𑁮. 𑀘𑀻𑀯𑀭𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀚𑀻𑀯𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁨𑁬. 𑀭𑀸𑀚𑀕𑀳𑀓𑁄𑀢𑀺 𑀭𑀸𑀚𑀕𑀳𑀯𑀸𑀲𑀻.

𑁩𑁨𑁮. 𑀅𑀫𑁄𑀳𑀚𑀸𑀢𑀺𑀓𑀢𑁆𑀢𑀸 𑀦 𑀘𑀺𑀭𑀲𑁆𑀲𑁂𑀯 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀅𑀳𑀁 𑀢𑁂 𑀧𑀺𑀢𑀸, 𑀓𑁂𑀦𑀝𑁆𑀞𑁂𑀦? 𑀬𑀲𑁆𑀫𑀸 𑀢𑁆𑀯𑀁 𑀫𑀬𑀸 𑀧𑁄𑀲𑀸𑀧𑀺𑀢𑁄.

𑁩𑁨𑁯. ‘‘𑀲𑀓𑁆𑀓𑁂 𑀯𑀺𑀲𑁆𑀲𑀝𑁆𑀞𑀫𑀢𑁆𑀢𑁂’’𑀢𑀺 𑀧𑀸𑀞𑁄, 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀺𑀲𑁆𑀲𑀝𑁆𑀞𑀫𑀢𑁆𑀢𑁄𑀯.

𑀧𑀚𑁆𑀚𑁄𑀢𑀭𑀸𑀚𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁩𑁪. 𑀪𑀼𑀜𑁆𑀚𑀺𑀢𑀼𑀁 𑀦𑀺𑀲𑀺𑀦𑁆𑀦𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀥𑀫𑁆𑀫𑀧𑀤𑁂 ‘𑀩𑀳𑀺𑀦𑀕𑀭𑁂 𑀤𑀺𑀲𑁆𑀯𑀸’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀤𑀺𑀯𑀲𑁂𑀲𑀼 𑀤𑀺𑀦𑁆𑀦𑀁 𑀢𑁂𑀦 𑀢𑁂𑀲𑀼 𑀏𑀓𑁂𑀓𑀁 𑀕𑀳𑁂𑀢𑁆𑀯𑀸 𑀤𑁆𑀯𑀻𑀲𑀼 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑁆𑀢𑀺 𑀬𑀼𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺.

𑀲𑀫𑀢𑁆𑀢𑀺𑀁𑀲𑀯𑀺𑀭𑁂𑀘𑀦𑀓𑀣𑀸𑀯𑀡𑁆𑀡𑀦𑀸

𑁩𑁩𑁬. 𑀓𑀩𑀴𑁂 𑀓𑀩𑀴𑁂𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀕𑀼𑀴𑀸𑀤𑀻𑀲𑀼 𑀧𑀓𑁆𑀔𑀺𑀢𑁆𑀢𑀁, 𑀢𑀁 𑀧𑀦 𑀪𑀕𑀯𑀸𑀯 𑀧𑀭𑀺𑀪𑀼𑀜𑁆𑀚𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀤𑁄𑀲𑁄.

𑀯𑀭𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁩𑁩𑁭. 𑀫𑀳𑀸𑀧𑀺𑀝𑁆𑀞𑀺𑀬𑀓𑁄𑀚𑀯𑀁 𑀦𑀸𑀫 𑀅𑀢𑀺𑀭𑁂𑀓𑀘𑀢𑀼𑀭𑀗𑁆𑀕𑀼𑀮𑀧𑀼𑀧𑁆𑀨𑀁 𑀓𑀺𑀭.

𑀓𑀫𑁆𑀩𑀮𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁪𑁦. 𑀉𑀧𑀘𑀸𑀭𑁂𑀢𑀺 𑀲𑀼𑀲𑀸𑀦𑀲𑁆𑀲 𑀉𑀧𑀘𑀸𑀭𑁂. 𑀩𑀳𑀺𑀧𑀺 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀓𑀢𑀺𑀓𑀓𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀢𑀯 𑀘 𑀫𑀫 𑀘 𑀳𑁄𑀢𑀽𑀢𑀺 𑀯𑀢𑁆𑀯𑀸 𑀇𑀢𑀭𑁂𑀦 𑀘 𑀢𑀣𑀸𑀯𑀼𑀢𑁆𑀢𑁂 𑀯𑀝𑁆𑀝𑀢𑀻’’𑀢𑀺 𑀲𑀫𑀸𑀦𑀧𑀭𑀺𑀓𑁆𑀔𑀸𑀭𑀯𑀺𑀥𑀺𑀁 𑀯𑀤𑀦𑁆𑀢𑀺.

𑁩𑁪𑁨. ‘‘𑀔𑀡𑁆𑀟𑀲𑀻𑀫𑀸𑀬𑀧𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁂𑀲𑀓𑀫𑁆𑀫𑀸𑀦𑀺𑀧𑀺 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀏𑀯𑀁 𑀲𑀦𑁆𑀢𑁂 𑀘𑁄𑀭𑀺𑀓𑀸𑀬 𑀓𑀢𑀲𑀤𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀸 𑀦 𑀯𑀝𑁆𑀝𑀢𑀻’’𑀢𑀺 𑀤𑀻𑀧𑀯𑀸𑀲𑀺𑀦𑁄 𑀯𑀤𑀦𑁆𑀢𑀺 𑀓𑀺𑀭. ‘‘𑀘𑁄𑀭𑀺𑀓𑀸𑀬 𑀕𑀳𑀺𑀢𑀢𑁆𑀢𑀸 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀆𑀕𑀢𑀲𑀼𑀢𑁆𑀢𑀜𑁆𑀘 𑀲𑀸𑀥𑀓’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀇𑀤𑀁 𑀆𑀯𑁂𑀡𑀺𑀓𑀮𑀓𑁆𑀔𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀆𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁪𑁩. ‘‘𑀇𑀤𑀁 𑀧𑀦 𑀪𑀡𑁆𑀟𑀸𑀕𑀸𑀭𑀦𑁆𑀢𑀺 𑀆𑀯𑁂𑀡𑀺𑀓𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀘𑀻𑀯𑀭𑀭𑀚𑀦𑀓𑀣𑀸𑀯𑀡𑁆𑀡𑀦𑀸

𑁩𑁪𑁪. 𑀕𑁄𑀫𑀬𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀯𑀺𑀭𑀽𑀧𑀢𑁆𑀢𑀸𑀯𑀸𑀭𑀺𑀢𑀁. ‘‘𑀓𑀼𑀗𑁆𑀓𑀼𑀫𑀧𑀼𑀧𑁆𑀨𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀅𑀮𑁆𑀮𑀺𑀓𑀸𑀬𑀸’’𑀢𑀺𑀧𑀺 𑀧𑀸𑀞𑁄 𑀅𑀢𑁆𑀣𑀺.

