺𑀕𑀸𑀣𑀸𑀲𑀼 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺 𑀅𑀫𑁆𑀳𑁂𑀳𑀺 𑀯𑀺𑀜𑁆𑀜𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀬𑀲𑁆𑀲 𑀧𑀧𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸 𑀕𑀸𑀣𑀸𑀬 𑁋 𑀬𑀲𑁆𑀲 𑀫𑀼𑀦𑀺𑀦𑁄 𑀧𑀧𑀜𑁆𑀘𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻 𑀘 𑀦𑀢𑁆𑀣𑀺, 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀅𑀪𑀺𑀲𑀗𑁆𑀔𑀢𑀸 𑀲𑀗𑁆𑀔𑀸𑀭𑀸 𑀘 𑀦𑀢𑁆𑀣𑀺, 𑀞𑀺𑀢𑀻 𑀅𑀦𑀼𑀲𑀬𑀸 𑀢𑀡𑁆𑀳𑀸 𑀘 𑀦𑀢𑁆𑀣𑀺, 𑀲𑀦𑁆𑀤𑀸𑀦𑀲𑀤𑀺𑀲𑀁 𑀢𑀡𑁆𑀳𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀧𑀮𑀺𑀖𑀲𑀤𑀺𑀲𑁄 𑀫𑁄𑀳𑁄 𑀘 𑀦𑀢𑁆𑀣𑀺, 𑀲𑁄 𑀫𑀼𑀦𑀺 𑀧𑀧𑀜𑁆𑀘𑀸𑀤𑀺𑀓𑀁 𑀲𑀩𑁆𑀩𑀁 𑀯𑀻𑀢𑀺𑀯𑀢𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀢𑁆𑀢𑀡𑁆𑀳𑀁 𑀦𑀺𑀫𑀸𑀦𑀁 𑀦𑀺𑀤𑀺𑀝𑁆𑀞𑀺𑀁 𑀦𑀺𑀲𑀦𑁆𑀤𑀸𑀦𑀁 𑀦𑀺𑀧𑀮𑀺𑀖𑀁 𑀮𑁄𑀓𑁂 𑀘𑀭𑀦𑁆𑀢𑀁 𑀢𑀁 𑀫𑀼𑀦𑀺𑀁 𑀲𑀤𑁂𑀯𑀓𑁄 𑀢𑀡𑁆𑀳𑀸𑀲𑀳𑀺𑀢𑁄 𑀮𑁄𑀓𑁄 𑀦 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄.

𑀕𑀸𑀣𑀸𑀬𑀁 𑀧𑀧𑀜𑁆𑀘𑀸𑀤𑀬𑁄 𑀪𑀕𑀯𑀢𑀸 𑀯𑀼𑀢𑁆𑀢𑀸, ‘‘𑀓𑀢𑀫𑁂 𑀢𑁂’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀧𑀜𑁆𑀘𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀆𑀥𑀸𑀭𑀧𑀼𑀕𑁆𑀕𑀮𑀁 𑀲𑀁𑀲𑀸𑀭𑁂 𑀘𑀺𑀭𑀁 𑀧𑀧𑀜𑁆𑀘𑀦𑁆𑀢𑀸𑀧𑁂𑀦𑁆𑀢𑀻 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀘, 𑀢𑀸𑀳𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀲𑀳𑀚𑀸𑀢𑀯𑀲𑁂𑀦 𑀯𑀸 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀯𑀸 𑀅𑀪𑀺𑀲𑀗𑁆𑀔𑀢𑀸 𑀲𑀗𑁆𑀔𑀸𑀭𑀸 𑀘 𑀧𑀧𑀜𑁆𑀘𑀸 𑀦𑀸𑀫. 𑀲𑀦𑁆𑀢𑀸𑀦𑁂 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑀸 𑀢𑀡𑁆𑀳𑀸 𑀲𑀢𑁆𑀢𑀸𑀦𑀁 𑀢𑀺𑀝𑁆𑀞𑀦𑀳𑁂𑀢𑀼𑀢𑁆𑀢𑀸 𑀞𑀺𑀢𑀻 𑀦𑀸𑀫. 𑀧𑀯𑀢𑁆𑀢𑀫𑀸𑀦𑀸𑀬 𑀢𑀡𑁆𑀳𑀸𑀬 𑀬𑀁 𑀧𑀭𑀺𑀬𑀼𑀝𑁆𑀞𑀸𑀦𑀜𑁆𑀘 𑀙𑀢𑁆𑀢𑀺𑀁𑀲𑀢𑀡𑁆𑀳𑀸𑀬 𑀚𑀸𑀮𑀺𑀦𑀺𑀬𑀸 𑀬𑀸𑀦𑀺 𑀯𑀺𑀘𑀭𑀺𑀢𑀸𑀦𑀺 𑀘 𑀯𑀼𑀢𑁆𑀢𑀸𑀦𑀺, 𑀇𑀤𑀁 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀆𑀥𑀸𑀭𑀁 𑀧𑀼𑀕𑁆𑀕𑀮𑀁 𑀩𑀦𑁆𑀥𑀦𑀝𑁆𑀞𑁂𑀦 𑀲𑀦𑁆𑀤𑀸𑀦𑀲𑀤𑀺𑀲𑀢𑁆𑀢𑀸 𑀲𑀦𑁆𑀤𑀸𑀦𑀁 𑀦𑀸𑀫. 𑀫𑁄𑀳𑁄 𑀅𑀢𑁆𑀢𑀦𑁄 𑀆𑀥𑀸𑀭𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀩𑁆𑀩𑀸𑀦𑀦𑀕𑀭𑀧𑁆𑀧𑀯𑁂𑀲𑀦𑀲𑁆𑀲 𑀧𑀝𑀺𑀲𑁂𑀥𑀓𑀢𑁆𑀢𑀸 𑀧𑀮𑀺𑀖𑀲𑀤𑀺𑀲𑀢𑁆𑀢𑀸 𑀧𑀮𑀺𑀖𑁄 𑀦𑀸𑀫. ‘‘𑀬𑀲𑁆𑀲 𑀧𑀧𑀜𑁆𑀘𑀸𑀤𑀬𑁄 𑀦𑀢𑁆𑀣𑀺, 𑀲𑁄 𑀓𑀺𑀁 𑀯𑀻𑀢𑀺𑀯𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑁂 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀧𑀜𑁆𑀘𑀸 𑀲𑀗𑁆𑀔𑀸𑀭𑀸, 𑀬𑀸 