𑁧. 𑀫𑀳𑀸𑀔𑀦𑁆𑀥𑀓𑀯𑀡𑁆𑀡𑀦𑀸
𑀩𑁄𑀥𑀺𑀓𑀣𑀸𑀯𑀡𑁆𑀡𑀦𑀸
𑀬𑀁 𑀔𑀦𑁆𑀥𑀓𑁂 𑀮𑀻𑀦𑀧𑀤𑀸𑀤𑀺𑀪𑁂𑀤-𑀧𑀓𑀸𑀲𑀦𑀁 𑀤𑀸𑀦𑀺 𑀲𑀼𑀧𑀢𑁆𑀢𑀓𑀸𑀮𑀁;
𑀢𑀲𑁆𑀫𑀸 𑀅𑀧𑀼𑀩𑁆𑀩𑀁 𑀯𑀺𑀦𑀬𑀢𑁆𑀣𑀫𑁂𑀯, 𑀯𑀓𑁆𑀔𑀸𑀫𑀺 𑀲𑀗𑁆𑀔𑁂𑀧𑀕𑀳𑀡𑀢𑁆𑀣𑀁.
𑀢𑀢𑁆𑀣 𑀓𑁂𑀦𑀝𑁆𑀞𑁂𑀦𑀸𑀬𑀁 𑀔𑀦𑁆𑀥𑀓𑁄𑀢𑀺? 𑀔𑀦𑁆𑀥𑀸𑀦𑀁 𑀲𑀫𑀽𑀳𑀢𑁆𑀢𑀸 𑀯𑀺𑀪𑀗𑁆𑀕𑁄 𑀯𑀺𑀬. 𑀢𑁂 𑀧𑀦 𑀓𑀣𑀦𑁆𑀢𑀺? 𑀔𑀦𑁆𑀥𑀸𑀦𑀁 𑀧𑀓𑀸𑀲𑀦𑀢𑁄 𑀤𑀻𑀧𑀦𑀢𑁄. 𑀔𑀦𑁆𑀥𑀸𑀢𑀺 𑀘𑁂𑀢𑁆𑀣 𑀧𑀩𑁆𑀩𑀚𑁆𑀚𑀸𑀤𑀺𑀯𑀺𑀦𑀬𑀓𑀫𑁆𑀫𑀲𑀗𑁆𑀔𑀸𑀢𑀸, 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀸 𑀘 𑀧𑀜𑁆𑀜𑀢𑁆𑀢𑀺𑀬𑁄 𑀅𑀥𑀺𑀧𑁆𑀧𑁂𑀢𑀸. 𑀧𑀩𑁆𑀩𑀚𑁆𑀚𑀸𑀤𑀻𑀦𑀺 𑀳𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 ‘‘𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀜𑁆𑀜𑀢𑁆𑀢𑀺𑀬𑀜𑁆𑀘 𑀔𑀦𑁆𑀥-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀤𑀸𑀭𑀼𑀓𑁆𑀔𑀦𑁆𑀥𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀉𑀤𑀓𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀲𑀁 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸𑀦𑀁 𑀔𑀦𑁆𑀥𑀸𑀦𑀁 𑀧𑀓𑀸𑀲𑀦𑀢𑁄 𑀯𑀡𑁆𑀡𑀦𑀢𑁄 𑀧𑀩𑁆𑀩𑀚𑁆𑀚𑀓𑁆𑀔𑀦𑁆𑀥𑀓𑀸𑀤𑀬𑁄 𑀯𑀻𑀲𑀢𑀺 ‘‘𑀔𑀦𑁆𑀥𑀓𑀸’’𑀢𑀺 𑀯𑀼𑀢𑁆𑀢𑀸, 𑀅𑀯𑀲𑀸𑀦𑁂 𑀤𑁆𑀯𑁂 𑀢𑀁𑀲𑀤𑀺𑀲𑀢𑁆𑀢𑀸 𑀯𑁂𑀮𑀸𑀬 𑀲𑀤𑀺𑀲𑀢𑁆𑀢𑀸 𑀲𑀻𑀮𑀲𑁆𑀲 𑀯𑁂𑀮𑀸𑀢𑀺 𑀯𑀘𑀦𑀁 𑀯𑀺𑀬. 𑀅𑀧𑀺𑀘 𑀪𑀸𑀕𑀭𑀸𑀲𑀢𑁆𑀣𑀢𑀸𑀧𑁂𑀢𑁆𑀣 𑀬𑀼𑀚𑁆𑀚𑀢𑁂 𑀢𑁂𑀲𑀁 𑀧𑀜𑁆𑀜𑀢𑁆𑀢𑀻𑀦𑀁 𑀪𑀸𑀕𑀢𑁄 𑀘 𑀭𑀸𑀲𑀺𑀢𑁄 𑀘 𑀯𑀺𑀪𑀢𑁆𑀢𑀢𑁆𑀢𑀸. 𑀓𑀺𑀁 𑀧𑀦𑁂𑀢𑁂𑀲𑀁 𑀔𑀦𑁆𑀥𑀓𑀸𑀦𑀁 𑀅𑀦𑀼𑀧𑀼𑀩𑁆𑀩𑀓𑀸𑀭𑀡𑀦𑁆𑀢𑀺? 𑀦𑀸𑀬𑀁 𑀧𑀼𑀘𑁆𑀙𑀸 𑀲𑀫𑁆𑀪𑀯𑀢𑀺, 𑀅𑀜𑁆𑀜𑀣𑀸 𑀯𑀼𑀢𑁆𑀢𑁂𑀲𑀼𑀧𑀺 𑀢𑀧𑁆𑀧𑀲𑀗𑁆𑀕𑀸𑀦𑀢𑀺𑀓𑁆𑀓𑀫𑀦𑀢𑁄. 𑀅𑀣 𑀯𑀸 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀲𑀸𑀲𑀦𑀧𑁆𑀧𑀯𑁂𑀲𑀦𑀲𑁆𑀲 𑀢𑀤𑀢𑁆𑀣𑀲𑀗𑁆𑀕𑀳𑀓𑁄 𑀫𑀳𑀸𑀔𑀦𑁆𑀥𑀓𑁄 𑀧𑀞𑀫𑀁 𑀯𑀼𑀢𑁆𑀢𑁄. 𑀓𑁂𑀦𑀸𑀢𑀺 𑀘𑁂? 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺. 𑀪𑀕𑀯𑀢𑀸 𑀧𑀦 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀢𑀣𑀸 𑀢𑀣𑀸 𑀯𑀼𑀢𑁆𑀢𑀸𑀦𑀺, 𑀦 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦. 𑀣𑁂𑀭𑀸 𑀧𑀦 𑀢𑀁 𑀢𑀁 𑀧𑀬𑁄𑀚𑀦𑀁 𑀧𑀝𑀺𑀘𑁆𑀘 𑀲𑀫𑀸𑀦𑀚𑀸𑀢𑀺𑀓𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀚𑁆𑀛𑀸𑀬𑀺𑀁𑀲𑀼. 𑀲𑁂𑀲𑀸𑀦𑀁 𑀧𑀬𑁄𑀚𑀦𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.
𑀔𑀦𑁆𑀥𑀓𑁄𑀯𑀺𑀤𑀸𑀢𑀺 𑀧𑀜𑁆𑀜𑀢𑁆𑀢𑀺𑀪𑀸𑀕𑀭𑀸𑀲𑀝𑁆𑀞𑁂𑀦 𑀦𑁂𑀲𑀁 𑀔𑀦𑁆𑀥𑀢𑁆𑀣𑀓𑁄𑀯𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀭𑀧𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀅𑀦𑀼𑀢𑁆𑀢𑀸𑀦𑀢𑁆𑀣𑀸𑀦𑀁 𑀧𑀤𑀸𑀦𑀁 𑀲𑀁𑀯𑀡𑁆𑀡𑀦𑀸. 𑀓𑀲𑁆𑀫𑀸 𑀧𑀦𑁂𑀯𑀁 𑀯𑀺𑀲𑁂𑀲𑀺𑀢𑀦𑁆𑀢𑀺? 𑀢𑀢𑁄 𑀲𑁂𑀲𑀪𑀸𑀕𑀸 𑀬𑀼𑀢𑁆𑀢𑀸. 𑀫𑀸𑀢𑀺𑀓𑀸𑀝𑁆𑀞𑀼𑀧𑁆𑀧𑀢𑁆𑀢𑀺𑀕𑁆𑀕𑀳𑀡𑀫𑁆𑀧𑁂𑀢𑁆𑀣 𑀧𑀤𑀪𑀸𑀚𑀦𑀺𑀬𑀕𑁆𑀕𑀳𑀡𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀳𑀺 𑀅𑀢𑁆𑀣𑀸 𑀬𑁂𑀲𑀁 𑀧𑀤𑀯𑀺𑀲𑁂𑀲𑀸𑀦𑀁 𑀅𑀝𑁆𑀞𑀓𑀣𑀸𑀬𑀁 𑀧𑀓𑀸𑀲𑀺𑀢𑀸, 𑀢𑁂𑀲𑀁 𑀢𑁂 𑀧𑀤𑀯𑀺𑀲𑁂𑀲𑁂 𑀧𑀼𑀦 𑀇𑀥 𑀯𑀤𑁂𑀬𑁆𑀬𑀸𑀫, 𑀯𑀡𑁆𑀡𑀦𑀸𑀬 𑀧𑀭𑀺𑀬𑁄𑀲𑀸𑀦𑀁 𑀓𑀤𑀸 𑀪𑀯𑁂 𑀢𑁂 𑀢𑁂 𑀅𑀢𑁆𑀣𑁂𑀢𑀺 𑀯𑀼𑀢𑁆𑀢𑀁, 𑀢𑀁 𑀢𑀲𑁆𑀲 𑀦𑀺𑀤𑁆𑀤𑁂𑀲𑁂𑀦 𑀬𑀼𑀚𑁆𑀚𑀢𑀺. 𑀉𑀢𑁆𑀢𑀸𑀦𑀸 𑀘𑁂𑀯 𑀬𑀸 𑀧𑀸𑀴𑀺, 𑀢𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀓𑀺𑀦𑁆𑀢𑀺 𑀯𑀢𑁆𑀢𑀩𑁆𑀩𑀁? 𑀦 𑀳𑀺 𑀅𑀢𑁆𑀣𑀸 𑀉𑀢𑁆𑀢𑀸𑀦𑀸𑀢𑀺 𑀲𑀫𑁆𑀪𑀯𑀢𑀺. 𑀅𑀥𑀺𑀧𑁆𑀧𑀸𑀬𑀸𑀦𑀼𑀲𑀦𑁆𑀥𑀻𑀳𑀻𑀢𑀺𑀆𑀤𑀺𑀯𑀘𑀦𑁂𑀳𑀺𑀧𑀺 𑀢𑀁 𑀯𑀘𑀦𑀁 𑀲𑀫𑁆𑀪𑀯𑀢𑀻𑀢𑀺 𑀘𑁂? 𑀦, 𑀅𑀢𑁆𑀣𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀧𑀤𑀯𑀺𑀲𑁂𑀲𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀢𑁂 𑀳𑀺 𑀅𑀢𑁆𑀣𑀢𑁄 𑀅𑀦𑀧𑁂𑀢𑀢𑁆𑀣𑁂𑀦, 𑀅𑀪𑀺𑀥𑀸𑀦𑀢𑁆𑀣𑁂𑀦 𑀯𑀸 𑀅𑀢𑁆𑀣𑁄𑀧𑀘𑀸𑀭𑁂𑀦 𑀯𑀸 𑀅𑀢𑁆𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀁𑀯𑀡𑁆𑀡𑀦𑀸𑀦𑀬𑁄𑀢𑀺 𑀲𑀁𑀯𑀡𑁆𑀡𑀦𑀸 𑀦𑀸𑀫 𑀅𑀯𑀼𑀢𑁆𑀢𑁂𑀲𑀼 𑀉𑀳𑀸𑀧𑁄𑀳𑀓𑁆𑀓𑀫𑀦𑀺𑀤𑀲𑁆𑀲𑀦𑀢𑁄 ‘‘𑀦𑀬𑁄’’𑀢𑀺 𑀯𑀼𑀢𑁆𑀢𑁄.
𑁧. 𑀉𑀭𑀼𑀯𑁂𑀮𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀸𑀮𑀺𑀓𑀭𑀸𑀲𑀺𑀯𑀲𑁂𑀦 𑀮𑀤𑁆𑀥𑀦𑀸𑀫𑀓𑁄 𑀕𑀸𑀫𑁄, 𑀢𑀲𑁆𑀫𑀸 𑀲𑀫𑀻𑀧𑀢𑁆𑀣𑁂 𑀏𑀢𑀁 𑀪𑀼𑀫𑁆𑀫𑀁. 𑀢𑀣𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀢𑀲𑁆𑀫𑀺𑀁 𑀯𑀸𑀮𑀺𑀓𑀭𑀸𑀲𑀺𑀫𑁆𑀳𑀺 𑀯𑀺𑀳𑀭𑀢𑀻𑀢𑀺 𑀆𑀧𑀚𑁆𑀚𑀢𑀺, ‘‘𑀉𑀭𑀼𑀯𑁂𑀮𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻𑀢𑀺 𑀬𑁂𑀦 𑀉𑀭𑀼𑀯𑁂𑀮𑀲𑁂𑀦𑀸𑀦𑀺𑀕𑀫𑁄’’𑀢𑀺𑀆𑀤𑀺𑀯𑀘𑀦𑀯𑀺𑀭𑁄𑀥𑁄 𑀘. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀽𑀮𑀓𑀸𑀭𑀡𑀫𑁂𑀯 𑀤𑀲𑁆𑀲𑀺𑀢𑀁. 𑀢𑀢𑁆𑀣 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁…𑀧𑁂… 𑀤𑀝𑁆𑀞𑀩𑁆𑀩𑁄𑀢𑀺 𑀦𑀺𑀕𑀫𑀦𑀯𑀘𑀦𑀁. 𑀢𑀁 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀕𑀸𑀫𑀁 𑀲𑀦𑁆𑀥𑀸𑀬 𑀬𑀣𑀸𑀯𑀼𑀢𑁆𑀢𑀧𑀤𑀢𑁆𑀣𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁. ‘‘𑀲𑁄 𑀧𑀦 𑀕𑀸𑀫𑁄 𑀢𑀤𑀼𑀧𑀘𑀸𑀭𑁂𑀦 𑀏𑀯𑀁 𑀦𑀸𑀫𑀁 𑀮𑀪𑀢𑀻’’𑀢𑀺 𑀯𑀘𑀦𑀁 𑀧𑀦 𑀅𑀯𑀼𑀢𑁆𑀢𑀲𑀺𑀤𑁆𑀥𑀦𑁆𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀣 𑀯𑀸 𑀬𑀲𑁆𑀲 ‘‘𑀉𑀭𑀼𑀯𑁂𑀮𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀯𑀸𑀮𑀺𑀓𑀭𑀸𑀲𑀺𑀲𑁆𑀲, 𑀢𑀲𑁆𑀲 𑀲𑀫𑀻𑀧𑀕𑀸𑀫𑀲𑁆𑀲𑀧𑀺 𑀦𑀸𑀫𑀁. 𑀢𑀢𑁆𑀣 𑀆𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀦 𑀇𑀥 𑀕𑀸𑀫𑀁 𑀲𑀦𑁆𑀥𑀸𑀬 ‘‘𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀆𑀳 𑀕𑁄𑀘𑀭𑀕𑀸𑀫𑀧𑀬𑁄𑀚𑀦𑀸𑀪𑀸𑀯𑀢𑁄. 𑀦 𑀳𑀺 𑀪𑀕𑀯𑀸 𑀢𑀁 𑀕𑀸𑀫𑀁 𑀕𑁄𑀘𑀭𑀁 𑀓𑀢𑁆𑀯𑀸 𑀢𑀤𑀸 𑀢𑀢𑁆𑀣 𑀯𑀺𑀳𑀸𑀲𑀺, 𑀢𑀲𑁆𑀫𑀸 𑀏𑀢𑁆𑀣 𑀯𑀸𑀮𑀺𑀓𑀭𑀸𑀲𑀺𑀲𑁆𑀲 𑀲𑀫𑀻𑀧𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀲𑁄 𑀏𑀯𑀫𑀸𑀳𑀸𑀢𑀺 𑀤𑀲𑁆𑀲𑁂𑀢𑀼𑀓𑀸𑀫𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀏𑀯𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀪𑀕𑀯𑀢𑁄 𑀕𑀸𑀫𑀢𑁄 𑀤𑀽𑀭𑀢𑀭𑁂 𑀅𑀭𑀜𑁆𑀜𑁂 𑀅𑀪𑀺𑀲𑀫𑁆𑀩𑁄𑀥𑀺𑀤𑀻𑀧𑀦𑁂𑀦 𑀤𑀼𑀢𑀺𑀬𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑀺𑀬𑀫𑀁 𑀢𑀻𑀳𑀺 𑀧𑀤𑁂𑀳𑀺 𑀅𑀓𑀸𑀲𑀺 𑀣𑁂𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀧𑀤𑀢𑁆𑀢𑀬𑀯𑀘𑀦𑀧𑀬𑁄𑀚𑀦𑀸𑀪𑀸𑀯𑀢𑁄. 𑀢𑀢𑁆𑀣 𑀦𑀤𑀦𑁆𑀢𑀸 𑀕𑀘𑁆𑀙𑀢𑀻𑀢𑀺 𑀦𑀤𑀻. 𑀦𑁂𑀮𑀜𑁆𑀚𑀮𑀸𑀬𑀸𑀢𑀺 𑀯𑀢𑁆𑀢𑀩𑁆𑀩𑁂 𑀮-𑀓𑀸𑀭𑀲𑁆𑀲 𑀭-𑀓𑀸𑀭𑀁 𑀓𑀢𑁆𑀯𑀸 ‘‘𑀦𑁂𑀭𑀜𑁆𑀚𑀭𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀓𑀤𑁆𑀤𑀫𑀲𑁂𑀯𑀸𑀮𑀯𑀺𑀭𑀳𑀺𑀢𑀢𑁆𑀢𑀸 𑀦𑀺𑀤𑁆𑀤𑁄𑀲𑀚𑀮𑀸𑀬𑀸𑀢𑀺 𑀅𑀢𑁆𑀣𑁄, 𑀦𑀻𑀮𑀚𑀮𑀸𑀬𑀸𑀢𑀺 𑀢𑀲𑁆𑀲𑀸 𑀦𑀸𑀫𑀫𑁂𑀯 𑀯𑀸 𑀏𑀢𑀁.
𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂𑀢𑀺 𑀏𑀢𑁆𑀣 𑀘 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀅𑀪𑀺𑀲𑀫𑁆𑀩𑁄𑀥𑁄. 𑀲𑁄 𑀘 𑀅𑀢𑁆𑀣𑀢𑁄 𑀪𑀕𑀯𑀢𑁄 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀁 𑀳𑁄𑀢𑀺 ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀦𑀸𑀫’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁬𑁨) 𑀧𑀝𑀺𑀲𑀫𑁆𑀪𑀺𑀤𑀸𑀯𑀘𑀦𑀢𑁄. 𑀓𑀺𑀜𑁆𑀘𑀸𑀧𑀺 𑀢𑀁 𑀦𑀸𑀫𑀓𑀭𑀡𑀪𑀽𑀢𑀁 𑀘𑀢𑀼𑀢𑁆𑀣𑀨𑀮𑀜𑀸𑀡𑀫𑁆𑀧𑀺 𑀯𑀢𑁆𑀢𑀼𑀁 𑀲𑀫𑁆𑀪𑀯𑀢𑀺, 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀁 𑀧𑀦 𑀓𑀭𑀡𑀢𑁄 𑀢𑀁 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀫𑁂𑀯 𑀏𑀢𑁆𑀣 𑀩𑁄𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀢𑀢𑀺𑀬𑀯𑀺𑀚𑁆𑀚𑀸𑀬 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸’’𑀢𑀺 𑀢𑀤𑁂𑀯 𑀤𑀲𑁆𑀲𑀺𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀩𑁄𑀚𑁆𑀛𑀗𑁆𑀕𑀸’’𑀢𑀺, ‘‘𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸’’𑀢𑀺 𑀘. 𑀢𑀢𑁆𑀣 𑀬𑀲𑁆𑀫𑀸 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀸𑀫𑀜𑁆𑀜𑀢𑁄 𑀯𑀢𑁆𑀢𑀼𑀓𑀸𑀫𑀢𑀸𑀥𑀺𑀧𑁆𑀧𑀸𑀬𑀯𑀲𑁂𑀦 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀯𑀼𑀢𑁆𑀢𑀁 𑀇𑀥𑀸𑀥𑀺𑀧𑁆𑀧𑁂𑀢𑀜𑀸𑀡𑀲𑁆𑀲𑀧𑀺 𑀢𑀤𑀦𑁆𑀢𑁄𑀕𑀥𑀢𑁆𑀢𑀸. 𑀅𑀣 𑀯𑀸 𑀧𑀸𑀴𑀺𑀬𑀁 𑀪𑀕𑀯𑀢𑁄 𑀆𑀤𑀺𑀫𑀕𑁆𑀕𑀢𑁆𑀢𑀬𑀯𑀘𑀦𑀲𑁆𑀲 𑀯𑀼𑀢𑁆𑀢𑀝𑁆𑀞𑀸𑀦𑀸𑀪𑀸𑀯𑀸 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀫𑁂𑀯 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑀁, 𑀦 𑀪𑀕𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀁 𑀧𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄𑀢𑀺 𑀲𑀫𑀬𑀦𑁆𑀢𑀭𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 ‘‘𑀘𑀢𑀽𑀲𑀽’’𑀢𑀺 𑀯𑀼𑀢𑁆𑀢𑀁 𑀆𑀤𑀺𑀢𑁆𑀢𑀬𑀲𑁆𑀲 𑀘𑀢𑀼𑀢𑁆𑀣𑀉𑀧𑀦𑀺𑀲𑁆𑀲𑀬𑀲𑀫𑁆𑀪𑀯𑁂𑀦 𑀩𑁄𑀥𑀺𑀧𑀭𑀺𑀬𑀸𑀬𑀲𑀺𑀤𑁆𑀥𑀺𑀢𑁄. ‘‘𑀧𑀼𑀕𑁆𑀕𑀮𑁄𑀧𑀺 𑀲𑁂𑀦𑀸𑀲𑀦𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁯 𑀧𑀘𑁆𑀘𑀬𑀦𑀺𑀤𑁆𑀤𑁂𑀲) 𑀯𑀘𑀦𑀢𑁄 𑀨𑀮𑀳𑁂𑀢𑀼𑀓𑁄 𑀨𑀮𑀚𑀦𑀓𑁄 𑀭𑀼𑀓𑁆𑀔𑁄 𑀨𑀮𑀭𑀼𑀓𑁆𑀔𑁄𑀢𑀺 𑀯𑀺𑀬 𑀩𑁄𑀥𑀺𑀳𑁂𑀢𑀼𑀭𑀼𑀓𑁆𑀔𑁄 𑀩𑁄𑀥𑀺𑀭𑀼𑀓𑁆𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 ‘‘𑀬𑀲𑁆𑀫𑀸 𑀓𑁂𑀯𑀮𑀁 𑀩𑁄𑀥𑀻𑀢𑀺 𑀭𑀼𑀓𑁆𑀔𑀲𑁆𑀲𑀧𑀺 𑀦𑀸𑀫𑀁, 𑀢𑀲𑁆𑀫𑀸 𑀩𑁄𑀥𑀻’’𑀢𑀺 𑀧𑀭𑀢𑁄 𑀯𑀼𑀢𑁆𑀢𑀁. 𑀦𑀺𑀕𑁆𑀭𑁄𑀥𑀸𑀤𑀺𑀭𑀼𑀓𑁆𑀔𑀢𑁄 𑀅𑀲𑁆𑀲 𑀯𑀺𑀲𑁂𑀲𑀦𑀯𑀘𑀦𑀁 𑀧𑀦 𑀢𑀤𑀜𑁆𑀜𑀩𑁄𑀥𑀺𑀫𑀽𑀮𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀓𑀼𑀲𑀮𑀫𑀽𑀮𑀢𑁆𑀢𑀸 𑀩𑁄𑀥𑀺 𑀘 𑀢𑀁 𑀫𑀽𑀮𑀜𑁆𑀘𑀸𑀢𑀺 𑀲𑀗𑁆𑀔𑁆𑀬𑀁 𑀮𑀪𑁂𑀬𑁆𑀬. 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄 𑀦𑀺𑀲𑀻𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀤𑀺𑀯𑀲𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀏𑀓-𑀲𑀤𑁆𑀤𑁄 𑀢𑀲𑁆𑀲 𑀦𑀺𑀲𑀚𑁆𑀚𑀸𑀲𑀗𑁆𑀔𑀸𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀦𑀼𑀬𑁄𑀕𑀸𑀦𑀼𑀭𑀽𑀧𑀲𑁆𑀲 𑀧𑀮𑁆𑀮𑀗𑁆𑀓𑀲𑁆𑀲 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀅𑀦𑀦𑁆𑀢𑀭𑀺𑀬𑀪𑀸𑀯𑀁 𑀅𑀣𑀲𑁆𑀲 𑀅𑀓𑁄𑀧𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀺𑀫𑀼𑀢𑁆𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀯𑀺𑀫𑀼𑀢𑁆𑀢𑀺𑀬𑀁 𑀯𑀸 𑀲𑀼𑀔𑀦𑁆𑀢𑀺 𑀦 𑀲𑀫𑁆𑀪𑀯𑀢𑀺. 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀢𑁆𑀢𑀸 𑀪𑀕𑀯𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀯𑀺𑀫𑀼𑀢𑁆𑀢𑀺 𑀏𑀯 𑀅𑀦𑀼𑀚𑀗𑁆𑀖𑀦𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀁, 𑀢𑀁 𑀲𑀫𑀸𑀧𑀚𑁆𑀚𑀦𑁂𑀦 𑀧𑀝𑀺𑀲𑀁𑀯𑁂𑀤𑀻 𑀅𑀦𑀼𑀪𑀯𑀦𑁆𑀢𑁄 𑀦𑀺𑀲𑀻𑀤𑀺. 𑀯𑁂𑀦𑁂𑀬𑁆𑀬𑀓𑀸𑀮𑀸𑀦𑀢𑀺𑀓𑁆𑀓𑀫𑀦𑀢𑁄 𑀢𑀁 𑀅𑀧𑁂𑀓𑁆𑀔𑀫𑀸𑀦𑁄 𑀦𑀺𑀲𑀻𑀤𑀺, 𑀦 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑀗𑁆𑀕𑁂𑀦.
𑀅𑀣 𑀔𑁄𑀢𑀺 𑀅𑀥𑀺𑀓𑀸𑀭𑀦𑁆𑀢𑀭𑀸𑀭𑀫𑁆𑀪𑁂 𑀦𑀺𑀧𑀸𑀢𑀤𑁆𑀯𑀬𑀁. 𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀬𑀫𑀸𑀦𑁄 𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀫𑀦𑀲𑀸𑀓𑀸𑀲𑀺, 𑀓𑀺𑀦𑁆𑀢𑀼 𑀢𑀢𑁄 𑀯𑀼𑀝𑁆𑀞𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀺𑀯𑁂𑀥𑀯𑀲𑁂𑀦𑁂𑀯 𑀲𑀼𑀫𑀦𑀲𑀺𑀓𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑀡𑀁 𑀕𑀫𑁆𑀪𑀻𑀭𑀢𑁆𑀢𑀸 𑀅𑀲𑁆𑀲𑀸𑀤𑀚𑀦𑀦𑀢𑁄, 𑀦 𑀅𑀧𑀼𑀩𑁆𑀩𑀦𑀬𑀤𑀲𑁆𑀲𑀦𑀸𑀥𑀺𑀧𑁆𑀧𑀸𑀬𑀢𑁄. 𑀧𑀘𑁆𑀘𑀓𑁆𑀔𑀪𑀽𑀢𑀲𑀩𑁆𑀩𑀥𑀫𑁆𑀫𑀢𑁆𑀢𑀸 𑀪𑀕𑀯𑀢𑁄 𑀅𑀲𑀫𑁆𑀫𑁄𑀳𑀢𑁄, 𑀧𑀝𑀺𑀯𑀺𑀤𑁆𑀥𑀲𑁆𑀲 𑀯𑀺𑀲𑀬𑀢𑁄 𑀯𑀸 𑀫𑀦𑀲𑀺𑀓𑀭𑀡𑀁 𑀧𑀦 𑀯𑀺𑀚𑀺𑀢𑀤𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀁 𑀯𑀺𑀬 𑀭𑀜𑁆𑀜𑁄 𑀅𑀧𑀼𑀩𑁆𑀩𑀁 𑀧𑀻𑀢𑀺𑀁 𑀚𑀦𑁂𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄’’𑀢𑀺 (𑀥. 𑀧. 𑁩𑁭𑁩). 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦 𑀢𑀲𑁆𑀲 𑀯𑀺𑀓𑀧𑁆𑀧𑀦𑀸𑀦𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘𑀸𑀧𑀺 ‘‘𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀻’’𑀢𑀺 𑀏𑀓𑀢𑁄𑀯 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀧𑀯𑀢𑁆𑀢𑀺𑀫𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀅𑀥𑀺𑀧𑁆𑀧𑁂𑀢𑀸 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀧𑀞𑀫𑀪𑀸𑀯𑀸𑀬, 𑀧𑀝𑀺𑀮𑁄𑀫𑀫𑀦𑀲𑀺𑀓𑀭𑀡𑀁 𑀧𑀦 𑀅𑀦𑀼𑀮𑁄𑀫𑁂 𑀧𑀘𑁆𑀘𑀬𑀸𑀦𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀢𑀣𑀸𑀪𑀸𑀯𑀲𑀸𑀥𑀦𑀢𑁆𑀣𑀁. 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀬 𑀏𑀯 𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀦 𑀅𑀜𑁆𑀜𑀣𑀸, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄, 𑀢𑀲𑁆𑀲𑀸 𑀘 𑀲𑀗𑁆𑀔𑀸𑀭𑀸 𑀨𑀮𑀦𑁆𑀢𑀺 𑀤𑀻𑀧𑀦𑀢𑁄. 𑀢𑀣𑀸 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀅𑀦𑀼𑀮𑁄𑀫𑀫𑀦𑀲𑀺𑀓𑀭𑀡𑀁 𑀓𑀸𑀭𑀡𑀦𑀺𑀭𑁄𑀥𑀸 𑀨𑀮𑀦𑀺𑀭𑁄𑀥𑀲𑀸𑀥𑀦𑀢𑁆𑀣𑀁. 𑀏𑀢𑁆𑀣 𑀘 𑀅𑀦𑀼𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀺𑀢𑀁. 𑀦 𑀳𑀺 𑀢𑀁 𑀅𑀯𑀺𑀚𑁆𑀚𑀸𑀤𑀺𑀦𑀺𑀭𑁄𑀥𑀫𑀢𑁆𑀢𑀦𑁆𑀢𑀺. 𑀢𑀢𑁆𑀣 ‘‘𑀬𑀢𑁄 𑀔𑀬𑀁 𑀧𑀘𑁆𑀘𑀬𑀸𑀦𑀁 𑀅𑀯𑁂𑀤𑀻’’𑀢𑀺 𑀯𑀘𑀦𑁂𑀦 𑀅𑀦𑀼𑀮𑁄𑀫𑁄 𑀦𑀸𑀥𑀺𑀧𑁆𑀧𑁂𑀢𑁄𑀢𑀺 𑀲𑀺𑀤𑁆𑀥𑀁. 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀉𑀪𑀬𑀢𑁆𑀣𑀧𑀺 𑀓𑀺𑀘𑁆𑀘𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀯𑀺𑀲𑀬𑀢𑁄 𑀘 𑀢𑀢𑁆𑀣 𑀫𑀕𑁆𑀕𑁄 𑀤𑀲𑁆𑀲𑀺𑀢𑁄.
