𑁫. 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁨𑁩. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀧𑀤𑀝𑁆𑀞𑀸𑀦𑀯𑀺𑀪𑀗𑁆𑀕𑁂𑀦 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀤𑀝𑁆𑀞𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀯. 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀮𑀓𑁆𑀔𑀡𑁄 𑀳𑀸𑀭𑁄 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁄𑀢𑀺 𑀧𑀼𑀘𑁆𑀙𑀢𑀺. ‘‘𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀮𑀓𑁆𑀔𑀡𑁄 𑀳𑀸𑀭𑁄 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋‘‘𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄𑀢𑀺𑀆𑀤𑀺 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁩). 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀯𑀺𑀢𑁆𑀣𑀸𑀭𑀪𑀽𑀢𑁄 𑀮𑀓𑁆𑀔𑀡𑁄 𑀳𑀸𑀭𑁄 𑀧𑀺𑀝𑀓𑀢𑁆𑀢𑀬𑁂 𑀤𑁂𑀲𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀺𑀁 𑀦𑀸𑀫 𑀮𑀓𑁆𑀔𑀺𑀢𑀩𑁆𑀩𑀁 𑀥𑀫𑁆𑀫𑀁 𑀮𑀓𑁆𑀔𑀻𑀬𑀢𑀻𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑁂 𑀮𑀓𑁆𑀔𑀡𑀳𑀸𑀭𑀯𑀺𑀘𑀬𑁂 𑀥𑀫𑁆𑀫𑁂 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁂 𑀥𑀫𑁆𑀫𑀸𑀢𑀺 𑀬𑁂 𑀲𑀫𑀽𑀳𑀸 𑀥𑀫𑁆𑀫𑀸. 𑀏𑀓𑀮𑀓𑁆𑀔𑀡𑀸𑀢𑀺 𑀲𑀫𑀸𑀦𑀮𑀓𑁆𑀔𑀡𑀸. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀲𑀫𑀸𑀦𑀮𑀓𑁆𑀔𑀡𑀸𑀦𑀁 𑀢𑁂𑀲𑀁 𑀲𑀫𑀽𑀳𑀥𑀫𑁆𑀫𑀸𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁. 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂𑀢𑀺 𑀲𑀫𑀸𑀦𑀮𑀓𑁆𑀔𑀡𑁂 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂, 𑀧𑀸𑀴𑀺𑀬𑀁 𑀪𑀕𑀯𑀢𑀸 𑀯𑀼𑀢𑁆𑀢𑁂 𑀲𑀢𑀺 𑀯𑀼𑀢𑁆𑀢𑀥𑀫𑁆𑀫𑀢𑁄 𑀅𑀯𑀲𑀺𑀝𑁆𑀞𑀲𑀫𑀸𑀦𑀮𑀓𑁆𑀔𑀡𑀸 𑀥𑀫𑁆𑀫𑀸 𑀲𑀫𑀸𑀦𑀮𑀓𑁆𑀔𑀡𑁂𑀦 𑀯𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀮𑀓𑁆𑀔𑀡𑀳𑀸𑀭𑀯𑀺𑀲𑀬𑁂 𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀢𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀯𑀼𑀢𑁆𑀢𑁂 𑀇𑀫𑁂 𑀲𑀫𑀸𑀦𑀮𑀓𑁆𑀔𑀡𑀸 𑀥𑀫𑁆𑀫𑀸𑀧𑀺 𑀯𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀓𑀺𑀁 𑀪𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺, 𑀲𑁄 𑀧𑀓𑀸𑀭𑁄 𑀓𑀺𑀁 𑀪𑀯𑁂𑀢𑀺 𑀧𑀼𑀘𑁆𑀙𑀢𑀺. 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺, 𑀲𑁄 𑀧𑀓𑀸𑀭𑁄 𑀲𑀫𑀸𑀦𑀮𑀓𑁆𑀔𑀡𑀸𑀢𑀺 𑀪𑀸𑀯𑁄 𑀪𑀯𑁂𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺 𑀪𑀕𑀯𑀸 𑀆𑀳? ‘‘𑀘𑀓𑁆𑀔𑀼𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀁 𑀪𑀕𑀯𑀸 𑀆𑀳. ‘‘𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀝𑁆𑀞𑀺𑀢’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁂 ‘‘𑀲𑁄𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀝𑁆𑀞𑀺𑀢’’𑀦𑁆𑀢𑀺𑀆𑀤𑀺𑀯𑀘𑀦𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 𑀪𑀯𑀢𑀺.

‘‘𑀅𑀦𑀯𑀝𑁆𑀞𑀺𑀢𑀸𑀤𑀺𑀮𑀓𑁆𑀔𑀡𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸 𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀪𑀸𑀯𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸 𑀯𑀸𑀢𑀺 𑀆𑀬𑀢𑀦𑀯𑀲𑁂𑀦𑁂𑀯 𑀏𑀓𑀮𑀓𑁆𑀔𑀡𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀔𑀦𑁆𑀥𑀯𑀲𑁂𑀦𑀧𑀺 𑀏𑀓𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀘𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀢𑀻𑀢𑁂, 𑀭𑀸𑀥, 𑀭𑀽𑀧𑁂 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺, 𑀅𑀦𑀸𑀕𑀢𑀁 𑀭𑀽𑀧𑀁 𑀫𑀸 𑀅𑀪𑀺𑀦𑀦𑁆𑀤𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀘𑀸𑀕𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀚𑁆𑀚𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀢𑀻𑀢𑀸𑀬, 𑀭𑀸𑀥, 𑀯𑁂𑀤𑀦𑀸𑀬 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺, 𑀅𑀦𑀸𑀕𑀢𑀁 𑀯𑁂𑀤𑀦𑀁 𑀫𑀸 𑀅𑀪𑀺𑀦𑀦𑁆𑀤𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀘𑀸𑀕𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀚𑁆𑀚𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀪𑀯𑁂.

‘‘𑀅𑀦𑀧𑁂𑀓𑁆𑀔𑀦𑀻𑀬𑀮𑀓𑁆𑀔𑀡𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸 𑀯𑀸 𑀔𑀦𑁆𑀥𑀮𑀓𑁆𑀔𑀡𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸 𑀯𑀸𑀢𑀺 𑀔𑀦𑁆𑀥𑀸𑀬𑀢𑀦𑀯𑀲𑁂𑀦𑁂𑀯 𑀏𑀓𑀮𑀓𑁆𑀔𑀡𑀥𑀫𑁆𑀫𑀸 𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦𑀸𑀧𑀺 𑀯𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀬𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑁂𑀦 𑀘 𑀪𑀕𑀯𑀸 𑀆𑀳, 𑀢𑀣𑀸 𑀘 𑀢𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑁂𑀦 𑀘 𑀅𑀯𑀼𑀢𑁆𑀢𑀸𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁂 𑀯𑀺𑀧𑀲𑁆𑀲𑀓𑀸 𑀧𑀼𑀕𑁆𑀕𑀮𑀸 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀦𑀺𑀘𑁆𑀘𑀁 𑀲𑀼𑀲𑀫𑀸𑀭𑀤𑁆𑀥𑀸 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸𑀲𑀢𑀺𑀁 𑀪𑀸𑀯𑁂𑀦𑁆𑀢𑀺, 𑀢𑁂 𑀯𑀺𑀧𑀲𑁆𑀲𑀓𑀸 𑀅𑀓𑀺𑀘𑁆𑀘𑀁 𑀲𑀼𑀪𑀲𑀼𑀔𑀸𑀤𑀺𑀓𑀁, 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀯𑀸 𑀦 𑀲𑁂𑀯𑀦𑁆𑀢𑀺, 𑀓𑀺𑀘𑁆𑀘𑁂 𑀅𑀲𑀼𑀪𑀸𑀲𑀼𑀔𑀸𑀤𑀺𑀓𑁂, 𑀓𑀸𑀬𑀸𑀤𑀺𑀓𑁂 𑀯𑀸 𑀲𑀸𑀢𑀘𑁆𑀘𑀓𑀸𑀭𑀺𑀦𑁄 𑀳𑁄𑀦𑁆𑀢𑀻𑀢𑀺 𑀪𑀕𑀯𑀸 𑀆𑀳𑀸𑀢𑀺 𑀬𑁄𑀚𑀦𑀸.