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀞𑀺𑀢𑀺, 𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀦𑁆𑀤𑀸𑀦𑀜𑁆𑀘, 𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀮𑀺𑀖𑀜𑁆𑀘 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀸, 𑀲𑀩𑁆𑀩𑀁 𑀏𑀢𑀁 𑀧𑀧𑀜𑁆𑀘𑀸𑀤𑀺𑀓𑀁 𑀬𑁄 𑀫𑀼𑀦𑀺 𑀲𑀫𑀢𑀺𑀓𑁆𑀓𑀦𑁆𑀢𑁄, 𑀅𑀬𑀁 𑀫𑀼𑀦𑀺 ‘‘𑀦𑀺𑀢𑁆𑀢𑀡𑁆𑀳𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑁨𑁮. ‘‘𑀬𑀲𑁆𑀲 𑀧𑀧𑀜𑁆𑀘𑀸𑀢𑀺𑀆𑀤𑀺𑀕𑀸𑀣𑀸𑀬𑀁 𑀬𑁂 𑀧𑀧𑀜𑁆𑀘𑀸𑀤𑀬𑁄 𑀯𑀼𑀢𑁆𑀢𑀸, 𑀢𑁂𑀲𑀼 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀳𑁂𑀢𑀼𑀓𑀸 𑀲𑀗𑁆𑀔𑀸𑀭𑀸 𑀓𑀤𑀸 𑀓𑀢𑀺𑀯𑀺𑀥𑀁 𑀨𑀮𑀁 𑀤𑁂𑀦𑁆𑀢𑀺, 𑀢𑀁𑀲𑀗𑁆𑀔𑀸𑀭𑀲𑀫𑁆𑀧𑀬𑀼𑀢𑁆𑀢𑀸 𑀢𑀡𑁆𑀳𑀸 𑀓𑀤𑀸 𑀓𑀢𑀺𑀯𑀺𑀥𑀁 𑀨𑀮𑀁 𑀤𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀧𑀜𑁆𑀘𑀲𑀗𑁆𑀔𑀸𑀭𑀸𑀤𑀻𑀲𑀼. 𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀭𑀸𑀢𑀺 𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀯𑀢𑁆𑀢𑀸 𑀧𑀭𑀺𑀬𑀼𑀝𑁆𑀞𑀸𑀦𑀸 𑀅𑀓𑀼𑀲𑀮𑀲𑀗𑁆𑀔𑀸𑀭𑀸 𑀘𑁂𑀢𑀦𑀸. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀢𑀺 𑀤𑀺𑀝𑁆𑀞𑁂 𑀧𑀲𑁆𑀲𑀺𑀢𑀩𑁆𑀩𑁂 𑀥𑀫𑁆𑀫𑁂 𑀅𑀢𑁆𑀢𑀪𑀸𑀯𑁂 𑀯𑁂𑀤𑀦𑀻𑀬𑀁 𑀨𑀮𑀁 𑀤𑁂𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀨𑀮𑀁 𑀯𑁂𑀤𑁂𑀢𑀻𑀢𑀺 𑀯𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸. 𑀓𑀸 𑀲𑀸? 𑀅𑀧𑀤𑀼𑀲𑁆𑀲𑀦𑀻𑀬𑀸𑀤𑀻𑀲𑀼 𑀅𑀢𑀺𑀤𑀼𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀧𑀞𑀫𑀚𑀯𑀦𑀘𑁂𑀢𑀦𑀸. 𑀉𑀧𑀧𑀚𑁆𑀚𑁂 𑀨𑀮𑀁 𑀯𑁂𑀤𑁂𑀢𑀻𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸, 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸. 𑀅𑀧𑀭𑀸𑀧𑀭𑀺𑀬𑀸𑀬𑁂 𑀅𑀢𑁆𑀢𑀪𑀸𑀯𑁂 𑀨𑀮𑀁 𑀯𑁂𑀤𑁂𑀢𑀻𑀢𑀺 𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀸, 𑀫𑀚𑁆𑀛𑁂 𑀧𑀯𑀢𑁆𑀢𑀸 𑀧𑀜𑁆𑀘 𑀚𑀯𑀦𑀘𑁂𑀢𑀦𑀸. 𑀢𑀺𑀨𑀮𑀤𑀸𑀦𑀯𑀲𑁂𑀦 𑀢𑀺𑀯𑀺𑀥𑀸 𑀲𑀗𑁆𑀔𑀸𑀭𑀸. 𑀏𑀯𑀁 𑀇𑀫𑀸𑀬 𑀢𑀺𑀯𑀺𑀥𑀸𑀬 𑀲𑀗𑁆𑀔𑀸𑀭𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀢𑀺𑀯𑀺𑀥𑀸 𑀢𑀡𑁆𑀳𑀸 𑀢𑀺𑀯𑀺𑀥𑀁 𑀨𑀮𑀁 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀅𑀢𑁆𑀢𑀪𑀸𑀯𑁂, 𑀉𑀧𑀧𑀚𑁆𑀚𑁂 𑀯𑀸 𑀅𑀦𑀦𑁆𑀢𑀭𑀪𑀯𑁂, 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂 𑀪𑀯𑁂 𑀤𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀏𑀯𑀁 𑀨𑀮𑀦𑀺𑀩𑁆𑀩𑀢𑁆𑀢𑀓𑀲𑀗𑁆𑀔𑀸𑀭𑀁 𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀢𑀡𑁆𑀳𑀁 𑀯𑀸 𑀪𑀕𑀯𑀸 𑀆𑀳.

