𑁬. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀧𑀜𑁆𑀘𑀪𑁂𑀲𑀚𑁆𑀚𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁬𑁦. ‘‘𑀬𑀁 𑀪𑁂𑀲𑀚𑁆𑀚𑀜𑁆𑀘𑁂𑀯 𑀅𑀲𑁆𑀲𑀸’’𑀢𑀺 𑀧𑀭𑀢𑁄 ‘‘𑀢𑀤𑀼𑀪𑀬𑁂𑀦 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀓𑀺𑀲𑁆𑀲𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀭𑁄𑀥𑀤𑀲𑁆𑀲𑀦𑀢𑁄 𑀦𑀺𑀤𑀸𑀦𑀸𑀦𑀧𑁂𑀓𑁆𑀔𑀁 𑀬𑀣𑀸𑀮𑀸𑀪𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀦𑀺𑀤𑀸𑀦𑀁 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀤𑀜𑁆𑀜𑀸𑀧𑁂𑀓𑁆𑀔𑀸𑀥𑀺𑀧𑁆𑀧𑀸𑀬𑀢𑁄. 𑀲𑀩𑁆𑀩𑀩𑀼𑀤𑁆𑀥𑀓𑀸𑀮𑁂𑀧𑀺 𑀳𑀺 𑀲𑀧𑁆𑀧𑀺𑀆𑀤𑀻𑀦𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀪𑀸𑀯𑀸𑀧𑁂𑀓𑁆𑀔𑀸𑀢𑀺 𑀢𑀣𑀸 𑀯𑀘𑀦𑁂𑀦 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑁂𑀯 ‘‘𑀆𑀳𑀸𑀭𑀢𑁆𑀣𑀜𑁆𑀘 𑀨𑀭𑁂𑀬𑁆𑀬, 𑀦 𑀘 𑀑𑀴𑀸𑀭𑀺𑀓𑁄 𑀆𑀳𑀸𑀭𑁄 𑀧𑀜𑁆𑀜𑀸𑀬𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀏𑀢𑁆𑀣 𑀘 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀦 𑀓𑀢𑁄. 𑀓𑀼𑀢𑁄𑀬𑁂𑀯 𑀧𑀦 𑀮𑀩𑁆𑀪𑀸 𑀢𑀤𑀜𑁆𑀜𑀸𑀧𑁂𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀪𑀕𑀯𑀢𑁄 𑀫𑀽𑀮𑀪𑁂𑀲𑀚𑁆𑀚𑀸𑀤𑀻𑀦𑀺 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀸𑀯𑀚𑀻𑀯𑀦𑁆𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑁄. 𑀬𑀁 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀯𑀘𑀦𑀁, 𑀢𑀁 ‘‘𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀅𑀧𑀭𑀸𑀧𑀭𑀲𑁆𑀫𑀺𑀁 𑀤𑀺𑀯𑀲𑁂 𑀓𑀸𑀮𑁂 𑀏𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑀢𑁄 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀅𑀢𑀺𑀲𑀬𑀢𑁆𑀢𑀸𑀪𑀸𑀯𑀢𑁄 ‘‘𑀬𑀁 𑀪𑁂𑀲𑀚𑁆𑀚𑀜𑁆𑀘𑁂𑀯 𑀅𑀲𑁆𑀲𑀸’’𑀢𑀺𑀆𑀤𑀺 𑀯𑀺𑀢𑀓𑁆𑀓𑀼𑀧𑁆𑀧𑀸𑀤𑁄 𑀦 𑀲𑀫𑁆𑀪𑀯𑀢𑀺. 𑀧𑀡𑀻𑀢𑀪𑁄𑀚𑀦𑀸𑀦𑀼𑀫𑀢𑀺𑀬𑀸 𑀧𑀲𑀺𑀤𑁆𑀥𑀢𑁆𑀢𑀸 𑀆𑀩𑀸𑀥𑀸𑀦𑀼𑀭𑀽𑀧𑀲𑀧𑁆𑀧𑀸𑀬𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀸𑀦𑀻𑀢𑀺 𑀘𑁂? 𑀢𑀜𑁆𑀘 𑀦, 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀓𑀺𑀲𑀸𑀤𑀺𑀪𑀸𑀯𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁄. 𑀬𑀣𑀸 ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬 𑀨𑀸𑀡𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀣𑀸 ‘‘𑀦𑀯𑀦𑀻𑀢𑀁 𑀉𑀧𑀸𑀤𑀸𑀬 𑀲𑀧𑁆𑀧𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄 𑀦𑀯𑀦𑀻𑀢𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀯𑀺𑀲𑁂𑀲𑀤𑀲𑁆𑀲𑀦𑀸𑀥𑀺𑀧𑁆𑀧𑀸𑀬𑀢𑁄. 𑀬𑀣𑀸 𑀨𑀸𑀡𑀺𑀢𑀕𑁆𑀕𑀳𑀡𑁂𑀦 𑀲𑀺𑀤𑁆𑀥𑁂𑀧𑀺 𑀧𑀭𑀢𑁄 𑀉𑀘𑁆𑀙𑀼𑀭𑀲𑁄 𑀯𑀺𑀲𑀼𑀁 𑀅𑀦𑀼𑀜𑁆𑀜𑀸𑀢𑁄 𑀉𑀘𑁆𑀙𑀼𑀲𑀸𑀫𑀜𑁆𑀜𑀢𑁄 𑀕𑀼𑀴𑁄𑀤𑀓𑀝𑁆𑀞𑀸𑀦𑁂 𑀞𑀧𑀦𑀸𑀥𑀺𑀧𑁆𑀧𑀸𑀬𑀢𑁄. 𑀢𑀣𑀸 𑀦𑀯𑀦𑀻𑀢𑁂 𑀯𑀺𑀲𑁂𑀲𑀯𑀺𑀥𑀺𑀤𑀲𑁆𑀲𑀦𑀸𑀥𑀺𑀧𑁆𑀧𑀸𑀬𑀢𑁄 𑀦𑀯𑀦𑀻𑀢𑀁 𑀯𑀺𑀲𑀼𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁂𑀲𑀯𑀺𑀥𑀺 𑀧𑀦𑀲𑁆𑀲 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀧𑀘𑀺𑀢𑁆𑀯𑀸 𑀲𑀧𑁆𑀧𑀺𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁂𑀦 𑀅𑀥𑁄𑀢𑀫𑁆𑀧𑀺 𑀧𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁨). 𑀢𑀢𑁆𑀣 𑀲𑀧𑁆𑀧𑀺 𑀧𑀓𑁆𑀓𑀸𑀯 𑀳𑁄𑀢𑀺, 𑀦𑀸𑀧𑀓𑁆𑀓𑀸. 𑀢𑀣𑀸 𑀨𑀸𑀡𑀺𑀢𑀫𑁆𑀧𑀺. 𑀦𑀯𑀦𑀻𑀢𑀁 𑀅𑀧𑀓𑁆𑀓𑀫𑁂𑀯.

