𑁧. 𑀧𑀞𑀫𑀧𑀸𑀭𑀸𑀚𑀺𑀓𑀁

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀯𑀡𑁆𑀡𑀦𑀸

𑀧𑀞𑀫𑀲𑁆𑀲𑁂𑀢𑁆𑀣 𑀦𑀺𑀤𑀸𑀦𑁂, 𑀞𑀢𑁆𑀯𑀸 𑀧𑀸𑀭𑀸𑀚𑀺𑀓𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑁄;

𑀘𑁄𑀤𑀦𑀸𑀧𑀭𑀺𑀳𑀸𑀭𑀦𑀬𑁄, 𑀧𑀼𑀕𑁆𑀕𑀮𑀯𑀢𑁆𑀣𑀼𑀧𑁆𑀧𑀓𑀸𑀲𑀦𑁂𑀬𑁂𑀯.

𑀢𑀢𑁆𑀣 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀼𑀢𑁆𑀣𑀯𑀲𑁆𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑁂 𑀏𑀯 𑀯𑁂𑀲𑀸𑀮𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀬𑀸𑀯 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁, 𑀢𑀸𑀯 𑀅𑀝𑁆𑀞 𑀯𑀲𑁆𑀲𑀸𑀦𑀺 𑀯𑁂𑀲𑀸𑀮𑀺𑀬𑀁𑀬𑁂𑀯 𑀯𑀺𑀳𑀭𑀦𑁆𑀢𑁄 𑀯𑀺𑀬 𑀧𑀸𑀴𑀺𑀓𑁆𑀓𑀫𑁂𑀦 𑀤𑀺𑀲𑁆𑀲𑀢𑀺, 𑀦 𑀘 𑀪𑀕𑀯𑀸 𑀢𑀸𑀯𑀢𑁆𑀢𑀓𑀁 𑀓𑀸𑀮𑀁 𑀢𑀢𑁆𑀣𑁂𑀯 𑀯𑀺𑀳𑀸𑀲𑀺. 𑀲𑁄 𑀳𑀺 𑀲𑀼𑀤𑀺𑀦𑁆𑀦𑀲𑁆𑀲 𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀅𑀦𑀼𑀚𑀸𑀦𑀺𑀢𑁆𑀯𑀸 𑀬𑀣𑀸𑀪𑀺𑀭𑀦𑁆𑀢𑀁 𑀢𑀢𑁆𑀣 𑀯𑀺𑀳𑀭𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀪𑁂𑀲𑀓𑀴𑀸𑀯𑀦𑀁 𑀧𑀢𑁆𑀯𑀸 𑀢𑀢𑁆𑀣 𑀢𑁂𑀭𑀲𑀫𑀁 𑀯𑀲𑁆𑀲𑀁 𑀯𑀲𑀺, 𑀢𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀘𑀼𑀤𑁆𑀤𑀲𑀫𑀁 𑀯𑀲𑁆𑀲𑀁 𑀯𑀲𑀺, 𑀧𑀦𑁆𑀦𑀭𑀲𑀫𑀁 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀺, 𑀲𑁄𑀴𑀲𑀫𑀁 𑀆𑀴𑀯𑀺𑀬𑀁, 𑀢𑀢𑁄 𑀯𑀼𑀢𑁆𑀣𑀯𑀲𑁆𑀲𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀲𑀢𑁆𑀢𑀭𑀲𑀫𑀁 𑀯𑀲𑀺, 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀧𑀭𑀸𑀦𑀺𑀧𑀺 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀢𑀢𑁆𑀣𑁂𑀯 𑀯𑀲𑀺. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 𑀭𑀸𑀚𑀕𑀳𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑁂𑀲𑀸𑀮𑀺𑀁 𑀧𑀸𑀧𑀼𑀡𑀺, 𑀢𑀢𑁄 𑀉𑀧𑀲𑀫𑁆𑀧𑀤𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀲𑀼𑀤𑀺𑀦𑁆𑀦𑁄 𑀯𑁂𑀲𑀸𑀮𑀺𑀬𑀁𑀬𑁂𑀯 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀺, 𑀢𑀢𑁄 𑀪𑀕𑀯𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀇𑀢𑁄 𑀧𑀞𑀫𑀢𑀭𑀁 𑀢𑀢𑁆𑀣 𑀯𑁂𑀲𑀸𑀮𑀺𑀬𑀜𑁆𑀘 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀤𑀲𑁆𑀲𑁂𑀢𑀼𑀓𑀸𑀫𑁄, 𑀯𑀺𑀦𑀬𑀦𑀺𑀤𑀸𑀦𑀸𑀦𑀦𑁆𑀢𑀭𑀁 𑀧𑀞𑀫𑀧𑀸𑀭𑀸𑀚𑀺𑀓𑀫𑁂𑀯 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀯𑁂𑀲𑀸𑀮𑀺𑀬𑀁 𑀧𑀞𑀫𑀁 𑀦𑀺𑀯𑀸𑀲𑀁, 𑀧𑀘𑁆𑀙𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀺𑀓𑀸𑀮𑁂 𑀦𑀺𑀯𑀸𑀲𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 ‘‘𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀞𑀫𑀲𑁆𑀲𑁂𑀢𑁆𑀣 𑀦𑀺𑀤𑀸𑀦𑁂, 𑀞𑀢𑁆𑀯𑀸 …𑀧𑁂… 𑀧𑀓𑀸𑀲𑀦𑁂𑀬𑁂𑀯𑀸’’𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀦𑀺𑀤𑀸𑀦𑁂 𑀞𑀢𑁆𑀯𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀺…𑀧𑁂… 𑀅𑀜𑁆𑀜𑀢𑀭𑀁 𑀯𑀚𑁆𑀚𑀺𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀼𑀕𑁆𑀕𑀮𑀧𑁆𑀧𑀓𑀸𑀲𑀦𑁂, ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀚𑁆𑀚𑀻 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀺…𑀧𑁂… 𑀢𑀺𑀓𑁆𑀔𑀢𑁆𑀢𑀼𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀻’’𑀢𑀺 (𑀧𑀸𑀭𑀸. 𑁩𑁦) 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀧𑁆𑀧𑀓𑀸𑀲𑀦𑁂 𑀘 𑀘𑁄𑀤𑀦𑀸𑀦𑀬𑁄, 𑀧𑀭𑀺𑀳𑀸𑀭𑀦𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀧𑀓𑀸𑀲𑀦𑀸 𑁋 𑀓𑀺𑀫𑀢𑁆𑀣𑀁 𑀣𑁂𑀭𑁂𑀦 𑀅𑀜𑁆𑀜𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀼𑀕𑁆𑀕𑀮𑀯𑀢𑁆𑀣𑀽𑀦𑀺 𑀯𑀺𑀬 𑀲𑀗𑁆𑀔𑁂𑀧𑀢𑁄 𑀅𑀯𑀢𑁆𑀯𑀸 𑀬𑀢𑁆𑀣 𑀘 𑀲𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀘 𑀥𑀫𑁆𑀫𑁂 𑀧𑀲𑀦𑁆𑀦𑁄, 𑀬𑀣𑀸 𑀘 𑀧𑀩𑁆𑀩𑀚𑀺𑀢𑁄, 𑀬𑀣𑀸 𑀘 𑀇𑀫𑀁 𑀯𑀢𑁆𑀣𑀼𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀁 𑀲𑀩𑁆𑀩𑀁 𑀅𑀦𑀯𑀲𑁂𑀲𑁂𑀢𑁆𑀯𑀸 𑀧𑀼𑀕𑁆𑀕𑀮𑀯𑀢𑁆𑀣𑀽𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸𑀦𑀻𑀢𑀺 𑀘𑁂? 𑀯𑀼𑀘𑁆𑀘𑀢𑁂 𑁋

𑀏𑀯𑀁 𑀲𑀤𑁆𑀥𑀸𑀬 𑀓𑀺𑀘𑁆𑀙𑁂𑀦, 𑀫𑀳𑀦𑁆𑀢𑁂 𑀪𑁄𑀕𑀜𑀸𑀢𑀓𑁂;

𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺, 𑀧𑁂𑀲𑀮𑀸𑀦𑀫𑁆𑀧𑀺 𑀲𑀩𑁆𑀩𑀲𑁄.

𑀲𑀩𑁆𑀩𑀮𑀸𑀫𑀓𑀥𑀫𑁆𑀫𑀸𑀬𑀁, 𑀫𑁂𑀣𑀼𑀦𑁄 𑀬𑀤𑀺 𑀲𑀫𑁆𑀪𑀯𑁂;

𑀦 𑀥𑀫𑁆𑀫𑀤𑁂𑀲𑀦𑀸𑀬𑁂𑀯, 𑀲𑀺𑀤𑁆𑀥𑀸 𑀯𑀺𑀭𑀢𑀺 𑀲𑀩𑁆𑀩𑀲𑁄.

𑀢𑀲𑁆𑀫𑀸 𑀦𑀯𑀗𑁆𑀕𑀲𑀤𑁆𑀥𑀫𑁆𑀫𑁂, 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑁂𑀧𑀺 𑀘;

𑀯𑀺𑀦𑀬𑁄 𑀧𑀜𑁆𑀜𑀧𑁂𑀢𑀩𑁆𑀩𑁄, 𑀢𑀢𑁄 𑀥𑀫𑁆𑀫𑀯𑀺𑀲𑀼𑀤𑁆𑀥𑀺𑀳𑀺.

𑀯𑀺𑀦𑀬𑀸𑀪𑀸𑀯𑀢𑁄 𑀏𑀯𑀁, 𑀅𑀚𑁆𑀛𑀸𑀘𑀸𑀭𑁄 𑀪𑀯𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀯𑀺𑀦𑀬𑀧𑀜𑁆𑀜𑀢𑁆𑀢𑀺, 𑀲𑀸𑀢𑁆𑀣𑀺𑀓𑀸 𑀧𑁂𑀲𑀮𑀲𑁆𑀲𑀧𑀺.

𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻, 𑀬𑀲𑁆𑀫𑀸 𑀬𑀁 𑀧𑀸𑀧𑀫𑀸𑀘𑀭𑀺;

𑀯𑀺𑀦𑀬𑁄𑀬𑁂𑀯 𑀲𑀤𑁆𑀥𑀸𑀦𑀁, 𑀆𑀤𑀻𑀦𑀯𑀯𑀺𑀪𑀸𑀯𑀺𑀦𑁄.

𑀢𑀲𑁆𑀫𑀸 𑀲𑀤𑁆𑀥𑀸𑀦𑀼𑀲𑀸𑀭𑀻𑀦𑀁, 𑀯𑀺𑀦𑀬𑁄 𑀲𑀸𑀢𑁆𑀣𑀓𑁄𑀯 𑀬𑀁;

𑀥𑀫𑁆𑀫𑁄 𑀥𑀫𑁆𑀫𑀸𑀦𑀼𑀲𑀸𑀭𑀻𑀦𑀁, 𑀢𑀢𑁄 𑀉𑀪𑀬𑀤𑁂𑀲𑀦𑀸.

𑀅𑀧𑀺 𑀘 𑀬𑀤𑀺 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀅𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀅𑀬𑀲𑁄 𑀧𑀢𑁆𑀣𑀝𑁄, 𑀧𑀕𑁂𑀯𑀜𑁆𑀜𑁂𑀲𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀚𑁆𑀛𑀸𑀘𑀸𑀭𑀲𑁆𑀲 𑀧𑀸𑀓𑀝𑀪𑀸𑀯𑀤𑀻𑀧𑀦𑀁. 𑀓𑀣𑀁? 𑁋

𑀅𑀪𑀩𑁆𑀩𑁄 𑀅𑀭𑀳𑀢𑁆𑀢𑀲𑁆𑀲, 𑀲𑀼𑀤𑀺𑀦𑁆𑀦𑁄 𑀧𑀼𑀢𑁆𑀢𑀫𑀸𑀢𑀭𑁄;

𑀪𑀩𑁆𑀩𑀸𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺, 𑀢𑀤𑀢𑁆𑀣𑀁 𑀦 𑀓𑀢𑀸 𑀅𑀬𑀁.

𑀦𑀦𑀼 𑀫𑀸𑀕𑀡𑁆𑀟𑀺𑀓𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀫𑀲𑁆𑀲𑀸 𑀳𑀺𑀢𑀢𑁆𑀣𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀩𑀻𑀚𑀓𑀩𑀻𑀚𑀓𑀫𑀸𑀢𑀽𑀦𑀁 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺 𑀣𑁂𑀭𑁂𑀦 𑀤𑀻𑀧𑀺𑀢𑀸. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀺, 𑀬𑁂𑀦 𑀲𑀫𑀬𑁂𑀦 𑀲𑀼𑀤𑀺𑀦𑁆𑀦𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀻’’𑀢𑀺 𑀯𑀸 ‘‘𑀬𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀻’’𑀢𑀺 𑀯𑀸 𑀯𑀘𑀦𑀁 𑀇𑀥 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? ‘‘𑀇𑀥 𑀧𑀦 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀳𑀺 𑀇𑀥 𑀦 𑀮𑀩𑁆𑀪𑀢𑀺. 𑀘𑀺𑀭𑀦𑀺𑀯𑀺𑀝𑁆𑀞𑁄 𑀳𑀺 𑀲𑁄 𑀕𑀸𑀫𑁄, 𑀦 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂𑀢𑀺. 𑀬𑀲𑁆𑀫𑀸 𑀧𑀦 𑀲𑁄 𑀘𑀺𑀭𑀦𑀺𑀯𑀺𑀝𑁆𑀞𑁄𑀧𑀺 𑀘 𑀕𑀸𑀫𑁄 𑀅𑀢𑁆𑀢𑀦𑁄 𑀦𑀺𑀯𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑀸𑀮𑀫𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀢𑁂𑀦 𑀧𑀭𑀺𑀬𑀸𑀬𑁂𑀦 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁨𑁫-𑁬. 𑀅𑀦𑀼𑀜𑁆𑀜𑀸𑀢𑁄𑀲𑀺 𑀧𑀦 𑀢𑁆𑀯𑀦𑁆𑀢𑀺 𑀲𑀫𑀡𑀯𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀪𑀕𑀯𑀸 𑀧𑀼𑀘𑁆𑀙𑀢𑀺. 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀦𑁆𑀢𑀺 𑀏𑀢𑁆𑀣 𑀚𑀦𑀓𑁂𑀳𑁂𑀯 𑀅𑀦𑀦𑀼𑀜𑁆𑀜𑀸𑀢𑀤𑀲𑁆𑀲𑀦𑀢𑁆𑀣𑀁 𑀧𑀼𑀘𑁆𑀙𑀻𑀢𑀺 𑀯𑀼𑀢𑁆𑀢𑀁. 𑀦 𑀔𑁄 𑀲𑀼𑀤𑀺𑀦𑁆𑀦 𑀢𑀣𑀸𑀕𑀢𑀸𑀢𑀺 ‘‘𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀕𑀯𑀸’’𑀢𑀺 𑀬𑀸𑀘𑀦𑀸𑀯𑀲𑁂𑀦 𑀧𑀦𑁂𑀯𑀫𑀸𑀳, 𑀦 𑀪𑀕𑀯𑀸 𑀲𑀬𑀁 𑀲𑀭𑀡𑀸𑀦𑀺 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀓𑀮𑀪𑀸𑀕𑀫𑁆𑀧𑀻’’𑀢𑀺 𑀧𑀸𑀞𑀲𑁂𑀲𑁄. 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀻𑀢𑀺 𑀤𑀼𑀢𑀺𑀬𑀢𑀢𑀺𑀬𑀯𑀺𑀓𑀧𑁆𑀧𑁂𑀲𑀼. 𑀧𑀼𑀭𑀺𑀫𑀧𑀤𑀲𑁆𑀲𑀸𑀢𑀺 𑀓𑀺𑀜𑁆𑀘𑀻𑀢𑀺 𑀧𑀤𑀲𑁆𑀲. 𑀉𑀢𑁆𑀢𑀭𑀧𑀤𑁂𑀦𑀸𑀢𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀧𑀤𑁂𑀦. 𑀲𑀫𑀸𑀦𑀯𑀺𑀪𑀢𑁆𑀢𑀻𑀢𑀺 𑀲𑀸𑀫𑀺𑀯𑀘𑀦𑀁. 𑀬𑀣𑀸 𑀓𑀺𑀁? ‘‘𑀓𑀲𑁆𑀲𑀘𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀢𑀬𑀸 𑀲𑀤𑁆𑀥𑀺𑀁 𑀅𑀫𑀭𑀺𑀢𑁆𑀯𑀸 𑀅𑀓𑀸𑀫𑀸 𑀚𑀻𑀯𑀺𑀲𑁆𑀲𑀸𑀫. 𑀲𑀘𑁂𑀧𑀺 𑀦 𑀫𑀭𑀸𑀫, 𑀅𑀓𑀸𑀫𑀓𑀸𑀯 𑀢𑀬𑀸 𑀯𑀺𑀬𑁄𑀕𑀁 𑀧𑀸𑀧𑀼𑀡𑀺𑀲𑁆𑀲𑀸𑀫, 𑀢𑀬𑀺 𑀚𑀻𑀯𑀫𑀸𑀦𑁂 𑀏𑀯 𑀦𑁄 𑀫𑀭𑀡𑀁 𑀪𑀯𑁂𑀬𑁆𑀬, 𑀫𑀭𑀡𑁂𑀦𑀧𑀺 𑀦𑁄 𑀢𑀬𑀸 𑀯𑀺𑀬𑁄𑀕𑀁 𑀫𑀬𑀁 𑀅𑀓𑀸𑀫𑀓𑀸𑀯 𑀧𑀸𑀧𑀼𑀡𑀺𑀲𑁆𑀲𑀸𑀫.

𑁩𑁦. 𑀓𑀢𑀺𑀧𑀸𑀳𑀁 𑀩𑀮𑀁 𑀕𑀸𑀳𑁂𑀢𑁆𑀯𑀸𑀢𑀺 𑀓𑀲𑁆𑀫𑀸 𑀧𑀦𑀸𑀬𑀁 𑀢𑀣𑀸 𑀧𑀩𑁆𑀩𑀚𑁆𑀚𑀸𑀬 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀅𑀦𑀼𑀜𑁆𑀜𑀸𑀢𑁄 𑀲𑀫𑀸𑀦𑁄 𑀓𑀢𑀺𑀧𑀸𑀳𑀁 𑀖𑀭𑁂𑀬𑁂𑀯 𑀯𑀺𑀮𑀫𑁆𑀩𑀺𑀢𑁆𑀯𑀸 𑀓𑀸𑀬𑀩𑀮𑀜𑁆𑀘 𑀅𑀕𑁆𑀕𑀳𑁂𑀲𑀻𑀢𑀺? 𑀅𑀦𑀼𑀫𑀢𑀺𑀤𑀸𑀦𑁂𑀦 𑀫𑀸𑀢𑀸𑀧𑀺𑀢𑀽𑀲𑀼 𑀲𑀳𑀸𑀬𑀓𑁂𑀲𑀼 𑀘 𑀢𑀼𑀝𑁆𑀞𑁄 𑀢𑁂𑀲𑀁 𑀘𑀺𑀢𑁆𑀢𑀢𑀼𑀝𑁆𑀞𑀢𑁆𑀣𑀁. 𑀓𑁂𑀲𑀼𑀘𑀺 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 𑀓𑁂𑀘𑀺 𑀆𑀘𑀭𑀺𑀬𑀸 ‘‘𑀅𑀬𑀁 𑀲𑀼𑀤𑀺𑀦𑁆𑀦𑁄 𑀚𑀻𑀯𑀓𑀯𑀢𑁆𑀣𑀼𑀢𑁄 𑀧𑀘𑁆𑀙𑀸 𑀧𑀁𑀲𑀼𑀓𑀽𑀮𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀁𑀲𑀼𑀓𑀽𑀮𑀺𑀓𑁄 𑀚𑀸𑀢𑁄’’𑀢𑀺 𑀲𑀜𑁆𑀜𑀸𑀬 ‘‘𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀻’’𑀢𑀺 𑀮𑀺𑀔𑀦𑁆𑀢𑀺, 𑀢𑀁 ‘‘𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. ‘‘𑀢𑀣𑀸 𑀲𑀼𑀤𑀺𑀦𑁆𑀦𑁄 𑀳𑀺 𑀪𑀕𑀯𑀢𑁄 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀧𑀩𑁆𑀩𑀚𑀺𑀢𑁄, 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀜𑀸𑀢𑀺𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀲𑀬𑀁 𑀧𑀩𑁆𑀩𑀚𑁆𑀚𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸’’𑀢𑀺, ‘‘𑀪𑀕𑀯𑀢𑁄 𑀳𑀺 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀇𑀤𑀁 𑀯𑀢𑁆𑀣𑀁, 𑀏𑀢𑁆𑀣𑀦𑁆𑀢𑀭𑁂 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀦 𑀓𑁄𑀘𑀺 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀺, 𑀲𑀩𑁆𑀩𑁂 𑀧𑀁𑀲𑀼𑀓𑀽𑀮𑀺𑀓𑀸𑀯 𑀅𑀳𑁂𑀲𑀼’’𑀦𑁆𑀢𑀺 𑀘 𑀯𑀼𑀢𑁆𑀢𑁂𑀦 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺, 𑀧𑀩𑁆𑀩𑀚𑁆𑀚𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄, 𑀦 𑀉𑀧𑀲𑀫𑁆𑀧𑀤𑀸𑀬. 𑀉𑀧𑀲𑀫𑁆𑀧𑀤𑀁 𑀧𑀦 𑀚𑀻𑀯𑀓𑀯𑀢𑁆𑀣𑀼𑀢𑁄 (𑀫𑀳𑀸𑀯. 𑁩𑁨𑁬) 𑀧𑀘𑁆𑀙𑀸 𑀅𑀮𑀢𑁆𑀣, 𑀢𑀲𑁆𑀫𑀸 𑀅𑀯𑀲𑁆𑀲𑀺𑀓𑁄 𑀜𑀸𑀢𑀺𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀲𑀺𑀬𑀸𑀢𑀺 𑀘𑁂? 𑀦, ‘‘𑀅𑀮𑀢𑁆𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀏𑀓𑀢𑁄 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀢𑁆𑀢𑀸. 𑀧𑀩𑁆𑀩𑀚𑁆𑀚𑀸𑀦𑀦𑁆𑀢𑀭𑀫𑁂𑀯 𑀳𑀺 𑀲𑁄 𑀉𑀧𑀲𑀫𑁆𑀧𑀦𑁆𑀦𑁄 𑀢𑁂𑀭𑀲𑀥𑀼𑀢𑀗𑁆𑀕𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑁄 𑀅𑀝𑁆𑀞 𑀯𑀲𑁆𑀲𑀸𑀦𑀺 𑀯𑀚𑁆𑀚𑀺𑀕𑀸𑀫𑁂 𑀯𑀺𑀳𑀭𑀺𑀢𑁆𑀯𑀸 𑀦𑀺𑀲𑁆𑀲𑀬𑀫𑀼𑀢𑁆𑀢𑀢𑁆𑀢𑀸 𑀲𑀬𑀁𑀯𑀲𑀻 𑀳𑀼𑀢𑁆𑀯𑀸 ‘‘𑀏𑀢𑀭𑀳𑀺 𑀔𑁄 𑀯𑀚𑁆𑀚𑀻 𑀤𑀼𑀩𑁆𑀪𑀺𑀓𑁆𑀔𑀸’’𑀢𑀺𑀆𑀤𑀺𑀢𑀓𑁆𑀓𑀯𑀲𑁂𑀦 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺, 𑀢𑀲𑁆𑀫𑀸 ‘‘𑀧𑀁𑀲𑀼𑀓𑀽𑀮𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑁄𑀬𑁂𑀯 𑀧𑀸𑀞𑁄 𑀬𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺, 𑀲𑁄𑀯 𑀧𑀫𑀸𑀡𑀢𑁄 𑀕𑀳𑁂𑀢𑀩𑁆𑀩𑁄. ‘‘𑀆𑀭𑀜𑁆𑀜𑀺𑀓𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀧𑀜𑁆𑀘 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺 𑀦𑁂𑀲𑀚𑁆𑀚𑀺𑀓𑀗𑁆𑀕𑀜𑁆𑀘 𑀯𑀺𑀳𑀸𑀭𑀲𑀪𑀸𑀕𑀢𑁆𑀢𑀸, ‘‘𑀧𑀺𑀡𑁆𑀟𑀧𑀸𑀢𑀺𑀓𑁄’’𑀢𑀺 𑀇𑀫𑀺𑀦𑀸 𑀧𑀜𑁆𑀘 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺, ‘‘𑀧𑀁𑀲𑀼𑀓𑀽𑀮𑀺𑀓𑁄’’𑀢𑀺 𑀇𑀫𑀺𑀦𑀸 𑀤𑁆𑀯𑁂 𑀘𑀻𑀯𑀭𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺. 𑀜𑀸𑀢𑀺𑀖𑀭𑀽𑀧𑀕𑀫𑀦𑀓𑀸𑀭𑀡𑀤𑀻𑀧𑀦𑀸𑀥𑀺𑀧𑁆𑀧𑀸𑀬𑀢𑁄 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁 𑀯𑀺𑀲𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀫𑀸 𑀅𑀢𑀺𑀳𑀭𑀸𑀧𑁂𑀲𑀼’’𑀦𑁆𑀢𑀺 𑀓𑀸𑀮𑀩𑁆𑀬𑀢𑁆𑀢𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀥𑀫𑁆𑀫𑀲𑁆𑀲𑀦𑁆𑀢𑀭𑀸𑀬𑀓𑀭𑀢𑀭𑀢𑁆𑀢𑀸 ‘‘𑀇𑀫𑀁 𑀦𑀬’’𑀦𑁆𑀢𑀺 𑀅𑀦𑀬𑁄𑀬𑁂𑀯.

𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸𑀦𑀁, 𑀯𑀺𑀦𑀸𑀲𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂;

𑀅𑀦𑀬𑁄 𑀦𑀬𑀭𑀽𑀧𑁂𑀦, 𑀩𑀼𑀤𑁆𑀥𑀺𑀫𑀸𑀕𑀫𑁆𑀫 𑀢𑀺𑀝𑁆𑀞𑀢𑀺.

𑁩𑁬. 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁. 𑀓𑀣𑀁? ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀲𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀪𑁂𑀤𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑁂 𑀲𑀭𑀽𑀧𑀢𑁄 𑀆𑀕𑀢𑀸 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀲𑀉𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀲𑀸𑀧𑀺 𑀤𑀼𑀯𑀺𑀥𑀸 𑀲𑀧𑀼𑀕𑁆𑀕𑀮𑀸𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀪𑁂𑀤𑀢𑁄. 𑀢𑀢𑁆𑀣 𑀬𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑁆𑀢𑁄 𑀆𑀧𑀢𑁆𑀢𑀺𑀬𑀸 𑀲𑀳, 𑀯𑀺𑀦𑀸 𑀯𑀸 𑀧𑀼𑀕𑁆𑀕𑀮𑁄 𑀤𑀲𑁆𑀲𑀺𑀢𑁄, 𑀲𑀸 𑀲𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸. 𑀇𑀢𑀭𑀸 𑀅𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀧𑀺 𑀤𑀼𑀯𑀺𑀥𑀸 𑀤𑀲𑁆𑀲𑀺𑀢𑀸𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀪𑁂𑀤𑀢𑁄. 𑀢𑀢𑁆𑀣 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸. ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀳𑀺 𑀧𑀼𑀕𑁆𑀕𑀮𑁄𑀯 𑀢𑀢𑁆𑀣 𑀤𑀲𑁆𑀲𑀺𑀢𑁄, 𑀦𑀸𑀧𑀢𑁆𑀢𑀺. 𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑁂 ‘‘𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀥𑀫𑁆𑀫𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺 𑀳𑀺 𑀢𑀢𑁆𑀣 𑀆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑁂𑀦, 𑀢𑀣𑀸 𑀅𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀧𑀺 𑀤𑀲𑁆𑀲𑀺𑀢𑀸𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀢𑁄𑀯 𑀤𑀼𑀯𑀺𑀥𑀸. 𑀢𑀢𑁆𑀣 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀲𑁂𑀔𑀺𑀬𑀸 𑀥𑀫𑁆𑀫𑀸. 𑀲𑁂𑀲𑀸 𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸𑀧𑀺 𑀤𑀼𑀯𑀺𑀥𑀸 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀪𑁂𑀤𑀢𑁄. 𑀢𑀢𑁆𑀣 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀸 𑀦𑀸𑀫 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀫𑀼𑀲𑀸𑀯𑀸𑀤 𑀑𑀫𑀲𑀯𑀸𑀤 𑀧𑁂𑀲𑀼𑀜𑁆𑀜 𑀪𑀽𑀢𑀕𑀸𑀫 𑀅𑀜𑁆𑀜𑀯𑀸𑀤𑀓 𑀉𑀚𑁆𑀛𑀸𑀧𑀦𑀓 𑀕𑀡𑀪𑁄𑀚𑀦 𑀧𑀭𑀫𑁆𑀧𑀭𑀪𑁄𑀚𑀦 𑀲𑀼𑀭𑀸𑀫𑁂𑀭𑀬 𑀅𑀗𑁆𑀕𑀼𑀮𑀺𑀧𑀢𑁄𑀤𑀓 𑀳𑀲𑀥𑀫𑁆𑀫 𑀅𑀦𑀸𑀤𑀭𑀺𑀬 𑀢𑀮𑀖𑀸𑀢𑀓𑀚𑀢𑀼𑀫𑀝𑁆𑀞𑀓 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀧𑀜𑁆𑀘𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀲𑁂𑀲𑀸𑀦𑀁 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀦𑀁 𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀼𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺𑀧𑀺 𑀧𑀤𑀪𑀸𑀚𑀦𑀦𑁆𑀢𑀭𑀸𑀧𑀢𑁆𑀢𑀺𑀯𑀺𑀦𑀻𑀢𑀯𑀢𑁆𑀣𑀼𑀧𑀝𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀯𑀲𑁂𑀦 𑀙𑀩𑁆𑀩𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁬𑁧) 𑀏𑀯𑀫𑀸𑀤𑀺𑀓𑀸 𑀧𑀤𑀪𑀸𑀚𑀦𑀺𑀬𑁂 𑀲𑀦𑁆𑀤𑀺𑀲𑁆𑀲𑀫𑀸𑀦𑀸𑀧𑀢𑁆𑀢𑀺 𑀧𑀤𑀪𑀸𑀚𑀦𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁, 𑀬𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀓𑀸 (𑀧𑀸𑀭𑀸. 𑁫𑁧𑁭) 𑀅𑀦𑁆𑀢𑀭𑀸𑀧𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁂𑀦 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁭𑁫) 𑀏𑀯𑀫𑀸𑀤𑀺𑀓𑀸 𑀯𑀺𑀦𑀻𑀢𑀯𑀢𑁆𑀣𑀼𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁧𑁪) 𑀏𑀯𑀫𑀸𑀤𑀺𑀓𑀸 𑀧𑀝𑀺𑀓𑁆𑀔𑁂𑀧𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. 𑀔𑀦𑁆𑀥𑀓𑁂𑀲𑀼 𑀧𑀜𑁆𑀜𑀢𑁆𑀢𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀺 𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸 𑀯𑀸𑀤𑀺𑀢𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁮𑁩𑁪) 𑀇𑀫𑀺𑀦𑀸 𑀯𑀼𑀢𑁆𑀢𑁂𑀦 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀘𑁆𑀘𑁂𑀬𑁆𑀬 𑀯𑀸 𑀕𑀸𑀬𑁂𑀬𑁆𑀬 𑀯𑀸 𑀯𑀸𑀤𑁂𑀬𑁆𑀬 𑀯𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀅𑀝𑁆𑀞𑀓𑀣𑀸𑀬 𑀤𑀺𑀲𑁆𑀲𑀫𑀸𑀦𑀁 𑀆𑀧𑀢𑁆𑀢𑀺𑀚𑀸𑀢𑀁, 𑀯𑀺𑀦𑀬𑀓𑀫𑁆𑀫𑀁 𑀯𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. 𑀙𑀩𑁆𑀩𑀺𑀥𑀫𑁆𑀧𑁂𑀢𑀁 𑀙𑀳𑀺 𑀓𑀸𑀭𑀡𑁂𑀳𑀺 𑀉𑀤𑁆𑀤𑁂𑀲𑀸𑀭𑀳𑀁 𑀦 𑀳𑁄𑀢𑀻𑀢𑀺 𑀅𑀦𑀼𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀜𑁆𑀘𑀳𑀺 𑀉𑀤𑁆𑀤𑁂𑀲𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀲𑀪𑀸𑀕𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀩𑁆𑀪𑀸𑀲𑀺𑀢𑀸𑀦𑀁, 𑀲𑀪𑀸𑀕𑀯𑀢𑁆𑀣𑀼𑀓𑀫𑁆𑀧𑀺 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀤𑁆𑀯𑀬𑀁 𑀅𑀲𑀪𑀸𑀕𑀸𑀧𑀢𑁆𑀢𑀺𑀓𑀢𑁆𑀢𑀸, 𑀅𑀦𑁆𑀢𑀭𑀸𑀧𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀁 𑀦𑀸𑀦𑀸𑀯𑀢𑁆𑀣𑀼𑀓𑀸𑀧𑀢𑁆𑀢𑀺𑀓𑀢𑁆𑀢𑀸, 𑀧𑀝𑀺𑀓𑁆𑀔𑁂𑀧𑀲𑀺𑀓𑁆𑀔𑀸𑀧𑀤𑀸𑀦𑀁 𑀓𑁂𑀲𑀜𑁆𑀘𑀺 𑀯𑀺𑀦𑀻𑀢𑀯𑀢𑁆𑀣𑀼𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀜𑁆𑀘 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀢𑁆𑀢𑀸, 𑀅𑀤𑀲𑁆𑀲𑀺𑀢𑀯𑀢𑁆𑀣𑀼𑀓𑀢𑁆𑀢𑀸 𑀪𑁂𑀤𑀸𑀦𑀼𑀯𑀢𑁆𑀢𑀓𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀯𑀢𑁆𑀣𑀼𑀓𑀢𑁆𑀢𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀤𑀼𑀯𑀺𑀥𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀪𑁂𑀤𑀢𑁄’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀫𑀸𑀲𑀢𑁄 𑀧𑀓𑀸𑀲𑀺𑀢𑀁 𑀳𑁄𑀢𑀺.

𑀢𑀢𑁆𑀣 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀲𑀉𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 𑀏𑀯𑀁 𑀓𑀺𑀭 𑀯𑀡𑁆𑀡𑀬𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀓𑀢𑀺𑀯𑀲𑁆𑀲𑀸𑀪𑀺𑀲𑀫𑁆𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀢𑁂𑀲𑀼 𑀧𑀞𑀫𑀧𑀸𑀭𑀸𑀚𑀺𑀓𑁄 𑀯𑁂𑀲𑀸𑀮𑀺𑀬𑀁 𑀧𑀜𑁆𑀜𑀢𑁆𑀢𑁄 𑀧𑀜𑁆𑀘𑀯𑀲𑁆𑀲𑀸𑀪𑀺𑀲𑀫𑁆𑀩𑀼𑀤𑁆𑀥𑁂𑀦 𑀳𑁂𑀫𑀦𑁆𑀢𑀸𑀦𑀁 𑀧𑀞𑀫𑁂 𑀫𑀸𑀲𑁂 𑀤𑀼𑀢𑀺𑀬𑁂 𑀧𑀓𑁆𑀔𑁂 𑀤𑀲𑀫𑁂 𑀤𑀺𑀯𑀲𑁂 𑀅𑀟𑁆𑀠𑀢𑁂𑀬𑁆𑀬𑀧𑁄𑀭𑀺𑀲𑀸𑀬 𑀙𑀸𑀬𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁂𑀦 𑀦𑀺𑀲𑀺𑀦𑁆𑀦𑁂𑀦 𑀅𑀟𑁆𑀠𑀢𑁂𑀭𑀲𑀸𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀫𑀚𑁆𑀛𑁂 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑁄’’𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺, 𑀓𑀲𑁆𑀫𑀸? 𑁋

𑀬𑀲𑁆𑀫𑀸 𑀤𑁆𑀯𑀸𑀤𑀲𑀫𑀁 𑀯𑀲𑁆𑀲𑀁, 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺 𑀚𑀺𑀦𑁄;

𑀢𑀲𑁆𑀫𑀺𑀜𑁆𑀘 𑀲𑀼𑀤𑁆𑀥𑁄 𑀲𑀗𑁆𑀖𑁄𑀢𑀺, 𑀦𑁂𑀯 𑀧𑀸𑀭𑀸𑀚𑀺𑀓𑀁 𑀢𑀤𑀸.

𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀲𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸;

𑀢𑀲𑁆𑀫𑀺𑀁 𑀲𑀺𑀤𑁆𑀥𑀸𑀢𑀺 𑀲𑀺𑀤𑁆𑀥𑀸𑀯, 𑀕𑀭𑀼𑀓𑀸𑀧𑀢𑁆𑀢𑀺 𑀦𑁄 𑀢𑀤𑀸.

𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀜𑁆𑀘, 𑀓𑀺𑀁 𑀲𑀢𑁆𑀣𑀸 𑀘𑀢𑀼𑀯𑀲𑁆𑀲𑀺𑀓𑁄;

𑀧𑀝𑀺𑀓𑁆𑀔𑀺𑀧𑀺 𑀓𑀺𑀫𑀸𑀡𑀜𑁆𑀘, 𑀲𑀫𑀢𑁆𑀢𑀁 𑀅𑀦𑀼𑀚𑀸𑀦𑀺 𑀲𑁄.

𑀅𑀚𑀸𑀢𑀲𑀢𑁆𑀢𑀼𑀁 𑀦𑀺𑀲𑁆𑀲𑀸𑀬, 𑀲𑀗𑁆𑀖𑀪𑁂𑀤𑀫𑀓𑀸𑀲𑀺 𑀬𑀁;

𑀤𑁂𑀯𑀤𑀢𑁆𑀢𑁄 𑀢𑀢𑁄 𑀲𑀗𑁆𑀖-𑀪𑁂𑀤𑁄 𑀧𑀘𑁆𑀙𑀺𑀫𑀩𑁄𑀥𑀺𑀬𑀁.

𑀆𑀭𑀸𑀥𑀬𑀺𑀁𑀲𑀼 𑀫𑀁 𑀧𑀼𑀩𑁆𑀩𑁂, 𑀪𑀺𑀓𑁆𑀔𑀽𑀢𑀺 𑀫𑀼𑀦𑀺𑀪𑀸𑀲𑀺𑀢𑀁;

𑀲𑀼𑀢𑁆𑀢𑀫𑁂𑀯 𑀧𑀫𑀸𑀡𑀁 𑀦𑁄, 𑀲𑁄𑀯 𑀓𑀸𑀮𑁄 𑀅𑀦𑀧𑁆𑀧𑀓𑁄𑀢𑀺.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀣 𑀪𑀕𑀯𑀸 𑀅𑀚𑁆𑀛𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀧𑀸𑀭𑀸𑀚𑀺𑀓𑀁 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀸 𑀦 𑀧𑀜𑁆𑀜𑀧𑁂𑀲𑀻’’𑀢𑀺, 𑀢𑀁 𑀲𑀓𑀮𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬𑀸𑀳. 𑀦 𑀓𑁂𑀯𑀮𑀁 𑀲𑀉𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀫𑀢𑁆𑀢𑀁, 𑀢𑁂𑀦 𑀲𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺𑀪𑁂𑀤𑀁 𑀲𑀓𑀮𑀁 𑀧𑀸𑀭𑀸𑀚𑀺𑀓𑀁 𑀲𑀦𑁆𑀥𑀸𑀬𑀸𑀳𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀦𑀸𑀪𑀺𑀧𑀭𑀸𑀫𑀲𑀦𑀫𑁆𑀧𑀺 𑀓𑀸𑀬𑀲𑀁𑀲𑀕𑁆𑀕𑁄, 𑀢𑀣𑀸𑀧𑀺 𑀏𑀢𑀁 𑀯𑀺𑀲𑁂𑀲𑀦𑀺𑀬𑀫𑀦𑀢𑁄, 𑀅𑀘𑁆𑀙𑀦𑁆𑀤𑀭𑀸𑀕𑀸𑀥𑀺𑀧𑁆𑀧𑀸𑀬𑀢𑁄 𑀘 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀙𑀦𑁆𑀤𑀭𑀸𑀕𑀭𑀢𑁆𑀢𑀲𑁆𑀲𑁂𑀯 𑀳𑀺 𑀓𑀸𑀬𑀲𑀁𑀲𑀕𑁆𑀕𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀅𑀲𑀼𑀘𑀺𑀧𑀸𑀦𑁂 𑀧𑀦 𑀳𑀢𑁆𑀣𑀺𑀦𑀺𑀬𑀸 𑀢𑀸𑀧𑀲𑀧𑀲𑁆𑀲𑀸𑀯𑀧𑀸𑀦𑁂𑀦 𑀯𑀸𑀮𑀓𑀸𑀩𑁆𑀬𑁄 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺, 𑀯𑀸𑀮𑀓𑀸𑀩𑁆𑀬𑀲𑁆𑀲 𑀯𑀢𑁆𑀣𑀼 𑀯𑀢𑁆𑀢𑀩𑁆𑀩𑀁. 𑀫𑀡𑁆𑀟𑀩𑁆𑀬𑀲𑁆𑀲 𑀦𑀸𑀪𑀺𑀬𑀸 𑀧𑀭𑀸𑀫𑀲𑀦𑁂𑀦𑁂𑀯 𑀓𑀺𑀭. 𑀭𑀽𑀧𑀤𑀲𑁆𑀲𑀦𑁂 𑀧𑀦 𑀯𑁂𑀚𑁆𑀚𑀓𑀸 𑀆𑀳𑀼 𑁋

‘‘𑀣𑀻𑀦𑀁 𑀲𑀦𑁆𑀤𑀲𑁆𑀲𑀦𑀸 𑀲𑀼𑀓𑁆𑀓𑀁, 𑀓𑀤𑀸𑀘𑀺 𑀘𑀮𑀺𑀢𑁄𑀯𑀭𑁂;

𑀢𑀁 𑀕𑀸𑀫𑀥𑀫𑁆𑀫𑀓𑀭𑀡𑀁, 𑀤𑁆𑀯𑀬𑀲𑀫𑀁 𑀲𑀗𑁆𑀕𑀫𑀺𑀬;

𑀕𑀩𑁆𑀪𑀸𑀤𑀻𑀢𑀺 𑀅𑀬𑀁 𑀦𑀬𑁄, 𑀣𑀻𑀦𑀁 𑀧𑀼𑀭𑀺𑀲𑀤𑀲𑁆𑀲𑀦𑀸𑀲𑀻𑀢𑁆𑀬𑀽𑀧𑀦𑁂𑀬𑁆𑀬’’.

𑀢𑀣𑀸𑀧𑁆𑀬𑀸𑀳𑀼 𑁋

‘‘𑀧𑀼𑀧𑁆𑀨𑀺𑀓𑁂 𑀏𑀥𑀺𑀬𑁆𑀬 𑀲𑀼𑀤𑁆𑀥𑁂, 𑀧𑀲𑁆𑀲𑀁 𑀦𑀭𑀜𑁆𑀘 𑀇𑀢𑁆𑀣𑀺 𑀢𑀁;

𑀕𑀩𑁆𑀪𑀜𑁆𑀘 𑀦𑀬𑁂𑀢𑁆𑀬𑀼𑀢𑁆𑀢-𑀫𑀺𑀢𑀺 𑀢𑀲𑁆𑀫𑀸 𑀓𑀸𑀲𑁄 𑀇𑀢𑀻’’𑀢𑀺.

𑀭𑀸𑀚𑁄𑀭𑁄𑀥𑁄 𑀯𑀺𑀬𑀸𑀢𑀺 𑀲𑀻𑀳𑀴𑀤𑀻𑀧𑁂 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀢𑀣𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀓𑀺𑀭 𑀏𑀯𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺, 𑀦 𑀢𑀁 𑀫𑀦𑀼𑀲𑁆𑀲𑀸𑀦𑀁 𑀯𑀺𑀲𑀬𑁄 𑀅𑀳𑁄𑀲𑀺 𑀢𑁂𑀲𑀁 𑀭𑀽𑀧𑀁 𑀯𑀺𑀬. 𑀢𑁂𑀦𑁂𑀯 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 ‘‘𑀓𑀘𑁆𑀘𑀺 𑀦𑁄 𑀢𑁆𑀯𑀁 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦 𑀅𑀦𑀪𑀺𑀭𑀢𑁄’’𑀢𑀺.

