𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀦𑀺𑀤𑀸𑀦𑀯𑀕𑁆𑀕𑀝𑀻𑀓𑀸

𑁧. 𑀦𑀺𑀤𑀸𑀦𑀲𑀁𑀬𑀼𑀢𑁆𑀢𑀁

𑁧. 𑀩𑀼𑀤𑁆𑀥𑀯𑀕𑁆𑀕𑁄

𑁧. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀤𑀼𑀢𑀺𑀬𑀲𑀼𑀢𑁆𑀢𑀸𑀤𑀻𑀦𑀺𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦𑁂𑀯 𑀤𑁂𑀲𑀺𑀢𑀸𑀦𑀻𑀢𑀺 𑀆𑀳 ‘‘𑀧𑀞𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀭𑀸𑀢𑀺 𑀧𑀤𑀁 𑀬𑁂 𑀤𑁂𑀲𑀓𑀸𑀮𑀸 𑀇𑀥 𑀯𑀺𑀳𑀭𑀡𑀓𑀺𑀭𑀺𑀬𑀸𑀬 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑁂𑀲𑀁 𑀧𑀭𑀺𑀤𑀻𑀧𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀲𑀫𑀬𑀁…𑀧𑁂… 𑀤𑀻𑀧𑁂𑀢𑀻’’𑀢𑀺 𑀆𑀳. 𑀢𑀁-𑀲𑀤𑁆𑀤𑁄 𑀳𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄, 𑀢𑀲𑁆𑀫𑀸 𑀇𑀥 𑀤𑁂𑀲𑀲𑁆𑀲 𑀓𑀸𑀮𑀲𑁆𑀲 𑀯𑀸 𑀧𑀝𑀺𑀦𑀺𑀤𑁆𑀤𑁂𑀲𑁄 𑀪𑀯𑀺𑀢𑀼𑀁 𑀅𑀭𑀳𑀢𑀺, 𑀦 𑀅𑀜𑁆𑀜𑀲𑁆𑀲. 𑀅𑀬𑀁 𑀢𑀸𑀯 𑀢𑀢𑁆𑀭𑀲𑀤𑁆𑀤𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑁂 𑀅𑀢𑁆𑀣𑀯𑀺𑀪𑀸𑀯𑀦𑀸. 𑀬𑀲𑁆𑀫𑀸 𑀧𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀢𑀢𑁆𑀭𑀲𑀤𑁆𑀤𑁄 𑀥𑀫𑁆𑀫𑀤𑁂𑀲𑀦𑀸𑀯𑀺𑀲𑀺𑀝𑁆𑀞𑀁 𑀤𑁂𑀲𑀁 𑀓𑀸𑀮𑀜𑁆𑀘 𑀯𑀺𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀸𑀲𑀺𑀢𑀩𑁆𑀩𑀬𑀼𑀢𑁆𑀢𑁂 𑀯𑀸 𑀤𑁂𑀲𑀓𑀸𑀮𑁂’’𑀢𑀺. 𑀢𑁂𑀦 𑀢𑀢𑁆𑀭𑀸𑀢𑀺 𑀬𑀢𑁆𑀣 𑀪𑀕𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀪𑀺𑀓𑁆𑀔𑀽 𑀆𑀮𑀧𑀺 𑀅𑀪𑀸𑀲𑀺, 𑀢𑀸𑀤𑀺𑀲𑁂 𑀤𑁂𑀲𑁂, 𑀓𑀸𑀮𑁂 𑀯𑀸𑀢𑀺 𑀅𑀢𑁆𑀣𑁄. 𑀦 𑀳𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺.

𑀦𑀦𑀼 𑀘 𑀬𑀢𑁆𑀣 𑀞𑀺𑀢𑁄 𑀪𑀕𑀯𑀸 ‘‘𑀅𑀓𑀸𑀮𑁄 𑀔𑁄 𑀢𑀸𑀯𑀸’’𑀢𑀺𑀆𑀤𑀺𑀦𑀸 𑀩𑀸𑀳𑀺𑀬𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀧𑀝𑀺𑀓𑁆𑀔𑀺𑀧𑀺, 𑀢𑀢𑁆𑀣𑁂𑀯 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄𑀯 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺? 𑀲𑀘𑁆𑀘𑀫𑁂𑀢𑀁. 𑀅𑀤𑁂𑀲𑁂𑀢𑀩𑁆𑀩𑀓𑀸𑀮𑁂 𑀅𑀤𑁂𑀲𑀦𑀸𑀬 𑀳𑀺 𑀇𑀤𑀁 𑀉𑀤𑀸𑀳𑀭𑀡𑀁. 𑀢𑁂𑀦𑀸𑀳 ‘‘𑀅𑀓𑀸𑀮𑁄 𑀔𑁄 𑀢𑀸𑀯𑀸’’𑀢𑀺. 𑀬𑀁 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸’’𑀢𑀺, 𑀢𑀫𑁆𑀧𑀺 𑀢𑀲𑁆𑀲 𑀅𑀓𑀸𑀮𑀪𑀸𑀯𑀲𑁆𑀲𑁂𑀯 𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀢𑀤𑀸 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑁂𑀦 𑀭𑀽𑀧𑀓𑀸𑀬𑁂 𑀅𑀓𑀫𑁆𑀫𑀜𑁆𑀜𑀢𑀸 𑀅𑀳𑁄𑀲𑀺, 𑀩𑀮𑀯𑀧𑀻𑀢𑀺𑀯𑁂𑀕𑁂𑀦 𑀦𑀸𑀫𑀓𑀸𑀬𑁂. 𑀢𑀤𑀼𑀪𑀬𑀲𑁆𑀲 𑀯𑀽𑀧𑀲𑀫𑀁 𑀆𑀕𑀫𑁂𑀦𑁆𑀢𑁄 𑀧𑀧𑀜𑁆𑀘𑀧𑀭𑀺𑀳𑀸𑀭𑀢𑁆𑀣𑀁 𑀪𑀕𑀯𑀸 ‘‘𑀅𑀓𑀸𑀮𑁄 𑀔𑁄’’𑀢𑀺 𑀧𑀭𑀺𑀬𑀸𑀬𑁂𑀦 𑀧𑀝𑀺𑀓𑁆𑀔𑀺𑀧𑀺. 𑀅𑀤𑁂𑀲𑁂𑀢𑀩𑁆𑀩𑀤𑁂𑀲𑁂 𑀅𑀤𑁂𑀲𑀦𑀸𑀬 𑀧𑀦 𑀉𑀤𑀸𑀳𑀭𑀡𑀁 ‘‘𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺, 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀇𑀥 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀁. ‘‘𑀲 𑀔𑁄 𑀲𑁄 𑀪𑀺𑀓𑁆𑀔𑀯𑁂 𑀩𑀸𑀮𑁄 𑀇𑀥 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁩.𑁨𑁪𑁮) 𑀧𑀤𑀧𑀽𑀭𑀡𑀫𑀢𑁆𑀢𑁂 𑀔𑁄-𑀲𑀤𑁆𑀤𑁄, ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁨𑁧) 𑀅𑀯𑀥𑀸𑀭𑀡𑁂, ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁧) 𑀆𑀤𑀺𑀓𑀸𑀮𑀢𑁆𑀣𑁂, 𑀯𑀸𑀓𑁆𑀬𑀸𑀭𑀫𑁆𑀪𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀤𑀧𑀽𑀭𑀡𑁂𑀦 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁 𑀓𑀢𑀁 𑀳𑁄𑀢𑀺, 𑀆𑀤𑀺𑀓𑀸𑀮𑀢𑁆𑀣𑁂𑀦 𑀯𑀸𑀓𑁆𑀬𑀲𑁆𑀲 𑀉𑀧𑀜𑁆𑀜𑀸𑀲𑀫𑀢𑁆𑀢𑀁, 𑀅𑀯𑀥𑀸𑀭𑀡𑀢𑁆𑀣𑁂𑀦 𑀧𑀦 𑀦𑀺𑀬𑀫𑀤𑀲𑁆𑀲𑀦𑀁. ‘‘𑀢𑀲𑁆𑀫𑀸 𑀆𑀫𑀦𑁆𑀢𑁂𑀲𑀺 𑀏𑀯𑀸’’𑀢𑀺 𑀆𑀫𑀦𑁆𑀢𑀦𑁂 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺.

‘‘𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀧𑀼𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀧𑀤𑀁 𑀯𑀼𑀢𑁆𑀢𑀦𑁆𑀢𑀺? 𑀬𑀤𑀺𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀁 𑀧𑀦 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀳𑀭𑀡𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀯𑀺𑀲𑁂𑀲𑀤𑀲𑁆𑀲𑀦𑀧𑀭𑀁, 𑀦 𑀆𑀫𑀦𑁆𑀢𑀦𑀓𑀺𑀭𑀺𑀬𑀸𑀬, 𑀇𑀥 𑀧𑀦 𑀆𑀫𑀦𑁆𑀢𑀦𑀓𑀺𑀭𑀺𑀬𑀸𑀬, 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀧𑀼𑀦 𑀪𑀕𑀯𑀸𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺. 𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦’’𑀦𑁆𑀢𑀺 𑀆𑀳. 𑀓𑀣𑀸𑀲𑀯𑀦𑀬𑀼𑀢𑁆𑀢𑀧𑀼𑀕𑁆𑀕𑀮𑀯𑀘𑀦𑀦𑁆𑀢𑀺 𑀯𑀓𑁆𑀔𑀫𑀸𑀦𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀬 𑀲𑀯𑀦𑀬𑁄𑀕𑁆𑀬𑀧𑀼𑀕𑁆𑀕𑀮𑀯𑀘𑀦𑀁. 𑀘𑀢𑀽𑀲𑀼𑀧𑀺 𑀧𑀭𑀺𑀲𑀸𑀲𑀼 𑀪𑀺𑀓𑁆𑀔𑀽 𑀏𑀯 𑀏𑀤𑀺𑀲𑀸𑀦𑀁 𑀤𑁂𑀲𑀦𑀸𑀦𑀁 𑀯𑀺𑀲𑁂𑀲𑁂𑀦 𑀪𑀸𑀚𑀦𑀪𑀽𑀢𑀸𑀢𑀺 𑀲𑀸𑀢𑀺𑀲𑀬𑁂𑀦 𑀲𑀸𑀲𑀦𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀇𑀥 𑀪𑀺𑀓𑁆𑀔𑀼𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀤𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺 𑀆𑀳. 𑀢𑀢𑁆𑀣 𑀪𑀺𑀓𑁆𑀔𑀓𑁄𑀢𑀺 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀦𑀲𑀻𑀮𑀢𑁆𑀢𑀸 𑀪𑀺𑀓𑁆𑀔𑀦𑀥𑀫𑁆𑀫𑀢𑁆𑀢𑀸 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀩𑀼𑀤𑁆𑀥𑀸𑀤𑀻𑀳𑀺𑀧𑀺 𑀅𑀚𑁆𑀛𑀼𑀧𑀕𑀢𑀁 𑀪𑀺𑀓𑁆𑀔𑀸𑀘𑀭𑀺𑀬𑀁 𑀉𑀜𑁆𑀙𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀅𑀦𑀼𑀝𑁆𑀞𑀺𑀢𑀢𑁆𑀢𑀸 𑀪𑀺𑀓𑁆𑀔𑀼. 𑀬𑁄 𑀳𑀺 𑀓𑁄𑀘𑀺 𑀅𑀧𑁆𑀧𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀚𑀻𑀯𑀺𑀓𑀓𑀧𑁆𑀧𑀦𑀁 𑀳𑀺𑀢𑁆𑀯𑀸 𑀮𑀺𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑁂𑀦𑁂𑀯 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀪𑀺𑀓𑁆𑀔𑀼. 𑀧𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀓𑀸𑀚𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀬 𑀉𑀲𑁆𑀲𑀸𑀳𑀚𑀸𑀢𑀢𑁆𑀢𑀸 𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀽𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 ‘‘𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀦𑁆𑀤𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀪𑀺𑀓𑁆𑀔𑀼, 𑀪𑀺𑀦𑁆𑀦𑀢𑁆𑀢𑀸 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁦𑁯) 𑀆𑀕𑀢𑀦𑀬𑁂𑀦. 𑀜𑀸𑀧𑀦𑁂𑀢𑀺 𑀅𑀯𑀩𑁄𑀥𑀦𑁂, 𑀧𑀝𑀺𑀯𑁂𑀤𑀦𑁂𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀦𑀲𑀻𑀮𑀢𑀸, 𑀦 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀻𑀳𑀺 𑀚𑀻𑀯𑀦𑀲𑀻𑀮𑀢𑀸. 𑀪𑀺𑀓𑁆𑀔𑀦𑀥𑀫𑁆𑀫𑀢𑀸 ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀻’’𑀢𑀺 (𑀚𑀸. 𑁧.𑁭.𑁫𑁯) 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀦𑀲𑀪𑀸𑀯𑀢𑀸, 𑀦 𑀬𑀸𑀘𑀦𑀸𑀓𑁄𑀳𑀜𑁆𑀜𑀲𑀪𑀸𑀯𑀢𑀸. 𑀪𑀺𑀓𑁆𑀔𑀦𑁂 𑀲𑀸𑀥𑀼𑀓𑀸𑀭𑀺𑀢𑀸 ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺 (𑀥. 𑀧. 𑁧𑁬𑁮) 𑀯𑀘𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀢𑁆𑀣 𑀅𑀧𑁆𑀧𑀫𑀚𑁆𑀚𑀢𑀸. 𑀅𑀣 𑀯𑀸 𑀲𑀻𑀮𑀁 𑀦𑀸𑀫 𑀧𑀓𑀢𑀺𑀲𑀪𑀸𑀯𑁄. 𑀇𑀥 𑀧𑀦 𑀢𑀣𑀸𑀥𑀺𑀝𑁆𑀞𑀸𑀦𑀁. 𑀥𑀫𑁆𑀫𑁄𑀢𑀺 𑀯𑀢𑀁. 𑀅𑀧𑀭𑁂 𑀧𑀦 ‘‘𑀲𑀻𑀮𑀁 𑀦𑀸𑀫 𑀯𑀢𑀯𑀲𑁂𑀦 𑀲𑀫𑀸𑀤𑀸𑀦𑀁. 𑀥𑀫𑁆𑀫𑁄 𑀦𑀸𑀫 𑀧𑀯𑁂𑀡𑀺-𑀆𑀕𑀢𑀁 𑀘𑀸𑀭𑀺𑀢𑁆𑀢𑀁. 𑀲𑀸𑀥𑀼𑀓𑀸𑀭𑀺𑀢𑀸 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀆𑀤𑀭𑀓𑀺𑀭𑀺𑀬𑀸’’𑀢𑀺 𑀯𑀡𑁆𑀡𑁂𑀦𑁆𑀢𑀺.

𑀳𑀻𑀦𑀸𑀥𑀺𑀓𑀚𑀦𑀲𑁂𑀯𑀺𑀢𑀯𑀼𑀢𑁆𑀢𑀺𑀦𑁆𑀢𑀺 𑀬𑁂 𑀪𑀺𑀓𑁆𑀔𑀼𑀪𑀸𑀯𑁂 𑀞𑀺𑀢𑀸𑀧𑀺 𑀚𑀸𑀢𑀺𑀫𑀤𑀸𑀤𑀺𑀯𑀲𑁂𑀦 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸, 𑀬𑁂 𑀘 𑀕𑀺𑀳𑀺𑀪𑀸𑀯𑁂 𑀧𑀭𑁂𑀲𑀼 𑀅𑀢𑁆𑀣𑀺𑀓𑀪𑀸𑀯𑀫𑁆𑀧𑀺 𑀅𑀦𑀼𑀧𑀕𑀢𑀢𑀸𑀬 𑀪𑀺𑀓𑁆𑀔𑀸𑀘𑀭𑀺𑀬𑀁 𑀧𑀭𑀫𑀓𑀸𑀧𑀜𑁆𑀜𑀁 𑀫𑀜𑁆𑀜𑀦𑁆𑀢𑀺, 𑀢𑁂𑀲𑀁 𑀉𑀪𑀬𑁂𑀲𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀘𑀦𑁂𑀦 𑀳𑀻𑀦𑀚𑀦𑁂𑀳𑀺 𑀤𑀮𑀺𑀤𑁆𑀤𑁂𑀳𑀺 𑀧𑀭𑀫𑀓𑀸𑀧𑀜𑁆𑀜𑀢𑀁 𑀧𑀢𑁆𑀢𑁂𑀳𑀺 𑀧𑀭𑀓𑀼𑀮𑁂𑀲𑀼 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁂𑀳𑀺 𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁆𑀥𑀢𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀺, 𑀅𑀥𑀺𑀓𑀚𑀦𑁂𑀳𑀺 𑀉𑀴𑀸𑀭𑀪𑁄𑀕𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀢𑁄 𑀧𑀩𑁆𑀩𑀚𑀺𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀆𑀚𑀻𑀯𑀲𑁄𑀥𑀦𑀢𑁆𑀣𑀁 𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀤𑀻𑀦𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀲𑁆𑀫𑀸 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀘𑀦𑀁 𑀆𑀫𑀦𑁆𑀢𑀦𑀪𑀸𑀯𑀢𑁄 𑀅𑀪𑀺𑀫𑀼𑀔𑀻𑀓𑀭𑀡𑀁, 𑀧𑀓𑀭𑀡𑀢𑁄 𑀲𑀸𑀫𑀢𑁆𑀣𑀺𑀬𑀢𑁄 𑀘 𑀲𑀼𑀲𑁆𑀲𑀽𑀲𑀸𑀚𑀦𑀦𑀁, 𑀲𑀓𑁆𑀓𑀘𑁆𑀘𑀲𑀯𑀦𑀫𑀦𑀲𑀺𑀓𑀸𑀭𑀦𑀺𑀬𑁄𑀚𑀦𑀜𑁆𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀯𑁄𑀢𑀺 𑀇𑀫𑀺𑀦𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭𑁂𑀧𑀻𑀢𑀺 𑀲𑀸𑀥𑀼𑀓𑀁 𑀲𑀯𑀦𑁂 𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭𑁂 𑀘. 𑀓𑀣𑀁 𑀧𑀯𑀢𑁆𑀢𑀺𑀢𑀸 𑀲𑀯𑀦𑀸𑀤𑀬𑁄 𑀲𑀸𑀥𑀼𑀓𑀁 𑀧𑀯𑀢𑁆𑀢𑀺𑀢𑀸 𑀳𑁄𑀦𑁆𑀢𑀻𑀢𑀺? ‘‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺 𑀳𑀢𑁆𑀣𑀕𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀤𑀭𑀕𑀸𑀭𑀯𑀬𑁄𑀕𑁂𑀦 𑀓𑀣𑀸𑀤𑀻𑀲𑀼 𑀅𑀧𑀭𑀺𑀪𑀯𑀸𑀤𑀺𑀦𑀸 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀓𑀣𑀁 𑀧𑀭𑀺𑀪𑁄𑀢𑀺, 𑀦 𑀓𑀣𑀺𑀓𑀁 𑀧𑀭𑀺𑀪𑁄𑀢𑀺, 𑀦 𑀅𑀢𑁆𑀢𑀸𑀦𑀁 𑀧𑀭𑀺𑀪𑁄𑀢𑀺, 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄, 𑀬𑁄𑀦𑀺𑀲𑁄 𑀘 𑀫𑀦𑀲𑀺 𑀓𑀭𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁫.𑁧𑁫𑁧). 𑀢𑁂𑀦𑀸𑀳 ‘‘𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀻’’𑀢𑀺. 𑀲𑀸𑀲𑀦𑀲𑀫𑁆𑀧𑀢𑁆𑀢𑀺 𑀦𑀸𑀫 𑀲𑀻𑀮𑀸𑀤𑀺𑀦𑀺𑀧𑁆𑀨𑀢𑁆𑀢𑀺. 𑀧𑀞𑀫𑀁 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀥𑀺𑀕𑀫𑀯𑀲𑁂𑀦. 𑀲𑀢𑁆𑀣𑀼𑀘𑀭𑀺𑀬𑀸𑀦𑀼𑀯𑀺𑀥𑀸𑀬𑀓𑀢𑁆𑀢𑀸 𑀲𑀻𑀮𑀸𑀤𑀺𑀕𑀼𑀡𑀸𑀦𑀼𑀝𑁆𑀞𑀸𑀦𑁂𑀦. 𑀢𑀺𑀡𑁆𑀡𑀁 𑀬𑀸𑀦𑀸𑀦𑀁 𑀯𑀲𑁂𑀦 𑀅𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀲𑀓𑀮𑀲𑀸𑀲𑀦𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸.

𑀲𑀦𑁆𑀢𑀺𑀓𑀢𑁆𑀢𑀸𑀢𑀺 𑀲𑀫𑀻𑀧𑀪𑀸𑀯𑀢𑁄. 𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸𑀢𑀺 𑀲𑀩𑁆𑀩𑀓𑀸𑀮𑀁 𑀲𑀁𑀯𑀼𑀢𑁆𑀢𑀺𑀪𑀸𑀯𑀢𑁄. 𑀬𑀣𑀸𑀦𑀼𑀲𑀺𑀝𑁆𑀞𑀦𑁆𑀢𑀺 𑀅𑀦𑀼𑀲𑀸𑀲𑀦𑀺𑀬𑀸𑀦𑀼𑀭𑀽𑀧𑀁, 𑀅𑀦𑀼𑀲𑀸𑀲𑀦𑀺𑀁 𑀅𑀦𑀯𑀲𑁂𑀲𑀢𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽𑀢𑀺 𑀬𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀥𑀫𑁆𑀫𑁂 𑀤𑁂𑀲𑀦𑀸𑀧𑀲𑀼𑀢𑀸, 𑀢𑁂. 𑀧𑀼𑀩𑁆𑀩𑁂 ‘‘𑀲𑀩𑁆𑀩𑀧𑀭𑀺𑀲𑀲𑀸𑀥𑀸𑀭𑀡𑀸 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀽𑀦𑀁 𑀏𑀯 𑀆𑀫𑀦𑁆𑀢𑀦𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 𑀓𑀺𑀫𑀢𑁆𑀣𑀁 𑀧𑀦 𑀪𑀕𑀯𑀸𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀢𑁆𑀣 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑀸. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀢𑀺 𑀅𑀲𑀫𑀸𑀳𑀺𑀢𑀘𑀺𑀢𑁆𑀢𑀸. 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀢𑀺 𑀳𑀺𑀬𑁆𑀬𑁄 𑀢𑀢𑁄 𑀧𑀭𑀤𑀺𑀯𑀲𑁂𑀲𑀼 𑀯𑀸 𑀲𑀼𑀢𑀥𑀫𑁆𑀫𑀁 𑀧𑀢𑀺 𑀫𑀦𑀲𑀸 𑀅𑀯𑁂𑀓𑁆𑀔𑀦𑁆𑀢𑀸. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀇𑀫𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀅𑀦𑀸𑀫𑀦𑁆𑀢𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀪𑀺𑀓𑁆𑀔𑀯𑁄𑀢𑀺 𑀘 𑀲𑀦𑁆𑀥𑀺𑀯𑀲𑁂𑀦 𑀇-𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄 ‘‘𑀪𑀺𑀓𑁆𑀔𑀯𑁄 𑀇𑀢𑀻’’𑀢𑀺, 𑀅𑀬𑀜𑁆𑀳𑀺 𑀇𑀢𑀺𑀲𑀤𑁆𑀤𑁄 𑀳𑁂𑀢𑀼𑀧𑀭𑀺𑀲𑀫𑀸𑀧𑀦𑀸𑀤𑀺𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑀧𑀓𑀸𑀭𑀸𑀯𑀥𑀸𑀭𑀡𑀦𑀺𑀤𑀲𑁆𑀲𑀦𑀸𑀤𑀺𑀅𑀦𑁂𑀓𑀢𑁆𑀣𑀧𑀪𑁂𑀤𑁄. 𑀢𑀣𑀸 𑀳𑁂𑀲 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁭𑁯) 𑀳𑁂𑀢𑀼𑀫𑁆𑀳𑀺 𑀤𑀺𑀲𑁆𑀲𑀢𑀺, ‘‘𑀢𑀲𑁆𑀫𑀸𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁯) 𑀧𑀭𑀺𑀲𑀫𑀸𑀧𑀦𑁂, ‘‘𑀇𑀢𑀺 𑀯𑀸 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁩) 𑀆𑀤𑀺𑀅𑀢𑁆𑀣𑁂 ‘‘𑀫𑀸𑀕𑀡𑁆𑀟𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁭𑁩, 𑁭𑁫) 𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑁂, ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄. 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄, 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁪) 𑀧𑀓𑀸𑀭𑁂, ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁯𑁬) 𑀅𑀯𑀥𑀸𑀭𑀡𑁂, ‘‘𑀲𑀩𑁆𑀩𑀫𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀲𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦) 𑀦𑀺𑀤𑀲𑁆𑀲𑀦𑁂. 𑀇𑀥𑀸𑀧𑀺 𑀦𑀺𑀤𑀲𑁆𑀲𑀦𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀯𑁄𑀢𑀺 𑀆𑀫𑀦𑁆𑀢𑀦𑀸𑀓𑀸𑀭𑁄 𑀢𑀫𑁂𑀲 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑁂𑀢𑀺 ‘‘𑀪𑀺𑀓𑁆𑀔𑀯𑁄𑀢𑀺 𑀆𑀫𑀦𑁆𑀢𑁂𑀲𑀻’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀪𑀤𑁆𑀤𑀦𑁆𑀢𑁂𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀇𑀢𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀩𑁆𑀩𑁂 ‘‘𑀪𑀕𑀯𑀸 𑀆𑀫𑀦𑁆𑀢𑁂𑀲𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀇𑀥 𑀪𑀕𑀯𑀢𑁄𑀢𑀺 𑀲𑀸𑀫𑀺𑀯𑀘𑀦𑀁 𑀆𑀫𑀦𑁆𑀢𑀦𑀫𑁂𑀯 𑀲𑀫𑁆𑀩𑀦𑁆𑀥𑀻𑀅𑀦𑁆𑀢𑀭𑀁 𑀅𑀧𑁂𑀓𑁆𑀔𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀪𑀕𑀯𑀢𑁄 𑀆𑀫𑀦𑁆𑀢𑀦𑀁 𑀧𑀝𑀺𑀅𑀲𑁆𑀲𑁄𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀢𑁄𑀢𑀺 𑀇𑀤𑀁 𑀧𑀦 𑀧𑀝𑀺𑀲𑁆𑀲𑀯𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀏𑀢𑁆𑀢𑀸𑀯𑀢𑀸 𑀬𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑀧𑀝𑀺𑀫𑀡𑁆𑀟𑀺𑀢𑀁 𑀦𑀺𑀤𑀸𑀦𑀁 𑀪𑀸𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀳 𑁋 𑀓𑀺𑀫𑀢𑁆𑀣𑀁 𑀧𑀦 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀭𑀺𑀬𑀫𑀸𑀦𑁂 𑀦𑀺𑀤𑀸𑀦𑀯𑀘𑀦𑀁, 𑀦𑀦𑀼 𑀪𑀕𑀯𑀢𑀸 𑀪𑀸𑀲𑀺𑀢𑀯𑀘𑀦𑀲𑁆𑀲𑁂𑀯 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀬 𑀞𑀺𑀢𑀺𑀅𑀲𑀫𑁆𑀫𑁄𑀲𑀲𑀤𑁆𑀥𑁂𑀬𑁆𑀬𑀪𑀸𑀯𑀲𑀫𑁆𑀧𑀸𑀤𑀦𑀢𑁆𑀣𑀁. 𑀓𑀸𑀮𑀤𑁂𑀲𑀤𑁂𑀲𑀓𑀦𑀺𑀫𑀺𑀢𑁆𑀢𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀸 𑀳𑀺 𑀤𑁂𑀲𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺 𑀅𑀲𑀫𑁆𑀫𑁄𑀲𑀥𑀫𑁆𑀫𑀸 𑀲𑀤𑁆𑀥𑁂𑀬𑁆𑀬𑀸 𑀘, 𑀤𑁂𑀲𑀓𑀸𑀮𑀓𑀢𑁆𑀢𑀼𑀲𑁄𑀢𑀼𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑀦𑀺𑀩𑀦𑁆𑀥𑁄 𑀯𑀺𑀬 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁄. 𑀢𑁂𑀦𑁂𑀯 𑀘𑀸𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀸𑀤𑀺𑀧𑀼𑀘𑁆𑀙𑀸𑀲𑀼 𑀓𑀢𑀸𑀲𑀼 𑀢𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀪𑀸𑀲𑀺𑀢𑀁.

𑀅𑀧𑀺𑀘 𑀲𑀢𑁆𑀣𑀼 𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀢𑀣𑀸𑀕𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀼𑀩𑁆𑀩𑀭𑀘𑀦𑀸𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀸𑀪𑀸𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀦 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑀭𑀘𑀦𑀸𑀤𑀻𑀳𑀺 𑀅𑀢𑁆𑀣𑁄 𑀅𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀏𑀓𑀧𑁆𑀧𑀫𑀸𑀡𑀢𑁆𑀢𑀸 𑀘 𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀢𑀣𑀸 𑀆𑀘𑀭𑀺𑀬𑀫𑀼𑀝𑁆𑀞𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑀲𑀢𑁆𑀣𑀼𑀲𑀸𑀯𑀓𑀸𑀦𑀼𑀭𑁄𑀥𑀸𑀪𑀸𑀯𑀢𑁄 𑀔𑀻𑀡𑀸𑀲𑀯𑀢𑁆𑀢𑀲𑀺𑀤𑁆𑀥𑀺. 𑀦 𑀳𑀺 𑀲𑀩𑁆𑀩𑀲𑁄 𑀔𑀻𑀡𑀸𑀲𑀯𑀲𑁆𑀲 𑀢𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀼𑀯𑀺𑀲𑀼𑀤𑁆𑀥𑀸 𑀘𑀲𑁆𑀲 𑀧𑀭𑀸𑀦𑀼𑀕𑁆𑀕𑀳𑀧𑁆𑀧𑀯𑀢𑁆𑀢𑀺, 𑀏𑀯𑀁 𑀤𑁂𑀲𑀓𑀲𑀁𑀓𑀺𑀮𑁂𑀲𑀪𑀽𑀢𑀸𑀦𑀁 𑀤𑀺𑀝𑁆𑀞𑀺𑀲𑀻𑀮𑀲𑀫𑁆𑀧𑀤𑀸𑀤𑀽𑀲𑀓𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀘𑁆𑀘𑀦𑁆𑀢𑀸𑀪𑀸𑀯𑀲𑀁𑀲𑀽𑀘𑀓𑁂𑀳𑀺 𑀜𑀸𑀡𑀲𑀫𑁆𑀧𑀤𑀸𑀧𑀳𑀸𑀦𑀲𑀫𑁆𑀧𑀤𑀸𑀪𑀺𑀩𑁆𑀬𑀜𑁆𑀚𑀦𑀓𑁂𑀳𑀺 𑀘 𑀲𑀁𑀩𑀼𑀤𑁆𑀥𑀯𑀺𑀲𑀼𑀤𑁆𑀥𑀪𑀸𑀯𑁂𑀳𑀺 𑀧𑀼𑀭𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀺, 𑀢𑀢𑁄 𑀏𑀯 𑀘 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀸𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀻𑀢𑀺 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀲𑀫𑀦𑁆𑀦𑀸𑀕𑀫𑁄 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀦𑀺𑀤𑀸𑀦𑀯𑀘𑀦𑁂𑀦 𑀧𑀓𑀸𑀲𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀤𑀻𑀧𑀦𑀢𑁄, 𑀇𑀥 𑀧𑀦 𑀫𑀽𑀮𑀤𑁆𑀯𑀬𑀯𑀲𑁂𑀦 𑀅𑀦𑁆𑀢𑀤𑁆𑀯𑀬𑀭𑀳𑀺𑀢𑀲𑁆𑀲 𑀢𑀺𑀲𑀦𑁆𑀥𑀺𑀓𑀸𑀮𑀩𑀦𑁆𑀥𑀲𑁆𑀲 𑀘𑀢𑀼𑀩𑁆𑀩𑀺𑀥𑀦𑀬𑀲𑀗𑁆𑀔𑁂𑀧𑀕𑀫𑁆𑀪𑀻𑀭𑀪𑀸𑀯𑀬𑀼𑀢𑁆𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀩𑁄𑀥𑀺𑀬𑀸 𑀦𑀺𑀤𑀲𑁆𑀲𑀦𑀢𑁄 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀣𑀼 𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺.

𑀢𑀣𑀸 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀜𑀸𑀡𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀳𑀺 𑀪𑀕𑀯𑀢𑁄 𑀦𑀢𑁆𑀣𑀺 𑀦𑀺𑀭𑀢𑁆𑀣𑀺𑀓𑀸 𑀧𑀯𑀢𑁆𑀢𑀺, 𑀅𑀢𑁆𑀢𑀳𑀺𑀢𑀢𑁆𑀣𑀸 𑀯𑀸, 𑀢𑀲𑁆𑀫𑀸 𑀧𑀭𑁂𑀲𑀁 𑀏𑀯 𑀅𑀢𑁆𑀣𑀸𑀬 𑀧𑀯𑀢𑁆𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀓𑀮𑀫𑁆𑀧𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀬𑀣𑀸𑀧𑀯𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑀸𑀦𑀁 𑀅𑀦𑀼𑀲𑀸𑀲𑀦𑀝𑁆𑀞𑁂𑀦 𑀲𑀸𑀲𑀦𑀁, 𑀦 𑀓𑀩𑁆𑀩𑀭𑀘𑀦𑀸. 𑀢𑀬𑀺𑀤𑀁 𑀲𑀢𑁆𑀣𑀼𑀘𑀭𑀺𑀢𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀸𑀦𑀯𑀘𑀦𑁂𑀳𑀺 𑀬𑀣𑀸𑀭𑀳𑀁 𑀧𑀓𑀸𑀲𑀻𑀬𑀢𑀺, 𑀇𑀥 𑀧𑀦 𑀤𑁆𑀯𑀸𑀤𑀲𑀧𑀤𑀺𑀓𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀸𑀯𑀦𑁂𑀦 𑀢𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺.

𑀅𑀧𑀺𑀘 𑀲𑀢𑁆𑀣𑀼 𑀧𑀫𑀸𑀡𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀲𑀸𑀲𑀦𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁, 𑀢𑀜𑁆𑀘𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 ‘‘𑀪𑀕𑀯𑀸’’𑀢𑀺 𑀘 𑀇𑀫𑀺𑀦𑀸 𑀧𑀤𑁂𑀦 𑀯𑀺𑀪𑀸𑀯𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀪𑀕𑀯𑀸’’𑀢𑀺 𑀘 𑀇𑀫𑀺𑀦𑀸 𑀢𑀣𑀸𑀕𑀢𑀲𑁆𑀲 𑀭𑀸𑀕𑀤𑁄𑀲𑀫𑁄𑀳𑀸𑀤𑀺-𑀲𑀩𑁆𑀩𑀲𑀁𑀓𑀺𑀮𑁂𑀲𑀫𑀮𑀤𑀼𑀘𑁆𑀘𑀭𑀺𑀢𑀸𑀤𑀺𑀤𑁄𑀲𑀧𑁆𑀧𑀳𑀸𑀦𑀤𑀻𑀧𑀦𑁂𑀦 𑀯𑀘𑀦𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀼𑀧𑀭𑀺𑀲𑀼𑀤𑁆𑀥𑀜𑀸𑀡𑀓𑀭𑀼𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀧𑀭𑀺𑀤𑀻𑀧𑀦𑁂𑀦 𑀢𑀢𑁄 𑀏𑀯 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀤𑀻𑀧𑀦𑁂𑀦 𑀅𑀬𑀫𑀢𑁆𑀣𑁄 𑀲𑀩𑁆𑀩𑀣𑀸 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺. 𑀇𑀤𑀫𑁂𑀢𑁆𑀣 𑀦𑀺𑀤𑀸𑀦𑀯𑀘𑀦𑁂 𑀧𑀬𑁄𑀚𑀦𑀦𑀺𑀤𑀲𑁆𑀲𑀦𑀁.

𑀦𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 𑀤𑁂𑀲𑀺𑀢𑀲𑁆𑀲. 𑀤𑁂𑀲𑀦𑀸𑀧𑀺 𑀳𑀺 𑀤𑁂𑀲𑁂𑀢𑀩𑁆𑀩𑀲𑁆𑀲 𑀲𑀻𑀮𑀸𑀤𑀺𑀅𑀢𑁆𑀣𑀲𑁆𑀲 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀦𑀺𑀓𑁆𑀔𑀺𑀧𑀦𑀢𑁄 ‘‘𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 ‘‘𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀢𑀸𑀯 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀢𑁆𑀣𑀸𑀬𑀁 𑀤𑁂𑀲𑀦𑀸 𑀏𑀯𑀁𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑁂 𑀤𑀲𑁆𑀲𑀺𑀢𑁂 𑀲𑀼𑀢𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀦𑀺𑀤𑀸𑀦𑀧𑀭𑀺𑀚𑀸𑀦𑀦𑁂𑀦 𑀯𑀡𑁆𑀡𑀦𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀢𑁄 𑀳𑁂𑀝𑁆𑀞𑀸 ‘‘𑀓𑀲𑁆𑀫𑀸 𑀪𑀕𑀯𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦𑁂𑀯 𑀤𑁂𑀲𑀦𑀸 𑀆𑀭𑀤𑁆𑀥𑀸’’𑀢𑀺 𑀓𑁂𑀦𑀘𑀺 𑀘𑁄𑀤𑀦𑀸𑀬 𑀓𑀢𑀸𑀬 ‘‘𑀧𑀭𑀚𑁆𑀛𑀸𑀲𑀬𑁄𑀬𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄’’𑀢𑀺 𑀧𑀭𑀺𑀳𑀸𑀭𑁄 𑀲𑀼𑀓𑀣𑀺𑀢𑁄 𑀳𑁄𑀢𑀺. 𑀢𑀢𑁆𑀣 𑀬𑀣𑀸 𑀅𑀦𑁂𑀓𑀲𑀢𑀅𑀦𑁂𑀓𑀲𑀳𑀲𑁆𑀲𑀪𑁂𑀤𑀸𑀦𑀺𑀧𑀺 𑀲𑀼𑀢𑁆𑀢𑀦𑁆𑀢𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀥𑀸𑀦𑀦𑀬𑁂𑀦 𑀲𑁄𑀴𑀲𑀯𑀺𑀥𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀳𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺. 𑀏𑀢𑁆𑀣 𑀘 𑀬𑀣𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺 ‘‘𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘, 𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘, 𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘𑀸’’𑀢𑀺 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀲𑀫𑁆𑀪𑀯𑀢𑁄, 𑀏𑀯𑀁 𑀬𑀤𑀺𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀚𑁆𑀛𑀸𑀲𑀬𑁂𑀦𑀧𑀺 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀻𑀳𑀺 𑀧𑀦 𑀧𑀼𑀭𑀢𑁄 𑀞𑀺𑀢𑁂𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀲𑀁𑀲𑀕𑁆𑀕𑁄 𑀦𑀢𑁆𑀣𑀻𑀢𑀺. 𑀦𑀬𑀺𑀥 𑀦𑀺𑀭𑀯𑀲𑁂𑀲𑁄 𑀯𑀺𑀢𑁆𑀣𑀸𑀭𑀦𑀬𑁄 𑀲𑀫𑁆𑀪𑀯𑀢𑀻𑀢𑀺 ‘‘𑀘𑀢𑁆𑀢𑀸𑀭𑁄 𑀳𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀯𑀸 𑀲𑀫𑁆𑀪𑀯𑀦𑁆𑀢𑀸𑀦𑀁 𑀲𑁂𑀲𑀦𑀺𑀓𑁆𑀔𑁂𑀧𑀸𑀦𑀁 𑀫𑀽𑀮𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀤𑀲𑁆𑀲𑀺𑀢𑀸, 𑀢𑀣𑀸𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀅𑀬𑀁 𑀲𑀁𑀲𑀕𑁆𑀕𑀪𑁂𑀤𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀦𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀁 𑀏𑀯 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄. 𑀅𑀣 𑀯𑀸 𑀦𑀺𑀓𑁆𑀔𑀺𑀧𑀦𑀁 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀤𑁂𑀲𑀦𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀺 𑀓𑀸𑀭𑀡𑀪𑀽𑀢𑁄𑀢𑀺 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑀚𑁆𑀛𑀸𑀲𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀘𑁆𑀙𑀸𑀬 𑀯𑀲𑁂𑀦 𑀧𑀯𑀢𑁆𑀢𑀥𑀫𑁆𑀫𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺, 𑀧𑀼𑀘𑁆𑀙𑀸𑀯𑀲𑀺𑀓𑁄. 𑀲𑀼𑀢𑁆𑀢𑀤𑁂𑀲𑀦𑀸𑀬 𑀯𑀢𑁆𑀣𑀼𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄. 𑀅𑀣 𑀯𑀸 𑀦𑀺𑀓𑁆𑀔𑀺𑀧𑀻𑀬𑀢𑀺 𑀲𑀼𑀢𑁆𑀢𑀁 𑀏𑀢𑁂𑀦𑀸𑀢𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺 𑀏𑀯. 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄. 𑀧𑀼𑀘𑁆𑀙𑀻𑀬𑀢𑀻𑀢𑀺 𑀧𑀼𑀘𑁆𑀙𑀸, 𑀧𑀼𑀘𑁆𑀙𑀺𑀢𑁆𑀯𑀸 𑀜𑀸𑀢𑀩𑁆𑀩𑁄 𑀅𑀢𑁆𑀣𑁄. 𑀢𑀲𑁆𑀲 𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀯𑀘𑀦𑀁 𑀧𑀼𑀘𑁆𑀙𑀸𑀯𑀲𑀺𑀓𑀁, 𑀢𑀤𑁂𑀯 𑀦𑀺𑀓𑁆𑀔𑁂𑀧𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 ‘‘𑀧𑀼𑀘𑁆𑀙𑀸𑀯𑀲𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀏𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘𑁂𑀢𑁆𑀣 𑀧𑀭𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑀢𑁆𑀢𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀯𑀺𑀲𑀼𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀪𑀸𑀯𑁄 𑀬𑀼𑀢𑁆𑀢𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀥𑀫𑁆𑀫𑀢𑀦𑁆𑀢𑀺𑀞𑀧𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑀤𑁂𑀲𑀦𑀢𑁆𑀢𑀸. 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀧𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀁 𑀤𑁂𑀲𑀦𑀸𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀸𑀦𑀁 𑀓𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀅𑀦𑀯𑀭𑁄𑀥𑁄, 𑀧𑀼𑀘𑁆𑀙𑀸𑀯𑀲𑀺𑀓𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀦𑀁 𑀯𑀸 𑀧𑀭𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀺𑀢𑀸𑀦𑀁 𑀓𑀣𑀁 𑀧𑀭𑀚𑁆𑀛𑀸𑀲𑀬𑁂 𑀅𑀦𑀯𑀭𑁄𑀥𑁄𑀢𑀺? 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀧𑀭𑁂𑀲𑀜𑁆𑀳𑀺 𑀅𑀪𑀺𑀦𑀻𑀳𑀸𑀭𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀼𑀢𑁆𑀢𑀤𑁂𑀲𑀦𑀸𑀓𑀸𑀭𑀡𑀼𑀧𑁆𑀧𑀸𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀚𑀸𑀮𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀸𑀤𑀻𑀦𑀁 𑀯𑀡𑁆𑀡𑀸𑀯𑀡𑁆𑀡𑀆𑀫𑀺𑀲𑀼𑀧𑁆𑀧𑀸𑀤𑀸𑀤𑀺𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑁂𑀲𑀁 𑀧𑀼𑀘𑁆𑀙𑀁 𑀯𑀺𑀦𑀸 𑀅𑀚𑁆𑀛𑀸𑀲𑀬𑀁 𑀏𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑀺𑀢𑁄 𑀧𑀭𑀚𑁆𑀛𑀸𑀲𑀬𑁄, 𑀧𑀼𑀘𑁆𑀙𑀸𑀯𑀲𑁂𑀦 𑀏𑀯 𑀤𑁂𑀲𑀺𑀢𑁄 𑀧𑀼𑀘𑁆𑀙𑀸𑀯𑀲𑀺𑀓𑁄𑀢𑀺 𑀧𑀸𑀓𑀝𑁄𑀯𑀸𑀬𑀫𑀢𑁆𑀣𑁄𑀢𑀺. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀢𑀺 𑀥𑀫𑁆𑀫𑀢𑀦𑁆𑀢𑀺𑀞𑀧𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀲𑀩𑀮𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄𑀢𑀺 𑀤𑀲𑀩𑀮𑀯𑀕𑁆𑀕𑁂 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀲𑀼𑀢𑁆𑀢𑀸𑀦𑀁 𑀆𑀯𑀮𑀺, 𑀢𑀣𑀸 𑀘𑀦𑁆𑀤𑁄𑀧𑀫𑀳𑀸𑀭𑀓𑀸𑀤𑀬𑁄.

𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀬𑁄. 𑀅𑀚𑁆𑀛𑀸𑀲𑀬𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑀺𑀁. 𑀔𑀦𑁆𑀢𑀺𑀦𑁆𑀢𑀺 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁. 𑀫𑀦𑀦𑁆𑀢𑀺 𑀘𑀺𑀢𑁆𑀢𑀁. 𑀅𑀪𑀺𑀦𑀻𑀳𑀸𑀭𑀦𑁆𑀢𑀺 𑀧𑀡𑀺𑀥𑀸𑀦𑀁. 𑀩𑀼𑀚𑁆𑀛𑀦𑀪𑀸𑀯𑀦𑁆𑀢𑀺 𑀩𑀼𑀚𑁆𑀛𑀦𑀲𑀪𑀸𑀯𑀁, 𑀧𑀝𑀺𑀯𑀺𑀚𑁆𑀛𑀦𑀸𑀓𑀸𑀭𑀁 𑀯𑀸.

𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀉𑀕𑁆𑀖𑀝𑀦𑀁 𑀦𑀸𑀫 𑀜𑀸𑀡𑀼𑀕𑁆𑀖𑀝𑀦𑀁, 𑀜𑀸𑀡𑁂𑀦 𑀉𑀕𑁆𑀖𑀝𑀺𑀢𑀫𑀢𑁆𑀢𑁂 𑀏𑀯 𑀥𑀫𑁆𑀫𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀜𑁆𑀘𑀺𑀢𑀁 𑀯𑀺𑀢𑁆𑀣𑀸𑀭𑀺𑀢𑀫𑁂𑀯 𑀅𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀉𑀤𑁆𑀤𑁂𑀲𑀸𑀤𑀻𑀳𑀺 𑀦𑁂𑀢𑀩𑁆𑀩𑁄𑀢𑀺 𑀦𑁂𑀬𑁆𑀬𑁄. 𑀩𑁆𑀬𑀜𑁆𑀚𑀦𑀧𑀤𑀁 𑀧𑀭𑀫𑀁 𑀅𑀲𑁆𑀲𑀸𑀢𑀺 𑀧𑀤𑀧𑀭𑀫𑁄. 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬𑀸𑀢𑀺 𑀉𑀤𑀸𑀳𑀸𑀭𑀥𑀫𑁆𑀫𑀲𑁆𑀲 𑀉𑀤𑁆𑀤𑁂𑀲𑁂 𑀉𑀤𑀸𑀳𑀝𑀫𑀢𑁆𑀢𑁂 𑀏𑀯. 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀜𑀸𑀡𑁂𑀦 𑀲𑀤𑁆𑀥𑀺𑀁 𑀅𑀪𑀺𑀲𑀫𑀸𑀬𑁄𑀕𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀸𑀬 𑀞𑀧𑀺𑀬𑀫𑀸𑀦𑀸𑀬 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 ‘‘𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 ‘‘𑀯𑀺𑀧𑀜𑁆𑀘𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀉𑀤𑁆𑀤𑁂𑀲𑀢𑁄𑀢𑀺 𑀉𑀤𑁆𑀤𑁂𑀲𑀳𑁂𑀢𑀼, 𑀉𑀤𑁆𑀤𑀺𑀲𑀦𑁆𑀢𑀲𑁆𑀲 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄, ‘‘𑀉𑀤𑁆𑀤𑀺𑀲𑀢𑁄’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀧𑀭𑀺𑀧𑀼𑀘𑁆𑀙𑀢𑁄𑀢𑀺 𑀧𑀭𑀺𑀧𑀼𑀘𑁆𑀙𑀦𑁆𑀢𑀲𑁆𑀲. 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀅𑀦𑁆𑀢𑀫𑀲𑁄 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀩𑁆𑀬𑀜𑁆𑀚𑀦𑀧𑀤𑀫𑁂𑀯 𑀧𑀭𑀫𑀁 𑀓𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀧𑀤𑀧𑀭𑀫𑁄’’𑀢𑀺 𑀯𑀼𑀘𑁆𑀘𑀢𑀺.

𑀏𑀓𑀘𑀭𑀸𑀢𑀺 𑀯𑀺𑀯𑁂𑀓𑀸𑀪𑀺𑀭𑀢𑀺𑀬𑀸 𑀏𑀓𑀯𑀺𑀳𑀸𑀭𑀺𑀦𑁄. 𑀤𑁆𑀯𑀺𑀘𑀭𑀸𑀢𑀺 𑀤𑁆𑀯𑁂 𑀏𑀓𑀚𑁆𑀛𑀸𑀲𑀬𑀸 𑀳𑀼𑀢𑁆𑀯𑀸 𑀜𑀸𑀡𑀘𑀭𑀺𑀬𑀸𑀤𑀺𑀯𑀲𑁂𑀦 𑀯𑀺𑀘𑀭𑀦𑁆𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀲𑀢𑁆𑀢𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑁂𑀦 𑀲𑀼𑀜𑁆𑀜𑀢𑀁. 𑀢𑀢𑁄 𑀏𑀯 𑀲𑀡𑁆𑀳𑀁 𑀲𑀼𑀔𑀼𑀫𑀁. ‘‘𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀪𑀕𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀆𑀭𑀪𑀻’’𑀢𑀺 𑀯𑀢𑁆𑀯𑀸 𑀢𑁂 𑀧𑀦 ‘‘𑀧𑀭𑁂’’𑀢𑀺 𑀯𑀼𑀢𑁆𑀢𑀧𑀼𑀕𑁆𑀕𑀮𑀸 𑀅𑀧𑀭𑀺𑀓𑀫𑁆𑀫𑀺𑀓𑀸 𑀲𑀼𑀧𑀭𑀺𑀲𑁄𑀥𑀺𑀢𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀘𑀸𑀢𑀺 𑀤𑀼𑀯𑀺𑀥𑀸, 𑀢𑀤𑀼𑀪𑀬𑁂𑀲𑀼 𑀲𑀢𑁆𑀣𑀼 𑀧𑀝𑀺𑀧𑀢𑁆𑀢𑀺𑀁 𑀉𑀧𑀫𑀸𑀫𑀼𑀔𑁂𑀦 𑀧𑀓𑀸𑀲𑁂𑀦𑁆𑀢𑁄 𑀬𑀣𑀸 𑀳𑀻𑀢𑀺𑀆𑀤𑀺𑀫𑀸𑀳. 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺 𑀮𑀺𑀔𑀦𑀯𑀲𑁂𑀦 𑀦 𑀉𑀧𑁆𑀧𑀸𑀤𑁂𑀢𑀺. 𑀅𑀓𑀢𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀅𑀓𑀢𑀸𑀦𑀼𑀬𑁄𑀕𑀁. 𑀲𑀻𑀮…𑀧𑁂… 𑀲𑀫𑁆𑀧𑀤𑀸𑀬𑀸𑀢𑀺 𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑀁 𑀲𑀻𑀮𑀲𑀫𑁆𑀧𑀤𑀸𑀬, 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀁 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀅𑀦𑀼𑀚𑀼𑀓𑀢𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀬 𑀬𑁄𑀚𑁂𑀦𑁆𑀢𑁄𑀢𑀺 𑀬𑁄𑀚𑀦𑀸.

𑀬𑀦𑁆𑀢𑀺 𑀬𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀲𑀦𑁆𑀥𑀸𑀬. 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀤𑀺𑀝𑁆𑀞𑀺 𑀘𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀝𑁆𑀞𑀺 𑀘𑁂𑀯 𑀓𑀫𑁆𑀫𑀧𑀣𑀲𑀫𑁆𑀫𑀸𑀤𑀺𑀝𑁆𑀞𑀺 𑀘. 𑀢𑀺𑀯𑀺𑀥𑁂𑀦𑀸𑀢𑀺 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀺 𑀏𑀯𑀁 𑀯𑀺𑀲𑀬𑀪𑀸𑀯𑀢𑁄 𑀢𑀺𑀧𑁆𑀧𑀓𑀸𑀭𑁂𑀦. 𑀬𑀣𑀸𑀯𑀼𑀢𑁆𑀢𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑀁 𑀲𑀻𑀮𑀁𑀬𑁂𑀯 𑀪𑀸𑀯𑀦𑀸𑀬 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺.

𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀁 𑀅𑀧𑀕𑀢𑀲𑀩𑁆𑀩𑀓𑀸𑀴𑀓𑀁. 𑀘𑀢𑀼𑀭𑀲𑁆𑀲𑀸𑀤𑀺𑀥𑁄𑀢𑁄 𑀲𑀼𑀧𑀭𑀺𑀫𑀚𑁆𑀚𑀺𑀢𑀫𑀡𑀺𑀓𑁆𑀔𑀦𑁆𑀥𑁄. 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑀸𑀯𑁄 𑀧𑀘𑁆𑀘𑀬𑀸𑀓𑀸𑀭𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀅𑀯𑀺𑀚𑁆𑀚𑀸 𑀏𑀯𑀸𑀢𑀺 𑀆𑀳 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑁆𑀢𑀺 𑀧𑀘𑁆𑀘𑀬𑀸𑀓𑀸𑀭’’𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑀸𑀓𑀸𑀭𑁄 𑀳𑀻’’𑀢𑀺𑀆𑀤𑀺.

𑀓𑀸𑀫𑀁 𑀯𑁄-𑀲𑀤𑁆𑀤𑁄 𑀧𑀤𑀧𑀭𑀝𑁆𑀞𑀺𑀢𑁄 𑀧𑀝𑀺𑀬𑁄𑀕𑀻𑀅𑀢𑁆𑀣𑀯𑀺𑀲𑁂𑀲𑀯𑀸𑀘𑀓𑁄, 𑀦𑀸𑀫𑀧𑀭𑀪𑀽𑀢𑁄 𑀧𑀦 𑀢𑀁 𑀢𑀁 𑀓𑀢𑁆𑀢𑀼𑀓𑀫𑁆𑀫𑀓𑀭𑀡𑀸𑀤𑀺𑀲𑀸𑀥𑀦𑀯𑀺𑀲𑀺𑀝𑁆𑀞𑀫𑁂𑀯 𑀧𑀩𑁄𑀥𑁂𑀢𑀺, 𑀳𑀺-𑀦𑀺𑀧𑀸𑀢𑀧𑀭𑀪𑀽𑀢𑁄 𑀧𑀦 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀯𑁄𑀢𑀺…𑀧𑁂… 𑀤𑀺𑀲𑁆𑀲𑀢𑀻’’𑀢𑀺. 𑀢𑀁𑀤𑁂𑀲𑀦𑀦𑁆𑀢𑀺 𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑁂𑀲𑀦𑀁. 𑀲𑀸 𑀳𑀺 𑀇𑀥 𑀢-𑀲𑀤𑁆𑀤𑁂𑀦 𑀧𑀘𑁆𑀘𑀸𑀫𑀲𑀻𑀬𑀢𑀺. ‘‘𑀲𑀼𑀡𑀸𑀣𑀸’’𑀢𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀢𑀸𑀯𑀘𑀦𑀢𑁄 𑀦 𑀓𑁂𑀯𑀮𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄.

𑀏𑀓𑀢𑁆𑀣𑀫𑁂𑀢𑀁 𑀧𑀤𑀁 𑀓-𑀲𑀤𑁆𑀤𑁂𑀦 𑀧𑀤𑀯𑀟𑁆𑀠𑀦𑀫𑀢𑁆𑀢𑀲𑁆𑀲 𑀓𑀢𑀢𑁆𑀢𑀸, 𑀢𑀲𑁆𑀫𑀸 𑀲𑀸𑀥𑀼𑀲𑀤𑁆𑀤𑀲𑁆𑀲 𑀓𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑁄 𑀲𑀸𑀥𑀼𑀓𑀲𑀤𑁆𑀤𑀲𑁆𑀲𑀧𑀺 𑀓𑀢𑁄 𑀏𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀥𑀼 𑀪𑀦𑁆𑀢𑁂𑀢𑀺 𑀬𑀸𑀘𑀸𑀫𑀳𑀁 𑀪𑀦𑁆𑀢𑁂𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀆𑀬𑀸𑀘𑀦𑁂’’𑀢𑀺. 𑀧𑀼𑀦 𑀲𑀸𑀥𑀼 𑀪𑀦𑁆𑀢𑁂𑀢𑀺 𑀏𑀯𑀁 𑀪𑀦𑁆𑀢𑁂𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀫𑁆𑀧𑀝𑀺𑀘𑁆𑀙𑀦𑁂’’𑀢𑀺. 𑀲𑀸𑀥𑀼 𑀲𑀸𑀥𑀽𑀢𑀺 𑀅𑀳𑁄 𑀅𑀳𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀳𑀁𑀲𑀦𑁂’’𑀢𑀺. 𑀲𑀸𑀥𑀼 𑀥𑀫𑁆𑀫𑀭𑀼𑀘𑀻𑀢𑀺 𑀧𑀼𑀜𑁆𑀜𑀓𑀸𑀫𑁄 𑀲𑀼𑀦𑁆𑀤𑀭𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀡𑀯𑀸𑀢𑀺 𑀧𑀜𑁆𑀜𑀯𑀸. 𑀅𑀤𑁆𑀤𑀼𑀩𑁆𑀪𑁄𑀢𑀺 𑀅𑀤𑀽𑀲𑀓𑁄. 𑀤𑀴𑁆𑀳𑀻𑀓𑀫𑁆𑀫𑁂𑀢𑀺 𑀣𑀺𑀭𑀻𑀓𑀭𑀡𑁂 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬𑀁. 𑀆𑀡𑀢𑁆𑀢𑀺𑀬𑀦𑁆𑀢𑀺 𑀆𑀡𑀸𑀧𑀦𑁂. ‘‘𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀲𑀸𑀥𑀼𑀓𑀲𑀤𑁆𑀤𑁂𑀦 𑀲𑀯𑀦𑀫𑀦𑀲𑀺𑀓𑀸𑀭𑀸𑀦𑀁 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸 𑀯𑀺𑀬 𑀢𑀤𑀸𑀡𑀸𑀧𑀦𑀫𑁆𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀬𑀸𑀘𑀦𑀢𑁆𑀣𑀢𑀸 𑀯𑀺𑀬 𑀘𑀲𑁆𑀲 𑀆𑀡𑀸𑀧𑀦𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑁂𑀢𑁆𑀣 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀦𑀺𑀯𑀸𑀭𑀡𑀁 𑀲𑀯𑀦𑁂 𑀦𑀺𑀬𑁄𑀚𑀦𑀯𑀲𑁂𑀦 𑀓𑀺𑀭𑀺𑀬𑀦𑁆𑀢𑀭𑀧𑀝𑀺𑀲𑁂𑀥𑀦𑀪𑀸𑀯𑀢𑁄, 𑀲𑁄𑀢𑀁 𑀑𑀤𑀳𑀣𑀸𑀢𑀺 𑀳𑀺 𑀅𑀢𑁆𑀣𑁄. 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀦𑀺𑀯𑀸𑀭𑀡𑀁 𑀅𑀜𑁆𑀜𑀘𑀺𑀦𑁆𑀢𑀸𑀧𑀝𑀺𑀲𑁂𑀥𑀦𑀢𑁄. 𑀧𑀼𑀭𑀺𑀫𑀦𑁆𑀢𑀺 ‘‘𑀲𑀼𑀡𑀸𑀣𑀸’’𑀢𑀺 𑀧𑀤𑀁. 𑀏𑀢𑁆𑀣𑀸𑀢𑀺 ‘‘𑀲𑀼𑀡𑀸𑀣, 𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀧𑀤𑀤𑁆𑀯𑀬𑁂, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀓𑀸𑀭𑁂. 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀦𑀺𑀯𑀸𑀭𑀡𑀁 𑀲𑁄𑀢𑀤𑁆𑀯𑀸𑀭𑁂 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀓𑀢𑁆𑀢𑀸. 𑀦 𑀳𑀺 𑀬𑀸𑀣𑀸𑀯𑀢𑁄 𑀲𑀼𑀡𑀦𑁆𑀢𑀲𑁆𑀲 𑀲𑀤𑁆𑀤𑀢𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀳𑁄𑀢𑀺. 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀦𑀺𑀯𑀸𑀭𑀡𑀁 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀓𑀢𑁆𑀢𑀸. 𑀦 𑀳𑀺 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀉𑀧𑀥𑀸𑀭𑁂𑀦𑁆𑀢𑀲𑁆𑀲 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀳𑁄𑀢𑀺. 𑀥𑀫𑁆𑀫𑀲𑁆𑀲𑀯𑀦𑁂 𑀦𑀺𑀬𑁄𑀚𑁂𑀢𑀺 ‘‘𑀲𑀼𑀡𑀸𑀣𑀸’’𑀢𑀺 𑀯𑀺𑀤𑀳𑀦𑀢𑁄. 𑀥𑀸𑀭𑀡𑀽𑀧𑀧𑀭𑀺𑀓𑁆𑀔𑀸𑀲𑀽𑀢𑀺 𑀏𑀢𑁆𑀣 𑀉𑀧𑀧𑀭𑀺𑀓𑁆𑀔𑀕𑁆𑀕𑀳𑀡𑁂𑀦𑁂𑀯 𑀢𑀼𑀮𑀦𑀢𑀻𑀭𑀡𑀸𑀤𑀺𑀓𑁂 𑀤𑀺𑀝𑁆𑀞𑀺𑀬𑀸 𑀘 𑀲𑀼𑀧𑁆𑀧𑀝𑀺𑀯𑁂𑀥𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀬𑀜𑁆𑀚𑀦𑁄𑀢𑀺 𑀏𑀢𑁆𑀣 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺. 𑀲𑀳 𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀲𑀩𑁆𑀬𑀜𑁆𑀚𑀦𑁄, 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀅𑀢𑁆𑀣𑁄, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺𑀓𑁄. 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑁄, 𑀅𑀢𑁆𑀣𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀕𑀫𑁆𑀪𑀻𑀭𑁄𑀢𑀺𑀆𑀤𑀻𑀲𑀼 𑀥𑀫𑁆𑀫𑁄 𑀦𑀸𑀫 𑀢𑀦𑁆𑀢𑀺. 𑀤𑁂𑀲𑀦𑀸 𑀦𑀸𑀫 𑀢𑀲𑁆𑀲𑀸 𑀫𑀦𑀲𑀸 𑀯𑀯𑀢𑁆𑀣𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸 𑀓𑀣𑀦𑀁. 𑀅𑀢𑁆𑀣𑁄 𑀦𑀸𑀫 𑀢𑀦𑁆𑀢𑀺𑀬𑀸 𑀅𑀢𑁆𑀣𑁄. 𑀧𑀝𑀺𑀯𑁂𑀥𑁄 𑀦𑀸𑀫 𑀢𑀦𑁆𑀢𑀺𑀬𑀸 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀬𑀲𑁆𑀫𑀸 𑀘𑁂𑀢𑁂 𑀥𑀫𑁆𑀫𑀤𑁂𑀲𑀦𑀸𑀅𑀢𑁆𑀣𑀧𑀝𑀺𑀯𑁂𑀥𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀴𑁆𑀳𑀸 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄…𑀧𑁂… 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺.

𑀏𑀢𑁆𑀣 𑀘 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀸𑀦𑀁 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸, 𑀧𑀝𑀺𑀯𑁂𑀥𑀲𑁆𑀲 𑀧𑀦 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀩𑁆𑀩𑀺𑀲𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑁂𑀲𑀦𑀁 𑀦𑀸𑀫 𑀉𑀤𑁆𑀤𑀺𑀲𑀦𑀁 𑀲𑀗𑁆𑀔𑁂𑀧𑀤𑀲𑁆𑀲𑀦𑀲𑀤𑀺𑀲𑀁. 𑀢𑀣𑀸 𑀳𑀺 𑀯𑀺𑀪𑀗𑁆𑀕𑀲𑀼𑀢𑁆𑀢𑁂 ‘‘𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀦𑀺𑀤𑁆𑀤𑀺𑀲𑀦𑀁 𑀪𑀸𑀲𑀦𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀢𑁄𑀧𑀺 𑀦𑀁 𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀭𑀺𑀩𑁆𑀬𑀢𑁆𑀢𑀁 𑀓𑀣𑀦𑀁 𑀯𑀸 𑀪𑀸𑀲𑀦𑀁.

𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄𑀢𑀺 𑀲𑀸𑀴𑀺𑀓𑀸𑀬 𑀆𑀮𑀸𑀧𑁄 𑀯𑀺𑀬 𑀫𑀥𑀼𑀭𑁄 𑀓𑀡𑁆𑀡𑀲𑀼𑀔𑁄 𑀧𑁂𑀫𑀦𑀻𑀬𑁄. 𑀧𑀝𑀺𑀪𑀸𑀦𑀁 𑀲𑀤𑁆𑀤𑁄. 𑀉𑀤𑀻𑀭𑀬𑀻𑀢𑀺 𑀉𑀘𑁆𑀘𑀸𑀭𑀻𑀬𑀢𑀺, 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀼𑀢𑁆𑀢𑁂 𑀉𑀲𑁆𑀲𑀸𑀳𑀚𑀸𑀢𑀸𑀢𑀺 𑀏𑀯𑀁 ‘‘𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀓𑀺𑀭 𑀲𑀢𑁆𑀣𑀸 𑀲𑀗𑁆𑀔𑁂𑀧𑁂𑀦𑁂𑀯 𑀤𑁂𑀲𑁂𑀲𑁆𑀲𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑀸 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸.

𑀓𑀢𑀫𑁄𑀢𑀺 𑀢𑀲𑁆𑀲 𑀧𑀤𑀲𑁆𑀲 𑀲𑀸𑀫𑀜𑁆𑀜𑀢𑁄 𑀧𑀼𑀘𑁆𑀙𑀸𑀪𑀸𑀯𑁄 𑀜𑀸𑀬𑀢𑀺, 𑀦 𑀯𑀺𑀲𑁂𑀲𑀢𑁄𑀢𑀺 𑀢𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑁂𑀲𑀪𑀸𑀯𑀁 𑀓𑀣𑁂𑀦𑁆𑀢𑁄 ‘‘𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸’’𑀢𑀺 𑀯𑀢𑁆𑀯𑀸 𑀢𑁂𑀦𑁂𑀯 𑀧𑀲𑀗𑁆𑀕𑁂𑀦 𑀫𑀳𑀸𑀦𑀺𑀤𑁆𑀤𑁂𑀲𑁂 𑀆𑀕𑀢𑀸 𑀲𑀩𑁆𑀩𑀸𑀧𑀺 𑀧𑀼𑀘𑁆𑀙𑀸 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀤𑀲𑁆𑀲𑁂𑀢𑀺 ‘‘𑀧𑀜𑁆𑀘𑀯𑀺𑀥𑀸 𑀳𑀺 𑀧𑀼𑀘𑁆𑀙𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀅𑀤𑀺𑀝𑁆𑀞𑀁 𑀚𑁄𑀢𑁂𑀢𑀺 𑀏𑀢𑀸𑀬𑀸𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸. 𑀤𑀺𑀝𑁆𑀞𑀁 𑀲𑀁𑀲𑀦𑁆𑀤𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸. 𑀲𑀁𑀲𑀦𑁆𑀤𑀦𑀜𑁆𑀘𑁂𑀢𑁆𑀣 𑀲𑀸𑀓𑀘𑁆𑀙𑀸𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀓𑀭𑀡𑀁. 𑀯𑀺𑀫𑀢𑀺𑀁 𑀙𑀺𑀦𑁆𑀤𑀢𑀺 𑀏𑀢𑀸𑀬𑀸𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀸. 𑀅𑀦𑀼𑀫𑀢𑀺𑀬𑀸 𑀧𑀼𑀘𑁆𑀙𑀦𑀁 𑀅𑀦𑀼𑀫𑀢𑀺𑀧𑀼𑀘𑁆𑀙𑀸. ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀼𑀘𑁆𑀙𑀸𑀬 𑀳𑀺 ‘‘𑀓𑀸 𑀢𑀼𑀫𑁆𑀳𑀸𑀓𑀁 𑀅𑀦𑀼𑀫𑀢𑀻’’𑀢𑀺 𑀅𑀦𑀼𑀫𑀢𑀺 𑀧𑀼𑀘𑁆𑀙𑀺𑀢𑀸 𑀳𑁄𑀢𑀺. 𑀓𑀣𑁂𑀢𑀼𑀓𑀫𑁆𑀬𑀢𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀬.

𑀮𑀓𑁆𑀔𑀡𑀦𑁆𑀢𑀺 𑀜𑀸𑀢𑀼𑀁 𑀧𑀼𑀘𑁆𑀙𑀺𑀢𑁄 𑀬𑁄 𑀓𑁄𑀘𑀺 𑀲𑀪𑀸𑀯𑁄. 𑀅𑀜𑁆𑀜𑀸𑀢𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀜𑀸𑀡𑁂𑀦 𑀅𑀜𑁆𑀜𑀸𑀢𑀪𑀸𑀯𑀫𑀸𑀳. 𑀅𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀘𑀓𑁆𑀔𑀼𑀦𑀸 𑀯𑀺𑀬 𑀦 𑀤𑀺𑀝𑁆𑀞𑀢𑀁. 𑀅𑀢𑀼𑀮𑀺𑀢𑀦𑁆𑀢𑀺 ‘‘𑀏𑀢𑁆𑀢𑀓𑀁 𑀇𑀤’’𑀦𑁆𑀢𑀺 𑀢𑀼𑀮𑀦𑀪𑀽𑀢𑁂𑀦 𑀜𑀸𑀡𑁂𑀦 𑀦 𑀢𑀼𑀮𑀺𑀢𑀢𑀁. 𑀅𑀢𑀻𑀭𑀺𑀢𑀦𑁆𑀢𑀺 𑀢𑀻𑀭𑀡𑀪𑀽𑀢𑁂𑀦 𑀜𑀸𑀡𑁂𑀦 𑀅𑀓𑀢𑀜𑀸𑀡𑀓𑀺𑀭𑀺𑀬𑀸𑀲𑀫𑀸𑀧𑀦𑀢𑀁. 𑀅𑀯𑀺𑀪𑀽𑀢𑀦𑁆𑀢𑀺 𑀜𑀸𑀡𑀲𑁆𑀲 𑀅𑀧𑀸𑀓𑀝𑀪𑀸𑀯𑀁. 𑀅𑀯𑀺𑀪𑀸𑀯𑀺𑀢𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀻𑀓𑀢𑀪𑀸𑀯𑀁.

𑀧𑀜𑁆𑀘𑀲𑀼 𑀧𑀼𑀘𑁆𑀙𑀸𑀲𑀼 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀢𑁄 𑀦 𑀲𑀦𑁆𑀢𑀺, 𑀢𑀸 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀧𑀼𑀘𑁆𑀙𑀁 𑀦𑀺𑀕𑀫𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀬𑀤𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀧𑀘𑁆𑀘𑀬𑀸𑀓𑀸𑀭𑁄, 𑀅𑀣 𑀓𑀲𑁆𑀫𑀸 𑀪𑀕𑀯𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀬 𑀲𑀗𑁆𑀔𑀸𑀭𑀸𑀤𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀓𑀣𑀺𑀢𑀸𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁆𑀧𑀺 𑀓𑀣𑁂𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀤𑀲𑁆𑀲𑀦𑁂𑀦 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀲𑁆𑀲 𑀓𑀣𑀺𑀢𑀪𑀸𑀯𑀢𑁄. 𑀆𑀳𑀸𑀭𑀯𑀕𑁆𑀕𑀲𑁆𑀲𑀸𑀢𑀺𑀆𑀤𑀺 ‘‘𑀧𑀘𑁆𑀘𑀬𑀸𑀓𑀸𑀭𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀧𑀸𑀴𑀺𑀬𑀁 𑀧𑀭𑀢𑁄 𑀯𑀼𑀢𑁆𑀢𑀁 𑀓𑀺𑀭𑀺𑀬𑀸𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀺, 𑀅𑀜𑁆𑀜𑀣𑀸 𑀲𑀗𑁆𑀔𑀸𑀭𑀸 𑀓𑀺𑀁 𑀓𑀢𑀸𑀢𑀺 𑀯𑀸 𑀓𑀭𑁄𑀦𑁆𑀢𑀻𑀢𑀺 𑀯𑀸 𑀦 𑀜𑀸𑀬𑁂𑀬𑁆𑀬. 𑀧𑀯𑀢𑁆𑀢𑀺𑀬𑀸 𑀅𑀦𑀼𑀮𑁄𑀫𑀢𑁄 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺𑀆𑀤𑀺𑀓𑀸 𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸.

‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯𑀸’’𑀢𑀺𑀆𑀤𑀺𑀓𑀸 𑀧𑀦 𑀢𑀲𑁆𑀲 𑀯𑀺𑀮𑁄𑀫𑀢𑁄 𑀧𑀝𑀺𑀮𑁄𑀫𑀓𑀣𑀸. 𑀅𑀘𑁆𑀘𑀦𑁆𑀢𑀫𑁂𑀯 𑀲𑀗𑁆𑀔𑀸𑀭𑁂 𑀯𑀺𑀭𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀯𑀺𑀭𑀸𑀕𑁄, 𑀫𑀕𑁆𑀕𑁄. 𑀅𑀲𑁂𑀲𑀦𑀺𑀭𑁄𑀥𑀸𑀢𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑁄𑀥𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑀸. 𑀏𑀯𑀁 𑀦𑀺𑀭𑁄𑀥𑀸𑀦𑀦𑁆𑀢𑀺 𑀏𑀯𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀤𑁆𑀥𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀸. 𑀇𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀦𑀺𑀭𑁄𑀥𑀯𑀘𑀦𑁂𑀦 𑀅𑀭𑀳𑀢𑁆𑀢𑀁 𑀯𑀤𑀢𑀺. 𑀲𑀓𑀮𑀲𑁆𑀲𑀸𑀢𑀺 𑀅𑀦𑀯𑀲𑁂𑀲𑀲𑁆𑀲. 𑀲𑀢𑁆𑀢𑀯𑀺𑀭𑀳𑀺𑀢𑀲𑁆𑀲𑀸𑀢𑀺 𑀧𑀭𑀧𑀭𑀺𑀓𑀧𑁆𑀧𑀺𑀢𑀚𑀻𑀯𑀭𑀳𑀺𑀢𑀲𑁆𑀲. 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀯𑀺𑀧𑀭𑀺𑀯𑀢𑁆𑀢𑁂𑀢𑁆𑀯𑀸.

𑀅𑀢𑁆𑀢𑀫𑀦𑀸𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀕𑀳𑀺𑀢𑀘𑀺𑀢𑁆𑀢𑀸. 𑀢𑀣𑀸𑀪𑀽𑀢𑀸 𑀘 𑀳𑀝𑁆𑀞𑀘𑀺𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀢𑀼𑀝𑁆𑀞𑀘𑀺𑀢𑁆𑀢𑀸’’𑀢𑀺. ‘‘𑀢𑀲𑁆𑀲 𑀯𑀘𑀦𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 𑀅𑀪𑀺𑀦𑀦𑁆𑀤𑀦𑀲𑀤𑁆𑀤𑁄 𑀅𑀦𑀼𑀫𑁄𑀤𑀦𑀢𑁆𑀣𑁄. ‘‘𑀅𑀪𑀺𑀦𑀦𑁆𑀤𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄. 𑀇𑀥 𑀧𑀦 𑀉𑀪𑀬𑀢𑁆𑀣𑁄𑀧𑀺 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀅𑀦𑀼𑀫𑁄𑀤𑀺𑀁𑀲𑀼 𑀘𑁂𑀯 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀘𑀸’’𑀢𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂𑀧𑀻𑀢𑀺 𑀤𑀼𑀢𑀺𑀬𑀲𑀼𑀢𑁆𑀢𑁂𑀧𑀺. 𑀧𑀺-𑀲𑀤𑁆𑀤𑁂𑀦 𑀢𑀤𑀜𑁆𑀜𑁂𑀲𑀼 𑀲𑀼𑀢𑁆𑀢𑁂𑀲𑀼𑀧𑀻𑀢𑀺 𑀅𑀢𑁆𑀣𑁄. ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸 𑀏𑀯𑀸’’𑀢𑀺 𑀯𑀢𑁆𑀯𑀸𑀧𑀺 𑀢𑀤𑁂𑀓𑀤𑁂𑀲𑀁 𑀇𑀥 𑀯𑀺𑀦𑀺𑀬𑁄𑀕𑀓𑁆𑀔𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀫𑀽𑀮𑀁. 𑀯𑀺𑀢𑁆𑀣𑀸𑀭𑀤𑁂𑀲𑀦𑀦𑁆𑀢𑀺 ‘‘𑀯𑀺𑀪𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀁 𑀯𑀺𑀪𑀗𑁆𑀕𑀤𑁂𑀲𑀦𑀁. 𑀉𑀤𑁆𑀤𑁂𑀲𑀤𑁂𑀲𑀦𑀸 𑀧𑀞𑀫𑀲𑀼𑀢𑁆𑀢𑁂 𑀅𑀦𑀼𑀮𑁄𑀫𑀤𑁂𑀲𑀦𑀸𑀲𑀤𑀺𑀲𑀸𑀯. 𑀧𑀼𑀦 𑀯𑀝𑁆𑀝𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀦𑁆𑀢𑁄. 𑀧𑀞𑀫𑀁 𑀉𑀤𑁆𑀤𑁂𑀲𑀯𑀲𑁂𑀦 𑀯𑀺𑀪𑀚𑀦𑀯𑀲𑁂𑀦 𑀯𑀺𑀯𑀝𑁆𑀝𑀁 𑀤𑀲𑁆𑀲𑀺𑀢𑀁, 𑀢𑀢𑁄 𑀏𑀯 𑀩𑁆𑀬𑀢𑀺𑀭𑁂𑀓𑀦𑀬𑁂𑀦 𑀯𑀺𑀯𑀝𑁆𑀝𑀫𑁆𑀧𑀺 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀻𑀢𑀺 𑀧𑀼𑀦𑀕𑁆𑀕𑀳𑀡𑀁.

𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀦𑁆𑀢𑀺 𑀇𑀤𑀁 𑀓𑀺𑀜𑁆𑀘𑀺 𑀧𑀓𑀸𑀭𑀢𑁄 𑀅𑀦𑀸𑀫𑀲𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀲𑀸𑀫𑀜𑁆𑀜𑀢𑁄 𑀩𑁆𑀬𑀸𑀧𑁂𑀢𑁆𑀯𑀸 𑀕𑀳𑀡𑀦𑁆𑀢𑀺 𑀆𑀳 ‘‘𑀲𑀗𑁆𑀔𑁂𑀧𑀢𑁄…𑀧𑁂… 𑀦𑀺𑀤𑁆𑀤𑁂𑀲𑁄’’𑀢𑀺. 𑀕𑀢𑀺𑀚𑀸𑀢𑀺𑀯𑀲𑁂𑀦𑀸𑀢𑀺 𑀧𑀜𑁆𑀘𑀕𑀢𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀏𑀓𑁂𑀓𑀸𑀬 𑀕𑀢𑀺𑀬𑀸 𑀔𑀢𑁆𑀢𑀺𑀬𑀸𑀤𑀺𑀪𑀼𑀫𑁆𑀫𑀤𑁂𑀯𑀸𑀤𑀺𑀳𑀢𑁆𑀣𑀺𑀆𑀤𑀺𑀚𑀸𑀢𑀺𑀯𑀲𑁂𑀦 𑀘. ‘‘𑀘𑀺𑀢𑁆𑀢𑀁 𑀫𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀺𑀘𑁆𑀘𑀯𑀺𑀲𑁂𑀲𑀁, ‘‘𑀫𑀸𑀦𑀲’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀸𑀦𑁂 𑀅𑀢𑁆𑀣𑁂 𑀲𑀤𑁆𑀤𑀯𑀺𑀲𑁂𑀲𑀁, ‘‘𑀧𑀡𑁆𑀟𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀕𑀼𑀡𑀯𑀺𑀲𑁂𑀲𑀁, ‘‘𑀘𑁂𑀢𑀲𑀺𑀓𑀁 𑀳𑀤𑀬’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀦𑀺𑀲𑁆𑀲𑀬𑀯𑀺𑀲𑁂𑀲𑀁, ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀜𑁆𑀜𑀲𑁆𑀲 𑀅𑀯𑀢𑁆𑀣𑀸𑀪𑀸𑀯𑀯𑀺𑀲𑁂𑀲𑀁, ‘‘𑀅𑀮𑀼𑀩𑁆𑀪𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀜𑁆𑀜𑀲𑁆𑀲 𑀓𑀺𑀭𑀺𑀬𑀸𑀪𑀸𑀯𑀯𑀺𑀲𑁂𑀲𑀁, ‘‘𑀅𑀮𑀼𑀩𑁆𑀪𑀺𑀢𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑀸𑀯𑀺𑀲𑁂𑀲𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀫𑀢𑁆𑀢𑀁 𑀯𑀸 𑀤𑀻𑀧𑀦𑀸 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀚𑀺𑀡𑁆𑀡𑀲𑁆𑀲 𑀚𑀻𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑀸𑀓𑀸𑀭𑁄 𑀚𑀻𑀭𑀡𑀢𑀸𑀢𑀺 𑀆𑀳 ‘‘𑀆𑀓𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺.

𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸𑀢𑀺 𑀓𑀮𑀮𑀓𑀸𑀮𑀢𑁄 𑀧𑀪𑀼𑀢𑀺 𑀧𑀼𑀭𑀺𑀫𑀭𑀽𑀧𑀸𑀦𑀁 𑀚𑀭𑀸𑀧𑀢𑁆𑀢𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀧𑀘𑁆𑀙𑀺𑀫𑀭𑀽𑀧𑀸𑀦𑀺 𑀧𑀭𑀺𑀧𑀓𑁆𑀓𑀭𑀽𑀧𑀸𑀦𑀼𑀭𑀽𑀧𑀸𑀦𑀺 𑀧𑀭𑀺𑀡𑀢𑀧𑀭𑀺𑀡𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀼𑀧𑀭𑀺𑀡𑀢𑀭𑀽𑀧𑀸𑀦𑀁 𑀧𑀭𑀺𑀧𑀸𑀓𑀓𑀸𑀮𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀔𑀡𑁆𑀟𑀺𑀘𑁆𑀘𑀸𑀤𑀺𑀲𑀪𑀸𑀯𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 ‘‘𑀔𑀡𑁆𑀟𑀺𑀘𑁆𑀘’’𑀦𑁆𑀢𑀺𑀆𑀤𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀚𑀭𑀸𑀬 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀧𑀓𑀢𑀺𑀦𑀺𑀤𑁆𑀤𑁂𑀲𑀸𑀢𑀺 𑀨𑀮𑀯𑀺𑀧𑀘𑁆𑀘𑀦𑀧𑀓𑀢𑀺𑀬𑀸 𑀦𑀺𑀤𑁆𑀤𑁂𑀲𑀸, 𑀚𑀭𑀸𑀬 𑀯𑀸 𑀧𑀸𑀧𑀼𑀡𑀺𑀢𑀩𑁆𑀩𑀨𑀮𑀫𑁂𑀯 𑀧𑀓𑀢𑀺, 𑀢𑀲𑁆𑀲𑀸 𑀦𑀺𑀤𑁆𑀤𑁂𑀲𑀸, 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸𑀢𑀺 𑀉𑀤𑀓𑀸𑀤𑀺𑀕𑀢𑀫𑀕𑁆𑀕𑁂𑀲𑀼 𑀢𑀺𑀡𑀭𑀼𑀓𑁆𑀔𑀲𑀁𑀪𑀕𑁆𑀕𑀢𑀸𑀤𑀬𑁄 𑀯𑀺𑀬 𑀧𑀭𑀺𑀧𑀸𑀓𑀕𑀢𑀫𑀕𑁆𑀕𑀲𑀗𑁆𑀔𑀸𑀢𑁂𑀲𑀼 𑀧𑀭𑀺𑀧𑀼𑀡𑁆𑀡𑀭𑀽𑀧𑁂𑀲𑀼 𑀮𑀩𑁆𑀪𑀫𑀸𑀦𑀸 𑀔𑀡𑁆𑀟𑀺𑀘𑁆𑀘𑀸𑀤𑀬𑁄 𑀚𑀭𑀸𑀬 𑀕𑀢𑀫𑀕𑁆𑀕𑀸𑀇𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀦 𑀚𑀭𑀸𑀢𑀺.

𑀬𑀲𑁆𑀫𑀸 𑀚𑀭𑀁 𑀧𑀢𑁆𑀢𑀲𑁆𑀲 𑀆𑀬𑀼 𑀳𑀸𑀬𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀚𑁆𑀚𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀬𑀼𑀳𑀸𑀦𑀸𑀤𑀬𑁄 𑀧𑀓𑀢𑀺𑀦𑀺𑀤𑁆𑀤𑁂𑀲𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸’’𑀢𑀺. 𑀢𑁂𑀦𑀸𑀳 ‘‘𑀇𑀫𑁂𑀳𑀺 𑀧𑀦𑀸’’𑀢𑀺𑀆𑀤𑀺.

𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀢𑁆𑀢𑀸 𑀅𑀯𑀻𑀘𑀺𑀚𑀭𑀸 𑀫𑀡𑀺𑀆𑀤𑀻𑀲𑀼 𑀫𑀦𑁆𑀤𑀤𑀲𑀓𑀸𑀤𑀻𑀲𑀼 𑀏𑀓𑁂𑀓𑀤𑀲𑀓𑁂𑀲𑀼 𑀘 𑀔𑀡𑁂 𑀔𑀡𑁂 𑀚𑀺𑀡𑁆𑀡𑀯𑀺𑀓𑀸𑀭𑀸𑀤𑀻𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀢𑀢𑁄 𑀅𑀜𑁆𑀜𑁂𑀲𑀽𑀢𑀺 𑀫𑀡𑀺𑀆𑀤𑀺𑀢𑁄 𑀅𑀜𑁆𑀜𑁂𑀲𑀼 𑀅𑀳𑀺𑀘𑁆𑀙𑀢𑁆𑀢𑀓𑀸𑀤𑀻𑀲𑀼, 𑀧𑀸𑀡𑀻𑀦𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑁂 𑀲𑀓𑀮𑀆𑀬𑀼𑀲𑁆𑀫𑀺𑀁 𑀕𑀳𑀺𑀢𑀢𑀭𑀼𑀡𑀬𑀼𑀯𑀸𑀚𑀭𑀸𑀓𑀸𑀮𑁂𑀲𑀼, 𑀏𑀓𑀤𑁆𑀯𑀺𑀢𑁆𑀢𑀺𑀤𑀺𑀯𑀲𑀸𑀢𑀺𑀓𑁆𑀓𑀫𑁂𑀲𑀼 𑀧𑀼𑀧𑁆𑀨𑀸𑀤𑀻𑀲𑀼 𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀳𑀺 𑀚𑀭𑀸𑀯𑀺𑀲𑁂𑀲𑀲𑁆𑀲 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀲𑀯𑀻𑀘𑀺𑀚𑀭𑀸 𑀦𑀸𑀫.

𑀘𑀯𑀦𑀓𑀯𑀲𑁂𑀦𑀸𑀢𑀺 𑀘𑀯𑀦𑀓𑀸𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦. 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀸𑀬 𑀘𑀼𑀢𑀺𑀬𑀸 𑀘𑀯𑀦𑀫𑁂𑀯 𑀘𑀯𑀦𑀢𑀸𑀢𑀺 𑀆𑀳 ‘‘𑀪𑀸𑀯𑀯𑀘𑀦𑁂𑀦 𑀮𑀓𑁆𑀔𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺, 𑀧𑀸𑀴𑀺𑀬𑀁 ‘‘𑀘𑀼𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀫𑀭𑀡𑀲𑁆𑀲 𑀲𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀗𑁆𑀕𑀼𑀧𑁆𑀧𑀢𑁆𑀢𑀺 𑀪𑀺𑀚𑁆𑀚𑀫𑀸𑀦𑀢𑀸. 𑀢𑁂𑀦 ‘‘𑀪𑁂𑀤𑁄’’𑀢𑀺 𑀇𑀫𑀺𑀦𑀸 𑀔𑀦𑁆𑀥𑀸𑀦𑀁 𑀪𑀺𑀚𑁆𑀚𑀫𑀸𑀦𑀢𑀸 𑀪𑁂𑀤𑀲𑀫𑀗𑁆𑀕𑀺𑀢𑀸 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀞𑀸𑀦𑀸𑀪𑀸𑀯𑀧𑀭𑀺𑀤𑀻𑀧𑀦𑀦𑁆𑀢𑀺 𑀓𑁂𑀦𑀘𑀺𑀧𑀺 𑀆𑀓𑀸𑀭𑁂𑀦 𑀅𑀯𑀝𑁆𑀞𑀸𑀦𑀸𑀪𑀸𑀯𑀤𑀻𑀧𑀦𑀁. 𑀖𑀝𑀲𑁆𑀲𑁂𑀯𑀸𑀢𑀺 𑀳𑀺 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀁. 𑀬𑀣𑀸 𑀖𑀝𑁂 𑀪𑀺𑀦𑁆𑀦𑁂 𑀓𑀧𑀸𑀮𑀸𑀤𑀺𑀅𑀯𑀬𑀯𑀲𑁂𑀲𑁄 𑀮𑀩𑁆𑀪𑀢𑀺, 𑀦 𑀏𑀯𑀁 𑀘𑀼𑀢𑀺𑀓𑁆𑀔𑀦𑁆𑀥𑁂𑀲𑀼 𑀪𑀗𑁆𑀕𑁂𑀲𑀼, 𑀦 𑀓𑁄𑀘𑀺 𑀯𑀺𑀲𑁂𑀲𑁄 𑀢𑀺𑀝𑁆𑀞𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑀭𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀘𑁆𑀘𑀼𑀲𑀗𑁆𑀔𑀸𑀢𑀁 𑀫𑀭𑀡𑀦𑁆𑀢𑀺 𑀫𑀘𑁆𑀘𑀼𑀲𑀜𑁆𑀜𑀺𑀢𑀁 𑀫𑀭𑀡𑀁. ‘‘𑀓𑀸𑀮𑀫𑀭𑀡’’𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀦𑁆𑀢𑀸𑀦𑀲𑁆𑀲 𑀅𑀘𑁆𑀘𑀦𑁆𑀢𑀲𑀫𑀼𑀘𑁆𑀙𑁂𑀤𑀪𑀽𑀢𑀁 𑀔𑀻𑀡𑀸𑀲𑀯𑀸𑀦𑀁 𑀫𑀭𑀡𑀁 𑀲𑀫𑀼𑀘𑁆𑀙𑁂𑀤𑀫𑀭𑀡𑀁. 𑀆𑀤𑀺-𑀲𑀤𑁆𑀤𑁂𑀦 𑀔𑀡𑀺𑀓𑀫𑀭𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀓𑀺𑀭𑀺𑀬𑀸𑀢𑀺 𑀅𑀦𑁆𑀢𑀓𑀲𑁆𑀲 𑀓𑀺𑀭𑀺𑀬𑀸, 𑀬𑀸 𑀮𑁄𑀓𑁂 𑀯𑀼𑀘𑁆𑀘𑀢𑀺 ‘‘𑀫𑀘𑁆𑀘𑀽’’𑀢𑀺, 𑀫𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀘𑀯𑀦𑀓𑀸𑀮𑁄 𑀏𑀯 𑀯𑀸 𑀅𑀦𑀢𑀺𑀓𑁆𑀓𑀫𑀦𑀻𑀬𑀢𑁆𑀢𑀸 𑀯𑀺𑀲𑁂𑀲𑁂𑀦 𑀓𑀸𑀮𑁄𑀢𑀺 𑀯𑀼𑀢𑁆𑀢𑁄𑀢𑀺 𑀢𑀲𑁆𑀲 𑀓𑀺𑀭𑀺𑀬𑀸 𑀅𑀢𑁆𑀣𑀢𑁄 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀪𑁂𑀤𑀧𑀯𑀢𑁆𑀢𑀺𑀬𑁂𑀯. ‘‘𑀫𑀘𑁆𑀘𑀼 𑀫𑀭𑀡’’𑀦𑁆𑀢𑀺 𑀯𑀸 𑀏𑀢𑁆𑀣 𑀲𑀫𑀸𑀲𑀁 𑀅𑀓𑀢𑁆𑀯𑀸 𑀬𑁄 ‘‘𑀫𑀘𑁆𑀘𑀽’’𑀢𑀺 𑀯𑀼𑀘𑁆𑀘𑀢𑀺 𑀪𑁂𑀤𑁄, 𑀢𑀫𑁂𑀯 𑀫𑀭𑀡𑀁 ‘‘𑀧𑀸𑀡𑀘𑀸𑀕𑁄’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀘𑀢𑀼𑀯𑁄𑀓𑀸𑀭𑀯𑀲𑁂𑀦𑀸𑀢𑀺 𑀘𑀢𑀼𑀯𑁄𑀓𑀸𑀭𑀪𑀯𑀯𑀲𑁂𑀦. 𑀢𑀢𑁆𑀣 𑀳𑀺 𑀭𑀽𑀧𑀓𑀸𑀬𑀲𑀜𑁆𑀜𑀺𑀢𑁄 𑀓𑀴𑁂𑀯𑀭𑁄 𑀦𑀢𑁆𑀣𑀺, 𑀬𑀁 𑀦𑀺𑀓𑁆𑀔𑀺𑀧𑁂𑀬𑁆𑀬. 𑀓𑀺𑀜𑁆𑀘𑀸𑀧𑀺 𑀏𑀓𑀯𑁄𑀓𑀸𑀭𑀪𑀯𑁂𑀧𑀺 𑀓𑀴𑁂𑀯𑀭𑀦𑀺𑀓𑁆𑀔𑁂𑀧𑁄 𑀦𑀢𑁆𑀣𑀺, 𑀭𑀽𑀧𑀓𑀸𑀬𑀲𑁆𑀲 𑀧𑀦 𑀢𑀢𑁆𑀣 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀏𑀓𑀯𑁄𑀓𑀸𑀭𑀯𑀲𑁂𑀦 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀢𑁆𑀢𑁄. 𑀘𑀢𑀼𑀯𑁄𑀓𑀸𑀭𑀯𑀲𑁂𑀦 𑀘𑀸𑀢𑀺 𑀘-𑀲𑀤𑁆𑀤𑁂𑀦 ‘‘𑀲𑁂𑀲𑀤𑁆𑀯𑀬𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑀲𑀩𑁆𑀩𑀢𑁆𑀣𑁂𑀯 𑀔𑀦𑁆𑀥𑀪𑁂𑀤𑀲𑀩𑁆𑀪𑀸𑀯𑀢𑁄. 𑀲𑁂𑀲𑀤𑁆𑀯𑀬𑀯𑀲𑁂𑀦𑀸𑀢𑀺 𑀲𑁂𑀲𑀪𑀯𑀤𑁆𑀯𑀬𑀯𑀲𑁂𑀦𑁂𑀯 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀬𑀤𑀺𑀧𑀺 𑀏𑀓𑀯𑁄𑀓𑀸𑀭𑀪𑀯𑁂 𑀭𑀽𑀧𑀓𑀸𑀬𑁄 𑀯𑀺𑀚𑁆𑀚𑀢𑀺, 𑀓𑀴𑁂𑀯𑀭𑀦𑀺𑀓𑁆𑀔𑁂𑀧𑁄 𑀧𑀦 𑀦𑀢𑁆𑀣𑀻𑀢𑀺 ‘‘𑀓𑀴𑁂𑀯𑀭𑀲𑁆𑀲 𑀲𑀩𑁆𑀪𑀸𑀯𑀢𑁄’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀫𑀦𑀼𑀲𑁆𑀲𑀸𑀤𑀻𑀲𑀼 𑀓𑀴𑁂𑀯𑀭𑀦𑀺𑀓𑁆𑀔𑁂𑀧𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀫𑀦𑀼𑀲𑁆𑀲𑀸𑀤𑀻𑀲𑀼 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄𑀢𑀺 𑀬𑁄𑀚𑀦𑀸. 𑀓𑀴𑁂𑀯𑀭𑀁 𑀦𑀺𑀓𑁆𑀔𑀺𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀫𑀭𑀡𑀁 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸, 𑀏𑀓𑀚𑁆𑀛𑀁 𑀕𑀳𑀡𑀫𑀢𑁆𑀢𑁂𑀦.

