𑁭. 𑀓𑀣𑀺𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀓𑀣𑀺𑀦𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁩𑁦𑁬. ‘‘𑀓𑀣𑀺𑀦𑀦𑁆𑀢𑀺 𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀦𑁆𑀢𑁄𑀓𑀭𑀡𑀲𑀫𑀢𑁆𑀣𑀢𑀸𑀬 𑀣𑀺𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁. ‘‘𑀧𑀜𑁆𑀘 𑀓𑀧𑁆𑀧𑀦𑁆𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀓𑀧𑁆𑀧𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀸𑀕𑀢𑀯𑀘𑀦𑀁 ‘‘𑀯𑁄’’𑀢𑀺 𑀇𑀫𑀲𑁆𑀲 𑀲𑀸𑀫𑀺𑀯𑀘𑀦𑀧𑀓𑁆𑀔𑁂 𑀬𑀼𑀚𑁆𑀚𑀢𑀺 𑀢𑁂𑀲𑀁 𑀢𑀲𑁆𑀫𑀺𑀁 𑀔𑀡𑁂 𑀅𑀦𑀢𑁆𑀣𑀢𑀓𑀣𑀺𑀦𑀢𑁆𑀢𑀸. 𑀤𑁆𑀯𑀻𑀲𑀼 𑀧𑀦𑁂𑀢𑁂𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀧𑀘𑁆𑀙𑀺𑀫𑁄 𑀬𑀼𑀢𑁆𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀧𑀸𑀯𑁂𑀬𑁆𑀬𑀓𑀸𑀦𑀁 𑀲𑀩𑁆𑀩𑀥𑀼𑀢𑀗𑁆𑀕𑀥𑀭𑀢𑁆𑀢𑀸. 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀳𑀺 𑀅𑀦𑀸𑀫𑀦𑁆𑀢𑀘𑀸𑀭𑁄 𑀧𑀜𑁆𑀜𑀢𑁆𑀢𑁄, 𑀢𑀣𑀸 𑀕𑀡𑀪𑁄𑀚𑀦𑀁. 𑀅𑀲𑀫𑀸𑀤𑀸𑀦𑀘𑀸𑀭𑁄 𑀅𑀦𑀥𑀺𑀝𑁆𑀞𑀺𑀢𑀢𑀺𑀘𑀻𑀯𑀭𑀲𑁆𑀲 𑀦𑀢𑁆𑀣𑀺 𑀅𑀢𑁂𑀘𑀻𑀯𑀭𑀺𑀓𑀲𑁆𑀲 𑀬𑀸𑀯𑀤𑀢𑁆𑀣𑀘𑀻𑀯𑀭𑀘𑀢𑀼𑀢𑁆𑀣𑀸𑀤𑀺𑀘𑀻𑀯𑀭𑀕𑁆𑀕𑀳𑀡𑀲𑀫𑁆𑀪𑀯𑀢𑁄. 𑀇𑀢𑀭𑀲𑁆𑀲𑀸𑀧𑀺 𑀅𑀦𑀥𑀺𑀝𑁆𑀞𑀸𑀦𑀫𑀼𑀔𑁂𑀦 𑀮𑀩𑁆𑀪𑀢𑀺. 𑀘𑀻𑀯𑀭𑀼𑀧𑁆𑀧𑀸𑀤𑁄 𑀅𑀧𑀁𑀲𑀼𑀓𑀽𑀮𑀺𑀓𑀲𑁆𑀲𑁂𑀯. ‘‘𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬’’𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑀘𑀸𑀭𑀲𑀻𑀫𑀝𑁆𑀞𑀲𑁆𑀲 𑀫𑀢𑀓𑀘𑀻𑀯𑀭𑀸𑀤𑀺𑀪𑀸𑀕𑀺𑀬𑀢𑀸𑀬 𑀩𑀤𑁆𑀥𑀲𑀻𑀫𑀸𑀬 𑀢𑀢𑁆𑀭𑀼𑀧𑁆𑀧𑀸𑀤𑀸𑀪𑀸𑀯𑀢𑁄 𑀯𑀺𑀜𑁆𑀜𑁂𑀬𑁆𑀬𑀫𑁂𑀢𑀁 𑀉𑀧𑀘𑀸𑀭𑀲𑀻𑀫𑀸𑀯𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸𑀢𑀺. 𑀓𑀣𑀺𑀦𑀢𑁆𑀣𑀸𑀭𑀁 𑀓𑁂 𑀮𑀪𑀦𑁆𑀢𑀻𑀢𑀺 𑀓𑁂 𑀲𑀸𑀥𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘 𑀚𑀦𑀸 𑀲𑀸𑀥𑁂𑀦𑁆𑀢𑀺. 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀳𑀺 𑀤𑀸𑀬𑀓𑀸 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺. ‘‘𑀢𑀢𑁆𑀭 𑀘𑁂, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀘𑀢𑀼𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀉𑀧𑀲𑀫𑁆𑀧𑀤𑀁 𑀧𑀯𑀸𑀭𑀡𑀁 𑀅𑀩𑁆𑀪𑀸𑀦’’𑀦𑁆𑀢𑀺 (𑀫𑀳𑀸𑀯. 𑁩𑁮𑁮) 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀢𑁆𑀢𑀸 ‘‘𑀦 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀬𑀲𑁆𑀲 𑀲𑀗𑁆𑀖𑁄 𑀓𑀣𑀺𑀦𑀤𑀼𑀲𑁆𑀲𑀁 𑀤𑁂𑀢𑀺, 𑀢𑀁 𑀳𑀢𑁆𑀣𑀧𑀸𑀲𑁂 𑀅𑀓𑀢𑁆𑀯𑀸𑀧𑀺 𑀩𑀳𑀺𑀲𑀻𑀫𑀸𑀬 𑀞𑀺𑀢𑀲𑁆𑀲𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸 𑀏𑀯 𑀤𑀸𑀢𑀩𑁆𑀩𑀁. 𑀓𑀲𑁆𑀫𑀸? ‘‘𑀢𑀲𑁆𑀲 𑀓𑀫𑁆𑀫𑀧𑁆𑀧𑀢𑁆𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀢𑀢𑁆𑀭𑀼𑀧𑁆𑀧𑀸𑀤𑁂𑀦 𑀢𑀡𑁆𑀟𑀼𑀮𑀸𑀤𑀺𑀦𑀸 𑀯𑀢𑁆𑀣𑁂𑀲𑀼 𑀘𑁂𑀢𑀸𑀧𑀺𑀢𑁂𑀲𑀼 𑀅𑀢𑁆𑀣𑀢𑀓𑀣𑀺𑀦𑀸𑀦𑀫𑁂𑀯 𑀢𑀸𑀦𑀺 𑀯𑀢𑁆𑀣𑀸𑀦𑀺 𑀧𑀸𑀧𑀼𑀡𑀦𑁆𑀢𑀺. 𑀯𑀢𑁆𑀣𑁂𑀳𑀺 𑀧𑀦 𑀢𑀡𑁆𑀟𑀼𑀮𑀸𑀤𑀻𑀲𑀼 𑀘𑁂𑀢𑀸𑀧𑀺𑀢𑁂𑀲𑀼 𑀲𑀩𑁆𑀩𑁂𑀲𑀁 𑀢𑀸𑀦𑀺 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀮𑀪𑀦𑁆𑀢𑀻𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀓𑁄𑀝𑀺𑀬𑀸 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀸𑀬𑁂𑀦 𑀅𑀧𑁆𑀧𑀯𑀸𑀭𑀺𑀢𑀸𑀦𑀫𑁆𑀧𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀲𑀫𑁆𑀪𑀯𑀢𑁄 𑀇𑀢𑀭𑁂 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁 𑀅𑀢𑁆𑀣𑀸𑀭𑀓𑀲𑁆𑀲 𑀘 𑀅𑀦𑀼𑀫𑁄𑀤𑀓𑀲𑁆𑀲 𑀘𑀸’’𑀢𑀺 (𑀧𑀭𑀺. 𑁪𑁦𑁩) 𑀧𑀭𑀺𑀯𑀸𑀭𑁂 𑀏𑀓𑀯𑀘𑀦𑀓𑀭𑀡𑀢𑁄, 𑀢𑀢𑁆𑀣𑁂𑀯 ‘‘𑀲𑀗𑁆𑀖𑀲𑁆𑀲 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀕𑀡𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 (𑀧𑀭𑀺. 𑁪𑁧𑁪) 𑀯𑀘𑀦𑀢𑁄 𑀘.

𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸𑀧𑀺 𑀦 𑀮𑀪𑀦𑁆𑀢𑀻𑀢𑀺 𑀇𑀤𑀁 𑀓𑀺𑀁 𑀏𑀓𑀲𑀻𑀫𑀲𑁆𑀫𑀺𑀁, 𑀉𑀤𑀸𑀳𑀼 𑀦𑀸𑀦𑀸𑀲𑀻𑀫𑀲𑁆𑀫𑀺𑀦𑁆𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀏𑀓𑀲𑀻𑀫𑀲𑁆𑀫𑀺𑀁, 𑀧𑀭𑀢𑁄 ‘‘𑀲𑀘𑁂 𑀧𑀦 𑀏𑀓𑀲𑀻𑀫𑀸𑀬 𑀩𑀳𑀽 𑀯𑀺𑀳𑀸𑀭𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀏𑀓𑀢𑁆𑀣 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁, 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑀭𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀇𑀤𑀜𑁆𑀳𑀺 𑀯𑀘𑀦𑀁 𑀲𑀩𑁆𑀩𑁂𑀲𑀁𑀬𑁂𑀯 𑀏𑀓𑁄 𑀓𑀣𑀺𑀦𑀢𑁆𑀣𑀸𑀭𑁄𑀢𑀺 𑀤𑀻𑀧𑁂𑀢𑀺. 𑀅𑀣 𑀦𑀸𑀦𑀸𑀲𑀻𑀫𑀲𑁆𑀫𑀺𑀁, 𑀉𑀧𑀦𑀦𑁆𑀤𑀲𑁆𑀲 𑀏𑀓𑀸𑀥𑀺𑀧𑁆𑀧𑀸𑀬𑀤𑀸𑀦𑀸𑀦𑀼𑀫𑀢𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀤𑁂𑀣, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀲𑁆𑀲 𑀏𑀓𑀸𑀥𑀺𑀧𑁆𑀧𑀸𑀬’’𑀦𑁆𑀢𑀺 (𑀫𑀳𑀸𑀯. 𑁩𑁬𑁪). 𑀇𑀤𑀜𑁆𑀳𑀺 𑀯𑀘𑀦𑀁 𑀤𑁆𑀯𑀻𑀲𑀼𑀧𑀺 𑀆𑀯𑀸𑀲𑁂𑀲𑀼 𑀢𑀲𑁆𑀲 𑀓𑀣𑀺𑀦𑀢𑁆𑀣𑀸𑀭𑀲𑀺𑀤𑁆𑀥𑀺𑀁 𑀤𑀻𑀧𑁂𑀢𑀻𑀢𑀺. 𑀅𑀯𑀺𑀭𑁄𑀥𑁄𑀯 𑀇𑀘𑁆𑀙𑀺𑀢𑀩𑁆𑀩𑁄 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸 𑀏𑀓𑀲𑀻𑀫𑀲𑁆𑀫𑀺𑀁 𑀯𑀸 𑀦𑀸𑀦𑀸𑀲𑀻𑀫𑀲𑁆𑀫𑀺𑀁 𑀯𑀸 𑀦𑀸𑀦𑀽𑀧𑀘𑀸𑀭𑁂 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸𑀧𑀺 𑀦 𑀮𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀲𑀫𑁆𑀧𑀦𑁆𑀦𑁄 𑀧𑀞𑀫𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀼𑀫𑁆𑀧𑀺 𑀮𑀪𑀢𑀺, 𑀯𑀲𑁆𑀲𑀺𑀓𑁄 𑀘 𑀳𑁄𑀢𑀺 𑀆𑀦𑀺𑀲𑀁𑀲𑀜𑁆𑀘 𑀮𑀪𑀢𑀻𑀢𑀺 𑀲𑀸𑀫𑀡𑁂𑀭𑀸𑀦𑀁 𑀯𑀲𑁆𑀲𑀽𑀧𑀕𑀫𑀦𑀁 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺, 𑀲𑀸𑀫𑀡𑁂𑀭𑀸 𑀓𑀣𑀺𑀦𑀸𑀦𑀺𑀲𑀁𑀲𑀁 𑀮𑀪𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺.

𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀧𑁆𑀧𑀳𑁄𑀦𑀓𑀦𑁆𑀢𑀺 𑀇𑀤𑀁 ‘‘𑀦 𑀅𑀜𑁆𑀜𑀢𑁆𑀭 𑀲𑀗𑁆𑀖𑀸𑀝𑀺𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀦𑁆𑀢𑀭𑀯𑀸𑀲𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 𑀧𑀸𑀴𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀯𑀺𑀭𑀳𑁂𑀦𑀸𑀧𑀺 𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀦𑁆𑀢𑀺 𑀤𑀻𑀧𑁂𑀢𑀻𑀢𑀺 𑀘𑁂? 𑀦, 𑀢𑀤𑀢𑁆𑀣𑀚𑀸𑀦𑀦𑀢𑁄, 𑀦 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀯𑀺𑀭𑀳𑁂𑀦 𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀦𑁆𑀢𑀺 𑀳𑀺 𑀤𑀻𑀧𑁂𑀢𑀼𑀓𑀸𑀫𑁄 𑀪𑀕𑀯𑀸 𑀢𑀁 𑀧𑀸𑀴𑀺𑀫𑀸𑀳. 𑀬𑀤𑀺 𑀏𑀯𑀁 ‘‘𑀅𑀜𑁆𑀜𑀢𑁆𑀭 𑀲𑀗𑁆𑀖𑀸𑀝𑀺𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀦𑁆𑀢𑀭𑀯𑀸𑀲𑀓𑁂𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸𑀢𑀺 𑀘𑁂? 𑀦, 𑀅𑀥𑀺𑀧𑁆𑀧𑀸𑀬𑀚𑀸𑀦𑀦𑀢𑁄𑀯. 𑀬𑁄 𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀭𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀅𑀜𑁆𑀜𑀢𑁆𑀭 𑀲𑀗𑁆𑀖𑀸𑀝𑀺𑀬𑀸 𑀦 𑀅𑀢𑁆𑀣𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀇𑀢𑀭𑀢𑁆𑀣𑀸𑀧𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 𑀲𑀼𑀓𑁆𑀓𑀧𑀓𑁆𑀔𑁂 ‘‘𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑀫𑁂𑀯 𑀘𑀻𑀯𑀭𑀁 𑀯𑀼𑀢𑁆𑀢𑀁, 𑀏𑀯𑀁 𑀲𑀦𑁆𑀢𑁂 ‘‘𑀘𑀢𑀼𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀲𑀢𑁆𑀢𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 𑀬𑀣𑀸𑀭𑀳𑀁 𑀉𑀓𑁆𑀓𑀝𑁆𑀞𑀓𑁄𑀝𑀺𑀬𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀓𑀡𑁆𑀳𑀧𑀓𑁆𑀔𑁂 𑀉𑀮𑁆𑀮𑀺𑀔𑀺𑀢…𑀧𑁂… 𑀦𑀺𑀲𑁆𑀲𑀻𑀫𑀝𑁆𑀞𑀸𑀦𑀼𑀫𑁄𑀤𑀦𑀸𑀦𑀁 𑀘𑀢𑀼𑀯𑀻𑀲𑀢𑀺𑀬𑀸 𑀆𑀓𑀸𑀭𑀸𑀦𑀁 𑀲𑀫𑁆𑀪𑀯𑀦𑁆𑀢𑀸𑀦𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑁂𑀦𑀧𑀺 𑀦𑀺𑀫𑀺𑀢𑁆𑀢𑀓𑀢𑀸𑀤𑀻𑀦𑀁 𑀅𑀲𑀫𑁆𑀪𑀯𑀦𑁆𑀢𑀸𑀦𑀁 𑀅𑀜𑁆𑀜𑀢𑀭𑀪𑀸𑀯𑁂𑀦𑀧𑀺 𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀦𑁆𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀅𑀳𑀢𑀸𑀳𑀢𑀓𑀧𑁆𑀧…𑀧𑁂… 𑀲𑀻𑀫𑀝𑁆𑀞𑀸𑀦𑀼𑀫𑁄𑀤𑀦𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀆𑀓𑀸𑀭𑀸𑀦𑀁 𑀲𑀫𑁆𑀪𑀯𑀦𑁆𑀢𑀸𑀦𑀁 𑀅𑀜𑁆𑀜𑀢𑀭𑀪𑀸𑀯𑁂𑀦𑀧𑀺 𑀇𑀢𑀭𑁂𑀲𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑁂𑀦𑀧𑀺 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀦𑁆𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄, 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑁋 𑀓𑀡𑁆𑀳𑀧𑀓𑁆𑀔𑁂 ‘‘𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀦 𑀅𑀜𑁆𑀜𑀢𑁆𑀭 𑀲𑀗𑁆𑀖𑀸𑀝𑀺𑀬𑀸 𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀯𑀸𑀲𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 𑀯𑀘𑀦𑀧𑁆𑀧𑀫𑀸𑀡𑀢𑁄 𑀢𑀁 𑀓𑀣𑀺𑀦𑀁 𑀅𑀦𑀢𑁆𑀣𑀢𑀁 𑀲𑀺𑀬𑀸. 