𑁭. 𑀲𑀧𑁆𑀧𑀸𑀡𑀓𑀯𑀕𑁆𑀕𑁄

𑁧. 𑀲𑀜𑁆𑀘𑀺𑀘𑁆𑀘𑀧𑀸𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁨. 𑀲𑀜𑁆𑀘𑀺𑀘𑁆𑀘𑀧𑀸𑀡𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁭. ‘‘𑀧𑀸𑀡𑁄 𑀅𑀢𑁆𑀣𑀻’’𑀢𑀺 𑀚𑀸𑀦𑀦𑁆𑀢𑁄𑀧𑀺 ‘‘𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀧𑀺𑀯𑀢𑀺𑀘𑁂, 𑀅𑀦𑀸𑀧𑀢𑁆𑀢𑀺.

𑀚𑀮𑁂 𑀧𑀓𑁆𑀔𑀺𑀧𑀦𑀁 𑀧𑀼𑀧𑁆𑀨𑀁, 𑀚𑀮𑀧𑁆𑀧𑀯𑁂𑀲𑀦𑀁 𑀇𑀤𑀁;

𑀏𑀯𑀁 𑀉𑀪𑀺𑀦𑁆𑀦𑀁 𑀦𑀸𑀦𑀢𑁆𑀢𑀁, 𑀜𑁂𑀬𑁆𑀬𑀁 𑀜𑀸𑀡𑀯𑀢𑀸 𑀲𑀤𑀸𑀢𑀺.

𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁨. 𑀢𑀢𑀺𑀬𑁂 𑀤𑁆𑀯𑀸𑀤𑀲 𑀉𑀓𑁆𑀓𑁄𑀝𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀅𑀓𑀢𑀁 𑀓𑀫𑁆𑀫𑀁, 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁, 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫𑀦𑁆𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀺. 𑀅𑀦𑀺𑀳𑀝𑀁, 𑀤𑀼𑀦𑁆𑀦𑀺𑀳𑀝𑀁, 𑀦 𑀧𑀼𑀦 𑀳𑀭𑀺𑀢𑀩𑁆𑀩𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀺, 𑀅𑀯𑀺𑀦𑀺𑀘𑁆𑀙𑀺𑀢𑀁, 𑀤𑀼𑀯𑀺𑀦𑀺𑀘𑁆𑀙𑀺𑀢𑀁, 𑀧𑀼𑀦 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀺. 𑀅𑀯𑀽𑀧𑀲𑀦𑁆𑀢𑀁, 𑀤𑀼𑀯𑀽𑀧𑀲𑀦𑁆𑀢𑀁, 𑀧𑀼𑀦 𑀯𑀽𑀧𑀲𑀫𑁂𑀢𑀩𑁆𑀩𑀦𑁆𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀦𑀬𑁄, 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀫𑀼𑀔𑀫𑀢𑁆𑀢𑀫𑁂𑀯 𑀤𑀲𑁆𑀲𑀺𑀢𑀁.

𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁯. ‘‘𑀧𑀸𑀭𑀸𑀚𑀺𑀓𑀸𑀦𑀻𑀢𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑀺𑀢𑀸𑀦𑀻’’𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀧𑀭𑀺𑀯𑀸𑀭𑀧𑀸𑀴𑀺𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼𑀦𑀻 𑀚𑀸𑀦𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀯𑁂𑀫𑀢𑀺𑀓𑀸 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀆𑀘𑀸𑀭𑀯𑀺𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀭𑀺. 𑁨𑁯𑁦). 𑀧𑀸𑀭𑀸𑀚𑀺𑀓𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀪𑀺𑀓𑁆𑀔𑀼 𑀅𑀦𑀸𑀧𑀢𑁆𑀢𑀺, 𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀘𑁂? 𑀦, 𑀲𑀁𑀓𑀺𑀮𑀺𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀧𑀝𑀺𑀘𑁆𑀙𑀸𑀤𑀦𑁂 𑀯𑀺𑀦𑀸 𑀆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀤𑀼𑀓𑁆𑀓𑀝𑀯𑀸𑀭𑁂 𑀯𑀢𑁆𑀢𑀩𑁆𑀩𑀸𑀧𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄 𑀧𑀞𑀫𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺 𑀲𑀳 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀼𑀦 𑀯𑀢𑁆𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀸𑀯 𑀓𑁄𑀝𑀺 𑀦 𑀙𑀺𑀚𑁆𑀚𑀢𑀻𑀢𑀺 𑀘𑁂𑀢𑁆𑀣 𑀬𑁄 𑀅𑀦𑁆𑀢𑀫𑀲𑁄 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀼 𑀯𑀸, 𑀫𑀸 𑀯𑀸, 𑀧𑀝𑀺𑀘𑁆𑀙𑀸𑀤𑀦𑀘𑀺𑀢𑁆𑀢𑁂𑀦𑁂𑀯 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀢𑀲𑁆𑀲 𑀧𑀼𑀦 𑀅𑀜𑁆𑀜𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀅𑀦𑀸𑀭𑁄𑀘𑀦𑁂𑀦𑁂𑀯 𑀦 𑀓𑁄𑀝𑀺 𑀙𑀺𑀦𑁆𑀦𑀸 𑀳𑁄𑀢𑀺, 𑀓𑀺𑀁 𑀧𑀼𑀦 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀘𑀦𑁂𑀦 𑀧𑀬𑁄𑀚𑀦𑀦𑁆𑀢𑀺 𑀦 𑀅𑀦𑁆𑀢𑀺𑀫𑀲𑁆𑀲 𑀅𑀦𑀸𑀭𑁄𑀘𑀦𑁂𑀦 𑀙𑀺𑀦𑁆𑀦𑀸 𑀳𑁄𑀢𑀺, 𑀅𑀧𑁆𑀧𑀝𑀺𑀘𑁆𑀙𑀸𑀤𑀦𑁂𑀦 𑀏𑀯 𑀙𑀺𑀦𑁆𑀦𑀸 𑀳𑁄𑀢𑀺, 𑀢𑀢𑁄 𑀅𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀅𑀧𑀼𑀩𑁆𑀩𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁, 𑀢𑀢𑁄 𑀧𑀝𑁆𑀞𑀸𑀬 𑀓𑁄𑀝𑀺 𑀙𑀺𑀦𑁆𑀦𑀸 𑀳𑁄𑀢𑀺, 𑀢𑀤𑀪𑀸𑀯𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀆𑀭𑁄𑀘𑁂𑀢𑀩𑁆𑀩𑀁, 𑀏𑀯𑀫𑁆𑀧𑀺 𑀓𑁄𑀝𑀺 𑀙𑀺𑀦𑁆𑀦𑀸 𑀳𑁄𑀢𑀻𑀢𑀺 𑀏𑀯𑀁 𑀦𑁄 𑀧𑀝𑀺𑀪𑀸𑀢𑀻𑀢𑀺 𑀆𑀘𑀭𑀺𑀬𑁄. 𑀢𑀢𑀺𑀬𑁂𑀦 𑀤𑀼𑀢𑀺𑀬𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀤𑀼𑀢𑀺𑀬𑁄 𑀦𑀸𑀫 𑀧𑀞𑀫𑁄’’𑀢𑀺 𑀯𑀤𑀦𑁆𑀢𑀸𑀦𑀁 ‘‘𑀯𑀢𑁆𑀣𑀼 𑀧𑀼𑀕𑁆𑀕𑀮𑁄 𑀦 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀸𑀭𑀺𑀢𑀢𑁆𑀢𑀸 𑀦 𑀲𑀼𑀦𑁆𑀤𑀭𑀁. 𑀅𑀜𑁆𑀜𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀆𑀭𑁄𑀘𑀦𑁂𑀧𑀺 𑀦 𑀲𑀼𑀦𑁆𑀤𑀭𑀁. 𑀓𑀲𑁆𑀫𑀸? 𑀧𑀼𑀩𑁆𑀩𑁂𑀯 𑀲𑀼𑀢𑁆𑀯𑀸 𑀅𑀜𑁆𑀜𑀲𑁆𑀲 𑀅𑀦𑀸𑀭𑁄𑀘𑀺𑀢𑀢𑁆𑀢𑀸. ‘‘𑀲𑀼𑀢𑁂𑀦 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁 𑀲𑀺𑀬𑀸’’𑀢𑀺 𑀯𑀤𑀦𑁆𑀢𑀺.

𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁦𑁪. 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀩𑀳𑀼𑀥𑀸. 𑀳𑀸𑀬𑀦𑀯𑀟𑁆𑀠𑀦𑀦𑁆𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀘𑁂 𑀤𑁆𑀯𑀸𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀊𑀦𑀢𑀸𑀬 𑀳𑀸𑀬𑀦𑀁 𑀓𑀢𑀁. 𑀧𑀲𑀽𑀢𑀲𑁆𑀲 𑀯𑀟𑁆𑀠𑀦𑀁 𑀓𑀸𑀢𑀩𑁆𑀩𑀁. 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀘𑁂 𑀯𑀟𑁆𑀠𑀦𑀁 𑀓𑀢𑀁. 𑀧𑀲𑀽𑀢𑀲𑁆𑀲 𑀳𑀸𑀬𑀦𑀁 𑀓𑀸𑀢𑀩𑁆𑀩𑀁. 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀻 𑀦𑀸𑀫 𑀲𑀸𑀯𑀡𑀫𑀸𑀲𑀲𑁆𑀲 𑀧𑀼𑀡𑁆𑀡𑀫𑀸𑀲𑀻. ‘‘𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀤𑀼𑀢𑀺𑀬𑁂 𑀉𑀧𑀕𑀘𑁆𑀙𑀢𑀺 𑀤𑀺𑀯𑀲𑁂’’𑀢𑀺 𑀮𑀺𑀔𑀺𑀢𑀁. 𑀲𑁄 𑀳𑀺 𑀧𑀲𑀽𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 𑀳𑁄𑀢𑀺. 𑀅𑀯𑀲𑁂𑀲𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀥𑀺𑀓𑀤𑀺𑀯𑀲𑀸𑀦𑀺 𑀳𑁄𑀦𑁆𑀢𑁂𑀯, 𑀢𑀲𑁆𑀫𑀸 𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀕𑀩𑁆𑀪𑀯𑀲𑁆𑀲𑀜𑁆𑀘 𑀧𑀯𑀸𑀭𑁂𑀢𑁆𑀯𑀸 𑀮𑀤𑁆𑀥𑀯𑀲𑁆𑀲𑀜𑁆𑀘 𑀅𑀕𑀡𑁂𑀢𑁆𑀯𑀸 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀕𑀡𑁂𑀢𑁆𑀯𑀸 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀁. 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑁄𑀢𑀺 ‘‘𑀕𑀩𑁆𑀪𑀯𑀲𑁆𑀲𑀁 𑀏𑀯 𑀧𑀳𑀸𑀬𑀸’’𑀢𑀺 𑀮𑀺𑀔𑀺𑀢𑀁, 𑀢𑀁 𑀤𑀼𑀮𑁆𑀮𑀺𑀔𑀺𑀢𑀁.

𑁪𑁦𑁬. 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀻𑀢𑀺 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺. ‘‘𑀑𑀧𑀧𑀸𑀢𑀺𑀓𑀲𑁆𑀲 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀪𑀸𑀯𑀢𑁄 𑀧𑀼𑀦 𑀘𑀢𑁆𑀢𑀸𑀭𑁄 𑀯𑀲𑁆𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀸 𑀓𑀸𑀢𑀩𑁆𑀩𑀸’’𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻𑀢𑀺 𑀓𑁂𑀘𑀺.

𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁦𑁯. 𑀣𑁂𑀬𑁆𑀬𑀲𑀢𑁆𑀣𑁄 𑀘𑁂 𑀲𑀼𑀤𑁆𑀥𑀫𑀸𑀢𑀼𑀕𑀸𑀫𑁄 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄. 𑀅𑀣 𑀪𑀺𑀓𑁆𑀔𑀼𑀦𑀺𑀬𑁄, 𑀲𑀫𑀬𑁄 𑀭𑀓𑁆𑀔𑀢𑀺. 𑀣𑁂𑀬𑁆𑀬𑀲𑀢𑁆𑀣𑀪𑀸𑀯𑀲𑁆𑀲 𑀞𑀸𑀦𑀁 𑀓𑀢𑁆𑀯𑀸 𑀭𑀓𑁆𑀔𑀡𑀻𑀬𑀢𑁆𑀢𑀸 𑀲𑀳𑀥𑀫𑁆𑀫𑀺𑀓𑀸𑀦𑀁 𑀭𑀓𑁆𑀔𑀢𑀺𑀬𑁂𑀯𑀸𑀢𑀺 𑀏𑀓𑁂. 𑀣𑁂𑀬𑁆𑀬𑀪𑀸𑀯𑁂 𑀦 𑀲𑀳𑀥𑀫𑁆𑀫𑀺𑀓𑀢𑀸, 𑀢𑀲𑁆𑀫𑀸 𑀦 𑀭𑀓𑁆𑀔𑀢𑀺 𑀏𑀯𑀸𑀢𑀺 𑀏𑀓𑁂. 𑀅𑀧𑀸𑀭𑀸𑀚𑀺𑀓𑀣𑁂𑀬𑁆𑀬𑀪𑀸𑀯𑁂 𑀲𑀢𑀺 𑀲𑀳𑀥𑀫𑁆𑀫𑀺𑀓𑀪𑀸𑀯𑁄𑀢𑀺 𑀘𑁂? 𑀇𑀢𑀭𑀲𑁆𑀫𑀺𑀁 𑀇𑀢𑀭𑀦𑁆𑀢𑀺 𑀲𑀫𑀬𑁄 𑀅𑀦𑀺𑀲𑁆𑀲𑀝𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼 𑀣𑁂𑀬𑁆𑀬𑀲𑀢𑁆𑀣𑁄 𑀘𑁂, 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀣𑁂𑀬𑁆𑀬𑀲𑀢𑁆𑀣𑁂 𑀣𑁂𑀬𑁆𑀬𑀲𑀢𑁆𑀣𑀲𑀜𑁆𑀜𑀻 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬𑀸𑀢𑀺 𑀘. ‘‘𑀲𑀤𑁆𑀥𑀺’’𑀦𑁆𑀢𑀺 𑀧𑀤𑀁 𑀓𑁂𑀲𑀼𑀘𑀺 𑀦𑀢𑁆𑀣𑀺, 𑀢𑀁 𑀅𑀦𑀦𑀼𑀭𑀽𑀧𑀁. 𑀢𑀣𑀸 𑀤𑀼𑀢𑀺𑀬𑁂𑀧𑀺.

𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁨. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻’’𑀢𑀺 𑀘 𑀧𑀸𑀞𑁄 𑀅𑀢𑁆𑀣𑀺, 𑀓𑁂𑀲𑀼𑀘𑀺 𑀦𑀢𑁆𑀣𑀺. 𑀦𑀢𑁆𑀣𑀺𑀪𑀸𑀯𑁄 𑀲𑀼𑀦𑁆𑀤𑀭𑁄 ‘‘𑀢𑁂𑀦 𑀔𑁄 𑀲𑀫𑀬𑁂𑀦𑀸’’𑀢𑀺 𑀅𑀥𑀺𑀓𑀸𑀭𑀢𑁆𑀢𑀸𑀢𑀺 𑀓𑁂𑀘𑀺. 𑀇𑀥 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸, 𑀲𑀺𑀓𑁆𑀔𑀫𑀸𑀦𑀸, 𑀲𑀸𑀫𑀡𑁂𑀭𑀻𑀢𑀺 𑀇𑀫𑀸𑀧𑀺 𑀢𑀺𑀲𑁆𑀲𑁄 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀇𑀫𑀸𑀲𑀁 𑀧𑀦 𑀲𑀫𑀬𑁄 𑀭𑀓𑁆𑀔𑀢𑀺, 𑀅𑀬𑀫𑀺𑀫𑀸𑀲𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀘 𑀯𑀺𑀲𑁂𑀲𑁄.

