𑁫. 𑀘𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀲𑁄𑀡𑀓𑁄𑀴𑀺𑀯𑀺𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁨𑁪𑁨. 𑀅𑀲𑀻𑀢𑀺𑀬𑀸 …𑀧𑁂… 𑀓𑀸𑀭𑁂𑀢𑀻𑀢𑀺 ‘‘𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸’’𑀢𑀺 𑀇𑀫𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑀢𑁆𑀣 ‘‘𑀕𑀸𑀫𑀸𑀦𑀁 𑀅𑀲𑀻𑀢𑀺𑀬𑀸 𑀲𑀳𑀲𑁆𑀲𑁂𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀲𑀻𑀢𑀺𑀬𑀸 𑀕𑀸𑀫𑀲𑀳𑀲𑁆𑀲𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀕𑀸𑀫𑀧𑁆𑀧𑀫𑀼𑀔𑀸 𑀕𑀸𑀫𑀺𑀓𑀸, 𑀢𑁂𑀲𑀁 𑀲𑀳𑀲𑁆𑀲𑀸𑀦𑀺. ‘‘𑀓𑀫𑁆𑀫𑀘𑀺𑀢𑁆𑀢𑀻𑀓𑀢𑀸𑀦𑀻’’𑀢𑀺 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑀁. 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑁂 𑀳𑀺 𑀢𑁂𑀲𑀁 𑀅𑀜𑁆𑀚𑀦𑀯𑀡𑁆𑀡𑀪𑀸𑀯𑁄. ‘‘𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑁂𑀦𑀘𑀺𑀤𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 𑀑𑀧𑀫𑁆𑀫𑁂 𑀧𑀯𑀢𑁆𑀢𑀢𑀺. 𑀏𑀯𑀫𑀼𑀧𑀫𑀸𑀦𑁄𑀧𑀤𑁂𑀲𑀧𑀼𑀘𑁆𑀙𑀸𑀯𑀥𑀸𑀭𑀡𑀧𑀝𑀺𑀜𑁆𑀜𑀸𑀢𑀑𑀧𑀫𑁆𑀫𑁂. 𑀧𑀼𑀭𑀢𑁄 𑀧𑁂𑀓𑁆𑀔𑀫𑀸𑀦𑀸𑀦𑀦𑁆𑀢𑀺 𑀅𑀦𑀸𑀤𑀭𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑀢𑁄 𑀧𑀦 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀬𑀸 𑀓𑀯𑀸𑀝𑀁 𑀲𑀼𑀩𑀤𑁆𑀥𑀁 𑀧𑀲𑁆𑀲𑀺𑀢𑁆𑀯𑀸 𑀇𑀘𑁆𑀙𑀺𑀢𑀸𑀓𑀸𑀭𑀓𑀼𑀲𑀮𑀢𑀸𑀬 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀦𑁆𑀢𑀺 𑀯𑀺𑀳𑀸𑀭𑀲𑁆𑀲 𑀯𑀟𑁆𑀠𑀫𑀸𑀦𑀘𑁆𑀙𑀸𑀬𑀸𑀬𑀁. ‘‘𑀅𑀳𑁄 𑀦𑀽𑀦𑀸𑀢𑀺 𑀅𑀳𑁄 𑀫𑀳𑀦𑁆𑀢𑁄’’𑀢𑀺 𑀮𑀺𑀔𑀺𑀢𑀁. 𑀪𑀕𑀯𑀢𑁄 𑀲𑀫𑁆𑀩𑀳𑀼𑀮𑁂𑀳𑀺 𑀲𑀤𑁆𑀥𑀺𑀁 𑀆𑀳𑀺𑀡𑁆𑀟𑀦𑀁 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀦𑀺𑀤𑀲𑁆𑀲𑀦𑁂𑀦 𑀅𑀦𑀸𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀉𑀢𑁆𑀢𑁂𑀚𑀦𑀢𑁆𑀣𑀁, 𑀏𑀯𑀁 𑀲𑀼𑀔𑀼𑀫𑀸𑀮𑀸𑀦𑀁 𑀧𑀸𑀤𑀭𑀓𑁆𑀔𑀡𑀢𑁆𑀣𑀁 𑀉𑀧𑀸𑀳𑀦𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀜𑁆𑀘.

𑀲𑁄𑀡𑀲𑁆𑀲𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸

𑁨𑁪𑁩. 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀳𑀻𑀢𑀺 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀓𑀸𑀭𑀁 𑀉𑀧𑀮𑀓𑁆𑀔𑁂𑀳𑀺.

