𑁬. 𑀲𑀼𑀭𑀸𑀧𑀸𑀦𑀯𑀕𑁆𑀕𑁄

𑁧. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀆𑀬𑀲𑁆𑀫𑀢𑁄 𑀬𑀁 𑀫𑀼𑀦𑀺 𑀲𑀸𑀕𑀢𑀲𑁆𑀲,

𑀫𑀳𑀺𑀤𑁆𑀥𑀺𑀓𑀢𑁆𑀢𑀲𑁆𑀲 𑀦𑀺𑀤𑀲𑁆𑀲𑀦𑁂𑀦;

𑀧𑀸𑀦𑀲𑁆𑀲 𑀤𑁄𑀲𑁄 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁,

𑀧𑀼𑀩𑁆𑀩𑁂𑀯 𑀲𑁄 𑀪𑀤𑁆𑀤𑀯𑀢𑀺𑀁 𑀧𑀬𑀸𑀢𑁄.

𑀢𑀲𑁆𑀫𑀸 𑀧𑀲𑁆𑀲𑀁 𑀦𑀸𑀕𑀫𑀧𑁄𑀣𑀬𑀺𑀢𑁆𑀯𑀸,

𑀯𑀺𑀦𑀺𑀲𑁆𑀲𑀝𑀁 𑀲𑀸𑀕𑀢𑀁 𑀇𑀤𑁆𑀥𑀺𑀬𑀸 𑀘;

𑀦𑀢𑁄 𑀲𑀼𑀭𑀸𑀧𑀸𑀦𑀦𑀺𑀲𑁂𑀥𑀦𑀢𑁆𑀣𑀁,

𑀓𑁄𑀲𑀫𑁆𑀩𑀺𑀫𑁂𑀯𑀚𑁆𑀛𑀕𑀫𑀸𑀢𑀺 𑀜𑁂𑀬𑁆𑀬𑀁.

𑁩𑁨𑁬-𑁮. 𑀧𑀲𑀼𑀧𑀸𑀮𑀓𑀸𑀢𑀺 𑀅𑀚𑀧𑀸𑀮𑀓𑀸. 𑀬𑁂𑀦 𑀫𑀚𑁆𑀚𑀢𑀺, 𑀢𑀲𑁆𑀲 𑀩𑀻𑀚𑀢𑁄 𑀧𑀝𑁆𑀞𑀸𑀬. 𑀓𑁂𑀘𑀺 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯𑀸𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸 𑀯𑀢𑁆𑀣𑀼𑀁 𑀚𑀸𑀦𑀺𑀢𑁆𑀯𑀸 𑀧𑀺𑀯𑀢𑁄 𑀅𑀓𑀼𑀲𑀮’’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 ‘‘𑀅𑀓𑀼𑀲𑀮𑁂𑀦𑁂𑀯 𑀧𑀸𑀢𑀩𑁆𑀩𑀢𑀸𑀬𑀸𑀢𑀺 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑀫𑁂𑀯 𑀲𑀦𑁆𑀥𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 ‘‘𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀦𑁆𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀫𑁆𑀧𑀺 ‘‘𑀢𑀩𑁆𑀩𑀳𑀼𑀮𑀦𑀬𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀫𑁆𑀧𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀅𑀓𑀼𑀲𑀮𑀘𑀺𑀢𑁆𑀢’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀢𑀁 𑀅𑀓𑀼𑀲𑀮𑁂𑀦𑁂𑀯 𑀧𑀺𑀯𑀢𑀻’’𑀢𑀺 𑀯𑀤𑀦𑁆𑀢𑀻𑀢𑀺.

𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁦. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩. 𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁬. 𑀢𑀢𑀺𑀬𑁂 𑀓𑀣𑀁 𑀢𑀺𑀯𑁂𑀤𑀦𑀁? 𑀳𑀲𑀸𑀥𑀺𑀧𑁆𑀧𑀸𑀬𑁂𑀦𑁂𑀯 ‘‘𑀧𑀭𑀲𑁆𑀲 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀉𑀤𑀓𑀁 𑀔𑀺𑀧𑀦𑁆𑀢𑀲𑁆𑀲 𑀤𑀼𑀓𑁆𑀔𑀯𑁂𑀤𑀦𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀁.

