𑀦𑀬𑀲𑀫𑀼𑀝𑁆𑀞𑀸𑀦𑀯𑀺𑀪𑀸𑀯𑀦𑀸

𑁭𑁯. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀸𑀤𑀺𑀦𑀸 𑀳𑀸𑀭𑀲𑀫𑁆𑀧𑀸𑀢𑁂𑀦 𑀏𑀓𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀸𑀤𑀺𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋‘‘𑀏𑀯𑀁 𑀦𑀸𑀦𑀸𑀲𑀼𑀢𑁆𑀢𑀯𑀲𑁂𑀦, 𑀏𑀓𑀲𑀼𑀢𑁆𑀢𑀯𑀲𑁂𑀦 𑀘 𑀳𑀸𑀭𑀯𑀺𑀘𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀬𑀯𑀺𑀘𑀸𑀭𑀁 𑀤𑀲𑁆𑀲𑁂𑀢𑀼𑀁 ‘𑀢𑀢𑁆𑀣 𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁭𑁯) 𑀯𑀼𑀢𑁆𑀢𑀁. ‘‘𑀢𑀢𑁆𑀣 𑀓𑀢𑀫𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑁄’’𑀢𑀺𑀆𑀤𑀺𑀁 𑀅𑀦𑀸𑀭𑀪𑀺𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀆𑀭𑀫𑁆𑀪𑀦𑁂 𑀓𑀸𑀭𑀡𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀳𑀸𑀭𑀸𑀤𑀻𑀲𑀼 𑀬𑁄 𑀅𑀢𑁆𑀣𑀦𑀬𑁄 𑀲𑀁𑀯𑀡𑁆𑀡𑀦𑀸𑀦𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀲𑁂𑀯 𑀅𑀢𑁆𑀣𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀪𑀽𑀫𑀺𑀁 𑀧𑀼𑀘𑁆𑀙𑀢𑀺 ‘‘𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺.

𑀓𑀺𑀜𑁆𑀘𑀸𑀧𑀺 𑀲𑀁𑀯𑀡𑁆𑀡𑀦𑀸𑀦𑀬𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀣𑀸𑀧𑀺 𑀅𑀢𑁆𑀣𑀦𑀬𑀲𑀁𑀯𑀡𑁆𑀡𑀦𑀸𑀦𑀬𑀸𑀦𑀁 𑀯𑀺𑀲𑁂𑀲𑀲𑁆𑀲 𑀧𑀸𑀓𑀝𑀁 𑀓𑀸𑀢𑀼𑀁 𑀧𑀼𑀦 𑀓𑀣𑀬𑀺𑀲𑁆𑀲𑀸𑀫. 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀦𑀬𑁄 𑀦𑀸𑀫. 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀮𑁄𑀪𑀸𑀤𑀻𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘𑁂𑀯 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀅𑀮𑁄𑀪𑀸𑀤𑀻𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀢𑀺𑀧𑀼𑀓𑁆𑀔𑀮𑁄 𑀦𑀬𑁄 𑀦𑀸𑀫. 𑀘𑀢𑀽𑀳𑀺 𑀲𑀼𑀪𑀲𑀜𑁆𑀜𑀸𑀤𑀻𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀓𑀮𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘𑁂𑀯 𑀘𑀢𑀽𑀳𑀺 𑀅𑀲𑀼𑀪𑀲𑀜𑁆𑀜𑀸𑀤𑀻𑀳𑀺 𑀅𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀳𑀺 𑀯𑀸 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀬𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀸 𑀦𑀬𑀸 𑀲𑀁𑀯𑀡𑁆𑀡𑀦𑀸𑀦𑀬𑀸 𑀦𑀸𑀫. 𑀢𑁂𑀲𑀁 𑀲𑀁𑀯𑀡𑁆𑀡𑀦𑀸𑀦𑀬𑀸𑀦𑀁 𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺 ‘‘𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺.

𑀦𑀬𑀸 𑀧𑀦 𑀦𑀸𑀦𑀸𑀲𑀼𑀢𑁆𑀢𑀢𑁄 𑀦𑀺𑀤𑁆𑀥𑀸𑀭𑀺𑀢𑁂𑀳𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀤𑀻𑀳𑀺 𑀫𑀽𑀮𑀧𑀤𑁂𑀳𑀺 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀬 𑀦𑀬𑀢𑁄 𑀅𑀦𑀼𑀩𑀼𑀚𑁆𑀛𑀺𑀬𑀫𑀸𑀦𑁄 𑀤𑀼𑀓𑁆𑀔𑀸𑀤𑀺𑀅𑀢𑁆𑀣𑁄. 𑀲𑁄 𑀳𑀺 𑀫𑀕𑁆𑀕𑀜𑀸𑀡𑀁 𑀦𑀬𑀢𑀺 𑀲𑀫𑁆𑀧𑀸𑀧𑁂𑀢𑀻𑀢𑀺 ‘‘𑀦𑀬𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀅𑀢𑁆𑀣𑀦𑀬𑁄 𑀦𑀸𑀫. 𑀢𑀲𑁆𑀲𑁂𑀯 𑀅𑀢𑁆𑀣𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺 ‘‘𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺? 𑀢𑀲𑁆𑀫𑀸 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀬 𑀦𑀬𑀕𑁆𑀕𑀸𑀳𑀢𑁄 𑀦𑀻𑀬𑀢𑀺 𑀅𑀦𑀼𑀧𑀼𑀘𑁆𑀙𑀻𑀬𑀢𑀻𑀢𑀺 𑀦𑀬𑁄, 𑀓𑁄 𑀲𑁄? 𑀲𑀼𑀢𑁆𑀢𑀢𑁆𑀣𑀪𑀽𑀢𑁄 𑀤𑀼𑀓𑁆𑀔𑀸𑀤𑀺𑀓𑁄 𑀅𑀢𑁆𑀣𑁄. 𑀦𑀬𑀢𑀺 𑀫𑀕𑁆𑀕𑀜𑀸𑀡𑀁 𑀧𑀸𑀧𑁂𑀢𑀻𑀢𑀺 𑀯𑀸 𑀦𑀬𑁄, 𑀤𑀼𑀓𑁆𑀔𑀸𑀤𑀺𑀓𑁄 𑀅𑀢𑁆𑀣𑁄𑀯. 𑀢𑁂𑀦𑀸𑀳 𑁋 ‘‘𑀅𑀦𑀼𑀩𑀼𑀚𑁆𑀛𑀺𑀬𑀫𑀸𑀦𑁄 𑀤𑀼𑀓𑁆𑀔𑀸𑀤𑀺𑀅𑀢𑁆𑀣𑁄. 𑀲𑁄 𑀳𑀺 𑀫𑀕𑁆𑀕𑀜𑀸𑀡𑀁 𑀦𑀬𑀢𑀺 𑀲𑀫𑁆𑀧𑀸𑀧𑁂𑀢𑀻𑀢𑀺 𑀦𑀬𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁭𑁯). 𑀲𑀫𑀼𑀝𑁆𑀞𑀳𑀦𑁆𑀢𑀺 𑀦𑀬𑀸 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀓𑀺𑀁 𑀢𑀁? 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀓𑀸𑀭𑀡𑀁, 𑀢𑀁𑀤𑀻𑀧𑀦𑀸 𑀲𑀁𑀯𑀡𑁆𑀡𑀦𑀸 𑀘. 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀦𑀸 𑀳𑀺 𑀤𑀼𑀓𑁆𑀔𑀸𑀤𑀺𑀅𑀢𑁆𑀣𑀦𑀬𑀸 𑀲𑀫𑁆𑀪𑀯𑀦𑁆𑀢𑀺. 𑀅𑀣 𑀯𑀸 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀻𑀳𑀺 𑀘𑀢𑀼𑀲𑀘𑁆𑀘𑀬𑁄𑀚𑀦𑀸 𑀲𑀫𑀼𑀝𑁆𑀞𑀸𑀦𑀁 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑀺𑀁 𑀧𑀦 𑀢𑀁? 𑀢𑀁𑀢𑀁𑀫𑀽𑀮𑀧𑀤𑁂𑀳𑀺 𑀘𑀢𑀼𑀲𑀘𑁆𑀘𑀬𑁄𑀚𑀦𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁭𑁯). 𑀏𑀯𑀁 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀲𑀢𑀺 𑀲𑀁𑀯𑀡𑁆𑀡𑀦𑀸𑀦𑀬𑀸𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀦𑀬𑀸𑀦𑀁 𑀲𑀫𑀼𑀝𑁆𑀞𑀸𑀦𑀁 𑀦𑀬𑀲𑀫𑀼𑀝𑁆𑀞𑀸𑀦𑀁, 𑀢𑀲𑁆𑀫𑀺𑀁 𑀦𑀬𑀲𑀫𑀼𑀝𑁆𑀞𑀸𑀦𑁂.

‘‘𑀓𑀢𑀫𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀧𑀞𑀫𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑀫𑀼𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑀫𑀼𑀝𑁆𑀞𑀸𑀦𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀬 𑀘 𑀢𑀡𑁆𑀳𑀸𑀬 𑀘 𑀧𑀼𑀩𑁆𑀩𑀸 𑀓𑁄𑀝𑀺 ‘‘𑀅𑀲𑀼𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀉𑀧𑁆𑀧𑀦𑁆𑀦𑀸, 𑀅𑀲𑀼𑀓𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀉𑀧𑁆𑀧𑀦𑁆𑀦𑀸’’𑀢𑀺 𑀦 𑀧𑀜𑁆𑀜𑀸𑀬𑀢𑀺 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄𑀢𑀺 𑀬𑁄𑀚𑀦𑀸. ‘‘𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀼 𑀓𑀢𑀫𑀸 𑀦𑀻𑀯𑀭𑀡𑀁, 𑀓𑀢𑀫𑀸 𑀲𑀁𑀬𑁄𑀚𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀅𑀯𑀺𑀚𑁆𑀚𑀸 𑀦𑀻𑀯𑀭𑀡𑀁 𑀢𑀡𑁆𑀳𑀸 𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀼. 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀺𑀓𑀢𑁆𑀢𑀸 𑀅𑀯𑀺𑀚𑁆𑀚𑀸 𑀦𑀻𑀯𑀭𑀡𑀁. 𑀪𑀯𑁂𑀲𑀼 𑀲𑀁𑀬𑁄𑀚𑀦𑀢𑁄 𑀢𑀡𑁆𑀳𑀸 𑀲𑀁𑀬𑁄𑀚𑀦𑀁. ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀲𑀢𑁆𑀢𑀸 𑀓𑀣𑀁 𑀯𑀺𑀘𑀭𑀦𑁆𑀢𑀺, 𑀓𑀣𑀁 𑀯𑀼𑀘𑁆𑀘𑀦𑁆𑀢𑀺, 𑀢𑀡𑁆𑀳𑀸𑀲𑀁𑀬𑁄𑀚𑀦𑀸 𑀲𑀢𑁆𑀢𑀸 𑀓𑀣𑀁 𑀯𑀺𑀘𑀭𑀦𑁆𑀢𑀺 𑀓𑀣𑀁 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀲𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀫𑁂𑀢𑁂𑀲𑀫𑀢𑁆𑀣𑀻𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸. 𑀅𑀯𑀺𑀚𑁆𑀚𑀸𑀬 𑀲𑀁𑀬𑀼𑀢𑁆𑀢𑀸 𑀯𑀺𑀬 𑀧𑀯𑀢𑁆𑀢𑀸 𑀅𑀯𑀺𑀚𑁆𑀚𑀸𑀬 𑀅𑀪𑀺𑀦𑀺𑀯𑀺𑀲𑀯𑀢𑁆𑀣𑀽𑀲𑀼 𑀲𑀁𑀬𑀼𑀢𑁆𑀢𑀸 𑀯𑀺𑀬 𑀧𑀯𑀢𑁆𑀢𑀸 𑀲𑀢𑁆𑀢𑀸 𑀅𑀯𑀺𑀚𑁆𑀚𑀸𑀧𑀓𑁆𑀔𑁂𑀦 𑀯𑀺𑀧𑀮𑁆𑀮𑀸𑀲𑁂𑀦 𑀦𑀺𑀘𑁆𑀘𑀸𑀤𑀺𑀅𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀪𑀽𑀢𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀯𑀺𑀘𑀭𑀦𑁆𑀢𑀺 𑀯𑀺𑀯𑀺𑀥𑀸 𑀘𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀦𑀺𑀘𑁆𑀘𑀸𑀤𑀺𑀅𑀪𑀺𑀦𑀺𑀯𑀺𑀲𑀦𑁆𑀢𑀸 𑀯𑀺𑀘𑀭𑀦𑁆𑀢𑀸 𑀲𑀢𑁆𑀢𑀸 ‘‘𑀤𑀺𑀝𑁆𑀞𑀺𑀘𑀭𑀺𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀡𑁆𑀳𑀸𑀲𑀁𑀬𑁄𑀚𑀦𑀫𑁂𑀢𑁂𑀲𑀦𑁆𑀢𑀺 𑀢𑀡𑁆𑀳𑀸𑀲𑀁𑀬𑁄𑀚𑀦𑀸. 𑀢𑀡𑁆𑀳𑀸𑀬 𑀲𑀁𑀬𑀼𑀢𑁆𑀢𑀸 𑀯𑀺𑀬 𑀧𑀯𑀢𑁆𑀢𑀸, 𑀢𑀡𑁆𑀳𑀸𑀬 𑀯𑀸 𑀆𑀭𑀫𑁆𑀫𑀡𑀪𑀽𑀢𑁂 𑀯𑀢𑁆𑀣𑀼𑀓𑀸𑀫𑁂 𑀲𑀁𑀬𑀼𑀢𑁆𑀢𑀸 𑀯𑀺𑀬 𑀧𑀯𑀢𑁆𑀢𑀸 𑀲𑀢𑁆𑀢𑀸 𑀢𑀡𑁆𑀳𑀸𑀧𑀓𑁆𑀔𑁂𑀦 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑁂𑀦 𑀆𑀭𑀫𑁆𑀫𑀡𑀪𑀽𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀘𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄.

‘‘𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸 𑀓𑀁 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀓𑀁 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑀺𑀝𑁆𑀞𑀺𑀘𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸 𑀇𑀢𑁄 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑀺𑀢𑀸 𑀳𑁄𑀦𑁆𑀢𑀸𑀧𑀺 ‘‘𑀲𑀼𑀔𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀁 𑀲𑀼𑀔𑀁 𑀦𑀢𑁆𑀣𑀺, 𑀤𑀼𑀓𑁆𑀔𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀁 𑀲𑀼𑀔𑀁 𑀧𑀦 𑀅𑀢𑁆𑀣𑀻’’𑀢𑀺 𑀫𑀦𑀲𑀺 𑀓𑀭𑁄𑀦𑁆𑀢𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀧𑀜𑁆𑀘𑀸𑀢𑀧𑀸𑀤𑀺𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀇𑀢𑁄 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑀺𑀢𑀸 𑀳𑁄𑀦𑁆𑀢𑀸𑀧𑀺 ‘‘𑀓𑀸𑀫𑁂 𑀧𑀝𑀺𑀲𑁂𑀯𑀦𑁆𑀢𑀸 𑀮𑁄𑀓𑀁 𑀯𑀟𑁆𑀠𑀸𑀧𑁂𑀦𑁆𑀢𑀸 𑀩𑀳𑀼𑀁 𑀧𑀼𑀜𑁆𑀜𑀁 𑀯𑀟𑁆𑀠𑀸𑀧𑁂𑀦𑁆𑀢𑀻’’𑀢𑀺 𑀫𑀦𑀲𑀺 𑀓𑀭𑁄𑀦𑁆𑀢𑀸 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺.

‘‘𑀓𑀲𑁆𑀫𑀸 𑀤𑀺𑀝𑁆𑀞𑀺𑀘𑀭𑀺𑀢𑀸 𑀢𑀣𑀸𑀯𑀺𑀥𑀁 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀓𑀲𑁆𑀫𑀸 𑀢𑀡𑁆𑀳𑀸𑀘𑀭𑀺𑀢𑀸 𑀢𑀣𑀸𑀯𑀺𑀥𑀁 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀺𑀁 𑀓𑀸𑀭𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀢𑁆𑀣 𑀢𑁂𑀲𑀼 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑁂𑀲𑀼. 𑀬𑀁 𑀬𑀲𑁆𑀫𑀸 𑀓𑀸𑀭𑀡𑀸 𑀯𑀺𑀳𑀭𑀦𑁆𑀢𑀺, 𑀢𑀁 𑀓𑀸𑀭𑀡𑀁 𑀓𑀺𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀇𑀢𑁄 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀦𑀢𑁆𑀣𑀺, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸 𑀓𑀼𑀢𑁄 𑀘 𑀅𑀢𑁆𑀣𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑁄𑀲𑀮𑁆𑀮𑀁 𑀯𑀸 𑀉𑀧𑀲𑀫𑀲𑀼𑀔𑀧𑁆𑀧𑀢𑁆𑀢𑀺 𑀯𑀸 𑀓𑀼𑀢𑁄 𑀅𑀢𑁆𑀣𑀺, 𑀢𑁂 𑀧𑀼𑀕𑁆𑀕𑀮𑀸 𑀉𑀧𑀲𑀫𑀲𑀼𑀔𑀲𑁆𑀲 𑀅𑀦𑀪𑀺𑀜𑁆𑀜𑀸 𑀯𑀺𑀧𑀭𑀻𑀢𑀘𑁂𑀢𑀸 𑀳𑀼𑀢𑁆𑀯𑀸 𑀏𑀯𑀁 𑀆𑀳𑀁𑀲𑀼 ‘‘𑀲𑀼𑀔𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀁 𑀲𑀼𑀔𑀁 𑀦𑀢𑁆𑀣𑀺, 𑀤𑀼𑀓𑁆𑀔𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀁 𑀲𑀼𑀔𑀁 𑀦𑀸𑀫 𑀅𑀢𑁆𑀣𑀻’’𑀢𑀺. 𑀢𑁂 𑀏𑀯𑀁𑀲𑀜𑁆𑀜𑀻 𑀏𑀯𑀁𑀤𑀺𑀝𑁆𑀞𑀻 𑀤𑀼𑀓𑁆𑀔𑁂𑀦 𑀲𑀼𑀔𑀁 𑀧𑀢𑁆𑀣𑀬𑀫𑀸𑀦𑀸 𑀳𑀼𑀢𑁆𑀯𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀇𑀢𑁄 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀦𑀢𑁆𑀣𑀺, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸 𑀓𑀼𑀢𑁄 𑀘 𑀅𑀢𑁆𑀣𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑁄𑀲𑀮𑁆𑀮𑀁 𑀯𑀸 𑀉𑀧𑀲𑀫𑀲𑀼𑀔𑀧𑁆𑀧𑀢𑁆𑀢𑀺 𑀯𑀸 𑀓𑀼𑀢𑁄 𑀅𑀢𑁆𑀣𑀺, 𑀢𑁂 𑀧𑀼𑀕𑁆𑀕𑀮𑀸 𑀉𑀧𑀲𑀫𑀲𑀼𑀔𑀲𑁆𑀲 𑀅𑀦𑀪𑀺𑀜𑁆𑀜𑀸 𑀯𑀺𑀧𑀭𑀻𑀢𑀘𑁂𑀢𑀸 𑀳𑀼𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 ‘‘𑀬𑁄 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺, 𑀲𑁄 𑀮𑁄𑀓𑀁 𑀯𑀟𑁆𑀠𑀬𑀢𑀺, 𑀬𑁄 𑀮𑁄𑀓𑀁 𑀯𑀟𑁆𑀠𑀬𑀢𑀺, 𑀲𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺. 𑀢𑁂 𑀏𑀯𑀁𑀲𑀜𑁆𑀜𑀻 𑀏𑀯𑀁𑀤𑀺𑀝𑁆𑀞𑀻 𑀓𑀸𑀫𑁂𑀲𑀼 𑀲𑀼𑀔𑀲𑀜𑁆𑀜𑀻 𑀳𑀼𑀢𑁆𑀯𑀸 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀘 𑀯𑀺𑀳𑀭𑀦𑁆𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀢𑀣𑀸 𑀯𑀺𑀳𑀭𑀦𑁆𑀢𑀸 𑀓𑀺𑀁 𑀯𑀟𑁆𑀠𑀬𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂 𑀢𑀤𑀪𑀺𑀜𑁆𑀜𑀸 𑀲𑀦𑁆𑀢𑀸 𑀭𑁄𑀕𑀫𑁂𑀯 𑀯𑀟𑁆𑀠𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀢𑀣𑀸 𑀯𑀟𑁆𑀠𑀬𑀦𑁆𑀢𑀸 𑀭𑁄𑀕𑀸𑀤𑀻𑀦𑀁 𑀪𑁂𑀲𑀚𑁆𑀚𑀁 𑀲𑀫𑀣𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑀬𑀦𑁆𑀢𑀺 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂 𑀭𑁄𑀕𑀸𑀪𑀺𑀢𑀼𑀦𑁆𑀦𑀸 𑀕𑀡𑁆𑀟𑀧𑀝𑀺𑀧𑀻𑀴𑀺𑀢𑀸 𑀲𑀮𑁆𑀮𑀸𑀦𑀼𑀯𑀺𑀤𑁆𑀥𑀸 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑀸𑀲𑀼𑀭𑁂𑀲𑀼 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀸𑀦𑀺 𑀓𑀭𑁄𑀦𑁆𑀢𑀸 𑀉𑀕𑁆𑀖𑀸𑀢𑀦𑀺𑀕𑁆𑀖𑀸𑀢𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸 𑀭𑁄𑀕𑀕𑀡𑁆𑀟𑀲𑀮𑁆𑀮𑀪𑁂𑀲𑀚𑁆𑀚𑀁 𑀦 𑀯𑀺𑀦𑁆𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀦 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁭𑁯) 𑀯𑀼𑀢𑁆𑀢𑁄. ‘‘𑀓𑀢𑀫𑁂 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀸, 𑀓𑀢𑀫𑁂 𑀭𑁄𑀕𑀸𑀤𑀬𑁄, 𑀓𑀢𑀫𑀁 𑀪𑁂𑀲𑀚𑁆𑀚’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀭𑁄𑀕𑀪𑁂𑀲𑀚𑁆𑀚𑀸𑀤𑀻𑀲𑀼. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀘 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀘 𑀲𑀁𑀓𑀺𑀮𑁂𑀲𑁄 𑀳𑁄𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀯𑁄𑀤𑀸𑀦𑀁 𑀳𑁄𑀢𑀺, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀘 𑀭𑁄𑀕𑁄 𑀳𑁄𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀭𑁄𑀕𑀦𑀺𑀕𑁆𑀖𑀸𑀢𑀓𑀪𑁂𑀲𑀚𑁆𑀚𑀁…𑀧𑁂... 𑀲𑀫𑀣𑀯𑀺𑀧𑀲𑁆𑀲𑀦𑀸 𑀲𑀮𑁆𑀮𑀼𑀤𑁆𑀥𑀸𑀭𑀡𑀪𑁂𑀲𑀚𑁆𑀚𑀁 𑀳𑁄𑀢𑀺.

