𑀭𑀽𑀧𑀸𑀯𑀘𑀭𑀓𑀼𑀲𑀮𑀁

𑀘𑀢𑀼𑀓𑁆𑀓𑀦𑀬𑁄

𑀧𑀞𑀫𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁦. 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑁄, ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 (𑀫. 𑀦𑀺. 𑁨.𑁨𑁪𑁮; 𑁩.𑁩𑁧𑁨; 𑀥. 𑀲. 𑁨𑁪𑁮; 𑀧𑀝𑀺. 𑀫. 𑁧.𑁨𑁦𑁯), 𑀭𑀽𑀧𑀭𑀸𑀕𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁩𑁬𑁩) 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀬𑁄𑀕𑀲𑀫𑁆𑀧𑀸𑀤𑀺𑀢𑀲𑁆𑀲 𑀭𑀽𑀧𑀚𑁆𑀛𑀸𑀦𑀲𑁆𑀲 𑀭𑀽𑀧𑀪𑀯𑀸𑀢𑀺𑀓𑁆𑀓𑀫𑀲𑁆𑀲𑀧𑀺 𑀉𑀧𑀸𑀬𑀪𑀸𑀯𑀢𑁄 𑀬𑀣𑀸 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀏𑀯 𑀫𑀕𑁆𑀕𑁄𑀢𑀺 𑀅𑀬𑀁 𑀦𑀺𑀬𑀫𑁄 𑀦 𑀬𑀼𑀚𑁆𑀚𑀢𑀺, 𑀏𑀯𑀁 𑀧𑀘𑁆𑀘𑀬𑀦𑁆𑀢𑀭𑀯𑀺𑀓𑀮𑀢𑀸𑀤𑀻𑀳𑀺 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀅𑀦𑀪𑀺𑀦𑀺𑀧𑁆𑀨𑀸𑀤𑀓𑀲𑁆𑀲𑀧𑀺 𑀅𑀢𑁆𑀣𑀺𑀪𑀸𑀯𑀢𑁄 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑁄 𑀏𑀯𑀸𑀢𑀺 𑀅𑀬𑀫𑁆𑀧𑀺 𑀦𑀺𑀬𑀫𑁄 𑀦 𑀬𑀼𑀚𑁆𑀚𑀢𑀺. 𑀏𑀯𑀜𑁆𑀘 𑀲𑀢𑀺 𑀬𑀤𑁂𑀯 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀦𑀺𑀧𑁆𑀨𑀸𑀤𑀓𑀁, 𑀢𑀲𑁆𑀲𑁂𑀯 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀭𑀽𑀧𑀸𑀯𑀘𑀭𑀓𑀼𑀲𑀮𑀪𑀸𑀯𑁄, 𑀦 𑀅𑀦𑀪𑀺𑀦𑀺𑀧𑁆𑀨𑀸𑀤𑀓𑀲𑁆𑀲𑀸𑀢𑀺 𑀅𑀬𑀫𑀢𑁆𑀣𑁄 𑀆𑀧𑀦𑁆𑀦𑁄𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀦 𑀲𑀩𑁆𑀩𑀲𑁆𑀲 𑀓𑀼𑀲𑀮𑀚𑁆𑀛𑀸𑀦𑀲𑁆𑀲𑀸𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀸𑀫𑀜𑁆𑀜𑀲𑀤𑁆𑀤𑁄𑀧𑀺 𑀅𑀥𑀺𑀓𑀸𑀭𑀯𑀲𑁂𑀦 𑀯𑀺𑀲𑁂𑀲𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀻𑀢𑀺 ‘‘𑀓𑀼𑀲𑀮𑀚𑁆𑀛𑀸𑀦𑀲𑁆𑀲 𑀫𑀕𑁆𑀕𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁.

𑀭𑀽𑀧𑀽𑀧𑀧𑀢𑁆𑀢𑀺𑀚𑀦𑀓𑀲𑀪𑀸𑀯𑁄 𑀭𑀽𑀧𑀪𑀯𑀯𑀺𑀧𑀘𑁆𑀘𑀦𑀲𑀪𑀸𑀯𑁄𑀢𑀺 𑀢𑀲𑁆𑀲𑀧𑀺 𑀯𑀺𑀧𑀸𑀓𑀥𑀫𑁆𑀫𑀪𑀸𑀯𑁂 𑀲𑀢𑀺𑀧𑀺 𑀲𑀩𑁆𑀩𑀓𑀼𑀲𑀮𑀸𑀓𑀼𑀲𑀮𑀲𑀸𑀥𑀸𑀭𑀡𑀁 𑀯𑀺𑀧𑀸𑀓𑀥𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑀁 ‘‘𑀯𑀺𑀧𑀸𑀓𑀥𑀫𑁆𑀫𑀪𑀸𑀯𑁄 𑀯𑀺𑀬𑀸’’𑀢𑀺 𑀉𑀤𑀸𑀳𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀲𑀸𑀫𑀜𑁆𑀜𑀫𑁆𑀧𑀺 𑀳𑀺 𑀯𑀺𑀲𑁂𑀲𑀢𑁄 𑀪𑀺𑀦𑁆𑀦𑀁 𑀓𑀢𑁆𑀯𑀸 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀩𑁆𑀩𑀲𑀫𑀸𑀦𑁄𑀢𑀺 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀦𑀺𑀧𑁆𑀨𑀸𑀤𑀓𑀲𑁆𑀲 𑀧𑀘𑁆𑀘𑀬𑀦𑁆𑀢𑀭𑀯𑀺𑀓𑀮𑀢𑀸𑀤𑀻𑀳𑀺 𑀅𑀦𑀺𑀧𑁆𑀨𑀸𑀤𑀓𑀲𑁆𑀲 𑀘 𑀲𑀩𑁆𑀩𑀲𑁆𑀲 𑀬𑀣𑀸𑀥𑀺𑀕𑀢𑀲𑁆𑀲 𑀛𑀸𑀦𑀲𑁆𑀲 𑀲𑀸𑀥𑀸𑀭𑀡𑁄. 𑀏𑀢𑁂𑀦 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀲𑁆𑀲 𑀧𑀭𑀺𑀕𑁆𑀕𑀳𑀺𑀢𑀢𑀁 𑀤𑀲𑁆𑀲𑁂𑀢𑀺. ‘‘𑀇𑀢𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸𑀧𑀺 𑀲𑀚𑀸𑀢𑀺𑀬𑀸 𑀲𑀸𑀥𑀸𑀭𑀡𑁄 𑀅𑀜𑁆𑀜𑀚𑀸𑀢𑀺𑀯𑀺𑀦𑀺𑀯𑀢𑁆𑀢𑀺𑀬𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀇𑀫𑀲𑁆𑀲 𑀛𑀸𑀦𑀲𑁆𑀲 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀉𑀧𑀸𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑁂 𑀤𑁆𑀯𑁂 𑀲𑀤𑁆𑀥𑀸 𑀳𑀺𑀭𑀻 𑀘. 𑀬𑀤𑀺 𑀧𑀝𑀺𑀧𑀤𑀸𑀬 𑀲𑀸𑀥𑁂𑀢𑀩𑁆𑀩𑀢𑁄 𑀧𑀼𑀕𑁆𑀕𑀮𑀧𑀼𑀩𑁆𑀩𑀗𑁆𑀕𑀫𑀸𑀬 𑀤𑁂𑀲𑀦𑀸𑀬 𑀪𑀸𑀯𑁂𑀦𑁆𑀢𑁂𑀦 𑀲𑀫𑀬𑀯𑀯𑀢𑁆𑀣𑀸𑀦𑀁 𑀓𑀢𑀁. 𑀧𑀝𑀺𑀧𑀤𑀸𑀭𑀳𑀺𑀢𑁂𑀲𑀼 𑀓𑀣𑀦𑁆𑀢𑀺 𑀆𑀳 ‘‘𑀓𑁂𑀲𑀜𑁆𑀘𑀻’’𑀢𑀺𑀆𑀤𑀺. 𑀢𑀢𑁆𑀣 𑀓𑁂𑀲𑀜𑁆𑀘𑀻𑀢𑀺 𑀲𑀫𑀣𑀪𑀸𑀯𑀦𑀸𑀬 𑀓𑀢𑀸𑀥𑀺𑀓𑀸𑀭𑀸𑀦𑀁. 𑀢𑁂𑀲𑀜𑁆𑀳𑀺 𑀫𑀕𑁆𑀕𑀸𑀥𑀺𑀕𑀫𑀦𑀢𑁄 𑀧𑀼𑀩𑁆𑀩𑁂 𑀅𑀦𑀥𑀺𑀕𑀢𑀚𑁆𑀛𑀸𑀦𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀯𑀺𑀬 𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀢𑀸𑀦𑀺 𑀲𑀫𑀺𑀚𑁆𑀛𑀦𑁆𑀢𑀺.

𑀅𑀜𑁆𑀜𑀸𑀦𑀻𑀢𑀺 𑀅𑀭𑀺𑀬𑀫𑀕𑁆𑀕𑀲𑀺𑀤𑁆𑀥𑀺𑀢𑁄 𑀅𑀜𑁆𑀜𑀸𑀦𑀺. 𑀢𑁂𑀲𑀼𑀧𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀲𑀺𑀤𑁆𑀥𑀢𑁆𑀢𑀸 𑀧𑀝𑀺𑀧𑀤𑀸𑀭𑀳𑀺𑀢𑁂𑀲𑀼𑀧𑀺. 𑀦𑀦𑀼 𑀘 𑀅𑀭𑀺𑀬𑀫𑀕𑁆𑀕𑀲𑀺𑀤𑁆𑀥𑀲𑁆𑀲𑀧𑀺 𑀆𑀕𑀫𑀦𑀯𑀲𑁂𑀦 𑀧𑀝𑀺𑀧𑀤𑀸 𑀉𑀧𑀮𑀩𑁆𑀪𑀢𑀺𑀬𑁂𑀯. 𑀇𑀢𑀭𑀣𑀸 ‘‘𑀦 𑀓𑀸𑀫𑀸𑀯𑀘𑀭𑀁 𑀯𑀺𑀬 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀉𑀧𑁆𑀧𑀚𑁆𑀚𑀢𑀻’’𑀢𑀺, ‘‘𑀩𑀳𑀼𑀢𑀭𑀁 𑀮𑁄𑀓𑀺𑀬𑀚𑁆𑀛𑀸𑀦𑀫𑁆𑀧𑀺 𑀦 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀇𑀚𑁆𑀛𑀢𑀻’’𑀢𑀺 𑀘 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺? 𑀦, 𑀬𑁂𑀪𑀼𑀬𑁆𑀬𑁂𑀦 𑀕𑀳𑀡𑀢𑁄 𑀧𑀼𑀕𑁆𑀕𑀮𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑁆𑀢𑀸 𑀘. 𑀅𑀭𑀺𑀬𑀫𑀕𑁆𑀕𑀲𑀫𑀺𑀚𑁆𑀛𑀦𑀓𑀜𑁆𑀳𑀺 𑀛𑀸𑀦𑀁 𑀓𑀲𑁆𑀲𑀘𑀺𑀤𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀇𑀢𑀭𑀁 𑀩𑀳𑀼𑀢𑀭𑀁 𑀮𑁄𑀓𑀺𑀬𑀚𑁆𑀛𑀸𑀦𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀭𑀺𑀬𑀲𑁆𑀲 𑀘 𑀅𑀓𑀢𑀸𑀥𑀺𑀓𑀸𑀭𑀲𑁆𑀲 𑀦 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀲𑀺𑀚𑁆𑀛𑀢𑀻𑀢𑀺 𑀢𑁂𑀲𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀭𑀺𑀬𑀫𑀕𑁆𑀕𑀲𑀺𑀤𑁆𑀥𑀲𑁆𑀲𑀧𑀺 𑀛𑀸𑀦𑀲𑁆𑀲 𑀯𑀺𑀧𑀸𑀓𑀸𑀦𑀁 𑀯𑀺𑀬 𑀓𑀼𑀲𑀮𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀤𑀺𑀲𑀢𑁆𑀢𑀸𑀪𑀸𑀯𑀢𑁄 𑀅𑀢𑀩𑁆𑀩𑀺𑀧𑀸𑀓𑀢𑁆𑀢𑀸 𑀘 𑀦 𑀫𑀕𑁆𑀕𑀸𑀕𑀫𑀦𑀯𑀲𑁂𑀦 𑀧𑀝𑀺𑀧𑀤𑀸 𑀬𑀼𑀚𑁆𑀚𑀢𑀺, 𑀏𑀯𑀫𑀲𑁆𑀲 𑀧𑀝𑀺𑀧𑀤𑀸𑀯𑀺𑀭𑀳𑁄 𑀲𑀺𑀤𑁆𑀥𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀼𑀤𑁆𑀥𑀺𑀓𑀦𑀯𑀓𑀤𑁂𑀲𑀦𑀸𑀧𑀺 𑀲𑀼𑀝𑁆𑀞𑀼 𑀦𑀻𑀢𑀸 𑀳𑁄𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 𑀮𑁄𑀓𑀼𑀢𑁆𑀢𑀭𑀓𑀣𑀸𑀬𑀁 ‘‘𑀮𑁄𑀓𑀺𑀬𑀚𑁆𑀛𑀸𑀦𑀫𑁆𑀧𑀻’’𑀢𑀺𑀆𑀤𑀺 (𑀥. 𑀲. 𑀫𑀽𑀮𑀝𑀻. 𑁨𑁭𑁭).

𑀯𑀝𑁆𑀝𑀸𑀲𑀬𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀪𑀽𑀢𑀸𑀬 𑀢𑀡𑁆𑀳𑀸𑀬 𑀢𑀦𑀼𑀓𑀭𑀡𑀯𑀲𑁂𑀦 𑀯𑀺𑀯𑀝𑁆𑀝𑀸𑀲𑀬𑀲𑁆𑀲 𑀯𑀟𑁆𑀠𑀦𑀦𑁆𑀢𑀺 𑀆𑀳 ‘‘𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁄𑀥𑀦𑁂𑀦 𑀆𑀲𑀬𑀧𑁄𑀲𑀦’’𑀦𑁆𑀢𑀺. 𑀆𑀲𑀬𑀧𑁄𑀲𑀦𑀦𑁆𑀢𑀺 𑀘 𑀛𑀸𑀦𑀪𑀸𑀯𑀦𑀸𑀬 𑀧𑀘𑁆𑀘𑀬𑀪𑀽𑀢𑀸 𑀧𑀼𑀩𑁆𑀩𑀬𑁄𑀕𑀸𑀤𑀺𑀯𑀲𑁂𑀦 𑀲𑀺𑀤𑁆𑀥𑀸 𑀅𑀚𑁆𑀛𑀸𑀲𑀬𑀲𑀫𑁆𑀧𑀤𑀸. 𑀲𑀸 𑀧𑀦 𑀢𑀡𑁆𑀳𑀼𑀧𑀢𑀸𑀧𑀯𑀺𑀕𑀫𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁄𑀥𑀦𑁂𑀦𑀸’’𑀢𑀺.

𑀣𑀺𑀦𑀫𑀺𑀤𑁆𑀥𑀸𑀤𑀻𑀦𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀦𑀁. 𑀧𑀳𑀸𑀦𑀦𑁆𑀢𑀺 𑀧𑀳𑀸𑀬𑀓𑀁.

𑀢𑀁𑀲𑀤𑀺𑀲𑁂𑀲𑀽𑀢𑀺 𑀫𑀳𑀕𑁆𑀕𑀢𑀪𑀸𑀯𑀸𑀤𑀺𑀦𑀸 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀲𑀤𑀺𑀲𑁂𑀲𑀼.

