𑁫. 𑀧𑀞𑀫𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁩𑁬. 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀓𑀺𑀜𑁆𑀘𑀸𑀧𑀺 ‘‘𑀧𑀯𑀸𑀭𑀺𑀢𑀸’’𑀇𑀘𑁆𑀘𑁂𑀯 𑀅𑀥𑀺𑀧𑁆𑀧𑁂𑀢𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸𑀯, 𑀅𑀣 𑀔𑁄 𑀧𑀘𑁆𑀙𑀺𑀫𑀸𑀯 𑀇𑀥𑀸𑀥𑀺𑀧𑁆𑀧𑁂𑀢𑀸.

𑁨𑁩𑁭. ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑀺𑀭𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀪𑀺𑀓𑁆𑀔𑀼𑀲𑁆𑀲 𑀇𑀤𑀫𑁆𑀧𑀺 𑀢𑁂 𑀅𑀥𑀺𑀓𑀁, 𑀇𑀢𑁄 𑀅𑀜𑁆𑀜𑀁 𑀦 𑀮𑀘𑁆𑀙𑀢𑀻𑀢𑀺 𑀓𑀺𑀭 𑀅𑀢𑁆𑀣𑁄.

𑁨𑁩𑁮-𑁯. ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀢𑁂𑀦𑁂𑀯 ‘‘𑀪𑀼𑀢𑁆𑀢𑀸𑀯𑀻’’𑀢𑀺 𑀏𑀢𑀲𑁆𑀲 𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑀼𑀁 𑀅𑀢𑁆𑀣𑀲𑀺𑀤𑁆𑀥𑀺 𑀦𑀢𑁆𑀣𑀺. 𑀬𑀤𑀺 𑀅𑀢𑁆𑀣𑀺, 𑀅𑀗𑁆𑀕𑀸𑀦𑀁 𑀙𑀓𑁆𑀓𑀢𑁆𑀢𑀤𑀲𑁆𑀲𑀦𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀦𑁆𑀢𑀺𑀆𑀤𑀺 𑀧𑀯𑀸𑀭𑀡𑀗𑁆𑀕𑀸𑀦𑀁 𑀧𑀜𑁆𑀘𑀓𑀢𑁆𑀢𑀤𑀲𑁆𑀲𑀦𑀁. 𑀯𑀭𑀓𑁄𑀢𑀺 𑀬𑁄 𑀓𑁄𑀘𑀺 𑀯𑀭𑀓𑁄. ‘‘𑀧𑀯𑀸𑀭𑀡𑀁 𑀧𑀦 𑀚𑀦𑁂𑀢𑀺𑀬𑁂𑀯𑀸𑀢𑀺 𑀯𑀺𑀲𑀼𑀁 𑀲𑀺𑀢𑁆𑀣𑀁 𑀯𑁄𑀤𑀓𑀁 𑀓𑀭𑁄𑀦𑁆𑀢𑀺, 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺. 𑀬𑀸𑀕𑀼𑀁 𑀯𑀸 𑀧𑀺𑀯𑀦𑁆𑀢𑁄 𑀧𑀞𑀫𑀁 𑀉𑀤𑀓𑀁 𑀧𑀺𑀯𑀢𑀺, 𑀯𑀝𑁆𑀝𑀢𑀺. 𑀅𑀯𑀲𑀺𑀝𑁆𑀞𑀁 𑀳𑁂𑀝𑁆𑀞𑀸𑀲𑀺𑀢𑁆𑀣𑀁 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀻’’𑀢𑀺 𑀮𑀺𑀔𑀺𑀢𑀁. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀚𑀦𑁂𑀢𑀺𑀬𑁂𑀯𑀸’’𑀢𑀺 𑀯𑀤𑀢𑀺, 𑀢𑀁 𑀦 𑀇𑀘𑁆𑀙𑀦𑁆𑀢𑀺 𑀆𑀘𑀭𑀺𑀬𑀸. 𑀪𑀚𑁆𑀚𑀺𑀢𑀧𑀺𑀝𑁆𑀞𑀦𑁆𑀢𑀺 𑀢𑀡𑁆𑀟𑀼𑀮𑀘𑀼𑀡𑁆𑀡𑀫𑁂𑀯. 𑀪𑀚𑁆𑀚𑀺𑀢𑀲𑀢𑁆𑀢𑀼𑀬𑁄 𑀧𑀺𑀡𑁆𑀟𑁂𑀢𑁆𑀯𑀸 𑀓𑀢𑀫𑁄𑀤𑀓𑁄 𑀲𑀢𑁆𑀢𑀼𑀫𑁄𑀤𑀓𑁄.

