𑁧𑁪. 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁪𑁬. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀯𑀺𑀪𑀗𑁆𑀕𑁂𑀦 𑀧𑀜𑁆𑀳𑀸𑀤𑀬𑁄 𑀲𑁄𑀥𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀝𑀺𑀦𑀺𑀤𑁆𑀤𑁂𑀲𑀢𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀏𑀓𑀢𑁆𑀢𑀢𑀸𑀬 𑀥𑀫𑁆𑀫𑀸, 𑀬𑁂𑀧𑀺 𑀘 𑀯𑁂𑀫𑀢𑁆𑀢𑀢𑀸𑀬 𑀦𑀺𑀤𑁆𑀤𑀺𑀝𑁆𑀞𑀸’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀬𑁂 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀣𑀸 𑀢𑁂 𑀥𑀸𑀭𑀬𑀺𑀢𑀩𑁆𑀩𑀸’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑁄.

‘‘𑀬𑁂 𑀥𑀫𑁆𑀫𑀸 𑀲𑀼𑀢𑁆𑀢𑁂𑀲𑀼 𑀏𑀓𑀢𑁆𑀢𑀢𑀸𑀬 𑀘 𑀯𑁂𑀫𑀢𑁆𑀢𑀢𑀸𑀬 𑀘 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀥𑀫𑁆𑀫𑀸 𑀓𑀺𑀁 𑀧𑀦 𑀢𑀣𑁂𑀯 𑀥𑀸𑀭𑀬𑀺𑀢𑀩𑁆𑀩𑀸, 𑀉𑀤𑀸𑀳𑀼 𑀅𑀜𑁆𑀜𑀣𑀸𑀧𑀺 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑁂 𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀬𑁂 𑀤𑀼𑀓𑁆𑀔𑀲𑀘𑁆𑀘𑀸𑀤𑀬𑁄 𑀥𑀫𑁆𑀫𑀸 𑀏𑀓𑀢𑁆𑀢𑀢𑀸𑀬 𑀘 𑀯𑁂𑀫𑀢𑁆𑀢𑀢𑀸𑀬 𑀘 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀤𑀼𑀓𑁆𑀔𑀲𑀘𑁆𑀘𑀸𑀤𑀬𑁄 𑀥𑀫𑁆𑀫𑀸 𑀢𑀣𑀸 𑀏𑀓𑀢𑁆𑀢𑀢𑀸𑀬 𑀘 𑀯𑁂𑀫𑀢𑁆𑀢𑀢𑀸𑀬 𑀘 𑀥𑀸𑀭𑀬𑀺𑀢𑀩𑁆𑀩𑀸 𑀉𑀧𑀮𑀓𑁆𑀔𑀺𑀢𑀩𑁆𑀩𑀸, 𑀦 𑀅𑀜𑁆𑀜𑀣𑀸 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸.

‘‘𑀲𑀸𑀫𑀜𑁆𑀜𑀓𑀧𑁆𑀧𑀦𑀸𑀬 𑀯𑁄𑀳𑀸𑀭𑀪𑀸𑀯𑁂𑀦 𑀅𑀦𑀯𑀝𑁆𑀞𑀸𑀦𑀢𑁄 𑀓𑀢𑀫𑀸 𑀏𑀓𑀢𑁆𑀢𑀢𑀸, 𑀓𑀢𑀫𑀸 𑀯𑁂𑀫𑀢𑁆𑀢𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑀼𑀓𑁆𑀔𑀦𑁆𑀢𑀺 𑀏𑀓𑀢𑁆𑀢𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀤𑀼𑀓𑁆𑀔𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀤𑀼𑀓𑁆𑀔𑀲𑀸𑀫𑀜𑁆𑀜𑀢𑀸 𑀤𑀼𑀓𑁆𑀔𑀲𑁆𑀲 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀚𑀸𑀢𑀺 𑀤𑀼𑀓𑁆𑀔𑀸, 𑀚𑀭𑀸 𑀤𑀼𑀓𑁆𑀔𑀸…𑀧𑁂... 𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔’’𑀦𑁆𑀢𑀺 𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀤𑀼𑀓𑁆𑀔𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀤𑀼𑀓𑁆𑀔𑀯𑀺𑀲𑁂𑀲𑀢𑀸 𑀤𑀼𑀓𑁆𑀔𑀲𑁆𑀲 𑀯𑁂𑀫𑀢𑁆𑀢𑀢𑀸 𑀦𑀸𑀫. 𑀢𑀢𑁆𑀣𑀸𑀢𑀺 𑀬𑁂 𑀤𑀼𑀓𑁆𑀔𑀸𑀤𑀬𑁄 𑀥𑀫𑁆𑀫𑀸 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸, 𑀢𑀢𑁆𑀣 𑀢𑁂𑀲𑀼 𑀤𑀼𑀓𑁆𑀔𑀸𑀤𑀻𑀲𑀼 𑀅𑀢𑁆𑀣𑁂𑀲𑀼.

𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 ‘‘𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸’’𑀢𑀺 𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀲𑀫𑀼𑀤𑀬𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀲𑀫𑀼𑀤𑀬𑀲𑀸𑀫𑀜𑁆𑀜𑀢𑀸 𑀲𑀫𑀼𑀤𑀬𑀲𑁆𑀲 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑁄 𑀲𑀫𑀼𑀤𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑀸𑀬𑀁 𑀢𑀡𑁆𑀳𑀸…𑀧𑁂… 𑀯𑀺𑀪𑀯𑀢𑀡𑁆𑀳𑀸’’𑀢𑀺 𑀯𑀺𑀲𑁂𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀲𑀫𑀼𑀤𑀬𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀲𑀫𑀼𑀤𑀬𑀯𑀺𑀲𑁂𑀲𑀢𑀸 𑀲𑀫𑀼𑀤𑀬𑀲𑁆𑀲 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 ‘‘𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄’’𑀢𑀺 𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀦𑀺𑀭𑁄𑀥𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀦𑀺𑀭𑁄𑀥𑀲𑀸𑀫𑀜𑁆𑀜𑀢𑀸 𑀦𑀺𑀭𑁄𑀥𑀲𑁆𑀲 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀦𑀺𑀭𑁄𑀥𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀦𑀺𑀭𑁄𑀥𑀯𑀺𑀲𑁂𑀲𑀢𑀸 𑀦𑀺𑀭𑁄𑀥𑀲𑁆𑀲 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺? 𑀧𑀝𑀺𑀧𑀤𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀲𑀸𑀫𑀜𑁆𑀜𑀢𑀸 𑀫𑀕𑁆𑀕𑀲𑁆𑀲 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀬𑀫𑁂𑀯 𑀅𑀭𑀺𑀬𑁄…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀯𑀺𑀲𑁂𑀲𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀯𑀺𑀲𑁂𑀲𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀢𑀸 𑀫𑀕𑁆𑀕𑀲𑁆𑀲 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀫𑀕𑁆𑀕𑁄𑀢𑀺 𑀦𑀺𑀭𑀬𑀕𑀸𑀫𑀺𑀫𑀕𑁆𑀕𑀸𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀲𑀸𑀫𑀜𑁆𑀜𑀫𑀕𑁆𑀕𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀲𑀸𑀫𑀜𑁆𑀜𑀫𑀕𑁆𑀕𑀢𑀸 𑀫𑀕𑁆𑀕𑀲𑁆𑀲 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑁄 𑀫𑀕𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀺𑀭𑀬𑀕𑀸𑀫𑀻 𑀫𑀕𑁆𑀕𑁄…𑀧𑁂… 𑀦𑀺𑀩𑁆𑀩𑀸𑀦𑀕𑀸𑀫𑀻 𑀫𑀕𑁆𑀕𑁄’’𑀢𑀺 𑀦𑀺𑀭𑀬𑀕𑀸𑀫𑀺𑀫𑀕𑁆𑀕𑀸𑀤𑀺𑀯𑀺𑀲𑁂𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀯𑀺𑀲𑁂𑀲𑀫𑀕𑁆𑀕𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀯𑀺𑀲𑁂𑀲𑀫𑀕𑁆𑀕𑀢𑀸 