𑁧. 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀯𑀺𑀪𑀸𑀯𑀦𑀸

𑁫𑁨. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀸𑀤𑀺𑀳𑀸𑀭𑀯𑀺𑀪𑀗𑁆𑀕𑁂𑀦 𑀅𑀲𑁆𑀲𑀸𑀤𑀸𑀤𑀬𑁄 𑀦𑀸𑀦𑀸𑀲𑀼𑀢𑁆𑀢𑀢𑁆𑀣𑀸 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀸𑀤𑀺𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄.

‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫𑀁, 𑀤𑀺𑀲𑀸𑀮𑁄𑀘𑀦𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸;

𑀲𑀗𑁆𑀔𑀺𑀧𑀺𑀬 𑀅𑀗𑁆𑀓𑀼𑀲𑁂𑀦 𑀳𑀺, 𑀦𑀬𑁂𑀳𑀺 𑀢𑀻𑀳𑀺 𑀦𑀺𑀤𑁆𑀤𑀺𑀲𑁂 𑀲𑀼𑀢𑁆𑀢’’𑀦𑁆𑀢𑀺. (𑀦𑁂𑀢𑁆𑀢𑀺. 𑁪 𑀦𑀬𑀲𑀗𑁆𑀔𑁂𑀧) 𑁋

𑀕𑀸𑀣𑀸 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑀲𑁆𑀲 𑀆𑀤𑀺𑀫𑁆𑀳𑀺 𑀦 𑀯𑀺𑀪𑀢𑁆𑀢𑁄, ‘‘𑀓𑀼𑀳𑀺𑀜𑁆𑀘𑀺 𑀯𑀺𑀪𑀢𑁆𑀢𑁄, 𑀳𑀸𑀭𑀲𑀫𑁆𑀧𑀸𑀢𑁂 𑀯𑀸 𑀯𑀺𑀪𑀢𑁆𑀢𑁄 𑀓𑀺𑀁, 𑀉𑀤𑀸𑀳𑀼 𑀦𑀬𑀲𑀫𑀼𑀝𑁆𑀞𑀸𑀦𑀳𑀸𑀭𑁂 𑀯𑀸 𑀯𑀺𑀪𑀢𑁆𑀢𑁄 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀳𑀸𑀭𑀲𑀫𑁆𑀧𑀸𑀢𑁂 𑀯𑀺𑀪𑀢𑁆𑀢𑁄’’𑀢𑀺 𑀢𑀼𑀫𑁆𑀳𑁂𑀳𑀺 𑀤𑀝𑁆𑀞𑀩𑁆𑀩𑁄𑀢𑀺 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀣 𑀯𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀪𑀽𑀫𑀺𑀲𑀤𑀺𑀲𑁂𑀲𑀼 𑀲𑀁𑀯𑀡𑁆𑀡𑁂𑀢𑀩𑁆𑀩𑁂𑀲𑀼 𑀦𑀸𑀦𑀸𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀦𑀸𑀦𑀸𑀯𑀡𑁆𑀡𑀲𑀼𑀕𑀦𑁆𑀥𑀧𑀼𑀧𑁆𑀨𑀲𑀤𑀺𑀲𑁂 𑀲𑁄𑀴𑀲 𑀳𑀸𑀭𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 𑀲𑁄𑀴𑀲 𑀳𑀸𑀭𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀢𑀣𑀸 𑀲𑀼𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑀸𑀘𑀭𑀺𑀬𑀲𑀼𑀯𑀺𑀘𑀸𑀭𑀺𑀢𑀚𑀫𑁆𑀩𑀼𑀦𑀤𑀸𑀪𑀭𑀡𑀲𑀤𑀺𑀲𑁂𑀲𑀼 𑀲𑀁𑀯𑀡𑁆𑀡𑁂𑀢𑀩𑁆𑀩𑁂𑀲𑀼 𑀦𑀸𑀦𑀸𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀦𑀸𑀦𑀸𑀯𑀺𑀥𑀭𑀁𑀲𑀺𑀚𑀸𑀮𑀯𑀺𑀯𑀺𑀥𑀫𑀡𑀺𑀭𑀢𑀦𑀲𑀤𑀺𑀲𑁂 𑀲𑁄𑀴𑀲 𑀳𑀸𑀭𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸𑀯 𑀲𑁄𑀴𑀲 𑀳𑀸𑀭𑀸 𑀯𑀺𑀪𑀢𑁆𑀢𑀸, 𑀫𑀳𑀸𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀧𑁆𑀧𑀝𑀓𑁄𑀚𑀲𑁆𑀲 𑀔𑀸𑀤𑀸𑀧𑀦𑀁 𑀅𑀢𑀺𑀤𑀼𑀓𑁆𑀓𑀭𑀁 𑀯𑀺𑀬, 𑀦𑀸𑀦𑀸𑀯𑀺𑀥𑁂𑀲𑀼 𑀲𑀁𑀯𑀡𑁆𑀡𑁂𑀢𑀩𑁆𑀩𑁂𑀲𑀼 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀧𑀭𑀫𑀢𑁆𑀣𑁄𑀚𑀸𑀬 𑀲𑁄𑀴𑀲𑀳𑀺 𑀳𑀸𑀭𑁂𑀳𑀺 𑀅𑀢𑀺𑀤𑀼𑀓𑁆𑀓𑀭𑀔𑀸𑀤𑀸𑀧𑀦𑀲𑀤𑀺𑀲𑀁 𑀯𑀺𑀜𑁆𑀜𑀸𑀧𑀦𑀁 𑀓𑀭𑁄𑀦𑁆𑀢𑁂𑀦 𑀘 𑀬𑁄𑀚𑀦𑀺𑀓𑀫𑀥𑀼𑀕𑀡𑁆𑀟𑀁 𑀧𑀻𑀴𑁂𑀢𑁆𑀯𑀸 𑀲𑀼𑀫𑀥𑀼𑀭𑀲𑀲𑁆𑀲 𑀧𑀸𑀬𑀸𑀧𑀦𑀁 𑀅𑀢𑀺𑀤𑀼𑀓𑁆𑀓𑀭𑀁 𑀯𑀺𑀬 𑀦𑀸𑀦𑀸𑀯𑀺𑀥𑁂𑀲𑀼 𑀲𑀁𑀯𑀡𑁆𑀡𑁂𑀢𑀩𑁆𑀩𑁂𑀲𑀼 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀧𑀭𑀫𑀢𑁆𑀣𑀫𑀥𑀼𑀭𑀲𑀲𑁆𑀲 𑀲𑁄𑀴𑀲𑀳𑀺 𑀳𑀸𑀭𑁂𑀳𑀺 𑀅𑀢𑀺𑀤𑀼𑀓𑁆𑀓𑀭𑀁 𑀧𑀸𑀬𑀸𑀧𑀦𑀲𑀤𑀺𑀲𑀁 𑀯𑀺𑀜𑁆𑀜𑀸𑀧𑀦𑀁 𑀓𑀭𑁄𑀦𑁆𑀢𑁂𑀦 𑀘 𑀆𑀘𑀭𑀺𑀬𑁂𑀦 𑀅𑀦𑁂𑀓𑁂𑀲𑀼 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀲𑁄𑀴𑀲 𑀳𑀸𑀭𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 𑀲𑁄𑀴𑀲 𑀳𑀸𑀭𑀸 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀦𑀸𑀦𑀸𑀯𑀺𑀥𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀢𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 𑀲𑁄𑀴𑀲 𑀳𑀸𑀭𑀸 𑀯𑀺𑀪𑀢𑁆𑀢𑀸 𑀓𑀺𑀁, 𑀉𑀤𑀸𑀳𑀼 𑀏𑀓𑀲𑁆𑀫𑀺𑀫𑁆𑀧𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 𑀲𑁄𑀴𑀲 𑀳𑀸𑀭𑀸 𑀯𑀺𑀪𑀢𑁆𑀢𑀸 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀏𑀓𑀲𑁆𑀫𑀺𑀫𑁆𑀧𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 𑀲𑁄𑀴𑀲 𑀳𑀸𑀭𑀸 𑀯𑀺𑀪𑀢𑁆𑀢𑀸𑀬𑁂𑀯𑀸𑀢𑀺 𑀢𑀣𑀸 𑀯𑀺𑀪𑀚𑀦𑁆𑀢𑁄 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺𑀆𑀤𑀺𑀓𑀁 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑀁 𑀆𑀳.

