𑀲𑀸𑀲𑀦𑀧𑀝𑁆𑀞𑀸𑀦𑀯𑀺𑀪𑀸𑀯𑀦𑀸

𑁮𑁯. ‘‘𑀢𑀢𑁆𑀣 𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀆𑀘𑀭𑀺𑀬𑁂𑀦 𑀲𑀩𑁆𑀩𑀣𑀸 𑀦𑀬𑀲𑀫𑀼𑀝𑁆𑀞𑀸𑀦𑀁 𑀞𑀧𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀲𑁄𑀴𑀲𑀳𑀸𑀭𑀧𑀜𑁆𑀘𑀦𑀬𑀅𑀝𑁆𑀞𑀸𑀭𑀲𑀫𑀽𑀮𑀧𑀤𑁂𑀲𑀼 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀓𑀣𑀁 𑀯𑀺𑀪𑀢𑁆𑀢𑀸, 𑀓𑀼𑀳𑀺𑀁 𑀅𑀫𑁆𑀳𑁂𑀳𑀺 𑀤𑀝𑁆𑀞𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑀢𑁆𑀣 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑁄𑀴𑀲𑀳𑀸𑀭𑀧𑀜𑁆𑀘𑀦𑀬𑀅𑀝𑁆𑀞𑀸𑀭𑀲𑀫𑀽𑀮𑀧𑀤𑁂𑀲𑀼 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀓𑁂𑀦 𑀧𑀤𑁂𑀦 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀓𑀼𑀳𑀺𑀁 𑀅𑀫𑁆𑀳𑁂𑀳𑀺 𑀯𑀺𑀢𑁆𑀣𑀸𑀭𑀢𑁄 𑀤𑀝𑁆𑀞𑀩𑁆𑀩𑀸𑀢𑀺 𑀧𑀼𑀘𑁆𑀙𑀢𑀺. 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀲𑀸𑀲𑀦𑀧𑀝𑁆𑀞𑀸𑀦𑁂 𑀫𑀬𑀸 𑀯𑀺𑀪𑀢𑁆𑀢𑀸, 𑀢𑀼𑀫𑁆𑀳𑁂𑀳𑀺 𑀘 𑀯𑀺𑀢𑁆𑀣𑀸𑀭𑀢𑁄 𑀲𑀸𑀲𑀦𑀧𑀝𑁆𑀞𑀸𑀦𑁂 𑀤𑀝𑁆𑀞𑀩𑁆𑀩𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀯𑀺𑀪𑀢𑁆𑀢𑀸𑀬𑁂𑀯 𑀳𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀤𑀝𑁆𑀞𑀩𑁆𑀩𑀸 𑀪𑀯𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁮𑁯) 𑀧𑀦 𑁋

‘‘𑀏𑀯𑀁 𑀲𑀩𑁆𑀩𑀣𑀸 𑀦𑀬𑀲𑀫𑀼𑀝𑁆𑀞𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀲𑀸𑀲𑀦𑀧𑀝𑁆𑀞𑀸𑀦𑀁 𑀯𑀺𑀪𑀚𑀦𑁆𑀢𑁄 𑀬𑀲𑁆𑀫𑀸 𑀲𑀗𑁆𑀕𑀳𑀯𑀸𑀭𑀸𑀤𑀻𑀲𑀼 𑀫𑀽𑀮𑀧𑀤𑁂𑀳𑁂𑀯 𑀧𑀝𑁆𑀞𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀲𑀭𑀽𑀧𑀢𑁄 𑀦 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀬𑀣𑀸 𑀫𑀽𑀮𑀧𑀤𑁂𑀳𑀺 𑀧𑀝𑁆𑀞𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁, 𑀏𑀯𑀁 𑀧𑀝𑁆𑀞𑀸𑀦𑀢𑁄𑀧𑀺 𑀫𑀽𑀮𑀧𑀤𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀸? 𑀲𑀸𑀲𑀦𑀧𑀝𑁆𑀞𑀸𑀦𑁂’𑀢𑀺 𑀆𑀳𑀸’’𑀢𑀺 𑁋

𑀯𑀼𑀢𑁆𑀢𑀁. 𑀲𑀸𑀲𑀦𑀧𑀝𑁆𑀞𑀸𑀦𑁂 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀤𑀝𑁆𑀞𑀩𑁆𑀩𑀸𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀸, ‘‘𑀓𑀢𑀫𑀁 𑀢𑀁 𑀲𑀸𑀲𑀦𑀧𑀝𑁆𑀞𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀲𑀸𑀲𑀦𑀧𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀝𑁆𑀞𑀸𑀭𑀲𑀫𑀽𑀮𑀧𑀤𑀲𑀸𑀲𑀦𑀧𑀝𑁆𑀞𑀸𑀦𑁂𑀲𑀼 𑀓𑀢𑀫𑀁 𑀢𑀁 𑀲𑀸𑀲𑀦𑀧𑀝𑁆𑀞𑀸𑀦𑀦𑁆𑀢𑀺 𑀇𑀤𑀸𑀦𑀺 𑀫𑀬𑀸 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀁 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀲𑀼𑀢𑁆𑀢𑀁 𑀲𑀸𑀲𑀦𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀲𑀸𑀲𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁. 𑀧𑀝𑁆𑀞𑀸𑀦𑀦𑁆𑀢𑀺 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀢𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀞𑀸𑀦𑀁 𑀧𑀯𑀢𑁆𑀢𑀦𑀁 𑀧𑀝𑁆𑀞𑀸𑀦𑀁, 𑀢𑀁𑀤𑀻𑀧𑀦𑀲𑀼𑀢𑁆𑀢𑀁 𑀧𑀦 𑀇𑀥 𑀧𑀝𑁆𑀞𑀸𑀦𑀁 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺. 𑀅𑀣 𑀯𑀸 𑀲𑀸𑀲𑀦𑀦𑁆𑀢𑀺 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀢𑁆𑀢𑀬𑀁 𑀲𑀸𑀲𑀦𑀁 𑀦𑀸𑀫, 𑀢𑀁 𑀲𑀺𑀓𑁆𑀔𑀢𑁆𑀢𑀬𑀁 𑀧𑀢𑀺𑀝𑁆𑀞𑀳𑀢𑀺 𑀏𑀢𑁂𑀦 𑀲𑀁𑀓𑀺𑀮𑁂𑀲𑀸𑀤𑀺𑀦𑀸𑀢𑀺 𑀧𑀝𑁆𑀞𑀸𑀦𑀁, 𑀲𑀺𑀓𑁆𑀔𑀢𑁆𑀢𑀬𑀲𑁆𑀲 𑀲𑀸𑀲𑀦𑀲𑁆𑀲 𑀧𑀝𑁆𑀞𑀸𑀦𑀦𑁆𑀢𑀺 𑀲𑀸𑀲𑀦𑀧𑀝𑁆𑀞𑀸𑀦𑀁. 𑀢𑀤𑀸𑀥𑀸𑀭𑀪𑀽𑀢𑀁 𑀲𑀼𑀢𑁆𑀢𑀫𑁆𑀧𑀺 𑀞𑀸𑀦𑁆𑀬𑀽𑀧𑀘𑀸𑀭𑀢𑁄 𑀲𑀸𑀲𑀦𑀧𑀝𑁆𑀞𑀸𑀦𑀁 𑀦𑀸𑀫. 𑀢𑀁 𑀲𑀸𑀲𑀦𑀧𑀝𑁆𑀞𑀸𑀦𑀲𑀼𑀢𑁆𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 𑁋

‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀢𑀡𑁆𑀳𑀸𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀤𑀺𑀝𑁆𑀞𑀺𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀤𑀼𑀘𑁆𑀘𑀭𑀺𑀢𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺 𑁋

𑀯𑀼𑀢𑁆𑀢𑀁. ‘‘𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀬𑁂 𑀲𑀁𑀓𑀺𑀮𑁂𑀲𑀸𑀤𑀬𑁄 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀲𑀁𑀓𑀺𑀮𑁂𑀲𑀸𑀤𑀻𑀲𑀼 𑀲𑀁𑀓𑀺𑀮𑁂𑀲𑁄 𑀓𑀺𑀢𑁆𑀢𑀓𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀲𑀁𑀓𑀺𑀮𑁂𑀲𑁄 𑀢𑀺𑀯𑀺𑀥𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀲𑀁𑀓𑀺𑀮𑁂𑀲𑀸𑀤𑀻𑀲𑀼 𑀥𑀫𑁆𑀫𑁂𑀲𑀼. ‘‘𑀢𑀺𑀯𑀺𑀥𑁂 𑀢𑀲𑁆𑀫𑀺𑀁 𑀲𑀁𑀓𑀺𑀮𑁂𑀲𑁂 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀓𑀢𑀫𑁂𑀦 𑀓𑀼𑀲𑀮𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀲𑀫𑀣𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀺𑀯𑀺𑀥𑁂 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀓𑁂. ‘‘𑀲𑁄 𑀲𑀫𑀣𑁄 𑀔𑀦𑁆𑀥𑁂𑀲𑀼 𑀓𑀢𑀫𑁄 𑀔𑀦𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀲𑀫𑀣𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. ‘‘𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀓𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀲𑀸 𑀯𑀺𑀧𑀲𑁆𑀲𑀦𑀸 𑀓𑀢𑀫𑁄 𑀔𑀦𑁆𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀸 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. ‘‘𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀓𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀲𑀼𑀘𑀭𑀺𑀢𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀢𑀁 𑀲𑀼𑀘𑀭𑀺𑀢𑀁 𑀓𑀢𑀫𑁄 𑀔𑀦𑁆𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀁 𑀲𑀼𑀘𑀭𑀺𑀢𑀁 𑀲𑀻𑀮𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. ‘‘𑀢𑀲𑁆𑀫𑀺𑀁 𑀲𑀻𑀮𑁂 𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀺𑀁 𑀪𑀯𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀲𑁆𑀲 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀻𑀮𑁂 𑀲𑀼𑀘𑀭𑀺𑀢𑀲𑀗𑁆𑀔𑀸𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑀲𑁆𑀲 𑀲𑀻𑀮𑀯𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀯𑁂𑀲𑀼 𑀓𑀸𑀫𑀪𑀯𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀆𑀲𑀢𑁆𑀢𑀺 𑀪𑀯𑀧𑀢𑁆𑀣𑀦𑀸 𑀬𑀤𑀺 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁𑀲𑀸𑀬𑀦𑁆𑀢𑀺 𑀏𑀯𑀁 𑀅𑀲𑁆𑀲 𑀅𑀬𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀯𑀁 𑀲𑀢𑀺 𑀅𑀲𑁆𑀲 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀅𑀬𑀁 𑀆𑀲𑀢𑁆𑀢𑀺 𑀪𑀯𑀧𑀢𑁆𑀣𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀘 𑀪𑀯𑀢𑀺, 𑀘-𑀲𑀤𑁆𑀤𑁂𑀦 𑀤𑀸𑀦𑀫𑀬𑀲𑀻𑀮𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀘 𑀪𑀯𑀢𑀻𑀢𑀺 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀓𑀸𑀫𑀪𑀯𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀉𑀧𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀢𑀻𑀢𑀺.

‘‘𑀲𑀁𑀓𑀺𑀮𑁂𑀲𑀸𑀤𑀬𑁄 𑀬𑁂𑀳𑀺 𑀲𑀼𑀢𑁆𑀢𑁂𑀳𑀺 𑀤𑀲𑁆𑀲𑀺𑀢𑀸, 𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀓𑀺𑀢𑁆𑀢𑀓𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀸𑀥𑀸𑀭𑀡𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑀼𑀢𑁆𑀢𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺 𑀪𑀯𑀦𑁆𑀢𑀺, 𑀲𑀸𑀥𑀸𑀭𑀡𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢, 𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀸𑀦𑀺 𑀓𑀢𑀸𑀦𑀺 𑀫𑀺𑀲𑁆𑀲𑀺𑀢𑀸𑀦𑀺 𑀘𑀢𑁆𑀢𑀸𑀭𑀺 𑀪𑀯𑀦𑁆𑀢𑀺. 𑀇𑀢𑀺 𑀅𑀝𑁆𑀞 𑀲𑀼𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀢𑀸𑀦𑀺𑀬𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀅𑀝𑁆𑀞 𑀲𑀼𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀲𑀸𑀥𑀸𑀭𑀡𑀸𑀦𑀺 𑀯𑀸𑀲𑀦𑀸𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢- 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀲𑀁𑀓𑀺𑀮𑁂𑀲- 𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢- 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢- 𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢- 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢- 𑀦𑁂𑀯𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀦𑀯𑀸𑀲𑀦𑀸- 𑀪𑀸𑀕𑀺𑀬𑀦𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀦𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑀸𑀦𑀺 𑀓𑀢𑀸𑀦𑀺 𑀫𑀺𑀲𑁆𑀲𑀺𑀢𑀸𑀦𑀺 𑀅𑀝𑁆𑀞 𑀲𑀼𑀢𑁆𑀢𑀸𑀦𑀺 𑀪𑀯𑀦𑁆𑀢𑀻𑀢𑀺 𑀲𑁄𑀴𑀲 𑀲𑀼𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀢𑁂𑀲𑀼 𑀲𑁄𑀴𑀲𑀲𑀼𑀢𑁆𑀢𑁂𑀲𑀼 𑀘𑀢𑁆𑀢𑀸𑀭𑀺 𑀏𑀓𑀓𑀸𑀦𑀺 𑀲𑀼𑀢𑁆𑀢𑀸𑀦𑀺 𑀘 𑀘𑀢𑁆𑀢𑀸𑀭𑀺 𑀤𑀼𑀓𑀸𑀦𑀺 𑀲𑀼𑀢𑁆𑀢𑀸𑀦𑀺 𑀘 𑀤𑁆𑀯𑁂 𑀢𑀺𑀓𑀸𑀦𑀺 𑀘 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺, 𑀤𑁆𑀯𑁂 𑀤𑀼𑀓𑀸𑀦𑀺 𑀲𑀼𑀢𑁆𑀢𑀸𑀦𑀺 𑀘 𑀤𑁆𑀯𑁂 𑀢𑀺𑀓𑀸𑀦𑀺 𑀘 𑀤𑁆𑀯𑁂 𑀘𑀢𑀼𑀓𑁆𑀓𑀸𑀦𑀺 𑀲𑀼𑀢𑁆𑀢𑀸𑀦𑀺 𑀘 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁮𑁯) 𑀆𑀕𑀢𑀸𑀦𑀺.

‘‘𑀬𑀤𑀺 𑀧𑀝𑁆𑀞𑀸𑀦𑀦𑀬𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀲𑁄𑀴𑀲 𑀲𑀼𑀢𑁆𑀢𑀸𑀦𑀺𑀬𑁂𑀯 𑀯𑀺𑀪𑀢𑁆𑀢𑀸𑀦𑀺, 𑀏𑀯𑀁 𑀲𑀢𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀦𑀯𑀯𑀺𑀥𑀁 𑀲𑀓𑀮𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁 𑀧𑀝𑁆𑀞𑀸𑀦𑀦𑀬𑁂𑀦 𑀅𑀯𑀺𑀪𑀢𑁆𑀢𑀁 𑀪𑀯𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀫𑁂𑀳𑀺 𑀲𑁄𑀴𑀲𑀳𑀺 𑀲𑀼𑀢𑁆𑀢𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑁆𑀞𑀸𑀦𑀦𑀬𑁂𑀦 𑀯𑀺𑀪𑀢𑁆𑀢𑁂𑀳𑀺 𑀲𑁄𑀴𑀲𑀳𑀺 𑀇𑀫𑁂𑀳𑀺 𑀲𑀼𑀢𑁆𑀢𑁂𑀳𑀺 𑀦𑀯𑀯𑀺𑀥𑀁 𑀲𑀓𑀮𑀁 𑀧𑀭𑀺𑀬𑀢𑁆𑀢𑀺𑀲𑀼𑀢𑁆𑀢𑀁 𑀧𑀝𑁆𑀞𑀸𑀦𑀦𑀬𑁂𑀦 𑀯𑀺𑀪𑀢𑁆𑀢𑀁𑀬𑁂𑀯 𑀳𑀼𑀢𑁆𑀯𑀸 𑀪𑀺𑀦𑁆𑀦𑀁 𑀪𑀯𑀢𑀺. 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀪𑁂𑀤𑀸𑀬 𑀕𑀸𑀣𑀸𑀬 𑀕𑀸𑀣𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀪𑁂𑀤𑁂𑀦 𑀯𑁂𑀬𑁆𑀬𑀸𑀓𑀭𑀡𑁂𑀦 𑀯𑁂𑀬𑁆𑀬𑀸𑀓𑀭𑀡𑀁 𑀅𑀦𑀼𑀫𑀺𑀦𑀺𑀢𑀩𑁆𑀩𑀁. 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀪𑁂𑀤𑁂𑀦 𑀲𑀼𑀢𑁆𑀢𑁂𑀦 𑀲𑀼𑀢𑁆𑀢𑀁 𑀅𑀦𑀼𑀫𑀺𑀦𑀺𑀢𑀩𑁆𑀩𑀁 𑀪𑀯𑀢𑀺𑀬𑁂𑀯𑀸𑀢𑀺.

𑁯𑁦. ‘‘𑀢𑁂𑀲𑀼 𑀲𑁄𑀴𑀲𑀲𑀼 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑁄𑀴𑀲𑀲𑀼 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀓𑀢𑀫𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺.