𑀫𑀕𑁆𑀕𑀲𑁆𑀲 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀦𑀺𑀭𑁄𑀥𑁄𑀢𑀺 𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑀸𑀤𑀺𑀯𑀺𑀲𑁂𑀲𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀲𑀸𑀫𑀜𑁆𑀜𑀦𑀺𑀭𑁄𑀥𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀲𑀸𑀫𑀜𑁆𑀜𑀦𑀺𑀭𑁄𑀥𑀢𑀸 𑀦𑀺𑀭𑁄𑀥𑀲𑁆𑀲 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑁄 𑀦𑀺𑀭𑁄𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄…𑀧𑁂… 𑀲𑀩𑁆𑀩𑀓𑀺𑀮𑁂𑀲𑀦𑀺𑀭𑁄𑀥𑁄’’𑀢𑀺 𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑀸𑀤𑀺𑀯𑀺𑀲𑁂𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀯𑀺𑀲𑁂𑀲𑀦𑀺𑀭𑁄𑀥𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀯𑀺𑀲𑁂𑀲𑀦𑀺𑀭𑁄𑀥𑀢𑀸 𑀦𑀺𑀭𑁄𑀥𑀲𑁆𑀲 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀭𑀽𑀧𑀦𑁆𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀸𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀲𑀸𑀫𑀜𑁆𑀜𑀭𑀽𑀧𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀲𑀸𑀫𑀜𑁆𑀜𑀭𑀽𑀧𑀢𑀸 𑀭𑀽𑀧𑀲𑁆𑀲 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑀁 𑀭𑀽𑀧’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁…𑀧𑁂… 𑀯𑀸𑀬𑁄𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀻’’𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀸𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀯𑀺𑀲𑁂𑀲𑀭𑀽𑀧𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀯𑀺𑀲𑁂𑀲𑀭𑀽𑀧𑀢𑀸 𑀭𑀽𑀧𑀲𑁆𑀲 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑁪𑁮. 𑀅𑀯𑀺𑀚𑁆𑀚𑀸𑀢𑀺 𑀤𑀼𑀓𑁆𑀔𑁂𑀅𑀜𑁆𑀜𑀸𑀡𑀸𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀅𑀯𑀺𑀚𑁆𑀚𑀸𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀅𑀯𑀺𑀚𑁆𑀚𑀸𑀲𑀸𑀫𑀜𑁆𑀜𑀢𑀸 𑀅𑀯𑀺𑀚𑁆𑀚𑀸𑀬 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀖𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺 𑀤𑀼𑀓𑁆𑀔𑁂𑀅𑀜𑁆𑀜𑀸𑀡𑀸𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀅𑀯𑀺𑀚𑁆𑀚𑀸𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀅𑀯𑀺𑀚𑁆𑀚𑀸𑀯𑀺𑀲𑁂𑀲𑀢𑀸 