𑀇𑀢𑀺𑀲𑀤𑁆𑀤𑀲𑁆𑀲 𑀘𑁂𑀢𑁆𑀣 𑀏𑀓𑀲𑁆𑀲 𑀮𑁄𑀧𑁄. 𑀇𑀢𑀺 𑀏𑀯𑀁 ‘‘𑀬𑁂𑀲𑀜𑁆𑀘𑀸’’𑀢𑀺𑀆𑀤𑀺𑀕𑀸𑀣𑀸𑀬 𑀓𑁂𑀲𑀸𑀤𑀺𑀓𑁂 𑀓𑀸𑀬𑁂 𑀕𑀢𑀸𑀬 𑀧𑀯𑀢𑁆𑀢𑀸𑀬 𑀲𑀢𑀺𑀬𑀸 𑀪𑀕𑀯𑀢𑀸 𑀲𑀭𑀽𑀧𑁂𑀦 𑀯𑀼𑀢𑁆𑀢𑀸𑀬 𑀯𑀺𑀚𑁆𑀚𑀫𑀸𑀦𑀸𑀬 𑀢𑀤𑀯𑀲𑁂𑀲𑀸 𑀯𑁂𑀤𑀦𑀸𑀕𑀢𑀸 𑀲𑀢𑀺 𑀘 𑀘𑀺𑀢𑁆𑀢𑀕𑀢𑀸 𑀲𑀢𑀺 𑀘 𑀥𑀫𑁆𑀫𑀕𑀢𑀸 𑀲𑀢𑀺 𑀘 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑁂𑀦 𑀯𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺 𑀲𑀗𑁆𑀔𑁂𑀧𑀢𑁄 𑀦𑀺𑀘𑁆𑀘𑀁 𑀲𑀼𑀲𑀫𑀸𑀭𑀤𑁆𑀥𑀸 𑀦𑀺𑀘𑁆𑀘𑀁 𑀯𑁂𑀤𑀦𑀸𑀕𑀢𑀸 𑀲𑀢𑀺 𑀘…𑀧𑁂… 𑀦𑀺𑀘𑁆𑀘𑀁 𑀘𑀺𑀢𑁆𑀢𑀕𑀢𑀸 𑀲𑀢𑀺 𑀘…𑀧𑁂… 𑀦𑀺𑀘𑁆𑀘𑀁 𑀥𑀫𑁆𑀫𑀕𑀢𑀸 𑀲𑀢𑀻𑀢𑀺 𑀯𑀢𑁆𑀢𑀩𑁆𑀩𑀸𑀢𑀺.

‘‘𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦𑁂𑀯 𑀏𑀓𑀮𑀓𑁆𑀔𑀡𑀸 𑀥𑀫𑁆𑀫𑀸 𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀣𑀸 𑀬𑀁 𑀓𑀺𑀜𑁆𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑀁, 𑀬𑀁 𑀓𑀺𑀜𑁆𑀘𑀺 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀲𑀼𑀢𑀁, 𑀬𑀁 𑀓𑀺𑀜𑁆𑀘𑀺 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀖𑀸𑀦𑀯𑀺𑀜𑁆𑀜𑀸𑀡𑀸𑀤𑀺𑀢𑁆𑀢𑀬𑁂𑀦 𑀯𑀺𑀜𑁆𑀜𑀸𑀡𑁂𑀦 𑀫𑀼𑀢𑀁, 𑀇𑀢𑀺 𑀏𑀯𑀁 𑀤𑀺𑀝𑁆𑀞𑀸𑀤𑀺𑀢𑁆𑀢𑀬𑁂 𑀪𑀕𑀯𑀢𑀸 𑀲𑀭𑀽𑀧𑁂𑀦 𑀯𑀼𑀢𑁆𑀢𑁂 𑀲𑀢𑀺 𑀢𑀤𑀯𑀲𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀢𑀁 𑀥𑀫𑁆𑀫𑀸𑀭𑀫𑁆𑀫𑀡𑀧𑀭𑀺𑀬𑀸𑀧𑀦𑁆𑀦𑀁 𑀭𑀽𑀧𑀁 𑀪𑀕𑀯𑀢𑀸 𑀆𑀮𑀫𑁆𑀩𑀺𑀢𑀩𑁆𑀩𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸 𑀯𑀼𑀢𑁆𑀢𑀁 𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀲𑀢𑀺 𑀢𑀤𑀯𑀲𑁂𑀲𑀁 𑀲𑀼𑀢𑀸𑀤𑀺𑀓𑀫𑁆𑀧𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀤𑀺𑀅𑀢𑁆𑀣𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑀫𑀼𑀢𑀁 𑀯𑀸’’𑀢𑀺.

‘‘𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀯𑀼𑀢𑁆𑀢𑀸𑀬 𑀢𑀤𑀯𑀲𑁂𑀲𑀸 𑀯𑁂𑀤𑀦𑀸𑀕𑀢𑀸𑀲𑀢𑀺𑀆𑀤𑀬𑁄𑀬𑁂𑀯 𑀯𑀢𑁆𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀧𑀺 𑀯𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀘𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀬𑁂𑀦 𑀦𑀺𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑁂𑀦 𑀘 𑀪𑀕𑀯𑀸 𑀆𑀳, 𑀢𑀣𑀸 𑀢𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑁂𑀦 𑀘 𑀪𑀕𑀯𑀸 𑀆𑀳, 𑀢𑀣𑀸 𑀢𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑁂𑀦 𑀘 𑀯𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀲𑁆𑀫𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀇𑀳 𑀫𑀫 𑀲𑀸𑀲𑀦𑁂, 𑀪𑀺𑀓𑁆𑀔𑀼, 𑀢𑁆𑀯𑀁 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀳𑀼𑀢𑁆𑀯𑀸 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀯𑀸 𑀯𑀺𑀦𑁂𑀬𑁆𑀬 𑀯𑀺𑀦𑀬𑀺𑀢𑁆𑀯𑀸 𑀓𑀸𑀬𑁂 𑀓𑁂𑀲𑀸𑀤𑀺𑀭𑀽𑀧𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀓𑁂𑀲𑀸𑀤𑀺𑀭𑀽𑀧𑀓𑀸𑀬𑀸𑀦𑀼𑀧𑀲𑁆𑀲𑀻 𑀳𑀼𑀢𑁆𑀯𑀸 𑀯𑀺𑀳𑀭𑀸𑀳𑀻’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑁂 𑀲𑀢𑀺 ‘‘𑀢𑀲𑁆𑀫𑀸𑀢𑀺𑀳, 𑀢𑁆𑀯𑀁 𑀪𑀺𑀓𑁆𑀔𑀼, 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁, 𑀢𑀲𑁆𑀫𑀸𑀢𑀺𑀳, 𑀢𑁆𑀯𑀁 𑀪𑀺𑀓𑁆𑀔𑀼, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺…𑀧𑁂… 𑀤𑁄𑀫𑀦𑀲𑁆𑀲𑀁, 𑀢𑀲𑁆𑀫𑀸𑀢𑀺𑀳, 𑀢𑁆𑀯𑀁 𑀪𑀺𑀓𑁆𑀔𑀼, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺…𑀧𑁂… 𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁 𑀪𑀯𑀢𑀻𑀢𑀺 𑀲𑀗𑁆𑀔𑁂𑀧𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀢𑁆𑀣𑀸𑀭𑀢𑁆𑀣𑁄 𑀧𑀦 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁩) 𑀩𑀳𑀼𑀥𑀸 𑀯𑀼𑀢𑁆𑀢𑁄𑀢𑀺 𑀅𑀫𑁆𑀳𑁂𑀳𑀺 𑀦 𑀯𑀺𑀢𑁆𑀣𑀸𑀭𑀺𑀢𑁄.

