𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁

𑀥𑀦𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸

𑁮𑁪. 𑀤𑀼𑀢𑀺𑀬𑁂 𑀭𑀸𑀚𑀽𑀳𑀺 𑀏𑀯 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀭𑀸𑀚𑀕𑀳’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀓𑁂 𑀲𑀫𑀻𑀧𑀢𑁆𑀣𑁂𑀦, 𑀅𑀥𑀺𑀓𑀭𑀡𑀢𑁆𑀣𑁂𑀦 𑀘 𑀧𑀝𑀺𑀮𑀤𑁆𑀥𑀪𑀼𑀫𑁆𑀫𑀯𑀺𑀪𑀢𑁆𑀢𑀺𑀓𑁂 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀘𑀢𑀽𑀳𑀺 𑀯𑀺𑀳𑀸𑀭𑁂𑀳𑀺 𑀯𑀺𑀳𑀭𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲 ‘‘𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀽’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀬𑁄 𑀏𑀯 𑀳𑀺 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀕𑀡𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀦 𑀢𑀢𑁄 𑀊𑀦𑀸 𑀅𑀥𑀺𑀓𑀸 𑀯𑀸 𑀅𑀓𑀺𑀭𑀺𑀬𑀢𑁆𑀢𑀸. 𑀢𑀢𑁆𑀣 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀓𑀫𑁆𑀫𑀓𑁄𑀲𑀮𑁆𑀮𑀢𑁆𑀣𑀁 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀅𑀢𑁆𑀣𑀺 𑀲𑀗𑁆𑀖𑀓𑀫𑁆𑀫𑀁 𑀲𑀗𑁆𑀖𑁄 𑀏𑀯 𑀓𑀭𑁄𑀢𑀺, 𑀦 𑀕𑀡𑁄 𑀦 𑀧𑀼𑀕𑁆𑀕𑀮𑁄, 𑀢𑀁 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀓𑀫𑁆𑀫𑀮𑀓𑁆𑀔𑀡𑁂𑀓𑀤𑁂𑀲𑀁 𑀞𑀧𑁂𑀢𑁆𑀯𑀸 𑀇𑀢𑀭𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀲𑀗𑁆𑀖𑀓𑀫𑁆𑀫𑀁 𑀲𑀗𑁆𑀖𑁄 𑀘 𑀓𑀭𑁄𑀢𑀺, 𑀕𑀡𑁄 𑀘 𑀓𑀭𑁄𑀢𑀺, 𑀧𑀼𑀕𑁆𑀕𑀮𑁄 𑀘 𑀓𑀭𑁄𑀢𑀺. 𑀓𑀺𑀜𑁆𑀘𑀸𑀢𑀺? 𑀬𑀁 𑀧𑀼𑀩𑁆𑀩𑁂 𑀞𑀧𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀁 ‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑁆𑀯𑁂 𑀢𑀬𑁄 𑀚𑀦𑀸 𑀯𑀲𑀦𑁆𑀢𑀺, 𑀢𑁂𑀳𑀺 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀫𑁆𑀧𑀺 𑀲𑀗𑁆𑀖𑁂𑀦 𑀓𑀢𑀲𑀤𑀺𑀲𑀫𑁂𑀯. 𑀬𑀲𑁆𑀫𑀺𑀁 𑀧𑀦 𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀤𑀺𑀯𑀲𑁂 𑀧𑀼𑀩𑁆𑀩𑀓𑀭𑀡𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀓𑀢𑀫𑁆𑀧𑀺 𑀓𑀢𑀺𑀓𑀯𑀢𑁆𑀢𑀁 𑀲𑀗𑁆𑀖𑁂𑀦 𑀓𑀢𑀲𑀤𑀺𑀲𑀫𑁂𑀯 𑀳𑁄𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬). 𑀧𑀼𑀦𑀧𑀺 𑀯𑀼𑀢𑁆𑀢𑀁 ‘‘𑀏𑀓𑀪𑀺𑀓𑁆𑀔𑀼𑀓𑁂 𑀧𑀦 𑀯𑀺𑀳𑀸𑀭𑁂 𑀏𑀓𑁂𑀦 𑀲𑀸𑀯𑀺𑀢𑁂𑀧𑀺 𑀧𑀼𑀭𑀺𑀫𑀓𑀢𑀺𑀓𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺 𑀏𑀯𑀸’’𑀢𑀺. 𑀅𑀢𑁆𑀣𑀺 𑀕𑀡𑀓𑀫𑁆𑀫𑀁 𑀲𑀗𑁆𑀖𑁄 𑀓𑀭𑁄𑀢𑀺, 𑀕𑀡𑁄 𑀓𑀭𑁄𑀢𑀺, 𑀧𑀼𑀕𑁆𑀕𑀮𑁄 𑀓𑀭𑁄𑀢𑀺, 𑀢𑀁 𑀢𑀬𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀸 𑀅𑀜𑁆𑀜𑁂𑀲𑀁 𑀲𑀦𑁆𑀢𑀺𑀓𑁂 𑀓𑀭𑀻𑀬𑀦𑁆𑀢𑀺, 𑀢𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀕𑀡𑀓𑀫𑁆𑀫𑀁 𑀕𑀡𑁄𑀯 𑀓𑀭𑁄𑀢𑀺, 𑀦 𑀲𑀗𑁆𑀖𑁄 𑀦 𑀧𑀼𑀕𑁆𑀕𑀮𑁄, 𑀢𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀅𑀜𑁆𑀜𑀫𑀜𑁆𑀜𑀁 𑀆𑀭𑁄𑀘𑀦𑀯𑀲𑁂𑀦 𑀓𑀭𑀻𑀬𑀢𑀺, 𑀢𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀧𑀼𑀕𑁆𑀕𑀮𑀓𑀫𑁆𑀫𑀁 𑀧𑀼𑀕𑁆𑀕𑀮𑁄𑀯 𑀓𑀭𑁄𑀢𑀺, 𑀦 𑀲𑀗𑁆𑀖𑁄 𑀦 𑀕𑀡𑁄, 𑀢𑀁 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀕𑀡𑀓𑀫𑁆𑀫𑀁 𑀏𑀓𑀘𑁆𑀘𑁄𑀯 𑀕𑀡𑁄 𑀓𑀭𑁄𑀢𑀺, 𑀏𑀓𑀘𑁆𑀘𑁄 𑀦 𑀓𑀭𑁄𑀢𑀺, 𑀢𑀢𑁆𑀣 𑀅𑀜𑀢𑁆𑀢𑀺𑀓𑀁 𑀤𑁆𑀯𑁂 𑀏𑀯 𑀓𑀭𑁄𑀦𑁆𑀢𑀺, 𑀦 𑀢𑀬𑁄. 𑀲𑀜𑀢𑁆𑀢𑀺𑀓𑀁 𑀢𑀬𑁄𑀯 𑀓𑀭𑁄𑀦𑁆𑀢𑀺, 𑀦 𑀢𑀢𑁄 𑀊𑀦𑀸 𑀅𑀥𑀺𑀓𑀸 𑀯𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀬𑁄 𑀏𑀯 𑀳𑀺 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀕𑀡𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀦 𑀢𑀢𑁄 𑀊𑀦𑀸 𑀅𑀥𑀺𑀓𑀸 𑀯𑀸 𑀅𑀓𑀺𑀭𑀺𑀬𑀢𑁆𑀢𑀸’’𑀢𑀺. 𑀢𑀲𑁆𑀫𑀸 𑀢𑀬𑁄𑀯 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀲𑀫𑁆𑀧𑀳𑀼𑀮𑀸, 𑀦 𑀢𑀢𑁄 𑀉𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀓𑀺𑀜𑁆𑀘𑀸𑀧𑀺 𑀓𑀫𑁆𑀫𑀮𑀓𑁆𑀔𑀡𑀁 𑀢𑀬𑁄𑀯 𑀓𑀭𑁄𑀦𑁆𑀢𑀺, 𑀅𑀣 𑀔𑁄 𑀢𑁂𑀳𑀺 𑀓𑀢𑀁 𑀲𑀗𑁆𑀖𑁂𑀦 𑀓𑀢𑀲𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀢𑀬𑁄 𑀚𑀦𑀸 𑀯𑀺𑀦𑀬𑀧𑀭𑀺𑀬𑀸𑀬𑁂𑀦𑀧𑀺 𑀲𑀗𑁆𑀖𑁄’’𑀢𑀺 𑀯𑀼𑀢𑁆𑀢𑀁, 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀯𑀺𑀦𑀬𑀓𑀫𑁆𑀫𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁, 𑀮𑀸𑀪𑀁 𑀧𑀦 𑀉𑀧𑀸𑀤𑀸𑀬 𑀅𑀦𑁆𑀢𑀫𑀲𑁄 𑀏𑀓𑁄𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀧𑀺 ‘‘𑀲𑀗𑁆𑀖𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺 𑀓𑀺𑀭. 𑀧𑀯𑀸𑀭𑀡𑀸𑀤𑀺𑀯𑀲𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀲𑀫𑀦𑀦𑁆𑀢𑀭𑀫𑁂𑀯 ‘‘𑀯𑀼𑀢𑁆𑀣𑀕𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀓𑁆𑀓𑀁𑀲𑀦𑀬𑁂𑀦 ‘‘𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑁂𑀦𑁂𑀯 ‘‘𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀅𑀦𑁆𑀢𑀭𑀸𑀬𑁂𑀦 𑀅𑀧𑀯𑀸𑀭𑀺𑀢𑀸 ‘‘𑀯𑀼𑀢𑁆𑀣𑀯𑀲𑁆𑀲𑀸’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀣𑀫𑁆𑀪𑀸𑀤𑀺 𑀓𑀝𑁆𑀞𑀓𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀢𑀦𑀼𑀓𑀁 𑀤𑀸𑀭𑀼𑀢𑁆𑀣𑀫𑁆𑀪𑀁 𑀅𑀦𑁆𑀢𑁄𑀓𑀢𑁆𑀯𑀸 𑀫𑀢𑁆𑀢𑀺𑀓𑀸𑀫𑀬𑀁 𑀣𑀫𑁆𑀪𑀁 𑀓𑀭𑁄𑀦𑁆𑀢𑀺, 𑀅𑀬𑀁 𑀧𑀦 𑀢𑀣𑀸 𑀦 𑀅𑀓𑀸𑀲𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀼𑀝𑀺𑀓𑀁 𑀓𑀭𑀺𑀢𑁆𑀯𑀸’’𑀢𑀺. 𑀢𑁂𑀮𑀫𑀺𑀲𑁆𑀲𑀸𑀬 𑀢𑀫𑁆𑀩𑀫𑀢𑁆𑀢𑀺𑀓𑀸𑀬.

𑁮𑁫. ‘‘𑀫𑀸 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀻’’𑀢𑀺 𑀇𑀫𑀺𑀦𑀸 𑀅𑀦𑀼𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑁂𑀦 𑀬𑀢𑁆𑀣 𑀇𑀝𑁆𑀞𑀓𑀧𑀘𑀦 𑀧𑀢𑁆𑀢𑀧𑀘𑀦 𑀓𑀼𑀝𑀺𑀓𑀭𑀡 𑀯𑀺𑀳𑀸𑀭𑀓𑀸𑀭𑀸𑀧𑀦 𑀦𑀯𑀓𑀫𑁆𑀫𑀓𑀭𑀡 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡 𑀯𑀺𑀳𑀸𑀭𑀲𑀫𑁆𑀫𑀚𑁆𑀚𑀦 𑀧𑀝𑀕𑁆𑀕𑀺𑀤𑀸𑀦 𑀓𑀽𑀧𑀧𑁄𑀓𑁆𑀔𑀭𑀡𑀻𑀔𑀡𑀸𑀧𑀦𑀸𑀤𑀻𑀲𑀼 𑀧𑀸𑀢𑀩𑁆𑀬𑀢𑀁 𑀚𑀸𑀦𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀓𑀧𑁆𑀧𑀺𑀬𑀯𑀘𑀦𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯 𑀧𑀭𑀺𑀬𑀸𑀬𑀁 𑀅𑀯𑀢𑁆𑀯𑀸 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀸𑀧𑀢𑁆𑀢𑀺𑀯𑀸𑀭𑁂𑀲𑀼 ‘‘𑀅𑀦𑀸𑀧𑀢𑁆𑀢𑀺 𑀅𑀲𑀢𑀺𑀬𑀸 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑁆𑀢𑀭𑀸𑀧𑀢𑁆𑀢𑀺𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺𑀧𑀺 𑀏𑀢𑀲𑁆𑀲 𑀦𑀸𑀫𑀫𑁂𑀯. ‘‘𑀕𑀘𑁆𑀙𑀣𑁂𑀢𑀁, 𑀪𑀺𑀓𑁆𑀔𑀯𑁂, 𑀓𑀼𑀝𑀺𑀓𑀁 𑀪𑀺𑀦𑁆𑀤𑀣𑀸’’𑀢𑀺 𑀇𑀫𑀺𑀦𑀸 𑀓𑀢𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑀸𑀦𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀘 𑀲𑀺𑀤𑁆𑀥𑀁. 𑀅𑀜𑁆𑀜𑀣𑀸 𑀳𑀺 𑀪𑀕𑀯𑀸 𑀦 𑀪𑀺𑀦𑁆𑀤𑀸𑀧𑁂𑀬𑁆𑀬. 𑀏𑀲 𑀦𑀬𑁄 𑀪𑁂𑀤𑀦𑀓𑀁 𑀙𑁂𑀤𑀦𑀓𑀁 𑀉𑀤𑁆𑀤𑀸𑀮𑀦𑀓𑀦𑁆𑀢𑀺 𑀏𑀢𑁆𑀣𑀸𑀧𑀺, 𑀆𑀧𑀢𑁆𑀢𑀺𑀪𑁂𑀤𑀸𑀯. 𑀢𑀢𑁄 𑀏𑀯 𑀳𑀺 𑀪𑁂𑀤𑀦𑀓𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀯𑀺𑀬 ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁, 𑀢𑀣𑀸 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑁄𑀢𑀺, 𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀓𑀭𑁄𑀢𑀺, 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀘 𑀲𑀺𑀤𑁆𑀥𑀁, 𑀅𑀜𑁆𑀜𑀣𑀸 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀯𑀺𑀬 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣, 𑀅𑀦𑀸𑀧𑀢𑁆𑀢𑀻’’𑀢𑀺 𑀦𑀬𑀫𑁂𑀯 𑀯𑀤𑁂𑀬𑁆𑀬, 𑀦 𑀪𑀺𑀦𑁆𑀤𑀸𑀧𑁂𑀬𑁆𑀬. 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀪𑀸𑀯𑀁 𑀧𑀦 𑀫𑁄𑀘𑁂𑀢𑁆𑀯𑀸 𑀓𑀝𑁆𑀞𑀧𑀸𑀲𑀸𑀡𑀸𑀤𑀺𑀫𑀺𑀲𑁆𑀲𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀦𑀸𑀧𑀢𑁆𑀢𑀺. 𑀢𑀣𑀸 𑀳𑀺 𑀙𑁂𑀤𑀦𑀓𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀪𑀕𑀯𑀢𑀸 𑀦𑀬𑁄 𑀤𑀺𑀦𑁆𑀦𑁄 ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺𑀆𑀤𑀻𑀲𑀼. 𑀓𑁂𑀘𑀺 𑀧𑀦 ‘‘𑀯𑀬𑀓𑀫𑁆𑀫𑀫𑁆𑀧𑀻𑀢𑀺 𑀏𑀢𑁂𑀦 𑀫𑀽𑀮𑀁 𑀤𑀢𑁆𑀯𑀸 𑀓𑀸𑀭𑀸𑀧𑀺𑀢𑀫𑁆𑀧𑀺 𑀅𑀢𑁆𑀣𑀺, 𑀢𑁂𑀦 𑀢𑀁 𑀅𑀜𑁆𑀜𑁂𑀦 𑀓𑀢𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀓𑀲𑁆𑀫𑀸? 𑀲𑀫𑁆𑀪𑀸𑀭𑁂 𑀓𑀺𑀡𑀺𑀢𑁆𑀯𑀸 𑀲𑀬𑀫𑁂𑀯 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀯𑀬𑀓𑀫𑁆𑀫𑀲𑀫𑁆𑀪𑀯𑀢𑁄. 𑀓𑀺𑀁 𑀯𑀸 𑀧𑀸𑀴𑀺𑀮𑁂𑀲𑁂 𑀲𑀢𑀺 𑀅𑀝𑁆𑀞𑀓𑀣𑀸𑀮𑁂𑀲𑀦𑀬𑁄. 𑀇𑀝𑁆𑀞𑀓𑀸𑀳𑀺 𑀕𑀺𑀜𑁆𑀚𑀓𑀸𑀯𑀲𑀣𑀲𑀗𑁆𑀔𑁂𑀧𑁂𑀦 𑀓𑀢𑀸 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀧𑀓𑀢𑀺𑀇𑀝𑁆𑀞𑀓𑀸𑀳𑀺 𑀘𑀺𑀦𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀸𑀯𑀲𑀣𑁄 𑀕𑀺𑀜𑁆𑀚𑀓𑀸𑀯𑀲𑀣𑁄 𑀦𑀸𑀫. 𑀲𑀸 𑀳𑀺 ‘‘𑀫𑀢𑁆𑀢𑀺𑀓𑀸𑀫𑀬𑀸’’𑀢𑀺 𑀦 𑀯𑀼𑀘𑁆𑀘𑀢𑀺, ‘‘𑀇𑀝𑁆𑀞𑀓𑀓𑀼𑀝𑀺𑀓𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀣𑀼𑀲𑀕𑁄𑀫𑀬𑀢𑀺𑀡𑀧𑀮𑀸𑀮𑀫𑀺𑀲𑁆𑀲𑀸 𑀫𑀢𑁆𑀢𑀺𑀓𑀸𑀫𑀬𑀸𑀧𑀺 𑀅𑀧𑀓𑁆𑀓𑀺𑀝𑁆𑀞𑀓𑀫𑀬𑀸𑀧𑀺 ‘‘𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺 𑀦𑁄 𑀔𑀦𑁆𑀢𑀻𑀢𑀺 𑀆𑀘𑀭𑀺𑀬𑁄, 𑀪𑀲𑁆𑀫𑀸𑀤𑀬𑁄 𑀳𑀺 𑀫𑀢𑁆𑀢𑀺𑀓𑀸𑀬 𑀤𑀴𑁆𑀳𑀺𑀪𑀸𑀯𑀢𑁆𑀣𑀫𑁂𑀯 𑀆𑀤𑀻𑀬𑀦𑁆𑀢𑀺, 𑀅𑀧𑀓𑁆𑀓𑀺𑀝𑁆𑀞𑀓𑀫𑀬𑀸𑀧𑀺 𑀕𑀺𑀜𑁆𑀚𑀓𑀸𑀯𑀲𑀣𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀦 𑀘 𑀆𑀬𑀲𑁆𑀫𑀸 𑀥𑀦𑀺𑀬𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀓𑀼𑀫𑁆𑀪𑀓𑀸𑀭𑁄 𑀯𑀺𑀬 𑀓𑀼𑀫𑁆𑀪𑀁 𑀢𑀁 𑀓𑀼𑀝𑀺𑀓𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀅𑀦𑀼𑀓𑁆𑀓𑀫𑁂𑀦 𑀧𑀦 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂𑀳𑀺 𑀘𑀺𑀦𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀲𑀺, 𑀅𑀧𑀓𑁆𑀓𑀺𑀝𑁆𑀞𑀓𑀫𑀬𑀸 𑀓𑀼𑀝𑀺 𑀯𑀺𑀬 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺 𑀏𑀓𑀸𑀩𑀤𑁆𑀥𑀸 𑀳𑁄𑀢𑀺, 𑀦 𑀢𑀣𑀸 𑀧𑀓𑁆𑀓𑀺𑀝𑁆𑀞𑀓𑀫𑀬𑀸, 𑀢𑀲𑁆𑀫𑀸 𑀲𑀸 𑀓𑀧𑁆𑀧𑀢𑀻𑀢𑀺 𑀏𑀓𑁂. 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸𑀬 𑀓𑀼𑀝𑀺𑀬𑀸 𑀩𑀳𑀺 𑀘𑁂 𑀢𑀺𑀡𑀓𑀼𑀝𑀺𑀓𑀸𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀯𑀲𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀲𑀘𑁂 𑀢𑀢𑁆𑀣 𑀢𑀢𑁆𑀣 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀏𑀓𑀸𑀩𑀤𑁆𑀥𑀁 𑀓𑀭𑁄𑀢𑀺, 𑀯𑀝𑁆𑀝𑀢𑀺. 𑀅𑀦𑁆𑀢𑁄 𑀘𑁂 𑀢𑀺𑀡𑀓𑀼𑀝𑀺𑀓𑀸𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀯𑀲𑀢𑀺, 𑀯𑀝𑁆𑀝𑀢𑀺. 𑀓𑀸𑀭𑀓𑁄 𑀏𑀯 𑀘𑁂 𑀯𑀲𑀢𑀺, 𑀓𑀭𑀡𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀦 𑀯𑀲𑀦𑀧𑀘𑁆𑀘𑀬𑀸. 𑀲𑀘𑁂 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀉𑀪𑀬𑀢𑁆𑀣 𑀯𑀸 𑀲𑀼𑀥𑀸𑀬 𑀮𑀺𑀫𑁆𑀧𑀢𑀺, 𑀯𑀝𑁆𑀝𑀢𑀺. 𑀬𑀲𑁆𑀫𑀸 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺 𑀲𑀼𑀓𑀭𑀸 𑀪𑀺𑀦𑁆𑀤𑀺𑀢𑀼𑀁, 𑀢𑀲𑁆𑀫𑀸 𑀢𑀢𑁆𑀣 𑀞𑀧𑀺𑀢𑀁 𑀧𑀢𑁆𑀢𑀘𑀻𑀯𑀭𑀸𑀤𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀘𑁄𑀭𑀸𑀤𑀻𑀳𑀺 𑀅𑀯𑀳𑀭𑀺𑀢𑀼𑀁 𑀲𑀓𑁆𑀓𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀢𑁆𑀢𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀸𑀬𑀸’’𑀢𑀺.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑀸𑀯𑀘𑁂 𑀧𑀢𑁆𑀢𑁂 𑀥𑀸𑀭𑁂𑀦𑁆𑀢𑀺, 𑀉𑀘𑁆𑀘𑀸𑀯𑀘𑀸𑀦𑀺 𑀧𑀢𑁆𑀢𑀫𑀡𑁆𑀟𑀮𑀸𑀦𑀺 𑀥𑀸𑀭𑁂𑀦𑁆𑀢𑀻’’𑀢𑀺 (𑀘𑀼𑀴𑀯. 𑁨𑁫𑁩) 𑀏𑀯𑀫𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 ‘‘𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀯𑀘𑀸 𑀧𑀢𑁆𑀢𑀸 𑀥𑀸𑀭𑁂𑀢𑀩𑁆𑀩𑀸, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑁂𑀲𑀼 𑀘 𑀤𑀼𑀓𑁆𑀓𑀝𑀁 𑀧𑀜𑁆𑀜𑀢𑁆𑀢𑀁. 𑀓𑀲𑁆𑀫𑀸? 𑀢𑀤𑀦𑀼𑀮𑁄𑀫𑀢𑁆𑀢𑀸. 𑀬𑀢𑁆𑀣𑀸𑀧𑀺 𑀦 𑀧𑀜𑁆𑀜𑀢𑁆𑀢𑀁, 𑀢𑀢𑁆𑀣 ‘‘𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀯𑀘𑀸𑀦𑀺 𑀙𑀢𑁆𑀢𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁬𑁯-𑁨𑁭𑁦) 𑀦𑀬𑁂𑀦 𑀤𑀼𑀓𑁆𑀓𑀝𑀁 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 ‘‘𑀢𑀢𑁆𑀭𑀸𑀬𑀁 𑀧𑀸𑀴𑀺𑀫𑀼𑀢𑁆𑀢𑀓𑁄’’𑀢𑀺 𑀆𑀭𑀪𑀺𑀢𑁆𑀯𑀸 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂𑀲𑀼 𑀯𑀡𑁆𑀡𑀫𑀝𑁆𑀞𑀁, 𑀲𑀯𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀤𑀻𑀧𑁂𑀦𑁆𑀢𑁂𑀦 ‘‘𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣𑀸𑀳 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀧𑀳𑀭𑀡𑀺𑀁 𑀲𑀩𑁆𑀩𑀁 𑀮𑁄𑀳𑀪𑀡𑁆𑀟𑀁, 𑀞𑀧𑁂𑀢𑁆𑀯𑀸 𑀆𑀲𑀦𑁆𑀤𑀺𑀁 𑀧𑀮𑁆𑀮𑀗𑁆𑀓𑀁 𑀤𑀸𑀭𑀼𑀧𑀢𑁆𑀢𑀁 𑀤𑀸𑀭𑀼𑀧𑀸𑀤𑀼𑀓𑀁 𑀲𑀩𑁆𑀩𑀁 𑀤𑀸𑀭𑀼𑀪𑀡𑁆𑀟𑀁, 𑀞𑀧𑁂𑀢𑁆𑀯𑀸 𑀓𑀢𑀓𑀜𑁆𑀘 𑀓𑀼𑀫𑁆𑀪𑀓𑀸𑀭𑀺𑀓𑀜𑁆𑀘 𑀲𑀩𑁆𑀩𑀁 𑀫𑀢𑁆𑀢𑀺𑀓𑀸𑀪𑀡𑁆𑀟’’𑀦𑁆𑀢𑀺 (𑀘𑀽𑀴𑀯. 𑁨𑁯𑁩) 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸𑀞𑀧𑀺𑀢𑀁 𑀯𑀚𑁆𑀚𑁂𑀢𑁆𑀯𑀸 𑀇𑀢𑀭𑀁 𑀲𑀩𑁆𑀩𑀁 𑀯𑀡𑁆𑀡𑀫𑀝𑁆𑀞𑀫𑁆𑀧𑀺 𑀲𑀯𑀺𑀓𑀸𑀭𑀫𑁆𑀧𑀺 𑀅𑀯𑀺𑀲𑁂𑀲𑁂𑀦 𑀯𑀝𑁆𑀝𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀁 𑀦 𑀬𑀼𑀢𑁆𑀢𑀁 𑀬𑀣𑀸𑀤𑀲𑁆𑀲𑀺𑀢𑀧𑀸𑀴𑀺𑀯𑀺𑀭𑁄𑀥𑀢𑁄, 𑀢𑀲𑁆𑀫𑀸 ‘‘𑀞𑀧𑁂𑀢𑁆𑀯𑀸 𑀧𑀳𑀭𑀡𑀺’’𑀦𑁆𑀢𑀺 𑀏𑀯𑀁 𑀚𑀸𑀢𑀺𑀯𑀲𑁂𑀦 𑀅𑀬𑀁 𑀧𑀸𑀴𑀺 𑀧𑀯𑀢𑁆𑀢𑀸, 𑀬𑀣𑀸𑀤𑀲𑁆𑀲𑀺𑀢𑀸 𑀧𑀸𑀴𑀺 𑀯𑀡𑁆𑀡𑀫𑀝𑁆𑀞𑀸𑀤𑀺𑀯𑀺𑀓𑀸𑀭𑀧𑀝𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀏𑀯𑀁 𑀉𑀪𑀬𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑁂𑀯. 𑀆𑀭𑀕𑁆𑀕𑁂𑀦 𑀦𑀺𑀔𑀸𑀤𑀦𑀕𑁆𑀕𑁂𑀦, ‘‘𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄’’𑀢𑀺 (𑀫. 𑀦𑀺. 𑁨.𑁪𑁫𑁮; 𑀥. 𑀧. 𑁪𑁦𑁧; 𑀲𑀼. 𑀦𑀺. 𑁬𑁩𑁦) 𑀏𑀢𑁆𑀣 𑀯𑀼𑀢𑁆𑀢𑀦𑀬𑀢𑁄 𑀆𑀭𑀕𑁆𑀕𑁂𑀦.

