𑁯. 𑀭𑀢𑀦𑀯𑀕𑁆𑀕𑁄

𑁧. 𑀅𑀦𑁆𑀢𑁂𑀧𑀼𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁯𑁪-𑁭. 𑀬𑀣𑀸 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑀺, 𑀏𑀯𑀫𑀸𑀓𑀸𑀭𑁂𑀦 𑀦𑀸𑀭𑀳𑀢𑀸𑀬𑀁 𑀧𑀼𑀭𑀺𑀲𑁄 𑀧𑀸𑀧𑁄 𑀳𑁄𑀢𑀼𑀁, 𑀦 𑀳𑁄𑀢𑀺 𑀧𑀸𑀧𑁄𑀢𑀺 𑀅𑀢𑁆𑀣𑁄, 𑀓𑀸𑀭𑀡𑀢𑁆𑀣𑀁 𑀯𑀸. 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀢𑁄𑀢𑀺 𑀯𑀸 𑀅𑀢𑁆𑀣𑁄. 𑀳𑀢𑁆𑀣𑀺𑀲𑀫𑁆𑀫𑀤𑁆𑀤𑀦𑁆𑀢𑀺 𑀲𑀗𑁆𑀖𑀸𑀝𑀲𑀫𑁆𑀫𑀤𑁆𑀤𑁄, 𑀅𑀓𑁆𑀓𑀫𑀦𑀁 𑀘𑀼𑀡𑁆𑀡𑀢𑀸𑀢𑀺 𑀅𑀢𑁆𑀣𑁄.

𑁪𑁯𑁮. 𑀭𑀢𑀦𑀁 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻, 𑀢𑀣𑀸𑀧𑀺 𑀇𑀥 𑀅𑀜𑁆𑀜𑀸𑀧𑀺 𑀤𑁂𑀯𑀺𑀕𑁄𑀢𑁆𑀢𑀸 𑀦 𑀭𑀓𑁆𑀔𑀢𑀺, 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀦 𑀫𑀳𑁂𑀲𑀻 𑀳𑁄𑀢𑀻’’𑀢𑀺 𑀯𑀘𑀦𑀸𑀪𑀸𑀯𑀢𑁄. 𑀲𑀘𑁂 𑀔𑀢𑁆𑀢𑀺𑀬𑁄𑀯 𑀳𑁄𑀢𑀺, 𑀦𑀸𑀪𑀺𑀲𑀺𑀢𑁆𑀢𑁄. 𑀅𑀪𑀺𑀲𑀺𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀦 𑀔𑀢𑁆𑀢𑀺𑀬𑁄 𑀭𑀓𑁆𑀔𑀢𑀻𑀢𑀺 𑀆𑀘𑀭𑀺𑀬𑁄. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀅𑀗𑁆𑀕𑀪𑀸𑀯𑁂𑀦 𑀘 𑀯𑀼𑀢𑁆𑀢𑀢𑁆𑀢𑀸 𑀅𑀪𑀺𑀲𑀺𑀢𑁆𑀢𑀪𑀸𑀯𑁄𑀯𑀧𑀫𑀸𑀡𑀁. 𑀲𑁂𑀲𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀢𑀺 𑀏𑀓𑁂.

𑁫𑁦𑁦-𑁫𑁦𑁧. ‘‘𑀦 𑀲𑀬𑀦𑀺𑀖𑀭𑁂 𑀲𑀬𑀦𑀺𑀖𑀭𑀲𑀜𑁆𑀜𑀻’’𑀢𑀺 𑀢𑀺𑀓𑀘𑁆𑀙𑁂𑀤𑁄𑀧𑀺 𑀏𑀢𑁆𑀣 𑀮𑀩𑁆𑀪𑀢𑀺. 𑀦 𑀲𑀬𑀦𑀺𑀖𑀭𑀁 𑀦𑀸𑀫 𑀅𑀧𑀭𑀺𑀓𑁆𑀔𑀺𑀢𑁆𑀢𑀭𑀼𑀓𑁆𑀔𑀫𑀽𑀮𑀸𑀤𑀺.

𑀅𑀦𑁆𑀢𑁂𑀧𑀼𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁪. ‘‘𑀅𑀥𑀺𑀯𑀸𑀲𑁂𑀦𑁆𑀢𑀼 𑀕𑀳𑀧𑀢𑀺𑀦𑁄 𑀪𑀢𑁆𑀢’’𑀦𑁆𑀢𑀺 𑀘 ‘‘𑀫𑁂 𑀕𑀳𑀧𑀢𑀺𑀦𑁄’’𑀢𑀺 𑀘 𑀅𑀢𑁆𑀣𑀺.

𑁫𑁦𑁬. 𑀓𑀼𑀭𑀼𑀦𑁆𑀤𑀺𑀯𑀘𑀦𑁂𑀦 𑀖𑀭𑁂𑀧𑀺 𑀬𑀤𑀺 𑀪𑀺𑀓𑁆𑀔𑀽 𑀆𑀲𑀗𑁆𑀓𑀦𑁆𑀢𑀺, 𑀢𑀢𑁆𑀣 𑀞𑀢𑁆𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀢𑀺𑀭𑀽𑀧𑀸𑀢𑀺 ‘‘𑀭𑀢𑀦𑀲𑀫𑁆𑀫𑀢𑁂 𑀧𑀁𑀲𑀼𑀓𑀽𑀮𑀕𑁆𑀕𑀳𑀡𑀁 𑀯𑀸 𑀭𑀢𑀦𑁂 𑀦𑀺𑀭𑀼𑀲𑁆𑀲𑀼𑀓𑁆𑀓𑀕𑀫𑀦𑀁 𑀯𑀸’’𑀢𑀺 𑀮𑀺𑀔𑀺𑀢𑀁. ‘‘𑀢𑀸𑀯𑀓𑀸𑀮𑀺𑀓𑀯𑀲𑁂𑀦𑀧𑀺 𑀅𑀦𑀸𑀫𑀸𑀲𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀦 𑀮𑀪𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀬𑀸𑀘𑀺𑀢𑁆𑀯𑀸 ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺 (𑀚𑀸. 𑁧.𑁭.𑁫𑁯) 𑀯𑀼𑀢𑁆𑀢𑀦𑀬𑁂𑀦.