‘‘𑀬𑀸𑀬 𑀤𑁂𑀲𑀦𑀸𑀬, 𑀕𑀸𑀣𑀸𑀬 𑀯𑀸 𑀨𑀮𑀦𑀺𑀩𑁆𑀩𑀢𑁆𑀢𑀓𑀁 𑀲𑀗𑁆𑀔𑀸𑀭𑀁 𑀆𑀳, 𑀲𑀸 𑀤𑁂𑀲𑀦𑀸, 𑀕𑀸𑀣𑀸 𑀯𑀸 𑀓𑀢𑀫𑁂𑀦 𑀤𑁂𑀲𑀦𑀸𑀪𑀽𑀢𑁂𑀦 𑀯𑀸 𑀅𑀧𑀭𑁂𑀦 𑀬𑀼𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀁 𑀮𑁄𑀪𑀧𑀓𑀢𑀁 𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸 ‘‘𑀬𑀲𑁆𑀲…𑀧𑁂… 𑀮𑁄𑀓𑁄’’𑀢𑀺 𑀤𑁂𑀲𑀦𑀸 𑀘 𑀬𑀸 ‘‘𑀬𑀁 𑀮𑁄𑀪𑀧𑀓𑀢𑀁 𑀓𑀫𑁆𑀫𑀁…𑀧𑁂… 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺 𑀤𑁂𑀲𑀦𑀸 𑀘 𑀯𑀼𑀢𑁆𑀢𑀸, 𑀪𑀕𑀯𑀢𑁄 𑀇𑀤𑀁 𑀤𑁂𑀲𑀦𑀸𑀤𑁆𑀯𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀼𑀩𑁆𑀩𑀸𑀧𑀭𑁂𑀦 𑀧𑀼𑀩𑁆𑀩𑀁 𑀅𑀧𑀭𑁂𑀦 𑀅𑀧𑀭𑀁 𑀧𑀼𑀩𑁆𑀩𑁂𑀦 𑀬𑀼𑀚𑁆𑀚𑀢𑀺 𑀬𑀼𑀚𑁆𑀚𑀦𑀁 𑀏𑀢𑀺 𑀲𑀫𑁂𑀢𑀺, 𑀬𑀣𑀸 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦, 𑀬𑀫𑀼𑀦𑁄𑀤𑀓𑀫𑁆𑀧𑀺 𑀕𑀗𑁆𑀕𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺. ‘‘𑀬𑀲𑁆𑀲…𑀧𑁂… 𑀮𑁄𑀓𑁄’’𑀢𑀺 𑀤𑁂𑀲𑀦𑀸 ‘‘𑀬𑀁 𑀮𑁄𑀪𑀧𑀓𑀢𑀁…𑀧𑁂… 𑀧𑀭𑀺𑀬𑀸𑀬𑁂’’𑀢𑀺 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, ‘‘𑀬𑀁 𑀮𑁄𑀪𑀧𑀓𑀢𑀁…𑀧𑁂… 𑀧𑀭𑀺𑀬𑀸𑀬𑁂’’𑀢𑀺 𑀤𑁂𑀲𑀦𑀸𑀧𑀺 ‘‘𑀬𑀲𑁆𑀲…𑀧𑁂… 𑀮𑁄𑀓𑁄’’𑀢𑀺 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀓𑀣𑀁 𑀬𑀼𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀺𑀨𑀮𑀢𑁆𑀢𑀬𑀦𑀺𑀩𑁆𑀩𑀢𑁆𑀢𑀓𑀝𑁆𑀞𑁂𑀦 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀁 𑀬𑀁 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺, 𑀢𑀁 𑀢𑀁 𑀲𑀼𑀢𑁆𑀢𑀫𑁆𑀧𑀺 𑀦𑀻𑀳𑀭𑀺𑀢𑁆𑀯𑀸 𑀧𑀼𑀩𑁆𑀩𑀸𑀧𑀭𑀲𑀁𑀲𑀦𑁆𑀤𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀁𑀲𑀦𑁆𑀤𑀦𑀸𑀓𑀸𑀭𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀭𑀢𑀡𑁆𑀳𑀸𑀯𑀺𑀘𑀭𑀺𑀢𑁂𑀲𑀼. 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀆𑀭𑀩𑁆𑀪 𑀲𑀢𑁆𑀢𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀁 𑀢𑀡𑁆𑀳𑀸𑀘𑀭𑀺𑀢𑀁. 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦𑀸𑀢𑀺 𑀅𑀲𑀼𑀪𑀸𑀦𑀺𑀘𑁆𑀘𑀸𑀤𑀺𑀤𑀲𑁆𑀲𑀦𑀩𑀮𑁂𑀦 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀧𑀳𑀸𑀢𑀩𑁆𑀩𑀁. 𑀲𑀗𑁆𑀔𑀸𑀭𑀸𑀢𑀺 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸 𑀲𑀗𑁆𑀔𑀸𑀭𑀸. 𑀤𑀲𑁆𑀲𑀦𑀩𑀮𑁂𑀦𑀸𑀢𑀺 𑀤𑀲𑁆𑀲𑀦𑀲𑀗𑁆𑀔𑀸𑀢𑀧𑀞𑀫𑀫𑀕𑁆𑀕𑀜𑀸𑀡𑀩𑀮𑁂𑀦 𑀧𑀳𑀸𑀢𑀩𑁆𑀩𑀸. 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀢𑀡𑁆𑀳𑀸𑀯𑀺𑀘𑀭𑀺𑀢𑁂𑀳𑀺 𑀅𑀯𑀲𑁂𑀲𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀦𑀺𑀕𑁆𑀕𑀢𑀸 𑀢𑀡𑁆𑀳𑀸 𑀬𑀲𑁆𑀲 𑀲𑁄 𑀦𑀺𑀢𑁆𑀢𑀡𑁆𑀳𑁄, 𑀦𑀺𑀢𑁆𑀢𑀡𑁆𑀳𑀲𑁆𑀲 𑀪𑀸𑀯𑁄 𑀦𑀺𑀢𑁆𑀢𑀡𑁆𑀳𑀢𑀸, 𑀓𑀸 𑀲𑀸? 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼.

