𑁧𑁫. 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁪𑁯. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀯𑀺𑀪𑀗𑁆𑀕𑁂𑀦 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀁 𑀏𑀓𑀢𑁆𑀢𑀢𑀸𑀤𑀬𑁄 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁 𑀚𑀦𑀬𑀦𑁆𑀢𑀻’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀬𑁄 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀚𑀦𑀬𑀢𑀺, 𑀢𑀲𑁆𑀲 𑀲𑁄 𑀧𑀭𑀺𑀓𑁆𑀔𑀸𑀭𑁄’’𑀢𑀺𑀆𑀤𑀺𑀓𑁄 𑀧𑀭𑀺𑀓𑁆𑀔𑀸𑀭𑀪𑀽𑀢𑀲𑁆𑀲 𑀳𑁂𑀢𑀼𑀦𑁄 𑀘𑁂𑀯 𑀧𑀘𑁆𑀘𑀬𑀲𑁆𑀲 𑀘 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀭𑀺𑀓𑁆𑀔𑀸𑀭𑀯𑀺𑀪𑀗𑁆𑀕𑁄 𑀦𑀸𑀫.

‘‘𑀓𑀢𑀫𑁄 𑀲𑀁𑀯𑀡𑁆𑀡𑁂𑀢𑀩𑁆𑀩𑁄 𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑁄 𑀥𑀫𑁆𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀳𑁂𑀢𑀼𑀧𑀘𑁆𑀘𑀬𑀧𑁆𑀧𑀓𑀸𑀭𑁄 𑀥𑀫𑁆𑀫𑁄 𑀬𑀁 𑀨𑀮𑀪𑀽𑀢𑀁 𑀥𑀫𑁆𑀫𑀁 𑀚𑀦𑀬𑀢𑀺 𑀚𑀦𑁂𑀢𑀺, 𑀢𑀲𑁆𑀲 𑀨𑀮𑀥𑀫𑁆𑀫𑀲𑁆𑀲 𑀲𑁄 𑀳𑁂𑀢𑀼𑀧𑀘𑁆𑀘𑀬𑀧𑁆𑀧𑀓𑀸𑀭𑁄 𑀥𑀫𑁆𑀫𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫. ‘‘𑀓𑀺𑀁𑀮𑀓𑁆𑀔𑀡𑁄 𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀣𑀸 𑀧𑀼𑀘𑁆𑀙𑀺𑀢𑁆𑀯𑀸 𑀮𑀓𑁆𑀔𑀡𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁𑀮𑀓𑁆𑀔𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘𑀢𑀢𑁆𑀣 ‘𑀬𑁄 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀚𑀦𑀬𑀢𑀺, 𑀢𑀲𑁆𑀲 𑀲𑁄 𑀧𑀭𑀺𑀓𑁆𑀔𑀸𑀭𑁄’𑀢𑀺 𑀲𑀗𑁆𑀔𑁂𑀧𑀢𑁄 𑀧𑀭𑀺𑀓𑁆𑀔𑀸𑀭𑀮𑀓𑁆𑀔𑀡𑀁 𑀯𑀢𑁆𑀯𑀸 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘𑀓𑀺𑀁𑀮𑀓𑁆𑀔𑀡𑁄’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪𑁯) 𑀯𑀼𑀢𑁆𑀢𑀁. ‘‘𑀓𑀺𑀢𑁆𑀢𑀓𑀸 𑀥𑀫𑁆𑀫𑀸 𑀚𑀦𑀬𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑁂 𑀥𑀫𑁆𑀫𑀸 𑀚𑀦𑀬𑀦𑁆𑀢𑀺 𑀳𑁂𑀢𑀼 𑀘 𑀧𑀘𑁆𑀘𑀬𑁄 𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀳𑁂𑀢𑀼𑀧𑀺 𑀓𑀸𑀭𑀡𑀁, 𑀧𑀘𑁆𑀘𑀬𑁄𑀧𑀺 𑀓𑀸𑀭𑀡𑀁, 𑀢𑀲𑁆𑀫𑀸 𑀓𑀸𑀭𑀡𑀸𑀬𑁂𑀯 𑀓𑁂𑀦 𑀮𑀓𑁆𑀔𑀡𑁂𑀦 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀺𑀁𑀮𑀓𑁆𑀔𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀦𑀺𑀢𑀩𑁆𑀩𑀨𑀮𑀢𑁄 𑀅𑀜𑁆𑀜𑁂𑀳𑀺 𑀨𑀮𑁂𑀳𑀺 𑀅𑀲𑀸𑀥𑀸𑀭𑀡𑀮𑀓𑁆𑀔𑀡𑁄 𑀳𑁂𑀢𑀼, 𑀲𑀩𑁆𑀩𑀨𑀮𑁂𑀳𑀺 𑀲𑀸𑀥𑀸𑀭𑀡𑀮𑀓𑁆𑀔𑀡𑁄 𑀧𑀘𑁆𑀘𑀬𑁄, 𑀇𑀫𑀺𑀦𑀸 𑀯𑀺𑀲𑁂𑀲𑀮𑀓𑁆𑀔𑀡𑁂𑀦 𑀤𑁆𑀯𑀺𑀥𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. ‘‘𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀺𑀲𑁂𑀲𑁄 𑀓𑀻𑀤𑀺𑀲𑁄 