𑀧𑀝𑁆𑀝𑀫𑀼𑀔𑁂 𑀯𑀸𑀢𑀺 𑀧𑀝𑁆𑀝𑀓𑁄𑀝𑀺𑀬𑀁. 𑀧𑀭𑀺𑀬𑀦𑁆𑀢𑁂𑀢𑀺 𑀘𑀻𑀯𑀭𑀧𑀭𑀺𑀬𑀦𑁆𑀢𑁂. 𑀯𑁂𑀡𑀺𑀉𑀳𑀼𑀫𑀼𑀦𑀺𑀬𑀼𑀧𑁂𑀜𑁆𑀜𑀸𑀫. 𑀅𑀕𑁆𑀖𑀺𑀬𑀦𑁆𑀢𑀺 𑀘𑁂𑀢𑀺𑀬𑀁. 𑀕𑀬𑀫𑀼𑀕𑁆𑀕𑀭𑀦𑁆𑀢𑀺 𑀢𑀼𑀮𑀸𑀤𑀡𑁆𑀟𑀲𑀡𑁆𑀞𑀸𑀦𑀁, 𑀕𑀬𑀸 𑀲𑀻𑀲𑁂 𑀲𑀽𑀘𑀺𑀓𑀸 𑀳𑁄𑀢𑀺, 𑀫𑀼𑀔𑀧𑀢𑁆𑀢𑀸 𑀮𑀤𑁆𑀭𑀸. 𑀉𑀓𑁆𑀓𑀺𑀭𑀦𑁆𑀢𑀺 𑀦𑀻𑀳𑀭𑀦𑁆𑀢𑀺 𑀓𑀭𑁄𑀦𑁆𑀢𑀺 𑀞𑀧𑁂𑀦𑁆𑀢𑀺. 𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸 𑀦𑀸𑀫 𑀕𑀡𑁆𑀞𑀺𑀓𑀧𑀝𑁆𑀝𑀸𑀤𑀺𑀓𑁄𑀡𑁂𑀲𑀼 𑀲𑀼𑀢𑁆𑀢𑀫𑀬𑀧𑀺𑀴𑀓𑀸. 𑀬𑀁 𑀏𑀢𑁆𑀣 𑀘𑀻𑀯𑀭𑀁 𑀯𑀸 𑀧𑀢𑁆𑀢𑁄 𑀯𑀸 ‘‘𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁄, 𑀢𑀢𑁆𑀣 𑀅𑀥𑀺𑀝𑁆𑀞𑀸𑀦𑀁 𑀭𑀼𑀳𑀢𑀺, 𑀯𑀺𑀓𑀧𑁆𑀧𑀦𑀸𑀧𑀺 𑀭𑀼𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑁂𑀟𑁆𑀟𑀼𑀪𑁄𑀢𑀺 𑀉𑀤𑀓𑀲𑀧𑁆𑀧𑁄. 𑀅𑀘𑁆𑀙𑀻𑀢𑀺 𑀓𑀼𑀜𑁆𑀚𑀭𑀓𑁆𑀔𑀺. 𑀕𑁄𑀫𑀼𑀢𑁆𑀢𑀓𑀦𑁆𑀢𑀺 𑀕𑁄𑀫𑀼𑀢𑁆𑀢𑀲𑀡𑁆𑀞𑀸𑀦𑀸 𑀭𑀸𑀚𑀺𑀬𑁄. 𑀓𑀼𑀜𑁆𑀘𑀺𑀓𑀸𑀬 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀢𑀸 𑀲𑀼𑀯𑀡𑁆𑀡𑀭𑀽𑀧𑀺𑀬𑀫𑀬𑀸𑀧𑀺 𑀯𑀝𑁆𑀝𑀢𑀻𑀢𑀺 𑀙𑀸𑀬𑀸 𑀤𑀺𑀲𑁆𑀲𑀢𑀺, ‘‘𑀓𑀼𑀜𑁆𑀘𑀺𑀓𑀸𑀬 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀢𑁄 𑀅𑀜𑁆𑀜𑁂 𑀓𑀧𑁆𑀧𑀺𑀬𑀮𑁄𑀳𑀸𑀤𑀺𑀫𑀬𑀸𑀯 𑀓𑀼𑀜𑁆𑀘𑀺𑀓𑀸 𑀓𑀧𑁆𑀧𑀦𑁆𑀢𑀺 𑀧𑀭𑀺𑀳𑀭𑀡𑀻𑀬𑀧𑀭𑀺𑀓𑁆𑀔𑀸𑀭𑀢𑁆𑀢𑀸. 𑀆𑀭𑀓𑀡𑁆𑀝𑀓𑁄 𑀧𑁄𑀢𑁆𑀣𑀓𑀸𑀤𑀺𑀓𑀭𑀡𑀲𑀢𑁆𑀣𑀓𑀚𑀸𑀢𑀺. ‘‘𑀆𑀫𑀡𑁆𑀟𑀓𑀲𑀸𑀭𑀓𑁄 𑀆𑀫𑀮𑀓𑀨𑀮𑀫𑀬𑁄’’𑀢𑀺 𑀯𑀤𑀦𑁆𑀢𑀺. 𑀢𑀸𑀮𑀧𑀡𑁆𑀡𑀩𑀻𑀚𑀦𑀻𑀆𑀤𑀻𑀲𑀼 ‘‘𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀢𑀸𑀦𑀺 𑀓𑀼𑀜𑁆𑀘𑀺𑀓𑀸 𑀯𑀺𑀬 𑀧𑀭𑀺𑀳𑀭𑀡𑀻𑀬𑀸𑀦𑀺, 𑀅𑀣 𑀔𑁄 ‘‘𑀉𑀘𑁆𑀘𑀸𑀯𑀘𑀸𑀦𑀺 𑀦 𑀥𑀸𑀭𑁂𑀢𑀩𑁆𑀩𑀸𑀦𑀻’’𑀢𑀺 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀓𑁂𑀯𑀮𑀜𑁆𑀳𑀺 𑀢𑀸𑀦𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀥𑀽𑀧𑀦𑀜𑁆𑀘 𑀢𑀸𑀮𑀯𑀡𑁆𑀝𑀜𑁆𑀘𑀸’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁬𑁯) 𑀯𑀼𑀢𑁆𑀢𑀸𑀦𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀢𑁂𑀮𑀪𑀸𑀚𑀦𑁂𑀲𑀼 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀻𑀢𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀭𑀸𑀚𑀯𑀮𑁆𑀮𑀪𑀸𑀢𑀺 𑀭𑀸𑀚𑀓𑀼𑀮𑀽𑀧𑀓𑀸. 𑀲𑀻𑀫𑀸𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸 𑀪𑀽𑀫𑀺, 𑀩𑀤𑁆𑀥𑀲𑀻𑀫𑀸 𑀘. ‘‘𑀬𑁂𑀲𑀁 𑀲𑀦𑁆𑀢𑀓𑀸 𑀢𑁂𑀲𑀁 𑀲𑀻𑀫𑀸, 𑀢𑀢𑁆𑀣 𑀧𑀭𑁂𑀳𑀺 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀪𑀽𑀫𑀺 𑀘 𑀲𑀻𑀫𑀸 𑀘 𑀬𑁂𑀲𑀁 𑀲𑀦𑁆𑀢𑀓𑀸, 𑀢𑁂𑀳𑀺 𑀏𑀯 𑀯𑀸𑀭𑁂𑀢𑀩𑁆𑀩𑀸. 𑀬𑁂𑀲𑀁 𑀧𑀦 𑀅𑀜𑁆𑀜𑁂𑀲𑀁 𑀪𑀽𑀫𑀺𑀬𑀁 𑀲𑀻𑀫𑀸 𑀓𑀢𑀸, 𑀢𑁂 𑀯𑀸𑀭𑁂𑀢𑀼𑀁 𑀦 𑀇𑀲𑁆𑀲𑀭𑀸’’𑀢𑀺 𑀯𑀤𑀦𑁆𑀢𑀺. ‘‘𑀲𑀗𑁆𑀖𑀪𑁂𑀤𑀸𑀤𑀻𑀦𑀁 𑀓𑀸𑀭𑀡𑀢𑁆𑀢𑀸 ‘𑀫𑀸 𑀓𑀭𑁄𑀣𑀸’𑀢𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀸 𑀏𑀯𑀸’’𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑀓𑀺𑀭.

𑁮𑁬-𑁭. 𑀤𑀸𑀭𑀼𑀓𑀼𑀝𑀺𑀓𑀁 𑀓𑀸𑀢𑀼𑀁, 𑀓𑀢𑁆𑀢𑀼𑀦𑁆𑀢𑀺 𑀘 𑀅𑀢𑁆𑀣𑀺. 𑀔𑀡𑁆𑀟𑀸𑀔𑀡𑁆𑀟𑀺𑀓𑀦𑁆𑀢𑀺 𑀨𑀮𑀸𑀨𑀮𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀆𑀡𑀸𑀧𑁂𑀳𑀻𑀢𑀺 𑀯𑀘𑀦𑀁 𑀅𑀦𑀺𑀝𑁆𑀞𑁂 𑀏𑀯 𑀯𑀼𑀘𑁆𑀘𑀢𑀻𑀢𑀺 𑀓𑀢𑁆𑀯𑀸 𑀩𑀦𑁆𑀥𑀁 𑀆𑀡𑀸𑀧𑁂𑀲𑀺. 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬𑀸𑀢𑀺 𑀲𑀫𑀺𑀤𑁆𑀥𑀺𑀬𑀁 𑀫𑀢𑁆𑀢𑀸𑀲𑀤𑁆𑀤𑁄𑀢𑀺 𑀜𑀸𑀧𑁂𑀢𑀺.

𑁮𑁮. ‘‘𑀏𑀯𑀭𑀽𑀧𑀁 𑀯𑀸𑀘𑀁 𑀪𑀸𑀲𑀺𑀢𑁆𑀯𑀸’’𑀢𑀺 𑀘 𑀧𑀸𑀞𑁄. 𑀮𑁄𑀫𑁂𑀦 𑀢𑁆𑀯𑀁 𑀫𑀼𑀢𑁆𑀢𑁄, 𑀫𑀸 𑀧𑀼𑀦𑀧𑀺 𑀏𑀯𑀭𑀽𑀧𑀫𑀓𑀸𑀲𑀻𑀢𑀺 𑀇𑀤𑀁 𑀓𑀺𑀁 𑀩𑁆𑀬𑀸𑀧𑀸𑀤𑀤𑀻𑀧𑀓𑀁, 𑀤𑀸𑀭𑀽𑀲𑀼𑀧𑀺 𑀮𑁄𑀪𑀓𑁆𑀔𑀦𑁆𑀥𑀤𑀻𑀧𑀓𑀁 𑀯𑀘𑀦𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀢𑁄 𑀢𑀲𑁆𑀲 𑀭𑀸𑀚𑀲𑁆𑀲 𑀧𑀢𑀺𑀭𑀽𑀧𑀁. 𑀦𑀦𑀼 𑀦𑀸𑀫 ‘‘𑀧𑀼𑀩𑁆𑀩𑁂 𑀓𑀢𑀁 𑀲𑀼𑀓𑀢𑀁 𑀪𑀦𑁆𑀢𑁂, 𑀯𑀤𑁂𑀬𑁆𑀬𑀸𑀣 𑀧𑀼𑀦𑀧𑀺 𑀬𑁂𑀦𑀢𑁆𑀣𑁄’’𑀢𑀺 𑀧𑀯𑀸𑀭𑁂𑀢𑁆𑀯𑀸 𑀅𑀢𑀻𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁 𑀢𑁂𑀦 𑀲𑀺𑀬𑀸𑀢𑀺? 𑀲𑀘𑁆𑀘𑀫𑁂𑀢𑀁 𑀲𑁄𑀢𑀸𑀧𑀦𑁆𑀦𑀢𑁆𑀢𑀸 𑀅𑀢𑀻𑀯 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄 𑀘, 𑀢𑀲𑁆𑀫𑀸 𑀪𑀺𑀓𑁆𑀔𑀽𑀦𑀁 𑀅𑀓𑀧𑁆𑀧𑀺𑀬𑀁 𑀅𑀲𑀳𑀦𑁆𑀢𑁄, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀘 𑀑𑀓𑀸𑀲𑀁 𑀓𑀢𑁆𑀢𑀼𑀓𑀸𑀫𑁄 ‘‘𑀲𑀼𑀧𑀬𑀼𑀢𑁆𑀢𑀸𑀦𑀺 𑀫𑁂 𑀤𑀸𑀭𑀽𑀦𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄𑀧𑀺 𑀏𑀯𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀳𑀺 𑀦𑀸𑀫 𑀏𑀯𑀭𑀽𑀧𑁂 𑀞𑀸𑀦𑁂. ‘‘𑀆𑀕𑀢𑀧𑀤𑀸𑀦𑀼𑀭𑀽𑀧𑁂𑀦𑀸𑀢𑀺 𑀅𑀜𑁆𑀜𑁂𑀳𑀺 𑀯𑀸 𑀧𑀤𑁂𑀳𑀺, 𑀇𑀢𑁄 𑀣𑁄𑀓𑀢𑀭𑁂𑀳𑀺 𑀯𑀸 𑀆𑀕𑀢𑀓𑀸𑀮𑁂 𑀢𑀤𑀦𑀼𑀭𑀽𑀧𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀦 𑀓𑁂𑀯𑀮𑀁 𑀇𑀫𑀲𑁆𑀫𑀺𑀁𑀬𑁂𑀯 𑀲𑀺𑀓𑁆𑀔𑀸𑀧𑀤𑁂, 𑀅𑀜𑁆𑀜𑁂𑀲𑀼𑀧𑀺 𑀆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀧𑀤𑀸𑀦𑀼𑀭𑀽𑀧𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀉𑀚𑁆𑀛𑀸𑀬𑀦𑀢𑁆𑀣𑁄 𑀅𑀤𑀺𑀦𑁆𑀦𑀲𑁆𑀲𑀸𑀤𑀺𑀦𑁆𑀦𑀢𑁆𑀢𑀸𑀯, 𑀢𑁂 𑀉𑀚𑁆𑀛𑀸𑀬𑀺𑀁𑀲𑀼.

𑀭𑀼𑀤𑁆𑀭𑀤𑀸𑀫𑀓𑁄 𑀦𑀸𑀫 𑀭𑀼𑀤𑁆𑀭𑀤𑀸𑀫𑀓𑀸𑀤𑀻𑀳𑀺 𑀉𑀧𑁆𑀧𑀸𑀤𑀺𑀢𑁄. 𑀩𑀸𑀭𑀸𑀡𑀲𑀺𑀦𑀕𑀭𑀸𑀤𑀻𑀲𑀼 𑀢𑁂𑀳𑀺 𑀢𑁂𑀳𑀺 𑀭𑀸𑀚𑀽𑀳𑀺 𑀧𑁄𑀭𑀸𑀡𑀲𑀢𑁆𑀣𑀸𑀦𑀼𑀭𑀽𑀧𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸 𑀉𑀧𑁆𑀧𑀸𑀤𑀺𑀢𑀸 𑀦𑀻𑀮𑀓𑀳𑀸𑀧𑀡𑀸. 𑀢𑁂𑀲𑀁 𑀓𑀺𑀭 𑀢𑀺𑀪𑀸𑀕𑀁 𑀅𑀕𑁆𑀖𑀢𑀺 𑀭𑀼𑀤𑁆𑀭𑀤𑀸𑀫𑀓𑁄, 𑀢𑀲𑁆𑀫𑀸 𑀢𑀲𑁆𑀲 𑀧𑀸𑀤𑁄 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼 𑀳𑁄𑀢𑀺. 𑀫𑀸𑀲𑀓𑁄 𑀧𑀦 𑀇𑀥 𑀅𑀧𑁆𑀧𑀫𑀸𑀡𑀁. 𑀓𑀳𑀸𑀧𑀡𑁄 𑀓𑀺𑀜𑁆𑀘𑀺𑀓𑀸𑀮𑁂 𑀊𑀦𑀯𑀻𑀲𑀢𑀺𑀫𑀸𑀲𑀓𑁄 𑀳𑁄𑀢𑀺, 𑀓𑀺𑀜𑁆𑀘𑀺 𑀓𑀸𑀮𑁂 𑀅𑀢𑀺𑀭𑁂𑀓𑀯𑀻𑀲𑀢𑀺𑀫𑀸𑀲𑀓𑁄. 𑀢𑀲𑁆𑀫𑀸 𑀢𑀲𑁆𑀲 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑁄 𑀧𑀜𑁆𑀘𑀫𑀸𑀲𑀓𑁄 𑀯𑀺𑀬 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑁄 𑀯𑀸 𑀊𑀦𑀧𑀜𑁆𑀘𑀫𑀸𑀲𑀓𑁄 𑀯𑀸 𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 ‘‘𑀢𑀤𑀸 𑀭𑀸𑀚𑀕𑀳𑁂 𑀯𑀻𑀲𑀢𑀺𑀫𑀸𑀲𑀓𑁄 𑀓𑀳𑀸𑀧𑀡𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀚𑀢𑀫𑀬𑁄 𑀲𑀼𑀯𑀡𑁆𑀡𑀫𑀬𑁄 𑀢𑀫𑁆𑀩𑀫𑀬𑁄 𑀘 𑀓𑀳𑀸𑀧𑀡𑁄 𑀳𑁄𑀢𑀺. 𑀲𑀼𑀯𑀡𑁆𑀡𑀪𑀽𑀫𑀺𑀬𑀁 𑀯𑀺𑀬 𑀧𑀸𑀤𑁄𑀧𑀺 𑀬𑀢𑁆𑀣 𑀢𑀫𑁆𑀩𑀫𑀬𑁄𑀯 𑀓𑀢𑁄 𑀳𑁄𑀢𑀺, 𑀢𑀢𑁆𑀣 𑀲𑁄𑀯 𑀧𑀸𑀤𑁄𑀢𑀺 𑀆𑀘𑀭𑀺𑀬𑁄. 𑀬𑀲𑁆𑀫𑀸 𑀧𑀸𑀤𑁄 𑀏𑀓𑀦𑀻𑀮𑀓𑀳𑀸𑀧𑀡𑀕𑁆𑀖𑀦𑀓𑁄, 𑀢𑀲𑁆𑀫𑀸 𑀢𑀲𑁆𑀲 𑀧𑀸𑀤𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑁄𑀯 𑀲𑀺𑀬𑀸 𑀧𑀸𑀤𑁄𑀢𑀺 𑀏𑀓𑁂. 𑀇𑀤𑀁 𑀦 𑀬𑀼𑀚𑁆𑀚𑀢𑀺. 𑀬𑁄 𑀘 𑀢𑀢𑁆𑀣 𑀧𑀸𑀤𑀸𑀭𑀳𑁄 𑀪𑀡𑁆𑀟𑁄, 𑀢𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀬𑀤𑀺 𑀧𑀸𑀤𑀸𑀭𑀳𑀁 𑀪𑀡𑁆𑀟𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼, 𑀲𑀺𑀤𑁆𑀥𑀁 ‘‘𑀲𑁄𑀯 𑀧𑀸𑀤𑁄 𑀧𑀘𑁆𑀙𑀺𑀫𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀽’’𑀢𑀺. 𑀦 𑀳𑀺 𑀲𑀩𑁆𑀩𑀢𑁆𑀣 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀦𑀻𑀮𑀓𑀳𑀸𑀧𑀡𑀕𑁆𑀖𑁂𑀦 𑀅𑀕𑁆𑀖𑀸𑀧𑁂𑀦𑁆𑀢𑀺. 𑀬𑀲𑁆𑀫𑀸 𑀢𑀲𑁆𑀲 𑀢𑀲𑁆𑀲𑁂𑀯 𑀓𑀳𑀸𑀧𑀡𑀕𑁆𑀖𑁂𑀦 𑀅𑀕𑁆𑀖𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀢𑀲𑁆𑀲 𑀚𑀦𑀧𑀤𑀲𑁆𑀲 𑀧𑀸𑀤𑁄𑀯 𑀧𑀸𑀤𑁄𑀢𑀺 𑀢𑀤𑀕𑁆𑀖𑀦𑀓𑀫𑁂𑀯 𑀧𑀸𑀤𑀕𑁆𑀖𑀦𑀓𑀦𑁆𑀢𑀺 𑀲𑀺𑀤𑁆𑀥𑀁, ‘‘𑀲𑁄 𑀘 𑀔𑁄 𑀧𑁄𑀭𑀸𑀡𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑁆𑀲 𑀯𑀲𑁂𑀦, 𑀦 𑀇𑀢𑀭𑁂𑀲𑀦𑁆𑀢𑀺 𑀬𑀢𑁆𑀣 𑀧𑀦 𑀦𑀻𑀮𑀓𑀳𑀸𑀧𑀡𑀸 𑀯𑀴𑀜𑁆𑀚𑀁 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣𑁂𑀯𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁯𑁨. 𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸𑀢𑀺 𑀮𑀓𑁆𑀔𑀡𑀸𑀦𑀼𑀧𑀜𑁆𑀜𑀢𑁆𑀢𑀺𑀓𑀢𑁆𑀢𑀸 𑀧𑀞𑀫𑀧𑀜𑁆𑀜𑀢𑁆𑀢𑀺𑀬𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸. 𑀬𑀢𑁄 𑀯𑀸 𑀅𑀧𑀓𑁆𑀓𑀦𑁆𑀢𑀸, 𑀲𑁄 𑀅𑀫𑀦𑀼𑀲𑁆𑀲𑁄 𑀦𑀸𑀫. ‘‘𑀅𑀫𑀦𑀼𑀲𑁆𑀲𑀕𑀸𑀫𑀁 𑀅𑀧𑀸𑀭𑀼𑀧𑀺𑀢𑁆𑀯𑀸, 𑀕𑀸𑀫𑀧𑁆𑀧𑀯𑁂𑀲𑀦𑀜𑁆𑀘 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀬𑀢𑁄 𑀕𑀸𑀫𑀢𑁄 𑀆𑀕𑀦𑁆𑀢𑀼𑀓𑀸𑀫𑀸 𑀏𑀯 𑀅𑀧𑀓𑁆𑀓𑀦𑁆𑀢𑀸, 𑀢𑀁 𑀕𑀸𑀫𑀁 𑀏𑀯𑀁 𑀧𑀯𑀺𑀲𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺 𑀏𑀓𑁂. 𑀓𑁂𑀘𑀺 𑀧𑀦 ‘‘𑀬𑀓𑁆𑀔𑀧𑀭𑀺𑀕𑁆𑀕𑀳𑀪𑀽𑀢𑁄𑀧𑀺 𑀆𑀧𑀡𑀸𑀤𑀻𑀲𑀼 𑀤𑀺𑀲𑁆𑀲𑀫𑀸𑀦𑁂𑀲𑀼 𑀏𑀯 ‘𑀕𑀸𑀫𑁄’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀅𑀤𑀺𑀲𑁆𑀲𑀫𑀸𑀦𑁂𑀲𑀼 𑀧𑀯𑁂𑀲𑀦𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀕𑀸𑀫𑁄 𑀏𑀯 𑀉𑀧𑀘𑀸𑀭𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀏𑀯𑀁 𑀓𑀫𑁆𑀫𑀥𑀸𑀭𑀬𑀯𑀲𑁂𑀦 𑀕𑀳𑀺𑀢𑁂 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀫𑁂𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀢𑀲𑁆𑀲 𑀖𑀭𑀽𑀧𑀘𑀸𑀭𑁄 𑀕𑀸𑀫𑁄𑀢𑀺 𑀆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀕𑀸𑀫𑀲𑁆𑀲𑀼𑀧𑀘𑀸𑀭𑁄 𑀘 𑀕𑀸𑀫𑁄 𑀘 𑀕𑀸𑀫𑀽𑀧𑀘𑀸𑀭𑁄 𑀘𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀺𑀭𑀼𑀚𑁆𑀛𑀢𑀺, 𑀦. ‘‘𑀇𑀫𑁂𑀲𑀁 𑀮𑀸𑀪𑀸𑀤𑀻𑀲𑀼 𑀮𑀓𑁆𑀔𑀡𑀁 𑀲𑀦𑁆𑀥𑀸𑀬 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘𑀖𑀭𑀁 𑀖𑀭𑀽𑀧𑀘𑀸𑀭𑁄’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀦 𑀫𑀬𑀁 𑀧𑀝𑀺𑀓𑁆𑀔𑀺𑀧𑀸𑀫𑀸’’𑀢𑀺 𑀘 𑀯𑀤𑀦𑁆𑀢𑀺. ‘‘𑀓𑀢𑀧𑀭𑀺𑀓𑁆𑀔𑁂𑀧𑁄 𑀘𑀸𑀢𑀺 𑀖𑀭𑀲𑁆𑀲 𑀲𑀫𑀦𑁆𑀢𑀢𑁄 𑀢𑀢𑁆𑀢𑀓𑁄 𑀉𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀬𑁄 𑀬𑁄 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀣𑁂𑀭𑀯𑀸𑀤𑁄 𑀯𑀸 𑀧𑀘𑁆𑀙𑀸 𑀯𑀼𑀘𑁆𑀘𑀢𑀻𑀢𑀺 𑀇𑀢𑁄 𑀅𑀦𑀸𑀕𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦𑀸𑀢𑀻𑀢𑀁. 𑀬𑀤𑀺 𑀅𑀢𑀻𑀢𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀫𑀳𑀸𑀧𑀤𑀼𑀫𑀣𑁂𑀭𑀯𑀸𑀤𑁄𑀯 𑀧𑀫𑀸𑀡𑀁 𑀚𑀸𑀢𑀦𑁆𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑀸𑀕𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑀸 𑀓𑀣𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁆𑀧𑀻𑀢𑀺 𑀕𑀸𑀫𑀽𑀧𑀘𑀸𑀭𑀮𑀓𑁆𑀔𑀡𑀫𑁆𑀧𑀺.

