𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀁

𑀧𑀞𑀫𑀧𑀜𑁆𑀜𑀢𑁆𑀢𑀺𑀦𑀺𑀤𑀸𑀦𑀯𑀡𑁆𑀡𑀦𑀸

𑁧𑁬𑁨. 𑀢𑀻𑀳𑀺 𑀲𑀼𑀤𑁆𑀥𑁂𑀦𑀸𑀢𑀺 𑀏𑀢𑁆𑀣 𑀢𑀻𑀳𑀻𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀯𑀸 𑀳𑁄𑀢𑀺, 𑀓𑀭𑀡𑀯𑀘𑀦𑀁 𑀯𑀸. 𑀦𑀺𑀲𑁆𑀲𑀓𑁆𑀓𑀧𑀓𑁆𑀔𑁂 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀳𑀺 𑀲𑀼𑀤𑁆𑀥𑁂𑀦. 𑀢𑀣𑀸 𑀤𑀼𑀘𑁆𑀘𑀭𑀺𑀢𑀫𑀮𑁂𑀳𑀺 𑀯𑀺𑀲𑀫𑁂𑀳𑀺 𑀧𑀧𑀜𑁆𑀘𑁂𑀳𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑀓𑀺𑀮𑁂𑀲𑀢𑁆𑀢𑀺𑀓𑁂𑀳𑀺 𑀩𑁄𑀥𑀺𑀫𑀡𑁆𑀟𑁂 𑀏𑀯 𑀲𑀼𑀤𑁆𑀥𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀭𑀡𑀧𑀓𑁆𑀔𑁂 𑀢𑀻𑀳𑀻𑀢𑀺 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀳𑀺 𑀲𑀼𑀤𑁆𑀥𑁂𑀦. 𑀢𑀣𑀸 𑀢𑀻𑀳𑀺 𑀲𑀼𑀘𑀭𑀺𑀢𑁂𑀳𑀺, 𑀢𑀻𑀳𑀺 𑀯𑀺𑀫𑁄𑀓𑁆𑀔𑁂𑀳𑀺, 𑀢𑀻𑀳𑀺 𑀪𑀸𑀯𑀦𑀸𑀳𑀺, 𑀢𑀻𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀳𑀺 𑀲𑀼𑀤𑁆𑀥𑁂𑀦𑀸𑀢𑀺 𑀲𑀩𑁆𑀩𑀕𑀼𑀡𑀢𑁆𑀢𑀺𑀓𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀪𑀸𑀯𑀺𑀢𑀦𑁆𑀢𑀺 𑀤𑁂𑀲𑀦𑀸𑀬 𑀯𑀺𑀢𑁆𑀣𑀸𑀭𑀺𑀢𑀁, 𑀯𑀺𑀪𑀽𑀢𑀁 𑀯𑀸 𑀓𑀢𑀁 𑀯𑀺𑀳𑀺𑀢𑀁, 𑀧𑀜𑁆𑀜𑀢𑁆𑀢𑀁 𑀯𑀸 𑀳𑁄𑀢𑀺. 𑀲𑀁𑀯𑀡𑁆𑀡𑀦𑀸𑀢𑀺 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀯𑀘𑀦𑀁.

𑀦 𑀓𑁂𑀯𑀮𑀁 𑀭𑀸𑀚𑀕𑀳𑀫𑁂𑀯, 𑀇𑀤𑀫𑁆𑀧𑀺 𑀦𑀕𑀭𑀁. 𑀲𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀲𑀧𑀭𑀺𑀬𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀧𑀭𑀺𑀓𑁆𑀔𑁂𑀧𑀦𑁆𑀢𑀺 𑀏𑀓𑁂. ‘‘𑀳𑀁𑀲𑀯𑀝𑁆𑀝𑀓𑀘𑁆𑀙𑀤𑀦𑁂𑀦𑀸𑀢𑀺 𑀳𑀁𑀲𑀧𑀭𑀺𑀓𑁆𑀔𑁂𑀧𑀲𑀡𑁆𑀞𑀸𑀦𑁂𑀦𑀸’’𑀢𑀺 𑀮𑀺𑀔𑀺𑀢𑀁. 𑀓𑀸𑀬𑀯𑀺𑀘𑁆𑀙𑀺𑀦𑁆𑀤𑀦𑀺𑀬𑀓𑀣𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑁂, 𑀧𑀭𑀲𑁆𑀲 𑀯𑀸 𑀅𑀢𑁆𑀢𑀪𑀸𑀯𑁂 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀓𑀭𑀁 𑀯𑀺𑀘𑁆𑀙𑀺𑀦𑁆𑀤𑀦𑀓𑀭𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺. 𑀅𑀲𑀼𑀪𑀸 𑀘𑁂𑀯 𑀲𑀼𑀪𑀸𑀓𑀸𑀭𑀯𑀺𑀭𑀳𑀺𑀢𑀢𑁆𑀢𑀸. 𑀅𑀲𑀼𑀘𑀺𑀦𑁄 𑀘 𑀤𑁄𑀲𑀦𑀺𑀲𑁆𑀲𑀦𑁆𑀤𑀦𑀧𑀪𑀯𑀢𑁆𑀢𑀸. 𑀧𑀝𑀺𑀓𑀽𑀮𑀸 𑀘 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀲𑀼 𑀆𑀲𑀬𑀢𑁄. 𑀅𑀲𑀼𑀪𑀸𑀬 𑀯𑀡𑁆𑀡𑀦𑁆𑀢𑀺 𑀅𑀲𑀼𑀪𑀸𑀓𑀸𑀭𑀲𑁆𑀲, 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀸 𑀯𑀺𑀢𑁆𑀣𑀸𑀭𑀁 𑀪𑀸𑀲𑀢𑀺. 𑀲𑀸𑀫𑀺𑀅𑀢𑁆𑀣𑁂 𑀳𑁂𑀢𑀁 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀅𑀲𑀼𑀪𑀦𑁆𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀆𑀯𑀺𑀪𑀸𑀯𑀸𑀬 𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀬 𑀯𑀺𑀢𑁆𑀣𑀸𑀭𑀓𑀣𑀸𑀲𑀗𑁆𑀔𑀸𑀢𑀁 𑀯𑀡𑁆𑀡𑀁 𑀪𑀸𑀲𑀪𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀁𑀬𑁂𑀯 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀁 𑀤𑀲𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑁆𑀧𑀦𑁆𑀦𑀁 𑀓𑀺𑀮𑁂𑀲𑀘𑁄𑀭𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀸 𑀛𑀸𑀦𑀘𑀺𑀢𑁆𑀢𑀁 𑀫𑀜𑁆𑀚𑀽𑀲𑀁 𑀦𑀸𑀫.

𑀢𑀢𑁆𑀭𑀺𑀫𑀸𑀦𑀻𑀢𑀺 𑀏𑀢𑁆𑀣𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀬𑀲𑁆𑀫𑀺𑀁 𑀯𑀸𑀭𑁂 𑀧𑀞𑀫𑀁 𑀛𑀸𑀦𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀓𑀮𑀫𑁆𑀧𑀺 𑀚𑀯𑀦𑀯𑀸𑀭𑀁 𑀅𑀦𑀼𑀮𑁄𑀫𑀧𑀭𑀺𑀓𑀫𑁆𑀫𑀉𑀧𑀘𑀸𑀭𑀕𑁄𑀢𑁆𑀭𑀪𑀼𑀅𑀧𑁆𑀧𑀦𑀸𑀧𑁆𑀧𑀪𑁂𑀤𑀁 𑀏𑀓𑀢𑁆𑀢𑀦𑀬𑁂𑀦 ‘‘𑀧𑀞𑀫𑀁 𑀛𑀸𑀦’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀅𑀧𑁆𑀧𑀦𑀸𑀧𑀝𑀺𑀧𑀸𑀤𑀺𑀓𑀸𑀬 𑀔𑀺𑀧𑁆𑀧𑀸𑀤𑀺𑀪𑁂𑀤𑀸𑀬 𑀅𑀪𑀺𑀜𑁆𑀜𑀸𑀬 𑀅𑀥𑀺𑀕𑀢𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀁 𑀉𑀧𑀸𑀤𑀸𑀬 𑀆𑀕𑀫𑀦𑀯𑀲𑁂𑀦 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑁄𑀤𑀸𑀧𑀓𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀆𑀤𑀺𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀞𑀫𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑀁, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁆𑀧𑀸𑀤𑀞𑀺𑀢𑀺𑀓𑁆𑀔𑀡𑁂𑀲𑀼 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸, 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀲𑀫𑁆𑀧𑀳𑀁𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀮𑀓𑁆𑀔𑀻𑀬𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀦𑁆𑀢𑀺 𑀓𑀢𑁆𑀯𑀸 ‘‘𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀢𑁆𑀢𑀺𑀧𑀓𑁆𑀔𑀦𑁆𑀤𑀦𑁂’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑀪𑀸𑀕𑁄 𑀮𑀓𑁆𑀔𑀻𑀬𑀢𑀺, 𑀢𑀺𑀯𑀺𑀥𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀦𑁂𑀦 𑀫𑀚𑁆𑀛𑀁 𑀮𑀓𑁆𑀔𑀻𑀬𑀢𑀺, 𑀘𑀢𑀼𑀩𑁆𑀩𑀺𑀥𑀸𑀬 𑀲𑀫𑁆𑀧𑀳𑀁𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑀁 𑀮𑀓𑁆𑀔𑀻𑀬𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀲 𑀮𑀓𑁆𑀔𑀡𑀸𑀦𑀻’’𑀢𑀺.

𑀧𑀸𑀭𑀺𑀩𑀦𑁆𑀥𑀓𑀢𑁄𑀢𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑀧𑀸𑀭𑀺𑀩𑀦𑁆𑀥𑀓𑀢𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑀁 𑀧𑀼𑀩𑁆𑀩𑀪𑀸𑀕𑀚𑀯𑀦𑀘𑀺𑀢𑁆𑀢𑀁 ‘‘𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀯𑀺𑀲𑀼𑀤𑁆𑀥𑀢𑁆𑀢𑀸 𑀢𑀁 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀢𑀤𑀢𑁆𑀣𑀸𑀬 𑀉𑀧𑀕𑀘𑁆𑀙𑀫𑀸𑀦𑀁 𑀏𑀓𑀲𑀦𑁆𑀢𑀢𑀺𑀯𑀲𑁂𑀦 𑀧𑀭𑀺𑀡𑀸𑀫𑁂𑀦𑁆𑀢𑀁 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫. 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀢𑀲𑁆𑀲 𑀢𑀢𑁆𑀣 𑀲𑀫𑀣𑀦𑀺𑀫𑀺𑀢𑁆𑀢𑁂 𑀧𑀓𑁆𑀔𑀦𑁆𑀤𑀦𑀁 𑀢𑀩𑁆𑀪𑀸𑀯𑀽𑀧𑀕𑀫𑀦𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀢𑀢𑁆𑀣 𑀘𑀺𑀢𑁆𑀢𑀧𑀓𑁆𑀔𑀦𑁆𑀤𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 𑀧𑀞𑀫𑀚𑁆𑀛𑀸𑀦𑀼𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀆𑀕𑀫𑀦𑀯𑀲𑁂𑀦 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀯𑀺𑀲𑀼𑀤𑁆𑀥𑀲𑁆𑀲 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑁆𑀲 𑀧𑀼𑀦 𑀯𑀺𑀲𑁄𑀥𑀦𑁂 𑀩𑁆𑀬𑀸𑀧𑀸𑀭𑀸𑀪𑀸𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀳𑁄𑀢𑀺. 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀢𑁆𑀢𑀸 𑀧𑀼𑀦 𑀲𑀫𑀸𑀥𑀸𑀦𑁂 𑀩𑁆𑀬𑀸𑀧𑀸𑀭𑀸𑀪𑀸𑀯𑀸 𑀘 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀳𑁄𑀢𑀺. 𑀓𑀺𑀮𑁂𑀲𑀲𑀁𑀲𑀕𑁆𑀕𑀁 𑀧𑀳𑀸𑀬 𑀏𑀓𑀦𑁆𑀢𑁂𑀦 𑀉𑀧𑀝𑁆𑀞𑀺𑀢𑀢𑁆𑀢𑀸 𑀧𑀼𑀦 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑁂 𑀩𑁆𑀬𑀸𑀧𑀸𑀭𑀸𑀲𑀫𑁆𑀪𑀯𑀢𑁄 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀳𑁄𑀢𑀺. 𑀢𑀢𑁆𑀣 𑀚𑀸𑀢𑀸𑀦𑀦𑁆𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀚𑀸𑀢𑀸𑀦𑀁 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀬𑀼𑀕𑀦𑀤𑁆𑀥𑀪𑀸𑀯𑁂𑀦 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀦𑀸𑀦𑀸𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸. 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀫𑀼𑀢𑁆𑀢𑀺𑀭𑀲𑁂𑀦𑁂𑀓𑀭𑀲𑀝𑁆𑀞𑁂𑀦 𑀅𑀦𑀢𑀺𑀯𑀢𑁆𑀢𑀦𑁂𑀓𑀲𑀪𑀸𑀯𑀸𑀦𑀁 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀉𑀧𑀕𑀢𑀁 𑀢𑀚𑁆𑀚𑀁 𑀢𑀲𑁆𑀲𑀸𑀭𑀼𑀧𑁆𑀧𑀁 𑀢𑀤𑀦𑀼𑀭𑀽𑀧𑀁 𑀯𑀻𑀭𑀺𑀬𑀁 𑀢𑀣𑀸 𑀘𑀺𑀢𑁆𑀢𑀁 𑀬𑁄𑀕𑀻 𑀯𑀸𑀳𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀓𑀢𑁆𑀯𑀸 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀘 𑀯𑀺𑀲𑁂𑀲𑀪𑀸𑀕𑀺𑀬𑀪𑀸𑀯𑀢𑁆𑀢𑀸 𑀆𑀲𑁂𑀯𑀦𑀝𑁆𑀞𑁂𑀦 𑀘 𑀲𑀫𑁆𑀧𑀳𑀁𑀲𑀦𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 ‘‘𑀅𑀦𑀦𑁆𑀢𑀭𑀸𑀢𑀻𑀢𑀁 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀁 𑀏𑀓𑀲𑀦𑁆𑀢𑀢𑀺𑀯𑀲𑁂𑀦 𑀧𑀭𑀺𑀡𑀸𑀫𑁂𑀦𑁆𑀢𑀁 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀮𑀺𑀔𑀺𑀢𑀁. 𑀢𑀢𑁆𑀣 𑀳𑀺 𑀧𑀭𑀺𑀡𑀸𑀫𑁂𑀦𑁆𑀢𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀏𑀢𑀸𑀦𑀺 𑀯𑀘𑀦𑀸𑀦𑀺 𑀅𑀢𑀻𑀢𑀲𑁆𑀲 𑀦 𑀲𑀫𑁆𑀪𑀯𑀦𑁆𑀢𑀺, 𑀬𑀜𑁆𑀘 𑀢𑀤𑀦𑀦𑁆𑀢𑀭𑀁 𑀮𑀺𑀔𑀺𑀢𑀁 ‘‘𑀅𑀧𑁆𑀧𑀦𑀸𑀲𑀫𑀸𑀥𑀺𑀘𑀺𑀢𑁆𑀢𑀁 𑀉𑀧𑀕𑀘𑁆𑀙𑀫𑀸𑀦𑀁 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀁 𑀢𑀢𑁆𑀣 𑀧𑀓𑁆𑀔𑀦𑁆𑀤𑀢𑀺 𑀦𑀸𑀫𑀸’’𑀢𑀺. 𑀇𑀫𑀺𑀦𑀸𑀧𑀺 𑀢𑀁 𑀦 𑀬𑀼𑀚𑁆𑀚𑀢𑀺, ‘‘𑀧𑀝𑀺𑀧𑀢𑁆𑀢𑀺𑀓𑁆𑀔𑀡𑁂 𑀏𑀯 𑀅𑀢𑀻𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀁 𑀢𑀢𑁆𑀣 𑀧𑀓𑁆𑀔𑀦𑁆𑀤𑀢𑀻’’𑀢𑀺 𑀯𑀘𑀦𑀫𑁂𑀯 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀘𑀭𑀺𑀬𑁄. ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀲𑁆𑀲𑀸𑀧𑀺 𑀛𑀸𑀦𑀲𑁆𑀲 𑀏𑀢𑀸𑀦𑀺 𑀤𑀲 𑀮𑀓𑁆𑀔𑀡𑀸𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀢𑀢𑁄 𑀧𑀝𑁆𑀞𑀸𑀬 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀏𑀯𑀸’’𑀢𑀺𑀧𑀺 𑀯𑀼𑀢𑁆𑀢𑀁. ‘‘𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑁂𑀦 𑀲𑀳𑀕𑀢’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀜𑁆𑀘 ‘‘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀲𑀗𑁆𑀔𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀓𑀮𑁆𑀬𑀸𑀡𑀓𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀢𑀜𑁆𑀘. 𑀏𑀯𑀁 𑀢𑀺𑀯𑀺𑀥𑀘𑀺𑀢𑁆𑀢𑀁 𑀢𑀤𑀥𑀺𑀕𑀫𑀫𑀽𑀮𑀓𑀸𑀦𑀁 𑀕𑀼𑀡𑀸𑀦𑀁, 𑀉𑀧𑀭𑀺𑀛𑀸𑀦𑀸𑀥𑀺𑀕𑀫𑀲𑁆𑀲 𑀯𑀸 𑀧𑀤𑀝𑁆𑀞𑀸𑀦𑀝𑁆𑀞𑁂𑀦 𑀅𑀥𑀺𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀲𑀫𑁆𑀧𑀦𑁆𑀦𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀁 𑀦𑀸𑀫𑀸𑀢𑀺.

𑀅𑀤𑁆𑀥𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀏𑀢𑁆𑀣 𑀆𑀘𑀭𑀺𑀬𑀸 𑀏𑀯𑀫𑀸𑀳𑀼 ‘‘𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑀫𑀜𑁆𑀜𑀯𑀥𑀤𑀲𑁆𑀲𑀦𑀲𑀯𑀦𑀲𑀫𑁆𑀪𑀯𑁂 𑀲𑀢𑁆𑀣𑀼𑀦𑁄 𑀲𑀢𑀺 𑀢𑀲𑁆𑀲 𑀉𑀧𑀤𑁆𑀤𑀯𑀲𑁆𑀲 𑀅𑀪𑀸𑀯𑁂 𑀉𑀧𑀸𑀬𑀸𑀚𑀸𑀦𑀦𑀢𑁄 ‘𑀅𑀬𑀁 𑀅𑀲𑀩𑁆𑀩𑀜𑁆𑀜𑀽’𑀢𑀺 𑀳𑁂𑀢𑀼𑀧𑀢𑀺𑀭𑀽𑀧𑀓𑀫𑀳𑁂𑀢𑀼𑀁 𑀯𑀢𑁆𑀯𑀸 𑀥𑀫𑁆𑀫𑀺𑀲𑁆𑀲𑀭𑀲𑁆𑀲𑀸𑀧𑀺 𑀢𑀣𑀸𑀕𑀢𑀲𑁆𑀲 𑀓𑀫𑁆𑀫𑁂𑀲𑁆𑀯𑀦𑀺𑀲𑁆𑀲𑀭𑀺𑀬𑀁 𑀅𑀲𑀫𑁆𑀩𑀼𑀚𑁆𑀛𑀫𑀸𑀦𑀸 𑀅𑀲𑀩𑁆𑀩𑀤𑀲𑁆𑀲𑀺𑀢𑀫𑀥𑀺𑀘𑁆𑀘𑀫𑁄𑀳𑀸 𑀩𑀳𑀼𑀚𑀦𑀸 𑀅𑀯𑀻𑀘𑀺𑀧𑀭𑀸𑀬𑀦𑀸 𑀪𑀯𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀲𑁄 𑀪𑀕𑀯𑀸 𑀧𑀕𑁂𑀯 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀥𑀫𑀸𑀦𑀪𑀸𑀯𑀁 𑀜𑀢𑁆𑀯𑀸 𑀢𑀤𑀪𑀸𑀯𑁄𑀧𑀸𑀬𑀸𑀪𑀸𑀯𑀁 𑀧𑀦 𑀲𑀼𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀼𑀕𑀢𑀺𑀮𑀸𑀪𑀳𑁂𑀢𑀼𑀫𑁂𑀯𑁂𑀓𑀁 𑀓𑀢𑁆𑀯𑀸 𑀅𑀲𑀼𑀪𑀤𑁂𑀲𑀦𑀸𑀬 𑀯𑀸 𑀭𑀽𑀧𑀲𑀤𑁆𑀤𑀤𑀲𑁆𑀲𑀦𑀲𑀯𑀦𑁂𑀳𑀺 𑀦𑀺𑀧𑁆𑀧𑀬𑁄𑀚𑀦𑁂𑀳𑀺 𑀯𑀺𑀭𑀫𑀺𑀢𑁆𑀯𑀸 𑀧𑀕𑁂𑀯 𑀢𑀢𑁄 𑀯𑀺𑀭𑀫𑀡𑀢𑁄, 𑀲𑀼𑀕𑀢𑀺𑀮𑀸𑀪𑀳𑁂𑀢𑀼𑀓𑀭𑀡𑀢𑁄, 𑀅𑀯𑀲𑁆𑀲𑀁 𑀧𑀜𑁆𑀜𑀸𑀧𑀺𑀢𑀩𑁆𑀩𑀸𑀬 𑀢𑀢𑀺𑀬𑀧𑀸𑀭𑀸𑀚𑀺𑀓𑀧𑀜𑁆𑀜𑀢𑁆𑀢𑀺𑀬𑀸 𑀯𑀢𑁆𑀣𑀸𑀕𑀫𑀤𑀲𑁆𑀲𑀦𑀢𑁄 𑀘 𑀅𑀢𑁆𑀢𑀦𑁄 𑀲𑀩𑁆𑀩𑀤𑀲𑁆𑀲𑀺𑀢𑀁 𑀧𑀭𑀺𑀓𑁆𑀔𑀓𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀬 𑀢𑀫𑀤𑁆𑀥𑀫𑀸𑀲𑀁 𑀯𑁂𑀦𑁂𑀬𑁆𑀬𑀳𑀺𑀢𑀦𑀺𑀧𑁆𑀨𑀢𑁆𑀢𑀺𑀬𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀯𑀓𑀸𑀲𑀁 𑀓𑀢𑁆𑀯𑀸 𑀯𑀺𑀳𑀭𑀺𑀢𑀼𑀓𑀸𑀫𑁄 ‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼’𑀦𑁆𑀢𑀺𑀆𑀤𑀺𑀫𑀸𑀳𑀸’’𑀢𑀺. 𑀆𑀘𑀭𑀺𑀬𑀸 𑀦𑀸𑀫 𑀩𑀼𑀤𑁆𑀥𑀫𑀺𑀢𑁆𑀢𑀢𑁆𑀣𑁂𑀭𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀸𑀤𑀬𑁄 𑀕𑀡𑀧𑀸𑀫𑁄𑀓𑁆𑀔𑀸, 𑀅𑀝𑁆𑀞𑀓𑀣𑀸𑀘𑀭𑀺𑀬𑀲𑁆𑀲 𑀘 𑀲𑀦𑁆𑀢𑀺𑀓𑁂 𑀲𑀼𑀢𑀧𑀼𑀩𑁆𑀩𑀸. 𑀢𑀢𑁄 𑀅𑀜𑁆𑀜𑁂 𑀏𑀓𑁂𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀺…𑀧𑁂… 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀤𑀁 𑀧𑀭𑀢𑁄 ‘‘𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀯𑀻𑀢𑀭𑀸𑀕𑀸, 𑀢𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀏𑀯 𑀪𑀬𑀁, 𑀳𑁄𑀢𑀺 𑀮𑁄𑀫𑀳𑀁𑀲𑁄, 𑀳𑁄𑀢𑀺 𑀙𑀫𑁆𑀪𑀺𑀢𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀦 𑀬𑀼𑀚𑁆𑀚𑀢𑀺, 𑀇𑀤𑀜𑁆𑀘 𑀪𑀕𑀯𑀢𑁄 𑀅𑀲𑀼𑀪𑀓𑀣𑀸𑀭𑀫𑁆𑀫𑀡𑀧𑁆𑀧𑀬𑁄𑀚𑀦𑁂𑀦 𑀦 𑀲𑀫𑁂𑀢𑀻𑀢𑀺 𑀘𑁂? 𑀦, 𑀢𑀤𑀢𑁆𑀣𑀸𑀚𑀸𑀦𑀦𑀢𑁄. 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀸𑀦𑀫𑁆𑀧𑀺 𑀢𑁂𑀲𑀁 𑀅𑀭𑀺𑀬𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀲𑀺𑀦𑁂𑀳𑀢𑁆𑀢𑀸 𑀔𑀻𑀡𑀸𑀲𑀯𑀸𑀦𑀁 𑀯𑀺𑀬 𑀫𑀭𑀡𑀁 𑀧𑀝𑀺𑀘𑁆𑀘 𑀅𑀪𑀬𑀁 𑀦 𑀳𑁄𑀢𑀺, 𑀪𑀬𑀜𑁆𑀘 𑀧𑀦 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑀸𑀦𑀼𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀁 𑀅𑀦𑀝𑁆𑀝𑀻𑀬𑀦𑁆𑀢𑀸𑀦𑀁 𑀯𑀺𑀬 𑀦 𑀫𑀳𑀦𑁆𑀢𑀁 𑀳𑀼𑀢𑁆𑀯𑀸 𑀘𑀺𑀢𑁆𑀢𑀁 𑀫𑁄𑀳𑁂𑀲𑀺. 𑀅𑀧𑀸𑀬𑀼𑀧𑀕𑁂 𑀢𑁂 𑀲𑀢𑁆𑀢𑁂 𑀦𑀸𑀓𑀸𑀲𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀇𑀤𑀁 𑀧𑀼𑀭𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀢𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀏𑀯 𑀪𑀬𑀁, 𑀙𑀫𑁆𑀪𑀺𑀢𑀢𑁆𑀢𑀁, 𑀮𑁄𑀫𑀳𑀁𑀲𑁄 𑀘, 𑀢𑀲𑁆𑀫𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀅𑀲𑀼𑀪𑀓𑀣𑀁 𑀓𑀣𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺.