𑀭𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑀺𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁧𑁧-𑁨. 𑀅𑀳𑀺𑀦𑀸 𑀟𑀝𑁆𑀞𑀯𑀢𑁆𑀣𑀼𑀫𑁆𑀳𑀺 𑀲𑁄 𑀪𑀺𑀓𑁆𑀔𑀼 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀕𑀢𑁄, 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀤𑀧𑀸𑀤𑀺. 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀕𑀸𑀫𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑀺𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁧𑁭. 𑀢𑀦𑁆𑀢𑀺 𑀪𑁂𑀤𑀦𑀓𑀁. 𑀅𑀲𑁆𑀲𑀸𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀧𑀞𑀫𑀁 𑀪𑁂𑀤𑀦𑀓𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀤𑁂𑀲𑁂𑀢𑀩𑁆𑀩𑀢𑁆𑀢𑀸. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺.

𑁫𑁨𑁦. 𑀯𑀸𑀲𑀺𑀚𑀝𑁂𑀢𑀺 𑀯𑀸𑀲𑀺𑀤𑀡𑁆𑀟𑀓𑁂.

𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁧-𑁨. ‘‘𑀉𑀘𑁆𑀘𑁂 𑀫𑀜𑁆𑀘𑁂’’𑀢𑀺 𑀘 ‘‘𑀉𑀘𑁆𑀘𑀸 𑀫𑀜𑁆𑀘𑁂’’𑀢𑀺 𑀘 𑀓𑀢𑁆𑀣𑀘𑀺. 𑀆𑀬𑀢𑁄𑀢𑀺 𑀯𑀺𑀢𑁆𑀣𑀢𑁄. 𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀧𑀸𑀤𑀓𑀁 𑀯𑀸.

𑀫𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀢𑀽𑀮𑁄𑀦𑀤𑁆𑀥𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁮. 𑀧𑁄𑀝𑀓𑀺𑀢𑀽𑀮𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀢𑀺𑀡𑀢𑀽𑀮𑀁. 𑀧𑀝𑀺𑀮𑀸𑀪𑁂𑀦 𑀉𑀤𑁆𑀤𑀸𑀮𑁂𑀢𑁆𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀝𑀺𑀮𑀸𑀪𑀫𑀢𑁆𑀢𑁂𑀦𑁂𑀯 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀺𑀬 𑀤𑀺𑀲𑁆𑀲𑀢𑀺, 𑀧𑀭𑀺𑀪𑁄𑀕𑁂𑀬𑁂𑀯 𑀧𑀦 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀘𑀦𑀁 𑀏𑀢𑁆𑀣 𑀲𑀸𑀥𑀓𑀁.

𑀢𑀽𑀮𑁄𑀦𑀤𑁆𑀥𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁧. 𑀓𑀺𑀜𑁆𑀘𑀸𑀧𑀺 𑀦𑀺𑀲𑀻𑀤𑀦𑀲𑁆𑀲 𑀚𑀸𑀢𑀺 𑀦 𑀤𑀺𑀲𑁆𑀲𑀢𑀺 𑀏𑀢𑁆𑀣, 𑀢𑀣𑀸𑀧𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀅𑀦𑀼𑀜𑁆𑀜𑀸𑀢𑀢𑁆𑀢𑀸, ‘‘𑀦𑀯 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻’’𑀢𑀺 𑀏𑀢𑁆𑀣 𑀘 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀘𑀻𑀯𑀭𑀚𑀸𑀢𑀺𑀬𑁂𑀯𑀲𑁆𑀲 𑀚𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀦𑁆𑀣𑀢𑀲𑀤𑀺𑀲𑀁 𑀲𑀦𑁆𑀣𑀭𑀺𑀢𑁆𑀯𑀸𑀢𑀺 𑀲𑀤𑀲’’𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀺𑀲𑀻𑀤𑀦𑀲𑀦𑁆𑀣𑀢𑀢𑁆𑀢𑀸 𑀉𑀧𑀫𑁂𑀢𑀺. 𑀮𑀸𑀪𑁂 𑀲𑀤𑀲𑀁, 𑀅𑀮𑀸𑀪𑁂 𑀅𑀤𑀲𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀏𑀓𑁂, 𑀢𑀁 𑀦 𑀬𑀼𑀢𑁆𑀢𑀁. ‘‘𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻’’𑀢𑀺 𑀢𑀲𑁆𑀲 𑀲𑀡𑁆𑀞𑀸𑀦𑀦𑀺𑀬𑀫𑀦𑀢𑁄.

𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁯. 𑀬𑀤𑀺 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺 𑀦𑀸𑀫 𑀅𑀥𑁄𑀦𑀸𑀪𑀺 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀸 𑀉𑀧𑁆𑀧𑀦𑁆𑀦𑀓𑀡𑁆𑀟𑀼𑀧𑀻𑀴𑀓𑀸𑀤𑀺𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀲 𑀲𑀼𑀕𑀢𑀲𑁆𑀲 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀤𑀻𑀖𑀲𑁄 𑀘𑀢𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀢𑀺𑀭𑀺𑀬𑀁 𑀤𑁆𑀯𑁂𑀢𑀺 𑀇𑀤𑀫𑁆𑀧𑀺 𑀅𑀢𑀺𑀫𑀳𑀦𑁆𑀢𑀁 𑀧𑀫𑀸𑀡𑀁 𑀤𑀺𑀲𑁆𑀲𑀢𑀺. 𑀲𑀩𑁆𑀩𑁄 𑀳𑀺 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀤𑀢𑁆𑀣𑀺𑀬𑀸 𑀲𑀢𑁆𑀢𑀯𑀺𑀤𑀢𑁆𑀣𑀺𑀓𑁄 𑀳𑁄𑀢𑀺, 𑀲𑀼𑀕𑀢𑀲𑁆𑀲 𑀘 𑀏𑀓𑀸𑀯𑀺𑀤𑀢𑁆𑀣𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺 𑀧𑀓𑀢𑀺𑀧𑀼𑀭𑀺𑀲𑀲𑁆𑀲 𑀧𑀫𑀸𑀡𑀁 𑀆𑀧𑀚𑁆𑀚𑀢𑀺 𑀢𑀺𑀭𑀺𑀬𑀁, 𑀤𑀻𑀖𑀲𑁄 𑀧𑀦 𑀤𑀺𑀕𑀼𑀡𑀁 𑀆𑀧𑀚𑁆𑀚𑀢𑀻𑀢𑀺. 𑀆𑀧𑀚𑁆𑀚𑀢𑀼, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀢𑀲𑁆𑀲𑀸, 𑀘𑁂 𑀇𑀘𑁆𑀙𑀢𑀺, 𑀲𑀩𑁆𑀩𑀫𑁆𑀧𑀺 𑀲𑀭𑀻𑀭𑀁 𑀧𑀝𑀺𑀘𑁆𑀙𑀸𑀤𑁂𑀲𑁆𑀲𑀢𑀺, 𑀲𑀩𑁆𑀩𑀲𑀭𑀻𑀭𑀕𑀢𑀲𑀗𑁆𑀖𑀸𑀝𑀺 𑀯𑀺𑀬 𑀩𑀳𑀼𑀕𑀼𑀡𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀓𑀸𑀫𑁄 𑀦𑀺𑀯𑀸𑀲𑁂𑀲𑁆𑀲𑀢𑀻𑀢𑀺 𑀅𑀬𑀁 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸.

𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁪𑁨. 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀧𑀺 𑀉𑀓𑁆𑀓𑀝𑁆𑀞𑀧𑀝𑀺𑀘𑁆𑀙𑁂𑀤𑀯𑀲𑁂𑀦 𑀅𑀦𑀼𑀜𑁆𑀜𑀸𑀢𑀸. 𑀯𑀲𑁆𑀲𑀓𑀸𑀮𑁂 𑀓𑁂𑀘𑀺 𑀲𑀗𑁆𑀖𑀸𑀝𑀺𑀧𑀭𑀺𑀪𑁄𑀕𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸. 𑀓𑀺𑀜𑁆𑀘𑀸𑀧𑀺 𑀇𑀫𑀺𑀦𑀸 𑀢𑀓𑁆𑀓𑁂𑀦 𑀅𑀦𑀼𑀜𑁆𑀜𑀸𑀢𑀸, ‘‘𑀅𑀧𑁆𑀧𑀫𑀸𑀡𑀺𑀓𑀸𑀬𑁄 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀬𑁄 𑀥𑀸𑀭𑁂𑀦𑁆𑀢𑀺, 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬𑁄 𑀥𑀸𑀭𑁂𑀦𑁆𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀦 𑀅𑀜𑁆𑀜𑀣𑀸 𑀧𑀼𑀡𑁆𑀡𑀧𑀭𑀺𑀘𑁆𑀙𑁂𑀤𑀢𑁄 𑀅𑀥𑀺𑀓𑀧𑁆𑀧𑀫𑀸𑀡𑀸𑀬𑁄 𑀢𑁂 𑀪𑀺𑀓𑁆𑀔𑀽 𑀥𑀸𑀭𑁂𑀲𑀼𑀦𑁆𑀢𑀺 𑀓𑀢𑁆𑀯𑀸 𑀏𑀢𑀧𑀭𑀫𑀢𑀸 𑀢𑀸𑀲𑀁 𑀅𑀦𑀼𑀜𑁆𑀜𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀲𑁂𑀯 𑀦𑀬𑁄 𑀤𑀲𑀫𑁂𑀧𑀺.

𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀦𑁆𑀤𑀢𑁆𑀣𑁂𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁧. 𑀢𑀢𑁆𑀣 𑀪𑀺𑀲𑀺𑀁 𑀯𑀸 𑀩𑀺𑀩𑁆𑀩𑁄𑀳𑀦𑀁 𑀯𑀸 𑀓𑀭𑁄𑀢𑀻𑀢𑀺 𑀤𑀻𑀖𑀲𑁄 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀲𑀸𑀥𑀸𑀭𑀡𑀢𑁆𑀣𑀁 𑀓𑀭𑁄𑀢𑀻𑀢𑀺 𑀬𑀼𑀚𑁆𑀚𑀢𑀺.

𑀦𑀦𑁆𑀤𑀢𑁆𑀣𑁂𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀭𑀢𑀦𑀯𑀕𑁆𑀕𑁄 𑀦𑀯𑀫𑁄.

𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀸𑀝𑀺𑀤𑁂𑀲𑀦𑀻𑀬𑀓𑀡𑁆𑀟𑁄

𑁧. 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁩-𑁫. ‘‘𑀧𑀝𑀺𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀸𑀴𑀺𑀬𑀁 𑀆𑀕𑀢𑀯𑀲𑁂𑀦𑁂𑀯 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸, 𑀦 𑀅𑀜𑁆𑀜𑀣𑀸. ‘‘𑀅𑀦𑁆𑀢𑀭𑀖𑀭𑁂 𑀅𑀦𑁆𑀢𑀭𑀖𑀭𑀲𑀜𑁆𑀜𑀻’’𑀢𑀺𑀆𑀤𑀺𑀦𑀸 𑀘 ‘‘𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂 𑀅𑀔𑀸𑀤𑀦𑀻𑀬𑀅𑀪𑁄𑀚𑀦𑀻𑀬𑀲𑀜𑁆𑀜𑀻’’𑀢𑀺𑀆𑀤𑀺𑀦𑀸 𑀘 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀺𑀓𑁆𑀔𑀼𑀦𑀺𑀲𑀜𑁆𑀜𑀻’’𑀢𑀺𑀆𑀤𑀺𑀦𑀸 𑀘 𑀦𑀬𑁂𑀦 𑀅𑀧𑀭𑁂𑀧𑀺 𑀢𑀬𑁄 𑀢𑀺𑀓𑀘𑁆𑀙𑁂𑀤𑀸 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸.

𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁯. ‘‘𑀦𑀺𑀫𑀦𑁆𑀢𑀺𑀢𑀸 𑀪𑀼𑀜𑁆𑀚𑀦𑁆𑀢𑀻𑀢𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀦𑀺𑀫𑀦𑁆𑀢𑀺𑀢𑀢𑀸 𑀏𑀢𑁆𑀣 𑀦 𑀅𑀗𑁆𑀕𑀁, 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀯𑀸 𑀇𑀥 𑀯𑀸 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀮𑁂𑀲𑀸𑀪𑀸𑀯𑀢𑁄, 𑀢𑀲𑁆𑀫𑀸 ‘‘𑀦𑀺𑀫𑀦𑁆𑀢𑀺𑀢𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀧𑀼𑀩𑁆𑀩𑁂 𑀆𑀘𑀺𑀡𑁆𑀡𑀯𑀲𑁂𑀦𑁂𑀯 𑀯𑀼𑀢𑁆𑀢𑁄. 𑀅𑀧𑀭𑁂𑀧𑀺 𑀢𑀬𑁄 𑀢𑀺𑀓𑀘𑁆𑀙𑁂𑀤𑀸 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀢𑀣𑀸 𑀳𑀺 𑀪𑀼𑀜𑁆𑀚𑀦𑁆𑀢𑀸𑀦𑀁 𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀦𑀺𑀁 𑀅𑀯𑀸𑀭𑁂𑀦𑁆𑀢𑀸𑀦𑀁 𑀧𑀸𑀝𑀺𑀤𑁂𑀲𑀦𑀻𑀬𑀫𑁂𑀯. ‘‘𑀏𑀲𑀸 𑀯𑁄𑀲𑀸𑀲𑀢𑀺 𑀦𑀸𑀫, 𑀯𑁄𑀲𑀸𑀲𑀦𑁆𑀢𑀻’’𑀢𑀺 𑀘 𑀤𑀼𑀯𑀺𑀥𑁄 𑀧𑀸𑀞𑁄. ‘‘𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂’’𑀢𑀺 𑀯𑀘𑀦𑁂𑀦 𑀧𑀼𑀦 ‘‘𑀕𑀸𑀭𑀬𑁆𑀳𑀁 𑀆𑀯𑀼𑀲𑁄 𑀥𑀫𑁆𑀫’’𑀦𑁆𑀢𑀺 𑀏𑀓𑀯𑀘𑀦𑀁 𑀯𑀺𑀭𑀼𑀤𑁆𑀥𑀦𑁆𑀢𑀺. 𑀧𑀞𑀫𑀁 𑀅𑀚𑁆𑀛𑁄𑀳𑀸𑀭𑁂𑀬𑁂𑀯 𑀆𑀧𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀣𑀸 𑀅𑀜𑁆𑀜𑀢𑁆𑀭𑀸𑀧𑀺 𑀆𑀕𑀘𑁆𑀙𑀢𑀺 ‘‘𑀆𑀧𑀚𑁆𑀚𑀺𑀫𑁆𑀳𑀸’’𑀢𑀺 𑀯𑀘𑀦𑀢𑁄. 𑀏𑀓𑁂𑀦 𑀩𑀳𑀽𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀓𑁂𑀘𑀺, 𑀢𑀁 𑀦 𑀲𑀼𑀦𑁆𑀤𑀭𑀁. ‘‘𑀢𑁂𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀞𑁂 𑀯𑀼𑀢𑁆𑀢𑀢𑁆𑀢𑀸𑀢𑀺 𑀫𑀫 𑀢𑀓𑁆𑀓𑁄. 𑀏𑀓𑁂𑀦 𑀲𑀳𑁂𑀯 ‘‘𑀅𑀳𑀁 𑀆𑀧𑀚𑁆𑀚𑀺’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀏𑀓𑁂𑀦 𑀤𑁆𑀯𑀻𑀳𑀺 𑀢𑀻𑀳𑀺 𑀤𑁂𑀲𑁂𑀢𑀩𑁆𑀩𑀢𑁄, 𑀲𑀩𑁆𑀩𑁂𑀳𑀺 𑀏𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀆𑀧𑀚𑁆𑀚𑀺𑀫𑁆𑀳𑀸𑀢𑀺 𑀲𑀳𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀏𑀓𑁂𑀦 𑀘𑁂 𑀅𑀯𑀸𑀭𑀺𑀢𑁄, ‘‘𑀅𑀳𑀁, 𑀆𑀯𑀼𑀲𑁄, 𑀕𑀸𑀭𑀬𑁆𑀳𑀁 𑀥𑀫𑁆𑀫𑀁 𑀆𑀧𑀚𑁆𑀚𑀺’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁.

𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁬𑁨-𑁫𑁭𑁦. 𑀢𑀢𑀺𑀬𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺𑀬𑁂𑀯.