𑀧𑀧𑀜𑁆𑀘𑀲𑀗𑁆𑀔𑀸𑀭𑀸𑀪𑀺𑀦𑀦𑁆𑀤𑀦𑀢𑁆𑀢𑀬𑀁 𑀬𑀤𑀺𑀧𑀺 𑀅𑀢𑁆𑀣𑀢𑁄 𑀏𑀓𑀁 𑀲𑀫𑀸𑀦𑀁, 𑀤𑁂𑀲𑀦𑀸𑀬 𑀧𑀦 𑀧𑀤𑀓𑁆𑀔𑀭𑀸𑀤𑀻𑀳𑀺 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀬𑁄𑀬𑀁 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀲𑁄𑀬𑀁 𑀓𑀢𑀺𑀯𑀺𑀥𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀘𑀸𑀬𑀁 𑀧𑀼𑀩𑁆𑀩𑀸𑀧𑀭𑁄 𑀲𑀦𑁆𑀥𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀦 𑀓𑁂𑀯𑀮𑀁 𑀲𑀼𑀢𑁆𑀢𑀦𑁆𑀢𑀭𑀲𑀁𑀲𑀦𑁆𑀤𑀦𑀫𑁂𑀯 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺, 𑀅𑀣 𑀔𑁄 𑀅𑀜𑁆𑀜𑁄𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘𑀲𑁄 𑀘𑀸𑀬’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁮). 𑀢𑀢𑁆𑀣 𑀅𑀢𑁆𑀣𑀲𑀦𑁆𑀥𑀻𑀢𑀺 𑀓𑀺𑀭𑀺𑀬𑀸𑀓𑀸𑀭𑀓𑀸𑀤𑀺𑀯𑀲𑁂𑀦 𑀅𑀢𑁆𑀣𑀲𑁆𑀲 𑀅𑀢𑁆𑀣𑁂𑀦 𑀲𑀦𑁆𑀥𑀺. 𑀧𑀤𑀲𑀦𑁆𑀥𑀻𑀢𑀺 𑀦𑀸𑀫𑀧𑀤𑀸𑀤𑀺𑀓𑀲𑁆𑀲 𑀦𑀸𑀫𑀧𑀤𑀸𑀤𑀺𑀓𑀦𑁆𑀢𑀭𑁂𑀦 𑀲𑀦𑁆𑀥𑀺. 𑀤𑁂𑀲𑀦𑀸𑀲𑀦𑁆𑀥𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀤𑁂𑀲𑀦𑀦𑁆𑀢𑀭𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀤𑁂𑀲𑀦𑀦𑁆𑀢𑀭𑁂𑀦 𑀲𑀦𑁆𑀥𑀺. 𑀦𑀺𑀤𑁆𑀤𑁂𑀲𑀲𑀦𑁆𑀥𑀻𑀢𑀺 𑀦𑀺𑀤𑁆𑀤𑁂𑀲𑀦𑁆𑀢𑀭𑀲𑁆𑀲 𑀦𑀺𑀤𑁆𑀤𑁂𑀲𑀦𑁆𑀢𑀭𑁂𑀦 𑀲𑀦𑁆𑀥𑀺.

𑀲𑀦𑁆𑀥𑀺 𑀘 𑀦𑀸𑀫 𑀅𑀢𑁆𑀣𑀸𑀤𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀲𑀪𑀸𑀯𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺, 𑀅𑀢𑁆𑀣𑀸𑀤𑀻𑀦𑀜𑁆𑀘 𑀙𑀅𑀢𑁆𑀣𑀧𑀤𑀸𑀤𑀻𑀲𑀼 𑀅𑀯𑀭𑁄𑀥𑀦𑀢𑁄 ‘‘𑀅𑀢𑁆𑀣𑀲𑀦𑁆𑀥𑀺 𑀙𑀧𑁆𑀧𑀤𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀢𑁆𑀣𑀲𑀦𑁆𑀥𑀺𑀩𑁆𑀬𑀜𑁆𑀚𑀦𑀲𑀦𑁆𑀥𑀬𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑀸 𑀤𑁂𑀲𑀦𑀸𑀲𑀦𑁆𑀥𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑁂𑀲𑀦𑀸𑀲𑀦𑁆𑀥𑀺 𑀦 𑀘 𑀧𑀣𑀯𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦 𑀘 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘𑀸𑀢𑀺 𑀏𑀢𑁆𑀣 𑀛𑀸𑀬𑀻 𑀛𑀸𑀦𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀆𑀮𑀫𑁆𑀩𑀺𑀢𑁆𑀯𑀸 𑀦 𑀘 𑀛𑀸𑀬𑀢𑀺, 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀲𑁆𑀲𑀝𑀁 𑀧𑀦 𑀦𑀺𑀩𑁆𑀩𑀸𑀦𑀁 𑀦𑀺𑀲𑁆𑀲𑀸𑀬 𑀆𑀮𑀫𑁆𑀩𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀛𑀸𑀬𑀢𑀺 𑀲𑀫𑀸𑀧𑀚𑁆𑀚𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀘 𑀆𑀧𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄. 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀳𑀺 𑀧𑀣𑀯𑀻𑀆𑀤𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑁂𑀯 𑀆𑀭𑀩𑁆𑀪 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀻𑀢𑀺. 𑀏𑀢𑁆𑀣 𑀘 𑀧𑀣𑀯𑀻𑀆𑀤𑀻𑀳𑀺 𑀫𑀳𑀸𑀪𑀽𑀢𑁂𑀳𑀺 𑀓𑀸𑀫𑀪𑀯𑀭𑀽𑀧𑀪𑀯𑀸 𑀕𑀳𑀺𑀢𑀸 𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀳𑀺𑀧𑀺 𑀅𑀭𑀽𑀧𑀪𑀯𑁄 𑀕𑀳𑀺𑀢𑁄, 𑀪𑀯𑀢𑁆𑀢𑀬𑀁 𑀯𑀚𑁆𑀚𑁂𑀢𑁆𑀯𑀸 𑀘 𑀛𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀧𑀣𑀯𑀻𑀆𑀤𑀬𑁄 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀻 𑀛𑀸𑀬𑀢𑀺 𑀘, 𑀏𑀯𑀁 𑀲𑀢𑀺 𑀇𑀥𑀮𑁄𑀓𑀲𑀗𑁆𑀔𑀸𑀢𑀁 𑀲𑀢𑁆𑀢𑀲𑀦𑁆𑀢𑀸𑀦𑀁 𑀯𑀸 𑀧𑀭𑀮𑁄𑀓𑀲𑀗𑁆𑀔𑀸𑀢𑀁 𑀲𑀢𑁆𑀢𑀲𑀦𑁆𑀢𑀸𑀦𑀁 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀦𑀁 𑀯𑀸 𑀦𑀺𑀲𑁆𑀲𑀸𑀬 𑀛𑀸𑀬𑀻 𑀛𑀸𑀬𑀢𑀻𑀢𑀺 𑀆𑀲𑀗𑁆𑀓𑀦𑀻𑀬𑀢𑁆𑀢𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀦 𑀘 𑀇𑀫𑀁 𑀮𑁄𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀫𑀁 𑀮𑁄𑀓𑀦𑁆𑀢𑀺 𑀇𑀥𑀮𑁄𑀓𑀲𑀗𑁆𑀔𑀸𑀢𑁄 𑀤𑀺𑀝𑁆𑀞𑁄 𑀅𑀢𑁆𑀢𑀪𑀸𑀯𑁄 𑀲𑀢𑁆𑀢𑀲𑀦𑁆𑀢𑀸𑀦𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀺𑀁 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀧𑀭𑀮𑁄𑀓𑀦𑁆𑀢𑀺 𑀇𑀥𑀮𑁄𑀓𑀢𑁄 𑀅𑀜𑁆𑀜𑁄 𑀪𑀯𑀦𑁆𑀢𑀭𑀲𑀗𑁆𑀔𑀸𑀢𑁄 𑀲𑀢𑁆𑀢𑀲𑀦𑁆𑀢𑀸𑀦𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀺𑀁 𑀦𑀺𑀲𑁆𑀲𑀸𑀬 𑀦 𑀘 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘.

