𑁩. 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁧𑁮. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁂𑀦 𑀧𑀤𑀧𑀜𑁆𑀳𑀸𑀤𑀬𑁄 𑀯𑀺𑀘𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀳𑀸𑀭𑁂𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀬𑀼𑀢𑁆𑀢𑀺𑀳𑀸𑀭𑁄 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄𑀢𑀺 𑀧𑀼𑀘𑁆𑀙𑀺. ‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦’’𑀦𑁆𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑁄𑀢𑀺𑀆𑀤𑀺 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁮). 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄 𑀓𑀺𑀁 𑀦𑀸𑀫 𑀲𑀼𑀢𑁆𑀢𑀢𑁆𑀣𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀯𑀲𑁂𑀦 𑀬𑁄𑀚𑀬𑀢𑀻𑀢𑀺 𑀬𑀼𑀜𑁆𑀚𑀺𑀢𑀩𑁆𑀩𑀁 𑀲𑀼𑀢𑁆𑀢𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀲𑀼𑀢𑁆𑀢𑀢𑁆𑀣𑁄 𑀧𑀦 𑀤𑀼𑀯𑀺𑀥𑁄 𑀅𑀢𑀣𑀸𑀓𑀸𑀭𑁂𑀦 𑀕𑀬𑁆𑀳𑀫𑀸𑀦𑁄, 𑀢𑀣𑀸𑀓𑀸𑀭𑁂𑀦 𑀕𑀬𑁆𑀳𑀫𑀸𑀦𑁄 𑀅𑀢𑁆𑀣𑁄𑀢𑀺. 𑀢𑀢𑁆𑀣 𑀅𑀢𑀣𑀸𑀓𑀸𑀭𑁂𑀦 𑀕𑀬𑁆𑀳𑀫𑀸𑀦𑁄𑀯 𑀅𑀢𑁆𑀣𑁄 𑀬𑀸𑀣𑀸𑀯𑀢𑁄 𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑁂𑀦 𑀬𑁄𑀚𑁂𑀢𑀩𑁆𑀩𑁄, 𑀇𑀢𑀭𑁄 𑀧𑀦 𑀪𑀽𑀢𑀓𑀣𑀦𑀫𑀢𑁆𑀢𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦𑀸𑀬𑀁 𑀬𑀼𑀢𑁆𑀢𑀺𑀕𑀯𑁂𑀲𑀦𑀸 𑀦𑀸𑀫 𑀲𑀁𑀯𑀡𑁆𑀡𑀦𑀸 𑀫𑀳𑀸𑀧𑀤𑁂𑀲𑁂𑀳𑀺 𑀯𑀺𑀦𑀸 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀬𑀼𑀢𑁆𑀢𑀺𑀳𑀸𑀭𑀁 𑀯𑀺𑀪𑀚𑀦𑁆𑀢𑁄 𑀢𑀲𑁆𑀲 𑀬𑀼𑀢𑁆𑀢𑀺𑀳𑀸𑀭𑀲𑁆𑀲 𑀮𑀓𑁆𑀔𑀡𑀁 𑀧𑀞𑀫𑀁 𑀉𑀧𑀤𑀺𑀲𑀺𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀳𑀸𑀧𑀤𑁂𑀲𑀸𑀢𑀺 𑀫𑀳𑀦𑁆𑀢𑁂 𑀩𑀼𑀤𑁆𑀥𑀸𑀤𑀬𑁄 𑀅𑀧𑀤𑀺𑀲𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀓𑀸𑀭𑀡𑀸𑀦𑀺, 𑀫𑀳𑀦𑁆𑀢𑀸𑀦𑀺 𑀯𑀸 𑀥𑀫𑁆𑀫𑀲𑁆𑀲 𑀅𑀧𑀤𑁂𑀲𑀸𑀦𑀺 𑀧𑀢𑀺𑀝𑁆𑀞𑀸𑀦𑀸𑀦𑀺. 𑀅𑀧𑀤𑀺𑀲𑀻𑀬𑀢𑁂𑀢𑀺 𑀅𑀧𑀤𑁂𑀲𑁄, 𑀩𑀼𑀤𑁆𑀥𑁄 𑀅𑀧𑀤𑁂𑀲𑁄 𑀏𑀢𑀲𑁆𑀲 𑀓𑀸𑀭𑀡𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀧𑀤𑁂𑀲𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄 𑀦𑁂𑀢𑀩𑁆𑀩𑁄. ‘‘𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀏𑀢𑀁 𑀲𑀼𑀢𑁆𑀢𑀁 𑀫𑀬𑀸 𑀲𑀼𑀢’’𑀦𑁆𑀢𑀺 𑀯𑀢𑁆𑀯𑀸 𑀆𑀪𑀢𑀲𑁆𑀲 𑀕𑀦𑁆𑀣𑀲𑁆𑀲 𑀲𑀼𑀢𑁆𑀢𑀯𑀺𑀦𑀬𑁂𑀳𑀺 𑀲𑀁𑀲𑀦𑁆𑀤𑀦𑀁 𑀥𑀫𑁆𑀫𑁄, 𑀅𑀲𑀁𑀲𑀦𑁆𑀤𑀦𑀁 𑀅𑀥𑀫𑁆𑀫𑁄𑀢𑀺 𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑀁 𑀫𑀳𑀸𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀫𑀬𑀸 𑀆𑀪𑀢𑀁, 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀫𑀬𑀸 𑀆𑀪𑀢𑀁, 𑀲𑀫𑁆𑀩𑀳𑀼𑀮𑀢𑁆𑀣𑁂𑀭𑀸𑀦𑀁 𑀲𑀫𑁆𑀫𑀼𑀔𑀸 𑀫𑀬𑀸 𑀆𑀪𑀢𑀁, 𑀏𑀓𑀢𑁆𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀫𑀬𑀸 𑀆𑀪𑀢’’𑀦𑁆𑀢𑀺 𑀯𑀢𑁆𑀯𑀸 𑀆𑀪𑀢𑀲𑁆𑀲 𑀕𑀦𑁆𑀣𑀲𑁆𑀲 𑀬𑀸𑀦𑀺 𑀩𑁆𑀬𑀜𑁆𑀚𑀦𑀧𑀤𑀅𑀢𑁆𑀣𑀧𑀤𑀸𑀦𑀺 𑀲𑀦𑁆𑀢𑀺, 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀪𑀕𑀯𑀢𑀸 𑀤𑁂𑀲𑀺𑀢𑁂 𑀲𑀼𑀢𑁆𑀢𑁂 𑀑𑀢𑀭𑀬𑀺𑀢𑀩𑁆𑀩𑀸𑀦𑀺 𑀅𑀦𑀼𑀧𑁆𑀧𑀯𑁂𑀲𑀺𑀢𑀸𑀦𑀺, 𑀯𑀺𑀦𑀬𑁂 𑀭𑀸𑀕𑀸𑀤𑀺𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀬𑀺𑀢𑀩𑁆𑀩𑀸𑀦𑀺 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀦𑀺. 𑀥𑀫𑁆𑀫𑀢𑀸𑀬𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺. 𑀬𑀤𑀺 𑀲𑀼𑀢𑁆𑀢𑀢𑁆𑀣𑁂𑀦, 𑀯𑀺𑀦𑀬𑀢𑁆𑀣𑁂𑀦, 𑀥𑀫𑁆𑀫𑀢𑀸𑀬 𑀘 𑀅𑀯𑀺𑀭𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀲𑀢𑀺 𑀢𑀯 𑀆𑀪𑀢𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀬𑀼𑀢𑁆𑀢𑀸𑀦𑀻𑀢𑀺 𑀯𑀺𑀦𑀺𑀘𑁆𑀙𑀬𑀦𑁆𑀢𑁂𑀳𑀺 𑀯𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀢𑁆𑀢𑀯𑀺𑀦𑀬𑀥𑀫𑁆𑀫𑀢𑀸𑀲𑀼 𑀑𑀢𑀭𑀬𑀺𑀢𑀩𑁆𑀩𑀸𑀦𑀺 𑀲𑀦𑁆𑀤𑀲𑁆𑀲𑀬𑀺𑀢𑀩𑁆𑀩𑀸𑀦𑀺 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀻𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀸𑀦𑀺, ‘‘𑀓𑀢𑁆𑀣 𑀲𑀼𑀢𑁆𑀢𑁂, 𑀓𑀢𑁆𑀣 𑀯𑀺𑀦𑀬𑁂, 𑀓𑀢𑁆𑀣 𑀥𑀫𑁆𑀫𑀢𑀸𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀓𑀢𑀫𑀲𑁆𑀫𑀺𑀁 𑀲𑀼𑀢𑁆𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀽𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀓𑁂𑀲𑀼 𑀲𑀼𑀢𑁆𑀢𑁂𑀲𑀼. 𑀭𑀸𑀕𑁄 𑀯𑀺𑀦𑀲𑁆𑀲𑀢𑀺 𑀯𑀽𑀧𑀲𑀫𑀢𑀺 𑀏𑀢𑁂𑀦 𑀅𑀲𑀼𑀪𑀸𑀤𑀺𑀦𑀸𑀢𑀺 𑀭𑀸𑀕𑀯𑀺𑀦𑀬𑀁, 𑀓𑀺𑀁 𑀢𑀁? 𑀅𑀲𑀼𑀪𑀸𑀤𑀺𑀦𑀺𑀫𑀺𑀢𑁆𑀢𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀸𑀕𑀯𑀺𑀦𑀬𑁄, 𑀓𑁄 𑀲𑁄? 𑀅𑀲𑀼𑀪𑀸𑀤𑀺𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑀓𑁄 𑀲𑀼𑀢𑁆𑀢𑀦𑁆𑀢𑀯𑀺𑀲𑁂𑀲𑁄. 𑀏𑀲 𑀦𑀬𑁄 𑀤𑁄𑀲𑀯𑀺𑀦𑀬𑁄𑀢𑀺𑀆𑀤𑀻𑀲𑀼𑀧𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀦𑀸𑀫 𑀲𑀲𑁆𑀲𑀢𑀤𑀺𑀝𑁆𑀞𑀺𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀏𑀓𑀢𑁆𑀢𑀦𑀬𑀸𑀤𑀻𑀦𑀁 𑀤𑀻𑀧𑀦𑁂𑀦 𑀅𑀯𑀺𑀚𑁆𑀚𑀸𑀤𑀺𑀲𑀗𑁆𑀔𑀸𑀭𑀸𑀤𑀺𑀲𑀪𑀸𑀯𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀤𑀻𑀧𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀓𑀢𑀫𑀺𑀲𑁆𑀲𑀁 𑀥𑀫𑁆𑀫𑀢𑀸𑀬𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺? 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂’’𑀢𑀺.