‘‘𑀏𑀓𑀲𑁆𑀫𑀺𑀁 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑁂 𑀓𑀲𑁆𑀫𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀆𑀢𑀸𑀧𑀻’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁. ‘‘𑀲𑀫𑁆𑀧𑀚𑀸𑀦𑁄’’𑀢𑀺 𑀧𑀤𑁂𑀦 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁. ‘‘𑀲𑀢𑀺𑀫𑀸’’𑀢𑀺 𑀧𑀤𑁂𑀦 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁. ‘‘𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀧𑀤𑁂𑀦 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁, 𑀦 𑀓𑀸𑀬𑁂𑀬𑁂𑀯 𑀧𑀯𑀢𑁆𑀢𑀁. 𑀏𑀯𑀁 𑀧𑀓𑀸𑀭𑁂𑀦 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀬𑁄𑀕𑀸𑀯𑀘𑀭𑀲𑁆𑀲 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂 𑀯𑀤𑁂𑀬𑁆𑀬, 𑀏𑀯𑀁 𑀲𑀢𑀺 𑀘𑀢𑀼𑀦𑁆𑀦𑀁 𑀯𑀻𑀭𑀺𑀬𑀧𑀜𑁆𑀜𑀸𑀲𑀢𑀺𑀲𑀫𑀸𑀥𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀸𑀥𑀓𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀲𑀸𑀥𑀦𑁂 𑀇𑀫𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀪𑀸𑀯𑀪𑁂𑀤𑀸𑀪𑀸𑀯𑀢𑁄 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁩).

𑁨𑁪. ‘‘𑀏𑀯𑀁 𑀯𑀼𑀢𑁆𑀢𑁂𑀧𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀬𑁂𑀯 𑀯𑀢𑁆𑀢𑀩𑁆𑀩𑀸 𑀪𑀯𑁂𑀬𑁆𑀬𑀼𑀁, 𑀓𑀣𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀬𑁂𑀦 𑀬𑁄𑀕𑀸𑀯𑀘𑀭𑁂𑀦 𑀪𑀸𑀯𑀺𑀬𑀫𑀸𑀦𑁂𑀲𑀼 𑀢𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀚𑁆𑀛𑀦𑀁 𑀩𑁄𑀥𑀁, 𑀅𑀭𑀺𑀬𑀫𑀕𑁆𑀕𑀜𑀸𑀡𑀁, 𑀩𑁄𑀥𑀁 𑀕𑀘𑁆𑀙𑀦𑁆𑀢𑀻𑀢𑀺 𑀩𑁄𑀥𑀗𑁆𑀕𑀫𑀸. 𑀩𑁄𑀥𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀧𑀓𑁆𑀔𑁂 𑀪𑀯𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀸.

‘‘𑀓𑀼𑀲𑀮𑀸𑀬𑁂𑀯 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀪𑀸𑀯𑁂𑀦 𑀦𑀻𑀳𑀭𑀺𑀢𑀸 𑀓𑀺𑀁, 𑀉𑀤𑀸𑀳𑀼 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀏𑀯𑀁 𑀅𑀓𑀼𑀲𑀮𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀲𑀮𑀸 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀢𑁆𑀢𑁂𑀦 𑀦𑀺𑀤𑁆𑀥𑀸𑀭𑀺𑀢𑀸 𑀬𑀣𑀸, 𑀏𑀯𑀁 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀢𑁆𑀢𑁂𑀦 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀓𑀣𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀮𑀓𑁆𑀔𑀡𑀢𑁆𑀢𑀸 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀆𑀳. 𑀢𑀢𑁆𑀣 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸. ‘‘𑀓𑀢𑀫𑀁 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀘𑀢𑀽𑀲𑀼…𑀧𑁂… 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻𑀢𑀺 𑀓𑀸𑀬𑀸𑀕𑀢𑀸𑀲𑀢𑀺𑀧𑀝𑁆𑀞𑀸𑀦𑁂 𑀬𑁄𑀕𑀸𑀯𑀘𑀭𑁂𑀦 𑀪𑀸𑀯𑀺𑀬𑀫𑀸𑀦𑁂 𑀲𑀢𑀺 𑀢𑁂𑀦 𑀬𑁄𑀕𑀸𑀯𑀘𑀭𑁂𑀦 𑀅𑀲𑀼𑀪𑁂 𑀓𑁂𑀲𑀸𑀤𑀺𑀓𑁂 𑀭𑀽𑀧𑀓𑀸𑀬𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀧𑀳𑀻𑀬𑀢𑀺, 𑀅𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, ‘‘𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 (𑀲𑀁. 𑀦𑀺. 𑁩.𑁫𑁬) 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀓𑀸𑀬𑁂 𑀙𑀦𑁆𑀤𑀭𑀸𑀕𑀁 𑀧𑀚𑀳𑀦𑁆𑀢𑀲𑁆𑀲 𑀢𑀲𑁆𑀲 𑀲𑀫𑀼𑀤𑀬𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀧𑀺 𑀙𑀦𑁆𑀤𑀭𑀸𑀕𑁄 𑀧𑀳𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀯𑁂𑀤𑀦𑀸𑀕𑀢𑀸𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑀺𑀬𑀫𑀸𑀦𑁂 𑀲𑀢𑀺 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀧𑀳𑀻𑀬𑀢𑀺, 𑀅𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀨𑀲𑁆𑀲𑀸𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧, 𑁩𑁯; 𑀫𑀳𑀸𑀯. 𑁧; 𑀉𑀤𑀸. 𑁧; 𑀯𑀺𑀪. 𑁨𑁨𑁫) 𑀯𑀼𑀢𑁆𑀢𑀢𑁆𑀢𑀸 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀁 𑀧𑀚𑀳𑀦𑁆𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑁂 𑀨𑀲𑁆𑀲𑀸𑀳𑀸𑀭𑁂 𑀙𑀦𑁆𑀤𑀭𑀸𑀕𑁄 𑀧𑀳𑀻𑀬𑀢𑀺. 𑀘𑀺𑀢𑁆𑀢𑀕𑀢𑀸𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑀺𑀬𑀫𑀸𑀦𑁂 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀧𑀳𑀻𑀬𑀢𑀺, 𑀅𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺. 𑀥𑀫𑁆𑀫𑀕𑀢𑀸𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑀺𑀬𑀫𑀸𑀦𑁂 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄 𑀧𑀳𑀻𑀬𑀢𑀺, 𑀅𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀧𑀳𑀸𑀢𑀩𑁆𑀩𑁂 𑀯𑀼𑀢𑁆𑀢𑁂 𑀢𑀤𑀯𑀲𑁂𑀲𑀸 𑀧𑀳𑀸𑀢𑀩𑁆𑀩𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

