𑁪. 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁨𑁨. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀪𑀽𑀢𑁂𑀦 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀸𑀤𑀻𑀦𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀪𑀸𑀯𑁄 𑀯𑀺𑀪𑀢𑁆𑀢𑁄, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀳𑀸𑀭𑁂𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄𑀢𑀺 𑀧𑀼𑀘𑁆𑀙𑀢𑀺. ‘‘𑀥𑀫𑁆𑀫𑀁 𑀤𑁂𑀲𑁂𑀲𑀺 𑀚𑀺𑀦𑁄’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀅𑀬𑀁 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄𑀢𑀺𑀆𑀤𑀺 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁨). ‘‘𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀯𑀺𑀢𑁆𑀣𑀸𑀭𑀪𑀽𑀢𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄 𑀧𑀺𑀝𑀓𑀢𑁆𑀢𑀬𑁂 𑀤𑁂𑀲𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀺𑀁 𑀦𑀸𑀫 𑀥𑀫𑁆𑀫𑀁 𑀤𑁂𑀲𑀬𑀢𑀺 𑀲𑀁𑀯𑀡𑁆𑀡𑁂𑀢𑀻’’𑀢𑀺 𑀧𑀼𑀘𑁆𑀙𑀁 𑀞𑀧𑁂𑀢𑁆𑀯𑀸 ‘‘𑀇𑀤𑀁 𑀆𑀲𑀦𑁆𑀦𑀓𑀸𑀭𑀡𑀁 𑀇𑀫𑀲𑁆𑀲 𑀆𑀲𑀦𑁆𑀦𑀨𑀮𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀺𑀪𑀚𑀺𑀢𑀼𑀁 ‘‘𑀅𑀬𑀁 𑀧𑀤𑀝𑁆𑀞𑀸𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀲𑀩𑁆𑀩𑁂𑀲𑀼 𑀯𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀬𑀸𑀣𑀸𑀯𑀢𑁄 𑀅𑀲𑀫𑁆𑀧𑀝𑀺𑀯𑁂𑀥𑁄 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸 𑀅𑀯𑀺𑀚𑁆𑀚𑀸𑀬𑀸𑀢𑀺 𑀲𑀩𑁆𑀩𑀥𑀫𑁆𑀫𑀬𑀸𑀣𑀸𑀯𑀅𑀲𑀫𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑀸, 𑀅𑀯𑀺𑀚𑁆𑀚𑀸, 𑀢𑀲𑁆𑀲𑀸 𑀅𑀯𑀺𑀚𑁆𑀚𑀸𑀬 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺𑀆𑀤𑀺𑀯𑀺𑀧𑀮𑁆𑀮𑀸𑀲𑀸 𑀧𑀤𑀝𑁆𑀞𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀁. 𑀯𑀺𑀧𑀮𑁆𑀮𑀸𑀲𑁂 𑀲𑀢𑀺 𑀅𑀯𑀺𑀚𑁆𑀚𑀸 𑀯𑀢𑁆𑀢𑀢𑀺 𑀉𑀧𑀭𑀽𑀧𑀭𑀺 𑀚𑀸𑀬𑀢𑀺 𑀦 𑀳𑀸𑀬𑀢𑀺, 𑀢𑀲𑁆𑀫𑀸 𑀯𑀺𑀧𑀮𑁆𑀮𑀸𑀲𑀸 𑀅𑀯𑀺𑀚𑁆𑀚𑀸𑀬 𑀧𑀤𑀝𑁆𑀞𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀁 𑀪𑀯𑀦𑁆𑀢𑀺. 𑀅𑀯𑀺𑀚𑁆𑀚𑀸𑀬 𑀯𑀝𑁆𑀝𑀫𑀽𑀮𑀓𑀢𑁆𑀢𑀸 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀤𑀝𑁆𑀞𑀸𑀦𑀁 𑀯𑀺𑀪𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀡𑁆𑀳𑀸𑀬𑀧𑀺 𑀯𑀝𑁆𑀝𑀫𑀽𑀮𑀓𑀢𑁆𑀢𑀸 𑀢𑀤𑀦𑀦𑁆𑀢𑀭𑀁 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁 𑀯𑀺𑀪𑀚𑀺𑀢𑀼𑀁 ‘‘𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑀧𑀺𑀬𑀲𑀪𑀸𑀯𑀁 𑀲𑀸𑀢𑀲𑀪𑀸𑀯𑀁 𑀘𑀓𑁆𑀔𑀸𑀤𑀺𑀥𑀫𑁆𑀫𑀚𑀸𑀢𑀁. 𑀧𑀺𑀬𑀦𑀻𑀬𑀲𑀸𑀢𑀦𑀻𑀬𑁂 𑀘𑀓𑁆𑀔𑀸𑀤𑀺𑀓𑁂 𑀲𑀢𑀺 𑀢𑀡𑁆𑀳𑀸 𑀯𑀢𑁆𑀢𑀢𑀺 𑀉𑀧𑀭𑀽𑀧𑀭𑀺 𑀚𑀸𑀬𑀢𑀺, 𑀢𑀲𑁆𑀫𑀸 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀁 𑀪𑀯𑀢𑀺.