‘‘𑀲𑀼𑀢𑁆𑀢𑀸𑀤𑀻𑀲𑀼 𑀅𑀯𑀢𑀭𑀦𑁆𑀢𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑁂 𑀅𑀯𑀺𑀮𑁄𑀫𑁂𑀦𑁆𑀢𑁂 𑀓𑀺𑀁 𑀦 𑀚𑀦𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁄 ‘‘𑀘𑀢𑀽𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀩𑀼𑀤𑁆𑀥𑀸𑀤𑀻𑀦𑀁 𑀲𑀫𑁆𑀫𑀼𑀔𑀸 𑀫𑀬𑀸 𑀆𑀪𑀢’’𑀦𑁆𑀢𑀺 𑀯𑀢𑁆𑀯𑀸 𑀆𑀪𑀢𑀕𑀦𑁆𑀣𑁄 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀬𑀤𑀺 𑀅𑀯𑀢𑀭𑀢𑀺, 𑀏𑀯𑀁 𑀲𑀢𑀺 𑀆𑀪𑀢𑀕𑀦𑁆𑀣𑁄 𑀆𑀲𑀯𑁂 𑀦 𑀚𑀦𑁂𑀢𑀺. 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀺𑀦𑀬𑁂 𑀬𑀤𑀺 𑀲𑀦𑁆𑀤𑀺𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀆𑀪𑀢𑀕𑀦𑁆𑀣𑁄 𑀆𑀲𑀯𑁂 𑀦 𑀚𑀦𑁂𑀢𑀺. 𑀥𑀫𑁆𑀫𑀢𑀜𑁆𑀘 𑀬𑀤𑀺 𑀦 𑀯𑀺𑀮𑁄𑀫𑁂𑀢𑀺, 𑀏𑀯𑀁 𑀲𑀢𑀺 𑀆𑀪𑀢𑀕𑀦𑁆𑀣𑁄 𑀆𑀲𑀯𑁂 𑀦 𑀚𑀦𑁂𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀓𑀺𑀫𑀢𑁆𑀣𑀁 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀆𑀪𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀪𑀢𑀕𑀦𑁆𑀣𑁂 𑀬𑀁 𑀬𑀁 𑀅𑀢𑁆𑀣𑀚𑀸𑀢𑀁, 𑀬𑀁 𑀬𑀁 𑀥𑀫𑁆𑀫𑀚𑀸𑀢𑀁 𑀯𑀸 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀬𑀼𑀚𑁆𑀚𑀢𑀺, 𑀢𑀁 𑀢𑀁 𑀅𑀢𑁆𑀣𑀚𑀸𑀢𑀁 𑀯𑀸 𑀢𑀁 𑀢𑀁 𑀥𑀫𑁆𑀫𑀚𑀸𑀢𑀁 𑀯𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑁂 𑀕𑀳𑁂𑀢𑀩𑁆𑀩𑀁. 𑀬𑁂𑀦 𑀬𑁂𑀦 𑀓𑀸𑀭𑀡𑁂𑀦 𑀘 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀬𑀼𑀚𑁆𑀚𑀢𑀺, 𑀢𑀁 𑀢𑀁 𑀓𑀸𑀭𑀡𑀁 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑁂 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀬𑀣𑀸 𑀧𑀓𑀸𑀭𑁂𑀦 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀬𑀼𑀚𑁆𑀚𑀢𑀺, 𑀲𑁄 𑀲𑁄 𑀧𑀓𑀸𑀭𑁄 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑁂 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀕𑀸𑀳𑀡𑀢𑁆𑀣𑀁 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀆𑀪𑀢𑀸𑀢𑀺 𑀅𑀢𑁆𑀣𑁄.

𑁧𑁯. 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀬𑀼𑀢𑁆𑀢𑀁 𑀅𑀯𑀺𑀭𑀼𑀤𑁆𑀥𑀁 𑀢𑀁 𑀢𑀁 𑀅𑀢𑁆𑀣𑀚𑀸𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, ‘‘𑀓𑀢𑁆𑀣 𑀓𑁂𑀦 𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀳𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁂𑀦 𑀧𑀼𑀕𑁆𑀕𑀮𑁂𑀦 𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑀁 𑀓𑀸𑀢𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀧𑀜𑁆𑀳𑀦𑁆𑀢𑀺 𑀧𑀜𑁆𑀳𑀺𑀢𑀩𑁆𑀩𑀁 𑀲𑀪𑀸𑀯𑀥𑀫𑁆𑀫𑀁. 𑀧𑀼𑀘𑁆𑀙𑀺𑀢𑁂𑀦𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀲𑀫𑀢𑁆𑀣𑁂𑀦 𑀧𑀡𑁆𑀟𑀺𑀢𑀧𑀼𑀕𑁆𑀕𑀮𑁂𑀦. 𑀧𑀜𑁆𑀳𑁂𑀢𑀺 𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀧𑀸𑀞𑁂. 𑀧𑀤𑀸𑀦𑀺 𑀓𑀢𑀺 𑀓𑀺𑀢𑁆𑀢𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀤𑀲𑁄 𑀧𑀞𑀫𑀁 𑀧𑀭𑀺𑀬𑁄𑀕𑀸𑀳𑀺𑀢𑀩𑁆𑀩𑀁 𑀬𑀼𑀢𑁆𑀢𑀺𑀳𑀸𑀭𑁂𑀦 𑀯𑀺𑀘𑁂𑀢𑀩𑁆𑀩𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘𑀓𑀣𑀁 𑀯𑀺𑀘𑁂𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀤𑀺 𑀲𑀩𑁆𑀩𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀧𑀤𑀸𑀦𑀻𑀢𑀺 𑀧𑀼𑀘𑁆𑀙𑀺𑀢𑀧𑀸𑀞𑁂 𑀦𑀺𑀭𑀯𑀲𑁂𑀲𑀸𑀦𑀺 𑀧𑀤𑀸𑀦𑀺 𑀏𑀓𑀁 𑀲𑀫𑀸𑀦𑀁 𑀅𑀢𑁆𑀣𑀁 𑀬𑀤𑀺 𑀅𑀪𑀺𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀅𑀢𑁆𑀣𑀯𑀲𑁂𑀦 𑀏𑀓𑁄 𑀧𑀜𑁆𑀳𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀤𑀢𑁆𑀣𑀲𑁆𑀲𑁂𑀓𑀲𑁆𑀲 𑀜𑀸𑀢𑀼𑀁 𑀇𑀘𑁆𑀙𑀺𑀢𑀢𑁆𑀢𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁯).

𑀏𑀓𑀦𑁆𑀢𑀺 𑀅𑀢𑁆𑀣𑀯𑀲𑁂𑀦 𑀏𑀓𑀯𑀺𑀥𑀁 𑀧𑀜𑁆𑀳𑀁. 𑀉𑀧𑀧𑀭𑀺𑀓𑁆𑀔𑀫𑀸𑀦𑁂𑀦 𑀧𑀼𑀕𑁆𑀕𑀮𑁂𑀦 𑀅𑀜𑁆𑀜𑀸𑀢𑀩𑁆𑀩𑀁 𑀤𑀴𑁆𑀳𑀁 𑀚𑀸𑀦𑀺𑀢𑀩𑁆𑀩𑀁. ‘‘𑀓𑁄 𑀆𑀚𑀸𑀦𑀦𑀸𑀓𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀆𑀚𑀸𑀦𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀇𑀫𑁂 𑀥𑀫𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀬𑁂 𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀸, 𑀇𑀫𑁂 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀳𑁄𑀦𑁆𑀢𑀺 𑀓𑀺𑀁, 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀳𑁄𑀦𑁆𑀢𑀺 𑀓𑀺𑀁, 𑀉𑀤𑀸𑀳𑀼 𑀇𑀫𑁂𑀲𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀏𑀓𑁄 𑀅𑀢𑁆𑀣𑁄 𑀳𑁄𑀢𑀺, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁 𑀳𑁄𑀢𑀺 𑀓𑀺’’𑀦𑁆𑀢𑀺 𑀬𑀼𑀢𑁆𑀢𑀺𑀢𑁄 𑀯𑀺𑀘𑁂𑀢𑁆𑀯𑀸 𑀅𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. ‘‘𑀬𑀣𑀸𑀯𑀼𑀢𑁆𑀢𑁄 𑀧𑀜𑁆𑀳𑁄 𑀓𑀺𑀁 𑀪𑀯𑁂’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀁 𑀧𑀜𑁆𑀳𑀁 𑀏𑀓𑀤𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀓𑀺𑀁 𑀪𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑀣𑀸 𑀲𑀸’’𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲𑀁 𑀧𑀼𑀘𑁆𑀙𑀸𑀕𑀸𑀣𑀸𑀬𑀁 𑁋 𑀘𑁄𑀭𑀖𑀸𑀢𑀓𑁂𑀦 𑀫𑀦𑀼𑀲𑁆𑀲𑁂𑀦 𑀘𑁄𑀭𑁄 𑀅𑀩𑁆𑀪𑀸𑀳𑀢𑁄 𑀯𑀺𑀬 𑀓𑁂𑀦 𑀥𑀫𑁆𑀫𑁂𑀦 𑀲𑀢𑁆𑀢𑀮𑁄𑀓𑁄 𑀲𑀤𑀸 𑀅𑀩𑁆𑀪𑀸𑀳𑀢𑁄, 𑀫𑀸𑀮𑀼𑀯𑀮𑀢𑀸𑀬 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀭𑀼𑀓𑁆𑀔𑁄 𑀧𑀭𑀺𑀯𑀸𑀭𑀺𑀢𑁄 𑀅𑀚𑁆𑀛𑁄𑀢𑁆𑀣𑀝𑁄 𑀯𑀺𑀬 𑀓𑁂𑀦 𑀥𑀫𑁆𑀫𑁂𑀦 𑀲𑀢𑁆𑀢𑀮𑁄𑀓𑁄 𑀲𑀤𑀸 𑀧𑀭𑀺𑀯𑀸𑀭𑀺𑀢𑁄 𑀅𑀚𑁆𑀛𑁄𑀢𑁆𑀣𑀝𑁄, 𑀯𑀺𑀲𑀧𑁆𑀧𑀻𑀢𑀔𑀼𑀭𑀧𑁆𑀧𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀅𑀦𑀼𑀧𑀯𑀺𑀝𑁆𑀞𑁄 𑀯𑀺𑀬 𑀓𑁂𑀦 𑀲𑀮𑁆𑀮𑁂𑀦 𑀲𑀢𑁆𑀢𑀮𑁄𑀓𑁄 𑀲𑀤𑀸 𑀑𑀢𑀺𑀡𑁆𑀡𑁄 𑀅𑀦𑀼𑀧𑀯𑀺𑀝𑁆𑀞𑁄, 𑀓𑀺𑀲𑁆𑀲 𑀓𑁂𑀦 𑀓𑀸𑀭𑀡𑁂𑀦 𑀲𑀢𑁆𑀢𑀮𑁄𑀓𑁄 𑀲𑀤𑀸 𑀥𑀽𑀧𑀸𑀬𑀺𑀢𑁄 𑀲𑀦𑁆𑀢𑀸𑀧𑀺𑀢𑁄𑀢𑀺 𑀬𑁄𑀚𑀦𑀸.