𑀧𑀻𑀢𑀺𑀲𑀼𑀔𑀯𑀦𑁆𑀢𑀁 𑀛𑀸𑀦𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀅𑀭𑀺𑀲𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀻𑀢𑀺𑀲𑀼𑀔…𑀧𑁂… 𑀅𑀓𑀸𑀭𑁄 𑀯𑀼𑀢𑁆𑀢𑁄’’𑀢𑀺 𑀆𑀳. 𑀫𑀕𑁆𑀕𑀲𑁆𑀲𑀧𑀺 𑀯𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁄 𑀢𑀣𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀲𑀫𑁆𑀫𑁄𑀲𑀥𑀫𑁆𑀫𑀦𑁆𑀢𑀺 𑀅𑀯𑀺𑀦𑀸𑀲𑀪𑀸𑀯𑀁.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁧-𑁧𑁬𑁨. 𑀤𑀺𑀝𑁆𑀞𑀸𑀤𑀻𑀦𑀯𑀲𑁆𑀲 𑀢𑀁𑀢𑀁𑀛𑀸𑀦𑀓𑁆𑀔𑀡𑁂 𑀅𑀦𑀼𑀧𑁆𑀧𑀚𑁆𑀚𑀦𑀥𑀫𑁆𑀫𑀢𑀸𑀧𑀸𑀤𑀦𑀁 𑀯𑀽𑀧𑀲𑀫𑀦𑀁 𑀯𑀺𑀭𑀚𑁆𑀚𑀦𑀁 𑀧𑀳𑀸𑀦𑀜𑁆𑀘𑀸𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀯𑀺𑀢𑀓𑁆𑀓𑀸𑀤𑀬𑁄𑀬𑁂𑀯 𑀛𑀸𑀦𑀗𑁆𑀕𑀪𑀽𑀢𑀸 𑀢𑀣𑀸 𑀓𑀭𑀻𑀬𑀦𑁆𑀢𑀺, 𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀸𑀤𑀬𑁄𑀢𑀺 𑀯𑀺𑀢𑀓𑁆𑀓𑀸𑀤𑀻𑀦𑀁𑀬𑁂𑀯 𑀯𑀽𑀧𑀲𑀫𑀸𑀤𑀺𑀯𑀘𑀦𑀁 𑀜𑀸𑀬𑀸𑀕𑀢𑀁. 𑀬𑀲𑁆𑀫𑀸 𑀧𑀦 𑀯𑀺𑀢𑀓𑁆𑀓𑀸𑀤𑀬𑁄 𑀯𑀺𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀏𑀢𑁂𑀦 𑀏𑀢𑀁 𑀑𑀴𑀸𑀭𑀺𑀓𑀦𑁆𑀢𑀺 𑀤𑀺𑀝𑁆𑀞𑀸𑀤𑀻𑀦𑀯𑀸 𑀏𑀯, 𑀢𑀲𑁆𑀫𑀸 𑀅𑀯𑀺𑀲𑁂𑀲𑁂𑀦 𑀯𑀺𑀢𑀓𑁆𑀓𑀸𑀤𑀻𑀦𑀁 𑀢𑀁𑀲𑀳𑀚𑀸𑀢𑀸𑀦𑀜𑁆𑀘 𑀯𑀽𑀧𑀲𑀫𑀸𑀤𑀺𑀓𑁂 𑀯𑀢𑁆𑀢𑀩𑁆𑀩𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀻𑀦𑀁𑀬𑁂𑀯 𑀯𑀽𑀧𑀲𑀫𑀸𑀤𑀺𑀓𑀁 𑀯𑀼𑀘𑁆𑀘𑀫𑀸𑀦𑀁 ‘‘𑀅𑀥𑀺𑀓𑀯𑀘𑀦𑀫𑀜𑁆𑀜𑀫𑀢𑁆𑀣𑀁 𑀩𑁄𑀥𑁂𑀢𑀻’’𑀢𑀺 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀤𑀻𑀧𑁂𑀢𑀻𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀺𑀢𑀸𑀦𑀺𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀯𑀘𑀦𑀸𑀤𑀻𑀦𑀺 𑀧𑀳𑁂𑀬𑁆𑀬𑀗𑁆𑀕𑀦𑀺𑀤𑁆𑀤𑁂𑀲𑀢𑀸𑀲𑀸𑀫𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀲𑀫𑀽𑀳𑀢𑁄 𑀕𑀳𑁂𑀢𑁆𑀯𑀸 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀁…𑀧𑁂… 𑀢𑀁 𑀤𑀻𑀧𑀓𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀇𑀤𑀸𑀦𑀺 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀁 𑀯𑀺𑀦𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦 𑀧𑀻𑀢𑀺𑀯𑀺𑀭𑀸𑀕𑀸𑀤𑀺𑀯𑀘𑀦𑀸𑀦𑀁 𑀲𑀯𑀺𑀲𑀬𑁂 𑀲𑀫𑀸𑀦𑀩𑁆𑀬𑀸𑀧𑀸𑀭𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀲𑁆𑀫𑀺𑀁 𑀤𑀲𑁆𑀲𑀺𑀢𑁂𑀢𑀺 ‘‘𑀬𑀸 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸’’𑀢𑀺𑀆𑀤𑀺𑀦𑀸 𑀛𑀸𑀦𑀯𑀺𑀪𑀗𑁆𑀕𑁂 𑀲𑀫𑁆𑀧𑀲𑀸𑀤𑀦𑁂 𑀤𑀲𑁆𑀲𑀺𑀢𑁂. 𑀲𑀫𑀸𑀦𑀸𑀥𑀺𑀓𑀭𑀡𑀦𑀺𑀤𑁆𑀤𑁂𑀲𑁂𑀦𑁂𑀯𑀸𑀢𑀺 𑀢𑀢𑁆𑀣𑁂𑀯 𑀯𑀺𑀪𑀗𑁆𑀕𑁂 𑀉𑀤𑁆𑀤𑁂𑀲𑀧𑀤𑀼𑀤𑁆𑀥𑀸𑀭𑀸𑀤𑀻𑀲𑀼 𑀲𑀤𑁆𑀥𑀸𑀛𑀸𑀦𑀸𑀦𑀁 ‘‘𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀏𑀓𑀸𑀥𑀺𑀓𑀭𑀡𑀢𑀸𑀯𑀘𑀦𑁂𑀦𑁂𑀯.

𑀑𑀴𑀸𑀭𑀺𑀓𑀗𑁆𑀕𑀫𑀼𑀔𑁂𑀦 ‘‘𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀻’’𑀢𑀺 𑀯𑀼𑀢𑁆𑀢𑀸𑀬 𑀢𑀁𑀢𑀁𑀛𑀸𑀦𑀦𑀺𑀓𑀦𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑀸𑀤𑀻𑀳𑀺 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀢𑀡𑁆𑀳𑀸𑀧𑁆𑀧𑀳𑀸𑀦𑀁 𑀏𑀢𑁂𑀲𑀁 𑀯𑀽𑀧𑀲𑀫𑀦’’𑀦𑁆𑀢𑀺 (𑀯𑀺𑀪. 𑁭𑁯𑁯). 𑀬𑀢𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀯𑀺𑀭𑀢𑁆𑀢𑀪𑀸𑀯𑀤𑀻𑀧𑀓𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑀦𑁆𑀢𑀺 𑀢𑀤𑀼𑀪𑀬𑀸𑀪𑀸𑀯𑀤𑀻𑀧𑀦𑀁 𑀧𑀼𑀦 𑀓𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁩. 𑀯𑀻𑀭𑀺𑀬𑀁 𑀉𑀧𑁂𑀓𑁆𑀔𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀕𑁆𑀕𑀳𑀦𑀺𑀕𑁆𑀕𑀳𑁂𑀲𑀼 𑀩𑁆𑀬𑀸𑀧𑀸𑀭𑀸𑀓𑀭𑀡𑁂𑀦 𑀉𑀧𑁂𑀓𑁆𑀔𑀺𑀬𑀢𑀻’’𑀢𑀺. 𑀕𑀳𑀡𑁂 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀲𑀗𑁆𑀔𑀸𑀭𑁂 𑀉𑀧𑁂𑀓𑁆𑀔𑀢𑀻𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀢𑀣𑀸𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸. 𑀢𑀲𑁆𑀲𑀸 𑀧𑀦 𑀯𑀺𑀲𑀬𑀢𑁄 𑀧𑀪𑁂𑀤𑁄 ‘‘𑀅𑀝𑁆𑀞 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁫𑁭) 𑀬𑀲𑁆𑀲𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄, 𑀢𑀁 𑀧𑀸𑀴𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀚𑁆𑀛𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀸𑀤𑀦𑁆𑀢𑀺 𑀧𑀼𑀭𑀺𑀫𑀓𑀫𑁆𑀫𑀧𑀘𑁆𑀘𑀬𑀸 𑀇𑀥 𑀉𑀧𑁆𑀧𑀢𑁆𑀢𑀺𑀁. 𑀧𑀯𑀢𑁆𑀢𑀦𑁆𑀢𑀺 𑀢𑀣𑀸 𑀉𑀧𑁆𑀧𑀦𑁆𑀦𑀲𑁆𑀲 𑀧𑀯𑀢𑁆𑀢𑀺𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄. 𑀆𑀬𑀽𑀳𑀦𑀦𑁆𑀢𑀺 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁. 𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀁. 𑀕𑀢𑀺𑀦𑁆𑀢𑀺 𑀬𑀸𑀬 𑀕𑀢𑀺𑀬𑀸 𑀲𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀦𑀺𑀩𑁆𑀩𑀢𑁆𑀢𑀺𑀦𑁆𑀢𑀺 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀁. 𑀉𑀧𑀧𑀢𑁆𑀢𑀺𑀦𑁆𑀢𑀺 ‘‘𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁. 𑀚𑀸𑀢𑀺𑀦𑁆𑀢𑀺 𑀚𑀭𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑀁 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺𑀁. 𑀚𑀭𑀸𑀫𑀭𑀡𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀏𑀢𑁆𑀣 𑀘 𑀉𑀧𑁆𑀧𑀸𑀤𑀸𑀤𑀬𑁄 𑀧𑀜𑁆𑀘𑁂𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑁆𑀲 𑀯𑀺𑀲𑀬𑀯𑀲𑁂𑀦 𑀯𑀼𑀢𑁆𑀢𑀸, 𑀲𑁂𑀲𑀸 𑀢𑁂𑀲𑀁 𑀯𑁂𑀯𑀘𑀦𑀯𑀲𑁂𑀦. ‘‘𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀻’’𑀢𑀺 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀉𑀧𑁆𑀧𑀸𑀤𑀲𑁆𑀲 𑀘𑁂𑀯 𑀧𑀝𑀺𑀲𑀦𑁆𑀥𑀺𑀬𑀸 𑀘 𑀯𑁂𑀯𑀘𑀦𑀁. ‘‘𑀕𑀢𑀺 𑀉𑀧𑀧𑀢𑁆𑀢𑀺 𑀘𑀸’’𑀢𑀺 𑀇𑀤𑀁 𑀤𑁆𑀯𑀬𑀁 𑀧𑀯𑀢𑁆𑀢𑀲𑁆𑀲. 𑀚𑀭𑀸𑀤𑀬𑁄 𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺.

𑀪𑀽𑀢𑀲𑁆𑀲𑀸𑀢𑀺 𑀔𑀦𑁆𑀥𑀧𑀜𑁆𑀘𑀓𑀲𑁆𑀲. 𑀏𑀢𑁂𑀳𑀻𑀢𑀺 𑀛𑀸𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀭𑀽𑀧𑁂𑀳𑀺.

𑀘𑀢𑀼𑀓𑁆𑀓𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀓𑀦𑀬𑀯𑀡𑁆𑀡𑀦𑀸

𑁧𑁬𑁭. 𑀆𑀓𑀸𑀭𑀪𑁂𑀤𑀦𑁆𑀢𑀺 𑀆𑀓𑀸𑀭𑀯𑀺𑀲𑁂𑀲𑀁. 𑀅𑀦𑁂𑀓𑀸𑀓𑀸𑀭𑀸 𑀳𑀺 𑀥𑀫𑁆𑀫𑀸, 𑀢𑁂 𑀘 𑀦𑀺𑀭𑀯𑀲𑁂𑀲𑀁 𑀬𑀸𑀣𑀸𑀯𑀢𑁄 𑀪𑀕𑀯𑀢𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸. 𑀬𑀣𑀸𑀳 𑁋 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑁩.𑁫). 𑀤𑀼𑀢𑀺𑀬𑀚𑁆𑀛𑀸𑀦𑀧𑀓𑁆𑀔𑀺𑀓𑀁 𑀦 𑀧𑀞𑀫𑀚𑁆𑀛𑀸𑀦𑀧𑀓𑁆𑀔𑀺𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀧𑀞𑀫𑀚𑁆𑀛𑀸𑀦𑀫𑁂𑀯 𑀳𑀻’’𑀢𑀺𑀆𑀤𑀺. 𑀅𑀢𑁆𑀣𑀢𑁄 𑀳𑀺 𑀘𑀢𑀼𑀓𑁆𑀓𑀧𑀜𑁆𑀘𑀓𑀦𑀬𑀸 𑀅𑀜𑁆𑀜𑀫𑀜𑁆𑀜𑀸𑀦𑀼𑀧𑁆𑀧𑀯𑁂𑀲𑀺𑀦𑁄. 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀁 𑀓𑀺𑀁 𑀲𑀯𑀺𑀘𑀸𑀭𑀢𑀸𑀬 𑀧𑀞𑀫𑀚𑁆𑀛𑀸𑀦𑀧𑀓𑁆𑀔𑀺𑀓𑀁 𑀉𑀤𑀸𑀳𑀼 𑀅𑀯𑀺𑀢𑀓𑁆𑀓𑀢𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀧𑀓𑁆𑀔𑀺𑀓𑀦𑁆𑀢𑀺 𑀲𑀺𑀬𑀸 𑀆𑀲𑀗𑁆𑀓𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺𑀆𑀤𑀺𑀦𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀲𑀼 𑀘 𑀤𑀼𑀢𑀺𑀬𑀚𑁆𑀛𑀸𑀦𑀫𑁂𑀯 𑀪𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀇𑀥𑁂𑀯, 𑀅𑀣 𑀔𑁄 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀲𑀼𑀧𑀻𑀢𑀺 𑀤𑁂𑀲𑀦𑀦𑁆𑀢𑀭𑁂𑀧𑀺 𑀬𑀣𑀸𑀯𑀼𑀢𑁆𑀢𑀚𑁆𑀛𑀸𑀦𑀲𑁆𑀲 𑀧𑀞𑀫𑀚𑁆𑀛𑀸𑀦𑀧𑀓𑁆𑀔𑀺𑀓𑀢𑁆𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀪𑀚𑀦𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀢𑀓𑁆𑀓𑀯𑀽𑀧𑀲𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀼𑀢𑁆𑀢𑀦𑁆𑀢𑁂𑀧𑀺 𑀧𑀜𑁆𑀘𑀓𑀦𑀬𑀲𑁆𑀲 𑀮𑀩𑁆𑀪𑀫𑀸𑀦𑀢𑀁 𑀤𑀲𑁆𑀲𑁂𑀢𑀺.

𑀦𑀦𑀼 𑀘 𑀲𑀼𑀢𑁆𑀢𑀦𑁆𑀢𑁂 𑀘𑀢𑁆𑀢𑀸𑀭𑀺𑀬𑁂𑀯 𑀛𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀻𑀢𑀺 𑀧𑀜𑁆𑀘𑀓𑀦𑀬𑁄 𑀦𑀢𑁆𑀣𑀺𑀬𑁂𑀯𑀸𑀢𑀺? 𑀦, ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸 𑀲𑀫𑀸𑀥𑀺𑀢𑁆𑀢𑀬𑀸𑀧𑀤𑁂𑀲𑁂𑀦 𑀧𑀜𑁆𑀘𑀓𑀦𑀬𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀘𑀢𑀼𑀓𑁆𑀓𑀦𑀬𑀦𑀺𑀲𑁆𑀲𑀺𑀢𑁄 𑀧𑀦 𑀓𑀢𑁆𑀯𑀸 𑀧𑀜𑁆𑀘𑀓𑀦𑀬𑁄 𑀯𑀺𑀪𑀢𑁆𑀢𑁄𑀢𑀺 𑀢𑀢𑁆𑀣𑀸𑀧𑀺 𑀧𑀜𑁆𑀘𑀓𑀦𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀳𑀺 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀦𑀦𑁆𑀢𑀺 𑀘 𑀯𑀺𑀦𑀸 𑀲𑀳 𑀘 𑀯𑀺𑀘𑀸𑀭𑁂𑀦 𑀯𑀺𑀢𑀓𑁆𑀓𑀧𑁆𑀧𑀳𑀸𑀦𑁂𑀦 𑀅𑀯𑀺𑀢𑀓𑁆𑀓𑀁 𑀲𑀳 𑀯𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀯𑀺𑀘𑀸𑀭𑀧𑁆𑀧𑀳𑀸𑀦𑁂𑀦 𑀅𑀯𑀺𑀘𑀸𑀭𑀦𑁆𑀢𑀺 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀜𑁆𑀘𑀸𑀢𑀺 𑀯𑀸 𑀢𑀺𑀯𑀺𑀥𑀫𑁆𑀧𑀺 𑀲𑀓𑁆𑀓𑀸 𑀲𑀗𑁆𑀕𑀡𑁆𑀳𑀺𑀢𑀼𑀁.

𑀤𑀼𑀢𑀺𑀬𑀦𑁆𑀢𑀺 𑀘 𑀯𑀺𑀢𑀓𑁆𑀓𑀭𑀳𑀺𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀭𑀳𑀺𑀢𑁂 𑀘 𑀜𑀸𑀬𑀸𑀕𑀢𑀸 𑀤𑁂𑀲𑀦𑀸. 𑀤𑀼𑀢𑀺𑀬𑀁 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸 𑀯𑀺𑀘𑀸𑀭𑀫𑀢𑁆𑀢𑀭𑀳𑀺𑀢𑁂𑀧𑀺 𑀤𑁆𑀯𑀬𑀧𑁆𑀧𑀳𑀸𑀦𑀸𑀥𑀺𑀕𑀢𑀲𑀫𑀸𑀦𑀥𑀫𑁆𑀫𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀜𑁆𑀘𑀓𑀦𑀬𑀦𑀺𑀤𑁆𑀤𑁂𑀲𑁂 𑀤𑀼𑀢𑀺𑀬𑁂 𑀯𑀽𑀧𑀲𑀦𑁆𑀢𑁄𑀧𑀺 𑀯𑀺𑀢𑀓𑁆𑀓𑁄 𑀢𑀁𑀲𑀳𑀸𑀬𑀯𑀺𑀘𑀸𑀭𑀸𑀯𑀽𑀧𑀲𑀫𑁂𑀦 𑀦 𑀲𑀫𑁆𑀫𑀸𑀯𑀽𑀧𑀲𑀦𑁆𑀢𑁄𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀭𑀳𑀺𑀢𑁂 𑀯𑀺𑀬 𑀯𑀺𑀘𑀸𑀭𑀯𑀽𑀧𑀲𑀫𑁂𑀦𑁂𑀯 𑀢𑀤𑀼𑀧𑀲𑀫𑀁 𑀲𑁂𑀲𑀥𑀫𑁆𑀫𑀲𑀫𑀸𑀦𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀢𑀢𑀺𑀬𑀁 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑁂𑀦 𑀦𑀺𑀩𑁆𑀩𑀺𑀲𑁂𑀲𑀁 𑀯𑀺𑀪𑀢𑁆𑀢𑀁. 𑀤𑀼𑀯𑀺𑀥𑀲𑁆𑀲𑀧𑀺 𑀲𑀳𑀸𑀬𑀯𑀺𑀭𑀳𑁂𑀦 𑀅𑀜𑁆𑀜𑀣𑀸 𑀘 𑀯𑀺𑀢𑀓𑁆𑀓𑀧𑁆𑀧𑀳𑀸𑀦𑁂𑀦 𑀅𑀯𑀺𑀢𑀓𑁆𑀓𑀢𑁆𑀢𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀢𑁆𑀢𑀜𑁆𑀘 𑀲𑀫𑀸𑀦𑀦𑁆𑀢𑀺 𑀲𑀫𑀸𑀦𑀥𑀫𑁆𑀫𑀢𑁆𑀢𑀸𑀧𑀺 𑀤𑀼𑀢𑀺𑀬𑀦𑁆𑀢𑀺 𑀦𑀺𑀤𑁆𑀤𑁂𑀲𑁄. 𑀯𑀺𑀘𑀸𑀭𑀫𑀢𑁆𑀢𑀫𑁆𑀧𑀺 𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀭𑀳𑀺𑀢𑀁 𑀯𑀺𑀬 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀅𑀯𑀺𑀢𑀓𑁆𑀓𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀯𑀺𑀪𑀢𑁆𑀢𑀁. 𑀧𑀞𑀫𑀚𑁆𑀛𑀸𑀦𑁂 𑀯𑀸 𑀲𑀳𑀘𑀸𑀭𑀻𑀲𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀏𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑁆𑀭𑀝𑁆𑀞𑀫𑁂𑀯 𑀤𑁄𑀲𑀢𑁄 𑀤𑀺𑀲𑁆𑀯𑀸 𑀉𑀪𑀬𑀫𑁆𑀧𑀺 𑀲𑀳𑀸𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀜𑁆𑀘𑀓𑀦𑀬𑁂 𑀢𑀢𑀺𑀬𑀁 𑀯𑀼𑀢𑁆𑀢𑀁 𑀢𑀢𑀺𑀬𑀁 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸. 𑀧𑀞𑀫𑀢𑁄 𑀅𑀦𑀦𑁆𑀢𑀭𑀪𑀸𑀯𑁂𑀦 𑀧𑀦𑀲𑁆𑀲 𑀤𑀼𑀢𑀺𑀬𑀪𑀸𑀯𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀭𑀽𑀧𑀢𑁄 𑀧𑀜𑁆𑀘𑀓𑀦𑀬𑁄 𑀦 𑀯𑀺𑀪𑀢𑁆𑀢𑁄𑀢𑀺? 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄. 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀸 𑀳𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀢𑀺.

𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀺𑀯𑀡𑁆𑀡𑀦𑀸

𑁧𑁭𑁬-𑁧𑁮𑁦. 𑀢𑀤𑀦𑀼𑀭𑀽𑀧𑀢𑀸𑀢𑀺 𑀢𑀲𑁆𑀲 𑀧𑀞𑀫𑀸𑀤𑀺𑀚𑁆𑀛𑀸𑀦𑀲𑁆𑀲 𑀅𑀦𑀼𑀭𑀽𑀧𑀲𑀪𑀸𑀯𑀸. 𑀬𑀣𑀸𑀮𑀤𑁆𑀥𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀤𑀺𑀲𑁆𑀯𑀸 𑀅𑀲𑁆𑀲𑀸𑀤𑀬𑀫𑀸𑀦𑀸 𑀦𑀺𑀓𑀦𑁆𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀔𑀦𑁆𑀥𑀸 𑀯𑀸 𑀢𑀤𑀸𑀭𑀓𑁆𑀔𑀪𑀽𑀢𑀸 𑀲𑀢𑀺𑀬𑁂𑀯 𑀯𑀸 𑀢𑀲𑁆𑀲 𑀛𑀸𑀦𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀢𑀸𑀬 ‘‘𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺. 𑀓𑀤𑀸𑀘𑀻𑀢𑀺 𑀬𑀤𑀸 𑀧𑀞𑀫𑀁 𑀅𑀥𑀺𑀕𑀦𑁆𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀬𑁂𑀯 𑀯𑀺𑀦𑀸 𑀧𑀬𑁄𑀕𑀦𑁆𑀢𑀭𑀁 𑀤𑀼𑀢𑀺𑀬𑀸𑀤𑀻𑀦𑀺 𑀅𑀥𑀺𑀕𑀘𑁆𑀙𑀢𑀺, 𑀈𑀤𑀺𑀲𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄.

𑁧𑁮𑁬. 𑀓𑀼𑀲𑀮𑀚𑁆𑀛𑀸𑀦𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 ‘‘𑀲𑁂𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑁂 𑀉𑀧𑁆𑀧𑀸𑀤𑁂𑀦𑁆𑀢𑀺 𑀦𑀸𑀫𑀸𑀢𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀢𑀁 𑀲𑀦𑁆𑀥𑀸𑀬𑀸𑀳.

𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁨𑁦𑁩. 𑀆𑀭𑀼𑀧𑁆𑀧𑀧𑀸𑀤𑀓𑀢𑀸 𑀘 𑀤𑀲𑁆𑀲𑀺𑀢𑀸 𑀯𑀺𑀦𑀸 𑀅𑀪𑀸𑀯𑀢𑁄. 𑀦 𑀳𑀺 𑀢𑁂𑀲𑀁 𑀆𑀭𑀼𑀧𑁆𑀧𑀧𑀸𑀤𑀓𑀢𑀸𑀬 𑀯𑀺𑀦𑀸 𑀦𑀺𑀭𑁄𑀥𑀧𑀸𑀤𑀓𑀢𑀸 𑀅𑀢𑁆𑀣𑀻𑀢𑀺. 𑀦𑀺𑀫𑁆𑀫𑀺𑀦𑀺𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀯𑀢𑁆𑀣𑀼𑀦𑁄 𑀦𑀺𑀫𑁆𑀫𑀸𑀦𑀯𑀲𑁂𑀦 𑀔𑀺𑀧𑁆𑀧𑀁 𑀦𑀺𑀲𑀦𑁆𑀢𑀺 𑀦𑀺𑀲𑀸𑀫𑀦𑀁 𑀆𑀮𑁄𑀘𑀦𑀁 𑀅𑀥𑀺𑀕𑀫𑁄 𑀏𑀢𑀲𑁆𑀲𑀸𑀢𑀺 𑀔𑀺𑀧𑁆𑀧𑀦𑀺𑀲𑀦𑁆𑀢𑀺. 𑀢𑀩𑁆𑀪𑀸𑀯𑁄 ‘‘𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀪𑀸𑀯𑁄’’𑀢𑀺 𑀆𑀳 ‘‘𑀔𑀺𑀧𑁆𑀧𑀤𑀲𑁆𑀲𑀦𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑀸’’𑀢𑀺.

𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀪𑀺𑀪𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁨𑁦𑁪. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀪𑀽𑀢𑀁 𑀓𑀲𑀺𑀡𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀆𑀬𑀢𑀦𑀁 𑀓𑀸𑀭𑀡𑀁 𑀏𑀢𑀲𑁆𑀲𑀸𑀢𑀺 𑀓𑀲𑀺𑀡𑀸𑀬𑀢𑀦𑀁, 𑀛𑀸𑀦𑀁. 𑀅𑀣 𑀯𑀸 𑀆𑀭𑀫𑁆𑀫𑀡𑀲𑁆𑀲 𑀅𑀦𑀯𑀲𑁂𑀲𑀨𑀭𑀡𑀝𑁆𑀞𑁂𑀦 𑀓𑀲𑀺𑀡𑀜𑁆𑀘 𑀢𑀁 𑀆𑀬𑀢𑀦𑀜𑁆𑀘 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀪𑀸𑀯𑀢𑁄 𑀘𑀸𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀁 𑀛𑀸𑀦𑀁 𑀓𑀲𑀺𑀡𑀸𑀬𑀢𑀦𑀁. 𑀢𑁂𑀦𑁂𑀯𑀸𑀳 ‘‘𑀲𑀢𑀺𑀧𑀺 𑀅𑀪𑀺𑀪𑀸𑀬𑀢𑀦𑀸𑀦𑀁 𑀓𑀲𑀺𑀡𑀸𑀬𑀢𑀦𑀢𑁆𑀢𑁂’’𑀢𑀺. 𑀪𑀸𑀯𑀦𑀸𑀬 𑀦𑀺𑀫𑀺𑀢𑁆𑀢𑀁 𑀪𑀸𑀯𑀦𑀸𑀦𑀺𑀫𑀺𑀢𑁆𑀢𑀁, 𑀆𑀭𑀫𑁆𑀫𑀡𑀲𑁆𑀲 𑀧𑀭𑀺𑀢𑁆𑀢𑀧𑁆𑀧𑀫𑀸𑀡𑀢𑀸 𑀲𑀼𑀯𑀺𑀲𑀼𑀤𑁆𑀥𑀦𑀻𑀮𑀸𑀤𑀺𑀢𑀸 𑀘, 𑀢𑀤𑁂𑀯 𑀦𑀸𑀦𑀢𑁆𑀢𑀁. 𑀪𑀸𑀯𑀦𑀸 𑀏𑀯 𑀯𑀸 𑀧𑀼𑀩𑁆𑀩𑀪𑀸𑀕𑀪𑀽𑀢𑀸 𑀪𑀸𑀯𑀦𑀸𑀦𑀺𑀫𑀺𑀢𑁆𑀢𑀁, 𑀢𑀲𑁆𑀲 𑀦𑀸𑀦𑀢𑁆𑀢𑀁 𑀪𑀸𑀯𑀦𑀸𑀦𑀺𑀫𑀺𑀢𑁆𑀢𑀦𑀸𑀦𑀢𑁆𑀢𑀁. 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀳𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀢𑁄 𑀦𑀸𑀦𑀸𑀲𑀪𑀸𑀯𑀸𑀢𑀺. 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀅𑀪𑀺𑀪𑀯𑀦𑀓𑀪𑀸𑀯𑀦𑀸𑀦𑀺𑀫𑀺𑀢𑁆𑀢𑀦𑀸𑀦𑀢𑁆𑀢𑀁 𑀓𑀲𑀺𑀡…𑀧𑁂… 𑀦𑀸𑀦𑀢𑁆𑀢𑀁, 𑀢𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀢𑁆𑀣 𑀘 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀪𑀽𑀢𑀓𑀲𑀺𑀡𑀸𑀭𑀫𑁆𑀫𑀡𑀸𑀦𑀺, 𑀪𑀽𑀢𑀓𑀲𑀺𑀡𑁂𑀲𑀼 𑀘 𑀬𑀁 𑀲𑀼𑀯𑀡𑁆𑀡𑀁 𑀤𑀼𑀩𑁆𑀩𑀡𑁆𑀡𑀦𑁆𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀢𑁆𑀣 𑀧𑀯𑀢𑁆𑀢𑀺𑀢𑀸𑀦𑀺 𑀲𑀩𑁆𑀩𑀢𑁆𑀣 𑀯𑀸 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑁂𑀦 𑀧𑀯𑀢𑁆𑀢𑀺𑀢𑀸𑀦𑀺 𑀧𑀞𑀫𑀢𑀢𑀺𑀬𑀸𑀪𑀺𑀪𑀸𑀬𑀢𑀦𑀸𑀦𑀻𑀢𑀺 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀯𑀡𑁆𑀡𑀓𑀲𑀺𑀡𑀸𑀭𑀫𑁆𑀫𑀡𑀸𑀦𑀺. 𑀬𑀤𑀺 𑀏𑀯𑀁 𑀤𑀼𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀧𑀜𑁆𑀘𑀫𑀸𑀤𑀻𑀦𑀁 𑀓𑁄 𑀯𑀺𑀲𑁂𑀲𑁄𑀢𑀺 ‘‘𑀧𑀜𑁆𑀘𑀫𑀸𑀤𑀻𑀦𑀺 𑀯𑀡𑁆𑀡𑀢𑁄 𑀭𑀫𑀡𑀻𑀬𑀢𑀭𑀸𑀦𑀺, 𑀦 𑀢𑀣𑀸 𑀇𑀢𑀭𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀧𑀼𑀭𑀺𑀫𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀅𑀝𑁆𑀞 𑀓𑀲𑀺𑀡𑀸𑀭𑀫𑁆𑀫𑀡𑀸𑀦𑁂𑀯, 𑀢𑀲𑁆𑀫𑀸 𑀢𑀁 𑀦𑁂𑀲𑀁 𑀫𑀢𑀺𑀫𑀢𑁆𑀢𑀁 ‘‘𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀯𑀺𑀫𑁄𑀓𑁆𑀔𑁂𑀲𑀼 𑀘 𑀧𑀞𑀫𑀤𑀼𑀢𑀺𑀬𑀯𑀺𑀫𑁄𑀓𑁆𑀔𑀸 𑀅𑀝𑁆𑀞 𑀓𑀲𑀺𑀡𑀸𑀭𑀫𑁆𑀫𑀡𑀸. 𑀢𑀢𑀺𑀬𑁄 𑀯𑀡𑁆𑀡𑀓𑀲𑀺𑀡𑀸𑀭𑀫𑁆𑀫𑀡𑁄. 𑀧𑀞𑀫𑀤𑀼𑀢𑀺𑀬𑀸𑀧𑀺 𑀯𑀸 𑀯𑀡𑁆𑀡𑀓𑀲𑀺𑀡𑀸𑀭𑀫𑁆𑀫𑀡𑀸 𑀏𑀯 ‘‘𑀩𑀳𑀺𑀤𑁆𑀥𑀸 𑀦𑀻𑀮𑀓𑀲𑀺𑀡𑀸𑀤𑀺𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀆𑀭𑀫𑁆𑀫𑀡𑀫𑀦𑀼𑀜𑁆𑀜𑀢𑀸𑀬 𑀳𑀺 𑀢𑀢𑁆𑀣 𑀅𑀦𑀺𑀕𑁆𑀕𑀢𑀺𑀢𑀪𑀸𑀯𑁂𑀦 𑀢𑁂𑀲𑀁 𑀧𑀯𑀢𑁆𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀢𑀢𑀺𑀬𑀲𑁆𑀲 𑀇𑀢𑀭𑁂𑀳𑀺 𑀓𑁄 𑀯𑀺𑀲𑁂𑀲𑁄𑀢𑀺? 𑀲𑀼𑀪𑀸𑀓𑀸𑀭𑀸𑀪𑁄𑀕𑁄. 𑀢𑀢𑀺𑀬𑁄 𑀏𑀯 𑀳𑀺 𑀲𑀼𑀪𑀦𑁆𑀢𑀺 𑀆𑀪𑀼𑀚𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀇𑀢𑀭𑁂𑀢𑀺.

