𑁪. 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑀯𑀺𑀪𑀸𑀯𑀦𑀸

𑁬𑁬. 𑀬𑁂𑀦 𑀬𑁂𑀦 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁂𑀦 𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸𑀦𑀁 𑀬𑀼𑀢𑁆𑀢𑀺𑀪𑀸𑀯𑁄 𑀆𑀘𑀭𑀺𑀬𑁂𑀦 𑀯𑀺𑀪𑀸𑀯𑀺𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, 𑀲𑁄 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀧𑀼𑀘𑁆𑀙𑀢𑀺.

𑀧𑀼𑀘𑁆𑀙𑀺𑀢𑁆𑀯𑀸 𑀬𑀲𑁆𑀫𑀺𑀁 𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀯𑀼𑀢𑁆𑀢𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀦𑀻𑀳𑀭𑀺𑀢𑀸𑀦𑀺, 𑀢𑀁 𑀲𑀼𑀢𑁆𑀢𑀧𑁆𑀧𑀤𑁂𑀲𑀁 𑀦𑀻𑀳𑀭𑀺𑀢𑀼𑀁 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄𑀢𑀺 𑀕𑀸𑀣𑀸’’𑀢𑀺 𑀯𑀼𑀢𑁆𑀢𑀸. 𑀕𑀸𑀣𑀸𑀢𑁆𑀣𑁄 𑀯𑀼𑀢𑁆𑀢𑁄𑀯. ‘‘𑀓𑀢𑀫𑁂 𑀕𑀸𑀣𑀸𑀢𑁆𑀣𑀸 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑀲𑁆𑀲 𑀅𑀢𑁆𑀣𑀪𑀽𑀢𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀧𑀤𑀝𑁆𑀞𑀸𑀦𑀁 𑀦𑀸𑀫 𑀲𑀼𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸. ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑀲𑁆𑀲 𑀅𑀢𑁆𑀣𑀪𑀽𑀢𑀸 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀁 𑀦𑀸𑀫 𑀓𑀸𑀫𑀘𑁆𑀙𑀦𑁆𑀤𑀆𑀤𑀺𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑀲𑁆𑀲 𑀅𑀢𑁆𑀣𑀪𑀽𑀢𑀸 𑀓𑀫𑁆𑀫𑀲𑁆𑀲𑀓𑀢𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀁 𑀦𑀸𑀫 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀁 𑀯𑀺𑀲𑁂𑀲𑀓𑀸𑀭𑀡𑀢𑁆𑀢𑀸. ‘‘𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬’’𑀦𑁆𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑀲𑁆𑀲 𑀅𑀢𑁆𑀣𑀪𑀽𑀢𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀧𑀜𑁆𑀜𑀸 𑀤𑀲𑁆𑀲𑀦𑀪𑀽𑀫𑀺𑀬𑀸 𑀧𑀤𑀝𑁆𑀞𑀸𑀦𑀁 𑀦𑀸𑀫 𑀧𑀞𑀫𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸. ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀽’’𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑀲𑁆𑀲 𑀅𑀢𑁆𑀣𑀪𑀽𑀢𑀁 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀦𑀁 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁 𑀦𑀸𑀫 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸. ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑀲𑁆𑀲 𑀅𑀢𑁆𑀣𑀪𑀽𑀢𑀸 𑀧𑀳𑀸𑀢𑀩𑁆𑀩𑀚𑀳𑀦𑀪𑀸𑀯𑀦𑀸𑀬 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀧𑀤𑀝𑁆𑀞𑀸𑀦𑀁 𑀦𑀸𑀫 𑀧𑀳𑀸𑀢𑀩𑁆𑀩𑀧𑁆𑀧𑀳𑀸𑀦𑁂𑀦 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀲𑀫𑁆𑀪𑀯𑀢𑁄.

‘‘𑀏𑀢𑁆𑀢𑀓𑁄𑀯 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑀪𑀽𑀢𑁂𑀦 𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀦𑀻𑀳𑀭𑀺𑀢𑀸𑀦𑀺, 𑀲𑁄 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁄 𑀦𑀺𑀬𑀼𑀢𑁆𑀢𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀇𑀢𑀺 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦…𑀧𑁂… 𑀕𑀳𑁂𑀢𑀩𑁆𑀩𑁄𑀢𑀺.