𑀲𑀼𑀓𑁆𑀓𑀧𑀓𑁆𑀔𑁂 𑀘 ‘‘𑀅𑀦𑀺𑀫𑀺𑀢𑁆𑀢𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 𑀯𑀘𑀦𑀧𑁆𑀧𑀫𑀸𑀡𑀢𑁄 𑀅𑀦𑀺𑀫𑀺𑀢𑁆𑀢𑀓𑀢𑁂𑀦 𑀓𑀣𑀺𑀦𑁂 𑀅𑀢𑁆𑀣𑀢𑁂 𑀢𑀜𑁆𑀘𑁂 𑀧𑀭𑀺𑀓𑀣𑀸 𑀓𑀢𑀁, 𑀢𑀣𑀸𑀧𑀺 𑀅𑀢𑁆𑀣𑀢𑀫𑁂𑀯 𑀓𑀣𑀺𑀦𑀁 𑀳𑁄𑀢𑀻𑀢𑀺 𑀅𑀬𑀁 𑀤𑀼𑀯𑀺𑀥𑁄𑀧𑀺 𑀯𑀺𑀭𑁄𑀥𑁄. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀥𑀺𑀧𑁆𑀧𑀸𑀬𑁂 𑀕𑀳𑀺𑀢𑁂 𑀧𑀭𑀺𑀳𑀸𑀭𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑁄 𑀆𑀦𑀺𑀲𑀁𑀲𑀁 𑀩𑀳𑀼𑀁 𑀤𑁂𑀢𑀻𑀢𑀺 𑀇𑀫𑀺𑀦𑀸 𑀧𑀘𑁆𑀘𑀬𑀮𑁄𑀮𑀪𑀸𑀯𑀁 𑀯𑀺𑀬 𑀤𑀻𑀧𑁂𑀢𑀺, 𑀢𑀣𑀸𑀧𑀺 𑀪𑀕𑀯𑀢𑀸 𑀬𑀸𑀯𑀤𑀢𑁆𑀣𑀘𑀻𑀯𑀭𑀧𑀭𑀺𑀬𑁂𑀲𑀦𑀧𑀜𑁆𑀜𑀸𑀧𑀦𑀫𑀼𑀔𑁂𑀦 𑀤𑁆𑀯𑀸𑀭𑀁 𑀤𑀺𑀦𑁆𑀦𑀦𑁆𑀢𑀺 𑀓𑀢𑁆𑀯𑀸 𑀲𑀗𑁆𑀖𑀸𑀦𑀼𑀕𑁆𑀕𑀳𑀢𑁆𑀣𑀁 𑀳𑁄𑀢𑀺. ‘‘𑀅𑀓𑀸𑀢𑀼𑀁 𑀦 𑀳𑁄𑀢𑀻𑀢𑀺 𑀅𑀦𑀸𑀤𑀭𑀺𑀬𑁂𑀦 𑀅𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀮𑀺𑀔𑀺𑀢𑀁. 𑀅𑀦𑀼𑀫𑁄𑀤𑀸𑀫𑀸𑀢𑀺 𑀏𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. ‘‘𑀅𑀦𑀼𑀫𑁄𑀤𑀸𑀫𑀻’’𑀢𑀺 𑀏𑀓𑀓𑁂𑀦 𑀯𑀢𑁆𑀢𑀩𑁆𑀩𑀁, 𑀇𑀢𑀭𑀣𑀸 ‘‘𑀦 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀓𑀺𑀭 𑀯𑀼𑀢𑁆𑀢𑀁. 𑀓𑀣𑀺𑀦𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀯𑀸𑀘𑀸𑀬 𑀪𑀺𑀦𑁆𑀦𑀫𑀢𑁆𑀢𑀸𑀬 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀢𑀁 𑀳𑁄𑀢𑀺. ‘‘𑀓𑀫𑁆𑀫𑀯𑀸𑀘𑀸 𑀧𑀦 𑀏𑀓𑀸𑀬𑁂𑀯 𑀯𑀝𑁆𑀝𑀢𑀻𑀢𑀺 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀏𑀯 𑀓𑀫𑁆𑀫𑀯𑀸𑀘𑀸, 𑀲𑁂𑀲𑀘𑀻𑀯𑀭𑀤𑀸𑀦𑁂 𑀅𑀧𑀮𑁄𑀓𑀦𑀫𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁. 𑀏𑀓𑀲𑀻𑀫𑀸𑀬𑀸𑀢𑀺 𑀏𑀓𑀉𑀧𑀘𑀸𑀭𑀲𑀻𑀫𑀸𑀬𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀓𑁂𑀘𑀺 𑀧𑀦 ‘‘𑀩𑀤𑁆𑀥𑀲𑀻𑀫𑀸 𑀅𑀥𑀺𑀧𑁆𑀧𑁂𑀢𑀸 𑀏𑀓𑀲𑀻𑀫𑀸𑀬 𑀏𑀓𑀝𑁆𑀞𑀸𑀦𑁂 𑀅𑀢𑁆𑀣𑀭𑀺𑀢𑁂 𑀲𑀩𑁆𑀩𑀢𑁆𑀣 𑀅𑀢𑁆𑀣𑀭𑀺𑀢𑀁 𑀳𑁄𑀢𑀺 ‘𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑁆𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑁂𑀳𑀺𑀧𑀺 𑀅𑀦𑀼𑀫𑁄𑀤𑀦𑁆𑀢𑁂𑀳𑀺 𑀅𑀢𑁆𑀣𑀭𑀺𑀢𑀫𑁂𑀯 𑀳𑁄𑀢𑀺, 𑀉𑀧𑀘𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑁂 𑀢𑀢𑁆𑀣 𑀢𑀢𑁆𑀣 𑀮𑀤𑁆𑀥𑀁 𑀢𑁂𑀳𑀺 𑀢𑁂𑀳𑀺 𑀮𑀤𑁆𑀥𑀩𑁆𑀩𑀁 𑀳𑁄𑀢𑀺. 𑀢𑀢𑁆𑀣 𑀧𑀯𑀺𑀝𑁆𑀞𑁂𑀳𑀺𑀧𑀺 𑀮𑀪𑀺𑀢𑀩𑁆𑀩𑀁 𑀲𑀩𑁆𑀩𑁂𑀳𑀺𑀧𑀺 𑀅𑀢𑁆𑀣𑀭𑀺𑀢𑀢𑁆𑀢𑀸, 𑀅𑀬𑀁 𑀯𑀺𑀲𑁂𑀲𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀏𑀯𑀫𑁂𑀯 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑁩𑁦𑁮. 𑀘𑀢𑀼𑀯𑀻𑀲𑀢𑀺 𑀆𑀓𑀸𑀭𑀯𑀦𑁆𑀢𑀢𑀸𑀬 𑀫𑀳𑀸𑀪𑀽𑀫𑀺𑀓𑀁. ‘‘𑀤𑀻𑀖𑀲𑀺𑀩𑁆𑀩𑀺𑀢𑀦𑁆𑀢𑀺 𑀧𑀘𑁆𑀙𑀸𑀓𑀢𑀲𑀺𑀩𑁆𑀩𑀦𑀁, 𑀑𑀯𑀝𑁆𑀝𑀺𑀢𑁆𑀯𑀸 𑀲𑀺𑀩𑁆𑀩𑀦𑀁 𑀯𑀸’’𑀢𑀺 𑀮𑀺𑀔𑀺𑀢𑀁. 𑀓𑀡𑁆𑀟𑀼𑀲𑀁 𑀦𑀸𑀫 𑀧𑀼𑀩𑁆𑀩𑀩𑀦𑁆𑀥𑀦𑀁. 𑀧𑀞𑀫𑀘𑀺𑀫𑀺𑀮𑀺𑀓𑀸 𑀖𑀝𑁂𑀢𑁆𑀯𑀸 𑀞𑀧𑀺𑀢𑀸 𑀳𑁄𑀢𑀻𑀢𑀺 𑀓𑀣𑀺𑀦𑀤𑀼𑀲𑁆𑀲𑀁 𑀤𑀼𑀩𑁆𑀩𑀮𑀁 𑀤𑀺𑀲𑁆𑀯𑀸 𑀢𑀁 𑀩𑀮𑀯𑀢𑀸 𑀅𑀢𑁆𑀢𑀦𑁄 𑀧𑀓𑀢𑀺𑀤𑀼𑀲𑁆𑀲𑁂𑀦 𑀲𑀤𑁆𑀥𑀺𑀁 𑀖𑀝𑁂𑀢𑁆𑀯𑀸 𑀤𑀼𑀧𑀝𑁆𑀝𑀁 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀼𑀓𑀸𑀫𑁂𑀳𑀺 𑀓𑀣𑀺𑀦𑀤𑀼𑀲𑁆𑀲𑀢𑁄 𑀧𑀓𑀢𑀺𑀤𑀼𑀲𑁆𑀲𑀲𑁆𑀲 𑀫𑀳𑀦𑁆𑀢𑀢𑀸𑀬 𑀧𑀞𑀫𑀁 𑀢𑀧𑁆𑀧𑀫𑀸𑀡𑀸𑀦𑀼𑀭𑀽𑀧𑀁 𑀩𑀦𑁆𑀥𑀓𑀡𑁆𑀟𑀼𑀲𑁂 𑀖𑀝𑁂𑀢𑁆𑀯𑀸 𑀭𑀚𑁆𑀚𑀼𑀓𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀓𑀢𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀣𑀺𑀦𑀘𑀻𑀯𑀭𑀲𑁆𑀲 𑀅𑀧𑁆𑀧𑀢𑀸𑀬 𑀧𑀞𑀫𑀁 𑀩𑀤𑁆𑀥𑀤𑀼𑀲𑁆𑀲𑀁 𑀓𑀼𑀘𑁆𑀙𑀺𑀘𑀺𑀫𑀺𑀮𑀺𑀓𑀸 𑀳𑁄𑀢𑀺, 𑀫𑀳𑀸𑀧𑀘𑁆𑀘𑀭𑀺𑀬𑀁, 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀯𑀼𑀢𑁆𑀢𑀯𑀘𑀦𑀦𑀺𑀤𑀲𑁆𑀲𑀦𑀁, 𑀩𑁆𑀬𑀜𑁆𑀚𑀦𑁂 𑀏𑀯 𑀪𑁂𑀤𑁄, 𑀅𑀢𑁆𑀣𑁂 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀇𑀫𑀺𑀦𑀸 𑀓𑀺𑀁 𑀤𑀻𑀧𑁂𑀢𑀻𑀢𑀺 𑀘𑁂? 𑀢𑀣𑀸𑀓𑀢𑀁 𑀤𑀼𑀧𑀝𑁆𑀝𑀘𑀻𑀯𑀭𑀁 𑀧𑀓𑀢𑀺𑀘𑀻𑀯𑀭𑀲𑁆𑀲 𑀫𑀳𑀦𑁆𑀢𑀢𑀸𑀬 𑀧𑀓𑀢𑀺𑀘𑀻𑀯𑀭𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀦 𑀓𑀣𑀺𑀦𑀘𑀻𑀯𑀭𑀲𑀗𑁆𑀔𑁆𑀬𑀦𑁆𑀢𑀺 𑀓𑀲𑁆𑀲𑀘𑀺 𑀲𑀺𑀬𑀸, 𑀦𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀓𑀼𑀘𑁆𑀙𑀺𑀘𑀺𑀫𑀺𑀮𑀺𑀓𑀪𑀸𑀯𑁂𑀦 𑀞𑀺𑀢𑀫𑁆𑀧𑀺 𑀓𑀣𑀺𑀦𑀘𑀻𑀯𑀭𑀁. 𑀫𑀳𑀦𑁆𑀢𑀫𑁆𑀧𑀺 𑀢𑀁 𑀧𑀓𑀢𑀺𑀘𑀻𑀯𑀭𑀁 𑀅𑀢𑁆𑀢𑀦𑁄 𑀓𑀣𑀺𑀦𑀘𑀻𑀯𑀭𑀫𑁂𑀯𑀸𑀢𑀺. 