𑀢𑀢𑁆𑀣𑀸𑀳 𑁋 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀻’’𑀢𑀺 𑀦 𑀬𑀼𑀚𑁆𑀚𑀢𑀺, 𑀦 𑀳𑀺 𑀧𑀝𑀺𑀮𑁄𑀫𑀸𑀧𑀤𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀪𑀯𑀺𑀢𑀼𑀫𑀭𑀳𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦, 𑀢𑀤𑀢𑁆𑀣𑀚𑀸𑀦𑀦𑀢𑁄. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑁆𑀢𑀺 𑀳𑀺 𑀪𑀸𑀯𑀦𑀧𑀼𑀁𑀲𑀓𑀁. 𑀅𑀦𑀼𑀮𑁄𑀫𑀢𑁄, 𑀧𑀝𑀺𑀮𑁄𑀫𑀢𑁄 𑀘 𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀫𑀦𑀲𑀸𑀓𑀸𑀲𑀻𑀢𑀺 𑀳𑀺 𑀢𑀢𑁆𑀣 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀦𑀺𑀭𑁄𑀥𑀲𑁆𑀲 𑀧𑀝𑀺𑀮𑁄𑀫𑀧𑁆𑀧𑀲𑀗𑁆𑀕𑀸𑀧𑀢𑁆𑀢𑀺𑀬𑁂𑀯𑀸𑀧𑀚𑁆𑀚𑀢𑀺. 𑀧𑀝𑀺𑀮𑁄𑀫𑁂 𑀘 𑀧𑀦𑁂𑀢𑀲𑁆𑀫𑀺𑀁 𑀅𑀦𑀼𑀓𑁆𑀓𑀫𑀦𑀺𑀬𑀫𑁄 𑀅𑀦𑀼𑀮𑁄𑀫𑁂 𑀅𑀦𑀼𑀓𑁆𑀓𑀫𑀦𑀺𑀬𑀫𑀢𑁄 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀧𑀝𑀺𑀮𑁄𑀫𑁄 𑀦𑀸𑀫 𑀅𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻’’𑀢𑀺𑀆𑀤𑀺. 𑀏𑀯𑀁 𑀲𑀦𑁆𑀢𑁂 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑁄 𑀳𑁄𑀢𑀺. 𑀓𑀣𑀁? 𑀧𑀝𑀺𑀘𑁆𑀘𑀸𑀢𑀺 𑀳𑀺 𑀇𑀫𑀺𑀦𑀸 𑀨𑀮𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦, 𑀧𑀘𑁆𑀘𑀬𑀸𑀦𑀜𑁆𑀘 𑀧𑀘𑁆𑀘𑀬𑀸𑀬𑀢𑁆𑀢𑀼𑀧𑀕𑀫𑀦𑁂𑀦 𑀢𑀲𑁆𑀲 𑀉𑀧𑁆𑀧𑀸𑀤𑀸𑀪𑀺𑀫𑀼𑀔𑀪𑀸𑀯𑀤𑀻𑀧𑀦𑀢𑁄 𑀅𑀲𑀫𑀼𑀧𑁆𑀧𑀸𑀤𑁄 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀅𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀏𑀯𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀧𑀦𑀲𑁆𑀲 𑀧𑀝𑀺𑀮𑁄𑀫𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀓𑁂. 𑀢𑀁 𑀅𑀬𑀼𑀢𑁆𑀢𑀁 𑀢𑀲𑁆𑀲 𑀅𑀦𑀼𑀮𑁄𑀫𑀪𑀸𑀯𑀦𑀺𑀬𑀫𑀦𑀢𑁄, 𑀅𑀢𑁆𑀣𑀸𑀢𑀺𑀲𑀬𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀅𑀧𑁆𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀢𑀲𑁆𑀲 𑀧𑀝𑀺𑀮𑁄𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀪𑀕𑀯𑀢𑀸 𑀧𑀸𑀴𑀺𑀬𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑀺𑀭𑁄𑀥𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀳𑀺 ‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸’’𑀢𑀺 𑀏𑀯𑀁 𑀧𑀘𑁆𑀘𑀬𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀦𑀧𑀘𑁆𑀘𑀬𑀪𑀸𑀯𑀯𑀲𑁂𑀦 𑀧𑀘𑁆𑀘𑀬𑀦𑀺𑀭𑁄𑀥𑀁, 𑀨𑀮𑀲𑁆𑀲 𑀧𑀘𑁆𑀘𑀬𑀧𑀝𑀺𑀕𑁆𑀕𑀳𑀸𑀪𑀸𑀯𑀯𑀲𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑀺𑀭𑁄𑀥𑀜𑁆𑀘 𑀤𑀻𑀧𑁂𑀢𑀺. 𑀤𑀼𑀯𑀺𑀥𑁄 𑀧𑀸𑀴𑀺𑀬𑀁 𑀦𑀺𑀭𑁄𑀥𑁄 𑀅𑀢𑁆𑀣𑀢𑁄 𑀅𑀦𑀼𑀧𑁆𑀧𑀸𑀤𑁄 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀦𑀺𑀭𑁄𑀥𑀫𑀢𑁆𑀢𑀦𑁆𑀢𑀺 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀢𑀲𑁆𑀲𑀸𑀦𑀼𑀪𑀸𑀯𑀤𑀻𑀧𑀦𑀸𑀥𑀺𑀧𑁆𑀧𑀸𑀬𑀢𑁄. 𑀯𑀺𑀤𑀺𑀢𑀯𑁂𑀮𑀸𑀬𑀦𑁆𑀢𑀺 𑀫𑀦𑀲𑀺𑀓𑀢𑀯𑁂𑀮𑀸𑀬𑀦𑁆𑀢𑀺 𑀅𑀢𑁆𑀣𑁄, 𑀅𑀜𑁆𑀜𑀣𑀸 𑀢𑀢𑁄 𑀧𑀼𑀩𑁆𑀩𑁂 𑀅𑀯𑀺𑀤𑀺𑀢𑀧𑁆𑀧𑀲𑀗𑁆𑀕𑀢𑁄.
𑀛𑀸𑀬𑀢𑁄𑀢𑀺 𑀏𑀢𑁆𑀣 𑀓𑀸𑀫𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀛𑀸𑀬𑀢𑁄 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀘𑀢𑀼𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑀸 𑀯𑀸 𑀧𑀓𑀸𑀲𑀦𑁆𑀢𑀺, 𑀢𑀣𑀸𑀧𑀺 𑀧𑀼𑀩𑁆𑀩𑀪𑀸𑀕𑁂 𑀲𑀫𑀣𑀸𑀤𑀺𑀬𑀸𑀦𑀺𑀓𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀕𑁆𑀕𑀳𑀡𑀁. 𑀘𑀢𑀼𑀲𑀘𑁆𑀘𑀥𑀫𑁆𑀫𑀕𑁆𑀕𑀳𑀡𑀁 𑀓𑀸𑀫𑀁 𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑀲𑁆𑀲𑀦𑀸𑀥𑀺𑀓𑀸𑀭𑁂𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸𑀧𑀺 ‘‘𑀬𑁄 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀲𑀫𑀼𑀤𑀬𑀁 𑀧𑀚𑀳𑀢𑀻’’𑀢𑀺 𑀮𑀤𑁆𑀥𑀺𑀯𑀲𑁂𑀦 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑁨. ‘‘𑀧𑀘𑁆𑀘𑀬𑀓𑁆𑀔𑀬𑀲𑁆𑀲𑀸’’𑀢𑀺 𑀓𑀺𑀘𑁆𑀘𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦 𑀧𑀘𑁆𑀘𑀬𑀦𑀺𑀩𑁆𑀩𑀸𑀦𑀁, 𑀢𑀤𑀼𑀧𑀦𑀺𑀲𑁆𑀲𑀬𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀤𑀼𑀯𑀺𑀥𑀁 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺. 𑀓𑀸𑀫𑀜𑁆𑀘 𑀢𑀁 𑀦 𑀓𑁂𑀯𑀮𑀁 𑀧𑀘𑁆𑀘𑀬𑀓𑁆𑀔𑀬𑀫𑀢𑁆𑀢𑀁 𑀓𑀭𑁄𑀢𑀺, 𑀅𑀣 𑀔𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀓𑁆𑀔𑀬𑀫𑁆𑀧𑀺 𑀓𑀭𑁄𑀢𑀺. 𑀬𑀢𑁄 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀭𑁄𑀥𑁄 𑀤𑀲𑁆𑀲𑀺𑀢𑁄, 𑀢𑀣𑀸𑀧𑀺 𑀳𑁂𑀢𑀼𑀦𑀺𑀭𑁄𑀥𑀸 𑀨𑀮𑀦𑀺𑀭𑁄𑀥𑁄𑀢𑀺 𑀓𑀢𑁆𑀯𑀸 ‘‘𑀧𑀘𑁆𑀘𑀬𑀓𑁆𑀔𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀘𑀢𑀼𑀲𑀘𑁆𑀘𑀕𑁆𑀕𑀳𑀡𑀁 𑀧𑀞𑀫𑀕𑀸𑀣𑀸𑀬𑀁 𑀯𑀼𑀢𑁆𑀢𑀦𑀬𑀯𑀺𑀧𑀮𑁆𑀮𑀸𑀲𑁂𑀦 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑁩. 𑀲𑀫𑀼𑀤𑀬𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀅𑀢𑁆𑀣𑁄𑀢𑀺 𑀏𑀢𑁆𑀣 𑀲𑀫𑀼𑀤𑀬𑁄 𑀓𑀺𑀘𑁆𑀘𑀯𑀲𑁂𑀦, 𑀦𑀺𑀭𑁄𑀥𑁄 𑀆𑀭𑀫𑁆𑀫𑀡𑀓𑀺𑀭𑀺𑀬𑀸𑀬. 𑀏𑀢𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸 𑀦𑀺𑀭𑁄𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀢𑀲𑁆𑀲 𑀅𑀦𑀼𑀪𑀸𑀯𑀲𑁆𑀲 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀮𑁆𑀮𑀗𑁆𑀓𑀸𑀪𑀼𑀚𑀺𑀢𑀝𑁆𑀞𑀸𑀦𑀜𑁆𑀘 ‘‘𑀧𑀮𑁆𑀮𑀗𑁆𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀨𑀮𑀸𑀥𑀺𑀕𑀫𑀝𑁆𑀞𑀸𑀦𑀁 ‘‘𑀧𑀮𑁆𑀮𑀗𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁.
𑀅𑀚𑀧𑀸𑀮𑀓𑀣𑀸𑀯𑀡𑁆𑀡𑀦𑀸
𑁪. 𑀲𑀫𑁆𑀫𑁄𑀤𑀻𑀢𑀺 𑀳𑀺𑀢𑀓𑀸𑀫𑀢𑀸𑀬 𑀪𑀕𑀯𑀸 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀯𑁂𑀤𑁂𑀳𑀺 𑀅𑀦𑁆𑀢𑀦𑁆𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑀁 𑀅𑀦𑁆𑀢𑁄 𑀦𑀸𑀫. 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀁 𑀕𑀢𑀢𑁆𑀢𑀸𑀢𑀺 𑀏𑀢𑁆𑀣 𑀅𑀭𑀳𑀢𑁆𑀢𑀁. 𑀢𑀢𑁆𑀣 𑀧𑀞𑀫𑁂𑀦 𑀯𑁂𑀤𑀦𑁆𑀢𑀕𑀽 𑀬𑀲𑁆𑀫𑀸, 𑀢𑀲𑁆𑀫𑀸 𑀏𑀯 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄. 𑀤𑀼𑀢𑀺𑀬𑁂𑀦 𑀯𑁂𑀤𑀦𑁆𑀢𑀕𑀽 𑀬𑀲𑁆𑀫𑀸, 𑀢𑀲𑁆𑀫𑀸 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄𑀢𑀺 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀓𑀺𑀜𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑀼𑀲𑀘𑁆𑀘𑀬𑀼𑀢𑁆𑀢𑀁 𑀅𑀢𑁆𑀣𑀢𑁄 𑀯𑀼𑀢𑁆𑀢𑀁, 𑀉𑀤𑀸𑀦𑀕𑀸𑀣𑀸𑀬𑀁 𑀯𑀼𑀢𑁆𑀢𑀧𑀝𑀺𑀯𑁂𑀥𑀸𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀧𑀭𑀺𑀳𑀸𑀭𑁄.
𑀅𑀚𑀧𑀸𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀫𑀼𑀘𑀮𑀺𑀦𑁆𑀤𑀓𑀣𑀸𑀯𑀡𑁆𑀡𑀦𑀸
𑁫. 𑀫𑀼𑀘𑀮𑀺𑀦𑁆𑀤𑀯𑀢𑁆𑀣𑀼𑀫𑁆𑀳𑀺 𑀏𑀢𑀫𑀢𑁆𑀣𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀁 𑀯𑀺𑀯𑁂𑀓𑀦𑁆𑀢𑀺 𑀉𑀧𑀥𑀺𑀯𑀺𑀯𑁂𑀓𑀁. ‘‘𑀅𑀩𑁆𑀬𑀸𑀧𑀚𑁆𑀚𑀁 𑀲𑀼𑀔𑀁 𑀮𑁄𑀓𑁂’’𑀢𑀺 𑀇𑀫𑀺𑀦𑀸 𑀧𑀞𑀫𑀫𑀕𑁆𑀕𑀁 𑀤𑀲𑁆𑀲𑁂𑀢𑀺 𑀢𑁂𑀦 𑀲𑀢𑁆𑀢𑁂𑀲𑀼 𑀫𑀸𑀭𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀩𑁆𑀬𑀸𑀧𑀸𑀤𑀧𑁆𑀧𑀳𑀸𑀦𑀲𑀺𑀤𑁆𑀥𑀺𑀢𑁄. ‘‘𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄’’𑀢𑀺 𑀇𑀫𑀺𑀦𑀸 𑀤𑀼𑀢𑀺𑀬𑀫𑀕𑁆𑀕𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑀻 𑀳𑀺 𑀧𑀼𑀕𑁆𑀕𑀮𑁄 𑀅𑀯𑀲𑀺𑀝𑁆𑀞𑀩𑁆𑀬𑀸𑀧𑀸𑀤𑀢𑀦𑀼𑀢𑁆𑀢𑀯𑀲𑁂𑀦 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀢𑁄 𑀳𑁄𑀢𑀺 𑀯𑀺𑀳𑀺𑀁𑀲𑀸𑀥𑀺𑀧𑁆𑀧𑀸𑀬𑀸𑀪𑀸𑀯𑀢𑁄. 𑀏𑀯𑀁 𑀘𑀢𑁆𑀢𑀸𑀭𑁄 𑀳𑀺 𑀫𑀕𑁆𑀕𑀸 𑀅𑀦𑀼𑀓𑁆𑀓𑀫𑁂𑀦𑀸𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀺.
𑀫𑀼𑀘𑀮𑀺𑀦𑁆𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀭𑀸𑀚𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸
𑁬. 𑀭𑀸𑀚𑀸𑀬𑀢𑀦𑀁 𑀧𑀸𑀢𑀮𑀺. ‘‘𑀘𑀢𑀼𑀤𑁆𑀤𑀺𑀲𑀸 𑀆𑀕𑀦𑁆𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀫𑀼𑀔𑀯𑀝𑁆𑀝𑀺𑀬𑀁 𑀓𑀺𑀭𑀲𑁆𑀲 𑀤𑀺𑀦𑁆𑀦𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀮𑁂𑀔𑀸𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀢𑁂 𑀯𑀸𑀡𑀺𑀚𑀸 𑀤𑁂𑀯𑀢𑀸𑀬 𑀕𑀸𑀭𑀯𑀤𑀲𑁆𑀲𑀦𑁂𑀦 𑀪𑀕𑀯𑀢𑁄 𑀭𑀽𑀧𑀓𑀸𑀬𑀤𑀲𑁆𑀲𑀦𑁂𑀦 𑀧𑀲𑀦𑁆𑀦𑀢𑁆𑀢𑀸 𑀲𑀭𑀡𑀁 𑀅𑀕𑁆𑀕𑀳𑁂𑀲𑀼𑀁. 𑀤𑁂𑀯𑀢𑀸𑀬 ‘‘𑀪𑀕𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀸𑀯𑀓𑀲𑀗𑁆𑀖𑀸𑀪𑀸𑀯𑀁, 𑀅𑀪𑀺𑀲𑀫𑁆𑀩𑀼𑀤𑁆𑀥𑀥𑀫𑁆𑀫𑀲𑀩𑁆𑀪𑀸𑀯𑀜𑁆𑀘 𑀚𑀸𑀦𑀺𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀦𑀦𑁆𑀢𑀻𑀢𑀺 𑀩𑀼𑀤𑁆𑀥𑀸𑀢𑀺 𑀲𑀫𑁆𑀩𑀦𑁆𑀥𑁄.
𑀭𑀸𑀚𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸
𑁭. 𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀦𑁆𑀢𑀺𑀆𑀤𑀺𑀫𑁆𑀳𑀺 𑀥𑀫𑁆𑀫𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁄, 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑁄. 𑀤𑀼𑀤𑁆𑀤𑀲𑀢𑁆𑀢𑀸 𑀤𑀼𑀭𑀦𑀼𑀩𑁄𑀥𑁄. 𑀲𑀦𑁆𑀢𑁄𑀢𑀺 𑀦𑀺𑀩𑁆𑀩𑀼𑀢𑁄. 𑀧𑀡𑀻𑀢𑁄𑀢𑀺 𑀅𑀢𑀧𑁆𑀧𑀓𑁄. 𑀇𑀤𑀁 𑀤𑁆𑀯𑀬𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑀓𑁆𑀓𑀸𑀯𑀘𑀭𑁄𑀢𑀺 𑀢𑀓𑁆𑀓𑁂𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀑𑀕𑀸𑀳𑀺𑀢𑀩𑁆𑀩𑁄 𑀦 𑀳𑁄𑀢𑀺, 𑀜𑀸𑀡𑁂𑀦𑁂𑀯 𑀅𑀯𑀘𑀭𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀯𑁂𑀤𑀦𑀻𑀬𑁄. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀩𑁆𑀩𑀸𑀦𑀫𑁂𑀯. 𑀢𑀜𑁆𑀳𑀺 𑀨𑀮𑀽𑀧𑀘𑀸𑀭𑁂𑀦 𑀏𑀓𑀫𑁆𑀧𑀺 𑀲𑀫𑀸𑀦𑀁 𑀢𑀣𑀸 𑀢𑀣𑀸 𑀯𑀼𑀘𑁆𑀘𑀢𑀺. 𑀭𑀸𑀫𑀸𑀢𑀺 𑀧𑀚𑀸. 𑀅𑀦𑀼 𑀅𑀦𑀼 𑀅𑀘𑁆𑀙𑀭𑀺𑀬𑀸 𑀅𑀦𑀘𑁆𑀙𑀭𑀺𑀬𑀸. 𑀢𑁂𑀲𑀁 𑀪𑀕𑀯𑀢𑁄 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀲𑀼𑀢𑀧𑀼𑀩𑁆𑀩𑀸𑀦𑀁, 𑀥𑀫𑁆𑀫𑀲𑁆𑀲 𑀯𑀸 𑀕𑀫𑁆𑀪𑀻𑀭𑀪𑀸𑀯𑀁 𑀅𑀥𑀺𑀕𑀢𑀧𑀼𑀩𑁆𑀩𑀸𑀦𑀁. 𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑁄 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀲𑀼𑀔𑀧𑁆𑀧𑀝𑀺𑀧𑀤𑀸, 𑀢𑀣𑀸𑀧𑀺 𑀩𑁄𑀥𑀺𑀲𑀢𑁆𑀢𑀧𑀝𑀺𑀧𑀤𑀁 𑀲𑀦𑁆𑀥𑀸𑀬 ‘‘𑀓𑀺𑀘𑁆𑀙𑁂𑀦 𑀫𑁂’’𑀢𑀺 𑀯𑀼𑀢𑁆𑀢𑀁. ‘‘𑀧𑀓𑀸𑀲𑀺𑀢𑀁 𑀧𑀓𑀸𑀲𑀺𑀢𑀼’’𑀦𑁆𑀢𑀺 𑀉𑀪𑀬𑀣𑀸𑀧𑀺 𑀧𑀸𑀞𑁄. 𑀧𑀭𑁂𑀢𑁂𑀳𑀺 𑀬𑀼𑀢𑁆𑀢𑁂𑀳𑀺. 𑀭𑀸𑀕𑀭𑀢𑁆𑀢𑀸𑀢𑀺 𑀓𑀸𑀫𑀭𑀸𑀕𑀤𑀺𑀝𑁆𑀞𑀺𑀭𑀸𑀕𑁂𑀳𑀺 𑀭𑀢𑁆𑀢𑀸. 𑀅𑀢𑁆𑀢𑀦𑀺𑀘𑁆𑀘𑀸𑀤𑀺𑀕𑀸𑀳𑀓𑀸 𑀦 𑀤𑀓𑁆𑀔𑀦𑁆𑀢𑀺 𑀦 𑀧𑀲𑁆𑀲𑀺𑀲𑁆𑀲𑀦𑁆𑀢𑀺.
𑁮. 𑀲𑀳𑀁𑀧𑀢𑀺 𑀓𑀺𑀭 ‘‘𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄’’𑀢𑀺 𑀇𑀫𑀁 𑀲𑀤𑁆𑀤𑀁 𑀢𑀣𑀸 𑀦𑀺𑀘𑁆𑀙𑀸𑀭𑁂𑀢𑀺, 𑀬𑀣𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀩𑁆𑀭𑀳𑁆𑀫𑀸𑀦𑁄 𑀲𑀼𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀲𑀦𑁆𑀢𑀸𑀦𑀸𑀦𑀼𑀲𑀬𑀺𑀢𑀯𑀲𑁂𑀦 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀭𑀸𑀕𑀸𑀤𑀺𑀭𑀚𑀁 𑀏𑀢𑁂𑀲𑀁, 𑀏𑀯𑀁𑀲𑀪𑀸𑀯𑀸𑀢𑀺 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸. 𑀅𑀲𑁆𑀲𑀯𑀦𑀢𑀸𑀢𑀺 𑀅𑀲𑁆𑀲𑀯𑀦𑀢𑀸𑀬.
𑀲𑀫𑀮𑁂𑀳𑀺 𑀲𑀢𑁆𑀣𑀸𑀭𑁂𑀳𑀺. 𑀅𑀧𑀸𑀧𑀼𑀭𑁂𑀢𑀦𑁆𑀢𑀺 𑀯𑀺𑀯𑀭 𑀏𑀢𑀁. 𑀅𑀫𑀢𑀲𑁆𑀲 𑀤𑁆𑀯𑀸𑀭𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸. 𑀯𑀺𑀚𑁆𑀚𑀢𑁆𑀢𑀬𑀘𑀢𑀼𑀫𑀕𑁆𑀕𑀜𑀸𑀡𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁. 𑀲𑁂𑀮𑁂𑀢𑀺 𑀲𑀺𑀮𑀸𑀫𑀬𑁂. 𑀯𑀺𑀕𑀢𑀭𑀚𑀢𑁆𑀢𑀸 𑀲𑀼𑀔𑀤𑀲𑁆𑀲𑀦𑀬𑁄𑀕𑁆𑀕𑁂 𑀇𑀢𑁄 𑀘 𑀏𑀢𑁆𑀢𑁄 𑀘 𑀆𑀕𑀦𑁆𑀢𑁆𑀯𑀸 𑀬𑀣𑀸 𑀞𑀺𑀢𑁄 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀫𑀦𑁆𑀢𑀢𑁄 𑀚𑀦𑀢𑀁 𑀧𑀲𑁆𑀲𑁂𑀬𑁆𑀬. 𑀢𑁆𑀯𑀫𑁆𑀧𑀺 𑀲𑀼𑀫𑁂𑀥 𑀲𑀼𑀦𑁆𑀤𑀭𑀧𑀜𑁆𑀜 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑀸𑀬 𑀲𑀫𑀦𑁆𑀢𑀘𑀓𑁆𑀔𑀼. 𑀲𑀩𑁆𑀩𑀓𑀺𑀮𑁂𑀲𑀲𑀗𑁆𑀕𑀸𑀫𑀸𑀦𑀁 𑀯𑀺𑀚𑀺𑀢𑀢𑁆𑀢𑀸 𑀯𑀺𑀚𑀺𑀢𑀲𑀗𑁆𑀕𑀸𑀫. 𑀚𑀸𑀢𑀺𑀓𑀦𑁆𑀢𑀸𑀭𑀸𑀤𑀺𑀦𑀺𑀢𑁆𑀣𑀭𑀡𑀢𑁆𑀣𑀁 𑀯𑁂𑀦𑁂𑀬𑁆𑀬𑀚𑀦𑀲𑀢𑁆𑀣𑀯𑀸𑀳𑀦𑀲𑀫𑀢𑁆𑀣𑀢𑀸𑀬 𑀲𑀢𑁆𑀣𑀯𑀸𑀳. 𑀓𑀸𑀫𑀘𑁆𑀙𑀦𑁆𑀤𑀇𑀡𑀲𑁆𑀲 𑀅𑀪𑀸𑀯𑀢𑁄 𑀅𑀡𑀡.
𑁯. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦 𑀘 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀘. 𑀇𑀫𑁂𑀲𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 ‘‘𑀩𑀼𑀤𑁆𑀥𑀘𑀓𑁆𑀔𑀽’’𑀢𑀺 𑀦𑀸𑀫𑀁. 𑀉𑀧𑁆𑀧𑀮𑀺𑀦𑀺𑀬𑀦𑁆𑀢𑀺 𑀉𑀧𑁆𑀧𑀮𑀯𑀦𑁂. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀻𑀢𑀺 𑀬𑀸𑀦𑀺 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀸𑀦𑁂𑀯 𑀧𑁄𑀲𑀺𑀬𑀦𑁆𑀢𑀺, 𑀢𑀢𑁆𑀣 𑀬𑀸𑀦𑀺 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑀽𑀭𑀺𑀬𑀭𑀁𑀲𑀺𑀲𑀫𑁆𑀨𑀲𑁆𑀲𑀁 𑀆𑀕𑀫𑀬𑀫𑀸𑀦𑀸𑀦𑀺 𑀞𑀺𑀢𑀸𑀦𑀺 𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺, 𑀢𑀸𑀦𑀺 𑀢𑀢𑀺𑀬𑀤𑀺𑀯𑀲𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀉𑀤𑀓𑀸 𑀧𑀦 𑀅𑀦𑀼𑀕𑁆𑀕𑀢𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀲𑀭𑁄𑀕𑀉𑀧𑁆𑀧𑀮𑀸𑀤𑀻𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀬𑀸𑀦𑀺 𑀦𑁂𑀯 𑀧𑀼𑀧𑁆𑀨𑀺𑀲𑁆𑀲𑀦𑁆𑀢𑀺 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸𑀦𑁂𑀯 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀸𑀦𑀺 𑀧𑀸𑀴𑀺𑀦𑀸𑀭𑀼𑀴𑁆𑀳𑀸𑀦𑀺, 𑀆𑀳𑀭𑀺𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑀸𑀦𑀺. 𑀏𑀢𑁂𑀳𑀺 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄 𑀧𑀤𑀧𑀭𑀫𑁄𑀢𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀘𑁆𑀘𑀪𑀸𑀲𑀻𑀢𑀺 𑀧𑀢𑀺 𑀅𑀪𑀸𑀲𑀺.
𑀅𑀧𑀸𑀭𑀼𑀢𑀸𑀢𑀺 𑀯𑀺𑀯𑀝𑀸. 𑀧𑀘𑁆𑀙𑀺𑀫𑀲𑁆𑀲 𑀧𑀤𑀤𑁆𑀯𑀬𑀲𑁆𑀲 𑀅𑀬𑀫𑀢𑁆𑀣𑁄. 𑀅𑀳𑀜𑁆𑀳𑀺 𑀅𑀢𑁆𑀢𑀦𑁄 𑀧𑀕𑀼𑀡𑀁 𑀲𑀼𑀧𑁆𑀧𑀯𑀢𑁆𑀢𑀫𑁆𑀧𑀺 𑀇𑀫𑀁 𑀧𑀡𑀻𑀢𑀁 𑀉𑀢𑁆𑀢𑀫𑀁 𑀥𑀫𑁆𑀫𑀁 𑀓𑀸𑀬𑀯𑀸𑀘𑀸𑀓𑀺𑀮𑀫𑀣𑀲𑀜𑁆𑀜𑀻 𑀳𑀼𑀢𑁆𑀯𑀸 𑀦𑀸𑀪𑀸𑀲𑀺.
𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀧𑀜𑁆𑀘𑀯𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸
𑁧𑁦. 𑀇𑀤𑀸𑀦𑀺 𑀧𑀦 𑀲𑀩𑁆𑀩𑁄 𑀚𑀦𑁄 𑀲𑀤𑁆𑀥𑀸𑀪𑀸𑀚𑀦𑀁 𑀉𑀧𑀦𑁂𑀢𑀼, 𑀧𑀽𑀭𑁂𑀲𑁆𑀲𑀸𑀫𑀺 𑀦𑁂𑀲𑀁 𑀲𑀗𑁆𑀓𑀧𑁆𑀧𑀦𑁆𑀢𑀺. 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑁄𑀢𑀺 𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀢𑁆𑀢𑀸 𑀦𑀺𑀓𑁆𑀓𑀺𑀮𑁂𑀲𑀚𑀸𑀢𑀺𑀓𑁄. 𑀆𑀚𑀸𑀦𑀺𑀲𑁆𑀲𑀢𑀻𑀢𑀺 𑀘𑁂 𑀦 𑀦𑀺𑀝𑁆𑀞𑀸𑀦𑀫𑀓𑀁𑀲𑀼 𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀢𑁂 𑀯𑀺𑀦𑀬𑀓𑁆𑀓𑀫𑀜𑁆𑀜𑀸, 𑀅𑀳𑀁 𑀤𑁂𑀲𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, ‘‘𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁨) 𑀏𑀢𑁆𑀣 𑀯𑀺𑀬 𑀅𑀪𑀽𑀢𑀧𑀭𑀺𑀓𑀧𑁆𑀧𑁄 𑀓𑀺𑀭𑁂𑀲𑁄. 𑀮𑁄𑀓𑁂 𑀢𑀲𑁆𑀲 𑀅𑀥𑀺𑀫𑀼𑀢𑁆𑀢𑀪𑀸𑀯𑀤𑀻𑀧𑀦𑀢𑁆𑀣𑀜𑁆𑀳𑀺 𑀇𑀤𑀁 𑀯𑀘𑀦𑀁 𑀅𑀢𑁆𑀢𑀦𑁄 𑀢𑀤𑀼𑀧𑀤𑁂𑀲𑁂𑀦 𑀅𑀯𑀺𑀤𑀺𑀢𑀪𑀸𑀯𑀤𑀻𑀧𑀦𑀢𑁆𑀣𑀁. 𑀢𑀲𑁆𑀲 𑀅𑀦𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀧𑀦𑁂𑀢𑁆𑀣 𑀧𑀬𑁄𑀚𑀦𑀸𑀦𑀺. 𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀢𑀲𑁆𑀲 𑀫𑀭𑀡𑀸𑀭𑀫𑁆𑀫𑀡𑀁 𑀉𑀧𑁆𑀧𑀚𑁆𑀚𑀺. 𑀢𑁂𑀦 𑀢𑀢𑁄 𑀧𑀼𑀩𑁆𑀩𑁂 𑀢𑀲𑁆𑀲 𑀲𑀢𑀺 𑀥𑀫𑁆𑀫𑀤𑁂𑀲𑀦𑀸𑀬 𑀔𑀺𑀧𑁆𑀧𑀁 𑀚𑀸𑀦𑀦𑀪𑀸𑀯𑀸𑀭𑀫𑁆𑀫𑀡𑀦𑁆𑀢𑀺 𑀤𑀻𑀧𑁂𑀢𑀺. 𑀧𑀭𑁄𑀧𑀤𑁂𑀲𑀢𑁄 𑀅𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀫𑀭𑀡𑀲𑀘𑁆𑀙𑀺𑀓𑀺𑀭𑀺𑀬𑀫𑁆𑀧𑀺 𑀤𑀲𑁆𑀲𑁂𑀢𑀺. 𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀦𑁂𑀓𑀜𑀸𑀡𑀲𑀫𑁄𑀥𑀸𑀦𑀸𑀪𑀸𑀯𑀢𑁄 𑀲𑀼𑀯𑀼𑀢𑁆𑀢𑀫𑁂𑀢𑀁. 𑀘𑀺𑀢𑁆𑀢𑀧𑀼𑀩𑁆𑀩𑀺𑀓𑀸 𑀳𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺, 𑀅𑀜𑁆𑀜𑀣𑀸 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀧𑁆𑀧𑀲𑀗𑁆𑀕𑁄. 𑀲𑀩𑁆𑀩𑀥𑀫𑁆𑀫𑀸𑀦𑀁 𑀏𑀓𑀢𑁄 𑀕𑀳𑀡𑁂 𑀯𑀺𑀭𑀼𑀤𑁆𑀥𑀓𑀸𑀮𑀸𑀦𑀁 𑀏𑀓𑀢𑁄 𑀚𑀸𑀦𑀦𑀧𑁆𑀧𑀲𑀗𑁆𑀕𑁄. 𑀢𑀢𑁄 𑀏𑀓𑀜𑀸𑀡𑀲𑁆𑀲 𑀯𑀺𑀢𑀣𑀪𑀸𑀯𑀧𑁆𑀧𑀢𑁆𑀢𑀺𑀤𑁄𑀲𑁄, 𑀢𑀲𑁆𑀫𑀸 𑀲𑀩𑁆𑀩𑀲𑁆𑀲 𑀯𑀺𑀦𑀸𑀦𑁂𑀓𑀜𑀸𑀡𑀲𑀫𑁄𑀥𑀸𑀦𑀁 𑀆𑀧𑀚𑁆𑀚𑀺𑀢𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀯𑀦𑁆𑀢𑀢𑁆𑀢𑀸 𑀧𑀦 𑀲𑀩𑁆𑀩𑀜𑁆𑀜𑀽 𑀏𑀯 𑀪𑀕𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀦 𑀲𑀩𑁆𑀩𑀓𑀸𑀮𑀁 𑀏𑀓𑀢𑁄. 𑀆𑀴𑀸𑀭𑀸𑀤𑀻𑀦𑀁 𑀫𑀭𑀡𑀸𑀚𑀸𑀦𑀦𑀢𑁄𑀢𑀺 𑀘𑁂? 𑀦, 𑀢𑀲𑁆𑀲 𑀚𑀸𑀦𑀦𑁂𑀦 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀲𑀩𑁆𑀩𑀜𑁆𑀜𑀼𑀢𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄. 𑀬𑀤𑀸𑀪𑀸𑀯𑁂𑀦 𑀬𑀤𑀸𑀪𑀸𑀯𑁄 𑀢𑀩𑁆𑀪𑀸𑀯𑁂𑀦 𑀢𑀲𑁆𑀲𑀸𑀪𑀸𑀯𑀧𑁆𑀧𑀲𑀗𑁆𑀕𑁄 𑀮𑁄𑀓𑁂 𑀲𑀺𑀤𑁆𑀥𑁄𑀢𑀺. ‘‘𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀻’’𑀢𑀺 𑀯𑀘𑀦𑀢𑁄 𑀢𑀲𑁆𑀲 𑀫𑀭𑀡𑀚𑀸𑀦𑀦𑀁 𑀲𑀺𑀤𑁆𑀥𑀦𑁆𑀢𑀺 𑀓𑀢𑁆𑀯𑀸 𑀪𑀯𑀁 𑀫𑀢𑁂𑀦𑁂𑀯 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽𑀢𑀺 𑀲𑀺𑀤𑁆𑀥𑀁 𑀦 𑀤𑁂𑀯𑀢𑀸𑀭𑁄𑀘𑀦𑀢𑁄 𑀧𑀼𑀩𑁆𑀩𑁂 𑀅𑀚𑀸𑀦𑀦𑀢𑁄𑀢𑀺 𑀘𑁂? 𑀦, 𑀯𑀺𑀲𑁂𑀲𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸 𑀧𑀚𑀸𑀦𑀦𑀢𑁄, 𑀤𑁂𑀯𑀢𑀸𑀬 𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑁆𑀧𑀢𑁆𑀢𑀺𑀤𑁄𑀲𑀢𑁄 𑀘. 𑀦 𑀳𑀺 𑀲𑁄 𑀓𑀲𑁆𑀲𑀘𑀺 𑀯𑀘𑀦𑁂𑀦 𑀅𑀜𑁆𑀜𑀸𑀲𑀻𑀢𑀺.