‘‘𑀇𑀫𑀸𑀬 𑀧𑀼𑀘𑁆𑀙𑀸𑀕𑀸𑀣𑀸𑀬 𑀓𑀺𑀢𑁆𑀢𑀓𑀸𑀦𑀺 𑀧𑀤𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀘𑁆𑀙𑀺𑀢𑀸𑀦𑀻𑀢𑀺 𑀧𑀼𑀘𑁆𑀙𑀺𑀢𑀢𑁆𑀣𑀸𑀦𑀺 𑀧𑀤𑀸𑀦𑀺 𑀘𑀢𑁆𑀢𑀸𑀭𑀺 𑀳𑁄𑀦𑁆𑀢𑀺. ‘‘𑀓𑀺𑀢𑁆𑀢𑀓𑀸 𑀧𑀜𑁆𑀳𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂 𑀢𑀬𑁄 𑀧𑀜𑁆𑀳𑀸’’𑀢𑀺 𑀯𑀼𑀢𑁆𑀢𑀁.

𑀪𑀕𑀯𑀸 𑀤𑁂𑀯𑀢𑀸𑀬 𑀳𑀺 𑀬𑀲𑁆𑀫𑀸 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀢𑀺 𑀢𑀲𑁆𑀫𑀸 𑀯𑀺𑀲𑁆𑀲𑀚𑁆𑀚𑀦𑀢𑁄 ‘‘𑀢𑀬𑁄𑀧𑀜𑁆𑀳𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀓𑀢𑀫𑀸 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 𑀮𑁄𑀓𑁄, 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄;

𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄 𑀲𑀤𑀸’’𑀢𑀺. 𑁋

𑀯𑀼𑀢𑁆𑀢𑀁. 𑀢𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑁋 𑀘𑁄𑀭𑀖𑀸𑀢𑀓𑁂𑀦 𑀫𑀦𑀼𑀲𑁆𑀲𑁂𑀦 𑀘𑁄𑀭𑁄 𑀅𑀩𑁆𑀪𑀸𑀳𑀢𑁄 𑀯𑀺𑀬 𑀫𑀘𑁆𑀘𑀼𑀦𑀸 𑀲𑀢𑁆𑀢𑀮𑁄𑀓𑁄 𑀲𑀤𑀸 𑀅𑀩𑁆𑀪𑀸𑀳𑀢𑁄, 𑀫𑀸𑀮𑀼𑀯𑀮𑀢𑀸𑀬 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀭𑀼𑀓𑁆𑀔𑁄 𑀧𑀭𑀺𑀯𑀸𑀭𑀺𑀢𑁄 𑀅𑀚𑁆𑀛𑁄𑀢𑁆𑀣𑀝𑁄 𑀯𑀺𑀬 𑀚𑀭𑀸𑀬 𑀲𑀢𑁆𑀢𑀮𑁄𑀓𑁄 𑀲𑀤𑀸 𑀧𑀭𑀺𑀯𑀸𑀭𑀺𑀢𑁄 𑀅𑀚𑁆𑀛𑁄𑀢𑁆𑀣𑀝𑁄, 𑀯𑀺𑀲𑀧𑁆𑀧𑀻𑀢𑀔𑀼𑀭𑀧𑁆𑀧𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀅𑀦𑀼𑀧𑀯𑀺𑀝𑁆𑀞𑁄 𑀯𑀺𑀬 𑀢𑀡𑁆𑀳𑀸𑀲𑀮𑁆𑀮𑁂𑀦 𑀲𑀢𑁆𑀢𑀮𑁄𑀓𑁄 𑀲𑀤𑀸 𑀑𑀢𑀺𑀡𑁆𑀡𑁄 𑀅𑀦𑀼𑀧𑀯𑀺𑀝𑁆𑀞𑁄, 𑀇𑀘𑁆𑀙𑀸𑀬 𑀲𑀢𑁆𑀢𑀮𑁄𑀓𑁄 𑀲𑀤𑀸 𑀥𑀽𑀧𑀸𑀬𑀺𑀢𑁄 𑀲𑀦𑁆𑀢𑀸𑀧𑀺𑀢𑁄𑀢𑀺 𑀬𑁄𑀚𑀦𑀸.

𑁨𑁦. ‘‘𑀓𑀢𑀫𑀁 𑀫𑀘𑁆𑀘𑀼, 𑀓𑀢𑀫𑀸 𑀚𑀭𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀚𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁. 𑀤𑀼𑀢𑀺𑀬𑀧𑀤𑁂 𑀯𑀼𑀢𑁆𑀢𑀸 𑀚𑀭𑀸 𑀘 𑀧𑀞𑀫𑀧𑀤𑁂 𑀯𑀼𑀢𑁆𑀢𑀁 𑀫𑀭𑀡𑀜𑁆𑀘 𑀇𑀫𑀸𑀦𑀺 𑀤𑁆𑀯𑁂 𑀲𑀗𑁆𑀔𑀢𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺, 𑀲𑀗𑁆𑀔𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀲𑀼𑀁 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀁 𑀚𑀭𑀸𑀫𑀭𑀡𑀸𑀦𑀁 𑀓𑀣𑀁 𑀪𑁂𑀤𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀚𑀭𑀸𑀬𑀁 𑀞𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀭𑀸𑀬𑀁 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀞𑀺𑀢𑀲𑁆𑀲 𑀔𑀦𑁆𑀥𑀧𑁆𑀧𑀩𑀦𑁆𑀥𑀲𑁆𑀲 𑀬𑀁 𑀅𑀜𑁆𑀜𑀣𑀢𑁆𑀢𑀁, 𑀅𑀬𑀁 𑀧𑀸𑀓𑀝𑀚𑀭𑀸 𑀦𑀸𑀫, 𑀦 𑀔𑀡𑀝𑁆𑀞𑀺𑀢𑀺𑀚𑀭𑀸. 𑀫𑀭𑀡𑀁 𑀯𑀬𑁄𑀢𑀺 𑀲𑀫𑁆𑀫𑀼𑀢𑀺𑀫𑀭𑀡𑀁 𑀘𑀼𑀢𑀺𑀬𑁂𑀯 𑀳𑁄𑀢𑀺, 𑀦 𑀔𑀡𑀺𑀓𑀫𑀭𑀡𑀁, 𑀦 𑀲𑀫𑀼𑀘𑁆𑀙𑁂𑀤𑀫𑀭𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 (𑀲𑀁. 𑀦𑀺. 𑁩.𑁩𑁮; 𑀅. 𑀦𑀺. 𑁩.𑁪𑁭; 𑀓𑀣𑀸. 𑁨𑁧𑁪).

𑀬𑀤𑀺 𑀞𑀺𑀢𑀲𑁆𑀲𑁂𑀯 𑀫𑀭𑀡𑀁 𑀲𑀺𑀬𑀸, 𑀏𑀯𑀁 𑀲𑀢𑀺 𑀚𑀭𑀸𑀫𑀭𑀡𑀸𑀦𑀁 𑀦𑀸𑀦𑀢𑁆𑀢𑀁 𑀬𑀼𑀢𑁆𑀢𑀁 𑀦 𑀲𑀺𑀬𑀸, 𑀅𑀬𑀼𑀢𑁆𑀢𑁂 𑀲𑀢𑀺 ‘‘𑀢𑁂 𑀢𑀬𑁄 𑀧𑀜𑁆𑀳𑀸’’𑀢𑀺 𑀯𑀘𑀦𑀫𑁆𑀧𑀺 𑀅𑀬𑀼𑀢𑁆𑀢𑀫𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑀢𑁄 ‘‘𑀢𑀢𑁆𑀣 𑀚𑀭𑀸𑀬 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀯𑀼𑀢𑁆𑀢𑀸𑀬 𑀚𑀭𑀸𑀬 𑀘 𑀯𑀼𑀢𑁆𑀢𑀲𑁆𑀲 𑀫𑀭𑀡𑀲𑁆𑀲 𑀘 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁 𑀬𑀼𑀢𑁆𑀢𑀁.