𑀅𑀣 𑀯𑀸 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀸𑀦𑀫𑁆𑀧𑀺 𑀢𑁂𑀲𑀁 𑀳𑁄𑀢𑀺 𑀏𑀯 𑀪𑀬𑀁, 𑀫𑀳𑀸𑀦𑀼𑀪𑀸𑀯𑀸 𑀯𑀻𑀢𑀭𑀸𑀕𑀸𑀢𑀺 𑀔𑀻𑀡𑀸𑀲𑀯𑀸𑀦𑀁 𑀫𑀳𑀦𑁆𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺, 𑀅𑀢𑀺𑀤𑀼𑀧𑁆𑀧𑀲𑀳𑁂𑀬𑁆𑀬𑀫𑀺𑀤𑀁 𑀫𑀭𑀡𑀪𑀬𑀁, 𑀬𑀢𑁄 𑀏𑀯𑀁𑀯𑀺𑀥𑀸𑀦𑀫𑁆𑀧𑀺 𑀅𑀯𑀻𑀢𑀭𑀸𑀕𑀢𑁆𑀢𑀸 𑀪𑀬𑀁 𑀳𑁄𑀢𑀻𑀢𑀺𑀧𑀺 𑀤𑀲𑁆𑀲𑁂𑀢𑀺. 𑀢𑀤𑀜𑁆𑀜𑁂 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀲𑀢𑀸𑀦𑀁 𑀅𑀜𑁆𑀜𑀢𑀭𑀸. 𑀢𑁂𑀦𑁂𑀤𑀁 𑀤𑀻𑀧𑁂𑀢𑀺 ‘‘𑀢𑀁 𑀢𑀣𑀸 𑀆𑀕𑀢𑀁 𑀅𑀲𑀺𑀳𑀢𑁆𑀣𑀁 𑀯𑀥𑀓𑀁 𑀧𑀲𑁆𑀲𑀺𑀢𑁆𑀯𑀸 𑀢𑀤𑀜𑁆𑀜𑁂𑀲𑀫𑁆𑀧𑀺 𑀳𑁄𑀢𑀺 𑀏𑀯 𑀪𑀬𑀁, 𑀧𑀕𑁂𑀯 𑀢𑁂𑀲𑀦𑁆𑀢𑀺 𑀓𑀢𑁆𑀯𑀸 𑀪𑀕𑀯𑀸 𑀧𑀞𑀫𑀫𑁂𑀯 𑀢𑁂𑀲𑀁 𑀅𑀲𑀼𑀪𑀓𑀣𑀁 𑀓𑀣𑁂𑀲𑀺, 𑀧𑀭𑀢𑁄 𑀢𑁂𑀲𑀁 𑀦𑀸𑀳𑁄𑀲𑀺. 𑀏𑀯𑀁 𑀫𑀳𑀸𑀦𑀺𑀲𑀁𑀲𑀸 𑀦𑁂𑀲𑀁 𑀅𑀲𑀼𑀪𑀓𑀣𑀸 𑀆𑀲𑀻’’𑀢𑀺. 𑀬𑁄 𑀧𑀦𑁂𑀢𑁆𑀣 𑀧𑀘𑁆𑀙𑀺𑀫𑁄 𑀦𑀬𑁄, 𑀲𑁄 ‘‘𑀢𑁂𑀲𑀼 𑀓𑀺𑀭 𑀪𑀺𑀓𑁆𑀔𑀽𑀲𑀼 𑀓𑁂𑀦𑀘𑀺𑀧𑀺 𑀓𑀸𑀬𑀯𑀺𑀓𑀸𑀭𑁄 𑀯𑀸 𑀯𑀘𑀻𑀯𑀺𑀓𑀸𑀭𑁄 𑀯𑀸 𑀦 𑀓𑀢𑁄, 𑀲𑀩𑁆𑀩𑁂 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀺𑀁𑀲𑀽’’𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀲𑀫𑁂𑀢𑀺.

𑀅𑀧𑀭𑁂 𑀧𑀦𑀸𑀳𑀽𑀢𑀺 𑀓𑀼𑀮𑀤𑁆𑀥𑀺𑀧𑀝𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀅𑀬𑀁 𑀓𑀺𑀭 𑀮𑀤𑁆𑀥𑀻’’𑀢𑀺 𑀯𑀘𑀦𑀁 ‘‘𑀫𑀸𑀭𑀥𑁂𑀬𑁆𑀬𑀁𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀣𑀁? 𑀅𑀬𑀁 𑀪𑀺𑀓𑁆𑀔𑀽 𑀅𑀖𑀸𑀢𑁂𑀦𑁆𑀢𑁄 𑀫𑀸𑀭𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀲𑁆𑀲𑀢𑀺 𑀅𑀓𑀼𑀲𑀮𑀓𑀭𑀡𑀢𑁄 𑀘. 𑀖𑀸𑀢𑁂𑀦𑁆𑀢𑁄 𑀧𑀦 𑀫𑀸𑀭𑀥𑁂𑀬𑁆𑀬𑀁 𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀢𑀺 𑀩𑀮𑀯𑀢𑁆𑀢𑀸 𑀓𑀫𑁆𑀫𑀲𑁆𑀲𑀸𑀢𑀺 𑀲𑀬𑀁 𑀫𑀸𑀭𑀧𑀓𑁆𑀔𑀺𑀓𑀢𑁆𑀢𑀸 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀧𑀦 ‘‘𑀬𑁂 𑀦 𑀫𑀢𑀸, 𑀢𑁂 𑀲𑀁𑀲𑀸𑀭𑀢𑁄 𑀦 𑀫𑀼𑀢𑁆𑀢𑀸’’𑀢𑀺 𑀅𑀢𑁆𑀢𑀦𑁄 𑀘 𑀮𑀤𑁆𑀥𑀺, 𑀢𑀲𑁆𑀫𑀸 𑀢𑀁 𑀢𑀢𑁆𑀣 𑀉𑀪𑀬𑁂𑀲𑀁 𑀫𑀕𑁆𑀕𑁂 𑀦𑀺𑀬𑁄𑀚𑁂𑀦𑁆𑀢𑀻 𑀏𑀯𑀫𑀸𑀳, 𑀢𑁂𑀦𑁂𑀯 ‘‘𑀫𑀸𑀭𑀧𑀓𑁆𑀔𑀺𑀓𑀸 𑀫𑀸𑀭𑁂𑀦 𑀲𑀫𑀸𑀦𑀮𑀤𑁆𑀥𑀺𑀓𑀸’’𑀢𑀺 𑀅𑀯𑀢𑁆𑀯𑀸 ‘‘𑀫𑀸𑀭𑀲𑁆𑀲𑀸 𑀦𑀼𑀯𑀢𑁆𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸. ‘‘𑀇𑀫𑀺𑀦𑀸 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀫𑀸 𑀫𑀸𑀭𑀲𑁆𑀲 𑀅𑀦𑀼𑀯𑀢𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀏𑀯𑀫𑀸𑀳𑀸’’𑀢𑀺 𑀓𑁂𑀘𑀺 𑀮𑀺𑀔𑀦𑁆𑀢𑀺. 𑀫𑀫 𑀲𑀦𑁆𑀢𑀺𑀓𑁂 𑀏𑀓𑀢𑁄 𑀉𑀧𑀝𑁆𑀞𑀸𑀦𑀫𑀸𑀕𑀘𑁆𑀙𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀉𑀤𑁆𑀤𑁂𑀲𑀸𑀤𑀺𑀁 𑀕𑀡𑁆𑀳𑀸𑀢𑀺.

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁫. 𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀬𑁂𑀲𑀁 𑀏𑀯𑀫𑀲𑁆𑀲 ‘‘𑀪𑀕𑀯𑀢𑀸 𑀆𑀘𑀺𑀓𑁆𑀔𑀺𑀢𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀧𑀘𑁆𑀘𑀬𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀚𑀻𑀯𑀺𑀢𑀓𑁆𑀔𑀬𑁄 𑀆𑀲𑀻’’𑀢𑀺, 𑀢𑁂𑀲𑀁 𑀢𑀁 𑀫𑀺𑀘𑁆𑀙𑀸𑀕𑀸𑀳𑀁 𑀦𑀺𑀲𑁂𑀥𑁂𑀢𑀺. 𑀓𑁂𑀯𑀮𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀧𑀘𑁆𑀘𑀬𑀸𑀯 𑀚𑀻𑀯𑀺𑀢𑀓𑁆𑀔𑀬𑁄 𑀆𑀲𑀺, 𑀇𑀤𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀢𑁂𑀲𑀁 𑀓𑁂𑀲𑀜𑁆𑀘𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸, 𑀓𑁂𑀲𑀜𑁆𑀘𑀺 𑀅𑀦𑀸𑀕𑀸𑀫𑀺𑀲𑀓𑀤𑀸𑀕𑀸𑀫𑀺𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑁆𑀧𑀢𑁆𑀢𑀺𑀬𑀸, 𑀓𑁂𑀲𑀜𑁆𑀘𑀺 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀸𑀬, 𑀓𑁂𑀲𑀜𑁆𑀘𑀺 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀅𑀢𑁆𑀢𑀲𑀺𑀦𑁂𑀳𑀧𑀅𑀬𑀸𑀤𑀸𑀦𑀸𑀬 𑀉𑀧𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸, 𑀓𑁂𑀲𑀜𑁆𑀘𑀺 𑀲𑀼𑀕𑀢𑀺𑀬𑀁 𑀉𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀅𑀳𑁄𑀲𑀻𑀢𑀺 𑀲𑀸𑀢𑁆𑀣𑀺𑀓𑀸𑀯 𑀫𑁂 𑀅𑀲𑀼𑀪𑀓𑀣𑀸, 𑀓𑀺𑀦𑁆𑀢𑀼 ‘‘𑀲𑀸𑀥𑀼, 𑀪𑀦𑁆𑀢𑁂 𑀪𑀕𑀯𑀸, 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑀢𑀽’’𑀢𑀺 𑀆𑀦𑀦𑁆𑀤𑁂𑀦 𑀬𑀸𑀘𑀺𑀢𑀢𑁆𑀢𑀸 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑀸𑀫𑀺, 𑀬𑀣𑀸 𑀯𑁄 𑀧𑀼𑀩𑁆𑀩𑁂 𑀆𑀘𑀺𑀓𑁆𑀔𑀺𑀢𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀸, 𑀏𑀯𑀁 𑀅𑀬𑀫𑁆𑀧𑀺 𑀔𑁄 𑀪𑀺𑀓𑁆𑀔𑀯𑁂𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀲𑁆𑀲𑀸𑀲𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀸 𑀳𑀺 𑀢𑀁 𑀅𑀲𑁆𑀲𑀸𑀲𑀁, 𑀧𑀲𑁆𑀲𑀸𑀲𑀁 𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀼𑀩𑁆𑀩𑀪𑀸𑀕𑁂, 𑀅𑀧𑀭𑀪𑀸𑀕𑁂 𑀧𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀪𑀯𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀘 𑀢𑀣𑀸 𑀯𑀼𑀢𑁆𑀢𑀸.

𑀅𑀲𑀼𑀪𑁂 𑀧𑀯𑀢𑁆𑀢𑀁 𑀅𑀲𑀼𑀪𑀦𑁆𑀢𑀺 𑀯𑀸 𑀧𑀯𑀢𑁆𑀢𑀁 𑀪𑀸𑀯𑀦𑀸𑀓𑀫𑁆𑀫𑀁 𑀅𑀲𑀼𑀪𑀓𑀫𑁆𑀫𑀁, 𑀢𑀤𑁂𑀯 𑀅𑀜𑁆𑀜𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀓𑀸𑀭𑀡𑀝𑁆𑀞𑁂𑀦 𑀞𑀸𑀦𑀢𑁆𑀢𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁, 𑀆𑀭𑀫𑁆𑀫𑀡𑀁 𑀯𑀸 𑀅𑀲𑀼𑀪𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀝𑁆𑀞𑁂𑀦 𑀞𑀸𑀦𑀦𑁆𑀢𑀺 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀇𑀥 𑀅𑀲𑀼𑀪𑀚𑁆𑀛𑀸𑀦𑀁, 𑀢𑁂𑀦𑁂𑀯 ‘‘𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀧𑀝𑀺𑀮𑀸𑀪𑀯𑀲𑁂𑀦. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀦𑁆𑀢𑀓𑀸𑀮𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀓𑀸𑀬𑀤𑀭𑀣𑀧𑁆𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀦𑀺𑀩𑁆𑀩𑀼𑀢𑁄. 𑀧𑀭𑀺𑀓𑀫𑁆𑀫𑀁 𑀯𑀸𑀢𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀺𑀭 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑀁. 𑀢𑀤𑀸 𑀳𑀺 𑀦𑀺𑀭𑀲𑁆𑀲𑀸𑀤𑀢𑁆𑀢𑀸 𑀅𑀲𑀦𑁆𑀢𑀁, 𑀅𑀧𑁆𑀧𑀡𑀺𑀳𑀺𑀢𑀜𑁆𑀘. 𑀬𑀣𑀸 𑀉𑀧𑀘𑀸𑀭𑁂 𑀦𑀻𑀯𑀭𑀡𑀯𑀺𑀕𑀫𑁂𑀦, 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀘 𑀲𑀦𑁆𑀢𑀢𑀸 𑀳𑁄𑀢𑀺, 𑀦 𑀢𑀣𑀸 𑀇𑀥, 𑀇𑀤𑀁 𑀧𑀦 ‘‘𑀆𑀤𑀺𑀲𑀫𑀦𑁆𑀦𑀸𑀳𑀸𑀭𑀢𑁄’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀅𑀲𑁂𑀘𑀦𑀓𑁄𑀢𑀺 𑀅𑀢𑀺𑀢𑁆𑀢𑀺𑀓𑀭𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀑𑀚𑀯𑀦𑁆𑀢𑁄’’𑀢𑀺. 𑀘𑁂𑀢𑀲𑀺𑀓𑀲𑀼𑀔𑀁 𑀛𑀸𑀦𑀓𑁆𑀔𑀡𑁂𑀧𑀺 𑀅𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀉𑀪𑁄𑀧𑀺 𑀛𑀸𑀦𑀸 𑀯𑀼𑀝𑁆𑀞𑀺𑀢𑀲𑁆𑀲𑁂𑀯 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀣𑁂𑀦 𑀲𑀓𑀲𑀦𑁆𑀢𑀸𑀦𑁂 𑀅𑀯𑀺𑀓𑁆𑀔𑀫𑁆𑀪𑀺𑀢𑁂. 𑀇𑀢𑀭𑀣𑀸 𑀧𑀸𑀧𑀓𑀸𑀦𑀁 𑀛𑀸𑀦𑁂𑀦 𑀲𑀳𑀼𑀧𑁆𑀧𑀢𑁆𑀢𑀺 𑀲𑀺𑀬𑀸. 𑀔𑀦𑁆𑀥𑀸𑀤𑀻𑀦𑀁 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀢𑁆𑀢𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁, 𑀯𑀺𑀲𑁂𑀲𑁂𑀦 𑀬𑀲𑁆𑀲 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀸. ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺𑀆𑀤𑀺𑀘𑀢𑀼𑀓𑁆𑀓𑀯𑀲𑁂𑀦 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀺𑀬𑀫𑀕𑁆𑀕𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀲𑁂𑀲𑀸𑀦𑀫𑁂𑀢𑀁 𑀦𑀢𑁆𑀣𑀻’’𑀢𑀺 𑀮𑀺𑀔𑀺𑀢𑀁.

𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑁄 𑀘𑀸𑀢𑀺 𑀲𑁄𑀴𑀲𑀯𑀢𑁆𑀣𑀼𑀓𑀲𑁆𑀲 𑀢𑀺𑀢𑁆𑀣𑀺𑀬𑀸𑀦𑀁 𑀦𑀢𑁆𑀣𑀺𑀢𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑀧𑀞𑀫𑀸𑀦𑀁 𑀧𑀦 𑀘𑀢𑀼𑀦𑁆𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀮𑁄𑀓𑀺𑀬𑀚𑁆𑀛𑀸𑀦𑀫𑁂𑀯 𑀢𑁂𑀲𑀁 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀮𑁄𑀓𑀼𑀢𑁆𑀢𑀭𑀧𑀤𑀝𑁆𑀞𑀸𑀦𑀁 𑀦𑀢𑁆𑀣𑀺 𑀏𑀯. ‘‘𑀨𑀮𑀫𑀼𑀢𑁆𑀢𑀫𑀦𑁆𑀢𑀺 𑀨𑀮𑁂 𑀉𑀢𑁆𑀢𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀢𑀼𑀢𑁆𑀢𑀬𑀸𑀦𑀼𑀓𑀽𑀮𑀦𑁆𑀢𑀺 𑀕𑀺𑀫𑁆𑀳𑁂 𑀅𑀭𑀜𑁆𑀜𑁂, 𑀳𑁂𑀫𑀦𑁆𑀢𑁂 𑀭𑀼𑀓𑁆𑀔𑀫𑀽𑀮𑁂, 𑀯𑀲𑀦𑁆𑀢𑀓𑀸𑀮𑁂 𑀲𑀼𑀜𑁆𑀜𑀸𑀕𑀸𑀭𑁂 𑀕𑀢𑁄. 𑀲𑁂𑀫𑁆𑀳𑀥𑀸𑀢𑀼𑀓𑀲𑁆𑀲 𑀅𑀭𑀜𑁆𑀜𑀁, 𑀧𑀺𑀢𑁆𑀢𑀥𑀸𑀢𑀼𑀓𑀲𑁆𑀲 𑀭𑀼𑀓𑁆𑀔𑀫𑀽𑀮𑀁, 𑀯𑀸𑀢𑀥𑀸𑀢𑀼𑀓𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑀁 𑀅𑀦𑀼𑀓𑀽𑀮𑀁. 𑀫𑁄𑀳𑀘𑀭𑀺𑀢𑀲𑁆𑀲 𑀅𑀭𑀜𑁆𑀜𑀁 𑀅𑀦𑀼𑀓𑀽𑀮𑀁 𑀫𑀳𑀸𑀅𑀭𑀜𑁆𑀜𑁂 𑀘𑀺𑀢𑁆𑀢𑀁 𑀦 𑀲𑀗𑁆𑀓𑀼𑀝𑀢𑀺, 𑀤𑁄𑀲𑀘𑀭𑀺𑀢𑀲𑁆𑀲 𑀭𑀼𑀓𑁆𑀔𑀫𑀽𑀮𑀁, 𑀭𑀸𑀕𑀘𑀭𑀺𑀢𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑀁. 𑀞𑀸𑀦𑀘𑀗𑁆𑀓𑀫𑀸𑀦𑀺 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀺, 𑀲𑀬𑀦𑀁 𑀮𑀻𑀦𑀧𑀓𑁆𑀔𑀺𑀓𑀁, 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂𑀦 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑀁, 𑀉𑀚𑀼𑀓𑀸𑀬𑀁 𑀧𑀡𑀺𑀥𑀸𑀦𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀧𑀯𑀢𑁆𑀢𑀦𑀲𑀼𑀔𑀁 ‘‘𑀧𑀭𑀺𑀫𑀼𑀔𑀁 𑀲𑀢𑀺’’𑀦𑁆𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀽𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀓𑀸𑀭𑀻𑀢𑀺 𑀓𑀭𑀡𑀲𑀻𑀮𑁄. 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀅𑀲𑁆𑀲𑀲𑀢𑀺 𑀧𑀲𑁆𑀲𑀲𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀲𑀢𑁄 𑀓𑀸𑀭𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀅𑀲𑁆𑀲𑀲𑀢𑀺 𑀧𑀲𑁆𑀲𑀲𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀞𑀫𑀘𑀢𑀼𑀓𑁆𑀓𑀁 𑀏𑀯 𑀮𑀩𑁆𑀪𑀢𑀺, 𑀦 𑀲𑁂𑀲𑀸𑀦𑀻’’𑀢𑀺 𑀘 ‘‘𑀤𑀻𑀖𑀁𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀅𑀮𑁄𑀧𑀲𑀫𑀸𑀲𑀁 𑀓𑀢𑁆𑀯𑀸’’𑀇𑀢𑀺 𑀘 ‘‘𑀏𑀓𑀢𑁆𑀣𑀢𑀸𑀬 𑀅𑀯𑀺𑀓𑁆𑀔𑁂𑀧’’𑀦𑁆𑀢𑀺 𑀘 ‘‘𑀅𑀲𑀫𑁆𑀪𑁄𑀕𑀯𑀲𑁂𑀦 𑀧𑀚𑀸𑀦𑀢𑁄’’𑀢𑀺 𑀘 ‘‘𑀢𑁂𑀦 𑀜𑀸𑀡𑁂𑀦𑀸’’𑀢𑀺 𑀘 ‘‘𑀧𑀚𑀸𑀦𑀢𑁄𑀢𑀺 𑀯𑀼𑀢𑁆𑀢𑀜𑀸𑀡𑁂𑀦𑀸’’𑀢𑀺 𑀘 ‘‘𑀲𑀢𑁄𑀓𑀸𑀭𑀻𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀳𑀺𑀓𑀸𑀭𑀻’’𑀢𑀺 𑀘 ‘‘𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀦𑁄 𑀅𑀲𑁆𑀲𑀸𑀲𑀸𑀯 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀅𑀲𑁆𑀲𑀸𑀲𑀸’’𑀢𑀺 𑀘 𑀮𑀺𑀔𑀺𑀢𑀁. 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀫𑁆𑀧𑀺 𑀬𑀼𑀚𑁆𑀚𑀢𑁂𑀯, 𑀢𑁂𑀦 𑀞𑀸𑀦𑁂𑀦 𑀧𑀝𑀺𑀲𑀺𑀤𑁆𑀥𑀁. 𑀢𑀸𑀮𑀼𑀁 𑀆𑀳𑀘𑁆𑀘 𑀦𑀺𑀩𑁆𑀩𑀸𑀬𑀦𑀢𑁄 𑀓𑀺𑀭 𑀧𑁄𑀢𑀓𑁄 𑀲𑀫𑁆𑀧𑀢𑀺𑀚𑀸𑀢𑁄𑀯 𑀔𑀺𑀧𑀺𑀢𑀲𑀤𑁆𑀤𑀁 𑀓𑀭𑁄𑀢𑀺, 𑀙𑀦𑁆𑀤𑀧𑀸𑀫𑁄𑀚𑁆𑀚𑀯𑀲𑁂𑀦 𑀙 𑀧𑀼𑀭𑀺𑀫𑀸 𑀢𑀬𑁄𑀢𑀺 𑀦𑀯. 𑀏𑀓𑁂𑀦𑀸𑀓𑀸𑀭𑁂𑀦𑀸𑀢𑀺 𑀅𑀲𑁆𑀲𑀸𑀲𑀯𑀲𑁂𑀦 𑀯𑀸 𑀧𑀲𑁆𑀲𑀸𑀲𑀯𑀲𑁂𑀦 𑀯𑀸 𑀏𑀯𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀪𑀸𑀯𑀬𑀢𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀺.

𑀓𑀸𑀬𑁄𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. 𑀉𑀧𑀝𑁆𑀞𑀸𑀦𑀁 𑀲𑀢𑀺. 𑀤𑀻𑀖𑀦𑁆𑀢𑀺 𑀲𑀻𑀖𑀁 𑀕𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁. 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂𑀢𑀺 𑀓𑀸𑀮𑀲𑀗𑁆𑀔𑀸𑀢𑁂 𑀯𑀺𑀬 𑀓𑀸𑀮𑀓𑁄𑀝𑁆𑀞𑀸𑀲𑁂𑀢𑀺 𑀅𑀢𑁆𑀣𑁄, 𑀤𑀻𑀖𑀓𑀸𑀮𑁂 𑀯𑀸𑀢𑀺 𑀅𑀢𑁆𑀣𑁄. 𑀏𑀓𑁄 𑀳𑀺 𑀅𑀲𑁆𑀲𑀸𑀲𑀫𑁂𑀯𑀽𑀧𑀮𑀓𑁆𑀔𑁂𑀢𑀺, 𑀏𑀓𑁄 𑀧𑀲𑁆𑀲𑀸𑀲𑀁, 𑀏𑀓𑁄 𑀉𑀪𑀬𑀁, 𑀢𑀲𑁆𑀫𑀸 ‘‘𑀯𑀺𑀪𑀸𑀕𑀁 𑀅𑀓𑀢𑁆𑀯𑀸’’𑀢𑀺 𑀯𑀸 𑀯𑀼𑀢𑁆𑀢𑀁, 𑀙𑀦𑁆𑀤𑁄𑀢𑀺 𑀏𑀯𑀁 𑀅𑀲𑁆𑀲𑀸𑀲𑀢𑁄, 𑀧𑀲𑁆𑀲𑀸𑀲𑀢𑁄 𑀘 𑀅𑀲𑁆𑀲𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀲𑁂𑀦 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀧𑀸𑀫𑁄𑀚𑁆𑀚𑀦𑁆𑀢𑀺. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀲𑀬𑀢𑁆𑀢𑀸 𑀘𑀺𑀢𑁆𑀢𑀁 𑀯𑀺𑀯𑀢𑁆𑀢𑀢𑀺, 𑀕𑀡𑀦𑀁 𑀧𑀳𑀸𑀬 𑀨𑀼𑀝𑁆𑀞𑀝𑁆𑀞𑀸𑀦𑀫𑁂𑀯 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀓𑁂𑀯𑀮𑀁 𑀉𑀧𑁂𑀓𑁆𑀔𑀸𑀯 𑀲𑀡𑁆𑀞𑀸𑀢𑀺. 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸𑀢𑀺 ‘‘𑀧𑀢𑁆𑀢𑀲𑁆𑀲 𑀢𑀬𑁄 𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀘𑀢𑁆𑀢𑀸𑀭𑁄 𑀲𑀡𑁆𑀞𑀸𑀦𑀸𑀢𑀺 𑀅𑀢𑁆𑀣𑁄.