‘‘𑀓𑀢𑀫𑁄 𑀓𑀢𑀫𑀁 𑀲𑀘𑁆𑀘’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀲𑀁𑀓𑀺𑀮𑁂𑀲𑁄 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀁𑀓𑀺𑀮𑁂𑀲𑀸𑀤𑀻𑀲𑀼 𑀲𑀁𑀓𑀺𑀮𑁂𑀲𑁄 𑀏𑀓𑀤𑁂𑀲𑀯𑀲𑁂𑀦 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀁 𑀳𑁄𑀢𑀺. 𑀢𑀤𑀪𑀺𑀲𑀗𑁆𑀕𑁄𑀢𑀺 𑀢𑀲𑁆𑀫𑀺𑀁 𑀲𑀁𑀓𑀺𑀮𑁂𑀲𑁂 𑀅𑀪𑀺𑀲𑀗𑁆𑀕𑁄 𑀯𑀺𑀬 𑀧𑀯𑀢𑁆𑀢𑁄 𑀮𑁄𑀓𑀺𑀬𑀥𑀫𑁆𑀫𑁄 𑀦𑀺𑀭𑀯𑀲𑁂𑀲𑀯𑀲𑁂𑀦 𑀤𑀼𑀓𑁆𑀔𑀲𑀘𑁆𑀘𑀁 𑀳𑁄𑀢𑀺. 𑀅𑀣 𑀯𑀸 𑀢𑀲𑁆𑀫𑀺𑀁 𑀤𑀼𑀓𑁆𑀔𑁂 𑀅𑀪𑀺𑀲𑀗𑁆𑀕𑁄 𑀯𑀺𑀬 𑀧𑀯𑀢𑁆𑀢𑀸 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁 𑀳𑁄𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑁄 𑀤𑀼𑀓𑁆𑀔𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁 𑀳𑁄𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀁 𑀳𑁄𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. ‘‘𑀢𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀢𑀫𑀁 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀓𑀢𑀫𑁄 𑀧𑀳𑀸𑀢𑀩𑁆𑀩𑁄, 𑀓𑀢𑀫𑁄 𑀪𑀸𑀯𑁂𑀢𑀩𑁆𑀩𑁄, 𑀓𑀢𑀫𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁮𑁦. 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, ‘‘𑀓𑀣𑀁 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀲𑀓𑁆𑀓𑀸𑀬𑀤𑀲𑁆𑀲𑀦𑁂 𑀧𑀯𑀢𑁆𑀢𑀺𑀪𑁂𑀤𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀤𑀺𑀝𑁆𑀞𑀺𑀘𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀲𑀓𑁆𑀓𑀸𑀬𑀤𑀲𑁆𑀲𑀦𑁂 𑀓𑀢𑀫𑁄 𑀧𑀯𑀢𑁆𑀢𑀺𑀪𑁂𑀤𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑁂𑀲𑀁 𑀲𑀓𑁆𑀓𑀸𑀬𑀤𑀲𑁆𑀲𑀦𑁂 𑀅𑀬𑀁 𑀧𑀯𑀢𑁆𑀢𑀺𑀪𑁂𑀤𑁄𑀢𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀤𑀺𑀝𑁆𑀞𑀺𑀘𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀤𑀸𑀦𑀺 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀤𑀲𑁆𑀲𑀦𑁂 𑀧𑀯𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘𑀤𑀺𑀝𑁆𑀞𑀺𑀘𑀭𑀺𑀢𑀸’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑁂𑀲𑀼. 𑀤𑀺𑀝𑁆𑀞𑀺𑀘𑀭𑀺𑀢𑀸 𑀧𑀼𑀕𑁆𑀕𑀮𑀸 𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀁 ‘‘𑀅𑀢𑁆𑀢𑀸’’𑀢𑀺 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀺 𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀩𑀮𑀯𑀪𑀸𑀯𑀢𑁄, 𑀢𑀡𑁆𑀳𑀸𑀘𑀭𑀺𑀢𑀸 𑀧𑀦 𑀭𑀽𑀧𑀁 𑀯𑀸 ‘‘𑀅𑀢𑁆𑀢𑀸’’𑀢𑀺 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 ‘‘𑀅𑀢𑁆𑀢𑀸’’𑀢𑀺 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 ‘‘𑀅𑀢𑁆𑀢𑀸’’𑀢𑀺 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺 𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀅𑀢𑁆𑀢𑀦𑀺𑀬𑀸𑀪𑀺𑀦𑀺𑀯𑁂𑀲𑀲𑁆𑀲 𑀩𑀮𑀯𑀪𑀸𑀯𑀢𑁄. 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀏𑀓𑁂𑀓𑀁 𑀦𑀺𑀲𑁆𑀲𑀸𑀬 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀅𑀬𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀻’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀲𑀓𑁆𑀓𑀸𑀬𑀤𑀲𑁆𑀲𑀦𑁂 𑀧𑀯𑀢𑁆𑀢𑀺𑀪𑁂𑀤𑁄 𑀯𑀺𑀜𑁆𑀜𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀓𑀢𑀫𑁄 𑀧𑀝𑀺𑀧𑀓𑁆𑀔𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀲𑁆𑀲𑀸 𑀧𑀝𑀺𑀧𑀓𑁆𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀚𑀳𑀦𑀯𑀲𑁂𑀦 𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀝𑀺𑀧𑀓𑁆𑀔𑁄, 𑀢𑀲𑁆𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀦𑁆𑀯𑀸𑀬𑀺𑀓𑀸 𑀅𑀦𑀼𑀕𑀼𑀡𑀪𑀸𑀯𑁂𑀦 𑀧𑀯𑀢𑁆𑀢𑀦𑀓𑀸 𑀥𑀫𑁆𑀫𑀸 𑀘 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀚𑀳𑀦𑀯𑀲𑁂𑀦 𑀧𑀝𑀺𑀧𑀓𑁆𑀔𑀸 𑀪𑀯𑀦𑁆𑀢𑀺. ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀦𑁆𑀯𑀸𑀬𑀺𑀓𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺 𑀇𑀫𑁂 𑀥𑀫𑁆𑀫𑀸 𑀅𑀦𑁆𑀯𑀸𑀬𑀺𑀓𑀸 𑀳𑁄𑀦𑁆𑀢𑀺. 𑀅𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑀲𑁆𑀲𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀝𑀺𑀧𑀓𑁆𑀔𑁄 𑀳𑁄𑀢𑀺 𑀧𑀳𑀸𑀬𑀓𑀢𑁆𑀢𑀸. ‘‘𑀢𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀤𑀬𑁄 𑀥𑀫𑁆𑀫𑀸 𑀔𑀦𑁆𑀥𑀢𑁄 𑀓𑀺𑀢𑁆𑀢𑀓𑀸 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀓𑀢𑀫𑁄 𑀔𑀦𑁆𑀥𑁄 𑀲𑀫𑀣𑁄, 𑀓𑀢𑀫𑁄 𑀔𑀦𑁆𑀥𑁄 𑀯𑀺𑀧𑀲𑁆𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀲𑀫𑀣𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀓𑁆𑀓𑀸𑀬𑀸𑀤𑀻𑀲𑀼 𑀓𑀢𑀫𑁄 𑀓𑀢𑀫𑀁 𑀲𑀘𑁆𑀘𑀁, 𑀓𑀢𑀫𑁄 𑀓𑀢𑀫𑀁 𑀲𑀘𑁆𑀘’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀲𑀓𑁆𑀓𑀸𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀢𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, 𑀓𑀣𑀁 𑀅𑀦𑁆𑀢𑀤𑁆𑀯𑀬𑀫𑀚𑁆𑀛𑀺𑀫𑀧𑀝𑀺𑀧𑀤𑀸 𑀦𑀺𑀤𑁆𑀥𑀸𑀭𑀺𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁂 𑀭𑀽𑀧𑀁 𑀅𑀢𑁆𑀢𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑁂𑀲𑀼 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀧𑀼𑀕𑁆𑀕𑀮𑀸 𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀁 ‘‘𑀅𑀢𑁆𑀢𑀸’’𑀢𑀺 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀺. 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀧𑀼𑀕𑁆𑀕𑀮𑀸 ‘‘𑀭𑀽𑀧𑀸𑀤𑀬𑁄 𑀘 𑀅𑀢𑁆𑀢𑀸, 𑀭𑀽𑀧𑀸𑀤𑀻𑀦𑀜𑁆𑀘 𑀅𑀦𑀺𑀘𑁆𑀘𑀢𑁆𑀢𑀸, 𑀅𑀢𑁆𑀢𑀲𑁆𑀲𑀸𑀧𑀺 𑀅𑀦𑀺𑀘𑁆𑀘𑀢𑁆𑀢𑀸 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺, 𑀅𑀢𑁆𑀢𑀸 𑀯𑀺𑀦𑀲𑁆𑀲𑀢𑀺, 𑀅𑀢𑁆𑀢𑀸 𑀧𑀭𑀁 𑀫𑀭𑀡𑀸 𑀦 𑀳𑁄𑀢𑀻’’𑀢𑀺 𑀅𑀪𑀺𑀦𑀺𑀯𑀺𑀲𑀦𑀢𑁄 ‘‘𑀉𑀘𑁆𑀙𑁂𑀤𑀯𑀸𑀤𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑁂 𑀢𑀡𑁆𑀳𑀸𑀘𑀭𑀺𑀢𑀸 𑀧𑀼𑀕𑁆𑀕𑀮𑀸 𑀭𑀽𑀧𑀁 𑀯𑀸 ‘‘𑀅𑀢𑁆𑀢𑀸’’𑀢𑀺 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀁 𑀯𑀸 ‘‘𑀅𑀢𑁆𑀢𑀸’’𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀸 𑀧𑀼𑀕𑁆𑀕𑀮𑀸 ‘‘𑀭𑀽𑀧𑀸𑀤𑀻𑀳𑀺 𑀅𑀢𑁆𑀢𑀸 𑀅𑀜𑁆𑀜𑁄 𑀅𑀜𑁆𑀜𑀢𑁆𑀢𑀸 𑀅𑀢𑁆𑀢𑀸 𑀦𑀺𑀘𑁆𑀘𑁄 𑀲𑀲𑁆𑀲𑀢𑁄’’𑀢𑀺 𑀅𑀪𑀺𑀦𑀺𑀯𑀺𑀲𑀦𑀢𑁄 ‘‘𑀲𑀲𑁆𑀲𑀢𑀯𑀸𑀤𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀢𑀢𑁆𑀣 𑀢𑁂𑀲𑀼 𑀉𑀘𑁆𑀙𑁂𑀤𑀯𑀸𑀤𑀻𑀲𑀲𑁆𑀲𑀢𑀯𑀸𑀤𑀻𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀸 𑀉𑀘𑁆𑀙𑁂𑀤𑀯𑀸𑀤𑀲𑀲𑁆𑀲𑀢𑀯𑀸𑀤𑀸 𑀉𑀪𑁄 𑀅𑀦𑁆𑀢𑀸 𑀅𑀦𑁆𑀢𑀤𑁆𑀯𑀬𑀧𑀝𑀺𑀧𑀤𑀸 𑀳𑁄𑀦𑁆𑀢𑀺. 𑀅𑀬𑀁 𑀅𑀦𑁆𑀢𑀤𑁆𑀯𑀬𑀧𑀝𑀺𑀧𑀤𑀸 𑀲𑀁𑀲𑀸𑀭𑀧𑀯𑀢𑁆𑀢𑀦𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀲𑀁𑀲𑀸𑀭𑀧𑀯𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀲 𑀅𑀦𑁆𑀢𑀤𑁆𑀯𑀬𑀲𑁆𑀲 𑀧𑀝𑀺𑀧𑀚𑁆𑀚𑀦𑀲𑁆𑀲 𑀧𑀚𑀳𑀦𑀯𑀲𑁂𑀦 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑁄𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀧𑀝𑀺𑀧𑀓𑁆𑀔𑁄 𑀳𑁄𑀢𑀺 𑀧𑀳𑀸𑀬𑀓𑀢𑁆𑀢𑀸. 𑀅𑀬𑀁 𑀫𑀕𑁆𑀕𑁄 𑀲𑀁𑀲𑀸𑀭𑀦𑀺𑀯𑀢𑁆𑀢𑀦𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀲𑀁𑀲𑀸𑀭𑀦𑀺𑀯𑀢𑁆𑀢𑀺 𑀳𑁄𑀢𑀺. 𑀢𑀢𑁆𑀣 𑀲𑀁𑀲𑀸𑀭𑀧𑀯𑀢𑁆𑀢𑀺𑀲𑀁𑀲𑀸𑀭𑀦𑀺𑀯𑀢𑁆𑀢𑀻𑀲𑀼 𑀧𑀯𑀢𑁆𑀢𑀺 𑀲𑀁𑀲𑀸𑀭𑀧𑀯𑀢𑁆𑀢𑀺 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀤𑀪𑀺𑀲𑀗𑁆𑀕𑁄 𑀢𑀲𑁆𑀫𑀺𑀁 𑀤𑀼𑀓𑁆𑀔𑁂 𑀅𑀪𑀺𑀲𑀗𑁆𑀕𑁄 𑀢𑀡𑁆𑀳𑀸 𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀡𑁆𑀳𑀸𑀦𑀺𑀭𑁄𑀥𑁄 𑀤𑀼𑀓𑁆𑀔𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀁, 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀺. ‘‘𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀦𑀬𑁄𑀯 𑀅𑀢𑁆𑀣𑁄.

‘‘𑀉𑀘𑁆𑀙𑁂𑀤𑀲𑀲𑁆𑀲𑀢𑀲𑁆𑀲 𑀓𑀺𑀢𑁆𑀢𑀓𑁄 𑀧𑀪𑁂𑀤𑁄, 𑀫𑀕𑁆𑀕𑀲𑁆𑀲 𑀓𑀺𑀢𑁆𑀢𑀓𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀉𑀘𑁆𑀙𑁂𑀤𑀲𑀲𑁆𑀲𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀘𑁆𑀙𑁂𑀤𑀲𑀲𑁆𑀲𑀢𑀅𑀭𑀺𑀬𑀫𑀕𑁆𑀕𑁂𑀲𑀼 𑀉𑀘𑁆𑀙𑁂𑀤𑀲𑀲𑁆𑀲𑀢𑀤𑀲𑁆𑀲𑀦𑀁 𑀲𑀫𑀸𑀲𑀢𑁄 𑀲𑀗𑁆𑀔𑁂𑀧𑀢𑁄 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀉𑀘𑁆𑀙𑁂𑀤𑁄 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑁆𑀢𑀸 𑀧𑀜𑁆𑀘𑀯𑀺𑀥𑁄, 𑀲𑀲𑁆𑀲𑀢𑀤𑀲𑁆𑀲𑀦𑀁 𑀏𑀓𑁂𑀓𑀲𑁆𑀫𑀺𑀁 𑀢𑀺𑀥𑀸 𑀉𑀧𑁆𑀧𑀚𑁆𑀚𑀦𑀢𑁄 𑀧𑀦𑁆𑀦𑀭𑀲𑀯𑀺𑀥𑀦𑁆𑀢𑀺 𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀓𑀢𑀫𑀸𑀦𑀺? 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑀸, 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀯𑀸𑀤𑀸, 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸, 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁩𑁦 𑀆𑀤𑀬𑁄) 𑀆𑀕𑀢𑀸𑀦𑀺. 𑀢𑁂𑀲𑀁 𑀉𑀘𑁆𑀙𑁂𑀤𑀲𑀲𑁆𑀲𑀢𑀤𑀲𑁆𑀲𑀦𑀸𑀦𑀁 𑀢𑁂𑀘𑀢𑁆𑀢𑀸𑀮𑀻𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀧𑀝𑀺𑀧𑀓𑁆𑀔𑁄 𑀫𑀕𑁆𑀕𑁄. 𑀓𑀢𑀫𑁂 𑀢𑁂𑀘𑀢𑁆𑀢𑀸𑀮𑀻𑀲𑀁? ‘‘𑀅𑀦𑀺𑀘𑁆𑀘𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸’’𑀢𑀺 𑀢𑀺𑀲𑁆𑀲𑁄 𑀲𑀜𑁆𑀜𑀸 𑀘 ‘‘𑀧𑀳𑀸𑀦𑀲𑀜𑁆𑀜𑀸 𑀯𑀺𑀭𑀸𑀕𑀲𑀜𑁆𑀜𑀸 𑀦𑀺𑀭𑁄𑀥𑀲𑀜𑁆𑀜𑀸’’𑀢𑀺 𑀢𑀺𑀲𑁆𑀲𑁄 𑀲𑀜𑁆𑀜𑀸 𑀘𑀸𑀢𑀺 𑀙 𑀲𑀜𑁆𑀜𑀸 𑀘 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀢𑁂𑀘𑀢𑁆𑀢𑀸𑀮𑀻𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀧𑀓𑁆𑀔𑁄 𑀫𑀕𑁆𑀕𑁄 𑀦𑀸𑀫.

