𑁧𑁬. 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁫𑁦. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑁂𑀦 𑀲𑀼𑀢𑁆𑀢𑀢𑁆𑀣𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁄 𑀯𑀺𑀪𑀢𑁆𑀢𑁄, 𑀲𑁄…𑀧𑁂… 𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀬𑁂 𑀥𑀫𑁆𑀫𑀸 𑀬𑀁𑀫𑀽𑀮𑀸’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂 𑀬𑀢𑁆𑀢𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀑𑀢𑀭𑀦𑁆𑀢𑀻’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫.

‘‘𑀓𑀺𑀢𑁆𑀢𑀓𑁂 𑀧𑀤𑀝𑁆𑀞𑀸𑀦𑁂 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂 𑀓𑀺𑀢𑁆𑀢𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂 𑀲𑀢𑀺 𑀅𑀯𑀼𑀢𑁆𑀢𑀸𑀦𑀺 𑀬𑀢𑁆𑀢𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀑𑀢𑀭𑀦𑁆𑀢𑀺 𑀲𑀫𑁄𑀲𑀭𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀅𑀯𑀼𑀢𑁆𑀢𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀯𑀺𑀬 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀆𑀦𑁂𑀢𑁆𑀯𑀸 𑀤𑁂𑀲𑀦𑀸𑀬 𑀆𑀭𑁄𑀧𑀬𑀺𑀢𑀩𑁆𑀩𑀸𑀦𑀺. ‘‘𑀓𑀸𑀦𑀺 𑀯𑀺𑀬 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀆𑀯𑀝𑁆𑀝𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀯𑀝𑁆𑀝𑁂 𑀳𑀸𑀭𑁂 𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂 𑀲𑀢𑀺 𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑀸𑀦𑀺 𑀩𑀳𑀼𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀑𑀢𑀭𑀦𑁆𑀢𑀺, 𑀢𑀸𑀦𑀺 𑀩𑀳𑀼𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀸𑀦𑀺 𑀬𑀣𑀸, 𑀏𑀯𑀁 𑀲𑀫𑀸𑀭𑁄𑀧𑀦𑁂 𑀳𑀸𑀭𑁂𑀧𑀺 𑀩𑀳𑀼𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀤𑁂𑀲𑀦𑀸𑀬 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄.

‘‘𑀓𑁂𑀯𑀮𑀁 𑀧𑀦 𑀧𑀤𑀝𑁆𑀞𑀸𑀦𑀯𑀲𑁂𑀦𑁂𑀯 𑀲𑀫𑀸𑀭𑁄𑀧𑀦𑀸 𑀓𑀸𑀢𑀩𑁆𑀩𑀸 𑀓𑀺𑀁, 𑀉𑀤𑀸𑀳𑀼 𑀅𑀜𑁆𑀜𑀯𑀲𑁂𑀦𑀸𑀧𑀺 𑀲𑀫𑀸𑀭𑁄𑀧𑀦𑀸 𑀓𑀸𑀢𑀩𑁆𑀩𑀸 𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀅𑀜𑁆𑀜𑀯𑀲𑁂𑀦𑀸𑀧𑀺 𑀲𑀫𑀸𑀭𑁄𑀧𑀦𑀸 𑀓𑀸𑀢𑀩𑁆𑀩𑀸; 𑀢𑀲𑁆𑀫𑀸 𑀲𑀫𑀸𑀭𑁄𑀧𑀦𑀸 𑀘𑀢𑀼𑀩𑁆𑀩𑀺𑀥𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀲𑀫𑀸𑀭𑁄𑀧𑀦𑀸 𑀘𑀢𑀼𑀩𑁆𑀩𑀺𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀲𑀫𑀸𑀭𑁄𑀧𑀦𑀸𑀲𑀼 𑀧𑀤𑀝𑁆𑀞𑀸𑀦𑀁 𑀧𑀤𑀝𑁆𑀞𑀸𑀦𑀲𑀫𑀸𑀭𑁄𑀧𑀦𑀸, 𑀯𑁂𑀯𑀘𑀦𑀁 𑀯𑁂𑀯𑀘𑀦𑀲𑀫𑀸𑀭𑁄𑀧𑀦𑀸, 𑀪𑀸𑀯𑀦𑀸 𑀪𑀸𑀯𑀦𑀸𑀲𑀫𑀸𑀭𑁄𑀧𑀦𑀸, 𑀧𑀳𑀸𑀦𑀁 𑀧𑀳𑀸𑀦𑀲𑀫𑀸𑀭𑁄𑀧𑀦𑀸, 𑀇𑀢𑀺 𑀇𑀫𑀺𑀦𑀸 𑀧𑀪𑁂𑀤𑁂𑀦 𑀲𑀫𑀸𑀭𑁄𑀧𑀦𑀸 𑀘𑀢𑀼𑀩𑁆𑀩𑀺𑀥𑀸 𑀓𑀸𑀢𑀩𑁆𑀩𑀸.