𑁩𑁯. 𑀓𑀮𑀻𑀢𑀺 𑀓𑁄𑀥𑁄, 𑀢𑀲𑁆𑀲 𑀲𑀸𑀲𑀦𑀁 𑀓𑀮𑀺𑀲𑀸𑀲𑀦𑀁, 𑀓𑀮𑀳𑁄. 𑀕𑀸𑀫𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀚𑀦𑀧𑀤𑀥𑀫𑁆𑀫𑀁 𑀚𑀦𑀧𑀤𑀯𑀸𑀲𑀻𑀦𑀁 𑀲𑀺𑀤𑁆𑀥𑀺𑀁. 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀁, 𑀲𑀭𑀻𑀭𑀜𑁆𑀘. 𑀅𑀲𑀼𑀢𑁆𑀢𑀦𑁆𑀢𑀯𑀺𑀦𑀺𑀩𑀤𑁆𑀥𑀦𑁆𑀢𑀺 𑀯𑀺𑀦𑀬𑀲𑀼𑀢𑁆𑀢𑁂 𑀅𑀦𑀸𑀕𑀢𑀁, 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂𑀲𑀼𑀧𑀺 𑀅𑀦𑀸𑀕𑀢𑀁, 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀲𑀼𑀫𑀫𑀸𑀮𑀦𑁆𑀢𑀺 𑀦𑀸𑀦𑀸𑀕𑀼𑀡𑀁 𑀲𑀦𑁆𑀥𑀸𑀬𑀸𑀳. 𑀭𑀢𑀦𑀤𑀸𑀫𑀦𑁆𑀢𑀺 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀝𑀺𑀓𑁆𑀔𑀺𑀧𑀦𑀸𑀥𑀺𑀧𑁆𑀧𑀸𑀬𑀸 𑀪𑀤𑁆𑀤𑀸𑀮𑀺 𑀯𑀺𑀬. 𑀧𑀤𑀦𑀺𑀭𑀼𑀢𑁆𑀢𑀺𑀩𑁆𑀬𑀜𑁆𑀚𑀦𑀸𑀦𑀺 𑀦𑀸𑀫𑀯𑁂𑀯𑀘𑀦𑀸𑀦𑁂𑀯 ‘‘𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁩𑁧𑁫) 𑀯𑀺𑀬. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀭𑀢𑀺 𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. 𑀅𑀓𑀼𑀲𑀮𑀧𑀓𑁆𑀔𑁂 𑀤𑀼𑀲𑁆𑀲𑀻𑀮𑁆𑀬𑀁 𑀦𑀸𑀫 𑀘𑁂𑀢𑀦𑀸. 𑀓𑀼𑀲𑀮𑀧𑀓𑁆𑀔𑁂𑀧𑀺 𑀘𑁂𑀢𑀦𑀸𑀧𑀭𑀺𑀬𑀸𑀬𑀢𑁄 𑀯𑀺𑀪𑀗𑁆𑀕𑁂 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸𑀢𑀺 𑀏𑀢𑁆𑀣 𑀮𑁄𑀓𑀯𑀚𑁆𑀚𑀲𑁆𑀲 𑀧𑀜𑁆𑀜𑀸𑀧𑀦𑁂 𑀲𑀗𑁆𑀖𑀲𑀼𑀝𑁆𑀞𑀼𑀢𑀸 𑀳𑁄𑀢𑀺 𑀧𑀸𑀓𑀝𑀸𑀤𑀻𑀦𑀯𑀢𑁄. 𑀧𑀜𑁆𑀜𑀢𑁆𑀢𑀺𑀯𑀚𑁆𑀚𑀲𑁆𑀲 𑀧𑀜𑁆𑀜𑀸𑀧𑀦𑁂 𑀲𑀗𑁆𑀖𑀨𑀸𑀲𑀼𑀢𑀸 𑀳𑁄𑀢𑀺 𑀧𑀸𑀓𑀝𑀸𑀦𑀺𑀲𑀁𑀲𑀢𑁆𑀢𑀸. 𑀢𑀢𑁆𑀣 𑀧𑀞𑀫𑁂𑀦 𑀤𑀼𑀫𑁆𑀫𑀗𑁆𑀓𑀽𑀦𑀁 𑀦𑀺𑀕𑁆𑀕𑀳𑁄, 𑀤𑀼𑀢𑀺𑀬𑁂𑀦 𑀧𑁂𑀲𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑁄. 𑀧𑀞𑀫𑁂𑀦 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑁄, 𑀤𑀼𑀢𑀺𑀬𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁. 𑀢𑀣𑀸 𑀧𑀞𑀫𑁂𑀦 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑁄, 𑀤𑀼𑀢𑀺𑀬𑁂𑀦 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑁄. ‘‘𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸𑀬 𑀘𑁄𑀤𑀺𑀬𑀫𑀸𑀦𑀲𑁆𑀲 𑀪𑀩𑁆𑀩𑀓𑀼𑀮𑀧𑀼𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀼𑀤𑀺𑀦𑁆𑀦𑁄 𑀢𑀁 𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺, 𑀢𑁂𑀦𑁂𑀯 𑀧𑀩𑁆𑀩𑀚𑁆𑀚𑀸 𑀅𑀦𑀼𑀜𑁆𑀜𑀸𑀢𑀸’’𑀢𑀺 𑀯𑀤𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀢𑀣𑀸 𑀧𑀞𑀫𑁂𑀦 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺, 𑀤𑀼𑀢𑀺𑀬𑁂𑀦 𑀯𑀺𑀦𑀬𑀸𑀦𑀼𑀕𑁆𑀕𑀳𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘𑁂𑀢𑁆𑀣 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁂 𑀬𑀢𑁆𑀣 𑀏𑀓𑀦𑁆𑀢𑀸𑀓𑀼𑀲𑀮𑀪𑀸𑀯𑁂𑀦, 𑀢𑀁 𑀲𑀗𑁆𑀖𑀲𑀼𑀝𑁆𑀞𑀼𑀪𑀸𑀯𑀸𑀬 𑀧𑀜𑁆𑀜𑀢𑁆𑀢𑀁 𑀮𑁄𑀓𑀯𑀚𑁆𑀚𑀢𑁄, 𑀬𑀢𑁆𑀣 𑀧𑀜𑁆𑀜𑀢𑁆𑀢𑀺𑀚𑀸𑀦𑀦𑁂 𑀏𑀯 𑀅𑀢𑁆𑀣𑀸𑀧𑀢𑁆𑀢𑀺, 𑀦 𑀅𑀜𑁆𑀜𑀤𑀸, 𑀢𑀁 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀯𑀸𑀧𑀺 𑀧𑀲𑀸𑀤𑀼𑀧𑁆𑀧𑀸𑀤𑀩𑀼𑀤𑁆𑀥𑀺𑀬𑀸 𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀁, 𑀇𑀢𑀭𑀜𑁆𑀘 𑀲𑁂𑀔𑀺𑀬𑀁, 𑀇𑀤𑀁 𑀮𑁄𑀓𑀯𑀚𑁆𑀚𑀁 𑀦𑀸𑀫. 𑀯𑀢𑁆𑀣𑀼𑀦𑁄 𑀧𑀜𑁆𑀜𑀢𑁆𑀢𑀺𑀬𑀸 𑀯𑀸 𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸𑀬𑀸𑀪𑀸𑀯𑁂𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀭𑀡𑁂, 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑁂 𑀯𑀸 𑀲𑀢𑀺 𑀬𑀢𑁆𑀣 𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁄, 𑀢𑀁 𑀲𑀩𑁆𑀩𑀁 𑀞𑀧𑁂𑀢𑁆𑀯𑀸 𑀲𑀼𑀭𑀸𑀧𑀸𑀦𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀕𑀦𑁆𑀢𑀼𑀓𑀯𑀢𑁆𑀢𑀁, 𑀆𑀯𑀸𑀲𑀺𑀓, 𑀕𑀫𑀺𑀓, 𑀅𑀦𑀼𑀫𑁄𑀤𑀦, 𑀪𑀢𑁆𑀢𑀕𑁆𑀕, 𑀧𑀺𑀡𑁆𑀟𑀘𑀸𑀭𑀺𑀓, 𑀆𑀭𑀜𑁆𑀜𑀓, 𑀲𑁂𑀦𑀸𑀲𑀦, 𑀚𑀦𑁆𑀢𑀸𑀖𑀭, 𑀯𑀘𑁆𑀘𑀓𑀼𑀝𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓, 𑀉𑀧𑀚𑁆𑀛𑀸𑀬, 𑀅𑀦𑁆𑀢𑁂𑀯𑀸𑀲𑀺𑀓, 𑀆𑀘𑀭𑀺𑀬𑀯𑀢𑁆𑀢𑀦𑁆𑀢𑀺 𑀏𑀢𑀸𑀦𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑀦𑀬𑁂𑀦 𑀕𑀡𑀺𑀬𑀫𑀸𑀦𑀸𑀦𑀺 𑀘𑀼𑀤𑁆𑀤𑀲, 𑀏𑀢𑀸𑀦𑀺 𑀧𑀦 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑁂𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀲𑀢𑁆𑀢𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀁𑀯𑀭𑁄 𑀲𑀁𑀯𑀭𑀯𑀺𑀦𑀬𑁄 𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀫𑁂𑀯. 𑀢𑀢𑁆𑀣 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄 𑀲𑀫𑀣𑀯𑀺𑀦𑀬𑀢𑁆𑀣𑀸𑀬 𑀲𑀫𑀣𑀯𑀺𑀦𑀬𑁄 𑀲𑀁𑀯𑀭𑀯𑀺𑀦𑀬𑀢𑁆𑀣𑀸𑀬 𑀲𑀁𑀯𑀭𑀯𑀺𑀦𑀬𑁄 𑀧𑀳𑀸𑀦𑀯𑀺𑀦𑀬𑀢𑁆𑀣𑀸𑀬𑀸𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀽𑀢𑀺 𑀏𑀓𑀫𑀺𑀯 𑀯𑀼𑀢𑁆𑀢𑀁 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀲𑀢𑀺 𑀲𑀗𑁆𑀖𑀨𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 𑀤𑀻𑀧𑀦𑀢𑁆𑀣𑀁. 𑀧𑀓𑀭𑀻𑀬𑀦𑁆𑀢𑀺 𑀏𑀢𑁆𑀣 𑀢𑁂 𑀢𑁂 𑀧𑀬𑁄𑀚𑀦𑀯𑀺𑀲𑁂𑀲𑀲𑀗𑁆𑀔𑀸𑀢𑀸 𑀅𑀢𑁆𑀣𑀯𑀲𑀸𑀢𑀺 𑀅𑀢𑁆𑀣𑀯𑀲𑀁 ‘‘𑀧𑀓𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀲𑀲𑀼 𑀧𑀤𑁂𑀲𑀼 𑀏𑀓𑁂𑀓𑀁 𑀫𑀽𑀮𑀁 𑀓𑀢𑁆𑀯𑀸 𑀤𑀲𑀓𑁆𑀔𑀢𑁆𑀢𑀼𑀁 𑀬𑁄𑀚𑀦𑀸𑀬 𑀧𑀤𑀲𑀢𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀘𑁆𑀙𑀺𑀫𑀲𑁆𑀲 𑀧𑀤𑀲𑁆𑀲 𑀯𑀲𑁂𑀦 𑀅𑀢𑁆𑀣𑀲𑀢𑀁 𑀧𑀼𑀭𑀺𑀫𑀲𑁆𑀲 𑀯𑀲𑁂𑀦 𑀥𑀫𑁆𑀫𑀲𑀢𑀁 𑀅𑀢𑁆𑀣𑀚𑁄𑀢𑀺𑀓𑀸𑀦𑀁 𑀦𑀺𑀭𑀼𑀢𑁆𑀢𑀻𑀦𑀁 𑀯𑀲𑁂𑀦 𑀦𑀺𑀭𑀼𑀢𑁆𑀢𑀺𑀲𑀢𑀁, 𑀥𑀫𑁆𑀫𑀪𑀽𑀢𑀸𑀦𑀁 𑀦𑀺𑀭𑀼𑀢𑁆𑀢𑀻𑀦𑀁 𑀯𑀲𑁂𑀦 𑀦𑀺𑀭𑀼𑀢𑁆𑀢𑀺𑀲𑀢𑀦𑁆𑀢𑀺 𑀤𑁆𑀯𑁂 𑀦𑀺𑀭𑀼𑀢𑁆𑀢𑀺𑀲𑀢𑀸𑀦𑀺, 𑀅𑀢𑁆𑀣𑀲𑀢𑁂 𑀜𑀸𑀡𑀲𑀢𑀁, 𑀥𑀫𑁆𑀫𑀲𑀢𑁂 𑀜𑀸𑀡𑀲𑀢𑀁 𑀤𑁆𑀯𑀻𑀲𑀼 𑀦𑀺𑀭𑀼𑀢𑁆𑀢𑀺𑀲𑀢𑁂𑀲𑀼 𑀤𑁆𑀯𑁂 𑀜𑀸𑀡𑀲𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀜𑀸𑀡𑀲𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀢𑀺 𑀥𑀫𑁆𑀫𑀲𑀗𑁆𑀖𑀲𑁆𑀲 𑀲𑀼𑀝𑁆𑀞𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀣𑀧𑀤𑀸𑀦𑀻𑀢𑀺 𑀅𑀝𑁆𑀞𑀓𑀣𑀸. 𑀥𑀫𑁆𑀫𑀧𑀤𑀸𑀦𑀻𑀢𑀺 𑀧𑀸𑀴𑀻’’𑀢𑀺 𑀯𑀼𑀢𑁆𑀢𑀁 𑀓𑀺𑀭.

𑀫𑁂𑀣𑀼𑀦𑀁 𑀥𑀫𑁆𑀫𑀦𑁆𑀢𑀺 𑀏𑀯𑀁 𑀩𑀳𑀼𑀮𑀦𑀬𑁂𑀦 𑀮𑀤𑁆𑀥𑀦𑀸𑀫𑀓𑀁 𑀲𑀓𑀲𑀫𑁆𑀧𑀬𑁄𑀕𑁂𑀦, 𑀧𑀭𑀲𑀫𑁆𑀧𑀬𑁄𑀕𑁂𑀦 𑀯𑀸 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀲𑁆𑀲 𑀲𑀓𑀫𑀕𑁆𑀕𑁂 𑀯𑀸 𑀧𑀭𑀫𑀕𑁆𑀕𑁂 𑀯𑀸 𑀧𑀭𑀦𑀺𑀫𑀺𑀢𑁆𑀢𑀲𑁆𑀲 𑀲𑀓𑀫𑀕𑁆𑀕𑁂 𑀏𑀯 𑀧𑀯𑁂𑀲𑀧𑀯𑀺𑀝𑁆𑀞𑀞𑀺𑀢𑀼𑀤𑁆𑀥𑀭𑀡𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀧𑀝𑀺𑀲𑀸𑀤𑀺𑀬𑀦𑀯𑀲𑁂𑀦 𑀲𑁂𑀯𑁂𑀬𑁆𑀬 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄𑀢𑀺. 𑀓𑁂𑀘𑀺 𑀧𑀦 ‘‘𑀧𑀯𑁂𑀲𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀸 𑀢𑀻𑀡𑀺 𑀯𑀸 𑀤𑁆𑀯𑁂 𑀯𑀸 𑀏𑀓𑀁 𑀯𑀸 𑀧𑀝𑀺𑀲𑁂𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁, 𑀞𑀺𑀢𑀁, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’𑀢𑀺𑀆𑀤𑀻’’𑀢𑀺 (𑀧𑀸𑀭𑀸. 𑁫𑁯) 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀘𑀢𑀽𑀲𑀼𑀧𑀺 𑀘𑀢𑀲𑁆𑀲𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑁂𑀬𑁂𑀯 𑀏𑀯𑀁 𑀯𑀤𑀦𑁆𑀢𑀺 ‘‘𑀆𑀧𑀚𑁆𑀚𑀢𑀼 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑀩𑁆𑀪𑀸𑀕𑀺𑀬𑀸’’𑀢𑀺, ‘‘𑀅𑀢𑁆𑀢𑀦𑁄 𑀯𑀻𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀜𑁆𑀘 𑀆𑀧𑀚𑁆𑀚𑀺𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀕𑀳𑀝𑁆𑀞𑀓𑀸𑀮𑁂 𑀫𑁂𑀣𑀼𑀦𑀸𑀤𑀺𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀏𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀏𑀓𑀫𑀦𑁂𑀓𑀁 𑀯𑀸 𑀧𑀝𑀺𑀓𑀭𑀺𑀢𑁆𑀯𑀸𑀯 𑀲𑁄 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀦𑀺𑀭𑀸𑀧𑀢𑁆𑀢𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀕𑀳𑀝𑁆𑀞𑀓𑀸𑀮𑁂 𑀲𑀸𑀧𑀢𑁆𑀢𑀺𑀓𑁄𑀯𑀸𑀢𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲𑀸𑀧𑀺 𑀅𑀢𑁆𑀣𑁂𑀯 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁. 𑀯𑀼𑀝𑁆𑀞𑀸𑀦𑀤𑁂𑀲𑀦𑀸𑀳𑀺 𑀧𑀦 𑀅𑀲𑀼𑀚𑁆𑀛𑀦𑀢𑁄 ‘𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’𑀢𑀺 𑀦 𑀯𑀼𑀢𑁆𑀢𑀁 𑀕𑀡𑀦𑀧𑀬𑁄𑀚𑀦𑀸𑀪𑀸𑀯𑀢𑁄. 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀧𑀤𑀪𑀸𑀚𑀦𑁂 ‘𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’𑀢𑀺 𑀯𑀘𑀦𑁂𑀦𑀸𑀬𑀫𑀢𑁆𑀣𑁄 𑀲𑀺𑀤𑁆𑀥𑁄’’𑀢𑀺 𑀬𑀼𑀢𑁆𑀢𑀺𑀜𑁆𑀘 𑀯𑀤𑀦𑁆𑀢𑀺. 𑀬𑀤𑀺 𑀏𑀯𑀁 𑀫𑀸𑀢𑀺𑀓𑀸𑀬𑀫𑁆𑀧𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑀲𑁆𑀲 𑀅𑀦𑀯𑀲𑁂𑀲𑀯𑀘𑀦𑀫𑁆𑀧𑀺 𑀦 𑀬𑀼𑀚𑁆𑀚𑁂𑀬𑁆𑀬. 𑀲𑀩𑁆𑀩𑁂𑀧𑀺 𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀪𑀺𑀓𑁆𑀔𑀼𑀕𑀡𑀦𑀜𑁆𑀘 𑀅𑀦𑀯𑀲𑁂𑀲𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀅𑀦𑀯𑀲𑁂𑀲𑀯𑀘𑀦𑀦𑁆𑀢𑀺 𑀓𑀢𑁆𑀯𑀸 𑀧𑀯𑁂𑀲𑁂𑀯 𑀆𑀧𑀢𑁆𑀢𑀺, 𑀦 𑀧𑀯𑀺𑀝𑁆𑀞𑀸𑀤𑀻𑀲𑀼, 𑀢𑀫𑁂𑀯𑁂𑀓𑀁 𑀲𑀦𑁆𑀥𑀸𑀬 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀫𑁆𑀧𑀺 𑀅𑀦𑁆𑀢𑁄 𑀓𑀢𑁆𑀯𑀸 𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀫𑀸𑀢𑀺𑀓𑀸𑀬𑀁 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’’𑀢𑀺 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀯𑀘𑀦𑀁 𑀢𑁂𑀦 𑀲𑀭𑀻𑀭𑀩𑀦𑁆𑀥𑀦𑁂𑀦 𑀉𑀧𑀲𑀫𑁆𑀧𑀤𑀸𑀬 𑀅𑀪𑀩𑁆𑀩𑀪𑀸𑀯𑀤𑀻𑀧𑀦𑀢𑁆𑀣𑀁. ‘‘𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀧𑀤𑀪𑀸𑀚𑀦𑁂 𑀯𑀘𑀦𑀁 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀲𑁆𑀲 𑀅𑀲𑀁𑀯𑀸𑀲𑀲𑁆𑀲 𑀲𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀣𑁂𑀬𑁆𑀬𑀲𑀁𑀯𑀸𑀲𑀓𑀪𑀸𑀯𑀤𑀻𑀧𑀦𑀢𑁆𑀣𑀁. 𑀦 𑀳𑀺 𑀲𑁄 𑀲𑀁𑀯𑀸𑀲𑀁 𑀲𑀸𑀤𑀺𑀬𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀑𑀫𑀲𑀯𑀸𑀤𑁂𑀦 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁮𑁯). 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀢𑀤𑀪𑀸𑀯𑀢𑁄 𑀲𑀺𑀤𑁆𑀥𑁄 𑀲𑁄 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺. 𑀢𑁂𑀦 𑀧𑀤𑀲𑁄𑀥𑀫𑁆𑀫𑀁 𑀲𑀳𑀲𑁂𑀬𑁆𑀬𑀜𑁆𑀘 𑀦 𑀚𑀦𑁂𑀢𑀺, 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑀸𑀤𑀺𑀜𑁆𑀘 𑀚𑀦𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑀻𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀲𑀼 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀸𑀤𑀺𑀲𑁂𑀲𑀢𑁄 𑀯𑀼𑀝𑁆𑀞𑀸𑀦𑀯𑀺𑀥𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻…𑀧𑁂… 𑀆𑀧𑀦𑁆𑀦𑀸’’𑀢𑀺 (𑀧𑀸𑀘𑀺. 𑁬𑁭𑁯) 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀁 𑀓𑀢𑁆𑀯𑀸𑀧𑀺 𑀧𑀸𑀭𑀸𑀚𑀺𑀓𑀢𑁄 𑀅𑀥𑀺𑀧𑁆𑀧𑀸𑀬𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀁 ‘‘𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺 (𑀧𑀸𑀘𑀺. 𑁬𑁭𑁯) 𑀆𑀧𑀢𑁆𑀢𑀺𑀦𑀸𑀫𑀕𑁆𑀕𑀳𑀡𑀜𑁆𑀘 𑀓𑀢𑀁. 𑀏𑀢𑁆𑀢𑀸𑀯𑀢𑀸 𑀲𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁂 𑀤𑀲𑁆𑀲𑀺𑀢𑀸𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀤𑀼𑀓𑀁 𑀯𑀺𑀢𑁆𑀣𑀸𑀭𑀺𑀢𑀁 𑀳𑁄𑀢𑀺. 𑀅𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁂𑀲𑀼 𑀲𑁂𑀔𑀺𑀬𑁂𑀲𑀼 𑀆𑀧𑀢𑁆𑀢𑀺𑀬𑀸 𑀤𑀲𑁆𑀲𑀦𑀓𑀸𑀭𑀡𑀁 𑀲𑁂𑀔𑀺𑀬𑀸𑀦𑀁 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁. 𑀢𑀤𑀪𑀸𑀯𑀢𑁄 𑀇𑀢𑀭𑁂𑀲𑀼 𑀆𑀧𑀢𑁆𑀢𑀺𑀤𑀲𑁆𑀲𑀦𑀁 𑀓𑀢𑀁. 𑀅𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁂𑀲𑀼𑀧𑀺 𑀤𑀲𑁆𑀲𑀺𑀢𑀸𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀤𑀼𑀓𑀜𑁆𑀘 𑀯𑀺𑀢𑁆𑀣𑀸𑀭𑀺𑀢𑀁 𑀳𑁄𑀢𑀻𑀢𑀺.

𑀧𑀞𑀫𑀧𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀁 𑀦𑀺𑀝𑁆𑀞𑀺𑀢𑀁.

𑀫𑀓𑁆𑀓𑀝𑀻𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁦-𑁧. 𑀤𑀼𑀢𑀺𑀬𑀧𑀜𑁆𑀜𑀢𑁆𑀢𑀺𑀬𑀁 ‘‘𑀇𑀥 𑀫𑀮𑁆𑀮𑀸 𑀬𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀝𑀺𑀲𑁂𑀯𑀢𑀻𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑀁 𑀧𑀘𑀼𑀭𑀧𑀝𑀺𑀲𑁂𑀯𑀦𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀢𑀜𑁆𑀘 𑀔𑁄 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸, 𑀦𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀸’’𑀢𑀺 𑀧𑀭𑀺𑀧𑀼𑀡𑁆𑀡𑀢𑁆𑀣𑀫𑁆𑀧𑀺 𑀧𑀞𑀫𑀁 𑀧𑀜𑁆𑀜𑀢𑁆𑀢𑀺𑀁 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀕𑀸𑀳𑁂𑀦 𑀯𑀸 𑀮𑁂𑀲𑀑𑀟𑁆𑀟𑀦𑀢𑁆𑀣𑀸𑀬 𑀯𑀸 𑀏𑀯𑀫𑀸𑀳. 𑀧𑀭𑀺𑀧𑀼𑀡𑁆𑀡𑀢𑁆𑀣𑀢𑀁𑀬𑁂𑀯 𑀦𑀺𑀬𑀫𑁂𑀢𑀼𑀁 ‘‘𑀦𑀦𑀼 𑀆𑀯𑀼𑀲𑁄 𑀢𑀣𑁂𑀯 𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀫𑀓𑁆𑀓𑀝𑀻𑀯𑀢𑁆𑀣𑀼 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀧𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑁂𑀲𑀢𑁆𑀢𑀸, 𑀢𑀣𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼. 𑀯𑀺𑀘𑀸𑀭𑀡𑀸 𑀧𑀦𑁂𑀢𑁆𑀣 𑀢𑀢𑀺𑀬𑀧𑀜𑁆𑀜𑀢𑁆𑀢𑀺𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺. ‘‘𑀦𑀦𑀼, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺 𑀦 𑀓𑁂𑀯𑀮𑀁 𑀲𑀉𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀲𑀺𑀤𑁆𑀥𑀁, ‘‘𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀲𑀼𑀧𑀺 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀅𑀦𑀼𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑁂𑀦𑀧𑀺 𑀲𑀺𑀤𑁆𑀥𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀣 𑀯𑀸 𑀬𑀤𑀺 𑀲𑀉𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀁 𑀲𑀸𑀯𑀲𑁂𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑀺, 𑀇𑀫𑀺𑀦𑀸 𑀅𑀦𑀼𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑁂𑀦𑀸𑀧𑀺 𑀓𑀺𑀁 𑀦 𑀲𑀺𑀤𑁆𑀥𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀤𑁂𑀯 𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀧𑀜𑁆𑀜𑀢𑁆𑀢𑀫𑁂𑀯 𑀮𑁂𑀲𑀢𑁆𑀣𑀺𑀓𑀸𑀦𑀁 𑀅𑀮𑁂𑀲𑁄𑀓𑀸𑀲𑀁 𑀓𑀢𑁆𑀯𑀸 𑀆𑀫𑁂𑀟𑀺𑀢𑀢𑁆𑀣𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 ‘‘𑀅𑀜𑁆𑀜𑀯𑀸𑀤𑀓𑁂 𑀯𑀺𑀳𑁂𑀲𑀓𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁦𑁧) 𑀯𑀺𑀬 𑀯𑀢𑁆𑀣𑀼𑀤𑁆𑀯𑀬𑁂𑀦 𑀆𑀧𑀢𑁆𑀢𑀺𑀤𑁆𑀯𑀬𑀁 𑀆𑀧𑀚𑁆𑀚𑀢𑀺, 𑀦 𑀘𑀸𑀧𑀚𑁆𑀚𑀢𑀺, 𑀲𑁄 𑀏𑀯𑀢𑁆𑀣𑁄 𑀅𑀜𑁆𑀜𑁂𑀦𑀸𑀧𑀺 𑀯𑀘𑀦𑁂𑀦 𑀲𑀼𑀧𑁆𑀧𑀓𑀸𑀲𑀺𑀢𑁄, 𑀲𑀼𑀧𑀭𑀺𑀩𑁆𑀬𑀢𑁆𑀢𑀓𑀭𑀡𑀢𑁆𑀣𑁂𑀦 𑀤𑀴𑁆𑀳𑀢𑀭𑁄 𑀓𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑀺𑀬𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀅𑀜𑁆𑀜𑁂𑀲𑀼 𑀘 𑀏𑀯𑀁 𑀯𑀺𑀲𑀼𑀤𑁆𑀥𑁄.

𑀬𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂𑀢𑀺𑀆𑀤𑀺𑀫𑁆𑀳𑀺 𑀧𑀦 𑀕𑀡𑁆𑀞𑀺𑀧𑀤𑀦𑀬𑁄 𑀢𑀸𑀯 𑀧𑀞𑀫𑀁 𑀯𑀼𑀘𑁆𑀘𑀢𑀺, 𑀲𑀘𑀺𑀢𑁆𑀢𑀓𑀧𑀓𑁆𑀔𑁂𑀢𑀺 𑀲𑀼𑀭𑀸𑀧𑀸𑀦𑀸𑀤𑀺𑀅𑀘𑀺𑀢𑁆𑀢𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑀺𑀢𑁆𑀢𑀓𑁂𑀲𑀼 𑀧𑀦 𑀬𑀁 𑀏𑀓𑀦𑁆𑀢𑀫𑀓𑀼𑀲𑀮𑁂𑀦𑁂𑀯 𑀲𑀫𑀼𑀝𑁆𑀞𑀸𑀧𑀺𑀢𑀜𑁆𑀘. 𑀉𑀪𑀬𑀁 𑀮𑁄𑀓𑀯𑀚𑁆𑀚𑀁 𑀦𑀸𑀫. 𑀲𑀼𑀭𑀸𑀧𑀸𑀦𑀲𑁆𑀫𑀺𑀜𑁆𑀳𑀺 ‘‘𑀲𑀼𑀭𑀸’’𑀢𑀺 𑀯𑀸 ‘‘𑀧𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀸 𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁂 𑀅𑀓𑀼𑀲𑀮𑀫𑁂𑀯, 𑀢𑀣𑀸 𑀪𑀺𑀓𑁆𑀔𑀼𑀦𑀻𑀦𑀁 𑀕𑀦𑁆𑀥𑀯𑀡𑁆𑀡𑀓𑀢𑁆𑀣𑀸𑀬 𑀮𑁂𑀧𑀦𑁂, 𑀪𑁂𑀲𑀚𑁆𑀚𑀢𑁆𑀣𑀸𑀬 𑀮𑁂𑀧𑀦𑁂 𑀅𑀤𑁄𑀲𑀢𑁆𑀢𑀸 ‘‘𑀅𑀯𑀺𑀘𑀸𑀭𑀡𑀻𑀬’’𑀦𑁆𑀢𑀺 𑀏𑀢𑁆𑀢𑀓𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀦 𑀯𑀝𑁆𑀝𑀢𑀻𑀢𑀺 ‘‘𑀚𑀸𑀦𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀦 𑀬𑀼𑀚𑁆𑀚𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑁆𑀲𑀸𑀧𑀺 𑀮𑁄𑀓𑀯𑀚𑁆𑀚𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀇𑀫𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑀢𑀸𑀬 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀲𑁆𑀲 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀇𑀥 𑀲𑀘𑀺𑀢𑁆𑀢𑀓𑀦𑁆𑀢𑀺 𑀘 𑀅𑀘𑀺𑀢𑁆𑀢𑀓𑀦𑁆𑀢𑀺 𑀘 𑀯𑀺𑀘𑀸𑀭𑀡𑀸 𑀯𑀢𑁆𑀣𑀼𑀯𑀺𑀚𑀸𑀦𑀦𑁂𑀬𑁂𑀯 𑀳𑁄𑀢𑀺, 𑀦 𑀧𑀜𑁆𑀜𑀢𑁆𑀢𑀺𑀯𑀺𑀚𑀸𑀦𑀦𑁂. 𑀬𑀤𑀺 𑀧𑀜𑁆𑀜𑀢𑁆𑀢𑀺𑀯𑀺𑀚𑀸𑀦𑀦𑁂 𑀳𑁄𑀢𑀺, 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀮𑁄𑀓𑀯𑀚𑁆𑀚𑀸𑀦𑁂𑀯 𑀲𑀺𑀬𑀼𑀁, 𑀦 𑀘 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀮𑁄𑀓𑀯𑀚𑁆𑀚𑀸𑀦𑀺, 𑀢𑀲𑁆𑀫𑀸 𑀯𑀢𑁆𑀣𑀼𑀯𑀺𑀚𑀸𑀦𑀦𑁂𑀬𑁂𑀯 𑀳𑁄𑀢𑀻’’𑀢𑀺, 𑀇𑀤𑀁 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑁂𑀔𑀺𑀬𑁂𑀲𑀼 𑀧𑀜𑁆𑀜𑀢𑁆𑀢𑀺𑀚𑀸𑀦𑀦𑀫𑁂𑀯 𑀧𑀫𑀸𑀡𑀁, 𑀦 𑀯𑀢𑁆𑀣𑀼𑀫𑀢𑁆𑀢𑀚𑀸𑀦𑀦𑀦𑁆𑀢𑀺, 𑀬𑀁 𑀧𑀦 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁 ‘‘𑀧𑀲𑀼𑀢𑁆𑀢𑀲𑁆𑀲 𑀫𑀼𑀔𑁂 𑀓𑁄𑀘𑀺 𑀲𑀼𑀭𑀁 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀦𑁆𑀢𑁄 𑀘𑁂 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺, 𑀢𑀢𑁆𑀣 𑀬𑀣𑀸 𑀪𑀺𑀓𑁆𑀔𑀼𑀦𑀺𑀬𑀸 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀧𑀭𑀲𑁆𑀲 𑀆𑀫𑀲𑀦𑀸𑀤𑀺𑀓𑀸𑀮𑁂 𑀓𑀸𑀬𑀁 𑀅𑀘𑀸𑀮𑁂𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀲𑀸𑀤𑀺𑀬𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 ‘𑀓𑀺𑀭𑀺𑀬𑀸𑀯 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀸 𑀬𑁂𑀪𑀼𑀬𑁆𑀬𑁂𑀦 𑀓𑀺𑀭𑀺𑀬𑀲𑀫𑁆𑀪𑀯𑀢𑁄, 𑀢𑀣𑀸 𑀅𑀬𑀫𑁆𑀧𑀺 𑀢𑀤𑀸 𑀓𑀺𑀭𑀺𑀬𑀸𑀯 𑀳𑁄𑀢𑀻’’𑀢𑀺, 𑀢𑀁 𑀲𑀼𑀯𑀺𑀘𑀸𑀭𑀺𑀢𑀁 𑀅𑀦𑁂𑀓𑀦𑁆𑀢𑀸𑀓𑀼𑀲𑀮𑀪𑀸𑀯𑀲𑀸𑀥𑀦𑀢𑁄. 𑀲𑀼𑀭𑀸𑀧𑀸𑀦𑀸𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑀸𑀓𑀼𑀲𑀮𑀢𑀸 𑀧𑀦 𑀫𑀚𑁆𑀚𑀲𑀜𑁆𑀜𑀺𑀦𑁄𑀧𑀺 𑀲𑀓𑀺𑀁 𑀧𑀬𑁄𑀕𑁂𑀦 𑀧𑀺𑀯𑀢𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀸.

𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀆𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀬𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑀘𑀺𑀢𑁆𑀢𑀓𑀲𑁆𑀲 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚𑀁. 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀲𑀗𑁆𑀔𑀸𑀢𑀲𑁆𑀲 𑀅𑀘𑀺𑀢𑁆𑀢𑀓𑀲𑁆𑀲 𑀘 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀫𑁆𑀧𑀺 𑀲𑀼𑀭𑀸𑀧𑀸𑀦𑀸𑀤𑀺 𑀮𑁄𑀓𑀯𑀚𑁆𑀚𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 ‘‘𑀬𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑀺𑀢𑁆𑀢𑀓𑀧𑀓𑁆𑀔𑁂𑀢𑀺 𑀳𑀺 𑀇𑀤𑀁 𑀯𑀘𑀦𑀁 𑀅𑀘𑀺𑀢𑁆𑀢𑀓𑀁 𑀲𑀦𑁆𑀥𑀸𑀬𑀸𑀳. 𑀦 𑀳𑀺 𑀏𑀓𑀁𑀲𑀢𑁄 𑀲𑀘𑀺𑀢𑁆𑀢𑀓𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂𑀢𑀺 𑀯𑀺𑀲𑁂𑀲𑀦𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑁆𑀲 𑀧𑀜𑁆𑀜𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯, 𑀯𑀢𑁆𑀣𑀼𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀲𑀺𑀬𑀸 𑀓𑀼𑀲𑀮𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀢𑀲𑁆𑀫𑀸 ‘‘𑀢𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯𑀸’’𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺 ‘‘𑀲𑁂𑀲𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀫𑀸𑀦𑁂 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸, 𑀲𑀼𑀧𑀺𑀦𑀦𑁆𑀢𑁂 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸 𑀲𑀼𑀧𑀺𑀦𑀦𑁆𑀢𑁂 𑀯𑀺𑀚𑁆𑀚𑀫𑀸𑀦𑀸𑀧𑀺 𑀯𑀻𑀢𑀺𑀓𑁆𑀓𑀫𑀙𑀸𑀬𑀸 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀁 𑀧𑀦 𑀯𑀘𑀦𑀁 𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀭𑀡𑀧𑁆𑀧𑀬𑁄𑀚𑀦𑀢𑁆𑀢𑀸 𑀘 𑀯𑀼𑀢𑁆𑀢𑀁, 𑀢𑁂𑀦 𑀬𑀁 𑀯𑀼𑀢𑁆𑀢𑀁 𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸𑀥𑀺𑀓𑀸𑀭𑁂 ‘‘𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀭𑀡𑀧𑁆𑀧𑀬𑁄𑀚𑀦𑀸𑀢𑀺 𑀬𑁂𑀪𑀼𑀬𑁆𑀬𑀢𑀸𑀬 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺, 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀓𑁆𑀓𑀝𑀻𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁩-𑁪. 𑀯𑀚𑁆𑀚𑀻𑀲𑀼 𑀚𑀦𑀧𑀤𑁂𑀲𑀼 𑀯𑀲𑀦𑁆𑀢𑀸 𑀯𑀚𑁆𑀚𑀺𑀦𑁄 𑀦𑀸𑀫, 𑀢𑁂𑀲𑀁 𑀧𑀼𑀢𑁆𑀢𑀸. 𑀬𑀸𑀯𑀤𑀢𑁆𑀣𑀦𑁆𑀢𑀺 𑀬𑀸𑀯𑀢𑀸 𑀅𑀢𑁆𑀣𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺, 𑀢𑀁 𑀓𑀸𑀫𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂, 𑀢𑀤𑁂𑀓𑀝𑁆𑀞𑁂 𑀘 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀭𑀡𑁂 𑀧𑀜𑁆𑀜𑀢𑁆𑀢𑁂 𑀲𑀢𑀺 𑀬𑀼𑀚𑁆𑀚𑀢𑀺, 𑀦 𑀅𑀜𑁆𑀜𑀣𑀸. 𑀢𑀣𑀸𑀧𑀺 𑀇𑀤𑀸𑀦𑀺 𑀧𑀜𑁆𑀜𑀧𑁂𑀢𑀩𑁆𑀩𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁, 𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀲𑁆𑀲𑀦𑁆𑀢𑀺 (𑀧𑀸𑀭𑀸. 𑁪𑁫𑁯), 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀓𑀼𑀝𑀺𑀬𑁄 𑀓𑀸𑀭𑀸𑀧𑁂𑀦𑁆𑀢𑀺 𑀅𑀧𑁆𑀧𑀫𑀸𑀡𑀺𑀓𑀸𑀬𑁄 (𑀧𑀸𑀭𑀸. 𑁩𑁪𑁨), 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺 (𑀧𑀸𑀘𑀺. 𑁧𑁦𑁭𑁭), 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺𑀆𑀤𑀺 (𑀧𑀸𑀘𑀺. 𑁧𑁦𑁮𑁪) 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑀢𑁄 𑀧𑀼𑀩𑁆𑀩𑁂 𑀅𑀥𑀺𑀝𑁆𑀞𑀸𑀦𑀁 𑀯𑀺𑀓𑀧𑁆𑀧𑀦𑀁 𑀯𑀸 𑀅𑀦𑀼𑀜𑁆𑀜𑀸𑀢𑀁. 𑀬𑀤𑀪𑀸𑀯𑀸 𑀅𑀢𑀺𑀭𑁂𑀓𑀘𑀻𑀯𑀭𑀦𑁆𑀢𑀺 𑀯𑀤𑁂𑀬𑁆𑀬, 𑀧𑀫𑀸𑀡𑀁 𑀯𑀸 𑀦 𑀧𑀜𑁆𑀜𑀢𑁆𑀢𑀁, 𑀬𑀤𑀪𑀸𑀯𑀸 𑀅𑀧𑁆𑀧𑀫𑀸𑀡𑀺𑀓𑀸𑀬𑁄𑀢𑀺 𑀯𑀤𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. ‘‘𑀉𑀮𑁆𑀮𑀼𑀫𑁆𑀧𑀢𑀼 𑀫𑀁, 𑀪𑀦𑁆𑀢𑁂, 𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 (𑀫𑀳𑀸𑀯. 𑁭𑁧, 𑁧𑁨𑁬) 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑁂𑀦 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀫𑁂𑀯 ‘‘𑀉𑀧𑀲𑀫𑁆𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀦 𑀧𑀝𑀺𑀲𑁂𑀯𑀺𑀢𑀩𑁆𑀩𑁄, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄’’𑀢𑀺 (𑀫𑀳𑀸𑀯. 𑁧𑁨𑁯) 𑀘 𑀧𑀜𑁆𑀜𑀢𑁆𑀢𑁂𑀦 𑀅𑀲𑁆𑀲𑀫𑀡𑀸𑀤𑀺𑀪𑀸𑀯𑀁 𑀉𑀧𑀕𑀦𑁆𑀢𑀼𑀓𑀸𑀫𑁂𑀦 𑀦𑀦𑀼 𑀧𑀞𑀫𑀁 𑀅𑀚𑁆𑀛𑀼𑀧𑀕𑀢𑀸 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀩𑁆𑀩𑀸, 𑀢𑀢𑁆𑀣 𑀤𑀼𑀩𑁆𑀩𑀮𑁆𑀬𑀁 𑀯𑀸 𑀆𑀯𑀺𑀓𑀸𑀢𑀩𑁆𑀩𑀁 𑀲𑀺𑀬𑀸, 𑀢𑁂 𑀧𑀦 ‘‘𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀽’’𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀑𑀓𑀸𑀲𑀓𑀭𑀡𑀢𑁆𑀣𑀁 𑀯𑀸 𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣𑁂𑀯 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀇𑀢𑀭𑁂𑀲𑀼𑀧𑀺 𑀧𑀸𑀭𑀸𑀚𑀺𑀓𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀬𑁄 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺, 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀯𑀸 𑀉𑀮𑁆𑀮𑀧𑀢𑀺, 𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀅𑀦𑀼𑀧𑀜𑁆𑀜𑀢𑁆𑀢𑀺 𑀳𑀺 𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀫𑁆𑀫𑀓𑀭𑀡𑀧𑁆𑀧𑀬𑁄𑀚𑀦𑀸. 𑀲𑀸 𑀳𑀺 𑀬𑀲𑁆𑀲 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺 𑀅𑀜𑁆𑀜𑀸 𑀯𑀸 𑀆𑀧𑀢𑁆𑀢𑀺, 𑀢𑀲𑁆𑀲 𑀦𑀺𑀬𑀫𑀤𑀲𑁆𑀲𑀦𑀧𑁆𑀧𑀬𑁄𑀚𑀦𑀸𑀢𑀺𑀮𑀓𑁆𑀔𑀡𑀸𑀦𑀼𑀧𑀜𑁆𑀜𑀢𑁆𑀢𑀺𑀓𑀢𑁆𑀢𑀸. 𑀏𑀯𑀜𑁆𑀳𑀺 𑀅𑀦𑁆𑀢𑁂 𑀅𑀯𑀢𑁆𑀯𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 (𑀧𑀸𑀭𑀸. 𑁯𑁧) 𑀅𑀦𑀼𑀧𑀜𑁆𑀜𑀢𑁆𑀢𑀺 𑀯𑀺𑀬. 𑀧𑀭𑀺𑀧𑀼𑀡𑁆𑀡𑁂 𑀧𑀦𑁂𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑁋

‘‘𑀦𑀺𑀤𑀸𑀦𑀸 𑀫𑀸𑀢𑀺𑀓𑀸𑀪𑁂𑀤𑁄, 𑀯𑀺𑀪𑀗𑁆𑀕𑁄 𑀢𑀁𑀦𑀺𑀬𑀸𑀫𑀓𑁄;

𑀢𑀢𑁄 𑀆𑀧𑀢𑁆𑀢𑀺𑀬𑀸 𑀪𑁂𑀤𑁄, 𑀅𑀦𑀸𑀧𑀢𑁆𑀢𑀺 𑀢𑀤𑀜𑁆𑀜𑀣𑀸’’𑀢𑀺. 𑁋

𑀅𑀬𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀼𑀤𑀺𑀦𑁆𑀦𑀯𑀢𑁆𑀣𑀼 𑀫𑀓𑁆𑀓𑀝𑀺𑀯𑀢𑁆𑀣𑀼 𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼 𑀘𑀸𑀢𑀺 𑀢𑀺𑀧𑁆𑀧𑀪𑁂𑀤𑀁 𑀯𑀢𑁆𑀣𑀼 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀦𑀺𑀤𑀸𑀦𑀁 𑀦𑀸𑀫, 𑀢𑀢𑁄 𑀦𑀺𑀤𑀸𑀦𑀸 ‘‘𑀬𑁄 𑀧𑀦, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄…𑀧𑁂… 𑀅𑀲𑀁𑀯𑀸𑀲𑁄’’𑀢𑀺 𑀇𑀫𑀺𑀲𑁆𑀲𑀸 𑀫𑀸𑀢𑀺𑀓𑀸𑀬 𑀪𑁂𑀤𑁄 𑀚𑀸𑀢𑁄. 𑀢𑀢𑁆𑀣 𑀳𑀺 ‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀘𑀦𑁂𑀦 ‘‘𑀲𑀘𑁆𑀘𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀜𑁆𑀘 𑀔𑁄 𑀇𑀢𑁆𑀣𑀺𑀬𑀸 𑀦𑁄 𑀧𑀼𑀭𑀺𑀲𑁂 𑀦𑁄 𑀧𑀡𑁆𑀟𑀓𑁂 𑀦𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁂 𑀘𑀸’’𑀢𑀺 𑀫𑀓𑁆𑀓𑀝𑀺𑀧𑀸𑀭𑀸𑀚𑀺𑀓𑁄 𑀯𑀺𑀬 𑀅𑀜𑁆𑀜𑁄𑀧𑀺 𑀮𑁂𑀲𑀁 𑀑𑀟𑁆𑀟𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀲𑁆𑀲 𑀅𑀮𑁂𑀲𑁄𑀓𑀸𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 𑀯𑀼𑀘𑁆𑀘𑀢𑀺. 𑀫𑀓𑁆𑀓𑀝𑀺𑀯𑀢𑁆𑀣𑀼𑀲𑀗𑁆𑀔𑀸𑀢𑀸 𑀦𑀺𑀤𑀸𑀦𑀸 ‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻’’𑀢𑀺 𑀫𑀸𑀢𑀺𑀓𑀸𑀯𑀘𑀦𑀪𑁂𑀤𑁄 𑀦 𑀇𑀢𑁆𑀣𑀺𑀬𑀸 𑀏𑀯 𑀫𑁂𑀣𑀼𑀦𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁄 𑀓𑀢𑁄, 𑀢𑀲𑁆𑀫𑀸 𑀯𑀺𑀪𑀗𑁆𑀕𑁄 𑀢𑀁𑀦𑀺𑀬𑀸𑀫𑀓𑁄 𑀢𑀲𑁆𑀲𑀸 𑀫𑀸𑀢𑀺𑀓𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀬𑀸𑀫𑀓𑁄 𑀯𑀺𑀪𑀗𑁆𑀕𑁄. 𑀯𑀺𑀪𑀗𑁆𑀕𑁂 𑀳𑀺 ‘‘𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄. 𑀢𑀬𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸. 𑀢𑀬𑁄 𑀧𑀡𑁆𑀟𑀓𑀸. 𑀢𑀬𑁄 𑀧𑀼𑀭𑀺𑀲𑀸. 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂…𑀧𑁂… 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀫𑀕𑁆𑀕𑁂’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁬) 𑀦𑀬𑁂𑀦 𑀲𑀩𑁆𑀩𑀮𑁂𑀲𑁄𑀓𑀸𑀲𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀬𑀫𑁄 𑀓𑀢𑁄.

𑀏𑀢𑁆𑀣𑀸𑀳 𑁋 𑀬𑀤𑀺 𑀏𑀯𑀁 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀯𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀯𑀸 𑀦 𑀓𑁂𑀯𑀮𑀁 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀺𑀪𑀗𑁆𑀕𑁂 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀤𑀯𑀘𑀦𑁂𑀦 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀪𑀺𑀓𑁆𑀔𑀼𑀪𑀸𑀯𑁂 𑀞𑀺𑀢𑀸 𑀏𑀯𑀁 𑀯𑀤𑁂𑀬𑁆𑀬 ‘‘𑀦𑀸𑀳𑀁 𑀉𑀧𑀲𑀫𑁆𑀧𑀤𑀓𑀸𑀮𑁂 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑀸, 𑀢𑀲𑁆𑀫𑀸 𑀦 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀲𑀺𑀓𑁆𑀔𑀸𑀧𑀺 𑀫𑁂𑀣𑀼𑀦𑀥𑀫𑁆𑀫𑁂𑀦 𑀧𑀸𑀭𑀸𑀚𑀺𑀓𑀸 𑀳𑁄𑀫𑀻’’𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀅𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀜𑁆𑀘𑀸𑀦𑀺𑀝𑁆𑀞𑀁. 𑀇𑀤𑀁 𑀅𑀧𑀭𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀢𑀺 ‘‘𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀸𑀥𑀸𑀭𑀡𑀸𑀦𑁂𑀯, 𑀦𑀸𑀲𑀸𑀥𑀸𑀭𑀡𑀸𑀦𑀻’’𑀢𑀺. 𑀅𑀧𑀺𑀘𑀸𑀬𑀁 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀁𑀬𑁂𑀯 𑀉𑀧𑀚𑁆𑀛’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑁬𑁯) 𑀯𑀼𑀢𑁆𑀢𑀁, 𑀅𑀧𑀺𑀘 𑀬𑁄 𑀢𑀣𑀸 𑀮𑁂𑀲𑀁 𑀑𑀟𑁆𑀟𑁂𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀯𑀺𑀬 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀢𑁂 𑀳𑀺 ‘‘𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀘𑀦𑀸𑀪𑀸𑀯𑁂 𑀲𑀢𑀺 ‘‘𑀆𑀧𑀢𑁆𑀢𑀺𑀁 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀧𑀦𑁆𑀦𑀸 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀏𑀢𑁆𑀣 𑀧𑀦 ‘‘𑀪𑀺𑀓𑁆𑀔𑀯𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑁂𑀘𑀺 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 𑀞𑀺𑀢𑀸, ‘‘𑀇𑀤𑀸𑀦𑀺 𑀘𑁂𑀧𑀺 𑀫𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀮𑀪𑁂𑀬𑁆𑀬𑀸𑀫 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑁂𑀘𑀺 𑀯𑀺𑀩𑁆𑀪𑀦𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀆𑀧𑀢𑁆𑀢𑀺𑀬𑀸 𑀪𑁂𑀤𑁄𑀢𑀺 𑀢𑀢𑁄 𑀯𑀺𑀪𑀗𑁆𑀕𑀢𑁄 ‘‘𑀅𑀓𑁆𑀔𑀸𑀬𑀺𑀢𑁂 𑀲𑀭𑀻𑀭𑁂 𑀧𑀸𑀭𑀸𑀚𑀺𑀓𑀁, 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑁂 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺𑀆𑀤𑀺 𑀆𑀧𑀢𑁆𑀢𑀺𑀬𑀸 𑀪𑁂𑀤𑁄 𑀳𑁄𑀢𑀺. 𑀅𑀦𑀸𑀧𑀢𑁆𑀢𑀺 𑀢𑀤𑀜𑁆𑀜𑀣𑀸𑀢𑀺 𑀢𑀢𑁄 𑀏𑀯 𑀯𑀺𑀪𑀗𑁆𑀕𑀢𑁄 𑀬𑁂𑀦𑀸𑀓𑀸𑀭𑁂𑀦 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀢𑁄 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀅𑀦𑀸𑀧𑀢𑁆𑀢𑀺𑀪𑁂𑀤𑁄𑀯 𑀳𑁄𑀢𑀺. ‘‘𑀲𑀸𑀤𑀺𑀬𑀢𑀺 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀦 𑀲𑀸𑀤𑀺𑀬𑀢𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀳𑀺 𑀯𑀺𑀪𑀗𑁆𑀕𑁂 𑀅𑀲𑀢𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀫𑀸𑀲𑀢𑁄 𑀕𑀸𑀣𑀸𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀏𑀢𑁆𑀣 𑀘 𑀧𑀦 𑁋

‘‘𑀦𑀺𑀤𑀸𑀦𑀫𑀸𑀢𑀺𑀓𑀸𑀪𑁂𑀤𑁄, 𑀯𑀺𑀪𑀗𑁆𑀕𑀲𑁆𑀲 𑀧𑀬𑁄𑀚𑀦𑀁;

𑀅𑀦𑀸𑀧𑀢𑁆𑀢𑀺𑀧𑀓𑀸𑀭𑁄 𑀘, 𑀧𑀞𑀫𑁄 𑀦𑀺𑀧𑁆𑀧𑀬𑁄𑀚𑀦𑁄’’𑀢𑀺. 𑁋

𑀇𑀫𑀁 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸𑀯 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀢𑁆𑀣𑁄 𑀧𑀓𑀸𑀲𑀺𑀢𑀩𑁆𑀩𑁄. 𑀓𑀣𑀁? 𑀪𑀕𑀯𑀢𑀸 𑀧𑀦 𑀬𑁂𑀦𑀸𑀓𑀸𑀭𑁂𑀦 𑀬𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑀺𑀢𑀁, 𑀢𑀲𑁆𑀲 𑀆𑀓𑀸𑀭𑀲𑁆𑀲 𑀲𑀫𑀢𑁆𑀣𑀁 𑀯𑀸 𑀅𑀲𑀫𑀢𑁆𑀣𑀁 𑀯𑀸𑀢𑀺 𑀤𑀼𑀯𑀺𑀥𑀁 𑀦𑀺𑀤𑀸𑀦𑀁, 𑀅𑀬𑀁 𑀦𑀺𑀤𑀸𑀦𑀪𑁂𑀤𑁄. 𑀫𑀸𑀢𑀺𑀓𑀸𑀧𑀺 𑀦𑀺𑀤𑀸𑀦𑀸𑀧𑁂𑀓𑁆𑀔𑀸 𑀦𑀺𑀤𑀸𑀦𑀸𑀦𑀧𑁂𑀓𑁆𑀔𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑀺𑀤𑀸𑀦𑀸𑀧𑁂𑀓𑁆𑀔𑀸𑀦𑀺. 𑀦 𑀳𑀺 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀪𑀺𑀓𑁆𑀔𑀽 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀲𑀦𑁆𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀫𑀼𑀲𑀸𑀯𑀸𑀤𑀮𑀓𑁆𑀔𑀡𑀁 𑀧𑀸𑀧𑁂𑀢𑁆𑀯𑀸 𑀪𑀸𑀲𑀺𑀁𑀲𑀼. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺 𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀕𑀺𑀳𑀻𑀦𑀁 𑀯𑀡𑁆𑀡𑀁 𑀪𑀸𑀲𑀺𑀁𑀲𑀼, 𑀦 𑀘 𑀢𑀸𑀯𑀢𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀳𑁄𑀢𑀺. 𑀢𑀢𑁆𑀣 𑀢𑁂𑀦 𑀮𑁂𑀲𑁂𑀦 𑀪𑀕𑀯𑀸 𑀢𑀁 𑀯𑀢𑁆𑀣𑀼𑀁 𑀦𑀺𑀤𑀸𑀦𑀁 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀤𑀸𑀦𑀸𑀧𑁂𑀓𑁆𑀔’’𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀤𑀸𑀦𑀸𑀧𑁂𑀓𑁆𑀔𑀸𑀦𑀺 𑀜𑀢𑁆𑀯𑀸 𑀢𑀩𑁆𑀩𑀺𑀧𑀭𑀻𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑀺𑀤𑀸𑀦𑀸𑀦𑀧𑁂𑀓𑁆𑀔𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀅𑀬𑀁 𑀫𑀸𑀢𑀺𑀓𑀸𑀪𑁂𑀤𑁄.