𑀚𑀸𑀬𑀦𑀝𑁆𑀞𑁂𑀦𑀸𑀢𑀺𑀆𑀤𑀺 𑀆𑀬𑀢𑀦𑀯𑀲𑁂𑀦 𑀬𑁄𑀦𑀺𑀯𑀲𑁂𑀦 𑀘 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀸𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀓𑀢𑁆𑀢𑀼𑀪𑀸𑀯𑀯𑀲𑁂𑀦 𑀧𑀤𑀤𑁆𑀯𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀚𑀸𑀢𑀺 𑀲𑀜𑁆𑀚𑀸𑀢𑀻’’𑀢𑀺 𑀧𑀦 𑀓𑀢𑁆𑀢𑀭𑀺 𑀲𑀸𑀫𑀺𑀦𑀺𑀤𑁆𑀤𑁂𑀲𑀲𑁆𑀲 𑀓𑀢𑀢𑁆𑀢𑀸 𑀉𑀪𑀬𑀢𑁆𑀣𑀸𑀧𑀺 𑀪𑀸𑀯𑀦𑀺𑀤𑁆𑀤𑁂𑀲𑁄. 𑀲𑀫𑁆𑀧𑀼𑀡𑁆𑀡𑀸 𑀚𑀸𑀢𑀺 𑀲𑀜𑁆𑀚𑀸𑀢𑀺. 𑀧𑀸𑀓𑀝𑀸 𑀦𑀺𑀩𑁆𑀩𑀢𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺. 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁…𑀧𑁂… 𑀅𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀲𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑁄𑀳𑀸𑀭𑀤𑁂𑀲𑀦𑀸.

𑀢𑀢𑁆𑀭 𑀢𑀢𑁆𑀭𑀸𑀢𑀺 𑀏𑀓𑀘𑀢𑀼𑀯𑁄𑀓𑀸𑀭𑀪𑀯𑁂𑀲𑀼 𑀤𑁆𑀯𑀺𑀦𑁆𑀦𑀁 𑀲𑁂𑀲𑀭𑀽𑀧𑀥𑀸𑀢𑀼𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀓𑀸𑀫𑀥𑀸𑀢𑀼𑀬𑀁 𑀯𑀺𑀓𑀮𑀸𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀲𑀢𑁆𑀢𑀦𑁆𑀦𑀁 𑀦𑀯𑀦𑁆𑀦𑀁 𑀤𑀲𑀦𑁆𑀦𑀁 𑀧𑀼𑀦 𑀤𑀲𑀦𑁆𑀦𑀁 𑀏𑀓𑀸𑀤𑀲𑀦𑁆𑀦𑀜𑁆𑀘 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀦𑁆𑀢𑀢𑀺𑀬𑀦𑁆𑀢𑀺 𑀬𑁂𑀦 𑀓𑀫𑁆𑀫𑀼𑀦𑀸 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄, 𑀢𑁂𑀦 𑀅𑀪𑀺𑀲𑀗𑁆𑀔𑀢𑀲𑀦𑁆𑀢𑀢𑀺𑀬𑀁. 𑀢𑀜𑁆𑀘 𑀔𑁄 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀓𑀫𑁆𑀫𑀁𑀬𑁂𑀯 𑀓𑀫𑁆𑀫𑀪𑀯𑁄 ‘‘𑀪𑀯𑀢𑀺 𑀏𑀢𑀲𑁆𑀫𑀸 𑀉𑀧𑀧𑀢𑁆𑀢𑀺𑀪𑀯𑁄’’𑀢𑀺 𑀓𑀢𑁆𑀯𑀸. 𑀓𑀫𑁆𑀫𑁂𑀦 𑀦𑀺𑀬𑁆𑀬𑀸𑀤𑀺𑀢𑀅𑀢𑁆𑀢𑀪𑀸𑀯𑀼𑀧𑀧𑀢𑁆𑀢𑀺𑀯𑀲𑁂𑀦 𑀪𑀯𑀢𑀻𑀢𑀺 𑀪𑀯𑁄, 𑀢𑀣𑀸 𑀢𑀣𑀸 𑀦𑀺𑀩𑁆𑀩𑀢𑁆𑀢𑀯𑀺𑀧𑀸𑀓𑁄 𑀓𑀝𑀢𑁆𑀢𑀸𑀭𑀽𑀧𑀜𑁆𑀘. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀪𑀯𑀢𑀻𑀢𑀺 𑀓𑀢𑁆𑀯𑀸 𑀪𑀯𑁄’’𑀢𑀺 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀓𑀫𑁆𑀫𑀁 𑀨𑀮𑀯𑁄𑀳𑀸𑀭𑁂𑀦 𑀪𑀯𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀓𑀣𑀺𑀢𑀁.

𑀉𑀧𑀸𑀤𑀺𑀬𑀦𑁆𑀢𑀺 𑀲𑀢𑁆𑀢𑀸 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀺 𑀏𑀢𑁂𑀦 𑀓𑀺𑀮𑁂𑀲𑀓𑀸𑀫𑁂𑀦. 𑀦 𑀓𑁂𑀯𑀮𑀁 𑀇𑀥 𑀓𑀭𑀡𑀲𑀸𑀥𑀦𑀫𑁂𑀯, 𑀅𑀣 𑀔𑁄 𑀓𑀢𑁆𑀢𑀼𑀲𑀸𑀥𑀦𑀫𑁆𑀧𑀺 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀬𑀁 𑀯𑀸’’𑀢𑀺. 𑀢𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀁. 𑀓𑀸𑀫𑁄 𑀘 𑀲𑁄 𑀓𑀸𑀫𑀦𑀝𑁆𑀞𑁂𑀦, 𑀉𑀧𑀸𑀤𑀸𑀦𑀜𑁆𑀘 𑀪𑀼𑀲𑀫𑀸𑀤𑀸𑀦𑀝𑁆𑀞𑁂𑀦𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀏𑀢𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀤𑀁. 𑀧𑀼𑀦 𑀏𑀢𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀲𑀗𑁆𑀔𑀸𑀢𑀁.

𑀲𑀲𑁆𑀲𑀢𑁄 𑀅𑀢𑁆𑀢𑀸𑀢𑀺 𑀇𑀤𑀁 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀫𑀸𑀦𑀁 𑀉𑀢𑁆𑀢𑀭𑀤𑀺𑀝𑁆𑀞𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀣𑀸 𑀏𑀲𑀸 𑀤𑀺𑀝𑁆𑀞𑀺 𑀤𑀴𑁆𑀳𑀻𑀓𑀭𑀡𑀯𑀲𑁂𑀦 𑀧𑀼𑀭𑀺𑀫𑀁 𑀉𑀢𑁆𑀢𑀭𑀸 𑀉𑀧𑀸𑀤𑀺𑀬𑀢𑀺, 𑀏𑀯𑀁 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀧𑀻𑀢𑀺. 𑀅𑀢𑁆𑀢𑀕𑁆𑀕𑀳𑀡𑀁 𑀧𑀦 ‘‘𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦’’𑀦𑁆𑀢𑀺 𑀇𑀤𑀁 𑀦 𑀤𑀺𑀝𑁆𑀞𑀼𑀧𑀸𑀤𑀸𑀦𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀮𑁄𑀓𑁄 𑀘𑀸𑀢𑀺 𑀅𑀢𑁆𑀢𑀕𑁆𑀕𑀳𑀡𑀯𑀺𑀦𑀺𑀫𑀼𑀢𑁆𑀢𑀕𑁆𑀕𑀳𑀡𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀪𑀽𑀢𑀁 𑀇𑀥 𑀧𑀼𑀭𑀺𑀫𑀤𑀺𑀝𑁆𑀞𑀺𑀉𑀢𑁆𑀢𑀭𑀤𑀺𑀝𑁆𑀞𑀺𑀯𑀘𑀦𑁂𑀳𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀬𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀦 𑀕𑁄𑀲𑀻𑀮𑀕𑁄𑀯𑀢𑀸𑀤𑀺𑀁 𑀲𑀫𑀸𑀤𑀺𑀬𑀢𑀺 𑀘𑁂𑀯 𑀅𑀦𑀼𑀢𑀺𑀝𑁆𑀞𑀢𑀺 𑀘, 𑀲𑁄 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀢𑁂𑀦𑀸𑀳 ‘‘𑀕𑁄𑀲𑀻𑀮…𑀧𑁂… 𑀲𑀬𑀫𑁂𑀯 𑀉𑀧𑀸𑀤𑀸𑀦𑀸𑀦𑀻’’𑀢𑀺. 𑀅𑀪𑀺𑀦𑀺𑀯𑁂𑀲𑀢𑁄𑀢𑀺 𑀅𑀪𑀺𑀦𑀺𑀯𑁂𑀲𑀦𑀢𑁄.

𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 ‘‘𑀅𑀢𑁆𑀢𑀸’’𑀢𑀺 𑀯𑀸𑀤𑀲𑁆𑀲 𑀧𑀜𑁆𑀜𑀸𑀧𑀦𑀲𑁆𑀲 𑀕𑀳𑀡𑀲𑁆𑀲 𑀓𑀸𑀭𑀡𑀪𑀽𑀢𑀸 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀢𑀲𑁆𑀲 𑀅𑀪𑀸𑀯𑀸 ‘‘𑀅𑀢𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀫𑀢𑁆𑀢𑀫𑁂𑀯. 𑀉𑀧𑀸𑀤𑀺𑀬𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀦𑁆𑀢𑀺.

𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀸𑀬𑀸𑀢𑀺 𑀇𑀤𑀁 𑀢𑀡𑁆𑀳𑀸𑀬 𑀭𑀽𑀧𑀢𑀡𑁆𑀳𑀸𑀤𑀺𑀪𑀸𑀯𑀲𑁆𑀲 𑀓𑀸𑀭𑀡𑀯𑀘𑀦𑀁 𑀙𑀤𑁆𑀯𑀸𑀭𑀸𑀭𑀫𑁆𑀫𑀡𑀺𑀓𑀥𑀫𑁆𑀫𑀸𑀦𑀁 𑀧𑀝𑀺𑀦𑀺𑀬𑀢𑀸𑀭𑀫𑁆𑀫𑀡𑀢𑁆𑀢𑀸. 𑀚𑀯𑀦𑀯𑀻𑀣𑀺𑀬𑀸 𑀧𑀯𑀢𑁆𑀢𑀸𑀬𑀸𑀢𑀺 𑀇𑀤𑀁 𑀢𑀲𑁆𑀲𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀤𑀲𑁆𑀲𑀦𑀁. 𑀲𑀪𑀸𑀯𑁂𑀦𑁂𑀯 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀯𑁂𑀴𑀼 𑀯𑀺𑀬 𑀦𑀺𑀲𑁆𑀲𑀬𑁄 𑀅𑀳𑀼𑀢𑁆𑀯𑀸 𑀑𑀮𑀼𑀫𑁆𑀪𑀓𑀪𑀸𑀯𑁂𑀦 𑀪𑀸𑀯𑁄 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀆𑀭𑀫𑁆𑀫𑀡𑀫𑁆𑀧𑀺 𑀢𑀁𑀲𑀤𑀺𑀲𑀁 𑀯𑀼𑀢𑁆𑀢𑀁. 𑀭𑀽𑀧𑁂𑀢𑀺 𑀯𑀺𑀲𑀬𑁂 𑀪𑀼𑀫𑁆𑀫𑀁. 𑀲𑀸 𑀢𑀺𑀯𑀺𑀥𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀲𑀸𑀤𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸. 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑀸𑀬 𑀲𑀁𑀲𑀝𑁆𑀞𑀢𑁆𑀢𑀸 𑀦𑀺𑀘𑁆𑀘𑀥𑀼𑀯𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀫𑀼𑀔𑁂𑀦 𑀅𑀲𑁆𑀲𑀸𑀤𑁂𑀦𑁆𑀢𑀻. 𑀪𑀯𑀲𑀳𑀕𑀢𑀸 𑀢𑀡𑁆𑀳𑀸 𑀪𑀯𑀢𑀡𑁆𑀳𑀸. 𑀪𑀯𑀢𑀺 𑀢𑀺𑀝𑁆𑀞𑀢𑀺 𑀲𑀩𑁆𑀩𑀓𑀸𑀮𑀦𑁆𑀢𑀺 𑀳𑀺 𑀪𑀯𑀤𑀺𑀝𑁆𑀞𑀺 𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀪𑀯𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀘. 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀪𑀯𑀢𑀡𑁆𑀳𑀸𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀪𑀯𑀢𑀺 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀯𑀺𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀏𑀯𑀁 𑀢𑀸𑀦𑀺 𑀅𑀝𑁆𑀞𑀸𑀭𑀲𑀸𑀢𑀺 𑀬𑀸 𑀙 𑀓𑀸𑀫𑀢𑀡𑁆𑀳𑀸, 𑀙 𑀪𑀯𑀢𑀡𑁆𑀳𑀸, 𑀙 𑀯𑀺𑀪𑀯𑀢𑀡𑁆𑀳𑀸 𑀯𑀼𑀢𑁆𑀢𑀸, 𑀏𑀢𑀸𑀦𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀢𑀡𑁆𑀳𑀸𑀧𑀘𑁆𑀘𑀬𑁄. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀲𑀓𑀲𑀦𑁆𑀢𑀢𑀺𑀬𑀁. 𑀩𑀳𑀺𑀤𑁆𑀥𑀸𑀢𑀺 𑀢𑀢𑁄 𑀩𑀳𑀺𑀤𑁆𑀥𑀸. 𑀅𑀢𑀻𑀢𑀸𑀭𑀫𑁆𑀫𑀡𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀇𑀢𑀭𑀸𑀭𑀫𑁆𑀫𑀡𑀸𑀦𑀺 𑀯𑀸, 𑀲𑀬𑀁 𑀧𑀦 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀇𑀤𑀸𑀦𑀺 𑀅𑀧𑀭𑁂𑀦𑀧𑀺 𑀧𑀓𑀸𑀭𑁂𑀦 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀔𑀦𑁆𑀥𑀧𑀜𑁆𑀘𑀓𑀁. 𑀉𑀧𑀬𑁄𑀕𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀉𑀧𑀸𑀤𑀸𑀬𑀸𑀢𑀺 𑀕𑀳𑁂𑀢𑁆𑀯𑀸. 𑀅𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀬𑀤𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀼𑀤𑀸𑀬𑀕𑁆𑀕𑀸𑀳𑀢𑁄 𑀅𑀲𑁆𑀫𑀻𑀢𑀺 𑀕𑀸𑀳𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁆𑀣𑀫𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 ‘‘𑀇𑀤𑀁𑀧𑀓𑀸𑀭𑁄 𑀅𑀳’’𑀦𑁆𑀢𑀺 𑀏𑀯𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀢𑀸𑀯 𑀅𑀦𑀼𑀧𑀦𑀺𑀥𑀸𑀬 𑀕𑀳𑀡𑀁.

𑀏𑀯𑀫𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀏𑀯𑀫𑀲𑁆𑀫𑀺, 𑀅𑀜𑁆𑀜𑀣𑀸𑀲𑁆𑀫𑀺, 𑀅𑀳𑀁 𑀪𑀯𑀺𑀲𑁆𑀲𑀁, 𑀇𑀢𑁆𑀣𑀁 𑀪𑀯𑀺𑀲𑁆𑀲𑀁, 𑀏𑀯𑀁 𑀪𑀯𑀺𑀲𑁆𑀲𑀁, 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀁, 𑀅𑀲𑀲𑁆𑀫𑀺, 𑀲𑀢𑀲𑁆𑀫𑀺, 𑀅𑀳𑀁 𑀲𑀺𑀬𑀁, 𑀇𑀢𑁆𑀣𑀁 𑀲𑀺𑀬𑀁, 𑀏𑀯𑀁 𑀲𑀺𑀬𑀁, 𑀅𑀜𑁆𑀜𑀣𑀸 𑀲𑀺𑀬𑀁, 𑀅𑀧𑀸𑀳𑀁 𑀲𑀺𑀬𑀁, 𑀅𑀧𑀸𑀳𑀁 𑀇𑀢𑁆𑀣𑀁 𑀲𑀺𑀬𑀁, 𑀅𑀧𑀸𑀳𑀁 𑀏𑀯𑀁 𑀲𑀺𑀬𑀁, 𑀅𑀧𑀸𑀳𑀁 𑀅𑀜𑁆𑀜𑀣𑀸 𑀲𑀺𑀬’’𑀦𑁆𑀢𑀺 𑀏𑀢𑁂𑀲𑀁 𑀲𑀗𑁆𑀕𑀳𑁄. 𑀉𑀧𑀦𑀺𑀥𑀸𑀬 𑀕𑀳𑀡𑀫𑁆𑀧𑀺 𑀤𑀼𑀯𑀺𑀥𑀁 𑀲𑀫𑀢𑁄 𑀅𑀲𑀫𑀢𑁄 𑀯𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀫𑀲𑁆𑀫𑀺, 𑀅𑀜𑁆𑀜𑀣𑀸𑀲𑁆𑀫𑀻’’𑀢𑀺 𑀘 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀫𑀲𑁆𑀫𑀻𑀢𑀺 𑀇𑀤𑀁 𑀲𑀫𑀢𑁄 𑀉𑀧𑀦𑀺𑀥𑀸𑀬 𑀕𑀳𑀡𑀁, 𑀬𑀣𑀸 𑀅𑀬𑀁 𑀔𑀢𑁆𑀢𑀺𑀬𑁄, 𑀏𑀯𑀁 𑀅𑀳𑀫𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀇𑀤𑀁 𑀧𑀦 𑀅𑀲𑀫𑀢𑁄 𑀕𑀳𑀡𑀁, 𑀬𑀣𑀸𑀬𑀁 𑀔𑀢𑁆𑀢𑀺𑀬𑁄 𑀢𑀢𑁄 𑀅𑀜𑁆𑀜𑀣𑀸 𑀅𑀳𑀁 𑀳𑀻𑀦𑁄 𑀯𑀸 𑀅𑀥𑀺𑀓𑁄 𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀢𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀪𑀯𑀺𑀲𑁆𑀲𑀦𑁆𑀢𑀺𑀆𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀅𑀦𑀸𑀕𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀁 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀲𑁆𑀫𑀻𑀢𑀺 𑀲𑀲𑁆𑀲𑀢𑁄 𑀅𑀲𑁆𑀫𑀺, 𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀢𑀲𑁆𑀫𑀻𑀢𑀺 𑀅𑀲𑀲𑁆𑀲𑀢𑁄 𑀅𑀲𑁆𑀫𑀺, 𑀅𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀇𑀢𑁄 𑀧𑀭𑀸𑀦𑀺 𑀲𑀺𑀬𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀁𑀲𑀬𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀧𑀸𑀳𑀁 𑀲𑀺𑀬𑀦𑁆𑀢𑀺𑀆𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 ‘‘𑀅𑀧𑀺 𑀦𑀸𑀫𑀸𑀳𑀁 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀢𑁆𑀣𑀦𑀸𑀓𑀧𑁆𑀧𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺𑀧𑀺 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀫𑁂𑀢𑁂𑀲𑀼 𑁋

𑀤𑁆𑀯𑁂 𑀤𑀺𑀝𑁆𑀞𑀺𑀲𑀻𑀲𑀸 𑀘𑀢𑁆𑀢𑀸𑀭𑁄, 𑀲𑀼𑀤𑁆𑀥𑀲𑀻𑀲𑀸 𑀲𑀻𑀲𑀫𑀽𑀮𑀓𑀸;

𑀢𑀬𑁄 𑀢𑀬𑁄𑀢𑀺 𑀏𑀢𑀸𑀦𑀺, 𑀅𑀝𑁆𑀞𑀸𑀭𑀲 𑀯𑀺𑀪𑀸𑀯𑀬𑁂.

𑀏𑀢𑁂 𑀳𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀸 𑀤𑁆𑀯𑁂 𑀤𑀺𑀝𑁆𑀞𑀺𑀲𑀻𑀲𑀸 𑀦𑀸𑀫, ‘‘𑀅𑀲𑁆𑀫𑀺, 𑀪𑀯𑀺𑀲𑁆𑀲𑀁 𑀲𑀺𑀬𑀁, 𑀅𑀧𑀸𑀳𑀁 𑀲𑀺𑀬’’𑀦𑁆𑀢𑀺 𑀏𑀢𑁂 𑀘𑀢𑁆𑀢𑀸𑀭𑁄 𑀲𑀼𑀤𑁆𑀥𑀲𑀻𑀲𑀸 𑀦𑀸𑀫, ‘‘𑀇𑀢𑁆𑀣𑀫𑀲𑁆𑀫𑀻’’𑀢𑀺𑀆𑀤𑀬𑁄 𑀢𑀬𑁄 𑀢𑀬𑁄𑀢𑀺 𑀤𑁆𑀯𑀸𑀤𑀲 𑀲𑀻𑀲𑀫𑀽𑀮𑀓𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀸𑀴𑀺𑀬𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀢𑀡𑁆𑀳𑀸 𑀆𑀕𑀢𑀸𑀢𑀺 𑀆𑀳 ‘‘𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑀻’’𑀢𑀺. 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀅𑀲𑁆𑀫𑀻𑀢𑀺 𑀇𑀫𑀺𑀦𑀸 𑀅𑀪𑀺𑀲𑁂𑀓𑀲𑁂𑀦𑀸𑀧𑀘𑁆𑀘𑀸𑀤𑀺𑀦𑀸 ‘‘𑀔𑀢𑁆𑀢𑀺𑀬𑁄 𑀅𑀳’’𑀦𑁆𑀢𑀺 𑀫𑀽𑀮𑀪𑀸𑀯𑀢𑁄 ‘‘𑀅𑀲𑁆𑀫𑀻’’𑀢𑀺 𑀳𑁄𑀢𑀺. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀗𑁆𑀕𑀳𑁂𑀢𑀺 𑀢𑀡𑁆𑀳𑀸𑀬 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀲𑁆𑀲 𑀲𑀁𑀔𑀺𑀧𑀦𑀯𑀲𑁂𑀦 𑀲𑀗𑁆𑀕𑀡𑁆𑀳𑀦𑁂 𑀓𑀭𑀺𑀬𑀫𑀸𑀦𑁂. ‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸𑀓𑀸𑀬𑀸’’𑀢𑀺𑀆𑀤𑀺 𑀦𑀺𑀤𑁆𑀤𑁂𑀲𑁄. ‘‘𑀭𑀽𑀧𑁂 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸’’𑀢𑀺𑀆𑀤𑀺 𑀦𑀺𑀤𑁆𑀤𑁂𑀲𑀢𑁆𑀣𑁄. ‘‘𑀓𑀸𑀫𑀭𑀸𑀕𑀪𑀸𑀯𑁂𑀦𑀸’’𑀢𑀺𑀆𑀤𑀺𑀓𑁄, ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬𑀸’’𑀢𑀺𑀆𑀤𑀺𑀓𑁄 𑀘 𑀦𑀺𑀤𑁆𑀤𑁂𑀲𑀯𑀺𑀢𑁆𑀣𑀸𑀭𑁄. ‘‘𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀙𑀴𑁂𑀯𑀸’’𑀢𑀺𑀆𑀤𑀺𑀓𑁄 𑀲𑀗𑁆𑀕𑀳𑁄.

𑀬𑀲𑁆𑀫𑀸 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀦𑀓𑀯𑀺𑀜𑁆𑀜𑀸𑀡𑀸𑀦𑀺 𑀯𑀺𑀬 𑀅𑀦𑁂𑀓𑀸 𑀏𑀯 𑀯𑁂𑀤𑀦𑀸, 𑀢𑀲𑁆𑀫𑀸 𑀢𑀸 𑀭𑀸𑀲𑀺𑀯𑀲𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀙 𑀯𑁂𑀤𑀦𑀸𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑁂𑀤𑀦𑀸𑀲𑀫𑀽𑀳𑀸’’𑀢𑀺. 𑀦𑀺𑀲𑁆𑀲𑀬𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀪𑀸𑀯𑁂𑀦 𑀦𑀸𑀦𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄, 𑀢𑀸 𑀓𑀼𑀘𑁆𑀙𑀺𑀦𑀸 𑀥𑀸𑀭𑁂𑀦𑁆𑀢𑀺𑀬𑁄 𑀯𑀺𑀬 𑀧𑁄𑀲𑁂𑀦𑁆𑀢𑀺𑀬𑁄 𑀯𑀺𑀬 𑀘 𑀳𑁄𑀦𑁆𑀢𑀻𑀢𑀺 𑀢𑀸𑀲𑀁 𑀫𑀸𑀢𑀼𑀲𑀤𑀺𑀲𑀢𑀸 𑀯𑀼𑀢𑁆𑀢𑀸. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀳𑁂𑀢𑀽𑀢𑀺 𑀦𑀺𑀲𑁆𑀲𑀬𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸. 𑀅𑀬𑀦𑁆𑀢𑀺 𑀅𑀬𑀁 𑀯𑁂𑀤𑀦𑀸 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑁂𑀤𑀦𑀸𑀧𑀤𑁂. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀯𑀲𑁂𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸. 𑀏𑀯𑀁 𑀯𑀺𑀪𑀗𑁆𑀕𑁂 𑀆𑀕𑀢𑀦𑀬𑁂𑀦 𑀲𑀸𑀥𑀸𑀭𑀡𑀢𑁄 𑀯𑀢𑁆𑀯𑀸𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀯𑁂𑀤𑀦𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀸𑀓𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀘𑀓𑁆𑀔𑀼𑀫𑁆𑀳𑀺 𑀲𑀫𑁆𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀫𑁆𑀳𑀺 𑀦𑀺𑀲𑁆𑀲𑀬𑀪𑀽𑀢𑁂 𑀉𑀧𑁆𑀧𑀦𑁆𑀦𑀨𑀲𑁆𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀬𑀲𑁆𑀫𑀸 𑀘𑀓𑁆𑀔𑀸𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑀢𑁄, 𑀆𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀺𑀲𑁂𑀲𑀢𑁄, 𑀲𑀸𑀫𑀜𑁆𑀜𑀢𑁄 𑀘 𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀯𑀺𑀪𑀸𑀯𑀺𑀢𑀸𑀦𑀺, 𑀢𑀲𑁆𑀫𑀸 ‘‘𑀬𑀁 𑀯𑀢𑁆𑀢𑀩𑁆𑀩𑀁…𑀧𑁂… 𑀯𑀼𑀢𑁆𑀢𑀫𑁂𑀯𑀸’’𑀢𑀺 𑀆𑀳.

𑀦𑀫𑀦𑀮𑀓𑁆𑀔𑀡𑀦𑁆𑀢𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀳𑀼𑀢𑁆𑀯𑀸 𑀦𑀫𑀦𑀲𑀪𑀸𑀯𑀁 𑀢𑁂𑀦 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀧𑀦 𑀏𑀓𑀸𑀯 𑀯𑁂𑀤𑀦𑀸. 𑀲𑀩𑁆𑀩𑀤𑀼𑀩𑁆𑀩𑀮𑀘𑀺𑀢𑁆𑀢𑀸𑀦𑀺 𑀦𑀸𑀫 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺. 𑀦𑀦𑀼 𑀢𑀢𑁆𑀣 𑀚𑀻𑀯𑀺𑀢𑀘𑀺𑀢𑁆𑀢𑀝𑁆𑀞𑀺𑀢𑀺𑀬𑁄 𑀘 𑀲𑀦𑁆𑀢𑀻𑀢𑀺? 𑀲𑀘𑁆𑀘𑀁, 𑀢𑀸𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀢𑀣𑀸 𑀧𑀸𑀓𑀝𑀁, 𑀬𑀣𑀸 𑀘𑁂𑀢𑀦𑀸𑀤𑀻𑀦𑀦𑁆𑀢𑀺 𑀢𑁂 𑀏𑀯𑁂𑀢𑁆𑀣 𑀧𑀸𑀴𑀺𑀬𑀁 𑀉𑀤𑁆𑀥𑀝𑀸. 𑀬𑁂𑀦 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀸𑀤𑀺𑀦𑀸 𑀓𑀸𑀭𑀡𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀫𑀳𑀸𑀪𑀽𑀢𑀦𑀺𑀤𑁆𑀤𑁂𑀲𑁂. 𑀅𑀜𑁆𑀜𑁄 𑀯𑀺𑀦𑀺𑀘𑁆𑀙𑀬𑀦𑀬𑁄𑀢𑀺 ‘‘𑀯𑀘𑀦𑀢𑁆𑀣𑀢𑁄 𑀓𑀮𑀸𑀧𑀢𑁄’’𑀢𑀺𑀆𑀤𑀺𑀦𑀸 𑀮𑀓𑁆𑀔𑀡𑀸𑀤𑀺𑀦𑀺𑀘𑁆𑀙𑀬𑀢𑁄 𑀅𑀜𑁆𑀜𑁄 𑀯𑀺𑀦𑀺𑀘𑁆𑀙𑀬𑀦𑀬𑁄. 𑀦𑀦𑀼 𑀲𑁄 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑁄, 𑀦 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂𑀢𑀺? 𑀢𑀢𑁆𑀣 𑀯𑀼𑀢𑁆𑀢𑁂𑀧𑀺 ‘‘𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀻’’𑀢𑀺 𑀅𑀢𑀺𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀉𑀧𑀸𑀤𑀸𑀬𑀸𑀢𑀺 𑀧𑀝𑀺𑀘𑁆𑀘. 𑀪𑀽𑀢𑀸𑀦𑀺 𑀳𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑀸𑀤𑀸𑀭𑀽𑀧𑀁 ‘‘𑀢𑀸𑀦𑀺 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁 𑀅𑀯𑀺𑀲𑁆𑀲𑀚𑁆𑀚𑀦𑀢𑁄. 𑀦𑀺𑀲𑁆𑀲𑀸𑀬𑀸𑀢𑀺𑀧𑀺 𑀏𑀓𑁂 𑀢𑁂𑀲𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄. 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸 𑀦𑀸𑀫 𑀏𑀓𑀁𑀲𑀢𑁄 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀧𑁂𑀓𑁆𑀔𑀸𑀢𑀺 𑀧𑀸𑀞𑀲𑁂𑀲𑁂𑀦 𑀅𑀢𑁆𑀣𑀁 𑀯𑀤𑀢𑀺. 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀯𑀺𑀦𑀸 𑀏𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀽𑀳𑀢𑁆𑀣𑁂 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀽𑀳𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀦𑀺𑀤𑁆𑀤𑁂𑀲𑁂𑀦 𑀲𑀫𑀽𑀳𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀽𑀳𑀁 𑀉𑀧𑀸𑀤𑀸𑀬𑀸’’𑀢𑀺. 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 (𑀥. 𑀲. 𑁫𑁮𑁪) 𑀆𑀕𑀢𑀦𑀬𑁂𑀦 ‘‘𑀢𑁂𑀯𑀻𑀲𑀢𑀺𑀯𑀺𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀳𑀤𑀬𑀯𑀢𑁆𑀣𑀼 𑀦 𑀦𑀺𑀤𑁆𑀤𑀺𑀝𑁆𑀞𑀁, ‘‘𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀸 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸𑀦. 𑁧.𑁧.𑁮) 𑀆𑀕𑀢𑀢𑁆𑀢𑀸 𑀳𑀤𑀬𑀯𑀢𑁆𑀣𑀼𑀫𑁆𑀧𑀺 𑀕𑀳𑁂𑀢𑁆𑀯𑀸 𑀚𑀸𑀢𑀺𑀭𑀽𑀧𑀪𑀸𑀯𑁂𑀦 𑀉𑀧𑀘𑀬𑀲𑀦𑁆𑀢𑀢𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 ‘‘𑀢𑁂𑀯𑀻𑀲𑀢𑀺𑀯𑀺𑀥’’𑀦𑁆𑀢𑀺 𑀯𑀼𑀢𑁆𑀢𑀁.

𑀘𑀓𑁆𑀔𑀼𑀲𑁆𑀲 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀅𑀲𑀸𑀥𑀸𑀭𑀡𑀓𑀸𑀭𑀡𑁂𑀦 𑀘𑀸𑀬𑀁 𑀦𑀺𑀤𑁆𑀤𑁂𑀲𑁄. ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸 ‘‘𑀢𑁂𑀪𑀽𑀫𑀓𑀯𑀺𑀧𑀸𑀓𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑁄𑀢𑀺 𑀆𑀬𑀽𑀳𑀦𑀲𑀪𑀸𑀯𑁄. 𑀘𑁄𑀧𑀦𑀯𑀲𑁂𑀦𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀲𑀁𑀘𑁄𑀧𑀦𑀯𑀲𑁂𑀦, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀘𑀦𑀪𑁂𑀤𑀯𑀲𑁂𑀦𑀸𑀢𑀺 𑀯𑀘𑀻𑀪𑁂𑀤𑀼𑀧𑁆𑀧𑀸𑀤𑀯𑀲𑁂𑀦, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑁄𑀧𑀦𑀁 𑀦 𑀪𑀯𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀳𑁄 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑀽𑀦𑀢𑀺𑀁𑀲𑀸𑀢𑀺 𑀏𑀢𑁆𑀣 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀯𑀺𑀦𑀺𑀫𑀼𑀢𑁆𑀢𑀸 𑀏𑀯 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸 𑀯𑁂𑀤𑀺𑀢𑀩𑁆𑀩𑀸 𑀢𑀲𑁆𑀲𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄.

𑀤𑀼𑀓𑁆𑀔𑁂𑀢𑀺 𑀏𑀓𑀫𑁆𑀧𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁 𑀲𑀁𑀲𑀺𑀮𑁂𑀲𑀦𑀦𑀺𑀲𑁆𑀲𑀬𑀯𑀺𑀲𑀬𑀩𑁆𑀬𑀸𑀧𑀦𑀯𑀲𑁂𑀦 𑀅𑀢𑁆𑀢𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀦𑀺𑀬𑁄𑀕𑀁 𑀕𑀘𑁆𑀙𑀢𑀻𑀢𑀺 ‘‘𑀘𑀢𑀽𑀳𑀺 𑀓𑀸𑀭𑀡𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑁄𑀧𑀺 𑀳𑀺 𑀯𑀺𑀪𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀅𑀦𑁂𑀓𑀥𑀸 𑀯𑀺𑀦𑀺𑀬𑁄𑀕𑀁 𑀕𑀘𑁆𑀙𑀢𑀺 𑀬𑀣𑀸 𑀢𑀤𑁆𑀥𑀺𑀢𑀢𑁆𑀣𑁂 𑀉𑀢𑁆𑀢𑀭𑀧𑀤𑀲𑀫𑀸𑀳𑀸𑀭𑁂𑀢𑀺. 𑀢𑀦𑁆𑀢𑀺 𑀅𑀜𑁆𑀜𑀸𑀡𑀁. 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀮𑀓𑁆𑀔𑀡𑀁 𑀤𑀼𑀓𑁆𑀔𑀲𑀘𑁆𑀘𑀁. 𑀅𑀲𑁆𑀲𑀸𑀢𑀺 𑀅𑀜𑁆𑀜𑀸𑀡𑀲𑁆𑀲. 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀪𑀸𑀯𑁂𑀦. 𑀲𑀳𑀚𑀸𑀢𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀧𑀦 𑀢𑀁𑀲𑀳𑀚𑀸𑀢𑀸 𑀨𑀲𑁆𑀲𑀸𑀤𑀬𑁄 𑀯𑀢𑁆𑀢𑀩𑁆𑀩𑀸. 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀤𑀼𑀓𑁆𑀔𑀲𑀘𑁆𑀘𑀁 𑀅𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺 𑀬𑁄𑀚𑀦𑀸. 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀉𑀧𑀬𑁄𑀕𑀏𑀓𑀯𑀘𑀦𑀁. 𑀏𑀢𑀦𑁆𑀢𑀺 𑀅𑀜𑁆𑀜𑀸𑀡𑀁. 𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀲𑁆𑀲. ‘‘𑀧𑀝𑀺𑀘𑁆𑀙𑀸𑀤𑁂𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀧𑀝𑀺𑀘𑁆𑀙𑀸𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀣𑀸𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀧𑀺 𑀏𑀓𑀤𑁂𑀲𑁂𑀦 𑀬𑀸𑀣𑀸𑀯𑀢𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑁄 𑀳𑁄𑀢𑀺𑀬𑁂𑀯𑀸𑀢𑀺 ‘‘𑀬𑀸𑀣𑀸𑀯𑀮𑀓𑁆𑀔𑀡𑀧𑀝𑀺𑀯𑁂𑀥𑀦𑀺𑀯𑀸𑀭𑀡𑁂𑀦𑀸’’𑀢𑀺 𑀯𑀢𑁆𑀯𑀸 ‘‘𑀜𑀸𑀡𑀧𑀯𑀢𑁆𑀢𑀺𑀬𑀸 𑀘𑁂𑀢𑁆𑀣 𑀅𑀧𑁆𑀧𑀤𑀸𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀼𑀭𑀺𑀫𑀁 𑀧𑀦 𑀧𑀝𑀺𑀯𑁂𑀥𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀲𑁂𑀥𑀓𑀣𑀸𑀤𑀲𑁆𑀲𑀦𑀁, 𑀧𑀘𑁆𑀙𑀺𑀫𑀁 𑀅𑀦𑀼𑀩𑁄𑀥𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸. 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑁂.

𑀲𑀳𑀚𑀸𑀢𑀲𑁆𑀲 𑀅𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀯𑀢𑁆𑀣𑀼 𑀳𑁄𑀢𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀢𑁄’’𑀢𑀺. 𑀆𑀭𑀫𑁆𑀫𑀡𑀢𑁄𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦. 𑀬𑀲𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁 𑀅𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀘𑁆𑀙𑀸𑀤𑀦𑀁 𑀤𑀼𑀓𑁆𑀔𑀲𑀘𑁆𑀘𑁂 𑀯𑀼𑀢𑁆𑀢𑀦𑀬𑀫𑁂𑀯 𑀏𑀓𑁂𑀦𑁂𑀯 𑀓𑀸𑀭𑀡𑁂𑀦 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀅𑀲𑀫𑁆𑀪𑀯𑀢𑁄, 𑀓𑀺𑀁 𑀧𑀦 𑀏𑀢𑀁 𑀏𑀓𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀧𑀝𑀺𑀘𑁆𑀙𑀸𑀤𑀦𑀢𑁄’’𑀢𑀺. 𑀇𑀤𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀦𑀺𑀭𑁄𑀥𑀧𑀝𑀺𑀧𑀤𑀸𑀦𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀤𑀸𑀭𑀩𑁆𑀪𑀸𑀢𑀺 𑀢𑀁 𑀆𑀭𑀩𑁆𑀪 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀧𑀘𑁆𑀙𑀺𑀫𑀜𑁆𑀳𑀺 𑀲𑀘𑁆𑀘𑀤𑁆𑀯𑀬𑀦𑁆𑀢𑀺 𑀦𑀺𑀭𑁄𑀥𑁄 𑀫𑀕𑁆𑀕𑁄. 𑀢𑀜𑁆𑀳𑀺 𑀦𑀬𑀕𑀫𑁆𑀪𑀻𑀭𑀢𑁆𑀢𑀸. 𑀤𑀼𑀤𑁆𑀤𑀲𑀦𑁆𑀢𑀺 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀢𑁆𑀢𑀸 𑀲𑀪𑀸𑀯𑁂𑀦𑁂𑀯 𑀕𑀫𑁆𑀪𑀻𑀭𑀢𑀸𑀬 𑀤𑀼𑀤𑁆𑀤𑀲𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀁 𑀤𑀼𑀭𑀯𑀕𑁆𑀕𑀸𑀳𑀁. 𑀢𑀢𑁆𑀣𑀸𑀢𑀺 𑀧𑀼𑀭𑀺𑀫𑁂 𑀲𑀘𑁆𑀘𑀤𑁆𑀯𑀬𑁂. 𑀅𑀦𑁆𑀥𑀪𑀽𑀢𑀦𑁆𑀢𑀺 𑀅𑀦𑁆𑀥𑀓𑀸𑀭𑀪𑀽𑀢𑀁. 𑀦 𑀧𑀯𑀢𑁆𑀢𑀢𑀺 𑀆𑀭𑀫𑁆𑀫𑀡𑀁 𑀓𑀸𑀢𑀼𑀁 𑀦 𑀯𑀺𑀲𑀳𑀢𑀺. 𑀯𑀘𑀦𑀻𑀬𑀢𑁆𑀢𑁂𑀦𑀸𑀢𑀺 𑀯𑀸𑀘𑀓𑀪𑀸𑀯𑁂𑀦 𑀢𑀣𑀸 𑀉𑀧𑀝𑁆𑀞𑀸𑀦𑀢𑁄. 𑀲𑀪𑀸𑀯𑀮𑀓𑁆𑀔𑀡𑀲𑁆𑀲 𑀤𑀼𑀤𑁆𑀤𑀲𑀢𑁆𑀢𑀸𑀢𑀺 𑀧𑀻𑀴𑀦𑀸𑀤𑀺𑀆𑀬𑀽𑀳𑀦𑀸𑀤𑀺𑀯𑀲𑁂𑀦 ‘‘𑀇𑀤𑀁 𑀤𑀼𑀓𑁆𑀔𑀁, 𑀅𑀬𑀁 𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁪𑁮𑁪; 𑁩.𑁧𑁦𑁪) 𑀬𑀸𑀣𑀸𑀯𑀢𑁄 𑀲𑀪𑀸𑀯𑀮𑀓𑁆𑀔𑀡𑀲𑁆𑀲 𑀤𑀼𑀤𑁆𑀤𑀲𑀢𑁆𑀢𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀧𑀼𑀭𑀺𑀫𑀤𑁆𑀯𑀬𑀁 𑀕𑀫𑁆𑀪𑀻𑀭𑀁. 𑀢𑀢𑁆𑀣𑀸𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀲𑀘𑁆𑀘𑀤𑁆𑀯𑀬𑁂. 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀲𑀼𑀪𑀸𑀤𑀺𑀯𑀺𑀧𑀭𑀻𑀢𑀕𑁆𑀕𑀸𑀳𑀸𑀦𑀁 𑀧𑀘𑁆𑀘𑀬𑀪𑀸𑀯𑀯𑀲𑁂𑀦 𑀅𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀇𑀤𑀸𑀦𑀺 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀧𑀓𑀸𑀭𑀦𑁆𑀢𑀭𑁂𑀦𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀼𑀓𑁆𑀔𑁂𑀢𑀺 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀅𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀸𑀬 𑀅𑀯𑀺𑀚𑁆𑀚𑀸𑀬 𑀤𑀼𑀓𑁆𑀔𑁂’’𑀢𑀺 𑀏𑀢𑁆𑀢𑀓𑁂𑀦. 𑀲𑀗𑁆𑀕𑀳𑀢𑁄𑀢𑀺 𑀲𑀫𑁄𑀥𑀸𑀦𑀢𑁄. 𑀓𑀺𑀘𑁆𑀘𑀢𑁄𑀢𑀺 𑀅𑀲𑀫𑁆𑀧𑀝𑀺𑀯𑁂𑀥𑀓𑀺𑀘𑁆𑀘𑀢𑁄. 𑀅𑀜𑁆𑀜𑀸𑀡𑀫𑀺𑀯𑀸𑀢𑀺 𑀯𑀺𑀲𑀬𑀲𑀪𑀸𑀯𑀁 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀧𑁆𑀧𑀤𑀸𑀦𑀓𑀺𑀘𑁆𑀘𑀫𑀺𑀯. ‘‘𑀤𑀼𑀓𑁆𑀔𑁂’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀧𑀯𑀢𑁆𑀢𑀢𑀺, 𑀯𑀺𑀲𑁂𑀲𑀢𑁄 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀲𑀩𑁆𑀩𑀢𑁆𑀣𑁂𑀯 𑀢𑀣𑀸 𑀅𑀯𑀺𑀲𑀺𑀝𑁆𑀞𑀲𑀪𑀸𑀯𑀤𑀲𑁆𑀲𑀦𑀁 𑀇𑀤𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀲𑁂𑀲𑀢𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀔𑀡𑀺𑀓𑀦𑀺𑀭𑁄𑀥𑀲𑁆𑀲 𑀇𑀥 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸 𑀯𑀺𑀭𑀸𑀕𑀕𑁆𑀕𑀳𑀡𑀢𑁄 𑀘 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀧𑀝𑀺𑀩𑀸𑀳𑀦𑀁 𑀇𑀥 ‘‘𑀦𑀺𑀭𑁄𑀥𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀦𑁂𑀲𑀁 𑀲𑀩𑁆𑀩𑀲𑁄 𑀅𑀦𑀼𑀧𑁆𑀧𑀚𑁆𑀚𑀦𑀫𑁂𑀯𑀸𑀢𑀺 𑀆𑀳 ‘‘𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻’’𑀢𑀺. ‘‘𑀅𑀯𑀺𑀚𑁆𑀚𑀸 𑀦𑀺𑀭𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺 𑀏𑀯𑀁 𑀲𑀩𑁆𑀩𑁂𑀳𑀺 𑀏𑀢𑁂𑀳𑀺 𑀦𑀺𑀭𑁄𑀥𑀧𑀤𑁂𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀤𑁂𑀲𑀺𑀢𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀁 𑀳𑀻’’𑀢𑀺𑀆𑀤𑀺. 𑀯𑀝𑁆𑀝𑀯𑀺𑀯𑀝𑁆𑀝𑀦𑁆𑀢𑀺 𑀯𑀝𑁆𑀝𑀜𑁆𑀘 𑀯𑀺𑀯𑀝𑁆𑀝𑀜𑁆𑀘. ‘‘𑀤𑁆𑀯𑀸𑀤𑀲𑀳𑀻’’𑀢𑀺 𑀇𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀅𑀦𑀼𑀮𑁄𑀫𑀢𑁄 𑀤𑁆𑀯𑀸𑀤𑀲𑀳𑀺 𑀧𑀤𑁂𑀳𑀺 𑀯𑀝𑁆𑀝𑀁, 𑀧𑀝𑀺𑀮𑁄𑀫𑀢𑁄 𑀤𑁆𑀯𑀸𑀤𑀲𑀳𑀺 𑀯𑀺𑀯𑀝𑁆𑀝𑀁 𑀇𑀥 𑀤𑀲𑁆𑀲𑀺𑀢’’𑀦𑁆𑀢𑀺.

𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀝𑀺𑀧𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀫𑀺𑀘𑁆𑀙𑀸 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀤𑀸, 𑀯𑀝𑁆𑀝𑀕𑀸𑀫𑀺𑀫𑀕𑁆𑀕𑁄 𑀤𑀼𑀓𑁆𑀔𑀸𑀯𑀳𑀢𑁆𑀢𑀸. 𑀢𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀁. 𑀢𑁂𑀦𑀸𑀳 ‘‘𑀅𑀦𑀺𑀬𑁆𑀬𑀸𑀦𑀺𑀓𑀧𑀝𑀺𑀧𑀤𑀸’’𑀢𑀺. 𑀲𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀓𑀣𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀸 𑀳𑁄𑀢𑀻𑀢𑀺? 𑀲𑀫𑁆𑀧𑀢𑁆𑀢𑀺𑀪𑀯𑁂 𑀲𑀼𑀔𑀸𑀯𑀳𑁄𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀝𑁆𑀝𑀲𑀻𑀲𑀢𑁆𑀢𑀸𑀢𑀺 𑀯𑀝𑁆𑀝𑀧𑀓𑁆𑀔𑀺𑀬𑀸𑀦𑀁 𑀉𑀢𑁆𑀢𑀫𑀗𑁆𑀕𑀪𑀸𑀯𑀢𑁄. 𑀅𑀦𑁆𑀢𑀫𑀲𑁄𑀢𑀺 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺 𑀅𑀯𑀓𑀁𑀲𑀧𑀭𑀺𑀬𑀦𑁆𑀢𑀢𑁄. ‘‘𑀇𑀤𑀁 𑀫𑁂 𑀧𑀼𑀜𑁆𑀜𑀁 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀁. 𑀧𑀡𑁆𑀡𑀫𑀼𑀝𑁆𑀞𑀺𑀤𑀸𑀦𑀫𑀢𑁆𑀢𑀦𑁆𑀢𑀺 𑀲𑀸𑀓𑀧𑀡𑁆𑀡𑀫𑀼𑀝𑁆𑀞𑀺𑀤𑀸𑀦𑀫𑀢𑁆𑀢𑀁. 𑀅𑀧𑁆𑀧𑀢𑁆𑀯𑀸𑀢𑀺 𑀅𑀦𑁆𑀢𑁄𑀕𑀥𑀳𑁂𑀢𑀼 𑀏𑀲 𑀦𑀺𑀤𑁆𑀤𑁂𑀲𑁄, 𑀅𑀧𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀤𑀕𑁆𑀕𑁂𑀦 𑀯𑀸 𑀧𑀝𑀺𑀧𑀚𑁆𑀚𑀦𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀕𑁆𑀕𑁂𑀦 𑀢𑀤𑀸𑀯𑀳𑀸 𑀧𑀝𑀺𑀧𑀤𑀸𑀧𑀺 𑀧𑀢𑁆𑀢𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 ‘‘𑀅𑀧𑁆𑀧𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀮𑁄𑀫𑀯𑀲𑁂𑀦𑀸𑀢𑀺 𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦. 𑀧𑀝𑀺𑀮𑁄𑀫𑀯𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀝𑀺𑀧𑀤𑀸 𑀧𑀼𑀘𑁆𑀙𑀺𑀢𑀸𑀢𑀺 𑀏𑀢𑁂𑀦 𑀧𑀝𑀺𑀧𑀤𑀸 𑀤𑁂𑀲𑁂𑀢𑀼𑀁 𑀆𑀭𑀤𑁆𑀥𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄 𑀬𑀣𑀸𑀭𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀬 𑀇𑀥𑀸𑀕𑀢𑀢𑁆𑀢𑀸. 𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀬𑀫𑁆𑀧𑁂𑀢𑁆𑀣 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀅𑀯𑀺𑀚𑁆𑀚𑀸𑀤𑀺𑀦𑀺𑀭𑁄𑀥𑀸 𑀧𑀦 𑀯𑀺𑀚𑁆𑀚𑀸𑀬 𑀲𑀢𑀺 𑀳𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀲𑀫𑁆𑀪𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀁 𑀪𑀸𑀚𑀺𑀢’’𑀦𑁆𑀢𑀺. 𑀲𑀭𑀽𑀧𑁂𑀦 𑀧𑀦 𑀢𑀸𑀬 𑀯𑀝𑁆𑀝𑀫𑁂𑀯 𑀧𑀓𑀸𑀲𑀺𑀢𑀁. 𑀯𑀓𑁆𑀔𑀢𑀺 𑀳𑀺 𑀧𑀭𑀺𑀬𑁄𑀲𑀸𑀦𑁂 ‘‘𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢’’𑀦𑁆𑀢𑀺. 𑀦𑀺𑀬𑁆𑀬𑀸𑀢𑀦𑁂𑀢𑀺 𑀦𑀺𑀕𑀫𑀦𑁂. 𑀨𑀮𑁂𑀦𑀸𑀢𑀺 𑀧𑀢𑁆𑀢𑀩𑁆𑀩𑀨𑀮𑁂𑀦 𑀧𑀝𑀺𑀧𑀤𑀸𑀬 𑀲𑀫𑁆𑀧𑀸𑀧𑀓𑀳𑁂𑀢𑀼𑀦𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀬𑀣𑀸 𑀳𑀺 𑀢𑀺𑀯𑀺𑀥𑁄 𑀳𑁂𑀢𑀼 𑀜𑀸𑀧𑀓𑁄, 𑀦𑀺𑀩𑁆𑀩𑀢𑁆𑀢𑀓𑁄, 𑀲𑀫𑁆𑀧𑀸𑀧𑀓𑁄𑀢𑀺, 𑀏𑀯𑀁 𑀢𑀺𑀯𑀺𑀥𑀁 𑀨𑀮𑀁 𑀜𑀸𑀧𑁂𑀢𑀩𑁆𑀩𑀁, 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁, 𑀲𑀫𑁆𑀧𑀸𑀧𑁂𑀢𑀩𑁆𑀩𑀦𑁆𑀢𑀺. 𑀢𑀲𑁆𑀫𑀸 𑀧𑀢𑁆𑀢𑀩𑁆𑀩𑀨𑀮𑁂𑀦 𑀦𑀺𑀩𑁆𑀩𑀸𑀦𑁂𑀦 𑀢𑀁𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀽𑀢𑀸𑀬 𑀧𑀝𑀺𑀧𑀤𑀸𑀬 𑀤𑀲𑁆𑀲𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀨𑀮𑁂𑀦 𑀳𑁂𑀢𑁆𑀣𑀸’’𑀢𑀺𑀆𑀤𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀏𑀯𑀁 𑀦𑀺𑀩𑁆𑀩𑀸𑀦𑀨𑀮𑀸 𑀅𑀬𑀁 ‘‘𑀲𑀫𑁆𑀫𑀸𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑁂𑀲𑀯𑀺𑀭𑀸𑀕𑀸 𑀅𑀲𑁂𑀲𑀦𑀺𑀭𑁄𑀥𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀅𑀯𑀺𑀚𑁆𑀚𑀸𑀬 𑀅𑀲𑁂𑀲𑀯𑀺𑀭𑀚𑁆𑀚𑀦𑀢𑁄 𑀅𑀲𑁂𑀲𑀦𑀺𑀭𑀼𑀚𑁆𑀛𑀦𑀢𑁄 𑀘. 𑀧𑀤𑀤𑁆𑀯𑀬𑁂𑀦𑀧𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀫𑁂𑀯 𑀯𑀤𑀢𑀺. 𑀢𑀜𑁆𑀳𑀺 𑀦𑀺𑀩𑁆𑀩𑀸𑀦𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀅𑀬𑀁 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁂𑀦 𑀫𑀕𑁆𑀕𑁂𑀦 𑀓𑀭𑀡𑀪𑀽𑀢𑁂𑀦 𑀅𑀲𑁂𑀲𑀦𑀺𑀭𑁄𑀥𑁄 𑀳𑁄𑀢𑀺, 𑀅𑀯𑀺𑀚𑁆𑀚𑀸𑀬 𑀅𑀲𑁂𑀲𑀦𑀺𑀭𑁄𑀥𑁄 𑀬𑀁 𑀆𑀕𑀫𑁆𑀫 𑀳𑁄𑀢𑀺, 𑀢𑀁 𑀫𑀕𑁆𑀕𑀁 𑀤𑀲𑁆𑀲𑁂𑀢𑀼𑀦𑁆𑀢𑀺. 𑀏𑀯𑀜𑁆𑀳𑀺 𑀲𑀢𑀻𑀢𑀺 𑀏𑀯𑀁 𑀧𑀤𑀪𑀸𑀚𑀦𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀤𑀢𑁆𑀣𑁂 𑀲𑀢𑀺. 𑀲𑀸𑀦𑀼𑀪𑀸𑀯𑀸 𑀧𑀝𑀺𑀧𑀤𑀸 𑀯𑀺𑀪𑀢𑁆𑀢𑀸 𑀳𑁄𑀢𑀻𑀢𑀺 𑀅𑀯𑀺𑀚𑁆𑀚𑀸𑀬 𑀅𑀲𑁂𑀲𑀦𑀺𑀭𑁄𑀥𑀳𑁂𑀢𑀼𑀧𑀝𑀺𑀧𑀤𑀸 𑀢𑀢𑁆𑀣 𑀲𑀸𑀢𑀺𑀲𑀬𑀲𑀸𑀫𑀢𑁆𑀣𑀺𑀬𑀲𑀫𑀸𑀬𑁄𑀕𑀢𑁄 𑀲𑀸𑀦𑀼𑀪𑀸𑀯𑀸 𑀯𑀺𑀪𑀢𑁆𑀢𑀸 𑀳𑁄𑀢𑀺. 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀕𑀳𑀡𑁂𑀦𑁂𑀢𑁆𑀣 𑀯𑀝𑁆𑀝𑀲𑁆𑀲𑀧𑀺 𑀯𑀺𑀪𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢’’𑀦𑁆𑀢𑀺.

𑀧𑀝𑀺𑀧𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀺𑀧𑀲𑁆𑀲𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀯𑀺𑀧𑁆𑀨𑀦𑁆𑀤𑀦𑁆𑀢𑀻𑀢𑀺 𑀦𑀺𑀫𑀺𑀲𑀦𑀯𑀲𑁂𑀦. 𑀅𑀦𑀺𑀫𑀺𑀲𑁂𑀳𑀻𑀢𑀺 𑀯𑀺𑀕𑀢𑀦𑀺𑀫𑀺𑀲𑁂𑀳𑀺 𑀉𑀫𑁆𑀫𑀻𑀮𑀦𑁆𑀢𑁂𑀳𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑀫𑀳𑀸𑀧𑀤𑀸𑀦𑁂. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 ‘‘𑀯𑀺𑀧𑀲𑁆𑀲𑀻’’𑀢𑀺 𑀧𑀤𑁂, 𑀏𑀢𑀲𑁆𑀫𑀺𑀁 𑀯𑀸 ‘‘𑀅𑀦𑀺𑀫𑀺𑀲𑁂𑀳𑀻’’𑀢𑀺𑀆𑀤𑀺𑀓𑁂 𑀬𑀣𑀸𑀕𑀢𑁂 𑀲𑀼𑀢𑁆𑀢𑀦𑁆𑀢𑁂.

𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀦𑀺𑀫𑀺𑀲𑀮𑁄𑀘𑀦𑀢𑁄 ‘‘𑀯𑀺𑀧𑀲𑁆𑀲𑀻’’𑀢𑀺 𑀲𑀫𑀜𑁆𑀜𑀸𑀧𑀝𑀺𑀮𑀸𑀪𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀅𑀓𑀸𑀭𑀡𑀁 𑀅𑀜𑁆𑀜𑁂𑀲𑀫𑁆𑀧𑀺 𑀫𑀳𑀸𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀅𑀦𑀺𑀫𑀺𑀲𑀮𑁄𑀘𑀦𑀢𑁆𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀢𑁄 𑀧𑀦 𑀅𑀜𑁆𑀜𑀫𑁂𑀯 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀮𑀸𑀴𑀬𑀫𑀸𑀦𑀲𑁆𑀲𑀸𑀢𑀺 𑀢𑁄𑀲𑁂𑀦𑁆𑀢𑀲𑁆𑀲. 𑀅𑀦𑀸𑀤𑀭𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀝𑁆𑀝𑀲𑁆𑀲𑀸𑀢𑀺 𑀅𑀢𑁆𑀣𑀲𑁆𑀲.

𑀧𑀼𑀜𑁆𑀜𑀼𑀲𑁆𑀲𑀬𑀲𑀗𑁆𑀔𑀸𑀢𑁄 𑀪𑀕𑁄 𑀅𑀲𑁆𑀲 𑀅𑀢𑀺𑀲𑀬𑁂𑀦 𑀅𑀢𑁆𑀣𑀻𑀢𑀺 𑀪𑀕𑀯𑀸𑀢𑀺 ‘‘𑀪𑀸𑀕𑁆𑀬𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀸𑀢𑀺 𑀲𑀫𑁆𑀫𑀤𑁂𑀯 𑀬𑀸𑀣𑀸𑀯𑀢𑁄, 𑀜𑀸𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀬𑁂𑀦 𑀳𑁂𑀢𑀼𑀦𑀸’’𑀢𑀺. 𑀲𑀁-𑀲𑀤𑁆𑀤𑁄 ‘‘𑀲𑀸𑀫’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀲𑀸𑀫𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦𑀸’’𑀢𑀺, 𑀲𑀬𑀫𑁆𑀪𑀼𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸, 𑀲𑀸𑀫𑀁 𑀩𑀼𑀚𑁆𑀛𑀺 𑀏𑀢𑁂𑀦𑀸𑀢𑀺 𑀲𑀫𑁆𑀩𑁄𑀥𑁄 𑀯𑀼𑀘𑁆𑀘𑀢𑀺 𑀫𑀕𑁆𑀕𑀜𑀸𑀡𑀁, ‘‘𑀩𑀼𑀚𑁆𑀛𑀢𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸 𑀇𑀥 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑀧𑀺 𑀲𑀗𑁆𑀕𑀳𑁄. 𑀩𑁄𑀥𑀺𑀫𑀸 𑀲𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑁄, 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁄 𑀬𑀣𑀸 ‘‘𑀲𑀸𑀓𑀧𑀢𑁆𑀣𑀯𑁄’’𑀢𑀺. 𑀩𑀼𑀚𑁆𑀛𑀦𑀓𑀲𑀢𑁆𑀢𑁄𑀢𑀺 𑀏𑀢𑁆𑀣 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀤𑀸𑀬 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺 𑀘 𑀲𑁄 𑀲𑀢𑁆𑀢𑀯𑀺𑀲𑁂𑀲𑀬𑁄𑀕𑀢𑁄 𑀲𑀢𑁆𑀢𑁄 𑀘𑀸𑀢𑀺 𑀩𑁄𑀥𑀺𑀲𑀢𑁆𑀢𑁄. 𑀧𑀢𑁆𑀣𑀬𑀫𑀸𑀦𑁄 𑀧𑀯𑀢𑁆𑀢𑀢𑀻𑀢𑀺 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫 𑀫𑀳𑀦𑁆𑀢𑀁 𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀚𑀸𑀢𑀘𑁆𑀙𑀦𑁆𑀤𑁄 𑀧𑀝𑀺𑀧𑀚𑁆𑀚𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀆𑀤𑀺𑀫𑀽𑀮𑀓𑀁 𑀤𑀼𑀓𑁆𑀔𑀁. 𑀓𑀸𑀫𑀁 𑀘𑀼𑀢𑀼𑀧𑀧𑀸𑀢𑀸𑀧𑀺 𑀫𑀭𑀡𑀚𑀸𑀢𑀺𑀬𑁄, ‘‘𑀚𑀸𑀬𑀢𑀺 𑀫𑀻𑀬𑀢𑀻’’𑀢𑀺 𑀧𑀦 𑀯𑀢𑁆𑀯𑀸 ‘‘𑀘𑀯𑀢𑀺 𑀉𑀧𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀦 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀢𑁂𑀲𑀁 𑀕𑀳𑀡𑀁, 𑀅𑀣 𑀔𑁄 𑀦𑀸𑀦𑀸𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀏𑀓𑀚𑁆𑀛𑀁 𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑀢𑀲𑁆𑀲 𑀚𑀭𑀸𑀫𑀭𑀡𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀫𑀳𑀸𑀲𑀢𑁆𑀢𑁄 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑁂 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀢𑀲𑁆𑀫𑀸𑀲𑁆𑀲 𑀚𑀭𑀸𑀫𑀭𑀡𑀫𑁂𑀯 𑀆𑀤𑀺𑀢𑁄 𑀉𑀧𑀝𑁆𑀞𑀸𑀲𑀺.

𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀉𑀧𑀸𑀬𑁂𑀦 𑀯𑀺𑀥𑀺𑀦𑀸 𑀜𑀸𑀬𑁂𑀦 𑀫𑀦𑀲𑀺𑀓𑀸𑀭𑁂𑀦 𑀧𑀣𑁂𑀦 𑀫𑀦𑀲𑀺𑀓𑀸𑀭𑀲𑁆𑀲 𑀧𑀯𑀢𑁆𑀢𑀦𑀢𑁄. 𑀲𑀫𑀸𑀬𑁄𑀕𑁄 𑀅𑀳𑁄𑀲𑀻𑀢𑀺 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀢𑀲𑁆𑀲 ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦𑀸’’𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑁂𑀦 𑀆𑀳. 𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀦𑁆𑀢𑀺 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀚𑀭𑀸𑀫𑀭𑀡𑁂 𑀓𑀸𑀭𑀡𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 ‘‘𑀬𑀲𑁆𑀫𑀺𑀁 𑀲𑀢𑀺 𑀬𑀁 𑀳𑁄𑀢𑀺, 𑀅𑀲𑀢𑀺 𑀘 𑀦 𑀳𑁄𑀢𑀺, 𑀢𑀁 𑀢𑀲𑁆𑀲 𑀓𑀸𑀭𑀡’’𑀦𑁆𑀢𑀺 𑀏𑀯𑀁 𑀅𑀩𑁆𑀬𑀪𑀺𑀘𑀸𑀭𑀚𑀸𑀢𑀺𑀓𑀸𑀭𑀡𑀧𑀭𑀺𑀕𑁆𑀕𑀡𑁆𑀳𑀦𑁂𑀦 ‘‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀬𑀸 𑀚𑀭𑀸𑀫𑀭𑀡𑀲𑁆𑀲 𑀓𑀸𑀭𑀡𑀧𑀭𑀺𑀕𑁆𑀕𑀸𑀳𑀺𑀓𑀸 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀺, 𑀢𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑀸 𑀘𑀲𑁆𑀲 𑀅𑀪𑀺𑀲𑀫𑀬𑁄 𑀧𑀝𑀺𑀯𑁂𑀥𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀯𑀝𑁆𑀝𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀕𑀳𑀡𑀁. 𑀢𑁂𑀦𑀸𑀳 ‘‘𑀏𑀯𑀫𑀺𑀤’’𑀦𑁆𑀢𑀺. 𑀇𑀥 𑀅𑀯𑀺𑀚𑁆𑀚𑀸𑀬 𑀲𑀫𑀼𑀤𑀬𑀲𑁆𑀲 𑀆𑀕𑀢𑀢𑁆𑀢𑀸 ‘‘𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀲𑀫𑀼𑀤𑀬𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀫𑀼𑀤𑀬𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸. 𑀅𑀦𑁂𑀓𑀯𑀸𑀭𑀜𑁆𑀳𑀺 𑀲𑀫𑀼𑀤𑀬𑀤𑀲𑁆𑀲𑀦𑀯𑀲𑁂𑀦 𑀜𑀸𑀡𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 ‘‘𑀲𑀫𑀼𑀤𑀬𑁄 𑀲𑀫𑀼𑀤𑀬𑁄’’𑀢𑀺 𑀆𑀫𑁂𑀟𑀺𑀢𑀯𑀘𑀦𑀁. 𑀅𑀣 𑀯𑀸 ‘‘𑀏𑀯𑀁 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀇𑀤𑀁 𑀦 𑀓𑁂𑀯𑀮𑀁 𑀦𑀺𑀩𑁆𑀩𑀢𑁆𑀢𑀺𑀤𑀲𑁆𑀲𑀦𑀧𑀭𑀁, 𑀅𑀣 𑀔𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀤𑁆𑀤𑁄 𑀯𑀺𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀇𑀥 𑀲𑀫𑀼𑀤𑀬𑀲𑀤𑁆𑀤𑁄 𑀦𑀺𑀩𑁆𑀩𑀢𑁆𑀢𑀺𑀫𑀼𑀔𑁂𑀦 𑀧𑀘𑁆𑀘𑀬𑀢𑁆𑀢𑀁 𑀯𑀤𑀢𑀺. 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘 𑀬𑀸𑀯𑀦𑁆𑀢𑁄 𑀇𑀥 𑀧𑀘𑁆𑀘𑀬𑀥𑀫𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀲𑀸𑀫𑀜𑁆𑀜𑀭𑀽𑀧𑁂𑀦 𑀩𑁆𑀬𑀸𑀧𑀦𑀺𑀘𑁆𑀙𑀸𑀯𑀲𑁂𑀦 𑀕𑀡𑁆𑀳𑀦𑁆𑀢𑁄 ‘‘𑀲𑀫𑀼𑀤𑀬𑁄 𑀲𑀫𑀼𑀤𑀬𑁄’’𑀢𑀺 𑀅𑀯𑁄𑀘. 𑀢𑁂𑀦𑀸𑀳 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺. 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀽𑀢𑀺 𑀲𑀫𑀼𑀤𑀬𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀪𑀸𑀯𑁄 𑀘𑀓𑁆𑀔𑀼. 𑀜𑀸𑀢𑀝𑁆𑀞𑁂𑀦𑀸𑀢𑀺 𑀜𑀸𑀢𑀪𑀸𑀯𑁂𑀦. 𑀧𑀚𑀸𑀦𑀦𑀝𑁆𑀞𑁂𑀦𑀸𑀢𑀺 ‘‘𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀢𑀁𑀢𑀁𑀧𑀘𑁆𑀘𑀬𑀥𑀫𑁆𑀫𑀧𑀯𑀢𑁆𑀢𑀺𑀬𑀸 𑀏𑀢𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄’’𑀢𑀺 𑀧𑀓𑀸𑀭𑀢𑁄 𑀯𑀸 𑀚𑀸𑀦𑀦𑀝𑁆𑀞𑁂𑀦. 𑀧𑀝𑀺𑀯𑁂𑀥𑀦𑀝𑁆𑀞𑁂𑀦𑀸𑀢𑀺 ‘‘𑀅𑀬𑀁 𑀅𑀯𑀺𑀚𑁆𑀚𑀸𑀤𑀺 𑀧𑀘𑁆𑀘𑀬𑀥𑀫𑁆𑀫𑁄 𑀇𑀫𑀲𑁆𑀲 𑀲𑀗𑁆𑀔𑀸𑀭𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀲𑀫𑀼𑀤𑀬𑁄’’𑀢𑀺 𑀧𑀝𑀺𑀯𑀺𑀚𑁆𑀛𑀦𑀝𑁆𑀞𑁂𑀦. 𑀑𑀪𑀸𑀲𑀦𑀝𑁆𑀞𑁂𑀦𑀸𑀢𑀺 𑀲𑀫𑀼𑀤𑀬𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀫𑁄𑀳𑀦𑁆𑀥𑀓𑀸𑀭𑀲𑁆𑀲 𑀓𑀺𑀮𑁂𑀲𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀦𑀯𑀲𑁂𑀦 𑀅𑀯𑀪𑀸𑀲𑀦𑀯𑀲𑁂𑀦. 𑀢𑀁 𑀧𑀦𑁂𑀢𑀁 ‘‘𑀘𑀓𑁆𑀔𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀜𑀸𑀡𑀁. 𑀦𑀺𑀭𑁄𑀥𑀯𑀸𑀭𑁂𑀢𑀺 𑀧𑀝𑀺𑀮𑁄𑀫𑀯𑀸𑀭𑁂. 𑀲𑁄 𑀳𑀺 ‘‘𑀓𑀺𑀲𑁆𑀲 𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀦𑀺𑀭𑁄𑀥𑀓𑀺𑀢𑁆𑀢𑀦𑀯𑀲𑁂𑀦 𑀆𑀕𑀢𑁄.

𑀯𑀺𑀧𑀲𑁆𑀲𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁦. 𑀲𑀺𑀔𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫-𑁧𑁦. 𑀦 𑀏𑀯𑀁 𑀬𑁄𑀚𑁂𑀢𑁆𑀯𑀸𑀢𑀺 ‘‘𑀲𑀺𑀔𑀺𑀲𑁆𑀲𑀧𑀻’’𑀢𑀺𑀆𑀤𑀺𑀦𑀸 𑀲𑀫𑀼𑀘𑁆𑀘𑀬𑀯𑀲𑁂𑀦 𑀏𑀯𑀁 𑀦 𑀬𑁄𑀚𑁂𑀢𑁆𑀯𑀸. 𑀓𑀲𑁆𑀫𑀸𑀢𑀺𑀆𑀤𑀺𑀦𑀸 𑀢𑀢𑁆𑀣 𑀓𑀸𑀭𑀡𑀁 𑀯𑀤𑀢𑀺. 𑀏𑀓𑀸𑀲𑀦𑁂 𑀅𑀤𑁂𑀲𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀦𑀸𑀦𑀸𑀞𑀸𑀦𑁂𑀲𑀼 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺𑀧𑀺 𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀼𑀢𑁆𑀢𑀪𑀸𑀯𑁂𑀦 𑀤𑁂𑀲𑀺𑀢𑀸𑀦𑀺, 𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀓𑀲𑀤𑀺𑀲𑀸 𑀢𑀤𑀢𑁆𑀣𑀲𑁆𑀲 𑀅𑀪𑀺𑀦𑁆𑀦𑀢𑁆𑀢𑀸. ‘‘𑀩𑀼𑀤𑁆𑀥𑀸 𑀚𑀸𑀢𑀸’’𑀢𑀺 𑀦 𑀅𑀜𑁆𑀜𑁄 𑀆𑀘𑀺𑀓𑁆𑀔𑀢𑀻𑀢𑀺 𑀬𑁄𑀚𑀦𑀸. 𑀦 𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀘𑁆𑀙𑀺𑀫𑀪𑀯𑁂 𑀧𑀭𑁄𑀧𑀤𑁂𑀲𑁂𑀦 𑀧𑀬𑁄𑀚𑀦𑀁 𑀅𑀢𑁆𑀣𑀺. 𑀕𑀢𑀫𑀕𑁆𑀕𑁂𑀦𑁂𑀯𑀸𑀢𑀺 𑀧𑀝𑀺𑀧𑀢𑁆𑀢𑀺𑀕𑀫𑀦𑁂𑀦 𑀕𑀢𑀫𑀕𑁆𑀕𑁂𑀦𑁂𑀯 𑀧𑀘𑁆𑀙𑀺𑀫𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸. 𑀕𑀘𑁆𑀙𑀦𑁆𑀢𑀻𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀸𑀣𑀸𑀯𑀢𑁄 𑀪𑀸𑀯𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀦 𑀢𑁂𑀲𑀁 𑀧𑀞𑀫𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀪𑀸𑀯𑀸𑀦𑀁 𑀯𑀺𑀧𑀲𑁆𑀲𑀦𑀸, 𑀩𑀼𑀤𑁆𑀥𑀢𑁆𑀣𑀸𑀬 𑀯𑀸 𑀯𑀺𑀧𑀲𑁆𑀲𑀦𑀸 𑀩𑀼𑀤𑁆𑀥𑀯𑀺𑀧𑀲𑁆𑀲𑀦𑀸.

𑀲𑀺𑀔𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀼𑀤𑁆𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀳𑀸𑀭𑀯𑀕𑁆𑀕𑁄

𑁧. 𑀆𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀆𑀳𑀭𑀦𑁆𑀢𑀻𑀢𑀺 𑀆𑀦𑁂𑀦𑁆𑀢𑀺 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀢𑁆𑀢𑀸𑀢𑀺 𑀧𑀲𑀼𑀢𑀸. 𑀪𑀽𑀢𑀸 𑀦𑀸𑀫 𑀬𑀲𑁆𑀫𑀸 𑀢𑀢𑁄 𑀧𑀝𑁆𑀞𑀸𑀬 𑀮𑁄𑀓𑁂 𑀚𑀸𑀢𑀯𑁄𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑁄, 𑀢𑀸𑀯 𑀲𑀫𑁆𑀪𑀯𑁂𑀲𑀺𑀦𑁄, 𑀏𑀲 𑀢𑀸𑀯 𑀕𑀩𑁆𑀪𑀲𑁂𑀬𑁆𑀬𑀓𑁂𑀲𑀼 𑀪𑀽𑀢𑀲𑀫𑁆𑀪𑀯𑁂𑀲𑀺𑀯𑀺𑀪𑀸𑀕𑁄, 𑀇𑀢𑀭𑁂𑀲𑀼 𑀧𑀦 𑀧𑀞𑀫𑀘𑀺𑀢𑁆𑀢𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀲𑀫𑁆𑀪𑀯-𑀲𑀤𑁆𑀤𑁄 𑀘𑁂𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀲𑁂𑀦 𑀧𑀲𑀽𑀢𑀺𑀧𑀭𑀺𑀬𑀸𑀬𑁄, 𑀇𑀢𑀭𑁂𑀲𑀁 𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄. 𑀧𑀞𑀫𑀘𑀺𑀢𑁆𑀢𑀧𑀞𑀫𑀇𑀭𑀺𑀬𑀸𑀧𑀣𑀓𑁆𑀔𑀡𑁂𑀲𑀼 𑀳𑀺 𑀢𑁂 𑀲𑀫𑁆𑀪𑀯𑀁 𑀉𑀧𑁆𑀧𑀢𑁆𑀢𑀺𑀁 𑀏𑀲𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀦𑀸𑀫, 𑀦 𑀢𑀸𑀯 𑀪𑀽𑀢𑀸 𑀉𑀧𑀧𑀢𑁆𑀢𑀺𑀬𑀸 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸, 𑀪𑀽𑀢𑀸 𑀏𑀯 𑀲𑀩𑁆𑀩𑀲𑁄 𑀪𑀯𑁂𑀲𑀦𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑁄 𑀘 ‘‘𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺𑀆𑀤𑀻𑀲𑀼 𑀪𑀽𑀢-𑀲𑀤𑁆𑀤𑀲𑁆𑀲 𑀔𑀻𑀡𑀸𑀲𑀯𑀯𑀸𑀘𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 ‘‘𑀅𑀕𑁆𑀕𑀺𑀦𑀸 𑀯𑀸 𑀉𑀤𑀓𑁂𑀦 𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬.

𑀬𑀣𑀸𑀲𑀓𑀁 𑀧𑀘𑁆𑀘𑀬𑀪𑀸𑀯𑁂𑀦 𑀅𑀢𑁆𑀢𑀪𑀸𑀯𑀲𑁆𑀲 𑀧𑀞𑀧𑀦𑀫𑁂𑀯𑁂𑀢𑁆𑀣 𑀆𑀳𑀸𑀭𑁂𑀳𑀺 𑀓𑀸𑀢𑀩𑁆𑀩𑀅𑀦𑀼𑀕𑁆𑀕𑀳𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀘𑀦𑀪𑁂𑀤𑁄…𑀧𑁂… 𑀏𑀓𑁄 𑀬𑁂𑀯𑀸’’𑀢𑀺. 𑀲𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀦𑁆𑀢𑀺 𑀲𑀢𑁆𑀢𑀲𑁆𑀲 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁. 𑀬𑀣𑀸 ‘‘𑀯𑀲𑁆𑀲𑀲𑀢𑀁 𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀞𑀺𑀢𑀺𑀬𑀸𑀢𑀺 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄, 𑀲𑀸 𑀧𑀦 𑀅𑀯𑀺𑀘𑁆𑀙𑁂𑀤𑁄𑀢𑀺 𑀆𑀳 ‘‘𑀅𑀯𑀺𑀘𑁆𑀙𑁂𑀤𑀸𑀬𑀸’’𑀢𑀺. 𑀅𑀦𑀼𑀧𑁆𑀧𑀩𑀦𑁆𑀥𑀥𑀫𑁆𑀫𑀼𑀧𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀲𑀦𑁆𑀢𑀸𑀦𑁄 𑀅𑀦𑀼𑀕𑁆𑀕𑀳𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀸𑀬𑀸’’𑀢𑀺. 𑀏𑀢𑀸𑀦𑀻𑀢𑀺 𑀞𑀺𑀢𑀺𑀅𑀦𑀼𑀕𑁆𑀕𑀳𑀧𑀤𑀸𑀦𑀺. 𑀉𑀪𑀬𑀢𑁆𑀣 𑀤𑀝𑁆𑀞𑀩𑁆𑀩𑀸𑀦𑀺 𑀦 𑀬𑀣𑀸𑀲𑀫𑁆𑀩𑀦𑁆𑀥𑀢𑁄.

𑀯𑀢𑁆𑀣𑀼𑀕𑀢𑀸 𑀑𑀚𑀸 𑀯𑀢𑁆𑀣𑀼 𑀯𑀺𑀬 𑀢𑁂𑀦 𑀲𑀤𑁆𑀥𑀺𑀁 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀢𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀓𑁄 𑀆𑀳𑀸𑀭𑁄’’𑀢𑀺, 𑀦𑀺𑀩𑁆𑀩𑀢𑁆𑀢𑀺𑀢𑀑𑀚𑀁 𑀧𑀦 𑀲𑀦𑁆𑀥𑀸𑀬 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀆𑀳𑀭𑀢𑀻’’𑀢𑀺 𑀯𑀓𑁆𑀔𑀢𑀺. 𑀑𑀴𑀸𑀭𑀺𑀓𑀢𑀸 𑀅𑀧𑁆𑀧𑁄𑀚𑀢𑀸𑀬 𑀦 𑀯𑀢𑁆𑀣𑀼𑀦𑁄 𑀣𑀽𑀮𑀢𑀸𑀬 𑀓𑀣𑀺𑀦𑀢𑀸𑀬 𑀯𑀸, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀭𑀺𑀢𑁆𑀢𑀸 𑀑𑀚𑀸 𑀳𑁄𑀢𑀺, 𑀢𑀁 𑀑𑀴𑀸𑀭𑀺𑀓𑀁. 𑀲𑀧𑁆𑀧𑀸𑀤𑀬𑁄 𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑀢𑀸𑀬 𑀑𑀴𑀸𑀭𑀺𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀲𑀸𑀡𑀸𑀤𑀻𑀦𑀁 𑀢𑀺𑀯𑀲𑁆𑀲𑀙𑀟𑁆𑀟𑀺𑀢𑀸𑀦𑀁 𑀧𑀽𑀢𑀺𑀪𑀽𑀢𑀢𑁆𑀢𑀸 𑀫𑀼𑀤𑀼𑀓𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀭𑀘𑁆𑀙𑀔𑁂𑀴𑀢𑁂𑀫𑀺𑀢𑀢𑀸𑀬 𑀧𑀦 𑀢𑀣𑀸𑀪𑀽𑀢𑀸𑀦𑀁 𑀢𑁂𑀲𑀁 𑀫𑀼𑀤𑀼𑀓𑀢𑀸. 𑀥𑀫𑁆𑀫𑀲𑀪𑀸𑀯𑁄 𑀳𑁂𑀲. 𑀲𑀲𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄 𑀢𑀭𑀼𑀡𑀢𑀺𑀡𑀲𑀲𑁆𑀲𑀔𑀸𑀤𑀦𑀢𑁄. 𑀲𑀓𑀼𑀡𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄 𑀢𑀺𑀡𑀩𑀻𑀚𑀸𑀤𑀺𑀔𑀸𑀤𑀦𑀢𑁄. 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄 𑀫𑀸𑀲𑀫𑀼𑀕𑁆𑀕𑀓𑀼𑀭𑀸𑀤𑀺𑀪𑁄𑀚𑀦𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁. 𑀲𑀼𑀔𑀼𑀫𑁄𑀢𑁆𑀯𑁂𑀯𑀸𑀢𑀺 𑀦 𑀓𑀺𑀜𑁆𑀘𑀺 𑀉𑀧𑀸𑀤𑀸𑀬, 𑀅𑀣 𑀔𑁄 𑀲𑀼𑀔𑀼𑀫𑁄𑀇𑀘𑁆𑀘𑁂𑀯 𑀦𑀺𑀝𑁆𑀞𑀁 𑀧𑀢𑁆𑀢𑁄 𑀢𑀢𑁄 𑀧𑀭𑀫𑀲𑀼𑀔𑀼𑀫𑀲𑁆𑀲 𑀅𑀪𑀸𑀯𑀢𑁄.

𑀯𑀢𑁆𑀣𑀼𑀯𑀲𑁂𑀦 𑀧𑀦𑁂𑀢𑁆𑀣 𑀆𑀳𑀸𑀭𑀲𑁆𑀲 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑀼𑀢𑁆𑀢𑀸, 𑀲𑀸 𑀘𑀲𑁆𑀲 𑀅𑀧𑁆𑀧𑁄𑀚𑀫𑀳𑁄𑀚𑀢𑀸𑀳𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀧𑀭𑀺𑀲𑁆𑀲𑀬𑀦𑁆𑀢𑀺 𑀔𑀼𑀤𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀁 𑀲𑀭𑀻𑀭𑀤𑀭𑀣𑀁. 𑀯𑀺𑀦𑁄𑀤𑁂𑀢𑀻𑀢𑀺 𑀯𑀢𑁆𑀣𑀼 𑀢𑀲𑁆𑀲 𑀯𑀺𑀦𑁄𑀤𑀦𑀫𑀢𑁆𑀢𑀁 𑀓𑀭𑁄𑀢𑀺. 𑀦 𑀧𑀦 𑀲𑀓𑁆𑀓𑁄𑀢𑀺 𑀧𑀸𑀮𑁂𑀢𑀼𑀦𑁆𑀢𑀺 𑀲𑀭𑀻𑀭𑀁 𑀬𑀸𑀧𑁂𑀢𑀼𑀁 𑀦𑀧𑁆𑀧𑀳𑁄𑀢𑀺 𑀦𑀺𑀭𑁄𑀚𑀢𑁆𑀢𑀸. 𑀦 𑀲𑀓𑁆𑀓𑁄𑀢𑀺 𑀧𑀭𑀺𑀲𑁆𑀲𑀬𑀁 𑀯𑀺𑀦𑁄𑀤𑁂𑀢𑀼𑀁 𑀆𑀫𑀸𑀲𑀬𑀲𑁆𑀲 𑀅𑀧𑀽𑀭𑀡𑀢𑁄.

𑀙𑀩𑁆𑀩𑀺𑀥𑁄𑀧𑀻𑀢𑀺 𑀇𑀫𑀺𑀦𑀸 𑀓𑀲𑁆𑀲𑀘𑀺 𑀨𑀲𑁆𑀲𑀲𑁆𑀲 𑀅𑀦𑀯𑀲𑁂𑀲𑀺𑀢𑀩𑁆𑀩𑀢𑀫𑀸𑀳. 𑀤𑁂𑀲𑀦𑀓𑁆𑀓𑀫𑁂𑀦𑁂𑀯𑁂𑀢𑁆𑀣 𑀨𑀲𑁆𑀲𑀸𑀤𑀻𑀦𑀁 𑀤𑀼𑀢𑀺𑀬𑀸𑀤𑀺𑀢𑀸, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸𑀢𑀺 𑀆𑀳 ‘‘𑀤𑁂𑀲𑀦𑀸𑀦𑀬𑁄 𑀏𑀯 𑀘𑁂𑀲𑀸’’𑀢𑀺𑀆𑀤𑀺. 𑀫𑀦𑀲𑁄 𑀲𑀜𑁆𑀘𑁂𑀢𑀦𑀸 𑀦 𑀲𑀢𑁆𑀢𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀫𑀦𑁄𑀕𑀳𑀡𑀁 𑀬𑀣𑀸 ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀺, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀘𑀸’’𑀢𑀺 𑀆𑀳 ‘‘𑀫𑀦𑁄𑀲𑀜𑁆𑀘𑁂𑀢𑀦𑀸𑀢𑀺 𑀘𑁂𑀢𑀦𑀸𑀯𑀸’’𑀢𑀺. 𑀘𑀺𑀢𑁆𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀫𑁂𑀯. 𑀏𑀓𑀭𑀸𑀲𑀺𑀁 𑀓𑀢𑁆𑀯𑀸𑀢𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸, 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀮𑀩𑁆𑀪𑀫𑀸𑀦𑀁 𑀉𑀧𑀸𑀤𑀺𑀡𑁆𑀡𑀓𑀸𑀤𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀳𑀸𑀭𑀢𑁆𑀣𑀁 𑀦 𑀲𑀸𑀥𑁂𑀦𑁆𑀢𑀻𑀢𑀺 𑀢𑀸𑀤𑀺𑀲𑀲𑁆𑀲 𑀆𑀳𑀸𑀭𑀲𑁆𑀲 𑀅𑀦𑀸𑀳𑀭𑀡𑀢𑁄. 𑀢𑀤𑀸𑀧𑀻𑀢𑀺 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑀓𑀸𑀮𑁂𑀧𑀺. 𑀉𑀧𑀸𑀤𑀺𑀡𑁆𑀡𑀓𑀸𑀳𑀸𑀭𑁄𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀓𑁂𑀘𑀺. 𑀇𑀤𑀁 𑀧𑀦 𑀆𑀘𑀭𑀺𑀬𑀸𑀦𑀁 𑀦 𑀭𑀼𑀘𑁆𑀘𑀢𑀺 𑀢𑀤𑀸 𑀉𑀧𑀸𑀤𑀺𑀡𑁆𑀡𑀓𑀭𑀽𑀧𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦𑁂𑀯 𑀲𑀳𑀚𑀸𑀢𑀸𑀢𑀺 𑀮𑀓𑁆𑀔𑀡𑀯𑀘𑀦𑀫𑁂𑀢𑀁, 𑀲𑀩𑁆𑀩𑀸𑀬𑀧𑀺 𑀓𑀫𑁆𑀫𑀚𑀭𑀽𑀧𑀧𑀭𑀺𑀬𑀸𑀧𑀦𑁆𑀦𑀸𑀬 𑀑𑀚𑀸𑀬 𑀅𑀢𑁆𑀣𑀺𑀪𑀸𑀯𑀲𑁆𑀲 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑁄. 𑀲𑀢𑁆𑀢𑀫𑀸𑀢𑀺 𑀉𑀧𑁆𑀧𑀦𑁆𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀢𑁆𑀢𑀫𑀤𑀺𑀯𑀲𑀸𑀧𑀺. 𑀭𑀽𑀧𑀲𑀦𑁆𑀢𑀢𑀺𑀁 𑀧𑀸𑀮𑁂𑀢𑀺 𑀧𑀯𑁂𑀡𑀺𑀖𑀝𑀦𑀯𑀲𑁂𑀦. 𑀅𑀬𑀫𑁂𑀯𑀸𑀢𑀺 𑀓𑀫𑁆𑀫𑀚𑀑𑀚𑀸. 𑀓𑀫𑁆𑀫𑀚𑀑𑀚𑀁 𑀧𑀦 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀑𑀚𑀸 𑀅𑀓𑀫𑁆𑀫𑀚𑀢𑁆𑀢𑀸 𑀅𑀦𑀼𑀧𑀸𑀤𑀺𑀡𑁆𑀡𑀆𑀳𑀸𑀭𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀼𑀧𑀸𑀤𑀺𑀡𑁆𑀡𑀓𑀸 𑀨𑀲𑁆𑀲𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀮𑁄𑀓𑀼𑀢𑁆𑀢𑀭𑀸 𑀨𑀲𑁆𑀲𑀸𑀤𑀬𑁄 𑀓𑀣𑀦𑁆𑀢𑀺 𑀆𑀳 ‘‘𑀮𑁄𑀓𑀼𑀢𑁆𑀢𑀭𑀸 𑀧𑀦 𑀭𑀼𑀴𑁆𑀳𑀻𑀯𑀲𑁂𑀦 𑀓𑀣𑀺𑀢𑀸’’𑀢𑀺. 𑀬𑀲𑁆𑀫𑀸 𑀢𑁂𑀲𑀁 𑀓𑀼𑀲𑀮𑀸𑀦𑀁 𑀉𑀧𑁂𑀢𑀧𑀭𑀺𑀬𑀸𑀬𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀺𑀧𑀸𑀓𑀸𑀦𑀁 𑀉𑀧𑀸𑀤𑀺𑀡𑁆𑀡𑀧𑀭𑀺𑀬𑀸𑀬𑁄 𑀦𑀢𑁆𑀣𑁂𑀯𑀸𑀢𑀺 𑀅𑀦𑀼𑀧𑀸𑀤𑀺𑀡𑁆𑀡𑀧𑀭𑀺𑀬𑀸𑀬𑁄𑀧𑀺 𑀭𑀼𑀴𑁆𑀳𑀻𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀩𑁆𑀩𑁂 ‘‘𑀆𑀳𑀸𑀭𑀸𑀢𑀺 𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀤𑀺 𑀧𑀘𑁆𑀘𑀬𑀝𑁆𑀞𑁄 𑀆𑀳𑀸𑀭𑀝𑁆𑀞𑁄𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺, 𑀅𑀣 𑀓𑀲𑁆𑀫𑀸 𑀇𑀫𑁂 𑀏𑀯 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸𑀢𑀺 𑀅𑀣 𑀓𑀲𑁆𑀫𑀸 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸. 𑀇𑀫𑁂 𑀏𑀯 𑀘 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑀢𑁆𑀢𑀸𑀢𑀺 𑀏𑀢𑁂𑀦 𑀬𑀣𑀸 𑀅𑀜𑁆𑀜𑁂 𑀧𑀘𑁆𑀘𑀬𑀥𑀫𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀸𑀯 𑀳𑁄𑀦𑁆𑀢𑀺, 𑀇𑀫𑁂 𑀧𑀦 𑀢𑀣𑀸 𑀘 𑀳𑁄𑀢𑀺 𑀅𑀜𑁆𑀜𑀣𑀸 𑀘𑀸𑀢𑀺 𑀲𑀫𑀸𑀦𑁂𑀧𑀺 𑀧𑀘𑁆𑀘𑀬𑀢𑁆𑀢𑁂 𑀅𑀢𑀺𑀭𑁂𑀓𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀁 𑀅𑀢𑀺𑀭𑁂𑀓𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑁄 𑀭𑀽𑀧𑀓𑀸𑀬𑀲𑁆𑀲 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀉𑀧𑀣𑀫𑁆𑀪𑀓𑀪𑀸𑀯𑀢𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀣𑀫𑁆𑀪𑀓𑀢𑁆𑀢𑁂𑀦 𑀉𑀧𑀓𑀸𑀭𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀆𑀳𑀸𑀭𑀧𑀘𑁆𑀘𑀬𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁬𑁦𑁮; 𑀧𑀝𑁆𑀞𑀸. 𑀅𑀝𑁆𑀞. 𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸). 𑀉𑀧𑀣𑀫𑁆𑀪𑀓𑀢𑁆𑀢𑀜𑁆𑀳𑀺 𑀲𑀢𑀻𑀧𑀺 𑀚𑀦𑀓𑀢𑁆𑀢𑁂 𑀅𑀭𑀽𑀧𑀻𑀦𑀁 𑀆𑀳𑀸𑀭𑀸𑀦𑀁 𑀆𑀳𑀸𑀭𑀚𑀭𑀽𑀧𑀲𑀫𑀼𑀝𑁆𑀞𑀸𑀦𑀓𑀭𑀽𑀧𑀸𑀳𑀸𑀭𑀲𑁆𑀲 𑀘 𑀳𑁄𑀢𑀺, 𑀅𑀲𑀢𑀺 𑀧𑀦 𑀉𑀧𑀣𑀫𑁆𑀪𑀓𑀢𑁆𑀢𑁂 𑀆𑀳𑀸𑀭𑀸𑀦𑀁 𑀚𑀦𑀓𑀢𑁆𑀢𑀁 𑀦𑀢𑁆𑀣𑀻𑀢𑀺 𑀉𑀧𑀣𑀫𑁆𑀪𑀓𑀢𑁆𑀢𑀁 𑀧𑀥𑀸𑀦𑀁. 𑀚𑀦𑀬𑀫𑀸𑀦𑁄𑀧𑀺 𑀳𑀺 𑀆𑀳𑀸𑀭𑁄 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀉𑀧𑀣𑀫𑁆𑀪𑀬𑀫𑀸𑀦𑁄 𑀏𑀯 𑀚𑀦𑁂𑀢𑀻𑀢𑀺 𑀉𑀧𑀣𑀫𑁆𑀪𑀓𑀪𑀸𑀯𑁄 𑀏𑀯 𑀆𑀳𑀸𑀭𑀪𑀸𑀯𑁄. 𑀯𑁂𑀤𑀦𑀸𑀬 𑀨𑀲𑁆𑀲𑁄 𑀯𑀺𑀲𑁂𑀲𑀧𑀘𑁆𑀘𑀬𑁄. ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀘𑀦𑀢𑁄 𑀯𑀺𑀜𑁆𑀜𑀸𑀡𑀲𑁆𑀲 𑀫𑀦𑁄𑀲𑀜𑁆𑀘𑁂𑀢𑀦𑀸. ‘‘𑀘𑁂𑀢𑀦𑀸 𑀢𑀺𑀯𑀺𑀥𑀁 𑀪𑀯𑀁 𑀚𑀦𑁂𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀧𑀦 𑀯𑀘𑀦𑀢𑁄 𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁 𑀯𑀺𑀲𑁂𑀲𑀧𑀘𑁆𑀘𑀬𑁄. 𑀦 𑀳𑀺 𑀑𑀓𑁆𑀓𑀦𑁆𑀢𑀯𑀺𑀜𑁆𑀜𑀸𑀡𑀸𑀪𑀸𑀯𑁂 𑀦𑀸𑀫𑀭𑀽𑀧𑀲𑁆𑀲 𑀅𑀢𑁆𑀣𑀺 𑀲𑀫𑁆𑀪𑀯𑁄. 𑀬𑀣𑀸𑀳 ‘‘𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀦 𑀑𑀓𑁆𑀓𑀫𑀺𑀲𑁆𑀲𑀣, 𑀅𑀧𑀺 𑀦𑀼 𑀔𑁄 𑀦𑀸𑀫𑀭𑀽𑀧𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀫𑀼𑀘𑁆𑀘𑀺𑀲𑁆𑀲𑀣𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁧𑁫). 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀼𑀢𑁆𑀢𑁂𑀦 𑀲𑀸𑀥𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀁 𑀬𑀤𑀺𑀧𑀺 𑀧𑀘𑁆𑀘𑀬𑀢𑁆𑀣𑁄 𑀆𑀳𑀸𑀭𑀢𑁆𑀣𑁄, 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀧𑀦 𑀇𑀫𑁂𑀯 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸𑀢𑀺 𑀢𑀁 𑀦𑁂𑀲𑀁 𑀯𑀺𑀲𑁂𑀲𑀧𑀘𑁆𑀘𑀬𑀢𑀁 𑀅𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑁄 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀫𑀼𑀔𑁂 𑀞𑀧𑀺𑀢𑀫𑀢𑁆𑀢𑁄 𑀏𑀯 𑀅𑀲𑀗𑁆𑀔𑀸𑀤𑀺𑀢𑁄, 𑀢𑀢𑁆𑀢𑀓𑁂𑀦𑀸𑀧𑀺 𑀅𑀩𑁆𑀪𑀦𑁆𑀢𑀭𑀲𑁆𑀲 𑀆𑀳𑀸𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 𑀏𑀯. 𑀢𑁂𑀦𑀸𑀳 ‘‘𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺. 𑀲𑀼𑀔𑀯𑁂𑀤𑀦𑀸𑀬 𑀳𑀺𑀢𑁄 𑀲𑀼𑀔𑀯𑁂𑀤𑀦𑀻𑀬𑁄. 𑀲𑀩𑁆𑀩𑀣𑀸𑀧𑀻𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀯𑀲𑁂𑀦. 𑀬𑀢𑁆𑀢𑀓𑀸 𑀨𑀲𑁆𑀲𑀲𑁆𑀲 𑀧𑀓𑀸𑀭𑀪𑁂𑀤𑀸, 𑀢𑁂𑀲𑀁 𑀯𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁄𑀧𑀺 𑀨𑀲𑁆𑀲𑀸𑀳𑀸𑀭𑁄 𑀬𑀣𑀸𑀭𑀳𑀁 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀺, 𑀅𑀦𑀸𑀳𑀸𑀭𑀓𑁄 𑀦𑀢𑁆𑀣𑀺.