𑀏𑀢𑁆𑀣𑀸𑀳 𑁋 𑀦𑀯𑀦𑀻𑀢𑀁 𑀯𑀺𑀬 𑀉𑀘𑁆𑀙𑀼𑀭𑀲𑁄𑀧𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀧𑀸𑀴𑀺𑀬𑀁 𑀏𑀯 𑀯𑀢𑁆𑀢𑀩𑁆𑀩𑁄𑀢𑀺? 𑀦 𑀯𑀢𑁆𑀢𑀩𑁆𑀩𑁄. 𑀓𑀲𑁆𑀫𑀸? 𑀲𑀢𑁆𑀢𑀸𑀳𑀓𑀸𑀮𑀺𑀓𑀧𑀸𑀴𑀺𑀬𑀁 𑀯𑀼𑀢𑁆𑀢𑁂 𑀉𑀘𑁆𑀙𑀼𑀭𑀲𑁄 𑀕𑀼𑀴𑀸𑀧𑀤𑁂𑀲𑁂𑀦 𑀬𑀣𑀸 𑀅𑀕𑀺𑀮𑀸𑀦𑀲𑁆𑀲 𑀨𑀸𑀡𑀺𑀢𑀁 𑀧𑀝𑀺𑀲𑀺𑀤𑁆𑀥𑀁, 𑀢𑀣𑀸 𑀉𑀘𑁆𑀙𑀼𑀭𑀲𑁄𑀧𑀻𑀢𑀺 𑀆𑀧𑀚𑁆𑀚𑀢𑀺, 𑀅𑀯𑀼𑀢𑁆𑀢𑁂 𑀧𑀦 𑀕𑀼𑀴𑀁 𑀯𑀺𑀬 𑀲𑁄 𑀨𑀸𑀡𑀺𑀢𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀇𑀥 𑀅𑀯𑀢𑁆𑀯𑀸 𑀧𑀘𑁆𑀙𑀸 𑀯𑀘𑀦𑁂𑀦 𑀕𑀼𑀴𑁄𑀤𑀓𑀝𑁆𑀞𑀸𑀦𑁂𑀯 𑀞𑀧𑀺𑀢𑁄 𑀳𑁄𑀢𑀺. 𑀢𑀤𑀢𑁆𑀣𑀫𑁂𑀯 𑀧𑀘𑁆𑀙𑀸𑀪𑀢𑁆𑀢𑀁 𑀯𑀝𑁆𑀝𑀦𑀓𑀧𑀸𑀦𑀓𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀏𑀯 𑀬𑀸𑀫𑀓𑀸𑀮𑀺𑀓𑁄𑀢𑀺 𑀘𑁂? 𑀦, 𑀅𑀝𑁆𑀞𑀓𑀣𑀸𑀯𑀺𑀭𑁄𑀥𑀢𑁄. 𑀦 𑀉𑀧𑀸𑀤𑀸𑀬𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑀢𑁆𑀣𑀢𑁆𑀢𑀸𑀢𑀺 𑀘𑁂? 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬 𑀉𑀘𑁆𑀙𑀼𑀯𑀺𑀓𑀢𑀺 𑀨𑀸𑀡𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩) 𑀬𑀤𑁂𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀝𑁆𑀞𑀓𑀣𑀸𑀯𑀘𑀦𑀁, 𑀢𑀢𑁆𑀣 ‘‘𑀉𑀧𑀸𑀤𑀸𑀬𑀸’’𑀢𑀺 𑀇𑀫𑀲𑁆𑀲 𑀦𑀺𑀲𑁆𑀲𑀸𑀬 𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄𑀢𑀺. 𑀦, 𑀧𑀭𑀢𑁄 𑀅𑀧𑀭𑀓𑀺𑀭𑀺𑀬𑀸𑀬 𑀅𑀤𑀲𑁆𑀲𑀦𑀢𑁄. 𑀬𑀣𑀸 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫; 𑀲𑀁. 𑀦𑀺. 𑁨.𑁪𑁩) ‘‘𑀧𑀝𑀺𑀘𑁆𑀘𑀸’’𑀢𑀺 𑀇𑀫𑀲𑁆𑀲 𑀉𑀲𑁆𑀲𑀼𑀓𑁆𑀓𑀯𑀘𑀦𑀲𑁆𑀲 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀧𑀭𑀓𑀺𑀭𑀺𑀬𑀸 𑀤𑀺𑀲𑁆𑀲𑀢𑀺, 𑀦 𑀢𑀣𑀸 ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸’’𑀢𑀺 𑀏𑀢𑁆𑀣 𑀅𑀧𑀭𑀓𑀺𑀭𑀺𑀬𑀸 𑀤𑀺𑀲𑁆𑀲𑀢𑀻𑀢𑀺. 𑀅𑀬𑀼𑀢𑁆𑀢𑀫𑁂𑀢𑀁 𑀢𑀢𑁆𑀣 𑀢𑀤𑀪𑀸𑀯𑁂𑀧𑀺 𑀲𑀺𑀤𑁆𑀥𑀢𑁆𑀢𑀸. 𑀬𑀣𑀸 ‘‘𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧’’𑀦𑁆𑀢𑀺 (𑀥. 𑀲. 𑁫𑁮𑁪) 𑀏𑀢𑁆𑀣 𑀅𑀧𑀭𑀓𑀺𑀭𑀺𑀬𑀸𑀬 𑀅𑀪𑀸𑀯𑁂𑀧𑀺 𑀉𑀲𑁆𑀲𑀼𑀓𑁆𑀓𑀯𑀘𑀦𑀁 𑀲𑀺𑀤𑁆𑀥𑀁, 𑀢𑀣𑀸 𑀏𑀢𑁆𑀣𑀸𑀧𑀺 𑀲𑀺𑀬𑀸𑀢𑀺? 𑀦, 𑀢𑀢𑁆𑀣 𑀧𑀸𑀞𑀲𑁂𑀲𑀸𑀧𑁂𑀓𑁆𑀔𑀢𑁆𑀢𑀸. 𑀬𑀣𑀸 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁, 𑀧𑀯𑀢𑁆𑀢𑀓𑀁 𑀯𑀸 𑀭𑀽𑀧𑀦𑁆𑀢𑀺 𑀇𑀫𑀁 𑀧𑀸𑀞𑀲𑁂𑀲𑀁 𑀲𑀸 𑀧𑀸𑀴𑀺 𑀅𑀧𑁂𑀓𑁆𑀔𑀢𑀺, 𑀦 𑀢𑀣𑀸 𑀇𑀤𑀁 𑀅𑀝𑁆𑀞𑀓𑀣𑀸𑀯𑀘𑀦𑀁 𑀓𑀜𑁆𑀘𑀺 𑀧𑀸𑀞𑀁 𑀅𑀧𑁂𑀓𑁆𑀔𑀢𑀺. 𑀧𑀭𑀺𑀧𑀼𑀡𑁆𑀡𑀯𑀸𑀤𑀺𑀦𑁄 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀲𑀜𑁆𑀜𑀸𑀓𑀭𑀡𑀫𑀢𑁆𑀢𑀁 𑀯𑀸 𑀢𑀲𑁆𑀲 𑀭𑀽𑀧𑀲𑁆𑀲. ‘‘𑀅𑀢𑁆𑀣𑀺 𑀭𑀽𑀧𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁫𑁮𑁪) 𑀳𑀺 𑀲𑀜𑁆𑀜𑀸𑀓𑀭𑀡𑀫𑀢𑁆𑀢𑀁, 𑀏𑀯𑀫𑀺𑀥𑀸𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸’’𑀢𑀺 𑀉𑀘𑁆𑀙𑀼𑀭𑀲𑀁 𑀆𑀤𑀺𑀁 𑀓𑀢𑁆𑀯𑀸, 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 ‘‘𑀉𑀘𑁆𑀙𑀼𑀭𑀲𑁂𑀦 𑀲𑀁𑀲𑀝𑁆𑀞𑀁 𑀪𑀢𑁆𑀢𑀁 𑀅𑀕𑀺𑀮𑀸𑀦𑁄 𑀪𑀺𑀓𑁆𑀔𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑁄, 𑀪𑀺𑀓𑁆𑀔𑀼𑀦𑀻 𑀧𑀸𑀝𑀺𑀤𑁂𑀲𑀦𑀺𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀢𑁂 𑀯𑀺𑀲𑁂𑀲𑀳𑁂𑀢𑀼𑀦𑁄 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀜𑁆𑀜𑀸𑀧𑁂𑀢𑀩𑁆𑀩𑀸.

𑀏𑀢𑁆𑀢𑀸𑀯𑀢𑀸 ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸𑀢𑀺 𑀉𑀘𑁆𑀙𑀼𑀭𑀲𑀁 𑀆𑀤𑀺𑀁 𑀓𑀢𑁆𑀯𑀸’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀬𑀤𑀺 ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸’’𑀢𑀺 𑀯𑀘𑀦𑁂𑀦 𑀉𑀘𑁆𑀙𑀼𑀭𑀲𑁄 𑀨𑀸𑀡𑀺𑀢𑀁 𑀲𑀺𑀬𑀸, ‘‘𑀅𑀧𑀓𑁆𑀓𑀸 𑀯𑀸’’𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀅𑀧𑀓𑁆𑀓𑀯𑀘𑀦𑁂𑀦 𑀉𑀘𑁆𑀙𑀼𑀭𑀲𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀅𑀣 ‘‘𑀧𑀓𑁆𑀓𑀸 𑀯𑀸’’𑀢𑀺 𑀯𑀘𑀦𑁂𑀦 𑀉𑀘𑁆𑀙𑀼𑀭𑀲𑁄 𑀨𑀸𑀡𑀺𑀢𑀦𑁆𑀢𑀺 𑀲𑀺𑀤𑁆𑀥𑀁, ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸’’𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀦𑁆𑀢𑀺 𑀉𑀢𑁆𑀢𑀭𑀁 𑀯𑀼𑀢𑁆𑀢𑀁, 𑀢𑀁 𑀅𑀦𑀼𑀢𑁆𑀢𑀭𑀦𑁆𑀢𑀺 𑀲𑀸𑀥𑀺𑀢𑀁 𑀳𑁄𑀢𑀺. 𑀲𑁄 𑀘𑁂𑀢𑁂𑀳𑀺 𑀅𑀧𑀓𑁆𑀓𑀸 𑀯𑀸𑀢𑀺 𑀲𑀸𑀫𑀁 𑀪𑀺𑀓𑁆𑀔𑀼𑀦𑀸 𑀅𑀧𑀓𑁆𑀓𑀸 𑀯𑀸. 𑀅𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸𑀢𑀺 𑀪𑀺𑀓𑁆𑀔𑀼𑀦𑀸𑀯 𑀲𑀸𑀫𑀁 𑀯𑀺𑀦𑀸 𑀯𑀢𑁆𑀣𑀼𑀦𑀸 𑀧𑀓𑁆𑀓𑀸 𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀅𑀜𑁆𑀜𑀣𑀸 ‘‘𑀲𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄, 𑀲𑁄 𑀤𑀼𑀝𑁆𑀞𑀼 𑀤𑀲𑁆𑀲𑀺𑀢𑁄. 𑀓𑀲𑁆𑀫𑀸? 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀛𑀸𑀫𑀉𑀘𑁆𑀙𑀼𑀨𑀸𑀡𑀺𑀢𑀁 𑀯𑀸 𑀓𑁄𑀝𑁆𑀝𑀺𑀢𑀉𑀘𑁆𑀙𑀼𑀨𑀸𑀡𑀺𑀢𑀁 𑀯𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, ‘‘𑀲𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸’’𑀢𑀺 𑀯𑀘𑀦𑀲𑁆𑀲 𑀘 𑀮𑀤𑁆𑀥𑀺𑀯𑀺𑀭𑁄𑀥𑀢𑁄 𑀅𑀯𑀼𑀢𑁆𑀢𑀢𑁆𑀢𑀸. ‘‘𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘𑀏𑀢𑀁 𑀲𑀯𑀢𑁆𑀣𑀼𑀓𑀧𑀓𑁆𑀓𑀁 𑀯𑀝𑁆𑀝𑀢𑀺 𑀦𑁄 𑀯𑀝𑁆𑀝𑀢𑀻’𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 ‘𑀉𑀘𑁆𑀙𑀼𑀨𑀸𑀡𑀺𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀦𑁄 𑀯𑀝𑁆𑀝𑀦𑀓𑀁 𑀦𑀸𑀫 𑀦𑀢𑁆𑀣𑀻’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩) 𑀯𑀼𑀢𑁆𑀢𑀢𑁆𑀢𑀸 𑀘 𑀲𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸𑀢𑀺 𑀅𑀢𑁆𑀣𑁄 𑀘 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀤𑁆𑀤𑀲𑁆𑀲𑀺𑀢𑁄𑀢𑀺 𑀲𑀺𑀤𑁆𑀥𑀁. 𑀆𑀳𑀸𑀭𑀢𑁆𑀣𑀦𑁆𑀢𑀺 𑀆𑀳𑀸𑀭𑀧𑀬𑁄𑀚𑀦𑀁. 𑀆𑀳𑀸𑀭𑀓𑀺𑀘𑁆𑀘𑀁 𑀬𑀸𑀧𑀦𑀦𑁆𑀢𑀺 𑀅𑀢𑁆𑀣𑁄𑀢𑀺 𑀘.