𑀦𑀸𑀦𑀧𑁆𑀧𑀓𑀸𑀭𑀢𑁄 𑀫𑀽𑀮𑀸𑀧𑀢𑁆𑀢𑀺𑀧𑁆𑀧𑀳𑁄𑀦𑀓𑀯𑀢𑁆𑀣𑀼𑀧𑀬𑁄𑀕𑀘𑀺𑀢𑁆𑀢𑀦𑀺𑀬𑀸𑀫𑀤𑀲𑁆𑀲𑀦𑀯𑀲𑁂𑀦 𑀫𑀸𑀢𑀺𑀓𑀸𑀬 𑀯𑀺𑀪𑀚𑀦𑀪𑀸𑀯𑀤𑀻𑀧𑀦𑀢𑁆𑀣𑀁 𑀢𑁂𑀲𑀁 𑀅𑀧𑁆𑀧𑀳𑁄𑀦𑀓𑀢𑀸𑀬 𑀯𑀸 𑀢𑀤𑀜𑁆𑀜𑀢𑀭𑀯𑁂𑀓𑀮𑁆𑀮𑀢𑀸𑀬 𑀯𑀸 𑀯𑀻𑀢𑀺𑀓𑁆𑀓𑀫𑁂 𑀲𑀢𑀺 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀁, 𑀅𑀲𑀢𑀺 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀜𑁆𑀘𑀸𑀢𑀺 𑀲𑀩𑁆𑀩𑀢𑁆𑀣 𑀢𑀬𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀫𑀸𑀢𑀺𑀓𑀸𑀬 𑀯𑀺𑀪𑀚𑀦𑀁 𑀯𑀺𑀪𑀗𑁆𑀕𑁄 𑀆𑀭𑀪𑀻𑀬𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀧𑀦 ‘‘𑀪𑀺𑀓𑁆𑀔𑀓𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀽’’𑀢𑀺 𑀓𑁂𑀯𑀮𑀁 𑀩𑁆𑀬𑀜𑁆𑀚𑀦𑀢𑁆𑀣𑀤𑀻𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀯𑀸, ‘‘𑀲𑀫𑀜𑁆𑀜𑀸𑀬 𑀪𑀺𑀓𑁆𑀔𑀽’’𑀢𑀺 𑀪𑀺𑀓𑁆𑀔𑀼𑀪𑀸𑀯𑀲𑀫𑁆𑀪𑀯𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀓𑁂𑀯𑀮𑀁 𑀪𑀺𑀓𑁆𑀔𑀼 𑀦𑀸𑀫 𑀧𑀯𑀢𑁆𑀢𑀺𑀝𑁆𑀞𑀸𑀦𑀤𑀻𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀯𑀸, ‘‘𑀏𑀳𑀺 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀼, 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀼, 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀽’’𑀢𑀺 𑀉𑀧𑀲𑀫𑁆𑀧𑀤𑀸𑀦𑀦𑁆𑀢𑀭𑁂𑀦𑀸𑀧𑀺 𑀪𑀺𑀓𑁆𑀔𑀼𑀪𑀸𑀯𑀲𑀺𑀤𑁆𑀥𑀺𑀤𑀻𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀯𑀸, ‘‘𑀪𑀤𑁆𑀭𑁄 𑀪𑀺𑀓𑁆𑀔𑀼, 𑀲𑀸𑀭𑁄 𑀪𑀺𑀓𑁆𑀔𑀼, 𑀲𑁂𑀓𑁆𑀔𑁄 𑀪𑀺𑀓𑁆𑀔𑀼, 𑀅𑀲𑁂𑀓𑁆𑀔𑁄 𑀪𑀺𑀓𑁆𑀔𑀽’’𑀢𑀺 𑀪𑀺𑀓𑁆𑀔𑀼𑀓𑀭𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀪𑀺𑀓𑁆𑀔𑀼𑀤𑀻𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀯𑀸 𑀯𑀺𑀪𑀗𑁆𑀕𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁄 𑀲𑀩𑁆𑀩𑀲𑀸𑀫𑀜𑁆𑀜𑀧𑀤𑀢𑁆𑀢𑀸, 𑀢𑀣𑀸 𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀲𑀤𑁆𑀯𑀸𑀭𑀯𑀲𑁂𑀦, 𑀅𑀥𑀺𑀓𑀭𑀡𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀘 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁄 𑀇𑀢𑀭𑀢𑁆𑀣 𑀢𑀤𑀪𑀸𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄𑀢𑀺𑀆𑀤𑀺 𑀯𑀢𑁆𑀣𑀼𑀦𑀺𑀬𑀫𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺𑀆𑀤𑀺 𑀧𑀬𑁄𑀕𑀦𑀺𑀬𑀫𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀪𑀺𑀓𑁆𑀔𑀼𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂𑀢𑀺𑀆𑀤𑀺 𑀘𑀺𑀢𑁆𑀢𑀦𑀺𑀬𑀫𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀲𑀸𑀤𑀺𑀬𑀢𑀺 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀦 𑀲𑀸𑀤𑀺𑀬𑀢𑀺 𑀅𑀦𑀸𑀧𑀢𑁆𑀢𑀻𑀢𑀺𑀆𑀤𑀺 𑀯𑀢𑁆𑀣𑀼𑀧𑀬𑁄𑀕𑀦𑀺𑀬𑀫𑁂 𑀲𑀢𑀺 𑀘𑀺𑀢𑁆𑀢𑀦𑀺𑀬𑀫𑀪𑀸𑀯𑀸𑀪𑀸𑀯𑀯𑀲𑁂𑀦 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀧𑀯𑀢𑁆𑀢𑁄, 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀢𑀺𑀆𑀤𑀺 𑀯𑀢𑁆𑀣𑀼𑀲𑁆𑀲 𑀅𑀧𑁆𑀧𑀳𑁄𑀦𑀓𑀢𑀸𑀬 𑀯𑀻𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀧𑀯𑀢𑁆𑀢𑁄, 𑀦 𑀲𑀸𑀤𑀺𑀬𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀘𑀺𑀢𑁆𑀢𑀦𑀺𑀬𑀫𑀯𑁂𑀓𑀮𑁆𑀬𑁂𑀦 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀧𑀯𑀢𑁆𑀢𑁄𑀢𑀺. 𑀏𑀯𑀁 𑀇𑀢𑀭𑁂𑀲𑀼𑀧𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀬𑀣𑀸𑀲𑀫𑁆𑀪𑀯𑀦𑀬𑁄 𑀅𑀬𑀦𑁆𑀢𑀺 𑀧𑀬𑁄𑀚𑀦𑁄 𑀯𑀺𑀪𑀗𑁆𑀕𑁄.

𑀅𑀦𑀸𑀧𑀢𑁆𑀢𑀺𑀯𑀸𑀭𑁄 𑀧𑀦 𑀫𑀽𑀮𑀸𑀧𑀢𑁆𑀢𑀺𑀢𑁄, 𑀢𑀤𑀜𑁆𑀜𑁂𑀓𑀤𑁂𑀲𑀢𑁄, 𑀲𑀩𑁆𑀩𑀸𑀧𑀢𑁆𑀢𑀺𑀢𑁄 𑀘 𑀅𑀦𑀸𑀧𑀢𑁆𑀢𑀺𑀤𑀻𑀧𑀦𑀯𑀲𑁂𑀦 𑀢𑀺𑀯𑀺𑀥𑁄. 𑀢𑀢𑁆𑀣 𑀬𑁄 𑀧𑀞𑀫𑁄, 𑀲𑁄 𑀯𑀺𑀪𑀗𑁆𑀕𑁄 𑀯𑀺𑀬 𑀢𑀬𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀧𑀯𑀢𑁆𑀢𑁄. 𑀓𑀢𑀫𑁂 𑀢𑀬𑁄? 𑀫𑀸𑀢𑀺𑀓𑀸𑀧𑀤𑀸𑀦𑀁 𑀲𑀸𑀢𑁆𑀣𑀓𑀦𑀺𑀭𑀢𑁆𑀣𑀓𑀸𑀦𑀁 𑀢𑀤𑀜𑁆𑀜𑀣𑀸 𑀉𑀤𑁆𑀥𑀭𑀡𑀸𑀦𑀼𑀤𑁆𑀥𑀭𑀡𑀯𑀲𑁂𑀦 𑀲𑀧𑁆𑀧𑀬𑁄𑀚𑀦𑀦𑀺𑀧𑁆𑀧𑀬𑁄𑀚𑀦𑀪𑀸𑀯𑀤𑀻𑀧𑀦𑀢𑁆𑀣𑀁, 𑀢𑀤𑀜𑁆𑀜𑀣𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀤𑀲𑁆𑀲𑀦𑀢𑁆𑀣𑀁, 𑀆𑀧𑀢𑁆𑀢𑀺𑀧𑁆𑀧𑀳𑁄𑀦𑀓𑀝𑁆𑀞𑀸𑀦𑁂𑀧𑀺 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀜𑁆𑀘𑀸𑀢𑀺. 𑀓𑀣𑀁? 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑁂 ‘‘𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀏𑀴𑀓𑀮𑁄𑀫𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀆𑀓𑀗𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺 (𑀧𑀸𑀭𑀸. 𑁫𑁭𑁨) 𑀏𑀢𑀸𑀦𑀺 𑀓𑁂𑀯𑀮𑀁 𑀯𑀢𑁆𑀣𑀼𑀫𑀢𑁆𑀢𑀤𑀻𑀧𑀦𑀧𑀤𑀸𑀦𑀻𑀢𑀺 𑀦𑀺𑀭𑀢𑁆𑀣𑀓𑀸𑀦𑀺 𑀦𑀸𑀫, 𑀢𑁂𑀲𑀁 𑀅𑀦𑀸𑀧𑀢𑁆𑀢𑀺. ‘‘𑀅𑀤𑁆𑀥𑀸𑀦𑀫𑀕𑁆𑀕𑀁 𑀅𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀦𑁆𑀦𑁂 𑀏𑀴𑀓𑀮𑁄𑀫𑁂 𑀅𑀦𑀸𑀧𑀢𑁆𑀢𑀺, 𑀆𑀓𑀗𑁆𑀔𑀫𑀸𑀦𑁂𑀦 𑀧𑀝𑀺𑀕𑁆𑀕𑀳𑀺𑀢𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀤𑀜𑁆𑀜𑀣𑀸 𑀅𑀦𑀼𑀤𑁆𑀥𑀭𑀡𑁂𑀦 𑀦𑀺𑀧𑁆𑀧𑀬𑁄𑀚𑀦𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀺, 𑀬𑀤𑀺𑀤𑀁 𑀫𑀸𑀢𑀺𑀓𑀸𑀬𑀁 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺, 𑀇𑀤𑀁 𑀲𑀸𑀢𑁆𑀣𑀓𑀁. 𑀢𑀲𑁆𑀲 𑀲𑀧𑁆𑀧𑀬𑁄𑀚𑀦𑀪𑀸𑀯𑀤𑀻𑀧𑀦𑀢𑁆𑀣𑀁 ‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀚𑀸𑀦𑀦𑀲𑀸𑀤𑀺𑀬𑀦𑀪𑀸𑀯𑁂𑀦 𑀆𑀧𑀢𑁆𑀢𑀺, 𑀅𑀲𑁂𑀯𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀬𑀁 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸 𑀕𑀭𑀼𑀧𑀭𑀺𑀓𑁆𑀔𑀸𑀭𑁄 𑀣𑁂𑀬𑁆𑀬𑀘𑀺𑀢𑁆𑀢𑀁 𑀅𑀯𑀳𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑀅𑀗𑁆𑀕𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀧𑁂𑀢𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑀺𑀢𑁂 𑀆𑀧𑀢𑁆𑀢𑀺𑀧𑁆𑀧𑀳𑁄𑀦𑀓𑀝𑁆𑀞𑀸𑀦𑁂𑀧𑀺 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀁 ‘‘𑀅𑀦𑀸𑀧𑀢𑁆𑀢𑀺 𑀧𑁂𑀢𑀧𑀭𑀺𑀕𑁆𑀕𑀳𑀺𑀢𑁂’’𑀢𑀺𑀆𑀤𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀅𑀦𑀸𑀧𑀢𑁆𑀢𑀺 𑀇𑀫𑀁 𑀚𑀸𑀦, 𑀇𑀫𑀁 𑀤𑁂𑀳𑀺, 𑀇𑀫𑀁 𑀆𑀳𑀭, 𑀇𑀫𑀺𑀦𑀸 𑀅𑀢𑁆𑀣𑁄, 𑀇𑀫𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻𑀢𑀺 𑀪𑀡𑀢𑀻𑀢𑀺𑀆𑀤𑀺 𑀧𑀦 𑀢𑀤𑀜𑁆𑀜𑀣𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 ‘‘𑀦𑀺𑀤𑀸𑀦𑀫𑀸𑀢𑀺𑀓𑀸𑀪𑁂𑀤𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀕𑀸𑀣𑀸𑀬 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀏𑀢𑁆𑀣 𑀧𑀞𑀫𑀧𑀜𑁆𑀜𑀢𑁆𑀢𑀺 𑀢𑀸𑀯 𑀧𑀞𑀫𑀩𑁄𑀥𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀢𑁆𑀢𑀸, 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀅𑀝𑁆𑀞𑀯𑀲𑁆𑀲𑀺𑀓𑀓𑀸𑀮𑁂 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂 𑀧𑀜𑁆𑀜𑀢𑁆𑀢𑀸. 𑀤𑀼𑀢𑀺𑀬𑀅𑀦𑀼𑀧𑀜𑁆𑀜𑀢𑁆𑀢𑀺 𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂 𑀉𑀧𑁆𑀧𑀦𑁆𑀦𑀸. 𑀲𑁄 𑀳𑀸𑀬𑀲𑁆𑀫𑀸 𑀫𑀓𑁆𑀓𑀝𑀺𑀧𑀸𑀭𑀸𑀚𑀺𑀓𑁄 𑀬𑀣𑀸 𑀫𑀸𑀢𑀼𑀕𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻 𑀅𑀦𑀥𑀺𑀧𑁆𑀧𑁂𑀢𑀸, 𑀢𑀣𑀸 𑀇𑀥𑀸𑀧𑀻𑀢𑀺 𑀲𑀜𑁆𑀜𑀸𑀬 ‘‘𑀲𑀘𑁆𑀘𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀜𑁆𑀘 𑀔𑁄 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸, 𑀦𑁄 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸’’𑀢𑀺 𑀆𑀳. 𑀢𑀢𑀺𑀬𑀸𑀦𑀼𑀧𑀜𑁆𑀜𑀢𑁆𑀢𑀺 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂 𑀉𑀧𑁆𑀧𑀦𑁆𑀦𑀸. 𑀢𑁂 𑀳𑀺 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑀸 𑀳𑀼𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀯𑀭𑀲𑀬𑀦𑁂𑀲𑀼 𑀲𑀬𑀺𑀢𑁆𑀯𑀸 𑀢𑀢𑀺𑀬𑀸𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀯𑀢𑁆𑀣𑀼𑀁 𑀉𑀧𑁆𑀧𑀸𑀤𑁂𑀲𑀼𑀁, 𑀢𑁂 𑀘 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 𑀉𑀧𑁆𑀧𑀦𑁆𑀦𑀸, 𑀲𑀬𑀜𑁆𑀘 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀢𑁆𑀢𑀸𑀢𑀺 ‘‘𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀫𑁆𑀧𑁂𑀢𑁆𑀣 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀁 𑀢𑀺𑀯𑀺𑀥𑀫𑁆𑀧𑀺 𑀯𑀢𑁆𑀣𑀼𑀁 𑀉𑀧𑀸𑀤𑀸𑀬 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀢𑀁 𑀓𑀸𑀮𑀁 𑀧𑀢𑁆𑀯𑀸 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑁄 𑀧𑀦𑀸𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀧𑀤𑀁. 𑀪𑀺𑀓𑁆𑀔𑀽𑀢𑀺 𑀢𑀲𑁆𑀲 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀬𑀫𑀧𑀤𑀁. 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀢𑀲𑁆𑀲 𑀯𑀺𑀲𑁂𑀲𑀦𑀯𑀘𑀦𑀁. 𑀦 𑀳𑀺 𑀲𑀩𑁆𑀩𑁄𑀧𑀺 𑀪𑀺𑀓𑁆𑀔𑀼𑀦𑀸𑀫𑀓𑁄 𑀬𑀸 𑀪𑀕𑀯𑀢𑀸 𑀬𑀸𑀬 𑀓𑀸𑀬𑀘𑀺 𑀉𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀽𑀦𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸 𑀯𑀺𑀳𑀺𑀢𑀸, ‘‘𑀏𑀢𑁆𑀣 𑀲𑀳 𑀚𑀻𑀯𑀦𑁆𑀢𑀻’’𑀢𑀺 𑀬𑁄 𑀘 𑀆𑀚𑀻𑀯𑁄 𑀯𑀼𑀢𑁆𑀢𑁄, 𑀢𑀁 𑀉𑀪𑀬𑀁 𑀲𑀫𑀸𑀧𑀦𑁆𑀦𑁄𑀯 𑀳𑁄𑀢𑀺. 𑀓𑀤𑀸 𑀧𑀦 𑀲𑀫𑀸𑀧𑀦𑁆𑀦𑁄 𑀅𑀳𑁄𑀲𑀺? 𑀬𑀸𑀬 𑀓𑀸𑀬𑀘𑀺 𑀉𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀫𑁂𑀯 𑀢𑀤𑀼𑀪𑀬𑀁 𑀚𑀸𑀦𑀦𑁆𑀢𑁄𑀧𑀺 𑀅𑀚𑀸𑀦𑀦𑁆𑀢𑁄𑀧𑀺 𑀢𑀤𑀚𑁆𑀛𑀼𑀧𑀕𑀢𑀢𑁆𑀢𑀸 𑀲𑀫𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀲𑀳 𑀚𑀻𑀯𑀦𑁆𑀢𑀻𑀢𑀺 𑀬𑀸𑀯 𑀲𑀺𑀓𑁆𑀔𑀁 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀧𑀸𑀭𑀸𑀚𑀺𑀓𑀪𑀸𑀯𑀜𑁆𑀘 𑀦 𑀧𑀸𑀧𑀼𑀡𑀸𑀢𑀺, 𑀬𑀁 𑀧𑀦 𑀯𑀼𑀢𑁆𑀢𑀁 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀲𑀸𑀚𑀻𑀯𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀳𑁄𑀢𑀻’’𑀢𑀺, 𑀢𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀲𑀺𑀓𑁆𑀔𑀁 𑀅𑀧𑀭𑀺𑀧𑀽𑀭𑁂𑀦𑁆𑀢𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀩𑀳𑀼𑀮𑁄 𑀯𑀸 𑀏𑀓𑀘𑁆𑀘𑀁 𑀲𑀸𑀯𑀲𑁂𑀲𑀁 𑀲𑀸𑀚𑀻𑀯𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀯𑀸 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀦𑀸𑀫 𑀦 𑀳𑁄𑀢𑀺. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀦 𑀘𑀢𑀼𑀓𑁆𑀓𑀁 𑀮𑀩𑁆𑀪𑀢𑀺 𑀅𑀢𑁆𑀣𑀺 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀲𑀻𑀮𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀦 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀅𑀘𑀺𑀢𑁆𑀢𑀓𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄, 𑀅𑀢𑁆𑀣𑀺 𑀦 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀩𑀳𑀼𑀮𑁄 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀦𑀺𑀭𑀸𑀧𑀢𑁆𑀢𑀺𑀓𑁄, 𑀅𑀢𑁆𑀣𑀺 𑀦 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀦 𑀘 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀅𑀢𑁆𑀣𑀺 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀘 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀘 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄, 𑀅𑀬𑀫𑁂𑀯 𑀘𑀢𑀼𑀢𑁆𑀣𑁄 𑀪𑀺𑀓𑁆𑀔𑀼 𑀉𑀓𑁆𑀓𑀝𑁆𑀞𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸. 𑀦 𑀳𑀺 𑀪𑀕𑀯𑀸 𑀅𑀦𑀼𑀓𑁆𑀓𑀝𑁆𑀞𑀁 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺 𑀘𑁂? 𑀦, ‘‘𑀢𑀢𑁆𑀭 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺𑀯𑀘𑀦𑀯𑀺𑀭𑁄𑀥𑀢𑁄. 𑀉𑀓𑁆𑀓𑀝𑁆𑀞𑀕𑁆𑀕𑀳𑀡𑀸𑀥𑀺𑀧𑁆𑀧𑀸𑀬𑁂 𑀲𑀢𑀺 ‘‘𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀺𑀓𑁆𑀔𑀢𑁆𑀢𑀬𑀲𑀫𑀸𑀧𑀦𑁆𑀦𑁄 𑀳𑀺 𑀲𑀩𑁆𑀩𑀼𑀓𑁆𑀓𑀝𑁆𑀞𑁄𑀢𑀺.

‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀧𑀭𑀢𑁄 𑀯𑀘𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀯𑀼𑀢𑁆𑀢𑀸𑀢𑀺 𑀘𑁂? 𑀦, 𑀢𑀲𑁆𑀲𑀸𑀧𑀺 𑀅𑀪𑀩𑁆𑀩𑀢𑁆𑀢𑀸. 𑀦 𑀳𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀁 𑀪𑀩𑁆𑀩𑁄, 𑀢𑀁 𑀲𑀺𑀓𑁆𑀔𑀁 𑀅𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀸𑀚𑀻𑀯𑀜𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀏𑀯 𑀳𑀺 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑁄 𑀲𑀸𑀚𑀻𑀯𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀫𑁂𑀯 𑀲𑀗𑁆𑀕𑀡𑁆𑀳𑀸𑀢𑀺, 𑀦𑁂𑀢𑀭𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀁 𑀯𑀸, 𑀢𑀲𑁆𑀫𑀸 ‘‘𑀢𑀢𑁆𑀭 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀗𑁆𑀕𑀸𑀳𑀓𑁄 𑀲𑀸𑀚𑀻𑀯𑁄 𑀲𑀺𑀓𑁆𑀔𑀸𑀲𑀸𑀚𑀻𑀯𑁄𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀲𑀸𑀚𑀻𑀯𑀯𑀺𑀲𑁂𑀲𑀦𑀢𑁆𑀣𑀁 𑀲𑀺𑀓𑁆𑀔𑀸𑀕𑁆𑀕𑀳𑀡𑀁 𑀓𑀢𑀁. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀫𑁂𑀯 𑀯𑀺𑀪𑀗𑁆𑀕𑁂 𑀲𑀺𑀓𑁆𑀔𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 ‘‘𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀏𑀓𑀫𑁂𑀯𑀺𑀤𑀁 𑀅𑀢𑁆𑀣𑀧𑀤𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀢𑀜𑁆𑀘 𑀉𑀧𑀲𑀫𑁆𑀧𑀤𑀽𑀧𑀕𑀫𑀦𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀲𑀺𑀓𑁆𑀔𑀦𑀸𑀥𑀺𑀓𑀸𑀭𑀢𑁆𑀢𑀸 ‘‘𑀲𑀺𑀓𑁆𑀔𑀢𑀻’’𑀢𑀺 𑀘 ‘‘𑀲𑀫𑀸𑀧𑀦𑁆𑀦𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑁄 𑀏𑀯𑀁 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄, 𑀢𑀸𑀤𑀺𑀲𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀅𑀧𑀭𑀪𑀸𑀕𑁂 𑀲𑀸𑀚𑀻𑀯𑀲𑀗𑁆𑀔𑀸𑀢𑀫𑁂𑀯 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬, 𑀢𑀲𑁆𑀫𑀺𑀁𑀬𑁂𑀯 𑀘 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀅𑀬𑀫𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀓𑀺𑀦𑁆𑀢𑀼 𑀅𑀝𑁆𑀞𑀓𑀣𑀸𑀦𑀬𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀲𑁄 𑀘 𑀦 𑀧𑀝𑀺𑀓𑁆𑀔𑁂𑀧𑀸𑀭𑀳𑁄𑀢𑀺 𑀢𑁂𑀦 𑀢𑀤𑀦𑀼𑀲𑀸𑀭𑁂𑀦 𑀪𑀯𑀺𑀢𑀩𑁆𑀩𑀁.

𑀅𑀥𑀺𑀧𑁆𑀧𑀸𑀬𑁄 𑀧𑀦𑁂𑀢𑁆𑀣 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀲𑁄 𑀤𑀸𑀦𑀺 𑀯𑀼𑀘𑁆𑀘𑀢𑀺 𑁋 𑀲𑀩𑁆𑀩𑁂𑀲𑀼𑀧𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀇𑀤𑀫𑁂𑀯 𑀪𑀺𑀓𑁆𑀔𑀼𑀮𑀓𑁆𑀔𑀡𑀁 𑀲𑀸𑀥𑀸𑀭𑀡𑀁, 𑀬𑀤𑀺𑀤𑀁 ‘‘𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺. 𑀔𑀻𑀡𑀸𑀲𑀯𑁄𑀧𑀺 𑀲𑀸𑀯𑀓𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀅𑀘𑀺𑀢𑁆𑀢𑀓𑀁, 𑀢𑀣𑀸 𑀲𑁂𑀓𑁆𑀔𑁄. 𑀧𑀼𑀣𑀼𑀚𑁆𑀚𑀦𑁄 𑀧𑀦 𑀲𑀘𑀺𑀢𑁆𑀢𑀓𑀫𑁆𑀧𑀺, 𑀢𑀲𑁆𑀫𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽𑀦𑀁 𑀲𑀸𑀫𑀜𑁆𑀜𑀫𑀺𑀤𑀁 𑀪𑀺𑀓𑁆𑀔𑀼𑀮𑀓𑁆𑀔𑀡𑀦𑁆𑀢𑀺 𑀓𑀢𑁆𑀯𑀸 𑀓𑁂𑀯𑀮𑀁 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄, 𑀓𑁂𑀯𑀮𑀁 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀘 𑀉𑀪𑀬𑀲𑀫𑀸𑀧𑀦𑁆𑀦𑁄 𑀘𑀸𑀢𑀺 𑀲𑀭𑀽𑀧𑁂𑀓𑀤𑁂𑀲𑁂𑀓𑀲𑁂𑀲𑀦𑀬𑁂𑀦 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀆𑀧𑀦𑁆𑀦𑁄’’𑀢𑁆𑀯𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀉𑀓𑁆𑀓𑀝𑁆𑀞𑀕𑁆𑀕𑀳𑀡𑁂𑀦 𑀅𑀦𑀼𑀓𑁆𑀓𑀝𑁆𑀞𑀸𑀦𑀁 𑀕𑀳𑀡𑀲𑀺𑀤𑁆𑀥𑀺𑀢𑁄 𑀅𑀝𑁆𑀞𑀓𑀣𑀸𑀬𑀁 𑀉𑀓𑁆𑀓𑀝𑁆𑀞𑁄𑀯 𑀯𑀼𑀢𑁆𑀢𑁄. 𑀢𑀫𑁂𑀯 𑀲𑀫𑁆𑀧𑀸𑀤𑁂𑀢𑀼𑀁 ‘‘𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀯𑀘𑀦𑁂 𑀧𑀭𑀺𑀳𑀸𑀭𑀁 𑀯𑀢𑁆𑀯𑀸 𑀬𑀲𑁆𑀫𑀸 𑀧𑀦 𑀲𑁄 𑀅𑀲𑀺𑀓𑁆𑀔𑀫𑁆𑀧𑀺 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄𑀢𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀘 𑀯𑀢𑁆𑀯𑀸 ‘‘𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄 𑀢𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀬𑀜𑁆𑀘 𑀲𑀸𑀚𑀻𑀯𑀁 𑀲𑀫𑀸𑀧𑀦𑁆𑀦𑁄 𑀢𑀢𑁆𑀣 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑀝𑁆𑀞𑀓𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀲𑁆𑀫𑀺𑀁 𑀧𑀦 𑀅𑀥𑀺𑀧𑁆𑀧𑀸𑀬𑁂 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀏𑀯 𑀕𑀳𑀡𑀁 𑀲𑀩𑁆𑀩𑀢𑁆𑀣𑀺𑀓𑀢𑁆𑀢𑀸, 𑀲𑀻𑀮𑀸𑀥𑀺𑀓𑀸𑀭𑀢𑁄 𑀘 𑀯𑀺𑀦𑀬𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀺𑀬𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀺𑀓𑁆𑀔𑀸𑀧𑀤𑀁 𑀧𑀘𑁆𑀘𑀓𑁆𑀔𑀦𑁆𑀢𑁄 𑀲𑀻𑀮𑀲𑀗𑁆𑀔𑀸𑀢𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄, 𑀢𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀧𑀝𑀺𑀲𑁂𑀯𑀺𑀢𑀫𑁂𑀣𑀼𑀦𑀲𑁆𑀲 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀦𑁆𑀢𑁄 𑀦 𑀲𑀫𑀽𑀳𑀦𑀢𑀺 𑀦𑀸𑀫. 𑀦 𑀳𑀺 𑀲𑁄 𑀪𑀺𑀓𑁆𑀔𑀼 𑀳𑀼𑀢𑁆𑀯𑀸 𑀧𑀝𑀺𑀲𑁂𑀯𑀺, ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺 𑀘 𑀧𑀜𑁆𑀜𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀲𑀫𑀸𑀲𑀢𑁄 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀦𑁆𑀦𑁄’’𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁 𑀯𑀼𑀢𑁆𑀢𑀁.

𑀓𑀺𑀁 𑀇𑀫𑀺𑀦𑀸 𑀯𑀺𑀲𑁂𑀲𑀯𑀘𑀦𑁂𑀦 𑀧𑀬𑁄𑀚𑀦𑀁, 𑀦𑀦𑀼 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸…𑀧𑁂… 𑀅𑀲𑀁𑀯𑀸𑀲𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀬𑁄 𑀧𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀣𑁂𑀬𑁆𑀬𑀲𑀁𑀯𑀸𑀲𑀸𑀤𑀺𑀓𑁄 𑀓𑁂𑀯𑀮𑁂𑀦 𑀲𑀫𑀜𑁆𑀜𑀸𑀫𑀢𑁆𑀢𑁂𑀦, 𑀧𑀝𑀺𑀜𑁆𑀜𑀸𑀫𑀢𑁆𑀢𑁂𑀦 𑀯𑀸 𑀪𑀺𑀓𑁆𑀔𑀼, 𑀢𑀲𑁆𑀲𑀸𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀅𑀢𑁆𑀣𑀺. 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀘 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀬𑁄 𑀯𑀸 𑀧𑀘𑁆𑀙𑀸 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀢𑀲𑁆𑀲 𑀘, 𑀬𑁄 𑀯𑀸 𑀧𑀓𑁆𑀔𑀧𑀡𑁆𑀟𑀓𑀢𑁆𑀢𑀸 𑀧𑀡𑁆𑀟𑀓𑀪𑀸𑀯𑀽𑀧𑀕𑀫𑀦𑁂𑀦 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀢𑀲𑁆𑀲 𑀘 𑀢𑀤𑀼𑀪𑀬𑀁 𑀅𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀺. ‘‘𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂 𑀘 𑀧𑀓𑁆𑀔𑀧𑀡𑁆𑀟𑀓𑁄 𑀉𑀧𑀲𑀫𑁆𑀧𑀤𑀸𑀬 𑀦 𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀢𑀭𑀲𑁆𑀫𑀺𑀁 𑀧𑀓𑁆𑀔𑁂 𑀯𑀢𑁆𑀣𑀽𑀢𑀺 𑀲𑀺𑀤𑁆𑀥𑀁, 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀉𑀧𑀲𑀫𑁆𑀧𑀦𑁆𑀦𑁄 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂 𑀧𑀡𑁆𑀟𑀓𑀢𑁆𑀢𑀸 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀲𑁄 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀲𑀺𑀓𑁆𑀔𑀸𑀬 𑀅𑀪𑀸𑀯𑁂𑀦 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀫𑀼𑀔𑁂𑀦 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀕𑁆𑀕𑀳𑀡𑀸𑀤𑀬𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀢𑀲𑁆𑀲 𑀓𑀼𑀢𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀦𑀬𑁄 𑀅𑀧𑀡𑁆𑀟𑀓𑀧𑀓𑁆𑀔𑀁 𑀅𑀮𑀪𑀫𑀸𑀦𑀲𑁆𑀲𑁂𑀯 𑀧𑀭𑀢𑁄 𑀬𑀼𑀚𑁆𑀚𑀢𑀺, 𑀮𑀪𑀦𑁆𑀢𑀲𑁆𑀲 𑀧𑀦 𑀅𑀭𑀽𑀧𑀲𑀢𑁆𑀢𑀸𑀦𑀁 𑀓𑀼𑀲𑀮𑀸𑀦𑀁 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀪𑀯𑀗𑁆𑀕𑀯𑀺𑀘𑁆𑀙𑁂𑀤𑁂 𑀲𑀢𑀺𑀧𑀺 𑀅𑀫𑀭𑀡𑀁 𑀯𑀺𑀬 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂𑀧𑀺 𑀪𑀺𑀓𑁆𑀔𑀼𑀪𑀸𑀯𑁄 𑀅𑀢𑁆𑀣𑀺. 𑀲𑀁𑀯𑀸𑀲𑀁 𑀯𑀸 𑀲𑀸𑀤𑀺𑀬𑀦𑁆𑀢𑀲𑁆𑀲 𑀦 𑀣𑁂𑀬𑁆𑀬𑀲𑀁𑀯𑀸𑀲𑀓𑀪𑀸𑀯𑁄 𑀅𑀢𑁆𑀣𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀯𑀺𑀬. 𑀦 𑀘 𑀲𑀳𑀲𑁂𑀬𑁆𑀬𑀸𑀤𑀺𑀓𑀁 𑀚𑀦𑁂𑀢𑀺. 𑀕𑀡𑀧𑀽𑀭𑀓𑁄 𑀧𑀦 𑀦 𑀳𑁄𑀢𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄 𑀯𑀺𑀬, 𑀦 𑀲𑁄 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀇𑀢𑀭𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀳𑁄𑀢𑀺, 𑀅𑀬𑀁 𑀇𑀫𑀲𑁆𑀲 𑀢𑀢𑁄 𑀯𑀺𑀲𑁂𑀲𑁄. 𑀓𑀺𑀫𑀬𑀁 𑀲𑀳𑁂𑀢𑀼𑀓𑁄, 𑀉𑀤𑀸𑀳𑀼 𑀅𑀳𑁂𑀢𑀼𑀓𑁄𑀢𑀺? 𑀦 𑀅𑀳𑁂𑀢𑀼𑀓𑁄. 𑀬𑀢𑁄 𑀉𑀧𑀲𑀫𑁆𑀧𑀤𑀸 𑀢𑀲𑁆𑀲 𑀅𑀧𑀡𑁆𑀟𑀓𑀧𑀓𑁆𑀔𑁂 𑀅𑀦𑀼𑀜𑁆𑀜𑀸𑀢𑀸 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸. 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂𑀧𑀺 𑀓𑀺𑀲𑁆𑀲 𑀦𑀸𑀦𑀼𑀜𑁆𑀜𑀸𑀢𑀸𑀢𑀺 𑀘𑁂? 𑀧𑀡𑁆𑀟𑀓𑀪𑀽𑀢𑀢𑁆𑀢𑀸 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑀲𑁆𑀲 𑀯𑀺𑀬.

𑀅𑀧𑀺𑀘 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 𑀤𑀻𑀧𑁂𑀢𑁆𑀯𑀸 𑀢𑀁 𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀢𑀢𑁆𑀣 𑀘 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀬𑀣𑀸𑀯𑀼𑀢𑁆𑀢𑀸𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀘𑁂𑀢𑁆𑀣, 𑀢𑀣𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑁂𑀬𑁆𑀬 (𑀧𑀸𑀭𑀸. 𑁮𑁯), 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀁 𑀘𑀻𑀯𑀭𑀁 𑀓𑀸𑀭𑀸𑀧𑁂𑀬𑁆𑀬 𑀅𑀢𑀺𑀭𑁂𑀓𑀁 𑀯𑀸, 𑀙𑁂𑀤𑀦𑀓𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁫𑁪𑁮) 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀦 𑀳𑀺 ‘‘𑀧𑀕𑁂𑀯 𑀧𑀡𑁆𑀟𑀓𑁂 𑀧𑀼𑀭𑀺𑀲𑁂 𑀯𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀬𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀫𑀸𑀢𑀺𑀓𑀸𑀬 𑀢𑀸𑀯 𑀯𑀺𑀦𑀺𑀘𑁆𑀙𑀬𑁄.

𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀣𑀸𑀯𑀡𑁆𑀡𑀦𑀸

𑁪𑁫. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀏𑀢𑁆𑀣 𑀲𑀸𑀲𑀦𑀢𑁄 𑀦𑀻𑀳𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦𑀸𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀼𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦 𑀚𑀸𑀦𑀸𑀢𑀻’’𑀢𑀺 (𑀧𑀭𑀺. 𑁪𑁪𑁨) 𑀏𑀯𑀫𑀸𑀤𑀺𑀢𑁄 𑀳𑀺 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀢𑁄 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀸𑀦𑀼𑀮𑁄𑀫𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁. ‘‘𑀅𑀦𑀸𑀧𑀢𑁆𑀢𑀺 𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄 𑀧𑀭𑀺𑀧𑀼𑀘𑁆𑀙𑀸𑀢𑀺 𑀪𑀡𑀢𑀻’’𑀢𑀺 𑀏𑀯𑀫𑀸𑀤𑀺𑀢𑁄 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀢𑁄 𑀆𑀘𑀭𑀺𑀬𑀯𑀸𑀤𑀁 𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁. 𑀪𑀸𑀭𑀼𑀓𑀘𑁆𑀙𑀓𑀯𑀢𑁆𑀣𑀼𑀲𑁆𑀫𑀺𑀁 ‘‘𑀆𑀬𑀲𑁆𑀫𑀸 𑀉𑀧𑀸𑀮𑀺 𑀏𑀯𑀫𑀸𑀳 𑁋 𑀅𑀦𑀸𑀧𑀢𑁆𑀢𑀺, 𑀆𑀯𑀼𑀲𑁄, 𑀲𑀼𑀧𑀺𑀦𑀦𑁆𑀢𑁂𑀦𑀸’’𑀢𑀺 (𑀧𑀸𑀭𑀸. 𑁭𑁮) 𑀏𑀯𑀫𑀸𑀤𑀺𑀢𑁄 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀢𑁄 𑀏𑀯 𑀅𑀢𑁆𑀢𑀦𑁄𑀫𑀢𑀺𑀁 𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁. 𑀢𑀸𑀬 𑀳𑀺 𑀅𑀢𑁆𑀢𑀦𑁄𑀫𑀢𑀺𑀬𑀸 𑀣𑁂𑀭𑁄 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺. 𑀅𑀧𑀺 𑀘 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀧𑀜𑁆𑀜𑀢𑁆𑀢𑁂𑀦 𑀯𑀸 𑀅𑀧𑀜𑁆𑀜𑀢𑁆𑀢𑁂𑀦 𑀯𑀸 𑀯𑀼𑀘𑁆𑀘𑀫𑀸𑀦𑁄…𑀧𑁂… 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁪𑁩). 𑀢𑀢𑁆𑀣 𑀳𑀺 𑀧𑀜𑁆𑀜𑀢𑁆𑀢𑀁 𑀦𑀸𑀫 𑀲𑀼𑀢𑁆𑀢𑀁. 𑀲𑁂𑀲𑀢𑁆𑀢𑀬𑀁 𑀅𑀧𑀜𑁆𑀜𑀢𑁆𑀢𑀁 𑀦𑀸𑀫. 𑀢𑁂𑀦𑀸𑀬𑀁 ‘‘𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀯𑀺𑀦𑀬𑀁, 𑀫𑀳𑀸𑀣𑁂𑀭𑀸’’𑀢𑀺 𑀕𑀸𑀣𑀸 𑀲𑀼𑀯𑀼𑀢𑁆𑀢𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦. 𑀆𑀳𑀘𑁆𑀘𑀧𑀤𑁂𑀦𑀸𑀢𑀺 𑀅𑀝𑁆𑀞 𑀯𑀡𑁆𑀡𑀝𑁆𑀞𑀸𑀦𑀸𑀦𑀺 𑀆𑀳𑀘𑁆𑀘 𑀯𑀼𑀢𑁆𑀢𑁂𑀦 𑀧𑀤𑀦𑀺𑀓𑀸𑀬𑁂𑀦𑀸𑀢𑀺 𑀅𑀢𑁆𑀣𑁄, 𑀉𑀤𑀸𑀳𑀝𑁂𑀦 𑀓𑀡𑁆𑀞𑁄𑀓𑁆𑀓𑀦𑁆𑀢𑁂𑀦 𑀧𑀤𑀲𑀫𑀽𑀳𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀲𑁂𑀦𑀸𑀢𑀺 𑀢𑀲𑁆𑀲 𑀆𑀳𑀘𑁆𑀘𑀪𑀸𑀲𑀺𑀢𑀲𑁆𑀲 𑀭𑀲𑁂𑀦, 𑀢𑀢𑁄 𑀉𑀤𑁆𑀥𑀝𑁂𑀦 𑀯𑀺𑀦𑀺𑀘𑁆𑀙𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑀘𑁆𑀙𑀸𑀬𑀸 𑀯𑀺𑀬 𑀳𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀆𑀘𑀭𑀺𑀬𑀯𑀸𑀤𑁄 ‘‘𑀆𑀘𑀭𑀺𑀬𑀯𑀁𑀲𑁄’’𑀢𑀺 𑀯𑀼𑀢𑁆𑀢𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀧𑀭𑀫𑁆𑀧𑀭𑀸𑀬 𑀆𑀪𑀢𑁄𑀯 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀓𑀸𑀭𑀡𑁄𑀧𑀧𑀢𑁆𑀢𑀺𑀲𑀺𑀤𑁆𑀥𑁄 𑀉𑀳𑀸𑀧𑁄𑀳𑀦𑀬𑀧𑁆𑀧𑀯𑀢𑁆𑀢𑁄 𑀧𑀘𑁆𑀘𑀓𑁆𑀔𑀸𑀤𑀺𑀧𑀫𑀸𑀡𑀧𑀢𑀺𑀭𑀽𑀧𑀓𑁄. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁆𑀣 ‘‘𑀅𑀢𑁆𑀢𑀦𑁄𑀫𑀢𑀻’’𑀢𑀺 𑀓𑁂𑀘𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀁, 𑀇𑀥 𑀘 𑀓𑀺𑀜𑁆𑀘𑀸𑀧𑀺 ‘‘𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸’’𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀫𑀳𑀸𑀧𑀤𑁂𑀲𑀦𑀬𑀲𑀺𑀤𑁆𑀥𑀁 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀝𑀺𑀓𑁆𑀔𑀺𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀸𑀦𑀦𑀼𑀜𑁆𑀜𑀸𑀢𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑁆𑀢𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀞𑀸𑀦𑀁 𑀑𑀓𑀸𑀲𑁄 𑀧𑀤𑁂𑀲𑁄𑀢𑀺 𑀓𑀸𑀭𑀡𑀯𑁂𑀯𑀘𑀦𑀸𑀦𑀺 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄’’𑀢𑀺𑀆𑀤𑀺 (𑀧𑀸𑀭𑀸. 𑁪𑁩) 𑀲𑀸𑀲𑀦𑀢𑁄, ‘‘𑀦𑀺𑀕𑁆𑀕𑀳𑀝𑁆𑀞𑀸𑀦’’𑀦𑁆𑀢𑀺 𑀘 ‘‘𑀅𑀲𑀦𑁆𑀤𑀺𑀝𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺 𑀘 ‘‘𑀅𑀲𑀦𑁆𑀤𑀺𑀝𑁆𑀞𑀺 𑀘 𑀧𑀦 𑀧𑀤𑁂𑀲𑁄’’𑀢𑀺 𑀘 𑀮𑁄𑀓𑀢𑁄, 𑀢𑀲𑁆𑀫𑀸 𑀫𑀳𑀸𑀧𑀤𑁂𑀲𑀸𑀢𑀺 𑀫𑀳𑀸𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀁 𑀦𑀸𑀫 𑀜𑀸𑀧𑀓𑁄 𑀳𑁂𑀢𑀼 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀫𑀳𑀦𑁆𑀢𑀪𑀸𑀯𑁄 𑀧𑀦 𑀢𑁂𑀲𑀁 𑀫𑀳𑀸𑀯𑀺𑀲𑀬𑀢𑁆𑀢𑀸 𑀫𑀳𑀸𑀪𑀽𑀢𑀸𑀦𑀁 𑀯𑀺𑀬. 𑀢𑁂 𑀤𑀼𑀯𑀺𑀥𑀸 𑀯𑀺𑀦𑀬𑀫𑀳𑀸𑀧𑀤𑁂𑀲𑀸 𑀲𑀼𑀢𑁆𑀢𑀦𑁆𑀢𑀺𑀓𑀫𑀳𑀸𑀧𑀤𑁂𑀲𑀸 𑀘𑀸𑀢𑀺. 𑀢𑀢𑁆𑀣 𑀯𑀺𑀦𑀬𑀫𑀳𑀸𑀧𑀤𑁂𑀲𑀸 𑀯𑀺𑀦𑀬𑁂 𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀺, 𑀇𑀢𑀭𑁂 𑀉𑀪𑀬𑀢𑁆𑀣𑀸𑀧𑀺, 𑀢𑁂𑀦𑁂𑀯 𑀧𑀭𑀺𑀯𑀸𑀭𑁂 𑀅𑀦𑀼𑀬𑁄𑀕𑀯𑀢𑁆𑀢𑁂 ‘‘𑀥𑀫𑁆𑀫𑀁 𑀦 𑀚𑀸𑀦𑀸𑀢𑀺, 𑀥𑀫𑁆𑀫𑀸𑀦𑀼𑀮𑁄𑀫𑀁 𑀦 𑀚𑀸𑀦𑀸𑀢𑀻’’𑀢𑀺 (𑀧𑀭𑀺. 𑁪𑁪𑁨) 𑀯𑀼𑀢𑁆𑀢𑀁. 𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀞𑀧𑁂𑀢𑁆𑀯𑀸 𑀯𑀺𑀦𑀬𑀧𑀺𑀝𑀓𑀁 𑀅𑀯𑀲𑁂𑀲𑀧𑀺𑀝𑀓𑀤𑁆𑀯𑀬𑀁. 𑀥𑀫𑁆𑀫𑀸𑀦𑀼𑀮𑁄𑀫𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂. 𑀢𑀢𑁆𑀣 𑀬𑁄 𑀥𑀫𑁆𑀫𑀁 𑀥𑀫𑁆𑀫𑀸𑀦𑀼𑀮𑁄𑀫𑀜𑁆𑀘𑁂𑀯 𑀚𑀸𑀦𑀸𑀢𑀺, 𑀦 𑀯𑀺𑀦𑀬𑀁 𑀯𑀺𑀦𑀬𑀸𑀦𑀼𑀮𑁄𑀫𑀜𑁆𑀘, 𑀲𑁄 ‘‘𑀥𑀫𑁆𑀫𑀁 𑀭𑀓𑁆𑀔𑀸𑀫𑀻’’𑀢𑀺 𑀯𑀺𑀦𑀬𑀁 𑀉𑀩𑁆𑀩𑀺𑀦𑀬𑀁 𑀓𑀭𑁄𑀢𑀺, 𑀇𑀢𑀭𑁄 ‘‘𑀯𑀺𑀦𑀬𑀁 𑀭𑀓𑁆𑀔𑀸𑀫𑀻’’𑀢𑀺 𑀥𑀫𑁆𑀫𑀁 𑀉𑀤𑁆𑀥𑀫𑁆𑀫𑀁 𑀓𑀭𑁄𑀢𑀺, 𑀉𑀪𑀬𑀁 𑀚𑀸𑀦𑀦𑁆𑀢𑁄 𑀉𑀪𑀬𑀫𑁆𑀧𑀺 𑀲𑀫𑁆𑀧𑀸𑀤𑁂𑀢𑀺.

𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀁 𑁋 𑀢𑀢𑁆𑀣 𑀧𑀞𑀫𑁄 ‘‘𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁, 𑀞𑀺𑀢𑀁, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺 𑀆𑀧𑀢𑁆𑀢𑀺, 𑀦 𑀲𑀸𑀤𑀺𑀬𑀢𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀏𑀢𑁆𑀣 𑀯𑀺𑀧𑁆𑀧𑀝𑀺𑀧𑀚𑁆𑀚𑀢𑀺. 𑀲𑁄 𑀳𑀸𑀬𑀲𑁆𑀫𑀸 𑀲𑀼𑀔𑀯𑁂𑀤𑀦𑀻𑀬𑀲𑁆𑀲 𑀉𑀧𑀸𑀤𑀺𑀦𑁆𑀦𑀨𑁄𑀝𑁆𑀞𑀩𑁆𑀩𑀲𑁆𑀲, 𑀓𑀸𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀲𑀫𑀸𑀬𑁄𑀕𑁂 𑀲𑀢𑀺 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀓𑀸𑀬𑀺𑀓𑀲𑀼𑀔𑀯𑁂𑀤𑀦𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑁂𑀦 𑀲𑀸𑀤𑀺𑀬𑀢𑀺 𑀦𑀸𑀫𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀅𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀧𑀺 𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀁 𑀓𑀭𑁄𑀢𑀺, 𑀢𑀣𑀸 𑀬𑀲𑁆𑀲 𑀲𑀦𑁆𑀣𑀢𑀢𑁆𑀢𑀸 𑀯𑀸 𑀬𑁄𑀦𑀺𑀤𑁄𑀲𑀯𑀲𑁂𑀦 𑀯𑀸 𑀤𑀼𑀓𑁆𑀔𑀸 𑀅𑀲𑀸𑀢𑀸 𑀯𑁂𑀤𑀦𑀸, 𑀯𑀸𑀢𑁄𑀧𑀳𑀝𑀕𑀢𑁆𑀢𑀢𑀸𑀬 𑀯𑀸 𑀦𑁂𑀯 𑀓𑀸𑀬𑀺𑀓𑀯𑁂𑀤𑀦𑀸, 𑀢𑀲𑁆𑀲 𑀚𑀸𑀦𑀢𑁄 𑀅𑀚𑀸𑀦𑀢𑁄𑀧𑀺 ‘‘𑀅𑀦𑀸𑀧𑀢𑁆𑀢𑀺 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁭𑁬) 𑀲𑀼𑀢𑁆𑀢𑀦𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀁 𑀓𑀭𑁄𑀢𑀺, 𑀢𑀣𑀸 𑀬𑀤𑀺 𑀫𑁄𑀘𑀦𑀭𑀸𑀕𑁂𑀦 𑀉𑀧𑀓𑁆𑀓𑀫𑀢𑁄 𑀫𑀼𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀧𑀕𑁂𑀯 𑀫𑁂𑀣𑀼𑀦𑀭𑀸𑀕𑁂𑀦𑀸𑀢𑀺 𑀤𑀼𑀓𑁆𑀓𑀝𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀏𑀯𑀁 𑀯𑀺𑀦𑀬𑀁 𑀉𑀩𑁆𑀩𑀺𑀦𑀬𑀁 𑀓𑀭𑁄𑀢𑀺 𑀦𑀸𑀫. 𑀇𑀢𑀭𑁄 ‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀚𑀸𑀦𑀢𑁄 𑀚𑀸𑀦𑀦𑁂𑀦𑁂𑀯 𑀲𑀼𑀔𑀯𑁂𑀤𑀦𑀸 𑀳𑁄𑀢𑀼 𑀯𑀸 𑀫𑀸 𑀯𑀸 𑀲𑀸𑀤𑀺𑀬𑀦𑀸 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀧𑀺 𑀚𑀸𑀦𑀢𑁄 𑀅𑀦𑀸𑀧𑀢𑁆𑀢𑀺𑀝𑁆𑀞𑀸𑀦𑁂 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀅𑀦𑀯𑀚𑁆𑀚𑀁 𑀲𑀸𑀯𑀚𑁆𑀚𑀁 𑀓𑀭𑁄𑀢𑀻𑀢𑀺 𑀏𑀯𑀁 𑀥𑀫𑁆𑀫𑀁 𑀉𑀤𑁆𑀥𑀫𑁆𑀫𑀁 𑀓𑀭𑁄𑀢𑀺. 𑀉𑀪𑀬𑀁 𑀧𑀦 𑀚𑀸𑀦𑀦𑁆𑀢𑁄 ‘‘𑀪𑀺𑀓𑁆𑀔𑀼𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂𑀢𑀺 (𑀧𑀸𑀭𑀸. 𑁫𑁭) 𑀯𑀘𑀦𑀢𑁄 𑀲𑁂𑀯𑀦𑀘𑀺𑀢𑁆𑀢𑀫𑁂𑀯𑁂𑀢𑁆𑀣 𑀧𑀫𑀸𑀡𑀁, 𑀢𑀲𑁆𑀲 𑀪𑀸𑀯𑁂𑀦 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀅𑀪𑀸𑀯𑁂𑀦 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀯𑀸 𑀉𑀪𑀬𑀫𑁆𑀧𑀺 𑀭𑀓𑁆𑀔𑀢𑀺 𑀲𑀫𑁆𑀧𑀸𑀤𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀲𑀧𑁆𑀧𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀗𑁆𑀕𑀻𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀞𑀧𑀺𑀢𑀧𑀸𑀴𑀺𑀢𑁄 𑀯𑀺𑀦𑀺𑀫𑀼𑀢𑁆𑀢𑀁 𑀓𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀸 𑀅𑀢𑁆𑀣𑀢𑁄, 𑀦𑀬𑀢𑁄, 𑀅𑀦𑀼𑀮𑁄𑀫𑀢𑁄 𑀘 𑀧𑀸𑀴𑀺𑀑𑀓𑁆𑀓𑀦𑁆𑀢𑀯𑀺𑀦𑀺𑀘𑁆𑀙𑀬𑀧𑁆𑀧𑀯𑀢𑁆𑀢𑀸 𑀅𑀦𑀼𑀧𑀯𑀺𑀝𑁆𑀞𑀯𑀺𑀦𑀺𑀘𑁆𑀙𑀬𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀦 𑀲𑀫𑀽𑀳𑀦𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁄𑀧𑀺 𑀪𑀕𑀯𑀸 𑀓𑁂𑀯𑀮𑀁 ‘‘𑀢𑁂𑀲𑀁 𑀫𑀢𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀫𑀫 𑀯𑀘𑀦𑀁 𑀯𑀺𑀬 𑀧𑀫𑀸𑀡𑀁 𑀓𑀭𑁄𑀢𑀽’’𑀢𑀺 𑀤𑀲𑁆𑀲𑀦𑀢𑁆𑀣𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀏𑀯𑀫𑀸𑀳 ‘‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀢𑀽’’𑀢𑀺 (𑀤𑀻. 𑀦𑀺. 𑁨.𑁨𑁧𑁬), 𑀢𑁂𑀦𑁂𑀢𑀁 𑀲𑀺𑀤𑁆𑀥𑀁 ‘‘𑀧𑀜𑁆𑀜𑀢𑁆𑀢𑀫𑁆𑀧𑀺 𑀘𑁂 𑀲𑀺𑀓𑁆𑀔𑀸𑀧𑀤𑀁 𑀲𑀫𑀽𑀳𑀦𑀺𑀢𑀼𑀁 𑀬𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀪𑀕𑀯𑀢𑀸, 𑀢𑀲𑁆𑀲 𑀧𑀜𑁆𑀜𑀢𑁆𑀢𑀸𑀦𑀼𑀮𑁄𑀫𑀁 𑀅𑀢𑀺𑀭𑁂𑀓𑀢𑁆𑀣𑀤𑀻𑀧𑀦𑀁, 𑀧𑀕𑁂𑀯𑀸𑀦𑀼𑀜𑁆𑀜𑀸𑀢𑀁 𑀪𑀕𑀯𑀢𑀸’’𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀊𑀦𑀸𑀢𑀺𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀘𑀭𑀺𑀬𑀓𑀼𑀮𑁂𑀲𑀼 𑀯𑀺𑀯𑀸𑀤𑁄 𑀅𑀜𑁆𑀜𑀫𑀜𑁆𑀜𑀁 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑀦𑀢𑁆𑀣𑀜𑁆𑀘. 𑀓𑀲𑁆𑀫𑀸 𑀲𑀗𑁆𑀖𑁄 𑀦 𑀲𑀫𑀽𑀳𑀦𑀻𑀢𑀺? 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀧𑁆𑀧𑀲𑀗𑁆𑀕𑀤𑀲𑁆𑀲𑀦𑀢𑁄. 𑀪𑀕𑀯𑀢𑀸 𑀘 ‘‘𑀲𑀩𑁆𑀩𑁂𑀳𑁂𑀯 𑀲𑀫𑀕𑁆𑀕𑁂𑀳𑀺 𑀲𑀫𑁆𑀫𑁄𑀤𑀫𑀸𑀦𑁂𑀳𑀺 𑀅𑀯𑀺𑀯𑀤𑀫𑀸𑀦𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀽𑀢𑀺 𑀘 𑀅𑀜𑁆𑀜𑀯𑀸𑀤𑀤𑀲𑁆𑀲𑀦𑀢𑁄 𑀯𑀺𑀯𑀤𑀫𑀸𑀦𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀁 𑀚𑀸𑀢𑀁, 𑀢𑀤𑀪𑀸𑀯𑀢𑁆𑀢𑀫𑁆𑀧𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀅𑀯𑀺𑀯𑀤𑀫𑀸𑀦𑁂𑀳𑁂𑀯 𑀲𑀺𑀓𑁆𑀔𑀺𑀢𑀩𑁆𑀩𑀁 𑀅𑀓𑀸𑀲𑀺.

𑀅𑀧𑀺𑀘𑀸𑀢𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀧𑀸𑀓𑀝𑀓𑀭𑀡𑀢𑁆𑀣𑀁 𑀆𑀭𑀫𑁆𑀪𑁄. 𑀢𑀢𑁆𑀣 ‘‘𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀯𑀺𑀦𑀬𑀝𑁆𑀞𑀓𑀣𑀸𑀲𑀽’’𑀢𑀺 𑀯𑀘𑀦𑀢𑁄 𑀧𑀺𑀝𑀓𑀢𑁆𑀢𑀬𑀲𑁆𑀲𑀧𑀺 𑀲𑀸𑀥𑀸𑀭𑀡𑀸 𑀏𑀲𑀸 𑀓𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, ‘‘𑀅𑀣 𑀧𑀦𑀸𑀬𑀁 𑀓𑀧𑁆𑀧𑀺𑀬’’𑀦𑁆𑀢𑀺𑀆𑀤𑀺 𑀯𑀺𑀦𑀬𑀲𑁆𑀲𑁂𑀯. 𑀓𑀸𑀭𑀓𑀲𑀗𑁆𑀖𑀲𑀤𑀺𑀲𑀦𑁆𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑀲𑀗𑁆𑀖𑀲𑀤𑀺𑀲𑀁. ‘‘𑀲𑀼𑀢𑁆𑀢𑀸𑀤𑀺𑀘𑀢𑀼𑀓𑁆𑀓𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀢𑁂𑀦 𑀅𑀯𑀺𑀭𑀼𑀤𑁆𑀥𑀲𑁆𑀲 𑀓𑀫𑁆𑀫𑀲𑁆𑀲 𑀓𑀸𑀭𑀓𑀲𑀗𑁆𑀖𑀲𑀤𑀺𑀲’’𑀦𑁆𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀲𑁆𑀲 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀁 𑀅𑀬𑀼𑀢𑁆𑀢𑀁, ‘‘𑀲𑀼𑀢𑁆𑀢𑀫𑁂𑀯 𑀩𑀮𑀯𑀢𑀭𑀁. 𑀲𑀼𑀢𑁆𑀢𑀜𑁆𑀳𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑀸𑀭𑀓𑀲𑀗𑁆𑀖𑀲𑀤𑀺𑀲’’𑀦𑁆𑀢𑀺 𑀏𑀢𑁂𑀳𑀺 𑀧𑀤𑁂𑀳𑀺 𑀅𑀬𑀼𑀢𑁆𑀢𑀢𑁆𑀢𑀸. 𑀧𑀸𑀓𑀢𑀺𑀓𑁂 𑀧𑀦 𑀕𑀡𑁆𑀞𑀺𑀧𑀤𑁂 ‘‘𑀢𑀫𑀢𑁆𑀣𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀢𑀲𑁆𑀲 𑀓𑀸𑀭𑀓𑀲𑀗𑁆𑀖𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀯𑀸𑀤𑀻𑀢𑀺 𑀅𑀫𑁆𑀳𑀸𑀓𑀁 𑀲𑀫𑀬𑀯𑀺𑀚𑀸𑀦𑀦𑀓𑁄 𑀅𑀜𑁆𑀜𑀦𑀺𑀓𑀸𑀬𑀺𑀓𑁄𑀢𑀺 𑀯𑀼𑀢𑁆𑀢𑀁. 𑀧𑀭𑀯𑀸𑀤𑀻 𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑁆𑀢𑀺 𑀓𑀣𑀁? ‘‘𑀅𑀜𑁆𑀜𑀢𑁆𑀭 𑀉𑀤𑀓𑀤𑀦𑁆𑀢𑀧𑁄𑀦𑀸’’𑀢𑀺 (𑀧𑀸𑀘𑀺. 𑁨𑁬𑁬) 𑀲𑀼𑀢𑁆𑀢𑀁 𑀲𑀓𑀯𑀸𑀤𑀺𑀲𑁆𑀲, 𑀢𑀤𑀦𑀼𑀮𑁄𑀫𑀢𑁄 𑀦𑀸𑀴𑀺𑀓𑁂𑀭𑀨𑀮𑀲𑁆𑀲 𑀉𑀤𑀓𑀫𑁆𑀧𑀺 𑀉𑀤𑀓𑀫𑁂𑀯 𑀳𑁄𑀢𑀻𑀢𑀺 𑀧𑀭𑀯𑀸𑀤𑀻 𑀘.

‘‘𑀦𑀸𑀴𑀺𑀓𑁂𑀭𑀲𑁆𑀲 𑀬𑀁 𑀢𑁄𑀬𑀁, 𑀧𑀼𑀭𑀸𑀡𑀁 𑀧𑀺𑀢𑁆𑀢𑀩𑀦𑁆𑀥𑀦𑀁;

𑀢𑀫𑁂𑀯 𑀢𑀭𑀼𑀡𑀁 𑀢𑁄𑀬𑀁, 𑀧𑀺𑀢𑁆𑀢𑀖𑀁 𑀩𑀮𑀩𑀦𑁆𑀥𑀦’’𑀦𑁆𑀢𑀺. 𑁋

𑀏𑀯𑀁 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑁂 𑀲𑀓𑀯𑀸𑀤𑀻 𑀥𑀜𑁆𑀜𑀨𑀮𑀲𑁆𑀲 𑀕𑀢𑀺𑀓𑀢𑁆𑀢𑀸, 𑀆𑀳𑀸𑀭𑀢𑁆𑀣𑀲𑁆𑀲 𑀘 𑀨𑀭𑀡𑀢𑁄 ‘‘𑀬𑀸𑀯𑀓𑀸𑀮𑀺𑀓𑀫𑁂𑀯 𑀢’’𑀦𑁆𑀢𑀺 𑀯𑀤𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀭𑁄 𑀆𑀘𑀭𑀺𑀬𑀯𑀸𑀤𑀦𑁆𑀢𑀺 ‘‘𑀲𑀼𑀗𑁆𑀓𑀁 𑀧𑀭𑀺𑀳𑀭𑀢𑀻𑀢𑀺 𑀏𑀢𑁆𑀣 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀧𑀭𑀺𑀳𑀭𑀢𑀺, 𑀅𑀯𑀳𑀸𑀭𑁄 𑀏𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 ‘‘𑀢𑀣𑀸 𑀓𑀭𑁄𑀦𑁆𑀢𑁄 𑀧𑀸𑀭𑀸𑀚𑀺𑀓𑀫𑀸𑀧𑀚𑁆𑀚𑀢𑀻’’𑀢𑀺 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑁂 𑀲𑀓𑀯𑀸𑀤𑀻 ‘‘𑀲𑀼𑀗𑁆𑀓𑀁 𑀧𑀭𑀺𑀳𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀲𑀼𑀢𑁆𑀢𑀁 𑀢𑀢𑁆𑀣𑁂𑀯 𑀆𑀕𑀢𑀫𑀳𑀸𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀲𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀲𑁂𑀥𑁂𑀢𑀺, 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺. 𑀧𑀭𑁄 𑀅𑀢𑁆𑀢𑀦𑁄𑀫𑀢𑀻𑀢𑀺 𑀏𑀢𑁆𑀣 ‘‘𑀧𑀼𑀭𑁂𑀪𑀢𑁆𑀢𑀁 𑀧𑀭𑀲𑀦𑁆𑀢𑀓𑀁 𑀅𑀯𑀳𑀭𑀸𑀢𑀺 𑀧𑀼𑀭𑁂𑀪𑀢𑁆𑀢𑀫𑁂𑀯 𑀳𑀭𑀺𑀲𑁆𑀲𑀸𑀫𑀻𑀢𑀺 𑀯𑀸𑀬𑀫𑀦𑁆𑀢𑀲𑁆𑀲 𑀧𑀘𑁆𑀙𑀸𑀪𑀢𑁆𑀢𑀁 𑀳𑁄𑀢𑀺, 𑀧𑀼𑀭𑁂𑀪𑀢𑁆𑀢𑀧𑀬𑁄𑀕𑁄𑀯 𑀲𑁄, 𑀢𑀲𑁆𑀫𑀸 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀢𑀼𑀫𑁆𑀳𑀸𑀓𑀁 𑀣𑁂𑀭𑀯𑀸𑀤𑀢𑁆𑀢𑀸 𑀫𑀽𑀮𑀝𑁆𑀞𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑁂 𑀲𑀓𑀯𑀸𑀤𑀻 ‘‘𑀢𑀁 𑀲𑀗𑁆𑀓𑁂𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁧𑁧𑁯) 𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑀺.

𑀧𑀭𑁄 𑀲𑀼𑀢𑁆𑀢𑀦𑁆𑀢𑀺 ‘‘𑀅𑀦𑀺𑀬𑀢𑀳𑁂𑀢𑀼𑀥𑀫𑁆𑀫𑁄 𑀲𑀫𑁆𑀫𑀢𑁆𑀢𑀦𑀺𑀬𑀢𑀳𑁂𑀢𑀼𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀲𑀼𑀢𑁆𑀢𑀁 𑀧𑀝𑁆𑀞𑀸𑀦𑁂 𑀮𑀺𑀔𑀺𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀭𑀺𑀬𑀫𑀕𑁆𑀕𑀲𑁆𑀲 𑀦 𑀦𑀺𑀩𑁆𑀩𑀸𑀦𑀫𑁂𑀯𑀸𑀭𑀫𑁆𑀫𑀡’’𑀦𑁆𑀢𑀺 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑁂 𑀲𑀓𑀯𑀸𑀤𑀻 ‘‘𑀆𑀭𑀫𑁆𑀫𑀡𑀢𑁆𑀢𑀺𑀓𑀸𑀤𑀺𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀦 𑀑𑀢𑀭𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀭𑀦𑁆𑀢𑀁𑀬𑁂𑀯 𑀳𑀺 𑀲𑀼𑀢𑁆𑀢𑀁 𑀦𑀸𑀫, 𑀦𑁂𑀢𑀭𑀁. 𑀢𑁂𑀦 𑀯𑀼𑀢𑁆𑀢𑀁 𑀧𑀸𑀴𑀺𑀆𑀕𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 𑀏𑀢𑁆𑀢𑀓𑁂𑀦𑀧𑀺 𑀲𑀺𑀤𑁆𑀥𑁂 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀧𑀸𑀴𑀺𑀆𑀕𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀺. 𑀢𑀸𑀤𑀺𑀲𑀜𑁆𑀳𑀺 𑀧𑀫𑀸𑀤𑀮𑁂𑀔𑀦𑁆𑀢𑀺 𑀆𑀘𑀭𑀺𑀬𑁄. ‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀁 𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤’’𑀦𑁆𑀢𑀺 (𑀥. 𑀧. 𑁨𑁧; 𑀦𑁂𑀢𑁆𑀢𑀺. 𑁨𑁬) 𑀯𑀘𑀦𑀢𑁄 𑀤𑀺𑀦𑁆𑀦𑀪𑁄𑀚𑀦𑁂 𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀲𑁆𑀲𑀬𑀸𑀦𑀺 𑀧𑀭𑀺𑀯𑀚𑁆𑀚𑀺𑀢𑁆𑀯𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀦𑀺𑀘𑁆𑀘𑁄 𑀳𑁄𑀢𑀻𑀢𑀺. 𑀏𑀯𑀭𑀽𑀧𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀆𑀭𑀼𑀴𑁆𑀳𑀫𑁆𑀧𑀺 𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀢𑁂𑀦 𑀯𑀼𑀢𑁆𑀢𑀁 𑀦𑁄 𑀘𑁂 𑀢𑀣𑀸 𑀧𑀜𑁆𑀜𑀸𑀬𑀢𑀻𑀢𑀺 𑀲𑀺𑀤𑁆𑀥𑁂𑀧𑀺 ‘‘𑀦𑁄 𑀘𑁂 𑀢𑀣𑀸 𑀧𑀜𑁆𑀜𑀸𑀬𑀢𑀺, 𑀦 𑀑𑀢𑀭𑀢𑀺 𑀦 𑀲𑀫𑁂𑀢𑀻’’𑀢𑀺. ‘‘𑀩𑀸𑀳𑀺𑀭𑀓𑀲𑀼𑀢𑁆𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀲𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑁂𑀦 𑀅𑀲𑀫𑁂𑀦𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀧𑀭𑁄 𑀆𑀘𑀭𑀺𑀬𑀯𑀸𑀤𑀦𑁆𑀢𑀺𑀆𑀤𑀻𑀲𑀼 𑀤𑁆𑀯𑀻𑀲𑀼 𑀦𑀬𑁂𑀲𑀼 𑀧𑀫𑀸𑀤𑀮𑁂𑀔𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀝𑁆𑀞𑀓𑀣𑀸𑀯𑀘𑀦𑀁 𑀣𑁂𑀭𑀯𑀸𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀆𑀘𑀭𑀺𑀬𑀯𑀸𑀤𑀁. 𑀧𑀭𑁄 𑀲𑀼𑀢𑁆𑀢𑀦𑁆𑀢𑀺 𑀧𑀭𑀯𑀸𑀤𑀺𑀦𑀸 ‘‘𑀫𑀽𑀮𑀩𑀻𑀚𑀁 𑀦𑀸𑀫 𑀳𑀮𑀺𑀤𑁆𑀤𑀺 𑀲𑀺𑀗𑁆𑀕𑀺𑀯𑁂𑀭𑀁 𑀯𑀘𑀸…𑀧𑁂… 𑀩𑀻𑀚𑁂 𑀩𑀻𑀚𑀲𑀜𑁆𑀜𑀻 𑀙𑀺𑀦𑁆𑀤𑀢𑀺 𑀯𑀸 𑀙𑁂𑀤𑀸𑀧𑁂𑀢𑀺 𑀯𑀸 𑀪𑀺𑀦𑁆𑀤𑀢𑀺 𑀯𑀸…𑀧𑁂… 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 (𑀧𑀸𑀘𑀺. 𑁯𑁧) 𑀢𑀼𑀫𑁆𑀳𑀸𑀓𑀁 𑀧𑀸𑀞𑀢𑁆𑀢𑀸 𑀳𑀮𑀺𑀤𑁆𑀤𑀺𑀕𑀡𑁆𑀞𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀓𑀯𑀸𑀤𑀻 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺 𑀅𑀢𑁆𑀣𑀺 𑀫𑀽𑀮𑁂 𑀲𑀜𑁆𑀚𑀸𑀬𑀦𑁆𑀢𑀻’’𑀢𑀺𑀆𑀤𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀅𑀝𑁆𑀞𑀓𑀣𑀸𑀲𑀗𑁆𑀔𑀸𑀢𑁂𑀦 𑀆𑀘𑀭𑀺𑀬𑀯𑀸𑀤𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀦 𑀳𑀺 𑀕𑀡𑁆𑀞𑀺𑀫𑁆𑀳𑀺 𑀕𑀡𑁆𑀞𑀺 𑀚𑀸𑀬𑀢𑀻𑀢𑀺. 𑀧𑀭𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑁆𑀢𑀺 𑀧𑀭𑀯𑀸𑀤𑀺𑀦𑀸 ‘‘𑀅𑀦𑀸𑀧𑀢𑁆𑀢𑀺 𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄𑀢𑀺 𑀯𑀘𑀦𑀲𑁆𑀲𑀸𑀦𑀼𑀮𑁄𑀫𑀢𑁄 ‘𑀅𑀫𑁆𑀳𑀸𑀓𑀁 𑀧𑁄𑀭𑀸𑀡𑀪𑀺𑀓𑁆𑀔𑀽 𑀏𑀓𑀧𑀸𑀲𑀸𑀤𑁂 𑀕𑀩𑁆𑀪𑀁 𑀣𑀓𑁂𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀬𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀢𑀣𑀸 𑀓𑀢𑁆𑀯𑀸 𑀆𑀕𑀢𑀸, 𑀢𑀲𑁆𑀫𑀸 𑀅𑀫𑁆𑀳𑀸𑀓𑀁 𑀯𑀝𑁆𑀝𑀢𑀻’𑀢𑀺 𑀢𑀼𑀫𑁆𑀳𑁂𑀲𑀼 𑀏𑀯 𑀏𑀓𑀘𑁆𑀘𑁂𑀲𑀼 𑀯𑀤𑀦𑁆𑀢𑁂𑀲𑀼 𑀢𑀼𑀫𑁆𑀳𑀸𑀓𑀁 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑁂 𑀲𑀓𑀯𑀸𑀤𑀻 ‘‘𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀜𑁆𑀘 𑀉𑀕𑁆𑀕𑀳𑀺𑀢𑀓𑀸𑀦𑀁𑀬𑁂𑀯 𑀆𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄 𑀧𑀫𑀸𑀡’’𑀦𑁆𑀢𑀺𑀆𑀤𑀺𑀅𑀝𑁆𑀞𑀓𑀣𑀸𑀯𑀘𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀲𑁂𑀥𑁂𑀢𑀺. 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀦𑁆𑀢𑀺 ‘‘𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑀸𑀧𑀼𑀘𑁆𑀙𑀸 𑀲𑀬𑀺𑀢𑁂𑀲𑀼 𑀓𑁂 𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀏𑀢𑁆𑀣 𑀧𑀦 𑀤𑁆𑀯𑁂𑀧𑀺 𑀚𑀦𑀸 𑀫𑀼𑀘𑁆𑀘𑀦𑁆𑀢𑀺 𑀬𑁄 𑀘 𑀬𑀓𑁆𑀔𑀕𑀳𑀺𑀢𑀓𑁄, 𑀬𑁄 𑀘 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑁄𑀢𑀺 𑀢𑀼𑀫𑁆𑀳𑀸𑀓𑀁 𑀣𑁂𑀭𑀯𑀸𑀤𑀢𑁆𑀢𑀸 𑀅𑀜𑁆𑀜𑁂 𑀲𑀩𑁆𑀩𑁂𑀧𑀺 𑀬𑀣𑀸 𑀢𑀣𑀸 𑀯𑀸 𑀦𑀺𑀧𑀦𑁆𑀦𑀸𑀤𑀬𑁄𑀧𑀺 𑀫𑀼𑀘𑁆𑀘𑀦𑁆𑀢𑀻𑀢𑀺 𑀧𑀝𑀺𑀲𑁂𑀥𑁂𑀢𑀺.

𑀅𑀣 𑀧𑀦𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁. 𑀧𑀭𑁄 𑀲𑀼𑀢𑁆𑀢𑀦𑁆𑀢𑀺 ‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺 𑀧𑀭𑀯𑀸𑀤𑀺𑀦𑀸 𑀕𑀼𑀢𑁆𑀢𑁂 𑀲𑀓𑀯𑀸𑀤𑀻 ‘‘𑀤𑀺𑀯𑀸 𑀓𑀺𑀮𑀦𑁆𑀢𑀭𑀽𑀧𑁄 𑀫𑀜𑁆𑀘𑁂 𑀦𑀺𑀲𑀺𑀦𑁆𑀦𑁄 𑀧𑀸𑀤𑁂 𑀪𑀽𑀫𑀺𑀢𑁄 𑀅𑀫𑁄𑀘𑁂𑀢𑁆𑀯𑀸𑀯 𑀦𑀺𑀤𑁆𑀤𑀸𑀯𑀲𑁂𑀦 𑀦𑀺𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺𑀆𑀤𑀺𑀅𑀝𑁆𑀞𑀓𑀣𑀸𑀯𑀘𑀦𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁭𑁭) 𑀤𑀲𑁆𑀲𑁂𑀢𑁆𑀯𑀸 𑀏𑀓𑀪𑀗𑁆𑀕𑁂𑀦 𑀦𑀺𑀧𑀦𑁆𑀦𑀸𑀤𑀬𑁄𑀧𑀺 𑀫𑀼𑀘𑁆𑀘𑀦𑁆𑀢𑀻𑀢𑀺 𑀧𑀝𑀺𑀲𑁂𑀥𑁂𑀢𑀺. 𑀅𑀣𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁. 𑀧𑀭𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑁆𑀢𑀺 ‘‘𑀤𑁄𑀫𑀦𑀲𑁆𑀲𑀁 𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺𑀆𑀤𑀺𑀯𑀘𑀦𑁂𑀳𑀺 (𑀤𑀻. 𑀦𑀺. 𑁨.𑁩𑁬𑁦) 𑀲𑀁𑀲𑀦𑁆𑀤𑀦𑀢𑁄 𑀲𑀤𑀸𑀭𑀧𑁄𑀲𑁂 𑀤𑁄𑀲𑁄 𑀢𑀼𑀫𑁆𑀳𑀸𑀓𑀁 𑀦𑀢𑁆𑀣𑀺, 𑀢𑁂𑀦 𑀯𑀼𑀢𑁆𑀢𑀁 ‘𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑁄’’’𑀢𑀺 (𑀔𑀼. 𑀧𑀸. 𑁫.𑁬; 𑀲𑀼. 𑀦𑀺. 𑁨𑁬𑁫) 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑁂 𑀓𑀺𑀜𑁆𑀘𑀸𑀧𑀺 𑀲𑀓𑀯𑀸𑀤𑀻 𑀩𑀳𑀼𑀲𑁆𑀲𑀼𑀢𑁄 𑀦 𑀳𑁄𑀢𑀺, 𑀅𑀣 𑀔𑁄 𑀭𑀸𑀕𑀲𑀳𑀺𑀢𑁂𑀦𑁂𑀯 𑀅𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑁂𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑀣𑀸𑀧𑀺 𑀅𑀦𑀼𑀭𑀽𑀧𑀢𑁄 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀁 𑀲𑀩𑁆𑀩𑀁 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀸𑀤𑀬𑁄 𑀆𑀳𑀼. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀧𑀦 ‘‘𑀏𑀢𑁆𑀣 𑀧𑀭𑁄𑀢𑀺 𑀯𑀼𑀢𑁆𑀢𑁄 𑀅𑀜𑁆𑀜𑀦𑀺𑀓𑀸𑀬𑀺𑀓𑁄, 𑀲𑁄 𑀧𑀦 𑀅𑀢𑁆𑀢𑀦𑁄 𑀲𑀼𑀢𑁆𑀢𑀸𑀤𑀻𑀦𑀺𑀬𑁂𑀯 𑀆𑀳𑀭𑀢𑀺. 𑀢𑀸𑀦𑀺 𑀲𑀓𑀯𑀸𑀤𑀻 𑀅𑀢𑁆𑀢𑀦𑁄 𑀲𑀼𑀢𑁆𑀢𑀸𑀤𑀺𑀫𑁆𑀳𑀺 𑀑𑀢𑀸𑀭𑁂𑀢𑁆𑀯𑀸 𑀲𑀘𑁂 𑀲𑀫𑁂𑀢𑀺 𑀕𑀡𑁆𑀳𑀸𑀢𑀺, 𑀦𑁄 𑀘𑁂 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺 𑀯𑀤𑀢𑀺.

𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀧𑀦 𑀓𑀺𑀜𑁆𑀘𑀸𑀧𑀺 𑀬𑁄 𑀧𑀦𑀸𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀧𑀤𑀁, 𑀢𑀣𑀸𑀧𑀺 𑀪𑀺𑀓𑁆𑀔𑀽𑀢𑀺 𑀇𑀫𑀺𑀦𑀸 𑀧𑀭𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 𑀢𑀤𑀦𑀼𑀭𑀽𑀧𑀸𑀦𑁂𑀯𑀲𑁆𑀲 𑀯𑀺𑀪𑀗𑁆𑀕𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀪𑀺𑀓𑁆𑀔𑀼𑀦𑀺𑀩𑁆𑀩𑀘𑀦𑀧𑀤𑀸𑀦𑀺 𑀢𑀻𑀡𑀺 𑀓𑀺𑀜𑁆𑀘𑀸𑀧𑀺 𑀲𑀪𑀺𑀓𑁆𑀔𑀼𑀪𑀸𑀯𑀲𑁆𑀲, 𑀅𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀘𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀩𑁆𑀩𑀚𑀺𑀢𑀲𑁆𑀲 𑀲𑀸𑀥𑀸𑀭𑀡𑀸𑀦𑀺, 𑀢𑀣𑀸𑀧𑀺 ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀺𑀲𑀼𑀢𑁆𑀢𑀁 𑀦𑀺𑀩𑁆𑀩𑀘𑀦𑀢𑁆𑀣𑀬𑀼𑀢𑁆𑀢𑁄𑀯 𑀧𑀼𑀕𑁆𑀕𑀮𑁄 ‘‘𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁮𑁯) 𑀏𑀢𑁆𑀣 𑀯𑀢𑁆𑀣𑀼, 𑀦 𑀇𑀢𑀭𑁄 𑀕𑀺𑀳𑀺𑀪𑀽𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀲𑁆𑀲𑀧𑀺 𑀯𑀺𑀦𑀬𑀧𑀺𑀝𑀓𑀲𑁆𑀲 𑀲𑀸𑀥𑀸𑀭𑀡𑀁 𑀪𑀺𑀓𑁆𑀔𑀼𑀮𑀓𑁆𑀔𑀡𑀁 𑀯𑀢𑁆𑀣𑀼𑀜𑁆𑀳𑀺 𑀪𑀕𑀯𑀸 𑀆𑀭𑀪𑀺. 𑀬𑁄 𑀧𑀦 𑀲𑀼𑀤𑁆𑀥𑁄 𑀏𑀯 𑀲𑀫𑀸𑀦𑁄 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑁄, 𑀲𑁄 𑀅𑀢𑁆𑀢𑀦𑁄 𑀲𑀪𑀺𑀓𑁆𑀔𑀼𑀪𑀸𑀯𑀢𑁆𑀢𑀸 𑀏𑀯 𑀯𑀢𑁆𑀣𑀼 𑀳𑁄𑀢𑀺, 𑀅𑀲𑀼𑀤𑁆𑀥𑁄𑀧𑀺 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 𑀞𑀺𑀢𑀢𑁆𑀢𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀲𑀼𑀤𑁆𑀥𑁄𑀧𑀺 𑀜𑀸𑀢𑀓𑁂𑀳𑀺, 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀯𑀸 𑀭𑀸𑀚𑀪𑀬𑀸𑀤𑀺𑀓𑀸𑀭𑀡𑁂𑀦 𑀯𑀸 𑀓𑀸𑀲𑀸𑀯𑁂𑀲𑀼 𑀲𑀉𑀲𑁆𑀲𑀸𑀳𑁄𑀯 𑀅𑀧𑀦𑀻𑀢𑀓𑀸𑀲𑀸𑀯𑁄 𑀯𑀢𑁆𑀣𑀼 𑀏𑀯 𑀧𑀼𑀦 𑀓𑀸𑀲𑀸𑀯𑀕𑁆𑀕𑀳𑀡𑁂𑀦 𑀣𑁂𑀬𑁆𑀬𑀲𑀁𑀯𑀸𑀲𑀓𑀪𑀸𑀯𑀸𑀦𑀼𑀧𑀕𑀫𑀦𑀢𑁄, 𑀪𑀺𑀓𑁆𑀔𑀼𑀦𑀺𑀩𑁆𑀩𑀘𑀦𑀢𑁆𑀣𑁂 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀧𑀦 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀪𑀺𑀓𑁆𑀔𑀼𑀦𑀺𑀩𑁆𑀩𑀘𑀦𑀢𑁆𑀣𑀁 𑀲𑀬𑀜𑁆𑀘 𑀅𑀚𑁆𑀛𑀼𑀧𑀕𑀢𑁄, 𑀲𑀁𑀯𑀸𑀲𑀁 𑀣𑁂𑀦𑁂𑀦𑁆𑀢𑁄, 𑀢𑀜𑁆𑀘𑁂 𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

‘‘𑀲𑀫𑀜𑁆𑀜𑀸𑀬 𑀪𑀺𑀓𑁆𑀔𑀼 𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀽’’𑀢𑀺 𑀯𑀘𑀦𑀤𑁆𑀯𑀬𑀁 𑀬𑀣𑀸𑀯𑀼𑀢𑁆𑀢𑀜𑁆𑀘 𑀅𑀢𑁆𑀣𑀁 𑀉𑀧𑀩𑁆𑀭𑀽𑀳𑁂𑀢𑀺, 𑀅𑀦𑁆𑀢𑀭𑀸 𑀉𑀧𑁆𑀧𑀦𑁆𑀦𑀸𑀬 𑀦𑀺𑀬𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀉𑀧𑀘𑁆𑀙𑀺𑀦𑁆𑀦𑀓𑀼𑀲𑀮𑀫𑀽𑀮𑁄 𑀓𑁂𑀯𑀮𑀸𑀬 𑀲𑀫𑀜𑁆𑀜𑀸𑀬, 𑀧𑀝𑀺𑀜𑁆𑀜𑀸𑀬 𑀘 ‘‘𑀪𑀺𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺, 𑀦 𑀧𑀭𑀫𑀢𑁆𑀣𑀢𑁄𑀢𑀺 𑀇𑀫𑀁 𑀅𑀢𑀺𑀭𑁂𑀓𑀢𑁆𑀣𑀁 𑀤𑀻𑀧𑁂𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀯𑀚𑁆𑀚𑀸𑀦𑀻’’𑀢𑀺 𑀆𑀳𑀘𑁆𑀘𑀪𑀸𑀲𑀺𑀢𑀁 𑀲𑀗𑁆𑀕𑀻𑀢𑀺𑀢𑁆𑀢𑀬𑀸𑀭𑀼𑀴𑁆𑀳𑀁 𑀲𑀼𑀢𑁆𑀢𑀁, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺𑀲𑁆𑀲 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸 𑀏𑀢𑁂𑀲𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀻’’𑀢𑀺 (𑀅. 𑀦𑀺. 𑁧.𑁩𑁧𑁦) 𑀯𑀼𑀢𑁆𑀢𑀁. 𑀧𑀜𑁆𑀘 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀫𑀳𑀸𑀲𑀸𑀯𑀚𑁆𑀚𑀸𑀦𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦 𑀫𑀳𑀸𑀲𑀸𑀯𑀚𑁆𑀚𑀢𑀭𑀸𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺. 𑀓𑀲𑁆𑀫𑀸? 𑀢𑁂𑀲𑀜𑁆𑀳𑀺 𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀲𑀩𑁆𑀩𑀩𑀮𑀯𑀫𑁆𑀧𑀺 𑀓𑀧𑁆𑀧𑀝𑁆𑀞𑀺𑀢𑀺𑀓𑀫𑁂𑀯 𑀳𑁄𑀢𑀺, 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀢𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀓𑀭𑀡𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀯𑀺𑀚𑁆𑀚𑀦𑁆𑀢𑀻’’𑀢𑀺 𑀯𑀸 ‘‘𑀲𑀼𑀤𑁆𑀥𑁄𑀯𑀸𑀬’’𑀦𑁆𑀢𑀺 𑀯𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. ‘‘𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 ‘‘𑀅𑀲𑀼𑀤𑁆𑀥𑁄’’𑀢𑀺 𑀯𑀸 ‘‘𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄’’𑀢𑀺 𑀯𑀸 𑀯𑀢𑁆𑀢𑀼𑀁. 𑀏𑀲 𑀳𑀺 𑀉𑀪𑁄𑀧𑀺 𑀧𑀓𑁆𑀔𑁂 𑀦 𑀪𑀚𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀜𑁆𑀜𑀸𑀬, 𑀧𑀝𑀺𑀜𑁆𑀜𑀸𑀬 𑀘 𑀪𑀺𑀓𑁆𑀔𑀼, 𑀦 𑀧𑀭𑀫𑀢𑁆𑀣𑀢𑁄’’𑀢𑀺.

𑀓𑀺𑀫𑀢𑁆𑀣𑀁 𑀧𑀦𑁂𑀯𑀁 𑀫𑀳𑀸𑀲𑀸𑀯𑀚𑁆𑀚𑀸𑀬 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀸𑀭𑀸𑀚𑀺𑀓𑀁 𑀪𑀕𑀯𑀸 𑀦 𑀧𑀜𑁆𑀜𑀧𑁂𑀲𑀻𑀢𑀺? 𑀤𑀼𑀩𑁆𑀩𑀺𑀚𑀸𑀦𑀢𑁆𑀢𑀸. 𑀧𑀓𑀢𑀺𑀬𑀸𑀧𑁂𑀲𑀸 𑀤𑀺𑀝𑁆𑀞𑀺 𑀦𑀸𑀫 ‘‘𑀲𑀫𑁆𑀫𑀸’’𑀢𑀺 𑀯𑀸 ‘‘𑀫𑀺𑀘𑁆𑀙𑀸’’𑀢𑀺 𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸, 𑀧𑀕𑁂𑀯 ‘‘𑀦𑀺𑀬𑀢𑀸’’𑀢𑀺 𑀯𑀸 ‘‘𑀅𑀦𑀺𑀬𑀢𑀸’’𑀢𑀺 𑀯𑀸𑀢𑀺. 𑀢𑀢𑁆𑀣 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸𑀬 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑀤𑀺𑀝𑁆𑀞𑀺𑀓𑀁 𑀧𑀸𑀭𑀸𑀚𑀺𑀓𑀁 𑀫𑀜𑁆𑀜𑀫𑀸𑀦𑀸 𑀉𑀧𑁄𑀲𑀣𑀸𑀤𑀻𑀦𑀺 𑀅𑀓𑀢𑁆𑀯𑀸 𑀅𑀘𑀺𑀭𑁂𑀦𑁂𑀯 𑀲𑀸𑀲𑀦𑀁 𑀯𑀺𑀦𑀸𑀲𑁂𑀬𑁆𑀬𑀼𑀁, 𑀲𑀬𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀼𑀁 𑀲𑀼𑀤𑁆𑀥𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀚𑁆𑀚𑀦𑁂𑀦. 𑀢𑀲𑁆𑀫𑀸 𑀉𑀧𑀸𑀬𑀓𑀼𑀲𑀮𑀢𑀸𑀬 𑀧𑀸𑀭𑀸𑀚𑀺𑀓𑀁 𑀅𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁, 𑀲𑀫𑁆𑀫𑀸𑀯𑀢𑁆𑀢𑀜𑁆𑀘 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀁 𑀲𑀗𑁆𑀖𑁂𑀦 𑀅𑀲𑀫𑁆𑀪𑁄𑀕𑀁, 𑀅𑀲𑀁𑀯𑀸𑀲𑀜𑁆𑀘 𑀅𑀓𑀸𑀲𑀺. 𑀪𑀕𑀯𑀸 𑀳𑀺 𑀢𑀲𑁆𑀲 𑀘𑁂 𑀏𑀲𑀸 𑀤𑀺𑀝𑁆𑀞𑀺 𑀅𑀦𑀺𑀬𑀢𑀸, 𑀲𑀫𑁆𑀫𑀸𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀑𑀲𑀸𑀭𑀡𑀁 𑀮𑀪𑀺𑀢𑁆𑀯𑀸 𑀧𑀓𑀢𑀢𑁆𑀢𑁄 𑀪𑀯𑁂𑀬𑁆𑀬. 𑀦𑀺𑀬𑀢𑀸 𑀘𑁂, 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀲𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀲𑀫𑁆𑀫𑀸𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀑𑀲𑀸𑀭𑀡𑀁 𑀮𑀪𑀺𑀢𑁆𑀯𑀸 𑀧𑀓𑀢𑀢𑁆𑀢𑁄 𑀪𑀯𑁂𑀬𑁆𑀬. 𑀓𑁂𑀯𑀮𑀁 ‘‘𑀲𑀫𑀜𑁆𑀜𑀸𑀬𑀪𑀺𑀓𑁆𑀔𑀼 𑀧𑀝𑀺𑀜𑁆𑀜𑀸𑀬𑀪𑀺𑀓𑁆𑀔𑀽’’𑀢𑀺 𑀦𑀸𑀫𑀫𑀢𑁆𑀢𑀥𑀸𑀭𑀓𑁄 𑀳𑀼𑀢𑁆𑀯𑀸 𑀧𑀭𑀁 𑀫𑀭𑀡𑀸 𑀅𑀭𑀺𑀝𑁆𑀞𑁄 𑀯𑀺𑀬 𑀲𑀁𑀲𑀸𑀭𑀔𑀸𑀡𑀼𑀓𑁄𑀯 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀁 𑀦𑀬𑀁 𑀅𑀤𑁆𑀤𑀲.

