𑁩. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁨𑁧. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀸. 𑀩𑀤𑀭𑀘𑀼𑀡𑁆𑀡𑀲𑀓𑁆𑀓𑀭𑀸𑀤𑀻𑀳𑀺 𑀬𑁄𑀚𑀺𑀢𑀁 𑀩𑀤𑀭𑀲𑀸𑀴𑀯𑀁. 𑀓𑀺𑀭𑀓𑀫𑁆𑀫𑀓𑀸𑀭𑁂𑀦𑀸𑀢𑀺 𑀓𑀺𑀭𑀲𑁆𑀲 𑀓𑀫𑁆𑀫𑀓𑀸𑀭𑁂𑀦.

𑁨𑁨𑁬. ‘‘𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀏𑀢𑁆𑀣𑀸𑀳𑀼 𑀧𑁄𑀭𑀸𑀡𑀢𑁆𑀣𑁂𑀭𑀸 ‘‘𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀣𑀺𑀓𑀸𑀬 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀯𑀺𑀓𑀧𑁆𑀧𑁂𑀲𑀺, 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀧𑀦 ‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀢𑁆𑀢𑀩𑁆𑀩𑀁, 𑀇𑀢𑀭𑁂𑀦 𑀯𑀢𑁆𑀢𑀩𑁆𑀩𑀁 ‘𑀢𑀲𑁆𑀲 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’’𑀢𑀺. 𑀧𑀜𑁆𑀘𑀲𑀼𑀲𑀳𑀥𑀫𑁆𑀫𑀺𑀓𑁂𑀲𑀽𑀢𑀺 𑀲𑀫𑁆𑀫𑀼𑀔𑀸 𑀞𑀺𑀢𑀲𑁆𑀲 𑀲𑀳𑀥𑀫𑁆𑀫𑀺𑀓𑀲𑁆𑀲 𑀬𑀲𑁆𑀲 𑀯𑀺𑀓𑀧𑁆𑀧𑁂𑀢𑀼𑀓𑀸𑀫𑁄, 𑀢𑀁 𑀲𑀳𑀥𑀫𑁆𑀫𑀺𑀓𑀁 𑀅𑀤𑀺𑀲𑁆𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂, 𑀲𑀬𑀫𑁂𑀯 𑀯𑀸 ‘‘𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀓𑁂, 𑀏𑀯𑀁 𑀲𑀢𑀺 𑀣𑁂𑀭𑁄 𑀢𑀲𑁆𑀫𑀺𑀁𑀬𑁂𑀯 𑀦𑀺𑀲𑀺𑀦𑁆𑀦𑁄𑀯 𑀢𑀣𑀸 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑀓𑁆𑀓𑁄 𑀤𑀺𑀲𑁆𑀲𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 𑀧𑀭𑀫𑁆𑀫𑀼𑀔𑀸 𑀯𑀺𑀓𑀧𑁆𑀧𑀦𑀸𑀯 𑀯𑀼𑀢𑁆𑀢𑀸, 𑀲𑀸 ‘‘𑀢𑁂𑀦 𑀳𑀸𑀦𑀦𑁆𑀤, 𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀇𑀫𑀺𑀦𑀸 𑀲𑀫𑁂𑀢𑀺, 𑀢𑀣𑀸𑀧𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀅𑀜𑁆𑀜𑀢𑀭𑀲𑁆𑀲 ‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’𑀢𑀺 𑀯𑀸 ‘𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀸 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀸 ‘𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀸 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸’’𑀢𑀺 𑀯𑀘𑀦𑀢𑁄 𑀲𑀳𑀥𑀫𑁆𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀏𑀯 𑀯𑀢𑁆𑀢𑀩𑁆𑀩𑀁, 𑀦 𑀲𑀬𑀫𑁂𑀯𑀸𑀢𑀺 𑀤𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀅𑀬𑀁 𑀧𑀘𑁆𑀙𑀺𑀫𑀦𑀬𑁄 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂𑀦𑀧𑀺 𑀲𑀫𑁂𑀢𑀺, 𑀢𑀲𑁆𑀫𑀸 𑀇𑀥 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀢𑁂 𑀫𑀦𑀼𑀲𑁆𑀲𑀸…𑀧𑁂… 𑀪𑁄𑀚𑀦𑀫𑀤𑀁𑀲𑀽’’𑀢𑀺 𑀯𑀘𑀦𑀢𑁄 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀧𑀜𑁆𑀜𑀸𑀬𑀢𑀺, 𑀢𑀣𑀸𑀧𑀺 𑀣𑁂𑀭𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑁂𑀦 𑀪𑀢𑁆𑀢𑁂𑀦 𑀲𑁄 𑀦𑀺𑀫𑀦𑁆𑀢𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀧𑀭𑀢𑁄 ‘‘𑀤𑁆𑀯𑁂 𑀢𑀬𑁄 𑀦𑀺𑀫𑀦𑁆𑀢𑀦𑁂 𑀏𑀓𑀢𑁄 𑀪𑀼𑀜𑁆𑀚𑀢𑀻’’𑀢𑀺 𑀯𑀘𑀦𑁂𑀦, 𑀅𑀦𑀸𑀧𑀢𑁆𑀢𑀺𑀯𑀸𑀭𑁂𑀦 𑀘 𑀯𑀺𑀭𑀼𑀚𑁆𑀛𑀢𑀺.

