𑁧𑁩. 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁧. 𑀦 𑀓𑁂𑀯𑀮𑀁 𑀯𑀺𑀳𑀸𑀭𑁄 𑀏𑀯 𑀓𑀻𑀝𑀸𑀕𑀺𑀭𑀺, 𑀲𑁄𑀧𑀺 𑀕𑀸𑀫𑁄 ‘‘𑀓𑀻𑀝𑀸𑀕𑀺𑀭𑀺’’𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀕𑀸𑀫𑀜𑁆𑀳𑀺 𑀲𑀦𑁆𑀥𑀸𑀬 𑀧𑀭𑀢𑁄 ‘‘𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀲𑀁𑀯𑀘𑁆𑀙𑀭𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀲𑁆𑀲𑀢𑀺 𑀓𑀺𑀭, 𑀢𑀁 𑀲𑀦𑁆𑀥𑀸𑀬 ‘‘𑀤𑁆𑀯𑀻𑀳𑀺 𑀫𑁂𑀖𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑀥𑀺𑀓𑀦𑁆𑀢𑀺 𑀙 𑀚𑀦𑁂 𑀲𑀦𑁆𑀥𑀸𑀬. 𑀅𑀓𑀢𑀯𑀢𑁆𑀣𑀼𑀦𑁆𑀢𑀺 𑀦𑀯𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁. ‘‘𑀚𑀸𑀪𑀺𑀲𑀼𑀫𑀦𑀸𑀤𑀺𑀕𑀘𑁆𑀙𑀁 𑀅𑀮𑁆𑀮𑀸𑀦𑀁 𑀳𑀭𑀺𑀢𑀸𑀦𑀁 𑀏𑀯𑀸’’𑀢𑀺 𑀮𑀺𑀔𑀺𑀢𑀁. 𑀪𑀽𑀢𑀕𑀸𑀫𑀩𑀻𑀚𑀕𑀸𑀫𑀪𑁂𑀤𑀢𑁄 𑀧𑀦𑁂𑀲 𑀪𑁂𑀤𑁄. 𑀯𑀢𑀢𑁆𑀣𑀸𑀬𑀸𑀢𑀺 𑀯𑀢𑀺𑀅𑀢𑁆𑀣𑀸𑀬. 𑀬𑀁𑀓𑀺𑀜𑁆𑀘𑀻𑀢𑀺 𑀲𑁄𑀤𑀓𑀁 𑀯𑀸 𑀦𑀺𑀭𑀼𑀤𑀓𑀁 𑀯𑀸. 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬𑀸𑀢𑀺 𑀯𑀦𑀭𑀸𑀚𑀺𑀓𑀸𑀤𑀺𑀅𑀢𑁆𑀣𑀸𑀬. 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀁 𑀓𑀼𑀮𑀤𑀽𑀲𑀓𑀁𑀬𑁂𑀯 𑀲𑀦𑁆𑀥𑀸𑀬, 𑀕𑀦𑁆𑀣𑀦𑀸𑀤𑀺𑀲𑀩𑁆𑀩𑀁 𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑁂𑀦 𑀥𑀫𑁆𑀫𑁄’’𑀢𑀺𑀆𑀤𑀺. ‘‘𑀆𑀯𑁂𑀴𑀁 𑀆𑀩𑀺𑀴’’𑀦𑁆𑀢𑀺𑀧𑀺 𑀧𑀸𑀞𑁄.