𑀧𑀸𑀝𑀺𑀤𑁂𑀲𑀦𑀻𑀬𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑁂𑀔𑀺𑀬𑀓𑀡𑁆𑀟𑁄

𑁧. 𑀧𑀭𑀺𑀫𑀡𑁆𑀟𑀮𑀯𑀕𑁆𑀕𑀯𑀡𑁆𑀡𑀦𑀸

𑁫𑁭𑁬. ‘‘𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁂𑀦𑀸𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀢𑁆𑀣𑀫𑁂𑀯 𑀦𑀺𑀲𑀺𑀦𑁆𑀦𑀲𑁆𑀲 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀉𑀪𑁄𑀧𑁂𑀢𑁂 𑀅𑀝𑁆𑀞𑀓𑀣𑀸𑀯𑀸𑀤𑀸 𑀏𑀓𑀧𑀭𑀺𑀘𑁆𑀙𑁂𑀤𑀸, ‘‘𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣’’𑀦𑁆𑀢𑀺 𑀲𑀼𑀔𑀼𑀫𑀁, 𑀏𑀓𑀧𑀢𑁆𑀢𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀬𑀣𑀸𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀤𑀼𑀧𑀝𑁆𑀝𑀁 𑀲𑀦𑁆𑀥𑀸𑀬 ‘‘𑀤𑁆𑀯𑀺𑀳𑀢𑁆𑀣𑀧𑁆𑀧𑀫𑀸𑀡𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀏𑀓𑀧𑀝𑁆𑀝𑀁, 𑀤𑁆𑀯𑀺𑀧𑀝𑁆𑀝𑀁 𑀯𑀸 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 ‘‘𑀤𑁆𑀯𑀺𑀳𑀢𑁆𑀣𑀧𑁆𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑀅𑀝𑁆𑀞𑀓𑀣𑀸𑀬𑀁 ‘‘𑀢𑀺𑀭𑀺𑀬𑀁 𑀤𑁆𑀯𑀺𑀳𑀢𑁆𑀣𑁄𑀧𑀺 𑀯𑀝𑁆𑀝𑀢𑀻’’𑀢𑀺, 𑀢𑀜𑁆𑀘 𑀔𑁄 𑀅𑀮𑀸𑀪𑁂 𑀏𑀯 ‘‘𑀅𑀮𑀸𑀪𑁂 𑀢𑀺𑀭𑀺𑀬𑀁 𑀤𑁆𑀯𑀺𑀳𑀢𑁆𑀣𑀧𑁆𑀧𑀫𑀸𑀡𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀇𑀤𑀁 𑀲𑀩𑁆𑀩𑀁 𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀭𑀼𑀤𑁆𑀥𑀁 𑀤𑀺𑀲𑁆𑀯𑀸 𑀲𑀚𑁆𑀚𑁂𑀢𑀩𑁆𑀩𑀁. 𑀦𑁄 𑀘𑁂 𑀲𑀚𑁆𑀚𑁂𑀢𑀺, 𑀤𑀼𑀓𑁆𑀓𑀝𑀁. 𑀲𑀘𑀺𑀢𑁆𑀢𑀓𑀁 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦𑁂𑀯 ‘‘𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀦 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 ‘‘𑀇𑀤𑀫𑁂𑀯𑀁 𑀓𑀢’’𑀦𑁆𑀢𑀺 𑀚𑀸𑀦𑀢𑁄𑀧𑀺 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑀯𑀸𑀤𑁄𑀧𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺. 𑀢𑀣𑀸 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀯𑀸𑀤𑁄𑀧𑀺. 𑀧𑀜𑁆𑀜𑀢𑁆𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑁂 𑀅𑀧𑀜𑁆𑀜𑀢𑁆𑀢𑁂𑀧𑀺 𑀬𑀁 𑀧𑀓𑀢𑀺𑀬𑀸 𑀯𑀚𑁆𑀚𑀁, 𑀢𑀁 𑀮𑁄𑀓𑀯𑀚𑁆𑀚𑀁. 𑀇𑀤𑀁 𑀧𑀦 𑀧𑀜𑁆𑀜𑀢𑁆𑀢𑁂𑀬𑁂𑀯 𑀯𑀚𑁆𑀚𑀁, 𑀦𑀸𑀧𑀜𑁆𑀜𑀢𑁆𑀢𑁂, 𑀢𑀲𑁆𑀫𑀸 𑀇𑀢𑀭𑀮𑁄𑀓𑀯𑀚𑁆𑀚𑁂𑀦 𑀅𑀲𑀤𑀺𑀲𑀢𑁆𑀢𑀸 𑀦 𑀮𑁄𑀓𑀯𑀚𑁆𑀚𑀁. 𑀧𑀡𑁆𑀡𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀯𑀚𑁆𑀚𑀢𑁄 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀅𑀦𑀸𑀤𑀭𑀺𑀬𑀘𑀺𑀢𑁆𑀢𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀲𑀘𑀺𑀢𑁆𑀢𑀓𑀁, 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀺𑀯𑁂𑀤𑀦𑀢𑁆𑀢𑀸 𑀢𑀺𑀯𑁂𑀤𑀦𑀁. 𑀬𑀲𑁆𑀫𑀸 𑀅𑀦𑀸𑀤𑀭𑀺𑀬𑀘𑀺𑀢𑁆𑀢𑀢𑀸 𑀦𑀸𑀫 𑀓𑁂𑀯𑀮𑀁 𑀅𑀓𑀼𑀲𑀮𑀫𑁂𑀯, 𑀢𑀜𑁆𑀘 𑀧𑀓𑀢𑀺𑀬𑀸 𑀯𑀚𑁆𑀚𑀁, 𑀢𑀲𑁆𑀫𑀸 𑀇𑀤𑀁 𑀮𑁄𑀓𑀯𑀚𑁆𑀚𑀁. 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑀁 𑀦𑀸𑀫 𑀤𑁄𑀫𑀦𑀲𑁆𑀲𑀺𑀓𑀲𑁆𑀲𑁂𑀯 𑀳𑁄𑀢𑀻𑀢𑀺 𑀤𑀼𑀓𑁆𑀔𑀯𑁂𑀤𑀦𑀁. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀺 𑀯𑀺𑀬 𑀦𑀺𑀯𑀸𑀲𑀦𑀸𑀤𑀺𑀤𑁄𑀲𑁄 𑀮𑁄𑀓𑀕𑀭𑀳𑀺𑀢𑁄 𑀦 𑀳𑁄𑀢𑀻𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀦𑁆𑀢𑀺 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄’’𑀢𑀺 𑀮𑀺𑀔𑀺𑀢𑀁.

𑁫𑁭𑁭. 𑀯𑀺𑀳𑀸𑀭𑁂𑀧𑀻𑀢𑀺 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀸𑀤𑀺𑀓𑀸𑀮𑁂, 𑀢𑀲𑁆𑀫𑀸 ‘‘𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀞𑀫𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀭𑀺𑀴𑀸𑀳𑀸𑀤𑀺𑀧𑀘𑁆𑀘𑀬𑀸 𑀓𑀧𑁆𑀧𑀢𑀺, 𑀦 𑀅𑀦𑁆𑀢𑀭𑀖𑀭𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼.

𑁫𑁮𑁨. ‘‘𑀏𑀓𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸’’𑀢𑀺 𑀏𑀢𑁆𑀣 ‘‘𑀕𑀘𑁆𑀙𑀦𑁆𑀢𑁄𑀧𑀺 𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀑𑀮𑁄𑀓𑁂𑀢𑀼𑀁 𑀮𑀪𑀢𑀺𑀬𑁂𑀯. 𑀢𑀣𑀸 𑀕𑀸𑀫𑁂 𑀧𑀽𑀚’’𑀦𑁆𑀢𑀺 𑀮𑀺𑀔𑀺𑀢𑀁, 𑀢𑀁 𑀧𑀦 ‘‘𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀸𑀤𑀺𑀲𑀁 𑀅𑀦𑁆𑀢𑀭𑀸𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀺𑀫𑀡𑁆𑀟𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁫𑁮𑁬. 𑀳𑀲𑀦𑀻𑀬𑀲𑁆𑀫𑀺𑀦𑁆𑀢𑀺 𑀳𑁂𑀢𑁆𑀯𑀢𑁆𑀣𑁂 𑀪𑀼𑀫𑁆𑀫𑀁, 𑀳𑀲𑀺𑀢𑀩𑁆𑀩𑀯𑀢𑁆𑀣𑀼𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀖𑀭𑁂 𑀉𑀘𑁆𑀘𑀸𑀲𑀤𑁆𑀤𑁂𑀦 𑀅𑀦𑀼𑀫𑁄𑀤𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀓𑀺𑀭. 𑀢𑀣𑀸 𑀳𑀺 𑀫𑀳𑀺𑀦𑁆𑀤𑀢𑁆𑀣𑁂𑀭𑁄𑀧𑀺 𑀳𑀢𑁆𑀣𑀺𑀲𑀸𑀮𑀸𑀤𑀻𑀲𑀼 𑀫𑀳𑀸𑀚𑀦𑀲𑁆𑀲 𑀓𑀣𑁂𑀲𑀺.

