𑁧𑁦. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸𑀯𑀡𑁆𑀡𑀦𑀸

𑁪𑁫𑁧. 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄’’𑀢𑀺 𑀯𑀼𑀢𑁆𑀢𑀁, 𑀉𑀪𑀢𑁄𑀯𑀺𑀪𑀗𑁆𑀕𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀔𑀦𑁆𑀥𑀓𑀪𑀸𑀡𑀓𑁄 𑀳𑁄𑀢𑀺. 𑀆𑀯𑀼𑀲𑁄 𑀏𑀢𑁆𑀣 𑀆𑀧𑀢𑁆𑀢𑀻𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 ‘‘𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀙𑀸 𑀯𑀺𑀦𑀬𑀥𑀭𑁄 ‘‘𑀯𑀢𑁆𑀣𑀼𑀫𑁆𑀳𑀺 𑀲𑀢𑀺 𑀧𑀫𑀸𑀡𑀁, 𑀦 𑀧𑀜𑁆𑀜𑀢𑁆𑀢𑀺𑀬’’𑀦𑁆𑀢𑀺 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀺, 𑀢𑁂𑀦 𑀯𑀼𑀢𑁆𑀢𑀁 𑀅𑀦𑁆𑀢𑁂 ‘‘𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀻’’𑀢𑀺.

𑁪𑁫𑁫. ‘‘𑀬𑀣𑀸 𑀫𑀬𑀸 𑀜𑀢𑁆𑀢𑀻’’𑀢𑀺 𑀮𑀺𑀔𑀦𑁆𑀢𑀺 ‘‘𑀧𑀜𑁆𑀜𑀢𑁆𑀢𑀸’’𑀢𑀺 𑀏𑀓𑀯𑀘𑀦𑀢𑁆𑀢𑀸.

𑀤𑀻𑀖𑀸𑀯𑀼𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁫𑁮. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄’’𑀢𑀺 𑀮𑀺𑀔𑀦𑁆𑀢𑀺. 𑀧𑀼𑀭𑀸𑀡𑀧𑁄𑀢𑁆𑀣𑀓𑁂𑀲𑀼 ‘‘𑀩𑀸𑀭𑀸𑀡𑀲𑀺𑀬’’𑀦𑁆𑀢𑀺 𑀦𑀢𑁆𑀣𑀺, ‘‘𑀦𑀢𑁆𑀣𑀺𑀪𑀸𑀯𑁄𑀯 𑀲𑀼𑀦𑁆𑀤𑀭𑁄’’𑀢𑀺 𑀯𑀤𑀦𑁆𑀢𑀺.

𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁪𑁬𑁭. 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁂𑀢𑀺 𑀲𑀗𑁆𑀕𑀻𑀢𑀺𑀢𑁆𑀣𑁂𑀭𑁂𑀳𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀧𑀸𑀮𑀺𑀮𑁂𑀬𑁆𑀬𑁄𑀢𑀺 𑀕𑀸𑀫𑁄, 𑀢𑀲𑁆𑀲 𑀯𑀲𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀁 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬 𑀦 𑀯𑀺𑀭𑀼𑀚𑁆𑀛𑀢𑀺.

𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁭𑁩. 𑀦 𑀢𑁆𑀯𑁂𑀯…𑀧𑁂… 𑀧𑀝𑀺𑀩𑀸𑀳𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻𑀢𑀺 𑀏𑀢𑁆𑀣 𑀲𑁂𑀦𑀸𑀲𑀦𑀸𑀭𑀳𑀲𑁆𑀲 𑀬𑁄 𑀲𑁂𑀦𑀸𑀲𑀦𑀁 𑀧𑀝𑀺𑀩𑀸𑀳𑀢𑀺, 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. ‘‘𑀓𑀮𑀳𑀓𑀸𑀭𑀓𑀸𑀤𑀻𑀦𑀫𑁂𑀢𑁆𑀣 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺𑀆𑀤𑀺𑀓𑀁 𑀲𑀗𑁆𑀖𑀲𑁆𑀲 𑀓𑀢𑀺𑀓𑀁 𑀯𑀢𑁆𑀯𑀸 𑀢𑀁 𑀦 𑀧𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀯𑀸 ‘𑀅𑀳𑀁 𑀩𑀼𑀤𑁆𑀥𑁄’𑀢𑀺 𑀧𑀲𑀬𑁆𑀳 𑀅𑀢𑁆𑀢𑀦𑀸 𑀅𑀢𑁆𑀢𑀦𑁄 𑀧𑀜𑁆𑀜𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀁 ‘𑀬𑀼𑀢𑁆𑀢𑀺𑀬𑀸 𑀕𑀡𑁆𑀳𑀣𑀸’𑀢𑀺 𑀯𑀢𑁆𑀯𑀸 𑀯𑀸𑀭𑁂𑀦𑁆𑀢𑀲𑁆𑀲 𑀯𑀸 𑀤𑁄𑀲𑁄 𑀦𑀢𑁆𑀣𑀺. 𑀇𑀥 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀁 𑀆𑀕𑀢𑀸𑀦𑀁 𑀓𑁄𑀲𑀫𑁆𑀩𑀺𑀓𑀸𑀦𑀫𑁆𑀧𑀺 ‘𑀬𑀣𑀸𑀯𑀼𑀟𑁆𑀠’𑀦𑁆𑀢𑀺 𑀅𑀯𑀢𑁆𑀯𑀸 ‘𑀯𑀺𑀯𑀺𑀢𑁆𑀢𑁂 𑀅𑀲𑀢𑀺 𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸𑀧𑀺 𑀤𑀸𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀦𑁆𑀢𑀁 𑀧𑀝𑀺𑀩𑀸𑀳𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀻𑀢𑀺 𑀓𑀺𑀭 𑀅𑀬𑀫𑀢𑁆𑀣𑁄 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀦𑀁 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑀤𑀸𑀧𑀦𑁂𑀦 𑀲𑀸𑀥𑀺𑀢𑀩𑁆𑀩𑁄’’𑀢𑀺 𑀮𑀺𑀔𑀺𑀢𑀁.