𑁨𑁪𑁪. 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺. 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀳𑀺 𑀦𑀺𑀩𑁆𑀩𑀸𑀦𑀁, 𑀅𑀭𑀳𑀢𑁆𑀢𑀜𑁆𑀘 𑀯𑀼𑀢𑁆𑀢𑀁. ‘‘𑀢𑀜𑁆𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 ‘𑀦𑁂𑀓𑁆𑀔𑀫𑁆𑀫’𑀦𑁆𑀢𑀺 𑀘 𑀕𑁂𑀳𑀢𑁄 𑀧𑀯𑀺𑀯𑀺𑀢𑁆𑀢𑀢𑁆𑀢𑀸 ‘𑀧𑀯𑀺𑀯𑁂𑀓𑁄’𑀢𑀺 𑀘 𑀩𑁆𑀬𑀸𑀧𑀚𑁆𑀚𑀸𑀪𑀸𑀯𑀢𑁄 ‘𑀅𑀩𑁆𑀬𑀸𑀧𑀚𑁆𑀚’𑀦𑁆𑀢𑀺 𑀘 𑀅𑀭𑀳𑀢𑁆𑀢𑀁 𑀉𑀧𑀸𑀤𑀸𑀦𑀲𑁆𑀲 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 ‘𑀉𑀧𑀸𑀤𑀸𑀦𑀓𑁆𑀔𑀬𑁄’𑀢𑀺 𑀘 𑀢𑀡𑁆𑀳𑀸𑀬 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 ‘𑀢𑀡𑁆𑀳𑀓𑁆𑀔𑀬𑁄’𑀢𑀺 𑀘 𑀲𑀫𑁆𑀫𑁄𑀳𑀸𑀪𑀸𑀯𑀢𑁄 ‘𑀅𑀲𑀫𑁆𑀫𑁄𑀳𑁄’𑀢𑀺 𑀘 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀳𑀺 𑀅𑀭𑀳𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺. 𑀲𑀺𑀬𑀸 𑀔𑁄 𑀏𑀯𑀫𑀲𑁆𑀲𑀸𑀢𑀺 𑀓𑀤𑀸𑀘𑀺 𑀏𑀯𑀫𑀲𑁆𑀲, 𑀅𑀲𑁆𑀲 𑀯𑀸 𑀆𑀬𑀲𑁆𑀫𑀢𑁄 𑀏𑀯𑀁 𑀲𑀺𑀬𑀸. 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀚𑀸𑀦𑀦𑁆𑀢𑁄. 𑀓𑀭𑀡𑀻𑀬𑀫𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀦𑁄. 𑀲𑁄 𑀏𑀯 𑀯𑀸 𑀧𑀸𑀞𑁄. 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀲𑁂𑀲𑁂𑀲𑀼 𑀦𑀺𑀩𑁆𑀩𑀸𑀦𑀦𑁆𑀢𑀺 𑀓𑁂𑀘𑀺. 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄𑀢𑀺 𑀏𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑀁. 𑀲𑁂𑀲𑁂𑀲𑀼 𑀅𑀭𑀳𑀢𑁆𑀢𑀦𑁆𑀢𑀺 𑀓𑁂𑀘𑀺. ‘‘𑀲𑀩𑁆𑀩𑁂𑀲𑁆𑀯𑁂𑀯𑁂𑀢𑁂𑀲𑀼 𑀉𑀪𑀬𑀫𑁆𑀧𑀻’’𑀢𑀺 𑀯𑀤𑀦𑁆𑀢𑀺. 𑀧𑀯𑀺𑀯𑁂𑀓𑀜𑁆𑀘 𑀘𑁂𑀢𑀲𑁄, 𑀅𑀥𑀺𑀫𑀼𑀢𑁆𑀢𑀲𑁆𑀲, 𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲 𑀘𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀆𑀬𑀢𑀦𑀸𑀦𑀁 𑀉𑀧𑁆𑀧𑀸𑀤𑀜𑁆𑀘 𑀯𑀬𑀜𑁆𑀘 𑀤𑀺𑀲𑁆𑀯𑀸.

𑀲𑀩𑁆𑀩𑀦𑀻𑀮𑀺𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁨𑁪𑁬. ‘‘𑀭𑀜𑁆𑀚𑀦𑀘𑁄𑀴𑀓𑁂𑀦 𑀧𑀼𑀜𑁆𑀙𑀺𑀢𑁆𑀯𑀸’’𑀢𑀺 𑀧𑀸𑀞𑁄. ‘‘𑀔𑀮𑁆𑀮𑀓𑀸𑀤𑀻𑀦𑀺 𑀅𑀧𑀦𑁂𑀢𑁆𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑁆𑀯𑁂 𑀢𑀻𑀡𑀺 𑀙𑀺𑀤𑁆𑀤𑀸𑀦𑀺 𑀓𑀢𑁆𑀯𑀸 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀸𑀦𑀁 𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄.

