𑁨. 𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁫𑁮𑁬. 𑀳𑀲𑀦𑀻𑀬𑀲𑁆𑀫𑀺𑀦𑁆𑀢𑀺 𑀳𑁂𑀢𑁆𑀯𑀢𑁆𑀣𑁂 𑀪𑀼𑀫𑁆𑀫𑀁, 𑀳𑀲𑀺𑀢𑀩𑁆𑀩𑀯𑀢𑁆𑀣𑀼𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀖𑀭𑁂 𑀉𑀘𑁆𑀘𑀸𑀲𑀤𑁆𑀤𑁂𑀦 𑀅𑀦𑀼𑀫𑁄𑀤𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀓𑀺𑀭. 𑀢𑀣𑀸 𑀳𑀺 𑀫𑀳𑀺𑀦𑁆𑀤𑀢𑁆𑀣𑁂𑀭𑁄𑀧𑀺 𑀳𑀢𑁆𑀣𑀺𑀲𑀸𑀮𑀸𑀤𑀻𑀲𑀼 𑀫𑀳𑀸𑀚𑀦𑀲𑁆𑀲 𑀓𑀣𑁂𑀲𑀺.

𑁫𑁯𑁧. 𑀓𑁂𑀘𑀺 𑀪𑀺𑀓𑁆𑀔𑀽 ‘‘𑀧𑀭𑀺𑀓𑁆𑀔𑀸𑀭𑀝𑁆𑀞𑀧𑀦𑀫𑀢𑁆𑀢𑁂𑀦 𑀯𑀸𑀲𑀽𑀧𑀕𑀢𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀪𑀺𑀓𑁆𑀔𑀼𑀦𑀺𑀬𑁄 𑀘𑁂 𑀯𑀸𑀲𑀽𑀧𑀕𑀸 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄𑀯 𑀓𑀧𑁆𑀧𑀺𑀬𑀪𑀽𑀫𑀺. ‘‘𑀬𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑁄 𑀏𑀓𑀭𑀢𑁆𑀢𑀫𑁆𑀧𑀺 𑀯𑀲𑀦𑁆𑀢𑀺, 𑀅𑀬𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄’’𑀢𑀺 (𑀧𑀸𑀘𑀺. 𑁧𑁬𑁧) 𑀯𑀘𑀦𑀢𑁄 𑀢𑀸𑀲𑀁 𑀲𑀫𑀻𑀧𑀁 𑀯𑀸 𑀢𑀸𑀳𑀺 𑀕𑀳𑀺𑀢𑀯𑀸𑀲𑀸𑀕𑀸𑀭𑀁 𑀯𑀸 ‘‘𑀕𑀘𑁆𑀙𑀸𑀫𑀻’’𑀢𑀺 𑀕𑀘𑁆𑀙𑀢𑁄 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀦 𑀳𑀺 𑀢𑀸𑀯𑀢𑀸 𑀢𑀁 𑀖𑀭𑀁 𑀅𑀦𑁆𑀢𑀭𑀖𑀭𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄.

𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.