𑀅𑀤𑀺𑀦𑁆𑀦𑀸𑀤𑀸𑀦𑁂 𑀲𑀢𑀺 𑀮𑁄𑀪𑁄 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀤𑀺𑀦𑁆𑀦𑀸𑀤𑀸𑀦𑀁 𑀮𑁄𑀪𑀲𑁆𑀲 𑀧𑀤𑀝𑁆𑀞𑀸𑀦𑀁 𑀪𑀯𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀜𑁆𑀳𑀺 𑀏𑀓𑀯𑀸𑀭𑀁 𑀉𑀧𑁆𑀧𑀦𑁆𑀦𑀫𑁆𑀧𑀺 𑀅𑀦𑀸𑀤𑀻𑀦𑀯𑀤𑀲𑁆𑀲𑀦𑀢𑁄 𑀮𑁄𑀪𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀁 𑀪𑀯𑀢𑁆𑀯𑁂𑀯.

𑀓𑁂𑀲𑀸𑀤𑀻𑀲𑀼 𑀅𑀲𑀼𑀪𑁂𑀲𑀼 𑀧𑀯𑀢𑁆𑀢𑀸𑀬𑀧𑀺 𑀲𑀼𑀪𑀲𑀜𑁆𑀜𑀸𑀬 𑀦𑀻𑀮𑀸𑀤𑀺𑀯𑀡𑁆𑀡𑀤𑀻𑀖𑀸𑀤𑀺𑀲𑀡𑁆𑀞𑀸𑀦𑀳𑀲𑀦𑀸𑀤𑀺𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀮𑀓𑁆𑀔𑀡𑀢𑁆𑀢𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀅𑀲𑀁𑀯𑀭𑁄 𑀲𑀼𑀪𑀲𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁 𑀪𑀯𑀢𑀺.

𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀻𑀲𑀼 𑀧𑀯𑀢𑁆𑀢𑀸𑀬𑀧𑀺 𑀲𑀼𑀔𑀲𑀜𑁆𑀜𑀸𑀬 𑀲𑀸𑀲𑀯𑀨𑀲𑁆𑀲𑀽𑀧𑀕𑀫𑀦𑀮𑀓𑁆𑀔𑀡𑀢𑁆𑀢𑀸 𑀭𑀽𑀧𑀸𑀤𑀻𑀲𑀼 𑀅𑀲𑁆𑀲𑀸𑀤𑁄 𑀲𑀼𑀔𑀲𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁.

𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀦𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑀸𑀬𑀧𑀺 𑀦𑀺𑀘𑁆𑀘𑀲𑀜𑁆𑀜𑀸𑀬 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑀦𑀼𑀧𑀲𑁆𑀲𑀦𑀮𑀓𑁆𑀔𑀡𑀢𑁆𑀢𑀸 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀦𑀺𑀘𑁆𑀘𑀕𑁆𑀕𑀳𑀡𑀁 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀲𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁.

𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀲𑀗𑁆𑀔𑀸𑀢𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬𑀧𑀺 𑀅𑀢𑁆𑀢𑀲𑀜𑁆𑀜𑀸𑀬 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀼𑀓𑁆𑀔𑀲𑀜𑁆𑀜𑀸𑀦𑀁 𑀅𑀲𑀫𑀦𑀼𑀧𑀲𑁆𑀲𑀦𑀮𑀓𑁆𑀔𑀡𑀢𑁆𑀢𑀸 𑀅𑀳𑀁𑀫𑀫𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀦𑀸𑀫𑀓𑀸𑀬𑁄 𑀅𑀢𑁆𑀢𑀲𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁.

𑀏𑀯𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀓𑀼𑀲𑀮𑀧𑀓𑁆𑀔𑀸𑀦𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀯𑀺𑀚𑁆𑀚𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀥𑀫𑁆𑀫𑀲𑀫𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀼 𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀸𑀬 𑀯𑀺𑀚𑁆𑀚𑀸𑀬 𑀲𑀩𑁆𑀩𑀥𑀫𑁆𑀫𑀲𑀫𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑀢𑁆𑀢𑀸 𑀲𑀩𑁆𑀩𑀁 𑀦𑁂𑀬𑁆𑀬𑀁 𑀯𑀺𑀚𑁆𑀚𑀸𑀬 𑀧𑀤𑀝𑁆𑀞𑀸𑀦𑀁.

𑀲𑀫𑀣𑀲𑁆𑀲 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀉𑀤𑁆𑀥𑀘𑁆𑀘𑀧𑀝𑀺𑀲𑀁𑀳𑀭𑀡𑀲𑀗𑁆𑀔𑀸𑀢𑀯𑀺𑀓𑁆𑀔𑀫𑁆𑀪𑀦𑀮𑀓𑁆𑀔𑀡𑀢𑁆𑀢𑀸 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀪𑀽𑀢𑀸 𑀅𑀲𑀼𑀪𑀸 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀲𑀼𑀪𑀸𑀬 𑀳𑀺 𑀢𑀡𑁆𑀳𑀸𑀧𑀝𑀺𑀧𑀓𑁆𑀔𑀢𑁆𑀢𑀸, 𑀢𑀡𑁆𑀳𑀸𑀬 𑀘 𑀅𑀪𑀸𑀯𑁂 𑀲𑀫𑀣𑁄 𑀢𑀺𑀝𑁆𑀞𑀢𑀻𑀢𑀺.

𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀅𑀮𑁄𑀪𑀲𑁆𑀲 𑀇𑀘𑁆𑀙𑀸𑀯𑀘𑀭𑀧𑀝𑀺𑀲𑀁𑀳𑀭𑀡𑀮𑀓𑁆𑀔𑀡𑀢𑁆𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀅𑀮𑁄𑀪𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀅𑀤𑁄𑀲𑀲𑁆𑀲 𑀅𑀩𑁆𑀬𑀸𑀧𑀚𑁆𑀚𑀮𑀓𑁆𑀔𑀡𑀢𑁆𑀢𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀅𑀤𑁄𑀲𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀅𑀫𑁄𑀳𑀲𑁆𑀲 𑀯𑀢𑁆𑀣𑀼𑀅𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀮𑀓𑁆𑀔𑀡𑀢𑁆𑀢𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀅𑀫𑁄𑀳𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀦𑀺𑀩𑁆𑀩𑀺𑀤𑀸𑀯𑀲𑁂𑀦 𑀧𑀯𑀢𑁆𑀢𑀸𑀬 𑀅𑀲𑀼𑀪𑀲𑀜𑁆𑀜𑀸𑀬 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀕𑀳𑀡𑀮𑀓𑁆𑀔𑀡𑀢𑁆𑀢𑀸 𑀦𑀺𑀩𑁆𑀩𑀺𑀤𑀸 𑀅𑀲𑀼𑀪𑀲𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁. 𑀦𑀺𑀩𑁆𑀩𑀺𑀤𑀸𑀜𑀸𑀡𑁂𑀦 𑀳𑀺 𑀅𑀦𑀪𑀺𑀭𑀢𑀺 𑀧𑀯𑀢𑁆𑀢𑀢𑀺, 𑀅𑀦𑀪𑀺𑀭𑀢𑀺𑀬𑀸 𑀘 𑀅𑀲𑀼𑀪𑀲𑀜𑁆𑀜𑀸 𑀞𑀺𑀢𑀸𑀢𑀺.

𑀤𑀼𑀓𑁆𑀔𑀯𑁂𑀤𑀦𑀸𑀯𑀲𑁂𑀦 𑀧𑀯𑀢𑁆𑀢𑀸𑀬 𑀤𑀼𑀓𑁆𑀔𑀲𑀜𑁆𑀜𑀸𑀬 𑀲𑀸𑀲𑀯𑀨𑀲𑁆𑀲𑀧𑀭𑀺𑀚𑀸𑀦𑀦𑀮𑀓𑁆𑀔𑀡𑀢𑁆𑀢𑀸 𑀯𑁂𑀤𑀦𑀸 𑀤𑀼𑀓𑁆𑀔𑀲𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁.

𑀉𑀧𑁆𑀧𑀸𑀤𑀯𑀬𑀯𑀲𑁂𑀦 𑀧𑀯𑀢𑁆𑀢𑀸𑀬 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀮𑀓𑁆𑀔𑀡𑀢𑁆𑀢𑀸 𑀉𑀧𑁆𑀧𑀸𑀤𑀯𑀬𑀸 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁. 𑀉𑀧𑁆𑀧𑀸𑀤𑀯𑀬𑀜𑁆𑀳𑀺 𑀲𑀫𑀦𑀼𑀧𑀲𑁆𑀲𑀺𑀢𑁆𑀯𑀸 𑀅𑀦𑀺𑀘𑁆𑀘𑀲𑀜𑁆𑀜𑀸 𑀧𑀯𑀢𑁆𑀢𑀸.

𑀥𑀫𑁆𑀫𑀫𑀢𑁆𑀢𑀲𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀸𑀬 𑀅𑀦𑀢𑁆𑀢𑀲𑀜𑁆𑀜𑀸𑀬 𑀲𑀩𑁆𑀩𑀥𑀫𑁆𑀫𑀅𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀢𑁆𑀢𑀸 𑀥𑀫𑁆𑀫𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁.

𑀓𑀸𑀫𑀭𑀸𑀕𑀲𑁆𑀲 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑀢𑁆𑀢𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀭𑀽𑀧𑀲𑀗𑁆𑀔𑀸𑀢𑁂 𑀓𑀸𑀬𑁂 𑀆𑀭𑀩𑁆𑀪 𑀧𑀯𑀢𑁆𑀢𑀲𑁆𑀲 𑀭𑀽𑀧𑀭𑀸𑀕𑀲𑁆𑀲 𑀘𑀓𑁆𑀔𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀦𑀢𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀸𑀦𑀺 𑀭𑀽𑀧𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀪𑀯𑀦𑀺𑀓𑀦𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀪𑀯𑀭𑀸𑀕𑀲𑁆𑀲 𑀙𑀴𑀸𑀬𑀢𑀦𑀁 𑀧𑀤𑀝𑁆𑀞𑀸𑀦𑀁. 𑀦𑀺𑀩𑁆𑀩𑀢𑁆𑀢𑀪𑀯𑀸𑀦𑀼𑀧𑀲𑁆𑀲𑀺𑀢𑀸𑀢𑀺 ‘‘𑀏𑀤𑀺𑀲𑀁 𑀅𑀦𑀺𑀝𑁆𑀞𑀁 𑀭𑀽𑀧𑀁 𑀫𑀸 𑀦𑀺𑀩𑁆𑀩𑀢𑁆𑀢𑀢𑀼, 𑀏𑀤𑀺𑀲𑀁 𑀇𑀝𑁆𑀞𑀁 𑀭𑀽𑀧𑀁 𑀦𑀺𑀩𑁆𑀩𑀢𑁆𑀢𑀢𑀼 𑀏𑀤𑀺𑀲𑀻 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀫𑀸 𑀦𑀺𑀩𑁆𑀩𑀢𑁆𑀢𑀢𑀼, 𑀏𑀤𑀺𑀲𑀻 𑀲𑀼𑀔𑀸 𑀯𑁂𑀤𑀦𑀸 𑀦𑀺𑀩𑁆𑀩𑀢𑁆𑀢𑀢𑀽’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀓𑀸𑀭𑁂𑀦 𑀧𑀯𑀢𑁆𑀢𑀸 𑀭𑀽𑀧𑀸𑀪𑀺𑀦𑀦𑁆𑀤𑀦𑀸, 𑀲𑀸 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀧𑀤𑀝𑁆𑀞𑀸𑀦𑀁.

𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀦𑀼𑀕𑀢𑀢𑁆𑀢𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀤𑀲𑁆𑀲𑀦𑀁 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀑𑀓𑀧𑁆𑀧𑀦𑀁 𑀮𑀓𑁆𑀔𑀡𑀁 𑀬𑀲𑁆𑀲𑀸 𑀲𑀤𑁆𑀥𑀸𑀬𑀸𑀢𑀺 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀲𑀤𑁆𑀥𑀸. 𑀅𑀥𑀺𑀫𑀼𑀢𑁆𑀢𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀬𑀲𑁆𑀲𑀸 𑀲𑀤𑁆𑀥𑀸𑀬𑀸𑀢𑀺 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀘 𑀲𑀤𑁆𑀥𑀸. 𑀅𑀦𑀸𑀯𑀺𑀮𑀁 𑀮𑀓𑁆𑀔𑀡𑀁 𑀬𑀲𑁆𑀲 𑀧𑀲𑀸𑀤𑀲𑁆𑀲𑀸𑀢𑀺 𑀅𑀦𑀸𑀯𑀺𑀮𑀮𑀓𑁆𑀔𑀡𑁄𑀢𑀺 𑀧𑀲𑀸𑀤𑁄. 𑀲𑀫𑁆𑀧𑀲𑀻𑀤𑀦𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀬𑀲𑁆𑀲 𑀧𑀲𑀸𑀤𑀲𑁆𑀲𑀸𑀢𑀺 𑀲𑀫𑁆𑀧𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀘 𑀧𑀲𑀸𑀤𑁄. 𑀲𑁄 𑀧𑀦 𑀧𑀲𑀸𑀤𑁄 𑀲𑀤𑁆𑀥𑀸𑀬 𑀏𑀯 𑀅𑀯𑀢𑁆𑀣𑀸𑀯𑀺𑀲𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀯𑁂𑀘𑁆𑀘𑀧𑀲𑀸𑀤𑁄 𑀅𑀪𑀺𑀧𑀢𑁆𑀣𑀺𑀬𑀦𑀮𑀓𑁆𑀔𑀡𑀸𑀬 𑀲𑀤𑁆𑀥𑀸𑀬 𑀧𑀤𑀝𑁆𑀞𑀸𑀦𑀁, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀲𑀤𑁆𑀥𑀸 𑀅𑀦𑀸𑀯𑀺𑀮𑀮𑀓𑁆𑀔𑀡𑀲𑁆𑀲 𑀧𑀲𑀸𑀤𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀯𑀻𑀭𑀺𑀬𑀁 𑀆𑀭𑀫𑁆𑀪𑀮𑀓𑁆𑀔𑀡𑀲𑁆𑀲 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀓𑀸𑀬𑀸𑀤𑀺𑀲𑀢𑀺𑀧𑀝𑁆𑀞𑀸𑀦𑀁 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸𑀬 𑀲𑀢𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀛𑀸𑀦𑀲𑀳𑀺𑀢𑀲𑁆𑀲 𑀲𑀫𑀸𑀥𑀺𑀲𑁆𑀲 𑀏𑀓𑀕𑁆𑀕𑀮𑀓𑁆𑀔𑀡𑀢𑁆𑀢𑀸 𑀯𑀺𑀢𑀓𑁆𑀓𑀸𑀤𑀺𑀛𑀸𑀦𑀸𑀦𑀺 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀧𑀜𑁆𑀜𑀸𑀬 𑀓𑀺𑀘𑁆𑀘𑀧𑀚𑀸𑀦𑀦𑀆𑀭𑀫𑁆𑀫𑀡𑀧𑀚𑀸𑀦𑀦𑀮𑀓𑁆𑀔𑀡𑀢𑁆𑀢𑀸 𑀲𑀘𑁆𑀘𑀸𑀦𑀺 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁.