𑀬𑀫𑀺𑀤𑀁 𑀉𑀪𑀬𑀦𑁆𑀢𑀺𑀆𑀤𑀻𑀲𑀼 𑀇𑀤𑀁 𑀉𑀪𑀬𑀁 𑀇𑀥𑀮𑁄𑀓𑀧𑀭𑀮𑁄𑀓𑀤𑁆𑀯𑀬𑀁 𑀅𑀦𑁆𑀢𑀭𑁂𑀦 𑀯𑀚𑁆𑀚𑁂𑀢𑁆𑀯𑀸 𑀬𑀁 𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁, 𑀢𑀁 𑀭𑀽𑀧𑀸𑀬𑀢𑀦𑀫𑁆𑀧𑀺. 𑀬𑀁 𑀲𑀤𑁆𑀤𑀸𑀬𑀢𑀦𑀁 𑀲𑀼𑀢𑀁, 𑀢𑀁 𑀲𑀤𑁆𑀤𑀸𑀬𑀢𑀦𑀫𑁆𑀧𑀺. 𑀬𑀁 𑀕𑀦𑁆𑀥𑀸𑀬𑀢𑀦𑀭𑀲𑀸𑀬𑀢𑀦𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀼𑀢𑀁, 𑀢𑀁 𑀕𑀦𑁆𑀥𑀸𑀬𑀢𑀦𑀭𑀲𑀸𑀬𑀢𑀦𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀫𑁆𑀧𑀺. 𑀬𑀁 𑀆𑀧𑁄𑀥𑀸𑀢𑀼 𑀆𑀓𑀸𑀲𑀥𑀸𑀢𑀼 𑀮𑀓𑁆𑀔𑀡𑀭𑀽𑀧𑀁 𑀑𑀚𑀸𑀲𑀗𑁆𑀔𑀸𑀢𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀭𑀽𑀧𑀁 𑀯𑀺𑀜𑁆𑀜𑀸𑀢𑀁, 𑀢𑀁 𑀆𑀧𑁄𑀥𑀸𑀢𑀸𑀤𑀺𑀓𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀭𑀽𑀧𑀫𑁆𑀧𑀺. 𑀬𑀁 𑀯𑀢𑁆𑀣𑀼 𑀧𑀭𑀺𑀬𑁂𑀲𑀺𑀢𑀁 𑀯𑀸 𑀅𑀧𑀭𑀺𑀬𑁂𑀲𑀺𑀢𑀁 𑀯𑀸 𑀲𑀦𑁆𑀢𑀺𑀓𑁂 𑀧𑀢𑁆𑀢𑀁, 𑀢𑀁 𑀯𑀢𑁆𑀣𑀼𑀫𑁆𑀧𑀺. 𑀬𑀁 𑀯𑀢𑁆𑀣𑀼 𑀧𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀢𑀁 𑀧𑀭𑀺𑀬𑁂𑀲𑀦𑀸𑀭𑀳𑀁 𑀲𑀼𑀦𑁆𑀤𑀭𑀁, 𑀢𑀁 𑀯𑀢𑁆𑀣𑀼𑀫𑁆𑀧𑀺. 𑀬𑀁 𑀯𑀢𑁆𑀣𑀼 𑀯𑀺𑀢𑀓𑁆𑀓𑀺𑀢𑀁 𑀯𑀺𑀢𑀓𑁆𑀓𑀦𑀯𑀲𑁂𑀦 𑀆𑀮𑀫𑁆𑀩𑀺𑀢𑀩𑁆𑀩𑀁, 𑀢𑀁 𑀯𑀢𑁆𑀣𑀼𑀫𑁆𑀧𑀺. 𑀬𑀁 𑀯𑀢𑁆𑀣𑀼 𑀯𑀺𑀘𑀸𑀭𑀺𑀢𑀁 𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀆𑀮𑀫𑁆𑀩𑀺𑀢𑀩𑁆𑀩𑀁, 𑀢𑀁 𑀯𑀢𑁆𑀣𑀼𑀫𑁆𑀧𑀺. 𑀬𑀁 𑀯𑀢𑁆𑀣𑀼 𑀫𑀦𑀲𑀸 𑀘𑀺𑀢𑁆𑀢𑁂𑀦𑁂𑀯 𑀅𑀦𑀼𑀘𑀺𑀦𑁆𑀢𑀺𑀢𑀁 𑀅𑀦𑀼𑀘𑀺𑀦𑁆𑀢𑀦𑀯𑀲𑁂𑀦 𑀆𑀮𑀫𑁆𑀩𑀺𑀢𑀩𑁆𑀩𑀁, 𑀢𑀁 𑀯𑀢𑁆𑀣𑀼𑀫𑁆𑀧𑀺 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀏𑀢𑁆𑀣 𑀤𑀺𑀝𑁆𑀞𑀸𑀤𑀺𑀓𑀁 𑀩𑀳𑀺𑀤𑁆𑀥𑀸𑀭𑀽𑀧𑀫𑁂𑀯 𑀕𑀳𑁂𑀢𑀩𑁆𑀩𑀁 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑁋 ‘‘𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑁄 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁄 𑀭𑀽𑀧𑀲𑀦𑁆𑀢𑀸𑀦𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁮). ‘‘𑀬𑀤𑀺 𑀛𑀸𑀬𑀻 𑀧𑀼𑀕𑁆𑀕𑀮𑁄 𑀬𑀣𑀸𑀯𑀼𑀢𑁆𑀢𑁂 𑀧𑀣𑀯𑀻𑀆𑀤𑀬𑁄 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘, 𑀏𑀯𑀁 𑀲𑀢𑀺 𑀅𑀬𑀁 𑀛𑀸𑀬𑀻 𑀧𑀼𑀕𑁆𑀕𑀮𑁄 𑀇𑀤𑀁 𑀦𑀸𑀫 𑀦𑀺𑀲𑁆𑀲𑀸𑀬 𑀛𑀸𑀬𑀢𑀻𑀢𑀺 𑀮𑁄𑀓𑁂 𑀓𑁂𑀦𑀘𑀺 𑀜𑀸𑀬𑀢𑀺 𑀓𑀺𑀁, 𑀉𑀤𑀸𑀳𑀼 𑀦 𑀜𑀸𑀬𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀦 𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀲𑀤𑁂𑀯𑀓𑁂 𑀮𑁄𑀓𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀮𑀲𑀫𑀸𑀧𑀢𑁆𑀢𑀺𑀛𑀸𑀦𑁂𑀦 𑀛𑀸𑀬𑀦𑁆𑀢𑁄 