𑀘𑀽𑀴𑀲𑀗𑁆𑀕𑀸𑀫𑀯𑀡𑁆𑀡𑀦𑀸

𑀅𑀦𑀼𑀯𑀺𑀚𑁆𑀚𑀓𑀲𑁆𑀲𑀧𑀝𑀺𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁬𑁫. 𑀞𑀸𑀦𑀦𑀺𑀲𑀚𑁆𑀚𑀯𑀢𑁆𑀣𑀸𑀤𑀺𑀦𑀺𑀲𑁆𑀲𑀺𑀢𑀸𑀢𑀺 ‘‘𑀏𑀯𑀁 𑀞𑀸𑀢𑀩𑁆𑀩𑀁 𑀏𑀯𑀁 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀸. 𑀲𑀜𑁆𑀜𑀸𑀚𑀦𑀦𑀢𑁆𑀣𑀦𑁆𑀢𑀺 ‘‘𑀏𑀯𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀲𑀜𑁆𑀚𑀸𑀦𑀦𑀢𑁆𑀣𑀁. 𑀅𑀦𑀼𑀯𑀺𑀥𑀺𑀬𑀦𑁆𑀢𑁂𑀦𑀸𑀢𑀺 𑀘𑀺𑀢𑁆𑀢𑁂 𑀞𑀧𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀮𑀚𑁆𑀚𑀸 𑀲𑀸 𑀦𑀼 𑀔𑁄𑀢𑀺 𑀓𑀺𑀁 𑀲𑀸 𑀮𑀚𑁆𑀚𑀸 𑀅𑀬𑀁 𑀧𑀭𑀺𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀬𑁄𑀕𑀯𑀢𑁆𑀢𑀁 𑀓𑀣𑀸𑀧𑁂𑀢𑁆𑀯𑀸𑀢𑀺 ‘‘𑀓𑀺𑀫𑀦𑀼𑀬𑁄𑀕𑀯𑀢𑁆𑀢𑀁 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦𑁂𑀯 𑀓𑀣𑀸𑀧𑁂𑀢𑁆𑀯𑀸. 𑀅𑀚𑀸𑀦𑀦𑀧𑁆𑀧𑀲𑀗𑁆𑀕𑀸 𑀦𑀸𑀫 𑀅𑀜𑁆𑀜𑀸𑀡𑀁.

𑁩𑁬𑁭. ‘‘𑀪𑀬𑁂𑀦 𑀪𑀬𑀸 𑀕𑀘𑁆𑀙𑀢𑀻’’𑀢𑀺 𑀪𑀬𑁂𑀦 𑀪𑀬𑀳𑁂𑀢𑀼 𑀪𑀬𑀸 𑀕𑀘𑁆𑀙𑀢𑀻𑀢𑀺 𑀳𑁂𑀢𑀼𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀣𑀸 ‘‘𑀭𑀢𑁆𑀢𑀢𑁆𑀢𑀸 𑀧𑀦 𑀤𑀼𑀝𑁆𑀞𑀢𑁆𑀢𑀸 𑀘 𑀙𑀦𑁆𑀤𑀸 𑀤𑁄𑀲𑀸 𑀘 𑀕𑀘𑁆𑀙𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁, 𑀏𑀯𑀁.