𑁩. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁧𑁮𑁪. 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀲𑀗𑁆𑀓𑀸𑀲𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀸𑀞𑁄, 𑀤𑀻𑀧𑀯𑀸𑀲𑀺𑀦𑁄 ‘‘𑀲𑀗𑁆𑀓𑀸𑀧𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺 𑀓𑀺𑀭. ‘‘𑀓𑀢𑀺 𑀦𑀼 𑀔𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀸’’𑀢𑀺 𑀘𑀺𑀦𑁆𑀢𑀸𑀬𑀁 ‘‘𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺 𑀬𑀁 𑀯𑀲𑁆𑀲𑀽𑀧𑀕𑀫𑀦𑀁 𑀯𑀼𑀢𑁆𑀢𑀁, 𑀢𑀁 ‘‘𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀯𑀢𑁆𑀯𑀸 𑀉𑀧𑀕𑀦𑁆𑀢𑀩𑁆𑀩𑀁. 𑀯𑀲𑁆𑀲𑀸𑀦𑀫𑀸𑀲𑀸 𑀘 𑀘𑀢𑁆𑀢𑀸𑀭𑁄. 𑀢𑀢𑁆𑀣 𑀧𑀞𑀫𑀁 𑀢𑁂𑀫𑀸𑀲𑀁, 𑀧𑀘𑁆𑀙𑀺𑀫𑀁 𑀢𑁂𑀫𑀸𑀲𑀦𑁆𑀢𑀺 𑀤𑀼𑀯𑀺𑀥𑀁 𑀢𑁂𑀫𑀸𑀲𑀁. 𑀢𑁂𑀦𑀸𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑀺𑀦𑁆𑀢𑀸 𑀅𑀳𑁄𑀲𑀺.

𑀯𑀲𑁆𑀲𑀸𑀦𑁂𑀘𑀸𑀭𑀺𑀓𑀸𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁮𑁫. 𑀅𑀦𑀧𑁂𑀓𑁆𑀔𑀕𑀫𑀦𑁂𑀦 𑀯𑀸 𑀅𑀜𑁆𑀜𑀢𑁆𑀣 𑀅𑀭𑀼𑀡𑀁 𑀉𑀝𑁆𑀞𑀸𑀧𑀦𑁂𑀦 𑀯𑀸 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑀧𑀞𑀫𑀁 𑀢𑀸𑀯 𑀲𑁄 𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. ‘‘𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀆𑀯𑀸𑀲𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀢𑁄 𑀑𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 ‘‘𑀲𑁄 𑀢𑀤𑀳𑁂𑀯 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺, 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁭) 𑀯𑀼𑀢𑁆𑀢𑀁.

𑀲𑀢𑁆𑀢𑀸𑀳𑀓𑀭𑀡𑀻𑀬𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁧𑁮𑁭-𑁮. 𑀤𑀼𑀢𑀺𑀬𑀁 𑀧𑀦 ‘‘𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑁂𑀢𑀺, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀲𑀢𑁆𑀢𑀸𑀳𑀢𑁄 𑀧𑀭𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 ‘‘𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀅𑀦𑁆𑀢𑁄 𑀲𑀦𑁆𑀦𑀺𑀯𑀢𑁆𑀢𑀁 𑀓𑀭𑁄𑀢𑀺, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁨𑁦𑁭) 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀓𑀸𑀭𑀡𑀤𑁆𑀯𑀬𑁂 𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑀸𑀪𑀸𑀯𑁂 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀢𑀻𑀡𑀺𑀧𑀺 𑀏𑀢𑀸𑀦𑀺 𑀯𑀘𑀦𑀸𑀦𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑀺𑀢𑀸𑀦𑀺 𑀯𑀺𑀕𑁆𑀕𑀳𑀸𑀦𑀺 𑀳𑁄𑀦𑁆𑀢𑀺. 𑀢𑀻𑀡𑀺 𑀧𑀭𑀺𑀳𑀻𑀦𑀸𑀦𑀻𑀢𑀺 𑀢𑀸𑀲𑀁 𑀦𑀢𑁆𑀣𑀺𑀢𑀸𑀬.

𑀧𑀳𑀺𑀢𑁂𑀬𑁂𑀯𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁧𑁯𑁯. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀁, 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀅𑀦𑁆𑀢𑁄𑀯𑀲𑁆𑀲𑁂 𑀲𑀁𑀳𑀸𑀭𑀺𑀓𑀪𑀸𑀯𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀣 𑀥𑀫𑁆𑀫𑀙𑀦𑁆𑀤𑀯𑀲𑁂𑀦𑀧𑀺 𑀆𑀕𑀢𑁂 𑀲𑀗𑁆𑀖𑀲𑁆𑀲 𑀆𑀬𑀫𑀼𑀔𑀁 𑀯𑀺𑀦𑀲𑁆𑀲𑀢𑀺. 𑀢𑀢𑁄 ‘‘𑀲𑁂𑀦𑀸𑀲𑀦𑀸𑀦𑀺 𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀁. 𑀆𑀕𑀢𑀦𑁆𑀢𑀺 𑀆𑀕𑀫𑀦𑀁. 𑀪𑀸𑀯𑁂𑀢𑁆𑀣 𑀢𑀧𑀘𑁆𑀘𑀬𑁄𑀬𑀁. 𑀲𑀗𑁆𑀖𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀦𑁆𑀢𑀺 𑀏𑀢𑁆𑀣 ‘‘𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀏𑀯 𑀲𑀗𑁆𑀖𑀓𑀭𑀡𑀻𑀬𑁂𑀲𑀼, 𑀦 𑀅𑀜𑁆𑀜𑁂𑀲𑀽’’𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀯𑀤𑀢𑀺 𑀓𑀺𑀭. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀢𑀁 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀬𑀁 𑀓𑀺𑀜𑁆𑀘𑀺 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀼 𑀲𑁂𑀦𑀸𑀲𑀦𑁂𑀲𑀽’’𑀢𑀺𑀆𑀤𑀺𑀦𑀸 𑀲𑁂𑀦𑀸𑀲𑀦𑀫𑁂𑀯 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁.

