𑁮. 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁄

𑁧. 𑀲𑀳𑀥𑀫𑁆𑀫𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁪. 𑀲𑀳𑀥𑀫𑁆𑀫𑀺𑀓𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨. 𑀯𑀺𑀮𑁂𑀔𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁮. 𑀆𑀧𑀢𑁆𑀢𑀺𑀜𑁆𑀘 𑀲𑀢𑀺𑀲𑀫𑁆𑀫𑁄𑀲𑀸𑀬𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀓𑀢𑁆𑀢𑀩𑁆𑀩𑀜𑁆𑀘 𑀦 𑀓𑀭𑁄𑀢𑀻𑀢𑀺 𑀤𑀻𑀧𑁂𑀢𑀺, 𑀦 𑀘𑀢𑁆𑀢𑀸𑀭𑀺 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀝𑁆𑀞𑁂𑀓𑀤𑁂𑀲𑁄 𑀚𑀦𑀧𑀤𑁄. 𑀩𑀼𑀤𑁆𑀥𑀓𑀸𑀮𑁂 𑀅𑀭𑀺𑀝𑁆𑀞𑀓𑀡𑁆𑀝𑀓𑀸 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸. ‘‘𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 𑀯𑀘𑀦𑁂𑀦 𑀳𑀺 𑀢𑁂 𑀪𑀕𑀯𑀢𑁄 𑀅𑀲𑀩𑁆𑀩𑀜𑁆𑀜𑀼𑀢𑀁 𑀤𑀻𑀧𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀤𑀲𑀯𑀢𑁆𑀣𑀼𑀤𑀻𑀧𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸. 𑀢𑁂 𑀳𑀺 𑀯𑀺𑀦𑀬𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸. 𑀧𑀭𑀽𑀧𑀳𑀸𑀭𑀸𑀤𑀺𑀯𑀸𑀤𑀸 𑀧𑀦 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀧𑁆𑀧𑀘𑁆𑀘𑀢𑁆𑀣𑀺𑀓𑀸. 𑀓𑁂 𑀧𑀦 𑀢𑁂? 𑀏𑀓𑀘𑁆𑀘𑁂 𑀫𑀳𑀸𑀲𑀗𑁆𑀖𑀺𑀓𑀸𑀤𑀬𑁄, 𑀦 𑀲𑀩𑁆𑀩𑁂𑀢𑀺 𑀤𑀻𑀧𑀦𑀢𑁆𑀣𑀁 ‘‘𑀧𑀭𑀽𑀧𑀳𑀸𑀭𑀸…𑀧𑁂… 𑀯𑀸𑀤𑀸’’𑀢𑀺 𑀯𑀺𑀲𑁂𑀲𑀦𑀯𑀘𑀦𑀫𑀸𑀳. 𑀢𑀢𑁆𑀣 𑀬𑁂 𑀓𑀼𑀳𑀓𑀸 𑀧𑀸𑀧𑀺𑀘𑁆𑀙𑀓𑀸 𑀅𑀪𑀽𑀢𑀁 𑀉𑀮𑁆𑀮𑀧𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀯𑀭𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀝𑁆𑀞𑀲𑁆𑀲𑀢𑀻 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑁆𑀯𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀢𑁆𑀢𑀸, 𑀅𑀜𑁆𑀜𑁂𑀳𑀺 𑀢𑀁 𑀤𑀺𑀲𑁆𑀯𑀸 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀸𑀭𑀓𑀸𑀬𑀺𑀓𑀸 𑀉𑀧𑀲𑀁𑀳𑀭𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀚𑀦𑀁 𑀯𑀜𑁆𑀘𑁂𑀦𑁆𑀢𑀺. 𑀬𑁂 𑀘 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀅𑀓𑀼𑀳𑀓𑀸, 𑀢𑁂𑀧𑀺 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀓𑁂𑀘𑀺 𑀢𑀁𑀤𑀺𑀝𑁆𑀞𑀺𑀓𑀸 𑀳𑁄𑀦𑁆𑀢𑀺 𑀅𑀥𑀺𑀫𑀸𑀦𑀺𑀦𑁄 𑀘. 