𑀇𑀤𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀜𑁆𑀘𑁂, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀓𑀣𑀁;

𑀓𑀻𑀴𑀺𑀢𑀁𑀯 𑀅𑀓𑀻𑀴𑀸𑀢𑀺, 𑀫𑀺𑀘𑁆𑀙𑀸𑀕𑀸𑀳𑁂𑀦 𑀢𑀁 𑀲𑀺𑀬𑀸.

𑀏𑀢𑁆𑀢𑀸𑀯𑀢𑀸 𑀓𑀣𑀁 𑀓𑀻𑀴𑀸, 𑀇𑀢𑀺 𑀓𑀻𑀴𑀸𑀬𑀁 𑀏𑀯𑀸𑀬𑀁;

𑀅𑀓𑀻𑀴𑀸𑀲𑀜𑁆𑀜𑀻 𑀳𑁄𑀢𑁂𑀢𑁆𑀣, 𑀯𑀺𑀦𑀬𑀢𑁆𑀣𑀁 𑀲𑀫𑀸𑀤𑀬𑁂.

𑀏𑀓𑀦𑁆𑀢𑀸𑀓𑀼𑀲𑀮𑁄 𑀬𑀲𑁆𑀫𑀸, 𑀓𑀻𑀴𑀸𑀬𑀸𑀪𑀺𑀭𑀢𑀫𑀦𑁄;

𑀢𑀲𑁆𑀫𑀸 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁, 𑀏𑀓𑀫𑁂𑀯𑁂𑀢𑁆𑀣 𑀮𑀩𑁆𑀪𑀢𑀻𑀢𑀺.

𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁪. ‘‘𑀮𑁄𑀓𑀯𑀚𑁆𑀚𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘𑀇𑀤𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀕𑁆𑀕𑀳𑁄’𑀢𑀺 𑀯𑀤𑀦𑁆𑀢𑀲𑁆𑀲 𑀦 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀬𑀁 𑀲𑀁𑀓𑀺𑀮𑀺𑀝𑁆𑀞𑁂𑀦𑁂𑀯 𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀺, 𑀬𑀁 𑀯𑀸 𑀅𑀭𑀺𑀬𑀧𑀼𑀕𑁆𑀕𑀮𑁄 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀅𑀚𑁆𑀛𑀸𑀘𑀭𑀢𑀺, 𑀇𑀤𑀁 𑀮𑁄𑀓𑀯𑀚𑁆𑀚𑀦𑁆𑀢𑀺 𑀲𑀩𑁆𑀩𑀢𑁆𑀣𑀺𑀓𑀯𑀸𑀤𑀻𑀆𑀤𑀻𑀦𑀺 𑀆𑀘𑀭𑀺𑀬𑀓𑀼𑀮𑀸𑀦𑀺. 𑀢𑀢𑁆𑀣 𑀤𑀼𑀢𑀺𑀬𑀢𑀢𑀺𑀬𑀯𑀺𑀓𑀧𑁆𑀧𑁄 𑀇𑀥 𑀦 𑀅𑀥𑀺𑀧𑁆𑀧𑁂𑀢𑁄 𑀲𑁂𑀔𑀺𑀬𑀸𑀦𑀁 𑀮𑁄𑀓𑀯𑀚𑁆𑀚𑀢𑁆𑀢𑀸.