𑀅𑀦𑀺𑀫𑀦𑁆𑀢𑀺𑀢𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀘 𑀳𑁄𑀢𑀺, 𑀢𑀁 ‘‘𑀯𑀲𑁆𑀲𑀘𑁆𑀙𑁂𑀤𑁄’’𑀢𑀺 𑀘 𑀯𑀤𑀦𑁆𑀢𑀺. 𑀦𑀺𑀫𑀦𑁆𑀢𑀺𑀢𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀏𑀢𑁆𑀣 𑀉𑀧𑀸𑀲𑀓𑁂𑀳𑀺 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀤𑀺𑀯𑀲𑁂 𑀤𑀸𑀦𑀸𑀤𑀻𑀦𑀺 𑀓𑀭𑁄𑀫, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺 𑀓𑀢𑀸𑀬𑀧𑀺 𑀓𑀢𑀺𑀓𑀸𑀬 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀧𑀯𑀸𑀭𑀡𑀸𑀬 𑀦𑀯𑀫𑀺𑀢𑁄 𑀧𑀝𑁆𑀞𑀸𑀬 𑀧𑀁𑀲𑀼𑀓𑀽𑀮𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑀼𑀁 𑀓𑀸𑀯𑀻𑀭𑀧𑀝𑁆𑀝𑀦𑁂 𑀯𑀺𑀬 𑀲𑀩𑁆𑀩𑁂𑀲𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺 𑀅𑀦𑀼𑀲𑀁𑀯𑀘𑁆𑀙𑀭𑀁 𑀦𑀺𑀬𑀫𑀢𑁄 𑀉𑀧𑀸𑀲𑀓𑁂𑀳𑀺 𑀲𑀚𑁆𑀚𑀺𑀢𑁆𑀯𑀸 𑀞𑀧𑀦𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀸 𑀓𑀢𑀺𑀓𑀸 𑀓𑀢𑀸 ‘𑀲𑀫𑀦𑁆𑀢𑀸 𑀪𑀺𑀓𑁆𑀔𑀽 𑀕𑀘𑁆𑀙𑀦𑁆𑀢𑀽’𑀢𑀺, 𑀖𑁄𑀲𑀦𑀁 𑀯𑀸 𑀓𑀢𑀁 𑀉𑀧𑀸𑀲𑀓𑁂𑀳𑀺, 𑀢𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀦𑀢𑁆𑀣𑀻𑀢𑀺 𑀢𑀣𑀸 ‘𑀅𑀦𑀼𑀲𑀁𑀯𑀘𑁆𑀙𑀭𑀁 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀲𑀓𑀺𑀁 𑀦𑀺𑀫𑀦𑁆𑀢𑀺𑀢𑁂𑀧𑀺 𑀯𑀝𑁆𑀝𑀢𑀻’’𑀢𑀺 𑀘 ‘‘𑀘𑀻𑀯𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀬𑀫𑀁 𑀓𑀢𑁆𑀯𑀸 𑀲𑀫𑀦𑁆𑀢𑀢𑁄 𑀆𑀕𑀢𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀤𑀸𑀦𑀢𑁄 𑀓𑀸𑀯𑀻𑀭𑀧𑀝𑁆𑀝𑀦𑁂 𑀖𑁄𑀲𑁂𑀢𑁆𑀯𑀸 𑀓𑀭𑀡𑀸𑀓𑀸𑀭𑁄 𑀧𑀜𑁆𑀜𑀸𑀬𑀢𑀻𑀢𑀺 𑀅𑀧𑀭𑁂’’𑀢𑀺 𑀘. 𑀆𑀘𑀭𑀺𑀬𑀸 𑀧𑀦 𑀏𑀯𑀁 𑀦 𑀯𑀤𑀦𑁆𑀢𑀺.

𑀅𑀦𑁆𑀢𑀭𑀸𑀬𑁂𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀓𑀣𑀸𑀯𑀡𑁆𑀡𑀦𑀸

𑁨𑁦𑁧. ‘‘𑀲𑀘𑁂 𑀤𑀽𑀭𑀁 𑀕𑀢𑁄 𑀳𑁄𑀢𑀺, 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 ‘𑀬𑀲𑁆𑀫𑀺𑀁 𑀅𑀦𑁆𑀢𑀭𑀸𑀬𑁂 𑀲𑀢𑀺 𑀯𑀲𑁆𑀲𑀘𑁆𑀙𑁂𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀺𑀁 𑀅𑀦𑁆𑀢𑀭𑀸𑀬𑁂𑀯 𑀯𑀲𑁆𑀲𑀘𑁆𑀙𑁂𑀤𑀫𑀓𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀯𑀻𑀢𑀺𑀦𑀸𑀫𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀦𑁆𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀬𑀥𑀭𑀸 𑀧𑀦 𑀦 𑀇𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀇𑀤𑀁 𑀢𑀢𑁆𑀭𑀼𑀧𑁆𑀧𑀸𑀤𑀸𑀤𑀺𑀦𑀺𑀫𑀺𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀲𑀦𑁆𑀥𑀸𑀬 ‘‘𑀆𑀘𑀭𑀺𑀬𑀸 𑀧𑀦 𑀏𑀯𑀁 𑀦 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑀸𑀯𑀼𑀁 𑀯𑀸𑀢𑀺 𑀩𑀮𑀺𑀩𑀤𑁆𑀥𑀁 𑀯𑀸. 𑀩𑀳𑀺𑀲𑀻𑀫𑀸𑀬 𑀞𑀺𑀢𑀸𑀦𑀦𑁆𑀢𑀺 𑀢𑁂𑀳𑀺 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑁂𑀳𑀺𑀧𑀻𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀯𑀲𑁆𑀲𑀘𑁆𑀙𑁂𑀤𑁂 𑀅𑀲𑁆𑀲 𑀯𑀲𑁆𑀲𑀘𑁆𑀙𑁂𑀤𑀲𑁆𑀲. 𑀯𑀺𑀳𑀸𑀭𑀸 𑀅𑀜𑁆𑀜𑀢𑁆𑀣 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀳𑀺 𑀢𑀢𑁆𑀣𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀇𑀫𑀲𑁆𑀫𑀺𑀁 𑀦𑀸𑀫 𑀧𑀤𑁂𑀲𑁂 𑀇𑀫𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀫𑀸’’𑀢𑀺 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀦𑁆𑀢𑀺.