𑀜𑀸𑀡𑀁 𑀅𑀧𑁆𑀧𑀦𑀸𑀧𑀜𑁆𑀜𑀸. 𑀯𑀺𑀚𑁆𑀚𑀫𑀸𑀦𑁂𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀅𑀯𑀺𑀚𑁆𑀚𑀫𑀸𑀦𑁂𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀢𑁆𑀢𑀧𑁆𑀧𑀫𑀸𑀡𑀢𑀸 𑀅𑀪𑀺𑀪𑀯𑀦𑀲𑁆𑀲 𑀓𑀸𑀭𑀡𑀁 𑀇𑀫𑁂𑀲𑀼 𑀘𑀢𑀽𑀲𑀼 𑀅𑀪𑀺𑀪𑀸𑀬𑀢𑀦𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀘 𑀲𑀩𑁆𑀩𑀢𑁆𑀣 ‘‘𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺 𑀯𑀘𑀦𑀢𑁄 𑀯𑀡𑁆𑀡𑀸𑀪𑁄𑀕𑀲𑀳𑀺𑀢𑀸𑀦𑀺𑀬𑁂𑀯 𑀕𑀳𑀺𑀢𑀸𑀦𑀻𑀢𑀺? 𑀦 𑀕𑀳𑀺𑀢𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀆𑀕𑀫𑁂𑀲𑀼. 𑀢𑀣𑀸 𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀓𑀣𑀁 𑀯𑀺𑀲𑀺𑀝𑁆𑀞𑀸𑀦𑀁 𑀯𑀡𑁆𑀡𑀸𑀪𑁄𑀕𑁂𑀦 𑀭𑀳𑀺𑀢𑀸𑀦𑀁 𑀲𑀳𑀺𑀢𑀸𑀦𑀜𑁆𑀘 𑀏𑀓𑀚𑁆𑀛𑀁 𑀫𑀦𑀲𑀺 𑀓𑀭𑁄𑀢𑀺? 𑀦 𑀏𑀓𑀚𑁆𑀛𑀁, 𑀯𑀺𑀲𑀼𑀁𑀬𑁂𑀯 𑀧𑀦 𑀢𑁂𑀲𑀼 𑀫𑀦𑀲𑀺𑀓𑀸𑀭𑁄. 𑀬𑀤𑀺 𑀯𑀺𑀲𑀼𑀁 𑀓𑀣𑀫𑁂𑀓𑀦𑁆𑀢𑀺? 𑀧𑀭𑀺𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑀢𑁄. 𑀬𑀤𑀺 𑀏𑀯𑀁 ‘‘𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀕𑁆𑀕𑀳𑀡𑀁 𑀅𑀢𑀺𑀭𑀺𑀘𑁆𑀙𑀢𑀻’’𑀢𑀺, 𑀦𑀸𑀢𑀺𑀭𑀺𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀺 𑀳𑀺 𑀏𑀲𑁄 𑀧𑀭𑀺𑀬𑀸𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀤𑀺𑀤𑀁 𑀯𑀡𑁆𑀡𑀸𑀪𑁄𑀕𑀚𑀦𑀺𑀢𑀁 𑀯𑀺𑀲𑁂𑀲𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀢𑁆𑀢𑀲𑀸𑀫𑀜𑁆𑀜𑁂𑀦 𑀏𑀓𑀢𑁆𑀢𑀁 𑀦𑁂𑀢𑁆𑀯𑀸 ‘‘𑀧𑀭𑀺𑀢𑁆𑀢𑀸𑀦𑀺 𑀅𑀪𑀺𑀪𑀼𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀤𑀦𑁆𑀢𑁄𑀕𑀥𑀥𑀫𑁆𑀫𑀧𑁆𑀧𑀪𑁂𑀤𑀁 𑀯𑀺𑀦𑁂𑀬𑁆𑀬𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀸𑀦𑀺 𑀘𑁂 𑀓𑀤𑀸𑀘𑀺 𑀯𑀡𑁆𑀡𑀯𑀲𑁂𑀦 𑀆𑀪𑀼𑀚𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺 𑀅𑀪𑀺𑀪𑀼𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀸𑀬 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀲𑀳𑀺𑀢𑀸𑀦𑀺 𑀘 𑀯𑀺𑀲𑀼𑀁 𑀫𑀦𑀲𑀺 𑀓𑀢𑁆𑀯𑀸 𑀉𑀪𑀬𑀢𑁆𑀣𑀸𑀧𑀺 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀧𑀭𑀺𑀢𑁆𑀢𑀸𑀪𑀺𑀪𑀯𑀦𑁂 𑀢𑀁 𑀲𑀳𑀺𑀢𑀧𑀭𑀺𑀢𑁆𑀢𑀸𑀪𑀺𑀪𑀯𑀦𑁂 𑀘 𑀧𑀭𑀺𑀢𑁆𑀢𑀸𑀪𑀺𑀪𑀯𑀦𑀲𑁆𑀲 𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀏𑀓𑀦𑁆𑀢𑀺 𑀯𑀘𑀦𑀁, 𑀏𑀲𑁄 𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀻𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀧𑀸𑀞𑀯𑀺𑀲𑁂𑀲𑀢𑁄 𑀅𑀝𑁆𑀞𑀓𑀣𑀸𑀬 𑀯𑀺𑀭𑁄𑀥𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀧𑀸𑀞𑀸𑀦𑀁 𑀅𑀯𑀺𑀭𑁄𑀥𑀁 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀅𑀪𑀺𑀥𑀫𑁆𑀫𑁂 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀲𑀳𑀺𑀢𑀸𑀦𑀺 𑀘 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀺. 𑀲𑀼𑀢𑁆𑀢𑀦𑁆𑀢𑁂 𑀧𑀦 ‘‘𑀉𑀪𑀬𑀸𑀦𑀺 𑀏𑀓𑀚𑁆𑀛’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀤𑁂𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀆𑀕𑀢𑀲𑁆𑀲𑀸𑀢𑀺 𑀲𑀼𑀢𑁆𑀢𑀦𑁆𑀢𑁂 𑀆𑀕𑀢𑀲𑁆𑀲. 𑀢𑀢𑁆𑀣 𑀳𑀺 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻’’𑀢𑀺 𑀆𑀕𑀢𑀁. 𑀅𑀯𑀘𑀦𑀢𑁄𑀢𑀺 𑀅𑀪𑀺𑀥𑀫𑁆𑀫𑁂 𑀅𑀯𑀘𑀦𑀢𑁄. 𑀬𑀤𑀺𑀧𑀺 𑀯𑀺𑀫𑁄𑀓𑁆𑀔𑀸 𑀯𑀺𑀲𑀼𑀁 𑀤𑁂𑀲𑀺𑀢𑀸, 𑀓𑀲𑀺𑀡𑀸𑀬𑀢𑀦𑀪𑀸𑀯𑁄 𑀯𑀺𑀬 𑀧𑀦 𑀅𑀪𑀺𑀪𑀸𑀬𑀢𑀦𑀸𑀦𑀁 𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀢𑀸𑀧𑀺 𑀅𑀢𑁆𑀣𑀻𑀢𑀺 𑀅𑀪𑀺𑀪𑀸𑀬𑀢𑀦𑀯𑀺𑀫𑁄𑀓𑁆𑀔𑀸𑀦𑀁 𑀇𑀥𑀸𑀧𑀺 𑀲𑀗𑁆𑀓𑀭𑁄 𑀤𑀼𑀦𑁆𑀦𑀺𑀯𑀸𑀭𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀲𑀩𑁆𑀩𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀲𑀸𑀥𑀸𑀭𑀡𑀯𑀘𑀦𑀪𑀸𑀯𑀢𑁄’’𑀢𑀺. 𑀢𑁂𑀦 𑀬𑀣𑀸 𑀅𑀪𑀺𑀪𑀸𑀬𑀢𑀦𑀤𑁂𑀲𑀦𑀸𑀬𑀁 𑀅𑀪𑀺𑀪𑀸𑀬𑀢𑀦𑀓𑀺𑀘𑁆𑀘𑀸𑀦𑀺 𑀦𑀺𑀭𑀯𑀲𑁂𑀲𑀢𑁄 𑀯𑀼𑀢𑁆𑀢𑀸𑀦𑀺, 𑀏𑀯𑀁 𑀯𑀺𑀫𑁄𑀓𑁆𑀔𑀤𑁂𑀲𑀦𑀸𑀬𑀁 𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀸𑀦𑀻𑀢𑀺 𑀇𑀥 𑀢𑁂𑀲𑀁 𑀅𑀲𑀗𑁆𑀓𑀭𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀬𑁂 𑀘 𑀬𑀣𑀸𑀯𑀼𑀢𑁆𑀢𑀁 𑀯𑀯𑀢𑁆𑀣𑀸𑀦𑀁 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀢𑁂𑀳𑀺 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀧𑀸𑀞𑀪𑁂𑀤𑁂 𑀅𑀜𑁆𑀜𑀁 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑀺𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀦𑀦𑀼 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀲𑁆𑀫𑀸 𑀧𑀦 𑀬𑀣𑀸 𑀲𑀼𑀢𑁆𑀢𑀦𑁆𑀢𑁂’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑁄’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺. 𑀦 𑀢𑀁 𑀢𑀲𑁆𑀲 𑀓𑀸𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀚𑁆𑀛𑀢𑁆𑀢𑀭𑀽𑀧𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀦𑁆𑀢𑀺 𑀇𑀥 𑀲𑀼𑀢𑁆𑀢𑀦𑁆𑀢𑁂 𑀘 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 (𑀅. 𑀦𑀺. 𑁮.𑁬𑁫) 𑀯𑀼𑀢𑁆𑀢𑀯𑀘𑀦𑀁 𑀲𑀦𑁆𑀥𑀸𑀬𑀸𑀳. 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺𑀬𑁂𑀯 𑀳𑀺 𑀅𑀪𑀺𑀪𑀯𑀦𑀻𑀬𑀸𑀦𑀻𑀢𑀺. 𑀅𑀜𑁆𑀜𑀳𑁂𑀢𑀼𑀓𑀦𑁆𑀢𑀺 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀅𑀜𑁆𑀜𑀁 𑀅𑀪𑀺𑀪𑀯𑀦𑀻𑀬𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀅𑀜𑁆𑀜𑀳𑁂𑀢𑀼𑀓𑀁. 𑀅𑀚𑁆𑀛𑀢𑁆𑀢𑀅𑀭𑀽𑀧𑀲𑀜𑁆𑀜𑀺𑀢𑀸𑀬 𑀏𑀯, 𑀦 𑀲𑀼𑀢𑁆𑀢𑀦𑁆𑀢𑁂 𑀯𑀺𑀬 𑀅𑀚𑁆𑀛𑀢𑁆𑀢𑀭𑀽𑀧𑀲𑀜𑁆𑀜𑀺𑀢𑀸𑀬 𑀘𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀪𑀽𑀢𑀢𑁆𑀢𑀸𑀢𑀺 𑀇𑀤𑀁 𑀜𑀸𑀡𑀼𑀢𑁆𑀢𑀭𑀸𑀦𑀁 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑁂𑀦 𑀅𑀧𑁆𑀧𑀦𑀸𑀦𑀺𑀩𑁆𑀩𑀢𑁆𑀢𑀦𑀁 𑀆𑀭𑀫𑁆𑀫𑀡𑀲𑁆𑀲 𑀅𑀪𑀺𑀪𑀯𑁄 𑀦 𑀲𑀼𑀝𑁆𑀞𑀼 𑀯𑀺𑀪𑀽𑀢𑀪𑀸𑀯𑀫𑀦𑁆𑀢𑀭𑁂𑀦 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀦𑀦𑀼 𑀘 𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀤𑁆𑀯𑀬𑀯𑀺𑀲𑁂𑀲𑀲𑁆𑀲 𑀤𑁂𑀲𑀦𑀸𑀯𑀺𑀮𑀸𑀲𑁄 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀤𑁂𑀲𑀦𑀸𑀯𑀺𑀮𑀸𑀲𑁄 𑀘 𑀬𑀣𑀸𑀯𑀼𑀢𑁆𑀢𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑁄 𑀳𑀺 𑀦𑀸𑀫 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀧𑀭𑀺𑀬𑀸𑀬𑀲𑁆𑀲 𑀯𑀺𑀪𑀸𑀯𑀦𑀁 𑀦 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺. 𑀢𑀢𑁆𑀣 𑀘 ‘‘𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀯𑀢𑁆𑀣𑀸𑀦𑀁 𑀤𑁂𑀲𑀦𑀸𑀯𑀺𑀮𑀸𑀲𑀦𑀺𑀩𑀦𑁆𑀥𑀦𑀫𑀸𑀳. 𑀢𑀣𑀸 𑀘𑁂𑀯 𑀳𑀺 𑀧𑀼𑀭𑀢𑁄 𑀤𑁂𑀲𑀦𑀸𑀯𑀺𑀮𑀸𑀲𑁄 𑀯𑀺𑀪𑀸𑀯𑀺𑀢𑁄.

𑀅𑀪𑀺𑀪𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀫𑁄𑀓𑁆𑀔𑀓𑀣𑀸𑀯𑀡𑁆𑀡𑀦𑀸

𑁨𑁪𑁮. 𑀢𑀦𑁆𑀢𑀺 ‘‘𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀓𑁂𑀲𑀸𑀤𑀺𑀯𑀡𑁆𑀡𑀫𑀸𑀳. 𑀢𑀁 𑀧𑀦 𑀬𑀲𑁆𑀫𑀸 𑀔𑀮𑀫𑀡𑁆𑀟𑀮𑀸𑀤𑀺 𑀯𑀺𑀬 𑀧𑀭𑀫𑁆𑀧𑀭𑀸𑀬 𑀛𑀸𑀦𑀲𑁆𑀲 𑀓𑀸𑀭𑀡𑀁, 𑀢𑀲𑁆𑀫𑀸 ‘‘𑀛𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦𑀸’’𑀢𑀺 𑀆𑀳. 𑀬𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀭𑀽𑀧𑀯𑀺𑀲𑁂𑀲𑁂𑀦. 𑀯𑀺𑀲𑀺𑀝𑁆𑀞𑁂𑀦𑀸𑀢𑀺 𑀅𑀢𑀺𑀲𑀬𑀧𑁆𑀧𑀢𑁆𑀢𑁂𑀦 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬𑁦 𑀆𑀤𑀬𑁄; 𑀯𑀺𑀪. 𑁬𑁨𑁫) 𑀯𑀺𑀬 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑁂𑀦 𑀭𑀽𑀧𑀛𑀸𑀦𑁂𑀦. ‘‘𑀯𑀺𑀲𑀺𑀝𑁆𑀞𑁂𑀦𑀸’’𑀢𑀺 𑀇𑀫𑀺𑀦𑀸 𑀳𑀺 𑀅𑀢𑀺𑀲𑀬𑀭𑀽𑀧𑀬𑀼𑀢𑁆𑀢𑁄 𑀭𑀽𑀧𑀻𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀧𑀣𑀯𑀻𑀓𑀲𑀺𑀡’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁪𑁯𑁯) 𑀛𑀸𑀦𑀸𑀦𑀫𑁂𑀯 𑀓𑀲𑀺𑀡𑀪𑀸𑀯𑁂𑀦 𑀧𑀯𑀢𑁆𑀢𑀸. 𑀲𑀼𑀢𑁆𑀢𑁂 𑀆𑀭𑀫𑁆𑀫𑀡𑀸𑀦𑀁 𑀓𑀲𑀺𑀡𑀪𑀸𑀯𑁂𑀦 𑀧𑀯𑀢𑁆𑀢𑀸 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁬𑁦; 𑀅. 𑀦𑀺. 𑁧𑁦.𑁨𑁫).

𑀯𑀺𑀫𑁄𑀓𑁆𑀔𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁫𑁧. 𑀅𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀯𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸, 𑀉𑀧𑁂𑀓𑁆𑀔𑀸𑀢𑀺 𑀅𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸, 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀢𑀺𑀧𑀺 𑀏𑀢𑀸𑀲𑀁𑀬𑁂𑀯 𑀦𑀸𑀫𑀦𑁆𑀢𑀺 (𑀯𑀺𑀪. 𑀅𑀝𑁆𑀞. 𑁯𑁪𑁭) 𑀳𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀓𑁆𑀔𑀢𑀻𑀢𑀺. 𑀅𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀢𑁆𑀢𑁂𑀧𑀺 𑀏𑀓𑀁 𑀓𑀢𑀺𑀧𑀬𑁂 𑀯𑀸 𑀲𑀢𑁆𑀢𑁂 𑀑𑀤𑀺𑀲𑁆𑀲 𑀧𑀯𑀢𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀸𑀤𑀺𑀉𑀧𑀸𑀤𑀸𑀦𑀯𑀺𑀲𑀬𑁂 𑀧𑀯𑀢𑁆𑀢𑀢𑁆𑀢𑀸 𑀓𑀣𑀫𑀧𑁆𑀧𑀫𑀸𑀡𑀕𑁄𑀘𑀭𑀸𑀢𑀺 𑀆𑀳 ‘‘𑀦 𑀘 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦𑀸’’𑀢𑀺𑀆𑀤𑀺. 𑀏𑀯𑀫𑁆𑀧𑀺 𑀬𑀣𑀸 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸𑀢𑀺 𑀲𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀸𑀬𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸 𑀯𑀼𑀘𑁆𑀘𑀢𑀺 𑀉𑀧𑀸𑀤𑀸𑀦𑀯𑀲𑁂𑀦, 𑀏𑀯𑀁 𑀲𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀸𑀦𑀫𑁆𑀧𑀺 𑀫𑁂𑀢𑁆𑀢𑀸𑀤𑀻𑀦𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸𑀧𑀺 𑀲𑀺𑀬𑀸𑀢𑀺 𑀘𑁂? 𑀦, 𑀅𑀧𑀭𑀸𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀫𑁂𑀢𑁆𑀢𑀸𑀤𑀻𑀦𑀁 𑀲𑀉𑀧𑀸𑀤𑀸𑀦𑀕𑁆𑀕𑀳𑀡𑀸𑀲𑀫𑁆𑀪𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀭𑀸𑀫𑀸𑀲𑀸’’𑀢𑀺𑀆𑀤𑀺.

𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀲𑀼𑀪𑀓𑀣𑀸𑀯𑀡𑁆𑀡𑀦𑀸

𑁨𑁬𑁩. ‘‘𑀏𑀓𑀸𑀳𑀫𑀢𑀁 𑀯𑀸 𑀤𑁆𑀯𑀻𑀳𑀫𑀢𑀁 𑀯𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁯; 𑀫. 𑀦𑀺. 𑁧.𑁧𑁧𑁨) 𑀯𑀼𑀢𑁆𑀢𑀸𑀲𑀼 𑀦𑀯𑀲𑀼 𑀲𑀺𑀯𑀣𑀺𑀓𑀸𑀲𑀼 𑀯𑀡𑁆𑀡𑀯𑀲𑁂𑀦 𑀧𑀯𑀢𑁆𑀢𑀚𑁆𑀛𑀸𑀦𑀁 𑀲𑀺𑀯𑀣𑀺𑀓𑀸𑀯𑀡𑁆𑀡𑀚𑁆𑀛𑀸𑀦𑀁. 𑀦𑀦𑀼 𑀘𑁂𑀢𑀲𑁆𑀲 𑀯𑀡𑁆𑀡𑀓𑀲𑀺𑀡𑁂𑀳𑀺 𑀕𑀳𑀡𑀁 𑀬𑀼𑀢𑁆𑀢𑀁, 𑀦 𑀅𑀲𑀼𑀪𑁂𑀳𑀻𑀢𑀺? 𑀦, 𑀲𑀺𑀯𑀣𑀺𑀓𑀸𑀯𑀡𑁆𑀡𑀁 𑀉𑀧𑀫𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑀸𑀬𑁂 𑀧𑀝𑀺𑀓𑀽𑀮𑀢𑁆𑀢𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀯𑀡𑁆𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦𑀸’’𑀢𑀺. 𑀅𑀬𑀫𑀢𑁆𑀣𑁄 𑀲𑀺𑀯𑀣𑀺𑀓𑀸𑀯𑀡𑁆𑀡𑀚𑁆𑀛𑀸𑀦𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄𑀢𑀺 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳.

𑀅𑀲𑀼𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸

𑁨𑁬𑁫. 𑀭𑀽𑀧𑀦𑀺𑀫𑀺𑀢𑁆𑀢𑀦𑁆𑀢𑀺 𑀭𑀽𑀧𑀳𑁂𑀢𑀼 𑀭𑀽𑀧𑀸𑀥𑀺𑀓𑀭𑀡𑀁. 𑀭𑀽𑀧𑀸𑀭𑀽𑀧𑀦𑀺𑀫𑀺𑀢𑁆𑀢𑁂𑀲𑀽𑀢𑀺 𑀭𑀽𑀧𑀥𑀫𑁆𑀫𑁂𑀲𑀼 𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀦𑀺𑀫𑀺𑀢𑁆𑀢𑁂𑀲𑀼 𑀘. 𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑁂𑀲𑀽𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀭𑀽𑀧𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀸𑀫𑀲𑀢𑀺 𑀭𑀽𑀧𑀫𑁆𑀧𑀺 𑀯𑀸 𑀭𑀽𑀧𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀫𑁆𑀧𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀲𑀫𑁆𑀪𑀯𑀢𑁄. 𑀭𑀽𑀧𑀸𑀤𑀻𑀲𑀽𑀢𑀺 𑀭𑀽𑀧𑀸𑀭𑀽𑀧𑀦𑀺𑀫𑀺𑀢𑁆𑀢𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑁂𑀲𑀼 𑀭𑀽𑀧𑀧𑀝𑀺𑀩𑀤𑁆𑀥𑀥𑀫𑁆𑀫𑁂𑀲𑀼 𑀘. 𑀅𑀦𑀸𑀯𑀚𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀘𑀼𑀢𑀺𑀢𑁄 𑀉𑀤𑁆𑀥𑀁 𑀉𑀧𑁆𑀧𑀢𑁆𑀢𑀺𑀭𑀳𑀸𑀦𑀁…𑀧𑁂… 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀲𑀫𑀢𑀺𑀓𑁆𑀓𑀫𑁄𑀢𑀺 𑀏𑀢𑁂𑀦 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁆𑀢𑁂𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀦𑀁 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀓𑀺𑀭𑀺𑀬𑁂𑀳𑀺 𑀯𑀺𑀲𑁂𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺 𑀅𑀦𑀥𑀺𑀕𑀢𑀪𑀸𑀯𑀢𑁄. 𑀬𑁂𑀲𑀜𑁆𑀳𑀺 𑀭𑀽𑀧𑀲𑀜𑁆𑀜𑀸𑀤𑀻𑀦𑀁 𑀅𑀭𑀽𑀧𑀪𑀸𑀯𑀦𑀸𑀬 𑀲𑀫𑀢𑀺𑀓𑁆𑀓𑀫𑀸𑀤𑀺𑀓𑁄 𑀮𑀩𑁆𑀪𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀽𑀧𑀪𑀸𑀯𑀦𑀸𑀬 𑀅𑀪𑀸𑀯𑁂 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀉𑀧𑁆𑀧𑀢𑁆𑀢𑀺𑀭𑀳𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀬𑀸𑀢𑀺 𑀏𑀓𑀦𑁆𑀢𑀭𑀽𑀧𑀦𑀺𑀲𑁆𑀲𑀺𑀢𑀸 𑀅𑀯𑀲𑀺𑀝𑁆𑀞𑀧𑀭𑀺𑀢𑁆𑀢𑀯𑀺𑀧𑀸𑀓𑀲𑀜𑁆𑀜𑀸𑀤𑀬𑁄.

