𑁫. 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑀯𑀺𑀪𑀸𑀯𑀦𑀸

𑁬𑁭. 𑀬𑁂𑀦 𑀬𑁂𑀦 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁂𑀦 𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸𑀦𑀺, 𑀲𑁄 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀼 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀸𑀤𑀻𑀲𑀼 𑀲𑁄𑀴𑀲𑀲𑀼 𑀳𑀸𑀭𑀲𑀫𑁆𑀧𑀸𑀢𑁂𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺.

‘‘𑀓𑀢𑀫𑁂𑀳𑀺 𑀲𑀼𑀢𑁆𑀢𑀢𑁆𑀣𑁂𑀳𑀺 𑀲𑀫𑀸𑀦𑀮𑀓𑁆𑀔𑀡𑀸 𑀓𑀢𑀫𑁂 𑀥𑀫𑁆𑀫𑀸 𑀕𑀳𑀺𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀦 𑀯𑀼𑀢𑁆𑀢𑀁 𑀇𑀤𑀁 𑀭𑀓𑁆𑀔𑀡𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀕𑀳𑀺𑀢𑀁, 𑀲𑀢𑀺𑀦𑁆𑀤𑁆𑀭𑀺𑀬𑁂 𑀕𑀳𑀺𑀢𑁂 𑀲𑀤𑁆𑀥𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀕𑀳𑀺𑀢𑀸𑀦𑀺 𑀪𑀯𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀝𑁆𑀞𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀦 𑀯𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀕𑀳𑀺𑀢𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀬 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀕𑀳𑀺𑀢𑁄 𑀪𑀯𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀧𑀼𑀘𑁆𑀙𑀺𑀢𑁆𑀯𑀸 𑀓𑀸𑀭𑀡𑀫𑀸𑀳 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀢𑁄 𑀳𑀻’’𑀢𑀺𑀆𑀤𑀺𑀦𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀳𑁂𑀢𑀼𑀢𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀢𑁄 𑀲𑀫𑁆𑀫𑀸𑀯𑀸𑀘𑀸 𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀲𑀫𑁆𑀫𑀸𑀯𑀸𑀘𑀸𑀢𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀲𑀫𑁆𑀫𑀸𑀆𑀚𑀻𑀯𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀲𑀫𑁆𑀫𑀸𑀯𑀸𑀬𑀸𑀫𑀢𑁄 𑀲𑀫𑁆𑀫𑀸𑀲𑀢𑀺𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀲𑀫𑁆𑀫𑀸𑀲𑀢𑀺𑀢𑁄 𑀲𑀫𑁆𑀫𑀸𑀲𑀫𑀸𑀥𑀺 𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀲𑀫𑁆𑀫𑀸𑀲𑀫𑀸𑀥𑀺𑀢𑁄 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀢𑁄 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀳𑀺 𑀬𑀲𑁆𑀫𑀸 𑀧𑀪𑀯𑀢𑀺, 𑀢𑀲𑁆𑀫𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀕𑀳𑀺𑀢𑁄 𑀪𑀯𑀢𑀻𑀢𑀺.

‘‘𑀏𑀢𑁆𑀢𑀓𑁄𑀯 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀮𑀓𑁆𑀔𑀡𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑁂𑀦 𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸 𑀲𑀫𑀸𑀦𑀮𑀓𑁆𑀔𑀡𑁂𑀦 𑀕𑀳𑀺𑀢𑀸 𑀪𑀯𑀦𑁆𑀢𑀺, 𑀲𑁄 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑁄 𑀦𑀺𑀬𑀼𑀢𑁆𑀢𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀕𑀳𑀺𑀢𑁄𑀢𑀺.

𑀇𑀢𑀺 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦…𑀧𑁂… 𑀕𑀳𑁂𑀢𑀩𑁆𑀩𑁄𑀢𑀺.