‘‘𑀲𑀫𑀣𑀯𑀲𑁂𑀦 𑀓𑀢𑀫𑁄 𑀧𑀝𑀺𑀧𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀝𑁆𑀞 𑀯𑀺𑀫𑁄𑀓𑁆𑀔𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀧𑀸𑀓𑀝𑀸. 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺 𑀲𑀫𑀣𑀯𑀲𑁂𑀦 𑀧𑀝𑀺𑀧𑀓𑁆𑀔𑁄 𑀫𑀕𑁆𑀕𑁄 𑀦𑀸𑀫. ‘‘𑀓𑀢𑀫𑀁 𑀜𑀸𑀡𑀁 𑀓𑀢𑀫𑀲𑁆𑀲 𑀥𑀫𑁆𑀫𑀲𑁆𑀲 𑀧𑀤𑀸𑀮𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀘𑀭𑀺𑀢𑁂 𑀧𑀯𑀢𑁆𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀫𑁄𑀳𑁄. 𑀢𑀡𑁆𑀳𑀸𑀘𑀭𑀺𑀢𑁂 𑀧𑀯𑀢𑁆𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀚𑀸𑀮𑀁. 𑀅𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀫𑁄𑀳𑁄. 𑀅𑀦𑀺𑀥𑀦𑀯𑀲𑁂𑀦 𑀧𑀯𑀢𑁆𑀢𑀁 𑀚𑀸𑀮𑀁. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑁂𑀚𑁂𑀢𑁆𑀯𑀸 𑀢𑀺𑀓𑁆𑀔𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘 𑀅𑀭𑀺𑀬𑀫𑀕𑁆𑀕𑀜𑀸𑀡𑀜𑁆𑀘𑀜𑀸𑀡𑀯𑀚𑀺𑀭𑀁 𑀦𑀸𑀫 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀜𑀸𑀡𑀧𑀤𑀝𑁆𑀞𑀸𑀦𑀢𑁆𑀢𑀸. 𑀫𑁄𑀳𑁄 𑀘 𑀚𑀸𑀮𑀜𑁆𑀘 𑀫𑁄𑀳𑀚𑀸𑀮𑀁. 𑀧𑀤𑀸𑀮𑁂𑀢𑀻𑀢𑀺 𑀧𑀤𑀸𑀮𑀦𑀁, 𑀓𑀢𑁆𑀢𑀭𑀺 𑀬𑀼𑀧𑀘𑁆𑀘𑀬𑁄, 𑀫𑁄𑀳𑀚𑀸𑀮𑀲𑁆𑀲 𑀧𑀤𑀸𑀮𑀦𑀦𑁆𑀢𑀺 𑀫𑁄𑀳𑀚𑀸𑀮𑀧𑀤𑀸𑀮𑀦𑀁. 𑀧𑀤𑀸𑀮𑀦𑀜𑁆𑀳𑀺 𑀤𑀼𑀯𑀺𑀥𑀁 𑀯𑀺𑀓𑁆𑀔𑀫𑁆𑀪𑀦𑀧𑀤𑀸𑀮𑀦𑀁 𑀲𑀫𑀼𑀘𑁆𑀙𑁂𑀤𑀧𑀤𑀸𑀮𑀦𑀦𑁆𑀢𑀺. 𑀧𑀼𑀩𑁆𑀩𑀪𑀸𑀕𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀦𑀧𑀤𑀸𑀮𑀦𑀁, 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀧𑀤𑀸𑀮𑀦𑀁 𑀏𑀯 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑁄𑀳𑀚𑀸𑀮𑁂 𑀅𑀯𑀺𑀚𑁆𑀚𑀸 𑀫𑁄𑀳𑁄, 𑀪𑀯𑀢𑀡𑁆𑀳𑀸 𑀚𑀸𑀮𑀁. 𑀅𑀢𑁆𑀢𑀦𑁄 𑀆𑀥𑀸𑀭𑀁 𑀧𑀼𑀕𑁆𑀕𑀮𑀁 𑀤𑀼𑀓𑁆𑀔𑀸𑀤𑀻𑀲𑀼 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀫𑁄𑀳𑁂𑀢𑀻𑀢𑀺 𑀫𑁄𑀳𑁄. 𑀧𑀞𑀫𑀁 𑀚𑀸𑀮𑀁 𑀚𑀝𑀁 𑀮𑀸𑀬𑀺𑀢𑁆𑀯𑀸 𑀚𑀝𑀸𑀯𑀲𑁂𑀦 𑀮𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀚𑀸𑀮𑀁, 𑀅𑀢𑁆𑀢𑀦𑀺 𑀚𑀸𑀢𑀁 𑀫𑀘𑁆𑀙𑀲𑀓𑀼𑀡𑀸𑀤𑀺𑀓𑀁 𑀮𑀸𑀢𑀺 𑀕𑀡𑁆𑀳𑀸𑀢𑀺, 𑀮𑀸𑀧𑁂𑀢𑀺 𑀕𑀡𑁆𑀳𑀸𑀧𑁂𑀢𑀻𑀢𑀺 𑀯𑀸 𑀚𑀸𑀮𑀁, 𑀚𑀸𑀮𑀁 𑀯𑀺𑀬𑀸𑀢𑀺 𑀚𑀸𑀮𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀭𑀽𑀧𑀸𑀤𑀻𑀲𑀼, 𑀲𑀓𑀅𑀢𑁆𑀢𑀪𑀸𑀯𑀸𑀤𑀻𑀲𑀼 𑀘 𑀲𑀁𑀲𑀺𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀚𑀸𑀮𑀁 𑀪𑀯𑀢𑀡𑁆𑀳𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁮𑁦). ‘‘𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀳𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀸𑀤𑀻𑀦𑀁 𑀓𑀺𑀮𑁂𑀲𑀧𑀓𑁆𑀔𑀸𑀦𑀁 𑀦𑀺𑀤𑁆𑀥𑀸𑀭𑀡𑀁 𑀓𑀢𑀁 𑀓𑀣𑀁 𑀓𑁂𑀦 𑀲𑀤𑁆𑀤𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦 𑀯𑀼𑀘𑁆𑀘𑀢𑀺 ‘𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬 𑀘 𑀪𑀯𑀢𑀡𑁆𑀳𑀸𑀬 𑀘𑀸’𑀢𑀺’’ 𑀯𑀼𑀢𑁆𑀢𑀁.

𑁮𑁧. ‘‘𑀇𑀢𑁄 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀧𑀝𑀺𑀧𑀤𑀸𑀤𑀬𑁄 𑀦𑀺𑀤𑁆𑀥𑀸𑀭𑀺𑀢𑀸, 𑀲𑀸𑀲𑀦𑁂 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀧𑀝𑀺𑀧𑀤𑀸𑀤𑀬𑁄 𑀓𑀣𑀁 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀁𑀓𑀺𑀮𑁂𑀲𑀧𑀓𑁆𑀔𑀸 𑀲𑀼𑀢𑁆𑀢𑀢𑁆𑀣𑀸 𑀆𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑀸, 𑀯𑁄𑀤𑀸𑀦𑀧𑀓𑁆𑀔𑀲𑀼𑀢𑁆𑀢𑀢𑁆𑀣𑀸 𑀓𑀣𑀁 𑀤𑀲𑁆𑀲𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀯𑀸 ‘‘𑀢𑀢𑁆𑀣 𑀤𑀺𑀝𑁆𑀞𑀺𑀘𑀭𑀺𑀢𑁄 𑀅𑀲𑁆𑀫𑀺𑀁 𑀲𑀸𑀲𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑁂𑀲𑀼. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀅𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀳𑀼𑀢𑁆𑀯𑀸 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀮𑁆𑀮𑁂𑀔𑀸𑀦𑀼𑀲𑀦𑁆𑀢𑀢𑀯𑀼𑀢𑁆𑀢𑀺 𑀪𑀯𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀮𑁆𑀮𑁂𑀔𑁂 𑀢𑀺𑀩𑁆𑀩𑀕𑀸𑀭𑀯𑁄, 𑀢𑀲𑁆𑀫𑀸 𑀲𑀮𑁆𑀮𑁂𑀔𑁂 𑀢𑀺𑀩𑁆𑀩𑀕𑀸𑀭𑀯𑀢𑁆𑀢𑀸. 𑀢𑀡𑁆𑀳𑀸𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀅𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀳𑀼𑀢𑁆𑀯𑀸 𑀲𑀺𑀓𑁆𑀔𑀸𑀦𑀼𑀲𑀦𑁆𑀢𑀢𑀯𑀼𑀢𑁆𑀢𑀺 𑀪𑀯𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀺𑀓𑁆𑀔𑀸𑀬 𑀢𑀺𑀩𑁆𑀩𑀕𑀸𑀭𑀯𑁄, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀬 𑀢𑀺𑀩𑁆𑀩𑀕𑀸𑀭𑀯𑀢𑁆𑀢𑀸. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸 𑀥𑀫𑁆𑀫𑀸𑀦𑀼𑀲𑀸𑀭𑀻 𑀧𑀼𑀕𑁆𑀕𑀮𑁄 𑀪𑀯𑀢𑀺. 𑀓𑀲𑁆𑀫𑀸? 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀲𑀬𑁂 𑀧𑀜𑁆𑀜𑀸𑀲𑀤𑀺𑀲𑀧𑀯𑀢𑁆𑀢𑀦𑀢𑁄. 𑀢𑀡𑁆𑀳𑀸𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸 𑀲𑀤𑁆𑀥𑀸𑀦𑀼𑀲𑀸𑀭𑀻 𑀪𑀯𑀢𑀺. 𑀓𑀲𑁆𑀫𑀸? 𑀢𑀡𑁆𑀳𑀸𑀯𑀲𑁂𑀦 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑀢𑁆𑀢𑀸. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬, 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀺, 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬, 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀺 𑀲𑀼𑀔𑁂𑀦 𑀓𑀺𑀮𑁂𑀲𑁂𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀼𑀁 𑀲𑀫𑀢𑁆𑀣𑀢𑁆𑀢𑀸. 𑀢𑀡𑁆𑀳𑀸𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬, 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀺, 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬, 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀺 𑀤𑀼𑀓𑁆𑀔𑁂𑀦 𑀓𑀺𑀮𑁂𑀲𑁂𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀼𑀁 𑀲𑀫𑀢𑁆𑀣𑀢𑁆𑀢𑀸.

‘‘𑀢𑀣𑀸 𑀓𑀲𑁆𑀫𑀸 𑀦𑀺𑀬𑁆𑀬𑀸𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀺𑀁 𑀓𑀸𑀭𑀡𑀁 𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀁 𑀬𑁂𑀦 𑀓𑀸𑀭𑀡𑁂𑀦 𑀦𑀺𑀬𑁆𑀬𑀸𑀢𑀺, 𑀢𑀁 𑀓𑀸𑀭𑀡𑀁 𑀓𑀺𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀢𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀓𑀸𑀫𑀸 𑀲𑀼𑀔𑁂𑀦 𑀅𑀧𑀭𑀺𑀘𑁆𑀘𑀢𑁆𑀢𑀸 𑀳𑀺 𑀬𑀲𑁆𑀫𑀸 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀓𑀸𑀫𑀸𑀦𑀁 𑀲𑀼𑀔𑁂𑀦 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀢𑀣𑀸 𑀦𑀺𑀬𑁆𑀬𑀸𑀢𑀺. 𑀲𑁄 𑀢𑀡𑁆𑀳𑀸𑀘𑀭𑀺𑀢𑁄 𑀓𑀸𑀫𑁂𑀳𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀘𑀺𑀬𑀫𑀸𑀦𑁄 𑀤𑀼𑀓𑁆𑀔𑁂𑀦 𑀧𑀝𑀺𑀦𑀺𑀲𑁆𑀲𑀭𑀢𑀺, 𑀤𑀦𑁆𑀥𑀜𑁆𑀘 𑀥𑀫𑁆𑀫𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀆𑀚𑀸𑀦𑀸𑀢𑀺. 𑀬𑁄 𑀧𑀦 𑀅𑀬𑀁 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀘𑀭𑀺𑀢𑁄 𑀳𑁄𑀢𑀺, 𑀲𑁄 𑀅𑀬𑀁 𑀤𑀺𑀝𑁆𑀞𑀺𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀆𑀤𑀺𑀢𑁄 𑀆𑀤𑀺𑀫𑁆𑀳𑀺𑀬𑁂𑀯 𑀓𑀸𑀫𑁂𑀳𑀺 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑁂𑀳𑀺 𑀅𑀦𑀢𑁆𑀣𑀺𑀓𑁄 𑀪𑀯𑀢𑀺. 𑀲𑁄 𑀤𑀺𑀝𑁆𑀞𑀺𑀘𑀭𑀺𑀢𑁄 𑀢𑀢𑁄 𑀢𑁂𑀳𑀺 𑀓𑀸𑀫𑁂𑀳𑀺 𑀯𑀺𑀯𑁂𑀘𑀺𑀬𑀫𑀸𑀦𑁄 𑀔𑀺𑀧𑁆𑀧𑀜𑁆𑀘 𑀲𑀼𑀔𑁂𑀦 𑀧𑀝𑀺𑀦𑀺𑀲𑁆𑀲𑀭𑀢𑀺, 𑀔𑀺𑀧𑁆𑀧𑀜𑁆𑀘 𑀥𑀫𑁆𑀫𑀁 𑀆𑀚𑀸𑀦𑀸𑀢𑀺.

‘‘𑀢𑀡𑁆𑀳𑀸𑀘𑀭𑀺𑀢𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀻𑀢𑀺 𑀏𑀓𑁂𑀓𑀸𑀬 𑀧𑀝𑀺𑀧𑀤𑀸𑀬 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀤𑀼𑀓𑁆𑀔𑀸𑀧𑀺 𑀧𑀝𑀺𑀧𑀤𑀸 𑀤𑀼𑀯𑀺𑀥𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀘 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘, 𑀲𑀼𑀔𑀸𑀧𑀺 𑀧𑀝𑀺𑀧𑀤𑀸 𑀤𑀼𑀯𑀺𑀥𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀘 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀏𑀯𑀁 𑀲𑀢𑀺 𑀏𑀓𑁄𑀯 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀸𑀢𑀻𑀢𑀺 𑀆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀢𑁆𑀢𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸𑀧𑀺 𑀤𑀼𑀯𑀺𑀥𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀧𑀺, 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸𑀧𑀺 𑀤𑀼𑀯𑀺𑀥𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀧𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀬𑁂 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀪𑀯𑀦𑁆𑀢𑀺, 𑀢𑁂 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸 𑀤𑀦𑁆𑀥𑀜𑁆𑀘 𑀧𑀝𑀺𑀦𑀺𑀲𑁆𑀲𑀭𑀦𑁆𑀢𑀺, 𑀤𑀦𑁆𑀥𑀜𑁆𑀘 𑀥𑀫𑁆𑀫𑀁 𑀆𑀚𑀸𑀦𑀦𑁆𑀢𑀺. 𑀬𑁂 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀪𑀯𑀦𑁆𑀢𑀺, 𑀢𑁂 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸 𑀔𑀺𑀧𑁆𑀧𑀜𑁆𑀘 𑀧𑀝𑀺𑀦𑀺𑀲𑁆𑀲𑀭𑀦𑁆𑀢𑀺, 𑀔𑀺𑀧𑁆𑀧𑀜𑁆𑀘 𑀥𑀫𑁆𑀫𑀁 𑀆𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀏𑀓𑁂𑀓𑀲𑁆𑀲𑁂𑀯 𑀏𑀓𑁂𑀓𑀸 𑀧𑀝𑀺𑀧𑀤𑀸 𑀬𑀼𑀢𑁆𑀢𑀸𑀯𑀸𑀢𑀺. ‘‘𑀇𑀫𑀸𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀦𑁆𑀢𑀺𑀬𑁂𑀯, 𑀦 𑀦𑀺𑀬𑁆𑀬𑀺𑀁𑀲𑀼 𑀦𑀺𑀬𑁆𑀬𑀺𑀲𑁆𑀲𑀦𑁆𑀢𑀻𑀢𑀺 𑀆𑀧𑀚𑁆𑀚𑁂𑀬𑁆𑀬 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸 𑀘𑀢𑀲𑁆𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀻𑀢𑁂𑀧𑀺 𑀇𑀫𑀸𑀳𑀺 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀺𑀁𑀲𑀼, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀦𑀺𑀬𑁆𑀬𑀦𑁆𑀢𑀺, 𑀅𑀦𑀸𑀕𑀢𑁂𑀧𑀺 𑀦𑀺𑀬𑁆𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀬𑀣𑀸 ‘‘𑀧𑀩𑁆𑀩𑀢𑁄 𑀢𑀺𑀝𑁆𑀞𑀢𑀻’’𑀢𑀺.

𑀏𑀯𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀘𑀢𑀼𑀓𑁆𑀓𑀫𑀕𑁆𑀕𑀁 𑀧𑀝𑀺𑀧𑀤𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. ‘‘𑀓𑀺𑀫𑀢𑁆𑀣𑀁 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀩𑀼𑀥𑀚𑀦𑀲𑁂𑀯𑀺𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻𑀢𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀦𑀁 𑀯𑀲𑁂𑀦 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑁆𑀯𑀺𑀤𑀺𑀲𑀸 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀧𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁂 𑀤𑁆𑀯𑀺𑀤𑀺𑀲𑀸 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀧𑀺 𑀤𑀲𑁆𑀲𑀺𑀢𑀸. 𑀅𑀬𑀁 𑀘𑀢𑀼𑀩𑁆𑀩𑀺𑀥𑀸 𑀘𑀢𑀼𑀲𑀘𑁆𑀘𑀬𑁄𑀚𑀦𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀪𑀽𑀫𑀺 𑀲𑀫𑀼𑀝𑁆𑀞𑀸𑀦𑀪𑀸𑀯𑀢𑁄𑀢𑀺. ‘‘𑀢𑀣𑀸𑀯𑀺𑀥𑀸𑀬 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀬 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀪𑀽𑀫𑀺𑀪𑀸𑀯𑁄 𑀓𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁮𑁨. ‘‘𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀪𑀽𑀢𑀸 𑀪𑀽𑀫𑀺 𑀤𑀲𑁆𑀲𑀺𑀢𑀸, 𑀢𑀲𑁆𑀲 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀓𑀢𑁆𑀣 𑀓𑀢𑀫𑀸 𑀤𑀺𑀲𑀸 𑀓𑀺𑀢𑁆𑀢𑀓𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀺-𑀲𑀤𑁆𑀤𑁄 𑀧𑀓𑁆𑀔𑀦𑁆𑀢𑀭𑀢𑁆𑀣𑁄. 𑀬𑁂 𑀤𑀺𑀲𑀸𑀪𑀽𑀢𑀸 𑀆𑀳𑀸𑀭𑀸𑀤𑀬𑁄 𑀥𑀫𑁆𑀫𑀸 𑀯𑁂𑀬𑁆𑀬𑀸𑀓𑀭𑀡𑁂𑀲𑀼 ‘‘𑀓𑀼𑀲𑀮𑀸𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀁, 𑀢𑁂 𑀤𑀺𑀲𑀸𑀪𑀽𑀢𑀸 𑀆𑀳𑀸𑀭𑀸𑀤𑀬𑁄 𑀥𑀫𑁆𑀫𑀸 𑀤𑀼𑀯𑀺𑀥𑁂𑀦 ‘‘𑀇𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸, 𑀇𑀫𑁂 𑀓𑀼𑀲𑀮𑀸 𑀯𑁄𑀤𑀸𑀦𑀥𑀫𑁆𑀫𑀸’’𑀢𑀺 𑀤𑀼𑀯𑀺𑀥𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸 𑀆𑀮𑁄𑀘𑀺𑀢𑀩𑁆𑀩𑀸. ‘‘𑀓𑀢𑀫𑁂𑀦 𑀤𑀼𑀯𑀺𑀥𑁂𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀮𑁄𑀓𑀯𑀝𑁆𑀝𑀸𑀦𑀼𑀲𑀸𑀭𑀻 𑀘 𑀮𑁄𑀓𑀯𑀺𑀯𑀝𑁆𑀝𑀸𑀦𑀼𑀲𑀸𑀭𑀻 𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀓𑀢𑀫𑀁 𑀯𑀝𑁆𑀝𑀁, 𑀓𑀢𑀫𑀁 𑀯𑀺𑀯𑀝𑁆𑀝’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀯𑀝𑁆𑀝𑀁 𑀦𑀸𑀫 𑀲𑀁𑀲𑀸𑀭𑁄, 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀁𑀲𑀸𑀭𑀲𑁆𑀲 𑀓𑀢𑀫𑁄 𑀳𑁂𑀢𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀓𑀫𑁆𑀫𑀓𑀺𑀮𑁂𑀲𑀸 𑀳𑁂𑀢𑀼 𑀲𑀁𑀲𑀸𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. ‘‘𑀓𑀢𑀫𑀁 𑀓𑀫𑁆𑀫𑀁 𑀦𑀸𑀫, 𑀘𑁂𑀢𑀦𑀸𑀬𑁂𑀯 𑀓𑀫𑁆𑀫𑀁 𑀦𑀸𑀫 𑀓𑀺𑀁, 𑀉𑀤𑀸𑀳𑀼 𑀘𑁂𑀢𑀲𑀺𑀓𑀜𑁆𑀘 𑀨𑀮𑀤𑀸𑀦𑀲𑀫𑀢𑁆𑀣𑀸𑀲𑀫𑀢𑁆𑀣𑀫𑁆𑀧𑀺 𑀓𑀫𑁆𑀫𑀁 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀓𑀫𑁆𑀫𑀓𑀺𑀮𑁂𑀲𑁂𑀲𑀼. ‘‘𑀢𑀁 𑀓𑀫𑁆𑀫𑀁 𑀓𑀣𑀁 𑀓𑁂𑀦 𑀧𑀓𑀸𑀭𑁂𑀦 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀘𑁂 𑀯𑀤𑁂𑀬𑁆𑀬, 𑀬𑀣𑀸 𑀬𑁂𑀦 𑀉𑀧𑀘𑀬𑁂𑀦 𑀓𑀢𑀁 𑀓𑀫𑁆𑀫𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀉𑀧𑀘𑀬𑁂 𑀢𑀁 𑀓𑀫𑁆𑀫𑀁 𑀤𑀝𑁆𑀞𑀩𑁆𑀩𑀁. ‘‘𑀢𑁂 𑀓𑀺𑀮𑁂𑀲𑀸 𑀓𑀢𑀫𑁂𑀳𑀺 𑀥𑀫𑁆𑀫𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸’’𑀢𑀺 𑀘𑁂 𑀧𑀼𑀘𑁆𑀙𑁂𑀬𑁆𑀬, 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀘𑀢𑀽𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. ‘‘𑀢𑁂 𑀓𑀺𑀮𑁂𑀲𑀸 𑀓𑀢𑁆𑀣 𑀤𑀝𑁆𑀞𑀩𑁆𑀩𑀸’’𑀢𑀺 𑀘𑁂 𑀧𑀼𑀘𑁆𑀙𑁂𑀬𑁆𑀬, 𑀤𑀲𑀯𑀢𑁆𑀣𑀼𑀓𑁂 𑀓𑀺𑀮𑁂𑀲𑀧𑀼𑀜𑁆𑀚𑁂 𑀢𑁂 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸.