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀜𑁆𑀘𑀓𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀓𑀣𑀺𑀦𑀤𑀼𑀲𑁆𑀲𑀁 𑀔𑀡𑁆𑀟𑀸𑀔𑀡𑁆𑀟𑀁 𑀩𑀳𑀼𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀩𑁆𑀩𑀺𑀢𑀼𑀓𑀸𑀫𑁄 𑀓𑀣𑀺𑀦𑀘𑀻𑀯𑀭𑀢𑁄 𑀧𑀝𑁆𑀝𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀅𑀓𑀣𑀺𑀦𑀘𑀻𑀯𑀭𑁂 𑀧𑀝𑁆𑀝𑀫𑀸𑀭𑁄𑀧𑁂𑀢𑀻’’𑀢𑀺 𑀮𑀺𑀔𑀺𑀢𑀁. 𑀅𑀣 𑀯𑀸 𑀩𑀳𑀽𑀦𑀺 𑀓𑀣𑀺𑀦𑀤𑀼𑀲𑁆𑀲𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀔𑀼𑀤𑁆𑀤𑀓𑀔𑀼𑀤𑁆𑀤𑀓𑀸𑀦𑀺 𑀏𑀓𑀘𑀻𑀯𑀭𑀢𑁆𑀣𑀸𑀬, 𑀫𑀳𑀦𑁆𑀢𑀸𑀦𑀺 𑀘 𑀊𑀦𑀢𑁆𑀣𑀸𑀬 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀺𑀦𑀘𑀻𑀯𑀭𑀢𑁄𑀢𑀺 𑀪𑀺𑀓𑁆𑀔𑀼 𑀏𑀓𑀘𑁆𑀘𑀢𑁄 𑀓𑀣𑀺𑀦𑀘𑀻𑀯𑀭𑀢𑁄 𑀧𑀝𑁆𑀝𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀆𑀭𑁄𑀧𑁂𑀢𑀺. 𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀁𑀲𑀼𑀓𑀽𑀮𑀸𑀦𑀺 𑀓𑀣𑀺𑀦𑀤𑀼𑀲𑁆𑀲𑀸𑀦𑀺 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀸𑀦𑀺 𑀤𑀸𑀢𑀩𑁆𑀩𑀸𑀦𑀺, 𑀉𑀤𑀸𑀳𑀼 𑀔𑀼𑀤𑁆𑀤𑀓𑀸𑀦𑀺𑀧𑀻𑀢𑀺? 𑀏𑀢𑁆𑀣 𑀅𑀘𑀻𑀯𑀭𑀲𑀗𑁆𑀔𑁆𑀬𑀢𑁆𑀢𑀸 𑀔𑀼𑀤𑁆𑀤𑀓𑀸𑀦𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀫𑁆𑀫𑀯𑀸𑀘𑀸 𑀢𑀢𑁆𑀣 𑀦 𑀭𑀼𑀳𑀢𑀻𑀢𑀺 𑀏𑀓𑁂. ‘‘𑀧𑀁𑀲𑀼𑀓𑀽𑀮𑁂𑀦 𑀅𑀢𑁆𑀣𑀢𑀁 𑀳𑁄𑀢𑀻’’𑀢𑀺 𑀧𑀸𑀴𑀺𑀬𑀁 𑀦𑀬𑀤𑀸𑀦𑀢𑁄 𑀓𑀼𑀘𑁆𑀙𑀺𑀘𑀺𑀫𑀺𑀮𑀺𑀓𑀪𑀸𑀯𑁂𑀦 𑀞𑀺𑀢𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀦𑀥𑀺𑀝𑁆𑀞𑀸𑀦𑀼𑀧𑀕𑀲𑁆𑀲 𑀧𑀼𑀭𑀸𑀡𑀘𑀻𑀯𑀭𑀪𑀸𑀯𑁂𑀦𑁂𑀯 𑀅𑀥𑀺𑀝𑁆𑀞𑀸𑀦𑀸𑀭𑀳𑀲𑁆𑀲𑀧𑀺 𑀓𑀣𑀺𑀦𑀘𑀻𑀯𑀭𑀪𑀸𑀯𑀸𑀦𑀼𑀫𑀢𑀺𑀫𑀼𑀔𑁂𑀦 𑀅𑀝𑁆𑀞𑀓𑀣𑀸𑀬𑀁 𑀧𑀤𑀸𑀦𑀢𑁄 𑀘 𑀔𑀼𑀤𑁆𑀤𑀓𑀸𑀦𑀺𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀜𑁆𑀳𑀺 𑀓𑀣𑀺𑀦𑀢𑁆𑀣𑀸𑀭𑀓𑁄 𑀖𑀝𑁂𑀢𑁆𑀯𑀸 𑀓𑀣𑀺𑀦𑀘𑀻𑀯𑀭𑀁 𑀓𑀭𑀺𑀲𑁆𑀲𑀢𑀻𑀢𑀺 𑀓𑀢𑁆𑀯𑀸 𑀓𑀧𑁆𑀧𑀢𑀻𑀢𑀺 𑀏𑀓𑁂, 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁.

𑀦𑀺𑀘𑀬𑀲𑀦𑁆𑀦𑀺𑀥𑀺 𑀲𑀗𑁆𑀖𑀸𑀬𑀢𑁆𑀢𑀸 𑀲𑀗𑁆𑀖𑁂𑀦 𑀓𑀢𑀢𑁆𑀢𑀸. 𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑁆𑀢𑀸 ‘‘𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀜𑁆𑀘 𑀔𑀡𑁆𑀟𑀸𑀦𑀺 𑀧𑀝𑁆𑀝𑀸𑀦𑀺 𑀧𑀫𑀸𑀡𑀁 𑀅𑀲𑁆𑀲𑀸𑀢𑀺 𑀧𑀜𑁆𑀘𑀓𑀁. 𑀢𑁂𑀦 𑀯𑀸 𑀅𑀢𑀺𑀭𑀺𑀢𑁆𑀢𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦𑀸𑀢𑀺 𑀲𑀗𑁆𑀖𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸 𑀤𑀺𑀦𑁆𑀦𑁂𑀦𑁂𑀯 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦 𑀲𑀫𑀡𑁆𑀟𑀮𑀺𑀓𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀁 𑀤𑀺𑀦𑁆𑀦𑀁𑀬𑁂𑀯 𑀳𑀺 𑀧𑀭𑀺𑀯𑀸𑀭𑁂 ‘‘𑀧𑀼𑀩𑁆𑀩𑀓𑀭𑀡𑀁 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀤𑀸𑀬𑀓𑁂𑀦 𑀤𑀺𑀬𑁆𑀬𑀫𑀸𑀦𑀁, 𑀢𑀲𑁆𑀫𑀸 𑀧𑀭𑀺𑀦𑀺𑀝𑁆𑀞𑀺𑀢𑀧𑀼𑀩𑁆𑀩𑀓𑀭𑀡𑀫𑁂𑀯 𑀘𑁂 𑀤𑀸𑀬𑀓𑁄 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀤𑀸𑀢𑀩𑁆𑀩𑀁. 𑀢𑁂𑀦 𑀘 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀸𑀫𑀡𑁆𑀟𑀮𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀢𑁆𑀣𑀭𑀺𑀢𑁆𑀯𑀸 𑀲𑀗𑁆𑀖𑁄 𑀅𑀦𑀼𑀫𑁄𑀤𑀸𑀧𑁂𑀢𑀩𑁆𑀩𑁄 𑀓𑀢𑀧𑀼𑀩𑁆𑀩𑀓𑀭𑀡𑀲𑁆𑀲 𑀧𑀼𑀦 𑀓𑀢𑁆𑀢𑀩𑁆𑀩𑀸𑀪𑀸𑀯𑀢𑁄. 𑀅𑀢𑁆𑀣𑀸𑀭𑀓𑀲𑁆𑀲 𑀳𑀢𑁆𑀣𑀕𑀢𑀫𑁂𑀯 𑀳𑀺 𑀲𑀦𑁆𑀥𑀸𑀬 ‘‘𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀦𑀺𑀝𑁆𑀞𑀺𑀢𑀧𑀼𑀩𑁆𑀩𑀓𑀭𑀡𑀫𑁆𑀧𑀺 𑀧𑀼𑀦 𑀥𑁄𑀯𑀺𑀢𑁆𑀯𑀸 𑀯𑀺𑀲𑀺𑀩𑁆𑀩𑀺𑀢𑁆𑀯𑀸 𑀓𑀸𑀢𑀩𑁆𑀩𑀫𑁂𑀯 𑀯𑀘𑀦𑀧𑀫𑀸𑀡𑀢𑁄𑀢𑀺 𑀘𑁂? 𑀦, 𑀙𑀺𑀦𑁆𑀦𑀲𑁆𑀲 𑀧𑀼𑀦 𑀙𑁂𑀤𑀸𑀲𑀫𑁆𑀪𑀯𑀢𑁄. 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀙𑀺𑀦𑁆𑀤𑀺𑀢𑀩𑁆𑀩𑀫𑁂𑀯𑀸𑀢𑀺 𑀘𑁂? 𑀦, 𑀧𑀩𑁆𑀩𑀚𑁆𑀚𑀸𑀥𑀺𑀓𑀸𑀭𑁂 ‘‘𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑀸𑀧𑁂𑀢𑁆𑀯𑀸’’𑀢𑀺 𑀯𑀘𑀦𑀧𑁆𑀧𑀫𑀸𑀡𑀢𑁄 𑀫𑀼𑀡𑁆𑀟𑀺𑀓𑀲𑁆𑀲 𑀙𑀺𑀦𑁆𑀦𑁂𑀧𑀺 𑀓𑁂𑀲𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀺𑀭𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀧𑀼𑀦 𑀑𑀳𑀸𑀭𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑀧𑁆𑀧𑀲𑀗𑁆𑀕𑀢𑁄, 𑀦 𑀇𑀥 𑀦-𑀓𑀸𑀭𑁂𑀦 𑀧𑀝𑀺𑀲𑀺𑀤𑁆𑀥𑀢𑁆𑀢𑀸𑀢𑀺 𑀘𑁂? 𑀦, ‘‘𑀦 𑀅𑀜𑁆𑀜𑀢𑁆𑀭 𑀲𑀗𑁆𑀖𑀸𑀝𑀺𑀬𑀸’’𑀢𑀺 𑀦-𑀓𑀸𑀭𑁂𑀦 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀢𑁆𑀣𑀢𑁂 𑀅𑀦𑀢𑁆𑀣𑀢𑀁 𑀳𑁄𑀢𑀻𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄, 𑀢𑀲𑁆𑀫𑀸 𑀅𑀪𑀺𑀦𑀺𑀯𑁂𑀲𑁄 𑀦 𑀓𑀸𑀢𑀩𑁆𑀩𑁄. ‘‘𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄𑀯 𑀕𑀳𑁂𑀢𑀩𑁆𑀩𑁄.

