𑁮. 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀅𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁨. 𑀆𑀬𑀲𑁆𑀫𑀸 𑀘 𑀮𑀓𑁆𑀔𑀡𑁄𑀢𑀺𑀆𑀤𑀻𑀲𑀼 ‘‘𑀓𑁄 𑀦𑀸𑀫𑀸𑀬𑀲𑁆𑀫𑀸 𑀮𑀓𑁆𑀔𑀡𑁄, 𑀓𑀲𑁆𑀫𑀸 𑀘 ‘𑀮𑀓𑁆𑀔𑀡𑁄’𑀢𑀺 𑀦𑀸𑀫𑀁 𑀅𑀳𑁄𑀲𑀺, 𑀓𑁄 𑀘𑀸𑀬𑀲𑁆𑀫𑀸 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀓𑀲𑁆𑀫𑀸 𑀘 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻’’𑀢𑀺 𑀢𑀁 𑀲𑀩𑁆𑀩𑀁 𑀧𑀓𑀸𑀲𑁂𑀢𑀼𑀁 ‘‘𑀬𑁆𑀯𑀸𑀬’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀦𑀸𑀢𑀺 𑀧𑀼𑀭𑀺𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀦.

𑀈𑀲𑀁 𑀳𑀲𑀺𑀢𑀁 ‘‘𑀲𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀦𑁆𑀤𑀳𑀲𑀺𑀢’’𑀦𑁆𑀢𑀺. 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀦𑁆𑀢𑀺 𑀦𑀬𑀺𑀤𑀁 𑀅𑀯𑀺𑀜𑁆𑀜𑀸𑀡𑀓𑀁 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀫𑀢𑁆𑀢𑀁, 𑀅𑀣 𑀔𑁄 𑀏𑀓𑁄 𑀧𑁂𑀢𑁄𑀢𑀺 𑀆𑀳 ‘‘𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. 𑀏𑀢𑁂 𑀅𑀢𑁆𑀢𑀪𑀸𑀯𑀸𑀢𑀺 𑀧𑁂𑀢𑀢𑁆𑀢𑀪𑀸𑀯𑀸. 𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀤𑁂𑀯𑀢𑁆𑀢𑀪𑀸𑀯𑀸 𑀯𑀺𑀬 𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀧𑀓𑀢𑀺𑀬𑀸. 𑀢𑁂𑀲𑀁 𑀧𑀦 𑀭𑀼𑀘𑀺𑀬𑀸 𑀆𑀧𑀸𑀣𑀁 𑀆𑀕𑀘𑁆𑀙𑁂𑀬𑁆𑀬𑀼𑀁 𑀫𑀦𑀼𑀲𑁆𑀲𑀸𑀦𑀁. 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀦𑀁 𑀅𑀦𑀸𑀣𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸 𑀓𑀭𑀼𑀡𑀸𑀢𑀺 𑀆𑀳 ‘‘𑀓𑀸𑀭𑀼𑀜𑁆𑀜𑁂 𑀓𑀢𑁆𑀢𑀩𑁆𑀩𑁂’’𑀢𑀺. 𑀅𑀢𑁆𑀢𑀦𑁄 𑀘 𑀲𑀫𑁆𑀧𑀢𑁆𑀢𑀺𑀁 𑀩𑀼𑀤𑁆𑀥𑀜𑀸𑀡𑀲𑁆𑀲 𑀘 𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀧𑀘𑁆𑀘𑁂𑀓𑀁 𑀲𑀫𑁆𑀧𑀢𑁆𑀢𑀺𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀢𑀤𑀼𑀪𑀬𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀥𑀫𑁆𑀫𑀥𑀸𑀢𑀽𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀥𑀫𑁆𑀫𑀥𑀸𑀢𑀽𑀢𑀺 𑀯𑀸 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄.