𑀲𑀩𑁆𑀩𑀣𑀸𑀧𑀻𑀢𑀺 𑀇𑀥𑀸𑀧𑀺 𑀨𑀲𑁆𑀲𑀸𑀳𑀸𑀭𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀓𑀸𑀬𑀤𑀲𑀓𑀁 𑀪𑀸𑀯𑀤𑀲𑀓𑀁 𑀯𑀢𑁆𑀣𑀼𑀤𑀲𑀓𑀦𑁆𑀢𑀺 𑀢𑀺𑀯𑀺𑀥𑀲𑀦𑁆𑀢𑀢𑀺𑀯𑀲𑁂𑀦. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀦𑀬𑁂𑀦𑀸𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀺𑀥𑀺𑀦𑀸. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀜𑁆𑀳𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀦𑀸𑀫𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄𑀬𑁂𑀯 𑀆𑀳𑀸𑀭𑀧𑀘𑁆𑀘𑀬𑀢𑀸𑀬 𑀢𑀁 𑀆𑀳𑀸𑀭𑁂𑀢𑀺 𑀯𑀼𑀢𑁆𑀢𑀁, 𑀲𑀳𑀚𑀸𑀢𑀭𑀽𑀧𑁂𑀲𑀼 𑀧𑀦 𑀯𑀢𑁆𑀣𑀼𑀦𑁄 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦, 𑀲𑁂𑀲𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀜𑁆𑀘 𑀞𑀧𑁂𑀢𑁆𑀯𑀸 𑀇𑀢𑀭𑁂𑀲𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀸𑀦𑀻𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀅𑀦𑀧𑀼𑀁𑀲𑀓𑀸𑀦𑀫𑁆𑀧𑀺 𑀦𑀧𑀼𑀁𑀲𑀓𑁂𑀳𑀺 𑀲𑀳 𑀯𑀘𑀦𑀢𑁄. 𑀲𑀸𑀲𑀯𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀯 𑀯𑀼𑀢𑁆𑀢𑀸 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀁 𑀳𑁂𑀢𑀦𑁆𑀢𑀺, 𑀢𑁂𑀦𑀸𑀳 ‘‘𑀅𑀯𑀺𑀲𑁂𑀲𑁂𑀦 𑀧𑀦𑀸’’𑀢𑀺𑀆𑀤𑀺. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀢𑀲𑁆𑀲 𑀢𑀲𑁆𑀲 𑀨𑀮𑀲𑁆𑀲 𑀯𑀺𑀲𑁂𑀲𑀢𑁄 𑀧𑀘𑁆𑀘𑀬𑀢𑀸𑀬 𑀏𑀢𑁂𑀲𑀁 𑀆𑀳𑀸𑀭𑀢𑁆𑀣𑁄, 𑀏𑀯𑀁 𑀅𑀯𑀺𑀲𑁂𑀲𑀢𑁄𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀲𑁂𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀁𑀲𑀫𑀼𑀝𑁆𑀞𑀸𑀦𑀥𑀫𑁆𑀫𑀸𑀦𑀦𑁆𑀢𑀺 𑀢𑁂𑀳𑀺 𑀨𑀲𑁆𑀲𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀥𑀫𑁆𑀫𑀸𑀦𑀜𑁆𑀘. 𑀢𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀕𑁆𑀕𑀳𑀡𑀁 𑀬𑀣𑀸𑀭𑀳𑀢𑁄 𑀤𑀝𑁆𑀞𑀩𑁆𑀩𑀁, 𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑀁 𑀧𑀦 𑀅𑀯𑀺𑀲𑁂𑀲𑀢𑁄.

𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀏𑀯 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀑𑀚𑀝𑁆𑀞𑀫𑀓𑀲𑀫𑀼𑀝𑁆𑀞𑀸𑀧𑀦𑁂𑀦𑁂𑀯 𑀧𑀦𑀲𑁆𑀲 𑀉𑀧𑀣𑀫𑁆𑀪𑀦𑀓𑀺𑀘𑁆𑀘𑀲𑀺𑀤𑁆𑀥𑀺. 𑀨𑀼𑀲𑀦𑁆𑀢𑁄𑀬𑁂𑀯𑀸𑀢𑀺 𑀨𑀼𑀲𑀦𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀏𑀯. 𑀆𑀬𑀽𑀳𑀫𑀸𑀦𑀸𑀯𑀸𑀢𑀺 𑀘𑁂𑀢𑀬𑀫𑀸𑀦𑀸 𑀏𑀯 𑀅𑀪𑀺𑀲𑀦𑁆𑀤𑀳𑀦𑁆𑀢𑀻 𑀏𑀯. 𑀯𑀺𑀚𑀸𑀦𑀦𑁆𑀢𑀫𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀺𑀚𑀸𑀦𑀦𑁆𑀢𑀫𑁂𑀯 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀢𑁆𑀣 𑀆𑀳𑀸𑀭𑀓𑀺𑀘𑁆𑀘𑀲𑀸𑀥𑀦𑀜𑁆𑀘 𑀢𑁂𑀲𑀁 𑀯𑁂𑀤𑀦𑀸𑀤𑀺𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀅𑀢𑁆𑀢𑀪𑀸𑀯𑀲𑁆𑀲 𑀧𑀯𑀢𑁆𑀢𑀦𑀫𑁂𑀯. 𑀓𑀸𑀬𑀝𑁆𑀞𑀧𑀦𑁂𑀦𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀓𑀫𑁆𑀫𑀚𑀸𑀤𑀺𑀭𑀽𑀧𑀁 𑀓𑀫𑁆𑀫𑀸𑀤𑀺𑀦𑀸𑀯 𑀧𑀯𑀢𑁆𑀢𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀫𑁆𑀫𑀚𑀦𑀺𑀢𑁄𑀧𑀻’’𑀢𑀺𑀆𑀤𑀺.

𑀉𑀧𑀸𑀤𑀺𑀡𑁆𑀡𑀭𑀽𑀧𑀲𑀦𑁆𑀢𑀢𑀺𑀬𑀸 𑀉𑀧𑀢𑁆𑀣𑀫𑁆𑀪𑀦𑁂𑀦𑁂𑀯 𑀉𑀢𑀼𑀘𑀺𑀢𑁆𑀢𑀚𑀭𑀽𑀧𑀲𑀦𑁆𑀢𑀢𑀻𑀦𑀫𑁆𑀧𑀺 𑀉𑀧𑀢𑁆𑀣𑀫𑁆𑀪𑀦𑀲𑀺𑀤𑁆𑀥𑀺 𑀳𑁄𑀢𑀻𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀭𑀽𑀧𑀲𑀦𑁆𑀢𑀢𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀢𑁆𑀣𑀫𑁆𑀪𑀦𑀫𑁂𑀯 𑀲𑀦𑁆𑀥𑀸𑀬 ‘‘𑀅𑀦𑀼𑀧𑀸𑀮𑀓𑁄 𑀳𑀼𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀁. 𑀭𑀽𑀧𑀓𑀸𑀬𑀲𑁆𑀲 𑀞𑀺𑀢𑀺𑀳𑁂𑀢𑀼𑀢𑀸 𑀳𑀺 𑀬𑀸𑀧𑀦𑀸 𑀅𑀦𑀼𑀧𑀸𑀮𑀦𑀸. 𑀲𑀼𑀔𑀸𑀤𑀺𑀯𑀢𑁆𑀣𑀼𑀪𑀽𑀢𑀦𑁆𑀢𑀺 𑀲𑀼𑀔𑀸𑀤𑀻𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁. 𑀆𑀭𑀫𑁆𑀫𑀡𑀫𑁆𑀧𑀺 𑀳𑀺 𑀯𑀲𑀢𑀺 𑀏𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀸 𑀥𑀫𑁆𑀫𑀸𑀢𑀺 𑀯𑀢𑁆𑀣𑀽𑀢𑀺 𑀯𑀼𑀘𑁆𑀘𑀢𑀺. 𑀨𑀼𑀲𑀦𑁆𑀢𑁄𑀬𑁂𑀯𑀸𑀢𑀺 𑀇𑀤𑀁 𑀨𑀲𑁆𑀲𑀲𑁆𑀲 𑀨𑀼𑀲𑀦𑀲𑀪𑀸𑀯𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑁂𑀦 𑀯𑀺𑀦𑀸 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀯𑁂𑀤𑀦𑀸𑀧𑀯𑀢𑁆𑀢𑀺𑀬𑀸 𑀯𑀺𑀦𑀸 𑀲𑀢𑁆𑀢𑀸𑀦𑀁 𑀲𑀦𑁆𑀥𑀸𑀯𑀦𑀢𑀸 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀼𑀔𑀸𑀤𑀺…𑀧𑁂… 𑀳𑁄𑀢𑀻’’𑀢𑀺. 𑀦 𑀘𑁂𑀢𑁆𑀣 𑀲𑀜𑁆𑀜𑀻𑀪𑀯𑀓𑀣𑀸𑀬𑀁 𑀅𑀲𑀜𑁆𑀜𑀻𑀪𑀯𑁄 𑀤𑀲𑁆𑀲𑁂𑀢𑀩𑁆𑀩𑁄, 𑀢𑀲𑁆𑀲𑀸𑀧𑀺 𑀯𑀸 𑀓𑀸𑀭𑀡𑀪𑀽𑀢𑀯𑁂𑀤𑀦𑀸𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀞𑀺𑀢𑀺𑀬𑀸 𑀳𑁂𑀢𑀼𑀦𑁄 𑀅𑀩𑁆𑀬𑀸𑀧𑀺𑀢𑀢𑁆𑀢𑀸, 𑀢𑀣𑀸 𑀳𑀺 ‘‘𑀫𑀦𑁄𑀲𑀜𑁆𑀘𑁂𑀢𑀦𑀸…𑀧𑁂… 𑀪𑀯𑀫𑀽𑀮𑀦𑀺𑀧𑁆𑀨𑀸𑀤𑀦𑀢𑁄 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸. 𑀢𑀢𑁄 𑀏𑀯 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑁆𑀢𑀫𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀺𑀚𑀸𑀦𑀦𑁆𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄.

𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺 𑀆𑀤𑀻𑀦𑀯𑀯𑀺𑀪𑀸𑀯𑀦𑀢𑁄. 𑀦𑀺𑀓𑀦𑁆𑀢𑀻𑀢𑀺 𑀦𑀺𑀓𑀸𑀫𑀦𑀸, 𑀭𑀲𑀢𑀡𑁆𑀳𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀸 𑀳𑀺 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀩𑀮𑀯𑀢𑀻, 𑀢𑁂𑀦𑁂𑀯𑁂𑀢𑁆𑀣 𑀅𑀯𑀥𑀸𑀭𑀡𑀁 𑀓𑀢𑀁. 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀦𑀺𑀓𑀦𑁆𑀢𑀺𑀬𑁂𑀯 𑀪𑀬𑀁 𑀫𑀳𑀸𑀦𑀢𑁆𑀣𑀳𑁂𑀢𑀼𑀢𑁄. 𑀉𑀧𑀕𑀫𑀦𑀁 𑀯𑀺𑀲𑀬𑀺𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑀸𑀡𑁂𑀲𑀼 𑀯𑀺𑀲𑀬𑀯𑀺𑀜𑁆𑀜𑀸𑀡𑁂𑀲𑀼 𑀘 𑀲𑀗𑁆𑀕𑀢𑀺𑀯𑀲𑁂𑀦 𑀧𑀯𑀢𑁆𑀢𑀺, 𑀢𑀁 𑀯𑁂𑀤𑀦𑀸𑀤𑀺𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 ‘‘𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀥𑀸𑀭𑀡𑁂 𑀧𑀬𑁄𑀚𑀦𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀬𑀽𑀳𑀦𑀁 𑀅𑀪𑀺𑀲𑀦𑁆𑀤𑀳𑀦𑀁, 𑀲𑀁𑀯𑀺𑀥𑀸𑀦𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀁 𑀪𑀯𑀽𑀧𑀧𑀢𑁆𑀢𑀺𑀳𑁂𑀢𑀼𑀢𑀸𑀬 ‘‘𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑀺𑀧𑀸𑀢𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀪𑀯𑀽𑀧𑀧𑀢𑁆𑀢𑀺𑀳𑁂𑀢𑀼𑀓𑀸𑀦𑀁 𑀲𑀩𑁆𑀩𑁂𑀲𑀁 𑀅𑀦𑀢𑁆𑀣𑀸𑀦𑀁 𑀫𑀽𑀮𑀓𑀸𑀭𑀡𑀢𑀸𑀬 ‘‘𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀦𑀺𑀓𑀦𑁆𑀢𑀺𑀆𑀤𑀻𑀦𑀁 𑀲𑀧𑁆𑀧𑀝𑀺𑀪𑀬𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁 𑀓𑀸𑀭𑀡𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀓𑀢𑁆𑀯𑀸𑀢𑀺 𑀆𑀮𑀬𑀁 𑀚𑀦𑁂𑀢𑁆𑀯𑀸, 𑀢𑀡𑁆𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀻𑀢𑀸𑀤𑀻𑀦𑀁 𑀧𑀼𑀭𑀓𑁆𑀔𑀢𑀸𑀢𑀺 𑀲𑀻𑀢𑀸𑀤𑀻𑀦𑀁 𑀧𑀼𑀭𑀢𑁄 𑀞𑀺𑀢𑀸, 𑀲𑀻𑀢𑀸𑀤𑀻𑀳𑀺 𑀩𑀸𑀥𑀺𑀬𑀫𑀸𑀦𑀸𑀢𑀺 𑀅𑀢𑁆𑀣𑁄.

𑀨𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀸𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀪𑁂𑀤𑀁 𑀨𑀲𑁆𑀲𑀁 𑀧𑀯𑀢𑁆𑀢𑁂𑀦𑁆𑀢𑀸. 𑀨𑀲𑁆𑀲𑀲𑁆𑀲𑀸𑀤𑀺𑀦𑁄𑀢𑀺 𑀓𑀸𑀬𑀲𑀫𑁆𑀨𑀲𑁆𑀲𑀯𑀲𑁂𑀦 𑀨𑁄𑀝𑁆𑀞𑀩𑁆𑀩𑀲𑀗𑁆𑀔𑀸𑀢𑀲𑁆𑀲 𑀅𑀲𑁆𑀲𑀸𑀤𑀦𑀲𑀻𑀮𑀸. 𑀓𑀸𑀬𑀲𑀫𑁆𑀨𑀲𑁆𑀲𑀯𑀲𑁂𑀦 𑀳𑀺 𑀲𑀢𑁆𑀢𑀸𑀦𑀁 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀨𑀲𑁆𑀲𑀸𑀳𑀸𑀭𑀸𑀤𑀻𑀦𑀯𑀤𑀲𑁆𑀲𑀦𑁂 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀉𑀤𑁆𑀥𑀝𑀁 ‘‘𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑁂𑀲𑀽’’𑀢𑀺𑀆𑀤𑀺𑀦𑀸. 𑀨𑀲𑁆𑀲𑀲𑁆𑀲𑀸𑀤𑀺𑀦𑁄𑀢𑀺 𑀯𑀸 𑀨𑀲𑁆𑀲𑀸𑀳𑀸𑀭𑀲𑁆𑀲𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀢𑀺 𑀳𑀺 𑀨𑀲𑁆𑀲𑀸𑀳𑀸𑀭𑁂 𑀲𑀢𑁆𑀢𑀸𑀦𑀁 𑀨𑀲𑁆𑀲𑀸𑀭𑀫𑁆𑀫𑀡𑁂 𑀅𑀲𑁆𑀲𑀸𑀤𑁄, 𑀦𑀸𑀲𑀢𑀺, 𑀢𑁂𑀦𑀸𑀳 ‘‘𑀨𑀲𑁆𑀲𑀲𑁆𑀲𑀸𑀤𑀫𑀽𑀮𑀓’’𑀦𑁆𑀢𑀺𑀆𑀤𑀺.

𑀚𑀸𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀪𑀬𑀲𑁆𑀲 𑀅𑀪𑀺𑀦𑀺𑀧𑀸𑀢𑀲𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀢𑀫𑁆𑀫𑀽𑀮𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀸𑀬𑀽𑀳𑀦𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀪𑀬𑀁 𑀲𑀩𑁆𑀩𑀦𑁆𑀢𑀺 𑀧𑀜𑁆𑀘𑀯𑀻𑀲𑀢𑀺, 𑀢𑀺𑀯𑀺𑀥𑀫𑀳𑀸𑀪𑀬𑀁, 𑀅𑀜𑁆𑀜𑀜𑁆𑀘 𑀲𑀩𑁆𑀩𑀪𑀬𑀁 𑀆𑀕𑀢𑀫𑁂𑀯 𑀳𑁄𑀢𑀺 𑀪𑀬𑀸𑀥𑀺𑀝𑁆𑀞𑀸𑀦𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁄.

𑀅𑀪𑀺𑀦𑀺𑀧𑀢𑀢𑀻𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑀺. 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑀺 𑀲𑀢𑁆𑀢𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀅𑀗𑁆𑀕𑀸𑀭𑀓𑀸𑀲𑀼𑀲𑀤𑀺𑀲𑁂 𑀪𑀯𑁂 𑀅𑀪𑀺𑀦𑀺𑀧𑀸𑀢𑀲𑀤𑀺𑀲𑀻. 𑀢𑀫𑁆𑀫𑀽𑀮𑀓𑀢𑁆𑀢𑀸𑀢𑀺 𑀦𑀸𑀫𑀭𑀽𑀧𑀦𑀺𑀩𑁆𑀩𑀢𑁆𑀢𑀺𑀫𑀽𑀮𑀓𑀢𑁆𑀢𑀸. 𑀲𑀩𑁆𑀩𑀪𑀬𑀸𑀦𑀁 𑀅𑀪𑀺𑀦𑀺𑀧𑀸𑀢𑁄𑀬𑁂𑀯 𑀪𑀬𑀁 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀓𑀢𑁆𑀯𑀸.

𑀅𑀧𑁆𑀧𑁂𑀢𑀺 𑀯𑀺𑀬𑀸𑀢𑀺 𑀨𑀮𑀲𑁆𑀲 𑀅𑀢𑁆𑀢𑀮𑀸𑀪𑀳𑁂𑀢𑀼𑀪𑀸𑀯𑀢𑁄 𑀓𑀸𑀭𑀡𑀁, 𑀢𑀁 𑀦𑀺𑀬𑁆𑀬𑀸𑀤𑁂𑀢𑀺 𑀯𑀺𑀬. 𑀢𑀦𑁆𑀢𑀺 𑀨𑀮𑀁. 𑀢𑀢𑁄𑀢𑀺 𑀓𑀸𑀭𑀡𑀢𑁄. 𑀏𑀢𑁂𑀲𑀦𑁆𑀢𑀺 𑀆𑀳𑀸𑀭𑀸𑀦𑀁. 𑀬𑀣𑀸𑀯𑀼𑀢𑁆𑀢𑁂𑀦𑀸𑀢𑀺 ‘‘𑀨𑀮𑀁 𑀦𑀺𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀢𑁆𑀣𑁂𑀦. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀯𑁂𑀤𑀦𑀸𑀦𑀺𑀭𑁄𑀥𑁂𑀦𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼.

𑀧𑀝𑀺𑀲𑀦𑁆𑀥𑀺𑀁 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀁 𑀆𑀤𑀺𑀁 𑀓𑀢𑁆𑀯𑀸. 𑀉𑀧𑀸𑀤𑀺𑀡𑁆𑀡𑀓𑀆𑀳𑀸𑀭𑁂 𑀲𑀦𑁆𑀥𑀸𑀬 ‘‘𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀸𑀦𑀁 𑀆𑀳𑀸𑀭𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀢𑀡𑁆𑀳𑀸𑀦𑀺𑀤𑀸𑀦𑀸. 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀲𑀢𑁆𑀢𑀸𑀦𑀁 𑀲𑀢𑁆𑀢𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀲𑀪𑀸𑀯𑀓𑀸𑀦𑀁 𑀘𑀓𑁆𑀔𑀼 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄 𑀪𑀸𑀯𑁄 𑀯𑀢𑁆𑀣𑀽𑀢𑀺 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀲𑀦𑁆𑀢𑀢𑀻𑀦𑀁 𑀯𑀲𑁂𑀦. 𑀲𑁂𑀲𑀸𑀦𑀁 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀅𑀦𑁆𑀥𑀩𑀥𑀺𑀭𑀅𑀪𑀸𑀯𑀓𑀸𑀦𑀁. 𑀊𑀦𑀊𑀦𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀘𑀓𑁆𑀔𑀼𑀦𑀸, 𑀲𑁄𑀢𑁂𑀦, 𑀢𑀤𑀼𑀪𑀬𑁂𑀦, 𑀪𑀸𑀯𑁂𑀦 𑀘 𑀊𑀦𑀊𑀦𑀲𑀦𑁆𑀢𑀢𑀺𑀯𑀲𑁂𑀦. 𑀧𑀝𑀺𑀲𑀦𑁆𑀥𑀺𑀬𑀁 𑀚𑀸𑀢𑀸 𑀧𑀝𑀺𑀲𑀦𑁆𑀥𑀺𑀓𑀸. 𑀧𑀞𑀫𑀪𑀯𑀗𑁆𑀕𑀘𑀺𑀢𑁆𑀢𑀓𑁆𑀔𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀢𑀡𑁆𑀳𑀸𑀬𑀧𑀺 𑀦𑀺𑀤𑀸𑀦𑀁 𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀢𑀡𑁆𑀳𑀸𑀦𑀺𑀤𑀸𑀦𑀦𑁆𑀢𑀺𑀧𑀺 𑀧𑀸𑀞𑁄. 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀭𑀽𑀧𑀢𑁄 𑀦𑀬𑀢𑁄 𑀘 𑀲𑀓𑀮𑀫𑁂𑀯 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀇𑀫𑀲𑁆𑀫𑀺𑀜𑁆𑀘 𑀧𑀦 𑀞𑀸𑀦𑁂’’𑀢𑀺𑀆𑀤𑀺𑀫𑀸𑀳. 𑀅𑀢𑀻𑀢𑀸𑀪𑀺𑀫𑀼𑀔𑀁 𑀤𑁂𑀲𑀦𑀁 𑀓𑀢𑁆𑀯𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀢𑁄 𑀧𑀝𑁆𑀞𑀸𑀬 𑀅𑀢𑀻𑀢𑀥𑀫𑁆𑀫𑀸𑀪𑀺𑀫𑀼𑀔𑀁 𑀢𑀩𑁆𑀩𑀺𑀲𑀬𑀁 𑀤𑁂𑀲𑀦𑀁 𑀓𑀢𑁆𑀯𑀸 𑀢𑀣𑀸𑀓𑀸𑀭𑀡𑁂𑀦. 𑀅𑀢𑀻𑀢𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑀻𑀢𑀺 𑀅𑀢𑀻𑀢𑀪𑀯𑁂𑀦 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀯𑀝𑁆𑀝𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀪𑀸𑀯𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀅𑀢𑀻𑀢𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄 ‘‘𑀅𑀢𑀻𑀢𑁂𑀦𑁂𑀯𑀸’’𑀢𑀺 𑀅𑀦𑀯𑀥𑀸𑀭𑀡𑀢𑁄, 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀢𑀻𑀢𑀸𑀪𑀺𑀫𑀼𑀔𑀕𑁆𑀕𑀳𑀡𑀁 𑀚𑀦𑀓𑀓𑀫𑁆𑀫𑀁 𑀕𑀳𑀺𑀢𑀁, 𑀢𑀡𑁆𑀳𑀸𑀲𑀻𑀲𑁂𑀦 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄. 𑀦 𑀳𑀺 𑀓𑀫𑁆𑀫𑀼𑀦𑀸 𑀯𑀺𑀦𑀸 𑀢𑀡𑁆𑀳𑀸 𑀪𑀯𑀦𑁂𑀢𑁆𑀢𑀺 𑀬𑀼𑀚𑁆𑀚𑀢𑀺.

𑀢𑀁 𑀓𑀫𑁆𑀫𑀦𑁆𑀢𑀺 𑀢𑀡𑁆𑀳𑀸𑀲𑀻𑀲𑁂𑀦 𑀯𑀼𑀢𑁆𑀢𑀓𑀫𑁆𑀫𑀁. 𑀤𑀲𑁆𑀲𑁂𑀢𑀼𑀦𑁆𑀢𑀺 𑀢𑀁 𑀅𑀢𑀻𑀢𑀁 𑀅𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁. 𑀢𑀲𑁆𑀲𑀢𑁆𑀢𑀪𑀸𑀯𑀲𑁆𑀲 𑀚𑀦𑀓𑀁 𑀓𑀫𑁆𑀫𑀦𑁆𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀚𑀦𑀓𑀁. 𑀢𑀢𑁄 𑀧𑀭𑀫𑁆𑀧𑀺 𑀅𑀢𑁆𑀢𑀪𑀸𑀯𑀁 𑀆𑀬𑀽𑀳𑀺𑀢𑀁 𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸 𑀘 𑀦𑀸𑀫 𑀢𑀡𑁆𑀳𑀸 𑀯𑀺𑀬 𑀓𑀫𑁆𑀫𑀢𑁆𑀢𑀸𑀢𑀺 𑀓𑀫𑁆𑀫𑀲𑁆𑀲𑁂𑀯 𑀕𑀳𑀡𑀁. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀽𑀢𑀺 𑀆𑀳𑀸𑀭𑀕𑁆𑀕𑀳𑀡𑁂𑀦 𑀯𑁂𑀤𑀦𑀸𑀤𑀺𑀕𑁆𑀕𑀳𑀡𑁂𑀦𑀸𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼. 𑀅𑀢𑁆𑀢𑀪𑀸𑀯𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑁄 𑀅𑀢𑀻𑀢𑀓𑀸𑀮𑀺𑀓𑁄 𑀘 𑀅𑀢𑁆𑀢𑀪𑀸𑀯𑁄. 𑀧𑀼𑀦 𑀤𑁆𑀯𑀻𑀲𑀽𑀢𑀺 𑀢𑀡𑁆𑀳𑀸𑀕𑁆𑀕𑀳𑀡𑁂 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼. 𑀢𑀲𑁆𑀲 𑀚𑀦𑀓𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘𑁂𑀯 𑀅𑀢𑀻𑀢𑀲𑁆𑀲 𑀘 𑀅𑀢𑁆𑀢𑀪𑀸𑀯𑀲𑁆𑀲 𑀚𑀦𑀓𑀁 𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀬𑀢𑁆𑀣 𑀢𑀁 𑀓𑀫𑁆𑀫𑀁 𑀆𑀬𑀽𑀳𑀺𑀢𑀁, 𑀲𑀸 𑀅𑀢𑀻𑀢𑀸 𑀚𑀸𑀢𑀺 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀢𑁂𑀦 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀅𑀦𑀫𑀢𑀕𑁆𑀕𑀢𑀁 𑀤𑀻𑀧𑁂𑀢𑀺. 𑀲𑀗𑁆𑀔𑁂𑀧𑁂𑀦𑀸𑀢𑀺 𑀲𑀗𑁆𑀔𑁂𑀧𑁂𑀦 𑀳𑁂𑀢𑀼𑀧𑀜𑁆𑀘𑀓𑀨𑀮𑀧𑀜𑁆𑀘𑀓𑀕𑁆𑀕𑀳𑀡𑀫𑁆𑀧𑀺 𑀳𑀺 𑀲𑀗𑁆𑀔𑁂𑀧𑁄 𑀏𑀯 𑀳𑁂𑀢𑀼𑀨𑀮𑀪𑀸𑀯𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀅𑀦𑁂𑀓𑀯𑀺𑀥𑀢𑁆𑀢𑀸.

𑀬𑀤𑀺 𑀅𑀢𑀻𑀢𑁂𑀦 𑀯𑀝𑁆𑀝𑀁 𑀤𑀲𑁆𑀲𑀺𑀢𑀁, 𑀏𑀯𑀁 𑀲𑀢𑀺 𑀲𑀧𑁆𑀧𑀤𑁂𑀲𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀳𑀺 𑀬𑀤𑀺𑀧𑀺 𑀲𑀭𑀽𑀧𑀢𑁄 𑀅𑀦𑀸𑀕𑀢𑁂𑀦 𑀯𑀝𑁆𑀝𑀁 𑀇𑀥 𑀦 𑀤𑀲𑁆𑀲𑀺𑀢𑀁, 𑀦𑀬𑀢𑁄 𑀧𑀦 𑀢𑀲𑁆𑀲𑀧𑀺 𑀤𑀲𑁆𑀲𑀺𑀢𑀢𑁆𑀢𑀸 𑀦𑀺𑀧𑁆𑀧𑀤𑁂𑀲𑀸 𑀏𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀤𑀓𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀦𑁆𑀢𑀺 𑀉𑀤𑀓𑀁 𑀧𑀭𑀺𑀧𑁆𑀮𑀯𑀯𑀲𑁂𑀦 𑀦𑀺𑀧𑀦𑁆𑀦𑀁. 𑀧𑀭𑀪𑀸𑀕𑀦𑁆𑀢𑀺 𑀧𑀭𑀉𑀢𑁆𑀢𑀫𑀗𑁆𑀕𑀪𑀸𑀕𑀁. 𑀑𑀭𑀢𑁄𑀢𑀺 𑀢𑀢𑁄 𑀅𑀧𑀭𑀪𑀸𑀕𑀢𑁄 𑀑𑀮𑁄𑀓𑁂𑀦𑁆𑀢𑁄. 𑀅𑀧𑀭𑀺𑀧𑀼𑀡𑁆𑀡𑁄𑀢𑀺 𑀯𑀺𑀓𑀮𑀸𑀯𑀬𑀯𑁄. 𑀏𑀯𑀁𑀲𑀫𑁆𑀧𑀤𑀦𑁆𑀢𑀺𑀆𑀤𑀺 𑀉𑀧𑀫𑀸𑀬 𑀲𑀁𑀲𑀦𑁆𑀤𑀦𑀁.

𑀬𑀣𑀸 𑀳𑀺 𑀕𑀻𑀯𑀸 𑀲𑀭𑀻𑀭𑀲𑀦𑁆𑀥𑀸𑀭𑀓𑀓𑀡𑁆𑀟𑀭𑀸𑀦𑀁 𑀫𑀽𑀮𑀝𑁆𑀞𑀸𑀦𑀪𑀽𑀢𑀸, 𑀏𑀯𑀁 𑀅𑀢𑁆𑀢𑀪𑀸𑀯𑀲𑀦𑁆𑀥𑀸𑀭𑀓𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀫𑀽𑀮𑀪𑀽𑀢𑀸 𑀢𑀡𑁆𑀳𑀸𑀢𑀺 𑀯𑀼𑀢𑁆𑀢𑀁 ‘‘𑀕𑀻𑀯𑀸𑀬 𑀤𑀺𑀝𑁆𑀞𑀓𑀸𑀮𑁄’’𑀢𑀺. 𑀬𑀣𑀸 𑀯𑁂𑀤𑀦𑀸𑀤𑀺𑀅𑀦𑁂𑀓𑀸𑀯𑀬𑀯𑀲𑀫𑀼𑀤𑀸𑀬𑀪𑀽𑀢𑁄 𑀅𑀢𑁆𑀢𑀪𑀸𑀯𑁄, 𑀏𑀯𑀁 𑀨𑀸𑀲𑀼𑀓𑀧𑀺𑀝𑁆𑀞𑀺𑀓𑀡𑁆𑀟𑀓𑀸𑀤𑀺𑀅𑀦𑁂𑀓𑀸𑀯𑀬𑀯𑀲𑀫𑀼𑀤𑀸𑀬𑀪𑀽𑀢𑀸 𑀧𑀺𑀝𑁆𑀞𑀻𑀢𑀺 ‘‘𑀧𑀺𑀝𑁆𑀞𑀺𑀬𑀸…𑀧𑁂… 𑀢𑀲𑁆𑀲 𑀤𑀺𑀝𑁆𑀞𑀓𑀸𑀮𑁄’’𑀢𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀲𑀗𑁆𑀔𑀸𑀢𑀦𑁆𑀢𑀺 𑀢𑀡𑁆𑀳𑀸𑀬 𑀓𑀣𑀺𑀢𑀁. 𑀇𑀥 𑀤𑁂𑀲𑀦𑀸𑀬 𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 ‘‘𑀦𑀗𑁆𑀕𑀼𑀝𑁆𑀞𑀫𑀽𑀮𑀲𑁆𑀲 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀭𑀺𑀬𑁄𑀲𑀸𑀦𑁂 ‘‘𑀦𑀗𑁆𑀕𑀼𑀝𑁆𑀞𑀫𑀽𑀮𑀁 𑀧𑀲𑁆𑀲𑁂𑀬𑁆𑀬𑀸’’𑀢𑀺 𑀉𑀧𑀫𑀸𑀤𑀲𑁆𑀲𑀦𑀁 𑀓𑀢𑀁. 𑀦𑀬𑀢𑁄 𑀧𑀭𑀺𑀧𑀼𑀡𑁆𑀡𑀪𑀸𑀯𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀅𑀦𑀸𑀕𑀢𑀲𑁆𑀲𑀸𑀧𑀺 𑀧𑀘𑁆𑀘𑀬𑀯𑀝𑁆𑀝𑀲𑁆𑀲 𑀳𑁂𑀢𑀼𑀯𑀲𑁂𑀦 𑀨𑀮𑀯𑀲𑁂𑀦 𑀯𑀸 𑀧𑀭𑀺𑀧𑀼𑀡𑁆𑀡𑀪𑀸𑀯𑀲𑁆𑀲 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀻𑀬𑀢𑁆𑀢𑀸 𑀆𑀤𑀺𑀢𑁄 𑀨𑀮𑀳𑁂𑀢𑀼𑀲𑀦𑁆𑀥𑀺, 𑀫𑀚𑁆𑀛𑁂 𑀳𑁂𑀢𑀼𑀨𑀮𑀲𑀦𑁆𑀥𑀺, 𑀅𑀦𑁆𑀢𑁂𑀧𑀺 𑀨𑀮𑀳𑁂𑀢𑀼𑀲𑀦𑁆𑀥𑀻𑀢𑀺 𑀏𑀯𑀁 𑀢𑀺𑀲𑀦𑁆𑀥𑀺𑀓𑀢𑁆𑀢𑀸 𑀘𑀢𑀼𑀲𑀗𑁆𑀔𑁂𑀧𑀫𑁂𑀯 𑀯𑀝𑁆𑀝𑀁 𑀤𑀲𑁆𑀲𑀺𑀢𑀦𑁆𑀢𑀺.

𑀆𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂𑀢𑀺 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀼…𑀧𑁂… 𑀆𑀳𑀸𑀭𑀸’’𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀆𑀳𑀸𑀭𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂…𑀧𑁂… 𑀅𑀦𑀼𑀕𑁆𑀕𑀳𑀸𑀬𑀸’’𑀢𑀺 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑀺𑀢𑁂 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂. 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺 𑀘𑀢𑀼𑀆𑀳𑀸𑀭𑀯𑀺𑀪𑀸𑀕𑀤𑀻𑀧𑀓𑀁 𑀤𑁂𑀲𑀦𑀁 𑀉𑀤𑁆𑀤𑁂𑀲𑀯𑀲𑁂𑀦𑁂𑀯 𑀦𑀺𑀝𑁆𑀞𑀸𑀧𑁂𑀲𑀺, 𑀉𑀧𑀭𑀺 𑀆𑀯𑀚𑁆𑀚𑁂𑀢𑁆𑀯𑀸 𑀢𑀼𑀡𑁆𑀳𑀻 𑀦𑀺𑀲𑀻𑀤𑀺. 𑀤𑀺𑀝𑁆𑀞𑀺𑀕𑀢𑀺𑀓𑁄𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑁄. 𑀯𑀭𑀕𑀦𑁆𑀥𑀯𑀸𑀲𑀺𑀢𑀦𑁆𑀢𑀺 𑀲𑀪𑀸𑀯𑀲𑀺𑀤𑁆𑀥𑁂𑀦 𑀘𑀦𑁆𑀤𑀦𑀕𑀦𑁆𑀥𑁂𑀦 𑀘𑁂𑀯 𑀢𑀤𑀜𑁆𑀜𑀦𑀸𑀦𑀸𑀕𑀦𑁆𑀥𑁂𑀦 𑀘 𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀯𑀭𑀕𑀦𑁆𑀥𑀯𑀸𑀲𑀺𑀢𑀁. 𑀭𑀢𑀦𑀘𑀗𑁆𑀓𑁄𑀝𑀯𑀭𑁂𑀦𑀸𑀢𑀺 𑀭𑀢𑀦𑀫𑀬𑁂𑀦 𑀉𑀢𑁆𑀢𑀫𑀘𑀗𑁆𑀓𑁄𑀝𑀓𑁂𑀦. 𑀤𑁂𑀲𑀦𑀸𑀦𑀼𑀲𑀦𑁆𑀥𑀺𑀁 𑀖𑀝𑁂𑀦𑁆𑀢𑁄𑀢𑀺 𑀬𑀣𑀸𑀤𑁂𑀲𑀺𑀢𑀸𑀬 𑀤𑁂𑀲𑀦𑀸𑀬 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀦𑁆𑀢𑁄, 𑀬𑀣𑀸 𑀉𑀧𑀭𑀺𑀤𑁂𑀲𑀦𑀸 𑀯𑀤𑁆𑀥𑁂𑀬𑁆𑀬, 𑀏𑀯𑀁 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑁄. 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀆𑀳𑀸𑀭𑁂𑀢𑀻𑀢𑀺 𑀢𑀲𑁆𑀲 𑀆𑀳𑀸𑀭𑀡𑀓𑀺𑀭𑀺𑀬𑀸𑀬 𑀯𑀼𑀢𑁆𑀢𑀧𑀼𑀘𑁆𑀙𑀸𑀬 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀸𑀝𑁂𑀦𑁆𑀢𑁄 ‘‘𑀬𑁄 𑀏𑀢𑀁…𑀧𑁂… 𑀪𑀼𑀜𑁆𑀚𑀢𑀺 𑀯𑀸’’𑀢𑀺 𑀆𑀳.

𑀯𑀺𑀜𑁆𑀜𑀸𑀡𑀸𑀳𑀸𑀭𑁂 𑀦𑀸𑀫 𑀇𑀘𑁆𑀙𑀺𑀢𑁂 𑀢𑀲𑁆𑀲 𑀉𑀧𑀪𑀼𑀜𑁆𑀚𑀓𑁂𑀦𑀧𑀺 𑀪𑀯𑀺𑀢𑀩𑁆𑀩𑀁, 𑀲𑁄 ‘‘𑀓𑁄 𑀦𑀼 𑀔𑁄’’𑀢𑀺 𑀅𑀬𑀁 𑀧𑀼𑀘𑁆𑀙𑀸𑀬 𑀅𑀥𑀺𑀧𑁆𑀧𑀸𑀬𑁄. 𑀉𑀢𑀼𑀲𑀫𑀬𑁂𑀢𑀺 𑀕𑀩𑁆𑀪𑀯𑀼𑀝𑁆𑀞𑀸𑀦𑀲𑀫𑀬𑁂. 𑀲𑁄 𑀳𑀺 𑀉𑀢𑀼𑀲𑀫𑀬𑀲𑁆𑀲 𑀫𑀢𑁆𑀢𑀓𑀲𑀫𑀬𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑁄. ‘‘𑀉𑀤𑀓𑁂𑀦 𑀅𑀡𑁆𑀟𑀸𑀦𑀺 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀫𑀳𑀸𑀲𑀫𑀼𑀤𑁆𑀤𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀕𑀺𑀚𑁆𑀛𑀧𑁄𑀢𑀓𑀸 𑀯𑀺𑀬 𑀆𑀳𑀸𑀭𑀲𑀜𑁆𑀘𑁂𑀢𑀦𑀸𑀬 𑀢𑀸𑀦𑀺 𑀓𑀘𑁆𑀙𑀧𑀡𑁆𑀟𑀸𑀦𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂𑀦 𑀬𑀸𑀧𑁂𑀦𑁆𑀢𑀻𑀢𑀺 𑀅𑀬𑀁 𑀢𑀲𑁆𑀲 𑀣𑁂𑀭𑀲𑁆𑀲 𑀮𑀤𑁆𑀥𑀺. 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀮𑀤𑁆𑀥𑀻𑀢𑀺 𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂𑀲𑀼 𑀓𑀺𑀜𑁆𑀘𑀸𑀧𑀺 𑀣𑁂𑀭𑀲𑁆𑀲 𑀬𑀼𑀢𑁆𑀢𑀸 𑀅𑀬𑀼𑀢𑁆𑀢𑀸 𑀯𑀸 𑀅𑀬𑀁 𑀮𑀤𑁆𑀥𑀺. 𑀇𑀫𑀁 𑀧𑀜𑁆𑀳𑀦𑁆𑀢𑀺 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀆𑀳𑀸𑀭𑁂𑀢𑀻’’𑀢𑀺 𑀇𑀫𑀁 𑀧𑀜𑁆𑀳𑀁 𑀏𑀢𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀮𑀤𑁆𑀥𑀺𑀬𑀸 𑀦 𑀧𑀦 𑀧𑀼𑀘𑁆𑀙𑀢𑀺, 𑀅𑀣 𑀔𑁄 𑀲𑀢𑁆𑀢𑀼𑀧𑀮𑀤𑁆𑀥𑀺𑀬𑀸 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁄. 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄 𑀉𑀫𑁆𑀫𑀢𑁆𑀢𑀓𑀲𑀤𑀺𑀲𑀢𑁆𑀢𑀸 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀺𑀢𑁆𑀯𑀸 𑀧𑀼𑀘𑁆𑀙𑀸𑀬 𑀓𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀆𑀳𑀸𑀭𑁂𑀢𑀻𑀢𑀺 𑀦𑀸𑀳𑀁 𑀯𑀤𑀸𑀫𑀻’’𑀢𑀺𑀆𑀤𑀺.