‘‘𑀆𑀳𑀸𑀭𑀸 𑀘𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀘𑀦𑁂 𑀆𑀳𑀸𑀭𑁂𑀲𑀼 𑀧𑀯𑀢𑁆𑀢𑀸 𑀓𑀸𑀫𑀭𑀸𑀕𑀤𑁄𑀲𑀫𑁄𑀳𑀸 𑀩𑁆𑀬𑀦𑁆𑀢𑀻𑀓𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄 𑀕𑀳𑀺𑀢𑁄. 𑀓𑀩𑀴𑀻𑀓𑀸𑀭𑀸𑀳𑀸𑀭𑀜𑁆𑀳𑀺 𑀆𑀭𑀩𑁆𑀪 𑀧𑀯𑀢𑁆𑀢𑁂 𑀓𑀸𑀫𑀭𑀸𑀕𑁂 𑀯𑀺𑀚𑁆𑀚𑀫𑀸𑀦𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀯𑀺𑀚𑀸𑀦𑀦𑀸 𑀦𑀢𑁆𑀣𑁂𑀯, 𑀢𑀲𑁆𑀫𑀺𑀁 𑀓𑀸𑀫𑀭𑀸𑀕𑁂 𑀧𑀦 𑀧𑀳𑀻𑀦𑁂 𑀧𑀭𑀺𑀚𑀸𑀦𑀦𑀸 𑀪𑀯𑀢𑀻𑀢𑀺. 𑀲𑁂𑀲𑀸𑀳𑀸𑀭𑀚𑀸𑀦𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸, 𑀯𑀺𑀧𑀮𑁆𑀮𑀸𑀲𑀸 𑀧𑀳𑀻𑀦𑀸, 𑀆𑀳𑀸𑀭𑀧𑀭𑀺𑀚𑀸𑀦𑀦𑀸 𑀉𑀧𑁆𑀧𑀦𑁆𑀦𑀸, 𑀲𑁄 𑀬𑁄𑀕𑀸𑀯𑀘𑀭𑁄 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺. 𑀲𑀼𑀪𑀲𑀜𑁆𑀜𑀺𑀢𑁂 𑀳𑀺 𑀓𑀸𑀬𑁂 𑀓𑀸𑀫𑀼𑀧𑀸𑀤𑀸𑀦𑀁 𑀯𑀺𑀲𑁂𑀲𑁂𑀦 𑀪𑀯𑀢𑀻𑀢𑀺 𑀲𑀼𑀪𑀲𑀜𑁆𑀜𑀺𑀢𑁄 𑀓𑀸𑀬𑁄 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼, 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀅𑀦𑀼𑀲𑀭𑀺𑀢𑀩𑁆𑀩𑁄 𑀅𑀲𑀼𑀪𑀲𑀜𑁆𑀜𑀺𑀢𑁄 𑀓𑁂𑀲𑀸𑀤𑀺 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑁆𑀯𑁂𑀯. 𑀲𑀼𑀔𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑀯𑀲𑁂𑀦 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀪𑀯𑀢𑀻𑀢𑀺 𑀲𑀼𑀔𑀲𑀜𑁆𑀜𑀺𑀢𑀸 𑀯𑁂𑀤𑀦𑀸 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼, 𑀯𑁂𑀤𑀦𑀸𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀯𑁂𑀤𑀦𑀸 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑁆𑀯𑁂𑀯. ‘‘𑀘𑀺𑀢𑁆𑀢𑀁 𑀦𑀺𑀘𑁆𑀘’’𑀦𑁆𑀢𑀺 𑀤𑀺𑀝𑁆𑀞𑀺𑀕𑀳𑀡𑀯𑀲𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀢𑀦𑁄 𑀲𑀻𑀮𑀯𑀢𑀯𑀲𑁂𑀦 𑀧𑀭𑀺𑀲𑀼𑀤𑁆𑀥𑀻𑀢𑀺 𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺 𑀘𑀺𑀢𑁆𑀢𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼, 𑀘𑀺𑀢𑁆𑀢𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁 𑀘𑀺𑀢𑁆𑀢𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑁆𑀯𑁂𑀯. 𑀥𑀫𑁆𑀫𑁂 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 𑀬𑀣𑀸𑀪𑀽𑀢𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀥𑀫𑁆𑀫𑁂𑀲𑀼 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀥𑀫𑁆𑀫𑀸 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼, 𑀥𑀫𑁆𑀫𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀥𑀫𑁆𑀫𑀸 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀦𑁆𑀢𑀺 𑀏𑀯. 𑀢𑀲𑁆𑀫𑀸 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄.

‘‘𑀬𑁂𑀦 𑀬𑁄𑀕𑀸𑀯𑀘𑀭𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸, 𑀲𑁄 𑀬𑁄𑀕𑀸𑀯𑀘𑀭𑁄 𑀉𑀧𑀸𑀤𑀸𑀦𑁂𑀳𑀺𑀬𑁂𑀯 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀬𑁄𑀕𑀸𑀤𑀻𑀳𑀺𑀧𑀺 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁄𑀕𑁂𑀳𑀺 𑀘 𑀯𑀺𑀲𑀁𑀬𑀼𑀢𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄𑀕𑁂𑀳𑀺 𑀘𑀸𑀢𑀺 𑀓𑀸𑀫𑀬𑁄𑀕𑀪𑀯𑀬𑁄𑀕𑀤𑀺𑀝𑁆𑀞𑀺𑀬𑁄𑀕𑀅𑀯𑀺𑀚𑁆𑀚𑀸𑀬𑁄𑀕𑁂𑀳𑀺 𑀘. 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀯𑀺𑀕𑀢𑁄, 𑀯𑀺𑀫𑀼𑀢𑁆𑀢𑁄 𑀘 𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀪𑀲𑀜𑁆𑀜𑀺𑀢𑁄 𑀳𑀺 𑀭𑀽𑀧𑀓𑀸𑀬𑁄 𑀓𑀸𑀫𑀭𑀸𑀕𑀲𑁆𑀲 𑀯𑀢𑁆𑀣𑀼 𑀳𑁄𑀢𑀺, 𑀓𑀸𑀬𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑁄 𑀓𑀸𑀬𑁄 𑀓𑀸𑀫𑀭𑀸𑀕𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑁆𑀯𑁂𑀯. ‘‘𑀲𑀼𑀔𑁄’’𑀢𑀺 𑀯𑀸 ‘‘𑀲𑀼𑀔𑀳𑁂𑀢𑀽’’𑀢𑀺 𑀯𑀸 𑀕𑀳𑀡𑀻𑀬𑁄 𑀪𑀯𑁄 𑀪𑀯𑀭𑀸𑀕𑀲𑁆𑀲 𑀯𑀢𑁆𑀣𑀼 𑀳𑁄𑀢𑀺, 𑀯𑁂𑀤𑀦𑀸𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑁄 𑀪𑀯𑁄 𑀪𑀯𑀭𑀸𑀕𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺. ‘‘𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺𑀬𑁄𑀕𑀲𑁆𑀲 𑀯𑀢𑁆𑀣𑀼 𑀳𑁄𑀢𑀺, 𑀘𑀺𑀢𑁆𑀢𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺𑀬𑁄𑀕𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺. 𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸, 𑀥𑀫𑁆𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀢𑀸𑀬 𑀘 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑁆𑀢𑀸 𑀅𑀯𑀺𑀦𑀺𑀩𑁆𑀪𑀼𑀚𑀺𑀢𑀩𑁆𑀩𑀸, 𑀥𑀫𑁆𑀫𑀫𑀢𑁆𑀢𑀢𑀸𑀬 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀬𑁄𑀕𑀲𑁆𑀲 𑀯𑀢𑁆𑀣𑀼 𑀳𑁄𑀦𑁆𑀢𑀺, 𑀥𑀫𑁆𑀫𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀬𑁄𑀕𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀦𑀼𑀧𑀲𑁆𑀲𑀓𑁄 ‘‘𑀬𑁄𑀕𑁂𑀳𑀺 𑀘 𑀯𑀺𑀲𑀁𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀅𑀬𑀁 𑀦𑀬𑁄 𑀆𑀲𑀯𑁂𑀳𑀺 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀑𑀖𑁂𑀳𑀺 𑀘 𑀦𑀺𑀢𑁆𑀣𑀺𑀡𑁆𑀡𑁄 𑀪𑀯𑀢𑀻𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄.