𑀯𑀚𑀸𑀤𑀻𑀲𑀼𑀯𑀲𑁆𑀲𑀽𑀧𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁨𑁦𑁩. 𑀯𑀚𑁂𑀦 𑀲𑀤𑁆𑀥𑀺𑀁 𑀕𑀢𑀲𑁆𑀲 𑀯𑀲𑁆𑀲𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀻𑀢𑀺 𑀯𑀲𑁆𑀲𑀘𑁆𑀙𑁂𑀤𑁄 𑀦 𑀳𑁄𑀢𑀻𑀢𑀺 𑀓𑀺𑀭 𑀅𑀥𑀺𑀧𑁆𑀧𑀸𑀬𑁄. 𑀲𑀢𑁆𑀣𑀲𑁆𑀲 𑀅𑀯𑀺𑀳𑀸𑀭𑀢𑁆𑀢𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂’’𑀢𑀺 𑀅𑀯𑀢𑁆𑀯𑀸 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀏𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁. ‘‘𑀲𑀢𑁆𑀣𑁂 𑀧𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 ‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲’𑀦𑁆𑀢𑀺 𑀯𑀸 ‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’𑀢𑀺 𑀯𑀸 𑀦 𑀯𑀝𑁆𑀝𑀢𑀺, 𑀆𑀮𑀬𑀓𑀭𑀡𑀫𑀢𑁆𑀢𑁂𑀦𑁂𑀯 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀮𑀺𑀔𑀺𑀢𑀁. 𑀢𑀁 𑀧𑀦 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺. ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺 𑀧𑀼𑀩𑁆𑀩𑀸𑀧𑀭𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦, 𑀅𑀥𑀺𑀧𑁆𑀧𑀸𑀬𑀸𑀚𑀸𑀦𑀦𑀢𑁄. 𑀲𑀢𑁆𑀣𑁄 𑀤𑀼𑀯𑀺𑀥𑁄 𑀞𑀺𑀢𑁄, 𑀲𑀜𑁆𑀘𑀸𑀭𑁄𑀢𑀺. 𑀢𑀢𑁆𑀣 𑀞𑀺𑀢𑁂 𑀓𑀼𑀝𑀺𑀓𑀸𑀬 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀯𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀜𑁆𑀘𑀸𑀭𑀺𑀫𑁆𑀳𑀺 𑀧𑀦 𑀲𑀢𑁆𑀣𑁂 𑀓𑀼𑀝𑀺𑀓𑀸𑀬 𑀅𑀪𑀸𑀯𑀢𑁄 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀢𑀺 𑀲𑀺𑀯𑀺𑀓𑀸𑀬 𑀯𑀸 𑀲𑀓𑀝𑀓𑀼𑀝𑀺𑀓𑀸𑀬 𑀯𑀸 𑀯𑀝𑁆𑀝𑀢𑀺, 𑀢𑀣𑀸 𑀯𑀚𑁂𑀧𑀺. 𑀢𑀻𑀲𑀼 𑀞𑀸𑀦𑁂𑀲𑀼 𑀪𑀺𑀓𑁆𑀔𑀼𑀦𑁄 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀺.

𑀧𑀯𑀸𑀭𑁂𑀢𑀼𑀜𑁆𑀘 𑀮𑀪𑀢𑀻𑀢𑀺 𑀏𑀢𑁆𑀣𑀸𑀬𑀁 𑀯𑀺𑀘𑀸𑀭𑀡𑀸 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀯𑀚𑁄, 𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 𑀇𑀤𑀁 𑀓𑀺𑀁 𑀯𑀲𑁆𑀲𑀭𑀓𑁆𑀔𑀡𑀢𑁆𑀣𑀁 𑀯𑀼𑀢𑁆𑀢𑀁, 𑀉𑀤𑀸𑀳𑀼 𑀯𑀲𑁆𑀲𑀘𑁆𑀙𑁂𑀤𑀸𑀧𑀢𑁆𑀢𑀺𑀭𑀓𑁆𑀔𑀡𑀢𑁆𑀣𑀦𑁆𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀯𑀲𑁆𑀲𑀭𑀓𑁆𑀔𑀡𑀢𑁆𑀣𑀁, ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑀢𑀺. 𑀅𑀣 𑀯𑀲𑁆𑀲𑀘𑁆𑀙𑁂𑀤𑀸𑀧𑀢𑁆𑀢𑀺𑀭𑀓𑁆𑀔𑀡𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀲𑀺𑀤𑁆𑀥𑀁 𑀦 𑀲𑁄 𑀧𑀯𑀸𑀭𑁂𑀢𑀼𑀁 𑀮𑀪𑀢𑀻𑀢𑀺, 𑀓𑀸 𑀧𑀦𑁂𑀢𑁆𑀣 𑀬𑀼𑀢𑁆𑀢𑀺? 𑀬𑀢𑁄 𑀅𑀬𑀫𑁂𑀯 𑀢𑀺𑀯𑀺𑀥𑁄 𑀧𑀯𑀸𑀭𑁂𑀢𑀼𑀁 𑀮𑀪𑀢𑀺, 𑀦𑁂𑀢𑀭𑁄. 