𑀢𑀲𑁆𑀫𑀺𑀁 𑀫𑀬𑀸 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀯𑀘𑀦𑁂 𑀫𑀬𑀸 ‘‘𑀆𑀳𑀸𑀭𑁂𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀲𑀢𑀺. 𑀅𑀬𑀁 𑀧𑀜𑁆𑀳𑁄𑀢𑀺 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀆𑀳𑀸𑀭𑁂𑀢𑀻’’𑀢𑀺 𑀅𑀬𑀁 𑀧𑀜𑁆𑀳𑁄 𑀬𑀼𑀢𑁆𑀢𑁄 𑀪𑀯𑁂𑀬𑁆𑀬. 𑀏𑀯𑀁 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂𑀢𑀺 𑀲𑀢𑁆𑀢𑀼𑀧𑀮𑀤𑁆𑀥𑀺𑀁 𑀅𑀦𑀸𑀤𑀸𑀬 ‘‘𑀓𑀢𑀫𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀥𑀫𑁆𑀫𑀧𑀯𑀢𑁆𑀢𑀯𑀲𑁂𑀦𑁂𑀯 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂. 𑀢𑁂𑀦𑁂𑀯 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀢𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀳 𑀉𑀧𑁆𑀧𑀦𑁆𑀦𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀅𑀢𑀻𑀢𑀪𑀯𑁂 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀯𑀲𑁂𑀦 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀦𑀸𑀫𑀭𑀽𑀧𑁂 𑀚𑀸𑀢𑁂 𑀲𑀢𑀻𑀢𑀺 𑀦𑀸𑀫𑀭𑀽𑀧𑁂 𑀦𑀺𑀩𑁆𑀩𑀢𑁆𑀢𑁂 𑀢𑀧𑁆𑀧𑀘𑁆𑀘𑀬𑀪𑀽𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀴𑀸𑀬𑀢𑀦𑀁 𑀳𑁄𑀢𑀺.

𑀢𑀢𑁆𑀭𑀸𑀬𑀁 𑀧𑀘𑁆𑀘𑀬𑀯𑀺𑀪𑀸𑀕𑁄 𑁋 𑀦𑀸𑀫𑀦𑁆𑀢𑀺 𑀯𑁂𑀤𑀦𑀸𑀤𑀺𑀔𑀦𑁆𑀥𑀢𑁆𑀢𑀬𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀭𑀽𑀧𑀁 𑀧𑀦 𑀲𑀢𑁆𑀢𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀁, 𑀦𑀺𑀬𑀫𑀢𑁄 𑀘𑀢𑁆𑀢𑀸𑀭𑀺 𑀪𑀽𑀢𑀸𑀦𑀺 𑀙 𑀯𑀢𑁆𑀣𑀽𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀳𑀸𑀭𑁄 𑀘. 𑀢𑀢𑁆𑀣 𑀯𑀺𑀧𑀸𑀓𑀦𑀸𑀫𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀳𑀤𑀬𑀯𑀢𑁆𑀣𑀼𑀦𑁄 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀙𑀝𑁆𑀞𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀭𑁂𑀲𑀁 𑀧𑀦 𑀧𑀜𑁆𑀘𑀸𑀬𑀢𑀦𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀲𑀳𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀁. 𑀧𑀯𑀢𑁆𑀢𑁂 𑀯𑀺𑀧𑀸𑀓𑀦𑀸𑀫𑀁 𑀯𑀺𑀧𑀸𑀓𑀲𑁆𑀲 𑀙𑀝𑁆𑀞𑀸𑀬𑀢𑀦𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀯𑀺𑀧𑀸𑀓𑀁 𑀧𑀦 𑀅𑀯𑀺𑀧𑀸𑀓𑀲𑁆𑀲 𑀙𑀝𑁆𑀞𑀲𑁆𑀲 𑀢𑀢𑁄 𑀯𑀺𑀧𑀸𑀓𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀫𑁆𑀧𑀺 𑀇𑀢𑀭𑀫𑁆𑀧𑀺 𑀯𑀺𑀧𑀸𑀓𑀦𑀸𑀫𑀁 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀅𑀯𑀺𑀧𑀸𑀓𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀢𑁄 𑀧𑀦 𑀯𑀢𑁆𑀣𑀼𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀬𑀁 𑀙𑀝𑁆𑀞𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑁆𑀢𑀸𑀭𑀺 𑀧𑀦 𑀪𑀽𑀢𑀸𑀦𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀚𑀻𑀯𑀺𑀢𑀁 𑀅𑀢𑁆𑀣𑀺𑀅𑀯𑀺𑀕𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀢𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁨.𑁫𑁯𑁪) 𑀕𑀳𑁂𑀢𑀩𑁆𑀩𑁄.

𑀧𑀜𑁆𑀳𑀲𑁆𑀲 𑀑𑀓𑀸𑀲𑀁 𑀤𑁂𑀦𑁆𑀢𑁄𑀢𑀺 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀨𑀼𑀲𑀢𑀻’’𑀢𑀺 𑀇𑀫𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀧𑀜𑁆𑀳𑀲𑁆𑀲 𑀑𑀓𑀸𑀲𑀁 𑀤𑁂𑀦𑁆𑀢𑁄. 𑀢𑀢𑁄 𑀯𑀺𑀯𑁂𑀘𑁂𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀦 𑀪𑀕𑀯𑀢𑀸 𑀘 𑀯𑀼𑀢𑁆𑀢𑀧𑀤𑁂𑀲𑀼. 𑀲𑀢𑁆𑀢𑁄𑀢𑀺 𑀅𑀢𑁆𑀢𑀸. 𑀲𑁄 𑀧𑀦 𑀉𑀘𑁆𑀙𑁂𑀤𑀯𑀸𑀤𑀺𑀦𑁄𑀧𑀺 𑀬𑀸𑀯 𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀢𑀸𑀯 𑀅𑀢𑁆𑀣𑁂𑀯𑀸𑀢𑀺 𑀮𑀤𑁆𑀥𑀺, 𑀧𑀕𑁂𑀯 𑀲𑀲𑁆𑀲𑀢𑀯𑀸𑀤𑀺𑀦𑁄. 𑀪𑀽𑀢𑁄𑀢𑀺 𑀯𑀺𑀚𑁆𑀚𑀫𑀸𑀦𑁄. 𑀦𑀺𑀧𑁆𑀨𑀢𑁆𑀢𑁄𑀢𑀺 𑀦𑀺𑀧𑁆𑀨𑀦𑁆𑀦𑁄. 𑀦 𑀢𑀲𑁆𑀲 𑀤𑀸𑀦𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀁 𑀓𑀺𑀜𑁆𑀘𑀺 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺. 𑀇𑀤𑀧𑁆𑀧𑀘𑁆𑀘𑀬𑀸 𑀇𑀤𑀦𑁆𑀢𑀺 𑀇𑀫𑀲𑁆𑀫𑀸 𑀯𑀺𑀜𑁆𑀜𑀸𑀡𑀸𑀳𑀸𑀭𑀧𑀘𑁆𑀘𑀬𑀸 𑀇𑀤𑀁 𑀦𑀸𑀫𑀭𑀽𑀧𑀁. 𑀧𑀼𑀦 𑀇𑀤𑀧𑁆𑀧𑀘𑁆𑀘𑀬𑀸 𑀇𑀤𑀦𑁆𑀢𑀺 𑀇𑀫𑀲𑁆𑀫𑀸 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀇𑀤𑀁 𑀲𑀴𑀸𑀬𑀢𑀦𑀦𑁆𑀢𑀺 𑀏𑀯𑀁 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀓𑀣𑀺𑀢𑀢𑁆𑀢𑀸 𑀬𑀣𑀸 𑀧𑀘𑁆𑀘𑀬𑀢𑁄 𑀦𑀺𑀩𑁆𑀩𑀢𑁆𑀢𑀁 𑀲𑀗𑁆𑀔𑀸𑀭𑀫𑀢𑁆𑀢𑀫𑀺𑀤𑀦𑁆𑀢𑀺 𑀲𑀜𑁆𑀜𑀢𑁆𑀢𑀺𑀁 𑀉𑀧𑀕𑀢𑁄. 𑀢𑁂𑀦𑀸𑀧𑀻𑀢𑀺 𑀲𑀜𑁆𑀜𑀢𑁆𑀢𑀼𑀧𑀕𑀢𑁂𑀦𑀸𑀧𑀺. 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸𑀢𑀺 𑀬𑀣𑀸 𑀧𑀼𑀘𑁆𑀙𑀸𑀬 𑀅𑀯𑀲𑀭𑁄 𑀦 𑀳𑁄𑀢𑀺, 𑀢𑀣𑀸 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸. 𑀤𑁂𑀲𑀦𑀸𑀭𑀼𑀴𑁆𑀳𑀦𑁆𑀢𑀺 𑀬𑀢𑁄 𑀲𑀴𑀸𑀬𑀢𑀦𑀧𑀤𑀢𑁄 𑀧𑀝𑁆𑀞𑀸𑀬 ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀻𑀣𑀺𑀁 𑀆𑀭𑀼𑀴𑁆𑀳𑀫𑁂𑀯. 𑀢𑀫𑁂𑀯𑀸𑀢𑀺 𑀲𑀴𑀸𑀬𑀢𑀦𑀧𑀤𑀫𑁂𑀯 𑀕𑀳𑁂𑀢𑁆𑀯𑀸. 𑀯𑀺𑀯𑀚𑁆𑀚𑁂𑀦𑁆𑀢𑁄𑀢𑀺 𑀯𑀺𑀯𑀝𑁆𑀝𑁂𑀦𑁆𑀢𑁄. 𑀏𑀯𑀫𑀸𑀳𑀸𑀢𑀺 ‘‘𑀙𑀦𑁆𑀦𑀁𑀢𑁆𑀯𑁂𑀯𑀸’’𑀢𑀺𑀆𑀤𑀺𑀆𑀓𑀸𑀭𑁂𑀦 𑀏𑀯𑀁 𑀤𑁂𑀲𑀺𑀢𑁂, ‘‘𑀯𑀺𑀦𑁂𑀬𑁆𑀬𑀚𑀦𑁄 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀏𑀯𑀫𑀸𑀳. 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸𑀢𑀺 𑀏𑀯𑀁 𑀧𑀼𑀭𑀺𑀫𑀪𑀯𑀢𑁄 𑀆𑀬𑀢𑀺𑀪𑀯𑀲𑁆𑀲 𑀧𑀘𑁆𑀘𑀬𑀯𑀲𑁂𑀦 𑀫𑀽𑀮𑀓𑀸𑀭𑀡𑀯𑀲𑁂𑀦 𑀘 𑀤𑁂𑀲𑀺𑀢𑀢𑁆𑀢𑀸 ‘‘𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀻’’𑀢𑀺 𑀯𑀼𑀢𑁆𑀢𑀁. 𑀢𑀤𑀫𑀺𑀦𑀸 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀺 𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀬𑁂 𑀧𑀘𑁆𑀘𑀬𑀲𑀫𑀯𑀸𑀬𑁂 𑀢𑁂𑀦𑀢𑁆𑀢𑀪𑀸𑀯𑁂𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸, 𑀢𑁂 𑀩𑀸𑀳𑀺𑀭𑀓𑀮𑀺𑀗𑁆𑀕𑁂 𑀞𑀺𑀢𑀸𑀧𑀺 𑀢𑁂𑀦𑁂𑀯 𑀢𑀢𑁆𑀣 𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀪𑀸𑀯𑀺𑀦𑀁 𑀲𑀫𑀺𑀢𑀩𑀸𑀳𑀺𑀢𑀧𑀸𑀧𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑀡𑀲𑀫𑁆𑀫𑀢𑀸𑀬𑁂𑀯 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸𑀬𑁂𑀯𑀸𑀢𑀺 𑀢𑁂 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦𑀸𑀢𑀺 𑀤𑀼𑀓𑁆𑀔𑀅𑀭𑀺𑀬𑀲𑀘𑁆𑀘𑀯𑀲𑁂𑀦. 𑀅𑀜𑁆𑀜𑀣𑀸 𑀓𑀣𑀁 𑀩𑀸𑀳𑀺𑀭𑀓𑀸𑀧𑀺 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀦𑁆𑀢𑀺 𑀦 𑀚𑀸𑀦𑀦𑁆𑀢𑀺. 𑀲𑀘𑁆𑀘𑀤𑁂𑀲𑀦𑀸𑀪𑀸𑀯𑀢𑁄 ‘‘𑀲𑀳 𑀢𑀡𑁆𑀳𑀸𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺. 𑀢𑀁 𑀦 𑀲𑀼𑀝𑁆𑀞𑀼. 𑀬𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀇𑀥 𑀚𑀸𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀲𑀸 𑀘 𑀢𑀡𑁆𑀳𑀸 𑀏𑀯 𑀲𑀦𑁆𑀢𑀸𑀦𑁂𑀦, 𑀢𑀡𑁆𑀳𑁂𑀯 𑀲𑀸 𑀚𑀸𑀢𑀺. 𑀚𑀭𑀸𑀫𑀭𑀡𑀜𑁆𑀘𑁂𑀢𑁆𑀣 𑀧𑀸𑀓𑀝𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀦 𑀔𑀡𑀺𑀓𑀁, 𑀢𑀲𑁆𑀫𑀸 𑀲𑀢𑀡𑁆𑀳𑀸 𑀏𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀲𑀫𑀼𑀤𑀬𑁄𑀢𑀺 𑀪𑀽𑀢𑀓𑀣𑀦𑀫𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦 𑀦 𑀚𑀸𑀦𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀬𑀢𑁆𑀣 𑀢𑀡𑁆𑀳𑀸 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸, 𑀢𑁂𑀲𑀼 𑀲𑀩𑁆𑀩𑀧𑀤𑁂𑀲𑀼. 𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀼𑀕𑁆𑀕𑀮𑁄 𑀧𑀭𑀫𑀢𑁆𑀣𑀢𑁄 𑀲𑀫𑀡𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀲𑀸𑀫𑀜𑁆𑀜𑀁 𑀩𑁆𑀭𑀳𑁆𑀫𑀜𑁆𑀜𑀜𑁆𑀘𑀸𑀢𑀺 𑀆𑀳 ‘‘𑀅𑀭𑀺𑀬…𑀧𑁂… 𑀩𑁆𑀭𑀳𑁆𑀫𑀜𑁆𑀜𑀜𑁆𑀘𑀸’’𑀢𑀺. 𑀬𑁂𑀦 𑀳𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀲𑀫𑀡-𑀲𑀤𑁆𑀤𑁄 𑀩𑁆𑀭𑀸𑀳𑁆𑀫𑀡-𑀲𑀤𑁆𑀤𑁄 𑀘 𑀲𑀓𑁂 𑀅𑀢𑁆𑀣𑁂 𑀦𑀺𑀭𑀼𑀴𑁆𑀳𑁄, 𑀢𑀲𑁆𑀲 𑀯𑀲𑁂𑀦 𑀅𑀪𑀺𑀦𑁆𑀦𑁄𑀧𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀪𑀬𑀢𑁆𑀣𑀸𑀧𑀻’’𑀢𑀺. 𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀓𑀣𑁂𑀲𑀺 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸.

𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀇𑀫𑁂 𑀥𑀫𑁆𑀫𑁂 𑀓𑀢𑀫𑁂 𑀥𑀫𑁆𑀫𑁂𑀢𑀺 𑀘 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀲𑀗𑁆𑀕𑀳𑁄. 𑀏𑀢𑀸𑀦𑀺 𑀳𑀺 𑀧𑀤𑀸𑀦𑀺 𑀚𑀭𑀸𑀫𑀭𑀡𑀸𑀤𑀻𑀦𑀁 𑀲𑀸𑀥𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀧𑀜𑁆𑀘𑀪𑀽𑀢𑀸𑀦𑀻𑀢𑀺 𑀆𑀳 ‘‘𑀏𑀢𑁆𑀢𑀓𑀁 𑀧𑀧𑀜𑁆𑀘𑀁 𑀓𑀢𑁆𑀯𑀸 𑀓𑀣𑀺𑀢𑀁, 𑀤𑁂𑀲𑀦𑀁…𑀧𑁂… 𑀅𑀚𑁆𑀛𑀸𑀲𑀬𑁂𑀦𑀸’’𑀢𑀺. 𑀇𑀫𑀺𑀦𑀸 𑀢𑀸𑀦𑁂𑀯 𑀚𑀭𑀸𑀫𑀭𑀡𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀆𑀤𑀺𑀢𑁄 ‘‘𑀇𑀫𑁂 𑀥𑀫𑁆𑀫𑁂’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑀤𑀲𑀸𑀥𑀸𑀭𑀡𑀢𑁄 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀬𑀣𑀸𑀦𑀼𑀮𑁄𑀫𑀲𑀸𑀲𑀦𑀜𑁆𑀳𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸, 𑀦 𑀬𑀣𑀸𑀥𑀫𑁆𑀫𑀲𑀸𑀲𑀦𑀦𑁆𑀢𑀺.

𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀘𑁆𑀘𑀸𑀦𑀕𑁄𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀬𑀲𑁆𑀫𑀸 𑀇𑀥 𑀚𑀸𑀦𑀦𑁆𑀢𑀸𑀧𑀺 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀯𑀤𑀦𑁆𑀢𑀺 𑀅𑀚𑀸𑀦𑀦𑁆𑀢𑀸𑀧𑀺 𑀩𑀸𑀳𑀺𑀭𑀓𑀸𑀧𑀺 𑀲𑀸𑀲𑀦𑀺𑀓𑀸𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦𑀧𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦𑀧𑀺, 𑀢𑀲𑁆𑀫𑀸 𑀢𑀁 𑀩𑀳𑀽𑀦𑀁 𑀯𑀘𑀦𑀁 𑀉𑀧𑀸𑀤𑀸𑀬 𑀆𑀫𑁂𑀟𑀺𑀢𑀯𑀲𑁂𑀦 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀢𑀣𑀸𑀦𑀺𑀤𑁆𑀤𑀺𑀝𑁆𑀞𑀢𑀸𑀤𑀲𑁆𑀲𑀦𑀢𑁆𑀣𑀁 𑀳𑀺𑀲𑁆𑀲 𑀅𑀬𑀁 𑀆𑀫𑁂𑀟𑀺𑀢𑀧𑀬𑁄𑀕𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀧𑀭𑁂𑀳𑀺𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀧𑀦𑀸𑀬𑀁 𑀏𑀯𑀁 𑀯𑀼𑀘𑁆𑀘𑀫𑀸𑀦𑀸 𑀅𑀢𑁆𑀣𑀜𑁆𑀘 𑀮𑀓𑁆𑀔𑀡𑀜𑁆𑀘 𑀉𑀧𑀸𑀤𑀸𑀬 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀯𑀘𑀦𑁂 𑀬𑀲𑁆𑀫𑀸 𑀯𑀺𑀜𑁆𑀜𑀽 𑀏𑀯 𑀧𑀫𑀸𑀡𑀁, 𑀦 𑀅𑀯𑀺𑀜𑁆𑀜𑀽, 𑀢𑀲𑁆𑀫𑀸 ‘‘𑀬𑀁 𑀧𑀡𑁆𑀟𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑁂 𑀅𑀯𑀬𑀯𑀸 𑀅𑀲𑁆𑀲𑀸𑀢𑀺 𑀤𑁆𑀯𑀬𑀁, 𑀤𑀼𑀯𑀺𑀥𑀁 𑀤𑀺𑀝𑁆𑀞𑀺𑀕𑀸𑀳𑀯𑀢𑁆𑀣𑀼, 𑀤𑁆𑀯𑀬𑀁 𑀤𑀺𑀝𑁆𑀞𑀺𑀕𑀸𑀳𑀯𑀲𑁂𑀦 𑀦𑀺𑀲𑁆𑀲𑀺𑀢𑁄 𑀅𑀧𑀲𑁆𑀲𑀺𑀢𑁄𑀢𑀺 𑀤𑁆𑀯𑀬𑀦𑀺𑀲𑁆𑀲𑀺𑀢𑁄. 𑀢𑁂𑀦𑀸𑀳 ‘‘𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀦𑀺𑀲𑁆𑀲𑀺𑀢𑁄’’𑀢𑀺. 𑀬𑀸𑀬 𑀤𑀺𑀝𑁆𑀞𑀺𑀬𑀸 ‘‘𑀲𑀩𑁆𑀩𑁄𑀬𑀁 𑀮𑁄𑀓𑁄 𑀅𑀢𑁆𑀣𑀺 𑀯𑀺𑀚𑁆𑀚𑀢𑀺 𑀲𑀩𑁆𑀩𑀓𑀸𑀮𑀁 𑀉𑀧𑀮𑀩𑁆𑀪𑀢𑀻’’𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀕𑀡𑁆𑀳𑀸𑀢𑀺, 𑀲𑀸 𑀤𑀺𑀝𑁆𑀞𑀺 𑀅𑀢𑁆𑀣𑀺𑀢𑀸, 𑀲𑀸 𑀏𑀯 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀮𑁄𑀓𑁄 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀕𑀸𑀳𑀢𑀸𑀬 𑀲𑀲𑁆𑀲𑀢𑁄, 𑀢𑀁 𑀲𑀲𑁆𑀲𑀢𑀁. 𑀬𑀸𑀬 𑀤𑀺𑀝𑁆𑀞𑀺𑀬𑀸 ‘‘𑀲𑀩𑁆𑀩𑁄𑀬𑀁 𑀮𑁄𑀓𑁄 𑀦𑀢𑁆𑀣𑀺 𑀦 𑀳𑁄𑀢𑀺 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀕𑀡𑁆𑀳𑀸𑀢𑀺, 𑀲𑀸 𑀤𑀺𑀝𑁆𑀞𑀺 𑀦𑀢𑁆𑀣𑀺𑀢𑀸, 𑀲𑀸 𑀏𑀯 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀉𑀧𑁆𑀧𑀦𑁆𑀦𑀕𑀸𑀳𑀢𑀸𑀬 𑀉𑀘𑁆𑀙𑁂𑀤𑁄, 𑀢𑀁 𑀉𑀘𑁆𑀙𑁂𑀤𑀁. 𑀮𑁄𑀓𑁄 𑀦𑀸𑀫 𑀲𑀗𑁆𑀔𑀸𑀭𑀮𑁄𑀓𑁄 𑀢𑀫𑁆𑀳𑀺 𑀕𑀳𑁂𑀢𑀩𑁆𑀩𑀢𑁄. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬𑀸𑀢𑀺 𑀅𑀯𑀺𑀧𑀭𑀻𑀢𑀧𑀜𑁆𑀜𑀸𑀬 𑀬𑀣𑀸𑀪𑀽𑀢𑀧𑀜𑁆𑀜𑀸𑀬. 𑀢𑁂𑀦𑀸𑀳 ‘‘𑀲𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀧𑀜𑁆𑀜𑀸’’𑀢𑀺. 𑀦𑀺𑀩𑁆𑀩𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀬𑀣𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼. 𑀧𑀜𑁆𑀜𑀸𑀬𑀦𑁆𑀢𑁂 𑀲𑁆𑀯𑁂𑀯𑀸𑀢𑀺 𑀲𑀦𑁆𑀢𑀸𑀦𑀦𑀺𑀩𑀦𑁆𑀥𑀦𑀯𑀲𑁂𑀦 𑀧𑀜𑁆𑀜𑀸𑀬𑀫𑀸𑀦𑁂𑀲𑀼 𑀏𑀯. 𑀬𑀸 𑀦𑀢𑁆𑀣𑀻𑀢𑀺 𑀬𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀢𑁆𑀢𑀸𑀦𑀁 𑀉𑀘𑁆𑀙𑀺𑀚𑁆𑀚𑀦𑀢𑁄 𑀯𑀺𑀦𑀲𑁆𑀲𑀦𑀢𑁄 𑀓𑁄𑀘𑀺 𑀞𑀺𑀢𑁄 𑀦𑀸𑀫 𑀲𑀢𑁆𑀢𑁄 𑀥𑀫𑁆𑀫𑁄 𑀯𑀸 𑀦𑀢𑁆𑀣𑀻𑀢𑀺 𑀲𑀗𑁆𑀔𑀸𑀭𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬. ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑀣𑀸𑀧𑀯𑀢𑁆𑀢𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸𑀯. 𑀲𑀸 𑀦 𑀳𑁄𑀢𑀻𑀢𑀺 𑀓𑀫𑁆𑀫𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀪𑁂𑀤𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀲𑀫𑀼𑀤𑀬𑀦𑀺𑀩𑁆𑀩𑀢𑁆𑀢𑀺𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄, 𑀲𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺, 𑀦 𑀳𑁄𑀢𑀺, 𑀦𑀧𑁆𑀧𑀯𑀢𑁆𑀢𑀢𑀺 𑀅𑀯𑀺𑀘𑁆𑀙𑁂𑀤𑁂𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀤𑀲𑁆𑀲𑀦𑀢𑁄. 𑀮𑁄𑀓𑀦𑀺𑀭𑁄𑀥𑀦𑁆𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀔𑀡𑀺𑀓𑀦𑀺𑀭𑁄𑀥𑀁. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑀸𑀦𑀁 𑀪𑀗𑁆𑀕’’𑀦𑁆𑀢𑀺. 𑀬𑀸 𑀅𑀢𑁆𑀣𑀻𑀢𑀺 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑀲𑁆𑀲 𑀏𑀓𑀢𑁆𑀢𑀕𑁆𑀕𑀳𑀡𑁂𑀦 𑀲𑀗𑁆𑀔𑀸𑀭𑀮𑁄𑀓𑁂 𑀬𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀲𑀩𑁆𑀩𑀓𑀸𑀮𑀁 𑀮𑁄𑀓𑁄 𑀅𑀢𑁆𑀣𑀻𑀢𑀺 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀲𑀸 𑀦 𑀳𑁄𑀢𑀻𑀢𑀺 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀦𑀺𑀭𑁄𑀥𑀲𑁆𑀲 𑀦𑀯𑀦𑀯𑀸𑀦𑀜𑁆𑀘 𑀉𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑀦𑀢𑁄, 𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀦 𑀳𑁄𑀢𑀺.

𑀮𑁄𑀓𑁄 𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀮𑁄𑀓𑀲𑀫𑀼𑀤𑀬𑁄𑀢𑀺 𑀆𑀳 ‘‘𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭’’𑀦𑁆𑀢𑀺. 𑀧𑀘𑁆𑀘𑀬𑀥𑀫𑁆𑀫𑀸𑀦𑀜𑁆𑀳𑀺 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑁄. 𑀧𑀝𑀺𑀮𑁄𑀫𑀁 𑀧𑀘𑁆𑀘𑀬𑀸𑀓𑀸𑀭𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀢𑀁𑀢𑀁𑀳𑁂𑀢𑀼𑀦𑀺𑀭𑁄𑀥𑀢𑁄 𑀢𑀁𑀢𑀁𑀨𑀮𑀦𑀺𑀭𑁄𑀥𑁄 𑀳𑀺 𑀧𑀝𑀺𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑁄. 𑀬𑁄 𑀳𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑀪𑀸𑀯𑁄, 𑀲𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀮𑁄𑀓𑀲𑀫𑀼𑀤𑀬𑁄. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀲𑀗𑁆𑀔𑀸𑀭𑀸𑀤𑀺𑀓𑀲𑁆𑀲. 𑀅𑀦𑀼𑀘𑁆𑀙𑁂𑀤𑀁 𑀧𑀲𑁆𑀲𑀢𑁄𑀢𑀺 𑀅𑀦𑀼𑀘𑁆𑀙𑁂𑀤𑀤𑀲𑁆𑀲𑀦𑀲𑁆𑀲 𑀳𑁂𑀢𑀼. 𑀅𑀬𑀫𑁆𑀧𑀻𑀢𑀺 𑀦 𑀓𑁂𑀯𑀮𑀁 𑀔𑀡𑀢𑁄 𑀉𑀤𑀬𑀯𑀬𑀦𑀻𑀳𑀭𑀡𑀦𑀬𑁄, 𑀅𑀣 𑀔𑁄 𑀧𑀘𑁆𑀘𑀬𑀢𑁄 𑀉𑀤𑀬𑀯𑀬𑀦𑀻𑀳𑀭𑀡𑀦𑀬𑁄𑀧𑀺.

𑀉𑀧𑀕𑀫𑀦𑀝𑁆𑀞𑁂𑀦 𑀢𑀡𑁆𑀳𑀸𑀯 𑀉𑀧𑀬𑁄. 𑀢𑀣𑀸 𑀤𑀺𑀝𑁆𑀞𑀼𑀧𑀬𑁄. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀉𑀧𑀬𑁂𑀳𑀺 𑀉𑀧𑀸𑀤𑀸𑀦𑀸𑀤𑀻𑀦𑀁 𑀅𑀦𑀢𑁆𑀣𑀦𑁆𑀢𑀭𑀢𑀁 𑀅𑀢𑀺𑀤𑀺𑀲𑀢𑀺. 𑀢𑀣𑀸 𑀘 𑀧𑀦 𑀢𑁂𑀲𑀼 𑀤𑀼𑀯𑀺𑀥𑀢𑀸 𑀉𑀧𑀸𑀤𑀻𑀬𑀢𑀺. 𑀦𑀦𑀼 𑀘 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀅𑀜𑁆𑀜𑀢𑁆𑀣 𑀯𑀼𑀢𑁆𑀢𑀸𑀦𑀻𑀢𑀺? 𑀲𑀘𑁆𑀘𑀁 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀘 𑀔𑁄 𑀅𑀢𑁆𑀣𑀢𑁄 𑀤𑁆𑀯𑁂 𑀏𑀯𑀸𑀢𑀺 𑀇𑀥 𑀏𑀯𑀁 𑀯𑀼𑀢𑁆𑀢𑀁. 𑀓𑀸𑀫𑀁 ‘‘𑀅𑀳𑀁 𑀫𑀫’’𑀦𑁆𑀢𑀺 𑀅𑀬𑀣𑀸𑀦𑀼𑀓𑁆𑀓𑀫𑁂𑀦 𑀯𑀼𑀢𑁆𑀢𑀁, 𑀬𑀣𑀸𑀦𑀼𑀓𑁆𑀓𑀫𑀁𑀬𑁂𑀯 𑀧𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺-𑀲𑀤𑁆𑀤𑁂𑀦 𑀧𑀭𑁄𑀧𑀭𑀲𑁆𑀲 𑀲𑀼𑀪𑀁 𑀅𑀲𑀼𑀪𑀦𑁆𑀢𑀺𑀆𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀥𑀫𑁆𑀫𑁂𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑁂. 𑀯𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀯𑀺𑀭𑀽𑀧𑀁 𑀦𑀺𑀯𑀺𑀲𑀦𑁆𑀢𑀺, 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀳𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺. 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀺𑀭𑀽𑀧𑀁 𑀯𑀺𑀫𑀼𑀘𑁆𑀘𑀺𑀢𑀼𑀁 𑀯𑀸 𑀅𑀧𑁆𑀧𑀤𑀸𑀦𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸 𑀩𑀤𑁆𑀥𑁄.

‘‘𑀅𑀪𑀺𑀦𑀺𑀯𑁂𑀲𑁄’’𑀢𑀺 𑀉𑀧𑀬𑀼𑀧𑀸𑀤𑀸𑀦𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀢𑀜𑁆𑀘𑀸𑀬𑀦𑁆𑀢𑀺 𑀢𑀜𑁆𑀘 𑀉𑀧𑀬𑀼𑀧𑀸𑀤𑀸𑀦’’𑀦𑁆𑀢𑀺. 𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲. 𑀧𑀢𑀺𑀝𑁆𑀞𑀸𑀦𑀪𑀽𑀢𑀦𑁆𑀢𑀺 𑀆𑀥𑀸𑀭𑀪𑀽𑀢𑀁. 𑀤𑁄𑀲𑀫𑁄𑀳𑀯𑀲𑁂𑀦𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀽𑀧𑀦𑀺𑀲𑁆𑀲𑀬𑀸 𑀏𑀯𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀅𑀓𑀼𑀲𑀮𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀫𑀺𑀦𑁆𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑁂. 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀅𑀪𑀺𑀦𑀺𑀯𑁂𑀲𑀦𑀁 𑀧𑀯𑀢𑁆𑀢𑁂𑀦𑁆𑀢𑀺. 𑀅𑀦𑀼𑀲𑁂𑀦𑁆𑀢𑀻𑀢𑀺 𑀣𑀸𑀫𑀕𑀢𑀸 𑀳𑀼𑀢𑁆𑀯𑀸 𑀅𑀧𑁆𑀧𑀳𑀸𑀦𑀪𑀸𑀯𑁂𑀦 𑀅𑀦𑀼𑀲𑁂𑀦𑁆𑀢𑀺. 𑀢𑀤𑀼𑀪𑀬𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑁆𑀯𑀬𑀁. 𑀦 𑀉𑀧𑀕𑀘𑁆𑀙𑀢𑀻𑀢𑀺 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀢𑀺𑀬𑀸 𑀦 𑀉𑀧𑀲𑀗𑁆𑀓𑀫𑀢𑀺 𑀦 𑀅𑀮𑁆𑀮𑀻𑀬𑀢𑀺. 𑀦 𑀉𑀧𑀸𑀤𑀺𑀬𑀢𑀻𑀢𑀺 𑀦 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀺. 𑀦 𑀅𑀥𑀺𑀝𑁆𑀞𑀸𑀢𑀻𑀢𑀺 𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀸𑀳𑁂𑀦 𑀅𑀥𑀺𑀝𑁆𑀞𑀸𑀬 𑀧𑀯𑀢𑁆𑀢𑀢𑀺. 𑀅𑀢𑁆𑀢𑀦𑀺𑀬𑀕𑀸𑀳𑁄 𑀦𑀸𑀫 𑀲𑀢𑀺 𑀅𑀢𑁆𑀢𑀕𑀸𑀳𑁂 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀸 𑀫𑁂’’𑀢𑀺. 𑀇𑀤𑀁 𑀤𑀼𑀓𑁆𑀔𑀕𑁆𑀕𑀳𑀡𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀧𑀲𑁆𑀲𑀬𑀁 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀫𑁂𑀯𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀫𑀢𑁆𑀢𑀫𑁂𑀯𑀸’’𑀢𑀺. ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀤𑀻. 𑀦𑀺. 𑁨.𑁩𑁮𑁭; 𑀫. 𑀦𑀺. 𑁧.𑁧𑁨𑁦; 𑁩.𑁩𑁭𑁩; 𑀯𑀺𑀪. 𑁧𑁯𑁦) 𑀳𑀺 𑀯𑀼𑀢𑁆𑀢𑀁. 𑀓𑀗𑁆𑀔𑀁 𑀦 𑀓𑀭𑁄𑀢𑀻𑀢𑀺 𑀲𑀁𑀲𑀬𑀁 𑀦 𑀉𑀧𑁆𑀧𑀸𑀤𑁂𑀢𑀺 𑀲𑀩𑁆𑀩𑀲𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄.

𑀦 𑀧𑀭𑀧𑁆𑀧𑀘𑁆𑀘𑀬𑁂𑀦𑀸𑀢𑀺 𑀧𑀭𑀲𑁆𑀲 𑀅𑀲𑀤𑁆𑀤𑀳𑀦𑁂𑀦. 𑀫𑀺𑀲𑁆𑀲𑀓𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀆𑀳𑀸𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀢𑁄 𑀧𑀝𑁆𑀞𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀅𑀯𑁄𑀘. 𑀦𑀺𑀓𑀽𑀝𑀦𑁆𑀢𑁄𑀢𑀺 𑀦𑀺𑀳𑀻𑀦𑀦𑁆𑀢𑁄. 𑀦𑀺𑀳𑀻𑀦𑀧𑀭𑀺𑀬𑀸𑀬𑁄 𑀳𑀺 𑀅𑀬𑀁 𑀦𑀺𑀓𑀽𑀝-𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀮𑀸𑀫𑀓𑀦𑁆𑀢𑁄’’𑀢𑀺. 𑀧𑀞𑀫𑀓𑀦𑁆𑀢𑀺 𑀘 𑀕𑀭𑀳𑀸𑀬𑀁 𑀓-𑀲𑀤𑁆𑀤𑁄. 𑀲𑀩𑁆𑀩𑀁 𑀦𑀢𑁆𑀣𑀻𑀢𑀺 𑀬𑀣𑀸𑀲𑀗𑁆𑀔𑀢𑀁 𑀪𑀗𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀦𑀢𑁆𑀣𑀺 𑀏𑀯, 𑀲𑀩𑁆𑀩𑀁 𑀦𑀢𑁆𑀣𑀺 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀫𑀢𑁆𑀣𑀻𑀢𑀺 𑀘 𑀬𑀣𑀸 𑀅𑀲𑀗𑁆𑀔𑀢𑀁 𑀅𑀢𑁆𑀣𑀺 𑀯𑀺𑀚𑁆𑀚𑀢𑀺, 𑀲𑀩𑁆𑀩𑀓𑀸𑀮𑀁 𑀉𑀧𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀦𑁆𑀢𑀺 𑀘𑁂𑀢𑁆𑀣 𑀲𑀓𑁆𑀓𑀸𑀬𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀁 ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧) 𑀯𑀺𑀬. 𑀢𑀜𑁆𑀳𑀺 𑀧𑀭𑀺𑀜𑁆𑀜𑀸𑀜𑀸𑀡𑀸𑀦𑀁 𑀧𑀘𑁆𑀘𑀬𑀪𑀽𑀢𑀁. 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑁂. 𑀓𑀺𑀁 𑀦𑀺𑀤𑀲𑁆𑀲𑁂𑀢𑀺? 𑀅𑀢𑁆𑀣𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀺𑀢’’𑀦𑁆𑀢𑀺 𑀦𑀺𑀘𑁆𑀘𑀢𑀁. 𑀲𑀲𑁆𑀲𑀢𑀕𑁆𑀕𑀸𑀳𑁄 𑀳𑀺 𑀇𑀥 𑀧𑀞𑀫𑁄 𑀅𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀉𑀘𑁆𑀙𑁂𑀤𑀕𑁆𑀕𑀸𑀳𑁄 𑀤𑀼𑀢𑀺𑀬𑁄𑀢𑀺 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀸 𑀘 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀏𑀢𑁆𑀣 𑀘 𑀉𑀧𑁆𑀧𑀦𑁆𑀦𑀦𑀺𑀭𑁄𑀥𑀓𑀣𑀦𑀢𑁄 𑀲𑀲𑁆𑀲𑀢𑀢𑀁, 𑀦𑀺𑀭𑀼𑀚𑁆𑀛𑀦𑁆𑀢𑀸𑀦𑀁 𑀅𑀲𑀢𑀺 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀁 𑀬𑀣𑀸𑀧𑀘𑁆𑀘𑀬𑀁 𑀧𑀼𑀦𑀽𑀧𑀕𑀫𑀦𑀓𑀣𑀦𑀢𑁄 𑀉𑀘𑁆𑀙𑁂𑀤𑀢𑀜𑁆𑀘 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑁂𑀦 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸𑀦𑀬𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁂…𑀧𑁂… 𑀅𑀦𑁆𑀢𑁂’’𑀢𑀺𑀆𑀤𑀺.

𑀓𑀘𑁆𑀘𑀸𑀦𑀕𑁄𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬𑀸𑀢𑀺 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀧𑀝𑀺𑀮𑀸𑀪𑀸𑀬. 𑀲𑀸 𑀳𑀺 𑀚𑀭𑀸𑀫𑀭𑀡𑀲𑀻𑀲𑁂𑀦 𑀯𑀼𑀢𑁆𑀢𑁂𑀲𑀼 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀺. 𑀯𑀺𑀭𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀧𑀝𑀺𑀮𑀸𑀪𑀸𑀬. 𑀲𑀻𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬. 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀉𑀧𑀸𑀲𑀓𑁄𑀧𑀺 𑀧𑀕𑁂𑀯 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀪𑀺𑀓𑁆𑀔𑀼 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀦𑀸𑀫. 𑀢𑁂𑀦𑀸𑀳 ‘‘𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀧𑀝𑀺𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀸𑀯𑀳𑀲𑁆𑀲 𑀅𑀭𑀺𑀬𑀲𑁆𑀲 𑀫𑀕𑁆𑀕𑀲𑁆𑀲. 𑀅𑀦𑀼𑀭𑀽𑀧𑀲𑀪𑀸𑀯𑀪𑀽𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀲𑀪𑀸𑀯𑀪𑀽𑀢𑀁. 𑀦𑀺𑀩𑁆𑀩𑀺𑀤𑀸𑀢𑀺 𑀇𑀫𑀺𑀦𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀧𑀭𑀺𑀬𑁄𑀲𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀤𑀢𑀺. 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸𑀢𑀺 𑀧𑀤𑀤𑁆𑀯𑀬𑁂𑀦 𑀅𑀭𑀺𑀬𑀫𑀕𑁆𑀕𑀁, 𑀇𑀢𑀭𑁂𑀦 𑀨𑀮𑀁. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀏𑀓𑁂𑀦 𑀦𑀬𑁂𑀦𑀸𑀢𑀺 𑀧𑀞𑀫𑁂𑀦 𑀦𑀬𑁂𑀦. 𑀢𑀢𑁆𑀣 𑀳𑀺 𑀪𑀕𑀯𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀥𑀫𑁆𑀫𑀓𑀣𑀺𑀓𑀮𑀓𑁆𑀔𑀡𑀁 𑀧𑀼𑀘𑁆𑀙𑀺𑀢𑁄 𑀢𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀬𑁄 𑀳𑀺 𑀯𑀺𑀧𑀲𑁆𑀲𑀦𑀁 𑀫𑀕𑁆𑀕𑀁 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀺𑀁 𑀧𑀸𑀧𑁂𑀢𑁆𑀯𑀸 𑀓𑀣𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀏𑀓𑀦𑁆𑀢𑀥𑀫𑁆𑀫𑀓𑀣𑀺𑀓𑁄. 𑀢𑁂𑀦𑀸𑀳 ‘‘𑀥𑀫𑁆𑀫𑀓𑀣𑀺𑀓𑀲𑁆𑀲 𑀧𑀼𑀘𑁆𑀙𑀸 𑀓𑀣𑀺𑀢𑀸’’𑀢𑀺. 𑀤𑁆𑀯𑀻𑀳𑀻𑀢𑀺 𑀤𑀼𑀢𑀺𑀬𑀢𑀢𑀺𑀬𑀦𑀬𑁂𑀳𑀺. 𑀢𑀦𑁆𑀢𑀺 𑀧𑀼𑀘𑁆𑀙𑀁. 𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀯𑀺𑀲𑀺𑀝𑁆𑀞𑀁 𑀓𑀢𑁆𑀯𑀸. 𑀬𑀣𑀸𑀧𑀼𑀘𑁆𑀙𑀺𑀢𑀫𑀢𑁆𑀢𑀫𑁂𑀯 𑀅𑀓𑀣𑁂𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀫𑁆𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀧𑀸𑀤𑀸𑀬 𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀯𑀺𑀲𑁂𑀲𑀁 𑀧𑀸𑀧𑁂𑀢𑁆𑀯𑀸. 𑀪𑀕𑀯𑀸 𑀳𑀺 𑀅𑀧𑁆𑀧𑀁 𑀬𑀸𑀘𑀺𑀢𑁄 𑀩𑀳𑀼𑀁 𑀤𑁂𑀦𑁆𑀢𑁄 𑀉𑀴𑀸𑀭𑀧𑀼𑀭𑀺𑀲𑁄 𑀯𑀺𑀬 𑀥𑀫𑁆𑀫𑀓𑀣𑀺𑀓𑀮𑀓𑁆𑀔𑀡𑀁 𑀧𑀼𑀘𑁆𑀙𑀺𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀢𑀜𑁆𑀘𑁂𑀯 𑀢𑀢𑁄 𑀘 𑀉𑀢𑁆𑀢𑀭𑀺𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁆𑀣 ‘‘𑀦𑀺𑀩𑁆𑀩𑀺𑀤𑀸𑀬…𑀧𑁂… 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑀤𑁂𑀲𑀦𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. ‘‘𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁, ‘‘𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀤𑁂𑀲𑀦𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀢𑁂𑀦𑀸𑀳 ‘‘𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀽𑀫𑀺𑀬𑁄 𑀦𑀺𑀤𑁆𑀤𑀺𑀝𑁆𑀞𑀸’’𑀢𑀺.

𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀮𑀺𑀗𑁆𑀕𑁂𑀦 𑀅𑀘𑁂𑀮𑀓𑁄𑀢𑀺 𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑁂𑀦 𑀅𑀘𑁂𑀮𑀓𑁄. 𑀢𑁂𑀦 𑀅𑀘𑁂𑀮𑀓𑀘𑀭𑀡𑁂𑀦 𑀅𑀘𑁂𑀮𑁄, 𑀦 𑀦𑀺𑀘𑁆𑀘𑁂𑀮𑀢𑀸𑀫𑀢𑁆𑀢𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀫𑁂𑀦𑀸𑀢𑀺 𑀕𑁄𑀢𑁆𑀢𑀦𑀸𑀫𑁂𑀦 𑀓𑀲𑁆𑀲𑀧𑁄𑀢𑀺. 𑀤𑁂𑀲𑁂𑀢𑀺 𑀧𑀯𑁂𑀤𑁂𑀢𑀺 𑀲𑀁𑀲𑀬𑀯𑀺𑀕𑀫𑀦𑀁 𑀏𑀢𑁂𑀦𑀸𑀢𑀺 𑀤𑁂𑀲𑁄, 𑀦𑀺𑀘𑁆𑀙𑀬𑀳𑁂𑀢𑀽𑀢𑀺 𑀆𑀳 ‘‘𑀓𑀺𑀜𑁆𑀘𑀺𑀤𑁂𑀯 𑀤𑁂𑀲’’𑀦𑁆𑀢𑀺𑀆𑀤𑀺. 𑀲𑁄 𑀳𑀺 𑀲𑀁𑀲𑀬𑀯𑀺𑀕𑀫𑀦𑀁 𑀓𑀭𑁄𑀢𑀻𑀢𑀺 𑀓𑀸𑀭𑀡𑀁. 𑀑𑀓𑀸𑀲𑀦𑁆𑀢𑀺 𑀅𑀯𑀲𑀁𑀲𑀦𑁆𑀤𑀦𑀧𑀤𑁂𑀲𑀁. 𑀢𑁂𑀦𑀸𑀳 ‘‘𑀔𑀡𑀁 𑀓𑀸𑀮’’𑀦𑁆𑀢𑀺. 𑀅𑀦𑁆𑀢𑀭𑀖𑀭𑀁 𑀅𑀦𑁆𑀢𑁄𑀦𑀺𑀯𑁂𑀲𑀦𑀁. 𑀅𑀦𑁆𑀢𑀭𑁂 𑀖𑀭𑀸𑀦𑀺 𑀏𑀢𑀲𑁆𑀲𑀸𑀢𑀺 𑀅𑀦𑁆𑀢𑀭𑀖𑀭𑀁, 𑀅𑀦𑁆𑀢𑁄𑀕𑀸𑀫𑁄. 𑀬𑀤𑀸𑀓𑀗𑁆𑀔𑀲𑀻𑀢𑀺 𑀬𑀁 𑀆𑀓𑀗𑁆𑀔𑀲𑀺. 𑀇𑀢𑀺 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀺. 𑀢𑁂𑀦𑀸𑀳 ‘‘𑀬𑀁 𑀇𑀘𑁆𑀙𑀲𑀻’’𑀢𑀺. 𑀬𑀤𑀸𑀓𑀗𑁆𑀔𑀲𑀻𑀢𑀺 𑀬𑀁 𑀆𑀓𑀗𑁆𑀔𑀲𑀺, 𑀓𑀲𑁆𑀲𑀧, 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄𑀧𑀺 𑀧𑀼𑀘𑁆𑀙𑀲𑀺, 𑀬𑀁 𑀆𑀓𑀗𑁆𑀔𑀲𑀺, 𑀢𑀫𑁂𑀯 𑀧𑀼𑀘𑁆𑀙𑀸𑀢𑀺 𑀅𑀢𑁆𑀣𑁄.

‘‘𑀬𑀸𑀯𑀢𑀢𑀺𑀬𑀁 𑀧𑀝𑀺𑀓𑁆𑀔𑀺𑀧𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀢𑀺𑀬𑀫𑁆𑀧𑀺 𑀔𑁄’’𑀢𑀺𑀆𑀤𑀺𑀦𑀸 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀲𑁄 𑀧𑀦 𑀦𑀬𑀯𑀲𑁂𑀦 𑀲𑀁𑀔𑀺𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀅𑀘𑁂𑀮𑀓𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀸𑀧𑁂𑀢𑁆𑀯𑀸 𑀘𑀲𑁆𑀲 𑀧𑀜𑁆𑀳𑀁 𑀓𑀣𑁂𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀕𑀸𑀭𑀯𑀚𑀦𑀦𑀢𑁆𑀣𑀁 𑀬𑀸𑀯𑀢𑀢𑀺𑀬𑀁 𑀧𑀝𑀺𑀓𑁆𑀔𑀺𑀧𑀺 𑀢𑀜𑁆𑀘 𑀥𑀫𑁆𑀫𑀲𑁆𑀲 𑀲𑀼𑀲𑁆𑀲𑀽𑀲𑀸𑀬. 𑀥𑀫𑁆𑀫𑀕𑀭𑀼𑀓𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀲𑀢𑁆𑀢𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀬𑀸𑀯𑀢𑀢𑀺𑀬𑀁 𑀬𑀸𑀘𑀸𑀧𑁂𑀢𑀻𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀯𑀲𑁂𑀦 𑀲𑀸𑀥𑀸𑀭𑀡𑀢𑁄 𑀧𑀤𑀁 𑀬𑁄𑀚𑁂𑀢𑁆𑀯𑀸 𑀧𑀼𑀦 ‘‘𑀏𑀢𑁆𑀢𑀓𑁂𑀦 𑀓𑀸𑀮𑁂𑀦𑀸’’𑀢𑀺 𑀓𑀲𑁆𑀲𑀧𑀲𑁆𑀲 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀫𑀸𑀢𑀺 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑁄. 𑀪𑀡𑀻𑀢𑀺 𑀧𑀼𑀦𑀯𑀘𑀦𑀯𑀲𑁂𑀦 𑀓𑀺𑀭𑀺𑀬𑀸𑀧𑀤𑀁 𑀯𑀤𑀢𑀺. 𑀫𑀸 𑀏𑀯𑀁 𑀪𑀡𑀺, 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. ‘‘𑀇𑀢𑀺 𑀪𑀕𑀯𑀸 𑀅𑀯𑁄𑀘𑀸’’𑀢𑀺 𑀧𑀦 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁. 𑀲𑀬𑀁𑀓𑀢𑀁 𑀤𑀼𑀓𑁆𑀔𑀦𑁆𑀢𑀺 𑀧𑀼𑀭𑀺𑀲𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀤𑀼𑀓𑁆𑀔𑀁, 𑀢𑁂𑀦 𑀓𑀢𑀁 𑀦𑀸𑀫 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀧𑀼𑀩𑁆𑀩𑁂 𑀢𑁂𑀦𑁂𑀯 𑀓𑀫𑁆𑀫𑀲𑁆𑀲 𑀉𑀧𑀘𑀺𑀢𑀢𑁆𑀢𑀸𑀢𑀺 𑀅𑀬𑀁 𑀦𑀬𑁄 𑀅𑀦𑀯𑀚𑁆𑀚𑁄. 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀦𑀺𑀘𑁆𑀘𑀁 𑀓𑀸𑀭𑀓𑀯𑁂𑀤𑀓𑀮𑀓𑁆𑀔𑀡𑀁 𑀅𑀢𑁆𑀢𑀸𑀦𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀢𑀲𑁆𑀲 𑀯𑀲𑁂𑀦 ‘‘𑀲𑀬𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀼𑀘𑁆𑀙𑀢𑀻𑀢𑀺 𑀪𑀕𑀯𑀸 ‘‘𑀫𑀸 𑀳𑁂𑀯’’𑀦𑁆𑀢𑀺 𑀅𑀯𑁄𑀘, 𑀢𑁂𑀦𑀸𑀳 ‘‘𑀲𑀬𑀁𑀓𑀢𑀁 𑀤𑀼𑀓𑁆𑀔𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀺. 𑀏𑀢𑁆𑀣 𑀘 𑀬𑀤𑀺 𑀩𑀸𑀳𑀺𑀭𑀓𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑁄 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺, 𑀲𑁄 𑀘 𑀦𑀺𑀘𑁆𑀘𑁄, 𑀢𑀲𑁆𑀲 𑀦𑀺𑀩𑁆𑀩𑀺𑀓𑀸𑀭𑀢𑀸𑀬, 𑀧𑀼𑀭𑀺𑀫𑀭𑀽𑀧𑀸𑀯𑀺𑀚𑀳𑀦𑀢𑁄 𑀓𑀲𑁆𑀲𑀘𑀺 𑀯𑀺𑀲𑁂𑀲𑀸𑀥𑀸𑀦𑀲𑁆𑀲 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀳𑀺𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁, 𑀳𑀺𑀢𑁂 𑀘 𑀯𑀢𑁆𑀢𑀦𑀢𑁆𑀣𑀁 𑀉𑀧𑀤𑁂𑀲𑁄 𑀘 𑀦𑀺𑀧𑁆𑀧𑀬𑁄𑀚𑀦𑁄 𑀲𑀺𑀬𑀸 𑀅𑀢𑁆𑀢𑀯𑀸𑀤𑀺𑀦𑁄. 𑀓𑀣𑀁 𑀯𑀸 𑀲𑁄 𑀉𑀧𑀤𑁂𑀲𑁄 𑀧𑀯𑀢𑁆𑀢𑀻𑀬𑀢𑀺? 𑀯𑀺𑀓𑀸𑀭𑀸𑀪𑀸𑀯𑀢𑁄. 𑀏𑀯𑀜𑁆𑀘 𑀅𑀢𑁆𑀢𑀦𑁄 𑀅𑀚𑀝𑀸𑀓𑀸𑀲𑀲𑁆𑀲 𑀯𑀺𑀬 𑀤𑀸𑀦𑀸𑀤𑀺𑀓𑀺𑀭𑀺𑀬𑀸 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀘 𑀦 𑀲𑀫𑁆𑀪𑀯𑀢𑀺, 𑀢𑀣𑀸 𑀲𑀼𑀔𑀲𑁆𑀲 𑀤𑀼𑀓𑁆𑀔𑀲𑁆𑀲 𑀘 𑀅𑀦𑀼𑀪𑀯𑀦𑀩𑀦𑁆𑀥𑁄 𑀏𑀯 𑀅𑀢𑁆𑀢𑀯𑀸𑀤𑀺𑀦𑁄 𑀦 𑀬𑀼𑀚𑁆𑀚𑀢𑀺 𑀓𑀫𑁆𑀫𑀩𑀦𑁆𑀥𑀸𑀪𑀸𑀯𑀢𑁄. 𑀚𑀸𑀢𑀺𑀆𑀤𑀻𑀦𑀜𑁆𑀘 𑀅𑀲𑀫𑁆𑀪𑀯𑀢𑁄 𑀓𑀼𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀣 𑀧𑀦 ‘‘𑀥𑀫𑁆𑀫𑀫𑀢𑁆𑀢𑀁 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀯𑀺𑀦𑀲𑁆𑀲𑀢𑀺 𑀘. 𑀬𑀲𑁆𑀲 𑀯𑀲𑁂𑀦𑀸𑀬𑀁 𑀓𑀺𑀭𑀺𑀬𑀸𑀯𑁄𑀳𑀸𑀭𑁄’’𑀢𑀺 𑀯𑀤𑁂𑀬𑁆𑀬, 𑀏𑀯𑀫𑁆𑀧𑀺 𑀧𑀼𑀭𑀺𑀫𑀭𑀽𑀧𑀸𑀯𑀺𑀚𑀳𑀦𑁂𑀦 𑀅𑀯𑀝𑁆𑀞𑀺𑀢𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀫𑀢𑁆𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀲𑀫𑁆𑀪𑀸𑀯𑁂𑀢𑀼𑀁. 𑀢𑁂 𑀯𑀸 𑀧𑀦𑀲𑁆𑀲 𑀥𑀫𑁆𑀫𑀸 𑀅𑀯𑀢𑁆𑀣𑀸𑀪𑀽𑀢𑀸, 𑀢𑀢𑁄 𑀅𑀜𑁆𑀜𑁂 𑀯𑀸 𑀲𑀺𑀬𑀼𑀁 𑀅𑀦𑀜𑁆𑀜𑁂 𑀯𑀸. 𑀬𑀤𑀺 𑀅𑀜𑁆𑀜𑁂, 𑀦 𑀢𑀸𑀳𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀸𑀳𑀺𑀧𑀺 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀬𑁄 𑀳𑀺 𑀓𑀭𑁄𑀢𑀺 𑀧𑀝𑀺𑀲𑀁𑀯𑁂𑀤𑁂𑀢𑀺 𑀘𑀯𑀢𑀺 𑀉𑀧𑀧𑀚𑁆𑀚𑀢𑀺 𑀘𑀸𑀢𑀺 𑀇𑀘𑁆𑀙𑀺𑀢𑀁, 𑀢𑀲𑁆𑀫𑀸 𑀢𑀤𑀢𑁆𑀣𑁄 𑀏𑀯 𑀬𑀣𑀸𑀯𑀼𑀢𑁆𑀢𑀤𑁄𑀲𑁄. 𑀓𑀺𑀜𑁆𑀘 𑀥𑀫𑁆𑀫𑀓𑀧𑁆𑀧𑀦𑀸𑀧𑀺 𑀦𑀺𑀭𑀢𑁆𑀣𑀺𑀓𑀸 𑀲𑀺𑀬𑀸. 𑀅𑀣 𑀅𑀦𑀜𑁆𑀜𑁂, 𑀉𑀧𑁆𑀧𑀸𑀤𑀯𑀺𑀦𑀸𑀲𑀯𑀦𑁆𑀢𑀻𑀳𑀺 𑀅𑀯𑀢𑁆𑀣𑀸𑀳𑀺 𑀅𑀦𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀢𑀸𑀲𑀁 𑀯𑀺𑀬 𑀉𑀧𑁆𑀧𑀸𑀤𑀯𑀺𑀦𑀸𑀲𑀲𑀫𑁆𑀪𑀯𑀢𑁄 𑀓𑀼𑀢𑁄 𑀦𑀺𑀘𑁆𑀘𑀢𑀸𑀯𑀓𑀸𑀲𑁄. 𑀢𑀸𑀲𑀫𑁆𑀧𑀺 𑀯𑀸 𑀅𑀢𑁆𑀢𑀦𑁄 𑀯𑀺𑀬 𑀦𑀺𑀘𑁆𑀘𑀢𑀸𑀧𑀢𑁆𑀢𑀻𑀢𑀺 𑀩𑀦𑁆𑀥𑀯𑀺𑀫𑁄𑀓𑁆𑀔𑀸𑀦𑀁 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀦 𑀬𑀼𑀚𑁆𑀚𑀢𑁂𑀯𑀸𑀬𑀁 𑀅𑀢𑁆𑀢𑀯𑀸𑀤𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀤𑀼𑀓𑁆𑀔𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀻’’𑀢𑀺. 𑀧𑀭𑀢𑁄𑀢𑀺 ‘‘𑀧𑀭𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀓𑁂 𑀧𑀭𑀲𑁆𑀫𑀺𑀁 𑀢𑀺𑀯𑀺𑀥𑁂𑀧𑀺 𑀦𑀬𑁂. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀥𑀺𑀘𑁆𑀘 𑀬𑀤𑀺𑀘𑁆𑀙𑀸𑀬 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀓𑀲𑁆𑀲𑀘𑀺 𑀯𑀸 𑀧𑀼𑀩𑁆𑀩𑀁 𑀯𑀺𑀦𑀸 𑀲𑀫𑀼𑀧𑁆𑀧𑀦𑁆𑀦𑀁. 𑀢𑁂𑀦𑀸𑀳 ‘‘𑀅𑀓𑀸𑀭𑀡𑁂𑀦 𑀬𑀤𑀺𑀘𑁆𑀙𑀸𑀬 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀓𑀲𑁆𑀫𑀸 𑀏𑀯𑀫𑀸𑀳𑀸𑀢𑀺 𑀏𑀯𑀁 𑀯𑀓𑁆𑀔𑀫𑀸𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀸𑀢𑀺 𑀅𑀘𑁂𑀮𑀲𑁆𑀲. 𑀅𑀬𑀦𑁆𑀢𑀺 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑁄𑀥𑁂𑀦𑁆𑀢𑁄𑀢𑀺 𑀲𑀬𑀁 𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀏𑀯 𑀅𑀢𑁆𑀢𑀦𑁄 𑀧𑀼𑀘𑁆𑀙𑀸𑀬 𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄. 𑀮𑀤𑁆𑀥𑀺𑀬𑀸 ‘‘𑀲𑀬𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀫𑀺𑀘𑁆𑀙𑀸𑀕𑀳𑀡𑀲𑁆𑀲 𑀧𑀝𑀺𑀲𑁂𑀥𑀦𑀢𑁆𑀣𑀸𑀬.

𑀲𑁄 𑀓𑀭𑁄𑀢𑀻𑀢𑀺 𑀲𑁄 𑀓𑀫𑁆𑀫𑀁 𑀓𑀭𑁄𑀢𑀺. 𑀲𑁄 𑀧𑀝𑀺𑀲𑀁𑀯𑁂𑀤𑀬𑀢𑀻𑀢𑀺 𑀓𑀸𑀭𑀓𑀯𑁂𑀤𑀓𑀸𑀦𑀁 𑀅𑀦𑀜𑁆𑀜𑀢𑁆𑀢𑀤𑀲𑁆𑀲𑀦𑀧𑀭𑀁 𑀏𑀢𑀁, 𑀦 𑀧𑀦 𑀓𑀫𑁆𑀫𑀓𑀺𑀭𑀺𑀬𑀸𑀨𑀮𑀸𑀦𑀁 𑀧𑀝𑀺𑀲𑀁𑀯𑁂𑀤𑀦𑀸𑀦𑀁 𑀲𑀫𑀸𑀦𑀓𑀸𑀮𑀢𑀸𑀤𑀲𑁆𑀲𑀦𑀧𑀭𑀁. 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀔𑁄𑀢𑀺 𑀅𑀯𑀥𑀸𑀭𑀡𑁂. ‘‘𑀲𑁄 𑀏𑀯𑀸’’𑀢𑀺 𑀤𑀲𑁆𑀲𑀺𑀢𑁄. 𑀅𑀦𑀺𑀬𑀢𑀸𑀤𑁂𑀲𑀸 𑀳𑀺 𑀏𑀢𑁂 𑀦𑀺𑀧𑀸𑀢𑀸. 𑀆𑀤𑀺𑀢𑁄𑀢𑀺 𑀪𑀼𑀫𑁆𑀫𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀆𑀤𑀺𑀫𑁆𑀳𑀺𑀬𑁂𑀯𑀸’’𑀢𑀺. ‘‘𑀲𑀬𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀕𑁂𑀯 ‘‘𑀲𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑀬𑀢𑀻’’𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀪𑀯𑀦𑁆𑀢𑀺. 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀢𑁄 𑀳𑀺 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀢𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄, 𑀢𑁂𑀦𑀸𑀳 ‘‘𑀏𑀯𑀁 𑀲𑀢𑀺 𑀧𑀘𑁆𑀙𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀦𑁆𑀢𑀺 𑀅𑀬𑀁 𑀮𑀤𑁆𑀥𑀺 𑀳𑁄𑀢𑀻’’𑀢𑀺. 𑀏𑀯𑀁 𑀲𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸𑀦𑀁 𑀩𑁆𑀭𑀽𑀳𑀺𑀢𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄, 𑀬𑀤𑀺𑀤𑀁 ‘‘𑀲𑀬𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀺. 𑀢𑀲𑁆𑀫𑀸 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀼𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀬𑀁𑀓𑀢𑀁…𑀧𑁂… 𑀏𑀢𑀁 𑀧𑀭𑁂𑀢𑀻’’𑀢𑀺. 𑀯𑀝𑁆𑀝𑀤𑀼𑀓𑁆𑀔𑀁 𑀅𑀥𑀺𑀧𑁆𑀧𑁂𑀢𑀁 𑀅𑀯𑀺𑀲𑁂𑀲𑀢𑁄 𑀅𑀢𑁆𑀣𑀻𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸. 𑀲𑀲𑁆𑀲𑀢𑀁 𑀲𑀲𑁆𑀲𑀢𑀕𑀸𑀳𑀁 𑀤𑀻𑀧𑁂𑀢𑀺 𑀧𑀭𑁂𑀲𑀁 𑀧𑀓𑀸𑀲𑁂𑀢𑀺, 𑀢𑀣𑀸𑀪𑀽𑀢𑁄 𑀘 𑀲𑀲𑁆𑀲𑀢𑀁 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀻𑀢𑀺. 𑀢𑀲𑁆𑀲𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲. 𑀢𑀁 ‘‘𑀲𑀬𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀯𑀺𑀧𑀭𑀻𑀢𑀤𑀲𑁆𑀲𑀦𑀁. 𑀏𑀢𑀁 𑀲𑀲𑁆𑀲𑀢𑀕𑁆𑀕𑀳𑀡𑀁. 𑀧𑀭𑁂𑀢𑀺 𑀉𑀧𑁂𑀢𑀺. 𑀢𑁂𑀦𑀸𑀳 ‘‘𑀓𑀸𑀭𑀓𑀜𑁆𑀘…𑀧𑁂… 𑀅𑀢𑁆𑀣𑁄’’𑀢𑀺. 𑀏𑀓𑀫𑁂𑀯 𑀕𑀡𑁆𑀳𑀦𑁆𑀢𑀦𑁆𑀢𑀺 𑀲𑀢𑀺𑀧𑀺 𑀯𑀢𑁆𑀣𑀼𑀪𑁂𑀤𑁂 𑀅𑀬𑁄𑀦𑀺𑀲𑁄 𑀉𑀧𑁆𑀧𑀚𑁆𑀚𑀦𑁂𑀦 𑀏𑀓𑀫𑁂𑀯 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀁.

𑀇𑀥 ‘‘𑀆𑀤𑀺𑀫𑁆𑀳𑀺𑀬𑁂𑀯𑀸’’𑀢𑀺 𑀧𑀤𑁂. ‘‘𑀧𑀭𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀕𑁂𑀯𑀸𑀢𑀺𑀆𑀤𑀺𑀦𑀸 𑀳𑁂𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑁂𑀢𑁆𑀣 𑀬𑁄𑀚𑀦𑀸 𑁋 ‘‘𑀧𑀭𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀕𑁂𑀯 𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑀬𑀢𑀻𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀪𑀯𑀦𑁆𑀢𑀻𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀲𑀢𑀻𑀢𑀺 𑀏𑀯𑀁 𑀫𑀼𑀤𑀼𑀓𑁂 𑀉𑀘𑁆𑀙𑁂𑀤𑀯𑀺𑀧𑀮𑁆𑀮𑀸𑀲𑁂 𑀧𑀞𑀫𑀼𑀧𑁆𑀧𑀦𑁆𑀦𑁂 𑀲𑀢𑀺 𑀧𑀘𑁆𑀙𑀸 ‘‘𑀧𑀭𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀅𑀬𑀁 𑀮𑀤𑁆𑀥𑀺 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀭𑀓𑁄𑀢𑀺 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄. 𑀢𑁂𑀦 𑀓𑀢𑀦𑁆𑀢𑀺 𑀓𑀫𑁆𑀫𑀓𑀸𑀭𑀓𑁂𑀦 𑀓𑀢𑀁. 𑀓𑀫𑁆𑀫𑀼𑀦𑀸 𑀳𑀺 𑀨𑀮𑀲𑁆𑀲 𑀯𑁄𑀳𑀸𑀭𑁄 𑀅𑀪𑁂𑀤𑁄𑀧𑀘𑀸𑀭𑀓𑀢𑁆𑀢𑀸. 𑀏𑀯𑀦𑁆𑀢𑀺 𑀤𑀺𑀝𑁆𑀞𑀺𑀲𑀳𑀕𑀢𑀸 𑀯𑁂𑀤𑀦𑀸 𑀲𑀸𑀢𑀲𑀪𑀸𑀯𑀸 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀤𑀺𑀦𑀸 𑀲𑀧𑀭𑀺𑀲𑁆𑀲𑀬𑀸 𑀲𑀉𑀧𑀸𑀬𑀸𑀲𑀸, 𑀏𑀯𑀁. ‘‘𑀧𑀕𑁂𑀯 𑀇𑀢𑀭𑁂’’𑀢𑀺 𑀯𑀼𑀢𑁆𑀢𑀯𑁂𑀤𑀦𑀸𑀬 𑀅𑀪𑀺𑀢𑀼𑀦𑁆𑀦𑀲𑁆𑀲 𑀯𑀺𑀤𑁆𑀥𑀲𑁆𑀲. ‘‘𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀉𑀘𑁆𑀙𑁂𑀤𑀦𑁆𑀢𑀺 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁, 𑀯𑀺𑀪𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀢𑁄 𑀳𑀺 𑀯𑀺𑀦𑀸𑀲𑀸𑀲𑀫𑁆𑀪𑀯𑀢𑁄 𑀅𑀢𑁆𑀣𑀺𑀪𑀸𑀯𑀦𑀺𑀩𑀦𑁆𑀥𑀦𑁄 𑀉𑀘𑁆𑀙𑁂𑀤𑁄. 𑀬𑀣𑀸 𑀳𑁂𑀢𑀼𑀨𑀮𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀲𑀢𑀺𑀧𑀺 𑀏𑀓𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀪𑀺𑀦𑁆𑀦𑀲𑀦𑁆𑀢𑀢𑀺𑀧𑀢𑀺𑀢𑁂𑀳𑀺 𑀯𑀺𑀲𑁂𑀲𑁂 𑀳𑁂𑀢𑀼𑀨𑀮𑀸𑀦𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀦𑀸𑀪𑀸𑀯𑀢𑁆𑀢𑀸 𑀪𑀺𑀦𑁆𑀦𑀲𑀦𑁆𑀢𑀸𑀦𑀧𑀢𑀺𑀢𑀸𑀦𑀁 𑀯𑀺𑀬 𑀅𑀘𑁆𑀘𑀦𑁆𑀢𑀪𑁂𑀤𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀦𑀸𑀦𑀢𑁆𑀢𑀦𑀬𑀲𑁆𑀲 𑀫𑀺𑀘𑁆𑀙𑀸𑀕𑀳𑀡𑀁 𑀉𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀲𑁆𑀲 𑀓𑀸𑀭𑀡𑀁. 𑀏𑀯𑀁 𑀳𑁂𑀢𑀼𑀨𑀮𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀪𑀸𑀯𑀪𑁂𑀤𑁂 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀏𑀓𑀢𑁆𑀢𑀦𑀬𑁂𑀦 𑀅𑀘𑁆𑀘𑀦𑁆𑀢𑀸𑀪𑁂𑀤𑀕𑀳𑀡𑀫𑁆𑀧𑀺 𑀓𑀸𑀭𑀡𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁. 𑀲𑀦𑁆𑀢𑀸𑀦𑀯𑀲𑁂𑀦 𑀳𑀺 𑀯𑀢𑁆𑀢𑀫𑀸𑀦𑁂𑀲𑀼 𑀔𑀦𑁆𑀥𑁂𑀲𑀼 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑁂𑀦 𑀏𑀓𑀢𑁆𑀢𑀕𑀳𑀡𑀦𑀺𑀩𑀦𑁆𑀥𑀦𑁄 𑀲𑀢𑁆𑀢𑀕𑁆𑀕𑀸𑀳𑁄, 𑀲𑀢𑁆𑀢𑀲𑁆𑀲 𑀘 𑀅𑀢𑁆𑀣𑀺𑀪𑀸𑀯𑀕𑁆𑀕𑀸𑀳𑀦𑀺𑀩𑀦𑁆𑀥𑀦𑁄 𑀉𑀘𑁆𑀙𑁂𑀤𑀕𑁆𑀕𑀸𑀳𑁄, 𑀬𑀸𑀯𑀸𑀬𑀁 𑀅𑀢𑁆𑀢𑀸 𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀢𑀸𑀯𑀸𑀬𑀁 𑀯𑀺𑀚𑁆𑀚𑀢𑀺𑀬𑁂𑀯𑀸𑀢𑀺 𑀕𑀳𑀡𑀢𑁄 𑀦𑀺𑀭𑀼𑀤𑀬𑀯𑀺𑀦𑀸𑀲𑁄 𑀇𑀥 𑀉𑀘𑁆𑀙𑁂𑀤𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 ‘‘𑀉𑀘𑁆𑀙𑁂𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑁂𑀦 𑀦𑀸𑀲𑁄 𑀯𑀺𑀦𑀸𑀲𑁄, 𑀅𑀪𑀸𑀯𑁄. 𑀲𑁄 𑀧𑀦 𑀫𑀁𑀲𑀘𑀓𑁆𑀔𑀼𑀧𑀜𑁆𑀜𑀸𑀘𑀓𑁆𑀔𑀽𑀦𑀁 𑀤𑀲𑁆𑀲𑀦𑀧𑀣𑀸𑀢𑀺𑀓𑁆𑀓𑀫𑁄𑀬𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀤𑀲𑁆𑀲𑀦’’𑀦𑁆𑀢𑀺. 𑀅𑀤𑀲𑁆𑀲𑀦𑁂 𑀳𑀺 𑀦𑀸𑀲𑀲𑀤𑁆𑀤𑁄 𑀮𑁄𑀓𑁂 𑀦𑀺𑀭𑀼𑀴𑁆𑀳𑁄𑀢𑀺. 𑀲𑀪𑀸𑀯𑀯𑀺𑀕𑀫𑁄 𑀲𑀪𑀸𑀯𑀸𑀧𑀕𑀫𑁄 𑀯𑀺𑀪𑀯𑁄. 𑀬𑁄 𑀳𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑁂𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀦 𑀲𑁄 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀢𑀺𑀝𑁆𑀞𑀢𑀺.

𑀏𑀢𑁂 𑀢𑁂𑀢𑀺 𑀯𑀸 𑀬𑁂 𑀇𑀫𑁂 𑀢𑀬𑀸 ‘‘𑀲𑀬𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀘 𑀧𑀼𑀝𑁆𑀞𑁂𑀦 𑀫𑀬𑀸 ‘‘𑀲𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑀬𑀢𑀻’’𑀢𑀺𑀆𑀤𑀺𑀦𑀸, ‘‘𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑀬𑀢𑀻’’𑀢𑀺𑀆𑀤𑀺𑀦𑀸 𑀘 𑀧𑀝𑀺𑀓𑁆𑀔𑀺𑀢𑁆𑀢𑀸 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀸 𑀅𑀦𑁆𑀢𑀸, 𑀢𑁂 𑀉𑀪𑁄 𑀅𑀦𑁆𑀢𑁂𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀏𑀢𑁂 𑀢𑁂𑀢𑀺 𑀬𑀢𑁆𑀣 𑀧𑀼𑀣𑀽 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀅𑀦𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑀢𑀸𑀬 𑀧𑀭𑀫𑀕𑀫𑁆𑀪𑀻𑀭𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀁 𑀅𑀧𑁆𑀧𑀚𑀸𑀦𑀦𑁆𑀢𑀸 𑀲𑀲𑁆𑀲𑀢𑀼𑀘𑁆𑀙𑁂𑀤𑁂 𑀦𑀺𑀫𑀼𑀕𑁆𑀕𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀯𑀺𑀲𑀳𑀦𑁆𑀢𑀺, 𑀏𑀢𑁂 𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫𑀸𑀢𑀺 𑀬𑁄𑀚𑀦𑀸. 𑀤𑁂𑀲𑁂𑀢𑀻𑀢𑀺 𑀧𑀞𑀫𑀁 𑀢𑀸𑀯 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂 𑀜𑀸𑀡𑀸𑀦𑀼𑀪𑀸𑀯𑁂𑀦 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀞𑀺𑀢𑁄, 𑀓𑀭𑀼𑀡𑀸𑀦𑀼𑀪𑀸𑀯𑁂𑀦 𑀤𑁂𑀲𑀦𑀸𑀥𑀫𑁆𑀫𑁂 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀞𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀏𑀢𑁆𑀣 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀓𑀸𑀭𑀡𑀢𑁄…𑀧𑁂… 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀞𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀬𑁄𑀚𑀦𑀸. 𑀓𑀸𑀭𑀡𑀢𑁄 𑀨𑀮𑀁 𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸, 𑀅𑀪𑀺𑀥𑁂𑀬𑁆𑀬𑀸𑀦𑀼𑀭𑀽𑀧𑀜𑁆𑀳𑀺 𑀮𑀺𑀗𑁆𑀕𑀯𑀘𑀦𑀸𑀦𑀺 𑀳𑁄𑀦𑁆𑀢𑀺. 𑀅𑀲𑁆𑀲𑀸𑀢𑀺 𑀨𑀮𑀲𑁆𑀲. 𑀦 𑀓𑁄𑀘𑀺 𑀓𑀸𑀭𑀓𑁄 𑀯𑀸 𑀯𑁂𑀤𑀓𑁄 𑀯𑀸 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀜𑁆𑀜𑀤𑀢𑁆𑀣𑀼 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁂𑀢𑀼𑀨𑀮𑀫𑀢𑁆𑀢𑀢𑀸𑀤𑀲𑁆𑀲𑀦𑀢𑁄 𑀓𑁂𑀯𑀮𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀕𑀳𑀡𑀢𑁄𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀏𑀢𑁂 𑀢𑁂, 𑀓𑀲𑁆𑀲𑀧…𑀧𑁂… 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑁂𑀦 𑀢𑀸𑀯 𑀧𑀤𑁂𑀦. 𑀲𑁂𑀲𑀧𑀜𑁆𑀳𑀸𑀢𑀺 ‘‘𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀓𑀸 𑀲𑁂𑀲𑀸 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀦𑀢𑁆𑀣𑀺 𑀤𑀼𑀓𑁆𑀔’’𑀦𑁆𑀢𑀺 𑀧𑀜𑁆𑀳𑁄 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦 𑀉𑀤𑁆𑀥𑀢𑁄. 𑀧𑀝𑀺𑀲𑁂𑀥𑀺𑀢𑀸 𑀳𑁄𑀦𑁆𑀢𑀻𑀢𑀺 𑀢𑀢𑀺𑀬𑀧𑀜𑁆𑀳𑁄, 𑀢𑀸𑀯 𑀧𑀞𑀫𑀤𑀼𑀢𑀺𑀬𑀧𑀜𑁆𑀳𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀲𑁄 𑀳𑀺 𑀧𑀜𑁆𑀳𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀝𑀺𑀓𑁆𑀔𑁂𑀧𑁂𑀦 𑀏𑀓𑀚𑁆𑀛𑀁 𑀧𑀝𑀺𑀓𑁆𑀔𑁂𑀧𑁂𑀦 𑀘. 𑀢𑁂𑀦𑀸𑀳 ‘‘𑀉𑀪𑁄…𑀧𑁂… 𑀧𑀝𑀺𑀓𑁆𑀔𑀺𑀢𑁆𑀢𑁄’’𑀢𑀺. 𑀏𑀢𑁆𑀣 𑀘 𑀬𑀲𑁆𑀲 𑀅𑀢𑁆𑀢𑀸 𑀓𑀸𑀭𑀓𑁄 𑀯𑁂𑀤𑀓𑁄 𑀯𑀸 𑀇𑀘𑁆𑀙𑀺𑀢𑁄, 𑀢𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀅𑀢𑁆𑀢𑀸 𑀅𑀦𑀼𑀜𑁆𑀜𑀸𑀢𑁄 𑀳𑁄𑀢𑀺. 𑀢𑀣𑀸 𑀘 𑀲𑀢𑀺 𑀅𑀦𑀼𑀧𑀼𑀩𑁆𑀩𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀯𑀺𑀬, 𑀲𑀼𑀔𑀸𑀤𑀺𑀥𑀫𑁆𑀫𑀸𑀦𑀁 𑀯𑀺𑀬 𑀘𑀲𑁆𑀲 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀸𑀤𑀯𑀦𑁆𑀢𑀢𑀸 𑀆𑀧𑀚𑁆𑀚𑀢𑀺. 𑀉𑀧𑁆𑀧𑀸𑀤𑁂 𑀘 𑀲𑀢𑀺 𑀅𑀯𑀲𑁆𑀲𑀁𑀪𑀸𑀯𑀻 𑀦𑀺𑀭𑁄𑀥𑁄𑀢𑀺 𑀅𑀦𑀯𑀓𑀸𑀲𑀸 𑀦𑀺𑀘𑁆𑀘𑀢𑀸𑀢𑀺. 𑀢𑀲𑁆𑀲 ‘‘𑀲𑀬𑀁𑀓𑀢’’𑀦𑁆𑀢𑀺 𑀧𑀞𑀫𑀧𑀜𑁆𑀳𑀧𑀝𑀺𑀓𑁆𑀔𑁂𑀧𑁄 𑀧𑀘𑁆𑀙𑀸 𑀘𑁂 𑀅𑀢𑁆𑀢𑀦𑁄 𑀦𑀺𑀭𑀼𑀴𑁆𑀳𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀅𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀼𑀩𑁆𑀩𑁂 𑀯𑀺𑀬 𑀯𑀸 𑀧𑀘𑁆𑀙𑀸𑀧𑀺. 𑀲𑁂𑀲𑀧𑀜𑁆𑀳𑀸𑀢𑀺 𑀢𑀢𑀺𑀬𑀧𑀜𑁆𑀳𑀸𑀤𑀬𑁄. 𑀢𑀢𑀺𑀬𑀧𑀜𑁆𑀳𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀏𑀯𑀜𑁆𑀘 𑀢𑀢𑀺𑀬𑀧𑀜𑁆𑀳𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀯𑁂𑀤𑀺𑀢𑀩𑁆𑀩𑁄 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀲𑀢𑀢𑀁 𑀲𑀫𑀺𑀢𑀁 𑀧𑀘𑁆𑀘𑀬𑀸𑀬𑀢𑁆𑀢𑀲𑁆𑀲 𑀤𑀻𑀧𑀦𑁂𑀦 𑀤𑀼𑀓𑁆𑀔𑀲𑁆𑀲 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀢𑁄 𑀏𑀯 𑀢𑀲𑁆𑀲 𑀅𑀚𑀸𑀦𑀦𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁩𑁯-𑁪𑁦; 𑀫𑀳𑀸𑀯. 𑁧; 𑀉𑀤𑀸. 𑁧).

𑀬𑀁 𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀯𑀲𑀢𑀻𑀢𑀺 𑀬𑁄𑀚𑀦𑀸. 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦𑀸𑀢𑀺 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀬𑀸𑀘𑀦𑁆𑀢𑁂𑀦 𑀢𑁂𑀦 𑀯𑀼𑀢𑁆𑀢𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦. 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀸𑀢𑀺𑀤𑀺𑀯𑀸𑀧𑀝𑀺𑀓𑁆𑀓𑀫𑀦𑀁, 𑀦𑀯𑁂𑀲𑀺𑀬𑀸𑀤𑀺𑀕𑁄𑀘𑀭𑀢𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀓𑀺𑀘𑁆𑀘𑁂𑀲𑀼 𑀤𑀓𑁆𑀔𑀢𑀸𑀤𑀺, 𑀉𑀤𑁆𑀤𑁂𑀲𑀸𑀤𑀻𑀲𑀼 𑀢𑀺𑀩𑁆𑀩𑀘𑁆𑀙𑀦𑁆𑀤𑀢𑀸, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀯𑀡𑁆𑀡𑀪𑀡𑀦𑁂 𑀅𑀢𑁆𑀢𑀫𑀦𑀢𑀸, 𑀩𑀼𑀤𑁆𑀥𑀸𑀤𑀻𑀦𑀁 𑀅𑀯𑀡𑁆𑀡𑀪𑀡𑀦𑁂 𑀅𑀦𑀢𑁆𑀢𑀫𑀦𑀢𑀸, 𑀢𑀺𑀢𑁆𑀣𑀺𑀬𑀸𑀦𑀁 𑀯𑀡𑁆𑀡𑀪𑀡𑀦𑁂 𑀅𑀦𑀢𑁆𑀢𑀫𑀦𑀢𑀸, 𑀩𑀼𑀤𑁆𑀥𑀸𑀤𑀻𑀦𑀁 𑀯𑀡𑁆𑀡𑀪𑀡𑀦𑁂 𑀅𑀢𑁆𑀢𑀫𑀦𑀢𑀸𑀢𑀺 (𑀫𑀳𑀸𑀯. 𑁮𑁭) 𑀇𑀫𑁂𑀲𑀁 𑀲𑀗𑁆𑀕𑀳𑁄. 𑀅𑀝𑁆𑀞 𑀯𑀢𑁆𑀢𑀸𑀦𑀻𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀢𑀺𑀢𑁆𑀣𑀺𑀬𑀯𑀢𑁆𑀢𑀸𑀦𑀺 𑀧𑀽𑀭𑁂𑀦𑁆𑀢𑁂𑀦. 𑀏𑀢𑁆𑀣 𑀘 𑀦𑀸𑀢𑀺𑀓𑀸𑀮𑁂𑀦 𑀕𑀸𑀫𑀧𑁆𑀧𑀯𑁂𑀲𑀦𑀸 𑀢𑀢𑁆𑀣 𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑁂𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀸𑀢𑀺𑀤𑀺𑀯𑀸𑀧𑀝𑀺𑀓𑁆𑀓𑀫𑀦𑀦𑁆𑀢𑀺 𑀇𑀤𑀫𑁂𑀓𑀁 𑀯𑀢𑁆𑀢𑀁.

𑀅𑀬𑀫𑁂𑀢𑁆𑀣 𑀧𑀸𑀞𑁄𑀢𑀺 𑀏𑀢𑀲𑁆𑀫𑀺𑀁 𑀓𑀲𑁆𑀲𑀧𑀲𑀼𑀢𑁆𑀢𑁂 𑀅𑀬𑀁 𑀧𑀸𑀞𑁄. 𑀅𑀜𑁆𑀜𑀢𑁆𑀣𑀸𑀢𑀺 𑀲𑀻𑀳𑀦𑀸𑀤𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁦𑁨-𑁪𑁦𑁩). 𑀖𑀁𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸𑀢𑀺 𑀬𑀣𑀸 𑀲𑀼𑀯𑀡𑁆𑀡𑀁 𑀦𑀺𑀖𑀁𑀲𑀺𑀢𑁆𑀯𑀸 𑀅𑀥𑀺𑀓𑀭𑀡𑀺𑀬𑀸 𑀓𑁄𑀝𑁆𑀝𑁂𑀢𑁆𑀯𑀸 𑀦𑀺𑀤𑁆𑀤𑁄𑀲𑀫𑁂𑀯 𑀕𑀬𑁆𑀳𑀢𑀺, 𑀏𑀯𑀁 𑀧𑀭𑀺𑀯𑀸𑀲𑀯𑀢𑁆𑀢𑀘𑀭𑀡𑁂𑀦 𑀖𑀁𑀲𑀺𑀢𑁆𑀯𑀸 𑀲𑀼𑀤𑁆𑀥𑀪𑀸𑀯𑀯𑀻𑀫𑀁𑀲𑀦𑁂𑀦 𑀓𑁄𑀝𑁆𑀝𑁂𑀢𑁆𑀯𑀸 𑀲𑀼𑀤𑁆𑀥𑁄 𑀏𑀯 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀥 𑀕𑀬𑁆𑀳𑀢𑀺. 𑀢𑀺𑀩𑁆𑀩𑀘𑁆𑀙𑀦𑁆𑀤𑀢𑀦𑁆𑀢𑀺 𑀲𑀸𑀲𑀦𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂 𑀢𑀺𑀩𑁆𑀩𑀘𑁆𑀙𑀦𑁆𑀤𑀢𑀁 𑀤𑀴𑁆𑀳𑀢𑀭𑀸𑀪𑀺𑀭𑀼𑀘𑀺𑀢𑀁. 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀻𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀲𑀺 𑀏𑀳𑀺𑀪𑀺𑀓𑁆𑀔𑀼𑀉𑀧𑀲𑀫𑁆𑀧𑀤𑀸𑀬 𑀉𑀧𑀦𑀺𑀲𑁆𑀲𑀬𑀸𑀪𑀸𑀯𑀢𑁄. 𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀧𑀢𑁆𑀢𑀸𑀲𑀦𑀯𑀲𑁂𑀦 𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸.

𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀢𑀺𑀫𑁆𑀩𑀭𑀼𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀬𑀲𑁆𑀫𑀸 𑀢𑀺𑀫𑁆𑀩𑀭𑀼𑀓𑁄 ‘‘𑀯𑁂𑀤𑀦𑀸 𑀅𑀢𑁆𑀢𑀸. 𑀅𑀢𑁆𑀢𑀸𑀯 𑀯𑁂𑀤𑀬𑀢𑀻’’𑀢𑀺 𑀏𑀯𑀁𑀮𑀤𑁆𑀥𑀺𑀓𑁄, 𑀢𑀲𑁆𑀫𑀸 𑀢𑀸𑀬 𑀮𑀤𑁆𑀥𑀺𑀬𑀸 ‘‘𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀯𑀤𑀢𑀺, 𑀢𑀁 𑀧𑀝𑀺𑀲𑀁𑀳𑀭𑀺𑀢𑀼𑀁 𑀪𑀕𑀯𑀸 ‘‘𑀲𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀁 𑀅𑀯𑁄𑀘. 𑀢𑁂𑀦𑀸𑀳 ‘‘𑀲𑀸 𑀯𑁂𑀤𑀦𑀸𑀢𑀺𑀆𑀤𑀺 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀮𑀤𑁆𑀥𑀺𑀬𑀸 𑀦𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺. 𑀏𑀢𑁆𑀣𑀸𑀧𑀻𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂. 𑀢𑀢𑁆𑀭𑀸𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀲𑀸 𑀯𑁂𑀤𑀦𑀸…𑀧𑁂… 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺, 𑀢𑀲𑁆𑀫𑀺𑀁 𑀧𑀸𑀞𑁂. 𑀆𑀤𑀺𑀫𑁆𑀳𑀺𑀬𑁂𑀯𑀸𑀢𑀺 𑀏𑀢𑁆𑀣 𑀪𑀼𑀫𑁆𑀫𑀯𑀘𑀦𑁂𑀦 ‘‘𑀆𑀤𑀺𑀢𑁄’’𑀢𑀺 𑀢𑁄-𑀲𑀤𑁆𑀤𑁄 𑀦 𑀦𑀺𑀲𑁆𑀲𑀓𑁆𑀓𑀯𑀘𑀦𑁂. 𑀏𑀯-𑀓𑀸𑀭𑁂𑀦 𑀔𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀧𑀦 ‘‘𑀯𑁂𑀤𑀦𑀸𑀢𑁄 𑀅𑀜𑁆𑀜𑁄 𑀅𑀢𑁆𑀢𑀸, 𑀯𑁂𑀤𑀦𑀸𑀬 𑀓𑀸𑀭𑀓𑁄’’𑀢𑀺 𑀮𑀤𑁆𑀥𑀺𑀓𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀯𑀸𑀤𑁄 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀇𑀥 ‘‘𑀯𑁂𑀤𑀦𑀸 𑀅𑀢𑁆𑀢𑀸’’𑀢𑀺 𑀏𑀯𑀁𑀮𑀤𑁆𑀥𑀺𑀓𑀲𑁆𑀲𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀏𑀯𑀜𑁆𑀳𑀺 𑀲𑀢𑀺 𑀯𑁂𑀤𑀦𑀸𑀬 𑀏𑀯 𑀯𑁂𑀤𑀦𑀸 𑀓𑀢𑀸 𑀳𑁄𑀢𑀻’’𑀢𑀺𑀆𑀤𑀺. 𑀇𑀫𑀺𑀲𑁆𑀲𑀸𑀢𑀺 𑀬𑀸𑀬 𑀯𑁂𑀤𑀦𑀸𑀬 𑀲𑀼𑀔𑀤𑀼𑀓𑁆𑀔𑀁 𑀓𑀢𑀁, 𑀇𑀫𑀺𑀲𑁆𑀲𑀸. 𑀧𑀼𑀩𑁆𑀩𑁂𑀧𑀻𑀢𑀺 𑀲𑀲𑁆𑀲𑀢𑀸𑀓𑀸𑀭𑀢𑁄 𑀧𑀼𑀩𑁆𑀩𑁂𑀧𑀺. 𑀧𑀼𑀭𑀺𑀫𑀜𑁆𑀳𑀺 𑀅𑀢𑁆𑀣𑀦𑁆𑀢𑀺 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 𑀅𑀢𑁆𑀣𑀁. 𑀅𑀝𑁆𑀞𑀓𑀣𑀸𑀬𑀦𑁆𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁. 𑀢𑀦𑁆𑀢𑀺 𑀧𑀼𑀭𑀺𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑀢𑁆𑀣𑀁. 𑀅𑀲𑁆𑀲𑀸𑀢𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲. 𑀬𑀲𑁆𑀫𑀸 𑀢𑀺𑀫𑁆𑀩𑀭𑀼𑀓𑁄 ‘‘𑀯𑁂𑀤𑀦𑀸𑀯 𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀳𑀁 𑀲𑀸 𑀯𑁂𑀤𑀦𑀸…𑀧𑁂… 𑀦 𑀯𑀤𑀸𑀫𑀻’’𑀢𑀺.