𑀦𑀦𑀼 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑀁 𑀓𑀣𑁂𑀢𑀼𑀓𑀸𑀫𑁂𑀦 𑀆𑀘𑀭𑀺𑀬𑁂𑀦 ‘‘𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺𑀆𑀤𑀺𑀯𑀘𑀦𑀁 𑀯𑀢𑁆𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺𑀆𑀤𑀺𑀓𑀁 𑀕𑀸𑀣𑀁 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄 𑀦𑀧𑁆𑀧𑀬𑁄𑀚𑁂𑀢𑀺 𑀯𑀺𑀧𑁆𑀧𑀓𑀺𑀡𑁆𑀡𑀯𑀺𑀲𑀬𑀢𑁆𑀢𑀸 𑀘 𑀦𑀬𑀯𑀺𑀘𑀸𑀭𑀲𑁆𑀲 𑀘 𑀅𑀦𑁆𑀢𑀭𑀺𑀢𑀢𑁆𑀢𑀸. 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄 𑀧𑀦 𑀢𑀁 𑀕𑀸𑀣𑀁 𑀧𑀬𑁄𑀚𑁂𑀢𑀺 𑀅𑀯𑀺𑀓𑀺𑀡𑁆𑀡𑀯𑀺𑀲𑀬𑀢𑁆𑀢𑀸. 𑀢𑀲𑁆𑀫𑀸 𑀢𑀁 𑀕𑀸𑀣𑀁 𑀧𑀘𑁆𑀘𑀸𑀫𑀲𑀺𑀢𑁆𑀯𑀸 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁂 𑀢𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄𑀢𑀺 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁𑀬𑁂𑀯𑀸𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

𑀏𑀯𑀁 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦𑀸𑀦𑀸𑀯𑀡𑁆𑀡𑀸𑀦𑀺 𑀫𑀼𑀢𑁆𑀢𑀧𑀼𑀧𑁆𑀨𑀸𑀦𑀺 𑀧𑀓𑀺𑀭𑀦𑁆𑀢𑁄 𑀯𑀺𑀬, 𑀲𑀼𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑀸𑀘𑀭𑀺𑀬𑀯𑀺𑀘𑀸𑀭𑀺𑀢𑁂𑀲𑀼 𑀲𑀼𑀭𑀢𑁆𑀢𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁂𑀲𑀼 𑀦𑀸𑀦𑀸𑀯𑀺𑀥𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀸𑀦𑀺 𑀯𑀺𑀯𑀺𑀥𑀸𑀦𑀺 𑀫𑀡𑀺𑀭𑀢𑀦𑀸𑀦𑀺 𑀩𑀦𑁆𑀥𑀦𑁆𑀢𑁄 𑀯𑀺𑀬, 𑀫𑀳𑀸𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀧𑁆𑀧𑀝𑀓𑁄𑀚𑀁 𑀔𑀸𑀤𑀸𑀧𑁂𑀦𑁆𑀢𑁄 𑀯𑀺𑀬, 𑀬𑁄𑀚𑀦𑀺𑀓𑀫𑀥𑀼𑀕𑀡𑁆𑀟𑀁 𑀧𑀻𑀴𑁂𑀢𑁆𑀯𑀸 𑀲𑀼𑀫𑀥𑀼𑀭𑀲𑀁 𑀧𑀸𑀬𑁂𑀦𑁆𑀢𑁄 𑀯𑀺𑀬 𑀘 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀦𑀸𑀦𑀸𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀉𑀤𑀸𑀳𑀭𑀦𑁆𑀢𑁄 𑀲𑁄𑀴𑀲 𑀳𑀸𑀭𑁂 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂 𑀏𑀓𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑀁 𑀆𑀭𑀪𑀺. 𑀆𑀭𑀪𑀦𑁆𑀢𑁄 𑀘 𑀬𑀸𑀬𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑁋

‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫𑀁, 𑀤𑀺𑀲𑀸𑀮𑁄𑀘𑀦𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸;

𑀲𑀗𑁆𑀔𑀺𑀧𑀺𑀬 𑀅𑀗𑁆𑀓𑀼𑀲𑁂𑀦 𑀳𑀺, 𑀦𑀬𑁂𑀳𑀺 𑀢𑀻𑀳𑀺 𑀦𑀺𑀤𑁆𑀤𑀺𑀲𑁂 𑀲𑀼𑀢𑁆𑀢’’𑀦𑁆𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀢𑀁 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄 𑀦𑀧𑁆𑀧𑀬𑁄𑀚𑁂𑀢𑀺 𑀯𑀺𑀧𑁆𑀧𑀓𑀺𑀡𑁆𑀡𑀯𑀺𑀲𑀬𑀢𑁆𑀢𑀸, 𑀦𑀬𑀯𑀺𑀘𑀸𑀭𑀲𑁆𑀲 𑀘 𑀅𑀦𑁆𑀢𑀭𑀺𑀢𑀢𑁆𑀢𑀸. 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀳𑀺 𑀳𑀸𑀭𑀸𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀫𑁂𑀯 𑀳𑀺 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄. 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄 𑀧𑀦 𑀢𑀁 𑀧𑀬𑁄𑀚𑁂𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀲𑁄𑀴𑀲 𑀳𑀸𑀭𑁂 𑀬𑁄𑀚𑁂𑀢𑁆𑀯𑀸𑀯 𑀢𑀤𑀦𑀦𑁆𑀢𑀭𑀁 𑀦𑀬𑀲𑀫𑀼𑀝𑁆𑀞𑀸𑀦𑀲𑁆𑀲 𑀓𑀣𑀺𑀢𑀢𑁆𑀢𑀸. 𑀢𑀲𑁆𑀫𑀸 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺 𑀕𑀸𑀣𑀁 𑀧𑀘𑁆𑀘𑀸𑀫𑀲𑀺𑀢𑁆𑀯𑀸 ‘‘𑀢𑀲𑁆𑀲𑀸 𑀦𑀺𑀤𑁆𑀤𑁂𑀲𑁄 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑁄? 𑀳𑀸𑀭𑀲𑀫𑁆𑀧𑀸𑀢𑁂𑀢𑀺 𑀆𑀳𑀸’’𑀢𑀺 𑁋

𑀯𑀼𑀢𑁆𑀢𑀁. 𑀕𑀸𑀣𑀸𑀢𑁆𑀣𑁄 𑀦𑀺𑀤𑁆𑀤𑁂𑀲𑀯𑀺𑀪𑀸𑀯𑀦𑀸𑀬𑀁 𑀯𑀼𑀢𑁆𑀢𑁄𑀯. ‘‘𑀲𑁄𑀴𑀲…𑀧𑁂… 𑀲𑀼𑀢𑁆𑀢’’𑀦𑁆𑀢𑀺 𑀬𑀸 𑀕𑀸𑀣𑀸 𑀦𑀺𑀤𑁆𑀤𑁂𑀲𑁂 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑁄, 𑀳𑀸𑀭𑀯𑀺𑀪𑀗𑁆𑀕𑀲𑁆𑀲 𑀆𑀤𑀺𑀫𑁆𑀳𑀺 𑀆𑀘𑀭𑀺𑀬𑁂𑀦 𑀦 𑀯𑀺𑀪𑀢𑁆𑀢𑁄, 𑀳𑀸𑀭𑀲𑀫𑁆𑀧𑀸𑀢𑁂 𑀯𑀸 𑀧𑀘𑁆𑀘𑀸𑀫𑀲𑀺𑀢𑁆𑀯𑀸 𑀯𑀺𑀪𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄 𑀓𑀺𑀁, 𑀉𑀤𑀸𑀳𑀼 𑀦𑀬𑀲𑀫𑀼𑀝𑁆𑀞𑀸𑀦𑁂 𑀯𑀸 𑀧𑀘𑁆𑀘𑀸𑀫𑀲𑀺𑀢𑁆𑀯𑀸 𑀯𑀺𑀪𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄 𑀓𑀺𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀳𑀸𑀭𑀲𑀫𑁆𑀧𑀸𑀢𑁂 𑀧𑀘𑁆𑀘𑀸𑀫𑀲𑀺𑀢𑁆𑀯𑀸 𑀯𑀺𑀪𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄𑀢𑀺 𑀯𑀺𑀲𑁆𑀲𑀚𑁆𑀚𑀦𑀸.

𑀳𑀸𑀭𑀲𑀫𑁆𑀧𑀸𑀢𑁂 𑀢𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, 𑀲𑁄 𑀳𑀸𑀭𑀲𑀫𑁆𑀧𑀸𑀢𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀪𑁂𑀤𑁂𑀦 𑀲𑁄𑀴𑀲𑀯𑀺𑀥𑁄, ‘‘𑀢𑀢𑁆𑀣 𑀓𑀢𑀫𑁄 𑀳𑀸𑀭𑀲𑀫𑁆𑀧𑀸𑀢𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀫𑀬𑀸 𑀯𑀺𑀪𑀚𑀺𑀬𑀫𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑀪𑀽𑀢𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄 𑀦𑀸𑀫𑀸𑀢𑀺 𑀢𑀣𑀸 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑁄𑀴𑀲𑀯𑀺𑀥𑁂 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀸𑀤𑀺𑀓𑁂 𑀳𑀸𑀭𑀲𑀫𑁆𑀧𑀸𑀢𑁂. 𑀓𑀢𑀫𑁄 𑀳𑀸𑀭𑀲𑀫𑁆𑀧𑀸𑀢𑀪𑀽𑀢𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺.

‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘;

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦, 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻’’𑀢𑀺. 𑁋

𑀲𑀼𑀢𑁆𑀢𑁂 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀓𑀺𑀁𑀤𑁂𑀲𑀬𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀫𑀸𑀤𑀁 𑀤𑁂𑀲𑀬𑀢𑀻’’𑀢𑀺𑀆𑀤𑀺𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀸𑀣𑀸𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁨) 𑀯𑀺𑀪𑀢𑁆𑀢𑁄. 𑀬𑁄𑀚𑀦𑀢𑁆𑀣𑁄 𑀧𑀦 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀅𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀫𑀸𑀭𑀲𑁆𑀲 𑀫𑀘𑁆𑀘𑀼𑀦𑁄 𑀯𑀲𑀁 𑀕𑀘𑁆𑀙𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀯𑀺𑀧𑀮𑁆𑀮𑀸𑀲𑁂𑀦 𑀯𑀺𑀧𑀮𑁆𑀮𑀸𑀲𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀫𑀸𑀭𑀲𑁆𑀲 𑀯𑀲𑀁 𑀕𑀘𑁆𑀙𑀢𑀺. 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦 𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀓𑀼𑀲𑀻𑀢𑀘𑀺𑀢𑁆𑀢𑁂𑀦 𑀢𑀁𑀘𑀺𑀢𑁆𑀢𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀫𑀸𑀭𑀲𑁆𑀲 𑀓𑀺𑀮𑁂𑀲𑀸𑀤𑀺𑀫𑀸𑀭𑀲𑁆𑀲 𑀯𑀲𑀁 𑀕𑀘𑁆𑀙𑀢𑀻𑀢𑀺.

‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’𑀢𑀺 𑀧𑀤𑁂𑀦 𑀤𑁂𑀲𑀺𑀢𑀁 𑀢𑀁 𑀧𑀫𑀸𑀤𑀥𑀫𑁆𑀫𑀚𑀸𑀢𑀁 𑀓𑀲𑁆𑀲 𑀧𑀤’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀁 𑀫𑀘𑁆𑀘𑀼𑀦𑁄 𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀦 𑀤𑁂𑀲𑀺𑀢𑁄 𑀅𑀢𑁆𑀣𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘𑀸𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀦 𑀤𑁂𑀲𑀺𑀢𑁄 𑀅𑀢𑁆𑀣𑁄 𑀓𑀣𑀁 𑀯𑀺𑀪𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂𑀦 𑀯𑀺𑀧𑀮𑁆𑀮𑀸𑀲𑁂𑀦 𑀬𑀤𑀸 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀧𑀲𑁆𑀲𑀢𑀺, 𑀢𑀤𑀸 𑀧𑀯𑀢𑁆𑀢𑁄 𑀲𑁄 𑀯𑀺𑀧𑀮𑁆𑀮𑀸𑀲𑁄 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀁 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀲𑁄 𑀧𑀦 𑀯𑀺𑀧𑀮𑁆𑀮𑀸𑀲𑁄 𑀓𑀺𑀁𑀮𑀓𑁆𑀔𑀡𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀣𑀸 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀺𑀧𑀭𑀻𑀢𑀕𑁆𑀕𑀸𑀳𑀮𑀓𑁆𑀔𑀡𑁄 𑀯𑀺𑀧𑀮𑁆𑀮𑀸𑀲𑁄’’𑀢𑀺 𑀯𑀼𑀢𑁆𑀢𑀁.

𑀯𑀺𑀧𑀭𑀻𑀢𑀕𑁆𑀕𑀸𑀳𑀮𑀓𑁆𑀔𑀡𑁄𑀢𑀺 𑀅𑀲𑀼𑀪𑀸𑀤𑀻𑀦𑀁𑀬𑁂𑀯 𑀲𑀼𑀪𑀸𑀤𑀺𑀯𑀺𑀧𑀭𑀻𑀢𑀕𑁆𑀕𑀸𑀳𑀮𑀓𑁆𑀔𑀡𑁄 𑀯𑀺𑀧𑀮𑁆𑀮𑀸𑀲𑁄 ‘‘𑀯𑀺𑀧𑀮𑁆𑀮𑀸𑀲𑀬𑀢𑀻’’𑀢𑀺 𑀓𑀸𑀭𑀺𑀢𑀢𑁆𑀣𑀲𑀫𑁆𑀪𑀯𑀢𑁄. 𑀓𑀺𑀁 𑀯𑀺𑀧𑀮𑁆𑀮𑀸𑀲𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑀮𑀓𑁆𑀔𑀡𑁄? 𑀲𑁄 𑀯𑀺𑀧𑀮𑁆𑀮𑀸𑀲𑁄 𑀲𑀜𑁆𑀜𑀁 𑀯𑀺𑀧𑀮𑁆𑀮𑀸𑀲𑀬𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀯𑀺𑀧𑀮𑁆𑀮𑀸𑀲𑀬𑀢𑀺, 𑀤𑀺𑀝𑁆𑀞𑀺𑀫𑁆𑀧𑀺 𑀯𑀺𑀧𑀮𑁆𑀮𑀸𑀲𑀬𑀢𑀺. 𑀇𑀢𑀺 𑀢𑀬𑁄 𑀥𑀫𑁆𑀫𑁂 𑀯𑀺𑀧𑀮𑁆𑀮𑀸𑀲𑀬𑀢𑀻𑀢𑀺 𑀯𑀺𑀧𑀮𑁆𑀮𑀸𑀲𑁂𑀢𑀩𑁆𑀩𑀸𑀦𑀁 𑀢𑀺𑀯𑀺𑀥𑀢𑁆𑀢𑀸 𑀯𑀺𑀧𑀮𑁆𑀮𑀸𑀲𑀸𑀧𑀺 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀫𑀼𑀤𑀼𑀓𑁄 𑀤𑀼𑀩𑁆𑀩𑀮𑁄 𑀲𑀼𑀪𑀸𑀤𑀺𑀯𑀲𑁂𑀦 𑀉𑀧𑀝𑁆𑀞𑀺𑀢𑀸𑀓𑀸𑀭𑀕𑁆𑀕𑀳𑀡𑀫𑀢𑁆𑀢𑀢𑁆𑀢𑀸, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀢𑁄 𑀩𑀮𑀯𑀸 𑀲𑀼𑀪𑀸𑀤𑀺𑀯𑀲𑁂𑀦 𑀉𑀧𑀝𑁆𑀞𑀳𑀦𑁆𑀢𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀼𑀪𑀸𑀤𑀺𑀯𑀲𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀕𑀳𑀡𑀢𑁄. 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀳𑀺 𑀩𑀮𑀯𑀢𑀭𑁄, 𑀬𑀁 𑀬𑀁 𑀆𑀭𑀫𑁆𑀫𑀡𑀁 𑀲𑀼𑀪𑀸𑀤𑀺𑀆𑀓𑀸𑀭𑁂𑀦 𑀉𑀧𑀝𑁆𑀞𑀸𑀢𑀺. 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀕𑀳𑀡𑀢𑁄. 𑀢𑀲𑁆𑀫𑀸 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀧𑀞𑀫𑀁 𑀯𑀼𑀢𑁆𑀢𑁄, 𑀢𑀤𑀦𑀦𑁆𑀢𑀭𑀁 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀢𑀤𑀦𑀦𑁆𑀢𑀭𑀁 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄 𑀯𑀼𑀢𑁆𑀢𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀏𑀓𑁂𑀓𑀲𑁆𑀲 𑀲𑀼𑀪𑀲𑀼𑀔𑀅𑀢𑁆𑀢𑀦𑀺𑀘𑁆𑀘𑀕𑁆𑀕𑀳𑀡𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀤𑁆𑀯𑀸𑀤𑀲𑀯𑀺𑀥𑀸 𑀳𑁄𑀦𑁆𑀢𑀺.

𑀯𑀺𑀧𑀮𑁆𑀮𑀸𑀲𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑁂 𑀯𑀺𑀧𑀮𑁆𑀮𑀸𑀲𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀺𑀲𑀬𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑀸𑀦𑀺 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀦𑀺 𑀯𑀺𑀧𑀮𑁆𑀮𑀸𑀲𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀺𑀲𑀬𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀓𑀼𑀳𑀺𑀁 𑀯𑀺𑀧𑀮𑁆𑀮𑀸𑀲𑀬𑀢𑀺 𑀘𑀢𑀽𑀲𑀼 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀲𑀽’’𑀢𑀺 𑀯𑀼𑀢𑁆𑀢𑀁. 𑀘𑀢𑀽𑀲𑀼 𑀭𑀽𑀧𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀲𑀗𑁆𑀔𑀸𑀢𑁂𑀲𑀼 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀲𑀼 𑀲𑁄 𑀲𑀩𑁆𑀩𑁄 𑀯𑀺𑀧𑀮𑁆𑀮𑀸𑀲𑁄 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺𑀬𑁄 𑀯𑀺𑀧𑀮𑁆𑀮𑀸𑀲𑀬𑀢𑀺. ‘‘𑀓𑀣𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀧𑀮𑁆𑀮𑀸𑀲𑀬𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄 𑀧𑀼𑀕𑁆𑀕𑀮𑁄 𑀭𑀽𑀧𑀁 𑀯𑀸 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀯𑀸 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀢𑁆𑀢𑀦𑀺 𑀭𑀽𑀧𑀁 𑀯𑀸 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀯𑀸 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀏𑀯𑀁 𑀢𑀲𑁆𑀲 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀧𑀮𑁆𑀮𑀸𑀲𑁄 𑀭𑀽𑀧𑀓𑀸𑀬𑁂 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺𑀬𑁄 𑀯𑀺𑀧𑀮𑁆𑀮𑀸𑀲𑀬𑀢𑀺. 𑀏𑀲𑁂𑀯 𑀦𑀬𑁄 𑀯𑁂𑀤𑀦𑀸𑀤𑀻𑀲𑀼𑀧𑀺.

‘‘𑀢𑁂𑀲𑀼 𑀭𑀽𑀧𑀓𑀸𑀬𑀸𑀤𑀻𑀲𑀼 𑀓𑀢𑀫𑀁 𑀓𑀢𑀫𑀲𑁆𑀲 𑀯𑀺𑀧𑀮𑁆𑀮𑀸𑀲𑀲𑁆𑀲 𑀯𑀢𑁆𑀣𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀏𑀯𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀯𑀺𑀧𑀮𑁆𑀮𑀸𑀲𑀲𑁆𑀲 𑀇𑀤𑀁 𑀇𑀫𑀲𑁆𑀲 𑀯𑀢𑁆𑀣𑀽𑀢𑀺 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀘𑀢𑀽𑀲𑀼 𑀧𑀞𑀫𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼 𑀭𑀽𑀧𑀁 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀯𑀺𑀧𑀮𑁆𑀮𑀸𑀲𑀲𑁆𑀲 𑀯𑀢𑁆𑀣𑀼 𑀳𑁄𑀢𑀻𑀢𑀺 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀯𑀁 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺𑀆𑀤𑀺𑀧𑁆𑀧𑀓𑀸𑀭𑁂𑀦 𑀯𑀺𑀧𑀮𑁆𑀮𑀸𑀲𑀸 𑀘𑀢𑀼𑀩𑁆𑀩𑀺𑀥𑀸 𑀪𑀯𑀦𑁆𑀢𑀺.

𑀇𑀤𑀁 𑀇𑀫𑀲𑁆𑀲 𑀯𑀢𑁆𑀣𑀽𑀢𑀺 𑀆𑀘𑀭𑀺𑀬𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀢𑁂𑀲𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀓𑀢𑀫𑁂 𑀫𑀽𑀮𑀓𑀸𑀭𑀡𑀥𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑀸, 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘 𑁋 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀯𑀺𑀧𑀮𑁆𑀮𑀸𑀲𑀸𑀦𑀁 𑀫𑀽𑀮𑀓𑀸𑀭𑀡𑀪𑀽𑀢𑀸 𑀪𑀯𑀦𑁆𑀢𑀺.

‘‘𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀏𑀓𑀢𑁄 𑀯𑀺𑀧𑀮𑁆𑀮𑀸𑀲𑀸𑀦𑀁 𑀫𑀽𑀮𑀓𑀸𑀭𑀡𑀁 𑀓𑀺𑀁 𑀳𑁄𑀦𑁆𑀢𑀺, 𑀉𑀤𑀸𑀳𑀼 𑀯𑀺𑀲𑀼𑀁 𑀯𑀺𑀲𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀪𑀚𑀺𑀢𑀼𑀁 ‘‘𑀢𑀡𑁆𑀳𑀸𑀦𑀺𑀯𑀼𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸𑀭𑀳𑀺𑀢𑀸 𑀢𑀡𑁆𑀳𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀦𑀺𑀯𑀼𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀢𑀡𑁆𑀳𑀸𑀬 𑀲𑀸𑀢𑀺𑀲𑀬𑀧𑀘𑁆𑀘𑀬𑀢𑁆𑀢𑀸. 𑀲𑀸𑀢𑀺𑀲𑀬𑀸𑀬 𑀳𑀺 𑀢𑀡𑁆𑀳𑀸𑀬 𑀅𑀲𑀼𑀪𑁂𑀧𑀺 ‘‘𑀲𑀼𑀪’’𑀦𑁆𑀢𑀺, 𑀤𑀼𑀓𑁆𑀔𑁂𑀧𑀺 ‘‘𑀲𑀼𑀔’’𑀦𑁆𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. ‘‘𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀯𑀺𑀚𑁆𑀚𑀸𑀦𑀺𑀯𑀼𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 ‘‘𑀤𑀺𑀝𑁆𑀞𑀺𑀦𑀺𑀯𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀅𑀯𑀺𑀚𑁆𑀚𑀸𑀬 𑀤𑀺𑀝𑁆𑀞𑀺 𑀪𑀯𑀢𑀻𑀢𑀺 𑀤𑀺𑀝𑁆𑀞𑀺𑀲𑀻𑀲𑁂𑀦 𑀅𑀯𑀺𑀚𑁆𑀚𑀁 𑀕𑀳𑁂𑀢𑁆𑀯𑀸 ‘‘𑀤𑀺𑀝𑁆𑀞𑀺𑀦𑀺𑀯𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑀦𑁆𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀅𑀯𑀺𑀚𑁆𑀚𑀸𑀦𑀺𑀯𑀼𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀤𑀺𑀝𑁆𑀞𑀺𑀭𑀳𑀺𑀢𑀸 𑀅𑀯𑀺𑀚𑁆𑀚𑀸𑀧𑀺 𑀕𑀳𑀺𑀢𑀸 𑀲𑀺𑀬𑀸, 𑀤𑀺𑀝𑁆𑀞𑀺𑀲𑀳𑀺𑀢𑀸𑀬 𑀳𑀺 𑀅𑀯𑀺𑀚𑁆𑀚𑀸𑀬 𑀅𑀦𑀺𑀘𑁆𑀘𑁂𑀧𑀺 ‘‘𑀦𑀺𑀘𑁆𑀘’’𑀦𑁆𑀢𑀺, 𑀅𑀦𑀢𑁆𑀢𑀦𑀺𑀬𑁂𑀧𑀺 ‘‘𑀅𑀢𑁆𑀢𑀸’’𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺.

‘‘𑀓𑀣𑀁 𑀢𑀡𑁆𑀳𑀸𑀫𑀽𑀮𑀓𑁄 𑀯𑀺𑀧𑀮𑁆𑀮𑀸𑀲𑁄 𑀧𑀯𑀢𑁆𑀢𑁄, 𑀓𑀣𑀁 𑀤𑀺𑀝𑁆𑀞𑀺𑀲𑀳𑀺𑀢𑀸𑀯𑀺𑀚𑁆𑀚𑀸𑀫𑀽𑀮𑀓𑁄 𑀯𑀺𑀧𑀮𑁆𑀮𑀸𑀲𑁄 𑀧𑀯𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀡𑁆𑀳𑀸𑀫𑀽𑀮𑀓𑀤𑀺𑀝𑁆𑀞𑀺𑀲𑀳𑀺𑀢𑀸𑀯𑀺𑀚𑁆𑀚𑀸𑀫𑀽𑀮𑀓𑁂𑀲𑀼. 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄𑀢𑀺 𑀤𑀺𑀝𑁆𑀞𑀺𑀲𑀳𑀺𑀢𑀸𑀯𑀺𑀚𑁆𑀚𑀸𑀫𑀽𑀮𑀓𑀯𑀺𑀧𑀮𑁆𑀮𑀸𑀲𑁄. 𑀅𑀢𑀻𑀢𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀅𑀤𑀩𑁆𑀩𑀪𑀽𑀢𑁄𑀧𑀺 𑀤𑀩𑁆𑀩𑀪𑀽𑀢𑁄 𑀯𑀺𑀬 𑀯𑀼𑀢𑁆𑀢𑁄. 𑀢𑀡𑁆𑀳𑀸𑀯𑀺𑀧𑀮𑁆𑀮𑀸𑀲𑁄𑀢𑀺 𑀤𑀺𑀝𑁆𑀞𑀺𑀲𑀳𑀺𑀢𑀢𑀡𑁆𑀳𑀸𑀫𑀽𑀮𑀓𑁄 𑀯𑀺𑀧𑀮𑁆𑀮𑀸𑀲𑁄 𑀅𑀦𑀸𑀕𑀢𑀁 𑀭𑀽𑀧𑀁 𑀤𑀺𑀝𑁆𑀞𑀺𑀪𑀺𑀦𑀦𑁆𑀤𑀦𑀯𑀲𑁂𑀦 𑀅𑀪𑀺𑀦𑀦𑁆𑀤𑀢𑀻𑀢𑀺. 𑀏𑀯𑀁 𑀅𑀢𑀻𑀢𑀲𑀫𑀦𑀼𑀧𑀲𑁆𑀲𑀦𑀅𑀦𑀸𑀕𑀢𑀸𑀪𑀺𑀦𑀦𑁆𑀤𑀦𑀪𑁂𑀤𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. ‘‘𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑁄 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀬𑁂𑀯 𑀤𑁆𑀯𑁂 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀺, 𑀅𑀣 𑀔𑁄 𑀤𑀲 𑀓𑀺𑀮𑁂𑀲𑀸𑀧𑀺, 𑀓𑀲𑁆𑀫𑀸 𑀤𑁆𑀯𑁂𑀬𑁂𑀯 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘 𑁋 𑀇𑀫𑁂 𑀤𑁆𑀯𑁂𑀬𑁂𑀯 𑀥𑀫𑁆𑀫𑀸 𑀧𑀭𑀫𑀲𑀸𑀯𑀚𑁆𑀚𑀲𑁆𑀲 𑀯𑀺𑀧𑀮𑁆𑀮𑀸𑀲𑀲𑁆𑀲 𑀫𑀽𑀮𑀓𑀸𑀭𑀡𑀢𑁆𑀢𑀸. 𑀢𑀸𑀳𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀳𑀺 𑀯𑀺𑀲𑀼𑀚𑁆𑀛𑀦𑁆𑀢𑀁 𑀘𑀺𑀢𑁆𑀢𑀁 𑀲𑀩𑁆𑀩𑁂𑀳𑀺 𑀓𑀺𑀮𑁂𑀲𑁂𑀳𑀺 𑀯𑀺𑀲𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀘 𑀯𑀺𑀲𑁂𑀲𑀢𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀳𑁄𑀦𑁆𑀢𑀻𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀦 𑀳𑀺 𑀢𑀸𑀲𑀼 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀲𑀼 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀦𑀸𑀲𑀼 𑀓𑁄𑀘𑀺 𑀲𑀁𑀓𑀺𑀮𑁂𑀲𑁄 𑀅𑀧𑁆𑀧𑀳𑀻𑀦𑁄 𑀦𑀸𑀫 𑀦𑀢𑁆𑀣𑀻𑀢𑀺.

‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀢𑀡𑁆𑀳𑀸𑀅𑀯𑀺𑀚𑁆𑀚𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁𑀬𑁂𑀯 𑀫𑀽𑀮𑀓𑀸𑀭𑀡𑀁 𑀳𑁄𑀦𑁆𑀢𑀺 𑀓𑀺𑀁, 𑀉𑀤𑀸𑀳𑀼 𑀲𑀓𑀮𑀲𑁆𑀲 𑀯𑀝𑁆𑀝𑀲𑁆𑀲𑀸𑀧𑀺 𑀫𑀽𑀮𑀓𑀸𑀭𑀡𑀁 𑀳𑁄𑀦𑁆𑀢𑀺 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀢𑀡𑁆𑀳𑀸𑀅𑀯𑀺𑀚𑁆𑀚𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀫𑀽𑀮𑀓𑀸𑀭𑀡𑀁 𑀳𑁄𑀦𑁆𑀢𑀺 𑀬𑀣𑀸, 𑀏𑀯𑀁 𑀲𑀓𑀮𑀲𑁆𑀲 𑀯𑀝𑁆𑀝𑀲𑁆𑀲𑀸𑀧𑀺 𑀫𑀽𑀮𑀓𑀸𑀭𑀡𑀁 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀁 𑀅𑀭𑀓𑁆𑀔𑀺𑀢𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀜𑁆𑀘 𑀳𑁄𑀢𑀺, 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁. 𑀬𑁂𑀲𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀧𑀼𑀩𑁆𑀩𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀢𑁂𑀳𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺 𑀢𑀡𑁆𑀳𑀸𑀲𑀁𑀬𑁄𑀚𑀦𑁂𑀳𑀺 𑀲𑀁𑀲𑀸𑀭𑁂 𑀲𑀦𑁆𑀥𑀸𑀯𑀦𑁆𑀢𑀸𑀦𑀁 𑀲𑀁𑀲𑀭𑀦𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀓𑀺𑀁 𑀦𑀺𑀭𑀬𑀁 𑀫𑀸𑀭𑀯𑀲𑀕𑀫𑀦𑁂𑀦 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀳𑁄𑀢𑀺, 𑀲𑀓𑀺𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀳𑁄𑀢𑀺, 𑀲𑀓𑀺𑀁 𑀧𑁂𑀢𑁆𑀢𑀺𑀯𑀺𑀲𑀬𑀁 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀳𑁄𑀢𑀺, 𑀲𑀓𑀺𑀁 𑀅𑀲𑀼𑀭𑀓𑀸𑀬𑀁 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀳𑁄𑀢𑀺, 𑀲𑀓𑀺𑀁 𑀤𑁂𑀯𑁂 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀳𑁄𑀢𑀺, 𑀲𑀓𑀺𑀁 𑀫𑀦𑀼𑀲𑁆𑀲𑁂 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘𑀸’’𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀦 𑀤𑁂𑀲𑀺𑀢𑁄 𑀅𑀢𑁆𑀣𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀦 𑀤𑁂𑀲𑀺𑀢𑁄 𑀅𑀢𑁆𑀣𑁄 𑀓𑀣𑀁 𑀯𑀺𑀪𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀬𑀸 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀦𑀺𑀬𑀢𑀸 𑀅𑀢𑁆𑀣𑀺, 𑀇𑀤𑀁 𑀅𑀓𑀮𑁆𑀮𑀢𑁆𑀢𑀁 𑀅𑀓𑀫𑁆𑀫𑀦𑀺𑀬𑀢𑁆𑀢𑀁 𑀣𑀺𑀦𑀁 𑀦𑀸𑀫. 𑀬𑀁 𑀓𑀸𑀬𑀲𑁆𑀲 𑀮𑀻𑀦𑀢𑁆𑀢𑀁 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀮𑀻𑀦𑀢𑁆𑀢𑀁 𑀅𑀢𑁆𑀣𑀺, 𑀇𑀤𑀁 𑀓𑀸𑀬𑀲𑁆𑀲 𑀮𑀻𑀦𑀢𑁆𑀢𑀁 𑀫𑀺𑀤𑁆𑀥𑀁 𑀦𑀸𑀫𑀸𑀢𑀺 𑀣𑀺𑀦𑀫𑀺𑀤𑁆𑀥𑀲𑀭𑀽𑀧𑀫𑁂𑀯 𑀯𑀼𑀢𑁆𑀢𑀁. 𑀢𑁂𑀳𑀺 𑀣𑀺𑀦𑀫𑀺𑀤𑁆𑀥𑁂𑀳𑀺 𑀘𑀺𑀢𑁆𑀢𑀲𑁆𑀲 𑀅𑀪𑀺𑀪𑀽𑀢𑀪𑀸𑀯𑀸𑀤𑀺𑀓𑁄 𑀧𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀦 𑀯𑀼𑀢𑁆𑀢𑁄, 𑀅𑀯𑀼𑀢𑁆𑀢𑁂𑀧𑀺 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑁂𑀳𑀺 𑀅𑀪𑀺𑀪𑀽𑀢𑀁, 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀢𑁂𑀦 𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀲𑀻𑀲𑁂𑀦 𑀲𑀁𑀬𑁄𑀚𑀦𑁂𑀦 𑀲𑀁𑀲𑀸𑀭𑁂 𑀫𑀸𑀭𑀯𑀲𑀕𑀫𑀦𑁂𑀦 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀧𑀭𑀺𑀬𑁄𑀲𑀸𑀦𑀲𑀪𑀸𑀯𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

‘‘𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀦 𑀤𑁂𑀲𑀺𑀢𑁄 𑀅𑀢𑁆𑀣𑁄 𑀓𑀣𑀁 𑀯𑀺𑀪𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀮𑁂𑀲𑀫𑀸𑀭𑀲𑁆𑀲𑀸𑀢𑀺 𑀓𑀺𑀮𑁂𑀲𑁄 𑀤𑀸𑀦𑀸𑀤𑀺𑀧𑀼𑀜𑁆𑀜𑁂 𑀫𑀸𑀭𑁂𑀢𑀺 𑀦𑀺𑀯𑀸𑀭𑁂𑀢𑀻𑀢𑀺 𑀅𑀢𑁆𑀣𑁂𑀦 𑀫𑀸𑀭𑁄𑀢𑀺 𑀓𑀺𑀮𑁂𑀲𑀫𑀸𑀭𑁄. 𑀇𑀫𑀺𑀦𑀸 𑀓𑀺𑀮𑁂𑀲𑀫𑀸𑀭𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑁆𑀢𑀸 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑀔𑀦𑁆𑀥𑀫𑀸𑀭𑀫𑀘𑁆𑀘𑀼𑀫𑀸𑀭𑀸 𑀘 𑀕𑀳𑀺𑀢𑀸, 𑀘-𑀲𑀤𑁆𑀤𑁂𑀦 𑀯𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑀫𑀸𑀭𑀲𑁆𑀲𑀸𑀢𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲. 𑀅𑀣 𑀯𑀸 ‘‘𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀢𑁆𑀢𑀫𑀸𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑁄 𑀬𑁄 𑀭𑀸𑀚𑀘𑁄𑀭𑀸𑀤𑀺𑀓𑁄 𑀤𑀸𑀦𑀸𑀤𑀻𑀦𑀺 𑀯𑀸 𑀇𑀲𑁆𑀲𑀭𑀺𑀬𑀪𑁄𑀕𑀸𑀤𑀻𑀦𑀺 𑀯𑀸 𑀫𑀸𑀭𑁂𑀢𑀺, 𑀲𑁄 𑀲𑁄 𑀭𑀸𑀚𑀘𑁄𑀭𑀸𑀤𑀺𑀓𑁄𑀧𑀺 𑀕𑀳𑀺𑀢𑁄, 𑀢𑀲𑁆𑀫𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀢𑁆𑀢𑀫𑀸𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀲𑀦𑁆𑀢𑀺 𑀇𑀘𑁆𑀙𑀁 𑀮𑁄𑀪𑀁 𑀅𑀥𑀺𑀧𑁆𑀧𑀸𑀬𑀁 𑀭𑀼𑀘𑀺𑀁 𑀆𑀓𑀗𑁆𑀔𑀁 𑀆𑀡𑀁 𑀆𑀡𑀢𑁆𑀢𑀺𑀁. 𑀕𑀘𑁆𑀙𑀢𑀻𑀢𑀺 𑀉𑀧𑀕𑀘𑁆𑀙𑀢𑀺 𑀉𑀧𑁂𑀢𑀺 𑀅𑀦𑀼𑀯𑀢𑁆𑀢𑀢𑀺 𑀅𑀦𑀼𑀕𑀘𑁆𑀙𑀢𑀺 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀅𑀢𑁆𑀣𑁄. ‘‘𑀓𑀲𑁆𑀫𑀸 𑀯𑀲𑀁 𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄 𑀲𑀢𑁆𑀢𑁄 𑀅𑀭𑀓𑁆𑀔𑀺𑀢𑀘𑀺𑀢𑁆𑀢𑁂𑀦 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀘𑀺𑀢𑁆𑀢𑁂𑀦 𑀘 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑀘𑀺𑀢𑁆𑀢𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀲𑁄 𑀲𑀢𑁆𑀢𑁄 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀤𑀻𑀳𑀺 𑀦𑀺𑀯𑀼𑀢𑁄 𑀳𑀼𑀢𑁆𑀯𑀸 𑀲𑀁𑀲𑀸𑀭𑀸𑀪𑀺𑀫𑀼𑀔𑁄 𑀳𑀺 𑀬𑀲𑁆𑀫𑀸 𑀳𑁄𑀢𑀺, 𑀦 𑀯𑀺𑀲𑀗𑁆𑀔𑀸𑀭𑀸𑀪𑀺𑀫𑀼𑀔𑁄, 𑀢𑀲𑁆𑀫𑀸 𑀫𑀸𑀭𑀲𑁆𑀲 𑀯𑀲𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

‘‘𑀅𑀭𑀓𑁆𑀔𑀺𑀢𑁂𑀦𑀸𑀢𑀺𑀆𑀤𑀺𑀓𑀲𑁆𑀲 𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄, 𑀢𑁂𑀦 ‘𑀅𑀭𑀓𑁆𑀔𑀺𑀢𑁂𑀦𑀸’𑀢𑀺𑀆𑀤𑀺𑀓𑁂𑀦 𑀲𑀼𑀢𑁆𑀢𑁂𑀦 𑀓𑀺𑀢𑁆𑀢𑀓𑀸𑀦𑀺 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀻’’𑀢𑀺𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀫𑀸𑀦𑀺 𑀪𑀕𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀭𑀓𑁆𑀔𑀺𑀢𑁂𑀦𑀸’’𑀢𑀺𑀆𑀤𑀺𑀲𑀼𑀢𑁆𑀢𑁂𑀦 𑀪𑀕𑀯𑀢𑀸 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺 𑀤𑀼𑀓𑁆𑀔𑀁, 𑀲𑀫𑀼𑀤𑀬𑁄 𑀘𑀸𑀢𑀺. 𑀓𑀣𑀁 𑀤𑁂𑀲𑀺𑀢𑀸𑀦𑀺? 𑀅𑀪𑀺𑀥𑀫𑁆𑀫𑀦𑀺𑀲𑁆𑀲𑀺𑀢𑀸𑀬 𑀓𑀣𑀸𑀬 𑀘𑁂𑀯 𑀲𑀼𑀢𑁆𑀢𑀦𑁆𑀢𑀦𑀺𑀲𑁆𑀲𑀺𑀢𑀸𑀬 𑀓𑀣𑀸𑀬 𑀘 𑀤𑁂𑀲𑀺𑀢𑀸𑀦𑀺. 𑀢𑀸𑀲𑀼 𑀓𑀣𑀸𑀲𑀼 𑀅𑀪𑀺𑀥𑀫𑁆𑀫𑀦𑀺𑀲𑁆𑀲𑀺𑀢𑀸𑀬 𑀓𑀣𑀸𑀬 𑀤𑁂𑀲𑀺𑀢𑁂 𑀲𑀢𑀺 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀅𑀭𑀓𑁆𑀔𑀺𑀢𑀁 𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁, 𑀅𑀭𑀓𑁆𑀔𑀺𑀢𑀁 𑀤𑀼𑀝𑁆𑀞𑀫𑁆𑀧𑀺 𑀘𑀺𑀢𑁆𑀢𑀁, 𑀅𑀭𑀓𑁆𑀔𑀺𑀢𑀁 𑀫𑀽𑀴𑁆𑀳𑀫𑁆𑀧𑀺 𑀘𑀺𑀢𑁆𑀢𑀁 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀜𑀸𑀧𑀺𑀢𑀁. 𑀢𑀢𑁆𑀣 𑀭𑀢𑁆𑀢𑀘𑀺𑀢𑁆𑀢𑀁 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀅𑀝𑁆𑀞𑀯𑀺𑀥𑀁, 𑀤𑀼𑀝𑁆𑀞𑀘𑀺𑀢𑁆𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀤𑀼𑀩𑁆𑀩𑀺𑀥𑀁, 𑀫𑀽𑀴𑁆𑀳𑀘𑀺𑀢𑁆𑀢𑀁 𑀫𑁄𑀫𑀽𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀤𑀼𑀩𑁆𑀩𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀲𑀜𑁆𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀅𑀕𑀼𑀢𑁆𑀢𑀺 𑀅𑀦𑀸𑀭𑀓𑁆𑀔𑀸 𑀉𑀧𑁆𑀧𑀦𑁆𑀦𑀸, 𑀢𑀸𑀬 𑀅𑀕𑀼𑀢𑁆𑀢𑀺𑀬𑀸 𑀅𑀦𑀸𑀭𑀓𑁆𑀔𑀸𑀬 𑀘𑀺𑀢𑁆𑀢𑀁 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺 𑀨𑀮𑀽𑀧𑀘𑀸𑀭𑁂𑀦𑀸𑀢𑀺.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀁𑀲𑀝𑁆𑀞𑀁 𑀘𑀺𑀢𑁆𑀢𑀁 𑀤𑁂𑀲𑀺𑀢𑀁, 𑀢𑀁 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀁𑀲𑀝𑁆𑀞𑀪𑀸𑀯𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑀸𑀦𑀼𑀕𑀢𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀁 𑀦𑀸𑀫𑀸𑀢𑀺. ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀣𑀺𑀦𑀫𑀺𑀤𑁆𑀥𑁂𑀦 𑀲𑀁𑀲𑀝𑁆𑀞𑀁 𑀘𑀺𑀢𑁆𑀢𑀁 𑀤𑁂𑀲𑀺𑀢𑀁, 𑀢𑀁 𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀧𑀜𑁆𑀘𑀯𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀣𑀺𑀦𑀫𑀺𑀤𑁆𑀥𑁂𑀦 𑀲𑀁𑀲𑀝𑁆𑀞𑀪𑀸𑀯𑁂𑀦 𑀣𑀺𑀦𑀫𑀺𑀤𑁆𑀥𑀯𑀲𑀸𑀦𑀼𑀕𑀢𑀢𑁆𑀢𑀸 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑀁 𑀦𑀸𑀫𑀸𑀢𑀺 𑀏𑀯𑀁 𑀬𑁂 𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁩𑁬𑁫) 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸, 𑀢𑁂 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀢𑀻𑀳𑀺 𑀧𑀤𑁂𑀳𑀺 𑀪𑀕𑀯𑀢𑀸 𑀤𑁂𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀫𑀸𑀭𑀲𑁆𑀲𑀸’’𑀢𑀺 𑀧𑀤𑁂𑀦 𑀧𑀜𑁆𑀘 𑀫𑀸𑀭𑀸 𑀕𑀳𑀺𑀢𑀸. 𑀢𑁂𑀲𑀼 𑀓𑀺𑀮𑁂𑀲𑀫𑀸𑀭𑁄 ‘‘𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀘𑀢𑁆𑀢𑀸𑀭𑁄 𑀑𑀖𑀸, 𑀘𑀢𑁆𑀢𑀸𑀭𑁄 𑀬𑁄𑀕𑀸, 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸, 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀅𑀝𑁆𑀞 𑀦𑀻𑀯𑀭𑀡𑀸, 𑀤𑀲 𑀓𑀺𑀮𑁂𑀲𑀸’’𑀢𑀺 (𑀥. 𑀲. 𑁧𑁧𑁦𑁨 𑀆𑀤𑀬𑁄) 𑀤𑁂𑀲𑀺𑀢𑁄. 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑁄 𑀧𑀦 ‘‘𑀓𑀼𑀲𑀮𑀸 𑀘𑁂𑀢𑀦𑀸 (𑀯𑀺𑀪. 𑁨𑁨𑁬) 𑀅𑀓𑀼𑀲𑀮𑀸 𑀘𑁂𑀢𑀦𑀸 (𑀯𑀺𑀪. 𑁨𑁨𑁬) 𑀓𑀼𑀲𑀮𑀁 𑀓𑀫𑁆𑀫𑀁 𑀅𑀓𑀼𑀲𑀮𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀺𑀢𑁄. 𑀔𑀦𑁆𑀥𑀫𑀸𑀭𑁄 𑀧𑀦 ‘‘𑀅𑀢𑁆𑀢𑀪𑀸𑀯𑁄 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀺𑀢𑁄. 𑀫𑀘𑁆𑀘𑀼𑀫𑀸𑀭𑁄 𑀧𑀦 ‘‘𑀘𑀼𑀢𑀺 𑀘𑀯𑀦𑀢𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁯𑁩) 𑀤𑁂𑀲𑀺𑀢𑁄. 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀪𑀺𑀥𑀫𑁆𑀫𑀦𑀺𑀲𑁆𑀲𑀺𑀢𑀸𑀬 𑀓𑀣𑀸𑀬 𑀤𑁂𑀲𑀺𑀢𑁄 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀼𑀢𑁆𑀢𑀦𑁆𑀢𑀦𑀺𑀲𑁆𑀲𑀺𑀢𑀸𑀬 𑀧𑀦 𑀓𑀣𑀸𑀬 𑀤𑁂𑀲𑀺𑀢𑁂 𑀲𑀢𑀺 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻, 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺, 𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺…𑀧𑁂… 𑀲𑁄𑀢𑀺𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺… 𑀖𑀸𑀦𑀺𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺… 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺… 𑀓𑀸𑀬𑀺𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺… 𑀫𑀦𑀺𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁩𑁪𑁭) 𑀏𑀯𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀬𑀁 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀁 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀁 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀤𑁂𑀲𑀺𑀢𑀁. 𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀦𑀯𑀲𑁂𑀦 𑀯𑀸 𑀅𑀧𑀭𑀦𑁆𑀢𑀓𑀧𑁆𑀧𑀦𑀯𑀲𑁂𑀦 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀦𑀯𑀲𑁂𑀦 𑀯𑀸 𑀫𑀺𑀘𑁆𑀙𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀲𑁆𑀲 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸 ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸 ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸 𑀉𑀧𑁆𑀧𑀦𑁆𑀦𑀸, 𑀢𑀸𑀳𑀺 𑀤𑀺𑀝𑁆𑀞𑀻𑀳𑀺 𑀯𑀸, 𑀬𑀸 𑀘 𑀤𑀺𑀝𑁆𑀞𑀺𑀬𑁄 ‘‘𑀇𑀫𑀸 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸…𑀧𑁂… 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸’’𑀢𑀺 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁩𑁦 𑀆𑀤𑀬𑁄) 𑀯𑀼𑀢𑁆𑀢𑀸, 𑀢𑀸𑀳𑀺 𑀤𑀺𑀝𑁆𑀞𑀻𑀳𑀺 𑀯𑀸 𑀲𑀫𑁆𑀧𑀬𑀼𑀢𑁆𑀢𑀁 𑀬𑀁 𑀘𑀺𑀢𑁆𑀢𑀁 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀤𑁂𑀲𑀺𑀢𑀁.

‘‘𑀣𑀺𑀦𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸, 𑀫𑀺𑀤𑁆𑀥𑀁 𑀦𑀸𑀫 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸’’𑀢𑀺 𑀯𑀸 ‘‘𑀣𑀺𑀦𑀁 𑀅𑀦𑀼𑀲𑁆𑀲𑀸𑀳𑀲𑀁𑀲𑀻𑀤𑀦𑀁, 𑀫𑀺𑀤𑁆𑀥𑀁 𑀉𑀲𑁆𑀲𑀸𑀳𑀲𑀢𑁆𑀢𑀺𑀯𑀺𑀖𑀸𑀢𑁄’’𑀢𑀺 𑀯𑀸 𑀬𑀸𑀦𑀺 𑀣𑀺𑀦𑀫𑀺𑀤𑁆𑀥𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀳𑀺 𑀣𑀺𑀦𑀫𑀺𑀤𑁆𑀥𑁂𑀳𑀺 𑀬𑀁 𑀘𑀺𑀢𑁆𑀢𑀁 𑀅𑀪𑀺𑀪𑀽𑀢𑀁 𑀅𑀚𑁆𑀛𑁄𑀢𑁆𑀣𑀝𑀁, 𑀢𑀁 𑀘𑀺𑀢𑁆𑀢𑀁 ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀤𑁂𑀲𑀺𑀢𑀁.

‘‘𑀯𑀲𑁄 𑀦𑀸𑀫 𑀇𑀘𑁆𑀙𑀸 𑀮𑁄𑀪𑁄 𑀅𑀥𑀺𑀧𑁆𑀧𑀸𑀬𑁄 𑀭𑀼𑀘𑀺 𑀆𑀓𑀗𑁆𑀔𑀸 𑀆𑀡𑀸 𑀆𑀡𑀢𑁆𑀢𑀻’’𑀢𑀺 𑀬𑁄 𑀯𑀲𑁄 𑀯𑀼𑀢𑁆𑀢𑁄, 𑀲𑁄 𑀯𑀲𑁄 ‘‘𑀯𑀲’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀤𑁂𑀲𑀺𑀢𑁄. ‘‘𑀧𑀜𑁆𑀘 𑀫𑀸𑀭𑀸 𑁋 𑀔𑀦𑁆𑀥𑀫𑀸𑀭𑁄 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑁄 𑀫𑀘𑁆𑀘𑀼𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑀫𑀸𑀭𑁄 𑀓𑀺𑀮𑁂𑀲𑀫𑀸𑀭𑁄’’𑀢𑀺 𑀬𑁄 𑀫𑀸𑀭𑁄 𑀯𑀼𑀢𑁆𑀢𑁄, 𑀲𑁄 𑀫𑀸𑀭𑁄 ‘‘𑀫𑀸𑀭𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀤𑁂𑀲𑀺𑀢𑁄. ‘‘𑀕𑀘𑁆𑀙𑀢𑀺, 𑀉𑀧𑀕𑀘𑁆𑀙𑀢𑀺, 𑀉𑀧𑁂𑀢𑀺, 𑀅𑀦𑀼𑀯𑀢𑁆𑀢𑀢𑀺, 𑀅𑀦𑀼𑀕𑀘𑁆𑀙𑀢𑀺, 𑀦𑀸𑀢𑀺𑀓𑁆𑀓𑀫𑀢𑀻’’𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄, 𑀲𑁄 𑀧𑀼𑀕𑁆𑀕𑀮𑁄 ‘‘𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀤𑁂𑀲𑀺𑀢𑁄𑀢𑀺. 𑀏𑀯𑀁 𑀤𑁂𑀲𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀅𑀓𑀼𑀲𑀮𑀸 𑀲𑀫𑀼𑀤𑀬𑀲𑀘𑁆𑀘𑀁, ‘‘𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀬𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄, 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺. ‘‘𑀓𑀺𑀫𑀢𑁆𑀣𑀸𑀬 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂𑀲𑀁 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀧𑀭𑀺𑀜𑁆𑀜𑀸𑀬 𑀘 𑀧𑀳𑀸𑀦𑀸𑀬 𑀘 ‘‘𑀅𑀭𑀓𑁆𑀔𑀺𑀢𑁂𑀦𑀸’’𑀢𑀺𑀆𑀤𑀺 𑀥𑀫𑁆𑀫𑀁 𑀪𑀕𑀯𑀸 𑀤𑁂𑀲𑁂𑀢𑀺, 𑀢𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 ‘‘𑀅𑀭𑀓𑁆𑀔𑀺𑀢𑁂𑀦𑀸’’𑀢𑀺𑀆𑀤𑀺𑀓𑁂𑀦 𑀜𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

‘‘𑀢𑁂𑀲𑀼 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼 𑀓𑀲𑁆𑀲 𑀲𑀘𑁆𑀘𑀲𑁆𑀲 𑀧𑀭𑀺𑀜𑁆𑀜𑀸𑀬, 𑀓𑀲𑁆𑀲 𑀲𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀤𑁂𑀲𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬, 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀧𑀭𑀺𑀜𑁆𑀜𑀸𑀧𑀳𑀸𑀦𑁂𑀳𑀺 𑀓𑀢𑀫𑀸𑀦𑀺 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑁂𑀦 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀭𑀺𑀚𑀸𑀦𑀸𑀢𑀺, 𑀬𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀚𑀳𑀢𑀺 𑀘, 𑀅𑀬𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁 𑀦𑀸𑀫. 𑀬𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀆𑀭𑀩𑁆𑀪 𑀢𑀡𑁆𑀳𑀸𑀬, 𑀅𑀯𑀺𑀚𑁆𑀚𑀸𑀬 𑀘 𑀧𑀳𑀸𑀦𑀁 𑀚𑀸𑀢𑀁, 𑀅𑀬𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁 𑀦𑀸𑀫𑀸𑀢𑀺. 𑀏𑀯𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀪𑀕𑀯𑀢𑀸 𑀤𑁂𑀲𑀺𑀢𑀸𑀦𑀺.

‘‘𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀤𑁂𑀲𑀺𑀢𑀪𑀸𑀯𑁄 𑀓𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀲𑀫𑀼𑀤𑀬𑀲𑀘𑁆𑀘𑁂𑀦 𑀅𑀲𑁆𑀲𑀸𑀤𑁄 𑀕𑀳𑀺𑀢𑁄, 𑀤𑀼𑀓𑁆𑀔𑀲𑀘𑁆𑀘𑁂𑀦 𑀆𑀤𑀻𑀦𑀯𑁄 𑀕𑀳𑀺𑀢𑁄, 𑀫𑀕𑁆𑀕𑀲𑀘𑁆𑀘𑀦𑀺𑀭𑁄𑀥𑀲𑀘𑁆𑀘𑁂𑀳𑀺 𑀦𑀺𑀲𑁆𑀲𑀭𑀡𑀁 𑀕𑀳𑀺𑀢𑀁, 𑀲𑀫𑀼𑀤𑀬𑀧𑁆𑀧𑀳𑀸𑀦𑀯𑀲𑁂𑀦 𑀲𑀩𑁆𑀩𑀕𑀢𑀺𑀧𑀚𑀳𑀦𑀁 𑀚𑀸𑀢𑀁, 𑀲𑀩𑁆𑀩𑀕𑀢𑀺𑀧𑀚𑀳𑀦𑀁 𑀨𑀮𑀦𑁆𑀢𑀺 𑀕𑀳𑀺𑀢𑀁. 𑀬𑁂𑀦 𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀤𑀺𑀓𑁂𑀦 𑀲𑀩𑁆𑀩𑀕𑀢𑀺𑀧𑀚𑀳𑀦𑀁 𑀚𑀸𑀢𑀁, 𑀲𑁄 𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀤𑀺𑀓𑁄 𑀉𑀧𑀸𑀬𑁄𑀢𑀺 𑀕𑀳𑀺𑀢𑁄, 𑀅𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀤𑀺𑀓𑀲𑁆𑀲 𑀧𑀝𑀺𑀲𑁂𑀥𑀦𑀫𑀼𑀔𑁂𑀦 𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀤𑀺𑀓𑀲𑁆𑀲 𑀦𑀺𑀬𑁄𑀚𑀦𑀁 𑀪𑀕𑀯𑀢𑁄 𑀆𑀡𑀢𑁆𑀢𑀻𑀢𑀺 𑀕𑀳𑀺𑀢𑀦𑁆𑀢𑀺 𑀤𑁂𑀲𑀦𑀸𑀳𑀸𑀭𑁂𑀦 𑀦𑀸𑀦𑀸𑀲𑀼𑀢𑁆𑀢𑁂𑀲𑀼 𑀤𑀲𑁆𑀲𑀺𑀢𑀸 𑀅𑀲𑁆𑀲𑀸𑀤𑀸𑀤𑀬𑁄 ‘‘𑀅𑀭𑀓𑁆𑀔𑀺𑀢𑁂𑀦𑀸’’𑀢𑀺𑀆𑀤𑀺𑀓𑁂 𑀏𑀓𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀸.

‘‘𑀅𑀲𑁆𑀲𑀸𑀤𑀸𑀤𑀻𑀦𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀪𑀸𑀯𑁄 𑀓𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀸𑀦𑀸𑀲𑀼𑀢𑁆𑀢𑁂𑀲𑀼 𑀅𑀲𑁆𑀲𑀸𑀤𑀸𑀤𑀬𑁄 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫. 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀏𑀓𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀅𑀲𑁆𑀲𑀸𑀤𑀸𑀤𑀬𑁄 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄 𑀦𑀸𑀫𑀸𑀢𑀺 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

‘‘𑀏𑀢𑁆𑀢𑀓𑁄𑀯 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀓𑁂𑀓𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀅𑀲𑁆𑀲𑀸𑀤𑀸𑀤𑀬𑁄 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁂𑀦 𑀦𑀻𑀳𑀭𑀺𑀢𑁆𑀯𑀸 𑀬𑀣𑀸𑀭𑀳𑀁 𑀤𑀲𑁆𑀲𑀺𑀢𑀸, 𑀲𑁄 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄 𑀦𑀺𑀬𑀼𑀢𑁆𑀢𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀕𑀳𑀺𑀢𑁄.

𑀇𑀢𑀺 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦…𑀧𑁂… 𑀕𑀳𑁂𑀢𑀩𑁆𑀩𑁄𑀢𑀺.