𑁨𑁬𑁨. 𑀢𑁂𑀮𑀧𑀭𑀺𑀪𑁄𑀕𑁂𑀦𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀧𑀭𑀺𑀪𑁄𑀕𑁂𑀦.

𑁨𑁬𑁩. 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀏𑀢𑁆𑀣 𑀲𑀢𑀺𑀧𑀘𑁆𑀘𑀬𑀢𑀸 𑀕𑀺𑀮𑀸𑀦𑀸𑀕𑀺𑀮𑀸𑀦𑀯𑀲𑁂𑀦 𑀤𑁆𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀳𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀅𑀯𑀺𑀲𑁂𑀲𑁂𑀦 𑀲𑀢𑀺𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸. 𑀇𑀫𑀲𑁆𑀫𑀺𑀁 𑀔𑀦𑁆𑀥𑀓𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀕𑀼𑀴𑀁, 𑀅𑀕𑀺𑀮𑀸𑀦𑀲𑁆𑀲 𑀕𑀼𑀴𑁄𑀤𑀓𑀁, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀮𑁄𑀡𑀲𑁄𑀯𑀻𑀭𑀓𑀁, 𑀅𑀕𑀺𑀮𑀸𑀦𑀲𑁆𑀲 𑀉𑀤𑀓𑀲𑀫𑁆𑀪𑀺𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀺𑀤𑁆𑀥𑀁 𑀲𑀢𑀺𑀧𑀘𑁆𑀘𑀬𑀢𑀸 𑀕𑀺𑀮𑀸𑀦𑀸𑀕𑀺𑀮𑀸𑀦𑀯𑀲𑁂𑀦 𑀤𑀼𑀯𑀺𑀥𑀸𑀢𑀺. 𑀅𑀜𑁆𑀜𑀣𑀸 𑀅𑀲𑀢𑀺 𑀧𑀘𑁆𑀘𑀬𑁂 𑀕𑀼𑀴𑁄𑀤𑀓𑀸𑀤𑀻𑀲𑀼 𑀆𑀧𑀚𑁆𑀚𑀢𑀺. 𑀢𑀢𑁄 𑀘 𑀧𑀸𑀴𑀺𑀯𑀺𑀭𑁄𑀥𑁄.

𑀧𑀺𑀝𑁆𑀞𑁂𑀳𑀻𑀢𑀺 𑀧𑀺𑀲𑀺𑀢𑀢𑁂𑀮𑁂𑀳𑀺. 𑀓𑁄𑀝𑁆𑀞𑀨𑀮𑀦𑁆𑀢𑀺 𑀓𑁄𑀝𑁆𑀞𑀭𑀼𑀓𑁆𑀔𑀲𑁆𑀲 𑀨𑀮𑀁. ‘‘𑀫𑀤𑀦𑀨𑀮𑀁 𑀯𑀸’’𑀢𑀺 𑀘 𑀮𑀺𑀔𑀺𑀢𑀁. 𑀳𑀺𑀗𑁆𑀕𑀼𑀚𑀢𑀼 𑀦𑀸𑀫 𑀳𑀺𑀗𑁆𑀕𑀼𑀭𑀼𑀓𑁆𑀔𑀲𑁆𑀲 𑀤𑀡𑁆𑀟𑀧𑀮𑁆𑀮𑀯𑀧𑀯𑀸𑀴𑀧𑀸𑀓𑀦𑀺𑀧𑁆𑀨𑀦𑁆𑀦𑀸. 𑀳𑀺𑀗𑁆𑀕𑀼𑀲𑀺𑀧𑀸𑀝𑀺𑀓𑀸 𑀦𑀸𑀫 𑀢𑀲𑁆𑀲 𑀫𑀽𑀮𑀲𑀸𑀔𑀧𑀸𑀓𑀦𑀺𑀧𑁆𑀨𑀦𑁆𑀦𑀸. 𑀢𑀓𑀁 𑀦𑀸𑀫 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀢𑀘𑀧𑀸𑀓𑁄𑀤𑀓𑀁. 𑀢𑀓𑀧𑀢𑁆𑀢𑀻𑀢𑀺 𑀢𑀲𑁆𑀲 𑀧𑀢𑁆𑀢𑀧𑀸𑀓𑁄𑀤𑀓𑀁. 𑀢𑀓𑀧𑀡𑁆𑀡𑀻𑀢𑀺 𑀢𑀲𑁆𑀲 𑀨𑀮𑀧𑀸𑀓𑁄𑀤𑀓𑀁. 𑀅𑀣 𑀯𑀸 ‘‘𑀢𑀓𑀁 𑀦𑀸𑀫 𑀮𑀸𑀔𑀸. 𑀢𑀓𑀧𑀢𑁆𑀢𑀻𑀢𑀺 𑀓𑀺𑀢𑁆𑀢𑀺𑀫𑀮𑁄𑀫𑀮𑀸𑀔𑀸. 𑀢𑀓𑀧𑀡𑁆𑀡𑀻𑀢𑀺 𑀧𑀓𑁆𑀓𑀮𑀸𑀔𑀸’’𑀢𑀺 𑀮𑀺𑀔𑀺𑀢𑀁. 𑀉𑀩𑁆𑀪𑀺𑀤𑀁 𑀦𑀸𑀫 𑀊𑀲𑀧𑀁𑀲𑀼𑀫𑀬𑀁.

𑁨𑁬𑁪. 𑀙𑀓𑀡𑀁 𑀕𑁄𑀫𑀬𑀁. 𑀧𑀸𑀓𑀢𑀺𑀓𑀘𑀼𑀡𑁆𑀡𑀁 𑀦𑀸𑀫 𑀅𑀧𑀓𑁆𑀓𑀓𑀲𑀸𑀯𑀘𑀼𑀡𑁆𑀡𑀁, 𑀢𑁂𑀦 ‘‘𑀞𑀧𑁂𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑀁 𑀲𑀩𑁆𑀩𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀘𑀸𑀮𑀺𑀢𑁂𑀳𑀻𑀢𑀺 𑀧𑀭𑀺𑀲𑁆𑀲𑀸𑀯𑀺𑀢𑁂𑀳𑀺.

𑁨𑁬𑁫. 𑀦𑀸𑀦𑀸𑀲𑀫𑁆𑀪𑀸𑀭𑁂𑀳𑀺 𑀓𑀢𑀦𑁆𑀢𑀺 𑀦𑀸𑀦𑁄𑀲𑀥𑁂𑀳𑀺.