𑀕𑀸𑀭𑀬𑁆𑀳𑁄 𑀆𑀘𑀭𑀺𑀬𑀼𑀕𑁆𑀕𑀳𑁄𑀢𑀺 𑀏𑀢𑁆𑀣 ‘‘𑀬𑀲𑁆𑀫𑀸 𑀉𑀘𑁆𑀙𑀼𑀭𑀲𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄, 𑀢𑀲𑁆𑀲 𑀓𑀲𑀝𑁄 𑀬𑀸𑀯𑀚𑀻𑀯𑀺𑀓𑁄, 𑀤𑁆𑀯𑀺𑀦𑁆𑀦𑀁𑀬𑁂𑀯 𑀲𑀫𑀯𑀸𑀬𑁄 𑀉𑀘𑁆𑀙𑀼𑀬𑀝𑁆𑀞𑀺, 𑀢𑀲𑁆𑀫𑀸 𑀯𑀺𑀓𑀸𑀮𑁂 𑀉𑀘𑁆𑀙𑀼𑀬𑀝𑁆𑀞𑀺𑀁 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺 𑀕𑀼𑀴𑀳𑀭𑀻𑀝𑀓𑀁 𑀯𑀺𑀬𑀸’𑀢𑀺 𑀏𑀯𑀫𑀸𑀤𑀺𑀓𑁄 𑀲𑀫𑁆𑀧𑀢𑀺 𑀦𑀺𑀩𑁆𑀩𑀢𑁆𑀢𑁄 𑀕𑀸𑀭𑀬𑁆𑀳𑀸𑀘𑀭𑀺𑀬𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄’’𑀢𑀺 𑀘, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂 𑀧𑀦 𑀯𑀝𑁆𑀝𑀢𑀻𑀢𑀺 ‘‘𑀦 𑀧𑀢𑁆𑀢𑀳𑀢𑁆𑀣𑁂𑀦 𑀓𑀯𑀸𑀝𑁄 𑀧𑀡𑀸𑀫𑁂𑀢𑀩𑁆𑀩𑁄’𑀢𑀺 𑀇𑀫𑀲𑁆𑀲 ‘𑀬𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑁄 𑀕𑀳𑀺𑀢𑁄, 𑀢𑁂𑀦 𑀳𑀢𑁆𑀣𑁂𑀦 𑀦 𑀧𑀡𑀸𑀫𑁂𑀢𑀩𑁆𑀩𑁄, 𑀇𑀢𑀭𑁂𑀦 𑀧𑀡𑀸𑀫𑁂𑀢𑀩𑁆𑀩𑁄’𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑀣𑀸 𑀆𑀘𑀭𑀦𑁆𑀢𑁄 𑀦 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. ‘𑀢𑀣𑀸 𑀩𑀼𑀤𑁆𑀥𑀩𑁄𑀥𑀺𑀘𑁂𑀢𑀺𑀬𑀸𑀦𑀁 𑀧𑀼𑀧𑁆𑀨𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀢𑀣𑀸 𑀆𑀘𑀭𑀦𑁆𑀢𑁄’’𑀢𑀺 𑀘. 𑀢𑀣𑀸 𑀆𑀘𑀭𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀓𑁄. 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀘𑁂 𑀏𑀯𑀁 𑀯𑀤𑀦𑁆𑀢𑀺, ‘‘𑀫𑀸 𑀏𑀯𑀁 𑀯𑀤𑀸’’𑀢𑀺 𑀅𑀧𑀲𑀸𑀤𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀜𑁆𑀘 𑀉𑀕𑁆𑀕𑀳𑀺𑀢𑀓𑀸𑀦𑀁𑀬𑁂𑀯𑀸’’𑀢𑀺𑀆𑀤𑀺. ‘‘𑀇𑀤𑀁 𑀲𑀩𑁆𑀩𑀁 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀆𑀳𑀸’’𑀢𑀺 𑀘 𑀯𑀼𑀢𑁆𑀢𑀁. ‘‘𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀅𑀝𑁆𑀞𑀓𑀣𑀸’’𑀢𑀺 𑀮𑀺𑀔𑀺𑀢𑀁.

𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀪𑀺𑀁𑀲𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁫. 𑀪𑀺𑀁𑀲𑀸𑀧𑀦𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁬. 𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁫𑁪. ‘‘𑀯𑀺𑀲𑀺𑀩𑁆𑀩𑀦𑀸𑀧𑁂𑀓𑁆𑀔𑁄’’𑀢𑀺 𑀯𑀘𑀦𑀢𑁄 𑀬𑀲𑁆𑀲 𑀅𑀧𑁂𑀓𑁆𑀔𑀸 𑀦𑀢𑁆𑀣𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁪. 𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁮. 𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁮. 𑀅𑀮𑀪𑀻𑀢𑀺 𑀮𑀪𑁄. 𑀬𑀣𑀸 ‘‘𑀧𑀘𑀢𑀻𑀢𑀺 𑀧𑀘𑁄, 𑀧𑀣𑀢𑀻𑀢𑀺 𑀧𑀣𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 ‘‘𑀮𑀪𑀢𑀻𑀢𑀺 𑀮𑀪𑁄’’𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀁? 𑀧𑀭𑀺𑀦𑀺𑀝𑁆𑀞𑀺𑀢𑀮𑀸𑀪𑀲𑁆𑀲𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀫𑀕𑁆𑀕𑁂𑀢𑀺 𑀲𑀺𑀩𑁆𑀩𑀺𑀦𑀺𑀫𑀕𑁆𑀕𑁂. 𑀓𑀧𑁆𑀧𑀓𑀢𑁂𑀦 𑀲𑀤𑁆𑀥𑀺𑀁 𑀅𑀓𑀧𑁆𑀧𑀓𑀢𑀁 𑀲𑀺𑀩𑁆𑀩𑁂𑀢𑀺. 𑀬𑀸𑀯𑀢𑀸 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺, 𑀢𑀸𑀯𑀢𑀸 𑀧𑀼𑀩𑁆𑀩𑀁 𑀓𑀧𑁆𑀧𑀫𑁂𑀯. 𑀓𑀧𑁆𑀧𑀁 𑀦 𑀯𑀺𑀚𑀳𑀢𑀺 𑀘𑁂, 𑀧𑀼𑀦 𑀓𑀧𑁆𑀧𑀁 𑀤𑀸𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄.

𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁭𑁪. 𑀧𑀭𑀺𑀪𑁄𑀕𑁄 𑀏𑀢𑁆𑀣 𑀓𑀸𑀬𑀓𑀫𑁆𑀫𑀁. 𑀅𑀧𑀘𑁆𑀘𑀼𑀤𑁆𑀥𑀸𑀭𑀡𑀁 𑀯𑀘𑀻𑀓𑀫𑁆𑀫𑀁.

𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀘𑀻𑀯𑀭𑀸𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁭𑁯. 𑀤𑀲𑀫𑁂 𑀬𑀲𑁆𑀫𑀸 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀘𑀻𑀯𑀭𑀦𑀺𑀲𑀻𑀤𑀦𑀫𑁆𑀧𑀻𑀢𑀺 𑀉𑀪𑀬𑀫𑁆𑀧𑀺 𑀲𑀤𑀲𑀫𑁂𑀯, 𑀢𑀲𑁆𑀫𑀸 𑀢𑀁 𑀉𑀪𑀬𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 ‘‘𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀢𑀢𑁆𑀣𑀸𑀧𑀺 𑀘𑀻𑀯𑀭𑀕𑁆𑀕𑀳𑀡𑁂𑀦 𑀘𑀻𑀯𑀭𑀦𑀺𑀲𑀻𑀤𑀦𑀁 𑀕𑀳𑀺𑀢𑀫𑁂𑀯𑀸𑀢𑀺 𑀅𑀢𑁆𑀣𑀢𑁄 𑀲𑀦𑁆𑀣𑀢𑀦𑀺𑀲𑀻𑀤𑀦𑀫𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀏𑀯𑀁 ‘‘𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀇𑀢𑀭𑀲𑁆𑀲 𑀅𑀦𑀺𑀲𑀻𑀤𑀦𑀅𑀤𑀲𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀏𑀢𑁆𑀣 𑀦𑀺𑀲𑀻𑀤𑀦𑀲𑀦𑁆𑀣𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀢𑁆𑀢𑀸 𑀇𑀢𑀭𑀫𑁆𑀧𑀺 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁 𑀢𑀚𑁆𑀚𑀸𑀢𑀺𑀓𑀢𑁆𑀢𑀸. 𑀲𑀲𑁆𑀲𑀸𑀫𑀺𑀓𑁂 𑀲𑀽𑀘𑀺𑀖𑀭𑁂 𑀲𑀽𑀘𑀺𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄𑀢𑀺 𑀧𑁄𑀭𑀸𑀡𑀸.

𑀘𑀻𑀯𑀭𑀸𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀲𑀼𑀭𑀸𑀧𑀸𑀦𑀯𑀕𑁆𑀕𑁄 𑀙𑀝𑁆𑀞𑁄.