𑁩𑁦𑁯. 𑀅𑀲𑀦𑁆𑀦𑀺𑀥𑀺𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀦𑁆𑀢𑀺 𑀏𑀢𑁆𑀣 𑀓𑀺𑀁 𑀓𑀣𑀺𑀦𑀢𑁆𑀣𑀸𑀭𑀫𑀸𑀲𑁂𑀬𑁂𑀯 𑀤𑀼𑀯𑀺𑀥𑁄𑀧𑀺 𑀲𑀦𑁆𑀦𑀺𑀥𑀺 𑀅𑀥𑀺𑀧𑁆𑀧𑁂𑀢𑁄, 𑀉𑀤𑀸𑀳𑀼 𑀢𑀢𑁄 𑀧𑀼𑀩𑁆𑀩𑁂𑀧𑀺, 𑀤𑀸𑀬𑀓𑁂𑀦 𑀯𑀸 𑀓𑀤𑀸 𑀤𑀸𑀢𑀩𑁆𑀩𑀁, 𑀓𑀺𑀁 𑀓𑀣𑀺𑀦𑀢𑁆𑀣𑀸𑀭𑀫𑀸𑀲𑁂𑀬𑁂𑀯, 𑀉𑀤𑀸𑀳𑀼 𑀢𑀢𑁄 𑀧𑀼𑀩𑁆𑀩𑁂𑀧𑀺, 𑀓𑀣𑀺𑀦𑀢𑁆𑀣𑀸𑀭𑀫𑀸𑀲𑁂𑀧𑀺 𑀅𑀲𑀼𑀓𑀲𑁆𑀫𑀺𑀁 𑀤𑀺𑀯𑀲𑁂𑀬𑁂𑀯 𑀅𑀢𑁆𑀣𑀸𑀭𑀢𑁆𑀣𑀸𑀬 𑀤𑀫𑁆𑀫𑀻𑀢𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺 𑀦 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀓𑀣𑀺𑀦𑀢𑁆𑀣𑀸𑀭𑀫𑀸𑀲𑁂 𑀏𑀯 𑀤𑀼𑀯𑀺𑀥𑁄𑀧𑀺 𑀲𑀦𑁆𑀦𑀺𑀥𑀺. 𑀤𑀸𑀬𑀓𑁂𑀦𑀸𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑀁 𑀯𑀺𑀬 𑀓𑀣𑀺𑀦𑀘𑀻𑀯𑀭𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸? ‘‘𑀓𑀣𑀺𑀦𑀤𑀸𑀬𑀓𑀲𑁆𑀲 𑀯𑀢𑁆𑀢𑀁 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀦𑀬𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀉𑀓𑁆𑀓𑀝𑁆𑀞𑀫𑀢𑁆𑀢𑀫𑁂𑀢𑀦𑁆𑀢𑀺 𑀘𑁂? 𑀦, ‘‘𑀓𑀣𑀺𑀦𑀁 𑀦𑀸𑀫 𑀅𑀢𑀺𑀉𑀓𑁆𑀓𑀝𑁆𑀞𑀁 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁮) 𑀯𑀼𑀢𑁆𑀢𑀢𑁆𑀢𑀸. 𑀦 𑀆𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀇𑀤𑀫𑁆𑀧𑀺 𑀆𑀕𑀫𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀼𑀩𑁆𑀩𑁂 𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀻𑀢𑀺.

𑁩𑁧𑁦. 𑀓𑀣𑀺𑀦𑀲𑁆𑀲𑀸𑀢𑀺 𑀓𑀣𑀺𑀦𑀢𑁆𑀣𑀸𑀭𑀲𑁆𑀲. 𑀉𑀩𑁆𑀪𑀸𑀭𑀸𑀬𑀸𑀢𑀺 𑀯𑀽𑀧𑀲𑀫𑀸𑀬, 𑀅𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀓𑀺𑀫𑀢𑁆𑀣𑀺𑀬𑀁 𑀉𑀩𑁆𑀪𑀸𑀭𑀦𑀺𑀤𑀲𑁆𑀲𑀦𑀦𑁆𑀢𑀺 𑀘𑁂? 𑀧𑀜𑁆𑀘𑀳𑀺 𑀅𑀦𑀸𑀧𑀢𑁆𑀢𑀺𑀓𑀸𑀮𑀧𑀭𑀺𑀬𑀦𑁆𑀢𑀤𑀲𑁆𑀲𑀦𑁂𑀦 𑀢𑁂𑀲𑀼 𑀲𑀁𑀯𑀭𑀼𑀧𑁆𑀧𑀸𑀤𑀦𑀢𑁆𑀣𑀁. 𑀅𑀜𑁆𑀜𑀣𑀸 ‘‘𑀘𑀻𑀯𑀭𑀓𑀸𑀮𑀲𑀫𑀬𑁄 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘 𑀫𑀸𑀲𑀸’’𑀢𑀺 (𑀧𑀸𑀭𑀸. 𑁬𑁪𑁯) 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑀭𑀸𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀺𑀉𑀩𑁆𑀪𑀸𑀭𑀸𑀪𑀸𑀯𑁂𑀧𑀺 𑀧𑀜𑁆𑀘𑀳𑀺 𑀧𑀜𑁆𑀘𑀲𑀼 𑀫𑀸𑀲𑁂𑀲𑀼 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀫𑀺𑀘𑁆𑀙𑀸𑀕𑀸𑀳𑁄 𑀲𑀺𑀬𑀸. 𑀢𑀢𑁄 𑀆𑀧𑀢𑁆𑀢𑀺𑀔𑁂𑀢𑁆𑀢𑁂 𑀅𑀦𑀸𑀧𑀢𑁆𑀢𑀺𑀔𑁂𑀢𑁆𑀢𑀲𑀜𑁆𑀜𑀸𑀬 𑀢𑀁 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀇𑀢𑀭𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀮𑀸𑀪𑀦𑁆𑀢𑀭𑀸𑀬𑀁 𑀓𑀭𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀤𑀸𑀬𑀲𑀢𑁆𑀢𑀓𑀓𑀣𑀸𑀯𑀡𑁆𑀡𑀦𑀸

𑁩𑁧𑁧. 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁂 𑀤𑁆𑀯𑁂𑀧𑀺 𑀧𑀮𑀺𑀩𑁄𑀥𑀸 𑀏𑀓𑀢𑁄 𑀙𑀺𑀚𑁆𑀚𑀦𑁆𑀢𑀻𑀢𑀺 𑀇𑀥, 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀁 𑀇𑀫𑀺𑀲𑁆𑀲𑀸 𑀔𑀦𑁆𑀥𑀓𑀧𑀸𑀴𑀺𑀬𑀸 𑀲𑀫𑁂𑀢𑀺 𑀏𑀓𑀢𑁄 𑀉𑀪𑀺𑀦𑁆𑀦𑀫𑁆𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀲𑁆𑀲 𑀓𑀢𑀢𑁆𑀢𑀸. ‘‘𑀇𑀤𑀁 𑀩𑀳𑀺𑀲𑀻𑀫𑀸𑀬𑀫𑁂𑀯 𑀯𑀼𑀢𑁆𑀢𑀁 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀼𑀢𑁆𑀢𑀁 𑀧𑀭𑀺𑀯𑀸𑀭𑁂 ‘𑀘𑀢𑁆𑀢𑀸𑀭𑁄 𑀓𑀣𑀺𑀦𑀼𑀤𑁆𑀥𑀸𑀭𑀸 𑀲𑀺𑀬𑀸 𑀅𑀦𑁆𑀢𑁄𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺, 𑀲𑀺𑀬𑀸 𑀩𑀳𑀺𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺, 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀦𑀸𑀲𑀦𑀦𑁆𑀢𑀺𑀓𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄’𑀢𑀺 (𑀧𑀭𑀺. 