‘‘𑀓𑀢𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀻’’𑀢𑀺 𑀘𑁂 𑀧𑀼𑀘𑁆𑀙𑁂𑀬𑁆𑀬, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸, 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀬𑁄𑀕𑀸, 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸, 𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀘𑀢𑁆𑀢𑀸𑀭𑁄 𑀑𑀖𑀸, 𑀘𑀢𑁆𑀢𑀸𑀭𑁄 𑀲𑀮𑁆𑀮𑀸, 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀻𑀢𑀺 𑀤𑀲 𑀯𑀢𑁆𑀣𑀽𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑀘𑀢𑀼𑀦𑁆𑀦𑀁 𑀓𑀺𑀘𑁆𑀘𑀯𑀲𑁂𑀦 𑀏𑀓𑀢𑁆𑀢𑀸. 𑀏𑀢𑁆𑀣 𑀘 𑀓𑀺𑀮𑁂𑀲𑀸𑀦𑀁 𑀧𑀘𑁆𑀘𑀬𑁄 𑀯𑀢𑁆𑀣𑀼𑀓𑀸𑀫𑁄𑀧𑀺 𑀓𑀺𑀮𑁂𑀲𑁄𑀧𑀺 𑀓𑀺𑀮𑁂𑀲𑀯𑀢𑁆𑀣𑀼 𑀳𑁄𑀢𑀺 𑀧𑀼𑀭𑀺𑀫𑀸𑀦𑀁 𑀧𑀼𑀭𑀺𑀫𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄.

‘‘𑀓𑀢𑀫𑁄 𑀓𑀢𑀫𑁄 𑀓𑀢𑀫𑀲𑁆𑀲 𑀓𑀢𑀫𑀲𑁆𑀲 𑀯𑀢𑁆𑀣𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀞𑀫𑁂 𑀆𑀳𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀮𑀫𑁆𑀩𑀺𑀢𑀩𑁆𑀩𑁂 𑀧𑀞𑀫𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀧𑀞𑀫𑁄 ‘‘𑀭𑀽𑀧𑀁 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀆𑀮𑀫𑁆𑀩𑀺𑀢𑀩𑁆𑀩𑁂 𑀤𑀼𑀢𑀺𑀬𑁂 𑀨𑀲𑁆𑀲𑀸𑀳𑀸𑀭𑁂 𑀤𑀼𑀢𑀺𑀬𑁄 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸 𑀲𑀼𑀔𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄 𑀧𑀯𑀢𑁆𑀢𑀢𑀺. 𑀆𑀮𑀫𑁆𑀩𑀺𑀢𑀩𑁆𑀩𑁂 𑀢𑀢𑀺𑀬𑁂 𑀘𑀺𑀢𑁆𑀢𑀸𑀳𑀸𑀭𑁂 𑀢𑀢𑀺𑀬𑁄 ‘‘𑀘𑀺𑀢𑁆𑀢𑀁 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀧𑀯𑀢𑁆𑀢𑀢𑀺, 𑀆𑀮𑀫𑁆𑀩𑀺𑀢𑀩𑁆𑀩𑁂 𑀘𑀢𑀼𑀢𑁆𑀣𑁂 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂 ‘‘𑀥𑀫𑁆𑀫𑁄 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀆𑀮𑀫𑁆𑀩𑀺𑀢𑀩𑁆𑀩𑁂 𑀧𑀞𑀫𑁂 ‘‘𑀭𑀽𑀧𑀁 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀧𑀞𑀫𑀁 𑀓𑀸𑀫𑀼𑀧𑀸𑀤𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀦𑀬𑀸𑀦𑀼𑀲𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁩. ‘‘𑀢𑁂𑀲𑀼 𑀆𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀓𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀆𑀳𑀸𑀭𑀸𑀤𑀻𑀲𑀼, 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑁂𑀲𑀼 𑀯𑀸. 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀭𑀽𑀧𑀯𑁂𑀤𑀦𑀸𑀲𑀼 𑀢𑀺𑀩𑁆𑀩𑀘𑁆𑀙𑀦𑁆𑀤𑀭𑀸𑀕𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀬𑁄 𑀘 𑀨𑀲𑁆𑀲𑀸𑀳𑀸𑀭𑁄 𑀧𑀯𑀢𑁆𑀢𑀢𑀺, 𑀇𑀫𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑀨𑀲𑁆𑀲𑀸𑀳𑀸𑀭𑀸 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀪𑀯𑀦𑁆𑀢𑀺. 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀥𑀫𑁆𑀫𑀘𑀺𑀢𑁆𑀢𑁂𑀲𑀼 𑀩𑀮𑀯𑀅𑀢𑁆𑀢𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀬𑁄 𑀘 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄, 𑀬𑁄 𑀘 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀯𑀢𑁆𑀢𑀢𑀺, 𑀇𑀫𑁂 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀯𑀺𑀜𑁆𑀜𑀸𑀡𑀸𑀳𑀸𑀭𑀸 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀪𑀯𑀦𑁆𑀢𑀺. ‘‘𑀢𑀢𑁆𑀣 𑀬𑁄 𑀘 𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀢𑀡𑁆𑀳𑀸𑀧𑀥𑀸𑀦𑀢𑁆𑀢𑀸 𑀘𑁂𑀯 𑀢𑀡𑁆𑀳𑀸𑀲𑀪𑀸𑀯𑀢𑁆𑀢𑀸 𑀘, 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀤𑀺𑀝𑁆𑀞𑀺𑀧𑀥𑀸𑀦𑀢𑁆𑀢𑀸 𑀘𑁂𑀯 𑀤𑀺𑀝𑁆𑀞𑀺𑀲𑀪𑀸𑀯𑀢𑁆𑀢𑀸 𑀘𑀸𑀢𑀺.

𑁮𑁪. ‘‘𑀓𑀢𑀫𑀲𑁆𑀫𑀺𑀁 𑀧𑀞𑀫𑀸𑀤𑀺𑀓𑁂 𑀆𑀳𑀸𑀭𑁂 𑀓𑀢𑀫𑁄 𑀧𑀞𑀫𑀸𑀤𑀺𑀓𑁄 𑀯𑀺𑀧𑀮𑁆𑀮𑀸𑀲𑁄 𑀧𑀯𑀢𑁆𑀢𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂’’𑀢𑀺𑀆𑀤𑀺𑀦𑀸 𑀦𑀸𑀫𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀺. ‘‘𑀓𑀢𑀫𑀲𑁆𑀫𑀺𑀁 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀓𑀢𑀫𑀁 𑀉𑀧𑀸𑀤𑀺𑀬𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀧𑀼𑀕𑁆𑀕𑀮𑁄 𑀓𑀸𑀫𑁂 𑀬𑁂𑀦 𑀉𑀧𑀸𑀤𑀸𑀦𑁂𑀦 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀉𑀧𑀸𑀤𑀸𑀦𑀁 ‘‘𑀓𑀸𑀫𑀼𑀧𑀸𑀤𑀸𑀦𑀁 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑁂𑀲𑀼 𑀇𑀫𑀺𑀦𑀸 𑀦𑀬𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀬𑁂𑀦 𑀓𑀸𑀫𑀼𑀧𑀸𑀤𑀸𑀦𑁂𑀦 𑀓𑀸𑀫𑁂𑀳𑀺 𑀧𑀼𑀕𑁆𑀕𑀮𑁄 𑀲𑀁𑀬𑀼𑀚𑁆𑀚𑀢𑀺, 𑀅𑀬𑀁 𑀓𑀸𑀫𑀼𑀧𑀸𑀤𑀸𑀦𑀥𑀫𑁆𑀫𑁄 ‘𑀓𑀸𑀫𑀬𑁄𑀕𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑁂𑀲𑀸𑀦𑀁 𑀬𑁄𑀚𑀦𑀢𑁆𑀣𑀸𑀤𑀬𑁄 𑀧𑀸𑀴𑀺𑀢𑁄, 𑀅𑀝𑁆𑀞𑀓𑀣𑀸𑀢𑁄 𑀘 𑀧𑀸𑀓𑀝𑀸.

𑁮𑁫. ‘‘𑀆𑀳𑀸𑀭𑀸𑀤𑀻𑀲𑀼 𑀓𑀢𑀫𑁂 𑀓𑀢𑀫𑀸 𑀤𑀺𑀲𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀇𑀫𑀸 𑀘𑀢𑀲𑁆𑀲𑁄 𑀤𑀺𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀼 𑀆𑀳𑀸𑀭𑀘𑀢𑀼𑀓𑁆𑀓𑀸𑀤𑀻𑀲𑀼 𑀤𑀲𑀲𑀼 𑀘𑀢𑀼𑀓𑁆𑀓𑁂𑀲𑀼 𑀧𑀞𑀫𑁄 𑀧𑀞𑀫𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀸𑀤𑀺𑀓𑁄 𑀧𑀞𑀫𑀸 𑀤𑀺𑀲𑀸, 𑀤𑀼𑀢𑀺𑀬𑁄 𑀤𑀼𑀢𑀺𑀬𑁄 𑀨𑀲𑁆𑀲𑀸𑀳𑀸𑀭𑀸𑀤𑀺𑀓𑁄 𑀤𑀼𑀢𑀺𑀬𑀸 𑀤𑀺𑀲𑀸, 𑀢𑀢𑀺𑀬𑁄 𑀢𑀢𑀺𑀬𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑀸𑀤𑀺𑀓𑁄 𑀢𑀢𑀺𑀬𑀸 𑀤𑀺𑀲𑀸, 𑀘𑀢𑀼𑀢𑁆𑀣𑁄 𑀘𑀢𑀼𑀢𑁆𑀣𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀸𑀤𑀺𑀓𑁄 𑀘𑀢𑀼𑀢𑁆𑀣𑀸 𑀤𑀺𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀢𑀸𑀲𑀼 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀢𑁂𑀲𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀓𑀢𑀫𑁂 𑀥𑀫𑁆𑀫𑀸 𑀓𑀢𑀫𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑁂 𑀆𑀳𑀸𑀭𑀸𑀤𑀬𑁄 𑀥𑀫𑁆𑀫𑀸 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀺𑀪𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄…𑀧𑁂… 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀉𑀤𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀆𑀳𑀸𑀭𑁄𑀢𑀺𑀆𑀤𑀺 𑀆𑀳𑀸𑀭𑀸𑀤𑀻𑀲𑀼 𑀬𑁂 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁮𑁫) 𑀯𑀼𑀢𑁆𑀢𑀁. 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀦𑁆𑀢𑀺 𑀏𑀓𑀤𑁂𑀲𑀪𑀽𑀢𑀸𑀦𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁. 𑀅𑀢𑁆𑀣𑁄𑀢𑀺 𑀲𑀪𑀸𑀯𑀥𑀫𑁆𑀫𑁄. 𑀲𑀤𑁆𑀤𑀢𑁆𑀣𑁄 𑀳𑀺 𑀅𑀲𑀫𑀸𑀦𑁄𑀢𑀺. ‘‘𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀘 𑀲𑀤𑁆𑀤𑀢𑁆𑀣𑀲𑁆𑀲 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀺.

‘‘𑀓𑀩𑀴𑀻𑀓𑀸𑀭𑀸𑀳𑀸𑀭𑀸𑀤𑀻𑀲𑀼 𑀓𑀢𑀫𑁂 𑀆𑀳𑀸𑀭𑀸𑀤𑀬𑁄 𑀓𑀢𑀫𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀭𑀺𑀜𑁆𑀜𑀁 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁄 𑀘 𑀓𑀩𑀴𑀻𑀓𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸. 𑀲𑀩𑁆𑀩𑁂𑀢𑀺 𑀲𑀩𑁆𑀩𑁂 𑀆𑀳𑀸𑀭𑀸𑀤𑀬𑁄 𑀥𑀫𑁆𑀫𑀸 𑀮𑁄𑀓𑀯𑀝𑁆𑀝𑀸𑀦𑀼𑀲𑀸𑀭𑀺𑀦𑁄 𑀪𑀯𑀦𑁆𑀢𑀺. 𑀢𑁂𑀢𑀺 𑀢𑁂 𑀲𑀩𑁆𑀩𑁂 𑀆𑀳𑀸𑀭𑀸𑀤𑀬𑁄 𑀥𑀫𑁆𑀫𑀸. 𑀮𑁄𑀓𑀸𑀢𑀺 𑀮𑁄𑀓𑀢𑁄 𑀯𑀝𑁆𑀝𑀢𑁄. 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀦𑀺𑀬𑁆𑀬𑀦𑁆𑀢𑀺.

𑁮𑁬. 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀺𑀲𑀸𑀪𑀽𑀢𑀸 𑀆𑀳𑀸𑀭𑀘𑀢𑀼𑀓𑁆𑀓𑀸𑀤𑀬𑁄 𑀤𑀲 𑀘𑀢𑀼𑀓𑁆𑀓𑀸 𑀥𑀫𑁆𑀫𑀸 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀯𑁄𑀤𑀸𑀦𑀧𑀓𑁆𑀔𑁂 𑀓𑀢𑀫𑁂 𑀤𑀺𑀲𑀸𑀪𑀽𑀢𑀸 𑀥𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀯𑁄𑀤𑀸𑀦𑀧𑀓𑁆𑀔𑁂 𑀤𑀺𑀲𑀸𑀪𑀽𑀢𑁂 𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀅𑀭𑀺𑀬𑀯𑀺𑀳𑀸𑀭𑀸 𑀆𑀦𑁂𑀜𑁆𑀚𑀯𑀺𑀳𑀸𑀭𑀸𑀢𑀺 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸. 𑀢𑁂𑀲𑀼 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄 𑀤𑀺𑀩𑁆𑀩𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄 𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑀸𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸𑀢𑀺 𑀫𑀸𑀦𑀧𑀳𑀸𑀦𑀁 𑀆𑀮𑀬𑀲𑀫𑀼𑀕𑁆𑀖𑀸𑀢𑁄 𑀅𑀯𑀺𑀚𑁆𑀚𑀸𑀧𑀳𑀸𑀦𑀁 𑀪𑀯𑀽𑀧𑀲𑀫𑁄𑀢𑀺 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀸. 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀻𑀢𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺. 𑀘𑀢𑀲𑁆𑀲𑁄 𑀲𑀫𑀸𑀥𑀺𑀪𑀸𑀯𑀦𑀸𑀢𑀺 𑀙𑀦𑁆𑀤𑀲𑀫𑀸𑀥𑀺𑀪𑀸𑀯𑀦𑀸 𑀯𑀻𑀭𑀺𑀬𑀲𑀫𑀸𑀥𑀺𑀪𑀸𑀯𑀦𑀸 𑀘𑀺𑀢𑁆𑀢𑀲𑀫𑀸𑀥𑀺𑀪𑀸𑀯𑀦𑀸 𑀯𑀻𑀫𑀁𑀲𑀸𑀲𑀫𑀸𑀥𑀺𑀪𑀸𑀯𑀦𑀸𑀢𑀺 𑀘𑀢𑀲𑁆𑀲𑁄 𑀲𑀫𑀸𑀥𑀺𑀪𑀸𑀯𑀦𑀸. 𑀘𑀢𑁆𑀢𑀸𑀭𑁄 𑀲𑀼𑀔𑀪𑀸𑀕𑀺𑀬𑀸𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀢𑀧𑁄 𑀩𑁄𑀚𑁆𑀛𑀗𑁆𑀕𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄𑀢𑀺 𑀘𑀢𑁆𑀢𑀸𑀭𑁄 𑀲𑀼𑀔𑀪𑀸𑀕𑀺𑀬𑀸. 𑀅𑀯𑀲𑁂𑀲𑀸 𑀧𑀸𑀓𑀝𑀸.

‘‘𑀘𑀢𑀽𑀲𑀼 𑀘𑀢𑀽𑀲𑀼 𑀧𑀝𑀺𑀧𑀤𑀸𑀤𑀻𑀲𑀼 𑀓𑀢𑀫𑁄 𑀧𑀝𑀺𑀧𑀤𑀸𑀤𑀺𑀓𑁄 𑀧𑀞𑀫𑁄 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀓𑁄 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀞𑀫𑀸 𑀧𑀝𑀺𑀧𑀤𑀸 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀝𑀺𑀧𑀤𑀸𑀤𑀬𑁄 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀸𑀤𑀺𑀓𑀸, 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀧𑀦 𑀲𑀢𑀺𑀧𑀤𑀝𑁆𑀞𑀸𑀦𑀸𑀤𑀺𑀓𑀸, 𑀢𑀲𑁆𑀫𑀸 ‘𑀧𑀞𑀫𑀸 𑀧𑀝𑀺𑀧𑀤𑀸 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦’𑀦𑁆𑀢𑀺𑀆𑀤𑀺𑀬𑁄𑀚𑀦𑀸 𑀓𑀸𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀧𑀞𑀫𑀸 𑀧𑀝𑀺𑀧𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀽𑀭𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀽𑀭𑀓𑀧𑀽𑀭𑁂𑀢𑀩𑁆𑀩𑀪𑀸𑀯𑀢𑁄 𑀢𑀣𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 ‘‘𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑁂 𑀧𑀝𑀺𑀧𑀤𑀸𑀤𑀬𑁄 𑀓𑀢𑀫𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀓𑁂 𑀧𑀽𑀭𑁂𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀞𑀫𑀸 𑀧𑀝𑀺𑀧𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀽𑀭𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁮𑁭. ‘‘𑀢𑁂𑀲𑀼 𑀤𑀲𑀲𑀼 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀻𑀲𑀼 𑀓𑀢𑀫𑁂 𑀥𑀫𑁆𑀫𑀸 𑀓𑀢𑀫𑀸 𑀤𑀺𑀲𑀸, 𑀓𑀢𑀫𑁂 𑀥𑀫𑁆𑀫𑀸 𑀓𑀢𑀫𑀸 𑀤𑀺𑀲𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀇𑀫𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀧𑀞𑀫𑀸 𑀧𑀝𑀺𑀧𑀤𑀸, 𑀧𑀞𑀫𑁄 𑀲𑀢𑀺𑀧𑀝𑁆𑀞𑀸𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑀲𑀲𑀼 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀻𑀲𑀼. 𑀇𑀫𑀸 𑀫𑀬𑀸 𑀯𑀼𑀘𑁆𑀘𑀫𑀸𑀦𑀸 𑀧𑀞𑀫𑀸 𑀧𑀝𑀺𑀧𑀤𑀸𑀤𑀬𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀪𑀯𑀦𑁆𑀢𑀺.

