𑁨. 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀲𑀦𑁆𑀦𑀺𑀧𑀸𑀢𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁩𑁨-𑁩. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀅𑀢𑁆𑀢𑀦𑁄 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁𑀬𑁂𑀯 𑀯𑀺𑀲𑀼𑀁 𑀉𑀧𑁄𑀲𑀣𑀓𑀭𑀡𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀞𑀺𑀢𑀲𑀫𑀬𑁂𑀦. 𑀓𑁄 𑀧𑀦 𑀲𑁄𑀢𑀺? 𑀫𑀚𑁆𑀛𑀺𑀫𑀩𑁄𑀥𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑁆𑀧𑀳𑁄𑀦𑀓𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀭𑀺𑀦𑀺𑀝𑁆𑀞𑀸𑀦𑀓𑀸𑀮𑁄. 𑀢𑁂𑀦𑁂𑀯𑀸𑀳 ‘‘𑀢𑀸𑀦𑀺 𑀦𑁂𑀲𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑀁 𑀧𑀜𑁆𑀜𑀸𑀧𑁂𑀢𑀼𑀓𑀸𑀫𑀢𑀸𑀬 𑀘 𑀲𑀺𑀓𑁆𑀔𑀸𑀧𑀤𑀸𑀦𑀁 𑀉𑀤𑁆𑀤𑁂𑀲𑀧𑀭𑀺𑀘𑁆𑀙𑁂𑀤𑀦𑀺𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀣𑀸’’𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀓𑁆𑀓𑀫𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀇𑀤𑀸𑀦𑀺 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀦𑀺𑀭𑀢𑁆𑀣𑀓𑀁 𑀆𑀧𑀚𑁆𑀚𑀢𑀺, 𑀇𑀤𑀜𑁆𑀘 𑀲𑀩𑁆𑀩𑀲𑀗𑁆𑀖𑀼𑀧𑁄𑀲𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁩𑁪. ‘‘𑀬𑀁𑀦𑀽𑀦 𑀅𑀬𑁆𑀬𑀸𑀧𑀺…𑀧𑁂… 𑀲𑀦𑁆𑀦𑀺𑀧𑀢𑁂𑀬𑁆𑀬𑀼’’𑀦𑁆𑀢𑀺 𑀩𑀳𑀽𑀦𑀁 𑀅𑀥𑀺𑀓𑀸𑀭𑀧𑁆𑀧𑀯𑀢𑁆𑀢𑀺. 𑀢𑀢𑁆𑀭𑀸𑀧𑀺 𑀯𑀺𑀦𑀬𑀁 𑀆𑀕𑀫𑁆𑀫 𑀯𑀼𑀢𑁆𑀢𑁄 𑀪𑀺𑀓𑁆𑀔𑀼 𑀲𑀸𑀫𑀺, 𑀦 𑀓𑁂𑀯𑀮𑀁 𑀲𑀗𑁆𑀖𑀢𑁆𑀣𑁂𑀭𑁄𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀲𑀗𑁆𑀖𑀲𑁆𑀲 𑀕𑀸𑀭𑀯𑀬𑀼𑀢𑁆𑀢𑀯𑀘𑀦𑀸𑀭𑀳𑀢𑀸𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂’’𑀢𑀺 𑀆𑀳. 𑀢𑀢𑁆𑀣 𑀲𑀬𑀁 𑀘𑁂 𑀣𑁂𑀭𑁄, 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 ‘‘𑀆𑀯𑀼𑀲𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀓𑀣𑀁 𑀧𑀜𑁆𑀜𑀸𑀬𑀢𑀺? 𑀩𑀼𑀤𑁆𑀥𑀓𑀸𑀮𑁂 𑀲𑀗𑁆𑀖𑀢𑁆𑀣𑁂𑀭𑁄 𑀅𑀩𑁆𑀬𑀢𑁆𑀢𑁄 𑀦𑀸𑀫 𑀤𑀼𑀮𑁆𑀮𑀪𑁄. 𑀲𑀩𑁆𑀩𑀓𑀫𑁆𑀫𑀯𑀸𑀘𑀸𑀬 𑀧𑀬𑁄𑀕𑀦𑀺𑀤𑀲𑁆𑀲𑀦𑁂 𑀘 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’ 𑀇𑀘𑁆𑀘𑁂𑀯 𑀪𑀕𑀯𑀸 𑀤𑀲𑁆𑀲𑁂𑀢𑀻𑀢𑀺 𑀘𑁂? 𑀏𑀯𑀫𑁂𑀢𑀁 𑀢𑀣𑀸 𑀤𑀲𑁆𑀲𑀦𑀢𑁄. 𑀲𑀗𑁆𑀖𑀁 𑀉𑀧𑀸𑀤𑀸𑀬 𑀲𑀗𑁆𑀖𑀢𑁆𑀣𑁂𑀭𑁂𑀦𑀸𑀧𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑀁, 𑀪𑀺𑀓𑁆𑀔𑀼𑀁 𑀉𑀧𑀸𑀤𑀸𑀬 ‘‘𑀆𑀯𑀼𑀲𑁄’’𑀢𑀺 𑀫𑀳𑀸𑀓𑀲𑁆𑀲𑀧𑀲𑁆𑀲 𑀓𑀫𑁆𑀫𑀯𑀸𑀘𑀸𑀬 𑀧𑀬𑁄𑀕𑀤𑀲𑁆𑀲𑀦𑀢𑁄, 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁂 𑀘 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄’’𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄 𑀘. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀧𑀭𑀢𑁄 𑀧𑀜𑁆𑀜𑀸𑀧𑁂𑀢𑀩𑁆𑀩𑁂 𑀉𑀧𑁄𑀲𑀣𑀓𑀭𑀡𑀦𑁆𑀢𑀭𑀸𑀬𑁂 𑀲𑀦𑁆𑀥𑀸𑀬𑀸𑀳. 𑀉𑀧𑁄𑀲𑀣𑀲𑁆𑀲 𑀩𑀳𑀼𑀯𑀺𑀥𑀢𑁆𑀢𑀸 𑀲𑀭𑀽𑀧𑀢𑁄 𑀯𑀢𑁆𑀢𑀼𑀁 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 𑀆𑀳. 𑀏𑀢𑁆𑀢𑀸𑀯𑀢𑀸 𑀜𑀢𑁆𑀢𑀺𑀁 𑀦𑀺𑀝𑁆𑀞𑀧𑁂𑀲𑀺. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀢𑁄 𑀏𑀯 𑀳𑀺 𑀉𑀧𑁄𑀲𑀣𑀓𑀫𑁆𑀫𑀁. 𑀦, 𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀲𑀫𑁆𑀪𑀯𑀢𑁄𑀢𑀺 𑀘𑁂? 𑀦, 𑀅𑀜𑁆𑀜𑁂𑀳𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀳𑀺 𑀅𑀲𑀤𑀺𑀲𑀢𑁆𑀢𑀸. 𑀦 𑀳𑀺 𑀏𑀢𑁆𑀣 𑀘𑀢𑀼𑀓𑁆𑀔𑀢𑁆𑀢𑀼𑀁 ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀆𑀭𑀪𑀻𑀬𑀢𑀻𑀢𑀺. 𑀅𑀜𑁆𑀜𑁂𑀳𑀺 𑀜𑀢𑁆𑀢𑀺𑀤𑀼𑀢𑀺𑀬𑁂𑀳𑀺 𑀅𑀲𑀤𑀺𑀲𑀢𑁆𑀢𑀸 𑀜𑀢𑁆𑀢𑀺𑀤𑀼𑀢𑀺𑀬𑀫𑁆𑀧𑀺 𑀫𑀸𑀳𑁄𑀢𑀽𑀢𑀺 𑀘𑁂? 𑀦, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀲𑁆𑀲 𑀅𑀜𑁆𑀜𑀣𑀸𑀧𑀺 𑀓𑀢𑁆𑀢𑀩𑁆𑀩𑀢𑁄. 𑀢𑀣𑀸 𑀳𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀏𑀓𑀘𑁆𑀘𑀁 𑀅𑀧𑀮𑁄𑀓𑀦𑀯𑀲𑁂𑀦𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀅𑀜𑁆𑀜𑀁 𑀅𑀜𑁆𑀜𑀣𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀇𑀤𑀫𑁂𑀯 𑀉𑀧𑁄𑀲𑀣𑀓𑀫𑁆𑀫𑀁 𑀜𑀸𑀧𑀓𑀁.

‘‘𑀓𑀺𑀁 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺 𑀇𑀤𑀁 𑀦 𑀜𑀢𑁆𑀢𑀺 𑀦𑀺𑀝𑁆𑀞𑀧𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁, 𑀢𑀜𑁆𑀳𑀺 𑀜𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀓𑀭𑀻𑀬𑀢𑀻𑀢𑀺. 𑀢𑀲𑁆𑀫𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀓𑀺𑀁 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘𑀁, 𑀬𑀤𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀢𑀣𑀸𑀧𑀺 𑀦 𑀯𑀢𑁆𑀢𑀩𑁆𑀩𑀁, 𑀦 𑀳𑀺 𑀢𑀁 𑀜𑀢𑁆𑀢𑀺𑀬𑀸 𑀅𑀦𑁆𑀢𑁄𑀓𑀭𑀻𑀬𑀢𑀻𑀢𑀺. 𑀬𑀤𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀦 𑀯𑀢𑁆𑀢𑀩𑁆𑀩𑀁 𑀧𑀬𑁄𑀚𑀦𑀸𑀪𑀸𑀯𑀸𑀢𑀺 𑀘𑁂? 𑀦, 𑀬𑀣𑀸𑀕𑀢𑀝𑁆𑀞𑀸𑀦𑁂𑀬𑁂𑀯 𑀯𑀢𑁆𑀢𑀩𑁆𑀩𑀢𑁄, 𑀧𑀭𑀧𑀤𑀸𑀧𑁂𑀓𑁆𑀔𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀓𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀲𑀗𑁆𑀖𑁄, 𑀧𑀼𑀕𑁆𑀕𑀮𑁄 𑀯𑀸 𑀞𑀧𑀦𑀓𑁆𑀔𑁂𑀢𑁆𑀢𑀸𑀢𑀺𑀓𑁆𑀓𑀫𑁂 𑀆𑀧𑀚𑁆𑀚𑀢𑀺. 𑀦 𑀳𑀺 𑀢𑀲𑁆𑀫𑀺𑀁 𑀔𑁂𑀢𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀲𑀫𑁆𑀫𑀚𑁆𑀚𑀦𑀸𑀲𑀦𑁄𑀤𑀓𑀧𑀤𑀻𑀧𑀓𑀭𑀡𑁂 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀳𑁄𑀢𑀺. 𑀉𑀧𑁄𑀲𑀣𑀓𑀫𑁆𑀫𑀢𑁄 𑀧𑀼𑀩𑁆𑀩𑁂 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀓𑀭𑀡𑀧𑀘𑁆𑀘𑀬𑀢𑁆𑀢𑀸 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸, 𑀦 𑀲𑀸 𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀸𑀧𑁂𑀓𑁆𑀔𑀸 𑀏𑀢𑁆𑀣𑀸𑀕𑀢𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀸𑀧𑀢𑁆𑀢𑀺 𑀯𑀺𑀬, 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀪𑀺𑀓𑁆𑀔𑀼 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀬𑀲𑁆𑀫𑀦𑁆𑀢𑁄 𑀆𑀭𑁄𑀘𑁂𑀣𑀸’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀧𑀞𑀫𑀁𑀬𑁂𑀯 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥𑀧𑀘𑁆𑀘𑀬𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀭𑀸𑀧𑁂𑀢𑀺. 𑀢𑀜𑁆𑀳𑀺 𑀓𑀢𑀁 𑀧𑀭𑀺𑀲𑀼𑀤𑁆𑀥𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀓𑀢𑀁 𑀅𑀧𑀭𑀺𑀲𑀼𑀤𑁆𑀥𑀧𑀘𑁆𑀘𑀬𑁄, 𑀢𑁂𑀦𑁂𑀯 𑀉𑀪𑀬𑀸𑀧𑁂𑀓𑁆𑀔𑀸𑀥𑀺𑀧𑁆𑀧𑀸𑀬𑁂𑀦 ‘‘𑀓𑀢𑀁 𑀦 𑀓𑀢’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀓𑀺𑀁 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘’’ 𑀫𑀺𑀘𑁆𑀘𑁂𑀯𑀸𑀳. 𑀢𑀢𑁆𑀣 𑀅𑀓𑀢𑀧𑀓𑁆𑀔𑁂 𑀢𑀸𑀯 𑀧𑀸𑀭𑀺𑀲𑀼𑀤𑁆𑀥𑀺𑀆𑀭𑁄𑀘𑀦𑀓𑁆𑀓𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀧𑀭𑀢𑁄 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺, 𑀲𑁄 𑀆𑀯𑀺 𑀓𑀭𑁂𑀬𑁆𑀬𑀸’’𑀢𑀺 𑀘, 𑀓𑀢𑀧𑀓𑁆𑀔𑁂 ‘‘𑀅𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑀸 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘 𑀯𑀓𑁆𑀔𑀢𑀺.

𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀬𑀲𑁆𑀫𑀦𑁆𑀢𑁄 𑀆𑀭𑁄𑀘𑁂𑀣. 𑀓𑀺𑀁𑀓𑀸𑀭𑀡𑀸? 𑀬𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀺. 𑀏𑀢𑁆𑀣 𑀘 ‘‘𑀉𑀤𑁆𑀤𑀺𑀲𑀸𑀫𑀻’’𑀢𑀺 𑀯𑀢𑁆𑀢𑀫𑀸𑀦𑀓𑀸𑀮𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 ‘‘𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀸𑀕𑀢𑀓𑀸𑀮𑀧𑀭𑀸𑀫𑀲𑀦𑁂𑀦 𑀬𑁆𑀯𑀸𑀬𑀁 ‘‘𑀤𑀸𑀦𑀺 𑀦𑁂𑀲𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁧𑁫𑁦) 𑀏𑀢𑁆𑀣 𑀯𑀼𑀢𑁆𑀢𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄, 𑀢𑀁 𑀲𑀦𑁆𑀥𑀸𑀬 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀬𑀲𑁆𑀫𑀸 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀢𑁆𑀢𑀫𑀸𑀦𑀲𑁆𑀲 𑀦𑀺𑀤𑀸𑀦𑀼𑀤𑁆𑀤𑁂𑀲𑀲𑀗𑁆𑀔𑀸𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀬𑀤𑁂𑀢𑀁 𑀅𑀦𑁆𑀢𑁂 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’𑀢𑀺𑀆𑀤𑀺𑀓𑀁 𑀬𑀸𑀯𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀁, 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺𑀔𑁂𑀢𑁆𑀢𑀢𑁆𑀢𑀸, 𑀅𑀯𑀬𑀯𑁂𑀧𑀺 𑀅𑀯𑀬𑀯𑀻𑀯𑁄𑀳𑀸𑀭𑀲𑀫𑁆𑀪𑀯𑀢𑁄 𑀘 𑀇𑀥 𑀆𑀧𑀢𑁆𑀢𑀺𑀔𑁂𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀯𑀼𑀢𑁆𑀢𑁂 𑀬𑀲𑁆𑀫𑀸 𑀧𑀭𑀢𑁄 𑀆𑀧𑀢𑁆𑀢𑀺𑀔𑁂𑀢𑁆𑀢𑀁 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀆𑀧𑀢𑁆𑀢𑀺𑀪𑀻𑀭𑀼𑀓𑀸 𑀢𑀼𑀫𑁆𑀳𑁂 𑀲𑀩𑁆𑀩𑁂𑀯 𑀧𑀞𑀫𑀫𑁂𑀯 𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀭𑁄𑀘𑁂𑀣𑀸𑀢𑀺 𑀅𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑁂 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀬𑀲𑁆𑀫𑀦𑁆𑀢𑁄 𑀆𑀭𑁄𑀘𑁂𑀣𑀸’’𑀢𑀺 𑀯𑀘𑀦𑀫𑁂𑀯 𑀦 𑀲𑀫𑁆𑀪𑀯𑀢𑀺 𑀢𑀤𑀸𑀭𑁄𑀘𑀦𑀲𑁆𑀲 𑀧𑀞𑀫𑀁 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀧𑀕𑁂𑀯 𑀢𑀲𑁆𑀲 𑀓𑀭𑀡𑀸𑀪𑀸𑀯𑁂𑀦 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀁. 𑀅𑀬𑀁 𑀦𑀬𑁄 𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑀸 𑀆𑀭𑁄𑀘𑀦𑁂 𑀬𑀼𑀚𑁆𑀚𑀢𑀺, 𑀦 𑀢𑀼𑀡𑁆𑀳𑀻𑀪𑀸𑀯𑁂, 𑀅𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀸 𑀢𑀼𑀡𑁆𑀳𑀻𑀪𑀸𑀯𑀧𑁆𑀧𑀢𑁆𑀢𑀺𑀢𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀲𑁆𑀫𑀺𑀁 𑀬𑀼𑀚𑁆𑀚𑀢𑁂𑀯. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀆𑀧𑀢𑁆𑀢𑀺𑀆𑀯𑀺𑀓𑀭𑀡𑀁 𑀅𑀓𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁂 𑀪𑀺𑀓𑁆𑀔𑀽 𑀧𑀲𑁆𑀲𑀺𑀢𑁆𑀯𑀸 𑀢𑁂𑀦𑁂𑀯 𑀢𑀼𑀡𑁆𑀳𑀻𑀪𑀸𑀯𑁂𑀦 𑀆𑀭𑁄𑀘𑀺𑀢𑀧𑀸𑀭𑀺𑀲𑀼𑀤𑁆𑀥𑀺𑀓𑁄 𑀳𑀼𑀢𑁆𑀯𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂’’𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀆𑀭𑀪𑀺.