𑀅𑀝𑁆𑀞𑀲𑀼 𑀉𑀧𑀲𑀫𑁆𑀧𑀤𑀸𑀲𑀼 𑀢𑀺𑀲𑁆𑀲𑁄𑀯𑁂𑀢𑁆𑀣 𑀯𑀼𑀢𑁆𑀢𑀸, 𑀦 𑀇𑀢𑀭𑀸 𑀧𑀸𑀝𑀺𑀧𑀼𑀕𑁆𑀕𑀮𑀢𑁆𑀢𑀸, 𑀪𑀺𑀓𑁆𑀔𑀽𑀦𑀁 𑀅𑀲𑀦𑁆𑀢𑀓𑀢𑁆𑀢𑀸 𑀘. 𑀢𑀢𑁆𑀣 𑀳𑀺 𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀏𑀯, 𑀲𑁂𑀲𑀸 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀓𑀸𑀢𑀺 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸, 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀉𑀧𑀲𑀫𑁆𑀧𑀤𑀸𑀦𑀁 𑀫𑀚𑁆𑀛𑁂 ‘‘𑀪𑀤𑁆𑀭𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺 𑀢𑀺𑀲𑁆𑀲𑀦𑁆𑀦𑀁 𑀲𑀸𑀥𑀸𑀭𑀡𑀢𑁆𑀢𑀸. 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀯𑀸 𑀲𑀭𑀡𑀕𑀫𑀦𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀯𑀸 𑀉𑀧𑀲𑀫𑁆𑀧𑀦𑁆𑀦𑁄 𑀳𑀺 𑀪𑀤𑁆𑀭𑁄 𑀘 𑀲𑀸𑀭𑁄 𑀘 𑀲𑁂𑀓𑁆𑀔𑁄 𑀘 𑀅𑀲𑁂𑀓𑁆𑀔𑁄 𑀘 𑀳𑁄𑀢𑀺, 𑀉𑀧𑀲𑀫𑁆𑀧𑀤𑀯𑀘𑀦𑀁 𑀧𑀦 𑀦𑁂𑀲𑀁 𑀲𑀸𑀯𑀓𑀪𑀸𑀯𑀤𑀻𑀧𑀦𑀢𑁆𑀣𑀁. 𑀇𑀫𑁂 𑀏𑀯 𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘.

𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄𑀢𑀺 𑀏𑀢𑁆𑀣 𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑁂𑀯 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑀸. 𑀦 𑀳𑀺 𑀅𑀜𑁆𑀜𑁂 𑀏𑀳𑀺𑀪𑀺𑀓𑁆𑀔𑀼𑀲𑀭𑀡𑀕𑀫𑀦𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀳𑀺 𑀉𑀧𑀲𑀫𑁆𑀧𑀦𑁆𑀦𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑀸, 𑀢𑁂𑀦𑁂𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽’’𑀢𑀺 𑀅𑀦𑁆𑀢𑀺𑀫𑁄𑀯 𑀯𑀼𑀢𑁆𑀢𑁄𑀢𑀺 𑀓𑀺𑀭 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄, 𑀢𑀁 𑀅𑀬𑀼𑀢𑁆𑀢𑀁. ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀪𑀩𑁆𑀩𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘𑀸’’𑀢𑀺 (𑀧𑀭𑀺. 𑁩𑁨𑁨) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺. 𑀅𑀜𑁆𑀜𑀣𑀸 𑀏𑀳𑀺𑀪𑀺𑀓𑁆𑀔𑀼𑀆𑀤𑀬𑁄𑀧𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀩𑁆𑀩𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘𑀸’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀘, 𑀅𑀧𑀺𑀘 𑀆𑀧𑀢𑁆𑀢𑀺𑀪𑀬𑀝𑁆𑀞𑀸𑀦𑀤𑀲𑁆𑀲𑀦𑀢𑁄 𑀘. 𑀓𑀣𑀁? 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀯𑀲𑀣𑀧𑀺𑀡𑁆𑀟𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀦 𑀧𑀝𑀺𑀕𑁆𑀕𑀳𑁂𑀲𑀺, 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀪𑀬𑀸 𑀘 𑀲𑀩𑁆𑀩𑀁 𑀢𑀺𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀦𑀤𑀺𑀁 𑀢𑀭𑀦𑁆𑀢𑁄 𑀫𑀦𑀁 𑀯𑀼𑀴𑁆𑀳𑁄 𑀅𑀳𑁄𑀲𑀺 𑀫𑀳𑀸𑀓𑀲𑁆𑀲𑀧𑁄. 𑀓𑀺𑀜𑁆𑀘 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑁂 𑀆𑀭𑀩𑁆𑀪 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀸𑀤𑀻𑀦𑀺 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀸𑀦𑀁 𑀦𑁂𑀲𑀁 𑀤𑀼𑀓𑁆𑀓𑀝𑀸𑀦𑀺 𑀘 𑀧𑀜𑁆𑀜𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀤𑀼𑀩𑁆𑀩𑀺𑀘𑀸𑀭𑀺𑀢𑀫𑁂𑀢𑀁. 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀬 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸𑀬 𑀅𑀦𑀼𑀜𑁆𑀜𑀸𑀢𑀧𑁆𑀧𑀲𑀗𑁆𑀕𑀪𑀬𑀸𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄, 𑀆𑀧𑀢𑁆𑀢𑀺𑀬𑀸 𑀪𑀩𑁆𑀩𑀢𑀁 𑀲𑀦𑁆𑀥𑀸𑀬 𑀢𑀲𑁆𑀫𑀺𑀫𑁆𑀧𑀺 𑀯𑀼𑀢𑁆𑀢𑁂 𑀧𑀼𑀩𑁆𑀩𑁂 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀺 𑀲𑀸 𑀧𑀼𑀦 𑀏𑀯𑀁 𑀯𑀤𑀦𑁆𑀢𑁂𑀦 𑀅𑀦𑀼𑀜𑁆𑀜𑀸𑀢𑀸𑀢𑀺 𑀪𑀺𑀓𑁆𑀔𑀽𑀦𑀁 𑀫𑀺𑀘𑁆𑀙𑀸𑀕𑀸𑀳𑁄 𑀯𑀸 𑀯𑀺𑀫𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦 𑀯𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 ‘‘𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸’’𑀢𑀺 (𑀧𑀸𑀘𑀺. 𑁧𑁬𑁧) 𑀇𑀫𑀺𑀦𑀸 𑀲𑀫𑁂𑀢𑀺. 𑀇𑀤𑀜𑁆𑀳𑀺 𑀲𑀸𑀓𑀺𑀬𑀸𑀤𑀻𑀦𑀁 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸𑀬 𑀅𑀦𑀼𑀧𑁆𑀧𑀩𑀦𑁆𑀥𑀪𑀬𑀸 𑀯𑀼𑀢𑁆𑀢𑀁.

𑀅𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑁋 𑀪𑀺𑀓𑁆𑀔𑀼-𑀧𑀤𑀦𑀺𑀤𑁆𑀤𑁂𑀲𑀢𑁆𑀢𑀸 𑀬𑀢𑁆𑀢𑀓𑀸𑀦𑀺 𑀢𑁂𑀦 𑀧𑀤𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀬𑁂 𑀘 𑀯𑀺𑀦𑀬𑀧𑀺𑀝𑀓𑁂 𑀢𑀢𑁆𑀣 𑀢𑀢𑁆𑀣 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀲𑀬𑀁 𑀆𑀧𑀢𑁆𑀢𑀸𑀧𑀚𑁆𑀚𑀦𑀝𑁆𑀞𑁂𑀦 𑀯𑀸 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀧𑀝𑀺𑀘𑁆𑀙𑀸𑀤𑀦𑀸𑀤𑀻𑀲𑀼 𑀧𑀭𑁂𑀲𑀁 𑀆𑀧𑀢𑁆𑀢𑀺𑀓𑀭𑀡𑀝𑁆𑀞𑁂𑀦 𑀯𑀸, 𑀢𑁂 𑀲𑀩𑁆𑀩𑁂𑀧𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀤𑀺𑀤𑀁 𑀢𑀲𑁆𑀲 𑀪𑀺𑀓𑁆𑀔𑀼-𑀧𑀤𑀲𑁆𑀲 𑀯𑀺𑀲𑁂𑀲𑀦𑀢𑁆𑀣𑀁 𑀯𑀼𑀢𑁆𑀢𑀁 𑀧𑀭𑀧𑀤𑀁 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺, 𑀢𑀲𑁆𑀲 𑀯𑀲𑁂𑀦 𑀇𑀤𑀁 𑀯𑀼𑀢𑁆𑀢𑀁 ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽’’𑀢𑀺. 𑀲𑁄 𑀏𑀯 𑀳𑀺 𑀓𑀫𑁆𑀫𑀯𑀸𑀘𑀸𑀦𑀦𑁆𑀢𑀭𑀫𑁂𑀯 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀳𑁄𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀲𑀉𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁄, 𑀢𑀲𑁆𑀲𑁂𑀯 𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀤𑀺𑀲𑁆𑀲𑀢𑀺, 𑀦𑁂𑀢𑀭𑀲𑁆𑀲. 𑀢𑀲𑁆𑀲𑁂𑀯 𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀲𑀫𑁆𑀪𑀯𑀢𑀺 ‘‘𑀉𑀮𑁆𑀮𑀼𑀫𑁆𑀧𑀢𑀼 𑀫𑀁, 𑀪𑀦𑁆𑀢𑁂, 𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 (𑀫𑀳𑀸𑀯. 𑁭𑁧, 𑁧𑁨𑁬) 𑀯𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀢𑁆𑀢𑀸, 𑀢𑀲𑁆𑀲𑁂𑀯 𑀘 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀫𑁂𑀯 𑀅𑀓𑀭𑀡𑀻𑀬𑀦𑀺𑀲𑁆𑀲𑀬𑀸𑀘𑀺𑀓𑁆𑀔𑀦𑀤𑀲𑁆𑀲𑀦𑀢𑁄, 𑀯𑀺𑀦𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑁂𑀲𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀮𑀓𑁆𑀔𑀡𑀧𑀸𑀭𑀺𑀧𑀽𑀭𑀺𑀢𑁄 𑀘𑀸𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀉𑀧𑀸𑀤𑀸𑀬 𑀲𑁄 𑀏𑀯 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀲𑁆𑀫𑀸 𑀧𑀦𑀲𑁆𑀲 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀲𑀩𑁆𑀩𑀣𑀸 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀢𑀁 𑀢𑀁 𑀯𑀢𑁆𑀣𑀼𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀢𑀢𑁄 𑀢𑀢𑁄 𑀆𑀧𑀢𑁆𑀢𑀺𑀢𑁄 𑀅𑀦𑀸𑀧𑀢𑁆𑀢𑀺, 𑀇𑀢𑀭𑀲𑁆𑀲 𑀆𑀧𑀢𑁆𑀢𑀻’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀬𑀢𑁆𑀣 𑀬𑀢𑁆𑀣 𑀲𑀸𑀯𑀚𑁆𑀚𑀧𑀜𑁆𑀜𑀢𑁆𑀢𑀺, 𑀅𑀦𑀯𑀚𑁆𑀚𑀧𑀜𑁆𑀜𑀢𑁆𑀢𑀺 𑀯𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀤𑀚𑁆𑀛𑀸𑀘𑀸𑀭𑀢𑁆𑀣𑁂𑀦𑀸𑀬𑀫𑁂𑀯 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀅𑀥𑀺𑀧𑁆𑀧𑁂𑀢𑁄 𑀦𑀸𑀫𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀦𑁆𑀢𑁂 𑀬𑀁 𑀯𑀼𑀢𑁆𑀢𑀁 ‘‘𑀬𑀸𑀬 𑀓𑀸𑀬𑀘𑀺 𑀉𑀧𑀲𑀫𑁆𑀧𑀤𑀸𑀬 𑀅𑀬𑀁 𑀇𑀫𑀲𑁆𑀫𑀺𑀁 ‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’𑀢𑀺 𑀅𑀢𑁆𑀣𑁂 𑀪𑀺𑀓𑁆𑀔𑀽𑀢𑀺 𑀅𑀥𑀺𑀧𑁆𑀧𑁂𑀢𑁄’’𑀢𑀺, 𑀢𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯. 𑀓𑀣𑀁 𑀳𑁄𑀢𑀺? 𑀯𑀺𑀭𑁄𑀥𑀤𑁄𑀲𑁄𑀧𑀺 𑀧𑀭𑀺𑀳𑀢𑁄 𑀳𑁄𑀢𑀺. 𑀓𑀣𑀁? 𑀲𑀘𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀏𑀯 𑀇𑀥𑀸𑀥𑀺𑀧𑁆𑀧𑁂𑀢𑁄 ‘‘𑀪𑀺𑀓𑁆𑀔𑀽’’𑀢𑀺 𑀘 ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀘, 𑀢𑁂𑀦 𑀦 𑀉𑀧𑀲𑀫𑁆𑀧𑀦𑁆𑀦𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦𑀸𑀫𑀸𑀢𑀺 𑀓𑀢𑁆𑀯𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀢𑁄 𑀅𑀜𑁆𑀜𑀣𑀸 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀬𑁄 𑀇𑀢𑀭𑁂𑀲𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀲𑀳𑀲𑁂𑀬𑁆𑀬𑀧𑀤𑀲𑁄𑀥𑀫𑁆𑀫𑀸𑀧𑀢𑁆𑀢𑀺𑀁 𑀚𑀦𑁂𑀬𑁆𑀬𑀼𑀁, 𑀑𑀫𑀲𑀦𑀸𑀤𑀺𑀓𑀸𑀮𑁂 𑀘 𑀤𑀼𑀓𑁆𑀓𑀝𑀫𑁂𑀯 𑀚𑀦𑁂𑀬𑁆𑀬𑀼𑀦𑁆𑀢𑀺 𑀏𑀯𑀫𑀸𑀤𑀺𑀓𑁄 𑀯𑀺𑀭𑁄𑀥𑀤𑁄𑀲𑁄 𑀧𑀭𑀺𑀳𑀢𑁄 𑀳𑁄𑀢𑀻𑀢𑀺 𑀲𑀩𑁆𑀩𑀁 𑀆𑀘𑀭𑀺𑀬𑁄 𑀯𑀤𑀢𑀺. 𑀫𑀗𑁆𑀕𑀼𑀭𑀘𑁆𑀙𑀯𑀺 𑀦𑀸𑀫 𑀲𑀸𑀫𑁄.

𑀬𑀲𑁆𑀫𑀸 𑀢𑁂 𑀅𑀢𑀺𑀫𑀳𑀦𑁆𑀢𑁄 𑀚𑀸𑀢𑀺𑀫𑀤𑁄 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀫𑀫 𑀲𑀸𑀲𑀦𑁂 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁. ‘‘𑀲𑀸𑀢𑀲𑀳𑀕𑀢𑀸 𑀧𑀞𑀫𑀚𑁆𑀛𑀸𑀦𑀲𑀼𑀔𑀲𑀳𑀕𑀢𑀸 𑀅𑀲𑀼𑀪𑁂 𑀘 𑀆𑀦𑀸𑀧𑀸𑀦𑁂 𑀘𑀸’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀢𑀺 𑀉𑀤𑁆𑀥𑀼𑀫𑀸𑀢𑀓𑀦𑀺𑀫𑀺𑀢𑁆𑀢𑁂 𑀧𑀝𑀺𑀮𑀤𑁆𑀥𑀧𑀞𑀫𑀚𑁆𑀛𑀸𑀦𑀲𑀜𑁆𑀜𑀸. 𑀭𑀽𑀧𑀲𑀜𑁆𑀜𑀸𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑀜𑁆𑀜𑀸. 𑀲𑁄 𑀢𑀁 𑀩𑁆𑀬𑀸𑀓𑀸𑀲𑀺 ‘‘𑀅𑀯𑀺𑀪𑀽𑀢𑀸, 𑀪𑀦𑁆𑀢𑁂, 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸 𑀅𑀯𑀟𑁆𑀠𑀺𑀢𑀩𑁆𑀩𑀢𑁆𑀢𑀸 𑀅𑀲𑀼𑀪𑀸𑀦𑀁, 𑀯𑀺𑀪𑀽𑀢𑀸, 𑀪𑀦𑁆𑀢𑁂, 𑀭𑀽𑀧𑀲𑀜𑁆𑀜𑀸 𑀯𑀟𑁆𑀠𑀺𑀢𑀩𑁆𑀩𑀢𑁆𑀢𑀸 𑀓𑀲𑀺𑀡𑀸𑀦’’𑀦𑁆𑀢𑀺. 𑀧𑀜𑁆𑀘𑀉𑀧𑀲𑀫𑁆𑀧𑀤𑀓𑁆𑀓𑀫𑁄 𑀫𑀳𑀸𑀯𑀕𑁆𑀕𑀸 𑀕𑀳𑀺𑀢𑁄. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀜𑀢𑁆𑀢𑀺 𑀲𑀩𑁆𑀩𑀧𑀞𑀫𑀁 𑀯𑀼𑀘𑁆𑀘𑀢𑀺, 𑀢𑀺𑀲𑁆𑀲𑀦𑁆𑀦𑀁 𑀧𑀦 𑀅𑀦𑀼𑀲𑁆𑀲𑀸𑀯𑀦𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑁂𑀤𑀸𑀪𑀸𑀯𑀢𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑀺𑀦𑁆𑀦𑀸 𑀜𑀢𑁆𑀢𑀺𑀢𑀸𑀲𑀁 𑀘𑀢𑀼𑀢𑁆𑀣𑀸𑀢𑀺 𑀓𑀢𑁆𑀯𑀸 ‘‘𑀜𑀢𑁆𑀢𑀺𑀘𑀢𑀼𑀢𑁆𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀫𑁂𑀯 𑀅𑀝𑁆𑀞𑀓𑀣𑀸𑀬 ‘‘𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀏𑀓𑀸𑀬 𑀘 𑀜𑀢𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀧𑀯𑀢𑁆𑀢𑀺𑀓𑁆𑀓𑀫𑁂𑀦 𑀧𑀤𑁂𑀦 𑀧𑀦 ‘‘𑀏𑀓𑀸𑀬 𑀜𑀢𑁆𑀢𑀺𑀬𑀸 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 (𑀫𑀳𑀸𑀯. 𑁩𑁮𑁪), 𑀙 𑀇𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 𑀅𑀥𑀫𑁆𑀫𑀓𑀫𑁆𑀫𑀁 𑀯𑀕𑁆𑀕𑀓𑀫𑁆𑀫’’𑀦𑁆𑀢𑀺 (𑀫𑀳𑀸𑀯. 𑁩𑁮𑁭) 𑀯𑀘𑀦𑀢𑁄 𑀓𑀼𑀧𑁆𑀧𑀓𑀫𑁆𑀫𑀫𑁆𑀧𑀺 𑀓𑀢𑁆𑀣𑀘𑀺 ‘‘𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀢𑀲𑁆𑀫𑀸 ‘‘𑀅𑀓𑀼𑀧𑁆𑀧𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀸 𑀅𑀓𑀼𑀧𑁆𑀧𑀫𑁆𑀧𑀺 𑀏𑀓𑀘𑁆𑀘𑀁 𑀦 𑀞𑀸𑀦𑀸𑀭𑀳𑀁, 𑀬𑁂𑀦 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁 ‘‘𑀲𑁄𑀲𑀸𑀭𑀺𑀢𑁄’’𑀢𑀺 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁯𑁫 𑀆𑀤𑀬𑁄) 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀞𑀸𑀦𑀸𑀭𑀳𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 ‘‘𑀞𑀸𑀦𑀸𑀭𑀳𑁂𑀦𑀸’’𑀢𑀺 𑀇𑀤𑀫𑁂𑀯 𑀧𑀤𑀁 𑀯𑀢𑁆𑀢𑀩𑁆𑀩𑀁, 𑀦 𑀧𑀼𑀩𑁆𑀩𑀧𑀤𑀁 𑀇𑀫𑀺𑀦𑀸 𑀅𑀓𑀼𑀧𑁆𑀧𑀲𑀺𑀤𑁆𑀥𑀺𑀢𑁄𑀢𑀺 𑀘𑁂? 𑀢𑀁 𑀦, 𑀅𑀝𑁆𑀞𑀸𑀦𑀸𑀭𑀳𑁂𑀦 𑀅𑀓𑀼𑀧𑁆𑀧𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀦𑀥𑀺𑀧𑁆𑀧𑁂𑀢𑁄𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀤𑁆𑀯𑀻𑀳𑀺 𑀧𑀦𑁂𑀢𑁂𑀳𑀺 𑀏𑀓𑀢𑁄 𑀯𑀼𑀢𑁆𑀢𑁂𑀳𑀺 𑀅𑀬𑀫𑀢𑁆𑀣𑁄 𑀧𑀜𑁆𑀜𑀸𑀬𑀢𑀺 ‘‘𑀓𑁂𑀯𑀮𑀁 𑀢𑁂𑀦 𑀅𑀓𑀼𑀧𑁆𑀧𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀅𑀬𑀫𑁆𑀧𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 ‘𑀪𑀺𑀓𑁆𑀔𑀽’𑀢𑀺, 𑀞𑀸𑀦𑀸𑀭𑀳𑁂𑀦 𑀘 𑀉𑀧𑀲𑀫𑁆𑀧𑀦𑁆𑀦𑁄 𑀅𑀬𑀫𑁆𑀧𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 ‘𑀪𑀺𑀓𑁆𑀔𑀽’𑀢𑀺, 𑀓𑀼𑀧𑁆𑀧𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀥𑀺𑀧𑁆𑀧𑁂𑀢𑁄’’𑀢𑀺. 𑀢𑁂𑀦𑀸𑀬𑀫𑁆𑀧𑀺 𑀅𑀢𑁆𑀣𑁄 𑀲𑀸𑀥𑀺𑀢𑁄 𑀳𑁄𑀢𑀺 ‘‘𑀬𑁄 𑀧𑀦, 𑀪𑀺𑀓𑁆𑀔𑀼, 𑀚𑀸𑀦𑀁 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀼𑀕𑁆𑀕𑀮𑀁 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄’’𑀢𑀺 (𑀧𑀸𑀘𑀺. 𑁪𑁦𑁩) 𑀯𑀘𑀦𑀢𑁄 𑀬𑀸𑀯 𑀦 𑀜𑀸𑀬𑀢𑀺, 𑀢𑀸𑀯 𑀲𑀫𑀜𑁆𑀜𑀸𑀬𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬𑀪𑀺𑀓𑁆𑀔𑀼𑀪𑀸𑀯𑀁 𑀉𑀧𑀕𑀢𑁄𑀧𑀺 𑀦 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀲𑀫𑀜𑁆𑀜𑀸𑀬𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬𑀪𑀺𑀓𑁆𑀔𑀼 𑀯𑀺𑀬 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀑𑀫𑀲𑀦𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀯𑀢𑁆𑀣𑀼 𑀳𑁄𑀢𑀺, 𑀓𑁂𑀯𑀮𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺𑀆𑀤𑀺 (𑀧𑀸𑀘𑀺. 𑁪𑁭) 𑀆𑀧𑀢𑁆𑀢𑀺𑀯𑀢𑁆𑀣𑀼𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀓𑀼𑀧𑁆𑀧𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀧𑀦 𑀧𑀘𑁆𑀙𑀸 𑀧𑀸𑀭𑀸𑀚𑀺𑀓𑁄𑀧𑀺 𑀚𑀸𑀢𑀺𑀢𑁄 𑀉𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 ‘‘𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁦𑁯) 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀧𑀦 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑁂𑀲𑀼 𑀓𑁄𑀘𑀺 𑀧𑀼𑀕𑁆𑀕𑀮𑁄 ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀦𑁄𑀧𑀺 𑀉𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀓𑁄𑀘𑀺 𑀢𑀺𑀝𑁆𑀞𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀧𑀦 𑀅𑀢𑁆𑀣𑀺 𑀓𑀫𑁆𑀫𑀁 𑀅𑀓𑀼𑀧𑁆𑀧𑀁 𑀞𑀸𑀦𑀸𑀭𑀳𑀁, 𑀅𑀢𑁆𑀣𑀺 𑀞𑀸𑀦𑀸𑀭𑀳𑀁 𑀦𑀸𑀓𑀼𑀧𑁆𑀧𑀁, 𑀅𑀢𑁆𑀣𑀺 𑀅𑀓𑀼𑀧𑁆𑀧𑀜𑁆𑀘𑁂𑀯 𑀦 𑀞𑀸𑀦𑀸𑀭𑀳𑀜𑁆𑀘, 𑀅𑀢𑁆𑀣𑀺 𑀦𑀸𑀓𑀼𑀧𑁆𑀧𑀁 𑀦 𑀘 𑀞𑀸𑀦𑀸𑀭𑀳𑀦𑁆𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀞𑀫𑀁 𑀢𑀸𑀯 𑀯𑀼𑀢𑁆𑀢𑀁, 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀧𑀸𑀓𑀝𑀸𑀦𑀺. 𑀤𑀼𑀢𑀺𑀬𑀁 𑀧𑀭𑀺𑀬𑀸𑀬𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀮𑀩𑁆𑀪𑀢𑀺. 𑀢𑀲𑁆𑀲 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀧𑀼𑀩𑁆𑀩𑁂 𑀲𑀺𑀓𑁆𑀔𑀫𑀸𑀦𑀓𑀸𑀮𑁂 𑀮𑀤𑁆𑀥𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀓𑀺𑀜𑁆𑀘𑀸𑀧𑀺 𑀅𑀓𑀼𑀧𑁆𑀧𑀜𑁆𑀘𑁂𑀯 𑀞𑀸𑀦𑀸𑀭𑀳𑀜𑁆𑀘, 𑀧𑀼𑀭𑀺𑀲𑀮𑀺𑀗𑁆𑀕𑁂 𑀧𑀦 𑀧𑀸𑀢𑀼𑀪𑀽𑀢𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀁𑀬𑁂𑀯 𑀉𑀧𑀚𑁆𑀛𑀁 𑀢𑀫𑁂𑀯 𑀉𑀧𑀲𑀫𑁆𑀧𑀤’’𑀦𑁆𑀢𑀺 (𑀧𑀸𑀭𑀸. 𑁬𑁯) 𑀏𑀢𑁆𑀣 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑁂𑀯𑀮𑀁 𑀲𑀸𑀫𑀡𑁂𑀭𑀪𑀸𑀯𑀸𑀧𑀢𑁆𑀢𑀺𑀢𑁄 𑀓𑀫𑁆𑀫𑀁 𑀤𑀸𑀦𑀺 𑀓𑀼𑀧𑁆𑀧𑀁 𑀚𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂𑀦 𑀘𑀻𑀯𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀯𑀺𑀬 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀓𑀢𑀸𑀬 𑀉𑀧𑀲𑀫𑁆𑀧𑀤𑀸𑀬 𑀯𑀺𑀚𑀳𑀦𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀽𑀢𑀺 𑀆𑀧𑀚𑁆𑀚𑀢𑀺. 𑀅𑀣 𑀯𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀅𑀲𑀢𑀺𑀧𑀺𑀢𑀁 𑀏𑀓𑀢𑁄𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀓𑀼𑀧𑁆𑀧𑀢𑀺, 𑀬𑀣𑀸𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺. 𑀢𑀲𑁆𑀫𑀸 𑀦 𑀢𑀸𑀯 𑀲𑀸 ‘‘𑀪𑀺𑀓𑁆𑀔𑀼𑀦𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑀲𑁆𑀫𑀸 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀧𑀺 𑀉𑀧𑁆𑀧𑀩𑁆𑀩𑀚𑀺𑀢𑀼𑀓𑀸𑀫𑀢𑀸𑀬 𑀕𑀺𑀳𑀺𑀮𑀺𑀗𑁆𑀕𑀁 𑀲𑀸𑀤𑀺𑀬𑀦𑁆𑀢𑀺𑀬𑀸 𑀧𑀼𑀦𑀧𑀺 𑀉𑀧𑀲𑀫𑁆𑀧𑀤𑀸 𑀉𑀪𑀢𑁄𑀲𑀗𑁆𑀖𑁂 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑁂𑀦 𑀧𑀭𑀺𑀬𑀸𑀬𑁂𑀦 ‘‘𑀓𑀼𑀧𑁆𑀧𑀢𑀻𑀢𑀺 𑀓𑀼𑀧𑁆𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸𑀯𑀼𑀢𑁆𑀢𑀓𑀫𑁆𑀫𑀤𑁄𑀲𑀸𑀪𑀸𑀯𑀢𑁄 𑀧𑀦 ‘‘𑀞𑀸𑀦𑀸𑀭𑀳’’𑀦𑁆𑀢𑀺. 𑀪𑀺𑀓𑁆𑀔𑀼𑀦𑀻 𑀧𑀦 𑀕𑀺𑀳𑀺𑀮𑀺𑀗𑁆𑀕𑀁 𑀲𑀸𑀤𑀺𑀬𑀦𑁆𑀢𑀺𑀓𑀸𑀮𑁂 𑀦 𑀧𑀼𑀭𑀺𑀲𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂 𑀲𑀢𑀺 𑀪𑀺𑀓𑁆𑀔𑀽𑀲𑀼 𑀉𑀧𑀲𑀫𑁆𑀧𑀤𑀁 𑀮𑀩𑁆𑀪𑀢𑀻𑀢𑀺 𑀲𑀸𑀥𑀓𑀁 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀉𑀧𑁆𑀧𑀩𑁆𑀩𑀚𑀺𑀢𑀸 𑀘𑁂, 𑀮𑀪𑀢𑀻𑀢𑀺 𑀏𑀓𑁂, 𑀢𑀁 𑀧𑀦𑀸𑀬𑀼𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀦𑀸𑀪𑀸𑀯𑀢𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀻𑀢𑀺 𑀆𑀘𑀭𑀺𑀬𑁄. ‘‘𑀬𑀣𑀸 ‘𑀓𑀢𑁆𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀅𑀓𑀢𑁂 𑀓𑀼𑀧𑁆𑀧𑀢𑀻𑀢𑀺 𑀓𑀢𑁆𑀯𑀸 𑀓𑀭𑀡𑀁 𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀬𑀢𑁆𑀣 𑀬𑀢𑁆𑀣 ‘‘𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀢𑀢𑁆𑀣 ‘‘𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀲𑁆𑀲 𑀕𑀡𑁆𑀞𑀺𑀧𑀤𑁂’’𑀢𑀺 𑀕𑀳𑁂𑀢𑀩𑁆𑀩𑀁.

𑀲𑀸𑀚𑀻𑀯𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

‘‘𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀦𑀺𑀬𑀢𑀸’’𑀢𑀺 𑀯𑀼𑀢𑁆𑀢𑀁 𑀅𑀦𑀼𑀕𑀡𑁆𑀞𑀺𑀧𑀤𑁂. 𑀬𑀢𑁆𑀣 ‘‘𑀅𑀦𑀼𑀕𑀡𑁆𑀞𑀺𑀧𑀤𑁂’’𑀢𑀺, 𑀢𑀢𑁆𑀣 ‘‘𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀲𑁆𑀲𑀸’’𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀢𑀺 𑀯𑀸 𑀢𑀻𑀲𑀼 𑀩𑁄𑀥𑀻𑀲𑀼 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀲𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀦𑀸𑀫. 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀩𑀳𑀼𑀓𑀢𑁆𑀢𑀸, 𑀪𑀺𑀓𑁆𑀔𑀼𑀲𑀻𑀮𑀢𑁆𑀢𑀸, 𑀓𑀺𑀮𑁂𑀲𑀧𑀺𑀤𑀳𑀦𑀯𑀲𑁂𑀦 𑀯𑀢𑁆𑀢𑀦𑀢𑁄, 𑀉𑀢𑁆𑀢𑀫𑁂𑀦 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀅𑀥𑀺𑀓𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀧𑀯𑀢𑁆𑀢𑀦𑀢𑁄 𑀉𑀢𑁆𑀢𑀫𑀦𑁆𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂. 𑀓𑀺𑀜𑁆𑀘𑀸𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀺 𑀥𑀫𑁆𑀫𑀢𑀸𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀸𑀯 𑀳𑁄𑀦𑁆𑀢𑀺, 𑀢𑀣𑀸𑀧𑀺 ‘‘𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀧𑀯𑀢𑁆𑀢𑀢𑀻’’𑀢𑀺 𑀦𑀺𑀬𑀫𑀺𑀢𑀁 𑀢𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺. 𑀢𑁂𑀦𑀸𑀳 ‘‘𑀦 𑀳𑀺 𑀢𑀁 𑀧𑀜𑁆𑀜𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀢𑁄𑀧𑀺 𑀘 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀻𑀮𑀁 𑀅𑀥𑀺𑀲𑀻𑀮𑀁, 𑀢𑀁 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀢𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺. 𑀲𑀫𑀦𑁆𑀢𑀪𑀤𑁆𑀭𑀓𑀁 𑀓𑀸𑀭𑀡𑀯𑀘𑀦𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀸𑀥𑀸𑀭𑀡𑀮𑀓𑁆𑀔𑀡𑀢𑁆𑀢𑀸 𑀇𑀫𑀺𑀲𑁆𑀲𑀸 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀅𑀭𑀺𑀬𑀧𑀼𑀕𑁆𑀕𑀮𑀸 𑀘 𑀏𑀓𑀘𑁆𑀘𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀲𑀸𑀥𑀺𑀢𑀫𑁂𑀢𑀁, 𑀢𑀲𑁆𑀫𑀸 ‘‘𑀦 𑀳𑀺 𑀢𑀁 𑀲𑀫𑀸𑀧𑀦𑁆𑀦𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀅𑀲𑀫𑀢𑁆𑀣𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺? 𑀦𑀸𑀲𑀫𑀢𑁆𑀣𑀁, 𑀲𑀫𑀢𑁆𑀣𑀫𑁂𑀯 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀲𑀸𑀲𑀸 𑀯𑀺𑀘𑀸𑀭𑀡𑀸, 𑀢𑀲𑁆𑀲 𑀢𑀲𑁆𑀲𑁂𑀯 𑀯𑀲𑁂𑀦 𑀅𑀝𑁆𑀞𑀓𑀣𑀸𑀬 𑀧𑀯𑀢𑁆𑀢𑀺𑀢𑁄. 𑀢𑀣𑀸 𑀳𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀥𑀺𑀓𑀸𑀭𑁂 ‘‘𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀯𑀼𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀆𑀕𑀢𑀢𑁆𑀢𑀸. 𑀏𑀲𑁂𑀯 𑀦𑀬𑁄 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑁂𑀲𑀼. 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂 𑀢𑀁? 𑀧𑀸𑀴𑀺𑀓𑁆𑀓𑀫𑀸𑀦𑀼𑀯𑀢𑁆𑀢𑀦𑁂𑀦 𑀧𑀸𑀴𑀺𑀓𑁆𑀓𑀫𑀤𑀲𑁆𑀲𑀦𑀢𑁆𑀣𑀁. 𑀢𑀢𑁆𑀭𑀺𑀤𑀁 𑀲𑀫𑀸𑀲𑀢𑁄 𑀅𑀥𑀺𑀧𑁆𑀧𑀸𑀬𑀤𑀻𑀧𑀦𑀁 𑁋 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀲𑁆𑀲 𑀢𑀺𑀓𑀧𑀭𑀺𑀘𑁆𑀙𑁂𑀤𑁂 𑀉𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺, 𑀅𑀓𑀝𑀸𑀦𑀼𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀉𑀧𑀲𑀫𑁆𑀧𑀦𑁆𑀦𑁂 𑀉𑀓𑁆𑀔𑀺𑀢𑁆𑀢𑀓𑁂 𑀲𑀺𑀬𑀸 𑀆𑀧𑀢𑁆𑀢𑀺, 𑀢𑀣𑀸 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑁂𑀢𑀺 𑀏𑀯𑀫𑀸𑀤𑀺. 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀬𑀁 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀅𑀥𑀺𑀘𑀺𑀢𑁆𑀢𑀁, 𑀢𑀁 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀘, ‘‘𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀧𑀜𑁆𑀜𑀸𑀯 𑀅𑀥𑀺𑀧𑀜𑁆𑀜𑀸, 𑀲𑀸 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸. 𑀦 𑀳𑀺 𑀢𑀁𑀲𑀫𑀸𑀧𑀦𑁆𑀦𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻’’𑀢𑀺. ‘‘𑀢𑀢𑁆𑀭 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. 𑀅𑀬𑀜𑁆𑀳𑀺 𑀧𑀸𑀴𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀦 𑀇𑀢𑀭𑀸𑀢𑀺 𑀤𑀻𑀧𑁂𑀢𑀺. 𑀅𑀝𑁆𑀞𑀓𑀣𑀸𑀯𑀘𑀦𑀁 𑀢𑀸𑀲𑀫𑁆𑀧𑀺 𑀢𑀺𑀡𑁆𑀡𑀁 𑀮𑁄𑀓𑀺𑀬𑀸𑀦𑀁 𑀅𑀥𑀺𑀧𑁆𑀧𑁂𑀢𑀢𑀁 𑀤𑀻𑀧𑁂𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁄 𑁋 𑀢𑀺𑀲𑁆𑀲𑁄𑀧𑀺 𑀮𑁄𑀓𑀺𑀬𑀸 𑀲𑀺𑀓𑁆𑀔𑀸 𑀇𑀫𑀲𑁆𑀫𑀺𑀁 𑀧𑀞𑀫𑀧𑀸𑀭𑀸𑀚𑀺𑀓𑁂 𑀲𑀫𑁆𑀪𑀯𑀦𑁆𑀢𑀺, 𑀓𑀸𑀮𑁂𑀦𑀸𑀧𑀺 𑀅𑀥𑀺𑀘𑀺𑀢𑁆𑀢𑀧𑀜𑁆𑀜𑀸𑀮𑀸𑀪𑀻 𑀪𑀺𑀓𑁆𑀔𑀼 𑀢𑀣𑀸𑀭𑀽𑀧𑀁 𑀅𑀲𑀧𑁆𑀧𑀸𑀬𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀢𑀢𑁄 𑀢𑀢𑁄 𑀅𑀥𑀺𑀘𑀺𑀢𑁆𑀢𑀢𑁄, 𑀅𑀥𑀺𑀧𑀜𑁆𑀜𑀸𑀢𑁄 𑀘 𑀆𑀯𑀢𑁆𑀢𑀺𑀢𑁆𑀯𑀸 𑀲𑀻𑀮𑀪𑁂𑀤𑀁 𑀧𑀸𑀧𑀼𑀡𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀦 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀧𑀜𑁆𑀜𑀸𑀮𑀸𑀪𑀻, 𑀅𑀬𑀁 𑀦𑀬𑁄 𑀇𑀢𑀭𑁂𑀲𑀼𑀧𑀺 𑀲𑀩𑁆𑀩𑁂𑀲𑀼 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 𑀲𑀘𑀺𑀢𑁆𑀢𑀓𑁂𑀲𑀼 𑀮𑀩𑁆𑀪𑀢𑀺, 𑀅𑀘𑀺𑀢𑁆𑀢𑀓𑁂𑀲𑀼 𑀧𑀦 𑀇𑀢𑀭𑁄𑀧𑀺. 𑀢𑀣𑀸𑀧𑀺 𑀓𑁂𑀯𑀮𑀁 𑀯𑀺𑀦𑀬𑀧𑀺𑀝𑀓𑀲𑁆𑀲, 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀲𑁆𑀲 𑀘 𑀲𑀗𑁆𑀕𑀸𑀳𑀓𑀢𑁆𑀢𑀸 ‘‘𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀉𑀢𑁆𑀢𑀭𑀧𑀤𑁂 𑀧𑀘𑁆𑀘𑀓𑁆𑀔𑀸𑀦𑀸𑀭𑀳𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀮𑁄𑀓𑀺𑀬𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀸𑀴𑀺𑀬𑀁 ‘‘𑀢𑀢𑁆𑀭 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀲𑀺𑀓𑁆𑀔𑀸𑀢𑀺 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀻 𑀘 𑀘𑁂𑀢𑀦𑀸 𑀘, 𑀅𑀜𑁆𑀜𑀢𑁆𑀭 𑀘𑁂𑀢𑀦𑀸𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀲𑀉𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀁, 𑀏𑀓𑀘𑁆𑀘𑀁 𑀅𑀦𑀼𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀜𑁆𑀘 𑀮𑀩𑁆𑀪𑀢𑀺. 𑀘𑀺𑀢𑁆𑀢𑀲𑁆𑀲 𑀅𑀥𑀺𑀓𑀭𑀡𑀁 𑀓𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀻𑀢𑀺 𑀅𑀥𑀺𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀣𑀸𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀻𑀮𑀧𑀘𑁆𑀘𑀯𑁂𑀓𑁆𑀔𑀡𑀸𑀧𑀺 𑀳𑀺 𑀲𑀻𑀮𑀫𑁂𑀯, 𑀢𑀲𑁆𑀫𑀸 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀤𑀺𑀘𑀸𑀭𑀺𑀢𑁆𑀢𑁂𑀲𑀼 𑀯𑀺𑀭𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑁂𑀢𑀦𑀁 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨) 𑀯𑀼𑀢𑁆𑀢𑀫𑀭𑀺𑀬𑀸𑀤𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 ‘‘𑀢𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀦 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀸𑀢𑀺 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀺𑀓𑁆𑀔𑀦𑀪𑀸𑀯𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑀸𑀚𑀻𑀯𑀦𑁆𑀢𑀺 𑀧𑀜𑁆𑀜𑀢𑁆𑀢𑀺. 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀧𑀼𑀩𑁆𑀩𑁂 𑀫𑁂𑀣𑀼𑀦𑀲𑀁𑀯𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀬𑀲𑁆𑀫𑀸 𑀲𑀺𑀓𑁆𑀔𑀸𑀬 𑀕𑀼𑀡𑀲𑀫𑁆𑀫𑀢𑀸𑀬 𑀧𑀼𑀜𑁆𑀜𑀲𑀫𑁆𑀫𑀢𑀸𑀬 𑀢𑀦𑁆𑀢𑀺𑀬𑀸 𑀅𑀪𑀸𑀯𑀢𑁄 𑀮𑁄𑀓𑀲𑁆𑀲 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀢𑀢𑁆𑀣 𑀦 𑀲𑀫𑁆𑀪𑀯𑀢𑀺. 𑀧𑀢𑁆𑀣𑀦𑀻𑀬𑀸 𑀳𑀺 𑀲𑀸, 𑀢𑀲𑁆𑀫𑀸 ‘‘𑀬𑀜𑁆𑀘 𑀲𑀸𑀚𑀻𑀯𑀁 𑀲𑀫𑀸𑀧𑀦𑁆𑀦𑁄, 𑀢𑀢𑁆𑀣 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀆𑀡𑀸𑀬 𑀳𑀺 𑀤𑀼𑀩𑁆𑀩𑀮𑁆𑀬𑀁 𑀲𑀫𑁆𑀪𑀯𑀢𑀻𑀢𑀺 𑀆𑀬𑀲𑁆𑀫𑀸 𑀉𑀧𑀢𑀺𑀲𑁆𑀲𑁄.

𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀓𑀣𑀸𑀯𑀡𑁆𑀡𑀦𑀸

𑀏𑀢𑁆𑀣 𑀬𑀸𑀫𑀻𑀢𑀺 𑀅𑀫𑀼𑀓𑀲𑁆𑀫𑀺𑀁 𑀢𑀺𑀢𑁆𑀣𑀸𑀬𑀢𑀦𑁂, 𑀖𑀭𑀸𑀤𑀺𑀫𑁆𑀳𑀺 𑀯𑀸. 𑀪𑀸𑀯𑀯𑀺𑀓𑀧𑁆𑀧𑀸𑀓𑀸𑀭𑁂𑀦𑀸𑀢𑀺 ‘‘𑀅𑀳𑀁 𑀅𑀲𑁆𑀲’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀬𑀁 𑀬𑀁 𑀪𑀯𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀢𑀲𑁆𑀲 𑀪𑀸𑀯𑀲𑁆𑀲 𑀯𑀺𑀓𑀧𑁆𑀧𑀸𑀓𑀸𑀭𑁂𑀦, 𑀪𑀺𑀓𑁆𑀔𑀼𑀪𑀸𑀯𑀢𑁄 𑀅𑀜𑁆𑀜𑀪𑀸𑀯𑀯𑀺𑀓𑀧𑁆𑀧𑀸𑀓𑀸𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁬. 𑀳𑀦𑁆𑀤𑀸𑀢𑀺 𑀯𑀘𑀲𑀸𑀬𑁂𑀯. 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄𑀢𑀺𑀆𑀤𑀺𑀧𑀤𑁂𑀳𑀺 𑀘𑀺𑀢𑁆𑀢𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. 𑀏𑀓𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦𑀸𑀢𑀺.

𑁫𑁧. 𑀩𑀼𑀤𑁆𑀥𑀁 𑀥𑀫𑁆𑀫𑀦𑁆𑀢𑀺𑀆𑀤𑀺𑀧𑀤𑁂𑀳𑀺 𑀔𑁂𑀢𑁆𑀢𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀆𑀤𑀺𑀢𑁄 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀲𑀪𑀸𑀯𑀧𑀭𑀺𑀘𑁆𑀘𑀸𑀕𑁄, 𑀧𑀘𑁆𑀙𑀺𑀫𑁂𑀳𑀺 𑀅𑀝𑁆𑀞𑀳𑀺 𑀪𑀸𑀯𑀦𑁆𑀢𑀭𑀸𑀤𑀸𑀦𑀜𑁆𑀘 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀧𑀘𑁆𑀘𑀓𑁆𑀔𑀸𑀫𑀺 𑀥𑀸𑀭𑁂𑀳𑀻𑀢𑀺 𑀏𑀢𑁂𑀳𑀺 𑀓𑀸𑀮𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. 𑀯𑀤𑀢𑀻𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀬𑁄𑀕𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀇𑀫𑀺𑀦𑀸 𑀯𑀺𑀚𑀸𑀦𑀦𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. 𑀉𑀫𑁆𑀫𑀢𑁆𑀢𑀓𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀻𑀢𑀺𑀆𑀤𑀻𑀳𑀺 𑀧𑀼𑀕𑁆𑀕𑀮𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. 𑀅𑀭𑀺𑀬𑀓𑁂𑀦 𑀫𑀺𑀮𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀻𑀢𑀺𑀆𑀤𑀻𑀳𑀺 𑀧𑀦 𑀧𑀼𑀕𑁆𑀕𑀮𑀸𑀤𑀺𑀦𑀺𑀬𑀫𑁂𑀧𑀺 𑀲𑀢𑀺 𑀯𑀺𑀚𑀸𑀦𑀦𑀦𑀺𑀬𑀫𑀸𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀬𑀸𑀬 𑀫𑀺𑀮𑀓𑁆𑀔𑀪𑀸𑀲𑀸𑀬 𑀓𑀸𑀮𑀦𑀺𑀬𑀫𑁄 𑀦𑀢𑁆𑀣𑀺, 𑀢𑀸𑀬𑀧𑀺 𑀪𑀸𑀲𑀸𑀬 𑀓𑀸𑀮𑀦𑀺𑀬𑀫𑀢𑁆𑀣𑀤𑀻𑀧𑀦𑁂 𑀲𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀭𑀼𑀳𑀢𑀻𑀢𑀺 𑀦𑁄 𑀫𑀢𑀻’’𑀢𑀺 𑀆𑀘𑀭𑀺𑀬𑁄. 𑀤𑀯𑀸𑀬𑀸𑀢𑀺𑀆𑀤𑀻𑀳𑀺 𑀔𑁂𑀢𑁆𑀢𑀸𑀤𑀺𑀦𑀺𑀬𑀫𑁂 𑀲𑀢𑀺𑀧𑀺 𑀘𑀺𑀢𑁆𑀢𑀦𑀺𑀬𑀫𑀸𑀪𑀸𑀯𑁂𑀦 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀯𑁂𑀢𑀼𑀓𑀸𑀫𑁄 𑀦 𑀲𑀸𑀯𑁂𑀢𑀻𑀢𑀺 𑀘𑀺𑀢𑁆𑀢𑀦𑀺𑀬𑀫𑁂𑀧𑀺 𑀲𑀢𑀺 𑀧𑀬𑁄𑀕𑀦𑀺𑀬𑀫𑀸𑀪𑀸𑀯𑁂𑀦 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀺𑀜𑁆𑀜𑀼𑀲𑁆𑀲𑀲𑀸𑀯𑁂𑀢𑀺, 𑀯𑀺𑀜𑁆𑀜𑀼𑀲𑁆𑀲 𑀦 𑀲𑀸𑀯𑁂𑀢𑀻𑀢𑀺 𑀘𑀺𑀢𑁆𑀢𑀔𑁂𑀢𑁆𑀢𑀓𑀸𑀮𑀧𑀬𑁄𑀕𑀧𑀼𑀕𑁆𑀕𑀮𑀯𑀺𑀚𑀸𑀦𑀦𑀦𑀺𑀬𑀫𑁂𑀧𑀺 𑀲𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀲𑀸𑀯𑁂𑀢𑀺, 𑀢𑀲𑁆𑀲𑁂𑀯 𑀲𑀯𑀦𑁂 𑀦 𑀭𑀼𑀳𑀢𑀺, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀤𑀺 𑀅𑀬𑀫𑁂𑀯 𑀚𑀸𑀦𑀸𑀢𑀽𑀢𑀺 𑀏𑀓𑀁 𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑁂𑀢𑀺, 𑀢𑀜𑁆𑀘𑁂 𑀲𑁄 𑀏𑀯 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀣 𑀲𑁄 𑀦 𑀚𑀸𑀦𑀸𑀢𑀺…𑀧𑁂… 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸’’𑀢𑀺. 𑀲𑀩𑁆𑀩𑀲𑁄 𑀯𑀸 𑀧𑀦 𑀦 𑀲𑀸𑀯𑁂𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸 𑀳𑁄𑀢𑀺 𑀲𑀺𑀓𑁆𑀔𑀸𑀢𑀺 𑀘𑀺𑀢𑁆𑀢𑀸𑀤𑀺𑀦𑀺𑀬𑀫𑁂𑀦𑁂𑀯 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 ‘‘𑀲𑀺𑀓𑁆𑀔𑀸…𑀧𑁂… 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀧𑀤𑀲𑁆𑀲 𑀧𑀤𑀪𑀸𑀚𑀦𑀁 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀢𑁆𑀣 𑀤𑁆𑀯𑁂 𑀅𑀫𑀺𑀲𑁆𑀲𑀸, 𑀧𑀘𑁆𑀙𑀺𑀫𑁄 𑀏𑀓𑁄 𑀫𑀺𑀲𑁆𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯 𑀯𑀘𑀻𑀪𑁂𑀤𑁂𑀦𑀸𑀢𑀺 𑀢𑀤𑀢𑁆𑀣𑀤𑀻𑀧𑀦𑀫𑀢𑁆𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸𑀯 𑀢𑁂𑀦𑁂𑀯 𑀯𑀘𑀻𑀪𑁂𑀤𑁂𑀦 𑀚𑀸𑀦𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀧𑀘𑁆𑀘𑀓𑁆𑀔𑀸𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁. 𑀲𑀫𑀬𑀜𑁆𑀜𑀽 𑀦𑀸𑀫 𑀢𑀤𑀥𑀺𑀧𑁆𑀧𑀸𑀬𑀚𑀸𑀦𑀦𑀫𑀢𑁆𑀢𑁂𑀦 𑀳𑁄𑀢𑀺.