‘‘𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀦𑀸𑀩𑀤𑁆𑀥𑀸, 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂;

𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀺, 𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 𑀫𑀸𑀢𑀭’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑁂 𑀯𑀸𑀘𑀓𑀜𑀸𑀧𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀬𑁂 𑀲𑀢𑁆𑀢𑀸 𑀓𑀸𑀫𑀦𑁆𑀥𑀸 𑀓𑀸𑀫𑁂𑀦 𑀅𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸 𑀢𑀡𑁆𑀳𑀸𑀙𑀤𑀦𑁂𑀦 𑀙𑀸𑀤𑀺𑀢𑀸, 𑀧𑀫𑀢𑁆𑀢𑀩𑀦𑁆𑀥𑀦𑀸𑀬 𑀩𑀤𑁆𑀥𑀸 𑀩𑀦𑁆𑀥𑀺𑀢𑀩𑁆𑀩𑀸, 𑀢𑁂 𑀲𑀢𑁆𑀢𑁂 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀢𑀺, 𑀬𑀣𑀸 𑀢𑀁 𑀓𑀼𑀫𑀺𑀦𑀸𑀫𑀼𑀔𑁂 𑀬𑁂 𑀫𑀘𑁆𑀙𑀸 𑀕𑀳𑀺𑀢𑀸, 𑀢𑁂 𑀫𑀘𑁆𑀙𑁂 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀢𑀺 𑀇𑀯, 𑀏𑀯𑀁 𑀢𑁂 𑀲𑀢𑁆𑀢𑁂 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀢𑀺. 𑀔𑀻𑀭𑀧𑀓𑁄 𑀯𑀘𑁆𑀙𑁄 𑀫𑀸𑀢𑀭𑀁 𑀅𑀦𑁆𑀯𑁂𑀢𑀺 𑀇𑀯, 𑀏𑀯𑀁 𑀢𑁂 𑀲𑀢𑁆𑀢𑁂 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀣 𑀯𑀸 𑀔𑀻𑀭𑀧𑀓𑁄 𑀯𑀘𑁆𑀙𑁄 𑀫𑀸𑀢𑀭𑀁 𑀅𑀦𑁆𑀯𑁂𑀢𑀺 𑀇𑀯, 𑀓𑀼𑀫𑀺𑀦𑀸𑀫𑀼𑀔𑁂 𑀕𑀳𑀺𑀢𑀸 𑀫𑀘𑁆𑀙𑀸 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀦𑁆𑀢𑀺 𑀇𑀯 𑀘, 𑀏𑀯𑀁 𑀬𑁂 𑀲𑀢𑁆𑀢𑀸 𑀓𑀸𑀫𑀦𑁆𑀥𑀸 𑀧𑀫𑀢𑁆𑀢𑀩𑀦𑁆𑀥𑀦𑀸𑀬 𑀩𑀦𑁆𑀥𑀺𑀢𑀩𑁆𑀩𑀸, 𑀢𑁂 𑀲𑀢𑁆𑀢𑀸 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀦𑁆𑀢𑀻𑀢𑀺 𑀬𑁄𑀚𑀦𑀸.

‘‘𑀇𑀤𑀁 𑀲𑀼𑀢𑁆𑀢𑀁𑀬𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑀢𑀺𑀕𑀫𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄, 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀅𑀢𑀺𑀯𑀢𑁆𑀢𑀢𑀺;

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸’’𑀢𑀺. 𑁋

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑁋

𑀯𑀼𑀢𑁆𑀢𑀁. 𑀙𑀦𑁆𑀤𑀸 𑀙𑀦𑁆𑀤𑀳𑁂𑀢𑀼𑀦𑀸 𑀤𑁄𑀲𑀸 𑀤𑁄𑀲𑀳𑁂𑀢𑀼𑀦𑀸 𑀪𑀬𑀸 𑀪𑀬𑀳𑁂𑀢𑀼𑀦𑀸 𑀫𑁄𑀳𑀸 𑀫𑁄𑀳𑀳𑁂𑀢𑀼𑀦𑀸 𑀬𑁄 𑀭𑀸𑀚𑀸𑀤𑀺𑀓𑁄 𑀬𑁄 𑀯𑀺𑀦𑀬𑀥𑀭𑀸𑀤𑀺𑀓𑁄 𑀯𑀸 𑀥𑀫𑁆𑀫𑀁 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀁 𑀅𑀢𑀺𑀯𑀢𑁆𑀢𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀢𑀺, 𑀢𑀲𑁆𑀲 𑀭𑀸𑀚𑀸𑀤𑀺𑀦𑁄 𑀯𑀸 𑀢𑀲𑁆𑀲 𑀯𑀺𑀦𑀬𑀥𑀭𑀸𑀤𑀺𑀦𑁄 𑀯𑀸 𑀬𑀲𑁄 𑀓𑀺𑀢𑁆𑀢𑀺 𑀘 𑀧𑀭𑀺𑀯𑀸𑀭𑁄 𑀘 𑀪𑁄𑀕𑁄 𑀘 𑀦𑀺𑀳𑀻𑀬𑀢𑀺. 𑀘𑀦𑁆𑀤𑀺𑀫𑀸 𑀓𑀸𑀴𑀧𑀓𑁆𑀔𑁂 𑀧𑀪𑀸𑀬 𑀦𑀺𑀳𑀻𑀬𑀢𑀺 𑀇𑀯, 𑀏𑀯𑀁 𑀦𑀺𑀳𑀻𑀬𑀢𑀻𑀢𑀺 𑀬𑁄𑀚𑀦𑀸.

‘‘𑀏𑀢𑁆𑀢𑀓𑀁𑀬𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸…𑀧𑁂… 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤𑀦𑁆𑀢𑀺 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀸𑀓𑀝𑁄. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀺𑀪𑀢𑁆𑀢𑁄.

‘‘𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘, 𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑁂 𑀯𑀺𑀲𑀬𑁂 𑀯𑀸𑀘𑀓𑀜𑀸𑀧𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀦𑀺𑀯𑀸𑀧𑀧𑀼𑀝𑁆𑀞𑁄 𑀫𑀳𑀸𑀯𑀭𑀸𑀳𑁄 𑀕𑀸𑀫𑀲𑀽𑀓𑀭𑁄 𑀦𑀺𑀤𑁆𑀤𑀸𑀬𑀺𑀢𑀸 𑀲𑀼𑀧𑀦𑀲𑀻𑀮𑁄 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻 𑀳𑁄𑀢𑀺 𑀇𑀯, 𑀏𑀯𑀁 𑀬𑁄 𑀫𑀦𑁆𑀤𑁄 𑀲𑀢𑁆𑀢𑁄 𑀬𑀤𑀸 𑀫𑀳𑀕𑁆𑀖𑀲𑁄 𑀳𑁄𑀢𑀺, 𑀲𑁄 𑀫𑀦𑁆𑀤𑁄 𑀲𑀢𑁆𑀢𑁄 𑀫𑀺𑀤𑁆𑀥𑀻 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀦𑀺𑀤𑁆𑀤𑀸𑀬𑀺𑀢𑀸 𑀫𑀼𑀤𑀼𑀨𑀲𑁆𑀲𑀲𑀬𑀦𑁂 𑀫𑀼𑀤𑀼𑀳𑀢𑁆𑀣𑁂𑀳𑀺 𑀧𑀭𑀸𑀫𑀲𑀺𑀢𑁄 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀁 𑀉𑀧𑁂𑀢𑀻𑀢𑀺 𑀬𑁄𑀚𑀦𑀸.

‘‘𑀅𑀬𑀲𑀸𑀯 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁, 𑀢𑀢𑀼𑀝𑁆𑀞𑀸𑀬 𑀢𑀫𑁂𑀯 𑀔𑀸𑀤𑀢𑀺;

𑀏𑀯𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁, 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀦𑀬𑀦𑁆𑀢𑀺 𑀤𑀼𑀕𑁆𑀕𑀢𑀺’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀅𑀬𑀲𑀸 𑀅𑀬𑀢𑁄 𑀲𑀫𑀼𑀝𑁆𑀞𑀺𑀢𑀁 𑀚𑀸𑀢𑀫𑀮𑀁 𑀢𑀢𑀼𑀝𑁆𑀞𑀸𑀬 𑀢𑀢𑁄 𑀅𑀬𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀢𑀫𑁂𑀯 𑀅𑀬𑀁 𑀔𑀸𑀤𑀢𑀺 𑀇𑀯, 𑀏𑀯𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀥𑁄𑀦𑀘𑀸𑀭𑀺𑀧𑀼𑀕𑁆𑀕𑀮𑀁 𑀲𑀸𑀦𑀺 𑀲𑀬𑀁 𑀓𑀢𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀤𑀼𑀕𑁆𑀕𑀢𑀺𑀁 𑀦𑀬𑀦𑁆𑀢𑀻𑀢𑀺 𑀬𑁄𑀚𑀦𑀸.

‘‘𑀘𑁄𑀭𑁄 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀻𑀢𑁄, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀩𑀚𑁆𑀛𑀢𑁂 𑀘;

𑀏𑀯𑀁 𑀅𑀬𑀁 𑀧𑁂𑀘𑁆𑀘 𑀧𑀚𑀸 𑀧𑀭𑀢𑁆𑀣, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀩𑀚𑁆𑀛𑀢𑁂 𑀘𑀸’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀲𑀦𑁆𑀥𑀺𑀫𑀼𑀔𑁂 𑀭𑀸𑀚𑀧𑀼𑀭𑀺𑀲𑀸𑀤𑀻𑀳𑀺 𑀕𑀳𑀺𑀢𑁄 𑀘𑁄𑀭𑁄 𑀲𑀓𑀫𑁆𑀫𑀼𑀦𑀸 𑀅𑀢𑁆𑀢𑀦𑀸 𑀓𑀢𑁂𑀦 𑀘𑁄𑀭𑀓𑀫𑁆𑀫𑁂𑀦 𑀳𑀜𑁆𑀜𑀢𑀺 𑀘 𑀩𑀚𑁆𑀛𑀢𑁂 𑀘 𑀬𑀣𑀸, 𑀏𑀯𑀁 𑀅𑀬𑀁 𑀧𑀸𑀧𑀓𑀸𑀭𑀺𑀦𑀻 𑀧𑀚𑀸 𑀧𑀭𑀢𑁆𑀣 𑀧𑀭𑀮𑁄𑀓𑁂 𑀧𑁂𑀘𑁆𑀘 𑀲𑀓𑀫𑁆𑀫𑀼𑀦𑀸 𑀲𑀬𑀁 𑀓𑀢𑁂𑀦 𑀅𑀓𑀼𑀲𑀮𑀓𑀫𑁆𑀫𑀼𑀦𑀸 𑀲𑀢𑁆𑀣𑀸𑀤𑀻𑀳𑀺 𑀳𑀜𑁆𑀜𑀢𑀺 𑀘 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀚𑁆𑀛𑀢𑁂 𑀘𑀸𑀢𑀺 𑀬𑁄𑀚𑀦𑀸.

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀅𑀢𑁆𑀢𑀦𑁄 𑀲𑀼𑀔𑀁 𑀏𑀲𑀸𑀦𑁄 𑀏𑀲𑀫𑀸𑀦𑁄 𑀬𑁄 𑀲𑀢𑁆𑀢𑁄 𑀅𑀜𑁆𑀜𑀸𑀦𑀺 𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺, 𑀲𑁄 𑀳𑀺𑀁𑀲𑀓𑁄 𑀲𑀢𑁆𑀢𑁄 𑀧𑀭𑀮𑁄𑀓𑁂 𑀧𑁂𑀘𑁆𑀘 𑀲𑀼𑀔𑀁 𑀦 𑀮𑀪𑀢𑀻𑀢𑀺 𑀬𑁄𑀚𑀦𑀸.

‘‘𑀕𑀼𑀦𑁆𑀦𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀓𑁆𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀦𑀤𑀺𑀁 𑀢𑀭𑀫𑀸𑀦𑀸𑀦𑀁 𑀕𑀼𑀦𑁆𑀦𑀁 𑀧𑀼𑀗𑁆𑀕𑀯𑁄 𑀚𑀺𑀫𑁆𑀳𑀁 𑀘𑁂 𑀕𑀘𑁆𑀙𑀢𑀺, 𑀏𑀯𑀁 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺 𑀲𑀩𑁆𑀩𑀸 𑀢𑀸 𑀕𑀸𑀯𑀺𑀬𑁄 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺 𑀬𑀣𑀸, 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼 𑀬𑁄 𑀭𑀸𑀚𑀸 𑀲𑁂𑀝𑁆𑀞𑀲𑀫𑁆𑀫𑀢𑁄, 𑀲𑁄 𑀭𑀸𑀚𑀸 𑀅𑀥𑀫𑁆𑀫𑀁 𑀘𑀭𑀢𑀺, 𑀏𑀯𑀁 𑀭𑀜𑁆𑀜𑁂 𑀅𑀥𑀫𑁆𑀫𑀁 𑀘𑀭𑀦𑁆𑀢𑁂 𑀲𑀢𑀺 𑀇𑀢𑀭𑀸 𑀧𑀚𑀸 𑀧𑀕𑁂𑀯 𑀧𑀞𑀫𑀫𑁂𑀯 𑀅𑀥𑀫𑁆𑀫𑀁 𑀘𑀭𑀢𑀺. 𑀭𑀸𑀚𑀸 𑀅𑀥𑀫𑁆𑀫𑀺𑀓𑁄 𑀘𑁂 𑀳𑁄𑀢𑀺, 𑀏𑀯𑀁 𑀭𑀜𑁆𑀜𑁂 𑀅𑀥𑀫𑁆𑀫𑀺𑀓𑁂 𑀲𑀢𑀺 𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀓𑁆𑀔𑀁 𑀲𑁂𑀢𑀻𑀢𑀺 𑀬𑁄𑀚𑀦𑀸.

‘‘𑀲𑀼𑀓𑀺𑀘𑁆𑀙𑀭𑀽𑀧𑀸 𑀯𑀢𑀺𑀫𑁂 𑀫𑀦𑀼𑀲𑁆𑀲𑀸, 𑀓𑀭𑁄𑀦𑁆𑀢𑀺 𑀧𑀸𑀧𑀁 𑀉𑀧𑀥𑀻𑀲𑀼 𑀭𑀢𑁆𑀢𑀸;

𑀕𑀘𑁆𑀙𑀦𑁆𑀢𑀺 𑀢𑁂 𑀩𑀳𑀼𑀚𑀦𑀲𑀦𑁆𑀦𑀺𑀯𑀸𑀲𑀁, 𑀦𑀺𑀭𑀬𑀁 𑀅𑀯𑀻𑀘𑀺𑀁 𑀓𑀝𑀼𑀓𑀁 𑀪𑀬𑀸𑀦𑀓’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀬𑁂 𑀫𑀦𑀼𑀲𑁆𑀲𑀸 𑀉𑀧𑀥𑀻𑀲𑀼 𑀓𑀸𑀫𑀕𑀼𑀡𑀽𑀧𑀥𑀻𑀲𑀼 𑀭𑀢𑁆𑀢𑀸 𑀭𑀸𑀕𑀸𑀪𑀺𑀪𑀽𑀢𑀸 𑀳𑀼𑀢𑁆𑀯𑀸 𑀧𑀸𑀧𑀁 𑀅𑀓𑀼𑀲𑀮𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀇𑀫𑁂 𑀧𑀸𑀧𑀓𑀫𑁆𑀫𑀓𑀭𑀸 𑀫𑀦𑀼𑀲𑁆𑀲𑀸 𑀲𑀼𑀓𑀺𑀘𑁆𑀙𑀭𑀽𑀧𑀸 𑀯𑀢 𑀲𑀼𑀝𑁆𑀞𑀼 𑀓𑀺𑀘𑁆𑀙𑀸𑀧𑀦𑁆𑀦𑀭𑀽𑀧𑀸 𑀯𑀢 𑀪𑀯𑀦𑁆𑀢𑀺, 𑀢𑁂 𑀧𑀸𑀧𑀓𑀫𑁆𑀫𑀓𑀭𑀸 𑀫𑀦𑀼𑀲𑁆𑀲𑀸 𑀓𑀝𑀼𑀓𑀁 𑀪𑀬𑀸𑀦𑀓𑀁 𑀩𑀳𑀼𑀚𑀦𑀲𑀦𑁆𑀦𑀺𑀯𑀸𑀲𑀁 𑀦𑀺𑀭𑀬𑀁 𑀅𑀯𑀻𑀘𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸.

‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀨𑀮𑀁 𑀓𑀤𑀮𑀺𑀬𑀸 𑀨𑀮𑀁 𑀓𑀤𑀮𑀺𑀁 𑀯𑁂 𑀏𑀓𑀦𑁆𑀢𑁂𑀦 𑀳𑀦𑁆𑀢𑀺 𑀬𑀣𑀸, 𑀨𑀮𑀁 𑀯𑁂𑀴𑀼𑀁 𑀯𑁂 𑀏𑀓𑀦𑁆𑀢𑁂𑀦 𑀳𑀦𑁆𑀢𑀺 𑀬𑀣𑀸, 𑀨𑀮𑀁 𑀦𑀴𑀁 𑀯𑁂 𑀏𑀓𑀦𑁆𑀢𑁂𑀦 𑀳𑀦𑁆𑀢𑀺 𑀬𑀣𑀸, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀫𑀸𑀢𑀭𑀁 𑀯𑁂 𑀏𑀓𑀦𑁆𑀢𑁂𑀦 𑀳𑀦𑁆𑀢𑀺 𑀬𑀣𑀸, 𑀏𑀯𑀁 𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀯𑁂 𑀏𑀓𑀦𑁆𑀢𑁂𑀦 𑀳𑀦𑁆𑀢𑀻𑀢𑀺 𑀬𑁄𑀚𑀦𑀸.