𑀕𑀼𑀴𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁭𑁪. 𑀲𑀸𑀫𑀁 𑀧𑀓𑁆𑀓𑀁 𑀲𑀫𑀧𑀓𑁆𑀓𑀦𑁆𑀢𑀺 𑀤𑀼𑀯𑀺𑀥𑀁 𑀯𑀺𑀬 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀔𑀻𑀭𑀸𑀤𑀻𑀲𑀼 𑀉𑀡𑁆𑀳𑀫𑀢𑁆𑀢𑀫𑁂𑀯 𑀧𑀸𑀓𑁄. 𑀢𑁂𑀦 𑀉𑀢𑁆𑀢𑀡𑁆𑀟𑀼𑀮𑀸𑀤𑀺𑀲𑀫𑀸𑀦𑀸 𑀳𑁄𑀦𑁆𑀢𑀺.

𑁨𑁭𑁬-𑁮. ‘‘𑀩𑀼𑀤𑁆𑀥𑀧𑁆𑀧𑀫𑀼𑀔’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 ‘𑀪𑀺𑀓𑁆𑀔𑀼𑀲𑀗𑁆𑀖𑁄’𑀢𑀺 𑀅𑀯𑀢𑁆𑀯𑀸 ‘𑀲𑀗𑁆𑀖𑁄’𑀢𑀺 𑀯𑀼𑀘𑁆𑀘𑀢𑀺 𑀪𑀕𑀯𑀦𑁆𑀢𑀫𑁆𑀧𑀺 𑀲𑀗𑁆𑀕𑀳𑁂𑀢𑀼’’𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀸𑀕𑁄𑀢𑀺 𑀳𑀢𑁆𑀣𑀻.

𑁨𑁭𑁯. 𑀲𑀫𑁆𑀩𑀸𑀥𑁂𑀢𑀺 𑀯𑀘𑁆𑀘𑀫𑀕𑁆𑀕𑁂 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀧𑀲𑁆𑀲𑀸𑀯𑀫𑀕𑁆𑀕𑁂𑀧𑀺 𑀅𑀦𑀼𑀮𑁄𑀫𑀢𑁄. 𑀤𑀳𑀦𑀁 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀸 𑀯𑀝𑁆𑀝𑀢𑀺. 𑀲𑀢𑁆𑀣𑀯𑀢𑁆𑀢𑀺𑀓𑀫𑁆𑀫𑀸𑀦𑀼𑀮𑁄𑀫𑀢𑁄 𑀦 𑀯𑀝𑁆𑀝𑀢𑀻𑀢𑀺 𑀘𑁂? 𑀦, 𑀧𑀝𑀺𑀓𑁆𑀔𑀺𑀢𑁆𑀢𑀧𑀝𑀺𑀓𑁆𑀔𑁂𑀧𑀸, 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀲𑁆𑀲 𑀢𑀧𑁆𑀧𑀭𑀫𑀢𑀸𑀤𑀻𑀧𑀦𑀢𑁄, 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀧𑀼𑀩𑁆𑀩𑁂 𑀧𑀝𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀲𑀢𑁆𑀣𑀓𑀫𑁆𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀧𑀘𑁆𑀙𑀸 ‘‘𑀦, 𑀪𑀺𑀓𑁆𑀔𑀯𑁂…𑀧𑁂… 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀢𑁆𑀣𑀓𑀫𑁆𑀫𑀲𑁆𑀲 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄. 𑀢𑁂𑀦 𑀲𑀫𑁆𑀩𑀸𑀥𑀲𑁆𑀲 𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑀁 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀦𑀸𑀫. 𑀲𑀢𑁆𑀣𑀯𑀢𑁆𑀢𑀺𑀓𑀫𑁆𑀫𑀢𑁄 𑀉𑀤𑁆𑀥𑀁 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀧𑀼𑀩𑁆𑀩𑁂 𑀲𑀫𑁆𑀩𑀸𑀥𑁂𑀬𑁂𑀯 𑀲𑀢𑁆𑀣𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀧𑀘𑁆𑀙𑀸 𑀲𑀫𑁆𑀩𑀸𑀥𑀲𑁆𑀲 𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑀫𑁆𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀧𑀝𑀺𑀓𑁆𑀔𑁂𑀧𑁄, 𑀦𑁂𑀢𑀭𑀲𑁆𑀲𑀸𑀢𑀺 𑀲𑀺𑀤𑁆𑀥𑀁. 𑀏𑀢𑁆𑀣 ‘‘𑀲𑀢𑁆𑀣𑀁 𑀦𑀸𑀫 𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀬𑁂𑀦 𑀙𑀺𑀦𑁆𑀤𑀢𑀺, 𑀢𑀁 𑀲𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀡𑁆𑀝𑀓𑁂𑀦 𑀯𑀸’’𑀢𑀺𑀆𑀤𑀺. 𑀔𑀸𑀭𑀤𑀸𑀦𑀁 𑀧𑀦𑁂𑀢𑁆𑀣 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀧𑀲𑀸𑀔𑁂 𑀮𑁂𑀧𑀫𑀼𑀔𑁂𑀦 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑁂 𑀧𑀦 ‘‘𑀲𑀢𑁆𑀣𑀓𑀫𑁆𑀫𑀁 𑀯𑀸’’𑀢𑀺 𑀧𑀸𑀞𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀢𑁆𑀣𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. ‘‘𑀯𑀢𑁆𑀣𑀻’’𑀢𑀺 𑀓𑀺𑀭 𑀅𑀕𑁆𑀖𑀺𑀓𑀸 𑀯𑀼𑀘𑁆𑀘𑀢𑀺. 𑀢𑀸𑀬 𑀙𑀺𑀦𑁆𑀤𑀦𑀁 𑀯𑀢𑁆𑀣𑀺𑀓𑀫𑁆𑀫𑀁 𑀦𑀸𑀫𑀸𑀢𑀺 𑀘 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺, 𑀢𑁂 ‘‘𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 𑀧𑀤𑀪𑀸𑀚𑀦𑀻𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀅𑀡𑁆𑀟𑀯𑀼𑀟𑁆𑀠𑀻𑀢𑀺 𑀯𑀸𑀢𑀡𑁆𑀟𑀓𑁄. 𑀆𑀤𑀸𑀦𑀯𑀢𑁆𑀢𑀻𑀢𑀺 𑀆𑀦𑀳𑀯𑀢𑁆𑀢𑀺.

𑀫𑀦𑀼𑀲𑁆𑀲𑀫𑀁𑀲𑀧𑀝𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁨𑁮𑁦. ‘‘𑀦, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀫𑀁𑀲𑀁…𑀧𑁂… 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀝𑀺…𑀧𑁂… 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀅𑀧𑁆𑀧𑀝𑀺𑀯𑁂𑀓𑁆𑀔𑀡𑀤𑀼𑀓𑁆𑀓𑀝𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀜𑁆𑀘𑀸𑀢𑀺 𑀤𑁆𑀯𑁂 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀫𑀁𑀲𑁂𑀧𑀺 𑀅𑀧𑁆𑀧𑀝𑀺𑀯𑁂𑀓𑁆𑀔𑀡𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀫𑁂𑀯. 𑀓𑁂𑀘𑀺 ‘‘𑀫𑀁𑀲𑀪𑀸𑀯𑀁 𑀚𑀸𑀦𑀦𑁆𑀢𑁄𑀯 𑀆𑀧𑀚𑁆𑀚𑀢𑀺. 𑀧𑀽𑀯𑀸𑀤𑀻𑀲𑀼 𑀅𑀚𑀸𑀦𑀦𑁆𑀢𑀲𑁆𑀲 𑀓𑀸 𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺 𑀯𑀤𑀦𑁆𑀢𑀺. 𑀅𑀚𑀸𑀦𑀦𑁆𑀢𑁄𑀧𑀺 𑀆𑀧𑀚𑁆𑀚𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸𑀢𑀺 𑀓𑁂𑀘𑀺.

