𑁨. 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁧𑁧. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁂𑀦 𑀅𑀲𑁆𑀲𑀸𑀤𑀸𑀤𑀬𑁄 𑀲𑀼𑀢𑁆𑀢𑀢𑁆𑀣𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀳𑀸𑀭𑁂𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑁄 𑀳𑀸𑀭𑁄 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘𑀸’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀕𑀸𑀣𑀸𑀬 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀅𑀬𑀁 𑀯𑀺𑀘𑀬𑁄 𑀳𑀸𑀭𑁄 𑀓𑀺𑀁 𑀯𑀺𑀘𑀺𑀦𑀢𑀻’’𑀢𑀺𑀆𑀤𑀺𑀓𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸.

‘‘𑀅𑀬𑀁 𑀯𑀺𑀘𑀬𑁄 𑀳𑀸𑀭𑁄 𑀓𑀺𑀁 𑀯𑀺𑀘𑀺𑀦𑀢𑀻’’𑀢𑀺 𑀇𑀫𑀺𑀦𑀸 𑀬𑁄 𑀯𑀺𑀘𑀬𑁄 𑀯𑀺𑀘𑀺𑀦𑀺𑀢𑀩𑁆𑀩𑁄, 𑀢𑀁 𑀯𑀺𑀘𑀬𑀁 𑀯𑀺𑀘𑀺𑀦𑀺𑀢𑀩𑁆𑀩𑀁 𑀧𑀼𑀘𑁆𑀙𑀢𑀺, 𑀢𑀲𑁆𑀫𑀸 𑀯𑀺𑀘𑀺𑀦𑀺𑀢𑀩𑁆𑀩𑀁 𑀯𑀺𑀲𑀬𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀧𑀤𑀁 𑀯𑀺𑀘𑀺𑀦𑀢𑀺, 𑀧𑀜𑁆𑀳𑀁 𑀯𑀺𑀘𑀺𑀦𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀓𑀺𑀁 𑀯𑀺𑀘𑀬𑁄 𑀧𑀤𑀯𑀺𑀘𑀬𑁄’’𑀢𑀺𑀆𑀤𑀺𑀁 𑀅𑀯𑀢𑁆𑀯𑀸 ‘‘𑀓𑀺𑀁 𑀯𑀺𑀘𑀺𑀦𑀢𑀺, 𑀧𑀤𑀁 𑀯𑀺𑀘𑀺𑀦𑀢𑀻’’𑀢𑀺𑀆𑀤𑀺𑀯𑀘𑀦𑁂𑀦 𑀯𑀺𑀘𑀬𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀤𑀁 𑀯𑀺𑀘𑀺𑀦𑀢𑀻𑀢𑀺 𑀦𑀯𑀯𑀺𑀥𑀲𑁆𑀲 𑀲𑀼𑀢𑁆𑀢𑀦𑁆𑀢𑀲𑁆𑀲 𑀲𑀩𑁆𑀩𑀁 𑀧𑀤𑀁 𑀬𑀸𑀯 𑀦𑀺𑀕𑀫𑀦𑀸 𑀦𑀸𑀫𑀧𑀤𑀸𑀤𑀺𑀚𑀸𑀢𑀺𑀲𑀤𑁆𑀤𑀸𑀤𑀺𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑀦𑁆𑀢𑀸𑀤𑀺𑀧𑀞𑀫𑀯𑀺𑀪𑀢𑁆𑀬𑀦𑁆𑀢𑀸𑀤𑀺𑀏𑀓𑀯𑀘𑀦𑀸𑀤𑀺𑀯𑀲𑁂𑀦 𑀯𑀺𑀘𑀺𑀦𑀢𑀺. 𑀧𑀜𑁆𑀳𑀁 𑀯𑀺𑀘𑀺𑀦𑀢𑀻𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸𑀤𑀺𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸𑀤𑀺𑀲𑀫𑁆𑀫𑀼𑀢𑀺𑀯𑀺𑀲𑀬𑀸𑀤𑀺𑀅𑀢𑀻𑀢𑀯𑀺𑀲𑀬𑀸𑀤𑀺𑀯𑀲𑁂𑀦 𑀯𑀺𑀘𑀺𑀦𑀢𑀺. 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀘𑀺𑀦𑀢𑀻𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀲𑀸𑀯𑀲𑁂𑀲𑀩𑁆𑀬𑀸𑀓𑀭𑀡𑀯𑀺𑀲𑁆𑀲𑀚𑁆𑀚𑀦𑀸𑀤𑀺 𑀲𑀉𑀢𑁆𑀢𑀭𑀩𑁆𑀬𑀸𑀓𑀭𑀡 𑀯𑀺𑀲𑁆𑀲𑀚𑁆𑀚𑀦𑀸𑀤𑀺 𑀮𑁄𑀓𑀺𑀬𑀩𑁆𑀬𑀸𑀓𑀭𑀡𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀯𑀲𑁂𑀦 𑀯𑀺𑀘𑀺𑀦𑀢𑀺. 𑀧𑀼𑀩𑁆𑀩𑀸𑀧𑀭𑀁 𑀯𑀺𑀘𑀺𑀦𑀢𑀻𑀢𑀺 𑀧𑀼𑀩𑁆𑀩𑁂𑀦 𑀅𑀧𑀭𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑀺𑀘𑀺𑀦𑀢𑀺. 𑀅𑀲𑁆𑀲𑀸𑀤𑀁 𑀯𑀺𑀘𑀺𑀦𑀢𑀻𑀢𑀺 𑀅𑀲𑁆𑀲𑀸𑀤𑀓𑀢𑀡𑁆𑀳𑀸𑀤𑀺𑀅𑀲𑁆𑀲𑀸𑀤𑁂𑀢𑀩𑁆𑀩𑀲𑀼𑀔𑀸𑀤𑀺𑀯𑀲𑁂𑀦 𑀯𑀺𑀘𑀺𑀦𑀢𑀺. 𑀆𑀤𑀻𑀦𑀯𑀁 𑀯𑀺𑀘𑀺𑀦𑀢𑀻𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀲𑁂𑀦 𑀯𑀸 𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀸𑀤𑀺𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀤𑀺𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀯𑀲𑁂𑀦 𑀯𑀸 𑀯𑀺𑀘𑀺𑀦𑀢𑀺. 𑀦𑀺𑀲𑁆𑀲𑀭𑀡𑀁 𑀯𑀺𑀘𑀺𑀦𑀢𑀻𑀢𑀺 𑀫𑀕𑁆𑀕𑀯𑀲𑁂𑀦 𑀯𑀸 𑀦𑀺𑀩𑁆𑀩𑀸𑀦𑀯𑀲𑁂𑀦 𑀯𑀸 𑀫𑀕𑁆𑀕𑀲𑁆𑀲 𑀯𑀸 𑀆𑀕𑀫𑀯𑀲𑁂𑀦, 𑀦𑀺𑀩𑁆𑀩𑀸𑀦𑀲𑁆𑀲 𑀅𑀲𑀗𑁆𑀔𑀢𑀥𑀸𑀢𑀼𑀆𑀤𑀺𑀧𑀭𑀺𑀬𑀸𑀬𑀯𑀲𑁂𑀦 𑀯𑀸 𑀯𑀺𑀘𑀺𑀦𑀢𑀺. 𑀨𑀮𑀁 𑀯𑀺𑀘𑀺𑀦𑀢𑀻𑀢𑀺 𑀥𑀫𑁆𑀫𑀘𑀭𑀡𑀲𑁆𑀲 𑀤𑀼𑀕𑁆𑀕𑀢𑀺𑀕𑀫𑀦𑀸𑀪𑀸𑀯𑁂𑀦 𑀯𑀸 𑀫𑀘𑁆𑀘𑀼𑀢𑀭𑀡𑀸𑀤𑀺𑀦𑀸 𑀯𑀸 𑀤𑁂𑀲𑀦𑀸𑀬 𑀨𑀮𑀁, 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀘𑀭𑀡𑀲𑁆𑀲 𑀨𑀮𑀁 𑀯𑀺𑀘𑀺𑀦𑀢𑀺. 𑀉𑀧𑀸𑀬𑀁 𑀯𑀺𑀘𑀺𑀦𑀢𑀻𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀦𑀺𑀩𑁆𑀩𑀺𑀤𑀸𑀜𑀸𑀡𑀸𑀤𑀺𑀯𑀲𑁂𑀦 𑀯𑀸 𑀲𑀤𑁆𑀥𑀸𑀲𑀢𑀺𑀯𑀲𑁂𑀦 𑀯𑀸 𑀯𑀺𑀲𑀼𑀤𑁆𑀥𑀺𑀬𑀸 𑀉𑀧𑀸𑀬𑀁 𑀯𑀺𑀘𑀺𑀦𑀢𑀺. 𑀆𑀡𑀢𑁆𑀢𑀺𑀁 𑀯𑀺𑀘𑀺𑀦𑀢𑀻𑀢𑀺 𑀧𑀸𑀧𑀧𑀭𑀺𑀯𑀚𑁆𑀚𑀦𑀸𑀡𑀢𑁆𑀢𑀺𑀯𑀲𑁂𑀦 𑀯𑀸 𑀮𑁄𑀓𑀲𑁆𑀲 𑀲𑀼𑀜𑁆𑀜𑀢𑀸𑀧𑁂𑀓𑁆𑀔𑀦𑀸𑀡𑀢𑁆𑀢𑀺𑀯𑀲𑁂𑀦 𑀯𑀸 𑀯𑀺𑀘𑀺𑀦𑀢𑀺. 𑀅𑀦𑀼𑀕𑀻𑀢𑀺𑀁 𑀯𑀺𑀘𑀺𑀦𑀢𑀻𑀢𑀺 𑀯𑀼𑀢𑁆𑀢𑀸𑀦𑀼𑀕𑀻𑀢𑀺𑀯𑀲𑁂𑀦 𑀯𑀸 𑀯𑀼𑀘𑁆𑀘𑀫𑀸𑀦𑀸𑀦𑀼𑀕𑀻𑀢𑀺𑀯𑀲𑁂𑀦 𑀯𑀸 𑀅𑀦𑀼𑀭𑀽𑀧𑀁 𑀕𑀻𑀢𑀺𑀁 𑀯𑀺𑀘𑀺𑀦𑀢𑀺. 𑀲𑀩𑁆𑀩𑁂 𑀦𑀯 𑀲𑀼𑀢𑁆𑀢𑀦𑁆𑀢𑁂 𑀯𑀺𑀘𑀺𑀦𑀢𑀻𑀢𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀓𑁂 𑀦𑀯 𑀲𑀼𑀢𑁆𑀢𑁂 𑀆𑀳𑀘𑁆𑀘𑀯𑀘𑀦𑀯𑀲𑁂𑀦 𑀯𑀸 𑀅𑀦𑀼𑀲𑀦𑁆𑀥𑀺𑀯𑀘𑀦𑀯𑀲𑁂𑀦 𑀯𑀸 𑀦𑀻𑀢𑀢𑁆𑀣𑀯𑀘𑀦𑀯𑀲𑁂𑀦 𑀯𑀸 𑀦𑁂𑀬𑁆𑀬𑀢𑁆𑀣𑀯𑀘𑀦𑀯𑀲𑁂𑀦 𑀯𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀯𑀲𑁂𑀦 𑀯𑀸 𑀯𑀺𑀘𑀺𑀦𑀢𑀺.

𑀓𑀺𑀜𑁆𑀘𑀸𑀧𑀺 𑀧𑀤𑀯𑀺𑀘𑀬𑁄 𑀧𑀞𑀫𑀁 𑀯𑀺𑀪𑀢𑁆𑀢𑁄, 𑀲𑀼𑀢𑁆𑀢𑀲𑁆𑀲 𑀧𑀦 𑀅𑀦𑀼𑀧𑀤𑀁 𑀯𑀺𑀘𑀺𑀦𑀺𑀢𑀩𑁆𑀩𑀢𑀸𑀬 𑀅𑀢𑀺𑀪𑀸𑀭𑀺𑀬𑁄, 𑀦 𑀲𑀼𑀓𑀭𑁄 𑀧𑀤𑀯𑀺𑀘𑀬𑁄𑀢𑀺 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀳𑀸𑀯𑀺𑀘𑀬𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁂 𑀢𑀸𑀯 𑀯𑀺𑀪𑀚𑀦𑁆𑀢𑁄 ‘‘𑀬𑀣𑀸 𑀓𑀺𑀁 𑀪𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀓𑀺𑀁 𑀪𑀯𑁂𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀲𑁄 𑀧𑀜𑁆𑀳𑀸𑀯𑀺𑀘𑀬𑁄 𑀧𑀯𑀢𑁆𑀢𑁂𑀢𑀩𑁆𑀩𑁄, 𑀢𑀁 𑀧𑀓𑀸𑀭𑀚𑀸𑀢𑀁 𑀓𑀻𑀤𑀺𑀲𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀸𑀭𑀸𑀬𑀦𑁂 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀧𑀼𑀘𑁆𑀙𑀢𑀺, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀧𑀜𑁆𑀳𑀸𑀯𑀺𑀘𑀬𑁄 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁. 𑀅𑀚𑀺𑀢𑁄𑀢𑀺 𑀩𑀸𑀯𑀭𑀻𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀘𑀸𑀭𑀓𑀪𑀽𑀢𑀸𑀦𑀁 𑀲𑁄𑀴𑀲𑀦𑁆𑀦𑀁 𑀅𑀜𑁆𑀜𑀢𑀭𑁄 𑀅𑀚𑀺𑀢𑁄. 𑀧𑀸𑀭𑀸𑀬𑀦𑁂𑀢𑀺 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀅𑀬𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀧𑀸𑀭𑀸𑀬𑀦𑀁, 𑀅𑀚𑀺𑀢𑀲𑀼𑀢𑁆𑀢𑀸𑀤𑀺𑀲𑁄𑀴𑀲𑀲𑀼𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, (𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,)

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁 𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺. (𑀲𑀼. 𑀦𑀺. 𑁧𑁦𑁩𑁮; 𑀘𑀽𑀴𑀦𑀺. 𑀯𑀢𑁆𑀣𑀼𑀕𑀸𑀣𑀸 𑁫𑁭, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧) 𑁋

𑀕𑀸𑀣𑀸𑀬 ‘‘𑀓𑁂𑀦 𑀥𑀫𑁆𑀫𑁂𑀦 𑀮𑁄𑀓𑁄 𑀅𑀭𑀺𑀬𑀯𑀚𑁆𑀚𑁄 𑀲𑀢𑁆𑀢𑁄 𑀦𑀺𑀯𑀼𑀢𑁄 𑀧𑀝𑀺𑀘𑁆𑀙𑀸𑀤𑀺𑀢𑁄, 𑀇𑀢𑀺 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀼𑀘𑁆𑀙𑀢𑀺. 𑀓𑁂𑀦 𑀳𑁂𑀢𑀼𑀦𑀸 𑀬𑀣𑀸𑀯𑀼𑀢𑁆𑀢𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀺, 𑀅𑀲𑁆𑀲 𑀬𑀣𑀸𑀯𑀼𑀢𑁆𑀢𑀮𑁄𑀓𑀲𑁆𑀲 𑀓𑀺𑀁 𑀅𑀪𑀺𑀮𑁂𑀧𑀦𑀁 𑀇𑀢𑀺 𑀢𑁆𑀯𑀁 𑀩𑁆𑀭𑀽𑀲𑀺, 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀮𑁄𑀓𑀲𑁆𑀲 𑀓𑀺𑀁 𑀫𑀳𑀩𑁆𑀪𑀬𑀦𑁆𑀢𑀺 𑀢𑁆𑀯𑀁 𑀩𑁆𑀭𑀽𑀲𑀻𑀢𑀺 𑀧𑀼𑀘𑁆𑀙𑀢𑀻’’𑀢𑀺 𑀅𑀢𑁆𑀣𑁄.

𑀇𑀢𑀺 𑀇𑀫𑀺𑀦𑀸 𑀧𑀪𑁂𑀤𑁂𑀦 𑀘𑀢𑁆𑀢𑀸𑀭𑀺 𑀇𑀫𑀸𑀦𑀺 𑀕𑀸𑀣𑀸𑀧𑀸𑀤𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺 𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀧𑀼𑀘𑁆𑀙𑀺𑀢𑀢𑁆𑀣𑀤𑀻𑀧𑀓𑀸𑀦𑀺 𑀯𑀸, 𑀧𑀥𑀸𑀦𑀯𑀲𑁂𑀦 𑀧𑀦 𑀲𑁄 ‘‘𑀏𑀓𑁄 𑀧𑀜𑁆𑀳𑁄’’𑀢𑀺 𑀫𑀢𑁄, 𑀬𑀤𑀺𑀧𑀺 𑀘𑀢𑀼𑀦𑁆𑀦𑀁 𑀧𑀤𑀸𑀦𑀁 𑀧𑀼𑀘𑁆𑀙𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑁄𑀢𑀺 𑀯𑀢𑁆𑀢𑀩𑁆𑀩𑁄, 𑀜𑀸𑀢𑀼𑀁 𑀧𑀦 𑀇𑀘𑁆𑀙𑀺𑀢𑀲𑁆𑀲 𑀏𑀓𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄 ‘‘𑀏𑀓𑁄 𑀧𑀜𑁆𑀳𑁄’’𑀢𑀺 𑀯𑀼𑀢𑁆𑀢𑀁. ‘‘𑀓𑀸𑀭𑀡𑀁 𑀯𑀤𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀓𑀸𑀭𑀡𑀫𑀸𑀳 ‘‘𑀏𑀓𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀸’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀤𑀺𑀧𑀺 𑀦𑀺𑀯𑀸𑀭𑀡𑀸𑀧𑀓𑀸𑀲𑀦𑀸𑀪𑀺𑀮𑁂𑀧𑀦𑀫𑀳𑀩𑁆𑀪𑀬𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀧𑀼𑀘𑁆𑀙𑀸𑀬𑀁 𑀕𑀳𑀺𑀢𑀸, 𑀏𑀓𑀲𑁆𑀲 𑀧𑀦 𑀅𑀪𑀺𑀥𑁂𑀬𑁆𑀬𑀢𑁆𑀣𑀲𑁆𑀲 𑀕𑀳𑀡𑀢𑁄 ‘𑀏𑀓𑁄 𑀧𑀜𑁆𑀳𑁄’𑀢𑀺 𑀧𑀥𑀸𑀦𑀯𑀲𑁂𑀦 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄’’𑀢𑀺. ‘‘𑀏𑀓𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀡𑀁 𑀓𑀣𑀁 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀏𑀯𑀜𑁆𑀳𑀺 𑀆𑀳𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀏𑀓𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀡𑁂𑀦𑁂𑀯 𑀪𑀕𑀯𑀸 𑀳𑀺 𑀬𑀲𑁆𑀫𑀸 𑀆𑀳, 𑀇𑀢𑀺 𑀢𑀲𑁆𑀫𑀸 𑀏𑀓𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀡𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀇𑀫𑀺𑀦𑀸 𑀮𑁄𑀓𑀸𑀥𑀺𑀝𑁆𑀞𑀸𑀦𑀁 𑀧𑀝𑀺𑀘𑁆𑀙𑀸𑀤𑀦𑀁 𑀧𑀼𑀘𑁆𑀙𑀢𑀺, 𑀦 𑀦𑀸𑀦𑀸𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁. ‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀇𑀫𑀺𑀦𑀸 𑀮𑁄𑀓𑀲𑁆𑀲𑁂𑀯 𑀅𑀧𑁆𑀧𑀓𑀸𑀲𑀦𑀁 𑀧𑀼𑀘𑁆𑀙𑀢𑀺, 𑀦 𑀦𑀸𑀦𑀸𑀲𑀪𑀸𑀯𑀥𑀫𑁆𑀫𑀲𑁆𑀲. ‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀇𑀫𑀺𑀦𑀸 𑀮𑁄𑀓𑀲𑁆𑀲𑁂𑀯 𑀅𑀪𑀺𑀮𑁂𑀧𑀦𑀁 𑀧𑀼𑀘𑁆𑀙𑀢𑀺, 𑀦 𑀦𑀸𑀦𑀸𑀲𑀪𑀸𑀯𑀥𑀫𑁆𑀫𑀲𑁆𑀲. ‘‘𑀓𑀺𑀁 𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲𑁂𑀯 𑀮𑁄𑀓𑀲𑁆𑀲 𑀫𑀳𑀩𑁆𑀪𑀬𑀁 𑀧𑀼𑀘𑁆𑀙𑀢𑀺, 𑀦 𑀦𑀸𑀦𑀸𑀲𑀪𑀸𑀯𑀥𑀫𑁆𑀫𑀲𑁆𑀲. 𑀢𑀲𑁆𑀫𑀸 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀧𑀜𑁆𑀳𑁄 𑀏𑀓𑀸𑀥𑀺𑀝𑁆𑀞𑀸𑀦𑀦𑀸𑀦𑀸𑀥𑀺𑀝𑁆𑀞𑀸𑀦𑁂𑀲𑀼 𑀏𑀓𑀸𑀥𑀺𑀝𑁆𑀞𑀸𑀦𑁄, 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑁂𑀲𑀼 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑁄, 𑀅𑀤𑀺𑀝𑁆𑀞𑀚𑁄𑀢𑀦𑀸𑀤𑀻𑀲𑀼 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀜𑁆𑀳𑁄𑀢𑀺𑀆𑀤𑀺𑀦𑀸 𑀬𑀣𑀸𑀲𑀫𑁆𑀪𑀯𑀁 𑀯𑀺𑀘𑀺𑀦𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀧𑀜𑁆𑀳𑀲𑁆𑀲 𑀬𑁄 𑀮𑁄𑀓𑁄 ‘𑀅𑀥𑀺𑀝𑁆𑀞𑀸𑀦𑁄’𑀢𑀺 𑀕𑀳𑀺𑀢𑁄, 𑀲𑁄 𑀮𑁄𑀓𑁄 𑀢𑀺𑀯𑀺𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀮𑁄𑀓𑁄 𑀢𑀺𑀯𑀺𑀥𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀬𑁄 𑀯𑀺𑀥𑀸 𑀏𑀢𑀲𑁆𑀲 𑀮𑁄𑀓𑀲𑁆𑀲𑀸𑀢𑀺 𑀢𑀺𑀯𑀺𑀥𑁄. 𑀓𑀺𑀮𑀺𑀲𑁆𑀲𑀢𑀺 𑀭𑀸𑀕𑀸𑀤𑀺𑀯𑀲𑁂𑀦 𑀓𑀸𑀫𑀸𑀯𑀘𑀭𑀲𑀢𑁆𑀢𑁄𑀢𑀺 𑀓𑀺𑀮𑁂𑀲𑁄, 𑀓𑀺𑀮𑁂𑀲𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀓𑀺𑀮𑁂𑀲𑀮𑁄𑀓𑁄, 𑀓𑀸𑀫𑀸𑀯𑀘𑀭𑀲𑀢𑁆𑀢𑁄. 𑀲𑁄 𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀩𑀳𑀼𑀮𑀢𑀸𑀬 𑀓𑀺𑀮𑁂𑀲𑀮𑁄𑀓𑁄𑀢𑀺. 𑀪𑀯𑀢𑀺 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀩𑀼𑀤𑁆𑀥𑀻𑀳𑀻𑀢𑀺 𑀪𑀯𑁄, 𑀪𑀯𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀪𑀯𑀮𑁄𑀓𑁄, 𑀭𑀽𑀧𑀸𑀯𑀘𑀭𑀲𑀢𑁆𑀢𑁄. 𑀲𑁄 𑀳𑀺 𑀛𑀸𑀦𑀸𑀤𑀺𑀩𑀼𑀤𑁆𑀥𑀻𑀳𑀺 𑀪𑀯𑀢𑀻𑀢𑀺. 𑀇𑀦𑁆𑀤𑁆𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑁄, 𑀇𑀦𑁆𑀤𑁆𑀭𑀺𑀬𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀇𑀦𑁆𑀤𑁆𑀭𑀺𑀬𑀮𑁄𑀓𑁄, 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑁄. 𑀲𑁄 𑀳𑀺 𑀆𑀦𑁂𑀜𑁆𑀚𑀲𑀫𑀸𑀥𑀺𑀩𑀳𑀼𑀮𑀢𑀸𑀬 𑀯𑀺𑀲𑀼𑀤𑁆𑀥𑀺𑀦𑁆𑀤𑁆𑀭𑀺𑀬𑁄 𑀳𑁄𑀢𑀻𑀢𑀺 𑀮𑁄𑀓𑀲𑀫𑀜𑁆𑀜𑀸 𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀸, 𑀢𑀲𑁆𑀫𑀸 𑀅𑀭𑀺𑀬𑀸 𑀦 𑀕𑀳𑀺𑀢𑀸𑀢𑀺.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀕𑀸𑀣𑀸𑀬 𑀧𑀼𑀘𑁆𑀙𑀸𑀯𑀺𑀘𑀬𑁄 𑀳𑀸𑀭𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀯𑀺𑀲𑁆𑀲𑀚𑁆𑀚𑀦𑀸𑀯𑀺𑀘𑀬𑁄 𑀳𑀸𑀭𑁄 𑀓𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀸𑀬 𑀯𑀺𑀪𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀧𑀼𑀘𑁆𑀙𑀸𑀬𑀁 𑁋

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, (𑀅𑀚𑀺𑀢𑀸𑀢𑀺 𑀪𑀕𑀯𑀸,)

𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺. (𑀲𑀼. 𑀦𑀺. 𑁧𑁦𑁩𑁯; 𑀘𑀽𑀴𑀦𑀺. 𑀯𑀢𑁆𑀣𑀼𑀕𑀸𑀣𑀸 𑁫𑁮, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲) 𑁋

𑀅𑀬𑀁 𑀕𑀸𑀣𑀸 𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺 𑀓𑀸𑀴𑀧𑀓𑁆𑀔𑀘𑀢𑀼𑀤𑁆𑀤𑀲𑀻, 𑀖𑀦𑀯𑀦𑀲𑀡𑁆𑀟, 𑀫𑁂𑀖𑀧𑀝𑀮𑀘𑁆𑀙𑀸𑀤𑀦, 𑀅𑀟𑁆𑀠𑀭𑀢𑁆𑀢𑀻𑀦𑀁 𑀯𑀲𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀅𑀦𑁆𑀥𑀓𑀸𑀭𑁂𑀦 𑀭𑀣𑀖𑀝𑀸𑀤𑀺 𑀧𑀝𑀺𑀘𑁆𑀙𑀸𑀤𑀺𑀢𑁄 𑀯𑀺𑀬 𑀥𑀫𑁆𑀫𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀅𑀯𑀺𑀚𑁆𑀚𑀸𑀬 𑀲𑀢𑁆𑀢𑀮𑁄𑀓𑁄 𑀦𑀺𑀯𑀼𑀢𑁄 𑀧𑀝𑀺𑀘𑁆𑀙𑀸𑀤𑀺𑀢𑁄. ‘‘𑀅𑀚𑀺𑀢𑀸’’𑀢𑀺 𑀘 𑀆𑀮𑀧𑀦𑀁 𑀓𑀢𑁆𑀯𑀸 𑀪𑀕𑀯𑀸 𑀆𑀳. 𑀯𑀺𑀯𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀫𑀸𑀤𑀳𑁂𑀢𑀼 𑀬𑀣𑀸𑀯𑀼𑀢𑁆𑀢𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀺. 𑀚𑀧𑁆𑀧𑀁 𑀢𑀡𑁆𑀳𑀁 𑀬𑀣𑀸𑀯𑀼𑀢𑁆𑀢𑀮𑁄𑀓𑀲𑁆𑀲 ‘‘𑀅𑀪𑀺𑀮𑁂𑀧𑀦’’𑀦𑁆𑀢𑀺 𑀅𑀳𑀁 𑀩𑁆𑀭𑀽𑀫𑀻𑀢𑀺 𑀪𑀕𑀯𑀸 𑀆𑀳, 𑀤𑀼𑀓𑁆𑀔𑀁 𑀚𑀸𑀢𑀺𑀆𑀤𑀺𑀯𑀝𑁆𑀝𑀤𑀼𑀓𑁆𑀔𑀁 𑀅𑀲𑁆𑀲 𑀬𑀣𑀸𑀯𑀼𑀢𑁆𑀢𑀮𑁄𑀓𑀲𑁆𑀲 ‘‘𑀫𑀳𑀩𑁆𑀪𑀬’’𑀦𑁆𑀢𑀺 𑀅𑀳𑀁 𑀩𑁆𑀭𑀽𑀫𑀻𑀢𑀺 𑀪𑀕𑀯𑀸 𑀅𑀚𑀺𑀢𑀁 𑀆𑀳𑀸𑀢𑀺 𑀅𑀢𑁆𑀣𑁄.

‘‘𑀇𑀫𑀸𑀬 𑀯𑀺𑀲𑁆𑀲𑀚𑁆𑀚𑀦𑀸𑀬 𑀓𑀣𑀁 𑀯𑀺𑀘𑀺𑀦𑁂𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀻𑀢𑀺 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀧𑀼𑀘𑁆𑀙𑀸𑀕𑀸𑀣𑀸𑀬𑀁 𑀯𑀼𑀢𑁆𑀢𑀸𑀦𑀺 𑀕𑀸𑀣𑀸𑀧𑀤𑀸𑀦𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀻𑀢𑀺 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀸𑀕𑀸𑀣𑀸𑀬𑀁 𑀯𑀼𑀢𑁆𑀢𑁂𑀳𑀺 𑀕𑀸𑀣𑀸𑀧𑀤𑁂𑀳𑀺 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺. 𑀓𑀣𑀁? 𑀧𑀞𑀫𑀁 𑀧𑀤𑀁 𑀧𑀞𑀫𑁂𑀦 𑀧𑀤𑁂𑀦, 𑀤𑀼𑀢𑀺𑀬𑀁 𑀧𑀤𑀁 𑀤𑀼𑀢𑀺𑀬𑁂𑀦 𑀧𑀤𑁂𑀦, 𑀢𑀢𑀺𑀬𑀁 𑀧𑀤𑀁 𑀢𑀢𑀺𑀬𑁂𑀦 𑀧𑀤𑁂𑀦, 𑀘𑀢𑀼𑀢𑁆𑀣𑀁 𑀧𑀤𑀁 𑀘𑀢𑀼𑀢𑁆𑀣𑁂𑀦 𑀧𑀤𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀁.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀞𑀫𑀧𑀜𑁆𑀳𑁂‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀞𑀫𑀸 𑀯𑀺𑀲𑁆𑀲𑀚𑁆𑀚𑀦𑀸 𑀓𑀢𑀸, 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸. 𑀯𑀺𑀚𑁆𑀚𑀸𑀬 𑀧𑀝𑀺𑀧𑀓𑁆𑀔𑀸 𑀅𑀯𑀺𑀚𑁆𑀚𑀸, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀬 𑀅𑀚𑀸𑀦𑀓𑁄 𑀮𑁄𑀓𑁄 𑀪𑀯𑁂𑀬𑁆𑀬. 𑀓𑀣𑀁 𑀦𑀺𑀯𑀼𑀢𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺. 𑀬𑀤𑀺 𑀏𑀯𑀁 ‘‘𑀦𑀻𑀯𑀭𑀡𑁂𑀦 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀳𑀺 𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺. ‘‘𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀪𑀸𑀯𑁄 𑀓𑁂𑀦 𑀯𑀘𑀦𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀲𑀩𑁆𑀩𑀲𑀢𑁆𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀸𑀡𑀸𑀦𑀁 𑀲𑀩𑁆𑀩𑀪𑀽𑀢𑀸𑀦𑀁, 𑀧𑀭𑀺𑀬𑀸𑀬𑀢𑁄 𑀏𑀓𑀫𑁂𑀯 𑀦𑀻𑀯𑀭𑀡𑀁 𑀯𑀤𑀸𑀫𑀺, 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀳𑀺 𑀲𑀩𑁆𑀩𑁂 𑀲𑀢𑁆𑀢𑀸. 𑀲𑀩𑁆𑀩𑀲𑁄𑀯 𑀪𑀺𑀓𑁆𑀔𑀯𑁂 𑀅𑀯𑀺𑀚𑁆𑀚𑀸𑀬 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀦𑀢𑁆𑀣𑀺 𑀲𑀢𑁆𑀢𑀸𑀦𑀁 𑀦𑀻𑀯𑀭𑀡𑀦𑁆𑀢𑀺 𑀯𑀤𑀸𑀫𑀻’’𑀢𑀺 𑀬𑀁 𑀯𑀘𑀦𑀁 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀪𑀕𑀯𑀸 𑀆𑀳, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀯𑀼𑀢𑁆𑀢𑁂𑀦 𑀢𑁂𑀦 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀪𑀸𑀯𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺.