𑀆𑀦𑁂𑀜𑁆𑀚𑀲𑀦𑁆𑀢𑀲𑀫𑀸𑀧𑀢𑁆𑀢𑀺𑀲𑀼𑀔𑀸𑀦𑀼𑀪𑀯𑀦𑀪𑀯𑀯𑀺𑀲𑁂𑀲𑀽𑀧𑀧𑀚𑁆𑀚𑀦𑀸𑀤𑀬𑁄 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀻𑀦𑀁 𑀅𑀢𑁆𑀣𑀸𑀢𑀺 𑀆𑀳 ‘‘𑀭𑀽𑀧𑀲𑀜𑁆𑀜𑀸…𑀧𑁂… 𑀦 𑀅𑀢𑁆𑀣𑁄’’𑀢𑀺.

𑀇𑀥 𑀉𑀕𑁆𑀖𑀸𑀝𑀺𑀢𑀓𑀲𑀺𑀡𑀯𑀲𑁂𑀦 𑀧𑀭𑀺𑀢𑁆𑀢𑀸𑀦𑀦𑁆𑀢𑀢𑀸 𑀳𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀢𑁂 𑀓𑀣𑀫𑀸𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀘𑀦𑀦𑁆𑀢𑀺? 𑀢𑀢𑁆𑀣𑀸𑀧𑀺 𑀅𑀦𑀦𑁆𑀢𑀨𑀭𑀡𑀲𑀩𑁆𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀅𑀦𑀦𑁆𑀢𑀨𑀭𑀡𑀢𑀸𑀲𑀩𑁆𑀪𑀸𑀯𑁂’’𑀢𑀺. 𑀬𑀤𑀺 𑀲𑀩𑁆𑀩𑀢𑁆𑀣 𑀅𑀦𑀦𑁆𑀢𑀨𑀭𑀡𑀢𑀸 𑀅𑀢𑁆𑀣𑀺, 𑀅𑀣 𑀓𑀲𑁆𑀫𑀸 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀫𑀬𑀯𑀯𑀢𑁆𑀣𑀸𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀝𑀺𑀧𑀢𑁆𑀢𑀻𑀢𑀺 𑀛𑀸𑀦𑀪𑀸𑀯𑀦𑀸𑀓𑀸𑀭𑀫𑀸𑀳.

𑁨𑁬𑁬. 𑀉𑀕𑁆𑀖𑀸𑀝𑀪𑀸𑀯𑁄 𑀉𑀕𑁆𑀖𑀸𑀝𑀺𑀫𑀁. 𑀬𑀣𑀸 𑀧𑀸𑀓𑀺𑀫𑀁.

𑁨𑁬𑁮. 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀢𑀺𑀓𑁆𑀓𑀫𑀢𑁄 𑀢𑀢𑀺𑀬𑀸𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀢𑁆𑀯𑀸 𑀬𑀼𑀢𑁆𑀢𑀺𑀢𑁄 𑀆𑀕𑀫𑀢𑁄 𑀘 𑀢𑀤𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀤𑀢𑀺𑀓𑁆𑀓𑀫𑀢𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀻𑀦𑀁 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 𑀯𑀺𑀲𑁂𑀲𑀢𑁄 𑀆𑀭𑀫𑁆𑀫𑀡𑁂 𑀤𑁄𑀲𑀤𑀲𑁆𑀲𑀦𑀁 𑀢𑀤𑁂𑀯 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀬𑀼𑀢𑁆𑀢𑀺, 𑀆𑀭𑀫𑁆𑀫𑀡𑁂 𑀧𑀦 𑀅𑀢𑀺𑀓𑁆𑀓𑀦𑁆𑀢𑁂 𑀢𑀤𑀸𑀭𑀫𑁆𑀫𑀡𑀁 𑀛𑀸𑀦𑀫𑁆𑀧𑀺 𑀅𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀺. 𑀪𑀸𑀯𑀦𑀸𑀬 𑀆𑀭𑀫𑁆𑀫𑀡𑀲𑁆𑀲 𑀯𑀺𑀕𑀫𑀦𑀁 𑀅𑀧𑀦𑀬𑀦𑀁 𑀯𑀺𑀪𑀸𑀯𑀦𑀸. 𑀧𑀸𑀴𑀺𑀬𑀦𑁆𑀢𑀺 𑀯𑀺𑀪𑀗𑁆𑀕𑁂. 𑀦𑀦𑀼 𑀘 𑀧𑀸𑀴𑀺𑀬𑀁 ‘‘𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 ‘‘𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡’’𑀦𑁆𑀢𑀺. ‘‘𑀦 𑀢𑀜𑁆𑀜𑁂𑀯𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀲𑁂𑀲𑀯𑀘𑀦𑁂𑀦 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀪𑀽𑀫𑀓𑀓𑀼𑀲𑀮𑀯𑀡𑁆𑀡𑀦𑀸

𑁨𑁬𑁯. 𑀲𑀢𑁆𑀢𑀳𑀺 𑀫𑀳𑀸𑀯𑀸𑀭𑁂𑀳𑀻𑀢𑀺 𑀧𑀝𑀺𑀘𑁆𑀘𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀲𑁆𑀲𑀬𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀳𑀸𑀯𑀸𑀭𑁂𑀳𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀸𑀤𑀺𑀦𑀬𑀸 𑀅𑀦𑀼𑀮𑁄𑀫𑀸𑀤𑀺𑀦𑀬𑀸. 𑀪𑀸𑀭𑀤𑁆𑀯𑀸𑀚𑀕𑁄𑀢𑀫𑀸𑀤𑀬𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀮𑁄𑀓𑁂 𑀕𑁄𑀢𑁆𑀢𑀸𑀦𑀺 𑀫𑀽𑀮𑀪𑀽𑀢𑀸𑀦𑀺, 𑀢𑀣𑀸 𑀓𑀝𑁆𑀞𑀓𑀮𑀸𑀧𑀸𑀤𑀬𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑁂𑀯 𑀘𑀭𑀡𑀸𑀦𑀻𑀢𑀺 𑀆𑀳 ‘‘𑀅𑀝𑁆𑀞𑀘𑀢𑁆𑀢𑀸𑀮𑀻𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀢𑁂𑀲𑀦𑁆𑀢𑀺 𑀪𑀩𑁆𑀩𑀸𑀪𑀩𑁆𑀩𑀸𑀦𑀁. 𑀤𑁆𑀯𑀸𑀭𑀲𑀻𑀲𑁂𑀦 𑀤𑁆𑀯𑀸𑀭𑀯𑀦𑁆𑀢𑀸𑀦𑀺 𑀕𑀬𑁆𑀳𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀢𑀁𑀢𑀁𑀤𑁆𑀯𑀸𑀭𑀸𑀦𑀺 𑀯𑀸 𑀓𑀸𑀬𑀸𑀤𑀻𑀦𑀻’’𑀢𑀺. 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀯𑀸 𑀓𑀢𑀁 𑀳𑀻𑀦𑀁, 𑀅𑀚𑁆𑀛𑀼𑀧𑁂𑀓𑁆𑀔𑀦𑁂𑀦 𑀓𑀢𑀁 𑀫𑀚𑁆𑀛𑀺𑀫𑀁, 𑀲𑀓𑁆𑀓𑀘𑁆𑀘𑀓𑀢𑀁 𑀧𑀡𑀻𑀢𑀁. 𑀆𑀫𑀺𑀲𑀓𑀺𑀜𑁆𑀚𑀓𑁆𑀔𑀸𑀤𑀺𑀳𑁂𑀢𑀼 𑀯𑀸 𑀓𑀢𑀁 𑀳𑀻𑀦𑀁, 𑀧𑀼𑀜𑁆𑀜𑀨𑀮𑀓𑀸𑀫𑀢𑀸𑀬 𑀓𑀢𑀁 𑀫𑀚𑁆𑀛𑀺𑀫𑀁, 𑀓𑀢𑁆𑀢𑀩𑁆𑀩𑀫𑀺𑀘𑁆𑀘𑁂𑀯 𑀅𑀭𑀺𑀬𑀪𑀸𑀯𑁂 𑀞𑀺𑀢𑁂𑀦 𑀓𑀢𑀁 𑀧𑀡𑀻𑀢𑀁. 𑀪𑀯𑀲𑀫𑁆𑀧𑀢𑁆𑀢𑀺𑀮𑁄𑀪𑁂𑀦 𑀯𑀸 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁, 𑀅𑀮𑁄𑀪𑀚𑁆𑀛𑀸𑀲𑀬𑁂𑀦 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁, 𑀧𑀭𑀳𑀺𑀢𑀸𑀬 𑀧𑀯𑀢𑁆𑀢𑀺𑀢𑀁 𑀧𑀡𑀻𑀢𑀁. 𑀧𑀭𑀺𑀢𑁆𑀢𑀓𑀢𑀁 𑀯𑀸 𑀳𑀻𑀦𑀁, 𑀫𑀢𑁆𑀢𑀲𑁄 𑀓𑀢𑀁 𑀫𑀚𑁆𑀛𑀺𑀫𑀁, 𑀅𑀥𑀺𑀫𑀢𑁆𑀢𑀲𑁄 𑀓𑀢𑀁 𑀧𑀡𑀻𑀢𑀁. 𑀫𑀳𑀕𑁆𑀕𑀢𑁂𑀲𑀼 𑀧𑀦 𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀳𑀻𑀦𑀁, 𑀦𑀸𑀢𑀺𑀲𑀼𑀪𑀸𑀯𑀺𑀢𑀁 𑀫𑀚𑁆𑀛𑀺𑀫𑀁, 𑀲𑀼𑀪𑀸𑀯𑀺𑀢𑀁 𑀯𑀲𑀺𑀧𑁆𑀧𑀢𑁆𑀢𑀁 𑀧𑀡𑀻𑀢𑀁. 𑀇𑀫𑁂𑀲𑀼𑀧𑀺 𑀏𑀓𑁂𑀓𑀲𑁆𑀲 𑀳𑀻𑀦𑀸𑀤𑀺𑀓𑀲𑁆𑀲 𑀆𑀬𑀽𑀳𑀦𑀦𑀸𑀦𑀢𑁆𑀢𑀸𑀤𑀺𑀯𑀲𑁂𑀦 𑀳𑀻𑀦𑀸𑀤𑀺𑀪𑁂𑀤𑁄 𑀮𑀩𑁆𑀪𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀲𑁂𑀦𑀸𑀢𑀺 𑀬𑁄 𑀘𑀺𑀢𑁆𑀢𑀧𑁆𑀧𑀪𑀸𑀯𑀺𑀢𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀪𑀸𑀯𑁄, 𑀲𑁄 𑀢𑀁𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑁂 𑀉𑀧𑀘𑀭𑀺𑀢𑁄𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄.

𑀢𑁂𑀪𑀽𑀫𑀓𑀓𑀼𑀲𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀡𑁆𑀡𑀦𑀸

𑁨𑁭𑁭. ‘‘𑀓𑁂𑀦𑀝𑁆𑀞𑁂𑀦 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺𑀆𑀤𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀘𑀦𑀁 (𑀧𑀝𑀺. 𑀫. 𑁨.𑁪𑁩) 𑀅𑀝𑁆𑀞𑀓𑀣𑀸𑀬 𑀆𑀪𑀢𑀁, 𑀢𑀲𑁆𑀫𑀸 𑀢𑀢𑁆𑀣 ‘‘𑀢𑀺𑀯𑀺𑀥𑁄𑀧𑀺 𑀅𑀦𑀼𑀢𑁆𑀢𑀭𑀥𑀫𑁆𑀫𑁄 𑀮𑁄𑀓𑀁 𑀢𑀭𑀢𑀻’’𑀢𑀺𑀆𑀤𑀺𑀦𑀸 𑀲𑀗𑁆𑀕𑀳𑀺𑀢𑁄𑀢𑀺 𑀢𑀁 𑀢𑀻𑀳𑀺 𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀁 𑀢𑀭𑀢𑀻𑀢𑀺 𑀏𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀓𑁂𑀓𑀲𑁆𑀫𑀺𑀁 𑀬𑁄𑀚𑁂𑀢𑀩𑁆𑀩𑁄 𑀮𑁄𑀓𑀲𑁆𑀲 𑀅𑀦𑁆𑀢𑀕𑀫𑀦𑀸𑀤𑀺𑀢𑀸𑀬 𑀫𑀕𑁆𑀕𑀸𑀤𑀻𑀲𑀼𑀧𑀺 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀫𑀕𑁆𑀕𑁂𑀬𑁂𑀯 𑀯𑀸 𑀢𑀺𑀯𑀺𑀥𑁄𑀧𑀺 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀢𑀺𑀯𑀢𑁆𑀢𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀢𑀸 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀁 𑀆𑀲𑁂𑀯𑀦𑀸𑀢𑀺 𑀇𑀫𑁂 𑀢𑀬𑁄 𑀪𑀸𑀯𑀦𑀸𑀯𑀺𑀲𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀲𑁆𑀫𑀸 𑀘𑁂𑀢𑁂 𑀪𑀸𑀯𑀦𑀸𑀯𑀺𑀲𑁂𑀲𑀸 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼 𑀘 𑀢𑀁𑀢𑀁𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀦𑀪𑀽𑀢𑀸𑀬 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬 𑀲𑀫𑁆𑀧𑀸𑀤𑀺𑀢𑁂𑀦 𑀜𑀸𑀡𑀯𑀺𑀲𑁂𑀲𑁂𑀦 𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀫𑀜𑁆𑀜𑀁…𑀧𑁂… 𑀯𑀟𑁆𑀠𑁂𑀢𑀻’’𑀢𑀺.

𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀭𑀼𑀓𑁆𑀔𑁄 𑀯𑀺𑀬 𑀲𑀸𑀔𑀸𑀬 𑀆𑀥𑀸𑀭𑀪𑀸𑀯𑁂𑀦 𑀯𑁄𑀳𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀨𑀮𑀜𑀸𑀡𑀨𑀮𑀗𑁆𑀕𑀸𑀦𑀁 𑀦𑀺𑀲𑁆𑀲𑀬𑀯𑀘𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀸. 𑀢𑀢𑁄𑀬𑁂𑀯 𑀦𑀺𑀲𑁆𑀲𑀬𑀪𑀸𑀯𑀢𑁄 𑀧𑀢𑀺𑀝𑁆𑀞𑀸𑀪𑀸𑀯𑀢𑁄. 𑀅𑀭𑀺𑀬𑀨𑀮𑀲𑀦𑁆𑀦𑀺𑀲𑁆𑀲𑀬𑁂𑀦 𑀳𑀺 𑀅𑀭𑀺𑀬𑀸 𑀓𑀢𑀓𑀺𑀘𑁆𑀘𑀸 𑀲𑀼𑀝𑁆𑀞𑀼 𑀦𑀺𑀩𑁆𑀩𑀺𑀦𑁆𑀦𑀲𑀩𑁆𑀩𑀪𑀯𑀸𑀧𑀺 𑀘𑀺𑀭𑀢𑀭𑀁 𑀮𑁄𑀓𑁂 𑀧𑀭𑀳𑀺𑀢𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀓𑀺𑀮𑁂𑀲𑀸𑀦𑀁 𑀑𑀥𑀺𑀲𑁄 𑀧𑀚𑀳𑀦𑀓𑀸𑀧𑀺 𑀅𑀭𑀺𑀬𑀫𑀕𑁆𑀕𑀸 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀲𑀩𑁆𑀩𑀓𑀼𑀲𑀮𑀧𑀝𑀺𑀧𑀓𑁆𑀔𑀢𑀸𑀬 𑀅𑀜𑁆𑀜𑀫𑀕𑁆𑀕𑀧𑁆𑀧𑀳𑀸𑀢𑀩𑁆𑀩𑁂𑀲𑀼𑀧𑀺 𑀓𑁂𑀦𑀘𑀺 𑀧𑀳𑀸𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑀁 𑀧𑀳𑀸𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀭𑁂𑀲𑀁 𑀯𑀺𑀚𑁆𑀚𑀼𑀢𑁄𑀪𑀸𑀲𑁂𑀦 𑀯𑀺𑀬 𑀢𑀫𑀲𑁆𑀲𑀸’’𑀢𑀺 𑀆𑀳. 𑀬𑁂𑀦 𑀧𑀸𑀴𑀺𑀬𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀜𑀸𑀡𑀸𑀦𑀁 𑀯𑀺𑀚𑁆𑀚𑀽𑀧𑀫𑀢𑀸 𑀤𑀲𑁆𑀲𑀺𑀢𑀸. 𑀬𑀤𑀺 𑀏𑀯𑀁 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸 𑀇𑀢𑀭𑁂𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀦 𑀢𑁂𑀲𑀁 𑀲𑀫𑀼𑀘𑁆𑀙𑁂𑀤𑀯𑀘𑀦𑀁 𑀬𑀼𑀢𑁆𑀢𑀁. 𑀦 𑀳𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁂 𑀤𑀲𑁆𑀲𑀦𑀫𑀕𑁆𑀕𑁄 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀣𑀸 𑀘 𑀲𑀢𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀏𑀯 𑀢𑁂 𑀲𑀺𑀬𑀼𑀁. 𑀅𑀣 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀬𑁂𑀦 ‘‘𑀯𑀺𑀚𑁆𑀚𑀼𑀢𑁄𑀪𑀸𑀲𑁂𑀦 𑀯𑀺𑀬 𑀢𑀫𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀬 𑀏𑀯 𑀲𑀺𑀤𑁆𑀥𑀁 𑀦 𑀘 𑀬𑀼𑀢𑁆𑀢𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀢𑀤𑀗𑁆𑀕𑀯𑀲𑁂𑀦 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺. 𑀯𑀺𑀓𑁆𑀔𑀫𑁆𑀪𑀦𑁂𑀧𑀺 𑀏𑀲𑁂𑀯 𑀦𑀬𑁄, 𑀅𑀦𑀼𑀮𑁄𑀫𑀜𑀸𑀡𑁂𑀦𑁂𑀯 𑀢𑀲𑁆𑀲 𑀲𑀸𑀢𑀺𑀲𑀬𑀁 𑀲𑀸𑀥𑀺𑀢𑀢𑁆𑀢𑀸. 𑀅𑀣 𑀧𑀦 𑀧𑀞𑀫𑀫𑀕𑁆𑀕𑀯𑀚𑁆𑀛𑀸 𑀏𑀯 𑀓𑀺𑀮𑁂𑀲𑀸 𑀇𑀢𑀭𑁂𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀇𑀢𑀭𑀪𑀸𑀯𑁄𑀯 𑀦 𑀲𑀺𑀬𑀸, 𑀦 𑀘 𑀅𑀦𑀧𑀸𑀬𑀕𑀫𑀦𑀻𑀬𑀸 𑀦𑀸𑀫 𑀓𑀺𑀮𑁂𑀲𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀅𑀢𑁆𑀣𑀺, 𑀦𑀸𑀧𑀺 𑀧𑀞𑀫𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸 𑀢𑁂𑀦 𑀯𑀺𑀚𑁆𑀚𑀼𑀢𑁄𑀪𑀸𑀲𑁂𑀦 𑀯𑀺𑀬 𑀢𑀫𑁄 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄𑀬𑀁 ‘‘𑀇𑀢𑀭𑁂𑀲𑀁…𑀧𑁂… 𑀲𑀫𑀼𑀘𑁆𑀙𑁂𑀤𑁄’’𑀢𑀺. 𑀮𑁄𑀓𑀺𑀬𑀚𑁆𑀛𑀸𑀦𑀫𑁆𑀧𑀺 𑀦 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀇𑀚𑁆𑀛𑀢𑀻𑀢𑀺 𑀇𑀤𑀁 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀦𑁂𑀢𑀩𑁆𑀩𑀁 𑀦𑁂𑀬𑁆𑀬𑀢𑁆𑀣𑀢𑁆𑀢𑀸𑀢𑀺 𑀢𑀁 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀓𑀢𑀸𑀥𑀺𑀓𑀸𑀭𑀲𑁆𑀲𑀸’’𑀢𑀺 𑀆𑀳. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀯𑀘𑀦𑀲𑁆𑀲 𑀘 𑀲𑀧𑁆𑀧𑀤𑁂𑀲𑀢𑀁 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀓𑀢𑀸𑀥𑀺𑀓𑀸𑀭𑀲𑁆𑀲 𑀅𑀭𑀺𑀬𑀲𑁆𑀲 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀫𑀸𑀦𑀫𑁆𑀧𑀺 𑀛𑀸𑀦𑀁 𑀫𑀕𑁆𑀕𑀧𑀝𑀺𑀧𑀤𑀸𑀯𑀲𑁂𑀦 𑀧𑀝𑀺𑀧𑀤𑀸𑀲𑀳𑀺𑀢𑀫𑁂𑀯𑀸𑀢𑀺. 𑀦 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀇𑀚𑁆𑀛𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑁂𑀦𑁂𑀢𑀁 𑀯𑀘𑀦𑀁 𑀦𑀺𑀧𑁆𑀧𑀤𑁂𑀲𑀫𑁂𑀯𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀢𑀸𑀥𑀺𑀓𑀸𑀭𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀲𑁆𑀲 𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀣𑀢𑀸 𑀧𑀸𑀴𑀺𑀢𑁄𑀧𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸𑀯𑀼𑀢𑁆𑀢…𑀧𑁂… 𑀓𑀢𑀸’’𑀢𑀺.

‘‘𑀬𑁄 𑀓𑁄𑀘𑀻𑀢𑀺 𑀅𑀯𑀺𑀲𑁂𑀲𑀯𑀘𑀦’’𑀦𑁆𑀢𑀺 𑀢𑀲𑁆𑀲 𑀅𑀧𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀓𑀺𑀁 𑀤𑁆𑀯𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀆𑀤𑀺𑀫𑀸𑀳. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀁 𑀧𑀭𑀺𑀚𑀸𑀦𑀦𑀁. 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀸𑀤𑀻𑀦𑀦𑁆𑀢𑀺 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀧𑀝𑀺𑀯𑁂𑀥𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀸𑀦𑀁. 𑀓𑀺𑀘𑁆𑀙𑀲𑀺𑀤𑁆𑀥𑀺𑀢𑁄𑀢𑀺 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀸𑀤𑀻𑀦𑀁 𑀓𑁂𑀲𑀜𑁆𑀘𑀺 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀓𑀺𑀘𑁆𑀙𑀲𑀺𑀤𑁆𑀥𑀺𑀢𑁄. 𑀏𑀲 𑀦𑀬𑁄 𑀤𑀼𑀢𑀺𑀬𑀯𑀸𑀭𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁. 𑀲𑀼𑀔𑀲𑀺𑀤𑁆𑀥𑀺𑀬𑀫𑁆𑀧𑀻𑀢𑀺 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀸𑀤𑀻𑀦𑀁 𑀓𑀺𑀘𑁆𑀙𑀲𑀺𑀤𑁆𑀥𑀺 𑀫𑀕𑁆𑀕𑀧𑀸𑀢𑀼𑀪𑀸𑀯𑀤𑀦𑁆𑀥𑀪𑀸𑀯𑀲𑁆𑀲 𑀓𑀸𑀭𑀡𑀪𑀸𑀯𑁂 𑀅𑀦𑁂𑀓𑀦𑁆𑀢𑀺𑀓𑀸. 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀦 𑀫𑀦𑁆𑀤𑀢𑀸 𑀢𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀏𑀢𑀤𑀦𑁆𑀢𑀢𑁆𑀢𑀸 𑀧𑀝𑀺𑀧𑀤𑀸𑀬𑀸𑀢𑀺 𑀏𑀢𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑀺𑀭𑀸𑀘𑀺𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀫𑀕𑁆𑀕𑀲𑁆𑀲 𑀔𑀺𑀧𑁆𑀧𑀤𑀦𑁆𑀥𑀸𑀪𑀺𑀜𑁆𑀜𑀢𑀸 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀸𑀦𑀦𑁆𑀢𑀺 𑀧𑀼𑀭𑀺𑀫𑀯𑀸𑀭𑀸𑀦𑀁, 𑀮𑀓𑁆𑀔𑀡𑀧𑀝𑀺𑀯𑁂𑀥𑀸𑀤𑀻𑀦𑀁𑀬𑁂𑀯 𑀯𑀸. 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂 𑀲𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀪𑀸𑀯𑁄, 𑀦 𑀢𑀢𑁄 𑀳𑁂𑀝𑁆𑀞𑀸𑀢𑀺 𑀦𑀺𑀘𑁆𑀙𑀺𑀢𑀢𑁆𑀢𑀸 𑀆𑀳 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑀢𑀸𑀯𑀲𑁂𑀦𑀸’’𑀢𑀺. 𑀢𑀲𑁆𑀲 𑀲𑀼𑀔𑀸𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸 𑀉𑀓𑁆𑀓𑀁𑀲𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀯𑀺𑀲𑀁𑀯𑀸𑀤𑀦𑀪𑁂𑀤𑀦𑀸𑀦𑀺𑀝𑁆𑀞𑀸𑀦𑀢𑁆𑀣𑀦𑀺𑀬𑁄𑀚𑀦𑀸𑀦𑀁 𑀧𑀯𑀢𑁆𑀢𑀺, 𑀢𑀢𑁆𑀣 𑀲𑀺𑀦𑁂𑀳𑀯𑀺𑀭𑀳𑁂𑀦𑁂𑀯 𑀢𑁂𑀲𑀁 𑀧𑀯𑀢𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀢𑀸 𑀘 𑀅𑀧𑀭𑀺𑀕𑁆𑀕𑀳𑀢𑀸 𑀘 𑀯𑀼𑀢𑁆𑀢𑀸. 𑀢𑀧𑁆𑀧𑀝𑀺𑀧𑀓𑁆𑀔𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸 𑀲𑀫𑁆𑀫𑀸𑀯𑀸𑀘𑀸𑀬 𑀲𑀺𑀦𑀺𑀤𑁆𑀥𑀪𑀸𑀯𑀢𑀸 𑀧𑀭𑀺𑀕𑁆𑀕𑀸𑀳𑀓𑀲𑀪𑀸𑀯𑀢𑀸. 𑀲𑀤𑁆𑀥𑀸𑀯𑀺𑀲𑁂𑀲𑀬𑁄𑀕𑀢𑁄 𑀯𑀸 𑀢𑀲𑁆𑀲𑀸 𑀲𑀺𑀦𑀺𑀤𑁆𑀥𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀧𑀯𑀢𑁆𑀢𑁂𑀢𑀺. 𑀚𑀻𑀯𑀫𑀸𑀦𑁄 𑀯𑀸 𑀲𑀢𑁆𑀢𑁄, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀸 𑀯𑁄𑀤𑀸𑀬𑀦𑁆𑀢𑀺 𑀏𑀢𑁂𑀦 𑀲𑀬𑀁 𑀯𑀸 𑀯𑁄𑀤𑀸𑀬𑀢𑀻𑀢𑀺 𑀯𑁄𑀤𑀸𑀦𑀁.

𑁨𑁮𑁫. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀧𑀢𑀺𑀝𑁆𑀞𑀸𑀦𑀁. 𑀅𑀯𑀲𑁂𑀲𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀆𑀬𑀽𑀳𑀦𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀢𑀺𑀝𑁆𑀞𑀸𑀦𑀁. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀆𑀬𑀽𑀳𑀦𑀸. 𑀮𑀻𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁. 𑀉𑀤𑁆𑀥𑀘𑁆𑀘𑀯𑀲𑁂𑀦 𑀆𑀬𑀽𑀳𑀦𑀸. 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀆𑀬𑀽𑀳𑀦𑀸. 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁. 𑀲𑀩𑁆𑀩𑀮𑁄𑀓𑀺𑀬𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸𑀢𑀺 𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁂𑀲𑀼 𑀧𑀓𑀸𑀭𑀦𑁆𑀢𑀭𑁂𑀲𑀼 𑀇𑀥 𑀅𑀯𑀼𑀢𑁆𑀢𑀸𑀦𑀁 𑀯𑀲𑁂𑀦𑀧𑀺 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀓𑀺𑀮𑁂𑀲𑀕𑁆𑀕𑀳𑀡𑁂𑀦 𑀢𑀡𑁆𑀳𑀸𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀕𑀳𑀺𑀢𑀸 𑀢𑀁𑀲𑀪𑀸𑀕𑀢𑀸𑀬 𑀢𑀤𑁂𑀓𑀝𑁆𑀞𑀢𑀸𑀬 𑀘. 𑀢𑀣𑀸 𑀅𑀪𑀺𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀅𑀯𑀲𑁂𑀲𑀓𑀺𑀮𑁂𑀲𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀩𑁆𑀩𑀮𑁄𑀓𑀺𑀬𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸. 𑀮𑀻𑀦𑀼𑀤𑁆𑀥𑀘𑁆𑀘𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀸𑀦𑀁 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀢𑁂𑀳𑀺 𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑁂 𑀯𑀢𑁆𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀢𑀢𑁆𑀣 𑀯𑀺𑀲𑁂𑀲𑀧𑀘𑁆𑀘𑀬𑀢𑀁 𑀤𑀻𑀧𑁂𑀢𑀼𑀁 𑀢𑀤𑀼𑀪𑀬𑀯𑀲𑁂𑀦𑀧𑀺 𑀬𑁄𑀚𑀦𑀸 𑀓𑀢𑀸. 𑀦𑀬𑀤𑀲𑁆𑀲𑀦𑀁 𑀯𑀸 𑀏𑀢𑀁 𑀢𑀢𑁆𑀣 𑀤𑀝𑁆𑀞𑀩𑁆𑀩𑀁. 𑀏𑀯𑀫𑀺𑀢𑀭𑁂𑀧𑀺 𑀧𑀓𑀸𑀭𑀸 𑀬𑁄𑀚𑁂𑀢𑀩𑁆𑀩𑀸𑀢𑀺. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁪.𑁧𑁧𑁨, 𑁧𑁧𑁪) 𑀅𑀗𑁆𑀕-𑀲𑀤𑁆𑀤𑀲𑁆𑀲 𑀓𑀸𑀭𑀡𑀢𑁆𑀣𑀢𑀸 𑀤𑀝𑁆𑀞𑀩𑁆𑀩𑀸.

𑁨𑁯𑁯. 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀪𑀸𑀲𑀫𑀸𑀦𑁄 𑀓𑀭𑁄𑀢𑀺 𑀦𑀸𑀫 𑀓𑀺𑀁 𑀯𑀓𑁆𑀔𑀫𑀸𑀦𑀁 𑀓𑀺𑀭𑀺𑀬𑀁, 𑀓𑀸 𑀧𑀦 𑀲𑀸𑀢𑀺? 𑀫𑀼𑀲𑀸𑀯𑀸𑀤𑀸𑀤𑀺𑀓𑀺𑀭𑀺𑀬𑀸𑀢𑀺 𑀯𑀺𑀤𑀺𑀢𑁄𑀯𑀸𑀬𑀫𑀢𑁆𑀣𑁄. 𑀏𑀯𑀁 𑀯𑀸 𑀏𑀢𑁆𑀣 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑁩𑁦𑁧. 𑀦𑀺𑀧𑁆𑀨𑀸𑀤𑀺𑀢𑀧𑀘𑁆𑀘𑀬𑀸𑀦𑀦𑁆𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀁. 𑀓𑀼𑀳𑀦𑀯𑀢𑁆𑀣𑀽𑀦𑀻𑀢𑀺 𑀧𑀸𑀧𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬 𑀮𑀽𑀔𑀘𑀻𑀯𑀭𑀸𑀤𑀺𑀲𑁂𑀯𑀦𑀯𑀲𑁂𑀦 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀅𑀭𑀳𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁨𑁪) 𑀅𑀢𑁆𑀢𑀸𑀦𑀁 𑀅𑀭𑀺𑀬𑀕𑀼𑀡𑀲𑀸𑀫𑀦𑁆𑀢𑀁 𑀓𑀢𑁆𑀯𑀸 𑀪𑀡𑀦𑀯𑀲𑁂𑀦 𑀯𑀺𑀲𑁂𑀲𑀮𑀸𑀪𑀺𑀦𑁄 𑀯𑀺𑀬 𑀅𑀢𑁆𑀢𑀦𑁄 𑀧𑀭𑀺𑀳𑀭𑀡𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀭𑁂𑀲𑀁 𑀯𑀺𑀫𑁆𑀳𑀸𑀧𑀦𑀓𑀸𑀭𑀡𑀸𑀦𑀺 𑀓𑀼𑀳𑀦𑀯𑀢𑁆𑀣𑀽𑀦𑀺.

𑁩𑁪𑁩. 𑀲𑀢𑀺𑀧𑀺 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀫𑀕𑁆𑀕𑀲𑁆𑀲 𑀅𑀦𑀺𑀫𑀺𑀢𑁆𑀢𑀦𑀸𑀫𑀮𑀸𑀪𑁂 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀦𑀸𑀫𑀺𑀓𑀸𑀢𑀺 𑀆𑀕𑀫𑀦𑀢𑁄 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑀦𑀸𑀫𑀁 𑀦 𑀮𑀪𑀢𑀻𑀢𑀺 𑀆𑀳 ‘‘𑀦 𑀧𑀦 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺…𑀧𑁂… 𑀲𑀺𑀤𑁆𑀥𑀁 𑀳𑁄𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀆𑀕𑀫𑀦𑀢𑁄 𑀲𑀼𑀜𑁆𑀜𑀢𑀁 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀫𑀕𑁆𑀕𑀲𑁆𑀲 𑀲𑀕𑀼𑀡𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀢𑀁𑀦𑀸𑀫𑀸𑀪𑀸𑀯𑁄 𑀦 𑀓𑀤𑀸𑀘𑀺𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀦𑀸𑀫𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀆𑀕𑀫𑀦𑀢𑁄 𑀦𑀸𑀫𑀮𑀸𑀪𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀧𑀭𑀺𑀧𑀼𑀡𑁆𑀡𑀦𑀸𑀫𑀲𑀺𑀤𑁆𑀥𑀺𑀳𑁂𑀢𑀼𑀢𑁆𑀢𑀸’’𑀢𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀲𑀩𑁆𑀩𑀯𑀺𑀫𑁄𑀓𑁆𑀔𑀫𑀼𑀔𑀸𑀕𑀢𑀸𑀦𑀫𑁆𑀧𑀺 𑀫𑀕𑁆𑀕𑀸𑀦𑀁. 𑀦𑀸𑀫𑀢𑁆𑀢𑀬𑀬𑁄𑀕𑁄𑀢𑀺 𑀲𑀼𑀜𑁆𑀜𑀢𑀸𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀦𑀸𑀫𑀬𑁄𑀕𑁄. 𑀯𑀯𑀢𑁆𑀣𑀸𑀦𑀁 𑀅𑀲𑀗𑁆𑀓𑀭𑁄.