𑀪𑀯𑁂’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀓𑀺𑀁 𑀪𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑀣𑀸 𑀅𑀗𑁆𑀓𑀼𑀭𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀬𑁄 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀢𑀣𑀸 𑀲𑁄 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀺𑀲𑁂𑀲𑁄 𑀓𑀺𑀁 𑀯𑀺𑀬 𑀪𑀯𑁂𑀢𑀺 𑀅𑀢𑁆𑀣𑁄. 𑀅𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀩𑀻𑀚𑀁 𑀅𑀲𑀸𑀥𑀸𑀭𑀡𑀁 𑀬𑀣𑀸, 𑀢𑀣𑀸 𑀳𑁂𑀢𑀼 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀲𑀸𑀥𑀸𑀭𑀡𑁄 𑀪𑀯𑁂. 𑀧𑀣𑀯𑀻 𑀘 𑀆𑀧𑁄 𑀘 𑀅𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀸𑀥𑀸𑀭𑀡𑀸 𑀪𑀯𑀦𑁆𑀢𑀺 𑀬𑀣𑀸, 𑀢𑀣𑀸 𑀧𑀘𑁆𑀘𑀬𑁄 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀸𑀥𑀸𑀭𑀡𑁄 𑀪𑀯𑁂. 𑀲𑀩𑁆𑀩𑀨𑀮𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀅𑀗𑁆𑀓𑀼𑀭𑀲𑁆𑀲 𑀩𑀻𑀚𑀁 𑀅𑀲𑀸𑀥𑀸𑀭𑀡𑀁 𑀚𑀦𑀓𑀁 𑀳𑁂𑀢𑀼. ‘‘𑀓𑀣𑀁 𑀧𑀣𑀯𑀻, 𑀆𑀧𑁄 𑀘 𑀲𑀸𑀥𑀸𑀭𑀡𑀸 𑀚𑀦𑀓𑀸𑀢𑀺 𑀲𑀤𑁆𑀤𑀳𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀗𑁆𑀓𑀼𑀭𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀁 𑀲𑀫𑀸𑀦𑀁 𑀨𑀮𑀁 𑀪𑀯𑀸𑀧𑁂𑀢𑀻𑀢𑀺 𑀲𑀪𑀸𑀯𑁄, 𑀓𑁄 𑀲𑁄? 𑀩𑀻𑀚𑀁 𑀳𑁂𑀢𑀼𑀬𑁂𑀯. ‘‘𑀓𑀺𑀁 𑀳𑁂𑀢𑀼𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁄 𑀩𑀻𑀚𑀗𑁆𑀓𑀼𑀭𑁄𑀧𑀫𑀸𑀬𑁂𑀯 𑀤𑀲𑁆𑀲𑁂𑀢𑀩𑁆𑀩𑁄, 𑀉𑀤𑀸𑀳𑀼 𑀅𑀜𑁆𑀜𑀽𑀧𑀫𑀸𑀬𑀧𑀺 𑀤𑀲𑁆𑀲𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀅𑀜𑁆𑀜𑀸𑀬 𑀉𑀧𑀫𑀸𑀬𑀧𑀺 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀸𑀬 𑀉𑀧𑀫𑀸𑀬𑀧𑀺 𑀳𑁂𑀢𑀼𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁄 𑀯𑀺𑀚𑀸𑀦𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀩𑀻𑀚𑀗𑁆𑀓𑀼𑀭𑀸𑀤𑀻𑀲𑀼 𑀩𑀸𑀳𑀺𑀭𑁂𑀲𑀼 𑀧𑀭𑀺𑀓𑁆𑀔𑀸𑀭𑀪𑀽𑀢𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀣𑀁 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀯𑀺𑀪𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀬𑀜𑁆𑀳𑀺 𑀲𑀁𑀲𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀩𑀸𑀳𑀺𑀭𑁂𑀲𑀼 𑀧𑀭𑀺𑀓𑁆𑀔𑀸𑀭𑀪𑀽𑀢𑁄 𑀳𑁂𑀢𑀼𑀧𑀘𑁆𑀘𑀬𑁄 𑀬𑀼𑀢𑁆𑀢𑁄 𑀳𑁄𑀢𑀼, 𑀓𑀣𑀁 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀬𑀼𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀬𑀜𑁆𑀳𑀺 𑀲𑀁𑀲𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘𑀏𑀯𑀁 𑀩𑀸𑀳𑀺𑀭𑀁 𑀳𑁂𑀢𑀼𑀧𑀘𑁆𑀘𑀬𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀁 𑀤𑀲𑁆𑀲𑁂𑀢𑀼𑀁 ‘𑀅𑀬𑀜𑁆𑀳𑀺 𑀲𑀁𑀲𑀸𑀭𑁄’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪𑁯) 𑀯𑀼𑀢𑁆𑀢𑀁. 