𑀅𑀢𑁆𑀢𑀦𑁄 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀲𑁆𑀲𑀺𑀢𑁆𑀯𑀸𑀧𑀺 𑀦𑀸𑀥𑀺𑀫𑀼𑀘𑁆𑀘𑀦𑁆𑀢𑀺, 𑀅𑀦𑀥𑀺𑀕𑀢𑁂 𑀅𑀥𑀺𑀓𑀢𑀲𑀜𑁆𑀜𑀺𑀦𑁄𑀯 𑀳𑁄𑀦𑁆𑀢𑀺. 𑀢𑀣𑀸 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀓𑀗𑁆𑀔𑀸𑀯𑀺𑀢𑀭𑀡𑀸 𑀦𑀸𑀫𑀕𑁄𑀢𑁆𑀢𑀸𑀤𑀻𑀲𑀼 𑀯𑀺𑀬 𑀲𑀘𑁆𑀘𑁂𑀲𑀼 𑀧𑀭𑀯𑀺𑀢𑀭𑀡𑀸 𑀧𑀭𑁂𑀳𑀺 𑀧𑀜𑁆𑀜𑀢𑁆𑀢𑀸 𑀦𑀸𑀫𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀯𑀺𑀦𑀬𑀥𑀭𑁄 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀅𑀭𑀳𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑁂𑀬𑁆𑀬 (𑀓𑀣𑀸. 𑁩𑁧𑁩; 𑀫𑀳𑀸𑀯. 𑁩𑁫𑁩). 𑀤𑀺𑀝𑁆𑀞𑀥𑀫𑁆𑀫𑀸…𑀧𑁂… 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂’’𑀢𑀺𑀆𑀤𑀻𑀦𑀺 (𑀫𑀳𑀸𑀯. 𑁩𑁦) 𑀲𑀼𑀢𑁆𑀢𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑁂 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑁂 ‘‘𑀧𑀭𑀺𑀬𑀢𑁆𑀢𑀺 𑀫𑀽𑀮’’𑀦𑁆𑀢𑀺 𑀯𑀸𑀤𑀺𑀦𑁄. ‘‘𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂’’𑀢𑀺 𑀦𑀺𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸𑀕𑀢𑀲𑁆𑀲 𑀯𑀺𑀪𑀗𑁆𑀕𑀧𑀤𑀸𑀦𑀺 𑀲𑀺𑀤𑁆𑀥𑀸𑀦𑀺. 𑀲𑀺𑀤𑁆𑀥𑁂𑀬𑁂𑀯 𑀓𑀺𑀁 𑀇𑀫𑀲𑁆𑀲 𑀅𑀗𑁆𑀕𑀸𑀦𑀺? 𑀕𑀭𑀳𑀺𑀢𑀼𑀓𑀸𑀫𑀢𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀯𑀺𑀯𑀡𑁆𑀡𑀦𑀜𑁆𑀘𑀸𑀢𑀺.

𑀯𑀺𑀮𑁂𑀔𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑁄𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁪𑁪. 𑀫𑁄𑀳𑀦𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁪. 𑀧𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁨. 𑀭𑀢𑁆𑀢𑀘𑀺𑀢𑁆𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦. 𑀯𑀺𑀳𑁂𑀞𑁂𑀢𑀼𑀓𑀸𑀫𑀁 𑀧𑀦 𑀤𑀺𑀲𑁆𑀯𑀸 ‘‘𑀲𑀘𑁂 𑀅𑀳𑀁 𑀇𑀫𑀁 𑀫𑀸𑀭𑁂𑀫𑀺, 𑀦𑀢𑁆𑀣𑀺 𑀫𑁂 𑀫𑁄𑀓𑁆𑀔𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀧𑀺𑀢𑁄 𑀲𑀢𑁆𑀢𑀲𑀜𑁆𑀜𑀁 𑀧𑀼𑀭𑁂𑀓𑁆𑀔𑀢𑁆𑀯𑀸 𑀧𑀳𑀸𑀭𑀁 𑀤𑁂𑀢𑀺, 𑀢𑀲𑁆𑀲 𑀬𑀣𑀸𑀯𑀢𑁆𑀣𑀼𑀓𑀫𑁂𑀯.