𑀯𑀸𑀴𑁂𑀳𑀺 𑀉𑀩𑁆𑀩𑀸𑀴𑁆𑀳𑀸𑀤𑀺𑀓𑁄 𑀳𑀺 𑀉𑀧𑀕𑀢𑀝𑁆𑀞𑀸𑀦𑀸𑀧𑀭𑀺𑀘𑁆𑀘𑀸𑀕𑀸 𑀮𑀪𑀢𑀺. 𑀧𑀭𑀺𑀘𑁆𑀘𑀸𑀕𑀸 𑀦 𑀮𑀪𑀢𑀻𑀢𑀺 𑀅𑀬𑀫𑁂𑀢𑁆𑀣 𑀬𑀼𑀢𑁆𑀢𑀺. 𑀬𑁂𑀦 𑀕𑀸𑀫𑁄, 𑀢𑀢𑁆𑀣 𑀕𑀢𑁄𑀧𑀺 𑀧𑀯𑀸𑀭𑁂𑀢𑀼𑀁 𑀮𑀪𑀢𑀻𑀢𑀺 𑀏𑀓𑁂𑀦𑀸𑀢𑀺 𑀆𑀘𑀭𑀺𑀬𑁄. 𑀬𑁄 𑀳𑀺 𑀧𑀼𑀩𑁆𑀩𑁂 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀦 𑀉𑀧𑀕𑀢𑁄, ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂’’𑀢𑀺 𑀉𑀧𑀕𑀢𑁄, 𑀲𑁄 𑀘 𑀧𑀭𑀺𑀘𑁆𑀘𑀢𑁆𑀢𑁄. 𑀅𑀜𑁆𑀜𑀣𑀸 𑀯𑀺𑀦𑀸 𑀯𑀺𑀳𑀸𑀭𑁂𑀦 𑀓𑁂𑀯𑀮𑀁 𑀕𑀸𑀫𑀁 𑀲𑀦𑁆𑀥𑀸𑀬 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀆𑀧𑀚𑁆𑀚𑀢𑀽𑀢𑀺 𑀘𑁂? 𑀦, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀚𑁂 𑀲𑀢𑁆𑀣𑁂 𑀦𑀸𑀯𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺 𑀯𑀘𑀦𑀁 𑀯𑀺𑀬 ‘‘𑀕𑀸𑀫𑁂 𑀉𑀧𑀕𑀦𑁆𑀢𑀼’’𑀦𑁆𑀢𑀺 𑀯𑀘𑀦𑀸𑀪𑀸𑀯𑀢𑁄. 𑀬𑀲𑁆𑀫𑀸 ‘‘𑀢𑀻𑀲𑀼 𑀞𑀸𑀦𑁂𑀲𑀼 𑀪𑀺𑀓𑁆𑀔𑀼𑀦𑁄 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀻’’𑀢𑀺 𑀯𑀘𑀦𑀁 𑀢𑀢𑁆𑀣 𑀯𑀲𑁆𑀲𑀽𑀧𑀕𑀫𑀦𑀁 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀺 𑀢𑀤𑀪𑀸𑀯𑁂 𑀙𑁂𑀤𑀸𑀪𑀸𑀯𑀸, 𑀢𑀲𑁆𑀫𑀸 ‘‘𑀲𑀢𑁆𑀣𑁂 𑀧𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀓𑀼𑀝𑀺𑀬𑀸 𑀅𑀪𑀸𑀯𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀲𑀺𑀤𑁆𑀥𑀁. 𑀢𑀻𑀲𑀼 𑀞𑀸𑀦𑁂𑀲𑀼 𑀪𑀺𑀓𑁆𑀔𑀼𑀦𑁄 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀻𑀢𑀺 ‘‘𑀢𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀦𑀢𑁆𑀣𑀺, 𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀕𑀫𑀦𑁂 𑀆𑀧𑀢𑁆𑀢𑀺 𑀘, 𑀧𑀯𑀸𑀭𑁂𑀢𑀼𑀜𑁆𑀘 𑀦 𑀮𑀪𑀢𑀻’’𑀢𑀺 𑀮𑀺𑀔𑀺𑀢𑀁, 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀣 𑀲𑀢𑁆𑀣𑁄 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀪𑀺𑀓𑁆𑀔𑀼𑀦𑀸 𑀧𑀢𑁆𑀣𑀺𑀢𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀢𑀺𑀓𑁆𑀓𑀫𑀢𑀺…𑀧𑁂… 𑀅𑀦𑁆𑀢𑀭𑀸 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀢𑀺𑀝𑁆𑀞𑀢𑀺 𑀯𑀸 𑀯𑀺𑀧𑁆𑀧𑀓𑀺𑀭𑀢𑀺 𑀯𑀸’’𑀢𑀺𑀆𑀤𑀺, 𑀢𑀁 𑀏𑀢𑁆𑀢𑀸𑀯𑀢𑀸 𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀕𑀢𑀸𑀦𑀫𑁆𑀧𑀺 𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀕𑀫𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ‘‘𑀧𑀤𑀭𑀘𑁆𑀙𑀤𑀦𑀁 𑀓𑀼𑀝𑀺𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀲𑁂𑀦𑀸𑀲𑀦𑀢𑁆𑀣𑀸𑀬 𑀭𑀼𑀓𑁆𑀔𑀁 𑀆𑀭𑀼𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀦 𑀧𑀸𑀴𑀺𑀯𑀺𑀭𑁄𑀥𑀢𑁄𑀢𑀺 𑀘𑁂? 