𑀅𑀯𑀺𑀚𑁆𑀚𑀸𑀬 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀯𑀺𑀚𑁆𑀚𑀸𑀢𑀺 𑀤𑀼𑀓𑁆𑀔𑁂𑀜𑀸𑀡𑀸𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀯𑀺𑀚𑁆𑀚𑀸𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀯𑀺𑀚𑁆𑀚𑀸𑀲𑀸𑀫𑀜𑁆𑀜𑀢𑀸 𑀯𑀺𑀚𑁆𑀚𑀸𑀬 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑀸 𑀯𑀺𑀚𑁆𑀚𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁…𑀧𑁂… 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀤𑀼𑀓𑁆𑀔𑁂𑀜𑀸𑀡𑀸𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀯𑀺𑀚𑁆𑀚𑀸𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀯𑀺𑀚𑁆𑀚𑀸𑀯𑀺𑀲𑁂𑀲𑀢𑀸 𑀯𑀺𑀚𑁆𑀚𑀸𑀬 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀲𑀫𑀸𑀧𑀢𑁆𑀢𑀻𑀢𑀺 𑀲𑀜𑁆𑀜𑀸𑀲𑀫𑀸𑀧𑀢𑁆𑀬𑀸𑀤𑀺𑀯𑀺𑀲𑁂𑀲𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀲𑀸𑀫𑀜𑁆𑀜𑀲𑀫𑀸𑀧𑀢𑁆𑀢𑀺𑀢𑀸 𑀯𑀼𑀢𑁆𑀢𑀸, 𑀲𑀸 𑀲𑀸𑀫𑀜𑁆𑀜𑀲𑀫𑀸𑀧𑀢𑁆𑀢𑀺𑀢𑀸 𑀲𑀫𑀸𑀧𑀢𑁆𑀢𑀺𑀬𑀸 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑀸 𑀲𑀫𑀸𑀧𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀅𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺…𑀧𑁂… 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻’’𑀢𑀺 𑀲𑀜𑁆𑀜𑀸𑀲𑀫𑀸𑀧𑀢𑁆𑀬𑀸𑀤𑀺𑀯𑀺𑀲𑁂𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀯𑀺𑀲𑁂𑀲𑀲𑀫𑀸𑀧𑀢𑁆𑀢𑀺𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀯𑀺𑀲𑁂𑀲𑀲𑀫𑀸𑀧𑀢𑁆𑀢𑀺𑀢𑀸 𑀲𑀫𑀸𑀧𑀢𑁆𑀢𑀺𑀬𑀸 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀛𑀸𑀬𑀻𑀢𑀺 𑀲𑁂𑀓𑁆𑀔𑀛𑀸𑀬𑀻𑀆𑀤𑀺𑀯𑀺𑀲𑁂𑀲𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀛𑀸𑀬𑀻𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀛𑀸𑀬𑀻𑀲𑀸𑀫𑀜𑁆𑀜𑀢𑀸 𑀛𑀸𑀬𑀺𑀦𑁄 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑁄 𑀛𑀸𑀬𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀢𑁆𑀣𑀺 𑀲𑁂𑀓𑁆𑀔𑁄 𑀛𑀸𑀬𑀻, 𑀅𑀢𑁆𑀣𑀺 𑀅𑀲𑁂𑀓𑁆𑀔𑁄 𑀛𑀸𑀬𑀻…𑀧𑁂… 𑀧𑀜𑁆𑀜𑀼𑀢𑁆𑀢𑀭𑁄 𑀛𑀸𑀬𑀻’’𑀢𑀺 𑀲𑁂𑀓𑁆𑀔𑀛𑀸𑀬𑀻𑀅𑀲𑁂𑀓𑁆𑀔𑀛𑀸𑀬𑀻𑀆𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀛𑀸𑀬𑀻𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀛𑀸𑀬𑀻𑀯𑀺𑀲𑁂𑀲𑀢𑀸 𑀛𑀸𑀬𑀺𑀦𑁄 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀲𑀫𑀸𑀥𑀻𑀢𑀺 