‘‘𑀓𑁄𑀥𑀫𑀓𑁆𑀔𑀕𑀭𑀼 𑀪𑀺𑀓𑁆𑀔𑀼, 𑀮𑀸𑀪𑀲𑀓𑁆𑀓𑀸𑀭𑀕𑀸𑀭𑀯𑁄;

𑀲𑀼𑀔𑁂𑀢𑁆𑀢𑁂 𑀧𑀽𑀢𑀺𑀩𑀻𑀚𑀁𑀯, 𑀲𑀤𑁆𑀥𑀫𑁆𑀫𑁂 𑀦 𑀯𑀺𑀭𑀽𑀳𑀢𑀻’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀲𑀼𑀔𑁂𑀢𑁆𑀢𑁂 𑀲𑀼𑀦𑁆𑀤𑀭𑁂 𑀔𑁂𑀢𑁆𑀢𑁂𑀧𑀺 𑀔𑀺𑀢𑁆𑀢𑀁 𑀧𑀽𑀢𑀺𑀩𑀻𑀚𑀁 𑀦 𑀭𑀼𑀳𑀢𑀺 𑀇𑀯, 𑀏𑀯𑀁 𑀬𑁄 𑀪𑀺𑀓𑁆𑀔𑀼 𑀮𑀸𑀪𑀲𑀓𑁆𑀓𑀸𑀭𑀕𑀸𑀭𑀯𑁄 𑀓𑁄𑀥𑀁 𑀓𑀼𑀚𑁆𑀛𑀦𑀮𑀓𑁆𑀔𑀡𑀁 𑀓𑁄𑀥𑀁, 𑀫𑀓𑁆𑀔𑀁 𑀧𑀭𑀕𑀼𑀡𑀲𑀻𑀮𑀫𑀓𑁆𑀔𑀦𑀮𑀓𑁆𑀔𑀡𑀁 𑀫𑀓𑁆𑀔𑀜𑁆𑀘 𑀕𑀭𑀼𑀁 𑀓𑀢𑁆𑀯𑀸 𑀘𑀭𑀢𑀺, 𑀲𑁄 𑀘𑀭𑀦𑁆𑀢𑁄 𑀪𑀺𑀓𑁆𑀔𑀼 𑀲𑀤𑁆𑀥𑀫𑁆𑀫𑀲𑁆𑀫𑀺𑀁 𑀦 𑀭𑀼𑀳𑀢𑀻𑀢𑀺 𑀬𑁄𑀚𑀦𑀸.

𑁯𑁧. ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺…𑀧𑁂… 𑀇𑀢𑀺 𑀫𑁂 𑀲𑀼𑀢’’𑀦𑁆𑀢𑀺 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀪𑀺𑀓𑁆𑀔𑀯𑁂 𑀇𑀥 𑀲𑀸𑀲𑀦𑁂, 𑀮𑁄𑀓𑁂 𑀯𑀸 𑀅𑀳𑀁 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀁 𑀫𑀫 𑀘𑁂𑀢𑀲𑀸 𑀢𑀲𑁆𑀲 𑀘𑁂𑀢𑁄 𑀘𑀺𑀢𑁆𑀢𑀁 𑀧𑀭𑀺𑀘𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀏𑀯𑀁 𑀧𑀚𑀸𑀦𑀸𑀫𑀺. ‘‘𑀓𑀣𑀁 𑀧𑀚𑀸𑀦𑀸𑀫𑀻’’𑀢𑀺 𑀘𑁂 𑀧𑀼𑀘𑁆𑀙𑁂𑀬𑁆𑀬, 𑀬𑀜𑁆𑀘 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄, 𑀬𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀼𑀴𑁆𑀳𑁄 𑀅𑀬𑀁 𑀧𑀼𑀕𑁆𑀕𑀮𑁄 𑀬𑀣𑀸 𑀬𑀸𑀬 𑀤𑀼𑀧𑁆𑀧𑀝𑀺𑀧𑀤𑀸𑀬 𑀬𑁂𑀦 𑀤𑀼𑀫𑁆𑀫𑀕𑁆𑀕𑁂𑀦 𑀇𑀭𑀺𑀬𑀢𑀺 𑀧𑀯𑀢𑁆𑀢𑀢𑀺, 𑀢𑀸𑀬 𑀤𑀼𑀧𑁆𑀧𑀝𑀺𑀧𑀤𑀸𑀬 𑀢𑁂𑀦 𑀤𑀼𑀫𑁆𑀫𑀕𑁆𑀕𑁂𑀦 𑀇𑀫𑀫𑁆𑀳𑀺 𑀇𑀫𑀲𑁆𑀫𑀺𑀁 𑀲𑀫𑀬𑁂 𑀤𑀼𑀧𑁆𑀧𑀝𑀺𑀧𑀚𑁆𑀚𑀦𑀓𑀸𑀮𑁂 𑀅𑀬𑀁 𑀤𑀼𑀧𑁆𑀧𑀝𑀺𑀧𑀦𑁆𑀦𑀁 𑀧𑀝𑀺𑀧𑀦𑁆𑀦𑁄 𑀤𑀼𑀫𑁆𑀫𑀕𑁆𑀕𑀲𑀫𑀸𑀭𑀼𑀴𑁆𑀳𑁄 𑀧𑀼𑀕𑁆𑀕𑀮𑁄 𑀘𑁂 𑀓𑀸𑀮𑀁 𑀓𑀭𑁂𑀬𑁆𑀬, 𑀏𑀯𑀁 𑀲𑀢𑀺 𑀆𑀪𑀢𑀁 𑀯𑀢𑁆𑀣𑀼 𑀦𑀺𑀓𑁆𑀔𑀺𑀢𑁆𑀢𑀁 𑀬𑀣𑀸, 𑀏𑀯𑀁 𑀦𑀺𑀭𑀬𑁂 𑀦𑀺𑀓𑁆𑀔𑀺𑀢𑁆𑀢𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀪𑀺𑀓𑁆𑀔𑀯𑁂 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀧𑀤𑀼𑀝𑁆𑀞𑀁 𑀧𑀤𑁄𑀲𑀺𑀢𑀁 𑀳𑀺 𑀬𑀲𑁆𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀓𑁆𑀔𑀺𑀢𑁆𑀢𑁄. 𑀏𑀯𑀁 𑀇𑀥 𑀲𑀸𑀲𑀦𑁂, 𑀮𑁄𑀓𑁂 𑀯𑀸 𑀘𑁂𑀢𑁄𑀧𑀤𑁄𑀲𑀳𑁂𑀢𑀼 𑀘 𑀧𑀦 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀧𑀼𑀕𑁆𑀕𑀮𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀉𑀧𑀧𑀚𑁆𑀚𑀦𑁆𑀢𑀻𑀢𑀺 𑀧𑀚𑀸𑀦𑀸𑀫𑀻𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀏𑀢𑀁 ‘‘𑀧𑀤𑀼𑀝𑁆𑀞𑀘𑀺𑀢𑁆𑀢𑀁 𑀜𑀢𑁆𑀯𑀸𑀦…𑀧𑁂… 𑀦𑀺𑀭𑀬𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺 𑀕𑀸𑀣𑀸𑀯𑀘𑀦𑀁 𑀇𑀢𑀺 𑀏𑀯𑀁 𑀯𑀼𑀘𑁆𑀘𑀢𑀺.

𑀲𑀢𑁆𑀣𑀸 𑀇𑀥 𑀲𑀸𑀲𑀦𑁂, 𑀮𑁄𑀓𑁂 𑀯𑀸 𑀧𑀤𑀼𑀝𑁆𑀞𑀘𑀺𑀢𑁆𑀢𑀁 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀜𑀢𑁆𑀯𑀸𑀦 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀸𑀲𑀺. 𑀇𑀫𑀫𑁆𑀳𑀺 𑀇𑀫𑀲𑁆𑀫𑀺𑀁 𑀲𑀫𑀬𑁂 𑀅𑀬𑀁 𑀧𑀼𑀕𑁆𑀕𑀮𑁄 𑀘𑁂 𑀓𑀸𑀮𑀁 𑀓𑀬𑀺𑀭𑀸𑀣, 𑀏𑀯𑀁 𑀲𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑀲𑀫𑀗𑁆𑀕𑀻 𑀳𑀺 𑀦𑀺𑀭𑀬𑀲𑁆𑀫𑀺𑀁 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀧𑀤𑀽𑀲𑀺𑀢𑀁 𑀳𑀺 𑀬𑀲𑁆𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀉𑀧𑀧𑀚𑁆𑀚𑁂𑀬𑁆𑀬, 𑀘𑁂𑀢𑁄𑀧𑀤𑁄𑀲𑀳𑁂𑀢𑀼 𑀲𑀢𑁆𑀢𑀸 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀦𑁆𑀢𑀺 𑀆𑀪𑀢𑀁 𑀯𑀢𑁆𑀣𑀼𑀁 𑀦𑀺𑀓𑁆𑀔𑀺𑀧𑁂𑀬𑁆𑀬 𑀬𑀣𑀸, 𑀏𑀯𑀫𑁂𑀯𑀁 𑀢𑀣𑀸𑀯𑀺𑀥𑁄 𑀤𑀼𑀧𑁆𑀧𑀜𑁆𑀜𑁄 𑀲𑁄 𑀧𑀤𑁄𑀲𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀪𑀕𑀯𑀢𑀸 𑀯𑀼𑀢𑁆𑀢𑁄, 𑀇𑀢𑀺 𑀫𑁂 𑀫𑀬𑀸 𑀲𑀼𑀢𑀦𑁆𑀢𑀺 𑀬𑁄𑀚𑀦𑀸.

‘‘𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀲𑀘𑁂 𑀘 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀣 𑀓𑀭𑁄𑀣 𑀯𑀸;

𑀦 𑀯𑁄 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁂𑀘𑁆𑀘𑀧𑀺 𑀧𑀮𑀸𑀬𑀢’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀲𑀧𑁆𑀧𑀼𑀭𑀺𑀲𑀸 𑀢𑀼𑀫𑁆𑀳𑁂 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀤𑀼𑀓𑁆𑀔𑀚𑀭𑀸𑀤𑀼𑀓𑁆𑀔𑀩𑁆𑀬𑀸𑀥𑀺𑀤𑀼𑀓𑁆𑀔𑀫𑀭𑀡𑀤𑀼𑀓𑁆𑀔𑀅𑀧𑀸𑀬𑀤𑀼𑀓𑁆𑀔- 𑀅𑀢𑀻𑀢𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀅𑀦𑀸𑀕𑀢𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀳𑀸𑀭𑀫𑀽𑀮𑀓𑀤𑀼𑀓𑁆𑀔𑀸𑀢𑀺 𑀅𑀝𑁆𑀞𑀯𑀺𑀥𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀘𑁂 𑀪𑀸𑀬𑀣, 𑀯𑁄 𑀢𑀼𑀫𑁆𑀳𑁂𑀳𑀺 𑀤𑀼𑀓𑁆𑀔𑀁 𑀢𑀣𑀸 𑀅𑀝𑁆𑀞𑀯𑀺𑀥𑀁 𑀤𑀼𑀓𑁆𑀔𑀁 𑀲𑀘𑁂 𑀅𑀧𑁆𑀧𑀺𑀬𑀁, 𑀏𑀯𑀁 𑀲𑀢𑀺 𑀆𑀯𑀺 𑀯𑀸 𑀬𑀤𑀺 𑀭𑀳𑁄 𑀯𑀸 𑀧𑀸𑀧𑀓𑀁 𑀓𑀫𑁆𑀫𑀁 𑀫𑀸𑀓𑀢𑁆𑀣 𑀫𑀸 𑀅𑀓𑀢𑁆𑀣. 𑀲𑀧𑁆𑀧𑀼𑀭𑀺𑀲𑀸 𑀢𑀼𑀫𑁆𑀳𑁂 𑀆𑀯𑀺 𑀯𑀸 𑀬𑀤𑀺 𑀭𑀳𑁄 𑀯𑀸 𑀧𑀸𑀧𑀓𑀁 𑀓𑀫𑁆𑀫𑀁 𑀲𑀘𑁂 𑀓𑀭𑀺𑀲𑁆𑀲𑀣 𑀯𑀸 𑀲𑀘𑁂 𑀓𑀭𑁄𑀣 𑀯𑀸, 𑀏𑀯𑀁 𑀲𑀢𑀺 𑀉𑀧𑁂𑀘𑁆𑀘𑀧𑀺 𑀲𑀜𑁆𑀘𑀺𑀘𑁆𑀘𑀸𑀧𑀺 𑀧𑀮𑀸𑀬𑀢𑀁 𑀧𑀮𑀸𑀬𑀦𑁆𑀢𑀸𑀦𑀁 𑀯𑁄 𑀢𑀼𑀫𑁆𑀳𑀸𑀓𑀁 𑀤𑀼𑀓𑁆𑀔𑀸 𑀅𑀝𑁆𑀞𑀯𑀺𑀥𑀸 𑀤𑀼𑀓𑁆𑀔𑀢𑁄 𑀧𑀫𑀼𑀢𑁆𑀢𑀺 𑀫𑀼𑀘𑁆𑀘𑀦𑀁 𑀦𑀢𑁆𑀣𑁂𑀯𑀸𑀢𑀺 𑀬𑁄𑀚𑀦𑀸.

‘‘𑀅𑀥𑀫𑁆𑀫𑁂𑀦 𑀥𑀦𑀁 𑀮𑀤𑁆𑀥𑀸, 𑀫𑀼𑀲𑀸𑀯𑀸𑀤𑁂𑀦 𑀘𑀽𑀪𑀬𑀁;

𑀫𑀫𑁂𑀢𑀺 𑀩𑀸𑀮𑀸 𑀫𑀜𑁆𑀜𑀦𑁆𑀢𑀺, 𑀢𑀁 𑀓𑀣𑀁 𑀦𑀼 𑀪𑀯𑀺𑀲𑁆𑀲𑀢𑀺.

‘‘𑀅𑀦𑁆𑀢𑀭𑀸𑀬𑀸 𑀲𑀼 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀫𑁆𑀪𑀢𑀲𑁆𑀲 𑀯𑀺𑀦𑀲𑁆𑀲𑀢𑀺;

𑀫𑀢𑀸 𑀲𑀕𑁆𑀕𑀁 𑀦 𑀕𑀘𑁆𑀙𑀦𑁆𑀢𑀺, 𑀦𑀦𑀼 𑀏𑀢𑁆𑀢𑀸𑀯𑀢𑀸 𑀳𑀢𑀸’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀬𑁂 𑀩𑀸𑀮𑀸 𑀅𑀥𑀫𑁆𑀫𑁂𑀦 𑀘 𑀫𑀼𑀲𑀸𑀯𑀸𑀤𑁂𑀦 𑀘 𑀥𑀦𑀁 𑀲𑀯𑀺𑀜𑁆𑀜𑀸𑀡𑀸𑀯𑀺𑀜𑁆𑀜𑀸𑀡𑀁 𑀲𑀩𑁆𑀩𑀁 𑀮𑀪𑀺𑀢𑀩𑁆𑀩𑀁 𑀥𑀦𑀁 𑀮𑀤𑁆𑀥𑀸 𑀉𑀪𑀬𑀁 𑀥𑀦𑀁 ‘‘𑀫𑀫 𑀥𑀦’’𑀦𑁆𑀢𑀺 𑀫𑀜𑁆𑀜𑀦𑁆𑀢𑀺, 𑀢𑁂𑀲𑀁 𑀩𑀸𑀮𑀸𑀦𑀁 𑀢𑀁 𑀉𑀪𑀬𑀁 𑀥𑀦𑀁 𑀓𑀣𑀁 𑀓𑁂𑀦 𑀦𑀼 𑀧𑀓𑀸𑀭𑁂𑀦 𑀪𑀯𑀺𑀲𑁆𑀲𑀢𑀺, 𑀅𑀥𑀫𑁆𑀫𑁂𑀦 𑀲𑀫𑁆𑀪𑀢𑀢𑁆𑀢𑀸 𑀘𑀺𑀭𑀝𑁆𑀞𑀺𑀢𑀺𑀓𑀁 𑀦 𑀳𑁄𑀢𑀺. 𑀅𑀦𑁆𑀢𑀭𑀸𑀬𑀸 𑀭𑀸𑀚𑀦𑁆𑀢𑀭𑀸𑀬𑀸𑀤𑀬𑁄 𑀅𑀦𑁆𑀢𑀭𑀸𑀬𑀸 𑀢𑁂𑀲𑀁 𑀩𑀸𑀮𑀸𑀦𑀁 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁂𑀦 𑀅𑀥𑀫𑁆𑀫𑀯𑁄𑀳𑀸𑀭𑀸𑀤𑀺𑀓𑁂𑀦 𑀬𑀁 𑀥𑀦𑀁 𑀲𑀫𑁆𑀪𑀢𑀁, 𑀅𑀲𑁆𑀲 𑀅𑀥𑀫𑁆𑀫𑀯𑁄𑀳𑀸𑀭𑀸𑀤𑀺𑀓𑀲𑁆𑀲 𑀢𑀁 𑀲𑀫𑁆𑀪𑀢𑀁 𑀥𑀦𑀁 𑀯𑀺𑀦𑀲𑁆𑀲𑀢𑀺. 𑀫𑀢𑀸 𑀫𑀭𑀦𑁆𑀢𑀸 𑀢𑁂 𑀩𑀸𑀮𑀸 𑀲𑀕𑁆𑀕𑀁 𑀲𑀼𑀕𑀢𑀺𑀁 𑀦 𑀕𑀘𑁆𑀙𑀦𑁆𑀢𑀺. 𑀲𑀼𑀕𑀢𑀺 𑀳𑀺 𑀲𑁄𑀪𑀦𑁂𑀳𑀺 𑀪𑁄𑀕𑁂𑀳𑀺 𑀅𑀕𑁆𑀕𑁄𑀢𑀺 ‘‘𑀲𑀕𑁆𑀕𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀏𑀢𑁆𑀢𑀸𑀯𑀢𑀸 𑀏𑀢𑁆𑀢𑀓𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀅𑀢𑁆𑀢𑀳𑀺𑀢𑀸𑀦𑀁 𑀳𑀸𑀬𑀦𑁂𑀦 𑀢𑁂 𑀩𑀸𑀮𑀸 𑀳𑀢𑀸 𑀯𑀺𑀦𑀝𑁆𑀞𑀸 𑀪𑀯𑀦𑁆𑀢𑀺 𑀦𑀦𑀽𑀢𑀺 𑀬𑁄𑀚𑀦𑀸.