𑀳𑀢𑁆𑀣𑀺𑀫𑀁𑀲𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁨𑁮𑁧. 𑀇𑀫𑁂𑀲𑀁 …𑀧𑁂… 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀤𑀲𑀦𑁆𑀦𑀫𑁆𑀧𑀺 𑀫𑀦𑀼𑀲𑁆𑀲𑀫𑀁𑀲𑀸𑀤𑀻𑀦𑀁 𑀅𑀓𑀧𑁆𑀧𑀺𑀬𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀦𑀯𑀘𑀦𑀁, 𑀦𑀸𑀧𑀢𑁆𑀢𑀺𑀯𑀺𑀪𑀸𑀕𑀤𑀲𑁆𑀲𑀦𑀯𑀘𑀦𑀁. 𑀬𑀁 𑀓𑀺𑀜𑁆𑀘𑀺 𑀜𑀢𑁆𑀯𑀸 𑀯𑀸 𑀅𑀜𑀢𑁆𑀯𑀸 𑀯𑀸 𑀔𑀸𑀤𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀇𑀤𑀫𑁆𑀧𑀺 𑀅𑀦𑀺𑀬𑀫𑀺𑀢𑀯𑀘𑀦𑀫𑁂𑀯 ‘‘𑀅𑀬𑀁 𑀦𑀸𑀫 𑀆𑀧𑀢𑁆𑀢𑀻’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸. 𑀢𑀤𑀼𑀪𑀬𑀫𑁆𑀧𑀺 𑀳𑁂𑀝𑁆𑀞𑀸 𑀫𑀦𑀼𑀲𑁆𑀲𑀸𑀤𑀻𑀦𑀁 𑀫𑀁𑀲𑀸𑀤𑀻𑀲𑀼 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀕𑀳𑀺𑀢𑀦𑀬𑁂𑀳𑀺 𑀅𑀥𑀺𑀧𑁆𑀧𑀸𑀬𑁄 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀏𑀢𑁂𑀲𑀁 𑀫𑀦𑀼𑀲𑁆𑀲𑀸𑀤𑀻𑀦𑀁 𑀫𑀁𑀲𑀸𑀤𑀻𑀦𑀺 𑀅𑀓𑀧𑁆𑀧𑀺𑀬𑀸𑀦𑀺, 𑀢𑀲𑁆𑀫𑀸 𑀫𑀦𑀼𑀲𑁆𑀲𑀸𑀦𑀁 𑀫𑀁𑀲𑀸𑀤𑀻𑀲𑀼 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺. 𑀲𑁂𑀲𑀸𑀦𑀁 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀸𑀧𑀢𑁆𑀢𑀻𑀢𑀺. 𑀧𑀸𑀞𑁂𑀬𑁂𑀯 𑀳𑀺 𑀮𑁄𑀳𑀺𑀢𑀸𑀤𑀺𑀁 𑀫𑀁𑀲𑀕𑀢𑀺𑀓𑀁 𑀓𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀫𑀁𑀲𑀁…𑀧𑁂… 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑁂𑀯 𑀳𑀢𑁆𑀣𑀸𑀤𑀻𑀦𑀁 𑀫𑀁𑀲𑀸𑀤𑀻𑀲𑀼𑀧𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀧𑀜𑁆𑀜𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀲𑀻𑀳𑀴𑀝𑁆𑀞𑀓𑀣𑀸𑀬𑀁 ‘‘𑀫𑀦𑀼𑀲𑁆𑀲𑀫𑀁𑀲𑁂 𑀯𑀸 𑀓𑁂𑀲𑁂 𑀯𑀸 𑀦𑀔𑁂 𑀯𑀸 𑀅𑀝𑁆𑀞𑀺𑀫𑁆𑀳𑀺 𑀯𑀸 𑀮𑁄𑀳𑀺𑀢𑁂 𑀯𑀸 𑀣𑀼𑀮𑁆𑀮𑀘𑁆𑀘𑀬𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀏𑀯 𑁋

‘‘𑀅𑀝𑁆𑀞𑀺𑀧𑀺 𑀮𑁄𑀳𑀺𑀢𑀁 𑀘𑀫𑁆𑀫𑀁, 𑀮𑁄𑀫𑀫𑁂𑀲𑀁 𑀦 𑀓𑀧𑁆𑀧𑀢𑀻’’𑀢𑀺. 𑁋

𑀔𑀼𑀤𑁆𑀤𑀲𑀺𑀓𑁆𑀔𑀸𑀕𑀸𑀣𑀸𑀧𑀤𑀲𑁆𑀲 𑀅𑀢𑁆𑀣𑁄 𑀘 𑀅𑀥𑀺𑀧𑁆𑀧𑀸𑀬𑁄 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺. 𑀧𑀝𑀺𑀕𑁆𑀕𑀳𑀡𑁂𑀢𑀺 𑀏𑀢𑁆𑀣 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. ‘‘𑀉𑀤𑀓𑀫𑀦𑀼𑀲𑁆𑀲𑀸𑀤𑀺𑀫𑀁𑀲𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀦𑀸𑀕𑀭𑀸𑀚𑁂𑀦 𑀯𑀼𑀢𑁆𑀢𑀸𑀤𑀻𑀦𑀯𑁂 𑀲𑀢𑀺𑀧𑀺 𑀉𑀚𑁆𑀛𑀸𑀬𑀦𑀸𑀥𑀺𑀓𑀸𑀭𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀧𑀝𑀺𑀓𑀽𑀮𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀬𑀸𑀕𑀼𑀫𑀥𑀼𑀕𑁄𑀴𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁮𑁩. 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄𑀢𑀺 𑀇𑀤𑀁 𑀲𑀗𑁆𑀕𑀻𑀢𑀺𑀓𑀸𑀭𑀓𑀯𑀘𑀦𑀁. 𑀦 𑀳𑀺 𑀪𑀕𑀯𑀸 𑀢𑀫𑁂𑀯 𑀲𑀺𑀓𑁆𑀔𑀸𑀧𑀤𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀜𑁆𑀜𑀧𑁂𑀲𑀺, 𑀏𑀯𑀁 𑀏𑀯𑀭𑀽𑀧𑁂𑀲𑀽𑀢𑀺 𑀏𑀓𑁂. 𑀧𑀞𑀫𑀧𑀜𑁆𑀜𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀦 𑀘 𑀢𑁂 𑀪𑀺𑀓𑁆𑀔𑀽 𑀲𑀸𑀧𑀢𑁆𑀢𑀺𑀓𑀸 𑀚𑀸𑀢𑀸. 𑀓𑀣𑀁? 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸. ‘‘𑀅𑀧𑀺𑀘 𑀫𑀬𑀁 𑀓𑀸𑀮𑀲𑁆𑀲𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀫𑀸𑀢𑀺𑀓𑀸𑀯𑀺𑀪𑀗𑁆𑀕𑁂 (𑀧𑀸𑀘𑀺. 𑁨𑁨𑁭) 𑀘 ‘‘𑀧𑀭𑀫𑁆𑀧𑀭𑀪𑁄𑀚𑀦𑀁 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑁄, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀏𑀢𑀁 𑀧𑀭𑀫𑁆𑀧𑀭𑀪𑁄𑀚𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀜𑁆𑀜𑀁 𑀪𑁄𑀚𑀦𑀁 𑀦𑀸𑀫 𑀦𑀺𑀫𑀦𑁆𑀢𑀦𑀢𑁄 𑀮𑀤𑁆𑀥𑀁 𑀬𑀁 𑀓𑀺𑀜𑁆𑀘𑀻𑀢𑀺 𑀲𑀺𑀤𑁆𑀥𑀁. 𑀬𑀲𑁆𑀫𑀸 𑀦 𑀪𑁄𑀚𑁆𑀚𑀬𑀸𑀕𑀼𑀦𑀺𑀫𑀦𑁆𑀢𑀦𑀢𑁄 𑀮𑀤𑁆𑀥𑀪𑁄𑀚𑀦𑀁, 𑀢𑀲𑁆𑀫𑀸 ‘‘𑀏𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 𑀢𑁂 𑀪𑀺𑀓𑁆𑀔𑀽 𑀧𑀭𑀺𑀪𑀼𑀜𑁆𑀚𑀺𑀁𑀲𑀽𑀢𑀺. 𑀏𑀢𑁆𑀣 ‘‘𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀅𑀜𑁆𑀜𑀦𑀺𑀫𑀦𑁆𑀢𑀦𑀢𑁄 𑀮𑀤𑁆𑀥𑀪𑁄𑀚𑀦𑀫𑁂𑀯 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀦𑁂𑀢𑀭𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀦𑀺𑀘𑁆𑀘𑀪𑀢𑁆𑀢𑁂 𑀲𑀮𑀸𑀓𑀪𑀢𑁆𑀢𑁂 𑀧𑀓𑁆𑀔𑀺𑀓𑁂 𑀉𑀧𑁄𑀲𑀣𑀺𑀓𑁂 𑀧𑀸𑀝𑀺𑀧𑀤𑀺𑀓𑁂’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀯𑁂𑀲𑀸𑀮𑀺𑀬𑀸 𑀧𑀜𑁆𑀜𑀢𑁆𑀢𑀓𑀸𑀮𑁂 𑀦𑀢𑁆𑀣𑀺, 𑀬𑀤𑀺 𑀅𑀢𑁆𑀣𑀺, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀫𑀸𑀢𑀺𑀓𑀸𑀯𑀺𑀪𑀗𑁆𑀕𑀯𑀺𑀭𑁄𑀥𑁄, 𑀢𑀲𑁆𑀫𑀸 ‘‘𑀅𑀧𑀺𑀘 𑀫𑀬𑀁 𑀓𑀸𑀮𑀲𑁆𑀲𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀢𑁆𑀢𑀸, 𑀧𑀤𑀪𑀸𑀚𑀦𑁂𑀧𑀺 ‘‘𑀅𑀜𑁆𑀜𑀁 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀘 𑀧𑀞𑀫𑀁 𑀯𑀸 𑀧𑀘𑁆𑀙𑀸 𑀯𑀸 𑀦𑀺𑀫𑀦𑁆𑀢𑀺𑀢𑀁 𑀪𑁄𑀚𑀦𑀁 𑀞𑀧𑁂𑀢𑁆𑀯𑀸 𑀅𑀦𑀺𑀫𑀦𑁆𑀢𑀺𑀢𑀫𑁂𑀯 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀦𑁂𑀢𑀭𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀆𑀧𑀦𑁆𑀦𑀁, ‘‘𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀦𑀺𑀫𑀦𑁆𑀢𑀺𑀢𑁂𑀦 𑀅𑀜𑁆𑀜𑀲𑁆𑀲 𑀪𑁄𑀚𑁆𑀚𑀬𑀸𑀕𑀼 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀧𑀞𑀫𑀦𑀺𑀫𑀦𑁆𑀢𑀺𑀢𑀪𑁄𑀚𑀦𑀢𑁄 𑀅𑀜𑁆𑀜𑀁 𑀧𑀘𑁆𑀙𑀸 𑀮𑀤𑁆𑀥𑀁 𑀦𑀺𑀫𑀦𑁆𑀢𑀺𑀢𑀪𑁄𑀚𑀦𑀁, 𑀦𑀺𑀘𑁆𑀘𑀪𑀢𑁆𑀢𑀸𑀤𑀻𑀦𑀺 𑀘 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀆𑀧𑀚𑁆𑀚𑀫𑀸𑀦𑀁 𑀯𑀺𑀬 𑀚𑀸𑀢𑀦𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀁, 𑀅𑀦𑀺𑀫𑀦𑁆𑀢𑀦𑀪𑁄𑀚𑀦𑁂 𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀜𑁆𑀘 𑀓𑀭𑁄𑀦𑁆𑀢𑁄, 𑀧𑀞𑀫𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀫𑁂𑀯 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀧𑀭𑀺𑀡𑀸𑀫𑁂𑀦𑁆𑀢𑁄 𑀘 ‘‘𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀪𑀕𑀯𑀸 𑀆𑀳, 𑀢𑀲𑁆𑀫𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀸 𑀦𑀺𑀫𑀦𑁆𑀢𑀦𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺. 𑀢𑁂𑀲𑀼 𑀦 𑀦𑀺𑀘𑁆𑀘𑀪𑀢𑁆𑀢𑀸𑀤𑀻𑀦𑀻𑀢𑀺 𑀆𑀧𑀦𑁆𑀦𑀁. 𑀢𑁂𑀦𑁂𑀯𑀸𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀦𑀺𑀘𑁆𑀘𑀪𑀢𑁆𑀢𑁂’’𑀢𑀺𑀆𑀤𑀻𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀗𑁆𑀕𑀸𑀬𑀺. 𑀅𑀥𑀺𑀧𑁆𑀧𑀸𑀬𑀜𑁆𑀜𑀽 𑀳𑀺 𑀢𑁂 𑀫𑀳𑀸𑀦𑀸𑀕𑀸, 𑀢𑀲𑁆𑀫𑀸 𑀧𑀞𑀫𑀫𑁂𑀯 𑀬𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁 ‘‘𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀁, 𑀧𑀘𑁆𑀙𑀸𑀧𑀺 𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑁂𑀦 𑀅𑀪𑁄𑀚𑀦𑀁 𑀫𑀥𑀼𑀕𑁄𑀴𑀓𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 𑀪𑁄𑀚𑁆𑀚𑀬𑀸𑀕𑀼 𑀏𑀯 𑀯𑀼𑀢𑁆𑀢𑀸𑀢𑀺 𑀏𑀯𑀁 𑀆𑀘𑀭𑀺𑀬𑁄.