𑀦𑀺𑀲𑀻𑀤𑀦𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁩𑁫𑁩. 𑀅𑀝𑁆𑀞𑀸𑀦𑀫𑁂𑀢𑀦𑁆𑀢𑀺 𑀏𑀢𑁆𑀣 𑀭𑀽𑀧𑀓𑀡𑁆𑀟𑁂 ‘‘𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀭𑀸𑀕𑀘𑀺𑀢𑁆𑀢𑀸𑀪𑀸𑀯𑀸 𑀦 𑀫𑀼𑀘𑁆𑀘𑀢𑀻𑀢𑀺 𑀯𑀸 𑀭𑀸𑀕𑀧𑀘𑁆𑀘𑀬𑁂 𑀲𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀓𑀣𑀸𑀯𑀢𑁆𑀣𑀼𑀦𑀸 𑀘.

𑁩𑁬𑁨. 𑀅𑀕𑁆𑀕𑀴𑀕𑀼𑀢𑁆𑀢𑀺𑀬𑁂𑀯 𑀧𑀫𑀸𑀡𑀦𑁆𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀦𑀺𑀓𑁆𑀔𑁂𑀧𑀓𑀸𑀭𑀡𑁂𑀳𑀺 𑀞𑀧𑁂𑀦𑁆𑀢𑁂𑀦 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁂𑀬𑁂𑀯 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀗𑁆𑀖𑀺𑀓𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸

𑁩𑁬𑁩. 𑀦𑁄 𑀘𑁂 𑀅𑀢𑁆𑀣𑀢𑀁 𑀳𑁄𑀢𑀺 ‘‘𑀏𑀓𑀁 𑀘𑀻𑀯𑀭𑀫𑀸𑀲’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀬𑀸𑀯 𑀘𑀻𑀯𑀭𑀫𑀸𑀲𑀸’’𑀢𑀺 𑀯𑀘𑀦𑀲𑁆𑀲 𑀅𑀪𑀸𑀯𑀢𑁄, 𑀢𑀲𑁆𑀫𑀸 𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲 𑀅𑀦𑀦𑀼𑀜𑁆𑀜𑀸𑀢𑀦𑁆𑀢𑀺 𑀘𑁂? 𑀦, 𑀳𑁂𑀝𑁆𑀞𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸, 𑀢𑀢𑁄 𑀮𑀻𑀦𑀢𑁆𑀣𑀤𑀻𑀧𑀦𑀢𑁆𑀣𑀫𑀺𑀥 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸 𑀘. 𑀳𑁂𑀝𑁆𑀞𑀸 𑀳𑀺 ‘‘𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀲𑀢𑁆𑀢𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁, 𑀏𑀢𑀁 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀁 𑀏𑀓𑀘𑀻𑀯𑀭𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀢𑁂𑀲𑀁𑀬𑁂𑀯 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁, 𑀢𑀲𑁆𑀫𑀸 𑀇𑀥 𑀢𑀁 𑀅𑀯𑀢𑁆𑀯𑀸 𑀏𑀓𑁄𑀧𑀺 𑀢𑀬𑁄 𑀕𑀡𑀧𑀽𑀭𑀓𑁂 𑀮𑀪𑀺𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀮𑀪𑀢𑀻𑀢𑀺 𑀇𑀫𑀁 𑀮𑀻𑀦𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀅𑀬𑀫𑀢𑁆𑀣𑁄 𑀦 𑀜𑀸𑀬𑀢𑀺. ‘‘𑀚𑀸𑀦𑀺𑀢𑀩𑁆𑀩𑁄 𑀘 𑀯𑀺𑀦𑀬𑀥𑀭𑁂𑀳𑀻𑀢𑀺 𑀢𑀣𑀸 𑀯𑀼𑀢𑁆𑀢𑁄𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀢𑀁 𑀳𑁄𑀢𑀺, 𑀧𑀜𑁆𑀘 𑀫𑀸𑀲𑁂 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁. ‘‘𑀇𑀥 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸’’𑀢𑀺 𑀦𑀺𑀬𑀫𑀺𑀢𑀢𑁆𑀢𑀸 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’’𑀢𑀺 𑀏𑀢𑁆𑀣 𑀘 ‘‘𑀇𑀥𑀸’’𑀢𑀺 𑀅𑀥𑀺𑀓𑀸𑀭𑀢𑁆𑀢𑀸 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀮𑀪𑀢𑀺. ‘‘𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸𑀢𑀺 𑀘𑀻𑀯𑀭𑀓𑀸𑀮𑀲𑁆𑀲𑀸𑀲𑀦𑁆𑀦𑀢𑁆𑀢𑀸 𑀘 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀫𑁆𑀧𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀜𑁆𑀘 𑀅𑀦𑀼𑀜𑁆𑀜𑀸𑀢𑀝𑁆𑀞𑀸𑀦𑀢𑁆𑀢𑀸 𑀏𑀯 𑀯𑀼𑀢𑁆𑀢’’𑀦𑁆𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁. 𑀓𑁂𑀘𑀺 𑀧𑀦 ‘‘𑀬𑀁 𑀧𑀦 𑀇𑀤𑀁 ‘𑀇𑀥 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸’𑀢𑀺𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 ‘𑀅𑀦𑀸𑀕𑀢𑀯𑀲𑁆𑀲𑁂’𑀢𑀺 𑀧𑀤𑀁, 𑀢𑀸𑀯 𑀧𑀼𑀘𑁆𑀙𑀺𑀢𑁆𑀯𑀸 ‘𑀓𑀲𑁆𑀫𑀸? 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸’𑀢𑀺 𑀇𑀤𑀁 𑀧𑀭𑀢𑁄 ‘𑀢𑀢𑁆𑀭 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀻’𑀢𑀺 𑀇𑀫𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 ‘𑀓𑀲𑁆𑀫𑀸? 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸’𑀢𑀺 𑀮𑀺𑀔𑀺𑀢𑀩𑁆𑀩𑀁. 𑀓𑀲𑁆𑀫𑀸𑀢𑀺 𑀘𑁂? 𑀧𑀭𑀢𑁄 ‘𑀘𑀻𑀯𑀭𑀫𑀸𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀳𑁂𑀫𑀦𑁆𑀢𑀲𑁆𑀲𑀸’𑀢𑀺 𑀯𑀼𑀢𑁆𑀢𑁂𑀦 𑀦𑀺𑀩𑁆𑀩𑀺𑀲𑁂𑀲𑀢𑁆𑀢𑀸, 𑀢𑀲𑁆𑀫𑀸 𑀏𑀯 𑀏𑀓𑀘𑁆𑀘𑁂𑀲𑀼 𑀧𑀡𑁆𑀟𑀺𑀢𑀦𑁆𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀇𑀥 𑀧𑀦 𑀇𑀥-𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀁, 𑀢𑀢𑁆𑀣 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄 𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀫𑀬𑁆𑀳𑀺𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀯𑀘𑀦𑀫𑁂𑀯𑀸𑀥𑀺𑀝𑁆𑀞𑀸𑀦𑀁, 𑀇𑀤𑀫𑁂𑀢𑁆𑀣 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀫𑀬𑁆𑀳𑀺𑀫𑀸𑀦𑀺 𑀘𑀻𑀯𑀭𑀸𑀦𑀻’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀫𑀬𑁆𑀳𑀺𑀫𑀸𑀦𑀻’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲 𑀘𑀻𑀯𑀭𑀸𑀦𑀺 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘𑀘𑀻𑀯𑀭𑀸𑀦𑀺 𑀧𑀸𑀧𑀼𑀡𑀦𑁆𑀢𑀻’𑀢𑀺 𑀯𑀢𑁆𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀤𑀼𑀕𑁆𑀕𑀳𑀺𑀢𑀸𑀦𑀻𑀢𑀺 𑀲𑀗𑁆𑀖𑀺𑀓𑀸𑀦𑁂𑀯 𑀳𑁄𑀦𑁆𑀢𑀺. ‘‘𑀕𑀳𑀺𑀢𑀫𑁂𑀯 𑀦𑀸𑀫𑀸’𑀢𑀺 𑀇𑀫𑀲𑁆𑀲 𑀇𑀤𑀁 𑀧𑀢𑁆𑀢𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀦 𑀯𑀺𑀤𑀺𑀢𑀁, 𑀢𑁂 𑀧𑀦 𑀪𑀸𑀕𑀸 𑀢𑁂𑀲𑀁 𑀅𑀢𑁆𑀣𑀢𑁄 𑀧𑀢𑁆𑀢𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀮𑀺𑀔𑀺𑀢𑀁. ‘‘𑀏𑀓𑀲𑁆𑀫𑀺𑀁 𑀅𑀧𑀢𑀺𑀢𑁂 𑀧𑀼𑀦 𑀆𑀕𑀢𑀸 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁬𑁪. ‘‘𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀢𑁆𑀣𑁂𑀦𑀸’’𑀢𑀺 𑀘𑀻𑀯𑀭𑀲𑀫𑀬𑀁 𑀉𑀧𑀸𑀤𑀸𑀬 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄.𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 ‘‘𑀭𑀸𑀚𑀯𑀺𑀳𑀸𑀭𑁂 𑀯𑀺𑀬 𑀦𑀸𑀦𑀸𑀧𑀭𑀺𑀯𑁂𑀡𑁂𑀲𑀼 𑀯𑀸 𑀇𑀥 𑀯𑀸 𑀯𑀼𑀢𑁆𑀣𑀸 𑀮𑀪𑀢𑀽’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁. ‘‘𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑀫𑁂𑀯 𑀉𑀝𑁆𑀞𑀸𑀧𑁂𑀢𑀻𑀢𑀺 𑀏𑀢𑀁 𑀯𑀘𑀦𑀫𑀢𑁆𑀢𑀫𑁂𑀯 𑀏𑀓𑀯𑀺𑀳𑀸𑀭𑁂 𑀲𑀢𑁆𑀢𑀸𑀳𑀓𑀺𑀘𑁆𑀘𑀸𑀪𑀸𑀯𑀸’’𑀢𑀺 𑀘 𑀮𑀺𑀔𑀺𑀢𑀁.