‘‘𑀢𑁂𑀲𑀼 𑀘𑀢𑀽𑀲𑀼 𑀤𑀺𑀲𑀸𑀪𑀽𑀢𑁂𑀲𑀼 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀻𑀲𑀼 𑀓𑀢𑀫𑁄 𑀤𑀺𑀲𑀸𑀪𑀽𑀢𑁄 𑀅𑀢𑁆𑀣𑁄 𑀓𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑁂𑀲𑀚𑁆𑀚’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀧𑀞𑀫𑀸 𑀧𑀝𑀺𑀧𑀤𑀸…𑀧𑁂… 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀉𑀤𑀢𑁆𑀢𑀲𑁆𑀲 𑀪𑁂𑀲𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀢𑁂𑀲𑀼 𑀤𑀲𑀲𑀼 𑀧𑀝𑀺𑀧𑀤𑀸𑀤𑀺𑀘𑀢𑀼𑀓𑁆𑀓𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑀫𑁄 𑀓𑀢𑀫𑁄 𑀓𑀢𑀫𑀁 𑀓𑀢𑀫𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀤𑀼𑀓𑁆𑀔𑀸 𑀘 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀦 𑀝𑀻𑀓𑀸𑀬𑀁 𑀯𑀺𑀢𑁆𑀣𑀸𑀭𑁂𑀦 𑀯𑀼𑀢𑁆𑀢𑁄 𑀧𑀸𑀓𑀝𑁄. 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀺𑀲𑀸𑀪𑀽𑀢𑀸 𑀆𑀳𑀸𑀭𑀘𑀢𑀼𑀓𑁆𑀓𑀸𑀤𑀬𑁄 𑀤𑀲 𑀘𑀢𑀼𑀓𑁆𑀓𑀸 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑀺𑀢𑀸, 𑀯𑁄𑀤𑀸𑀦𑀧𑀓𑁆𑀔𑁂 𑀧𑀦 𑀤𑀺𑀲𑀸𑀪𑀽𑀢𑀸 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀬𑁄 𑀤𑀲 𑀘𑀢𑀼𑀓𑁆𑀓𑀸 𑀲𑀫𑀢𑀺𑀓𑁆𑀓𑀫𑀧𑀳𑀸𑀬𑀓𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑀺𑀢𑀸.

‘‘𑀢𑁂𑀲𑀁 𑀆𑀳𑀸𑀭𑀘𑀢𑀼𑀓𑁆𑀓𑀸𑀤𑀻𑀦𑀁 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀧𑀳𑀸𑀦𑀲𑀗𑁆𑀔𑀸𑀢𑀁 𑀬𑀁 𑀯𑀺𑀓𑁆𑀓𑀻𑀴𑀺𑀢𑀜𑁆𑀘 𑀢𑁂𑀲𑀁 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀻𑀦𑀁 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀬𑀁 𑀯𑀺𑀓𑁆𑀓𑀻𑀴𑀺𑀢𑀜𑁆𑀘 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀁 𑀬𑀁 𑀯𑀺𑀓𑁆𑀓𑀻𑀴𑀺𑀢𑀜𑁆𑀘 𑀅𑀢𑁆𑀣𑀺, 𑀢𑀁 𑀢𑀺𑀯𑀺𑀥𑀁 𑀯𑀺𑀓𑁆𑀓𑀻𑀴𑀺𑀢𑀁 𑀓𑀢𑀫𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀓𑁆𑀓𑀻𑀴𑀺𑀢𑀁 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂𑀲𑀁 𑀯𑀺𑀓𑁆𑀓𑀻𑀴𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀬𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸 𑀯𑀺𑀫𑀼𑀘𑁆𑀘𑀺𑀁𑀲𑀼, 𑀢𑁂𑀲𑀼 𑀩𑀼𑀤𑁆𑀥𑀲𑁆𑀲𑁂𑀯 𑀯𑀺𑀓𑁆𑀓𑀻𑀴𑀺𑀢𑀁 𑀪𑀯𑀢𑀺 𑀓𑀺𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲𑁂𑀯 𑀯𑀺𑀓𑁆𑀓𑀻𑀴𑀺𑀢𑀁 𑀪𑀯𑀢𑀺 𑀓𑀺𑀁, 𑀲𑀸𑀯𑀓𑀲𑁆𑀲𑁂𑀯 𑀯𑀺𑀓𑁆𑀓𑀻𑀴𑀺𑀢𑀁 𑀪𑀯𑀢𑀺 𑀓𑀺𑀁, 𑀉𑀤𑀸𑀳𑀼 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀺𑀓𑁆𑀓𑀻𑀴𑀺𑀢𑀁 𑀪𑀯𑀢𑀺 𑀓𑀺’’𑀦𑁆𑀢𑀺 𑀯𑀺𑀘𑀸𑀭𑀡𑀸𑀬 𑀲𑀫𑁆𑀪𑀯𑀢𑁄 ‘‘𑀢𑁂𑀲𑀁 𑀯𑀺𑀓𑁆𑀓𑀻𑀴𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀬𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸 𑀫𑀼𑀘𑁆𑀘𑀺𑀁𑀲𑀼, 𑀢𑁂𑀲𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀺𑀓𑁆𑀓𑀻𑀴𑀺𑀢𑀁. 𑀬𑀁 𑀆𑀳𑀸𑀭𑀘𑀢𑀼𑀓𑁆𑀓𑀸𑀤𑀻𑀦𑀁 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀲𑀧𑀭𑀲𑀦𑁆𑀢𑀸𑀦𑁂 𑀲𑀫𑀢𑀺𑀓𑁆𑀓𑀫𑀦𑀧𑀳𑀸𑀦𑀜𑁆𑀘 𑀬𑀸 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀻𑀦𑀁 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀲𑀧𑀭𑀲𑀦𑁆𑀢𑀸𑀦𑁂 𑀪𑀸𑀯𑀦𑀸𑀲𑀫𑁆𑀧𑀸𑀤𑀦𑀸, 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀦𑀸 𑀘 𑀅𑀢𑁆𑀣𑀺, 𑀇𑀤𑀁 𑀲𑀩𑁆𑀩𑀁 𑀯𑀺𑀓𑁆𑀓𑀻𑀴𑀺𑀢𑀁 𑀦𑀸𑀫 𑀪𑀯𑀢𑀻𑀢𑀺 𑀅𑀢𑁆𑀣𑁄.

‘‘𑀲𑀩𑁆𑀩𑁂𑀲𑀁 𑀆𑀳𑀸𑀭𑀘𑀢𑀼𑀓𑁆𑀓𑀸𑀤𑀻𑀦𑀁 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀲𑀩𑁆𑀩𑁂 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀬𑁄 𑀤𑀲 𑀘𑀢𑀼𑀓𑁆𑀓𑀸 𑀧𑀝𑀺𑀧𑀓𑁆𑀔𑀸 𑀳𑁄𑀦𑁆𑀢𑀺 𑀓𑀺𑀁, 𑀉𑀤𑀸𑀳𑀼 𑀬𑀣𑀸𑀓𑁆𑀓𑀫𑀁 𑀘𑀢𑀼𑀓𑁆𑀓𑀸𑀦𑀁 𑀘𑀢𑀼𑀓𑁆𑀓𑀸 𑀧𑀝𑀺𑀧𑀓𑁆𑀔𑀸 𑀳𑁄𑀦𑁆𑀢𑀺 𑀓𑀺’’𑀦𑁆𑀢𑀺 𑀯𑀺𑀘𑀸𑀭𑀡𑀸𑀬 𑀲𑀫𑁆𑀪𑀯𑀢𑁄 𑀬𑀣𑀸𑀓𑁆𑀓𑀫𑀁 𑀘𑀢𑀼𑀓𑁆𑀓𑀸𑀦𑀁 𑀘𑀢𑀼𑀓𑁆𑀓𑀸 𑀧𑀝𑀺𑀧𑀓𑁆𑀔𑀸 𑀳𑁄𑀦𑁆𑀢𑀺 𑀧𑀳𑀸𑀢𑀩𑁆𑀩𑀧𑀳𑀸𑀬𑀓𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘𑀇𑀤𑀸𑀦𑀺 𑀆𑀳𑀸𑀭𑀸𑀤𑀻𑀦𑀁 𑀧𑀝𑀺𑀧𑀤𑀸𑀤𑀻𑀳𑀺 𑀬𑁂𑀦 𑀲𑀫𑀢𑀺𑀓𑁆𑀓𑀫𑀦𑀁, 𑀢𑀁 𑀦𑁂𑀲𑀁 𑀧𑀝𑀺𑀧𑀓𑁆𑀔𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’𑀢𑀺𑀆𑀤𑀺𑀫𑀸𑀳𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁮𑁭) 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀘𑀢𑁆𑀢𑀸𑀭𑁄 𑀬𑁂 𑀆𑀳𑀸𑀭𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀯𑁄𑀤𑀸𑀦𑀧𑀓𑁆𑀔𑁂 𑀬𑀸 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀢𑀸 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀧𑀝𑀺𑀧𑀓𑁆𑀔𑁄 𑀆𑀳𑀸𑀭𑀸𑀦𑀁 𑀧𑀳𑀸𑀢𑀩𑁆𑀩𑀢𑁆𑀢𑀸, 𑀧𑀝𑀺𑀧𑀤𑀸𑀦𑀁 𑀧𑀦 𑀧𑀳𑀸𑀬𑀓𑀢𑁆𑀢𑀸. 𑀲𑀢𑀺𑀧𑀺 𑀆𑀳𑀸𑀭𑀸𑀦𑀁 𑀅𑀧𑁆𑀧𑀳𑀸𑀢𑀩𑁆𑀩𑀪𑀸𑀯𑁂 𑀯𑀺𑀧𑀲𑁆𑀲𑀦𑀸𑀭𑀫𑁆𑀫𑀡𑀢𑁆𑀢𑀸 𑀆𑀳𑀸𑀭𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀯𑀲𑁂𑀦 𑀧𑀳𑀸𑀢𑀩𑁆𑀩𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀏𑀯𑀫𑀸𑀤𑀺𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀻𑀳𑀸𑀢𑀺 𑀲𑀻𑀳𑀲𑀤𑀺𑀲𑀸 𑀩𑀼𑀤𑁆𑀥𑀸 𑀘 𑀲𑀻𑀳𑀲𑀤𑀺𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀲𑀻𑀳𑀲𑀤𑀺𑀲𑀸 𑀲𑀸𑀯𑀓𑀸 𑀘𑀸𑀢𑀺 𑀲𑀻𑀳𑀲𑀤𑀺𑀲𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑀸. 𑀲𑀸𑀯𑀓𑀸 𑀧𑀦 𑀅𑀳𑀢𑀭𑀸𑀕𑀤𑁄𑀲𑀫𑁄𑀳𑀸𑀧𑀺 𑀲𑀦𑁆𑀢𑀺, 𑀢𑁂𑀧𑀺 ‘‘𑀲𑀻𑀳𑀸’’𑀢𑀺 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀢𑀁 𑀦𑀺𑀯𑀢𑁆𑀢𑀸𑀧𑀦𑀢𑁆𑀣𑀁 ‘‘𑀳𑀢𑀭𑀸𑀕𑀤𑁄𑀲𑀫𑁄𑀳𑀸’’𑀢𑀺 𑀯𑀼𑀢𑁆𑀢𑀁. 𑀳𑀦𑀺𑀢𑀩𑁆𑀩𑀸𑀢𑀺 𑀳𑀢𑀸, 𑀭𑀸𑀕𑁄 𑀘 𑀤𑁄𑀲𑁄 𑀘 𑀫𑁄𑀳𑁄 𑀘 𑀭𑀸𑀕𑀤𑁄𑀲𑀫𑁄𑀳𑀸, 𑀳𑀢𑀸 𑀭𑀸𑀕𑀤𑁄𑀲𑀫𑁄𑀳𑀸 𑀏𑀢𑁂𑀳𑀺 𑀲𑀸𑀯𑀓𑁂𑀳𑀻𑀢𑀺 𑀳𑀢𑀭𑀸𑀕𑀤𑁄𑀲𑀫𑁄𑀳𑀸, 𑀲𑀸𑀯𑀓𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑀲𑀸𑀯𑀓𑀸𑀦𑀁𑀬𑁂𑀯 𑀩𑁆𑀬𑀪𑀺𑀘𑀸𑀭𑀲𑀫𑁆𑀪𑀯𑀢𑁄𑀢𑀺. 𑀢𑁂𑀲𑀁 𑀲𑀻𑀳𑀸𑀦𑀁 𑀩𑀼𑀤𑁆𑀥𑀸𑀦𑀁, 𑀢𑁂𑀲𑀁 𑀲𑀻𑀳𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀢𑁂𑀲𑀁 𑀲𑀻𑀳𑀸𑀦𑀁 𑀲𑀸𑀯𑀓𑀸𑀦𑀁 𑀪𑀸𑀯𑀦𑀸 𑀯𑁄𑀤𑀸𑀦𑀧𑀓𑁆𑀔𑁂 𑀪𑀸𑀯𑀺𑀢𑀩𑁆𑀩𑀸𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀪𑀸𑀯𑀦𑀸 𑀯𑀟𑁆𑀠𑀦𑀸 𑀘, 𑀲𑀘𑁆𑀙𑀺𑀓𑀺𑀭𑀺𑀬𑀸 𑀯𑁄𑀤𑀸𑀦𑀧𑀓𑁆𑀔𑁂𑀬𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀦𑀁 𑀨𑀮𑀦𑀺𑀩𑁆𑀩𑀸𑀦𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘, 𑀩𑁆𑀬𑀦𑁆𑀢𑀻𑀓𑀺𑀭𑀺𑀬𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀳𑀸𑀢𑀩𑁆𑀩𑀸𑀦𑀁 𑀧𑀳𑀸𑀦𑀲𑀗𑁆𑀔𑀸𑀢𑀸 𑀩𑁆𑀬𑀦𑁆𑀢𑀻𑀓𑀺𑀭𑀺𑀬𑀸 𑀘 𑀯𑀺𑀓𑁆𑀓𑀻𑀴𑀺𑀢𑀁 𑀦𑀸𑀫 𑀪𑀯𑀢𑀺.

𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀧𑀯𑀢𑁆𑀢𑀦𑀁 𑀪𑀸𑀯𑀦𑀸, 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘. 𑀯𑀺𑀧𑀭𑀺𑀬𑀸𑀲𑀸𑀦𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀧𑀳𑀸𑀦𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀁, 𑀅𑀦𑀼𑀧𑁆𑀧𑀸𑀤𑀦𑀜𑁆𑀘 𑀲𑀗𑁆𑀔𑁂𑀧𑀢𑁄 𑀯𑀺𑀓𑁆𑀓𑀻𑀴𑀺𑀢𑀁 𑀦𑀸𑀫𑀸𑀢𑀺 𑀕𑀳𑀺𑀢𑀁. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀲𑀤𑁆𑀥𑀫𑁆𑀫𑀕𑁄𑀘𑀭𑁄 𑀲𑀤𑁆𑀥𑀫𑁆𑀫𑀲𑁆𑀲 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀕𑁄𑀘𑀭𑁄 𑀧𑀯𑀢𑁆𑀢𑀦𑀳𑁂𑀢𑀽𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀯𑀺𑀧𑀭𑀺𑀬𑀸𑀲𑀸 𑀯𑀺𑀧𑀮𑁆𑀮𑀸𑀲𑀸 𑀓𑀺𑀮𑁂𑀲𑀕𑁄𑀘𑀭𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀕𑁄𑀘𑀭𑁄 𑀧𑀯𑀢𑁆𑀢𑀺𑀳𑁂𑀢𑀽𑀢𑀺 𑀅𑀥𑀺𑀧𑁆𑀧𑁂𑀢𑀸.

‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸𑀢𑀺𑀆𑀤𑀺𑀦𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀆𑀳𑀸𑀭𑀘𑀢𑀼𑀓𑁆𑀓𑀸𑀤𑀻𑀦𑀁 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀢𑀡𑁆𑀳𑀸𑀘𑀭𑀺𑀢𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀪𑀸𑀯𑀦𑀸𑀫𑀼𑀔𑁂𑀦 𑀬𑀸 𑀦𑀺𑀤𑁆𑀥𑀸𑀭𑀡𑀸 𑀆𑀘𑀭𑀺𑀬𑁂𑀦 𑀓𑀢𑀸, ‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’𑀢𑀺𑀆𑀤𑀺𑀦𑀸 𑀘 𑀯𑁄𑀤𑀸𑀦𑀧𑀓𑁆𑀔𑁂 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀻𑀦𑀁 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀢𑀡𑁆𑀳𑀸𑀘𑀭𑀺𑀢𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀫𑀼𑀔𑁂𑀦 𑀬𑀸 𑀦𑀺𑀤𑁆𑀥𑀸𑀭𑀡𑀸 𑀆𑀘𑀭𑀺𑀬𑁂𑀦 𑀓𑀢𑀸, 𑀲𑀸 𑀅𑀬𑀁 𑀦𑀺𑀤𑁆𑀥𑀸𑀭𑀡𑀸 𑀓𑀢𑀫𑀲𑁆𑀲 𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀪𑀽𑀫𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀦𑁆𑀢𑀺 𑀬𑀸 𑀅𑀬𑀁 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸 𑀦𑀺𑀤𑁆𑀥𑀸𑀭𑀡𑀸 𑀓𑀢𑀸, 𑀲𑀸 𑀅𑀬𑀁 𑀤𑁆𑀯𑀺𑀧𑁆𑀧𑀓𑀸𑀭𑀸 𑀦𑀺𑀤𑁆𑀥𑀸𑀭𑀡𑀸 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀦𑀬𑀲𑀫𑀼𑀝𑁆𑀞𑀸𑀦𑀓𑁄𑀲𑀮𑁆𑀮𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺.

‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀦𑀺𑀤𑁆𑀥𑀸𑀭𑀺𑀢𑀸𑀬 𑀦𑀬𑀲𑁆𑀲 𑀪𑀽𑀫𑀺𑀪𑀸𑀯𑁄 𑀓𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀦𑀺𑀤𑁆𑀥𑀸𑀭𑀡𑀸𑀬 𑀦𑀬𑀪𑀽𑀫𑀺𑀪𑀸𑀯𑁂𑀦 ‘‘𑀬𑁄 𑀦𑁂𑀢𑀺…𑀧𑁂… 𑀓𑀼𑀲𑀮𑀸𑀢𑀺 𑀘𑀸’’𑀢𑀺 𑀬𑀁 𑀯𑀘𑀦𑀁 𑀆𑀘𑀭𑀺𑀬𑁄 𑀆𑀳, 𑀢𑁂𑀦 𑀯𑀘𑀦𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀪𑀽𑀫𑀺 𑀆𑀘𑀭𑀺𑀬𑁂𑀦 𑀯𑀺𑀪𑀸𑀯𑀺𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑀸 𑀢𑀺𑀧𑀼𑀓𑁆𑀔𑀮𑀦𑀬𑀪𑀽𑀫𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀺𑀧𑀼𑀓𑁆𑀔𑀮𑀦𑀬𑀪𑀽𑀫𑀺𑀁 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 ‘‘𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀢𑀺 ‘‘𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺𑀆𑀤𑀺𑀯𑀘𑀦𑀫𑁂𑀯 𑀆𑀘𑀭𑀺𑀬𑁂𑀦 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 𑀧𑀦 ‘‘𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬𑀸’’𑀢𑀺𑀆𑀤𑀺𑀯𑀘𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀲𑀘𑁆𑀘𑀁, 𑀢𑀺𑀧𑀼𑀓𑁆𑀔𑀮𑀦𑀬𑀪𑀽𑀫𑀺𑀪𑀸𑀯𑀦𑀸 𑀧𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀢𑁆𑀢𑀬𑀯𑀲𑁂𑀦 𑀧𑀯𑀢𑁆𑀢𑀸, 𑀢𑀲𑁆𑀫𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀢𑁆𑀢𑀬𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬𑀸’’𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁. 𑀏𑀯𑀫𑀧𑀺 ‘‘𑀢𑀢𑁆𑀣 𑀬𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺𑀆𑀤𑀺𑀯𑀘𑀦𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 𑀧𑀦 ‘‘𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬𑀸’’𑀢𑀺𑀆𑀤𑀺𑀯𑀘𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀲𑀘𑁆𑀘𑀁, 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀢𑁆𑀢𑀬𑀁 𑀧𑀦 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀢𑁄 𑀢𑀺𑀧𑀼𑀓𑁆𑀔𑀮𑀦𑀬𑀲𑁆𑀲 𑀦𑀺𑀕𑁆𑀕𑀘𑁆𑀙𑀦𑀢𑁄 𑀦𑀺𑀓𑁆𑀔𑀫𑀦𑀢𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀪𑀽𑀫𑀺𑀯𑀺𑀪𑀸𑀯𑀦𑀸𑀬𑀁 𑀧𑀝𑀺𑀧𑀤𑀸𑀯𑀺𑀪𑀸𑀕𑀢𑁄 𑀯𑀺𑀪𑀸𑀯𑀺𑀢𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀢𑁄 𑀦𑀺𑀤𑁆𑀥𑀸𑀭𑀺𑀢𑀁, 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀪𑀽𑀫𑀺𑀯𑀺𑀪𑀸𑀯𑀦𑀸𑀬𑀁 𑀧𑀝𑀺𑀧𑀤𑀸𑀯𑀺𑀪𑀸𑀕𑀢𑁄 𑀯𑀺𑀪𑀸𑀯𑀺𑀢𑀁 𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀁 𑀧𑀞𑀫𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀬𑁄 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀪𑀽𑀫𑀺𑀯𑀺𑀪𑀸𑀯𑀦𑀸𑀬𑀁 𑀦𑀺𑀤𑁆𑀥𑀸𑀭𑀺𑀢𑁄, 𑀢𑀲𑁆𑀫𑀺𑀁 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑁂. 𑀬𑁂𑀢𑀺 𑀬𑁂 𑀤𑀦𑁆𑀥𑀉𑀤𑀢𑁆𑀢𑀸 𑀤𑀺𑀝𑁆𑀞𑀺𑀘𑀭𑀺𑀢𑀧𑀼𑀕𑁆𑀕𑀮𑀸 𑀬𑀣𑀸𑀓𑁆𑀓𑀫𑀁 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀇𑀢𑀺 𑀦𑀺𑀬𑁆𑀬𑀓𑀸 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀘 𑀦𑀺𑀤𑁆𑀥𑀸𑀭𑀺𑀢𑀸. ‘‘𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀢𑀫𑁄 𑀲𑀁𑀓𑀺𑀮𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀦𑀺𑀤𑁆𑀥𑀸𑀭𑀺𑀢𑀸…𑀧𑁂… 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, 𑀇𑀢𑀺 𑀅𑀬𑀁 𑀤𑀲𑀯𑀺𑀥𑁄 𑀆𑀳𑀸𑀭𑀘𑀢𑀼𑀓𑁆𑀓𑀸𑀤𑀺𑀘𑀢𑀼𑀓𑁆𑀓𑁄 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀁𑀓𑀺𑀮𑁂𑀲𑁄 𑀳𑁄𑀢𑀺. 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀁𑀓𑀺𑀮𑁂𑀲𑁄 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑁄, ‘‘𑀓𑀢𑀫𑀁 𑀯𑁄𑀤𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀇𑀤𑀁 𑀯𑁄𑀤𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀸𑀡𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀇𑀢𑀺 𑀇𑀤𑀁 𑀤𑀲𑀯𑀺𑀥𑀁 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀺𑀘𑀢𑀼𑀓𑁆𑀓𑀪𑀽𑀢𑀁 𑀥𑀫𑁆𑀫𑀚𑀸𑀢𑀁 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑁄𑀤𑀸𑀦𑀁 𑀳𑁄𑀢𑀺.

𑁮𑁮. ‘‘𑀢𑁂𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀼𑀩𑁆𑀩𑁂𑀧𑀺 ‘𑀢𑀢𑁆𑀣 𑀬𑁂’𑀢𑀺𑀆𑀤𑀺𑀦𑀸 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀓𑀲𑁆𑀫𑀸 𑀧𑀦 𑀧𑀼𑀦 ‘‘𑀢𑀢𑁆𑀣 𑀬𑁂’𑀢𑀺𑀆𑀤𑀺𑀦𑀸 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀦𑀺𑀤𑁆𑀥𑀸𑀭𑀺𑀢𑀸’’𑀢𑀺 𑀘𑁂 𑀯𑀤𑁂𑀬𑁆𑀬? 𑀧𑀼𑀩𑁆𑀩𑁂 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀁 𑀲𑀸𑀫𑀺𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑀺𑀢𑀸, 𑀧𑀘𑁆𑀙𑀸 𑀧𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁 𑀅𑀯𑀬𑀯𑀸𑀦𑀁 𑀲𑀫𑀽𑀳𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀢𑀺 𑀯𑀺𑀲𑁂𑀲𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀣 𑀬𑁂…𑀧𑁂… 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸𑀢𑀺 𑀏𑀢𑁆𑀣 𑀬𑁄𑀚𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑁄𑀯. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀬𑁄𑀢𑀺 𑀉𑀤𑀢𑁆𑀢𑁄 𑀤𑀺𑀝𑁆𑀞𑀺𑀘𑀭𑀺𑀢𑁄. 𑀅𑀬𑀦𑁆𑀢𑀺 𑀅𑀬𑀁 𑀦𑀺𑀬𑀢𑁄 𑀉𑀤𑀢𑁆𑀢𑁄 𑀤𑀺𑀝𑁆𑀞𑀺𑀘𑀭𑀺𑀢𑁄. 𑀧𑀼𑀦 𑀬𑁄𑀢𑀺 𑀉𑀤𑀢𑁆𑀢𑁄𑀯 𑀢𑀡𑁆𑀳𑀸𑀘𑀭𑀺𑀢𑁄 𑀘 𑀫𑀦𑁆𑀤𑁄 𑀤𑀺𑀝𑁆𑀞𑀺𑀘𑀭𑀺𑀢𑁄 𑀘. 𑀲𑀸𑀥𑀸𑀭𑀡𑀸𑀬𑀸𑀢𑀺 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘.

‘‘𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀬𑁄 𑀢𑀬𑁄 𑀧𑀼𑀕𑁆𑀕𑀮𑀸 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑀸, 𑀢𑁂𑀲𑀼 𑀢𑀻𑀲𑀼 𑀧𑀼𑀕𑁆𑀕𑀮𑁂𑀲𑀼 𑀓𑀢𑀫𑀲𑁆𑀲 𑀓𑀢𑀫𑀲𑁆𑀲 𑀓𑀢𑀫𑀁 𑀓𑀢𑀫𑀁 𑀪𑀕𑀯𑀸 𑀉𑀧𑀤𑀺𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀧𑀝𑀺𑀧𑀤𑀸𑀪𑁂𑀤𑁂𑀦 𑀧𑀼𑀕𑁆𑀕𑀮𑀪𑁂𑀤𑁄 𑀆𑀘𑀭𑀺𑀬𑁂𑀦 𑀯𑀺𑀪𑀸𑀯𑀺𑀢𑁄, 𑀓𑀣𑀁 𑀤𑁂𑀲𑀦𑀸𑀪𑁂𑀤𑁂𑀦 𑀧𑀼𑀕𑁆𑀕𑀮𑀪𑁂𑀤𑁄 𑀯𑀺𑀪𑀸𑀯𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀤𑁂𑀲𑀦𑀸𑀪𑁂𑀤𑁂𑀦𑀧𑀺 𑀧𑀼𑀕𑁆𑀕𑀮𑀪𑁂𑀤𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀲𑀼 𑀧𑀼𑀕𑁆𑀕𑀮𑁂𑀲𑀼. ‘‘𑀲𑀫𑀣𑀤𑁂𑀲𑀦𑀸𑀯𑀺𑀧𑀲𑁆𑀲𑀦𑀸𑀤𑁂𑀲𑀦𑀸𑀪𑁂𑀤𑁂𑀦𑁂𑀯 𑀧𑀼𑀕𑁆𑀕𑀮𑀪𑁂𑀤𑁄 𑀯𑀺𑀪𑀸𑀯𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀫𑀼𑀤𑀼𑀥𑀫𑁆𑀫𑀤𑁂𑀲𑀦𑀸𑀢𑀺𑀓𑁆𑀔𑀥𑀫𑁆𑀫𑀤𑁂𑀲𑀦𑀸𑀪𑁂𑀤𑁂𑀦𑀧𑀺 𑀧𑀼𑀕𑁆𑀕𑀮𑀪𑁂𑀤𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑁂𑀲𑀼𑀧𑀺 𑀏𑀯𑀫𑁂𑀯 𑀅𑀦𑀼𑀲𑀦𑁆𑀥𑁆𑀬𑀢𑁆𑀣𑁄 𑀯𑀢𑁆𑀢𑀩𑁆𑀩𑁄.

𑀯𑀺𑀲𑀼𑀁 𑀯𑀺𑀲𑀼𑀁 𑀧𑀝𑀺𑀧𑀤𑀸𑀪𑁂𑀤𑁂𑀦 𑀘𑀢𑁆𑀢𑀸𑀭𑁄 𑀳𑀼𑀢𑁆𑀯𑀸 𑀯𑀺𑀲𑀼𑀁 𑀘 𑀲𑀫𑁆𑀧𑀺𑀡𑁆𑀟𑀺𑀢𑀸 𑀘 𑀧𑀝𑀺𑀧𑀤𑀸𑀪𑁂𑀤𑁂𑀦 𑀘𑁂𑀯 𑀤𑁂𑀲𑀦𑀸𑀪𑁂𑀤𑁂𑀦 𑀘 𑀢𑀬𑁄 𑀳𑁄𑀦𑁆𑀢𑀻𑀢𑀺 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀬𑁂’’𑀢𑀺𑀆𑀤𑀺𑀁 𑀧𑀼𑀦 𑀯𑀢𑁆𑀯𑀸 ‘‘𑀇𑀢𑀺 𑀔𑁄 𑀘𑀢𑁆𑀢𑀸𑀭𑀺 𑀳𑀼𑀢𑁆𑀯𑀸 𑀢𑀻𑀡𑀺 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀢𑀻𑀡𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀦𑀺𑀤𑁆𑀤𑁂𑀲𑁄, ‘‘𑀘𑀢𑁆𑀢𑀸𑀭𑁄 𑀢𑀬𑁄’’𑀢𑀺 𑀧𑀦 𑀧𑀓𑀢𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄𑀯.

‘‘𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀢𑀫𑁄 𑀲𑀁𑀓𑀺𑀮𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀁 𑀲𑀁𑀓𑀺𑀮𑁂𑀲𑁄𑀢𑀺 ‘‘𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺…𑀧𑁂… 𑀲𑀻𑀮𑀯𑀺𑀧𑀢𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀻’’𑀢𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀇𑀢𑀺 𑀅𑀬𑀁 𑀲𑀫𑀽𑀳𑁄 𑀲𑀁𑀓𑀺𑀮𑁂𑀲𑁄 𑀳𑁄𑀢𑀺. ‘‘𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀲𑀁𑀓𑀺𑀮𑁂𑀲𑁄 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑁄, 𑀓𑀣𑀁 𑀯𑁄𑀤𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀇𑀤𑀁 𑀯𑁄𑀤𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀤𑀁 𑀯𑁄𑀤𑀸𑀦𑀦𑁆𑀢𑀺 ‘‘𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺…𑀧𑁂… 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢’’𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀫𑀽𑀳𑀪𑀽𑀢𑀁 𑀇𑀢𑀺 𑀇𑀤𑀁 𑀥𑀫𑁆𑀫𑀚𑀸𑀢𑀁 𑀯𑁄𑀤𑀸𑀦𑀁 𑀳𑁄𑀢𑀺.

‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀢𑁆𑀢𑀸𑀭𑁄 𑀳𑀼𑀢𑁆𑀯𑀸 𑀢𑀬𑁄 𑀧𑀼𑀕𑁆𑀕𑀮𑀸 𑀪𑀯𑀦𑁆𑀢𑀻𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀸𑀯𑀺𑀢𑀸, 𑀢𑀬𑁄 𑀳𑀼𑀢𑁆𑀯𑀸 𑀓𑀺𑀢𑁆𑀢𑀓𑀸 𑀧𑀼𑀕𑁆𑀕𑀮𑀸 𑀪𑀯𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀇𑀢𑀺 𑀔𑁄 𑀘𑀢𑁆𑀢𑀸𑀭𑀺 𑀳𑀼𑀢𑁆𑀯𑀸 𑀢𑀻𑀡𑀺 𑀪𑀯𑀦𑁆𑀢𑀺, 𑀢𑀻𑀡𑀺 𑀳𑀼𑀢𑁆𑀯𑀸 𑀤𑁆𑀯𑁂 𑀪𑀯𑀦𑁆𑀢𑀺 𑀢𑀡𑁆𑀳𑀸𑀘𑀭𑀺𑀢𑁄 𑀘 𑀤𑀺𑀝𑁆𑀞𑀺𑀘𑀭𑀺𑀢𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑁄 𑀳𑀼𑀢𑁆𑀯𑀸 𑀢𑀻𑀡𑀺 𑀢𑀬𑁄 𑀪𑀯𑀦𑁆𑀢𑀺. 𑀢𑀻𑀡𑀺 𑀢𑀬𑁄 𑀳𑀼𑀢𑁆𑀯𑀸 𑀢𑀡𑁆𑀳𑀸𑀘𑀭𑀺𑀢𑁄 𑀘 𑀤𑀺𑀝𑁆𑀞𑀺𑀘𑀭𑀺𑀢𑁄 𑀘𑀸𑀢𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀯𑀦𑁆𑀢𑀺.

‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀢𑀫𑁄 𑀲𑀁𑀓𑀺𑀮𑁂𑀲𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀁 𑀲𑀁𑀓𑀺𑀮𑁂𑀲𑁄𑀢𑀺 ‘‘𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘…𑀧𑁂… 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘𑀸’’𑀢𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀁 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀇𑀢𑀺 𑀅𑀬𑀁 𑀲𑀫𑀽𑀳𑁄 𑀲𑀁𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀁𑀓𑀺𑀮𑁂𑀲𑁄 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑁄, 𑀓𑀣𑀁 𑀯𑁄𑀤𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀇𑀤𑀁 𑀯𑁄𑀤𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑁄𑀤𑀸𑀦𑀦𑁆𑀢𑀺 ‘‘𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘…𑀧𑁂… 𑀲𑀉𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀅𑀦𑀼𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀫𑀽𑀳𑀪𑀽𑀢𑀁 𑀇𑀢𑀺 𑀇𑀤𑀁 𑀥𑀫𑁆𑀫𑀚𑀸𑀢𑀁 𑀯𑁄𑀤𑀸𑀦𑀁 𑀳𑁄𑀢𑀺.

‘‘𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺𑀆𑀤𑀺𑀦𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀅𑀓𑀼𑀲𑀮𑀫𑀽𑀮𑀢𑀺𑀓𑀸𑀤𑀻𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀢𑀺𑀓𑀸𑀦𑀁, 𑀢𑀺𑀡𑁆𑀡𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀸𑀦𑀁 𑀲𑀁𑀓𑀺𑀮𑁂𑀲𑀯𑀺𑀪𑀸𑀯𑀦𑀸𑀫𑀼𑀔𑁂𑀦 𑀬𑀸 𑀦𑀺𑀤𑁆𑀥𑀸𑀭𑀡𑀸 𑀓𑀢𑀸, ‘‘𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺𑀆𑀤𑀺𑀦𑀸 𑀯𑁄𑀤𑀸𑀦𑀧𑀓𑁆𑀔𑁂 𑀓𑀼𑀲𑀮𑀫𑀽𑀮𑀢𑀺𑀓𑀸𑀤𑀻𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀢𑀺𑀓𑀸𑀦𑀁, 𑀢𑀺𑀡𑁆𑀡𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀸𑀦𑀁 𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀫𑀼𑀔𑁂𑀦 𑀬𑀸 𑀦𑀺𑀤𑁆𑀥𑀸𑀭𑀡𑀸 𑀓𑀢𑀸, 𑀅𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑀺𑀤𑁆𑀥𑀸𑀭𑀡𑀸 𑀢𑀺𑀧𑀼𑀓𑁆𑀔𑀮𑀲𑁆𑀲 𑀘 𑀦𑀬𑀲𑁆𑀲, 𑀅𑀗𑁆𑀓𑀼𑀲𑀲𑁆𑀲 𑀘 𑀦𑀬𑀲𑁆𑀲 𑀪𑀽𑀫𑀺 𑀲𑀫𑀼𑀝𑁆𑀞𑀸𑀦𑀁 𑀧𑀯𑀢𑁆𑀢𑀺𑀳𑁂𑀢𑀼 𑀦𑀸𑀫𑀸𑀢𑀺 𑀬𑁄𑀚𑁂𑀢𑁆𑀯𑀸 ‘‘𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘𑀸’’𑀢𑀺𑀆𑀤𑀺𑀦𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀤𑀼𑀓𑀸𑀤𑀻𑀦𑀁 𑀧𑀦𑁆𑀦𑀭𑀲𑀦𑁆𑀦𑀁 𑀤𑀼𑀓𑀸𑀦𑀁, 𑀤𑁆𑀯𑀺𑀦𑁆𑀦𑀁 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀫𑀼𑀔𑁂𑀦 𑀬𑀸 𑀦𑀺𑀤𑁆𑀥𑀸𑀭𑀡𑀸 𑀓𑀢𑀸, ‘‘𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘𑀸’’𑀢𑀺𑀆𑀤𑀺𑀦𑀸 𑀯𑁄𑀤𑀸𑀦𑀧𑀓𑁆𑀔𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀼𑀓𑀸𑀤𑀻𑀦𑀁 𑀏𑀓𑀽𑀦𑀯𑀻𑀲𑀢𑀺𑀤𑀼𑀓𑀸𑀦𑀁, 𑀤𑁆𑀯𑀺𑀦𑁆𑀦𑀁 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀫𑀼𑀔𑁂𑀦 𑀬𑀸 𑀦𑀺𑀤𑁆𑀥𑀸𑀭𑀡𑀸 𑀓𑀢𑀸, 𑀅𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻𑀢𑀺𑀧𑀺 𑀦𑀻𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀳𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀢𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀲𑁆𑀲 𑀲𑀫𑁆𑀪𑀯𑁄, 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀢𑁄 𑀘 𑀢𑀺𑀧𑀼𑀓𑁆𑀔𑀮𑀦𑀬𑀲𑁆𑀲 𑀲𑀫𑁆𑀪𑀯𑁄 𑀳𑁄𑀢𑀺. 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀦 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀢𑁄 𑀢𑀺𑀧𑀼𑀓𑁆𑀔𑀮𑀦𑀬𑀲𑁆𑀲 𑀲𑀫𑁆𑀪𑀯𑁄, 𑀢𑀺𑀧𑀼𑀓𑁆𑀔𑀮𑀦𑀬𑀢𑁄 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑁆𑀲 𑀲𑀫𑁆𑀪𑀯𑁄 𑀳𑁄𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑁆𑀢𑁂 ‘𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘𑀸’𑀢𑀺𑀆𑀤𑀺𑀦𑀸 𑀲𑀫𑀣𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺 𑀤𑀲𑁆𑀲𑀺𑀢𑀸. 𑀢𑁂𑀦𑁂𑀯 𑀳𑀺 ‘𑀘𑀢𑁆𑀢𑀸𑀭𑀺 𑀳𑀼𑀢𑁆𑀯𑀸 𑀢𑀻𑀡𑀺 𑀪𑀯𑀦𑁆𑀢𑀺, 𑀢𑀻𑀡𑀺 𑀳𑀼𑀢𑁆𑀯𑀸 𑀤𑁆𑀯𑁂 𑀪𑀯𑀦𑁆𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁮𑁮).