‘‘𑀢𑀸𑀲𑀼 𑀘𑀢𑀼𑀩𑁆𑀩𑀺𑀥𑀸𑀲𑀼 𑀲𑀫𑀸𑀭𑁄𑀧𑀦𑀸𑀲𑀼 𑀓𑀢𑀫𑀸 𑀧𑀤𑀝𑁆𑀞𑀸𑀦𑀲𑀫𑀸𑀭𑁄𑀧𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀣𑀸 𑀧𑀼𑀘𑁆𑀙𑀺𑀢𑁆𑀯𑀸 𑀧𑀤𑀝𑁆𑀞𑀸𑀦𑀲𑀫𑀸𑀭𑁄𑀧𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀦 𑀧𑀤𑀝𑁆𑀞𑀸𑀦𑁂𑀦 𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑀸𑀦𑀁 𑀧𑀤𑀝𑁆𑀞𑀸𑀦𑀸𑀦𑀁 𑀲𑀫𑀸𑀭𑁄𑀧𑀦𑀸 𑀓𑀢𑀫𑀸𑀢𑀺 𑀧𑀼𑀘𑁆𑀙𑀢𑀺.

𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀼𑀲𑀮𑀲𑁆𑀲 𑀬𑀁 𑀅𑀓𑀭𑀡𑀁 𑀅𑀓𑀭𑀡𑀳𑁂𑀢𑀼 𑀲𑀸𑀲𑀦𑀁 𑀅𑀢𑁆𑀣𑀺, 𑀏𑀢𑀁 𑀲𑀸𑀲𑀦𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀳𑁄𑀢𑀺, 𑀅𑀣 𑀯𑀸 𑀅𑀓𑀭𑀡𑀁 𑀅𑀓𑀭𑀡𑀢𑁆𑀣𑀸𑀬 𑀬𑀁 𑀲𑀸𑀲𑀦𑀁 𑀅𑀢𑁆𑀣𑀺, 𑀏𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀳𑁄𑀢𑀺, 𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀸𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀭𑀡𑀦𑁆𑀢𑀺 𑀳𑀺 𑀲𑀫𑁆𑀧𑀤𑀸𑀦𑀢𑁆𑀣𑁂 𑀧𑀯𑀢𑁆𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁 𑀬𑀣𑀸 ‘‘𑀓𑀺𑀲𑁆𑀲 𑀅𑀢𑁆𑀣𑀸𑀬 𑀓𑀺𑀫𑀢𑁆𑀣’’𑀦𑁆𑀢𑀺. 𑀓𑀼𑀲𑀮𑀲𑁆𑀲 𑀲𑀫𑁆𑀧𑀤𑀸 𑀲𑀫𑁆𑀧𑀤𑀸𑀬 𑀬𑀁 𑀲𑀸𑀲𑀦𑀁 𑀅𑀢𑁆𑀣𑀺, 𑀏𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁. 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀢𑁆𑀣𑀁 𑀬𑀁 𑀲𑀸𑀲𑀦𑀁 𑀅𑀢𑁆𑀣𑀺, 𑀏𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀳𑁄𑀢𑀺.