‘‘𑀓𑁂𑀦 𑀓𑀸𑀭𑀡𑁂𑀦 𑀬𑀼𑀢𑁆𑀢𑀁, 𑀓𑀣𑀁 𑀓𑀸𑀭𑀡𑁂𑀦 𑀦𑀸𑀦𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀕𑀩𑁆𑀪𑀕𑀢𑀸𑀧𑀺 𑀳𑀺 𑀫𑀻𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀭𑀁 𑀅𑀧𑁆𑀧𑀢𑁆𑀢𑀸 𑀕𑀩𑁆𑀪𑀕𑀢𑀸𑀧𑀺 𑀲𑀢𑁆𑀢𑀸 𑀳𑀺 𑀬𑀲𑁆𑀫𑀸 𑀫𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀦𑀸𑀦𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. ‘‘𑀕𑀩𑁆𑀪𑀕𑀢𑀸𑀧𑀺 𑀚𑀭𑀧𑁆𑀧𑀢𑁆𑀢𑀸 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦 𑀘 𑀢𑁂 𑀚𑀺𑀡𑁆𑀡𑀸 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀭𑀧𑁆𑀧𑀢𑁆𑀢𑀸𑀧𑀺 𑀅𑀚𑀺𑀡𑁆𑀡𑀢𑁆𑀢𑀸 𑀚𑀺𑀡𑁆𑀡𑀚𑀭𑀁 𑀅𑀧𑁆𑀧𑀢𑁆𑀢𑀸𑀯 𑀫𑀻𑀬𑀦𑁆𑀢𑀺, 𑀏𑀯𑀁 𑀇𑀥𑀸𑀥𑀺𑀧𑁆𑀧𑁂𑀢𑀲𑁆𑀲 𑀚𑀺𑀡𑁆𑀡𑀚𑀭𑀸𑀯𑀺𑀭𑀳𑀺𑀢𑀲𑁆𑀲 𑀫𑀭𑀡𑀲𑁆𑀲 𑀲𑀫𑁆𑀪𑀯𑀢𑁄 𑀅𑀜𑁆𑀜𑀸 𑀚𑀭𑀸, 𑀅𑀜𑁆𑀜𑀁 𑀫𑀭𑀡𑀦𑁆𑀢𑀺 𑀜𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀦 𑀕𑀩𑁆𑀪𑀕𑀢𑀸𑀦𑀁𑀬𑁂𑀯 𑀚𑀺𑀡𑁆𑀡𑀚𑀭𑀁 𑀅𑀧𑁆𑀧𑀢𑁆𑀢𑀁 𑀫𑀭𑀡𑀁 𑀅𑀢𑁆𑀣𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀅𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀅𑀢𑁆𑀣𑀺 𑀘 𑀤𑁂𑀯𑀸𑀦𑀁 𑀫𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀤𑁂𑀯𑀸𑀧𑀺 𑀘𑀺𑀭𑀓𑀸𑀮𑀲𑀫𑁆𑀪𑀯𑀢𑁄 𑀚𑀭𑀁 𑀧𑀢𑁆𑀢𑀸 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦 𑀘 𑀢𑁂𑀲𑀁 𑀲𑀭𑀻𑀭𑀸𑀦𑀺 𑀚𑀻𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀚𑀭𑀸𑀫𑀭𑀡𑀸𑀦𑀁 𑀦𑀸𑀦𑀢𑁆𑀢𑁂 𑀓𑀸𑀭𑀡𑀁 𑀏𑀢𑁆𑀢𑀓𑀫𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀓𑁆𑀓𑀢𑁂 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀺𑀡𑁆𑀡𑀚𑀭𑀸𑀬 𑀧𑀝𑀺𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀓𑀢𑁂𑀯, 𑀫𑀭𑀡𑀲𑁆𑀲 𑀧𑀦 𑀧𑀝𑀺𑀓𑀫𑁆𑀫𑀲𑁆𑀲 𑀓𑀸𑀢𑀼𑀁 𑀦 𑀲𑀓𑁆𑀓𑀢𑁂𑀯, 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀚𑀭𑀸𑀫𑀭𑀡𑀸𑀦𑀁 𑀦𑀸𑀦𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀦 𑀲𑀓𑁆𑀓𑀢𑁂 𑀫𑀭𑀡𑀲𑁆𑀲 𑀧𑀝𑀺𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀬 𑀯𑀲𑀻𑀪𑀸𑀯𑁂 𑀲𑀢𑀺 𑀲𑀓𑁆𑀓𑀸 𑀫𑀭𑀡𑀲𑁆𑀲𑀸𑀧𑀺 𑀧𑀝𑀺𑀓𑀫𑁆𑀫𑀁 𑀓𑀸𑀢𑀼𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀅𑀜𑁆𑀜𑀢𑁆𑀭𑁂𑀯 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀯𑀺𑀲𑀬𑀸’’𑀢𑀺 𑀯𑀼𑀢𑁆𑀢𑀁.

𑀚𑀭𑀸𑀫𑀭𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀦𑀸𑀦𑀸𑀪𑀸𑀯𑁄 𑀆𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀣𑀁 𑀧𑀦 𑀢𑀡𑁆𑀳𑀸𑀬 𑀚𑀭𑀸𑀫𑀭𑀡𑁂𑀳𑀺 𑀦𑀸𑀦𑀸𑀪𑀸𑀯𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁄 𑀢𑁂𑀳𑀺 𑀢𑀡𑁆𑀳𑀸𑀬 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀬 𑀅𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀚𑀻𑀭𑀦𑁆𑀢𑀸𑀧𑀺 𑀫𑀻𑀬𑀦𑁆𑀢𑀸𑀧𑀺 𑀯𑀻𑀢𑀭𑀸𑀕𑀸 𑀬𑀲𑁆𑀫𑀸 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀡𑁆𑀳𑀸𑀬 𑀚𑀭𑀸𑀫𑀭𑀡𑁂𑀳𑀺 𑀦𑀸𑀦𑀸𑀪𑀸𑀯𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄.