𑁪𑁧𑁬). 𑀢𑀢𑁆𑀣 𑀩𑀳𑀺𑀲𑀻𑀫𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀉𑀤𑁆𑀥𑀭𑀺𑀬𑁆𑀬𑀢𑀻𑀢𑀺 𑀇𑀥 𑀤𑀲𑁆𑀲𑀺𑀢𑀦𑀬𑁄𑀯. 𑀓𑀣𑀁 𑀅𑀦𑁆𑀢𑁄𑀲𑀻𑀫𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄? 𑀅𑀓𑀢𑀘𑀻𑀯𑀭𑀫𑀸𑀤𑀸𑀬 ‘𑀦 𑀧𑀘𑁆𑀘𑁂𑀲𑁆𑀲’𑀦𑁆𑀢𑀺 𑀕𑀢𑁄, 𑀕𑀢𑀕𑀢𑀝𑁆𑀞𑀸𑀦𑁂 𑀨𑀸𑀲𑀼𑀯𑀺𑀳𑀸𑀭𑀁 𑀅𑀮𑀪𑀦𑁆𑀢𑁄 𑀢𑀫𑁂𑀯 𑀯𑀺𑀳𑀸𑀭𑀁 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀘𑀻𑀯𑀭𑀧𑀮𑀺𑀩𑁄𑀥𑁄 𑀞𑀺𑀢𑁄. 𑀲𑁄 𑀘 ‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’𑀦𑁆𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀙𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑁆𑀢𑁄𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀢𑀺, 𑀢𑀲𑁆𑀫𑀸 𑀤𑀼𑀯𑀺𑀥𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁, 𑀢𑀁 𑀬𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀅𑀦𑁆𑀢𑁄𑀲𑀻𑀫𑀸𑀬 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺 𑀧𑀯𑀢𑁆𑀢𑀉𑀩𑁆𑀪𑀸𑀭𑁄 𑀇𑀢𑀭𑁂𑀲𑀼 𑀲𑀫𑁄𑀥𑀸𑀦𑀁 𑀦 𑀕𑀘𑁆𑀙𑀢𑀻𑀢𑀺 𑀅𑀢𑀺𑀭𑀺𑀢𑁆𑀢𑁄 𑀲𑀺𑀬𑀸. 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄𑀢𑀺 𑀘𑀻𑀯𑀭𑀓𑀸𑀮𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄. 𑀲𑀉𑀩𑁆𑀪𑀸𑀭𑁂 𑀘𑀻𑀯𑀭𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀦𑁆𑀢𑁄 𑀯𑀺𑀬 𑀔𑀸𑀬𑀢𑀺, 𑀅𑀣 𑀔𑁄 𑀲𑀸𑀧𑁂𑀓𑁆𑀔𑀢𑀸𑀬 𑀘𑀻𑀯𑀭𑀓𑀭𑀡𑁂 𑀲𑀉𑀲𑁆𑀲𑀸𑀳𑁄𑀯 𑀳𑁄𑀢𑀻𑀢𑀺 𑀮𑁂𑀲𑀁 𑀲𑀦𑁆𑀥𑀸𑀬 𑀧𑀭𑀺𑀯𑀸𑀭𑀯𑀲𑁂𑀦 ‘‘𑀤𑁆𑀯𑁂 𑀧𑀮𑀺𑀩𑁄𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀙𑀺𑀚𑁆𑀚𑀦𑁆𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁧𑁧) 𑀯𑀼𑀢𑁆𑀢𑀁. ‘‘𑀓𑀢𑀘𑀻𑀯𑀭𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀦 𑀲𑀫𑁆𑀪𑀯𑀢𑀺.

𑁩𑁧𑁬. 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀅𑀦𑀯𑀲𑁂𑀲𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁄 ‘‘𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀓𑀣𑀺𑀦𑀼𑀤𑁆𑀥𑀸𑀭𑁂 𑀯𑀺𑀲𑁂𑀲𑁄 𑀦𑀢𑁆𑀣𑀺. 𑀧𑀼𑀕𑁆𑀕𑀮𑀸𑀥𑀺𑀧𑁆𑀧𑀸𑀬𑀯𑀺𑀲𑁂𑀲𑁂𑀦 𑀓𑁂𑀯𑀮𑀁 𑀯𑀸𑀭𑀤𑀲𑁆𑀲𑀦𑀢𑁆𑀣𑀁 𑀲𑀫𑀸𑀤𑀸𑀬𑀯𑀸𑀭𑀸 𑀯𑀼𑀢𑁆𑀢𑀸’’𑀢𑀺 𑀲𑀩𑁆𑀩𑁂𑀲𑀼 𑀕𑀡𑁆𑀞𑀺𑀧𑀤𑁂𑀲𑀼 𑀮𑀺𑀔𑀺𑀢𑀁. 𑀇𑀥 𑀧𑀦 𑀧𑀼𑀕𑁆𑀕𑀮𑀸𑀥𑀺𑀧𑁆𑀧𑀸𑀬𑁂𑀦 𑀧𑀬𑁄𑀚𑀦𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀧𑀓𑁆𑀓𑀫𑀦𑀦𑁆𑀢𑀺𑀓𑀲𑁆𑀲 𑀅𑀪𑀸𑀯𑀸 ‘‘𑀬𑀣𑀸𑀲𑀫𑁆𑀪𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀧𑁆𑀧𑀓𑀢𑁂𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀯𑀲𑁂𑀦 𑀧𑀓𑁆𑀓𑀫𑀦𑀦𑁆𑀢𑀺𑀓𑀢𑀸 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀧𑀓𑁆𑀓𑀫𑀦𑀦𑁆𑀢𑀺𑀓𑀯𑀸𑀭𑁄𑀧𑀺 𑀯𑀢𑁆𑀢𑀩𑁆𑀩𑁄𑀢𑀺 𑀘𑁂? 𑀦, 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀮𑀓𑁆𑀔𑀡𑀧𑁆𑀧𑀲𑀗𑁆𑀕𑀢𑁄. 𑀅𑀓𑀢𑀘𑀻𑀯𑀭𑀲𑁆𑀲 𑀦 𑀲𑀯𑀦𑀦𑁆𑀢𑀺𑀓𑀢𑀸 𑀘.