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀤𑁂𑀦 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀞𑀫𑀲𑁆𑀲𑁂𑀯 𑀧𑀤𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸 𑀦 𑀲𑀺𑀬𑀸, ‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀤𑀼𑀢𑀺𑀬𑀧𑀤𑀲𑁆𑀲𑀸𑀧𑀺 𑀯𑀺𑀲𑁆𑀲𑀚𑁆𑀚𑀦𑀸 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀢𑁂𑀦 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀤𑁂𑀦 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀞𑀫𑀲𑁆𑀲 𑀧𑀤𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸 𑀬𑀼𑀢𑁆𑀢𑀸 𑀬𑀼𑀢𑁆𑀢𑀢𑀭𑀸 𑀳𑁄𑀢𑀺, 𑀬𑀼𑀢𑁆𑀢𑀢𑀭𑀢𑁆𑀢𑀸 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀜𑁆𑀳𑁂 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀫𑀬𑀸 𑀯𑀢𑁆𑀢𑀩𑁆𑀩𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀳𑁂 ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀅𑀬𑀁 𑀯𑀺𑀲𑁆𑀲𑀚𑁆𑀚𑀦𑀸 𑀓𑀸𑀢𑀩𑁆𑀩𑀸, 𑀯𑀺𑀯𑀺𑀘𑁆𑀙𑀸𑀬 𑀧𑀯𑀢𑁆𑀢𑀢𑁆𑀢𑀸, 𑀧𑀫𑀸𑀤𑀸 𑀘 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑀦𑀸 𑀓𑀸𑀢𑀩𑁆𑀩𑀸, ‘‘𑀓𑀣𑀁 𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑀦𑀸 𑀓𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀧𑀼𑀣𑀼𑀚𑁆𑀚𑀦𑀪𑀽𑀢𑁄 𑀧𑀼𑀕𑁆𑀕𑀮𑁄 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁄, 𑀲𑁄 𑀧𑀼𑀣𑀼𑀚𑁆𑀚𑀦𑀪𑀽𑀢𑁄 𑀧𑀼𑀕𑁆𑀕𑀮𑁄 𑀯𑀺𑀯𑀺𑀘𑁆𑀙𑀸𑀬 𑀯𑀺𑀯𑀺𑀘𑁆𑀙𑀢𑀺. ‘‘𑀬𑀸𑀬 𑀯𑀺𑀯𑀺𑀘𑁆𑀙𑀸𑀬 𑀯𑀺𑀯𑀺𑀘𑁆𑀙𑀢𑀺, 𑀲𑀸 𑀯𑀺𑀯𑀺𑀘𑁆𑀙𑀸 𑀓𑀢𑀫𑀸 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀯𑀺𑀯𑀺𑀘𑁆𑀙𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺 𑀯𑀼𑀢𑁆𑀢𑀁. ‘‘𑀢𑀸𑀬 𑀓𑀲𑁆𑀫𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑁄 𑀲𑁄 𑀧𑀼𑀣𑀼𑀚𑁆𑀚𑀦𑀪𑀽𑀢𑁄 𑀧𑀼𑀕𑁆𑀕𑀮𑁄 𑀲𑀤𑁆𑀤𑀳𑀺𑀢𑀩𑁆𑀩𑁂𑀲𑀼 𑀦𑀸𑀪𑀺𑀲𑀤𑁆𑀤𑀳𑀢𑀺; 𑀲𑀤𑁆𑀤𑀳𑀺𑀢𑀩𑁆𑀩𑁂𑀲𑀼 𑀦 𑀅𑀪𑀺𑀲𑀤𑁆𑀤𑀳𑀦𑁆𑀢𑁄 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀆𑀭𑀪𑀺𑀢𑀩𑁆𑀩𑀁 𑀯𑀻𑀭𑀺𑀬𑀁 𑀦𑀸𑀭𑀪𑀢𑀺; 𑀅𑀦𑀸𑀭𑀪𑀦𑁆𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀇𑀥 𑀮𑁄𑀓𑁂 𑀧𑀫𑀸𑀤𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻𑀢𑀺, 𑀧𑀫𑀸𑀤𑁂𑀦 𑀯𑀺𑀳𑀭𑀦𑁆𑀢𑁄 𑀧𑀫𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀼𑀓𑁆𑀓𑁂 𑀥𑀫𑁆𑀫𑁂 𑀦 𑀉𑀧𑁆𑀧𑀸𑀤𑀺𑀬𑀢𑀺; 𑀅𑀦𑀼𑀧𑁆𑀧𑀸𑀤𑀬𑀦𑁆𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀅𑀦𑀼𑀧𑁆𑀧𑀸𑀤𑀺𑀬𑀫𑀸𑀦𑀸 𑀳𑀼𑀢𑁆𑀯𑀸 𑀦𑀧𑁆𑀧𑀓𑀸𑀲𑀦𑁆𑀢𑀺 𑀧𑀓𑀸𑀲𑀦𑀯𑀲𑁂𑀦 𑀦 𑀧𑀯𑀢𑁆𑀢𑀦𑁆𑀢𑀺; 𑀢𑀲𑁆𑀫𑀸 ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀢𑀸𑀤𑀺𑀲𑀲𑁆𑀲 𑀲𑀼𑀓𑁆𑀓𑀥𑀫𑁆𑀫𑀸𑀦𑀁 𑀅𑀧𑁆𑀧𑀓𑀸𑀲𑀦𑀪𑀸𑀯𑁄 𑀅𑀫𑁆𑀳𑁂𑀳𑀺 𑀓𑁂𑀦 𑀯𑀘𑀦𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑁋

‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸;

𑀢𑁂 𑀕𑀼𑀡𑁂𑀳𑀺 𑀧𑀓𑀸𑀲𑀦𑁆𑀢𑀺, 𑀓𑀺𑀢𑁆𑀢𑀺𑀬𑀸 𑀘 𑀬𑀲𑁂𑀦 𑀘𑀸’’𑀢𑀺. 𑁋

𑀬𑀁 𑀕𑀸𑀣𑀸𑀧𑀸𑀞𑀁 𑀪𑀕𑀯𑀸 𑀬𑀣𑀸 𑀬𑁂𑀦 𑀅𑀧𑁆𑀧𑀓𑀸𑀲𑀦𑀸𑀓𑀸𑀭𑁂𑀦 𑀆𑀳, 𑀢𑀣𑀸 𑀢𑁂𑀦 𑀅𑀧𑁆𑀧𑀓𑀸𑀲𑀦𑀸𑀓𑀸𑀭𑁂𑀦 𑀯𑀼𑀢𑁆𑀢𑁂𑀦 𑀢𑁂𑀦 𑀕𑀸𑀣𑀸𑀧𑀸𑀞𑁂𑀦 𑀢𑀸𑀤𑀺𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀼𑀓𑁆𑀓𑀥𑀫𑁆𑀫𑀸𑀦𑀁 𑀅𑀧𑁆𑀧𑀓𑀸𑀲𑀦𑀪𑀸𑀯𑁄 𑀢𑀼𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄𑀬𑁂𑀯, 𑀢𑀲𑁆𑀫𑀸 ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀸 𑀓𑀸𑀢𑀩𑁆𑀩𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀸𑀣𑀸𑀢𑁆𑀣𑁄 𑀧𑀦 𑁋 𑀳𑀺𑀫𑀯𑀦𑁆𑀢𑁄 𑀧𑀩𑁆𑀩𑀢𑁄 𑀤𑀽𑀭𑁂 𑀞𑀺𑀢𑁄 𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀲𑀘𑀓𑁆𑀔𑀼𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀧𑀓𑀸𑀲𑀢𑀺 𑀇𑀯, 𑀏𑀯𑀁 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀕𑀼𑀡𑀯𑀲𑁂𑀦 𑀧𑀯𑀢𑁆𑀢𑀸𑀬 𑀓𑀺𑀢𑁆𑀢𑀺𑀬𑀸 𑀘 𑀕𑀼𑀡𑀯𑀲𑁂𑀦 𑀧𑀯𑀢𑁆𑀢𑁂𑀳𑀺 𑀬𑀲𑀧𑀭𑀺𑀪𑁄𑀕𑀧𑀭𑀺𑀯𑀸𑀭𑁂𑀳𑀺 𑀘 𑀤𑀽𑀭𑁂 𑀞𑀺𑀢𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀧𑀓𑀸𑀲𑀦𑁆𑀢𑀺, 𑀭𑀢𑁆𑀢𑀺𑀓𑀸𑀮𑁂 𑀔𑀺𑀢𑁆𑀢𑀸 𑀲𑀭𑀸 𑀉𑀲𑀽 𑀦 𑀤𑀺𑀲𑁆𑀲𑀦𑁆𑀢𑀺 𑀬𑀣𑀸, 𑀏𑀢𑁆𑀣 𑀲𑀢𑁆𑀢𑀮𑁄𑀓𑁂 𑀯𑀺𑀯𑀺𑀘𑁆𑀙𑀸𑀧𑀫𑀸𑀤𑀸𑀦𑀁 𑀯𑀲𑁂𑀦 𑀯𑀺𑀳𑀭𑀦𑁆𑀢𑁄 𑀅𑀲𑀦𑁆𑀢𑁄 𑀦 𑀤𑀺𑀲𑁆𑀲𑀦𑁆𑀢𑀺. 𑀬𑁂 𑀲𑀦𑁆𑀢𑁄 𑀧𑀓𑀸𑀲𑀦𑁆𑀢𑀺, 𑀢𑁂 𑀲𑀦𑁆𑀢𑁄 𑀕𑀼𑀡𑁂𑀳𑀺 𑀧𑀓𑀸𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀕𑀼𑀡𑁂𑀳𑀺 𑀧𑀓𑀸𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑀼𑀡𑀸 𑀦𑀸𑀫 𑀅𑀩𑁆𑀪𑀦𑁆𑀢𑀭𑁂 𑀚𑀸𑀢𑀸, ‘‘𑀓𑀣𑀁 𑀕𑀼𑀡𑁂𑀳𑀺 𑀧𑀓𑀸𑀲𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀓𑀺𑀢𑁆𑀢𑀺𑀬𑀸 𑀘 𑀬𑀲𑁂𑀦 𑀘𑀸’’𑀢𑀺 𑀯𑀼𑀢𑁆𑀢𑀁. 𑀕𑀼𑀡𑀸𑀦𑀼𑀪𑀸𑀯𑁂𑀦 𑀧𑀯𑀢𑁆𑀢𑀸𑀬 𑀓𑀺𑀢𑁆𑀢𑀺𑀬𑀸 𑀘 𑀕𑀼𑀡𑀸𑀦𑀼𑀪𑀸𑀯𑁂𑀦 𑀧𑀯𑀢𑁆𑀢𑁂𑀦 𑀬𑀲𑁂𑀦 𑀘 𑀧𑀓𑀸𑀲𑀦𑁆𑀢𑀸 𑀧𑀼𑀕𑁆𑀕𑀮𑀸 𑀕𑀼𑀡𑁂𑀳𑀺 𑀧𑀓𑀸𑀲𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀸𑀯𑀸𑀢𑀺.

𑀬𑀤𑀺 𑀯𑀺𑀯𑀺𑀘𑁆𑀙𑀸𑀧𑀫𑀸𑀤𑀸𑀦𑀁 𑀯𑀲𑁂𑀦 𑀦𑀧𑁆𑀧𑀓𑀸𑀲𑀢𑀺, 𑀏𑀯𑀁 𑀲𑀢𑀺 𑀮𑁄𑀓𑁄 𑀦𑀺𑀯𑀼𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀞𑀫𑀲𑁆𑀲 𑀧𑀤𑀲𑁆𑀲𑀸𑀧𑀺 𑀯𑀺𑀲𑁆𑀲𑀚𑁆𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀢𑁂𑀦 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦𑀸𑀢𑀺 ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀧𑀤𑁂𑀦 ‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀤𑀼𑀢𑀺𑀬𑀲𑁆𑀲 𑀧𑀤𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸 𑀬𑀼𑀢𑁆𑀢𑀸 𑀬𑀼𑀢𑁆𑀢𑀢𑀭𑀸𑀢𑀺 𑀅𑀢𑁆𑀣𑁄. 𑀧𑀤𑁂𑀦𑀸𑀢𑀺 𑀘 𑀧𑀤𑀢𑁆𑀣𑀝𑁆𑀞𑁂𑀦 𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀅𑀢𑁆𑀣𑁄. 𑀧𑀤𑀲𑁆𑀲𑀸𑀢𑀺 𑀧𑀤𑀢𑁆𑀣𑀲𑁆𑀲 𑀧𑀼𑀘𑁆𑀙𑀺𑀢𑀩𑁆𑀩𑀲𑁆𑀲𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀲 𑀦𑀬𑁄 𑀳𑁂𑀝𑁆𑀞𑀸, 𑀉𑀧𑀭𑀺 𑀘.

‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀧𑀜𑁆𑀳𑁂 ‘‘𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀸 𑀢𑀲𑁆𑀲𑀸 𑀅𑀚𑀺𑀢𑁂𑀦 𑀤𑀝𑁆𑀞𑀩𑁆𑀩𑀸. ‘‘𑀓𑀢𑀫𑀸 𑀚𑀧𑁆𑀧𑀸 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀚𑀧𑁆𑀧𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀢𑀡𑁆𑀳𑀸 𑀮𑁄𑀓𑀁 𑀅𑀪𑀺𑀮𑀺𑀫𑁆𑀧𑀢𑀻𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸 𑀬𑁂𑀦 𑀢𑀡𑁆𑀳𑀸𑀬 𑀅𑀪𑀺𑀮𑁂𑀧𑀦𑀪𑀸𑀯𑁂𑀦 𑁋

‘‘𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀁 𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺. 𑁋

𑀬𑀁 𑀕𑀸𑀣𑀁 𑀪𑀕𑀯𑀸 𑀆𑀳, 𑀢𑀣𑀸 𑀢𑁂𑀦 𑀅𑀪𑀺𑀮𑁂𑀧𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀬 𑀢𑀸𑀬 𑀕𑀸𑀣𑀸𑀬 𑀲𑀸 𑀢𑀡𑁆𑀳𑀸 𑀮𑁄𑀓𑀁 𑀅𑀪𑀺𑀮𑀺𑀫𑁆𑀧𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀸𑀣𑀸𑀬𑀁 𑀧𑀦 𑁋 𑀭𑀚𑁆𑀚𑀢𑀺 𑀲𑀢𑁆𑀢𑁄𑀢𑀺 𑀭𑀢𑁆𑀢𑁄, 𑀭𑀸𑀕𑀲𑀫𑀗𑁆𑀕𑀻𑀲𑀢𑁆𑀢𑁄. 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀅𑀲𑀢𑀺 𑀧𑀯𑀢𑁆𑀢𑀢𑀺 𑀨𑀮𑀦𑁆𑀢𑀺 𑀅𑀢𑁆𑀣𑀁, 𑀨𑀮𑀁. 𑀓𑀸𑀭𑀡𑀁 𑀨𑀮𑀁 𑀥𑀸𑀭𑁂𑀢𑀺, 𑀢𑀁 𑀓𑀸𑀭𑀡𑀁 𑀥𑀫𑁆𑀫𑀁 𑀦𑀸𑀫. 𑀅𑀦𑁆𑀥𑀓𑀸𑀭𑀁 𑀅𑀦𑁆𑀥𑀁. 𑀬𑀦𑁆𑀢𑀺 𑀬𑀫𑁆𑀳𑀺 𑀓𑀸𑀮𑁂. 𑀬𑀦𑁆𑀢𑀺 𑀳𑀺 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀬𑀫𑁆𑀳𑀺 𑀓𑀸𑀮𑁂 𑀭𑀸𑀕𑁄 𑀦𑀭𑀁 𑀭𑀸𑀕𑀲𑀫𑀗𑁆𑀕𑀺𑀁 𑀲𑀳𑀢𑁂 𑀅𑀪𑀺𑀪𑀯𑀢𑀺, 𑀢𑀤𑀸 𑀓𑀸𑀮𑁂 𑀅𑀦𑁆𑀥𑀁 𑀅𑀦𑁆𑀥𑀓𑀸𑀭𑀁 𑀢𑀫𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀭𑀸𑀕𑁄 𑀦𑀭𑀁 𑀬𑀁 𑀬𑀲𑁆𑀫𑀸 𑀲𑀳𑀢𑁂, 𑀢𑀲𑁆𑀫𑀸 𑀅𑀦𑁆𑀥𑀁 𑀢𑀫𑀁 𑀢𑀤𑀸 𑀳𑁄𑀢𑀻𑀢𑀺 𑀯𑀸, 𑀭𑀸𑀕𑁄 𑀬𑀁 𑀦𑀭𑀁 𑀲𑀳𑀢𑁂, 𑀢𑀲𑁆𑀲 𑀦𑀭𑀲𑁆𑀲 𑀅𑀦𑁆𑀥𑀁 𑀢𑀫𑀁 𑀢𑀤𑀸 𑀳𑁄𑀢𑀻𑀢𑀺 𑀯𑀸, 𑀭𑀸𑀕𑁄 𑀦𑀭𑀁 𑀬𑀁 𑀲𑀳𑀢𑁂 𑀅𑀪𑀺𑀪𑀽𑀬𑀢𑁂 𑀬𑀁 𑀲𑀳𑀦𑀁 𑀅𑀪𑀺𑀪𑀯𑀦𑀁 𑀦𑀺𑀧𑁆𑀨𑀸𑀤𑁂𑀢𑀺, 𑀢𑀁 𑀲𑀳𑀦𑀁 𑀅𑀪𑀺𑀪𑀯𑀦𑀁 𑀅𑀦𑁆𑀥𑀁 𑀅𑀦𑁆𑀥𑀓𑀸𑀭𑀁 𑀢𑀫𑀁 𑀳𑁄𑀢𑀻𑀢𑀺 𑀯𑀸 𑀬𑁄𑀚𑀦𑀸.

‘‘𑀬𑀤𑀺 𑀭𑀢𑁆𑀢𑁄 𑀅𑀢𑁆𑀣𑀸𑀤𑀺𑀓𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀲𑀢𑀺 𑀓𑀣𑀁 𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀪𑀯𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀸𑀬𑀁 𑀢𑀡𑁆𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀭𑀫𑁆𑀫𑀡𑁂𑀲𑀼 𑀆𑀲𑀢𑁆𑀢𑀺𑀩𑀳𑀼𑀮𑀲𑁆𑀲 𑀆𑀲𑀗𑁆𑀕𑀩𑀳𑀼𑀮𑀲𑁆𑀲 𑀢𑀡𑁆𑀳𑀸𑀲𑀫𑀗𑁆𑀕𑀺𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀸 𑀅𑀬𑀁 𑀢𑀡𑁆𑀳𑀸 𑀏𑀯𑀁 𑀩𑀳𑀼𑀆𑀲𑀗𑁆𑀕𑀯𑀲𑁂𑀦 𑀅𑀪𑀺𑀚𑀧𑁆𑀧𑀸 𑀧𑀭𑀺𑀬𑀼𑀝𑁆𑀞𑀸𑀦𑀝𑁆𑀞𑀸𑀬𑀺𑀦𑀻 𑀳𑁄𑀢𑀺. 𑀇𑀢𑀺 𑀓𑀭𑀺𑀢𑁆𑀯𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀢𑁆𑀣 𑀢𑀡𑁆𑀳𑀸𑀬 𑀲𑀢𑁆𑀢𑀮𑁄𑀓𑁄 𑀓𑁂𑀦𑀘𑀺 𑀲𑀺𑀮𑁂𑀲𑁂𑀦 𑀅𑀪𑀺𑀮𑀺𑀢𑁆𑀢𑁄 𑀫𑀓𑁆𑀔𑀺𑀢𑁄 𑀯𑀺𑀬 𑀚𑀧𑁆𑀧𑀸𑀪𑀺𑀮𑁂𑀧𑁂𑀦 𑀅𑀪𑀺𑀮𑀺𑀢𑁆𑀢𑁄 𑀦𑀸𑀫 𑀪𑀯𑀢𑀻𑀢𑀺 𑀬𑁄𑀚𑀦𑀸. ‘‘𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀅𑀧𑁆𑀧𑀓𑀸𑀲𑀦𑀲𑁆𑀲𑀧𑀺 𑀓𑀸𑀭𑀡𑀁 𑀪𑀯𑀢𑀺, 𑀢𑀲𑁆𑀫𑀸 ‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’𑀢𑀺 𑀤𑀼𑀢𑀺𑀬𑀧𑀤𑀢𑁆𑀣𑀲𑁆𑀲𑀧𑀺 𑀯𑀺𑀲𑁆𑀲𑀚𑁆𑀚𑀦𑀸 𑀲𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀢𑀲𑁆𑀲 𑀮𑁄𑀓𑀲𑁆𑀲 𑀫𑀳𑀩𑁆𑀪𑀬𑀁 𑀓𑀺’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀢𑁆𑀣𑀧𑀜𑁆𑀳𑁂 ‘‘𑀅𑀲𑁆𑀲 𑀮𑁄𑀓𑀲𑁆𑀲 𑀤𑀼𑀓𑁆𑀔𑀁 𑀫𑀳𑀩𑁆𑀪𑀬𑀁 𑀪𑀯𑁂’’𑀢𑀺 𑀅𑀬𑀁 𑀯𑀺𑀲𑁆𑀲𑀚𑁆𑀚𑀦𑀸 𑀢𑀲𑁆𑀲𑀸 𑀅𑀚𑀺𑀢𑁂𑀦 𑀤𑀝𑁆𑀞𑀩𑁆𑀩𑀸. 𑀪𑀸𑀬𑀢𑀺 𑀮𑁄𑀓𑁄 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀫𑀳𑀦𑁆𑀢𑀁 𑀪𑀬𑀁 𑀫𑀳𑀩𑁆𑀪𑀬𑀁. ‘‘𑀓𑀢𑀺𑀯𑀺𑀥𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑀼𑀯𑀺𑀥𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑁂 𑀯𑀺𑀥𑀸 𑀅𑀲𑁆𑀲 𑀤𑀼𑀓𑁆𑀔𑀲𑁆𑀲𑀸𑀢𑀺 𑀤𑀼𑀯𑀺𑀥𑀁. ‘‘𑀓𑀢𑀫𑀁 𑀤𑀼𑀯𑀺𑀥𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀓𑀢𑀫𑀁 𑀓𑀸𑀬𑀺𑀓𑀁, 𑀓𑀢𑀫𑀁 𑀘𑁂𑀢𑀲𑀺𑀓’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀁 𑀓𑀸𑀬𑀺𑀓𑀁, 𑀇𑀤𑀁 𑀤𑀼𑀓𑁆𑀔𑀁 𑀬𑀁 𑀘𑁂𑀢𑀲𑀺𑀓𑀁, 𑀇𑀤𑀁 𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁.

𑀭𑁄𑀕𑀸𑀤𑀺𑀲𑀢𑁆𑀣𑀸𑀤𑀺𑀅𑀦𑀺𑀝𑁆𑀞𑀭𑀽𑀧𑀁 𑀲𑀢𑁆𑀢𑀮𑁄𑀓𑀲𑁆𑀲 𑀫𑀳𑀩𑁆𑀪𑀬𑀁 𑀪𑀯𑁂𑀬𑁆𑀬, ‘‘𑀓𑀣𑀁 𑀤𑀼𑀓𑁆𑀔𑀁 𑀫𑀳𑀩𑁆𑀪𑀬𑀁 𑀪𑀯𑁂𑀢𑀺 𑀲𑀤𑁆𑀤𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑁂 𑀲𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀉𑀩𑁆𑀩𑀺𑀚𑁆𑀚𑀦𑁆𑀢𑀺, 𑀤𑀼𑀓𑁆𑀔𑁂𑀦 𑀲𑀫𑀲𑀫𑀁 𑀅𑀜𑁆𑀜𑀁 𑀪𑀬𑀁 𑀲𑀢𑁆𑀢𑀸𑀦𑀁 𑀦𑀢𑁆𑀣𑀺, 𑀤𑀼𑀓𑁆𑀔𑀢𑁄 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀦 𑀪𑀬𑀁 𑀓𑀼𑀢𑁄 𑀅𑀢𑁆𑀣𑀺. 𑀳𑀺 𑀬𑀲𑁆𑀫𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑀼𑀓𑁆𑀔𑀢𑁄 𑀅𑀜𑁆𑀜𑀲𑁆𑀲 𑀪𑀬𑀲𑁆𑀲 𑀅𑀪𑀸𑀯𑀢𑁄 ‘‘𑀤𑀼𑀓𑁆𑀔𑀁 𑀮𑁄𑀓𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀯𑀘𑀦𑀁 𑀲𑀤𑁆𑀤𑀳𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀭𑁄𑀕𑀸𑀤𑀺𑀲𑀢𑁆𑀣𑀸𑀤𑀺𑀅𑀦𑀺𑀝𑁆𑀞𑀭𑀽𑀧𑀁 𑀤𑀼𑀓𑁆𑀔𑀫𑀽𑀮𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀲𑁂𑀦 𑀤𑀼𑀯𑀺𑀥𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀯𑁂𑀤𑀦𑀸𑀬𑁂𑀯, 𑀏𑀯𑀁 𑀲𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸𑀦𑀁 𑀫𑀳𑀩𑁆𑀪𑀬𑀪𑀸𑀯𑁄 𑀦 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀲𑀩𑁆𑀩𑀓𑀸𑀮𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀤𑀸𑀘𑀺 𑀓𑀲𑁆𑀲𑀘𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀮𑁄𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀢𑀻𑀲𑀼 𑀤𑀼𑀓𑁆𑀔𑀢𑀸𑀲𑀼. 𑀮𑁄𑀓𑁄𑀢𑀺 𑀪𑁄𑀕𑀲𑀫𑁆𑀧𑀦𑁆𑀦𑁄 𑀘𑁂𑀯 𑀅𑀧𑁆𑀧𑀸𑀩𑀸𑀥𑁄 𑀘 𑀲𑀢𑁆𑀢𑀮𑁄𑀓𑁄. 𑀑𑀥𑀲𑁄 𑀑𑀥𑀺𑀲𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀅𑀢𑁆𑀢𑀽𑀧𑀓𑁆𑀓𑀫𑀫𑀽𑀮𑀸𑀬 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀢𑀺, 𑀓𑀤𑀸𑀘𑀺 𑀧𑀭𑀽𑀧𑀓𑁆𑀓𑀫𑀫𑀽𑀮𑀸𑀬 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀢𑀺, 𑀢𑀣𑀸 𑀑𑀥𑀲𑁄 𑀑𑀥𑀺𑀲𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀸𑀬𑀼𑀓𑁄 𑀮𑁄𑀓𑁄 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀢𑀺, ‘‘𑀓𑁂𑀦 𑀳𑁂𑀢𑀼𑀦𑀸 𑀫𑀼𑀘𑁆𑀘𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀧𑀼𑀘𑁆𑀙𑀁 𑀞𑀧𑁂𑀢𑁆𑀯𑀸 𑀳𑁂𑀢𑀼𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀮𑁄𑀓𑁂 𑀅𑀧𑁆𑀧𑁂𑀓𑀘𑁆𑀘𑁂 𑀅𑀧𑁆𑀧𑀸𑀩𑀸𑀥𑀸 𑀳𑁄𑀦𑁆𑀢𑀺, 𑀢𑁂 𑀪𑁄𑀕𑀲𑀫𑁆𑀧𑀦𑁆𑀦𑀢𑁆𑀢𑀸 𑀘𑁂𑀯 𑀅𑀧𑁆𑀧𑀸𑀩𑀸𑀥𑀢𑁆𑀢𑀸 𑀘 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀦𑁆𑀢𑀺, 𑀯𑀺𑀲𑁂𑀲𑀢𑁄 𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀫𑀼𑀘𑁆𑀘𑀦𑁆𑀢𑀺. 𑀅𑀧𑁆𑀧𑁂𑀓𑀘𑁆𑀘𑁂 𑀤𑀻𑀖𑀸𑀬𑀼𑀓𑀸𑀧𑀺 𑀳𑁄𑀦𑁆𑀢𑀺, 𑀢𑁂 𑀤𑀻𑀖𑀸𑀬𑀼𑀓𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀦𑁆𑀢𑀺; 𑀯𑀺𑀲𑁂𑀲𑀢𑁄 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀫𑀼𑀘𑁆𑀘𑀦𑁆𑀢𑀺 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀉𑀧𑁂𑀓𑁆𑀔𑀸𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑀢𑁆𑀢𑀸.