‘‘𑀓𑀣𑀁 𑀔𑀡𑀢𑀺 𑀅𑀢𑁆𑀢𑀸𑀦𑀁, 𑀓𑀣𑀁 𑀫𑀺𑀢𑁆𑀢𑁂𑀳𑀺 𑀚𑀻𑀭𑀢𑀺;

𑀓𑀣𑀁 𑀯𑀺𑀯𑀝𑁆𑀝𑀢𑁂 𑀥𑀫𑁆𑀫𑀸, 𑀓𑀣𑀁 𑀲𑀕𑁆𑀕𑀁 𑀦 𑀕𑀘𑁆𑀙𑀢𑀺’’.

‘‘𑀮𑁄𑀪𑀸 𑀔𑀡𑀢𑀺 𑀅𑀢𑁆𑀢𑀸𑀦𑀁, 𑀮𑀼𑀤𑁆𑀥𑁄 𑀫𑀺𑀢𑁆𑀢𑁂𑀳𑀺 𑀚𑀻𑀭𑀢𑀺;

𑀮𑁄𑀪𑀸 𑀯𑀺𑀯𑀝𑁆𑀝𑀢𑁂 𑀥𑀫𑁆𑀫𑀸, 𑀮𑁄𑀪𑀸 𑀲𑀕𑁆𑀕𑀁 𑀦 𑀕𑀘𑁆𑀙𑀢𑀻’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀬𑁄𑀚𑀦𑀢𑁆𑀣𑁄 𑀧𑀸𑀓𑀝𑁄.

‘‘𑀘𑀭𑀦𑁆𑀢𑀺 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀅𑀫𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑀸;

𑀓𑀭𑁄𑀦𑁆𑀢𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮𑀁.

‘‘𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀁, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀤𑀼𑀫𑁆𑀫𑁂𑀥𑀸 𑀦𑀺𑀧𑁆𑀧𑀜𑁆𑀜𑀸 𑀩𑀸𑀮𑀸 𑀅𑀫𑀺𑀢𑁆𑀢𑁂𑀦 𑀧𑀸𑀧𑀓𑀁 𑀓𑀫𑁆𑀫𑀁 𑀓𑀢𑀁 𑀇𑀯, 𑀏𑀯𑀁 𑀅𑀢𑁆𑀢𑀦𑀸 𑀓𑀝𑀼𑀓𑀧𑁆𑀨𑀮𑀁 𑀬𑀁 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀢𑀁 𑀧𑀸𑀧𑀓𑀁 𑀓𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀘𑀭𑀦𑁆𑀢𑀺. 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀭𑁄𑀦𑁆𑀢𑁄 𑀧𑀘𑁆𑀙𑀸 𑀅𑀦𑀼𑀢𑀧𑁆𑀧𑀢𑀺, 𑀢𑀁 𑀓𑀢𑀁 𑀓𑀫𑁆𑀫𑀁 𑀦 𑀲𑀸𑀥𑀼. 𑀬𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀭𑁄𑀤𑀁 𑀭𑀼𑀤𑀦𑁆𑀢𑁄 𑀅𑀲𑁆𑀲𑀼𑀫𑀼𑀔𑁄 𑀧𑀝𑀺𑀲𑁂𑀯𑀢𑀺, 𑀢𑀁 𑀓𑀢𑀁 𑀓𑀫𑁆𑀫𑀁 𑀦 𑀲𑀸𑀥𑀽𑀢𑀺 𑀬𑁄𑀚𑀦𑀸.

‘‘𑀤𑀼𑀓𑁆𑀓𑀭𑀁 𑀤𑀼𑀢𑁆𑀢𑀺𑀢𑀺𑀓𑁆𑀔𑀜𑁆𑀘…𑀧𑁂… 𑀅𑀯𑀻𑀢𑀭𑀸𑀕𑁄’’𑀢𑀺 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀲𑀼𑀢𑁆𑀢𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑁄.

‘‘𑀅𑀧𑁆𑀧𑀫𑁂𑀬𑁆𑀬𑀁 𑀧𑀫𑀺𑀦𑀦𑁆𑀢𑁄, 𑀓𑁄𑀥 𑀯𑀺𑀤𑁆𑀯𑀸 𑀯𑀺𑀓𑀧𑁆𑀧𑀬𑁂;

𑀅𑀧𑁆𑀧𑀫𑁂𑀬𑁆𑀬𑀁 𑀧𑀫𑀸𑀬𑀺𑀦𑀁, 𑀦𑀺𑀯𑀼𑀢𑀁 𑀢𑀁 𑀫𑀜𑁆𑀜𑁂 𑀅𑀓𑀺𑀲𑁆𑀲𑀯’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀇𑀥 𑀲𑀸𑀲𑀦𑁂 𑀅𑀧𑁆𑀧𑀫𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀕𑀼𑀡𑀁 𑀔𑀻𑀡𑀸𑀲𑀯𑀁 𑀧𑀼𑀕𑁆𑀕𑀮𑀁 ‘‘𑀅𑀬𑀁 𑀔𑀻𑀡𑀸𑀲𑀯𑁄 𑀧𑀼𑀕𑁆𑀕𑀮𑁄 𑀏𑀢𑁆𑀢𑀓𑀲𑀻𑀮𑁄 𑀏𑀢𑁆𑀢𑀓𑀲𑀫𑀸𑀥𑀺 𑀏𑀢𑁆𑀢𑀓𑀧𑀜𑁆𑀜𑁄’’𑀢𑀺 𑀧𑀫𑀺𑀦𑀦𑁆𑀢𑁄 𑀓𑁄 𑀧𑀼𑀣𑀼𑀚𑁆𑀚𑀦𑁄 𑀯𑀺𑀓𑀧𑁆𑀧𑀬𑁂. 𑀅𑀧𑁆𑀧𑀫𑁂𑀬𑁆𑀬𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀁 𑀧𑀫𑀸𑀬𑀺𑀦𑀁 𑀧𑀫𑀸𑀬𑀦𑁆𑀢𑀁 𑀢𑀁 𑀧𑀼𑀣𑀼𑀚𑁆𑀚𑀦𑀁 𑀅𑀬𑀁 𑀦𑀺𑀯𑀼𑀢𑀁 𑀅𑀯𑀓𑀼𑀚𑁆𑀚𑀧𑀜𑁆𑀜𑀁 𑀅𑀓𑀺𑀲𑁆𑀲𑀯𑀁 𑀅𑀧𑀜𑁆𑀜𑀦𑁆𑀢𑀺 𑀫𑀜𑁆𑀜𑁂 𑀫𑀜𑁆𑀜𑀸𑀫𑀻𑀢𑀺 𑀬𑁄𑀚𑀦𑀸.

‘‘𑀧𑀼𑀭𑀺𑀲𑀲𑁆𑀲 𑀳𑀺 𑀚𑀸𑀢𑀲𑁆𑀲, 𑀓𑀼𑀞𑀸𑀭𑀻 𑀚𑀸𑀬𑀢𑁂 𑀫𑀼𑀔𑁂;

𑀬𑀸𑀬 𑀙𑀺𑀦𑁆𑀤𑀢𑀺 𑀅𑀢𑁆𑀢𑀸𑀦𑀁, 𑀩𑀸𑀮𑁄 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀁.

‘‘𑀦 𑀳𑀺 𑀲𑀢𑁆𑀣𑀁 𑀲𑀼𑀦𑀺𑀲𑀺𑀢𑀁, 𑀯𑀺𑀲𑀁 𑀳𑀮𑀸𑀳𑀮𑀁 𑀇𑀯;

𑀏𑀯𑀁 𑀯𑀺𑀭𑀤𑁆𑀥𑀁 𑀧𑀸𑀢𑁂𑀢𑀺, 𑀯𑀸𑀘𑀸 𑀤𑀼𑀩𑁆𑀪𑀸𑀲𑀺𑀢𑀸 𑀬𑀣𑀸’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀤𑀼𑀩𑁆𑀪𑀸𑀲𑀺𑀢𑀁 𑀅𑀭𑀺𑀬𑀽𑀧𑀯𑀸𑀤𑀲𑀗𑁆𑀔𑀸𑀢𑀁 𑀨𑀭𑀼𑀲𑀯𑀸𑀘𑀁 𑀪𑀡𑀁 𑀪𑀡𑀦𑁆𑀢𑁄 𑀩𑀸𑀮𑁄 𑀤𑀼𑀝𑁆𑀞𑁄 𑀧𑀼𑀭𑀺𑀲𑁄 𑀬𑀸𑀬 𑀓𑀼𑀞𑀸𑀭𑀻𑀲𑀤𑀺𑀲𑀺𑀬𑀸 𑀤𑀼𑀩𑁆𑀪𑀸𑀲𑀺𑀢𑀯𑀸𑀘𑀸𑀬 𑀅𑀢𑁆𑀢𑀸𑀦𑀁 𑀙𑀺𑀦𑁆𑀤𑀢𑀺, 𑀲𑀸 𑀓𑀼𑀞𑀸𑀭𑀻𑀲𑀤𑀺𑀲𑀻 𑀤𑀼𑀩𑁆𑀪𑀸𑀲𑀺𑀢𑀯𑀸𑀘𑀸 𑀚𑀸𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀼𑀔𑁂 𑀚𑀸𑀬𑀢𑁂 𑀚𑀸𑀬𑀢𑀺, 𑀲𑀸 𑀤𑀼𑀩𑁆𑀪𑀸𑀲𑀺𑀢𑀯𑀸𑀘𑀸 𑀫𑀼𑀔𑁂 𑀚𑀸𑀬𑀢𑀺 𑀇𑀯, 𑀏𑀯𑀁 𑀲𑀼𑀦𑀺𑀲𑀺𑀢𑀁 𑀲𑀢𑁆𑀣𑀁 𑀫𑀼𑀔𑁂 𑀦 𑀚𑀸𑀬𑀢𑀺, 𑀬𑀣𑀸 𑀳𑀮𑀸𑀳𑀮𑀁 𑀯𑀺𑀲𑀁 𑀫𑀼𑀔𑁂 𑀦 𑀚𑀸𑀬𑀢𑀺, 𑀤𑀼𑀩𑁆𑀪𑀸𑀲𑀺𑀢𑀸 𑀯𑀸𑀘𑀸 𑀅𑀧𑀸𑀬𑁂𑀲𑀼 𑀯𑀺𑀭𑀤𑁆𑀥𑀁 𑀧𑀼𑀕𑁆𑀕𑀮𑀁 𑀧𑀸𑀢𑁂𑀢𑀺 𑀬𑀣𑀸, 𑀏𑀯𑀁 𑀲𑀼𑀦𑀺𑀲𑀺𑀢𑀁 𑀲𑀢𑁆𑀣𑀁 𑀅𑀧𑀸𑀬𑁂𑀲𑀼 𑀦 𑀧𑀸𑀢𑁂𑀢𑀺, 𑀳𑀮𑀸𑀳𑀮𑀁 𑀯𑀺𑀲𑀁 𑀅𑀧𑀸𑀬𑁂𑀲𑀼 𑀦 𑀧𑀸𑀢𑁂𑀢𑀻𑀢𑀺 𑀬𑁄𑀚𑀦𑀸.

𑁯𑁨. ‘‘𑀬𑁄 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺, 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄;

𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀁, 𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺.

‘‘𑀅𑀧𑁆𑀧𑀫𑀢𑁆𑀢𑁄 𑀅𑀬𑀁 𑀓𑀮𑀺, 𑀬𑁄 𑀅𑀓𑁆𑀔𑁂𑀲𑀼 𑀥𑀦𑀧𑀭𑀸𑀚𑀬𑁄;

𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸, 𑀅𑀬𑀫𑁂𑀯 𑀫𑀳𑀦𑁆𑀢𑀢𑀭𑁄 𑀓𑀮𑀺;

𑀬𑁄 𑀲𑀼𑀕𑀢𑁂𑀲𑀼 𑀫𑀦𑀁 𑀧𑀤𑁄𑀲𑀬𑁂.

‘‘𑀲𑀢𑀁 𑀲𑀳𑀲𑁆𑀲𑀸𑀦𑀁 𑀦𑀺𑀭𑀩𑁆𑀩𑀼𑀤𑀸𑀦𑀁, 𑀙𑀢𑁆𑀢𑀺𑀁𑀲𑀢𑀻 𑀧𑀜𑁆𑀘 𑀘 𑀅𑀩𑁆𑀩𑀼𑀤𑀸𑀦𑀺;

𑀬𑀫𑀭𑀺𑀬𑀕𑀭𑀳𑀻 𑀦𑀺𑀭𑀬𑀁 𑀉𑀧𑁂𑀢𑀺, 𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀧𑀸𑀧𑀓’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀬𑁄 𑀧𑀼𑀕𑁆𑀕𑀮𑁄 𑀦𑀺𑀦𑁆𑀤𑀺𑀬𑀁 𑀤𑀼𑀘𑁆𑀘𑀭𑀁 𑀤𑀼𑀲𑁆𑀲𑀻𑀮𑀁 𑀧𑀼𑀕𑁆𑀕𑀮𑀁 𑀧𑀲𑀁𑀲𑀢𑀺, 𑀲𑁄 𑀧𑀲𑀁𑀲𑀓𑁄 𑀧𑀼𑀕𑁆𑀕𑀮𑁄 𑀫𑀼𑀔𑁂𑀦 𑀓𑀮𑀺𑀁 𑀯𑀺𑀘𑀺𑀦𑀸𑀢𑀺 𑀉𑀧𑀘𑀺𑀦𑀸𑀢𑀺, 𑀢𑁂𑀦 𑀓𑀮𑀺𑀦𑀸 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺. 𑀬𑁄 𑀲𑀼𑀘𑀸𑀭𑀻 𑀲𑀻𑀮𑀯𑀸 𑀧𑀼𑀕𑁆𑀕𑀮𑁄 𑀧𑀲𑀁𑀲𑀺𑀬𑁄 𑀳𑁄𑀢𑀺, 𑀢𑀁 𑀯𑀸 𑀲𑀼𑀘𑀸𑀭𑀺𑀁 𑀯𑀸 𑀲𑀻𑀮𑀯𑀦𑁆𑀢𑀁 𑀧𑀼𑀕𑁆𑀕𑀮𑀁 𑀬𑁄 𑀧𑀼𑀕𑁆𑀕𑀮𑁄 𑀦𑀺𑀦𑁆𑀤𑀢𑀺, 𑀲𑁄 𑀦𑀺𑀦𑁆𑀤𑀦𑁆𑀢𑁄 𑀧𑀼𑀕𑁆𑀕𑀮𑁄 𑀫𑀼𑀔𑁂𑀦 𑀓𑀮𑀺𑀁 𑀯𑀺𑀘𑀺𑀦𑀸𑀢𑀺 𑀉𑀧𑀘𑀺𑀦𑀸𑀢𑀺, 𑀢𑁂𑀦 𑀓𑀮𑀺𑀦𑀸 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺.

𑀅𑀢𑁆𑀢𑀦𑀸 𑀲𑀳𑀸𑀧𑀺 𑀲𑀩𑁆𑀩𑀲𑁆𑀲 𑀥𑀦𑀲𑁆𑀲 𑀯𑀲𑁂𑀦𑀧𑀺 𑀅𑀓𑁆𑀔𑁂𑀲𑀼 𑀬𑁄 𑀥𑀦𑀧𑀭𑀸𑀚𑀬𑁄 𑀪𑀯𑀢𑀺, 𑀅𑀬𑀁 𑀓𑀮𑀺 𑀅𑀬𑀁 𑀥𑀦𑀧𑀭𑀸𑀚𑀬𑁄 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺. 𑀬𑁄 𑀧𑀼𑀕𑁆𑀕𑀮𑁄 𑀲𑀼𑀕𑀢𑁂𑀲𑀼 𑀫𑀦𑀁 𑀧𑀤𑁄𑀲𑀬𑁂, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑁄 𑀓𑀮𑀺 𑀪𑀯𑀢𑀺, 𑀅𑀬𑀫𑁂𑀯 𑀓𑀮𑀺 𑀫𑀳𑀦𑁆𑀢𑀢𑀭𑁄 𑀳𑁄𑀢𑀺.