𑀲𑀭𑀡𑀲𑀫𑀸𑀥𑁆𑀬𑀸𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀲𑀫𑀸𑀥𑀺𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀲𑀫𑀸𑀥𑀺𑀲𑀸𑀫𑀜𑁆𑀜𑀢𑀸 𑀲𑀫𑀸𑀥𑀺𑀦𑁄 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑁄 𑀲𑀫𑀸𑀥𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀭𑀡𑁄 𑀲𑀫𑀸𑀥𑀺, 𑀅𑀭𑀡𑁄 𑀲𑀫𑀸𑀥𑀺…𑀧𑁂… 𑀫𑀺𑀘𑁆𑀙𑀸𑀲𑀫𑀸𑀥𑀺, 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀲𑀭𑀡𑀲𑀫𑀸𑀥𑁆𑀬𑀸𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀲𑀫𑀸𑀥𑀺𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀲𑀫𑀸𑀥𑀺𑀯𑀺𑀲𑁂𑀲𑀢𑀸 𑀲𑀫𑀸𑀥𑀺𑀦𑁄 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀧𑀝𑀺𑀧𑀤𑀸𑀢𑀺 𑀆𑀕𑀸𑀴𑁆𑀳𑀧𑀝𑀺𑀧𑀤𑀸𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀧𑀝𑀺𑀧𑀤𑀸𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀅𑀬𑀁 𑀧𑀝𑀺𑀧𑀤𑀸𑀲𑀸𑀫𑀜𑁆𑀜𑀢𑀸 𑀧𑀝𑀺𑀧𑀤𑀸𑀬 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑀸 𑀧𑀝𑀺𑀧𑀤𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀕𑀸𑀴𑁆𑀳𑀧𑀝𑀺𑀧𑀤𑀸, 𑀦𑀺𑀚𑁆𑀛𑀸𑀫𑀧𑀝𑀺𑀧𑀤𑀸…𑀧𑁂… 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸’’𑀢𑀺 𑀆𑀕𑀸𑀴𑁆𑀳𑀧𑀝𑀺𑀧𑀤𑀸𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀧𑀝𑀺𑀧𑀤𑀸𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀧𑀝𑀺𑀧𑀤𑀸𑀯𑀺𑀲𑁂𑀲𑀢𑀸 𑀧𑀝𑀺𑀧𑀤𑀸𑀬 𑀯𑁂𑀫𑀢𑁆𑀢𑀢𑀸 𑀦𑀸𑀫.

𑀓𑀸𑀬𑁄𑀢𑀺 𑀦𑀸𑀫𑀓𑀸𑀬𑀸𑀤𑀺𑀯𑀺𑀲𑁂𑀲𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀓𑀸𑀬𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀓𑀸𑀬𑀲𑀸𑀫𑀜𑁆𑀜𑀢𑀸 𑀓𑀸𑀬𑀲𑁆𑀲 𑀏𑀓𑀢𑁆𑀢𑀢𑀸 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑁄 𑀓𑀸𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀸𑀫𑀓𑀸𑀬𑁄 𑀭𑀽𑀧𑀓𑀸𑀬𑁄…𑀧𑁂… 𑀅𑀬𑀁 𑀦𑀸𑀫𑀓𑀸𑀬𑁄’’𑀢𑀺 𑀦𑀸𑀫𑀓𑀸𑀬𑀸𑀤𑀺𑀯𑀺𑀲𑁂𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑀸 𑀓𑀸𑀬𑀯𑀺𑀲𑁂𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀅𑀬𑀁 𑀓𑀸𑀬𑀯𑀺𑀲𑁂𑀲𑀢𑀸 𑀓𑀸𑀬𑀲𑁆𑀲 𑀯𑁂𑀫𑀢𑁆𑀢𑀢𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀧𑀤𑀢𑁆𑀣𑀸𑀤𑀺𑀓𑁄 𑀯𑀺𑀲𑁂𑀲𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪𑁭) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑁄.

𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀤𑀼𑀓𑁆𑀔𑀲𑀫𑀼𑀤𑀬𑀸𑀤𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀏𑀓𑀢𑁆𑀢𑀢𑀸𑀤𑀺𑀮𑀓𑁆𑀔𑀡𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀬𑁄 𑀥𑀫𑁆𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑁂𑀦 ‘‘𑀤𑀼𑀓𑁆𑀔𑀦𑁆𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀚𑀸𑀢𑀺 𑀤𑀼𑀓𑁆𑀔𑀸, 𑀚𑀭𑀸 𑀤𑀼𑀓𑁆𑀔𑀸’’𑀢𑀺𑀆𑀤𑀺𑀯𑀘𑀦𑁂𑀦. 𑀬𑁄 𑀥𑀫𑁆𑀫𑁄𑀢𑀺 𑀬𑁄 𑀓𑁄𑀘𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑁆𑀬𑀸𑀤𑀺𑀯𑀺𑀲𑁂𑀲𑀥𑀫𑁆𑀫𑁄. 𑀬𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀢𑀢𑁄 𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀚𑀭𑀸𑀤𑀺𑀯𑀺𑀲𑁂𑀲𑀥𑀫𑁆𑀫𑀲𑁆𑀲. 𑀲𑀫𑀸𑀦𑀪𑀸𑀯𑁄𑀢𑀺 𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑀥𑀫𑁆𑀫𑁂𑀦 𑀚𑀭𑀸𑀤𑀺𑀯𑀺𑀲𑁂𑀲𑀥𑀫𑁆𑀫𑀲𑁆𑀲 𑀤𑀼𑀓𑁆𑀔𑀪𑀸𑀯𑁂𑀦 𑀲𑀫𑀸𑀦𑀪𑀸𑀯𑁄. 𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀚𑀭𑀸𑀤𑀺𑀯𑀺𑀲𑁂𑀲𑀥𑀫𑁆𑀫𑀲𑁆𑀲. 𑀏𑀓𑀢𑁆𑀢𑀢𑀸𑀬𑀸𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀢𑀸𑀤𑀺𑀲𑀫𑀸𑀦𑀢𑀸𑀬 𑀤𑀼𑀓𑁆𑀔𑀲𑀫𑀼𑀤𑀬𑀸𑀤𑀺𑀪𑀸𑀯𑀸𑀦𑀁 𑀏𑀓𑀻𑀪𑀸𑀯𑁂𑀦. 𑀏𑀓𑀻𑀪𑀯𑀢𑀻𑀢𑀺 𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑀪𑁂𑀤𑁂𑀦 𑀅𑀦𑁂𑀓𑁄𑀧𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺𑀆𑀤𑀺𑀦𑀸 𑀏𑀓𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸𑀬 𑀏𑀓𑀻𑀪𑀯𑀢𑀺. 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀺𑀮𑀓𑁆𑀔𑀡𑁄, 𑀢𑁂𑀦 𑀢𑁂𑀦 𑀯𑁂𑀫𑀢𑁆𑀢𑀁 𑀕𑀘𑁆𑀙𑀢𑀺. 𑀬𑀲𑁆𑀲 𑀚𑀸𑀢𑀺𑀆𑀤𑀺𑀥𑀫𑁆𑀫𑀲𑁆𑀲 𑀬𑁂𑀦 𑀬𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀧𑀭𑀺𑀧𑀸𑀘𑀦𑀸𑀤𑀺𑀲𑀪𑀸𑀯𑁂𑀦 𑀬𑁄 𑀚𑀸𑀢𑀺𑀆𑀤𑀺𑀥𑀫𑁆𑀫𑁄 𑀚𑀭𑀸𑀤𑀺𑀥𑀫𑁆𑀫𑁂𑀦 𑀯𑀺𑀮𑀓𑁆𑀔𑀡𑁄 𑀯𑀺𑀲𑀤𑀺𑀲𑁄 𑀳𑁄𑀢𑀺, 𑀢𑀲𑁆𑀲 𑀚𑀸𑀢𑀺𑀆𑀤𑀺𑀥𑀫𑁆𑀫𑀲𑁆𑀲 𑀢𑁂𑀦 