𑀢𑁂𑀲𑀁 𑀢𑀸𑀳𑀺 𑀤𑀼𑀓𑁆𑀔𑀢𑀸𑀳𑀺 𑀫𑀼𑀘𑁆𑀘𑀦𑀁 𑀅𑀦𑁂𑀓𑀦𑁆𑀢𑀺𑀓𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀳𑀺 𑀅𑀦𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀦𑁂𑀓𑀦𑁆𑀢𑀺𑀓𑀁 𑀫𑀼𑀘𑁆𑀘𑀦𑀁 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀢𑀫𑀁 𑀏𑀓𑀦𑁆𑀢𑀺𑀓𑀫𑀼𑀘𑁆𑀘𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬𑀸𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀧𑀺 𑀲𑀗𑁆𑀔𑀢𑀢𑁆𑀢𑀸 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸, 𑀢𑀸𑀤𑀺𑀲𑀸𑀬 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀮𑁄𑀓𑁄𑀢𑀺 𑀅𑀭𑀳𑀸. 𑀉𑀧𑀸𑀤𑀻𑀬𑀢𑀺 𑀯𑀺𑀧𑀸𑀓𑀓𑁆𑀔𑀦𑁆𑀥𑀘𑀢𑀼𑀓𑁆𑀓𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀔𑀸𑀢𑀁 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀉𑀧𑀸𑀤𑀺, 𑀉𑀧𑀸𑀤𑀺𑀬𑁂𑀯 𑀲𑁂𑀲𑀁 𑀉𑀧𑀸𑀤𑀺𑀲𑁂𑀲𑀁, 𑀔𑀦𑁆𑀥𑀧𑀜𑁆𑀘𑀓𑀁, 𑀢𑀁 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸. 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀳𑀼𑀢𑁆𑀯𑀸 𑀫𑀼𑀘𑁆𑀘𑀢𑀺, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑀸𑀬𑀁 𑀓𑀭𑀡𑀦𑀺𑀤𑁆𑀤𑁂𑀲𑁄. 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀘 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀦𑀺𑀩𑁆𑀩𑀸𑀬𑀦𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀲𑀗𑁆𑀔𑀢𑀥𑀸𑀢𑀼. 𑀢𑀲𑁆𑀫𑀸𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀲𑀓𑀮𑀮𑁄𑀓𑀩𑁆𑀬𑀸𑀧𑀓𑀪𑀸𑀯𑁂𑀦 𑀲𑀩𑁆𑀩𑀮𑁄𑀓𑀲𑀗𑁆𑀕𑀸𑀳𑀓𑀢𑁆𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀲𑀩𑁆𑀩𑀮𑁄𑀓𑀲𑁆𑀲 𑀤𑀼𑀓𑁆𑀔𑀁 𑀳𑁄𑀢𑀺, 𑀇𑀢𑀺 𑀓𑀢𑁆𑀯𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀲𑀩𑁆𑀩𑀮𑁄𑀓𑀲𑁆𑀲 𑀤𑀼𑀓𑁆𑀔𑀪𑀸𑀯𑀢𑁄 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁.

‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧, 𑁩, 𑁩𑁬; 𑀫𑀳𑀸𑀯. 𑁧; 𑀯𑀺𑀪. 𑁨𑁨𑁫) 𑀯𑀘𑀦𑀢𑁄 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀧𑀤𑁂𑀦 ‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀢𑀢𑀺𑀬𑀧𑀤𑀲𑁆𑀲𑀸𑀧𑀺 𑀯𑀺𑀲𑁆𑀲𑀚𑁆𑀚𑀦𑀸 𑀲𑀺𑀬𑀸𑀢𑀺 𑀆𑀲𑀗𑁆𑀓𑀪𑀸𑀯𑀢𑁄 ‘‘𑀢𑁂𑀦 𑀘 𑀘𑀢𑀼𑀢𑁆𑀣𑀲𑁆𑀲 𑀧𑀤𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸 𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀓𑁂𑀦 𑀬𑀣𑀸𑀓𑁆𑀓𑀫𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀬𑀼𑀢𑁆𑀢𑀢𑀭𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀬𑀣𑀸𑀓𑁆𑀓𑀫𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀬𑀼𑀢𑁆𑀢𑀢𑀭𑀢𑁆𑀢𑀸 𑀬𑀼𑀢𑁆𑀢𑀢𑀭𑀚𑀸𑀦𑀦𑀓𑁄 𑀪𑀕𑀯𑀸 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀫𑀸𑀳, 𑀢𑀲𑁆𑀫𑀸 𑀬𑀼𑀢𑁆𑀢𑀢𑀭𑀪𑀸𑀯𑁄 𑀢𑀼𑀫𑁆𑀳𑁂𑀳𑀺 𑀚𑀸𑀦𑀺𑀢𑀩𑁆𑀩𑁄𑀢𑀺.

𑀏𑀢𑁆𑀣 𑀘 𑀮𑁄𑀓𑀲𑁆𑀲 𑀦𑀻𑀯𑀭𑀡𑀸𑀤𑀻𑀦𑀺 𑀅𑀚𑀸𑀦𑀦𑁆𑀢𑁂𑀦 𑀘 𑀢𑀺𑀢𑁆𑀣𑀺𑀬𑀯𑀸𑀤𑁂𑀲𑀼 𑀲𑀫𑀬𑀦𑁆𑀢𑀭𑁂𑀲𑀼 𑀧𑀭𑀺𑀘𑀬𑁂𑀦 𑀘 𑀢𑁂𑀲𑀼 𑀲𑀫𑀬𑀦𑁆𑀢𑀭𑁂𑀲𑀼 𑀘𑁂𑀯 𑀦𑀻𑀯𑀭𑀡𑀸𑀤𑀻𑀲𑀼 𑀘 𑀲𑀁𑀲𑀬𑀧𑀓𑁆𑀔𑀦𑁆𑀤𑁂𑀦 𑀏𑀓𑀁𑀲𑁂𑀦𑁂𑀯 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀏𑀓𑀁𑀲𑁂𑀦𑁂𑀯 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑁂𑀦 𑀩𑁆𑀬𑀸𑀓𑀸𑀢𑀩𑁆𑀩𑀢𑁆𑀢𑀸 𑀘 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘𑀸𑀬𑀁 𑀧𑀼𑀘𑁆𑀙𑀸 𑀅𑀚𑀸𑀦𑀦𑁆𑀢𑀲𑁆𑀲 𑀚𑀸𑀦𑀦𑀢𑁆𑀣𑀸𑀬, 𑀚𑀸𑀢𑀲𑀁𑀲𑀬𑀲𑁆𑀲 𑀘 𑀲𑀁𑀲𑀬𑀯𑀺𑀦𑁄𑀤𑀦𑀢𑁆𑀣𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀲𑁆𑀲 𑀦𑀻𑀯𑀭𑀡𑀸𑀤𑀺𑀯𑀺𑀲𑀬𑀲𑁆𑀲 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀸. 𑀦𑀻𑀯𑀭𑀡𑀸𑀤𑀻𑀦𑀁 𑀧𑀦 𑀯𑀺𑀲𑀬𑀸𑀦𑀁 𑀮𑁄𑀓𑁄 𑀘 𑀆𑀥𑀸𑀭𑀪𑀸𑀯𑁂𑀦 𑀕𑀸𑀣𑀸𑀬𑀁 𑀯𑀼𑀢𑁆𑀢𑁄𑀢𑀺 ‘‘𑀏𑀓𑁄 𑀧𑀜𑁆𑀳𑁄 𑀤𑀲𑁆𑀲𑀺𑀢𑁄’’𑀢𑀺 𑀅𑀬𑀫𑁂𑀢𑁆𑀣 𑀧𑀼𑀘𑁆𑀙𑀸𑀯𑀺𑀘𑀬𑁄, 𑀯𑀺𑀲𑁆𑀲𑀚𑁆𑀚𑀦𑀸𑀯𑀺𑀘𑀬𑁄 𑀧𑀦 ‘‘𑀅𑀤𑀺𑀝𑁆𑀞𑀚𑁄𑀢𑀦𑀸 𑀯𑀺𑀲𑁆𑀲𑀚𑁆𑀚𑀦𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀯𑀺𑀲𑁆𑀲𑀚𑁆𑀚𑀦𑀸’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀺𑀘𑀬𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀏𑀓𑀸𑀥𑀸𑀭𑁂 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀯𑀺𑀘𑀬𑁄 𑀆𑀘𑀭𑀺𑀬𑁂𑀳𑀺 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀅𑀦𑁂𑀓𑀸𑀥𑀸𑀭𑁂 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀬𑁄 𑀯𑀺𑀘𑀬𑁄 𑀯𑀺𑀪𑀚𑀦𑀸𑀭𑀳𑁄, 𑀲𑁄 𑀯𑀺𑀘𑀬𑁄 𑀓𑀣𑀁 𑀅𑀫𑁆𑀳𑁂𑀳𑀺 𑀯𑀺𑀜𑁆𑀜𑀸𑀬𑀢𑀺, 𑀅𑀫𑁆𑀳𑀸𑀓𑀁 𑀯𑀺𑀜𑁆𑀜𑀸𑀧𑀦𑀢𑁆𑀣𑀸𑀬 𑀢𑀲𑁆𑀫𑀺𑀁 𑀯𑀺𑀘𑀬𑀁 𑀯𑀺𑀪𑀚𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀅𑀦𑁂𑀓𑀸𑀥𑀸𑀭𑀁 𑀧𑀼𑀘𑁆𑀙𑀁 𑀢𑀸𑀯 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑁋

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, (𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,)

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂’’𑀢𑀺. (𑀲𑀼. 𑀦𑀺. 𑁧𑁦𑁪𑁦; 𑀘𑀽𑀴𑀦𑀺. 𑀯𑀢𑁆𑀣𑀼𑀕𑀸𑀣𑀸 𑁫𑁯, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁩) 𑁋

𑀕𑀸𑀣𑀫𑀸𑀳. 𑀕𑀸𑀣𑀸𑀢𑁆𑀣𑁄 𑀢𑀸𑀯 𑀤𑀝𑁆𑀞𑀩𑁆𑀩𑁄. 𑀲𑀯𑀦𑁆𑀢𑀻𑀢𑀺 𑀲𑀦𑁆𑀤𑀦𑁆𑀢𑀺, 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀥𑀻𑀢𑀺 𑀢𑀡𑁆𑀳𑀸𑀤𑀻𑀦𑀁 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀲𑀩𑁆𑀩𑁂𑀲𑀼 𑀭𑀽𑀧𑀸𑀤𑀻𑀲𑀼 𑀆𑀬𑀢𑀦𑁂𑀲𑀼. 𑀲𑁄𑀢𑀸𑀢𑀺 𑀢𑀡𑁆𑀳𑀸𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀤𑀬𑁄 𑀲𑁄𑀢𑀸. 𑀇𑀘𑁆𑀘𑀸𑀬𑀲𑁆𑀫𑀸𑀢𑀺 𑀇𑀢𑀺 𑀏𑀯𑀁 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀆𑀳. 𑀲𑁄𑀢𑀸𑀦𑀦𑁆𑀢𑀺 𑀢𑀡𑁆𑀳𑀸𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀲𑁄𑀢𑀸𑀦𑀁. 𑀓𑀺𑀁 𑀦𑀺𑀯𑀸𑀭𑀡𑀦𑁆𑀢𑀺 𑀓𑀺𑀁 𑀓𑀢𑀫𑀁 𑀥𑀫𑁆𑀫𑀚𑀸𑀢𑀁 𑀆𑀯𑀭𑀡𑀁 𑀪𑀯𑁂, 𑀓𑀸 𑀓𑀢𑀫𑀸 𑀥𑀫𑁆𑀫𑀚𑀸𑀢𑀺 𑀭𑀓𑁆𑀔𑀸 𑀪𑀯𑁂. 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀻𑀢𑀺 𑀲𑁄𑀢𑀸𑀦𑀁 𑀢𑀡𑁆𑀳𑀸𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀲𑀁𑀯𑀭𑀡𑀁 𑀆𑀯𑀭𑀡𑀁 𑀇𑀤𑀁 𑀥𑀫𑁆𑀫𑀚𑀸𑀢𑀁 𑀪𑀯𑁂𑀢𑀺 𑀲𑀩𑁆𑀩𑀲𑀢𑁆𑀢𑀳𑀺𑀢𑀢𑁆𑀣𑀁 𑀅𑀫𑁆𑀳𑀸𑀓𑀁 𑀢𑁆𑀯𑀁 𑀓𑀣𑁂𑀳𑀺. 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂𑀢𑀺 𑀓𑁂𑀦 𑀧𑀳𑀸𑀬𑀓𑀥𑀫𑁆𑀫𑁂𑀦 𑀢𑀡𑁆𑀳𑀸𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀤𑀬𑁄 𑀲𑁄𑀢𑀸 𑀧𑀡𑁆𑀟𑀺𑀢𑁂𑀳𑀺 𑀧𑀺𑀥𑀻𑀬𑀭𑁂𑀢𑀺 𑀧𑀼𑀘𑁆𑀙𑀢𑀻𑀢𑀺 𑀧𑀼𑀘𑁆𑀙𑀺𑀢𑀸𑀦𑀺.

‘‘𑀧𑀼𑀘𑁆𑀙𑀸𑀯𑀲𑁂𑀦 𑀓𑀣𑀺𑀢𑀸𑀬 ‘𑀲𑀯𑀦𑁆𑀢𑀺…𑀧𑁂… 𑀧𑀺𑀥𑀻𑀬𑀭𑁂’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀓𑀺𑀢𑁆𑀢𑀓𑀸𑀦𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺, 𑀓𑀺𑀢𑁆𑀢𑀓𑀸 𑀧𑀜𑁆𑀳𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺, 𑀢𑁂 𑀤𑁆𑀯𑁂 𑀧𑀜𑁆𑀳𑀸’’𑀢𑀺 𑀯𑀼𑀢𑁆𑀢𑀁. ‘‘𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀸𑀬 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀬𑀤𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀲𑀺𑀬𑀼𑀁, 𑀏𑀯𑀁 𑀲𑀦𑁆𑀢𑁂𑀲𑀼 𑀧𑀜𑁆𑀳𑀸𑀧𑀺 𑀘𑀢𑀼𑀩𑁆𑀩𑀺𑀥𑀸 𑀲𑀺𑀬𑀼𑀁, 𑀓𑀲𑁆𑀫𑀸 ‘𑀤𑁆𑀯𑁂’𑀢𑀺 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀓𑀲𑁆𑀫𑀸? 𑀇𑀫𑁂 𑀳𑀺 𑀩𑀳𑁆𑀯𑀸𑀥𑀺𑀯𑀘𑀦𑁂𑀦 𑀧𑀼𑀘𑁆𑀙𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑁂 𑀏𑀢𑀸𑀬 𑀕𑀸𑀣𑀸𑀬 𑀕𑀳𑀺𑀢𑀸 𑀅𑀢𑁆𑀣𑀸 𑀩𑀳𑁆𑀯𑀸𑀥𑀺𑀯𑀘𑀦𑁂𑀦 𑀧𑀼𑀘𑁆𑀙𑀺𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀯𑀦𑁆𑀢𑀺…𑀧𑁂… 𑀧𑀺𑀥𑀻𑀬𑀭𑁂𑀢𑀺 𑀩𑀳𑀽𑀦𑀺 𑀯𑀘𑀦𑀸𑀦𑀺 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀸 𑀲𑀁𑀯𑀭𑀲𑀗𑁆𑀔𑀸𑀢𑀸 𑀲𑀢𑀺 𑀘𑁂𑀯 𑀧𑀺𑀤𑀳𑀦𑀳𑁂𑀢𑀼𑀪𑀽𑀢𑀸 𑀧𑀜𑁆𑀜𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀸𑀯 𑀧𑀼𑀘𑁆𑀙𑀺𑀢𑀸, 𑀢𑀲𑁆𑀫𑀸 𑀅𑀢𑁆𑀣𑀯𑀲𑁂𑀦 𑀤𑁆𑀯𑁂 𑀧𑀜𑁆𑀳𑀸 𑀯𑀼𑀢𑁆𑀢𑀸 𑀯𑀸’’𑀢𑀺. ‘‘𑀧𑀼𑀘𑁆𑀙𑀸𑀬 𑀤𑀼𑀯𑀺𑀥𑀢𑁆𑀣𑀯𑀺𑀲𑀬𑀢𑀸 𑀓𑀣𑀁 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀧𑀼𑀘𑁆𑀙𑀸𑀬 𑀤𑀼𑀯𑀺𑀥𑀢𑁆𑀣𑀯𑀺𑀲𑀬𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀏𑀯𑀁 𑀲𑀫𑀸𑀧𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀁 𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀇𑀫𑀸𑀳𑀺 𑀤𑀼𑀕𑁆𑀕𑀢𑀺𑀳𑁂𑀢𑀼𑀪𑀽𑀢𑀸𑀳𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀲𑀗𑁆𑀔𑀸𑀢𑀸𑀳𑀺 𑀆𑀧𑀤𑀸𑀳𑀺 𑀯𑀸, 𑀧𑀸𑀡𑀯𑀥𑀸𑀤𑀻𑀳𑀺 𑀆𑀧𑀤𑀸𑀳𑀺 𑀯𑀸, 𑀲𑀫𑀁 𑀲𑀳, 𑀲𑀩𑁆𑀩𑀣𑀸 𑀯𑀸 𑀅𑀬𑀁 𑀲𑀢𑁆𑀢𑀮𑁄𑀓𑁄 𑀆𑀧𑀦𑁆𑀦𑁄 𑀅𑀚𑁆𑀛𑁄𑀢𑁆𑀣𑀝𑁄, 𑀏𑀯𑀁 𑀅𑀚𑁆𑀛𑁄𑀢𑁆𑀣𑀝𑀲𑁆𑀲 𑀯𑀸 𑀲𑀫𑀸𑀧𑀦𑁆𑀦𑀲𑁆𑀲. 𑀏𑀯𑀁 𑀲𑀁𑀓𑀺𑀮𑀺𑀝𑁆𑀞𑀲𑁆𑀲𑀸𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀬𑁄 𑀯𑀸 𑀧𑀸𑀡𑀯𑀥𑀸𑀤𑀻𑀦𑀺 𑀆𑀕𑀫𑁆𑀫 𑀧𑀯𑀢𑁆𑀢𑁂𑀳𑀺 𑀤𑀲𑀳𑀺 𑀓𑀺𑀮𑁂𑀲𑀯𑀢𑁆𑀣𑀽𑀳𑀺 𑀘 𑀅𑀬𑀁 𑀲𑀢𑁆𑀢𑀮𑁄𑀓𑁄 𑀲𑀁𑀓𑀺𑀮𑀺𑀝𑁆𑀞𑁄, 𑀏𑀯𑀁 𑀲𑀁𑀓𑀺𑀮𑀺𑀝𑁆𑀞𑀲𑁆𑀲 𑀘 𑀮𑁄𑀓𑀲𑁆𑀲𑀸𑀢𑀺 𑀲𑀫𑀸𑀧𑀦𑁆𑀦𑀲𑁆𑀲 𑀅𑀚𑁆𑀛𑁄𑀢𑁆𑀣𑀝𑀲𑁆𑀲 𑀮𑁄𑀓𑀲𑁆𑀲 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀓𑀺𑀁 𑀓𑀢𑀫𑀁 𑀥𑀫𑁆𑀫𑀚𑀸𑀢𑀁 𑀪𑀯𑁂. 𑀇𑀢𑀺 𑀏𑀯𑀜𑁆𑀳𑀺 𑀲𑀘𑁆𑀘𑀁 𑀅𑀚𑀺𑀢𑀲𑀼𑀢𑁆𑀢𑁂 𑀆𑀳𑀸𑀢𑀺 𑀯𑀺𑀢𑁆𑀣𑀸𑀭𑀢𑁆𑀣𑁄, 𑀧𑀼𑀘𑁆𑀙𑀸𑀬 𑀤𑀼𑀯𑀺𑀥𑀢𑁆𑀣𑀯𑀺𑀲𑀬𑀢𑀸 𑀜𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀓𑀺𑀁 𑀦𑀼 𑀲𑁄𑀢𑀸 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀲𑀩𑁆𑀩𑀥𑀺 𑀲𑀯𑀦𑁆𑀢𑀺, 𑀉𑀤𑀸𑀳𑀼, 𑀏𑀓𑀘𑁆𑀘𑀲𑁆𑀲𑁂𑀯𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺, 𑀅𑀲𑀫𑀸𑀳𑀺𑀢𑀲𑁆𑀲 𑀲𑀯𑀦𑁆𑀢𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀧𑁆𑀧𑀫𑀸𑀤𑀩𑀳𑀼𑀮𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀧𑁆𑀧𑀫𑀸𑀤𑀩𑀳𑀼𑀮𑀢𑁆𑀢𑀸 𑀭𑀽𑀧𑀸𑀤𑀻𑀲𑀼 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲𑁂𑀯 𑀲𑁄𑀢𑀸 𑀲𑀯𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀦 𑀲𑀫𑀸𑀳𑀺𑀢𑀲𑁆𑀲 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀧𑁆𑀧𑀫𑀸𑀤𑀯𑀺𑀭𑀳𑀺𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄. ‘‘𑀓𑀢𑀫𑀸 𑀅𑀪𑀺𑀚𑁆𑀛𑀸, 𑀓𑀢𑀫𑁄 𑀩𑁆𑀬𑀸𑀧𑀸𑀤𑁄, 𑀓𑀢𑀫𑁄 𑀧𑀫𑀸𑀤𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀸 𑀅𑀪𑀺𑀚𑁆𑀛𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀧𑁆𑀧𑀫𑀸𑀤𑁂𑀲𑀼. 𑀬𑀸 𑀅𑀪𑀺𑀚𑁆𑀛𑀸, 𑀅𑀬𑀁 𑀮𑁄𑀪𑁄, 𑀦 𑀅𑀪𑀺𑀚𑁆𑀛𑀸𑀬𑀦𑀫𑀢𑁆𑀢𑀁. 𑀮𑁄𑀪𑁄 𑀘 𑀅𑀓𑀼𑀲𑀮𑀫𑀽𑀮𑀁, 𑀦 𑀮𑀼𑀩𑁆𑀪𑀦𑀫𑀢𑁆𑀢𑀁. 𑀬𑁄 𑀩𑁆𑀬𑀸𑀧𑀸𑀤𑁄, 𑀅𑀬𑀁 𑀤𑁄𑀲𑁄, 𑀦 𑀩𑁆𑀬𑀸𑀧𑀚𑁆𑀚𑀦𑀫𑀢𑁆𑀢𑀁. 𑀤𑁄𑀲𑁄 𑀘 𑀅𑀓𑀼𑀲𑀮𑀫𑀽𑀮𑀁, 𑀦 𑀤𑀽𑀲𑀦𑀫𑀢𑁆𑀢𑀁. 𑀬𑁄 𑀧𑀫𑀸𑀤𑁄, 𑀅𑀬𑀁 𑀫𑁄𑀳𑁄, 𑀦 𑀲𑀢𑀺𑀯𑀺𑀧𑁆𑀧𑀯𑀸𑀲𑀫𑀢𑁆𑀢𑀁. 𑀫𑁄𑀳𑁄 𑀘 𑀅𑀓𑀼𑀲𑀮𑀫𑀽𑀮𑀁, 𑀦 𑀫𑀽𑀳𑀦𑀫𑀢𑁆𑀢𑀁. 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀪𑀺𑀚𑁆𑀛𑀸𑀤𑀻𑀦𑀁 𑀅𑀓𑀼𑀲𑀮𑀫𑀽𑀮𑀢𑁆𑀢𑀸 𑀬𑀲𑁆𑀲 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀧𑁆𑀧𑀫𑀸𑀤𑀩𑀳𑀼𑀮𑀲𑁆𑀲 𑀅𑀲𑀫𑀸𑀳𑀺𑀢𑀲𑁆𑀲 𑀙𑀲𑀼 𑀭𑀽𑀧𑀸𑀤𑀻𑀲𑀼 𑀆𑀬𑀢𑀦𑁂𑀲𑀼 𑀢𑀡𑁆𑀳𑀸 𑀲𑀯𑀦𑁆𑀢𑀺.

‘‘𑀓𑀢𑀺𑀯𑀺𑀥𑀸 𑀲𑀸 𑀢𑀡𑁆𑀳𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀁. ‘‘𑀙𑀦𑁆𑀦𑀁 𑀭𑀽𑀧𑀢𑀡𑁆𑀳𑀸𑀤𑀻𑀦𑀁 𑀙𑀲𑀼 𑀭𑀽𑀧𑀸𑀤𑀺𑀆𑀬𑀢𑀦𑁂𑀲𑀼 𑀲𑀯𑀦𑀁 𑀓𑁂𑀦 𑀘 𑀯𑀘𑀦𑁂𑀦 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀯𑀢𑀻𑀢𑀺 𑀘 𑀔𑁄, 𑀪𑀺𑀓𑁆𑀔𑀯𑁂…𑀧𑁂… 𑀧𑀝𑀺𑀳𑀜𑁆𑀜𑀢𑀻’’𑀢𑀺 𑀬𑀁 𑀯𑀘𑀦𑀁 𑀪𑀕𑀯𑀸 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀆𑀳, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀯𑀼𑀢𑁆𑀢𑀦𑀬𑁂𑀦 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀢𑀡𑁆𑀳𑀸𑀤𑀻𑀦𑀁 𑀙𑀦𑁆𑀦𑀁 𑀲𑁄𑀢𑀸𑀦𑀁 𑀤𑁆𑀯𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸 𑀘𑀓𑁆𑀔𑀸𑀤𑀬𑁄 𑀦𑀺𑀲𑁆𑀲𑀺𑀢𑀽𑀧𑀘𑀸𑀭𑀯𑀲𑁂𑀦 𑀲𑀬𑀁 𑀲𑀯𑀦𑁆𑀢𑁄 𑀯𑀺𑀬 𑀪𑀕𑀯𑀢𑀸 𑀯𑀼𑀢𑁆𑀢𑀸. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑀸 𑀲𑀩𑁆𑀩𑀲𑁆𑀫𑀸 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀢𑁄 𑀘 𑀲𑀯𑀢𑀺 𑀧𑀯𑀢𑁆𑀢𑀢𑀺. 𑀲𑀩𑁆𑀩𑀣𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀢𑀡𑁆𑀳𑀸𑀬𑀦𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀉𑀦𑁆𑀦𑀫𑀦𑀸𑀤𑀺𑀧𑁆𑀧𑀓𑀸𑀭𑁂𑀦 𑀲𑀯𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. ‘‘𑀓𑀲𑁆𑀫𑀸 𑀲𑀩𑁆𑀩𑀲𑁆𑀫𑀸 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀢𑁄 𑀘 𑀲𑀯𑀢𑀺 𑀧𑀯𑀢𑁆𑀢𑀢𑀺, 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀢𑀡𑁆𑀳𑀸𑀬𑀦𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀉𑀦𑁆𑀦𑀫𑀦𑀸𑀤𑀺𑀧𑁆𑀧𑀓𑀸𑀭𑁂𑀦 𑀲𑀯𑀦𑀪𑀸𑀯𑁄 𑀯𑀺𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦𑀸𑀢𑀺 𑀅𑀲𑀫𑀸𑀳𑀺𑀢𑀲𑁆𑀲 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀢𑁄 𑀘 𑀢𑀡𑁆𑀳𑀸𑀬𑀦𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀉𑀦𑁆𑀦𑀫𑀦𑀸𑀓𑀸𑀭𑁂𑀦 𑀢𑀡𑁆𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀧𑀯𑀢𑁆𑀢𑀚𑀸𑀦𑀦𑀓𑁄 𑀪𑀕𑀯𑀸 ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸’’𑀢𑀺 𑀆𑀳.

‘‘𑀲𑁄𑀢𑀸𑀦𑀁 ‘𑀓𑀺𑀁 𑀦𑀺𑀯𑀸𑀭𑀡’𑀦𑁆𑀢𑀺 𑀇𑀫𑀺𑀦𑀸 𑀓𑀺𑀁 𑀧𑀼𑀘𑁆𑀙𑀢𑀺? 𑀲𑁄𑀢𑀸𑀦𑀁 𑀅𑀦𑀼𑀲𑀬𑀧𑁆𑀧𑀳𑀸𑀦𑀁 𑀧𑀼𑀘𑁆𑀙𑀢𑀺 𑀓𑀺𑀁? 𑀉𑀤𑀸𑀳𑀼 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀁 𑀧𑀼𑀘𑁆𑀙𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀖𑀸𑀢𑀁 𑀧𑀼𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀖𑀸𑀢𑀁 𑀯𑁄𑀤𑀸𑀦𑀁, 𑀉𑀤𑀸𑀳𑀼 𑀯𑀼𑀝𑁆𑀞𑀸𑀦𑀁 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀤𑀁 𑀯𑁄𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, ‘𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂’𑀢𑀺 𑀇𑀫𑀺𑀦𑀸 𑀓𑀺𑀁 𑀧𑀼𑀘𑁆𑀙𑀢𑀺? 𑀲𑁄𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺 𑀓𑀺𑀁? 𑀉𑀤𑀸𑀳𑀼 𑀯𑀻𑀢𑀺𑀓𑁆𑀓𑀫𑀦𑀁, 𑀲𑀫𑀼𑀕𑁆𑀖𑀸𑀝𑀁 𑀯𑀸 𑀧𑀼𑀘𑁆𑀙𑀢𑀺 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀲𑁄𑀢𑀸𑀦𑀁…𑀧𑁂… 𑀧𑀺𑀥𑀻𑀬𑀭𑁂𑀢𑀺 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀝𑀁 𑀧𑀼𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀝𑀁 𑀯𑁄𑀤𑀸𑀦𑀁 𑀓𑀺𑀁, 𑀉𑀤𑀸𑀳𑀼 𑀯𑀼𑀝𑁆𑀞𑀸𑀦𑀁 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀤𑀁 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸’’𑀢𑀺𑀆𑀤𑀺𑀧𑀼𑀘𑁆𑀙𑀸𑀯𑀺𑀘𑀬𑁄 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄; 𑀢𑀸𑀬 𑀧𑀼𑀘𑁆𑀙𑀸𑀬 ‘‘𑀓𑀢𑀫𑁄 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀘𑁆𑀙𑀸𑀬𑀁 𑁋

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, (𑀅𑀚𑀺𑀢𑀸𑀢𑀺 𑀪𑀕𑀯𑀸,)

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺. (𑀲𑀼. 𑀦𑀺. 𑁧𑁦𑁪𑁧 𑀘𑀽𑀴𑀦𑀺. 𑀯𑀢𑁆𑀣𑀼𑀕𑀸𑀣𑀸 𑁬𑁦, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪) 𑁋

𑀕𑀸𑀣𑀸 𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀲𑁆𑀲𑀁 𑀕𑀸𑀣𑀸𑀬𑀁 𑀅𑀚𑀺𑀢 𑀮𑁄𑀓𑀲𑁆𑀫𑀺𑀁 𑀬𑀸𑀦𑀺 𑀲𑁄𑀢𑀸𑀦𑀺 𑀲𑀯𑀦𑁆𑀢𑀺, 𑀢𑁂𑀲𑀁 𑀲𑁄𑀢𑀸𑀦𑀁 𑀬𑀁 𑀦𑀺𑀯𑀸𑀭𑀡𑀁, 𑀲𑀸 𑀲𑀢𑀺 𑀳𑁄𑀢𑀺; 𑀢𑀁 𑀲𑀢𑀺𑀁 𑀲𑁄𑀢𑀸𑀦𑀁 𑀲𑀁𑀯𑀭𑀦𑁆𑀢𑀺 𑀅𑀳𑀁 𑀩𑁆𑀭𑀽𑀫𑀺; 𑀏𑀢𑁂 𑀲𑁄𑀢𑀸 𑀧𑀜𑁆𑀜𑀸𑀬 𑀧𑀺𑀥𑀻𑀬𑀭𑁂𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀢𑁆𑀣 𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺. 𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. 𑀧𑀺𑀥𑀻𑀬𑀭𑁂𑀢𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺.