𑀅𑀧𑀺𑀘 𑀓𑀺𑀫𑀺𑀤𑀁 𑀢𑀢𑁆𑀣 𑀚𑀸𑀦𑀦𑀁 𑀦𑀸𑀫 𑀢𑀤𑀸𑀭𑀫𑁆𑀫𑀡𑀜𑀸𑀡𑀼𑀧𑁆𑀧𑀢𑁆𑀢𑀻𑀢𑀺 𑀘𑁂? 𑀦, 𑀮𑁄𑀓𑁂 𑀲𑀩𑁆𑀩𑀜𑁆𑀜𑀼𑀦𑁄 𑀅𑀘𑁆𑀘𑀦𑁆𑀢𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀲𑀸𑀥𑀺𑀓𑀸 𑀳𑀺 𑀫𑀬𑀸 𑀏𑀓𑀜𑀸𑀡𑀓𑁆𑀔𑀡𑁂 𑀲𑀩𑁆𑀩𑀁 𑀜𑀸𑀡𑀁, 𑀢𑀤𑀜𑁆𑀜𑁂𑀲𑀜𑁆𑀘 𑀢𑀤𑀜𑁆𑀜𑀸𑀡𑀸𑀦𑀼𑀧𑁆𑀧𑀢𑁆𑀢𑀺. 𑀅𑀧𑀺𑀘 𑀲𑀩𑁆𑀩𑀜𑁆𑀜𑀼𑀦𑁄 𑀲𑀩𑁆𑀩𑀥𑀫𑁆𑀫𑀯𑀺𑀲𑀬𑁂 𑀜𑀸𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀲𑀺𑀤𑁆𑀥𑀺 𑀢𑀲𑁆𑀲 𑀜𑀸𑀡𑀲𑁆𑀲 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀯𑀺𑀲𑀬𑁄𑀢𑀺 𑀘𑁂? 𑀦, 𑀳𑁂𑀢𑀼𑀦𑀺𑀤𑀲𑁆𑀲𑀦𑀸𑀦𑀼𑀧𑁆𑀧𑀢𑁆𑀢𑀺𑀢𑁄. 𑀅𑀧𑀺𑀘 ‘‘𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀻’’𑀢𑀺 𑀏𑀢𑁆𑀣 𑀯𑀺𑀲𑁂𑀲𑀯𑀘𑀦𑀁 𑀅𑀢𑁆𑀣𑀺. 𑀬𑁂𑀦 𑀤𑁂𑀯𑀢𑀸𑀭𑁄𑀘𑀦𑀼𑀢𑁆𑀢𑀭𑀓𑀸𑀮𑀫𑁂𑀯 𑀪𑀕𑀯𑀢𑁄 𑀜𑀸𑀡𑀁 𑀉𑀤𑀧𑀸𑀤𑀻𑀢𑀺 𑀧𑀜𑁆𑀜𑀸𑀬𑀢𑀺. 𑀦 𑀳𑀺 𑀯𑀘𑀦𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑀫𑀢𑁆𑀢𑁂𑀦 𑀢𑀤𑀢𑁆𑀣𑀧𑀼𑀩𑁆𑀩𑀸𑀧𑀭𑀺𑀬𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀬𑀼𑀢𑁆𑀢𑀫𑁂𑀢𑀁. 𑀅𑀪𑀺𑀤𑁄𑀲𑀓𑀸𑀮𑀁𑀓𑀢𑁄𑀢𑀺 𑀧𑀞𑀫𑀬𑀸𑀫𑁂 𑀓𑀸𑀮𑀁𑀓𑀢𑁄. ‘‘𑀫𑀚𑁆𑀛𑀺𑀫𑀬𑀸𑀫𑁂’’𑀢𑀺𑀧𑀺 𑀯𑀤𑀦𑁆𑀢𑀺. 𑀉𑀪𑀬𑀢𑁆𑀣𑀧𑀺 𑀫𑀳𑀸𑀚𑀸𑀦𑀺𑀬𑁄. 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂, 𑀏𑀓𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀘 𑀧𑀢𑁆𑀢𑀩𑁆𑀩𑀫𑀕𑁆𑀕𑀨𑀮𑀢𑁄 𑀧𑀭𑀺𑀳𑀻𑀦𑀢𑁆𑀢𑀸 𑀫𑀳𑀢𑀻 𑀚𑀸𑀦𑀺 𑀅𑀲𑁆𑀲𑀸𑀢𑀺 𑀫𑀳𑀸𑀚𑀸𑀦𑀺. 𑀢𑁂𑀲𑀼 𑀳𑀺 𑀤𑁆𑀯𑀻𑀲𑀼 𑀆𑀴𑀸𑀭𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀪𑀯𑁂 𑀦𑀺𑀩𑁆𑀩𑀢𑁆𑀢𑁄, 𑀉𑀤𑀓𑁄 𑀪𑀯𑀕𑁆𑀕𑁂, 𑀢𑀲𑁆𑀫𑀸 𑀦𑁂𑀲𑀁 𑀥𑀫𑁆𑀫𑀤𑁂𑀲𑀦𑀸𑀬 𑀅𑀓𑁆𑀔𑀡𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀦 𑀇𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑀺𑀪𑀸𑀯𑀁 𑀲𑀦𑁆𑀥𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀢𑀜𑁆𑀘 𑀲𑀦𑁆𑀥𑀸𑀬𑀸𑀢𑀺 𑀦𑁄 𑀢𑀓𑁆𑀓𑁄, 𑀅𑀜𑁆𑀜𑀣𑀸 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀢𑀺 𑀆𑀘𑀭𑀺𑀬𑁄.
𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀸𑀢𑀓𑀸𑀮𑁂 𑀲𑀼𑀧𑀺𑀦𑀧𑀝𑀺𑀕𑁆𑀕𑀸𑀳𑀓𑀸 𑀘𑁂𑀯 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀸 𑀘 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀸. 𑀢𑁂𑀲𑀼 𑀢𑀬𑁄 𑀤𑁆𑀯𑀺𑀥𑀸 𑀩𑁆𑀬𑀸𑀓𑀭𑀺𑀁𑀲𑀼 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀺, 𑀧𑀩𑁆𑀩𑀚𑀦𑁆𑀢𑁄 𑀩𑀼𑀤𑁆𑀥𑁄’’𑀢𑀺. 𑀧𑀜𑁆𑀘 𑀩𑁆𑀭𑀸𑀳𑁆𑀫𑀡𑀸 ‘‘𑀅𑀕𑀸𑀭𑁂 𑀦 𑀢𑀺𑀝𑁆𑀞𑀢𑀺, 𑀩𑀼𑀤𑁆𑀥𑁄𑀯 𑀳𑁄𑀢𑀻’’𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀸𑀯 𑀅𑀳𑁂𑀲𑀼𑀁. 𑀢𑁂𑀲𑀼 𑀧𑀼𑀭𑀺𑀫𑀸 𑀢𑀬𑁄 𑀬𑀣𑀸𑀫𑀦𑁆𑀢𑀧𑀸𑀭𑀁 𑀕𑀢𑀸. 𑀇𑀫𑁂 𑀧𑀦 𑀫𑀦𑁆𑀢𑀧𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀼𑀜𑁆𑀜𑀫𑀳𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀼𑀭𑁂𑀢𑀭𑀫𑁂𑀯 𑀧𑀩𑁆𑀩𑀚𑀺𑀁𑀲𑀼. 𑀇𑀫𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀯𑀕𑁆𑀕𑀺𑀬𑀸’’𑀢𑀺. ‘‘𑀢𑁂𑀲𑀁 𑀧𑀼𑀢𑁆𑀢𑀸’’𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀸 ‘‘𑀩𑀳𑀽𑀧𑀓𑀸𑀭𑀸 𑀔𑁄 𑀫𑁂’’𑀢𑀺 𑀘𑀺𑀦𑁆𑀢𑁂𑀲𑀺. 𑀓𑀺𑀁 𑀉𑀧𑀓𑀸𑀭𑀓𑀸𑀦𑀁 𑀏𑀯 𑀏𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀇𑀢𑀭𑁂𑀲𑀁 𑀦 𑀤𑁂𑀲𑁂𑀢𑀻𑀢𑀺? 𑀦𑁄 𑀦 𑀤𑁂𑀲𑁂𑀢𑀺. 𑀉𑀧𑀓𑀸𑀭𑀸𑀦𑀼𑀲𑁆𑀲𑀭𑀡𑀫𑀢𑁆𑀢𑀓𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀦𑀬𑁄. 𑀅𑀢𑁆𑀢𑀦𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀺𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁, 𑀓𑀢𑀜𑁆𑀜𑀼𑀢𑀸𑀤𑀺𑀧𑀲𑀁𑀲𑀦𑀢𑁆𑀣𑀁, 𑀧𑀭𑁂𑀲𑀜𑁆𑀘 𑀓𑀢𑀜𑁆𑀜𑀼𑀪𑀸𑀯𑀸𑀤𑀺𑀦𑀺𑀬𑁄𑀚𑀦𑀢𑁆𑀣𑀁, 𑀔𑀺𑀧𑁆𑀧𑀚𑀸𑀦𑀦𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁.
𑁧𑁧. 𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺𑀦𑁆𑀢𑀺 𑀕𑀬𑀸𑀬 𑀘 𑀩𑁄𑀥𑀺𑀬𑀸 𑀘 𑀫𑀚𑁆𑀛𑁂 𑀢𑀺𑀕𑀸𑀯𑀼𑀢𑀦𑁆𑀢𑀭𑁂 𑀞𑀸𑀦𑁂. 𑀩𑁄𑀥𑀺𑀫𑀡𑁆𑀟𑀢𑁄 𑀳𑀺 𑀕𑀬𑀸 𑀢𑀻𑀡𑀺 𑀕𑀸𑀯𑀼𑀢𑀸𑀦𑀺. 𑀩𑀸𑀭𑀸𑀡𑀲𑀺𑀦𑀕𑀭𑀁 𑀅𑀝𑁆𑀞𑀸𑀭𑀲 𑀬𑁄𑀚𑀦𑀸𑀦𑀺. 𑀉𑀧𑀓𑁄 𑀧𑀦 𑀩𑁄𑀥𑀺𑀫𑀡𑁆𑀟𑀲𑁆𑀲 𑀘 𑀕𑀬𑀸𑀬 𑀘 𑀅𑀦𑁆𑀢𑀭𑁂 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀅𑀦𑁆𑀢𑀭𑀸-𑀲𑀤𑁆𑀤𑁂𑀦 𑀧𑀦 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀈𑀤𑀺𑀲𑁂𑀲𑀼 𑀘 𑀞𑀸𑀦𑁂𑀲𑀼 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀏𑀓𑀫𑁂𑀯 𑀅𑀦𑁆𑀢𑀭𑀸𑀲𑀤𑁆𑀤𑀁 𑀧𑀬𑀼𑀚𑁆𑀚𑀦𑁆𑀢𑀺, 𑀲𑁄 𑀤𑀼𑀢𑀺𑀬𑀧𑀤𑁂𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀅𑀬𑁄𑀚𑀺𑀬𑀫𑀸𑀦𑁂 𑀧𑀦 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀇𑀥 𑀧𑀦 𑀬𑁄𑀚𑁂𑀢𑁆𑀯𑀸𑀯 𑀯𑀼𑀢𑁆𑀢𑁄𑀢𑀺.
𑀲𑀩𑁆𑀩𑀸𑀪𑀺𑀪𑀽𑀢𑀺 𑀲𑀩𑁆𑀩𑀁 𑀢𑁂𑀪𑀽𑀫𑀓𑀥𑀫𑁆𑀫𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀢𑀡𑁆𑀳𑀓𑁆𑀔𑀬𑁂𑀢𑀺 𑀦𑀺𑀩𑁆𑀩𑀸𑀦𑁂. 𑀯𑀺𑀫𑀼𑀢𑁆𑀢𑁄𑀢𑀺 𑀆𑀭𑀫𑁆𑀫𑀡𑀢𑁄 𑀯𑀺𑀫𑀼𑀢𑁆𑀢𑁄. 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀫𑀬𑁆𑀳𑀁 𑀧𑀝𑀺𑀧𑀼𑀕𑁆𑀕𑀮𑁄 𑀦𑀸𑀫 𑀦𑀢𑁆𑀣𑀺, 𑀅𑀲𑀤𑀺𑀲𑁄𑀢𑀺 𑀅𑀢𑁆𑀣𑁄, 𑀫𑀫 𑀲𑀩𑁆𑀩𑀜𑁆𑀜𑀼𑀪𑀸𑀯𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀮𑁄𑀓𑁂 𑀞𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀫𑀫 𑀧𑀘𑁆𑀘𑀢𑁆𑀣𑀺𑀓𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀆𑀳𑀜𑁆𑀙𑀁 𑀅𑀫𑀢𑀤𑀼𑀦𑁆𑀤𑀼𑀪𑀺𑀦𑁆𑀢𑀺 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑀸𑀬 𑀅𑀫𑀢𑀪𑁂𑀭𑀺𑀁 𑀧𑀳𑀭𑀺𑀲𑁆𑀲𑀸𑀫𑀻𑀢𑀺 𑀕𑀘𑁆𑀙𑀸𑀫𑀺.
𑀅𑀭𑀳𑀲𑀺 𑀅𑀦𑀦𑁆𑀢𑀚𑀺𑀦𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄 𑀢𑁆𑀯𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑀺 𑀅𑀢𑁆𑀢𑀦𑁄 𑀲𑀢𑁆𑀣𑀼𑀦𑀸𑀫𑀁. 𑀳𑀼𑀧𑁂𑀬𑁆𑀬𑀸𑀲𑀻𑀢𑀺 𑀆𑀯𑀼𑀲𑁄 𑀏𑀯𑀫𑁆𑀧𑀺 𑀦𑀸𑀫 𑀪𑀯𑁂𑀬𑁆𑀬. 𑀧𑀓𑁆𑀓𑀸𑀫𑀻𑀢𑀺 𑀯𑀗𑁆𑀓𑀳𑀸𑀭𑀚𑀦𑀧𑀤𑀁 𑀦𑀸𑀫 𑀅𑀕𑀫𑀸𑀲𑀺. 𑀪𑀕𑀯𑀸𑀧𑀺 ‘‘𑀢𑀢𑁆𑀣 𑀢𑀲𑁆𑀲 𑀫𑀺𑀕𑀮𑀼𑀤𑁆𑀤𑀓𑀲𑁆𑀲 𑀥𑀻𑀢𑀼𑀬𑀸 𑀘𑀸𑀧𑀸𑀬 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀅𑀦𑀸𑀕𑀸𑀫𑀻 𑀅𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀆𑀮𑀧𑀺. 𑀲𑁄 𑀘 𑀢𑀣𑁂𑀯𑀸𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀺𑀳𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.
𑁧𑁨. 𑀲𑀡𑁆𑀞𑀧𑁂𑀲𑀼𑀦𑁆𑀢𑀺 𑀓𑀢𑀺𑀓𑀁 𑀅𑀓𑀁𑀲𑀼. 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄𑀢𑀺 𑀧𑀥𑀸𑀦𑀢𑁄 𑀪𑀝𑁆𑀞𑁄 𑀧𑀭𑀺𑀳𑀻𑀦𑁄. ‘‘𑀅𑀪𑀺𑀚𑀸𑀦𑀸𑀣 𑀦𑀼 𑀪𑀸𑀲𑀺𑀢𑀫𑁂𑀢’’𑀦𑁆𑀢𑀺, ‘‘𑀯𑀸𑀘𑀁 𑀪𑀸𑀲𑀺𑀢𑀫𑁂𑀯’’𑀦𑁆𑀢𑀺 𑀘 𑀏𑀯𑀭𑀽𑀧𑀁 𑀓𑀜𑁆𑀘𑀺 𑀯𑀘𑀦𑀪𑁂𑀤𑀁 𑀅𑀓𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀦𑁆𑀢𑀁 𑀲𑀼𑀲𑁆𑀲𑀽𑀲𑀺𑀁𑀲𑀽𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀲𑁄𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀅𑀜𑁆𑀜𑀸𑀢𑀺 𑀅𑀜𑁆𑀜𑀸𑀬, 𑀚𑀸𑀦𑀺𑀢𑀼𑀦𑁆𑀢𑀺 𑀅𑀢𑁆𑀣𑁄.
𑁧𑁩. 𑀅𑀣 𑀓𑀺𑀫𑀢𑁆𑀣𑀁 𑀆𑀫𑀦𑁆𑀢𑁂𑀲𑀻𑀢𑀺? 𑀢𑀢𑁄𑀧𑀺 𑀲𑀼𑀝𑁆𑀞𑀼𑀢𑀭𑀁 𑀧𑀝𑀺𑀚𑀸𑀦𑀦𑀢𑁆𑀣𑀁, 𑀥𑀫𑁆𑀫𑀲𑁆𑀲 𑀅𑀪𑀺𑀪𑀸𑀭𑀺𑀬𑀤𑀼𑀮𑁆𑀮𑀪𑀪𑀸𑀯𑀤𑀻𑀧𑀦𑀢𑁆𑀣𑀁, 𑀅𑀓𑁆𑀔𑀭𑀯𑀺𑀓𑁆𑀔𑁂𑀧𑀦𑀺𑀯𑀸𑀭𑀡𑀢𑁆𑀣𑀜𑁆𑀘. 𑀢𑀢𑁆𑀣 𑀤𑁆𑀯𑁂𑀫𑁂𑀢𑀺 𑀅𑀦𑁆𑀢𑀤𑁆𑀯𑀬𑀯𑀘𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀢𑀤𑀦𑁆𑀢𑁄𑀕𑀥𑀪𑀸𑀯𑀢𑁄. 𑀅𑀧𑀺𑀘 𑀬𑁄𑀚𑀦𑀸𑀯𑀲𑁂𑀦. 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀢𑀺 𑀳𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀲𑀻𑀲𑀪𑀽𑀢𑀸 𑀤𑁆𑀯𑁂 𑀓𑀺𑀮𑁂𑀲𑀸. 𑀢𑁂 𑀘 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸 𑀅𑀦𑁆𑀢𑀸 𑀦𑀸𑀫. 𑀢𑁂𑀲𑀼 𑀢𑀡𑁆𑀳𑀸𑀯𑀲𑁂𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁 𑀪𑀚𑀦𑁆𑀢𑁄 𑀲𑀫𑀣𑀁 𑀧𑀭𑀺𑀳𑀸𑀧𑁂𑀢𑀺 𑀩𑀸𑀮𑁄, 𑀢𑀣𑀸 𑀅𑀯𑀺𑀚𑁆𑀚𑀸𑀯𑀲𑁂𑀦 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀪𑀚𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀯𑀺𑀧𑀲𑁆𑀲𑀦𑀦𑁆𑀢𑀺 𑀦 𑀲𑀓𑁆𑀓𑀸 𑀉𑀪𑁄 𑀤𑁆𑀯𑁂 𑀅𑀦𑁆𑀢𑁂 𑀅𑀧𑁆𑀧𑀳𑀸𑀬 𑀅𑀫𑀢𑀁 𑀅𑀥𑀺𑀕𑀦𑁆𑀢𑀼𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸. 𑀅𑀧𑀺𑀘 𑀮𑀻𑀦𑀼𑀤𑁆𑀥𑀘𑁆𑀘𑀧𑀳𑀸𑀦𑀤𑀲𑁆𑀲𑀦𑀫𑁂𑀢𑀁. 𑀮𑀻𑀦𑁄 𑀳𑀺 𑀦𑀺𑀓𑁆𑀔𑀺𑀢𑁆𑀢𑀯𑀻𑀭𑀺𑀬𑀸𑀭𑀫𑁆𑀪𑁄 𑀓𑀸𑀫𑀲𑀼𑀔𑀜𑁆𑀘 𑀪𑀚𑀢𑀺, 𑀇𑀢𑀭𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑁄 𑀅𑀢𑁆𑀢𑀓𑀺𑀮𑀫𑀣𑀁. 𑀉𑀪𑁄𑀧𑀺 𑀢𑁂 𑀯𑀻𑀭𑀺𑀬𑀲𑀫𑀢𑀸𑀬 𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀦𑁆𑀢𑀸 𑀦𑀸𑀫. 𑀅𑀧𑀺𑀘 𑀢𑀺𑀲𑁆𑀲𑁄 𑀲𑀸𑀲𑀦𑁂 𑀧𑀝𑀺𑀧𑀤𑀸 𑀯𑀼𑀢𑁆𑀢𑀸 𑀆𑀕𑀸𑀴𑁆𑀳𑀸, 𑀦𑀺𑀚𑁆𑀛𑀸𑀫𑀸, 𑀫𑀚𑁆𑀛𑀺𑀫𑀸 𑀘. 𑀢𑀢𑁆𑀣 𑀆𑀕𑀸𑀴𑁆𑀳𑀸 ‘‘𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀏𑀯𑀫𑀸𑀤𑀺𑀓𑀸. 𑀦𑀺𑀚𑁆𑀛𑀸𑀫𑀸 ‘‘𑀅𑀘𑁂𑀮𑀓𑁄 𑀳𑁄𑀢𑀺, 𑀫𑀼𑀢𑁆𑀢𑀸𑀘𑀸𑀭𑁄’’𑀢𑀺 𑀏𑀯𑀫𑀸𑀤𑀺𑀓𑀸, 𑀫𑀚𑁆𑀛𑀺𑀫𑀸 ‘‘𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀏𑀯𑀫𑀸𑀤𑀺𑀓𑀸. 𑀢𑀢𑁆𑀣 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀆𑀕𑀸𑀴𑁆𑀳𑀸 𑀦𑀸𑀫 𑀧𑀝𑀺𑀧𑀤𑀸 𑀳𑁄𑀢𑀺 𑀲𑀩𑁆𑀩𑀸𑀓𑀼𑀲𑀮𑀫𑀽𑀮𑀢𑁆𑀢𑀸. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀦𑀺𑀚𑁆𑀛𑀸𑀫𑀸 𑀦𑀸𑀫 𑀅𑀢𑁆𑀢𑀚𑁆𑀛𑀸𑀧𑀦𑀢𑁄. 𑀉𑀪𑁄𑀧𑁂𑀢𑁂 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸 𑀅𑀦𑁆𑀢𑀸 𑀦𑀸𑀫, 𑀢𑀲𑁆𑀫𑀸 𑀇𑀫𑁂𑀯 𑀲𑀦𑁆𑀥𑀸𑀬 𑀤𑁆𑀯𑁂𑀫𑁂𑀢𑀺. 𑀓𑀺𑀫𑀢𑁆𑀣𑀁 𑀪𑀕𑀯𑀸 ‘‘𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺 𑀧𑀩𑁆𑀩𑀚𑀺𑀢𑁂 𑀏𑀯 𑀅𑀥𑀺𑀓𑀭𑁄𑀢𑀺, 𑀦 𑀕𑀳𑀝𑁆𑀞𑁂𑀢𑀺? 𑀧𑀩𑁆𑀩𑀚𑀺𑀢𑀸𑀦𑀁 𑀢𑀤𑀥𑀺𑀫𑀼𑀢𑁆𑀢𑀢𑁆𑀢𑀸, 𑀲𑀼𑀔𑀧𑀭𑀺𑀯𑀚𑁆𑀚𑀦𑀲𑀫𑀢𑁆𑀣𑀢𑀸𑀬, 𑀢𑀤𑀥𑀺𑀓𑀢𑀢𑁆𑀢𑀸 𑀘 𑀧𑀩𑁆𑀩𑀚𑀺𑀢𑀸 𑀏𑀢𑁆𑀣 𑀅𑀥𑀺𑀓𑀢𑀸, 𑀦 𑀕𑀳𑀝𑁆𑀞𑀸. 𑀬𑀤𑀺 𑀏𑀯𑀁 𑀓𑀺𑀫𑀢𑁆𑀣𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀸𑀳, 𑀦𑀦𑀼 𑀢𑁂 𑀧𑀓𑀢𑀺𑀬𑀸𑀧𑀺 𑀓𑀸𑀫𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀢𑀁 𑀦𑀺𑀲𑁆𑀲𑀭𑀡𑀢𑁆𑀣𑀁 𑀧𑀩𑁆𑀩𑀚𑀺𑀢𑀸𑀢𑀺? 𑀦, 𑀢𑁂𑀲𑀁 𑀅𑀦𑁆𑀢𑀤𑁆𑀯𑀬𑀦𑀺𑀲𑁆𑀲𑀺𑀢𑀢𑁆𑀢𑀸. 𑀢𑁂 𑀳𑀺 𑀇𑀥 𑀮𑁄𑀓𑁂 𑀓𑀸𑀫𑁂𑀦 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀦𑁆𑀢𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀢𑀲𑁆𑀲𑁂𑀯 𑀢𑀧𑀲𑁆𑀲 𑀨𑀮𑁂𑀦 𑀧𑁂𑀘𑁆𑀘 𑀤𑀺𑀩𑁆𑀩𑁂 𑀓𑀸𑀫𑁂 𑀆𑀲𑀻𑀲𑀫𑀸𑀦𑀸 𑀤𑀴𑁆𑀳𑀢𑀭𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑁆𑀢𑀢𑁆𑀣𑁄 𑀧𑀦 𑀇𑀥 𑀓𑀼𑀘𑁆𑀙𑀺𑀢𑀝𑁆𑀞𑁂𑀦 𑀯𑁂𑀤𑀺𑀢𑀩𑁆𑀩𑁄 ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦𑀁, 𑀬𑀤𑀺𑀤𑀁 𑀧𑀺𑀡𑁆𑀟𑁄𑀮𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀇𑀢𑀺𑀯𑀼. 𑁯𑁧; 𑀲𑀁. 𑀦𑀺. 𑁩.𑁮𑁦) 𑀯𑀺𑀬.