𑀇𑀢𑀺 𑀏𑀯𑀁𑀧𑀓𑀸𑀭𑁂𑀦 𑀯𑀼𑀢𑁆𑀢𑀲𑁆𑀲 𑀢𑀲𑁆𑀲 𑀲𑀸𑀲𑀦𑀲𑁆𑀲 𑀓𑀺𑀁 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀺𑀲𑁂𑀲𑀲𑁆𑀲 𑀯𑀺𑀲𑁂𑀲𑀧𑀤𑀝𑁆𑀞𑀸𑀦𑀁 𑀧𑀼𑀦 𑀧𑀼𑀘𑁆𑀙𑀢𑀺. 𑀇𑀤𑀁 𑀲𑀼𑀘𑀭𑀺𑀢𑀢𑁆𑀢𑀬𑀁 𑀲𑀸𑀲𑀦𑀲𑁆𑀲 𑀑𑀯𑀸𑀤𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀼𑀘𑀭𑀺𑀢𑀢𑁆𑀢𑀬𑁂𑀦 𑀳𑁂𑀢𑀼𑀦𑀸 𑀲𑀸𑀲𑀦𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁 𑀬𑀣𑀸 ‘‘𑀅𑀦𑁆𑀦𑁂𑀦 𑀯𑀲𑀢𑀻’’𑀢𑀺𑀆𑀤𑀺. ‘‘𑀲𑀼𑀘𑀭𑀺𑀢𑀢𑁆𑀢𑀬𑁂 𑀧𑀤𑀝𑁆𑀞𑀸𑀦𑁂 𑀯𑀼𑀢𑁆𑀢𑁂 𑀓𑀢𑀫𑀁 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀁 𑀓𑀸𑀬𑀺𑀓𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀁 𑀔𑀦𑁆𑀥𑀢𑁆𑀢𑀬𑀁 𑀲𑀸𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀁, ‘‘𑀔𑀦𑁆𑀥𑀢𑁆𑀢𑀬𑁂 𑀧𑀤𑀝𑁆𑀞𑀸𑀦𑁂 𑀲𑀫𑀸𑀭𑁄𑀧𑀬𑀺𑀢𑁂 𑀓𑀢𑀫𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑁆𑀯𑀬𑀁 𑀲𑀸𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀁. ‘‘𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑁆𑀯𑀬𑁂 𑀧𑀤𑀝𑁆𑀞𑀸𑀦𑁂 𑀲𑀫𑀸𑀭𑁄𑀧𑀬𑀺𑀢𑁂 𑀓𑀢𑀫𑀁 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀲𑀫𑀣𑀲𑁆𑀲 𑀨𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀁 𑀨𑀮𑀤𑁆𑀯𑀬𑀁 𑀲𑀸𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀁.