𑀫𑀢𑀲𑀦𑁆𑀢𑀓𑀓𑀣𑀸𑀯𑀡𑁆𑀡𑀦𑀸

𑁩𑁬𑁯. 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀫𑀺𑀁 𑀓𑀸𑀮𑀁𑀓𑀢𑁂. 𑀢𑀢𑁆𑀣 ‘‘𑀧𑀢𑁆𑀢𑀘𑀻𑀯𑀭𑁂’’𑀢𑀺 𑀧𑀥𑀸𑀦𑀧𑀭𑀺𑀓𑁆𑀔𑀸𑀭𑀤𑀲𑁆𑀲𑀦𑀫𑀼𑀔𑁂𑀦 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀜𑁆𑀘𑁂𑀢𑀁 𑀳𑁄𑀢𑀺, 𑀲𑀗𑁆𑀖𑀲𑁆𑀲 𑀓𑀧𑁆𑀧𑀺𑀬𑀫𑁂𑀯 𑀫𑀢𑀢𑁆𑀢𑀸𑀢𑀺 𑀏𑀓𑁂. 𑀦𑁄𑀢𑀺 𑀢𑀓𑁆𑀓𑁄 𑀧𑀢𑁆𑀢𑀘𑀢𑀼𑀓𑁆𑀓𑁂 𑀲𑀩𑁆𑀩𑀣𑀸 𑀅𑀓𑀧𑁆𑀧𑀺𑀬𑀧𑀢𑁆𑀢𑀦𑀬𑀯𑀺𑀭𑁄𑀥𑀢𑁄. 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀲𑁂𑀦𑀸𑀲𑀦𑁂 𑀘 𑀯𑀲𑀢𑁄 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑀢𑁆𑀣 𑀘𑁂𑀓𑁄 𑀓𑀸𑀮𑀁𑀓𑀢𑁄, 𑀇𑀢𑀭𑁄 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀁 𑀅𑀧𑀸𑀧𑁂𑀢𑁆𑀯𑀸 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀸𑀢𑀺, 𑀲𑀗𑁆𑀖𑀲𑀦𑁆𑀢𑀓𑀁 𑀕𑀳𑀺𑀢𑀁 𑀳𑁄𑀢𑀺, 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀦𑀸𑀯𑀸𑀲𑁂 𑀕𑀡𑁆𑀳𑀸𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄 𑀅𑀲𑁆𑀲𑀸𑀫𑀺𑀓𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀫𑀭𑀡𑀲𑀫𑀬𑁂 𑀯𑀢𑁆𑀢𑀼𑀁 𑀅𑀲𑀳𑀦𑁆𑀢𑁄 𑀘𑁂 𑀘𑀺𑀢𑁆𑀢𑁂𑀦𑁂𑀯 𑀤𑁂𑀢𑀺, 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀲𑀗𑁆𑀖𑁄𑀯 𑀢𑀲𑁆𑀲 𑀲𑀸𑀫𑀻. 𑀧𑀭𑁄 𑀯𑀸 𑀅𑀯𑀺𑀲𑁆𑀲𑀸𑀲𑀺𑀓𑁄 𑀲𑀬𑀫𑁂𑀯 𑀕𑀡𑁆𑀳𑀸𑀢𑀺, 𑀕𑀳𑀡𑀁 𑀦 𑀭𑀼𑀳𑀢𑀺, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀘𑁂, 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀢𑀲𑁆𑀲 𑀘 𑀆𑀯𑀸𑀲𑀕𑀢𑀲𑁆𑀲 𑀓𑁄 𑀲𑀸𑀫𑀻. ‘‘𑀲𑀗𑁆𑀖𑁄 𑀲𑀸𑀫𑀻’’𑀢𑀺 𑀯𑀘𑀦𑀢𑁄 𑀲𑀗𑁆𑀖𑁂𑀦 𑀩𑀮𑀓𑁆𑀓𑀸𑀭𑁂𑀦 𑀲𑁄 𑀯𑀸𑀭𑁂𑀢𑀩𑁆𑀩𑁄𑀢𑀺 𑀏𑀓𑁂. 𑀚𑀻𑀯𑀫𑀸𑀦𑀓𑀸𑀮𑁂 𑀕𑀳𑀺𑀢𑀢𑁆𑀢𑀸 𑀦 𑀲𑀗𑁆𑀖𑁄 𑀲𑀸𑀫𑀻𑀢𑀺 𑀏𑀓𑁂. 𑀲𑀸𑀫𑀺𑀓𑁄 𑀘𑁂 𑀲𑀬𑀁 𑀧𑀲𑁆𑀲𑀺𑀢𑁆𑀯𑀸 𑀅𑀘𑁆𑀙𑀺𑀦𑁆𑀤𑀺𑀢𑀼𑀁 𑀮𑀪𑀢𑀺, 𑀲𑀗𑁆𑀖𑁄𑀧𑀺 𑀮𑀪𑀢𑀺 𑀲𑀸𑀫𑀺𑀞𑀸𑀦𑁂 𑀞𑀺𑀢𑀢𑁆𑀢𑀸𑀢𑀺 𑀇𑀢𑀭𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀫𑀢𑀓𑀲𑁆𑀲 𑀳𑀺𑀭𑀜𑁆𑀜𑀸𑀤𑀺𑀅𑀓𑀧𑁆𑀧𑀺𑀬𑀪𑀡𑁆𑀟𑀁 𑀳𑁄𑀢𑀺. 𑀉𑀕𑁆𑀕𑀳𑀺𑀢𑀜𑁆𑀘𑁂𑀢𑀁 𑀳𑁄𑀢𑀺, 𑀉𑀕𑁆𑀕𑀳𑀺𑀢𑁂 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀁 𑀘𑁂, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀤𑀸𑀲𑁄 𑀘𑁂 𑀕𑀳𑀺𑀢𑁄 𑀳𑁄𑀢𑀺, 𑀦 𑀲𑀗𑁆𑀖𑁄 𑀲𑀸𑀫𑀻, 𑀆𑀭𑀸𑀫𑀺𑀓𑁄 𑀘𑁂, 𑀲𑀗𑁆𑀖𑁄 𑀲𑀸𑀫𑀻. 𑀕𑀸𑀯𑀻𑀫𑀳𑀺𑀁𑀲𑀻𑀆𑀤𑀬𑁄 𑀳𑁄𑀦𑁆𑀢𑀺, 𑀆𑀯𑀸𑀲𑀕𑀢𑀸𑀦𑀁 𑀲𑀗𑁆𑀖𑁄 𑀲𑀸𑀫𑀻, 𑀅𑀦𑀸𑀯𑀸𑀲𑀕𑀢𑀸𑀦𑀁 𑀦 𑀲𑀗𑁆𑀖𑁄 𑀲𑀸𑀫𑀻. 𑀲𑀗𑁆𑀖𑁄 𑀘𑁂 𑀆𑀯𑀸𑀲𑀁 𑀆𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀲𑀫𑀻𑀧𑁂 𑀩𑀳𑀺𑀲𑀻𑀫𑀸𑀬 𑀞𑀧𑁂𑀢𑀺, 𑀓𑀸𑀭𑀓𑀲𑀗𑁆𑀖𑁄 𑀲𑀸𑀫𑀻, 𑀢𑀣𑀸 𑀆𑀭𑀸𑀫𑀺𑀓𑁂. 𑀫𑀢𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀦𑀺𑀓𑁆𑀔𑁂𑀧𑀯𑀲𑁂𑀦 𑀞𑀧𑀺𑀢𑁄 𑀳𑁄𑀢𑀺, 𑀏𑀲𑁄𑀯 𑀲𑀸𑀫𑀻. 𑀫𑀳𑀕𑁆𑀖𑁄 𑀘𑁂 𑀳𑁄𑀢𑀺, 𑀲𑁂𑀲𑀲𑁆𑀲 𑀲𑀗𑁆𑀖𑁄 𑀲𑀸𑀫𑀻. ‘‘𑀓𑁂𑀦𑀘𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀓𑁆𑀓𑀫𑁄 𑀏𑀢𑁂𑀦 𑀤𑀲𑁆𑀲𑀺𑀢𑁄. 𑀧𑀼𑀦 𑀉𑀧𑀝𑁆𑀞𑀸𑀓𑀸𑀦𑀁 𑀩𑀳𑀼𑀪𑀸𑀯𑁂 𑀲𑀢𑀺 𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀓𑀫𑁆𑀫𑀯𑀸𑀘𑀸𑀬𑀁 ‘‘𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀡𑁂𑀭𑀯𑀸𑀭𑁂 ‘‘𑀘𑀻𑀯𑀭’’𑀦𑁆𑀢𑀺 𑀧𑀸𑀞𑁄. ‘‘𑀇𑀫𑀁 𑀢𑀼𑀬𑁆𑀳𑀁 𑀤𑁂𑀫𑀺 𑀤𑀤𑀸𑀫𑀺 𑀤𑀚𑁆𑀚𑀸𑀫𑀺 𑀑𑀡𑁄𑀚𑁂𑀫𑀺 𑀧𑀭𑀺𑀘𑁆𑀘𑀚𑀸𑀫𑀺 𑀯𑀺𑀲𑁆𑀲𑀚𑁆𑀚𑀸𑀫𑀺 𑀦𑀺𑀲𑁆𑀲𑀚𑁆𑀚𑀸𑀫𑀻’𑀢𑀺 𑀯𑀸 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀺…𑀧𑁂… 𑀦𑀺𑀲𑁆𑀲𑀚𑁆𑀚𑀸𑀫𑀻’𑀢𑀺 𑀯𑀸 𑀯𑀤𑀢𑀺, ‘𑀲𑀫𑁆𑀫𑀼𑀔𑀸 𑀯𑀸 𑀧𑀭𑀫𑁆𑀫𑀼𑀔𑀸 𑀯𑀸 𑀯𑀼𑀢𑁆𑀢𑁂 𑀤𑀺𑀦𑁆𑀦𑀁𑀬𑁂𑀯 𑀳𑁄𑀢𑀻’𑀢𑀺 𑀤𑀸𑀦𑀮𑀓𑁆𑀔𑀡𑀲𑁆𑀲 𑀘 ‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’𑀢𑀺 𑀯𑀼𑀢𑁆𑀢𑁂 ‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’𑀢𑀺 𑀯𑀤𑀢𑀺, ‘𑀲𑀼𑀤𑀺𑀦𑁆𑀦𑀁 𑀲𑀼𑀕𑁆𑀕𑀳𑀺𑀢𑀜𑁆𑀘𑀸’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀕𑀳𑀡𑀮𑀓𑁆𑀔𑀡𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 ‘𑀫𑀫 𑀲𑀦𑁆𑀢𑀓𑀁 𑀢𑀯 𑀘 𑀫𑀫 𑀘 𑀳𑁄𑀢𑀽’𑀢𑀺 𑀏𑀯𑀫𑀸𑀤𑀺𑀯𑀘𑀦𑁂𑀦 𑀲𑀫𑀸𑀦𑀧𑀭𑀺𑀓𑁆𑀔𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀘𑀭𑀺𑀬𑀸’’𑀢𑀺 𑀮𑀺𑀔𑀺𑀢𑀁.

𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 𑀅𑀢𑀻𑀯 𑀧𑀧𑀜𑁆𑀘𑀁 𑀓𑀢𑁆𑀯𑀸 𑀧𑀼𑀦 ‘‘𑀇𑀤𑀫𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀲𑀘𑁂𑀲𑀫𑁆𑀩𑀳𑀼𑀮𑀸, 𑀤𑁆𑀯𑁂 𑀯𑀸 𑀲𑀫𑀸𑀦𑀧𑀭𑀺𑀓𑁆𑀔𑀸𑀭𑀁 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀢𑁆𑀢𑀫𑀸𑀦𑀁 𑀉𑀧𑁆𑀧𑀚𑁆𑀚𑀦𑀓𑁂𑀦 𑀲𑀤𑁆𑀥𑀺𑀁 𑀧𑁂𑀲𑀮𑀲𑁆𑀲 𑀏𑀓𑀲𑁆𑀲 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀲𑁄 𑀧𑀼𑀦 𑀢𑁂𑀲𑀫𑁂𑀯 𑀧𑀭𑀺𑀘𑁆𑀘𑀚𑀢𑀺, 𑀏𑀢𑁆𑀢𑀸𑀯𑀢𑀸 𑀢𑁂 𑀲𑀫𑀸𑀦𑀧𑀭𑀺𑀓𑁆𑀔𑀸𑀭𑀺𑀓𑀸 𑀳𑁄𑀦𑁆𑀢𑀻𑀢𑀺. 𑀇𑀤𑀁 𑀲𑀫𑀸𑀦𑀧𑀭𑀺𑀓𑁆𑀔𑀸𑀭𑀮𑀓𑁆𑀔𑀡𑀁 𑀧𑀸𑀴𑀺𑀆𑀤𑀻𑀲𑀼 𑀯𑀼𑀢𑁆𑀢𑀮𑀓𑁆𑀔𑀡𑁂𑀬𑁂𑀯 𑀧𑀢𑀦𑀢𑁄 𑀅𑀘𑀮𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀢𑀣𑀸𑀧𑀺 𑀧𑁄𑀭𑀸𑀡𑀯𑀺𑀥𑀺𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀯𑀢𑁆𑀢𑀦𑀢𑁄 𑀧𑀝𑀺𑀲𑁂𑀥𑁂𑀢𑀩𑁆𑀩𑁄, 𑀆𑀘𑀭𑀺𑀬𑀸𑀦𑀁 𑀫𑀢𑀸𑀦𑀼𑀲𑀸𑀭𑁂𑀦 𑀓𑀸𑀢𑀩𑁆𑀩𑀁 𑀓𑀸𑀢𑀼𑀓𑀸𑀫𑁂𑀦𑀸𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁, ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀸𑀫𑀡𑁂𑀭𑁄 𑀧𑀜𑁆𑀘𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀏𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀕𑀳𑀺𑀢𑁄 𑀮𑀸𑀪𑀁 𑀦 𑀮𑀪𑀢𑀺, 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁𑀅𑀦𑀼𑀧𑁆𑀧𑀦𑁆𑀦𑀘𑀻𑀯𑀭𑀓𑀣𑀸𑀯𑀡𑁆𑀡𑀦𑀸