𑀇𑀢𑀭𑁄𑀢𑀺 𑀮𑀓𑁆𑀔𑀡𑀢𑁆𑀣𑁂𑀭𑁄. 𑀉𑀧𑀧𑀢𑁆𑀢𑀻𑀢𑀺 𑀚𑀸𑀢𑀺. 𑀉𑀧𑀧𑀢𑁆𑀢𑀺𑀲𑀻𑀲𑁂𑀦 𑀳𑀺 𑀢𑀣𑀸𑀭𑀽𑀧𑀁 𑀅𑀢𑁆𑀢𑀪𑀸𑀯𑀁 𑀯𑀤𑀢𑀺. 𑀮𑁄𑀳𑀢𑀼𑀡𑁆𑀟𑀓𑁂𑀳𑀻𑀢𑀺 𑀮𑁄𑀳𑀫𑀬𑁂𑀳𑁂𑀯 𑀢𑀼𑀡𑁆𑀟𑀓𑁂𑀳𑀺. 𑀘𑀭𑀦𑁆𑀢𑀻𑀢𑀺 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀅𑀘𑁆𑀙𑀭𑀺𑀬𑀁 𑀯𑀢𑀸𑀢𑀺 𑀕𑀭𑀳𑀘𑁆𑀙𑀭𑀺𑀬𑀁 𑀦𑀸𑀫𑁂𑀢𑀁. 𑀘𑀓𑁆𑀔𑀼𑀪𑀽𑀢𑀸𑀢𑀺 𑀲𑀫𑁆𑀧𑀢𑁆𑀢𑀤𑀺𑀩𑁆𑀩𑀘𑀓𑁆𑀔𑀼𑀓𑀸, 𑀮𑁄𑀓𑀲𑁆𑀲 𑀘𑀓𑁆𑀔𑀼𑀪𑀽𑀢𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀢𑁆𑀭𑀸𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀬𑀢𑁆𑀭𑀸𑀢𑀺 𑀓𑀸𑀭𑀡𑀯𑀘𑀦’’𑀦𑁆𑀢𑀺. 𑀅𑀜𑁆𑀜𑀢𑁆𑀭 𑀳𑀺 ‘‘𑀬𑀢𑁆𑀭 𑀳𑀺 𑀦𑀸𑀫𑀸’’𑀢𑀺 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀫𑀸𑀡𑁂 𑀲𑀢𑁆𑀢𑀦𑀺𑀓𑀸𑀬𑁂 𑀢𑁂 𑀘 𑀔𑁄 𑀯𑀺𑀪𑀸𑀕𑁂𑀦 𑀓𑀸𑀫𑀪𑀯𑀸𑀤𑀺𑀪𑁂𑀤𑁂 𑀪𑀯𑁂, 𑀦𑀺𑀭𑀬𑀸𑀤𑀺𑀪𑁂𑀤𑀸 𑀕𑀢𑀺𑀬𑁄, 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀺𑀆𑀤𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀢𑀣𑀸𑀭𑀽𑀧𑁂 𑀲𑀢𑁆𑀢𑀸𑀯𑀸𑀲𑁂 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘 𑀫𑁂 𑀉𑀧𑀦𑁂𑀢𑀼𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁂𑀦.