‘‘𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻’’𑀢𑀺 𑀪𑀕𑀯𑀸 𑀆𑀳 𑁋 ‘‘𑀬𑀸𑀬 𑀓𑀸𑀬𑀘𑀺 𑀲𑀢𑀺𑀬𑀸 𑀲𑁄𑀢𑀸𑀦𑀁 𑀲𑀁𑀯𑀭𑀡𑀓𑀺𑀘𑁆𑀘𑀁 𑀲𑀺𑀤𑁆𑀥𑀁 𑀓𑀺𑀁, 𑀯𑀺𑀲𑀺𑀝𑁆𑀞𑀸𑀬 𑀲𑀢𑀺𑀬𑀸 𑀲𑁄𑀢𑀸𑀦𑀁 𑀲𑀁𑀯𑀭𑀡𑀓𑀺𑀘𑁆𑀘𑀁 𑀲𑀺𑀤𑁆𑀥𑀁 𑀓𑀺𑀁, 𑀓𑀢𑀫𑀸𑀬 𑀲𑀢𑀺𑀬𑀸 𑀲𑁄𑀢𑀸𑀦𑀁 𑀲𑀁𑀯𑀭𑀡𑀓𑀺𑀘𑁆𑀘𑀁 𑀲𑀺𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀓𑀸𑀬𑀕𑀢𑀸𑀬 𑀲𑀢𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸𑀢𑀺 𑀭𑀽𑀧𑀓𑀸𑀬𑁂 𑀕𑀢𑀁 𑀓𑁂𑀲𑀸𑀤𑀺𑀓𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀢𑀺𑀬𑀸. 𑀪𑀸𑀯𑀺𑀢𑀸𑀬𑀸𑀢𑀺 𑀓𑀸𑀬𑀕𑀢𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀦𑀺𑀩𑁆𑀩𑀺𑀦𑁆𑀤𑀦𑀢𑁄 𑀯𑀺𑀭𑀚𑁆𑀚𑀦𑀢𑁄 𑀦𑀺𑀭𑁄𑀥𑀦𑀢𑁄 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀢𑁄 𑀅𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀪𑀸𑀯𑀺𑀢𑀸𑀬. 𑀏𑀯𑀜𑁆𑀳𑀺 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺; 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺; 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺; 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺; 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺; 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺; 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀻𑀢𑀺. 𑀩𑀳𑀼𑀮𑀻𑀓𑀢𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀤𑀺𑀯𑀲𑀫𑁆𑀧𑀺 𑀫𑀸𑀲𑀫𑁆𑀧𑀺 𑀲𑀁𑀯𑀘𑁆𑀙𑀭𑀫𑁆𑀧𑀺 𑀲𑀢𑁆𑀢𑀲𑀁𑀯𑀘𑁆𑀙𑀭𑀫𑁆𑀧𑀺 𑀩𑀳𑀼𑀮𑀻𑀓𑀢𑀸𑀬. 𑀘𑀓𑁆𑀔𑀼𑀦𑁆𑀢𑀺 𑀅𑀪𑀺𑀚𑁆𑀛𑀸𑀤𑀺𑀧𑀯𑀢𑁆𑀢𑀺𑀤𑁆𑀯𑀸𑀭𑀪𑀸𑀯𑁂𑀦 𑀞𑀺𑀢𑀁 𑀘𑀓𑁆𑀔𑀼𑀁, 𑀦𑀺𑀕𑁆𑀕𑀳𑀺𑀢𑀸𑀕𑀫𑀁 𑀤𑀝𑁆𑀞𑀩𑁆𑀩𑀁. 𑀦𑀸𑀯𑀺𑀜𑁆𑀙𑀢𑀻𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀅𑀪𑀺𑀚𑁆𑀛𑀸𑀤𑀺𑀲𑀳𑀺𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁, 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀯𑀸 𑀦𑀸𑀓𑀟𑁆𑀠𑀢𑀺, 𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀼 𑀦𑀸𑀯𑀺𑀜𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀅𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀼 𑀦 𑀧𑀝𑀺𑀳𑀜𑁆𑀜𑀢𑀺. 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀲𑁄𑀢𑀁 𑀦𑀸𑀯𑀺𑀜𑁆𑀙𑀢𑀺. 𑀫𑀦𑀸𑀧𑀺𑀓𑁂𑀲𑀼 𑀲𑀤𑁆𑀤𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀓𑁂𑀲𑀼 𑀲𑀤𑁆𑀤𑁂𑀲𑀼 𑀦 𑀧𑀝𑀺𑀳𑀜𑁆𑀜𑀢𑀻𑀢𑀺 𑀬𑁄𑀚𑀦𑀸 𑀬𑀣𑀸𑀲𑀫𑁆𑀪𑀯𑀢𑁄 𑀓𑀸𑀢𑀩𑁆𑀩𑀸.

‘‘𑀓𑁂𑀦 𑀓𑀸𑀭𑀡𑁂𑀦 𑀦𑀸𑀯𑀺𑀜𑁆𑀙𑀢𑀺 𑀧𑀝𑀺𑀳𑀜𑁆𑀜𑀢𑀻’’𑀢𑀺 𑀧𑀼𑀘𑁆𑀙𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀢𑁆𑀢𑀸 𑀦𑀸𑀯𑀺𑀜𑁆𑀙𑀢𑀺 𑀦 𑀧𑀝𑀺𑀳𑀜𑁆𑀜𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. ‘‘𑀓𑁂𑀦𑀸𑀭𑀓𑁆𑀔𑁂𑀦 𑀢𑁂 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀸’’𑀢𑀺 𑀧𑀼𑀘𑁆𑀙𑀢𑀺, 𑀲𑀢𑀺𑀆𑀭𑀓𑁆𑀔𑁂𑀦 𑀢𑁂 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. ‘‘𑀲𑀢𑀺𑀆𑀭𑀓𑁆𑀔𑁂𑀦 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀪𑀸𑀯𑁄 𑀓𑁂𑀦 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦𑀸𑀢𑀺 𑀢𑀲𑁆𑀫𑀸 𑀲𑀢𑀺𑀆𑀭𑀓𑁆𑀔𑁂𑀦 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀢𑁆𑀢𑀸 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀚𑀸𑀦𑀦𑀓𑁄 𑀪𑀕𑀯𑀸 ‘‘𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡’’𑀦𑁆𑀢𑀺 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀲𑀢𑀺𑀆𑀭𑀓𑁆𑀔𑁂𑀦 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀪𑀸𑀯𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀧𑀼𑀩𑁆𑀩𑀪𑀸𑀕𑁂 𑀧𑀜𑁆𑀜𑀸 𑀲𑀢𑁆𑀬𑀸𑀦𑀼𑀕𑀸𑀢𑀺 𑀓𑀺𑀘𑁆𑀘𑀫𑁂𑀯𑁂𑀢𑁆𑀣 𑀅𑀥𑀺𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡’’𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀯𑀺𑀢𑁆𑀣𑀸𑀭𑀢𑁆𑀣𑁄 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀯𑀺𑀢𑁆𑀣𑀸𑀭𑀢𑁆𑀣𑁄 ‘‘𑀓𑀣𑀁 𑀅𑀫𑁆𑀳𑁂𑀳𑀺 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀯𑀺𑀢𑁆𑀣𑀸𑀭𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀜𑀸𑀬 𑀅𑀦𑀼𑀲𑀬𑀸 𑀧𑀳𑀻𑀬𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. 𑀅𑀦𑀼𑀲𑀬𑀸𑀢𑀺 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀬𑁄. 𑀧𑀳𑀻𑀬𑀦𑁆𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀅𑀦𑀼𑀲𑀬𑁂𑀲𑀼 𑀧𑀜𑁆𑀜𑀸𑀬 𑀧𑀳𑀻𑀦𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀸𑀧𑀺 𑀅𑀢𑁆𑀣𑀢𑁄 𑀧𑀳𑀻𑀬𑀦𑁆𑀢𑀺. 𑀓𑀺𑀲𑁆𑀲 𑀧𑀳𑀻𑀦𑀢𑁆𑀢𑀸 ‘‘𑀧𑀳𑀻𑀬𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺? 𑀅𑀦𑀼𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀧𑀭𑀺𑀬𑀼𑀝𑁆𑀞𑀸𑀦𑀸 𑀧𑀳𑀻𑀬𑀦𑁆𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺.

‘‘𑀢𑀁 𑀅𑀦𑀼𑀲𑀬𑀧𑁆𑀧𑀳𑀸𑀦𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀓𑀺𑀁 𑀯𑀺𑀬 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀁 𑀬𑀣𑀸 𑀔𑀦𑁆𑀥𑀯𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀦𑁆𑀥𑀯𑀦𑁆𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀓𑀼𑀤𑀸𑀮𑀸𑀤𑀺𑀦𑀸 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀅𑀦𑀯𑀲𑁂𑀲𑀫𑀽𑀮𑀼𑀤𑁆𑀥𑀭𑀡𑁂 𑀓𑀢𑁂 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀗𑁆𑀓𑀼𑀭𑀲𑀦𑁆𑀢𑀢𑀺𑀧𑀺 𑀓𑀼𑀤𑀸𑀮𑀸𑀤𑀺𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸𑀯 𑀪𑀯𑀢𑀺 𑀬𑀣𑀸, 𑀏𑀯𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀦𑀼𑀲𑀬𑁂𑀲𑀼 𑀧𑀳𑀻𑀦𑁂𑀲𑀼 𑀅𑀦𑀼𑀲𑀬𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀲𑀦𑁆𑀢𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀸 𑀧𑀺𑀤𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀪𑀯𑀢𑀺. 𑀓𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸 𑀪𑀯𑀢𑀺? 𑀧𑀜𑁆𑀜𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀸 𑀪𑀯𑀢𑀻𑀢𑀺 𑀅𑀢𑁆𑀣𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. ‘‘𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀯𑁄 𑀓𑀣𑀁 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀯𑀘𑀦𑀢𑁄 𑀅𑀦𑀼𑀲𑀬𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀲𑀦𑁆𑀢𑀢𑀺𑀬𑀸 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀯𑁄 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀫𑁂𑀲𑀼 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀲𑁄𑀢𑀸𑀦𑀁 𑀲𑀁𑀯𑀭𑀁, 𑀧𑀺𑀥𑀸𑀦𑀜𑁆𑀘 𑀅𑀚𑀸𑀦𑀦𑁆𑀢𑁂𑀦 𑀯𑀸 𑀲𑀁𑀲𑀬𑀺𑀢𑁂𑀦 𑀯𑀸 𑀲𑀁𑀯𑀭𑀧𑀺𑀥𑀸𑀦𑀸𑀦𑀁 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸𑀢𑀺 𑀧𑀼𑀘𑁆𑀙𑀸𑀯𑀺𑀘𑀬𑁄 𑀘𑁂𑀯 𑀲𑀢𑀺𑀧𑀜𑁆𑀜𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑁆𑀢𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁂𑀲𑀼 𑀘 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀓𑁄 𑀧𑀜𑁆𑀳𑁄 𑀦𑀻𑀯𑀭𑀡𑀯𑀺𑀘𑀺𑀓𑀺𑀘𑁆𑀙𑀸𑀧𑀫𑀸𑀤𑀚𑀧𑁆𑀧𑀸𑀦𑀁 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀧𑀺 𑀮𑁄𑀓𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀏𑀓𑁄 𑀧𑀜𑁆𑀳𑁄𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀲𑀢𑀺 ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸’’𑀢𑀺𑀆𑀤𑀺𑀓𑁄𑀧𑀺 𑀧𑀜𑁆𑀳𑁄 𑀲𑀁𑀯𑀭𑀧𑀺𑀥𑀸𑀦𑀸𑀦𑀁 𑀯𑀲𑁂𑀦 𑀤𑀼𑀯𑀺𑀥𑁄𑀧𑀺 𑀏𑀓𑀢𑁆𑀣𑀯𑀲𑁂𑀦 𑀕𑀳𑁂𑀢𑁆𑀯𑀸 𑀏𑀓𑀸𑀥𑀺𑀝𑁆𑀞𑀸𑀦𑀯𑀲𑁂𑀦 ‘‘𑀏𑀓𑁄 𑀧𑀜𑁆𑀳𑁄’’𑀢𑀺 𑀯𑀢𑁆𑀢𑀩𑁆𑀩𑁄, 𑀲𑁄𑀢𑀸𑀦𑀁 𑀩𑀳𑀼𑀪𑀸𑀯𑀢𑁄 𑀯𑀸 ‘‘𑀩𑀳𑀼𑀧𑀜𑁆𑀳𑁄’’𑀢𑀺 𑀯𑀢𑁆𑀢𑀩𑁆𑀩𑁄; 𑀢𑀣𑀸 𑀧𑀦 𑀅𑀯𑀢𑁆𑀯𑀸 𑀲𑁄𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀲𑀁𑀯𑀭𑀧𑀺𑀥𑀸𑀦𑀸𑀦𑀁 𑀯𑀲𑁂𑀦 ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸’’𑀢𑀺𑀆𑀤𑀺𑀫𑁆𑀳𑀺 ‘‘𑀤𑁆𑀯𑁂 𑀧𑀜𑁆𑀳𑀸’’𑀢𑀺 𑀯𑀼𑀢𑁆𑀢𑀸. 𑀢𑀤𑀦𑀼𑀲𑀸𑀭𑁂𑀦 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀫𑁆𑀳𑀺𑀧𑀺 𑀮𑁄𑀓𑀁 𑀅𑀦𑀸𑀫𑀲𑀺𑀢𑁆𑀯𑀸 𑀦𑀻𑀯𑀭𑀡𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀲𑁂𑀦 ‘‘𑀘𑀢𑁆𑀢𑀸𑀭𑁄 𑀧𑀜𑁆𑀳𑀸’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀸𑀢𑀺 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄𑀢𑀺 𑀦𑀬𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁.

𑀤𑁂𑀲𑀦𑀸𑀓𑀸𑀮𑁂 𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀅𑀦𑀼𑀲𑀦𑁆𑀥𑀺𑀫𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸 𑀭𑀘𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀘𑁂𑀯 𑀧𑀜𑁆𑀳𑀁 𑀅𑀝𑁆𑀞𑀧𑁂𑀢𑁆𑀯𑀸, 𑀧𑀝𑀺𑀜𑁆𑀜𑀜𑁆𑀘 𑀅𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀘 𑀯𑀺𑀘𑀬𑀳𑀸𑀭𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀤𑁂𑀲𑀦𑀸𑀓𑀸𑀮𑁂 𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀘𑁂𑀯 𑀢𑀁 𑀧𑀜𑁆𑀳𑀁 𑀞𑀧𑁂𑀢𑁆𑀯𑀸, 𑀧𑀝𑀺𑀜𑁆𑀜𑀜𑁆𑀘 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀘 𑀬𑁄 𑀯𑀺𑀘𑀬𑁄 𑀳𑀸𑀭𑁄 𑀯𑀺𑀪𑀢𑁆𑀢𑁄, 𑀲𑁄 𑀯𑀺𑀘𑀬𑀳𑀸𑀭𑁄 𑀓𑀣𑀁 𑀅𑀫𑁆𑀳𑁂𑀳𑀺 𑀯𑀺𑀜𑁆𑀜𑀸𑀬𑀢𑀺, 𑀅𑀫𑁆𑀳𑀸𑀓𑀁 𑀯𑀺𑀜𑁆𑀜𑀸𑀧𑀦𑀢𑁆𑀣𑀸𑀬 𑀢𑀲𑁆𑀫𑀺𑀁 𑀯𑀺𑀘𑀬𑀁 𑀯𑀺𑀪𑀚𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀢𑁂𑀲𑀼 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀦𑀺 𑀲𑁄𑀢𑀸𑀦𑀻’’𑀢𑀺𑀆𑀤𑀺𑀕𑀸𑀣𑀸𑀬 𑀯𑀺𑀘𑀬𑀸𑀓𑀸𑀭𑀤𑀲𑁆𑀲𑀦𑀸𑀦𑀦𑁆𑀢𑀭𑀁 ‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀕𑀸𑀣𑀸𑀢𑁆𑀣𑁄 𑀢𑀸𑀯 𑀯𑀺𑀜𑁆𑀜𑀸𑀢𑀩𑁆𑀩𑁄 𑁋 𑀬𑀸𑀬 𑀧𑀜𑁆𑀜𑀸𑀬 𑀅𑀦𑀼𑀲𑀬𑀧𑁆𑀧𑀳𑀸𑀦𑁂𑀦 𑀲𑁄𑀢𑀦𑀺𑀭𑀼𑀚𑁆𑀛𑀦𑀁 𑀯𑀼𑀢𑁆𑀢𑀁, 𑀬𑀸𑀬 𑀲𑀢𑀺𑀬𑀸 𑀘 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑁂𑀦 𑀲𑁄𑀢𑀦𑀺𑀭𑀼𑀚𑁆𑀛𑀦𑀁 𑀯𑀼𑀢𑁆𑀢𑀁, 𑀲𑀸𑀬𑀁 𑀧𑀜𑁆𑀜𑀸 𑀘𑁂𑀯 𑀲𑀸𑀬𑀁 𑀲𑀢𑀺 𑀘 𑀢𑀸𑀳𑀺 𑀧𑀜𑁆𑀜𑀸𑀲𑀢𑀻𑀳𑀺 𑀅𑀲𑁂𑀲𑀁 𑀲𑀳𑀼𑀧𑁆𑀧𑀦𑁆𑀦𑀁 𑀦𑀸𑀫𑀜𑁆𑀘𑁂𑀯 𑀭𑀽𑀧𑀜𑁆𑀘, 𑀏𑀢𑀁 𑀲𑀩𑁆𑀩𑀁 𑀓𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑁂 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀫𑀸𑀭𑀺𑀲 𑀫𑁂 𑀫𑀬𑀸 𑀧𑀼𑀝𑁆𑀞𑁄 𑀢𑁆𑀯𑀁 𑀪𑀕𑀯𑀸 𑀫𑀬𑁆𑀳𑀁 𑀏𑀢𑀁 𑀦𑀺𑀭𑀼𑀚𑁆𑀛𑀦𑀁 𑀧𑀩𑁆𑀭𑀽𑀳𑀺, 𑀇𑀢𑀺 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀢𑀺.

𑀅𑀚𑀺𑀢 𑀢𑁆𑀯𑀁 𑀬𑀫𑁂𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀁 𑀦𑀺𑀭𑀼𑀚𑁆𑀛𑀦𑀁 𑀫𑀁 𑀅𑀧𑀼𑀘𑁆𑀙𑀺, 𑀅𑀳𑀁 𑀢𑁂 𑀢𑀯 𑀢𑀁 𑀦𑀺𑀭𑀼𑀚𑁆𑀛𑀦𑀁 𑀯𑀤𑀸𑀫𑀺. 𑀬𑀢𑁆𑀣 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂 𑀧𑀜𑁆𑀜𑀸𑀲𑀢𑀺𑀲𑀳𑀺𑀢𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀳 𑀏𑀓𑀢𑁄 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺, 𑀏𑀢𑁆𑀣 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂 𑀏𑀢𑀁 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀏𑀓𑀢𑁄 𑀏𑀓𑀓𑁆𑀔𑀡𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑀭𑀼𑀚𑁆𑀛𑀢𑀺, 𑀏𑀢𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀦𑀺𑀭𑁄𑀥𑁄 𑀦𑀸𑀢𑀺𑀯𑀢𑁆𑀢𑀢𑀺, 𑀢𑀁 𑀢𑀁 𑀦𑀸𑀫𑀭𑀽𑀧𑀦𑀺𑀭𑁄𑀥𑀁 𑀲𑁄 𑀲𑁄 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄 𑀦𑀸𑀢𑀺𑀯𑀢𑁆𑀢𑀢𑀻𑀢𑀺.

‘‘𑀢𑀲𑁆𑀫𑀺𑀁 𑀧𑀜𑁆𑀳𑁂 𑀅𑀬𑀁 𑀅𑀚𑀺𑀢𑁄 𑀓𑀺𑀁 𑀧𑀼𑀘𑁆𑀙𑀢𑀺? 𑀉𑀧𑀭𑀼𑀚𑁆𑀛𑀦𑀫𑁂𑀯 𑀧𑀼𑀘𑁆𑀙𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀁 𑀧𑀼𑀘𑁆𑀙𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁄 ‘‘𑀅𑀬𑀁 𑀧𑀜𑁆𑀳𑁂 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀦𑁆𑀢𑀺 𑀬𑁄 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀜𑁆𑀳𑀁 𑀅𑀧𑀼𑀘𑁆𑀙𑀻𑀢𑀺 𑀅𑀬𑀁 𑀅𑀚𑀺𑀢𑁄. 𑀧𑀜𑁆𑀳𑁂𑀢𑀺 ‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸’’𑀢𑀺𑀆𑀤𑀺𑀧𑀜𑁆𑀳𑁂. 𑀬𑀤𑀺 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀢𑀺, 𑀏𑀯𑀁 𑀲𑀢𑀺 ‘‘𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀧𑀼𑀘𑁆𑀙𑀦𑀁 𑀅𑀬𑀼𑀢𑁆𑀢𑀁 𑀪𑀯𑁂𑀬𑁆𑀬𑀸𑀢𑀺? 𑀦, 𑀅𑀦𑀼𑀲𑀦𑁆𑀥𑀻𑀬𑀢𑀺 𑀏𑀢𑁂𑀦 𑀉𑀧𑀦𑀺𑀭𑀼𑀚𑁆𑀛𑀦𑁂𑀦𑀸𑀢𑀺 𑀅𑀦𑀼𑀲𑀦𑁆𑀥𑀻𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄 𑀓𑀺𑀁…𑀧𑁂… 𑀦𑀺𑀩𑁆𑀩𑀸𑀦𑀥𑀸𑀢𑀼’’𑀦𑁆𑀢𑀺. 𑀅𑀦𑀼𑀲𑀦𑁆𑀥𑀺𑀧𑀼𑀘𑁆𑀙𑀦𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀧𑀺 𑀧𑀼𑀘𑁆𑀙𑀦𑀢𑁄 ‘‘𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀧𑀼𑀘𑁆𑀙𑀦𑀁 𑀬𑀼𑀢𑁆𑀢𑀫𑁂𑀯.

‘‘𑀬𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀧𑀼𑀘𑁆𑀙𑀺𑀢𑀸, 𑀢𑀁 𑀓𑀢𑀫𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀘𑁆𑀙𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀧𑀝𑀺𑀧𑀤𑀁 𑀯𑀺𑀲𑀬𑁂𑀦 𑀲𑀳 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀡𑀻 𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀗𑁆𑀔𑀢𑀸𑀦𑀻𑀢𑀺 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀳𑀺 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀤𑀼𑀓𑁆𑀔𑀸𑀤𑀻𑀦𑀺 𑀓𑀭𑀻𑀬𑀦𑁆𑀢𑀻𑀢𑀺 𑀲𑀗𑁆𑀔𑀢𑀸𑀦𑀺. 𑀦𑀺𑀭𑁄𑀥𑀥𑀫𑁆𑀫𑀸𑀦𑀻𑀢𑀺 𑀦𑀺𑀭𑀼𑀚𑁆𑀛𑀦𑀁 𑀦𑀺𑀭𑁄𑀥𑁄, 𑀥𑀫𑁆𑀫𑁄𑀧𑀺 𑀦𑀺𑀭𑁄𑀥𑀥𑀫𑁆𑀫𑁄𑀯, 𑀢𑀲𑁆𑀫𑀸 𑀦𑀺𑀭𑁄𑀥𑁄 𑀥𑀫𑁆𑀫𑁄 𑀲𑀪𑀸𑀯𑁄 𑀬𑁂𑀲𑀁 𑀤𑀼𑀓𑁆𑀔𑀸𑀤𑀻𑀦𑀦𑁆𑀢𑀺 𑀦𑀺𑀭𑁄𑀥𑀥𑀫𑁆𑀫𑀸𑀦𑀻𑀢𑀺 𑀅𑀢𑁆𑀣𑁄𑀯 𑀕𑀳𑁂𑀢𑀩𑁆𑀩𑁄. 𑀢𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀢𑀻𑀡𑀺 𑀤𑀼𑀓𑁆𑀔𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀺 𑀲𑀗𑁆𑀔𑀢𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, ‘‘𑀓𑀺𑀁 𑀦𑀺𑀭𑁄𑀥𑀲𑀘𑁆𑀘’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀦𑀺𑀭𑁄𑀥𑁄 𑀅𑀲𑀗𑁆𑀔𑀢𑁄’’𑀢𑀺 𑀯𑀼𑀢𑁆𑀢𑀁. 𑀇𑀥 ‘‘𑀦𑀺𑀭𑁄𑀥𑀥𑀫𑁆𑀫𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀳𑀺 𑀅𑀲𑀗𑁆𑀔𑀢𑀢𑁆𑀢𑀸 𑀅𑀲𑀗𑁆𑀔𑀢𑁄. 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀪𑀸𑀯𑀢𑁄 𑀅𑀦𑀺𑀭𑁄𑀥𑀥𑀫𑁆𑀫𑁄. ‘‘𑀧𑀳𑀸𑀬𑀓𑀧𑀳𑀸𑀢𑀩𑁆𑀩𑁂𑀲𑀼 𑀲𑀘𑁆𑀘𑁂𑀲𑀼 𑀓𑀢𑀫𑁂𑀦 𑀧𑀳𑀸𑀬𑀓𑁂𑀦 𑀓𑀢𑀫𑁄 𑀧𑀳𑀸𑀢𑀩𑁆𑀩𑁄, 𑀓𑀢𑀫𑀸𑀬 𑀪𑀽𑀫𑀺𑀬𑀸 𑀧𑀳𑀻𑀦𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀲𑀫𑀼𑀤𑀬𑁄 𑀤𑁆𑀯𑀻𑀲𑀼 𑀪𑀽𑀫𑀻𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑀻𑀲𑀼 𑀪𑀽𑀫𑀻𑀲𑀽𑀢𑀺 𑀤𑀲𑁆𑀲𑀦𑀪𑀸𑀯𑀦𑀸𑀪𑀽𑀫𑀻𑀲𑀼. 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀓𑀸𑀫𑀪𑀯𑀭𑀸𑀕𑁄. 𑀭𑀽𑀧𑀭𑀸𑀕𑁄𑀢𑀺 𑀭𑀽𑀧𑀪𑀯𑀭𑀸𑀕𑁄. 𑀅𑀭𑀽𑀧𑀭𑀸𑀕𑁄𑀢𑀺 𑀅𑀭𑀽𑀧𑀪𑀯𑀭𑀸𑀕𑁄. 𑀲𑀁𑀬𑁄𑀚𑀦𑀪𑁂𑀤𑀢𑁄 𑀤𑀲 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁧𑁨. 𑀧𑀳𑀸𑀢𑀩𑁆𑀩𑀲𑀁𑀬𑁄𑀚𑀦𑀸𑀦𑀺 𑀤𑀲𑁆𑀲𑀦𑀪𑀽𑀫𑀺𑀪𑀸𑀯𑀦𑀸𑀪𑀽𑀫𑀺𑀪𑁂𑀤𑁂𑀦 𑀯𑀺𑀪𑀢𑁆𑀢𑀸𑀦𑀺, 𑀅𑀫𑁆𑀳𑁂𑀳𑀺𑀧𑀺 𑀜𑀸𑀢𑀸𑀦𑀺, ‘‘𑀇𑀦𑁆𑀤𑁆𑀭𑀺𑀬𑀪𑁂𑀤𑀢𑁄 𑀓𑀣𑀁 𑀯𑀺𑀪𑀢𑁆𑀢𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑀢𑁆𑀣 𑀢𑀻𑀡𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀧𑀳𑀸𑀢𑀩𑁆𑀩𑀲𑀁𑀬𑁄𑀚𑀦𑁂𑀲𑀼 𑀓𑀢𑀫𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀓𑀢𑀫𑀁 𑀇𑀦𑁆𑀤𑁆𑀭𑀺𑀬𑀁 𑀅𑀢𑁆𑀢𑀦𑁄 𑀧𑀳𑀸𑀬𑀓𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀢𑀻𑀡𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀥𑀺𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀳𑀸𑀬𑀓𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀯𑀲𑁂𑀦. ‘‘𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑀁𑀬𑁄𑀚𑀦𑀸𑀦𑀁 𑀦𑀺𑀭𑀼𑀚𑁆𑀛𑀦𑀳𑁂𑀢𑀼 𑀳𑁄𑀢𑀼, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀓𑀺𑀲𑁆𑀲 𑀳𑁂𑀢𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀬𑁂𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑁂𑀦 𑀅𑀭𑀳𑀸 ‘‘𑀫𑁂 𑀚𑀸𑀢𑀺 𑀔𑀻𑀡𑀸’’𑀢𑀺 𑀏𑀯𑀁 𑀚𑀸𑀦𑀸𑀢𑀺, 𑀇𑀤𑀁 𑀚𑀸𑀦𑀦𑀳𑁂𑀢𑀼 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀔𑀬𑁂 𑀚𑀸𑀢𑀺𑀓𑁆𑀔𑀬𑁂 𑀅𑀭𑀳𑀢𑁆𑀢𑀨𑀮𑁂 𑀧𑀯𑀢𑁆𑀢𑀁 𑀜𑀸𑀡𑀁. 𑀬𑀁 𑀬𑁂𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑁂𑀦 𑀅𑀭𑀳𑀸 ‘‘𑀇𑀢𑁆𑀣𑀢𑁆𑀢𑀸𑀬 𑀅𑀧𑀭𑀁 𑀦 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺, 𑀇𑀤𑀁 𑀧𑀚𑀸𑀦𑀦𑀳𑁂𑀢𑀼 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀅𑀦𑀼𑀧𑁆𑀧𑀸𑀤𑁂 𑀧𑀦 𑀅𑀦𑀼𑀧𑁆𑀧𑀚𑁆𑀚𑀦𑁂 𑀅𑀭𑀳𑀢𑁆𑀢𑀨𑀮𑁂 𑀧𑀯𑀢𑁆𑀢𑀁 𑀜𑀸𑀡𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀚𑀸𑀦𑀦𑀳𑁂𑀢𑀼 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀦𑁆𑀤𑁆𑀭𑀺𑀬𑀜𑀸𑀡𑀸𑀦𑀺 𑀧𑀳𑀸𑀬𑀓𑀸𑀦𑀺 𑀓𑀢𑁆𑀯𑀸 𑀲𑀁𑀬𑁄𑀚𑀦𑀸𑀦𑀺 𑀦𑀺𑀭𑀼𑀚𑁆𑀛𑀦𑁆𑀢𑀺, ‘‘𑀢𑀸𑀦𑀺 𑀜𑀸𑀡𑀸𑀦𑀺 𑀓𑀤𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑀢𑁆𑀣 𑀬𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀸𑀧𑀼𑀡𑀦𑁆𑀢𑀲𑁆𑀲 𑀦𑀺𑀭𑀼𑀚𑁆𑀛𑀢𑀼, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀲𑁆𑀲 𑀦𑀺𑀭𑀼𑀚𑁆𑀛𑀢𑀼, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀓𑀤𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀜𑁆𑀘 𑀔𑀬𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑁂𑀢𑀺 𑀓𑀺𑀘𑁆𑀘𑀪𑁂𑀤𑁂𑀦 𑀤𑁆𑀯𑁂, 𑀲𑀪𑀸𑀯𑀢𑁄 𑀧𑀦 𑀏𑀓𑀸𑀯.