𑀬𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁨𑁫𑁪. ‘‘𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀭𑀗𑁆𑀕𑀼𑀮𑀢𑁄 𑀳𑁂𑀝𑁆𑀞𑀸 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀓𑀸𑀲𑀸𑀯𑀁 𑀧𑀦 𑀯𑀝𑁆𑀝𑀢𑀺, 𑀓𑀼𑀲𑀼𑀫𑁆𑀪𑀸𑀤𑀺𑀭𑀢𑁆𑀢𑀫𑁂𑀯 𑀦 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁.

𑀲𑀩𑁆𑀩𑀘𑀫𑁆𑀫𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁫𑁫. 𑀓𑀺𑀲𑁆𑀲 𑀢𑁆𑀬𑀸𑀬𑀦𑁆𑀢𑀺 𑀓𑀺𑀲𑁆𑀲 𑀢𑁂 𑀅𑀬𑀁.

𑁨𑁫𑁬. 𑀕𑀺𑀳𑀺𑀯𑀺𑀓𑀢𑀦𑁆𑀢𑀺 𑀕𑀺𑀳𑀻𑀦𑀁 𑀅𑀢𑁆𑀣𑀸𑀬 𑀓𑀢𑀁. ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀻𑀤𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁. 𑀓𑀺𑀜𑁆𑀘𑀸𑀧𑀺 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓𑀁 𑀲𑀩𑁆𑀩𑀸𑀦𑁂𑀯 𑀕𑁄𑀦𑀓𑀸𑀤𑀻𑀦𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀯𑀺𑀦𑀬𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀕𑀭𑀼𑀓𑁂 𑀞𑀸𑀢𑀩𑁆𑀩𑀢𑁄 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀢𑀢𑁆𑀣 𑀧𑀦 𑀲𑀼𑀢𑁆𑀢𑀦𑁆𑀢𑀺𑀓𑀤𑁂𑀲𑀦𑀸𑀬 𑀕𑀳𑀝𑁆𑀞𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀞𑀧𑁂𑀢𑁆𑀯𑀸 ‘𑀢𑀽𑀮𑀺𑀓𑀁…𑀧𑁂… 𑀯𑀝𑁆𑀝𑀦𑁆𑀢𑀻’𑀢𑀺 𑀯𑀼𑀢𑁆𑀢𑀁 𑀯𑀺𑀬 𑀔𑀸𑀬𑀢𑀻𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁.

𑁨𑁫𑁯. 𑀫𑀺𑀕𑀫𑀸𑀢𑀼𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀯𑀸𑀢𑀫𑀺𑀕𑁄𑀢𑀺 𑀘 𑀢𑀲𑁆𑀲 𑀦𑀸𑀫𑀁. ‘‘𑀓𑀸𑀴𑀲𑀻𑀳𑁄 𑀓𑀸𑀴𑀫𑀼𑀔𑁄 𑀓𑀧𑀻’’𑀢𑀺 𑀮𑀺𑀔𑀺𑀢𑀁. 𑀘𑀫𑁆𑀫𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁂𑀦 𑀧𑀭𑀺𑀬𑀸𑀬𑁂𑀦 𑀘𑀫𑁆𑀫𑀁 𑀯𑀝𑁆𑀝𑀺𑀲𑁆𑀲𑀢𑀺, 𑀲𑁄 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. ‘‘𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀧𑀭𑀺𑀳𑀸𑀭𑁄 𑀧𑀝𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀦, 𑀪𑀺𑀓𑁆𑀔𑀯𑁂, 𑀓𑀺𑀜𑁆𑀘𑀺 𑀘𑀫𑁆𑀫𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸 𑀲𑀺𑀤𑁆𑀥𑁂 ‘‘𑀦, 𑀪𑀺𑀓𑁆𑀔𑀯𑁂, 𑀕𑁄𑀘𑀫𑁆𑀫’’𑀦𑁆𑀢𑀺 𑀇𑀤𑀁 𑀧𑀭𑀢𑁄 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀻’’𑀢𑀺 𑀏𑀢𑁆𑀣 𑀅𑀦𑀼𑀫𑀢𑀺𑀧𑁆𑀧𑀲𑀗𑁆𑀕𑀪𑀬𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.