𑀕𑁄𑀧𑁆𑀨𑀦𑀦𑁆𑀢𑀺 𑀕𑀦𑁆𑀣𑀦𑀁. 𑀯𑁂𑀞𑀺𑀫𑀦𑁆𑀢𑀺 𑀢𑀕𑁆𑀕𑀢𑀺𑀓𑀫𑁂𑀯. 𑀯𑁂𑀥𑀺𑀫𑀁 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀧𑀼𑀧𑁆𑀨𑀁 𑀯𑁂𑀥𑁂𑀢𑁆𑀯𑀸 𑀓𑀢𑀁. 𑀓𑀡𑁆𑀝𑀓𑀫𑁆𑀧𑀺 𑀩𑀦𑁆𑀥𑀺𑀢𑀼𑀦𑁆𑀢𑀺 𑀏𑀢𑁆𑀣 ‘‘𑀲𑀬𑀁 𑀯𑀺𑀚𑁆𑀛𑀦𑀢𑁆𑀣𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀚𑀸𑀮𑀫𑀬𑀁 𑀯𑀺𑀢𑀸𑀦𑀁 𑀚𑀸𑀮𑀯𑀺𑀢𑀸𑀦𑀁. 𑀧𑀼𑀧𑁆𑀨𑀧𑀝𑀺𑀘𑁆𑀙𑀓𑀁 𑀕𑀯𑀓𑁆𑀔𑀁 𑀯𑀺𑀬 𑀲𑀙𑀺𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀢𑀸𑀮𑀧𑀡𑁆𑀡𑀕𑀼𑀴𑀓𑀦𑁆𑀢𑀺 𑀢𑀸𑀮𑀧𑀡𑁆𑀡𑀫𑀬𑀁 𑀧𑀼𑀦 𑀓𑀢𑀫𑁆𑀧𑀺 𑀧𑀝𑀺𑀙𑀺𑀚𑁆𑀚𑀓𑀫𑁂𑀯. 𑀥𑀫𑁆𑀫𑀭𑀚𑁆𑀚𑀼 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀧𑀼𑀧𑁆𑀨𑀧𑁆𑀧𑀯𑁂𑀲𑀦𑀢𑁆𑀣𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀩𑀤𑁆𑀥𑀭𑀚𑁆𑀚𑀼. ‘‘𑀓𑀸𑀲𑀸𑀯𑁂𑀦 𑀩𑀤𑁆𑀥𑀫𑁆𑀧𑀺 𑀲𑀼𑀢𑁆𑀢𑀯𑀸𑀓𑀸𑀤𑀻𑀳𑀺 𑀩𑀤𑁆𑀥𑀁 𑀪𑀡𑁆𑀟𑀺𑀢𑀲𑀤𑀺𑀲’’𑀦𑁆𑀢𑀺 𑀮𑀺𑀔𑀺𑀢𑀁. 𑀅𑀁𑀲𑀪𑀡𑁆𑀟𑀺𑀓𑀁 𑀧𑀲𑀺𑀩𑁆𑀩𑀓𑁂 𑀧𑀓𑁆𑀔𑀺𑀢𑁆𑀢𑀲𑀤𑀺𑀲𑀢𑁆𑀢𑀸 𑀯𑁂𑀥𑀺𑀫𑀁 𑀦 𑀚𑀸𑀢𑀁, 𑀢𑀲𑁆𑀫𑀸 ‘‘𑀲𑀺𑀣𑀺𑀮𑀩𑀤𑁆𑀥𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀅𑀜𑁆𑀜𑀫𑀜𑁆𑀜𑀁 𑀅𑀨𑀼𑀲𑀸𑀧𑁂𑀢𑁆𑀯𑀸 𑀅𑀦𑁂𑀓𑀓𑁆𑀔𑀢𑁆𑀢𑀼𑀫𑁆𑀧𑀺 𑀧𑀭𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀽𑀭𑀺𑀢𑀦𑁆𑀢𑀺 𑀤𑀻𑀖𑀢𑁄 𑀧𑀲𑀸𑀭𑁂𑀢𑁆𑀯𑀸 𑀧𑀽𑀭𑀺𑀢𑀁. 𑀖𑀝𑀺𑀓𑀤𑀸𑀫𑀑𑀮𑀫𑁆𑀩𑀓𑁄𑀢𑀺 ‘‘𑀬𑀫𑀓𑀤𑀸𑀫𑀑𑀮𑀫𑁆𑀩𑀓𑁄’’𑀢𑀺 𑀮𑀺𑀔𑀺𑀢𑀁. ‘‘𑀕𑁂𑀡𑁆𑀟𑀼𑀔𑀭𑀧𑀢𑁆𑀢𑀤𑀸𑀫𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀘𑁂𑀮𑀸𑀤𑀻𑀳𑀺 𑀓𑀢𑀤𑀸𑀫𑀫𑁆𑀧𑀺 𑀦 𑀯𑀝𑁆𑀝𑀢𑀺 𑀅𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.