𑁨𑁨𑁯. 𑀏𑀢𑁆𑀣𑀸𑀬𑀁 𑀯𑀺𑀘𑀸𑀭𑀡𑀸 𑁋 ‘‘𑀅𑀜𑁆𑀜𑁄 𑀫𑀦𑀼𑀲𑁆𑀲𑁄 𑀧𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀅𑀧𑀭𑀪𑀸𑀕𑁂 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀦𑀢𑁆𑀣𑀺 𑀧𑀬𑁄𑀚𑀦𑀁, 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀧𑀬𑁄𑀚𑀦𑀦𑁆𑀢𑀺 𑀲𑁆𑀯𑁂𑀧𑀺 𑀪𑀦𑁆𑀢𑁂 𑀆𑀕𑀘𑁆𑀙𑁂𑀬𑁆𑀬𑀸𑀣𑀸𑀢𑀺 𑀏𑀢𑁆𑀣 𑀓𑀢𑀭𑀁 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁, 𑀢𑀲𑁆𑀫𑀸 𑀅𑀥𑀺𑀧𑁆𑀧𑀸𑀬𑁄 𑀘𑁂𑀢𑁆𑀣 𑀧𑀫𑀸𑀡𑀦𑁆𑀢𑀺. 𑀦, ‘‘𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀻’’𑀢𑀺 𑀯𑀘𑀦𑀢𑁄𑀢𑀺. 𑀢𑀢𑁆𑀣 ‘‘𑀲𑁆𑀯𑁂𑀧𑀺 𑀪𑀦𑁆𑀢𑁂’’𑀢𑀺 𑀏𑀢𑁆𑀣 𑀬𑀣𑀸 𑀯𑀘𑀦𑀫𑀢𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀓𑁆𑀓𑀫𑁂𑀦 𑀅𑀢𑁆𑀣𑁄 𑀕𑀳𑀺𑀢𑁄, 𑀢𑀣𑀸 ‘‘𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺 𑀅𑀦𑁆𑀢𑀭𑀸 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀮𑀤𑁆𑀥𑀪𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑀺𑀡𑁆𑀟𑀸𑀬 𑀳𑀺 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀣, 𑀪𑀦𑁆𑀢𑁂, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀤𑀺𑀦𑁆𑀦𑀫𑁆𑀧𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀮𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀯𑁄𑀳𑀸𑀭𑁂𑀦 