𑀢𑀣𑀸𑀪𑀽𑀢𑀲𑁆𑀲𑀸𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀪𑀸𑀯𑀬𑀢𑁄. 𑀲𑀁𑀯𑀭𑁄𑀢𑀺 𑀲𑀢𑀺𑀲𑀁𑀯𑀭𑁄. 𑀅𑀣 𑀯𑀸 𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑀸𑀦𑀁, 𑀤𑀼𑀢𑀺𑀬𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁, 𑀢𑀢𑀺𑀬𑁂𑀦 𑀧𑀻𑀢𑀺𑀬𑀸, 𑀘𑀢𑀼𑀢𑁆𑀣𑁂𑀦 𑀲𑀼𑀔𑀤𑀼𑀓𑁆𑀔𑀸𑀦𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀲𑀜𑁆𑀜𑀸𑀬, 𑀧𑀝𑀺𑀖𑀲𑀜𑁆𑀜𑀸𑀬, 𑀦𑀸𑀦𑀢𑁆𑀢𑀲𑀜𑁆𑀜𑀸𑀬 𑀯𑀸 𑀧𑀳𑀸𑀦𑀁. ‘‘𑀲𑀻𑀮𑀦𑁆𑀢𑀺 𑀯𑁂𑀭𑀫𑀡𑀺 𑀲𑀻𑀮𑀁, 𑀘𑁂𑀢𑀦𑀸 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮’’𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁯 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀯𑀼𑀢𑁆𑀢𑀯𑀺𑀥𑀺𑀦𑀸𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀅𑀢𑁆𑀣𑀢𑁄 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀥𑀫𑁆𑀫𑀸 𑀉𑀧𑀥𑀸𑀭𑀡𑀲𑀫𑀸𑀥𑀸𑀦𑀲𑀗𑁆𑀔𑀸𑀢𑁂𑀦 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺 𑀏𑀢𑁆𑀣𑀸𑀧𑀺 𑀘𑁂𑀢𑀦𑀸𑀲𑀻𑀮𑀫𑁂𑀯, 𑀓𑀢𑁆𑀣𑀘𑀺 𑀯𑀺𑀭𑀢𑀺𑀲𑀻𑀮𑀫𑁆𑀧𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀣𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼𑀧𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀯𑀺𑀭𑀢𑀺𑀧𑁆𑀧𑀲𑀗𑁆𑀕𑁄 𑀅𑀳𑁄𑀲𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻𑀢𑀺 𑀓𑀢𑁆𑀯𑀸 𑀢𑀲𑁆𑀲𑀸𑀧𑀺 𑀯𑀺𑀭𑀢𑀺𑀧𑁆𑀧𑀲𑀗𑁆𑀕𑁄. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀆𑀦𑀸𑀧𑀸𑀦𑀸𑀭𑀫𑁆𑀫𑀡𑁂. 𑀢𑀸𑀬 𑀲𑀢𑀺𑀬𑀸𑀢𑀺 𑀢𑀢𑁆𑀣 𑀉𑀧𑁆𑀧𑀦𑁆𑀦𑀲𑀢𑀺𑀬𑀸. ‘‘𑀢𑁂𑀦 𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀆𑀯𑀚𑁆𑀚𑀦𑁂𑀦𑀸’’𑀢𑀺 𑀮𑀺𑀔𑀺𑀢𑀁. 𑀏𑀢𑁂𑀦 𑀦𑀸𑀦𑀸𑀯𑀚𑁆𑀚𑀦𑀧𑁆𑀧𑀯𑀢𑁆𑀢𑀺𑀤𑀻𑀧𑀦𑀢𑁄 𑀦𑀸𑀦𑀸𑀚𑀯𑀦𑀯𑀸𑀭𑁂𑀳𑀺𑀧𑀺 𑀲𑀺𑀓𑁆𑀔𑀢𑀺 𑀦𑀸𑀫𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺, 𑀬𑁂𑀦 𑀧𑀦 𑀫𑀦𑀲𑀺𑀓𑀸𑀭𑁂𑀦 𑀯𑀸. 𑀜𑀸𑀡𑀼𑀧𑁆𑀧𑀸𑀤𑀦𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀬𑀸𑀯 𑀧𑀭𑀺𑀬𑁄𑀲𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀆𑀦𑀸𑀧𑀸𑀦𑀸𑀭𑀫𑁆𑀫𑀡𑁂. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀦𑀬𑁂𑀦𑀸’’𑀢𑀺 𑀮𑀺𑀔𑀺𑀢𑀁. 𑀢𑀢𑁆𑀭𑀸𑀢𑀺 𑀢𑁂𑀲𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀸. 𑀢𑀜𑁆𑀳𑀺 ‘‘𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂’’𑀢𑀺 𑀇𑀫𑀺𑀦𑀸 𑀲𑀼𑀝𑁆𑀞𑀼 𑀲𑀫𑁂𑀢𑀺. ‘‘𑀧𑀞𑀫𑀯𑀸𑀤𑁄 𑀤𑀻𑀖𑀪𑀸𑀡𑀓𑀸𑀦𑀁. 𑀢𑁂 𑀳𑀺 ‘𑀧𑀞𑀫𑀚𑁆𑀛𑀸𑀦𑀁 𑀮𑀪𑀺𑀢𑁆𑀯𑀸 𑀦𑀸𑀦𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀤𑀼𑀢𑀺𑀬𑀢𑁆𑀣𑀸𑀬 𑀯𑀸𑀬𑀸𑀫𑀢𑁄 𑀉𑀧𑀘𑀸𑀭𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀲𑁂𑀦 𑀑𑀴𑀸𑀭𑀺𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀧𑀯𑀢𑁆𑀢𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀲𑁂𑀦 𑀑𑀴𑀸𑀭𑀺𑀓𑀸’𑀢𑀺 𑀯𑀤𑀦𑁆𑀢𑀺. ‘𑀫𑀚𑁆𑀛𑀺𑀫𑀪𑀸𑀡𑀓𑀸 𑀛𑀸𑀦𑀮𑀸𑀪𑀺𑀲𑁆𑀲 𑀲𑀫𑀸𑀧𑀚𑁆𑀚𑀦𑀓𑀸𑀮𑁂, 𑀏𑀓𑀸𑀲𑀦𑀧𑀝𑀺𑀮𑀸𑀪𑁂 𑀘 𑀉𑀧𑀭𑀽𑀧𑀭𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑀦𑁆𑀢𑀪𑀸𑀯𑀢𑁄 𑀧𑀞𑀫𑀢𑁄 𑀤𑀼𑀢𑀺𑀬𑀲𑁆𑀲𑀼𑀧𑀘𑀸𑀭𑁂 𑀲𑀼𑀔𑀼𑀫𑀢𑀁 𑀯𑀤𑀦𑁆𑀢𑀻’’’𑀢𑀺 𑀮𑀺𑀔𑀺𑀢𑀁.

𑀯𑀺𑀧𑀲𑁆𑀲𑀦𑀸𑀬𑀁 𑀧𑀦𑀸𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀅𑀬𑀁 𑀓𑀫𑁄, 𑀅𑀜𑁆𑀜𑀲𑁆𑀲 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀓𑀁 𑀭𑀽𑀧𑀁, 𑀦 𑀇𑀢𑁄 𑀅𑀜𑁆𑀜𑀦𑁆𑀢𑀺 𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 ‘‘𑀲𑀓𑀮𑀭𑀽𑀧𑀧𑀭𑀺𑀕𑁆𑀕𑀳𑁂’’𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁂𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀢𑁄 𑀧𑀪𑀼𑀢𑀺 𑀩𑀮𑀯𑀢𑀻 𑀯𑀺𑀧𑀲𑁆𑀲𑀦𑀸. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑀩𑁆𑀩𑁂𑀲𑀁𑀬𑁂𑀯 𑀧𑀦 𑀫𑀢𑁂𑀦 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂𑀢𑀺𑀆𑀤𑀺𑀦𑀸. 𑀲𑁄𑀥𑀦𑀸 𑀦𑀸𑀫 𑀯𑀺𑀲𑁆𑀲𑀚𑁆𑀚𑀦𑀁. 𑀅𑀲𑁆𑀲𑀸𑀢𑀺 ‘‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭’’𑀦𑁆𑀢𑀺 𑀧𑀤𑀲𑁆𑀲.

𑀧𑀼𑀭𑀢𑁄 𑀦𑀫𑀦𑀸 𑀆𑀦𑀫𑀦𑀸. 𑀢𑀺𑀭𑀺𑀬𑀁 𑀦𑀫𑀦𑀸 𑀯𑀺𑀦𑀫𑀦𑀸. 𑀲𑀼𑀝𑁆𑀞𑀼 𑀦𑀫𑀦𑀸 𑀲𑀦𑁆𑀦𑀫𑀦𑀸. 𑀧𑀘𑁆𑀙𑀸 𑀦𑀫𑀦𑀸 𑀧𑀡𑀫𑀦𑀸. 𑀚𑀸𑀡𑀼𑀓𑁂 𑀕𑀳𑁂𑀢𑁆𑀯𑀸 𑀞𑀸𑀦𑀁 𑀯𑀺𑀬 𑀇𑀜𑁆𑀚𑀦𑀸𑀢𑀺 𑀆𑀦𑀫𑀦𑀸𑀤𑀻𑀦𑀁 𑀆𑀯𑀺𑀪𑀸𑀯𑀢𑁆𑀣𑀫𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀭𑀽𑀧𑁂𑀳𑀺 𑀆𑀦𑀫𑀦𑀸𑀤𑀺 𑀯𑀸 𑀓𑀫𑁆𑀧𑀦𑀸𑀤𑀺 𑀯𑀸 𑀳𑁄𑀢𑀺, 𑀢𑀣𑀸𑀭𑀽𑀧𑁂 𑀧𑀲𑁆𑀲𑀫𑁆𑀪𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀺 𑀓𑀺𑀭𑀸𑀢𑀺 𑀇𑀢𑀺 𑀘𑁂. 𑀏𑀯𑀁 𑀲𑀦𑁆𑀢𑁂𑀢𑀺 𑀲𑀦𑁆𑀢𑀲𑀼𑀔𑀼𑀫𑀫𑁆𑀧𑀺 𑀘𑁂 𑀧𑀲𑁆𑀲𑀫𑁆𑀪𑀢𑀺. 𑀧𑀪𑀸𑀯𑀦𑀸𑀢𑀺 𑀉𑀧𑁆𑀧𑀸𑀤𑀦𑀁. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀽𑀧𑀲𑀦𑁆𑀢𑀢𑁆𑀢𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀪𑀸𑀯𑀦𑀸 𑀦 𑀳𑁄𑀢𑀺. 𑀬𑀲𑁆𑀫𑀸 𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀲𑀫𑀸𑀧𑀚𑁆𑀚𑀢𑀺, 𑀲𑀫𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀦 𑀯𑀼𑀝𑁆𑀞𑀳𑀦𑁆𑀢𑀺. 𑀇𑀢𑀺 𑀓𑀺𑀭𑀸𑀢𑀺 𑀏𑀯𑀫𑁂𑀢𑀁 𑀢𑀸𑀯 𑀯𑀘𑀦𑀦𑁆𑀢𑀺 𑀢𑀤𑁂𑀢𑀁. 𑀲𑀤𑁆𑀤𑁄𑀯 𑀲𑀤𑁆𑀤𑀦𑀺𑀫𑀺𑀢𑁆𑀢𑀁, ‘‘𑀲𑀢𑁄 𑀅𑀲𑁆𑀲𑀲𑀢𑀺 𑀲𑀢𑁄 𑀧𑀲𑁆𑀲𑀲𑀢𑀻’’𑀢𑀺 𑀧𑀤𑀸𑀦𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀧𑀤𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀧𑁆𑀧𑀝𑀺𑀧𑀻𑀴𑀦𑀦𑁆𑀢𑀺 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀁 𑀓𑀺𑀜𑁆𑀘𑀸𑀧𑀺 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺𑀧𑀺 𑀅𑀢𑁆𑀣𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪) 𑀯𑀘𑀦𑀢𑁄. 𑀢𑀣𑀸𑀧𑀺 ‘‘𑀦 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑀉𑀤𑁆𑀤𑀺𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀬𑀸𑀯 𑀦 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀏𑀢𑁆𑀣 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀆𑀪𑀺𑀲𑀫𑀸𑀘𑀸𑀭𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀬𑀁 𑀧𑀦𑁂𑀢𑁆𑀣 𑀆𑀧𑀢𑁆𑀢𑀺𑀝𑁆𑀞𑀸𑀦𑀺𑀬𑀁 𑀦 𑀳𑁄𑀢𑀺, 𑀢𑀁 𑀅𑀫𑀺𑀲𑁆𑀲𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀬𑀣𑀸𑀯𑀼𑀢𑁆𑀢𑁂𑀦𑀸𑀢𑀺 𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸. 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀺𑀓𑁄. 𑀧𑀜𑁆𑀘𑀲𑀦𑁆𑀥𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀛𑀸𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑀫𑁆𑀧𑀺 𑀢𑀤𑀢𑁆𑀣𑀚𑁄𑀢𑀺𑀓𑀸𑀧𑀺 𑀧𑀭𑀺𑀬𑀢𑁆𑀢𑀺 𑀇𑀥 𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫. 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀢𑀸𑀤𑀺 𑀲𑁂𑀦𑀸𑀲𑀦𑀁. 𑀲𑀁𑀓𑀺𑀮𑀺𑀝𑁆𑀞𑀘𑀻𑀯𑀭𑀥𑁄𑀯𑀦𑀸𑀤𑀬𑁄 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀸. ‘‘𑀅𑀦𑁆𑀢𑀭𑀸 𑀧𑀢𑀺𑀢𑀁 𑀦𑀼 𑀔𑁄’’𑀢𑀺 𑀯𑀺𑀓𑀫𑁆𑀧𑀢𑀺.

𑀅𑀚𑁆𑀛𑀢𑁆𑀢𑀁 𑀯𑀺𑀓𑁆𑀔𑁂𑀧𑀕𑀢𑁂𑀦𑀸𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀯𑀺𑀓𑁆𑀔𑁂𑀧𑀕𑀢𑁂𑀦. 𑀲𑀸𑀭𑀤𑁆𑀥𑀸 𑀅𑀲𑀫𑀸𑀳𑀺𑀢𑀢𑁆𑀢𑀸. 𑀉𑀧𑀦𑀺𑀩𑀦𑁆𑀥𑀦𑀣𑀫𑁆𑀪𑀫𑀽𑀮𑀁 𑀦𑀸𑀫 𑀦𑀸𑀲𑀺𑀓𑀕𑁆𑀕𑀁, 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀸. 𑀢𑀢𑁆𑀣𑁂𑀯𑀸𑀢𑀺 𑀦𑀸𑀲𑀺𑀓𑀕𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑁂. ‘‘𑀤𑁄𑀮𑀸𑀨𑀮𑀓𑀲𑁆𑀲 𑀏𑀓𑀧𑀲𑁆𑀲𑁂 𑀏𑀯 𑀉𑀪𑁄 𑀓𑁄𑀝𑀺𑀬𑁄 𑀫𑀚𑁆𑀛𑀜𑁆𑀘 𑀧𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺.

𑀇𑀥 𑀧𑀦𑀸𑀢𑀺 𑀓𑀓𑀘𑀽𑀧𑀫𑁂. 𑀤𑁂𑀲𑀢𑁄𑀢𑀺 𑀨𑀼𑀲𑀦𑀓𑀝𑁆𑀞𑀸𑀦𑀢𑁄. ‘‘𑀦𑀺𑀫𑀺𑀢𑁆𑀢𑀁 𑀧𑀝𑁆𑀞𑀧𑁂𑀢𑀩𑁆𑀩𑀦𑁆𑀢𑀺 𑀦𑀺𑀫𑀺𑀢𑁆𑀢𑁂 𑀲𑀢𑀺 𑀧𑀝𑁆𑀞𑀧𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀕𑀭𑀽𑀳𑀺 𑀪𑀸𑀯𑁂𑀢𑀩𑁆𑀩𑀢𑁆𑀢𑀸 𑀕𑀭𑀼𑀓𑀪𑀸𑀯𑀦𑀁. 𑀏𑀓𑀘𑁆𑀘𑁂 𑀆𑀳𑀽𑀢𑀺 𑀏𑀓𑀘𑁆𑀘𑁂 𑀛𑀸𑀬𑀺𑀦𑁄 𑀆𑀳𑀼.

‘‘𑀲𑀜𑁆𑀜𑀸𑀦𑀸𑀦𑀢𑀸𑀬𑀸’’𑀢𑀺 𑀯𑀘𑀦𑀢𑁄 𑀏𑀓𑀘𑁆𑀘𑁂𑀳𑀺 𑀯𑀼𑀢𑁆𑀢𑀫𑁆𑀧𑀺 𑀧𑀫𑀸𑀡𑀫𑁂𑀯, 𑀲𑀗𑁆𑀕𑀻𑀢𑀺𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀓𑀣𑀸𑀬 𑀅𑀦𑀸𑀕𑀢𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀁. ‘‘𑀫𑀬𑁆𑀳𑀁 𑀢𑀸𑀭𑀓𑀭𑀽𑀧𑀁 𑀦𑀼 𑀔𑁄 𑀉𑀧𑀝𑁆𑀞𑀸𑀢𑀻’’𑀢𑀺𑀆𑀤𑀺𑀧𑀭𑀺𑀓𑀧𑁆𑀧𑁂 𑀅𑀲𑀢𑀺𑀧𑀺 𑀥𑀸𑀢𑀼𑀦𑀸𑀦𑀢𑁆𑀢𑁂𑀦 𑀏𑀢𑀸𑀲𑀁 𑀥𑀸𑀢𑀽𑀦𑀁 𑀉𑀧𑁆𑀧𑀢𑁆𑀢𑀺 𑀯𑀺𑀬 𑀓𑁂𑀯𑀮𑀁 𑀪𑀸𑀯𑀬𑀢𑁄 𑀢𑀣𑀸 𑀢𑀣𑀸 𑀉𑀧𑀝𑁆𑀞𑀸𑀢𑀺. ‘‘𑀦 𑀦𑀺𑀫𑀺𑀢𑁆𑀢’𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀇𑀥 𑀯𑀼𑀢𑁆𑀢𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁂𑀯.

𑀦𑀺𑀫𑀺𑀢𑁆𑀢𑁂 𑀧𑀝𑀺𑀪𑀸𑀕𑁂. 𑀦𑀸𑀦𑀸𑀓𑀸𑀭𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑀸𑀦𑀸𑀯𑀺𑀥𑀢𑀁. 𑀯𑀺𑀪𑀸𑀯𑀬𑀦𑁆𑀢𑀺 𑀚𑀸𑀦𑀁 𑀧𑀓𑀸𑀲𑀬𑀁. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀢𑀺 𑀢𑀢𑁄 𑀲𑀫𑁆𑀪𑀽𑀢𑁂 𑀦𑀺𑀫𑀺𑀢𑁆𑀢𑁂, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀯𑀸 𑀦𑀸𑀦𑀸𑀓𑀸𑀭𑀁. 𑀦𑀺𑀫𑀺𑀢𑁆𑀢𑁂 𑀳𑀺 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄𑀯 𑀦𑀸𑀦𑀸𑀓𑀸𑀭𑀢𑀜𑁆𑀘 𑀯𑀺𑀪𑀸𑀯𑁂𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀯𑀸 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀩𑀦𑁆𑀥𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀭𑀓𑀭𑀽𑀧𑀸𑀤𑀺𑀯𑀡𑁆𑀡𑀢𑁄. 𑀓𑀓𑁆𑀔𑀴𑀢𑁆𑀢𑀸𑀤𑀺𑀮𑀓𑁆𑀔𑀡𑀢𑁄.

𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀆𑀲𑀦𑁆𑀦𑀪𑀯𑀗𑁆𑀕𑀢𑁆𑀢𑀸𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 𑀲𑀻𑀳𑀴𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀙𑀝𑁆𑀞𑁂, 𑀲𑀢𑁆𑀢𑀫𑁂 𑀯𑀸 𑀅𑀧𑁆𑀧𑀦𑀸𑀬 𑀲𑀢𑀺 𑀫𑀕𑁆𑀕𑀯𑀻𑀣𑀺𑀬𑀁 𑀨𑀮𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸. 𑀇𑀥 𑀳𑁄𑀢𑀽𑀢𑀺 𑀘𑁂? 𑀦, 𑀮𑁄𑀓𑀺𑀬𑀧𑁆𑀧𑀦𑀸𑀧𑀺 𑀳𑀺 𑀅𑀧𑁆𑀧𑀦𑀸𑀯𑀻𑀣𑀺𑀫𑁆𑀳𑀺 𑀮𑁄𑀓𑀼𑀢𑁆𑀢𑀭𑁂𑀦 𑀲𑀫𑀸𑀦𑀕𑀢𑀺𑀓𑀸𑀯𑀸𑀢𑀺 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑁄𑀧𑀺 𑀪𑀺𑀓𑁆𑀔𑀼 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀲𑀻𑀤𑀺𑀢𑀼𑀓𑀸𑀫𑁄 𑀘𑀢𑀼𑀢𑁆𑀣𑁂, 𑀧𑀜𑁆𑀘𑀫𑁂 𑀯𑀸 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀦 𑀙𑀝𑁆𑀞𑁂, 𑀲𑀢𑁆𑀢𑀫𑁂 𑀯𑀸. 𑀢𑀢𑁆𑀣 𑀳𑀺 𑀅𑀧𑁆𑀧𑀦𑀸. 𑀢𑀢𑁄 𑀧𑀭𑀁 𑀅𑀧𑁆𑀧𑀦𑀸𑀬 𑀆𑀥𑀸𑀭𑀪𑀸𑀯𑀁 𑀦 𑀕𑀘𑁆𑀙𑀢𑀺. 𑀆𑀲𑀦𑁆𑀦𑀪𑀯𑀗𑁆𑀕𑀢𑁆𑀢𑀸 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁 𑀯𑀸 𑀕𑀘𑁆𑀙𑀢𑀺 𑀣𑀮𑁂 𑀞𑀺𑀢𑀖𑀝𑁄 𑀯𑀺𑀬 𑀚𑀯𑀦𑀸𑀦𑀫𑀦𑁆𑀢𑀭𑁂 𑀞𑀺𑀢𑀢𑁆𑀢𑀸𑀢𑀺 𑀓𑀺𑀭 𑀆𑀘𑀭𑀺𑀬𑁄.

𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀸𑀦𑀺 𑀅𑀦𑀸𑀯𑀚𑁆𑀚𑀺𑀢𑁆𑀯𑀸 𑀛𑀸𑀦𑀗𑁆𑀕𑀸𑀦𑁂𑀯 𑀆𑀯𑀚𑁆𑀚𑀦𑀁 𑀆𑀯𑀚𑁆𑀚𑀦𑀯𑀲𑀻 𑀦𑀸𑀫. 𑀢𑀢𑁄 𑀧𑀭𑀁 𑀘𑀢𑀼𑀦𑁆𑀦𑀁, 𑀧𑀜𑁆𑀘𑀦𑁆𑀦𑀁 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑀁, 𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻 𑀦𑀸𑀫. 𑀢𑁂𑀦𑁂𑀯 ‘‘𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻 𑀧𑀦 𑀆𑀯𑀚𑁆𑀚𑀦𑀯𑀲𑀺𑀬𑀸 𑀏𑀯 𑀯𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀸𑀧𑀚𑁆𑀚𑀦𑀯𑀲𑀻 𑀦𑀸𑀫 𑀬𑀢𑁆𑀢𑀓𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀢𑁆𑀢𑀓𑀁 𑀲𑀫𑀸𑀧𑀚𑁆𑀚𑀦𑀁, 𑀢𑀁 𑀧𑀦 𑀇𑀘𑁆𑀙𑀺𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀫𑀢𑁆𑀣𑀢𑀸𑀢𑀺. ‘‘𑀅𑀥𑀺𑀝𑁆𑀞𑀸𑀦𑀯𑀲𑀺𑀬𑀸 𑀯𑀼𑀝𑁆𑀞𑀸𑀦𑀯𑀲𑀺𑀦𑁄 𑀅𑀬𑀁 𑀦𑀸𑀦𑀢𑁆𑀢𑀁 𑀅𑀥𑀺𑀝𑁆𑀞𑀸𑀦𑀸𑀦𑀼𑀪𑀸𑀯𑁂𑀦 𑀚𑀯𑀦𑀁 𑀚𑀯𑀢𑀺, 𑀯𑀼𑀝𑁆𑀞𑀸𑀦𑀸𑀦𑀼𑀪𑀸𑀯𑁂𑀦 𑀧𑀦 𑀅𑀥𑀺𑀧𑁆𑀧𑁂𑀢𑀢𑁄 𑀅𑀥𑀺𑀓𑀁 𑀚𑀯𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀧𑀺𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀁 𑀆𑀯𑀚𑁆𑀚𑀺𑀢𑁆𑀯𑀸 𑀚𑀯𑀦𑀜𑁆𑀘 𑀚𑀯𑀺𑀢𑁆𑀯𑀸 𑀧𑀼𑀦 𑀆𑀯𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀜𑁆𑀘𑀫𑀁 𑀛𑀸𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀬𑀁 𑀓𑀺𑀭 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄. 𑀪𑀕𑀯𑀢𑁄 𑀧𑀦 𑀆𑀯𑀚𑁆𑀚𑀦𑀲𑀫𑀦𑀦𑁆𑀢𑀭𑀫𑁂𑀯 𑀛𑀸𑀦𑀁 𑀳𑁄𑀢𑀻𑀢𑀺 𑀲𑀩𑁆𑀩𑀁 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

‘‘𑀯𑀢𑁆𑀣𑀼𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀁. 𑀤𑁆𑀯𑀸𑀭𑀦𑁆𑀢𑀺 𑀘𑀓𑁆𑀔𑀸𑀤𑀺. 𑀆𑀭𑀫𑁆𑀫𑀡𑀦𑁆𑀢𑀺 𑀭𑀽𑀧𑀸𑀤𑀻’’𑀢𑀺 𑀮𑀺𑀔𑀺𑀢𑀁. 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀧𑀲𑁆𑀲𑀢𑀺, 𑀅𑀜𑁆𑀜𑀣𑀸𑀧𑀺 𑀧𑀲𑁆𑀲𑀢𑀺. 𑀓𑀣𑀁? ‘‘𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑁂𑀲𑀼 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀺 𑀬𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲, 𑀢𑀁 𑀯𑀺𑀜𑁆𑀜𑀸𑀡𑀁 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀢𑀫𑁆𑀧𑀺 𑀧𑀲𑁆𑀲𑀢𑀺, 𑀏𑀓𑀲𑁆𑀲 𑀯𑀸 𑀆𑀭𑀫𑁆𑀫𑀡𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄𑀢𑀺 𑀘 𑀫𑀫 𑀢𑀓𑁆𑀓𑁄 𑀯𑀺𑀘𑀸𑀭𑁂𑀢𑁆𑀯𑀸𑀯 𑀕𑀳𑁂𑀢𑀩𑁆𑀩𑁄.