𑀬𑁄 𑀘𑀸𑀬𑀁 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄𑀢𑀺 𑀏𑀢𑁆𑀣 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁄 𑀅𑀥𑀺𑀧𑁆𑀧𑁂𑀢𑁄, 𑀤𑀼𑀢𑀺𑀬𑁄 𑀓𑀺𑀮𑁂𑀲𑀓𑀸𑀫𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀼𑀔𑀫𑁂𑀢𑁆𑀣 𑀓𑀸𑀫𑀲𑀼𑀔𑀁 𑀦𑀸𑀫. 𑀢𑁂𑀦 𑀯𑀺𑀧𑀸𑀓𑀲𑀼𑀔𑀲𑁆𑀲 𑀦𑀺𑀭𑀯𑀚𑁆𑀚𑀪𑀸𑀯𑀁 𑀤𑀻𑀧𑁂𑀢𑀻𑀢𑀺. 𑀅𑀮𑁆𑀮𑀻𑀬𑀦𑀁 𑀦𑀸𑀫 𑀢𑀤𑀪𑀺𑀦𑀦𑁆𑀤𑀦𑀸. 𑀅𑀦𑀼𑀬𑁄𑀕𑁄 𑀦𑀸𑀫 𑀪𑀯𑀦𑁆𑀢𑀭𑁂 𑀢𑀤𑀦𑀼𑀬𑁄𑀕𑀧𑀢𑁆𑀣𑀦𑀸. 𑀳𑀸𑀦𑀪𑀸𑀕𑀺𑀬𑀓𑀭𑀢𑁆𑀢𑀸 𑀓𑀼𑀲𑀮𑀧𑀓𑁆𑀔𑀲𑁆𑀲, 𑀳𑀻𑀦𑀧𑀼𑀕𑁆𑀕𑀮𑀪𑀸𑀯𑀺𑀢𑀢𑁆𑀢𑀸, 𑀳𑀻𑀦𑀥𑀸𑀢𑀼𑀧𑀪𑀯𑀢𑁆𑀢𑀸 𑀘 𑀮𑀸𑀫𑀓𑀝𑁆𑀞𑁂𑀦 𑀳𑀻𑀦𑁄. 𑀕𑀸𑀫𑀦𑀺𑀯𑀸𑀲𑀺𑀲𑀢𑁆𑀢𑀥𑀫𑁆𑀫𑀢𑁆𑀢𑀸 𑀕𑀫𑁆𑀫𑁄. 𑀧𑀼𑀣𑀼𑀚𑁆𑀚𑀦𑀲𑀸𑀥𑀸𑀭𑀡𑀢𑁆𑀢𑀸 𑀧𑁄𑀣𑀼𑀚𑁆𑀚𑀦𑀺𑀓𑁄. 𑀅𑀦𑀭𑀺𑀬𑁄𑀢𑀺 𑀅𑀭𑀺𑀬𑀸𑀦𑀁 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸, 𑀅𑀭𑀺𑀬𑀥𑀫𑁆𑀫𑀧𑀝𑀺𑀧𑀓𑁆𑀔𑀢𑁆𑀢𑀸, 𑀅𑀦𑀭𑀺𑀬𑀓𑀭𑀢𑁆𑀢𑀸, 𑀅𑀦𑀭𑀺𑀬𑀥𑀫𑁆𑀫𑀢𑁆𑀢𑀸, 𑀅𑀦𑀭𑀺𑀬𑀸𑀘𑀺𑀡𑁆𑀡𑀢𑁆𑀢𑀸 𑀘 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀢𑁆𑀣𑀲𑀗𑁆𑀔𑀸𑀢𑀲𑀁𑀲𑀸𑀭𑀪𑀬𑀸𑀯𑀳𑀢𑁆𑀢𑀸, 𑀅𑀦𑀢𑁆𑀣𑀨𑀮𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸 𑀘 𑀅𑀦𑀢𑁆𑀣𑀲𑀁𑀳𑀺𑀢𑁄. 𑀅𑀢𑁆𑀢𑀦𑁄 𑀓𑁂𑀯𑀮𑀁 𑀔𑁂𑀤𑀽𑀧𑀕𑀫𑁄 𑀅𑀢𑁆𑀢𑀓𑀺𑀮𑀫𑀣𑁄 𑀦𑀸𑀫. 𑀲𑁄 𑀤𑀺𑀝𑁆𑀞𑀺𑀕𑀢𑀧𑀼𑀩𑁆𑀩𑀓𑀢𑁆𑀢𑀢𑀧𑀸𑀦𑀼𑀓𑁆𑀓𑀫𑀓𑀺𑀭𑀺𑀬𑀸𑀯𑀺𑀲𑁂𑀲𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀺𑀯𑀲𑁂𑀦 𑀅𑀦𑀼𑀬𑁄𑀕𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀦𑀸𑀫. 𑀅𑀢𑁆𑀢𑀯𑀺𑀬𑁄𑀕𑀯𑀺𑀢𑁆𑀢𑀸𑀧𑀭𑀺𑀲𑁆𑀲𑀫𑀢𑁆𑀢𑀸, 𑀅𑀦𑀼𑀧𑀸𑀬𑀧𑀯𑀢𑁆𑀢𑀢𑁆𑀢𑀸 𑀲𑀫𑁆𑀧𑀚𑁆𑀚𑀫𑀸𑀦𑁄 𑀫𑀺𑀕𑀬𑁄𑀦𑀺𑀕𑁄𑀬𑁄𑀦𑀺𑀓𑀼𑀓𑁆𑀓𑀼𑀭𑀬𑁄𑀦𑀺𑀲𑀽𑀓𑀭𑀬𑁄𑀦𑀻𑀲𑀼 𑀧𑀸𑀢𑀸𑀬𑀢𑀺. 𑀯𑀺𑀧𑀘𑁆𑀘𑀫𑀸𑀦𑁄 𑀦𑀭𑀓𑀁 𑀦𑁂𑀢𑀻𑀢𑀺 𑀅𑀦𑀢𑁆𑀣𑀲𑀁𑀳𑀺𑀢𑁄. 𑀏𑀢𑁂 𑀢𑁆𑀯𑀸𑀢𑀺 𑀏𑀢𑁂 𑀢𑀼. 𑀢𑀣𑀸𑀕𑀢𑁂𑀦𑀸𑀢𑀺 𑀅𑀢𑁆𑀢𑀸𑀦𑀁 𑀅𑀯𑀺𑀢𑀣𑀸𑀕𑀫𑀦𑀁 𑀆𑀯𑀺 𑀓𑀭𑁄𑀢𑀺, 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀦 𑀫𑀬𑀸 𑀧𑀭𑀺𑀯𑀺𑀢𑀓𑁆𑀓𑀺𑀢𑀫𑀢𑁆𑀢𑁂𑀦 𑀯𑀺𑀢𑀓𑁆𑀓𑀺𑀢𑀸, 𑀓𑀺𑀦𑁆𑀢𑀼 𑀫𑀬𑀸 𑀢𑀣𑀸𑀕𑀢𑁂𑀦𑁂𑀯 𑀲𑀢𑀸 𑀅𑀪𑀺𑀲𑀫𑁆𑀩𑁄𑀥𑀺𑀜𑀸𑀡𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺. 𑀘𑀓𑁆𑀔𑀼𑀓𑀭𑀡𑀻𑀢𑀺𑀆𑀤𑀻𑀳𑀺 𑀧𑀦 𑀢𑀫𑁂𑀯 𑀧𑀝𑀺𑀧𑀤𑀁 𑀣𑁄𑀫𑁂𑀢𑀺. 𑀪𑁂𑀲𑀚𑁆𑀚𑀁 𑀆𑀢𑀼𑀭𑀲𑁆𑀲 𑀯𑀺𑀬 ‘‘𑀘𑀓𑁆𑀔𑀼𑀓𑀭𑀡𑀻’’𑀢𑀺 𑀇𑀫𑀺𑀦𑀸 𑀜𑀸𑀡𑀘𑀓𑁆𑀔𑀼𑀯𑀺𑀲𑁄𑀥𑀦𑀁 𑀯𑀼𑀢𑁆𑀢𑀁. 𑀜𑀸𑀡𑀓𑀭𑀡𑀻𑀢𑀺 𑀇𑀫𑀺𑀦𑀸 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀁 𑀯𑀼𑀢𑁆𑀢𑀁. 𑀉𑀧𑀲𑀫𑀸𑀬𑀸𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀯𑀼𑀢𑁆𑀢𑀸. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑀦𑀁 𑀯𑀼𑀢𑁆𑀢𑀁. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀲𑀘𑁆𑀘𑀧𑀝𑀺𑀯𑀺𑀚𑁆𑀛𑀦𑀁 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀲𑁄𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀏𑀯𑀁 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.
𑁧𑁪. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀸 𑀅𑀜𑁆𑀜𑀢𑁆𑀣 𑀯𑀺𑀬 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀅𑀓𑀣𑁂𑀢𑁆𑀯𑀸 𑀧𑀞𑀫𑀫𑁂𑀯 𑀅𑀲𑁂𑀯𑀺𑀢𑀩𑁆𑀩𑀫𑀦𑁆𑀢𑀤𑁆𑀯𑀬𑀁 𑀯𑀢𑁆𑀯𑀸 𑀫𑀚𑁆𑀛𑀺𑀫𑀧𑀝𑀺𑀧𑀤𑀁 𑀤𑁂𑀲𑁂𑀲𑀻𑀢𑀺? 𑀅𑀢𑁆𑀢𑀸𑀤𑀺𑀫𑀺𑀘𑁆𑀙𑀸𑀪𑀺𑀫𑀸𑀦𑀦𑀺𑀯𑀸𑀭𑀡𑀢𑁆𑀣𑀁, 𑀓𑀼𑀫𑁆𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁆𑀣𑀜𑁆𑀘 𑀅𑀦𑁆𑀢𑀤𑁆𑀯𑀬𑀯𑀚𑁆𑀚𑀦𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀲𑁂𑀲𑀸𑀥𑀺𑀕𑀫𑀤𑀻𑀧𑀦𑀦𑀬𑁂𑀦 𑀅𑀩𑀸𑀳𑀼𑀮𑁆𑀮𑀺𑀓𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀢𑁂𑀲𑀜𑁆𑀘 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀤𑀻𑀧𑀦𑁂𑀦 𑀢𑀢𑁆𑀣 𑀅𑀦𑀼𑀬𑁄𑀚𑀦𑀢𑁆𑀣𑀁 𑀧𑀘𑁆𑀙𑀸 𑀲𑀫𑁆𑀫𑀸𑀧𑀝𑀺𑀧𑀤𑀁 𑀤𑁂𑀲𑁂𑀲𑀺, 𑀢𑀢𑁄 𑀢𑀲𑁆𑀲 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀲𑁂𑀦 𑀤𑁂𑀲𑁂𑀢𑀼𑀓𑀸𑀫𑁄 ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀫𑀸𑀳, 𑀅𑀬𑀫𑁂𑀢𑁆𑀣 𑀅𑀦𑀼𑀲𑀦𑁆𑀥𑀺. ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀲𑀼𑀢𑁆𑀢𑀸𑀦𑀼𑀲𑀦𑁆𑀥𑀺𑀧𑀓𑀆𑀲𑀦𑀢𑁆𑀣𑀁 𑀅𑀬𑀫𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀯𑀼𑀢𑁆𑀢𑀁 𑀧𑀝𑀺𑀧𑀤𑀁 𑀲𑀼𑀢𑁆𑀯𑀸 𑀓𑀺𑀭 𑀓𑁄𑀡𑁆𑀟𑀜𑁆𑀜𑁄 𑀆𑀳 ‘‘𑀓𑀣𑀁 𑀪𑀕𑀯𑀢𑀸 𑀯𑀼𑀢𑁆𑀢𑀧𑀝𑀺𑀧𑀤𑀸𑀬 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸. 𑀅𑀬𑀜𑁆𑀳𑀺 𑀧𑀝𑀺𑀧𑀤𑀸 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀲𑀢𑀺 𑀲𑀫𑁆𑀪𑀯𑀢𑀺, 𑀦 𑀅𑀜𑁆𑀜𑀣𑀸. 𑀓𑀺𑀮𑁂𑀲𑀸𑀦𑀜𑁆𑀘 𑀬𑀤𑀺 𑀮𑁄𑀪𑀢𑁄 𑀉𑀧𑁆𑀧𑀢𑁆𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀦𑀁 𑀯𑀺𑀬, 𑀢𑀤𑀸𑀲𑁂𑀯𑀦𑀸𑀬 𑀅𑀦𑀼𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀢𑀤𑀯𑀢𑁆𑀣𑀼𑀲𑁆𑀲 𑀯𑀸 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺. 𑀢𑀤𑀯𑀢𑁆𑀣𑀼𑀯𑀺𑀧𑀭𑀻𑀢𑀓𑀸𑀬𑀓𑀺𑀮𑀫𑀣𑀸𑀲𑁂𑀯𑀦𑀸𑀬 𑀅𑀦𑀼𑀧𑁆𑀧𑀢𑁆𑀢𑀺 𑀲𑀺𑀬𑀸. 𑀉𑀪𑁄𑀧𑁂𑀢𑀸 𑀪𑀕𑀯𑀢𑀸 ‘𑀅𑀦𑁆𑀢𑀸’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀓𑀣𑀁 𑀧𑀦𑁂𑀢𑀺𑀲𑁆𑀲𑀸𑀬 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀉𑀧𑁆𑀧𑀢𑁆𑀢𑀺 𑀲𑀫𑁆𑀪𑀯𑁂𑀬𑁆𑀬𑀸’’𑀢𑀺. 𑀪𑀕𑀯𑀸 𑀆𑀳 𑀅𑀦𑀼𑀧𑀸𑀬𑀸𑀲𑁂𑀯𑀦𑀢𑁄. 𑀓𑀣𑀦𑁆𑀢𑀺 𑀘𑁂? 𑁋
‘‘𑀲𑀁𑀲𑀸𑀭𑀫𑀽𑀮𑀢𑁄 𑀜𑀸𑀡𑀁, 𑀢𑀜𑁆𑀘 𑀜𑀸𑀡𑀸 𑀧𑀳𑀺𑀬𑁆𑀬𑀢𑀺;
𑀚𑀻𑀯𑀺𑀢𑁂 𑀲𑀢𑀺 𑀢𑀁 𑀳𑁄𑀢𑀺, 𑀢𑀜𑁆𑀘 𑀚𑀻𑀯𑀺𑀢𑀲𑀸𑀥𑀦𑁂.
‘‘𑀢𑀲𑁆𑀫𑀸 𑀜𑀸𑀡𑀸𑀬 𑀫𑁂𑀥𑀸𑀯𑀻, 𑀭𑀓𑁆𑀔𑁂 𑀚𑀻𑀯𑀺𑀢𑀫𑀢𑁆𑀢𑀦𑁄;
𑀜𑀸𑀡𑀲𑀸𑀥𑀦𑀪𑀽𑀢𑀜𑁆𑀘, 𑀲𑀻𑀮𑀜𑁆𑀘 𑀧𑀭𑀺𑀧𑀸𑀮𑀬𑁂.
‘‘𑀚𑀻𑀯𑀺𑀢𑀜𑁆𑀘 𑀬𑀣𑀸 𑀮𑁄𑀓𑁂, 𑀪𑀺𑀦𑁆𑀦𑁂 𑀓𑀸𑀬𑁂 𑀦 𑀯𑀺𑀚𑁆𑀚𑀢𑀺;
𑀢𑀣𑁂𑀯 𑀪𑀺𑀦𑁆𑀦𑀲𑀻𑀮𑀲𑁆𑀲, 𑀦𑀢𑁆𑀣𑀺 𑀜𑀸𑀡𑀲𑁆𑀲 𑀲𑀫𑁆𑀪𑀯𑁄.
‘‘𑀢𑀲𑁆𑀫𑀸 𑀆𑀬𑀼𑀜𑁆𑀘 𑀲𑀻𑀮𑀜𑁆𑀘, 𑀜𑀸𑀡𑀢𑁆𑀣𑀁 𑀭𑀓𑁆𑀔𑀢𑀸 𑀲𑀢𑀸;
𑀲𑁂𑀯𑀺𑀢𑀩𑁆𑀩𑀸 𑀦 𑀓𑀸𑀫𑀸𑀧𑀺, 𑀦𑀸𑀧𑀺 𑀓𑀸𑀬𑀯𑀺𑀦𑀸𑀲𑀦𑀸.
‘‘𑀓𑀸𑀫𑁂𑀲𑀼 𑀕𑁂𑀥𑀫𑀼𑀧𑀕𑀫𑁆𑀫 𑀳𑀺𑀦𑁄 𑀕𑀫𑁆𑀫𑀜𑁆𑀘,
𑀅𑀘𑁆𑀘𑀼𑀤𑁆𑀥𑀦𑁄 𑀓𑀺𑀮𑀫𑀣𑀁 𑀕𑀫𑀼𑀧𑁂𑀢𑀺 𑀫𑀽𑀴𑁆𑀳𑁄;
𑀬𑁄 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀧𑀭𑀫𑀁 𑀉𑀧𑁂𑀢𑀺,
𑀲𑁄 𑀔𑀺𑀧𑁆𑀧𑀫𑁂𑀯 𑀮𑀪𑀢𑁂 𑀧𑀭𑀫𑀁 𑀯𑀺𑀫𑁄𑀓𑁆𑀔’’𑀦𑁆𑀢𑀺.
𑀲𑀼𑀢𑁆𑀯𑀸 𑀢𑀤𑁂𑀢𑀁 𑀲𑀼𑀕𑀢𑀲𑁆𑀲 𑀯𑀸𑀓𑁆𑀬𑀁,
𑀧𑀜𑁆𑀜𑀁 𑀫𑀼𑀦𑀻 𑀲𑁄 𑀲𑀼𑀢𑀚𑀁 𑀮𑀪𑀺𑀢𑁆𑀯𑀸;
𑀘𑀺𑀦𑁆𑀢𑀸𑀫𑀬𑀁 𑀜𑀸𑀡 𑀧𑀯𑁂𑀲𑀫𑀸𑀦𑁄,
𑀉𑀘𑁆𑀙𑀺𑀦𑁆𑀤𑀬𑀁 𑀧𑀜𑁆𑀳𑀫𑀺𑀫𑀁 𑀅𑀧𑀼𑀘𑁆𑀙𑀺.
‘‘𑀦𑀺𑀩𑁆𑀩𑁂𑀥𑀧𑀤𑀝𑁆𑀞𑀸𑀦𑀁 𑀧𑀳𑀸𑀬 𑀖𑁄𑀭𑀁,
𑀢𑀧𑀁 𑀓𑀣𑀫𑀺𑀯𑀸𑀢𑀺 𑀲𑁄 𑀢𑁆𑀯𑀁;
𑀩𑁆𑀭𑀽𑀳𑀺 𑀢𑀤𑁂𑀯 𑀳𑁄𑀢𑀺 𑀪𑀺𑀓𑁆𑀔𑀼 𑀘𑀭,
𑀯𑀺𑀭𑀸𑀕𑀫𑀼𑀧𑀬𑀸𑀢𑀺 𑀘 𑀤𑀼𑀓𑁆𑀔𑀲𑀘𑁆𑀘𑀲𑁆𑀲;
𑀤𑀲𑁆𑀲𑀦𑁂𑀦𑁂𑀯 𑀤𑀼𑀓𑁆𑀔𑀸𑀦𑀼𑀪𑀯𑀦𑀸,
𑀢𑀫𑁆𑀳𑀺 𑀤𑁄𑀲𑀲𑁆𑀲 𑀧𑀘𑁆𑀘𑀬𑁄’’𑀢𑀺.
𑀲𑀼𑀢𑁆𑀯𑀸𑀯 𑀓𑁄𑀡𑁆𑀟𑀜𑁆𑀜𑁄 𑀫𑀼𑀦𑀺𑀯𑀘𑀦𑀁,
𑀯𑀼𑀝𑁆𑀞𑀸𑀬 𑀳𑀝𑁆𑀞𑁄 𑀲𑀳𑀲𑀸 𑀅𑀯𑁄𑀘;
‘‘𑀉𑀤𑀸𑀳𑀭 𑀢𑁆𑀯𑀁 𑀪𑀕𑀯𑀸 𑀫𑀫𑁂𑀢𑀁,
𑀪𑀺𑀓𑁆𑀔𑀼 𑀬𑀣𑀸 𑀧𑀲𑁆𑀲𑀢𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺.
𑀘𑀺𑀦𑁆𑀢𑀸𑀫𑀬𑀺𑀲𑁆𑀲 𑀧𑀜𑁆𑀜𑀸𑀧𑀭𑀺𑀧𑀼𑀡𑁆𑀡𑀸 𑀪𑀸𑀯𑀦𑀸𑀫𑀬𑀺𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸 𑀇𑀫𑁂𑀳𑀺 𑀇𑀢𑀺 𑀪𑀕𑀯𑀸 𑀲𑀼𑀢𑁆𑀢𑀫𑀺𑀤𑀫𑀸𑀳𑀸𑀢𑀺 𑀓𑀺𑀭. 𑀓𑀲𑁆𑀫𑀸 𑀪𑀕𑀯𑀸 𑀓𑁄𑀡𑁆𑀟𑀜𑁆𑀜𑀲𑁆𑀲 𑀧𑀼𑀭𑀺𑀫𑀫𑁂𑀯 𑀲𑀘𑁆𑀘𑀤𑁂𑀲𑀦𑀁 𑀅𑀯𑀟𑁆𑀠𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀕𑀢𑀓𑁆𑀓𑀫𑀫𑀸𑀳𑀸𑀢𑀺? 𑀦𑀸𑀳𑀁 𑀓𑀲𑁆𑀲𑀘𑀺 𑀆𑀕𑀫𑀁 𑀤𑁂𑀲𑁂𑀫𑀺, 𑀅𑀧𑀺𑀘 𑀔𑁄 𑀲𑀬𑀫𑁂𑀯 𑀏𑀯𑀫𑀥𑀺𑀕𑀢𑁄𑀫𑁆𑀳𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑀢𑁆𑀣 ‘‘𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀇𑀫𑀺𑀦𑀸 𑀇𑀤𑀁 𑀅𑀢𑁆𑀣𑀤𑁆𑀯𑀬𑀁 𑀤𑀲𑁆𑀲𑁂𑀢𑀺, 𑀦 𑀫𑀬𑀸 𑀆𑀴𑀸𑀭𑀢𑁄, 𑀉𑀤𑀓𑀢𑁄 𑀯𑀸 𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄, 𑀓𑀺𑀦𑁆𑀢𑀼 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑁆𑀯𑁂𑀯 𑀜𑀸𑀡𑀁 𑀫𑁂 𑀉𑀤𑀧𑀸𑀤𑀻𑀢𑀺 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀆𑀦𑀼𑀪𑀸𑀯𑀁 𑀧𑀓𑀸𑀲𑁂𑀢𑀺. 𑀅𑀧𑀺𑀘 𑀬𑀲𑁆𑀫𑀸 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀯𑀺𑀦𑀸𑀧𑀺 𑀧𑀭𑁄𑀧𑀤𑁂𑀲𑁂𑀦 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀓𑀣𑀁 𑀢𑀼𑀫𑁆𑀳𑁂𑀯 𑀫𑀫𑀸𑀧𑀤𑁂𑀲𑁂𑀦 𑀦 𑀧𑀲𑁆𑀲𑀣𑀸𑀢𑀺.
𑁧𑁫. 𑀘𑀓𑁆𑀔𑀼𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀜𑀸𑀡𑀯𑁂𑀯𑀘𑀦𑀸𑀦𑁂𑀯. 𑀜𑀸𑀡𑀜𑁆𑀳𑀺 𑀲𑀘𑁆𑀘𑀸𑀦𑀁 𑀆𑀮𑁄𑀘𑀦𑀢𑁄 𑀘𑀓𑁆𑀔𑀼𑀪𑀽𑀢𑀢𑁆𑀣𑀚𑀸𑀦𑀦𑀢𑁄 𑀜𑀸𑀡𑀁. 𑀧𑀓𑀸𑀭𑁂𑀳𑀺 𑀚𑀸𑀦𑀦𑀢𑁄 𑀧𑀜𑁆𑀜𑀸. 𑀓𑀺𑀮𑁂𑀲𑀯𑀺𑀤𑀸𑀭𑀡𑀢𑁄, 𑀯𑀺𑀚𑁆𑀚𑀦𑀢𑁄 𑀘 𑀯𑀺𑀚𑁆𑀚𑀸. 𑀲𑀘𑁆𑀘𑀘𑁆𑀙𑀸𑀤𑀓𑀢𑀫𑀯𑀺𑀦𑀸𑀲𑀦𑀢𑁄, 𑀢𑁂𑀲𑀁 𑀕𑀢𑀺𑀓𑁄𑀝𑀺𑀧𑀓𑀸𑀲𑀦𑀢𑁄 𑀆𑀮𑁄𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀞𑀫𑁂𑀦 𑀧𑀭𑀺𑀯𑀝𑁆𑀝𑁂𑀦 𑀲𑀘𑁆𑀘𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀞𑀧𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀢𑁂𑀲𑀁 𑀓𑀢𑁆𑀢𑀩𑁆𑀩𑀸𑀓𑀸𑀭𑀧𑀭𑀺𑀘𑁆𑀙𑀺𑀦𑁆𑀤𑀦𑀧𑀜𑁆𑀜𑀁, 𑀢𑀢𑀺𑀬𑁂𑀦 𑀲𑀘𑁆𑀘𑁂𑀲𑀼 𑀜𑀸𑀡𑀓𑀺𑀘𑁆𑀘𑀲𑀦𑁆𑀦𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺.
𑁧𑁬. 𑀬𑀸𑀯𑀓𑀻𑀯𑀜𑁆𑀘𑀸𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀬𑀸𑀯𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀇𑀢𑀺 𑀘𑀺𑀢𑁆𑀢𑀫𑀦𑁄’’𑀢𑀺𑀆𑀤𑀺 𑀯𑀺𑀬. 𑀭𑀸𑀕𑀸𑀤𑀻𑀳𑀺 𑀅𑀓𑀼𑀧𑁆𑀧𑀢𑀸𑀬 𑀅𑀓𑀼𑀧𑁆𑀧𑀸 𑀯𑀺𑀫𑀼𑀢𑁆𑀢𑀺. 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀥𑀫𑁆𑀫𑀤𑁂𑀲𑀦𑀸. 𑀲𑀸 𑀳𑀺 𑀥𑀫𑁆𑀫𑀸𑀦𑀁 𑀩𑁆𑀬𑀸𑀓𑀭𑀡𑀢𑁄 𑀧𑀓𑀸𑀲𑀦𑀢𑁄 ‘‘𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀭𑀚𑀁 𑀯𑀻𑀢𑀫𑀮𑀦𑁆𑀢𑀺 𑀏𑀢𑁆𑀣 𑀯𑀺𑀭𑀚𑀁 𑀯𑀺𑀲𑀫𑀳𑁂𑀢𑀼𑀯𑀸𑀤𑀯𑀺𑀕𑀫𑀢𑁄. 𑀯𑀻𑀢𑀫𑀮𑀁 𑀅𑀳𑁂𑀢𑀼𑀓𑀯𑀸𑀤𑀯𑀺𑀕𑀫𑀢𑁄. 𑀯𑀺𑀭𑀚𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀢𑁄. 𑀯𑀻𑀢𑀫𑀮𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀢𑁄. 𑀯𑀺𑀭𑀚𑀁 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀢𑁄. 𑀯𑀻𑀢𑀫𑀮𑀁 𑀅𑀦𑀼𑀲𑀬𑀧𑁆𑀧𑀳𑀸𑀦𑀢𑁄. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀥𑀫𑁆𑀫𑀫𑀢𑁆𑀢𑀤𑀲𑁆𑀲𑀦𑀁, 𑀦 𑀢𑀢𑁆𑀣 𑀲𑀢𑁆𑀢𑁄 𑀯𑀸 𑀚𑀻𑀯𑁄 𑀯𑀸 𑀓𑀸𑀭𑀓𑁄 𑀯𑀸 𑀯𑁂𑀤𑀓𑁄 𑀯𑀸𑀢𑀺, 𑀢𑁂𑀦𑁂𑀯𑀸𑀳 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀦𑁆𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀇𑀤𑀜𑁆𑀳𑀺 𑀢𑀲𑁆𑀲 𑀥𑀫𑁆𑀫𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀯𑀲𑁂𑀦 𑀏𑀯 𑀲𑀗𑁆𑀔𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.
𑁧𑁭. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀏𑀢𑁆𑀣 𑀤𑁂𑀲𑀦𑀸𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀧𑀝𑀺𑀯𑁂𑀥𑀜𑀸𑀡𑀜𑁆𑀘 𑀮𑀩𑁆𑀪𑀢𑁂𑀯. 𑀏𑀢𑁆𑀣 𑀓𑀺𑀫𑀢𑁆𑀣𑀁 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀦𑁆𑀢𑀺? 𑀦𑀸𑀦𑀸𑀤𑀺𑀝𑁆𑀞𑀺𑀕𑀢𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄 𑀮𑀤𑁆𑀥𑀸𑀮𑁄𑀓𑀢𑁆𑀢𑀸, 𑀅𑀧𑀸𑀬𑀪𑀬𑀲𑀫𑀢𑀺𑀓𑁆𑀓𑀫𑀦𑀢𑁄 𑀅𑀲𑁆𑀲𑀸𑀲𑀁 𑀧𑀢𑁆𑀢𑀢𑁆𑀢𑀸, 𑀤𑁂𑀯𑀓𑀸𑀬𑀯𑀺𑀫𑀸𑀦𑀤𑀲𑁆𑀲𑀦𑀢𑁄 𑀧𑀻𑀢𑀺𑀧𑀸𑀫𑁄𑀚𑁆𑀚𑀘𑀮𑀺𑀢𑀢𑁆𑀢𑀸 𑀘𑀸𑀢𑀺 𑀏𑀯𑀫𑀸𑀤𑀻𑀦𑁂𑀢𑁆𑀣 𑀓𑀸𑀭𑀡𑀸𑀦𑀺 𑀯𑀤𑀦𑁆𑀢𑀺. 𑀧𑀣𑀯𑀺𑀓𑀫𑁆𑀧𑀦𑀫𑀳𑀸𑀲𑀤𑁆𑀤𑀧𑀸𑀢𑀼𑀪𑀸𑀯𑁄 𑀘 𑀥𑀫𑁆𑀫𑀢𑀸𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀏𑀓𑁂. 𑀤𑁂𑀯𑀢𑀸𑀦𑀁 𑀓𑀻𑀴𑀺𑀢𑀼𑀓𑀸𑀫𑀢𑀸𑀬 𑀧𑀣𑀯𑀺𑀓𑀫𑁆𑀧𑁄. 𑀩𑀳𑀼𑀦𑁄 𑀤𑁂𑀯𑀲𑀗𑁆𑀖𑀲𑁆𑀲 𑀲𑀦𑁆𑀦𑀺𑀧𑀸𑀢𑀢𑁄, 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸𑀚𑀸𑀮𑀯𑀺𑀲𑀚𑁆𑀚𑀦𑀢𑁄 𑀘𑀸𑀢𑀺 𑀏𑀓𑀘𑁆𑀘𑁂.