‘‘𑀭𑁂𑀘𑀓𑀁 𑀦𑀸𑀫 𑀢𑀣𑀸𑀮𑀸𑀲𑀺𑀬𑀦𑀸𑀝𑀦𑀝𑀸𑀦𑀁 𑀦𑀘𑁆𑀘’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀁 ‘‘𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀲𑀸𑀭𑀺𑀬𑁄 𑀦𑀸𑀫 𑀭𑀼𑀢𑀲𑀼𑀦𑀔𑀸 𑀲𑀺𑀗𑁆𑀕𑀸𑀮𑀓𑀫𑁆𑀫𑀓𑀼𑀭𑀼𑀗𑁆𑀕𑀓𑁂𑀴𑀺𑀧𑀦𑁂 𑀞𑀺𑀢𑀸’’𑀢𑀺 𑀓𑀺𑀭 𑀧𑀸𑀞𑁄. ‘‘𑀦𑀺𑀩𑀼𑀚𑁆𑀛𑀦𑁆𑀢𑀻’’𑀢𑀺 𑀧𑀸𑀴𑀺.

𑁪𑁩𑁨. 𑀅𑀩𑀮𑀩𑀮𑀸𑀤𑀺-𑀧𑀤𑀸𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸. 𑀬𑀣𑀸 𑀧𑀸𑀫𑁄𑀓𑁆𑀔𑀸𑀦𑀁 𑀯𑀲𑁂𑀦 𑀲𑀩𑁆𑀩𑁂𑀧𑀺 ‘‘𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸’’𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀧𑀸𑀫𑁄𑀓𑁆𑀔𑀧𑁆𑀧𑀢𑁆𑀢𑀲𑀸𑀯𑀓𑀲𑁆𑀲 𑀯𑀲𑁂𑀦 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁂 𑀲𑀩𑁆𑀩𑁂𑀧𑀺 ‘‘𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺.

𑁪𑁩𑁩. ‘‘𑀕𑀸𑀫𑁂 𑀯𑀸 𑀦 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸𑀯 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑀢𑁆𑀣 𑀦 𑀯𑀲𑀺𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁. ‘‘𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀢𑁆𑀣𑀲𑀩𑁆𑀪𑀸𑀯𑀢𑁄. 𑀬𑀲𑁆𑀫𑀺𑀜𑁆𑀳𑀺 𑀕𑀸𑀫𑁂 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀫𑀺𑀁 𑀕𑀸𑀫𑁂, 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀓𑀼𑀮𑀤𑀽𑀲𑀦𑀁 𑀓𑀢𑀁, 𑀢𑀁 𑀯𑀺𑀳𑀸𑀭𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑀁 𑀓𑀣𑀦𑁆𑀢𑀺 𑀘𑁂? ‘‘𑀕𑀸𑀫𑁂 𑀯𑀸 𑀦 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑁂𑀦 𑀬𑀲𑁆𑀫𑀺𑀁 𑀕𑀸𑀫𑁂 𑀓𑀼𑀮𑀤𑀽𑀲𑀦𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀧𑀺 𑀯𑀲𑀺𑀢𑀼𑀁 𑀦 𑀮𑀩𑁆𑀪𑀢𑀻𑀢𑀺 𑀆𑀧𑀦𑁆𑀦𑀁, 𑀢𑀁 𑀤𑀺𑀲𑁆𑀯𑀸 ‘‘𑀢𑀲𑁆𑀫𑀺𑀁 𑀯𑀺𑀳𑀸𑀭𑁂’’𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑀲𑁆𑀫𑀺𑀁 𑀯𑀲𑀺𑀢𑀼𑀁 𑀮𑀩𑁆𑀪𑀢𑀻𑀢𑀺 𑀲𑀺𑀤𑁆𑀥𑀁. ‘‘𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑀢𑁆𑀣 𑀯𑀲𑀦𑁆𑀢𑁂𑀦 𑀲𑀸𑀫𑀦𑁆𑀢𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀧𑀻𑀢𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁄 𑀦𑀸𑀫 𑀢𑀲𑁆𑀫𑀺𑀁𑀬𑁂𑀯 𑀕𑀸𑀫𑁂 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀸𑀫𑀦𑁆𑀢𑀯𑀺𑀳𑀸𑀭𑁄 𑀘 𑀢𑀲𑁆𑀲 𑀕𑀸𑀫𑀲𑁆𑀲 𑀲𑀸𑀫𑀦𑁆𑀢𑀯𑀺𑀳𑀸𑀭𑁄 𑀘𑀸𑀢𑀺 𑀉𑀪𑀬𑀁 𑀯𑀼𑀘𑁆𑀘𑀢𑀺, 𑀏𑀢𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑀢𑁆𑀣 𑀯𑀲𑀦𑁆𑀢𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀦 𑀘𑀭𑀺𑀢𑀩𑁆𑀩𑀁. 