‘‘𑀧𑀚𑀸𑀦𑀦𑀓𑀺𑀘𑁆𑀘𑀫𑁆𑀧𑀺 𑀏𑀓𑀫𑁂𑀯, 𑀓𑀣𑀁 𑀤𑁆𑀯𑁂 𑀲𑀺𑀬𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀧𑀜𑁆𑀜𑀸𑀪𑁂𑀤𑁂𑀦 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀢𑀺 𑀬𑀸 𑀧𑀜𑁆𑀜𑀸 𑀧𑀼𑀩𑁆𑀩𑀕𑀸𑀣𑀸𑀬𑀁 𑀲𑁄𑀢𑀧𑀺𑀥𑀸𑀦𑀓𑀺𑀘𑁆𑀘𑁂𑀦 𑀯𑀼𑀢𑁆𑀢𑀸, 𑀲𑀸 𑀧𑀜𑁆𑀜𑀸 𑀧𑀓𑀸𑀭𑁂𑀳𑀺 𑀚𑀸𑀦𑀦𑀲𑀪𑀸𑀯𑁂𑀦 𑀧𑀜𑁆𑀜𑀸 𑀦𑀸𑀫. 𑀬𑀣𑀸𑀤𑀺𑀝𑁆𑀞𑀁 𑀆𑀭𑀫𑁆𑀫𑀡𑀁 𑀅𑀧𑀺𑀮𑀸𑀧𑀦𑀝𑁆𑀞𑁂𑀦 𑀑𑀕𑀸𑀳𑀦𑀝𑁆𑀞𑁂𑀦 𑀲𑀢𑀺 𑀦𑀸𑀫.

𑁧𑁩. ‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀦𑀸𑀫𑀭𑀽𑀧𑀜𑁆𑀘𑀸’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀓𑀣𑀁 𑀅𑀫𑁆𑀳𑁂𑀳𑀺 𑀜𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀦𑀸𑀫𑀭𑀽𑀧𑀁 𑀯𑀺𑀪𑀚𑀦𑁆𑀢𑁄 ‘‘𑀢𑀢𑁆𑀣 𑀬𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀪𑁂𑀤𑁂 𑀪𑀯𑀢𑁆𑀢𑀬𑁂. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀦𑀸𑀫𑀭𑀽𑀧𑀲𑀫𑀼𑀤𑀸𑀬𑁂. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀘𑀓𑁆𑀔𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑁆𑀢𑀁 𑀲𑀦𑁆𑀥𑀸𑀬 𑀦 𑀯𑀼𑀢𑁆𑀢𑀁, 𑀧𑀘𑀼𑀭𑀚𑀦𑀲𑁆𑀲 𑀧𑀦 𑀅𑀯𑀺𑀪𑀚𑀺𑀢𑁆𑀯𑀸 𑀕𑀳𑀡𑀻𑀬𑀲𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀪𑀸𑀕𑀁 𑀚𑀸𑀦𑀦𑁆𑀢𑁂𑀳𑀺 𑀧𑀦 ‘‘𑀦𑀸𑀫𑀁 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁, 𑀭𑀽𑀧𑀁 𑀧𑀦 𑀦 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁, 𑀲𑀳𑀚𑀸𑀢’’𑀦𑁆𑀢𑀺 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀲𑀢𑀺𑀲𑀳𑀺𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲. 𑀦𑀺𑀭𑁄𑀥𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁.

𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀸 𑀅𑀚𑀺𑀢𑁄 ‘‘𑀧𑀜𑁆𑀜𑀸 𑀘𑁂𑀯…𑀧𑁂… 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀧𑀸𑀭𑀸𑀬𑀦𑁂 𑀆𑀳. ‘‘𑀧𑀜𑁆𑀜𑀸 𑀘𑁂𑀯𑀸𑀢𑀺𑀆𑀤𑀺𑀕𑀸𑀣𑀸𑀬 𑀬𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀧𑀼𑀘𑁆𑀙𑀺𑀢𑀸, 𑀲𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀢𑀫𑁂𑀦 𑀅𑀥𑀺𑀕𑀫𑁂𑀦 𑀧𑀢𑁆𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀫𑀼𑀔𑁂𑀦 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀫𑀼𑀔𑁂𑀦 𑀧𑀢𑁆𑀢𑀩𑁆𑀩𑀸, 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀬 𑀘 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑀽𑀮𑀪𑀽𑀢𑀸𑀦𑀺, 𑀢𑀲𑁆𑀫𑀸 𑀫𑀽𑀮𑀪𑀽𑀢𑀸𑀦𑀺 𑀢𑀸𑀦𑀺 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀲𑀢𑀺 𑀘 𑀧𑀜𑁆𑀜𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑀸𑀬 𑀲𑀢𑀺𑀬𑀸 𑀲𑀺𑀚𑁆𑀛𑀫𑀸𑀦𑀸𑀬 𑀏𑀓𑀦𑁆𑀢𑁂𑀦 𑀲𑀫𑀸𑀥𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁄, 𑀲𑀢𑀺𑀕𑁆𑀕𑀳𑀡𑁂𑀦 𑀘 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀕𑀸𑀣𑀸𑀬𑀁 𑀅𑀥𑀺𑀧𑁆𑀧𑁂𑀢𑀁, 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑁂𑀦 𑀘 𑀲𑀫𑀸𑀥𑀺𑀓𑀺𑀘𑁆𑀘𑀁 𑀧𑀸𑀓𑀝𑀦𑁆𑀢𑀺 𑀆𑀳 ‘‘𑀲𑀢𑀺 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀜𑁆𑀘𑀸’’𑀢𑀺. 𑀧𑀜𑁆𑀜𑀸𑀬 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀁 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑁂𑀦 𑀲𑀺𑀚𑁆𑀛𑀢𑀺, 𑀦 𑀯𑀺𑀦𑀸 𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀜𑁆𑀘𑀸’’𑀢𑀺.

𑀇𑀫𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀫𑀕𑁆𑀕𑀓𑁆𑀔𑀡𑁂 𑀯𑀸 𑀲𑀺𑀚𑁆𑀛𑀦𑁆𑀢𑁂𑀲𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀬𑀸 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀲𑀺𑀤𑁆𑀥𑀸, 𑀇𑀤𑀁 𑀲𑀤𑁆𑀤𑀳𑀦𑀑𑀓𑀧𑁆𑀧𑀦𑀲𑀗𑁆𑀔𑀸𑀢𑀁 𑀥𑀫𑁆𑀫𑀚𑀸𑀢𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀲𑀺𑀤𑁆𑀥𑀁, ‘‘𑀢𑁂𑀲𑀼 𑀫𑀽𑀮𑀪𑀽𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀺𑀤𑁆𑀥𑁂𑀲𑀼 𑀓𑀢𑀫𑁂𑀦 𑀇𑀦𑁆𑀤𑁆𑀭𑀺𑀬𑁂𑀦 𑀓𑀢𑀫𑁄 𑀥𑀫𑁆𑀫𑁄 𑀲𑀺𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑀺𑀦𑀸 𑀅𑀬𑀁 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀬𑀸 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀲𑀢𑁆𑀬𑀸𑀤𑀻𑀲𑀼. 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑀸𑀢𑀺 𑀧𑀘𑁆𑀘𑀬𑀪𑀽𑀢𑀸𑀬 𑀲𑀤𑁆𑀥𑀸𑀬 𑀲𑀺𑀤𑁆𑀥𑁄 𑀙𑀦𑁆𑀤𑁄 𑀅𑀥𑀺𑀧𑀢𑀻𑀢𑀺 𑀲𑀤𑁆𑀥𑀸𑀥𑀺𑀧𑀢𑀺, 𑀲𑀤𑁆𑀥𑀸𑀥𑀺𑀧𑀢𑀺𑀦𑀸 𑀧𑀯𑀢𑁆𑀢𑁂𑀢𑀩𑁆𑀩𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑀸. 𑀙𑀦𑁆𑀤𑀲𑀫𑀸𑀥𑀻𑀢𑀺 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀲𑀫𑀸𑀥𑀺 𑀯𑀸 𑀙𑀦𑁆𑀤𑀸𑀥𑀺𑀧𑀢𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑁄 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑁄 𑀲𑀫𑀸𑀥𑀺 𑀯𑀸 𑀙𑀦𑁆𑀤𑀲𑀫𑀸𑀥𑀺, 𑀧𑀳𑀸𑀦𑀁 𑀧𑀳𑀸𑀦𑀳𑁂𑀢𑀼 𑀳𑁄𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀧𑀳𑀸𑀦𑀦𑁆𑀢𑀺 𑀘 𑀧𑀚𑀳𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁂 𑀏𑀢𑁂𑀦 𑀙𑀦𑁆𑀤𑀲𑀫𑀸𑀥𑀺𑀦𑀸𑀢𑀺 𑀧𑀳𑀸𑀦𑀦𑁆𑀢𑀺 𑀓𑀭𑀡𑀲𑀸𑀥𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦𑀸𑀢𑀺 𑀧𑀭𑀺𑀓𑀫𑁆𑀫𑀩𑀮𑁂𑀦. 𑀪𑀸𑀯𑀦𑀸𑀩𑀮𑁂𑀦𑀸𑀢𑀺 𑀫𑀳𑀕𑁆𑀕𑀢𑀪𑀸𑀯𑀦𑀸𑀩𑀮𑁂𑀦.

‘‘𑀲𑁄 𑀙𑀦𑁆𑀤𑀲𑀫𑀸𑀥𑀺 𑀲𑀬𑀁 𑀓𑁂𑀯𑀮𑁄𑀯 𑀧𑀳𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂. ‘‘𑀢𑀲𑁆𑀫𑀺𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀅𑀲𑁆𑀲𑀸𑀲𑀸’’𑀢𑀺𑀆𑀤𑀺𑀦𑀸 𑀅𑀲𑁆𑀲𑀸𑀲𑀸𑀤𑀺𑀲𑀻𑀲𑁂𑀦 𑀅𑀲𑁆𑀲𑀸𑀲𑀸𑀤𑀺𑀚𑀦𑀓𑀸 𑀯𑀻𑀭𑀺𑀬𑀲𑀗𑁆𑀔𑀸𑀭𑀸 𑀕𑀳𑀺𑀢𑀸, 𑀢𑁂 𑀘 𑀬𑀸𑀯 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻, 𑀢𑀸𑀯 𑀧𑀼𑀦𑀧𑁆𑀧𑀼𑀦𑀁 𑀲𑀭𑀡𑀢𑁄 𑀘 𑀲𑀭𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀗𑁆𑀓𑀧𑁆𑀧𑀢𑁄 𑀘 𑀲𑀗𑁆𑀓𑀧𑁆𑀧𑀸. 𑀬𑁄 𑀧𑀦 ‘‘𑀲𑀭𑀲𑀗𑁆𑀓𑀧𑁆𑀧𑀸, 𑀇𑀫𑁂 𑀲𑀗𑁆𑀔𑀸𑀭𑀸 𑀘𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀧𑀼𑀭𑀺𑀫𑀓𑁄 𑀙𑀦𑁆𑀤𑀲𑀫𑀸𑀥𑀺 𑀯𑀸 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀘 𑀢𑀤𑀗𑁆𑀕𑀧𑁆𑀧𑀳𑀸𑀦𑀢𑀸𑀬 𑀘 𑀧𑀳𑀸𑀦𑀁 𑀧𑀳𑀸𑀦𑀳𑁂𑀢𑀼𑀧𑀥𑀸𑀦𑀁 𑀯𑀸, ‘‘𑀇𑀫𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀗𑁆𑀔𑀸𑀭𑀸𑀤𑀬𑁄 𑀓𑀺𑀁 𑀪𑀸𑀯𑁂𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑁂 𑀘 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑁂 𑀲𑀗𑁆𑀔𑀸𑀭𑀸 𑀘 𑀢𑀤𑀼𑀪𑀬𑀜𑁆𑀘 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻𑀢𑀺 𑀬𑁄𑀚𑀦𑀸.

𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀙𑀦𑁆𑀤𑁄 𑀏𑀯 𑀅𑀥𑀺𑀧𑀢𑀺 𑀙𑀦𑁆𑀤𑀸𑀥𑀺𑀧𑀢𑀺, 𑀙𑀦𑁆𑀤𑀸𑀥𑀺𑀧𑀢𑀺𑀲𑀫𑀸𑀥𑀺. 𑀢𑁂𑀦 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀙𑀦𑁆𑀤𑀁 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀮𑀪𑀢𑀺 𑀲𑀫𑀸𑀥𑀺’’𑀦𑁆𑀢𑀺 (𑀯𑀺𑀪. 𑁪𑁩𑁨). 𑀙𑀦𑁆𑀤𑀳𑁂𑀢𑀼𑀓𑁄 𑀯𑀸 𑀲𑀫𑀸𑀥𑀺, 𑀙𑀦𑁆𑀤𑀸𑀤𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺, 𑀙𑀦𑁆𑀤𑀸𑀥𑀺𑀧𑀢𑀺𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀲𑀫𑀸𑀥𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸, 𑀧𑀥𑀸𑀦𑀲𑀤𑁆𑀤𑁂𑀦 𑀲𑀗𑁆𑀔𑀢𑀲𑀗𑁆𑀔𑀸𑀭𑀸𑀤𑀬𑁄 𑀦𑀺𑀯𑀢𑁆𑀢𑀸𑀧𑀺𑀢𑀸, 𑀙𑀦𑁆𑀤𑀲𑀫𑀸𑀥𑀺 𑀘 𑀧𑀥𑀸𑀦𑀲𑀗𑁆𑀔𑀸𑀭𑀸 𑀘𑀸𑀢𑀺 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀸, 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀙𑀦𑁆𑀤…𑀧𑁂… 𑀲𑀫𑀦𑁆𑀦𑀸𑀕𑀢𑁄, 𑀢𑀁…𑀧𑁂… 𑀕𑀢𑀁. 𑀇𑀚𑁆𑀛𑀢𑀺 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑁆𑀥𑀺, 𑀓𑁄𑀝𑁆𑀞𑀸𑀲𑁄, 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀓𑁄𑀝𑁆𑀞𑀸𑀲𑁄𑀢𑀺 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀧𑀸𑀤𑀘𑀢𑀼𑀢𑁆𑀣𑁄. 𑀇𑀚𑁆𑀛𑀦𑁆𑀢𑀺 𑀯𑀸 𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺, 𑀧𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀧𑀸𑀤𑁄, 𑀇𑀤𑁆𑀥𑀺𑀬𑀸 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄. 𑀇𑀤𑁆𑀥𑀺𑀧𑀸𑀤𑁄𑀢𑀺 𑀲𑀸𑀫𑀜𑁆𑀜𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑁄𑀧𑀺 ‘‘𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄𑀯 𑀕𑀳𑁂𑀢𑀩𑁆𑀩𑁄, 𑀢𑀁 𑀇𑀤𑁆𑀥𑀺𑀧𑀸𑀤𑀁 𑀢𑀁 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀓𑀺𑀘𑁆𑀘𑀢𑁄 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁. 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀢𑀤𑀗𑁆𑀕𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁, 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀓𑀺𑀘𑁆𑀘𑀢𑁄 𑀲𑀫𑀼𑀘𑁆𑀙𑁂𑀤𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁, 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁. 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀢𑀤𑀗𑁆𑀕𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁, 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁, 𑀫𑀕𑁆𑀕𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀲𑀫𑀼𑀘𑁆𑀙𑁂𑀤𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁, 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁. 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀦𑁆𑀢𑀺 𑀏𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑀯𑀲𑁂𑀦 𑀯𑁄𑀲𑁆𑀲𑀕𑁆𑀕𑁄 𑀤𑀼𑀯𑀺𑀥𑁄. 𑀢𑀢𑁆𑀣𑀧𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀤𑀗𑁆𑀕𑀯𑀲𑁂𑀦 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄, 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀪𑀸𑀯𑁂𑀦 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄, 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄, 𑀆𑀭𑀫𑁆𑀫𑀡𑀓𑀭𑀡𑁂𑀦 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀬𑀣𑀸𑀯𑀼𑀢𑁆𑀢𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀧𑀭𑀺𑀡𑀫𑀢𑀺, 𑀧𑀭𑀺𑀡𑀢𑀁 𑀯𑀸 𑀧𑀭𑀺𑀧𑀘𑀢𑀺 𑀧𑀭𑀺𑀧𑀘𑀦𑀁 𑀓𑀭𑁄𑀢𑀻𑀢𑀺 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀻, 𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁.

𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀓𑀸𑀭𑁄 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀣𑀁 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀓𑀸𑀭𑁄 𑀅𑀫𑁆𑀳𑁂𑀳𑀺 𑀯𑀺𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑀢𑁆𑀣 𑀬𑀸 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑀺𑀜𑁆𑀜𑁂𑀬𑁆𑀬𑁄. 𑀲𑀁𑀔𑀺𑀢𑁆𑀢𑀯𑀲𑁂𑀦 𑀧𑀦 𑀞𑀧𑀺𑀢𑀁 𑀧𑀸𑀞𑀁 𑀯𑀺𑀢𑁆𑀣𑀸𑀭𑀢𑁄 𑀞𑀧𑁂𑀲𑁆𑀲𑀸𑀫𑀺. 𑀓𑀣𑀁? 𑁋

‘‘𑀢𑀢𑁆𑀣 𑀬𑀸 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀯𑀻𑀭𑀺𑀬𑀲𑀫𑀸𑀥𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀸 𑀪𑀸𑀯𑀦𑀸𑀩𑀮𑁂𑀦 𑀯𑀸, 𑀇𑀤𑀁 𑀧𑀳𑀸𑀦𑀁. 𑀢𑀢𑁆𑀣 𑀬𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀸 𑀲𑀭𑀲𑀗𑁆𑀓𑀧𑁆𑀧𑀸, 𑀇𑀫𑁂 𑀲𑀗𑁆𑀔𑀸𑀭𑀸. 𑀇𑀢𑀺 𑀧𑀼𑀭𑀺𑀫𑀓𑁄 𑀘 𑀯𑀻𑀭𑀺𑀬𑀲𑀫𑀸𑀥𑀺, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀘 𑀧𑀳𑀸𑀦𑀁 𑀇𑀫𑁂 𑀘 𑀲𑀗𑁆𑀔𑀸𑀭𑀸, 𑀢𑀤𑀼𑀪𑀬𑀁 𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁.

‘‘𑀢𑀢𑁆𑀣 𑀬𑀸 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀘𑀺𑀢𑁆𑀢𑀲𑀫𑀸𑀥𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀸 𑀪𑀸𑀯𑀦𑀸𑀩𑀮𑁂𑀦 𑀯𑀸, 𑀇𑀤𑀁 𑀧𑀳𑀸𑀦𑀁. 𑀢𑀢𑁆𑀣 𑀬𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀸 𑀲𑀭𑀲𑀗𑁆𑀓𑀧𑁆𑀧𑀸, 𑀇𑀫𑁂 𑀲𑀗𑁆𑀔𑀸𑀭𑀸. 𑀇𑀢𑀺 𑀧𑀼𑀭𑀺𑀫𑀓𑁄 𑀘 𑀘𑀺𑀢𑁆𑀢𑀲𑀫𑀸𑀥𑀺, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀘 𑀧𑀳𑀸𑀦𑀁 𑀇𑀫𑁂 𑀘 𑀲𑀗𑁆𑀔𑀸𑀭𑀸, 𑀢𑀤𑀼𑀪𑀬𑀁 𑀘𑀺𑀢𑁆𑀢𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁.

‘‘𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺, 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀸 𑀪𑀸𑀯𑀦𑀸𑀩𑀮𑁂𑀦 𑀯𑀸, 𑀇𑀤𑀁 𑀧𑀳𑀸𑀦𑀁. 𑀢𑀢𑁆𑀣 𑀬𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀸 𑀲𑀭𑀲𑀗𑁆𑀓𑀧𑁆𑀧𑀸, 𑀇𑀫𑁂 𑀲𑀗𑁆𑀔𑀸𑀭𑀸. 𑀇𑀢𑀺 𑀧𑀼𑀭𑀺𑀫𑀓𑁄 𑀘 𑀯𑀻𑀫𑀁𑀲𑀸𑀲𑀫𑀸𑀥𑀺 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀘 𑀧𑀳𑀸𑀦𑀁 𑀇𑀫𑁂 𑀘 𑀲𑀗𑁆𑀔𑀸𑀭𑀸, 𑀢𑀤𑀼𑀪𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺’’𑀦𑁆𑀢𑀺.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀯𑀻𑀭𑀺𑀬𑀲𑀫𑀸𑀥𑀻𑀢𑀺 𑀯𑀻𑀭𑀺𑀬𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀲𑀫𑀸𑀥𑀺 𑀯𑀸 𑀯𑀻𑀭𑀺𑀬𑀸𑀥𑀺𑀧𑀢𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑁄 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑁄 𑀲𑀫𑀸𑀥𑀺 𑀯𑀸 𑀯𑀻𑀭𑀺𑀬𑀲𑀫𑀸𑀥𑀺. 𑀘𑀺𑀢𑁆𑀢𑀲𑀫𑀸𑀥𑀻𑀢𑀺 𑀘𑀺𑀢𑁆𑀢𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀲𑀫𑀸𑀥𑀺 𑀯𑀸 𑀘𑀺𑀢𑁆𑀢𑀸𑀥𑀺𑀧𑀢𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑁄 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑁄 𑀲𑀫𑀸𑀥𑀺 𑀯𑀸 𑀘𑀺𑀢𑁆𑀢𑀲𑀫𑀸𑀥𑀺. 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺 𑀯𑀻𑀫𑀁𑀲𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀲𑀫𑀸𑀥𑀺 𑀯𑀸 𑀯𑀻𑀫𑀁𑀲𑀸𑀥𑀺𑀧𑀢𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑁄 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑁄 𑀲𑀫𑀸𑀥𑀺 𑀯𑀸 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺.

𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑁂𑀦𑁂𑀢𑁆𑀣 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑀓𑀢𑀸, 𑀕𑀫𑁆𑀪𑀻𑀭𑀜𑀸𑀡𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀭𑀽𑀧𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀸 𑀕𑀫𑁆𑀪𑀻𑀭𑀢𑁄 𑀯𑀸 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸.

𑁧𑁪. ‘‘𑀙𑀦𑁆𑀤𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀺 𑀘𑀺𑀢𑁆𑀢𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑁄, ‘‘𑀏𑀯𑀁 𑀲𑀢𑀺 𑀯𑀻𑀫𑀁𑀲𑀸𑀲𑀫𑀸𑀥𑀺𑀬𑁂𑀯 𑀜𑀸𑀡𑀫𑀽𑀮𑀓𑁄 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺 𑀪𑀯𑁂𑀬𑁆𑀬, 𑀅𑀜𑁆𑀜𑁂 𑀢𑀬𑁄 𑀲𑀫𑀸𑀥𑀬𑁄 𑀅𑀜𑁆𑀜𑀸𑀡𑀫𑀽𑀮𑀓𑀸 𑀅𑀜𑁆𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸 𑀅𑀜𑁆𑀜𑀸𑀡𑀧𑀯𑀢𑁆𑀢𑀺𑀬𑁄 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀲𑀩𑁆𑀩𑁂 𑀲𑀫𑀸𑀥𑀬𑁄 𑀜𑀸𑀡𑀫𑀽𑀮𑀓𑀸𑀤𑀬𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁄 𑀲𑀫𑀸𑀥𑀺 𑀜𑀸𑀡𑀫𑀽𑀮𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑁄 𑀲𑀫𑀸𑀥𑀻𑀢𑀺 𑀙𑀦𑁆𑀤𑀲𑀫𑀸𑀥𑀺, 𑀯𑀻𑀭𑀺𑀬𑀲𑀫𑀸𑀥𑀺, 𑀘𑀺𑀢𑁆𑀢𑀲𑀫𑀸𑀥𑀺, 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺 𑀘𑀢𑀼𑀩𑁆𑀩𑀺𑀥𑁄 𑀲𑀫𑀸𑀥𑀺. 𑀜𑀸𑀡𑀫𑀽𑀮𑀓𑁄𑀢𑀺 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀻𑀲𑀼 𑀧𑀯𑀢𑁆𑀢𑀁 𑀉𑀧𑀘𑀸𑀭𑀜𑀸𑀡𑀫𑀽𑀮𑀓𑁄. 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀅𑀥𑀺𑀕𑀫𑀜𑀸𑀡𑀁 𑀧𑀼𑀩𑁆𑀩𑀗𑁆𑀕𑀫𑀁 𑀅𑀲𑁆𑀲𑀸𑀢𑀺 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄. 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀅𑀦𑀼𑀧𑀭𑀺𑀯𑀢𑁆𑀢𑀺 𑀅𑀲𑁆𑀲𑀸𑀢𑀺 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀣 𑀯𑀸 𑀦𑀸𑀦𑀸𑀯𑀚𑁆𑀚𑀦𑀽𑀧𑀘𑀸𑀭𑀜𑀸𑀡𑀁 𑀯𑀸 𑀧𑀝𑀺𑀲𑀦𑁆𑀥𑀺𑀜𑀸𑀡𑀁 𑀯𑀸 𑀫𑀽𑀮𑀁 𑀅𑀲𑁆𑀲𑀸𑀢𑀺 𑀜𑀸𑀡𑀫𑀽𑀮𑀓𑁄, 𑀉𑀧𑀘𑀸𑀭𑀜𑀸𑀡𑀁 𑀧𑀼𑀩𑁆𑀩𑀗𑁆𑀕𑀫𑀁 𑀅𑀲𑁆𑀲𑀸𑀢𑀺 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄, 𑀅𑀧𑁆𑀧𑀦𑀸𑀜𑀸𑀡𑀁 𑀅𑀦𑀼𑀧𑀭𑀺𑀯𑀢𑁆𑀢𑀺 𑀅𑀲𑁆𑀲𑀸𑀢𑀺 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀲𑀩𑁆𑀩𑀁 𑀯𑀸 𑀉𑀧𑀘𑀸𑀭𑀜𑀸𑀡𑀁 𑀫𑀽𑀮𑀁 𑀅𑀲𑁆𑀲𑀸𑀢𑀺 𑀜𑀸𑀡𑀫𑀽𑀮𑀓𑁄. 𑀅𑀧𑁆𑀧𑀦𑀸𑀜𑀸𑀡𑀁 𑀧𑀼𑀩𑁆𑀩𑀗𑁆𑀕𑀫𑀁 𑀅𑀲𑁆𑀲𑀸𑀢𑀺 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄. 𑀅𑀪𑀺𑀜𑁆𑀜𑀸𑀜𑀸𑀡𑀁 𑀅𑀦𑀼𑀧𑀭𑀺𑀯𑀢𑁆𑀢𑀺 𑀅𑀲𑁆𑀲𑀸𑀢𑀺 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀅𑀦𑀼𑀧𑀭𑀺𑀯𑀢𑁆𑀢𑀦𑀁 𑀯𑀸 𑀅𑀦𑀼𑀧𑀭𑀺𑀯𑀢𑁆𑀢𑀺, 𑀜𑀸𑀡𑀲𑁆𑀲 𑀅𑀦𑀼𑀧𑀭𑀺𑀯𑀢𑁆𑀢𑀺 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺 𑀅𑀲𑁆𑀲𑀸𑀢𑀺 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀜𑀸𑀡𑀁 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯.

𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸𑀢𑀺 𑀬𑀣𑀸 𑀙𑀦𑁆𑀤𑀲𑀫𑀸𑀥𑀺𑀆𑀤𑀺𑀘𑀢𑀼𑀩𑁆𑀩𑀺𑀥𑀲𑀫𑀸𑀥𑀺𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀧𑀼𑀭𑁂 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼 𑀅𑀢𑁆𑀢𑀦𑁄 𑀔𑀦𑁆𑀥𑀧𑀝𑀺𑀩𑀤𑁆𑀥𑀲𑁆𑀲, 𑀧𑀭𑁂𑀲𑀁 𑀔𑀦𑁆𑀥𑀧𑀝𑀺𑀩𑀤𑁆𑀥𑀲𑁆𑀲 𑀘 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀁 𑀢𑀣𑀸 𑀢𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀧𑀘𑁆𑀙𑀸 𑀅𑀦𑀸𑀕𑀢𑀸𑀲𑀼 𑀚𑀸𑀢𑀻𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼 𑀅𑀢𑁆𑀢𑀦𑁄 𑀔𑀦𑁆𑀥𑀧𑀝𑀺𑀩𑀤𑁆𑀥𑀲𑁆𑀲, 𑀧𑀭𑁂𑀲𑀁 𑀔𑀦𑁆𑀥𑀧𑀝𑀺𑀩𑀤𑁆𑀥𑀲𑁆𑀲 𑀘 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂𑀢𑀺 𑀬𑀣𑀸 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀅𑀦𑀸𑀕𑀢𑁂𑀲𑀼 𑀲𑀢𑁆𑀢𑀲𑀼𑀬𑁂𑀯 𑀤𑀺𑀯𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁𑀬𑁂𑀯 𑀘𑀺𑀢𑁆𑀢𑀲𑁆𑀲 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀁, 𑀢𑀣𑀸 𑀢𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲 𑀧𑀼𑀭𑁂 𑀅𑀢𑀻𑀢𑁂𑀲𑀼 𑀲𑀢𑁆𑀢𑀲𑀼𑀬𑁂𑀯 𑀤𑀺𑀯𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁𑀬𑁂𑀯 𑀘𑀺𑀢𑁆𑀢𑀲𑁆𑀲 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀦𑁆𑀢𑀺 𑀅𑀢𑁆𑀣𑁄.

𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀦𑁆𑀢𑀺 𑀬𑀣𑀸 𑀘𑀓𑁆𑀔𑀼𑀫𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀤𑀺𑀯𑀲𑀪𑀸𑀕𑁂 𑀲𑀽𑀭𑀺𑀬𑀸𑀮𑁄𑀓𑁂𑀦 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸 𑀆𑀧𑀸𑀣𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀧𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀢𑀣𑀸 𑀭𑀢𑁆𑀢𑀺𑀪𑀸𑀕𑁂 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀧𑀺 𑀅𑀦𑁆𑀥𑀓𑀸𑀭𑁂 𑀯𑀢𑁆𑀢𑀫𑀸𑀦𑁂 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀭𑀽𑀧𑀸𑀬𑀢𑀦𑀲𑁆𑀲 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀁. 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸𑀢𑀺 𑀬𑀣𑀸 𑀭𑀢𑁆𑀢𑀺𑀪𑀸𑀕𑁂 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀧𑀺 𑀅𑀦𑁆𑀥𑀓𑀸𑀭𑁂 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀭𑀽𑀧𑀸𑀬𑀢𑀦𑀲𑁆𑀲 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀁, 𑀢𑀣𑀸 𑀤𑀺𑀯𑀲𑀪𑀸𑀕𑁂 𑀲𑀼𑀔𑀼𑀫𑀲𑁆𑀲 𑀭𑀽𑀧𑀸𑀬𑀢𑀦𑀲𑁆𑀲 𑀯𑀸 𑀓𑁂𑀦𑀘𑀺 𑀧𑀸𑀓𑀸𑀭𑀸𑀤𑀺𑀦𑀸 𑀢𑀺𑀭𑁄𑀳𑀺𑀢𑀲𑁆𑀲 𑀭𑀽𑀧𑀸𑀬𑀢𑀦𑀲𑁆𑀲 𑀯𑀸 𑀅𑀢𑀺𑀤𑀽𑀭𑀝𑁆𑀞𑀸𑀦𑁂 𑀧𑀯𑀢𑁆𑀢𑀲𑁆𑀲 𑀭𑀽𑀧𑀸𑀬𑀢𑀦𑀲𑁆𑀲 𑀯𑀸 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀣𑀸 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲 𑀤𑀺𑀯𑀲𑀪𑀸𑀕𑁂 𑀤𑀺𑀩𑁆𑀩𑀲𑁄𑀢𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀲𑀼𑀔𑀼𑀫𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀯𑀸 𑀓𑁂𑀦𑀘𑀺 𑀧𑀸𑀓𑀸𑀭𑀸𑀤𑀺𑀦𑀸 𑀢𑀺𑀭𑁄𑀳𑀺𑀢𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀯𑀸 𑀅𑀢𑀺𑀤𑀽𑀭𑀝𑁆𑀞𑀸𑀦𑁂 𑀧𑀯𑀢𑁆𑀢𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀯𑀸 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀁, 𑀢𑀣𑀸 𑀭𑀢𑁆𑀢𑀺𑀪𑀸𑀕𑁂𑀧𑀺 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲 𑀤𑀺𑀩𑁆𑀩𑀲𑁄𑀢𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀲𑀼𑀔𑀼𑀫𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀯𑀸 𑀓𑁂𑀦𑀘𑀺 𑀧𑀸𑀓𑀸𑀭𑀸𑀤𑀺𑀦𑀸 𑀢𑀺𑀭𑁄𑀳𑀺𑀢𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀯𑀸 𑀅𑀢𑀺𑀤𑀽𑀭𑀝𑁆𑀞𑀸𑀦𑁂 𑀧𑀯𑀢𑁆𑀢𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀯𑀸 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀫𑁂𑀯, 𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀦𑁆𑀢𑀺 𑀅𑀬𑀁 𑀦𑀬𑁄𑀧𑀺 𑀦𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀬𑀣𑀸 𑀧𑀼𑀭𑁂𑀢𑀺 𑀬𑀣𑀸 𑀲𑀫𑀸𑀥𑀺𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀬𑀣𑀸 𑀘 𑀭𑀽𑀧𑀸𑀬𑀢𑀦𑁂 𑀯𑀼𑀢𑁆𑀢𑀁, 𑀢𑀣𑀸 𑀲𑀫𑀸𑀥𑀺𑀲𑁆𑀲 𑀤𑀺𑀩𑁆𑀩𑀲𑁄𑀢𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀲𑀤𑁆𑀤𑀸𑀬𑀢𑀦𑁂 𑀘 𑀦𑁂𑀢𑀩𑁆𑀩’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁪).

‘‘𑀜𑀸𑀡𑀫𑀽𑀮𑀓𑀸𑀤𑀺𑀲𑀫𑀸𑀥𑀺𑀦𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑀸𑀤𑀺𑀲𑀳𑀺𑀢𑁂𑀦 𑀓𑀺𑀁 𑀪𑀸𑀯𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀯𑀺𑀯𑀝𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀧𑀭𑀺𑀬𑁄𑀦𑀤𑁆𑀥𑁂𑀦𑀸𑀢𑀺 𑀦𑀻𑀯𑀭𑀡𑀸𑀤𑀺𑀯𑀺𑀕𑀫𑀦𑁂𑀦. 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀲𑀫𑁆𑀧𑀬𑀼𑀢𑁆𑀢𑀁 𑀫𑀕𑁆𑀕𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀇𑀤𑁆𑀥𑀺𑀧𑀸𑀤𑀲𑀫𑁆𑀧𑀬𑀼𑀢𑁆𑀢𑁂 𑀫𑀕𑁆𑀕𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀳𑀺 𑀫𑀕𑁆𑀕𑀘𑀺𑀢𑁆𑀢𑀲𑀳𑀪𑀽𑀦𑀺 𑀓𑀼𑀲𑀮𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀢𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀪𑀽𑀢𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀫𑀕𑁆𑀕𑀘𑀺𑀢𑁆𑀢𑁂 𑀦𑀺𑀭𑀼𑀚𑁆𑀛𑀫𑀸𑀦𑁂 𑀅𑀦𑀼𑀧𑁆𑀧𑀚𑁆𑀚𑀦𑀪𑀸𑀯𑁂𑀦 𑀦𑀺𑀭𑀼𑀚𑁆𑀛𑀦𑁆𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸. 𑀏𑀯𑀁 𑀫𑀕𑁆𑀕𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀧𑀜𑁆𑀜𑀸 𑀘 𑀲𑀢𑀺 𑀘 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑁄𑀚𑀦𑀸.

‘‘𑀓𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀸𑀫𑀭𑀽𑀧𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀜𑁆𑀘 𑀦𑀺𑀭𑀼𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 ‘‘𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀧𑀜𑁆𑀜𑀸 𑀘 𑀲𑀢𑀺 𑀘𑀸𑀢𑀺 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀏𑀯𑀁 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀦𑀸𑀫𑀭𑀽𑀧𑀜𑁆𑀘 𑀦𑀺𑀭𑀼𑀚𑁆𑀛𑀢𑀺, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀧𑀦 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀦𑀺𑀭𑀼𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀫𑀭𑀽𑀧𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀫𑀭𑀽𑀧𑀜𑁆𑀘𑀸𑀢𑀺 𑀫𑀕𑁆𑀕𑁂𑀦 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀤𑀺𑀓𑁂 𑀅𑀦𑀼𑀧𑀘𑁆𑀙𑀺𑀦𑁆𑀦𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁, 𑀪𑀽𑀢𑀼𑀧𑀸𑀤𑀸𑀭𑀽𑀧𑀜𑁆𑀘. 𑀯𑀺𑀜𑁆𑀜𑀸𑀡𑀳𑁂𑀢𑀼𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀳𑁂𑀢𑀼 𑀅𑀲𑁆𑀲 𑀦𑀸𑀫𑀭𑀽𑀧𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀡𑀳𑁂𑀢𑀼𑀓𑀁. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑁂𑀦 𑀧𑀘𑁆𑀘𑀬𑁂𑀦 𑀦𑀺𑀩𑁆𑀩𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲. 𑀳𑁂𑀢𑀽𑀢𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀤𑀺𑀓𑁄 𑀓𑀺𑀮𑁂𑀲𑁄. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁. 𑀅𑀦𑀸𑀳𑀸𑀭𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑀁. 𑀅𑀦𑀪𑀺𑀦𑀦𑁆𑀤𑀺𑀢𑀦𑁆𑀢𑀺 𑀓𑀸𑀫𑀢𑀡𑁆𑀳𑀸𑀤𑀻𑀳𑀺 𑀅𑀦𑀪𑀺𑀦𑀦𑁆𑀤𑀺𑀢𑀩𑁆𑀩𑀁. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀦𑁆𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀲𑀦𑁆𑀤𑀳𑀦𑀭𑀳𑀺𑀢𑀁. 𑀦𑁆𑀢𑀺 𑀢𑀸𑀤𑀺𑀲𑀁 𑀯𑀺𑀜𑁆𑀜𑀸𑀡𑀁. 𑀅𑀳𑁂𑀢𑀽𑀢𑀺 𑀦𑀢𑁆𑀣𑀺 𑀳𑁂𑀢𑀼𑀲𑀗𑁆𑀔𑀸𑀢𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀇𑀫𑀲𑁆𑀲 𑀦𑀸𑀫𑀭𑀽𑀧𑀲𑁆𑀲𑀸𑀢𑀺 𑀅𑀳𑁂𑀢𑀼. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀲𑀳𑀸𑀬𑀯𑀺𑀭𑀳𑁂𑀦 𑀦𑀢𑁆𑀣𑀺 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀇𑀫𑀲𑁆𑀲𑀸𑀢𑀺 𑀅𑀧𑁆𑀧𑀘𑁆𑀘𑀬𑀁. 𑀏𑀯𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀜𑁆𑀘 𑀦𑀺𑀭𑀼𑀚𑁆𑀛𑀢𑀻𑀢𑀺.

‘‘𑀧𑀜𑁆𑀜𑀸𑀲𑀢𑀻𑀦𑀜𑁆𑀘𑁂𑀯 𑀦𑀸𑀫𑀭𑀽𑀧𑀲𑁆𑀲 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀺𑀭𑀼𑀚𑁆𑀛𑀦𑀪𑀸𑀯𑁄 𑀓𑀣𑀁 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀢𑁆𑀢𑀩𑁆𑀩𑀸𑀓𑀸𑀭𑁂𑀦 𑀧𑀜𑁆𑀜𑀸𑀲𑀢𑀻𑀦𑀜𑁆𑀘𑁂𑀯 𑀦𑀸𑀫𑀭𑀽𑀧𑀲𑁆𑀲 𑀘 𑀦𑀺𑀭𑀼𑀚𑁆𑀛𑀦𑀪𑀸𑀯𑀚𑀸𑀦𑀦𑀓𑁄 𑀪𑀕𑀯𑀸 𑀬𑀣𑀸𑀦𑀺𑀭𑀼𑀚𑁆𑀛𑀦𑀪𑀸𑀯𑀤𑀻𑀧𑀓𑀁 ‘‘𑀬𑀫𑁂𑀢𑀁…𑀧𑁂… 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀕𑀸𑀣𑀸𑀯𑀘𑀦𑀁 𑀆𑀳. 𑀢𑁂𑀦 𑀕𑀸𑀣𑀸𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀫𑀬𑀸 𑀯𑀼𑀢𑁆𑀢𑁄 𑀦𑀺𑀭𑀼𑀚𑁆𑀛𑀦𑀪𑀸𑀯𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀬𑁂𑀯𑀸𑀢𑀺. 𑀏𑀢𑁆𑀣𑀸𑀧𑀺 𑀧𑀜𑁆𑀜𑀸𑀲𑀢𑀺𑀦𑀸𑀫𑀭𑀽𑀧𑀸𑀦𑀁 𑀦𑀺𑀭𑀼𑀚𑁆𑀛𑀦𑀁 𑀅𑀚𑀸𑀦𑀦𑁆𑀢𑁂𑀦 𑀢𑀢𑁆𑀣 𑀯𑀸 𑀲𑀁𑀲𑀬𑀦𑁆𑀢𑁂𑀦 𑀅𑀚𑀺𑀢𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸𑀢𑀺 𑀯𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸𑀢𑀺 𑀯𑀸 𑀧𑀜𑁆𑀜𑀸𑀤𑀻𑀦𑀁 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀫𑁆𑀫𑀢𑁄 𑀯𑀸 𑀅𑀦𑁂𑀓𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸𑀢𑀺 𑀯𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸’’𑀢𑀺 𑀯𑀸 𑀇𑀘𑁆𑀘𑁂𑀯𑀫𑀸𑀤𑀺𑀧𑀼𑀘𑁆𑀙𑀸𑀯𑀺𑀘𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄. ‘‘𑀲𑀭𑀽𑀧𑀤𑀲𑁆𑀲𑀦𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀸 𑀅𑀦𑁂𑀓𑀸𑀥𑀺𑀝𑁆𑀞𑀸𑀦𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺 𑀯𑀸 𑀇𑀘𑁆𑀘𑁂𑀯𑀫𑀸𑀤𑀺𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄.

𑀏𑀯𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀘𑁂𑀯 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀘𑁆𑀙𑀸𑀯𑀺𑀘𑀬𑁄 𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄 𑀘 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑁂𑀲𑀼 𑀏𑀓𑀢𑁄 𑀤𑀲𑁆𑀲𑀺𑀢𑁂𑀲𑀼 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀓𑀣𑀁 𑀧𑀼𑀘𑁆𑀙𑀸𑀯𑀺𑀘𑀬𑁄 𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄 𑀘 𑀅𑀫𑁆𑀳𑁂𑀳𑀺 𑀯𑀺𑀜𑁆𑀜𑀸𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀧𑀼𑀘𑁆𑀙𑀁 𑀦𑀻𑀳𑀭𑀺𑀢𑁆𑀯𑀸 𑀢𑀢𑁆𑀣 𑀯𑀺𑀘𑀬𑀁 𑀯𑀺𑀪𑀚𑀦𑁆𑀢𑁄 ‘‘𑀬𑁂 𑀘 𑀲𑀗𑁆𑀔𑀢𑀥𑀫𑁆𑀫𑀸𑀲𑁂’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀏𑀯𑀁 𑀅𑀦𑀼𑀲𑀦𑁆𑀥𑀺𑀧𑀼𑀘𑁆𑀙𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 𑀳𑁂𑀝𑁆𑀞𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸, 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀘 𑀧𑀼𑀘𑁆𑀙𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀲𑁆𑀲𑀺𑀢𑀸𑀢𑀺 𑀇𑀤𑀸𑀦𑀺 𑀢𑀸 𑀲𑀳 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀘 𑀲𑀗𑁆𑀔𑀢𑀥𑀫𑁆𑀫𑀸𑀲𑁂’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁪) 𑁋

𑀯𑀼𑀢𑁆𑀢𑀁. 𑀢𑀲𑁆𑀲𑀸𑀬𑀁 𑀅𑀢𑁆𑀣𑁄 𑁋 𑀇𑀥 𑀲𑀸𑀲𑀦𑁂 𑀬𑁂 𑀅𑀭𑀳𑀦𑁆𑀢𑁄 𑀲𑀗𑁆𑀔𑀢𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀧𑀼𑀣𑀽 𑀩𑀳𑀽𑀬𑁂𑀯 𑀲𑀢𑁆𑀢 𑀚𑀦𑀸 𑀲𑁂𑀓𑁆𑀔𑀸 𑀲𑀻𑀮𑀸𑀤𑀺𑀲𑀺𑀓𑁆𑀔𑀫𑀸𑀦𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀭𑀳𑀦𑁆𑀢𑀸𑀯𑀜𑁆𑀘𑁂𑀯 𑀲𑁂𑀓𑁆𑀔𑀸𑀦𑀜𑁆𑀘 𑀇𑀭𑀺𑀬𑀁 𑀧𑀝𑀺𑀧𑀢𑁆𑀢𑀺𑀁 𑀫𑁂𑀁 𑀫𑀳𑀸 𑀧𑀼𑀝𑁆𑀞𑁄 𑀦𑀺𑀧𑀓𑁄 𑀢𑁆𑀯𑀁 𑀪𑀕𑀯𑀸 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲 𑀇𑀢𑀺 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀼𑀘𑁆𑀙𑀦𑁆𑀢𑁄 𑀆𑀳𑀸𑀢𑀺.

𑁧𑁫. 𑀢𑀲𑁆𑀲𑀁 𑀕𑀸𑀣𑀸𑀬𑀁 ‘‘𑀓𑀺𑀢𑁆𑀢𑀓𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀤𑀢𑁆𑀣𑀸𑀦𑀼𑀭𑀽𑀧𑀁 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀬𑁂 𑀘 …𑀧𑁂… 𑀫𑀸𑀭𑀺𑀲𑀸’’𑀢𑀺 𑀕𑀸𑀣𑀸𑀬𑀁 𑀬𑁂 𑀧𑀜𑁆𑀳𑀸 𑀧𑀼𑀘𑁆𑀙𑀺𑀢𑀸, 𑀢𑁂 𑀧𑀜𑁆𑀳𑀸 𑀢𑀬𑁄 𑀳𑁄𑀦𑁆𑀢𑀺, ‘‘𑀓𑀺𑀲𑁆𑀲 𑀓𑁂𑀦 𑀓𑀸𑀭𑀡𑁂𑀦 𑀢𑀬𑁄 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀓𑀺𑀲𑁆𑀲…𑀧𑁂… 𑀬𑁄𑀕𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑁂𑀓𑁆𑀔𑀸 𑀅𑀭𑀺𑀬𑀸 𑀘 𑀅𑀲𑁂𑀓𑁆𑀔𑀸 𑀅𑀭𑀺𑀬𑀸 𑀘 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀳𑀸𑀦𑀜𑁆𑀘𑀸𑀢𑀺 𑀲𑁂𑀔𑀸𑀲𑁂𑀔𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀧𑁆𑀧𑀳𑀸𑀦𑀸𑀦𑀺, 𑀢𑁂𑀲𑀁 𑀬𑁄𑀕𑁄𑀢𑀺 𑀲𑁂𑀔𑀸…𑀧𑁂… 𑀬𑁄𑀕𑁄, 𑀢𑁂𑀦 𑀲𑁂𑀔𑀸…𑀧𑁂… 𑀬𑁄𑀕𑁂𑀦. 𑀏𑀯𑀁 𑀧𑀼𑀘𑁆𑀙𑀸𑀯𑀺𑀥𑀺𑀦𑀸 𑀳𑀺 𑀬𑀲𑁆𑀫𑀸 ‘‘𑀬𑁂 𑀘 𑀲𑀗𑁆𑀔𑀢𑀥𑀫𑁆𑀫𑀸𑀲𑁂…𑀧𑁂… 𑀫𑀸𑀭𑀺𑀲𑀸’’𑀢𑀺 𑀕𑀸𑀣𑀫𑀸𑀳, 𑀢𑀲𑁆𑀫𑀸 𑀢𑀬𑁄 𑀧𑀜𑁆𑀳𑀸 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

‘‘𑀬𑁂 𑀘 𑀲𑀗𑁆𑀔𑀢𑀥𑀫𑁆𑀫𑀸𑀲𑁂’’𑀢𑀺 𑀇𑀫𑀺𑀦𑀸 𑀅𑀲𑁂𑀓𑁆𑀔𑀸𑀦𑀁 𑀅𑀭𑀳𑀢𑁆𑀢𑀁 𑀧𑀼𑀘𑁆𑀙𑀢𑀺, ‘‘𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀣𑀽 𑀇𑀥𑀸’’𑀢𑀺 𑀇𑀫𑀺𑀦𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀲𑁂𑀓𑁆𑀔𑀲𑀺𑀓𑁆𑀔𑀦𑀁 𑀧𑀼𑀘𑁆𑀙𑀢𑀺, ‘‘𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺 𑀇𑀫𑀺𑀦𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀯𑀺𑀧𑀲𑁆𑀲𑀦𑀸 𑀧𑀼𑀩𑁆𑀩𑀪𑀸𑀕𑁂 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀧𑀼𑀘𑁆𑀙𑀢𑀺. ‘‘𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸𑀢𑀺 𑀯𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸𑀢𑀺 𑀯𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸𑀢𑀺 𑀯𑀸 𑀅𑀦𑁂𑀓𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸’’𑀢𑀺 𑀯𑀸 𑀇𑀘𑁆𑀘𑁂𑀯𑀫𑀸𑀤𑀺𑀧𑀼𑀘𑁆𑀙𑀸𑀯𑀺𑀘𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄.

𑀲𑀢𑁆𑀢𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀧𑀼𑀘𑁆𑀙𑀁 𑀦𑀻𑀳𑀭𑀺𑀢𑁆𑀯𑀸 𑀧𑀼𑀘𑁆𑀙𑀸𑀯𑀺𑀘𑀬𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀢𑀲𑁆𑀲𑀁 𑀧𑀼𑀘𑁆𑀙𑀸𑀬𑀁 𑀓𑀢𑀫𑀸 𑀯𑀺𑀲𑁆𑀲𑀚𑁆𑀚𑀦𑀸𑀕𑀸𑀣𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀕𑀸𑀣𑀸𑀬𑀁. ‘‘𑀓𑀸𑀫𑁂𑀲𑀼…𑀧𑁂… 𑀧𑀭𑀺𑀩𑁆𑀩𑀚𑁂’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀸𑀕𑀸𑀣𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸. 𑀓𑀸𑀫𑁂𑀲𑀽𑀢𑀺 𑀓𑀸𑀫𑀻𑀬𑀦𑁆𑀢𑀻𑀢𑀺 𑀓𑀸𑀫𑀸, 𑀢𑁂𑀲𑀼 𑀓𑀸𑀫𑁂𑀲𑀼. 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀧𑀡𑁆𑀟𑀺𑀢𑁂𑀳𑀺 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬. 𑀫𑀦𑀲𑀸 𑀦𑀸𑀯𑀺𑀮𑁄𑀲𑀺𑀬𑀸𑀢𑀺 𑀆𑀯𑀺𑀮𑀪𑀸𑀯𑀓𑀭𑁂 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀸𑀤𑀬𑁄 𑀘𑁂𑀯 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀥𑀫𑁆𑀫𑁂 𑀧𑀚𑀳𑀦𑁆𑀢𑁄 𑀧𑀡𑁆𑀟𑀺𑀢𑁄 𑀫𑀦𑀲𑀸 𑀅𑀦𑀸𑀯𑀺𑀮𑁄 𑀲𑀼𑀧𑁆𑀧𑀲𑀦𑁆𑀦𑁄 𑀪𑀯𑁂𑀬𑁆𑀬. 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀦𑀸 𑀧𑀭𑀺𑀢𑀼𑀮𑀺𑀢𑀢𑁆𑀢𑀸 𑀅𑀦𑀺𑀘𑁆𑀘𑀢𑀸𑀤𑀻𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀓𑀼𑀲𑀮𑁄 𑀙𑁂𑀓𑁄. 𑀲𑀢𑁄𑀢𑀺 𑀓𑁂𑀲𑀸𑀤𑀻𑀲𑀼 𑀲𑀭𑀢𑀻𑀢𑀺 𑀲𑀢𑁄. 𑀪𑀺𑀓𑁆𑀔𑀽𑀢𑀺 𑀲𑀗𑁆𑀔𑀢𑀥𑀫𑁆𑀫𑁂 𑀪𑀬𑀸𑀤𑀺𑀢𑁄 𑀇𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀼. 𑀧𑀭𑀺𑀩𑁆𑀩𑀚𑁂𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀪𑀸𑀯𑁂𑀦 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑁂 𑀧𑀭𑀺 𑀲𑀫𑀦𑁆𑀢𑀢𑁄 𑀯𑀚𑁆𑀚𑁂𑀬𑁆𑀬.

𑀧𑀼𑀘𑁆𑀙𑀸𑀕𑀸𑀣𑀸𑀬𑀁 ‘‘𑀦𑀺𑀧𑀓𑁄’’𑀢𑀺 𑀧𑀤𑁂𑀦 𑀧𑀲𑀁𑀲𑀺𑀢𑁂𑀦 𑀪𑀕𑀯𑀢𑀸 𑀯𑀺𑀲𑁆𑀲𑀚𑁆𑀚𑀦𑀸𑀕𑀸𑀣𑀸 𑀯𑀼𑀢𑁆𑀢𑀸, 𑀢𑀲𑁆𑀲 𑀪𑀕𑀯𑀢𑁄 𑀬𑁂𑀦 𑀅𑀦𑀸𑀯𑀭𑀡𑀜𑀸𑀡𑁂𑀦 𑀉𑀓𑁆𑀓𑀁𑀲𑀕𑀢𑁂𑀦 𑀧𑀓𑁆𑀓𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀢𑀁 𑀅𑀦𑀸𑀯𑀭𑀡𑀜𑀸𑀡𑀁 𑀢𑀸𑀯 𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀸𑀯𑀭𑀡𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 𑀓𑀢𑀁 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀢𑀻𑀢𑁂 𑀅𑀁𑀲𑁂𑀢𑀺 𑀅𑀢𑀻𑀢𑀪𑀯𑁂 𑀲𑀧𑀭𑀓𑁆𑀔𑀦𑁆𑀥𑀸𑀤𑀺𑀓𑁂 𑀓𑁄𑀝𑁆𑀞𑀸𑀲𑁂 𑀅𑀜𑁆𑀜𑀸𑀡𑁂𑀦 𑀅𑀧𑁆𑀧𑀝𑀺𑀳𑀢𑀁 𑀪𑀕𑀯𑀢𑁄 𑀜𑀸𑀡𑀤𑀲𑁆𑀲𑀦𑀁. 𑀅𑀦𑀸𑀕𑀢𑁂 𑀅𑀁𑀲𑁂𑀢𑀺 𑀅𑀦𑀸𑀕𑀢𑀪𑀯𑁂 𑀲𑀧𑀭𑀓𑁆𑀔𑀦𑁆𑀥𑀸𑀤𑀺𑀓𑁂 𑀓𑁄𑀝𑁆𑀞𑀸𑀲𑁂. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀁𑀲𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀪𑀯𑁂 𑀲𑀧𑀭𑀓𑁆𑀔𑀦𑁆𑀥𑀸𑀤𑀺𑀓𑁂 𑀓𑁄𑀝𑁆𑀞𑀸𑀲𑁂.

‘‘𑀜𑀸𑀡𑀤𑀲𑁆𑀲𑀦𑀲𑁆𑀲 𑀓𑀢𑀭𑀲𑁆𑀫𑀺𑀁 𑀧𑀝𑀺𑀖𑀸𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀧𑀼𑀘𑁆𑀙𑀁 𑀞𑀧𑁂𑀢𑁆𑀯𑀸 𑀧𑀝𑀺𑀖𑀸𑀢𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀲𑀧𑀭𑀓𑁆𑀔𑀦𑁆𑀥𑀸𑀤𑀺𑀓𑁂 𑀓𑁄𑀝𑁆𑀞𑀸𑀲𑁂 𑀅𑀜𑁆𑀜𑁂𑀲𑀫𑁆𑀧𑀺 𑀜𑀸𑀡𑀤𑀲𑁆𑀲𑀦𑀁 𑀪𑀯𑁂𑀬𑁆𑀬, 𑀢𑀤𑀦𑀼𑀲𑀸𑀭𑁂𑀦 𑀅𑀢𑀻𑀢𑀸𑀦𑀸𑀕𑀢𑀓𑁄𑀝𑁆𑀞𑀸𑀲𑁂𑀲𑀼𑀧𑀺 𑀓𑀢𑀭𑀲𑁆𑀫𑀺𑀁 𑀅𑀜𑁆𑀜𑁂𑀲𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄 𑀪𑀯𑁂𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀧𑀼𑀘𑁆𑀙𑀁 𑀞𑀧𑁂𑀢𑁆𑀯𑀸 𑀧𑀝𑀺𑀖𑀸𑀢𑀯𑀺𑀲𑀬𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁄 𑀘𑀸𑀢𑀺 𑀓𑁆𑀯 𑀓𑀢𑀭𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀲𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄 𑀪𑀯𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀺.

𑀅𑀦𑀺𑀘𑁆𑀘𑁂, 𑀤𑀼𑀓𑁆𑀔𑁂, 𑀅𑀦𑀢𑁆𑀢𑀦𑀺𑀬𑁂 𑀘 𑀅𑀜𑁆𑀜𑁂𑀲𑀁 𑀅𑀜𑁆𑀜𑀸𑀡𑀁 𑀬𑀁 𑀅𑀤𑀲𑁆𑀲𑀦𑀁 𑀅𑀢𑁆𑀣𑀺, 𑀅𑀜𑁆𑀜𑀸𑀡𑀸𑀤𑀲𑁆𑀲𑀦𑀲𑀗𑁆𑀔𑀸𑀢𑁄 𑀲𑀪𑀸𑀯𑁄 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄 𑀪𑀯𑀢𑀺, 𑀦 𑀲𑀧𑀭𑀓𑁆𑀔𑀦𑁆𑀥𑀸𑀤𑀺𑀤𑀲𑁆𑀲𑀦𑀫𑀢𑁆𑀢𑀧𑀝𑀺𑀖𑀸𑀢𑁄. 𑀏𑀢𑁂𑀦 𑀅𑀦𑀺𑀘𑁆𑀘𑀢𑁄 𑀮𑀓𑁆𑀔𑀡𑀢𑁆𑀢𑀬𑁂 𑀧𑀯𑀢𑁆𑀢𑀲𑁆𑀲 𑀜𑀸𑀡𑀤𑀲𑁆𑀲𑀦𑀲𑁆𑀲 𑀅𑀜𑁆𑀜𑁂𑀲𑀁 𑀤𑀼𑀭𑀪𑀺𑀲𑀫𑁆𑀪𑀯𑀁, 𑀪𑀕𑀯𑀢𑁄 𑀘 𑀜𑀸𑀡𑀤𑀲𑁆𑀲𑀦𑀲𑁆𑀲 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀢𑀁 𑀤𑀲𑁆𑀲𑁂𑀢𑀺. 𑀪𑀕𑀯𑀢𑁄 𑀳𑀺 𑀮𑀓𑁆𑀔𑀡𑀢𑁆𑀢𑀬𑀯𑀺𑀪𑀸𑀯𑀦𑁂𑀦 𑀯𑁂𑀦𑁂𑀬𑁆𑀬𑀸 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀁 𑀮𑀪𑀦𑁆𑀢𑀺. ‘‘𑀪𑀕𑀯𑀢𑁄 𑀜𑀸𑀡𑀤𑀲𑁆𑀲𑀦𑀧𑀝𑀺𑀖𑀸𑀢𑀸𑀪𑀸𑀯𑁂𑀦 𑀅𑀜𑁆𑀜𑁂𑀲𑀜𑁆𑀘 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑀪𑀸𑀯𑁄 𑀓𑀢𑀫𑀸𑀬 𑀉𑀧𑀫𑀸𑀬 𑀅𑀫𑁆𑀳𑀸𑀓𑀁 𑀧𑀸𑀓𑀝𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀉𑀧𑀫𑀸𑀬 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀬𑀣𑀸 𑀇𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀥 𑀲𑀢𑁆𑀢𑀮𑁄𑀓𑁂 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀆𑀓𑀸𑀲𑁂 𑀢𑀸𑀭𑀓𑀸𑀦𑀺 𑀧𑀲𑁆𑀲𑁂𑀬𑁆𑀬, 𑀕𑀡𑀦𑀲𑀗𑁆𑀓𑁂𑀢𑁂𑀦 ‘‘𑀏𑀢𑁆𑀢𑀓𑀸𑀦𑀻’’𑀢𑀺 𑀦𑁄 𑀘 𑀚𑀸𑀦𑁂𑀬𑁆𑀬 𑀬𑀣𑀸, 𑀏𑀯𑀁 𑀅𑀜𑁆𑀜𑁂𑀲𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄 𑀅𑀬𑀁 𑀅𑀜𑁆𑀜𑀸𑀡𑀤𑀲𑁆𑀲𑀦𑀲𑀪𑀸𑀯𑁄 𑀪𑀯𑀢𑀺.