𑀧𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀢𑀮𑀲𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁬. ‘‘𑀓𑀸𑀬𑀁 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑀁 𑀯𑀸’’𑀢𑀺 (𑀧𑀸𑀘𑀺. 𑁪𑁫𑁬) 𑀯𑀘𑀦𑀢𑁄 𑀓𑀸𑀬𑀸𑀤𑀻𑀲𑀼 𑀬𑀁 𑀉𑀘𑁆𑀘𑀸𑀭𑁂𑀢𑀺, 𑀢𑀁 𑀢𑀮𑀁 𑀦𑀸𑀫. 𑀢𑀮𑀫𑁂𑀯 𑀢𑀮𑀲𑀢𑁆𑀢𑀺𑀓𑀁. 𑀧𑁄𑀣𑀦𑀲𑀫𑀢𑁆𑀣𑀝𑁆𑀞𑁂𑀦 𑀲𑀢𑁆𑀢𑀺𑀓𑀦𑁆𑀢𑀺 𑀏𑀓𑁂. 𑀢𑀁 ‘‘𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀻’’𑀢𑀺 𑀇𑀫𑀺𑀦𑀸 𑀦𑀺𑀬𑀫𑁂𑀢𑀺. 𑀏𑀯𑀁 𑀓𑀼𑀧𑀺𑀢𑀸 𑀳𑀺 𑀓𑁄𑀧𑀯𑀲𑁂𑀦 𑀧𑁄𑀣𑀦𑀸𑀲𑀫𑀢𑁆𑀣𑀢𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀳𑀢𑁆𑀣𑀕𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀲𑀼𑀔𑀲𑀫𑁆𑀨𑀲𑁆𑀲𑀫𑁆𑀧𑀺 𑀳𑁄𑀢𑀼, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀬𑀲𑁆𑀫𑀸 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀧𑀳𑀝𑁂 𑀧𑀼𑀭𑀺𑀫𑁂𑀦 𑀧𑀸𑀘𑀺𑀢𑁆𑀢𑀺𑀬𑀁. 𑀓𑁂𑀯𑀮𑀁 𑀉𑀘𑁆𑀘𑀸𑀭𑁂𑀢𑀼𑀓𑀸𑀫𑀢𑀸𑀬 𑀉𑀕𑁆𑀕𑀺𑀭𑀡𑀫𑀢𑁆𑀢𑁂 𑀓𑀢𑁂 𑀇𑀫𑀺𑀦𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀇𑀫𑀺𑀦𑀸 𑀧𑀦 𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀳𑀸𑀭𑁄 𑀤𑀺𑀦𑁆𑀦𑁄, 𑀢𑀲𑁆𑀫𑀸 𑀦 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀤𑀺𑀦𑁆𑀦𑀢𑁆𑀢𑀸 𑀤𑀼𑀓𑁆𑀓𑀝𑀁. 𑀓𑀺𑀫𑀺𑀤𑀁 𑀤𑀼𑀓𑁆𑀓𑀝𑀁 𑀧𑀳𑀸𑀭𑀧𑀘𑁆𑀘𑀬𑀸, 𑀉𑀤𑀸𑀳𑀼 𑀉𑀕𑁆𑀕𑀺𑀭𑀡𑀧𑀘𑁆𑀘𑀬𑀸𑀢𑀺? 𑀧𑀳𑀸𑀭𑀧𑀘𑁆𑀘𑀬𑀸 𑀏𑀯 𑀤𑀼𑀓𑁆𑀓𑀝𑀁. 𑀧𑀼𑀭𑀺𑀫𑀁 𑀉𑀕𑁆𑀕𑀺𑀭𑀡𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀤𑀼𑀓𑁆𑀓𑀝𑀁 𑀧𑀸𑀘𑀺𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀺. 𑀧𑀼𑀭𑀺𑀫𑀜𑁆𑀳𑀺 𑀉𑀕𑁆𑀕𑀺𑀭𑀡𑀁, 𑀧𑀘𑁆𑀙𑀸 𑀧𑀳𑀸𑀭𑁄. 𑀦 𑀘 𑀧𑀘𑁆𑀙𑀺𑀫𑀧𑀳𑀸𑀭𑀁 𑀦𑀺𑀲𑁆𑀲𑀸𑀬 𑀧𑀼𑀭𑀺𑀫𑀁 𑀉𑀕𑁆𑀕𑀺𑀭𑀡𑀁 𑀅𑀦𑀸𑀧𑀢𑁆𑀢𑀺𑀯𑀢𑁆𑀣𑀼𑀓𑀁 𑀪𑀯𑀺𑀢𑀼𑀫𑀭𑀳𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. ‘‘𑀢𑁂𑀦 𑀧𑀳𑀸𑀭𑁂𑀦 𑀳𑀢𑁆𑀣𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀪𑀺𑀚𑁆𑀚𑀢𑀺, 