𑀢𑀢𑁄 𑀧𑀭𑀁 𑀢𑀻𑀲𑀼 𑀘𑀢𑀼𑀓𑁆𑀓𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺 𑀏𑀓𑀫𑁂𑀓𑀁 𑀓𑀢𑁆𑀯𑀸 𑀕𑀡𑁂𑀢𑀩𑁆𑀩𑀁. 𑀲𑀫𑀣𑁂𑀦 𑀆𑀭𑀫𑁆𑀫𑀡𑀢𑁄 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀫𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑀁. ‘‘𑀤𑀼𑀓𑁆𑀔𑀫𑁂𑀢𑀁 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀧𑀦 ‘‘𑀆𑀭𑀫𑁆𑀫𑀡𑀢𑁄 𑀅𑀲𑀫𑁆𑀫𑁄𑀳𑀢𑁄’’𑀢𑀺 𑀬𑀁 𑀯𑀼𑀢𑁆𑀢𑀁, 𑀇𑀥 𑀢𑀢𑁄 𑀯𑀼𑀢𑁆𑀢𑀦𑀬𑀢𑁄 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀬𑁂𑀦 𑀫𑁄𑀳𑁂𑀦 𑀢𑀁 𑀤𑀼𑀓𑁆𑀔𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀦 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀲 𑀯𑀺𑀳𑀢𑀢𑁆𑀢𑀸 𑀯𑀸 𑀏𑀯𑀁 𑀧𑀯𑀢𑁆𑀢𑁂 𑀜𑀸𑀡𑁂 𑀬𑀣𑀸𑀭𑀼𑀘𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀼𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑀸𑀮𑁂 𑀲𑀫𑀢𑁆𑀣𑀪𑀸𑀯𑀢𑁄 𑀯𑀸 𑀤𑀼𑀓𑁆𑀔𑀸𑀤𑀻𑀲𑀼 𑀢𑀻𑀲𑀼 𑀅𑀲𑀫𑁆𑀫𑁄𑀳𑀢𑁄 𑀜𑀸𑀡𑀁 𑀯𑀼𑀢𑁆𑀢𑀁. 𑀦𑀺𑀭𑁄𑀥𑁂 𑀆𑀭𑀫𑁆𑀫𑀡𑀢𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀸 𑀅𑀲𑀫𑁆𑀫𑁄𑀳𑀢𑁄 𑀦 𑀲𑀫𑁆𑀪𑀯𑀢𑀺 𑀫𑁄𑀳𑀧𑁆𑀧𑀳𑀸𑀦𑀸𑀪𑀸𑀯𑀸, 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀯𑀺𑀭𑁄𑀥𑀢𑁄 𑀘. 𑀢𑀢𑁆𑀣 ‘‘𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦𑀸’’𑀢𑀺𑀆𑀤𑀺 𑀆𑀭𑀫𑁆𑀫𑀡𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. ‘‘𑀆𑀯𑀚𑁆𑀚𑀢𑁄’’𑀢𑀺𑀆𑀤𑀺 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀚𑀸𑀦𑀢𑁄, 𑀧𑀲𑁆𑀲𑀢𑁄, 𑀧𑀘𑁆𑀘𑀯𑁂𑀓𑁆𑀔𑀢𑁄 𑀘. 𑀢𑀤𑀥𑀺𑀫𑀼𑀢𑁆𑀢𑀢𑀸𑀯𑀲𑁂𑀦 𑀅𑀥𑀺𑀝𑁆𑀞𑀳𑀢𑁄, 𑀅𑀥𑀺𑀫𑀼𑀘𑁆𑀘𑀢𑁄, 𑀢𑀣𑀸 𑀯𑀻𑀭𑀺𑀬𑀸𑀤𑀺𑀁 𑀲𑀫𑀸𑀤𑀳𑀢𑁄 𑀔𑀡𑀺𑀓𑀲𑀫𑀸𑀥𑀺𑀦𑀸.

𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬. 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬. 𑀲𑀩𑁆𑀩𑀜𑁆𑀳𑀺 𑀤𑀼𑀓𑁆𑀔𑀲𑀘𑁆𑀘𑀁 𑀅𑀪𑀺𑀜𑁆𑀜𑁂𑀬𑁆𑀬𑀁, 𑀧𑀭𑀺𑀜𑁆𑀜𑁂𑀬𑁆𑀬𑀜𑁆𑀘. 𑀢𑀢𑁆𑀭 𑀘𑀸𑀬𑀁 𑀧𑀻𑀢𑀻𑀢𑀺 𑀮𑀺𑀔𑀺𑀢𑀁. 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺𑀆𑀤𑀺 𑀫𑀕𑁆𑀕𑀓𑁆𑀔𑀡𑀁 𑀲𑀦𑁆𑀥𑀸𑀬𑀸𑀳𑀸𑀢𑀺 𑀯𑀼𑀢𑁆𑀢𑀁. 𑀫𑀕𑁆𑀕𑁂𑀦 𑀅𑀲𑀫𑁆𑀫𑁄𑀳𑀲𑀗𑁆𑀔𑀸𑀢𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄 𑀫𑀕𑁆𑀕𑁄𑀧𑀺 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀯𑀼𑀢𑁆𑀢𑁄. 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀲𑀫𑀣𑁂 𑀓𑀸𑀬𑀺𑀓𑀲𑀼𑀔𑀸𑀪𑀸𑀯𑀸 𑀯𑀼𑀢𑁆𑀢𑀁. 𑀤𑁆𑀯𑀻𑀲𑀼 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑁂𑀲𑀽𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀻…𑀧𑁂… 𑀲𑀺𑀓𑁆𑀔𑀢𑀺 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀻…𑀧𑁂… 𑀲𑀺𑀓𑁆𑀔𑀢𑀻𑀢𑀺 𑀏𑀢𑁂𑀲𑀼. 𑀫𑁄𑀤𑀦𑀸𑀤𑀺 𑀲𑀩𑁆𑀩𑀁 𑀧𑀻𑀢𑀺𑀯𑁂𑀯𑀘𑀦𑀁. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺 𑀓𑀺𑀮𑁂𑀲𑁂, 𑀢𑀫𑁆𑀫𑀽𑀮𑀓𑁂 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂. 𑀏𑀯𑀁 𑀪𑀸𑀯𑀺𑀢𑁄𑀢𑀺 𑀦 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀦𑁂𑀦 𑀪𑀸𑀯𑀺𑀢𑁄. 𑀏𑀯𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀪𑀸𑀯𑀺𑀢𑁄. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂𑀲𑀼𑀧𑀺 𑀧𑀯𑀢𑁆𑀢𑀅𑀲𑁆𑀲𑀸𑀲𑀫𑀼𑀔𑁂𑀦𑁂𑀯 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁 𑀉𑀧𑀸𑀬𑀓𑀼𑀲𑀮𑁂𑀦 𑀪𑀕𑀯𑀢𑀸.

𑁧𑁬𑁮. 𑀓𑀲𑁆𑀫𑀸 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀫𑁆𑀳𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁭𑁨. 𑀉𑀲𑁆𑀲𑀼𑀓𑁆𑀓𑀯𑀘𑀦𑀦𑁆𑀢𑀺 𑀧𑀸𑀓𑀝𑀲𑀤𑁆𑀤𑀲𑀜𑁆𑀜𑀸 𑀓𑀺𑀭, 𑀲𑀫𑀸𑀦𑀓𑀧𑀤𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀼𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀏𑀢𑁆𑀣 𑀯𑀺𑀬 𑀲𑀜𑁆𑀘𑀺𑀘𑁆𑀘 𑀯𑁄𑀭𑁄𑀧𑁂𑀢𑀼𑀓𑀸𑀫𑀲𑁆𑀲 𑀲𑀜𑁆𑀘𑀺𑀘𑁆𑀘𑀧𑀤𑀁 𑀯𑁄𑀭𑁄𑀧𑀦𑀧𑀤𑀲𑁆𑀲 𑀉𑀲𑁆𑀲𑀼𑀓𑁆𑀓𑀁, 𑀲𑀜𑁆𑀘𑁂𑀢𑀦𑀸 𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀜𑁆𑀘 𑀏𑀓𑀲𑁆𑀲𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀓𑁂𑀯𑀮𑀁 𑀘𑁂𑀢𑀲𑀺𑀓𑀫𑀢𑁆𑀢𑁂𑀦𑁂𑀯 𑀳𑁄𑀢𑀺, 𑀧𑀬𑁄𑀕𑁄𑀧𑀺 𑀇𑀘𑁆𑀙𑀺𑀢𑀩𑁆𑀩𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸𑀦𑀻𑀢𑀺 𑀓𑀺𑀭 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. ‘‘𑀚𑀸𑀦𑀺𑀢𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀚𑀸𑀦𑀦𑁆𑀢𑁄…𑀧𑁂… 𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀯𑁄𑀭𑁄𑀧𑀦𑀫𑁆𑀧𑀺 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀢𑁆𑀣𑀲𑀺𑀤𑁆𑀥𑀺𑀬𑀸 𑀳𑀺 𑀧𑀼𑀭𑀺𑀫𑀘𑁂𑀢𑀦𑀸 𑀅𑀢𑁆𑀣𑀲𑀸𑀥𑀺𑀓𑀸 𑀳𑁄𑀢𑀺. 𑀲𑀩𑁆𑀩𑀲𑀼𑀔𑀼𑀫𑀅𑀢𑁆𑀢𑀪𑀸𑀯𑀦𑁆𑀢𑀺 𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀭𑀽𑀧𑀁. 𑀅𑀢𑁆𑀢𑀲𑀗𑁆𑀔𑀸𑀢𑀸𑀦𑀜𑁆𑀳𑀺 𑀅𑀭𑀽𑀧𑀸𑀦𑀁 𑀔𑀦𑁆𑀥𑀯𑀺𑀪𑀗𑁆𑀕𑁂 (𑀯𑀺𑀪. 𑁧 𑀆𑀤𑀬𑁄) 𑀯𑀺𑀬 𑀇𑀥 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀅𑀦𑀥𑀺𑀧𑁆𑀧𑁂𑀢𑀸. 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀦𑁆𑀢𑀺 𑀬𑁂𑀪𑀼𑀬𑁆𑀬𑀯𑀘𑀦𑀁, 𑀑𑀧𑀧𑀸𑀢𑀺𑀓𑀫𑀦𑀼𑀲𑁆𑀲𑁂𑀧𑀺 𑀧𑀸𑀭𑀸𑀚𑀺𑀓𑀫𑁂𑀯, 𑀅𑀭𑀽𑀧𑀓𑀸𑀬𑁂 𑀉𑀧𑀓𑁆𑀓𑀫𑀸𑀪𑀸𑀯𑀸 𑀢𑀕𑁆𑀕𑀳𑀡𑀁 𑀓𑀲𑁆𑀫𑀸𑀢𑀺 𑀘𑁂? 𑀅𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲𑁂𑀯 𑀭𑀽𑀧𑀓𑀸𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀫𑁆𑀪𑀯𑀢𑁄. 𑀢𑁂𑀦 𑀲𑀚𑀻𑀯𑀓𑁄𑀯 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄𑀧𑀺 𑀦𑀸𑀫 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁. 𑀏𑀢𑁆𑀣 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀦𑁆𑀢𑀺 𑀫𑀦𑀼𑀲𑁆𑀲𑀫𑀸𑀢𑀼𑀬𑀸 𑀯𑀸 𑀢𑀺𑀭𑀘𑁆𑀙𑀸𑀦𑀫𑀸𑀢𑀼𑀬𑀸 𑀯𑀸. 𑀯𑀼𑀢𑁆𑀢𑀜𑁆𑀳𑀺 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁮𑁦) 𑁋

‘‘𑀇𑀢𑁆𑀣𑀺𑀁 𑀳𑀦𑁂 𑀘 𑀫𑀸𑀢𑀭𑀁, 𑀧𑀼𑀭𑀺𑀲𑀜𑁆𑀘 𑀧𑀺𑀢𑀭𑀁 𑀳𑀦𑁂;

𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀦 𑀢𑁂𑀦𑀸𑀦𑀦𑁆𑀢𑀭𑀁 𑀨𑀼𑀲𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺.

𑀧𑀞𑀫𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑁂𑀯. 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀬 𑀳𑀺 𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀞𑀫𑀘𑀺𑀢𑁆𑀢𑀁 𑀦𑀸𑀫. 𑀘𑀼𑀢𑀺𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀁 𑀦𑀸𑀫. 𑀅𑀜𑁆𑀜𑀣𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀞𑀫𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺 𑀯𑀺𑀦𑀸 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀪𑀸𑀯𑁂 𑀯𑀸 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑁄𑀲𑀧𑁆𑀧𑀲𑀗𑁆𑀕𑁄. 𑀅𑀬𑀁 𑀲𑀩𑁆𑀩𑀧𑀞𑀫𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄𑀢𑀺 𑀓𑀺𑀜𑁆𑀘𑀸𑀧𑀺 𑀇𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀦𑁆𑀢𑀢𑀺𑀬𑀸 𑀬𑀸𑀯 𑀫𑀭𑀡𑀸 𑀉𑀧𑁆𑀧𑀚𑁆𑀚𑀦𑀓𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂𑀲𑀼 𑀅𑀧𑀭𑀺𑀫𑀸𑀡𑁂𑀲𑀼 ‘‘𑀲𑀩𑁆𑀩𑀧𑀞𑀫𑁄’’𑀢𑀺 𑀤𑀺𑀲𑁆𑀲𑀢𑀺. 𑀬𑀤𑀸 𑀧𑀦 𑀬𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀧𑀼𑀩𑁆𑀩𑀸𑀧𑀭𑀺𑀬𑀯𑀲𑁂𑀦 𑀲𑀦𑁆𑀢𑀢𑀺𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀢𑀤𑀸 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸. 𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀦𑁆𑀢𑁄 𑀳𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺 𑀦𑀸𑀫. 𑀏𑀢𑁆𑀣 𑀘 𑀦𑀸𑀦𑀢𑁆𑀢𑀦𑀬𑁂 𑀅𑀥𑀺𑀧𑁆𑀧𑁂𑀢𑁂 𑀲𑀢𑀺 ‘‘𑀲𑀩𑁆𑀩𑀧𑀞𑀫𑁄’’𑀢𑀺 𑀯𑀘𑀦𑀁 𑀬𑀼𑀚𑁆𑀚𑀢𑀺, 𑀦 𑀧𑀦 𑀏𑀓𑀢𑁆𑀢𑀦𑀬𑁂 𑀲𑀦𑁆𑀢𑀢𑀺𑀬𑀸 𑀏𑀓𑀢𑁆𑀢𑀸. 𑀏𑀓𑀢𑁆𑀢𑀦𑀬𑁄 𑀘 𑀇𑀥𑀸𑀥𑀺𑀧𑁆𑀧𑁂𑀢𑁄 ‘‘𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’’𑀢𑀺 𑀯𑀘𑀦𑀢𑁄, 𑀢𑀲𑁆𑀫𑀸 ‘‘𑀲𑀩𑁆𑀩𑀧𑀞𑀫𑁄’’𑀢𑀺 𑀯𑀘𑀦𑀁 𑀦 𑀬𑀼𑀚𑁆𑀚𑀢𑀻𑀢𑀺 𑀘𑁂? 𑀦, 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀩𑀳𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀲𑀦𑁆𑀢𑀢𑀺 𑀦𑀸𑀫 𑀅𑀦𑁂𑀓𑁂𑀲𑀁 𑀧𑀼𑀩𑁆𑀩𑀸𑀧𑀭𑀺𑀬𑀼𑀧𑁆𑀧𑀢𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀅𑀬𑀁 𑀲𑀩𑁆𑀩𑀧𑀞𑀫𑁄’’𑀢𑀺 𑀯𑀼𑀢𑁆𑀢𑁄, 𑀏𑀯𑀫𑁂𑀢𑁆𑀣 𑀤𑁆𑀯𑁂𑀧𑀺 𑀦𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀅𑀜𑁆𑀜𑀣𑀸 ‘‘𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’’𑀢𑀺 𑀇𑀤𑀁 𑀯𑀘𑀦𑀁 𑀦 𑀲𑀺𑀚𑁆𑀛𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 ‘‘𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’’𑀢𑀺 𑀯𑀘𑀦𑀢𑁄 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀬𑀲𑁆𑀫𑀸 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀺𑀓𑁄𑀧𑀺𑀢𑁂 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀓𑁄𑀧𑀺𑀢𑀫𑁂𑀯 𑀳𑁄𑀢𑀺, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀦 𑀯𑀺𑀓𑁄𑀧𑀺𑀢𑁂 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀓𑁄𑀧𑀺𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀤𑀼𑀪𑀬𑀫𑁆𑀧𑀺 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀢𑀤𑁂𑀯 𑀲𑀦𑁆𑀥𑀸𑀬 ‘𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀆𑀳. ‘‘𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’’𑀢𑀺 𑀯𑀘𑀦𑀢𑁄 𑀧𑀓𑀢𑀺𑀬𑀸 𑀆𑀬𑀼𑀧𑀭𑀺𑀬𑀦𑁆𑀢𑀁 𑀧𑀢𑁆𑀯𑀸 𑀫𑀭𑀡𑀓𑀲𑀢𑁆𑀢𑁂 𑀯𑀻𑀢𑀺𑀓𑁆𑀓𑀫𑁂 𑀲𑀢𑀺 𑀅𑀦𑀸𑀧𑀢𑁆𑀢𑀺 𑀯𑀻𑀢𑀺𑀓𑁆𑀓𑀫𑀧𑀘𑁆𑀘𑀬𑀸 𑀲𑀦𑁆𑀢𑀢𑀺𑀬𑀸 𑀅𑀓𑁄𑀧𑀺𑀢𑀢𑁆𑀢𑀸. 𑀯𑀻𑀢𑀺𑀓𑁆𑀓𑀫𑀧𑀘𑁆𑀘𑀬𑀸 𑀘𑁂 𑀆𑀬𑀼𑀧𑀭𑀺𑀬𑀦𑁆𑀢𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸𑀯 𑀫𑀭𑀡𑀓𑀲𑀢𑁆𑀢𑁂 𑀯𑀻𑀢𑀺𑀓𑁆𑀓𑀫𑀧𑀘𑁆𑀘𑀬𑀸 𑀆𑀧𑀢𑁆𑀢𑀺, 𑀓𑀫𑁆𑀫𑀩𑀤𑁆𑀥𑁄 𑀘𑀸𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. ‘‘𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬, 𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬, 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀯𑀘𑀦𑀢𑁄 𑀯𑀸 𑀘𑁂𑀢𑀦𑀸𑀓𑁆𑀔𑀡𑁂 𑀏𑀯 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀏𑀓𑀦𑁆𑀢𑀸𑀓𑀼𑀲𑀮𑀢𑁆𑀢𑀸, 𑀤𑀼𑀓𑁆𑀔𑀯𑁂𑀤𑀦𑀢𑁆𑀢𑀸, 𑀓𑀸𑀬𑀓𑀫𑁆𑀫𑀢𑁆𑀢𑀸, 𑀯𑀘𑀻𑀓𑀫𑁆𑀫𑀢𑁆𑀢𑀸, 𑀓𑀺𑀭𑀺𑀬𑀢𑁆𑀢𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀢𑁆𑀢𑀝𑁆𑀞𑀚𑀯𑀦𑀯𑀸𑀭𑀫𑀢𑁆𑀢𑀦𑁆𑀢𑀺 𑀲𑀪𑀸𑀕𑀸𑀭𑀫𑁆𑀫𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀦𑁂𑀯 ‘‘𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑀦𑀦𑁆𑀢𑀭𑀲𑁆𑀲 𑀧𑀘𑁆𑀘𑀬𑀁 𑀳𑁄𑀦𑁆𑀢𑀁 𑀬𑀣𑀸 𑀧𑀼𑀭𑁂 𑀯𑀺𑀬 𑀅𑀳𑀼𑀢𑁆𑀯𑀸 𑀤𑀼𑀩𑁆𑀩𑀮𑀲𑁆𑀲. 𑀢𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁄𑀧𑀦𑀁.

𑀈𑀢𑀺𑀦𑁆𑀢𑀺 𑀲𑀢𑁆𑀢𑀯𑀺𑀥𑀯𑀺𑀘𑁆𑀙𑀺𑀓𑀸𑀤𑀻𑀦𑀺 𑀬𑀼𑀤𑁆𑀥𑁂 𑀟𑀁𑀲𑀺𑀢𑁆𑀯𑀸 𑀫𑀸𑀭𑀡𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀧𑀚𑁆𑀚𑀭𑀓𑀦𑁆𑀢𑀺 𑀲𑀭𑀻𑀭𑀟𑀸𑀳𑀁. 𑀲𑀽𑀘𑀺𑀓𑀦𑁆𑀢𑀺 𑀲𑀽𑀮𑀁. 𑀯𑀺𑀲𑀽𑀘𑀺𑀓𑀦𑁆𑀢𑀺 𑀲𑀼𑀓𑁆𑀔𑀫𑀸𑀢𑀺𑀲𑀸𑀭𑀁𑀯𑀲𑀬𑀁. 𑀧𑀓𑁆𑀔𑀦𑁆𑀤𑀺𑀬𑀦𑁆𑀢𑀺 𑀭𑀢𑁆𑀢𑀸𑀢𑀺𑀲𑀸𑀭𑀁. 𑀤𑁆𑀯𑀢𑁆𑀢𑀺𑀩𑁆𑀬𑀸𑀫𑀲𑀢𑀧𑁆𑀧𑀫𑀸𑀡𑁂 𑀫𑀳𑀸𑀓𑀸𑀬𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀞𑀺𑀢𑀦𑀸𑀕𑀼𑀤𑁆𑀥𑀭𑀡𑀁, 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀺𑀢𑁂 𑀧𑀭𑁂𑀲𑀁 𑀓𑀸𑀬𑁂 𑀯𑀺𑀲𑀫𑀭𑀡𑀁 𑀯𑀸 𑀟𑀸𑀳𑀼𑀧𑁆𑀧𑀸𑀤𑀦𑀁 𑀯𑀸 𑀧𑀬𑁄𑀕𑁄 𑀦𑀸𑀫.

𑀓𑁂𑀘𑀻𑀢𑀺 𑀫𑀳𑀸𑀲𑀗𑁆𑀖𑀺𑀓𑀸. 𑀅𑀬𑀁 𑀇𑀢𑁆𑀣𑀻. 𑀓𑀼𑀮𑀼𑀫𑁆𑀩𑀲𑁆𑀲𑀸𑀢𑀺 𑀕𑀩𑁆𑀪𑀲𑁆𑀲. 𑀓𑀣𑀁 𑀲𑀸 𑀇𑀢𑀭𑀲𑁆𑀲𑀸𑀢𑀺 𑀘𑁂? 𑀢𑀲𑁆𑀲 𑀤𑀼𑀝𑁆𑀞𑁂𑀦 𑀫𑀦𑀲𑀸𑀦𑀼𑀧𑀓𑁆𑀔𑀺𑀢𑁂 𑀲𑁄 𑀘 𑀕𑀩𑁆𑀪𑁄 𑀲𑀸 𑀘 𑀇𑀤𑁆𑀥𑀻𑀢𑀺 𑀉𑀪𑀬𑀫𑁆𑀧𑀺 𑀲𑀳𑁂𑀯 𑀦𑀲𑁆𑀲𑀢𑀺, 𑀖𑀝𑀕𑁆𑀕𑀻𑀦𑀁 𑀪𑁂𑀤𑀦𑀺𑀩𑁆𑀩𑀸𑀬𑀦𑀁 𑀯𑀺𑀬 𑀏𑀓𑀓𑁆𑀔𑀡𑁂 𑀳𑁄𑀢𑀺. ‘‘𑀢𑁂𑀲𑀁 𑀲𑀼𑀢𑁆𑀢𑀦𑁆𑀢𑀺𑀓𑁂𑀲𑀼 𑀑𑀘𑀭𑀺𑀬𑀫𑀸𑀦𑀁 𑀦 𑀲𑀫𑁂𑀢𑀻’’𑀢𑀺 𑀮𑀺𑀔𑀺𑀢𑀁, ‘‘𑀢𑁂𑀲𑀁 𑀫𑀢𑀁 𑀕𑀳𑁂𑀢𑁆𑀯𑀸 ‘𑀣𑀸𑀯𑀭𑀻𑀦𑀫𑁆𑀧𑀺 𑀅𑀬𑀁 𑀬𑀼𑀚𑁆𑀚𑀢𑀻’𑀢𑀺 𑀯𑀼𑀢𑁆𑀢𑁂 𑀢𑀺𑀓𑀯𑀲𑁂𑀦 𑀧𑀝𑀺𑀲𑁂𑀥𑀺𑀢𑀩𑁆𑀩𑀦𑁆𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀲𑀸𑀳𑀢𑁆𑀣𑀺𑀓𑀦𑀺𑀲𑁆𑀲𑀕𑁆𑀕𑀺𑀬𑀧𑀬𑁄𑀕𑁂𑀲𑀼 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀲𑀢𑁆𑀢𑀫𑀸𑀬 𑀲𑀳𑀼𑀧𑁆𑀧𑀦𑁆𑀦𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀸𑀳𑀢𑁆𑀣𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀡𑀢𑁆𑀢𑀺𑀓𑁂 𑀧𑀦 𑀲𑀢𑁆𑀢𑀳𑀺𑀧𑀺 𑀘𑁂𑀢𑀦𑀸𑀳𑀺 𑀲𑀳 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀫𑁆𑀪𑀯𑀢𑁄 𑀲𑀢𑁆𑀢𑀲𑀢𑁆𑀢 𑀲𑀤𑁆𑀤𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀓𑁂𑀓𑀓𑁆𑀔𑀭𑀪𑀸𑀯𑀁 𑀕𑀦𑁆𑀢𑁆𑀯𑀸 𑀬𑀢𑁆𑀢𑀓𑁂𑀳𑀺 𑀅𑀓𑁆𑀔𑀭𑁂𑀳𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀢𑀤𑀯𑀲𑀸𑀦𑀓𑁆𑀔𑀭𑀲𑀫𑀼𑀝𑁆𑀞𑀸𑀧𑀺𑀓𑀸𑀬 𑀲𑀢𑁆𑀢𑀫𑀘𑁂𑀢𑀦𑀸𑀬 𑀲𑀳𑀚𑀸𑀢𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀆𑀡𑀢𑁆𑀢𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀯𑀺𑀚𑁆𑀚𑀸𑀫𑀬𑀧𑀬𑁄𑀕𑁂. 𑀓𑀸𑀬𑁂𑀦𑀸𑀡𑀢𑁆𑀢𑀺𑀬𑀁 𑀧𑀦 𑀲𑀸𑀳𑀢𑁆𑀣𑀺𑀓𑁂 𑀯𑀼𑀢𑁆𑀢𑀦𑀬𑁄𑀯. 𑀣𑀸𑀯𑀭𑀧𑀬𑁄𑀕𑁂 𑀬𑀸𑀯𑀢𑀸 𑀧𑀭𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀢𑀸𑀯𑀢𑀸 𑀓𑀫𑁆𑀫𑀩𑀤𑁆𑀥𑁄, 𑀆𑀧𑀢𑁆𑀢𑀺 𑀘. 𑀢𑀢𑁄 𑀧𑀭𑀁 𑀅𑀢𑀺𑀲𑀜𑁆𑀘𑀭𑀡𑁂 𑀓𑀫𑁆𑀫𑀩𑀤𑁆𑀥𑀸𑀢𑀺𑀩𑀳𑀼𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀲𑀢𑀺 𑀧𑀭𑀁 𑀫𑀭𑀡𑁂. 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀧𑀦𑁂𑀢𑁆𑀣 𑀏𑀓𑀸. 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸 𑀬𑀲𑁆𑀫𑀸 𑀏𑀢𑁆𑀣 𑀘 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀘 𑀮𑀩𑁆𑀪𑀢𑀺, 𑀦 𑀅𑀜𑁆𑀜𑀢𑁆𑀣, 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀸 𑀇𑀫𑀸 𑀕𑀸𑀣𑀸𑀬𑁄 𑁋

‘‘𑀪𑀽𑀢𑀥𑀫𑁆𑀫𑀦𑀺𑀬𑀸𑀫𑀸 𑀬𑁂, 𑀢𑁂 𑀥𑀫𑁆𑀫𑀸 𑀦𑀺𑀬𑀢𑀸 𑀫𑀢𑀸;

𑀪𑀸𑀯𑀺𑀥𑀫𑁆𑀫𑀦𑀺𑀬𑀸𑀫𑀸 𑀬𑁂, 𑀢𑁂𑀯 𑀅𑀦𑀺𑀬𑀢𑀸 𑀇𑀥.