𑁫𑁩. 𑀯𑀡𑁆𑀡𑀧𑀝𑁆𑀞𑀸𑀦𑀁 𑀩𑀼𑀤𑁆𑀥𑀕𑀼𑀡𑀤𑀻𑀧𑀓𑀁 𑀲𑀼𑀢𑁆𑀢𑀁. 𑀉𑀧𑀸𑀮𑀺𑀕𑀳𑀧𑀢𑀺𑀦𑀸 𑀯𑀼𑀢𑁆𑀢𑀸 𑀓𑀺𑀭 𑀉𑀧𑀸𑀮𑀺𑀕𑀸𑀣𑀸. 𑀧𑀜𑁆𑀜𑀸𑀡𑀁 𑀲𑀜𑁆𑀜𑀸𑀡𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁, 𑀢𑀲𑁆𑀫𑀸 𑀩𑁄𑀥𑀺𑀧𑀜𑁆𑀜𑀸𑀡𑀦𑁆𑀢𑀺 𑀩𑁄𑀥𑀺𑀲𑀜𑁆𑀜𑀸𑀡𑀁, 𑀩𑁄𑀥𑀺𑀩𑀻𑀚𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀺𑀬𑀫𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀤𑁆𑀯𑀻𑀲𑀼𑀧𑀺 𑀚𑀸𑀦𑀦𑁆𑀢𑁂𑀲𑀼 𑀏𑀯 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑁂 𑀢𑁂𑀲𑀼 𑀏𑀓𑁄 𑀘𑁂 𑀚𑀸𑀦𑀸𑀢𑀺, 𑀦 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀻’’𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀫𑁆𑀧𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. ‘‘𑀕𑀺𑀳𑀻 𑀳𑁄𑀫𑀻’’𑀢𑀺 𑀯𑀸 ‘‘𑀕𑀺𑀳𑀺𑀫𑁆𑀳𑀻’’𑀢𑀺 𑀯𑀸 𑀯𑀼𑀢𑁆𑀢𑁂 𑀓𑀺𑀜𑁆𑀘𑀸𑀧𑀺 𑀯𑀢𑁆𑀢𑀫𑀸𑀦𑀯𑀘𑀦𑀁 𑀳𑁄𑀢𑀺. ‘‘𑀥𑀸𑀭𑁂𑀳𑀻’’𑀢𑀺 𑀅𑀢𑁆𑀣𑀸𑀪𑀸𑀯𑀸 𑀘 ‘‘𑀥𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀘 𑀧𑀭𑀲𑁆𑀲𑀼𑀧𑀭𑀺 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦 𑀳𑁄𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀁 𑀥𑀫𑁆𑀫𑀦𑁆𑀢𑀺 𑀲𑀩𑁆𑀩𑀢𑁆𑀣 𑀥𑀫𑁆𑀫𑀯𑀘𑀦𑀁 𑀯𑀼𑀢𑁆𑀢𑀁 𑀬𑀁 𑀲𑀦𑁆𑀥𑀸𑀬 ‘‘𑀲𑀦𑁆𑀤𑀺𑀝𑁆𑀞𑀺𑀓’’𑀦𑁆𑀢𑀺 𑀯𑀤𑀢𑀺, 𑀢𑀁 𑀧𑀓𑀸𑀲𑁂𑀢𑀼𑀁. 𑀅𑀜𑁆𑀜𑀣𑀸 ‘‘𑀯𑀺𑀚𑀺𑀢𑀯𑀺𑀚𑀬𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀲𑀼𑀧𑀺 𑀢𑀧𑁆𑀧𑀲𑀗𑁆𑀕𑀢𑁄 𑀩𑀼𑀤𑁆𑀥𑀲𑀤𑁆𑀤𑁄𑀧𑀺 𑀅𑀯𑀲𑀸𑀦𑁂 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀆𑀘𑀭𑀺𑀬𑀯𑁂𑀯𑀘𑀦𑁂𑀲𑀼 𑀧𑀦 𑀬𑁄 𑀫𑀁 𑀧𑀩𑁆𑀩𑀸𑀚𑁂𑀲𑀻𑀢𑀺𑀆𑀤𑀺 𑀉𑀧𑀚𑁆𑀛𑀁 𑀅𑀕𑁆𑀕𑀳𑁂𑀢𑁆𑀯𑀸, 𑀧𑀭𑀁 𑀯𑀸 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀑𑀓𑀮𑁆𑀮𑀓𑁄𑀢𑀺 𑀓𑀧𑀡𑀸𑀥𑀺𑀯𑀘𑀦𑀁. 𑀫𑁄𑀴𑀺𑀩𑀤𑁆𑀥𑁄𑀢𑀺 𑀲𑀺𑀔𑀸𑀩𑀤𑁆𑀥𑁄, 𑀑𑀫𑀼𑀓𑁆𑀓𑀫𑀓𑀼𑀝𑁄 𑀯𑀸. 𑀘𑁂𑀮𑁆𑀮𑀓𑁄 𑀅𑀣𑁂𑀭𑁄. 𑀘𑁂𑀝𑀓𑁄 𑀫𑀚𑁆𑀛𑀺𑀫𑁄. 𑀫𑁄𑀴𑀺𑀕𑀮𑁆𑀮𑁄 𑀫𑀳𑀸𑀲𑀸𑀫𑀡𑁂𑀭𑁄. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀦𑀸𑀕𑀸𑀤𑀻𑀦𑀁 𑀦𑀸𑀕𑀭𑀽𑀧𑀸𑀤𑀻𑀦𑀁 𑀯𑀸 𑀲𑀦𑁆𑀢𑀺𑀓𑁂, 𑀪𑀸𑀲𑀸𑀚𑀸𑀦𑀦𑀓𑀺𑀦𑁆𑀦𑀭𑀸𑀤𑀻𑀦𑀁 𑀯𑀸. ‘‘𑀤𑁂𑀯𑀢𑀸 𑀦𑀸𑀫 𑀫𑀳𑀸𑀧𑀜𑁆𑀜𑀸’’𑀢𑀺 𑀓𑀺𑀭 𑀧𑀸𑀞𑁄. 𑀤𑀯𑀸𑀬𑀸𑀢𑀺 𑀲𑀳𑀲𑀸. 𑀭𑀯𑀸𑀪𑀜𑁆𑀜𑁂𑀦𑀸𑀢𑀺 𑀔𑀮𑀺𑀢𑀪𑀜𑁆𑀜𑁂𑀦. 𑀅𑀓𑁆𑀔𑀭𑀲𑀫𑀬𑀸𑀦𑀜𑁆𑀳𑀺 𑀦𑀸𑀪𑀺𑀜𑁆𑀜𑀸𑀢𑀸𑀬 𑀯𑀸 𑀓𑀭𑀡𑀸𑀦𑀁 𑀅𑀯𑀺𑀲𑀤𑀢𑀸𑀬 𑀯𑀸 𑀳𑁄𑀢𑀺 𑀭𑀯𑀸𑀪𑀜𑁆𑀜𑀁. 𑀅𑀯𑀺𑀥𑁂𑀬𑁆𑀬𑀺𑀦𑁆𑀤𑁆𑀭𑀺𑀬𑀢𑀸𑀬 ‘‘𑀧𑁄𑀢𑁆𑀣𑀓𑀭𑀽𑀧𑀲𑀤𑀺𑀲𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀕𑀭𑀼𑀫𑁂𑀥𑀲𑁆𑀲 𑀫𑀦𑁆𑀤𑀧𑀜𑁆𑀜𑀲𑁆𑀲. 𑀓𑀺𑀢𑁆𑀢𑀸𑀯𑀢𑀸 𑀧𑀦 𑀕𑀭𑀼𑀫𑁂𑀥𑁄 𑀳𑁄𑀢𑀻𑀢𑀺 𑀘𑁂? 𑀲𑀫𑀬𑁂 𑀅𑀓𑁄𑀯𑀺𑀤𑀢𑀸𑀬.

𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀧𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁫. ‘‘𑀧𑀝𑀺𑀲𑁂𑀯𑀢𑀺𑀦𑀸𑀫𑀸’’𑀢𑀺 𑀧𑀤𑀁 𑀫𑀸𑀢𑀺𑀓𑀸𑀬𑀁 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. ‘‘𑀏𑀲𑁄 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫𑀸’’𑀢𑀺 𑀲𑀩𑁆𑀩𑀧𑀸𑀴𑀺𑀧𑁄𑀢𑁆𑀣𑀓𑁂𑀲𑀼, 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀲𑁄 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫𑀸’’𑀢𑀺 𑀉𑀤𑁆𑀥𑀝𑀸. 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀦𑁆𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀢𑀁 𑀤𑀲𑁆𑀲𑀺𑀢𑀁. 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑁂𑀦 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀦 𑀤𑀲𑁆𑀲𑀺𑀢𑀁. 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀩𑁆𑀪𑀦𑁆𑀢𑀭𑀢𑀮𑀁 𑀙𑀼𑀧𑀦𑁆𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀘𑁆𑀙𑀼𑀧𑀦𑁆𑀢𑀁 𑀦𑀻𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀫𑀚𑁆𑀛𑀦𑁆𑀢𑀺 𑀅𑀕𑁆𑀕𑀧𑁆𑀧𑀤𑁂𑀲𑀁. 𑀉𑀧𑀭𑀺𑀪𑀸𑀕𑀫𑀚𑁆𑀛𑀦𑁆𑀢𑀺 𑀉𑀧𑀭𑀺𑀪𑀸𑀕𑀲𑁆𑀲 𑀅𑀕𑁆𑀕𑀧𑁆𑀧𑀤𑁂𑀲𑀁. 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀦𑁆𑀢𑀺 𑀏𑀢𑁆𑀣 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀇𑀥𑀸𑀧𑀺 𑀆𑀧𑀢𑁆𑀢𑀻𑀢𑀺 𑀘𑁂? 𑀦𑁂𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀫𑀢𑀘𑀫𑁆𑀫𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀢𑀘𑀫𑁆𑀫𑀜𑁆𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀁, 𑀉𑀧𑀸𑀤𑀺𑀦𑁆𑀦𑁂 𑀏𑀯 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀅𑀧𑀺𑀥𑀸𑀬 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸. 𑀬𑀣𑀸 𑀤𑀦𑁆𑀢𑀸 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀧𑀺𑀥𑀸𑀬𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑁄𑀦𑀲𑁄𑀢𑀺 𑀕𑁄𑀡𑀧𑀺𑀝𑁆𑀞𑀺𑀓𑁄 𑀫𑀡𑁆𑀟𑀮𑀲𑀧𑁆𑀧𑁄, 𑀬𑀲𑁆𑀲 𑀧𑀺𑀝𑁆𑀞𑁂 𑀮𑁄𑀳𑀺𑀢𑀓𑀸𑀦𑀺 𑀫𑀡𑁆𑀟𑀮𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀓𑀮𑀮𑀧𑀭𑀺𑀘𑀬𑀯𑀸𑀭𑀺𑀘𑀸𑀭𑀫𑀘𑁆𑀙𑀕𑁆𑀕𑀳𑀡𑁂𑀦 𑀓𑀺𑀜𑁆𑀘𑀸𑀧𑀺 𑀲𑀫𑀼𑀤𑁆𑀤𑁂 𑀫𑀳𑀸𑀫𑀼𑀔𑀸 𑀳𑀢𑁆𑀣𑀺𑀲𑀭𑀻𑀭𑀫𑁆𑀧𑀺 𑀏𑀓𑀧𑁆𑀧𑀳𑀸𑀭𑁂𑀦 𑀕𑀺𑀮𑀺𑀢𑀼𑀁 𑀲𑀫𑀢𑁆𑀣𑀸 𑀢𑀢𑁄 𑀫𑀳𑀦𑁆𑀢𑀢𑀭𑀸 𑀘 𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀫𑀼𑀔𑀸𑀤𑀻𑀲𑀼 𑀫𑁂𑀣𑀼𑀦𑀥𑀫𑁆𑀫𑁄 𑀦 𑀲𑀫𑁆𑀪𑀯𑀢𑀻𑀢𑀺 𑀢𑀢𑁆𑀣 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀻𑀢𑀺 𑀏𑀓𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀢𑀫𑁂𑀯 𑀳𑀻𑀢𑀺 𑀅𑀦𑀦𑁆𑀢𑀭𑀁 𑀲𑀦𑁆𑀥𑀸𑀬. 𑀲𑀤𑁆𑀥𑀺𑀁 𑀬𑁄𑀚𑀦𑀸𑀬 𑀅𑀓𑁆𑀔𑀭𑀬𑁄𑀚𑀦𑀸𑀬. ‘‘𑀧𑀜𑁆𑀜𑀢𑁆𑀢𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀳𑀺 𑀲𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀲𑀫𑀲𑀺𑀓𑁆𑀔𑀢𑀸 𑀦𑀸𑀫𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑀪𑀺𑀓𑁆𑀔𑀽𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀦 𑀳𑀺 𑀓𑀲𑁆𑀲𑀘𑀺 𑀊𑀦𑀫𑀥𑀺𑀓𑀁 𑀯𑀸 𑀅𑀢𑁆𑀣𑀻’’𑀢𑀺 𑀢𑀲𑁆𑀲 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑁂 𑀧𑀦 𑁋

‘‘𑀦 𑀉𑀓𑁆𑀔𑀺𑀢𑁆𑀢𑀓𑁄 𑀦 𑀘 𑀧𑀦 𑀧𑀸𑀭𑀺𑀯𑀸𑀲𑀺𑀓𑁄,

𑀦 𑀲𑀗𑁆𑀖𑀪𑀺𑀦𑁆𑀦𑁄 𑀦 𑀘 𑀧𑀦 𑀧𑀓𑁆𑀔𑀲𑀗𑁆𑀓𑀦𑁆𑀢𑁄;

𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺𑀬𑀸 𑀞𑀺𑀢𑁄,

𑀓𑀣𑀁 𑀦𑀼 𑀲𑀺𑀓𑁆𑀔𑀸𑀬 𑀅𑀲𑀸𑀥𑀸𑀭𑀡𑁄 𑀲𑀺𑀬𑀸’’𑀢𑀺. (𑀧𑀭𑀺. 𑁪𑁭𑁯) 𑁋

𑀯𑀼𑀢𑁆𑀢𑀁. 𑀢𑀤𑀝𑁆𑀞𑀓𑀣𑀸𑀬 𑀘 ‘‘𑀅𑀬𑀁 𑀧𑀜𑁆𑀳𑀸 𑀦𑀳𑀸𑀧𑀺𑀢𑀧𑀼𑀩𑁆𑀩𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀅𑀬𑀜𑁆𑀳𑀺 𑀔𑀼𑀭𑀪𑀡𑁆𑀟𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀮𑀪𑀢𑀺, 𑀅𑀜𑁆𑀜𑁂 𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀲𑀺𑀓𑁆𑀔𑀸𑀬 𑀅𑀲𑀸𑀥𑀸𑀭𑀡𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀬𑀣𑀸 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀢𑀣𑀸 𑀯𑁂𑀤𑀺𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀲𑀸𑀥𑀸𑀭𑀡𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺𑀧𑀺 𑀪𑀺𑀓𑁆𑀔𑀼 𑀲𑀺𑀓𑁆𑀔𑀢𑀺, 𑀏𑀯𑀫𑀜𑁆𑀜𑁄𑀧𑀺 𑀅𑀦𑁆𑀳𑀸𑀧𑀺𑀢𑀧𑀼𑀩𑁆𑀩𑀓𑁄 𑀪𑀺𑀓𑁆𑀔𑀼 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀺𑀓𑁆𑀔𑀢𑀺 𑀏𑀯 𑀢𑀤𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀦𑁆𑀢𑀺 𑀓𑀢𑁆𑀯𑀸 𑀲𑀩𑁆𑀩𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀲𑀫𑀲𑀺𑀓𑁆𑀔𑀢𑀸 𑀦𑀸𑀫𑀸𑀢𑀺. 𑀬𑀁 𑀢𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀺𑀯𑀺𑀪𑀗𑁆𑀕𑁄𑀢𑀁𑀦𑀺𑀬𑀸𑀫𑀓𑁄𑀢𑀺𑀮𑀓𑁆𑀔𑀡𑀢𑁆𑀢𑀸 𑀯𑀢𑁆𑀣𑀼𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀧𑁆𑀧𑀲𑀗𑁆𑀕𑁂𑀦 𑀓𑀢𑁂 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑁂 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀬𑁂 𑀘 ‘‘𑀢𑀬𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀯𑀺𑀪𑀗𑁆𑀕𑁄 𑀧𑀯𑀢𑁆𑀢𑀢𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸, 𑀢𑁂 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀞𑀫𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸

𑁫𑁭. 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀸 𑀅𑀲𑁆𑀲 𑀳𑁄𑀢𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀲𑀸 𑀅𑀓𑀼𑀲𑀮𑀸 𑀆𑀧𑀢𑁆𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀮𑀲𑀫𑁆𑀪𑀯𑀁 𑀅𑀪𑀺𑀪𑀯𑀢𑀺, 𑀭𑀸𑀕𑀸𑀪𑀺𑀪𑀯𑁂 𑀢𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑀸𑀢𑀺 𑀮𑀤𑁆𑀥𑀦𑀸𑀫𑀸 𑀧𑀼𑀩𑁆𑀩𑀪𑀸𑀕𑁂 𑀆𑀧𑀦𑁆𑀦𑀸 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀤𑀬𑁄 𑀆𑀧𑀢𑁆𑀢𑀺𑀬𑁄 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸 𑀲𑀬𑀫𑁂𑀯𑁂𑀓𑀸 𑀅𑀲𑁆𑀲. 𑀯𑀢𑁆𑀣𑀼𑀦𑀸 𑀲𑀪𑀸𑀕𑀸𑀳𑀺 𑀯𑀸 𑀅𑀲𑀪𑀸𑀕𑀸𑀳𑀺 𑀯𑀸 𑀅𑀜𑁆𑀜𑀸𑀳𑀺 𑀧𑀸𑀭𑀸𑀚𑀺𑀓𑀢𑁆𑀢𑁂𑀦 𑀲𑀫𑀸𑀦𑀚𑀸𑀢𑀺𑀓𑀸𑀳𑀺 𑀆𑀧𑀢𑁆𑀢𑀻𑀳𑀺 𑀲𑀬𑀁 𑀦𑀸𑀪𑀺𑀪𑀯𑀻𑀬𑀢𑀻𑀢𑀺 𑀏𑀓𑁂. 𑀢𑀁 𑀢𑀁 𑀧𑀼𑀩𑁆𑀩𑁂 𑀯𑀺𑀘𑀸𑀭𑀺𑀢𑀫𑁂𑀯. 𑀬𑀤𑀸 𑀧𑀦 𑀘𑀢𑀲𑁆𑀲𑁄𑀧𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄 𑀏𑀓𑀢𑁄 𑀳𑁄𑀦𑁆𑀢𑀺, 𑀢𑀤𑀸 𑀢𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀪𑀺𑀪𑀯𑀦𑁆𑀢𑀺, 𑀅𑀪𑀺𑀓𑁆𑀔𑀼𑀁 𑀓𑀭𑁄𑀦𑁆𑀢𑀺, 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀓𑀭𑁄𑀦𑁆𑀢𑀺, 𑀲𑀫𑀜𑁆𑀜𑀸𑀬𑀧𑀺 𑀪𑀺𑀓𑁆𑀔𑀼 𑀦 𑀳𑁄𑀢𑀺. 𑀑𑀫𑀲𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑀁 𑀦 𑀚𑀦𑁂𑀢𑀻𑀢𑀺 𑀏𑀓𑁂. 𑀤𑀼𑀢𑀺𑀬𑁂𑀦 𑀅𑀢𑁆𑀣𑀯𑀺𑀓𑀧𑁆𑀧𑁂𑀦 𑀧𑀸𑀭𑀸𑀚𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺 𑀆𑀧𑀢𑁆𑀢𑀻𑀢𑀺 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀆𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀯𑀸𑀤𑀻𑀦𑀁 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺, 𑀬𑀼𑀚𑁆𑀚𑀢𑀺 𑀘𑁂𑀲𑀸 𑀧𑀭𑀲𑀸𑀧𑁂𑀓𑁆𑀔𑀸. 𑀲𑀸𑀧𑀢𑁆𑀢𑀺𑀓𑁄 𑀦𑀸𑀫 𑀲𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀅𑀜𑁆𑀜𑀣𑀸 𑀢𑀲𑁆𑀲 𑀔𑀡𑀪𑀗𑁆𑀕𑁂𑀦 𑀅𑀦𑀸𑀧𑀢𑁆𑀢𑀺𑀓𑁄 𑀪𑀯𑁂𑀬𑁆𑀬, 𑀦 𑀘 𑀳𑁄𑀢𑀻𑀢𑀺. 𑀓𑀤𑀸 𑀧𑀦 𑀳𑁄𑀢𑀻𑀢𑀺? 𑀬𑀤𑀸 𑀓𑀸𑀮𑀁 𑀓𑀭𑁄𑀢𑀺, 𑀬𑀤𑀸 𑀘 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀲𑀸𑀫𑀡𑁂𑀭𑀸𑀤𑀺𑀪𑀽𑀫𑀺𑀬𑀁 𑀢𑀺𑀝𑁆𑀞𑀢𑀺. 𑀬𑀤𑀺 𑀏𑀯𑀁 𑀲𑀺𑀓𑁆𑀔𑀸𑀬 𑀧𑀘𑁆𑀘𑀓𑁆𑀔𑀸𑀢𑀸𑀬 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸 𑀘𑀸𑀢𑀺 𑀉𑀪𑀬𑀁 𑀢𑀲𑁆𑀲 𑀏𑀓𑀢𑁄 𑀅𑀢𑁆𑀣𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺𑀆𑀧𑀢𑁆𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀓𑀺𑀁 𑀦 𑀧𑀘𑁆𑀘𑀓𑁆𑀔𑀸𑀢𑀸, 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁂𑀦 𑀤𑁂𑀲𑀸𑀧𑁂𑀢𑀩𑁆𑀩𑀸. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀚𑀸𑀢𑀁, 𑀅𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀢𑀺, 𑀕𑀳𑀝𑁆𑀞𑁄 𑀯𑀼𑀝𑁆𑀞𑀸𑀢𑀺, 𑀲𑀸𑀫𑀡𑁂𑀭𑁄 𑀯𑀼𑀝𑁆𑀞𑀸𑀢𑀺, 𑀢𑀢𑁄 𑀯𑀺𑀦𑀬𑀯𑀺𑀭𑁄𑀥𑀸 𑀦 𑀯𑀼𑀝𑁆𑀞𑀸𑀢𑀺. 𑀳𑀜𑁆𑀘𑀺 𑀧𑀦 𑀯𑀼𑀝𑁆𑀞𑀸𑀢𑀺 𑀕𑀳𑀝𑁆𑀞𑁄, 𑀲𑀸𑀫𑀡𑁂𑀭𑁄 𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄𑀯 𑀛𑀸𑀦𑀮𑀸𑀪𑀻 𑀅𑀲𑁆𑀲, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀯𑀸 𑀅𑀭𑀳𑀢𑁆𑀢𑀨𑀮𑀲𑁆𑀲 𑀯𑀸 𑀮𑀸𑀪𑀻 𑀅𑀲𑁆𑀲, 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀲𑀸𑀧𑀢𑁆𑀢𑀺𑀓𑁄 𑀅𑀭𑀳𑀸 𑀅𑀲𑁆𑀲. 𑀉𑀓𑁆𑀔𑀺𑀢𑁆𑀢𑀓𑁄 𑀉𑀧𑁆𑀧𑀩𑁆𑀩𑀚𑀺𑀢𑁄 𑀯𑀸 𑀧𑀭𑀺𑀯𑀸𑀲𑀸𑀭𑀳𑁄 𑀫𑀸𑀦𑀢𑁆𑀢𑀸𑀭𑀳𑁄 𑀉𑀧𑁆𑀧𑀩𑁆𑀩𑀚𑀺𑀢𑁄 𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀛𑀸𑀦𑀮𑀸𑀪𑀻 𑀅𑀲𑁆𑀲, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲, 𑀅𑀭𑀳𑀢𑁆𑀢𑀨𑀮𑀲𑁆𑀲 𑀯𑀸 𑀮𑀸𑀪𑀻 𑀅𑀲𑁆𑀲, 𑀲𑀸𑀧𑀢𑁆𑀢𑀺𑀓𑁄 𑀲𑀦𑁆𑀢𑀭𑀸𑀬𑀺𑀓𑁄 𑀅𑀭𑀳𑀸 𑀅𑀲𑁆𑀲, 𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀧𑀭𑀺𑀯𑀸𑀲𑀁, 𑀫𑀸𑀦𑀢𑁆𑀢𑀁 𑀯𑀸 𑀤𑀢𑁆𑀯𑀸 𑀅𑀩𑁆𑀪𑁂𑀢𑀩𑁆𑀩𑁄 𑀉𑀓𑁆𑀔𑀺𑀢𑁆𑀢𑀓𑁄 𑀑𑀲𑀸𑀭𑁂𑀢𑀩𑁆𑀩𑁄𑀢𑀺 𑀲𑀫𑀸𑀦𑁄 𑀅𑀬𑀁 𑀉𑀧𑀮𑀩𑁆𑀪𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄 𑀬𑀸𑀯 𑀪𑀺𑀓𑁆𑀔𑀼𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺 𑀲𑀸𑀤𑀺𑀬𑀢𑀺 𑀲𑀁𑀯𑀸𑀲𑀁, 𑀲𑀦𑁆𑀢𑀭𑀸𑀬𑀺𑀓𑀢𑁆𑀢𑀸 𑀉𑀧𑁄𑀲𑀣𑀤𑀺𑀯𑀲𑀸𑀤𑀻𑀲𑀼 𑀕𑀳𑀝𑁆𑀞𑀲𑁆𑀲 𑀯𑀺𑀬 𑀲𑀬𑀫𑁂𑀯 𑀲𑀻𑀮𑀁 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀧𑀺 𑀦 𑀲𑀻𑀮𑀲𑀫𑀸𑀤𑀸𑀦𑀁 𑀭𑀼𑀳𑀢𑀺, 𑀧𑀕𑁂𑀯 𑀛𑀸𑀦𑀸𑀤𑀻𑀦𑀺. 𑀲𑁄 𑀘𑁂 𑀪𑀺𑀓𑁆𑀔𑀼𑀪𑀸𑀯𑀁 𑀦 𑀲𑀸𑀤𑀺𑀬𑀢𑀺 𑀦 𑀧𑀝𑀺𑀚𑀸𑀦𑀸𑀢𑀺 𑀲𑀁𑀯𑀸𑀲𑀁 𑀦 𑀲𑀸𑀤𑀺𑀬𑀢𑀺, 𑀓𑁂𑀯𑀮𑀁 𑀪𑀺𑀓𑁆𑀔𑀽𑀦𑀁 𑀆𑀯𑀺𑀓𑀢𑁆𑀯𑀸 𑀭𑀸𑀚𑀯𑁂𑀭𑀺𑀘𑁄𑀭𑀸𑀤𑀺𑀪𑀬𑁂𑀦 𑀓𑀸𑀲𑀸𑀯𑀁 𑀦 𑀧𑀭𑀺𑀘𑁆𑀘𑀚𑀢𑀺, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺 𑀲𑀳𑀲𑁂𑀬𑁆𑀬𑀸𑀤𑀺𑀁 𑀚𑀦𑁂𑀢𑀺, 𑀲𑀻𑀮𑀲𑁆𑀲 𑀘 𑀛𑀸𑀦𑀸𑀤𑀻𑀦𑀜𑁆𑀘 𑀪𑀸𑀕𑀻 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀆𑀧𑀦𑁆𑀦𑁂𑀦 𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁂𑀦 𑀲𑀦𑁆𑀢𑀻 𑀆𑀧𑀢𑁆𑀢𑀺 𑀆𑀯𑀺𑀓𑀸𑀢𑀩𑁆𑀩𑀸, 𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀺, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺𑀆𑀤𑀺 (𑀫𑀳𑀸𑀯. 𑁧𑁩𑁪-𑁧𑁩𑁫).

𑀢𑀢𑁆𑀣 𑀲𑀦𑁆𑀢𑀻 𑀆𑀧𑀢𑁆𑀢𑀻𑀢𑀺 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀧𑁆𑀧𑀪𑁂𑀤𑀸 𑀲𑀩𑁆𑀩𑀸𑀧𑀺 𑀆𑀧𑀢𑁆𑀢𑀺 𑀆𑀧𑀦𑁆𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀕𑁂𑀯 𑀕𑀳𑀝𑁆𑀞𑀸𑀤𑀺𑀪𑀽𑀫𑀺𑀬𑀁 𑀞𑀺𑀢𑁄 𑀛𑀸𑀦𑀸𑀤𑀻𑀦𑀁 𑀪𑀸𑀕𑀻 𑀅𑀲𑁆𑀲 𑀲𑀼𑀤𑁆𑀥𑀦𑁆𑀢𑁂 𑀞𑀺𑀢𑀢𑁆𑀢𑀸, 𑀬𑁄 𑀧𑀦 𑀉𑀓𑁆𑀔𑀺𑀢𑁆𑀢𑀓𑁄 𑀅𑀦𑁄𑀲𑀸𑀭𑀺𑀢𑁄, 𑀕𑀭𑀼𑀥𑀫𑁆𑀫𑀁 𑀯𑀸 𑀆𑀧𑀚𑁆𑀚𑀺𑀢𑁆𑀯𑀸 𑀅𑀯𑀼𑀝𑁆𑀞𑀺𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀕𑀳𑀝𑁆𑀞𑀸𑀤𑀺𑀪𑀽𑀫𑀺𑀬𑀁 𑀞𑀺𑀢𑁄, 𑀦 𑀲𑁄 𑀛𑀸𑀦𑀸𑀤𑀻𑀦𑀁 𑀪𑀸𑀕𑀻𑀬𑁂𑀯 𑀪𑀯𑀢𑀺 𑀦 𑀲𑀼𑀤𑁆𑀥𑀦𑁆𑀢𑁂 𑀞𑀺𑀢𑀢𑁆𑀢𑀸, 𑀲𑀓𑀭𑀡𑀻𑀬𑀢𑁆𑀢𑀸 𑀘, 𑀢𑁂𑀦𑁂𑀯 𑀪𑀕𑀯𑀢𑀸 ‘‘𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀑𑀲𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑁂 𑀪𑀺𑀓𑁆𑀔𑀼𑀓𑀸𑀮𑁂 𑀆𑀧𑀦𑁆𑀦𑀸 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀺𑀧𑁆𑀧𑀝𑀺𑀲𑀸𑀭𑀁 𑀚𑀦𑀬𑀺𑀢𑁆𑀯𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀫𑀽𑀮𑀓𑀸𑀦𑀁 𑀧𑀸𑀫𑁄𑀚𑁆𑀚𑀸𑀤𑀻𑀦𑀁 𑀲𑀫𑁆𑀪𑀯𑀁 𑀦𑀺𑀯𑀸𑀭𑁂𑀦𑁆𑀢𑀺, 𑀦𑁄 𑀲𑀓𑀸𑀲𑀸𑀯𑁂𑀲𑀼𑀬𑁂𑀯. 𑀦𑁄 𑀘𑁂 𑀦𑀺𑀯𑀸𑀭𑁂𑀦𑁆𑀢𑀺, 𑀲𑀫𑁆𑀪𑀯𑀢𑀺. 𑀕𑀭𑀼𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀯𑀺𑀓𑀢𑁆𑀯𑀸 𑀘𑁂 𑀉𑀧𑁆𑀧𑀩𑁆𑀩𑀚𑀺𑀢𑁄, 𑀧𑀓𑀢𑀢𑁆𑀢𑁄 𑀳𑀼𑀢𑁆𑀯𑀸 𑀉𑀧𑁆𑀧𑀩𑁆𑀩𑀚𑀺𑀢𑁄𑀢𑀺 𑀓𑀢𑁆𑀯𑀸 𑀛𑀸𑀦𑀸𑀤𑀻𑀦𑀁 𑀪𑀸𑀕𑀻 𑀅𑀲𑁆𑀲 ‘‘𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀧𑀕𑁂𑀯 𑀪𑀺𑀓𑁆𑀔𑀼𑀓𑀸𑀮𑁂, 𑀦 𑀢𑁆𑀯𑁂𑀯 𑀉𑀓𑁆𑀔𑀺𑀢𑁆𑀢𑀓𑁄 𑀲𑀓𑀭𑀡𑀻𑀬𑀢𑁆𑀢𑀸𑀢𑀺 𑀏𑀓𑁂. 𑀢𑀤𑀦𑀼𑀯𑀢𑁆𑀢𑀦𑀓𑁄 𑀧𑀦 𑀢𑀁 𑀮𑀤𑁆𑀥𑀺𑀁 𑀧𑀳𑀸𑀬 𑀪𑀸𑀕𑀻 𑀅𑀲𑁆𑀲. 𑀦, 𑀪𑀺𑀓𑁆𑀔𑀯𑁂, 𑀲𑀕𑀳𑀝𑁆𑀞𑀸𑀬 𑀧𑀭𑀺𑀲𑀸𑀬 (𑀫𑀳𑀸𑀯. 𑁧𑁫𑁪) 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀲𑁆𑀲 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬𑀸𑀢𑀺 (𑀫𑀳𑀸𑀯. 𑁧𑁮𑁩) 𑀏𑀢𑁆𑀣 𑀕𑀳𑀝𑁆𑀞𑁄 𑀦𑀸𑀫 𑀧𑀓𑀢𑀺𑀬𑀸 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑁄. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 𑀞𑀺𑀢𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄. 𑀲𑁄 𑀲𑀓𑀸𑀲𑀸𑀯𑁂𑀲𑀼 𑀲𑀸𑀧𑁂𑀓𑁆𑀔𑀢𑁆𑀢𑀸 𑀲𑀸𑀫𑀡𑁂𑀭𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀢𑁂𑀦𑁂𑀯 𑀮𑀺𑀗𑁆𑀕𑁂𑀦 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀸𑀫𑀡𑁂𑀭𑁄 𑀳𑁄𑀢𑀺. 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄 𑀲𑀁𑀯𑀸𑀲𑀁 𑀲𑀸𑀤𑀺𑀬𑀦𑁆𑀢𑁄𑀧𑀺 𑀧𑀘𑁆𑀙𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀓𑁆𑀓𑀫𑁂𑀦 𑀅𑀲𑀸𑀤𑀺𑀬𑀺𑀢𑁆𑀯𑀸 𑀲𑀸𑀫𑀡𑁂𑀭𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀯𑀺𑀬 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀸𑀫𑀡𑁂𑀭𑁄 𑀳𑁄𑀢𑀺, 𑀦 𑀧𑀼𑀦 𑀓𑀸𑀲𑀸𑀯𑀁 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑀩𑁆𑀩𑁄 𑀪𑀺𑀓𑁆𑀔𑀽𑀳𑀺 𑀧𑀞𑀫𑀁 𑀤𑀺𑀦𑁆𑀦𑀮𑀺𑀗𑁆𑀕𑁂𑀬𑁂𑀯 𑀞𑀺𑀢𑀢𑁆𑀢𑀸. 𑀬𑁄 𑀧𑀦 𑀧𑀸𑀭𑀸𑀚𑀺𑀓𑁄 𑀘𑁄𑀤𑀺𑀬𑀫𑀸𑀦𑁄 𑀧𑀭𑀸𑀚𑀺𑀢𑁆𑀯𑀸 ‘‘𑀳𑀦𑁆𑀤, 𑀪𑀦𑁆𑀢𑁂, 𑀲𑀸𑀫𑀡𑁂𑀭𑁄 𑀪𑀯𑀸𑀫𑀺, 𑀲𑀭𑀡𑀸𑀦𑀺 𑀤𑁂𑀣𑀸’’𑀢𑀺 𑀯𑀤𑀢𑀺, ‘‘𑀲𑀸𑀥𑀼 𑀕𑀡𑁆𑀳𑀸𑀳𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀕𑀺𑀳𑀺𑀮𑀺𑀗𑁆𑀕𑁂 𑀞𑀧𑁂𑀢𑁆𑀯𑀸 𑀧𑀼𑀦 𑀓𑀸𑀲𑀸𑀬𑀸𑀦𑀺 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. ‘‘𑀇𑀤𑀁 𑀧𑀦 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀆𑀘𑀭𑀺𑀬𑁄 𑀯𑀤𑀢𑀺. 𑀧𑀯𑁂𑀲𑀦𑀁 𑀦𑀸𑀫 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀅𑀗𑁆𑀕𑀚𑀸𑀢𑁂𑀦 𑀲𑀫𑁆𑀨𑀼𑀲𑀦𑀁. 𑀧𑀯𑀺𑀝𑁆𑀞𑀁 𑀦𑀸𑀫 𑀬𑀸𑀯 𑀫𑀽𑀮𑀸 𑀧𑀯𑁂𑀲𑁂𑀦𑁆𑀢𑀲𑁆𑀲 𑀯𑀺𑀧𑁆𑀧𑀓𑀢𑀓𑀸𑀮𑁂 𑀯𑀸𑀬𑀸𑀫𑀓𑀸𑀮𑁄. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑁂 𑀅𑀗𑁆𑀕𑀚𑀸𑀢𑀁 𑀞𑀺𑀢𑀁 𑀦𑀸𑀫. 𑀉𑀤𑁆𑀥𑀭𑀡𑀁 𑀦𑀸𑀫 𑀦𑀻𑀳𑀭𑀡𑀓𑀸𑀮𑁄. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀯𑀸𑀬𑀸𑀫𑀢𑁄 𑀑𑀭𑀫𑀺𑀢𑁆𑀯𑀸 𑀞𑀸𑀦𑀁 𑀞𑀺𑀢𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀯𑁂𑀲𑀦𑀧𑀯𑀺𑀝𑁆𑀞𑀉𑀤𑁆𑀥𑀭𑀡𑀓𑀸𑀮𑁂𑀲𑀼𑀧𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀳𑁄𑀢𑀺𑀬𑁂𑀯.

𑀧𑀞𑀫𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀲𑀢𑁆𑀢𑀢𑀺𑀤𑁆𑀯𑀺𑀲𑀢𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸

𑁫𑁯-𑁬𑁦. ‘‘𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢’’𑀦𑁆𑀢𑀺 𑀯𑀘𑀦𑀢𑁄 𑀅𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀫𑁆𑀧𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀲𑁄 𑀔𑀸𑀬𑀺𑀢𑀁, 𑀉𑀧𑁆𑀧𑀸𑀝𑀺𑀢𑀁 𑀯𑀸 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺, 𑀢𑀣𑀸 ‘‘𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢’’𑀦𑁆𑀢𑀺 𑀯𑀘𑀦𑀢𑁄 𑀫𑀢𑀁 𑀲𑀩𑁆𑀩𑀔𑀸𑀬𑀺𑀢𑀁, 𑀉𑀧𑁆𑀧𑀸𑀝𑀺𑀢𑀁 𑀯𑀸 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀲𑀸𑀯𑀲𑁂𑀲𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀇𑀤𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑀁 𑀮𑁄𑀓𑀯𑀚𑁆𑀚𑀁, 𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀧𑀸𑀭𑀸𑀚𑀺𑀓𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀫𑁆𑀧𑀺 𑀳𑀺 𑀮𑁄𑀓𑀯𑀚𑁆𑀚𑀁, 𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀅𑀣 𑀯𑀸 𑀉𑀪𑀬𑀫𑁆𑀧𑀺 𑀅𑀦𑀯𑀲𑁂𑀲𑀁 𑀧𑀜𑁆𑀜𑀢𑁆𑀢𑀁. 𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑁂 𑀳𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀁 𑀧𑀸𑀧𑁂𑀢𑁆𑀯𑀸 𑀞𑀧𑀺𑀢𑁂 𑀢𑀢𑁄 𑀧𑀭𑀁 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀔𑁂𑀢𑁆𑀢𑀫𑁆𑀧𑀺 𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑀁 𑀯𑀺𑀬 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑀢𑁆𑀣 𑀦𑀺𑀫𑀺𑀢𑁆𑀢𑀁 𑀔𑀸𑀬𑀺𑀢𑀁, 𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣𑀸𑀳 𑁋 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀓𑀺𑀁 𑀲𑀸𑀯𑀲𑁂𑀲𑀫𑁂𑀯 𑀪𑀕𑀯𑀸 𑀧𑀜𑁆𑀜𑀸𑀧𑁂𑀢𑀻𑀢𑀺? 𑀦. 𑀏𑀓𑀁𑀲𑀢𑁄 𑀧𑀦 𑀬𑀣𑀸𑀲𑀫𑁆𑀪𑀯𑀁 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀬𑀺𑀲𑁆𑀲𑀸𑀫, 𑀓𑀺𑀫𑀢𑁆𑀣𑀁 𑀧𑀦 𑀪𑀕𑀯𑀸 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂 𑀧𑀸𑀭𑀸𑀚𑀺𑀓𑀁 𑀦 𑀧𑀜𑁆𑀜𑀸𑀧𑁂𑀲𑀻𑀢𑀺 𑀅𑀬𑀁 𑀢𑀸𑀯 𑀅𑀧𑀼𑀘𑁆𑀙𑀸 𑀩𑀼𑀤𑁆𑀥𑀯𑀺𑀲𑀬𑀢𑁆𑀢𑀸 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸. 𑀇𑀤𑀁 𑀧𑀦𑁂𑀢𑁆𑀣 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 ‘‘𑀉𑀧𑀟𑁆𑀠𑀪𑀸𑀯𑀲𑁆𑀲 𑀤𑀼𑀩𑁆𑀩𑀺𑀦𑀺𑀘𑁆𑀙𑀬𑀢𑁆𑀢𑀸’’𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀦𑀸𑀫 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑀼𑀔𑀸𑀦𑀁 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀢𑀺𑀓𑁆𑀓𑀫𑁆𑀫 𑀬𑀸𑀯 𑀢𑀢𑀺𑀬𑀓𑁄𑀝𑁆𑀞𑀸𑀲𑀧𑀭𑀺𑀬𑁄𑀲𑀸𑀦𑀸 𑀔𑀸𑀤𑀺𑀢𑀁, 𑀢𑀢𑀺𑀬𑀓𑁄𑀝𑁆𑀞𑀸𑀲𑀁 𑀅𑀢𑀺𑀓𑁆𑀓𑀫𑁆𑀫 𑀬𑀸𑀯 𑀘𑀢𑀼𑀢𑁆𑀣𑀓𑁄𑀝𑁆𑀞𑀸𑀲𑀧𑀭𑀺𑀬𑁄𑀲𑀸𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼.