‘‘𑀬𑁂𑀲𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀤𑀝𑁆𑀞𑀸𑀦𑀸𑀦𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸𑀦𑀺, 𑀢𑁂 𑀅𑀯𑀺𑀚𑁆𑀚𑀸𑀤𑀬𑁄 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑁂 𑀅𑀯𑀺𑀚𑁆𑀚𑀸𑀤𑀬𑁄𑀧𑀺 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸 𑀅𑀲𑁆𑀲𑀸𑀤𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀯𑀺𑀚𑁆𑀚𑀸𑀬 𑀳𑀺 𑀆𑀤𑀻𑀦𑀯𑀘𑁆𑀙𑀸𑀤𑀦𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀚𑀸𑀢𑁄𑀢𑀺. 𑀲𑀘𑁆𑀘𑀲𑀫𑁆𑀫𑁄𑀳𑀦𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀧𑀼𑀦𑀩𑁆𑀪𑀯𑀯𑀺𑀭𑁄𑀳𑀦𑀮𑀓𑁆𑀔𑀡𑀸 𑀢𑁂𑀪𑀽𑀫𑀓𑀘𑁂𑀢𑀦𑀸 𑀲𑀗𑁆𑀔𑀸𑀭𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀑𑀧𑀧𑀘𑁆𑀘𑀬𑀺𑀓𑀲𑀗𑁆𑀔𑀸𑀢𑁂𑀦 𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀦𑀸𑀫𑀓𑀸𑀬𑀭𑀽𑀧𑀓𑀸𑀬𑀲𑀗𑁆𑀖𑀸𑀢𑀮𑀓𑁆𑀔𑀡𑀁 𑀦𑀸𑀫𑀭𑀽𑀧𑀁 𑀙𑀴𑀸𑀬𑀢𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄, 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀯𑀢𑁆𑀢𑀸𑀦𑀁 𑀮𑀓𑁆𑀔𑀡𑀁 𑀙𑀴𑀸𑀬𑀢𑀦𑀁 𑀙𑀩𑁆𑀩𑀺𑀥𑀲𑁆𑀲 𑀨𑀲𑁆𑀲𑀲𑁆𑀲 𑀬𑀣𑀸𑀓𑁆𑀓𑀫𑀁 𑀧𑀤𑀝𑁆𑀞𑀸𑀦𑀁 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄, 𑀘𑀓𑁆𑀔𑀼𑀧𑀲𑀸𑀤𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀦𑁆𑀦𑀺𑀧𑀸𑀢𑀮𑀓𑁆𑀔𑀡𑁄 𑀙𑀩𑁆𑀩𑀺𑀥𑁄 𑀨𑀲𑁆𑀲𑁄, 𑀢𑀁 𑀯𑁂𑀤𑀦𑀸𑀬 𑀢𑁂𑀦 𑀙𑀩𑁆𑀩𑀺𑀥𑁂𑀦 𑀨𑀲𑁆𑀲𑁂𑀦 𑀲𑀳𑀚𑀸𑀢𑀸𑀬 𑀙𑀩𑁆𑀩𑀺𑀥𑀸𑀬 𑀯𑁂𑀤𑀦𑀸𑀬 𑀬𑀣𑀸𑀓𑁆𑀓𑀫𑀁 𑀧𑀤𑀝𑁆𑀞𑀸𑀦𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄, 𑀇𑀝𑁆𑀞𑀸𑀦𑀼𑀪𑀯𑀦𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸 𑀢𑀺𑀯𑀺𑀥𑀸 𑀯𑁂𑀤𑀦𑀸, 𑀢𑀁 𑀢𑀡𑁆𑀳𑀸𑀬 𑀢𑀸𑀬 𑀢𑀺𑀯𑀺𑀥𑀸𑀬 𑀯𑁂𑀤𑀦𑀸𑀬 𑀯𑀲𑁂𑀦 𑀧𑀯𑀢𑁆𑀢𑀸𑀬 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁 𑀉𑀧𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄, 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀢𑀁 𑀉𑀧𑀸𑀤𑀸𑀦𑀲𑁆𑀲 𑀢𑀸𑀬 𑀢𑀡𑁆𑀳𑀸𑀬 𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀘𑀢𑀼𑀩𑁆𑀩𑀺𑀥𑀲𑁆𑀲 𑀉𑀧𑀸𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀉𑀧𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄. ‘‘𑀲𑁄 𑀯𑁂𑀤𑀦𑀸𑀬𑀸’’𑀢𑀺 𑀘 ‘‘𑀲𑀸 𑀢𑀡𑁆𑀳𑀸𑀬𑀸’’𑀢𑀺 𑀘 ‘‘𑀲𑀸 𑀉𑀧𑀸𑀤𑀸𑀦𑀲𑁆𑀲𑀸’’𑀢𑀺 𑀘 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀦𑀺𑀤𑁆𑀤𑁂𑀲𑁄 𑀯𑀸 𑀲𑀺𑀬𑀸.