𑀏𑀢𑁆𑀣𑀸𑀳 𑁋 𑀧𑀞𑀫𑀁 ‘‘𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀧𑀺 ‘‘𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀣 ‘‘𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀸’’𑀢𑀺 𑀮𑀓𑁆𑀔𑀡𑀢𑁆𑀢𑀸 𑀬𑀣𑀸𑀭𑀼𑀢𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀢𑀣𑀸𑀧𑀺 ‘‘𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁 𑀮𑀓𑁆𑀔𑀡𑀯𑀺𑀭𑁄𑀥𑀢𑁄, 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄 𑀘. 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀸 𑀏𑀯 𑀳𑀺 𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑁄 𑀓𑀢𑁄 𑀳𑁄𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲 𑀉𑀧𑁄𑀲𑀣𑀓𑀭𑀡𑁂𑀦. 𑀢𑀜𑁆𑀘 𑀲𑁄𑀯 𑀓𑀭𑀺𑀲𑁆𑀲𑀢𑀺, 𑀦 𑀲𑀗𑁆𑀖𑁄𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀯 𑀆𑀧𑀚𑁆𑀚𑀢𑀺. ‘‘𑀲𑀼𑀡𑀸𑀣𑀸’’𑀢𑀺 𑀯𑀼𑀢𑁆𑀢𑁂 𑀅𑀘𑀺𑀢𑁆𑀢𑀲𑀸𑀫𑀕𑁆𑀕𑀺𑀧𑁆𑀧𑀲𑀗𑁆𑀕𑀪𑀬𑀸 ‘‘𑀲𑀼𑀡𑁄𑀫𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀁 ‘‘𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀁, 𑀆𑀧𑀢𑁆𑀢𑀺𑀔𑁂𑀢𑁆𑀢𑀤𑀲𑁆𑀲𑀦𑀸𑀥𑀺𑀧𑁆𑀧𑀸𑀬𑀦𑀺𑀭𑀧𑁂𑀓𑁆𑀔𑀢𑀸𑀬 ‘‘𑀲𑀼𑀡𑁄𑀫’’ 𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁. 𑀏𑀓𑀧𑀤𑁂𑀦𑁂𑀯 𑀳𑀺𑀲𑁆𑀲 𑀢𑀤𑀥𑀺𑀧𑁆𑀧𑀸𑀬𑁄 𑀅𑀢𑀺𑀓𑁆𑀓𑀦𑁆𑀢𑁄𑀢𑀺. 𑀬𑀤𑀺 𑀏𑀯𑀁 𑀓𑀺𑀫𑀢𑁆𑀣𑀁 𑀢𑀁 𑀲𑀩𑁆𑀩𑁂𑀳𑁂𑀯 𑀆𑀭𑀤𑁆𑀥𑀦𑁆𑀢𑀺 𑀘𑁂? ‘‘𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀅𑀲𑀸𑀥𑀸𑀭𑀡𑀯𑀘𑀦𑁂𑀦 𑀆𑀧𑀦𑁆𑀦𑀲𑁆𑀲 𑀅𑀘𑀺𑀢𑁆𑀢𑀲𑀸𑀫𑀕𑁆𑀕𑀺𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁. 𑀲𑀭𑀫𑀸𑀦𑁂𑀦𑀸𑀢𑀺 𑀇𑀫𑀺𑀦𑀸 𑀘𑀲𑁆𑀲 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀲𑀘𑀺𑀢𑁆𑀢𑀓𑀢𑀁 𑀤𑀲𑁆𑀲𑁂𑀢𑀺. 𑀅𑀦𑁆𑀢𑀭𑀸𑀬𑀺𑀓𑁄 𑀥𑀫𑁆𑀫𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺 𑀏𑀯𑀁 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀏𑀯𑀁 𑀧𑀭𑀺𑀢𑁆𑀢𑀓𑀲𑁆𑀲 𑀇𑀫𑀲𑁆𑀲 𑀫𑀼𑀲𑀸𑀯𑀸𑀤𑀲𑁆𑀲 𑀫𑀳𑀸𑀤𑀻𑀦𑀯𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁂𑀦𑀸𑀢𑀺 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀉𑀧𑀸𑀤𑀸𑀬 𑀅𑀦𑀸𑀧𑀢𑁆𑀢𑀺𑀪𑀸𑀯𑀲𑀗𑁆𑀔𑀸𑀢𑀁 𑀅𑀦𑀯𑀲𑁂𑀲𑀜𑁆𑀘 𑀉𑀧𑀸𑀤𑀸𑀬 𑀕𑀺𑀳𑀺𑀪𑀸𑀯𑀲𑀗𑁆𑀔𑀸𑀢𑀁 𑀯𑀺𑀲𑀼𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦 𑀓𑀲𑁆𑀫𑀸 𑀆𑀯𑀺 𑀓𑀸𑀢𑀩𑁆𑀩𑀸? 𑀅𑀦𑁆𑀢𑀭𑀸𑀬𑀪𑀸𑀯𑀸𑀦𑀼𑀧𑀕𑀫𑀦𑁂𑀦 𑀨𑀸𑀲𑀼𑀯𑀺𑀳𑀸𑀭𑀧𑀘𑁆𑀘𑀬𑀢𑁆𑀢𑀸. 𑀇𑀥 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄’’𑀢𑀺 𑀦 𑀯𑀼𑀢𑁆𑀢𑀁 𑀧𑀭𑀢𑁄 𑀤𑀺𑀯𑀲𑀦𑀺𑀬𑀫𑀲𑁆𑀲 𑀓𑀢𑁆𑀢𑀼𑀓𑀸𑀫𑀢𑀸𑀥𑀺𑀧𑁆𑀧𑀸𑀬𑁂𑀦 𑀅𑀯𑀼𑀢𑁆𑀢𑀢𑁆𑀢𑀸. 𑀏𑀯𑀁 𑀧𑀦 𑀢𑁂 𑀪𑀺𑀓𑁆𑀔𑀽 𑀲𑀩𑁆𑀩𑀤𑀺𑀯𑀲𑁂𑀲𑀼 𑀉𑀤𑁆𑀤𑀺𑀲𑀺𑀁𑀲𑀼.

𑁧𑁩𑁫. ‘‘𑀆𑀤𑀺𑀫𑁂𑀢’’𑀦𑁆𑀢𑀺 𑀲𑀻𑀮𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀯𑀼𑀢𑁆𑀢𑀁, 𑀓𑀺𑀜𑁆𑀘𑀸𑀧𑀺 𑀕𑀦𑁆𑀣𑀧𑀸𑀢𑀺𑀫𑁄𑀓𑁆𑀔𑁄 𑀅𑀥𑀺𑀧𑁆𑀧𑁂𑀢𑁄. ‘‘𑀧𑀜𑁆𑀘𑀦𑁆𑀦𑀁 𑀯𑀸’’𑀢𑀺 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀦𑀚𑁆𑀛𑀸𑀧𑀦𑁆𑀦𑁄 𑀯𑀸𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀤𑁂𑀲𑀦𑀸. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 ‘‘‘𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸’𑀢𑀺 𑀏𑀢𑁆𑀢𑀸𑀯𑀢𑀸 𑀜𑀢𑁆𑀢𑀺 𑀳𑁄𑀢𑀺. 𑀬𑀸𑀯𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀸 𑀦𑀸𑀫 ‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’𑀢𑀺𑀆𑀤𑀺𑀯𑀘𑀦𑀢𑁆𑀢𑀬𑀁, 𑀅𑀦𑁆𑀢𑁂 ‘𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀻’𑀢𑀺 𑀇𑀤𑀜𑁆𑀘𑀸𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀞𑀫𑀁 𑀆𑀧𑀢𑁆𑀢𑀺𑀁 𑀲𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲, 𑀤𑀼𑀢𑀺𑀬𑀁 𑀅𑀲𑀭𑀦𑁆𑀢𑀲𑁆𑀲 𑀲𑀸𑀭𑀡𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀯𑀘𑀻𑀤𑁆𑀯𑀸𑀭𑁂’’𑀢𑀺 𑀧𑀸𑀓𑀝𑀯𑀲𑁂𑀦 𑀉𑀚𑀼𑀓𑀫𑁂𑀯 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸𑀧𑀺 𑀓𑀭𑀻𑀬𑀢𑀺, 𑀓𑀸𑀬𑀓𑀫𑁆𑀫𑀸𑀪𑀸𑀯𑀸 𑀧𑀦 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸𑀬𑁂𑀯 𑀆𑀯𑀺 𑀓𑀸𑀢𑀩𑁆𑀩𑀸. ‘‘𑀲𑀗𑁆𑀖𑀫𑀚𑁆𑀛𑁂 𑀯𑀸’’𑀢𑀺𑀆𑀤𑀺 𑀮𑀓𑁆𑀔𑀡𑀯𑀘𑀦𑀁 𑀓𑀺𑀭. 𑀲𑀗𑁆𑀖𑀼𑀧𑁄𑀲𑀣𑀓𑀭𑀡𑀢𑁆𑀣𑀁 𑀲𑀗𑁆𑀖𑀫𑀚𑁆𑀛𑁂 𑀘𑁂 𑀦𑀺𑀲𑀺𑀦𑁆𑀦𑁄, 𑀢𑀲𑁆𑀫𑀺𑀁 𑀲𑀗𑁆𑀖𑀫𑀚𑁆𑀛𑁂. 𑀕𑀡𑀼𑀧𑁄𑀲𑀣𑀓𑀭𑀡𑀢𑁆𑀣𑀜𑁆𑀘𑁂 𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄, 𑀢𑀲𑁆𑀫𑀺𑀁 𑀕𑀡𑀫𑀚𑁆𑀛𑁂. 𑀏𑀓𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀘𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀫𑀺𑀁 𑀏𑀓𑀧𑀼𑀕𑁆𑀕𑀮𑁂 𑀆𑀯𑀺 𑀓𑀸𑀢𑀩𑁆𑀩𑀸𑀢𑀺, ‘‘𑀏𑀢𑁂𑀦 𑀦 𑀓𑁂𑀯𑀮𑀁 𑀲𑀗𑁆𑀖𑀫𑀚𑁆𑀛𑁂 𑀏𑀯𑀸𑀬𑀁 𑀫𑀼𑀲𑀸𑀯𑀸𑀤𑁄 𑀲𑀫𑁆𑀪𑀯𑀢𑀺, 𑀅𑀣 𑀔𑁄 𑀏𑀢𑁆𑀣 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀅𑀲𑀢𑀺𑀧𑀺 ‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀬𑀲𑁆𑀫𑀦𑁆𑀢𑁄 𑀆𑀭𑁄𑀘𑁂𑀣𑀸’𑀢𑀺𑀆𑀤𑀺𑀯𑀺𑀥𑀸𑀦𑁂 𑀕𑀡𑀼𑀧𑁄𑀲𑀣𑁂𑀧𑀺 𑀲𑀸𑀧𑀢𑁆𑀢𑀺𑀓𑁄 𑀳𑀼𑀢𑁆𑀯𑀸 𑀉𑀧𑁄𑀲𑀣𑀁 𑀓𑀢𑁆𑀢𑀼𑀓𑀸𑀫𑁄 𑀅𑀦𑀸𑀭𑁄𑀘𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄𑀯 𑀓𑀭𑁄𑀢𑀺 𑀘𑁂, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀓𑀭𑀡𑀢𑁄 𑀮𑀓𑁆𑀔𑀡𑀯𑀘𑀦𑀁 𑀓𑀺𑀭𑁂𑀢’’𑀦𑁆𑀢𑀺 𑀯𑀤𑀦𑁆𑀢𑀺 𑀢𑀓𑁆𑀓𑀺𑀓𑀸. 𑀅𑀜𑁆𑀜𑀣𑀸 ‘‘𑀕𑀡𑀫𑀚𑁆𑀛𑁂𑀯𑀸’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀆𑀭𑁄𑀘𑀦𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀆𑀭𑁄𑀘𑁂𑀦𑁆𑀢𑁄 𑀳𑀺 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀆𑀯𑀺 𑀓𑀭𑁄𑀦𑁆𑀢𑁄 𑀲𑀗𑁆𑀖𑀫𑀚𑁆𑀛𑁂 𑀆𑀯𑀺 𑀓𑀭𑁄𑀢𑀺 𑀦𑀸𑀫. 𑀅𑀢𑁆𑀢𑀦𑁄 𑀉𑀪𑀢𑁄𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀸𑀦𑀁 𑀆𑀭𑁄𑀘𑁂𑀦𑁆𑀢𑁄 𑀕𑀡𑀫𑀚𑁆𑀛𑁂. 𑀏𑀓𑀲𑁆𑀲𑁂𑀯𑀸𑀭𑁄𑀘𑁂𑀲𑁆𑀲𑀸𑀫𑀺 𑀲𑀪𑀸𑀕𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀆𑀭𑁄𑀘𑁂𑀦𑁆𑀢𑁄 𑀏𑀓𑀧𑀼𑀕𑁆𑀕𑀮𑁂 𑀆𑀭𑁄𑀘𑁂𑀢𑀺 𑀦𑀸𑀫. 𑀧𑀼𑀩𑁆𑀩𑁂 𑀯𑀺𑀪𑀢𑁆𑀢𑀧𑀤𑀲𑁆𑀲 𑀧𑀼𑀦 𑀯𑀺𑀪𑀚𑀦𑀁 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁩𑁬-𑁭. ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀲𑀺𑀓𑀁…𑀧𑁂… 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 𑀇𑀤𑀁 𑀅𑀦𑀼𑀧𑁄𑀲𑀣𑁂 𑀏𑀯 𑀢𑀁 𑀤𑀼𑀓𑁆𑀓𑀝𑀁, 𑀉𑀧𑁄𑀲𑀣𑁂 𑀧𑀦 𑀤𑁂𑀯𑀲𑀺𑀓𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀘𑀸𑀢𑀼𑀤𑁆𑀤𑀲𑀺𑀬𑀁 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀧𑀦𑁆𑀦𑀭𑀲𑀺𑀬𑀁 𑀉𑀤𑁆𑀤𑀺𑀲𑀺𑀁𑀲𑀼, 𑀢𑁂𑀦𑀸𑀳 ‘‘𑀲𑀓𑀺𑀁 𑀧𑀓𑁆𑀔𑀲𑁆𑀲𑀸’’𑀢𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀲𑀸𑀫𑀕𑁆𑀕𑀻𑀤𑀺𑀯𑀲𑁄 𑀉𑀧𑁄𑀲𑀣𑀤𑀺𑀯𑀲𑁄 𑀏𑀯𑀸𑀢𑀺 𑀤𑀻𑀧𑁂𑀢𑀺. 𑀉𑀪𑀬𑁂𑀦 𑀅𑀝𑁆𑀞𑀫𑀺𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀯𑀲𑀺𑀓𑀁 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀢𑀺𑀧𑁆𑀧𑀲𑀗𑁆𑀕𑀁 𑀦𑀺𑀯𑀸𑀭𑁂𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀪𑀺𑀦𑁆𑀦𑁄 𑀘𑁂 𑀲𑀗𑁆𑀖𑁄 𑀧𑀸𑀝𑀺𑀧𑀤𑀤𑀺𑀯𑀲𑁂 𑀲𑀫𑀕𑁆𑀕𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀉𑀪𑀬𑀫𑁆𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑁄 𑀉𑀪𑀬𑁂𑀦 𑀏𑀓𑀻𑀪𑀽𑀢𑁂𑀦 𑀦𑀺𑀯𑀸𑀭𑀺𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄 𑀦 𑀤𑁂𑀯𑀲𑀺𑀓𑁄. 𑀘𑁂, 𑀅𑀳𑁄𑀭𑀢𑁆𑀢𑀁 𑀓𑀸𑀢𑀩𑁆𑀩𑁄. 𑀢𑀲𑁆𑀫𑀺𑀜𑁆𑀘 𑀧𑀓𑁆𑀔𑁂 𑀧𑀓𑀢𑀺𑀉𑀧𑁄𑀲𑀣𑁄 𑀦 𑀤𑁂𑀯𑀲𑀺𑀓𑁄. 𑀘𑁂, 𑀅𑀳𑁄𑀭𑀢𑁆𑀢𑀁 𑀓𑀸𑀢𑀩𑁆𑀩𑁄. 𑀢𑀲𑁆𑀫𑀺𑀜𑁆𑀘 𑀧𑀓𑁆𑀔𑁂 𑀧𑀓𑀢𑀺𑀉𑀧𑁄𑀲𑀣𑁄 𑀅𑀦𑀼𑀤𑁆𑀤𑀺𑀝𑁆𑀞𑁄. 𑀘𑁂 𑀳𑁄𑀢𑀺, 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀢𑀺 𑀆𑀧𑀚𑁆𑀚𑀢𑀺. 𑀦 𑀅𑀧𑀯𑀸𑀤𑀦𑀬𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸𑀢𑀺 𑀘𑁂? 𑀦, 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑀸𑀫𑀕𑁆𑀕𑀻𑀤𑀺𑀯𑀲𑁂 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑀁 𑀓𑀢𑁆𑀯𑀸 𑀧𑀼𑀦 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀧𑀓𑀢𑀺𑀉𑀧𑁄𑀲𑀣𑀤𑀺𑀯𑀲𑁂 𑀲𑀫𑁆𑀧𑀢𑁆𑀢𑁂 𑀧𑀓𑀢𑀺𑀉𑀧𑁄𑀲𑀣𑁄 𑀦 𑀓𑀸𑀢𑀩𑁆𑀩𑁄𑀢𑀺. 𑀅𑀧𑀯𑀸𑀤𑁄𑀢𑀺. 𑀅𑀧𑀯𑀸𑀤𑀺𑀢𑀩𑁆𑀩𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀉𑀲𑁆𑀲𑀕𑁆𑀕𑀯𑀺𑀥𑀸𑀦𑀁 𑀦𑀺𑀯𑀸𑀭𑁂𑀢𑀺.

𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀲𑀸𑀫𑀕𑁆𑀕𑀻𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑀸𑀫𑀕𑁆𑀕𑀻 𑀦𑀸𑀫𑁂𑀲𑀸 𑀲𑀪𑀸𑀕𑀸𑀦𑀁 𑀲𑀦𑁆𑀦𑀺𑀧𑀸𑀢𑁄. 𑀲𑀪𑀸𑀕𑀸 𑀘 𑀦𑀸𑀫 𑀬𑀢𑁆𑀢𑀓𑀸 𑀲𑀳𑀥𑀫𑁆𑀫𑀺𑀓𑀸, 𑀢𑁂 𑀲𑀩𑁆𑀩𑁂𑀧𑀺 𑀳𑁄𑀦𑁆𑀢𑀺, 𑀉𑀤𑀸𑀳𑀼 𑀆𑀯𑀸𑀲𑀲𑀪𑀸𑀕𑀢𑀸𑀬 𑀲𑀪𑀸𑀕𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀢𑀢𑁆𑀣 𑀬𑀤𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀲𑀸𑀫𑀕𑁆𑀕𑀻 𑀲𑀸𑀫𑀕𑁆𑀕𑀻 𑀦𑀸𑀫, 𑀲𑀩𑁆𑀩𑁂𑀲𑀁 𑀧𑀼𑀣𑀼𑀯𑀺𑀪𑀢𑁆𑀢𑀸𑀦𑀁 𑀲𑀸𑀫𑀕𑁆𑀕𑀻 𑀇𑀘𑁆𑀙𑀺𑀢𑀩𑁆𑀩𑀸. 𑀅𑀣𑀸𑀯𑀲𑀣𑀯𑀲𑁂𑀦, 𑀏𑀓𑀸𑀯𑀸𑀲𑀲𑀪𑀸𑀕𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 𑀏𑀓𑀸𑀯𑀸𑀲𑁂 𑀲𑀸𑀫𑀕𑁆𑀕𑀻𑀢𑀺 𑀆𑀧𑀚𑁆𑀚𑀢𑀺. 𑀫𑀸 𑀦𑁄 𑀅𑀕𑀫𑀸𑀲𑀻𑀢𑀺 𑀅𑀕𑀢𑁄 𑀫𑀸 𑀳𑁄𑀢𑀺.

𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁧𑁩𑁮. 𑀏𑀓𑀸𑀯𑀸𑀲𑀕𑀢𑀸𑀦𑀁 𑀯𑀲𑁂𑀦 𑀲𑀸𑀫𑀕𑁆𑀕𑀺𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀲𑀻𑀫𑀕𑀢𑀸𑀦𑀁 𑀯𑀲𑁂𑀦 𑀅𑀦𑀼𑀚𑀸𑀦𑀺𑀢𑀼𑀓𑀸𑀫𑁄 𑀪𑀕𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 𑀆𑀳. 𑀅𑀣 𑀆𑀯𑀸𑀲𑀧𑀭𑀺𑀘𑁆𑀙𑁂𑀤𑀁 𑀯𑀢𑁆𑀢𑀼𑀓𑀸𑀫𑁄 𑀪𑀯𑁂𑀬𑁆𑀬. 𑀏𑀢𑁆𑀢𑀸𑀯𑀢𑀸 𑀏𑀓𑀸𑀯𑀸𑀲𑁄 𑀬𑀸𑀯𑀢𑀸 𑀏𑀓𑀸𑀲𑀻𑀫𑀸. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 𑀯𑀤𑁂𑀬𑁆𑀬. 𑀢𑀲𑁆𑀫𑀸 𑀦 𑀇𑀥 𑀅𑀦𑀼𑀜𑁆𑀜𑀸𑀢𑀩𑀤𑁆𑀥𑀲𑀻𑀫𑀸𑀯𑀲𑁂𑀦 𑀏𑀓𑀸𑀯𑀸𑀲𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺, 𑀉𑀧𑀘𑀸𑀭𑀲𑀻𑀫𑀸𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀧𑀸𑀴𑀺𑀢𑁄𑀯, 𑀬𑀣𑀸𑀳 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀏𑀓𑁄 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑀺…𑀧𑁂… 𑀏𑀓𑀸𑀥𑀺𑀧𑁆𑀧𑀸𑀬’’𑀦𑁆𑀢𑀺 (𑀫𑀳𑀸𑀯. 𑁩𑁬𑁪). 𑀅𑀜𑁆𑀜𑀣𑀸 𑀯𑀲𑁆𑀲𑀘𑁆𑀙𑁂𑀤𑁄𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀯, 𑀓𑀣𑀁? 𑀏𑀓𑀸𑀯𑀸𑀲𑀯𑀲𑁂𑀦𑁂𑀯 𑀘𑁂 𑀲𑀸𑀫𑀕𑁆𑀕𑀻, 𑀩𑀳𑀼𑀆𑀯𑀸𑀲𑀅𑀦𑀸𑀯𑀸𑀲𑁂𑀲𑀼 𑀦 𑀲𑀫𑁆𑀪𑀯𑁂𑀬𑁆𑀬. 𑀢𑀢𑁄 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺 (𑀫𑀳𑀸𑀯. 𑁧𑁮𑁧)-𑀧𑀸𑀴𑀺𑀯𑀺𑀭𑁄𑀥𑁄 𑀲𑀢𑀺𑀧𑀺 𑀲𑀗𑁆𑀖𑁂 𑀅𑀦𑀸𑀯𑀸𑀲𑁂 𑀉𑀧𑁄𑀲𑀣𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑁄. 𑀅𑀦𑀸𑀯𑀸𑀲𑁂𑀧𑀺 𑀘𑁂 𑀲𑀸𑀫𑀕𑁆𑀕𑀻 𑀮𑀩𑁆𑀪𑀢𑀺, ‘‘𑀏𑀢𑁆𑀢𑀸𑀯𑀢𑀸 𑀲𑀸𑀫𑀕𑁆𑀕𑀻, 𑀬𑀸𑀯𑀢𑀸 𑀏𑀓𑀸𑀯𑀸𑀲𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀲𑀩𑁆𑀩𑀣𑀸 𑀧𑀼𑀭𑀺𑀫𑀦𑀬𑁄 𑀧𑀘𑁆𑀙𑀺𑀫𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀓𑀢𑁆𑀯𑀸 𑀦𑀸𑀦𑀸𑀯𑀸𑀲𑀯𑀲𑁂𑀦𑀧𑀺 𑀲𑀸𑀫𑀕𑁆𑀕𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀁 𑀓𑀫𑁆𑀫𑀁 𑀓𑀭𑁄𑀫𑀸𑀢𑀺 𑀯𑀢𑁆𑀯𑀸 𑀦 𑀅𑀓𑀁𑀲𑀽’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀦𑀸𑀕𑀢𑀫𑁆𑀧𑀺 𑀅𑀧𑁂𑀓𑁆𑀔𑀢𑀺, 𑀢𑀲𑁆𑀫𑀸 ‘𑀓𑀭𑁄𑀫𑀸’𑀢𑀺 𑀯𑀼𑀢𑁆𑀢𑁂 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀲𑀻𑀫𑀁 𑀅𑀲𑁄𑀥𑁂𑀢𑁆𑀯𑀸𑀧𑀺 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀅𑀟𑁆𑀠𑀝𑁆𑀞𑀫𑀭𑀢𑀦𑀼𑀩𑁆𑀩𑁂𑀥𑁄 𑀳𑀢𑁆𑀣𑀺𑀧𑁆𑀧𑀫𑀸𑀡𑁄. 𑀲𑀘𑁂 𑀏𑀓𑁄 𑀩𑀤𑁆𑀥𑁄 𑀳𑁄𑀢𑀺, 𑀦 𑀓𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀼𑀦𑁆𑀦𑀁 𑀧𑀩𑁆𑀩𑀢𑀓𑀽𑀝𑀸𑀦𑀁 𑀳𑁂𑀝𑁆𑀞𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑀤𑀺𑀲𑁂 𑀧𑀸𑀲𑀸𑀡𑁂 𑀞𑀺𑀢𑀢𑁆𑀢𑀸 𑀏𑀓𑀸𑀩𑀤𑁆𑀥𑀪𑀸𑀯𑁂 𑀲𑀢𑀺𑀧𑀺 𑀧𑀣𑀯𑀺𑀢𑁄 𑀉𑀤𑁆𑀥𑀁 𑀢𑁂𑀲𑀁 𑀲𑀫𑁆𑀩𑀦𑁆𑀥𑁂 𑀅𑀲𑀢𑀺 𑀳𑁂𑀝𑁆𑀞𑀸 𑀧𑀣𑀯𑀺𑀕𑀢𑀲𑀫𑁆𑀩𑀦𑁆𑀥𑀫𑀢𑁆𑀢𑁂 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 ‘𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀅𑀢𑀺𑀫𑀳𑀦𑁆𑀢𑁄𑀧𑀺 𑀧𑀸𑀲𑀸𑀡𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻’𑀢𑀺 𑀯𑀼𑀢𑁆𑀢𑀁. 𑀧𑀣𑀯𑀺𑀢𑁄 𑀳𑁂𑀝𑁆𑀞𑀸 𑀢𑀲𑁆𑀲 𑀫𑀳𑀦𑁆𑀢𑀪𑀸𑀯𑁂 𑀕𑀬𑁆𑀳𑀫𑀸𑀦𑁂 𑀧𑀩𑁆𑀩𑀢𑀫𑁂𑀯 𑀳𑁄𑀢𑀻’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀘𑀺𑀦𑀺𑀢𑁆𑀯𑀸 𑀓𑀢𑀧𑀁𑀲𑀼𑀧𑀼𑀜𑁆𑀚𑁂 𑀢𑀺𑀡𑀕𑀼𑀫𑁆𑀩𑀭𑀼𑀓𑁆𑀔𑀸 𑀘𑁂 𑀚𑀸𑀬𑀦𑁆𑀢𑀺, 𑀧𑀩𑁆𑀩𑀢𑁄 𑀳𑁄𑀢𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. 𑀦𑁂𑀯𑀸𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄’’𑀢𑀺 𑀯𑀼𑀢𑁆𑀢𑀁.

𑀧𑀸𑀲𑀸𑀡𑁄𑀢𑀺 ‘‘𑀲𑀼𑀥𑀸𑀫𑀬𑀧𑀸𑀲𑀸𑀡𑁄𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀯𑀻𑀫𑀁𑀲𑀺𑀢𑀩𑁆𑀩𑀁 𑀇𑀝𑁆𑀞𑀓𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑁆𑀧𑀫𑀸𑀡𑁄 𑀢𑀼𑀮𑀢𑀸𑀬, 𑀦 𑀢𑀼𑀮𑀕𑀡𑀦𑀸𑀬. 𑀲𑁄𑀧𑀻𑀢𑀺 𑀔𑀸𑀡𑀼𑀓𑁄 𑀯𑀺𑀬 𑀉𑀝𑁆𑀞𑀺𑀢𑀧𑀸𑀲𑀸𑀡𑁄.

𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀫𑀢𑁆𑀢𑀫𑁆𑀧𑀻𑀢𑀺 𑀏𑀓𑀘𑁆𑀘𑁂𑀲𑀼 𑀦𑀺𑀫𑀺𑀢𑁆𑀢𑀲𑀤𑁆𑀤𑁄 𑀦𑀢𑁆𑀣𑀺. 𑀏𑀢𑁆𑀣 𑀢𑀬𑁄 𑀘𑁂 𑀲𑀸𑀭𑀭𑀼𑀓𑁆𑀔𑀸 𑀳𑁄𑀦𑁆𑀢𑀺, 𑀤𑁆𑀯𑁂 𑀅𑀲𑀸𑀭𑀭𑀼𑀓𑁆𑀔𑀸, 𑀲𑀸𑀭𑀭𑀼𑀓𑁆𑀔𑀸𑀦𑀁 𑀩𑀳𑀼𑀢𑁆𑀢𑀁 𑀇𑀘𑁆𑀙𑀺𑀢𑀩𑁆𑀩𑀁. ‘‘𑀲𑀼𑀲𑀸𑀦𑀫𑁆𑀧𑀺 𑀇𑀥 ‘𑀯𑀦𑀫𑁂𑀯𑀸’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺 𑀲𑀬𑀁𑀚𑀸𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀘𑀢𑀽𑀲𑀼 𑀤𑁆𑀯𑁂 𑀅𑀦𑁆𑀢𑁄𑀲𑀸𑀭𑀸 𑀘𑁂, 𑀯𑀝𑁆𑀝𑀢𑀺. 𑀅𑀦𑁆𑀢𑁄𑀲𑀸𑀭𑀸 𑀅𑀥𑀺𑀓𑀸, 𑀲𑀫𑀸 𑀯𑀸, 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀩𑀳𑀽𑀲𑀼𑀧𑀺 𑀤𑁆𑀯𑁂 𑀘𑁂 𑀅𑀦𑁆𑀢𑁄𑀲𑀸𑀭𑀸 𑀅𑀢𑁆𑀣𑀺, 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺.

𑀧𑀭𑀪𑀸𑀕𑁂𑀢𑀺 𑀏𑀢𑁆𑀣 ‘‘𑀏𑀢𑁂𑀳𑀺 𑀩𑀤𑁆𑀥𑀝𑁆𑀞𑀸𑀦𑀢𑁄 𑀕𑀢𑀢𑁆𑀢𑀸 𑀯𑀝𑁆𑀝𑀢𑀺. 𑀢𑀣𑀸 𑀤𑀻𑀖𑀫𑀕𑁆𑀕𑁂𑀧𑀺 𑀕𑀳𑀺𑀢𑀝𑁆𑀞𑀸𑀦𑀢𑁄 𑀕𑀢𑀝𑁆𑀞𑀸𑀦𑀲𑁆𑀲 𑀅𑀜𑁆𑀜𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.

𑀅𑀦𑁆𑀯𑀤𑁆𑀥𑀫𑀸𑀲𑀦𑁆𑀢𑀺 𑀏𑀢𑁆𑀣 ‘‘𑀅𑀦𑀼𑀩𑀤𑁆𑀥𑁄 𑀅𑀤𑁆𑀥𑀫𑀸𑀲𑁄, 𑀅𑀤𑁆𑀥𑀫𑀸𑀲𑀲𑁆𑀲 𑀯𑀸 𑀅𑀦𑀽’’𑀢𑀺 𑀮𑀺𑀔𑀺𑀢𑀁. ‘‘𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀢𑀓𑀧𑁆𑀧𑀫𑀸𑀡𑀉𑀤𑀓𑁂𑀬𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑁂𑀘𑀺. 𑀢𑁂𑀫𑀺𑀬𑀢𑀻𑀢𑀺 𑀇𑀫𑀺𑀦𑀸 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀦𑀤𑀺𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀸𑀬 𑀦𑀤𑀺𑀬𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀉𑀤𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀧𑁆𑀧𑁄𑀤𑀓𑁂𑀧𑀺 𑀞𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀓𑁂. ‘‘𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀦𑀤𑀺𑀦𑀺𑀫𑀺𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁂𑀢𑀼𑀢𑁄 𑀧𑀭𑀢𑁄 𑀢𑀢𑁆𑀢𑀓𑀁 𑀉𑀤𑀓𑀁 𑀬𑀤𑀺 𑀧𑀯𑀢𑁆𑀢𑀢𑀺, 𑀦𑀤𑀻 𑀏𑀯𑀸’’𑀢𑀺 𑀯𑀤𑀦𑁆𑀢𑀺.

𑀚𑀸𑀢𑀲𑁆𑀲𑀭𑀸𑀤𑀻𑀲𑀼 𑀞𑀺𑀢𑁄𑀤𑀓𑀁 𑀚𑀸𑀢𑀲𑁆𑀲𑀭𑀸𑀤𑀺𑀧𑀤𑁂𑀲𑁂𑀦 𑀅𑀦𑀦𑁆𑀢𑀭𑀺𑀓𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀦𑀤𑀺𑀧𑀸𑀭𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀁 𑀯𑀺𑀬. 𑀲𑀘𑁂 𑀲𑁄 𑀧𑀤𑁂𑀲𑁄 𑀓𑀸𑀮𑀦𑁆𑀢𑀭𑁂𑀦 𑀕𑀸𑀫𑀔𑁂𑀢𑁆𑀢𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀣 𑀅𑀜𑁆𑀜𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀓𑁆𑀔𑁂𑀧𑀺𑀫𑀦𑁆𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀓𑀁.

𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸𑀦𑀁 𑀲𑀻𑀫𑀸𑀬 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 ‘‘𑀆𑀬𑀢𑀺𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀬 𑀑𑀓𑀸𑀲𑀁 𑀞𑀧𑁂𑀢𑁆𑀯𑀸’’𑀢𑀺 𑀮𑀺𑀔𑀺𑀢𑀁. 𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀺 𑀧𑀦𑀸𑀢𑀺 ‘‘𑀏𑀓𑀲𑁆𑀲 𑀉𑀧𑀟𑁆𑀠𑀁 𑀅𑀦𑁆𑀢𑁄𑀓𑀢𑁆𑀢𑀼𑀓𑀸𑀫𑀢𑀸𑀬 𑀲𑀢𑀺 𑀲𑀩𑁆𑀩𑁂𑀲𑀁 𑀆𑀕𑀫𑀦𑁂 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 ‘𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀻’𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀲𑀸𑀫𑀻𑀘𑀺𑀯𑀲𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀅𑀦𑀸𑀕𑀫𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 ‘‘𑀲𑀻𑀫𑀸𑀬 𑀅𑀩𑀤𑁆𑀥𑀢𑁆𑀢𑀸 𑀯𑀕𑁆𑀕𑀁 𑀦𑀸𑀫 𑀦 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. ‘‘𑀅𑀜𑁆𑀜𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀞𑀢𑁆𑀯𑀸 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀓𑀸𑀮𑁂, 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬 𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀘 𑀆𑀕𑀫𑀦𑀧𑀬𑁄𑀚𑀦𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀪𑁂𑀭𑀺𑀲𑀜𑁆𑀜𑀁 𑀯𑀸𑀢𑀺 ‘‘𑀲𑀫𑁆𑀫𑀦𑁆𑀦𑀦𑀧𑀭𑀺𑀬𑁄𑀲𑀸𑀦𑀁 𑀓𑀭𑁄𑀫𑀸𑀢𑀺 𑀯𑀢𑁆𑀯𑀸’’𑀢𑀺 𑀮𑀺𑀔𑀺𑀢𑀁, 𑀢𑁂𑀦 𑀢𑀸𑀤𑀺𑀲𑁂 𑀓𑀸𑀮𑁂 𑀢𑀁 𑀓𑀧𑁆𑀧𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀓𑀺𑀁 𑀇𑀫𑀺𑀦𑀸? 𑀲𑀼𑀔𑀓𑀭𑀡𑀢𑁆𑀣𑀦𑁆𑀢𑀺 𑀫𑀳𑀸𑀚𑀦𑀲𑀦𑁆𑀦𑀺𑀧𑀸𑀢𑀦𑀧𑀭𑀺𑀲𑁆𑀲𑀫𑀁 𑀅𑀓𑀢𑁆𑀯𑀸 𑀅𑀧𑁆𑀧𑀢𑀭𑁂𑀳𑀺 𑀲𑀼𑀔𑀓𑀭𑀡𑀢𑁆𑀣𑀁. 𑀬𑀤𑀺 𑀫𑀳𑀸𑀲𑀻𑀫𑀸𑀩𑀦𑁆𑀥𑀦𑀓𑀸𑀮𑁂 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀢𑀢𑁆𑀢𑀓𑁂𑀦𑀧𑀺 𑀲𑀼𑀔𑀯𑀺𑀳𑀸𑀭𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀞𑀫’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀻𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀻𑀬𑀧𑀭𑀫𑀢𑁆𑀢𑀸 𑀲𑀗𑁆𑀖𑀓𑀫𑁆𑀫𑀲𑁆𑀲. 𑀓𑀫𑁆𑀫𑀸𑀭𑀳𑁂𑀦 𑀲𑀤𑁆𑀥𑀺𑀁 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀘𑁂 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀺. 𑀢𑀢𑁆𑀢𑀓𑀧𑁆𑀧𑀫𑀸𑀡𑀁 𑀲𑀼𑀔𑀦𑀺𑀲𑀚𑁆𑀚𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀫𑁂𑀯 𑀦𑀺𑀫𑀺𑀢𑁆𑀢𑀁 𑀅𑀜𑁆𑀜𑁂𑀧𑀺 𑀓𑀺𑀢𑁆𑀢𑁂𑀢𑁆𑀯𑀸 𑀲𑀘𑁂 𑀩𑀦𑁆𑀥𑀦𑁆𑀢𑀺, 𑀯𑀝𑁆𑀝𑀢𑀻𑀢𑀺 𑀏𑀓𑁂.