𑀬𑀤𑀺𑀧𑀺 𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁄 𑀔𑀸𑀬𑀺𑀢𑀦𑁆𑀢𑀺 ‘‘𑀚𑀻𑀯𑀫𑀸𑀦𑀓𑀲𑀭𑀻𑀭𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀮𑁆𑀮𑀲𑀭𑀻𑀭𑁂𑀢𑀺 𑀅𑀪𑀺𑀦𑀯𑁂, 𑀅𑀓𑀼𑀣𑀺𑀢𑁂 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀫𑀸𑀦𑀲𑀭𑀻𑀭𑁂 𑀅𑀓𑁆𑀔𑀺𑀦𑀸𑀲𑀸𑀤𑀻𑀲𑀼 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀦𑀸𑀲𑀸𑀬 𑀯𑀢𑁆𑀣𑀺𑀓𑁄𑀲𑁂 𑀘 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 ‘‘𑀅𑀫𑀕𑁆𑀕𑁂𑀦 𑀅𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑀯𑀺𑀲𑁂𑀲𑁂𑀦𑁂𑀢𑁆𑀣 𑀯𑀼𑀢𑁆𑀢𑀁. 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀤𑀼𑀓𑁆𑀓𑀝𑀁, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀅𑀓𑁆𑀔𑀺𑀓𑀡𑁆𑀡𑀯𑀡𑁂𑀲𑀼 𑀤𑀼𑀓𑁆𑀓𑀝𑀁, 𑀅𑀯𑀲𑁂𑀲𑀲𑀭𑀻𑀭𑁂𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀇𑀤𑀁 𑀯𑀺𑀦𑀻𑀢𑀯𑀢𑁆𑀣𑀼𑀲𑁆𑀫𑀺𑀁 ‘‘𑀏𑀳𑀺, 𑀪𑀦𑁆𑀢𑁂, 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀸’’𑀢𑀺. ‘‘𑀅𑀮𑀁 𑀪𑀕𑀺𑀦𑀺 𑀦𑁂𑀢𑀁 𑀓𑀧𑁆𑀧𑀢𑀻’’𑀢𑀺 (𑀧𑀸𑀭𑀸. 𑁭𑁯) 𑀇𑀫𑀺𑀦𑀸 𑀢𑀸𑀯 𑀫𑁂𑀣𑀼𑀦𑀭𑀸𑀕𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. ‘‘𑀏𑀳𑀺, 𑀪𑀦𑁆𑀢𑁂, 𑀊𑀭𑀼𑀦𑁆𑀢𑀭𑀺𑀓𑀸𑀬 𑀖𑀝𑁆𑀝𑁂𑀳𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀢𑀣𑀸 𑀅𑀓𑀸𑀲𑀻’’𑀢𑀺 𑀇𑀫𑀺𑀦𑀸 𑀢𑀸𑀯 𑀫𑁄𑀘𑀦𑀲𑁆𑀲𑀸𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀢𑁂𑀦𑁂𑀯𑀸𑀳 𑀪𑀕𑀯𑀸 ‘‘𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺. ‘‘𑀬𑁄 𑀧𑀦 𑀫𑁂𑀣𑀼𑀦𑀭𑀸𑀕𑁂𑀦 𑀊𑀭𑀼𑀦𑁆𑀢𑀭𑀺𑀓𑀸𑀬 𑀖𑀝𑁆𑀝𑁂𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀲𑀺𑀤𑁆𑀥𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀫𑀦𑀼𑀲𑁆𑀲𑀸𑀦𑀁 𑀅𑀓𑁆𑀔𑀺𑀓𑀡𑁆𑀡𑀯𑀡𑀸𑀤𑀺 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼, 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀏𑀢𑁆𑀣 𑀤𑀼𑀯𑀺𑀜𑁆𑀜𑁂𑀬𑁆𑀬𑁄 𑀧𑀸𑀴𑀺𑀮𑁂𑀲𑁄, 𑀢𑀲𑁆𑀫𑀸 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁, 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀓𑁆𑀔𑀺𑀓𑀡𑁆𑀡𑀯𑀡𑀁 𑀙𑀼𑀧𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀲𑀺𑀤𑁆𑀥𑀦𑁆𑀢𑀺 𑀅𑀬𑀁 𑀘𑀫𑁆𑀫𑀓𑁆𑀔𑀦𑁆𑀥𑀓𑁂 𑀧𑀸𑀴𑀺𑀮𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲𑀸𑀢𑀺 𑀚𑀻𑀯𑀫𑀸𑀦𑀓𑀲𑀤𑁆𑀤𑁄 𑀫𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦𑀸𑀢𑀺 𑀇𑀤𑀁 𑀓𑀺𑀜𑁆𑀘𑀸𑀧𑀺 ‘‘𑀓𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀁 𑀲𑀭𑀻𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀲𑁂𑀲𑀅𑀝𑁆𑀞𑀓𑀣𑀸𑀲𑀼 ‘‘𑀫𑁂𑀣𑀼𑀦𑀭𑀸𑀕𑁂𑀦 𑀫𑀼𑀔𑁂𑀦𑀸’’𑀢𑀺 𑀯𑀘𑀦𑀸𑀪𑀸𑀯𑀢𑁄 𑀢𑀢𑁆𑀣𑁂𑀯 𑀪𑀸𑀯𑀢𑁄 𑀢𑀁 𑀯𑀘𑀦𑀁 𑀧𑀸𑀴𑀺𑀯𑀘𑀦𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀫𑁂𑀣𑀼𑀦𑀭𑀸𑀕𑁂𑀦 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀯𑁂𑀲𑁂𑀦𑁆𑀢𑁄 𑀙𑀼𑀧𑀢𑀺, 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀁. ‘‘𑀫𑁂𑀣𑀼𑀦𑀭𑀸𑀕𑁂𑀦 𑀫𑀼𑀔𑁂𑀦𑀸’’𑀢𑀺𑀧𑀺 𑀓𑀢𑁆𑀣𑀘𑀺, 𑀧𑀸𑀴𑀺𑀬𑀁 𑀅𑀯𑀺𑀲𑁂𑀲𑁂𑀦 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀢𑀁 𑀲𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀁 𑀧𑀲𑀁𑀲𑀦𑁆𑀢𑀻𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀺…𑀧𑁂… 𑀯𑀼𑀢𑁆𑀢𑀦𑀬𑁂𑀦𑁂𑀯 𑀣𑀼𑀮𑁆𑀮𑀘𑁆𑀘𑀬𑀁, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀤𑀼𑀓𑁆𑀓𑀝𑀦𑁆𑀢𑀺𑀆𑀤𑀺𑀅𑀝𑁆𑀞𑀓𑀣𑀸𑀯𑀘𑀦𑁂𑀳𑀺 𑀲𑀁𑀲𑀦𑁆𑀤𑀦𑀢𑁄. ‘‘𑀢𑀁 𑀲𑀩𑁆𑀩𑀫𑁆𑀧𑀺…𑀧𑁂… 𑀧𑀼𑀭𑀺𑀫𑀁 𑀧𑀲𑀁𑀲𑀦𑁆𑀢𑀻’’𑀢𑀺 𑀇𑀤𑀁 𑀲𑀗𑁆𑀕𑀻𑀢𑀺𑀢𑁄 𑀧𑀘𑁆𑀙𑀸 𑀲𑀻𑀳𑀴𑀤𑀻𑀧𑀓𑁂𑀳𑀺 𑀆𑀘𑀭𑀺𑀬𑁂𑀳𑀺 𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀯𑀘𑀦𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀇𑀢𑀭𑀣𑀸 𑀳𑀻𑀢𑀺 𑀧𑀓𑀢𑀺𑀫𑀼𑀔𑁂𑀦. 𑀓𑀲𑁆𑀫𑀸 𑀤𑀼𑀓𑁆𑀓𑀝𑀦𑁆𑀢𑀺 𑀘𑁂? ‘‘𑀅𑀗𑁆𑀕𑀼𑀮𑀺𑀩𑀻𑀚𑀸𑀤𑀻𑀦𑀺 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀼𑀢𑁆𑀢𑀁. 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀧𑀲𑁆𑀲𑀸𑀯𑀫𑀕𑁆𑀕𑀦𑁆𑀢𑀺 𑀏𑀢𑁆𑀣 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀧𑀼𑀩𑁆𑀩𑁂 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀏𑀢𑁆𑀣 ‘‘𑀧𑀲𑁆𑀲𑀸𑀯𑀫𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑁂 𑀤𑀼𑀓𑁆𑀓𑀝𑀦𑁆𑀢𑀺 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀫𑁂𑀣𑀼𑀦𑀭𑀸𑀕𑁂𑀦. 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀘 𑀔𑀦𑁆𑀥𑀓𑁂 𑀧𑀲𑁆𑀲𑀸𑀯𑀦𑀺𑀫𑀺𑀢𑁆𑀢𑀯𑀲𑁂𑀦𑁂𑀯𑀸𑀕𑀢𑀢𑁆𑀢𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀏𑀓𑀽𑀦𑀲𑀢𑁆𑀢𑀢𑀺𑀤𑁆𑀯𑀺𑀲𑀢𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀦𑁆𑀣𑀢𑀘𑀢𑀼𑀓𑁆𑀓𑀪𑁂𑀤𑀓𑀓𑀣𑀸𑀯𑀡𑁆𑀡𑀦𑀸

𑁬𑁧-𑁨. 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀔𑀸𑀡𑀼𑀁 𑀓𑀢𑁆𑀯𑀸𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑁆𑀢𑁄 𑀔𑀸𑀡𑀼𑀁 𑀧𑀯𑁂𑀲𑁂𑀢𑁆𑀯𑀸 𑀲𑀫𑀢𑀮𑀁 𑀯𑀸 𑀓𑀢𑁆𑀯𑀸 𑀅𑀢𑀺𑀭𑀺𑀢𑁆𑀢𑀁 𑀯𑀸 𑀔𑀸𑀡𑀼𑀁 𑀖𑀝𑁆𑀝𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀧𑀯𑁂𑀲𑀸𑀪𑀸𑀯𑀸. 𑀈𑀲𑀓𑀁 𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀞𑀺𑀢𑀁 𑀔𑀸𑀡𑀼𑀫𑁂𑀯 𑀘𑁂 𑀅𑀗𑁆𑀕𑀚𑀸𑀢𑁂𑀦 𑀙𑀼𑀧𑀢𑀺, 𑀧𑀸𑀭𑀸𑀚𑀺𑀓𑀁. ‘‘𑀉𑀧𑁆𑀧𑀮𑀕𑀦𑁆𑀥𑀸 𑀉𑀧𑁆𑀧𑀮𑀪𑀸𑀯𑀸’’𑀢𑀺𑀧𑀺 𑀤𑀻𑀧𑀯𑀸𑀲𑀺𑀦𑁄 𑀧𑀞𑀦𑁆𑀢𑀺 𑀓𑀺𑀭. 𑀲𑀼𑀢𑁆𑀢𑀁 𑀪𑀺𑀓𑁆𑀔𑀼𑀫𑁆𑀳𑀻𑀢𑀺 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂𑀢𑀺 (𑀧𑀸𑀭𑀸. 𑁫𑁭) 𑀏𑀢𑁆𑀣 𑀯𑀺𑀬. ‘‘𑀲𑀼𑀢𑁆𑀢𑀪𑀺𑀓𑁆𑀔𑀼𑀫𑁆𑀳𑀻’’𑀢𑀺 𑀘 𑀧𑀞𑀦𑁆𑀢𑀺, 𑀢𑀁 𑀉𑀚𑀼𑀓𑀫𑁂𑀯.

𑀲𑀦𑁆𑀣𑀢𑀘𑀢𑀼𑀓𑁆𑀓𑀪𑁂𑀤𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀧𑀓𑀺𑀡𑁆𑀡𑀓𑁂 𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀓𑀺𑀭𑀺𑀬𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀓𑀸𑀬𑁄, 𑀯𑀸𑀘𑀸 𑀘 𑀲𑀳 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀓𑀺𑀭𑀺𑀬𑀸𑀦𑀁 𑀯𑀲𑁂𑀦 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸, 𑀘𑀺𑀢𑁆𑀢𑀁 𑀧𑀦𑁂𑀢𑁆𑀣 𑀅𑀧𑁆𑀧𑀫𑀸𑀡𑀁 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀲𑁆𑀲 𑀓𑀺𑀭𑀺𑀬𑀢𑁆𑀢𑀸, 𑀅𑀘𑀺𑀢𑁆𑀢𑀓𑀢𑁆𑀢𑀸 𑀘. 𑀢𑀢𑁆𑀣 𑀓𑀺𑀭𑀺𑀬𑀸 𑀆𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀫𑁆𑀧𑀺 𑀏𑀓𑀘𑁆𑀘𑀁 𑀩𑀸𑀳𑀼𑀮𑁆𑀮𑀦𑀬𑁂𑀦 ‘‘𑀓𑀺𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀬𑀺𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀁 𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑁂𑀧𑀺 ‘‘𑀲𑁄 𑀘𑁂 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁 ‘‘𑀦 𑀲𑀸𑀤𑀺𑀬𑀢𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀘. 𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸𑀧𑀺 𑀓𑀺𑀭𑀺𑀬𑀸 𑀯𑀺𑀦𑀸 𑀲𑁂𑀯𑀦𑀘𑀺𑀢𑁆𑀢𑁂𑀦 𑀦 𑀳𑁄𑀢𑀺 𑀘𑀺𑀢𑁆𑀢𑀚𑀢𑁆𑀢𑀸, 𑀯𑀺𑀓𑀸𑀭𑀭𑀽𑀧𑀢𑁆𑀢𑀸, 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀓𑀢𑁆𑀢𑀸 𑀘. 𑀢𑀲𑁆𑀫𑀸 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀫𑀺𑀤𑀁 𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀁 𑀇𑀢𑀭𑀁 𑀘𑀺𑀢𑁆𑀢𑀚𑀭𑀽𑀧𑀁 𑀯𑀺𑀬 𑀚𑀦𑀓𑀘𑀺𑀢𑁆𑀢𑁂𑀦 𑀯𑀺𑀦𑀸 𑀦 𑀢𑀺𑀝𑁆𑀞𑀢𑀺, 𑀇𑀢𑀭𑀁 𑀲𑀤𑁆𑀤𑀸𑀬𑀢𑀦𑀁 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀓𑀺𑀭𑀺𑀬𑀸𑀬 𑀲𑀢𑀺 𑀏𑀓𑀦𑁆𑀢𑀢𑁄 𑀢𑀚𑁆𑀚𑀦𑀓𑀁 𑀲𑁂𑀯𑀦𑀘𑀺𑀢𑁆𑀢𑀁 𑀅𑀢𑁆𑀣𑀺𑀬𑁂𑀯𑀸𑀢𑀺 𑀓𑀢𑁆𑀯𑀸 𑀦 𑀲𑀸𑀤𑀺𑀬𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺. 𑀬𑀲𑁆𑀫𑀸 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀫𑁆𑀧𑀺 𑀲𑀫𑀸𑀦𑀁 𑀲𑁂𑀯𑀦𑀘𑀺𑀢𑁆𑀢𑀁 𑀦 𑀲𑀩𑁆𑀩𑀓𑀸𑀮𑀁 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 ‘‘𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀦𑀼𑀧𑁆𑀧𑀚𑁆𑀚𑀢𑀺 𑀘𑁂, 𑀦 𑀲𑀸𑀤𑀺𑀬𑀢𑀺 𑀦𑀸𑀫, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑁂𑀦𑁂𑀯 𑀪𑀕𑀯𑀸 ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺 𑀘𑀺𑀢𑁆𑀢𑁂𑀦𑁂𑀯 𑀆𑀧𑀢𑁆𑀢𑀺𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀦 𑀓𑀺𑀭𑀺𑀬𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺, 𑀢𑀸𑀦𑀺 𑀏𑀯 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀦𑀸𑀫𑀸𑀢𑀺 𑀘, 𑀘𑀢𑀽𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀓𑀸𑀬𑀯𑀸𑀘𑀸𑀳𑀺 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀻𑀢𑀺 𑀘 𑀏𑀢𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀅𑀯𑀺𑀭𑁄𑀥𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀜𑁆𑀜𑀣𑀸 𑀯𑀺𑀭𑁄𑀥𑀺𑀢𑀸𑀦𑀺. 𑀓𑀣𑀁? 𑀬𑀜𑁆𑀳𑀺 𑀆𑀧𑀢𑁆𑀢𑀺𑀁 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀦 𑀢𑀢𑁆𑀣 𑀓𑀸𑀬𑀸𑀤𑀬𑁄𑀢𑀺 𑀆𑀧𑀦𑁆𑀦𑀁, 𑀢𑀢𑁄 𑀓𑀫𑁆𑀫𑀯𑀸𑀘𑀸𑀬 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀲𑀢𑁆𑀢𑀸𑀢𑀺 𑀆𑀧𑀚𑁆𑀚𑀢𑀺, 𑀅𑀣 𑀢𑀢𑁆𑀣𑀸𑀧𑀺 𑀓𑀸𑀬𑀸𑀤𑀬𑁄 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀮𑀩𑁆𑀪𑀦𑁆𑀢𑀺. ‘‘𑀘𑀢𑀽𑀳𑀺 𑀆𑀓𑀸𑀭𑁂𑀳𑀻’’𑀢𑀺 𑀦 𑀬𑀼𑀚𑁆𑀚𑀢𑀺, ‘‘𑀢𑀻𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀏𑀯𑀁 𑀯𑀺𑀭𑁄𑀥𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁 𑀅𑀯𑀺𑀭𑁄𑀥𑀺𑀢𑀸𑀦𑀻𑀢𑀺? 𑀲𑀯𑀺𑀜𑁆𑀜𑀢𑁆𑀢𑀺𑀓𑀸𑀯𑀺𑀜𑁆𑀜𑀢𑁆𑀢𑀺𑀓𑀪𑁂𑀤𑀪𑀺𑀦𑁆𑀦𑀢𑁆𑀢𑀸 𑀓𑀸𑀬𑀸𑀤𑀻𑀦𑀁. 𑀬𑀸 𑀓𑀺𑀭𑀺𑀬𑀸 𑀆𑀧𑀢𑁆𑀢𑀺, 𑀢𑀁 𑀏𑀓𑀘𑁆𑀘𑀁 𑀓𑀸𑀬𑁂𑀦 𑀲𑀯𑀺𑀜𑁆𑀜𑀢𑁆𑀢𑀺𑀓𑁂𑀦 𑀆𑀧𑀚𑁆𑀚𑀢𑀺, 𑀏𑀓𑀘𑁆𑀘𑀁 𑀲𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸𑀘𑀸𑀬, 𑀏𑀓𑀘𑁆𑀘𑀁 𑀲𑀯𑀺𑀜𑁆𑀜𑀢𑁆𑀢𑀺𑀓𑀸𑀳𑀺 𑀓𑀸𑀬𑀯𑀸𑀘𑀸𑀳𑀺 𑀆𑀧𑀚𑁆𑀚𑀢𑀺. 𑀬𑀸 𑀧𑀦 𑀅𑀓𑀺𑀭𑀺𑀬𑀸 𑀆𑀧𑀢𑁆𑀢𑀺, 𑀢𑀁 𑀏𑀓𑀘𑁆𑀘𑀁 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀢𑀜𑁆𑀘 𑀔𑁄 𑀅𑀯𑀲𑀺𑀝𑁆𑀞𑀸𑀳𑀺 𑀅𑀯𑀺𑀜𑁆𑀜𑀢𑁆𑀢𑀺𑀓𑀸𑀳𑀺 𑀓𑀸𑀬𑀯𑀸𑀘𑀸𑀳𑀺𑀬𑁂𑀯, 𑀦 𑀯𑀺𑀦𑀸 ‘‘𑀦𑁄 𑀘𑁂 𑀓𑀸𑀬𑁂𑀦 𑀯𑀸𑀘𑀸𑀬 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁧𑁪, 𑁪𑁨𑁧) 𑀯𑀘𑀦𑀢𑁄. 𑀅𑀯𑀺𑀲𑁂𑀲𑁂𑀦 𑀯𑀸 𑀏𑀓𑀘𑁆𑀘𑀁 𑀆𑀧𑀢𑁆𑀢𑀺𑀁 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀏𑀓𑀘𑁆𑀘𑀁 𑀯𑀸𑀘𑀸𑀬, 𑀏𑀓𑀘𑁆𑀘𑀁 𑀓𑀸𑀬𑀯𑀸𑀘𑀸𑀳𑀺. 𑀬𑀁 𑀧𑀦𑁂𑀢𑁆𑀣 𑀓𑀸𑀬𑀯𑀸𑀘𑀸𑀳𑀺, 𑀢𑀁 𑀏𑀓𑀘𑁆𑀘𑀁 𑀓𑁂𑀯𑀮𑀸𑀳𑀺 𑀓𑀸𑀬𑀯𑀸𑀘𑀸𑀳𑀺 𑀆𑀧𑀚𑁆𑀚𑀢𑀺, 𑀏𑀓𑀘𑁆𑀘𑀁 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀯𑀁 𑀅𑀯𑀺𑀭𑁄𑀥𑀺𑀢𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀭𑀸𑀬𑀁 𑀲𑀫𑀸𑀲𑀢𑁄 𑀅𑀢𑁆𑀣𑀯𑀺𑀪𑀸𑀯𑀦𑀸 𑁋 𑀓𑀸𑀬𑁂𑀦 𑀆𑀧𑀚𑁆𑀚𑀢𑀻𑀢𑀺 𑀓𑀸𑀬𑁂𑀦 𑀲𑀯𑀺𑀜𑁆𑀜𑀢𑁆𑀢𑀺𑀓𑁂𑀦 𑀅𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀏𑀓𑀘𑁆𑀘𑀁 𑀆𑀧𑀚𑁆𑀚𑀢𑀺, 𑀅𑀯𑀺𑀜𑁆𑀜𑀢𑁆𑀢𑀺𑀓𑁂𑀦 𑀓𑀢𑁆𑀢𑀩𑁆𑀩𑀁 𑀅𑀓𑀢𑁆𑀯𑀸 𑀆𑀧𑀚𑁆𑀚𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀅𑀓𑀢𑀫𑁆𑀧𑀺 𑀳𑀺 𑀮𑁄𑀓𑁂 ‘‘𑀓𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀇𑀤𑀁 𑀤𑀼𑀓𑁆𑀓𑀝𑀁 𑀫𑀬𑀸, 𑀬𑀁 𑀫𑀬𑀸 𑀧𑀼𑀜𑁆𑀜𑀁 𑀦 𑀓𑀢’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼, 𑀲𑀸𑀲𑀦𑁂 𑀘 ‘‘𑀇𑀤𑀁 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀼𑀓𑁆𑀓𑀝𑀁, 𑀬𑀁 𑀢𑁆𑀯𑀁 𑀪𑀕𑀯𑀦𑁆𑀢𑀁 𑀦 𑀧𑀼𑀘𑁆𑀙𑀻’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁪𑁪𑁩), 𑀏𑀯𑀫𑀺𑀥 𑀯𑀺𑀦𑀬𑀧𑀭𑀺𑀬𑀸𑀬𑁂 𑀓𑀸𑀬𑁂𑀦 𑀅𑀓𑀭𑀡𑀻𑀬𑀫𑁆𑀧𑀺 ‘‘𑀓𑀸𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀅𑀬𑀫𑁂𑀯 𑀦𑀬𑁄 𑀯𑀸𑀘𑀸𑀬 𑀆𑀧𑀚𑁆𑀚𑀢𑀻𑀢𑀺𑀆𑀤𑀻𑀲𑀼. 𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩𑀢𑁄 𑀯𑀸 𑀅𑀓𑀢𑁆𑀢𑀩𑁆𑀩𑀢𑁄 𑀯𑀸 𑀓𑀸𑀬𑀸𑀤𑀺𑀪𑁂𑀤𑀸𑀧𑁂𑀓𑁆𑀔𑀫𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀓𑀺𑀭𑀺𑀬𑀸𑀕𑁆𑀕𑀳𑀡𑀁 𑀓𑀸𑀬𑀸𑀤𑀻𑀦𑀁 𑀲𑀯𑀺𑀜𑁆𑀜𑀢𑁆𑀢𑀺𑀓𑀸𑀯𑀺𑀜𑁆𑀜𑀢𑁆𑀢𑀺𑀓𑀪𑁂𑀤𑀤𑀲𑁆𑀲𑀦𑀢𑁆𑀣𑀁. 𑀲𑀜𑁆𑀜𑀸𑀕𑁆𑀕𑀳𑀡𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀸𑀦𑀗𑁆𑀕𑀘𑀺𑀢𑁆𑀢𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁, 𑀢𑁂𑀦 𑀬𑀁 𑀘𑀺𑀢𑁆𑀢𑀁 𑀓𑀺𑀭𑀺𑀬𑀸𑀮𑀓𑁆𑀔𑀡𑁂, 𑀅𑀓𑀺𑀭𑀺𑀬𑀸𑀮𑀓𑁆𑀔𑀡𑁂 𑀯𑀸 𑀲𑀦𑁆𑀦𑀺𑀳𑀺𑀢𑀁, 𑀬𑀢𑁄 𑀯𑀸 𑀓𑀺𑀭𑀺𑀬𑀸 𑀯𑀸 𑀅𑀓𑀺𑀭𑀺𑀬𑀸 𑀯𑀸 𑀳𑁄𑀢𑀺, 𑀦 𑀢𑀁 𑀅𑀯𑀺𑀲𑁂𑀲𑁂𑀦 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀯𑀸 𑀅𑀦𑀗𑁆𑀕𑀁 𑀯𑀸 𑀳𑁄𑀢𑀺, 𑀓𑀺𑀦𑁆𑀢𑀼 𑀬𑀸𑀬 𑀲𑀜𑁆𑀜𑀸𑀬 ‘‘𑀲𑀜𑁆𑀜𑀸𑀯𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀅𑀗𑁆𑀕𑀁, 𑀇𑀢𑀭𑀁 𑀅𑀦𑀗𑁆𑀕𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀸𑀧𑀤𑀁 𑀲𑀘𑀺𑀢𑁆𑀢𑀓𑀁 𑀳𑁄𑀢𑀺, 𑀬𑀤𑀪𑀸𑀯𑀸 𑀅𑀘𑀺𑀢𑁆𑀢𑀓𑀁, 𑀢𑁂𑀦 𑀢𑀲𑁆𑀲 𑀅𑀯𑀺𑀲𑁂𑀲𑁂𑀦 𑀲𑀸𑀯𑀚𑁆𑀚𑀢𑁆𑀢𑀸 𑀮𑁄𑀓𑀯𑀚𑁆𑀚𑀪𑀸𑀯𑁄𑀯 𑀯𑀼𑀘𑁆𑀘𑀢𑀺, 𑀓𑀺𑀦𑁆𑀢𑀼 𑀲𑀸𑀯𑀚𑁆𑀚𑀁𑀬𑁂𑀯 𑀲𑀫𑀸𑀦𑀁 𑀏𑀓𑀘𑁆𑀘𑀁 𑀮𑁄𑀓𑀯𑀚𑁆𑀚𑀁 𑀏𑀓𑀘𑁆𑀘𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀮𑁄𑀓𑀯𑀚𑁆𑀚𑀕𑁆𑀕𑀳𑀡𑀁. 𑀘𑀺𑀢𑁆𑀢𑀫𑁂𑀯 𑀬𑀲𑁆𑀫𑀸 ‘‘𑀮𑁄𑀓𑀯𑀚𑁆𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀫𑀦𑁄𑀓𑀫𑁆𑀫𑀫𑁆𑀧𑀺 𑀲𑀺𑀬𑀸 𑀆𑀧𑀢𑁆𑀢𑀻𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 𑀓𑀫𑁆𑀫𑀕𑁆𑀕𑀳𑀡𑀁. 𑀬𑀁 𑀧𑀦𑁂𑀢𑁆𑀣 𑀅𑀓𑀺𑀭𑀺𑀬𑀸𑀮𑀓𑁆𑀔𑀡𑀁 𑀓𑀫𑁆𑀫𑀁, 𑀢𑀁 𑀓𑀼𑀲𑀮𑀢𑁆𑀢𑀺𑀓𑀯𑀺𑀦𑀺𑀫𑀼𑀢𑁆𑀢𑀁 𑀲𑀺𑀬𑀸𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 𑀓𑀼𑀲𑀮𑀢𑁆𑀢𑀺𑀓𑀕𑁆𑀕𑀳𑀡𑀁. 𑀬𑀸 𑀧𑀦𑁂𑀢𑁆𑀣 𑀅𑀩𑁆𑀬𑀸𑀓𑀢𑀸 𑀆𑀧𑀢𑁆𑀢𑀺, 𑀢𑀁 𑀏𑀓𑀘𑁆𑀘𑀁 𑀅𑀯𑁂𑀤𑀦𑀫𑁆𑀧𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀆𑀧𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀯𑁂𑀤𑀦𑀸𑀢𑁆𑀢𑀺𑀓𑀁 𑀏𑀢𑁆𑀣 𑀦 𑀮𑀩𑁆𑀪𑀢𑀻𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 𑀯𑁂𑀤𑀦𑀸𑀢𑁆𑀢𑀺𑀓𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀺𑀓𑁆𑀔𑀸𑀧𑀤𑀜𑁆𑀳𑀺 𑀲𑀘𑀺𑀢𑁆𑀢𑀓𑀧𑀼𑀕𑁆𑀕𑀮𑀯𑀲𑁂𑀦 ‘‘𑀢𑀺𑀘𑀺𑀢𑁆𑀢𑀁 𑀢𑀺𑀯𑁂𑀤𑀦’’𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀅𑀘𑀺𑀢𑁆𑀢𑀓𑁂𑀦𑀸𑀧𑀦𑁆𑀦𑀫𑁆𑀧𑀺 ‘‘𑀢𑀺𑀘𑀺𑀢𑁆𑀢𑀁 𑀢𑀺𑀯𑁂𑀤𑀦’’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺 𑀅𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺 (𑀧𑀭𑀺. 𑁩𑁨𑁪). 𑀅𑀢𑁆𑀣𑀸𑀧𑀢𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺 𑀓𑀼𑀲𑀮𑀘𑀺𑀢𑁆𑀢𑁄 𑀯𑀼𑀝𑁆𑀞𑀸𑀢𑀻’’𑀢𑀺𑀆𑀤𑀺 (𑀧𑀭𑀺. 𑁪𑁭𑁦). 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀲𑀜𑁆𑀜𑀸 𑀲𑀤𑀸 𑀅𑀦𑀸𑀧𑀢𑁆𑀢𑀺𑀫𑁂𑀯 𑀓𑀭𑁄𑀢𑀺, 𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀫𑁂𑀯, 𑀅𑀘𑀺𑀢𑁆𑀢𑀓𑀁 𑀦𑀸𑀫 𑀯𑀢𑁆𑀣𑀼𑀅𑀯𑀺𑀚𑀸𑀦𑀦𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀚𑀸𑀦𑀦𑀁, 𑀇𑀤𑀫𑁂𑀢𑁂𑀲𑀁 𑀦𑀸𑀦𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦𑀸𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀗𑁆𑀕𑀳𑀯𑀲𑁂𑀦. 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀤𑀸𑀦𑀸𑀤𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄. 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸𑀤𑀺 𑀲𑀺𑀬𑀸 𑀓𑀺𑀭𑀺𑀬𑀢𑁄. 𑀉𑀧𑀦𑀺𑀓𑁆𑀔𑀺𑀢𑁆𑀢𑀸𑀧𑀝𑀺𑀓𑁆𑀔𑁂𑀧𑁂 𑀲𑀺𑀬𑀸 𑀅𑀓𑀺𑀭𑀺𑀬𑀢𑁄. 𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀓𑀼𑀝𑀺𑀓𑀭𑀡𑁂 𑀲𑀺𑀬𑀸 𑀓𑀺𑀭𑀺𑀬𑀢𑁄, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀓𑀭𑀡𑁂 𑀲𑀺𑀬𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄. 𑀬𑀁 𑀘𑀺𑀢𑁆𑀢𑀗𑁆𑀕𑀁 𑀮𑀪𑀢𑀺𑀬𑁂𑀯𑀸𑀢𑀺 𑀓𑀸𑀬𑀘𑀺𑀢𑁆𑀢𑀁 𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀏𑀯𑀁. 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦 𑀲𑀳𑀸𑀧𑀺 𑀘𑀺𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁄 𑀲𑁄 𑀲𑀯𑀺𑀜𑁆𑀜𑀢𑁆𑀢𑀺𑀓𑁄, 𑀅𑀯𑀺𑀜𑁆𑀜𑀢𑁆𑀢𑀺𑀓𑁄 𑀘 𑀯𑀼𑀢𑁆𑀢𑁄 𑀓𑀸𑀬𑁄, 𑀢𑀲𑁆𑀲 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁, 𑀢𑀣𑀸 𑀯𑀘𑀻𑀓𑀫𑁆𑀫𑀁. 𑀢𑀢𑁆𑀣 𑀲𑀯𑀺𑀜𑁆𑀜𑀢𑁆𑀢𑀺𑀓𑁄 𑀓𑀸𑀬𑁄 𑀉𑀧𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀁 𑀲𑀸𑀥𑁂𑀢𑀺, 𑀇𑀢𑀭𑁄 𑀅𑀦𑀼𑀧𑁆𑀧𑀢𑁆𑀢𑀺𑀬𑀸. 𑀢𑀣𑀸 𑀯𑀸𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 ‘‘𑀬𑁄 𑀢𑀢𑁆𑀣 𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄’’𑀢𑀺 𑀯𑀘𑀦𑀢𑁄 𑀯𑀻𑀢𑀺𑀓𑁆𑀓𑀫𑁂 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. ‘‘𑀳𑀲𑀺𑀢𑀼𑀧𑁆𑀧𑀸𑀤𑀯𑁄𑀝𑁆𑀞𑀩𑁆𑀩𑀦𑀸𑀦𑀺𑀧𑀺 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀸𑀦𑀺. 𑀇𑀤𑀫𑁆𑀧𑀺 𑀦 𑀫𑀬𑀸 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀳𑀲𑀫𑀸𑀦𑁄 𑀧𑀲𑁆𑀲𑀢𑀺 𑀬𑀤𑀸, 𑀢𑀤𑀸 𑀯𑁄𑀝𑁆𑀞𑀩𑁆𑀩𑀦𑀁 𑀚𑀯𑀦𑀕𑀢𑀺𑀓’’𑀦𑁆𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀺 𑀧𑀜𑁆𑀜𑀢𑁆𑀢𑀺𑀁 𑀅𑀚𑀸𑀦𑀺𑀢𑁆𑀯𑀸 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸𑀤𑀺𑀓𑀸𑀮𑁂 𑀕𑀳𑁂𑀢𑀩𑁆𑀩𑀸𑀦𑀺.

𑀏𑀢𑁆𑀣 𑀧𑀦 𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄…𑀧𑁂… 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀅𑀢𑁆𑀣𑀺 𑀓𑁄𑀘𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄, 𑀅𑀢𑁆𑀣𑀺 𑀓𑁄𑀘𑀺 𑀦 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄. 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀽𑀲𑀼 𑀧𑀝𑀺𑀲𑁂𑀯𑀦𑁆𑀢𑁄 𑀅𑀢𑁆𑀣𑀺 𑀓𑁄𑀘𑀺 𑀦 𑀧𑀸𑀭𑀸𑀚𑀺𑀓𑁄. 𑀧𑀓𑁆𑀔𑀧𑀡𑁆𑀟𑀓𑁄 𑀅𑀧𑀡𑁆𑀟𑀓𑀧𑀓𑁆𑀔𑁂 𑀉𑀧𑀲𑀫𑁆𑀧𑀦𑁆𑀦𑁄 𑀧𑀡𑁆𑀟𑀓𑀧𑀓𑁆𑀔𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀲𑁄 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀻𑀢𑀺 𑀦 𑀧𑀸𑀭𑀸𑀚𑀺𑀓𑁄 𑀦𑀸𑀫. 𑀦 𑀳𑀺 𑀅𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺. 𑀲𑁄 𑀅𑀦𑀸𑀧𑀢𑁆𑀢𑀺𑀓𑀢𑁆𑀢𑀸 𑀅𑀧𑀡𑁆𑀟𑀓𑀧𑀓𑁆𑀔𑁂 𑀆𑀕𑀢𑁄 𑀓𑀺𑀁 𑀅𑀲𑀁𑀯𑀸𑀲𑁄 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀳𑁄𑀢𑀺, ‘‘𑀅𑀪𑀩𑁆𑀩𑁄 𑀢𑁂𑀦 𑀲𑀭𑀻𑀭𑀩𑀦𑁆𑀥𑀦𑁂𑀦𑀸’’𑀢𑀺 (𑀧𑀸𑀭𑀸. 𑁫𑁫; 𑀫𑀳𑀸𑀯. 𑁧𑁨𑁯) 𑀳𑀺 𑀯𑀼𑀢𑁆𑀢𑀁. ‘‘𑀬𑁄 𑀧𑀦, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀽𑀦𑀁…𑀧𑁂… 𑀅𑀲𑀁𑀯𑀸𑀲𑁄’’𑀢𑀺 (𑀧𑀸𑀭𑀸. 𑁪𑁪) 𑀯𑀼𑀢𑁆𑀢𑀢𑁆𑀢𑀸 𑀬𑁄 𑀧𑀦 𑀪𑀺𑀓𑁆𑀔𑀼𑀪𑀸𑀯𑁂𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀲𑁄 𑀏𑀯 𑀅𑀪𑀩𑁆𑀩𑁄. 𑀦𑀸𑀬𑀁 𑀅𑀧𑀸𑀭𑀸𑀚𑀺𑀓𑀢𑁆𑀢𑀸𑀢𑀺 𑀘𑁂? 𑀦, ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁮𑁬) 𑀯𑀼𑀢𑁆𑀢𑀝𑁆𑀞𑀸𑀦𑁂 𑀬𑀣𑀸 𑀅𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑀺𑀢𑀸𑀬𑀧𑀺 𑀓𑀫𑁆𑀫𑀁 𑀭𑀼𑀳𑀢𑀺 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀭𑀺𑀤𑀁 𑀬𑀼𑀢𑁆𑀢𑀺 𑁋 𑀉𑀧𑀲𑀫𑁆𑀧𑀦𑁆𑀦𑀧𑀼𑀩𑁆𑀩𑁄 𑀏𑀯 𑀘𑁂 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺, 𑀲𑀗𑁆𑀖𑁄 𑀘 𑀢𑀲𑁆𑀫𑀺𑀁 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻, 𑀏𑀯𑀜𑁆𑀘𑁂 𑀓𑀫𑁆𑀫𑀁 𑀭𑀼𑀳𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀦𑁄 𑀔𑀦𑁆𑀢𑀻𑀢𑀺 𑀆𑀘𑀭𑀺𑀬𑁄. 𑀕𑀳𑀝𑁆𑀞𑁄 𑀯𑀸 𑀢𑀺𑀢𑁆𑀣𑀺𑀬𑁄 𑀯𑀸 𑀧𑀡𑁆𑀟𑀓𑁄 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺, 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸 𑀦 𑀯𑀼𑀢𑁆𑀢𑀸 𑀳𑁄𑀢𑀺, ‘‘𑀲𑀗𑁆𑀖𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀲𑀗𑁆𑀖𑁄 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀉𑀧𑀲𑀫𑁆𑀧𑀦𑁆𑀦𑁄 𑀲𑀗𑁆𑀖𑁂𑀦𑀸’’𑀢𑀺 (𑀫𑀳𑀸𑀯. 𑁧𑁨𑁭) 𑀳𑀺 𑀯𑀘𑀦𑀢𑁄 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸𑀬 𑀯𑀢𑁆𑀢𑀩𑁆𑀩𑀸𑀬 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁂𑀦, 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀲𑀜𑁆𑀜𑀺𑀢𑁂𑀦 𑀯𑀸 𑀏𑀓𑁂𑀦 𑀯𑀼𑀢𑁆𑀢𑀸 𑀲𑀗𑁆𑀖𑁂𑀦 𑀯𑀼𑀢𑁆𑀢𑀸𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀅𑀬𑀫𑁂𑀯 𑀲𑀩𑁆𑀩𑀓𑀫𑁆𑀫𑁂𑀲𑀼 𑀬𑀼𑀢𑁆𑀢𑀺. 𑀢𑀣𑀸 𑀅𑀢𑁆𑀣𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀓𑁄𑀘𑀺 𑀦𑀸𑀲𑁂𑀢𑀩𑁆𑀩𑁄 ‘‘𑀬𑁄 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄, 𑀅𑀬𑀁 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀯, 𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯, 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀆𑀤𑀺𑀁 𑀚𑀦𑁂𑀢𑀺, 𑀢𑀲𑁆𑀲 𑀑𑀫𑀲𑀦𑁂 𑀘 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀅𑀪𑀺𑀓𑁆𑀔𑀼𑀦𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀦 𑀦𑀸𑀲𑁂𑀢𑀩𑁆𑀩𑁄 ‘‘𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄…𑀧𑁂… 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀧𑀸𑀴𑀺𑀬𑀸 𑀅𑀪𑀸𑀯𑀢𑁄. 𑀢𑁂𑀦𑁂𑀯 𑀲𑁄 𑀉𑀧𑀲𑀫𑁆𑀧𑀦𑁆𑀦𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀦 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀸𑀤𑀺𑀁 𑀚𑀦𑁂𑀢𑀺, 𑀓𑁂𑀯𑀮𑀁 𑀅𑀲𑀁𑀯𑀸𑀲𑁄𑀢𑀺 𑀓𑀢𑁆𑀯𑀸 𑀕𑀡𑀧𑀽𑀭𑀓𑁄 𑀦 𑀳𑁄𑀢𑀺, 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄𑀧𑀺 𑀳𑀺 𑀲𑀁𑀯𑀸𑀲𑁄𑀢𑀺 𑀯𑀼𑀢𑁆𑀢𑁄. 𑀲𑀫𑀲𑀺𑀓𑁆𑀔𑀢𑀸𑀧𑀺 𑀲𑀁𑀯𑀸𑀲𑁄𑀢𑀺 𑀓𑀢𑁆𑀯𑀸 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀻𑀢𑀺 𑀧𑀤𑀲𑁄𑀥𑀫𑁆𑀫𑀸𑀧𑀢𑁆𑀢𑀺𑀁 𑀧𑀦 𑀚𑀦𑁂𑀢𑀻𑀢𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺. 𑀬𑀣𑀸 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀏𑀓𑀓𑀫𑁆𑀫𑀸𑀤𑀺𑀦𑁄 𑀲𑀁𑀯𑀸𑀲𑀲𑁆𑀲 𑀅𑀪𑀸𑀯𑀸 𑀪𑀺𑀓𑁆𑀔𑀼𑀦𑀻 𑀅𑀲𑀁𑀯𑀸𑀲𑀸 𑀪𑀺𑀓𑁆𑀔𑀼𑀲𑁆𑀲, 𑀢𑀣𑀸 𑀪𑀺𑀓𑁆𑀔𑀼 𑀘 𑀪𑀺𑀓𑁆𑀔𑀼𑀦𑀺𑀬𑀸, 𑀧𑀤𑀲𑁄𑀥𑀫𑁆𑀫𑀸𑀧𑀢𑁆𑀢𑀺𑀁 𑀧𑀦 𑀚𑀦𑁂𑀢𑀺. 𑀢𑀣𑀸 ‘‘𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄𑀧𑀺 𑀏𑀓𑀘𑁆𑀘𑁄 𑀬𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀅𑀯𑀼𑀢𑁆𑀢𑁄𑀢𑀺 𑀇𑀫𑀺𑀦𑀸 𑀦𑀺𑀤𑀲𑁆𑀲𑀦𑁂𑀦 𑀲𑀸 𑀓𑀸𑀭𑀡𑀘𑁆𑀙𑀸𑀬𑀸 𑀕𑀳𑀡𑀁 𑀦 𑀕𑀘𑁆𑀙𑀢𑀺.