𑁩𑁭𑁫. 𑀉𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀧𑀓𑁆𑀓𑀫𑀢𑀻𑀢𑀺 𑀏𑀢𑁆𑀣 ‘‘𑀲𑀗𑁆𑀖𑁂𑀦 𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑁆𑀢𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀸𑀢𑀼𑀁 𑀲𑀗𑁆𑀖𑀲𑁆𑀲 𑀭𑀼𑀘𑁆𑀘𑀢𑀻’’𑀢𑀺 𑀲𑀸𑀯𑀺𑀢𑁂𑀧𑀺 𑀯𑀺𑀩𑁆𑀪𑀫𑀢𑀺, 𑀢𑀢𑁄 𑀦 𑀮𑀪𑀢𑀺, 𑀧𑀼𑀦 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀘𑀻𑀯𑀭𑀪𑀸𑀚𑀦𑀁 𑀲𑀫𑁆𑀪𑀸𑀯𑁂𑀦𑁆𑀢𑁄𑀧𑀺 𑀦 𑀮𑀪𑀢𑀺𑀬𑁂𑀯 𑀧𑀼𑀩𑁆𑀩𑀧𑀓𑀢𑀺𑀢𑁄 𑀪𑀝𑁆𑀞𑀢𑁆𑀢𑀸. 𑀅𑀣 𑀧𑀸𑀧𑀺𑀢𑁂 𑀯𑀺𑀩𑁆𑀪𑀫𑀢𑀺, 𑀮𑀪𑀢𑀻’’𑀢𑀺 𑀘 𑀯𑀼𑀢𑁆𑀢𑀁.

𑀲𑀗𑁆𑀖𑁂𑀪𑀺𑀦𑁆𑀦𑁂𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸

𑁩𑁭𑁬. 𑀧𑀭𑀲𑀫𑀼𑀤𑁆𑀤𑁂𑀢𑀺 𑀚𑀫𑁆𑀩𑀼𑀤𑀻𑀧𑁂.