𑁧𑁮. 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀯𑀺𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀢𑀲𑁆𑀲 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀯𑀘𑀦𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁄. 𑀢𑀤𑀯𑀲𑀸𑀦𑁄 𑀳𑀺 𑀢𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁄. 𑀲𑁆𑀯𑀸𑀓𑁆𑀔𑀸𑀢𑁄𑀢𑀺𑀆𑀤𑀺 ‘‘𑀏𑀳𑀻’’𑀢𑀺 𑀆𑀫𑀦𑁆𑀢𑀦𑀸𑀬 𑀧𑀬𑁄𑀚𑀦𑀤𑀲𑁆𑀲𑀦𑀯𑀘𑀦𑀁. ‘‘𑀏𑀳𑀺𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄 𑀘𑀭…𑀧𑁂… 𑀓𑀺𑀭𑀺𑀬𑀸𑀬𑀸’’𑀢𑀺 𑀘 𑀅𑀯𑁄𑀘𑀸𑀢𑀺 𑀧𑀤𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀯𑀲𑀺𑀝𑁆𑀞𑀁 𑀫𑀕𑁆𑀕𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑀥𑀺𑀕𑀘𑁆𑀙. 𑀓𑀺𑀫𑀢𑁆𑀣𑀁? 𑀲𑀫𑁆𑀫𑀸𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑁄. ‘‘𑀏𑀳𑀺𑀪𑀺𑀓𑁆𑀔𑀽’’𑀢𑀺 𑀇𑀫𑀺𑀦𑀸 𑀪𑀕𑀯𑀢𑁄 𑀯𑀘𑀦𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 ‘‘𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸’’𑀢𑀺 𑀯𑀼𑀢𑁆𑀢𑀸. 𑀲𑀸𑀯 𑀢𑀲𑁆𑀲𑀸𑀬𑀲𑁆𑀫𑀢𑁄 𑀬𑀸𑀯𑀚𑀻𑀯𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀢𑀲𑁆𑀲𑀸 𑀉𑀧𑀲𑀫𑁆𑀧𑀤𑀸𑀬 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀸𑀤𑀺𑀦𑀸 𑀯𑀺𑀘𑁆𑀙𑁂𑀤𑀸 𑀯𑀸 𑀢𑀤𑀜𑁆𑀜𑀸𑀬 𑀉𑀧𑀲𑀫𑁆𑀧𑀤𑀸𑀬 𑀓𑀺𑀘𑁆𑀘𑀁 𑀯𑀸 𑀦𑀢𑁆𑀣𑀻𑀢𑀺 𑀇𑀤𑀫𑀢𑁆𑀣𑀤𑁆𑀯𑀬𑀁 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀦𑁆𑀦𑀫𑁆𑀧𑀺 𑀉𑀧𑀲𑀫𑁆𑀧𑀤𑀸𑀦𑀁 𑀏𑀳𑀺𑀪𑀺𑀓𑁆𑀔𑀼𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀧𑀜𑁆𑀳𑀩𑁆𑀬𑀸𑀓𑀭𑀡𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸𑀦𑀁 𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀦𑁆𑀢𑀭𑀸 𑀯𑀺𑀘𑁆𑀙𑁂𑀤𑁄 𑀯𑀸 𑀢𑀤𑀜𑁆𑀜𑀽𑀧𑀲𑀫𑁆𑀧𑀤𑀸𑀬 𑀓𑀺𑀘𑁆𑀘𑀁 𑀯𑀸 𑀦𑀢𑁆𑀣𑀺, 𑀇𑀢𑀭𑀲𑁆𑀲𑀢𑁆𑀣𑀻𑀢𑀺. 𑀦𑀺𑀓𑀸𑀬𑀦𑁆𑀢𑀭𑀺𑀓𑀸 𑀧𑀦𑀸𑀳𑀼 ‘‘𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀲𑀗𑁆𑀔𑀸𑀢𑀸𑀬 𑀉𑀧𑀲𑀫𑁆𑀧𑀤𑀸𑀬 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀼𑀧𑀲𑀫𑁆𑀧𑀤𑀜𑁆𑀘 𑀤𑀲𑀯𑀕𑁆𑀕𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑀯𑀺𑀥𑁄𑀧𑀲𑀫𑁆𑀧𑀤𑀸’’𑀢𑀺. 𑀓𑀸 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀉𑀧𑀲𑀫𑁆𑀧𑀤𑀸 𑀦𑀸𑀫𑀸𑀢𑀺? 𑀢𑀤𑀥𑀺𑀕𑀢𑀓𑀺𑀭𑀺𑀬𑀸𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀲𑁂𑀓𑁆𑀔𑀸 𑀢𑀤𑀥𑀺𑀯𑀸𑀲𑀦𑀘𑁂𑀢𑀦𑀸𑀬 𑀧𑀭𑀺𑀪𑀸𑀯𑀺𑀢𑀧𑀜𑁆𑀘𑀓𑁆𑀔𑀦𑁆𑀥𑀺𑀓𑀸 𑀅𑀚𑁆𑀛𑀢𑁆𑀢𑀲𑀦𑁆𑀢𑀢𑀺. 𑀓𑀸 𑀧𑀦𑁂𑀢𑁆𑀣 𑀧𑀭𑀺𑀪𑀸𑀯𑀦𑀸 𑀦𑀸𑀫? 𑀢𑀩𑁆𑀩𑀺𑀧𑀓𑁆𑀔𑀥𑀫𑁆𑀫𑀚𑁆𑀛𑀸𑀘𑀸𑀭𑀯𑀺𑀭𑀼𑀤𑁆𑀥𑀪𑀸𑀯𑁄, 𑀢𑀲𑁆𑀲 𑀧𑀢𑁆𑀢𑀺𑀬𑀸 𑀢𑀸𑀬 𑀧𑀭𑀺𑀪𑀸𑀯𑀦𑀸𑀬 𑀯𑀲𑁂𑀦 𑀓𑀢𑁆𑀣𑀘𑀺 ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀮𑁄𑀪𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀪𑀩𑁆𑀩𑁄 𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀪𑀸𑀯𑁂𑀢𑀼’’𑀦𑁆𑀢𑀺𑀆𑀤𑀺. 𑀏𑀢𑁆𑀣𑀸𑀳𑀼 𑀦𑀺𑀓𑀸𑀬𑀦𑁆𑀢𑀭𑀺𑀓𑀸 ‘‘𑀬𑀣𑀸𑀯𑀼𑀢𑁆𑀢𑀸𑀬 𑀉𑀧𑀲𑀫𑁆𑀧𑀤𑀸𑀬 𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄 𑀥𑀫𑁆𑀫𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀢𑀺𑀯𑀲𑁂𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀬𑀸𑀯 𑀅𑀯𑀺𑀘𑁆𑀙𑁂𑀤𑁄, 𑀢𑀸𑀯 𑀉𑀧𑀲𑀫𑁆𑀧𑀦𑁆𑀦𑁄𑀢𑀺, 𑀅𑀜𑁆𑀜𑀣𑀸 𑀢𑀢𑁄 𑀥𑀫𑁆𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑀧𑁆𑀧𑀲𑀗𑁆𑀕𑁄 𑀆𑀧𑀚𑁆𑀚𑀢𑀻’’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀲𑀼𑀢𑁆𑀢𑀁 𑀆𑀳𑀭𑀣𑀸’’𑀢𑀺. 𑀢𑁂 𑀘𑁂 𑀯𑀤𑁂𑀬𑁆𑀬𑀼𑀁 ‘‘𑀬𑁄 𑀢𑁂𑀲𑀁 𑀤𑀲𑀦𑁆𑀦𑀁 𑀅𑀲𑁂𑀓𑁆𑀔𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀸𑀤𑀸𑀬 𑀧𑀝𑀺𑀮𑀸𑀪𑀲𑀫𑀦𑁆𑀦𑀸𑀕𑀫𑁄 𑀅𑀭𑀺𑀬𑁄 𑀳𑁄𑀢𑀺 𑀯𑀺𑀧𑁆𑀧𑀳𑀻𑀦𑁄𑀢𑀺 𑀏𑀯𑀫𑀸𑀤𑀻𑀦𑀺 𑀦𑁄 𑀲𑀼𑀢𑁆𑀢𑀸𑀦𑀻’’𑀢𑀺. 𑀏𑀯𑀁 𑀲𑀢𑀺 𑀅𑀲𑀦𑁆𑀢𑀥𑀫𑁆𑀫𑁂𑀳𑀺, 𑀧𑀭𑀲𑀢𑁆𑀢𑁂𑀳𑀺 𑀘 𑀲𑀫𑀦𑁆𑀦𑀸𑀕𑀫𑀤𑁄𑀲𑀧𑁆𑀧𑀲𑀗𑁆𑀕𑁄 𑀦𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀓𑀺𑀁𑀓𑀸𑀭𑀡𑀁? 𑀲𑀼𑀢𑁆𑀢𑀲𑀫𑁆𑀪𑀯𑀢𑁄. 𑀬𑀣𑀸𑀳 𑁋 ‘‘𑀭𑀸𑀚𑀸, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀻 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁩.𑁧𑁯𑁯-𑁨𑁦𑁦 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀺𑀢𑁆𑀣𑀸𑀭𑁄. 𑀯𑀲𑀺𑀪𑀸𑀯𑁄 𑀢𑀢𑁆𑀣 𑀲𑀫𑀦𑁆𑀦𑀸𑀕𑀢𑀲𑀤𑁆𑀤𑁂𑀦 𑀯𑀼𑀢𑁆𑀢𑁄. 𑀢𑀲𑁆𑀲𑀳𑀺𑀢𑁂𑀲𑀼 𑀭𑀢𑀦𑁂𑀲𑀼 𑀯𑀲𑀺𑀪𑀸𑀯𑁄 𑀓𑀸𑀫𑀘𑀸𑀭𑁄 𑀅𑀢𑁆𑀣𑀻𑀢𑀺 𑀘𑁂? 𑀏𑀢𑁆𑀣 𑀯𑀲𑀺𑀪𑀸𑀯𑁄 𑀲𑀫𑀦𑁆𑀦𑀸𑀕𑀫𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀅𑀜𑁆𑀜𑀢𑁆𑀣 𑀧𑀢𑁆𑀢𑀺𑀲𑀗𑁆𑀔𑀸𑀢𑁄, 𑀢𑀁 𑀥𑀫𑁆𑀫𑀦𑁆𑀢𑀭𑀦𑁆𑀢𑀺. 𑀓𑀺𑀫𑁂𑀢𑁆𑀣 𑀯𑀺𑀲𑁂𑀲𑀓𑀸𑀭𑀡𑀁? 𑀦𑀢𑁆𑀣𑀺 𑀘, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸𑀯 𑀉𑀧𑀲𑀫𑁆𑀧𑀤𑀸. 𑀅𑀬𑀫𑁂𑀯 𑀦𑀬𑁄 𑀧𑀩𑁆𑀩𑀚𑁆𑀚𑀸𑀤𑀻𑀲𑀼𑀧𑀺 𑀦𑁂𑀢𑀩𑁆𑀩𑁄.
𑁧𑁯. 𑀓𑀺𑀜𑁆𑀘𑀸𑀧𑀺 𑀯𑀧𑁆𑀧𑀢𑁆𑀣𑁂𑀭𑀲𑁆𑀲 𑀧𑀸𑀝𑀺𑀧𑀤𑀤𑀺𑀯𑀲𑁂…𑀧𑁂… 𑀅𑀲𑁆𑀲𑀚𑀺𑀢𑁆𑀣𑁂𑀭𑀲𑁆𑀲 𑀘𑀢𑀼𑀢𑁆𑀣𑀺𑀬𑀦𑁆𑀢𑀺 𑀏𑀯𑀁 𑀦𑀸𑀦𑀸𑀤𑀺𑀯𑀲𑁂𑀲𑀼 𑀧𑀸𑀝𑁂𑀓𑁆𑀓𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀢𑀣𑀸𑀧𑀺 𑀑𑀯𑀸𑀤𑀲𑀸𑀫𑀜𑁆𑀜𑁂𑀦 𑀯𑀧𑁆𑀧𑀪𑀤𑁆𑀤𑀺𑀬𑀸𑀦𑀁, 𑀫𑀳𑀸𑀦𑀸𑀫𑀅𑀲𑁆𑀲𑀚𑀻𑀦𑀜𑁆𑀘𑁂𑀢𑁆𑀣 𑀏𑀓𑀢𑁄 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑁨𑁦. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸’’𑀢𑀺 𑀓𑀺𑀫𑀢𑁆𑀣𑀁 𑀆𑀤𑀺𑀢𑁄𑀯 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀻𑀧𑁂𑀢𑀻𑀢𑀺? 𑀢𑁂𑀲𑀁 𑀧𑀼𑀣𑀼𑀚𑁆𑀚𑀦𑀓𑀸𑀮𑁂𑀧𑀺 𑀇𑀢𑀭𑀮𑀓𑁆𑀔𑀡𑀤𑁆𑀯𑀬𑀲𑁆𑀲 𑀧𑀸𑀓𑀝𑀢𑁆𑀢𑀸. 𑀢𑁂 𑀳𑀺 𑀫𑀦𑀸𑀧𑀸𑀦𑀁 𑀓𑀸𑀫𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀲𑁆𑀲𑀦𑁂𑀦 𑀲𑀁𑀯𑀺𑀕𑁆𑀕𑀸 𑀧𑀩𑁆𑀩𑀚𑀺𑀁𑀲𑀽𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀢𑀸𑀯 𑀦𑁂𑀲𑀁 𑀏𑀓𑀤𑁂𑀲𑁂𑀦 𑀧𑀸𑀓𑀝𑀁, 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀢𑁄 𑀓𑀸𑀬𑀺𑀓𑀤𑀼𑀓𑁆𑀔𑀁, 𑀢𑀜𑁆𑀘 𑀫𑀸𑀦𑀲𑀲𑁆𑀲 𑀧𑀘𑁆𑀘𑀬𑁄𑀢𑀺 𑀫𑀸𑀦𑀲𑀺𑀓𑀤𑀼𑀓𑁆𑀔𑀜𑁆𑀘 𑀧𑀸𑀓𑀝𑀁, 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀯𑀚𑁆𑀚𑀺𑀢𑁆𑀯𑀸 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀤𑀻𑀧𑁂𑀢𑀼𑀁 𑀆𑀭𑀪𑀺. 𑀢𑀜𑁆𑀘 𑀤𑀻𑀧𑁂𑀦𑁆𑀢𑁄 𑀤𑀼𑀓𑁆𑀔𑀮𑀓𑁆𑀔𑀡𑁂𑀦𑁂𑀯 𑀤𑀻𑀧𑁂𑀢𑀼𑀁 ‘‘𑀭𑀽𑀧𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀫𑀢𑁆𑀣𑀦𑁆𑀢𑀺? 𑀅𑀦𑀺𑀘𑁆𑀘𑀮𑀓𑁆𑀔𑀡𑀢𑁄𑀧𑀺 𑀢𑁂𑀲𑀁 𑀤𑀼𑀓𑁆𑀔𑀮𑀓𑁆𑀔𑀡𑀲𑁆𑀲 𑀲𑀼𑀝𑁆𑀞𑀼𑀢𑀭𑀁 𑀧𑀸𑀓𑀝𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀢𑁆𑀢𑀸, 𑀢𑀧𑁆𑀧𑀭𑀸𑀬𑀡𑀪𑀸𑀯𑀢𑁄 𑀘 𑀤𑀼𑀓𑁆𑀔𑀮𑀓𑁆𑀔𑀡𑀁 𑀲𑀼𑀝𑁆𑀞𑀼 𑀧𑀸𑀓𑀝𑀁, 𑀢𑀲𑁆𑀫𑀸 𑀢𑁂𑀦 𑀢𑀸𑀯 𑀲𑀼𑀝𑁆𑀞𑀼 𑀧𑀸𑀓𑀝𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀻𑀧𑁂𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀢𑀤𑀼𑀪𑀬𑁂𑀦𑀸𑀧𑀺 𑀤𑀻𑀧𑁂𑀢𑀼𑀁 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺 𑀯𑀓𑁆𑀔𑀢𑀺. 𑀓𑀮𑁆𑀮𑀁 𑀦𑀽𑀢𑀺 𑀬𑀼𑀢𑁆𑀢𑀁 𑀦𑀼. 𑀏𑀢𑀁 𑀫𑀫𑀸𑀢𑀺 𑀢𑀡𑁆𑀳𑀸𑀕𑁆𑀕𑀸𑀳𑁄. 𑀏𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀕𑁆𑀕𑀸𑀳𑁄. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑁄. 𑀢𑀡𑁆𑀳𑀸𑀕𑁆𑀕𑀸𑀳𑁄 𑀘𑁂𑀢𑁆𑀣 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀯𑀲𑁂𑀦, 𑀫𑀸𑀦𑀕𑁆𑀕𑀸𑀳𑁄 𑀦𑀯𑀯𑀺𑀥𑀫𑀸𑀦𑀯𑀲𑁂𑀦, 𑀤𑀺𑀝𑁆𑀞𑀺𑀕𑁆𑀕𑀸𑀳𑁄 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.
𑀧𑀜𑁆𑀘𑀯𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸
𑁨𑁫. 𑀬𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀧𑀜𑁆𑀘𑀫𑀺𑀬𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀢𑁆𑀢𑀫𑀺𑀬𑀁 𑀦𑀸𑀴𑀓𑀢𑁆𑀣𑁂𑀭𑀲𑁆𑀲 𑀦𑀸𑀴𑀓𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀪𑀤𑁆𑀤𑀧𑀤𑀧𑀼𑀡𑁆𑀡𑀫𑀸𑀬𑀁 𑀬𑀲𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀉𑀤𑀺𑀓𑁆𑀔𑀦𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀸𑀲𑀺, 𑀢𑁂𑀦 𑀲𑀫𑀬𑁂𑀦 𑀬𑀲𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀓𑀺𑀭 𑀉𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀓𑀼𑀮𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑀲𑀗𑁆𑀔𑀸𑀢𑁄, 𑀧𑀭𑀺𑀚𑀦𑀲𑀗𑁆𑀔𑀸𑀢𑁄 𑀯𑀸 𑀬𑀲𑁄 𑀯𑀺𑀲𑁂𑀲𑀢𑁄 𑀧𑀯𑀟𑁆𑀠𑀢𑀺. 𑀢𑁂𑀦 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀏𑀯𑀁 𑀦𑀸𑀫𑀫𑀓𑀁𑀲𑀼. ‘‘𑀲𑀼𑀔𑀼𑀫𑀸𑀮𑁄’’𑀢𑀺𑀆𑀤𑀺 𑀓𑀺𑀫𑀢𑁆𑀣𑀁 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺? 𑀧𑀘𑁆𑀙𑀺𑀫𑀚𑀦𑀲𑁆𑀲 𑀦𑁂𑀓𑁆𑀔𑀫𑁆𑀫𑁂 𑀲𑀫𑀼𑀲𑁆𑀲𑀸𑀳𑀦𑀚𑀦𑀦𑀢𑁆𑀣𑀁. 𑀏𑀯𑀁 𑀉𑀢𑁆𑀢𑀫𑀪𑁄𑀕𑀲𑀫𑀧𑁆𑀧𑀺𑀢𑀸𑀦𑀫𑁆𑀧𑀺 𑀉𑀢𑁆𑀢𑀫𑁂𑀲𑀼 𑀪𑁄𑀕𑁂𑀲𑀼 𑀅𑀧𑁆𑀧𑀫𑀢𑁆𑀢𑀓𑁂𑀦𑀸𑀧𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑁂𑀦 𑀯𑀺𑀢𑀚𑁆𑀚𑁂𑀢𑁆𑀯𑀸 𑀓𑀸𑀮𑀸𑀓𑀸𑀮𑀁 𑀅𑀕𑀡𑁂𑀢𑁆𑀯𑀸 𑀯𑀺𑀯𑁂𑀓𑀸𑀪𑀺𑀭𑀢𑀺𑀬𑀸 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀢𑀺𑀡𑀁 𑀯𑀺𑀬 𑀧𑀳𑀸𑀬 𑀕𑁂𑀳𑀢𑁄 𑀦𑀺𑀓𑁆𑀔𑀫𑀦𑀸 𑀅𑀳𑁄𑀲𑀺, 𑀓𑀲𑁆𑀲 𑀧𑀦𑀜𑁆𑀜𑀲𑁆𑀲 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀗𑁆𑀕𑀻𑀪𑀽𑀢𑀲𑁆𑀲𑀸𑀢𑀺 𑀢𑁂𑀳𑀺 𑀏𑀓𑀢𑁆𑀢𑀁 𑀉𑀧𑀕𑀢𑀲𑁆𑀲, 𑀅𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦𑀺𑀤𑁆𑀤𑀸 𑀑𑀓𑁆𑀓𑀫𑀻𑀢𑀺 𑀫𑀦𑀸𑀧𑁂𑀲𑀼𑀧𑀺 𑀯𑀺𑀲𑀬𑁂𑀲𑀼 𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑁆𑀯𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀁 𑀉𑀧𑀦𑁂𑀲𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀭𑀢𑁆𑀢𑀺𑀬𑁄 𑀘𑀸𑀢𑀺 𑀢𑀬𑁄𑀧𑀺 𑀬𑀸𑀫𑁂. 𑀢𑁂𑀦 𑀧𑀭𑀺𑀚𑀦𑀲𑁆𑀲 𑀯𑀺𑀓𑀸𑀭𑀤𑀲𑁆𑀲𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀭𑀢𑁆𑀢𑀺-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀓𑀸𑀮𑁂 𑀲𑀽𑀭𑀺𑀬𑀸𑀪𑀸𑀯𑁂, 𑀬𑀸𑀫𑁂 𑀘 𑀧𑀯𑀢𑁆𑀢𑀢𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑁄. 𑀬𑀸𑀫𑁂𑀯𑀺𑀥 𑀯𑀺𑀜𑁆𑀜𑁂𑀬𑁆𑀬𑁄 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁂 𑀘. 𑀓𑀘𑁆𑀙𑁂𑀢𑀺 𑀓𑀘𑁆𑀙𑀧𑀲𑁆𑀲𑁂. 𑀓𑀡𑁆𑀞𑁂𑀢𑀺 𑀓𑀡𑁆𑀞𑀲𑁆𑀲 𑀳𑁂𑀝𑁆𑀞𑀸. 𑀫𑀼𑀤𑀺𑀗𑁆𑀕𑀲𑁆𑀲 𑀳𑀺 𑀉𑀧𑀭𑀺 𑀓𑀡𑁆𑀞𑀁 𑀞𑀧𑁂𑀢𑁆𑀯𑀸 𑀲𑀬𑀦𑁆𑀢𑀺𑀬𑀸 𑀓𑀡𑁆𑀞𑁂 𑀫𑀼𑀤𑀺𑀗𑁆𑀕𑀁 𑀅𑀤𑁆𑀤𑀲𑀸𑀢𑀺 𑀅𑀢𑁆𑀣𑁄. 𑀆𑀴𑀫𑁆𑀩𑀭𑀦𑁆𑀢𑀺 𑀧𑀡𑀯𑀁. 𑀉𑀪𑀢𑁄𑀫𑀼𑀔𑀲𑁆𑀲 𑀢𑀦𑀼𑀓𑀸 𑀤𑀻𑀖𑀸. 𑀯𑀺𑀢𑁆𑀣𑀺𑀦𑁆𑀦𑀲𑀫𑀢𑀮𑀲𑁆𑀲 𑀯𑀸𑀤𑀺𑀢𑀲𑁆𑀲 𑀏𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑁄𑀢𑀺 𑀲𑀼𑀧𑀺𑀦𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀅𑀲𑀫𑁆𑀩𑀦𑁆𑀥𑀧𑀮𑀸𑀧𑀁 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑁄. 𑀲𑀼𑀲𑀸𑀦𑀁 𑀫𑀜𑁆𑀜𑁂𑀢𑀺 𑀲𑀼𑀲𑀸𑀦𑀁 𑀯𑀺𑀬 𑀅𑀤𑁆𑀤𑀲 𑀲𑀓𑀁 𑀧𑀭𑀺𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀤𑀻𑀦𑀯𑁄𑀢𑀺 𑀅𑀲𑀼𑀪𑀪𑀸𑀯𑁄. 𑀦𑀺𑀩𑁆𑀩𑀺𑀤𑀸𑀬 𑀘𑀺𑀢𑁆𑀢𑀁 𑀲𑀡𑁆𑀞𑀸𑀢𑀻𑀢𑀺 𑀯𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀲𑀗𑁆𑀔𑀸𑀢𑀸𑀬 𑀉𑀓𑁆𑀓𑀡𑁆𑀞𑀸𑀬 𑀘𑀺𑀢𑁆𑀢𑀁 𑀦𑀫𑀻𑀢𑀺 𑀅𑀢𑁆𑀣𑁄. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀇𑀫𑀸𑀳𑀺 𑀇𑀢𑁆𑀣𑀻𑀳𑀺 𑀲𑀳 𑀦𑀸𑀳𑀁 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀤𑁆𑀯𑁂 𑀓𑀺𑀭 𑀆𑀓𑀸𑀭𑀸 𑀢𑀲𑁆𑀲 𑀧𑀫𑀸𑀤𑀲𑀼𑀢𑁆𑀢𑀧𑀭𑀺𑀚𑀦𑀤𑀲𑁆𑀲𑀦𑁂 𑀧𑀸𑀓𑀝𑀸 𑀚𑀸𑀢𑀸 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑁄, 𑀅𑀲𑀼𑀪𑀸𑀓𑀸𑀭𑀲𑁆𑀲 𑀅𑀢𑀺𑀑𑀴𑀸𑀭𑀺𑀓𑀪𑀸𑀯𑁄 𑀘. 𑀏𑀯𑀁 𑀲𑀢𑀺 𑀑𑀴𑀸𑀭𑀺𑀓𑀢𑀭𑁂 𑀘 𑀅𑀲𑀼𑀪𑀸𑀓𑀸𑀭𑁂 𑀓𑀺𑀮𑁂𑀲𑀯𑀲𑁂𑀦𑀸𑀬𑀁 𑀲𑀩𑁆𑀩𑁄𑀧𑀺 𑀮𑁄𑀓𑁄 𑀏𑀢𑁆𑀣 𑀧𑀻𑀴𑀺𑀢𑁄 𑀫𑀼𑀘𑁆𑀙𑀺𑀢𑁄. 𑀅𑀳𑁄 𑀓𑀺𑀮𑁂𑀲𑀸 𑀩𑀮𑀯𑀢𑀭𑀸𑀢𑀺 𑀳𑀺 𑀧𑀲𑁆𑀲𑀢𑁄 𑀧𑀲𑁆𑀲𑀢𑁄 𑀢𑀲𑁆𑀲 𑀤𑁆𑀯𑁂𑀧𑀺 𑀢𑁂 𑀆𑀓𑀸𑀭𑀸 𑀧𑀸𑀓𑀝𑀸 𑀚𑀸𑀢𑀸, 𑀬𑁂𑀦𑁂𑀯𑀫𑀯𑁄𑀘𑀸𑀢𑀺.
‘‘𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀬𑁄 𑀆𑀭𑁄𑀳𑀺𑀢𑁆𑀯𑀸’’𑀢𑀺 𑀏𑀢𑁂𑀦𑀲𑁆𑀲 𑀦𑀺𑀲𑁆𑀲𑀗𑁆𑀕𑀢𑀸𑀬 𑀯𑀺𑀲𑁆𑀲𑀝𑁆𑀞𑀕𑀫𑀦𑀁 𑀤𑀻𑀧𑁂𑀢𑀺. 𑀲𑁄 𑀳𑀺 𑀩𑀮𑀯𑀲𑀁𑀯𑁂𑀕𑀸𑀪𑀺𑀢𑀼𑀦𑁆𑀦𑀳𑀤𑀬𑀢𑁆𑀢𑀸 𑀧𑀭𑀺𑀚𑀦𑀲𑁆𑀲 𑀧𑀩𑁄𑀥𑁂 𑀲𑀢𑀺𑀧𑀺 𑀅𑀢𑁆𑀢𑀦𑁄 𑀕𑀫𑀦𑀦𑀺𑀯𑀸𑀭𑀡𑀲𑀫𑀢𑁆𑀣𑀪𑀸𑀯𑀁 𑀅𑀲𑀳𑀫𑀸𑀦𑁄 𑀅𑀢𑁆𑀢𑀸𑀦𑀁 𑀢𑀓𑁆𑀓𑁂𑀦𑁆𑀢𑁄 𑀯𑀺𑀲𑁆𑀲𑀝𑁆𑀞𑁄 𑀅𑀕𑀫𑀸𑀲𑀺. 𑀅𑀫𑀦𑀼𑀲𑁆𑀲𑀸𑀢𑀺 𑀤𑁂𑀯𑀢𑀸. 𑀢𑀸 𑀳𑀺 𑀫𑀦𑀼𑀲𑁆𑀲𑁂𑀳𑀺 𑀲𑀼𑀕𑀢𑀺𑀧𑀝𑀺𑀯𑁂𑀥𑀜𑀸𑀡𑀲𑀡𑁆𑀞𑀸𑀦𑀸𑀤𑀺𑀕𑀼𑀡𑀲𑀸𑀫𑀜𑁆𑀜𑁂𑀦 ‘‘𑀅𑀫𑀦𑀼𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀅𑀲𑀫𑀸𑀦𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀸𑀤𑀬𑁄 ‘‘𑀅𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀸 ‘‘𑀅𑀯𑀲𑀮𑀸’’𑀢𑀺 𑀯𑀸 𑀯𑀼𑀘𑁆𑀘𑀦𑁆𑀢𑀺, 𑀓𑀺𑀦𑁆𑀢𑀼 𑀚𑀸𑀢𑀺𑀲𑀪𑀸𑀕𑀢𑀸𑀬 𑀏𑀯 𑀯𑀲𑀮𑀸𑀤𑀬𑁄 ‘‘𑀅𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀫𑀦𑀼𑀲𑁆𑀲𑁂𑀳𑀺 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀪𑀸𑀕𑀢𑀸𑀬 𑀤𑁂𑀯𑀢𑀸 ‘‘𑀅𑀫𑀦𑀼𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀸. 𑀅𑀜𑁆𑀜𑀣𑀸 𑀫𑀦𑀼𑀲𑁆𑀲𑀸 𑀦 𑀳𑁄𑀦𑁆𑀢𑀻𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 ‘‘𑀅𑀫𑀦𑀼𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀸 𑀪𑀯𑁂𑀬𑁆𑀬𑀼𑀁.
𑁨𑁬. 𑀯𑀦𑀕𑀳𑀦𑀁 𑀤𑀺𑀲𑁆𑀯𑀸 ‘‘𑀲𑀼𑀫𑀼𑀢𑁆𑀢𑁄𑀳𑀁 𑀦𑀕𑀭𑀢𑁄’’𑀢𑀺 𑀧𑀫𑀼𑀤𑀺𑀢𑀢𑁆𑀢𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀉𑀤𑀸𑀦𑁂𑀲𑀺. 𑀇𑀤𑀁 𑀔𑁄 𑀬𑀲𑀸𑀢𑀺 𑀪𑀕𑀯𑀸 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀜𑁆𑀳𑀺 𑀢𑀡𑁆𑀳𑀸𑀤𑀺𑀓𑀺𑀮𑁂𑀲𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀁, 𑀅𑀦𑀼𑀧𑀲𑀝𑁆𑀞𑀢𑀜𑁆𑀘 𑀤𑀲𑁆𑀲𑀦𑀫𑀢𑁆𑀢𑁂𑀦𑀸𑀧𑀺 𑀅𑀲𑁆𑀲𑀸𑀤𑀚𑀦𑀦𑀢𑁄. 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀬𑁂𑀦 𑀢𑀁 𑀦𑀺𑀩𑁆𑀩𑀸𑀦𑀁 𑀇𑀥 𑀦𑀺𑀲𑀺𑀦𑁆𑀦𑀫𑀢𑁆𑀢𑁄𑀯 𑀢𑁆𑀯𑀁 𑀅𑀥𑀺𑀕𑀫𑀺𑀲𑁆𑀲𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀭𑀸𑀢𑀺 𑀅𑀲𑁆𑀲𑀤𑁆𑀥𑁂𑀬𑁆𑀬𑀅𑀩𑁆𑀬𑀢𑁆𑀢𑀺𑀧𑀭𑀺𑀳𑀸𑀲𑁂𑀲𑀼 𑀦𑀺𑀧𑀸𑀢𑁄, 𑀇𑀥 𑀅𑀩𑁆𑀬𑀢𑁆𑀢𑀺𑀬𑀁. 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀬𑁄 𑀑𑀭𑁄𑀳𑀺𑀢𑁆𑀯𑀸𑀢𑀺 𑀘 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀳𑀺 𑀑𑀢𑀭𑀺𑀢𑁆𑀯𑀸. 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀢𑀲𑁆𑀲 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀅𑀜𑁆𑀜𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀅𑀓𑀢𑁆𑀯𑀸 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀲𑀼𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀢𑁆𑀢𑀸, 𑀧𑀝𑀺𑀯𑁂𑀥𑀓𑁆𑀔𑀡𑀸𑀦𑀢𑀺𑀓𑁆𑀓𑀫𑀦𑀢𑁆𑀣𑀁 𑀅𑀦𑀼𑀧𑀤𑁆𑀤𑀼𑀢𑀸𑀦𑀼𑀧𑀲𑀝𑁆𑀞𑀢𑀸𑀦𑀁 𑀧𑀸𑀧𑀓𑀥𑀫𑁆𑀫𑀤𑁂𑀲𑀦𑀸𑀪𑀺𑀫𑀼𑀔𑀘𑀺𑀢𑁆𑀢𑀢𑁆𑀢𑀸, 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀦𑁄 𑀅𑀘𑀺𑀭𑀸𑀕𑀫𑀦𑀤𑀲𑁆𑀲𑀦𑀢𑁄 𑀘. 𑀓𑀺𑀫𑀢𑁆𑀣𑀁 𑀪𑀕𑀯𑀸 𑀢𑀲𑁆𑀲 𑀲𑀼𑀝𑁆𑀞𑀼𑀢𑀭𑀁 𑀲𑀁𑀯𑀺𑀕𑁆𑀕𑀳𑀤𑀬𑀲𑁆𑀲 𑀪𑀯𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀲𑁆𑀲 𑀪𑀯𑀸𑀪𑀯𑀽𑀧𑀸𑀬𑀸𑀦𑀺𑀲𑀁𑀲𑀓𑀣𑀁 𑀧𑀞𑀫𑀫𑁂𑀯 𑀓𑀣𑁂𑀲𑀻𑀢𑀺? 𑀲𑀩𑁆𑀩𑀪𑀯𑀸𑀤𑀻𑀦𑀯𑀤𑀲𑁆𑀲𑀦𑀢𑁆𑀣𑀁. 𑀲𑁄 𑀳𑀺 𑀫𑀦𑀼𑀲𑁆𑀲𑀮𑁄𑀓𑀲𑁆𑀲𑁂𑀯 𑀉𑀧𑀤𑁆𑀤𑀼𑀢𑀉𑀧𑀲𑀝𑁆𑀞𑀪𑀸𑀯𑀁 𑀅𑀤𑁆𑀤𑀲, 𑀦 𑀲𑀕𑁆𑀕𑀸𑀦𑀦𑁆𑀢𑀺 𑀓𑀤𑀸𑀘𑀺 𑀲𑀕𑁆𑀕𑀮𑁄𑀓𑀁 𑀲𑀼𑀔𑀢𑁄 𑀫𑀜𑁆𑀜𑁂𑀬𑁆𑀬. 𑀢𑀢𑁆𑀣 𑀲𑀼𑀔𑀲𑀜𑁆𑀜𑁂𑀦 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀧𑁂𑀲𑁂𑀬𑁆𑀬𑀸𑀢𑀺 𑀲𑀕𑁆𑀕𑀸𑀦𑀫𑁆𑀧𑀺 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀼𑀓𑀸𑀫𑀢𑀸𑀬 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀆𑀭𑀪𑀺. 𑀏𑀢𑁆𑀣 𑀤𑀸𑀦𑀁, 𑀤𑀸𑀦𑀸𑀦𑀺𑀲𑀁𑀲𑀁, 𑀲𑀻𑀮𑀸𑀦𑀺𑀲𑀁𑀲𑀜𑁆𑀘 𑀓𑀣𑁂𑀦𑁆𑀢𑁄 𑀤𑀸𑀦𑀲𑀻𑀮𑀓𑀣𑀁 𑀓𑀣𑁂𑀢𑀺 𑀦𑀸𑀫. 𑀲𑀕𑁆𑀕𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀲𑀕𑁆𑀕𑀓𑀣𑀁 𑀓𑀣𑁂𑀢𑀺 𑀦𑀸𑀫. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸𑀦𑀁 𑀅𑀦𑀺𑀘𑁆𑀘𑀢𑀁, 𑀅𑀧𑀲𑀸𑀤𑀢𑀁, 𑀫𑀳𑀸𑀤𑀻𑀦𑀯𑀢𑀜𑁆𑀘 𑀓𑀣𑁂𑀦𑁆𑀢𑁄 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁, 𑀑𑀓𑀸𑀭𑀁, 𑀲𑀁𑀓𑀺𑀮𑁂𑀲𑀜𑁆𑀘 𑀧𑀓𑀸𑀲𑁂𑀢𑀺. 𑀦𑁂𑀓𑁆𑀔𑀫𑁆𑀫𑁂 𑀢𑀤𑀪𑀸𑀯𑀢𑁄 𑀘 𑀢𑀁𑀦𑀺𑀲𑁆𑀲𑀭𑀡𑀢𑁄 𑀘 𑀢𑀩𑁆𑀩𑀺𑀧𑀭𑀻𑀢𑀁 𑀆𑀦𑀺𑀲𑀁𑀲𑀁 𑀓𑀣𑁂𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀢𑀺 𑀦𑀸𑀫. 𑀢𑀢𑁆𑀣 𑀑𑀓𑀸𑀭𑀦𑁆𑀢𑀺 𑀅𑀯𑀓𑀸𑀭𑀁 𑀮𑀸𑀫𑀓𑀪𑀸𑀯𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑀁 𑀩𑀸𑀥𑀦𑀁 𑀉𑀧𑀢𑀸𑀧𑀦𑀁 𑀯𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀮𑀘𑀺𑀢𑁆𑀢𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀤𑀺𑀝𑁆𑀞𑀺𑀬𑁄𑀕𑀯𑀺𑀘𑀺𑀓𑀺𑀘𑁆𑀙𑀸𑀬𑁄𑀕𑀸𑀦𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀯𑀺𑀳𑀢𑀢𑁆𑀢𑀸. 𑀫𑀼𑀤𑀼𑀘𑀺𑀢𑁆𑀢𑀁 𑀲𑀢𑀺𑀦𑁆𑀤𑁆𑀭𑀺𑀬𑀲𑀫𑀸𑀬𑁄𑀕𑁂𑀦, 𑀯𑀺𑀳𑀺𑀁𑀲𑀸𑀲𑀸𑀭𑀫𑁆𑀪𑀸𑀤𑀺𑀓𑀺𑀮𑁂𑀲𑀧𑀯𑁂𑀲𑀁 𑀦𑀺𑀯𑀸𑀭𑁂𑀢𑁆𑀯𑀸 𑀘𑀺𑀢𑁆𑀢𑀫𑀼𑀤𑀼𑀢𑀸𑀤𑀺𑀓𑀼𑀲𑀮𑀥𑀫𑁆𑀫𑀧𑁆𑀧𑀯𑁂𑀲𑀦𑀁 𑀓𑀭𑁄𑀦𑁆𑀢𑀁 𑀲𑀳𑀚𑀸𑀢𑀁 𑀘𑀺𑀢𑁆𑀢𑀁 𑀫𑀼𑀤𑀼𑀁 𑀓𑀭𑁄𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀦𑀼𑀪𑀸𑀯𑁂𑀦 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀯𑀺𑀲𑁂𑀲𑀢𑁄 𑀦𑀻𑀯𑀭𑀡𑀯𑀺𑀧𑀓𑁆𑀔𑀪𑀽𑀢𑀦𑁆𑀢𑀺. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀉𑀤𑀕𑁆𑀕𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀣𑀺𑀦𑀫𑀺𑀤𑁆𑀥𑀲𑀗𑁆𑀔𑀸𑀢𑀮𑀻𑀦𑀪𑀸𑀯𑀯𑀺𑀧𑀓𑁆𑀔𑀦𑁆𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀦𑀼𑀪𑀸𑀯𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑀁 𑀢𑀲𑁆𑀲 𑀧𑀲𑀸𑀤𑀮𑀓𑁆𑀔𑀡𑀢𑁆𑀢𑀸. 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀢𑀺 𑀏𑀢𑀁 𑀯𑀺𑀲𑀬𑀯𑀲𑁂𑀦 𑀤𑁂𑀲𑀦𑀁 𑀉𑀧𑀸𑀮𑀺𑀢𑁆𑀣𑁂𑀭𑁄 𑀧𑀓𑀸𑀲𑁂𑀢𑀺. 𑀲𑀘𑁆𑀘𑀸𑀦𑀺 𑀳𑀺 𑀲𑀸𑀫𑀼𑀓𑁆𑀓𑀁𑀲𑀺𑀓𑀤𑁂𑀲𑀦𑀸𑀬 𑀯𑀺𑀲𑀬𑀸𑀦𑀺. 𑀅𑀜𑁆𑀜𑀣𑀸 𑀤𑀼𑀓𑁆𑀔𑀸𑀤𑀻𑀦𑀺 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸𑀢𑀺 𑀆𑀧𑀚𑁆𑀚𑀢𑀺 𑀢𑀲𑁆𑀲 𑀯𑀺𑀪𑀸𑀯𑀦𑁂 𑀲𑀘𑁆𑀘𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸.