‘‘𑀓𑀲𑁆𑀫𑀸 𑀧𑀦 𑀅𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀦𑀺𑀤𑁆𑀥𑀸𑀭𑀡𑀸𑀬 𑀢𑀺𑀧𑀼𑀓𑁆𑀔𑀮𑀲𑁆𑀲 𑀘 𑀦𑀬𑀲𑁆𑀲, 𑀅𑀗𑁆𑀓𑀼𑀲𑀲𑁆𑀲 𑀘 𑀦𑀬𑀲𑁆𑀲 𑀪𑀽𑀫𑀺𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀲𑁆𑀲 𑀦𑀺𑀤𑁆𑀥𑀸𑀭𑀡𑀸𑀬 𑀪𑀽𑀫𑀺𑀪𑀸𑀯𑁂𑀦 𑀆𑀘𑀭𑀺𑀬𑁄 ‘‘𑀬𑁄 𑀅𑀓𑀼𑀲𑀮𑁂…𑀧𑁂… 𑀤𑀺𑀲𑀸𑀮𑁄𑀘𑀦𑁂𑀦𑀸𑀢𑀺 𑀘𑀸’’𑀢𑀺 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀦𑀺𑀤𑁆𑀥𑀸𑀭𑀡𑀸𑀬 𑀢𑀺𑀧𑀼𑀓𑁆𑀔𑀮…𑀧𑁂… 𑀬𑀲𑁆𑀲 𑀪𑀽𑀫𑀺𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄.

‘‘𑀏𑀢𑁆𑀢𑀸𑀯𑀢𑀸 𑀦𑀬𑀲𑀫𑀼𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀅𑀜𑁆𑀜𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀬𑁂𑀦 𑀦𑀬𑀲𑀫𑀼𑀝𑁆𑀞𑀸𑀦𑁂𑀦 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀯𑁄𑀤𑀸𑀦𑀧𑀓𑁆𑀔𑁂 𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀢𑀁 𑀢𑀁 𑀦𑀬𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀼𑀢𑁆𑀢𑀁 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀦𑀬𑀓𑁆𑀓𑀫𑁂𑀦 𑀧𑀦 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑀬𑀺𑀲𑁆𑀲𑀸𑀫𑀺 𑁋 𑀤𑁆𑀯𑁂 𑀧𑀼𑀕𑁆𑀕𑀮𑀸, 𑀢𑀬𑁄 𑀧𑀼𑀕𑁆𑀕𑀮𑀸, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸𑀢𑀺 𑀧𑀼𑀕𑁆𑀕𑀮𑀸 𑀢𑀺𑀓𑁄𑀝𑁆𑀞𑀸𑀲𑀸 𑀪𑀯𑀦𑁆𑀢𑀺, 𑀘𑀢𑀼𑀤𑀺𑀲𑀸, 𑀙𑀤𑀺𑀲𑀸, 𑀅𑀝𑁆𑀞𑀤𑀺𑀲𑀸𑀢𑀺 𑀤𑀺𑀲𑀸𑀧𑀺 𑀢𑀺𑀓𑁄𑀝𑁆𑀞𑀸𑀲𑀸 𑀪𑀯𑀦𑁆𑀢𑀺. 𑀢𑀢𑁆𑀣 𑀤𑁆𑀯𑁂 𑀧𑀼𑀕𑁆𑀕𑀮𑀸𑀢𑀺 𑀢𑀡𑁆𑀳𑀸𑀘𑀭𑀺𑀢𑁄 𑀧𑀼𑀕𑁆𑀕𑀮𑁄, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀧𑀼𑀕𑁆𑀕𑀮𑁄𑀢𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀯𑀦𑁆𑀢𑀺. 𑀢𑀬𑁄 𑀧𑀼𑀕𑁆𑀕𑀮𑀸𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑁄, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑁄, 𑀦𑁂𑀬𑁆𑀬𑀧𑀼𑀕𑁆𑀕𑀮𑁄𑀢𑀺 𑀢𑀬𑁄 𑀧𑀼𑀕𑁆𑀕𑀮𑀸 𑀪𑀯𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀢𑀡𑁆𑀳𑀸𑀘𑀭𑀺𑀢𑁄 𑀧𑀼𑀕𑁆𑀕𑀮𑁄, 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀤𑀺𑀝𑁆𑀞𑀺𑀘𑀭𑀺𑀢𑁄 𑀧𑀼𑀕𑁆𑀕𑀮𑁄, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀢𑀡𑁆𑀳𑀸𑀘𑀭𑀺𑀢𑁄 𑀧𑀼𑀕𑁆𑀕𑀮𑁄, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀤𑀺𑀝𑁆𑀞𑀺𑀘𑀭𑀺𑀢𑁄 𑀧𑀼𑀕𑁆𑀕𑀮𑁄𑀢𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀪𑀯𑀦𑁆𑀢𑀺. 𑀘𑀢𑀼𑀤𑀺𑀲𑀸𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑁆𑀯𑁂 𑀤𑁆𑀯𑁂 𑀤𑀺𑀲𑀸, 𑀯𑁄𑀤𑀸𑀦𑀧𑀓𑁆𑀔𑁂 𑀤𑁆𑀯𑁂 𑀤𑁆𑀯𑁂 𑀤𑀺𑀲𑀸𑀢𑀺 𑀘𑀢𑀼𑀤𑀺𑀲𑀸 𑀪𑀯𑀦𑁆𑀢𑀺. 𑀙𑀤𑀺𑀲𑀸𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀤𑀺𑀲𑀸, 𑀯𑁄𑀤𑀸𑀦𑀧𑀓𑁆𑀔𑁂 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀤𑀺𑀲𑀸𑀢𑀺 𑀙𑀤𑀺𑀲𑀸 𑀪𑀯𑀦𑁆𑀢𑀺. 𑀅𑀝𑁆𑀞𑀤𑀺𑀲𑀸𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀘𑀢𑀲𑁆𑀲𑁄 𑀘𑀢𑀲𑁆𑀲𑁄 𑀤𑀺𑀲𑀸, 𑀯𑁄𑀤𑀸𑀦𑀧𑀓𑁆𑀔𑁂 𑀘𑀢𑀲𑁆𑀲𑁄 𑀘𑀢𑀲𑁆𑀲𑁄 𑀤𑀺𑀲𑀸𑀢𑀺 𑀅𑀝𑁆𑀞𑀤𑀺𑀲𑀸 𑀪𑀯𑀦𑁆𑀢𑀺. 𑀢𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑁂 𑀧𑀼𑀕𑁆𑀕𑀮𑁂, 𑀘𑀢𑀼𑀤𑀺𑀲𑀸 𑀘 𑀦𑀺𑀲𑁆𑀲𑀸𑀬 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀢𑀬𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁂𑀬𑁆𑀬𑀧𑀼𑀕𑁆𑀕𑀮𑁂 𑀘 𑀙𑀤𑀺𑀲𑀸 𑀘 𑀦𑀺𑀲𑁆𑀲𑀸𑀬 𑀢𑀺𑀧𑀼𑀓𑁆𑀔𑀮𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑁂 𑀘𑀢𑁆𑀢𑀸𑀭𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑀢𑀡𑁆𑀳𑀸𑀘𑀭𑀺𑀢𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀢𑀡𑁆𑀳𑀸𑀘𑀭𑀺𑀢𑀫𑀼𑀤𑀺𑀦𑁆𑀤𑁆𑀭𑀺𑀬𑀤𑀺𑀝𑁆𑀞𑀺𑀘𑀭𑀺𑀢𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑀺𑀝𑁆𑀞𑀺𑀘𑀭𑀺𑀢𑁂 𑀧𑀼𑀕𑁆𑀕𑀮𑁂 𑀘 𑀅𑀝𑁆𑀞𑀤𑀺𑀲𑀸 𑀘 𑀦𑀺𑀲𑁆𑀲𑀸𑀬 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀏𑀓𑁂𑀓𑀲𑁆𑀫𑀺𑀁 𑀦𑀬𑀲𑀫𑀼𑀝𑁆𑀞𑀸𑀦𑁂 𑀯𑀺𑀪𑀚𑀺𑀢𑁂 𑀤𑀺𑀲𑀸𑀮𑁄𑀘𑀦𑀅𑀗𑁆𑀓𑀼𑀲𑀦𑀬𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀯𑀺𑀪𑀚𑀺𑀢𑀸𑀦𑀺 𑀪𑀯𑀦𑁆𑀢𑀺.

‘‘𑀓𑀣𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀻’’𑀢𑀺 𑀘𑁂 𑀯𑀤𑁂𑀬𑁆𑀬? ‘‘𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘 𑀅𑀳𑀺𑀭𑀺𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘 𑀅𑀲𑁆𑀲𑀢𑀺 𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀓𑁄𑀲𑀚𑁆𑀚𑀜𑁆𑀘 𑀤𑁄𑀯𑀘𑀲𑁆𑀲𑀜𑁆𑀘 𑀅𑀳𑀁𑀓𑀸𑀭𑁄 𑀘 𑀫𑀫𑀁𑀓𑀸𑀭𑁄 𑀘 𑀅𑀲𑁆𑀲𑀤𑁆𑀥𑀸 𑀘 𑀧𑀫𑀸𑀤𑁄 𑀘 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀅𑀲𑀁𑀯𑀭𑁄 𑀘 𑀅𑀪𑀺𑀚𑁆𑀛𑀸 𑀘 𑀩𑁆𑀬𑀸𑀧𑀸𑀤𑁄 𑀘 𑀦𑀻𑀯𑀭𑀡𑀜𑁆𑀘 𑀲𑀁𑀬𑁄𑀚𑀦𑀜𑁆𑀘 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘 𑀫𑀓𑁆𑀔𑁄 𑀘 𑀧𑀴𑀸𑀲𑁄 𑀘 𑀇𑀲𑁆𑀲𑀸 𑀘 𑀫𑀘𑁆𑀙𑁂𑀭𑀜𑁆𑀘 𑀫𑀸𑀬𑀸 𑀘 𑀲𑀸𑀞𑁂𑀬𑁆𑀬𑀜𑁆𑀘 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘𑀸’’𑀢𑀺 (𑀦𑁂𑀢𑁆𑀢𑀺. 𑁮𑁮) 𑀤𑀼𑀓𑀤𑀼𑀓𑀯𑀲𑁂𑀦 𑀤𑁂𑀲𑀺𑀢𑁄 𑀅𑀬𑀁 𑀤𑀺𑀲𑀸𑀪𑀽𑀢𑁄 𑀅𑀓𑀼𑀲𑀮𑀥𑀫𑁆𑀫𑀲𑀫𑀽𑀳𑁄 𑀤𑁆𑀯𑀺𑀦𑁆𑀦𑀁 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀁𑀓𑀺𑀮𑁂𑀲𑁄 𑀳𑁄𑀢𑀻𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀲𑀁𑀓𑀺𑀮𑁂𑀲𑀲𑀸𑀫𑀜𑁆𑀜𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀇𑀫𑁂𑀲𑀼 𑀧𑀦𑁆𑀦𑀭𑀲𑀲𑀼 𑀤𑀼𑀓𑀤𑀼𑀓𑀯𑀲𑁂𑀦 𑀤𑁂𑀲𑀺𑀢𑁂𑀲𑀼 𑀤𑀺𑀲𑀸𑀪𑀽𑀢𑁂𑀲𑀼 𑀅𑀓𑀼𑀲𑀮𑀥𑀫𑁆𑀫𑁂𑀲𑀼 𑀓𑀢𑀫𑁄 𑀅𑀓𑀼𑀲𑀮𑀥𑀫𑁆𑀫𑁄 𑀓𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀲𑀸’’𑀢𑀺 𑀫𑀦𑀲𑀸𑀯 𑀤𑀺𑀲𑀸𑀥𑀫𑁆𑀫𑀪𑀸𑀯𑁂𑀦 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀅𑀬𑀁 𑀧𑀞𑀫𑁄 𑀧𑀞𑀫𑁄 𑀅𑀓𑀼𑀲𑀮𑀥𑀫𑁆𑀫𑁄 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀞𑀫𑀸 𑀤𑀺𑀲𑀸 𑀦𑀸𑀫, 𑀅𑀬𑀁 𑀅𑀬𑀁 𑀤𑀼𑀢𑀺𑀬𑁄 𑀤𑀼𑀢𑀺𑀬𑁄 𑀅𑀓𑀼𑀲𑀮𑀥𑀫𑁆𑀫𑁄 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀼𑀢𑀺𑀬𑀸 𑀤𑀺𑀲𑀸 𑀦𑀸𑀫𑀸’’𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀲𑀫𑀼𑀤𑀬𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑀸𑀦𑀺 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸 𑀯𑀺𑀪𑀚𑀺𑀢𑀩𑁆𑀩𑀥𑀫𑁆𑀫𑀲𑀪𑀸𑀯𑁄 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑁄, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺, 𑀢𑀲𑁆𑀲 𑀑𑀮𑁄𑀓𑀦𑀸 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀤𑀺𑀲𑀸𑀮𑁄𑀘𑀦𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺, 𑀢𑀣𑀸 𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀸𑀯𑀺𑀲𑁂𑀲𑀪𑀽𑀢𑀲𑁆𑀲 𑀥𑀫𑁆𑀫𑀯𑀺𑀲𑁂𑀲𑀲𑁆𑀲 𑀧𑀼𑀕𑁆𑀕𑀮𑀸𑀦𑀁 𑀦𑀬𑀦𑀜𑁆𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀬𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀅𑀗𑁆𑀓𑀼𑀲𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺.

‘‘𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘, 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘, 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀯𑀻𑀭𑀺𑀬𑀸𑀭𑀫𑁆𑀪𑁄 𑀘, 𑀲𑁄𑀯𑀘𑀲𑁆𑀲𑀜𑁆𑀘 𑀥𑀫𑁆𑀫𑁂 𑀜𑀸𑀡𑀜𑁆𑀘 𑀅𑀦𑁆𑀯𑀬𑁂 𑀜𑀸𑀡𑀜𑁆𑀘, 𑀔𑀬𑁂 𑀜𑀸𑀡𑀜𑁆𑀘 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀜𑁆𑀘, 𑀲𑀤𑁆𑀥𑀸 𑀘 𑀅𑀧𑁆𑀧𑀫𑀸𑀤𑁄 𑀘, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀲𑀁𑀯𑀭𑁄 𑀘, 𑀅𑀦𑀪𑀺𑀚𑁆𑀛𑀸 𑀘 𑀅𑀩𑁆𑀬𑀸𑀧𑀸𑀤𑁄 𑀘, 𑀭𑀸𑀕𑀯𑀺𑀭𑀸𑀕𑀸 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺, 𑀅𑀪𑀺𑀲𑀫𑀬𑁄 𑀘 𑀅𑀧𑁆𑀧𑀺𑀘𑁆𑀙𑀢𑀸 𑀘, 𑀲𑀦𑁆𑀢𑀼𑀝𑁆𑀞𑀺 𑀘 𑀅𑀓𑁆𑀓𑁄𑀥𑁄 𑀘, 𑀅𑀦𑀼𑀧𑀦𑀸𑀳𑁄 𑀘 𑀅𑀫𑀓𑁆𑀔𑁄 𑀘, 𑀅𑀧𑀴𑀸𑀲𑁄 𑀘 𑀇𑀲𑁆𑀲𑀸𑀧𑀳𑀸𑀦𑀜𑁆𑀘 𑀫𑀘𑁆𑀙𑀭𑀺𑀬𑀧𑁆𑀧𑀳𑀸𑀦𑀜𑁆𑀘 𑀯𑀺𑀚𑁆𑀚𑀸 𑀘, 𑀯𑀺𑀫𑀼𑀢𑁆𑀢𑀺 𑀘 𑀲𑀗𑁆𑀔𑀢𑀸𑀭𑀫𑁆𑀫𑀡𑁄 𑀘 𑀯𑀺𑀫𑁄𑀓𑁆𑀔𑁄, 𑀅𑀲𑀗𑁆𑀔𑀢𑀸𑀭𑀫𑁆𑀫𑀡𑁄 𑀘 𑀯𑀺𑀫𑁄𑀓𑁆𑀔𑁄, 𑀲𑀉𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀅𑀦𑀼𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺 (𑀦𑁂𑀢𑁆𑀢𑀺. 𑁮𑁮) 𑀢𑀺𑀓𑀤𑀼𑀓𑀯𑀲𑁂𑀦 𑀤𑁂𑀲𑀺𑀢𑀁 𑀇𑀤𑀁 𑀤𑀺𑀲𑀸𑀪𑀽𑀢𑀁 𑀓𑀼𑀲𑀮𑀲𑀫𑀽𑀳𑀥𑀫𑁆𑀫𑀚𑀸𑀢𑀁 𑀤𑁆𑀯𑀺𑀦𑁆𑀦𑀁 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑁄𑀤𑀸𑀦𑀁 𑀳𑁄𑀢𑀻𑀢𑀺 𑀯𑁄𑀤𑀸𑀦𑀧𑀓𑁆𑀔𑁂 𑀯𑁄𑀤𑀸𑀦𑀲𑀸𑀫𑀜𑁆𑀜𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀇𑀫𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀤𑀼𑀓𑀤𑀼𑀓𑀯𑀲𑁂𑀦 𑀯𑀸 𑀤𑁂𑀲𑀺𑀢𑁂𑀲𑀼 𑀤𑀺𑀲𑀸𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑀫𑁄 𑀓𑀢𑀫𑁄 𑀓𑀼𑀲𑀮𑀥𑀫𑁆𑀫𑁄 𑀓𑀢𑀫𑀲𑁆𑀲 𑀓𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀲𑀸’’𑀢𑀺 𑀫𑀦𑀲𑀸𑀯 𑀤𑀺𑀲𑀸𑀥𑀫𑁆𑀫𑀪𑀸𑀯𑁂𑀦 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀧𑀞𑀫𑁄 𑀧𑀞𑀫𑁄 𑀓𑀼𑀲𑀮𑀥𑀫𑁆𑀫𑁄 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑁄𑀤𑀸𑀦𑀧𑀓𑁆𑀔𑁂 𑀧𑀞𑀫𑀸 𑀤𑀺𑀲𑀸 𑀦𑀸𑀫, 𑀅𑀬𑀁 𑀤𑀼𑀢𑀺𑀬𑁄 𑀤𑀼𑀢𑀺𑀬𑁄 𑀓𑀼𑀲𑀮𑀥𑀫𑁆𑀫𑁄 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑁄𑀤𑀸𑀦𑀧𑀓𑁆𑀔𑁂 𑀤𑀼𑀢𑀺𑀬𑀸 𑀤𑀺𑀲𑀸 𑀦𑀸𑀫𑀸’’𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀫𑀕𑁆𑀕𑀲𑀘𑁆𑀘𑀦𑀺𑀭𑁄𑀥𑀲𑀘𑁆𑀘𑀸𑀦𑀺 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸 𑀯𑀺𑀪𑀚𑀺𑀢𑀩𑁆𑀩𑀥𑀫𑁆𑀫𑀪𑀸𑀯𑁄 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑁄, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺, 𑀢𑀲𑁆𑀲 𑀑𑀮𑁄𑀓𑀦𑀸 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀤𑀺𑀲𑀸𑀮𑁄𑀘𑀦𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺, 𑀢𑀣𑀸 𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀸𑀯𑀺𑀲𑁂𑀲𑀪𑀽𑀢𑀲𑁆𑀲 𑀥𑀫𑁆𑀫𑀯𑀺𑀲𑁂𑀲𑀲𑁆𑀲 𑀧𑀼𑀕𑁆𑀕𑀮𑀸𑀦𑀁 𑀦𑀬𑀦𑀜𑁆𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀬𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀅𑀗𑁆𑀓𑀼𑀲𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺.