𑀢𑀢𑁆𑀭𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀸𑀭𑀯𑀺𑀪𑀸𑀯𑀦𑀸 𑁋 𑀆𑀤𑀸𑀬𑀯𑀸𑀭𑀸 𑀲𑀢𑁆𑀢, 𑀢𑀣𑀸 𑀲𑀫𑀸𑀤𑀸𑀬𑀯𑀸𑀭𑀸𑀢𑀺 𑀤𑁆𑀯𑁂 𑀲𑀢𑁆𑀢𑀓𑀯𑀸𑀭𑀸. 𑀢𑀢𑁄 𑀧𑀓𑁆𑀓𑀫𑀦𑀦𑁆𑀢𑀺𑀓𑀁 𑀯𑀚𑁆𑀚𑁂𑀢𑁆𑀯𑀸 𑀯𑀺𑀧𑁆𑀧𑀓𑀢𑀘𑀻𑀯𑀭𑀲𑁆𑀲 𑀆𑀤𑀸𑀬𑀯𑀸𑀭𑀸, 𑀲𑀫𑀸𑀤𑀸𑀬𑀯𑀸𑀭𑀸 𑀘𑀸𑀢𑀺 𑀤𑁆𑀯𑁂 𑀙𑀓𑁆𑀓𑀯𑀸𑀭𑀸. 𑀢𑀢𑁄 𑀧𑀭𑀁 𑀦𑀺𑀝𑁆𑀞𑀸𑀦𑀲𑀦𑁆𑀦𑀺𑀝𑁆𑀞𑀸𑀦𑀦𑀸𑀲𑀦𑀦𑁆𑀢𑀺𑀓𑀸𑀦𑀁 𑀯𑀲𑁂𑀦 𑀢𑀻𑀡𑀺 𑀢𑀺𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀢𑀢𑁆𑀣 𑀧𑀞𑀫𑀢𑁆𑀢𑀺𑀓𑀁 𑀅𑀦𑁆𑀢𑁄𑀲𑀻𑀫𑀸𑀬 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀇𑀫𑀁 𑀯𑀺𑀥𑀺𑀁 𑀅𑀦𑀸𑀫𑀲𑀺𑀢𑁆𑀯𑀸 𑀩𑀳𑀺𑀲𑀻𑀫𑀸𑀬𑀁 𑀏𑀯 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀧𑀓𑁆𑀓𑀫𑀦𑀦𑁆𑀢𑀺𑀓𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀲𑀉𑀩𑁆𑀪𑀸𑀭𑀸 𑀢𑀢𑁆𑀣 𑀦 𑀬𑀼𑀚𑁆𑀚𑀦𑁆𑀢𑀺. ‘‘𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀲𑀫𑁆𑀪𑀯𑀦𑁆𑀢𑁄𑀧𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀦 𑀯𑀼𑀢𑁆𑀢𑁄. 𑀤𑀼𑀢𑀺𑀬𑀢𑁆𑀢𑀺𑀓𑀁 𑀅𑀦𑁆𑀢𑁄𑀲𑀻𑀫𑀸𑀬 ‘𑀦 𑀧𑀘𑁆𑀘𑁂𑀲𑁆𑀲’𑀦𑁆𑀢𑀺 𑀧𑀯𑀢𑁆𑀢𑀁, 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀲𑀫𑁆𑀪𑀯𑀢𑀺, 𑀢𑀣𑀸𑀧𑀺 𑀬𑁂𑀳𑀺 𑀘𑀻𑀯𑀭𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺, 𑀢𑁂𑀲𑀁𑀬𑁂𑀯𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀦 𑀯𑀼𑀢𑁆𑀢𑁄’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀧𑀦𑁆𑀦𑀭𑀲𑀓𑁂 𑀯𑀺𑀧𑁆𑀧𑀓𑀢𑀘𑀻𑀯𑀭𑀲𑁆𑀲𑁂𑀯𑀸𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀢𑀓𑁆𑀓𑁄. 𑀅𑀥𑀺𑀝𑁆𑀞𑀸𑀦𑀼𑀧𑀕𑁂 𑀘 𑀯𑀺𑀧𑁆𑀧𑀓𑀢𑁂 𑀲𑀢𑀺 𑀦 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄. 𑀦𑀺𑀝𑁆𑀞𑀸𑀦𑀸𑀯𑀲𑁂𑀲𑁂 𑀲𑀢𑀺 𑀦 𑀦𑀸𑀲𑀦𑀦𑁆𑀢𑀺𑀓𑁄𑀢𑀺 𑀧𑁄𑀭𑀸𑀡𑀸. 𑀢𑀢𑀺𑀬𑀢𑁆𑀢𑀺𑀓𑀁 𑀅𑀦𑀥𑀺𑀝𑁆𑀞𑀺𑀢-𑀧𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀧𑀯𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀞𑀫𑀢𑁆𑀢𑀺𑀓𑁂𑀦 𑀲𑀫𑁂𑀢𑀺. 𑀢𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀧𑀬𑁄𑀚𑀦𑀁 𑀓𑀺𑀭 𑀢𑀁. 𑀬𑀲𑁆𑀫𑀸 𑀇𑀫𑁂 𑀢𑀬𑁄 𑀅𑀢𑁆𑀣𑀯𑀺𑀓𑀧𑁆𑀧𑀸 𑀇𑀫𑁂𑀳𑀺 𑀏𑀯 𑀢𑀻𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁂𑀳𑀺 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀁, 𑀢𑀲𑁆𑀫𑀸 𑀇𑀫𑁂𑀯 𑀬𑁄𑀚𑀺𑀢𑀸 𑀏𑀓𑀲𑀫𑁆𑀩𑀦𑁆𑀥𑀯𑀲𑁂𑀦, 𑀅𑀜𑁆𑀜𑀣𑀸 𑀧𑀞𑀫𑀢𑁆𑀢𑀺𑀓𑀁 𑀙𑀓𑁆𑀓𑀁 𑀪𑀯𑁂𑀬𑁆𑀬 𑀇𑀫𑀲𑁆𑀲 𑀧𑀦𑁆𑀦𑀭𑀲𑀓𑀲𑁆𑀲 𑀅𑀦𑁆𑀢𑁂 𑀙𑀓𑁆𑀓𑀁 𑀯𑀺𑀬. 𑀢𑀢𑀺𑀬𑀢𑁆𑀢𑀺𑀓𑀸𑀦𑀦𑁆𑀢𑀭𑀁 𑀘𑀢𑀼𑀢𑁆𑀣𑀢𑁆𑀢𑀺𑀓𑀁 𑀲𑀫𑁆𑀪𑀯𑀦𑁆𑀢𑀁 ‘‘𑀅𑀦𑁆𑀢𑁄𑀲𑀻𑀫𑀸𑀬𑀁 ‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀯𑀘𑀦𑀯𑀺𑀲𑁂𑀲𑁂𑀦 𑀲𑀫𑁆𑀪𑀯𑀢𑀺. 𑀢𑀣𑀸 𑀘 𑀬𑁄𑀚𑀺𑀬𑀫𑀸𑀦𑀁 𑀇𑀢𑀭𑁂𑀳𑀺 𑀲𑀯𑀦𑀦𑁆𑀢𑀺𑀓𑀸𑀤𑀻𑀳𑀺 𑀅𑀯𑀺𑀭𑀼𑀤𑁆𑀥𑀓𑁆𑀓𑀫𑀁 𑀳𑁄𑀢𑀺, 𑀢𑀲𑁆𑀫𑀸 𑀘𑀢𑀼𑀢𑁆𑀣𑀢𑁆𑀢𑀺𑀓𑀁 𑀅𑀳𑀼𑀢𑁆𑀯𑀸 𑀙𑀓𑁆𑀓𑀁 𑀚𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀢𑀻𑀡𑀺 𑀢𑀺𑀓𑀸𑀦𑀺 𑀏𑀓𑀁 𑀙𑀓𑁆𑀓𑀜𑁆𑀘𑀸𑀢𑀺 𑀧𑀞𑀫𑀁 𑀧𑀦𑁆𑀦𑀭𑀲𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀸𑀦𑀺 𑀇𑀤𑀫𑁂𑀯 𑀧𑀦𑁆𑀦𑀭𑀲𑀓𑀁 𑀉𑀧𑀲𑀕𑁆𑀕𑀯𑀺𑀲𑁂𑀲𑁂𑀦 𑀤𑀼𑀢𑀺𑀬𑀁 𑀲𑀫𑀸𑀤𑀸𑀬𑀧𑀦𑁆𑀦𑀭𑀲𑀓𑀁 𑀦𑀸𑀫 𑀓𑀢𑀁. 𑀧𑀼𑀦 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬𑀸𑀢𑀺 𑀢𑀢𑀺𑀬𑀁 𑀧𑀦𑁆𑀦𑀭𑀲𑀓𑀁, 𑀲𑀫𑀸𑀤𑀸𑀬𑀸𑀢𑀺 𑀘𑀢𑀼𑀢𑁆𑀣𑀁 𑀧𑀦𑁆𑀦𑀭𑀲𑀓𑀁 𑀤𑀲𑁆𑀲𑀺𑀢𑀁. 𑀏𑀯𑀁 𑀘𑀢𑁆𑀢𑀸𑀭𑀺 𑀧𑀦𑁆𑀦𑀭𑀲𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀧𑀞𑀫𑀤𑀼𑀢𑀺𑀬𑁂𑀲𑀼 𑀧𑀦𑁆𑀦𑀭𑀲𑀓𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀓𑀢𑀘𑀻𑀯𑀭𑀁 𑀅𑀥𑀺𑀧𑁆𑀧𑁂𑀢𑀁, 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀯𑀺𑀧𑁆𑀧𑀓𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀧𑀼𑀩𑁆𑀩𑁂 𑀦𑀺𑀩𑀤𑁆𑀥𑀝𑁆𑀞𑀸𑀦𑁂 𑀘𑀻𑀯𑀭𑀸𑀲𑀸𑀬 𑀕𑀳𑁂𑀢𑀩𑁆𑀩𑀁, 𑀅𑀜𑁆𑀜𑀢𑁆𑀣 𑀦 𑀯𑀝𑁆𑀝𑀢𑀺. 