𑀏𑀢𑁆𑀣𑀸𑀳 𑁋 𑀬𑀣𑀸 𑀧𑀘𑁆𑀙𑀸𑀮𑀤𑁆𑀥𑀮𑁂𑀲𑁂𑀦 𑀣𑁂𑀭𑁂𑀦 𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀧𑀓𑁆𑀔𑁂𑀧𑁄 𑀓𑀢𑁄, 𑀏𑀯𑀁 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 𑀧𑀭𑀫𑁆𑀧𑀭𑀪𑁄𑀚𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀙 𑀓𑀧𑁆𑀧𑀺𑀲𑁆𑀲𑀦𑁆𑀢𑀻’’𑀢𑀺 𑀓𑀺𑀫𑀢𑁆𑀣𑀁 𑀦 𑀯𑀼𑀘𑁆𑀘𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀣𑀸𑀯𑀼𑀢𑁆𑀢𑀮𑁂𑀲𑀦𑀺𑀤𑀲𑁆𑀲𑀦𑀢𑁆𑀣𑀁. 𑀅𑀜𑁆𑀜𑀣𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀯𑁂𑀲𑀸𑀮𑀺𑀬𑀁, 𑀅𑀦𑁆𑀥𑀓𑀯𑀺𑀦𑁆𑀤𑁂 𑀘𑀸𑀢𑀺 𑀉𑀪𑀬𑀢𑁆𑀣 𑀉𑀧𑀟𑁆𑀠𑀼𑀧𑀟𑁆𑀠𑁂𑀦 𑀧𑀜𑁆𑀜𑀢𑁆𑀢𑀁 𑀲𑀺𑀬𑀸. 𑀦𑁄 𑀘𑁂, 𑀲𑀸𑀧𑀢𑁆𑀢𑀺𑀓𑀸 𑀪𑀺𑀓𑁆𑀔𑀽 𑀲𑀺𑀬𑀼𑀁, 𑀦 𑀘 𑀢𑁂 𑀲𑀸𑀧𑀢𑁆𑀢𑀺𑀓𑀸 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁂𑀧𑀺 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀤𑀲𑁆𑀲𑀦𑀢𑁄. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀽𑀦𑀁 𑀤𑁂𑀳𑀻𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 ‘‘𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀪𑀕𑀯𑀢𑁄 𑀆𑀡𑀢𑁆𑀢𑀺𑀬𑀸 𑀧𑀭𑀺𑀪𑀼𑀢𑁆𑀢𑀸𑀦𑀫𑁆𑀧𑀺 ‘‘𑀑𑀤𑀺𑀲𑁆𑀲𑀓𑀁 𑀦𑀼 𑀔𑁄 𑀇𑀤𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀯𑀺𑀫𑀢𑀺𑀧𑁆𑀧𑀢𑁆𑀢𑀸𑀦𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀢𑁆𑀣𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀫𑀺𑀥𑀸𑀧𑁂𑀢𑁂 𑀧𑀜𑁆𑀜𑀢𑁆𑀢𑀁 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀑𑀫𑀤𑁆𑀤𑀺𑀢𑁆𑀯𑀸 𑀧𑀭𑀫𑁆𑀧𑀭𑀪𑁄𑀚𑀦𑀁 𑀓𑀣𑀁 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻𑀢𑀺. 𑀏𑀢𑁆𑀣𑀸𑀳𑀼 𑀓𑁂𑀘𑀺 𑀆𑀘𑀭𑀺𑀬𑀸 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂𑀦𑁂𑀯 ‘‘𑀅𑀜𑁆𑀜𑀲𑁆𑀲 𑀪𑁄𑀚𑀦𑀁 𑀦 𑀓𑀧𑁆𑀧𑀢𑀻’’𑀢𑀺 𑀚𑀸𑀦𑀦𑁆𑀢𑀸𑀧𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀸𑀕𑀼𑀜𑁆𑀘𑀸’’𑀢𑀺 𑀯𑀺𑀲𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀧𑀝𑀕𑁆𑀕𑀺𑀤𑀸𑀦𑀫𑀳𑀸𑀯𑀺𑀓𑀝𑀸𑀤𑀺 𑀯𑀺𑀬 𑀓𑀧𑁆𑀧𑀢𑀻’’𑀢𑀺 𑀲𑀜𑁆𑀜𑀸𑀬 𑀪𑀼𑀜𑁆𑀚𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑀺𑀘 𑀫𑀬𑀁 𑀓𑀸𑀮𑀲𑁆𑀲𑁂𑀯 𑀪𑁄𑀚𑁆𑀚𑀬𑀸𑀕𑀼𑀬𑀸 𑀥𑀸𑀢𑀸’’𑀢𑀺𑀆𑀤𑀺, 𑀢𑀁 𑀅𑀬𑀼𑀢𑁆𑀢𑀁 𑀢𑀢𑁆𑀣 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀫𑀸𑀢𑀺𑀓𑀸𑀯𑀺𑀪𑀗𑁆𑀕𑀯𑀺𑀭𑁄𑀥𑁂𑀦 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀦𑀺𑀘𑁆𑀘𑀪𑀢𑁆𑀢𑀸𑀤𑀻𑀦𑀁 𑀅𑀲𑀫𑁆𑀪𑀯𑀧𑁆𑀧𑀲𑀗𑁆𑀕𑀢𑁄, 𑀪𑀺𑀓𑁆𑀔𑀽𑀦𑀁 𑀲𑀸𑀧𑀢𑁆𑀢𑀺𑀓𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄, 𑀫𑀺𑀘𑁆𑀙𑀸𑀕𑀸𑀳𑀳𑁂𑀢𑀼𑀧𑁆𑀧𑀲𑀗𑁆𑀕𑁂𑀦 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀧𑁆𑀧𑀲𑀗𑁆𑀕𑀢𑁄 𑀘. 𑀢𑁂 𑀳𑀺 𑀪𑀺𑀓𑁆𑀔𑀽 𑀬𑀲𑁆𑀫𑀸 𑀪𑀕𑀯𑀸 𑀓𑀢𑁆𑀣𑀘𑀺 𑀯𑀺𑀦𑀬𑀯𑀲𑁂𑀦 𑀓𑀧𑁆𑀧𑀺𑀬𑀫𑁆𑀧𑀺 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁯𑁪; 𑀲𑀼. 𑀦𑀺. 𑁮𑁧; 𑀫𑀺. 𑀧. 𑁪.𑁫.𑁯) 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀲𑁆𑀫𑀸 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀧𑀢𑀺 ‘‘𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑀺𑀓𑁆𑀔𑀸𑀧𑀤𑀁 𑀧𑀢𑀺 𑀪𑀕𑀯𑀸𑀧𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀢𑁆𑀣𑀫𑁂𑀯 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀸𑀕𑀼𑀜𑁆𑀘𑀸’’𑀢𑀺 𑀆𑀳. 𑀤𑀼𑀭𑀯𑀕𑁆𑀕𑀸𑀳𑁄 𑀳𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀳𑀺 𑀪𑀸𑀭𑀤𑁆𑀯𑀸𑀚𑀲𑁆𑀲 𑀧𑀸𑀬𑀸𑀲𑀁 𑀅𑀪𑁄𑀚𑀦𑁂𑀬𑁆𑀬𑀦𑁆𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄 𑀧𑀝𑀺𑀓𑁆𑀔𑀺𑀧𑀺. 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀲𑀚𑁆𑀚𑀺𑀢𑀁 𑀢𑁂𑀓𑀝𑀼𑀮𑀬𑀸𑀕𑀼𑀁 𑀧𑀦 ‘‘𑀬𑀤𑀧𑀺, 𑀆𑀦𑀦𑁆𑀤, 𑀯𑀺𑀜𑁆𑀜𑀢𑁆𑀢𑀁, 𑀢𑀤𑀧𑀺 𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀬𑀤𑀧𑀺, 𑀆𑀦𑀦𑁆𑀤, 𑀅𑀦𑁆𑀢𑁄𑀯𑀼𑀢𑁆𑀣’’𑀦𑁆𑀢𑀺𑀆𑀤𑀺𑀫𑁂𑀯𑀸𑀳. 𑀢𑁂𑀦 𑀦𑁄 𑀘𑁂 𑀢𑀁 𑀅𑀦𑁆𑀢𑁄𑀯𑀼𑀢𑁆𑀣𑀁 𑀓𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑀤𑀲𑁆𑀲𑀦𑁂𑀦 𑀧𑀡𑀻𑀢𑀪𑁄𑀚𑀦𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀺 𑀉𑀧𑀢𑁆𑀣𑀫𑁆𑀪𑁂𑀢𑀺 𑀪𑀕𑀯𑀢𑁄𑀧𑀺 𑀓𑀧𑁆𑀧𑀢𑀺, 𑀧𑀕𑁂𑀯 𑀅𑀫𑁆𑀳𑀸𑀓𑀦𑁆𑀢𑀺.