𑀲𑀗𑁆𑀖𑀲𑀸𑀫𑀕𑁆𑀕𑀻𑀓𑀣𑀸𑀯𑀡𑁆𑀡𑀦𑀸

𑁪𑁭𑁫. ‘‘𑀅𑀣 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀑𑀲𑀸𑀭𑁂𑀢𑁆𑀯𑀸 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽…𑀧𑁂… 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀫𑀸’’𑀢𑀺 𑀯𑀘𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀁 𑀯𑀺𑀦𑀬𑀮𑀓𑁆𑀔𑀡𑀓𑀼𑀲𑀮𑀲𑁆𑀲. 𑀯𑀺𑀚𑁆𑀚𑀫𑀸𑀦𑁂 𑀳𑀺 𑀓𑀸𑀭𑀓𑀲𑀗𑁆𑀖𑁂 𑀇𑀢𑀭𑁄 𑀲𑀗𑁆𑀖𑁄 𑀑𑀲𑀸𑀭𑀺𑀢𑀼𑀁 𑀦 𑀮𑀪𑀢𑀺. 𑀑𑀲𑀸𑀭𑁂𑀦𑁆𑀢𑁄 𑀘𑁂, 𑀢𑁂 𑀪𑀺𑀓𑁆𑀔𑀽 𑀓𑀸𑀭𑀓𑀲𑀗𑁆𑀖𑁂𑀦 𑀲𑀫𑀸𑀦𑀮𑀤𑁆𑀥𑀺𑀓𑀪𑀸𑀯𑀁 𑀧𑀢𑁆𑀢𑀢𑁆𑀢𑀸 𑀢𑁂𑀦 𑀲𑀫𑀸𑀦𑀲𑀁𑀯𑀸𑀲𑀓𑀸 𑀳𑁄𑀦𑁆𑀢𑀺, 𑀢𑀢𑁄 𑀉𑀓𑁆𑀔𑁂𑀧𑀓𑀸𑀦𑀁 𑀙𑀦𑁆𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀑𑀲𑀸𑀭𑁂𑀦𑁆𑀢𑀸𑀦𑀁 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺, 𑀢𑀲𑁆𑀫𑀸 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀢𑀁 𑀪𑀺𑀓𑁆𑀔𑀼𑀁 𑀑𑀲𑀸𑀭𑁂𑀣𑀸’’𑀢𑀺 (𑀫𑀳𑀸𑀯. 𑁪𑁭𑁪) 𑀪𑀕𑀯𑀢𑁄 𑀯𑀘𑀦𑁂𑀦 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀑𑀲𑀸𑀭𑁂𑀲𑀼𑀁, 𑀉𑀤𑀸𑀳𑀼 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸, 𑀉𑀤𑀸𑀳𑀼 𑀇𑀢𑀭𑁂𑀲𑀁 𑀙𑀦𑁆𑀤𑀁 𑀕𑀳𑁂𑀢𑁆𑀯𑀸 𑀑𑀲𑀸𑀭𑁂𑀲𑀼𑀁, 𑀦𑀦𑀼 𑀏𑀢𑁂𑀲𑀫𑀜𑁆𑀜𑀢𑀭𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩𑀁, 𑀦 𑀘 𑀧𑀦𑁂𑀢𑀁 𑀲𑀩𑁆𑀩𑀕𑀡𑁆𑀞𑀺𑀧𑀤𑁂𑀲𑀼 𑀯𑀺𑀘𑀸𑀭𑀺𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀢𑀓𑁆𑀓𑁄 𑁋

‘‘𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀗𑁆𑀖𑁂𑀦, 𑀓𑀢𑀓𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀲𑀢𑀺 𑀢𑀲𑁆𑀫𑀺𑀁 𑀦 𑀅𑀜𑁆𑀜𑀲𑁆𑀲, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁 𑀔𑀫𑀁.

‘‘𑀯𑀺𑀭𑀫𑀦𑁆𑀢𑁂 𑀢𑀢𑁄 𑀤𑁄𑀲𑁄, 𑀅𑀧𑀺 𑀲𑀗𑁆𑀖𑁄 𑀅𑀓𑀸𑀭𑀓𑁄;

𑀑𑀲𑀸𑀭𑁂𑀢𑀼𑀁 𑀅𑀮𑀁 𑀬𑀲𑁆𑀫𑀸, 𑀓𑀸𑀭𑀓𑁄 𑀅𑀦𑀼𑀮𑁄𑀫𑀺𑀓𑁄’’𑀢𑀺.

𑁪𑁭𑁭. ‘‘𑀅𑀝𑁆𑀞 𑀤𑀽𑀢𑀗𑁆𑀕𑀸𑀦𑀺 𑀦𑀸𑀫 𑀲𑁄𑀢𑀸 𑀘 𑀳𑁄𑀢𑀺, 𑀲𑀸𑀯𑁂𑀢𑀸 𑀘 𑀉𑀕𑁆𑀕𑀳𑁂𑀢𑀸 𑀘 𑀥𑀸𑀭𑁂𑀢𑀸 𑀘 𑀯𑀺𑀜𑁆𑀜𑀸𑀢𑀸 𑀘 𑀯𑀺𑀜𑁆𑀜𑀸𑀧𑁂𑀢𑀸 𑀘 𑀓𑀼𑀲𑀮𑁄 𑀘 𑀲𑀳𑀺𑀢𑀸𑀲𑀳𑀺𑀢𑀤𑀲𑁆𑀲𑀦𑁄 𑀘 𑀅𑀓𑀮𑀳𑀓𑀸𑀭𑀓𑁄 𑀘𑀸𑀢𑀺 𑀏𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀲𑁆𑀲 𑀮𑀻𑀦𑀢𑁆𑀣𑀧𑀓𑀸𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