𑀕𑁄𑀖𑀸𑀢𑀓𑁄𑀢𑀺 𑀕𑀼𑀦𑁆𑀦𑀁 𑀅𑀪𑀺𑀡𑁆𑀳𑀁 𑀳𑀦𑀦𑀓𑁄. 𑀢𑁂𑀦𑀸𑀳 ‘‘𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸’’𑀢𑀺. 𑀢𑀲𑁆𑀲𑀸𑀢𑀺 𑀕𑀼𑀦𑁆𑀦𑀁 𑀯𑀥𑀓𑀓𑀫𑁆𑀫𑀲𑁆𑀲. 𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑀲𑁆𑀲𑀸𑀢𑀺 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀲𑁆𑀲. 𑀩𑀮𑀯𑀢𑀸 𑀕𑁄𑀖𑀸𑀢𑀓𑀓𑀫𑁆𑀫𑁂𑀦 𑀯𑀺𑀧𑀸𑀓𑁂 𑀤𑀻𑀬𑀫𑀸𑀦𑁂 𑀅𑀮𑀤𑁆𑀥𑁄𑀓𑀸𑀲𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀢𑀲𑁆𑀫𑀺𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑁂 𑀇𑀤𑀸𑀦𑀺 𑀮𑀤𑁆𑀥𑁄𑀓𑀸𑀲𑀁 ‘‘𑀅𑀯𑀲𑁂𑀲𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀻𑀢𑀺 𑀧𑀸𑀧𑀓𑀫𑁆𑀫𑀚𑀦𑀺𑀢𑀸 𑀧𑀝𑀺𑀲𑀦𑁆𑀥𑀺. 𑀓𑀫𑁆𑀫𑀲𑀪𑀸𑀕𑀢𑀸𑀬𑀸𑀢𑀺 𑀓𑀫𑁆𑀫𑀲𑀤𑀺𑀲𑀪𑀸𑀯𑁂𑀦. 𑀆𑀭𑀫𑁆𑀫𑀡𑀲𑀪𑀸𑀕𑀢𑀸𑀬𑀸𑀢𑀺 𑀆𑀭𑀫𑁆𑀫𑀡𑀲𑁆𑀲 𑀲𑀪𑀸𑀕𑀪𑀸𑀯𑁂𑀦 𑀲𑀤𑀺𑀲𑀪𑀸𑀯𑁂𑀦. 𑀬𑀸𑀤𑀺𑀲𑁂 𑀳𑀺 𑀆𑀭𑀫𑁆𑀫𑀡𑁂 𑀧𑀼𑀩𑁆𑀩𑁂 𑀢𑀁 𑀓𑀫𑁆𑀫𑀁 𑀢𑀲𑁆𑀲 𑀘 𑀯𑀺𑀧𑀸𑀓𑁄 𑀧𑀯𑀢𑁆𑀢𑁄, 𑀢𑀸𑀤𑀺𑀲𑁂𑀬𑁂𑀯 𑀆𑀭𑀫𑁆𑀫𑀡𑁂 𑀇𑀤𑀁 𑀓𑀫𑁆𑀫𑀁 𑀇𑀫𑀲𑁆𑀲 𑀯𑀺𑀧𑀸𑀓𑁄 𑀘 𑀧𑀯𑀢𑁆𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂𑀧𑀺 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀲𑁄 𑀏𑀯 𑀢𑀺𑀢𑁆𑀢𑀺𑀭𑁄, 𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀻’’𑀢𑀺. 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀻𑀢𑀺 𑀧𑀼𑀩𑁆𑀩𑁂 𑀓𑀢𑀽𑀧𑀘𑀺𑀢𑀲𑁆𑀲 𑀧𑁂𑀢𑀽𑀧𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀓𑀢𑁄𑀓𑀸𑀲𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀁 𑀇𑀤𑀸𑀦𑀺 𑀢𑀣𑀸 𑀉𑀧𑀝𑁆𑀞𑀳𑀦𑁆𑀢𑀁 𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀳𑁄𑀲𑀺. 𑀲𑁄𑀢𑀺 𑀕𑁄𑀖𑀸𑀢𑀓𑁄. 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀧𑁂𑀢𑁄 𑀚𑀸𑀢𑁄 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀢𑀸𑀯𑀲𑁂𑀦.