𑀉𑀧𑀘𑁆𑀙𑀺𑀦𑁆𑀦𑀸𑀬 𑀘𑁂 𑀘𑀻𑀯𑀭𑀸𑀲𑀸𑀬 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁, 𑀦 𑀢𑀁 𑀘𑀻𑀯𑀭𑀧𑀮𑀺𑀩𑁄𑀥𑀁 𑀓𑀭𑁄𑀢𑀻’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀢𑀢𑀺𑀬𑀓𑀣𑀺𑀦𑁂 𑀆𑀕𑀢𑀘𑀻𑀯𑀭𑀧𑀘𑁆𑀘𑀸𑀲𑀸 𑀇𑀥 𑀘𑀻𑀯𑀭𑀸𑀲𑀸𑀢𑀺 𑀢𑀓𑁆𑀓𑁄. 𑀬𑀢𑁆𑀣 𑀘𑀻𑀯𑀭𑀸𑀲𑀸, 𑀢𑀁 𑀞𑀸𑀦𑀁 𑀅𑀥𑀺𑀓𑀭𑀡𑀽𑀧𑀘𑀸𑀭𑁂𑀦 ‘‘𑀘𑀻𑀯𑀭𑀸𑀲𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺 𑀓𑀢𑁆𑀯𑀸 ‘‘𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀸𑀲𑀸𑀬 𑀮𑀪𑀢𑀻𑀢𑀺 𑀅𑀦𑀸𑀲𑀸𑀬𑀺𑀢𑀝𑁆𑀞𑀸𑀦𑁂 𑀮𑀪𑀢𑀻𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣 𑀦𑀺𑀝𑁆𑀞𑀸𑀦𑀲𑀦𑁆𑀦𑀺𑀝𑁆𑀞𑀸𑀦𑀦𑀸𑀲𑀦𑀆𑀲𑀸𑀯𑀘𑁆𑀙𑁂𑀤𑀺𑀓𑀯𑀲𑁂𑀦 𑀏𑀓𑁄 𑀯𑀸𑀭𑁄𑀢𑀺 𑀇𑀤𑀫𑁂𑀓𑀁 𑀘𑀢𑀼𑀓𑁆𑀓𑀁 𑀚𑀸𑀢𑀁, 𑀢𑀲𑁆𑀫𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺 𑀢𑀻𑀡𑀺 𑀢𑀺𑀓𑀸𑀦𑀺 𑀆𑀲𑀸𑀯𑀘𑁆𑀙𑁂𑀤𑀺𑀓𑀸𑀥𑀺𑀓𑀸𑀦𑀺 𑀢𑀻𑀡𑀺 𑀘𑀢𑀼𑀓𑁆𑀓𑀸𑀦𑀻𑀢𑀺 𑀏𑀓𑀁 𑀅𑀦𑀸𑀲𑀸𑀬𑀤𑁆𑀯𑀸𑀤𑀲𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀤𑀦𑀦𑁆𑀢𑀭𑁂 𑀆𑀲𑀸𑀬𑀤𑁆𑀯𑀸𑀤𑀲𑀓𑁂 𑀓𑀺𑀜𑁆𑀘𑀸𑀧𑀺 𑀧𑀞𑀫𑀤𑁆𑀯𑀸𑀤𑀲𑀓𑁆𑀓𑀫𑁄 𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀢𑀁 𑀦𑀺𑀩𑁆𑀩𑀺𑀲𑁂𑀲𑀦𑁆𑀢𑀺 𑀢𑀫𑁂𑀓𑀁 𑀤𑁆𑀯𑀸𑀤𑀲𑀓𑀁 𑀅𑀯𑀼𑀢𑁆𑀢𑀲𑀺𑀤𑁆𑀥𑀁 𑀓𑀢𑁆𑀯𑀸 𑀯𑀺𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 ‘‘𑀅𑀦𑁆𑀢𑁄𑀲𑀻𑀫𑀸𑀬 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 ‘‘𑀲𑁄 𑀩𑀳𑀺𑀲𑀻𑀫𑀕𑀢𑁄 𑀲𑀼𑀡𑀸𑀢𑀻’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀢𑀢𑀺𑀬𑀘𑀢𑀼𑀓𑁆𑀓𑁂 𑀲𑀯𑀦𑀦𑁆𑀢𑀺𑀓𑀸𑀤𑀻𑀦𑀜𑁆𑀘 𑀑𑀓𑀸𑀲𑀓𑀭𑀡𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀧𑀦 𑀤𑁆𑀯𑀸𑀤𑀲𑀓𑀁 𑀅𑀦𑀸𑀲𑀸𑀬 𑀯𑀲𑁂𑀦 𑀮𑀩𑁆𑀪𑀫𑀸𑀦𑀫𑁆𑀧𑀺 𑀇𑀫𑀺𑀦𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀁 𑀓𑀢𑁆𑀯𑀸 𑀦 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀢𑁆𑀣 𑀤𑁆𑀯𑁂 𑀤𑁆𑀯𑀸𑀤𑀲𑀓𑀸𑀦𑀺 𑀉𑀤𑁆𑀥𑀭𑀺𑀢𑀸𑀦𑀺. 𑀓𑀭𑀡𑀻𑀬𑀤𑁆𑀯𑀸𑀤𑀲𑀓𑁂𑀧𑀺 𑀬𑀣𑀸𑀤𑀲𑁆𑀲𑀺𑀢𑀅𑀦𑀸𑀲𑀸𑀬𑀤𑁆𑀯𑀸𑀤𑀲𑀓𑀁, 𑀅𑀯𑀼𑀢𑁆𑀢𑀲𑀺𑀤𑁆𑀥𑀁 𑀆𑀲𑀸𑀬𑀤𑁆𑀯𑀸𑀤𑀲𑀓𑀜𑁆𑀘𑀸𑀢𑀺 𑀤𑁆𑀯𑁂 𑀤𑁆𑀯𑀸𑀤𑀲𑀓𑀸𑀦𑀺 𑀉𑀤𑁆𑀥𑀭𑀺𑀢𑀩𑁆𑀩𑀸𑀦𑀺. 𑀇𑀤𑀸𑀦𑀺 𑀤𑀺𑀲𑀁𑀕𑀫𑀺𑀓𑀦𑀯𑀓𑀁 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 ‘‘𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀻’’𑀢𑀺 𑀯𑀘𑀦𑁂𑀦𑁂𑀯 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀇𑀤𑀁 𑀅𑀯𑀼𑀢𑁆𑀢𑀲𑀺𑀤𑁆𑀥𑀫𑁂𑀯, 𑀢𑀲𑁆𑀫𑀸 𑀢𑀁 𑀦 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀆𑀯𑀸𑀲𑀧𑀮𑀺𑀩𑁄𑀥𑀸𑀪𑀸𑀯𑁄 𑀤𑀲𑁆𑀲𑀺𑀢𑁄.

𑁩𑁨𑁧. ‘‘𑀘𑀻𑀯𑀭𑀧𑀝𑀺𑀯𑀻𑀲𑀁 𑀅𑀧𑀯𑀺𑀮𑀸𑀬𑀫𑀸𑀦𑁄’’𑀢𑀺 𑀇𑀫𑀺𑀦𑀸 𑀘𑀻𑀯𑀭𑀧𑀮𑀺𑀩𑁄𑀥𑀲𑀫𑀗𑁆𑀕𑀺𑀢𑀫𑀲𑁆𑀲 𑀤𑀲𑁆𑀲𑁂𑀢𑀺. 𑀧𑀝𑀺𑀯𑀻𑀲𑁄𑀢𑀺 𑀅𑀢𑁆𑀢𑀦𑁄 𑀧𑀢𑁆𑀢𑀩𑁆𑀩𑁄 𑀘𑀻𑀯𑀭𑀪𑀸𑀕𑁄. 𑀅𑀧𑀯𑀺𑀮𑀸𑀬𑀫𑀸𑀦𑁄𑀢𑀺 𑀆𑀓𑀗𑁆𑀔𑀫𑀸𑀦𑁄. 𑀢𑀲𑁆𑀲 𑀘𑀻𑀯𑀭𑀮𑀸𑀪𑁂 𑀲𑀢𑀺 𑀯𑀲𑁆𑀲𑀁𑀯𑀼𑀢𑁆𑀣𑀸𑀯𑀸𑀲𑁂 𑀦𑀺𑀝𑁆𑀞𑀸𑀦𑀲𑀦𑁆𑀦𑀺𑀝𑁆𑀞𑀸𑀦𑀦𑀸𑀲𑀦𑀦𑁆𑀢𑀺𑀓𑀸𑀦𑀁 𑀯𑀲𑁂𑀦 𑀏𑀓𑀁 𑀢𑀺𑀓𑀁, 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁, 𑀕𑀢𑀝𑁆𑀞𑀸𑀦𑁂 𑀏𑀓𑀦𑁆𑀢𑀺 𑀢𑀺𑀡𑁆𑀡𑀁 𑀢𑀺𑀓𑀸𑀦𑀁 𑀯𑀲𑁂𑀦 𑀏𑀓𑀁 𑀦𑀯𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄 𑀧𑀭𑀁 𑀦𑀺𑀝𑁆𑀞𑀸𑀦𑀲𑀦𑁆𑀦𑀺𑀝𑁆𑀞𑀸𑀦𑀦𑀸𑀲𑀦𑀦𑁆𑀢𑀺 𑀓𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀲𑀉𑀩𑁆𑀪𑀸𑀭𑀸𑀦𑀁 𑀯𑀲𑁂𑀦 𑀨𑀸𑀲𑀼𑀯𑀺𑀳𑀸𑀭𑀧𑀜𑁆𑀘𑀓𑀁 𑀯𑀼𑀢𑁆𑀢𑀁. 𑀉𑀪𑀬𑀢𑁆𑀣 𑀲𑁂𑀲𑀓𑀣𑀺𑀦𑀼𑀤𑁆𑀥𑀸𑀭𑀸𑀲𑀫𑁆𑀪𑀯𑁄 𑀧𑀸𑀓𑀝𑁄𑀯. 𑀅𑀬𑀁 𑀧𑀦𑁂𑀢𑁆𑀣 𑀧𑀜𑁆𑀘𑀓𑁂 𑀯𑀺𑀲𑁂𑀲𑁄 𑁋 𑀲𑀫𑀸𑀤𑀸𑀬𑀯𑀸𑀭𑁄 𑀦 𑀲𑀫𑁆𑀪𑀯𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀧𑀘𑁆𑀘𑀸𑀕𑀫𑀦𑀸𑀥𑀺𑀧𑁆𑀧𑀸𑀬𑀢𑁄.

𑁩𑁨𑁫. 𑀤𑁆𑀯𑁂𑀫𑁂 𑀪𑀺𑀓𑁆𑀔𑀯𑁂 𑀓𑀣𑀺𑀦𑀲𑁆𑀲 𑀧𑀮𑀺𑀩𑁄𑀥𑀸𑀢𑀺 𑀓𑀣𑀺𑀦𑀢𑁆𑀣𑀸𑀭𑀲𑁆𑀲 𑀅𑀦𑀼𑀧𑀩𑀦𑁆𑀥𑀦𑀧𑀘𑁆𑀘𑀬𑀸𑀢𑀺.

𑀓𑀣𑀺𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.