𑀕𑀦𑁆𑀣𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑁄 𑀪𑀯𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀼𑀪𑀲𑀜𑁆𑀜𑀺𑀢𑁄 𑀭𑀽𑀧𑀓𑀸𑀬𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀓𑀸𑀬𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑁄 𑀭𑀽𑀧𑀓𑀸𑀬𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺. 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀽𑀢𑀸 𑀯𑁂𑀤𑀦𑀸 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫). 𑀯𑁂𑀤𑀦𑀸𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀯𑁂𑀤𑀦𑀸 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺. ‘‘𑀘𑀺𑀢𑁆𑀢𑀁 𑀦𑀺𑀘𑁆𑀘’’𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀯𑀲𑁂𑀦 𑀲𑀲𑁆𑀲𑀢𑀲𑁆𑀲 ‘‘𑀅𑀢𑁆𑀢𑀦𑁄 𑀲𑀻𑀮𑁂𑀦 𑀲𑀼𑀤𑁆𑀥𑀺, 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺 𑀧𑀭𑀸𑀫𑀲𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀦𑀺𑀘𑁆𑀘’’𑀦𑁆𑀢𑀺 𑀕𑀳𑀺𑀢𑀁 𑀘𑀺𑀢𑁆𑀢𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀘𑀺𑀢𑁆𑀢𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁 𑀘𑀺𑀢𑁆𑀢𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺. 𑀥𑀫𑁆𑀫𑀸𑀦𑀁 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀲𑀪𑀸𑀯𑀲𑁆𑀲 𑀅𑀤𑀲𑁆𑀲𑀦𑀢𑁄 𑀪𑀯𑀤𑀺𑀝𑁆𑀞𑀺𑀯𑀺𑀪𑀯𑀤𑀺𑀝𑁆𑀞𑀺 𑀳𑁄𑀢𑀺, 𑀢𑀲𑁆𑀫𑀸 ‘‘𑀇𑀤𑀁 𑀲𑀘𑁆𑀘’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀸 𑀥𑀫𑁆𑀫𑀸 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀥𑀫𑁆𑀫𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀥𑀫𑁆𑀫𑀸 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀦𑀼𑀧𑀲𑁆𑀲𑀓𑁄 ‘‘𑀕𑀦𑁆𑀣𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄.

𑀲𑀼𑀪𑀲𑀜𑁆𑀜𑀺𑀢𑁄 𑀘 𑀓𑀸𑀬𑁄 𑀭𑀸𑀕𑀲𑀮𑁆𑀮𑀲𑁆𑀲 𑀯𑀢𑁆𑀣𑀼, 𑀓𑀸𑀬𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑁄 𑀓𑀸𑀬𑁄 𑀭𑀸𑀕𑀲𑀮𑁆𑀮𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺. 𑀲𑀼𑀔𑀲𑀜𑁆𑀜𑀺𑀢𑀸𑀬 𑀯𑁂𑀤𑀦𑀸𑀬 𑀤𑁄𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑁂𑀤𑀦𑀸 𑀤𑁄𑀲𑀲𑀮𑁆𑀮𑀲𑁆𑀲 𑀯𑀢𑁆𑀣𑀼, 𑀯𑁂𑀤𑀦𑀸𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀯𑁂𑀤𑀦𑀸 𑀤𑁄𑀲𑀲𑀮𑁆𑀮𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺. ‘‘𑀘𑀺𑀢𑁆𑀢𑀁 𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 ‘‘𑀅𑀢𑁆𑀢𑀸 𑀲𑁂𑀬𑁆𑀬𑁄’’𑀢𑀺𑀆𑀤𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀫𑀸𑀦𑀲𑀮𑁆𑀮𑀲𑁆𑀲 𑀘𑀺𑀢𑁆𑀢𑀁 𑀯𑀢𑁆𑀣𑀼, 𑀘𑀺𑀢𑁆𑀢𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁 𑀘𑀺𑀢𑁆𑀢𑀁 𑀫𑀸𑀦𑀲𑀮𑁆𑀮𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺. 𑀥𑀫𑁆𑀫𑀸𑀦𑀁 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀲𑀪𑀸𑀯𑀲𑁆𑀲 𑀅𑀚𑀸𑀦𑀦𑀢𑁄 𑀥𑀫𑁆𑀫𑀸 𑀫𑁄𑀳𑀲𑀮𑁆𑀮𑀲𑁆𑀲 𑀯𑀢𑁆𑀣𑀼, 𑀥𑀫𑁆𑀫𑀕𑀢𑀸𑀬 𑀧𑀦 𑀲𑀢𑀺𑀬𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀥𑀫𑁆𑀫𑀸 𑀫𑁄𑀳𑀲𑀮𑁆𑀮𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀦𑀼𑀧𑀲𑁆𑀲𑀓𑁄 ‘‘𑀲𑀮𑁆𑀮𑁂𑀳𑀺 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀻’’𑀢𑀺 𑀯𑀼𑀢𑁆𑀢𑁄.

‘‘𑀆𑀳𑀸𑀭𑀸 𑀘𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, ‘‘𑀓𑀺𑀁 𑀧𑀦 𑀆𑀳𑀸𑀭𑀸𑀯 𑀅𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀘 𑀅𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀘𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀬𑁄𑀕𑀸𑀯𑀘𑀭𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸, 𑀢𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀯 𑀧𑀭𑀺𑀜𑁆𑀜𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀦 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 𑀘𑁂 𑀯𑀤𑁂𑀬𑁆𑀬 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀘 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀧𑀭𑀺𑀜𑁆𑀜𑀸𑀢𑁂𑀲𑀼 𑀲𑀜𑁆𑀜𑀸𑀬𑀧𑀺 𑀧𑀭𑀺𑀜𑁆𑀜𑀸𑀢𑀩𑁆𑀩𑀪𑀸𑀯𑀢𑁄. 𑀲𑀸 𑀳𑀺 𑀯𑁂𑀤𑀦𑀸𑀘𑀺𑀢𑁆𑀢𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀲𑀼 𑀧𑀭𑀺𑀜𑁆𑀜𑀸𑀢𑁂𑀲𑀼 𑀅𑀯𑀺𑀦𑀸𑀪𑀸𑀯𑀢𑁄 𑀧𑀭𑀺𑀜𑁆𑀜𑀸𑀢𑀸𑀯𑀸𑀢𑀺.