‘‘𑀪𑀽𑀢𑀥𑀫𑁆𑀫𑀦𑀺𑀬𑀸𑀫𑀸𑀦𑀁, 𑀞𑀺𑀢𑀸𑀯 𑀲𑀸 𑀧𑀘𑁆𑀘𑀬𑀝𑁆𑀞𑀺𑀢𑀺;

𑀪𑀸𑀯𑀺𑀥𑀫𑁆𑀫𑀦𑀺𑀬𑀸𑀫𑀸𑀦𑀁, 𑀲𑀸𑀧𑁂𑀓𑁆𑀔𑀸 𑀧𑀘𑁆𑀘𑀬𑀝𑁆𑀞𑀺𑀢𑀺.

‘‘𑀢𑁂𑀦𑀜𑁆𑀜𑀸 𑀳𑁂𑀢𑀼𑀬𑀸 𑀅𑀢𑁆𑀣𑀺, 𑀲𑀸𑀧𑀺 𑀥𑀫𑁆𑀫𑀦𑀺𑀬𑀸𑀫𑀢𑀸;

𑀢𑀲𑁆𑀲𑀸 𑀨𑀮𑀁 𑀅𑀦𑀺𑀬𑀢𑀁, 𑀨𑀮𑀸𑀧𑁂𑀓𑁆𑀔𑀸 𑀦𑀺𑀬𑀸𑀫𑀢𑀸.

‘‘𑀏𑀯𑀜𑁆𑀳𑀺 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀞𑀺𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸;

𑀮𑀤𑁆𑀥𑀥𑀫𑁆𑀫𑀦𑀺𑀬𑀸𑀫𑀸 𑀬𑀸, 𑀲𑀸𑀢𑁆𑀣𑀲𑀸𑀥𑀓𑀘𑁂𑀢𑀦𑀸.

‘‘𑀘𑁂𑀢𑀦𑀸𑀲𑀺𑀤𑁆𑀥𑀺𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀢𑀲𑁆𑀲𑀸𑀢𑁆𑀣𑀲𑀺𑀤𑁆𑀥𑀺𑀢𑁄;

𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀸𑀧𑀺, 𑀙𑀩𑁆𑀩𑀺𑀥𑀸 𑀅𑀢𑁆𑀣𑀲𑀸𑀥𑀺𑀓𑀸.

‘‘𑀆𑀡𑀢𑁆𑀢𑀺𑀬𑀁 𑀬𑀢𑁄 𑀲𑀓𑁆𑀓𑀸, 𑀯𑀺𑀪𑀸𑀯𑁂𑀢𑀼𑀁 𑀯𑀺𑀪𑀸𑀕𑀢𑁄;

𑀢𑀲𑁆𑀫𑀸 𑀆𑀡𑀢𑁆𑀢𑀺𑀬𑀁𑀬𑁂𑀯, 𑀯𑀼𑀢𑁆𑀢𑀸 𑀲𑀸 𑀅𑀢𑁆𑀣𑀲𑀸𑀥𑀺𑀓𑀸.

‘‘𑀫𑀺𑀘𑁆𑀙𑀢𑁆𑀢𑁂 𑀯𑀸𑀧𑀺 𑀲𑀫𑁆𑀫𑀢𑁆𑀢𑁂, 𑀦𑀺𑀬𑀢𑀸𑀦𑀺𑀬𑀢𑀸 𑀫𑀢𑀸;

𑀅𑀪𑀺𑀥𑀫𑁆𑀫𑁂 𑀦 𑀲𑀩𑁆𑀩𑀢𑁆𑀣𑀺, 𑀢𑀢𑁆𑀣 𑀲𑀸 𑀦𑀺𑀬𑀢𑀸 𑀲𑀺𑀬𑀸.

‘‘𑀬𑀸 𑀣𑁂𑀬𑁆𑀬𑀘𑁂𑀢𑀦𑀸 𑀲𑀩𑁆𑀩𑀸, 𑀲𑀳𑀢𑁆𑀣𑀸𑀡𑀢𑁆𑀢𑀺𑀓𑀸𑀧𑀺 𑀯𑀸;

𑀅𑀪𑀺𑀥𑀫𑁆𑀫𑀦𑀬𑁂𑀦𑀸𑀬𑀁, 𑀏𑀓𑀦𑁆𑀢𑀦𑀺𑀬𑀢𑀸 𑀲𑀺𑀬𑀸.

‘‘𑀧𑀸𑀡𑀸𑀢𑀺𑀧𑀸𑀢𑀁 𑀦𑀺𑀲𑁆𑀲𑀸𑀬, 𑀲𑀳𑀢𑁆𑀣𑀸𑀡𑀢𑁆𑀢𑀺𑀓𑀸𑀤𑀺𑀓𑀸;

𑀅𑀪𑀺𑀥𑀫𑁆𑀫𑀯𑀲𑁂𑀦𑁂𑀲𑀸, 𑀧𑀘𑁆𑀘𑁂𑀓𑀁 𑀢𑀁 𑀤𑀼𑀓𑀁 𑀪𑀚𑁂.

‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑁄, 𑀘𑁂𑀢𑀦𑀸 𑀘𑁂𑀢𑀺 𑀢𑀁 𑀤𑁆𑀯𑀬𑀁;

𑀦 𑀲𑀸𑀳𑀢𑁆𑀣𑀺𑀓𑀓𑀫𑁆𑀫𑁂𑀦, 𑀧𑀕𑁂𑀯𑀸𑀡𑀢𑁆𑀢𑀺𑀓𑀸𑀲𑀫𑀁.

‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑁄, 𑀘𑁂𑀢𑀦𑀸 𑀘𑁂𑀢𑀺 𑀢𑀁 𑀤𑁆𑀯𑀬𑀁;

𑀦 𑀲𑀸𑀳𑀢𑁆𑀣𑀺𑀓𑀓𑀫𑁆𑀫𑁂𑀦, 𑀧𑀕𑁂𑀯𑀸𑀡𑀢𑁆𑀢𑀺𑀓𑀸𑀲𑀫𑀁.

‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑁆𑀔𑀡𑁂 𑀯𑀥𑀓𑀘𑁂𑀢𑀦𑀸;

𑀘𑀺𑀭𑀸𑀞𑀺𑀢𑀸𑀢𑀺 𑀓𑁄 𑀥𑀫𑁆𑀫𑁄, 𑀦𑀺𑀬𑀸𑀫𑁂𑀢𑀺 𑀆𑀧𑀢𑁆𑀢𑀺𑀓𑀁.

‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑁆𑀔𑀡𑁂 𑀘𑁂 𑀯𑀥𑀓𑁄 𑀲𑀺𑀬𑀸;

𑀫𑀢𑁄 𑀲𑀼𑀢𑁆𑀢𑁄 𑀧𑀩𑀼𑀤𑁆𑀥𑁄 𑀯𑀸, 𑀓𑀼𑀲𑀮𑁄 𑀯𑀥𑀓𑁄 𑀲𑀺𑀬𑀸.

‘‘𑀓𑀼𑀲𑀮𑀢𑁆𑀢𑀺𑀓𑀪𑁂𑀤𑁄 𑀘, 𑀯𑁂𑀤𑀦𑀸𑀢𑁆𑀢𑀺𑀓𑀪𑁂𑀤𑁄𑀧𑀺;

𑀲𑀺𑀬𑀸 𑀢𑀣𑀸 𑀕𑀢𑁄 𑀲𑀺𑀤𑁆𑀥𑁄, 𑀲𑀳𑀢𑁆𑀣𑀸 𑀯𑀥𑀓𑀘𑁂𑀢𑀦𑀸’’𑀢𑀺.

𑀬𑀸𑀦𑀺 𑀧𑀦 𑀩𑀻𑀚𑀉𑀢𑀼𑀓𑀫𑁆𑀫𑀥𑀫𑁆𑀫𑀘𑀺𑀢𑁆𑀢𑀦𑀺𑀬𑀸𑀫𑀸𑀦𑀺 𑀧𑀜𑁆𑀘 𑀅𑀝𑁆𑀞𑀓𑀣𑀸𑀬 𑀆𑀦𑁂𑀢𑁆𑀯𑀸 𑀦𑀺𑀤𑀲𑁆𑀲𑀺𑀢𑀸𑀦𑀺, 𑀢𑁂𑀲𑀼 𑀅𑀬𑀫𑀢𑁆𑀣𑀲𑀸𑀥𑀓𑀘𑁂𑀢𑀦𑀸 𑀬𑁄𑀕𑀁 𑀕𑀘𑁆𑀙𑀢𑀻𑀢𑀺 𑀫𑀜𑁆𑀜𑁂 ‘‘𑀅𑀬𑀁 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸𑀦𑀺𑀬𑀫𑁄 𑀦𑀢𑁆𑀣𑀻’’𑀢𑀺 𑀘𑁂𑀢𑀦𑀸𑀦𑀁 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀸𑀦𑀫𑁆𑀧𑀺 𑀦𑀢𑁆𑀣𑀺𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀪𑀚𑀸𑀧𑀺𑀬𑀫𑀸𑀦𑀸 𑀬𑁂𑀦, 𑀢𑁂𑀦 𑀲𑀩𑁆𑀩𑁂𑀧𑀺 𑀬𑀣𑀸𑀲𑀫𑁆𑀪𑀯𑀁 𑀓𑀫𑁆𑀫𑀘𑀺𑀢𑁆𑀢𑀦𑀺𑀬𑀸𑀫𑁂 𑀪𑀚𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀻𑀯𑀺𑀢𑁂 𑀆𑀤𑀻𑀦𑀯𑁄 𑀫𑀭𑀡𑀯𑀡𑁆𑀡𑀤𑀲𑁆𑀲𑀦𑁂 𑀦 𑀯𑀺𑀪𑀢𑁆𑀢𑁄𑀯, 𑀇𑀥 𑀧𑀦 𑀲𑀗𑁆𑀓𑀧𑁆𑀧𑀧𑀤𑁂 𑀅𑀢𑁆𑀣𑀢𑁄 ‘‘𑀫𑀭𑀡𑀲𑀜𑁆𑀜𑀻 𑀫𑀭𑀡𑀘𑁂𑀢𑀦𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄’’𑀢𑀺 𑀏𑀯𑀁 𑀅𑀯𑀺𑀪𑀽𑀢𑀢𑁆𑀢𑀸 𑀯𑀺𑀪𑀢𑁆𑀢𑁄, 𑀅𑀧𑀸𑀓𑀝𑀢𑁆𑀢𑀸, 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀯𑀸 𑀅𑀯𑀺𑀪𑀸𑀕𑀸 𑀓𑀸𑀭𑀺𑀢𑀸 𑀯𑀸. 𑀦𑀬𑀺𑀤𑀁 𑀯𑀺𑀢𑀓𑁆𑀓𑀲𑁆𑀲 𑀦𑀸𑀫𑀦𑁆𑀢𑀺 𑀦 𑀯𑀺𑀢𑀓𑁆𑀓𑀲𑁆𑀲𑁂𑀯 𑀦𑀸𑀫𑀁, 𑀓𑀺𑀦𑁆𑀢𑀼 𑀲𑀜𑁆𑀜𑀸𑀘𑁂𑀢𑀦𑀸𑀦𑀫𑁆𑀧𑀺 𑀦𑀸𑀫𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀫𑁆𑀧𑀺 𑀏𑀯𑀫𑁂𑀯 𑀯𑀼𑀢𑁆𑀢𑀁.

𑁧𑁭𑁪. 𑀓𑀸𑀬𑀢𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀢𑁆𑀢𑀺𑀜𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀘𑀦𑀲𑀺𑀮𑀺𑀝𑁆𑀞𑀢𑁆𑀣𑀁 ‘‘𑀉𑀲𑀼𑀲𑀢𑁆𑀢𑀺𑀆𑀤𑀺𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀤𑁆𑀤𑁂𑀲𑀺𑀓𑁂 𑀓𑀫𑁆𑀫𑀲𑁆𑀲𑀸𑀭𑀫𑁆𑀫𑀡𑀁 𑀲𑁄 𑀯𑀸 𑀳𑁄𑀢𑀺, 𑀅𑀜𑁆𑀜𑁄 𑀯𑀸. 𑀉𑀪𑀬𑁂𑀳𑀻𑀢𑀺 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑁆𑀧𑀳𑀸𑀭𑁄 𑀦 𑀲𑀬𑀫𑁂𑀯 𑀲𑀓𑁆𑀓𑁄𑀢𑀺, 𑀤𑀼𑀢𑀺𑀬𑀁 𑀮𑀪𑀺𑀢𑁆𑀯𑀸 𑀧𑀦 𑀲𑀓𑁆𑀓𑁄𑀦𑁆𑀢𑁄 𑀚𑀻𑀯𑀺𑀢𑀯𑀺𑀦𑀸𑀲𑀦𑀳𑁂𑀢𑀼 𑀅𑀳𑁄𑀲𑀺, 𑀢𑀤𑀢𑁆𑀣𑀫𑁂𑀯 𑀳𑀺 𑀯𑀥𑀓𑁂𑀦 𑀲𑁄 𑀤𑀺𑀦𑁆𑀦𑁄, 𑀤𑀼𑀢𑀺𑀬𑁄 𑀧𑀦 𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀤𑀺𑀦𑁆𑀦𑁄, 𑀢𑁂𑀦 𑀲𑀼𑀝𑁆𑀞𑀼 𑀯𑀼𑀢𑁆𑀢𑀁 ‘‘𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯𑀸’’𑀢𑀺, ‘‘𑀘𑁂𑀢𑀦𑀸 𑀦𑀸𑀫 𑀤𑀸𑀭𑀼𑀡𑀸𑀢𑀺 𑀕𑀭𑀼𑀁 𑀯𑀢𑁆𑀣𑀼𑀁 𑀆𑀭𑀩𑁆𑀪 𑀧𑀯𑀢𑁆𑀢𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸 𑀧𑀓𑀢𑀺𑀲𑀪𑀸𑀯𑀯𑀥𑀓𑀘𑁂𑀢𑀦𑀸, 𑀦𑁄 𑀤𑀸𑀭𑀼𑀡𑀸 𑀳𑁄𑀢𑀻’’𑀢𑀺 𑀆𑀘𑀭𑀺𑀬𑁂𑀦 𑀮𑀺𑀔𑀺𑀢𑀁. ‘‘𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸 𑀧𑀭𑀺𑀯𑀸𑀭𑀸, 𑀯𑀥𑀓𑀘𑁂𑀢𑀦𑀸𑀯 𑀤𑀸𑀭𑀼𑀡𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀥𑀺𑀧𑁆𑀧𑀸𑀬𑀦𑁆𑀢𑀺 𑀉𑀪𑁄𑀧𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀸𑀳𑀢𑁆𑀣𑀺𑀓𑁄𑀧𑀺 𑀲𑀗𑁆𑀓𑁂𑀢𑀢𑁆𑀢𑀸 𑀦 𑀫𑀼𑀘𑁆𑀘𑀢𑀺 𑀓𑀺𑀭.

𑀓𑀺𑀭𑀺𑀬𑀸𑀯𑀺𑀲𑁂𑀲𑁄 𑀅𑀝𑁆𑀞𑀓𑀣𑀸𑀲𑀼 𑀅𑀦𑀸𑀕𑀢𑁄. ‘‘𑀏𑀯𑀁 𑀯𑀺𑀚𑁆𑀛, 𑀏𑀯𑀁 𑀧𑀳𑀭, 𑀏𑀯𑀁 𑀖𑀸𑀳𑁂𑀳𑀻’𑀢𑀺 𑀧𑀸𑀴𑀺𑀬𑀸 𑀲𑀫𑁂𑀢𑀻𑀢𑀺 𑀆𑀘𑀭𑀺𑀬𑁂𑀦 𑀕𑀳𑀺𑀢𑁄’’𑀢𑀺 𑀯𑀤𑀦𑁆𑀢𑀺. 𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸𑀢𑀺𑀆𑀤𑀺 𑀯𑀢𑁆𑀣𑀼𑀯𑀺𑀲𑀗𑁆𑀓𑁂𑀢𑀫𑁂𑀯 𑀓𑀺𑀭. 𑀏𑀢𑀁 𑀕𑀸𑀫𑁂 𑀞𑀺𑀢𑀦𑁆𑀢𑀺 𑀧𑀼𑀕𑁆𑀕𑀮𑁄𑀯 𑀦𑀺𑀬𑀫𑀺𑀢𑁄. 𑀬𑁄 𑀧𑀦 𑀮𑀺𑀗𑁆𑀕𑀯𑀲𑁂𑀦 ‘‘𑀤𑀻𑀖𑀁…𑀧𑁂… 𑀫𑀸𑀭𑁂𑀳𑀻’’𑀢𑀺 𑀆𑀡𑀸𑀧𑁂𑀢𑀺 𑀅𑀦𑀺𑀬𑀫𑁂𑀢𑁆𑀯𑀸. 𑀬𑀤𑀺 𑀦𑀺𑀬𑀫𑁂𑀢𑁆𑀯𑀸 𑀯𑀤𑀢𑀺, ‘‘𑀏𑀢𑀁 𑀤𑀻𑀖’’𑀦𑁆𑀢𑀺 𑀯𑀤𑁂𑀬𑁆𑀬𑀸𑀢𑀺 𑀅𑀧𑀭𑁂. 𑀆𑀘𑀭𑀺𑀬𑀸 𑀧𑀦 ‘‘𑀤𑀻𑀖𑀦𑁆𑀢𑀺 𑀯𑀼𑀢𑁆𑀢𑁂 𑀦𑀺𑀬𑀫𑀺𑀢𑀁 𑀳𑁄𑀢𑀺, 𑀏𑀯𑀁 𑀅𑀦𑀺𑀬𑀫𑁂𑀢𑁆𑀯𑀸 𑀯𑀤𑀢𑀺, 𑀦 𑀧𑀦 𑀆𑀡𑀸𑀧𑀓𑁄 𑀤𑀻𑀖𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀫𑀸𑀭𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀤𑀦𑁆𑀢𑀺 𑀓𑀺𑀭. ‘‘𑀅𑀢𑁆𑀣𑁄 𑀧𑀦 𑀘𑀺𑀢𑁆𑀢𑁂𑀦 𑀏𑀓𑀁 𑀲𑀦𑁆𑀥𑀸𑀬𑀧𑀺 𑀅𑀦𑀺𑀬𑀫𑁂𑀢𑁆𑀯𑀸 𑀆𑀡𑀸𑀧𑁂𑀢𑀻’’𑀢𑀺 𑀮𑀺𑀔𑀺𑀢𑀁. ‘‘𑀇𑀢𑀭𑁄 𑀅𑀜𑁆𑀜𑀁 𑀢𑀸𑀤𑀺𑀲𑀁 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦 𑀕𑀢𑀢𑁆𑀢𑀸. ‘‘𑀏𑀯𑀁 𑀤𑀻𑀖𑀸𑀤𑀺𑀯𑀲𑁂𑀦𑀸𑀧𑀺 𑀘𑀺𑀢𑁆𑀢𑁂𑀦 𑀅𑀦𑀺𑀬𑀫𑀺𑀢𑀲𑁆𑀲𑁂𑀯𑀸𑀢𑀺 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁, 𑀲𑀼𑀝𑁆𑀞𑀼 𑀯𑀻𑀫𑀁𑀲𑀺𑀢𑁆𑀯𑀸 𑀲𑀩𑁆𑀩𑀁 𑀕𑀳𑁂𑀢𑀩𑁆𑀩𑀁, 𑀑𑀓𑀸𑀲𑀲𑁆𑀲 𑀦𑀺𑀬𑀫𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀑𑀓𑀸𑀲𑀦𑀺𑀬𑀫𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀲𑀦𑁆𑀢𑁄 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀲𑀺𑀦𑁆𑀦𑀁 𑀫𑀸𑀭𑁂𑀢𑀼𑀓𑀸𑀫𑁄𑀯 𑀳𑁄𑀢𑀺, 𑀲𑀬𑀁 𑀧𑀦 𑀢𑀤𑀸 𑀢𑀢𑁆𑀣 𑀦𑀢𑁆𑀣𑀺. 𑀢𑀲𑁆𑀫𑀸 𑀑𑀓𑀸𑀲𑁂𑀦 𑀲𑀳 𑀅𑀢𑁆𑀢𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺, 𑀢𑁂𑀦 𑀅𑀢𑁆𑀢𑀦𑀸 𑀫𑀸𑀭𑀸𑀧𑀺𑀢𑁄 𑀧𑀭𑁄 𑀏𑀯 𑀫𑀸𑀭𑀸𑀧𑀺𑀢𑁄. 𑀓𑀣𑀁? 𑀲𑀬𑀁 𑀭𑀲𑁆𑀲𑁄 𑀘 𑀢𑀦𑀼𑀓𑁄 𑀘 𑀳𑀼𑀢𑁆𑀯𑀸 𑀧𑀼𑀩𑁆𑀩𑀪𑀸𑀕𑁂 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀆𑀡𑀢𑁆𑀢𑀺𑀓𑁆𑀔𑀡𑁂 ‘‘𑀤𑀻𑀖𑀁 𑀭𑀲𑁆𑀲𑀁 𑀣𑀽𑀮𑀁 𑀩𑀮𑀯𑀦𑁆𑀢𑀁 𑀫𑀸𑀭𑁂𑀳𑀻’’𑀢𑀺 𑀆𑀡𑀸𑀧𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀅𑀢𑁆𑀢𑀦𑀺 𑀢𑀲𑁆𑀲𑀸𑀓𑀸𑀭𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑁂𑀦 𑀫𑀽𑀮𑀝𑁆𑀞𑀲𑁆𑀲 𑀓𑀫𑁆𑀫𑀩𑀤𑁆𑀥𑁄. 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀽𑀢𑀧𑀭𑀫𑁆𑀧𑀭𑀸𑀦𑀺𑀤𑁆𑀤𑁂𑀲𑁂 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀻𑀦𑀁 𑀬𑀣𑀸𑀲𑀫𑁆𑀪𑀯𑀁 𑀆𑀭𑁄𑀘𑀦𑁂, 𑀧𑀝𑀺𑀕𑁆𑀕𑀡𑁆𑀳𑀦𑁂 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀁 𑀧𑀦 𑀑𑀓𑀸𑀲𑀸𑀪𑀸𑀯𑀢𑁄 𑀦 𑀯𑀼𑀢𑁆𑀢𑀁. 𑀫𑀽𑀮𑀝𑁆𑀞𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑀸 𑀳𑀺 𑀢𑀲𑁆𑀲 𑀑𑀓𑀸𑀲𑁄 𑀅𑀧𑀭𑀺𑀘𑁆𑀙𑀺𑀦𑁆𑀦𑁄, 𑀢𑁂𑀦𑀲𑁆𑀲 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀯𑀥𑀓𑁄 𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀫𑀽𑀮𑀝𑁆𑀞𑁄 𑀆𑀘𑀭𑀺𑀬𑁄 𑀧𑀼𑀩𑁆𑀩𑁂 𑀆𑀧𑀦𑁆𑀦𑀤𑀼𑀓𑁆𑀓𑀝𑁂𑀦 𑀲𑀳 𑀣𑀼𑀮𑁆𑀮𑀘𑁆𑀘𑀬𑀫𑁆𑀧𑀺 𑀆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀫𑀳𑀸𑀚𑀦𑁄 𑀳𑀺 𑀢𑁂𑀦 𑀧𑀸𑀧𑁂 𑀦𑀺𑀬𑁄𑀚𑀺𑀢𑁄𑀢𑀺. 𑀇𑀤𑀁 𑀧𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀁 𑀯𑀥𑀓𑁄 𑀘𑁂 𑀢𑀫𑀢𑁆𑀣𑀁 𑀦 𑀲𑀸𑀯𑁂𑀢𑀺 𑀆𑀧𑀚𑁆𑀚𑀢𑀺. 𑀬𑀤𑀺 𑀲𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸𑀬 𑀅𑀪𑀸𑀯𑀸. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀧𑀝𑀺𑀕𑁆𑀕𑀡𑁆𑀳𑀢𑀺, 𑀢𑀁 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀸𑀞𑁂 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀯𑀥𑀓𑁄 𑀧𑀦 ‘𑀲𑀸𑀥𑀼 𑀓𑀭𑁄𑀫𑀻’𑀢𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀁 𑀦 𑀓𑀭𑁄𑀢𑀺. 𑀏𑀯𑀜𑁆𑀳𑀺 𑀦𑀺𑀬𑀫𑁂 ‘𑀫𑀽𑀮𑀝𑁆𑀞𑀲𑁆𑀲 𑀓𑀺𑀁 𑀦𑀸𑀫 𑀳𑁄𑀢𑀺, 𑀓𑀺𑀫𑀲𑁆𑀲 𑀤𑀼𑀓𑁆𑀓𑀝𑀸𑀧𑀢𑁆𑀢𑀻’𑀢𑀺 𑀲𑀜𑁆𑀚𑀸𑀢𑀓𑀗𑁆𑀔𑀸𑀦𑀁 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 ‘𑀫𑀽𑀮𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’’𑀢𑀺 𑀯𑀼𑀢𑁆𑀢𑀁. ‘‘𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀫𑀽𑀮𑀝𑁆𑀞𑀲𑁆𑀲 𑀘 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀦 𑀲𑀺𑀮𑀺𑀲𑁆𑀲𑀢𑀺, 𑀫𑀽𑀮𑀝𑁆𑀞𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀤𑀲𑁆𑀲𑀦𑀸𑀥𑀺𑀓𑀸𑀭𑀢𑁆𑀢𑀸 𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀯𑀼𑀢𑁆𑀢𑀁.

𑀯𑀺𑀲𑀓𑁆𑀓𑀺𑀬𑀤𑀽𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀯𑀢𑁆𑀢𑀼𑀓𑀸𑀫𑀢𑀸𑀬 𑀘 𑀓𑀺𑀘𑁆𑀙𑁂𑀦𑁂𑀢𑁆𑀣 𑀯𑀢𑁆𑀯𑀸 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀪𑀕𑀯𑀢𑀸 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 ‘‘𑀫𑀽𑀮𑀝𑁆𑀞𑀲𑁆𑀲𑁂𑀯 𑀤𑀼𑀓𑁆𑀓𑀝’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀆𑀘𑀭𑀺𑀬𑁂𑀦 𑀆𑀡𑀢𑁆𑀢𑁂𑀦 𑀩𑀼𑀤𑁆𑀥𑀭𑀓𑁆𑀔𑀺𑀢𑁂𑀦 𑀢𑀤𑀢𑁆𑀣𑁂 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲𑁂𑀯 𑀆𑀭𑁄𑀘𑀺𑀢𑁂 𑀓𑀺𑀜𑁆𑀘𑀸𑀧𑀺 𑀬𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀣 𑀔𑁄 𑀆𑀘𑀭𑀺𑀬𑀲𑁆𑀲𑁂𑀯𑁂𑀢𑀁 𑀤𑀼𑀓𑁆𑀓𑀝𑀁 𑀯𑀺𑀲𑀗𑁆𑀓𑁂𑀢𑀢𑁆𑀢𑀸, 𑀦 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲, 𑀓𑀲𑁆𑀫𑀸? 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸𑀬 𑀆𑀧𑀦𑁆𑀦𑀢𑁆𑀢𑀸. 𑀢𑁂𑀦𑁂𑀯 ‘‘𑀆𑀡𑀸𑀧𑀓𑀲𑁆𑀲 𑀘 𑀯𑀥𑀓𑀲𑁆𑀲 𑀘 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀫𑀽𑀮𑀝𑁆𑀞𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀤𑀼𑀓𑁆𑀓𑀝𑀁 ‘‘𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀢𑁆𑀢𑀸 𑀦 𑀯𑀼𑀢𑁆𑀢𑀁.