𑁫𑁯𑁧. 𑀓𑁂𑀘𑀺 𑀪𑀺𑀓𑁆𑀔𑀽 ‘‘𑀧𑀭𑀺𑀓𑁆𑀔𑀸𑀭𑀝𑁆𑀞𑀧𑀦𑀫𑀢𑁆𑀢𑁂𑀦 𑀯𑀸𑀲𑀽𑀧𑀕𑀢𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀪𑀺𑀓𑁆𑀔𑀼𑀦𑀺𑀬𑁄 𑀘𑁂 𑀯𑀸𑀲𑀽𑀧𑀕𑀸 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄𑀯 𑀓𑀧𑁆𑀧𑀺𑀬𑀪𑀽𑀫𑀺. ‘‘𑀬𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑁄 𑀏𑀓𑀭𑀢𑁆𑀢𑀫𑁆𑀧𑀺 𑀯𑀲𑀦𑁆𑀢𑀺, 𑀅𑀬𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄’’𑀢𑀺 (𑀧𑀸𑀘𑀺. 𑁧𑁬𑁧) 𑀯𑀘𑀦𑀢𑁄 𑀢𑀸𑀲𑀁 𑀲𑀫𑀻𑀧𑀁 𑀯𑀸 𑀢𑀸𑀳𑀺 𑀕𑀳𑀺𑀢𑀯𑀸𑀲𑀸𑀕𑀸𑀭𑀁 𑀯𑀸 ‘‘𑀕𑀘𑁆𑀙𑀸𑀫𑀻’’𑀢𑀺 𑀕𑀘𑁆𑀙𑀢𑁄 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀦 𑀳𑀺 𑀢𑀸𑀯𑀢𑀸 𑀢𑀁 𑀖𑀭𑀁 𑀅𑀦𑁆𑀢𑀭𑀖𑀭𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄.

𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀔𑀫𑁆𑀪𑀓𑀢𑀯𑀕𑁆𑀕𑀯𑀡𑁆𑀡𑀦𑀸

𑁬𑁦𑁪. 𑀲𑀽𑀧𑁄 𑀧𑀢𑁆𑀢𑀧𑁆𑀧𑀫𑀸𑀡𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀸𑀓𑀸𑀭𑁄. 𑀑𑀮𑁄𑀡𑀻 𑀯𑀼𑀘𑁆𑀘𑀢𑀺 𑀓𑀼𑀥𑀺𑀢𑀁, 𑀕𑁄𑀭𑀲𑀢𑁄 𑀧𑀽𑀭𑀸 𑀣𑀽𑀧𑀺𑀢𑁄𑀢𑀺 𑀅𑀢𑁆𑀣𑁄.

𑁬𑁦𑁫. 𑀳𑁂𑀝𑁆𑀞𑀸 𑀑𑀭𑁄𑀳𑀢𑀻𑀢𑀺 𑀏𑀢𑁆𑀣 ‘‘𑀑𑀭𑁄𑀳𑀦𑀧𑁆𑀧𑀫𑀸𑀡𑁂 𑀲𑀢𑀺 𑀏𑀓𑀤𑁂𑀲𑁂 𑀣𑀽𑀧𑀻𑀓𑀢𑁂𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀧𑀢𑁆𑀢𑀲𑁆𑀲 𑀧𑀦 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀧𑀤𑀼𑀫𑀺𑀦𑀺𑀧𑀡𑁆𑀡𑀸𑀤𑀻𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀑𑀤𑀳𑀦𑁆𑀢𑀺𑀬𑀸 𑀮𑀤𑁆𑀥𑀁 𑀦𑀸𑀫 𑀯𑀝𑁆𑀝𑀢𑀻’’𑀢𑀺 𑀘 𑀯𑀤𑀦𑁆𑀢𑀺. 𑀏𑀢𑁆𑀣 ‘‘𑀬𑀲𑁆𑀫𑀸 ‘𑀲𑀫𑀢𑀺𑀢𑁆𑀢𑀺𑀓𑁄 𑀧𑀺𑀡𑁆𑀟𑀧𑀸𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄’𑀢𑀺 𑀯𑀘𑀦𑀁 𑀧𑀺𑀡𑁆𑀟𑀧𑀸𑀢𑁄 𑀲𑀫𑀧𑀼𑀡𑁆𑀡𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑁂 𑀧𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑁄 𑀤𑀺𑀬𑁆𑀬𑀫𑀸𑀦𑁄 𑀣𑀽𑀧𑀻𑀓𑀢𑁄𑀧𑀺 𑀘𑁂 𑀳𑁄𑀢𑀺, 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. ‘𑀣𑀽𑀧𑀻𑀓𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 𑀳𑀺 𑀯𑀘𑀦𑀁 𑀧𑀞𑀫𑀁 𑀣𑀽𑀧𑀻𑀓𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀘𑁆𑀙𑀸 𑀧𑀝𑀺𑀕𑁆𑀕𑀡𑁆𑀳𑀢𑁄, 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀧𑀢𑁆𑀢𑁂𑀦 𑀧𑀝𑀺𑀕𑁆𑀕𑀡𑁆𑀳𑀢𑁄 𑀘𑁂𑀧𑀺 𑀣𑀽𑀧𑀻𑀓𑀢𑀁 𑀳𑁄𑀢𑀺, 𑀯𑀝𑁆𑀝𑀢𑀺 𑀅𑀣𑀽𑀧𑀻𑀓𑀢𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸. 𑀧𑀬𑁄𑀕𑁄 𑀧𑀦 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀧𑀼𑀩𑁆𑀩𑀤𑁂𑀲𑀸’’𑀢𑀺 𑀘 ‘‘𑀲𑀫𑀢𑀺𑀢𑁆𑀢𑀺𑀓𑀦𑁆𑀢𑀺 𑀯𑀸 𑀪𑀸𑀯𑀦𑀧𑀼𑀁𑀲𑀓’’𑀦𑁆𑀢𑀺 𑀘 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀔𑀫𑁆𑀪𑀓𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀓𑁆𑀓𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸

𑁬𑁦𑁯. 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂 ‘‘𑀲𑀽𑀧𑁄 𑀦𑀸𑀫 𑀤𑁆𑀯𑁂 𑀲𑀽𑀧𑀸’’𑀢𑀺 𑀦 𑀯𑀼𑀢𑁆𑀢𑀁 𑀲𑀽𑀧𑀕𑁆𑀕𑀳𑀡𑁂𑀦 𑀧𑀡𑀻𑀢𑀪𑁄𑀚𑀦𑁂𑀳𑀺 𑀅𑀯𑀲𑁂𑀲𑀸𑀦𑀁 𑀲𑀩𑁆𑀩𑀪𑁄𑀚𑀦𑀸𑀦𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀘𑀲𑁆𑀲 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀅𑀢𑁆𑀢𑀦𑁄 𑀥𑀦𑁂𑀦𑀸’’𑀢𑀺 𑀇𑀤𑀁 𑀅𑀥𑀺𑀓𑀁. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 ‘‘𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀅𑀚𑀸𑀦𑀦𑁆𑀢𑀲𑁆𑀲 𑀕𑀺𑀮𑀸𑀦𑀲𑁆𑀲 𑀆𑀧𑀤𑀸𑀲𑀽’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀦, ‘‘𑀲𑀫𑀲𑀽𑀧𑀓𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀓𑀢𑁆𑀣𑀘𑀺 𑀮𑀺𑀔𑀺𑀢𑀁, 𑀢𑀜𑁆𑀘 𑀧𑀫𑀸𑀤𑀯𑀲𑁂𑀦 𑀮𑀺𑀔𑀺𑀢𑀁. ‘‘𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀑𑀕𑀺𑀮𑀺𑀢𑀼𑀓𑀸𑀫𑀲𑁆𑀲𑀧𑀺 𑀲𑀳𑀲𑀸 𑀘𑁂 𑀧𑀯𑀺𑀲𑀢𑀺, 𑀏𑀢𑁆𑀣 ‘𑀅𑀲𑀜𑁆𑀘𑀺𑀘𑁆𑀘𑀸’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀜𑀢𑁆𑀢𑀫𑁆𑀧𑀺 𑀅𑀯𑀺𑀜𑁆𑀜𑀢𑁆𑀢𑀫𑁆𑀧𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀁 𑀲𑀳𑀲𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 ‘𑀅𑀲𑀢𑀺𑀬𑀸’𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀮𑀺𑀔𑀺𑀢𑀁, 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀏𑀓𑀘𑁆𑀘𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 ‘‘𑀭𑀲𑀭𑀲𑁂𑀢𑀺 𑀮𑀺𑀔𑀺𑀢𑀁, 𑀢𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀓𑁆𑀓𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀩𑀴𑀯𑀕𑁆𑀕𑀯𑀡𑁆𑀡𑀦𑀸

𑁬𑁧𑁮. ‘‘𑀲𑀩𑁆𑀩𑀁 𑀳𑀢𑁆𑀣’’𑀦𑁆𑀢𑀺 𑀯𑀘𑀦𑀢𑁄 𑀏𑀓𑀤𑁂𑀲𑀁 𑀫𑀼𑀔𑁂 𑀧𑀓𑁆𑀔𑀺𑀧𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀏𑀓𑀘𑁆𑀘𑁂. ‘‘𑀲𑀩𑁆𑀩𑀦𑁆𑀢𑀺 𑀯𑀘𑀦𑀢𑁄 𑀏𑀓𑀤𑁂𑀲𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀅𑀯𑀺𑀲𑁂𑀲𑀺𑀢𑀢𑁆𑀢𑀸.

𑁬𑁨𑁪. 𑀲𑀺𑀢𑁆𑀣𑀸𑀯𑀓𑀸𑀭𑀓𑁂 ‘‘𑀓𑀘𑀯𑀭𑀁 𑀙𑀟𑁆𑀟𑁂𑀦𑁆𑀢𑀁 𑀲𑀺𑀢𑁆𑀣𑀁 𑀙𑀟𑁆𑀟𑀺𑀬𑁆𑀬𑀢𑀻’’𑀢𑀺 𑀘 ‘‘𑀓𑀘𑀯𑀭𑀁 𑀙𑀟𑁆𑀟𑁂𑀦𑁆𑀢𑁄’’𑀢𑀺 𑀘 𑀧𑀸𑀞𑁄.

𑀓𑀩𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀼𑀭𑀼𑀲𑀼𑀭𑀼𑀯𑀕𑁆𑀕𑀯𑀡𑁆𑀡𑀦𑀸

𑁬𑁨𑁭. ‘‘𑀲𑀼𑀭𑀼𑀲𑀼𑀭𑀼’’𑀦𑁆𑀢𑀺 𑀘 ‘‘𑀲𑀼𑀭𑁄𑀲𑀼𑀭𑁄’’𑀢𑀺 𑀘 𑀧𑀸𑀞𑁄. 𑀲𑀻𑀢𑀻𑀓𑀢𑁄𑀢𑀺 𑀲𑀻𑀢𑀗𑁆𑀓𑁄. ‘‘𑀲𑀺𑀮𑀓𑀩𑀼𑀤𑁆𑀥𑁄𑀢𑀺 𑀅𑀭𑀺𑀬𑀸𑀦𑀁 𑀧𑀭𑀺𑀳𑀸𑀲𑀯𑀘𑀦𑀫𑁂𑀯𑁂𑀢’’𑀦𑁆𑀢𑀺 𑀮𑀺𑀔𑀺𑀢𑀁.

𑁬𑁩𑁧. 𑀧𑀝𑀺𑀓𑁆𑀓𑀽𑀮𑀯𑀲𑁂𑀦𑀸𑀢𑀺 𑀏𑀢𑁆𑀣 𑀬𑀤𑀺 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁, ‘‘𑀲𑁂𑀬𑁆𑀬𑀣𑀸𑀧𑀺 𑀓𑀸𑀫𑀪𑁄𑀕𑀺𑀦𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀢𑁂 𑀧𑀝𑀺𑀓𑁆𑀓𑀽𑀮𑀁 𑀓𑀭𑁄𑀦𑁆𑀢𑀻𑀢𑀺 𑀘𑁂? 𑀦, 𑀇𑀲𑁆𑀲𑀭𑀺𑀬𑀮𑀺𑀗𑁆𑀕𑀯𑀲𑁂𑀦 𑀕𑀳𑀡𑀲𑀫𑁆𑀪𑀯𑀢𑁄. 𑀢𑁂 𑀳𑀺 𑀅𑀦𑀸𑀤𑀭𑀸 𑀳𑁄𑀦𑁆𑀢𑀺. 𑀧𑀢𑁆𑀢𑀥𑁄𑀯𑀦𑀦𑁆𑀢𑀺 𑀧𑀢𑁆𑀢𑀥𑁄𑀯𑀦𑁄𑀤𑀓𑀁 𑀪𑁄𑀚𑀦𑀧𑀝𑀺𑀲𑀁𑀬𑀼𑀢𑁆𑀢𑀁.

𑁬𑁩𑁪. ‘‘𑀙𑀢𑁆𑀢𑀧𑀸𑀤𑀼𑀓𑀸𑀬’’𑀦𑁆𑀢𑀺 𑀘 ‘‘𑀙𑀢𑁆𑀢𑀧𑀸𑀤𑁂’’𑀢𑀺 𑀘 𑀧𑀸𑀞𑁄.