𑀅𑀬𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑁄 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀬𑀢𑁆𑀣 𑀓𑀢𑁆𑀣𑀘𑀺𑀧𑀺 𑀅𑀦𑀺𑀲𑁆𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀛𑀸𑀬𑀢𑀻𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀓𑁂𑀦𑀘𑀺 𑀦 𑀜𑀸𑀬𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀦𑀸𑀪𑀺𑀚𑀸𑀦𑀸𑀫, 𑀓𑀺𑀁 𑀢𑁆𑀯𑀁 𑀦𑀺𑀲𑁆𑀲𑀸𑀬 𑀛𑀸𑀬𑀲𑀻’’𑀢𑀺. (𑀲𑀁. 𑀦𑀺. 𑁩.𑁭𑁯; 𑀦𑁂𑀢𑁆𑀢𑀺. 𑁧𑁦𑁪);

‘‘𑀓𑁂𑀦𑀘𑀺 𑀅𑀯𑀺𑀜𑁆𑀜𑀸𑀬𑀪𑀸𑀯𑁄 𑀓𑁂𑀦 𑀲𑀼𑀢𑁆𑀢𑁂𑀦 𑀯𑀺𑀪𑀸𑀯𑁂𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑀺𑀦𑀸 𑀕𑁄𑀥𑀺𑀓𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁧.𑁧𑁫𑁯) 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀫𑀸𑀭𑁄 𑀧𑀸𑀧𑀺𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀤𑀸𑀦𑀺 𑀔𑀻𑀡𑀸𑀲𑀯𑀘𑀺𑀢𑁆𑀢𑀲𑁆𑀲 𑀓𑀢𑁆𑀣𑀘𑀺𑀧𑀺 𑀅𑀦𑀺𑀲𑁆𑀲𑀺𑀢𑀪𑀸𑀯𑀁 𑀕𑁄𑀥𑀺𑀓𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁧.𑁧𑁫𑁯) 𑀯𑀓𑁆𑀓𑀮𑀺𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁩.𑁮𑁭) 𑀘 𑀯𑀺𑀪𑀸𑀯𑁂𑀢𑀼𑀁 ‘𑀬𑀣𑀸 𑀫𑀸𑀭𑁄’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁮) 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀸𑀭𑀓𑁂, 𑀧𑀼𑀜𑁆𑀜𑁂 𑀯𑀸 𑀫𑀸𑀭𑁂𑀢𑀺 𑀦𑀺𑀯𑀸𑀭𑁂𑀢𑀻𑀢𑀺 𑀫𑀸𑀭𑁄, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑁂 𑀫𑀸𑀭𑁂𑀢𑀻𑀢𑀺 𑀯𑀸 𑀫𑀸𑀭𑁄. 𑀧𑀸𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀦𑁆𑀢𑀢𑀸𑀬 𑀧𑀸𑀧𑀺𑀫𑀸. 𑀧𑀼𑀩𑁆𑀩𑀢𑁆𑀢𑀪𑀸𑀯𑁂 𑀕𑁄𑀥𑀲𑁆𑀲 𑀖𑀸𑀢𑀓𑀢𑁆𑀢𑀸 ‘‘𑀕𑁄𑀥𑀺𑀓𑁄’’𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀉𑀤𑁆𑀥𑀁 𑀧𑀝𑀺𑀲𑀦𑁆𑀥𑀸𑀤𑀺 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀦𑁆𑀢𑁄 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺. ‘‘𑀧𑀭𑀘𑀺𑀢𑁆𑀢𑀚𑀸𑀦𑀦𑀓𑁄 𑀫𑀸𑀭𑁄 𑀓𑀲𑁆𑀫𑀸 𑀦 𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄 𑀕𑁄𑀥𑀺𑀓𑁄 𑀳𑀺 𑀬𑀲𑁆𑀫𑀸 𑀧𑀧𑀜𑁆𑀘𑀸𑀢𑀻𑀢𑁄, 𑀢𑀲𑁆𑀫𑀸 𑀢𑀡𑁆𑀳𑀸𑀧𑀳𑀸𑀦𑁂𑀦 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄𑀧𑀺 𑀅𑀲𑁆𑀲 𑀕𑁄𑀥𑀺𑀓𑀲𑁆𑀲 𑀬𑀲𑁆𑀫𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀘 𑀦 𑀚𑀸𑀦𑀸𑀢𑀻𑀢𑀺.

