𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀲𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁨. 𑀨𑀼𑀲𑀦𑁆𑀢𑁄𑀢𑀺 𑀣𑁂𑀬𑁆𑀬𑀸𑀬 𑀨𑀼𑀲𑀦𑁆𑀢𑁄.

𑁩. 𑀦𑀺𑀘𑁆𑀙𑀯𑀺𑀢𑁆𑀣𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁪. 𑀫𑀸𑀢𑀼𑀕𑀸𑀫𑁄 𑀲𑀲𑁆𑀲𑀸𑀫𑀺𑀓𑁄 𑀅𑀢𑁆𑀢𑀦𑁄 𑀨𑀲𑁆𑀲𑁂 𑀅𑀦𑀺𑀲𑁆𑀲𑀭𑁄. 𑀯𑀝𑁆𑀝𑀺𑀢𑁆𑀯𑀸𑀢𑀺 𑀪𑀲𑁆𑀲𑀺𑀢𑁆𑀯𑀸 𑀅𑀧𑀭𑀁 𑀕𑀦𑁆𑀢𑁆𑀯𑀸.

𑁪. 𑀫𑀗𑁆𑀕𑀼𑀮𑀺𑀢𑁆𑀣𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁫. 𑀫𑀗𑁆𑀕𑀦𑀯𑀲𑁂𑀦 𑀉𑀮𑀢𑀻𑀢𑀺 𑀫𑀗𑁆𑀕𑀼𑀮𑀺, 𑀯𑀺𑀭𑀽𑀧𑀩𑀻𑀪𑀘𑁆𑀙𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀭𑀽𑀧𑀁 𑀤𑀼𑀤𑁆𑀤𑀲𑀺𑀓𑀁 𑀩𑀻𑀪𑀘𑁆𑀙’’𑀦𑁆𑀢𑀺.

𑁫. 𑀑𑀓𑀺𑀮𑀺𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀉𑀤𑁆𑀥𑀁 𑀉𑀤𑁆𑀥𑀁 𑀅𑀕𑁆𑀕𑀺𑀦𑀸 𑀧𑀓𑁆𑀓𑀲𑀭𑀻𑀭𑀢𑀸𑀬 𑀉𑀧𑁆𑀧𑀓𑁆𑀓𑀁. 𑀳𑁂𑀝𑁆𑀞𑀢𑁄 𑀧𑀕𑁆𑀖𑀭𑀡𑀯𑀲𑁂𑀦 𑀓𑀺𑀮𑀺𑀦𑁆𑀦𑀲𑀭𑀻𑀭𑀢𑀸𑀬 𑀑𑀓𑀺𑀮𑀺𑀦𑀻. 𑀇𑀢𑁄 𑀘𑀺𑀢𑁄 𑀘 𑀅𑀗𑁆𑀕𑀸𑀭𑀲𑀫𑁆𑀧𑀭𑀺𑀓𑀺𑀡𑁆𑀡𑀢𑀸𑀬 𑀑𑀓𑀺𑀭𑀺𑀦𑀻. 𑀢𑁂𑀦𑀸𑀳 ‘‘𑀲𑀸 𑀓𑀺𑀭𑀸’’𑀢𑀺𑀆𑀤𑀺. 𑀅𑀗𑁆𑀕𑀸𑀭𑀘𑀺𑀢𑀓𑁂𑀢𑀺 𑀅𑀗𑁆𑀕𑀸𑀭𑀲𑀜𑁆𑀘𑀬𑁂. 𑀲𑀭𑀻𑀭𑀢𑁄 𑀧𑀕𑁆𑀖𑀭𑀦𑁆𑀢𑀺 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀸𑀦𑀺 𑀲𑁂𑀤𑀕𑀢𑀸𑀦𑀺. 𑀢𑀲𑁆𑀲 𑀓𑀺𑀭 𑀭𑀜𑁆𑀜𑁄𑀢𑀺 𑀢𑀲𑁆𑀲 𑀓𑀸𑀮𑀺𑀗𑁆𑀕𑀲𑁆𑀲 𑀭𑀜𑁆𑀜𑁄. 𑀦𑀸𑀝𑀓𑀺𑀦𑀻𑀢𑀺 𑀦𑀘𑁆𑀘𑁂 𑀅𑀥𑀺𑀓𑀢𑀸 𑀇𑀢𑁆𑀣𑀻. 𑀲𑁂𑀤𑀦𑁆𑀢𑀺 𑀲𑁂𑀤𑀦𑀁, 𑀢𑀸𑀧𑀦𑀦𑁆𑀢𑀺 𑀅𑀢𑁆𑀣𑁄.

𑀑𑀓𑀺𑀮𑀺𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀲𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁭. 𑀅𑀲𑀻𑀲𑀓𑀁 𑀓𑀩𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀓𑀫𑁆𑀫𑀸𑀬𑀽𑀳𑀦𑀓𑀸𑀮𑁂 𑀢𑀣𑀸 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀧𑀭𑀺𑀘𑀬𑀢𑁄.

𑁭-𑁧𑁧. 𑀧𑀸𑀧𑀪𑀺𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁮-𑁨𑁨𑁨. 𑀮𑀸𑀫𑀓𑀪𑀺𑀓𑁆𑀔𑀽𑀢𑀺 𑀳𑀻𑀦𑀸𑀘𑀸𑀭𑀢𑀸𑀬 𑀮𑀸𑀫𑀓𑁄, 𑀪𑀺𑀓𑁆𑀔𑀼𑀯𑁂𑀲𑀢𑀸𑀬, 𑀪𑀺𑀓𑁆𑀔𑀸𑀳𑀸𑀭𑁂𑀦 𑀚𑀻𑀯𑀦𑀢𑁄 𑀘 𑀪𑀺𑀓𑁆𑀔𑀼. 𑀘𑀺𑀢𑁆𑀢𑀓𑁂𑀴𑀺𑀦𑁆𑀢𑀺 𑀘𑀺𑀢𑁆𑀢𑀭𑀼𑀘𑀺𑀬𑀁 𑀢𑀁 𑀢𑀁 𑀓𑀻𑀴𑀦𑁆𑀢𑁄. 𑀅𑀬𑀫𑁂𑀯𑀸𑀢𑀺 𑀪𑀺𑀓𑁆𑀔𑀼𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁄 𑀏𑀯.

𑀧𑀸𑀧𑀪𑀺𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.