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀲𑀳 𑀲𑀁𑀲𑀸𑀭𑁄 𑀪𑀯𑀢𑀻𑀢𑀺 𑀲𑀳𑁂𑀢𑀼𑀧𑀘𑁆𑀘𑀬𑁄. 𑀅𑀬𑀁 𑀲𑀁𑀲𑀸𑀭𑁄 𑀳𑀺 𑀬𑀲𑁆𑀫𑀸 𑀲𑀳𑁂𑀢𑀼𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀫𑀸 𑀅𑀚𑁆𑀛𑀢𑁆𑀢𑀺𑀓𑁂𑀧𑀺 𑀧𑀭𑀺𑀓𑁆𑀔𑀸𑀭𑀪𑀽𑀢𑁄 𑀳𑁂𑀢𑀼𑀧𑀘𑁆𑀘𑀬𑁄 𑀬𑀼𑀢𑁆𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑁄 𑀇𑀫𑀲𑁆𑀲 𑀲𑀁𑀲𑀸𑀭𑀲𑁆𑀲 𑀲𑀳𑁂𑀢𑀼𑀧𑀘𑁆𑀘𑀬𑀢𑁆𑀢𑀁 𑀬𑀤𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑀁, ‘‘𑀓𑀣𑀁 𑀲𑀤𑁆𑀤𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀅𑀯𑀺𑀚𑁆𑀚𑀸𑀤𑀺𑀦𑀸 𑀳𑁂𑀢𑀼𑀧𑀘𑁆𑀘𑀬𑁂𑀦 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀲𑀁𑀲𑀸𑀭𑁄𑀢𑀺 𑀦𑀺𑀩𑁆𑀩𑀢𑁆𑀢𑁄𑀢𑀺 𑀪𑀕𑀯𑀢𑀸 𑀲𑀁𑀲𑀸𑀭𑀲𑁆𑀲 𑀲𑀳𑁂𑀢𑀼𑀧𑀘𑁆𑀘𑀬𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀤𑁆𑀤𑀳𑀺𑀢𑀩𑁆𑀩𑀁. 𑀅𑀯𑀺𑀚𑁆𑀚𑀸𑀤𑀬𑁄 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑁄 𑀳𑁄𑀢𑀼, ‘‘𑀓𑀢𑀫𑁄 𑀅𑀯𑀺𑀚𑁆𑀚𑀸𑀬 𑀳𑁂𑀢𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀢𑀺 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀬 𑀳𑁂𑀢𑀽’’𑀢𑀺 𑀯𑀼𑀢𑁆𑀢𑀁. ‘‘𑀓𑀢𑀫𑁄 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀓𑀢𑀫𑀸 𑀅𑀯𑀺𑀚𑁆𑀚𑀸 𑀓𑀢𑀫𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀢𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀼𑀭𑀺𑀫𑀺𑀓𑀸 𑀅𑀯𑀺𑀚𑁆𑀚𑀸 𑀧𑀘𑁆𑀙𑀺𑀫𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀢𑀽’’𑀢𑀺 𑀯𑀼𑀢𑁆𑀢𑀁. ‘‘𑀓𑀢𑀫𑀸 𑀧𑀼𑀭𑀺𑀫𑀺𑀓𑀸 𑀅𑀯𑀺𑀚𑁆𑀚𑀸 𑀓𑀢𑀫𑀸 𑀧𑀘𑁆𑀙𑀺𑀫𑀺𑀓𑀸 𑀅𑀯𑀺𑀚𑁆𑀚𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀳𑁂𑀢𑀼𑀪𑀽𑀢𑁄 𑀧𑀼𑀭𑀺𑀫𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀲𑀫𑀦𑀦𑁆𑀢𑀭𑁄𑀯 𑀓𑀺𑀁, 𑀉𑀤𑀸𑀳𑀼 𑀧𑀭𑀫𑁆𑀧𑀭𑀳𑁂𑀢𑀼𑀧𑀺 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀩𑀻𑀚𑀗𑁆𑀓𑀼𑀭𑁄 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀻𑀚𑀗𑁆𑀓𑀼𑀭𑁄𑀢𑀺 𑀩𑀻𑀚𑀸𑀦𑀁 𑀅𑀗𑁆𑀓𑀼𑀭𑁄𑀢𑀺 𑀩𑀻𑀚𑀗𑁆𑀓𑀼𑀭𑁄, 𑀩𑀻𑀚𑀸𑀦𑀁 𑀲𑀫𑀦𑀦𑁆𑀢𑀭𑀳𑁂𑀢𑀼𑀢𑀸𑀬 𑀅𑀗𑁆𑀓𑀼𑀭𑁄 𑀦𑀺𑀩𑁆𑀩𑀢𑁆𑀢𑀢𑀺 𑀯𑀺𑀬. 𑀬𑀢𑁆𑀣 𑀭𑀼𑀓𑁆𑀔𑀸𑀤𑀺𑀓𑁂 𑀬𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀺𑀁 𑀭𑀼𑀓𑁆𑀔𑀸𑀤𑀺𑀓𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀅𑀲𑁆𑀲 𑀨𑀮𑀲𑁆𑀲 𑀇𑀤𑀁 𑀩𑀻𑀚𑀁 𑀧𑀦 𑀧𑀭𑀫𑁆𑀧𑀭𑀳𑁂𑀢𑀼𑀢𑀸𑀬 𑀳𑁂𑀢𑀼𑀪𑀽𑀢𑀁 𑀪𑀯𑀢𑀺.