‘‘𑀬𑀸𑀕𑀼𑀲𑀺𑀢𑁆𑀣𑀫𑀢𑁆𑀢𑀸𑀦𑁂𑀯 𑀤𑁆𑀯𑁂…𑀧𑁂… 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀭𑀘𑀗𑁆𑀓𑀫𑀘𑁆𑀙𑀸𑀤𑀬𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀬𑀸𑀕𑀼𑀁 𑀧𑀺𑀯𑀦𑁆𑀢𑁄 𑀲𑀘𑁂 𑀅𑀜𑁆𑀜𑀁 𑀢𑀸𑀤𑀺𑀲𑀁𑀬𑁂𑀯 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑀡𑀸 𑀦 𑀳𑁄𑀢𑀻𑀢𑀺 𑀓𑀺𑀭 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. 𑀲𑀘𑁂 𑀅𑀜𑁆𑀜𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀅𑀲𑀦𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑁆𑀧𑀓𑀢𑀪𑁄𑀚𑀦𑀲𑁆𑀲𑀸𑀪𑀸𑀯𑀢𑁄. 𑀪𑁄𑀚𑀦𑀲𑀸𑀮𑀸𑀬𑀁 𑀪𑀼𑀜𑁆𑀚𑀦𑁆𑀢𑁄 𑀘𑁂, 𑀅𑀢𑁆𑀢𑀦𑁄 𑀅𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑀁 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀓𑀸𑀫𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀢𑁆𑀢𑁂 𑀧𑀦 𑀆𑀭𑀸𑀫𑀺𑀓𑁄 𑀆𑀓𑀺𑀭𑀢𑀺, 𑀢𑀢𑁄 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀤𑀜𑁆𑀳𑀺 𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑀅𑀦𑁂𑀲𑀦𑀸𑀬 𑀉𑀧𑁆𑀧𑀦𑁆𑀦𑁂𑀬𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀬𑀣𑀸 𑀳𑀺 𑀲𑀗𑁆𑀖𑀢𑁄 𑀉𑀤𑁆𑀥𑀝𑀧𑀺𑀡𑁆𑀟𑀁 𑀤𑀼𑀲𑁆𑀲𑀻𑀮𑁄 𑀤𑁂𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁. ‘‘𑀯𑀺𑀲𑀪𑀸𑀕𑁄 𑀮𑀚𑁆𑀚𑀻 𑀘𑁂 𑀤𑁂𑀢𑀺, 𑀢𑀁 𑀢𑁂𑀦 𑀲𑀫𑁆𑀪𑁄𑀕𑀁 𑀅𑀓𑀢𑁆𑀢𑀼𑀓𑀸𑀫𑀢𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀻𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀯𑁂𑀲𑀦𑀸𑀬𑀸𑀢𑀺 𑀪𑀢𑁆𑀢𑀕𑁆𑀕𑁂. ‘‘𑀫𑀁𑀲𑁂𑀦 𑀭𑀲𑀁, 𑀫𑀁𑀲𑀜𑁆𑀘 𑀭𑀲𑀜𑁆𑀘 𑀫𑀁𑀲𑀭𑀲𑀦𑁆𑀢𑀺 𑀆𑀧𑀚𑁆𑀚𑀦𑀢𑁄 ‘𑀫𑀁𑀲𑀭𑀲’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑁂𑀧𑀢𑁄 𑀳𑁄𑀢𑀺, 𑀫𑀁𑀲𑀲𑁆𑀲 𑀭𑀲𑀁 𑀫𑀁𑀲𑀭𑀲𑀦𑁆𑀢𑀺 𑀯𑀺𑀕𑁆𑀕𑀳𑁄 𑀦𑀸𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀼𑀢𑁆𑀢𑀁. 