𑀓𑀲𑁆𑀫𑀸? 𑀯𑀸𑀘𑀜𑁆𑀘 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀅𑀭𑀺𑀬𑀕𑀭𑀳𑀻 𑀧𑀼𑀕𑁆𑀕𑀮𑁄 𑀬𑀁 𑀓𑀸𑀮𑀁 𑀧𑀸𑀧𑀓𑀁 𑀦𑀺𑀭𑀬𑀁 𑀉𑀧𑁂𑀢𑀺, 𑀲𑁄 𑀓𑀸𑀮𑁄 ‘‘𑀲𑀢𑀁 𑀲𑀳𑀲𑁆𑀲𑀸𑀦𑀁 𑀦𑀺𑀭𑀩𑁆𑀩𑀼𑀤𑀸𑀦𑀜𑁆𑀘 𑀙𑀢𑁆𑀢𑀺𑀁𑀲 𑀦𑀺𑀭𑀩𑁆𑀩𑀼𑀤𑀸𑀦𑀺 𑀘 𑀧𑀜𑁆𑀘 𑀅𑀩𑁆𑀩𑀼𑀤𑀸𑀦𑀺 𑀘 𑀬𑀲𑁆𑀫𑀺𑀁 𑀓𑀸𑀮𑁂 𑀕𑀡𑀻𑀬𑀦𑁆𑀢𑀻’’𑀢𑀺 𑀢𑁂𑀦 𑀓𑀸𑀮𑁂𑀦 𑀲𑀫𑁄 𑀳𑁄𑀢𑀺, 𑀢𑀲𑁆𑀫𑀸 𑀫𑀳𑀦𑁆𑀢𑀢𑀭𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸.

‘‘𑀬𑁄 𑀮𑁄𑀪𑀕𑀼𑀡𑁂 𑀅𑀦𑀼𑀬𑀼𑀢𑁆𑀢𑁄…𑀧𑁂…

𑀕𑀘𑁆𑀙𑀲𑀺 𑀔𑁄 𑀧𑀧𑀢𑀁 𑀘𑀺𑀭𑀭𑀢𑁆𑀢’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀬𑁄 𑀧𑀼𑀕𑁆𑀕𑀮𑁄 𑀮𑁄𑀪𑀕𑀼𑀡𑁂 𑀅𑀦𑀼𑀬𑀼𑀢𑁆𑀢𑁄 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀬𑀼𑀢𑁆𑀢𑁄 𑀳𑁄𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀅𑀜𑁆𑀜𑁂 𑀧𑀼𑀕𑁆𑀕𑀮𑁂 𑀯𑀘𑀲𑀸 𑀧𑀭𑀺𑀪𑀸𑀲𑀢𑀺, 𑀅𑀲𑁆𑀲𑀤𑁆𑀥𑁄 𑀓𑀤𑀭𑀺𑀬𑁄 𑀅𑀯𑀤𑀜𑁆𑀜𑀽 𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑀜𑁆𑀜𑀽 𑀦 𑀳𑁄𑀢𑀺, 𑀫𑀘𑁆𑀙𑀭𑀻 𑀧𑁂𑀲𑀼𑀡𑀺𑀬𑀁 𑀧𑁂𑀲𑀼𑀡𑀺𑀬𑀲𑁆𑀫𑀺𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺.

𑀫𑀼𑀔𑀤𑀼𑀕𑁆𑀕 𑀫𑀼𑀔𑀯𑀺𑀲𑀫 𑀯𑀺𑀪𑀽𑀢 𑀯𑀺𑀕𑀢𑀪𑀽𑀢 𑀅𑀦𑀭𑀺𑀬 𑀪𑀽𑀦𑀳𑀼 𑀩𑀼𑀤𑁆𑀥𑀺𑀯𑀺𑀦𑀸𑀲𑀓 𑀧𑀸𑀧𑀓 𑀤𑀼𑀓𑁆𑀓𑀝𑀓𑀸𑀭𑀺 𑀧𑀼𑀭𑀺𑀲𑀦𑁆𑀢 𑀧𑀼𑀭𑀺𑀲𑀮𑀸𑀫𑀓 𑀓𑀮𑀺 𑀅𑀮𑀓𑁆𑀔𑀺 𑀅𑀯𑀚𑀸𑀢𑀧𑀼𑀢𑁆𑀢 𑀢𑁆𑀯𑀁 𑀦𑁂𑀭𑀬𑀺𑀓𑁄 𑀅𑀲𑀺. 𑀇𑀥 𑀇𑀤𑀸𑀦𑀺 𑀩𑀳𑀼𑀪𑀸𑀡𑀻 𑀫𑀸 𑀳𑁄𑀳𑀺.

𑀅𑀳𑀺𑀢𑀸𑀬 𑀭𑀚𑀁 𑀅𑀢𑁆𑀢𑀦𑀺 𑀫𑀸 𑀆𑀓𑀺𑀭𑀲𑀺 𑀫𑀸 𑀧𑀓𑁆𑀔𑀺𑀧𑀲𑀺. 𑀓𑀺𑀩𑁆𑀩𑀺𑀲𑀓𑀸𑀭𑀺 𑀢𑁆𑀯𑀁 𑀲𑀦𑁆𑀢𑁂 𑀔𑀻𑀡𑀸𑀲𑀯𑁂 𑀧𑀼𑀕𑁆𑀕𑀮𑁂 𑀕𑀭𑀳𑀲𑀺, 𑀩𑀳𑀽𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀓𑀫𑁆𑀫𑀸𑀦𑀺 𑀘𑀭𑀲𑀺, 𑀘𑀭𑀺𑀢𑁆𑀯𑀸 𑀢𑁆𑀯𑀁 𑀘𑀺𑀭𑀭𑀢𑁆𑀢𑀁 𑀭𑀘𑀦𑀯𑀺𑀭𑀳𑀺𑀢𑀁 𑀧𑀧𑀢𑀁 𑀦𑀭𑀓𑀁 𑀦𑀺𑀭𑀬𑀁 𑀕𑀘𑁆𑀙𑀲𑀺 𑀔𑁄 𑀏𑀓𑀁𑀲𑁂𑀦𑀸𑀢𑀺 𑀬𑁄𑀚𑀦𑀸.

𑀦𑀸𑀦𑀸𑀯𑀺𑀥𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑁄𑀴𑀲𑀲𑀼 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀓𑀢𑀫𑀁 𑀲𑀼𑀢𑁆𑀢𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸…𑀧𑁂… 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺 𑀇𑀤𑀁 𑀯𑀸𑀲𑀦𑀸𑀪𑀸𑀕𑁂 𑀧𑀼𑀜𑁆𑀜𑀪𑀸𑀕𑁂 𑀯𑀺𑀲𑀬𑁂 𑀯𑀸𑀘𑀓𑀜𑀸𑀧𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀅𑀢𑁆𑀣𑁄 𑀧𑀸𑀓𑀝𑁄.

𑁯𑁩. ‘‘𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘…𑀧𑁂… 𑀅𑀧𑀸𑀧𑀺𑀓𑀸 𑀓𑀸𑀮𑀗𑁆𑀓𑀺𑀭𑀺𑀬𑀸’’𑀢𑀺 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑁂 𑀧𑀼𑀜𑁆𑀜𑀪𑀸𑀕𑁂 𑀯𑀺𑀲𑀬𑁂 𑀯𑀸𑀘𑀓𑀜𑀸𑀧𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀅𑀢𑁆𑀣𑁄 𑀧𑀸𑀓𑀝𑁄.

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀦 𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀮𑀪𑀢𑁂 𑀲𑀼𑀔’’𑀦𑁆𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀅𑀢𑁆𑀣𑁄 𑀧𑀸𑀓𑀝𑁄.

‘‘𑀕𑀼𑀦𑁆𑀦𑀁 𑀘𑁂 𑀢𑀭𑀫𑀸𑀦𑀸𑀦𑀁…𑀧𑁂… 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄’’𑀢𑀺 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀅𑀢𑁆𑀣𑁄 𑀧𑀸𑀓𑀝𑁄.

𑁯𑁪. ‘‘𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… 𑀏𑀯𑀁 𑀧𑀚𑀸𑀦𑀸𑀢𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸…𑀧𑁂… 𑀲𑀼𑀢𑁆𑀢𑀁 𑀦𑀸𑀫. 𑀅𑀢𑁆𑀣𑁄 𑀧𑀸𑀓𑀝𑁄.

‘‘𑀓𑀲𑁆𑀫𑀸 𑀪𑀕𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀢𑀻’’𑀢𑀺 𑀧𑀼𑀘𑁆𑀙𑁂𑀬𑁆𑀬, 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀺. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀤𑁂𑀲𑀦𑁆𑀢𑀭𑀕𑀢𑀸𑀦𑀁 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀢𑁆𑀣𑀁, 𑀢𑀢𑁆𑀭 𑀞𑀺𑀢𑀸𑀦𑀁 𑀉𑀲𑁆𑀲𑀼𑀓𑁆𑀓𑀲𑀫𑀼𑀧𑁆𑀧𑀸𑀤𑀦𑀢𑁆𑀣𑀁, 𑀲𑀸𑀯𑀓𑀸𑀦𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀩𑀤𑁆𑀥𑀯𑀸𑀲𑀦𑀺𑀯𑀸𑀭𑀡𑀢𑁆𑀣𑀁, 𑀅𑀢𑁆𑀢𑀦𑁄 𑀘 𑀢𑀢𑁆𑀣 𑀦𑀺𑀩𑀤𑁆𑀥𑀯𑀸𑀲𑁂 𑀅𑀦𑀸𑀲𑀗𑁆𑀕𑀤𑀲𑁆𑀲𑀦𑀢𑁆𑀣𑀁, 𑀲𑀫𑁆𑀩𑀼𑀤𑁆𑀥𑀯𑀲𑀺𑀢𑀝𑁆𑀞𑀸𑀦𑀢𑀸𑀬 𑀤𑁂𑀲𑀸𑀦𑀁 𑀘𑁂𑀢𑀺𑀬𑀪𑀸𑀯𑀲𑀫𑁆𑀧𑀸𑀤𑀦𑀢𑁆𑀣𑀁, 𑀩𑀳𑀽𑀦𑀁 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀽𑀧𑀲𑀗𑁆𑀓𑀫𑀦𑀸𑀤𑀻𑀳𑀺 𑀧𑀼𑀜𑁆𑀜𑁄𑀖𑀧𑁆𑀧𑀲𑀯𑀦𑀢𑁆𑀣𑀁, 𑀅𑀯𑀼𑀝𑁆𑀞𑀺𑀆𑀤𑀺𑀉𑀧𑀤𑁆𑀤𑀯𑀽𑀧𑀲𑀫𑀦𑀢𑁆𑀣𑀜𑁆𑀘𑀸𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀻𑀢𑀺 𑀚𑀦𑀧𑀤𑀘𑀭𑀡𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀏𑀓𑀧𑀼𑀧𑁆𑀨𑀁 𑀘𑀚𑀺𑀢𑁆𑀯𑀸𑀦, 𑀲𑀳𑀲𑁆𑀲𑀁 𑀓𑀧𑁆𑀧𑀓𑁄𑀝𑀺𑀬𑁄;

𑀤𑁂𑀯𑁂 𑀘𑁂𑀯 𑀫𑀦𑀼𑀲𑁆𑀲𑁂 𑀘, 𑀲𑁂𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀲𑀳𑀲𑁆𑀲𑀁 𑀓𑀧𑁆𑀧𑀓𑁄𑀝𑀺𑀬𑁄𑀢𑀺 𑀲𑀳𑀲𑁆𑀲𑀁 𑀅𑀢𑁆𑀢𑀪𑀸𑀯𑀢𑁄 𑀓𑁄𑀝𑀺𑀬𑁄.

‘‘𑀅𑀲𑁆𑀲𑀢𑁆𑀣𑁂 𑀳𑀭𑀺𑀢𑁄𑀪𑀸𑀲𑁂, 𑀲𑀁𑀯𑀺𑀭𑀽𑀴𑁆𑀳𑀫𑁆𑀳𑀺 𑀧𑀸𑀤𑀧𑁂;

𑀏𑀓𑀁 𑀩𑀼𑀤𑁆𑀥𑀕𑀢𑀁 𑀲𑀜𑁆𑀜𑀁, 𑀅𑀮𑀪𑀺𑀁𑀳𑀁 𑀧𑀢𑀺𑀲𑁆𑀲𑀢𑁄.

‘‘𑀅𑀚𑁆𑀚 𑀢𑀺𑀁𑀲𑀁 𑀢𑀢𑁄 𑀓𑀧𑁆𑀧𑀸, 𑀦𑀸𑀪𑀺𑀚𑀸𑀦𑀸𑀫𑀺 𑀤𑀼𑀕𑁆𑀕𑀢𑀺𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸, 𑀢𑀲𑁆𑀲𑀸 𑀲𑀜𑁆𑀜𑀸𑀬 𑀯𑀸𑀲𑀦𑀸’’𑀢𑀺. 𑁋

𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀳𑀭𑀺𑀢𑁄𑀪𑀸𑀲𑁂𑀢𑀺 𑀳𑀭𑀺𑀢𑀑𑀪𑀸𑀲𑁂. 𑀅𑀮𑀪𑀺𑀁𑀳𑀦𑁆𑀢𑀺 𑀅𑀳𑀁 𑀅𑀮𑀪𑀺𑀁.

‘‘𑀧𑀺𑀡𑁆𑀟𑀸𑀬 𑀓𑁄𑀲𑀮𑀁 𑀧𑀼𑀭𑀁…𑀧𑁂… 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄’’𑀢𑀺 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀅𑀕𑁆𑀕𑀧𑀼𑀕𑁆𑀕𑀮𑁄 𑀅𑀦𑀼𑀓𑀫𑁆𑀧𑀓𑁄 𑀢𑀡𑁆𑀳𑀸𑀦𑀺𑀖𑀸𑀢𑀓𑁄 𑀫𑀼𑀦𑀺 𑀲𑀫𑁆𑀩𑀼𑀤𑁆𑀥𑁄 𑀧𑀼𑀭𑁂𑀪𑀢𑁆𑀢𑀁 𑀧𑀺𑀡𑁆𑀟𑀸𑀬 𑀧𑀺𑀡𑁆𑀟𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀓𑁄𑀲𑀮𑀁 𑀧𑀼𑀭𑀁 𑀧𑀸𑀯𑀺𑀲𑀺.

𑀬𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀲𑀩𑁆𑀩𑀧𑀼𑀧𑁆𑀨𑁂𑀳𑀺 𑀅𑀮𑀗𑁆𑀓𑀢𑁄 𑀯𑀝𑀁𑀲𑀓𑁄 𑀧𑀼𑀧𑁆𑀨𑀯𑀝𑀁𑀲𑀓𑁄𑀯 𑀅𑀢𑁆𑀣𑀺, 𑀲𑁄 𑀅𑀬𑀁 𑀧𑀼𑀭𑀺𑀲𑁄 𑀭𑀸𑀚𑀫𑀕𑁆𑀕𑁂𑀦 𑀓𑁄𑀲𑀮𑀧𑀼𑀭𑀁 𑀧𑀯𑀺𑀲𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁 𑀤𑁂𑀯𑀫𑀸𑀦𑀼𑀲𑀧𑀽𑀚𑀺𑀢𑀁 𑀲𑀫𑁆𑀩𑀼𑀤𑁆𑀥𑀁 𑀅𑀤𑁆𑀤𑀲, 𑀤𑀺𑀲𑁆𑀯𑀸 𑀳𑀝𑁆𑀞𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺; 𑀧𑀲𑀸𑀤𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺.

𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁄 𑀅𑀬𑀁 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀲𑀼𑀭𑀪𑀺𑀁 𑀯𑀡𑁆𑀡𑀯𑀦𑁆𑀢𑀁 𑀫𑀦𑁄𑀭𑀫𑀁 𑀢𑀁 𑀯𑀝𑀁𑀲𑀓𑀁 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑁂𑀳𑀺 𑀧𑀸𑀡𑀻𑀪𑀺 𑀉𑀧𑀦𑀸𑀫𑁂𑀲𑀺.

𑀢𑀢𑁄 𑀩𑀼𑀤𑁆𑀥𑀲𑁆𑀲 𑀮𑀧𑀦𑀦𑁆𑀢𑀭𑀸 𑀮𑀧𑀦𑀲𑁆𑀲 𑀯𑀤𑀦𑀲𑁆𑀲 𑀅𑀦𑁆𑀢𑀭𑀸 𑀅𑀕𑁆𑀕𑀺𑀲𑀺𑀔𑀸 𑀯𑀡𑁆𑀡𑀸 𑀲𑀳𑀲𑁆𑀲𑀭𑀁𑀲𑀺 𑀑𑀓𑁆𑀓𑀸 𑀧𑀪𑀸 𑀦𑀺𑀓𑁆𑀔𑀫𑀺, 𑀅𑀩𑁆𑀪𑀸 𑀯𑀺𑀚𑁆𑀚𑀼 𑀦𑀺𑀓𑁆𑀔𑀫𑀢𑀺 𑀇𑀯, 𑀏𑀯𑀁 𑀆𑀦𑀦𑀸 𑀲𑀳𑀲𑁆𑀲𑀭𑀁𑀲𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑁄 𑀲𑀻𑀲𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀭𑀺𑀢𑁆𑀯𑀸𑀦 𑀧𑀭𑀺𑀯𑀝𑁆𑀝𑁂𑀢𑁆𑀯𑀸 𑀫𑀼𑀤𑁆𑀥𑀦𑀺 𑀅𑀦𑁆𑀢𑀭𑀥𑀸𑀬𑀣.