𑀅𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑁂𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁩. 𑀕𑁄𑀫𑀁𑀲𑀧𑁂𑀲𑀺𑀬𑁄 𑀓𑀢𑁆𑀯𑀸𑀢𑀺 𑀕𑀸𑀯𑀺𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀕𑁄𑀫𑀁𑀲𑀁 𑀨𑀸𑀮𑁂𑀢𑁆𑀯𑀸 𑀧𑁂𑀲𑀺𑀬𑁄 𑀓𑀢𑁆𑀯𑀸. 𑀲𑀼𑀓𑁆𑀔𑀸𑀧𑁂𑀢𑁆𑀯𑀸𑀢𑀺 𑀓𑀸𑀮𑀦𑁆𑀢𑀭𑀁 𑀞𑀧𑀦𑀢𑁆𑀣𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸. 𑀲𑀼𑀓𑁆𑀔𑀸𑀧𑀺𑀬𑀫𑀸𑀦𑀸𑀦𑀁 𑀫𑀁𑀲𑀧𑁂𑀲𑀻𑀦𑀜𑁆𑀳𑀺 𑀯𑀮𑁆𑀮𑀽𑀭𑀲𑀫𑀜𑁆𑀜𑀸.

𑀧𑁂𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀺𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁪. 𑀦𑀺𑀧𑁆𑀧𑀓𑁆𑀔𑀘𑀫𑁆𑀫𑁂𑀢𑀺 𑀯𑀺𑀕𑀢𑀧𑀓𑁆𑀔𑀘𑀫𑁆𑀫𑁂.

𑁪. 𑀦𑀺𑀘𑁆𑀙𑀯𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁫. 𑀉𑀭𑀩𑁆𑀪𑁂 𑀳𑀦𑀢𑀻𑀢𑀺 𑀑𑀭𑀩𑁆𑀪𑀺𑀓𑁄. 𑀏𑀴𑀓𑁂𑀢𑀺 𑀅𑀚𑁂.

𑁫. 𑀅𑀲𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁬. 𑀦𑀺𑀯𑀸𑀧𑀧𑀼𑀝𑁆𑀞𑁂𑀢𑀺 𑀅𑀢𑁆𑀢𑀦𑀸 𑀤𑀺𑀦𑁆𑀦𑀦𑀺𑀯𑀸𑀧𑁂𑀦 𑀧𑁄𑀲𑀺𑀢𑁂. 𑀅𑀲𑀺𑀦𑀸 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄.

𑁬. 𑀲𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁭. 𑀏𑀓𑀁 𑀫𑀺𑀕𑀦𑁆𑀢𑀺 𑀏𑀓𑀁 𑀤𑀻𑀧𑀓𑀫𑀺𑀕𑀁.

𑁭. 𑀉𑀲𑀼𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁮. 𑀓𑀸𑀭𑀡𑀸𑀳𑀻𑀢𑀺 𑀬𑀸𑀢𑀦𑀸𑀳𑀺. 𑀜𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀜𑀢𑁆𑀯𑀸.

𑁮. 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀲𑀼𑀡𑁄𑀢𑀺 𑀧𑀽𑀭𑁂𑀢𑀻𑀢𑀺 𑀲𑀽𑀢𑁄, 𑀅𑀲𑁆𑀲𑀤𑀫𑀓𑀸𑀤𑀺𑀓𑁄.