𑀫𑀁𑀲𑀓𑀭𑀫𑁆𑀩𑀓𑁄 𑀦𑀸𑀫…𑀧𑁂… 𑀯𑀝𑁆𑀝𑀢𑀻𑀢𑀺 𑀲𑀼𑀤𑁆𑀥𑀬𑀸𑀕𑀼 𑀏𑀯 𑀳𑁄𑀢𑀺. 𑀅𑀧𑁆𑀧𑀯𑀸𑀭𑀡𑀫𑀺𑀲𑁆𑀲𑀓𑀓𑀭𑀫𑁆𑀩𑀓𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀦 𑀧𑀯𑀸𑀭𑁂𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑀧𑀭𑀢𑁄 ‘‘𑀇𑀤𑀜𑁆𑀘 𑀓𑀭𑀫𑁆𑀩𑀓𑁂𑀦 𑀦 𑀲𑀫𑀸𑀦𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺, 𑀢𑀲𑁆𑀫𑀸 ‘‘𑀢𑀁 𑀅𑀪𑀺𑀳𑀭𑀺𑀢𑁆𑀯𑀸 𑀓𑀜𑁆𑀚𑀺𑀬𑀁 𑀕𑀡𑁆𑀳𑀣𑀸’𑀢𑀺 𑀯𑀤𑀦𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑀡𑀸 𑀦 𑀳𑁄𑀢𑀻’’𑀢𑀺 𑀘 ‘‘𑀫𑀺𑀲𑁆𑀲𑀓𑀬𑀸𑀕𑀼𑀁 𑀕𑀡𑁆𑀳𑀣𑀸’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 ‘𑀲𑀫𑁆𑀫𑀺𑀲𑁆𑀲𑀺𑀢𑀁 𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀘 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀬𑀸𑀕𑀼𑀫𑀺𑀲𑁆𑀲𑀓𑀦𑁆𑀢𑀺 𑀏𑀢𑁆𑀣 𑀧𑀤𑀤𑁆𑀯𑀬𑁂 𑀧𑀯𑀸𑀭𑀡𑀸𑀭𑀳𑀲𑁆𑀲 𑀦𑀸𑀫𑀕𑁆𑀕𑀳𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀭 𑀘𑁂 𑀬𑀸𑀕𑀼 𑀩𑀳𑀼𑀢𑀭𑀸 𑀯𑀸 𑀳𑁄𑀢𑀺 𑀲𑀫𑀲𑀫𑀸 𑀯𑀸, 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀢𑀢𑁆𑀣 𑀅𑀪𑀺𑀳𑀸𑀭𑀓𑀧𑀝𑀺𑀓𑁆𑀔𑁂𑀧𑀓𑀸𑀦𑀁 𑀬𑀸𑀕𑀼𑀲𑀜𑁆𑀜𑀢𑁆𑀢𑀸. 𑀬𑀸𑀕𑀼 𑀘𑁂 𑀫𑀦𑁆𑀤𑀸, 𑀪𑀢𑁆𑀢𑀁 𑀩𑀳𑀼𑀢𑀭𑀁, 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀢𑀢𑁆𑀣 𑀪𑀺𑀦𑁆𑀦𑀲𑀜𑁆𑀜𑀢𑁆𑀢𑀸𑀢𑀺 𑀢𑀓𑁆𑀓𑁄 𑀆𑀘𑀭𑀺𑀬𑀲𑁆𑀲. 𑀪𑀢𑁆𑀢𑀫𑀺𑀲𑁆𑀲𑀓𑁂 𑀧𑀯𑀸𑀭𑀡𑀸𑀭𑀳𑀲𑁆𑀲 𑀦𑀸𑀫𑀲𑁆𑀲 𑀲𑀩𑁆𑀪𑀸𑀯𑀢𑁄 𑀲𑀩𑁆𑀩𑀤𑀸 𑀧𑀯𑀸𑀭𑁂𑀢𑀺 𑀏𑀯. 𑀫𑀺𑀲𑁆𑀲𑀓𑁂 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁. 𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻𑀢𑀺 𑀬𑀣𑀸 𑀪𑀢𑁆𑀢𑀲𑀺𑀝𑁆𑀞𑀁 𑀦 𑀧𑀢𑀢𑀺, 𑀢𑀣𑀸 𑀕𑀸𑀴𑁆𑀳𑀁 𑀳𑀢𑁆𑀣𑁂𑀦 𑀧𑀻𑀴𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀤𑁂𑀢𑀺.