‘‘𑀏𑀯𑀁 𑀩𑀤𑁆𑀥𑀸𑀲𑀼 𑀧𑀦…𑀧𑁂… 𑀲𑀻𑀫𑀦𑁆𑀢𑀭𑀺𑀓𑀸 𑀳𑀺 𑀕𑀸𑀫𑀔𑁂𑀢𑁆𑀢𑀁 𑀪𑀚𑀢𑀻’’𑀢𑀺 𑀦 𑀆𑀯𑀸𑀲𑀯𑀲𑁂𑀦 𑀲𑀸𑀫𑀕𑁆𑀕𑀻𑀧𑀭𑀺𑀘𑁆𑀙𑁂𑀤𑁄, 𑀓𑀺𑀦𑁆𑀢𑀼 𑀲𑀻𑀫𑀸𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀦𑀺𑀫𑀺𑀢𑁆𑀢𑀼𑀧𑀕𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸’’𑀢𑀺 𑀲𑀜𑁆𑀘𑀸𑀭𑀺𑀫𑀦𑀺𑀫𑀺𑀢𑁆𑀢𑀲𑁆𑀲 𑀢𑀧𑁆𑀧𑀭𑀢𑁄 𑀯𑀼𑀢𑁆𑀢𑀁. 𑀇𑀢𑁄 𑀧𑀝𑁆𑀞𑀸𑀬 𑀕𑀡𑁆𑀞𑀺𑀧𑀤𑀓𑁆𑀓𑀫𑁄 𑀳𑁄𑀢𑀺 𑁋 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀢𑁂 𑀅𑀯𑀺𑀧𑁆𑀧𑀯𑀸𑀲𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀲𑀫𑀸𑀦𑀲𑀁𑀯𑀸𑀲𑀓𑀫𑁂𑀯 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀸𑀬𑀸𑀫𑀦𑁆𑀢𑀸 𑀲𑀫𑀽𑀳𑀦𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. ‘‘𑀏𑀓𑀭𑀢𑀦𑀧𑁆𑀧𑀫𑀸𑀡𑀸’’𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀭𑀸 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀓𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑁂𑀯. 𑀔𑀡𑁆𑀟𑀲𑀻𑀫𑀢𑁄 𑀧𑀝𑁆𑀞𑀸𑀬 𑀩𑀦𑁆𑀥𑀦𑀁 𑀆𑀘𑀺𑀡𑁆𑀡𑀁. 𑀆𑀘𑀺𑀡𑁆𑀡𑀓𑀭𑀡𑁂𑀦 𑀯𑀺𑀕𑀢𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺. 𑀓𑀼𑀝𑀺𑀕𑁂𑀳𑁂𑀢𑀺 𑀓𑀼𑀝𑀺𑀖𑀭𑁂 𑀪𑀽𑀫𑀺𑀖𑀭𑁂. 𑀉𑀤𑀼𑀓𑁆𑀔𑀮𑀁𑀯𑀸𑀢𑀺 𑀪𑀽𑀫𑀺𑀉𑀤𑀼𑀓𑁆𑀔𑀮𑀁 𑀯𑀺𑀬 𑀔𑀼𑀤𑁆𑀤𑀓𑀸𑀯𑀸𑀝𑀁. ‘‘𑀧𑀫𑀼𑀔𑁂’’𑀢𑀺 𑀪𑀽𑀫𑀺𑀓𑀼𑀝𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀻𑀢𑀺 𑀪𑀺𑀢𑁆𑀢𑀺𑀢𑁄 𑀑𑀭𑀁 𑀦𑀺𑀫𑀺𑀢𑁆𑀢𑀸𑀦𑀺 𑀞𑀧𑁂𑀢𑁆𑀯𑀸 𑀓𑀺𑀢𑁆𑀢𑀺𑀢𑀢𑁆𑀢𑀸 𑀳𑁂𑀝𑁆𑀞𑀸 𑀆𑀓𑀸𑀲𑁂 𑀦 𑀑𑀢𑀭𑀢𑀺, 𑀉𑀧𑀭𑀺 𑀓𑀢𑁂 𑀧𑀸𑀲𑀸𑀤𑁂𑀢𑀺 𑀅𑀢𑁆𑀣𑁄. 𑀪𑀺𑀢𑁆𑀢𑀺𑀮𑀕𑁆𑀕𑁂𑀢𑀺 𑀪𑀺𑀢𑁆𑀢𑀺𑀦𑀺𑀲𑁆𑀲𑀺𑀢𑀓𑁂. 𑀇𑀫𑁂 𑀓𑀺𑀭 𑀪𑀺𑀢𑁆𑀢𑀺𑀮𑀕𑁆𑀕𑀸𑀧𑀺 ‘‘𑀏𑀓𑀸𑀩𑀤𑁆𑀥𑀸’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀲𑀩𑁆𑀩𑁄 𑀧𑀸𑀲𑀸𑀤𑁄 𑀲𑀻𑀫𑀝𑁆𑀞𑁄 𑀳𑁄𑀢𑀻𑀢𑀺 𑀏𑀓𑀸𑀩𑀤𑁆𑀥𑁄 𑀯𑀸 𑀳𑁄𑀢𑀼, 𑀫𑀸 𑀯𑀸. 𑀢𑀸𑀮𑀫𑀽𑀮𑀓𑀧𑀩𑁆𑀩𑀢𑁄 𑀦𑀸𑀫 𑀅𑀦𑀼𑀧𑀼𑀩𑁆𑀩𑁂𑀦 𑀢𑀦𑀼𑀓𑁄. 𑀆𑀓𑀸𑀲𑀧𑀩𑁆𑀪𑀸𑀭𑀦𑁆𑀢𑀺 𑀅𑀧𑀭𑀺𑀓𑁆𑀔𑁂𑀧𑀧𑀩𑁆𑀪𑀸𑀭𑀁. 𑀲𑀼𑀲𑀺𑀭𑀧𑀸𑀲𑀸𑀡𑁄 𑀦𑀸𑀫 𑀮𑁂𑀡𑀁 𑀳𑁄𑀢𑀺. 𑀅𑀦𑁆𑀢𑁄𑀮𑁂𑀡𑀦𑁆𑀢𑀺 𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑁄𑀮𑁂𑀡𑀁. 𑀤𑁆𑀯𑀸𑀭𑀁 𑀧𑀦 𑀲𑀦𑁆𑀥𑀸𑀬 𑀧𑀭𑀢𑁄 ‘‘𑀑𑀭𑀢𑁄’’𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀣𑀸𑀧𑀺 𑀲𑀻𑀫𑀢𑁄 𑀩𑀳𑀺𑀮𑁂𑀡𑁂𑀦 𑀑𑀢𑀭𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸𑀢𑀺 𑀲𑀻𑀫𑀝𑁆𑀞𑀁 𑀤𑀽𑀭𑀕𑀢𑀫𑁆𑀧𑀺 𑀲𑀻𑀫𑀕𑀢𑀁 𑀲𑀻𑀫𑀲𑀫𑁆𑀩𑀦𑁆𑀥𑀁𑀯, 𑀢𑀲𑁆𑀫𑀸 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀞𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 ‘‘𑀢𑀦𑁆𑀦𑀺𑀲𑁆𑀲𑀺𑀢𑀓𑀁 𑀅𑀧𑀦𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀓𑀸𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀫𑀳𑀸𑀣𑁂𑀭𑀸𑀧𑀺 ‘‘𑀲𑁄𑀥𑁂𑀢𑀩𑁆𑀩’’𑀫𑀺𑀘𑁆𑀘𑁂𑀯 𑀯𑀤𑀦𑁆𑀢𑀻𑀢𑀺 𑀏𑀓𑁂. ‘‘𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀘 𑀧𑀸𑀞𑁄 𑀅𑀢𑁆𑀣𑀺. ‘‘𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺 𑀘 𑀧𑀭𑀢𑁄 𑀯𑀓𑁆𑀔𑀢𑀺, 𑀢𑀲𑁆𑀫𑀸 𑀲𑀸𑀥𑀸𑀭𑀡𑀧𑀸𑀞𑁄𑀯 𑀲𑀼𑀦𑁆𑀤𑀭𑁄𑀢𑀺 𑀏𑀓𑁂. 𑀧𑀼𑀭𑀺𑀫𑀦𑀬𑁂𑀧𑀻𑀢𑀺 𑀔𑀡𑁆𑀟𑀲𑀻𑀫𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀫𑀳𑀸𑀲𑀻𑀫𑀸𑀬 𑀑𑀦𑀢𑁂𑀧𑀻𑀢𑀺 𑀅𑀢𑁆𑀣𑁄. 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀅𑀦𑁆𑀢𑁄 𑀞𑀺𑀢𑀢𑁆𑀢𑀸. 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀧𑀣𑀯𑀺𑀕𑀢𑀁 𑀫𑀽𑀮𑀁 𑀔𑀡𑁆𑀟𑀲𑀻𑀫𑀸𑀯 𑀳𑁄𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀁 𑀯𑀸𑀢𑀺 𑀅𑀧𑀭𑁂. ‘‘𑀫𑀚𑁆𑀛𑁂 𑀧𑀦 𑀙𑀺𑀦𑁆𑀦𑁂 𑀫𑀳𑀸𑀲𑀻𑀫𑀸𑀬 𑀞𑀺𑀢𑀫𑀽𑀮𑀁 𑀫𑀳𑀸𑀲𑀻𑀫𑀫𑁂𑀯 𑀪𑀚𑀢𑀺, 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑀁 𑀔𑀡𑁆𑀟𑀲𑀻𑀫𑀫𑁂𑀯 𑀪𑀚𑀢𑀺 𑀢𑀤𑀸𑀬𑀢𑁆𑀢𑀧𑀣𑀯𑀺𑀭𑀲𑀸𑀤𑀻𑀳𑀺 𑀅𑀦𑀼𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀻𑀫𑀸𑀬 𑀧𑀘𑁆𑀙𑀸 𑀉𑀝𑁆𑀞𑀺𑀢𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀧𑀘𑁆𑀙𑀸𑀲𑀻𑀫𑀸𑀬𑀁 𑀓𑀢𑀕𑁂𑀳𑁂 𑀯𑀺𑀬𑀸’’𑀢𑀺 𑀯𑀢𑁆𑀯𑀸 ‘‘𑀩𑀦𑁆𑀥𑀦𑀓𑀸𑀮𑁂 𑀞𑀺𑀢𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺 𑀉𑀧𑀭𑀺𑀲𑀻𑀫𑀸𑀬 𑀅𑀕𑀫𑀦𑀢𑁄’’𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀩𑀦𑁆𑀥𑀦𑀓𑀸𑀮𑁂 𑀧𑀼𑀦 𑀆𑀭𑁄𑀳𑀡𑀁 𑀦𑀸𑀫 𑀦𑀢𑁆𑀣𑀺, 𑀩𑀦𑁆𑀥𑀺𑀢𑀓𑀸𑀮𑁂 𑀏𑀯 𑀆𑀭𑀼𑀳𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀧𑀘𑁆𑀙𑀸 𑀉𑀝𑁆𑀞𑀺𑀢𑀭𑀼𑀓𑁆𑀔𑁄 𑀧𑀦 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀲𑀻𑀫𑀲𑀗𑁆𑀔𑁆𑀬𑀫𑁂𑀯 𑀕𑀢𑁄, 𑀏𑀯𑀁 𑀧𑀼𑀩𑁆𑀩𑁂 𑀉𑀝𑁆𑀞𑀺𑀢𑀭𑀼𑀓𑁆𑀔𑁄𑀧𑀻𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀬𑀁 𑀓𑀺𑀜𑁆𑀘𑀺𑀧𑀻’’𑀢𑀺 𑀯𑀘𑀦𑀢𑁄 𑀢𑀺𑀡𑀸𑀤𑀺𑀧𑀺 𑀲𑀗𑁆𑀕𑀳𑀺𑀢𑀁. 𑀫𑀳𑀸𑀣𑁂𑀭𑀸𑀧𑀺 𑀢𑀺𑀡𑀁 𑀲𑁄𑀥𑁂𑀢𑁆𑀯𑀸𑀯 𑀓𑀭𑁄𑀦𑁆𑀢𑀻𑀢𑀺.

𑁧𑁪𑁦. 𑀬𑀲𑁆𑀫𑀸 𑀫𑀚𑁆𑀛𑀢𑁄 𑀓𑁄𑀡𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑁄𑀡𑀢𑁄 𑀓𑁄𑀡’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀆𑀧𑀢𑁆𑀢𑀺𑀜𑁆𑀘 𑀆𑀧𑀚𑁆𑀚𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀧𑀸𑀭𑀬𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀓𑀸 𑀲𑀸? 𑀲𑀻𑀫𑀸. ‘‘𑀬𑀸 𑀲𑀩𑁆𑀩𑀦𑁆𑀢𑀺𑀫𑁂𑀦…𑀧𑁂… 𑀯𑀳𑀢𑀻’’𑀢𑀺 𑀢𑀢𑁄 𑀳𑁂𑀝𑁆𑀞𑀺𑀫𑀸 𑀦𑀸𑀯𑀸𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂, 𑀢𑀁 𑀦 𑀬𑀼𑀢𑁆𑀢𑀁 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀦𑀸𑀯𑀝𑁆𑀞𑀪𑀡𑁆𑀟𑀸𑀥𑀺𑀓𑀸𑀭𑁂 𑀢𑀲𑁆𑀲𑀸𑀧𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑁆𑀲 𑀪𑀸𑀭𑀧𑁆𑀧𑀫𑀸𑀡𑁂𑀦 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀦𑀤𑀻𑀧𑀸𑀭𑀲𑀻𑀫𑀸𑀲𑀫𑁆𑀪𑀯𑀢𑁄 𑀢𑀸𑀲𑀁 ‘‘𑀏𑀓𑀸 𑀯𑀸 𑀦𑀤𑀻𑀧𑀸𑀭𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀭𑀡𑀢𑁆𑀣𑀦𑁆𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄. 𑀉𑀪𑀬𑀢𑁆𑀣𑀸𑀧𑀺 𑀥𑀼𑀯-𑀲𑀤𑁆𑀤𑁄 𑀕𑀳𑀺𑀢𑁄. 𑀢𑁂𑀦 𑀉𑀧𑁄𑀲𑀣𑀦𑁆𑀢𑀭𑀸𑀬 𑀧𑀭𑀺𑀳𑀭𑀡𑀢𑁆𑀣𑀁 𑀉𑀧𑁄𑀲𑀣𑀤𑀺𑀯𑀲𑁄 𑀦𑀺𑀬𑀫𑀢𑁄𑀯 𑀯𑀼𑀢𑁆𑀢𑁄. 𑀏𑀢𑁆𑀣 𑀘 𑀦𑀸𑀯𑀸 𑀦𑀸𑀫 𑀧𑀫𑀸𑀡𑀬𑀼𑀢𑁆𑀢𑀸 𑀲𑀩𑁆𑀩𑀲𑀸𑀥𑀸𑀭𑀡𑀸 𑀣𑀫𑁆𑀪𑀦𑀸𑀯𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀓𑀼𑀮𑁆𑀮𑀦𑀸𑀯𑀸𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑁄𑀢𑀺 𑀅𑀢𑁆𑀣𑁄. 𑀲𑀘𑁂 𑀏𑀓𑀁 𑀕𑀸𑀫𑀔𑁂𑀢𑁆𑀢𑀁, 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀞𑀺𑀢𑁂 𑀪𑀺𑀓𑁆𑀔𑀽 𑀳𑀢𑁆𑀣𑀧𑀸𑀲𑀕𑀢𑁂 𑀓𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀦𑀸𑀦𑀸𑀕𑀸𑀫𑀔𑁂𑀢𑁆𑀢𑀁 𑀘𑁂, 𑀅𑀦𑀸𑀕𑀫𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀉𑀪𑀬𑀢𑀻𑀭𑁂 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀫𑀢𑁆𑀢𑁂𑀦 𑀤𑀻𑀧𑀓𑁄 𑀲𑀗𑁆𑀕𑀳𑀺𑀢𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀤𑀻𑀧𑀓𑁂 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑁂𑀯. ‘‘𑀦𑀤𑀺𑀬𑀸 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀉𑀧𑀭𑀺𑀬𑁂𑀯 𑀳𑀺 𑀦𑀤𑀻 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁪𑁧. ‘‘𑀬𑀁 𑀲𑀗𑁆𑀖𑁄 𑀆𑀓𑀗𑁆𑀔𑀢𑀺 𑀯𑀺𑀳𑀸𑀭𑀁 𑀯𑀸…𑀧𑁂… 𑀕𑀼𑀳𑀁 𑀯𑀸’’𑀢𑀺 𑀯𑀘𑀦𑀢𑁄 𑀦 𑀓𑁂𑀯𑀮𑀁 𑀧𑀣𑀯𑀺𑀬𑀁𑀬𑁂𑀯, 𑀯𑀺𑀳𑀸𑀭𑀸𑀤𑀻𑀦𑀁 𑀉𑀧𑀭𑀺𑀧𑀺 𑀲𑀻𑀫𑀸 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀺 𑀉𑀧𑁄𑀲𑀣𑀓𑀫𑁆𑀫𑀧𑀥𑀸𑀦𑀢𑁆𑀢𑀸𑀢𑀺 𑀲𑀺𑀤𑁆𑀥𑀁. 𑀢𑀧𑁆𑀧𑀥𑀸𑀦𑀸 𑀲𑀻𑀫𑀸𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀢𑀤𑀥𑀺𑀓𑀸𑀭𑀸𑀦𑀼𑀜𑁆𑀜𑀸𑀢𑀢𑁆𑀢𑀸, 𑀲𑀫𑁆𑀫𑀼𑀢𑀺𑀬𑀁 ‘‘𑀲𑀫𑀸𑀦𑀲𑀁𑀯𑀸𑀲𑀸’’𑀢𑀺 𑀏𑀢𑁆𑀢𑀸𑀯𑀢𑀸 𑀲𑀺𑀤𑁆𑀥𑁂 𑀯𑀺𑀲𑀼𑀁 ‘‘𑀏𑀓𑀽𑀧𑁄𑀲𑀣𑀸’’𑀢𑀺 𑀯𑀘𑀦𑀢𑁄 𑀘. ‘‘𑀉𑀧𑁄𑀲𑀣𑀁 𑀞𑀧𑁂𑀢𑁆𑀯𑀸 𑀲𑁂𑀲𑀓𑀫𑁆𑀫𑀸𑀦𑀺 𑀲𑀫𑀸𑀦𑀲𑀁𑀯𑀸𑀲𑀸 𑀦𑀸𑀫𑀸’’𑀢𑀺 𑀮𑀺𑀔𑀺𑀢𑀁. ‘‘𑀏𑀓𑀁 𑀲𑀫𑀽𑀳𑀦𑀺𑀢𑁆𑀯𑀸’’𑀢𑀺 𑀧𑀸𑀴𑀺𑀧𑀸𑀞𑁄.

𑁧𑁪𑁨. 𑀓𑀢𑁄𑀯𑀲𑁆𑀲𑀸𑀢𑀺 𑀏𑀓𑀲𑀻𑀫𑀸𑀬 𑀲𑀫𑀕𑁆𑀕𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀦𑀸𑀦𑀸𑀲𑀻𑀫𑀸𑀬𑀁 𑀞𑀺𑀢𑀸𑀦𑀁 𑀲𑀯𑀦𑀁 𑀧𑀫𑀸𑀡𑀁, 𑀏𑀓𑀲𑀻𑀫𑀸𑀬𑀧𑀺 𑀳𑀢𑁆𑀣𑀧𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑀸𑀦𑀁 𑀯𑀸 𑀲𑀯𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀅𑀦𑀺𑀝𑁆𑀞𑀁 𑀆𑀧𑀚𑁆𑀚𑀢𑀺. 𑀢𑀢𑁆𑀣 𑀲𑀫𑁆𑀫𑀢𑀸𑀬 𑀯𑀸 𑀅𑀲𑀫𑁆𑀫𑀢𑀸𑀬 𑀯𑀸𑀢𑀺 𑀉𑀧𑁄𑀲𑀣𑀸𑀕𑀸𑀭𑀲𑀫𑁆𑀫𑀼𑀢𑀺𑀬𑀸, 𑀦 𑀲𑀻𑀫𑀸𑀲𑀫𑁆𑀫𑀼𑀢𑀺𑀬𑀸. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀅𑀥𑀺𑀓𑀸𑀭𑀢𑁄, 𑀧𑀭𑀢𑁄 𑀙𑀦𑁆𑀤𑀤𑀸𑀦𑀧𑀜𑁆𑀜𑀢𑁆𑀢𑀺𑀢𑁄, 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀧𑀜𑁆𑀜𑀢𑁆𑀢𑀺𑀢𑁄 𑀘. 𑀢𑀢𑁆𑀣 𑀧𑀼𑀭𑀺𑀫𑀁 𑀓𑀸𑀭𑀡𑀁 𑀧𑀼𑀭𑀺𑀫𑀁 𑀅𑀦𑀺𑀝𑁆𑀞𑀁 𑀦𑀺𑀯𑀸𑀭𑁂𑀢𑀺, 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑁄𑀲𑀣𑀫𑀼𑀔𑀦𑁆𑀢𑀺 𑀉𑀧𑁄𑀲𑀣𑀝𑁆𑀞𑀸𑀦𑀁. ‘‘𑀉𑀧𑁄𑀲𑀣𑀫𑀼𑀔𑀲𑁆𑀲𑀸𑀢𑀺 𑀉𑀧𑁄𑀲𑀣𑀸𑀕𑀸𑀭𑀝𑁆𑀞𑀸𑀦𑀲𑁆𑀲𑀸’’𑀢𑀺 𑀮𑀺𑀔𑀺𑀢𑀁. 𑀬𑀸𑀦𑀺 𑀓𑀸𑀦𑀺𑀘𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑁂𑀢𑀻𑀢𑀺 𑀇𑀤𑀁 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? ‘‘𑀧𑀞𑀫𑀁 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑁂𑀢𑀩𑁆𑀩𑀸 𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀧𑀞𑀫𑀁 𑀯𑀼𑀢𑁆𑀢𑀢𑁆𑀢𑀸 𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 𑀘𑁂? 𑀢𑀁 𑀧𑀦 𑀅𑀓𑀸𑀭𑀡𑀁, 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀬 𑀆𑀮𑀲𑀺𑀬𑀁 𑀅𑀢𑁆𑀣𑀺. 𑀲𑀻𑀫𑀸𑀲𑀫𑀽𑀳𑀦𑀦𑀓𑀸𑀮𑁂 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑀽𑀳𑀦𑀺𑀢𑁆𑀯𑀸𑀯 𑀲𑀻𑀫𑀸𑀲𑀫𑀽𑀳𑀦𑀦𑀁 𑀇𑀚𑁆𑀛𑀢𑀻𑀢𑀺 𑀏𑀓𑁂. 𑀢𑀁 𑀅𑀬𑀼𑀢𑁆𑀢𑀁 𑀅𑀩𑀤𑁆𑀥𑀸𑀬 𑀲𑀻𑀫𑀸𑀬 𑀉𑀧𑁄𑀲𑀣𑀸𑀕𑀸𑀭𑀲𑀫𑁆𑀫𑀼𑀢𑀺𑀲𑀺𑀤𑁆𑀥𑀺𑀢𑁄𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀉𑀧𑁄𑀲𑀣𑀫𑀼𑀔𑀦𑁆𑀢𑀺 𑀉𑀧𑁄𑀲𑀣𑀸𑀕𑀸𑀭𑀲𑁆𑀲 𑀫𑀼𑀔𑀦𑁆𑀢𑀺 𑀆𑀘𑀭𑀺𑀬𑀸. 𑀉𑀧𑁄𑀲𑀣𑀫𑀼𑀔𑀲𑁆𑀲 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀸 𑀲𑀻𑀫𑀸𑀬 𑀯𑀼𑀢𑁆𑀢𑀦𑀬𑁂𑀦 𑀓𑀸𑀢𑀩𑁆𑀩𑀸. 𑀏𑀓𑁂𑀦𑀸𑀧𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀓𑁂. ‘‘𑀧𑀸𑀲𑀸𑀤𑁄 𑀯𑀸 𑀳𑁄𑀢𑀼, 𑀫𑀡𑁆𑀟𑀧𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑁄. 𑀓𑀫𑁆𑀫𑀯𑀸𑀘𑀸𑀬 𑀧𑀦 ‘𑀉𑀧𑁄𑀲𑀣𑀫𑀼𑀔’𑀫𑀺𑀘𑁆𑀘𑁂𑀯 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀧𑁄𑀭𑀸𑀡𑀓𑁄 𑀆𑀯𑀸𑀲𑁄 𑀦𑀸𑀫 𑀫𑀽𑀮𑀸𑀯𑀸𑀲𑁄’’𑀢𑀺 𑀮𑀺𑀔𑀺𑀢𑀁. 𑀯𑀤𑀢𑀺 𑀖𑀝𑀫𑀢𑁆𑀢𑀸 𑀇𑀢𑀺 𑀳𑀺 𑀮𑀓𑁆𑀔𑀡𑀁.

𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁧𑁪𑁩-𑁪. ‘‘𑀫𑀦𑀫𑁆𑀳𑀺 𑀯𑀽𑀴𑁆𑀳𑁄’’𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀫𑀦𑀫𑁆𑀳𑀺 𑀯𑀽𑀴𑁆𑀳𑁄𑀢𑀺 𑀫𑀦𑀁 𑀯𑀽𑀴𑁆𑀳𑁄 𑀅𑀫𑁆𑀳𑀻𑀢𑀺 𑀅𑀢𑁆𑀣𑁄. 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸𑀢𑀺 𑀅𑀦𑁆𑀢𑀭𑀖𑀭𑀲𑀗𑁆𑀔𑀸𑀢𑀁 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸. 𑀓𑁂𑀘𑀺 ‘‘𑀧𑀭𑀺𑀓𑁆𑀔𑀺𑀢𑁆𑀢𑀁 𑀕𑀸𑀫𑀁 𑀲𑀦𑁆𑀥𑀸𑀬 ‘𑀕𑀸𑀫’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀦𑁆𑀥𑀸𑀬 ‘𑀕𑀸𑀫𑀽𑀧𑀘𑀸𑀭’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀦𑀺𑀯𑁂𑀲𑀦𑀭𑀘𑁆𑀙𑀸𑀤𑀬𑁄 𑀲𑀦𑁆𑀥𑀸𑀬 𑀕𑀸𑀫𑀁, 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀸𑀦𑀺 𑀲𑀦𑁆𑀥𑀸𑀬 ‘‘𑀕𑀸𑀫𑀽𑀧𑀘𑀸𑀭’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀅𑀦𑁂𑀓𑀥𑀸 𑀧𑀞𑀦𑁆𑀢𑀺. 𑀓𑀺𑀁 𑀢𑁂𑀦, 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀣𑀸 𑀲𑀫𑁂𑀦𑁆𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁. 𑀪𑀺𑀓𑁆𑀔𑀽𑀦𑀁 𑀧𑀼𑀭𑀺𑀫𑀓𑀫𑁆𑀫𑀯𑀸𑀘𑀸 𑀦 𑀯𑀝𑁆𑀝𑀢𑀻𑀢𑀺 𑀕𑀸𑀫𑀕𑀸𑀫𑀽𑀧𑀘𑀸𑀭𑁂 𑀅𑀦𑁆𑀢𑁄𑀓𑀢𑁆𑀯𑀸 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬 𑀲𑀫𑁆𑀫𑀢𑀸𑀬 𑀉𑀧𑀭𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀼𑀢𑀺𑀬𑀁 𑀬𑀼𑀚𑁆𑀚𑀢𑀺. 𑀬𑀢𑁆𑀣 𑀧𑀦 𑀓𑁂𑀯𑀮𑀁 𑀅𑀭𑀜𑁆𑀜𑀁𑀬𑁂𑀯 𑀲𑀫𑁆𑀫𑀢𑀁, 𑀢𑀢𑁆𑀣 𑀓𑀣𑀁 𑀦 𑀯𑀝𑁆𑀝𑀢𑀻𑀢𑀺. 𑀢𑀢𑁆𑀣 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 𑀯𑀘𑀦𑀁 𑀦 𑀲𑀸𑀢𑁆𑀣𑀓𑀦𑁆𑀢𑀺 𑀘𑁂? 𑀯𑀼𑀘𑁆𑀘𑀢𑁂 𑁋 𑀏𑀯𑀫𑁂𑀢𑀁, 𑀓𑀺𑀦𑁆𑀢𑀼 𑀅𑀦𑀼𑀲𑁆𑀲𑀸𑀯𑀦𑀳𑀸𑀦𑀺𑀧𑁆𑀧𑀲𑀗𑁆𑀕𑀢𑁄 𑀢𑀁 𑀯𑀘𑀦𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀼𑀭𑀺𑀫𑀓𑀫𑁆𑀫𑀯𑀸𑀘𑀸 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀏𑀓𑀲𑁆𑀫𑀺𑀁 𑀯𑀸 𑀅𑀢𑁆𑀣𑁂 𑀓𑀫𑁆𑀫𑀯𑀸𑀘𑀸𑀤𑁆𑀯𑀬𑀆𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁. ‘‘𑀦 𑀳𑀺 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀓𑀫𑁆𑀫𑁂 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀪𑀺𑀦𑁆𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀲𑀗𑁆𑀖𑀸𑀦𑀫𑁆𑀧𑀺 𑀅𑀬𑀫𑁂𑀯 𑀯𑀺𑀥𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀘𑁂? 𑀦𑀸𑀧𑀚𑁆𑀚𑀢𑀺 𑀧𑀝𑀺𑀕𑁆𑀕𑀳𑀲𑀦𑁆𑀦𑀺𑀥𑀻𑀦𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸, 𑀑𑀫𑀲𑀦𑀸𑀤𑀺𑀧𑀘𑁆𑀘𑀬𑀸 𑀅𑀯𑀺𑀲𑁂𑀲𑀢𑁄, 𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀫𑀢𑁆𑀢𑀸𑀧𑁂𑀓𑁆𑀔𑀢𑀸𑀬 𑀘. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲. 𑀦 𑀓𑀫𑁆𑀫𑀯𑀸𑀘𑀁 𑀯𑀕𑁆𑀕𑀁 𑀓𑀭𑁄𑀦𑁆𑀢𑀻𑀢𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀞𑀧𑁂𑀢𑁆𑀯𑀸 𑀕𑀸𑀫𑀦𑁆𑀢𑀺 𑀏𑀢𑁆𑀣. ‘‘𑀬𑀤𑀺 𑀪𑀺𑀓𑁆𑀔𑀽𑀦𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀦 𑀑𑀢𑀭𑀢𑀺, 𑀅𑀣 𑀓𑀲𑁆𑀫𑀸 𑀕𑀸𑀫𑁂 𑀲𑀻𑀫𑀸𑀩𑀦𑁆𑀥𑀦𑀓𑀸𑀮𑁂 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑀦𑁆𑀢𑀻𑀢𑀺 𑀘𑁂? 𑀆𑀘𑀺𑀡𑁆𑀡𑀓𑀧𑁆𑀧𑁂𑀦, 𑀦 𑀢𑀢𑁄 𑀅𑀜𑁆𑀜𑀁 𑀓𑀜𑁆𑀘𑀺 𑀅𑀢𑁆𑀣𑀁 𑀅𑀧𑁂𑀓𑁆𑀔𑀺𑀢𑁆𑀯𑀸’’𑀢𑀺 𑀮𑀺𑀔𑀺𑀢𑀁. ‘‘𑀅𑀢𑁆𑀣𑀢𑁄 𑀳𑀺 𑀲𑀸 𑀩𑀳𑀺𑀤𑁆𑀥𑀸𑀧𑀺 𑀅𑀩𑀤𑁆𑀥𑀸 𑀏𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀕𑀸𑀫𑁂 𑀩𑀤𑁆𑀥𑀸 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀬𑀲𑁆𑀫𑀸 𑀕𑀸𑀫𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸𑀢𑀺 𑀏𑀓𑁂. 𑀲𑁄𑀧𑀺 𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀦𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀕𑀸𑀫𑀁 𑀅𑀦𑁆𑀢𑁄𑀓𑀢𑁆𑀯𑀸 𑀩𑀤𑁆𑀥𑀸𑀬 𑀲𑀻𑀫𑀸𑀬 𑀧𑀼𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀬𑀁 𑀅𑀭𑀜𑁆𑀜𑀧𑀤𑁂𑀲𑁂 𑀞𑀢𑁆𑀯𑀸 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸, 𑀉𑀤𑀸𑀳𑀼 𑀕𑀸𑀫𑁂 𑀞𑀢𑁆𑀯𑀸𑀢𑀺? 𑀕𑀸𑀫𑁂 𑀞𑀢𑁆𑀯𑀸 𑀓𑀢𑀸𑀬𑀧𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑀸 𑀨𑀭𑀢𑀻𑀢𑀺. 𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀤𑁄𑀲𑀸𑀦𑀼𑀮𑁄𑀫𑀢𑁆𑀢𑀸 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀞𑀢𑁆𑀯𑀸 𑀦 𑀓𑀸𑀢𑀩𑁆𑀩𑀸𑀢𑀺 𑀦𑁄 𑀢𑀓𑁆𑀓𑁄, 𑀏𑀲 𑀦𑀬𑁄 𑀲𑀫𑀽𑀳𑀦𑀦𑁂𑀧𑀻𑀢𑀺 𑀆𑀘𑀭𑀺𑀬𑁄. 𑀔𑀡𑁆𑀟𑀲𑀻𑀫𑀸𑀬𑀁 𑀞𑀢𑁆𑀯𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀢𑀺𑀆𑀤𑀻𑀲𑀼 𑀫𑀳𑀸𑀲𑀻𑀫𑀸 𑀓𑀺𑀭 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸’’𑀢𑀺 𑀯𑀼𑀢𑁆𑀢𑀸.

𑁧𑁪𑁬. ‘‘𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀺𑀲𑁆𑀲𑀸 𑀲𑀻𑀫𑀸𑀬 𑀲𑀫𑀸𑀦𑀲𑀁𑀯𑀸𑀲𑀸𑀬 𑀏𑀓𑀽𑀧𑁄𑀲𑀣𑀸𑀬 𑀲𑀫𑀼𑀕𑁆𑀖𑀸𑀢𑁄, 𑀲𑁄 𑀢𑀼𑀡𑁆𑀳𑀲𑁆𑀲𑀸’’𑀢𑀺 𑀅𑀦𑁆𑀥𑀓𑀧𑁄𑀢𑁆𑀣𑀓𑁂, 𑀲𑀻𑀳𑀴𑀧𑁄𑀢𑁆𑀣𑀓𑁂𑀲𑀼 𑀘 𑀓𑁂𑀲𑀼𑀘𑀺 𑀧𑀸𑀞𑁄 𑀅𑀢𑁆𑀣𑀺. 𑀓𑁂𑀲𑀼𑀘𑀺 ‘‘𑀲𑀫𑀼𑀕𑁆𑀖𑀸𑀢𑁄 𑀏𑀢𑀺𑀲𑁆𑀲𑀸 𑀲𑀻𑀫𑀸𑀬𑀸’’𑀢𑀺 𑀧𑀞𑀫𑀁 𑀮𑀺𑀔𑀦𑁆𑀢𑀺, 𑀓𑁂𑀲𑀼𑀘𑀺 ‘‘𑀏𑀢𑀺𑀲𑁆𑀲𑀸 𑀲𑀻𑀫𑀸𑀬 𑀲𑀫𑀼𑀕𑁆𑀖𑀸𑀢𑁄’’𑀢𑀺 𑀘.

𑀕𑀸𑀫𑀲𑀻𑀫𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁪𑁭. 𑀲𑀸 𑀘𑀸𑀢𑀺 𑀲𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀕𑀸𑀫𑀲𑀻𑀫𑀸 𑀘 𑀇𑀢𑀭𑀸 𑀘. 𑀲𑀸 𑀓𑀢𑀫𑀸𑀢𑀺 𑀘𑁂? ‘‘𑀧𑀓𑀢𑀺𑀕𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀲𑀸 𑀘 𑀳𑁄𑀢𑀺 𑀇𑀢𑀭𑀸 𑀘 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸𑀬𑁂𑀯 ‘‘𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑀁 𑀮𑀪𑀢𑀻’’𑀢𑀺 𑀏𑀓𑀯𑀘𑀦𑀁 𑀓𑀢𑀁, 𑀢𑀁 𑀦 𑀬𑀼𑀢𑁆𑀢𑀁 𑀉𑀪𑀺𑀦𑁆𑀦𑀫𑁆𑀧𑀺 𑀕𑀸𑀫𑀢𑁆𑀢𑀸𑀢𑀺 𑀏𑀓𑁂. ‘‘𑀳𑁄𑀦𑁆𑀢𑀺, 𑀦 𑀮𑀪𑀦𑁆𑀢𑀻’’𑀢𑀺 𑀘 𑀩𑀳𑀼𑀯𑀘𑀦𑀫𑁆𑀧𑀺 𑀓𑀭𑁄𑀦𑁆𑀢𑀻𑀢𑀺. ‘‘𑀲𑀸 𑀘 𑀇𑀢𑀭𑀸 𑀘𑀸’’𑀢𑀺 𑀯𑀼𑀢𑁆𑀢𑀸 ‘‘𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀕𑀸𑀫𑀲𑀻𑀫𑀸 𑀧𑀓𑀢𑀺𑀕𑀸𑀫𑀸𑀤𑀬𑁄 𑀅𑀪𑀺𑀦𑁆𑀦𑀸’’𑀢𑀺 𑀘 𑀯𑀤𑀦𑁆𑀢𑀺. ‘‘𑀪𑀺𑀓𑁆𑀔𑀼𑀯𑀲𑀢𑀻’’𑀢𑀺 𑀧𑀸𑀞𑁄, ‘‘𑀯𑀲𑀦𑁆𑀢𑀻’’𑀢𑀺 𑀘 𑀮𑀺𑀔𑀺𑀢𑀁. ‘‘𑀅𑀣𑀲𑁆𑀲 𑀞𑀺𑀢𑁄𑀓𑀸𑀲𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑀯𑀘𑀦𑀫𑁂𑀯 𑀬𑀼𑀢𑁆𑀢𑀁. 𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸𑀢𑀺 𑀓𑀢𑀭𑀁 𑀲𑀻𑀫𑀁 𑀧𑀝𑀺𑀓𑁆𑀔𑀺𑀧𑀢𑀺? 𑀩𑀤𑁆𑀥𑀲𑀻𑀫𑀁, 𑀏𑀓𑀸𑀤𑀲𑀯𑀺𑀧𑀢𑁆𑀢𑀺𑀲𑀻𑀫𑀜𑁆𑀜𑀢𑀭𑀧𑁆𑀧𑀲𑀗𑁆𑀕𑀢𑁄𑀢𑀺 𑀆𑀘𑀭𑀺𑀬𑀸. 𑀲𑀘𑁂 𑀧𑀞𑀫𑀁 𑀲𑀻𑀫𑀸𑀬 𑀩𑀤𑁆𑀥𑀸𑀬 𑀧𑀘𑁆𑀙𑀸 𑀦𑀤𑀺𑀆𑀤𑀬𑁄 𑀳𑁄𑀦𑁆𑀢𑀺, 𑀧𑀝𑀺𑀓𑁆𑀔𑁂𑀧𑁄𑀢𑀺 𑀧𑀲𑀗𑁆𑀕𑁄 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀩𑀤𑁆𑀥𑀲𑀻𑀫𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀣𑀸 𑀲𑀩𑁆𑀩𑁄 𑀕𑀸𑀫𑁄 𑀕𑀸𑀫𑀲𑀻𑀫𑀸, 𑀢𑀣𑀸 𑀲𑀩𑁆𑀩𑀸 𑀦𑀤𑀻 𑀅𑀲𑀻𑀫𑀸. 𑀓𑀺𑀦𑁆𑀢𑀼 𑀢𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀢𑀺 𑀲𑀻𑀫𑀸𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀧𑀦 𑀏𑀓𑀺𑀲𑁆𑀲𑀸 𑀦𑀤𑀺𑀬𑀸 𑀘𑀢𑀼𑀯𑀕𑁆𑀕𑀸𑀤𑀻𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀸𑀤𑀺𑀓𑀫𑁆𑀫𑀓𑀭𑀡𑀓𑀸𑀮𑁂 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀸𑀯𑀺𑀧𑁆𑀧𑀯𑀸𑀲𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁 𑀯𑀺𑀬𑀸𑀢𑀺 𑀆𑀘𑀭𑀺𑀬𑀸, 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑁂𑀧𑀺 𑀅𑀦𑁆𑀢𑁄𑀦𑀤𑀺𑀬𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀦𑀸𑀯𑀸𑀕𑀢𑁄 𑀘𑁂, 𑀦𑀸𑀯𑀸𑀬𑀁 𑀯𑀼𑀢𑁆𑀢𑀦𑀬𑁂𑀦. 𑀲𑀢𑁆𑀣𑀕𑀢𑁄 𑀘𑁂, 𑀲𑀢𑁆𑀣𑁂 𑀯𑀼𑀢𑁆𑀢𑀦𑀬𑁂𑀦. 𑀲𑁄 𑀘𑁂 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀦𑀺𑀯𑀺𑀝𑁆𑀞𑁄, 𑀕𑀸𑀫𑁂 𑀯𑀼𑀢𑁆𑀢𑀦𑀬𑁂𑀦 𑀢𑀺𑀘𑀻𑀯𑀭𑀸𑀯𑀺𑀧𑁆𑀧𑀯𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑀸𑀧𑀺 𑀅𑀬𑀁 𑀯𑀺𑀲𑁂𑀲𑁄 𑁋 𑀲𑀘𑁂 𑀲𑀢𑁆𑀣𑁄 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀳𑁄𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀧𑀫𑀸𑀡𑀦𑁆𑀢𑀺 𑀏𑀓𑁂. 𑀲𑀢𑁆𑀣𑁄𑀯 𑀧𑀫𑀸𑀡𑀦𑁆𑀢𑀺 𑀆𑀘𑀭𑀺𑀬𑀸. 𑀲𑀘𑁂 𑀧𑀦𑁂𑀢𑁆𑀣 𑀩𑀳𑀽 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑁆𑀳𑀺 𑀓𑁂𑀘𑀺 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁, 𑀓𑁂𑀘𑀺 𑀕𑀡𑀼𑀧𑁄𑀲𑀣𑀁, 𑀓𑁂𑀘𑀺 𑀲𑀗𑁆𑀖𑀼𑀧𑁄𑀲𑀣𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑀢𑀸𑀬 ‘‘𑀩𑀳𑀽 𑀲𑀗𑁆𑀖𑀸’’𑀢𑀺 𑀅𑀯𑀢𑁆𑀯𑀸 ‘‘𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁. 𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀲𑀻𑀫𑀸𑀲𑀫𑁆𑀪𑁂𑀤𑀲𑀫𑁆𑀪𑀯𑀢𑁄𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀞𑀧𑁂𑀦𑁆𑀢𑁂 𑀳𑀺 𑀊𑀦𑀓𑀁 𑀦 𑀞𑀧𑁂𑀢𑀩𑁆𑀩𑀁. ‘‘𑀅𑀞𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯𑀸’’𑀢𑀺 𑀯𑀼𑀢𑁆𑀢𑀁. 𑀕𑀘𑁆𑀙𑀦𑁆𑀢𑀺𑀬𑀸 𑀧𑀦𑀸𑀢𑀺 𑀏𑀢𑁆𑀣 ‘‘𑀉𑀤𑀓𑀼𑀓𑁆𑀔𑁂𑀧𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀜𑀢𑁆𑀢𑀻𑀢𑀺𑀆𑀤𑀺 𑀓𑀺𑀁 𑀲𑀻𑀫𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀪𑀬𑀸 𑀯𑀼𑀢𑁆𑀢𑀁, 𑀉𑀤𑀸𑀳𑀼 𑀧𑀭𑀺𑀲𑀢𑁄𑀢𑀺? 𑀏𑀓𑀓𑀫𑁆𑀫𑀲𑁆𑀲 𑀦𑀸𑀦𑀸𑀲𑀻𑀫𑀸𑀬 𑀅𑀲𑀫𑁆𑀪𑀯𑀢𑁄 𑀲𑀻𑀫𑀢𑁄𑀢𑀺. 𑀏𑀓𑀓𑀫𑁆𑀫𑀲𑁆𑀲 𑀦𑀸𑀦𑀸𑀲𑀻𑀫𑀝𑁆𑀞𑀲𑀗𑁆𑀖𑁂𑀦 𑀅𑀲𑀫𑁆𑀪𑀯𑀢𑁄 𑀧𑀭𑀺𑀲𑀢𑁄𑀢𑀺𑀧𑀺 𑀏𑀓𑁂. ‘‘𑀲𑀯𑀦𑀁 𑀳𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀤𑁄𑀲𑀧𑁆𑀧𑀲𑀗𑁆𑀕𑀢𑁄𑀢𑀺 𑀦𑁄 𑀢𑀓𑁆𑀓𑁄. 𑀏𑀓𑀺𑀲𑁆𑀲𑀸 𑀳𑀺 𑀲𑀻𑀫𑀸𑀬 𑀏𑀓𑀁 𑀓𑀫𑁆𑀫𑀁 𑀅𑀦𑀺𑀝𑁆𑀞𑀧𑁂𑀦𑁆𑀢𑁄 𑀳𑀸𑀧𑁂𑀢𑀻𑀢𑀺 𑀆𑀘𑀭𑀺𑀬𑁄.