𑁯. 𑀤𑀼𑀢𑀺𑀬𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀧𑁂𑀲𑀼𑀜𑁆𑀜𑀽𑀧𑀲𑀁𑀳𑀸𑀭𑀯𑀲𑁂𑀦 𑀇𑀢𑁄 𑀲𑀼𑀢𑀁 𑀅𑀫𑀼𑀢𑁆𑀭, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑀁 𑀇𑀥 𑀲𑀽𑀘𑁂𑀢𑀻𑀢𑀺 𑀲𑀽𑀘𑀓𑁄. 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀺 𑀫𑀦𑀼𑀲𑁆𑀲𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦. 𑀓𑀼𑀫𑁆𑀪𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄𑀢𑀺 𑀭𑀜𑁆𑀜𑀸 𑀅𑀟𑁆𑀟𑀓𑀭𑀡𑁂 𑀞𑀧𑀺𑀢𑁄 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑁄. 𑀲𑁄 𑀳𑀺 𑀕𑀸𑀫𑀚𑀦𑀓𑀸𑀬𑀁 𑀓𑀽𑀝𑁂𑀢𑀺 𑀯𑀜𑁆𑀘𑁂𑀢𑀻𑀢𑀺 𑀕𑀸𑀫𑀓𑀽𑀝𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀘𑀺 ‘‘𑀢𑀸𑀤𑀺𑀲𑁄 𑀏𑀯 𑀕𑀸𑀫𑀚𑁂𑀝𑁆𑀞𑀓𑁄 𑀕𑀸𑀫𑀓𑀽𑀝𑀓𑁄’’𑀢𑀺 𑀯𑀤𑀦𑁆𑀢𑀺. 𑀲𑀫𑁂𑀦 𑀪𑀯𑀺𑀢𑀩𑁆𑀩𑀁, ‘‘𑀥𑀫𑁆𑀫𑀝𑁆𑀞𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀭𑀳𑀲𑁆𑀲𑀗𑁆𑀕𑁂 𑀦𑀺𑀲𑀻𑀤𑀦𑀯𑀲𑁂𑀦 𑀯𑀺𑀲𑀫𑀸 𑀦𑀺𑀲𑀚𑁆𑀚𑀸𑀯 𑀅𑀳𑁄𑀲𑀺.

𑀓𑀼𑀫𑁆𑀪𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀲𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁨. 𑀨𑀼𑀲𑀦𑁆𑀢𑁄𑀢𑀺 𑀣𑁂𑀬𑁆𑀬𑀸𑀬 𑀨𑀼𑀲𑀦𑁆𑀢𑁄.

𑁩. 𑀦𑀺𑀘𑁆𑀙𑀯𑀺𑀢𑁆𑀣𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁪. 𑀫𑀸𑀢𑀼𑀕𑀸𑀫𑁄 𑀲𑀲𑁆𑀲𑀸𑀫𑀺𑀓𑁄 𑀅𑀢𑁆𑀢𑀦𑁄 𑀨𑀲𑁆𑀲𑁂 𑀅𑀦𑀺𑀲𑁆𑀲𑀭𑁄. 𑀯𑀝𑁆𑀝𑀺𑀢𑁆𑀯𑀸𑀢𑀺 𑀪𑀲𑁆𑀲𑀺𑀢𑁆𑀯𑀸 𑀅𑀧𑀭𑀁 𑀕𑀦𑁆𑀢𑁆𑀯𑀸.

𑁪. 𑀫𑀗𑁆𑀕𑀼𑀮𑀺𑀢𑁆𑀣𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁫. 𑀫𑀗𑁆𑀕𑀦𑀯𑀲𑁂𑀦 𑀉𑀮𑀢𑀻𑀢𑀺 𑀫𑀗𑁆𑀕𑀼𑀮𑀺, 𑀯𑀺𑀭𑀽𑀧𑀩𑀻𑀪𑀘𑁆𑀙𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀭𑀽𑀧𑀁 𑀤𑀼𑀤𑁆𑀤𑀲𑀺𑀓𑀁 𑀩𑀻𑀪𑀘𑁆𑀙’’𑀦𑁆𑀢𑀺.