𑀧𑀦 ‘‘𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀪𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀣𑀸 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀕𑀡𑀪𑁄𑀚𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀘𑀳𑀺 𑀪𑁄𑀚𑀦𑁂𑀳𑀺 𑀦𑀺𑀫𑀦𑁆𑀢𑀺𑀢𑀲𑁆𑀲…𑀧𑁂… 𑀧𑀭𑀲𑁆𑀲 𑀧𑀭𑀲𑁆𑀲 𑀪𑁄𑀚𑀦𑁂’’𑀢𑀺 𑀯𑀼𑀢𑁆𑀢𑀯𑀘𑀦𑀯𑀺𑀭𑁄𑀥𑁄. 𑀇𑀤𑀜𑁆𑀳𑀺 𑀯𑀘𑀦𑀁 𑀬𑁂𑀦 𑀧𑀞𑀫𑀁 𑀦𑀺𑀫𑀦𑁆𑀢𑀺𑀢𑁄, 𑀢𑀢𑁄 𑀧𑀞𑀫𑀦𑀺𑀫𑀦𑁆𑀢𑀺𑀢𑀁 𑀆𑀤𑀸𑀬 𑀕𑀢𑁄 𑀧𑀭𑀲𑁆𑀲 𑀧𑀭𑀲𑁆𑀲 𑀦𑀺𑀫𑀦𑁆𑀢𑀦𑀓𑀤𑀸𑀬𑀓𑀲𑁆𑀲 𑀪𑁄𑀚𑀦𑁂𑀢𑀺 𑀅𑀢𑁆𑀣𑀧𑀭𑀺𑀤𑀻𑀧𑀦𑀢𑁄 𑀦𑀺𑀫𑀦𑁆𑀢𑀦𑀢𑁄 𑀮𑀤𑁆𑀥𑀪𑀢𑁆𑀢𑀲𑁆𑀲 𑀪𑁄𑀚𑀦𑁂𑀬𑁂𑀯 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀤𑁆𑀯𑁂 𑀢𑀬𑁄 𑀦𑀺𑀫𑀦𑁆𑀢𑀦𑁂 𑀏𑀓𑀢𑁄’’𑀢𑀺 𑀯𑀘𑀦𑁂𑀦𑀧𑀺 𑀲𑀫𑁂𑀢𑀺, 𑀅𑀜𑁆𑀜𑀣𑀸 ‘‘𑀬𑁂𑀦 𑀦𑀺𑀫𑀦𑁆𑀢𑀺𑀢𑁄, 𑀢𑀲𑁆𑀲 𑀪𑁄𑀚𑀦𑀢𑁄 𑀧𑀭𑀲𑁆𑀲 𑀪𑁄𑀚𑀦𑁂’’𑀢𑀺 𑀏𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀧𑀸𑀴𑀺𑀬𑀁 𑀯𑀸 ‘‘𑀦𑀺𑀫𑀦𑁆𑀢𑀦𑁂𑀦 𑀏𑀓𑀢𑁄𑀪𑀼𑀜𑁆𑀚𑀢𑀻’’𑀢𑀺 𑀏𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀤𑀼𑀢𑀺𑀬𑀦𑀺𑀫𑀦𑁆𑀢𑀦𑀲𑁆𑀲 𑀧𑀞𑀫𑀪𑁄𑀚𑀦𑁂 𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 ‘‘𑀬𑁂𑀦 𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀫𑀦𑁆𑀢𑀦𑀧𑀝𑀺𑀧𑀸𑀝𑀺𑀬𑀸 𑀪𑀼𑀜𑁆𑀚𑀢𑀻𑀢𑀺 𑀧𑀸𑀴𑀻𑀢𑀺 𑀘𑁂? 𑀦, ‘‘𑀅𑀦𑀸𑀧𑀢𑁆𑀢𑀺 𑀦𑀺𑀘𑁆𑀘𑀪𑀢𑁆𑀢𑁂’’𑀢𑀺𑀆𑀤𑀺𑀧𑀸𑀴𑀺𑀯𑀺𑀭𑁄𑀥𑀢𑁄.

𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀁 𑀓𑀲𑁆𑀫𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀘𑁂? ‘𑀧𑀭𑀫𑁆𑀧𑀭𑀪𑁄𑀚𑀦𑀁 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑁄, 𑀢𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀏𑀢𑀁 𑀧𑀭𑀫𑁆𑀧𑀭𑀪𑁄𑀚𑀦𑀁 𑀦𑀸𑀫𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁. 𑀬𑀤𑀺 𑀏𑀯𑀁 𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀓𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀦𑀺𑀘𑁆𑀘𑀪𑀢𑁆𑀢𑀸𑀤𑀺 𑀑𑀤𑀺𑀲𑁆𑀲𑀓𑀦𑁆𑀢𑀺 𑀘𑁂? 𑀢𑀁 𑀦, 𑀢𑀤𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀥𑀦𑁂𑀦 𑀦𑀺𑀧𑁆𑀨𑀦𑁆𑀦𑀲𑁆𑀲, 𑀲𑀗𑁆𑀖𑀢𑁄 𑀮𑀤𑁆𑀥𑀲𑁆𑀲 𑀯𑀸 𑀧𑀸𑀢𑁄 𑀧𑀘𑀦𑀓𑀬𑀸𑀕𑀼 𑀘𑁂 𑀖𑀦𑀸 𑀳𑁄𑀢𑀺, 𑀢𑀲𑁆𑀲𑀸𑀧𑀺, 𑀏𑀓𑀓𑀼𑀝𑀺𑀓𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀪𑀺𑀓𑁆𑀔𑀸𑀘𑀭𑀺𑀬𑀯𑀲𑁂𑀦 𑀮𑀪𑀺𑀢𑀩𑁆𑀩𑀦𑀺𑀘𑁆𑀘𑀪𑀢𑁆𑀢𑀲𑁆𑀲 𑀘 𑀅𑀓𑀧𑁆𑀧𑀺𑀬𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀢𑀢𑁆𑀣 𑀪𑀺𑀓𑁆𑀔𑀸𑀘𑀭𑀺𑀬𑀯𑀲𑁂𑀦 𑀮𑀤𑁆𑀥𑀁 𑀦 𑀓𑀧𑁆𑀧𑀢𑀺 𑀦𑀺𑀫𑀦𑁆𑀢𑀦𑀓𑀸𑀦𑀁 𑀅𑀧𑁆𑀧𑀲𑀸𑀤𑀸𑀯𑀳𑀦𑀢𑁄𑀢𑀺 𑀘𑁂? 𑀦, ‘‘𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀯𑀺𑀭𑁄𑀥𑀢𑁄. 𑀔𑀸𑀤𑀦𑀻𑀬𑀫𑁆𑀧𑀺 𑀳𑀺 𑀧𑀭𑀲𑁆𑀲 𑀔𑀸𑀤𑀺𑀢𑁆𑀯𑀸 𑀪𑀼𑀢𑁆𑀢𑀢𑁆𑀢𑀸 𑀦𑀺𑀫𑀦𑁆𑀢𑀦𑀪𑁄𑀚𑀦𑀁 𑀅𑀪𑀼𑀜𑁆𑀚𑀦𑁆𑀢𑁄 𑀅𑀧𑁆𑀧𑀲𑀸𑀤𑀁 𑀓𑀭𑁄𑀢𑀺 𑀏𑀯, 𑀢𑀲𑁆𑀫𑀸 𑀅𑀧𑁆𑀧𑀲𑀸𑀤𑀸𑀯𑀳𑀁 𑀅𑀧𑁆𑀧𑀫𑀸𑀡𑀁, 𑀢𑀲𑁆𑀫𑀸 𑀦𑀺𑀘𑁆𑀘𑀪𑀢𑁆𑀢𑀸𑀤𑀺 𑀑𑀤𑀺𑀲𑁆𑀲𑀓𑀁 𑀦 𑀲𑀫𑁆𑀪𑀯𑀢𑀺. 𑀅𑀧𑀺𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀤𑁆𑀥𑀺𑀁 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀬𑀁 𑀬𑀁 𑀔𑀫𑀢𑀺, 𑀢𑀁 𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑁄𑀧𑀺 𑀓𑁂𑀲𑀜𑁆𑀘𑀺 𑀆𑀘𑀭𑀺𑀬𑀸𑀦𑀁 𑀯𑀺𑀦𑀺𑀘𑁆𑀙𑀬𑁄. 𑀆𑀘𑀭𑀺𑀬𑀲𑁆𑀲 𑀧𑀦 𑀯𑀺𑀦𑀺𑀘𑁆𑀙𑀬𑁄 𑀅𑀦𑁆𑀢𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. ‘‘𑀔𑀻𑀭𑀁 𑀯𑀸 𑀭𑀲𑀁 𑀯𑀸 𑀧𑀺𑀯𑀢𑁄 𑀅𑀫𑀺𑀲𑁆𑀲𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀕𑀡𑁆𑀞𑀺𑀧𑀤𑁂 ‘‘𑀳𑁂𑀝𑁆𑀞𑀸 𑀑𑀤𑀦𑁂𑀦𑀸𑀫𑀺𑀲𑁆𑀲𑁂𑀢𑁆𑀯𑀸 𑀉𑀧𑀭𑀺 𑀢𑀺𑀝𑁆𑀞𑀢𑀻’’𑀢𑀺 𑀮𑀺𑀔𑀺𑀢𑀁.