𑀦, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸, 𑀇𑀫𑀲𑁆𑀲 𑀇𑀥 𑀧𑀼𑀦𑀧𑀺 𑀧𑀝𑀺𑀓𑁆𑀔𑁂𑀧𑀦𑀢𑁄. ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀓𑁆𑀔𑁂𑀧𑁂𑀦 𑀲𑀺𑀤𑁆𑀥𑁂 ‘‘𑀦, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑁄𑀓𑀸𑀲𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁄 𑀯𑀺𑀬 𑀲𑀺𑀬𑀸𑀢𑀺 𑀘𑁂? 𑀦, 𑀅𑀚𑁆𑀛𑁄𑀓𑀸𑀲𑀲𑁆𑀲 𑀅𑀲𑁂𑀦𑀸𑀲𑀦𑀪𑀸𑀯𑀸𑀦𑀼𑀫𑀢𑀺𑀧𑁆𑀧𑀲𑀗𑁆𑀕𑀢𑁄. 𑀅𑀚𑁆𑀛𑁄𑀓𑀸𑀲𑁄 𑀳𑀺 ‘‘𑀅𑀚𑁆𑀛𑁄𑀓𑀸𑀲𑁂 𑀧𑀮𑀸𑀮𑀧𑀼𑀜𑁆𑀚𑁂’’𑀢𑀺 𑀯𑀘𑀦𑀢𑁄 𑀲𑁂𑀦𑀸𑀲𑀦𑀦𑁆𑀢𑀺 𑀲𑀺𑀤𑁆𑀥𑀁. 𑀘𑀢𑀼𑀲𑀸𑀮𑀅𑀚𑁆𑀛𑁄𑀓𑀸𑀲𑁂 𑀯𑀲𑀦𑁆𑀢𑁄𑀧𑀺 ‘‘𑀘𑀢𑀼𑀲𑀸𑀮𑀸𑀬 𑀯𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀝𑁆𑀝𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀇𑀥 𑀅𑀲𑁂𑀦𑀸𑀲𑀦𑀺𑀓𑁄 𑀦𑀸𑀫 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀅𑀢𑁆𑀢𑀦𑁄 𑀦𑀺𑀩𑀤𑁆𑀥𑀯𑀸𑀲𑀢𑁆𑀣𑀁 𑀅𑀧𑀸𑀧𑀺𑀢𑀲𑁂𑀦𑀸𑀲𑀦𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀤𑁆𑀯𑀺𑀦𑁆𑀦𑀁 𑀧𑀝𑀺𑀓𑁆𑀔𑁂𑀧𑀸𑀦𑀁 𑀅𑀜𑁆𑀜𑀢𑀭𑀸𑀢𑀺𑀭𑁂𑀓𑀢𑀸 𑀘 𑀭𑀼𑀓𑁆𑀔𑀫𑀽𑀮𑁂𑀧𑀺 𑀦𑀺𑀩𑁆𑀩𑀓𑁄𑀲𑁂𑀧𑀺 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘, 𑀅𑀧𑀸𑀧𑀺𑀢𑀲𑁂𑀦𑀸𑀲𑀦𑀺𑀓𑁂𑀦𑀸𑀧𑀺 𑀕𑀩𑁆𑀪𑁂 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘 𑀆𑀧𑀚𑁆𑀚𑀢𑀺, 𑀲𑀤𑁆𑀯𑀸𑀭𑀩𑀦𑁆𑀥𑀫𑁂𑀯 𑀲𑁂𑀦𑀸𑀲𑀦𑀁 𑀇𑀥 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀦𑀺𑀤𑀸𑀦𑀢𑁄. 𑀅𑀬𑀜𑁆𑀳𑀺 𑀅𑀲𑁂𑀦𑀸𑀲𑀦𑀺𑀓𑀯𑀲𑁆𑀲𑀽𑀧𑀕𑀫𑀦𑀸𑀧𑀢𑁆𑀢𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀲𑁂𑀦𑀸𑀲𑀦𑀺𑀓𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀲𑀻𑀢𑁂𑀦𑀧𑀺 𑀉𑀡𑁆𑀳𑁂𑀦𑀧𑀺 𑀓𑀺𑀮𑀫𑀦𑁆𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀦𑀺𑀤𑀸𑀦𑁂 𑀧𑀜𑁆𑀜𑀢𑁆𑀢𑀸, 𑀢𑀲𑁆𑀫𑀸 𑀲𑀻𑀢𑀸𑀤𑀺𑀧𑀝𑀺𑀓𑁆𑀔𑁂𑀧𑀫𑁂𑀯 𑀇𑀥 𑀲𑁂𑀦𑀸𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁. 𑀏𑀯𑀁 𑀲𑀦𑁆𑀢𑁂 𑀲𑀺𑀤𑁆𑀥𑀁 𑀧𑀼𑀩𑁆𑀩𑀧𑀓𑁆𑀔𑀦𑀺𑀤𑀲𑁆𑀲𑀦𑀦𑁆𑀢𑀺 𑀘𑁂? 𑀦, 𑀧𑀼𑀩𑁆𑀩𑁂 𑀅𑀧𑀭𑀢𑁆𑀣𑀧𑀯𑀢𑁆𑀢𑀺𑀲𑀽𑀘𑀦𑀢𑁄. 𑀤𑀼𑀢𑀺𑀬𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁨𑁮; 𑀫. 𑀦𑀺. 𑁧.𑁨𑁭𑁧) 𑀯𑀘𑀦𑀸𑀦𑀺 𑀦𑀺𑀤𑀲𑁆𑀲𑀦𑀁. 𑀅𑀚𑁆𑀛𑁄𑀓𑀸𑀲𑀧𑀝𑀺𑀓𑁆𑀔𑁂𑀧𑀦𑀺𑀤𑀸𑀦𑁂𑀦 𑀩𑀳𑀺𑀅𑀚𑁆𑀛𑁄𑀓𑀸𑀲𑁄𑀯 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀦 𑀘𑀢𑀼𑀲𑀸𑀮𑀸𑀤𑀺𑀫𑀚𑁆𑀛𑀕𑀢𑁄 𑀅𑀚𑁆𑀛𑁄𑀓𑀸𑀲𑁄𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦 𑀦𑀺𑀤𑀸𑀦𑀁 𑀧𑀫𑀸𑀡𑀦𑁆𑀢𑀺 𑀘𑁂? 𑀦, 𑀦𑀺𑀬𑀫𑀢𑁄. 𑀓𑀺𑀜𑁆𑀘𑀺 𑀳𑀺 𑀲𑀺𑀓𑁆𑀔𑀸𑀧𑀤𑀁 𑀦𑀺𑀤𑀸𑀦𑀸𑀧𑁂𑀓𑁆𑀔𑀁 𑀳𑁄𑀢𑀻𑀢𑀺 𑀲𑀸𑀥𑀺𑀢𑀫𑁂𑀢𑀁. 