𑀬𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸, 𑀲𑁄 𑀬𑁄𑀕𑀸𑀯𑀘𑀭𑁄 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀸𑀦𑁄 𑀘, 𑀬𑁄𑀕𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑁄 𑀘, 𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄 𑀘, 𑀆𑀲𑀯𑁂𑀳𑀺 𑀅𑀦𑀸𑀲𑀯𑁄 𑀘, 𑀑𑀖𑁂𑀳𑀺 𑀦𑀺𑀢𑁆𑀣𑀺𑀡𑁆𑀡𑁄 𑀘, 𑀲𑀮𑁆𑀮𑁂𑀳𑀺 𑀯𑀺𑀲𑀮𑁆𑀮𑁄 𑀘 𑀪𑀯𑀢𑀻𑀢𑀺 𑀯𑀼𑀢𑁆𑀢𑁄, ‘‘𑀓𑀺𑀁 𑀧𑀦 𑀢𑀣𑀸𑀯𑀺𑀥𑁄𑀯 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀣𑀸𑀧𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀅𑀕𑀢𑀺𑀫𑁆𑀧𑀺 𑀦 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀕𑀢𑀺𑀕𑀫𑀦𑁂𑀳𑀺 𑀘 𑀦 𑀅𑀕𑀢𑀺𑀁 𑀕𑀘𑁆𑀙𑀢𑀻’’𑀢𑀺 𑀆𑀳. 𑀲𑀼𑀪𑀸𑀤𑀺𑀲𑀜𑁆𑀜𑀺𑀢𑁂 𑀭𑀽𑀧𑀓𑀸𑀬𑁂 𑀅𑀧𑁂𑀓𑁆𑀔𑀫𑀸𑀦𑁄 𑀧𑀼𑀕𑁆𑀕𑀮𑁄 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀻𑀢𑀺 𑀲𑀼𑀪𑀸𑀤𑀺𑀲𑀜𑁆𑀜𑀺𑀢𑁄 𑀭𑀽𑀧𑀓𑀸𑀬𑁄 𑀯𑀺𑀲𑁂𑀲𑀢𑁄 𑀙𑀦𑁆𑀤𑀸𑀕𑀢𑀺𑀬𑀸 𑀯𑀢𑁆𑀣𑀼 𑀳𑁄𑀢𑀺, 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀦 𑀧𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀓𑁄 𑀓𑀸𑀬𑁄 𑀙𑀦𑁆𑀤𑀸𑀕𑀢𑀺𑀬𑀸 𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄 𑀧𑀼𑀕𑁆𑀕𑀮𑁄 𑀙𑀦𑁆𑀤𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺. 𑀲𑀼𑀔𑀯𑁂𑀤𑀦𑀲𑁆𑀲𑀸𑀤𑀯𑀲𑁂𑀦 𑀯𑁂𑀤𑀬𑀫𑀸𑀦𑁄 𑀢𑀤𑀪𑀸𑀯𑁂𑀦 𑀩𑁆𑀬𑀸𑀧𑀸𑀤𑀁 𑀆𑀕𑀘𑁆𑀙𑀢𑀻𑀢𑀺 𑀲𑀼𑀔𑀯𑁂𑀤𑀦𑀸 𑀤𑁄𑀲𑀸𑀕𑀢𑀺𑀬𑀸 𑀯𑀢𑁆𑀣𑀼 𑀳𑁄𑀢𑀺, 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀦 𑀧𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀯𑁂𑀤𑀦𑀸 𑀤𑁄𑀲𑀸𑀕𑀢𑀺𑀬𑀸 𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑁂𑀤𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄 𑀧𑀼𑀕𑁆𑀕𑀮𑁄 𑀤𑁄𑀲𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺. 𑀲𑀦𑁆𑀢𑀢𑀺𑀖𑀦𑀯𑀲𑁂𑀦 ‘‘𑀦𑀺𑀘𑁆𑀘𑀁, 𑀥𑀼𑀯’’𑀦𑁆𑀢𑀺 𑀕𑀳𑀺𑀢𑀁 𑀘𑀺𑀢𑁆𑀢𑀁 𑀫𑁄𑀳𑀲𑁆𑀲 𑀯𑀢𑁆𑀣𑀼 𑀳𑁄𑀢𑀺, 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀦 𑀧𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁 𑀘𑀺𑀢𑁆𑀢𑀁 𑀫𑁄𑀳𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄 𑀧𑀼𑀕𑁆𑀕𑀮𑁄 𑀤𑁄𑀲𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺. 𑀯𑀺𑀪𑀚𑀺𑀢𑁆𑀯𑀸 𑀥𑀫𑁆𑀫𑀲𑀪𑀸𑀯𑀁 𑀅𑀚𑀸𑀦𑀦𑁆𑀢𑀲𑁆𑀲 𑀪𑀬𑀁 𑀚𑀸𑀬𑀢𑀻𑀢𑀺 𑀯𑀺𑀪𑀚𑀺𑀢𑁆𑀯𑀸 𑀅𑀚𑀸𑀦𑀺𑀬𑀲𑀪𑀸𑀯𑀸 𑀥𑀫𑁆𑀫𑀸 𑀪𑀬𑀲𑁆𑀲 𑀯𑀢𑁆𑀣𑀼 𑀳𑁄𑀦𑁆𑀢𑀺, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀦 𑀧𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀯𑀺𑀪𑀚𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀸 𑀥𑀫𑁆𑀫𑀸 𑀭𑀸𑀕𑀲𑁆𑀲 𑀯𑀢𑁆𑀣𑀼 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄 𑀧𑀼𑀕𑁆𑀕𑀮𑁄 𑀪𑀬𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺. 𑀏𑀯𑀁 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑁂 𑀅𑀓𑀼𑀲𑀮𑁂𑀧𑀺 𑀥𑀫𑁆𑀫𑁂 𑀦𑀻𑀳𑀭𑀺𑀢𑁆𑀯𑀸 𑀇𑀤𑀸𑀦𑀺 𑀦𑀺𑀕𑀫𑁂𑀢𑀼𑀁 ‘‘𑀏𑀯𑀁 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀢𑁆𑀢𑀸 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀼𑀦 𑀯𑀼𑀢𑁆𑀢𑀁.