𑀆𑀦𑀦𑁆𑀤𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁 𑀇𑀤𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀘𑀻𑀯𑀭𑀁 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸 𑀏𑀢𑀁 𑀅𑀩𑁆𑀭𑀯𑀺 𑁋 ‘‘𑀫𑀳𑀸𑀫𑀼𑀦𑀺, 𑀲𑀺𑀢𑀓𑀫𑁆𑀫𑀲𑁆𑀲 𑀳𑁂𑀢𑀼 𑀓𑁄? 𑀢𑀁 𑀳𑁂𑀢𑀼𑀁 𑀩𑁆𑀬𑀸𑀓𑀭𑁄𑀳𑀺, 𑀥𑀫𑁆𑀫𑀸𑀮𑁄𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀬𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀜𑀸𑀡𑀁 𑀲𑀤𑀸 𑀧𑀯𑀢𑁆𑀢𑀢𑀺, 𑀓𑀗𑁆𑀔𑀸𑀯𑀺𑀢𑀭𑀡𑁄 𑀫𑀼𑀦𑀺 𑀲𑁄 𑀪𑀕𑀯𑀸 𑀓𑀗𑁆𑀔𑀺𑀁 𑀯𑁂𑀫𑀢𑀺𑀓𑀁 𑀆𑀦𑀦𑁆𑀤𑀁 𑀣𑁂𑀭𑀁 𑀏𑀢𑀁 𑀅𑀩𑁆𑀭𑀯𑀺. 𑀆𑀦𑀦𑁆𑀤, 𑀬𑁄 𑀲𑁄𑀧𑀼𑀭𑀺𑀲𑁄 𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺, 𑀲𑁄 𑀧𑀼𑀭𑀺𑀲𑁄 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀸𑀦𑀺 𑀤𑀼𑀕𑁆𑀕𑀢𑀺𑀁 𑀦 𑀕𑀫𑀺𑀲𑁆𑀲𑀢𑀺, 𑀤𑁂𑀯𑁂𑀲𑀼 𑀤𑁂𑀯𑀲𑁄𑀪𑀕𑁆𑀕𑀁 𑀤𑀺𑀩𑁆𑀩𑀁 𑀭𑀚𑁆𑀚𑀁 𑀧𑀲𑀸𑀲𑀺𑀢𑁆𑀯𑀸 𑀫𑀦𑀼𑀚𑁂𑀲𑀼 𑀭𑀝𑁆𑀞𑁂 𑀲𑀓𑀮𑀭𑀝𑁆𑀞𑁂 𑀫𑀦𑀼𑀚𑀺𑀦𑁆𑀤𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺. 𑀲𑁄 𑀧𑀼𑀭𑀺𑀲𑁄 𑀘𑀭𑀺𑀫𑀁 𑀧𑀩𑁆𑀩𑀚𑀺𑀢𑁆𑀯𑀸, 𑀥𑀫𑁆𑀫𑀢𑀁 𑀲𑀘𑁆𑀙𑀺𑀓𑀢𑁆𑀯𑀸 𑀘 𑀥𑀼𑀢𑀭𑀸𑀕𑁄 𑀯𑀝𑀁𑀲𑀓𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑀢𑀣𑀸𑀕𑀢𑁂 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂 𑀯𑀸 𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑁂 𑀯𑀸 𑀘𑀺𑀢𑁆𑀢𑁂 𑀧𑀲𑀦𑁆𑀦𑀫𑁆𑀳𑀺 𑀤𑀓𑁆𑀔𑀺𑀡𑀸 𑀅𑀧𑁆𑀧𑀓𑀸 𑀦𑀸𑀫 𑀦𑀢𑁆𑀣𑀺.

𑀩𑀼𑀤𑁆𑀥𑀸 𑀏𑀯𑀁 𑀏𑀢𑁆𑀢𑀓𑀸𑀢𑀺 𑀅𑀘𑀺𑀦𑁆𑀢𑀺𑀬𑀸 𑀪𑀯𑀦𑁆𑀢𑀺. 𑀩𑀼𑀤𑁆𑀥𑀥𑀫𑁆𑀫𑀸 𑀩𑀼𑀤𑁆𑀥𑀕𑀼𑀡𑀸 𑀏𑀯𑀁 𑀏𑀢𑁆𑀢𑀓𑀸𑀢𑀺 𑀅𑀘𑀺𑀦𑁆𑀢𑀺𑀬𑀸 𑀪𑀯𑀦𑁆𑀢𑀺, 𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁 𑀯𑀺𑀧𑀸𑀓𑁄 𑀧𑀼𑀜𑁆𑀜𑀯𑀺𑀧𑀸𑀓𑁄 𑀏𑀯𑀁 𑀏𑀢𑁆𑀢𑀓𑁄𑀢𑀺 𑀅𑀘𑀺𑀦𑁆𑀢𑀺𑀬𑁄 𑀳𑁄𑀢𑀻𑀢𑀺 𑀏𑀢𑀁 𑀅𑀩𑁆𑀭𑀯𑀻𑀢𑀺 𑀬𑁄𑀚𑀦𑀸.

𑁯𑁬. ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁…𑀧𑁂… 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸 𑀇𑀢𑀺 𑀫𑁂 𑀲𑀼𑀢’’𑀦𑁆𑀢𑀺 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀪𑀺𑀓𑁆𑀔𑀯𑁂, 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀳𑀁 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀫𑀫 𑀘𑁂𑀢𑀲𑀸 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑁂𑀢𑁄 𑀘𑀺𑀢𑁆𑀢𑀁 𑀧𑀭𑀺𑀘𑁆𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀏𑀯𑀁 𑀧𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀅𑀬𑀁 𑀧𑀼𑀕𑁆𑀕𑀮𑁄 𑀬𑀜𑁆𑀘 𑀤𑀸𑀦𑀸𑀤𑀺𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄, 𑀬𑀜𑁆𑀘 𑀤𑀲𑁆𑀲𑀦𑀸𑀤𑀺𑀫𑀕𑁆𑀕𑀁 𑀲𑀫𑀸𑀭𑀼𑀴𑁆𑀳𑁄 𑀳𑀼𑀢𑁆𑀯𑀸 𑀢𑀁 𑀧𑀝𑀺𑀧𑀤𑀁, 𑀫𑀕𑁆𑀕𑀜𑁆𑀘 𑀇𑀭𑀺𑀬𑀢𑀺 𑀧𑀯𑀢𑁆𑀢𑁂𑀢𑀺, 𑀇𑀫𑀫𑁆𑀳𑀺 𑀇𑀫𑀲𑁆𑀫𑀺𑀜𑁆𑀘 𑀲𑀫𑀬𑁂 𑀅𑀬𑀁 𑀧𑀼𑀕𑁆𑀕𑀮𑁄 𑀘𑁂 𑀓𑀸𑀮𑀁 𑀓𑀭𑁂𑀬𑁆𑀬, 𑀏𑀯𑀁 𑀲𑀢𑀺 𑀆𑀪𑀢𑀁 𑀯𑀢𑁆𑀣𑀼𑀁 𑀦𑀺𑀓𑁆𑀔𑀺𑀧𑀢𑀺 𑀬𑀣𑀸, 𑀏𑀯𑀁 𑀢𑀸𑀬 𑀧𑀝𑀺𑀧𑀤𑀸𑀬 𑀢𑁂𑀦 𑀫𑀕𑁆𑀕𑁂𑀦 𑀲𑀕𑁆𑀕𑁂 𑀅𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑁄 𑀪𑀯𑁂. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀪𑀺𑀓𑁆𑀔𑀯𑁂, 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀳𑀺 𑀬𑀲𑁆𑀫𑀸 𑀧𑀲𑀦𑁆𑀦𑀁 𑀧𑀲𑀸𑀤𑀺𑀢𑀁, 𑀢𑀲𑁆𑀫𑀸 𑀦𑀺𑀓𑁆𑀔𑀺𑀢𑁆𑀢𑁄 𑀪𑀯𑁂. 𑀇𑀥 𑀲𑀸𑀲𑀦𑁂, 𑀮𑁄𑀓𑁂 𑀯𑀸 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀧𑀼𑀕𑁆𑀕𑀮𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀘𑁂𑀢𑁄𑀧𑀲𑀸𑀤𑀳𑁂𑀢𑀼 𑀔𑁄 𑀧𑀦 𑀉𑀧𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀁 𑀅𑀳𑀁 𑀧𑀚𑀸𑀦𑀸𑀫𑀻𑀢𑀺 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀅𑀯𑁄𑀘. 𑀢𑀢𑁆𑀣 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀗𑁆𑀕𑀳𑀯𑀲𑁂𑀦 𑀧𑀯𑀢𑁆𑀢𑀁 𑀏𑀢𑀁 ‘‘𑀧𑀲𑀦𑁆𑀦𑀘𑀺𑀢𑁆𑀢𑀁 𑀜𑀢𑁆𑀯𑀸𑀦…𑀧𑁂… 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺 𑀕𑀸𑀣𑀸𑀯𑀘𑀦𑀁 𑀯𑀼𑀘𑁆𑀘𑀢𑀺. 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀪𑀕𑀯𑀢𑀸 𑀯𑀼𑀢𑁆𑀢𑁄, 𑀇𑀢𑀺 𑀫𑁂 𑀫𑀬𑀸 𑀲𑀼𑀢𑀦𑁆𑀢𑀺 𑀬𑁄𑀚𑀦𑀸.

‘‘𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀁…𑀧𑁂… 𑀏𑀢𑀸𑀤𑀺𑀲𑀁 𑀓𑀢𑀧𑀼𑀜𑁆𑀜𑀸 𑀮𑀪𑀺’’𑀦𑁆𑀢𑀺 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫. 𑀦𑀸𑀭𑀺 𑀤𑁂𑀯𑀥𑀻𑀢𑀸 𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁂𑀳𑀺 𑀙𑀸𑀤𑀺𑀢𑀁 𑀦𑀸𑀯𑀁 𑀆𑀭𑀼𑀬𑁆𑀳 𑀢𑀺𑀝𑁆𑀞𑀲𑀺, 𑀧𑁄𑀓𑁆𑀔𑀭𑀡𑀺𑀁 𑀤𑁂𑀯𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑀲𑀺, 𑀧𑀤𑀼𑀫𑀁 𑀧𑀸𑀡𑀺𑀦𑀸 𑀙𑀺𑀦𑁆𑀤𑀲𑀺.

𑀤𑁂𑀯𑀢𑁂 𑀓𑁂𑀦 𑀓𑀫𑁆𑀫𑁂𑀦 𑀢𑁂 𑀢𑀯 𑀢𑀸𑀤𑀺𑀲𑁄 𑀯𑀡𑁆𑀡𑁄 𑀢𑀸𑀤𑀺𑀲𑁄 𑀆𑀦𑀼𑀪𑀸𑀯𑁄 𑀢𑀸𑀤𑀺𑀲𑀻 𑀚𑀼𑀢𑀺 𑀪𑀯𑀢𑀺, 𑀤𑁂𑀯𑀢𑁂 𑀢𑁂 𑀢𑀯 𑀬𑁂 𑀓𑁂𑀘𑀺 𑀪𑁄𑀕𑀸 𑀫𑀦𑀲𑀸 𑀇𑀘𑁆𑀙𑀺𑀢𑀸 𑀪𑀯𑀦𑁆𑀢𑀺, 𑀢𑁂 𑀪𑁄𑀕𑀸 𑀘 𑀓𑁂𑀦 𑀓𑀫𑁆𑀫𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑁂𑀯𑀢𑁂 𑀫𑁂 𑀧𑀼𑀘𑁆𑀙𑀺𑀢𑀸 𑀢𑁆𑀯𑀁 𑀲𑀁𑀲 𑀲𑀁𑀲𑀸𑀳𑀺 𑀇𑀤𑀁 𑀲𑀩𑁆𑀩𑀁 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲 𑀘 𑀨𑀮𑀦𑁆𑀢𑀺 𑀲𑀓𑁆𑀓𑁄 𑀧𑀼𑀘𑁆𑀙𑀢𑀺.

𑀤𑁂𑀯𑀭𑀸𑀚𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀥𑀻𑀢𑀸 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀓𑁆𑀓𑀲𑁆𑀲 𑀩𑁆𑀬𑀸𑀓𑀸𑀲𑀺. 𑀤𑁂𑀯𑀭𑀸𑀚𑀸 𑀅𑀤𑁆𑀥𑀸𑀦𑀁 𑀤𑀻𑀖𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀅𑀳𑀁 𑀬𑀲𑀲𑁆𑀲𑀺𑀦𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀫𑀦𑁄𑀭𑀫𑀁 𑀣𑀽𑀧𑀁 𑀅𑀤𑁆𑀤𑀲𑁆𑀲𑀁, 𑀤𑀺𑀲𑁆𑀯𑀸 𑀢𑀢𑁆𑀣 𑀣𑀽𑀧𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁. 𑀧𑀲𑀦𑁆𑀦𑀸𑀳𑀁 𑀲𑁂𑀳𑀺 𑀧𑀸𑀡𑀻𑀳𑀺 𑀧𑀤𑀼𑀫𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺𑀁. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀇𑀤𑀁 𑀲𑀩𑁆𑀩𑀁 𑀨𑀮𑀁 𑀯𑀺𑀧𑀸𑀓𑁄 𑀪𑀯𑁂. 𑀓𑀢𑀧𑀼𑀜𑁆𑀜𑀸𑀳𑀁 𑀏𑀢𑀸𑀤𑀺𑀲𑀁 𑀨𑀮𑀁 𑀅𑀮𑀪𑀺𑀦𑁆𑀢𑀺 𑀲𑀓𑁆𑀓𑀲𑁆𑀲 𑀩𑁆𑀬𑀸𑀓𑀸𑀲𑀺. 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀯𑀤𑀢𑀻𑀢𑀺 𑀬𑁄𑀚𑀦𑀸.

‘‘𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀲𑀼𑀢𑁆𑀢𑀸𑀦𑀺𑀬𑁂𑀯 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀤𑀸𑀦𑀓𑀣𑀸 𑀲𑀻𑀮𑀓𑀣𑀸 𑀲𑀕𑁆𑀕𑀓𑀣𑀸 𑀧𑀼𑀜𑁆𑀜𑀓𑀣𑀸 𑀧𑀼𑀜𑁆𑀜𑀯𑀺𑀧𑀸𑀓𑀓𑀣𑀸𑀢𑀺 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀬 𑀤𑁂𑀲𑀦𑀸𑀬 𑀤𑀸𑀦𑀜𑁆𑀘 𑀤𑀸𑀦𑀨𑀮𑀜𑁆𑀘 𑀤𑀲𑁆𑀲𑀺𑀢𑀁, 𑀲𑀸 𑀤𑁂𑀲𑀦𑀸 𑀤𑀸𑀦𑀓𑀣𑀸 𑀦𑀸𑀫. 𑀬𑀸𑀬 𑀤𑁂𑀲𑀦𑀸𑀬 𑀲𑀻𑀮𑀜𑁆𑀘 𑀲𑀻𑀮𑀨𑀮𑀜𑁆𑀘 𑀤𑀲𑁆𑀲𑀺𑀢𑀁, 𑀲𑀸 𑀤𑁂𑀲𑀦𑀸 𑀲𑀻𑀮𑀓𑀣𑀸 𑀦𑀸𑀫. 𑀬𑀸𑀬 𑀤𑁂𑀲𑀦𑀸𑀬 𑀲𑀕𑁆𑀕𑀸 𑀘 𑀲𑀕𑁆𑀕𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀧𑀓𑀜𑁆𑀘 𑀓𑀫𑁆𑀫𑀁 𑀤𑀲𑁆𑀲𑀺𑀢𑀁, 𑀲𑀸 𑀲𑀕𑁆𑀕𑀓𑀣𑀸 𑀦𑀸𑀫. 𑀬𑀸𑀬 𑀤𑁂𑀲𑀦𑀸𑀬 𑀤𑀸𑀦𑀲𑀻𑀮𑀪𑀸𑀯𑀦𑀸𑀤𑀺𑀯𑀲𑁂𑀦 𑀤𑀲𑀯𑀺𑀥𑀁 𑀧𑀼𑀜𑁆𑀜𑀓𑀫𑁆𑀫𑀁 𑀤𑀲𑁆𑀲𑀺𑀢𑀁, 𑀲𑀸 𑀧𑀼𑀜𑁆𑀜𑀓𑀣𑀸 𑀦𑀸𑀫. 𑀬𑀸𑀬 𑀤𑁂𑀲𑀦𑀸𑀬 𑀢𑀸𑀤𑀺𑀲𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀯𑀺𑀯𑀺𑀥𑁄 𑀅𑀬𑀁 𑀯𑀺𑀧𑀸𑀓𑁄 𑀇𑀫𑀲𑁆𑀲 𑀧𑀼𑀜𑁆𑀜𑀲𑁆𑀲 𑀯𑀺𑀧𑀸𑀓𑁄𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑀺𑀢𑁄, 𑀲𑀸 𑀧𑀼𑀜𑁆𑀜𑀯𑀺𑀧𑀸𑀓𑀓𑀣𑀸 𑀦𑀸𑀫.

𑀤𑀲𑀩𑀮𑀥𑀭𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀉𑀤𑁆𑀤𑀺𑀲𑁆𑀲𑀓𑀢𑁂𑀲𑀼 𑀲𑀭𑀻𑀭𑀥𑀸𑀢𑀼𑀁 𑀅𑀩𑁆𑀪𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀧𑀁𑀲𑀽𑀳𑀺 𑀓𑀢𑁂𑀲𑀼 𑀣𑀽𑀧𑁂𑀲𑀼 𑀬𑁂 𑀦𑀭𑀸 𑀧𑀲𑀦𑁆𑀦𑀸, 𑀢𑁂 𑀦𑀭𑀸 𑀢𑀢𑁆𑀣 𑀣𑀽𑀧𑁂 𑀓𑀸𑀭𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀲𑀕𑁆𑀕𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀫𑁄𑀤𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀇𑀤𑀁 𑀲𑀼𑀢𑁆𑀢𑀁 𑀯𑀸…𑀧𑁂… 𑀲𑀼𑀢𑁆𑀢𑀁.