𑁫. 𑀑𑀓𑀺𑀮𑀺𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀉𑀤𑁆𑀥𑀁 𑀉𑀤𑁆𑀥𑀁 𑀅𑀕𑁆𑀕𑀺𑀦𑀸 𑀧𑀓𑁆𑀓𑀲𑀭𑀻𑀭𑀢𑀸𑀬 𑀉𑀧𑁆𑀧𑀓𑁆𑀓𑀁. 𑀳𑁂𑀝𑁆𑀞𑀢𑁄 𑀧𑀕𑁆𑀖𑀭𑀡𑀯𑀲𑁂𑀦 𑀓𑀺𑀮𑀺𑀦𑁆𑀦𑀲𑀭𑀻𑀭𑀢𑀸𑀬 𑀑𑀓𑀺𑀮𑀺𑀦𑀻. 𑀇𑀢𑁄 𑀘𑀺𑀢𑁄 𑀘 𑀅𑀗𑁆𑀕𑀸𑀭𑀲𑀫𑁆𑀧𑀭𑀺𑀓𑀺𑀡𑁆𑀡𑀢𑀸𑀬 𑀑𑀓𑀺𑀭𑀺𑀦𑀻. 𑀢𑁂𑀦𑀸𑀳 ‘‘𑀲𑀸 𑀓𑀺𑀭𑀸’’𑀢𑀺𑀆𑀤𑀺. 𑀅𑀗𑁆𑀕𑀸𑀭𑀘𑀺𑀢𑀓𑁂𑀢𑀺 𑀅𑀗𑁆𑀕𑀸𑀭𑀲𑀜𑁆𑀘𑀬𑁂. 𑀲𑀭𑀻𑀭𑀢𑁄 𑀧𑀕𑁆𑀖𑀭𑀦𑁆𑀢𑀺 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀸𑀦𑀺 𑀲𑁂𑀤𑀕𑀢𑀸𑀦𑀺. 𑀢𑀲𑁆𑀲 𑀓𑀺𑀭 𑀭𑀜𑁆𑀜𑁄𑀢𑀺 𑀢𑀲𑁆𑀲 𑀓𑀸𑀮𑀺𑀗𑁆𑀕𑀲𑁆𑀲 𑀭𑀜𑁆𑀜𑁄. 𑀦𑀸𑀝𑀓𑀺𑀦𑀻𑀢𑀺 𑀦𑀘𑁆𑀘𑁂 𑀅𑀥𑀺𑀓𑀢𑀸 𑀇𑀢𑁆𑀣𑀻. 𑀲𑁂𑀤𑀦𑁆𑀢𑀺 𑀲𑁂𑀤𑀦𑀁, 𑀢𑀸𑀧𑀦𑀦𑁆𑀢𑀺 𑀅𑀢𑁆𑀣𑁄.

𑀑𑀓𑀺𑀮𑀺𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀲𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁭. 𑀅𑀲𑀻𑀲𑀓𑀁 𑀓𑀩𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀓𑀫𑁆𑀫𑀸𑀬𑀽𑀳𑀦𑀓𑀸𑀮𑁂 𑀢𑀣𑀸 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀧𑀭𑀺𑀘𑀬𑀢𑁄.

𑁭-𑁧𑁧. 𑀧𑀸𑀧𑀪𑀺𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁮-𑁨𑁨𑁨. 𑀮𑀸𑀫𑀓𑀪𑀺𑀓𑁆𑀔𑀽𑀢𑀺 𑀳𑀻𑀦𑀸𑀘𑀸𑀭𑀢𑀸𑀬 𑀮𑀸𑀫𑀓𑁄, 𑀪𑀺𑀓𑁆𑀔𑀼𑀯𑁂𑀲𑀢𑀸𑀬, 𑀪𑀺𑀓𑁆𑀔𑀸𑀳𑀸𑀭𑁂𑀦 𑀚𑀻𑀯𑀦𑀢𑁄 𑀘 𑀪𑀺𑀓𑁆𑀔𑀼. 𑀘𑀺𑀢𑁆𑀢𑀓𑁂𑀴𑀺𑀦𑁆𑀢𑀺 𑀘𑀺𑀢𑁆𑀢𑀭𑀼𑀘𑀺𑀬𑀁 𑀢𑀁 𑀢𑀁 𑀓𑀻𑀴𑀦𑁆𑀢𑁄. 𑀅𑀬𑀫𑁂𑀯𑀸𑀢𑀺 𑀪𑀺𑀓𑁆𑀔𑀼𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁄 𑀏𑀯.

𑀧𑀸𑀧𑀪𑀺𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.