𑀲𑀸𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀸𑀦𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀻𑀢𑀺 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀪𑀢𑁆𑀢𑀸𑀦𑀺, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸𑀦𑀺, ‘‘𑀇𑀤𑀸𑀦𑀺 𑀓𑀢𑀫𑀲𑁆𑀲 𑀓𑀢𑀫𑀁 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀯𑀦𑀁 𑀯𑀦𑀣𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀁 𑀓𑀸𑀫𑀕𑀼𑀡𑀧𑀜𑁆𑀘𑀓𑀁 𑀯𑀦𑀁 𑀢𑀡𑁆𑀳𑀸𑀪𑀽𑀢𑀲𑁆𑀲 𑀯𑀦𑀣𑀲𑁆𑀲 𑀧𑀤𑀝𑁆𑀞𑀸𑀦𑀁 𑀢𑀡𑁆𑀳𑀸𑀯𑀢𑁆𑀣𑀼𑀪𑀸𑀯𑀢𑁄, ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑀗𑁆𑀔𑀸𑀢𑀁 𑀇𑀤𑀁 𑀯𑀦𑀁 ‘‘𑀅𑀳𑁄 𑀘𑀓𑁆𑀔𑀼, 𑀅𑀳𑁄 𑀲𑁄𑀢𑀁, 𑀅𑀳𑁄 𑀖𑀸𑀦𑀁, 𑀅𑀳𑁄 𑀚𑀺𑀯𑁆𑀳𑀸, 𑀅𑀳𑁄 𑀓𑀸𑀬𑁄’’𑀢𑀺 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀲𑀗𑁆𑀔𑀸𑀢𑀲𑁆𑀲 𑀯𑀦𑀣𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀁. 𑀅𑀧𑀭𑀺𑀜𑁆𑀜𑀸𑀢𑀁 𑀤𑁆𑀯𑀸𑀤𑀲𑀸𑀬𑀢𑀦𑀲𑀗𑁆𑀔𑀸𑀢𑀁 𑀇𑀤𑀁 𑀯𑀦𑀁 𑀲𑀁𑀬𑁄𑀚𑀦𑀲𑀗𑁆𑀔𑀸𑀢𑀲𑁆𑀲 𑀯𑀦𑀣𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀁, 𑀆𑀬𑀢𑀦𑀁 𑀧𑀝𑀺𑀘𑁆𑀘 𑀲𑀁𑀬𑁄𑀚𑀦𑀼𑀧𑁆𑀧𑀚𑁆𑀚𑀦𑀢𑁄 𑀅𑀦𑀼𑀲𑀬𑀲𑀗𑁆𑀔𑀸𑀢𑀁 𑀇𑀤𑀁 𑀯𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑀲𑁆𑀲 𑀯𑀦𑀣𑀲𑁆𑀲 𑀧𑀤𑀝𑁆𑀞𑀸𑀦𑀁 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀁. ‘‘𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀻𑀦𑀁 𑀯𑀦𑀪𑀸𑀯𑁄 𑀘 𑀢𑀡𑁆𑀳𑀸𑀤𑀻𑀦𑀁 𑀯𑀦𑀣𑀪𑀸𑀯𑁄 𑀘 𑀓𑁂𑀦 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀻𑀦𑀁 𑀯𑀦𑀪𑀸𑀯𑁂𑀦 𑀘 𑀢𑀡𑁆𑀳𑀸𑀤𑀻𑀦𑀁 𑀯𑀦𑀣𑀪𑀸𑀯𑁂𑀦 𑀘 𑀪𑀕𑀯𑀸 ‘‘𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀜𑁆𑀘𑀸’’𑀢𑀺 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀪𑀕𑀯𑀢𑁄 𑀯𑀘𑀦𑁂𑀦 𑀯𑀘𑀦𑀸𑀦𑀼𑀲𑀸𑀭𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺. 𑀅𑀬𑀦𑁆𑀢𑀺 𑀅𑀬𑀁 ‘‘𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂’’𑀢𑀺𑀆𑀤𑀺𑀲𑀁𑀯𑀡𑁆𑀡𑀦𑀸. 𑀧𑀤𑀝𑁆𑀞𑀸𑀦𑁂𑀦𑀸𑀢𑀺 𑀏𑀓𑁂𑀓𑁂𑀦 𑀧𑀤𑀝𑁆𑀞𑀸𑀦𑁂𑀦. 𑀲𑀫𑀸𑀭𑁄𑀧𑀦𑀸𑀢𑀺 𑀢𑀤𑀜𑁆𑀜𑀧𑀤𑀝𑁆𑀞𑀸𑀦𑀸𑀦𑀁 𑀲𑀫𑀸𑀭𑁄𑀧𑀦𑀸. 𑀲𑀫𑀸𑀭𑁄𑀧𑁂𑀦𑁆𑀢𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀺 𑀏𑀢𑀸𑀬 𑀲𑀁𑀯𑀡𑁆𑀡𑀦𑀸𑀬𑀸𑀢𑀺 𑀲𑀫𑀸𑀭𑁄𑀧𑀦𑀸𑀢𑀺 𑀯𑀺𑀕𑁆𑀕𑀳𑁄𑀢𑀺. (𑁧)