‘‘𑀢𑀡𑁆𑀳𑀸𑀬 𑀚𑀻𑀭𑀡𑀪𑀺𑀚𑁆𑀚𑀦𑀮𑀓𑁆𑀔𑀡𑀁 𑀅𑀢𑁆𑀣𑀻𑀢𑀺 𑀢𑁂𑀳𑀺 𑀢𑀡𑁆𑀳𑀸𑀬 𑀅𑀦𑀜𑁆𑀜𑀢𑁆𑀢𑁂 𑀓𑁄 𑀦𑀸𑀫 𑀤𑁄𑀲𑁄 𑀲𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁄 𑀤𑁄𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀺 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀭𑀸𑀫𑀭𑀡𑀁 𑀬𑀣𑀸 𑀬𑁂𑀦 𑀚𑀻𑀭𑀡𑀪𑀺𑀚𑁆𑀚𑀦𑀮𑀓𑁆𑀔𑀡𑁂𑀦 𑀧𑀸𑀓𑀝𑀁, 𑀏𑀯𑀁 𑀚𑀻𑀭𑀡𑀪𑀺𑀚𑁆𑀚𑀦𑀮𑀓𑁆𑀔𑀡𑁂𑀦 𑀢𑀡𑁆𑀳𑀸𑀧𑀺 𑀧𑀸𑀓𑀝𑀸. 𑀬𑀤𑀺 𑀘 𑀲𑀺𑀬𑀸; 𑀏𑀯𑀁 𑀲𑀦𑁆𑀢𑁂 𑀬𑁄𑀩𑁆𑀩𑀦𑀝𑁆𑀞𑀸𑀧𑀺 𑀲𑀩𑁆𑀩𑁂 𑀫𑀸𑀡𑀯𑀸 𑀯𑀺𑀕𑀢𑀢𑀡𑁆𑀳𑀸 𑀲𑀺𑀬𑀼𑀁, 𑀦 𑀘 𑀯𑀺𑀕𑀢𑀢𑀡𑁆𑀳𑀸, 𑀢𑀲𑁆𑀫𑀸 𑀦𑀸𑀦𑀸𑀪𑀸𑀯𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄. 𑀢𑀢𑁄 𑀅𑀜𑁆𑀜𑁄𑀧𑀺 𑀤𑁄𑀲𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀘 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀭𑀸𑀫𑀭𑀡𑀸𑀦𑀁 𑀢𑀡𑁆𑀳𑀸𑀬 𑀅𑀦𑀜𑁆𑀜𑀢𑁆𑀢𑁂 𑀲𑀢𑀺 𑀢𑀡𑁆𑀳𑀸𑀬 𑀪𑀯𑀢𑀡𑁆𑀳𑀸𑀬 𑀤𑀼𑀓𑁆𑀔𑀲𑀫𑀼𑀤𑀬𑁄 𑀳𑁄𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀲𑀫𑀼𑀤𑀬𑁄 𑀲𑀺𑀬𑀸. 𑀬𑀲𑁆𑀫𑀸 𑀦 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀢𑀲𑁆𑀫𑀸 𑀚𑀭𑀸𑀫𑀭𑀡𑁂𑀳𑀺 𑀢𑀡𑁆𑀳𑀸𑀬 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀳𑀺 𑀢𑀸𑀬 𑀅𑀦𑀜𑁆𑀜𑀢𑁆𑀢𑁂 𑀲𑀢𑀺 𑀏𑀯𑀫𑁆𑀧𑀺 𑀤𑁄𑀲𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀘 𑀢𑀡𑁆𑀳𑀸 𑀫𑀕𑁆𑀕𑀯𑀚𑁆𑀛𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀳𑀺 𑀢𑀸𑀬 𑀅𑀦𑀜𑁆𑀜𑀢𑁆𑀢𑁂 𑀲𑀢𑀺 𑀬𑀣𑀸 𑀢𑀡𑁆𑀳𑀸 𑀫𑀕𑁆𑀕𑀯𑀚𑁆𑀛𑀸 𑀳𑁄𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀫𑁆𑀧𑀺 𑀫𑀕𑁆𑀕𑀯𑀚𑁆𑀛𑀁 𑀲𑀺𑀬𑀸. 𑀬𑀣𑀸 𑀚𑀭𑀸𑀫𑀭𑀡𑀁 𑀫𑀕𑁆𑀕𑀯𑀚𑁆𑀛𑀁 𑀦 𑀳𑁄𑀢𑀺, 𑀏𑀯𑀁 𑀢𑀡𑁆𑀳𑀸𑀧𑀺 𑀫𑀕𑁆𑀕𑀯𑀚𑁆𑀛𑀸 𑀦 𑀲𑀺𑀬𑀸, 𑀢𑀣𑀸 𑀘 𑀦 𑀳𑁄𑀢𑀺 𑀧𑀳𑀸𑀢𑀩𑁆𑀩𑀸𑀧𑀳𑀸𑀢𑀩𑁆𑀩𑀪𑀸𑀯𑀢𑁄, 𑀢𑀲𑁆𑀫𑀸𑀧𑀺 𑀚𑀭𑀸𑀫𑀭𑀡𑁂𑀳𑀺 𑀢𑀡𑁆𑀳𑀸𑀬 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀬𑀤𑀺 𑀘𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀬 𑀬𑀼𑀢𑁆𑀢𑀺𑀬𑀸 𑀉𑀧𑀧𑀢𑁆𑀢𑀺𑀬𑀸 𑀏𑀯 𑀚𑀭𑀸𑀫𑀭𑀡𑁂𑀳𑀺 𑀢𑀡𑁆𑀳𑀸𑀬 𑀅𑀜𑁆𑀜𑀢𑁆𑀢𑀁 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀅𑀜𑁆𑀜𑁂𑀳𑀺𑀧𑀺 𑀓𑀸𑀭𑀡𑁂𑀳𑀺 𑀕𑀯𑁂𑀲𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀸𑀬 𑀬𑀼𑀢𑁆𑀢𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸𑀢𑀺 𑀬𑀸 𑀬𑀼𑀢𑁆𑀢𑀺 ‘‘𑀬𑀤𑀺 𑀘𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀬 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀉𑀧𑀧𑀢𑁆𑀢𑀺𑀬𑀸. 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀅𑀜𑁆𑀜𑁂𑀳𑀺 𑀅𑀜𑁆𑀜𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀉𑀧𑀧𑀢𑁆𑀢𑀻𑀳𑀺 𑀚𑀭𑀸𑀫𑀭𑀡𑁂𑀳𑀺 𑀢𑀡𑁆𑀳𑀸𑀬 𑀅𑀜𑁆𑀜𑀢𑁆𑀢𑀁 𑀕𑀯𑁂𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀬𑀼𑀢𑁆𑀢𑀺𑀬𑀸, 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀢𑁆𑀢𑀁 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀬𑀤𑀺 𑀘 𑀲𑀦𑁆𑀤𑀺𑀲𑁆𑀲𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀼𑀢𑁆𑀢𑀺𑀲𑀫𑀸𑀭𑀼𑀴𑁆𑀳𑀁 𑀅𑀢𑁆𑀣𑀢𑁄 𑀘 𑀫𑀭𑀡𑁂𑀳𑀺 𑀢𑀡𑁆𑀳𑀸𑀬 𑀘 𑀅𑀜𑁆𑀜𑀢𑁆𑀢𑀁 𑀬𑀤𑀺 𑀘 𑀲𑀦𑁆𑀤𑀺𑀲𑁆𑀲𑀢𑀺, 𑀩𑁆𑀬𑀜𑁆𑀚𑀦𑀢𑁄𑀧𑀺 𑀅𑀜𑁆𑀜𑀢𑁆𑀢𑀁 𑀕𑀯𑁂𑀲𑀺𑀢𑀩𑁆𑀩𑀫𑁂𑀯𑀸𑀢𑀺 𑀅𑀢𑁆𑀣𑁄.