𑁯𑁭. 𑀤𑁂𑀯𑀧𑀼𑀢𑁆𑀢𑀲𑀭𑀻𑀭𑀯𑀡𑁆𑀡𑀸 𑀤𑁂𑀯𑀧𑀼𑀢𑁆𑀢𑀲𑀭𑀻𑀭𑀲𑀤𑀺𑀲𑀯𑀡𑁆𑀡𑀸 𑀲𑀼𑀪𑀕𑀲𑀡𑁆𑀞𑀺𑀢𑀺 𑀲𑁄𑀪𑀕𑁆𑀕𑀬𑀼𑀢𑁆𑀢𑀲𑀡𑁆𑀞𑀸𑀦𑀸 𑀲𑀩𑁆𑀩𑁂 𑀚𑀦𑀸 𑀉𑀤𑀓𑁂𑀦 𑀧𑀁𑀲𑀼𑀁 𑀢𑁂𑀫𑁂𑀢𑁆𑀯𑀸 𑀣𑀽𑀧𑀁 𑀯𑀟𑁆𑀠𑁂𑀣, 𑀲𑁄 𑀅𑀬𑀁 𑀣𑀽𑀧𑁄 𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀣𑀽𑀧𑁄𑀢𑀺 𑀧𑀼𑀘𑁆𑀙𑀢𑀺.

𑀲𑀼𑀕𑀢𑁆𑀢𑁂 𑀲𑀼𑀦𑁆𑀤𑀭𑀕𑀢𑁆𑀢𑁂 𑀤𑁂𑀯𑀢𑁂 𑀢𑀲𑁆𑀫𑀺𑀁 𑀣𑀽𑀧𑁂 𑀧𑀲𑀦𑁆𑀦𑀸 𑀇𑀫𑁂 𑀤𑁂𑀯𑀫𑀦𑀼𑀚𑀸 𑀓𑀸𑀭𑀁 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀸 𑀳𑀼𑀢𑁆𑀯𑀸 𑀚𑀭𑀸𑀫𑀭𑀡𑀢𑁄 𑀧𑀫𑀼𑀘𑁆𑀘𑀭𑁂. 𑀲𑁄 𑀅𑀬𑀁 𑀣𑀽𑀧𑁄 𑀫𑀳𑁂𑀲𑀺𑀦𑁄 𑀤𑀲𑀩𑀮𑀥𑀫𑁆𑀫𑀥𑀸𑀭𑀺𑀦𑁄 𑀲𑀼𑀕𑀢𑀲𑁆𑀲 𑀣𑀽𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳𑀸𑀢𑀺 𑀬𑁄𑀚𑀦𑀸. 𑀇𑀤𑀁 𑀲𑀼𑀢𑁆𑀢𑀁 𑀯𑀸…𑀧𑁂… 𑀲𑀼𑀢𑁆𑀢𑀁.

𑀬𑀸𑀳𑀁 𑀬𑀸 𑀅𑀳𑀁 𑀫𑀳𑁂𑀲𑀺𑀦𑁄 𑀣𑀽𑀧𑀁 𑀘𑀢𑁆𑀢𑀸𑀭𑀺 𑀉𑀧𑁆𑀧𑀮𑀸𑀦𑀺 𑀘 𑀫𑀸𑀮𑀜𑁆𑀘 𑀅𑀪𑀺𑀭𑁄𑀧𑀬𑀺𑀁, 𑀢𑁂𑀦 𑀫𑀬𑀸 𑀓𑀢𑀁 𑀢𑀁 𑀧𑀼𑀜𑁆𑀜𑀁 𑀉𑀴𑀸𑀭𑀁 𑀯𑀢 𑀆𑀲𑀺 𑀅𑀳𑁄𑀲𑀺. 𑀢𑀢𑁄 𑀓𑀧𑁆𑀧𑀢𑁄 𑀅𑀚𑁆𑀚 𑀓𑀧𑁆𑀧𑀸 𑀢𑀺𑀁𑀲𑀁 𑀥𑀭𑀦𑁆𑀢𑀺 𑀲𑀢𑁆𑀣𑀼𑀦𑁄 𑀣𑀽𑀧𑀁 𑀧𑀽𑀚𑁂𑀢𑁆𑀯𑀸 𑀢𑀢𑁆𑀢𑀓𑀸𑀦𑀺 𑀤𑀼𑀕𑁆𑀕𑀢𑀺𑀁 𑀦 𑀚𑀸𑀦𑀸𑀫𑀺, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀸𑀫𑀻𑀢𑀺 𑀬𑁄𑀚𑀦𑀸. 𑀇𑀤𑀁 𑀲𑀼𑀢𑁆𑀢𑀁 𑀯𑀸…𑀧𑁂… 𑀲𑀼𑀢𑁆𑀢𑀁.

𑀅𑀳𑀁 𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀥𑀭𑀲𑁆𑀲 𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀥𑀭𑁂𑀦 𑀲𑀫𑁆𑀧𑀦𑁆𑀦𑀲𑁆𑀲 𑀯𑀺𑀚𑀺𑀢𑀯𑀺𑀚𑀬𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀣𑀽𑀧𑀁 𑀅𑀧𑀽𑀚𑁂𑀲𑀺𑀁, 𑀧𑀽𑀚𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀓𑀧𑁆𑀧𑁂 𑀆𑀬𑀼𑀓𑀧𑁆𑀧𑁂 𑀧𑀫𑀼𑀤𑀺𑀢𑁄 𑀆𑀲𑀺𑀁. 𑀫𑀬𑀸 𑀬𑀁 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀢𑁂𑀦 𑀧𑀼𑀜𑁆𑀜𑁂𑀦 𑀯𑀺𑀦𑀺𑀧𑀸𑀢𑀁 𑀅𑀦𑀸𑀕𑀦𑁆𑀢𑀼𑀦 𑀅𑀦𑀸𑀕𑀦𑁆𑀢𑁆𑀯𑀸 𑀤𑁂𑀯𑀲𑁄𑀪𑀕𑁆𑀕𑀁 𑀲𑀫𑁆𑀧𑀢𑁆𑀢𑀺𑀁 𑀘 𑀤𑁂𑀯𑀭𑀚𑁆𑀚𑀸𑀦𑀺 𑀘 𑀢𑀸𑀦𑀺 𑀅𑀓𑀸𑀭𑀺𑀁. 𑀅𑀣 𑀯𑀸 𑀤𑁂𑀯𑀲𑁄𑀪𑀕𑁆𑀕𑀜𑁆𑀘 𑀫𑀬𑀸 𑀓𑀸𑀭𑀺𑀢𑀁, 𑀭𑀚𑁆𑀚𑀸𑀦𑀺 𑀘 𑀫𑀬𑀸 𑀓𑀸𑀭𑀺𑀢𑀸𑀦𑀺.

𑀅𑀤𑀦𑁆𑀢𑀤𑀫𑀓𑀲𑁆𑀲 𑀲𑀸𑀲𑀦𑁂 𑀬𑀁 𑀘𑀓𑁆𑀔𑀼 𑀧𑀜𑁆𑀜𑀸𑀘𑀓𑁆𑀔𑀼 𑀧𑀡𑀺𑀳𑀺𑀢𑀁, 𑀢𑀣𑀸 𑀘𑀺𑀢𑁆𑀢𑀁 𑀬𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀧𑀡𑀺𑀳𑀺𑀢𑀁, 𑀢𑀁 𑀲𑀩𑁆𑀩𑀁 𑀧𑀜𑁆𑀜𑀸𑀘𑀓𑁆𑀔𑀼 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀫𑁂 𑀫𑀬𑀸 𑀮𑀤𑁆𑀥𑀁, 𑀅𑀳𑀁 𑀯𑀺𑀥𑀼𑀢𑀮𑀢𑀸𑀲𑀗𑁆𑀔𑀸𑀢𑀢𑀡𑁆𑀳𑀸 𑀳𑀼𑀢𑁆𑀯𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀨𑀮𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑀫𑁆𑀧𑀦𑁆𑀦𑀸 𑀅𑀫𑁆𑀳𑀻𑀢𑀺 𑀅𑀯𑁄𑀘𑀸𑀢𑀺 𑀬𑁄𑀚𑀦𑀸. 𑀇𑀤𑀁 𑀲𑀼𑀢𑁆𑀢𑀁 𑀯𑀸…𑀧𑁂… 𑀲𑀼𑀢𑁆𑀢𑀁.

𑁯𑁮. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁂 𑀨𑀮𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑀫𑁆𑀧𑀦𑁆𑀦𑁂 𑀅𑀔𑀺𑀮𑁂 𑀧𑀜𑁆𑀘𑀘𑁂𑀢𑁄𑀔𑀻𑀮𑀭𑀳𑀺𑀢𑁂 𑀅𑀦𑀸𑀲𑀯𑁂 𑀅𑀭𑀡𑀯𑀺𑀳𑀸𑀭𑀺𑀫𑁆𑀳𑀺 𑀅𑀭𑀡𑀯𑀺𑀳𑀸𑀭𑀲𑀻𑀮𑁂 𑀅𑀲𑀗𑁆𑀕𑀫𑀸𑀦𑀲𑁂 𑀅𑀮𑀕𑁆𑀕𑀫𑀸𑀦𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀫𑀺𑀁 𑀲𑀸𑀫𑀸𑀓𑀧𑀢𑁆𑀣𑁄𑀤𑀦𑀫𑀢𑁆𑀢𑀫𑁂𑀯 𑀤𑀓𑁆𑀔𑀺𑀡𑀁 𑀅𑀤𑀸𑀲𑀺𑀁.

𑀢𑀲𑁆𑀫𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀢𑁆𑀢𑀫𑀁 𑀥𑀫𑁆𑀫𑀁 𑀧𑀘𑁆𑀘𑁂𑀓𑀩𑁄𑀥𑀺𑀥𑀫𑁆𑀫𑀁 𑀑𑀓𑀧𑁆𑀧𑀬𑀺𑀁 ‘‘𑀲𑁄 𑀉𑀢𑁆𑀢𑀫𑁄 𑀥𑀫𑁆𑀫𑁄 𑀅𑀢𑁆𑀣𑀻’’𑀢𑀺 𑀲𑀤𑁆𑀤𑀳𑀺𑀁. 𑀏𑀯𑀁 𑀅𑀭𑀺𑀬𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀻𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀫𑁂 𑀫𑀫 𑀲𑀗𑁆𑀕𑀫𑁄 𑀓𑀢𑁄 𑀲𑀺𑀬𑀸 𑀪𑀯𑁂, 𑀓𑀼𑀤𑀸𑀲𑀼𑀧𑀺 𑀘 𑀅𑀳𑀁 𑀅𑀧𑁂𑀓𑁆𑀔𑀯𑀸 𑀫𑀸 𑀪𑀯𑁂𑀬𑁆𑀬𑀦𑁆𑀢𑀺 𑀫𑀸𑀦𑀲𑀁 𑀢𑀲𑁆𑀫𑀺𑀜𑁆𑀘 𑀥𑀫𑁆𑀫𑁂 𑀧𑀡𑀺𑀥𑁂𑀲𑀺𑀁 ‘‘𑀇𑀫𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀮𑀤𑁆𑀥𑀥𑀫𑁆𑀫𑀁 𑀅𑀳𑀫𑁆𑀧𑀺 𑀲𑀘𑁆𑀙𑀺𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀢𑁆𑀢𑀁 𑀧𑀡𑀺𑀤𑀳𑀺𑀁.

𑀢𑀲𑁆𑀲𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀓𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀢𑁄 𑀅𑀳𑀁 𑀤𑀻𑀖𑀸𑀬𑀼𑀓𑁂𑀲𑀼 𑀅𑀫𑀫𑁂𑀲𑀼 ‘‘𑀫𑀫 𑀧𑀭𑀺𑀕𑁆𑀕𑀳𑁄’’𑀢𑀺 𑀧𑀭𑀺𑀕𑁆𑀕𑀳𑀸𑀪𑀸𑀯𑁂𑀦 𑀅𑀧𑀭𑀺𑀕𑁆𑀕𑀳𑁂𑀲𑀼 𑀯𑀺𑀲𑁂𑀲𑀕𑀸𑀫𑀻𑀲𑀼 𑀅𑀳𑀻𑀦𑀕𑀸𑀫𑀻𑀲𑀼 𑀓𑀼𑀭𑀽𑀲𑀼 𑀉𑀢𑁆𑀢𑀭𑀓𑀼𑀭𑀽𑀲𑀼 𑀧𑀸𑀡𑀻𑀲𑀼 𑀲𑀢𑁆𑀢𑁂𑀲𑀼 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀉𑀧𑀧𑀚𑁆𑀚𑀣 𑀉𑀧𑀧𑀚𑁆𑀚𑀺𑀁.

𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀢𑁄 𑀯𑀺𑀘𑀺𑀢𑁆𑀭𑀫𑀸𑀮𑀸𑀪𑀭𑀡𑀸𑀦𑀼𑀮𑁂𑀧𑀻𑀲𑀼 𑀬𑀲𑀲𑁆𑀲𑀻𑀲𑀼 𑀧𑀭𑀺𑀯𑀸𑀭𑀯𑀦𑁆𑀢𑁂𑀲𑀼 𑀢𑀺𑀤𑀲𑁄 𑀤𑁂𑀯𑁄 𑀅𑀳𑀁 𑀯𑀺𑀲𑀺𑀝𑁆𑀞𑀓𑀸𑀬𑀽𑀧𑀕𑀢𑁄 𑀳𑀼𑀢𑁆𑀯𑀸 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀉𑀧𑀧𑀚𑁆𑀚𑀣.

𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀢𑁄 𑀅𑀳𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀅𑀔𑀻𑀮𑁄 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀳𑀺𑀢𑀸𑀳𑀺𑀢𑀸𑀲𑀻𑀳𑀺 𑀓𑀼𑀲𑀮𑀸𑀓𑀼𑀲𑀮𑀯𑀻𑀢𑀺𑀯𑀢𑁆𑀢𑁂𑀳𑀺 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀺𑀪𑀺 𑀇𑀫𑁂𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺, 𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀯𑀸 𑀫𑁂 𑀫𑀫 𑀲𑀫𑀸𑀕𑀫𑁄 𑀆𑀲𑀺.

‘‘𑀲𑀻𑀮𑀯𑀢𑁄 𑀬𑀁 𑀇𑀘𑁆𑀙𑀺𑀢𑀁, 𑀢𑀁 𑀲𑀫𑀺𑀚𑁆𑀛𑀢𑁂’’𑀢𑀺 𑀇𑀫𑀁 𑀯𑀘𑀦𑀁 𑀢𑀣𑀸𑀕𑀢𑁄 𑀚𑀺𑀦𑁄 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀅𑀯𑀘 𑀔𑁄, 𑀬𑀣𑀸 𑀬𑀣𑀸 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦 𑀫𑁂 𑀫𑀦𑀲𑀸 𑀯𑀺𑀘𑀺𑀦𑁆𑀢𑀺𑀢𑀁, 𑀢𑀣𑀸 𑀢𑀣𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀲𑀫𑀺𑀤𑁆𑀥𑀁 𑀪𑀯𑀢𑀺. 𑀅𑀬𑀁 𑀪𑀯𑁄 𑀅𑀦𑁆𑀢𑀺𑀫𑁄 𑀪𑀯𑁄𑀢𑀺 𑀬𑁄𑀚𑀦𑀸. 𑀇𑀤𑀁 𑀲𑀼𑀢𑁆𑀢𑀁 𑀯𑀸…𑀧𑁂… 𑀲𑀼𑀢𑁆𑀢𑀁.

𑀏𑀓𑀢𑀺𑀁𑀲𑀫𑁆𑀳𑀺 𑀓𑀧𑁆𑀧𑀫𑁆𑀳𑀺 𑀚𑀺𑀦𑁄 𑀅𑀦𑁂𑀚𑁄 𑀅𑀦𑀦𑁆𑀢𑀤𑀲𑁆𑀲𑀻 ‘‘𑀲𑀺𑀔𑀻’’𑀢𑀺 𑀇𑀢𑀺𑀦𑀸𑀫𑀓𑁄 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀲𑀸𑀧𑀺 𑀪𑀕𑀯𑀢𑁄 𑀭𑀸𑀚𑀸 𑀪𑀸𑀢𑀸 𑀲𑀺𑀔𑀺𑀤𑁆𑀥𑁂 𑀘 𑀲𑀺𑀔𑀻 𑀇𑀢𑀺𑀦𑀸𑀫𑀓𑁂 𑀩𑀼𑀤𑁆𑀥𑁂 𑀘 𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑁂 𑀘 𑀅𑀪𑀺𑀧𑁆𑀧𑀲𑀦𑁆𑀦𑁄 𑀮𑁄𑀓𑀯𑀺𑀦𑀸𑀬𑀓𑀫𑁆𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑀺 𑀤𑁂𑀯𑀸𑀢𑀺𑀤𑁂𑀯𑀲𑁆𑀲 𑀦𑀭𑀼𑀢𑁆𑀢𑀫𑀲𑁆𑀲 𑀫𑀳𑁂𑀲𑀺𑀦𑁄 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁 𑀲𑀫𑀦𑁆𑀢𑀢𑁄 𑀕𑀸𑀯𑀼𑀢𑀺𑀓𑀁 𑀣𑀽𑀧𑀁 𑀅𑀓𑀸𑀲𑀺𑀁.