‘‘𑀓𑀣𑀁 𑀢𑀺𑀧𑀼𑀓𑁆𑀔𑀮𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀻’’𑀢𑀺 𑀘𑁂 𑀧𑀼𑀘𑁆𑀙𑁂𑀬𑁆𑀬, ‘‘𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑁋 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑁋 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀺𑀲𑁆𑀲𑁄 𑀅𑀓𑀼𑀲𑀮𑀲𑀜𑁆𑀜𑀸 𑁋 𑀓𑀸𑀫𑀲𑀜𑁆𑀜𑀸, 𑀩𑁆𑀬𑀸𑀧𑀸𑀤𑀲𑀜𑁆𑀜𑀸, 𑀯𑀺𑀳𑀺𑀁𑀲𑀸𑀲𑀜𑁆𑀜𑀸. 𑀢𑀺𑀲𑁆𑀲𑁄 𑀯𑀺𑀧𑀭𑀻𑀢𑀲𑀜𑁆𑀜𑀸 𑁋 𑀦𑀺𑀘𑁆𑀘𑀲𑀜𑁆𑀜𑀸, 𑀲𑀼𑀔𑀲𑀜𑁆𑀜𑀸, 𑀅𑀢𑁆𑀢𑀲𑀜𑁆𑀜𑀸. 𑀢𑀺𑀲𑁆𑀲𑁄 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸 𑁋 𑀤𑀼𑀓𑁆𑀔𑀤𑀼𑀓𑁆𑀔𑀢𑀸, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸. 𑀢𑀬𑁄 𑀅𑀕𑁆𑀕𑀻 𑁋 𑀭𑀸𑀕𑀕𑁆𑀕𑀺, 𑀤𑁄𑀲𑀕𑁆𑀕𑀺, 𑀫𑁄𑀳𑀕𑁆𑀕𑀺. 𑀢𑀬𑁄 𑀲𑀮𑁆𑀮𑀸 𑁋 𑀭𑀸𑀕𑀲𑀮𑁆𑀮𑁄, 𑀤𑁄𑀲𑀲𑀮𑁆𑀮𑁄, 𑀫𑁄𑀳𑀲𑀮𑁆𑀮𑁄. 𑀢𑀺𑀲𑁆𑀲𑁄 𑀚𑀝𑀸 𑁋 𑀭𑀸𑀕𑀚𑀝𑀸, 𑀤𑁄𑀲𑀚𑀝𑀸, 𑀫𑁄𑀳𑀚𑀝𑀸. 𑀢𑀺𑀲𑁆𑀲𑁄 𑀅𑀓𑀼𑀲𑀮𑀽𑀧𑀧𑀭𑀺𑀓𑁆𑀔𑀸 𑁋 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁. 𑀢𑀺𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑁋 𑀲𑀻𑀮𑀯𑀺𑀧𑀢𑁆𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀻’’𑀢𑀺 (𑀦𑁂𑀢𑁆𑀢𑀺. 𑁮𑁮) 𑀢𑀺𑀓𑀯𑀲𑁂𑀦 𑀤𑁂𑀲𑀺𑀢𑁄 𑀅𑀬𑀁 𑀤𑀺𑀲𑀸𑀪𑀽𑀢𑁄 𑀅𑀓𑀼𑀲𑀮𑀥𑀫𑁆𑀫𑀲𑀫𑀽𑀳𑁄 𑀢𑀺𑀡𑁆𑀡𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀁 𑀲𑀁𑀓𑀺𑀮𑁂𑀲𑁄 𑀳𑁄𑀢𑀻𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀲𑀁𑀓𑀺𑀮𑁂𑀲𑀲𑀸𑀫𑀜𑁆𑀜𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀇𑀫𑁂𑀲𑀼 𑀤𑁆𑀯𑀸𑀤𑀲𑀲𑀼 𑀢𑀺𑀓𑀢𑀺𑀓𑀯𑀲𑁂𑀦 𑀤𑁂𑀲𑀺𑀢𑁂𑀲𑀼 𑀤𑀺𑀲𑀸𑀪𑀽𑀢𑁂𑀲𑀼 𑀅𑀓𑀼𑀲𑀮𑀥𑀫𑁆𑀫𑁂𑀲𑀼 𑀓𑀢𑀫𑁄 𑀓𑀢𑀫𑁄 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀓𑀢𑀫𑀲𑁆𑀲 𑀓𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀲𑀸’’𑀢𑀺 𑀫𑀦𑀲𑀸𑀯 𑀤𑀺𑀲𑀸𑀥𑀫𑁆𑀫𑀪𑀸𑀯𑁂𑀦 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀅𑀬𑀁 𑀧𑀞𑀫𑁄 𑀧𑀞𑀫𑁄 𑀅𑀓𑀼𑀲𑀮𑀥𑀫𑁆𑀫𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀞𑀫𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀤𑀼𑀢𑀺𑀬𑁄 𑀤𑀼𑀢𑀺𑀬𑁄 𑀅𑀓𑀼𑀲𑀮𑀥𑀫𑁆𑀫𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀼𑀢𑀺𑀬𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀢𑀢𑀺𑀬𑁄 𑀢𑀢𑀺𑀬𑁄 𑀅𑀓𑀼𑀲𑀮𑀥𑀫𑁆𑀫𑁄 𑀦𑁂𑀬𑁆𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀢𑀢𑀺𑀬𑀸 𑀤𑀺𑀲𑀸 𑀦𑀸𑀫𑀸’’𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀲𑀫𑀼𑀤𑀬𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑀸𑀦𑀺 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸 𑀯𑀺𑀪𑀚𑀺𑀢𑀩𑁆𑀩𑀥𑀫𑁆𑀫𑀲𑀪𑀸𑀯𑁄 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑁄. 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀢𑀺𑀧𑀼𑀓𑁆𑀔𑀮𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀢𑀲𑁆𑀲 𑀑𑀮𑁄𑀓𑀦𑀸 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀤𑀺𑀲𑀸𑀮𑁄𑀘𑀦𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺 𑀢𑀣𑀸 𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀸𑀯𑀺𑀲𑁂𑀲𑀪𑀽𑀢𑀲𑁆𑀲 𑀥𑀫𑁆𑀫𑀯𑀺𑀲𑁂𑀲𑀲𑁆𑀲 𑀧𑀼𑀕𑁆𑀕𑀮𑀸𑀦𑀁 𑀦𑀬𑀦𑀜𑁆𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀬𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀅𑀗𑁆𑀓𑀼𑀲𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺.

‘‘𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑁋 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁, 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁, 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁. 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑁋 𑀓𑀸𑀬𑀲𑀼𑀘𑀭𑀺𑀢𑀁, 𑀯𑀘𑀻𑀲𑀼𑀘𑀭𑀺𑀢𑀁, 𑀫𑀦𑁄𑀲𑀼𑀘𑀭𑀺𑀢𑀁. 𑀢𑀬𑁄 𑀓𑀼𑀲𑀮𑀯𑀺𑀢𑀓𑁆𑀓𑀸 𑁋 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄, 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀬𑁄 𑀲𑀫𑀸𑀥𑀻 𑁋 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺. 𑀢𑀺𑀲𑁆𑀲𑁄 𑀓𑀼𑀲𑀮𑀲𑀜𑁆𑀜𑀸 𑁋 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸, 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸, 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸. 𑀢𑀺𑀲𑁆𑀲𑁄 𑀅𑀯𑀺𑀧𑀭𑀻𑀢𑀲𑀜𑁆𑀜𑀸 𑁋 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀤𑀼𑀓𑁆𑀔𑀲𑀜𑁆𑀜𑀸, 𑀅𑀦𑀢𑁆𑀢𑀲𑀜𑁆𑀜𑀸. 𑀢𑀺𑀲𑁆𑀲𑁄 𑀓𑀼𑀲𑀮𑀽𑀧𑀧𑀭𑀺𑀓𑁆𑀔𑀸 𑁋 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁, 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁, 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁. 𑀢𑀻𑀡𑀺 𑀲𑁄𑀘𑁂𑀬𑁆𑀬𑀸𑀦𑀺 𑁋 𑀓𑀸𑀬𑀲𑁄𑀘𑁂𑀬𑁆𑀬𑀁, 𑀯𑀘𑀻𑀲𑁄𑀘𑁂𑀬𑁆𑀬𑀁, 𑀫𑀦𑁄𑀲𑁄𑀘𑁂𑀬𑁆𑀬𑀁. 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑁋 𑀲𑀻𑀮𑀲𑀫𑁆𑀧𑀢𑁆𑀢𑀺, 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺, 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀢𑀬𑁄 𑀔𑀦𑁆𑀥𑀸 𑁋 𑀲𑀻𑀮𑀓𑁆𑀔𑀦𑁆𑀥𑁄, 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑁋 𑀲𑀼𑀜𑁆𑀜𑀢𑀁, 𑀅𑀦𑀺𑀫𑀺𑀢𑁆𑀢𑀁, 𑀅𑀧𑁆𑀧𑀡𑀺𑀳𑀺𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑁮𑁮) 𑀢𑀺𑀓𑀢𑀺𑀓𑀯𑀲𑁂𑀦 𑀤𑁂𑀲𑀺𑀢𑀁 𑀇𑀤𑀁 𑀤𑀺𑀲𑀸𑀪𑀽𑀢𑀁 𑀓𑀼𑀲𑀮𑀲𑀫𑀽𑀳𑀥𑀫𑁆𑀫𑀚𑀸𑀢𑀁 𑀢𑀺𑀡𑁆𑀡𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀁 𑀯𑁄𑀤𑀸𑀦𑀁 𑀳𑁄𑀢𑀻𑀢𑀺 𑀯𑁄𑀤𑀸𑀦𑀧𑀓𑁆𑀔𑁂 𑀯𑁄𑀤𑀸𑀦𑀲𑀸𑀫𑀜𑁆𑀜𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀇𑀫𑁂𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀤𑀲𑀲𑀼 𑀢𑀺𑀓𑀢𑀺𑀓𑀯𑀲𑁂𑀦 𑀤𑁂𑀲𑀺𑀢𑁂𑀲𑀼 𑀤𑀺𑀲𑀸𑀪𑀽𑀢𑁂𑀲𑀼 𑀓𑀼𑀲𑀮𑀥𑀫𑁆𑀫𑁂𑀲𑀼 𑀓𑀢𑀫𑁄 𑀓𑀢𑀫𑁄 𑀓𑀼𑀲𑀮𑀥𑀫𑁆𑀫𑁄 𑀓𑀢𑀫𑀲𑁆𑀲 𑀓𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀲𑀸’’𑀢𑀺 𑀫𑀦𑀲𑀸𑀯 𑀤𑀺𑀲𑀸𑀥𑀫𑁆𑀫𑀪𑀸𑀯𑁂𑀦 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀅𑀬𑀁 𑀧𑀞𑀫𑁄 𑀧𑀞𑀫𑁄 𑀓𑀼𑀲𑀮𑀥𑀫𑁆𑀫𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀲𑁆𑀲 𑀯𑁄𑀤𑀸𑀦𑀧𑀓𑁆𑀔𑁂 𑀧𑀞𑀫𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀤𑀼𑀢𑀺𑀬𑁄 𑀤𑀼𑀢𑀺𑀬𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀲𑁆𑀲 𑀯𑁄𑀤𑀸𑀦𑀧𑀓𑁆𑀔𑁂 𑀤𑀼𑀢𑀺𑀬𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀢𑀢𑀺𑀬𑁄 𑀢𑀢𑀺𑀬𑁄 𑀓𑀼𑀲𑀮𑀥𑀫𑁆𑀫𑁄 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑁄𑀤𑀸𑀦𑀧𑀓𑁆𑀔𑁂 𑀢𑀢𑀺𑀬𑀸 𑀤𑀺𑀲𑀸 𑀦𑀸𑀫𑀸’’𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀺𑀲𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 𑀫𑀕𑁆𑀕𑀲𑀘𑁆𑀘𑀦𑀺𑀭𑁄𑀥𑀲𑀘𑁆𑀘𑀸𑀦𑀺 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸 𑀯𑀺𑀪𑀚𑀺𑀢𑀩𑁆𑀩𑀥𑀫𑁆𑀫𑀲𑀪𑀸𑀯𑁄 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑁄. 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀢𑀺𑀧𑀼𑀓𑁆𑀔𑀮𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀢𑀲𑁆𑀲 𑀑𑀮𑁄𑀓𑀦𑀸 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀤𑀺𑀲𑀸𑀮𑁄𑀘𑀦𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀢𑀣𑀸 𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀸𑀯𑀺𑀲𑁂𑀲𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀕𑁆𑀕𑀮𑀸𑀦𑀁 𑀦𑀬𑀦𑀜𑁆𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀬𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀅𑀗𑁆𑀓𑀼𑀲𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺.

‘‘𑀓𑀣𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀘𑁂 𑀧𑀼𑀘𑁆𑀙𑁂𑀬𑁆𑀬, ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸, 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀬𑁄𑀕𑀸, 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸, 𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀘𑀢𑁆𑀢𑀸𑀭𑁄 𑀑𑀖𑀸, 𑀘𑀢𑁆𑀢𑀸𑀭𑁄 𑀲𑀮𑁆𑀮𑀸, 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀻’’𑀢𑀺 (𑀦𑁂𑀢𑁆𑀢𑀺. 𑁮𑁭) 𑀘𑀢𑀼𑀓𑁆𑀓𑀘𑀢𑀼𑀓𑁆𑀓𑀯𑀲𑁂𑀦 𑀤𑁂𑀲𑀺𑀢𑁄 𑀅𑀬𑀁 𑀤𑀺𑀲𑀸𑀪𑀽𑀢𑁄 𑀘𑀢𑀼𑀓𑁆𑀓𑁄 𑀘𑀢𑀼𑀓𑁆𑀓𑁄 𑀅𑀓𑀼𑀲𑀮𑀥𑀫𑁆𑀫𑁄 ‘‘𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀘 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀘 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀘 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀘𑀸’’𑀢𑀺 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀁𑀓𑀺𑀮𑁂𑀲𑁄𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀲𑀁𑀓𑀺𑀮𑁂𑀲𑀲𑀸𑀫𑀜𑁆𑀜𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀇𑀫𑁂𑀲𑀼 𑀘𑀢𑀼𑀓𑁆𑀓𑀘𑀢𑀼𑀓𑁆𑀓𑀯𑀲𑁂𑀦 𑀤𑁂𑀲𑀺𑀢𑁂𑀲𑀼 𑀤𑀲𑀲𑀼 𑀘𑀢𑀼𑀓𑁆𑀓𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑀫𑁄 𑀓𑀢𑀫𑁄 𑀅𑀓𑀼𑀲𑀮𑀥𑀫𑁆𑀫𑁄 𑀓𑀢𑀫𑀲𑁆𑀲 𑀓𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀲𑀸’’𑀢𑀺 𑀫𑀦𑀲𑀸𑀯 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀺𑀲𑀸𑀥𑀫𑁆𑀫𑀪𑀸𑀯𑁂𑀦 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀅𑀬𑀁 𑀧𑀞𑀫𑁄 𑀧𑀞𑀫𑁄 𑀅𑀓𑀼𑀲𑀮𑀥𑀫𑁆𑀫𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀞𑀫𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀤𑀼𑀢𑀺𑀬𑁄 𑀤𑀼𑀢𑀺𑀬𑁄 𑀅𑀓𑀼𑀲𑀮𑀥𑀫𑁆𑀫𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀼𑀢𑀺𑀬𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀢𑀢𑀺𑀬𑁄 𑀢𑀢𑀺𑀬𑁄 𑀅𑀓𑀼𑀲𑀮𑀥𑀫𑁆𑀫𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀢𑀺𑀬𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀘𑀢𑀼𑀢𑁆𑀣𑁄 𑀘𑀢𑀼𑀢𑁆𑀣𑁄 𑀅𑀓𑀼𑀲𑀮𑀥𑀫𑁆𑀫𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀢𑀼𑀢𑁆𑀣𑀸 𑀤𑀺𑀲𑀸 𑀦𑀸𑀫𑀸’’𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀺𑀲𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸, 𑀲𑀫𑀼𑀤𑀬𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑀸𑀦𑀺 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸, 𑀯𑀺𑀪𑀚𑀺𑀢𑀩𑁆𑀩𑀥𑀫𑁆𑀫𑀲𑀪𑀸𑀯𑁄 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑁄. 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀢𑀲𑁆𑀲 𑀑𑀮𑁄𑀓𑀦𑀸 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀤𑀺𑀲𑀸𑀮𑁄𑀘𑀦𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀢𑀣𑀸 𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀸𑀯𑀺𑀲𑁂𑀲𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀕𑁆𑀕𑀮𑀸𑀦𑀁 𑀦𑀬𑀦𑀜𑁆𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀬𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀅𑀗𑁆𑀓𑀼𑀲𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺.

‘‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀲𑀫𑀸𑀥𑀺𑀪𑀸𑀯𑀦𑀸, 𑀘𑀢𑁆𑀢𑀸𑀭𑁄 𑀲𑀼𑀔𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀸𑀡𑀸’’𑀢𑀺 (𑀦𑁂𑀢𑁆𑀢𑀺. 𑁮𑁬) 𑀘𑀢𑀼𑀓𑁆𑀓𑀘𑀢𑀼𑀓𑁆𑀓𑀯𑀲𑁂𑀦 𑀤𑁂𑀲𑀺𑀢𑀁 𑀇𑀤𑀁 𑀤𑀺𑀲𑀸𑀪𑀽𑀢𑀁 𑀓𑀼𑀲𑀮𑀲𑀫𑀽𑀳𑀥𑀫𑁆𑀫𑀚𑀸𑀢𑀁 ‘‘𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀘 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀘 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀲 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀘𑀸’’𑀢𑀺 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑁄𑀤𑀸𑀦𑀁 𑀳𑁄𑀢𑀻𑀢𑀺 𑀯𑁄𑀤𑀸𑀦𑀧𑀓𑁆𑀔𑁂 𑀯𑁄𑀤𑀸𑀦𑀲𑀸𑀫𑀜𑁆𑀜𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀇𑀫𑁂𑀲𑀼 𑀘𑀢𑀼𑀓𑁆𑀓𑀘𑀢𑀼𑀓𑁆𑀓𑀯𑀲𑁂𑀦 𑀤𑁂𑀲𑀺𑀢𑁂𑀲𑀼 𑀤𑀲𑀲𑀼 𑀘𑀢𑀼𑀓𑁆𑀓𑁂𑀲𑀼 𑀓𑀼𑀲𑀮𑀥𑀫𑁆𑀫𑁂𑀲𑀼 𑀓𑀢𑀫𑁄 𑀓𑀢𑀫𑁄 𑀓𑀼𑀲𑀮𑀥𑀫𑁆𑀫𑁄 𑀓𑀢𑀫𑀲𑁆𑀲 𑀓𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀲𑀸’’𑀢𑀺 𑀫𑀦𑀲𑀸𑀯 𑀤𑀺𑀲𑀸𑀥𑀫𑁆𑀫𑀪𑀸𑀯𑁂𑀦 𑀑𑀮𑁄𑀓𑁂𑀢𑁆𑀯𑀸, ‘‘𑀅𑀬𑀁 𑀅𑀬𑀁 𑀧𑀞𑀫𑁄 𑀧𑀞𑀫𑁄 𑀓𑀼𑀲𑀮𑀥𑀫𑁆𑀫𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀞𑀫𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀤𑀼𑀢𑀺𑀬𑁄 𑀤𑀼𑀢𑀺𑀬𑁄 𑀓𑀼𑀲𑀮𑀥𑀫𑁆𑀫𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀼𑀢𑀺𑀬𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀢𑀢𑀺𑀬𑁄 𑀢𑀢𑀺𑀬𑁄 𑀓𑀼𑀲𑀮𑀥𑀫𑁆𑀫𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀢𑀺𑀬𑀸 𑀤𑀺𑀲𑀸 𑀦𑀸𑀫. 𑀅𑀬𑀁 𑀅𑀬𑀁 𑀘𑀢𑀼𑀢𑁆𑀣𑁄 𑀘𑀢𑀼𑀢𑁆𑀣𑁄 𑀓𑀼𑀲𑀮𑀥𑀫𑁆𑀫𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀓𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀢𑀼𑀢𑁆𑀣𑀸 𑀤𑀺𑀲𑀸 𑀦𑀸𑀫𑀸’’𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀺𑀲𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸, 𑀫𑀕𑁆𑀕𑀲𑀘𑁆𑀘𑀦𑀺𑀭𑁄𑀥𑀲𑀘𑁆𑀘𑀸𑀦𑀺 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸, 𑀯𑀺𑀪𑀚𑀺𑀢𑀩𑁆𑀩𑀥𑀫𑁆𑀫𑀲𑀪𑀸𑀯𑁄 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑁄. 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀢𑀲𑁆𑀲 𑀑𑀮𑁄𑀓𑀦𑀸 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀸. 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀤𑀺𑀲𑀸𑀮𑁄𑀘𑀦𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀺. 𑀢𑀣𑀸 𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀸𑀯𑀺𑀲𑁂𑀲𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀕𑁆𑀕𑀮𑀸𑀦𑀁 𑀦𑀬𑀦𑀜𑁆𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀬𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀘 𑀅𑀗𑁆𑀓𑀼𑀲𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀻𑀢𑀺 𑀦𑀬𑀓𑁆𑀓𑀫𑁂𑀦 𑀲𑀗𑁆𑀔𑁂𑀧𑀢𑁄 𑀦𑀬𑀲𑀫𑀼𑀝𑁆𑀞𑀸𑀦𑀁 𑀪𑀯𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺.

𑀇𑀢𑀺 𑀦𑀬𑀲𑀫𑀼𑀝𑁆𑀞𑀸𑀦𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.