𑁩𑁫𑁦. 𑀦𑀺𑀫𑀺𑀢𑁆𑀢𑀥𑀫𑁆𑀫𑀸 𑀲𑀗𑁆𑀔𑀸𑀭𑀸 𑀢𑁂𑀳𑀺 𑀲𑀦𑀺𑀫𑀺𑀢𑁆𑀢𑀸 𑀲𑀯𑀺𑀕𑁆𑀕𑀳𑀸 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀢𑁂𑀲𑀁 𑀅𑀪𑀸𑀯𑀺𑀢𑀪𑀸𑀯𑀦𑀲𑁆𑀲 𑀪𑀸𑀯𑀺𑀢𑀪𑀸𑀯𑀦𑀲𑁆𑀲 𑀘 𑀉𑀧𑀝𑁆𑀞𑀳𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀽𑀳𑀸𑀤𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀘 ‘‘𑀯𑀺𑀫𑁄𑀓𑁆𑀔𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁩𑁫𑁦) 𑀯𑀼𑀢𑁆𑀢𑀁, 𑀦 ‘‘𑀢𑀲𑁆𑀫𑀺𑀁 𑀯𑀺𑀫𑁄𑀓𑁆𑀔𑁂’’𑀢𑀺, 𑀢𑀲𑁆𑀫𑀸 ‘‘𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁄𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀁 𑀆𑀳𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑀭𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀺𑀫𑀺𑀢𑁆𑀢𑀪𑀸𑀯𑀸𑀪𑀸𑀯𑁄 𑀦𑀢𑁆𑀣𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀘 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀪𑀸𑀯𑁄 𑀧𑀭𑀺𑀬𑀸𑀬𑁂𑀦𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸𑀬 𑀢𑀲𑁆𑀲𑀸 𑀅𑀦𑀺𑀫𑀺𑀢𑁆𑀢𑀪𑀸𑀯𑀸𑀪𑀸𑀯𑁄 𑀅𑀢𑁆𑀣𑀺 𑀏𑀯, 𑀏𑀯𑀜𑁆𑀘 𑀲𑀢𑀺 ‘‘𑀅𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀺𑀫𑀺𑀢𑁆𑀢𑀦𑀸𑀫𑀤𑀸𑀦𑀸𑀪𑀸𑀯𑁄’’𑀢𑀺 𑀘 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀲𑀼𑀝𑁆𑀞𑀼𑀢𑀭𑀁 𑀬𑀼𑀚𑁆𑀚𑀢𑀺, 𑀢𑀣𑀸 𑀅𑀦𑀺𑀫𑀺𑀢𑁆𑀢𑁂𑀦 𑀫𑀕𑁆𑀕𑀲𑁆𑀲 𑀅𑀦𑀺𑀫𑀺𑀢𑁆𑀢𑀪𑀸𑀯𑁄 𑀦 𑀬𑀼𑀚𑁆𑀚𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀧𑀭𑀫𑀢𑁆𑀣𑀢𑁄 𑀦𑀸𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺? 𑀲𑀘𑁆𑀘𑀫𑁂𑀢𑀁, 𑀧𑀭𑀺𑀬𑀸𑀬𑀲𑀺𑀤𑁆𑀥𑀁𑀬𑁂𑀯 𑀧𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀅𑀦𑀺𑀫𑀺𑀢𑁆𑀢𑀪𑀸𑀯𑀁 𑀕𑀳𑁂𑀢𑁆𑀯𑀸 𑀫𑀕𑁆𑀕𑀲𑁄𑀥𑀦𑀯𑀲𑁂𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁄 ‘‘𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀅𑀦𑀺𑀫𑀺𑀢𑁆𑀢𑀪𑀸𑀯𑀸𑀪𑀸𑀯𑁄 𑀦𑀢𑁆𑀣𑀻𑀢𑀺𑀯𑀺𑀭𑀼𑀤𑁆𑀥𑀁 𑀯𑀺𑀬 𑀳𑁄𑀢𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀦𑀺𑀫𑀺𑀢𑁆𑀢𑀁…𑀧𑁂… 𑀤𑀻𑀧𑀺𑀢𑁄 𑀳𑁄𑀢𑀻’’𑀢𑀺 𑀲𑀬𑀫𑁂𑀯 𑀯𑀓𑁆𑀔𑀢𑀻𑀢𑀺. 𑀲𑀸𑀫𑀜𑁆𑀜𑀦𑁆𑀢𑀺 𑀉𑀧𑀫𑁄𑀧𑀫𑀺𑀢𑀩𑁆𑀩𑀸𑀦𑀁 𑀲𑀫𑁆𑀩𑀦𑁆𑀥𑀫𑀸𑀳. 𑀦 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀙𑀦𑁆𑀤𑀘𑀺𑀢𑁆𑀢𑀸𑀦𑀁 𑀅𑀬𑀁 𑀲𑀫𑀜𑁆𑀜𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀦 𑀘 𑀢𑁂𑀳𑀺 𑀫𑀕𑁆𑀕𑀲𑁆𑀲𑀸𑀢𑀺 𑀙𑀦𑁆𑀤𑀘𑀺𑀢𑁆𑀢𑁂𑀳𑀺 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀏𑀢𑀲𑁆𑀲𑀸𑀢𑀺 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀅𑀬𑀁 𑀲𑀫𑀜𑁆𑀜𑀸 𑀫𑀕𑁆𑀕𑀲𑁆𑀲 𑀦𑀢𑁆𑀣𑀺. 𑀓𑀲𑁆𑀫𑀸? 𑀢𑁂𑀲𑀁 𑀙𑀦𑁆𑀤𑀘𑀺𑀢𑁆𑀢𑀸𑀦𑀁 𑀅𑀫𑀕𑁆𑀕𑀗𑁆𑀕𑀢𑁆𑀢𑀸.

𑀛𑀸𑀦𑀲𑁆𑀲 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀓𑀢𑁆𑀢𑀸𑀢𑀺 𑀏𑀢𑁂𑀦 𑀇𑀦𑁆𑀤𑁆𑀭𑀺𑀬𑀩𑀮𑀸𑀤𑀻𑀦𑀫𑁆𑀧𑀺 𑀫𑀕𑁆𑀕𑀲𑀫𑁆𑀧𑀬𑁄𑀕𑀢𑁄 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀓𑀢𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀢𑀺𑀧𑀺 𑀧𑀘𑁆𑀘𑀦𑀻𑀓𑀸𑀫𑀲𑀦𑁂 𑀦 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀢𑀁 𑀧𑀭𑀺𑀩𑁆𑀬𑀢𑁆𑀢𑀁 𑀬𑀣𑀸 𑀲𑀭𑀲𑀢𑀸𑀢𑀺 𑀆𑀳 ‘‘𑀲𑀭𑀲𑀧𑁆𑀧𑀥𑀸𑀦𑁄’’𑀢𑀺. 𑀤𑁆𑀯𑀻𑀳𑀻𑀢𑀺 𑀲𑀭𑀲𑀧𑀘𑁆𑀘𑀦𑀻𑀓𑁂𑀳𑀺. 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑁂𑀳𑀻𑀢𑀺 𑀆𑀕𑀫𑀦𑀦𑀺𑀭𑀧𑁂𑀓𑁆𑀔𑁂𑀳𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀭𑀲𑀢𑁄𑀯 𑀦𑀸𑀫𑀮𑀸𑀪𑁂 𑀅𑀯𑀯𑀢𑁆𑀣𑀸𑀦𑀸𑀧𑀢𑁆𑀢𑀺 𑀲𑀩𑁆𑀩𑀲𑁆𑀲 𑀫𑀕𑁆𑀕𑀲𑁆𑀲 𑀲𑀩𑁆𑀩𑀦𑀸𑀫𑀪𑀸𑀯𑀸𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀫𑀸. 𑀅𑀢𑁆𑀢𑀸𑀪𑀺…𑀧𑁂… 𑀫𑀕𑁆𑀕𑀸𑀢𑀺 𑀢𑁂𑀦 𑀆𑀕𑀫𑀦𑀢𑁄 𑀦𑀸𑀫𑀮𑀸𑀪𑀲𑁆𑀲 𑀧𑀘𑁆𑀘𑀦𑀻𑀓𑀢𑁄 𑀦𑀸𑀫𑀮𑀸𑀪𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀭𑀲𑀦𑁆𑀢𑀭𑁂𑀢𑀺 𑀅𑀦𑀺𑀫𑀺𑀢𑁆𑀢𑀪𑀸𑀯𑀸𑀤𑀺𑀓𑁂. 𑀧𑀘𑁆𑀘𑀦𑀻𑀓𑀲𑀳𑀺𑀢𑁂𑀦 𑀲𑀭𑀲𑁂𑀦𑀸𑀢𑀺 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀪𑀸𑀯𑁂𑀳𑀺 𑀢𑀤𑀸𑀕𑀫𑀦𑁂𑀳𑀺. 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀸𑀦𑀺𑀯𑀸𑀭𑀡𑀸𑀢𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑁆𑀲 𑀅𑀦𑀺𑀲𑁂𑀥𑀦𑀢𑁄. 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀲𑁆𑀲𑁂𑀯 𑀫𑀕𑁆𑀕𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀫𑀕𑁆𑀕𑁄 𑀇𑀥 𑀅𑀲𑀗𑁆𑀕𑀳𑀺𑀢𑁄 𑀲𑀺𑀬𑀸𑀢𑀺 𑀆𑀲𑀗𑁆𑀓𑀺𑀢𑁆𑀯𑀸 𑀆𑀳 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸’’𑀢𑀺𑀆𑀤𑀺. 𑀲𑀗𑁆𑀔𑀸𑀭𑁂𑀳𑀺 𑀯𑀼𑀝𑁆𑀞𑀸𑀦𑀁 𑀦 𑀲𑀺𑀬𑀸, 𑀮𑀓𑁆𑀔𑀡𑁂𑀳𑀺 𑀏𑀯 𑀯𑀼𑀝𑁆𑀞𑀸𑀦𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀮𑀓𑁆𑀔𑀡𑀧𑀝𑀺𑀯𑁂𑀥𑁄 𑀦 𑀲𑀺𑀬𑀸 𑀅𑀢𑀤𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑀸𑀦𑀜𑁆𑀳𑀺 𑀳𑀼𑀢𑁆𑀯𑀸 𑀅𑀪𑀸𑀯𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀸𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀲𑀼 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀯𑁄𑀳𑀸𑀭𑁄.

𑀆𑀓𑀸𑀭𑀯𑀦𑁆𑀢𑁂𑀲𑀼 𑀕𑀳𑀺𑀢𑁂𑀲𑀼 𑀢𑀤𑀸𑀓𑀸𑀭𑁄𑀧𑀺 𑀕𑀳𑀺𑀢𑁄𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀮𑀓𑁆𑀔𑀡𑀸𑀦𑀺𑀧𑀺 𑀧𑀝𑀺𑀯𑀺𑀤𑁆𑀥𑀸𑀦𑀺 𑀳𑁄𑀦𑁆𑀢𑀺 𑀢𑀤𑀸𑀓𑀸𑀭𑀲𑀗𑁆𑀔𑀸𑀭𑀕𑁆𑀕𑀳𑀡𑀢𑁄’’𑀢𑀺. 𑀬𑀣𑀸𑀯𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 ‘‘𑀲𑀗𑁆𑀔𑀸𑀭𑁂𑀲𑀽’’𑀢𑀺𑀆𑀤𑀺𑀦𑀸𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀥𑀺𑀧𑁆𑀧𑀸𑀬𑁂𑀦. 𑀯𑀺𑀲𑀼𑀦𑁆𑀢𑀺 𑀲𑀗𑁆𑀔𑀸𑀭𑁂𑀳𑀺 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀧𑀜𑁆𑀘𑀥𑀸 𑀉𑀤𑁆𑀤𑀺𑀲𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀅𑀚𑁆𑀛𑀢𑁆𑀢𑀤𑀼𑀓𑀯𑀲𑁂𑀦 𑀭𑀽𑀧𑀤𑀼𑀓𑀯𑀲𑁂𑀦 𑀘 𑀪𑀺𑀦𑁆𑀤𑀺𑀢𑁆𑀯𑀸 𑀅𑀪𑀺𑀦𑁆𑀤𑀺𑀢𑁆𑀯𑀸 𑀘 𑀦𑀺𑀫𑀺𑀢𑁆𑀢𑀯𑀘𑀦𑁂𑀦𑁂𑀯 𑀉𑀤𑁆𑀤𑀺𑀲𑀢𑀺 𑀧𑀯𑀢𑁆𑀢𑀲𑁆𑀲𑀧𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀯𑀼𑀝𑁆𑀞𑀸𑀢𑀩𑁆𑀩𑀢𑀸𑀲𑀸𑀫𑀜𑁆𑀜𑀢𑁄 𑀘. 𑀢𑁂𑀦𑁂𑀯 𑀉𑀧𑀸𑀤𑀺𑀦𑁆𑀦𑀸𑀦𑀼𑀧𑀸𑀤𑀺𑀦𑁆𑀦𑀯𑀲𑁂𑀦 𑀧𑀯𑀢𑁆𑀢𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸𑀧𑀺 ‘‘𑀅𑀬𑀁 𑀢𑀸𑀯 𑀦𑀺𑀫𑀺𑀢𑁆𑀢𑁂 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀦𑀺𑀫𑀺𑀢𑁆𑀢𑀯𑀲𑁂𑀦𑁂𑀯 𑀦𑀺𑀕𑀫𑁂𑀢𑀺. 𑀏𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸, 𑀧𑀯𑀢𑁆𑀢𑀁 𑀧𑀦 𑀅𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀩𑁄𑀚𑁆𑀛𑀗𑁆𑀕𑀸𑀤𑀺𑀯𑀺𑀲𑁂𑀲𑀦𑁆𑀢𑀺 𑀩𑁄𑀚𑁆𑀛𑀗𑁆𑀕𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀁 𑀅𑀲𑀤𑀺𑀲𑀢𑀁. 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀲𑀗𑁆𑀔𑀸𑀢𑀸 𑀯𑀺𑀢𑀓𑁆𑀓𑀸𑀤𑀺𑀯𑀺𑀭𑀸𑀕𑀪𑀸𑀯𑀦𑀸 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀯𑀺𑀭𑀸𑀕𑀪𑀸𑀯𑀦𑀸. 𑀇𑀢𑀭𑀲𑁆𑀲𑀸𑀢𑀺 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀓𑀲𑁆𑀲. 𑀅𑀢𑀩𑁆𑀪𑀸𑀯𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀫𑀕𑁆𑀕𑀸𑀲𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑁆𑀢𑁂 𑀫𑀕𑁆𑀕𑀲𑁆𑀲 𑀧𑀞𑀫𑀸𑀤𑀺𑀚𑁆𑀛𑀸𑀦𑀺𑀓𑀢𑀸 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑁆𑀢𑁂 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀢𑀸 𑀏𑀯 𑀘 𑀢𑀩𑁆𑀩𑀲𑁂𑀦 𑀘 𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀯𑀺𑀲𑁂𑀲𑁄𑀢𑀺 𑀢𑁂𑀲𑀁 𑀦𑀺𑀬𑀫𑁂 𑀆𑀲𑀦𑁆𑀦𑀓𑀸𑀭𑀡𑀁 𑀧𑀥𑀸𑀦𑀓𑀸𑀭𑀡𑀜𑁆𑀘 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸, 𑀦 𑀏𑀯𑀁 𑀧𑀸𑀤𑀓𑀚𑁆𑀛𑀸𑀦𑀸𑀤𑀬𑁄𑀢𑀺.

𑀇𑀤𑀸𑀦𑀺 𑀅𑀧𑀸𑀤𑀓𑀧𑀞𑀫𑀚𑁆𑀛𑀸𑀦𑀧𑀸𑀤𑀓𑀸𑀦𑀁 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑀧𑀞𑀫𑀚𑁆𑀛𑀸𑀦𑀸𑀦𑀺 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀸𑀦𑀜𑁆𑀘 𑀫𑀕𑁆𑀕𑀸𑀦𑀁 𑀏𑀓𑀦𑁆𑀢𑁂𑀦 𑀧𑀞𑀫𑀚𑁆𑀛𑀸𑀦𑀺𑀓𑀪𑀸𑀯𑀢𑁄 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄𑀬𑁂𑀯𑁂𑀢𑁆𑀣 𑀏𑀓𑀦𑁆𑀢𑀺𑀓𑁄 𑀧𑀥𑀸𑀦𑀜𑁆𑀘𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑀭𑁂𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀫𑀕𑁆𑀕𑀸. 𑀧𑀸𑀤𑀓𑀚𑁆𑀛𑀸𑀦𑀸𑀢𑀺𑀓𑁆𑀓𑀦𑁆𑀢𑀸𑀦𑀁 𑀅𑀗𑁆𑀕𑀸𑀦𑀁 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀯𑀺𑀭𑀸𑀕𑀪𑀸𑀯𑀦𑀸𑀪𑀽𑀢𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀥𑀺𑀝𑁆𑀞𑀸𑀦𑀪𑀽𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑁂𑀦 𑀆𑀳𑀺𑀢𑀯𑀺𑀲𑁂𑀲𑀸 𑀫𑀕𑁆𑀕𑀲𑁆𑀲 𑀛𑀸𑀦𑀗𑁆𑀕𑀸𑀤𑀺𑀯𑀺𑀲𑁂𑀲𑀦𑀺𑀬𑀸𑀫𑀺𑀓𑀸 𑀳𑁄𑀢𑀻𑀢𑀺 ‘‘𑀧𑀸𑀤𑀓𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀘 𑀅𑀥𑀺𑀝𑁆𑀞𑀸𑀦𑀪𑀽𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑁂𑀦, 𑀏𑀯𑀁 𑀆𑀭𑀫𑁆𑀫𑀡𑀪𑀽𑀢𑁂𑀦 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑁂𑀦 𑀉𑀪𑀬𑀲𑀩𑁆𑀪𑀸𑀯𑁂 𑀅𑀚𑁆𑀛𑀸𑀲𑀬𑀯𑀲𑁂𑀦 𑀆𑀳𑀺𑀢𑀯𑀺𑀲𑁂𑀲𑀸 𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻𑀢𑀺 𑀆𑀳 ‘‘𑀏𑀯𑀁 𑀲𑁂𑀲𑀯𑀸𑀤𑁂𑀲𑀼𑀧𑀺…𑀧𑁂… 𑀬𑁄𑀚𑁂𑀢𑀩𑁆𑀩𑁄’’𑀢𑀺.

