𑁪. 𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁧-𑁩. 𑀧𑀝𑀺𑀬𑀸𑀮𑁄𑀓𑀦𑁆𑀢𑀺 𑀧𑀘𑁆𑀙𑀺𑀫𑀁 𑀤𑁂𑀲𑀁. 𑀧𑀽𑀯𑀕𑀡𑀦𑀸𑀬𑀸𑀢𑀺 𑀅𑀢𑀺𑀭𑀺𑀢𑁆𑀢𑀧𑀽𑀯𑀕𑀡𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀘𑁂 ‘‘𑀅𑀧𑀸𑀣𑁂𑀬𑁆𑀬𑀸𑀤𑀺𑀅𑀢𑁆𑀣𑀸𑀬 𑀲𑀚𑁆𑀚𑀺𑀢’’𑀦𑁆𑀢𑀺 𑀲𑀜𑁆𑀜𑀸𑀬 𑀕𑀡𑁆𑀳𑀸𑀢𑀺, 𑀅𑀘𑀺𑀢𑁆𑀢𑀓𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲 𑀆𑀧𑀢𑁆𑀢𑀺 𑀏𑀯. 𑀅𑀣 𑀉𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀢𑀺, 𑀦 𑀫𑀼𑀘𑁆𑀘𑀢𑀺𑀬𑁂𑀯. 𑀅𑀲𑀁𑀯𑀺𑀪𑀸𑀕𑁂 𑀧𑀦 𑀅𑀦𑀸𑀧𑀢𑁆𑀢𑀺 𑀅𑀓𑀧𑁆𑀧𑀺𑀬𑀢𑁆𑀢𑀸. 𑀅𑀘𑀺𑀢𑁆𑀢𑀓𑀢𑀸 𑀧𑀜𑁆𑀜𑀢𑁆𑀢𑀺𑀚𑀸𑀦𑀦𑀸𑀪𑀸𑀯𑁂𑀦𑁂𑀯, 𑀦 𑀯𑀢𑁆𑀣𑀼𑀚𑀸𑀦𑀦𑀸𑀪𑀸𑀯𑁂𑀦𑀸𑀢𑀺 𑀏𑀓𑁂. 𑀦, 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀧𑀸𑀣𑁂𑀬𑁆𑀬𑀸𑀤𑀺𑀅𑀢𑁆𑀣𑀸𑀬 𑀲𑀚𑁆𑀚𑀺𑀢𑀪𑀸𑀯𑀚𑀸𑀦𑀦’’𑀦𑁆𑀢𑀺 𑀅𑀗𑁆𑀕𑁂𑀲𑀼 𑀅𑀯𑀼𑀢𑁆𑀢𑀢𑁆𑀢𑀸. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦𑁂𑀯𑀁 𑀯𑀼𑀢𑁆𑀢𑀁 ‘‘𑀏𑀓𑁂𑀦 𑀯𑀸 𑀅𑀦𑁂𑀓𑁂𑀳𑀺 𑀯𑀸 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑁂𑀲𑀼 𑀕𑀳𑀺𑀢𑁂𑀲𑀼 𑀢𑁂𑀲𑀁 𑀅𑀦𑀸𑀭𑁄𑀘𑀦𑁂𑀦 𑀯𑀸 𑀲𑀬𑀁 𑀯𑀸 𑀚𑀸𑀦𑀺𑀢𑁆𑀯𑀸 𑀬𑁄 𑀅𑀜𑁆𑀜𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀏𑀓𑀢𑁄 𑀢𑀻𑀲𑀼, 𑀘𑀢𑀽𑀲𑀼 𑀯𑀸 𑀧𑀯𑀺𑀝𑁆𑀞𑁂𑀲𑀼 𑀏𑀓𑁂𑀦 𑀘𑁂 𑀤𑁆𑀯𑁂𑀧𑀢𑁆𑀢𑀧𑀽𑀭𑀸 𑀕𑀳𑀺𑀢𑀸, 𑀤𑀼𑀢𑀺𑀬𑁂 𑀤𑁆𑀯𑁂 𑀕𑀡𑁆𑀳𑀦𑁆𑀢𑁂 𑀧𑀞𑀫𑁄 𑀘𑁂 𑀦 𑀦𑀺𑀯𑀸𑀭𑁂𑀢𑀺, 𑀧𑀞𑀫𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀦𑀺𑀯𑀸𑀭𑁂𑀢𑀺 𑀘𑁂, 𑀅𑀦𑀸𑀧𑀢𑁆𑀢𑀺, 𑀤𑀼𑀢𑀺𑀬𑀲𑁆𑀲𑁂𑀯 𑀤𑀼𑀓𑁆𑀓𑀝’’𑀦𑁆𑀢𑀺. 