‘‘𑀕𑁄𑀥𑀺𑀓𑀲𑀼𑀢𑁆𑀢𑁂𑀦𑁂𑀯 𑀯𑀺𑀪𑀸𑀯𑁂𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀕𑁄𑀥𑀺𑀓𑀲𑀼𑀢𑁆𑀢𑀯𑀓𑁆𑀓𑀮𑀺𑀲𑀼𑀢𑁆𑀢𑁂𑀳𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀦𑀺𑀲𑁆𑀲𑀺𑀢𑀪𑀸𑀯𑁄 𑀯𑀺𑀪𑀸𑀯𑀺𑀢𑁄, 𑀏𑀯𑀁 𑀲𑀢𑀺 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀦𑀺𑀲𑁆𑀲𑀺𑀢𑀪𑀸𑀯𑁄 𑀓𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀢𑀤𑀸𑀧𑀺 𑀦 𑀯𑀺𑀜𑁆𑀜𑀸𑀬𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁂𑀯𑀓𑁂𑀦 𑀮𑁄𑀓𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀉𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀨𑀮𑀲𑀫𑀸𑀧𑀢𑁆𑀢𑀺𑀛𑀸𑀦𑁂𑀦 𑀛𑀸𑀬𑀫𑀸𑀦𑀸 𑀇𑀫𑁂 𑀔𑀻𑀡𑀸𑀲𑀯𑀸 𑀓𑀢𑁆𑀣𑀘𑀺 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀛𑀸𑀬𑀦𑁆𑀢𑀻𑀢𑀺 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀦 𑀜𑀸𑀬𑀦𑁆𑀢𑀺 𑀲𑀫𑀸𑀭𑀓𑁂𑀦…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀦 𑀜𑀸𑀬𑀦𑁆𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀦 𑀜𑀸𑀬𑀦𑁆𑀢𑀻𑀢𑀺 𑀏𑀢𑁆𑀣 𑀳𑀺 𑀦-𑀓𑀸𑀭𑁄 𑀘 ‘‘𑀛𑀸𑀬𑀫𑀸𑀦𑀸’’𑀢𑀺 𑀧𑀤𑁂 𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄 ‘‘𑀦 𑀛𑀸𑀬𑀫𑀸𑀦𑀸’’𑀢𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄. ‘‘𑀦 𑀜𑀸𑀬𑀦𑁆𑀢𑀻’’𑀢𑀺 𑀧𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀁 𑀏𑀯 ‘‘𑀮𑁄𑀓𑁂 𑀓𑁂𑀦𑀘𑀺𑀧𑀺 𑀦 𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀅𑀬𑀁 𑀤𑁂𑀲𑀦𑀸𑀲𑀦𑁆𑀥𑀻𑀢𑀺 𑀕𑁄𑀥𑀺𑀓𑀲𑀼𑀢𑁆𑀢𑀯𑀓𑁆𑀓𑀮𑀺𑀲𑀼𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀢𑁆𑀣𑀯𑀲𑁂𑀦 𑀲𑀁𑀲𑀦𑁆𑀤𑀦𑀸 𑀦𑀺𑀤𑁆𑀥𑀸𑀭𑀺𑀢𑀸 𑀯𑀺𑀬 ‘‘𑀦 𑀘 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀤𑁂𑀲𑀦𑀸𑀬 𑀘 ‘‘𑀦 𑀘 𑀇𑀫𑀁 𑀮𑁄𑀓’’𑀦𑁆𑀢𑀺𑀆𑀤𑀺𑀤𑁂𑀲𑀦𑀸𑀬 𑀘 𑀬𑀸𑀬 𑀤𑁂𑀲𑀦𑀸𑀬 𑀅𑀢𑁆𑀣𑀯𑀲𑁂𑀦 𑀲𑀁𑀲𑀦𑁆𑀤𑀦𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀢𑀸𑀬 𑀤𑁂𑀲𑀦𑀸𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀬𑀁 𑀓𑀺𑀜𑁆𑀘𑀺 𑀦𑀺𑀲𑁆𑀲𑀸𑀬 𑀛𑀸𑀬𑀻 𑀦 𑀛𑀸𑀬𑀢𑀺, 𑀦𑀺𑀩𑁆𑀩𑀸𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀻 𑀛𑀸𑀬𑀢𑀻𑀢𑀺 𑀅𑀢𑁆𑀣𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀸, 𑀅𑀬𑀁 𑀲𑀁𑀲𑀦𑁆𑀤𑀦𑀸 𑀤𑁂𑀲𑀦𑀸𑀲𑀦𑁆𑀥𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀤𑁂𑀲𑀦𑀸𑀲𑀦𑁆𑀥𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑀸 𑀦𑀺𑀤𑁆𑀤𑁂𑀲𑀲𑀦𑁆𑀥𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀸 𑀦𑀺𑀤𑁆𑀤𑁂𑀲𑀲𑀦𑁆𑀥𑀻𑀢𑀺 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀅𑀢𑁆𑀣𑀲𑀦𑁆𑀥𑀺𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀤𑁂𑀲𑀦𑀸𑀲𑀦𑁆𑀥𑀺𑀦𑀺𑀤𑁆𑀤𑁂𑀲𑀲𑀦𑁆𑀥𑀻𑀲𑀼 𑀬𑀸 𑀲𑀦𑁆𑀥𑀺 ‘‘𑀦𑀺𑀤𑁆𑀤𑁂𑀲𑀲𑀦𑁆𑀥𑀻’’𑀢𑀺 𑀉𑀤𑁆𑀤𑀺𑀝𑁆𑀞𑀸, 𑀲𑀸 𑀦𑀺𑀤𑁆𑀤𑁂𑀲𑀢𑁄 𑀓𑀢𑀫𑀸𑀢𑀺 𑀧𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀳𑀚𑀸𑀢𑀯𑀲𑁂𑀦 𑀯𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀸 𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀬𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀦𑁆𑀢𑀺 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸, 𑀧𑀼𑀣𑀼𑀚𑁆𑀚𑀦𑀸 𑀧𑀼𑀕𑁆𑀕𑀮𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀢𑁆𑀢𑀸. 𑀬𑀤𑀺 𑀤𑁂𑀲𑀦𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸, 𑀏𑀯𑀁 𑀲𑀢𑀺 𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀏𑀢𑁆𑀣 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀤𑁂𑀲𑀺𑀢𑀦𑁆𑀢𑀺 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀚𑀸𑀦𑀦𑀢𑁆𑀣𑀸𑀬 𑀤𑁂𑀲𑀺𑀢𑀸 𑀲𑀼𑀢𑁆𑀢𑀧𑁆𑀧𑀤𑁂𑀲𑀸. 𑀅𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀬𑁂𑀲𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸, 𑀅𑀭𑀺𑀬𑀧𑀼𑀕𑁆𑀕𑀮𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀢𑁆𑀢𑀸. 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀬 𑀧𑀦 𑀅𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀬𑀢𑁆𑀣 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀤𑁂𑀲𑀺𑀢𑀦𑁆𑀢𑀺 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀚𑀸𑀦𑀦𑀢𑁆𑀣𑀸𑀬 𑀤𑁂𑀲𑀺𑀢𑀸 𑀲𑀼𑀢𑁆𑀢𑀧𑁆𑀧𑀤𑁂𑀲𑀸.