𑀅𑀝𑁆𑀞𑀘𑀻𑀯𑀭𑀫𑀸𑀢𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁩𑁭𑁯. 𑀬𑀲𑁆𑀫𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀤𑀼𑀩𑁆𑀩𑀺𑀚𑀸𑀦𑀁, 𑀢𑀲𑁆𑀫𑀸 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀫𑁆𑀧𑀺 𑀧𑀭𑀺𑀬𑀦𑁆𑀢𑀕𑀢𑀫𑁂𑀯 𑀕𑀳𑁂𑀢𑀩𑁆𑀩𑀁. ‘‘𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀪𑀺𑀓𑁆𑀔𑀽𑀲𑀼𑀧𑀺…𑀧𑁂… 𑀧𑀸𑀧𑀼𑀡𑀸𑀢𑀻𑀢𑀺 ‘𑀉𑀧𑀘𑀸𑀭𑀲𑀻𑀫𑀸𑀬 𑀤𑁂𑀫𑀸’𑀢𑀺 𑀏𑀯𑀁 𑀤𑀺𑀦𑁆𑀦𑀫𑁂𑀯 𑀲𑀦𑁆𑀥𑀸𑀬𑀸’’𑀢𑀺 𑀮𑀺𑀔𑀺𑀢𑀁. ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀔𑀡𑁆𑀟𑀲𑀻𑀫𑀸𑀤𑀻𑀲𑀼 𑀞𑀺𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀢𑀸𑀲𑀁 𑀯𑀺𑀲𑀼𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀢𑁆𑀢𑀸. 𑀲𑀫𑀸𑀦𑀲𑀁𑀯𑀸𑀲𑀓𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀦𑀁 𑀇𑀤𑀁 𑀦𑀸𑀦𑀢𑁆𑀢𑀁 𑁋 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀕𑀸𑀫𑀝𑁆𑀞𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀓𑀲𑁆𑀫𑀸? ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬𑀸’’𑀢𑀺 𑀤𑀺𑀦𑁆𑀦𑀁 𑀧𑀦 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀅𑀢𑁆𑀣𑀺, 𑀢𑀢𑁆𑀣 𑀞𑀺𑀢𑀸𑀦𑀁, 𑀇𑀢𑀭𑀢𑁆𑀭 𑀞𑀺𑀢𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀺. ‘‘𑀔𑀡𑁆𑀟𑀲𑀻𑀫𑀸𑀬𑀁 𑀞𑀢𑁆𑀯𑀸 ‘𑀲𑀻𑀫𑀝𑁆𑀞𑀓𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀼𑀢𑁆𑀢𑁂 𑀉𑀧𑀘𑀸𑀭𑀲𑀻𑀫𑀸𑀬 𑀏𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀤𑁂𑀫𑀸’’𑀢𑀺 𑀔𑀡𑁆𑀟𑀲𑀻𑀫𑀸𑀬𑀁 𑀞𑀢𑁆𑀯𑀸 𑀤𑀺𑀦𑁆𑀦𑁂 𑀢𑀢𑁆𑀣𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀓𑁂𑀘𑀺. 𑀬𑁄𑀚𑀦𑀲𑀢𑀫𑁆𑀧𑀺 𑀧𑀽𑀭𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀻𑀢𑀺 𑀏𑀢𑁆𑀣 𑀯𑀺𑀳𑀸𑀭𑀽𑀧𑀘𑀸𑀭𑁂 𑀳𑀢𑁆𑀣𑀧𑀸𑀲𑁂𑀦, 𑀩𑀳𑀺𑀕𑀸𑀫𑀸𑀤𑀻𑀲𑀼 𑀤𑁆𑀯𑀸𑀤𑀲𑀳𑀢𑁆𑀣𑁂𑀦 𑀉𑀧𑀘𑀸𑀭𑁄𑀢𑀺 𑀏𑀓𑁂. ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸𑀧𑀺 𑀧𑀭𑀺𑀓𑁆𑀔𑁂𑀧𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀏𑀓𑁂. ‘‘𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑀢𑁄 𑀩𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀢𑁆𑀯𑀸 ‘𑀲𑀗𑁆𑀖𑀲𑁆𑀲𑀸’𑀢𑀺 𑀯𑀼𑀢𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄𑀯 𑀲𑀸𑀫𑀻’’𑀢𑀺 𑀯𑀤𑀦𑁆𑀢𑀺. 𑀏𑀓𑁄𑀧𑀺 𑀕𑀦𑁆𑀢𑁆𑀯𑀸𑀢𑀺 𑀏𑀢𑁆𑀣 𑀲𑀩𑁆𑀩𑁂𑀲𑀁 𑀯𑀸 𑀧𑀸𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀆𑀦𑁂𑀢𑁆𑀯𑀸 𑀯𑀸 𑀧𑀸𑀧𑁂𑀢𑀩𑁆𑀩𑀁, 𑀇𑀢𑀭𑀣𑀸 𑀕𑀢𑀲𑁆𑀲 𑀦 𑀧𑀸𑀧𑀼𑀡𑀸𑀢𑀺. 𑀲𑀫𑀸𑀦𑀮𑀸𑀪𑀓𑀢𑀺𑀓𑀸 𑀫𑀽𑀮𑀸𑀯𑀸𑀲𑁂 𑀲𑀢𑀺 𑀲𑀺𑀬𑀸, 𑀫𑀽𑀮𑀸𑀯𑀸𑀲𑀯𑀺𑀦𑀸𑀲𑁂𑀦 𑀓𑀢𑀺𑀓𑀸𑀧𑀺 𑀯𑀺𑀦𑀲𑁆𑀲𑀢𑀺. 𑀲𑀫𑀸𑀦𑀮𑀸𑀪𑀯𑀘𑀦𑀁 𑀲𑀢𑀺 𑀤𑁆𑀯𑀻𑀲𑀼, 𑀩𑀳𑀽𑀲𑀼 𑀯𑀸 𑀬𑀼𑀚𑁆𑀚𑀢𑀺. 𑀢𑁂𑀦𑁂𑀯 𑀏𑀓𑀲𑁆𑀫𑀺𑀁 𑀅𑀯𑀲𑀺𑀝𑁆𑀞𑁂 𑀬𑀼𑀚𑁆𑀚𑀢𑀻𑀢𑀺 𑀦𑁄 𑀫𑀢𑀺.

‘‘𑀢𑀸𑀯𑀓𑀸𑀮𑀺𑀓𑀓𑀸𑀮𑁂𑀦, 𑀫𑀽𑀮𑀘𑁆𑀙𑁂𑀤𑀯𑀲𑁂𑀦 𑀯𑀸;

𑀅𑀜𑁆𑀜𑁂𑀲𑀁 𑀓𑀫𑁆𑀫𑀁 𑀅𑀜𑁆𑀜𑀲𑁆𑀲, 𑀲𑀺𑀬𑀸 𑀦𑀸𑀯𑀸𑀲𑀲𑀗𑁆𑀕𑀫𑁄’’𑀢𑀺. 𑁋

𑀆𑀘𑀭𑀺𑀬𑁄.