𑁫𑁧. 𑀧𑀤𑀝𑁆𑀞𑀸𑀦𑁂𑀦 𑀲𑀫𑀸𑀭𑁄𑀧𑀦𑀸 𑀆𑀘𑀭𑀺𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑀸 𑀯𑁂𑀯𑀘𑀦𑁂𑀦 𑀲𑀫𑀸𑀭𑁄𑀧𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀸 𑀯𑁂𑀯𑀘𑀦𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀘𑀢𑀽𑀲𑀼 𑀧𑀤𑀝𑁆𑀞𑀸𑀦𑀲𑀫𑀸𑀭𑁄𑀧𑀦𑀸𑀤𑀻𑀲𑀼 𑀲𑀫𑀸𑀭𑁄𑀧𑀦𑀸𑀲𑀼 𑀯𑁂𑀯𑀘𑀦𑁂𑀦 𑀏𑀓𑁂𑀓𑁂𑀦 𑀭𑁄𑀢𑀤𑀜𑁆𑀜𑀯𑁂𑀯𑀘𑀦𑀸𑀦𑀁 𑀲𑀫𑀸𑀭𑁄𑀧𑀦𑀸 𑀓𑀢𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀭𑀸𑀕𑀯𑀺𑀭𑀸𑀕𑀸’’𑀢𑀺 𑀘 ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀘 ‘‘𑀲𑁂𑀓𑁆𑀔𑀨𑀮’’𑀦𑁆𑀢𑀺 𑀘 𑀇𑀤𑀁 𑀯𑀘𑀦𑀢𑁆𑀢𑀬𑀁 𑀅𑀦𑀸𑀕𑀸𑀫𑀺𑀨𑀮𑀢𑁆𑀣𑀢𑁆𑀢𑀸 𑀅𑀦𑀸𑀕𑀸𑀫𑀺𑀨𑀮𑀲𑁆𑀲 𑀯𑁂𑀯𑀘𑀦𑀁. ‘‘𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸’’𑀢𑀺 𑀘 ‘‘𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺 𑀘 ‘‘𑀅𑀲𑁂𑀓𑁆𑀔𑀨𑀮’’𑀦𑁆𑀢𑀺 𑀘 𑀇𑀤𑀁 𑀯𑀘𑀦𑀢𑁆𑀢𑀬𑀁 𑀅𑀭𑀳𑀢𑁆𑀢𑀨𑀮𑀢𑁆𑀣𑀢𑁆𑀢𑀸 𑀅𑀭𑀳𑀢𑁆𑀢𑀨𑀮𑀲𑁆𑀲 𑀯𑁂𑀯𑀘𑀦𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. (𑁨)

𑀯𑁂𑀯𑀘𑀦𑁂𑀦 𑀲𑀫𑀸𑀭𑁄𑀧𑀦𑀸 𑀆𑀘𑀭𑀺𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑀸 𑀪𑀸𑀯𑀦𑀸𑀬 𑀲𑀫𑀸𑀭𑁄𑀧𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀸 𑀪𑀸𑀯𑀦𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀘𑀢𑀽𑀲𑀼 𑀧𑀤𑀝𑁆𑀞𑀸𑀦𑀲𑀫𑀸𑀭𑁄𑀧𑀦𑀸𑀤𑀻𑀲𑀼 𑀓𑀢𑀫𑀸𑀬 𑀤𑁂𑀲𑀺𑀢𑀸𑀬 𑀪𑀸𑀯𑀦𑀸𑀬 𑀓𑀢𑀫𑁂𑀲𑀸𑀦𑀁 𑀅𑀤𑁂𑀲𑀺𑀢𑀸𑀦𑀁 𑀪𑀸𑀯𑀦𑀸𑀭𑁄𑀧𑀦𑀸 𑀓𑀢𑀫𑀸𑀢𑀺 𑀧𑀼𑀘𑁆𑀙𑀢𑀺. 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀬𑀁 𑀪𑀸𑀯𑀦𑀁 𑀪𑀕𑀯𑀸 ‘‘𑀢𑀲𑁆𑀫𑀸𑀢𑀺𑀳, 𑀢𑁆𑀯𑀁 𑀪𑀺𑀓𑁆𑀔𑀼, 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’’𑀦𑁆𑀢𑀺 (𑀲𑀁. 𑀦𑀺. 𑁫.𑁩𑁬𑁯, 𑁩𑁭𑁧, 𑁩𑁯𑁫, 𑁪𑁧𑁫) 𑀆𑀳, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀢𑀸𑀬 𑀪𑀸𑀯𑀦𑀸𑀬 𑀢𑀤𑀜𑁆𑀜𑀪𑀸𑀯𑀦𑀸𑀧𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