𑀧𑀸𑀤𑀓𑀚𑁆𑀛𑀸𑀦𑀲𑀗𑁆𑀔𑀸𑀭𑁂𑀲𑀽𑀢𑀺 𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀭𑁂𑀲𑀼. ‘‘𑀧𑀞𑀫𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸’’𑀢𑀺 (𑀥. 𑀲. 𑀅𑀝𑁆𑀞. 𑁩𑁫𑁦) 𑀳𑀺 𑀯𑀼𑀢𑁆𑀢𑀁. 𑀢𑀁𑀢𑀁𑀯𑀺𑀭𑀸𑀕𑀸𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑁂𑀦𑀸𑀢𑀺 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀭𑀚𑁆𑀚𑀦𑀸𑀯𑀺𑀭𑀚𑁆𑀚𑀦𑀪𑀸𑀯𑀦𑀸𑀪𑀸𑀯𑁂𑀦. 𑀢𑁂𑀦 𑀆𑀭𑀫𑁆𑀫𑀡𑀚𑁆𑀛𑀸𑀦𑀲𑁆𑀲𑀧𑀺 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑁂𑀲𑀸𑀥𑀸𑀦𑀁 𑀉𑀧𑀦𑀺𑀲𑁆𑀲𑀬𑀢𑀫𑀸𑀳.

𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀸𑀦𑀺𑀬𑁂𑀯 𑀩𑁄𑀚𑁆𑀛𑀗𑁆𑀕𑀸𑀤𑀺𑀯𑀺𑀲𑁂𑀲𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀓𑀸𑀭𑀡𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀼𑀧𑀦𑀺𑀲𑁆𑀲𑀬𑁄, 𑀢𑀲𑁆𑀲 𑀲𑀩𑁆𑀪𑀸𑀯𑁂. 𑀢𑀤𑀪𑀸𑀯𑀸𑀪𑀸𑀯𑀢𑁄𑀢𑀺 𑀢𑀲𑁆𑀲 𑀅𑀚𑁆𑀛𑀸𑀲𑀬𑀲𑁆𑀲 𑀅𑀪𑀸𑀯𑀸𑀪𑀸𑀯𑀢𑁄.

𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀆𑀭𑀼𑀧𑁆𑀧𑁂 𑀅𑀭𑀽𑀧𑀚𑁆𑀛𑀸𑀦𑀫𑁂𑀯 𑀧𑀸𑀤𑀓𑀁 𑀲𑀺𑀬𑀸𑀢𑀺 𑀆𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀯𑀚𑁆𑀚𑀸𑀦’’𑀦𑁆𑀢𑀺. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀑𑀴𑀸𑀭𑀺𑀓𑀗𑁆𑀕𑀸𑀢𑀺𑀓𑁆𑀓𑀫𑀦𑀽𑀧𑀦𑀺𑀲𑁆𑀲𑀬𑀸 𑀯𑀺𑀧𑀲𑁆𑀲𑀦𑀸𑀬 𑀅𑀥𑀺𑀝𑁆𑀞𑀸𑀦𑀸𑀭𑀫𑁆𑀫𑀡𑀪𑀽𑀢𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀬𑁄. 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀻𑀢𑀺 𑀧𑀜𑁆𑀘𑀳𑀺 𑀛𑀸𑀦𑀗𑁆𑀕𑁂𑀳𑀺. ‘‘𑀢𑀁𑀢𑀁𑀯𑀸𑀤𑁂𑀳𑀺 𑀧𑀜𑁆𑀜𑀸𑀧𑀺𑀬𑀫𑀸𑀦𑀸𑀦𑀺 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀺 𑀯𑀸𑀤𑀲𑀳𑀘𑀸𑀭𑀺𑀢𑀸𑀬 ‘𑀯𑀸𑀤𑀸’𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑀬𑁄𑀧𑁂𑀢𑁂 𑀯𑀸𑀤𑁂’’𑀢𑀺 𑀆𑀳. 𑀯𑀤𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀸 𑀯𑀸𑀤𑀓𑀭𑀡𑀪𑀽𑀢𑀸𑀦𑀺 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀺 𑀯𑀸𑀤𑀸.

𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲…𑀧𑁂… 𑀲𑀼𑀲𑀗𑁆𑀔𑀢𑀢𑁆𑀢𑀸𑀢𑀺 𑀏𑀢𑁂𑀦 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑀫𑁆𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀓𑀺𑀜𑁆𑀘𑀺 𑀯𑀺𑀲𑁂𑀲𑀸𑀥𑀸𑀦𑀁 𑀓𑀭𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀢𑁄 𑀢𑀲𑁆𑀫𑀺𑀁𑀬𑁂𑀯 𑀲𑀦𑁆𑀢𑀸𑀦𑁂 𑀢𑀲𑁆𑀲 𑀯𑀺𑀧𑀸𑀓𑁄, 𑀦𑀸𑀜𑁆𑀜𑀢𑁆𑀣.

𑀧𑀼𑀭𑀺𑀫𑀸𑀦𑀼𑀮𑁄𑀫𑀁 𑀯𑀺𑀬 𑀢𑀦𑁆𑀢𑀺 𑀬𑀣𑀸 𑀕𑁄𑀢𑁆𑀭𑀪𑀼𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀸𑀦𑀼𑀮𑁄𑀫𑀢𑁄 𑀧𑀼𑀭𑀺𑀫𑀅𑀦𑀼𑀮𑁄𑀫𑀜𑀸𑀡𑀁 𑀢𑀁 𑀕𑁄𑀢𑁆𑀭𑀪𑀼𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀸𑀦𑀼𑀮𑁄𑀫𑀁 𑀅𑀦𑀼𑀩𑀦𑁆𑀥𑀢𑀺, 𑀏𑀯𑀁. 𑀢𑀤𑀧𑀻𑀢𑀺 𑀕𑁄𑀢𑁆𑀭𑀪𑀼𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀸𑀦𑀼𑀮𑁄𑀫𑀜𑀸𑀡𑀫𑁆𑀧𑀺 𑀅𑀜𑁆𑀜𑀁 𑀅𑀦𑀼𑀮𑁄𑀫𑀜𑀸𑀡𑀫𑁂𑀯 𑀅𑀦𑀼𑀩𑀦𑁆𑀥𑁂𑀬𑁆𑀬, 𑀢𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀲𑀸 𑀪𑀽𑀫𑀻𑀢𑀺 𑀲𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀪𑀽𑀫𑀺. 𑀏𑀓𑁄 𑀪𑀯𑁄𑀢𑀺 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀏𑀢𑁂𑀦 𑀲𑀢𑁆𑀢 𑀪𑀯𑁂 𑀤𑁆𑀯𑁂 𑀪𑀯𑁂𑀢𑀺 𑀇𑀤𑀫𑁆𑀧𑀺 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀦𑁂𑀢𑀩𑁆𑀩𑀢𑁆𑀣𑀁, 𑀦 𑀬𑀣𑀸𑀭𑀼𑀢𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀏𑀓𑀯𑀸𑀭𑀁 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀏𑀓𑀯𑀸𑀭𑀁 𑀫𑀦𑀼𑀲𑁆𑀲𑁂𑀲𑀽𑀢𑀺 𑀏𑀯𑀫𑁆𑀧𑀺 𑀫𑀺𑀲𑁆𑀲𑀺𑀢𑀽𑀧𑀧𑀢𑁆𑀢𑀺𑀯𑀲𑁂𑀦 𑀢𑁂𑀲𑀼 𑀏𑀓𑀺𑀲𑁆𑀲𑀸 𑀏𑀯 𑀉𑀧𑀧𑀢𑁆𑀢𑀺𑀬𑀸 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄. 𑀬𑀁 𑀧𑀦 ‘‘𑀦 𑀢𑁂 𑀪𑀯𑀁 𑀅𑀝𑁆𑀞𑀫𑀫𑀸𑀤𑀺𑀬𑀦𑁆𑀢𑀻’’𑀢𑀺 (𑀔𑀼. 𑀧𑀸. 𑁬.𑁯; 𑀲𑀼. 𑀦𑀺. 𑁨𑁩𑁨) 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀪𑀯𑀁𑀬𑁂𑀯 𑀲𑀦𑁆𑀥𑀸𑀬𑀸𑀳. 𑀫𑀳𑀕𑁆𑀕𑀢𑀪𑀯𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀢𑀣𑀸 ‘‘𑀞𑀧𑁂𑀢𑁆𑀯𑀸 𑀤𑁆𑀯𑁂 𑀪𑀯𑁂’’𑀢𑀺 𑀏𑀢𑁆𑀣𑀸𑀧𑀺 𑀓𑀸𑀫𑀸𑀯𑀘𑀭𑀤𑁂𑀯𑀫𑀦𑀼𑀲𑁆𑀲𑀪𑀯𑀸𑀦𑀁 𑀫𑀺𑀲𑁆𑀲𑀓𑀯𑀲𑁂𑀦𑁂𑀯, 𑀢𑀲𑁆𑀫𑀸 𑀓𑀸𑀫𑀥𑀸𑀢𑀼𑀬𑀁 𑀬𑁂 𑀤𑁆𑀯𑁂 𑀪𑀯𑀸𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑀫𑀦𑀼𑀲𑁆𑀲𑀯𑀲𑁂𑀦 𑀬𑁂 𑀤𑁆𑀯𑁂 𑀪𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀯𑀺𑀓𑀧𑁆𑀧𑁂𑀲𑀼 𑀧𑀼𑀕𑁆𑀕𑀮𑀪𑁂𑀤𑁂𑀦 𑀧𑀝𑀺𑀧𑀤𑀸 𑀪𑀺𑀦𑁆𑀤𑀺𑀢𑁆𑀯𑀸 𑀓𑀲𑁆𑀲𑀘𑀺 𑀘𑀮𑀢𑀻𑀢𑀺, 𑀓𑀲𑁆𑀲𑀘𑀺 𑀦 𑀘𑀮𑀢𑀻𑀢𑀺 𑀓𑀢𑁆𑀯𑀸 ‘‘𑀘𑀮𑀢𑀺 𑀏𑀯𑀸’’𑀢𑀺 𑀅𑀯𑀥𑀸𑀭𑀡𑀫𑀦𑁆𑀢𑀭𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀅𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁩𑁫𑁦 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀧𑀓𑀺𑀡𑁆𑀡𑀓𑀓𑀣𑀸) ‘‘𑀬𑀣𑀸 𑀘 𑀧𑀝𑀺𑀧𑀤𑀸, 𑀏𑀯𑀁 𑀅𑀥𑀺𑀧𑀢𑀺𑀧𑀺 𑀘𑀮𑀢𑀺 𑀏𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀫𑁆𑀧𑀺 𑀧𑀝𑀺𑀧𑀤𑀸𑀲𑀼 𑀅𑀪𑁂𑀤𑁂𑀦 𑀕𑀳𑀺𑀢𑀸𑀲𑀼 𑀏𑀓𑀦𑁆𑀢𑁂𑀦 𑀘𑀮𑀦𑀁 𑀲𑀫𑁆𑀪𑀯𑀢𑀻𑀢𑀺 ‘‘𑀘𑀮𑀢𑀺𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 𑀦 𑀘𑀮𑀢𑀻’’𑀢𑀺 𑀢𑀢𑀺𑀬𑀯𑀺𑀓𑀧𑁆𑀧𑁄 𑀘𑀮𑀦𑀸𑀯𑀥𑀸𑀭𑀡𑁄 𑀯𑀼𑀢𑁆𑀢𑁄.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀫𑀕𑁆𑀕𑀯𑀻𑀲𑀢𑀺𑀫𑀳𑀸𑀦𑀬𑀯𑀡𑁆𑀡𑀦𑀸

𑁩𑁫𑁭. 𑀛𑀸𑀦𑀫𑀕𑁆𑀕𑀸𑀤𑀺𑀧𑀭𑀺𑀬𑀸𑀬𑁂𑀳𑀺 𑀓𑀣𑀺𑀢𑁂 𑀩𑁄𑀚𑁆𑀛𑀦𑀓𑀸𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀯𑀺𑀲𑁂𑀲𑀢𑁄 𑀧𑀼𑀩𑁆𑀩𑀪𑀸𑀕𑁂 ‘‘𑀛𑀸𑀦𑀁 𑀪𑀸𑀯𑁂𑀫𑀺 𑀫𑀕𑁆𑀕𑀁 𑀪𑀸𑀯𑁂𑀫𑀻’’𑀢𑀺 𑀧𑀯𑀢𑁆𑀢𑀚𑁆𑀛𑀸𑀲𑀬𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑀲𑁆𑀲 𑀧𑀼𑀩𑁆𑀩𑀪𑀸𑀕𑁂’’𑀢𑀺𑀆𑀤𑀺𑀫𑀸𑀳.

𑁩𑁫𑁮. 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸𑀢𑀺 𑀢𑀣𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀧𑀼𑀩𑁆𑀩𑀪𑀸𑀕𑀸𑀪𑀺𑀲𑀗𑁆𑀔𑀸𑀭𑁂𑀦. 𑀢𑁂𑀦𑁂𑀯𑀸𑀳 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀤𑀦𑀼𑀭𑀽𑀧𑀩𑀮𑀸𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀮𑀸𑀪𑁂𑀦 𑀲𑀢𑁆𑀢𑀺𑀯𑀺𑀲𑁂𑀲𑀬𑁄𑀕𑀫𑀸𑀳. 𑀬𑀤𑀺 𑀧𑀼𑀩𑁆𑀩𑀪𑀸𑀕𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀙𑀦𑁆𑀤𑀸𑀤𑀻𑀦𑀁 𑀅𑀥𑀺𑀧𑀢𑀺𑀪𑀸𑀯𑁄, 𑀓𑀺𑀫𑀢𑁆𑀣𑀫𑁂𑀢𑁂𑀬𑁂𑀯 𑀏𑀯𑀁 𑀯𑀼𑀢𑁆𑀢𑀸, 𑀦𑀦𑀼 𑀲𑀤𑁆𑀥𑀸𑀤𑀻𑀦𑀫𑁆𑀧𑀺 𑀧𑀼𑀩𑁆𑀩𑀪𑀸𑀕𑀸𑀪𑀺𑀲𑀗𑁆𑀔𑀸𑀭𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀲𑁂𑀲𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺. 𑀅𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀸𑀢𑀺𑀲𑀬𑀫𑀦𑀼𑀯𑀢𑁆𑀢𑀺𑀢𑀩𑁆𑀩𑀪𑀸𑀯𑀭𑀳𑀺𑀢𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀤𑁆𑀥𑀸𑀤𑀬𑁄𑀧𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀅𑀦𑀼𑀯𑀢𑁆𑀢𑀬𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀫𑀥𑀼𑀭𑁂𑀦 𑀅𑀜𑁆𑀜𑁂𑀦 𑀯𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀪𑀸𑀯𑁄 𑀦 𑀢𑁂𑀲𑀁 𑀬𑀣𑀸 𑀙𑀦𑁆𑀤𑀸𑀤𑀻𑀦𑀦𑁆𑀢𑀺 𑀢𑁂𑀬𑁂𑀯 𑀅𑀥𑀺𑀧𑀢𑀺𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀲𑀳𑀚𑀸𑀢𑀸𑀥𑀺𑀧𑀢𑀺𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁄 𑀧𑀭𑀺𑀩𑁆𑀬𑀢𑁆𑀢𑁄 𑀳𑁄𑀢𑀺.

𑀘𑀢𑀼𑀫𑀕𑁆𑀕𑀦𑀬𑀲𑀳𑀲𑁆𑀲𑀯𑀡𑁆𑀡𑀦𑀸

𑁩𑁬𑁨. 𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀲𑀤𑀺𑀲𑀸 𑀧𑀯𑀢𑁆𑀢𑀺. 𑀢𑀣𑀸 𑀳𑀺 𑀲𑁄 𑀅𑀥𑀺𑀧𑀢𑀺 𑀯𑀺𑀬 𑀅𑀜𑁆𑀜𑀸𑀥𑀺𑀧𑀢𑀺𑀦𑀸 𑀤𑀺𑀝𑁆𑀞𑀺𑀬𑀸 𑀲𑀳 𑀦𑀧𑁆𑀧𑀯𑀢𑁆𑀢𑀢𑀻𑀢𑀺. 𑀏𑀓𑀤𑁂𑀲…𑀧𑁂… 𑀉𑀧𑀫𑀸 𑀳𑁄𑀢𑀺, 𑀦 𑀲𑀩𑁆𑀩𑀲𑀸𑀫𑀜𑁆𑀜𑁂𑀦, 𑀇𑀢𑀭𑀣𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑁂 𑀅𑀦𑁆𑀥𑀓𑀸𑀭𑀸𑀯𑀢𑁆𑀣𑀭𑀡𑀁 𑀯𑀺𑀬 𑀅𑀕𑁆𑀕𑀫𑀕𑁆𑀕𑀢𑀺𑀭𑁄𑀥𑀸𑀦𑁂 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀧𑁆𑀧𑀯𑀢𑁆𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑁂 𑀅𑀜𑁆𑀜𑁂. ‘‘𑀆𑀦𑀻𑀢𑀁 𑀇𑀤𑀁 𑀲𑀼𑀢𑁆𑀢’’𑀦𑁆𑀢𑀺 𑀯𑀺𑀪𑀢𑁆𑀢𑀺 𑀧𑀭𑀺𑀡𑀸𑀫𑁂𑀢𑀩𑁆𑀩𑀸. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦. 𑀦 𑀉𑀧𑀫𑀸𑀬 𑀯𑀼𑀢𑁆𑀢𑀢𑁆𑀢𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀦 𑀉𑀧𑀫𑀸𑀬 𑀯𑀼𑀢𑁆𑀢𑀪𑀸𑀯𑀢𑁄. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀯𑀸 𑀏𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀬𑁂𑀦 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬𑀁 𑀉𑀧𑀫𑀸𑀬 𑀦 𑀯𑀼𑀢𑁆𑀢𑀢𑁆𑀢𑀸. 𑀅𑀯𑀬𑀯𑀸 𑀯𑀺𑀬 𑀳𑁄𑀦𑁆𑀢𑀺, 𑀬𑁂𑀦 𑀢𑁂 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸, 𑀘𑀺𑀢𑁆𑀢𑀲𑁆𑀲 𑀏𑀢𑁂𑀢𑀺 𑀘 𑀘𑁂𑀢𑀲𑀺𑀓𑀸𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀦𑁆𑀢𑀺, 𑀦 𑀧𑀦 ‘‘𑀨𑀲𑁆𑀲𑀺𑀓𑀸’’𑀢𑀺𑀆𑀤𑀺𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.