𑁧𑁩. 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁪𑁫. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀑𑀢𑀭𑀡𑀳𑀸𑀭𑀯𑀺𑀪𑀗𑁆𑀕𑁂𑀦 𑀑𑀢𑀭𑁂𑀢𑀩𑁆𑀩𑀸 𑀲𑀼𑀢𑁆𑀢𑀢𑁆𑀣𑀸 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑁄𑀥𑀦𑁄 𑀳𑀸𑀭𑁄 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀬𑀣𑀸 𑀆𑀬𑀲𑁆𑀫𑀸 𑀅𑀚𑀺𑀢𑁄’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑁄. ‘‘𑀓𑀣𑀁 𑀢𑀢𑁆𑀣 𑀧𑀜𑁆𑀳𑁂 𑀲𑁄𑀥𑀦𑁄 𑀳𑀸𑀭𑁄 𑀯𑀺𑀜𑁆𑀜𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀆𑀬𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀸𑀭𑀸𑀬𑀦𑁂 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄 𑀯𑀺𑀜𑁆𑀜𑀸𑀢𑀩𑁆𑀩𑁄𑀢𑀺. ‘‘𑀦𑀺𑀬𑀫𑁂𑀢𑁆𑀯𑀸 𑀯𑀺𑀪𑀚𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀦𑀺𑀬𑀫𑁂𑀢𑁆𑀯𑀸 𑀯𑀺𑀪𑀚𑀺𑀢𑀼𑀁 ‘‘𑀓𑁂𑀦𑀲𑁆𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀸𑀣𑀸𑀢𑁆𑀣𑁄 𑀯𑀼𑀢𑁆𑀢𑁄𑀯.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺. 𑁋

𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀕𑀸𑀣𑀸𑀬𑀜𑁆𑀘 𑁋

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, (𑀅𑀚𑀺𑀢𑀸𑀢𑀺 𑀪𑀕𑀯𑀸,)

𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺. 𑁋

𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀕𑀸𑀣𑀸𑀬𑀜𑁆𑀘𑀸𑀢𑀺 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀕𑀸𑀣𑀸𑀲𑀼 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀪𑀕𑀯𑀸 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀤𑀁 𑀢𑀤𑀢𑁆𑀣𑁂 𑀅𑀜𑁆𑀜𑀸𑀡𑀲𑀁𑀲𑀬𑀸𑀤𑀺𑀫𑀮𑀸𑀦𑀁 𑀅𑀧𑀦𑀬𑀦𑁂𑀦 𑀲𑁄𑀥𑁂𑀢𑀺. 𑀢𑀤𑀢𑁆𑀣𑁂 𑀳𑀺 𑀯𑀺𑀲𑁆𑀲𑀚𑁆𑀚𑀺𑀢𑁂 𑀅𑀜𑁆𑀜𑀸𑀡𑀲𑀁𑀲𑀬𑀸𑀤𑀻𑀦𑀁 𑀅𑀪𑀸𑀯𑀢𑁄 𑀅𑀢𑁆𑀣𑁄 𑀲𑁄𑀥𑀺𑀢𑁄 𑀦𑀸𑀫, 𑀅𑀢𑁆𑀣𑁂 𑀘 𑀲𑁄𑀥𑀺𑀢𑁂 𑀧𑀤𑀫𑁆𑀧𑀺 𑀲𑁄𑀥𑀺𑀢𑀁𑀬𑁂𑀯. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀢𑀤𑀢𑁆𑀣𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀢𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪𑁫), 𑀝𑀻𑀓𑀸𑀬𑀜𑁆𑀘 ‘‘𑀢𑀩𑁆𑀩𑀺𑀲𑀬𑀅𑀜𑁆𑀜𑀸𑀡𑀲𑀁𑀲𑀬𑀸𑀤𑀺𑀫𑀮𑀸𑀧𑀦𑀬𑀦𑁂𑀦 𑀲𑁄𑀥𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑁄 𑀘 𑀆𑀭𑀫𑁆𑀪𑀦𑁆𑀢𑀺 𑀧𑀼𑀘𑁆𑀙𑀺𑀢𑀼𑀁 𑀆𑀭𑀪𑀺𑀢𑀩𑁆𑀩𑀁 𑀲𑀩𑁆𑀩𑀕𑀸𑀣𑀸𑀧𑀤𑀁, 𑀕𑀸𑀣𑀸𑀢𑁆𑀣𑀁 𑀯𑀸, 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀲𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀪𑀕𑀯𑀸 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀏𑀢𑁆𑀢𑀓𑁂𑀦𑁂𑀯 𑀧𑀤𑁂𑀦 𑀲𑁄𑀥𑁂𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲 𑀦𑀬𑁄.

‘‘𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀧𑀤𑁂𑀦 𑀪𑀕𑀯𑀢𑀸 𑀆𑀭𑀫𑁆𑀪𑁄 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄 𑀲𑀼𑀤𑁆𑀥𑁄 𑀲𑁄𑀥𑀺𑀢𑁄 𑀳𑁄𑀢𑀺. 𑀲𑁂𑀲𑀕𑀸𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑀢𑁆𑀣 𑀧𑀜𑁆𑀳𑁂 𑀏𑀯𑀁 𑀦𑀺𑀭𑀯𑀲𑁂𑀲𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀆𑀭𑀫𑁆𑀪𑁄 𑀲𑀼𑀤𑁆𑀥𑁄 𑀲𑁄𑀥𑀺𑀢𑁄 𑀪𑀯𑀢𑀺, 𑀲𑁄 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀲𑁄𑀥𑀺𑀢𑁄 𑀪𑀯𑀢𑀺. 𑀬𑀢𑁆𑀣 𑀧𑀜𑁆𑀳𑁂 𑀏𑀯𑀁 𑀦𑀺𑀭𑀯𑀲𑁂𑀲𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀆𑀭𑀫𑁆𑀪𑁄 𑀬𑀸𑀯 𑀅𑀲𑀼𑀤𑁆𑀥𑁄 𑀅𑀲𑁄𑀥𑀺𑀢𑁄 𑀪𑀯𑀢𑀺, 𑀢𑀸𑀯 𑀲𑁄 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀲𑁄𑀥𑀺𑀢𑁄 𑀦 𑀪𑀯𑀢𑀻𑀢𑀺 𑀬𑁄𑀚𑀦𑀸. ‘‘𑀢𑁂𑀦𑀸𑀳𑀸’’𑀢𑀺𑀆𑀤𑁆𑀬𑀸𑀦𑀼𑀲𑀦𑁆𑀥𑁆𑀬𑀸𑀤𑁆𑀬𑀢𑁆𑀣𑁄 𑀘𑁂𑀯 ‘‘𑀦𑀺𑀬𑀼𑀢𑁆𑀢𑁄 𑀲𑁄𑀥𑀦𑁄 𑀳𑀸𑀭𑁄’’𑀢𑀺 𑀅𑀦𑀼𑀲𑀦𑁆𑀥𑁆𑀬𑀸𑀤𑁆𑀬𑀢𑁆𑀣𑁄 𑀘 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.