‘‘𑀓𑀣𑀁 𑀩𑁆𑀬𑀜𑁆𑀚𑀦𑀢𑁄 𑀅𑀜𑁆𑀜𑀢𑁆𑀢𑀁 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀮𑁆𑀮𑁄𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀲𑀮𑁆𑀮𑁄’’𑀢𑀺 𑀯𑀸 ‘‘𑀥𑀽𑀧𑀸𑀬𑀦’’𑀦𑁆𑀢𑀺 𑀯𑀸 𑀤𑁆𑀯𑀻𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀇𑀫𑁂𑀲𑀁 𑀇𑀘𑁆𑀙𑀸𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁 𑀲𑀫𑀸𑀦𑀢𑁆𑀢𑀁 𑀬𑀼𑀚𑁆𑀚𑀢𑀺, 𑀦 𑀅𑀜𑁆𑀜𑀢𑁆𑀢𑀁. ‘‘𑀲𑀮𑁆𑀮𑁄’’𑀢𑀺 𑀯𑀸 ‘‘𑀥𑀽𑀧𑀸𑀬𑀦’’𑀦𑁆𑀢𑀺 𑀯𑀸 𑀤𑁆𑀯𑀻𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀯𑀼𑀘𑁆𑀘𑀫𑀸𑀦𑀸𑀦𑀁 𑀚𑀭𑀸𑀫𑀭𑀡𑀸𑀦𑀁 𑀢𑀡𑁆𑀳𑀸𑀬 𑀏𑀓𑀢𑁆𑀢𑀁 𑀦 𑀬𑀼𑀚𑁆𑀚𑀢𑀺. 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀘𑁆𑀙𑀸𑀬 𑀘 𑀢𑀡𑁆𑀳𑀸𑀬 𑀘 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀁 𑀦 𑀬𑀼𑀚𑁆𑀚𑀢𑀺, 𑀏𑀓𑀢𑁆𑀢𑀫𑁂𑀯 𑀬𑀼𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀇𑀘𑁆𑀙𑀸𑀬 𑀘 𑀢𑀡𑁆𑀳𑀸𑀬 𑀘 𑀚𑀻𑀭𑀡𑀪𑀺𑀚𑁆𑀚𑀦𑀲𑀫𑁆𑀪𑀯𑀢𑁄 𑀚𑀭𑀸𑀫𑀭𑀡𑁂𑀳𑀺 𑀢𑀡𑁆𑀳𑀸𑀬 𑀏𑀓𑀢𑁆𑀢𑀁 𑀲𑀺𑀬𑀸, ‘‘𑀓𑀲𑁆𑀫𑀸 𑀅𑀜𑁆𑀜𑀢𑁆𑀢𑀁 𑀬𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄 ‘‘𑀢𑀡𑁆𑀳𑀸𑀬 𑀅𑀥𑀺𑀧𑁆𑀧𑀸𑀬𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀡𑁆𑀳𑀸𑀬 𑀅𑀥𑀺𑀧𑁆𑀧𑀸𑀬𑁂 𑀅𑀧𑀭𑀺𑀧𑀽𑀭𑀫𑀸𑀦𑁂 𑀦𑀯𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀓𑁄𑀥𑁄 𑀘 𑀉𑀧𑁆𑀧𑀚𑁆𑀚𑀢𑀺, 𑀉𑀧𑀦𑀸𑀳𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀚𑀭𑀸𑀫𑀭𑀡𑁂𑀲𑀼 𑀅𑀧𑀭𑀺𑀧𑀽𑀭𑀫𑀸𑀦𑁂𑀲𑀼 𑀦𑀯𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀓𑁄𑀥𑁄 𑀘 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑀦𑀸𑀳𑁄 𑀘 𑀦 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀚𑀭𑀸𑀬 𑀘 𑀫𑀭𑀡𑀲𑁆𑀲 𑀘 𑀢𑀡𑁆𑀳𑀸𑀬 𑀘 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀁 𑀬𑀼𑀚𑁆𑀚𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀤𑀺 𑀇𑀘𑁆𑀙𑀸 𑀢𑀡𑁆𑀳𑀸𑀬 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁 𑀬𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀓𑀲𑁆𑀫𑀸 𑀪𑀕𑀯𑀢𑀸 ‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀕𑀸𑀣𑀸𑀬𑀁 ‘‘𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄 𑀲𑀤𑀸’’𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀬𑀁 𑀧𑀦𑀺𑀤𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀇𑀘𑁆𑀙𑀸’’𑀢𑀺𑀧𑀺 ‘‘𑀢𑀡𑁆𑀳𑀸’’𑀢𑀺𑀧𑀺 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀬𑀁 𑀧𑀦𑀺𑀤𑀁 𑀅𑀪𑀺𑀮𑀧𑀺𑀢𑀁 𑀬𑀁 𑀧𑀦𑀺𑀤𑀁 𑀅𑀪𑀺𑀮𑀧𑀦𑀁 𑀓𑀢𑀁, 𑀇𑀤𑀁 𑀅𑀪𑀺𑀮𑀧𑀦𑀁 𑀪𑀕𑀯𑀢𑀸 𑀩𑀸𑀳𑀺𑀭𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀢𑀲𑀺𑀢𑀩𑁆𑀩𑀸𑀦𑀁 𑀯𑀢𑁆𑀣𑀽𑀦𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀪𑁂𑀤𑀸𑀦𑀁 𑀯𑀲𑁂𑀦 ‘‘𑀇𑀘𑁆𑀙𑀸’’𑀢𑀺𑀧𑀺 ‘‘𑀢𑀡𑁆𑀳𑀸’’𑀢𑀺𑀧𑀺 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑀁 𑀅𑀪𑀺𑀮𑀧𑀦𑀯𑀲𑁂𑀦 𑀓𑀢𑀦𑁆𑀢𑀺 𑀏𑀓𑀢𑁆𑀢𑀁 𑀬𑀼𑀢𑁆𑀢𑀫𑁂𑀯, 𑀦 𑀦𑀸𑀦𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀦𑀸𑀫𑀯𑀲𑁂𑀦 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸𑀦𑀁 𑀇𑀘𑁆𑀙𑀸𑀢𑀡𑁆𑀳𑀸𑀤𑀻𑀦𑀁 𑀓𑁂𑀦 𑀏𑀓𑀢𑁆𑀢𑀁 𑀬𑀼𑀢𑁆𑀢𑀦𑁆𑀢𑀺 𑀲𑀤𑁆𑀤𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀩𑁆𑀩𑀸𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀦𑀸𑀦𑀸𑀫𑀯𑀲𑁂𑀦 𑀧𑀪𑁂𑀤𑀸 𑀲𑀩𑁆𑀩𑀸 𑀇𑀘𑁆𑀙𑀸𑀤𑀺𑀓𑀸 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸 𑀳𑀺 𑀬𑀲𑁆𑀫𑀸 𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀦𑀸𑀫𑀯𑀲𑁂𑀦 𑀪𑀺𑀦𑁆𑀦𑀸𑀦𑀫𑁆𑀧𑀺 𑀏𑀓𑀮𑀓𑁆𑀔𑀡𑁂𑀦 𑀏𑀓𑀢𑁆𑀢𑀁 𑀬𑀼𑀢𑁆𑀢𑀦𑁆𑀢𑀺 𑀲𑀤𑁆𑀤𑀳𑀺𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀺𑀫𑀺𑀯 𑀬𑀼𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀲𑀩𑁆𑀩𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀝𑁆𑀞𑀕𑁆𑀕𑀺𑀆𑀤𑀺𑀯𑀲𑁂𑀦 𑀅𑀦𑁂𑀓𑁄 𑀲𑀩𑁆𑀩𑁄𑀅𑀕𑁆𑀕𑀺 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑁄 𑀬𑀣𑀸, 𑀏𑀯𑀁 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀲𑁆𑀲 𑀅𑀕𑁆𑀕𑀺𑀦𑁄 𑀉𑀧𑀸𑀤𑀸𑀦𑀯𑀲𑁂𑀦 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀧𑀸𑀓𑀝𑁄. 𑀆𑀭𑀫𑁆𑀫𑀡𑀯𑀲𑁂𑀦 𑀢𑀡𑁆𑀳𑀸 𑀅𑀜𑁆𑀜𑁂𑀳𑀺 𑀅𑀜𑁆𑀜𑁂𑀳𑀺 𑀦𑀸𑀫𑁂𑀳𑀺 𑀪𑀕𑀯𑀢𑀸 𑀅𑀪𑀺𑀮𑀧𑀺𑀢𑀸, 𑀉𑀧𑀸𑀤𑀸𑀦𑀯𑀲𑁂𑀦 𑀅𑀕𑁆𑀕𑀺 𑀅𑀜𑁆𑀜𑁂𑀳𑀺 𑀅𑀜𑁆𑀜𑁂𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑁄𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀆𑀕𑀢𑀦𑀸𑀫𑁂𑀳𑀺 𑀏𑀯 𑀢𑀡𑁆𑀳𑀸 𑀅𑀪𑀺𑀮𑀧𑀺𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀘𑁆𑀙𑀸𑀇𑀢𑀺𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸𑀦𑀺 𑀅𑀢𑁆𑀣𑀸𑀦𑀺 𑀭𑀽𑀧𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺 𑀲𑀢𑁆𑀢𑀸 𑀇𑀘𑁆𑀙𑀦𑁆𑀢𑀺 𑀏𑀢𑀸𑀬𑀸𑀢𑀺 𑀇𑀘𑁆𑀙𑀸. 𑀢𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀢𑀡𑁆𑀳𑀸. 𑀲𑀮𑁆𑀮𑀢𑀺 𑀧𑀯𑀺𑀲𑀢𑀺 𑀯𑀺𑀲𑀧𑁆𑀧𑀻𑀢𑀁 𑀲𑀮𑁆𑀮𑀁 𑀯𑀺𑀬𑀸𑀢𑀺 𑀲𑀮𑁆𑀮𑀸, 𑀲𑀦𑁆𑀢𑀸𑀧𑀁 𑀮𑀸𑀢𑀺 𑀆𑀤𑀤𑀸𑀢𑀻𑀢𑀺 𑀯𑀸 𑀲𑀮𑁆𑀮𑀸, 𑀲𑀦𑁆𑀢𑀸𑀧𑀁 𑀮𑀸𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀯𑀸 𑀲𑀮𑁆𑀮𑀸. 𑀥𑀽𑀧𑀸𑀬𑀢𑀺 𑀲𑀦𑁆𑀢𑀸𑀧𑁂𑀢𑀺 𑀧𑀭𑀺𑀤𑀳𑀢𑀻𑀢𑀺 𑀥𑀽𑀧𑀸𑀬𑀦𑀸. 𑀲𑀭𑀢𑀺 𑀆𑀓𑀟𑁆𑀠𑀢𑀺 𑀅𑀯𑀳𑀭𑀢𑀺 𑀲𑀻𑀖𑀲𑁄𑀢𑀸 𑀲𑀭𑀺𑀢𑀸 𑀯𑀺𑀬𑀸𑀢𑀺 𑀲𑀭𑀺𑀢𑀸, 𑀲𑀭𑀢𑀺 𑀲𑀮𑁆𑀮𑀢𑀻𑀢𑀺 𑀯𑀸 𑀲𑀭𑀺𑀢𑀸. 𑀯𑀺𑀲𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀧𑀻𑀢𑀺𑀯𑀲𑁂𑀦 𑀲𑀺𑀦𑁂𑀳𑀢𑀻𑀢𑀺 𑀲𑀺𑀦𑁂𑀳𑁄. 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀓𑀺𑀮𑀫𑀣𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀓𑀺𑀮𑀫𑀣𑁄. 𑀲𑀢𑁆𑀢𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀫𑀜𑁆𑀜𑀦𑁆𑀢𑀺 𑀏𑀢𑀸𑀬𑀸𑀢𑀺 𑀫𑀜𑁆𑀜𑀦𑀸. 𑀪𑀯𑀁 𑀩𑀦𑁆𑀥𑀢𑀻𑀢𑀺 𑀩𑀦𑁆𑀥𑁄. 𑀆𑀲𑀻𑀬𑀢𑁂 𑀧𑀢𑁆𑀣𑀻𑀬𑀢𑁂𑀢𑀺 𑀆𑀲𑀸. 𑀆𑀲𑀺𑀬𑀢𑀺 𑀧𑀢𑁆𑀣𑁂𑀢𑀻𑀢𑀺 𑀯𑀸 𑀆𑀲𑀸. 𑀧𑀺𑀧𑀸𑀲𑀻𑀬𑀢𑁂𑀢𑀺 𑀧𑀺𑀧𑀸𑀲𑀸, 𑀆𑀭𑀫𑁆𑀫𑀡𑀭𑀲𑀁 𑀧𑀺𑀧𑀸𑀲𑀢𑀻𑀢𑀺 𑀯𑀸 𑀧𑀺𑀧𑀸𑀲𑀸. 𑀅𑀪𑀺𑀦𑀦𑁆𑀤𑀻𑀬𑀢𑁂𑀢𑀺 𑀅𑀪𑀺𑀦𑀦𑁆𑀤𑀦𑀸, 𑀅𑀪𑀺𑀦𑀦𑁆𑀤𑀢𑀻𑀢𑀺 𑀯𑀸 𑀅𑀪𑀺𑀦𑀦𑁆𑀤𑀦𑀸. 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀓𑀣𑀸𑀯𑀲𑁂𑀦 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁦) 𑀯𑁂𑀤𑀺𑀢𑀩𑁆𑀩𑁄.