𑀅𑀯𑀺𑀲𑀗𑁆𑀓𑁂𑀢𑁂 ‘‘𑀫𑀽𑀮𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑀗𑁆𑀓𑁂𑀢𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀲𑀺𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀁 𑀧𑀦 𑀤𑀼𑀓𑁆𑀓𑀝𑀁 𑀯𑀥𑀓𑀲𑁆𑀲𑁂𑀯. 𑀲𑁄 𑀳𑀺 𑀧𑀞𑀫𑀁 𑀆𑀡𑀸𑀧𑀓𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀧𑀸𑀧𑁂𑀢𑁆𑀯𑀸 𑀲𑀬𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 ‘‘𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀘 𑀯𑀥𑀓𑀲𑁆𑀲 𑀘 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀢𑀁 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯, ‘‘𑀬𑀢𑁄 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀘 𑀢𑀁 𑀦 𑀯𑀼𑀢𑁆𑀢𑀁. ‘‘𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀼𑀩𑁆𑀩𑁂 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀼𑀢𑁆𑀢𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑁄 𑀧𑀞𑀫𑀫𑁂𑀯 𑀅𑀦𑀸𑀧𑀦𑁆𑀦𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀆𑀧𑀦𑁆𑀦𑀢𑁆𑀢𑀸. 𑀢𑀣𑀸𑀧𑀺 𑀯𑀥𑀓𑀲𑁆𑀲 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑁂𑀲𑀁 𑀧𑀸𑀭𑀸𑀚𑀺𑀓𑀪𑀸𑀯𑁄 𑀧𑀸𑀓𑀝𑁄 𑀚𑀸𑀢𑁄𑀢𑀺 𑀓𑀢𑁆𑀯𑀸 ‘‘𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀏𑀓𑀢𑁄 𑀯𑀼𑀢𑁆𑀢𑀁, 𑀦 𑀢𑀣𑀸 ‘‘𑀆𑀡𑀸𑀧𑀓𑀲𑁆𑀲, 𑀯𑀥𑀓𑀲𑁆𑀲 𑀘 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀏𑀢𑁆𑀣. 𑀓𑀲𑁆𑀫𑀸? 𑀯𑀥𑀓𑀲𑁆𑀲 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀆𑀧𑀦𑁆𑀦𑀢𑁆𑀢𑀸. 𑀲𑁄 𑀳𑀺 𑀧𑀞𑀫𑀁 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺. 𑀬𑀤𑀺 𑀧𑀦 𑀅𑀦𑁆𑀢𑁂𑀯𑀸𑀲𑀺𑀓𑀸 𑀓𑁂𑀯𑀮𑀁 𑀆𑀘𑀭𑀺𑀬𑀲𑁆𑀲 𑀕𑀭𑀼𑀓𑀢𑀸𑀬 𑀲𑀸𑀲𑀦𑀁 𑀆𑀭𑁄𑀘𑁂𑀦𑁆𑀢𑀺 𑀲𑀬𑀁 𑀅𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀲𑀫𑀸𑀦𑀸 𑀧𑀸𑀭𑀸𑀚𑀺𑀓𑁂𑀦 𑀅𑀦𑀸𑀧𑀢𑁆𑀢𑀺. 𑀅𑀓𑀧𑁆𑀧𑀺𑀬𑀲𑀸𑀲𑀦𑀳𑀭𑀡𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀺 𑀏𑀯, 𑀇𑀫𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀦𑀢𑁆𑀣𑀁 𑀥𑀫𑁆𑀫𑀧𑀤𑀯𑀢𑁆𑀣𑀽𑀳𑀺 𑀫𑀺𑀕𑀮𑀼𑀤𑁆𑀤𑀓𑀲𑁆𑀲 𑀪𑀭𑀺𑀬𑀸𑀬 𑀲𑁄𑀢𑀸𑀧𑀦𑁆𑀦𑀸𑀬 𑀥𑀦𑀼𑀉𑀲𑀼𑀲𑀽𑀮𑀸𑀤𑀺𑀤𑀸𑀦𑀁 𑀦𑀺𑀤𑀲𑁆𑀲𑀦𑀁 𑀯𑀤𑀦𑁆𑀢𑀺 𑀏𑀓𑁂. 𑀢𑀁 𑀢𑀺𑀢𑁆𑀢𑀺𑀭𑀚𑀸𑀢𑀓𑁂𑀦 (𑀚𑀸. 𑁧.𑁪.𑁭𑁩 𑀆𑀤𑀬𑁄) 𑀲𑀫𑁂𑀢𑀺, 𑀢𑀲𑁆𑀫𑀸 𑀲𑀼𑀢𑁆𑀢𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀅𑀦𑀼𑀮𑁄𑀫𑁂𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀇𑀥 𑀧𑀦 𑀤𑀽𑀢𑀧𑀭𑀫𑁆𑀧𑀭𑀸𑀬 𑀘 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀧𑀸𑀯𑀤𑀢𑀽’’𑀢𑀺 𑀏𑀢𑁆𑀣 𑀅𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀯𑀸𑀘𑀸𑀬 𑀯𑀸 𑀆𑀭𑁄𑀘𑁂𑀢𑀼, 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸, 𑀧𑀡𑁆𑀡𑁂𑀦 𑀯𑀸, 𑀤𑀽𑀢𑁂𑀦 𑀯𑀸 𑀆𑀭𑁄𑀘𑁂𑀢𑀼, 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺. 𑀲𑀘𑁂 𑀯𑀺𑀲𑁂𑀲𑁂𑀢𑁆𑀯𑀸 𑀫𑀽𑀮𑀝𑁆𑀞𑁄, 𑀅𑀦𑁆𑀢𑀭𑀸𑀤𑀽𑀢𑁄 𑀯𑀸 𑀯𑀤𑀢𑀺, 𑀢𑀤𑀢𑀺𑀓𑁆𑀓𑀫𑁂 𑀯𑀺𑀲𑀗𑁆𑀓𑁂𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀥𑀺𑀓𑀸𑀭𑀤𑁆𑀯𑀬𑁂 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑀬𑁄 𑀯𑀼𑀘𑁆𑀘𑀢𑀺 𑁋 ‘‘𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀥𑀓𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀦 𑀆𑀡𑀸𑀧𑀓𑀲𑁆𑀲 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲. 𑀬𑀤𑀺 𑀧𑀦 𑀲𑁄 𑀯𑀚𑁆𑀛𑀫𑀭𑀡𑀸𑀫𑀭𑀡𑁂𑀲𑀼 𑀅𑀯𑀲𑁆𑀲𑀫𑀜𑁆𑀜𑀢𑀭𑀁 𑀓𑀭𑁄𑀢𑀺, 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸𑀡𑀢𑁆𑀢𑀺𑀓𑁆𑀔𑀡𑁂 𑀏𑀯 𑀧𑀸𑀭𑀸𑀚𑀺𑀓𑀤𑀼𑀓𑁆𑀓𑀝𑁂𑀲𑀼 𑀅𑀜𑁆𑀜𑀢𑀭𑀁 𑀲𑀺𑀬𑀸. ‘‘𑀇𑀢𑀺 𑀘𑀺𑀢𑁆𑀢𑀫𑀦𑁄’’𑀢𑀺 𑀅𑀥𑀺𑀓𑀸𑀭𑀢𑁄 ‘‘𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺 𑀏𑀢𑁆𑀣𑀸𑀧𑀺 𑀇𑀢𑀺-𑀲𑀤𑁆𑀤𑁄 𑀯𑀺𑀬 ‘‘𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀅𑀥𑀺𑀓𑀸𑀭𑀢𑁄 ‘‘𑀫𑀽𑀮𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸 𑀲𑀭𑀽𑀧𑁂𑀦 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀢𑁄 𑀘𑀼𑀢𑁆𑀢𑀭𑀺 𑀦𑀬𑀤𑀸𑀦𑀢𑁆𑀣𑀁. ‘‘𑀫𑀽𑀮𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀫𑀽𑀮𑀝𑁆𑀞𑀲𑁆𑀲𑁂𑀯 𑀯𑀲𑁂𑀦 𑀦𑀺𑀬𑀫𑀺𑀢𑀢𑁆𑀢𑀸 ‘‘𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺 𑀦 𑀜𑀸𑀬𑀢𑀺. ‘‘𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀳𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁂 𑀲𑀓𑁆𑀓𑀸 𑀉𑀪𑀬𑁂𑀲𑀁 𑀯𑀲𑁂𑀦 𑀤𑀼𑀓𑁆𑀓𑀝𑁂 𑀬𑁄𑀚𑁂𑀢𑀼𑀁. 𑀢𑀲𑁆𑀫𑀸 𑀏𑀯 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀅𑀥𑀺𑀓𑀸𑀭𑀁 𑀕𑀳𑁂𑀢𑁆𑀯𑀸 ‘‘𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀫𑀽𑀮𑀝𑁆𑀞𑀲𑁆𑀲𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀦𑁂𑀯 𑀅𑀦𑀼𑀜𑁆𑀜𑀸𑀢𑀁, 𑀦 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀓𑁂𑀯𑀮𑀦𑁆𑀢𑀼 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀅𑀦𑀺𑀬𑀫𑀺𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀧𑀦 𑀧𑀸𑀭𑀸𑀚𑀺𑀓𑀤𑀼𑀓𑁆𑀓𑀝𑁂𑀲𑀼 𑀅𑀜𑁆𑀜𑀢𑀭𑀁 𑀪𑀯𑁂𑀬𑁆𑀬𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄, 𑀢𑀲𑁆𑀫𑀸 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀉𑀪𑀬𑁂𑀲𑀁 𑀯𑀲𑁂𑀦 𑀬𑁄𑀚𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀆𑀘𑀭𑀺𑀬𑁂𑀳𑀺 ‘‘𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯𑁂𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀽𑀮𑀝𑁆𑀞𑁄 𑀦𑁂𑀯 𑀅𑀦𑀼𑀜𑁆𑀜𑀸𑀢𑁄 ‘‘𑀫𑀽𑀮𑀝𑁆𑀞𑀲𑁆𑀲𑀸’’𑀢𑀺 𑀯𑀘𑀦𑀸𑀪𑀸𑀯𑀢𑁄, 𑀦 𑀘 𑀧𑀝𑀺𑀓𑁆𑀔𑀺𑀢𑁆𑀢𑁄 ‘‘𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀧𑀸𑀴𑀺𑀬𑀸 𑀅𑀪𑀸𑀯𑀢𑁄, 𑀧𑀝𑀺𑀕𑁆𑀕𑀡𑁆𑀳𑀦𑀧𑀘𑁆𑀘𑀬𑀸 𑀯𑀥𑀓𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀦𑀬𑀁 𑀤𑀸𑀢𑀼𑀁 ‘‘𑀫𑀽𑀮𑀝𑁆𑀞𑀲𑁆𑀲𑀸’’𑀢𑀺 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸 ‘‘𑀢𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯𑁂𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀁. 𑀢𑀢𑁆𑀭 𑀳𑀺 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀢𑀲𑁆𑀲 𑀆𑀧𑀢𑁆𑀢𑀺 𑀅𑀦𑀺𑀬𑀢𑀸𑀢𑀺. 𑀓𑀲𑁆𑀫𑀸 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀢𑁆𑀢𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑀧𑀘𑁆𑀘𑀬𑀸 𑀯𑀥𑀓𑀲𑁆𑀲 𑀤𑀼𑀓𑁆𑀓𑀝𑀁 𑀅𑀯𑀢𑁆𑀯𑀸 𑀫𑀽𑀮𑀝𑁆𑀞𑀲𑁆𑀲𑁂𑀯 𑀯𑀲𑁂𑀦 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀦𑀺𑀝𑁆𑀞𑀦𑀺𑀯𑀸𑀭𑀡𑀢𑁆𑀣𑀁. ‘‘𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀧𑀝𑀺𑀕𑁆𑀕𑀡𑁆𑀳𑀦𑀧𑀘𑁆𑀘𑀬𑀸 𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀅𑀦𑀦𑁆𑀢𑀭𑀦𑀬𑁂𑀦 𑀲𑀭𑀽𑀧𑁂𑀦 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀧𑀺 𑀫𑀽𑀮𑀝𑁆𑀞𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀇𑀢𑀺 𑀢𑀁 𑀏𑀯𑀁 𑀆𑀧𑀦𑁆𑀦𑀁 𑀣𑀼𑀮𑁆𑀮𑀘𑁆𑀘𑀬𑀁 𑀉𑀢𑁆𑀢𑀸𑀦𑀦𑁆𑀢𑀺 𑀢𑀁 𑀅𑀯𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀅𑀦𑀼𑀢𑁆𑀢𑀸𑀦𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀦𑁆𑀢𑀺 𑀇𑀫𑀁 𑀅𑀦𑀺𑀝𑁆𑀞𑀕𑁆𑀕𑀳𑀡𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀫𑀽𑀮𑀝𑁆𑀞𑀲𑁆𑀲𑁂𑀯𑁂𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀘𑀭𑀺𑀬𑁂𑀦 𑀳𑀺 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁆𑀧𑀺 𑀉𑀢𑁆𑀢𑀸𑀦𑀫𑁂𑀯. 𑀉𑀢𑁆𑀢𑀸𑀦𑀜𑁆𑀘 𑀓𑀲𑁆𑀫𑀸 𑀅𑀫𑁆𑀳𑀸𑀓𑀁 𑀔𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀧𑀝𑀺𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀁. ‘‘𑀧𑀺𑀝𑀓𑀢𑁆𑀢𑀬𑀸𑀤𑀻𑀲𑀼 𑀅𑀧𑁆𑀧𑀝𑀺𑀳𑀢𑀩𑀼𑀤𑁆𑀥𑀺𑀬𑁄𑀧𑀺 𑀆𑀘𑀭𑀺𑀬𑀸 𑀲𑀭𑀽𑀧𑁂𑀦 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑀅𑀯𑀼𑀢𑁆𑀢𑀢𑁆𑀢𑀸 𑀏𑀯𑀭𑀽𑀧𑁂𑀲𑀼 𑀦𑀸𑀫 𑀞𑀸𑀦𑁂𑀲𑀼 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀸𑀤𑀺𑀲𑁄𑀢𑀺 𑀲𑀼𑀳𑀤𑀬𑀸 𑀓𑀼𑀮𑀧𑀼𑀢𑁆𑀢𑀸 𑀅𑀦𑀸𑀕𑀢𑁂 𑀯𑀼𑀢𑁆𑀢𑀦𑀬𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀗𑁆𑀓𑀭𑀤𑁄𑀲𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀯𑀡𑁆𑀡𑀦𑀸𑀯𑁂𑀮𑀜𑁆𑀘 𑀅𑀦𑀢𑀺𑀓𑁆𑀓𑀫𑁆𑀫 𑀧𑀝𑀺𑀧𑀚𑁆𑀚𑀦𑁆𑀢𑀻’’𑀢𑀺 𑀘 𑀅𑀧𑀭𑁂𑀳𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬 𑀯𑀸 𑀅𑀯𑀼𑀢𑁆𑀢𑀢𑁆𑀢𑀸 𑀏𑀯𑀭𑀽𑀧𑁂𑀲𑀼 𑀦𑀸𑀫 𑀧𑀸𑀞𑁄 𑀆𑀘𑀭𑀺𑀬𑁂𑀦 𑀧𑀘𑁆𑀙𑀸 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀲𑁆𑀲𑀢𑀻𑀢𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀮𑀺𑀔𑀺𑀲𑁆𑀲𑀸𑀫. 𑀏𑀯𑀁 𑀲𑀦𑁆𑀢𑁂 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺𑀬𑁂𑀯 𑀦 𑀲𑀺𑀬𑀸, 𑀲𑀜𑁆𑀘𑀭𑀺𑀢𑁆𑀢𑀧𑀝𑀺𑀕𑁆𑀕𑀳𑀡𑀫𑀭𑀡𑀸𑀪𑀺𑀦𑀦𑁆𑀤𑀦𑁂𑀲𑀼𑀧𑀺 𑀘 𑀆𑀧𑀢𑁆𑀢𑀺 𑀳𑁄𑀢𑀺, 𑀫𑀸𑀭𑀡𑀧𑀝𑀺𑀕𑁆𑀕𑀳𑀡𑁂 𑀓𑀣𑀁 𑀦 𑀲𑀺𑀬𑀸, 𑀢𑀲𑁆𑀫𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑁂𑀦𑁂𑀯𑁂𑀢𑁆𑀣 ‘‘𑀫𑀽𑀮𑀝𑁆𑀞𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀦𑀬𑁂𑀧𑀺 𑀘𑁂𑀢𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀯𑁂𑀤𑀺𑀢𑀩𑁆𑀩𑀫𑁂𑀯, 𑀑𑀓𑀸𑀲𑀸𑀪𑀸𑀯𑁂𑀦 𑀧𑀦 𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁄 𑀬𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑁂𑀧𑀻𑀢𑀺.

𑁧𑁭𑁫. 𑀅𑀭𑀳𑁄 𑀭𑀳𑁄𑀲𑀜𑁆𑀜𑀻𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀢𑀢𑁆𑀣 𑀧𑀭𑀫𑁆𑀧𑀭𑀸𑀬 𑀲𑀼𑀢𑁆𑀯𑀸 𑀫𑀭𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀉𑀮𑁆𑀮𑀧𑀦𑁆𑀢𑀲𑁆𑀲 𑀉𑀤𑁆𑀤𑁂𑀲𑁂 𑀲𑀢𑀺 𑀉𑀤𑁆𑀤𑀺𑀝𑁆𑀞𑀲𑁆𑀲 𑀫𑀭𑀡𑁂𑀦 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀅𑀲𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀫𑀭𑀡𑁂𑀦 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑀼𑀢𑁆𑀯𑀸 𑀫𑁂 𑀯𑀚𑁆𑀛𑀲𑁆𑀲 𑀆𑀭𑁄𑀘𑁂𑀢𑀽’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀉𑀮𑁆𑀮𑀧𑀦𑁆𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑀢𑀸 𑀤𑀽𑀢𑀧𑀭𑀫𑁆𑀧𑀭𑀸𑀬 𑀯𑀼𑀢𑁆𑀢𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁂 ‘‘𑀬𑁄 𑀓𑁄𑀘𑀺 𑀲𑀼𑀢𑁆𑀯𑀸 𑀯𑀤𑀢𑀽’’𑀢𑀺 𑀉𑀮𑁆𑀮𑀧𑀢𑀺, 𑀯𑀚𑁆𑀛𑁄 𑀲𑀬𑀫𑁂𑀯 𑀲𑀼𑀢𑁆𑀯𑀸 𑀫𑀭𑀢𑀺, 𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀦 𑀧𑀸𑀭𑀸𑀚𑀺𑀓𑀁. 𑀬𑁄 𑀓𑁄𑀘𑀺 𑀲𑀼𑀢𑁆𑀯𑀸 𑀯𑀤𑀢𑀺, 𑀲𑁄 𑀘𑁂 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀁. ‘‘𑀬𑁄 𑀓𑁄𑀘𑀺 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀁 𑀫𑀸𑀭𑁂𑀢𑀽’’𑀢𑀺 𑀉𑀮𑁆𑀮𑀧𑀢𑀺, 𑀬𑁄 𑀓𑁄𑀘𑀺 𑀲𑀼𑀢𑁆𑀯𑀸 𑀫𑀸𑀭𑁂𑀢𑀺, 𑀧𑀸𑀭𑀸𑀚𑀺𑀓𑀁, 𑀲𑀬𑀫𑁂𑀯 𑀲𑀼𑀢𑁆𑀯𑀸 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀦 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀯𑀁 𑀬𑀣𑀸𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁭𑁬. 𑀫𑀽𑀮𑀁 𑀤𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀪𑀺𑀦𑁆𑀤𑀺𑀢𑁆𑀯𑀸, 𑀪𑀜𑁆𑀚𑀺𑀢𑁆𑀯𑀸, 𑀘𑀯𑀺𑀢𑁆𑀯𑀸, 𑀘𑀼𑀡𑁆𑀡𑁂𑀢𑁆𑀯𑀸, 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀧𑀕𑁂𑀯 𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀬𑁂𑀲𑀁 𑀳𑀢𑁆𑀣𑀢𑁄 𑀫𑀽𑀮𑀁 𑀕𑀳𑀺𑀢𑀦𑁆𑀢𑀺 𑀬𑁂𑀲𑀁 𑀜𑀸𑀢𑀓𑀧𑀭𑀺𑀯𑀸𑀭𑀺𑀢𑀸𑀦𑀁 𑀳𑀢𑁆𑀣𑀢𑁄 𑀫𑀽𑀮𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀕𑀳𑀺𑀢𑀁, 𑀧𑁄𑀢𑁆𑀣𑀓𑀲𑀸𑀫𑀺𑀓𑀳𑀢𑁆𑀣𑀢𑁄 𑀧𑀼𑀩𑁆𑀩𑁂 𑀤𑀺𑀦𑁆𑀦𑀫𑀽𑀮𑀁 𑀧𑀼𑀦 𑀕𑀳𑁂𑀢𑁆𑀯𑀸 𑀢𑁂𑀲𑀜𑁆𑀜𑁂𑀯 𑀜𑀸𑀢𑀓𑀸𑀤𑀻𑀦𑀁 𑀤𑀢𑁆𑀯𑀸 𑀫𑀼𑀘𑁆𑀘𑀢𑀺, 𑀏𑀯𑀁 𑀧𑁄𑀢𑁆𑀣𑀓𑀲𑀸𑀫𑀺𑀓𑀲𑁆𑀲𑁂𑀯 𑀲𑀦𑁆𑀢𑀓𑀁 𑀚𑀸𑀢𑀁 𑀳𑁄𑀢𑀺. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀲𑀘𑁂𑀧𑀺 𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀲𑀻𑀖𑀁 𑀢𑁂𑀲𑀁 𑀫𑀽𑀮𑀁 𑀤𑀢𑁆𑀯𑀸 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑁂𑀦 𑀥𑀦𑁂𑀦 𑀧𑁄𑀢𑁆𑀣𑀓𑁄 𑀓𑀻𑀢𑁄, 𑀢𑀜𑁆𑀘 𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀧𑁄𑀢𑁆𑀣𑀓𑀲𑀸𑀫𑀺𑀓𑀳𑀢𑁆𑀣𑀢𑁄 𑀥𑀦𑁂 𑀕𑀳𑀺𑀢𑁂 𑀧𑁄𑀢𑁆𑀣𑀓𑁂 𑀅𑀤𑀺𑀦𑁆𑀦𑁂𑀧𑀺 𑀫𑀼𑀘𑁆𑀘𑀦𑀢𑁄. 𑀲𑀘𑁂 𑀅𑀜𑁆𑀜𑀁 𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀬𑀼𑀢𑁆𑀢𑀁 𑀧𑁄𑀢𑁆𑀣𑀓𑀲𑁆𑀲 𑀅𑀢𑁆𑀢𑀦𑀺𑀬𑀪𑀸𑀯𑀢𑁄 𑀅𑀫𑁄𑀘𑀺𑀢𑀢𑁆𑀢𑀸. 𑀲𑀘𑁂 𑀧𑁄𑀢𑁆𑀣𑀓𑀁 𑀲𑀸𑀫𑀺𑀓𑀸𑀦𑀁 𑀤𑀢𑁆𑀯𑀸 𑀫𑀽𑀮𑀁 𑀦 𑀕𑀡𑁆𑀳𑀸𑀢𑀺, 𑀦 𑀫𑀼𑀘𑁆𑀘𑀢𑀺 𑀅𑀢𑁆𑀢𑀦𑀺𑀬𑀪𑀸𑀯𑀢𑁄 𑀅𑀫𑁄𑀘𑀺𑀢𑀢𑁆𑀢𑀸. 𑀲𑀘𑁂 𑀧𑁄𑀢𑁆𑀣𑀓𑀁 𑀫𑀽𑀮𑀝𑁆𑀞𑁂𑀦 𑀤𑀺𑀬𑁆𑀬𑀫𑀸𑀦𑀁 ‘‘𑀢𑀯𑁂𑀯 𑀳𑁄𑀢𑀽’’𑀢𑀺 𑀅𑀧𑁆𑀧𑁂𑀢𑀺, 𑀫𑀼𑀘𑁆𑀘𑀢𑀺 𑀅𑀢𑁆𑀢𑀦𑀺𑀬𑀪𑀸𑀯𑀢𑁄 𑀫𑁄𑀘𑀺𑀢𑀢𑁆𑀢𑀸. 𑀏𑀢𑁆𑀣𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀬𑀣𑀸 𑀘𑁂𑀢𑀺𑀬𑀁 𑀯𑀸 𑀧𑀝𑀺𑀫𑀁 𑀧𑁄𑀓𑁆𑀔𑀭𑀡𑀺𑀁 𑀲𑁂𑀢𑀼𑀁 𑀯𑀸 𑀓𑀺𑀡𑀺𑀢𑁆𑀯𑀸 𑀕𑀳𑀺𑀢𑀫𑁆𑀧𑀺 𑀓𑀸𑀭𑀓𑀲𑁆𑀲𑁂𑀯𑁂𑀢𑀁 𑀧𑀼𑀜𑁆𑀜𑀁, 𑀦 𑀓𑀺𑀡𑀺𑀢𑁆𑀯𑀸 𑀕𑀳𑀺𑀢𑀲𑁆𑀲, 𑀢𑀣𑀸 𑀧𑀸𑀧𑀫𑁆𑀧𑀺 𑀬𑁂𑀦 𑀧𑁄𑀢𑁆𑀣𑀓𑁄 𑀮𑀺𑀔𑀺𑀢𑁄, 𑀢𑀲𑁆𑀲𑁂𑀯 𑀬𑀼𑀚𑁆𑀚𑀢𑀺, 𑀦 𑀇𑀢𑀭𑀲𑁆𑀲𑀸𑀢𑀺 𑀘𑁂? 𑀦, ‘‘𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺 𑀯𑀘𑀦𑀢𑁄. 𑀧𑀭𑁂𑀦 𑀳𑀺 𑀓𑀢𑀲𑀢𑁆𑀣𑀁 𑀮𑀪𑀺𑀢𑁆𑀯𑀸 𑀉𑀧𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀦𑁆𑀢𑀺 𑀲𑀺𑀤𑁆𑀥𑀁. 𑀏𑀯𑀁 𑀧𑀭𑁂𑀦 𑀮𑀺𑀔𑀺𑀢𑀫𑁆𑀧𑀺 𑀧𑁄𑀢𑁆𑀣𑀓𑀁 𑀮𑀪𑀺𑀢𑁆𑀯𑀸 𑀬𑀣𑀸 𑀯𑀚𑁆𑀛𑁄 𑀢𑀁 𑀧𑀲𑁆𑀲𑀺𑀢𑁆𑀯𑀸 𑀫𑀭𑀢𑀺, 𑀢𑀣𑀸 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬 𑀧𑀸𑀭𑀸𑀚𑀺𑀓𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺. 𑀘𑁂𑀢𑀺𑀬𑀸𑀤𑀻𑀢𑀺 𑀏𑀢𑀫𑀦𑀺𑀤𑀲𑁆𑀲𑀦𑀁 𑀓𑀭𑀡𑀧𑀘𑁆𑀘𑀬𑀁 𑀳𑀺 𑀢𑀁 𑀓𑀫𑁆𑀫𑀁 𑀇𑀤𑀁𑀫𑀭𑀡𑀧𑀘𑁆𑀘𑀬𑀦𑁆𑀢𑀺 𑀏𑀯𑀁 𑀆𑀘𑀭𑀺𑀬𑁂𑀦 𑀯𑀺𑀘𑀸𑀭𑀺𑀢𑀁. 𑀫𑀫 𑀧𑀦 𑀘𑁂𑀢𑀺𑀬𑀸𑀤𑀺𑀦𑀺𑀤𑀲𑁆𑀲𑀦𑁂𑀦𑁂𑀯 𑀲𑁄𑀧𑀺 𑀅𑀢𑁆𑀣𑁄 𑀲𑀸𑀥𑁂𑀢𑀩𑁆𑀩𑁄 𑀯𑀺𑀬 𑀧𑀝𑀺𑀪𑀸𑀢𑀺.