‘‘𑀩𑀻𑀚𑀁 𑀧𑀦 𑀏𑀓𑀁𑀬𑁂𑀯 𑀳𑁄𑀢𑀺, 𑀓𑀣𑀁 𑀤𑁆𑀯𑀺𑀥𑀸 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀤𑀼𑀯𑀺𑀥𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀲𑀫𑀦𑀦𑁆𑀢𑀭𑀓𑀸𑀮𑀧𑀭𑀫𑁆𑀧𑀭𑀓𑀸𑀮𑀪𑁂𑀤𑁂𑀦 𑀳𑁂𑀢𑀼𑀧𑀺 𑀤𑀼𑀯𑀺𑀥𑁄 𑀳𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀩𑀻𑀚𑀪𑀽𑀢𑁄 𑀳𑁂𑀢𑀼 𑀤𑀼𑀯𑀺𑀥𑁄 𑀬𑀣𑀸, 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀳𑁂𑀢𑀼𑀪𑀽𑀢𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀧𑀺 𑀲𑀫𑀦𑀦𑁆𑀢𑀭𑀳𑁂𑀢𑀼 𑀘 𑀧𑀭𑀫𑁆𑀧𑀭𑀳𑁂𑀢𑀼 𑀘𑀸𑀢𑀺 𑀓𑀸𑀮𑀪𑁂𑀤𑁂𑀦 𑀤𑀼𑀯𑀺𑀥𑁄 𑀪𑀯𑀢𑀺, 𑀲𑀫𑀦𑀦𑁆𑀢𑀭𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀲𑀫𑀦𑀦𑁆𑀢𑀭𑀲𑁆𑀲 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀲𑀫𑀦𑀦𑁆𑀢𑀭𑀳𑁂𑀢𑀼 𑀳𑁄𑀢𑀺. 𑀧𑀼𑀭𑀺𑀫𑀢𑀭𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀘𑁆𑀙𑀺𑀫𑀢𑀭𑀲𑁆𑀲 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀭𑀫𑁆𑀧𑀭𑀳𑁂𑀢𑀼 𑀳𑁄𑀢𑀺. 𑀇𑀢𑀺 𑀩𑀻𑀚𑀪𑀽𑀢𑁄 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀧𑀣𑀯𑀻𑀆𑀧𑀸𑀤𑀺𑀓𑁄 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄𑀢𑀺 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀬𑀣𑀸, 𑀏𑀯𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄𑀢𑀺 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

‘‘𑀏𑀢𑁆𑀢𑀓𑁂𑀦𑁂𑀯 𑀳𑁂𑀢𑀼𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁄 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀯𑀸 𑀧𑀦 𑀣𑀸𑀮𑀓𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘𑀬𑀣𑀸 𑀯𑀸 𑀧𑀦𑀸𑀢𑀺𑀆𑀤𑀺𑀦𑀸𑀧𑀺 𑀳𑁂𑀢𑀼𑀧𑀘𑁆𑀘𑀬𑀯𑀺𑀪𑀸𑀕𑀫𑁂𑀯 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀤𑀻𑀧𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀣𑀸𑀮𑀓𑀜𑁆𑀘 𑀯𑀝𑁆𑀝𑀺 𑀘 𑀢𑁂𑀮𑀜𑁆𑀘 𑀧𑀤𑀻𑀧𑀲𑁆𑀲 𑀲𑀪𑀸𑀯𑀳𑁂𑀢𑀼 𑀲𑀫𑀸𑀦𑀳𑁂𑀢𑀼 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀤𑀻𑀧𑀲𑁆𑀲 𑀧𑀘𑁆𑀘𑀬𑀪𑀽𑀢𑀫𑁆𑀧𑀺 𑀣𑀸𑀮𑀓𑀸𑀤𑀺𑀓𑀁 𑀲𑀪𑀸𑀯𑀳𑁂𑀢𑀼 