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀇𑀫𑀺𑀦𑀸𑀧𑀺 𑀧𑀳𑀸𑀭𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀉𑀕𑁆𑀕𑀺𑀭𑀡𑀁 𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸𑀢𑀺 𑀲𑀺𑀤𑁆𑀥𑀁, 𑀲𑀼𑀝𑁆𑀞𑀼 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘𑀢𑀺𑀭𑀘𑁆𑀙𑀸𑀦𑀸𑀤𑀻𑀦𑀁 𑀅𑀲𑀼𑀘𑀺𑀓𑀭𑀡𑀸𑀤𑀻𑀦𑀺 𑀤𑀺𑀲𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸𑀧𑀺 𑀉𑀕𑁆𑀕𑀺𑀭𑀦𑁆𑀢𑀲𑁆𑀲 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀏𑀯𑀸’’𑀢𑀺 𑀯𑀤𑀦𑁆𑀢𑀺.

𑀢𑀮𑀲𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁬𑁨. 𑀉𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦𑀸𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀦𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀯𑀢𑁆𑀣𑀼𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺.

𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁬𑁮. 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀲𑀬𑀁 𑀲𑀜𑁆𑀜𑀸𑀬 𑀢𑀣𑀸 𑀅𑀫𑀜𑁆𑀜𑀦𑁆𑀢𑁄 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀫𑀜𑁆𑀜𑁂’’𑀢𑀺 𑀯𑀤𑀦𑁆𑀢𑁄 𑀓𑀺𑀁 𑀫𑀼𑀲𑀸𑀯𑀸𑀤𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺? 𑀦 𑀲𑀺𑀬𑀸 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸, 𑀦 𑀘 𑀓𑁂𑀯𑀮𑀁 ‘‘𑀫𑀜𑁆𑀜𑁂’’𑀢𑀺 𑀇𑀫𑀺𑀦𑀸 𑀦𑀺𑀬𑀫𑀢𑁄 𑀅𑀗𑁆𑀕𑀲𑀫𑁆𑀧𑀢𑁆𑀢𑀺 𑀳𑁄𑀢𑀺. 𑀧𑀭𑀫𑀢𑁆𑀣𑀯𑀺𑀳𑀺𑀢𑀁 𑀓𑀢𑁆𑀣𑀘𑀺 𑀳𑁄𑀢𑀺. ‘‘𑀉𑀤𑀓𑀁 𑀫𑀜𑁆𑀜𑁂 𑀆𑀤𑀺𑀢𑁆𑀢’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀧𑀭𑁄 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑀼 𑀯𑀸, 𑀫𑀸 𑀯𑀸, 𑀢𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦’’𑀦𑁆𑀢𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺.

𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑀲𑁆𑀲𑀼𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁭𑁩. 𑀇𑀫𑁂𑀲𑀁 𑀲𑀼𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀯𑀘𑀦’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀻𑀢𑀺 𑀲𑀺𑀬𑀸 𑀓𑀺𑀭𑀺𑀬𑀸 𑀲𑀺𑀬𑀸 𑀅𑀓𑀺𑀭𑀺𑀬𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀺. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀯𑀸𑀤𑀓𑀧𑀘𑁆𑀘𑀬𑀸𑀧𑀢𑁆𑀢𑀺 𑀓𑀺𑀭𑀺𑀬𑀸 𑀘 𑀯𑀺𑀳𑁂𑀲𑀓𑀧𑀘𑁆𑀘𑀬𑀸𑀧𑀢𑁆𑀢𑀺 𑀅𑀓𑀺𑀭𑀺𑀬𑀸 𑀘, 𑀢𑀤𑀼𑀪𑀬𑀁 𑀧𑀦 𑀏𑀓𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀓𑀢𑁆𑀯𑀸 𑀢𑀁 𑀅𑀜𑁆𑀜𑀯𑀸𑀤𑀓𑀲𑀗𑁆𑀔𑀸𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀺𑀬𑀸 𑀓𑀺𑀭𑀺𑀬𑀸 𑀧𑀞𑀫𑀲𑁆𑀲 𑀯𑀲𑁂𑀦, 𑀲𑀺𑀬𑀸 𑀅𑀓𑀺𑀭𑀺𑀬𑀸 𑀤𑀼𑀢𑀺𑀬𑀲𑁆𑀲 𑀯𑀲𑁂𑀦𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀉𑀧𑀲𑁆𑀲𑀼𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀫𑁆𑀫𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁭𑁪. ‘‘𑀥𑀫𑁆𑀫𑀺𑀓𑀸𑀦𑀁 𑀓𑀫𑁆𑀫𑀸𑀦’’𑀦𑁆𑀢𑀺 (𑀧𑀸𑀘𑀺. 