𑀬𑀁 𑀉𑀧𑀸𑀤𑀸𑀦𑀁 𑀑𑀧𑀧𑀘𑁆𑀘𑀬𑀺𑀓𑀁 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀦𑀺𑀩𑁆𑀩𑀢𑁆𑀢𑀓𑀁, 𑀢𑀁 𑀉𑀧𑀸𑀤𑀸𑀦𑀁 𑀤𑀼𑀯𑀺𑀥𑀲𑁆𑀲 𑀪𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁄 𑀓𑀫𑁆𑀫𑀪𑀯𑁄 𑀦𑀸𑀫𑀓𑀸𑀬𑀭𑀽𑀧𑀓𑀸𑀬𑀲𑀫𑁆𑀪𑀯𑀦𑀮𑀓𑁆𑀔𑀡𑁄, 𑀲𑁄 𑀓𑀫𑁆𑀫𑀪𑀯𑁄 𑀚𑀸𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀬𑀸 𑀉𑀧𑀧𑀢𑁆𑀢𑀺𑀪𑀽𑀢𑀸 𑀚𑀸𑀢𑀺 𑀔𑀦𑁆𑀥𑀧𑀸𑀢𑀼𑀪𑀸𑀯𑀮𑀓𑁆𑀔𑀡𑀸, 𑀢𑀁 𑀲𑀸 𑀚𑀸𑀢𑀺 𑀚𑀭𑀸𑀬 𑀧𑀤𑀝𑁆𑀞𑀸𑀦𑀁. 𑀬𑀸 𑀚𑀺𑀡𑁆𑀡𑀚𑀭𑀸 𑀉𑀧𑀥𑀺𑀓𑁆𑀔𑀦𑁆𑀥𑀧𑀭𑀺𑀧𑀸𑀓𑀮𑀓𑁆𑀔𑀡𑀸, 𑀢𑀁 𑀲𑀸 𑀚𑀺𑀡𑁆𑀡𑀚𑀭𑀸 𑀫𑀭𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀫𑁆𑀧𑀺 𑀬𑀲𑁆𑀲 𑀲𑀫𑁆𑀫𑀼𑀢𑀺𑀫𑀭𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀮𑀓𑁆𑀔𑀡𑀁, 𑀢𑀫𑁆𑀧𑀺 𑀢𑀲𑁆𑀲 𑀲𑀫𑁆𑀫𑀼𑀢𑀺𑀫𑀭𑀡𑀁 𑀲𑁄𑀓𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀺𑀬𑀲𑁆𑀲 𑀫𑀭𑀡𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀲𑁄𑀓𑀼𑀧𑁆𑀧𑀚𑁆𑀚𑀦𑀢𑁄 𑀬𑁄 𑀲𑁄𑀓𑁄 𑀜𑀸𑀢𑀺𑀆𑀤𑀺𑀧𑀺𑀬𑁂𑀲𑀼 𑀉𑀲𑁆𑀲𑀼𑀓𑁆𑀓𑀓𑀸𑀭𑀓𑁄, 𑀢𑀁 𑀲𑁄 𑀲𑁄𑀓𑁄 𑀧𑀭𑀺𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁄 𑀧𑀭𑀺𑀤𑁂𑀯𑁄 𑀮𑀸𑀮𑀧𑁆𑀧𑀓𑀸𑀭𑀓𑁄, 𑀢𑀁 𑀲𑁄 𑀧𑀭𑀺𑀤𑁂𑀯𑁄 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀓𑀸𑀬𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀁, 𑀢𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀁 𑀤𑁄𑀫𑀦𑀲𑁆𑀲𑀁 𑀘𑀺𑀢𑁆𑀢𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀁, 𑀢𑀁 𑀤𑁄𑀫𑀦𑀲𑁆𑀲𑀁 𑀉𑀧𑀸𑀬𑀸𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁄 𑀉𑀧𑀸𑀬𑀸𑀲𑁄 𑀑𑀤𑀳𑀦𑀓𑀸𑀭𑀓𑁄 𑀅𑀯𑀤𑀳𑀦𑀓𑀸𑀭𑀓𑁄, 𑀢𑀁 𑀲𑁄 𑀉𑀧𑀸𑀬𑀸𑀲𑁄 𑀪𑀯𑀲𑁆𑀲 𑀉𑀧𑀸𑀬𑀸𑀲𑀲𑁆𑀲 𑀦𑀺𑀲𑁆𑀲𑀬𑀲𑀦𑁆𑀢𑀸𑀦𑀪𑀯𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀪𑀯𑀲𑁆𑀲𑀸𑀢𑀺 𑀯𑀼𑀢𑁆𑀢𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀯𑀗𑁆𑀕𑀸𑀦𑀺 𑀓𑀺𑀮𑁂𑀲𑁄 𑀪𑀯𑀲𑁆𑀲 𑀅𑀗𑁆𑀕𑀁 𑀓𑀸𑀭𑀡𑀁 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀸𑀦𑀺 𑀪𑀯𑀲𑀗𑁆𑀔𑀸𑀢𑀸𑀦𑀺 𑀅𑀗𑁆𑀕𑀸𑀦𑀺 𑀅𑀯𑀬𑀯𑀸𑀦𑀺. 𑀬𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀓𑀸𑀮𑁂 𑀲𑀫𑀕𑁆𑀕𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀪𑀯𑀦𑁆𑀢𑀺, 𑀢𑀤𑀸 𑀲𑁄 𑀓𑀺𑀮𑁂𑀲𑀯𑀝𑁆𑀝𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀲𑀗𑁆𑀔𑀸𑀢𑁄 𑀥𑀫𑁆𑀫𑀲𑀫𑀽𑀳𑁄 ‘‘𑀪𑀯𑀲𑁆𑀲𑀸’’𑀢𑀺 𑀏𑀢𑁆𑀣 𑀪𑀯𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀁 𑀪𑀯𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀯𑀝𑁆𑀝𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀢𑁆𑀢𑀬𑀁 𑀲𑀁𑀲𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀚𑀸𑀢𑀺𑀦𑀺𑀧𑁆𑀨𑀦𑁆𑀦𑀓𑀺𑀮𑁂𑀲𑀸𑀤𑀺𑀯𑀝𑁆𑀝𑁂𑀦 𑀲𑀁𑀲𑀸𑀭𑀲𑁆𑀲 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀼𑀧𑁆𑀧𑀚𑁆𑀚𑀦𑀢𑁄, 𑀬𑁄 𑀅𑀭𑀺𑀬𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁄, 𑀢𑀁 𑀲𑁄 𑀅𑀭𑀺𑀬𑀫𑀕𑁆𑀕𑁄 𑀦𑀺𑀭𑁄𑀥𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀸𑀯𑀢𑁄.