𑀦 𑀳𑁄𑀢𑀻𑀢𑀺 𑀓𑀲𑁆𑀫𑀸 𑀲𑀤𑁆𑀤𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦 𑀳𑀺 𑀲𑀓𑁆𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀤𑀻𑀧𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀅𑀦𑀕𑁆𑀕𑀺𑀓𑀁 𑀅𑀕𑁆𑀕𑀺𑀭𑀳𑀺𑀢𑀁 𑀣𑀸𑀮𑀓𑀜𑁆𑀘 𑀯𑀝𑁆𑀝𑀺𑀜𑁆𑀘 𑀢𑁂𑀮𑀜𑁆𑀘 𑀤𑀻𑀧𑁂𑀢𑀼𑀁 𑀚𑀸𑀮𑁂𑀢𑀼𑀁 𑀳𑀺 𑀬𑀲𑁆𑀫𑀸 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀧𑀼𑀭𑀺𑀫𑁄 𑀧𑀤𑀻𑀧𑁄 𑀧𑀘𑁆𑀙𑀺𑀫𑀲𑁆𑀲 𑀧𑀤𑀻𑀧𑀲𑁆𑀲 𑀲𑀪𑀸𑀯𑀳𑁂𑀢𑀼 𑀳𑁄𑀢𑀺 𑀯𑀺𑀬, 𑀏𑀯𑀁 𑀣𑀸𑀮𑀓𑀸𑀤𑀺𑀓𑀁 𑀲𑀪𑀸𑀯𑀳𑁂𑀢𑀼 𑀦 𑀳𑁄𑀢𑀺. 𑀇𑀢𑀺 𑀏𑀯𑀁𑀧𑀓𑀸𑀭𑁄 𑀲𑀪𑀸𑀯𑁄 𑀲𑀫𑀸𑀦𑁄 𑀧𑀤𑀻𑀧𑁄 𑀳𑁂𑀢𑀼 𑀳𑁄𑀢𑀺 𑀬𑀣𑀸, 𑀧𑀭𑀪𑀸𑀯𑁄 𑀅𑀲𑀫𑀸𑀦𑁄 𑀣𑀸𑀮𑀓𑀸𑀤𑀺𑀓𑁄 𑀧𑀘𑁆𑀘𑀬𑁄 𑀳𑁄𑀢𑀺 𑀬𑀣𑀸 𑀘, 𑀢𑀣𑀸 𑀅𑀚𑁆𑀛𑀢𑁆𑀢𑀺𑀓𑁄 𑀲𑀪𑀸𑀯𑁄 𑀳𑁂𑀢𑀼 𑀳𑁄𑀢𑀺, 𑀩𑀸𑀳𑀺𑀭𑁄 𑀅𑀲𑀫𑀸𑀦𑁄 𑀧𑀘𑁆𑀘𑀬𑁄 𑀳𑁄𑀢𑀺. 𑀚𑀦𑀓𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀳𑁂𑀢𑀼 𑀳𑁄𑀢𑀺, 𑀧𑀭𑀺𑀕𑁆𑀕𑀸𑀳𑀓𑁄 𑀉𑀧𑀢𑁆𑀣𑀫𑁆𑀪𑀓𑁄 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀜𑁆𑀜𑁂𑀳𑀺 𑀨𑀮𑁂𑀳𑀺 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼 𑀳𑁄𑀢𑀺, 𑀲𑀩𑁆𑀩𑁂𑀳𑀺 𑀨𑀮𑁂𑀳𑀺 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀬𑁄𑀚𑁂𑀢𑁆𑀯𑀸 𑀧𑀤𑀻𑀧𑁄𑀧𑀫𑀸𑀬𑀧𑀺 𑀳𑁂𑀢𑀼𑀧𑀘𑁆𑀘𑀬𑀸𑀦𑀁 𑀧𑀸𑀓𑀝𑁄 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀳𑁂𑀢𑀼𑀧𑀘𑁆𑀘𑀬𑀧𑁆𑀧𑀪𑁂𑀤𑀁 𑀓𑀸𑀭𑀡𑀁 𑀧𑀭𑀺𑀓𑁆𑀔𑀸𑀭𑁄𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀓𑀸𑀭𑀡𑀪𑀸𑀯𑁄 𑀘 𑀨𑀮𑀸𑀧𑁂𑀓𑁆𑀔𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑁄 𑀓𑀸𑀭𑀡𑀪𑀸𑀯𑁄 𑀬𑁂𑀦𑀸𑀓𑀸𑀭𑁂𑀦 𑀳𑁄𑀢𑀺, 𑀓𑀢𑀫𑁄 𑀲𑁄 𑀓𑀸𑀭𑀡𑀪𑀸𑀯𑁄, 𑀓𑀢𑀫𑁄 𑀲𑁄 𑀆𑀓𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀘 ‘‘𑀬𑀁 𑀨𑀮𑀁 𑀬𑁂𑀦 𑀯𑀺𑀲𑁂𑀲𑁂𑀦 𑀳𑁄𑀢𑀺, 𑀓𑀢𑀫𑀁 𑀢𑀁 𑀨𑀮𑀁, 𑀓𑀢𑀫𑁄 𑀲𑁄 𑀯𑀺𑀲𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀘 ‘‘𑀓𑀸𑀭𑀡𑀨𑀮𑀸𑀦𑀁 𑀬𑁄 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺, 𑀓𑀢𑀫𑁄 𑀲𑁄 𑀲𑀫𑁆𑀩𑀦𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀘 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀯𑀼𑀧𑀘𑁆𑀙𑁂𑀤𑀢𑁆𑀣𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀫𑀦𑀼𑀲𑀦𑁆𑀥𑁆𑀬𑀢𑁆𑀣𑁄 