𑀢𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀧𑀭𑀺𑀧𑀸𑀘𑀦𑀸𑀤𑀺𑀲𑀪𑀸𑀯𑁂𑀦 𑀲𑁄 𑀚𑀸𑀢𑀺𑀆𑀤𑀺𑀥𑀫𑁆𑀫𑁄 𑀚𑀭𑀸𑀤𑀺𑀥𑀫𑁆𑀫𑁂𑀦 𑀯𑁂𑀫𑀢𑁆𑀢𑀢𑀁 𑀯𑀺𑀲𑀤𑀺𑀲𑀢𑁆𑀢𑀁 𑀕𑀘𑁆𑀙𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀸𑀤𑀺𑀪𑀸𑀯𑁂𑀦 𑀲𑀫𑀸𑀦𑁄𑀧𑀺 𑀚𑀸𑀢𑀺𑀆𑀤𑀺𑀥𑀫𑁆𑀫𑁄 𑀚𑀭𑀸𑀤𑀺𑀥𑀫𑁆𑀫𑀲𑁆𑀲 𑀯𑀺𑀲𑀺𑀝𑁆𑀞𑀢𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀤𑀼𑀓𑁆𑀔𑀲𑀫𑀼𑀤𑀬𑀸𑀤𑀺𑀥𑀫𑁆𑀫𑀲𑁆𑀲 𑀏𑀓𑀢𑁆𑀢𑀯𑁂𑀫𑀢𑁆𑀢𑀢𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀢𑀸𑀬 𑀏𑀓𑀢𑁆𑀢𑀯𑁂𑀫𑀢𑁆𑀢𑀢𑀸𑀬 𑀓𑀢𑁆𑀣 𑀧𑀼𑀘𑁆𑀙𑀺𑀢𑁂 𑀲𑀢𑀺 𑀅𑀥𑀺𑀝𑁆𑀞𑀸𑀦𑀁 𑀯𑀻𑀫𑀁𑀲𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀲𑀼𑀢𑁆𑀢𑀸𑀤𑀺𑀓𑁂 𑀧𑀼𑀘𑁆𑀙𑀺𑀢𑁂 𑀲𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀲𑀼𑀢𑁆𑀢𑁂 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀼𑀢𑁆𑀢𑁂 𑀯𑀸 𑀧𑀼𑀘𑁆𑀙𑀺𑀢𑁂, 𑀯𑁂𑀬𑁆𑀬𑀸𑀓𑀭𑀡𑁂 𑀯𑀸 𑀧𑀼𑀘𑁆𑀙𑀺𑀢𑁂, 𑀕𑀸𑀣𑀸𑀬𑀁 𑀯𑀸 𑀧𑀼𑀘𑁆𑀙𑀺𑀢𑀸𑀬𑀁 𑀲𑀢𑀺 𑀅𑀥𑀺𑀝𑁆𑀞𑀸𑀦𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘𑀓𑀺𑀁 𑀯𑀻𑀫𑀁𑀲𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑁂𑀬𑁆𑀬 ‘‘𑀏𑀓𑀢𑁆𑀢𑀢𑀸𑀬 𑀧𑀼𑀘𑁆𑀙𑀢𑀺 𑀓𑀺𑀁, 𑀉𑀤𑀸𑀳𑀼 𑀯𑁂𑀫𑀢𑁆𑀢𑀢𑀸𑀬 𑀧𑀼𑀘𑁆𑀙𑀢𑀺 𑀓𑀺’’𑀦𑁆𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘𑀇𑀤𑀸𑀦𑀺 𑀢𑀸𑀯 𑀏𑀓𑀢𑁆𑀢𑀯𑁂𑀫𑀢𑁆𑀢𑀢𑀸𑀯𑀺𑀲𑀬𑁂 𑀦𑀺𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘𑀲𑀼𑀢𑁆𑀢𑁂 𑀯𑀸 𑀯𑁂𑀬𑁆𑀬𑀸𑀓𑀭𑀡𑁂 𑀯𑀸’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪𑁮) 𑀯𑀼𑀢𑁆𑀢𑀁. ‘‘𑀓𑀣𑀁 𑀧𑀼𑀘𑁆𑀙𑀺𑀢𑀁, 𑀓𑀣𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀤𑀺 𑀏𑀓𑀢𑁆𑀢𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑁂𑀦𑀸𑀳𑀸’’𑀢𑀺𑀆𑀤𑁆𑀬𑀸𑀦𑀼𑀲𑀦𑁆𑀥𑁆𑀬𑀸𑀤𑀺𑀓𑁄 𑀘 ‘‘𑀦𑀺𑀬𑀼𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄’’𑀢𑀺 𑀇𑀫𑀲𑁆𑀲 𑀅𑀦𑀼𑀲𑀦𑁆𑀥𑁆𑀬𑀸𑀤𑀺𑀓𑁄 𑀘 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.