𑀲𑀩𑁆𑀩𑀢𑁆𑀣 𑀤𑀺𑀦𑁆𑀦𑀫𑁂𑀯𑀸𑀢𑀺 ‘‘𑀲𑀫𑀸𑀦𑀪𑀸𑀕𑁄𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀏𑀓𑀫𑁂𑀓𑀁 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻𑀢𑀺 𑀘𑁂 𑀯𑀤𑀢𑀺, 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺 𑀯𑀺𑀪𑀸𑀕𑀲𑁆𑀲 𑀓𑀢𑀢𑁆𑀢𑀸. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀻𑀯𑀭𑁂 𑀤𑀺𑀦𑁆𑀦𑁂 𑀧𑀁𑀲𑀼𑀓𑀽𑀮𑀺𑀓𑀸𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀉𑀪𑀢𑁄𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀫𑀺𑀲𑁆𑀲𑀺𑀢𑀢𑁆𑀢𑀸, 𑀢𑀢𑁆𑀣 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀘 𑀧𑀼𑀕𑁆𑀕𑀮𑁄 𑀯𑀺𑀲𑀼𑀁 𑀮𑀪𑀢𑀺. 𑀏𑀯𑀁 𑀲𑀦𑁆𑀢𑁂 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀁 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀤𑀺𑀦𑁆𑀦𑀪𑀸𑀯𑀫𑁂𑀯 𑀤𑀻𑀧𑁂𑀢𑀺, 𑀦 𑀉𑀪𑀢𑁄𑀲𑀗𑁆𑀖𑀧𑀜𑁆𑀜𑀢𑁆𑀢𑀺𑀁, 𑀢𑀲𑁆𑀫𑀸 𑀏𑀯 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀸𑀭𑁄 𑀦 𑀯𑀼𑀢𑁆𑀢𑁄. 𑀅𑀣 𑀯𑀸 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯 𑀧𑀫𑀸𑀡𑀁, 𑀦 𑀯𑀺𑀘𑀸𑀭𑀡𑀸𑀢𑀺 𑀏𑀓𑁂. 𑀬𑀲𑁆𑀫𑀸 𑀏𑀓𑁄 𑀅𑀤𑁆𑀥𑀸𑀦𑀸𑀤𑀺𑀬𑀓𑁄 𑀯𑀺𑀬 𑀤𑀼𑀯𑀺𑀥𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀉𑀪𑀢𑁄𑀲𑀗𑁆𑀖𑀕𑁆𑀕𑀳𑀡𑁂𑀦 𑀏𑀓𑁄 𑀪𑀺𑀓𑁆𑀔𑀼 𑀦 𑀕𑀳𑀺𑀢𑁄𑀢𑀺. ‘‘𑀲𑀩𑁆𑀩𑀸𑀯𑀸𑀲𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀘𑀸’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀯𑀺𑀳𑀸𑀭𑁂𑀲𑀼 𑀘𑁂𑀢𑀺𑀬𑀥𑀫𑁆𑀫𑀸𑀦𑀁 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀕𑁄 𑀤𑀸𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦, 𑀢𑀢𑁆𑀣 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀇𑀥 𑀯𑀺𑀳𑀸𑀭𑁂𑀦 𑀖𑀝𑀺𑀢𑀢𑁆𑀢𑀸 𑀘 𑀢𑀫𑁆𑀳𑀺 𑀢𑀫𑁆𑀳𑀺 𑀯𑀺𑀳𑀸𑀭𑁂 𑀏𑀓𑀪𑀸𑀕𑀁 𑀮𑀪𑀺𑀢𑀩𑁆𑀩𑀫𑁂𑀯𑀸𑀢𑀺 𑀧𑀭𑀺𑀳𑀭𑀦𑁆𑀢𑀺. 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸𑀢𑀺 𑀯𑀺𑀓𑀸𑀮𑁂 𑀅𑀧𑀭𑀺𑀪𑁄𑀕𑀢𑁆𑀢𑀸 𑀲𑀓𑀮𑁄𑀧𑀺 𑀯𑀝𑁆𑀝𑁂𑀬𑁆𑀬𑀸𑀢𑀺 𑀘𑁂? ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀭𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑁂𑀦 ‘‘𑀳𑀭𑀸𑀫𑀻’’𑀢𑀺 𑀕𑀳𑀺𑀢𑀢𑁆𑀢𑀸 𑀘 𑀦 𑀯𑀝𑁆𑀝𑀢𑀺. 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁆𑀧𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁂𑀯𑀸𑀢𑀺 𑀅𑀢𑁆𑀣𑁄, 𑀇𑀢𑀭𑀣𑀸 𑀲𑀫𑀼𑀘𑁆𑀘𑀬𑀢𑁆𑀣𑁂 𑀕𑀳𑀺𑀢𑁂 ‘‘𑀮𑀓𑁆𑀔𑀡𑀜𑁆𑀜𑀽 𑀯𑀤𑀦𑁆𑀢𑀻’’𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. 𑀓𑀲𑁆𑀫𑀸𑀢𑀺 𑀆𑀭𑀪𑀺𑀢𑁆𑀯𑀸 𑀧𑀧𑀜𑁆𑀘𑀁 𑀓𑀭𑁄𑀦𑁆𑀢𑀺. 𑀓𑀺𑀁 𑀢𑁂𑀦, 𑀧𑀭𑀢𑁄 ‘‘𑀘𑀻𑀯𑀭𑀫𑀸𑀲𑀢𑁄 𑀧𑀝𑁆𑀞𑀸𑀬…𑀧𑁂… 𑀅𑀢𑀻𑀢𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀻’’𑀢𑀺 𑀇𑀫𑀺𑀦𑀸 𑀲𑀺𑀤𑁆𑀥𑀢𑁆𑀢𑀸 𑀦 𑀯𑀺𑀘𑀸𑀭𑀺𑀢𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀓𑁆𑀔𑀡𑀜𑁆𑀜𑀽’’𑀢𑀺 𑀅𑀘𑀮𑀯𑀲𑁂𑀦. 𑀲𑀘𑁂 𑀧𑀦 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑁄…𑀧𑁂… 𑀲𑀫𑁆𑀧𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀁 𑀲𑀫𑁆𑀧𑀢𑁆𑀢𑀸𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑁂 𑀧𑀦 𑀬𑀲𑁆𑀫𑀸 𑀅𑀦𑀦𑁆𑀢𑀭𑀸𑀢𑀻𑀢𑀁 𑀳𑁂𑀫𑀦𑁆𑀢𑀁 𑀏𑀯 𑀯𑀼𑀢𑁆𑀣𑀸 𑀦𑀸𑀫 𑀳𑁄𑀦𑁆𑀢𑀺, 𑀦 𑀯𑀲𑁆𑀲𑀁, 𑀢𑀲𑁆𑀫𑀸 ‘‘𑀫𑀸𑀢𑀺𑀓𑀸 𑀆𑀭𑁄𑀧𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀬𑁂 𑀯𑀸 𑀣𑁂𑀭𑁂𑀳𑀺 𑀧𑁂𑀲𑀺𑀢𑀸, 𑀢𑁂𑀲𑀁 𑀧𑀸𑀧𑀼𑀡𑀸𑀢𑀻𑀢𑀺 𑀓𑀺𑀭 𑀅𑀢𑁆𑀣𑁄.

𑀘𑀻𑀯𑀭𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.