𑀩𑀳𑀺𑀦𑀤𑀺𑀢𑀻𑀭𑁂 𑀚𑀸𑀢𑀭𑀼𑀓𑁆𑀔𑀲𑁆𑀲 𑀅𑀦𑁆𑀢𑁄𑀦𑀤𑀺𑀬𑀁 𑀧𑀯𑀺𑀝𑁆𑀞𑀲𑀸𑀔𑀸𑀬 𑀯𑀸𑀢𑀺 𑀏𑀢𑁆𑀣 𑀘 𑀦𑀤𑀺𑀢𑀻𑀭𑁂 𑀔𑀸𑀡𑀼𑀓𑀁 𑀓𑁄𑀝𑁆𑀝𑁂𑀢𑁆𑀯𑀸𑀢𑀺 𑀏𑀢𑁆𑀣 𑀘 𑀲𑀘𑁂 𑀧𑀦 𑀲𑁂𑀢𑀼 𑀯𑀸 𑀲𑁂𑀢𑀼𑀧𑀸𑀤𑀸 𑀯𑀸 𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀘 𑀲𑀻𑀫𑀸𑀲𑁄𑀥𑀦𑀁 𑀦𑀸𑀫 𑀕𑀸𑀫𑀲𑀻𑀫𑀝𑁆𑀞𑁂 𑀳𑀢𑁆𑀣𑀧𑀸𑀲𑀸𑀦𑀬𑀦𑀁. 𑀔𑀡𑁆𑀟𑀲𑀻𑀫𑀸𑀬 𑀉𑀝𑁆𑀞𑀺𑀢𑀭𑀼𑀓𑁆𑀔𑀢𑁄 𑀯𑀺𑀬𑁄𑀚𑁂𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀢𑀻𑀭𑀝𑁆𑀞𑁂 𑀭𑀼𑀓𑁆𑀔𑁂 𑀩𑀤𑁆𑀥𑀦𑀸𑀯𑀸𑀬 𑀕𑀸𑀫𑁄 𑀆𑀥𑀸𑀭𑁄𑀢𑀺. ‘‘𑀉𑀪𑀢𑁄𑀪𑀸𑀕𑁂𑀦 𑀕𑀸𑀫𑀲𑀻𑀫𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁂𑀢𑀼 𑀔𑀡𑁆𑀟𑀲𑀻𑀫𑀸𑀫𑀳𑀸𑀲𑀻𑀫𑀸𑀬𑁄 𑀨𑀼𑀲𑀺𑀢𑁆𑀯𑀸 𑀞𑀺𑀢𑀭𑀼𑀓𑁆𑀔𑁂𑀦 𑀉𑀧𑀫𑁂𑀢𑀩𑁆𑀩𑁄’’𑀢𑀺 𑀘 𑀮𑀺𑀔𑀺𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂 𑀢𑀸𑀯 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀢𑀸𑀤𑀺𑀲𑁂 𑀞𑀸𑀦𑁂 𑀓𑀢𑀓𑀫𑁆𑀫𑀁 𑀓𑀺𑀁 𑀦𑀤𑀺𑀬𑀁 𑀓𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀉𑀤𑀸𑀳𑀼 𑀕𑀸𑀫𑀲𑀻𑀫𑀸𑀬𑀁, 𑀅𑀣 𑀉𑀪𑀬𑀢𑁆𑀣𑀸𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀢𑀁 𑀘𑁂 𑀦𑀤𑀺𑀬𑀁 𑀓𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀯 𑀲𑁄𑀥𑁂𑀢𑀩𑁆𑀩𑀸, 𑀦 𑀇𑀢𑀭𑀸. 𑀅𑀣 𑀕𑀸𑀫𑀲𑀻𑀫𑀸𑀬𑀁 𑀓𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦 𑀲𑁄𑀥𑁂𑀢𑀩𑁆𑀩𑀸. 𑀬𑀤𑀺 𑀉𑀪𑀬𑀢𑁆𑀣 𑀓𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼 𑀏𑀓𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀆𑀧𑀚𑁆𑀚𑀢𑀺. 𑀢𑀢𑁄 ‘‘𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀜𑀢𑁆𑀢𑀺, 𑀅𑀜𑁆𑀜𑀺𑀲𑁆𑀲𑀸 𑀅𑀦𑀼𑀲𑁆𑀲𑀸𑀯𑀦𑀸 𑀳𑁄𑀢𑀻’’𑀢𑀺 𑀇𑀤𑀜𑁆𑀘 ‘‘𑀔𑀡𑁆𑀟𑀲𑀻𑀫𑀸𑀫𑀳𑀸𑀲𑀻𑀫𑀝𑁆𑀞𑀸𑀦𑀁 𑀓𑀸𑀬𑀲𑀸𑀫𑀕𑁆𑀕𑀺𑀬𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀜𑁆𑀘𑀸𑀦𑀺𑀝𑁆𑀞𑀁 𑀆𑀧𑀚𑁆𑀚𑀢𑀻𑀢𑀺? 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀬𑀣𑀸𑀯𑀼𑀢𑁆𑀢𑀁 𑀓𑀫𑁆𑀫𑀁 𑀉𑀪𑀬𑀢𑁆𑀣 𑀓𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀦 𑀘 𑀬𑀣𑀸𑀯𑀼𑀢𑁆𑀢𑀁 𑀅𑀦𑀺𑀝𑁆𑀞𑀁 𑀆𑀧𑀚𑁆𑀚𑀢𑀺. 𑀓𑀲𑁆𑀫𑀸? ‘‘𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀸𑀦𑀁 𑀏𑀓𑁂𑀓𑀲𑀻𑀫𑀸𑀬𑀁 𑀧𑀯𑀢𑁆𑀢𑀢𑁆𑀢𑀸, 𑀓𑀸𑀭𑀓𑀪𑀺𑀓𑁆𑀔𑀽𑀦𑀁 𑀯𑀸 𑀏𑀓𑁂𑀓𑀲𑀻𑀫𑀸𑀬𑀁 𑀞𑀺𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀉𑀪𑀬𑀢𑁆𑀣𑀸𑀧𑀺 𑀞𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀦 𑀢𑀁 𑀅𑀓𑀸𑀭𑀡𑀁. 𑀏𑀓𑀻𑀪𑀸𑀯𑀁 𑀉𑀧𑀕𑀢𑀲𑀻𑀫𑀝𑁆𑀞𑀸𑀦𑁂 𑀓𑀢𑀢𑁆𑀢𑀸𑀢𑀺 𑀇𑀤𑀁 𑀅𑀘𑀮𑀓𑀸𑀭𑀡𑀁. 𑀏𑀓𑀻𑀪𑀸𑀯𑀁 𑀉𑀧𑀕𑀢𑀸𑀲𑀼 𑀳𑀺 𑀤𑁆𑀯𑀻𑀲𑀼 𑀦𑀤𑀻𑀕𑀸𑀫𑀲𑀻𑀫𑀸𑀲𑀼 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘. 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀁 𑀘𑁂 𑀦𑀤𑀻 𑀳𑁄𑀢𑀺, 𑀲𑀫𑀼𑀤𑁆𑀤𑁄 𑀯𑀸, 𑀚𑀸𑀢𑀲𑁆𑀲𑀭𑁄 𑀯𑀸. 𑀢𑁂𑀲𑀼 𑀞𑀺𑀢𑀪𑀺𑀓𑁆𑀔𑀼 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀁 𑀞𑀺𑀢𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀢𑀢𑁆𑀣 𑀘𑁂 𑀦𑀤𑀺𑀆𑀤𑀺𑀮𑀓𑁆𑀔𑀡𑀁 𑀅𑀧𑁆𑀧𑀢𑁆𑀢𑁄 𑀤𑀻𑀧𑀓𑁄, 𑀧𑀸𑀲𑀸𑀡𑁄, 𑀭𑀼𑀓𑁆𑀔𑁄 𑀯𑀸 𑀳𑁄𑀢𑀺, 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑁂𑀳𑀺 𑀯𑀴𑀜𑁆𑀚𑀦𑀝𑁆𑀞𑀸𑀦𑀁 𑀘𑁂 𑀢𑀁 𑀳𑁄𑀢𑀺, 𑀕𑀸𑀫𑀔𑁂𑀢𑁆𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀓𑀢𑀭𑀕𑀸𑀫𑀔𑁂𑀢𑁆𑀢𑀁? 𑀬𑀢𑁄 𑀫𑀦𑀼𑀲𑁆𑀲𑀸 𑀲𑀜𑁆𑀘𑀭𑀦𑁆𑀢𑀺, 𑀲𑀩𑁆𑀩𑁂 𑀘𑁂 𑀲𑀜𑁆𑀘𑀭𑀦𑁆𑀢𑀺, 𑀯𑀺𑀲𑀼𑀁 𑀕𑀸𑀫𑀔𑁂𑀢𑁆𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀘 𑀆𑀘𑀭𑀺𑀬𑀸.

𑀧𑀘𑁆𑀙𑀺𑀫𑀦𑀬𑁂 𑀲𑀘𑁂 𑀲𑁂𑀢𑀼 𑀦𑀤𑀻𑀮𑀓𑁆𑀔𑀡𑀝𑁆𑀞𑀸𑀦𑀁 𑀅𑀨𑀼𑀲𑀺𑀢𑁆𑀯𑀸 𑀞𑀺𑀢𑁄, 𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀏𑀓𑁄 𑀘𑁂 𑀕𑀸𑀫𑁄, 𑀢𑀁 𑀲𑁄𑀥𑁂𑀢𑁆𑀯𑀸, 𑀤𑁆𑀯𑀻𑀲𑀼 𑀢𑀻𑀭𑁂𑀲𑀼 𑀲𑀘𑁂 𑀤𑁆𑀯𑁂, 𑀤𑁆𑀯𑁂𑀧𑀺 𑀕𑀸𑀫𑁂 𑀲𑁄𑀥𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀓𑀢𑀁 𑀉𑀪𑀬𑀢𑁆𑀭 𑀓𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀤𑁆𑀯𑀻𑀲𑀼 𑀦𑀤𑀻𑀲𑀼, 𑀚𑀸𑀢𑀲𑁆𑀲𑀭𑁂𑀲𑀼 𑀘 𑀏𑀓𑀓𑀫𑁆𑀫𑀧𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀦𑀬𑁄 𑀔𑀡𑁆𑀟𑀲𑀻𑀫𑀸𑀫𑀳𑀸𑀲𑀻𑀫𑀸𑀦𑀫𑁆𑀧𑀺 𑀮𑀩𑁆𑀪𑀢𑁂𑀯. 𑀲𑀘𑁂 𑀲𑁂𑀢𑀼 𑀦𑀤𑀻𑀮𑀓𑁆𑀔𑀡𑀝𑁆𑀞𑀸𑀦𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑁄, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀧𑀺 𑀲𑁄𑀥𑁂𑀢𑀩𑁆𑀩𑀸.

𑀲𑀻𑀫𑀸𑀦𑀫𑁂𑀯 𑀘𑁂𑀓𑀢𑁆𑀢𑀁, 𑀯𑁂𑀳𑀸𑀲𑀝𑁆𑀞𑀁 𑀯𑀺𑀦𑀸 𑀕𑀢𑁄;

𑀯𑀺𑀤𑀺𑀢𑁆𑀯𑀸 𑀏𑀓𑀓𑀫𑁆𑀫𑀲𑁆𑀲, 𑀲𑀻𑀫𑀢𑁄 𑀇𑀤𑀫𑀸𑀤𑀺𑀲𑁂.

𑀏𑀓𑀲𑀻𑀫𑀁 𑀤𑁆𑀯𑀺𑀲𑀻𑀫𑀁 𑀯𑀸, 𑀢𑀺𑀲𑀻𑀫𑀁 𑀘𑀢𑀼𑀲𑀻𑀫𑀓𑀁;