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀤𑀸𑀦𑀺 𑀬𑀲𑁆𑀫𑀸 𑀓𑀸𑀭𑀡𑀁 ‘𑀧𑀭𑀺𑀓𑁆𑀔𑀸𑀭𑁄’𑀢𑀺 𑀯𑀼𑀢𑁆𑀢𑀁, 𑀓𑀸𑀭𑀡𑀪𑀸𑀯𑁄 𑀘 𑀨𑀮𑀸𑀧𑁂𑀓𑁆𑀔𑀸𑀬, 𑀢𑀲𑁆𑀫𑀸 𑀓𑀸𑀭𑀡𑀲𑁆𑀲 𑀬𑁄 𑀓𑀸𑀭𑀡𑀪𑀸𑀯𑁄 𑀬𑀣𑀸 𑀘 𑀲𑁄 𑀳𑁄𑀢𑀺, 𑀬𑀜𑁆𑀘 𑀨𑀮𑀁, 𑀬𑁄 𑀘 𑀢𑀲𑁆𑀲 𑀯𑀺𑀲𑁂𑀲𑁄, 𑀬𑁄 𑀘 𑀓𑀸𑀭𑀡𑀨𑀮𑀸𑀦𑀁 𑀲𑀫𑁆𑀩𑀦𑁆𑀥𑁄, 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑁂𑀢𑀼𑀁 ‘𑀅𑀯𑀼𑀧𑀘𑁆𑀙𑁂𑀤𑀢𑁆𑀣𑁄’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪𑁯) 𑀇𑀫𑀺𑀦𑀸 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀅𑀯𑀼𑀧𑀘𑁆𑀙𑀺𑀦𑁆𑀦𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀲𑀗𑁆𑀔𑀸𑀢𑀲𑁆𑀲 𑀓𑀸𑀭𑀡𑀲𑁆𑀲 𑀬𑁄 𑀅𑀦𑀼𑀧𑀘𑁆𑀙𑁂𑀤𑀢𑁆𑀣𑁄 𑀅𑀢𑁆𑀣𑀺, 𑀲𑁄 𑀅𑀦𑀼𑀧𑀘𑁆𑀙𑁂𑀤𑀢𑁆𑀣𑁄 𑀲𑀦𑁆𑀢𑀢𑀺𑀅𑀢𑁆𑀣𑁄 𑀳𑁄𑀢𑀺 𑀨𑀮𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸, 𑀬𑀜𑁆𑀘 𑀓𑀸𑀭𑀡𑀁 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀚𑀦𑀓𑀁 𑀉𑀧𑀢𑁆𑀣𑀫𑁆𑀪𑀓𑀁 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀲𑁄 𑀅𑀦𑀼𑀧𑀘𑁆𑀙𑀺𑀦𑁆𑀦𑁄 𑀏𑀯 𑀦𑀸𑀫 𑀳𑁄𑀢𑀻𑀢𑀺. 𑀬𑀜𑁆𑀘 𑀨𑀮𑀁 𑀅𑀜𑁆𑀜𑀲𑁆𑀲 𑀓𑀸𑀭𑀡𑀁 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀺𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑁂 𑀢𑀲𑁆𑀲 𑀘 𑀲𑀦𑁆𑀢𑀢𑀺𑀅𑀢𑁆𑀣𑁄 𑀳𑁄𑀢𑀺. 𑀬𑀁 𑀧𑀦 𑀨𑀮𑀁 𑀅𑀜𑁆𑀜𑀲𑁆𑀲 𑀨𑀮𑀲𑁆𑀲 𑀓𑀸𑀭𑀡𑀁 𑀅𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀉𑀧𑀘𑁆𑀙𑀺𑀦𑁆𑀦𑀁 𑀳𑁄𑀢𑀺, 𑀬𑀣𑀸 𑀢𑀁 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺. 𑀓𑀸𑀭𑀡𑀢𑁄 𑀦𑀺𑀩𑁆𑀩𑀢𑁆𑀢𑀲𑁆𑀲 𑀨𑀮𑀲𑁆𑀲 𑀬𑁄 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁄 𑀅𑀢𑁆𑀣𑀺, 𑀲𑁄 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁄 𑀨𑀮𑀢𑁆𑀣𑁄 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀸𑀦𑀁 𑀬𑁄 𑀧𑀝𑀺𑀲𑀦𑁆𑀥𑀺𑀅𑀢𑁆𑀣𑁄 𑀧𑀝𑀺𑀲𑀦𑁆𑀤𑀳𑀦𑀢𑁆𑀣𑁄 𑀅𑀢𑁆𑀣𑀺, 𑀲𑁄 𑀧𑀝𑀺𑀲𑀦𑁆𑀥𑀺𑀅𑀢𑁆𑀣𑁄 𑀧𑀼𑀦𑀩𑁆𑀪𑀯𑀢𑁆𑀣𑁄 𑀧𑀼𑀦𑀩𑁆𑀪𑀯𑀦𑀢𑁆𑀣𑁄 𑀳𑁄𑀢𑀺. 