𑀩𑀳𑀼𑀲𑁆𑀲𑀼𑀢𑁄 𑀲𑀩𑁆𑀩𑀲𑀺𑀲𑁆𑀲𑀸𑀤𑀻𑀦𑀁 𑀧𑀢𑀺𑀝𑁆𑀞𑀸𑀦𑀢𑁆𑀢𑀸 𑀢𑀺𑀢𑁆𑀣𑀁 𑀯𑀺𑀬𑀸𑀢𑀺 𑀢𑀺𑀢𑁆𑀣𑀁, 𑀚𑀸𑀦𑀸𑀢𑀻𑀢𑀺 𑀜𑀽, 𑀢𑀺𑀢𑁆𑀣𑀁 𑀜𑀽𑀢𑀺 𑀢𑀺𑀢𑁆𑀣𑀜𑁆𑀜𑀽, 𑀢𑀺𑀢𑁆𑀣𑀜𑁆𑀜𑀼𑀦𑁄 𑀪𑀸𑀯𑁄 𑀢𑀺𑀢𑁆𑀣𑀜𑁆𑀜𑀼𑀢𑀸, 𑀲𑀫𑁆𑀫𑀸𑀧𑀬𑀺𑀭𑀼𑀧𑀸𑀲𑀦𑀸, 𑀲𑀸 𑀧𑀻𑀢𑀜𑁆𑀜𑀼𑀢𑀸𑀬 𑀧𑀤𑀝𑁆𑀞𑀸𑀦𑀁. 𑀩𑀳𑀼𑀲𑁆𑀲𑀼𑀢𑀲𑁆𑀲 𑀳𑀺 𑀲𑀫𑁆𑀫𑀸𑀧𑀬𑀺𑀭𑀼𑀧𑀸𑀲𑀦𑀸𑀬 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀸𑀫𑁄𑀚𑁆𑀚𑁂𑀦 𑀘 𑀓𑀫𑁆𑀫𑀝𑁆𑀞𑀸𑀦𑀩𑁆𑀭𑀽𑀳𑀦𑀸 𑀚𑀸𑀬𑀢𑀻𑀢𑀺 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑁂𑀦 𑀧𑀻𑀢𑀺𑀁 𑀚𑀸𑀦𑀸𑀢𑀻𑀢𑀺 𑀧𑀻𑀢𑀜𑁆𑀜𑀽, 𑀧𑀻𑀢𑀜𑁆𑀜𑀼𑀦𑁄 𑀪𑀸𑀯𑁄 𑀧𑀻𑀢𑀜𑁆𑀜𑀼𑀢𑀸, 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀩𑁆𑀭𑀽𑀳𑀦𑀸, 𑀲𑀸 𑀧𑀢𑁆𑀢𑀜𑁆𑀜𑀼𑀢𑀸𑀬 𑀧𑀤𑀝𑁆𑀞𑀸𑀦𑀁. 𑀓𑀫𑁆𑀫𑀝𑁆𑀞𑀸𑀦𑀩𑁆𑀭𑀽𑀳𑀦𑀸𑀬 𑀳𑀺 𑀪𑀸𑀯𑀦𑀸𑀧𑀢𑁆𑀢𑀚𑀸𑀦𑀦𑀢𑀸 𑀚𑀸𑀬𑀢𑀻𑀢𑀺 𑀧𑀢𑁆𑀢𑀜𑁆𑀜𑀼𑀢𑀸. 𑀪𑀸𑀯𑀦𑀸𑀧𑀢𑁆𑀢𑀚𑀸𑀦𑀦𑀢𑀸 𑀅𑀢𑁆𑀢𑀜𑁆𑀜𑀼𑀢𑀸𑀬 𑀧𑀤𑀝𑁆𑀞𑀸𑀦𑀁. 𑀪𑀸𑀯𑀦𑀸𑀧𑀢𑁆𑀢𑀚𑀸𑀦𑀦𑀢𑀸𑀬 𑀳𑀺 𑀧𑀜𑁆𑀘𑀳𑀺 𑀧𑀥𑀸𑀦𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀢𑁆𑀢𑀦𑁄 𑀚𑀸𑀦𑀦𑀢𑀸 𑀚𑀸𑀬𑀢𑀻𑀢𑀺 𑀅𑀢𑁆𑀢𑀜𑁆𑀜𑀼𑀢𑀸 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀬 𑀧𑀤𑀝𑁆𑀞𑀸𑀦𑀁.