𑀢𑀢𑁆𑀭𑀸𑀬𑀁 𑀦𑀬𑁄𑀢𑀺 𑀢𑀲𑁆𑀲 𑀕𑀸𑀫𑀽𑀧𑀘𑀸𑀭𑀲𑁆𑀲 𑀕𑀳𑀡𑁂 𑀅𑀬𑀁 𑀦𑀬𑁄. 𑀯𑀺𑀓𑀸𑀮𑁂𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀽𑀢𑀺 𑀏𑀢𑁆𑀣 ‘‘𑀕𑀸𑀫𑀧𑁆𑀧𑀯𑁂𑀲𑀦𑀜𑁆𑀳𑀺 𑀩𑀳𑀺 𑀏𑀯 𑀆𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀕𑀸𑀫𑀲𑀗𑁆𑀔𑀸𑀢𑀽𑀧𑀘𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀕𑀳𑀺𑀢𑁂 𑀲𑀫𑁂𑀢𑀻𑀢𑀺 𑀫𑀫 𑀢𑀓𑁆𑀓𑁄. ‘‘𑀆𑀤𑀺-𑀲𑀤𑁆𑀤𑀢𑁄 𑀖𑀭𑁂 𑀞𑀺𑀢𑀸𑀦𑀁 𑀤𑀺𑀦𑁆𑀦𑀮𑀸𑀪𑀪𑀸𑀚𑀦𑀸𑀤𑀻𑀦𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀕𑀸𑀫𑀽𑀧𑀘𑀸𑀭𑁂 𑀞𑀺𑀢𑀸𑀦𑀁 𑀧𑀸𑀧𑀼𑀡𑀺𑀢𑀩𑁆𑀩𑀮𑀸𑀪𑀁 𑀲𑀜𑁆𑀘𑀺𑀘𑁆𑀘 𑀅𑀤𑁂𑀦𑁆𑀢𑀸𑀦𑀁 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀓𑀼𑀭𑀼𑀦𑁆𑀤𑀺𑀆𑀤𑀻𑀲𑀼 𑀧𑀸𑀴𑀺𑀬𑀁 𑀯𑀼𑀢𑁆𑀢𑀯𑀘𑀦𑀸𑀦𑀼𑀮𑁄𑀫𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀫𑀸𑀤𑀮𑁂𑀔𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄 𑀲𑀗𑁆𑀕𑀻𑀢𑀺𑀢𑁄 𑀧𑀝𑁆𑀞𑀸𑀬 𑀆𑀕𑀢𑁄. ‘‘𑀬𑀜𑁆𑀘𑁂𑀢𑀁 𑀫𑀳𑀸𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺𑀆𑀤𑀺 𑀲𑀻𑀳𑀴𑀤𑀻𑀧𑁂 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀁 ‘‘𑀯𑀺𑀦𑀺𑀘𑁆𑀙𑀬𑀦𑀬𑁄’’𑀢𑀺 𑀘. 𑀮𑁂𑀟𑁆𑀟𑀼𑀧𑀸𑀢𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁, 𑀦 𑀉𑀧𑀘𑀸𑀭𑀁. 𑀲𑁄 𑀳𑀺 𑀢𑀢𑁄 𑀅𑀧𑀭𑁂𑀦 𑀮𑁂𑀟𑁆𑀟𑀼𑀧𑀸𑀢𑁂𑀦 𑀧𑀭𑀘𑁆𑀙𑀺𑀦𑁆𑀦𑁄. 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑁂𑀢𑀺 𑀦𑀺𑀬𑀫𑁂𑀦 𑀅𑀜𑁆𑀜𑀢𑁆𑀣 𑀅𑀜𑁆𑀜𑀣𑀸𑀢𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀯𑀸 𑀦𑀺𑀬𑀫𑁂𑀦 𑀬𑀣𑀸𑀭𑀼𑀢𑀯𑀲𑁂𑀦𑀸𑀧𑀺 𑀅𑀢𑁆𑀣𑁄 𑀇𑀥 𑀬𑀼𑀚𑁆𑀚𑀢𑀺. 𑀅𑀪𑀺𑀥𑀫𑁆𑀫𑁂 𑀧𑀦𑀸𑀢𑀺𑀆𑀤𑀺𑀦𑀸 𑀅𑀜𑁆𑀜𑀣𑀸𑀧𑀺 𑀅𑀢𑁆𑀣𑀸𑀧𑀢𑁆𑀢𑀺𑀲𑀺𑀤𑁆𑀥𑀁 𑀤𑀲𑁆𑀲𑁂𑀢𑀺.

‘‘𑀧𑀭𑀺𑀘𑁆𑀘𑀸𑀕𑀸𑀤𑀺𑀫𑁆𑀳𑀺 𑀅𑀓𑀢𑁂 ‘𑀇𑀤𑀁 𑀫𑀫 𑀲𑀦𑁆𑀢𑀓’𑀦𑁆𑀢𑀺 𑀅𑀯𑀺𑀤𑀺𑀢𑀫𑁆𑀧𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀧𑀼𑀢𑁆𑀢𑀓𑀸𑀦𑀁 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀲𑀦𑁆𑀢𑀓𑀁 𑀯𑀺𑀬, 𑀢𑀁 𑀅𑀢𑁆𑀣𑀢𑁄 𑀅𑀧𑀭𑀺𑀘𑁆𑀘𑀢𑁆𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀣𑁂𑀦𑀲𑁆𑀲 𑀓𑀫𑁆𑀫𑀁 𑀣𑁂𑀬𑁆𑀬𑀁, 𑀣𑁂𑀦𑁂𑀦 𑀕𑀳𑁂𑀢𑀩𑁆𑀩𑀪𑀽𑀢𑀁 𑀪𑀡𑁆𑀟𑀁. 𑀣𑁂𑀬𑁆𑀬𑀦𑁆𑀢𑀺 𑀲𑀗𑁆𑀔𑀸𑀢𑀦𑁆𑀢𑀺 𑀣𑁂𑀬𑁆𑀬𑀲𑀗𑁆𑀔𑀸𑀢’’𑀦𑁆𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀁 𑀣𑁂𑀬𑁆𑀬𑀁 𑀬𑀲𑁆𑀲 𑀣𑁂𑀦𑀲𑁆𑀲 𑀓𑀫𑁆𑀫𑀁, 𑀲𑁄 𑀬𑀲𑁆𑀫𑀸 𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀯𑀳𑀭𑀡𑀘𑀺𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀣𑁂𑀬𑁆𑀬𑀲𑀗𑁆𑀔𑀸𑀢’’𑀦𑁆𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀯𑀳𑀭𑀡𑀘𑀺𑀢𑁆𑀢𑁄’’𑀢𑀺 𑀧𑀤𑀪𑀸𑀚𑀦𑀫𑁆𑀧𑀺 𑀢𑁂𑀲𑀁 𑀧𑁄𑀭𑀸𑀡𑀸𑀦𑀁 𑀬𑀼𑀚𑁆𑀚𑀢𑁂𑀯, 𑀢𑀣𑀸𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. ‘‘𑀬𑀜𑁆𑀘 𑀧𑀼𑀩𑁆𑀩𑀪𑀸𑀕𑁂 ‘𑀅𑀯𑀳𑀭𑀺𑀲𑁆𑀲𑀸𑀫𑀻’𑀢𑀺 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁, 𑀬𑀜𑁆𑀘 𑀕𑀫𑀦𑀸𑀤𑀺𑀲𑀸𑀥𑀓𑀁, 𑀧𑀭𑀸𑀫𑀲𑀦𑀸𑀤𑀺𑀲𑀸𑀥𑀓𑀁 𑀯𑀸 𑀫𑀚𑁆𑀛𑁂 𑀧𑀯𑀢𑁆𑀢𑀁, 𑀬𑀜𑁆𑀘 𑀞𑀸𑀦𑀸𑀘𑀸𑀯𑀦𑀧𑀬𑁄𑀕𑀲𑀸𑀥𑀓𑀁, 𑀢𑁂𑀲𑀼 𑀅𑀬𑀫𑁂𑀯𑁂𑀓𑁄 𑀧𑀘𑁆𑀙𑀺𑀫𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄 ‘𑀣𑁂𑀦𑁄’𑀢𑀺 𑀅𑀧𑀭𑁂’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀊𑀦𑀫𑀸𑀲𑀓𑀫𑀸𑀲𑀧𑀸𑀤𑀸𑀤𑀻𑀲𑀼 ‘‘𑀅𑀯𑀳𑀭𑀡𑀘𑀺𑀢𑁆𑀢𑁂𑀲𑀼 𑀏𑀓𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀦𑀸𑀫 𑀯𑀘𑀦𑀪𑁂𑀤𑁂𑀦𑁂𑀯 𑀪𑀺𑀦𑁆𑀦𑀸, 𑀅𑀢𑁆𑀣𑀢𑁄 𑀧𑀦 𑀅𑀪𑀺𑀦𑁆𑀦𑀸. 𑀆𑀓𑀼𑀮𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀸𑀢𑀺 𑀆𑀘𑀭𑀺𑀬𑀸𑀦𑀁 𑀫𑀼𑀔𑁂 𑀲𑀦𑁆𑀢𑀺𑀓𑁂 𑀲𑀩𑁆𑀩𑀸𑀓𑀸𑀭𑁂𑀦 𑀅𑀕𑁆𑀕𑀳𑀺𑀢𑀯𑀺𑀦𑀺𑀘𑁆𑀙𑀬𑀸𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀸. 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀧𑀸𑀴𑀺 (𑀧𑀝𑁆𑀞𑀸. 𑁫.𑁧.𑁧 𑀆𑀤𑀬𑁄, 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀧𑀸𑀴𑀺) 𑀯𑀺𑀬 𑀆𑀓𑀼𑀮𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀸, 𑀓𑁂𑀯𑀮𑀁 𑀢𑀁 𑀆𑀘𑀭𑀺𑀬𑀸 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀫𑀓𑀢𑁆𑀯𑀸 𑀲𑀗𑁆𑀕𑀻𑀢𑀺𑀢𑁄 𑀧𑀝𑁆𑀞𑀸𑀬 𑀆𑀕𑀢𑀦𑀬𑀫𑀯𑀺𑀦𑀸𑀲𑁂𑀢𑁆𑀯𑀸 𑀯𑀡𑁆𑀡𑀬𑀦𑁆𑀢𑀻𑀢𑀺 ‘‘𑀧𑀝𑁆𑀞𑀸𑀦𑀧𑀸𑀴𑀺𑀫𑀺𑀯𑀸𑀢𑀺 𑀅𑀧𑀭𑁂 𑀯𑀤𑀦𑁆𑀢𑀻’’𑀢𑀺 𑀘 𑀯𑀼𑀢𑁆𑀢𑀸. 𑀧𑁄𑀭𑀸𑀡𑀸𑀢𑀺 𑀲𑀗𑁆𑀕𑀻𑀢𑀺𑀆𑀘𑀭𑀺𑀬𑀸. 𑀅𑀬𑀫𑁂𑀢𑁆𑀣 𑀲𑀸𑀫𑀻𑀘𑀺 𑀏𑀯, 𑀲𑀘𑁂 𑀦 𑀤𑁂𑀢𑀺, 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀧𑀸𑀭𑀸𑀚𑀺𑀓𑀪𑀬𑀸 𑀧𑀦 𑀬𑀣𑀸 𑀲𑀺𑀓𑁆𑀔𑀸𑀓𑀸𑀫𑁄 𑀤𑁂𑀢𑀺, 𑀏𑀯𑀁 𑀤𑀸𑀢𑀩𑁆𑀩𑀫𑁂𑀯. 𑀬𑀸𑀦𑀺 𑀧𑀦𑁂𑀢𑁆𑀣 𑀯𑀢𑁆𑀣𑀽𑀦𑀺, 𑀢𑀸𑀦𑀺 𑀲𑀻𑀳𑀴𑀤𑀻𑀧𑁂 𑀆𑀘𑀭𑀺𑀬𑁂𑀳𑀺 𑀲𑀗𑁆𑀖𑀸𑀤𑀻𑀦𑀫𑀦𑀼𑀫𑀢𑀺𑀬𑀸 𑀅𑀝𑁆𑀞𑀓𑀣𑀸𑀲𑀼 𑀧𑀓𑁆𑀔𑀺𑀢𑁆𑀢𑀸𑀦𑀺, ‘‘𑀅𑀦𑀸𑀕𑀢𑁂 𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀳𑀺𑀢𑀢𑁆𑀣𑀸𑀬 𑀧𑁄𑀢𑁆𑀣𑀓𑀸𑀭𑀼𑀴𑁆𑀳𑀓𑀸𑀮𑀢𑁄 𑀧𑀘𑁆𑀙𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀆𑀡𑀢𑁆𑀢𑀺𑀓𑀁 𑀆𑀡𑀢𑁆𑀢𑀺𑀓𑁆𑀔𑀡𑁂𑀧𑀺 𑀕𑀡𑁆𑀳𑀸𑀢𑀺, 𑀓𑀸𑀮𑀦𑁆𑀢𑀭𑁂𑀦𑀸𑀧𑀺 𑀅𑀢𑁆𑀣𑀲𑀸𑀥𑀓𑁄, 𑀓𑀸𑀮𑀦𑁆𑀢𑀭𑀁 𑀲𑀦𑁆𑀥𑀸𑀬𑀸𑀢𑀺 𑀇𑀤𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁. 𑀪𑀝𑁆𑀞𑁂𑀢𑀺 𑀅𑀧𑀕𑀢𑁂. 𑀅𑀦𑁆𑀢𑀭𑀲𑀫𑀼𑀤𑁆𑀤𑁂 𑀅𑀢𑀼𑀭𑀼𑀫𑀼𑀳𑀼𑀤𑁂. 𑀨𑀭𑀢𑀺 𑀲𑀸𑀥𑁂𑀢𑀺. 𑀦𑀯𑀥𑁄𑀢𑁄𑀢𑀺 𑀦𑀯𑀓𑀢𑁄. 𑀧𑀸𑀲𑀸𑀡𑀲𑀓𑁆𑀔𑀭𑀦𑁆𑀢𑀺 𑀧𑀸𑀲𑀸𑀡𑀜𑁆𑀘 𑀲𑀓𑁆𑀔𑀭𑀜𑁆𑀘.

𑀪𑀽𑀫𑀝𑁆𑀞𑀓𑀣𑀸𑀤𑀺𑀯𑀡𑁆𑀡𑀦𑀸

𑁯𑁪. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀘𑁆𑀘𑁂𑀧𑀺 𑀅𑀮𑀺𑀓𑁂𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑀣𑁂𑀢𑀭𑀳𑀺 𑀬𑀼𑀢𑁆𑀢𑀺𑀬𑀸 𑀕𑀳𑁂𑀢𑀩𑁆𑀩𑀸. 𑀢𑀢𑁆𑀣 ‘‘𑀘𑀢𑀼𑀯𑀕𑁆𑀕𑁂𑀦 𑀞𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀧𑀯𑀸𑀭𑀡𑀅𑀩𑁆𑀪𑀸𑀦𑀸𑀤𑀺𑀲𑀩𑁆𑀩𑀁 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺’’𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑁂 ‘‘𑀉𑀧𑀲𑀫𑁆𑀧𑀤𑀧𑀯𑀸𑀭𑀡𑀓𑀣𑀺𑀦𑀩𑁆𑀪𑀸𑀦𑀸𑀤𑀻𑀦𑀻’’𑀢𑀺 𑀮𑀺𑀔𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀆𑀘𑀭𑀺𑀬𑀸 ‘‘𑀧𑀫𑀸𑀤𑀮𑁂𑀔𑀸’’𑀢𑁆𑀯𑁂𑀯 𑀯𑀡𑁆𑀡𑀬𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀫𑀸𑀤𑀮𑀺𑀔𑀺𑀢’’𑀦𑁆𑀢𑀺. 𑀬𑀁 𑀬𑀁 𑀯𑀘𑀦𑀁 𑀫𑀼𑀲𑀸, 𑀢𑀢𑁆𑀣 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀝𑀲𑁆𑀲 𑀯𑀘𑀦𑁂 𑀧𑀬𑁄𑀚𑀦𑀸𑀪𑀸𑀯𑀸 ‘‘𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀫𑁆𑀧𑀺 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀧𑀫𑀸𑀤𑀮𑀺𑀔𑀺𑀢𑀦𑁆𑀢𑀺 𑀏𑀢𑁆𑀣 𑀇𑀥 𑀅𑀥𑀺𑀧𑁆𑀧𑁂𑀢𑀫𑁂𑀯 𑀕𑀳𑁂𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑀺𑀢𑁂 𑀲𑀫𑁂𑀢𑀺 𑀯𑀺𑀬. 𑀆𑀘𑀭𑀺𑀬𑀸 𑀧𑀦 ‘‘𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀤𑀼𑀓𑁆𑀓𑀝𑁂 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑁂 ‘‘𑀲𑀘𑁆𑀘𑀸𑀮𑀺𑀓𑁂’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀫𑀸𑀤𑀮𑁂𑀔𑀸’’𑀢𑀺 𑀯𑀤𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. ‘‘𑀓𑀼𑀲𑀮𑀘𑀺𑀢𑁆𑀢𑁂𑀦 𑀕𑀫𑀦𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀤𑀸𑀦𑀜𑁆𑀘 𑀤𑀲𑁆𑀲𑀸𑀫𑀻’’𑀢𑀺 𑀯𑀘𑀦𑁂𑀦 𑀅𑀦𑀸𑀧𑀢𑁆𑀢𑀺 𑀯𑀺𑀬.

𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻𑀢𑀺 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝𑀫𑀸𑀧𑀚𑁆𑀚𑀢𑀺. 𑀩𑀳𑀼𑀓𑀸𑀧𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀽𑀢𑀺 𑀔𑀡𑀦𑀩𑁆𑀬𑀽𑀳𑀦𑀼𑀤𑁆𑀥𑀭𑀡𑁂𑀲𑀼 𑀤𑀲 𑀤𑀲 𑀓𑀢𑁆𑀯𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄, 𑀢𑁂𑀲𑀼 𑀉𑀤𑁆𑀥𑀭𑀡𑁂 𑀤𑀲 𑀧𑀸𑀘𑀺𑀢𑁆𑀢𑀺𑀬𑁄 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺, 𑀚𑀸𑀢𑀺𑀯𑀲𑁂𑀦 ‘‘𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀼𑀭𑀺𑀫𑁂𑀦 𑀲𑀫𑁂𑀢𑀺. ‘‘𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑀧𑀬𑁄𑀕𑁂 ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀫𑀸𑀦𑀧𑀬𑁄𑀕𑀸 𑀩𑀳𑀼𑀤𑀼𑀓𑁆𑀓𑀝𑀢𑁆𑀢𑀁 𑀜𑀸𑀧𑁂𑀢𑀺. 𑀔𑀡𑀦𑁂 𑀩𑀳𑀼𑀓𑀸𑀦𑀻𑀢𑀺 𑀲𑀫𑀸𑀦𑀧𑀬𑁄𑀕𑀢𑁆𑀢𑀸 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦𑀸𑀢𑀺 𑀬𑀣𑀸 𑀧𑀦𑁂𑀢𑁆𑀣, 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑀸𑀦𑀺 𑀅𑀝𑁆𑀞𑀓𑀣𑀸𑀬 𑀆𑀕𑀢𑀯𑀘𑀦𑀸𑀦𑀺 𑀲𑀗𑁆𑀕𑀻𑀢𑀺𑀢𑁄 𑀧𑀝𑁆𑀞𑀸𑀬 𑀆𑀕𑀢𑀢𑁆𑀢𑀸 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀇𑀥 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀕𑀳𑁂𑀢𑀩𑁆𑀩𑀸, 𑀦 𑀅𑀜𑁆𑀜𑁂𑀲𑀽’’𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀓𑀺𑀭𑀸𑀳. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀧𑀼𑀭𑀺𑀫𑀔𑀡𑀦𑀁 𑀧𑀘𑁆𑀙𑀺𑀫𑀁 𑀧𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀢𑁂𑀦𑁂𑀯 𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀯𑀺𑀲𑀪𑀸𑀕𑀓𑀺𑀭𑀺𑀬𑀁 𑀯𑀸 𑀧𑀢𑁆𑀯𑀸 𑀧𑀼𑀭𑀺𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀘 𑀯𑀼𑀢𑁆𑀢𑀁.

𑀏𑀯𑀁 𑀏𑀓𑀝𑁆𑀞𑀸𑀦𑁂 𑀞𑀺𑀢𑀸𑀬 𑀓𑀼𑀫𑁆𑀪𑀺𑀬𑀸 𑀞𑀸𑀦𑀸𑀘𑀸𑀯𑀦𑀜𑁆𑀘𑁂𑀢𑁆𑀣 𑀙𑀳𑀸𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀫𑁆𑀪𑀺𑀬𑀸𑀢𑀺 𑀪𑀼𑀫𑁆𑀫𑀯𑀘𑀦𑀁. 𑀉𑀤𑁆𑀥𑀁 𑀉𑀓𑁆𑀔𑀺𑀧𑀦𑁆𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀪𑀽𑀫𑀺𑀢𑁄 𑀫𑁄𑀘𑁂𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀢𑁆𑀣 𑀫𑀼𑀔𑀯𑀝𑁆𑀝𑀺𑀬𑀸 𑀨𑀼𑀝𑁆𑀞𑁄𑀓𑀸𑀲𑀁 𑀩𑀼𑀦𑁆𑀤𑁂𑀦 𑀫𑁄𑀘𑀺𑀢𑁂 ‘‘𑀞𑀸𑀦𑀸𑀘𑀸𑀯𑀦𑀜𑁆𑀘𑁂𑀢𑁆𑀣 𑀙𑀳𑀸𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁂𑀢𑀺, 𑀢𑀣𑀸 𑀅𑀯𑀢𑁆𑀯𑀸 ‘‘𑀪𑀽𑀫𑀺𑀢𑁄 𑀫𑀼𑀢𑁆𑀢𑁂 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀦𑁆𑀢𑁂 𑀪𑀽𑀫𑀺𑀢𑁄 𑀫𑁄𑀘𑀺𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀣 𑀏𑀓𑀘𑁆𑀘𑁂 𑀏𑀯𑀁 𑀅𑀢𑁆𑀣𑀁 𑀯𑀤𑀦𑁆𑀢𑀺 ‘‘𑀧𑀼𑀩𑁆𑀩𑁂 𑀔𑀡𑀦𑁆𑀢𑁂𑀦 𑀅𑀯𑀲𑁂𑀲𑀝𑁆𑀞𑀸𑀦𑀸𑀦𑀺 𑀯𑀺𑀬𑁄𑀚𑀺𑀢𑀸𑀦𑀺, 𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀲𑀗𑁆𑀔𑁂𑀧𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀯𑀘𑀦𑀲𑁆𑀲 𑀧𑀫𑀸𑀤𑀮𑁂𑀔𑀪𑀸𑀯𑁄 ‘‘𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀯𑀸 𑀓𑀭𑁄𑀢𑀺, 𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻’’𑀢𑀺 𑀯𑀘𑀦𑁂𑀦 𑀤𑀻𑀧𑀺𑀢𑁄.

𑀬𑀁 𑀧𑀦 ‘‘𑀧𑀻𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀣𑁂𑀢𑀭𑀳𑀺 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸 𑀉𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 𑀧𑀤𑀲𑁆𑀲 ‘‘𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸𑀳𑀺 𑀅𑀦𑀸𑀕𑀢𑀧𑀝𑀺𑀓𑁆𑀔𑁂𑀧𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 ‘‘𑀅𑀲𑀫𑁆𑀪𑀺𑀦𑁆𑀦𑀯𑀢𑁆𑀣𑀼𑀓𑀸 𑀅𑀲𑀫𑁆𑀪𑀺𑀦𑁆𑀦𑀸𑀭𑀫𑁆𑀫𑀡𑀸 𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀓𑀸 𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑀸’’𑀢𑀺 𑀯𑀘𑀦𑀫𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑀻𑀢𑀸𑀦𑀸𑀕𑀢𑀧𑀝𑀺𑀓𑁆𑀔𑁂𑀧𑁄𑀢𑀺 𑀧𑀭𑀺𑀯𑀢𑁆𑀢𑁂𑀢𑀺, 𑀢𑀣𑀸 𑀢𑀸𑀤𑀺𑀲𑁂𑀳𑀺 𑀧𑀭𑀺𑀯𑀢𑁆𑀢’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀁 𑀯𑀤𑀦𑁆𑀢𑀺. 𑀬𑀁 𑀧𑀦 𑀆𑀘𑀭𑀺𑀬𑀸 ‘‘𑀇𑀤𑀁 𑀧𑀫𑀸𑀤𑀮𑀺𑀔𑀺𑀢’’𑀦𑁆𑀢𑀺 𑀅𑀧𑀦𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀘𑀦𑀓𑀸𑀮𑁂 𑀯𑀸𑀘𑁂𑀦𑁆𑀢𑀺, 𑀉𑀤𑁆𑀤𑀺𑀲𑀦𑁆𑀢𑀺, 𑀢𑀫𑁂𑀯 𑀘 𑀇𑀫𑀺𑀦𑀸𑀧𑀺 𑀆𑀘𑀭𑀺𑀬𑁂𑀦 ‘‘𑀧𑀫𑀸𑀤𑀮𑀺𑀔𑀺𑀢’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀬𑀜𑁆𑀘 𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀢𑀫𑁂𑀯 𑀘 𑀤𑀲𑁆𑀲𑁂𑀦𑁆𑀢𑁂𑀦 𑀇𑀫𑀺𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀁 𑀧𑀦 𑀢𑀢𑁆𑀣𑁂𑀯𑀸’’𑀢𑀺𑀆𑀤𑀺.

𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀦𑁂𑀯 𑀅𑀯𑀳𑀸𑀭𑁄 𑀦 𑀕𑀻𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀢𑁄𑀯 𑀪𑁂𑀤𑁄, 𑀦 𑀅𑀢𑁆𑀣𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁 𑀓𑀢𑀭𑁂𑀳𑀻𑀢𑀺 𑀘𑁂? 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺, 𑀮𑁂𑀔𑀓𑁂𑀳𑀺 𑀯𑀸, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. ‘‘𑀦 𑀳𑀺 𑀢𑀤𑁂𑀯 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑀢𑁄 𑀧𑀸𑀭𑀸𑀚𑀺𑀓𑀫𑀳𑀼𑀢𑁆𑀯𑀸 𑀓𑀢𑁆𑀣𑀘𑀺 𑀳𑁄𑀢𑀻’’𑀢𑀺 𑀲𑀩𑁆𑀩𑀁 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀤𑀼𑀝𑁆𑀞𑀧𑀺𑀢𑀁 𑀯𑀸 𑀞𑀧𑁂𑀢𑀻𑀢𑀺 𑀏𑀢𑁆𑀣 𑀢𑀢𑁄 𑀧𑀕𑁆𑀖𑀭𑀺𑀲𑁆𑀲𑀢𑀻𑀢𑀺 𑀞𑀸𑀦𑀸𑀘𑀸𑀯𑀦𑀁 𑀲𑀦𑁆𑀥𑀸𑀬 𑀓𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀢𑀁 𑀧𑀦 𑀕𑀡𑁆𑀳𑀢𑀼 𑀯𑀸 𑀫𑀸 𑀯𑀸 𑀢𑀢𑁆𑀣𑁂𑀯 ‘‘𑀪𑀺𑀦𑁆𑀤𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀢𑁆𑀣𑁂𑀯𑀸𑀢𑀺 𑀞𑀸𑀦𑀸𑀘𑀸𑀯𑀦𑀁 𑀅𑀓𑀭𑁄𑀦𑁆𑀢𑁄𑀯 𑀞𑀸𑀦𑀸 𑀅𑀘𑀸𑀯𑁂𑀢𑀼𑀓𑀸𑀫𑁄𑀯 𑀓𑁂𑀯𑀮𑀁 ‘𑀪𑀺𑀦𑁆𑀤𑀢𑀻’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀘 𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀣𑀸 ‘‘𑀧𑀕𑁆𑀖𑀭𑀺𑀢𑁂𑀳𑀺 𑀢𑀺𑀦𑁆𑀢𑀧𑀁𑀲𑀼𑀁 𑀕𑀳𑁂𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀕𑀳𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀕𑀳𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀅𑀧𑀭𑁂. ‘‘𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀓𑀭𑁄𑀢𑀺, 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀆𑀡𑀢𑁆𑀢𑀺𑀬𑀸 𑀯𑀺𑀭𑀼𑀚𑁆𑀛𑀢𑀺, ‘‘𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀅𑀢𑁆𑀣𑀲𑀸𑀥𑀓𑁄 𑀆𑀡𑀢𑁆𑀢𑀺𑀓𑀸𑀮𑁂 𑀏𑀯 𑀧𑀸𑀭𑀸𑀚𑀺𑀓𑀁. 𑀅𑀧𑀺𑀘 𑀆𑀯𑀸𑀝𑀓𑀸𑀤𑀻𑀦𑀺 𑀣𑀸𑀯𑀭𑀧𑀬𑁄𑀕𑀸𑀦𑀺 𑀘 𑀏𑀢𑁆𑀣 𑀲𑀸𑀥𑀓𑀸𑀦𑀺. 𑀦𑀢𑁆𑀣𑀺 𑀓𑀸𑀮𑀓𑀢𑀧𑀬𑁄𑀕𑀸𑀦𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀦𑀻𑀢𑀺 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀏𑀓𑁂. 𑀬𑀢𑁆𑀣 𑀬𑀢𑁆𑀣 ‘‘𑀅𑀧𑀭𑁂’’𑀢𑀺 𑀯𑀸 ‘‘𑀏𑀓𑁂’’𑀢𑀺 𑀯𑀸 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀙𑀟𑁆𑀟𑁂𑀢𑀩𑁆𑀩𑀁. 𑀯𑀤𑀦𑁆𑀢𑀻𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀦, 𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀢𑁆𑀣𑀢𑁄𑀢𑀺 𑀧𑀸𑀴𑀺𑀧𑀭𑀺𑀳𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀯𑀫𑁂𑀓𑁂 𑀯𑀤𑀦𑁆𑀢𑀻𑀢𑀺 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀓𑀲𑁆𑀫𑀸? ‘‘𑀧𑀲𑁆𑀲𑀸𑀯𑀁 𑀯𑀸 𑀙𑀟𑁆𑀟𑁂𑀢𑀻’’𑀢𑀺 𑀘 ‘‘𑀅𑀧𑀭𑀺𑀪𑁄𑀕𑀁 𑀯𑀸 𑀓𑀭𑁄𑀢𑀻’’𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬 ‘‘𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀢𑁆𑀯𑀸 𑀪𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀧𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄𑀢𑀺𑀆𑀤𑀺𑀓𑀣𑀸𑀬 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀯𑀘𑀦’’𑀦𑁆𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀆𑀳. 𑀲𑀗𑁆𑀕𑀳𑀸𑀘𑀭𑀺𑀬𑀸𑀦𑀁 𑀯𑀸𑀤𑁄𑀢𑀺 𑀏𑀓𑁂. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀧𑀺 𑀢𑁂 𑀏𑀯, 𑀢𑀲𑁆𑀫𑀸 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀅𑀙𑀟𑁆𑀟𑁂𑀢𑀼𑀓𑀸𑀫𑀫𑁆𑀧𑀺 𑀢𑀣𑀸 𑀓𑀭𑁄𑀦𑁆𑀢𑀁 ‘‘𑀙𑀟𑁆𑀟𑁂𑀢𑀻’’𑀢𑀺 𑀯𑁄𑀳𑀭𑀦𑁆𑀢𑀺. 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀏𑀯𑀁 𑀲𑀦𑁆𑀢𑁂 ‘‘𑀞𑀸𑀦𑀸𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀅𑀢𑀺𑀯𑀺𑀬 𑀲𑀫𑁂𑀢𑀺, 𑀢𑀢𑁆𑀣 𑀞𑀸𑀦𑀸𑀘𑀸𑀯𑀦𑀘𑀺𑀢𑁆𑀢𑀲𑁆𑀲 𑀦𑀢𑁆𑀣𑀺𑀢𑀸𑀬 𑀞𑀸𑀦𑀸 𑀘𑀼𑀢𑀫𑁆𑀧𑀺 𑀦 ‘‘𑀞𑀸𑀦𑀸 𑀘𑀼𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀢𑀭𑀣𑀸𑀧𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀸𑀪𑀸𑀯𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑀲𑁆𑀲𑀧𑀺 𑀤𑀼𑀓𑁆𑀓𑀝𑀁 𑀬𑀼𑀚𑁆𑀚𑀢𑀺.

𑁯𑁬. 𑀲𑀬𑀫𑁂𑀯 𑀧𑀢𑀺𑀢𑀫𑁄𑀭𑀲𑁆𑀲𑁂𑀯 𑀇𑀢𑁄 𑀘𑀺𑀢𑁄 𑀘 𑀓𑀭𑁄𑀢𑁄 𑀣𑀼𑀮𑁆𑀮𑀘𑁆𑀘𑀬𑀁. 𑀆𑀓𑀸𑀲𑀝𑁆𑀞𑀯𑀺𑀦𑀺𑀘𑁆𑀙𑀬𑁂 𑀢𑀧𑁆𑀧𑀲𑀗𑁆𑀕𑁂𑀦 𑀢𑀲𑁆𑀫𑀺𑀁 𑀯𑁂𑀳𑀸𑀲𑀸𑀤𑀺𑀕𑀢𑁂𑀧𑀺 𑀅𑀲𑀫𑁆𑀫𑁄𑀳𑀢𑁆𑀣𑀁 𑀏𑀯𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀏𑀯𑀫𑀜𑁆𑀜𑀢𑁆𑀭𑀸𑀧𑀺 𑀲𑀸𑀫𑀺𑀲𑁂’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀞𑀸𑀦𑀸𑀘𑀸𑀯𑀦𑀁 𑀅𑀓𑀭𑁄𑀦𑁆𑀢𑁄 𑀘𑀸𑀮𑁂𑀢𑀻’’𑀢𑀺 𑀯𑀘𑀦𑀢𑁄 𑀞𑀸𑀦𑀸𑀘𑀸𑀯𑀦𑁂 𑀣𑀼𑀮𑁆𑀮𑀘𑁆𑀘𑀬𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀘𑀺 𑀅𑀨𑀦𑁆𑀤𑀸𑀧𑁂𑀢𑁆𑀯𑀸 𑀞𑀸𑀦𑀸𑀘𑀸𑀯𑀦𑀸𑀘𑀸𑀯𑀦𑁂𑀳𑀺𑀧𑀺 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑁂 𑀯𑀤𑀦𑁆𑀢𑀺. ‘‘𑀢𑁂 𑀞𑀸𑀦𑀸𑀘𑀸𑀯𑀦𑀁 𑀅𑀓𑀭𑁄𑀦𑁆𑀢𑁄𑀢𑀺 𑀇𑀫𑀁 𑀅𑀝𑁆𑀞𑀓𑀣𑀸𑀯𑀘𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀲𑁂𑀥𑁂𑀢𑀩𑁆𑀩𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑁯𑁭. 𑀙𑁂𑀤𑀦𑀫𑁄𑀘𑀦𑀸𑀤𑀺 𑀉𑀧𑀭𑀺𑀪𑀸𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀁 𑀞𑀸𑀦𑀢𑁄 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺. 𑀏𑀢𑁆𑀣 ‘‘𑀏𑀓𑀓𑁄𑀝𑀺𑀁 𑀦𑀻𑀳𑀭𑀺𑀢𑁆𑀯𑀸 𑀞𑀧𑀺𑀢𑁂 𑀯𑀁𑀲𑁂 𑀞𑀺𑀢𑀲𑁆𑀲 𑀆𑀓𑀸𑀲𑀓𑀭𑀡𑀁 𑀲𑀦𑁆𑀥𑀸𑀬𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀢𑁂 𑀧𑀦 𑀅𑀣 ‘‘𑀫𑀽𑀮𑀁 𑀅𑀘𑁆𑀙𑁂𑀢𑁆𑀯𑀸 𑀯𑀮𑀬𑀁 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀺, 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀫𑀽𑀮𑀢𑁄 𑀅𑀦𑀻𑀳𑀭𑀺𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀲𑁂𑀥𑁂𑀢𑀩𑁆𑀩𑀸. 𑀪𑀺𑀢𑁆𑀢𑀺𑀦𑀺𑀲𑁆𑀲𑀺𑀢𑀦𑁆𑀢𑀺 𑀪𑀺𑀢𑁆𑀢𑀺𑀬𑀸 𑀉𑀧𑀢𑁆𑀣𑀫𑁆𑀪𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀦𑁆𑀢𑀺 𑀦𑀸𑀕𑀤𑀦𑁆𑀢𑀸𑀤𑀻𑀲𑀼 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀙𑀺𑀦𑁆𑀦𑀫𑀢𑁆𑀢𑁂𑀢𑀺 𑀉𑀧𑀭𑀺 𑀉𑀕𑁆𑀕𑀦𑁆𑀢𑁆𑀯𑀸 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁯𑁮. 𑀉𑀧𑀭𑀺 𑀞𑀺𑀢𑀲𑁆𑀲 𑀧𑀺𑀝𑁆𑀞𑀺𑀬𑀸𑀢𑀺 𑀏𑀢𑁆𑀣 𑀅𑀥𑁄 𑀑𑀲𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀑𑀲𑀸𑀭𑁂𑀦𑁆𑀢𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀺𑀝𑁆𑀞𑀺𑀬𑀸 𑀳𑁂𑀝𑁆𑀞𑀺𑀫𑁂𑀦 𑀞𑀺𑀢𑁄𑀓𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁, 𑀉𑀤𑁆𑀥𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀉𑀤𑀓𑀢𑁄 𑀫𑀼𑀢𑁆𑀢𑀫𑀢𑁆𑀢𑁂. ‘‘𑀏𑀯𑀁 𑀕𑀳𑀺𑀢𑁂 𑀪𑀽𑀫𑀝𑁆𑀞𑁂 𑀯𑀼𑀢𑁆𑀢𑁂𑀦 𑀲𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀢𑀫𑀘𑁆𑀙𑀸𑀦𑀁 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁 𑀓𑀺𑀭. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀫𑀸𑀭𑁂𑀢𑁆𑀯𑀸 𑀕𑀡𑁆𑀳𑀢𑁄 𑀊𑀦𑀧𑀸𑀤𑀕𑁆𑀖𑀦𑀓𑁂 𑀤𑀼𑀓𑁆𑀓𑀝𑀁, 𑀲𑀳𑀧𑀬𑁄𑀕𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀁 𑀦𑀢𑁆𑀣𑀻𑀢𑀺 𑀏𑀓𑁂. 𑀫𑀤𑀦𑀨𑀮𑀯𑀲𑀸𑀤𑀻𑀦𑀻𑀢𑀺 𑀏𑀢𑁆𑀣 𑀲𑀻𑀳𑀴𑀪𑀸𑀲𑀸 𑀓𑀺𑀭 𑀯𑀲 𑀇𑀢𑀺 𑀯𑀺𑀲𑀦𑁆𑀢𑀺 𑀅𑀢𑁆𑀣𑁄, 𑀕𑀭𑀼𑀴𑀸𑀓𑀸𑀭𑁂𑀦 𑀓𑀢𑀼𑀧𑁆𑀧𑁂𑀬𑀺𑀢𑀁 𑀯𑀸.

𑁯𑁯. 𑀧𑀼𑀩𑁆𑀩𑁂 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑀉𑀧𑀫𑀸𑀬 𑀯𑀼𑀢𑁆𑀢𑀸 𑀏𑀯. ‘‘𑀣𑀮𑁂 𑀞𑀧𑀺𑀢𑀸𑀬 𑀦𑀸𑀯𑀸𑀬 𑀦 𑀨𑀼𑀝𑁆𑀞𑁄𑀓𑀸𑀲𑀫𑀢𑁆𑀢𑀫𑁂𑀯𑀸’’𑀢𑀺 𑀧𑀸𑀞𑁄. ‘‘𑀯𑀸𑀢𑁄 𑀆𑀕𑀫𑁆𑀫𑀸𑀢𑀺 𑀯𑀘𑀦𑀢𑁄 𑀯𑀸𑀢𑀲𑁆𑀲 𑀦𑀢𑁆𑀣𑀺𑀓𑀸𑀮𑁂 𑀧𑀬𑁄𑀕𑀲𑁆𑀲 𑀓𑀢𑀢𑁆𑀢𑀸 𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀅𑀢𑁆𑀣𑀺𑀓𑀸𑀮𑁂 𑀘𑁂 𑀓𑀢𑁄, 𑀅𑀯𑀳𑀸𑀭𑁄𑀯𑀸’’𑀢𑀺 𑀯𑀤𑀦𑁆𑀢𑀺. ‘‘𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀓𑁂𑀲𑀦𑁆𑀢𑀺 𑀘𑁂? 𑀬𑁂𑀲𑀁 𑀳𑀢𑁆𑀣𑁂 𑀓𑀳𑀸𑀧𑀡𑀸𑀦𑀺 𑀕𑀳𑀺𑀢𑀸𑀦𑀺, 𑀢𑁂𑀲𑀁 𑀯𑀸, 𑀦𑀸𑀯𑀸𑀲𑀸𑀫𑀺𑀦𑀸 𑀦𑀸𑀯𑀸𑀬 𑀅𑀕𑁆𑀕𑀳𑀺𑀢𑀸𑀬 𑀦𑀸𑀯𑀸𑀲𑀸𑀫𑀺𑀓𑀲𑁆𑀲 𑀯𑀸’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑁧𑁦𑁪. 𑀦𑀺𑀭𑀫𑁆𑀩𑀺𑀢𑁆𑀯𑀸 𑀉𑀧𑀭𑀺. 𑀅𑀓𑀢𑀁 𑀯𑀸 𑀧𑀦 𑀧𑀢𑀺𑀝𑁆𑀞𑀧𑁂𑀢𑀻𑀢𑀺 𑀅𑀧𑀼𑀩𑁆𑀩𑀁 𑀯𑀸 𑀧𑀝𑁆𑀞𑀧𑁂𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁬. 𑀕𑀸𑀫𑀝𑁆𑀞𑁂 𑀯𑀸 ‘‘𑀕𑀸𑀫𑁄 𑀦𑀸𑀫𑀸’’𑀢𑀺 𑀦 𑀯𑀼𑀢𑁆𑀢𑀁 𑀧𑀞𑀫𑀁 𑀕𑀸𑀫𑀮𑀓𑁆𑀔𑀡𑀲𑁆𑀲 𑀲𑀩𑁆𑀩𑀲𑁄 𑀯𑀼𑀢𑁆𑀢𑀢𑁆𑀢𑀸.

𑁧𑁦𑁭. 𑀅𑀭𑀜𑁆𑀜𑀝𑁆𑀞𑁂 𑀅𑀭𑀜𑁆𑀜𑀁 𑀦𑀸𑀫𑀸𑀢𑀺 𑀧𑀼𑀦 𑀦 𑀓𑁂𑀯𑀮𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑀜𑁆𑀜𑁂𑀯 𑀅𑀭𑀜𑁆𑀜𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀓𑀺𑀦𑁆𑀢𑀼 𑀧𑀭𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀘𑁂𑀢𑀁 𑀳𑁄𑀢𑀺, 𑀢𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀅𑀢𑁆𑀣𑁂𑀧𑀺 𑀅𑀭𑀜𑁆𑀜𑀕𑁆𑀕𑀳𑀡𑀁 𑀓𑀢𑀁. 𑀅𑀕𑁆𑀕𑁂𑀧𑀺 𑀫𑀽𑀮𑁂𑀧𑀺 𑀙𑀺𑀦𑁆𑀦𑀸𑀢𑀺 𑀏𑀢𑁆𑀣 ‘‘𑀦 𑀯𑁂𑀞𑁂𑀢𑁆𑀯𑀸 𑀞𑀺𑀢𑀸, 𑀙𑀺𑀦𑁆𑀦𑀫𑀢𑁆𑀢𑁂 𑀧𑀢𑀦𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑁄𑀢𑀺 𑀅𑀭𑀜𑁆𑀜𑀲𑀸𑀫𑀺𑀓𑁂𑀳𑀺 𑀧𑀭𑁂𑀳𑀺 𑀮𑀤𑁆𑀥𑁂𑀳𑀺 𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑁄. 𑀅𑀤𑁆𑀥𑀕𑀢𑁄𑀧𑀻𑀢𑀺 𑀘𑀺𑀭𑀓𑀸𑀮𑀺𑀓𑁄𑀧𑀺. ‘‘𑀦 𑀕𑀳𑁂𑀢𑀩𑁆𑀩𑁄𑀢𑀺 𑀅𑀭𑀜𑁆𑀜𑀲𑀸𑀫𑀺𑀓𑁂𑀳𑀺 𑀅𑀦𑀼𑀜𑁆𑀜𑀸𑀢𑁂𑀦𑀧𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀙𑀮𑁆𑀮𑀺𑀬𑀸 𑀧𑀭𑀺𑀬𑁄𑀦𑀤𑁆𑀥𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀸𑀫𑀺𑀓𑀸𑀦𑀁 𑀦𑀺𑀭𑀧𑁂𑀓𑁆𑀔𑀢𑀁 𑀤𑀻𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀬𑀤𑀺 𑀲𑀸𑀫𑀺𑀓𑀸𑀦𑀁 𑀲𑀸𑀧𑁂𑀓𑁆𑀔𑀢𑀸 𑀅𑀢𑁆𑀣𑀺, 𑀦 𑀯𑀝𑁆𑀝𑀢𑀺.

𑁧𑁦𑁮. 𑀢𑀢𑁆𑀣 ‘‘𑀪𑀸𑀚𑀦𑁂𑀲𑀼 𑀧𑁄𑀓𑁆𑀔𑀭𑀡𑀻𑀢𑀴𑀸𑀓𑁂𑀲𑀼 𑀘 𑀕𑀸𑀯𑁄 𑀧𑀓𑁆𑀓𑁄𑀲𑀢𑀻𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀢𑀬𑁄 𑀤𑀲 𑀯𑀸𑀭𑀸 𑀆𑀤𑀺𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑀸’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀳𑀦𑀉𑀤𑀓𑀁 𑀦𑀸𑀫 𑀢𑀴𑀸𑀓𑀭𑀓𑁆𑀔𑀡𑀢𑁆𑀣𑀸𑀬 𑀅𑀥𑀺𑀓𑁄𑀤𑀓𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑀉𑀤𑀓𑀁. ‘‘𑀕𑀳𑁂𑀢𑀼𑀁 𑀦 𑀮𑀪𑀢𑀻𑀢𑀺 𑀲𑀸𑀫𑀻𑀘𑀺𑀓𑀫𑁆𑀫𑀁 𑀦 𑀳𑁄𑀢𑀻’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀇𑀢𑁄 𑀧𑀝𑁆𑀞𑀸𑀬 ‘‘𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀦𑀼𑀕𑀡𑁆𑀞𑀺𑀧𑀤𑁂𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀦𑀺𑀓𑁆𑀔𑀦𑁆𑀢𑁂 𑀉𑀤𑀓𑁂𑀢𑀺 𑀧𑀸𑀞𑀲𑁂𑀲𑁄, 𑀲𑀼𑀓𑁆𑀔𑀫𑀸𑀢𑀺𑀓𑀸𑀧𑀬𑁄𑀕𑀢𑁆𑀢𑀸 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀴𑀸𑀓𑀁 𑀦𑀺𑀲𑁆𑀲𑀸𑀬 𑀔𑁂𑀢𑁆𑀢𑀲𑁆𑀲 𑀓𑀢𑀢𑁆𑀢𑀸𑀢𑀺 ‘‘𑀲𑀩𑁆𑀩𑀲𑀸𑀥𑀸𑀭𑀡𑀁 𑀢𑀴𑀸𑀓𑀁 𑀳𑁄𑀢𑀻’’𑀢𑀺 𑀧𑀞𑀫𑀁 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀬𑀲𑁆𑀫𑀸 𑀢𑀴𑀸𑀓𑀕𑀢𑀁 𑀉𑀤𑀓𑀁 𑀲𑀩𑁆𑀩𑀲𑀸𑀥𑀸𑀭𑀡𑀫𑁆𑀧𑀺 𑀫𑀸𑀢𑀺𑀓𑀸𑀬 𑀲𑀢𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 𑀓𑀼𑀭𑀼𑀦𑁆𑀤𑀺𑀬𑀸𑀤𑀻𑀲𑀼 𑀅𑀯𑀳𑀸𑀭𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀅𑀧𑀭𑁂 𑀆𑀳𑀽𑀢𑀺. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀦 𑀲𑀫𑁂𑀢𑀻𑀢𑀺 𑀬𑀲𑁆𑀫𑀸 𑀲𑀩𑁆𑀩𑀲𑀸𑀥𑀸𑀭𑀡𑀤𑁂𑀲𑁄 𑀦𑀸𑀫 𑀢𑀜𑁆𑀘 𑀢𑀴𑀸𑀓𑀁 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀓𑀢𑀺𑀓𑀸𑀪𑀸𑀯𑀸 𑀘 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯 𑀬𑀼𑀢𑁆𑀢𑀦𑁆𑀢𑀺 𑀆𑀳𑀸𑀘𑀭𑀺𑀬𑁄.

𑁧𑁦𑁯. ‘‘𑀢𑀢𑁄 𑀧𑀝𑁆𑀞𑀸𑀬 𑀅𑀯𑀳𑀸𑀭𑁄 𑀦𑀢𑁆𑀣𑀻𑀢𑀺 𑀣𑁂𑀬𑁆𑀬𑀸𑀬𑀧𑀺 𑀕𑀡𑁆𑀳𑀢𑁄, 𑀢𑀲𑁆𑀫𑀸 𑀬𑀣𑀸𑀫𑀼𑀡𑁆𑀟𑀫𑀳𑀸𑀚𑁂𑀢𑀩𑁆𑀩𑀢𑁆𑀢𑀸, 𑀅𑀭𑀓𑁆𑀔𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀘 𑀅𑀜𑁆𑀜𑀫𑁆𑀧𑀺 𑀲𑀗𑁆𑀖𑀲𑀦𑁆𑀢𑀓𑀁 𑀇𑀤𑀁 𑀦 𑀳𑁄𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑁧𑁧𑁦. 𑀉𑀚𑀼𑀓𑀫𑁂𑀯 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣 ‘‘𑀲𑀫𑀻𑀧𑁂 𑀭𑀼𑀓𑁆𑀔𑀲𑀸𑀔𑀸𑀤𑀻𑀳𑀺 𑀲𑀦𑁆𑀥𑀸𑀭𑀺𑀢𑀢𑁆𑀢𑀸 𑀈𑀲𑀓𑀁 𑀔𑀮𑀺𑀢𑁆𑀯𑀸 𑀉𑀚𑀼𑀓𑀫𑁂𑀯 𑀢𑀺𑀝𑁆𑀞𑀢𑀺 𑀘𑁂, 𑀅𑀯𑀳𑀸𑀭𑁄. 𑀙𑀺𑀦𑁆𑀦𑀯𑁂𑀡𑀼 𑀯𑀺𑀬 𑀢𑀺𑀝𑁆𑀞𑀢𑀺 𑀘𑁂, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀁, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁂 ‘‘𑀲𑀘𑁂 𑀢𑀸𑀦𑀺 𑀭𑀓𑁆𑀔𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀦𑁄 𑀅𑀜𑁆𑀜𑀣𑀸𑀢𑀺 𑀲𑀫𑁆𑀧𑀢𑁆𑀢𑁂 𑀘𑁂 𑀯𑀸𑀢𑁂 𑀯𑀸𑀢𑀫𑀼𑀔𑀲𑁄𑀥𑀦𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀢𑁆𑀣𑁄.