‘‘𑀢𑀡𑁆𑀳𑀸𑀬 𑀇𑀘𑁆𑀙𑀸𑀤𑀺𑀧𑁆𑀧𑀓𑀸𑀭𑀯𑀲𑁂𑀦 𑀆𑀮𑀧𑀺𑀢𑀪𑀸𑀯𑁄 𑀓𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀘 𑀯𑁂𑀯𑀘𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁂 ‘‘𑀆𑀲𑀸 𑀘 𑀧𑀻𑀳𑀸…𑀧𑁂… 𑀯𑁂𑀯𑀘𑀦’’𑀦𑁆𑀢𑀺 (𑀦𑁂𑀢𑁆𑀢𑀺. 𑁩𑁭) 𑀬𑀸 𑀢𑀡𑁆𑀳𑀸 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀯𑀼𑀢𑁆𑀢𑀸, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀯𑀼𑀢𑁆𑀢𑀸𑀬 𑀢𑀡𑁆𑀳𑀸𑀬 𑀇𑀘𑁆𑀙𑀸𑀤𑀺𑀧𑁆𑀧𑀓𑀸𑀭𑀯𑀲𑁂𑀦 𑀆𑀮𑀧𑀺𑀢𑀪𑀸𑀯𑁄 𑀲𑀤𑁆𑀤𑀳𑀺𑀢𑀩𑁆𑀩𑁄. ‘‘𑀯𑁂𑀯𑀘𑀦𑀯𑀺𑀪𑀗𑁆𑀕𑁂 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄𑀧𑀺 𑀪𑀕𑀯𑀢𑀸 𑀅𑀯𑀼𑀢𑁆𑀢𑁂 𑀓𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀪𑀕𑀯𑀸 ‘‘𑀭𑀽𑀧𑁂 𑀢𑀺𑀲𑁆𑀲𑀸’’𑀢𑀺𑀆𑀤𑀺𑀓𑀁 𑀬𑀁 𑀯𑀘𑀦𑀫𑀸𑀳, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀯𑀼𑀢𑁆𑀢𑁂𑀦 𑀢𑁂𑀦 𑀯𑀘𑀦𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄 𑀯𑀸𑀢𑀺. 𑀏𑀯𑀁 𑀬𑀼𑀚𑁆𑀚𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀇𑀘𑁆𑀙𑀸𑀢𑀡𑁆𑀳𑀸𑀦𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸, 𑀚𑀭𑀸𑀬 𑀘 𑀫𑀭𑀡𑀲𑁆𑀲 𑀘 𑀢𑀡𑁆𑀳𑀸𑀬 𑀘 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀸 𑀘 ‘‘𑀢𑀬𑁄 𑀧𑀜𑁆𑀳𑀸’’𑀢𑀺 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀯𑀘𑀦𑀁 𑀬𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑁨𑁧. ‘‘𑀓𑁂𑀦𑀲𑁆𑀲𑀼𑀩𑁆𑀪𑀸𑀳𑀢𑁄 𑀮𑁄𑀓𑁄𑀢𑀺𑀆𑀤𑀺𑀕𑀸𑀣𑀸𑀬 𑀢𑀬𑁄 𑀧𑀜𑁆𑀳𑀸 𑀯𑀼𑀢𑁆𑀢𑀸’’𑀢𑀺 𑀧𑀜𑁆𑀳𑀢𑁆𑀢𑀬𑀪𑀸𑀯𑁂 𑀬𑀼𑀢𑁆𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸. ‘‘𑀢𑀢𑁄 𑀅𑀜𑁆𑀜𑁂𑀳𑀺 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀺 𑀓𑀣𑀁 𑀜𑀸𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀅𑀜𑁆𑀜𑁂𑀳𑀺 𑀧𑀓𑀸𑀭𑁂𑀳𑀺𑀧𑀺 𑀬𑀼𑀢𑁆𑀢𑀺𑀕𑀯𑁂𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑁄 𑀤𑀼𑀓𑁆𑀔𑀽𑀧𑀘𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑁄 𑀤𑀼𑀓𑁆𑀔𑀽𑀧𑀘𑀸𑀭𑁄 𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀭𑀫𑀽𑀮𑀓𑁄𑀢𑀺 𑀬𑀼𑀚𑁆𑀚𑀢𑀺, 𑀲𑀩𑁆𑀩𑁄 𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁄 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀓𑁄𑀢𑀺 𑀦 𑀬𑀼𑀚𑁆𑀚𑀢𑀺. 𑀯𑀘𑀦𑀢𑁆𑀣𑀢𑁄 𑀧𑀦 𑀤𑀼𑀓𑁆𑀔𑀲𑁆𑀲 𑀉𑀧𑀘𑀸𑀭𑁄 𑀧𑀯𑀢𑁆𑀢𑀻𑀢𑀺 𑀤𑀼𑀓𑁆𑀔𑀽𑀧𑀘𑀸𑀭𑁄. 𑀓𑀸𑀫𑀢𑀡𑁆𑀳𑀸𑀧𑀘𑁆𑀘𑀬𑀸 𑀧𑀯𑀢𑁆𑀢𑁄 𑀲𑀗𑁆𑀔𑀸𑀭𑁄 𑀫𑀽𑀮𑀁 𑀏𑀢𑀲𑁆𑀲𑀸𑀢𑀺 𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀭𑀫𑀽𑀮𑀓𑁄. 𑀦𑀺𑀩𑁆𑀩𑀺𑀤𑀸𑀬 𑀉𑀧𑀘𑀸𑀭𑁄 𑀧𑀯𑀢𑁆𑀢𑀻𑀢𑀺 𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁄. 𑀓𑀸𑀫𑀢𑀡𑁆𑀳𑀸𑀬 𑀧𑀭𑀺𑀓𑁆𑀔𑀸𑀭𑀪𑀽𑀢𑁄 𑀯𑀢𑁆𑀣𑀼𑀓𑀸𑀫𑁄 𑀫𑀽𑀮𑀁 𑀏𑀢𑀲𑁆𑀲𑀸𑀢𑀺 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀓𑁄𑀢𑀺. 𑀢𑀢𑁆𑀣 𑀅𑀦𑀪𑀺𑀭𑀢𑀺𑀲𑀗𑁆𑀔𑀸𑀢𑀸 𑀉𑀓𑁆𑀓𑀡𑁆𑀞𑀸 𑀦𑀺𑀩𑁆𑀩𑀺𑀤𑀸 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀺𑀓𑀸 𑀬𑀼𑀚𑁆𑀚𑀢𑀺, 𑀜𑀸𑀡𑀦𑀺𑀩𑁆𑀩𑀺𑀤𑀸 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀺𑀓𑀸 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁄 𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁄 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀓𑁄𑀢𑀺 𑀦 𑀧𑀦 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁.

‘‘𑀧𑀜𑁆𑀳𑀢𑁆𑀢𑀬𑀪𑀸𑀯𑁂 𑀘𑁂𑀯 𑀤𑀼𑀓𑁆𑀔𑀽𑀧𑀘𑀸𑀭𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁂 𑀘 𑀬𑀸 𑀬𑀼𑀢𑁆𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀲𑀸𑀯 𑀬𑀼𑀢𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸 𑀓𑀺𑀁, 𑀉𑀤𑀸𑀳𑀼 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀅𑀜𑁆𑀜𑀸𑀧𑀺 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀜𑁆𑀳𑀢𑁆𑀢𑀬𑀪𑀸𑀯𑁂 𑀘𑁂𑀯 𑀤𑀼𑀓𑁆𑀔𑀽𑀧𑀘𑀸𑀭𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁂 𑀘 𑀬𑀸 𑀬𑀼𑀢𑁆𑀢𑀺 𑀫𑀬𑀸 𑀯𑀺𑀪𑀢𑁆𑀢𑀸, 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀅𑀦𑀼𑀲𑀸𑀭𑁂𑀦 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀢𑁂𑀲𑀼 𑀢𑁂𑀲𑀼 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 𑀬𑀼𑀢𑁆𑀢𑀺𑀧𑀺 𑀕𑀯𑁂𑀲𑀺𑀢𑀩𑁆𑀩𑀸𑀢𑀺.

‘‘𑀇𑀤𑀁 𑀦𑀬𑀤𑀲𑁆𑀲𑀦𑀁 𑀲𑀁𑀔𑀺𑀢𑁆𑀢𑀁, 𑀦 𑀲𑀓𑁆𑀓𑀸 𑀯𑀺𑀢𑁆𑀣𑀸𑀭𑀢𑁄 𑀕𑀯𑁂𑀲𑀺𑀢𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄 𑀢𑀁 𑀦𑀬𑀤𑀲𑁆𑀲𑀦𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀺 𑀪𑀕𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀲𑀼𑀪𑀲𑁆𑀲 𑀚𑀺𑀕𑀼𑀘𑁆𑀙𑀦𑀻𑀬𑀪𑀸𑀯𑀢𑁄 𑀭𑀸𑀕𑀼𑀧𑁆𑀧𑀸𑀤𑁄 𑀦 𑀬𑀼𑀢𑁆𑀢𑁄, 𑀢𑀲𑁆𑀫𑀸 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀼𑀪𑀤𑁂𑀲𑀦𑀸 𑀭𑀸𑀕𑀯𑀺𑀦𑀬𑀸𑀬 𑀬𑀼𑀢𑁆𑀢𑀸. 𑀫𑁂𑀢𑁆𑀢𑀸𑀬 𑀤𑁄𑀲𑀧𑀝𑀺𑀧𑀓𑁆𑀔𑀢𑁆𑀢𑀸 𑀤𑁄𑀲𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀸𑀤𑁂𑀲𑀦𑀸 𑀤𑁄𑀲𑀯𑀺𑀦𑀬𑀸𑀬 𑀬𑀼𑀢𑁆𑀢𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀧𑀜𑁆𑀜𑀸𑀯𑀺𑀲𑀬𑀢𑁆𑀢𑀸 𑀫𑁄𑀳𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸 𑀫𑁄𑀳𑀯𑀺𑀦𑀬𑀸𑀬 𑀬𑀼𑀢𑁆𑀢𑀸. ‘‘𑀭𑀸𑀕𑀘𑀭𑀺𑀢𑀲𑁆𑀲𑀸𑀧𑀺 𑀫𑁂𑀢𑁆𑀢𑀸𑀤𑀺𑀤𑁂𑀲𑀦𑀸 𑀬𑀼𑀚𑁆𑀚𑁂𑀬𑁆𑀬 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀤𑀺 𑀳𑀺 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀺𑀩𑁆𑀩𑀓𑀺𑀮𑁂𑀲𑀲𑁆𑀲 𑀭𑀸𑀕𑀘𑀭𑀺𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀬𑀤𑀺 𑀤𑁂𑀲𑁂𑀬𑁆𑀬, 𑀏𑀯𑀁 𑀲𑀢𑀺 𑀫𑁂𑀢𑁆𑀢𑀸𑀯𑀲𑁂𑀦𑀧𑀺 𑀭𑀸𑀕𑀼𑀧𑁆𑀧𑀚𑁆𑀚𑀦𑀢𑁄 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺. 𑀲𑀼𑀔𑀁 𑀧𑀝𑀺𑀧𑀤𑀁 𑀯𑀸 𑀬𑀤𑀺 𑀤𑁂𑀲𑁂𑀬𑁆𑀬, 𑀏𑀯𑀁 𑀲𑀢𑀺 𑀭𑀸𑀕𑀘𑀭𑀺𑀢𑀲𑁆𑀲 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀬𑀼𑀚𑁆𑀚𑀦𑀢𑁄 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺. 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀳𑀸𑀦𑀁 𑀯𑀸 𑀬𑀤𑀺𑀧𑀺 𑀤𑁂𑀲𑁂𑀬𑁆𑀬, 𑀏𑀯𑀁 𑀲𑀢𑀺 𑀭𑀸𑀕𑀘𑀭𑀺𑀢𑀲𑁆𑀲 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀁 𑀯𑀚𑁆𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀧𑀳𑀸𑀦𑀲𑁆𑀲 𑀤𑀼𑀓𑁆𑀓𑀭𑀢𑁄 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