𑁨𑁭. 𑀘𑀢𑀼𑀤𑁆𑀤𑀺𑀲𑀸𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼. 𑀅𑀪𑀺𑀲𑀗𑁆𑀔𑀭𑁂𑀲𑀻𑀢𑀺 𑀅𑀪𑀺𑀲𑀗𑁆𑀔𑀭𑀺. 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀉𑀪𑀺𑀦𑁆𑀦𑀁 𑀧𑀝𑀺𑀮𑀪𑀺𑀢𑀩𑁆𑀩𑀯𑀺𑀲𑁂𑀲𑀦𑁆𑀢𑀭𑀸𑀬𑀦𑀺𑀲𑁂𑀥𑀦𑀢𑁆𑀣𑀁. 𑀬𑀤𑀺 𑀲𑁄 𑀧𑀼𑀢𑁆𑀢𑀁 𑀧𑀲𑁆𑀲𑁂𑀬𑁆𑀬, 𑀧𑀼𑀢𑁆𑀢𑀲𑁆𑀲𑀧𑀺 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑁄 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺, 𑀲𑁂𑀝𑁆𑀞𑀺𑀲𑁆𑀲𑀧𑀺 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑁄 𑀦 𑀲𑀺𑀬𑀸. 𑀤𑀺𑀝𑁆𑀞𑀲𑀘𑁆𑀘𑁄𑀧𑀺 ‘‘𑀤𑁂𑀳𑀺 𑀢𑁂 𑀫𑀸𑀢𑀼𑀬𑀸 𑀚𑀻𑀯𑀺𑀢’’𑀦𑁆𑀢𑀺 𑀯𑀤𑀦𑁆𑀢𑁄 𑀓𑀺𑀫𑀜𑁆𑀜𑀁 𑀦 𑀓𑀭𑁂𑀬𑁆𑀬. 𑀬𑀲𑁄𑀧𑀺 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀭𑀳𑀸𑀧𑀺 𑀲𑀫𑀸𑀦𑁄 𑀲𑀬𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 𑀓𑀺𑀫𑀜𑁆𑀜𑀸𑀬 𑀲𑀡𑁆𑀞𑀳𑁂𑀬𑁆𑀬.
𑁨𑁮. 𑀉𑀪𑁄𑀳𑀺𑀧𑀺 𑀧𑀢𑁆𑀢𑀩𑁆𑀩𑀯𑀺𑀲𑁂𑀲𑀓𑁄𑀝𑀺𑀬𑀸 𑀧𑀢𑁆𑀢𑀢𑁆𑀢𑀸 𑀪𑀕𑀯𑀸 𑀧𑀼𑀦 𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀲𑀺. 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄𑀢𑀺 𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀓𑀸𑀮𑀁 𑀲𑀦𑁆𑀥𑀸𑀬𑀸𑀳. 𑀲𑁄𑀢𑀸𑀧𑀦𑁆𑀦𑁄 𑀳𑀺 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑀸𑀭𑀳𑀢𑁆𑀢𑀸 𑀅𑀕𑀸𑀭𑀺𑀬𑀪𑀽𑀢𑁄 𑀦𑀸𑀫 𑀳𑁄𑀢𑀺 𑀅𑀧𑀩𑁆𑀩𑀚𑀺𑀢𑁄. 𑀲𑀫𑁆𑀧𑀢𑀺 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀅𑀕𑀸𑀭𑀫𑀚𑁆𑀛𑀯𑀲𑀦𑀲𑁆𑀲 𑀅𑀪𑀩𑁆𑀩𑀢𑁆𑀢𑀸 ‘‘𑀅𑀕𑀸𑀭𑀺𑀓𑁄’’𑀢𑀺 𑀦 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀬𑀲𑁆𑀲 𑀤𑀺𑀝𑁆𑀞𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀬𑁂𑀦 𑀤𑀺𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄’’𑀢𑀺 𑀯𑀘𑀦𑁂𑀦 𑀮𑀤𑁆𑀥𑀦𑀬𑀢𑁆𑀢𑀸 𑀧𑀘𑁆𑀙𑀸 𑀕𑀳𑀧𑀢𑀺 𑀕𑀺𑀳𑀺𑀯𑁂𑀲𑀥𑀸𑀭𑀺𑀫𑁂𑀯 𑀬𑀲𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀲𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀧𑀘𑁆𑀙𑀸𑀲𑀫𑀡𑁂𑀦𑀸’’𑀢𑀺. 𑀢𑀢𑁆𑀣 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭 𑀧𑀭𑀺𑀧𑀽𑀭𑁂𑀳𑀺 𑀢𑀸𑀯, 𑀬𑀸𑀯 𑀲𑀫𑁆𑀫𑀸𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸, 𑀬𑀸𑀯 𑀘𑀼𑀢𑀺𑀘𑀺𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑀺𑀗𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀬𑀸𑀢𑀺 𑀧𑁄𑀭𑀸𑀡𑀸, 𑀢𑀜𑁆𑀘 𑀬𑀼𑀢𑁆𑀢𑀁. 𑀮𑀺𑀗𑁆𑀕𑀫𑀢𑁆𑀢𑀜𑁆𑀳𑀺 𑀲𑀦𑁆𑀥𑀸𑀬 𑀲𑁄 𑀆𑀬𑀲𑁆𑀫𑀸 ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀆𑀳.
𑀓𑀺𑀫𑀢𑁆𑀣𑀁 𑀪𑀕𑀯𑀸 𑀬𑀲𑀲𑁆𑀲 𑀫𑀸𑀢𑀼, 𑀧𑀚𑀸𑀧𑀢𑀺𑀬𑀸 𑀘 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀢𑁆𑀯𑀸𑀯 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺? 𑀬𑀲𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀢𑁆𑀢𑀸 𑀤𑀸𑀦𑀜𑁆𑀘 𑀲𑁄𑀫𑀦𑀲𑁆𑀲𑀺𑀓𑀘𑀺𑀢𑁆𑀢𑁂𑀦 𑀦 𑀤𑀤𑁂𑀬𑁆𑀬𑀼𑀁, 𑀲𑀢𑁆𑀣𑀭𑀺 𑀘 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀫𑀕𑁆𑀕𑀧𑀝𑀺𑀯𑁂𑀥𑀫𑁆𑀧𑀺 𑀦 𑀮𑀪𑁂𑀬𑁆𑀬𑀼𑀦𑁆𑀢𑀺 𑀪𑀕𑀯𑀸 𑀧𑀞𑀫𑀁 𑀢𑀸𑀯 𑀢𑀸 𑀯𑀺𑀕𑀢𑀲𑁄𑀓𑀲𑀮𑁆𑀮𑀳𑀤𑀬𑀸𑀬𑁄 𑀓𑀢𑁆𑀯𑀸 𑀧𑀼𑀦 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸𑀲𑀺.
𑁩𑁦. 𑀲𑁂𑀝𑁆𑀞𑀸𑀦𑀼𑀲𑁂𑀝𑁆𑀞𑀻𑀦𑀦𑁆𑀢𑀺 𑀅𑀦𑀼𑀓𑁆𑀓𑀫𑀲𑁂𑀝𑁆𑀞𑀻𑀦𑀦𑁆𑀢𑀺 𑀧𑁄𑀭𑀸𑀡𑀸. ‘‘𑀲𑁂𑀝𑁆𑀞𑀺𑀦𑁄 𑀘𑀸𑀦𑀼𑀲𑁂𑀝𑁆𑀞𑀺𑀦𑁄 𑀘 𑀬𑀸𑀦𑀺 𑀓𑀼𑀮𑀸𑀦𑀺, 𑀢𑀸𑀦𑀺 𑀲𑁂𑀝𑁆𑀞𑀸𑀦𑀼𑀲𑁂𑀝𑁆𑀞𑀸𑀦𑀺 𑀓𑀼𑀮𑀸𑀦𑀺, 𑀢𑁂𑀲𑀁 𑀲𑁂𑀝𑁆𑀞𑀸𑀦𑀼𑀲𑁂𑀝𑁆𑀞𑀻𑀦𑀁 𑀓𑀼𑀮𑀸𑀦’’𑀦𑁆𑀢𑀺 𑀮𑀺𑀔𑀺𑀢𑀁. 𑀥𑀫𑁆𑀫𑀯𑀺𑀦𑀬𑁄𑀢𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀸𑀯𑀘𑀦𑀦𑁆𑀢𑀺 𑀇𑀥 𑀅𑀢𑁆𑀣𑀢𑁄 𑀏𑀓𑀁. 𑀅𑀣 𑀯𑀸 𑀥𑀫𑁆𑀫𑁂𑀦 𑀯𑀺𑀦𑀬𑁄, 𑀦 𑀤𑀡𑁆𑀟𑀲𑀢𑁆𑀣𑁂𑀳𑀻𑀢𑀺 𑀥𑀫𑁆𑀫𑀯𑀺𑀦𑀬𑁄, 𑀥𑀫𑁆𑀫𑀸𑀬 𑀯𑀺𑀦𑀬𑁄, 𑀦 𑀳𑀺𑀁𑀲𑀢𑁆𑀣𑀦𑁆𑀢𑀺 𑀯𑀸 𑀥𑀫𑁆𑀫𑀢𑁄 𑀯𑀺𑀦𑀬𑁄, 𑀦𑀸𑀥𑀫𑁆𑀫𑀢𑁄𑀢𑀺 𑀯𑀸 𑀥𑀫𑁆𑀫𑁄 𑀯𑀺𑀦𑀬𑁄, 𑀦𑀸𑀥𑀫𑁆𑀫𑁄𑀢𑀺 𑀯𑀸 𑀥𑀫𑁆𑀫𑀸𑀦𑀁 𑀯𑀺𑀦𑀬𑁄, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀯𑀸 𑀥𑀫𑁆𑀫𑀓𑀸𑀬𑀢𑁆𑀢𑀸, 𑀥𑀫𑁆𑀫𑀲𑀸𑀫𑀺𑀢𑁆𑀢𑀸 𑀯𑀸 𑀥𑀫𑁆𑀫𑁄 𑀪𑀕𑀯𑀸, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀦𑀬𑁄, 𑀦 𑀢𑀓𑁆𑀓𑀺𑀓𑀸𑀦𑀦𑁆𑀢𑀺 𑀯𑀸 𑀥𑀫𑁆𑀫𑀯𑀺𑀦𑀬𑁄. 𑀲𑀫𑀸𑀦𑀸𑀥𑀺𑀓𑀭𑀡𑀯𑀲𑁂𑀦 𑀯𑀸 𑀥𑀫𑁆𑀫𑀯𑀺𑀦𑀬𑁄 𑀦𑀻𑀮𑀼𑀧𑁆𑀧𑀮𑀁 𑀯𑀺𑀬, 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘𑀸𑀢𑀺 𑀥𑀫𑁆𑀫𑀯𑀺𑀦𑀬𑁄 𑀨𑀮𑀸𑀨𑀮𑀁 𑀯𑀺𑀬 𑀦𑀧𑀼𑀁𑀲𑀓𑀫𑀺𑀢𑀺 𑀧𑀼𑀮𑁆𑀮𑀺𑀗𑁆𑀕𑀸𑀧𑀤𑁂𑀲𑀢𑁄 𑀅𑀲𑁆𑀲 𑀮𑀺𑀗𑁆𑀕𑀪𑀸𑀯𑁄 𑀲𑀺𑀤𑁆𑀥𑁄, 𑀬𑀲𑁆𑀲 𑀯𑀸 𑀥𑀫𑁆𑀫𑁄 𑀯𑀺𑀦𑀬𑁄, 𑀲𑁄 𑀥𑀫𑁆𑀫𑀯𑀺𑀦𑀬𑁄 𑀲𑁂𑀢𑀧𑀝𑁄 𑀧𑀼𑀭𑀺𑀲𑁄 𑀯𑀺𑀬, 𑀥𑀫𑁆𑀫𑁂𑀦 𑀬𑀼𑀢𑁆𑀢𑁄 𑀯𑀸 𑀯𑀺𑀦𑀬𑁄 𑀥𑀫𑁆𑀫𑀯𑀺𑀦𑀬𑁄 𑀅𑀲𑁆𑀲𑀭𑀣𑁄 𑀯𑀺𑀬𑀸𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.
𑁩𑁪. ‘‘𑀔𑀡𑁆𑀟𑀲𑀻𑀫𑀁 𑀦𑁂𑀢𑁆𑀯𑀸’’𑀢𑀺 𑀪𑀡𑁆𑀟𑀼𑀓𑀫𑁆𑀫𑀸𑀭𑁄𑀘𑀦𑀧𑀝𑀺𑀳𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦 ‘‘𑀲𑀪𑀺𑀓𑁆𑀔𑀼𑀓𑁂 𑀯𑀺𑀳𑀸𑀭𑁂 𑀅𑀜𑁆𑀜𑀫𑁆𑀧𑀺 𑀏𑀢𑀲𑁆𑀲 𑀓𑁂𑀲𑁂 𑀙𑀺𑀦𑁆𑀤𑀸’’𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺. 𑀧𑀩𑁆𑀩𑀸𑀚𑁂𑀢𑁆𑀯𑀸𑀢𑀺 𑀇𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑀧𑀓𑀸𑀲𑀦𑀢𑁆𑀣𑀁 ‘‘𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀏𑀳𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑀚𑁆𑀛𑀸𑀬𑁄 𑀘𑁂 𑀓𑁂𑀲𑀫𑀲𑁆𑀲𑀼𑀑𑀭𑁄𑀧𑀦𑀸𑀤𑀻𑀦𑀺 𑀅𑀓𑀢𑁆𑀯𑀸 𑀧𑀩𑁆𑀩𑀚𑀢𑁆𑀣𑀁 𑀲𑀭𑀡𑀸𑀦𑀺 𑀤𑁂𑀢𑀺, 𑀦 𑀭𑀼𑀳𑀢𑀺 𑀧𑀩𑁆𑀩𑀚𑁆𑀚𑀸. 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀭𑀼𑀳𑀢𑀺 𑀉𑀧𑀲𑀫𑁆𑀧𑀤𑀸. 𑀅𑀧𑁆𑀧𑀢𑁆𑀢𑀘𑀻𑀯𑀭𑀸𑀦𑀁 𑀉𑀧𑀲𑀫𑁆𑀧𑀤𑀸𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁄, 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀘𑁂𑀢𑀁 𑀬𑀼𑀚𑁆𑀚𑀢𑁂𑀯𑀸𑀢𑀺 𑀏𑀓𑁂. 𑀳𑁄𑀢𑀺 𑀘𑁂𑀢𑁆𑀣 𑁋
‘‘𑀲𑀮𑀺𑀗𑁆𑀕𑀲𑁆𑀲𑁂𑀯 𑀧𑀩𑁆𑀩𑀚𑁆𑀚𑀸, 𑀯𑀺𑀮𑀺𑀗𑁆𑀕𑀲𑁆𑀲𑀸𑀧𑀺 𑀘𑁂𑀢𑀭𑀸;
𑀅𑀧𑁂𑀢𑀧𑀼𑀩𑁆𑀩𑀯𑁂𑀲𑀲𑁆𑀲, 𑀢𑀁 𑀤𑁆𑀯𑀬𑀁 𑀇𑀢𑀺 𑀘𑀸𑀧𑀭𑁂’’𑀢𑀺.
𑀪𑀺𑀓𑁆𑀔𑀼𑀦𑀸 𑀳𑀺 𑀲𑀳𑀢𑁆𑀣𑁂𑀦 𑀯𑀸 𑀆𑀡𑀢𑁆𑀢𑀺𑀬𑀸 𑀯𑀸 𑀤𑀺𑀦𑁆𑀦𑀫𑁂𑀯 𑀓𑀸𑀲𑀸𑀯𑀁 𑀯𑀝𑁆𑀝𑀢𑀺, 𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀦 𑀲𑀦𑁆𑀢𑁂𑀲𑁆𑀯𑁂𑀯 𑀓𑀸𑀲𑀸𑀯𑁂𑀲𑀼, 𑀦𑀸𑀲𑀦𑁆𑀢𑁂𑀲𑀼 𑀅𑀲𑀫𑁆𑀪𑀯𑀢𑁄𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀧𑀞𑀫𑀁…𑀧𑁂…𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀦𑁆𑀢𑀺 𑀏𑀢𑁆𑀣 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀤𑀺𑀦𑁆𑀦𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀸𑀫𑀺 𑀓𑁂𑀯𑀮𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑀤𑀲𑁆𑀲𑀦𑀢𑁄 𑁋
𑀆𑀤𑀺𑀦𑁆𑀦𑀧𑀼𑀩𑁆𑀩𑀮𑀺𑀗𑁆𑀕𑀲𑁆𑀲, 𑀦𑀕𑁆𑀕𑀲𑁆𑀲𑀸𑀧𑀺 𑀤𑁆𑀯𑀬𑀁 𑀪𑀯𑁂;
𑀦𑁂𑀢𑀭𑀲𑁆𑀲𑀸𑀢𑀺 𑀦𑁄 𑀔𑀦𑁆𑀢𑀺, 𑀲𑀩𑁆𑀩𑀧𑀸𑀞𑀸𑀦𑀼𑀮𑁄𑀫𑀢𑁄𑀢𑀺. 𑁋
𑀆𑀘𑀭𑀺𑀬𑁄. 𑀆𑀘𑀭𑀺𑀬𑁂𑀦 𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀧𑀩𑁆𑀩𑀚𑁆𑀚𑀸 𑀦 𑀭𑀼𑀳𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂𑀧𑀺 𑀢𑀣𑁂𑀯 𑀮𑀺𑀔𑀺𑀢𑀁. 𑀉𑀭𑀸𑀤𑀻𑀦𑀺 𑀞𑀸𑀦𑀸𑀦𑀺 𑀦𑀸𑀫. 𑀲𑀁𑀯𑀼𑀢𑀸𑀤𑀻𑀦𑀺 𑀓𑀭𑀡𑀸𑀦𑀺 𑀦𑀸𑀫. ‘‘𑀅𑀦𑀼𑀦𑀸𑀲𑀺𑀓𑀦𑁆𑀢𑀁 𑀓𑀢𑁆𑀯𑀸 𑀏𑀓𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 𑀅𑀦𑁆𑀢𑀭𑀸 𑀅𑀝𑁆𑀞𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀦𑁂𑀧𑀺 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑁂 𑀏𑀯 𑀯𑀺𑀘𑁆𑀙𑁂𑀤𑁄, 𑀅𑀜𑁆𑀜𑀢𑁆𑀭 𑀦 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀅𑀦𑀼𑀦𑀸𑀲𑀺𑀓𑀦𑁆𑀢𑁂 𑀤𑀺𑀬𑁆𑀬𑀫𑀸𑀦𑁂 𑀔𑀮𑀺𑀢𑁆𑀯𑀸 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀫𑀓𑀸𑀭𑁂𑀦 𑀫𑀺𑀲𑁆𑀲𑀻𑀪𑀽𑀢𑁂 𑀔𑁂𑀢𑁆𑀢𑁂 𑀑𑀢𑀺𑀡𑁆𑀡𑀢𑁆𑀢𑀸 𑀯𑀝𑁆𑀝𑀢𑀻𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀫𑀺𑀲𑁆𑀲𑀁 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀯𑀘𑀦𑀓𑀸𑀮𑁂 𑀧𑀦 𑀅𑀦𑀼𑀦𑀸𑀲𑀺𑀓𑀝𑁆𑀞𑀸𑀦𑁂 𑀯𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. ‘‘𑀏𑀯𑀁 𑀓𑀫𑁆𑀫𑀯𑀸𑀘𑀸𑀬𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀉𑀪𑀢𑁄𑀲𑀼𑀤𑁆𑀥𑀺𑀬𑀸𑀯 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀫𑀳𑀸𑀣𑁂𑀭𑁄 𑀧𑀢𑀺𑀢𑀤𑀦𑁆𑀢𑀸𑀤𑀺𑀓𑀸𑀭𑀡𑀢𑀸𑀬 𑀅𑀘𑀢𑀼𑀭𑀲𑁆𑀲𑀁 𑀓𑀢𑁆𑀯𑀸 𑀯𑀤𑀢𑀺, 𑀩𑁆𑀬𑀢𑁆𑀢𑀲𑀸𑀫𑀡𑁂𑀭𑁄 𑀲𑀫𑀻𑀧𑁂 𑀞𑀺𑀢𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀩𑁆𑀬𑀢𑁆𑀢𑀁 𑀯𑀤𑀸𑀧𑁂𑀢𑀺. 𑀫𑀳𑀸𑀣𑁂𑀭𑁂𑀦 𑀅𑀯𑀼𑀢𑁆𑀢𑀁 𑀯𑀤𑀸𑀧𑁂𑀢𑀻𑀢𑀺 𑀦 𑀯𑀝𑁆𑀝𑀢𑀺. 𑀓𑀫𑁆𑀫𑀯𑀸𑀘𑀸𑀬 𑀇𑀢𑀭𑁄 𑀪𑀺𑀓𑁆𑀔𑀼 𑀘𑁂 𑀯𑀤𑀢𑀺, 𑀯𑀝𑁆𑀝𑀢𑀻𑀢𑀺. 𑀲𑀗𑁆𑀖𑁄 𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀧𑀼𑀕𑁆𑀕𑀮𑁄𑀢𑀺. 𑀦 𑀦𑀸𑀦𑀸𑀲𑀻𑀫𑀧𑀯𑀢𑁆𑀢𑀓𑀫𑁆𑀫𑀯𑀸𑀘𑀸𑀲𑀸𑀫𑀜𑁆𑀜𑀦𑀬𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁆𑀢𑀸. 𑀅𑀣 𑀣𑁂𑀭𑁂𑀦 𑀘𑀢𑀼𑀭𑀲𑁆𑀲𑀁 𑀯𑀼𑀢𑁆𑀢𑀁 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀲𑀸𑀫𑀡𑁂𑀭𑁄 𑀲𑀬𑀁 𑀯𑀢𑁆𑀯𑀸 𑀯𑀤𑀸𑀧𑁂𑀢𑀺, 𑀉𑀪𑀢𑁄𑀲𑀼𑀤𑁆𑀥𑀺 𑀏𑀯 𑀳𑁄𑀢𑀺 𑀣𑁂𑀭𑁂𑀦 𑀯𑀼𑀢𑁆𑀢𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁄 𑀅𑀲𑀸𑀥𑀸𑀭𑀡𑁂 𑀩𑀼𑀤𑁆𑀥𑀕𑀼𑀡𑁂, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁄 𑀦𑀺𑀩𑁆𑀩𑀸𑀦𑀁, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁄 𑀲𑁂𑀓𑁆𑀔𑀥𑀫𑁆𑀫𑀁, 𑀅𑀲𑁂𑀓𑁆𑀔𑀥𑀫𑁆𑀫𑀜𑁆𑀘 𑀲𑀭𑀡𑀁 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀲𑀭𑀡𑀢𑁆𑀢𑀬𑀲𑀗𑁆𑀓𑀭𑀤𑁄𑀲𑁄. 𑀲𑀩𑁆𑀩𑀫𑀲𑁆𑀲 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑁆𑀢𑀺 𑀤𑀲𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀫𑀼𑀢𑁆𑀢𑀁 𑀧𑀭𑀸𑀫𑀸𑀲𑀸𑀧𑀭𑀸𑀫𑀸𑀲𑀸𑀤𑀺. ‘‘𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀯𑀺𑀦𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀲𑁂𑀔𑀺𑀬𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀺𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀫𑀦𑁂𑀦 𑀧𑀽𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀘𑀸𑀭𑀺𑀢𑁆𑀢𑀲𑁆𑀲 𑀅𑀓𑀭𑀡𑁂 𑀯𑀸𑀭𑀺𑀢𑁆𑀢𑀲𑁆𑀲 𑀓𑀭𑀡𑁂 𑀤𑀡𑁆𑀟𑀓𑀫𑁆𑀫𑀸𑀭𑀳𑁄 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺.
𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀤𑀼𑀢𑀺𑀬𑀫𑀸𑀭𑀓𑀣𑀸𑀯𑀡𑁆𑀡𑀦𑀸
𑁩𑁫. ‘‘𑀢𑁂𑀦 𑀳𑁂𑀢𑀼𑀦𑀸’’𑀢𑀺 𑀯𑀘𑀦𑀢𑁄 𑀧𑀸𑀴𑀺𑀬𑀁 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺 𑀳𑁂𑀢𑁆𑀯𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀤𑀼𑀢𑀺𑀬𑀫𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀉𑀭𑀼𑀯𑁂𑀮𑀧𑀸𑀝𑀺𑀳𑀸𑀭𑀺𑀬𑀓𑀣𑀸𑀯𑀡𑁆𑀡𑀦𑀸
𑁩𑁭-𑁮. 𑀯𑀲𑁂𑀬𑁆𑀬𑀸𑀫𑀸𑀢𑀺 ‘‘𑀢𑁆𑀯𑀜𑁆𑀘 𑀅𑀳𑀜𑁆𑀘 𑀯𑀲𑁂𑀬𑁆𑀬𑀸𑀫𑀸’’𑀢𑀺 𑀧𑀺𑀬𑀯𑀘𑀦𑁂𑀦 𑀢𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀯𑀼𑀢𑁆𑀢𑀁 𑀓𑀺𑀭. 𑀢𑁂𑀚𑀲𑀸 𑀢𑁂𑀚𑀦𑁆𑀢𑀺 𑀆𑀦𑀼𑀪𑀸𑀯𑁂𑀦 𑀆𑀦𑀼𑀪𑀸𑀯𑀁. 𑀢𑁂𑀚𑁄𑀥𑀸𑀢𑀼𑀬𑀸 𑀯𑀸 𑀢𑁂𑀚𑁄𑀥𑀸𑀢𑀼𑀁. 𑀉𑀪𑀺𑀦𑁆𑀦𑀁 𑀲𑀚𑁄𑀢𑀺𑀪𑀽𑀢𑀸𑀦𑀦𑁆𑀢𑀺 𑀅𑀦𑀸𑀤𑀭𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀪𑀸𑀯𑀲𑀢𑁆𑀢𑀫𑀻𑀅𑀢𑁆𑀣𑁂 𑀯𑀸. 𑀅𑀕𑁆𑀬𑀸𑀕𑀸𑀭𑀫𑁂𑀯 𑀆𑀤𑀺𑀢𑁆𑀢𑀁, 𑀦 𑀢𑀢𑁆𑀣 𑀯𑀲𑀦𑀓𑁄 𑀲𑀢𑁆𑀢𑀚𑀸𑀢𑀺𑀓𑁄. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀇𑀤𑁆𑀥𑀺𑀯𑀺𑀲𑀬𑁄. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀅𑀕𑁆𑀬𑀸𑀕𑀸𑀭𑀫𑁆𑀧𑀺 𑀅𑀦𑀸𑀤𑀺𑀢𑁆𑀢𑀁 𑀦𑀸𑀥𑀺𑀝𑁆𑀞𑀸𑀲𑀻𑀢𑀺? 𑀅𑀢𑁆𑀢𑀦𑁄 𑀤𑀼𑀓𑁆𑀔𑀼𑀧𑁆𑀧𑀸𑀤𑀸𑀪𑀸𑀯𑀲𑁆𑀲 𑀅𑀦𑀢𑀺𑀯𑀺𑀫𑁆𑀳𑀸𑀤𑀺𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀓𑀺𑀫𑀢𑁆𑀣𑀁 𑀧𑀭𑀲𑀦𑁆𑀢𑀓𑀁 𑀫𑀳𑀸𑀲𑀫𑁆𑀪𑀸𑀭𑀧𑀯𑀢𑁆𑀢𑀁 𑀢𑀁 𑀯𑀺𑀦𑀸𑀲𑁂𑀢𑀻𑀢𑀺? 𑀧𑀼𑀦 𑀬𑀣𑀸𑀧𑁄𑀭𑀸𑀡𑀁 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀓𑀢𑁆𑀢𑀼𑀓𑀸𑀫𑀢𑀸𑀥𑀺𑀧𑁆𑀧𑀸𑀬𑀢𑁄. 𑀧𑀭𑀺𑀬𑀸𑀤𑀺𑀦𑁆𑀦𑁄𑀢𑀺 𑀔𑀬𑀁 𑀦𑀻𑀢𑁄. 𑀢𑁂𑀚𑀲𑀸 𑀢𑁂𑀚𑀦𑁆𑀢𑀺 𑀆𑀦𑀼𑀪𑀸𑀯𑁂𑀦 𑀆𑀦𑀼𑀪𑀸𑀯𑀁. 𑀅𑀕𑁆𑀬𑀸𑀕𑀸𑀭𑀲𑁆𑀲 𑀧𑀭𑀺𑀢𑁆𑀢𑀢𑁆𑀢𑀸 𑀇𑀢𑀭𑁄 𑀅𑀢𑁆𑀣𑁄 𑀦 𑀲𑀫𑁆𑀪𑀯𑀢𑀺. 𑀅𑀬𑀫𑀢𑁆𑀣𑁄 ‘‘𑀫𑀓𑁆𑀔𑀁 𑀅𑀲𑀳𑀫𑀸𑀦𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀯𑀺𑀬 𑀲𑀫𑁂𑀢𑀺. 𑀇𑀤𑁆𑀥𑀸𑀦𑀼𑀪𑀸𑀯𑀫𑀓𑁆𑀔𑀦𑀜𑁆𑀳𑀺 𑀢𑀢𑁆𑀣 𑀫𑀓𑁆𑀔𑁄 𑀦𑀸𑀫. 𑀧𑀢𑁆𑀢𑁂𑀦𑀸𑀢𑀺 𑀧𑀤𑀼𑀫𑀧𑀢𑁆𑀢𑁂𑀦𑀸𑀢𑀺𑀧𑀺 𑀧𑁄𑀭𑀸𑀡𑀸. 𑀧𑀤𑀼𑀫𑀺𑀦𑀺𑀲𑀡𑁆𑀟𑁂 𑀞𑀺𑀢𑁄 𑀳𑀺 𑀪𑀕𑀯𑀸 𑀢𑀢𑁆𑀣 𑀅𑀳𑁄𑀲𑀻𑀢𑀺 𑀢𑁂𑀲𑀁 𑀫𑀢𑀺.