𑁧𑁧𑁧. 𑀅𑀜𑁆𑀜𑁂𑀲𑀼 𑀧𑀦 𑀯𑀺𑀘𑀸𑀭𑀡𑀸 𑀏𑀯 𑀦𑀢𑁆𑀣𑀻𑀢𑀺 𑀢𑁂𑀲𑀼 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑀢𑁆𑀢𑀸 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀏𑀢𑁂𑀦 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸𑀧𑀺 𑀘𑁄𑀭𑁂𑀳𑀺 𑀆𑀳𑀝𑀁 𑀘𑁄𑀤𑁂𑀢𑁆𑀯𑀸 𑀕𑀡𑁆𑀳𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁧𑁧𑁨. 𑀏𑀲𑁂𑀯 𑀦𑀬𑁄𑀢𑀺 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁, 𑀓𑀲𑁆𑀫𑀸? 𑀅𑀜𑁆𑀜𑁂𑀳𑀺 𑀧𑀢𑁆𑀢𑁂𑀳𑀺 𑀲𑀸𑀥𑀸𑀭𑀡𑀲𑁆𑀲 𑀲𑀜𑁆𑀜𑀸𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀧𑀤𑀯𑀸𑀭𑁂𑀦𑀸𑀢𑀺 𑀘𑁄𑀭𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑁄. 𑀕𑀸𑀫𑀤𑁆𑀯𑀸𑀭𑀦𑁆𑀢𑀺 𑀯𑁄𑀳𑀸𑀭𑀫𑀢𑁆𑀢𑀫𑁂𑀯, 𑀕𑀸𑀫𑀦𑁆𑀢𑀺 𑀅𑀢𑁆𑀣𑁄 𑀆𑀡𑀢𑁆𑀢𑀺𑀬𑀸 𑀤𑀝𑁆𑀞𑀩𑁆𑀩𑀢𑁆𑀢𑀸, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀤𑁆𑀥𑀸𑀭𑁂 𑀏𑀯 𑀧𑀸𑀭𑀸𑀚𑀺𑀓𑀁. 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀦𑁆𑀢𑁆𑀯𑀸𑀢𑀺 𑀯𑀘𑀦𑁂𑀦 𑀬𑀸𑀯 𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀢𑁄 𑀉𑀧𑀘𑀸𑀭𑁄, 𑀲𑀩𑁆𑀩𑀫𑁂𑀢𑀁 𑀆𑀡𑀢𑁆𑀢𑀫𑁂𑀯 𑀳𑁄𑀢𑀺. ‘‘𑀞𑀢𑁆𑀯𑀸 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀧𑀼𑀭𑀺𑀫𑀣𑁂𑀬𑁆𑀬𑀘𑀺𑀢𑁆𑀢𑀁 𑀯𑀽𑀧𑀲𑀫𑀺𑀢𑁆𑀯𑀸 𑀕𑀫𑀦𑀢𑁆𑀣𑀜𑁆𑀘𑁂 𑀪𑀡𑁆𑀟𑀁 𑀦 𑀦𑀺𑀓𑁆𑀔𑀺𑀢𑁆𑀢𑀁, 𑀬𑀣𑀸𑀕𑀳𑀺𑀢𑀫𑁂𑀯, 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺, 𑀦𑀺𑀓𑁆𑀔𑀺𑀢𑁆𑀢𑀜𑁆𑀘𑁂, 𑀉𑀤𑁆𑀥𑀸𑀭𑁂𑀦𑀸’’𑀢𑀺 𑀘 𑀮𑀺𑀔𑀺𑀢𑀁. 𑀓𑁂𑀯𑀮𑀁 ‘‘𑀮𑀺𑀔𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀕𑀡𑁆𑀞𑀺𑀧𑀤𑁂 𑀕𑀳𑁂𑀢𑀩𑁆𑀩𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀢𑀺 𑀞𑀸𑀦𑀸𑀘𑀸𑀯𑀦𑀁 𑀅𑀓𑀢𑁆𑀯𑀸 𑀦𑀺𑀯𑀢𑁆𑀣𑀧𑀸𑀭𑀼𑀢𑀦𑀻𑀳𑀸𑀭𑁂𑀦 ‘‘𑀧𑀼𑀩𑁆𑀩𑁂𑀯𑁂𑀤𑀁 𑀫𑀬𑀸 𑀕𑀳𑀺𑀢’’𑀦𑁆𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑁄. ‘‘𑀦𑀝𑁆𑀞𑁂 𑀪𑀡𑁆𑀟𑀤𑁂𑀬𑁆𑀬𑀁 𑀓𑀺𑀭𑀸’’𑀢𑀺 𑀮𑀺𑀔𑀺𑀢𑀁. ‘‘𑀅𑀜𑁆𑀜𑁄 𑀯𑀸’’𑀢𑀺 𑀯𑀘𑀦𑁂𑀦 𑀬𑁂𑀦 𑀞𑀧𑀺𑀢𑀁, 𑀢𑁂𑀦 𑀤𑀺𑀦𑁆𑀦𑁂 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺 𑀕𑁄𑀧𑀓𑀲𑁆𑀲 𑀤𑀸𑀦𑁂 𑀯𑀺𑀬, ‘‘𑀓𑁂𑀯𑀮𑀁 𑀇𑀥 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. ‘‘𑀅𑀜𑁆𑀜𑁄 𑀯𑀸’’𑀢𑀺 𑀯𑀘𑀦𑀢𑁄 𑀬𑁂𑀦 𑀞𑀧𑀺𑀢𑀁. 𑀲𑁄 𑀯𑀸𑀢𑀺𑀧𑀺 𑀮𑀩𑁆𑀪𑀢𑀻𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀯𑀸-𑀲𑀤𑁆𑀤𑁂𑀦 𑀬𑀲𑁆𑀲 𑀳𑀢𑁆𑀣𑁂 𑀞𑀧𑀺𑀢𑀁, 𑀲𑁄 𑀯𑀸 𑀤𑁂𑀢𑀺 𑀭𑀸𑀚𑀕𑀳𑁂 𑀕𑀡𑀓𑁄 𑀯𑀺𑀬 𑀥𑀦𑀺𑀬𑀲𑁆𑀲, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀬𑀼𑀢𑁆𑀢𑀁 𑀯𑀺𑀬.

𑀢𑀯 𑀣𑀽𑀮𑀲𑀸𑀝𑀓𑁄 𑀮𑀤𑁆𑀥𑁄𑀢𑀺 𑀯𑀼𑀢𑁆𑀢𑀓𑁆𑀔𑀡𑁂 𑀫𑀼𑀲𑀸𑀯𑀸𑀤𑁂 𑀤𑀼𑀓𑁆𑀓𑀝𑀁. 𑀢𑀲𑁆𑀲 𑀦𑀸𑀫𑀁 𑀮𑀺𑀔𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀢𑁂𑀦 ‘𑀕𑀳𑁂𑀢𑁆𑀯𑀸 𑀞𑀧𑁂𑀬𑁆𑀬𑀸𑀲𑀻’𑀢𑀺 𑀆𑀡𑀢𑁆𑀢𑀢𑁆𑀢𑀸 𑀦𑀸𑀫𑀮𑁂𑀔𑀦𑀓𑀸𑀮𑁂 𑀅𑀦𑀸𑀧𑀢𑁆𑀢𑀺 𑀓𑀼𑀲𑀲𑀗𑁆𑀓𑀫𑀦𑀲𑀤𑀺𑀲𑀁 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀚𑀸𑀦𑀦𑁆𑀢𑀻𑀢𑀺 𑀦 𑀲𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀚𑀸𑀦𑀺𑀢𑁆𑀯𑀸𑀧𑀺 𑀘𑀺𑀢𑁆𑀢𑁂𑀦 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺 𑀏𑀲𑁂𑀯 𑀦𑀬𑁄. 𑀚𑀸𑀦𑀦𑁆𑀢𑁂𑀦 𑀧𑀦 𑀭𑀓𑁆𑀔𑀺𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑁂𑀯 𑀏𑀢𑀦𑁆𑀢𑀺 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀉𑀫𑁆𑀫𑀕𑁆𑀕𑁂𑀦𑀸𑀢𑀺 𑀧𑀼𑀭𑀸𑀧𑀸𑀡𑀁 𑀔𑀡𑀺𑀢𑁆𑀯𑀸 𑀓𑀢𑀫𑀕𑁆𑀕𑁂𑀦𑀸𑀢𑀺 𑀅𑀢𑁆𑀣𑁄.

𑀦𑀺𑀲𑁆𑀲𑀺𑀢𑀯𑀸𑀭𑀺𑀓𑀲𑁆𑀲 𑀧𑀦 𑀲𑀪𑀸𑀕𑀸 𑀪𑀢𑁆𑀢𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸 𑀯𑀺𑀳𑀸𑀭𑁂 𑀧𑀦𑁆𑀢𑀺, 𑀢𑀣𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀧𑀢𑁆𑀢𑀯𑀸𑀭𑀁 𑀅𑀕𑁆𑀕𑀳𑁂𑀢𑀼𑀁 𑀦 𑀮𑀪𑀦𑁆𑀢𑀺, ‘‘𑀢𑀲𑁆𑀲 𑀯𑀸 𑀲𑀪𑀸𑀕𑀸 𑀅𑀤𑀸𑀢𑀼𑀁 𑀦 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀤𑀼𑀢𑀺𑀬𑀲𑁆𑀲𑀸𑀢𑀺 𑀦 𑀳𑀺 𑀏𑀓𑁂𑀦𑀸𑀦𑀻𑀢𑀁 𑀤𑁆𑀯𑀺𑀦𑁆𑀦𑀁 𑀧𑀳𑁄𑀢𑀺, 𑀲𑀘𑁂 𑀧𑀳𑁄𑀢𑀺 𑀧𑀸𑀧𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀭𑀺𑀧𑀼𑀘𑁆𑀙𑀁 𑀤𑁂𑀢𑀻𑀢𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀢𑀻’’𑀢𑀺 𑀮𑀺𑀔𑀺𑀢𑀁. 𑀲𑀗𑁆𑀖𑀲𑁆𑀲 𑀪𑀸𑀭𑀁 𑀦𑀸𑀫 ‘‘𑀲𑀤𑁆𑀥𑀫𑁆𑀫𑀯𑀸𑀘𑀦𑀸 𑀏𑀯𑀸’’𑀢𑀺 𑀯𑀼𑀢𑁆𑀢𑀁, ‘‘𑀦𑀯𑀓𑀫𑁆𑀫𑀺𑀓𑁄𑀧𑀺 𑀯𑀼𑀘𑁆𑀘𑀢𑀻’’𑀢𑀺 𑀘, ‘‘𑀇𑀢𑁄 𑀪𑀡𑁆𑀟𑀢𑁄 𑀯𑀝𑁆𑀝𑀦𑁆𑀢𑀁 𑀧𑀼𑀦 𑀅𑀦𑁆𑀢𑁄 𑀧𑀯𑀺𑀲𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀧𑀤𑀲𑁆𑀲 𑀓𑀼𑀭𑀼𑀦𑁆𑀤𑀻𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀳𑀺 𑀅𑀥𑀺𑀧𑁆𑀧𑀸𑀬𑁄 𑀯𑀺𑀯𑀭𑀺𑀢𑁄’’𑀢𑀺 𑀮𑀺𑀔𑀺𑀢𑀁.

𑁧𑁧𑁩. 𑀕𑀘𑁆𑀙𑀦𑁆𑀢𑁂 𑀬𑀸𑀦𑁂 𑀯𑀸𑀢𑀺 𑀏𑀢𑁆𑀣 ‘‘𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀩𑀳𑀺 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀤𑀢𑀺 𑀓𑀺𑀭. ‘‘𑀕𑀘𑁆𑀙𑀦𑁆𑀢𑁂 𑀬𑀸𑀦𑁂 𑀯𑀸𑀢𑀺𑀆𑀤𑀺 𑀲𑀼𑀗𑁆𑀓𑀝𑁆𑀞𑀸𑀦𑀩𑁆𑀪𑀦𑁆𑀢𑀭𑁂 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀩𑀳𑀺 𑀞𑀺𑀢𑀲𑁆𑀲 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, ‘‘𑀅𑀦𑁆𑀢𑁄 𑀞𑀢𑁆𑀯𑀸’’𑀢𑀺 𑀅𑀥𑀺𑀓𑀸𑀭𑁂 𑀯𑀼𑀢𑁆𑀢𑀢𑁆𑀢𑀸 𑀘𑁂𑀢𑀺 𑀬𑀼𑀢𑁆𑀢𑀁 𑁋 𑀬𑀸𑀦𑀸𑀤𑀻𑀲𑀼 𑀞𑀧𑀺𑀢𑁂 𑀢𑀲𑁆𑀲 𑀧𑀬𑁄𑀕𑀁 𑀯𑀺𑀦𑀸𑀬𑁂𑀯 𑀕𑀢𑁂𑀲𑀼 𑀧𑀸𑀭𑀸𑀚𑀺𑀓𑁄 𑀦 𑀳𑁄𑀢𑀺. 𑀓𑀲𑁆𑀫𑀸 𑀦 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀘𑁂? 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀩𑀳𑀺 𑀞𑀺𑀢𑀢𑁆𑀢𑀸. 𑀅𑀭𑀜𑁆𑀜𑀝𑁆𑀞𑁂 ‘‘𑀅𑀲𑁆𑀲𑀢𑀺𑀬𑀸 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀧𑀺 𑀪𑀡𑁆𑀟𑀤𑁂𑀬𑁆𑀬𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁭) 𑀯𑀼𑀢𑁆𑀢𑀁 𑀢𑁂𑀲𑀁 𑀲𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀇𑀥 𑀧𑀦 ‘‘𑀅𑀢𑁆𑀭 𑀧𑀯𑀺𑀝𑁆𑀞𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀦 𑀩𑀳𑀺 𑀞𑀺𑀢𑀲𑁆𑀲, 𑀢𑀁 𑀓𑀺𑀭 𑀲𑀼𑀗𑁆𑀓𑀲𑀗𑁆𑀓𑁂𑀢𑀁. 𑀅𑀜𑁆𑀜𑀁 𑀳𑀭𑀸𑀧𑁂𑀢𑀻𑀢𑀺 𑀢𑀢𑁆𑀣 ‘‘𑀲𑀳𑀢𑁆𑀣𑀸’’𑀢𑀺 𑀯𑀘𑀦𑀢𑁄 𑀅𑀦𑀸𑀧𑀢𑁆𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀢𑁄 𑀧𑀸𑀘𑀺𑀢𑁆𑀢𑀺𑀬𑀁, 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀳𑀭𑀡𑁂 𑀲𑀸𑀤𑀻𑀦𑀯𑀢𑁆𑀢𑀸 𑀤𑀼𑀓𑁆𑀓𑀝𑀁.

𑀲𑀼𑀗𑁆𑀓𑀝𑁆𑀞𑀸𑀦𑁂 𑀲𑀼𑀗𑁆𑀓𑀁 𑀤𑀢𑁆𑀯𑀸𑀯 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀁 𑀫𑀸𑀢𑀺𑀓𑀸𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. ‘‘𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑀺, 𑀢𑁂𑀲𑀼 𑀤𑀓𑁆𑀔𑀺𑀡𑀤𑁆𑀯𑀸𑀭𑀲𑁆𑀲 𑀧𑀼𑀭𑀢𑁄 𑀫𑀕𑁆𑀕𑁄 𑀣𑀽𑀧𑀸𑀭𑀸𑀫𑀢𑁄 𑀆𑀦𑀦𑁆𑀤𑀘𑁂𑀢𑀺𑀬𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀚𑁂𑀢𑀯𑀦𑀯𑀺𑀳𑀸𑀭𑀲𑁆𑀲𑀦𑁆𑀢𑀭𑀧𑀸𑀓𑀸𑀭𑀲𑁆𑀲𑀸𑀲𑀦𑁆𑀦𑁂 𑀦𑀺𑀯𑀺𑀝𑁆𑀞𑁄, 𑀬𑁄 𑀦 𑀕𑀸𑀫𑀁 𑀧𑀯𑀺𑀲𑀦𑁆𑀢𑁄 𑀉𑀧𑀘𑀸𑀭𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀣𑀽𑀧𑀸𑀭𑀸𑀫𑀢𑁄 𑀘 𑀫𑀳𑀸𑀘𑁂𑀢𑀺𑀬𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀭𑀸𑀚𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁄 𑀦 𑀑𑀓𑁆𑀓𑀫𑀢𑀻’’𑀢𑀺 𑀓𑀺𑀭 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁. 𑀏𑀢𑁆𑀣 𑀘𑀸𑀢𑀺 𑀲𑀼𑀗𑁆𑀓𑀖𑀸𑀢𑁂 ‘‘𑀤𑁆𑀯𑀻𑀳𑀺 𑀮𑁂𑀟𑁆𑀟𑀼𑀧𑀸𑀢𑁂𑀳𑀻𑀢𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑀸’’𑀢𑀺 𑀮𑀺𑀔𑀺𑀢𑀁. 𑀤𑁆𑀯𑀻𑀳𑀺 𑀮𑁂𑀟𑁆𑀟𑀼𑀧𑀸𑀢𑁂𑀳𑀻𑀢𑀺 𑀲𑀼𑀗𑁆𑀓𑀖𑀸𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑁂 𑀅𑀝𑁆𑀞𑀧𑀺𑀢𑁂 𑀬𑀼𑀚𑁆𑀚𑀢𑀺, 𑀞𑀧𑀺𑀢𑁂 𑀧𑀦 𑀅𑀢𑀺𑀭𑁂𑀓𑀬𑁄𑀚𑀦𑀫𑁆𑀧𑀺 𑀲𑀼𑀗𑁆𑀓𑀖𑀸𑀢𑀁 𑀳𑁄𑀢𑀻𑀢𑀺 𑀢𑀢𑁄 𑀧𑀭𑀁 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸 𑀉𑀧𑀘𑀸𑀭𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀲𑁄 𑀧𑀦𑁂𑀢𑁆𑀣𑀸𑀧𑀺 𑀤𑀼𑀯𑀺𑀥𑁄 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀪𑁂𑀤𑀢𑁄. 𑀢𑀢𑁆𑀣 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑀁 𑀩𑀸𑀳𑀺𑀭𑁄𑀧𑀘𑀸𑀭𑀁 𑀲𑀦𑁆𑀥𑀸𑀬 𑀧𑀸𑀴𑀺𑀬𑀁, 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀘 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀅𑀩𑁆𑀪𑀦𑁆𑀢𑀭𑀁 𑀲𑀦𑁆𑀥𑀸𑀬 𑀓𑀼𑀭𑀼𑀦𑁆𑀤𑀺𑀬𑀦𑁆𑀢𑀺 𑀦𑁄 𑀔𑀦𑁆𑀢𑀺. ‘‘𑀅𑀢𑁆𑀭 𑀧𑀯𑀺𑀝𑁆𑀞𑀲𑁆𑀲 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑀽𑀢𑀺 𑀳𑀺 𑀦𑀺𑀬𑀫𑀺𑀢𑀝𑁆𑀞𑀸𑀦𑀁 𑀏𑀓𑀦𑁆𑀢𑀢𑁄 𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑀁 𑀳𑁄𑀢𑀺, 𑀢𑀜𑁆𑀘 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀤𑀼𑀓𑁆𑀓𑀝𑀔𑁂𑀢𑁆𑀢𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘𑁂, 𑀤𑀼𑀢𑀺𑀬𑁄 𑀮𑁂𑀟𑁆𑀟𑀼𑀧𑀸𑀢𑁄𑀢𑀺 𑀦𑁄 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀆𑀘𑀭𑀺𑀬𑁄 𑀯𑀤𑀢𑀺.

𑁧𑁧𑁪. 𑀥𑀦𑀁 𑀧𑀦 𑀕𑀢𑀝𑁆𑀞𑀸𑀦𑁂 𑀯𑀟𑁆𑀠𑀢𑀻𑀢𑀺 𑀏𑀢𑁆𑀣 ‘‘𑀯𑀟𑁆𑀠𑀺𑀬𑀸 𑀲𑀳 𑀅𑀯𑀳𑀸𑀭𑀓𑀲𑁆𑀲 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀢𑀁 𑀯𑀟𑁆𑀠𑀺𑀁 𑀤𑀲𑁆𑀲𑀸𑀫𑀻’’𑀢𑀺 𑀅𑀕𑁆𑀕𑀳𑁂𑀲𑀺, 𑀢𑀢𑁆𑀣 𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑀲𑁆𑀲 𑀯𑀟𑁆𑀠𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑁂𑀯𑀮𑀁 𑀆𑀞𑀧𑀺𑀢𑀔𑁂𑀢𑁆𑀢𑀲𑁆𑀲 𑀦 𑀯𑀟𑁆𑀠𑀢𑀺. ‘‘𑀬𑀁 𑀥𑀦𑀁 𑀯𑀟𑁆𑀠𑀺, 𑀢𑀁 𑀤𑁂𑀦𑁆𑀢𑀲𑁆𑀲 𑀅𑀯𑀳𑀸𑀭𑀓𑀲𑁆𑀲 𑀯𑀟𑁆𑀠𑀺𑀬𑀸 𑀅𑀤𑀸𑀦𑁂 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀦𑀸𑀫𑁂𑀦𑀸𑀢𑀺 𑀲𑀧𑁆𑀧𑀦𑀸𑀫𑁂𑀦 𑀯𑀸 𑀲𑀸𑀫𑀺𑀓𑁂𑀦 𑀓𑀢𑁂𑀦 𑀯𑀸.

𑁧𑁧𑁬. 𑀭𑀸𑀚𑀖𑀭𑀲𑁆𑀲 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺, 𑀧𑀭𑀺𑀓𑁆𑀔𑀺𑀢𑁆𑀢𑀭𑀸𑀚𑀗𑁆𑀕𑀡𑀁 𑀯𑀸 𑀅𑀦𑁆𑀢𑁄𑀯𑀢𑁆𑀣𑀼. 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀭𑀸𑀚𑀗𑁆𑀕𑀡𑁂 𑀞𑀺𑀢𑀲𑁆𑀲 𑀲𑀓𑀮𑀦𑀕𑀭𑀁 𑀞𑀸𑀦𑀁. 𑀕𑁄𑀡𑀲𑁆𑀲 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀞𑀺𑀢𑀲𑁆𑀲 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀫𑁂𑀯 𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀔𑀡𑁆𑀟𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀢𑀦𑀸 𑀔𑀡𑁆𑀟𑀺𑀢𑀘𑁆𑀙𑀺𑀤𑁆𑀤𑀁. 𑀢𑀢𑁆𑀣𑁂𑀯 𑀖𑀸𑀢𑁂𑀢𑀻𑀢𑀺 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀢𑁆𑀢𑀸 𑀯𑀥𑀓𑀘𑀺𑀢𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀅𑀤𑀺𑀦𑁆𑀦𑀸𑀤𑀸𑀦𑀧𑀬𑁄𑀕𑀢𑁆𑀢𑀸. 𑀢𑀫𑁆𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁𑀯 𑀳𑁄𑀢𑀺. 𑀇𑀥 𑀢𑀤𑀼𑀪𑀬𑀁 𑀮𑀪𑀢𑀺 𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀸𑀧𑀭𑀪𑀸𑀕𑁂𑀳𑀻’’𑀢𑀺 𑀯𑀼𑀢𑁆𑀢𑀁.

𑁧𑁧𑁮. 𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀦𑁆𑀢𑀺 𑀬𑀤𑀺 𑀬𑁄 𑀆𑀡𑀢𑁆𑀢𑁄 𑀅𑀯𑀲𑁆𑀲𑀁 𑀢𑀁 𑀪𑀡𑁆𑀟𑀁 𑀳𑀭𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀏𑀯 𑀧𑀸𑀭𑀸𑀚𑀺𑀓𑀁. ‘‘𑀇𑀥 𑀢𑀺𑀡𑁆𑀡𑀁 𑀓𑀲𑁆𑀫𑀸 𑀧𑀸𑀭𑀸𑀚𑀺𑀓𑀁, 𑀦𑀦𑀼 ‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀢𑀬𑁄 𑀳𑀭𑀣𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀢𑀭𑁂𑀲𑀜𑁆𑀘 𑀧𑀝𑀺𑀧𑀸𑀝𑀺𑀬𑀸 𑀏𑀓𑁂𑀓𑀲𑁆𑀲𑀸𑀡𑀢𑁆𑀢𑀢𑁆𑀢𑀸 𑀏𑀓𑁂𑀓𑁂𑀦 𑀘 𑀤𑀼𑀓𑁆𑀓𑀝𑁂𑀦 𑀪𑀯𑀺𑀢𑀩𑁆𑀩𑀁. 𑀓𑀣𑀁, 𑀏𑀓𑁄 𑀓𑀺𑀭 𑀫𑀸𑀲𑀕𑁆𑀖𑀦𑀓𑀁 𑀧𑀭𑀺𑀲𑁆𑀲𑀸𑀯𑀦𑀁 𑀣𑁂𑀦𑁂𑀢𑁆𑀯𑀸 𑀤𑁂𑀲𑁂𑀢𑁆𑀯𑀸 𑀦𑀺𑀭𑀼𑀲𑁆𑀲𑀸𑀳𑁄 𑀏𑀯 𑀯𑀸 𑀳𑀼𑀢𑁆𑀯𑀸 𑀧𑀼𑀦 𑀫𑀸𑀲𑀕𑁆𑀖𑀦𑀓𑀁 𑀲𑀽𑀘𑀺𑀁 𑀢𑀣𑁂𑀯 𑀓𑀢𑁆𑀯𑀸 𑀧𑀼𑀦 𑀫𑀸𑀲𑀕𑁆𑀖𑀦𑀓𑀦𑁆𑀢𑀺 𑀏𑀯𑀁 𑀲𑀺𑀬𑀸𑀢𑀺? 𑀦 𑀏𑀯𑀁, 𑀢𑀁 𑀬𑀣𑀸 𑀉𑀧𑁆𑀧𑀮𑀣𑁂𑀦𑀓𑁄 𑀬𑁂𑀦 𑀯𑀢𑁆𑀣𑀼 𑀧𑀽𑀭𑀢𑀺 𑀢𑀸𑀯 𑀲𑀉𑀲𑁆𑀲𑀸𑀳𑀢𑁆𑀢𑀸 𑀧𑀸𑀭𑀸𑀚𑀺𑀓𑁄 𑀆𑀲𑀺, 𑀏𑀯𑀫𑀺𑀫𑁂 𑀲𑀉𑀲𑁆𑀲𑀸𑀳𑀸𑀯 𑀦 𑀤𑁂𑀲𑀬𑀺𑀁𑀲𑀼 𑀯𑀸’’𑀢𑀺 𑀮𑀺𑀔𑀺𑀢𑀁, 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀢𑁂𑀲𑀼 𑀏𑀓𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁 𑀯𑀺𑀦𑀸 𑀯𑀺𑀬 𑀆𑀡𑀢𑁆𑀢𑀺𑀬𑀸 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀅𑀣 𑀔𑁄 ‘‘𑀢𑀲𑁆𑀲𑀸𑀬𑀁 𑀅𑀢𑁆𑀣𑁄’’𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁂𑀲𑀼 𑀘 𑀏𑀓𑀪𑀡𑁆𑀟𑀏𑀓𑀝𑁆𑀞𑀸𑀦𑀸𑀤𑀻𑀲𑀼 𑀘 𑀲𑀫𑁆𑀩𑀳𑀼𑀮𑀸 𑀏𑀓𑀁 𑀆𑀡𑀸𑀧𑁂𑀦𑁆𑀢𑀻𑀢𑀺 𑀆𑀡𑀢𑁆𑀢𑀺𑀫𑁂𑀯 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀆𑀡𑀢𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀸 𑀯𑀺𑀬, 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘‘𑀏𑀓𑀪𑀡𑁆𑀟𑀁 𑀏𑀓𑀝𑁆𑀞𑀸𑀦’𑀦𑁆𑀢𑀺 𑀘 𑀧𑀸𑀞𑁄 ‘𑀏𑀓𑀓𑀼𑀮𑀲𑁆𑀲 𑀪𑀡𑁆𑀟’𑀦𑁆𑀢𑀺 𑀯𑀘𑀦𑀢𑁄’’𑀢𑀺 𑀯𑀤𑀦𑁆𑀢𑀺.