𑀇𑀤𑀁 𑀲𑀸𑀧𑁂𑀓𑁆𑀔𑀁, 𑀇𑀤𑀁 𑀅𑀦𑀧𑁂𑀓𑁆𑀔𑀦𑁆𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀺, 𑀦 𑀳𑀺 𑀏𑀢𑁆𑀣 𑀉𑀪𑀢𑁄𑀯𑀺𑀪𑀗𑁆𑀕𑁂 𑀯𑀺𑀬 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀤𑀪𑀸𑀚𑀦𑀁, 𑀅𑀦𑀸𑀧𑀢𑁆𑀢𑀺𑀯𑀸𑀭𑁄 𑀯𑀸 𑀅𑀢𑁆𑀣𑀻𑀢𑀺? 𑀇𑀥𑀸𑀧𑀺 𑀤𑁂𑀲𑀦𑀸𑀯𑀺𑀥𑀸𑀦𑀢𑁄 𑀧𑀜𑁆𑀜𑀸𑀬𑀢𑀺. ‘‘𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀭𑀼𑀓𑁆𑀔𑀫𑀽𑀮𑀫𑁆𑀧𑀺 𑀦𑀺𑀩𑁆𑀩𑀓𑁄𑀲𑀫𑁆𑀧𑀺 𑀉𑀧𑀥𑀸𑀯𑀦𑁆𑀢𑀻’’𑀢𑀺 𑀳𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀦𑀺𑀤𑀸𑀦𑀯𑀘𑀦𑁂𑀳𑀺 𑀩𑀳𑀺 𑀯𑀸 𑀅𑀦𑁆𑀢𑁄 𑀯𑀸 𑀲𑀩𑁆𑀩𑀁 𑀑𑀯𑀲𑁆𑀲𑀓𑀝𑁆𑀞𑀸𑀦𑀁 𑀇𑀥 𑀅𑀚𑁆𑀛𑁄𑀓𑀸𑀲𑁄 𑀦𑀸𑀫. 𑀅𑀦𑁄𑀯𑀲𑁆𑀲𑀓𑀝𑁆𑀞𑀸𑀦𑀫𑁆𑀧𑀺 𑀅𑀦𑀺𑀩𑁆𑀩𑀓𑁄𑀲𑀫𑁂𑀯 𑀇𑀥 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑁂𑀦 𑀦 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺 𑀦 𑀆𑀮𑀬𑀓𑀭𑀡𑀧𑀝𑀺𑀓𑁆𑀔𑁂𑀧𑁄, ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀯𑀘𑀦𑀧𑀝𑀺𑀓𑁆𑀔𑁂𑀧𑁄. 𑀙𑀯𑀲𑀭𑀻𑀭𑀁 𑀤𑀳𑀺𑀢𑁆𑀯𑀸 𑀙𑀸𑀭𑀺𑀓𑀸𑀬, 𑀅𑀝𑁆𑀞𑀺𑀓𑀸𑀦𑀜𑁆𑀘 𑀅𑀢𑁆𑀣𑀸𑀬 𑀓𑀼𑀝𑀺𑀓𑀸 𑀓𑀭𑀻𑀬𑀢𑀻𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀯𑀘𑀦𑀁. ‘‘𑀝𑀗𑁆𑀓𑀺𑀢𑀫𑀜𑁆𑀘𑁄𑀢𑀺 𑀓𑀲𑀺𑀓𑀼𑀝𑀺𑀓𑀸𑀧𑀸𑀲𑀸𑀡𑀖𑀭’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀅𑀓𑀯𑀸𑀝𑀩𑀤𑁆𑀥𑀲𑁂𑀦𑀸𑀲𑀦𑁂 𑀅𑀢𑁆𑀢𑀦𑁄 𑀧𑀸𑀧𑀺𑀢𑁂 𑀲𑀪𑀸𑀕𑀝𑁆𑀞𑀸𑀦𑁂 𑀲𑀓𑀯𑀸𑀝𑀩𑀤𑁆𑀥𑁂 𑀯𑀲𑀢𑀺 𑀘𑁂, 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀬𑁄𑀕𑁄𑀧𑀺 𑀅𑀢𑁆𑀣𑀺, ‘‘𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀦 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀧𑀸𑀴𑀺 𑀘 𑀅𑀝𑁆𑀞𑀓𑀣𑀸 𑀘, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁.

𑀅𑀥𑀫𑁆𑀫𑀺𑀓𑀓𑀢𑀺𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁦𑁫. 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀅𑀦𑁆𑀥𑀓𑀝𑁆𑀞𑀓𑀣𑀸𑀯𑀘𑀦𑀁 𑀊𑀦𑀧𑀦𑁆𑀦𑀭𑀲𑀯𑀲𑁆𑀲𑁂𑀦 𑀲𑀸𑀫𑀡𑁂𑀭𑁂𑀦 𑀇𑀥 𑀯𑀺𑀳𑀸𑀭𑁂 𑀦 𑀯𑀢𑁆𑀣𑀩𑁆𑀩𑀸, 𑀦 𑀧𑀁𑀲𑀼𑀓𑀽𑀮𑀁 𑀆𑀳𑀺𑀡𑁆𑀟𑀺𑀢𑀩𑁆𑀩𑀁, 𑀦 𑀘𑁄𑀴𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸, 𑀦 𑀅𑀜𑁆𑀜𑀯𑀺𑀳𑀸𑀭𑁂 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀲𑀦𑁆𑀢𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀅𑀜𑁆𑀜𑀫𑀜𑁆𑀜𑀁 𑀦𑁂𑀯 𑀆𑀮𑀧𑁂𑀬𑁆𑀬𑀸𑀫 𑀦 𑀲𑀮𑁆𑀮𑀧𑁂𑀬𑁆𑀬𑀸𑀫, 𑀦 𑀲𑀚𑁆𑀛𑀸𑀬𑀺𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸𑀧𑀢𑁆𑀢𑁂𑀦 𑀯𑀝𑁆𑀝𑀢𑀺, 𑀦 𑀅𑀧𑀭𑀺𑀧𑀼𑀡𑁆𑀡𑀧𑀭𑀺𑀓𑁆𑀔𑀸𑀭𑀲𑁆𑀲 𑀯𑀸𑀲𑁄𑀢𑀺.