𑀅𑀓𑀧𑁆𑀧𑀺𑀬𑀓𑀢𑀦𑁆𑀢𑀺 𑀏𑀢𑁆𑀣 ‘‘𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑀺𑀢𑁂𑀳𑀺 𑀓𑀤𑀮𑀺𑀧𑁆𑀨𑀮𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀢𑀺𑀭𑀺𑀢𑁆𑀢𑀁 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀢𑀁 𑀓𑀤𑀮𑀺𑀧𑁆𑀨𑀮𑀸𑀤𑀺𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀫𑀺𑀲𑁆𑀲𑀓𑀭𑀲𑀢𑁆𑀢𑀸 𑀧𑀼𑀦 𑀢𑀸𑀦𑀺 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀧𑀼𑀩𑁆𑀩𑁂 𑀢𑁂𑀲𑀼 𑀯𑀺𑀦𑀬𑀓𑀫𑁆𑀫𑀲𑁆𑀲 𑀅𑀦𑀸𑀭𑀼𑀴𑁆𑀳𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. ‘‘𑀪𑀼𑀢𑁆𑀢𑀸𑀯𑀺𑀦𑀸 𑀘 𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀯𑀼𑀝𑁆𑀞𑀺𑀢𑁂𑀦 𑀓𑀢’’𑀦𑁆𑀢𑀺 𑀯𑀘𑀦𑀢𑁄 𑀪𑀼𑀢𑁆𑀢𑀸𑀯𑀺𑀦𑀸 𑀅𑀧𑁆𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀯𑀼𑀝𑁆𑀞𑀺𑀢𑁂𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁, 𑀢𑀲𑁆𑀫𑀸 ‘‘𑀧𑀸𑀢𑁄𑀯 𑀅𑀤𑁆𑀥𑀸𑀦𑀁 𑀕𑀘𑁆𑀙𑀦𑁆𑀢𑁂𑀲𑀼 𑀤𑁆𑀯𑀻𑀲𑀼 𑀏𑀓𑁄 𑀧𑀯𑀸𑀭𑀺𑀢𑁄 𑀅𑀯𑀼𑀝𑁆𑀞𑀺𑀢𑁄 𑀢𑀢𑁆𑀣 𑀦𑀺𑀲𑀻𑀤𑀢𑀺, 𑀲𑁄 𑀇𑀢𑀭𑁂𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀁 𑀪𑀺𑀓𑁆𑀔𑀁 𑀅𑀢𑁆𑀢𑀦𑀸 𑀅𑀪𑀼𑀢𑁆𑀯𑀸𑀧𑀺 ‘𑀅𑀮𑀫𑁂𑀢𑀁 𑀲𑀩𑁆𑀩’𑀦𑁆𑀢𑀺 𑀓𑀸𑀢𑀼𑀁 𑀮𑀪𑀢𑀺 𑀏𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀓𑁆𑀓𑀧𑀓𑁆𑀔𑁂 ‘‘𑀪𑀼𑀢𑁆𑀢𑀸𑀯𑀺𑀦𑀸 𑀓𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑀁, 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀅𑀢𑁆𑀢𑀦𑁄 𑀲𑀢𑁆𑀢𑀗𑁆𑀕𑀸𑀦𑀺 𑀦 𑀧𑀽𑀭𑁂𑀦𑁆𑀢𑀺, 𑀓𑀡𑁆𑀳𑀧𑀓𑁆𑀔𑁂 𑀧𑀝𑀺𑀪𑀸𑀕𑁂𑀦 𑀲𑀢𑁆𑀢 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀼𑀢𑁆𑀢𑀸𑀯𑀺𑀦𑀸 𑀅𑀧𑁆𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀯𑀼𑀝𑁆𑀞𑀺𑀢𑁂𑀦, 𑀅𑀯𑀼𑀝𑁆𑀞𑀺𑀢𑁂𑀦 𑀯𑀸 𑀓𑀢𑀁 𑀳𑁄𑀢𑀺, 𑀯𑀝𑁆𑀝𑀢𑀺. ‘‘𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀅𑀯𑀼𑀝𑁆𑀞𑀺𑀢𑁂𑀦𑁂𑀯𑀸’’𑀢𑀺 