𑁧𑁧𑁯-𑁧𑁨𑁦. 𑀑𑀘𑀭𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀯𑀲𑁆𑀲𑀁𑀳𑀸𑀭𑀺𑀬𑁂 𑀪𑀡𑁆𑀟𑁂. 𑀢𑀁 𑀲𑀗𑁆𑀓𑁂𑀢𑀦𑁆𑀢𑀺 𑀢𑀲𑁆𑀲 𑀲𑀗𑁆𑀓𑁂𑀢𑀲𑁆𑀲. 𑀅𑀣 𑀯𑀸 𑀢𑀁 𑀲𑀗𑁆𑀓𑁂𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀘𑁆𑀙𑀸 𑀯𑀸. 𑀅𑀧𑀢𑁆𑀯𑀸 𑀧𑀼𑀭𑁂 𑀯𑀸. 𑀏𑀲 𑀦𑀬𑁄 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀺𑀓𑀫𑁆𑀫𑀁 𑀮𑀳𑀼𑀓𑀁 𑀇𑀢𑁆𑀢𑀭𑀓𑀸𑀮𑀁, 𑀢𑀗𑁆𑀔𑀡𑁂 𑀏𑀯 𑀪𑀡𑁆𑀟𑀁 𑀅𑀯𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀓𑀺𑀜𑁆𑀘𑀺 𑀪𑀡𑁆𑀟𑀁 𑀤𑀽𑀭𑀁 𑀳𑁄𑀢𑀺, 𑀓𑀺𑀜𑁆𑀘𑀺 𑀪𑀸𑀭𑀺𑀬𑀁, 𑀢𑀁 𑀕𑀳𑁂𑀢𑀼𑀁 𑀬𑀸𑀯 𑀕𑀘𑁆𑀙𑀢𑀺 𑀬𑀸𑀯 𑀉𑀓𑁆𑀔𑀺𑀧𑀢𑀺, 𑀢𑀸𑀯 𑀦𑀺𑀫𑀺𑀢𑁆𑀢𑀲𑁆𑀲 𑀧𑀘𑁆𑀙𑀸 𑀳𑁄𑀢𑀺. 𑀲𑀘𑁂 𑀢𑀁 𑀪𑀡𑁆𑀟𑀁 𑀅𑀥𑀺𑀕𑀢𑀁 𑀯𑀺𑀬 𑀆𑀲𑀦𑁆𑀦𑀁, 𑀮𑀳𑀼𑀓𑀜𑁆𑀘, 𑀲𑀓𑁆𑀓𑀸 𑀦𑀺𑀫𑀺𑀢𑁆𑀢𑀓𑁆𑀔𑀡𑁂 𑀅𑀯𑀳𑀭𑀺𑀢𑀼𑀁, 𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀓𑀺𑀦𑁆𑀢𑀺? 𑀦, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁆𑀧𑀺 ‘‘𑀢𑀢𑁄 𑀧𑀝𑁆𑀞𑀸𑀬 𑀢𑁂𑀦𑁂𑀯 𑀦𑀺𑀫𑀺𑀢𑁆𑀢𑁂𑀦 𑀅𑀯𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺 𑀆𑀭𑀤𑁆𑀥𑀢𑁆𑀢𑀸. 𑀬𑀤𑀺 𑀏𑀯𑀁 ‘‘𑀧𑀼𑀭𑁂𑀪𑀢𑁆𑀢𑀧𑀬𑁄𑀕𑁄 𑀏𑀲𑁄’’𑀢𑀺 𑀯𑀸𑀭𑁄 𑀧𑀫𑀸𑀡𑀁 𑀳𑁄𑀢𑀺, 𑀦 𑀘 𑀢𑀁 𑀧𑀫𑀸𑀡𑀁 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀯𑀸𑀤𑀲𑁆𑀲 𑀧𑀘𑁆𑀙𑀸 𑀯𑀼𑀢𑁆𑀢𑀢𑁆𑀢𑀸, 𑀦 𑀲𑀗𑁆𑀓𑁂𑀢𑀓𑀫𑁆𑀫𑀁 𑀯𑀺𑀬 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀳𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀇𑀥 𑀦𑀢𑁆𑀣𑀺, 𑀇𑀤𑀫𑁂𑀯 𑀢𑁂𑀲𑀁 𑀦𑀸𑀦𑀢𑁆𑀢𑀁.

𑁧𑁨𑁧. 𑀢𑀜𑁆𑀘 𑀅𑀲𑀫𑁆𑀫𑁄𑀳𑀢𑁆𑀣𑀦𑁆𑀢𑀺 𑀏𑀓𑁄 ‘‘𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀯𑀸, 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀻𑀦𑀺 𑀯𑀸 𑀤𑀺𑀲𑁆𑀯𑀸 𑀕𑀡𑁆𑀳𑀸’’𑀢𑀺, 𑀏𑀓𑁄 𑀕𑀳𑁂𑀢𑀩𑁆𑀩𑀁 𑀪𑀡𑁆𑀟𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 ‘‘𑀧𑀼𑀭𑁂𑀪𑀢𑁆𑀢𑀁 𑀏𑀯𑀁 𑀯𑀡𑁆𑀡𑀲𑀡𑁆𑀞𑀸𑀦𑀁 𑀪𑀡𑁆𑀟𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑀺, 𑀏𑀯𑀁𑀯𑀺𑀥𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀏𑀯𑀁𑀯𑀺𑀥𑀁 𑀲𑀗𑁆𑀓𑁂𑀢𑀁 𑀦𑀺𑀫𑀺𑀢𑁆𑀢𑀜𑁆𑀘 𑀤𑀲𑁆𑀲𑁂𑀢𑀼𑀦𑁆𑀢𑀺 𑀘, 𑀬𑀣𑀸𑀥𑀺𑀧𑁆𑀧𑀸𑀬𑀦𑁆𑀢𑀺 𑀤𑀼𑀢𑀺𑀬𑁄 𑀢𑀢𑀺𑀬𑀲𑁆𑀲 𑀢𑀢𑀺𑀬𑁄 𑀘𑀢𑀼𑀢𑁆𑀣𑀲𑁆𑀲𑀸𑀢𑀺 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀘𑁂 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀤𑀼𑀢𑀺𑀬𑁄 𑀘𑀢𑀼𑀢𑁆𑀣𑀲𑁆𑀲 𑀯𑀤𑁂𑀢𑀺, 𑀦 𑀬𑀣𑀸𑀥𑀺𑀧𑁆𑀧𑀸𑀬𑁄𑀢𑀺 𑀘. ‘‘𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂𑀢𑀺 𑀅𑀯𑀲𑁆𑀲𑀁 𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀧𑀼𑀩𑁆𑀩𑁂𑀯 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀘 𑀮𑀺𑀔𑀺𑀢𑀁. 𑀧𑀝𑀺𑀕𑁆𑀕𑀡𑁆𑀳𑀓𑀸𑀦𑀁 𑀤𑀼𑀓𑁆𑀓𑀝𑀁 𑀲𑀩𑁆𑀩𑀢𑁆𑀣𑁄𑀓𑀸𑀲𑀸𑀪𑀸𑀯𑀢𑁄 𑀦 𑀯𑀼𑀢𑁆𑀢𑀁. 𑀧𑀸𑀭𑀸𑀚𑀺𑀓𑀸𑀧𑀚𑁆𑀚𑀦𑁂𑀦𑁂𑀢𑀁 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀺𑀢𑁆𑀯𑀸 𑀆𑀧𑀚𑁆𑀚𑀦𑁆𑀢𑀺 𑀓𑀺𑀭. 𑀅𑀢𑁆𑀣𑀲𑀸𑀥𑀓𑀸𑀡𑀢𑁆𑀢𑀺𑀘𑁂𑀢𑀦𑀸𑀔𑀡𑁂 𑀏𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀫𑀕𑁆𑀕𑀝𑁆𑀞𑀸𑀦𑀺𑀬𑀁 𑀓𑀢𑀭𑀁, 𑀓𑀢𑀭𑀁 𑀨𑀮𑀝𑁆𑀞𑀸𑀦𑀺𑀬𑀦𑁆𑀢𑀺 ‘‘𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸 𑀦𑀸𑀫 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀨𑀮𑀝𑁆𑀞𑀸𑀦𑀺𑀬𑀸 𑀘𑁂𑀢𑀦𑀸𑀢𑀺 𑀲𑀺𑀤𑁆𑀥𑀁. 𑀆𑀡𑀢𑁆𑀢𑀺 𑀘𑁂 𑀫𑀕𑁆𑀕𑀝𑁆𑀞𑀸𑀦𑀺𑀬𑀸 𑀲𑀺𑀬𑀸, 𑀘𑁂𑀢𑀦𑀸𑀲𑀳𑀚𑀢𑁆𑀢𑀸 𑀦 𑀲𑀫𑁆𑀪𑀯𑀢𑀺, 𑀢𑀣𑀸 𑀪𑀡𑁆𑀟𑀲𑁆𑀲 𑀅𑀯𑀲𑁆𑀲𑀁𑀳𑀸𑀭𑀺𑀢𑀸 𑀘 𑀦 𑀲𑀫𑁆𑀪𑀯𑀢𑀺. 𑀆𑀡𑀢𑁆𑀢𑀺𑀓𑁆𑀔𑀡𑁂 𑀏𑀯 𑀳𑀺 𑀢𑀁 𑀅𑀯𑀲𑁆𑀲𑀁𑀳𑀸𑀭𑀺𑀢𑀁 𑀚𑀸𑀢𑀦𑁆𑀢𑀺 𑀅𑀯𑀳𑀸𑀭𑀓𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀜𑁆𑀘𑁂, 𑀢𑀫𑁆𑀧𑀺 𑀦 𑀲𑀫𑁆𑀪𑀯𑀢𑀺 𑀅𑀦𑀸𑀕𑀢𑀢𑁆𑀢𑀸. 𑀘𑁂𑀢𑀦𑀸 𑀘𑁂 𑀫𑀕𑁆𑀕𑀝𑁆𑀞𑀸𑀦𑀺𑀬𑀸 𑀳𑁄𑀢𑀺, 𑀆𑀡𑀢𑁆𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀁, 𑀪𑀡𑁆𑀟𑀲𑁆𑀲 𑀅𑀯𑀲𑁆𑀲𑀁𑀳𑀸𑀭𑀺𑀢𑀸 𑀏𑀯 𑀯𑀸 𑀨𑀮𑀝𑁆𑀞𑀸𑀦𑀺𑀬𑀸 𑀘𑁂, 𑀅𑀢𑁆𑀣𑁄 𑀦 𑀲𑀫𑁆𑀪𑀯𑀢𑀺. 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀏𑀯 𑀳𑀺 𑀨𑀮𑀝𑁆𑀞𑀸𑀦𑀺𑀬𑀸 𑀪𑀯𑀺𑀢𑀼𑀫𑀭𑀳𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀢𑀸𑀯 𑀇𑀥 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀲𑀫𑁆𑀪𑀯𑀢𑀺 𑀘𑁂𑀢𑀦𑀸 𑀫𑀕𑁆𑀕𑀝𑁆𑀞𑀸𑀦𑀺𑀬𑀸, 𑀢𑀲𑁆𑀲𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀪𑀸𑀯𑁄 𑀨𑀮𑀝𑁆𑀞𑀸𑀦𑀺𑀬𑁄. 𑀬𑀣𑀸 𑀓𑀺𑀁? 𑀬𑀣𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀲𑀤𑁆𑀥𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀲𑀤𑁆𑀥𑀸𑀬 𑀲𑀤𑁆𑀤𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁆𑀣 𑀅𑀜𑁆𑀜𑁄 𑀲𑀤𑁆𑀥𑁄, 𑀅𑀜𑁆𑀜𑁄 𑀲𑀤𑁆𑀥𑀸𑀬 𑀲𑀤𑁆𑀤𑀢𑁆𑀣𑁄𑀢𑀺 𑀲𑀺𑀤𑁆𑀥𑀁, 𑀬𑀣𑀸 𑀘 ‘‘𑀏𑀓𑁄 𑀅𑀫𑁄𑀳𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣 𑀅𑀫𑁄𑀳𑁄 𑀥𑀫𑁆𑀫𑁄 𑀅𑀜𑁆𑀜𑁄, 𑀅𑀜𑁆𑀜𑁂 𑀢𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀢𑀸𑀤𑀬𑁄𑀢𑀺 𑀲𑀺𑀤𑁆𑀥𑀁. 𑀬𑀣𑀸 𑀘 𑀯𑀺𑀦𑀬𑀧𑀺𑀝𑀓𑁂 𑀬𑀸𑀦𑀺 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺, 𑀏𑀯𑀁 𑀬𑀣𑀸𑀲𑀫𑁆𑀪𑀯𑀁 ‘‘𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀅𑀜𑁆𑀜𑀸 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀢𑀸, 𑀅𑀜𑁆𑀜𑁄 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀪𑀸𑀯𑁄𑀢𑀺 𑀲𑀺𑀤𑁆𑀥𑀁. 𑀇𑀫𑀺𑀦𑀸 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀦𑀬𑁂𑀦 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀢𑀺 𑀞𑀸𑀦𑀸𑀦𑀻𑀢𑀺? 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀞𑀸𑀦𑀸𑀦𑀻𑀢𑀺. 𑀓𑀢𑀺 𑀯𑀢𑁆𑀣𑀽𑀦𑀻𑀢𑀺? 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀯𑀢𑁆𑀣𑀽𑀦𑀻𑀢𑀺. 𑀓𑀢𑀺 𑀪𑀽𑀫𑀺𑀬𑁄𑀢𑀺? 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀪𑀽𑀫𑀺𑀬𑁄𑀢𑀺 𑀏𑀯𑀫𑀸𑀤𑀬𑁄𑀧𑀺 𑀤𑀲𑁆𑀲𑁂𑀢𑀩𑁆𑀩𑀸. 𑀢𑀣𑀸 𑀳𑀺 𑀢𑀲𑁆𑀲𑀸 𑀏𑀯𑀁 𑀫𑀕𑁆𑀕𑀝𑁆𑀞𑀸𑀦𑀺𑀬𑀸𑀬 𑀅𑀢𑁆𑀣𑀲𑀸𑀥𑀺𑀓𑀸𑀬 𑀘𑁂𑀢𑀦𑀸𑀬 𑀬𑀲𑁆𑀫𑀸 𑀅𑀜𑁆𑀜𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀢𑀸 𑀅𑀦𑀢𑁆𑀣𑀦𑁆𑀢𑀭𑀪𑀽𑀢𑀸 𑀆𑀓𑀸𑀭𑀯𑀺𑀲𑁂𑀲𑀲𑀗𑁆𑀔𑀸𑀢𑀸 𑀨𑀮𑀝𑁆𑀞𑀸𑀦𑀺𑀬𑀸 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸 𑀦𑀸𑀫 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀓𑁂𑀯𑀮𑀁 𑀥𑀫𑁆𑀫𑀦𑀺𑀬𑀸𑀫𑀢𑁆𑀢𑀁𑀬𑁂𑀯 𑀉𑀧𑀫𑀢𑁆𑀢𑁂𑀦 𑀆𑀘𑀭𑀺𑀬𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺𑀧𑀺 𑀲𑀫𑁆𑀪𑀯𑀢𑀻𑀢𑀺 𑀦 𑀢𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁, ‘‘𑀇𑀤𑀁 𑀲𑀩𑁆𑀩𑀁 𑀓𑁂𑀯𑀮𑀁 𑀢𑀓𑁆𑀓𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀆𑀘𑀭𑀺𑀬𑁄.

𑀪𑀽𑀫𑀝𑁆𑀞𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸

𑁧𑁨𑁨. ‘‘𑀯𑀺𑀪𑀗𑁆𑀕𑀦𑀬𑀤𑀲𑁆𑀲𑀦𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀲𑀫𑁆𑀧𑀸𑀤𑁂𑀢𑀼𑀁 ‘‘𑀇𑀤𑀸𑀦𑀺 𑀢𑀢𑁆𑀣 𑀢𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀗𑁆𑀕𑀯𑀢𑁆𑀣𑀼𑀪𑁂𑀤𑁂𑀦 𑀘𑀸𑀢𑀺 𑀅𑀯𑀳𑀸𑀭𑀗𑁆𑀕𑀚𑀸𑀦𑀦𑀪𑁂𑀤𑁂𑀦 𑀯𑀢𑁆𑀣𑀼𑀲𑁆𑀲 𑀳𑀭𑀺𑀢𑀩𑁆𑀩𑀪𑀡𑁆𑀟𑀲𑁆𑀲 𑀕𑀭𑀼𑀓𑀮𑀳𑀼𑀓𑀪𑀸𑀯𑀪𑁂𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀗𑁆𑀕𑀜𑁆𑀘 𑀯𑀢𑁆𑀣𑀼𑀪𑁂𑀤𑁂𑀦 𑀆𑀧𑀢𑁆𑀢𑀺𑀪𑁂𑀤𑀜𑁆𑀘 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀢𑀺𑀭𑁂𑀓𑀫𑀸𑀲𑀓𑁄 𑀊𑀦𑀧𑀜𑁆𑀘𑀫𑀸𑀲𑀓𑁄𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀦 𑀯𑀼𑀢𑁆𑀢𑁄, 𑀢𑀻𑀳𑀺𑀧𑀺 𑀏𑀓𑁄 𑀏𑀯 𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄𑀢𑀺. 𑀅𑀦𑀚𑁆𑀛𑀸𑀯𑀼𑀝𑁆𑀞𑀓𑀁 𑀦𑀸𑀫 𑀅𑀭𑀜𑁆𑀜𑀧𑀸𑀮𑀓𑀸𑀤𑀺𑀦𑀸 𑀦 𑀓𑁂𑀦𑀘𑀺 𑀫𑀫𑀸𑀬𑀺𑀢𑀁. 𑀙𑀟𑁆𑀟𑀺𑀢𑀁 𑀦𑀸𑀫 𑀅𑀦𑀢𑁆𑀣𑀺𑀓𑀪𑀸𑀯𑁂𑀦 𑀅𑀢𑀺𑀭𑁂𑀓𑀫𑀢𑁆𑀢𑀸𑀤𑀺𑀦𑀸 𑀲𑀸𑀫𑀺𑀓𑁂𑀦 𑀙𑀟𑁆𑀟𑀺𑀢𑀁. 𑀦𑀝𑁆𑀞𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀙𑀺𑀦𑁆𑀦𑀸𑀮𑀬𑀢𑁆𑀢𑀸 𑀙𑀺𑀦𑁆𑀦𑀫𑀽𑀮𑀓𑀁. 𑀅𑀲𑁆𑀲𑀸𑀫𑀺𑀓𑀯𑀢𑁆𑀣𑀽𑀢𑀺 𑀅𑀘𑁆𑀙𑀺𑀦𑁆𑀦𑀫𑀽𑀮𑀓𑀫𑁆𑀧𑀺 𑀬𑀲𑁆𑀲 𑀲𑀸𑀫𑀺𑀓𑁄 𑀓𑁄𑀘𑀺 𑀦𑁄 𑀳𑁄𑀢𑀺, 𑀦𑀺𑀭𑀧𑁂𑀓𑁆𑀔𑀸 𑀯𑀸 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀬𑀁 𑀯𑀸 𑀧𑀭𑀺𑀘𑁆𑀘𑀢𑁆𑀢𑀁 𑀤𑁂𑀯𑀢𑀸𑀤𑀻𑀦𑀁, 𑀇𑀤𑀁 𑀲𑀩𑁆𑀩𑀁 𑀅𑀲𑁆𑀲𑀸𑀫𑀺𑀓𑀯𑀢𑁆𑀣𑀼 𑀦𑀸𑀫. 𑀤𑁂𑀯𑀢𑀸𑀤𑀻𑀦𑀁 𑀯𑀸 𑀩𑀼𑀤𑁆𑀥𑀥𑀫𑁆𑀫𑀸𑀦𑀁 𑀯𑀸 𑀧𑀭𑀺𑀘𑁆𑀘𑀢𑁆𑀢𑀁 𑀧𑀭𑁂𑀳𑀺 𑀘𑁂 𑀆𑀭𑀓𑁆𑀔𑀓𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀫𑁂𑀯. 𑀢𑀣𑀸𑀭𑀽𑀧𑁂 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑁂 𑀭𑀸𑀚𑀸𑀦𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀳𑀦𑀦𑀸𑀤𑀺𑀓𑀁 𑀓𑀭𑁂𑀬𑁆𑀬𑀼𑀁, 𑀅𑀦𑀸𑀭𑀓𑁆𑀔𑀓𑁂 𑀧𑀦 𑀆𑀯𑀸𑀲𑁂, 𑀅𑀪𑀺𑀓𑁆𑀔𑀼𑀓𑁂 𑀅𑀦𑀸𑀭𑀸𑀫𑀺𑀓𑀸𑀤𑀺𑀓𑁂 𑀘 𑀬𑀁 𑀩𑀼𑀤𑁆𑀥𑀥𑀫𑁆𑀫𑀲𑁆𑀲 𑀲𑀦𑁆𑀢𑀓𑀁, 𑀢𑀁 ‘‘𑀆𑀕𑀢𑀸𑀕𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀓𑁆𑀔𑀺𑀢𑀩𑁆𑀩𑀁 𑀕𑁄𑀧𑁂𑀢𑀩𑁆𑀩𑀁 𑀫𑀫𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑀲𑀗𑁆𑀖𑀲𑀦𑁆𑀢𑀓𑀁 𑀯𑀺𑀬 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀙𑀸𑀬𑀸 𑀤𑀺𑀲𑁆𑀲𑀢𑀺. 𑀇𑀲𑁆𑀲𑀭𑁄 𑀳𑀺 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀢𑀸𑀤𑀺𑀲𑁂 𑀧𑀭𑀺𑀓𑁆𑀔𑀸𑀭𑁂 𑀘𑁄𑀭𑁂𑀳𑀺𑀧𑀺 𑀕𑀬𑁆𑀳𑀫𑀸𑀦𑁂 𑀯𑀸𑀭𑁂𑀢𑀼𑀁 𑀧𑀝𑀺𑀩𑀮𑁄 𑀘𑁂, 𑀩𑀮𑀓𑁆𑀓𑀸𑀭𑁂𑀦 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀼𑀦𑁆𑀢𑀺. 𑀅𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀲𑀦𑁆𑀢𑀓𑀲𑀜𑁆𑀜𑀺𑀲𑁆𑀲 𑀙𑀲𑀼 𑀆𑀓𑀸𑀭𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀦𑀸𑀧𑀢𑁆𑀢𑀺 𑀯𑀺𑀬 𑀤𑀺𑀲𑁆𑀲𑀢𑀺, ‘‘𑀬𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀻’’𑀢𑀺 𑀅𑀗𑁆𑀕𑀪𑀸𑀯𑁄 𑀓𑀺𑀜𑁆𑀘𑀸𑀧𑀺 𑀤𑀺𑀲𑁆𑀲𑀢𑀺, 𑀧𑀭𑀲𑀦𑁆𑀢𑀓𑁂 𑀢𑀣𑀸 𑀧𑀝𑀺𑀧𑀦𑁆𑀦𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀘𑁄𑀭𑁂𑀳𑀺 𑀳𑀝𑀁, 𑀘𑁄𑀭𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀭𑁄 𑀘𑁂𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀕𑀡𑁆𑀳𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀸𑀫𑀺𑀓𑁄 𑀏𑀯 𑀘𑁂 𑀕𑀡𑁆𑀳𑀢𑀺, 𑀦 𑀧𑀸𑀭𑀸𑀚𑀺𑀓𑀁, 𑀬𑀲𑁆𑀫𑀸 𑀘𑁄𑀤𑁂𑀢𑁆𑀯𑀸, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀘 𑀲𑁄 ‘‘𑀫𑀫 𑀲𑀦𑁆𑀢𑀓𑀁 𑀕𑀡𑁆𑀳𑀸𑀫𑀻’’𑀢𑀺 𑀕𑀳𑁂𑀢𑀼𑀁 𑀮𑀪𑀢𑀺. 𑀧𑀞𑀫𑀁 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑁂 𑀧𑀘𑁆𑀙𑀸 𑀣𑁂𑀬𑁆𑀬𑀘𑀺𑀢𑁆𑀢𑁄 𑀕𑀡𑁆𑀳𑀢𑀺, 𑀏𑀲 𑀦𑀬𑁄. 𑀲𑀸𑀫𑀺𑀓𑁂𑀦 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑁂 𑀲𑁄 𑀘𑁂 𑀘𑁄𑀭𑁄 𑀓𑀸𑀮𑀁 𑀓𑀭𑁄𑀢𑀺, 𑀅𑀜𑁆𑀜𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑀺, 𑀦 𑀧𑀸𑀭𑀸𑀚𑀺𑀓𑁄. 𑀅𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑁂 𑀏𑀯 𑀘𑁂 𑀓𑀸𑀮𑀁 𑀓𑀭𑁄𑀢𑀺, 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓𑀁 𑀫𑀽𑀮𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀓𑀪𑀸𑀯𑁂 𑀞𑀺𑀢𑀢𑁆𑀢𑀸. 𑀘𑁄𑀭𑀪𑀺𑀓𑁆𑀔𑀼𑀫𑁆𑀳𑀺 𑀫𑀢𑁂 ‘‘𑀫𑀢𑀓𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 𑀲𑀗𑁆𑀖𑁄 𑀯𑀺𑀪𑀚𑀺𑀢𑁆𑀯𑀸 𑀘𑁂 𑀢𑀁 𑀕𑀡𑁆𑀳𑀢𑀺, 𑀫𑀽𑀮𑀲𑀸𑀫𑀺𑀓𑁄 ‘‘𑀫𑀫 𑀲𑀦𑁆𑀢𑀓𑀫𑀺𑀤’’𑀦𑁆𑀢𑀺 𑀕𑀳𑁂𑀢𑀼𑀁 𑀮𑀪𑀢𑀺.