𑁨𑁦𑁬. 𑀫𑀼𑀲𑀸𑀯𑀸𑀤𑁄𑀢𑀺 𑀯𑀺𑀲𑀁𑀯𑀸𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀓𑁂𑀘𑀺 ‘‘𑀯𑀺𑀲𑀁𑀯𑀸𑀤𑀦𑀯𑀲𑁂𑀦 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘, ‘‘𑀭𑀜𑁆𑀜𑁄 𑀯𑀼𑀢𑁆𑀢𑀯𑀘𑀦𑀸𑀦𑀼𑀭𑀽𑀧𑀢𑁄 𑀫𑀼𑀲𑀸𑀯𑀸𑀤𑁄𑀢𑀺 𑀕𑀳𑀝𑁆𑀞𑀸 𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘 𑀯𑀤𑀦𑁆𑀢𑀺.

𑁨𑁦𑁭. ‘‘𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺. 𑀓𑀲𑁆𑀫𑀸? ‘𑀤𑀼𑀢𑀺𑀬𑁂 𑀯𑀲𑀸𑀫𑀻’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀧𑀞𑀫𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀧𑀼𑀦 ‘𑀧𑀞𑀫𑁂 𑀏𑀯 𑀯𑀲𑀸𑀫𑀻’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀤𑀼𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀉𑀪𑀬𑀸𑀯𑀸𑀲𑁂 𑀯𑀺𑀥𑀸𑀦𑀁 𑀦𑀢𑁆𑀣𑀻’’𑀢𑀺 𑀮𑀺𑀔𑀺𑀢𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀧𑀞𑀫𑀁 𑀕𑀳𑀺𑀢𑀝𑁆𑀞𑀸𑀦𑁂 𑀅𑀯𑀲𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀁 𑀯𑀲𑀢𑀺, 𑀢𑀢𑁄 𑀧𑀞𑀫𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺. 𑀧𑀘𑁆𑀙𑀺𑀫𑀕𑁆𑀕𑀸𑀳𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀇𑀤𑀜𑁆𑀳𑀺 𑀤𑀺𑀯𑀲𑀯𑀲𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁 𑀦𑀸𑀫 𑀳𑁄𑀢𑀺. 𑀅𑀣 𑀧𑀘𑁆𑀙𑀺𑀫𑀁 𑀢𑁂𑀫𑀸𑀲𑀁 𑀅𑀜𑁆𑀜𑀲𑁆𑀫𑀺𑀁 𑀯𑀲𑀢𑀺, 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀇𑀤𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀦𑀁 𑀯𑀲𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀉𑀪𑁄𑀧𑁂𑀢𑁂 𑀅𑀢𑁆𑀣𑀯𑀺𑀓𑀧𑁆𑀧𑀸 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸. 𑀬𑀢𑁆𑀣𑀸𑀬𑀁 𑀧𑀝𑀺𑀲𑁆𑀲𑀼𑀢𑁄, 𑀢𑀢𑁆𑀣 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀓𑀢𑁆𑀣 𑀧𑀦 𑀧𑀼𑀭𑀺𑀫𑀺𑀓𑀸 𑀧𑀜𑁆𑀜𑀸𑀬𑀢𑀻𑀢𑀺? 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀬𑀢𑁆𑀣 𑀢𑀤𑀳𑁂𑀯 𑀧𑀘𑁆𑀙𑀺𑀫𑀕𑁆𑀕𑀸𑀳𑁄, 𑀢𑀢𑁆𑀣 𑀧𑀞𑀫𑀁 𑀕𑀳𑀺𑀢𑀝𑁆𑀞𑀸𑀦𑁂 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑁄 𑀦 𑀯𑀲𑁆𑀲𑀘𑁆𑀙𑁂𑀤𑁄, 𑀲𑁄 𑀢𑀤𑀳𑁂𑀯 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀻𑀢𑀺𑀆𑀤𑀺𑀫𑁆𑀳𑀺 ‘‘𑀓𑀭𑀡𑀻𑀬𑀁 𑀦𑀸𑀫 𑀲𑀢𑁆𑀢𑀸𑀳𑀓𑀭𑀡𑀻𑀬’’𑀦𑁆𑀢𑀺 𑀮𑀺𑀔𑀺𑀢𑀁.

𑀧𑀸𑀴𑀺𑀫𑀼𑀢𑁆𑀢𑀓𑀭𑀢𑁆𑀢𑀺𑀘𑁆𑀙𑁂𑀤𑀯𑀺𑀦𑀺𑀘𑁆𑀙𑀬𑁂 ‘‘𑀥𑀫𑁆𑀫𑀲𑁆𑀲𑀯𑀦𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀆𑀤𑀺𑀫𑁆𑀳𑀺 𑀘𑀢𑀽𑀲𑀼 𑀯𑀸𑀭𑁂𑀲𑀼 𑀦𑀺𑀭𑀧𑁂𑀓𑁆𑀔𑀧𑀓𑁆𑀓𑀫𑀦𑀲𑁆𑀲𑀸𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦𑀸’’𑀢𑀺 𑀦 𑀯𑀼𑀢𑁆𑀢𑀁 𑀢𑀲𑁆𑀫𑀺𑀁 𑀲𑀢𑀺 𑀦𑀺𑀭𑀧𑁂𑀓𑁆𑀔𑀕𑀫𑀦𑀸𑀪𑀸𑀯𑀢𑁄. 𑀢𑀢𑁆𑀣 𑀧𑀼𑀭𑀺𑀫𑀸 𑀤𑁆𑀯𑁂 𑀯𑀸𑀭𑀸 𑀯𑀲𑁆𑀲𑀁 𑀅𑀦𑀼𑀧𑀕𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀉𑀧𑀕𑀢𑀲𑁆𑀲 𑀢𑀤𑀳𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀲𑀢𑁆𑀢𑀸𑀳𑀁 𑀆𑀕𑀘𑁆𑀙𑀢𑁄 𑀦 𑀯𑀲𑁆𑀲𑀘𑁆𑀙𑁂𑀤𑁄𑀢𑀺 𑀲𑀺𑀤𑁆𑀥𑀁. 