𑀏𑀓𑀓𑀫𑁆𑀫𑀁 𑀲𑀺𑀬𑀸 𑀢𑀲𑁆𑀲, 𑀓𑁄𑀧𑁄 𑀧𑀭𑀺𑀲𑀢𑁄 𑀲𑀺𑀬𑀸𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀦𑀤𑀺𑀬𑀁 𑀓𑀭𑁄𑀦𑁆𑀢𑀸𑀦𑀁 𑀉𑀤𑀓𑀼𑀓𑁆𑀔𑁂𑀧𑀢𑁄 𑀩𑀳𑀺 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄 𑀅𑀧𑁆𑀧𑀫𑀸𑀡𑀁. 𑀕𑀸𑀫𑁂 𑀓𑀭𑁄𑀦𑁆𑀢𑀸𑀦𑀁 𑀦𑀤𑀺𑀬𑀁 𑀲𑀫𑁆𑀩𑀦𑁆𑀥𑀭𑀼𑀓𑁆𑀔𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀢𑁄 𑀩𑀳𑀺 𑀞𑀺𑀢𑀪𑀺𑀓𑁆𑀔𑀼 𑀅𑀧𑁆𑀧𑀫𑀸𑀡𑀁, 𑀢𑀢𑁄 𑀑𑀭𑀁 𑀧𑀫𑀸𑀡𑀁. 𑀩𑀤𑁆𑀥𑀲𑀻𑀫𑀸𑀬 𑀲𑀫𑁆𑀩𑀦𑁆𑀥𑀭𑀼𑀓𑁆𑀔𑀲𑁆𑀲 𑀩𑀤𑁆𑀥𑀲𑀻𑀫𑀸𑀬 𑀞𑀺𑀢𑀪𑀺𑀓𑁆𑀔𑀼 𑀧𑀫𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺. ‘‘𑀲𑀘𑁂 𑀧𑀦 𑀲𑁂𑀢𑀼 𑀯𑀸 𑀲𑁂𑀢𑀼𑀧𑀸𑀤𑀸 𑀯𑀸 𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀫𑁆𑀧𑀺 𑀧𑀸𑀭𑁄𑀳𑀸𑀤𑀻𑀲𑀼 𑀯𑀺𑀬 𑀲𑀓𑀮𑀲𑀻𑀫𑀸𑀲𑁄𑀥𑀦𑀫𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀲𑀸𑀥𑁂𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀅𑀢𑀺𑀯𑀼𑀝𑁆𑀞𑀺𑀓𑀸𑀮𑁂 𑀧𑀦𑀸𑀢𑀺 𑀏𑀢𑁆𑀣 𑀅𑀢𑀺𑀯𑀼𑀝𑁆𑀞𑀺 𑀦𑀸𑀫 𑀬𑀣𑀸 𑀘𑀸𑀢𑀼𑀫𑀸𑀲𑀺𑀓𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀘𑀢𑀼𑀫𑀸𑀲𑀁 𑀅𑀢𑀺𑀯𑀼𑀝𑁆𑀞𑀺𑀬𑁂𑀯 𑀲𑀘𑁂 𑀳𑁄𑀢𑀺, 𑀲𑀩𑁆𑀩𑁄𑀧𑀺 𑀑𑀖𑁂𑀦 𑀑𑀢𑁆𑀣𑀝𑁄𑀓𑀸𑀲𑁄 𑀦𑀤𑀻 𑀏𑀯. 𑀅𑀣 𑀏𑀓𑀺𑀲𑁆𑀲𑀸𑀧𑀺 𑀅𑀢𑀺𑀯𑀼𑀝𑁆𑀞𑀺𑀬𑀸 𑀑𑀖𑁄 𑀘𑀢𑀼𑀫𑀸𑀲𑀁 𑀢𑀺𑀝𑁆𑀞𑀢𑀺, 𑀲𑀦𑁆𑀤𑀢𑀺 𑀯𑀸, 𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀑𑀖𑁂𑀦 𑀑𑀢𑁆𑀣𑀝𑁄𑀓𑀸𑀲𑁄 𑀲𑀩𑁆𑀩𑁄𑀧𑀺 𑀦𑀤𑀻 𑀏𑀯. 𑀦𑀤𑀺𑀁 𑀑𑀢𑁆𑀣𑀭𑀺𑀢𑁆𑀯𑀸 𑀲𑀦𑁆𑀤𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀢𑀫𑁂𑀯 𑀯𑀸 𑀦𑀤𑀺𑀁 𑀅𑀜𑁆𑀜𑀁 𑀯𑀸 𑀅𑀧𑀼𑀩𑁆𑀩𑀁 𑀯𑀸 𑀧𑀤𑁂𑀲𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀯𑀲𑁂𑀦 𑀦𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀑𑀢𑁆𑀣𑀭𑀺𑀢𑁆𑀯𑀸 𑀲𑀦𑁆𑀤𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀯𑀝𑁆𑀝𑀢𑀺. 𑀕𑀸𑀫𑀦𑀺𑀕𑀫𑀲𑀻𑀫𑀁 𑀑𑀢𑁆𑀣𑀭𑀺𑀢𑁆𑀯𑀸𑀢𑀺 𑀘𑀢𑀼𑀫𑀸𑀲𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀅𑀕𑀫𑀦𑀧𑀣𑁂𑀢𑀺 𑀢𑀤𑀳𑀼 𑀕𑀢𑀧𑀘𑁆𑀘𑀸𑀕𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀓𑁂’’𑀢𑀺 𑀮𑀺𑀔𑀺𑀢𑀁. 𑀬𑀁 𑀧𑀦 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀓𑀲𑁆𑀫𑀸? 𑀦𑀤𑀺𑀬𑀫𑁆𑀧𑀺 𑀢𑀁𑀤𑁄𑀲𑀧𑁆𑀧𑀲𑀗𑁆𑀕𑀢𑁄. 𑀢𑀺𑀧𑀼𑀲𑀓𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀓𑀫𑀮𑀼𑀧𑁆𑀧𑀮𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀲𑀩𑁆𑀩𑁄𑀧𑀺 𑀅𑀚𑀸𑀢𑀲𑁆𑀲𑀭𑁄 𑀳𑁄𑀢𑀺, 𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀬𑁂𑀳𑀺 𑀓𑀢𑀁, 𑀢𑁂𑀲𑀁 𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀁 𑀯𑀸, 𑀲𑀫𑀦𑁆𑀢𑀢𑁄 𑀢𑀻𑀭𑀝𑁆𑀞𑀕𑀸𑀫𑁂𑀳𑀺 𑀘𑁂 𑀓𑀢𑀁, 𑀲𑀩𑁆𑀩𑀕𑀸𑀫𑀲𑀗𑁆𑀔𑁆𑀬𑀁 𑀯𑀸, 𑀅𑀜𑁆𑀜𑁂𑀳𑀺 𑀕𑀸𑀫𑀔𑁂𑀢𑁆𑀢𑁂𑀳𑀺 𑀅𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁 𑀘𑁂, 𑀯𑀺𑀲𑀼𑀁𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀁 𑀯𑀸 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁮. 𑀲𑀁𑀲𑀝𑁆𑀞𑀯𑀺𑀝𑀧𑀸𑀢𑀺 𑀇𑀫𑀺𑀦𑀸 𑀆𑀲𑀦𑁆𑀦𑀢𑁆𑀢𑀁 𑀤𑀻𑀧𑁂𑀢𑀺, 𑀢𑁂𑀦 𑀧𑀤𑁂𑀲𑀲𑀫𑁆𑀪𑀺𑀦𑁆𑀤𑀦𑀸 𑀇𑀥 𑀲𑀫𑁆𑀪𑁂𑀤𑁄𑀢𑀺 𑀤𑀻𑀧𑁂𑀢𑀺. 𑀲𑁄 𑀧𑀦 𑀯𑀟𑁆𑀠𑀦𑁆𑀢𑁄 𑀲𑀻𑀫𑀸𑀲𑀗𑁆𑀓𑀭𑀁 𑀓𑀭𑁄𑀢𑀻𑀢𑀺 𑀩𑀤𑁆𑀥𑀲𑀻𑀫𑀝𑁆𑀞𑀸𑀦𑀧𑁆𑀧𑀯𑁂𑀲𑀦𑀯𑀲𑁂𑀦 ‘‘𑀏𑀓𑀤𑁂𑀲𑀩𑀤𑁆𑀥𑀲𑀻𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁄 𑀲𑀗𑁆𑀓𑀭𑀤𑁄𑀲𑁄 𑀳𑁄𑀢𑀺. 𑀦, 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬 𑀲𑀻𑀫𑀸 𑀲𑀫𑁆𑀪𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 ‘‘𑀧𑀞𑀫𑀁 𑀩𑀤𑁆𑀥𑀲𑀻𑀫𑀸𑀬 𑀧𑀘𑁆𑀙𑀸 𑀅𑀢𑁆𑀢𑀦𑀸 𑀩𑀦𑁆𑀥𑀺𑀢𑀩𑁆𑀩𑀲𑀻𑀫𑀸 𑀦 𑀲𑀫𑁆𑀪𑀺𑀦𑁆𑀤𑀺𑀢𑀩𑁆𑀩𑀸’’𑀢𑀺 𑀏𑀓𑁂 𑀅𑀥𑀺𑀧𑁆𑀧𑀸𑀬𑀁 𑀲𑀁𑀯𑀡𑁆𑀡𑀬𑀦𑁆𑀢𑀺. 𑀧𑀞𑀫𑀁 𑀲𑀫𑁆𑀫𑀢𑀲𑀻𑀫𑀸𑀬𑀁 𑀲𑀫𑁆𑀪𑁂𑀤𑀸𑀪𑀸𑀯𑀢𑁄 𑀲𑁆𑀯𑀸𑀥𑀺𑀧𑁆𑀧𑀸𑀬𑁄 𑀅𑀚𑁆𑀛𑁄𑀢𑁆𑀣𑀭𑀡𑁂𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀙𑀸 𑀩𑀦𑁆𑀥𑀺𑀢𑀩𑁆𑀩𑀲𑀻𑀫𑀸𑀬 𑀧𑀞𑀫𑀁 𑀩𑀤𑁆𑀥𑀲𑀻𑀫𑀸 𑀦 𑀲𑀫𑁆𑀪𑀺𑀦𑁆𑀤𑀺𑀢𑀩𑁆𑀩𑀸. 𑀲𑀓𑀮𑀁 𑀯𑀸 𑀏𑀓𑀤𑁂𑀲𑀢𑁄 𑀯𑀸 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄𑀓𑀭𑀡𑁂𑀦 𑀧𑀞𑀫𑀁 𑀩𑀤𑁆𑀥𑀲𑀻𑀫𑀸𑀬 𑀲𑀻𑀫𑀦𑁆𑀢𑀭𑀺𑀓𑁂 𑀅𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀦𑀢𑁄 𑀳𑀺 𑀲𑀫𑁆𑀪𑀺𑀦𑁆𑀤𑀢𑀺 𑀦𑀸𑀫, 𑀧𑀭𑁂𑀲𑀁 𑀩𑀤𑁆𑀥𑀲𑀻𑀫𑀁 𑀲𑀓𑀮𑀁 𑀯𑀸 𑀏𑀓𑀤𑁂𑀲𑀢𑁄 𑀯𑀸 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄𑀓𑀭𑀡𑁂𑀦 𑀅𑀚𑁆𑀛𑁄𑀢𑁆𑀣𑀭𑀢𑀺 𑀦𑀸𑀫, 𑀢𑁂𑀦𑁂𑀯𑀸𑀳 ‘‘𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀞𑀫𑀁 𑀩𑀤𑁆𑀥𑀲𑀻𑀫𑀸𑀬 𑀲𑀻𑀫𑀦𑁆𑀢𑀭𑀺𑀓𑀁 𑀧𑀘𑁆𑀙𑀸 𑀩𑀦𑁆𑀥𑀺𑀢𑀩𑁆𑀩𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑀁 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀦𑁆𑀢𑀺. 𑀇𑀫𑀸 𑀤𑁆𑀯𑁂𑀧𑀺 𑀯𑀺𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀲𑀫𑁆𑀪𑀯𑀦𑁆𑀢𑀺. 𑀲𑁄 𑀧𑀦 𑀯𑀟𑁆𑀠𑀦𑁆𑀢𑁄 𑀲𑀻𑀫𑀸𑀲𑀗𑁆𑀓𑀭𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀓𑁂𑀯𑀮𑀁 𑀲𑀻𑀫𑀸𑀲𑀗𑁆𑀓𑀭𑀫𑁂𑀯 𑀓𑀭𑁄𑀢𑀺. 𑀢𑀲𑁆𑀫𑀺𑀁 𑀓𑀢𑀓𑀫𑁆𑀫𑀸𑀦𑀺 𑀦 𑀓𑀼𑀧𑁆𑀧𑀦𑁆𑀢𑀻𑀢𑀺 𑀓𑁂𑀘𑀺, 𑀢𑀁 𑀦𑀬𑀼𑀢𑁆𑀢𑀁 𑀲𑀸𑀔𑀸𑀧𑀸𑀭𑁄𑀳𑀙𑁂𑀤𑀦𑀲𑀻𑀫𑀸𑀲𑁄𑀥𑀦𑀸𑀦𑀁 𑀯𑀼𑀢𑁆𑀢𑀢𑁆𑀢𑀸. 𑀇𑀤𑀁 𑀲𑀩𑁆𑀩𑀁 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀕𑀭𑀼𑀓𑀼𑀮𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀙𑀟𑁆𑀟𑁂𑀢𑀩𑁆𑀩𑀁.

𑀉𑀧𑁄𑀲𑀣𑀪𑁂𑀤𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁪𑁯. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀸’’𑀢𑀺 𑀢𑀤𑀸 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑀲𑁆𑀲 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘𑁂 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀲𑀸𑀫𑀕𑁆𑀕𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀦 𑀘 𑀓𑀫𑁆𑀫𑀯𑀸𑀘𑀸𑀬 𑀪𑀕𑀯𑀢𑀸 𑀧𑀬𑁄𑀕𑁄 𑀤𑀲𑁆𑀲𑀺𑀢𑁄, 𑀧𑀸𑀴𑀺𑀦𑀬𑀢𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑀓𑁆𑀓𑀫𑁄 𑀤𑀲𑁆𑀲𑀺𑀢𑁄. 𑀢𑀣𑀸 𑀧𑀜𑁆𑀘𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁄 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀬𑁄 𑀯𑀸 𑀤𑁆𑀯𑁂 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀸𑀫𑀁 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀻 𑀦𑀸𑀫 𑀳𑁄𑀢𑀺 𑀯𑀕𑁆𑀕𑀓𑀣𑀸𑀬 𑀬𑀣𑀸𑀓𑀫𑁆𑀫𑀁 𑀲𑀸𑀫𑀕𑁆𑀕𑀻𑀯𑀯𑀢𑁆𑀣𑀸𑀦𑀢𑁄. 𑀢𑀣𑀸𑀧𑀺 𑀯𑀕𑁆𑀕𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀲𑀫𑀕𑁆𑀕𑀁, 𑀲𑀫𑀕𑁆𑀕𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀘 𑀯𑀕𑁆𑀕𑀁 𑀦𑀸𑀫 𑀓𑀢𑀁. 𑀆𑀯𑁂𑀡𑀺𑀓𑀢𑁄 𑀯𑀸 𑀕𑀡𑀓𑀫𑁆𑀫𑀸𑀤𑀺𑀲𑀫𑁆𑀪𑀯𑀢𑁄, 𑀢𑀲𑁆𑀲 𑀘 𑀲𑀫𑀕𑁆𑀕𑀯𑀕𑁆𑀕𑀪𑀸𑀯𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑁂𑀦 𑀯𑀕𑁆𑀕𑀦𑁆𑀢𑀺 𑀏𑀢𑁆𑀣 𑀧𑀸𑀭𑀺𑀲𑀼𑀤𑁆𑀥𑀺𑀓𑀭𑀡𑀁 𑀥𑀫𑁆𑀫𑀺𑀓𑀁, 𑀲𑀗𑁆𑀖𑀲𑁆𑀲𑁂𑀯 𑀙𑀦𑁆𑀤𑀸𑀕𑀫𑀦𑀁, 𑀦 𑀕𑀡𑀲𑁆𑀲𑀸𑀢𑀺 𑀓𑀢𑁆𑀯𑀸 𑀯𑀕𑁆𑀕𑀁 𑀦𑀸𑀫 𑀳𑁄𑀢𑀺. ‘‘𑀏𑀓𑀯𑀸𑀭𑀁 𑀓𑀢𑀁 𑀲𑀼𑀓𑀢𑀁, 𑀆𑀧𑀢𑁆𑀢𑀺𑀁 𑀧𑀦 𑀆𑀧𑀚𑁆𑀚𑀢𑀺, 𑀧𑀼𑀦 𑀓𑀸𑀢𑀼𑀁 𑀦 𑀮𑀪𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀧𑀜𑁆𑀘𑀲𑀼 𑀏𑀓𑀲𑁆𑀲 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀘𑀢𑀽𑀳𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁, 𑀙𑀦𑁆𑀤𑀳𑀸𑀭𑀓𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀧𑀢𑁆𑀢𑁂 𑀢𑁂𑀦 𑀲𑀗𑁆𑀖𑁄 𑀧𑀳𑁄𑀢𑀺, 𑀢𑀲𑁆𑀫𑀸 𑀙𑀦𑁆𑀤𑁄 𑀲𑀗𑁆𑀖𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸

𑁧𑁫𑁦. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄…𑀧𑁂… 𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀺, 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀺…𑀧𑁂… 𑀢𑀲𑁆𑀫𑀸 𑀢𑀼𑀡𑁆𑀳𑀻. 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’𑀢𑀺 𑀯𑀢𑁆𑀯𑀸 ‘𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀯𑀲𑁂𑀲𑁂 𑀲𑀼𑀢𑁂𑀦 𑀲𑀸𑀯𑀺𑀢𑁂 𑀉𑀤𑁆𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺 𑀲𑀼𑀢𑀸 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁂𑀳𑀻’’𑀢𑀺 𑀏𑀢𑁆𑀣 ‘‘𑀥𑀸𑀭𑀬𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦’’𑀦𑁆𑀢𑀺 𑀯𑀘𑀦𑀁 𑀲𑀁𑀔𑀺𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀢𑁂𑀦𑁂𑀯 𑀔𑀼𑀤𑁆𑀤𑀓𑀧𑁂𑀬𑁆𑀬𑀸𑀮𑀯𑀲𑁂𑀦 𑀮𑀺𑀔𑀺𑀢𑀁. 𑀏𑀯𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀺, 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂’’𑀢𑀺 𑀏𑀢𑁆𑀣𑀸𑀧𑀺 ‘‘𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦’’𑀦𑁆𑀢𑀺 𑀯𑀘𑀦𑀁 𑀲𑀁𑀔𑀺𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀏𑀓𑁂. 𑀓𑁂𑀘𑀺 ‘‘𑀅𑀯𑀺𑀯𑀤𑀫𑀸𑀦𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑁂 𑀦𑀺𑀤𑀸𑀦𑀼𑀤𑁆𑀤𑁂𑀲𑁄 𑀦𑀺𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑀸𑀯𑀺𑀓𑀭𑁄𑀦𑁆𑀢𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀓𑀲𑁆𑀫𑀸? ‘‘𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸’’𑀢𑀺 𑀦𑀺𑀝𑁆𑀞𑀸𑀦𑀯𑀘𑀦𑁂𑀦 𑀳𑀺 𑀦𑀺𑀤𑀸𑀦𑀲𑁆𑀲 𑀦𑀺𑀝𑁆𑀞𑀺𑀢𑀪𑀸𑀯𑁄 𑀯𑀼𑀢𑁆𑀢𑁄, 𑀦𑀺𑀤𑀸𑀦𑀸𑀯𑀲𑀸𑀦𑁂 𑀘 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺. ‘‘𑀲𑀭𑀪𑀜𑁆𑀜𑀁 𑀦𑀸𑀫 𑀲𑀭𑁂𑀦 𑀪𑀡𑀦’’𑀦𑁆𑀢𑀺 𑀮𑀺𑀔𑀺𑀢𑀁. 𑀲𑀚𑁆𑀛𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 ‘‘𑀲𑀚𑁆𑀛𑀸𑀬𑀁 𑀓𑀭𑁄𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. ‘‘𑀆𑀧𑀼𑀘𑁆𑀙𑀸𑀫𑀻𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀦 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀢𑀼𑀡𑁆𑀳𑀻𑀪𑀸𑀯𑁂 𑀬𑀼𑀚𑁆𑀚𑀢𑀺. ‘‘𑀅𑀣𑀸𑀧𑀺 𑀮𑀸𑀪𑀸𑀤𑀺𑀦𑀸 𑀅𑀪𑀺𑀪𑀽𑀢𑁄 𑀯𑀸𑀭𑁂𑀢𑀺, 𑀢𑀁 𑀦 𑀧𑀫𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀓𑀣𑁂𑀦𑁆𑀢𑁄 𑀬𑀤𑀺 𑀯𑀺𑀘𑁆𑀙𑀺𑀦𑁆𑀤𑀢𑀺, 𑀧𑀼𑀦 𑀆𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺.

𑀅𑀥𑀫𑁆𑀫𑀓𑀫𑁆𑀫𑀧𑀝𑀺𑀓𑁆𑀓𑁄𑀲𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁫𑁪. ‘‘𑀢𑁂𑀲𑀁 𑀅𑀦𑀼𑀧𑀤𑁆𑀤𑀯𑀢𑁆𑀣𑀸𑀬𑀸’’𑀢𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀅𑀜𑁆𑀜𑁄𑀧𑀺 𑀉𑀧𑀤𑁆𑀤𑀯𑁄 𑀩𑀳𑀽𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁.

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀅𑀚𑁆𑀛𑁂𑀲𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁫𑁫. ‘‘𑀣𑁂𑀭𑀸𑀥𑀺𑀓𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀢𑁆𑀯𑀸𑀧𑀺 𑀧𑀘𑁆𑀙𑀸 𑀅𑀯𑀺𑀲𑁂𑀲𑁂𑀦 ‘‘𑀬𑁄 𑀢𑀢𑁆𑀣 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄, 𑀢𑀲𑁆𑀲𑀸𑀥𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀦𑁆𑀢𑁂’’𑀢𑀺 𑀯𑀘𑀦𑀁 𑀣𑁂𑀭𑀲𑁆𑀲𑀸𑀧𑀺 𑀅𑀢𑁆𑀣𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. ‘‘𑀕𑀘𑁆𑀙𑀸𑀯𑀼𑀲𑁄 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸’’𑀢𑀺 𑀯𑀘𑀦𑀢𑁄 𑀅𑀲𑀢𑀺𑀧𑀺 𑀅𑀦𑁆𑀢𑀭𑀸𑀬𑁂 𑀣𑀸𑀫𑀁 𑀧𑀫𑀸𑀡𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀤𑀺𑀲𑀁𑀕𑀫𑀺𑀓𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁬𑁩. ‘‘𑀲𑀘𑀲𑁆𑀲 𑀲𑀤𑁆𑀥𑀺𑀁𑀘𑀭𑀸 𑀪𑀺𑀓𑁆𑀔𑀼𑀉𑀧𑀝𑁆𑀞𑀸𑀓𑀸 𑀅𑀢𑁆𑀣𑀻’’𑀢𑀺 𑀧𑀸𑀞𑁄. ‘‘𑀉𑀢𑀼𑀯𑀲𑁆𑀲𑁂𑀢𑀺 𑀉𑀢𑀼𑀲𑀁𑀯𑀘𑁆𑀙𑀭𑁂 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀽’’𑀢𑀺 𑀮𑀺𑀔𑀺𑀢𑀁.

𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁪. 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀫𑁆𑀫𑀻𑀢𑀺 ‘‘𑀲𑀸𑀧𑀢𑁆𑀢𑀺𑀓𑁄 𑀣𑁂𑀭𑀸𑀦𑀁 𑀤𑁂𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀤𑀼𑀓𑁆𑀓𑀝𑀁 𑀲𑀫𑁆𑀪𑀯𑀢𑀻’’𑀢𑀺 𑀆𑀘𑀭𑀺𑀬𑁂𑀦 𑀮𑀺𑀔𑀺𑀢𑀁. 𑀓𑀺𑀁 𑀦𑀼 𑀔𑁄 𑀓𑀸𑀭𑀡𑀁? 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀦 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀦𑀸𑀫 𑀓𑁂𑀯𑀮𑀁 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸 𑀳𑁄𑀢𑀻𑀢𑀺. ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀫𑁆𑀫𑀻’’𑀢𑀺 𑀏𑀢𑁆𑀣 𑀧𑀦 𑀓𑀺𑀭𑀺𑀬𑀸 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀫𑀳𑀦𑁆𑀢𑀸 𑀳𑀺 𑀢𑁂 𑀆𑀘𑀭𑀺𑀬𑀸 𑀦𑀸𑀫. 𑀢𑀢𑁆𑀣 ‘‘𑀤𑀫𑁆𑀫𑀻’’𑀢𑀺 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀯𑀼𑀢𑁆𑀢𑀁. ‘‘𑀳𑀭𑀸’’𑀢𑀺 𑀘 ‘‘𑀆𑀭𑁄𑀘𑁂𑀳𑀻’’𑀢𑀺 𑀘 𑀳𑀸𑀭𑀓𑀲𑁆𑀲 𑀅𑀦𑀸𑀭𑁄𑀘𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀙𑀦𑁆𑀤𑀤𑀸𑀦𑁂𑀧𑀺. 𑀢𑀢𑁆𑀣 ‘‘𑀤𑀫𑁆𑀫𑀻’’𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀸𑀫𑀕𑁆𑀕𑀺𑀤𑀻𑀧𑀦𑀯𑀘𑀦𑀁, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯, 𑀏𑀯𑀁 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀡𑁆𑀡𑁂𑀢𑀺. 𑀅𑀣 𑀯𑀸 𑀧𑀞𑀫𑀁 𑀲𑀫𑀕𑁆𑀕𑀪𑀸𑀯𑀁 𑀲𑀦𑁆𑀥𑀸𑀬, 𑀤𑀼𑀢𑀺𑀬𑀁 𑀧𑀘𑁆𑀙𑀸 𑀯𑀺𑀥𑀸𑀢𑀩𑁆𑀩𑀪𑀸𑀯𑀁, 𑀢𑀢𑀺𑀬𑀁 𑀙𑀦𑁆𑀤𑀳𑀸𑀭𑀓𑀲𑁆𑀲 𑀤𑀼𑀓𑁆𑀓𑀝𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀉𑀪𑀬𑀢𑁆𑀣𑀸𑀧𑀺 ‘‘𑀲𑀗𑁆𑀖𑀧𑁆𑀧𑀢𑁆𑀢𑁄 𑀧𑀓𑁆𑀓𑀫𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀲𑀗𑁆𑀖𑁂 𑀲𑀫𑀕𑁆𑀕𑁂 𑀏𑀯 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀁 𑀭𑀼𑀳𑀢𑀺, 𑀦𑀸𑀲𑀫𑀕𑁆𑀕𑁂𑀢𑀺 𑀲𑀺𑀤𑁆𑀥𑀁. ‘‘𑀲𑀗𑁆𑀖𑀧𑁆𑀧𑀢𑁆𑀢𑁄 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀉𑀓𑁆𑀔𑀺𑀢𑁆𑀢𑀓𑀸𑀤𑀻𑀦𑀫𑁆𑀧𑀺 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀁 𑀭𑀼𑀳𑀢𑀻𑀢𑀺 𑀲𑀺𑀤𑁆𑀥𑀁, 𑀢𑀜𑁆𑀘 𑀔𑁄 𑀧𑀓𑀢𑀢𑁆𑀢𑀲𑀜𑁆𑀜𑀸𑀬, 𑀦𑁄 𑀅𑀜𑁆𑀜𑀣𑀸𑀢𑀺 𑀢𑀓𑁆𑀓𑁄. 𑀚𑀸𑀦𑀺𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀤𑀺𑀦𑁆𑀦𑁂 𑀦 𑀬𑀸𑀢𑀺, 𑀆𑀧𑀢𑁆𑀢𑀺 𑀘, 𑀅𑀚𑀸𑀦𑀺𑀢𑁆𑀯𑀸 𑀤𑀺𑀦𑁆𑀦𑁂 𑀬𑀸𑀢𑀺 𑀘, 𑀅𑀦𑀸𑀧𑀢𑁆𑀢𑀻𑀢𑀺 𑀏𑀓𑁂. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸 𑀦𑀸𑀫 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀏𑀢𑁆𑀣 𑀲𑀗𑁆𑀔𑀮𑀺𑀓𑀸 𑀦𑀸𑀫 𑀅𑀦𑀦𑁆𑀢𑀭𑁂𑀦 𑀲𑀫𑁆𑀩𑀚𑁆𑀛𑀢𑀺, 𑀅𑀜𑁆𑀜𑁂𑀦 𑀘 𑀲𑀗𑁆𑀔𑀮𑀺𑀓𑁂𑀦𑀸𑀢𑀺 𑀓𑁂𑀯𑀮𑀁 𑀲𑀗𑁆𑀔𑀮𑀺𑀓𑀸 𑀧𑀸𑀭𑀺𑀲𑀼𑀤𑁆𑀥𑀺 𑀦𑀸𑀫 𑀳𑁄𑀢𑀻𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀏𑀯𑀁 𑀲𑀦𑁆𑀢𑁂 𑀯𑀺𑀲𑁂𑀲𑀦𑀁 𑀦𑀺𑀭𑀢𑁆𑀣𑀓𑀁 𑀳𑁄𑀢𑀺. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸 𑀩𑀤𑁆𑀥𑀸𑀯 𑀳𑁄𑀢𑀺 𑀅𑀦𑁆𑀢𑁄𑀕𑁂𑀳𑁂 𑀏𑀯 𑀲𑀫𑁆𑀧𑀬𑁄𑀚𑀦𑀢𑁆𑀢𑀸. 𑀬𑀣𑀸 𑀲𑀸 𑀦 𑀓𑀢𑁆𑀣𑀘𑀺 𑀕𑀘𑁆𑀙𑀢𑀺, 𑀢𑀣𑀸 𑀲𑀸𑀧𑀺 𑀦 𑀓𑀢𑁆𑀣𑀘𑀺 𑀕𑀘𑁆𑀙𑀢𑀻𑀢𑀺 𑀓𑀺𑀭 𑀅𑀥𑀺𑀧𑁆𑀧𑀸𑀬𑁄.

𑀙𑀦𑁆𑀤𑀤𑀸𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁫-𑁭. ‘‘𑀙𑀦𑁆𑀤𑀁 𑀤𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀯𑀸 𑀲𑀻𑀫𑀦𑁆𑀢𑀭𑀺𑀓𑀁 𑀯𑀸 𑀩𑀳𑀺𑀲𑀻𑀫𑀁 𑀯𑀸 𑀕𑀦𑁆𑀢𑁆𑀯𑀸 𑀆𑀕𑀢𑁄 𑀪𑀺𑀓𑁆𑀔𑀼 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀺, 𑀢𑀲𑁆𑀫𑀸 𑀕𑀫𑀺𑀓𑀪𑀺𑀓𑁆𑀔𑀽𑀦𑀁 𑀙𑀦𑁆𑀤𑀁 𑀕𑀡𑁆𑀳𑀺𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀩𑀦𑁆𑀥𑀺𑀢𑁆𑀯𑀸 𑀧𑀼𑀦 𑀯𑀺𑀳𑀸𑀭𑀲𑀻𑀫𑀁 𑀩𑀦𑁆𑀥𑀺𑀢𑀼𑀁 𑀢𑁂𑀲𑀁 𑀙𑀦𑁆𑀤𑀁 𑀦 𑀕𑀡𑁆𑀳𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀫𑀼𑀳𑀼𑀢𑁆𑀢𑀁 𑀏𑀓𑀫𑀦𑁆𑀢𑀁 𑀳𑁄𑀣𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀬𑀁 𑀓𑀺𑀜𑁆𑀘𑀺 𑀪𑀺𑀓𑁆𑀔𑀼𑀓𑀫𑁆𑀫𑀁 𑀕𑀳𑀝𑁆𑀞𑀸𑀤𑀻𑀲𑀼 𑀳𑀢𑁆𑀣𑀧𑀸𑀲𑀕𑀢𑁂𑀲𑀼 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀦𑀺𑀲𑁆𑀲𑀻𑀫𑀦𑁆𑀢𑀺 𑀩𑀳𑀺𑀲𑀻𑀫𑀁. 𑀢𑀲𑁆𑀲 𑀲𑀫𑁆𑀫𑀼𑀢𑀺𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀢𑀲𑁆𑀫𑀺𑀁 𑀲𑀢𑀺𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀆𑀲𑀦𑁂𑀦 𑀲𑀳 𑀉𑀤𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀦𑁆𑀦𑀭𑀲𑁄𑀧𑀻𑀢𑀺 𑀅𑀧𑀺-𑀲𑀤𑁆𑀤𑁄 𑀘𑀸𑀢𑀼𑀤𑁆𑀤𑀲𑀺𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀬𑀤𑀺 𑀦𑁄 𑀏𑀢’’𑀦𑁆𑀢𑀺. ‘‘𑀅𑀚𑁆𑀚 𑀫𑁂 𑀉𑀧𑁄𑀲𑀣𑁄 𑀧𑀦𑁆𑀦𑀭𑀲𑁄’’𑀢𑀺 𑀅𑀥𑀺𑀝𑁆𑀞𑀸𑀦𑀁 𑀲𑀤𑀸 𑀦 𑀓𑀺𑀜𑁆𑀘𑀺, 𑀦 𑀅𑀜𑁆𑀜𑀣𑀸𑀢𑀺 𑀏𑀓𑁂.

𑀆𑀧𑀢𑁆𑀢𑀺𑀧𑀝𑀺𑀓𑀫𑁆𑀫𑀯𑀺𑀥𑀺𑀓𑀣𑀸𑀤𑀺𑀯𑀡𑁆𑀡𑀦𑀸

𑁧𑁬𑁯-𑁧𑁭𑁦. 𑀧𑀝𑀺𑀤𑁂𑀲𑁂𑀫𑀻𑀢𑀺 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀼𑀢𑁆𑀢𑁂 𑀤𑁂𑀲𑀦𑀸 𑀘 𑀧𑀝𑀺𑀕𑁆𑀕𑀳𑁄 𑀘 𑀳𑁄𑀢𑀺𑀬𑁂𑀯 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑁂𑀦 𑀯𑀺𑀲𑀼𑀤𑁆𑀥𑀺𑀬𑀸 𑀯𑀼𑀢𑁆𑀢𑀢𑁆𑀢𑀸𑀢𑀺 𑀓𑁂𑀘𑀺. 𑀯𑁂𑀫𑀢𑀺𑀓𑁂𑀦 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀺𑀲𑁆𑀲𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄, 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀓𑀢𑁂 𑀬𑀸𑀯 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦 𑀳𑁄𑀢𑀺, 𑀢𑀸𑀯 𑀲𑀪𑀸𑀕𑀸𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀮𑀪𑀢𑀺, 𑀅𑀜𑁆𑀜𑁂𑀲𑀜𑁆𑀘 𑀓𑀫𑁆𑀫𑀸𑀦𑀁 𑀧𑀭𑀺𑀲𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺. 𑀧𑀼𑀦 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀁. 𑀦 𑀘𑀸𑀢𑀺 𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀺, 𑀤𑁂𑀲𑀺𑀢𑁂 𑀧𑀦 𑀤𑁄𑀲𑁄 𑀦𑀢𑁆𑀣𑀻𑀢𑀺. 𑀢𑀣𑀸 𑀇𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀘 𑀲𑀓𑀮𑀲𑀗𑁆𑀖𑁂 𑀲𑀪𑀸𑀕𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁂, 𑀯𑁂𑀫𑀢𑀺𑀓𑁂 𑀘. 𑀢𑀣𑀸 𑀘 ‘‘𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀬𑀤𑀸 𑀲𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀢𑀻’’𑀢𑀺, ‘‘𑀢𑀤𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’𑀢𑀺 𑀯𑀢𑁆𑀯𑀸 ‘𑀉𑀧𑁄𑀲𑀣𑀁 𑀓𑀸𑀢𑀼𑀁 𑀮𑀪𑀢𑀻’’𑀢𑀺 𑀘 𑀮𑀺𑀔𑀺𑀢𑀁.

𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁭𑁨-𑁩. ‘‘𑀅𑀢𑁆𑀣𑀜𑁆𑀜𑁂’’𑀢𑀺 𑀧𑀼𑀩𑁆𑀩𑀯𑀸𑀭𑁂, ‘‘𑀅𑀣𑀜𑁆𑀜𑁂’’𑀢𑀺 𑀧𑀘𑁆𑀙𑀸𑀯𑀸𑀭𑁂 𑀧𑀸𑀞𑁄. 𑀲𑀻𑀫𑀁 𑀑𑀓𑁆𑀓𑀦𑁆𑀢𑁂 𑀯𑀸 𑀑𑀓𑁆𑀓𑀫𑀦𑁆𑀢𑁂 𑀯𑀸 𑀧𑀲𑁆𑀲𑀦𑁆𑀢𑀺. 𑀥𑀫𑁆𑀫𑀲𑀜𑁆𑀜𑀺𑀦𑁄 𑀧𑀦 𑀅𑀜𑁆𑀜𑀸𑀡𑁂𑀦 𑀳𑁄𑀦𑁆𑀢𑀺. ‘‘𑀯𑁂𑀫𑀢𑀺𑀓𑀧𑀦𑁆𑀦𑀭𑀲𑀓𑀁 𑀉𑀢𑁆𑀢𑀸𑀦𑀫𑁂𑀯𑀸’’𑀢𑀺 𑀧𑀸𑀞𑁄.

𑀲𑀻𑀫𑁄𑀓𑁆𑀓𑀦𑁆𑀢𑀺𑀓𑀧𑁂𑀬𑁆𑀬𑀸𑀮𑀓𑀣𑀸𑀯𑀡𑁆𑀡𑀦𑀸

𑁧𑁭𑁮. ‘‘𑀦 𑀅𑀓𑀸𑀫𑀸 𑀤𑀸𑀢𑀩𑁆𑀩𑀸’’𑀢𑀺𑀯𑀘𑀦𑀢𑁄 𑀇𑀘𑁆𑀙𑀸𑀬 𑀲𑀢𑀺 𑀤𑀸𑀢𑀩𑁆𑀩𑀸𑀢𑀺 𑀲𑀺𑀤𑁆𑀥𑀁.

𑀮𑀺𑀗𑁆𑀕𑀸𑀤𑀺𑀤𑀲𑁆𑀲𑀦𑀓𑀣𑀸𑀯𑀡𑁆𑀡𑀦𑀸

𑁧𑁮𑁦. 𑀦𑀸𑀪𑀺𑀯𑀺𑀢𑀭𑀦𑁆𑀢𑀻𑀢𑀺 𑀏𑀢𑁆𑀣 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀸 𑀓𑀺𑀭 𑀢𑁂. 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀢𑀲𑁆𑀲 𑀑𑀲𑀸𑀭𑀡𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀓𑀢𑁂 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀇𑀢𑀭𑁂𑀦 𑀮𑀤𑁆𑀥𑀺𑀦𑀺𑀲𑁆𑀲𑀚𑁆𑀚𑀦𑀫𑀢𑁆𑀢𑁂𑀦 𑀓𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀜𑁆𑀘 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑀜𑁆𑀘 𑀚𑀸𑀦𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀲𑁆𑀫𑀸 𑀇𑀫𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀓𑁂.

𑀦𑀕𑀦𑁆𑀢𑀩𑁆𑀩𑀕𑀦𑁆𑀢𑀩𑁆𑀩𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁧𑁮𑁧. 𑀦 𑀕𑀦𑁆𑀢𑀩𑁆𑀩𑁄𑀢𑀺 𑀓𑀺𑀁 𑀲𑀦𑁆𑀥𑀸𑀬? ‘‘𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦𑀸’’𑀢𑀺 𑀯𑀘𑀦𑀢𑁄 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀢𑀁 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀤𑀲 𑀤𑀲 𑀳𑀼𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀸𑀦𑀸𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀤𑀻𑀲𑀼 𑀞𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀮𑀪𑀦𑁆𑀢𑀺. 𑀦𑀯𑀓𑀫𑁆𑀫𑀲𑀸𑀮𑀸𑀤𑀺𑀓𑀸 𑀦𑀸𑀦𑀸𑀲𑀻𑀫𑀸𑀓𑁄𑀝𑀺 𑀉𑀧𑁄𑀲𑀣𑀸𑀥𑀺𑀝𑁆𑀞𑀸𑀦𑀢𑁆𑀣𑀁 𑀲𑀻𑀫𑀸𑀧𑀺 𑀦𑀤𑀻𑀧𑀺 𑀦 𑀕𑀦𑁆𑀢𑀩𑁆𑀩𑀸. 𑀕𑀭𑀼𑀓𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀮𑀳𑀼𑀓𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦𑀸’’𑀢𑀺 𑀯𑀘𑀦𑀁 𑀲𑀸𑀥𑁂𑀢𑀺. 𑀢𑀢𑁆𑀣 ‘‘𑀬𑀲𑁆𑀫𑀺𑀁 𑀆𑀯𑀸𑀲𑁂 𑀉𑀧𑁄𑀲𑀣𑀓𑀸𑀭𑀓𑀸 …𑀧𑁂… 𑀅𑀓𑀢𑁆𑀯𑀸 𑀦 𑀕𑀦𑁆𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀯𑀺𑀲𑁆𑀲𑀝𑁆𑀞𑀉𑀧𑁄𑀲𑀣𑀸𑀧𑀺 𑀆𑀯𑀸𑀲𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. ‘‘𑀢𑀢𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀓𑀭𑀡𑀢𑁆𑀣𑀁 𑀯𑀺𑀲𑁆𑀲𑀝𑁆𑀞𑀉𑀧𑁄𑀲𑀣𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀔𑀡𑁆𑀟𑀲𑀻𑀫𑀁 𑀯𑀸 𑀧𑀯𑀺𑀲𑀺𑀢𑀼𑀦𑁆𑀢𑀺 𑀅𑀧𑀭𑁂 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑁂𑀯 𑀉𑀧𑁄𑀲𑀣𑀦𑁆𑀢𑀭𑀸𑀬𑁄𑀢𑀺 ‘‘𑀅𑀢𑁆𑀢𑀦𑁄 𑀉𑀧𑁄𑀲𑀣𑀦𑁆𑀢𑀭𑀸𑀬𑁄’’𑀢𑀺 𑀮𑀺𑀔𑀺𑀢𑀁.

𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀲𑀦𑁆𑀤𑀲𑁆𑀲𑀦𑀓𑀣𑀸𑀯𑀡𑁆𑀡𑀦𑀸

𑁧𑁮𑁩. ‘‘𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀓𑀮𑀳𑀸𑀤𑀺𑀪𑀬𑁂𑀦 𑀦𑀸𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑀓𑀫𑁆𑀫𑁂 𑀢𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀏𑀓𑁂. ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸’’𑀢𑀺 (𑀫𑀳𑀸𑀯. 𑁧𑁮𑁩) 𑀯𑀘𑀦𑀢𑁄 𑀲𑀸𑀫𑀕𑁆𑀕𑀻𑀤𑀺𑀯𑀲𑁄 𑀅𑀦𑀼𑀧𑁄𑀲𑀣𑀤𑀺𑀯𑀲𑁄𑀢𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀧𑀭𑀺𑀯𑀸𑀭𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀘𑀭𑀺𑀬𑀸. 𑀘𑀸𑀢𑀼𑀤𑁆𑀤𑀲𑀺𑀬𑀁, 𑀧𑀦𑁆𑀦𑀭𑀲𑀺𑀬𑀁 𑀯𑀸 𑀘𑁂 𑀲𑀗𑁆𑀖𑁄 𑀲𑀫𑀕𑁆𑀕𑁄 𑀳𑁄𑀢𑀺, ‘‘𑀅𑀚𑁆𑀚𑀼𑀧𑁄𑀲𑀣𑁄 𑀲𑀸𑀫𑀕𑁆𑀕𑀻’’𑀢𑀺 𑀅𑀯𑀢𑁆𑀯𑀸 𑀧𑀓𑀢𑀺𑀦𑀻𑀳𑀸𑀭𑁂𑀦𑁂𑀯 𑀓𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀬𑀣𑀸𑀤𑁂𑀲𑀦𑀸 𑀓𑀢𑀸𑀢𑀺 𑀦𑁄 𑀢𑀓𑁆𑀓𑁄. 𑀅𑀜𑁆𑀜𑀣𑀸 𑀬𑀣𑀸𑀯𑀼𑀢𑁆𑀢𑀤𑁆𑀯𑀬𑁂 𑀘𑁂 𑀲𑀸𑀫𑀕𑁆𑀕𑀻 𑀳𑁄𑀢𑀺, 𑀢𑀢𑁆𑀣 𑀉𑀧𑁄𑀲𑀣𑀁 𑀅𑀓𑀢𑁆𑀯𑀸 𑀅𑀦𑀼𑀧𑁄𑀲𑀣𑀤𑀺𑀯𑀲𑁂 𑀏𑀯 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀢𑀺 𑀆𑀧𑀚𑁆𑀚𑀢𑀺. 𑀅𑀜𑁆𑀜𑀣𑀸 𑀧𑀼𑀩𑁆𑀩𑁂 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀇𑀤𑀸𑀦𑀺 𑀧𑀝𑀺𑀲𑁂𑀥𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀲𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁧𑁩𑁬) 𑀧𑀼𑀩𑁆𑀩𑁂 𑀳𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀓𑀺𑀁 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸’’𑀢𑀺 𑀘 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀸’’𑀢𑀺 (𑀫𑀳𑀸𑀯. 𑁧𑁪𑁯) 𑀘 𑀧𑀘𑁆𑀙𑀸 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀉𑀧𑁄𑀲𑀣𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀁 𑀅𑀦𑀺𑀝𑁆𑀞𑀁, 𑀲𑀢𑀺 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸 𑀅𑀜𑁆𑀜𑁄 𑀤𑀺𑀯𑀲𑁄 𑀧𑀓𑀢𑀺𑀯𑀲𑁂𑀦 𑀅𑀦𑀼𑀧𑁄𑀲𑀣𑁄𑀧𑀺 𑀉𑀧𑁄𑀲𑀣𑀤𑀺𑀯𑀲𑁄 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑀦𑀯𑀲𑁂𑀦 𑀦𑀺𑀯𑀸𑀭𑁂𑀢𑀼𑀫𑁆𑀧𑀺 𑀏𑀯𑀁𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.