𑁪. 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀅𑀨𑀸𑀲𑀼𑀓𑀯𑀺𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁧𑁦. ‘‘𑀲𑀗𑁆𑀖𑀁 𑀆𑀯𑀼𑀲𑁄 𑀧𑀯𑀸𑀭𑁂𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀙𑀸𑀧𑀺 ‘‘𑀯𑀤𑀢𑀼 𑀫𑀁 𑀲𑀗𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀅𑀳𑀁 𑀲𑀗𑁆𑀖𑀁 𑀧𑀯𑀸𑀭𑁂𑀫𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀣𑁂𑀭𑀸, 𑀫𑀚𑁆𑀛𑀺𑀫𑀸, 𑀦𑀯𑀸 𑀯𑀸 𑀅𑀯𑀺𑀲𑁂𑀲𑁂𑀦𑀸𑀬𑀲𑁆𑀫𑀦𑁆𑀢𑁄 𑀲𑀩𑁆𑀩𑁂𑀧𑀺 𑀫𑀁 𑀯𑀤𑀦𑁆𑀢𑀽𑀢𑀺.

𑀧𑀯𑀸𑀭𑀡𑀸𑀪𑁂𑀤𑀯𑀡𑁆𑀡𑀦𑀸

𑁨𑁧𑁨. 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸𑀢𑀺 𑀏𑀢𑁆𑀣 𑀢𑀸𑀤𑀺𑀲𑁂 𑀓𑀺𑀘𑁆𑀘𑁂 𑀲𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀯𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀫𑀳𑀸𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀯𑀸𑀭𑁂𑀢𑁆𑀯𑀸 𑀧𑀦𑁆𑀦𑀭𑀲𑀺𑀬𑀁 𑀓𑀸𑀬𑀲𑀸𑀫𑀕𑁆𑀕𑀺𑀁 𑀇𑀤𑀸𑀦𑀺𑀧𑀺 𑀤𑁂𑀦𑁆𑀢𑀺. 𑀘𑁂𑀢𑀺𑀬𑀕𑀺𑀭𑀺 𑀫𑀳𑀸𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀅𑀝𑁆𑀞𑀫𑀺𑀬𑀁 𑀕𑀘𑁆𑀙𑀦𑁆𑀢𑀺, 𑀢𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀯𑀸𑀭𑁂𑀢𑀼𑀓𑀸𑀫𑀸𑀦𑀁𑀬𑁂𑀯 𑀳𑁄𑀢𑀺. ‘‘𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀯𑀘𑀦𑀢𑁄 𑀇𑀤𑀁 𑀆𑀘𑀺𑀡𑁆𑀡’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀦𑁄 𑀘𑁂 𑀅𑀥𑀺𑀝𑁆𑀞𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀏𑀓𑀲𑁆𑀲 𑀯𑀼𑀢𑁆𑀢𑀤𑀼𑀓𑁆𑀓𑀝𑀁, 𑀢𑀲𑁆𑀲𑁂𑀯 𑀯𑀼𑀢𑁆𑀢𑀁 𑀧𑀼𑀩𑁆𑀩𑀓𑀺𑀘𑁆𑀘𑀜𑁆𑀘 𑀲𑀗𑁆𑀖𑀕𑀡𑀸𑀦𑀫𑁆𑀧𑀺 𑀦𑁂𑀢𑀩𑁆𑀩𑀁.

𑀧𑀯𑀸𑀭𑀡𑀸𑀤𑀸𑀦𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁧𑁩. 𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸𑀢𑀺 𑀧𑀯𑀸𑀭𑀡𑀸𑀤𑀸𑀬𑀓𑁂𑀦.

𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

‘‘𑀢𑀲𑁆𑀲𑀸 𑀘 𑀧𑀯𑀸𑀭𑀡𑀸𑀬 𑀆𑀭𑁄𑀘𑀺𑀢𑀸𑀬 𑀲𑀗𑁆𑀖𑁂𑀦 𑀘 𑀧𑀯𑀸𑀭𑀺𑀢𑁂 𑀲𑀩𑁆𑀩𑁂𑀲𑀁 𑀲𑀼𑀧𑁆𑀧𑀯𑀸𑀭𑀺𑀢𑀁 𑀳𑁄𑀢𑀻𑀢𑀺 𑀯𑀘𑀦𑀢𑁄 𑀓𑁂𑀯𑀮𑀁 𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀸𑀤𑀸𑀬𑀓𑁄𑀧𑀺 𑀧𑀯𑀸𑀭𑀺𑀢𑁄𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀻𑀢𑀺.