‘‘𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀓𑁂𑀦 𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀓𑁂𑀦 𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀓𑀼𑀲𑀮𑀧𑀓𑁆𑀔𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀏𑀲 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄. 𑀅𑀓𑀼𑀲𑀮𑀧𑀓𑁆𑀔𑀲𑀸𑀫𑀜𑁆𑀜𑀓𑀼𑀲𑀮𑀧𑀓𑁆𑀔𑀲𑀸𑀫𑀜𑁆𑀜𑁂𑀳𑀺 𑀤𑀲𑁆𑀲𑁂𑀢𑁆𑀯𑀸 𑀅𑀓𑀼𑀲𑀮𑀯𑀺𑀲𑁂𑀲𑀓𑀼𑀲𑀮𑀯𑀺𑀲𑁂𑀲𑁂𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀁𑀓𑀺𑀮𑁂𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀦𑀺𑀤𑁆𑀤𑁂𑀲𑀲𑀦𑁆𑀥𑀻𑀢𑀺 𑀅𑀓𑀼𑀲𑀮𑀧𑀓𑁆𑀔𑀸𑀤𑀺𑀓𑀲𑁆𑀲 𑀧𑀼𑀭𑀺𑀫𑀦𑀺𑀤𑁆𑀤𑁂𑀲𑀲𑁆𑀲 𑀲𑀁𑀓𑀺𑀮𑁂𑀲𑀸𑀤𑀺𑀓𑁂𑀦 𑀧𑀘𑁆𑀙𑀺𑀫𑁂𑀦 𑀦𑀺𑀤𑁆𑀤𑁂𑀲𑁂𑀦 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀯𑀲𑁂𑀦 𑀅𑀬𑀁 𑀲𑀁𑀲𑀦𑁆𑀤𑀦𑀸 𑀘 𑀦𑀺𑀤𑁆𑀤𑁂𑀲𑀲𑀦𑁆𑀥𑀺 𑀦𑀸𑀫. 𑀓𑀼𑀲𑀮𑀧𑀓𑁆𑀔𑀸𑀤𑀺𑀓𑀲𑁆𑀲 𑀧𑀼𑀭𑀺𑀫𑀲𑁆𑀲 𑀦𑀺𑀤𑁆𑀤𑁂𑀲𑀲𑁆𑀲 𑀯𑁄𑀤𑀸𑀦𑀸𑀤𑀺𑀓𑁂𑀦 𑀧𑀘𑁆𑀙𑀺𑀫𑁂𑀦 𑀦𑀺𑀤𑁆𑀤𑁂𑀲𑁂𑀦 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀯𑀲𑁂𑀦 𑀅𑀬𑀁 𑀲𑀁𑀲𑀦𑁆𑀤𑀦𑀸 𑀘 𑀦𑀺𑀤𑁆𑀤𑁂𑀲𑀲𑀦𑁆𑀥𑀺 𑀦𑀸𑀫𑀸𑀢𑀺 𑀯𑀺𑀪𑀚𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑁆𑀲 𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑀦𑀺𑀤𑀸𑀦𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺𑀧𑁆𑀧𑀪𑁂𑀤𑁂𑀦 𑀘𑁂𑀯 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀦𑀺𑀤𑁆𑀤𑁂𑀲𑀲𑀦𑁆𑀥𑀺𑀤𑁂𑀲𑀦𑀸𑀲𑀦𑁆𑀥𑀺𑀧𑁆𑀧𑀪𑁂𑀤𑁂𑀦 𑀘 𑀯𑀺𑀪𑀚𑀺𑀢𑀩𑁆𑀩𑀪𑀸𑀯𑁄 𑀓𑁂𑀦 𑀅𑀫𑁆𑀳𑁂𑀳𑀺 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦 𑀢𑀣𑀸 𑀯𑀺𑀪𑀚𑀺𑀢𑀩𑁆𑀩𑀪𑀸𑀯𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 ‘‘𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺𑀓𑀁 (𑀦𑁂𑀢𑁆𑀢𑀺. 𑁪 𑀳𑀸𑀭𑀲𑀗𑁆𑀔𑁂𑀧) 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑁆𑀲 𑀢𑀣𑀸 𑀯𑀺𑀪𑀚𑀺𑀢𑀩𑁆𑀩𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀏𑀢𑁆𑀢𑀸𑀯𑀢𑀸 𑀘 𑀘𑀢𑀼𑀩𑁆𑀬𑀽𑀳𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄, 𑀅𑀜𑁆𑀜𑁄 𑀦𑀺𑀬𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀲𑀁 𑀬𑀲𑁆𑀲𑀁 𑀧𑀸𑀴𑀺𑀬𑀁 𑀬𑁄 𑀬𑁄 𑀘𑀢𑀼𑀩𑁆𑀩𑀺𑀥𑁄, 𑀲𑁄 𑀲𑁄 𑀘𑀢𑀼𑀩𑁆𑀬𑀽𑀳𑀳𑀸𑀭𑁄 𑀘 𑀬𑀣𑀸𑀮𑀸𑀪𑀯𑀲𑁂𑀦 𑀬𑁄𑀚𑀺𑀢𑁄, 𑀢𑀲𑁆𑀲𑀁 𑀢𑀲𑁆𑀲𑀁 𑀧𑀸𑀴𑀺𑀬𑀁 𑀲𑁄 𑀲𑁄 𑀘𑀢𑀼𑀩𑁆𑀩𑀺𑀥𑁄 𑀘𑀢𑀼𑀩𑁆𑀬𑀽𑀳𑀳𑀸𑀭𑁄 𑀢𑀣𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀢𑁆𑀢𑁄 𑀬𑁄𑀚𑀺𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀇𑀢𑀺 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.