𑁪𑁭𑁫) 𑀯𑀘𑀦𑀢𑁄 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀥𑀫𑁆𑀫𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 ‘‘𑀙𑀦𑁆𑀤𑀁 𑀤𑀫𑁆𑀫𑀻’’𑀢𑀺 𑀙𑀦𑁆𑀤𑀁 𑀤𑁂𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯, 𑀦 𑀧𑀝𑀺𑀧𑀢𑁆𑀢𑀺. 𑀅𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀔𑀺𑀬𑁆𑀬𑀢𑀺, 𑀢𑀁 𑀯𑀸 𑀉𑀓𑁆𑀓𑁄𑀝𑁂𑀢𑀺, 𑀅𑀦𑀸𑀧𑀢𑁆𑀢𑀺 𑀦𑁂𑀯 𑀳𑁄𑀢𑀻𑀢𑀺? 𑀦, 𑀢𑀣𑀸 𑀙𑀦𑁆𑀤𑀤𑀸𑀦𑀓𑀸𑀮𑁂 𑀅𑀓𑀢𑁆𑀯𑀸 𑀧𑀘𑁆𑀙𑀸 𑀅𑀥𑀫𑁆𑀫𑀓𑀫𑁆𑀫𑀔𑀺𑀬𑁆𑀬𑀦𑀸𑀤𑀺𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀯𑀼𑀢𑁆𑀢𑀢𑁆𑀢𑀸. 𑀅𑀥𑀫𑁆𑀫𑁂𑀦 𑀯𑀸 𑀯𑀕𑁆𑀕𑁂𑀦 𑀯𑀸 𑀦 𑀓𑀫𑁆𑀫𑀸𑀭𑀳𑀲𑁆𑀲 𑀯𑀸 𑀓𑀫𑁆𑀫𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀫𑁄𑀓𑁆𑀔𑀓𑀭𑀡𑀢𑁄 𑀅𑀯𑀺𑀲𑁂𑀲𑀫𑁂𑀯 𑀢𑀣𑀸𑀯𑀘𑀦𑀦𑁆𑀢𑀺 𑀘𑁂? 𑀦, 𑀙𑀦𑁆𑀤𑀤𑀸𑀦𑀓𑀸𑀮𑁂 𑀅𑀥𑀫𑁆𑀫𑀓𑀫𑁆𑀫𑀓𑀭𑀡𑀸𑀦𑀼𑀫𑀢𑀺𑀬𑀸 𑀅𑀪𑀸𑀯𑀢𑁄, 𑀓𑀸𑀭𑀓𑀲𑁆𑀲𑁂𑀯 𑀯𑀚𑁆𑀚𑀧𑁆𑀧𑀲𑀗𑁆𑀕𑀢𑁄 𑀘. 𑀕𑀡𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀘𑁂? 𑀧𑀸𑀭𑀺𑀲𑀼𑀤𑁆𑀥𑀺𑀙𑀦𑁆𑀤𑀤𑀸𑀬𑀓𑀸𑀯 𑀢𑁂, 𑀦 𑀕𑀡𑁄 𑀅𑀓𑀫𑁆𑀫𑀧𑁆𑀧𑀢𑁆𑀢𑀢𑁆𑀢𑀸, 𑀧𑀭𑀺𑀯𑀸𑀭𑁂𑀧𑀺 (𑀧𑀭𑀺. 𑁪𑁮𑁨 𑀆𑀤𑀬𑁄) 𑀓𑀫𑁆𑀫𑀯𑀕𑁆𑀕𑁂 𑀓𑀫𑁆𑀫𑀧𑁆𑀧𑀢𑁆𑀢𑀙𑀦𑁆𑀤𑀤𑀸𑀬𑀓𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀢𑀣𑀸𑀧𑀺 𑀅𑀥𑀫𑁆𑀫𑀓𑀫𑁆𑀫𑀲𑁆𑀲 𑀙𑀦𑁆𑀤𑁄 𑀦 𑀤𑀸𑀢𑀩𑁆𑀩𑁄 𑀤𑁂𑀦𑁆𑀢𑁂 𑀅𑀓𑀧𑁆𑀧𑀺𑀬𑀸𑀦𑀼𑀫𑀢𑀺𑀤𑀼𑀓𑁆𑀓𑀝𑀢𑁄. 𑀢𑀢𑁆𑀣 𑀳𑀺 𑀬𑁄𑀚𑀦𑀤𑀼𑀓𑁆𑀓𑀝𑀢𑁄 𑀦 𑀫𑀼𑀘𑁆𑀘𑀦𑁆𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄.