𑁩𑁯. 𑀤𑀺𑀦𑁆𑀦𑀦𑁆𑀢𑀺 𑀅𑀦𑀼𑀫𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀻𑀢𑁄 𑀦𑀺𑀩𑁆𑀪𑀬𑁄. 𑀓𑀲𑁆𑀫𑀸? 𑀬𑀢𑁄 𑀲𑁄 𑀫𑀕𑁆𑀕𑁂𑀦 𑀪𑀬𑀫𑀢𑀻𑀢𑁄. ‘‘𑀲𑀼𑀫𑀦𑀫𑀦𑀲𑁄𑀢𑀺 𑀲𑀼𑀦𑁆𑀤𑀭𑀘𑀺𑀢𑁆𑀢𑀲𑀗𑁆𑀔𑀸𑀢𑀫𑀦𑁄. 𑀲𑀼𑀫𑀦𑁄 𑀏𑀯 𑀯𑀸’’𑀢𑀺 𑀮𑀺𑀔𑀺𑀢𑀁. 𑀢𑁂𑀚𑁄𑀯𑀸𑀢𑀺 𑀅𑀕𑁆𑀕𑀺 𑀯𑀺𑀬. 𑀥𑀸𑀢𑀼𑀓𑀼𑀲𑀮𑁄𑀢𑀺 𑀢𑁂𑀚𑁄𑀥𑀸𑀢𑀼𑀫𑁆𑀳𑀺 𑀓𑀼𑀲𑀮𑁄. ‘‘𑀩𑁆𑀬𑀯𑀳𑀺𑀢𑀸 𑀘𑁂’’𑀢𑀺 𑀲𑀤𑁆𑀤𑀮𑀓𑁆𑀔𑀡𑀢𑁆𑀢𑀸 𑀘 𑀉𑀧𑀲𑀕𑁆𑀕𑁄. 𑀢𑁂𑀚𑁄𑀥𑀸𑀢𑀼𑀲𑀫𑀸𑀧𑀢𑁆𑀢𑀻𑀲𑀼 𑀓𑀼𑀲𑀮𑁄 𑀇𑀘𑁆𑀘𑁂𑀯𑀢𑁆𑀣𑁄. 𑀉𑀤𑀺𑀘𑁆𑀙𑀭𑁂𑀢𑀺 𑀉𑀮𑁆𑀮𑁄𑀓𑁂𑀲𑀼𑀁. ‘‘𑀲𑀁𑀧𑀭𑀺𑀯𑀸𑀭𑁂𑀲𑀼’’𑀦𑁆𑀢𑀺 𑀘 𑀮𑀺𑀔𑀺𑀢𑀁. 𑀇𑀢𑀺 𑀏𑀯𑀁 𑀪𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀳𑀢𑀸𑀢𑀺 𑀲𑀫𑀸𑀢𑀺 𑀅𑀢𑁆𑀣𑁄, 𑀓𑀸𑀴𑀓𑀸𑀯 𑀳𑁄𑀦𑁆𑀢𑀻𑀢𑀺 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀈𑀲𑀓𑀫𑁆𑀧𑀺 𑀩𑁆𑀬𑀸𑀧𑀸𑀭𑀁 𑀅𑀓𑀢𑁆𑀯𑀸 𑀉𑀧𑀲𑀫𑀸𑀦𑀼𑀭𑀽𑀧𑀁 𑀢𑀺𑀝𑁆𑀞𑀦𑁆𑀢𑀺. 𑀬𑁂 𑀘 𑀅𑀦𑁂𑀓𑀯𑀡𑁆𑀡𑀸 𑀅𑀘𑁆𑀘𑀺𑀬𑁄 𑀳𑁄𑀦𑁆𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀻𑀮𑀸 𑀅𑀣 𑀮𑁄𑀳𑀺𑀢𑀺𑀓𑀸’’𑀢𑀺𑀆𑀤𑀺𑀫𑀸𑀳.
𑁪𑁦. 𑀘𑀢𑀼𑀤𑁆𑀤𑀺𑀲𑀸𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼.
𑁪𑁪. 𑀧𑀁𑀲𑀼𑀓𑀽𑀮𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀧𑀭𑀺𑀬𑁂𑀲𑀫𑀸𑀦𑀲𑁆𑀲 𑀧𑀝𑀺𑀮𑀸𑀪𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀧𑀸𑀝𑀺𑀳𑀻𑀭𑀤𑀲𑁆𑀲𑀦𑀢𑁆𑀣𑀸𑀬 𑀘 𑀲𑀸 𑀧𑀭𑀺𑀬𑁂𑀲𑀦𑀸. 𑀲𑀸 𑀅𑀬𑀁 𑀲𑀸𑀬𑀁. 𑀢𑀸 𑀇𑀫𑀸 𑀢𑀬𑀺𑀫𑀸. 𑀤𑁆𑀯𑁂 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀆𑀬𑀸𑀫𑀺 𑀅𑀳𑀁 𑀆𑀬𑀫𑀳𑀁. 𑀏𑀢𑀦𑁆𑀢𑀺 𑀏𑀢𑀲𑁆𑀲. 𑀬𑀣𑀸 𑀫𑀬𑀦𑁆𑀢𑀺 𑀬𑀲𑁆𑀫𑀸 𑀫𑀬𑀁.
𑁫𑁦-𑁫𑁧. 𑀉𑀤𑀓𑀯𑀸𑀳𑀓𑁄𑀢𑀺 𑀉𑀤𑀓𑁄𑀖𑁄. 𑀉𑀤𑀓𑀲𑁄𑀢𑁄𑀢𑀺 𑀧𑁄𑀭𑀸𑀡𑀸. ‘‘𑀬𑀸𑀬 𑀢𑁆𑀯’’𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀺𑀭𑀧𑀝𑀺𑀓𑀸𑀢𑀺 𑀘𑀺𑀭𑀧𑀪𑀼𑀢𑀺, 𑀦𑀸𑀕𑀤𑀫𑀦𑀢𑁄 𑀧𑀝𑁆𑀞𑀸𑀬 𑀘𑀺𑀭𑀧𑀝𑀺𑀓𑀸. ‘‘𑀘𑀺𑀭𑀧𑀝𑀺𑀲𑀗𑁆𑀔𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀓𑁂𑀲𑀫𑀺𑀲𑁆𑀲𑀦𑁆𑀢𑀺𑀆𑀤𑀺𑀫𑁆𑀳𑀺 𑀅𑀩𑁆𑀩𑁄𑀓𑀺𑀡𑁆𑀡𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀢𑁆𑀢𑀸 𑀓𑁂𑀲𑀸𑀤𑀬𑁄𑀯 𑀓𑁂𑀲𑀫𑀺𑀲𑁆𑀲𑀸𑀢𑀺 𑀧𑁄𑀭𑀸𑀡𑀸. 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀦𑁆𑀢𑀺 𑀏𑀢𑁆𑀣 𑀔𑀸𑀭𑀻 𑀯𑀼𑀘𑁆𑀘𑀢𑀺 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑁄. 𑀚𑀝𑀺𑀮𑁂 𑀧𑀸𑀳𑁂𑀲𑀻𑀢𑀺 𑀤𑁆𑀯𑁂 𑀢𑀬𑁄 𑀢𑀸𑀧𑀲𑁂 𑀧𑀸𑀳𑁂𑀲𑀺. ‘‘𑀲𑁄𑀴𑀲𑀸𑀢𑀺𑀭𑁂𑀓𑀅𑀟𑁆𑀠𑀉𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀁.
𑁫𑁪. 𑀅𑀕𑁆𑀕𑀺𑀳𑀼𑀢𑁆𑀢𑁂 𑀓𑀢𑀧𑀭𑀺𑀘𑀬𑀢𑁆𑀢𑀸 𑀪𑀕𑀯𑀸 𑀢𑁂𑀲𑀁 𑀆𑀤𑀺𑀢𑁆𑀢𑀧𑀭𑀺𑀬𑀸𑀬-𑀫𑀪𑀸𑀲𑀺 (𑀲𑀁. 𑀦𑀺. 𑁪.𑁨𑁮). 𑀢𑀢𑁆𑀣 𑀏𑀓𑀘𑁆𑀘𑀁 𑀆𑀭𑀫𑁆𑀫𑀡𑀯𑀲𑁂𑀦 𑀆𑀤𑀺𑀢𑁆𑀢𑀁 𑀘𑀓𑁆𑀔𑀸𑀤𑀺 𑀭𑀸𑀕𑀕𑁆𑀕𑀺𑀦𑀸, 𑀏𑀓𑀘𑁆𑀘𑀁 𑀲𑀫𑁆𑀧𑀬𑁄𑀕𑀯𑀲𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀬𑀺𑀢𑀸𑀤𑀺𑀓𑁂𑀦𑁂𑀯, 𑀏𑀓𑀘𑁆𑀘𑀁 𑀅𑀪𑀺𑀪𑀽𑀢𑀢𑁆𑀣𑁂𑀦 𑀘𑀓𑁆𑀔𑀸𑀤𑀺 𑀏𑀯 𑀚𑀸𑀢𑀺𑀆𑀤𑀺𑀦𑀸, 𑀏𑀓𑀘𑁆𑀘𑀁 𑀧𑀘𑁆𑀘𑀬𑀢𑁆𑀣𑁂𑀦, 𑀢𑀤𑁂𑀯 𑀲𑁄𑀓𑀸𑀤𑀺𑀦𑀸𑀢𑀺 𑀬𑀣𑀸𑀲𑀫𑁆𑀪𑀯𑀫𑁂𑀢𑁆𑀣 𑀆𑀤𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀔𑀮𑀓𑁆𑀔𑀡𑀫𑁂𑀯𑁂𑀓𑀁 𑀧𑀸𑀓𑀝𑀁, 𑀢𑀤𑀦𑀼𑀲𑀸𑀭𑁂𑀦 𑀧𑀦 𑀇𑀢𑀭𑀁 𑀮𑀓𑁆𑀔𑀡𑀤𑁆𑀯𑀬𑀫𑁆𑀧𑀺 𑀢𑁂𑀳𑀺 𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀤𑀼𑀓𑁆𑀔𑀸𑀓𑀸𑀭𑀲𑁆𑀲 𑀇𑀢𑀭𑀸𑀓𑀸𑀭𑀤𑀻𑀧𑀦𑀢𑁄. 𑀲𑀦𑁆𑀢𑀲𑀼𑀔𑀢𑀡𑁆𑀳𑀸𑀪𑀺𑀦𑀺𑀯𑀺𑀝𑁆𑀞𑀢𑁆𑀢𑀸 𑀧𑀦𑁂𑀲𑀁 𑀤𑀼𑀓𑁆𑀔𑀮𑀓𑁆𑀔𑀡𑀧𑀼𑀩𑁆𑀩𑀗𑁆𑀕𑀫𑀸 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.
𑀉𑀭𑀼𑀯𑁂𑀮𑀧𑀸𑀝𑀺𑀳𑀸𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀓𑀣𑀸𑀯𑀡𑁆𑀡𑀦𑀸
𑁫𑁫-𑁭. 𑀯𑀢𑁆𑀣𑀼𑀓𑀸𑀫𑀪𑀽𑀢𑀸 𑀇𑀢𑁆𑀣𑀺𑀬𑁄 𑀓𑀸𑀫𑀺𑀢𑁆𑀣𑀺𑀬𑁄. 𑀤𑀼𑀢𑀺𑀬𑀸𑀤𑀬𑁄 𑀅𑀲𑁆𑀲𑀸𑀲𑀓𑀸. 𑀬𑀲𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑁂 𑀏𑀯 𑀪𑀕𑀯𑀢𑀺 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀮𑁄𑀓𑁂 𑀧𑀞𑀫𑀫𑁂𑀯 𑀯𑀲𑁆𑀲𑀲𑀳𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀩𑁆𑀭𑀳𑁆𑀫𑀸𑀦𑁄 𑀘 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀯𑁂𑀤𑁂𑀲𑀼 𑀲𑀳𑀲𑁆𑀲𑀢𑁆𑀢𑀬𑀫𑀢𑁆𑀢𑀁 𑀩𑀼𑀤𑁆𑀥𑀧𑀝𑀺𑀲𑀁𑀬𑀼𑀢𑁆𑀢𑀁 𑀧𑀭𑀺𑀬𑀢𑁆𑀢𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀘𑁂𑀦𑁆𑀢𑀺, 𑀪𑀕𑀯𑀢𑁄 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀘 𑀩𑀼𑀤𑁆𑀥𑀓𑀣𑀸 𑀮𑀓𑁆𑀔𑀡𑀜𑁆𑀜𑀽𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀉𑀧𑁆𑀧𑀸𑀤𑀺𑀢𑀸, 𑀧𑀢𑁆𑀣𑀝𑀸 𑀮𑁄𑀓𑁂, 𑀢𑀲𑁆𑀫𑀸 𑀬𑀼𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑀣𑀸. ‘‘𑀢𑀫𑀤𑁆𑀤𑀲 𑀩𑀺𑀫𑁆𑀩𑀺𑀲𑀸𑀭𑁄, 𑀧𑀸𑀲𑀸𑀤𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁄’’𑀢𑀺𑀆𑀤𑀺𑀕𑀸𑀣𑀸𑀳𑀺 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀏𑀯 𑀅𑀪𑀺𑀲𑀺𑀢𑁆𑀢𑀢𑀸 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀺𑀤𑁆𑀥𑀸.
𑁫𑁮. 𑀇𑀥𑀸𑀯𑀼𑀲𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀳𑁄𑀢𑀺 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀡𑀼𑀦𑁆𑀦𑀧𑀘𑁆𑀘𑁂𑀓𑀲𑀘𑁆𑀘𑁄 𑀲𑀫𑀯𑀬𑀲𑀝𑁆𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄𑀢𑀺 (𑀤𑀻. 𑀦𑀺. 𑁩.𑁩𑁪𑁮, 𑁩𑁬𑁦; 𑀅. 𑀦𑀺. 𑁧𑁦.𑁧𑁯) 𑀤𑀲 𑀅𑀭𑀺𑀬𑀯𑀸𑀲𑀸 𑀦𑀸𑀫. 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀅𑀝𑁆𑀞 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀻𑀢𑀺𑀧𑀺 𑀧𑁄𑀭𑀸𑀡𑀸. 𑀢𑀢𑁆𑀣 𑀦𑀻𑀯𑀭𑀡𑀸 𑀧𑀜𑁆𑀘𑀗𑁆𑀕𑀸 𑀘. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀙𑀴𑀗𑁆𑀕𑀸. 𑀲𑀢𑀸𑀭𑀓𑁆𑀔𑁂𑀦 𑀏𑀓𑀸𑀭𑀓𑁆𑀔𑀸. 𑀲𑀗𑁆𑀔𑀸𑀬 𑀏𑀓𑀁 𑀧𑀝𑀺𑀲𑁂𑀯𑀢𑀺, 𑀅𑀥𑀺𑀯𑀸𑀲𑁂𑀢𑀺, 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀗𑁆𑀔𑀸𑀬 𑀏𑀓𑀁 𑀯𑀺𑀦𑁄𑀤𑁂𑀢𑀻𑀢𑀺 𑀅𑀬𑀁 𑀘𑀢𑀼𑀭𑀸𑀧𑀲𑁆𑀲𑁂𑀦𑁄. 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀣𑀼𑀧𑀘𑁆𑀘𑁂𑀓𑀲𑀘𑁆𑀘𑀸𑀦𑀺 𑀘𑀢𑁆𑀢𑀸𑀭𑀺 𑀧𑀳𑀻𑀦𑀸𑀦𑀺, 𑀏𑀯𑀁 𑀧𑀡𑀼𑀦𑁆𑀦𑀧𑀘𑁆𑀘𑁂𑀓𑀲𑀘𑁆𑀘𑁄. 𑀓𑀸𑀫𑁂𑀲𑀦𑀸 𑀪𑀯𑁂𑀲𑀦𑀸 𑀧𑀳𑀻𑀦𑀸 𑀳𑁄𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀏𑀯𑀁 𑀲𑀫𑀯𑀬𑀲𑀝𑁆𑀞𑁂𑀲𑀦𑁄. 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄 𑀧𑀳𑀻𑀦𑁄 𑀳𑁄𑀢𑀺, 𑀏𑀯𑀁 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄, 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀏𑀯𑀁 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺. 𑀭𑀸𑀕𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄…𑀧𑁂… 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄𑀢𑀺 𑀧𑀚𑀸𑀦𑀸𑀢𑀺, 𑀤𑁄𑀲𑁄, 𑀫𑁄𑀳𑁄 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄𑀢𑀺 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄𑀢𑀺.
‘‘𑀞𑀸𑀦𑀸𑀞𑀸𑀦𑀁 𑀯𑀺𑀧𑀸𑀓𑀜𑁆𑀘, 𑀜𑀸𑀡𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁;
𑀅𑀦𑁂𑀓𑀥𑀸𑀢𑀼𑀬𑁄 𑀮𑁄𑀓𑀁, 𑀅𑀥𑀺𑀫𑀼𑀢𑁆𑀢𑀺𑀜𑁆𑀘 𑀧𑀸𑀡𑀺𑀦𑀁.
‘‘𑀚𑀸𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘, 𑀧𑀭𑁄𑀧𑀭𑀺𑀬𑀢𑀁 𑀫𑀼𑀦𑀺;
𑀛𑀸𑀦𑀸𑀤𑀺𑀲𑀁𑀓𑀺𑀮𑁂𑀲𑀸𑀤𑀺-𑀜𑀸𑀡𑀁 𑀯𑀺𑀚𑁆𑀚𑀢𑁆𑀢𑀬𑀁 𑀢𑀣𑀸’’𑀢𑀺. 𑁋
𑀇𑀫𑀸𑀦𑀺 𑀤𑀲 𑀩𑀮𑀸𑀦𑀺. 𑀅𑀲𑁂𑀓𑁆𑀔𑀗𑁆𑀕𑀸𑀦𑀺 𑀦𑀸𑀫 𑀅𑀲𑁂𑀓𑁆𑀔𑀸 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺 𑀅𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺. 𑀢𑀢𑁆𑀣 𑀤𑀲𑀫𑀁 𑀅𑀲𑁂𑀓𑁆𑀔𑀁. 𑀏𑀢𑁂𑀳𑀺 𑀤𑀲𑀳𑀺 𑀘𑀼𑀧𑁂𑀢𑁄 𑀧𑀸𑀭𑀫𑀻𑀳𑀻𑀢𑀺 𑀧𑁄𑀭𑀸𑀡𑀸.
𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸
𑁬𑁦. 𑀓𑀺𑀁 𑀓𑀸𑀳𑀲𑀻𑀢𑀺 𑀓𑀺𑀁 𑀓𑀸𑀳𑀢𑀺. ‘‘𑀓𑀺𑀁 𑀓𑀭𑁄𑀢𑀺, 𑀓𑀺𑀁 𑀓𑀭𑁄𑀲𑀻’’𑀢𑀺 𑀯𑀸 𑀩𑁆𑀬𑀜𑁆𑀚𑀦𑀁 𑀩𑀳𑀼𑀁 𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀸𑀤𑁂𑀦𑁆𑀢𑁄𑀢𑀺 𑀦𑀺𑀕𑀫𑁂𑀦𑁆𑀢𑁄. ‘‘𑀧𑀘𑁆𑀘𑀩𑁆𑀬𑀣𑀸, 𑀧𑀘𑁆𑀘𑀩𑁆𑀬𑀣’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀓𑀧𑁆𑀧𑀦𑀳𑀼𑀢𑁂𑀳𑀻𑀢𑀺 𑀏𑀢𑁆𑀣 𑀤𑀲𑀓𑀸𑀦𑀁 𑀲𑀢𑀁 𑀲𑀳𑀲𑁆𑀲𑀁, 𑀲𑀳𑀲𑁆𑀲𑀸𑀦𑀁 𑀲𑀢𑀁 𑀲𑀢𑀲𑀳𑀲𑁆𑀲𑀁, 𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀓𑁄𑀝𑀺, 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀧𑀓𑁄𑀝𑀺, 𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀓𑁄𑀝𑀺𑀧𑀓𑁄𑀝𑀺, 𑀓𑁄𑀝𑀺𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀦𑀳𑀼𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀧𑁆𑀧𑀦𑀳𑀼𑀢𑁂𑀳𑀻𑀢𑀺 𑀏𑀯𑀫𑀦𑀼𑀲𑀸𑀭𑀢𑁄 𑀅𑀩𑁆𑀪𑀢𑀻𑀢𑀁 𑀦𑀸𑀫𑀸𑀢𑀺 𑀔𑀦𑁆𑀥𑀓𑀪𑀸𑀡𑀓𑀸𑀦𑀁 𑀧𑀸𑀞𑁄𑀢𑀺.
𑁬𑁩. ‘‘𑀓𑀼𑀮𑀘𑁆𑀙𑁂𑀤𑀸𑀬𑀸’’𑀢𑀺 𑀧𑀸𑀞𑁄, 𑀓𑀼𑀮𑀼𑀧𑀘𑁆𑀙𑁂𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸 ‘‘𑀥𑀫𑁆𑀫𑁂𑀦 𑀓𑀺𑀭 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀦𑀬𑀦𑁆𑀢𑀺, 𑀦𑀸𑀥𑀫𑁆𑀫𑁂𑀦𑀸’’𑀢𑀺 𑀦 𑀧𑀼𑀦 𑀘𑁄𑀤𑁂𑀲𑀼𑀦𑁆𑀢𑀺 𑀏𑀯𑀁 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄.
𑀏𑀢𑁆𑀢𑀸𑀯𑀢𑀸 𑀣𑁂𑀭𑁄 𑀦𑀺𑀤𑀸𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋
‘‘𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺 𑀏𑀢𑁆𑀣 𑀫𑀽𑀮-
𑀕𑀦𑁆𑀣𑀲𑁆𑀲 𑀲𑀺𑀤𑁆𑀥𑀺𑀓𑁆𑀓𑀫𑀤𑀲𑁆𑀲𑀦𑁂𑀦;
𑀦𑀺𑀤𑀸𑀦𑀦𑀺𑀝𑁆𑀞𑀸𑀦𑀫𑀓𑀁𑀲𑀼 𑀥𑀫𑁆𑀫-
𑀲𑀗𑁆𑀕𑀸𑀳𑀓𑀸 𑀢𑁂 𑀯𑀺𑀦𑀬𑀓𑁆𑀓𑀫𑀜𑁆𑀜𑀽.
‘‘𑀦𑀺𑀤𑀸𑀦𑀮𑀻𑀦𑀢𑁆𑀣𑀧𑀤𑀸𑀦𑀫𑁂𑀯,
𑀦𑀺𑀤𑀸𑀦𑀺𑀝𑁆𑀞𑀸𑀦𑀫𑀺𑀤𑀁 𑀯𑀺𑀤𑀺𑀢𑁆𑀯𑀸;
𑀇𑀢𑁄 𑀧𑀭𑀁 𑀘𑁂 𑀯𑀺𑀦𑀬𑀢𑁆𑀣𑀬𑀼𑀢𑁆𑀢-
𑀧𑀤𑀸𑀦𑀺 𑀯𑀻𑀫𑀁𑀲𑀦𑀫𑁂𑀯 𑀜𑁂𑀬𑁆𑀬’’𑀦𑁆𑀢𑀺.
𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸
𑁬𑁪. 𑀩𑀼𑀤𑁆𑀥𑀼𑀧𑀚𑁆𑀛𑀸𑀬𑀓𑀸𑀦𑀁 𑀇𑀢𑀭𑁂𑀲𑀁 𑀏𑀳𑀺𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀓𑀧𑁆𑀧𑀢𑁄 𑀦𑁂𑀲𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀤𑀺𑀲𑀢𑁆𑀢𑀸 ‘‘𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀸. 𑀦 𑀓𑁂𑀯𑀮𑀜𑁆𑀘 𑀇𑀢𑁆𑀣𑀫𑁆𑀪𑀽𑀢𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀅𑀧𑀺𑀘 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀻𑀢𑀺𑀆𑀤𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀧𑀺𑀧𑀸𑀲𑀸𑀲𑀳𑀦𑀢𑁄, 𑀇𑀢𑀭𑁂𑀲𑀁 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀢𑁆𑀢𑀸 𑀘.
𑁬𑁫. 𑀓𑁂𑀦 𑀓𑁄 𑀉𑀧𑀚𑁆𑀛𑀸𑀬𑁄 𑀕𑀳𑁂𑀢𑀩𑁆𑀩𑁄𑀢𑀺? ‘‘𑀢𑀤𑀸 𑀲𑁄 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑀺𑀢𑁄, 𑀏𑀢𑀭𑀳𑀺 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀳𑁄𑀢𑀺. 𑀉𑀧𑀚𑁆𑀛𑀸𑀬𑁂𑀦 𑀘 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁 𑀲𑀦𑁆𑀥𑀸𑀬𑀸’’𑀢𑀺 𑀓𑁂𑀳𑀺𑀘𑀺 𑀮𑀺𑀔𑀺𑀢𑀁. 𑀢𑀁 𑀢𑁂 𑀏𑀯𑀁 𑀚𑀸𑀦𑀦𑁆𑀢𑀺 ‘‘𑀉𑀧𑀚𑁆𑀛𑀸𑀬𑁂𑀦 ‘𑀲𑀸𑀳𑀽’𑀢𑀺𑀆𑀤𑀺𑀦𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 ‘𑀲𑀸𑀥𑀼 𑀲𑀼𑀝𑁆𑀞𑀼 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’𑀢𑀺 𑀯𑀘𑀦𑀁 𑀓𑁂𑀯𑀮𑀁 𑀪𑀺𑀓𑁆𑀔𑀽𑀳𑀺 𑀆𑀘𑀺𑀡𑁆𑀡𑀫𑁂𑀯, 𑀦 𑀓𑀢𑁆𑀣𑀘𑀺 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀢𑁂𑀦 𑀉𑀧𑀚𑁆𑀛𑀸𑀬𑁄 𑀕𑀳𑀺𑀢𑁄𑀯 𑀳𑁄𑀢𑀻’’𑀢𑀺. 𑀢𑀢𑁆𑀣 𑀲𑀸𑀳𑀽𑀢𑀺 𑀲𑀸𑀥𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀳𑀽𑀢𑀺 𑀮𑀳𑀼, 𑀢𑁆𑀯𑀁 𑀫𑀫 𑀦 𑀪𑀸𑀭𑀺𑀬𑁄𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀧𑀸𑀬𑀺𑀓𑀦𑁆𑀢𑀺 𑀉𑀧𑀸𑀬𑀧𑀝𑀺𑀲𑀁𑀬𑀼𑀢𑁆𑀢𑀁, 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀢𑁆𑀯𑀁 𑀫𑁂 𑀇𑀢𑁄 𑀧𑀝𑁆𑀞𑀸𑀬 𑀪𑀸𑀭𑁄 𑀚𑀸𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀦𑁆𑀢𑀺 𑀅𑀦𑀼𑀭𑀽𑀧𑀁 𑀢𑁂 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀦𑁆𑀢𑀺 𑀅𑀢𑁆𑀣𑁄.
𑁬𑁬. 𑀢𑀸𑀤𑀺𑀲𑀫𑁂𑀯 𑀫𑀼𑀔𑀥𑁄𑀯𑀦𑁄𑀤𑀓𑀁 𑀉𑀢𑀼𑀫𑁆𑀳𑀺 𑀏𑀓𑀲𑀪𑀸𑀕𑁂𑀢𑀺. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦-𑀓𑀸𑀭𑀢𑁄 𑀧𑀝𑁆𑀞𑀸𑀬. 𑀢𑁂𑀦 ‘‘𑀦𑀸𑀢𑀺𑀤𑀽𑀭𑁂 𑀕𑀦𑁆𑀢𑀩𑁆𑀩𑀁, 𑀦𑀸𑀘𑁆𑀘𑀸𑀲𑀦𑁆𑀦𑁂 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦-𑀓𑀸𑀭𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀻𑀢𑀺 𑀏𑀓𑁂. 𑀲𑀘𑀺𑀢𑁆𑀢𑀓𑀸 𑀅𑀬𑀁 𑀆𑀧𑀢𑁆𑀢𑀺, 𑀉𑀤𑀸𑀳𑀼 𑀅𑀘𑀺𑀢𑁆𑀢𑀓𑀸𑀢𑀺? 𑀅𑀦𑀸𑀤𑀭𑀺𑀬𑀧𑀘𑁆𑀘𑀬𑀢𑁆𑀢𑀸 𑀲𑀘𑀺𑀢𑁆𑀢𑀓𑀸. 𑀅𑀦𑀸𑀤𑀭𑀺𑀬𑀧𑀘𑁆𑀘𑀬𑀢𑀸 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀅𑀦𑀸𑀤𑀭𑀺𑀬𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀳𑀺𑀢𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀲𑁂𑀔𑀺𑀬𑀸𑀦𑀁 𑀕𑀡𑀧𑀭𑀺𑀘𑁆𑀙𑁂𑀤𑀸𑀓𑀭𑀡𑀜𑁆𑀳𑀺 𑀔𑀦𑁆𑀥𑀓𑀧𑀭𑀺𑀬𑀸𑀧𑀦𑁆𑀦𑀸𑀧𑀢𑁆𑀢𑀺𑀬𑀸 𑀲𑀗𑁆𑀕𑀡𑁆𑀳𑀦𑀢𑁆𑀣𑀁. 𑀇𑀤𑀁 𑀧𑀦 𑀮𑀓𑁆𑀔𑀡𑀁 𑀘𑀸𑀭𑀺𑀢𑁆𑀢𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀦 𑀯𑀸𑀭𑀺𑀢𑁆𑀢𑁂 𑀅𑀓𑀧𑁆𑀧𑀺𑀬𑀫𑀁𑀲𑀔𑀸𑀤𑀦𑀸𑀤𑀺𑀆𑀧𑀢𑁆𑀢𑀻𑀦𑀁 𑀅𑀘𑀺𑀢𑁆𑀢𑀓𑀢𑁆𑀢𑀸. 𑀔𑀦𑁆𑀥𑀓𑀯𑀸𑀭𑀺𑀢𑁆𑀢𑀸𑀦𑀁 𑀢𑁂𑀳𑀺 𑀲𑀗𑁆𑀕𑀳𑁄, 𑀲𑁂𑀔𑀺𑀬𑀯𑀸𑀭𑀺𑀢𑁆𑀢𑁂𑀬𑁂𑀯 𑀅𑀘𑀺𑀢𑁆𑀢𑀓𑁂𑀳𑀺 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸𑀤𑀻𑀳𑀻𑀢𑀺 𑀆𑀘𑀭𑀺𑀬𑁄. 𑀬𑀢𑁆𑀣 𑀬𑀢𑁆𑀣 𑀦-𑀓𑀸𑀭𑁂𑀦 𑀧𑀝𑀺𑀲𑁂𑀥𑁄 𑀓𑀭𑀻𑀬𑀢𑀺, 𑀓𑀺𑀁 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀸𑀧𑀢𑁆𑀢𑀻𑀢𑀺? 𑀆𑀫. 𑀬𑀢𑁆𑀣 𑀅𑀝𑁆𑀞𑀓𑀣𑀸𑀬 𑀦𑀬𑁄 𑀦 𑀤𑀲𑁆𑀲𑀺𑀢𑁄, 𑀢𑀢𑁆𑀣 𑀲𑀩𑁆𑀩𑀢𑁆𑀣. 𑀧𑀭𑀢𑁄 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀓𑀸𑀴𑀯𑀡𑁆𑀡𑀓𑀢𑀸 𑀯𑀸 𑀲𑀼𑀥𑀸𑀩𑀤𑁆𑀥𑀸 𑀯𑀸 𑀳𑁄𑀢𑀺 𑀦𑀺𑀭𑀚𑀫𑀢𑁆𑀢𑀺𑀓𑀸, 𑀢𑀣𑀸𑀭𑀽𑀧𑀸𑀬 𑀪𑀽𑀫𑀺𑀬𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀬𑁄 𑀤𑀲𑁆𑀲𑀺𑀢𑁄.