‘‘𑀪𑀕𑀯𑀸 𑀭𑀸𑀕𑀘𑀭𑀺𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀺𑀭𑀯𑀲𑁂𑀲𑀯𑀲𑁂𑀦 𑀬𑀼𑀢𑁆𑀢𑀺 𑀦 𑀯𑀺𑀪𑀢𑁆𑀢𑀸, 𑀦𑀬𑀤𑀲𑁆𑀲𑀦𑀫𑁂𑀯𑀸𑀢𑀺 𑀬𑁄 𑀦𑀬𑁄 𑀤𑀲𑁆𑀲𑀺𑀢𑁄, 𑀢𑁂𑀦 𑀦𑀬𑁂𑀦 𑀅𑀜𑁆𑀜𑀸𑀧𑀺 𑀕𑀯𑁂𑀲𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀬𑀁 𑀓𑀺𑀜𑁆𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀸𑀕𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁, 𑀤𑁄𑀲𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁, 𑀫𑁄𑀳𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁 𑀤𑁂𑀲𑀺𑀢𑀁, 𑀢𑀁 𑀲𑀩𑁆𑀩𑀁 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁 𑀬𑀢𑁆𑀢𑀓𑀸 𑀧𑀸𑀴𑀺𑀧𑁆𑀧𑀤𑁂𑀲𑀸 𑀜𑀸𑀡𑀲𑁆𑀲 𑀪𑀽𑀫𑀺, 𑀢𑀢𑁆𑀢𑀓𑁂𑀲𑀼 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

‘‘𑀭𑀸𑀕𑀸𑀤𑀺𑀧𑁆𑀧𑀳𑀸𑀦𑀯𑀲𑁂𑀦 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀅𑀜𑁆𑀜𑁂𑀳𑀺𑀧𑀺 𑀫𑁂𑀢𑁆𑀢𑀸𑀤𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀨𑀮𑀲𑀫𑀸𑀧𑀢𑁆𑀢𑀺𑀦𑀯𑀸𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀯𑀲𑀻𑀪𑀸𑀯𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀬𑀼𑀢𑁆𑀢𑀺𑀕𑀯𑁂𑀲𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀫𑁂𑀢𑁆𑀢𑀸𑀯𑀺𑀳𑀸𑀭𑀮𑀸𑀪𑀺𑀦𑁄 𑀲𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀸𑀬 𑀩𑁆𑀬𑀸𑀧𑀸𑀤𑀧𑀝𑀺𑀧𑀓𑁆𑀔𑀢𑁆𑀢𑀸 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀻𑀢𑀺 𑀘, 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀩𑁆𑀬𑀸𑀧𑀸𑀤𑁄 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺. 𑀓𑀭𑀼𑀡𑀸𑀯𑀺𑀳𑀸𑀭𑀺𑀲𑁆𑀲 𑀓𑀭𑀼𑀡𑀸𑀯𑀺𑀳𑀸𑀭𑀮𑀸𑀪𑀺𑀦𑁄 𑀲𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀭𑀼𑀡𑀸𑀬 𑀯𑀺𑀳𑁂𑀲𑀸𑀬 𑀧𑀝𑀺𑀧𑀓𑁆𑀔𑀢𑁆𑀢𑀸 𑀯𑀺𑀳𑁂𑀲𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀓𑀭𑀼𑀡𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀯𑀺𑀳𑁂𑀲𑀸 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺. 𑀫𑀼𑀤𑀺𑀢𑀸𑀯𑀺𑀳𑀸𑀭𑀺𑀲𑁆𑀲 𑀫𑀼𑀤𑀺𑀢𑀸𑀯𑀺𑀳𑀸𑀭𑀮𑀸𑀪𑀺𑀦𑁄 𑀲𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀼𑀤𑀺𑀢𑀸𑀬 𑀅𑀭𑀢𑀺𑀬𑀸 𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀭𑀢𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀫𑀼𑀤𑀺𑀢𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀅𑀭𑀢𑀺 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺. 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀺𑀲𑁆𑀲 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀮𑀸𑀪𑀺𑀦𑁄 𑀲𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁂𑀓𑁆𑀔𑀸𑀬 𑀭𑀸𑀕𑀲𑁆𑀲 𑀧𑀝𑀺𑀧𑀓𑁆𑀔𑀢𑁆𑀢𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀭𑀸𑀕𑁄 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺.

𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀺𑀲𑁆𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀧𑀝𑀺𑀮𑀤𑁆𑀥𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀮𑀸𑀪𑀺𑀦𑁄 𑀲𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀺 𑀢𑁂𑀦 𑀢𑁂𑀦𑁂𑀯 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀦𑀺𑀘𑁆𑀘𑀸𑀤𑀻𑀲𑀼 𑀧𑀳𑀻𑀦𑁂𑀦 𑀦𑀺𑀫𑀺𑀢𑁆𑀢𑁂𑀦 𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀸𑀤𑀺𑀯𑀺𑀧𑀮𑁆𑀮𑀸𑀲𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀦𑀺𑀫𑀺𑀢𑁆𑀢𑀁 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺. ‘‘𑀅𑀲𑁆𑀫𑀻’’𑀢𑀺 𑀫𑀜𑁆𑀜𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀅𑀢𑁆𑀢𑀯𑀺𑀕𑀢𑀁 ‘‘𑀅𑀬𑀁 𑀔𑀦𑁆𑀥𑀧𑀜𑁆𑀘𑀓𑁄 𑀅𑀳𑀁 𑀅𑀲𑁆𑀫𑀻’’𑀢𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀅𑀣 𑀘 𑀧𑀦 𑀅𑀲𑀫𑀦𑀼𑀧𑀲𑁆𑀲𑀦𑁂 𑀲𑀢𑀺𑀧𑀺 ‘‘𑀫𑁂 𑀓𑀺𑀁 𑀅𑀲𑁆𑀫𑀻’’𑀢𑀺 ‘‘𑀓𑀣𑀁 𑀅𑀲𑁆𑀫𑀻’’𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀓𑀣𑀁𑀓𑀣𑀸𑀲𑀮𑁆𑀮𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑀢𑁄 ‘‘𑀅𑀬𑀁 𑀔𑀦𑁆𑀥𑀧𑀜𑁆𑀘𑀓𑁄 𑀅𑀳𑀁 𑀅𑀲𑁆𑀫𑀻’’𑀢𑀺 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀓𑀣𑀁𑀓𑀣𑀸𑀲𑀮𑁆𑀮𑀁 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺.

‘‘𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑁂𑀯 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑀧𑀺 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸 𑀧𑀦 𑀧𑀞𑀫𑀁 𑀛𑀸𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀣 𑀯𑀸 ‘‘𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀺𑀲𑁆𑀲𑁂𑀯 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑀧𑀺 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸 𑀧𑀦 𑀧𑀞𑀫𑀁 𑀛𑀸𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀣𑀸 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀺𑀲𑁆𑀲 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸, 𑀏𑀯𑀁 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀺𑀲𑁆𑀲𑀧𑀺 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸. 𑀓𑀣𑀁? 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄 𑀲𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀯𑀺𑀲𑁂𑀲𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀛𑀸𑀦𑀲𑁆𑀲 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺. 𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀉𑀧𑀘𑀸𑀭𑀥𑀫𑁆𑀫𑁂𑀦 𑀲𑀳 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑀸 𑀛𑀸𑀦𑀲𑁆𑀲 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀉𑀧𑀭𑀺𑀛𑀸𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺.

𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀉𑀧𑀘𑀸𑀭𑀥𑀫𑁆𑀫𑁂𑀦 𑀲𑀳 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸 𑀯𑀺𑀲𑁂𑀲𑀸𑀬 𑀉𑀧𑀭𑀺𑀛𑀸𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀅𑀯𑀺𑀢𑀓𑁆𑀓𑀛𑀸𑀦𑀲𑁆𑀲 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀉𑀧𑀘𑀸𑀭𑀥𑀫𑁆𑀫𑁂𑀦 𑀲𑀳 𑀘𑀢𑀼𑀢𑁆𑀣𑀚𑁆𑀛𑀸𑀦𑀥𑀫𑁆𑀫𑀸 𑀛𑀸𑀦𑀲𑁆𑀲 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀉𑀧𑀭𑀺𑀛𑀸𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑁂𑀲𑀦𑀸 𑀬𑀼𑀚𑁆𑀚𑀢𑀺. 𑀲𑁂𑀲𑁂𑀲𑀼𑀧𑀺 𑀅𑀢𑁆𑀣𑀸𑀦𑀼𑀭𑀽𑀧𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀬𑀣𑀸𑀯𑀼𑀢𑁆𑀢𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀻𑀪𑀸𑀯𑁂𑀦 𑀧𑀭𑀺𑀘𑀺𑀢𑀁 𑀓𑀮𑁆𑀮𑀢𑀸𑀧𑀭𑀺𑀘𑀺𑀢𑀁 𑀘𑀺𑀢𑁆𑀢𑀁 𑀦𑀸𑀫.

𑀏𑀢𑁆𑀢𑀓𑀫𑁂𑀯 𑀬𑀼𑀢𑁆𑀢𑀺𑀕𑀯𑁂𑀲𑀦𑀁 𑀦 𑀓𑀸𑀢𑀩𑁆𑀩𑀁, 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑁂𑀲𑀼 𑀬𑀣𑀸𑀮𑀤𑁆𑀥𑀬𑀼𑀢𑁆𑀢𑀺𑀕𑀯𑁂𑀲𑀦𑀫𑁆𑀧𑀺 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀲𑀩𑁆𑀩𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁 𑀬𑀣𑀸𑀯𑀼𑀢𑁆𑀢𑀪𑀽𑀫𑀺𑀕𑁄𑀘𑀭𑀸𑀦𑀁 𑀯𑀺𑀘𑀬𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀪𑀸𑀯𑁄 𑀓𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦 𑀬𑁄𑀚𑁂𑀢𑀩𑁆𑀩𑀪𑀸𑀯𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 ‘‘𑀲𑀩𑁆𑀩𑁂𑀲’’𑀦𑁆𑀢𑀺𑀆𑀤𑀺𑀓𑀁 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀢𑀺 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.