𑁨𑁮𑁪. 𑀕𑀺𑀮𑀸𑀦𑀲𑁆𑀲𑁂𑀯 𑀪𑀕𑀯𑀢𑀸 𑀕𑀼𑀴𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑀸𑀬𑀦𑀻𑀬𑀸𑀦𑀻’’𑀢𑀺 (𑀧𑀸𑀭𑀸. 𑁬𑁨𑁨) 𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀢𑁂 𑀇𑀥 𑀧𑀝𑀺𑀕𑁆𑀕𑀳𑀡𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀁𑀲𑀼. 𑀇𑀥 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀕𑀼𑀴𑁄𑀤𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀼𑀴𑀸𑀥𑀺𑀓𑀸𑀭𑀢𑁆𑀢𑀸 𑀧𑀼𑀩𑁆𑀩𑁂 𑀅𑀦𑀼𑀜𑁆𑀜𑀸𑀢𑀜𑁆𑀘 𑀯𑀢𑁆𑀯𑀸 𑀅𑀕𑀺𑀮𑀸𑀦𑀲𑁆𑀲 𑀕𑀼𑀴𑁄𑀤𑀓𑀁 𑀅𑀦𑀼𑀜𑁆𑀜𑀸𑀢𑀁, 𑀢𑁂𑀦 𑀕𑀺𑀮𑀸𑀦𑁂𑀦 𑀲𑀢𑀺 𑀧𑀘𑁆𑀘𑀬𑁂 𑀕𑀼𑀴𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄, 𑀕𑀼𑀴𑁄𑀤𑀓𑀁 𑀅𑀲𑀢𑀺 𑀧𑀘𑁆𑀘𑀬𑁂𑀧𑀺 𑀯𑀝𑁆𑀝𑀢𑀻𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀻𑀧𑁂𑀢𑀺. 𑀢𑀢𑁆𑀣 ‘‘𑀕𑀼𑀴𑁄𑀤𑀓𑀁 𑀓𑀸𑀮𑀺𑀓𑁂𑀲𑀼 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀪𑀕𑀯𑀢𑀸 𑀑𑀤𑀺𑀲𑁆𑀲𑀸𑀦𑀼𑀜𑁆𑀜𑀸𑀢𑀢𑁆𑀢𑀸 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀦 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀉𑀤𑀓𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀪𑀸𑀯𑀁 𑀚𑀳𑀢𑀺. ‘‘𑀬𑀣𑀸 𑀅𑀫𑁆𑀩𑀸𑀤𑀺 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀬𑀸𑀫𑀓𑀸𑀮𑀺𑀓𑀁 𑀚𑀸𑀢𑀁, 𑀢𑀣𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀚𑀳𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑁂 𑀬𑀸𑀯𑀚𑀻𑀯𑀺𑀓𑁂 𑀞𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁, 𑀢𑀜𑁆𑀘 𑀪𑀕𑀯𑀢𑀸 𑀑𑀤𑀺𑀲𑁆𑀲𑀸𑀦𑀼𑀜𑁆𑀜𑀸𑀢𑀢𑁆𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀪𑀸𑀯𑁂 𑀤𑁄𑀲𑁄 𑀦𑀢𑁆𑀣𑀺. ‘‘𑀕𑀼𑀴𑁄𑀤𑀓’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀤𑀓𑀕𑀢𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀤𑀺 𑀉𑀤𑀓𑀫𑀺𑀲𑁆𑀲𑀁 𑀉𑀤𑀓𑀕𑀢𑀺𑀓𑀁 𑀳𑁄𑀢𑀺, 𑀫𑀥𑀼𑀧𑀺 𑀲𑀺𑀬𑀸 𑀢𑀁 𑀢𑀣𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀫𑀸 𑀳𑁄𑀢𑀼, 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀲𑀺𑀬𑀸 𑀉𑀤𑀓𑀕𑀢𑀺𑀓𑀢𑁆𑀢𑀸, 𑀢𑀜𑁆𑀘 𑀦 𑀳𑁄𑀢𑀺, ‘‘𑀲𑀩𑁆𑀩𑀢𑁆𑀣𑀸𑀧𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑁨𑁮𑁫. 𑀲𑀼𑀜𑁆𑀜𑀸𑀕𑀸𑀭𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁.