𑀏𑀢𑁆𑀣𑀸𑀳 𑁋 𑀪𑀽𑀫𑀝𑁆𑀞𑀸𑀤𑀺𑀦𑀺𑀫𑀺𑀢𑁆𑀢𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀸 𑀏𑀯 𑀅𑀯𑀳𑀸𑀭𑀪𑁂𑀤𑀸, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀲𑀦𑁆𑀢𑀻𑀢𑀺. 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀅𑀜𑁆𑀜𑁂𑀧𑀺 𑀲𑀦𑁆𑀢𑀺, 𑀢𑁂𑀧𑀺 𑀯𑀢𑁆𑀢𑀩𑁆𑀩𑀸. 𑀦 𑀳𑀺 𑀪𑀕𑀯𑀸 𑀲𑀸𑀯𑀲𑁂𑀲𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀢𑀺. 𑀦𑁄 𑀘𑁂 𑀲𑀦𑁆𑀢𑀺, 𑀬𑁂 𑀇𑀫𑁂 𑀢𑀼𑀮𑀸𑀓𑀽𑀝𑀓𑀁𑀲𑀓𑀽𑀝𑀫𑀸𑀦𑀓𑀽𑀝𑀉𑀓𑁆𑀓𑁄𑀝𑀦𑀯𑀜𑁆𑀘𑀦𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑀯𑀺𑀧𑀭𑀸𑀫𑁄𑀲𑀆𑀮𑁄𑀧𑀲𑀸𑀳𑀲𑀸𑀓𑀸𑀭𑀸 𑀘 𑀲𑀼𑀢𑁆𑀢𑀗𑁆𑀕𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑀸, 𑀢𑁂 𑀇𑀥 𑀆𑀕𑀢𑁂𑀲𑀼 𑀏𑀢𑁆𑀣 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀘 𑀮𑀓𑁆𑀔𑀡𑀢𑁄 𑀯𑀸 𑀢𑁂𑀲𑀁 𑀲𑀫𑁄𑀥𑀸𑀦𑀕𑀢𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀮𑀓𑁆𑀔𑀡𑀢𑁄 𑀲𑀺𑀤𑁆𑀥𑁄𑀯. 𑀓𑀣𑀁? ‘‘𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀗𑁆𑀕𑀯𑀢𑁆𑀣𑀼𑀪𑁂𑀤𑁂𑀦. 𑀆𑀧𑀢𑁆𑀢𑀺𑀪𑁂𑀤𑁄 𑀳𑀺 𑀧𑀸𑀴𑀺𑀬𑀁 (𑀧𑀸𑀭𑀸. 𑁧𑁨𑁮-𑁧𑁩𑁦) 𑀯𑀼𑀢𑁆𑀢𑁄 𑀏𑀯, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀸 𑀯𑀜𑁆𑀘𑁂𑀢𑁆𑀯𑀸 𑀕𑀡𑁆𑀳𑀢𑀺, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀣𑁂𑀬𑁆𑀬𑀸𑀯𑀳𑀸𑀭𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁮; 𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀆𑀕𑀢𑀢𑁆𑀢𑀸 𑀢𑀼𑀮𑀸𑀓𑀽𑀝𑀕𑀳𑀡𑀸𑀤𑀬𑁄 𑀣𑁂𑀬𑁆𑀬𑀸𑀯𑀳𑀸𑀭𑁂 𑀲𑀫𑁄𑀥𑀸𑀦𑀁 𑀕𑀢𑀸𑀢𑀺 𑀲𑀺𑀤𑁆𑀥𑀁. 𑀯𑀺𑀧𑀭𑀸𑀫𑁄𑀲𑀆𑀮𑁄𑀧𑀲𑀸𑀳𑀲𑀸𑀓𑀸𑀭𑀸 𑀘 𑀅𑀝𑁆𑀞𑀓𑀣𑀸𑀬𑀸𑀕𑀢𑁂 𑀧𑀲𑀬𑁆𑀳𑀸𑀯𑀳𑀸𑀭𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀇𑀫𑀁𑀬𑁂𑀯 𑀯𑀸 𑀧𑀲𑀬𑁆𑀳𑀸𑀯𑀳𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀫𑀝𑁆𑀞𑀁 𑀅𑀭𑀜𑁆𑀜𑀝𑁆𑀞’’𑀦𑁆𑀢𑀺 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀕𑀸𑀫𑀝𑁆𑀞𑀁 𑀦𑀸𑀫 𑀪𑀡𑁆𑀟𑀁 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀸𑀕𑁄 𑀯𑀼𑀢𑁆𑀢𑁄. 𑀢𑁂𑀦𑁂𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀕𑀳𑀡𑀸𑀓𑀸𑀭𑀪𑁂𑀤𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀓𑀢𑀁. 𑀦 𑀳𑀺 𑀪𑀽𑀫𑀺𑀢𑀮𑀸𑀤𑀻𑀳𑀺 𑀕𑀸𑀫𑀸𑀭𑀜𑁆𑀜𑀝𑁆𑀞𑀁 𑀬𑀁 𑀓𑀺𑀜𑁆𑀘𑀻𑀢𑀺. 𑀢𑀢𑁆𑀣 𑀬𑀁 𑀢𑀼𑀮𑀸𑀓𑀽𑀝𑀁, 𑀢𑀁 𑀭𑀽𑀧𑀓𑀽𑀝𑀗𑁆𑀕𑀕𑀳𑀡𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀯𑁂𑀳𑀸𑀲𑀝𑁆𑀞𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀳𑀤𑀬𑀪𑁂𑀤𑀲𑀺𑀔𑀸𑀪𑁂𑀤𑀭𑀚𑁆𑀚𑀼𑀪𑁂𑀤𑀯𑀲𑁂𑀦 𑀢𑀺𑀯𑀺𑀥𑁂 𑀫𑀸𑀦𑀓𑀽𑀝𑁂 ‘‘𑀲𑁆𑀯𑀸𑀬𑀁 𑀳𑀤𑀬𑀪𑁂𑀤𑁄 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀢𑀻’’𑀢𑀺 𑀏𑀢𑁆𑀣 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀳𑀤𑀬𑀪𑁂𑀤𑁄 𑀳𑀺 𑀲𑀧𑁆𑀧𑀺𑀢𑁂𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. ‘‘𑀨𑀦𑁆𑀤𑀸𑀧𑁂𑀢𑀺 𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀓𑀭𑁄𑀢𑀻’’𑀢𑀺 𑀏𑀢𑁆𑀣 𑀲𑀺𑀔𑀸𑀪𑁂𑀤𑁄𑀧𑀺 𑀮𑀩𑁆𑀪𑀢𑀺. 𑀲𑁄 ‘‘𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀔𑁂𑀢𑁆𑀢𑀫𑀺𑀦𑀦𑀓𑀸𑀮𑁂 𑀭𑀚𑁆𑀚𑀼𑀪𑁂𑀤𑁄 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. ‘‘𑀥𑀫𑁆𑀫𑀁 𑀘𑀭𑀦𑁆𑀢𑁄 𑀲𑀸𑀫𑀺𑀓𑀁 𑀧𑀭𑀸𑀚𑁂𑀢𑀻’’𑀢𑀺 𑀏𑀢𑁆𑀣 𑀉𑀓𑁆𑀓𑁄𑀝𑀦𑀁 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀻𑀢𑀺 𑀢𑁂 𑀘 𑀢𑀣𑀸 𑀯𑀜𑁆𑀘𑀦𑀦𑀺𑀓𑀢𑀺𑀬𑁄𑀧𑀺.

𑀆𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀸𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸

𑁧𑁩𑁧. 𑀦 𑀘 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑀕𑀸𑀳𑁂𑀦 𑀕𑀳𑀺𑀢𑀫𑁆𑀧𑀺 𑀧𑀼𑀦 𑀤𑀸𑀢𑀩𑁆𑀩𑀦𑁆𑀢𑀺 𑀇𑀤𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀪𑀺𑀓𑁆𑀔𑀽 𑀲𑀳𑀸𑀬𑀓𑀸 𑀳𑁄𑀦𑁆𑀢𑀺. 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺…𑀧𑁂… 𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂’’𑀢𑀺 (𑀧𑀸𑀭𑀸. 𑁧𑁪𑁬) 𑀇𑀫𑀺𑀦𑀸 𑀅𑀲𑀫𑁂𑀦𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀳𑀺 ‘‘𑀲𑁄 𑀚𑀸𑀦𑀺𑀢𑁆𑀯𑀸 𑀢𑀁 𑀘𑁄𑀤𑁂𑀲𑀺 𑀅𑀲𑁆𑀲𑀫𑀡𑁄𑀲𑀺 𑀢𑁆𑀯’’𑀦𑁆𑀢𑀺 𑀯𑀘𑀦𑁂𑀦 𑀅𑀦𑀢𑁆𑀢𑀫𑀦𑀢𑀸 𑀤𑀻𑀧𑀺𑀢𑀸. 𑀧𑀼𑀦 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂’’𑀢𑀺 𑀯𑀘𑀦𑁂𑀦 𑀅𑀢𑁆𑀢𑀫𑀦𑀢𑀸𑀬𑀧𑀺 𑀲𑀢𑀺 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 𑀭𑀼𑀳𑀢𑀻𑀢𑀺 𑀤𑀻𑀧𑀺𑀢𑀦𑁆𑀢𑀺 𑀘𑁂? 𑀢𑀁 𑀦, 𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀢𑁆𑀣𑀢𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺 𑀯𑀺𑀲𑁆𑀲𑀸𑀲𑀲𑀜𑁆𑀜𑀸𑀬 𑀕𑀸𑀳𑁂 𑀲𑀢𑀺, 𑀲𑁄𑀧𑀺 𑀪𑀺𑀓𑁆𑀔𑀼 𑀲𑀳𑀸𑀬𑀓𑀢𑁆𑀢𑀸 𑀦 𑀓𑀼𑀤𑁆𑀥𑁄 𑀘𑁄𑀤𑁂𑀲𑀺, 𑀧𑀺𑀬𑁄 𑀏𑀯 𑀲𑀫𑀸𑀦𑁄 ‘‘𑀓𑀘𑁆𑀘𑀺 𑀅𑀲𑁆𑀲𑀫𑀡𑁄𑀲𑀺 𑀢𑁆𑀯𑀁, 𑀕𑀘𑁆𑀙, 𑀯𑀺𑀦𑀺𑀘𑁆𑀙𑀬𑀁 𑀓𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑁂 𑀢𑀺𑀝𑁆𑀞𑀸𑀳𑀻’’𑀢𑀺 𑀘𑁄𑀤𑁂𑀲𑀺. 𑀲𑀘𑁂𑀧𑀺 𑀲𑁄 𑀓𑀼𑀤𑁆𑀥𑁄 𑀏𑀯 𑀘𑁄𑀤𑁂𑀬𑁆𑀬, ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀓𑁂𑀯𑀮𑀁 𑀧𑀸𑀭𑀸𑀚𑀺𑀓𑀸𑀪𑀸𑀯𑀁 𑀤𑀻𑀧𑁂𑀢𑀺, 𑀦 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀲𑀺𑀤𑁆𑀥𑀁. 𑀬𑁄 𑀧𑀦 𑀧𑀭𑀺𑀲𑀫𑀚𑁆𑀛𑁂 𑀮𑀚𑁆𑀚𑀸𑀬 𑀅𑀥𑀺𑀯𑀸𑀲𑁂𑀢𑀺, 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀼𑀦𑀯𑀢𑁆𑀢𑀼𑀓𑀸𑀫𑀢𑀸𑀥𑀺𑀧𑁆𑀧𑀸𑀬𑁂 𑀧𑀦 𑀲𑁄𑀧𑀺 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀘𑁄𑀭𑁄 𑀧𑀲𑀬𑁆𑀳 𑀕𑀳𑁂𑀢𑀼𑀓𑀸𑀫𑁄𑀧𑀺 ‘‘𑀅𑀥𑀺𑀯𑀸𑀲𑁂𑀣, 𑀪𑀦𑁆𑀢𑁂, 𑀇𑀥 𑀫𑁂 𑀘𑀻𑀯𑀭𑀸𑀦𑀻’’𑀢𑀺 𑀯𑀢𑁆𑀯𑀸 𑀘𑀻𑀯𑀭𑀸𑀦𑀺 𑀣𑁂𑀭𑁂𑀦 𑀤𑀺𑀦𑁆𑀦𑀸𑀦𑀺, 𑀅𑀤𑀺𑀦𑁆𑀦𑀸𑀦𑀺 𑀯𑀸 𑀲𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀣𑁂𑀭𑁄 𑀧𑀼𑀦 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀘𑁄𑀤𑁂𑀢𑀼𑀁 𑀮𑀪𑀢𑀺, 𑀧𑀼𑀩𑁆𑀩𑁂 𑀅𑀥𑀺𑀯𑀸𑀲𑀦𑀸 𑀅𑀥𑀺𑀯𑀸𑀲𑀦𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺 𑀪𑀬𑁂𑀦 𑀢𑀼𑀡𑁆𑀳𑀻𑀪𑀽𑀢𑀢𑁆𑀢𑀸, ‘‘𑀬𑀁 𑀘𑀻𑀯𑀭𑀁 𑀇𑀥 𑀲𑀸𑀫𑀺𑀓𑁄 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀺𑀓𑀲𑁆𑀲 𑀧𑀸𑀓𑀢𑀺𑀓𑀁 𑀓𑀸𑀢𑀩𑁆𑀩𑀁, ‘‘𑀇𑀤𑀁 𑀓𑀺𑀭 𑀯𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀕𑀳𑀺𑀢𑀁, 𑀢𑀲𑁆𑀲 𑀢𑁂𑀦 𑀲𑀗𑁆𑀖𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀉𑀧𑀓𑀸𑀭𑀺𑀢𑀸 𑀅𑀢𑁆𑀣𑀺, 𑀕𑀳𑀺𑀢𑀧𑁆𑀧𑀫𑀸𑀡𑀁 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. ‘‘𑀲𑁄 𑀢𑁂𑀦 𑀬𑀣𑀸𑀕𑀳𑀺𑀢𑀁 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸 𑀅𑀦𑀡𑁄 𑀳𑁄𑀢𑀺, 𑀕𑀺𑀮𑀸𑀦𑀸𑀤𑀻𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑀦𑁆𑀢𑀺 𑀏𑀓𑀪𑀡𑁆𑀟𑀁 𑀏𑀯. ‘‘𑀪𑀸𑀭𑀺𑀬𑀜𑁆𑀳𑀺𑀤𑀁 𑀢𑁆𑀯𑀫𑁆𑀧𑀺 𑀏𑀓𑀧𑀲𑁆𑀲𑀁 𑀕𑀡𑁆𑀳, 𑀅𑀳𑀫𑁆𑀧𑀺 𑀏𑀓𑀧𑀲𑁆𑀲𑀁 𑀕𑀡𑁆𑀳𑀸𑀫𑀻𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀉𑀪𑀬𑁂𑀲𑀁 𑀧𑀬𑁄𑀕𑁂𑀦 𑀞𑀸𑀦𑀸𑀘𑀸𑀯𑀦𑁂 𑀓𑀢𑁂 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀳𑁄𑀢𑀺. 𑀅𑀜𑁆𑀜𑀣𑀸 ‘𑀲𑀸𑀳𑀢𑁆𑀣𑀺𑀓𑀁 𑀯𑀸 𑀆𑀡𑀢𑁆𑀢𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺, 𑀆𑀡𑀢𑁆𑀢𑀺𑀓𑀁 𑀯𑀸 𑀲𑀸𑀳𑀢𑁆𑀣𑀺𑀓𑀲𑁆𑀲𑀸’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀮𑀺𑀔𑀺𑀢𑀁. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀧𑀦 ‘‘𑀦 𑀓𑁂𑀯𑀮𑀁 𑀪𑀸𑀭𑀺𑀬𑁂 𑀏𑀯 𑀯𑀢𑁆𑀣𑀼𑀫𑁆𑀳𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺, 𑀧𑀜𑁆𑀘𑀫𑀸𑀲𑀓𑀫𑀢𑁆𑀢𑀫𑁆𑀧𑀺 𑀤𑁆𑀯𑁂 𑀘𑁂 𑀚𑀦𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀸𑀝𑁂𑀓𑁆𑀓𑀁, 𑀲𑀸𑀳𑀢𑁆𑀣𑀺𑀓𑀁 𑀦𑀸𑀫 𑀢𑀁 𑀓𑀫𑁆𑀫𑀁, 𑀲𑀸𑀳𑀢𑁆𑀣𑀺𑀓𑀧𑀬𑁄𑀕𑀢𑁆𑀢𑀸 𑀏𑀓𑀲𑁆𑀫𑀺𑀁𑀬𑁂𑀯 𑀪𑀡𑁆𑀟𑁂, 𑀢𑀲𑁆𑀫𑀸 ‘𑀲𑀸𑀳𑀢𑁆𑀣𑀺𑀓𑀁 𑀆𑀡𑀢𑁆𑀢𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀻’𑀢𑀺 𑀯𑀘𑀦𑀫𑀺𑀫𑀁 𑀦𑀬𑀁 𑀦 𑀧𑀝𑀺𑀩𑀸𑀳𑀢𑀺. ‘𑀲𑀸𑀳𑀢𑁆𑀣𑀺𑀓𑀯𑀢𑁆𑀣𑀼𑀅𑀗𑁆𑀕𑀦𑁆𑀢𑀺 𑀲𑀸𑀳𑀢𑁆𑀣𑀺𑀓𑀲𑁆𑀲 𑀯𑀢𑁆𑀣𑀼𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀻’𑀢𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀇𑀥 𑀧𑀦 𑀧𑀬𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀬𑀼𑀚𑁆𑀚𑀢𑀻’’𑀢𑀺 𑀆𑀳 𑀓𑀺𑀭, 𑀢𑀁 𑀅𑀬𑀼𑀢𑁆𑀢𑀁 𑀓𑀸𑀬𑀯𑀘𑀻𑀓𑀫𑁆𑀫𑀦𑁆𑀢𑀺 𑀯𑀘𑀦𑀸𑀪𑀸𑀯𑀸, 𑀢𑀲𑁆𑀫𑀸 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑁂𑀲𑀼 𑀧𑀬𑁄𑀕𑁂𑀲𑀼 𑀅𑀜𑁆𑀜𑀢𑀭𑁂𑀦 𑀯𑀸𑀬𑀫𑀸𑀧𑀢𑁆𑀢𑀺 𑀲𑀫𑀼𑀝𑁆𑀞𑀸𑀢𑀺, 𑀢𑀣𑀸𑀧𑀺 𑀢𑀼𑀭𑀺𑀢𑀢𑀼𑀭𑀺𑀢𑀸 𑀳𑀼𑀢𑁆𑀯𑀸 𑀯𑀺𑀮𑁄𑀧𑀦𑀸𑀤𑀻𑀲𑀼 𑀕𑀳𑀡𑀕𑀸𑀳𑀸𑀧𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀬𑀣𑀸 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀓𑀸𑀮𑁂𑀦 𑀧𑀭𑀲𑁆𑀲 𑀥𑀫𑁆𑀫𑀁 𑀆𑀭𑀩𑁆𑀪 𑀲𑀻𑀖𑀁 𑀲𑀻𑀖𑀁 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁨𑁧) 𑀯𑀼𑀢𑁆𑀢𑀸, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣𑀧𑀺 𑀬𑁂 𑀅𑀦𑀼𑀢𑁆𑀢𑀭𑀸𑀤𑀬𑁄 𑀏𑀓𑀦𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀬𑁄 𑀏𑀓𑀦𑁆𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀇𑀢𑀭𑁂 𑀅𑀦𑀺𑀬𑀢𑀸𑀭𑀫𑁆𑀫𑀡𑀢𑁆𑀢𑀸 ‘‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦 𑀏𑀓𑀓𑁆𑀔𑀡𑁂 𑀉𑀪𑀬𑀸𑀭𑀫𑁆𑀫𑀡𑀢𑁆𑀢𑀸. 𑀅𑀬𑀁 𑀧𑀦 𑀆𑀧𑀢𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀸𑀳𑀢𑁆𑀣𑀺𑀓𑀸 𑀆𑀡𑀢𑁆𑀢𑀺𑀓𑀸𑀧𑀺 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀅𑀦𑀺𑀤𑀲𑁆𑀲𑀦𑀫𑁂𑀢𑀦𑁆𑀢𑀺 𑀅𑀬𑀼𑀢𑁆𑀢𑀁. ‘‘𑀬𑀣𑀸 𑀅𑀦𑀺𑀬𑀢𑀸𑀭𑀫𑁆𑀫𑀡𑀢𑁆𑀢𑀸 ‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀅𑀦𑀺𑀬𑀢𑀧𑀬𑁄𑀕𑀢𑁆𑀢𑀸 𑀅𑀬𑀫𑁆𑀧𑀺 𑀆𑀧𑀢𑁆𑀢𑀺 ‘𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑀸’𑀢𑀺 𑀯𑀼𑀢𑁆𑀢𑀸𑀢𑀺 𑀦𑀺𑀤𑀲𑁆𑀲𑀦𑀫𑁂𑀯𑁂𑀢’’𑀦𑁆𑀢𑀺 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 𑀆𑀳𑀼. ‘‘𑀇𑀫𑁂 𑀧𑀦𑀸𑀘𑀭𑀺𑀬𑀸 𑀉𑀪𑀺𑀦𑁆𑀦𑀁 𑀏𑀓𑀢𑁄 𑀆𑀭𑀫𑁆𑀫𑀡𑀓𑀭𑀡𑀁 𑀦𑀢𑁆𑀣𑀺. 𑀅𑀢𑁆𑀣𑀺 𑀘𑁂, ‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁨.𑁨𑁧.𑁧 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑀺𑀓) 𑀧𑀝𑁆𑀞𑀸𑀦𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀜𑁆𑀜𑀸𑀬 𑀆𑀳𑀁𑀲𑀼, 𑀢𑁂𑀲𑀁 𑀫𑀢𑁂𑀦 ‘𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸, 𑀦 𑀘 𑀦𑀺𑀭𑀢𑁆𑀣𑀓𑀁, 𑀢𑀲𑁆𑀫𑀸 𑀅𑀢𑁆𑀣𑁂𑀯 𑀏𑀓𑀢𑁄 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑁄 𑀥𑀫𑁆𑀫𑁄. 𑀧𑀼𑀦 ‘𑀅𑀬𑀁 𑀲𑁄’𑀢𑀺 𑀦𑀺𑀬𑀫𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀥𑀫𑁆𑀫𑀸 𑀯𑀺𑀬 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀪𑀸𑀯𑀢𑁄 𑀦 𑀉𑀤𑁆𑀥𑀝𑁄 𑀲𑀺𑀬𑀸. 𑀢𑀢𑁆𑀣 𑀅𑀦𑀼𑀤𑁆𑀥𑀝𑀢𑁆𑀢𑀸 𑀏𑀯 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀉𑀪𑀺𑀦𑁆𑀦𑀫𑁆𑀧𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀥𑀫𑁆𑀫𑀸𑀦𑀁 𑀏𑀓𑀢𑁄 𑀆𑀭𑀫𑁆𑀫𑀡𑀓𑀭𑀡𑀥𑀫𑁆𑀫𑀯𑀲𑁂𑀦 ‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’𑀢𑀺 𑀅𑀯𑀢𑁆𑀯𑀸 ‘𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑀬𑁄𑀯 𑀲𑀸𑀭𑁄𑀢𑀺 𑀦𑁄 𑀢𑀓𑁆𑀓𑁄’’𑀢𑀺 𑀆𑀘𑀭𑀺𑀬𑁄. 𑀢𑀢𑁆𑀣 ‘‘𑀓𑀸𑀬𑀯𑀘𑀻𑀓𑀫𑁆𑀫’’𑀦𑁆𑀢𑀺 𑀅𑀯𑀘𑀦𑀁 𑀧𑀦𑀲𑁆𑀲 𑀲𑀸𑀳𑀢𑁆𑀣𑀺𑀓𑀧𑀬𑁄𑀕𑀢𑁆𑀢𑀸 𑀏𑀓𑀧𑀬𑁄𑀕𑀲𑁆𑀲 𑀅𑀦𑁂𑀓𑀓𑀫𑁆𑀫𑀢𑁆𑀢𑀸𑀯, 𑀬𑀤𑀺 𑀪𑀯𑁂𑀬𑁆𑀬, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀬𑀣𑀸 𑀢𑀢𑁆𑀣 𑀫𑀦𑁄𑀓𑀫𑁆𑀫𑀁 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀁 𑀚𑀸𑀢𑀁, 𑀏𑀯𑀁 𑀢𑀲𑁆𑀫𑀺𑀁 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑁂 𑀯𑀘𑀻𑀓𑀫𑁆𑀫𑀁 𑀅𑀩𑁆𑀩𑁄𑀳𑀸𑀭𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀁 𑀧𑀦 𑀓𑁂𑀯𑀮𑀁 𑀓𑀸𑀬𑀓𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀚𑀸𑀢𑀁, 𑀘𑀺𑀢𑁆𑀢𑀁 𑀯𑀺𑀬 𑀢𑀢𑁆𑀣 𑀅𑀗𑁆𑀕𑀫𑁂𑀯 𑀚𑀸𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀸𑀳𑀢𑁆𑀣𑀺𑀓𑀧𑀬𑁄𑀕𑀢𑁆𑀢𑀸’’𑀢𑀺, ‘‘𑀅𑀗𑁆𑀕𑀪𑀸𑀯𑀫𑀢𑁆𑀢𑀫𑁂𑀯 𑀳𑀺 𑀲𑀦𑁆𑀥𑀸𑀬 ‘𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑁄 𑀢𑀓𑁆𑀓𑁄’’𑀢𑀺 𑀘, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀓𑀸𑀬𑀯𑀸𑀘𑀸 𑀲𑀫𑀼𑀝𑁆𑀞𑀸𑀦𑀸, 𑀬𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀺𑀬𑀼𑀁;

𑀢𑀢𑁆𑀣 𑀓𑀫𑁆𑀫𑀁 𑀦 𑀢𑀁 𑀘𑀺𑀢𑁆𑀢𑀁, 𑀓𑀫𑁆𑀫𑀁 𑀦𑀲𑁆𑀲𑀢𑀺 𑀔𑀻𑀬𑀢𑀺.

𑀓𑀺𑀭𑀺𑀬𑀸𑀓𑀺𑀭𑀺𑀬𑀸𑀤𑀺𑀓𑀁 𑀬𑀜𑁆𑀘, 𑀓𑀫𑁆𑀫𑀸𑀓𑀫𑁆𑀫𑀸𑀤𑀺𑀓𑀁 𑀪𑀯𑁂;

𑀦 𑀬𑀼𑀢𑁆𑀢𑀁 𑀢𑀁 𑀯𑀺𑀭𑀼𑀤𑁆𑀥𑀢𑁆𑀢𑀸, 𑀓𑀫𑁆𑀫𑀫𑁂𑀓𑀁𑀯 𑀬𑀼𑀚𑁆𑀚𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁩𑁨. 𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀢𑀺 𑀏𑀢𑁆𑀣 𑀓𑁂𑀯𑀮𑀁 𑀘𑀺𑀢𑁆𑀢𑀁, 𑀢𑀲𑁆𑀲𑁂𑀯 𑀉𑀧𑁆𑀧𑀸𑀤𑁂𑀢𑀩𑁆𑀩𑀸𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀳 𑁋 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑀸𑀤𑀻𑀲𑀼, 𑀲𑀩𑁆𑀩𑁂𑀲𑀼 𑀘 𑀅𑀓𑀺𑀭𑀺𑀬𑀲𑀺𑀓𑁆𑀔𑀸𑀧𑀤𑁂𑀲𑀼 𑀦 𑀓𑀸𑀬𑀗𑁆𑀕𑀘𑁄𑀧𑀦𑀁 𑀯𑀸 𑀯𑀸𑀘𑀗𑁆𑀕𑀘𑁄𑀧𑀦𑀁 𑀯𑀸, 𑀅𑀧𑀺𑀘𑀸𑀧𑀢𑁆𑀢𑀺, 𑀓𑀲𑁆𑀫𑀸 𑀇𑀫𑀲𑁆𑀫𑀺𑀁𑀬𑁂𑀯 𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀧𑀢𑁆𑀢𑀺, 𑀦 𑀲𑀩𑁆𑀩𑀸𑀧𑀢𑁆𑀢𑀻𑀳𑀻𑀢𑀺? 𑀦, 𑀓𑀲𑁆𑀫𑀸.