𑀇𑀫𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑀁 𑀤𑀻𑀧𑁂𑀢𑀼𑀁 ‘‘𑀲𑀢𑁆𑀢𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀻’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑁄 𑀧𑀼𑀦 𑀓𑀸𑀢𑀼𑀁 𑀦 𑀮𑀪𑀢𑀺 𑀧𑀞𑀫𑀁 𑀓𑀢𑀲𑁆𑀲 𑀧𑀼𑀦 𑀢𑁂𑀦𑁂𑀯 𑀓𑀢𑁆𑀢𑀩𑁆𑀩𑀧𑁆𑀧𑀲𑀗𑁆𑀕𑀢𑁄. 𑀬𑀜𑁆𑀘 𑀅𑀓𑀢𑀁, 𑀢𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀣 𑀲𑁄𑀯 𑀧𑀞𑀫𑁄 𑀧𑀼𑀦 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀧𑀼𑀩𑁆𑀩𑁂 𑀅𑀓𑀢𑀁 𑀓𑀸𑀢𑀼𑀁 𑀮𑀪𑀢𑀺. 𑀤𑀼𑀢𑀺𑀬𑁄 𑀧𑀞𑀫𑀪𑀸𑀚𑀦𑁂𑀧𑀺 𑀓𑀸𑀢𑀼𑀁 𑀮𑀪𑀢𑀺. ‘‘𑀬𑁂𑀦 𑀅𑀓𑀢𑀁, 𑀢𑁂𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀬𑁂𑀦 𑀬𑀁 𑀧𑀞𑀫𑀁 𑀓𑀧𑁆𑀧𑀺𑀬𑀁 𑀓𑀢𑀁, 𑀢𑀫𑁂𑀯 𑀲𑁄 𑀧𑀼𑀦 𑀓𑀸𑀢𑀼𑀁 𑀦 𑀮𑀪𑀢𑀺, 𑀅𑀜𑁆𑀜𑁂𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀢𑁆𑀣 𑀢𑀦𑁆𑀢𑀺 𑀢𑀁 𑀧𑀞𑀫𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀧𑁂𑀲𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀘𑁂 𑀕𑀢𑁄, 𑀢𑀢𑁆𑀭𑀝𑁆𑀞𑁂𑀦 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀸𑀳𑁂𑀢𑁆𑀯𑀸 𑀅𑀧𑀭𑁂𑀦 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀢𑀢𑁆𑀣 𑀏𑀓𑁄𑀯 𑀏𑀯𑀫𑁂𑀯 𑀓𑀸𑀢𑀼𑀁 𑀦 𑀮𑀪𑀢𑀻𑀢𑀺. ‘‘𑀬𑀁 𑀓𑀺𑀜𑁆𑀘𑀺 𑀕𑀺𑀮𑀸𑀦𑀁 𑀉𑀤𑁆𑀤𑀺𑀲𑁆𑀲𑀸’𑀢𑀺𑀆𑀤𑀺𑀯𑀘𑀦𑀢𑁄 𑀯𑀺𑀳𑀸𑀭𑀸𑀤𑀻𑀲𑀼 𑀕𑀺𑀮𑀸𑀦𑀲𑁆𑀲 𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑀫𑁆𑀧𑀺 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀁 𑀦𑀸𑀫, 𑀢𑀲𑁆𑀫𑀸 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀆𑀳𑀸𑀭𑀢𑁆𑀣𑀸𑀬𑀸𑀢𑀺 𑀯𑀺𑀓𑀸𑀮𑁂 𑀏𑀯𑀸𑀢𑀺 𑀏𑀓𑁂.

𑁨𑁪𑁧. 𑀓𑀸𑀬𑀓𑀫𑁆𑀫𑀁 𑀅𑀚𑁆𑀛𑁄𑀳𑀭𑀡𑀢𑁄. 𑀯𑀘𑀻𑀓𑀫𑁆𑀫𑀁 𑀯𑀸𑀘𑀸𑀬 ‘‘𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀣 𑀪𑀦𑁆𑀢𑁂’’𑀢𑀺 𑀅𑀓𑀸𑀭𑀸𑀧𑀦𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.