𑀓𑀺𑀮𑁂𑀲𑀸𑀦𑀁 𑀬𑁄 𑀧𑀮𑀺𑀩𑁄𑀥𑀢𑁆𑀣𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑀢𑁆𑀣𑁄 𑀅𑀢𑁆𑀣𑀺, 𑀲𑁄 𑀧𑀮𑀺𑀩𑁄𑀥𑀢𑁆𑀣𑁄 𑀧𑀭𑀺𑀬𑀼𑀝𑁆𑀞𑀸𑀦𑀢𑁆𑀣𑁄 𑀳𑁄𑀢𑀺. 𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀬𑁄 𑀅𑀲𑀫𑀼𑀕𑁆𑀖𑀸𑀢𑀢𑁆𑀣𑁄 𑀅𑀢𑁆𑀣𑀺, 𑀲𑁄 𑀅𑀲𑀫𑀼𑀕𑁆𑀖𑀸𑀢𑀢𑁆𑀣𑁄 𑀅𑀦𑀼𑀲𑀬𑀢𑁆𑀣𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀬𑁄 𑀅𑀲𑀫𑁆𑀧𑀝𑀺𑀯𑁂𑀥𑀢𑁆𑀣𑁄 𑀅𑀢𑁆𑀣𑀺, 𑀲𑁄 𑀅𑀲𑀫𑁆𑀧𑀝𑀺𑀯𑁂𑀥𑀢𑁆𑀣𑁄 𑀅𑀯𑀺𑀚𑁆𑀚𑀢𑁆𑀣𑁄 𑀳𑁄𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁄 𑀅𑀧𑀭𑀺𑀜𑁆𑀜𑀸𑀢𑀢𑁆𑀣𑁄 𑀅𑀢𑁆𑀣𑀺, 𑀲𑁄 𑀅𑀧𑀭𑀺𑀜𑁆𑀜𑀸𑀢𑀢𑁆𑀣𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀩𑀻𑀚𑀢𑁆𑀣𑁄 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀓𑀸𑀭𑀡𑀪𑀸𑀯𑁄 𑀘 𑀓𑀸𑀭𑀡𑀸𑀓𑀸𑀭𑁄 𑀘 𑀨𑀮𑀜𑁆𑀘 𑀨𑀮𑀯𑀺𑀲𑁂𑀲𑁄 𑀘 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀧𑀭𑀫𑁆𑀧𑀭𑀳𑁂𑀢𑀼𑀧𑀘𑁆𑀘𑀬𑀢𑁆𑀣𑁄, 𑀓𑀢𑀫𑁄 𑀘 𑀲𑀫𑁆𑀩𑀦𑁆𑀥𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀢𑁆𑀣 𑀅𑀯𑀼𑀧𑀘𑁆𑀙𑁂𑀤𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀬𑀲𑁆𑀲𑀁 𑀭𑀽𑀧𑀸𑀭𑀽𑀧𑀧𑀯𑀢𑁆𑀢𑀺𑀬𑀁 𑀅𑀯𑀼𑀧𑀘𑁆𑀙𑀺𑀦𑁆𑀦𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀧𑁆𑀧𑀪𑁂𑀤𑀲𑁆𑀲 𑀓𑀸𑀭𑀡𑀲𑁆𑀲 𑀬𑁄 𑀅𑀯𑀼𑀧𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀲𑁄 𑀅𑀯𑀼𑀧𑀘𑁆𑀙𑁂𑀤𑁄 𑀢𑀢𑁆𑀣 𑀢𑀺𑀲𑁆𑀲𑀁 𑀭𑀽𑀧𑀸𑀭𑀽𑀧𑀧𑀯𑀢𑁆𑀢𑀺𑀬𑀁 𑀲𑀦𑁆𑀢𑀢𑀺 𑀳𑁄𑀢𑀺. 𑀬𑀢𑁆𑀣 𑀬𑀲𑁆𑀲𑀁 𑀭𑀽𑀧𑀸𑀭𑀽𑀧𑀧𑀯𑀢𑁆𑀢𑀺𑀬𑀁 𑀬𑀸 𑀲𑀦𑁆𑀢𑀢𑀺 𑀅𑀢𑁆𑀣𑀺, 𑀲𑀸 𑀲𑀦𑁆𑀢𑀢𑀺𑀢𑀢𑁆𑀣 𑀭𑀽𑀧𑀸𑀭𑀽𑀧𑀧𑀯𑀢𑁆𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑁆𑀯𑀸 𑀧𑀭𑀫𑁆𑀧𑀭𑀳𑁂𑀢𑀼𑀆𑀤𑀺𑀓𑁄 𑀯𑀺𑀜𑁆𑀜𑀸𑀢𑀩𑁆𑀩𑁄.

𑀲𑀻𑀮𑀓𑁆𑀔𑀦𑁆𑀥𑁄𑀢𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑀓𑁆𑀔𑀦𑁆𑀥𑁄. 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀫𑀳𑀕𑁆𑀕𑀢𑀓𑁆𑀔𑀦𑁆𑀥𑀲𑁆𑀲, 𑀲𑀫𑀸𑀥𑀺𑀧𑀝𑁆𑀞𑀸𑀦𑁄 𑀳𑀺 𑀫𑀳𑀕𑁆𑀕𑀢𑀥𑀫𑁆𑀫𑁄. 𑀧𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 𑀫𑀕𑁆𑀕𑀨𑀮𑀧𑀜𑁆𑀜𑀸𑀧𑀥𑀸𑀦𑀓𑁆𑀔𑀦𑁆𑀥𑁄. 𑀲𑁄 𑀳𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀺𑀢𑁆𑀣𑀜𑁆𑀜𑀼𑀢𑀸𑀤𑀻𑀦𑀁 𑀅𑀢𑁆𑀣𑁄 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀯.