𑁬𑁩𑁭. 𑀘𑀸𑀧𑁄𑀢𑀺 𑀲𑀢𑁆𑀢𑀔𑀸𑀤𑀦𑀯𑀥𑁄. ‘‘𑀲𑁂𑀲𑀸 𑀲𑀩𑁆𑀩𑀸 𑀥𑀦𑀼𑀯𑀺𑀓𑀢𑀺 𑀓𑁄𑀤𑀡𑁆𑀟𑁂 𑀧𑀯𑀺𑀝𑁆𑀞𑀸’’𑀢𑀺 𑀘 𑀮𑀺𑀔𑀺𑀢𑀁, 𑀧𑀝𑀺𑀫𑀼𑀓𑁆𑀓𑀦𑁆𑀢𑀺 𑀧𑀯𑁂𑀲𑀺𑀢𑀁, 𑀮𑀕𑁆𑀕𑀺𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀭𑀼𑀲𑀼𑀭𑀼𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀸𑀤𑀼𑀓𑀯𑀕𑁆𑀕𑀯𑀡𑁆𑀡𑀦𑀸

𑁬𑁪𑁦. 𑀲𑀬𑀁 𑀬𑀸𑀦𑀕𑀢𑁄 𑀳𑀼𑀢𑁆𑀯𑀸, 𑀬𑀣𑀸 𑀬𑀸𑀦𑀕𑀢𑀲𑁆𑀲 𑀯𑁂.

𑀅𑀮𑀁 𑀯𑀢𑁆𑀢𑀼𑀁 𑀢𑀣𑀸 𑀦𑀸𑀮𑀁, 𑀲𑀙𑀢𑁆𑀢𑁄 𑀙𑀢𑁆𑀢𑀧𑀸𑀡𑀺𑀦𑁄.

𑀬𑀣𑀸 𑀏𑀢𑁆𑀣, 𑀏𑀯𑀁 𑀅𑀜𑁆𑀜𑀢𑁆𑀭𑀸𑀧𑀺.

𑁬𑁪𑁭. 𑀙𑀧𑀓𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑀘𑀸𑀳𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀞𑁄, ‘‘𑀤𑀲 𑀘𑁂 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘 𑀅𑀢𑁆𑀣𑀺, ‘‘𑀯𑀢𑁆𑀣𑀼𑀲𑁆𑀫𑀺𑀁 𑀅𑀕𑀺𑀮𑀸𑀦𑀲𑁆𑀲𑀸’’𑀢𑀺 𑀘 𑀆𑀕𑀘𑁆𑀙𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁, 𑀲𑀺𑀓𑁆𑀔𑀸𑀧𑀤𑁂𑀬𑁂𑀯 𑀲𑀼𑀦𑁆𑀤𑀭𑀁. 𑀣𑁄𑀫𑀺𑀢𑁄𑀢𑀺 𑀅𑀳𑀫𑁆𑀧𑀺 𑀚𑀸𑀦𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸 𑀥𑀦𑀬𑀲𑀮𑀸𑀪𑀲𑀗𑁆𑀔𑀸𑀢𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦 𑀳𑁄𑀢𑀺 𑀲𑀫𑁆𑀧𑀭𑀸𑀬𑁂 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑀳𑁂𑀢𑀼 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀅𑀣 𑀯𑀸 𑀯𑀺𑀦𑀺𑀧𑀸𑀢𑁂𑀦𑀸𑀢𑀺 𑀳𑁂𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀯𑀺𑀦𑀺𑀧𑀸𑀢𑀦𑀸𑀬 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀥𑀫𑁆𑀫𑀘𑀭𑀡𑁂𑀦 𑀅𑀥𑀫𑁆𑀫𑀘𑀭𑀡𑀸𑀬. ‘‘𑀅𑀲𑁆𑀫𑀸 𑀓𑀼𑀫𑁆𑀪𑀺𑀫𑀺𑀯𑀸’’𑀢𑀺 𑀘 𑀧𑀞𑀦𑁆𑀢𑀺.

𑀧𑀸𑀤𑀼𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀯𑀡𑁆𑀡𑀦𑀸

𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀳𑀦𑁆𑀢𑀻𑀢𑀺 𑀓𑀢𑁆𑀯𑀸 ‘‘𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀫𑀦𑀼𑀪𑀸𑀲𑀦𑀁 𑀓𑀺𑀭𑀺𑀬𑀁. 𑀇𑀫𑀸𑀦𑀺 𑀓𑀺𑀭𑀺𑀬𑀸𑀦𑀺. 𑀥𑀫𑁆𑀫𑀤𑁂𑀲𑀦𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸𑀘𑀸𑀘𑀺𑀢𑁆𑀢𑀢𑁄𑀢𑀺 𑀏𑀢𑁆𑀣 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀪𑀸𑀯𑀢𑁄 𑀉𑀚𑁆𑀚𑀕𑁆𑀖𑀺𑀓𑀉𑀘𑁆𑀘𑀸𑀲𑀤𑁆𑀤𑀸𑀤𑀻𑀲𑀼 𑀯𑀺𑀬 ‘‘𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀸𑀦𑀺. 𑀦𑀺𑀲𑀻𑀤𑀦𑀕𑀫𑀦𑀸𑀳𑀸𑀭𑀧𑀓𑁆𑀔𑀺𑀧𑀦𑀸𑀤𑀺𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑀸 𑀢𑀢𑁆𑀣 𑀬𑀼𑀢𑁆𑀢𑀁, 𑀦 𑀥𑀫𑁆𑀫𑀤𑁂𑀲𑀦𑁂 𑀢𑀸𑀤𑀺𑀲𑀲𑁆𑀲𑀸𑀪𑀸𑀯𑀸.

𑀧𑀓𑀺𑀡𑁆𑀡𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀔𑀺𑀬𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀢𑁆𑀢𑀸𑀥𑀺𑀓𑀭𑀡𑀲𑀫𑀣𑀯𑀡𑁆𑀡𑀦𑀸

‘‘𑀬𑁂𑀪𑀼𑀬𑁆𑀬𑀲𑀺𑀓𑀸 𑀓𑀸𑀢𑀩𑁆𑀩𑀸…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑁄 𑀓𑀸𑀢𑀩𑁆𑀩𑁄, 𑀲𑁄 𑀧𑀼𑀕𑁆𑀕𑀮𑁄’’𑀢𑀺 𑀘 𑀮𑀺𑀔𑀺𑀢𑀁.

𑀲𑀢𑁆𑀢𑀸𑀥𑀺𑀓𑀭𑀡𑀲𑀫𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