𑀓𑀫𑁆𑀫𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀙𑀦𑁆𑀤𑀁𑀅𑀤𑀢𑁆𑀯𑀸𑀕𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁮𑁧. 𑀲𑀦𑁆𑀦𑀺𑀧𑀸𑀢𑀁 𑀅𑀦𑀸𑀕𑀦𑁆𑀢𑁆𑀯𑀸 𑀘𑁂 𑀙𑀦𑁆𑀤𑀁 𑀦 𑀤𑁂𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀏𑀓𑁂. 𑀤𑀼𑀓𑁆𑀓𑀝𑀦𑁆𑀢𑀺 𑀏𑀓𑁂 𑀥𑀫𑁆𑀫𑀓𑀫𑁆𑀫𑀦𑁆𑀢𑀭𑀸𑀬𑀓𑀭𑀡𑀸𑀥𑀺𑀧𑁆𑀧𑀸𑀬𑀢𑁆𑀢𑀸. 𑀲𑀗𑁆𑀖𑀫𑀚𑁆𑀛𑁂 𑀙𑀦𑁆𑀤𑀁 𑀤𑀸𑀢𑀼𑀁 𑀮𑀪𑀢𑀻𑀢𑀺 𑀓𑁂𑀘𑀺. 𑀤𑀺𑀦𑁆𑀦𑀙𑀦𑁆𑀤𑁂 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀦 𑀕𑀢𑁂𑀧𑀺 𑀙𑀦𑁆𑀤𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑀘𑁂? 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀓𑀲𑁆𑀫𑀸? ‘‘𑀅𑀳𑀢𑁆𑀣𑀧𑀸𑀲𑁄 𑀙𑀦𑁆𑀤𑀸𑀭𑀳𑁄’’𑀢𑀺𑀆𑀤𑀻𑀳𑀺 𑀯𑀺𑀭𑀼𑀚𑁆𑀛𑀦𑀢𑁄. 𑀧𑀸𑀴𑀺𑀬𑀁 𑀧𑀦 𑀤𑀸𑀢𑀼𑀓𑀸𑀫𑀢𑀸𑀬 𑀳𑀢𑁆𑀣𑀧𑀸𑀲𑀁 𑀅𑀢𑀺𑀓𑁆𑀓𑀫𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺.

𑀙𑀦𑁆𑀤𑀁𑀅𑀤𑀢𑁆𑀯𑀸𑀕𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁮𑁪-𑁫. 𑀅𑀤𑀸𑀲𑀻𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀅𑀤𑀸𑀲𑀺. 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀢𑁂 𑀙𑀩𑁆𑀩𑀕𑁆𑀕𑀺𑀬𑀸 𑀅𑀢𑁆𑀢𑀸𑀦𑀁 𑀧𑀭𑀺𑀯𑀚𑁆𑀚𑀬𑀺𑀢𑁆𑀯𑀸 ‘‘𑀲𑀗𑁆𑀖𑁄’’𑀢𑀺 𑀅𑀯𑀢𑁆𑀯𑀸 ‘‘𑀪𑀺𑀓𑁆𑀔𑀽’’𑀢𑀺 𑀆𑀳𑀁𑀲𑀼. 𑀧𑀭𑀺𑀡𑀸𑀫𑁂𑀦𑁆𑀢𑀻𑀢𑀺 𑀦𑁂𑀦𑁆𑀢𑀺. 𑀢𑀢𑁆𑀣 𑀮𑀸𑀪𑁄𑀢𑀺 𑀧𑀤𑀼𑀤𑁆𑀥𑀸𑀭𑀓𑀭𑀡𑀁 𑀇𑀥 𑀅𑀦𑀥𑀺𑀧𑁆𑀧𑁂𑀢𑀲𑁆𑀲𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀮𑀸𑀪𑀤𑀻𑀧𑀦𑀢𑁆𑀣𑀁. 𑀘𑀻𑀯𑀭𑀫𑁂𑀯 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑁂𑀦𑁂𑀯 ‘‘𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁 𑀤𑀺𑀦𑁆𑀦𑀁 𑀔𑀻𑀬𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀤𑀺𑀦𑁆𑀦𑀦𑁆𑀢𑀺 𑀘 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁.

𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁯𑁧. 𑀜𑀸𑀢𑀓𑀫𑁆𑀧𑀺 𑀧𑀭𑀲𑁆𑀲 𑀤𑀸𑀢𑀼𑀓𑀸𑀫𑀁 𑀅𑀜𑁆𑀜𑀲𑁆𑀲 𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀏𑀯. 𑀲𑀩𑁆𑀩𑀢𑁆𑀣 𑀆𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀼𑀓𑀸𑀫𑀁 𑀬𑀣𑀸𑀲𑀼𑀔𑀁 𑀯𑀺𑀘𑀸𑀭𑁂𑀢𑀼𑀁 𑀮𑀪𑀢𑀺.

𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁄 𑀅𑀝𑁆𑀞𑀫𑁄.