𑀪𑀸𑀯𑁂𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀏𑀓𑀤𑁂𑀲𑁂𑀲𑀼 𑀯𑀼𑀢𑁆𑀢𑁂 𑀢𑀤𑀯𑀲𑁂𑀲𑀸𑀧𑀺 𑀪𑀸𑀯𑁂𑀢𑀩𑁆𑀩𑀸 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀢𑁆𑀢𑀸 𑀦𑀻𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸, 𑀧𑀳𑀸𑀢𑀩𑁆𑀩𑁂𑀲𑀼𑀧𑀺 𑀥𑀫𑁆𑀫𑁂𑀲𑀼 𑀏𑀓𑀤𑁂𑀲𑁂 𑀯𑀼𑀢𑁆𑀢𑁂 𑀢𑀤𑀯𑀲𑁂𑀲𑀸𑀧𑀺 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸 𑀏𑀓𑀮𑀓𑁆𑀔𑀡𑀢𑁆𑀢𑀸 𑀦𑀻𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀅𑀜𑁆𑀜𑀣𑀸𑀧𑀺 𑀬𑀤𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀢𑁂𑀧𑀺 𑀯𑀤𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀮𑀓𑁆𑀔𑀡𑀳𑀸𑀭𑀲𑁆𑀲 𑀉𑀤𑀸𑀳𑀭𑀡𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁆𑀣 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀢𑁆𑀣 𑀬𑀲𑁆𑀲𑀁 𑀭𑀽𑀧𑁂𑀓𑀤𑁂𑀲𑀤𑁂𑀲𑀦𑀸𑀬𑀁 𑀭𑀽𑀧𑀺𑀦𑁆𑀤𑁆𑀭𑀺𑀬𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀅𑀝𑁆𑀞𑀯𑀺𑀥𑀁 𑀇𑀦𑁆𑀤𑁆𑀭𑀺𑀬𑀁 𑀭𑀽𑀧𑁂𑀓𑀤𑁂𑀲𑀁 𑀪𑀕𑀯𑀢𑀸 𑀤𑁂𑀲𑀺𑀢𑀁. 𑀢𑀢𑁆𑀣𑁂𑀯 𑀢𑀲𑁆𑀲𑀁 𑀭𑀽𑀧𑁂𑀓𑀤𑁂𑀲𑀤𑁂𑀲𑀦𑀸𑀬𑀁 𑀭𑀽𑀧𑀥𑀸𑀢𑀼 𑀭𑀼𑀧𑁆𑀧𑀦𑀮𑀓𑁆𑀔𑀡𑀸 𑀘𑀓𑁆𑀔𑀼𑀥𑀸𑀢𑀸𑀤𑀺𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀧𑀭𑀺𑀬𑁄𑀲𑀸𑀦𑀸 𑀤𑀲𑀯𑀺𑀥𑀸 𑀭𑀽𑀧𑀥𑀸𑀢𑀼 𑀭𑀼𑀧𑁆𑀧𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸 𑀤𑁂𑀲𑀺𑀢𑀸. 𑀲𑀩𑁆𑀩𑁄 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀤𑁂𑀲𑀺𑀢𑁄. 𑀭𑀽𑀧𑀸𑀬𑀢𑀦𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀘𑀓𑁆𑀔𑀸𑀬𑀢𑀦𑀸𑀤𑀺𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀧𑀭𑀺𑀬𑁄𑀲𑀸𑀦𑀁 𑀤𑀲𑀯𑀺𑀥𑀁 𑀆𑀬𑀢𑀦𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸 𑀪𑀕𑀯𑀢𑀸 𑀤𑁂𑀲𑀺𑀢𑀁.

𑀬𑀢𑁆𑀣 𑀯𑀸 𑀧𑀦 𑀬𑀲𑁆𑀲𑀁 𑀯𑁂𑀤𑀦𑁂𑀓𑀤𑁂𑀲𑀤𑁂𑀲𑀦𑀸𑀬𑀁 𑀲𑀼𑀔𑀸 𑀯𑁂𑀤𑀦𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀢𑀢𑁆𑀣 𑀢𑀲𑁆𑀲𑀁 𑀯𑁂𑀤𑀦𑁂𑀓𑀤𑁂𑀲𑀤𑁂𑀲𑀦𑀸𑀬𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀤𑁂𑀲𑀺𑀢𑀁, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀤𑁂𑀲𑀺𑀢𑀁, 𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘𑀜𑁆𑀘 𑀤𑁂𑀲𑀺𑀢𑀁 𑀲𑀼𑀔𑀯𑁂𑀤𑀦𑀸𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀬𑀢𑁆𑀣 𑀯𑀸 𑀧𑀦 𑀬𑀲𑁆𑀲𑀁 𑀯𑁂𑀤𑀦𑁂𑀓𑀤𑁂𑀲𑀤𑁂𑀲𑀦𑀸𑀬𑀁 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀢𑀢𑁆𑀣 𑀢𑀲𑁆𑀲𑀁 𑀯𑁂𑀤𑀦𑁂𑀓𑀤𑁂𑀲𑀤𑁂𑀲𑀦𑀸𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀤𑁂𑀲𑀺𑀢𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀤𑁂𑀲𑀺𑀢𑀁, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀜𑁆𑀘 𑀤𑁂𑀲𑀺𑀢𑀁 𑀤𑀼𑀓𑁆𑀔𑀯𑁂𑀤𑀦𑀸𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀬𑀢𑁆𑀣 𑀯𑀸 𑀧𑀦 𑀬𑀲𑁆𑀲𑀁 𑀯𑁂𑀤𑀦𑁂𑀓𑀤𑁂𑀲𑀤𑁂𑀲𑀦𑀸𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀢𑀢𑁆𑀣 𑀢𑀲𑁆𑀲𑀁 𑀯𑁂𑀤𑀦𑁂𑀓𑀤𑁂𑀲𑀤𑁂𑀲𑀦𑀸𑀬𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀤𑁂𑀲𑀺𑀢𑀁, 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘 𑀤𑁂𑀲𑀺𑀢𑁄𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀬𑀲𑁆𑀲𑀁 𑀤𑁂𑀲𑀦𑀸𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀤𑁂𑀲𑀺𑀢𑀸, 𑀢𑀲𑁆𑀲𑀁 𑀤𑁂𑀲𑀦𑀸𑀬𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁂𑀲𑀺𑀢𑀁 𑀳𑁄𑀢𑀼 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸, ‘‘𑀓𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄 𑀪𑀯𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀳𑀺 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸 𑀅𑀦𑀼𑀲𑁂𑀢𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀤𑁂𑀲𑀺𑀢𑀸 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀘 𑀤𑁂𑀲𑀺𑀢𑀸𑀬 𑀅𑀯𑀺𑀚𑁆𑀚𑀸𑀫𑀽𑀮𑀓𑁄 𑀲𑀩𑁆𑀩𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸…𑀧𑁂… 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀤𑁂𑀲𑀺𑀢𑁄𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄.

‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀅𑀦𑀼𑀮𑁄𑀫𑀯𑀲𑁂𑀦 𑀧𑀯𑀢𑁆𑀢𑁄 𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, ‘‘𑀬𑀤𑀺 𑀢𑀣𑀸 𑀧𑀯𑀢𑁆𑀢𑁄 𑀲𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄, 𑀏𑀯𑀁 𑀲𑀢𑀺 𑀲𑀩𑁆𑀩𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀲𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀘 𑀅𑀦𑀼𑀮𑁄𑀫𑀯𑀲𑁂𑀦 𑀧𑀯𑀢𑁆𑀢𑁄, 𑀲𑁄 𑀘 𑀲𑀭𑀸𑀕𑀲𑀤𑁄𑀲𑀲𑀫𑁄𑀳𑀲𑀁𑀓𑀺𑀮𑁂𑀲𑀧𑀓𑁆𑀔𑁂𑀦 𑀳𑀸𑀢𑀩𑁆𑀩𑁄. 𑀬𑁄 𑀘 𑀧𑀝𑀺𑀮𑁄𑀫𑀯𑀲𑁂𑀦 ‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺𑀆𑀤𑀺𑀓𑁄 𑀧𑀯𑀢𑁆𑀢𑁄, 𑀲𑁄 𑀘 𑀯𑀻𑀢𑀭𑀸𑀕𑀯𑀻𑀢𑀤𑁄𑀲𑀯𑀻𑀢𑀫𑁄𑀳𑀅𑀭𑀺𑀬𑀥𑀫𑁆𑀫𑁂𑀳𑀺 𑀳𑀸𑀢𑀩𑁆𑀩𑁄. 𑀬𑁄 𑀘 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀧𑀯𑀢𑁆𑀢𑁄, 𑀲𑁄 𑀘 𑀢𑀤𑀼𑀪𑀬𑁂𑀳𑀺 𑀳𑀸𑀢𑀩𑁆𑀩𑁄. 𑀢𑀲𑁆𑀫𑀸 ‘‘𑀲𑀩𑁆𑀩𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁄𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄.