𑀫𑀳𑀸𑀉𑀧𑀸𑀲𑀓𑁄𑀢𑀺 𑀕𑁂𑀳𑀲𑀸𑀫𑀺𑀓𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀆𑀧𑀢𑁆𑀢𑀻’’𑀢𑀺 𑀯𑀘𑀦𑁂𑀦 𑀓𑀼𑀭𑀼𑀦𑁆𑀤𑀺𑀬𑀁 ‘‘𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀁 𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺. ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀥𑀺𑀧𑁆𑀧𑀸𑀬𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀺𑀘𑀸𑀭𑀺𑀢𑁄’’𑀢𑀺 𑀮𑀺𑀔𑀺𑀢𑀁. ‘‘𑀘𑀸𑀭𑀺𑀢𑁆𑀢𑀢𑁄𑀢𑀺 ‘𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸’𑀢𑀺 𑀧𑀭𑀢𑁄 𑀯𑀢𑁆𑀢𑀩𑁆𑀩𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀘𑀻𑀓𑀫𑁆𑀫𑀁 𑀅𑀯𑀺𑀓𑀧𑁆𑀧𑀦𑀁. 𑀏𑀢𑁆𑀣 ‘‘𑀫𑀳𑀸𑀉𑀧𑀸𑀲𑀓𑁄 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑀺…𑀧𑁂… 𑀧𑀘𑁆𑀙𑀸 𑀮𑀤𑁆𑀥𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀘𑀦𑀢𑁄, ‘‘𑀓𑀸𑀮𑀲𑁆𑀲𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀧𑀸𑀴𑀺𑀢𑁄, 𑀔𑀦𑁆𑀥𑀓𑁂 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀦𑀺𑀫𑀦𑁆𑀢𑀦𑁂 𑀅𑀜𑁆𑀜𑀲𑁆𑀲 𑀪𑁄𑀚𑁆𑀚𑀬𑀸𑀕𑀼 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁨𑁮𑁩) 𑀯𑀘𑀦𑀢𑁄 𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀯𑀸 𑀧𑀯𑁂𑀤𑁂𑀢𑀼 𑀅𑀦𑀺𑀫𑀦𑁆𑀢𑁂𑀢𑁆𑀯𑀸 𑀯𑀸, 𑀧𑀞𑀫𑀕𑀳𑀺𑀢𑀦𑀺𑀫𑀦𑁆𑀢𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀞𑀫𑀦𑀺𑀫𑀦𑁆𑀢𑀦𑀪𑁄𑀚𑀦𑀢𑁄 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀧𑀭𑀲𑀦𑁆𑀢𑀓𑀁 𑀪𑁄𑀚𑀦𑀁 𑀧𑀭𑀫𑁆𑀧𑀭𑀪𑁄𑀚𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁, 𑀲𑀗𑁆𑀖𑀕𑀡𑀢𑁄 𑀮𑀤𑁆𑀥𑀁 𑀯𑀸 𑀅𑀕𑀳𑀝𑁆𑀞𑀲𑀦𑁆𑀢𑀓𑀁 𑀯𑀝𑁆𑀝𑀢𑀺, 𑀦𑀺𑀫𑀦𑁆𑀢𑀦𑀢𑁄 𑀧𑀞𑀫𑀁 𑀦𑀺𑀩𑀤𑁆𑀥𑀢𑁆𑀢𑀸 𑀧𑀦 𑀦𑀺𑀘𑁆𑀘𑀪𑀢𑁆𑀢𑀸𑀤𑀺 𑀧𑀭𑀲𑀦𑁆𑀢𑀓𑀫𑁆𑀧𑀺 𑀯𑀝𑁆𑀝𑀢𑀺. 𑀔𑀦𑁆𑀥𑀓𑁂 ‘‘𑀦 𑀘, 𑀪𑀺𑀓𑁆𑀔𑀯𑁂…𑀧𑁂… 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁨𑁮𑁩) 𑀯𑀘𑀦𑀁 𑀧𑀭𑀲𑀦𑁆𑀢𑀓𑀪𑁄𑀚𑀦𑀯𑀼𑀢𑁆𑀢𑀦𑀺𑀬𑀫𑀦𑀁. 𑀢𑀢𑁄 𑀳𑀢𑁆𑀣𑀓𑁄𑀯 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄.

𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.