𑀲𑀘𑁂 𑀲𑀜𑁆𑀘𑀺𑀘𑁆𑀘 𑀦 𑀯𑀤𑀢𑀺, 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀲𑁂𑀦 (𑀓𑀗𑁆𑀔𑀸. 𑀅𑀝𑁆𑀞. 𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀤𑀼𑀓𑁆𑀓𑀝𑀁. ‘‘𑀅𑀢𑀺𑀭𑁂𑀓𑀧𑀝𑀺𑀕𑁆𑀕𑀳𑀡’’𑀦𑁆𑀢𑀺 𑀢𑀢𑁆𑀣 𑀧𑀜𑁆𑀘𑀫𑀁 𑀅𑀗𑁆𑀕𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀓𑀢𑁆𑀢𑀩𑁆𑀩𑀸𑀓𑀭𑀡𑀢𑁄 𑀧𑀦 𑀤𑀼𑀓𑁆𑀓𑀝𑀁. 𑀅𑀜𑁆𑀜𑀣𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀇𑀤𑀁 𑀆𑀧𑀚𑁆𑀚𑀢𑀺, 𑀅𑀦𑀺𑀯𑀸𑀭𑀡𑀁, 𑀅𑀦𑀸𑀭𑁄𑀘𑀦𑀁 𑀯𑀸 𑀙𑀝𑁆𑀞𑀗𑁆𑀕𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀏𑀓𑀦𑀺𑀓𑀸𑀬𑀺𑀓𑀸𑀦𑀁 𑀯𑀸𑀢𑀺 𑀏𑀢𑁆𑀣 ‘‘𑀆𑀲𑀦𑁆𑀦𑀯𑀺𑀳𑀸𑀭𑀪𑀺𑀓𑁆𑀔𑀽, 𑀆𑀲𑀦𑁆𑀦𑀆𑀲𑀦𑀲𑀸𑀮𑀸𑀕𑀢𑀸 𑀯𑀸 𑀲𑀘𑁂 𑀯𑀺𑀲𑀪𑀸𑀕𑁂𑀳𑀺 𑀆𑀦𑀻𑀢𑀁 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, ‘𑀆𑀭𑀸𑀫𑀺𑀓𑀸𑀤𑀻𑀦𑀁𑀬𑁂𑀯 𑀯𑀸 𑀤𑀸𑀧𑁂𑀦𑁆𑀢𑀻’𑀢𑀺 𑀚𑀸𑀦𑀸𑀢𑀺, 𑀬𑀢𑁆𑀣 𑀧𑀭𑀺𑀪𑁄𑀕𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑀸’𑀢𑀺 𑀯𑀘𑀦𑀢𑁄 𑀧𑀘𑁆𑀙𑀺𑀆𑀤𑀻𑀲𑀼 𑀅𑀥𑀺𑀓𑀫𑁆𑀧𑀺 𑀕𑀡𑁆𑀳𑀢𑁄 𑀅𑀦𑀸𑀧𑀢𑁆𑀢𑀻’’𑀢𑀺 𑀓𑁂𑀘𑀺 𑀯𑀺𑀦𑀬𑀥𑀭𑀫𑀸𑀦𑀺𑀦𑁄 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁𑀬𑁂𑀯 𑀦𑀺𑀲𑀻𑀤𑀢𑀼, 𑀆𑀘𑀭𑀺𑀬𑀸 𑀧𑀦 ‘‘𑀧𑀘𑁆𑀙𑀺𑀆𑀤𑀻𑀲𑀼𑀧𑀺 𑀉𑀓𑁆𑀓𑀝𑁆𑀞𑀧𑀢𑁆𑀢𑀲𑁆𑀲 𑀧𑀫𑀸𑀡𑀯𑀲𑁂𑀦 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑀸 𑀕𑀳𑁂𑀢𑀩𑁆𑀩𑀸. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀓𑀣𑀸 𑀳𑁂𑀲𑀸’’𑀢𑀺 𑀯𑀤𑀦𑁆𑀢𑀺.

𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.