𑀢𑀢𑁆𑀢𑀓𑀸 𑀧𑀸𑀡𑀸𑀢𑀺𑀧𑀸𑀢𑀸𑀢𑀺 ‘‘𑀏𑀓𑀸𑀧𑀺 𑀘𑁂𑀢𑀦𑀸 𑀓𑀺𑀘𑁆𑀘𑀯𑀲𑁂𑀦 ‘𑀢𑀢𑁆𑀢𑀓𑀸’𑀢𑀺 𑀯𑀼𑀢𑁆𑀢𑀸 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀓𑁆𑀓𑀢𑀸 𑀯𑀺𑀬𑀸’’𑀢𑀺 𑀮𑀺𑀔𑀺𑀢𑀁. 𑀧𑀫𑀸𑀡𑁂 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀧𑁆𑀧𑀫𑀸𑀡𑁂. ‘‘𑀓𑀢𑀁 𑀫𑀬𑀸 𑀏𑀯𑀭𑀽𑀧𑁂 𑀆𑀯𑀸𑀝𑁂 𑀔𑀡𑀺𑀢𑁂 𑀢𑀲𑁆𑀫𑀺𑀁 𑀧𑀢𑀺𑀢𑁆𑀯𑀸 𑀫𑀭𑀢𑀽’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀥𑀓𑁄 𑀆𑀯𑀸𑀝𑀧𑁆𑀧𑀫𑀸𑀡𑀁 𑀦𑀺𑀬𑀫𑁂𑀢𑁆𑀯𑀸 𑀲𑀘𑁂 𑀔𑀡𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀫𑀲𑁆𑀫𑀺𑀁 𑀆𑀯𑀸𑀝𑁂’’𑀢𑀺. 𑀇𑀤𑀸𑀦𑀺 𑀔𑀡𑀺𑀢𑀩𑁆𑀩𑀁 𑀲𑀦𑁆𑀥𑀸𑀬 𑀏𑀢𑁆𑀢𑀓𑀧𑁆𑀧𑀫𑀸𑀡𑀲𑁆𑀲 𑀅𑀦𑀺𑀬𑀫𑀺𑀢𑀢𑁆𑀢𑀸 ‘‘𑀏𑀓𑀲𑁆𑀫𑀺𑀫𑁆𑀧𑀺 𑀓𑀼𑀤𑀸𑀮𑀧𑁆𑀧𑀳𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑁂𑀳𑀺 𑀓𑀺𑀜𑁆𑀘𑀸𑀧𑀺 𑀉𑀧𑀞𑀢𑀁, 𑀢𑀣𑀸𑀧𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀉𑀪𑀬𑀢𑁆𑀣 𑀅𑀢𑁆𑀣𑁂𑀯𑀸𑀢𑀺 𑀆𑀘𑀭𑀺𑀬𑀸. 𑀩𑀳𑀽𑀦𑀁 𑀫𑀭𑀡𑁂 𑀆𑀭𑀫𑁆𑀫𑀡𑀦𑀺𑀬𑀫𑁂 𑀓𑀣𑀦𑁆𑀢𑀺 𑀘𑁂? 𑀯𑀚𑁆𑀛𑁂𑀲𑀼 𑀏𑀓𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀆𑀮𑀫𑁆𑀩𑀺𑀢𑁂 𑀲𑀩𑁆𑀩𑁂𑀲𑀫𑀸𑀮𑀫𑁆𑀩𑀺𑀢𑀫𑁂𑀯 𑀳𑁄𑀢𑀺. 𑀏𑀓𑀲𑁆𑀲 𑀫𑀭𑀡𑁂𑀧𑀺 𑀦 𑀢𑀲𑁆𑀲 𑀲𑀓𑀮𑀁 𑀚𑀻𑀯𑀺𑀢𑀁 𑀲𑀓𑁆𑀓𑀸 𑀆𑀮𑀫𑁆𑀩𑀺𑀢𑀼𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀉𑀧𑁆𑀧𑀦𑁆𑀦𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀅𑀢𑁆𑀣𑀺𑀢𑀸𑀬𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑀸 𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀬𑀼𑀚𑁆𑀚𑀢𑀺. 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀧𑀼𑀭𑁂𑀚𑀸𑀢𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀢𑀁 𑀚𑀻𑀯𑀺𑀢𑀫𑀸𑀮𑀫𑁆𑀩𑀡𑀁 𑀓𑀢𑁆𑀯𑀸 𑀲𑀢𑁆𑀢𑀫𑀚𑀯𑀦𑀧𑀭𑀺𑀬𑀸𑀧𑀦𑁆𑀦𑀘𑁂𑀢𑀦𑀸𑀬 𑀑𑀧𑀓𑁆𑀓𑀫𑁂 𑀓𑀢𑁂 𑀅𑀢𑁆𑀣𑀢𑁄 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀲𑀩𑁆𑀩𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀸𑀮𑀫𑁆𑀩𑀺𑀢𑀁, 𑀯𑁄𑀭𑁄𑀧𑀺𑀢𑀜𑁆𑀘 𑀳𑁄𑀢𑀺, 𑀇𑀢𑁄 𑀧𑀦𑀜𑁆𑀜𑀣𑀸 𑀦 𑀲𑀓𑁆𑀓𑀸; 𑀏𑀯𑀫𑁂𑀯 𑀧𑀼𑀩𑁆𑀩𑀪𑀸𑀕𑁂 ‘‘𑀩𑀳𑀽𑀧𑀺𑀲𑀢𑁆𑀢𑁂 𑀫𑀸𑀭𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀦𑁆𑀦𑀺𑀝𑁆𑀞𑀸𑀦𑀓𑀸𑀮𑁂 𑀯𑀺𑀲𑀧𑀓𑁆𑀔𑀺𑀧𑀦𑀸𑀤𑀻𑀲𑀼 𑀏𑀓𑀁 𑀧𑀬𑁄𑀕𑀁 𑀲𑀸𑀥𑀬𑀫𑀸𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑁂𑀢𑀦𑀸 𑀢𑁂𑀲𑀼 𑀏𑀓𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀮𑀫𑁆𑀩𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀉𑀧𑁆𑀧𑀦𑁆𑀦𑀸𑀬 𑀧𑀦𑁂𑀓𑀸𑀬 𑀲𑀩𑁆𑀩𑁂𑀧𑀺 𑀢𑁂 𑀫𑀸𑀭𑀺𑀢𑀸 𑀳𑁄𑀦𑁆𑀢𑀺 𑀢𑀸𑀬 𑀏𑀯 𑀲𑀩𑁆𑀩𑁂𑀲𑀁 𑀫𑀭𑀡𑀲𑀺𑀤𑁆𑀥𑀺𑀢𑁄, 𑀅𑀜𑁆𑀜𑀣𑀸 𑀦 𑀲𑀓𑁆𑀓𑀸 𑀯𑁄𑀭𑁄𑀧𑁂𑀢𑀼𑀁, 𑀆𑀮𑀫𑁆𑀩𑀺𑀢𑀼𑀁 𑀯𑀸. 𑀢𑀢𑁆𑀣 𑀏𑀓𑀸𑀬 𑀘𑁂𑀢𑀦𑀸𑀬 𑀩𑀳𑀽𑀦𑀁 𑀫𑀭𑀡𑁂 𑀅𑀓𑀼𑀲𑀮𑀭𑀸𑀲𑀺 𑀓𑀣𑀦𑁆𑀢𑀺 𑀘𑁂? 𑀯𑀺𑀲𑀼𑀁 𑀯𑀺𑀲𑀼𑀁 𑀫𑀭𑀡𑁂 𑀧𑀯𑀢𑁆𑀢𑀘𑁂𑀢𑀦𑀸𑀦𑀁 𑀓𑀺𑀘𑁆𑀘𑀓𑀭𑀡𑀢𑁄. 𑀓𑀣𑀁? 𑀢𑀸 𑀧𑀦 𑀲𑀩𑁆𑀩𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀲𑀼 𑀬𑀸𑀬 𑀓𑀸𑀬𑀘𑀺 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀇𑀢𑀭𑀸 𑀲𑀩𑁆𑀩𑀸𑀧𑀺 ‘‘𑀢𑀢𑁄 𑀩𑀮𑀯𑀢𑀭𑀓𑀼𑀲𑀮𑀧𑀝𑀺𑀩𑀸𑀳𑀺𑀢𑀸 𑀅𑀳𑁄𑀲𑀺𑀓𑀫𑁆𑀫’’𑀦𑁆𑀢𑀺𑀆𑀤𑀺𑀓𑁄𑀝𑁆𑀞𑀸𑀲𑀁 𑀪𑀚𑀦𑁆𑀢𑀺, 𑀧𑀼𑀦𑀧𑀺 𑀯𑀺𑀧𑀸𑀓𑀁 𑀚𑀦𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀸𑀧𑀺 𑀯𑀺𑀬 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀼𑀲𑀮𑀘𑁂𑀢𑀦𑀸 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀢𑀣𑀸 𑀅𑀬𑀫𑁆𑀧𑀺 𑀘𑁂𑀢𑀦𑀸 𑀅𑀦𑀦𑁆𑀢𑀭𑀪𑀯𑁂 𑀏𑀯 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀤𑀺𑀯𑀲𑁂𑀦 𑀢𑀸𑀲𑀁 𑀓𑀺𑀘𑁆𑀘𑀮𑁂𑀲𑀓𑀭𑀡𑀢𑁄 𑀏𑀓𑀸𑀧𑀺 𑀲𑀫𑀸𑀦𑀸 ‘‘𑀭𑀸𑀲𑀻’’𑀢𑀺 𑀯𑀼𑀢𑁆𑀢𑀸. 𑀢𑀸𑀬 𑀧𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀅𑀢𑀺𑀢𑀺𑀓𑁆𑀔𑁄 𑀯𑀺𑀧𑀸𑀓𑁄 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄𑀢𑀺𑀆𑀤𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀧𑀜𑁆𑀘𑀺𑀢𑀁.

𑀅𑀫𑀭𑀺𑀢𑀼𑀓𑀸𑀫𑀸 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑀢𑁆𑀢𑀸 𑀑𑀧𑀧𑀸𑀢𑀺𑀓𑀫𑀭𑀡𑁂𑀧𑀺 𑀆𑀧𑀢𑁆𑀢𑀺. ‘‘‘𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀢𑀦𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀘𑁂? 𑀑𑀧𑀧𑀸𑀢𑀺𑀓𑀢𑁆𑀢𑀁, 𑀧𑀢𑀦𑀜𑁆𑀘 𑀏𑀓𑀫𑁂𑀯𑀸’’𑀢𑀺 𑀮𑀺𑀔𑀺𑀢𑀁. 𑀅𑀣 𑀯𑀸 ‘‘𑀲𑀩𑁆𑀩𑀣𑀸𑀧𑀺 𑀅𑀦𑀼𑀤𑁆𑀤𑀺𑀲𑁆𑀲𑁂𑀯𑀸’’𑀢𑀺 𑀯𑀘𑀦𑀢𑁄 𑀏𑀢𑁆𑀣 𑀫𑀭𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑀲𑀫𑁆𑀪𑀯𑀢𑁄 ‘‘𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀭𑀢𑀺 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀲𑀼𑀯𑀼𑀢𑁆𑀢𑀁. 𑀲𑀘𑁂 ‘‘𑀧𑀢𑀺𑀢𑁆𑀯𑀸 𑀫𑀭𑀢𑀽’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀔𑀡𑀺𑀢𑁄 𑀳𑁄𑀢𑀺, 𑀑𑀧𑀧𑀸𑀢𑀺𑀓𑀫𑀦𑀼𑀲𑁆𑀲𑁄 𑀘 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀞𑀺𑀢𑀦𑀺𑀬𑀫𑁂𑀦𑁂𑀯 ‘‘𑀉𑀢𑁆𑀢𑀭𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀭𑀢𑀻𑀢𑀺 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸 𑀦 𑀤𑀺𑀲𑁆𑀲𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄’’𑀢𑀺. 𑀲𑁄 𑀳𑀺 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀧𑀢𑀺𑀢𑁆𑀯𑀸 𑀫𑀭𑀢𑀺, 𑀢𑁂𑀦 𑀧𑀸𑀢𑁄𑀧𑀺 𑀢𑀲𑁆𑀲 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀲𑀺𑀬𑀸 𑁋 𑀬𑁄 𑀧𑀦 ‘‘𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀭𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀑𑀧𑀸𑀢𑀔𑀡𑀦𑀓𑁆𑀔𑀡𑁂 𑀅𑀭𑀽𑀧𑀮𑁄𑀓𑁂 𑀚𑀻𑀯𑀢𑀺. 𑀯𑀥𑀓𑀘𑁂𑀢𑀦𑀸 𑀘 ‘‘𑀅𑀦𑀺𑀬𑀢𑁄 𑀥𑀫𑁆𑀫𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀸𑀢𑀼𑀖𑀸𑀢𑀺𑀓𑀫𑁆𑀫𑀲𑁆𑀲 𑀧𑀺𑀢𑀼𑀖𑀸𑀢𑀺𑀓𑀫𑁆𑀫𑀲𑁆𑀲 𑀅𑀭𑀳𑀦𑁆𑀢𑀖𑀸𑀢𑀺𑀓𑀫𑁆𑀫𑀲𑁆𑀲 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁫.𑁩𑁮 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀢𑁆𑀢𑀺𑀓) 𑀯𑀘𑀦𑀢𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀘 𑀢𑀁 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀲𑁆𑀲𑀢𑁆𑀣𑀺, 𑀦 𑀘 𑀲𑀸 𑀘𑁂𑀢𑀦𑀸 ‘‘𑀅𑀦𑀺𑀬𑀢𑁄 𑀥𑀫𑁆𑀫𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀸𑀢𑀼𑀖𑀸𑀢𑀺𑀓𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁫.𑁪𑁮 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀢𑁆𑀢𑀺𑀓) 𑀯𑀘𑀦𑀢𑁄 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀳𑁄𑀢𑀺. 𑀅𑀜𑁆𑀜𑁄 𑀇𑀥 𑀧𑀢𑀺𑀢𑁆𑀯𑀸 𑀫𑀭𑀡𑀓𑀲𑀢𑁆𑀢𑁄 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂 𑀯𑀥𑀓𑀘𑁂𑀢𑀦𑀸𑀬 𑀓𑀺𑀁 𑀆𑀭𑀫𑁆𑀫𑀡𑀦𑁆𑀢𑀺 𑀘𑁂? 𑀬𑀲𑁆𑀲 𑀓𑀲𑁆𑀲𑀘𑀺 𑀇𑀥 𑀚𑀻𑀯𑀦𑀓𑀲𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁. 𑀓𑀺𑀜𑁆𑀘𑀸𑀧𑀺 𑀲𑁄 𑀦 𑀫𑀭𑀢𑀺, 𑀅𑀣 𑀔𑁄 𑀧𑀸𑀡𑀸𑀢𑀺𑀧𑀸𑀢𑁄 𑀳𑁄𑀢𑀺 𑀏𑀯. 𑀬𑀣𑀸 𑀓𑀺𑀁 ‘‘𑀬𑀣𑀸𑀓𑁆𑀓𑀫𑁂𑀦 𑀞𑀺𑀢𑁂 𑀲𑀢𑁆𑀢 𑀚𑀦𑁂 𑀏𑀓𑁂𑀦 𑀓𑀡𑁆𑀟𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀫𑀻’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀘𑀺𑀦𑁆𑀢𑁂𑀢𑁆𑀯𑀸 𑀲𑀦𑁆𑀦𑀺𑀝𑁆𑀞𑀸𑀦𑀓𑀸𑀮𑁂 𑀢𑁂𑀲𑀼 𑀏𑀓𑀲𑁆𑀲 𑀚𑀻𑀯𑀺𑀢𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀓𑀡𑁆𑀟𑁄 𑀢𑀁 𑀯𑀺𑀭𑀚𑁆𑀛𑀺𑀢𑁆𑀯𑀸 𑀇𑀢𑀭𑁂 𑀙 𑀚𑀦𑁂 𑀫𑀸𑀭𑁂𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀬𑀁 𑀧𑀸𑀡𑀸𑀢𑀺𑀧𑀸𑀢𑀻 𑀏𑀯 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀬𑁄 𑀓𑁄𑀘𑀻’’𑀢𑀺 𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀯𑀥𑀓𑀘𑁂𑀢𑀦𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀚𑀻𑀯𑀺𑀢𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀺𑀁 𑀅𑀫𑀢𑁂𑀧𑀺 𑀇𑀢𑀭𑀲𑁆𑀲 𑀯𑀲𑁂𑀦 𑀧𑀸𑀡𑀸𑀢𑀺𑀧𑀸𑀢𑀻. 𑀲𑀘𑁂 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄𑀯 𑀳𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 𑀏𑀯𑀭𑀽𑀧𑁂𑀲𑀼. 𑀅𑀬𑀫𑁂𑀯 𑀳𑁂𑀢𑁆𑀣 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀕𑀢𑀸 𑀬𑀼𑀢𑁆𑀢𑀺 𑀯𑀺𑀦𑀺𑀘𑁆𑀙𑀬𑀓𑀣𑀸𑀢𑀺 𑀯𑀼𑀢𑁆𑀢𑀁.

𑀧𑀢𑀦𑀭𑀽𑀧𑀁 𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀫𑀸𑀢𑀼𑀬𑀸 𑀧𑀢𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀸𑀬 𑀫𑀢𑀸𑀬 𑀲𑁄 𑀫𑀸𑀢𑀼𑀖𑀸𑀢𑀓𑁄 𑀳𑁄𑀢𑀺, 𑀦 𑀓𑁂𑀯𑀮𑀁 𑀧𑀼𑀭𑀺𑀲𑀖𑀸𑀢𑀓𑁄, 𑀢𑀲𑁆𑀫𑀸 𑀧𑀢𑀦𑀲𑁆𑀲𑁂𑀯 𑀯𑀲𑁂𑀦 𑀆𑀧𑀢𑁆𑀢𑀺. 𑀓𑀲𑁆𑀫𑀸? 𑀧𑀢𑀦𑀭𑀽𑀧𑀫𑀭𑀡𑀭𑀽𑀧𑀸𑀦𑀁 𑀏𑀓𑀲𑀦𑁆𑀢𑀸𑀦𑀢𑁆𑀢𑀸, 𑀢𑀤𑁂𑀯 𑀳𑀺𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑀲𑁆𑀲 𑀳𑀺 𑀧𑀭𑀺𑀯𑀢𑁆𑀢𑀦𑀁 𑀦𑀢𑁆𑀣𑀺, 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑁂𑀯 𑀧𑀯𑀢𑁆𑀢𑀺𑀬𑀁 𑀦𑀺𑀭𑀼𑀚𑁆𑀛𑀦𑀼𑀧𑁆𑀧𑀚𑁆𑀚𑀦𑀓𑀸𑀦𑀺, 𑀇𑀢𑁆𑀣𑀺𑀧𑀼𑀭𑀺𑀲𑁄𑀢𑀺 𑀘 𑀢𑀢𑁆𑀣 𑀯𑁄𑀳𑀸𑀭𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀫𑀸𑀢𑀼𑀖𑀸𑀢𑀓𑁄𑀯, 𑀦 𑀧𑀼𑀭𑀺𑀲𑀖𑀸𑀢𑀓𑁄𑀢𑀺, 𑀬𑀣𑀸 𑀢𑀲𑁆𑀲 𑀧𑀢𑀦𑀭𑀽𑀧𑀯𑀲𑁂𑀦𑀸𑀧𑀢𑁆𑀢𑀺, 𑀢𑀣𑀸 𑀇𑀥𑀸𑀧𑀺 𑀧𑀢𑀦𑀭𑀽𑀧𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀏𑀓𑀲𑀦𑁆𑀢𑀸𑀦𑀢𑁆𑀢𑀸𑀢𑀺 𑀅𑀬𑀁 𑀧𑀞𑀫𑀣𑁂𑀭𑀯𑀸𑀤𑁂 𑀬𑀼𑀢𑁆𑀢𑀺. 𑀤𑀼𑀢𑀺𑀬𑁂 𑀓𑀺𑀜𑁆𑀘𑀸𑀧𑀺 𑀧𑁂𑀢𑁄 𑀧𑀢𑀺𑀢𑁄, 𑀬𑀓𑁆𑀔𑁄 𑀘, 𑀅𑀣 𑀔𑁄 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 ‘‘𑀯𑀸𑀫𑁂𑀦 𑀲𑀽𑀓𑀭𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁯𑁬; 𑀫𑀳𑀸𑀦𑀺. 𑀅𑀝𑁆𑀞. 𑁧𑁬𑁬) 𑀏𑀢𑁆𑀣 𑀯𑀼𑀢𑁆𑀢𑀬𑀓𑁆𑀔𑀸𑀦𑀁 𑀧𑀝𑀺𑀲𑀦𑁆𑀥𑀺 𑀯𑀺𑀬 𑀲𑀩𑁆𑀩𑀭𑀽𑀧𑀸𑀦𑀁 𑀲𑀸𑀥𑀸𑀭𑀡𑀢𑁆𑀢𑀸, 𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑁆𑀢𑀸 𑀘 𑀢𑀺𑀭𑀘𑁆𑀙𑀸𑀦𑀭𑀽𑀧𑁂𑀦 𑀫𑀢𑁂 𑀫𑀭𑀡𑀭𑀽𑀧𑀯𑀲𑁂𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀯𑀢𑁆𑀣𑀼𑀯𑀲𑁂𑀦 𑀮𑀳𑀼𑀓𑀸𑀧𑀢𑁆𑀢𑀺𑀬𑀸 𑀧𑀭𑀺𑀯𑀢𑁆𑀢𑀦𑀸 𑀳𑁄𑀢𑀺 𑀏𑀯 𑀢𑀢𑁆𑀣𑀚𑀸𑀢𑀓𑀭𑀼𑀓𑁆𑀔𑀸𑀤𑀺𑀙𑁂𑀤𑀦𑀧𑀸𑀘𑀺𑀢𑁆𑀢𑀺𑀬𑀧𑀭𑀺𑀯𑀢𑁆𑀢𑀦𑀁 𑀯𑀺𑀬. 𑀅𑀬𑀫𑁂𑀯 𑀬𑀼𑀢𑁆𑀢𑀢𑀭𑁄, 𑀢𑀲𑁆𑀫𑀸 𑀧𑀘𑁆𑀙𑀸 𑀯𑀼𑀢𑁆𑀢𑁄. 𑀧𑀸𑀭𑀸𑀚𑀺𑀓𑀲𑁆𑀲 𑀧𑀦 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀬𑀣𑀸 𑀢𑀣𑀸 𑀯𑀸 𑀧𑀢𑀺𑀢𑁆𑀯𑀸 𑀬𑀣𑀸 𑀢𑀣𑀸 𑀯𑀸 𑀫𑀭𑀢𑀼, 𑀧𑀸𑀭𑀸𑀚𑀺𑀓𑀫𑁂𑀯 𑀕𑀭𑀼𑀓𑀢𑁆𑀢𑀸. 𑀕𑀭𑀼𑀓𑀸𑀧𑀢𑁆𑀢𑀺𑀬𑀸 𑀳𑀺 𑀯𑀺𑀧𑀭𑀺𑀯𑀢𑁆𑀢𑀦𑀸 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁.

𑀣𑀼𑀮𑁆𑀮𑀘𑁆𑀘𑀬𑀁 𑀢𑀺𑀭𑀘𑁆𑀙𑀸𑀦𑁂, 𑀫𑀢𑁂 𑀪𑁂𑀤𑀲𑁆𑀲 𑀓𑀸𑀭𑀡𑀁;

𑀲𑀭𑀽𑀧𑀫𑀭𑀡𑀁 𑀢𑀺𑀲𑁆𑀲𑁄, 𑀨𑀼𑀲𑁆𑀲𑁄 𑀫𑀜𑁆𑀜𑁂𑀢𑀺 𑀅𑀜𑁆𑀜𑀣𑀸.

𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀤𑀼𑀢𑀺𑀬𑀯𑀸𑀤𑁂 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀢𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀭𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄’’𑀢𑀺 𑀮𑀺𑀔𑀺𑀢𑀁. ‘‘𑀢𑀺𑀭𑀘𑁆𑀙𑀸𑀦𑁂’’𑀢𑀺 𑀏𑀢𑁆𑀣 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺. ‘‘𑀲𑀓𑀲𑀓𑀭𑀽𑀧𑁂𑀦𑁂𑀯 𑀫𑀭𑀡𑀁 𑀪𑀯𑀢𑀺 𑀦𑀸𑀜𑁆𑀜𑀣𑀸’’𑀢𑀺 𑀘 𑀯𑀤𑀦𑁆𑀢𑀺. 𑀬𑀓𑁆𑀔𑀧𑁂𑀢𑀭𑀽𑀧𑁂𑀦 𑀫𑀢𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀫𑀭𑀡𑁂 𑀯𑀺𑀬𑀸’’𑀢𑀺 𑀮𑀺𑀔𑀺𑀢𑀁. 𑀧𑀳𑀸𑀭𑀁 𑀮𑀤𑁆𑀥𑀸𑀢𑀺 𑀲𑀢𑁆𑀢𑀸𑀦𑀁 𑀫𑀸𑀭𑀡𑀢𑁆𑀣𑀸𑀬 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁.