𑁨𑁨𑁨. 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬𑀸𑀢𑀺 𑀧𑀯𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀅𑀜𑁆𑀜𑀫𑀜𑁆𑀜𑀁 𑀓𑀣𑁂𑀦𑁆𑀢𑀺𑀬𑀸. 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬𑀸𑀢𑀺 𑀏𑀓𑀘𑁆𑀘𑁂𑀲𑀼 𑀬𑀣𑀸𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑀘𑁆𑀘𑁂𑀲𑀼 𑀲𑀓𑀲𑀓𑀝𑁆𑀞𑀸𑀦𑀁 𑀕𑀢𑁂𑀲𑀼. 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀧𑀼𑀦𑀧𑀺 𑀲𑀩𑁆𑀩𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 ‘‘𑀕𑀢𑁂 𑀅𑀦𑀸𑀦𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀁𑀬𑁂𑀯 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁, 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀮𑀺𑀔𑀺𑀢𑀁. 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 ‘‘𑀬𑀤𑀺 𑀲𑀩𑁆𑀩𑁂 𑀯𑀼𑀝𑁆𑀞𑀳𑀺𑀢𑁆𑀯𑀸 𑀕𑀢𑀸, 𑀲𑀦𑁆𑀦𑀺𑀧𑀸𑀢𑁂𑀢𑀼𑀜𑁆𑀘 𑀦 𑀲𑀓𑁆𑀓𑀸, 𑀏𑀓𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀧𑀯𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀫𑀸? 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀲𑀗𑁆𑀖𑀓𑀫𑁆𑀫𑀸𑀪𑀸𑀯𑀸 𑀯𑀕𑁆𑀕𑀁 𑀦 𑀳𑁄𑀢𑀺 𑀓𑀺𑀭. 𑀏𑀢𑁆𑀣 𑀧𑀦 𑀏𑀓𑀘𑁆𑀘𑁂𑀲𑀼 𑀕𑀢𑁂𑀲𑀼𑀧𑀺 𑀲𑀩𑁆𑀩𑁂𑀲𑀼 𑀕𑀢𑁂𑀲𑀼𑀧𑀺 𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀓𑁂𑀯𑀮𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀏𑀓𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀧𑀯𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀯𑀸𑀭𑁂𑀫𑀻’’𑀢𑀺 𑀯𑀘𑀦𑀢𑁄. 𑀲𑀩𑁆𑀩𑁂𑀧𑀺 𑀳𑀺 𑀲𑀦𑁆𑀦𑀺𑀧𑀢𑀺𑀢𑀸 𑀧𑀘𑁆𑀙𑀸 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑀧𑀭𑀺𑀲𑀗𑁆𑀓𑀺𑀢𑀁 𑀯𑀸 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀅𑀦𑀸𑀕𑀢𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀜𑀢𑁆𑀯𑀸𑀧𑀺 𑀏𑀓𑀘𑁆𑀘𑀸𑀦𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑀡𑀸𑀯𑀘𑀦𑀁 𑀯𑀺𑀬 𑀳𑁄𑀢𑀺. 𑀲𑀫𑁆𑀫𑀼𑀔𑀻𑀪𑀽𑀢𑁂 𑀘𑀢𑁆𑀢𑀸𑀭𑁄 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀧𑀦𑁆𑀦𑀘𑀻𑀯𑀭𑀸𑀤𑀺𑀦𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀧𑀯𑀸𑀭𑀡𑀸 𑀦 𑀳𑁄𑀢𑀺 𑀲𑀩𑁆𑀩𑀸𑀬𑀢𑁆𑀢𑀢𑁆𑀢𑀸. ‘‘𑀲𑀫𑀕𑁆𑀕𑀸𑀦𑀁 𑀧𑀯𑀸𑀭𑀡𑀸 𑀧𑀜𑁆𑀜𑀢𑁆𑀢𑀸’’𑀢𑀺 𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. ‘‘𑀇𑀢𑁄 𑀅𑀜𑁆𑀜𑀣𑀸 𑀦 𑀯𑀝𑁆𑀝𑀢𑀺 𑀅𑀝𑁆𑀞𑀓𑀣𑀸𑀬𑀁 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸’’𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀤𑀢𑀺. ‘‘𑀣𑁄𑀓𑀢𑀭𑁂𑀳𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸𑀯𑀸’’𑀢𑀺 𑀯𑀼𑀢𑁆𑀢𑀁. 𑀆𑀕𑀦𑁆𑀢𑀼𑀓𑀸 𑀦𑀸𑀫 𑀦𑀯𑀫𑀺𑀢𑁄 𑀧𑀝𑁆𑀞𑀸𑀬𑀸𑀕𑀢𑀸 𑀯𑀸 𑀯𑀚𑀲𑀢𑁆𑀣𑀦𑀸𑀯𑀸𑀲𑀼 𑀯𑀼𑀢𑁆𑀣𑀯𑀲𑁆𑀲𑀸 𑀯𑀸 𑀳𑁄𑀦𑁆𑀢𑀺.

𑁨𑁩𑁭. ‘‘𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺 𑀢𑀣𑀸𑀕𑀢𑁄𑀢𑀺𑀆𑀤𑀻’’𑀢𑀺 𑀮𑀺𑀔𑀺𑀢𑀁. ‘‘𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀻’’𑀢𑀺 𑀯𑀼𑀢𑁆𑀢𑀁.

𑁨𑁩𑁯. ‘‘𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀸𑀢𑀺 𑀢𑁂𑀦 𑀲𑀳 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀺𑀢𑀁.

𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.