‘‘𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁨𑁩) 𑀆𑀘𑀭𑀺𑀬𑁂𑀦 𑀬𑀸 𑀮𑀓𑁆𑀔𑀡𑀳𑀸𑀭𑀬𑁄𑀚𑀦𑀸 𑀯𑀼𑀢𑁆𑀢𑀸, 𑀲𑀸𑀯 𑀓𑀸𑀢𑀩𑁆𑀩𑀸, 𑀦 𑀅𑀜𑁆𑀜𑀣𑀸 𑀓𑀸𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 𑀅𑀜𑁆𑀜𑀣𑀸𑀧𑀺 𑀮𑀓𑁆𑀔𑀡𑀳𑀸𑀭𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁂 𑀧𑀣𑀯𑀻𑀆𑀤𑀬𑁄 𑀭𑀽𑀧𑀥𑀫𑁆𑀫𑀸, 𑀬𑁂 𑀨𑀲𑁆𑀲𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸 𑀲𑀦𑁆𑀥𑀸𑀭𑀡𑀸𑀤𑀺𑀓𑀺𑀘𑁆𑀘𑀢𑁄 𑀲𑀗𑁆𑀖𑀝𑁆𑀝𑀦𑀸𑀤𑀺𑀓𑀺𑀘𑁆𑀘𑀢𑁄 𑀏𑀓𑀮𑀓𑁆𑀔𑀡𑀸, 𑀢𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀬𑁂 𑀧𑀣𑀯𑀻𑀆𑀤𑀬𑁄 𑀭𑀽𑀧𑀥𑀫𑁆𑀫𑀸, 𑀬𑁂 𑀨𑀲𑁆𑀲𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸 𑀓𑀓𑁆𑀔𑀴𑀸𑀤𑀺𑀮𑀓𑁆𑀔𑀡𑀢𑁄 𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀢𑁄 𑀏𑀓𑀮𑀓𑁆𑀔𑀡𑀸, 𑀢𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀬𑁂 𑀥𑀫𑁆𑀫𑀸 𑀭𑀼𑀧𑁆𑀧𑀦𑀲𑀸𑀫𑀜𑁆𑀜𑀢𑁄 𑀦𑀫𑀦𑀲𑀸𑀫𑀜𑁆𑀜𑀢𑁄 𑀅𑀦𑀺𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀢𑁄 𑀯𑀸 𑀔𑀦𑁆𑀥𑀸𑀬𑀢𑀦𑀸𑀤𑀺𑀲𑀸𑀫𑀜𑁆𑀜𑀢𑁄 𑀯𑀸 𑀏𑀓𑀮𑀓𑁆𑀔𑀡𑀸, 𑀢𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀏𑀓𑀲𑁆𑀫𑀺𑀁 𑀲𑀗𑁆𑀔𑀢𑀥𑀫𑁆𑀫𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀬𑁂 𑀲𑀗𑁆𑀔𑀢𑀥𑀫𑁆𑀫𑀸 𑀪𑀗𑁆𑀕𑀼𑀧𑁆𑀧𑀸𑀤𑀢𑁄 𑀲𑀗𑁆𑀔𑀢𑁄 𑀘𑀼𑀢𑀽𑀧𑀧𑀸𑀢𑀢𑁄 𑀲𑀫𑀸𑀦𑀦𑀺𑀭𑁄𑀥𑀼𑀧𑁆𑀧𑀸𑀤𑀲𑀗𑁆𑀔𑀢𑀢𑁄 𑀯𑀸 𑀘𑀼𑀢𑀽𑀧𑀧𑀸𑀢𑀢𑁄 𑀏𑀓𑀮𑀓𑁆𑀔𑀡𑀸, 𑀢𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀏𑀓𑀲𑁆𑀫𑀺𑀁 𑀲𑀗𑁆𑀔𑀢𑀥𑀫𑁆𑀫𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸 𑀲𑀗𑁆𑀔𑀢𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀓𑀺𑀘𑁆𑀘𑀢𑁄 𑀘 𑀮𑀓𑁆𑀔𑀡𑀢𑁄 𑀘𑀸𑀢𑀺𑀆𑀤𑀻𑀲𑀼 𑀘-𑀲𑀤𑁆𑀤𑁂𑀦 𑀲𑀳𑀘𑀭𑀡𑀲𑀫𑀸𑀦𑀳𑁂𑀢𑀼𑀢𑀸𑀤𑀬𑁄 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀳𑀘𑀭𑀡𑀸𑀤𑀻𑀲𑀼 𑀘 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 ‘‘𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄 (𑀤𑀻. 𑀦𑀺. 𑁩.𑁩𑁪𑁧, 𑁩𑁫𑁭, 𑁩𑁫𑁯; 𑀅. 𑀦𑀺. 𑁯.𑁨𑁪), 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸’’𑀢𑀺𑀆𑀤𑀻𑀲𑀼 𑀲𑀳𑀘𑀸𑀭𑀺𑀢𑀸𑀬 𑀲𑀜𑁆𑀜𑀸𑀲𑀳𑀕𑀢𑀸 𑀥𑀫𑁆𑀫𑀸 𑀦𑀺𑀤𑁆𑀥𑀸𑀭𑀺𑀢𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯.

‘‘𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀲𑀭𑀽𑀧𑀢𑁄 𑀯𑀼𑀢𑁆𑀢𑁂 𑀏𑀓𑀮𑀓𑁆𑀔𑀡𑀸𑀤𑀺𑀢𑁄 𑀅𑀯𑀲𑀺𑀝𑁆𑀞𑀥𑀫𑁆𑀫𑀸𑀦𑀫𑁆𑀧𑀺 𑀯𑀼𑀢𑁆𑀢𑀪𑀸𑀯𑁄 𑀓𑁂𑀦 𑀅𑀫𑁆𑀳𑁂𑀳𑀺 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦 𑀅𑀯𑀲𑀺𑀝𑁆𑀞𑀥𑀫𑁆𑀫𑀸𑀦𑀫𑁆𑀧𑀺 𑀯𑀼𑀢𑁆𑀢𑀪𑀸𑀯𑁂𑀦 ‘‘𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂’’𑀢𑀺𑀆𑀤𑀺𑀓𑀁 𑀬𑀁 𑀯𑀘𑀦𑀁 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀆𑀳, 𑀢𑁂𑀦 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀅𑀯𑀲𑀺𑀝𑁆𑀞𑀸𑀦𑀫𑁆𑀧𑀺 𑀯𑀼𑀢𑁆𑀢𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀏𑀢𑁆𑀢𑀸𑀯𑀢𑀸 𑀘 𑀮𑀓𑁆𑀔𑀡𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄, 𑀅𑀜𑁆𑀜𑁄 𑀦𑀺𑀬𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀮𑀓𑁆𑀔𑀡𑁄 𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀲𑀁 𑀧𑀸𑀴𑀺𑀬𑀁 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀥𑀫𑁆𑀫𑀸𑀧𑀺 𑀬𑁂𑀦 𑀮𑀓𑁆𑀔𑀡𑀳𑀸𑀭𑁂𑀦 𑀦𑀺𑀤𑁆𑀥𑀸𑀭𑀺𑀢𑀸, 𑀢𑀲𑁆𑀲𑀁 𑀧𑀸𑀴𑀺𑀬𑀁 𑀲𑁄 𑀮𑀓𑁆𑀔𑀡𑁄 𑀳𑀸𑀭𑁄 𑀦𑀺𑀬𑀼𑀢𑁆𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑀺𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺.

𑀇𑀢𑀺 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.