𑀧𑀥𑀸𑀦𑀺𑀬𑀗𑁆𑀕𑁂𑀲𑀼 𑀲𑀫𑀦𑁆𑀦𑀸𑀕𑀢𑀢𑁆𑀢𑀚𑀸𑀦𑀦𑀢𑀸𑀬 𑀳𑀺 𑀧𑀼𑀩𑁆𑀩𑁂 𑀧𑀼𑀜𑁆𑀜𑀓𑀭𑀡𑀁 𑀚𑀸𑀢𑀁, 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀼𑀩𑁆𑀩𑁂 𑀳𑀺 𑀓𑀢𑁂𑀦 𑀧𑀼𑀜𑁆𑀜𑁂𑀦 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀮𑀤𑁆𑀥𑁄, 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁂𑀦 𑀳𑀺 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀮𑀤𑁆𑀥𑁄, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀳𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁 𑀚𑀸𑀢𑀁, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁 𑀲𑀻𑀮𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑁂𑀦 𑀳𑀺 𑀲𑀻𑀮𑀸𑀦𑀺 𑀲𑀫𑁆𑀧𑀢𑀺𑀝𑁆𑀞𑀺𑀢𑀸𑀦𑀺, 𑀲𑀻𑀮𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀦𑀺 𑀳𑀺 𑀲𑀫𑁆𑀧𑀢𑀺𑀝𑁆𑀞𑀺𑀢𑀁 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦𑀢𑁆𑀣𑁂𑀯𑀸𑀢𑀺, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀢𑀲𑁆𑀫𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀸𑀫𑁄𑀚𑁆𑀚𑁂𑀦 𑀧𑀻𑀢𑀺 𑀚𑀸𑀬𑀢𑀺, 𑀢𑀲𑁆𑀫𑀸 𑀧𑀸𑀫𑁄𑀚𑁆𑀚𑀁 𑀧𑀻𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀧𑀻𑀢𑀺𑀬𑀸 𑀧𑀲𑁆𑀲𑀤𑁆𑀥𑀺 𑀚𑀸𑀬𑀢𑀺, 𑀢𑀲𑁆𑀫𑀸 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀧𑀲𑁆𑀲𑀤𑁆𑀥𑀺𑀬𑀸 𑀲𑀼𑀔𑀁 𑀚𑀸𑀬𑀢𑀺, 𑀢𑀲𑁆𑀫𑀸 𑀧𑀲𑁆𑀲𑀤𑁆𑀥𑀺 𑀲𑀼𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀼𑀔𑁂𑀦 𑀲𑀫𑀸𑀥𑀺 𑀚𑀸𑀬𑀢𑀺, 𑀢𑀲𑁆𑀫𑀸 𑀲𑀼𑀔𑀁 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀫𑀸𑀥𑀺𑀦𑀸 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀚𑀸𑀬𑀢𑀺, 𑀢𑀲𑁆𑀫𑀸 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂𑀦 𑀦𑀺𑀩𑁆𑀩𑀺𑀤𑀸𑀜𑀸𑀡𑀁 𑀚𑀸𑀬𑀢𑀺, 𑀢𑀲𑁆𑀫𑀸 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀸𑀬 𑀧𑀤𑀝𑁆𑀞𑀸𑀦𑀁. 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑁄 𑀚𑀸𑀬𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀺𑀭𑀸𑀕𑁂𑀦 𑀯𑀺𑀫𑀼𑀢𑁆𑀢𑀺 𑀚𑀸𑀬𑀢𑀺, 𑀢𑀲𑁆𑀫𑀸 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀚𑀸𑀬𑀢𑀺, 𑀢𑀲𑁆𑀫𑀸 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀬𑁄 𑀓𑁄𑀘𑀺 𑀥𑀫𑁆𑀫𑁄 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀬𑁄 𑀓𑁄𑀘𑀺 𑀥𑀫𑁆𑀫𑁄 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀩𑁆𑀩𑁄 𑀲𑁄 𑀥𑀫𑁆𑀫𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑁄.

‘‘𑀉𑀧𑀦𑀺𑀲𑁆𑀲𑀬𑀥𑀫𑁆𑀫𑀲𑁆𑀲, 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀯𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑁄 𑀓𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀉𑀧𑀦𑀺𑀲𑁆𑀲𑀬𑀥𑀫𑁆𑀫𑀲𑁆𑀲, 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 ‘‘𑀥𑀫𑁆𑀫𑀁 𑀤𑁂𑀲𑁂𑀢𑀺 𑀚𑀺𑀦𑁄’’𑀢𑀺𑀆𑀤𑀺𑀓𑀁 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀥𑀫𑁆𑀫𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀪𑀸𑀯𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺. ‘‘𑀬𑀣𑀸𑀯𑀼𑀢𑁆𑀢𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀓𑀺𑀁, 𑀉𑀤𑀸𑀳𑀼 𑀅𑀜𑁆𑀜𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄 𑀅𑀢𑁆𑀣𑀺 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀸𑀴𑀺𑀬𑀁 𑀅𑀯𑀺𑀪𑀢𑁆𑀢𑀫𑁆𑀧𑀺 𑀬𑀣𑀸𑀮𑀸𑀪𑀯𑀲𑁂𑀦 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄 𑀦𑀻𑀳𑀭𑀺𑀢𑁆𑀯𑀸 𑀬𑀼𑀢𑁆𑀢𑁄 𑀬𑀼𑀚𑁆𑀚𑀺𑀢𑀩𑁆𑀩𑁄, 𑀯𑀺𑀪𑀚𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀢𑀺 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.