𑀓𑀢𑁆𑀢𑀩𑁆𑀩𑀸 𑀲𑀸𑀥𑀺𑀓𑀁 𑀲𑀺𑀓𑁆𑀔𑀸, 𑀯𑀺𑀜𑁆𑀜𑀢𑁆𑀢𑀺𑀁 𑀓𑀸𑀬𑀯𑀸𑀘𑀺𑀓𑀁;

𑀅𑀓𑀢𑁆𑀯𑀸 𑀓𑀸𑀬𑀯𑀸𑀘𑀸𑀳𑀺, 𑀅𑀯𑀺𑀜𑁆𑀜𑀢𑁆𑀢𑀻𑀳𑀺 𑀢𑀁 𑀨𑀼𑀲𑁂.

𑀦 𑀮𑁂𑀲𑀪𑀸𑀯𑀢𑁆𑀢𑀸. 𑀲𑀧𑁆𑀧𑀸𑀬𑁂 𑀆𑀭𑀫𑁆𑀫𑀡𑁂 𑀅𑀝𑁆𑀞𑀢𑁆𑀯𑀸 𑀧𑀝𑀺𑀮𑀤𑁆𑀥𑀸𑀲𑁂𑀯𑀦𑀁 𑀳𑀼𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀼𑀝𑁆𑀞𑀼 𑀥𑀸𑀯𑀢𑀻𑀢𑀺 𑀲𑀦𑁆𑀥𑀸𑀯𑀢𑀺. 𑀢𑀢𑁄 𑀅𑀪𑀺𑀚𑁆𑀛𑀸𑀬 𑀲𑀳𑀕𑀢𑀁, 𑀩𑁆𑀬𑀸𑀧𑀸𑀤𑀲𑀳𑀕𑀢𑀁 𑀯𑀸 𑀳𑀼𑀢𑁆𑀯𑀸 𑀯𑀺𑀲𑁂𑀲𑀢𑁄 𑀥𑀸𑀯𑀢𑀻𑀢𑀺 𑀯𑀺𑀥𑀸𑀯𑀢𑀺.

𑁧𑁩𑁭. 𑀯𑀡𑀁 𑀓𑀢𑁆𑀯𑀸 𑀕𑀳𑁂𑀢𑀼𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀇𑀢𑁆𑀣𑀺𑀭𑀽𑀧𑀲𑁆𑀲 𑀦𑀸𑀫 𑀬𑀢𑁆𑀣 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀓𑁂𑀘𑀺. ‘‘𑀓𑀸𑀬𑀧𑀝𑀺𑀩𑀤𑁆𑀥𑀕𑁆𑀕𑀳𑀡𑀁 𑀬𑀼𑀢𑁆𑀢𑀁, 𑀢𑀁 𑀲𑀦𑁆𑀥𑀸𑀬 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀪𑀬𑀁 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀓𑀼𑀲𑀲𑀗𑁆𑀓𑀸𑀫𑀦𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁩𑁮. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀬𑀁 𑀯𑀼𑀢𑁆𑀢𑀁 ‘‘𑀧𑀤𑀼𑀤𑁆𑀥𑀸𑀭𑁂𑀦𑁂𑀯 𑀓𑀸𑀭𑁂𑀢𑀩𑁆𑀩𑁄’’𑀢𑀺, 𑀢𑀁 𑀲𑀼𑀯𑀼𑀢𑁆𑀢𑀁. 𑀓𑀺𑀦𑁆𑀢𑀼 𑀢𑀲𑁆𑀲 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀓𑀫𑀢𑁆𑀢𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 𑀯𑀼𑀢𑁆𑀢𑀁. 𑀉𑀤𑁆𑀥𑀸𑀭𑁂 𑀯𑀸𑀬𑀁 𑀆𑀧𑀦𑁆𑀦𑁄, 𑀢𑀲𑁆𑀫𑀸 𑀤𑀺𑀲𑁆𑀯𑀸 𑀕𑀘𑁆𑀙𑀦𑁆𑀢𑁄 ‘‘𑀧𑀤𑀼𑀤𑁆𑀥𑀸𑀭𑁂𑀦𑁂𑀯 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀇𑀤𑀁 𑀢𑀢𑁆𑀣 𑀤𑀼𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁? ‘‘𑀲𑀸𑀝𑀓𑀢𑁆𑀣𑀺𑀓𑁄 𑀲𑀸𑀝𑀓𑀧𑀲𑀺𑀩𑁆𑀩𑀓𑀫𑁂𑀯 𑀕𑀳𑁂𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀝𑀓𑀪𑀸𑀯𑀁 𑀜𑀢𑁆𑀯𑀸 ‘𑀧𑀘𑁆𑀙𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀢𑀺, 𑀦 𑀉𑀤𑁆𑀥𑀸𑀭𑁂 𑀏𑀯𑀸𑀧𑀚𑁆𑀚𑀢𑀺. 𑀬𑀤𑀸 𑀩𑀳𑀺 𑀞𑀢𑁆𑀯𑀸 ‘𑀲𑀸𑀝𑀓𑁄 𑀅𑀬’𑀦𑁆𑀢𑀺 𑀤𑀺𑀲𑁆𑀯𑀸 𑀕𑀘𑁆𑀙𑀢𑀺, 𑀢𑀤𑀸 𑀧𑀤𑀼𑀤𑁆𑀥𑀸𑀭𑁂𑀦𑁂𑀯 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀦 𑀯𑀼𑀢𑁆𑀢𑀫𑁂𑀢𑀁, 𑀓𑀺𑀦𑁆𑀢𑀼 𑀓𑀺𑀜𑁆𑀘𑀸𑀧𑀺 𑀧𑀭𑀺𑀓𑀧𑁆𑀧𑁄 𑀤𑀺𑀲𑁆𑀲𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀅𑀯𑀳𑀸𑀭𑀓𑁆𑀔𑀡𑁂 𑀦 𑀤𑀺𑀲𑁆𑀲𑀢𑀻𑀢𑀺 𑀦 𑀲𑁄 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄, 𑀅𑀬𑀫𑀢𑁆𑀣𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀯, 𑀢𑀲𑁆𑀫𑀸 ‘‘𑀜𑀸𑀬𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀓𑀫𑁆𑀫𑀦𑁆𑀢𑀲𑀸𑀮𑀸 𑀦𑀸𑀫 𑀓𑀲𑁆𑀲𑀓𑀸𑀦𑀁 𑀯𑀦𑀘𑁆𑀙𑁂𑀤𑀓𑀸𑀦𑀁 𑀕𑁂𑀳𑀸𑀦𑀺. 𑀅𑀬𑀁 𑀢𑀸𑀯𑀸𑀢𑀺 𑀲𑀘𑁂 𑀉𑀧𑀘𑀸𑀭𑀲𑀻𑀫𑀦𑁆𑀢𑀺𑀆𑀤𑀺 𑀬𑀸𑀯 𑀣𑁂𑀭𑀯𑀸𑀤𑁄 𑀫𑀳𑀸𑀅𑀝𑁆𑀞𑀓𑀣𑀸𑀦𑀬𑁄, 𑀢𑀢𑁆𑀣 𑀓𑁂𑀘𑀺 𑀧𑀦𑀸𑀢𑀺𑀆𑀤𑀺 𑀦 𑀕𑀳𑁂𑀢𑀩𑁆𑀩𑀁 𑀣𑁂𑀭𑀯𑀸𑀤𑀢𑁆𑀢𑀸 𑀬𑀼𑀢𑁆𑀢𑀺𑀅𑀪𑀸𑀯𑀢𑁄, 𑀦 𑀳𑀺 𑀲𑀸𑀳𑀢𑁆𑀣𑀺𑀓𑁂 𑀏𑀯𑀁𑀯𑀺𑀥𑀸 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸 𑀳𑁄𑀢𑀺. 𑀆𑀡𑀢𑁆𑀢𑀺𑀓𑁂 𑀏𑀯 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸. ‘‘𑀲𑁂𑀲𑀁 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀲𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀓𑀼𑀲𑀲𑀗𑁆𑀓𑀸𑀫𑀦𑀓𑀭𑀡𑁂 𑀲𑀘𑁂 𑀧𑀭𑁄 ‘‘𑀦𑀸𑀬𑀁 𑀫𑀫 𑀲𑀦𑁆𑀢𑀓𑁄’’𑀢𑀺 𑀚𑀸𑀦𑀸𑀢𑀺, 𑀇𑀢𑀭𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀔𑀻𑀮𑀲𑀗𑁆𑀓𑀸𑀫𑀦𑁂 𑀯𑀺𑀬. ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑀘𑁂 𑀚𑀸𑀦𑀸𑀢𑀺, 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀜𑁆𑀘𑀓𑀸𑀦𑀺 𑀲𑀗𑁆𑀓𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁.

𑁧𑁪𑁦. 𑀧𑀭𑀸𑀦𑀼𑀤𑁆𑀤𑀬𑀢𑀸𑀬𑀸𑀢𑀺 𑀏𑀢𑁆𑀣 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑁂𑀦 𑀪𑀕𑀯𑀢𑀸 𑀓𑀲𑁆𑀫𑀸 ‘‘𑀅𑀦𑀸𑀧𑀢𑁆𑀢𑀺 𑀧𑁂𑀢𑀧𑀭𑀺𑀕𑁆𑀕𑀳𑁂 𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑁂’’𑀢𑀺 (𑀧𑀸𑀭𑀸. 𑁧𑁩𑁧) 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀏𑀯. 𑀬𑀲𑁆𑀲 𑀳𑀺 𑀧𑀭𑀺𑀓𑁆𑀔𑀸𑀭𑀲𑁆𑀲 𑀆𑀤𑀸𑀦𑁂 𑀭𑀸𑀚𑀸𑀦𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀦 𑀳𑀦𑀦𑀸𑀤𑀻𑀦𑀺 𑀓𑀭𑁂𑀬𑁆𑀬𑀼𑀁, 𑀢𑀲𑁆𑀫𑀺𑀫𑁆𑀧𑀺 𑀦𑀸𑀫 𑀲𑀫𑀡𑁄 𑀕𑁄𑀢𑀫𑁄 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀁 𑀅𑀪𑀺𑀓𑁆𑀔𑀼𑀁 𑀓𑀭𑁄𑀢𑀻𑀢𑀺 𑀫𑀳𑀸𑀚𑀦𑁄 𑀪𑀕𑀯𑀢𑀺 𑀧𑀲𑀸𑀤𑀜𑁆𑀜𑀣𑀢𑁆𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀧𑀸𑀬𑀼𑀧𑀕𑁄 𑀳𑁄𑀢𑀺. 𑀅𑀧𑁂𑀢𑀧𑀭𑀺𑀕𑁆𑀕𑀳𑀺𑀢𑀸 𑀭𑀼𑀓𑁆𑀔𑀸𑀤𑀻 𑀘 𑀤𑀼𑀮𑁆𑀮𑀪𑀸, 𑀦 𑀘 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀭𑀼𑀓𑁆𑀔𑀸𑀤𑀻𑀳𑀺 𑀧𑀸𑀧𑀪𑀻𑀭𑀼𑀓𑁄 𑀉𑀧𑀸𑀲𑀓𑀚𑀦𑁄 𑀧𑀝𑀺𑀫𑀸𑀖𑀭𑀘𑁂𑀢𑀺𑀬𑀩𑁄𑀥𑀺𑀖𑀭𑀯𑀺𑀳𑀸𑀭𑀸𑀤𑀻𑀦𑀺 𑀅𑀓𑀢𑁆𑀯𑀸 𑀫𑀳𑀢𑁄 𑀧𑀼𑀜𑁆𑀜𑀓𑁆𑀔𑀦𑁆𑀥𑀢𑁄 𑀧𑀭𑀺𑀳𑀸𑀬𑁂𑀬𑁆𑀬. ‘‘𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸’’𑀢𑀺 (𑀫𑀳𑀸𑀯. 𑁧𑁨𑁮) 𑀯𑀼𑀢𑁆𑀢𑀦𑀺𑀲𑁆𑀲𑀬𑀸 𑀘 𑀅𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺. 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀳𑀺 𑀪𑀺𑀓𑁆𑀔𑀽 𑀭𑀼𑀓𑁆𑀔𑀫𑀽𑀮𑀧𑀁𑀲𑀼𑀓𑀽𑀮𑀸𑀦𑀺 𑀦 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀻𑀢𑀺, 𑀧𑀩𑁆𑀩𑀚𑁆𑀚𑀸 𑀘 𑀦 𑀲𑀫𑁆𑀪𑀯𑁂𑀬𑁆𑀬𑀼𑀁, 𑀲𑀧𑁆𑀧𑀤𑀝𑁆𑀞𑀓𑀸𑀮𑁂 𑀙𑀸𑀭𑀺𑀓𑀢𑁆𑀣𑀸𑀬 𑀭𑀼𑀓𑁆𑀔𑀁 𑀅𑀕𑁆𑀕𑀳𑁂𑀢𑁆𑀯𑀸 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬𑀼𑀁, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀤𑀺𑀓𑀸𑀮𑁂 𑀲𑀸𑀔𑀸𑀪𑀗𑁆𑀕𑀸𑀤𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀕𑁆𑀕𑀸 𑀳𑀼𑀢𑁆𑀯𑀸 𑀢𑀺𑀢𑁆𑀣𑀺𑀬𑀮𑀤𑁆𑀥𑀺𑀫𑁂𑀯 𑀲𑀼𑀮𑀤𑁆𑀥𑀺 𑀯𑀺𑀬 𑀤𑀻𑀧𑁂𑀦𑁆𑀢𑀸 𑀯𑀺𑀘𑀭𑁂𑀬𑁆𑀬𑀼𑀁, 𑀢𑀢𑁄 𑀢𑀺𑀢𑁆𑀣𑀺𑀬𑁂𑀲𑁆𑀯𑁂𑀯 𑀮𑁄𑀓𑁄 𑀧𑀲𑀻𑀤𑀺𑀢𑁆𑀯𑀸 𑀤𑀺𑀝𑁆𑀞𑀺𑀕𑁆𑀕𑀳𑀡𑀁 𑀧𑀢𑁆𑀯𑀸 𑀲𑀁𑀲𑀸𑀭𑀔𑀸𑀡𑀼𑀓𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀪𑀕𑀯𑀸 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀏𑀯 ‘‘𑀅𑀦𑀸𑀧𑀢𑁆𑀢𑀺 𑀧𑁂𑀢𑀧𑀭𑀺𑀕𑁆𑀕𑀳𑁂’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁧. 𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻𑀢𑀺 ‘‘𑀕𑀳𑀺𑀢𑀁 𑀯𑀺𑀜𑁆𑀜𑀢𑁆𑀢𑀺𑀲𑀤𑀺𑀲𑀢𑁆𑀢𑀸 𑀦𑁂𑀯 𑀪𑀡𑁆𑀟𑀤𑁂𑀬𑁆𑀬𑀁 𑀦 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀮𑀺𑀔𑀺𑀢𑀁, 𑀇𑀤𑀁 𑀧𑀓𑀢𑀺𑀚𑀦𑁂 𑀬𑀼𑀚𑁆𑀚𑀢𑀺. ‘‘𑀲𑀘𑁂 𑀧𑀦 𑀲𑀸𑀫𑀺𑀓𑁄 𑀯𑀸 𑀢𑁂𑀦 𑀆𑀡𑀢𑁆𑀢𑁄 𑀯𑀸 ‘𑀅𑀧𑀭𑀲𑁆𑀲 𑀲𑀳𑀸𑀬𑀪𑀺𑀓𑁆𑀔𑀼𑀲𑁆𑀲 𑀪𑀸𑀕𑀁 𑀏𑀲 𑀕𑀡𑁆𑀳𑀸𑀢𑀺 𑀬𑀸𑀘𑀢𑀺 𑀯𑀸’𑀢𑀺 𑀬𑀁 𑀅𑀧𑀭𑀪𑀸𑀕𑀁 𑀤𑁂𑀢𑀺, 𑀢𑀁 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀯𑀤𑀦𑁆𑀢𑀺.

𑁧𑁪𑁮-𑁯. 𑀔𑀸𑀤𑀦𑁆𑀢𑀲𑁆𑀲 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀘𑁄𑀭𑀲𑁆𑀲 𑀯𑀸 𑀲𑀸𑀫𑀺𑀓𑀲𑁆𑀲 𑀯𑀸 𑀲𑀫𑁆𑀧𑀢𑁆𑀢𑀲𑁆𑀲 𑀤𑀺𑀦𑁆𑀦𑀁 𑀲𑀼𑀤𑀺𑀦𑁆𑀦𑀫𑁂𑀯 𑀓𑀺𑀭. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀉𑀲𑁆𑀲𑀸𑀳𑀕𑀢𑀸𑀦𑀁 𑀯𑀸’’𑀢𑀺 𑀅𑀯𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀳𑀺 𑀓𑀢𑀺𑀧𑀬𑀸𑀦𑀁 𑀅𑀦𑀼𑀲𑁆𑀲𑀸𑀳𑀢𑀸𑀬 𑀲𑀗𑁆𑀖𑀺𑀓𑀫𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀬𑀤𑀺 𑀲𑀉𑀲𑁆𑀲𑀸𑀳𑀸𑀯 𑀕𑀘𑁆𑀙𑀦𑁆𑀢𑀺, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀢𑁄 𑀅𑀯𑀳𑀸𑀭𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀼𑀪𑀬𑀫𑁂𑀓𑀁. 𑀙𑀟𑁆𑀟𑀺𑀢𑀯𑀺𑀳𑀸𑀭𑁂 𑀉𑀧𑀘𑀸𑀭𑀲𑀻𑀫𑀸𑀬 𑀧𑀫𑀸𑀡𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸, 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀉𑀧𑀘𑀸𑀭𑀲𑀻𑀫𑀸𑀬 𑀩𑀳𑀺 𑀞𑀢𑁆𑀯𑀸 𑀖𑀡𑁆𑀝𑀺𑀧𑀳𑀭𑀡𑀸𑀤𑀺𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺 𑀔𑀸𑀤𑀢𑀺, 𑀢𑁂𑀦 𑀏𑀯𑀁 𑀔𑀸𑀤𑀺𑀢𑀁 𑀲𑀼𑀔𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀇𑀢𑀭𑀯𑀺𑀳𑀸𑀭𑁂 𑀢𑀢𑁆𑀣 𑀤𑀺𑀢𑁆𑀢𑀯𑀺𑀥𑀺𑀦𑀸𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀼𑀔𑀸𑀤𑀺𑀢𑀁 𑀅𑀦𑁆𑀢𑁄𑀯𑀺𑀳𑀸𑀭𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁, 𑀆𑀕𑀢𑀸𑀦𑀸𑀕𑀢𑀸𑀦𑀁 𑀲𑀦𑁆𑀢𑀓𑀢𑁆𑀢𑀸𑀢𑀺 ‘‘𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀤𑁂𑀫𑀻’’𑀢𑀺 𑀤𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀯𑀁 𑀅𑀯𑀢𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀻’’𑀢𑀺 𑀤𑀺𑀦𑁆𑀦𑀫𑁆𑀧𑀺 𑀢𑀸𑀤𑀺𑀲𑀫𑁂𑀯. 𑀢𑀣𑀸 𑀳𑀺 𑀩𑀳𑀺 𑀞𑀺𑀢𑁄 𑀮𑀸𑀪𑀁 𑀦 𑀮𑀪𑀢𑀺 𑀪𑀕𑀯𑀢𑁄 𑀯𑀘𑀦𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁫𑁩. ‘‘𑀫𑀢𑀲𑀽𑀓𑀭𑁄’’𑀢𑀺 𑀯𑀘𑀦𑀢𑁄 𑀢𑀫𑁂𑀯 𑀚𑀻𑀯𑀦𑁆𑀢𑀁 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀓𑀢𑁆𑀯𑀸 𑀤𑀸𑀢𑀼𑀁 𑀦 𑀮𑀪𑀢𑀺. 𑀯𑀚𑁆𑀛𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀫𑀤𑁆𑀤𑀦𑁆𑀢𑁄 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀓𑀺𑀢𑁆𑀢𑀓𑀁 𑀪𑀡𑁆𑀟𑀤𑁂𑀬𑁆𑀬𑀁, 𑀦 𑀳𑀺 𑀲𑀓𑁆𑀓𑀸 ‘‘𑀏𑀢𑁆𑀢𑀓𑀸 𑀲𑀽𑀓𑀭𑀸 𑀫𑀤𑁆𑀤𑀺𑀢𑁆𑀯𑀸 𑀕𑀢𑀸 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀚𑀸𑀦𑀺𑀢𑀼𑀦𑁆𑀢𑀺? 𑀬𑀢𑁆𑀢𑀓𑁂 𑀲𑀸𑀫𑀺𑀓𑀸𑀦𑀁 𑀤𑀺𑀦𑁆𑀦𑁂 𑀢𑁂 ‘‘𑀤𑀺𑀦𑁆𑀦𑀁 𑀫𑀫 𑀪𑀡𑁆𑀟’’𑀦𑁆𑀢𑀺 𑀢𑀼𑀲𑁆𑀲𑀦𑁆𑀢𑀺, 𑀢𑀢𑁆𑀢𑀓𑀁 𑀤𑀸𑀢𑀩𑁆𑀩𑀁. 𑀦𑁄 𑀘𑁂 𑀢𑀼𑀲𑁆𑀲𑀦𑁆𑀢𑀺, 𑀅𑀢𑀺𑀓𑁆𑀓𑀦𑁆𑀢𑀲𑀽𑀓𑀭𑀫𑀽𑀮𑀁 𑀤𑀢𑁆𑀯𑀸 𑀓𑀺𑀁 𑀑𑀧𑀸𑀢𑁄 𑀔𑀡𑀺𑀢𑁆𑀯𑀸 𑀤𑀸𑀢𑀩𑁆𑀩𑁄𑀢𑀺? 𑀦 𑀤𑀸𑀢𑀩𑁆𑀩𑁄. 𑀅𑀣 𑀓𑀺𑀁 𑀘𑁄𑀤𑀺𑀬𑀫𑀸𑀦𑀲𑁆𑀲 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀓𑁂𑀯𑀮𑀁 𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀁 𑀤𑀢𑁆𑀯𑀸 𑀢𑁄𑀲𑁂𑀢𑀩𑁆𑀩𑁄𑀯 𑀲𑀸𑀫𑀺𑀓𑁄, 𑀏𑀲𑁂𑀯 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀽𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. ‘‘𑀢𑀤𑀳𑁂𑀯 𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀯𑀸 𑀫𑀤𑁆𑀤𑀦𑁆𑀢𑁄 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑀼𑀫𑁆𑀩𑁂 𑀔𑀺𑀧𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯𑀸𑀢𑀺 𑀅𑀯𑀲𑁆𑀲𑀁 𑀧𑀯𑀺𑀲𑀦𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀭𑀘𑀓𑁆𑀓𑀸𑀤𑀺𑀪𑀬𑀁 𑀆𑀕𑀢𑀁. 𑀫𑀽𑀮𑀯𑀢𑁆𑀣𑀼𑀘𑁆𑀙𑁂𑀤𑀦𑁆𑀢𑀺 ‘‘𑀲𑀩𑁆𑀩𑀲𑁂𑀦𑀸𑀲𑀦𑀁 𑀏𑀢𑁂 𑀇𑀲𑁆𑀲𑀭𑀸’’𑀢𑀺 𑀯𑀘𑀦𑀢𑁄 𑀇𑀢𑀭𑁂 𑀅𑀦𑀺𑀲𑁆𑀲𑀭𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑁧𑁫𑁬. 𑀆𑀭𑀸𑀫𑀭𑀓𑁆𑀔𑀓𑀸𑀢𑀺 𑀯𑀺𑀲𑁆𑀲𑀝𑁆𑀞𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸𑀢𑀺 𑀏𑀢𑁆𑀣 𑀬𑀲𑁆𑀲 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀁 𑀪𑀺𑀓𑁆𑀔𑀼𑀁, 𑀪𑀸𑀕𑀁 𑀯𑀸 𑀲𑀸𑀫𑀺𑀓𑀸 𑀦 𑀭𑀓𑁆𑀔𑀦𑁆𑀢𑀺 𑀦 𑀤𑀡𑁆𑀟𑁂𑀦𑁆𑀢𑀺, 𑀢𑀲𑁆𑀲 𑀤𑀸𑀦𑀁 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀥 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀢𑀫𑁆𑀧𑀺 ‘‘𑀦 𑀯𑀝𑁆𑀝𑀢𑀺 𑀲𑀗𑁆𑀖𑀺𑀓𑁂’’𑀢𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀯 𑀪𑀺𑀓𑁆𑀔𑀼 𑀇𑀲𑁆𑀲𑀭𑁄𑀢𑀺 𑀬𑀢𑁆𑀣 𑀲𑁄 𑀇𑀘𑁆𑀙𑀢𑀺, 𑀢𑀢𑁆𑀣 𑀅𑀢𑁆𑀢𑀜𑀸𑀢𑀳𑁂𑀢𑀼𑀁 𑀮𑀪𑀢𑀺 𑀓𑀺𑀭 𑀅𑀢𑁆𑀣𑁄. 𑀅𑀧𑀺𑀘 ‘‘𑀤𑀳𑀭𑁄’’𑀢𑀺 𑀯𑀤𑀦𑁆𑀢𑀺. 𑀲𑀯𑀢𑁆𑀣𑀼𑀓𑀦𑁆𑀢𑀺 𑀲𑀳 𑀪𑀽𑀫𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀕𑀭𑀼𑀪𑀡𑁆𑀟𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀢𑀺𑀡𑀫𑀢𑁆𑀢𑀁 𑀧𑀦 𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀺𑀦𑁆𑀢𑀼 𑀕𑀭𑀼𑀪𑀡𑁆𑀟𑀦𑁆𑀢𑀺 𑀘𑁂, 𑀅𑀭𑀓𑁆𑀔𑀺𑀬𑀅𑀕𑁄𑀧𑀺𑀬𑀝𑁆𑀞𑀸𑀦𑁂, 𑀯𑀺𑀦𑀲𑁆𑀲𑀦𑀓𑀪𑀸𑀯𑁂 𑀘 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀧𑁆𑀧𑀺𑀬𑁂𑀧𑀺 𑀘𑀸𑀢𑀺 𑀯𑀢𑁆𑀯𑀸, 𑀅𑀯𑀢𑁆𑀯𑀸 𑀯𑀸 𑀕𑀳𑀡𑀬𑀼𑀢𑁆𑀢𑁂 𑀫𑀸𑀢𑀸𑀤𑀺𑀲𑀦𑁆𑀢𑀓𑁂𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦. 𑀇𑀤𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 ‘‘𑀭𑀸𑀚𑀸𑀧𑀺𑀫𑁂𑀲𑀁 𑀅𑀪𑀺𑀧𑁆𑀧𑀲𑀦𑁆𑀦𑁄’’𑀢𑀺 (𑀧𑀸𑀭𑀸. 𑁮𑁬) 𑀯𑀘𑀦𑀢𑁄 𑀮𑀸𑀪𑀕𑁆𑀕𑀫𑀳𑀢𑁆𑀢𑀁, 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀜𑁆𑀘 𑀧𑀢𑁆𑀢𑀓𑀸𑀮𑁂 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀺𑀤𑁆𑀥𑀁.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.