𑀓𑀧𑁆𑀧𑀺𑀬𑀪𑀽𑀫𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁫. 𑀑𑀭𑀯𑀲𑀤𑁆𑀤𑀦𑁆𑀢𑀺 𑀫𑀳𑀸𑀲𑀤𑁆𑀤𑀁. 𑀩𑀳𑀽𑀳𑀺 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀏𑀢𑁆𑀣 𑀏𑀓𑁂𑀦𑀸𑀧𑀺 𑀯𑀝𑁆𑀝𑀢𑀺. ‘‘𑀩𑀳𑀽𑀲𑀼 𑀏𑀓𑀲𑁆𑀲𑀧𑀺 𑀯𑀘𑀦𑁂𑀦 𑀲𑀳 𑀲𑀺𑀬𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀆𑀫𑀲𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀸𑀫𑀲𑀺𑀢𑁂 𑀦 𑀯𑀝𑁆𑀝𑀢𑀺. ‘‘𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀯𑀘𑀦𑁂𑀦 𑀲𑁂𑀲𑀸𑀧𑀺 𑀅𑀦𑀼𑀜𑁆𑀜𑀸𑀢𑀸. ‘‘𑀪𑀺𑀢𑁆𑀢𑀺𑀜𑁆𑀘𑁂 𑀉𑀧𑀲𑀦𑁆𑀢𑁂 𑀧𑀘𑁆𑀙𑀸 𑀢𑀁 𑀧𑀽𑀭𑁂𑀦𑁆𑀢𑀺, 𑀢𑀢𑁆𑀣 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀓𑀢𑀺𑀪𑀽𑀫𑀺𑀬𑀁𑀬𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀉𑀧𑀭𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀝𑁆𑀞𑀓𑀸𑀤𑀻𑀳𑀺 𑀓𑀢𑀸𑀘𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀺𑀭𑀼𑀚𑁆𑀛𑀢𑀺 𑀯𑀺𑀬. 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀯𑀸𑀢𑀺 𑀏𑀢𑁆𑀣 ‘‘𑀅𑀲𑀢𑀺𑀬𑀸 𑀅𑀦𑀥𑀺𑀝𑁆𑀞𑀺𑀢𑀸𑀬 𑀲𑀭𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀘𑁂 𑀉𑀧𑀭𑀺 𑀅𑀥𑀺𑀝𑁆𑀞𑀺𑀢𑀸, 𑀳𑁂𑀝𑁆𑀞𑀸 𑀞𑀺𑀢𑀁 𑀪𑀡𑁆𑀟𑀁 𑀅𑀓𑀧𑁆𑀧𑀺𑀬𑀁, 𑀉𑀧𑀭𑀺𑀝𑁆𑀞𑀺𑀢𑀫𑁂𑀯 𑀓𑀧𑁆𑀧𑀺𑀬𑀁, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀓𑀧𑁆𑀧𑀺𑀬𑀓𑀼𑀝𑀺 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀁𑀯𑀺𑀥𑁂 𑀧𑀼𑀦 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀸𑀢𑀼𑀁 𑀤𑁂𑀫𑀸𑀢𑀺 𑀏𑀢𑁆𑀣 𑀓𑀧𑁆𑀧𑀺𑀬𑀓𑀼𑀝𑀺𑀓𑀺𑀘𑁆𑀘𑀁 𑀓𑀸𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑁄𑀚𑀦𑀲𑀸𑀮𑀸 𑀧𑀦 𑀲𑁂𑀦𑀸𑀲𑀦𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀓𑀸𑀢𑀩𑁆𑀩𑀦𑁆𑀢𑀺 𑀅𑀧𑀭𑁂. ‘‘𑀅𑀓𑀢𑁂𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

‘‘𑀫𑀼𑀔𑀲𑀦𑁆𑀦𑀺𑀥𑀺 𑀦𑀸𑀫 𑀪𑁄𑀚𑀦𑀓𑀸𑀮𑁂 𑀲𑀦𑁆𑀦𑀺𑀥𑀻’’𑀢𑀺 𑀮𑀺𑀔𑀺𑀢𑀁. 𑀫𑀼𑀔𑀲𑀦𑁆𑀦𑀺𑀥𑀻𑀢𑀺 𑀢𑀲𑁆𑀲 𑀦𑀸𑀫𑀁. ‘‘𑀬𑀤𑀺 𑀲𑀦𑁆𑀦𑀺𑀥𑀺 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁 𑀪𑀯𑁂𑀬𑁆𑀬, 𑀫𑀼𑀔𑀲𑀦𑁆𑀦𑀺𑀥𑀺 𑀧𑀦 𑀤𑀼𑀓𑁆𑀓𑀝𑀁, 𑀢𑀲𑁆𑀫𑀸 𑀲𑀦𑁆𑀦𑀺𑀥𑀺 𑀅𑀦𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀢𑀲𑁆𑀲 𑀲𑀦𑁆𑀢𑀓𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀥𑀺𑀧𑁆𑀧𑁂𑀢𑀁. 𑀘𑀻𑀯𑀭𑀯𑀺𑀓𑀧𑁆𑀧𑀦𑁂 𑀯𑀺𑀬 𑀓𑀧𑁆𑀧𑀺𑀬𑀫𑀢𑁆𑀢𑀁 𑀜𑀸𑀢𑀩𑁆𑀩𑀦𑁆𑀢𑀺 𑀓𑁂𑀘𑀺.

𑀓𑁂𑀡𑀺𑀬𑀚𑀝𑀺𑀮𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁦𑁦. ‘‘𑀅𑀢𑁆𑀢𑀦𑀸 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀫𑁂𑀯 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀸𑀫𑀡𑁂𑀭𑀸𑀤𑀻𑀳𑀺 𑀧𑀸𑀦𑀓𑀁 𑀓𑀢𑁆𑀯𑀸 𑀤𑀺𑀦𑁆𑀦𑁂 𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀺, 𑀦 𑀧𑀘𑁆𑀙𑀸𑀪𑀢𑁆𑀢𑀁 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀢𑁆𑀣 𑀧𑀼𑀦 𑀧𑀝𑀺𑀕𑁆𑀕𑀳𑀡𑁂 𑀦𑀺𑀤𑁆𑀤𑁄𑀲𑀢𑁆𑀢𑀸, 𑀧𑀼𑀭𑁂𑀪𑀢𑁆𑀢𑀫𑁂𑀯 𑀧𑀝𑀺𑀕𑁆𑀕𑀳𑀡𑀲𑁆𑀲 𑀦𑀺𑀲𑁆𑀲𑀝𑁆𑀞𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀅𑀕𑁆𑀕𑀳𑀺𑀢𑀢𑁆𑀢𑀸 𑀤𑁄𑀲𑁄 𑀦 𑀤𑀺𑀲𑁆𑀲𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀸𑀮𑀽𑀓𑀸 𑀦𑀸𑀫 𑀓𑀦𑁆𑀤𑀸, ‘‘𑀇𑀢𑁄 𑀓𑀺𑀜𑁆𑀘𑀺𑀢𑀓’’𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀨𑀸𑀭𑀼𑀲𑀓𑀦𑁆𑀢𑀺 𑀕𑁄𑀴𑀯𑀺𑀲𑀬𑁂 𑀏𑀓𑁄 𑀭𑀼𑀓𑁆𑀔𑁄’’𑀢𑀺 𑀘 𑀮𑀺𑀔𑀺𑀢𑀁. ‘‘𑀧𑀓𑁆𑀓𑀟𑀸𑀓𑀭𑀲’’𑀦𑁆𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 ‘‘𑀅𑀧𑀓𑁆𑀓𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀯𑀘𑀦𑁂𑀦𑀧𑀺 𑀲𑀺𑀤𑁆𑀥𑀫𑁂𑀯. 𑀢𑀡𑁆𑀟𑀼𑀮𑀥𑁄𑀯𑀦𑁄𑀤𑀓𑀫𑁆𑀧𑀺 𑀥𑀜𑁆𑀜𑀭𑀲𑁄 𑀏𑀯. ‘‘𑀦𑀺𑀓𑁆𑀓𑀲𑀝𑁄 𑀉𑀘𑁆𑀙𑀼𑀭𑀲𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄’’𑀢𑀺 𑀮𑀺𑀔𑀺𑀢𑀁. 𑀲𑀸𑀯𑀺𑀢𑁆𑀢𑀻𑀢𑀺 𑀕𑀸𑀬𑀢𑁆𑀢𑀺. 𑀙𑀦𑁆𑀤𑀲𑁄𑀢𑀺 𑀯𑁂𑀤𑀲𑁆𑀲. ‘‘𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀚𑀺𑀢𑁂𑀦 𑀅𑀓𑀧𑁆𑀧𑀺𑀬𑁂 𑀲𑀫𑀸𑀤𑀧𑁂𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸𑀧𑀺 𑀦 𑀓𑁂𑀯𑀮𑀁 𑀤𑀲𑀲𑀼 𑀏𑀯 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀅𑀣 𑀔𑁄 𑀬𑀁 𑀪𑀺𑀓𑁆𑀔𑀼𑀲𑁆𑀲 𑀦 𑀓𑀧𑁆𑀧𑀢𑀺, 𑀢𑀲𑁆𑀫𑀺𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁.

𑁩𑁦𑁫. 𑀤𑁆𑀯𑁂 𑀧𑀝𑀸 𑀤𑁂𑀲𑀦𑀸𑀫𑁂𑀦𑁂𑀯𑀸𑀢𑀺 𑀘𑀻𑀦𑀧𑀝𑁆𑀝𑀲𑁄𑀫𑀸𑀭𑀧𑀝𑁆𑀝𑀸𑀦𑀺. 𑀢𑀻𑀡𑀻𑀢𑀺 𑀧𑀢𑁆𑀢𑀼𑀡𑁆𑀡𑁂𑀦 𑀲𑀳 𑀢𑀻𑀡𑀺. 𑀇𑀤𑁆𑀥𑀺𑀫𑀬𑀺𑀓𑀁 𑀏𑀳𑀺𑀪𑀺𑀓𑁆𑀔𑀽𑀦𑀁 𑀦𑀺𑀩𑁆𑀩𑀢𑁆𑀢𑀁. 𑀤𑁂𑀯𑀤𑀢𑁆𑀢𑀺𑀬𑀁 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦 𑀮𑀤𑁆𑀥𑀁. ‘‘𑀬𑀸𑀫𑀸𑀢𑀺𑀓𑁆𑀓𑀫𑁂 𑀲𑀦𑁆𑀦𑀺𑀥𑀺𑀯𑀲𑁂𑀦 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀲𑁂𑀦𑀸’’𑀢𑀺 𑀮𑀺𑀔𑀺𑀢𑀁.

𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.