𑀅𑀧𑀺 𑀘 ‘‘𑀪𑀺𑀓𑁆𑀔𑀼 𑀲𑀼𑀢𑁆𑀢𑀪𑀺𑀓𑁆𑀔𑀼𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀩𑀼𑀤𑁆𑀥𑁄 𑀲𑀸𑀤𑀺𑀬𑀢𑀺, 𑀉𑀪𑁄 𑀦𑀸𑀲𑁂𑀢𑀩𑁆𑀩𑀸’’𑀢𑀺 (𑀧𑀸𑀭𑀸. 𑁬𑁬) 𑀘, ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺 (𑀧𑀸𑀭𑀸. 𑁩𑁮𑁪) 𑀘 𑀯𑀘𑀦𑀢𑁄 𑀬𑁄 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀯𑀺𑀚𑁆𑀚𑀓𑁂𑀦 𑀅𑀦𑀼𑀯𑀺𑀚𑁆𑀚𑀺𑀬𑀫𑀸𑀦𑁄 𑀧𑀭𑀸𑀚𑀸𑀧𑀺𑀢𑁄, 𑀲𑁄𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯, 𑀦 𑀑𑀫𑀲𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑀁 𑀚𑀦𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 ‘‘𑀉𑀧𑀲𑀫𑁆𑀧𑀦𑁆𑀦𑀁 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀔𑀼𑀁𑀲𑁂𑀢𑀼𑀓𑀸𑀫𑁄’’𑀢𑀺 𑀧𑀸𑀴𑀺 𑀦𑀢𑁆𑀣𑀺, 𑀓𑀺𑀜𑁆𑀘𑀸𑀧𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 ‘‘𑀬𑀁 𑀅𑀓𑁆𑀓𑁄𑀲𑀢𑀺, 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀅𑀦𑀜𑁆𑀜𑀸𑀧𑀤𑁂𑀲𑁂𑀦 𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀦𑀁, ‘𑀫𑀁 𑀅𑀓𑁆𑀓𑁄𑀲𑀢𑀻’𑀢𑀺 𑀚𑀸𑀦𑀦𑀸, 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀢𑀸𑀤𑀻𑀦𑀁 𑀅𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑁂 ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀑𑀫𑀲𑀯𑀸𑀤𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁮𑁯) 𑀯𑀘𑀦𑀢𑁄 𑀅𑀲𑀼𑀤𑁆𑀥𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀬 𑀏𑀯 𑀑𑀫𑀲𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲 𑀤𑀼𑀓𑁆𑀓𑀝𑀁. ‘‘𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄, 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀦𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀑𑀫𑀲𑀯𑀸𑀤𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁮𑁯) 𑀯𑀘𑀦𑀢𑁄 𑀧𑀦 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 ‘‘𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀢𑀸 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀢𑀸’’𑀢𑀺 𑀦 𑀯𑀼𑀢𑁆𑀢𑀁 𑀅𑀦𑁂𑀓𑀁𑀲𑀺𑀓𑀢𑁆𑀢𑀸 𑀢𑀲𑁆𑀲 𑀅𑀗𑁆𑀕𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺 𑀘𑁂𑀢𑁆𑀣 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀅𑀢𑁆𑀣𑀺 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄, 𑀅𑀢𑁆𑀣𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀘𑁂𑀯 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀘, 𑀅𑀢𑁆𑀣𑀺 𑀦𑁂𑀯 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄. 𑀢𑀢𑁆𑀣 𑀢𑀢𑀺𑀬𑁄 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀸 𑀳𑀺 𑀬𑀸𑀯 𑀦 𑀮𑀺𑀗𑁆𑀕𑀁 𑀧𑀭𑀺𑀘𑁆𑀘𑀚𑀢𑀺, 𑀓𑀸𑀲𑀸𑀯𑁂 𑀲𑀉𑀲𑁆𑀲𑀸𑀳𑀸𑀯 𑀲𑀫𑀸𑀦𑀸 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀻𑀧𑀺 𑀪𑀺𑀓𑁆𑀔𑀼𑀦𑀻 𑀏𑀯 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑀸𑀯. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦’’𑀦𑁆𑀢𑀺 (𑀘𑀽𑀴𑀯. 𑁪𑁩𑁪). 𑀓𑀤𑀸 𑀘 𑀧𑀦 𑀲𑀸 𑀅𑀪𑀺𑀓𑁆𑀔𑀼𑀦𑀻 𑀳𑁄𑀢𑀻𑀢𑀺? 𑀬𑀤𑀸 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑀸 𑀕𑀺𑀳𑀺𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑀺, 𑀲𑀸 ‘‘𑀯𑀺𑀩𑁆𑀪𑀦𑁆𑀢𑀸’’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀬𑀤𑁂𑀯 𑀲𑀸 𑀯𑀺𑀩𑁆𑀪𑀦𑁆𑀢𑀸, 𑀢𑀤𑁂𑀯 𑀅𑀪𑀺𑀓𑁆𑀔𑀼𑀦𑀻’’𑀢𑀺 (𑀘𑀽𑀴𑀯. 𑁪𑁩𑁪). 𑀓𑀺𑀢𑁆𑀢𑀸𑀯𑀢𑀸 𑀧𑀦 𑀯𑀺𑀩𑁆𑀪𑀦𑁆𑀢𑀸 𑀳𑁄𑀢𑀻𑀢𑀺? 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑀸 𑀓𑀸𑀲𑀸𑀯𑁂𑀲𑀼 𑀅𑀦𑀸𑀮𑀬𑀸 𑀓𑀸𑀲𑀸𑀯𑀁 𑀯𑀸 𑀅𑀧𑀦𑁂𑀢𑀺, 𑀦𑀕𑁆𑀕𑀸 𑀯𑀸 𑀕𑀘𑁆𑀙𑀢𑀺, 𑀢𑀺𑀡𑀧𑀡𑁆𑀡𑀸𑀤𑀺𑀦𑀸 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀸𑀲𑀸𑀯𑀁𑀬𑁂𑀯 𑀯𑀸 𑀕𑀺𑀳𑀺𑀦𑀺𑀯𑀸𑀲𑀦𑀸𑀓𑀸𑀭𑁂𑀦 𑀦𑀺𑀯𑀸𑀲𑁂𑀢𑀺, 𑀑𑀤𑀸𑀢𑀁 𑀯𑀸 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑀺, 𑀲𑀮𑀺𑀗𑁆𑀕𑁂𑀦𑁂𑀯 𑀯𑀸 𑀲𑀤𑁆𑀥𑀺𑀁 𑀢𑀺𑀢𑁆𑀣𑀺𑀬𑁂𑀲𑀼 𑀧𑀯𑀺𑀲𑀺𑀢𑁆𑀯𑀸 𑀓𑁂𑀲𑀮𑀼𑀜𑁆𑀘𑀦𑀸𑀤𑀺𑀯𑀢𑀁 𑀲𑀫𑀸𑀤𑀺𑀬𑀢𑀺, 𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀁 𑀯𑀸 𑀲𑀫𑀸𑀤𑀺𑀬𑀢𑀺, 𑀢𑀤𑀸 𑀯𑀺𑀩𑁆𑀪𑀦𑁆𑀢𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀸 𑀪𑀺𑀓𑁆𑀔𑀼𑀦𑀺𑀮𑀺𑀗𑁆𑀕𑁂 𑀞𑀺𑀢𑀸𑀯 𑀢𑀺𑀢𑁆𑀣𑀺𑀬𑀯𑀢𑀁 𑀲𑀫𑀸𑀤𑀺𑀬𑀢𑀺, 𑀲𑀸 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀪𑀺𑀓𑁆𑀔𑀼 𑀯𑀺𑀬 𑀧𑀘𑁆𑀙𑀸 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀺, 𑀲𑁂𑀲𑀸 𑀧𑀩𑁆𑀩𑀚𑁆𑀚𑀫𑁂𑀯𑁂𑀓𑀁 𑀮𑀪𑀦𑁆𑀢𑀺, 𑀦 𑀉𑀧𑀲𑀫𑁆𑀧𑀤𑀁. 𑀧𑀸𑀴𑀺𑀬𑀁 𑀓𑀺𑀜𑁆𑀘𑀸𑀧𑀺 ‘‘𑀬𑀸 𑀲𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀲𑀓𑀸𑀲𑀸𑀯𑀸 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑀸, 𑀲𑀸 𑀆𑀕𑀢𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺 𑀯𑀘𑀦𑀢𑁄 𑀬𑀸 𑀧𑀞𑀫𑀁 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀘𑁆𑀙𑀸 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑀸, 𑀲𑀸 𑀆𑀕𑀢𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀅𑀦𑀼𑀜𑁆𑀜𑀸𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀲𑀗𑁆𑀕𑀻𑀢𑀺𑀆𑀘𑀭𑀺𑀬𑁂𑀳𑀺 𑀧𑀦 ‘‘𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀧𑀼𑀦 𑀲𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀏𑀯 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀦𑀸𑀦𑀼𑀜𑁆𑀜𑀸𑀢𑀁 𑀪𑀕𑀯𑀢𑀸. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀯. 𑀧𑀓𑁆𑀔𑀧𑀡𑁆𑀟𑀓𑀻𑀧𑀺 𑀪𑀺𑀓𑁆𑀔𑀼𑀦𑀻 𑀏𑀯. 𑀓𑀺𑀦𑁆𑀢𑀺 𑀧𑀼𑀘𑁆𑀙𑀸.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁬𑁭. 𑀯𑀺𑀦𑀻𑀢𑀸𑀦𑀺 𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀯𑀢𑁆𑀣𑀽𑀦𑀺 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀢𑁂𑀲𑀁 𑀢𑁂𑀲𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀦𑀁 𑀯𑀢𑁆𑀣𑀽𑀦𑀁 𑀧𑀸𑀝𑁂𑀓𑁆𑀓𑀁 𑀦𑀸𑀫𑀕𑀡𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀊𑀦𑀸𑀥𑀺𑀓𑀤𑁄𑀲𑀲𑁄𑀥𑀦𑀝𑁆𑀞𑁂𑀦 𑀉𑀤𑁆𑀤𑀸𑀦𑀸 𑀘 𑀢𑀸 𑀫𑀢𑁆𑀭𑀸𑀤𑀺𑀲𑀺𑀤𑁆𑀥𑀺𑀕𑀸𑀣𑀸𑀳𑀺 𑀙𑀦𑁆𑀤𑁄𑀯𑀺𑀘𑀺𑀢𑀺𑀮𑀓𑁆𑀔𑀡𑁂𑀦 𑀕𑀸𑀣𑀸 𑀘𑀸𑀢𑀺 ‘‘𑀉𑀤𑁆𑀤𑀸𑀦𑀕𑀸𑀣𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀤𑁂, 𑀲𑁄𑀥𑀦𑁂 𑀇𑀢𑀺 𑀥𑀸𑀢𑀼𑀲𑁆𑀲 𑀭𑀽𑀧𑀁 𑀉𑀤𑁆𑀤𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸 𑀧𑀦 𑀉𑀤𑁆𑀤𑀸𑀦𑀕𑀸𑀣𑀸 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀲𑀗𑁆𑀕𑀻𑀢𑀺𑀓𑀸𑀮𑁂 𑀞𑀧𑀺𑀢𑀸, 𑀓𑀢𑁆𑀣𑀸𑀢𑀺 𑀘𑁂? 𑀧𑀤𑀪𑀸𑀚𑀦𑀻𑀬𑀸𑀯𑀲𑀸𑀦𑁂. ‘‘𑀯𑀢𑁆𑀣𑀼𑀕𑀸𑀣𑀸 𑀦𑀸𑀫 ‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀽’𑀢𑀺𑀆𑀤𑀻𑀦𑀁 𑀇𑀫𑁂𑀲𑀁 𑀯𑀺𑀦𑀻𑀢𑀯𑀢𑁆𑀣𑀽𑀦𑀁 𑀦𑀺𑀤𑀸𑀦𑀸𑀦𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀻𑀢𑀯𑀢𑁆𑀣𑀽𑀦𑀺 𑀏𑀯 ‘‘𑀯𑀢𑁆𑀣𑀼𑀕𑀸𑀣𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀫𑁂𑀢𑁆𑀣 𑀲𑀫𑀸𑀲𑀢𑁄 𑀅𑀥𑀺𑀧𑁆𑀧𑀸𑀬𑀦𑀺𑀤𑀲𑁆𑀲𑀦𑀁 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀫𑀽𑀮𑀸𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀯𑀸, ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀯𑀲𑁂𑀦 𑀯𑀸, ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀯𑀸 𑀬𑀸𑀦𑀺 𑀯𑀢𑁆𑀣𑀽𑀦𑀺 𑀯𑀺𑀦𑀻𑀢𑀸𑀦𑀺 𑀯𑀺𑀦𑀺𑀘𑁆𑀙𑀺𑀢𑀸𑀦𑀺, 𑀢𑀸𑀦𑀺 𑀯𑀺𑀦𑀻𑀢𑀯𑀢𑁆𑀣𑀽𑀦𑀺 𑀦𑀸𑀫. 𑀢𑁂𑀲𑀁 𑀯𑀺𑀦𑀻𑀢𑀯𑀢𑁆𑀣𑀽𑀦𑀁 𑀦𑀺𑀤𑀸𑀦𑀯𑀢𑁆𑀣𑀼𑀤𑀻𑀧𑀺𑀓𑀸 𑀢𑀦𑁆𑀢𑀺 𑀯𑀢𑁆𑀣𑀼𑀕𑀸𑀣𑀸 𑀦𑀸𑀫. 𑀉𑀤𑁆𑀤𑀸𑀦𑀕𑀸𑀣𑀸𑀯 ‘‘𑀯𑀢𑁆𑀣𑀼𑀕𑀸𑀣𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀏𑀓𑁂. 𑀢𑁂𑀲𑀁 ‘‘𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀆𑀬𑀢𑀺𑀁 𑀯𑀺𑀦𑀬𑀥𑀭𑀸 𑀯𑀺𑀦𑀬𑀁 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀦 𑀳𑀺 𑀉𑀤𑁆𑀤𑀸𑀦𑀕𑀸𑀣𑀸𑀬𑀁 𑀓𑀺𑀜𑁆𑀘𑀺𑀧𑀺 𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑀁 𑀤𑀺𑀲𑁆𑀲𑀢𑀺, 𑀉𑀤𑁆𑀤𑀸𑀦𑀕𑀸𑀣𑀸𑀦𑀁 𑀯𑀺𑀲𑀼𑀁 𑀧𑀬𑁄𑀚𑀦𑀁 𑀯𑀼𑀢𑁆𑀢𑀁 ‘‘𑀲𑀼𑀔𑀁 𑀯𑀺𑀦𑀬𑀥𑀭𑀸 𑀉𑀕𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀢𑀲𑁆𑀫𑀸 𑀧𑀬𑁄𑀚𑀦𑀦𑀸𑀦𑀢𑁆𑀢𑀢𑁄𑀧𑁂𑀢𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣𑀸𑀬𑀁 𑀯𑀺𑀕𑁆𑀕𑀳𑁄 𑁋 𑀯𑀢𑁆𑀣𑀽𑀦𑀺 𑀏𑀯 𑀕𑀸𑀣𑀸 𑀯𑀢𑁆𑀣𑀼𑀕𑀸𑀣𑀸. 𑀯𑀺𑀦𑀻𑀢𑀯𑀢𑁆𑀣𑀼𑀢𑁄 𑀯𑀺𑀲𑁂𑀲𑀦𑀢𑁆𑀣𑀫𑁂𑀢𑁆𑀣 𑀕𑀸𑀣𑀸𑀕𑁆𑀕𑀳𑀡𑀁. 𑀉𑀤𑁆𑀤𑀸𑀦𑀕𑀸𑀣𑀸𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 𑀯𑀢𑁆𑀣𑀼𑀕𑁆𑀕𑀳𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀕𑀸𑀣𑀸𑀦𑀁 𑀯𑀢𑁆𑀣𑀽𑀦𑀻𑀢𑀺 𑀯𑀢𑁆𑀢𑀩𑁆𑀩𑁂 𑀯𑀢𑁆𑀣𑀼𑀕𑀸𑀣𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀓𑁆𑀓𑀝𑀺𑀯𑀢𑁆𑀣𑀼𑀁 𑀅𑀜𑁆𑀜𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀆𑀭𑁄𑀘𑁂𑀲𑀼𑀁, 𑀇𑀥 𑀲𑀬𑀫𑁂𑀯. 𑀢𑀢𑁆𑀣 𑀓𑀸𑀭𑀡𑀲𑁆𑀲 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀧𑀺 𑀅𑀜𑁆𑀜𑁂 𑀏𑀯. ‘‘𑀢𑀢𑁆𑀣 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀇𑀥 𑀢𑁂 𑀏𑀯𑀸’’𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁.

𑁬𑁭-𑁮. 𑀜𑀢𑁆𑀯𑀸𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸 𑀲𑀬𑀫𑁂𑀯 𑀜𑀢𑁆𑀯𑀸. 𑀧𑁄𑀓𑁆𑀔𑀭𑀦𑁆𑀢𑀺 𑀲𑀭𑀻𑀭𑀁 𑀪𑁂𑀭𑀺𑀧𑁄𑀓𑁆𑀔𑀭𑀁 𑀯𑀺𑀬. 𑀮𑁄𑀓𑀺𑀬𑀸 𑀅𑀯𑀺𑀓𑀮𑀁 ‘‘𑀲𑀼𑀦𑁆𑀤𑀭’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀧𑀞𑀫𑁂𑀦𑀢𑁆𑀣𑁂𑀦 𑀯𑀺𑀲𑀺𑀝𑁆𑀞𑀓𑀸𑀬𑀘𑁆𑀙𑀯𑀺𑀢𑀸𑀬𑀸𑀢𑀺 𑀅𑀢𑁆𑀣𑁄, 𑀤𑀼𑀢𑀺𑀬𑁂𑀦 𑀯𑀡𑁆𑀡𑀲𑀼𑀦𑁆𑀤𑀭𑀢𑀸𑀬𑀸𑀢𑀺. ‘‘𑀉𑀧𑁆𑀧𑀮𑀕𑀩𑁆𑀪𑀯𑀡𑁆𑀡𑀢𑁆𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸, 𑀢𑀲𑁆𑀫𑀸 𑀉𑀧𑁆𑀧𑀮𑀯𑀡𑁆𑀡𑀸𑀢𑀺 𑀦𑀸𑀫𑀁 𑀮𑀪𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀦𑀻𑀮𑀼𑀧𑁆𑀧𑀮𑀯𑀡𑁆𑀡𑀸 𑀓𑀸𑀬𑀘𑁆𑀙𑀯𑀻𑀢𑀺 𑀯𑀘𑀦𑀁 𑀧𑀦 𑀲𑀸𑀫𑀘𑁆𑀙𑀯𑀺𑀁 𑀤𑀻𑀧𑁂𑀢𑀺. 𑀮𑁄𑀓𑁂 𑀧𑀦 ‘‘𑀉𑀧𑁆𑀧𑀮𑀲𑀫𑀸 𑀧𑀲𑀢𑁆𑀣𑀲𑀸𑀫𑀸’’𑀢𑀺 𑀯𑀘𑀦𑀢𑁄 ‘‘𑀬𑀸 𑀲𑀸𑀫𑀸 𑀲𑀸𑀫𑀯𑀡𑁆𑀡𑀸 𑀲𑀸𑀫𑀢𑀦𑀼𑀫𑀚𑁆𑀛𑀸, 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀲𑀕𑁆𑀕𑁂 𑀫𑀫 𑀯𑀸𑀲𑁄’’𑀢𑀺 𑀯𑀘𑀦𑀢𑁄 𑀲𑀸𑀫𑀘𑁆𑀙𑀯𑀺𑀓𑀸 𑀇𑀢𑁆𑀣𑀻𑀦𑀁 𑀧𑀲𑀢𑁆𑀣𑀸. ‘‘𑀬𑀸𑀯𑀲𑁆𑀲𑀸 𑀦𑀁 𑀅𑀦𑁆𑀥𑀓𑀸𑀭’’𑀦𑁆𑀢𑀺𑀧𑀺 𑀧𑀸𑀞𑁄. 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀬𑁄 𑀦 𑀮𑀺𑀫𑁆𑀧𑀢𑀺.

𑁬𑁯. 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀦𑁆𑀢𑀺 𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀧𑀸𑀢𑀼𑀪𑀽𑀢𑀁, 𑀢𑀜𑁆𑀘 𑀔𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑁆𑀢𑀭𑀥𑀸𑀦𑁂𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑁂𑀦. 𑀏𑀯𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀧𑀸𑀢𑀼𑀪𑀸𑀯𑁂𑀧𑀺. 𑀏𑀢𑁂𑀦 𑀬𑀣𑀸 𑀩𑁆𑀭𑀳𑁆𑀫𑀸𑀦𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀁 𑀧𑀼𑀭𑀺𑀲𑀲𑀡𑁆𑀞𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀬𑀣𑀸 𑀘 𑀓𑀲𑁆𑀲𑀘𑀺 𑀧𑀡𑁆𑀟𑀓𑀲𑁆𑀲 𑀯𑀺𑀦𑀸𑀧𑀺 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀦 𑀧𑀼𑀭𑀺𑀲𑀲𑀡𑁆𑀞𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀣𑀸 𑀢𑁂𑀲𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺, 𑀢𑀁 𑀧𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀯𑀸 𑀅𑀦𑁆𑀢𑀭𑀥𑀸𑀬𑀦𑁆𑀢𑀁 𑀫𑀭𑀦𑁆𑀢𑀸𑀦𑀁 𑀯𑀺𑀬 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀥𑀸𑀬𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀇𑀦𑁆𑀤𑁆𑀭𑀺𑀬𑁂 𑀦𑀺𑀭𑀼𑀤𑁆𑀥𑁂 𑀇𑀢𑀭𑀁 𑀯𑀺𑀲𑀪𑀸𑀕𑀺𑀦𑁆𑀤𑁆𑀭𑀺𑀬𑀁 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀫𑀸 𑀫𑀳𑀸𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀲𑁆𑀲𑁂𑀯 𑀓𑀺𑀭𑀲𑁆𑀲 𑀯𑀺𑀲𑀪𑀸𑀕𑀺𑀦𑁆𑀤𑁆𑀭𑀺𑀬𑀁 𑀧𑀸𑀢𑀼𑀪𑀯𑀢𑀺, 𑀢𑀲𑁆𑀫𑀸 ‘‘𑀭𑀢𑁆𑀢𑀺𑀪𑀸𑀕𑁂 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀁𑀬𑁂𑀯 𑀉𑀧𑀚𑁆𑀛𑀁 𑀢𑀫𑁂𑀯 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀯𑀘𑀦𑀢𑁄 𑀧𑀯𑀢𑁆𑀢𑀺𑀦𑀻𑀬𑁂𑀯 𑀉𑀧𑀚𑁆𑀛𑀸𑀬𑀸, 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑀸 𑀪𑀺𑀓𑁆𑀔𑀼𑀦𑀻𑀬𑁂𑀯 𑀆𑀘𑀭𑀺𑀬𑀸𑀢𑀺 𑀓𑀢𑁆𑀯𑀸 𑀢𑀸𑀲𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀁, 𑀆𑀘𑀭𑀺𑀬𑀯𑀢𑁆𑀢𑀜𑁆𑀘 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸𑀲𑀤𑀸𑀲𑀸𑀬𑀁 𑀧𑀸𑀢𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀓𑀸𑀢𑀩𑁆𑀩𑀁, 𑀢𑀸𑀳𑀺 𑀘 𑀇𑀫𑀲𑁆𑀲 𑀯𑀺𑀳𑀸𑀭𑀁 𑀆𑀕𑀫𑁆𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀸𑀤𑀺 𑀓𑀸𑀢𑀩𑁆𑀩𑀁 𑀦𑀼 𑀔𑁄𑀢𑀺 𑀘𑁂? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀕𑀫𑀺𑀢𑀼’’𑀦𑁆𑀢𑀺 𑀯𑀘𑀦𑁂𑀦 𑀯𑀺𑀦𑀸𑀪𑀸𑀯𑀤𑀻𑀧𑀦𑀢𑁄 𑀓𑁂𑀯𑀮𑀁 𑀦 𑀧𑀼𑀦 𑀉𑀧𑀚𑁆𑀛𑀸 𑀕𑀳𑁂𑀢𑀩𑁆𑀩𑀸, 𑀦 𑀘 𑀉𑀧𑀲𑀫𑁆𑀧𑀤𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀫𑁂𑀯 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀁𑀬𑁂𑀯 𑀉𑀧𑀚𑁆𑀛’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀕𑀫𑀺𑀢𑀼𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀯𑀺𑀦𑀸 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀳𑀺 𑀏𑀯 𑀲𑀤𑁆𑀥𑀺𑀁 𑀲𑀫𑀗𑁆𑀕𑀻 𑀪𑀯𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀸𑀴𑀺𑀮𑁂𑀲𑁂𑀦 ‘‘𑀢𑀲𑁆𑀲𑀸 𑀏𑀯 𑀕𑀸𑀫𑀦𑁆𑀢𑀭𑀸𑀤𑀻𑀳𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀲𑀺𑀤𑁆𑀥𑀁 𑀳𑁄𑀢𑀺, 𑀆𑀕𑀦𑁆𑀢𑁆𑀯𑀸 𑀲𑀗𑁆𑀕𑀫𑀺𑀢𑀼𑀁 𑀲𑀓𑁆𑀓𑀸, 𑀬𑀜𑁆𑀘 𑀪𑀕𑀯𑀢𑀸 𑀕𑀫𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀦𑀺𑀲𑁆𑀲𑀸𑀬 𑀓𑀼𑀢𑁄 𑀕𑀸𑀫𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀸 𑀆𑀧𑀢𑁆𑀢𑀺. 𑀦 𑀳𑀺 𑀪𑀕𑀯𑀸 𑀆𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀢𑀻𑀢𑀺 𑀬𑀼𑀢𑁆𑀢𑀫𑁂𑀯 𑀢𑀁, 𑀅𑀜𑁆𑀜𑀣𑀸 ‘‘𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸, 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀧𑀸𑀴𑀺𑀯𑀘𑀦𑀢𑁄 𑀦 𑀕𑀸𑀫𑀦𑁆𑀢𑀭𑀸𑀤𑀻𑀳𑀺 𑀅𑀦𑀸𑀧𑀢𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀲𑀸𑀥𑀸𑀭𑀡𑀢𑀸 𑀆𑀧𑀢𑁆𑀢𑀺𑀬𑁂𑀯 ‘‘𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸, 𑀬𑀸 𑀘 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀕𑀫𑀦𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀦𑀤𑀻𑀧𑀸𑀭𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀕𑀡𑀑𑀳𑀻𑀬𑀦𑀸𑀧𑀢𑁆𑀢𑀺𑀬𑁄, 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀦 𑀯𑀼𑀢𑁆𑀢𑀢𑁆𑀢𑀸𑀢𑀺 𑀘𑁂? 𑀦 𑀯𑀼𑀢𑁆𑀢𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀗𑁆𑀓𑀦𑁆𑀢𑀸𑀬𑀧𑀺 𑀢𑀲𑁆𑀲𑀸 𑀢𑀸 𑀧𑀳𑀸𑀬 𑀅𑀜𑁆𑀜𑀸𑀳𑀺 𑀲𑀗𑁆𑀕𑀫𑀦𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀸𑀤𑀻𑀳𑀺 𑀅𑀦𑀸𑀧𑀢𑁆𑀢𑀺 𑀏𑀯 𑀲𑀩𑁆𑀩𑀓𑀸𑀮𑀦𑁆𑀢𑀺 𑀇𑀫𑀲𑁆𑀲 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄 𑀢𑀣𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀸𑀤𑀺𑀯𑀢𑁆𑀣𑀼𑀁 𑀲𑀜𑁆𑀘𑀺𑀘𑁆𑀘 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀚𑁆𑀛𑀸𑀘𑀭𑀦𑁆𑀢𑀻𑀧𑀺 𑀲𑀸 𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀓𑀸𑀭𑀡𑁂𑀦 𑀅𑀦𑀸𑀧𑀚𑁆𑀚𑀦𑀢𑁄 𑀅𑀦𑀸𑀧𑀢𑁆𑀢𑀺. 𑀅𑀦𑀸𑀧𑀚𑁆𑀚𑀦𑀝𑁆𑀞𑁂𑀦𑁂𑀯 𑀯𑀼𑀝𑁆𑀞𑀸𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀬𑁄𑀕𑀻 𑀅𑀦𑀼𑀧𑁆𑀧𑀦𑁆𑀦𑁂 𑀏𑀯 𑀓𑀺𑀮𑁂𑀲𑁂 𑀦𑀺𑀭𑁄𑀥𑁂𑀢𑀺. 𑀅𑀩𑀦𑁆𑀥𑀦𑁄𑀧𑀺 𑀧𑀢𑁆𑀢𑁄 ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑀩𑁆𑀩𑀲𑁄 𑀯𑀸 𑀧𑀦 𑀦 𑀲𑀸𑀯𑁂𑀢𑀺 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸, 𑀏𑀯𑀫𑀺𑀥 𑀅𑀦𑀸𑀧𑀦𑁆𑀦𑀸𑀧𑀺 𑀆𑀧𑀢𑁆𑀢𑀺 𑀯𑀼𑀝𑁆𑀞𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀧𑀦 𑀲𑀸 𑀧𑀼𑀭𑀺𑀲𑁂𑀦 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀁 𑀅𑀦𑀸𑀧𑀚𑁆𑀚𑀦𑁆𑀢𑀻𑀧𑀺 𑀲𑀓𑁆𑀓𑁄𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀕𑀫𑀺𑀢𑀼𑀁, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 ‘‘𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀲𑀗𑁆𑀖𑀫𑀚𑁆𑀛𑁂 𑀕𑀡𑀫𑀚𑁆𑀛𑁂 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦𑀸’’𑀢𑀺 (𑀧𑀭𑀺. 𑁩𑁨𑁪). 𑀬𑀁 𑀧𑀦 𑀯𑀼𑀢𑁆𑀢𑀁 𑀧𑀭𑀺𑀯𑀸𑀭𑁂 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀆𑀧𑀚𑁆𑀚𑀦𑁆𑀢𑁄 𑀯𑀼𑀝𑁆𑀞𑀸𑀢𑀺 𑀯𑀼𑀝𑁆𑀞𑀳𑀦𑁆𑀢𑁄 𑀆𑀧𑀚𑁆𑀚𑀢𑀻’’𑀢𑀺 (𑀧𑀭𑀺. 𑁩𑁨𑁪), 𑀢𑀲𑁆𑀲 𑀲𑀳𑀲𑁂𑀬𑁆𑀬𑀸𑀤𑀺𑀁 𑀆𑀧𑀚𑁆𑀚𑀢𑀺 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀽𑀭𑁂 𑀯𑀺𑀳𑀸𑀭𑁄 𑀳𑁄𑀢𑀺 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫𑀁, 𑀯𑀺𑀳𑀸𑀭𑀢𑁄 𑀧𑀝𑁆𑀞𑀸𑀬 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀁𑀯𑀺𑀤𑀳𑀦𑀁 𑀧𑀭𑀺𑀫𑁄𑀘𑁂𑀢𑁆𑀯𑀸𑀢𑀺 𑀅𑀤𑁆𑀥𑀸𑀦𑀕𑀫𑀦𑀲𑀁𑀯𑀺𑀤𑀳𑀦𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀸 𑀓𑁄𑀧𑁂𑀢𑁆𑀯𑀸𑀢𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀲𑀸𑀫𑀡𑁂𑀭𑁂𑀦𑀸𑀧𑀻’’𑀢𑀺 𑀯𑀘𑀦𑀢𑁄 𑀅𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀲𑁆𑀲 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀁 𑀦𑀢𑁆𑀣𑀻𑀢𑀺 𑀯𑀺𑀬 𑀤𑀺𑀲𑁆𑀲𑀢𑀺. 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀞𑀧𑀺𑀢𑁄𑀢𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑁄. 𑀅𑀯𑀺𑀓𑀧𑁆𑀧𑀺𑀢𑀸𑀦𑀁 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻𑀢𑀺 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀥𑀺𑀁 𑀪𑀺𑀓𑁆𑀔𑀼𑀦𑀻𑀳𑀺 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁨𑁧) 𑀯𑀘𑀦𑀢𑁄 𑀯𑀼𑀢𑁆𑀢𑀁. 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦𑀸𑀢𑀺 𑀯𑀢𑁆𑀣𑀼𑀁 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦 𑀯𑀸 𑀧𑀝𑀺𑀕𑁆𑀕𑀳𑀡𑁂𑀦 𑀯𑀸 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺. 𑀧𑀓𑁆𑀔𑀫𑀸𑀦𑀢𑁆𑀢𑀓𑀸𑀮𑁂 𑀧𑀼𑀦𑀤𑁂𑀯 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀲𑀘𑁂, 𑀪𑀺𑀓𑁆𑀔𑀼𑀓𑀸𑀮𑁂 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸, 𑀦𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑀸𑀢𑀺 𑀦𑁄 𑀮𑀤𑁆𑀥𑀻𑀢𑀺 𑀆𑀘𑀭𑀺𑀬𑁄.

𑀧𑀭𑀺𑀯𑀸𑀲𑀤𑀸𑀦𑀁 𑀧𑀦 𑀦𑀢𑁆𑀣𑀻𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀙𑀸𑀤𑀦𑀸𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀪𑀺𑀓𑁆𑀔𑀼𑀦𑀻 𑀅𑀲𑀸𑀥𑀸𑀭𑀡𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀝𑀺𑀮𑀪𑀢𑀺, 𑀪𑀺𑀓𑁆𑀔𑀽𑀲𑀼 𑀉𑀧𑀲𑀫𑁆𑀧𑀤𑀁 𑀦 𑀮𑀪𑀢𑀺, 𑀧𑀩𑁆𑀩𑀚𑁆𑀚𑀁 𑀮𑀪𑀢𑀺, 𑀅𑀦𑀼𑀧𑀩𑁆𑀩𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀪𑀸𑀯𑁂 𑀞𑀺𑀢𑁄 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀁 𑀦 𑀚𑀦𑁂𑀢𑀺. 𑀯𑀺𑀩𑁆𑀪𑀦𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑁂 𑀧𑀸𑀢𑀼𑀪𑀽𑀢𑁂 𑀪𑀺𑀓𑁆𑀔𑀽𑀲𑀼 𑀉𑀧𑀲𑀫𑁆𑀧𑀤𑀁 𑀦 𑀮𑀪𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀯𑀺𑀩𑁆𑀪𑀦𑁆𑀢𑀫𑀸𑀦𑀲𑁆𑀲 𑀕𑀳𑀝𑁆𑀞𑀲𑁆𑀲𑁂𑀯 𑀲𑀢𑁄 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑀲𑁆𑀲 𑀲𑀘𑁂 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀢𑀺, 𑀦𑁂𑀯 𑀪𑀺𑀓𑁆𑀔𑀼𑀦𑀻𑀲𑀼 𑀉𑀧𑀲𑀫𑁆𑀧𑀤𑀁 𑀮𑀪𑀢𑀺, 𑀦 𑀧𑀼𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀚𑀸𑀢𑁂 𑀪𑀺𑀓𑁆𑀔𑀽𑀲𑀼 𑀯𑀸𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀪𑀺𑀓𑁆𑀔𑀼 𑀳𑁄𑀢𑀺, 𑀲𑁄 𑀘𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀯𑀺𑀩𑁆𑀪𑀫𑀺𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀝𑀺𑀮𑀪𑁂𑀬𑁆𑀬, 𑀪𑀺𑀓𑁆𑀔𑀼𑀦𑀻𑀲𑀼 𑀉𑀧𑀲𑀫𑁆𑀧𑀤𑀁 𑀧𑀝𑀺𑀮𑀪𑀢𑀺 𑀉𑀪𑀬𑀢𑁆𑀣 𑀧𑀼𑀩𑁆𑀩𑁂 𑀧𑀸𑀭𑀸𑀚𑀺𑀓𑀪𑀸𑀯𑀁 𑀅𑀧𑁆𑀧𑀢𑁆𑀢𑀢𑁆𑀢𑀸. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀝𑀺𑀮𑀪𑁂𑀬𑁆𑀬, 𑀉𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀏𑀯. 𑀧𑀼𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀢𑁆𑀢𑀸. 𑀧𑀼𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀪𑀺𑀓𑁆𑀔𑀼𑀦𑀻𑀲𑀼 𑀉𑀧𑀲𑀫𑁆𑀧𑀤𑀁 𑀮𑀪𑀢𑀺. 𑀏𑀯𑀁 𑀘𑁂 𑀓𑀢𑀤𑁆𑀯𑀸𑀤𑀲𑀲𑀗𑁆𑀕𑀳𑀲𑁆𑀲 𑀤𑀸𑀭𑀓𑀲𑁆𑀲 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀕𑀺𑀳𑀺𑀕𑀢𑀸 𑀇𑀢𑁆𑀣𑀻 𑀳𑁄𑀢𑀺, 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸 𑀓𑀺𑀭. 𑀪𑀺𑀓𑁆𑀔𑀼𑀦𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑀦𑁆𑀢𑀭𑀥𑀸𑀦𑁂𑀦, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀧𑀼𑀭𑀺𑀲𑀮𑀺𑀗𑁆𑀕𑀦𑁆𑀢𑀭𑀥𑀸𑀦𑁂𑀦 𑀧𑀓𑁆𑀔𑀧𑀡𑁆𑀟𑀓𑀪𑀸𑀯𑁄 𑀪𑀯𑁂𑀬𑁆𑀬, 𑀦 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀦𑀸𑀲𑁂𑀢𑀩𑁆𑀩𑀸 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀓𑀢𑀺𑀪𑀸𑀯𑀸𑀧𑀢𑁆𑀢𑀺𑀲𑀫𑁆𑀪𑀯𑀸. 𑀧𑀓𑀢𑀺𑀧𑀡𑁆𑀟𑀓𑀁 𑀧𑀦 𑀲𑀦𑁆𑀥𑀸𑀬 ‘‘𑀧𑀡𑁆𑀟𑀓𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀧𑀓𑁆𑀔𑀧𑀡𑁆𑀟𑀓𑁄 𑀳𑀺 𑀲𑀁𑀯𑀸𑀲𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄, 𑀇𑀢𑀭𑁄 𑀉𑀪𑀬𑀦𑀸𑀲𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀢𑁂𑀲𑀁 𑀧𑀼𑀦 𑀧𑀓𑀢𑀺𑀪𑀸𑀯𑁄 𑀪𑀯𑁂𑀬𑁆𑀬, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀁𑀬𑁂𑀯 𑀉𑀧𑀚𑁆𑀛𑀁 𑀢𑀫𑁂𑀯 𑀉𑀧𑀲𑀫𑁆𑀧𑀤𑀁 𑀢𑀸𑀦𑀺𑀬𑁂𑀯 𑀯𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀕𑀫𑀺𑀢𑀼’’𑀦𑁆𑀢𑀺 𑀅𑀬𑀁 𑀯𑀺𑀥𑀺 𑀲𑀫𑁆𑀪𑀯𑀢𑀺. 𑀲𑀘𑁂 𑀦𑁂𑀲𑀁 𑀮𑀺𑀗𑁆𑀕𑀦𑁆𑀢𑀭𑀁 𑀧𑀸𑀢𑀼𑀪𑀯𑁂𑀬𑁆𑀬, 𑀲𑁄 𑀘 𑀯𑀺𑀥𑀺, 𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀲𑀸𑀥𑀸𑀭𑀡𑀸, 𑀢𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀼𑀁 𑀅𑀲𑀸𑀥𑀸𑀭𑀡𑀸𑀳𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀬𑀫𑁆𑀧𑀺 𑀯𑀺𑀥𑀺 𑀲𑀫𑁆𑀪𑀯𑀢𑀺. 𑀬𑀁 𑀯𑀼𑀢𑁆𑀢𑀁 𑀧𑀭𑀺𑀯𑀸𑀭𑁂 ‘‘𑀲𑀳 𑀧𑀝𑀺𑀮𑀸𑀪𑁂𑀦 𑀧𑀼𑀭𑀺𑀫𑀁 𑀚𑀳𑀢𑀺, 𑀧𑀘𑁆𑀙𑀺𑀫𑁂 𑀧𑀢𑀺𑀝𑁆𑀞𑀸𑀢𑀺, 𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀧𑀜𑁆𑀜𑀢𑁆𑀢𑀺𑀬𑁄 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑀳 𑀧𑀝𑀺𑀮𑀸𑀪𑁂𑀦 𑀧𑀘𑁆𑀙𑀺𑀫𑀁 𑀚𑀳𑀢𑀺, 𑀧𑀼𑀭𑀺𑀫𑁂 𑀧𑀢𑀺𑀝𑁆𑀞𑀸𑀢𑀺, 𑀯𑀺𑀜𑁆𑀜𑀢𑁆𑀢𑀺𑀬𑁄’’𑀢𑀺𑀆𑀤𑀺, 𑀢𑀁 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀻𑀢𑀺 𑀆𑀘𑀭𑀺𑀬𑁄. 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀧𑀼𑀭𑀺𑀲𑀮𑀺𑀗𑁆𑀕𑀁 𑀯𑀸 𑀅𑀦𑁆𑀢𑀭𑀥𑀸𑀬𑀦𑁆𑀢𑀁 𑀓𑀺𑀁 𑀲𑀓𑀮𑀫𑁆𑀧𑀺 𑀲𑀭𑀻𑀭𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀉𑀤𑀸𑀳𑀼 𑀲𑀬𑀫𑁂𑀯. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀲𑀓𑀮𑀁 𑀲𑀭𑀻𑀭𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀬𑀁 𑀧𑀼𑀕𑁆𑀕𑀮𑁄 𑀘𑀼𑀢𑁄 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀲𑀸𑀫𑀜𑁆𑀜𑀸 𑀘𑀼𑀢𑁄 𑀪𑀯𑁂𑀬𑁆𑀬, 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀦𑁆𑀢𑁄 𑀑𑀧𑀧𑀸𑀢𑀺𑀓𑁄 𑀪𑀯𑁂𑀬𑁆𑀬. 𑀅𑀣 𑀲𑀬𑀫𑁂𑀯 𑀅𑀦𑁆𑀢𑀭𑀥𑀸𑀬𑀢𑀺, 𑀲𑁄𑀧𑀺 𑀪𑀸𑀯𑁄 𑀢𑀲𑁆𑀲 𑀯𑀺𑀭𑀼𑀚𑁆𑀛𑀢𑀺. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀳𑀺 𑀲𑀓𑀮𑀫𑁆𑀧𑀺 𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀸𑀦𑀻𑀢𑀺 𑀔𑀡𑀦𑀺𑀭𑁄𑀥𑁄 𑀯𑀺𑀬 𑀢𑁂𑀲𑀁 𑀅𑀦𑁆𑀢𑀭𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑁆𑀧𑀲𑀗𑁆𑀕𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀧𑁆𑀧𑀪𑀸𑀦𑀁 𑀤𑀻𑀧𑀸𑀦𑀁 𑀏𑀓𑀧𑁆𑀧𑀪𑀸𑀦𑀺𑀭𑁄𑀥𑁂𑀧𑀺 𑀇𑀢𑀭𑀺𑀲𑁆𑀲𑀸 𑀞𑀸𑀦𑀁 𑀯𑀺𑀬 𑀲𑁂𑀲𑀲𑀭𑀻𑀭𑀝𑁆𑀞𑀸𑀦𑀁 𑀢𑀢𑁆𑀣 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭𑁧-𑁨. 𑀫𑀼𑀘𑁆𑀘𑀢𑀼 𑀯𑀸 𑀫𑀸 𑀯𑀸 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀫𑁄𑀘𑀦𑀭𑀸𑀕𑀸𑀪𑀸𑀯𑀢𑁄. 𑀅𑀯𑀺𑀲𑀬𑁄𑀢𑀺 𑀅𑀲𑀸𑀤𑀺𑀬𑀦𑀁 𑀦𑀸𑀫 𑀏𑀯𑀭𑀽𑀧𑁂 𑀞𑀸𑀦𑁂 𑀤𑀼𑀓𑁆𑀓𑀭𑀦𑁆𑀢𑀺 𑀅𑀢𑁆𑀣𑁄. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀉𑀪𑀺𑀦𑁆𑀦𑀁 𑀯𑀸𑀬𑀸𑀫𑁂𑀦 𑀦𑀺𑀧𑀚𑁆𑀚𑀢𑀺 ‘‘𑀢𑀲𑁆𑀲 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀢𑁆𑀯𑀁 𑀫𑀸 𑀯𑀸𑀬𑀸𑀫, 𑀏𑀯𑀁 𑀢𑁂 𑀅𑀦𑀸𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀺, 𑀓𑀺𑀭𑀺𑀬𑀜𑁆𑀳𑁂𑀢𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀘𑀦𑀢𑁄 𑀅𑀓𑀺𑀭𑀺𑀬𑀫𑁆𑀧𑁂𑀢𑀁 𑀲𑀺𑀓𑁆𑀔𑀸𑀧𑀤𑀁 𑀬𑁂𑀪𑀼𑀬𑁆𑀬𑁂𑀦 ‘‘𑀓𑀺𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑁭𑁩-𑁪. ‘‘𑀧𑀸𑀭𑀸𑀚𑀺𑀓𑀪𑀬𑁂𑀦 𑀆𑀓𑀸𑀲𑀕𑀢𑀫𑁂𑀯 𑀓𑀢𑁆𑀯𑀸 𑀧𑀯𑁂𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀲𑀳𑀲𑀸 𑀢𑀸𑀮𑀼𑀓𑀁 𑀯𑀸 𑀧𑀲𑁆𑀲𑀁 𑀯𑀸 𑀅𑀗𑁆𑀕𑀚𑀸𑀢𑀁 𑀙𑀼𑀧𑀢𑀺 𑀘𑁂, 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀫𑀸? 𑀦 𑀫𑁂𑀣𑀼𑀦𑀭𑀸𑀕𑀢𑁆𑀢𑀸𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀤𑀦𑁆𑀢𑀸𑀦𑀁 𑀩𑀸𑀳𑀺𑀭𑀪𑀸𑀯𑁄 𑀑𑀝𑁆𑀞𑀸𑀦𑀁 𑀩𑀸𑀳𑀺𑀭𑀪𑀸𑀯𑁄 𑀯𑀺𑀬 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀩𑀳𑀺 𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑁂 𑀚𑀺𑀯𑁆𑀳𑀸𑀬 𑀘 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺. 𑀢𑀁 𑀧𑀼𑀕𑁆𑀕𑀮𑀁 𑀯𑀺𑀲𑀜𑁆𑀜𑀺𑀁 𑀓𑀢𑁆𑀯𑀸𑀢𑀺 𑀯𑀘𑀦𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀔𑀺𑀢𑁆𑀢𑀘𑀺𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑁄 𑀧𑀦 𑀧𑀼𑀕𑁆𑀕𑀮𑁄 𑀦 𑀯𑀺𑀲𑀜𑁆𑀜𑀻𑀓𑀢𑁄, 𑀲𑁄 𑀘𑁂 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀲𑁆𑀲 𑀥𑀸𑀢𑀼𑀖𑀝𑁆𑀝𑀦𑀘𑀭𑀺𑀡𑀺𑀚𑁆𑀛𑀺𑀡𑀺𑀓𑀸𑀤𑀺𑀲𑀜𑁆𑀜𑀸𑀬 𑀲𑀸𑀤𑀺𑀬𑀢𑀺, 𑀫𑁂𑀣𑀼𑀦𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀯𑀺𑀲𑀜𑁆𑀜𑀻𑀧𑀓𑁆𑀔𑀫𑁂𑀯 𑀪𑀚𑀢𑀻𑀢𑀺 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺. ‘‘𑀫𑁂𑀣𑀼𑀦𑀫𑁂𑀢𑀁 𑀫𑀜𑁆𑀜𑁂 𑀓𑀲𑁆𑀲𑀘𑀺 𑀅𑀫𑀦𑀼𑀲𑁆𑀲𑀲𑁆𑀲𑀸’’𑀢𑀺 𑀜𑀢𑁆𑀯𑀸 𑀲𑀸𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀏𑀯. 𑀧𑀡𑁆𑀟𑀓𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀦𑁆𑀢𑀺 𑀧𑀡𑁆𑀟𑀓𑀲𑁆𑀲 𑀯𑀘𑁆𑀘𑀫𑀕𑁆𑀕𑁂 𑀯𑀸 𑀫𑀼𑀔𑁂 𑀯𑀸, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁. 𑀅𑀯𑁂𑀤𑀬𑀦𑁆𑀢𑀲𑁆𑀲𑀧𑀺 𑀲𑁂𑀯𑀦𑀘𑀺𑀢𑁆𑀢𑀯𑀲𑁂𑀦 𑀆𑀧𑀢𑁆𑀢𑀺 𑀲𑀦𑁆𑀣𑀢𑁂𑀦𑁂𑀯 𑀲𑁂𑀯𑀦𑁂 𑀯𑀺𑀬.

𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀲𑁆𑀫𑀺𑀁 ‘‘𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀲𑁄 𑀆𑀭𑁄𑀘𑁂𑀲𑀻’’𑀢𑀺 𑀤𑀼𑀯𑀺𑀥𑁄 𑀧𑀸𑀞𑁄 𑀅𑀢𑁆𑀣𑀺. 𑀢𑀢𑁆𑀣 ‘‘𑀆𑀭𑁄𑀘𑁂𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀧𑀸𑀞𑁄 ‘‘𑀯𑁂𑀤𑀺𑀬𑀺 𑀯𑀸 𑀲𑁄 𑀪𑀺𑀓𑁆𑀔𑀯𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀼𑀦𑁆𑀤𑀭𑀁, 𑀅𑀜𑁆𑀜𑀣𑀸 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. ‘‘𑀯𑁂𑀤𑀺𑀬𑀸 𑀯𑀸’’𑀢𑀺 𑀤𑀻𑀧𑀯𑀸𑀲𑀺𑀦𑁄 𑀧𑀞𑀦𑁆𑀢𑀺 𑀓𑀺𑀭, 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀸 𑀳𑀢𑁆𑀣𑀕𑁆𑀕𑀸𑀳𑀸𑀤𑀬𑁄, 𑀢𑀲𑁆𑀫𑀸 ‘‘𑀤𑀼𑀓𑁆𑀓𑀝𑀫𑁂𑀯𑀲𑁆𑀲 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀧𑀦 𑀤𑀼𑀓𑁆𑀓𑀝𑀫𑁂𑀯𑀲𑁆𑀲 𑀳𑁄𑀢𑀺, 𑀢𑀲𑁆𑀫𑀸 𑀬𑀸𑀯 𑀲𑀻𑀲𑀁 𑀦 𑀧𑀸𑀧𑀼𑀡𑀸𑀢𑀺 𑀧𑀼𑀕𑁆𑀕𑀮𑁄, 𑀢𑀸𑀯 𑀤𑀼𑀓𑁆𑀓𑀝𑁂 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀻𑀲𑀁 𑀦𑀸𑀫 𑀫𑀕𑁆𑀕𑀧𑀝𑀺𑀧𑀸𑀤𑀦𑀁. ‘‘𑀲𑀻𑀲𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺 𑀢𑀸𑀯 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑁂 𑀢𑀺𑀝𑁆𑀞𑀢𑀻’’𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁. 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑁂𑀦𑀸𑀢𑀺 𑀏𑀢𑁆𑀣 𑀪𑀸𑀯𑀦𑀺𑀝𑁆𑀞𑀸𑀧𑀘𑁆𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀝𑁆𑀞𑁂𑀦 𑀤𑀁𑀲𑁂𑀦 𑀔𑀸𑀤𑀦𑁂𑀦𑀸𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁.

𑁭𑁬-𑁭. 𑀲𑀗𑁆𑀕𑀸𑀫𑀲𑀻𑀲𑁂 𑀬𑀼𑀤𑁆𑀥𑀫𑀼𑀔𑁂 𑀬𑁄𑀥𑀧𑀼𑀭𑀺𑀲𑁄 𑀯𑀺𑀬𑀸𑀬𑀁 𑀪𑀺𑀓𑁆𑀔𑀽𑀢𑀺 ‘‘𑀲𑀗𑁆𑀕𑀸𑀫𑀲𑀻𑀲𑀬𑁄𑀥𑁄 𑀪𑀺𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁 𑀉𑀧𑀺𑀮𑀯𑀸𑀬, 𑀏𑀓𑁂𑀦 𑀯𑀸 𑀩𑀳𑀽𑀳𑀺 𑀯𑀸 𑀓𑀡𑁆𑀝𑀓𑁂𑀳𑀺 𑀣𑀓𑀺𑀢𑀩𑁆𑀩𑀁 𑀓𑀡𑁆𑀝𑀓𑀤𑁆𑀯𑀸𑀭𑀁. 𑀤𑀼𑀲𑁆𑀲𑀤𑁆𑀯𑀸𑀭𑀁 𑀲𑀸𑀡𑀺𑀤𑁆𑀯𑀸𑀭𑀜𑁆𑀘 𑀤𑀼𑀲𑁆𑀲𑀲𑀸𑀡𑀺𑀤𑁆𑀯𑀸𑀭𑀁. ‘‘𑀓𑀺𑀮𑀜𑁆𑀚𑀲𑀸𑀡𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀤𑀼𑀲𑁆𑀲𑀲𑀸𑀡𑀺𑀬𑀫𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀓𑀲𑀤𑀺𑀲𑀢𑁆𑀢𑀸 ‘‘𑀏𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀓𑀸𑀲𑀢𑀮𑁂𑀢𑀺 𑀳𑀫𑁆𑀫𑀺𑀬𑀢𑀮𑁂𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀺𑀧𑀦𑁆𑀦𑀸𑀦𑀁 𑀆𑀧𑀼𑀘𑁆𑀙𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀘 𑀦 𑀉𑀝𑁆𑀞𑀸𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀏𑀯 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀸. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? ‘‘𑀭𑀢𑁆𑀢𑀺𑀁 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀉𑀝𑁆𑀞𑀳𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀸𑀧𑀺 𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘, 𑀢𑁂𑀦 𑀇𑀢𑀭𑀲𑁆𑀫𑀸 𑀤𑀼𑀓𑁆𑀓𑀝𑀸 𑀫𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀘 𑀦 𑀉𑀝𑁆𑀞𑀸𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀏𑀢𑁆𑀣 𑀦 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀢𑁆𑀢𑀸 𑀧𑀭𑀺𑀘𑁆𑀙𑁂𑀤𑀢𑁄 𑀅𑀩𑁆𑀪𑀦𑁆𑀢𑀭𑁂 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀦 ‘‘𑀲𑀼𑀧𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀬 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀯𑀁 𑀦𑀺𑀧𑀚𑁆𑀚𑀦𑁆𑀢𑁄𑀢𑀺 𑀦𑀺𑀧𑀚𑁆𑀚𑀦𑀓𑀸𑀮𑁂 𑀆𑀧𑀚𑁆𑀚𑀺𑀢𑀩𑁆𑀩𑀤𑀼𑀓𑁆𑀓𑀝𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀉𑀝𑁆𑀞𑀳𑀦𑁆𑀢𑀲𑁆𑀲 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀬𑀤𑀺 𑀭𑀢𑁆𑀢𑀺𑀁 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 ‘𑀤𑀺𑀯𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’𑀢𑀺, 𑀅𑀦𑀸𑀤𑀭𑀺𑀬𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀏𑀢𑁆𑀣𑀸𑀧𑀺 ‘‘𑀦𑀺𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀉𑀝𑁆𑀞𑀸𑀳𑀻’’𑀢𑀺 𑀦 𑀯𑀼𑀢𑁆𑀢𑀢𑁆𑀢𑀸 𑀘 𑀚𑀸𑀦𑀺𑀢𑀩𑁆𑀩𑀁. ‘‘𑀫𑀳𑀸𑀧𑀘𑁆𑀘𑀭𑀺𑀬𑀁 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀤𑀼𑀓𑁆𑀓𑀝’’𑀦𑁆𑀢𑀺 𑀏𑀓𑁂 𑀯𑀤𑀦𑁆𑀢𑀺. 𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑀢𑁄 𑀅𑀦𑀺𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀲𑀘𑁂 𑀧𑀦 𑀭𑀢𑁆𑀢𑀺𑀁 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄, 𑀅𑀭𑀼𑀡𑀼𑀝𑁆𑀞𑀸𑀦𑀲𑀫𑀬𑁂 𑀓𑁄𑀘𑀺 𑀯𑀺𑀯𑀭𑀢𑀺, 𑀤𑁆𑀯𑀸𑀭𑀚𑀕𑁆𑀕𑀦𑀸𑀤𑀻𑀦𑀺 𑀅𑀓𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀓𑀲𑁆𑀫𑀸? 𑀆𑀧𑀢𑁆𑀢𑀺𑀔𑁂𑀢𑁆𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.