𑀢𑀲𑁆𑀫𑀺𑀁 𑀣𑀽𑀧𑁂 𑀩𑀮𑀺𑀁 𑀧𑀽𑀚𑀸𑀩𑀮𑀺𑀁 𑀅𑀪𑀺𑀳𑀸𑀭𑀻 𑀫𑀦𑀼𑀲𑁆𑀲𑁄 𑀚𑀸𑀢𑀺𑀲𑀼𑀫𑀦𑀁 𑀧𑀕𑁆𑀕𑀬𑁆𑀳 𑀧𑀳𑀝𑁆𑀞𑁄 𑀧𑀽𑀚𑁂𑀲𑀺. 𑀅𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀏𑀓𑀁 𑀧𑀼𑀧𑁆𑀨𑀁 𑀯𑀸𑀢𑁂𑀦 𑀧𑀳𑀭𑀺𑀢𑀁 𑀳𑀼𑀢𑁆𑀯𑀸 𑀧𑀢𑀺𑀢𑀁. 𑀅𑀳𑀁 𑀢𑀁 𑀧𑀢𑀺𑀢𑀁 𑀏𑀓𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑁂𑀯 𑀧𑀼𑀧𑁆𑀨𑀲𑀸𑀫𑀺𑀓𑀲𑁆𑀲 𑀅𑀤𑀸𑀲𑀺𑀁.

𑀲𑁄 𑀫𑀦𑀼𑀲𑁆𑀲𑁄 𑀧𑀼𑀧𑁆𑀨𑀲𑀸𑀫𑀺𑀓𑁄 𑀅𑀪𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀫𑀁 ‘‘𑀢𑁆𑀯𑀫𑁂𑀯 𑀏𑀢𑀁 𑀏𑀓𑀁 𑀧𑀼𑀧𑁆𑀨𑀁 𑀧𑀽𑀚𑀸’’𑀢𑀺 𑀅𑀤𑀸𑀲𑀺. 𑀤𑀤𑀸𑀲𑀻𑀢𑀺 𑀏𑀢𑁆𑀣 𑀤-𑀓𑀸𑀭𑁄 𑀆𑀕𑀫𑁄. 𑀅𑀳𑀁 𑀢𑀁 𑀏𑀓𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀁 𑀩𑀼𑀤𑁆𑀥𑀕𑀼𑀡𑀁 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀅𑀪𑀺𑀭𑁄𑀧𑀬𑀺𑀁, 𑀢𑀢𑁄 𑀓𑀧𑁆𑀧𑀢𑁄 𑀅𑀚𑁆𑀚 𑀓𑀧𑁆𑀧𑀸 𑀢𑀺𑀁𑀲𑀁 𑀅𑀳𑁂𑀲𑀼𑀁. 𑀢𑁂𑀲𑀼 𑀓𑀧𑁆𑀧𑁂𑀲𑀼 𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑀺𑀦𑀺𑀧𑀸𑀢𑀜𑁆𑀘 𑀦 𑀕𑀘𑁆𑀙𑀸𑀫𑀺, 𑀇𑀤𑀁 𑀨𑀮𑀁 𑀣𑀽𑀧𑀧𑀽𑀚𑀸𑀬 𑀨𑀮𑀦𑁆𑀢𑀺 𑀅𑀯𑁄𑀘𑀸𑀢𑀺 𑀬𑁄𑀚𑀦𑀸. 𑀇𑀤𑀁 𑀲𑀼𑀢𑁆𑀢𑀁 𑀯𑀸…𑀧𑁂… 𑀲𑀼𑀢𑁆𑀢𑀁.

𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀩𑁆𑀭𑀳𑁆𑀫𑀤𑀢𑁆𑀢𑀦𑀸𑀫𑀓𑀲𑁆𑀲 𑀭𑀸𑀚𑀺𑀦𑁄 𑀓𑀧𑀺𑀮𑀁 𑀦𑀸𑀫 𑀦𑀕𑀭𑀁 𑀲𑀼𑀯𑀺𑀪𑀢𑁆𑀢𑀁 𑀪𑀸𑀕𑀢𑁄 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀁, 𑀫𑀳𑀸𑀧𑀣𑀁 𑀫𑀳𑀸𑀧𑀣𑀲𑀫𑁆𑀧𑀦𑁆𑀦𑀁 𑀆𑀓𑀺𑀡𑁆𑀡𑀁, 𑀦𑀸𑀦𑀸𑀚𑀸𑀢𑀺𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀧𑀼𑀡𑁆𑀡𑀁, 𑀇𑀤𑁆𑀥𑀁 𑀨𑀻𑀢𑀜𑁆𑀘 𑀆𑀲𑀺.

𑀧𑀜𑁆𑀘𑀸𑀮𑀸𑀦𑀁 𑀢𑀢𑁆𑀣 𑀧𑀼𑀭𑀼𑀢𑁆𑀢𑀫𑁂 𑀅𑀳𑀁 𑀓𑀼𑀫𑁆𑀫𑀸𑀲𑀁 𑀯𑀺𑀓𑁆𑀓𑀺𑀡𑀺𑀁, 𑀲𑁄 𑀅𑀳𑀁 𑀬𑀲𑀲𑁆𑀲𑀺𑀦𑀁 𑀉𑀧𑀭𑀺𑀝𑁆𑀞𑀁 𑀉𑀧𑀲𑀫𑀻𑀧𑁂 𑀞𑀺𑀢𑀁 𑀅𑀭𑀺𑀝𑁆𑀞𑀁 𑀦𑀸𑀫 𑀲𑀫𑁆𑀩𑀼𑀤𑁆𑀥𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀤𑁆𑀤𑀲𑀺𑀁, 𑀤𑀺𑀲𑁆𑀯𑀸 𑀳𑀝𑁆𑀞𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀦𑀭𑀼𑀢𑁆𑀢𑀫𑀁 𑀅𑀭𑀺𑀝𑁆𑀞𑀁 𑀫𑁂 𑀕𑁂𑀳𑀲𑁆𑀫𑀺𑀁 𑀬𑀁 𑀥𑀼𑀯𑀪𑀢𑁆𑀢𑀁 𑀯𑀺𑀚𑁆𑀚𑀣 𑀯𑀺𑀚𑁆𑀚𑀺, 𑀢𑁂𑀦 𑀥𑀼𑀯𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀲𑀺𑀁.

𑀬𑀢𑁄 𑀘 𑀬𑀲𑁆𑀫𑀺𑀁 𑀓𑀸𑀮𑁂 𑀘 𑀓𑀢𑁆𑀢𑀺𑀓𑁄 𑀬𑀲𑁆𑀲𑀁 𑀧𑀦𑁆𑀦𑀭𑀲𑀻𑀧𑀼𑀡𑁆𑀡𑁄, 𑀲𑀸 𑀧𑀼𑀡𑁆𑀡𑀫𑀸𑀲𑀻 𑀧𑀦𑁆𑀦𑀭𑀲𑀻 𑀉𑀧𑀝𑁆𑀞𑀺𑀢𑀸, 𑀢𑀢𑁄 𑀘 𑀢𑀲𑁆𑀫𑀺𑀁 𑀓𑀸𑀮𑁂 𑀘 𑀅𑀳𑀁 𑀦𑀯𑀁 𑀤𑀼𑀲𑁆𑀲𑀬𑀼𑀕𑀁 𑀕𑀬𑁆𑀳 𑀅𑀭𑀺𑀝𑁆𑀞𑀲𑁆𑀲 𑀅𑀭𑀺𑀝𑁆𑀞𑀦𑀸𑀫𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑁂𑀲𑀺𑀁.

𑀦𑀭𑀼𑀢𑁆𑀢𑀫𑁄 𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄 𑀢𑀡𑁆𑀳𑀸𑀦𑀺𑀖𑀸𑀢𑀓𑁄 𑀫𑀼𑀦𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀲𑀦𑁆𑀦𑀘𑀺𑀢𑁆𑀢𑀁 𑀫𑀁 𑀜𑀢𑁆𑀯𑀸𑀦 𑀧𑀝𑀺𑀕𑁆𑀕𑀡𑁆𑀳𑀺.

𑀅𑀳𑀁 𑀓𑀮𑁆𑀬𑀸𑀡𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀬𑀁 𑀦𑀕𑀭𑁂 𑀅𑀟𑁆𑀠𑁂 𑀓𑀼𑀮𑀲𑁆𑀫𑀺𑀁 𑀲𑁂𑀝𑁆𑀞𑀺𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀉𑀧𑁆𑀧𑀚𑁆𑀚𑀺𑀁, 𑀧𑀸𑀡𑁂𑀳𑀺 𑀘 𑀧𑀺𑀬𑀢𑀭𑁄 𑀆𑀲𑀺𑀁.

𑀢𑀢𑁄 𑀘 𑀢𑀲𑁆𑀫𑀺𑀁 𑀓𑀸𑀮𑁂 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀳𑀼𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑁂𑀦 𑀘𑁄𑀤𑀺𑀢𑁄 𑀅𑀳𑀁 𑀧𑀸𑀲𑀸𑀤𑀸 𑀑𑀭𑀼𑀳𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀁.

𑀲𑁄 𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸 𑀕𑁄𑀢𑀫𑁄 𑀅𑀦𑀼𑀓𑀫𑁆𑀧𑀸𑀬 𑀫𑁂 𑀥𑀫𑁆𑀫𑀁 𑀅𑀤𑁂𑀲𑁂𑀲𑀺. 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁 𑀲𑀫𑀼𑀤𑀬𑀲𑀘𑁆𑀘𑀜𑁆𑀘 𑀤𑀼𑀓𑁆𑀔𑀲𑁆𑀲 𑀅𑀢𑀺𑀓𑁆𑀓𑀫𑀁 𑀦𑀺𑀭𑁄𑀥𑀲𑀘𑁆𑀘𑀜𑁆𑀘 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁 𑀫𑀕𑁆𑀕𑀁 𑀫𑀕𑁆𑀕𑀲𑀘𑁆𑀘𑀜𑁆𑀘 𑀇𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀢𑀤𑀼𑀧𑁆𑀧𑀸𑀤𑀓𑀁 𑀥𑀫𑁆𑀫𑀁 𑀫𑀼𑀦𑀺 𑀪𑀕𑀯𑀸 𑀕𑁄𑀢𑀫𑁄 𑀅𑀤𑁂𑀲𑀬𑀺.

𑀅𑀳𑀁 𑀢𑀲𑁆𑀲 𑀪𑀕𑀯𑀢𑁄 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀭𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀁, 𑀅𑀳𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀢𑀦𑁆𑀤𑀺𑀢𑁄 𑀳𑀼𑀢𑁆𑀯𑀸 𑀲𑀫𑀣𑀁 𑀧𑀝𑀺𑀯𑀺𑀚𑁆𑀛𑀺𑀁.

𑀅𑀚𑁆𑀛𑀢𑁆𑀢𑀜𑁆𑀘 𑀬𑁂 𑀆𑀲𑀯𑀸, 𑀩𑀳𑀺𑀤𑁆𑀥𑀸 𑀘 𑀬𑁂 𑀆𑀲𑀯𑀸 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸 𑀆𑀲𑀼𑀁, 𑀲𑀩𑁆𑀩𑁂 𑀢𑁂 𑀆𑀲𑀯𑀸 𑀫𑁂 𑀫𑀫 𑀯𑀺𑀚𑁆𑀚𑀺𑀁𑀲𑀼, 𑀧𑀼𑀦 𑀦 𑀘 𑀉𑀧𑁆𑀧𑀚𑁆𑀚𑀭𑁂.

𑀤𑀼𑀓𑁆𑀔𑀁 ‘‘𑀧𑀭𑀺𑀬𑀦𑁆𑀢𑀓𑀢𑀁 𑀬𑀲𑁆𑀲 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀧𑀭𑀺𑀬𑀦𑁆𑀢𑀓𑀢𑀁 𑀆𑀲𑀺, 𑀅𑀬𑀁 𑀲𑀫𑀼𑀲𑁆𑀲𑀬𑁄 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀘𑀭𑀺𑀫𑁄 𑀅𑀦𑁆𑀢𑀺𑀫𑁄 𑀆𑀲𑀺, 𑀇𑀤𑀸𑀦𑀺 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀦𑁆𑀢𑀭𑀁 𑀧𑀼𑀦𑀩𑁆𑀪𑀯𑁄 𑀫𑀫 𑀦𑀢𑁆𑀣𑀻𑀢𑀺 𑀅𑀯𑁄𑀘𑀸𑀢𑀺 𑀬𑁄𑀚𑀦𑀸. 𑀬𑀁 𑀦𑀸𑀦𑀸𑀯𑀺𑀥𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀉𑀤𑀸𑀳𑀭𑀡𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀁, 𑀇𑀤𑀁 𑀦𑀸𑀦𑀸𑀯𑀺𑀥𑀁 𑀲𑀼𑀢𑁆𑀢𑀁 𑀯𑀸𑀲𑀦𑀸𑀪𑀸𑀕𑁂 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑁂 𑀯𑀺𑀲𑀬𑁂 𑀯𑀸𑀘𑀓𑀜𑀸𑀧𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫.

𑀦𑀸𑀦𑀸𑀯𑀺𑀥𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀢𑀫𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀼 𑀲𑁄𑀴𑀲𑀲𑀼 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀓𑀢𑀫𑀁 𑀲𑀼𑀢𑁆𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺.

𑀉𑀤𑁆𑀥𑀁 𑀩𑁆𑀭𑀳𑁆𑀫𑀮𑁄𑀓𑁂 𑀅𑀥𑁄 𑀓𑀸𑀫𑀸𑀯𑀘𑀭𑁂 𑀪𑀯𑁂 𑀲𑀩𑁆𑀩𑀥𑀺 𑀲𑀩𑁆𑀩𑁂𑀲𑀼 𑀪𑀯𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁄 𑀅𑀭𑀳𑀸 ‘‘𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀅𑀳𑀁 𑀅𑀲𑁆𑀫𑀻’’𑀢𑀺 𑀅𑀦𑀸𑀦𑀼𑀧𑀲𑁆𑀲𑀻, 𑀏𑀯𑀁 𑀯𑀺𑀫𑀼𑀢𑁆𑀢𑁄 𑀅𑀭𑀳𑀸 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀑𑀖𑀁 𑀅𑀧𑀼𑀦𑀩𑁆𑀪𑀯𑀸𑀬 𑀉𑀤𑀢𑀸𑀭𑀺 𑀉𑀢𑁆𑀢𑀺𑀡𑁆𑀡𑁄𑀢𑀺 𑀬𑁄𑀚𑀦𑀸. 𑀇𑀤𑀁 𑀲𑀼𑀢𑁆𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑁂 𑀲𑁂𑀓𑁆𑀔𑀥𑀫𑁆𑀫𑁂 𑀯𑀺𑀲𑀬𑁂 𑀯𑀸𑀘𑀓𑀜𑀸𑀧𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫.

‘‘𑀏𑀢𑁆𑀢𑀓𑀫𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀻𑀮𑀯𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀦𑀦𑁆𑀤, 𑀲𑀻𑀮𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 ‘‘𑀓𑀺𑀦𑁆𑀢𑀺 𑀫𑁂 𑀫𑀫 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀚𑀸𑀬𑁂𑀬𑁆𑀬 𑀧𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀘𑁂𑀢𑀦𑀸 𑀦 𑀓𑀭𑀡𑀻𑀬𑀸 𑀦 𑀓𑀸𑀢𑀩𑁆𑀩𑀸. 𑀆𑀦𑀦𑁆𑀤, 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀬𑀁 𑀚𑀸𑀬𑁂𑀬𑁆𑀬 𑀧𑀯𑀢𑁆𑀢𑁂𑀬𑁆𑀬, 𑀏𑀲𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀚𑀸𑀬𑀦𑀸 𑀧𑀯𑀢𑁆𑀢𑀦𑀸 𑀥𑀫𑁆𑀫𑀢𑀸 𑀪𑀯𑀢𑀺. 𑀆𑀦𑀦𑁆𑀤, 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀸 𑀧𑀼𑀕𑁆𑀕𑀮𑁂𑀦 ‘‘𑀓𑀺𑀦𑁆𑀢𑀺 𑀫𑁂 𑀫𑀫 𑀧𑀸𑀫𑁄𑀚𑁆𑀚𑀁 𑀚𑀸𑀬𑁂𑀬𑁆𑀬 𑀧𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀘𑁂𑀢𑀦𑀸 𑀦 𑀓𑀭𑀡𑀻𑀬𑀸, 𑀆𑀦𑀦𑁆𑀤, 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀧𑀸𑀫𑁄𑀚𑁆𑀚𑀁 𑀬𑀁 𑀚𑀸𑀬𑁂𑀬𑁆𑀬 𑀧𑀯𑀢𑁆𑀢𑁂𑀬𑁆𑀬, 𑀏𑀲𑀸 𑀧𑀸𑀫𑁄𑀚𑁆𑀚𑀲𑁆𑀲 𑀚𑀸𑀬𑀦𑀸 𑀧𑀯𑀢𑁆𑀢𑀦𑀸 𑀥𑀫𑁆𑀫𑀢𑀸. 𑀲𑁂𑀲𑁂𑀲𑀼𑀧𑀺 𑀇𑀫𑀲𑁆𑀲 𑀬𑁄𑀚𑀦𑀸𑀦𑀬𑀸𑀦𑀼𑀲𑀸𑀭𑁂𑀦 𑀬𑁄𑀚𑀦𑀸𑀦𑀬𑁄 𑀕𑀳𑁂𑀢𑀩𑁆𑀩𑁄. 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀸𑀫.