𑁨. 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀯𑀺𑀪𑀸𑀯𑀦𑀸

𑁫𑁩. 𑀬𑁂𑀦 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁂𑀦 𑀅𑀲𑁆𑀲𑀸𑀤𑀸𑀤𑀬𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, 𑀲𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀸𑀤𑀻𑀲𑀼 𑀲𑁄𑀴𑀲𑀲𑀼 𑀳𑀸𑀭𑀲𑀫𑁆𑀧𑀸𑀢𑁂𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀅𑀬𑀁 𑀥𑀫𑁆𑀫𑁄 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀯𑀺𑀘𑀬𑀺𑀢𑀩𑁆𑀩𑁄, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄 𑀦𑀸𑀫𑀸𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀢𑀡𑁆𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀏𑀯𑀁 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀫𑀸 𑀤𑁂𑀲𑀦𑀸𑀳𑀸𑀭𑀧𑀤𑀢𑁆𑀣𑀯𑀺𑀘𑀬𑁄 𑀯𑀺𑀘𑀬𑀳𑀸𑀭𑁄, 𑀢𑀲𑁆𑀫𑀸 𑀤𑁂𑀲𑀦𑀸𑀳𑀸𑀭𑁂 𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀬 𑀢𑀡𑁆𑀳𑀸𑀬 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑀧𑀯𑀺𑀘𑀬𑀫𑀼𑀔𑁂𑀦 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀁 𑀤𑀲𑁆𑀲𑁂𑀢𑀼𑀁 ‘𑀢𑀢𑁆𑀣 𑀢𑀡𑁆𑀳𑀸 𑀤𑀼𑀯𑀺𑀥𑀸’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁩) 𑁋

𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺𑀲𑀼𑀢𑁆𑀢𑀢𑁆𑀣𑁂 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁂𑀦 𑀲𑀁𑀯𑀡𑁆𑀡𑀺𑀢𑁂 𑀅𑀓𑀼𑀲𑀮𑀥𑀫𑁆𑀫𑁂 ‘‘𑀢𑀡𑁆𑀳𑀸’’𑀢𑀺 𑀦𑀺𑀤𑁆𑀥𑀸𑀭𑀺𑀢𑀸 𑀲𑀩𑁆𑀩𑀢𑀡𑁆𑀳𑀸. 𑀓𑀼𑀲𑀮𑀸𑀧𑀻𑀢𑀺 𑀘𑀢𑀼𑀪𑀽𑀫𑀓𑁂 𑀓𑀼𑀲𑀮𑁂 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀸 𑀢𑀡𑁆𑀳𑀸𑀧𑀺. 𑀅𑀓𑀼𑀲𑀮𑀸𑀧𑀻𑀢𑀺 𑀅𑀓𑀼𑀲𑀮𑀥𑀫𑁆𑀫𑁂 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀸 𑀢𑀡𑁆𑀳𑀸𑀧𑀻𑀢𑀺 𑀤𑀼𑀯𑀺𑀥𑀸 𑀳𑁄𑀢𑀻𑀢𑀺 𑀯𑀺𑀘𑀬𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 𑀝𑀻𑀓𑀸𑀬𑀁 𑁋 ‘‘𑀓𑀼𑀲𑀮𑀥𑀫𑁆𑀫𑀸𑀭𑀫𑁆𑀫𑀡𑀸𑀢𑀺 𑀓𑀼𑀲𑀮𑀥𑀫𑁆𑀫𑁂 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑁂𑀲𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑀁, 𑀇𑀥 ‘𑀓𑀼𑀲𑀮𑀸 𑀥𑀫𑁆𑀫𑀸’𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀫𑁆𑀧𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸’’𑀢𑀺.

‘‘𑀓𑀼𑀲𑀮𑀸 𑀢𑀡𑁆𑀳𑀸 𑀓𑀺𑀁𑀕𑀸𑀫𑀺𑀦𑀻, 𑀅𑀓𑀼𑀲𑀮𑀸 𑀢𑀡𑁆𑀳𑀸 𑀓𑀺𑀁 𑀕𑀸𑀫𑀺𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀓𑀼𑀲𑀮𑀸 𑀲𑀁𑀲𑀸𑀭𑀕𑀸𑀫𑀺𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀓𑀢𑀫𑁄 𑀓𑀼𑀲𑀮𑀸𑀓𑀼𑀲𑀮𑀢𑀡𑁆𑀳𑀸𑀦𑀁 𑀯𑀺𑀲𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀓𑀼𑀲𑀮𑀸 𑀲𑀁𑀲𑀸𑀭𑀕𑀸𑀫𑀺𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀡𑁆𑀳𑀸 𑀦𑀸𑀫 𑀲𑀁𑀲𑀸𑀭𑀕𑀸𑀫𑀺𑀦𑀻 𑀳𑁄𑀢𑀼, 𑀓𑀣𑀁 𑀅𑀧𑀘𑀬𑀕𑀸𑀫𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀧𑀳𑀸𑀦𑀢𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀁, 𑀧𑀳𑀸𑀦𑀲𑁆𑀲 𑀳𑁂𑀢𑀼𑀪𑀽𑀢𑀸 𑀢𑀡𑁆𑀳𑀸 𑀧𑀳𑀸𑀦𑀢𑀡𑁆𑀳𑀸𑀢𑀺 𑀅𑀢𑁆𑀣𑁄, 𑀧𑀳𑀸𑀢𑀩𑁆𑀩𑀢𑀡𑁆𑀳𑀁 𑀆𑀕𑀫𑁆𑀫 𑀬𑀁 𑀧𑀳𑀸𑀦𑀁 𑀧𑀯𑀢𑁆𑀢𑁂𑀢𑀩𑁆𑀩𑀁, 𑀢𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑁂𑀦 𑀧𑀳𑀸𑀦𑁂𑀦 𑀅𑀧𑀘𑀬𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀓𑀺𑀁 𑀧𑀦 𑀢𑀡𑁆𑀳𑀸𑀬𑁂𑀯 𑀓𑀼𑀲𑀮𑀸𑀓𑀼𑀲𑀮𑀸𑀢𑀺 𑀤𑀼𑀩𑁆𑀩𑀺𑀥𑀸, 𑀉𑀤𑀸𑀳𑀼 𑀅𑀜𑁆𑀜𑁄𑀧𑀺 𑀓𑀼𑀲𑀮𑀸𑀓𑀼𑀲𑀮𑀸𑀢𑀺 𑀤𑀼𑀩𑁆𑀩𑀺𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀫𑀸𑀦𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀓𑀢𑀫𑁄 𑀫𑀸𑀦𑁄 𑀓𑀼𑀲𑀮𑁄, 𑀓𑀢𑀫𑁄 𑀫𑀸𑀦𑁄 𑀅𑀓𑀼𑀲𑀮𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀁 𑀫𑀸𑀦𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀧𑀚𑀳𑀢𑀺, 𑀅𑀬𑀁 𑀫𑀸𑀦𑁄 𑀓𑀼𑀲𑀮𑁄. 𑀬𑁄 𑀧𑀦 𑀫𑀸𑀦𑁄 𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀬𑀢𑀺, 𑀅𑀬𑀁 𑀫𑀸𑀦𑁄 𑀅𑀓𑀼𑀲𑀮𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀫𑀸𑀦𑀁…𑀧𑁂… 𑀓𑀼𑀲𑀮𑁄𑀢𑀺 𑀬𑀁 𑀫𑀸𑀦𑀁 𑀦𑀺𑀲𑁆𑀲𑀸𑀬 𑀉𑀧𑀦𑀺𑀲𑁆𑀲𑀸𑀬 𑀧𑀳𑀸𑀦𑀁 𑀧𑀯𑀢𑁆𑀢𑀺𑀢𑀁, 𑀢𑁂𑀦 𑀧𑀳𑀸𑀦𑁂𑀦 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀫𑀸𑀦𑀁 𑀧𑀚𑀳𑀢𑀺, 𑀅𑀬𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁄 𑀫𑀸𑀦𑁄 𑀨𑀮𑀽𑀧𑀘𑀸𑀭𑁂𑀦 𑀓𑀼𑀲𑀮𑁄. 𑀬𑁄 𑀧𑀦…𑀧𑁂… 𑀅𑀓𑀼𑀲𑀮𑁄𑀢𑀺 𑀬𑁄 𑀧𑀦 𑀫𑀸𑀦𑁄 𑀧𑀭𑀳𑀺𑀁𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀬𑀢𑀺, 𑀅𑀬𑀁 𑀫𑀸𑀦𑁄 𑀅𑀓𑀼𑀲𑀮𑁄𑀢𑀺 𑀯𑀺𑀘𑀬𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄.

‘‘𑀲𑀁𑀲𑀸𑀭𑀸𑀧𑀘𑀬𑀕𑀸𑀫𑀺𑀦𑀻𑀲𑀼 𑀢𑀸𑀲𑀼 𑀢𑀡𑁆𑀳𑀸𑀲𑀼 𑀓𑀢𑀫𑀸 𑀅𑀧𑀘𑀬𑀕𑀸𑀫𑀺𑀦𑀻 𑀢𑀡𑁆𑀳𑀸 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀸𑀬 𑀢𑀡𑁆𑀳𑀸𑀬 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑀁 𑀦𑁂𑀓𑁆𑀔𑀫𑁆𑀫𑀲𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀲𑀁𑀲𑀸𑀭𑀸𑀧𑀘𑀬𑀕𑀸𑀫𑀺𑀦𑀻𑀲𑀼 𑀢𑀡𑁆𑀳𑀸𑀪𑀽𑀢𑀸𑀲𑀼 𑀓𑀼𑀲𑀮𑀸𑀓𑀼𑀲𑀮𑀸𑀲𑀼. 𑀅𑀬𑀁 𑀢𑀡𑁆𑀳𑀸 𑀓𑀼𑀲𑀮𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀭𑀺𑀬𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑀁 𑀆𑀬𑀢𑀦𑀁 𑀬𑀁 𑀅𑀭𑀺𑀬𑀨𑀮𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺, 𑀢𑀁 𑀆𑀬𑀢𑀦𑀁 𑀅𑀭𑀺𑀬𑀨𑀮𑀥𑀫𑁆𑀫𑀁 𑀅𑀳𑀁 𑀓𑀼𑀤𑀸𑀲𑁆𑀲𑀼 𑀲𑀘𑁆𑀙𑀺𑀓𑀢𑁆𑀯𑀸 𑀯𑀺𑀳𑀭𑀺𑀲𑁆𑀲’’𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀲𑁆𑀲 𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀢𑀲𑁆𑀫𑀺𑀁 𑀅𑀭𑀺𑀬𑀨𑀮𑁂 𑀧𑀺𑀳𑀸 𑀉𑀧𑁆𑀧𑀚𑁆𑀚𑀢𑀺, 𑀧𑀺𑀳𑀸𑀧𑀘𑁆𑀘𑀬𑀸 𑀬𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀤𑁄𑀫𑀦𑀲𑁆𑀲𑀁 ‘‘𑀦𑁂𑀓𑁆𑀔𑀫𑁆𑀫𑀲𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀅𑀭𑀺𑀬𑀨𑀮𑁂 𑀧𑀺𑀳𑀸𑀲𑀗𑁆𑀔𑀸𑀢𑀸 𑀢𑀡𑁆𑀳𑀸 𑀓𑀼𑀲𑀮𑀸 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀅𑀭𑀺𑀬𑀨𑀮𑀥𑀫𑁆𑀫𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀢𑁆𑀢𑀸𑀢𑀺 𑀯𑀺𑀘𑀬𑀺𑀢𑀩𑁆𑀩𑀁.

‘‘𑀓𑀣𑀁 𑀧𑀯𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀭𑀸𑀕𑀯𑀺𑀭𑀸𑀕𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀢𑁆𑀢𑀩𑁆𑀩𑀸. 𑀢𑀤𑀸𑀭𑀫𑁆𑀫𑀡𑀸 𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀆𑀕𑀫𑁆𑀫 𑀧𑀯𑀢𑁆𑀢𑀸 𑀢𑀡𑁆𑀳𑀸 𑀓𑀼𑀲𑀮𑀸 𑀅𑀦𑀯𑀚𑁆𑀚𑀸, 𑀬𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀧𑀢𑁆𑀢𑀩𑁆𑀩𑀸, 𑀢𑀤𑀸𑀭𑀫𑁆𑀫𑀡𑀸 𑀢𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀆𑀕𑀫𑁆𑀫 𑀧𑀯𑀢𑁆𑀢𑀸 𑀢𑀡𑁆𑀳𑀸 𑀓𑀼𑀲𑀮𑀸 𑀅𑀦𑀯𑀚𑁆𑀚𑀸𑀢𑀺 𑀯𑀺𑀘𑀬𑀺𑀢𑀩𑁆𑀩𑀸. 𑀢𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀯𑀲𑁂𑀦 𑀪𑀕𑀯𑀢𑀸 𑁋

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄, 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁;

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺. (𑀉𑀤𑀸. 𑁩𑁨; 𑀦𑁂𑀢𑁆𑀢𑀺. 𑁩𑁧, 𑁬𑁫, 𑁭𑁮) 𑁋

𑀕𑀸𑀣𑀸𑀬𑀁 ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺 𑀧𑀤𑀁 𑀯𑀼𑀢𑁆𑀢𑀁, ‘‘𑀢𑀲𑁆𑀲𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀬𑁄 𑀧𑀯𑀺𑀘𑀬𑁄 𑀓𑀸𑀢𑀩𑁆𑀩𑁄, 𑀓𑀢𑀫𑁄 𑀲𑁄 𑀧𑀯𑀺𑀘𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀲𑁆𑀲𑀸 𑀓𑁄 𑀧𑀯𑀺𑀘𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀓𑁄 𑀧𑀯𑀺𑀘𑀬𑁄𑀢𑀺 𑀘𑁂 𑀧𑀼𑀘𑁆𑀙𑁂𑀬𑁆𑀬 ‘‘𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀧𑀯𑀺𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑁄 𑀧𑀯𑀺𑀘𑀬𑁄 𑀓𑀢𑁆𑀣 𑀤𑀝𑁆𑀞𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀓𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀧𑀯𑀺𑀘𑀬𑁄 𑀓𑀢𑁆𑀣 𑀓𑀲𑁆𑀫𑀺𑀁 𑀥𑀫𑁆𑀫𑁂 𑀤𑀝𑁆𑀞𑀩𑁆𑀩𑁄𑀢𑀺 𑀧𑀼𑀘𑁆𑀙𑀢𑀺. 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀧𑀸𑀭𑀫𑀺𑀢𑀸𑀬 𑀉𑀓𑁆𑀓𑀁𑀲𑀕𑀢𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀸𑀯𑀦𑀸𑀬 𑀲𑁄 𑀧𑀯𑀺𑀘𑀬𑁄 𑀤𑀝𑁆𑀞𑀩𑁆𑀩𑁄.

‘‘𑀘𑀢𑀼𑀢𑁆𑀣𑁂 𑀛𑀸𑀦𑁂 𑀧𑀸𑀭𑀫𑀺𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀘𑀢𑀼𑀢𑁆𑀣𑁂 𑀳𑀺 𑀛𑀸𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄 𑀲𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻 𑀧𑀼𑀕𑁆𑀕𑀮𑁄 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁 𑀅𑀦𑀗𑁆𑀕𑀡𑀁 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁 𑀫𑀼𑀤𑀼 𑀓𑀫𑁆𑀫𑀦𑀺𑀬𑀁 𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀇𑀢𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀪𑀸𑀯𑀬𑀢𑀺, 𑀲𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀅𑀝𑁆𑀞𑀯𑀺𑀥𑀁 𑀯𑀺𑀚𑁆𑀚𑀸𑀘𑀭𑀡𑀁 𑀅𑀥𑀺𑀕𑀘𑁆𑀙𑀢𑀺. 𑀓𑀢𑀫𑀁 𑀅𑀝𑁆𑀞𑀯𑀺𑀥𑀁? 𑀙 𑀅𑀪𑀺𑀜𑁆𑀜𑀸, 𑀤𑁆𑀯𑁂 𑀘 𑀯𑀺𑀲𑁂𑀲𑁂 𑀯𑀸 𑀅𑀥𑀺𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀇𑀤𑁆𑀥𑀺𑀯𑀺𑀥𑀸𑀤𑀬𑁄 𑀧𑀜𑁆𑀘, 𑀮𑁄𑀓𑀺𑀬𑀸𑀪𑀺𑀜𑁆𑀜𑀸 𑀘𑁂𑀯 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸 𑀘𑀸𑀢𑀺 𑀙 𑀅𑀪𑀺𑀜𑁆𑀜𑀸. 𑀫𑀦𑁄𑀫𑀬𑀺𑀤𑁆𑀥𑀺 𑀘𑁂𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘𑀸𑀢𑀺 𑀤𑁆𑀯𑁂 𑀘 𑀯𑀺𑀲𑁂𑀲𑀸 𑀳𑁄𑀦𑁆𑀢𑀺.

‘‘𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀓𑀼𑀢𑁄 𑀧𑀭𑀺𑀲𑀼𑀤𑁆𑀥𑀁…𑀧𑁂… 𑀓𑀼𑀢𑁄 𑀆𑀦𑁂𑀜𑁆𑀚𑀧𑁆𑀧𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀁 𑀘𑀺𑀢𑁆𑀢𑀁 𑀬𑀢𑁄 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀘𑀺𑀢𑁆𑀢𑀁 𑀬𑀢𑁄 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑀢𑁄 𑀧𑀭𑀺𑀲𑀼𑀤𑁆𑀥𑀁, 𑀢𑀢𑁄 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑀢𑁄 𑀧𑀭𑀺𑀬𑁄𑀤𑀸𑀢𑀁 𑀳𑁄𑀢𑀺. 𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀖𑀸𑀢𑁂𑀦 𑀬𑀢𑁄 𑀯𑀻𑀢𑀭𑀸𑀕𑀸𑀤𑀺𑀅𑀦𑀗𑁆𑀕𑀡𑀪𑀸𑀯𑀢𑁄 𑀅𑀦𑀗𑁆𑀕𑀡𑀁, 𑀢𑀢𑁄 𑀯𑀻𑀢𑀭𑀸𑀕𑀸𑀤𑀺𑀅𑀦𑀗𑁆𑀕𑀡𑀪𑀸𑀯𑀢𑁄 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁. 𑀬𑀢𑁄 𑀲𑀼𑀪𑀸𑀯𑀺𑀢𑀪𑀸𑀯𑀢𑁄 𑀫𑀼𑀤𑀼, 𑀢𑀢𑁄 𑀲𑀼𑀪𑀸𑀯𑀺𑀢𑀪𑀸𑀯𑀢𑁄 𑀓𑀫𑁆𑀫𑀦𑀺𑀬𑀁. 𑀬𑀢𑁄 𑀧𑀭𑀺𑀲𑀼𑀤𑁆𑀥𑀸𑀤𑀻𑀲𑀼 𑀞𑀺𑀢𑀪𑀸𑀯𑀢𑁄 𑀞𑀺𑀢𑀁, 𑀢𑀢𑁄 𑀧𑀭𑀺𑀲𑀼𑀤𑁆𑀥𑀸𑀤𑀻𑀲𑀼 𑀞𑀺𑀢𑀪𑀸𑀯𑀢𑁄 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀻𑀢𑀺𑀧𑀺 𑀬𑁄𑀚𑀦𑀸 𑀬𑀼𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁩) 𑀬𑀼𑀕𑀴𑀢𑁄 𑀆𑀕𑀢𑀢𑁆𑀢𑀸. 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀸𑀑𑀪𑀸𑀲𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑀢𑁄 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁. 𑀲𑀤𑁆𑀥𑀸𑀬 𑀳𑀺 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀓𑁆𑀔𑁂 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺, 𑀯𑀻𑀭𑀺𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀓𑁆𑀔𑁂 𑀓𑁄𑀲𑀚𑁆𑀚𑁂 𑀦 𑀇𑀜𑁆𑀚𑀢𑀺, 𑀲𑀢𑀺𑀬𑀸 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀓𑁆𑀔𑁂 𑀧𑀫𑀸𑀤𑁂 𑀦 𑀇𑀜𑁆𑀚𑀢𑀺, 𑀲𑀫𑀸𑀥𑀺𑀦𑀸 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀓𑁆𑀔𑁂 𑀉𑀤𑁆𑀥𑀘𑁆𑀘𑁂 𑀦 𑀇𑀜𑁆𑀚𑀢𑀺, 𑀧𑀜𑁆𑀜𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀓𑁆𑀔𑀸𑀬 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀺, 𑀑𑀪𑀸𑀲𑀕𑀢𑀁 𑀘𑀺𑀢𑁆𑀢𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑁂 𑀦 𑀇𑀜𑁆𑀚𑀢𑀺. 𑀇𑀢𑀺 𑀇𑀫𑁂𑀳𑀺 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀜𑁆𑀘 𑀫𑀦𑁄𑀫𑀬𑀺𑀤𑁆𑀥𑀺𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀜𑁆𑀘 𑀅𑀥𑀺𑀕𑀫𑀽𑀧𑀸𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀧𑀭𑀺𑀘𑀬𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀤𑀝𑁆𑀞𑀩𑁆𑀩𑁄𑀬𑁂𑀯𑀸𑀢𑀺 𑀲𑀗𑁆𑀔𑁂𑀧𑀢𑁆𑀣𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁩) ‘‘𑀢𑀢𑁆𑀣 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀸 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀦𑀸 𑀯𑀸 𑀯𑀼𑀢𑁆𑀢𑁄𑀬𑁂𑀯𑀸𑀢𑀺 𑀅𑀫𑁆𑀳𑁂𑀳𑀺 𑀦 𑀯𑀼𑀢𑁆𑀢𑁄.

‘‘𑀬𑁂𑀲𑀁 𑀭𑀸𑀕𑀸𑀤𑀺𑀅𑀗𑁆𑀕𑀡𑀸𑀦𑀁 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑀁, 𑀬𑁂𑀲𑀁 𑀅𑀪𑀺𑀚𑁆𑀛𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁, 𑀬𑀸𑀬 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀬𑀸 𑀅𑀪𑀸𑀯𑁂𑀦 𑀞𑀺𑀢𑀁, 𑀇𑀜𑁆𑀚𑀦𑀸𑀬 𑀅𑀪𑀸𑀯𑁂𑀦 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀢𑁂 𑀭𑀸𑀕𑀸𑀤𑀺𑀅𑀗𑁆𑀕𑀡𑀸𑀤𑀬𑁄 𑀓𑀢𑀫𑀸𑀬 𑀧𑀓𑁆𑀔𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀅𑀗𑁆𑀕𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀭𑀸𑀕𑀸𑀤𑀺𑀅𑀗𑁆𑀕𑀡𑀸𑀤𑀻𑀲𑀼 𑀅𑀗𑁆𑀕𑀡𑀸 𑀘 𑀭𑀸𑀕𑀸𑀤𑀺𑀅𑀗𑁆𑀕𑀡𑀸 𑀘 𑀉𑀧𑀓𑁆𑀓𑀺𑀮𑁂𑀲𑀸 𑀅𑀪𑀺𑀚𑁆𑀛𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸 𑀘 𑀲𑀦𑁆𑀢𑀺, 𑀢𑀤𑀼𑀪𑀬𑀁 𑀭𑀸𑀕𑀸𑀤𑀺𑀅𑀗𑁆𑀕𑀡𑀅𑀪𑀺𑀚𑁆𑀛𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀤𑁆𑀯𑀬𑀁 𑀢𑀡𑁆𑀳𑀸𑀧𑀓𑁆𑀔𑁄 𑀭𑀸𑀕𑀸𑀤𑀺𑀅𑀗𑁆𑀕𑀡𑀸𑀦𑀁 𑀢𑀡𑁆𑀳𑀸𑀲𑀪𑀸𑀯𑀢𑁆𑀢𑀸, 𑀅𑀪𑀺𑀚𑁆𑀛𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸𑀦𑀜𑁆𑀘 𑀢𑀡𑁆𑀳𑀸𑀬 𑀅𑀦𑀼𑀮𑁄𑀫𑀢𑁆𑀢𑀸. 𑀬𑀸 𑀇𑀜𑁆𑀚𑀦𑀸 𑀨𑀦𑁆𑀤𑀦𑀸 𑀬𑀸 𑀘 𑀘𑀺𑀢𑁆𑀢𑀲𑁆𑀲 𑀅𑀝𑁆𑀞𑀺𑀢𑀺 𑀅𑀦𑀯𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀅𑀬𑀁 𑀇𑀜𑁆𑀚𑀦𑀸 𑀅𑀝𑁆𑀞𑀺𑀢𑀺 𑀤𑀺𑀝𑁆𑀞𑀺𑀧𑀓𑁆𑀔𑁄 𑀇𑀜𑁆𑀚𑀦𑀸𑀬 𑀘 𑀅𑀝𑁆𑀞𑀺𑀢𑀺𑀬𑀸 𑀘 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀳𑁂𑀢𑀼𑀪𑀸𑀯𑀢𑁄𑀢𑀺 𑀧𑀯𑀺𑀘𑀬𑁄 𑀓𑀸𑀢𑀩𑁆𑀩𑁄.

‘‘𑀓𑀺𑀁 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑁆𑀢𑀸𑀬𑁂𑀯 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀜𑁆𑀘 𑀫𑀦𑁄𑀫𑀬𑀺𑀤𑁆𑀥𑀺𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀜𑁆𑀘 𑀅𑀥𑀺𑀕𑀫𑀽𑀧𑀸𑀬𑁄 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀺𑀦𑁄, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀇𑀢𑀺 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀺𑀦𑁄 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀯𑀲𑀺𑀝𑁆𑀞𑀁 𑀪𑀯𑀢𑀺, 𑀢𑀲𑁆𑀫𑀸𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀅𑀝𑁆𑀞𑀦𑁆𑀦𑀁 𑀜𑀸𑀡𑀸𑀦𑀁 𑀅𑀥𑀺𑀕𑀫𑀽𑀧𑀸𑀬𑁄 𑀳𑁄𑀢𑀺, 𑀲𑁄 𑀘 𑀅𑀥𑀺𑀕𑀫𑀽𑀧𑀸𑀬𑀪𑀸𑀯𑁄 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑁂𑀯 𑀪𑀯𑁂𑀬𑁆𑀬, 𑀓𑀣𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀢𑁆𑀢𑀮𑀸𑀪𑀺𑀦𑁄 𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀲𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀲𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀬𑁂𑀯 𑀅𑀝𑁆𑀞𑀢𑁆𑀯𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄𑀧𑀺 𑀏𑀯𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀺 𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀉𑀧𑀭𑀺𑀫𑀁 𑀲𑀫𑀸𑀧𑀢𑁆𑀢𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁩) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀬𑁄𑀚𑀦𑀫𑀢𑁆𑀢𑀁 𑀓𑀭𑀺𑀲𑁆𑀲𑀸𑀫.

𑀲𑁄 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻 𑀬𑁄𑀕𑀸𑀯𑀘𑀭𑁄 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀢𑁄 𑀉𑀧𑀭𑀺𑀫𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀲𑀦𑁆𑀢𑀢𑀭𑀢𑁄 𑀫𑀦𑀲𑀺 𑀓𑀭𑁄𑀢𑀺. 𑀬𑀣𑀸𑀯𑀼𑀢𑁆𑀢𑀁 𑀉𑀧𑀭𑀺𑀫𑀁 𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑁄 𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀺𑀦𑁄 𑀬𑁄𑀕𑀸𑀯𑀘𑀭𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑀜𑁆𑀜𑀸 𑀲𑀜𑁆𑀜𑀸𑀧𑀥𑀸𑀦𑀸 𑀲𑀫𑀸𑀧𑀢𑁆𑀢𑀺 𑀑𑀴𑀸𑀭𑀺𑀓𑀸 𑀯𑀺𑀬 𑀳𑀼𑀢𑁆𑀯𑀸 𑀲𑀡𑁆𑀞𑀳𑀢𑀺, 𑀧𑀝𑀺𑀖𑀲𑀜𑁆𑀜𑀸 𑀘 𑀉𑀓𑁆𑀓𑀡𑁆𑀞𑀸 𑀅𑀦𑀪𑀺𑀭𑀢𑀺 𑀳𑀼𑀢𑁆𑀯𑀸 𑀲𑀡𑁆𑀞𑀳𑀢𑀺, 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀬𑁄𑀕𑀸𑀯𑀘𑀭𑁄 𑀲𑀩𑁆𑀩𑀲𑁄 𑀦𑀺𑀭𑀯𑀲𑁂𑀲𑀢𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘‘𑀆𑀓𑀸𑀲𑀁 𑀅𑀦𑀦𑁆𑀢’’𑀦𑁆𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀭𑀽𑀧𑀲𑀜𑁆𑀜𑀸 𑀭𑀽𑀧𑀸𑀯𑀘𑀭𑀲𑀜𑁆𑀜𑀸 𑀧𑀜𑁆𑀘𑀯𑀺𑀥𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑁄 𑀳𑁄𑀢𑀺. 𑀦𑀸𑀦𑀢𑁆𑀢𑀲𑀜𑁆𑀜𑀸 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑁄𑀓𑀸𑀭𑁄 𑀅𑀓𑀼𑀲𑀮𑁄 𑀧𑀯𑀢𑁆𑀢𑀢𑀺. 𑀏𑀯𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀆𑀤𑀻𑀦𑀯𑀤𑀲𑁆𑀲𑀻 𑀳𑀼𑀢𑁆𑀯𑀸 𑀢𑀸 𑀭𑀽𑀧𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑁄 𑀆𑀭𑀫𑁆𑀫𑀡𑁂 𑀲𑀫𑀢𑀺𑀓𑁆𑀓𑀫𑀢𑀺, 𑀅𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀧𑀝𑀺𑀖𑀲𑀜𑁆𑀜𑀸 𑀘 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀺. 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀲𑀫𑀢𑀺𑀓𑁆𑀓𑀫𑁂𑀦 𑀲𑀫𑀸𑀳𑀺𑀢𑀲𑁆𑀲, 𑀲𑀦𑁆𑀢𑀯𑀼𑀢𑁆𑀢𑀺𑀦𑀸 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀑𑀪𑀸𑀲𑁄 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺. 𑀭𑀽𑀧𑀸𑀦𑀁 𑀓𑀲𑀺𑀡𑀭𑀽𑀧𑀸𑀦𑀁 𑀛𑀸𑀦𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑀜𑁆𑀘 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀬𑁄𑀚𑀦𑀸.

‘‘𑀬𑁂𑀦 𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀲𑁆𑀲, 𑀲𑀫𑀸𑀳𑀺𑀢𑀲𑁆𑀲 𑀑𑀪𑀸𑀲𑁄 𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀜𑁆𑀘 𑀅𑀦𑁆𑀢𑀭𑀥𑀸𑀬𑀢𑀺, 𑀲𑁄 𑀲𑀫𑀸𑀥𑀺 𑀓𑀺𑀢𑁆𑀢𑀓𑁂𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀓𑀣𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀲𑀫𑀸𑀥𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄 𑀲𑀫𑀸𑀥𑀻𑀢𑀺 𑀬𑁂𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁄, 𑀲𑁄 𑀤𑀼𑀯𑀺𑀥𑁄𑀧𑀺 𑀲𑀫𑀸𑀥𑀺 𑀅𑀦𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀯𑀻𑀭𑀺𑀬𑀸𑀭𑀫𑁆𑀪𑁂𑀳𑀺 𑀢𑀻𑀳𑀺 𑀉𑀧𑀓𑀸𑀭𑀓𑀗𑁆𑀕𑁂𑀳𑀺 𑀘 𑀧𑀲𑁆𑀲𑀤𑁆𑀥𑀺𑀲𑀢𑀻𑀳𑀺 𑀤𑁆𑀯𑀻𑀳𑀺 𑀧𑀭𑀺𑀓𑁆𑀔𑀸𑀭𑀗𑁆𑀕𑁂𑀳𑀺 𑀘 𑀅𑀯𑀺𑀓𑁆𑀔𑀺𑀢𑁆𑀢𑁂𑀦 𑀏𑀓𑁂𑀦 𑀲𑀪𑀸𑀯𑀗𑁆𑀕𑁂𑀦 𑀘 𑀙𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑁂𑀢𑀩𑁆𑀩𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. ‘‘𑀓𑀣𑀁 𑀓𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀦𑀪𑀺𑀚𑁆𑀛𑀸𑀲𑀳𑀕𑀢𑀁 𑀫𑁂 𑀫𑀸𑀦𑀲𑀁 𑀲𑀩𑁆𑀩𑀮𑁄𑀓𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑁂𑀲𑀼 𑀙𑀲𑀼 𑀅𑀗𑁆𑀕𑁂𑀲𑀼 𑀓𑀺𑀢𑁆𑀢𑀓𑁄 𑀲𑀫𑀣𑁄, 𑀓𑀺𑀢𑁆𑀢𑀓𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀏𑀢𑁆𑀢𑀓𑁄 𑀲𑀫𑀣𑁄, 𑀏𑀢𑁆𑀢𑀓𑀸 𑀯𑀺𑀧𑀲𑁆𑀲𑀦𑀸𑀢𑀺 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀬𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁪. ‘‘𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑁆𑀲 𑀲𑀫𑀸𑀥𑀺𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀲𑀫𑀸𑀥𑀺𑀫𑀼𑀔𑁂𑀦 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, ‘‘𑀢𑀸𑀬 𑀧𑀝𑀺𑀧𑀤𑀸𑀬 𑀮𑀪𑀺𑀢𑀩𑁆𑀩𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀓𑀺𑀢𑁆𑀢𑀓𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀬𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀤𑀸𑀬 𑀮𑀪𑀺𑀢𑀩𑁆𑀩𑁄, 𑀲𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀜𑀸𑀡𑀤𑀲𑁆𑀲𑀦𑁂𑀦 𑀯𑁂𑀤𑀺𑀢𑀩𑁆𑀩𑁄.

‘‘𑀓𑀣𑀁 𑀧𑀜𑁆𑀘𑀯𑀺𑀥𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀬𑀁 𑀲𑀫𑀸𑀥𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀳𑁄𑀢𑀺, 𑀇𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀲𑁆𑀲 𑀅𑀭𑀳𑀢𑁄 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺. 𑀅𑀬𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀆𑀬𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀸 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄 𑀳𑁄𑀢𑀺, 𑀇𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲…𑀧𑁂… 𑀪𑀯𑀢𑀺. 𑀅𑀬𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀓𑀺𑀮𑁂𑀲𑀅𑀭𑀻𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄, 𑀓𑀸𑀫𑀸𑀫𑀺𑀲𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀸𑀦𑀁 𑀅𑀪𑀸𑀯𑀢𑁄 𑀦𑀺𑀭𑀸𑀫𑀺𑀲𑁄 𑀘 𑀳𑁄𑀢𑀺, 𑀇𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲…𑀧𑁂… 𑀪𑀯𑀢𑀺. 𑀅𑀬𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀅𑀓𑀸𑀧𑀼𑀭𑀺𑀲𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀩𑀼𑀤𑁆𑀥𑁂𑀳𑀺 𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄 𑀳𑁄𑀢𑀺, 𑀇𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲…𑀧𑁂… 𑀪𑀯𑀢𑀺. 𑀅𑀬𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀅𑀗𑁆𑀕𑀲𑀦𑁆𑀢𑀓𑀺𑀮𑁂𑀲𑀤𑀭𑀣𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑁄 𑀘𑁂𑀯 𑀤𑀺𑀯𑀲𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀅𑀢𑀺𑀢𑁆𑀢𑀺𑀓𑀭𑀡𑀢𑁄 𑀧𑀡𑀻𑀢𑁄 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑁂𑀦 𑀅𑀭𑀳𑀢𑀸 𑀧𑀼𑀕𑁆𑀕𑀮𑁂𑀦 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄 𑀘 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑀸𑀥𑀺𑀲𑀗𑁆𑀔𑀸𑀢𑁂𑀦 𑀏𑀓𑁄𑀤𑀺𑀪𑀸𑀯𑁂𑀦 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄 𑀘 𑀲𑀲𑀗𑁆𑀔𑀸𑀭𑁂𑀦 𑀲𑀧𑀬𑁄𑀕𑁂𑀦 𑀅𑀥𑀺𑀕𑀢𑀢𑁆𑀢𑀸, 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀦𑀺𑀕𑁆𑀕𑀬𑁆𑀳 𑀅𑀦𑀥𑀺𑀕𑀢𑀢𑁆𑀢𑀸, 𑀅𑀜𑁆𑀜𑁂 𑀓𑀺𑀮𑁂𑀲𑁂 𑀯𑀸𑀭𑁂𑀢𑁆𑀯𑀸 𑀅𑀦𑀥𑀺𑀕𑀢𑀢𑁆𑀢𑀸, 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀢𑁆𑀢𑀸 𑀦𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄 𑀳𑁄𑀢𑀺, 𑀇𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀲𑁆𑀲 𑀅𑀭𑀳𑀢𑁄 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀻𑀢𑀺 𑀧𑀜𑁆𑀘𑀯𑀺𑀥𑁂𑀦 𑀜𑀸𑀡𑀤𑀲𑁆𑀲𑀦𑁂𑀦 𑀲𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀯𑀺𑀘𑀬𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄𑀢𑀺.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀸𑀤𑀻𑀲𑀼 𑀲𑀫𑀸𑀥𑀻𑀲𑀼 𑀓𑀺𑀢𑁆𑀢𑀓𑁄 𑀲𑀫𑀣𑁄, 𑀓𑀺𑀢𑁆𑀢𑀓𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁄 𑀘 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀣𑁄, 𑀯𑀺𑀧𑀲𑁆𑀲𑀦𑀸𑀢𑀺 𑀘 𑀅𑀭𑀳𑀢𑁆𑀢𑀨𑀮𑀲𑀫𑀣𑀯𑀺𑀧𑀲𑁆𑀲𑀦𑀸𑀯 𑀅𑀥𑀺𑀧𑁆𑀧𑁂𑀢𑀸, 𑀦 𑀧𑀼𑀩𑁆𑀩𑀪𑀸𑀕𑀲𑀫𑀣𑀯𑀺𑀧𑀲𑁆𑀲𑀦𑀸𑀢𑀺. 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, ‘‘𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬𑀁 𑀯𑀼𑀢𑁆𑀢𑁄 𑀲𑀫𑀸𑀥𑀺 𑀓𑀺𑀢𑁆𑀢𑀓𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀬𑁄 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬𑀁 𑀯𑀼𑀢𑁆𑀢𑁄, 𑀲𑁄 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀧𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀓𑀢𑀫𑁂𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀻𑀢𑀺𑀨𑀭𑀡𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸 𑀳𑁄𑀢𑀺. 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀜𑁆𑀜𑀸 𑀲𑀼𑀔𑀨𑀭𑀡𑀢𑀸 𑀳𑁄𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀘𑁂𑀢𑁄𑀧𑀭𑀺𑀬𑀧𑀜𑁆𑀜𑀸 𑀘𑁂𑀢𑁄𑀨𑀭𑀡𑀢𑀸 𑀳𑁄𑀢𑀺. 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸 𑀆𑀮𑁄𑀓𑀨𑀭𑀡𑀢𑀸 𑀳𑁄𑀢𑀺. 𑀛𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀧𑀜𑁆𑀜𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀧𑀜𑁆𑀘𑀯𑀺𑀥𑁂𑀦 𑀧𑀜𑁆𑀜𑀸𑀧𑀓𑀸𑀭𑁂𑀦 𑀯𑀺𑀘𑀬𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄𑀢𑀺. ‘‘𑀢𑁂𑀲𑀼 𑀧𑀜𑁆𑀘𑀯𑀺𑀥𑁂𑀲𑀼 𑀧𑀓𑀸𑀭𑁂𑀲𑀼 𑀓𑀺𑀢𑁆𑀢𑀓𑁄 𑀲𑀫𑀣𑁄, 𑀓𑀺𑀢𑁆𑀢𑀓𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁄 𑀘 𑀧𑀻𑀢𑀺𑀨𑀭𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁫. 𑀲𑀫𑁆𑀧𑀬𑁄𑀕𑀯𑀲𑁂𑀦 𑀲𑀫𑀸𑀥𑀺 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀣𑀁 𑀆𑀭𑀫𑁆𑀫𑀡𑀯𑀲𑁂𑀦 𑀯𑀺𑀪𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑁂𑀳𑀺 𑀤𑀲𑀳𑀺 𑀆𑀭𑀫𑁆𑀫𑀡𑁂𑀳𑀺 𑀓𑀲𑀺𑀡𑁂𑀳𑀺𑀧𑀺 𑀲𑀫𑀸𑀥𑀺 𑀯𑀺𑀘𑀺𑀦𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄𑀢𑀺. ‘‘𑀢𑁂𑀲𑀼 𑀤𑀲𑀲𑀼 𑀓𑀺𑀢𑁆𑀢𑀓𑁄 𑀲𑀫𑀣𑁄, 𑀓𑀺𑀢𑁆𑀢𑀓𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑀺𑀡𑀦𑁆𑀢𑀺 𑀘 𑀓𑀲𑀺𑀡𑀫𑀡𑁆𑀟𑀮𑀫𑁆𑀧𑀺 𑀧𑀭𑀺𑀓𑀫𑁆𑀫𑀫𑁆𑀧𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁆𑀧𑀺 𑀢𑀲𑁆𑀫𑀺𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀚𑁆𑀛𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀲𑀲𑀫𑁆𑀧𑀬𑀼𑀢𑁆𑀢𑀚𑁆𑀛𑀸𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁.

‘‘𑀓𑀺𑀁 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀲𑀫𑀸𑀥𑀺𑀬𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀬𑁄𑀚𑁂𑀢𑀩𑁆𑀩𑁄, 𑀉𑀤𑀸𑀳𑀼 𑀅𑀜𑁆𑀜𑁄𑀧𑀺 𑀬𑁄𑀚𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀪𑁂𑀤𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁄 𑀦𑀺𑀭𑀯𑀲𑁂𑀲𑁄 𑀅𑀭𑀺𑀬𑀫𑀕𑁆𑀕𑁄𑀧𑀺 𑀯𑀺𑀘𑀬𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀲𑀩𑁆𑀩𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀦𑁆𑀢𑀺 𑀫𑀬𑀸 𑀯𑀼𑀢𑁆𑀢𑀦𑀬𑁂𑀦 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑁄 𑀦𑀺𑀭𑀯𑀲𑁂𑀲𑁄 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀪𑁂𑀤𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁄 𑀅𑀭𑀺𑀬𑁄 𑀫𑀕𑁆𑀕𑁄 𑀬𑁄𑀚𑁂𑀢𑀩𑁆𑀩𑁄. 𑀓𑀣𑀁? 𑀬𑁂𑀦 𑀬𑁂𑀦 𑀅𑀦𑀪𑀺𑀚𑁆𑀛𑀸𑀤𑀺𑀆𑀓𑀸𑀭𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀢𑀸𑀤𑀺𑀆𑀓𑀸𑀭𑁂𑀦 𑀲𑀫𑀸𑀥𑀺 𑀫𑀬𑀸 𑀯𑀼𑀢𑁆𑀢𑁄, 𑀢𑁂𑀦 𑀢𑁂𑀦 𑀅𑀦𑀪𑀺𑀚𑁆𑀛𑀸𑀤𑀺𑀆𑀓𑀸𑀭𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀢𑀸𑀤𑀺𑀆𑀓𑀸𑀭𑁂𑀦 𑀬𑁄 𑀬𑁄 𑀅𑀭𑀺𑀬𑀫𑀕𑁆𑀕𑁄 𑀲𑀫𑀣𑁂𑀦 𑀬𑁄𑀚𑁂𑀢𑀼𑀁 𑀲𑀫𑁆𑀪𑀯𑀢𑀺, 𑀲𑁄 𑀲𑁄 𑀅𑀭𑀺𑀬𑀫𑀕𑁆𑀕𑁄 𑀲𑀫𑀣𑁂𑀦 𑀯𑀺𑀘𑀬𑀺𑀢𑁆𑀯𑀸 𑀬𑁄𑀚𑀬𑀺𑀢𑀩𑁆𑀩𑁄. 𑀬𑁄 𑀬𑁄 𑀅𑀭𑀺𑀬𑀫𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀬 𑀬𑁄𑀚𑁂𑀢𑀼𑀁 𑀲𑀫𑁆𑀪𑀯𑀢𑀺, 𑀲𑁄 𑀲𑁄 𑀅𑀭𑀺𑀬𑀫𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀬 𑀬𑁄𑀚𑀬𑀺𑀢𑁆𑀯𑀸 𑀬𑁄𑀚𑀬𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

‘‘𑀬𑁂𑀳𑀺 𑀲𑀫𑀣𑀸𑀥𑀺𑀝𑁆𑀞𑀸𑀦𑁂𑀳𑀺 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺 𑀬𑁄𑀚𑀬𑀺𑀢𑀩𑁆𑀩𑁄, 𑀢𑁂 𑀲𑀫𑀣𑀸𑀥𑀺𑀝𑁆𑀞𑀸𑀦𑀸 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸 𑀓𑀢𑀫𑁂𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑁂 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸 𑀅𑀦𑀺𑀘𑁆𑀘𑀢𑀸𑀬 𑀤𑀼𑀓𑁆𑀔𑀢𑀸𑀬 𑀅𑀦𑀢𑁆𑀢𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑁂 𑀲𑀫𑀣𑀸𑀥𑀺𑀝𑁆𑀞𑀸𑀦𑀸 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸 ‘‘𑀅𑀦𑀺𑀘𑁆𑀘𑀢𑀸𑀬 𑀧𑀜𑁆𑀜𑀸𑀬 𑀤𑀼𑀓𑁆𑀔𑀢𑀸𑀬 𑀧𑀜𑁆𑀜𑀸𑀬 𑀅𑀦𑀢𑁆𑀢𑀢𑀸𑀬 𑀧𑀜𑁆𑀜𑀸𑀬𑀸’’𑀢𑀺 𑀢𑀻𑀳𑀺 𑀅𑀦𑀼𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸 𑀕𑀡𑁆𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀢𑀸𑀤𑀺𑀦𑀸 𑀲𑀳𑀘𑀭𑀡𑀢𑁄 𑀅𑀦𑀼𑀧𑀲𑁆𑀲𑀦𑀸𑀧𑀜𑁆𑀜𑀸𑀧𑀺 ‘‘𑀅𑀦𑀺𑀘𑁆𑀘𑀢𑀸 𑀤𑀼𑀓𑁆𑀔𑀢𑀸 𑀅𑀦𑀢𑁆𑀢𑀢𑀸’’𑀢𑀺 𑀯𑀼𑀘𑁆𑀘𑀢𑀺.

‘‘𑀬𑁄 𑀬𑁄𑀕𑀻 𑀧𑀼𑀕𑁆𑀕𑀮𑁄 𑀲𑀫𑀣𑀸𑀥𑀺𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀫𑀸𑀦𑁄 𑀳𑁄𑀢𑀺, 𑀲𑁄 𑀬𑁄𑀕𑀻 𑀧𑀼𑀕𑁆𑀕𑀮𑁄 𑀓𑀺𑀁 𑀪𑀸𑀯𑀬𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀫𑀸𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀦𑀺 𑀪𑀸𑀯𑀬𑀫𑀸𑀦𑁄 𑀧𑀼𑀕𑁆𑀕𑀮𑁄 𑀭𑀸𑀕𑀘𑀭𑀺𑀢𑁄 𑀤𑁄𑀲𑀘𑀭𑀺𑀢𑁄 𑀫𑁄𑀳𑀘𑀭𑀺𑀢𑁄𑀢𑀺 𑀢𑀺𑀯𑀺𑀥𑁄, ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀓𑀢𑀫𑁂𑀦 𑀓𑀢𑀫𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀦𑀺𑀬𑁆𑀬𑀸𑀢𑀺, 𑀓𑀢𑀫𑀸𑀬𑀁 𑀓𑀢𑀫𑀸𑀬𑀁 𑀲𑀺𑀓𑁆𑀔𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀧𑀚𑀳𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀧𑀭𑀺𑀚𑀸𑀦𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀧𑀯𑀸𑀳𑁂𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀦𑀺𑀤𑁆𑀥𑀼𑀦𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀯𑀫𑁂𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀉𑀧𑁆𑀧𑀸𑀝𑁂𑀦𑁆𑀢𑁄, 𑀓𑀢𑀫𑀁 𑀓𑀢𑀫𑀁 𑀯𑀺𑀚𑀝𑁂𑀦𑁆𑀢𑁄 𑀦𑀺𑀬𑁆𑀬𑀸𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀭𑀸𑀕𑀘𑀭𑀺𑀢𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀤𑀸𑀦𑀺 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀬𑀢𑁆𑀣 𑀲𑀺𑀓𑁆𑀔𑀦𑁆𑀢𑀸𑀦𑀁 𑀯𑀺𑀲𑁂𑀲𑀢𑁄 𑀦𑀺𑀬𑁆𑀬𑀸𑀦𑀫𑀼𑀔𑀸𑀦𑀺, 𑀬𑁂𑀲𑀜𑁆𑀘 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀺 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀭𑀸𑀕𑀘𑀭𑀺𑀢𑁄’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄𑀧𑀺 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁫) 𑀯𑀼𑀢𑁆𑀢𑁄𑀬𑁂𑀯.

‘‘𑀓𑀲𑁆𑀫𑀸 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀦𑁆𑀢𑁄 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀯𑀺𑀫𑁄𑀓𑁆𑀔𑀫𑀼𑀔𑁂𑀲𑀼. 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀜𑁆𑀜𑀸𑀧𑀥𑀸𑀦𑀢𑁆𑀢𑀸. 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀸𑀥𑀺𑀧𑀥𑀸𑀦𑀢𑁆𑀢𑀸. 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀲𑀻𑀮𑀓𑁆𑀔𑀦𑁆𑀥𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀻𑀮𑀧𑀥𑀸𑀦𑀢𑁆𑀢𑀸. 𑀇𑀢𑀺 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀦𑁆𑀢𑁄 𑀲𑁄 𑀬𑁄𑀕𑀻 𑀧𑀼𑀕𑁆𑀕𑀮𑁄 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀢𑀺𑀬𑁂𑀯𑀸𑀢𑀺 𑀧𑀜𑁆𑀜𑀸𑀧𑀥𑀸𑀦𑀸𑀤𑀺𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁫) 𑀯𑀼𑀢𑁆𑀢𑁄. 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑀬𑀢𑀺. ‘‘𑀓𑀲𑁆𑀫𑀸 𑀪𑀸𑀯𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀪𑀸𑀯𑁄 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀚𑀸𑀦𑀺𑀢𑁄, ‘‘𑀓𑀣𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀬𑁄 𑀬𑁄𑀕𑀻 𑀧𑀼𑀕𑁆𑀕𑀮𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀬𑁄𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀪𑀯𑀗𑁆𑀕𑀸𑀦𑀺 𑀓𑀢𑀫𑀁 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺, 𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀬𑁄 𑀘 𑀘𑀺𑀢𑁆𑀢𑀜𑁆𑀘 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀅𑀗𑁆𑀕𑀸𑀦𑀺 𑀪𑀸𑀯𑀦𑀁 𑀯𑀟𑁆𑀠𑀦𑀁 𑀕𑀘𑁆𑀙𑀦𑁆𑀢𑀺. 𑀲𑀻𑀮𑀜𑁆𑀘 𑀲𑀫𑀸𑀥𑀺 𑀘 𑀤𑁆𑀯𑁂 𑀧𑀤𑀸𑀦𑀺 𑀤𑁆𑀯𑁂 𑀧𑀸𑀤𑀸 𑀪𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀪𑀸𑀯𑀦𑀁 𑀯𑀟𑁆𑀠𑀦𑀁 𑀕𑀘𑁆𑀙𑀦𑁆𑀢𑀺.

‘‘𑀓𑀣𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀳𑁄𑀢𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀸𑀯𑀺𑀢𑀓𑀸𑀬𑁄𑀢𑀺 𑀪𑀸𑀯𑀺𑀢𑁄 𑀓𑀸𑀬𑁄 𑀓𑀸𑀬𑀆𑀪𑀺𑀲𑀫𑀸𑀘𑀸𑀭𑀺𑀓𑁄, 𑀓𑀸𑀬𑀲𑀁𑀯𑀭𑁄 𑀯𑀸 𑀬𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀪𑀸𑀯𑀺𑀢𑀓𑀸𑀬𑁄. 𑀲𑁂𑀲𑁂𑀲𑀼𑀧𑀺 𑀏𑀲 𑀦𑀬𑁄. 𑀓𑀸𑀬𑁂 𑀓𑀸𑀬𑀆𑀪𑀺𑀲𑀫𑀸𑀘𑀸𑀭𑀺𑀓𑁂, 𑀓𑀸𑀬𑀲𑀁𑀯𑀭𑁂 𑀯𑀸 𑀪𑀸𑀯𑀺𑀬𑀫𑀸𑀦𑁂 𑀲𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀘 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀓𑀸𑀬𑀲𑀫𑀸𑀘𑀸𑀭𑀲𑀻𑀮𑀢𑁆𑀢𑀸. 𑀲𑀻𑀮𑁂 𑀯𑀸𑀘𑀸𑀲𑀁𑀯𑀭𑀆𑀚𑀻𑀯𑀲𑀁𑀯𑀭𑀯𑀲𑁂𑀦 𑀧𑀯𑀢𑁆𑀢𑁂 𑀲𑀻𑀮𑁂 𑀪𑀸𑀯𑀺𑀬𑀫𑀸𑀦𑁂 𑀲𑀢𑀺 𑀲𑀫𑁆𑀫𑀸𑀯𑀸𑀘𑀸 𑀘 𑀲𑀫𑁆𑀫𑀸𑀆𑀚𑀻𑀯𑁄 𑀘 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀯𑀸𑀘𑀸𑀤𑀺𑀲𑀁𑀯𑀭𑀲𑀻𑀮𑀢𑁆𑀢𑀸. 𑀘𑀺𑀢𑁆𑀢𑁂 𑀘𑀺𑀢𑁆𑀢𑀲𑀁𑀯𑀭𑀯𑀲𑁂𑀦 𑀧𑀯𑀢𑁆𑀢𑁂 𑀘𑀺𑀢𑁆𑀢𑁂 𑀪𑀸𑀯𑀺𑀬𑀫𑀸𑀦𑁂 𑀲𑀢𑀺 𑀲𑀫𑁆𑀫𑀸𑀲𑀢𑀺 𑀘 𑀲𑀫𑁆𑀫𑀸𑀲𑀫𑀸𑀥𑀺 𑀘 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀘𑀺𑀢𑁆𑀢𑀲𑀁𑀯𑀭𑀲𑀻𑀮𑀢𑁆𑀢𑀸. 𑀧𑀜𑁆𑀜𑀸𑀬 𑀪𑀸𑀯𑀺𑀬𑀫𑀸𑀦𑀸𑀬 𑀲𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀘 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑀸𑀦𑀢𑁆𑀢𑀸, 𑀉𑀧𑀓𑀸𑀭𑀓𑀢𑁆𑀢𑀸 𑀘. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀳𑀺 𑀧𑀼𑀦𑀧𑁆𑀧𑀼𑀦𑀁 𑀲𑀗𑁆𑀓𑀧𑁆𑀧𑀦𑁆𑀢𑀲𑁆𑀲 𑀧𑀜𑁆𑀜𑀸 𑀯𑀟𑁆𑀠𑀢𑀻𑀢𑀺.

‘‘𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀘 𑀤𑁆𑀯𑁂 𑀥𑀫𑁆𑀫𑀸 𑀓𑀸𑀬𑀯𑀲𑁂𑀦𑁂𑀯 𑀯𑀺𑀪𑀢𑁆𑀢𑀸 𑀯𑀺𑀘𑁂𑀢𑀩𑁆𑀩𑀸 𑀓𑀺𑀁, 𑀉𑀤𑀸𑀳𑀼 𑀘𑀺𑀢𑁆𑀢𑀯𑀲𑁂𑀦 𑀯𑀺𑀪𑀢𑁆𑀢𑀸 𑀯𑀺𑀘𑁂𑀢𑀩𑁆𑀩𑀸 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀬𑀲𑀼𑀘𑀭𑀺𑀢𑀘𑁂𑀢𑀦𑀸𑀪𑀽𑀢𑁄 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀢𑀁𑀲𑀳𑀺𑀢𑁄 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀺𑀬𑀸 𑀓𑀸𑀬𑀺𑀓𑁄, 𑀯𑀺𑀭𑀢𑀺𑀪𑀽𑀢𑁄 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀢𑀁𑀲𑀳𑀺𑀢𑁄 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀺𑀬𑀸 𑀘𑁂𑀢𑀲𑀺𑀓𑁄, 𑀢𑀢𑁆𑀣 𑀢𑁂𑀲𑀼 𑀓𑀸𑀬𑀺𑀓𑀘𑁂𑀢𑀲𑀺𑀓𑀪𑀽𑀢𑁂𑀲𑀼 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀫𑁆𑀫𑀸𑀯𑀸𑀬𑀸𑀫𑁂𑀲𑀼 𑀬𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀫𑁆𑀫𑀸𑀯𑀸𑀬𑀸𑀫𑁄 𑀓𑀸𑀬𑀲𑀗𑁆𑀕𑀳𑁄, 𑀲𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀫𑁆𑀫𑀸𑀯𑀸𑀬𑀸𑀫𑁄 𑀓𑀸𑀬𑁂 𑀓𑀸𑀬𑀆𑀪𑀺𑀲𑀫𑀸𑀘𑀸𑀭𑀺𑀓𑁂, 𑀓𑀸𑀬𑀲𑀁𑀯𑀭𑁂 𑀯𑀸 𑀪𑀸𑀯𑀺𑀢𑁂 𑀲𑀢𑀺 𑀪𑀸𑀯𑀦𑀁 𑀕𑀘𑁆𑀙𑀢𑀺. 𑀬𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀫𑁆𑀫𑀸𑀯𑀸𑀬𑀸𑀫𑁄 𑀘𑀺𑀢𑁆𑀢𑀲𑀗𑁆𑀕𑀳𑁄, 𑀲𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀫𑁆𑀫𑀸𑀯𑀸𑀬𑀸𑀫𑁄 𑀘𑀺𑀢𑁆𑀢𑁂 𑀘𑀺𑀢𑁆𑀢𑀲𑀁𑀯𑀭𑁂 𑀪𑀸𑀯𑀺𑀢𑁂 𑀲𑀢𑀺 𑀪𑀸𑀯𑀦𑀁 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸.

‘‘𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀦𑁆𑀢𑁄 𑀲𑁄 𑀬𑁄𑀕𑀻 𑀧𑀼𑀕𑁆𑀕𑀮𑁄 𑀓𑀺𑀢𑁆𑀢𑀓𑀁 𑀅𑀥𑀺𑀕𑀫𑀁 𑀕𑀘𑁆𑀙𑀢𑀻’’𑀢𑀺 𑀯𑀺𑀘𑀬𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀯𑀺𑀥𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀔𑀺𑀧𑁆𑀧𑀸𑀥𑀺𑀕𑀫𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁫) 𑀯𑀺𑀪𑀢𑁆𑀢𑁄. ‘‘𑀓𑁂𑀦 𑀓𑀢𑀫𑁄 𑀅𑀥𑀺𑀕𑀫𑁄 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀲𑀫𑀣𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁬. ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺𑀲𑀼𑀢𑁆𑀢𑀢𑁆𑀣𑁄 𑀯𑁂𑀦𑁂𑀬𑁆𑀬𑀸𑀦𑀁 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀫𑀼𑀔𑁂𑀦 𑀆𑀘𑀭𑀺𑀬𑁂𑀦 𑀯𑀺𑀘𑀬𑀺𑀢𑁄 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀤𑁂𑀲𑀓𑀲𑁆𑀲 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑀲𑁆𑀲 𑀤𑀲 𑀩𑀮𑀸𑀦𑀺 𑀓𑀣𑀁 𑀯𑀺𑀘𑀬𑀺𑀢𑀩𑁆𑀩𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑁄 𑀤𑁂𑀲𑀬𑀢𑀺, 𑀲𑁄 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀇𑀢𑀺 𑀫𑀳𑀸𑀣𑁂𑀭𑁄 ‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’𑀢𑀺 𑀕𑀸𑀣𑀸𑀬 𑀯𑀲𑁂𑀦 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀫𑀼𑀔𑁂𑀦 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀁 𑀦𑀺𑀤𑁆𑀤𑀺𑀲𑀦𑁆𑀢𑁄, 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀳𑀺 𑀢𑀲𑁆𑀲𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀪𑀸𑀯𑀦𑀸𑀯𑀺𑀲𑁂𑀲𑀸𑀦𑀁 𑀪𑀸𑀯𑀦𑀸𑀦𑀺𑀲𑀁𑀲𑀸𑀦𑀜𑁆𑀘 𑀯𑀺𑀪𑀚𑀦𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀘𑀬𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸, 𑀇𑀤𑀸𑀦𑀺 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀫𑁆𑀧𑀺 𑀯𑀲𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘𑀢𑀢𑁆𑀣 𑀬𑁄 𑀤𑁂𑀲𑀬𑀢𑀻’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑁋

𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀦𑁆𑀢𑁂𑀲𑀼 𑀲𑀸𑀲𑀺𑀢𑀩𑁆𑀩𑀲𑀸𑀲𑀓𑁂𑀲𑀼. 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄 𑀬𑁄 𑀤𑁂𑀲𑀓𑁄 𑀲𑀢𑁆𑀣𑀸 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀑𑀯𑀸𑀤𑁂𑀦 𑀲𑀸𑀯𑀓𑁂 𑀦 𑀯𑀺𑀲𑀁𑀯𑀸𑀤𑀬𑀢𑀺, 𑀢𑀲𑁆𑀲 𑀤𑁂𑀲𑀓𑀲𑁆𑀲 𑀲𑀢𑁆𑀣𑀼𑀦𑁄 𑀤𑀲 𑀩𑀮𑀸𑀦𑀺 𑀯𑀺𑀘𑀬𑀺𑀢𑀩𑁆𑀩𑀸𑀦𑀻𑀢𑀺 𑀬𑁄𑀚𑀦𑀸.

‘‘𑀓𑀺𑀦𑁆𑀢𑀺 𑀤𑁂𑀲𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀢𑀺𑀯𑀺𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀼 𑀤𑀲𑀲𑀼 𑀢𑀣𑀸𑀕𑀢𑀩𑀮𑁂𑀲𑀼 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀧𑀞𑀫𑀁 𑀢𑀣𑀸𑀕𑀢𑀩𑀮𑀁 𑀦𑀸𑀫, ‘‘𑀢𑀁 𑀩𑀮𑀁 𑀓𑀣𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀲𑁄 𑀢𑀣𑀸 𑀑𑀯𑀤𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁬) 𑀯𑀼𑀢𑁆𑀢𑁄, 𑀧𑀸𑀴𑀺𑀯𑀲𑁂𑀦𑀧𑀺 𑀧𑀸𑀓𑀝𑁄. ‘‘𑀏𑀢𑀁 𑀞𑀸𑀦𑀁 𑀦 𑀯𑀺𑀚𑁆𑀚𑀢𑀻’’𑀢𑀺 𑀚𑀸𑀦𑀦𑀁 𑀅𑀝𑁆𑀞𑀸𑀦𑀜𑀸𑀡𑀁 𑀦𑀸𑀫, ‘‘𑀏𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀚𑀸𑀦𑀦𑀁 𑀞𑀸𑀦𑀜𑀸𑀡𑀁 𑀦𑀸𑀫𑀸𑀢𑀺 𑀞𑀸𑀦𑀸𑀝𑁆𑀞𑀸𑀦𑀸𑀦𑀁 𑀚𑀸𑀦𑀦𑀜𑀸𑀡𑀁 𑀧𑀞𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. (𑁧)

𑁫𑁭. 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀧𑀞𑀫𑀁 𑀢𑀣𑀸𑀕𑀢𑀩𑀮𑀁 𑀆𑀘𑀭𑀺𑀬𑁂𑀦 𑀯𑀺𑀘𑀬𑀺𑀢𑀁 𑀯𑀺𑀪𑀢𑁆𑀢𑀁 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀣𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑀁 𑀤𑀼𑀢𑀺𑀬𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀞𑀸𑀦𑀸𑀝𑁆𑀞𑀸𑀦𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀬𑀁 𑀧𑀝𑀺𑀧𑀤𑀸 𑀇𑀫𑀲𑁆𑀫𑀺𑀁 𑀪𑀯𑁂 𑀕𑀸𑀫𑀺𑀦𑀻, 𑀅𑀬𑀁 𑀧𑀝𑀺𑀧𑀤𑀸 𑀇𑀫𑀲𑁆𑀫𑀺𑀁 𑀪𑀯𑁂 𑀕𑀸𑀫𑀺𑀦𑀻’’𑀢𑀺 𑀲𑀩𑁆𑀩𑀢𑁆𑀣 𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀚𑀸𑀦𑀦𑀜𑀸𑀡𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑀁 𑀦𑀸𑀫𑀸𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑀁 𑀤𑀼𑀢𑀺𑀬𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. (𑁨)

𑁫𑁯. 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑀁 𑀤𑀼𑀢𑀺𑀬𑀁 𑀢𑀣𑀸𑀕𑀢𑀩𑀮𑀁 𑀆𑀘𑀭𑀺𑀬𑁂𑀦 𑀯𑀺𑀘𑀬𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀣𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑀁 𑀢𑀢𑀺𑀬𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀬𑀁 𑀥𑀸𑀢𑀼 𑀘 𑀅𑀬𑀁 𑀥𑀸𑀢𑀼 𑀘 𑀅𑀦𑁂𑀓𑀥𑀸𑀢𑀼 𑀦𑀸𑀫, 𑀅𑀬𑀁 𑀥𑀸𑀢𑀼 𑀘 𑀅𑀬𑀁 𑀥𑀸𑀢𑀼 𑀘 𑀦𑀸𑀦𑀸𑀥𑀸𑀢𑀼 𑀦𑀸𑀫𑀸’’𑀢𑀺 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀽𑀦𑀁 𑀚𑀸𑀦𑀦𑀜𑀸𑀡𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑀁 𑀦𑀸𑀫𑀸𑀢𑀺 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑀁 𑀢𑀢𑀺𑀬𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺. (𑁩)

𑁬𑁦. 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑀁 𑀢𑀢𑀺𑀬𑀁 𑀢𑀣𑀸𑀕𑀢𑀩𑀮𑀁 𑀆𑀘𑀭𑀺𑀬𑁂𑀦 𑀯𑀺𑀘𑀬𑀺𑀢𑀁 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀣𑀁 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀁 𑀘𑀢𑀼𑀢𑁆𑀣𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀓𑀲𑁆𑀲 𑀮𑁄𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀇𑀫𑁂 𑀲𑀢𑁆𑀢𑀸 𑀏𑀯𑀁 𑀅𑀥𑀺𑀫𑀼𑀢𑁆𑀢𑀸, 𑀇𑀫𑁂 𑀲𑀢𑁆𑀢𑀸 𑀏𑀯𑀁 𑀅𑀥𑀺𑀫𑀼𑀢𑁆𑀢𑀸’’𑀢𑀺 𑀲𑀢𑁆𑀢𑀸𑀦𑀁 𑀅𑀥𑀺𑀫𑀼𑀘𑁆𑀘𑀦𑀸𑀦𑀁 𑀚𑀸𑀦𑀦𑀜𑀸𑀡𑀁 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀁 𑀦𑀸𑀫𑀸𑀢𑀺 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀁 𑀘𑀢𑀼𑀢𑁆𑀣𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺. (𑁪)

𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀁 𑀘𑀢𑀼𑀢𑁆𑀣𑀁 𑀢𑀣𑀸𑀕𑀢𑀩𑀮𑀁 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀣𑀁 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀸𑀜𑀸𑀡𑀁 𑀧𑀜𑁆𑀘𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀢𑁂 𑀬𑀣𑀸𑀥𑀺𑀫𑀼𑀢𑁆𑀢𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀏𑀯𑀁 𑀅𑀥𑀺𑀫𑀼𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀇𑀤𑀁 𑀓𑀫𑁆𑀫𑀁 𑀓𑀡𑁆𑀳𑀁, 𑀇𑀫𑀲𑁆𑀲 𑀓𑀡𑁆𑀳𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄. 𑀇𑀤𑀁 𑀓𑀫𑁆𑀫𑀁 𑀲𑀼𑀓𑁆𑀓𑀁, 𑀇𑀫𑀲𑁆𑀲 𑀲𑀼𑀓𑁆𑀓𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄’’𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀧𑀸𑀓𑀸𑀦𑀁 𑀦𑀸𑀦𑀢𑁆𑀢𑀚𑀸𑀦𑀦𑀜𑀸𑀡𑀁 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀸𑀜𑀸𑀡𑀁 𑀦𑀸𑀫𑀸𑀢𑀺 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀸𑀜𑀸𑀡𑀁 𑀧𑀜𑁆𑀘𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺.

𑁬𑁨. 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀸𑀜𑀸𑀡𑀁 𑀧𑀜𑁆𑀘𑀫𑀁 𑀢𑀣𑀸𑀕𑀢𑀩𑀮𑀁 𑀆𑀘𑀭𑀺𑀬𑁂𑀦 𑀯𑀺𑀘𑀬𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀓𑀣𑀁 𑀛𑀸𑀦𑀸𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀜𑀸𑀡𑀁 𑀙𑀝𑁆𑀞𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀢𑀣𑀸 𑀲𑀫𑀸𑀤𑀺𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀏𑀯𑀁 𑀲𑀫𑀸𑀤𑀺𑀦𑁆𑀦𑀸𑀦𑀁 𑀓𑀫𑁆𑀫𑀸𑀦𑀁 𑀛𑀸𑀦𑀸𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀲𑀫𑀸𑀥𑀻𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀇𑀤𑀁 𑀯𑁄𑀤𑀸𑀦𑀁, 𑀇𑀤𑀁 𑀯𑀼𑀝𑁆𑀞𑀸𑀦𑀁, 𑀏𑀯𑀁 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀏𑀯𑀁 𑀯𑁄𑀤𑀸𑀬𑀢𑀺, 𑀏𑀯𑀁 𑀯𑀼𑀝𑁆𑀞𑀳𑀢𑀻’’𑀢𑀺 𑀛𑀸𑀦𑀸𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀸𑀦𑀁 𑀅𑀦𑀸𑀯𑀭𑀡𑀜𑀸𑀡𑀁 𑀛𑀸𑀦𑀸𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀜𑀸𑀡𑀁 𑀦𑀸𑀫𑀸𑀢𑀺 𑀛𑀸𑀦𑀸𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀜𑀸𑀡𑀁 𑀙𑀝𑁆𑀞𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺. (𑁫)

𑁬𑁩. 𑀛𑀸𑀦𑀸𑀦𑀁 𑀲𑀁𑀓𑀺𑀮𑁂𑀲𑀜𑀸𑀡𑀁 𑀙𑀝𑁆𑀞𑀁 𑀢𑀣𑀸𑀕𑀢𑀩𑀮𑀁 𑀆𑀘𑀭𑀺𑀬𑁂𑀦 𑀯𑀺𑀘𑀬𑀺𑀢𑀁, ‘‘𑀓𑀣𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸𑀜𑀸𑀡𑀁 𑀲𑀢𑁆𑀢𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀢𑀲𑁆𑀲𑁂𑀯 𑀲𑀫𑀸𑀥𑀺𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀏𑀯𑀁 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀏𑀯𑀁 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸𑀦𑀻’’𑀢𑀺 𑀚𑀸𑀦𑀦𑁂𑀦 𑀲𑀳 ‘‘𑀅𑀬𑀁 𑀫𑀼𑀤𑀺𑀦𑁆𑀤𑁆𑀭𑀺𑀬𑁄, 𑀅𑀬𑀁 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑁄, 𑀅𑀬𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄’’𑀢𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀩𑀮𑀸𑀦𑀁 𑀅𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸𑀚𑀸𑀦𑀦𑀜𑀸𑀡𑀁𑀅𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸𑀚𑀸𑀦𑀦𑀜𑀸𑀡𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸𑀜𑀸𑀡𑀁 𑀦𑀸𑀫𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸𑀜𑀸𑀡𑀁 𑀲𑀢𑁆𑀢𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺. (𑁬)

𑁬𑁪. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀁 𑀲𑀢𑁆𑀢𑀫𑀁 𑀢𑀣𑀸𑀕𑀢𑀩𑀮𑀁 𑀆𑀘𑀭𑀺𑀬𑁂𑀦 𑀯𑀺𑀘𑀬𑀺𑀢𑀁, ‘‘𑀓𑀣𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀅𑀝𑁆𑀞𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀁, 𑀓𑀣𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀦𑀯𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀢𑀢𑁆𑀣 𑀬𑀁 𑀅𑀦𑁂𑀓𑀯𑀺𑀳𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀏𑀓𑀁 𑀚𑀸𑀢𑀺’’𑀦𑁆𑀢𑀺𑀆𑀤𑀺𑀦𑀸 𑀚𑀸𑀢𑀺𑀯𑀲𑁂𑀦 𑀯𑀸 ‘‘𑀏𑀯𑀁𑀦𑀸𑀫𑁄’’𑀢𑀺𑀆𑀤𑀺𑀦𑀸 𑀦𑀸𑀫𑀕𑁄𑀢𑁆𑀢𑀯𑀡𑁆𑀡𑀸𑀳𑀸𑀭𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀦𑀸𑀬 𑀧𑀭𑀺𑀬𑀦𑁆𑀢𑀯𑀲𑁂𑀦 𑀯𑀸 𑀲𑀸𑀓𑀸𑀭𑀲𑁆𑀲 𑀲𑀉𑀤𑁆𑀤𑁂𑀲𑀲𑁆𑀲 𑀅𑀦𑁂𑀓𑀯𑀺𑀳𑀺𑀢𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀢𑀁𑀢𑀁𑀪𑀯𑀲𑁆𑀲 𑀅𑀲𑁂𑀲𑀢𑁄 𑀚𑀸𑀦𑀦𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀦𑀸𑀫𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀅𑀝𑁆𑀞𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺. (𑁭)

𑀘𑀯𑀫𑀸𑀦𑀉𑀧𑀧𑀚𑁆𑀚𑀫𑀸𑀦𑀳𑀻𑀦𑀧𑀡𑀻𑀢𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀲𑀼𑀕𑀢𑀤𑀼𑀕𑁆𑀕𑀢𑀬𑀣𑀸𑀓𑀫𑁆𑀫𑀽𑀧𑀕𑀸𑀦𑀁 𑀲𑀢𑁆𑀢𑀸𑀦𑀁 𑀅𑀲𑁂𑀲𑀢𑁄 𑀘𑀼𑀢𑀽𑀧𑀧𑀸𑀢𑀸𑀦𑀁 𑀚𑀸𑀦𑀦𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀦𑀸𑀫𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀦𑀯𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺. (𑁮-𑁯)

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀺𑀅𑀝𑁆𑀞𑀫𑀦𑀯𑀫𑀁 𑀢𑀣𑀸𑀕𑀢𑀩𑀮𑀁 𑀆𑀘𑀭𑀺𑀬𑁂𑀦 𑀯𑀺𑀘𑀬𑀺𑀢𑀁 𑀯𑀺𑀪𑀢𑁆𑀢𑀁, ‘‘𑀓𑀣𑀁 𑀲𑀩𑁆𑀩𑀸𑀲𑀯𑀓𑁆𑀔𑀬𑀜𑀸𑀡𑀁 𑀤𑀲𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀢𑀢𑁆𑀣 𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑁄𑀥𑀺𑀫𑀽𑀮𑁂 𑀲𑀁𑀓𑀺𑀮𑁂𑀲𑀫𑀸𑀭𑀦𑀺𑀳𑀦𑀁 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁, 𑀇𑀤𑀁 𑀓𑀺𑀮𑁂𑀲𑀫𑀸𑀭𑀦𑀺𑀳𑀦𑀁 𑀜𑀸𑀡𑀁 𑀲𑀩𑁆𑀩𑀸𑀲𑀯𑀓𑁆𑀔𑀬𑀜𑀸𑀡𑀁 𑀦𑀸𑀫𑀸𑀢𑀺 𑀲𑀩𑁆𑀩𑀸𑀲𑀯𑀓𑁆𑀔𑀬𑀜𑀸𑀡𑀁 𑀤𑀲𑀫𑀁 𑀢𑀣𑀸𑀕𑀢𑀩𑀮𑀁 𑀯𑀺𑀘𑀬𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀸𑀴𑀺𑀢𑁄 𑀘 𑀅𑀝𑁆𑀞𑀓𑀣𑀸𑀢𑁄 𑀘 𑀬𑀢𑀺𑀧𑁄𑀢𑀸𑀦𑀫𑁆𑀧𑀺 𑀧𑀸𑀓𑀝𑁄 𑀪𑀯𑁂𑀬𑁆𑀬𑀸𑀢𑀺 𑀫𑀜𑁆𑀜𑀺𑀢𑁆𑀯𑀸 𑀦 𑀤𑀲𑁆𑀲𑀺𑀢𑁄.(𑁧𑁦)

‘‘𑀏𑀢𑁆𑀢𑀓𑁄𑀯 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀯𑀺𑀘𑀬𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑁂 𑀬𑁂 𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸 𑀯𑀼𑀢𑁆𑀢𑀸, 𑀢𑁂 𑀢𑁂 𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁂𑀦 𑀯𑀺𑀘𑀬𑀺𑀢𑀩𑁆𑀩𑀸, 𑀲𑁄 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄 𑀦𑀺𑀬𑀼𑀢𑁆𑀢𑁄 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀇𑀢𑀺 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦…𑀧𑁂… 𑀕𑀳𑁂𑀢𑀩𑁆𑀩𑁄𑀢𑀺.