𑁧. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁪𑁨. 𑀓𑁄𑀲𑀺𑀬𑀓𑀸𑀭𑀓𑁄𑀢𑀺 𑀏𑀢𑁆𑀣 𑀓𑁄𑀲𑀁 𑀓𑀭𑁄𑀦𑁆𑀢𑀻𑀢𑀺 ‘‘𑀓𑁄𑀲𑀓𑀸𑀭𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀸𑀦𑀁 𑀧𑀸𑀡𑀓𑀸𑀦𑀁 𑀓𑁄𑀲𑀢𑁄 𑀦𑀺𑀩𑁆𑀩𑀢𑁆𑀢𑀁 𑀓𑁄𑀲𑀺𑀬𑀁 𑀦𑀸𑀫. 𑀅𑀢𑁆𑀢𑀦𑀸 𑀓𑀢𑀁 𑀘𑁂? 𑀦𑀺𑀲𑁆𑀲𑀚𑁆𑀚𑀦𑀓𑀸𑀮𑁂 ‘‘𑀲𑀬𑀁 𑀓𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀉𑀪𑁄𑀳𑀺 𑀘𑁂 𑀓𑀢𑀁, 𑀬𑀣𑀸𑀧𑀸𑀞𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀅𑀢𑁆𑀢𑀦𑀸 𑀘 𑀧𑀭𑁂𑀳𑀺 𑀘 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀻𑀢𑀺𑀆𑀤𑀺𑀘𑀢𑀼𑀓𑁆𑀓𑀫𑁆𑀧𑀺 𑀲𑀫𑁆𑀪𑀯𑀦𑁆𑀢𑀁 𑀦 𑀤𑀲𑁆𑀲𑀺𑀢𑀁. 𑀯𑀺𑀦𑀬𑀥𑀫𑁆𑀫𑀢𑀸 𑀳𑁂𑀲𑀸, 𑀬𑀤𑀺𑀤𑀁 𑀏𑀓𑀲𑁆𑀫𑀺𑀁 𑀢𑀺𑀓𑁂 𑀯𑀸 𑀘𑀢𑀼𑀓𑁆𑀓𑁂 𑀯𑀸 𑀤𑀲𑁆𑀲𑀺𑀢𑁂 𑀇𑀢𑀭𑀁 𑀲𑀫𑁆𑀪𑀯𑀦𑁆𑀢𑀫𑁆𑀧𑀺 𑀦 𑀯𑀼𑀘𑁆𑀘𑀢𑀻𑀢𑀺.

𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.