𑀪𑀕𑀯𑀢𑁄 𑀧𑀦 𑀢𑀣𑀸 𑀅𑀪𑀸𑀯𑀢𑁄 𑀓𑁂𑀦𑀘𑀺 𑀅𑀜𑁆𑀜𑀸𑀡𑁂𑀦 𑀅𑀤𑀲𑁆𑀲𑀦𑁂𑀦 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀤𑀲𑁆𑀲𑀦𑀁 𑀪𑀯𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀪𑀕𑀯𑀢𑁄 𑀜𑀸𑀡𑀤𑀲𑁆𑀲𑀦𑀲𑁆𑀲 𑀅𑀧𑁆𑀧𑀝𑀺𑀳𑀢𑀪𑀸𑀯𑁄 𑀓𑀲𑁆𑀫𑀸 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀦𑀸𑀯𑀭𑀡𑀜𑀸𑀡𑀤𑀲𑁆𑀲𑀦𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀦𑀺𑀧𑀓𑀲𑁆𑀲…𑀧𑁂… 𑀪𑀕𑀯𑀢𑁄 𑀅𑀦𑀸𑀯𑀭𑀡𑀜𑀸𑀡𑀁 𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤𑁂𑀳𑀺 𑀆𑀘𑀭𑀺𑀬𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, 𑀧𑀘𑁆𑀙𑀸 𑀕𑀸𑀣𑀸𑀬 ‘𑀇𑀭𑀺𑀬’𑀦𑁆𑀢𑀺 𑀧𑀤𑁂𑀦 𑀧𑀼𑀘𑁆𑀙𑀺𑀢𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀝𑀺𑀧𑀤𑀸 𑀓𑀣𑀁 𑀯𑀺𑀚𑀸𑀦𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀲𑁂𑀔𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑁂. 𑀲𑁂𑀔𑁂𑀦𑀸𑀢𑀺 𑀲𑀺𑀓𑁆𑀔𑀦𑀲𑀻𑀮𑁂𑀦 𑀧𑀼𑀕𑁆𑀕𑀮𑁂𑀦 𑀭𑀚𑀦𑀻𑀬𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀕𑁂𑀥𑀸 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀧𑀭𑀺𑀬𑀼𑀝𑁆𑀞𑀸𑀦𑀻𑀬𑁂𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀤𑁄𑀲𑀸 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩𑀁.

‘‘𑀢𑁂𑀲𑀼 𑀕𑁂𑀥𑀤𑁄𑀲𑁂𑀲𑀼 𑀓𑀢𑀫𑀁 𑀦𑀺𑀯𑀸𑀭𑁂𑀦𑁆𑀢𑁄 𑀪𑀕𑀯𑀸 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀓𑀢𑀫𑀁 𑀧𑀤𑀫𑀸𑀳𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀸 𑀇𑀘𑁆𑀙𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀕𑁂𑀥𑀤𑁄𑀲𑁂𑀲𑀼. 𑀇𑀘𑁆𑀙𑀸𑀢𑀺 𑀭𑀸𑀕𑀺𑀘𑁆𑀙𑀸. 𑀫𑀼𑀘𑁆𑀙𑀸𑀢𑀺 𑀮𑁄𑀪𑀫𑁄𑀳𑀲𑀳𑀕𑀢𑀫𑁄𑀳𑀫𑀼𑀘𑁆𑀙𑀸. 𑀧𑀢𑁆𑀣𑀦𑀸𑀢𑀺 𑀭𑀸𑀕𑀧𑀢𑁆𑀣𑀦𑀸. 𑀧𑀺𑀬𑀸𑀬𑀦𑀸𑀢𑀺 𑀢𑀡𑁆𑀳𑀸𑀧𑀺𑀬𑀸𑀬𑀦𑀸𑀯, 𑀦 𑀫𑁂𑀢𑁆𑀢𑀸𑀧𑀺𑀬𑀸𑀬𑀦𑀸. 𑀓𑀻𑀴𑀦𑀸𑀢𑀺 𑀕𑁂𑀥𑀓𑀻𑀴𑀦𑀸. 𑀏𑀢𑀸𑀦𑀺 𑀳𑀺 𑀕𑁂𑀥𑀧𑀭𑀺𑀬𑀸𑀬𑀯𑀘𑀦𑀸𑀦𑀺. 𑀢𑀁 𑀕𑁂𑀥𑀲𑀗𑁆𑀔𑀸𑀢𑀁 𑀇𑀘𑁆𑀙𑀸𑀤𑀺𑀓𑀁 𑀦𑀺𑀯𑀸𑀭𑁂𑀦𑁆𑀢𑁄 𑀪𑀕𑀯𑀸 ‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀓𑀸𑀭𑁂𑀦 𑀆𑀳.

𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀖𑀸𑀢𑀁 𑀤𑁄𑀲𑀁 𑀦𑀺𑀯𑀸𑀭𑁂𑀦𑁆𑀢𑁄 𑀪𑀕𑀯𑀸 ‘‘𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸’’𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀓𑀸𑀭𑁂𑀦 𑀆𑀳𑀸𑀢𑀺 𑀬𑁄𑀚𑀦𑀸. 𑀕𑁂𑀥𑀤𑁄𑀲𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀯𑀸𑀭𑁂𑀦𑁆𑀢𑁄 𑀪𑀕𑀯𑀸 𑀤𑁆𑀯𑁂 𑀧𑀤𑀸𑀦𑀺 𑀆𑀳𑀸𑀢𑀺 𑀯𑀼𑀢𑁆𑀢𑀁, ‘‘𑀢𑀁 𑀓𑁂𑀦 𑀅𑀢𑁆𑀣𑁂𑀦 𑀲𑀤𑁆𑀤𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀣𑀸 𑀳𑀺 𑀲𑁂𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀚𑀦𑀻𑀬𑁂𑀲𑀼 𑀅𑀪𑀺𑀕𑀺𑀚𑁆𑀛𑀦𑁆𑀢𑁄 𑀲𑁂𑀔𑁄 𑀅𑀦𑀼𑀧𑁆𑀧𑀦𑁆𑀦𑀁 𑀮𑁄𑀪𑀧𑀥𑀸𑀦𑀁 𑀓𑀺𑀮𑁂𑀲𑀜𑁆𑀘 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀜𑁆𑀘 𑀨𑀸𑀢𑀺𑀁 𑀅𑀪𑀺𑀯𑀟𑁆𑀠𑀦𑀁 𑀓𑀭𑁄𑀢𑀺, 𑀧𑀭𑀺𑀬𑀼𑀝𑁆𑀞𑀸𑀦𑀻𑀬𑁂𑀲𑀼 𑀆𑀯𑀺𑀮𑁄 𑀲𑁂𑀔𑁄 𑀅𑀦𑀼𑀧𑁆𑀧𑀦𑁆𑀦𑀁 𑀤𑁄𑀲𑀧𑀥𑀸𑀦𑀁 𑀓𑀺𑀮𑁂𑀲𑀜𑁆𑀘 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀜𑁆𑀘 𑀨𑀸𑀢𑀺𑀁 𑀯𑀟𑁆𑀠𑀦𑀁 𑀓𑀭𑁄𑀢𑀺, 𑀇𑀢𑀺 𑀇𑀫𑀺𑀦𑀸 𑀧𑀝𑀺𑀓𑁆𑀔𑁂𑀧𑀅𑀢𑁆𑀣𑁂𑀦 𑀢𑀁 𑀫𑀫 𑀯𑀘𑀦𑀁 𑀲𑀤𑁆𑀤𑀳𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀓𑀺𑀁 𑀧𑀦 𑀅𑀦𑀪𑀺𑀕𑀺𑀚𑁆𑀛𑀦𑁆𑀢𑁄, 𑀅𑀦𑀸𑀯𑀺𑀮𑁄 𑀘 𑀲𑁂𑀓𑁆𑀔𑁄 𑀅𑀕𑁂𑀥𑀤𑁄𑀲𑀦𑀺𑀯𑀸𑀭𑀡𑀫𑁂𑀯 𑀓𑀭𑁄𑀢𑀺, 𑀉𑀤𑀸𑀳𑀼 𑀉𑀢𑁆𑀢𑀭𑀺𑀧𑀺 𑀧𑀝𑀺𑀧𑀤𑀁 𑀧𑀽𑀭𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀉𑀢𑁆𑀢𑀭𑀺𑀧𑀺 𑀧𑀝𑀺𑀧𑀤𑀁 𑀧𑀽𑀭𑁂𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀧𑀦 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄𑀢𑀺 𑀦𑀢𑁆𑀣𑀺 𑀆𑀯𑀺𑀮𑀓𑀭𑀸 𑀲𑀗𑁆𑀓𑀧𑁆𑀧𑀸 𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑀸 𑀏𑀢𑀲𑁆𑀲𑀸𑀢𑀺 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄, 𑀇𑀘𑁆𑀙𑀸𑀤𑀺𑀕𑁂𑀥𑀲𑁆𑀲 𑀅𑀪𑀸𑀯𑁂𑀦 𑀅𑀦𑀪𑀺𑀕𑀺𑀚𑁆𑀛𑀦𑁆𑀢𑁄 𑀯𑀸𑀬𑀫𑀢𑀺 𑀓𑀼𑀲𑀮𑀯𑀸𑀬𑀸𑀫𑀁 𑀧𑀯𑀢𑁆𑀢𑁂𑀢𑀺. ‘‘𑀓𑀣𑀁 𑀯𑀸𑀬𑀫𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁄𑀢𑀺 𑀉𑀧𑀭𑀺𑀪𑀸𑀯𑀦𑀸𑀫𑀕𑁆𑀕𑀪𑀸𑀯𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑁂𑀓𑁆𑀔𑁄. 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀲𑀓𑁆𑀓𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦𑁂𑀯 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁫-𑁧𑁬) 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀪𑀢𑁆𑀢𑁄.

𑁧𑁬. 𑀬𑁂𑀦𑀸𑀢𑀺 𑀅𑀲𑀼𑀪𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀡𑀮𑀓𑁆𑀔𑀡𑁂𑀦 𑀇𑀦𑁆𑀤𑁆𑀭𑀺𑀬𑁂𑀦 𑀢𑀡𑁆𑀳𑀸𑀫𑀬𑀺𑀢𑀯𑀢𑁆𑀣𑀽𑀲𑀼 𑀓𑀸𑀫𑀢𑀡𑁆𑀳𑀸𑀬 𑀲𑀳𑀚𑀸𑀢𑀁 𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀅𑀲𑀼𑀪𑀸𑀤𑀺𑀅𑀦𑀼𑀲𑁆𑀲𑀭𑀡𑀮𑀓𑁆𑀔𑀡𑀁 𑀇𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀬𑁂𑀦 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑁂𑀦 𑀅𑀯𑀺𑀓𑁆𑀔𑁂𑀧𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀅𑀯𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀬𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀲𑀫𑁆𑀫𑀧𑁆𑀧𑀥𑀸𑀦𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀬𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀇𑀦𑁆𑀤𑁆𑀭𑀺𑀬𑁂𑀦 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂…𑀧𑁂… 𑀦𑀸𑀥𑀺𑀯𑀸𑀲𑁂𑀢𑀺, 𑀇𑀤𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀸 𑀬𑀸 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀸𑀯𑀺𑀮𑀪𑀸𑀯𑀢𑁄 𑀇𑀤𑀁 𑀲𑀤𑁆𑀤𑀳𑀦𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀇𑀫𑀸𑀦𑀺 𑀲𑁂𑀓𑁆𑀔𑀲𑁆𑀲 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺.

𑀏𑀓𑀲𑁆𑀫𑀺𑀁𑀬𑁂𑀯 𑀯𑀺𑀲𑀬𑁂 𑀚𑁂𑀝𑁆𑀞𑀓𑀪𑀸𑀯𑀁 𑀦 𑀧𑀸𑀧𑀼𑀡𑁂𑀬𑁆𑀬𑀼𑀁, 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀚𑁂𑀝𑁆𑀞𑀓𑀪𑀸𑀯𑀁 𑀧𑀸𑀧𑀼𑀡𑀺𑀢𑀼𑀁 𑀅𑀭𑀳𑀦𑁆𑀢𑀺, ‘‘𑀓𑀢𑀫𑀁 𑀇𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀯𑀺𑀲𑀬𑁂 𑀚𑁂𑀝𑁆𑀞𑀓𑀪𑀸𑀯𑀁 𑀧𑀯𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑀢𑁄 𑀇𑀤𑀁 𑀇𑀦𑁆𑀤𑁆𑀭𑀺𑀬𑀁 𑀇𑀫𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀚𑁂𑀝𑁆𑀞𑀓𑀪𑀸𑀯𑀁 𑀧𑀯𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀺𑀁 𑀦𑀼 𑀲𑁂𑀓𑁆𑀔𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀯 𑀅𑀧𑁆𑀧𑀫𑀢𑁆𑀢𑁄’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑁄 𑀣𑁄𑀫𑀺𑀢𑁄, 𑀉𑀤𑀸𑀳𑀼 𑀲𑀩𑁆𑀩𑁂𑀳𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀲𑀩𑁆𑀩𑁂𑀳𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀧𑀫𑀼𑀔𑁂𑀳𑀺 𑀯𑀼𑀢𑁆𑀢𑁄 𑀣𑁄𑀫𑀺𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀲𑁂𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀤𑀲𑁆𑀲𑀦𑁂𑀦 𑀲𑁂𑀔𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑁂𑀳𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀧𑁆𑀧𑀫𑀢𑁆𑀢𑁄𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑁄 𑀣𑁄𑀫𑀺𑀢𑁄 𑀅𑀦𑀸𑀯𑀺𑀮𑀢𑀸𑀬 𑀫𑀦𑀲𑀸𑀢𑀺 𑀬𑁄𑀚𑀦𑀸. ‘‘𑀲𑁂𑀓𑁆𑀔𑀲𑁆𑀲 𑀅𑀦𑀸𑀯𑀺𑀮𑀢𑀸 𑀓𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳 𑀪𑀕𑀯𑀸 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀢𑀸 ‘‘𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁂𑀓𑁆𑀔𑀲𑁆𑀲 𑀅𑀦𑀸𑀯𑀺𑀮𑀢𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑀸𑀢𑀺.

𑁧𑁭. 𑀲𑁂𑀓𑁆𑀔𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀧𑀝𑀺𑀧𑀤𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀣𑀁 𑀅𑀲𑁂𑀓𑁆𑀔𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀧𑀝𑀺𑀧𑀤𑀸 𑀜𑀸𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀅𑀲𑁂𑀓𑁆𑀔𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀧𑀝𑀺𑀧𑀤𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀫𑀢𑁆𑀣𑀓𑀧𑁆𑀧𑀢𑁆𑀢𑀸𑀬 𑀧𑀝𑀺𑀧𑀤𑀸𑀬 𑀅𑀲𑁂𑀓𑁆𑀔𑁄 𑀓𑀼𑀲𑀮𑁄 𑀙𑁂𑀓𑀢𑀭𑁄𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑁄 𑀣𑁄𑀫𑀺𑀢𑁄 𑀅𑀦𑀸𑀯𑀺𑀮𑀢𑀸𑀬 𑀫𑀦𑀲𑀸𑀢𑀺. 𑀅𑀲𑁂𑀓𑁆𑀔𑀲𑁆𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀬𑀁 𑀓𑁄𑀲𑀮𑁆𑀮𑀁 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀢𑀲𑁆𑀲 𑀓𑁄𑀲𑀮𑁆𑀮𑀲𑁆𑀲 𑀯𑀺𑀲𑀬𑀪𑀽𑀢𑁂 𑀲𑀩𑁆𑀩𑀥𑀫𑁆𑀫𑁂 𑀢𑀸𑀯 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀥𑀫𑁆𑀫𑀲𑀗𑁆𑀔𑀸𑀢𑁄 𑀮𑁄𑀓𑁄 𑀦𑀸𑀫 𑀓𑀺𑀮𑁂𑀲𑀮𑁄𑀓𑁄, 𑀪𑀯𑀮𑁄𑀓𑁄, 𑀇𑀦𑁆𑀤𑁆𑀭𑀺𑀬𑀮𑁄𑀓𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀧𑀭𑀺𑀢𑁆𑀢𑀥𑀫𑁆𑀫𑀝𑁆𑀞𑁄 𑀓𑀺𑀮𑁂𑀲𑀚𑀦𑀦𑀝𑁆𑀞𑁂𑀦 𑀓𑀺𑀮𑁂𑀲𑁄, 𑀓𑀼𑀲𑀮𑀸𑀤𑀺𑀧𑀯𑀢𑁆𑀢𑀦𑀝𑁆𑀞𑁂𑀦 𑀮𑁄𑀓𑁄 𑀘𑀸𑀢𑀺 𑀓𑀺𑀮𑁂𑀲𑀮𑁄𑀓𑁄. 𑀫𑀳𑀕𑁆𑀕𑀢𑀥𑀫𑁆𑀫𑀝𑁆𑀞𑁄 𑀪𑀯𑀦𑀝𑁆𑀞𑁂𑀦 𑀪𑀯𑁄, 𑀯𑀼𑀢𑁆𑀢𑀦𑀬𑁂𑀦 𑀮𑁄𑀓𑁄 𑀘𑀸𑀢𑀺 𑀪𑀯𑀮𑁄𑀓𑁄. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀥𑀫𑁆𑀫𑀝𑁆𑀞𑁄 𑀆𑀥𑀺𑀧𑀘𑁆𑀘𑀝𑁆𑀞𑀬𑁄𑀕𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀪𑀽𑀢𑁄 𑀳𑀼𑀢𑁆𑀯𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀧𑀢𑁆𑀢𑀦𑀝𑁆𑀞𑁂𑀦 𑀮𑁄𑀓𑁄 𑀘𑀸𑀢𑀺 𑀇𑀦𑁆𑀤𑁆𑀭𑀺𑀬𑀮𑁄𑀓𑁄.

‘‘𑀢𑀻𑀲𑀼 𑀮𑁄𑀓𑁂𑀲𑀼 𑀓𑀢𑀫𑁂𑀦 𑀓𑀢𑀫𑁄 𑀲𑀫𑀼𑀤𑀸𑀕𑀘𑁆𑀙𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑁄 𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁄𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀓𑀺𑀮𑁂𑀲𑀮𑁄𑀓𑀲𑀗𑁆𑀔𑀸𑀢𑁂 𑀧𑀭𑀺𑀢𑁆𑀢𑀥𑀫𑁆𑀫𑁂, 𑀪𑀯𑀮𑁄𑀓𑀲𑀗𑁆𑀔𑀸𑀢𑁂 𑀫𑀳𑀕𑁆𑀕𑀢𑀥𑀫𑁆𑀫𑁂 𑀘 𑀢𑀁𑀢𑀁𑀲𑀫𑁆𑀧𑀸𑀤𑀦𑀯𑀲𑁂𑀦 𑀞𑀺𑀢𑁄, 𑀲𑁄 𑀧𑀼𑀕𑁆𑀕𑀮𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀢𑁆𑀢𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑁂𑀢𑀺.

‘‘𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀸𑀧𑀦𑀯𑀲𑁂𑀦 𑀯𑀼𑀟𑁆𑀠𑀸𑀧𑀺𑀬𑀫𑀸𑀦𑁂𑀲𑀼 𑀓𑀸 𑀧𑀜𑁆𑀜𑀸 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀦𑁆𑀤𑁆𑀭𑀺𑀬𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑁂𑀬𑁆𑀬𑀲𑁆𑀲𑀸𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲. 𑀧𑀭𑀺𑀜𑁆𑀜𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀲𑀮𑀓𑁆𑀔𑀡𑀢𑁄, 𑀧𑀘𑁆𑀘𑀬𑀢𑁄 𑀘 𑀧𑀭𑀺𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀧𑀜𑁆𑀜𑀸. ‘‘𑀲𑀸 𑀧𑀭𑀺𑀜𑁆𑀜𑀸 𑀓𑀢𑀺𑀯𑀺𑀥𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑀸 𑀤𑀼𑀯𑀺𑀥𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸 𑀧𑀭𑀺𑀜𑁆𑀜𑀸 𑀤𑀲𑁆𑀲𑀦𑀧𑀭𑀺𑀜𑁆𑀜𑀸𑀬 𑀘 𑀪𑀸𑀯𑀦𑀸𑀧𑀭𑀺𑀜𑁆𑀜𑀸𑀬 𑀘 𑀤𑀼𑀯𑀺𑀥𑁂𑀦 𑀯𑀺𑀜𑁆𑀜𑀽𑀳𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀢𑀺. 𑀤𑀲𑁆𑀲𑀦𑀧𑀭𑀺𑀜𑁆𑀜𑀸𑀬𑀸𑀢𑀺 𑀘 𑀤𑀲𑁆𑀲𑀦𑀫𑀕𑁆𑀕𑀧𑀜𑁆𑀜𑀸𑀚𑀦𑀺𑀓𑀸𑀬 𑀜𑀸𑀢𑀧𑀭𑀺𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀤𑀲𑁆𑀲𑀦𑀧𑀭𑀺𑀜𑁆𑀜𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁭). 𑀪𑀸𑀯𑀦𑀸𑀧𑀭𑀺𑀜𑁆𑀜𑀸𑀬𑀸𑀢𑀺 𑀪𑀸𑀯𑀦𑀸𑀫𑀕𑁆𑀕𑀧𑀜𑁆𑀜𑀸𑀚𑀦𑀺𑀓𑀸𑀬 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀲𑀤𑁆𑀥𑀺𑀁 𑀧𑀳𑀸𑀦𑀧𑀭𑀺𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑁄.

‘‘𑀲𑀸 𑀤𑀼𑀯𑀺𑀥𑁂𑀦𑀸’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀅𑀢𑁆𑀣𑁄 𑀅𑀢𑀺𑀲𑀗𑁆𑀔𑁂𑀧𑁄 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀤𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀸𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀼𑀧𑁆𑀧𑀚𑁆𑀚𑀦𑀓𑀸𑀮𑁂. 𑀲𑁂𑀔𑁄𑀢𑀺 𑀲𑀺𑀓𑁆𑀔𑀦𑀲𑀻𑀮𑀢𑀸𑀬 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀘𑁂𑀯 𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑁄 𑀘. 𑀜𑁂𑀬𑁆𑀬𑀦𑁆𑀢𑀺 𑀜𑀸𑀢𑀩𑁆𑀩𑀁 𑀭𑀽𑀧𑀸𑀤𑀺𑀓𑀁 𑀲𑀗𑁆𑀔𑀸𑀭𑀁. 𑀧𑀭𑀺𑀚𑀸𑀦𑀸𑀢𑀻𑀢𑀺 𑀧𑀭𑀺𑀕𑁆𑀕𑀳𑀸𑀤𑀺𑀜𑀸𑀡𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀚𑀸𑀦𑀸𑀢𑀺 𑀦𑀺𑀩𑁆𑀩𑀺𑀤𑀸𑀜𑀸𑀡𑀲𑀳𑀕𑀢𑁂𑀦. 𑀢𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀘𑁂𑀯 𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑀲𑁆𑀲 𑀘. 𑀤𑁆𑀯𑁂 𑀥𑀫𑁆𑀫𑀸𑀢𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀩𑀮𑀯𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁄 𑀘𑁂𑀯 𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑀲𑁆𑀲 𑀘 𑀩𑀮𑀯𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁄 𑀘. 𑀬𑀣𑀸𑀓𑁆𑀓𑀫𑀁 𑀤𑀲𑁆𑀲𑀦𑀓𑁄𑀲𑀮𑁆𑀮𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀜𑁆𑀘𑁂𑀯 𑀪𑀸𑀯𑀦𑀸𑀓𑁄𑀲𑀮𑁆𑀮𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀺𑀓𑀜𑁆𑀘 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸𑀧𑀦𑀯𑀲𑁂𑀦 𑀕𑀘𑁆𑀙𑀦𑁆𑀢𑀺.

‘‘𑀧𑀼𑀩𑁆𑀩𑁂 𑀬𑀁 𑀜𑀸𑀡𑀁 ‘𑀦𑁂𑀬𑁆𑀬𑀲𑁆𑀲 𑀧𑀭𑀺𑀜𑁆𑀜𑀸’𑀢𑀺 𑀯𑀼𑀢𑁆𑀢𑀁, 𑀢𑀁 𑀜𑀸𑀡𑀁 𑀓𑀢𑀺𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀁 𑀜𑀸𑀡𑀁 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁…𑀧𑁂... 𑀲𑀘𑁆𑀙𑀺𑀓𑀺𑀭𑀺𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀢𑀸𑀲𑀼 𑀯𑀺𑀧𑀲𑁆𑀲𑀦𑀸𑀪𑁂𑀤𑁂𑀦 𑀪𑀺𑀦𑁆𑀦𑀸𑀲𑀼 𑀧𑀜𑁆𑀘𑀲𑀼 𑀅𑀪𑀺𑀜𑁆𑀜𑀸𑀤𑀻𑀲𑀼 𑀓𑀢𑀫𑀸 𑀅𑀪𑀺𑀜𑁆𑀜𑀸, 𑀓𑀢𑀫𑀸 𑀧𑀭𑀺𑀜𑁆𑀜𑀸, 𑀓𑀢𑀫𑀁 𑀧𑀳𑀸𑀦𑀁, 𑀓𑀢𑀫𑀸 𑀪𑀸𑀯𑀦𑀸, 𑀓𑀢𑀫𑀸 𑀲𑀘𑁆𑀙𑀺𑀓𑀺𑀭𑀺𑀬𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀅𑀪𑀺𑀜𑁆𑀜𑀸𑀤𑀻𑀲𑀼. 𑀬𑀁 𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑁂 𑀜𑀸𑀡𑀦𑁆𑀢𑀺 𑀭𑀽𑀧𑀥𑀫𑁆𑀫𑀸𑀦𑀁 𑀓𑀓𑁆𑀔𑀴𑀸𑀤𑀺𑀲𑀮𑀓𑁆𑀔𑀡𑁂, 𑀅𑀭𑀽𑀧𑀥𑀫𑁆𑀫𑀸𑀦𑀁 𑀨𑀼𑀲𑀦𑀸𑀤𑀺𑀲𑀮𑀓𑁆𑀔𑀡𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀁 𑀬𑀁 𑀜𑀸𑀡𑀁 𑀳𑁂𑀢𑀼𑀨𑀮𑀚𑀸𑀦𑀦𑀳𑁂𑀢𑀼𑀚𑀸𑀦𑀦𑀲𑀗𑁆𑀔𑀸𑀢𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀘𑁂𑀯 𑀳𑁂𑀢𑀼𑀨𑀮𑀚𑀸𑀦𑀦𑀲𑀗𑁆𑀔𑀸𑀢𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀘 𑀪𑀯𑀢𑀺. 𑀅𑀬𑀁 𑀲𑀮𑀓𑁆𑀔𑀡𑁂𑀦 𑀲𑀤𑁆𑀥𑀺𑀁 𑀳𑁂𑀢𑀼𑀨𑀮𑀚𑀸𑀦𑀦𑀸 𑀧𑀜𑁆𑀜𑀸 𑀅𑀪𑀺𑀜𑁆𑀜𑀸 𑀦𑀸𑀫.

𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀅𑀪𑀺𑀚𑀸𑀦𑀺𑀢𑁆𑀯𑀸. 𑀬𑀸 𑀧𑀭𑀺𑀚𑀸𑀦𑀦𑀸𑀢𑀺𑀆𑀤𑀻𑀲𑀼 ‘‘𑀇𑀤𑀁 𑀅𑀦𑀯𑀚𑁆𑀚𑀁 𑀓𑀼𑀲𑀮𑀁, 𑀇𑀤𑀁 𑀲𑀸𑀯𑀚𑁆𑀚𑀁 𑀅𑀓𑀼𑀲𑀮𑀁, 𑀇𑀤𑀁 𑀅𑀓𑀼𑀲𑀮𑀯𑀺𑀧𑀸𑀓𑀚𑀦𑀓𑀁 𑀲𑀸𑀯𑀚𑁆𑀚𑀁, 𑀇𑀤𑀁 𑀓𑀼𑀲𑀮𑀯𑀺𑀧𑀸𑀓𑀚𑀦𑀓𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑀁𑀓𑀺𑀮𑀺𑀝𑁆𑀞𑀁 𑀓𑀡𑁆𑀳𑀁, 𑀇𑀤𑀁 𑀅𑀲𑀁𑀓𑀺𑀮𑀺𑀝𑁆𑀞𑀁 𑀲𑀼𑀓𑁆𑀓𑀁, 𑀇𑀤𑀁 𑀓𑀼𑀲𑀮𑀁 𑀅𑀦𑀯𑀚𑁆𑀚𑀸𑀤𑀺𑀓𑀁 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀅𑀓𑀼𑀲𑀮𑀁 𑀲𑀸𑀯𑀚𑁆𑀚𑀸𑀤𑀺𑀓𑀁 𑀦 𑀲𑁂𑀯𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀯𑀲𑁂𑀦 𑀕𑀳𑀺𑀢𑀸 𑀲𑀫𑁆𑀫𑀲𑀺𑀢𑀸 𑀇𑀫𑁂 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀲𑀗𑁆𑀔𑀢𑀥𑀫𑁆𑀫𑀸 𑀇𑀤𑀁 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀨𑀮𑀁 𑀆𑀦𑀺𑀲𑀁𑀲𑀁 𑀅𑀦𑀼𑀓𑁆𑀓𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀺. 𑀢𑀦𑁆𑀦𑀺𑀩𑁆𑀩𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀉𑀧𑁆𑀧𑀚𑁆𑀚𑀦𑀢𑁄 𑀉𑀧𑀘𑀸𑀭𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀕𑀳𑀺𑀢𑀸𑀦𑀁 𑀧𑀯𑀢𑁆𑀢𑀺𑀢𑀸𑀦𑀁 𑀢𑁂𑀲𑀁 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀁 𑀅𑀬𑀁 𑀲𑀘𑁆𑀘𑀸𑀦𑀼𑀩𑁄𑀥𑀧𑀝𑀺𑀯𑁂𑀥𑁄 𑀅𑀢𑁆𑀣𑁄𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀸 𑀧𑀭𑀺𑀚𑀸𑀦𑀦𑀸 𑀧𑀯𑀢𑁆𑀢𑀸, 𑀲𑀸 𑀅𑀬𑀁 𑀧𑀭𑀺𑀚𑀸𑀦𑀦𑀸 𑀧𑀭𑀺𑀜𑁆𑀜𑀸 𑀦𑀸𑀫𑀸𑀢𑀺 𑀬𑁄𑀚𑁂𑀢𑁆𑀯𑀸, 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀭𑀺𑀜𑁆𑀜𑀸𑀧𑀜𑁆𑀜𑀸𑀬 𑀧𑀭𑀺𑀚𑀸𑀦𑀺𑀢𑁆𑀯𑀸 𑀧𑀳𑀸𑀢𑀩𑁆𑀩𑀸, 𑀪𑀸𑀯𑁂𑀢𑀩𑁆𑀩𑀸, 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀘 𑀢𑀬𑁄 𑀥𑀫𑁆𑀫𑀸 𑀅𑀯𑀲𑀺𑀝𑁆𑀞𑀸 𑀪𑀯𑀦𑁆𑀢𑀺. ‘‘𑀬𑁂 𑀅𑀓𑀼𑀲𑀮𑀸, 𑀢𑁂 𑀧𑀳𑀸𑀢𑀩𑁆𑀩𑀸’’𑀢𑀺 𑀬𑀸 𑀧𑀭𑀺𑀚𑀸𑀦𑀦𑀸 𑀧𑀜𑁆𑀜𑀸 𑀧𑀯𑀢𑁆𑀢𑀸, 𑀇𑀤𑀁 𑀧𑀳𑀸𑀦𑀁 𑀧𑀳𑀸𑀦𑀜𑀸𑀡𑀁. ‘‘𑀬𑁂 𑀓𑀼𑀲𑀮𑀸, 𑀢𑁂 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀬𑀸 𑀧𑀭𑀺𑀚𑀸𑀦𑀦𑀸 𑀧𑀜𑁆𑀜𑀸 𑀧𑀯𑀢𑁆𑀢𑀸, 𑀲𑀸 𑀪𑀸𑀯𑀦𑀸𑀧𑀜𑁆𑀜𑀸. ‘‘𑀬𑀁 𑀅𑀲𑀗𑁆𑀔𑀢𑀁, 𑀇𑀤𑀁 𑀲𑀘𑁆𑀙𑀺𑀓𑀺𑀭𑀺𑀬’’𑀦𑁆𑀢𑀺 𑀬𑀸 𑀧𑀭𑀺𑀚𑀸𑀦𑀦𑀸 𑀧𑀜𑁆𑀜𑀸 𑀧𑀯𑀢𑁆𑀢𑀸, 𑀲𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀸𑀢𑀺 𑀬𑁄𑀚𑁂𑀢𑁆𑀯𑀸 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁂𑀦 𑀅𑀯𑀺𑀭𑀼𑀤𑁆𑀥𑁄 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀅𑀪𑀺𑀜𑁆𑀜𑀸𑀤𑀬𑁄 𑀧𑀜𑁆𑀘𑀯𑀺𑀥𑀸 𑀧𑀜𑁆𑀜𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀢𑀸𑀳𑀺 𑀧𑀭𑀺𑀜𑁆𑀜𑀸𑀳𑀺 𑀚𑀸𑀦𑀦𑁆𑀢𑁄 𑀧𑀼𑀕𑁆𑀕𑀮𑁄 ‘𑀓𑀺’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀣𑁄𑀫𑀻𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑁄 𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀚𑀸𑀦𑀸𑀢𑀺, 𑀅𑀬𑀁 𑀚𑀸𑀦𑀦𑁆𑀢𑁄 𑀧𑀼𑀕𑁆𑀕𑀮𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀼𑀲𑀮𑀢𑁆𑀢𑀸 𑀙𑁂𑀓𑀢𑁆𑀢𑀸 ‘‘𑀅𑀢𑁆𑀣𑀓𑀼𑀲𑀮𑁄’’𑀢𑀺 𑀯𑀼𑀘𑁆𑀘𑀢𑀺 𑀣𑁄𑀫𑀻𑀬𑀢𑀺, 𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀓𑀼𑀲𑀮𑀢𑁆𑀢𑀸 ‘‘𑀥𑀫𑁆𑀫𑀓𑀼𑀲𑀮𑁄’’𑀢𑀺 𑀘 𑀘𑀢𑀼𑀦𑁆𑀦𑀁 𑀏𑀓𑀢𑁆𑀢𑀸𑀤𑀻𑀦𑀁 𑀦𑀬𑀸𑀦𑀁 𑀬𑀼𑀢𑁆𑀢𑀢𑀸𑀬 𑀓𑁄𑀯𑀺𑀤𑀢𑁆𑀢𑀸 ‘‘𑀓𑀮𑁆𑀬𑀸𑀡𑀢𑀸𑀓𑀼𑀲𑀮𑁄’’𑀢𑀺 𑀘 𑀨𑀮𑀲𑀫𑀸𑀧𑀢𑁆𑀢𑀻𑀲𑀼 𑀓𑁄𑀯𑀺𑀤𑀢𑁆𑀢𑀸 ‘‘𑀨𑀮𑀢𑀸𑀓𑀼𑀲𑀮𑁄’’𑀢𑀺 𑀘 𑀯𑀟𑁆𑀠𑀻𑀲𑀼 𑀓𑁄𑀯𑀺𑀤𑀢𑁆𑀢𑀸 ‘‘𑀆𑀬𑀓𑀼𑀲𑀮𑁄’’𑀢𑀺 𑀘 𑀅𑀯𑀟𑁆𑀠𑀻𑀲𑀼 𑀓𑁄𑀯𑀺𑀤𑀢𑁆𑀢𑀸 ‘‘𑀅𑀧𑀸𑀬𑀓𑀼𑀲𑀮𑁄’’𑀢𑀺 𑀘 𑀅𑀘𑁆𑀘𑀸𑀬𑀺𑀓𑁂 𑀓𑀺𑀘𑁆𑀘𑁂 𑀯𑀸 𑀪𑀬𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀲𑀢𑀺 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲, 𑀪𑀬𑀲𑁆𑀲 𑀯𑀸 𑀢𑀺𑀓𑀺𑀘𑁆𑀙𑀦𑀲𑀫𑀢𑁆𑀣𑁂 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀓𑀸𑀭𑀡𑁂 𑀓𑁄𑀯𑀺𑀤𑀢𑁆𑀢𑀸 ‘‘𑀉𑀧𑀸𑀬𑀓𑀼𑀲𑀮𑁄’’𑀢𑀺 𑀘 𑀫𑀳𑀦𑁆𑀢𑁂𑀲𑀼 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬 𑀲𑀫𑁆𑀧𑀦𑁆𑀦𑀢𑁆𑀢𑀸 ‘‘𑀫𑀳𑀢𑀸 𑀓𑁄𑀲𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀘 𑀯𑀼𑀘𑁆𑀘𑀢𑀺 𑀣𑁄𑀫𑀻𑀬𑀢𑀺. ‘‘𑀢𑀲𑁆𑀲 𑀅𑀲𑁂𑀓𑁆𑀔𑀲𑁆𑀲 𑀅𑀢𑁆𑀣𑀸𑀤𑀻𑀲𑀼 𑀓𑀼𑀲𑀮𑀪𑀸𑀯𑁄 𑀓𑀣𑀁 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀓𑀣𑀁 𑀅𑀫𑁆𑀳𑁂𑀳𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀜𑁆𑀜𑀸𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁, ‘‘𑀓𑀢𑁆𑀣 𑀧𑀯𑀢𑁆𑀢𑁂𑀦 𑀲𑀢𑀺𑀲𑀳𑀺𑀢𑁂𑀦 𑀜𑀸𑀡𑁂𑀦 𑀲𑀫𑁆𑀧𑀦𑁆𑀦𑁄 𑀲𑀢𑁄 𑀓𑀺𑀫𑀢𑁆𑀣𑀁 𑀧𑀭𑀺𑀩𑁆𑀩𑀚𑁂’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑁂𑀲𑀼 𑀧𑀯𑀢𑁆𑀢𑁂𑀦 𑀲𑀢𑀺𑀲𑀳𑀺𑀢𑀜𑀸𑀡𑁂𑀦 𑀲𑀫𑁆𑀧𑀦𑁆𑀦𑁄 𑀲𑀢𑁄 𑀇𑀫𑀫𑀢𑁆𑀣𑀁 𑀧𑀭𑀺𑀩𑁆𑀩𑀚𑁂’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀦𑀸𑀢𑀺 𑀬𑁄 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀧𑀯𑀢𑁆𑀢𑁂𑀦 𑀲𑀢𑀺𑀲𑀳𑀺𑀢𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀢𑁄 𑀅𑀲𑁂𑀓𑁆𑀔𑀪𑀺𑀓𑁆𑀔𑀼, 𑀢𑁂𑀦 𑀅𑀲𑁂𑀓𑁆𑀔𑀪𑀺𑀓𑁆𑀔𑀼𑀦𑀸 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀢𑁆𑀢𑀸 𑀅𑀜𑁆𑀜𑀧𑀬𑁄𑀚𑀦𑀸𑀪𑀸𑀯𑀢𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀅𑀪𑀺𑀓𑁆𑀓𑀦𑁆𑀢𑁂…𑀧𑁂… 𑀢𑀼𑀡𑁆𑀳𑀻𑀪𑀸𑀯𑁂𑀦 𑀲𑀢𑁂𑀦 𑀲𑀢𑀺𑀲𑀳𑀺𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀜𑀸𑀡𑁂𑀦 𑀯𑀺𑀳𑀸𑀢𑀩𑁆𑀩𑀁 𑀘𑀢𑀼𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀲𑀗𑁆𑀔𑀸𑀢𑀁 𑀯𑀺𑀳𑀭𑀡𑀁 𑀧𑀯𑀢𑁆𑀢𑁂𑀢𑀩𑁆𑀩𑀁.

‘‘𑀬𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀝𑀺𑀧𑀤𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀇𑀫𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀝𑀺𑀧𑀤𑀸 𑀲𑀗𑁆𑀔𑁂𑀧𑀢𑁄 𑀓𑀢𑀺𑀯𑀺𑀥𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑀸 𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀸 𑀘𑀭𑀺𑀬𑀸 𑀲𑀗𑁆𑀔𑁂𑀧𑀢𑁄 𑀧𑀼𑀕𑁆𑀕𑀮𑀯𑀲𑁂𑀦 𑀤𑁆𑀯𑁂𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀸 𑀤𑁆𑀯𑁂 𑀘𑀭𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸 𑀘𑀭𑀺𑀬𑀸 𑀪𑀸𑀯𑁂𑀢𑀩𑁆𑀩𑀓𑀼𑀲𑀮𑀸𑀤𑀺𑀪𑁂𑀤𑁂𑀦 𑀯𑀸 𑀅𑀢𑁆𑀣𑀓𑁄𑀲𑀮𑁆𑀮𑀸𑀤𑀺𑀪𑁂𑀤𑁂𑀦 𑀯𑀸 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑀪𑁂𑀤𑁂𑀦 𑀯𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀇𑀫𑀸 𑀘𑀭𑀺𑀬𑀸 𑀤𑁆𑀯𑁂𑀢𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸 𑀅𑀦𑀼𑀚𑀸𑀦𑀦𑀯𑀲𑁂𑀦 𑀤𑁂𑀲𑀺𑀢𑀸, 𑀯𑀺𑀲𑀼𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀏𑀓𑀸 𑀘𑀭𑀺𑀬𑀸, 𑀯𑀺𑀲𑀼𑀚𑁆𑀛𑀦𑁆𑀢𑀸𑀦𑀁 𑀲𑁂𑀓𑁆𑀔𑀸𑀦𑀁 𑀏𑀓𑀸 𑀘𑀭𑀺𑀬𑀸𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀤𑁆𑀯𑁂𑀢𑀺 𑀤𑀝𑁆𑀞𑀩𑁆𑀩𑀸.

‘‘𑀅𑀲𑁂𑀓𑁆𑀔𑁄𑀬𑁂𑀯 𑀓𑀲𑁆𑀫𑀸 ‘𑀲𑀢𑁄 𑀅𑀪𑀺𑀓𑁆𑀓𑀫𑀢𑀻’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀢𑀺 𑀣𑁄𑀫𑀻𑀬𑀢𑀺, 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄𑀧𑀺 ‘𑀲𑀢𑁄 𑀅𑀪𑀺𑀓𑁆𑀓𑀫𑀢𑀻’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀢𑀺 𑀣𑁄𑀫𑀻𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀓𑀢𑀓𑀺𑀘𑁆𑀘𑀸𑀦𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀢𑀓𑀺𑀘𑁆𑀘𑀸𑀦𑀺, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀢𑀓𑀺𑀘𑁆𑀘𑀢𑁆𑀢𑀸 𑀬𑀁 𑀧𑀼𑀘𑁆𑀙𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀘𑀢𑀼𑀩𑁆𑀩𑀺𑀥𑀁 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀩𑁄𑀚𑁆𑀛𑀺𑀢𑀩𑁆𑀩𑀁…𑀧𑁂… 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦 𑀩𑁄𑀚𑁆𑀛𑀺𑀢𑀩𑁆𑀩𑀁 𑀪𑀯𑁂. 𑀘𑀢𑀼𑀩𑁆𑀩𑀺𑀥𑀁 𑀇𑀤𑀁 𑀩𑁄𑀚𑁆𑀛𑀁 𑀩𑁄𑀚𑁆𑀛𑀺𑀢𑀩𑁆𑀩𑀁 𑀬𑁄 𑀅𑀲𑁂𑀓𑁆𑀔𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸 𑀏𑀯𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀦𑀸 𑀚𑀸𑀦𑀸𑀢𑀺,𑀅𑀬𑀁 𑀅𑀲𑁂𑀓𑁆𑀔𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀭𑀸𑀕𑀲𑁆𑀲 𑀔𑀬𑀸𑀬, 𑀤𑁄𑀲𑀲𑁆𑀲 𑀔𑀬𑀸𑀬, 𑀫𑁄𑀳𑀲𑁆𑀲 𑀔𑀬𑀸𑀬 𑀲𑀢𑁄 𑀅𑀪𑀺𑀓𑁆𑀓𑀫𑀢𑀺, 𑀲𑀢𑁄 𑀧𑀝𑀺𑀓𑁆𑀓𑀫𑀢𑀻’’𑀢𑀺 𑀯𑀼𑀘𑁆𑀘𑀢𑀺 𑀣𑁄𑀫𑀻𑀬𑀢𑀺. 𑀲𑁂𑀓𑁆𑀔𑁄𑀧𑀺 𑀬𑀣𑀸𑀯𑀼𑀢𑁆𑀢𑀁 𑀩𑁄𑀚𑁆𑀛𑀁 𑀩𑁄𑀚𑁆𑀛𑀺𑀢𑀩𑁆𑀩𑀁 𑀅𑀢𑁆𑀢𑀦𑁄 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀦𑀸 𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘‘𑀲𑀢𑁄…𑀧𑁂… 𑀫𑁄𑀳𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀢𑀺 𑀣𑁄𑀫𑀻𑀬𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑁂 𑀯𑀺𑀲𑀼𑀚𑁆𑀛𑀦𑁆𑀢𑀸? 𑀲𑁂𑀓𑁆𑀔𑀸’’𑀢𑀺.

‘‘𑀓𑀲𑁆𑀫𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀅𑀪𑀺𑀓𑁆𑀓𑀫𑀦𑀸𑀤𑀺𑀪𑀸𑀯𑁄, 𑀭𑀸𑀕𑀸𑀤𑀻𑀦𑀜𑁆𑀘 𑀔𑀬𑀪𑀸𑀯𑁄 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑁂𑀦𑀸𑀳 𑀪𑀕𑀯𑀸 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺. ‘‘𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫’𑀦𑁆𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁧𑁫) 𑀫𑀦𑀸𑀧𑀺𑀓𑁂𑀲𑀼 𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑀦𑀪𑀸𑀯𑁄, 𑀅𑀫𑀦𑀸𑀧𑀺𑀓𑁂𑀲𑀼 𑀓𑀸𑀫𑁂𑀲𑀼 𑀫𑀦𑀲𑀸 𑀅𑀦𑀸𑀯𑀺𑀮𑀪𑀸𑀯𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀓𑀼𑀲𑀮𑀪𑀸𑀯𑁄, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀭𑀺𑀩𑁆𑀩𑀚𑀦𑀪𑀸𑀯𑁄 𑀆𑀘𑀭𑀺𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑁄, 𑀲𑁄 𑀦𑀸𑀪𑀺𑀕𑀺𑀚𑁆𑀛𑀦𑀪𑀸𑀯𑀸𑀤𑀺𑀓𑁄 𑀓𑀲𑁆𑀫𑀸 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑁂𑀦𑀸𑀳 𑀓𑀸𑀫𑁂𑀲𑀼…𑀧𑁂… 𑀧𑀭𑀺𑀩𑁆𑀩𑀚𑁂’’𑀢𑀺. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄 𑀧𑀼𑀩𑁆𑀩𑁂 𑀏𑀓𑀸𑀥𑀺𑀝𑁆𑀞𑀸𑀦𑀸𑀤𑀺𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁂 𑀅𑀚𑀺𑀢𑀲𑀼𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀲𑀼𑀢𑁆𑀢𑀦𑁆𑀢𑀭𑁂𑀲𑀼 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀅𑀚𑀺𑀢𑀲𑀼𑀢𑁆𑀢𑁂 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀢𑁆𑀢𑀦𑁆𑀢𑀭𑁂𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀧𑀼𑀘𑁆𑀙𑀸𑀯𑀺𑀘𑀬𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀸 𑀬𑁄𑀚𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

𑀏𑀢𑁆𑀢𑀸𑀯𑀢𑀸 𑀘 𑀫𑀳𑀸𑀣𑁂𑀭𑁄 𑀯𑀺𑀘𑀬𑀳𑀸𑀭𑀁 𑀯𑀺𑀪𑀚𑀦𑁆𑀢𑁄 𑀅𑀚𑀺𑀢𑀲𑀼𑀢𑁆𑀢𑀯𑀲𑁂𑀦 𑀧𑀼𑀘𑁆𑀙𑀸𑀯𑀺𑀘𑀬𑀁, 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀼𑀢𑁆𑀢𑀦𑁆𑀢𑀭𑁂𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀸𑀦𑀁 𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩’𑀦𑁆𑀢𑀺 𑀆𑀳𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁭) 𑁋

𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀦𑁆𑀢𑀺 𑀅𑀚𑀺𑀢𑀲𑀼𑀢𑁆𑀢𑁂 (𑀲𑀼. 𑀦𑀺. 𑁧𑁦𑁩𑁮 𑀆𑀤𑀬𑁄; 𑀘𑀽𑀴𑀦𑀺. 𑀯𑀢𑁆𑀣𑀼𑀕𑀸𑀣𑀸 𑁫𑁭, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧 𑀆𑀤𑀬𑁄) 𑀯𑀼𑀢𑁆𑀢𑀧𑀼𑀘𑁆𑀙𑀸𑀯𑀺𑀘𑀬𑀸𑀦𑀼𑀲𑀸𑀭𑁂𑀦 𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀲𑀼𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀧𑀼𑀘𑁆𑀙𑀸𑀯𑀺𑀘𑀬𑁄 𑀯𑀺𑀪𑀚𑁂𑀢𑀩𑁆𑀩𑁄, 𑀏𑀯𑀁 𑀅𑀚𑀺𑀢𑀲𑀼𑀢𑁆𑀢𑁂 (𑀲𑀼. 𑀦𑀺. 𑁧𑁦𑁩𑁮 𑀆𑀤𑀬𑁄; 𑀘𑀽𑀴𑀦𑀺. 𑀯𑀢𑁆𑀣𑀼𑀕𑀸𑀣𑀸 𑁫𑁭 𑀆𑀤𑀬𑁄, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧 𑀆𑀤𑀬𑁄) 𑀯𑀼𑀢𑁆𑀢𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀸𑀦𑀼𑀲𑀸𑀭𑁂𑀦 𑀲𑀼𑀢𑁆𑀢𑀦𑁆𑀢𑀭𑁂𑀲𑀼𑀧𑀺 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀲𑀼𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄 𑀯𑀺𑀪𑀚𑁂𑀢𑀩𑁆𑀩𑁄.

𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑁄 𑀲𑀼𑀢𑁆𑀢𑀅𑀦𑀼𑀕𑀻𑀢𑀺𑀯𑀺𑀘𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑀼𑀢𑁆𑀢𑀲𑁆𑀲 𑀘 𑀅𑀦𑀼𑀕𑀻𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀢𑁆𑀢𑀲𑁆𑀲𑀸𑀢𑀺 𑀦𑀻𑀳𑀭𑀺𑀢𑀲𑀼𑀢𑁆𑀢𑀲𑁆𑀲. 𑀅𑀦𑀼𑀕𑀻𑀢𑀻𑀢𑀺 𑀲𑀼𑀢𑁆𑀢𑀦𑁆𑀢𑀭𑀤𑁂𑀲𑀦𑀸𑀲𑀗𑁆𑀔𑀸𑀢𑀸 𑀅𑀦𑀼𑀕𑀻𑀢𑀺. 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀲𑀫𑀸𑀦𑁂𑀢𑀩𑁆𑀩𑀸𑀢𑀺 𑀢𑀲𑁆𑀲𑀸 𑀅𑀦𑀼𑀕𑀻𑀢𑀺𑀬𑀸 𑀅𑀢𑁆𑀣𑀢𑁄, 𑀩𑁆𑀬𑀜𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑁂𑀦 𑀲𑀫𑀸𑀦𑀸 𑀲𑀤𑀺𑀲𑀻 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀺𑀁 𑀯𑀸 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑀼𑀢𑁆𑀢𑁂 𑀅𑀦𑀼𑀕𑀻𑀢𑀺 𑀲𑀼𑀢𑁆𑀢𑀢𑁆𑀣𑀢𑁄, 𑀩𑁆𑀬𑀜𑁆𑀚𑀦𑀢𑁄 𑀘 𑀲𑀫𑀸𑀦𑁂𑀢𑀩𑁆𑀩𑀸. ‘‘𑀅𑀢𑁆𑀣𑀢𑁄 𑀅𑀲𑀫𑀸𑀦𑁂 𑀓𑁄 𑀦𑀸𑀫 𑀤𑁄𑀲𑁄 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀅𑀢𑁆𑀣𑀸𑀧𑀕𑀢𑀁 𑀳𑀺 𑀩𑁆𑀬𑀜𑁆𑀚𑀦𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀢𑁄 𑀅𑀲𑀫𑀸𑀦𑁂 𑀤𑁄𑀲𑁄 𑀯𑀼𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, 𑀩𑁆𑀬𑀜𑁆𑀚𑀦𑀢𑁄 𑀅𑀲𑀫𑀸𑀦𑁂 𑀧𑀦 𑀓𑁄 𑀦𑀸𑀫 𑀤𑁄𑀲𑁄 𑀆𑀧𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀅𑀢𑁆𑀣𑁄𑀧𑀺 𑀤𑀼𑀦𑁆𑀦𑀬𑁄 𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀤𑁄𑀲𑀢𑁆𑀢𑀸 𑀅𑀦𑀼𑀕𑀻𑀢𑀺𑀬𑀸 𑀯𑀸 𑀲𑀼𑀢𑁆𑀢𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀽𑀧𑁂𑀢𑀁 𑀲𑀗𑁆𑀕𑀸𑀬𑀺𑀢𑀩𑁆𑀩𑀁.

𑀅𑀦𑀼𑀕𑀻𑀢𑀺𑀯𑀺𑀘𑀬𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀲𑀼𑀢𑁆𑀢𑀲𑁆𑀲 𑀯𑀺𑀘𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀲𑀼𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀢𑁆𑀢𑀜𑁆𑀘𑀸𑀢𑀺 𑀦𑀺𑀤𑁆𑀥𑀸𑀭𑀺𑀢𑀲𑀼𑀢𑁆𑀢𑀜𑁆𑀘. ‘‘𑀇𑀤𑀁 𑀦𑀺𑀤𑁆𑀥𑀸𑀭𑀺𑀢𑀲𑀼𑀢𑁆𑀢𑀁 𑀦𑀸𑀫 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀆𑀳𑀘𑁆𑀘𑀯𑀘𑀦𑀁 𑀓𑀺𑀁, 𑀉𑀤𑀸𑀳𑀼 𑀲𑀗𑁆𑀕𑀸𑀬𑀦𑁆𑀢𑁂𑀳𑀺 𑀯𑀼𑀢𑁆𑀢𑀁 𑀅𑀦𑀼𑀲𑀦𑁆𑀥𑀺𑀯𑀘𑀦𑀁 𑀓𑀺’’𑀦𑁆𑀢𑀺 𑀧𑀯𑀺𑀘𑀺𑀦𑀺𑀢𑀩𑁆𑀩𑀁, ‘‘𑀇𑀤𑀁 𑀦𑀺𑀤𑁆𑀥𑀸𑀭𑀺𑀢𑀲𑀼𑀢𑁆𑀢𑀁 𑀦𑀻𑀢𑀢𑁆𑀣𑀁 𑀓𑀺𑀁, 𑀉𑀤𑀸𑀳𑀼 𑀦𑁂𑀬𑁆𑀬𑀢𑁆𑀣𑀁 𑀓𑀺’’𑀦𑁆𑀢𑀺 𑀧𑀯𑀺𑀘𑀺𑀦𑀺𑀢𑀩𑁆𑀩𑀁, ‘‘𑀇𑀤𑀁 𑀦𑀺𑀤𑁆𑀥𑀸𑀭𑀺𑀢𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀓𑀺𑀁, 𑀉𑀤𑀸𑀳𑀼 𑀯𑀸𑀲𑀦𑀸𑀪𑀸𑀕𑀺𑀬𑀁 𑀓𑀺’’𑀦𑁆𑀢𑀺 𑀧𑀯𑀺𑀘𑀺𑀦𑀺𑀢𑀩𑁆𑀩𑀁, ‘‘𑀇𑀤𑀁 𑀦𑀺𑀤𑁆𑀥𑀸𑀭𑀺𑀢𑀲𑀼𑀢𑁆𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀓𑀺𑀁, 𑀉𑀤𑀸𑀳𑀼 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀓𑀺’’𑀦𑁆𑀢𑀺 𑀧𑀯𑀺𑀘𑀺𑀦𑀺𑀢𑀩𑁆𑀩𑀁. 𑀏𑀯𑀁 𑀧𑀯𑀺𑀘𑀺𑀦𑀺𑀢𑁆𑀯𑀸 𑀬𑀤𑀺 𑀆𑀳𑀘𑁆𑀘𑀯𑀘𑀦𑀁 𑀪𑀯𑁂, 𑀏𑀯𑀁 𑀲𑀢𑀺 ‘‘𑀆𑀳𑀘𑁆𑀘𑀯𑀘𑀦’’𑀦𑁆𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀅𑀲𑁂𑀓𑁆𑀔𑀲𑀼𑀢𑁆𑀢𑀁 𑀪𑀯𑁂, 𑀏𑀯𑀁 𑀲𑀢𑀺 ‘‘𑀅𑀲𑁂𑀓𑁆𑀔𑀲𑀼𑀢𑁆𑀢’’𑀦𑁆𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁, 𑀜𑀸𑀢𑀦𑁆𑀢𑀺 𑀅𑀢𑁆𑀣𑁄.

‘‘𑀲𑀼𑀢𑁆𑀢𑀁 𑀧𑀯𑀺𑀘𑀺𑀦𑀺𑀢𑁆𑀯𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀪𑀽𑀢𑀸𑀦𑀺 𑀲𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀢𑁆𑀣 𑀧𑀤𑁂𑀲𑁂 𑀧𑀲𑁆𑀲𑀺𑀢𑀩𑁆𑀩𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀧𑀼𑀘𑁆𑀙𑀁 𑀞𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀧𑀲𑁆𑀲𑀺𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀳𑀺𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀩𑁆𑀩𑀸𑀦𑀺…𑀧𑁂… 𑀧𑀭𑀺𑀬𑁄𑀲𑀸𑀦𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲𑀸𑀢𑀺 𑀬𑀁 𑀲𑀼𑀢𑁆𑀢𑀁 𑀯𑀺𑀘𑀺𑀦𑀺𑀢𑀼𑀁 𑀦𑀺𑀤𑁆𑀥𑀸𑀭𑀺𑀢𑀁, 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀘𑀢𑀼𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀅𑀪𑀸𑀯𑀢𑁄 𑀲𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺 𑀢𑀲𑁆𑀲𑁂𑀯 𑀲𑀼𑀢𑁆𑀢𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂 𑀧𑀲𑁆𑀲𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄.

𑀬𑀣𑀸𑀯𑀼𑀢𑁆𑀢𑀁 𑀲𑀼𑀢𑁆𑀢𑀯𑀺𑀘𑀬𑀁 𑀦𑀺𑀕𑀫𑁂𑀦𑁆𑀢𑁄 ‘‘𑀏𑀯𑀁 𑀲𑀼𑀢𑁆𑀢𑀁 𑀧𑀯𑀺𑀘𑁂𑀢𑀩𑁆𑀩’’𑀦𑁆𑀢𑀺 𑀆𑀳. ‘‘𑀦 𑀬𑀣𑀸𑀯𑀼𑀢𑁆𑀢𑀧𑀼𑀘𑁆𑀙𑀸𑀤𑀻𑀦𑀁 𑀧𑀯𑀺𑀘𑁂𑀢𑀩𑁆𑀩𑀪𑀸𑀯𑁄 𑀅𑀫𑁆𑀳𑁂𑀳𑀺 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 ‘‘𑀢𑁂𑀦𑀸𑀳…𑀧𑁂… 𑀅𑀦𑀼𑀕𑀻𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦 𑀬𑀣𑀸𑀯𑀼𑀢𑁆𑀢𑀧𑀼𑀘𑁆𑀙𑀸𑀤𑀻𑀦𑀁 𑀯𑀺𑀘𑁂𑀢𑀩𑁆𑀩𑀪𑀸𑀯𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘…𑀧𑁂… 𑀅𑀦𑀼𑀕𑀻𑀢𑀻’’𑀢𑀺𑀆𑀤𑀺𑀓𑀁 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀯𑀺𑀘𑁂𑀢𑀩𑁆𑀩𑀪𑀸𑀯𑁄 𑀢𑀼𑀫𑁆𑀳𑁂𑀳𑀺 𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀘 𑀯𑀺𑀘𑀬𑁄 𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀓𑀺𑀁, 𑀉𑀤𑀸𑀳𑀼 𑀅𑀜𑁆𑀜𑁄𑀧𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄 𑀅𑀢𑁆𑀣𑀺 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀯𑀺𑀘𑀬𑁄 𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀘𑁆𑀙𑀸𑀯𑀺𑀘𑀬𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀧𑀼𑀩𑁆𑀩𑀸𑀧𑀭𑀯𑀺𑀘𑀬𑀅𑀦𑀼𑀕𑀻𑀢𑀺𑀯𑀺𑀘𑀬𑀲𑀼𑀢𑁆𑀢𑀯𑀺𑀘𑀬𑀸 𑀲𑀭𑀽𑀧𑀢𑁄 𑀯𑀺𑀪𑀢𑁆𑀢𑀸, 𑀢𑁂𑀳𑀺 𑀅𑀯𑀲𑁂𑀲𑁄 𑀅𑀲𑁆𑀲𑀸𑀤𑀸𑀤𑀺𑀯𑀺𑀘𑀬𑁄𑀧𑀺 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀢𑁆𑀢𑁄 𑀬𑀼𑀜𑁆𑀚𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.