𑁧𑁭𑁭. 𑀲𑀸𑀥𑀼 𑀲𑀼𑀝𑁆𑀞𑀼 𑀫𑀭𑀢𑀽𑀢𑀺 𑀯𑀘𑀻𑀪𑁂𑀤𑀁 𑀓𑀭𑁄𑀢𑀺. 𑀯𑀺𑀲𑀪𑀸𑀕𑀭𑁄𑀕𑁄𑀢𑀺 𑀲𑀭𑀻𑀭𑀝𑁆𑀞𑁄 𑀕𑀡𑁆𑀟𑀧𑀻𑀴𑀓𑀸𑀤𑀺.

𑁧𑁭𑁮. 𑀓𑀸𑀴𑀸𑀦𑀼𑀲𑀸𑀭𑀻𑀢𑀺 𑀏𑀓𑀺𑀲𑁆𑀲𑀸 𑀮𑀢𑀸𑀬 𑀫𑀽𑀮𑀁 𑀓𑀺𑀭. 𑀫𑀳𑀸𑀓𑀘𑁆𑀙𑀧𑁂𑀦 𑀓𑀢𑀧𑀼𑀧𑁆𑀨𑀁 𑀯𑀸. 𑀳𑀁𑀲𑀧𑀼𑀧𑁆𑀨𑀦𑁆𑀢𑀺 𑀳𑀁𑀲𑀸𑀦𑀁 𑀧𑀓𑁆𑀔𑀧𑀢𑁆𑀢𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑀦𑀬𑀜𑁆𑀳𑁂𑀢𑁆𑀣 𑀬𑁄𑀚𑁂𑀢𑁆𑀯𑀸 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀦𑀯𑀺𑀥𑀺 𑀤𑀲𑁆𑀲𑁂𑀢𑀩𑁆𑀩𑁄.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁮𑁦. 𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸𑀢𑀺 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀪𑁂𑀤𑁂𑀦 𑀲𑀕𑁆𑀕𑀧𑀸𑀧𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀅𑀢𑁆𑀣𑀢𑁄 𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸 𑀏𑀯𑀁𑀅𑀥𑀺𑀧𑁆𑀧𑀸𑀬𑀺𑀦𑁄 𑀫𑀭𑀡𑀢𑁆𑀣𑀺𑀓𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀫𑀭𑀡𑀢𑁆𑀣𑀺𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀸 𑀆𑀧𑀦𑁆𑀦𑀸 𑀧𑀸𑀭𑀸𑀚𑀺𑀓𑀁. 𑀦 𑀳𑀺 𑀢𑁂 ‘‘𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑁄𑀳𑀸𑀭𑀯𑀲𑁂𑀦. 𑀲𑀦𑁆𑀦𑀺𑀝𑁆𑀞𑀸𑀦𑁂 𑀧𑀦𑁂𑀢𑀁 𑀦𑀢𑁆𑀣𑀺. 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑀫𑁄𑀘𑀦𑁂 𑀯𑀺𑀬 𑀦 𑀳𑁄𑀢𑀺. 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀅𑀦𑁆𑀢𑀭𑀸 𑀅𑀫𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸. 𑀳𑁂𑀝𑁆𑀞𑀺𑀫𑀪𑀸𑀕𑁂 𑀳𑀺 𑀓𑀺𑀲𑁆𑀫𑀺𑀜𑁆𑀘𑀺 𑀯𑀺𑀚𑁆𑀚𑀫𑀸𑀦𑁂 𑀯𑀮𑀺 𑀧𑀜𑁆𑀜𑀸𑀬𑀢𑀺. 𑀤𑀲𑁆𑀲𑀺𑀢𑁂𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑁂. 𑀧𑀝𑀺𑀩𑀦𑁆𑀥𑀦𑁆𑀢𑀺 𑀢𑀬𑀸 𑀧𑀝𑀺𑀩𑀦𑁆𑀥𑀁, 𑀧𑀭𑀺𑀪𑁄𑀕𑀦𑁆𑀢𑀭𑀸𑀬𑀁 𑀲𑀗𑁆𑀖𑀲𑁆𑀲 𑀫𑀸 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄.

𑁧𑁮𑁧-𑁨. 𑀬𑀲𑁆𑀫𑀸 𑀓𑀺𑀭𑀺𑀬𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 ‘‘𑀧𑀞𑀫𑀁 𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀧𑀺 𑀅𑀢𑁆𑀢𑀦𑀸 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑀢𑁄 𑀧𑀡𑀻𑀢𑀧𑀡𑀻𑀢𑀁 𑀤𑁂𑀦𑁆𑀢𑁄 𑀢𑀢𑁆𑀣𑀧𑀺 𑀅𑀢𑁆𑀢𑀓𑀸𑀭𑀺𑀬𑀁 𑀅𑀤𑀸𑀲𑀺. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀏𑀢𑁆𑀣 𑀅𑀜𑁆𑀜𑀁 𑀆𑀓𑀟𑁆𑀠𑀦𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀧𑀢𑀦𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀺𑀲𑀦𑁆𑀥𑀺 𑀦𑀢𑁆𑀣𑀺. 𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀧𑀝𑀺𑀖𑁄 𑀘 𑀧𑀬𑁄𑀕𑁄 𑀘 𑀅𑀢𑁆𑀣𑀺, 𑀯𑀥𑀓𑀘𑁂𑀢𑀦𑀸 𑀦𑀢𑁆𑀣𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀯𑀢𑁆𑀣𑀼𑀅𑀚𑀸𑀦𑀦𑀯𑀲𑁂𑀦 𑀅𑀚𑀸𑀦𑀦𑁆𑀢𑀲𑁆𑀲 𑀤𑁄𑀲𑁄 𑀦𑀢𑁆𑀣𑀺, 𑀇𑀤𑀁 𑀓𑀺𑀭 𑀢𑁂𑀲𑀁 𑀦𑀸𑀦𑀢𑁆𑀢𑀁. ‘𑀅𑀲𑀜𑁆𑀘𑀺𑀘𑁆𑀘𑁄 𑀅𑀳’𑀦𑁆𑀢𑀺 𑀧𑀸𑀴𑀺𑀬𑀁 𑀦 𑀤𑀺𑀲𑁆𑀲𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀢𑀣𑀸𑀭𑀽𑀧𑀸𑀬 𑀧𑀸𑀴𑀺𑀬𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀦𑁄 𑀘𑁂, 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀏𑀢𑁆𑀣 ‘‘𑀤𑀼𑀓𑁆𑀔𑀯𑁂𑀤𑀦𑀸 𑀘𑁂 𑀦𑀼𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘𑀫𑀼𑀕𑁆𑀕𑀭𑀸 𑀦𑀸𑀫 𑀔𑀸𑀤𑀦𑀤𑀡𑁆𑀟𑀓𑀸. 𑀯𑁂𑀫𑀸 𑀦𑀸𑀫 𑀢𑁂𑀲𑀁 𑀔𑀸𑀤𑀦𑀤𑀡𑁆𑀟𑀓𑀸𑀦𑀁 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀢𑀺𑀭𑀺𑀬𑀁 𑀩𑀦𑁆𑀥𑀺𑀢𑀩𑁆𑀩𑀤𑀡𑁆𑀟𑀸’’𑀢𑀺 𑀮𑀺𑀔𑀺𑀢𑀁. 𑀳𑁂𑀝𑁆𑀞𑀸𑀯 𑀤𑀼𑀯𑀺𑀥𑀸𑀧𑀺 𑀧𑀞𑀦𑁆𑀢𑀺. 𑀳𑀢𑁆𑀣𑀧𑁆𑀧𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺 ‘‘𑀢𑀲𑁆𑀲 𑀯𑀺𑀓𑁆𑀔𑁂𑀧𑁄 𑀫𑀸 𑀳𑁄𑀢𑀽’’𑀢𑀺 𑀉𑀧𑀘𑁆𑀙𑀺𑀦𑁆𑀤𑀢𑀺. 𑀯𑀺𑀲𑁂𑀲𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀢𑀧𑁆𑀧𑀪𑀯𑀁 𑀲𑀓𑁆𑀓𑀸𑀭𑀁 𑀮𑀚𑁆𑀚𑀻𑀬𑀦𑁆𑀢𑁄 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺 𑀲𑀪𑀸𑀕𑀸𑀦𑀁 𑀩𑁆𑀬𑀸𑀓𑀢𑀢𑁆𑀢𑀸. 𑀢𑁂 𑀳𑀺 𑀓𑀧𑁆𑀧𑀺𑀬𑀔𑁂𑀢𑁆𑀢𑀁 𑀆𑀭𑁄𑀘𑁂𑀦𑁆𑀢𑀺.

𑁧𑁮𑁬. 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀦 𑀯𑀺𑀜𑁆𑀜𑀢𑁆𑀢𑀺𑀬𑀸. 𑀲𑀸 𑀳𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀓𑀢𑀸𑀧𑀺 𑀅𑀓𑀢𑀸 𑀯𑀺𑀬𑀸𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺. ‘‘‘𑀯𑀤𑁂𑀬𑁆𑀬𑀸𑀣, 𑀪𑀦𑁆𑀢𑁂 𑀬𑁂𑀦𑀢𑁆𑀣𑁄’𑀢𑀺 𑀏𑀯𑀁 𑀅𑀓𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀢𑁆𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀮𑀺𑀔𑀺𑀢𑀁. 𑀢𑀺𑀢𑁆𑀣𑀺𑀬𑀪𑀽𑀢𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀲𑀳𑀢𑁆𑀣𑀸 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺. 𑀧𑀺𑀢𑀼𑀘𑁆𑀙𑀸 𑀦𑀸𑀫 𑀧𑀺𑀢𑀼𑀪𑀕𑀺𑀦𑀻. 𑀲𑀘𑁂𑀧𑀺 𑀦 𑀬𑀸𑀘𑀦𑁆𑀢𑀺 ‘‘𑀬𑀸𑀘𑀺𑀢𑀼𑀁 𑀤𑀼𑀓𑁆𑀔’’𑀦𑁆𑀢𑀺, 𑀲𑀬𑀁 𑀯𑀸 𑀏𑀯𑀁 𑀯𑀢𑁆𑀢𑀼𑀫𑀲𑀓𑁆𑀓𑁄𑀦𑁆𑀢𑀸. ‘‘𑀬𑀤𑀸 𑀢𑁂𑀲𑀁 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀯𑀸. ‘‘‘𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀦 𑀳𑁄𑀢𑀻’𑀢𑀺 𑀯𑀘𑀦𑀢𑁄 𑀬𑀸𑀯 𑀲𑀢𑁆𑀢𑀫𑁄 𑀓𑀼𑀮𑀧𑀭𑀺𑀯𑀝𑁆𑀝𑁄, 𑀢𑀸𑀯 𑀪𑁂𑀲𑀚𑁆𑀚𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀫𑀳𑀸𑀫𑀸𑀢𑀼𑀬𑀸𑀘𑀽𑀴𑀫𑀸𑀢𑀼𑀬𑀸𑀢𑀺𑀆𑀤𑀻𑀦𑀁.

𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸𑀢𑀺 ‘‘𑀲𑀸𑀫𑀡𑁂𑀭𑁂𑀳𑀺 𑀯𑀸’’𑀢𑀺𑀆𑀤𑀺𑀦𑀸. ‘‘𑀦 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸’’𑀢𑀺 𑀯𑀤𑀦𑁆𑀢𑀺. ‘‘𑀧𑀘𑁆𑀘𑀸𑀲𑀻𑀲𑀢𑀺 𑀲𑀘𑁂, 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀧𑁆𑀧𑀺𑀬𑀯𑀲𑁂𑀦𑀸𑀢𑀺 𑀧𑀼𑀧𑁆𑀨𑀁 𑀆𑀦𑁂𑀣𑀸𑀢𑀺𑀆𑀤𑀺𑀦𑀸. ‘‘𑀧𑀽𑀚𑀁 𑀅𑀓𑀸𑀲𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀬𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺.

‘‘𑀪𑀡𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀓𑀸𑀢𑀩𑁆𑀩𑀁. 𑀥𑀫𑁆𑀫𑀜𑁆𑀳𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦𑁄 𑀘𑁂 𑀚𑀸𑀦𑀦𑁆𑀢𑀺, 𑀦 𑀧𑀸𑀤𑀸 𑀅𑀧𑀦𑁂𑀢𑀩𑁆𑀩𑀸. 𑀅𑀯𑀫𑀗𑁆𑀕𑀮𑀦𑁆𑀢𑀺 𑀳𑀺 𑀕𑀡𑁆𑀳𑀦𑁆𑀢𑀺.

𑀘𑁄𑀭𑀦𑀸𑀕𑀲𑁆𑀲 𑀳𑀺 𑀆𑀫𑀝𑁆𑀞𑀁 𑀤𑀺𑀦𑁆𑀦𑁂 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀅𑀦𑀸𑀫𑀝𑁆𑀞𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀗𑁆𑀕𑀼𑀮𑀦𑁆𑀢𑀭𑁂 𑀣𑁄𑀓𑀁 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑁂 𑀪𑀢𑁆𑀢𑀁 𑀲𑀩𑁆𑀩𑀁 𑀅𑀤𑀸𑀲𑀺, 𑀲𑁄 𑀢𑁂𑀦 𑀢𑀼𑀲𑁆𑀲𑀺. 𑀯𑀭𑀧𑁄𑀢𑁆𑀣𑀓𑀘𑀺𑀢𑁆𑀢𑀢𑁆𑀣𑀭𑀡𑀦𑁆𑀢𑀺 𑀲𑀺𑀩𑁆𑀩𑀺𑀢𑁆𑀯𑀸 𑀓𑀸𑀢𑀩𑁆𑀩𑀢𑁆𑀣𑀭𑀡𑀯𑀺𑀓𑀢𑀺. 𑀧𑀺𑀢𑀼𑀭𑀸𑀚𑀸 𑀤𑀫𑀺𑀴𑀲𑁆𑀲 𑀧𑀭𑀸𑀚𑀺𑀢𑁄 𑀭𑁄𑀳𑀡𑁂 𑀲𑁄𑀴𑀲𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀭𑀺𑀯𑀼𑀢𑁄 ‘‘𑀭𑀚𑁆𑀚𑀁 𑀕𑀡𑁆𑀳𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀓𑀸𑀭𑀡𑀸 𑀏𑀓𑀁 𑀅𑀫𑀘𑁆𑀘𑀁 𑀖𑀸𑀢𑀸𑀧𑁂𑀲𑀺. 𑀲𑁂𑀲𑀸 𑀪𑀬𑁂𑀦 𑀧𑀮𑀸𑀬𑀦𑁆𑀢𑀸 𑀅𑀭𑀜𑁆𑀜𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑁂𑀳𑀺 𑀯𑀺𑀮𑀼𑀢𑁆𑀢𑀸 𑀳𑀫𑁆𑀩𑀼𑀕𑀮𑁆𑀮𑀓𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀘𑀸𑀢𑀼𑀦𑀺𑀓𑀸𑀬𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑁂𑀲𑀁 𑀲𑀗𑁆𑀕𑀳𑀁 𑀓𑀢𑁆𑀯𑀸 𑀧𑀼𑀦 𑀆𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸 𑀳𑀫𑁆𑀩𑀼𑀕𑀮𑁆𑀮𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑀁 𑀅𑀓𑀸𑀲𑀺. 𑀲𑁂𑀲𑀸𑀧𑀺 𑀏𑀓𑁂𑀓𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀼𑀁 𑀓𑀺𑀭.

𑁧𑁮𑁭. 𑀘𑁄𑀭𑀲𑀫𑀻𑀧𑀁 𑀧𑁂𑀲𑁂𑀦𑁆𑀢𑁄 ‘‘𑀯𑀸𑀴𑀬𑀓𑁆𑀔𑀯𑀺𑀳𑀸𑀭𑀁 𑀧𑁂𑀲𑁂𑀢𑀻’’𑀢𑀺 𑀇𑀫𑀺𑀦𑀸 𑀲𑀤𑀺𑀲𑁄. 𑀓𑀲𑁆𑀫𑀸? 𑀫𑀭𑀡𑀸𑀥𑀺𑀧𑁆𑀧𑀸𑀬𑀢𑁆𑀢𑀸. 𑀢𑀴𑀸𑀓𑀸𑀤𑀻𑀲𑀼 𑀫𑀘𑁆𑀙𑀸𑀤𑀺𑀕𑁆𑀕𑀳𑀡𑀢𑁆𑀣𑀁 𑀓𑁂𑀯𑀝𑁆𑀝𑀁 𑀅𑀜𑁆𑀜𑀸𑀧𑀤𑁂𑀲𑁂𑀦 ‘‘𑀢𑀴𑀸𑀓𑀢𑀻𑀭𑀁 𑀕𑀘𑁆𑀙𑀸’’𑀢𑀺 𑀧𑀳𑀺𑀡𑀦𑁆𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁂𑀦 𑀪𑀯𑀺𑀢𑀩𑁆𑀩𑀁, ‘‘𑀯𑀸𑀴𑀬𑀓𑁆𑀔𑀯𑀺𑀳𑀸𑀭𑀁 𑀧𑀸𑀳𑁂𑀲𑀻’’𑀢𑀺 𑀇𑀫𑀲𑁆𑀲 𑀲𑀤𑀺𑀲𑁄. 𑀓𑀲𑁆𑀫𑀸? ‘‘𑀫𑀭𑀡𑀸𑀥𑀺𑀧𑁆𑀧𑀸𑀬𑀢𑁆𑀢𑀸’’𑀢𑀺 𑀯𑀘𑀦𑀲𑁆𑀲𑀸𑀦𑀼𑀮𑁄𑀫𑀢𑁄, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀏𑀯𑀁 𑀯𑀸𑀴𑀬𑀓𑁆𑀔𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑁧𑁮𑁯. 𑀢𑀁 𑀢𑀢𑁆𑀭𑀝𑁆𑀞𑀺𑀢𑀁 𑀙𑀺𑀦𑁆𑀤𑀦𑁆𑀢𑀦𑁆𑀢𑀺 𑀢𑀁-𑀲𑀤𑁆𑀤𑁄 𑀏𑀓𑀘𑁆𑀘𑁂𑀲𑀼 𑀦𑀢𑁆𑀣𑀺. 𑀇𑀢𑀭𑁂𑀲𑀼 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. ‘‘𑀇𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀓𑀼𑀲𑀮𑀘𑀺𑀢𑁆𑀢𑁂𑀦𑀧𑀺 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸. 𑀅𑀜𑁆𑀜𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑀢𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸.

𑁧𑁯𑁦. 𑀓𑀣𑀁? 𑀓𑀼𑀝𑀺𑀭𑀓𑁆𑀔𑀡𑀢𑁆𑀣𑀜𑁆𑀳𑀺 𑀪𑀕𑀯𑀢𑀸 𑀧𑀝𑀕𑁆𑀕𑀺𑀤𑀸𑀦𑀸𑀤𑀺 𑀅𑀦𑀼𑀜𑁆𑀜𑀸𑀢𑀁, 𑀓𑀼𑀝𑀺 𑀦𑀸𑀫𑁂𑀲𑀸 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬. 𑀢𑀲𑁆𑀫𑀸 ‘‘𑀪𑀺𑀓𑁆𑀔𑀼𑀭𑀓𑁆𑀔𑀡𑀢𑁆𑀣𑀁 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀢𑀻’𑀢𑀺 𑀯𑀢𑁆𑀢𑀩𑁆𑀩𑀫𑁂𑀢𑁆𑀣 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲 𑀦𑀕𑁆𑀕𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸, 𑀚𑀻𑀯𑀺𑀢𑀭𑀓𑁆𑀔𑀡𑀢𑁆𑀣𑀜𑁆𑀘 𑀲𑀧𑁆𑀧𑀤𑀝𑁆𑀞𑀓𑀸𑀮𑁂 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 ‘‘𑀅𑀧𑀺 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁, 𑀦 𑀘 𑀭𑀼𑀓𑁆𑀔𑁄 𑀯𑀸 𑀙𑀺𑀦𑁆𑀤𑀺𑀢𑀩𑁆𑀩𑁄’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀲𑁆𑀫𑀸 𑀢𑀁 𑀦𑀺𑀤𑀲𑁆𑀲𑀦𑀁 𑀅𑀧𑁆𑀧𑀫𑀸𑀡𑀁, 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀏𑀯𑁂𑀢𑁆𑀣 𑀧𑀫𑀸𑀡𑀁. 𑀏𑀢𑁆𑀣 𑀧𑀦𑀸𑀬𑀁 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄 𑁋 𑀅𑀭𑀺𑀬𑀧𑀼𑀕𑁆𑀕𑀮𑁂𑀲𑀼𑀧𑀺 𑀲𑀢𑁆𑀢𑀸 𑀦𑀕𑁆𑀕𑀺𑀬𑀁 𑀧𑀲𑁆𑀲𑀺𑀢𑁆𑀯𑀸 𑀅𑀧𑁆𑀧𑀲𑀸𑀤𑀁 𑀓𑀢𑁆𑀯𑀸 𑀦𑀺𑀭𑀬𑀽𑀧𑀕𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀲𑀧𑁆𑀧𑀸 𑀘 𑀟𑀁𑀲𑀺𑀢𑁆𑀯𑀸, 𑀢𑁂𑀲𑀁 𑀧𑀸𑀧𑀯𑀺𑀫𑁄𑀘𑀦𑀢𑁆𑀣𑀁 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸 𑀅𑀦𑀼𑀜𑁆𑀜𑀸𑀢𑀸. 𑀤𑀸𑀦𑀧𑀢𑀻𑀦𑀁 𑀘𑀺𑀢𑁆𑀢𑀭𑀓𑁆𑀔𑀡𑀢𑁆𑀣𑀁 𑀧𑀝𑀕𑁆𑀕𑀺𑀤𑀸𑀦𑀸𑀤𑀺. 𑀅𑀜𑁆𑀜𑀣𑀸 𑀮𑁄𑀓𑀲𑁆𑀲 𑀧𑀼𑀜𑁆𑀜𑀦𑁆𑀢𑀭𑀸𑀬𑁄, 𑀲𑀗𑁆𑀖𑀲𑁆𑀲 𑀘 𑀮𑀸𑀪𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀯𑀥𑀓𑀲𑁆𑀲 𑀧𑀦 𑀘𑀺𑀢𑁆𑀢𑀳𑀺𑀢𑀓𑀭𑀡𑀁 𑀦𑀢𑁆𑀣𑀺, 𑀢𑀁 𑀧𑀦 𑀅𑀯𑀻𑀢𑀺𑀓𑁆𑀓𑀫𑀁, 𑀚𑀻𑀯𑀺𑀢𑀧𑀭𑀺𑀘𑁆𑀘𑀚𑀦𑀁 𑀧𑀲𑁆𑀲𑀺𑀢𑁆𑀯𑀸 𑀯𑀸 ‘‘𑀅𑀳𑁄 𑀤𑀼𑀓𑁆𑀓𑀭𑀁 𑀓𑀢’’𑀦𑁆𑀢𑀺 𑀧𑀲𑀸𑀤𑀫𑁂𑀯 𑀮𑀪𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀢𑀦𑁄 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲 𑀯𑀝𑁆𑀝𑀢𑀺. 𑀅𑀜𑁆𑀜𑀣𑀸 𑀢𑀺𑀢𑁆𑀣𑀺𑀬𑀸𑀦𑀁 𑀅𑀲𑀤𑁆𑀥𑀫𑁆𑀫𑀲𑀺𑀤𑁆𑀥𑀺𑀬𑀸𑀢𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀚𑀻𑀯𑀺𑀢𑀢𑁆𑀣𑀸𑀬 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀢𑁆𑀢𑀲𑀺𑀦𑁂𑀳𑀯𑀲𑁂𑀦 𑀙𑀺𑀦𑁆𑀤𑀦𑀢𑁄 𑀅𑀓𑀼𑀲𑀮𑀢𑁆𑀢𑀸 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀅𑀦𑁂𑀓𑁂𑀲𑀼 𑀭𑀼𑀓𑁆𑀔𑁂𑀦 𑀑𑀢𑁆𑀣𑀢𑁂𑀲𑀼, 𑀑𑀧𑀸𑀢𑁂 𑀯𑀸 𑀧𑀢𑀺𑀢𑁂𑀲𑀼 𑀅𑀜𑁆𑀜𑁂𑀦 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀭𑀼𑀓𑁆𑀔𑀙𑁂𑀤𑀦𑀸𑀤𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀲𑁆𑀫𑀸? 𑀧𑀭𑀧𑀭𑀺𑀢𑁆𑀢𑀸𑀡𑀸𑀥𑀺𑀧𑁆𑀧𑀸𑀬𑀢𑁄𑀢𑀺. 𑀧𑀭𑀺𑀢𑁆𑀢𑀦𑁆𑀢𑀺 𑀭𑀓𑁆𑀔𑀡𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀦𑁆𑀢𑀸 𑀪𑀽𑀫𑀺𑀢𑀘𑁆𑀙𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁯𑁧. 𑀢𑀻𑀳𑀺 𑀫𑀸𑀭𑀺𑀢𑁂 𑀧𑀦 𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀏𑀢𑁆𑀣 𑀢𑀻𑀲𑀼 𑀏𑀓𑁂𑀦 𑀫𑀸𑀭𑀺𑀢𑁂𑀧𑀺 ‘‘𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀢𑁆𑀢𑀸 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀬𑁄𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀸𑀭𑁂𑀦𑁆𑀢𑀺 𑀘𑁂, 𑀆𑀧𑀚𑁆𑀚𑀢𑀺, 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀯𑀸 𑀅𑀯𑀺𑀲𑀗𑁆𑀓𑁂𑀢’’𑀦𑁆𑀢𑀺. ‘‘𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑁂 𑀧𑀦 𑀲𑀩𑁆𑀩𑀢𑁆𑀣 𑀯𑀺𑀲𑀗𑁆𑀓𑁂𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑁆𑀯𑀺𑀦𑁆𑀦𑀁 𑀩𑀮𑀁 𑀕𑀳𑁂𑀢𑁆𑀯𑀸 𑀢𑀢𑀺𑀬𑁄 𑀘𑁂 𑀫𑀸𑀭𑁂𑀢𑀺 𑀆𑀧𑀚𑁆𑀚𑀢𑀺 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘𑀤𑁆𑀯𑁂 𑀫𑀸𑀭𑁂𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀫𑀸𑀭𑀺𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀧𑀳𑀸𑀭𑀸𑀦𑀁 𑀫𑀭𑀡𑁂 𑀲𑀢𑀺 𑀤𑁆𑀯𑁂 𑀫𑀸𑀭𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀲𑀢𑀺 𑀏𑀓𑁄𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺.

𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.