𑀏𑀢𑁆𑀣𑀸𑀳 𑁋 𑀬𑀲𑁆𑀫𑀸 𑀧𑀸𑀴𑀺𑀬𑀁𑀬𑁂𑀯 ‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁬𑁬) 𑀪𑀕𑀯𑀢𑁄 𑀯𑀘𑀦𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁄 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂’’𑀢𑀺 𑀏𑀢𑁆𑀣 𑀓𑁄 𑀪𑀕𑀯𑀢𑁄 𑀯𑀘𑀦𑀮𑁂𑀲𑁄𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺 𑀤𑁂𑀲𑀦𑀺𑀬𑀫𑀦𑀢𑁄. 𑀉𑀧𑀚𑁆𑀛𑀸𑀬𑁂𑀦 𑀅𑀦𑀼𑀫𑀢𑀁𑀬𑁂𑀯 𑀧𑀞𑀫𑀕𑀫𑀦𑀦𑁆𑀢𑀺 𑀘𑁂? 𑀦, 𑀅𑀲𑀺𑀤𑁆𑀥𑀢𑁆𑀢𑀸, 𑀲𑀺𑀤𑁆𑀥𑁂𑀧𑀺 𑀬𑀣𑀸𑀯𑀼𑀢𑁆𑀢𑀦𑀬𑀲𑀺𑀤𑁆𑀥𑀺𑀢𑁄 𑀘. 𑀦 𑀳𑀺 𑀯𑀸𑀭𑀺𑀢𑁆𑀢𑀲𑁆𑀲 𑀅𑀦𑀼𑀫𑀢𑀺 𑀅𑀦𑀸𑀧𑀢𑁆𑀢𑀺𑀓𑀭𑀸 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀓𑁄𑀝𑁆𑀞𑀓𑀦𑁆𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀁. 𑀦 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀦 𑀦𑀺𑀤𑀳𑀺𑀢𑀩𑁆𑀩𑀁 𑀯𑀸.
𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀦𑀲𑀫𑁆𑀫𑀸𑀯𑀢𑁆𑀢𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸
𑁬𑁮. 𑀅𑀥𑀺𑀫𑀢𑁆𑀢𑀁 𑀕𑁂𑀳𑀲𑁆𑀲𑀺𑀢𑀧𑁂𑀫𑀁 𑀦 𑀳𑁄𑀢𑀻𑀢𑀺 𑀏𑀢𑁆𑀣 𑀕𑁂𑀳𑀲𑁆𑀲𑀺𑀢𑀧𑁂𑀫𑀁 𑀦 𑀅𑀓𑀼𑀲𑀮𑀫𑀺𑀘𑁆𑀘𑁂𑀯 𑀤𑀝𑁆𑀞𑀩𑁆𑀩𑀁 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁆𑀢𑀸 𑀇𑀫𑀲𑁆𑀲 𑀮𑀓𑁆𑀔𑀡𑀲𑁆𑀲. 𑀦 𑀔𑀻𑀡𑀸𑀲𑀯𑀸𑀦𑀁 𑀅𑀲𑀫𑁆𑀫𑀸𑀯𑀢𑁆𑀢𑀦𑀸𑀪𑀸𑀯𑀢𑁄𑀢𑀺 𑀘𑁂? 𑀦, 𑀢𑁂𑀲𑀁 𑀦 𑀧𑀡𑀸𑀫𑁂𑀢𑀩𑁆𑀩𑀁 𑀢𑀁𑀲𑀫𑀦𑁆𑀦𑀸𑀕𑀫𑀦𑀲𑀺𑀤𑁆𑀥𑀺𑀢𑁄, 𑀢𑀲𑁆𑀫𑀸 ‘‘𑀫𑀫𑁂𑀲 𑀪𑀸𑀭𑁄’’𑀢𑀺 𑀫𑀫𑀢𑁆𑀢𑀓𑀭𑀡𑀁 𑀢𑀢𑁆𑀣 𑀧𑁂𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀓𑁄 𑀯𑀢𑁆𑀢𑀲𑀫𑁆𑀧𑀦𑁆𑀦𑁄…𑀧𑁂… 𑀢𑁂𑀲𑀁 𑀅𑀦𑀸𑀧𑀢𑁆𑀢𑀻’𑀢𑀺 𑀏𑀢𑁆𑀣 𑀯𑀺𑀬 𑀲𑀘𑁂 𑀏𑀓𑁄 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 ‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀳𑁄𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀅𑀦𑁆𑀢𑁂𑀯𑀸𑀲𑀺𑀓𑀁 𑀯𑀸 𑀕𑀺𑀮𑀸𑀦𑀁 𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀑𑀯𑀤𑀺𑀢𑀩𑁆𑀩𑀁 𑀑𑀯𑀤𑀺𑀲𑁆𑀲𑀸𑀫𑀺, 𑀇𑀢𑀺 𑀓𑀭𑀡𑀻𑀬𑁂𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺, 𑀢𑁂 𑀏𑀯𑀸𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 ‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀯 𑀓𑁂𑀯𑀮𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀳𑁄𑀣𑀸’𑀢𑀺 𑀯𑀤𑀦𑁆𑀢𑀺, 𑀯𑀢𑁆𑀢𑀁 𑀯𑀸 𑀦 𑀲𑀸𑀤𑀺𑀬𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁.
𑀦𑀲𑀫𑁆𑀫𑀸𑀯𑀢𑁆𑀢𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀭𑀸𑀥𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸
𑁭𑁩. ‘‘𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀫𑀼𑀢𑁆𑀢𑀁 𑀧𑀽𑀢𑀺𑀓𑀸𑀬𑁄 𑀯𑀺𑀬𑀸’’𑀢𑀺 𑀯𑀢𑁆𑀯𑀸𑀧𑀺 ‘‘𑀧𑀽𑀢𑀺𑀪𑀸𑀯𑁂𑀦 𑀫𑀼𑀢𑁆𑀢𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁 𑀪𑁂𑀲𑀚𑁆𑀚𑀁 𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚’’𑀦𑁆𑀢𑀺 𑀮𑀺𑀔𑀺𑀢𑀁. 𑀲𑀩𑁆𑀩𑀢𑁆𑀣 𑀇𑀢𑁆𑀣𑀦𑁆𑀦𑀸𑀫𑁄𑀢𑀺 𑀏𑀓𑁄𑀯 𑀦-𑀓𑀸𑀭𑁄 𑀳𑁄𑀢𑀺.
𑀭𑀸𑀥𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀆𑀘𑀭𑀺𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸
𑁭𑁬. ‘‘𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑀁. ‘‘𑀆𑀬𑀲𑁆𑀫𑀢𑁄 𑀑𑀯𑀸𑀤𑀁 𑀦𑀺𑀲𑁆𑀲𑀸𑀬 𑀯𑀲𑀸𑀫𑀻’’𑀢𑀺 𑀧𑀸𑀞𑀲𑁂𑀲𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀲𑁆𑀲𑀸𑀬𑀸𑀢𑀺 𑀯𑀸 𑀦𑀺𑀲𑁆𑀲𑀬𑀸, 𑀦𑀺𑀲𑁆𑀲𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀬𑀲𑁆𑀫𑀢𑁄𑀢𑀺 𑀯𑀸 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁.
𑀆𑀘𑀭𑀺𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸
𑁮𑁩. 𑀤𑀺𑀲𑀁 𑀕𑀢𑁄𑀢𑀺 𑀢𑀢𑁆𑀣 𑀥𑀼𑀭𑀦𑀺𑀓𑁆𑀔𑀺𑀢𑁆𑀢𑀯𑀸𑀲𑁄 𑀳𑀼𑀢𑁆𑀯𑀸 𑀢𑀺𑀭𑁄𑀕𑀸𑀫𑀁 𑀕𑀢𑁄. 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺 𑀏𑀢𑁆𑀣𑀸𑀧𑀺 𑀉𑀧𑀚𑁆𑀛𑀸𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀓𑀢𑀺𑀧𑀸𑀳𑁂𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀫𑀦𑁂 𑀘𑁂𑀲 𑀉𑀲𑁆𑀲𑀸𑀳𑁄 𑀭𑀓𑁆𑀔𑀢𑀺. 𑀫𑀸 𑀇𑀥 𑀧𑀝𑀺𑀓𑁆𑀓𑀫𑀻𑀢𑀺 𑀫𑀸 𑀇𑀥 𑀕𑀘𑁆𑀙. 𑀲𑀪𑀸𑀕𑀸 𑀦𑀸𑀫 𑀉𑀧𑀚𑁆𑀛𑀸𑀬𑀲𑁆𑀲 𑀲𑀺𑀲𑁆𑀲𑀸. 𑀢𑀢𑁆𑀣 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸. 𑀬𑀤𑀺 𑀏𑀯𑀁 𑀓𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀢𑁂𑀦 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀔𑀫𑁂𑀬𑁆𑀬𑀸’’𑀢𑀺. 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀉𑀧𑀚𑁆𑀛𑀸𑀬𑁂𑀦 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀉𑀧𑀚𑁆𑀛𑀸𑀬𑀲𑀫𑁄𑀥𑀸𑀦𑀁 𑀦𑀺𑀭𑀢𑁆𑀣𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀘𑀺𑀭𑁂𑀦 𑀅𑀦𑀼𑀕𑁆𑀕𑀳𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀉𑀧𑀚𑁆𑀛𑀸𑀬𑁄𑀯 𑀦𑀺𑀲𑁆𑀲𑀬𑁄. 𑀉𑀧𑀚𑁆𑀛𑀸𑀬𑁄 𑀘𑁂 𑀅𑀮𑀚𑁆𑀚𑀻 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀯𑀸𑀭𑁂𑀢𑁆𑀯𑀸 𑀅𑀯𑀺𑀭𑀫𑀦𑁆𑀢𑀁 𑀉𑀧𑀚𑁆𑀛𑀸𑀬𑀁 𑀧𑀳𑀸𑀬 𑀯𑀺𑀦𑀸𑀧𑀺 𑀦𑀺𑀲𑁆𑀲𑀬𑀧𑀡𑀸𑀫𑀦𑁂𑀦 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀉𑀧𑀚𑁆𑀛𑀸𑀬𑀲𑁆𑀲 𑀘𑁂 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀭𑀓𑁆𑀔𑀢𑀺. 𑀧𑀓𑁆𑀔𑀧𑀡𑁆𑀟𑀓𑁄 𑀘𑁂 𑀳𑁄𑀢𑀺, 𑀦𑀺𑀲𑁆𑀲𑀬𑀚𑀸𑀢𑀺𑀓𑁄 𑀘𑁂 ‘‘𑀉𑀧𑀚𑁆𑀛𑀸𑀬𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑀁 𑀆𑀕𑀫𑁂𑀳𑀻’’𑀢𑀺 𑀯𑀤𑀢𑀺, 𑀲𑀬𑀫𑁂𑀯 𑀯𑀸 𑀆𑀕𑀫𑁂𑀢𑀺, 𑀯𑀝𑁆𑀝𑀢𑀺. 𑀉𑀧𑀚𑁆𑀛𑀸𑀬𑁄 𑀘𑁂 𑀉𑀓𑁆𑀔𑁂𑀧𑀦𑀺𑀬𑀓𑀫𑁆𑀫𑀓𑀢𑁄 𑀳𑁄𑀢𑀺, 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀺𑀬𑀁 𑀞𑀺𑀢𑀢𑁆𑀢𑀸 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁 𑀧𑀦 𑀧𑀲𑁆𑀲𑀺𑀢𑁆𑀯𑀸 𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀆𑀕𑀫𑁂𑀢𑀼𑀁 𑀮𑀪𑀢𑀺. 𑀫𑀸𑀦𑀢𑁆𑀢𑀸𑀘𑀸𑀭𑀻 𑀘𑁂 𑀳𑁄𑀢𑀺, 𑀅𑀩𑁆𑀪𑀸𑀦𑀁 𑀆𑀕𑀫𑁂𑀢𑀩𑁆𑀩𑀁. 𑀤𑀻𑀖𑀁 𑀘𑁂 𑀧𑀭𑀺𑀯𑀸𑀲𑀁 𑀘𑀭𑀢𑀺, 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄, 𑀉𑀧𑀚𑁆𑀛𑀸𑀬𑀲𑀫𑁄𑀥𑀸𑀦𑀁 𑀅𑀧𑁆𑀧𑀫𑀸𑀡𑀁. 𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀘𑀸𑀭𑀺𑀦𑀸 𑀳𑀺 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄. 𑀬𑀁 𑀧𑀦 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀫𑁆𑀧𑀺 𑀲𑀸𑀤𑀺𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺𑀆𑀤𑀺 (𑀘𑀽𑀴𑀯. 𑀅𑀝𑁆𑀞. 𑁭𑁫), 𑀢𑀁 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀸𑀥𑁂𑀢𑀺 𑀏𑀯. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀘𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 ‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫𑀫𑀢𑁆𑀢𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀯𑀢𑁆𑀢𑀁 𑀓𑀭𑁄𑀦𑁆𑀢𑀺𑀬𑁂𑀯, 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀦𑁆𑀢𑀺𑀬𑁂𑀯, 𑀢𑀁 𑀯𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀦𑀸𑀧𑀢𑁆𑀢𑀻’’𑀢𑀺. 𑀢𑀁 𑀯𑀢𑁆𑀢𑀲𑀸𑀤𑀺𑀬𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀸𑀪𑀸𑀯𑀫𑀢𑁆𑀢𑀤𑀻𑀧𑀦𑀢𑁆𑀣𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀲𑀸𑀧𑁂𑀓𑁆𑀔𑀢𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀢𑁂 𑀘𑁂 𑀉𑀧𑀚𑁆𑀛𑀸𑀬𑁂𑀦 𑀯𑀸𑀭𑀺𑀢𑀸𑀦𑀼𑀭𑀽𑀧𑀫𑁂𑀯 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀢𑁂𑀲𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.
𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀻𑀢𑀺 ‘‘𑀏𑀢𑁆𑀢𑀸𑀯𑀢𑀸 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁂𑀧𑀺 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀦𑀢𑀺𑀓𑁆𑀓𑀫𑁆𑀫 𑀮𑁂𑀟𑁆𑀟𑀼𑀧𑀸𑀢𑀤𑁆𑀯𑀬𑀩𑁆𑀪𑀦𑁆𑀢𑀭𑁂 𑀢𑀺𑀭𑁄𑀯𑀺𑀳𑀸𑀭𑁂𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁂, 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀯𑀸 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑁂𑀬𑁂𑀯𑀸𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄, 𑀏𑀢𑁆𑀣 𑀧𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀯𑀺𑀫𑀼𑀢𑁆𑀢𑁂 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀳𑀸𑀭𑁄𑀢𑀺 𑀘𑁂𑀢𑁆𑀣 ‘‘𑀢𑀸𑀤𑀺𑀲𑀲𑁆𑀲 𑀯𑀺𑀳𑀸𑀭𑀲𑁆𑀲 𑀅𑀦𑁆𑀢𑁂 𑀞𑀺𑀢𑀸 𑀏𑀓𑀸 𑀓𑀼𑀝𑀺𑀓𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀲𑀘𑁂 𑀉𑀪𑁄𑀧𑀺 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸 𑀓𑁂𑀦𑀘𑀺…𑀧𑁂… 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀦 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀯𑀸𑀤𑁄 𑀲𑀫𑁂𑀢𑀺. 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑁄 𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀳𑁄𑀢𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸. ‘‘𑀩𑀳𑀺𑀲𑀻𑀫’’𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑁄𑀯𑀺𑀳𑀸𑀭𑀲𑀻𑀫𑀸𑀬𑀁 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀢𑁆𑀢𑀸 𑀧𑀦 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀯𑀸𑀤𑁄 𑀦 𑀲𑀫𑁂𑀢𑀺. 𑀏𑀓𑀸𑀯𑀸𑀲𑁂 𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁂 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀯𑀸 𑀅𑀦𑁆𑀢𑀫𑀲𑁄 𑀅𑀦𑁆𑀢𑁄𑀢𑀺𑀬𑁄𑀚𑀦𑁂𑀧𑀺 𑀯𑀲𑀢𑁄 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑁄 𑀘 𑀉𑀧𑀘𑀸𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀲𑀸 𑀘 𑀉𑀧𑀘𑀸𑀭𑀲𑀻𑀫𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁂𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀏𑀓𑀸𑀯𑀸𑀲𑁄.
𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀏𑀓𑀸𑀯𑀸𑀲𑀯𑀺𑀫𑀢𑀺𑀬𑀁 𑀲𑀻𑀫𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀘𑁂? 𑀦, 𑀘𑀻𑀯𑀭𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬 𑀯𑀺𑀘𑀸𑀭𑀺𑀢𑀢𑁆𑀢𑀸. 𑀬𑀣𑀸𑀳 ‘‘𑀲𑀻𑀫𑀝𑁆𑀞𑀓𑀲𑀗𑁆𑀖𑁄 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀸𑀢𑀽’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯). 𑀓𑀢𑀭𑀲𑀻𑀫𑀸𑀬 𑀪𑀸𑀚𑁂𑀢𑀩𑁆𑀩𑀁? 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀓𑀺𑀭𑀸𑀳 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬𑀸’’𑀢𑀺. 𑀢𑀢𑁄 𑀦𑀁 𑀆𑀳𑀁𑀲𑀼 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦𑀸𑀫 𑀢𑀺𑀬𑁄𑀚𑀦𑀸𑀧𑀺 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑀺𑀬𑁄𑀚𑀦𑁂 𑀞𑀺𑀢𑀸 𑀮𑀸𑀪𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀢𑀺𑀬𑁄𑀚𑀦𑁂 𑀞𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀆𑀭𑀸𑀫𑀁 𑀧𑀯𑀺𑀲𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀕𑀫𑀺𑀓𑁄 𑀢𑀺𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀲𑁂𑀦𑀸𑀲𑀦𑀁 𑀆𑀧𑀼𑀘𑁆𑀙𑀺𑀲𑁆𑀲𑀢𑀺, 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀦𑁆𑀦𑀲𑁆𑀲 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀲𑁆𑀲𑀢𑀺, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀢𑀺𑀬𑁄𑀚𑀦𑁂 𑀞𑀢𑁆𑀯𑀸 𑀆𑀭𑀸𑀫𑀧𑁆𑀧𑀯𑁂𑀲𑀦𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀸 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀫𑁂𑀢𑀁 𑀉𑀧𑀘𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀲𑁆𑀫𑀸 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀮𑁂𑀟𑁆𑀟𑀼𑀧𑀸𑀢𑀤𑁆𑀯𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀯𑀲𑀢𑁄 𑀦𑀺𑀲𑁆𑀲𑀬𑁄 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀲𑀺𑀤𑁆𑀥𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀉𑀧𑀘𑀸𑀭𑀲𑀻𑀫𑀸𑀬 𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀸𑀬, 𑀅𑀢𑀺𑀭𑁂𑀓𑀸𑀬 𑀯𑀸 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺. 𑀲𑀸 𑀳𑀺 𑀆𑀯𑀸𑀲𑁂𑀲𑀼 𑀯𑀟𑁆𑀠𑀦𑁆𑀢𑁂𑀲𑀼 𑀯𑀟𑁆𑀠𑀢𑀺, 𑀧𑀭𑀺𑀳𑀸𑀬𑀦𑁆𑀢𑁂𑀲𑀼 𑀧𑀭𑀺𑀳𑀸𑀬𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀢𑀸𑀤𑀺𑀲𑀲𑁆𑀲 𑀯𑀺𑀳𑀸𑀭𑀲𑁆𑀲 𑀅𑀦𑁆𑀢𑁂 𑀞𑀺𑀢𑀸 𑀏𑀓𑀸 𑀓𑀼𑀝𑀺 𑀯𑀺𑀳𑀸𑀭𑁄𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀲𑀸𑀧𑀺 𑀢𑀲𑁆𑀲𑁂𑀯 𑀯𑀺𑀳𑀸𑀭𑀲𑁆𑀲 𑀓𑀼𑀝𑀺𑀓𑀸𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀲𑁄 𑀆𑀯𑀸𑀲𑁄 𑀳𑁄𑀢𑀺. 𑀦𑀸𑀦𑀸𑀯𑀸𑀲𑁄 𑀏𑀯 𑀘𑁂 𑀅𑀥𑀺𑀧𑁆𑀧𑁂𑀢𑁄, ‘‘𑀅𑀦𑁆𑀢𑁂 𑀞𑀺𑀢𑀸 𑀓𑀼𑀝𑀺𑀓𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀧𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀦𑀸𑀦𑀸𑀯𑀸𑀲𑁂 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀬𑁆𑀯𑀸𑀬𑀁 ‘‘𑀦𑁄 𑀢𑀓𑁆𑀓𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀢𑀸𑀤𑀺𑀲𑁂 𑀦𑀸𑀦𑀸𑀯𑀸𑀲𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑀲𑁆𑀲 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀬𑁂𑀦 𑀯𑀼𑀢𑁆𑀢𑁄. 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀳𑀺 ‘‘𑀕𑀳𑀡𑁂𑀦 𑀕𑀳𑀡𑀁 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀮𑀓𑁆𑀔𑀡𑀢𑁆𑀢𑀸 𑀇𑀢𑀭𑀢𑁆𑀣 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀏𑀓𑁄 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑀺…𑀧𑁂… 𑀤𑁂𑀣, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀲𑁆𑀲 𑀏𑀓𑀸𑀥𑀺𑀧𑁆𑀧𑀸𑀬’’𑀦𑁆𑀢𑀺 (𑀫𑀳𑀸𑀯. 𑁩𑁬𑁪). 𑀅𑀝𑁆𑀞𑀓𑀣𑀸𑀬𑀜𑁆𑀘𑀲𑁆𑀲 𑀏𑀯𑀁 𑀯𑀼𑀢𑁆𑀢𑀁 ‘‘𑀇𑀤𑀜𑁆𑀘 𑀦𑀸𑀦𑀸𑀮𑀸𑀪𑁂𑀳𑀺 𑀦𑀸𑀦𑀽𑀧𑀘𑀸𑀭𑁂𑀳𑀺 𑀏𑀓𑀲𑀻𑀫𑀯𑀺𑀳𑀸𑀭𑁂𑀳𑀺 𑀓𑀣𑀺𑀢𑀁, 𑀦𑀸𑀦𑀸𑀲𑀻𑀫𑀯𑀺𑀳𑀸𑀭𑁂 𑀧𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁬𑁪). 𑀅𑀧𑀭𑀺𑀓𑁆𑀔𑀺𑀢𑁆𑀢𑀸 𑀦𑀸𑀦𑀸𑀯𑀸𑀲𑀸 𑀏𑀓𑀽𑀧𑀘𑀸𑀭𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘 𑀏𑀓𑀽𑀧𑀘𑀸𑀭𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀢𑁆𑀢𑀸𑀯𑀢𑀸 𑀮𑁂𑀟𑁆𑀟𑀼𑀧𑀸𑀢𑀤𑁆𑀯𑀬𑀩𑁆𑀪𑀦𑁆𑀢𑀭𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀢𑁄 𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺 𑀏𑀯𑀸𑀢𑀺 𑀅𑀬𑀫𑀢𑁆𑀣𑁄 𑀲𑀸𑀥𑀺𑀢𑁄𑀢𑀺. 𑀏𑀢𑁆𑀣𑀸𑀳 𑁋 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀲𑀢𑁄𑀧𑀺 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀕𑀘𑁆𑀙𑀦𑁆𑀢𑀸𑀦𑀁𑀬𑁂𑀯 𑀅𑀲𑀫𑁆𑀧𑀢𑁆𑀢𑁂𑀲𑀼 𑀤𑀳𑀭𑁂𑀲𑀼 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀺, 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁯𑁫)? 𑀯𑀼𑀘𑁆𑀘𑀢𑁂 𑁋 𑀢𑀁 𑀉𑀧𑀚𑁆𑀛𑀸𑀬𑁂𑀦 𑀲𑀫𑀸𑀕𑀫𑁂 𑀲𑀉𑀲𑁆𑀲𑀸𑀳𑀢𑀸𑀬 𑀯𑀼𑀢𑁆𑀢𑀁. 𑀇𑀥 𑀥𑀼𑀯𑀯𑀸𑀲𑀁 𑀲𑀦𑁆𑀥𑀸𑀬, 𑀢𑀲𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀮𑁄𑀫𑁂𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀁 𑀅𑀢𑀺𑀓𑁆𑀓𑀫𑁆𑀫𑀸𑀢𑀺 𑀇𑀤𑀁 𑀤𑁂𑀯𑀲𑀺𑀓𑀁 𑀆𑀭𑁄𑀘𑁂𑀢𑁆𑀯𑀸 𑀯𑀲𑀦𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀫𑀫 𑀢𑀓𑁆𑀓𑁄. 𑀤𑁂𑀯𑀲𑀺𑀓𑀁 𑀆𑀭𑁄𑀘𑁂𑀢𑁆𑀯𑀸 𑀯𑀢𑁆𑀣𑀩𑁆𑀩𑀦𑁆𑀢𑀺 𑀳𑀺 𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀬𑀁 𑀤𑀺𑀲𑁆𑀲𑀢𑀺, 𑀢𑀜𑁆𑀘 𑀧𑀦 𑀅𑀧𑀓𑀢𑀜𑁆𑀜𑀽𑀳𑀺 𑀆𑀘𑀺𑀡𑁆𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀧𑀜𑁆𑀘𑀓𑀓𑀣𑀸𑀯𑀡𑁆𑀡𑀦𑀸
𑁮𑁪. 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 ‘‘𑀅𑀢𑁆𑀢𑀸𑀦𑀫𑁂𑀯 𑀧𑀞𑀫𑀁, 𑀧𑀢𑀺𑀭𑀽𑀧𑁂 𑀦𑀺𑀯𑁂𑀲𑀬𑁂’’𑀢𑀺 (𑀥. 𑀧. 𑁧𑁫𑁮) 𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦. 𑀦𑀻𑀮𑀲𑀫𑀸𑀬𑁄𑀕𑀢𑁄 𑀦𑀻𑀮𑀁 𑀯𑀺𑀬 𑀯𑀼𑀢𑁆𑀢𑀁 ‘‘𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦𑀸’’𑀢𑀺. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀦𑀸𑀫 𑀆𑀧𑀚𑁆𑀚𑀺𑀢𑁆𑀯𑀸 𑀅𑀯𑀼𑀝𑁆𑀞𑀺𑀢𑁄.
𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀧𑀜𑁆𑀘𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸
𑁮𑁬. 𑀬𑁄 𑀲𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄𑀢𑀺 𑀏𑀢𑁆𑀣 𑀤𑁆𑀯𑁂 𑀅𑀢𑁆𑀣𑀯𑀺𑀓𑀧𑁆𑀧𑀸 𑁋 𑀢𑀲𑁆𑀲 𑀧𑀲𑀽𑀭𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑀁 𑀲𑀦𑁆𑀥𑀸𑀬 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄, 𑀲𑁄 𑀪𑀺𑀓𑁆𑀔𑀼 𑀢𑀁𑀬𑁂𑀯 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀫𑀻𑀢𑀺 𑀅𑀬𑀫𑁂𑀓𑁄 𑀅𑀢𑁆𑀣𑁄. 𑀏𑀯𑀁 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀼𑀦 𑀕𑀺𑀳𑀺𑀯𑁂𑀲𑁂𑀦 𑀆𑀕𑀢𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄, 𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀓𑁄 𑀅𑀢𑁆𑀣𑁄. 𑀢𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀁 𑀞𑀧𑁂𑀢𑁆𑀯𑀸 ‘‘𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄’’𑀢𑀺 𑀏𑀢𑁆𑀣 𑀦 𑀕𑀺𑀳𑀺𑀯𑁂𑀲𑀥𑀸𑀭𑀡𑁄𑀯 𑀧𑀼𑀩𑁆𑀩𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀓𑀺𑀦𑁆𑀢𑀼 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀬𑀣𑀸𑀲𑀫𑀸𑀤𑀺𑀦𑁆𑀦𑀢𑀺𑀢𑁆𑀣𑀺𑀬𑀯𑁂𑀲𑁂 𑀞𑀺𑀢𑁄𑀧𑀺. 𑀤𑀺𑀝𑁆𑀞𑀺𑀯𑀲𑁂𑀦 𑀅𑀢𑀺𑀢𑁆𑀣𑀺𑀬𑀪𑀽𑀢𑀢𑁆𑀢𑀸 𑀅𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄, 𑀲𑁄 𑀧𑀦𑀸𑀕𑀢𑁄 𑀯𑀺𑀩𑁆𑀪𑀦𑁆𑀢𑁄 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀧𑀭𑀺𑀯𑀸𑀲𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀓𑀺𑀁 𑀇𑀫𑀲𑁆𑀲 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 𑀪𑀺𑀓𑁆𑀔𑀼𑀯𑁂𑀲𑀁 𑀕𑀳𑁂𑀢𑁆𑀯𑀸 𑀲𑀭𑀡𑀕𑀫𑀦𑁂𑀦 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸 𑀚𑀸𑀢𑀸, 𑀦 𑀚𑀸𑀢𑀸𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀚𑀸𑀢𑀸, ‘‘𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁄𑀧𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁, 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁮𑁬) 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀺. 𑀅𑀣 𑀦 𑀚𑀸𑀢𑀸, 𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸𑀬 𑀧𑀩𑁆𑀩𑀚𑁆𑀚𑀸𑀬 𑀅𑀧𑀭𑀸𑀫𑀲𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀢𑀢𑁆𑀣 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 ‘‘𑀲𑀸𑀫𑀡𑁂𑀭𑀲𑁆𑀲𑁂𑀯 𑀲𑀢𑁄 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. 𑀇𑀢𑀭𑁂 𑀢𑀣𑀸 𑀦 𑀯𑀤𑀦𑁆𑀢𑀺. 𑀢𑁂 𑀳𑀺 ‘‘𑀏𑀯𑀁 𑀆𑀭𑀸𑀥𑀓𑁄 𑀔𑁄 𑀪𑀺𑀓𑁆𑀔𑀯𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀕𑀢𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’𑀢𑀺 (𑀫𑀳𑀸𑀯. 𑁮𑁭) 𑀲𑀼𑀢𑁆𑀢𑀧𑀤𑀁 𑀧𑀭𑀺𑀳𑀭𑀺𑀢𑀩𑁆𑀩𑀁, 𑀧𑀼𑀭𑁂 𑀘 𑀧𑀘𑁆𑀙𑀸 𑀘 ‘𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄’𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄 𑀦 𑀲𑀸𑀫𑀡𑁂𑀭𑁄 𑀚𑀸𑀢𑁄𑀢𑀺 𑀘𑁂, 𑀬𑀤𑀺 𑀏𑀯𑀁 𑀅𑀧𑀩𑁆𑀩𑀸𑀚𑁂𑀢𑁆𑀯𑀸𑀯 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 𑀘 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀲𑀼𑀢𑁆𑀢𑀁 𑀯𑀺𑀭𑀼𑀚𑁆𑀛𑀢𑀺. ‘𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑁄’𑀢𑀺 𑀧𑀸𑀞𑁄𑀧𑀺 𑀦 𑀲𑀼𑀦𑁆𑀤𑀭𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀲𑀘𑁂 𑀪𑀺𑀦𑁆𑀤𑀢𑀺, 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀧𑀼𑀡𑁆𑀡𑁂𑀧𑀺 𑀧𑀼𑀦 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀢𑀲𑁆𑀲 𑀲𑀁𑀯𑀭𑀁 𑀪𑀺𑀓𑁆𑀔𑀼𑀓𑀭𑀡𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀲𑀻𑀮𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀭𑀡𑀸𑀦𑀺 𑀲𑀘𑁂 𑀪𑀺𑀚𑁆𑀚𑀦𑁆𑀢𑀺 𑀲𑀸𑀫𑀡𑁂𑀭𑀲𑁆𑀲𑁂𑀯.
𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.