‘‘𑀢𑀲𑁆𑀫𑀸𑀢𑀺𑀳𑀸’’𑀢𑀺𑀆𑀤𑀺𑀧𑀸𑀞𑁂 ‘‘𑀓𑀺𑀁 𑀪𑀸𑀯𑀦𑀁 𑀪𑀕𑀯𑀸 𑀆𑀳𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀆𑀢𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀆𑀢𑀸𑀧𑀻’’𑀢𑀺 𑀯𑀘𑀦𑁂𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀪𑀕𑀯𑀸 𑀆𑀳. ‘‘𑀲𑀫𑁆𑀧𑀚𑀸𑀦𑁄’’𑀢𑀺 𑀯𑀘𑀦𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀕𑀯𑀸 𑀆𑀳. ‘‘𑀲𑀢𑀺𑀫𑀸’’𑀢𑀺 𑀯𑀘𑀦𑁂𑀦 𑀲𑀢𑀺𑀦𑁆𑀤𑁆𑀭𑀺𑀬𑀁 𑀆𑀳. ‘‘𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀘𑀦𑁂𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀆𑀳. ‘‘𑀏𑀯𑀁 𑀯𑀼𑀢𑁆𑀢𑁂 𑀓𑀢𑀫𑀸 𑀪𑀸𑀯𑀦𑀸 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀏𑀯𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑀸𑀬 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑀸𑀯𑀦𑀸𑀬 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀓𑁂𑀦 𑀓𑀸𑀭𑀡𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑁂𑀦, 𑀪𑀸𑀯𑁂𑀢𑀩𑁆𑀩𑀪𑀸𑀯𑁂𑀦 𑀯𑀸 𑀏𑀓𑀮𑀓𑁆𑀔𑀡𑀢𑁆𑀢𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. ‘‘𑀢𑁂𑀲𑀼 𑀲𑀫𑀸𑀭𑁄𑀧𑀺𑀢𑁂𑀲𑀼 𑀓𑀢𑀫𑁂 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀘𑀢𑀽𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑁂𑀲𑀼 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀯𑀫𑁂𑀯 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸.

𑀪𑀸𑀯𑀦𑀸𑀬 𑀲𑀫𑀸𑀭𑁄𑀧𑀦𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑀸 𑀧𑀳𑀸𑀦𑁂𑀦 𑀲𑀫𑀸𑀭𑁄𑀧𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀘𑀢𑀽𑀲𑀼 𑀧𑀤𑀝𑁆𑀞𑀸𑀦𑀲𑀫𑀸𑀭𑁄𑀧𑀦𑀸𑀤𑀻𑀲𑀼 𑀓𑀢𑀫𑁂𑀦 𑀤𑁂𑀲𑀺𑀢𑁂𑀦 𑀧𑀳𑀸𑀦𑁂𑀦 𑀓𑀢𑀫𑁂𑀲𑀁 𑀅𑀤𑁂𑀲𑀺𑀢𑀸𑀦𑀁 𑀧𑀳𑀸𑀦𑀸𑀦𑀁 𑀓𑀢𑀫𑀸 𑀲𑀫𑀸𑀭𑁄𑀧𑀦𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀅𑀲𑀼𑀪𑁂 ‘𑀲𑀼𑀪’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀻’’𑀢𑀺 𑀤𑁂𑀲𑀺𑀢𑁂𑀦 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀺𑀮𑁂𑀲𑀓𑀸𑀫𑀼𑀧𑀸𑀤𑀸𑀦𑀧𑁆𑀧𑀳𑀸𑀦𑀸𑀤𑀬𑁄𑀧𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸.

‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀤𑀼𑀓𑁆𑀔𑁂 ‘𑀲𑀼𑀔’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀻’’𑀢𑀺 𑀤𑁂𑀲𑀺𑀢𑁂𑀦 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀨𑀲𑁆𑀲𑀸𑀳𑀸𑀭𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀺𑀮𑁂𑀲𑀪𑀯𑀼𑀧𑀸𑀤𑀸𑀦𑀧𑁆𑀧𑀳𑀸𑀦𑀸𑀤𑀬𑁄𑀧𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸.

‘‘𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀅𑀦𑀺𑀘𑁆𑀘𑁂 ‘𑀦𑀺𑀘𑁆𑀘’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀻’’𑀢𑀺 𑀤𑁂𑀲𑀺𑀢𑁂𑀦 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀯𑀺𑀜𑁆𑀜𑀸𑀡𑀸𑀳𑀸𑀭𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀺𑀮𑁂𑀲𑀤𑀺𑀝𑁆𑀞𑀼𑀧𑀸𑀤𑀸𑀦𑀧𑁆𑀧𑀳𑀸𑀦𑀸𑀤𑀬𑁄𑀧𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸.