𑀲𑀪𑀸𑀯𑁄 𑀳𑁂𑀢𑀽𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, ‘‘𑀓𑀻𑀤𑀺𑀲𑁄 𑀲𑁄 𑀲𑀪𑀸𑀯𑁄 𑀳𑁂𑀢𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀯𑀸 𑀧𑀦 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀜𑁆𑀘 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀧𑀝𑀺𑀘𑁆𑀘 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀭𑀽𑀧𑁂 𑀧𑀝𑀺𑀘𑁆𑀘 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀘𑀓𑁆𑀔𑀸𑀤𑀻𑀲𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀧𑀘𑁆𑀘𑀬𑀢𑀸𑀬 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄, 𑀭𑀽𑀧𑀸𑀭𑀫𑁆𑀫𑀡𑀁 𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄, 𑀆𑀮𑁄𑀓𑁄 𑀲𑀦𑁆𑀦𑀺𑀲𑁆𑀲𑀬𑀢𑀸𑀬 𑀉𑀧𑀦𑀺𑀲𑁆𑀲𑀬𑀢𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁄 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀨𑀮𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀅𑀲𑀫𑀸𑀦𑀢𑁆𑀢𑀸 𑀲𑀪𑀸𑀯𑁄 𑀳𑁂𑀢𑀼 𑀦 𑀳𑁄𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀫𑀦𑀲𑀺𑀓𑀸𑀭𑁄. 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀧𑀦 𑀨𑀮𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀡𑀪𑀸𑀯𑁂𑀦 𑀲𑀫𑀸𑀦𑀢𑁆𑀢𑀸 𑀲𑀪𑀸𑀯𑁄 𑀳𑁂𑀢𑀼 𑀳𑁄𑀢𑀺 𑀬𑀣𑀸, 𑀏𑀯𑀁 𑀲𑀗𑁆𑀔𑀸𑀭𑀸 𑀦𑀸𑀫𑀓𑁆𑀔𑀦𑁆𑀥𑀪𑀸𑀯𑁂𑀦 𑀲𑀫𑀸𑀦𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀸 𑀲𑀪𑀸𑀯𑁄 𑀳𑁂𑀢𑀼 𑀳𑁄𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑁂𑀦 𑀏𑀓𑀲𑀦𑁆𑀢𑀢𑀺𑀯𑀲𑁂𑀦 𑀲𑀫𑀸𑀦𑀢𑁆𑀢𑀸 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀦𑁆𑀢𑀁 𑀲𑀪𑀸𑀯𑁄 𑀳𑁂𑀢𑀼 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 ‘‘𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀲𑁆𑀲𑀸’’𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀳𑁂𑀢𑀼, 𑀧𑀘𑁆𑀘𑀬𑁄 𑀚𑀦𑀓𑁄, 𑀉𑀧𑀢𑁆𑀣𑀫𑁆𑀪𑀓𑁄 𑀘 𑀬𑁄 𑀓𑁄𑀘𑀺 𑀉𑀧𑀦𑀺𑀲𑁆𑀲𑀬𑁄 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀩𑁆𑀩𑁄 𑀲𑁄 𑀳𑁂𑀢𑀼𑀧𑀘𑁆𑀘𑀬𑁄 𑀚𑀦𑀓𑀉𑀧𑀢𑁆𑀣𑀫𑁆𑀪𑀓𑁄 𑀚𑀦𑀺𑀢𑀩𑁆𑀩𑀼𑀧𑀢𑁆𑀣𑀫𑁆𑀪𑀺𑀬𑀲𑁆𑀲 𑀨𑀮𑀲𑁆𑀲 𑀧𑀭𑀺𑀓𑁆𑀔𑀭𑀡𑀢𑁄 𑀅𑀪𑀺𑀲𑀗𑁆𑀔𑀭𑀡𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫.

‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀳𑁂𑀢𑀼𑀧𑀘𑁆𑀘𑀬𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫𑀸𑀢𑀺 𑀓𑁂𑀦 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀓𑀸𑀭𑀡𑀪𑀽𑀢𑁂𑀦 𑀲𑀩𑁆𑀩𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 ‘‘𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁 𑀚𑀦𑀬𑀦𑁆𑀢𑀻’’𑀢𑀺 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 𑀯𑀘𑀦𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄, ‘‘𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁 𑀚𑀦𑀬𑀦𑁆𑀢𑀻’’𑀢𑀺 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑁂𑀳𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀏𑀢𑁆𑀢𑀓𑁄𑀯 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄 𑀬𑀼𑀜𑁆𑀚𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁, 𑀬𑁄 𑀬𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄 𑀬𑀼𑀜𑁆𑀚𑀺𑀢𑀩𑁆𑀩𑁄, 𑀲𑁄 𑀲𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄 𑀦𑀻𑀳𑀭𑀺𑀢𑁆𑀯𑀸 𑀬𑀼𑀢𑁆𑀢𑁄 𑀬𑀼𑀜𑁆𑀚𑀺𑀢𑀩𑁆𑀩𑁄𑀢𑀺.

𑀇𑀢𑀺 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.