𑁪𑁧𑁪. 𑀅𑀧𑀺𑀘𑁂𑀢𑁆𑀣 ‘‘𑀯𑀺𑀜𑁆𑀜𑀽 𑀧𑀝𑀺𑀩𑀮𑀸’’𑀢𑀺 𑀯𑀘𑀦𑀢𑁄 𑀅𑀧𑁆𑀧𑀝𑀺𑀩𑀮𑀸 𑀅𑀦𑀸𑀧𑀢𑁆𑀢𑀺𑀯𑀢𑁆𑀣𑀼𑀓𑀸𑀢𑀺 𑀏𑀓𑁂, 𑀢𑀁 𑀦 𑀬𑀼𑀢𑁆𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀢𑁆𑀢𑀸. ‘‘𑀪𑀺𑀓𑁆𑀔𑀼 𑀲𑀁𑀯𑀺𑀤𑀳𑀢𑀺, 𑀫𑀸𑀢𑀼𑀕𑀸𑀫𑁄 𑀦 𑀲𑀁𑀯𑀺𑀤𑀳𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁭. 𑀕𑀳𑀝𑁆𑀞𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑀓𑀫𑁆𑀫𑀁 𑀫𑁄𑀓𑁆𑀔𑀦𑁆𑀢𑀭𑀸𑀬𑀺𑀓𑀫𑁂𑀯, 𑀢𑀲𑁆𑀫𑀸 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑀸 𑀅𑀳𑁂𑀢𑀼𑀓𑀢𑁆𑀢𑀸. 𑀧𑀼𑀩𑁆𑀩𑁂 𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀸 𑀲𑀫𑁆𑀫𑀼𑀝𑁆𑀞𑀸 𑀲𑀼𑀤𑁆𑀥𑀲𑀜𑁆𑀜𑀺𑀦𑁄 𑀅𑀦𑁆𑀢𑀭𑀸𑀬𑀺𑀓𑀸 𑀏𑀯. 𑀲𑁂𑀲𑀸𑀢𑀺 𑀚𑀸𑀢𑀺𑀓𑀸. 𑀭𑀲𑁂𑀦𑀸𑀢𑀺 𑀪𑀸𑀯𑁂𑀦. 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀓𑀭𑀡𑀁 𑀓𑀢𑁆𑀯𑀸 𑀓𑀼𑀝𑁆𑀝𑀦𑀝𑁆𑀞𑁂𑀦 𑀙𑀺𑀦𑁆𑀤𑀦𑀝𑁆𑀞𑁂𑀦. 𑀅𑀲𑀺𑀲𑀽𑀦𑀽𑀧𑀫𑀸 𑀓𑀼𑀲𑀮𑀥𑀫𑁆𑀫𑀘𑁆𑀙𑁂𑀤𑀦𑀝𑁆𑀞𑁂𑀦. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀘𑀺𑀢𑁆𑀢𑀯𑀺𑀢𑀼𑀤𑀦𑀝𑁆𑀞𑁂𑀦𑀸𑀢𑀺 𑀧𑁄𑀭𑀸𑀡𑀸. 𑀅𑀦𑀸𑀧𑀢𑁆𑀢𑀺𑀧𑀸𑀴𑀺𑀬𑀁 ‘‘𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 𑀫𑀼𑀔𑀸𑀭𑀼𑀴𑁆𑀳𑀯𑀲𑁂𑀦 𑀮𑀺𑀔𑀺𑀢𑀁.

𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁫. ‘‘𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀝𑁆𑀞𑁂𑀦𑀸𑀢𑀺 𑀇𑀫𑀺𑀦𑀸 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀢𑀁 𑀤𑀻𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀺𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁂𑀦 𑀲𑀳𑀯𑀸𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀣𑀸 𑀲𑀘𑀺𑀢𑁆𑀢𑀓𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀲𑀦𑁆𑀥𑀸𑀬 𑀦 𑀬𑀼𑀚𑁆𑀚𑀢𑀺.

𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁮. 𑀬𑀢𑁆𑀣 𑀢𑁂 𑀦 𑀧𑀲𑁆𑀲𑀸𑀫𑀸𑀢𑀺 𑀢𑁂𑀢𑀺 𑀢𑀁. 𑀅𑀣 𑀯𑀸 𑀢𑀯 𑀭𑀽𑀧𑀸𑀤𑀺𑀁 𑀦 𑀧𑀲𑁆𑀲𑀸𑀫. 𑀅𑀬𑀁 𑀲𑀫𑀡𑀼𑀤𑁆𑀤𑁂𑀲𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. ‘‘𑀲𑀘𑁂 𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀲𑀗𑁆𑀖𑀸𑀦𑀼𑀫𑀢𑀺𑀬𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀁 𑀦 𑀬𑀼𑀢𑁆𑀢𑀁, 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀬𑀤𑀺 𑀲𑁄 𑀧𑀸𑀭𑀸𑀚𑀺𑀓𑁄, 𑀮𑀺𑀗𑁆𑀕𑀦𑀸𑀲𑀦𑀸 𑀦𑀸𑀫 𑀲𑀺𑀬𑀸. 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺 𑀘 𑀤𑀺𑀝𑁆𑀞𑀺 𑀲𑀢𑁆𑀣𑀭𑀺 𑀅𑀲𑀢𑁆𑀣𑀸𑀤𑀺𑀤𑀺𑀝𑁆𑀞𑀺 𑀦 𑀳𑁄𑀢𑀺. 𑀲𑀘𑁂 𑀲𑀸 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀲𑀁𑀯𑀭𑁂 𑀅𑀢𑀺𑀝𑁆𑀞𑀦𑁆𑀢𑁄 𑀮𑀺𑀗𑁆𑀕𑀦𑀸𑀲𑀦𑀸𑀬𑁂𑀯 𑀦𑀸𑀲𑁂𑀢𑀩𑁆𑀩𑁄𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄.

𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀲𑀧𑁆𑀧𑀸𑀡𑀓𑀯𑀕𑁆𑀕𑁄 𑀲𑀢𑁆𑀢𑀫𑁄.