‘‘𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀅𑀦𑀢𑁆𑀢𑀦𑀺 ‘𑀅𑀢𑁆𑀢𑀸’𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀻’’𑀢𑀺 𑀤𑁂𑀲𑀺𑀢𑁂𑀦 ‘‘𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀧𑀭𑀺𑀜𑁆𑀜𑀸𑀬? 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀺𑀮𑁂𑀲𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀧𑁆𑀧𑀳𑀸𑀦𑀸𑀤𑀬𑁄𑀧𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. (𑁪)

𑀧𑀳𑀸𑀦𑀳𑀸𑀭𑁄 𑀧𑀦 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀬𑁂𑀯𑀸𑀢𑀺 𑀇𑀥 𑀦 𑀯𑀤𑀸𑀫.

‘‘𑀲𑀼𑀢𑁆𑀢𑁂 𑀤𑁂𑀲𑀺𑀢𑁂𑀦 𑀏𑀓𑁂𑀓𑁂𑀦 𑀧𑀤𑀝𑁆𑀞𑀸𑀦𑀸𑀤𑀺𑀓𑁂𑀦 𑀅𑀤𑁂𑀲𑀺𑀢𑀸𑀦𑀁 𑀧𑀤𑀝𑁆𑀞𑀸𑀦𑀸𑀤𑀻𑀦𑀁 𑀲𑀫𑀸𑀭𑁄𑀧𑀦𑀪𑀸𑀯𑁄 𑀓𑁂𑀦 𑀅𑀫𑁆𑀳𑁂𑀳𑀺 𑀯𑀺𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳 𑀆𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀢𑀣𑀸 𑀲𑀫𑀸𑀭𑁄𑀧𑀦𑀪𑀸𑀯𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑁋

‘‘𑀬𑁂 𑀥𑀫𑁆𑀫𑀸 𑀬𑀁𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸;

𑀢𑁂 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸, 𑀏𑀲 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄’’𑀢𑀺 𑁋

𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀯𑀘𑀦𑀸𑀦𑀼𑀲𑀸𑀭𑁂𑀦 𑀢𑀣𑀸 𑀲𑀫𑀸𑀭𑁄𑀧𑀦𑀪𑀸𑀯𑁄 𑀢𑀼𑀫𑁆𑀳𑁂𑀳𑀺 𑀯𑀺𑀚𑀸𑀦𑀺𑀢𑀩𑁆𑀩𑁄 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀓𑀺𑀁 𑀧𑀦 𑀏𑀢𑁆𑀢𑀸𑀯𑀢𑀸 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄, 𑀅𑀜𑁆𑀜𑁄 𑀦𑀺𑀬𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑁂 𑀤𑁂𑀲𑀺𑀢𑁂𑀦 𑀦𑀬𑁂𑀦 𑀧𑀤𑀝𑁆𑀞𑀸𑀦𑀸𑀤𑀺𑀓𑁂𑀦 𑀅𑀤𑁂𑀲𑀺𑀢𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀺 𑀪𑀯𑀦𑁆𑀢𑀺, 𑀢𑁂𑀦 𑀢𑁂𑀦 𑀧𑀤𑀝𑁆𑀞𑀸𑀦𑀸𑀤𑀺𑀓𑁂𑀦 𑀅𑀤𑁂𑀲𑀺𑀢𑀸𑀦𑀁 𑀧𑀤𑀝𑁆𑀞𑀸𑀦𑀸𑀤𑀻𑀦𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄 𑀦𑀺𑀬𑀼𑀢𑁆𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀜𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀇𑀢𑀺 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀇𑀫𑁂 𑀬𑀣𑀸𑀯𑀼𑀢𑁆𑀢𑀸 𑀲𑁄𑀴𑀲 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀢𑁆𑀣𑁂𑀲𑀼 𑀅𑀜𑁆𑀜𑀸𑀡𑀲𑀁𑀲𑀬𑀸𑀦𑀁 𑀳𑀭𑀡𑀢𑁄 𑀅𑀧𑀦𑀬𑀦𑀢𑁄 𑀳𑀸𑀭𑀸 𑀦𑀸𑀫𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑀯𑀺𑀪𑀸𑀯𑀦𑀸.