𑀲𑀸𑀫𑀦𑁆𑀢𑀕𑀸𑀫𑁂𑀧𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀦 𑀬𑀲𑁆𑀫𑀺𑀁 𑀕𑀸𑀫𑁂 𑀓𑀼𑀮𑀤𑀽𑀲𑀦𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲 𑀲𑀸𑀫𑀦𑁆𑀢𑀕𑀸𑀫𑁂 𑀓𑀼𑀮𑀤𑀽𑀲𑀓𑀯𑀺𑀳𑀸𑀭𑀲𑁆𑀲 𑀲𑀸𑀫𑀦𑁆𑀢𑀯𑀢𑁆𑀣𑀼𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂𑀧𑀺 𑀘𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀲𑁆𑀫𑀺𑀁 𑀲𑀸𑀫𑀦𑁆𑀢𑀕𑀸𑀫𑁂 𑀓𑀼𑀮𑀤𑀽𑀲𑀓𑀁 𑀦 𑀓𑀢𑀁, 𑀢𑀲𑁆𑀫𑀺𑀫𑁆𑀧𑀺 𑀘𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀦𑁂𑀯 𑀯𑀺𑀳𑀸𑀭𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦 𑀦𑀕𑀭𑁂 𑀘𑀭𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀏𑀓𑁂. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 𑀯𑀺𑀘𑀸𑀭𑀡𑀸 𑀏𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.

𑁪𑁩𑁬-𑁭. 𑀤𑀸𑀧𑁂𑀢𑀼𑀁 𑀦 𑀮𑀪𑀦𑁆𑀢𑀺, 𑀧𑀼𑀧𑁆𑀨𑀤𑀸𑀦𑀜𑁆𑀳𑀺 𑀲𑀺𑀬𑀸. 𑀢𑀲𑁆𑀲𑁂𑀯 𑀦 𑀓𑀧𑁆𑀧𑀢𑀻𑀢𑀺 𑀏𑀢𑁆𑀣 𑀬𑀸𑀕𑀼𑀆𑀤𑀻𑀦𑀺 𑀆𑀦𑁂𑀢𑁆𑀯𑀸 ‘‘𑀤𑀤𑀦𑁆𑀢𑀽’’𑀢𑀺 𑀇𑀘𑁆𑀙𑀸𑀯𑀲𑁂𑀦 𑀯𑀤𑀢𑀺 𑀘𑁂, 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀺, 𑀓𑁂𑀯𑀮𑀁 𑀧𑀦 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀅𑀢𑁆𑀢𑀸𑀦𑀁 𑀯𑀸 𑀧𑀭𑁂𑀲𑀁 𑀯𑀸 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 ‘‘𑀇𑀫𑁂 𑀫𑀦𑀼𑀲𑁆𑀲𑀸 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀽’’𑀢𑀺 𑀯𑀤𑀦𑁆𑀢𑀲𑁆𑀲 𑀢𑀲𑁆𑀲𑁂𑀯 𑀦 𑀓𑀧𑁆𑀧𑀢𑀺 𑀬𑀸𑀕𑀼𑀆𑀤𑀻𑀦𑀁 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀳𑀥𑀫𑁆𑀫𑀺𑀓𑀸𑀦’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑀢𑁄 𑀲𑀬𑀫𑁂𑀯𑀸𑀢𑀺 𑀅𑀧𑀭𑁂. 𑀆𑀘𑀭𑀺𑀬𑀸 𑀧𑀦 ‘‘𑀬𑀣𑀸 𑀫𑀳𑀸𑀧𑀘𑁆𑀘𑀭𑀺𑀬𑀁, 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 ‘𑀢𑀲𑁆𑀲𑁂𑀯𑀸’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀯𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀺𑀲𑁂𑀲𑁂𑀢𑁆𑀯𑀸 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀻’’𑀢𑀺 𑀯𑀤𑀦𑁆𑀢𑀺.

𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀭𑀲𑀓𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.