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀯𑀸𑀭𑀸 𑀉𑀧𑀕𑀢𑀲𑁆𑀲 𑀦𑀺𑀭𑀧𑁂𑀓𑁆𑀔𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀸, ‘‘𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀻’’𑀢𑀺 𑀢𑀢𑁄 𑀩𑀳𑀺𑀤𑁆𑀥𑀸 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑀲𑁆𑀲 𑀯𑀲𑁆𑀲𑀘𑁆𑀙𑁂𑀤𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀻’’𑀢𑀺 𑀯𑀘𑀦𑀸𑀪𑀸𑀯𑀸 𑀯𑀺𑀦𑀸 𑀭𑀢𑁆𑀢𑀺𑀘𑁆𑀙𑁂𑀤𑀓𑀸𑀭𑀡𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀧𑀯𑀸𑀭𑁂𑀢𑁆𑀯𑀸 𑀧𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺 𑀧𑀯𑀸𑀭𑀡𑀸𑀬 𑀢𑀁𑀤𑀺𑀯𑀲𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸. 𑀢𑀢𑁆𑀣 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀦𑁆𑀢𑀭𑀸𑀬𑁂𑀦. 𑀆𑀘𑀭𑀺𑀬𑁄 𑀧𑀦 ‘‘𑀦 𑀧𑀼𑀦 𑀇𑀥𑀸𑀕𑀘𑁆𑀙𑀸𑀫𑀻’𑀢𑀺 𑀦𑀺𑀭𑀧𑁂𑀓𑁆𑀔𑁄𑀧𑀺 𑀲𑀓𑀭𑀡𑀻𑀬𑁄𑀯 𑀕𑀦𑁆𑀢𑀼𑀁 𑀮𑀪𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀓𑀭𑀡𑀻𑀬𑁄’𑀢𑀺 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀢𑀺. ‘‘𑀲𑀻𑀳𑀴𑀤𑀻𑀧𑁂 𑀓𑀺𑀭 𑀘𑀽𑀴𑀧𑀯𑀸𑀭𑀡𑀸 𑀦𑀸𑀫 𑀅𑀢𑁆𑀣𑀺, 𑀢𑀁 𑀧𑀯𑀸𑀭𑀡𑀁 𑀓𑀢𑁆𑀯𑀸 𑀬𑀣𑀸𑀲𑀼𑀔𑀁 𑀲𑀓𑀭𑀡𑀻𑀬𑀸 𑀕𑀘𑁆𑀙𑀦𑁆𑀢𑀺, 𑀧𑀬𑁄𑀕𑀜𑁆𑀘 𑀤𑀲𑁆𑀲𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀢𑀢𑁆𑀣 𑀙 𑀅𑀭𑀼𑀡𑀸 𑀅𑀦𑁆𑀢𑁄𑀯𑀲𑁆𑀲𑁂 𑀳𑁄𑀦𑁆𑀢𑀺, 𑀏𑀓𑁄 𑀩𑀳𑀺, 𑀢𑀲𑁆𑀫𑀸 𑀲𑁄 𑀢𑁂𑀫𑀸𑀲𑀁 𑀯𑀼𑀢𑁆𑀣𑁄 𑀳𑁄𑀢𑀻𑀢𑀺 𑀅𑀧𑀭𑁂’’𑀢𑀺 𑀘, ‘‘𑀆𑀘𑀭𑀺𑀬𑁄 𑀏𑀯𑀁 𑀦 𑀯𑀤𑀢𑀻’’𑀢𑀺 𑀘 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣 𑀯𑀺𑀳𑀸𑀭𑀁 𑀉𑀧𑁂𑀢𑀻𑀢𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀕𑀩𑁆𑀪𑀁 𑀉𑀧𑁂𑀢𑀻𑀢𑀺 𑀧𑁄𑀭𑀸𑀡𑀸. 𑀅𑀲𑀢𑀺𑀬𑀸 𑀧𑀦 𑀯𑀲𑁆𑀲𑀁 𑀦 𑀉𑀧𑁂𑀢𑀻𑀢𑀺 𑀏𑀢𑁆𑀣 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲’’𑀦𑁆𑀢𑀺 𑀅𑀯𑀘𑀦𑁂𑀦. ‘‘𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀭𑀢𑁆𑀢𑀺𑀘𑁆𑀙𑁂𑀤𑀓𑀸𑀭𑀡𑀁 𑀯𑀺𑀦𑀸 𑀢𑀺𑀭𑁄𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀆𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀕𑀘𑁆𑀙𑀢𑁄𑀧𑀺 𑀯𑀲𑁆𑀲𑀘𑁆𑀙𑁂𑀤’’𑀦𑁆𑀢𑀺 𑀮𑀺𑀔𑀺𑀢𑀁.

𑁨𑁦𑁮. 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬𑀸𑀢𑀺 𑀅𑀦𑁆𑀢𑀭𑀸 𑀧𑀩𑁆𑀩𑀚𑀺𑀢𑀪𑀺𑀓𑁆𑀔𑀼𑀦𑀸, 𑀙𑀺𑀦𑁆𑀦𑀯𑀲𑁆𑀲𑁂𑀦 𑀯𑀸 𑀧𑀝𑀺𑀲𑁆𑀲𑀼𑀢𑁄, 𑀅𑀜𑁆𑀜𑁂𑀦 𑀧𑀦 𑀧𑀼𑀭𑀺𑀫𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀺𑀓𑀸𑀬𑀁 𑀧𑀝𑀺𑀲𑁆𑀲𑀯𑁄 𑀦 𑀓𑀸𑀢𑀩𑁆𑀩𑁄. 𑀭𑀢𑁆𑀢𑀺𑀘𑁆𑀙𑁂𑀤𑁂 𑀲𑀩𑁆𑀩𑀢𑁆𑀣 𑀯𑀲𑁆𑀲𑀘𑁆𑀙𑁂𑀤𑁄𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 𑀦 𑀇𑀘𑁆𑀙𑀦𑁆𑀢𑀺. 𑀢𑀁 𑀲𑀸𑀥𑁂𑀢𑀼𑀁 𑀅𑀦𑁂𑀓𑀥𑀸 𑀧𑀧𑀜𑁆𑀘𑁂𑀦𑁆𑀢𑀺. 𑀓𑀺𑀁 𑀢𑁂𑀦.

𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.