𑁯. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀤𑁆𑀯𑁂𑀦𑀺𑀲𑁆𑀲𑀸𑀭𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁯𑁫. 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀦𑁆𑀢𑀺 𑀏𑀢𑁆𑀣 𑀦𑀺𑀲𑁆𑀲𑀸𑀭𑀡𑀁 𑀦𑀸𑀫 𑀓𑀼𑀮𑀤𑀽𑀲𑀓𑀸𑀦𑀁𑀬𑁂𑀯 𑀅𑀦𑀼𑀜𑁆𑀜𑀸𑀢𑀁, 𑀅𑀬𑀁 𑀧𑀦 𑀓𑀼𑀮𑀤𑀽𑀲𑀓𑁄 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀧𑁆𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀬𑀤𑀺 𑀏𑀯𑀁 𑀓𑀣𑀁 𑀲𑀼𑀦𑀺𑀲𑁆𑀲𑀸𑀭𑀺𑀢𑁄 𑀳𑁄𑀢𑀻𑀢𑀺? 𑀘𑀽𑀴𑀯𑀕𑁆𑀕𑁂 ‘‘𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁨𑁭) 𑀯𑀼𑀢𑁆𑀢𑀢𑁆𑀢𑀸. ‘‘𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺 𑀯𑀘𑀦𑀢𑁄 𑀘𑀓𑁆𑀓𑀁 𑀩𑀦𑁆𑀥𑀦𑁆𑀢𑀺 𑀜𑀸𑀢𑀩𑁆𑀩𑀁.

𑀉𑀧𑀸𑀮𑀺𑀧𑀼𑀘𑁆𑀙𑀸𑀓𑀣𑀸𑀯𑀡𑁆𑀡𑀦𑀸

𑁪𑁦𑁦. ‘‘𑀧𑀭𑀢𑁄𑀢𑀺 𑀉𑀧𑀸𑀮𑀺𑀧𑀼𑀘𑁆𑀙𑀢𑁄 𑀧𑀭’’𑀦𑁆𑀢𑀺 𑀮𑀺𑀔𑀺𑀢𑀁. 𑀤𑁄𑀲𑀸𑀭𑀺𑀢𑀧𑀸𑀴𑀺𑀬𑀁 ‘‘𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀦 𑀆𑀕𑀢𑁄 𑀯𑀺𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀅𑀥𑀫𑁆𑀫𑀓𑀫𑁆𑀫𑀸𑀦𑀺𑀬𑁂𑀯 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀧𑀜𑁆𑀘𑀸𑀕𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀧𑀭𑀺𑀯𑀸𑀭𑁂 𑀇𑀫𑀲𑁆𑀫𑀺𑀁 𑀔𑀦𑁆𑀥𑀓𑁂 ‘‘𑀧𑀜𑁆𑀘 𑀅𑀥𑀫𑁆𑀫𑀺𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑁆𑀥𑀫𑀽𑀕𑀩𑀥𑀺𑀭𑁄 𑀲𑁄𑀲𑀸𑀭𑀺𑀢𑁄’’𑀢𑀺 𑀇𑀫𑀺𑀦𑀸 𑀅𑀧𑀩𑁆𑀩𑀚𑀺𑀢𑀲𑁆𑀲𑀧𑀺 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀻𑀢𑀺 𑀲𑀺𑀤𑁆𑀥𑀁.

𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.