𑀅𑀜𑁆𑀜𑀸 𑀯𑁂𑀤𑀦𑀸𑀢𑀺𑀆𑀤𑀻𑀲𑀼𑀧𑀺 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀓𑀸𑀭𑀓𑀯𑁂𑀤𑀦𑀸𑀢𑀺 𑀓𑀢𑁆𑀢𑀼𑀪𑀽𑀢𑀯𑁂𑀤𑀦𑀸. 𑀯𑁂𑀤𑀦𑀸𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀦𑀸𑀪𑀽𑀢𑀲𑀼𑀔𑀤𑀼𑀓𑁆𑀔𑀁 𑀓𑀣𑀺𑀢𑀁, 𑀦 𑀯𑀝𑁆𑀝𑀲𑀼𑀔𑀤𑀼𑀓𑁆𑀔𑀁. ‘‘𑀯𑀺𑀧𑀸𑀓𑀲𑀼𑀔𑀤𑀼𑀓𑁆𑀔𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁 ‘‘𑀲𑀬𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄.

𑀢𑀺𑀫𑁆𑀩𑀭𑀼𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀅𑀯𑀺𑀚𑁆𑀚𑀸 𑀦𑀻𑀯𑀭𑀡𑀸 𑀪𑀯𑀸𑀤𑀺-𑀆𑀤𑀻𑀦𑀯𑀲𑁆𑀲 𑀦𑀺𑀯𑀸𑀭𑀺𑀢𑀧𑀝𑀺𑀘𑁆𑀙𑀸𑀤𑀺𑀓𑀸 𑀏𑀢𑀲𑁆𑀲𑀸𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁄, 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀸𑀭𑀺𑀢𑀲𑁆𑀲𑀸’’𑀢𑀺. 𑀅𑀬𑀁 𑀓𑀸𑀬𑁄𑀢𑀺 𑀩𑀸𑀮𑀲𑁆𑀲 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀪𑀸𑀯𑀁 𑀭𑀓𑁆𑀔𑀁 𑀓𑀢𑁆𑀯𑀸 𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀅𑀬𑀸𑀣𑀸𑀯𑀤𑀲𑁆𑀲𑀦𑀯𑀲𑁂𑀦 𑀢𑀡𑁆𑀳𑀸𑀬 𑀧𑀝𑀺𑀮𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀁𑀢𑀁𑀪𑀯𑀽𑀧𑀕𑀸 𑀲𑀗𑁆𑀔𑀸𑀭𑀸 𑀲𑀗𑁆𑀔𑀭𑀻𑀬𑀦𑁆𑀢𑀺. 𑀢𑁂𑀳𑀺 𑀘 𑀅𑀢𑁆𑀢𑀪𑀸𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀫𑀸 𑀅𑀬𑀜𑁆𑀘 𑀅𑀯𑀺𑀚𑁆𑀚𑀸𑀬 𑀓𑀸𑀬𑁄 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀅𑀲𑁆𑀲𑀸𑀢𑀺 𑀩𑀸𑀮𑀲𑁆𑀲. 𑀅𑀬𑀁 𑀅𑀢𑁆𑀣𑁄𑀢𑀺 ‘‘𑀅𑀬𑀁 𑀓𑀸𑀬𑁄 𑀦𑀸𑀫𑀭𑀽𑀧𑀦𑁆𑀢𑀺 𑀘 𑀯𑀼𑀢𑁆𑀢𑁄’’𑀢𑀺 𑀅𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀴𑀸𑀬𑀢𑀦𑀲𑀗𑁆𑀕𑀳𑀢𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁. 𑀏𑀯𑀫𑁂𑀢𑀁 𑀤𑁆𑀯𑀬𑀦𑁆𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀦𑀺𑀯𑀸𑀭𑀺𑀢𑀢𑁆𑀢𑀸, 𑀢𑀡𑁆𑀳𑀸𑀬 𑀘 𑀲𑀁𑀬𑀼𑀢𑁆𑀢𑀢𑁆𑀢𑀸 𑀏𑀯𑀁 𑀲𑀧𑀭𑀲𑀦𑁆𑀢𑀸𑀦𑀕𑀢𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑀲𑀗𑁆𑀔𑀸𑀢𑀁 𑀤𑁆𑀯𑀬𑀁 𑀳𑁄𑀢𑀺. 𑀅𑀜𑁆𑀜𑀢𑁆𑀣𑀸𑀢𑀺 𑀲𑀼𑀢𑁆𑀢𑀦𑁆𑀢𑀭𑁂𑀲𑀼. ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫-𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁫; 𑁪.𑁬𑁦-𑁬𑁧; 𑀓𑀣𑀸. 𑁪𑁬𑁫, 𑁪𑁬𑁭) 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀘𑀓𑁆𑀔𑀼𑀭𑀽𑀧𑀸𑀤𑀺𑀤𑁆𑀯𑀬𑀸𑀦𑀺 𑀧𑀝𑀺𑀘𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀯𑀼𑀢𑁆𑀢𑀸, 𑀇𑀥 𑀧𑀦 𑀅𑀪𑀺𑀦𑁆𑀤𑀺𑀢𑁆𑀯𑀸 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀧𑀝𑀺𑀘𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀯𑀼𑀢𑁆𑀢𑀸 ‘‘𑀤𑁆𑀯𑀬𑀁 𑀧𑀝𑀺𑀘𑁆𑀘 𑀨𑀲𑁆𑀲𑁄’’𑀢𑀺, 𑀢𑀲𑁆𑀫𑀸 𑀫𑀳𑀸𑀤𑁆𑀯𑀬𑀁 𑀦𑀸𑀫 𑀓𑀺𑀭𑁂𑀢𑀁 𑀅𑀦𑀯𑀲𑁂𑀲𑀢𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀳𑀺 𑀲𑀴𑀸𑀬𑀢𑀦𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑁂𑀯. 𑀨𑀲𑁆𑀲𑀓𑀸𑀭𑀡𑀸𑀦𑀻𑀢𑀺 𑀨𑀲𑁆𑀲𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀸𑀦𑀺. 𑀬𑁂𑀳𑀻𑀢𑀺 𑀳𑁂𑀢𑀼𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀬𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀻’’𑀢𑀺. 𑀨𑀲𑁆𑀲𑁄 𑀏𑀯 𑀨𑀼𑀲𑀦𑀓𑀺𑀘𑁆𑀘𑁄, 𑀦 𑀨𑀲𑁆𑀲𑀸𑀬𑀢𑀦𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀨𑀲𑁆𑀲𑁂𑀦 𑀨𑀼𑀝𑁆𑀞𑁄’’𑀢𑀺. 𑀧𑀭𑀺𑀧𑀼𑀡𑁆𑀡𑀯𑀲𑁂𑀦𑀸𑀢𑀺 𑀅𑀯𑁂𑀓𑀮𑁆𑀮𑀯𑀲𑁂𑀦. 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀳𑀻𑀦𑀸𑀦𑀺 𑀨𑀲𑁆𑀲𑀲𑁆𑀲 𑀓𑀸𑀭𑀡𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀺𑀬𑀸𑀢𑀺 ‘‘𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀦𑀺𑀩𑁆𑀩𑀢𑁆𑀢𑀦𑀸𑀤𑀺𑀫𑁆𑀳𑀻𑀢𑀺 𑀲𑀯𑀺𑀜𑁆𑀜𑀸𑀡𑀓𑀲𑁆𑀲 𑀓𑀸𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀁 𑀓𑀸𑀬𑀦𑀺𑀩𑁆𑀩𑀢𑁆𑀢𑀦𑀁, 𑀓𑀸𑀬𑁄 𑀯𑀸 𑀦𑀺𑀩𑁆𑀩𑀢𑁆𑀢𑀢𑀺 𑀏𑀢𑁂𑀦𑀸𑀢𑀺 𑀓𑀸𑀬𑀦𑀺𑀩𑁆𑀩𑀢𑁆𑀢𑀦𑀁, 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸. 𑀆𑀤𑀺𑀲𑀤𑁆𑀤𑁂𑀦 𑀨𑀲𑁆𑀲𑀲𑀴𑀸𑀬𑀢𑀦𑀸𑀤𑀺𑀲𑀗𑁆𑀕𑀳𑁄. 𑀅𑀥𑀺𑀓𑀁 𑀧𑀬𑀲𑀢𑀺 𑀧𑀬𑀼𑀜𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀬𑀸𑀲𑁄, 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀅𑀥𑀺𑀓𑀧𑀬𑁄𑀕𑁄’’𑀢𑀺.

𑀪𑀕𑀯𑀸 𑀅𑀫𑁆𑀳𑀸𑀓𑀁 𑀉𑀧𑁆𑀧𑀸𑀤𑀓𑀪𑀸𑀯𑁂𑀦 𑀫𑀽𑀮𑀪𑀸𑀯𑁂𑀦 𑀪𑀕𑀯𑀁𑀫𑀽𑀮𑀓𑀸. 𑀇𑀫𑁂 𑀥𑀫𑁆𑀫𑀸𑀢𑀺 𑀇𑀫𑁂 𑀓𑀸𑀭𑀡𑀥𑀫𑁆𑀫𑀸. 𑀬𑁂𑀳𑀺 𑀫𑀬𑀁 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀲𑀫𑀸𑀦𑁂𑀧𑀺 𑀓𑀸𑀬𑀦𑀺𑀩𑁆𑀩𑀢𑁆𑀢𑀦𑀸𑀤𑀺𑀫𑁆𑀳𑀺 𑀯𑀺𑀲𑁂𑀲𑀁 𑀚𑀸𑀦𑁂𑀬𑁆𑀬𑀸𑀫, 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀉𑀧𑁆𑀧𑀸𑀤𑀺𑀢𑀸’’𑀢𑀺𑀆𑀤𑀺. 𑀆𑀚𑀸𑀦𑀸𑀫𑀸𑀢𑀺 𑀅𑀪𑀺𑀫𑀼𑀔𑀁 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀸𑀫. 𑀧𑀝𑀺𑀯𑀺𑀚𑁆𑀛𑀸𑀫𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀥𑀺𑀕𑀘𑁆𑀙𑀸𑀫𑀸𑀢𑀺 𑀅𑀢𑁆𑀣𑁄. 𑀦𑁂𑀢𑀸𑀢𑀺 𑀅𑀫𑁆𑀳𑀸𑀓𑀁 𑀲𑀦𑁆𑀢𑀸𑀦𑁂 𑀧𑀸𑀧𑁂𑀢𑀸. 𑀯𑀺𑀦𑁂𑀢𑀸𑀢𑀺 𑀬𑀣𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀳𑁄𑀢𑀺, 𑀏𑀯𑀁 𑀯𑀺𑀲𑁂𑀲𑀢𑁄 𑀦𑁂𑀢𑀸, 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀸 𑀯𑀺𑀦𑁂𑀢𑀸. 𑀅𑀦𑀼𑀦𑁂𑀢𑀸𑀢𑀺 𑀅𑀦𑀼𑀭𑀽𑀧𑀁 𑀦𑁂𑀢𑀸. 𑀅𑀦𑁆𑀢𑀭𑀦𑁆𑀢𑀭𑀸 𑀬𑀣𑀸𑀥𑀫𑁆𑀫𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀭𑀽𑀧𑀢𑁄 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀬𑀣𑀸𑀲𑀪𑀸𑀯𑀢𑁄 …𑀧𑁂… 𑀤𑀲𑁆𑀲𑁂𑀢𑀸’’𑀢𑀺. 𑀆𑀧𑀸𑀣𑀁 𑀉𑀧𑀕𑀘𑁆𑀙𑀦𑁆𑀢𑀸𑀦𑀁 𑀪𑀕𑀯𑀸 𑀧𑀝𑀺𑀲𑀭𑀡𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀦𑁆𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸 𑀥𑀫𑁆𑀫𑀸. 𑀢𑁂𑀦𑀸𑀳 ‘‘𑀘𑀢𑀼𑀪𑀽𑀫𑀓𑀥𑀫𑁆𑀫𑀸’’𑀢𑀺𑀆𑀤𑀺. 𑀧𑀝𑀺𑀲𑀭𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀧𑀝𑀺𑀲𑀭𑀡𑀁, 𑀢𑀲𑁆𑀫𑀸 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀪𑀕𑀯𑀸 𑀧𑀝𑀺𑀲𑀭𑀡𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀢𑁂𑀦𑀸𑀳 ‘‘𑀅𑀧𑀺 𑀘𑀸’’𑀢𑀺𑀆𑀤𑀺. 𑀨𑀲𑁆𑀲𑁄 𑀆𑀕𑀘𑁆𑀙𑀢𑀻𑀢𑀺 𑀧𑀝𑀺𑀯𑀺𑀚𑁆𑀛𑀦𑀓𑀯𑀲𑁂𑀦 𑀨𑀲𑁆𑀲𑁄 𑀜𑀸𑀡𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑁄𑀬𑁂𑀯 𑀲𑁄 𑀅𑀢𑁆𑀣𑀢𑁄 ‘‘𑀅𑀳𑀁 𑀓𑀺𑀦𑁆𑀦𑀸𑀫𑁄’’𑀢𑀺 𑀦𑀸𑀫𑀁 𑀧𑀼𑀘𑁆𑀙𑀦𑁆𑀢𑁄 𑀯𑀺𑀬, 𑀪𑀕𑀯𑀸 𑀘𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀳𑀁 𑀪𑀕𑀯𑀸’’𑀢𑀺𑀆𑀤𑀺. 𑀉𑀧𑀝𑁆𑀞𑀸𑀢𑀽𑀢𑀺 𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀢𑀼. 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀽𑀢𑀺 𑀪𑀕𑀯𑀢𑁄 𑀏𑀯 𑀪𑀸𑀕𑁄 𑀳𑁄𑀢𑀼, 𑀪𑀕𑀯𑀸𑀯 𑀦𑀁 𑀅𑀢𑁆𑀢𑀦𑁄 𑀪𑀸𑀕𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀽𑀢𑀺 𑀅𑀢𑁆𑀣𑁄, 𑀪𑀕𑀯𑀢𑁄 𑀪𑀸𑀕𑁄 𑀬𑀤𑀺𑀤𑀁 𑀥𑀫𑁆𑀫𑀲𑁆𑀲 𑀅𑀓𑁆𑀔𑀸𑀦𑀁, 𑀅𑀫𑁆𑀳𑀸𑀓𑀁 𑀧𑀦 𑀲𑀯𑀦𑀁 𑀪𑀸𑀕𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀲𑀤𑁆𑀤𑀮𑀓𑁆𑀔𑀡𑁂𑀦 𑀲𑀫𑁂𑀢𑀺. 𑀓𑁂𑀘𑀺 𑀧𑀦 𑀧𑀝𑀺𑀪𑀸𑀢𑀽𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺 𑀜𑀸𑀡𑁂𑀦 𑀤𑀺𑀲𑁆𑀲𑀢𑀼 𑀤𑁂𑀲𑀻𑀬𑀢𑀽𑀢𑀺 𑀯𑀸 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀼𑀫𑁆𑀳𑁂𑀬𑁂𑀯 𑀦𑁄 𑀓𑀣𑁂𑀢𑁆𑀯𑀸 𑀤𑁂𑀣𑀸𑀢𑀺 𑀅𑀢𑁆𑀣𑁄’’𑀢𑀺.

𑀩𑀸𑀮𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀘 𑀓𑀸𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑀸 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘. 𑀢𑁂𑀦𑀸𑀳 ‘‘𑀓𑀫𑁆𑀫𑀁…𑀧𑁂… 𑀦𑀺𑀭𑀼𑀤𑁆𑀥𑀸’’𑀢𑀺. 𑀚𑀯𑀸𑀧𑁂𑀢𑁆𑀯𑀸𑀢𑀺 𑀕𑀳𑀺𑀢𑀚𑀯𑀦𑀁 𑀓𑀢𑁆𑀯𑀸, 𑀬𑀣𑀸 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀲𑀫𑀢𑁆𑀣𑀁 𑀳𑁄𑀢𑀺, 𑀏𑀯𑀁 𑀓𑀢𑁆𑀯𑀸. 𑀬𑀤𑀺 𑀦𑀺𑀭𑀼𑀤𑁆𑀥𑀸, 𑀓𑀣𑀁 𑀅𑀧𑁆𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂𑀧𑀺 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀲𑀸 𑀏𑀯 𑀢𑀺𑀢𑁆𑀢𑀺𑀭𑀻, 𑀢𑀸𑀦𑁂𑀯 𑀑𑀲𑀥𑀸𑀦𑀺, 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺 𑀘. 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀢𑀤𑀢𑁆𑀣𑀯𑀺𑀲𑁂𑀲𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀔𑀬𑀢𑁆𑀣𑀸𑀬𑀸’’𑀢𑀺. 𑀧𑀝𑀺𑀲𑀦𑁆𑀥𑀺𑀓𑀸𑀬𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀕𑀳𑀡𑀧𑀼𑀩𑁆𑀩𑀓𑀁 𑀓𑀸𑀬𑀁. 𑀧𑀸𑀴𑀺𑀬𑀁 ‘‘𑀩𑀸𑀮𑁂𑀦𑀸’’𑀢𑀺 𑀓𑀭𑀡𑀯𑀘𑀦𑀁 𑀦𑀺𑀲𑁆𑀲𑀓𑁆𑀓𑁂𑀢𑀺 𑀆𑀳 ‘‘𑀩𑀸𑀮𑀢𑁄’’𑀢𑀺. 𑀪𑀸𑀯𑀺𑀦𑀸 𑀲𑀳 𑀧𑀝𑀺𑀲𑀦𑁆𑀥𑀺𑀦𑀸 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑁄. 𑀬𑁄 𑀧𑀦 𑀏𑀓𑀦𑁆𑀢𑀢𑁄 𑀢𑁂𑀦𑀢𑁆𑀢𑀪𑀸𑀯𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀪𑀩𑁆𑀩𑁄, 𑀲𑁄 𑀪𑀸𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀦𑀸 ‘‘𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄’’𑀢𑀺, 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀲𑁄 𑀘 𑀬𑀸𑀯 𑀅𑀭𑀺𑀬𑀪𑀽𑀫𑀺𑀁 𑀦 𑀑𑀓𑁆𑀓𑀫𑀢𑀺, 𑀢𑀸𑀯 𑀩𑀸𑀮𑀥𑀫𑁆𑀫𑀲𑀫𑀗𑁆𑀕𑀻 𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀲𑀩𑁆𑀩𑁄𑀧𑀺 𑀧𑀼𑀣𑀼𑀚𑁆𑀚𑀦𑁄 𑀩𑀸𑀮𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 ‘‘𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄 𑀔𑀻𑀡𑀸𑀲𑀯𑁄 𑀧𑀡𑁆𑀟𑀺𑀢𑁄’’𑀢𑀺 𑀔𑀻𑀡𑀸𑀲𑀯-𑀲𑀤𑁆𑀤𑁂𑀦 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄 𑀯𑀺𑀲𑁂𑀲𑀺𑀢𑁄. 𑀬𑀤𑀺 𑀏𑀯𑀁 𑀲𑁂𑀓𑁆𑀔𑀸 𑀓𑀣𑀦𑁆𑀢𑀺 𑀆𑀳 ‘‘𑀲𑁄𑀢𑀸𑀧𑀦𑁆𑀦𑀸’’𑀢𑀺𑀆𑀤𑀺. 𑀢𑁂 𑀳𑀺 𑀲𑀺𑀔𑀸𑀧𑀢𑁆𑀢𑀧𑀡𑁆𑀟𑀺𑀘𑁆𑀘𑀪𑀸𑀯𑀮𑀓𑁆𑀔𑀡𑀸𑀪𑀸𑀯𑀢𑁄 𑀧𑀡𑁆𑀟𑀺𑀢𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸 𑀔𑀻𑀡𑀸𑀲𑀯𑀸 𑀯𑀺𑀬, 𑀩𑀮𑀯𑀢𑀭𑀸𑀦𑀁 𑀧𑀦 𑀩𑀸𑀮𑀥𑀫𑁆𑀫𑀸𑀦𑀁 𑀧𑀳𑀻𑀦𑀢𑁆𑀢𑀸 𑀩𑀸𑀮𑀸𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀧𑀼𑀣𑀼𑀚𑁆𑀚𑀦𑀸 𑀯𑀺𑀬. 𑀪𑀚𑀺𑀬𑀫𑀸𑀦𑀸 𑀧𑀦 𑀘𑀢𑀼𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀁 𑀉𑀧𑀸𑀤𑀸𑀬 𑀧𑀡𑁆𑀟𑀺𑀢𑀧𑀓𑁆𑀔𑀁 𑀪𑀚𑀦𑁆𑀢𑀺, 𑀦 𑀩𑀸𑀮𑀧𑀓𑁆𑀔𑀁 𑀯𑀼𑀢𑁆𑀢𑀓𑀸𑀭𑀡𑁂𑀦𑀸𑀢𑀺.

𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀢𑀁 𑀅𑀧𑁆𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀘𑁆𑀘𑀬𑀥𑀫𑁆𑀫𑁄𑀧𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀥𑀫𑁆𑀫𑀁 𑀉𑀧𑀸𑀤𑀸𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄, 𑀢𑀣𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄𑀧𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀉𑀧𑀸𑀤𑀸𑀬 𑀧𑀘𑁆𑀘𑀬𑀥𑀫𑁆𑀫𑁄𑀢𑀺 𑀬𑀣𑀸𑀭𑀳𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸. 𑀬𑁂𑀲𑀁 𑀯𑀺𑀦𑁂𑀬𑁆𑀬𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀬𑁂𑀯 𑀲𑀼𑀩𑁄𑀥𑀢𑁄 𑀉𑀧𑀝𑁆𑀞𑀸𑀢𑀺, 𑀢𑁂𑀲𑀁 𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄. 𑀬𑁂𑀲𑀁 𑀧𑀦 𑀯𑀺𑀦𑁂𑀬𑁆𑀬𑀸𑀦𑀁 𑀢𑀤𑀼𑀪𑀬𑀲𑁆𑀫𑀺𑀁 𑀯𑀺𑀪𑀚𑁆𑀚 𑀲𑀼𑀢𑁂 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀢𑁂 𑀲𑀦𑁆𑀥𑀸𑀬 𑀪𑀕𑀯𑀸 𑀢𑀤𑀼𑀪𑀬𑀁 𑀯𑀺𑀪𑀚𑁆𑀚 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂 𑀘 𑀥𑀫𑁆𑀫𑁂’’𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀻𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀢𑁆𑀣𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀧𑀘𑁆𑀘𑀬𑀲𑁆𑀲 𑀪𑀸𑀯𑁄 𑀧𑀘𑁆𑀘𑀬𑀢𑁆𑀢𑀁, 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀢𑀸. 𑀅𑀲𑀪𑀸𑀯𑀥𑀫𑁆𑀫𑁂 𑀦 𑀮𑀩𑁆𑀪𑀢𑀻𑀢𑀺 ‘‘𑀲𑀪𑀸𑀯𑀥𑀫𑁆𑀫𑁂’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀚𑀸𑀢𑀺 𑀚𑀭𑀸 𑀫𑀭𑀡𑀜𑁆𑀘 𑀲𑀪𑀸𑀯𑀥𑀫𑁆𑀫𑁄 𑀦 𑀳𑁄𑀢𑀺, 𑀬𑁂𑀲𑀁 𑀧𑀦 𑀔𑀦𑁆𑀥𑀸𑀦𑀁 𑀚𑀸𑀢𑀺 𑀚𑀭𑀸 𑀫𑀭𑀡𑀜𑁆𑀘, 𑀢𑁂 𑀏𑀯 𑀲𑀪𑀸𑀯𑀥𑀫𑁆𑀫𑀸, 𑀅𑀣 𑀓𑀲𑁆𑀫𑀸 𑀤𑁂𑀲𑀦𑀸𑀬 𑀢𑁂 𑀕𑀳𑀺𑀢𑀸𑀢𑀺? 𑀦𑀸𑀬𑀁 𑀤𑁄𑀲𑁄, 𑀚𑀸𑀢𑀺 𑀚𑀭𑀸 𑀫𑀭𑀡𑀜𑁆𑀳𑀺 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀯𑀺𑀓𑀸𑀭𑀫𑀢𑁆𑀢𑀁, 𑀦𑀜𑁆𑀜𑁂𑀲𑀁, 𑀢𑀲𑁆𑀫𑀸 𑀢𑁂 𑀕𑀳𑀺𑀢𑀸𑀢𑀺. 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀦𑁆𑀢𑀺 𑀦 𑀯𑀺𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀁 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺 𑀯𑀺𑀬 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀼𑀧𑁆𑀧𑀢𑁆𑀢𑀺 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀬𑀢𑁆𑀢𑀸, 𑀅𑀣 𑀔𑁄 𑀲𑀸 𑀢𑀣𑀸𑀕𑀢𑀸𑀦𑀁 𑀉𑀧𑁆𑀧𑀸𑀤𑁂𑀧𑀺 𑀅𑀦𑀼𑀧𑁆𑀧𑀸𑀤𑁂𑀧𑀺 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀲𑀸 𑀓𑀸𑀫𑀁 𑀅𑀲𑀗𑁆𑀔𑀢𑀸 𑀯𑀺𑀬 𑀥𑀸𑀢𑀼 𑀦 𑀦𑀺𑀘𑁆𑀘𑀸, 𑀢𑀣𑀸𑀧𑀺 ‘‘𑀲𑀩𑁆𑀩𑀓𑀸𑀮𑀺𑀓𑀸’’𑀢𑀺 𑀏𑀢𑁂𑀦 𑀚𑀸𑀢𑀺𑀧𑀘𑁆𑀘𑀬𑀢𑁄 𑀚𑀭𑀸𑀫𑀭𑀡𑀼𑀧𑁆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀚𑀸𑀢𑀺𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄’’𑀢𑀺. 𑀚𑀸𑀢𑀺𑀧𑀘𑁆𑀘𑀬𑀸𑀢𑀺 𑀘 𑀚𑀸𑀢𑀺𑀲𑀗𑁆𑀔𑀸𑀢𑀧𑀘𑁆𑀘𑀬𑀸. 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀞𑀺𑀢𑀸𑀯 𑀲𑀸 𑀥𑀸𑀢𑀼, 𑀬𑀸𑀬𑀁 𑀇𑀤𑀧𑁆𑀧𑀘𑁆𑀘𑀬𑀢𑀸 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀢𑀸 𑀢𑀲𑁆𑀲 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄. 𑀇𑀤𑀸𑀦𑀺 𑀦 𑀓𑀤𑀸𑀘𑀺 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺 𑀳𑁄𑀢𑀺𑀬𑁂𑀯𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂 𑀦𑀺𑀬𑀫𑁂𑀢𑀺. 𑀉𑀪𑀬𑁂𑀦𑀧𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀬𑀢𑁆𑀣 𑀳𑁄𑀢𑀺, 𑀢𑀢𑁆𑀣 𑀅𑀯𑀲𑁆𑀲𑀁𑀪𑀸𑀯𑀺𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀞𑀺𑀢𑀸𑀯 𑀲𑀸 𑀥𑀸𑀢𑀽’’𑀢𑀺. 𑀤𑁆𑀯𑀻𑀳𑀺 𑀧𑀤𑁂𑀳𑀺. 𑀢𑀺𑀝𑁆𑀞𑀦𑁆𑀢𑀻𑀢𑀺 𑀬𑀲𑁆𑀲 𑀯𑀲𑁂𑀦 𑀥𑀫𑁆𑀫𑀸𑀦𑀁 𑀞𑀺𑀢𑀺, 𑀲𑀸 𑀇𑀤𑀧𑁆𑀧𑀘𑁆𑀘𑀬𑀢𑀸 𑀥𑀫𑁆𑀫𑀝𑁆𑀞𑀺𑀢𑀢𑀸. 𑀥𑀫𑁆𑀫𑁂𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂 𑀥𑀫𑁆𑀫𑁂. 𑀦𑀺𑀬𑀫𑁂𑀢𑀺 𑀯𑀺𑀲𑁂𑀲𑁂𑀢𑀺. 𑀳𑁂𑀢𑀼𑀕𑀢𑀯𑀺𑀲𑁂𑀲𑀲𑀫𑀸𑀬𑁄𑀕𑁄 𑀳𑀺 𑀳𑁂𑀢𑀼𑀨𑀮𑀲𑁆𑀲 𑀏𑀯𑀁 𑀥𑀫𑁆𑀫𑀢𑀸𑀦𑀺𑀬𑀸𑀫𑁄 𑀏𑀯𑀸𑀢𑀺.

𑀅𑀧𑀭𑁄 𑀦𑀬𑁄 𑁋 𑀞𑀺𑀢𑀸𑀯 𑀲𑀸 𑀥𑀸𑀢𑀽𑀢𑀺 𑀬𑀸𑀬𑀁 𑀚𑀭𑀸𑀫𑀭𑀡𑀲𑁆𑀲 𑀇𑀤𑀧𑁆𑀧𑀘𑁆𑀘𑀬𑀢𑀸 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺, 𑀏𑀲𑀸 𑀥𑀸𑀢𑀼 𑀏𑀲 𑀲𑀪𑀸𑀯𑁄. 𑀢𑀣𑀸𑀕𑀢𑀸𑀦𑀁 𑀉𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂 𑀉𑀤𑁆𑀥𑀜𑁆𑀘 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁄, 𑀫𑀚𑁆𑀛𑁂 𑀘 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁄 𑀦 𑀢𑀣𑀸𑀕𑀢𑁂𑀳𑀺 𑀉𑀧𑁆𑀧𑀸𑀤𑀺𑀢𑁄, 𑀅𑀣 𑀔𑁄 𑀲𑀫𑁆𑀪𑀯𑀦𑁆𑀢𑀲𑁆𑀲 𑀚𑀭𑀸𑀫𑀭𑀡𑀲𑁆𑀲 𑀲𑀩𑁆𑀩𑀓𑀸𑀮𑀁 𑀚𑀸𑀢𑀺𑀧𑀘𑁆𑀘𑀬𑀢𑁄 𑀲𑀫𑁆𑀪𑀯𑁄𑀢𑀺 𑀞𑀺𑀢𑀸𑀯 𑀲𑀸 𑀥𑀸𑀢𑀼, 𑀓𑁂𑀯𑀮𑀁 𑀧𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀢𑁄 ‘‘𑀅𑀬𑀁 𑀥𑀫𑁆𑀫𑁄 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀯𑁂𑀤𑀦𑀢𑁄 𑀘 𑀢𑀣𑀸𑀕𑀢𑁄 ‘‘𑀥𑀫𑁆𑀫𑀲𑀸𑀫𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀅𑀧𑀼𑀩𑁆𑀩𑀲𑁆𑀲 𑀉𑀧𑁆𑀧𑀸𑀤𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀞𑀺𑀢𑀸𑀯 𑀲𑀸 𑀥𑀸𑀢𑀽’’𑀢𑀺. 𑀲𑀸 𑀏𑀯 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀏𑀢𑁆𑀣 𑀯𑀺𑀧𑀮𑁆𑀮𑀸𑀲𑀸𑀪𑀸𑀯𑀢𑁄 𑀏𑀯𑀁 𑀅𑀯𑀩𑀼𑀚𑁆𑀛𑀫𑀸𑀦𑀲𑁆𑀲 𑀏𑀢𑀲𑁆𑀲 𑀲𑀪𑀸𑀯𑀲𑁆𑀲, 𑀳𑁂𑀢𑀼𑀦𑁄 𑀯𑀸 𑀢𑀣𑁂𑀯 𑀪𑀸𑀯𑀢𑁄 𑀞𑀺𑀢𑀢𑀸𑀢𑀺 𑀥𑀫𑁆𑀫𑀝𑁆𑀞𑀺𑀢𑀢𑀸, 𑀚𑀸𑀢𑀺 𑀯𑀸 𑀚𑀭𑀸𑀫𑀭𑀡𑀲𑁆𑀲 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀧𑀯𑀢𑁆𑀢𑀆𑀬𑀽𑀳𑀦-𑀲𑀁𑀬𑁄𑀕-𑀧𑀮𑀺𑀩𑁄𑀥-𑀲𑀫𑀼𑀤𑀬-𑀳𑁂𑀢𑀼𑀧𑀘𑁆𑀘𑀬𑀝𑁆𑀞𑀺𑀢𑀻𑀢𑀺 𑀢𑀤𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑁂𑀦𑀲𑁆𑀲𑀸 𑀞𑀺𑀢𑀢𑀸 ‘‘𑀥𑀫𑁆𑀫𑀝𑁆𑀞𑀺𑀢𑀢𑀸’’𑀢𑀺 𑀨𑀮𑀁 𑀧𑀢𑀺 𑀲𑀸𑀫𑀢𑁆𑀣𑀺𑀬𑀢𑁄 𑀳𑁂𑀢𑀼𑀫𑁂𑀯 𑀯𑀤𑀢𑀺. 𑀥𑀸𑀭𑀻𑀬𑀢𑀺 𑀧𑀘𑁆𑀘𑀬𑁂𑀳𑀻𑀢𑀺 𑀯𑀸 𑀥𑀫𑁆𑀫𑁄, 𑀢𑀺𑀝𑁆𑀞𑀢𑀺 𑀢𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀨𑀮𑀦𑁆𑀢𑀺 𑀞𑀺𑀢𑀺, 𑀥𑀫𑁆𑀫𑀲𑁆𑀲 𑀞𑀺𑀢𑀺 𑀥𑀫𑁆𑀫𑀝𑁆𑀞𑀺𑀢𑀺. 𑀥𑀫𑁆𑀫𑁄𑀢𑀺 𑀯𑀸 𑀓𑀸𑀭𑀡𑀁 𑀧𑀘𑁆𑀘𑀬𑀪𑀸𑀯𑁂𑀦 𑀨𑀮𑀲𑁆𑀲 𑀥𑀸𑀭𑀡𑀢𑁄, 𑀢𑀲𑁆𑀲 𑀞𑀺𑀢𑀺 𑀲𑀪𑀸𑀯𑁄, 𑀥𑀫𑁆𑀫𑀢𑁄 𑀘 𑀅𑀜𑁆𑀜𑁄 𑀲𑀪𑀸𑀯𑁄 𑀦𑀢𑁆𑀣𑀻𑀢𑀺 𑀥𑀫𑁆𑀫𑀝𑁆𑀞𑀺𑀢𑀺, 𑀧𑀘𑁆𑀘𑀬𑁄. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁪). 𑀥𑀫𑁆𑀫𑀝𑁆𑀞𑀺𑀢𑀺 𑀏𑀯 𑀥𑀫𑁆𑀫𑀝𑁆𑀞𑀺𑀢𑀢𑀸. 𑀲𑀸 𑀏𑀯 𑀥𑀸𑀢𑀼 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀇𑀫𑀲𑁆𑀲 𑀲𑀪𑀸𑀯𑀲𑁆𑀲, 𑀳𑁂𑀢𑀼𑀦𑁄 𑀯𑀸 𑀅𑀜𑁆𑀜𑀣𑀢𑁆𑀢𑀸𑀪𑀸𑀯𑀢𑁄, ‘‘𑀦 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀲𑁆𑀲 𑀘 𑀢𑀩𑁆𑀪𑀸𑀯𑀸𑀪𑀸𑀯𑀢𑁄 𑀦𑀺𑀬𑀸𑀫𑀢𑀸 𑀯𑀯𑀢𑁆𑀣𑀺𑀢𑀪𑀸𑀯𑁄𑀢𑀺 𑀥𑀫𑁆𑀫𑀦𑀺𑀬𑀸𑀫𑀢𑀸. 𑀨𑀮𑀲𑁆𑀲 𑀯𑀸 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀬𑀸 𑀲𑀢𑀺 𑀲𑀫𑁆𑀪𑀯𑁄 𑀥𑀫𑁆𑀫𑁂 𑀳𑁂𑀢𑀼𑀫𑁆𑀳𑀺 𑀞𑀺𑀢𑀢𑀸𑀢𑀺 𑀥𑀫𑁆𑀫𑀝𑁆𑀞𑀺𑀢𑀢𑀸, 𑀅𑀲𑀢𑀺 𑀅𑀲𑀫𑁆𑀪𑀯𑁄 𑀥𑀫𑁆𑀫𑀦𑀺𑀬𑀸𑀫𑀢𑀸𑀢𑀺 𑀏𑀯𑀁 𑀨𑀮𑁂𑀦 𑀳𑁂𑀢𑀼𑀁 𑀯𑀺𑀪𑀸𑀯𑁂𑀢𑀺, 𑀢𑀁 ‘‘𑀞𑀺𑀢𑀸𑀯 𑀲𑀸 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁. 𑀇𑀫𑁂𑀲𑀁 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀘𑁆𑀘𑀬𑀢𑀸𑀲𑀗𑁆𑀔𑀸𑀢𑀁 𑀇𑀤𑀧𑁆𑀧𑀘𑁆𑀘𑀬𑀢𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑁂𑀦 𑀅𑀪𑀺𑀫𑀼𑀔𑀁 𑀩𑀼𑀚𑁆𑀛𑀢𑀺 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀢𑁄 𑀏𑀯 𑀅𑀪𑀺𑀲𑀫𑁂𑀢𑀺 𑀅𑀪𑀺𑀫𑀼𑀔𑀁 𑀲𑀫𑀸𑀕𑀘𑁆𑀙𑀢𑀺, 𑀆𑀤𑀺𑀢𑁄 𑀓𑀣𑁂𑀦𑁆𑀢𑁄 𑀆𑀘𑀺𑀓𑁆𑀔𑀢𑀺, 𑀉𑀤𑁆𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀉𑀤𑁆𑀤𑁂𑀲𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁄 𑀤𑁂𑀲𑁂𑀢𑀺. 𑀬𑀣𑀸𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑀁 𑀦𑀺𑀤𑁆𑀤𑀺𑀲𑀦𑀯𑀲𑁂𑀦 𑀧𑀓𑀸𑀭𑁂𑀳𑀺 𑀜𑀸𑀧𑁂𑀦𑁆𑀢𑁄 𑀧𑀜𑁆𑀜𑀸𑀧𑁂𑀢𑀺. 𑀧𑀓𑀸𑀭𑁂𑀳𑀺 𑀏𑀯 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀧𑀝𑁆𑀞𑀧𑁂𑀢𑀺. 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀁 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺. 𑀯𑀺𑀯𑀝𑀜𑁆𑀳𑀺 𑀯𑀺𑀪𑀢𑁆𑀢𑀜𑁆𑀘 𑀅𑀢𑁆𑀣𑀁 𑀳𑁂𑀢𑀽𑀤𑀸𑀳𑀭𑀡𑀤𑀲𑁆𑀲𑀦𑁂𑀳𑀺 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀸𑀦𑀻𑀓𑀭𑁄𑀢𑀺. 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑁄 𑀢𑀣𑀸 𑀧𑀘𑁆𑀘𑀓𑁆𑀔𑀪𑀽𑀢𑀁 𑀓𑀢𑁆𑀯𑀸 𑀦𑀺𑀕𑀫𑀦𑀯𑀲𑁂𑀦 𑀧𑀲𑁆𑀲𑀣𑀸𑀢𑀺 𑀘𑀸𑀳.

𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺𑀆𑀤𑀻𑀲𑀽𑀢𑀺 𑀚𑀸𑀢𑀺𑀆𑀤𑀻𑀦𑀁 𑀚𑀭𑀸𑀫𑀭𑀡𑀧𑀘𑁆𑀘𑀬𑀪𑀸𑀯𑁂𑀲𑀼. 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀻𑀢𑀺 𑀬𑀸𑀯𑀢𑀓𑁂𑀳𑀺 𑀧𑀘𑁆𑀘𑀬𑁂𑀳𑀺 𑀬𑀁 𑀨𑀮𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀭𑀳𑀁, 𑀅𑀯𑀺𑀓𑀮𑁂𑀳𑀺 𑀢𑁂𑀳𑁂𑀯 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀦 𑀊𑀦𑀸𑀥𑀺𑀓𑁂𑀳𑀻𑀢𑀺. 𑀢𑁂𑀦𑀸𑀳 ‘‘𑀅𑀦𑀽𑀦𑀸𑀥𑀺𑀓𑁂𑀳𑁂𑀯𑀸’’𑀢𑀺. 𑀬𑀣𑀸 𑀢𑀁 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑁂𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄𑀢𑀺. 𑀢𑁂𑀦 𑀢𑀁𑀢𑀁𑀨𑀮𑀦𑀺𑀧𑁆𑀨𑀸𑀤𑀦𑁂 𑀢𑀲𑁆𑀲𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀢𑀧𑁆𑀧𑀓𑀸𑀭𑀢𑀸 𑀢𑀣𑀢𑀸𑀢𑀺 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀫𑀕𑁆𑀕𑀺𑀦𑁆𑀢𑀺 𑀲𑀫𑁄𑀥𑀸𑀦𑀁, 𑀲𑀫𑀯𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀫𑁆𑀪𑀯𑀸𑀪𑀸𑀯𑀢𑁄𑀢𑀺 𑀅𑀦𑀼𑀧𑁆𑀧𑀚𑁆𑀚𑀦𑀲𑁆𑀲 𑀅𑀪𑀸𑀯𑀢𑁄. 𑀢𑀣𑀸𑀯𑀺𑀥𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀜𑁆𑀳𑀺 𑀲𑀢𑀺𑀧𑀺 𑀨𑀮𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑁂 𑀢𑀲𑁆𑀲𑀸𑀯𑀺𑀢𑀣𑀢𑀸 𑀲𑀺𑀬𑀸. 𑀅𑀜𑁆𑀜𑀥𑀫𑁆𑀫𑀧𑀘𑁆𑀘𑀬𑁂𑀳𑀻𑀢𑀺 𑀅𑀜𑁆𑀜𑀲𑁆𑀲 𑀨𑀮𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁂𑀳𑀺. 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑁆𑀧𑀢𑁆𑀢𑀺𑀢𑁄𑀢𑀺 𑀢𑀢𑁄 𑀅𑀜𑁆𑀜𑀲𑁆𑀲 𑀨𑀮𑀥𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀦 𑀳𑀺 𑀓𑀤𑀸𑀘𑀺 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑁂𑀳𑀺 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀢𑀲𑁆𑀲𑀸 𑀲𑀸𑀫𑀕𑁆𑀕𑀺𑀬𑀸 𑀅𑀜𑁆𑀜𑀣𑀢𑀸 𑀦𑀸𑀫 𑀲𑀺𑀬𑀸, 𑀦 𑀘𑁂𑀢𑀁 𑀅𑀢𑁆𑀣𑀻𑀢𑀺 ‘‘𑀅𑀦𑀜𑁆𑀜𑀣𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀢𑁄𑀢𑀺 𑀧𑀘𑁆𑀘𑀬𑀪𑀸𑀯𑀢𑁄. 𑀧𑀘𑁆𑀘𑀬𑀲𑀫𑀽𑀳𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀢𑀸-𑀲𑀤𑁆𑀤𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁 𑀬𑀣𑀸 ‘‘𑀤𑁂𑀯𑁄𑀬𑁂𑀯 𑀤𑁂𑀯𑀢𑀸’’𑀢𑀺, 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀲𑀫𑀽𑀳𑁄 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀲𑀫𑀽𑀳𑀢𑁆𑀣𑁄 𑀢𑀸𑀲𑀤𑁆𑀤𑁄 𑀬𑀣𑀸 ‘‘𑀚𑀦𑀸𑀦𑀁 𑀲𑀫𑀽𑀳𑁄 𑀚𑀦𑀢𑀸’’𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀦 𑀦𑀺𑀘𑁆𑀘𑀁 𑀲𑀲𑁆𑀲𑀢𑀦𑁆𑀢𑀺 𑀅𑀦𑀺𑀘𑁆𑀘𑀁. 𑀚𑀭𑀸𑀫𑀭𑀡𑀁 𑀦 𑀅𑀦𑀺𑀘𑁆𑀘𑀁 𑀲𑀗𑁆𑀔𑀸𑀭𑀸𑀦𑀁 𑀯𑀺𑀓𑀸𑀭𑀪𑀸𑀯𑀢𑁄 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸, 𑀢𑀣𑀸𑀧𑀺 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑀗𑁆𑀔𑀢𑀸𑀤𑀻𑀲𑀼𑀧𑀺. 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀁 𑀲𑀳𑀺𑀢𑁂𑀳𑁂𑀯 𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑁄 𑀬𑀣𑀸𑀲𑀪𑀸𑀯𑀁 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀧𑀘𑁆𑀘𑀬𑁂𑀳𑀺 𑀓𑀢𑀦𑁆𑀢𑀺 𑀲𑀗𑁆𑀔𑀢𑀁. 𑀧𑀘𑁆𑀘𑀬𑀸𑀭𑀳𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀦 𑀯𑀺𑀦𑀸 𑀢𑁂𑀦 𑀲𑀳𑀺𑀢𑀲𑀫𑁂𑀢𑀫𑁂𑀯 𑀉𑀧𑁆𑀧𑀦𑁆𑀦𑀦𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀔𑀬𑀲𑀪𑀸𑀯𑀦𑁆𑀢𑀺 𑀪𑀺𑀚𑁆𑀚𑀦𑀲𑀪𑀸𑀯𑀁. 𑀯𑀺𑀕𑀘𑁆𑀙𑀦𑀓𑀲𑀪𑀸𑀯𑀦𑁆𑀢𑀺 𑀲𑀓𑀪𑀸𑀯𑀢𑁄 𑀅𑀧𑀕𑀘𑁆𑀙𑀦𑀓𑀲𑀪𑀸𑀯𑀁. 𑀯𑀺𑀭𑀚𑁆𑀚𑀦𑀓𑀲𑀪𑀸𑀯𑀦𑁆𑀢𑀺 𑀧𑀮𑀼𑀚𑁆𑀚𑀦𑀓𑀲𑀪𑀸𑀯𑀁. 𑀦𑀺𑀭𑀼𑀚𑁆𑀛𑀦𑀓𑀲𑀪𑀸𑀯𑀦𑁆𑀢𑀺 𑀔𑀡𑀪𑀗𑁆𑀕𑀯𑀲𑁂𑀦 𑀧𑀪𑀗𑁆𑀕𑀼𑀲𑀪𑀸𑀯𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀚𑀭𑀸𑀬 𑀯𑀼𑀢𑁆𑀢𑀦𑀬𑁂𑀦. 𑀚𑀦𑀓𑀧𑁆𑀧𑀘𑁆𑀘𑀬𑀸𑀦𑀁 𑀓𑀫𑁆𑀫𑀸𑀤𑀻𑀦𑀁. 𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁂𑀢𑀺 𑀏𑀢𑁆𑀣 𑀓𑀺𑀘𑁆𑀘𑀸𑀦𑀼𑀪𑀸𑀯𑁄 𑀦𑀸𑀫 𑀬𑀣𑀸 𑀧𑀯𑀢𑁆𑀢𑀫𑀸𑀦𑁂 𑀧𑀘𑁆𑀘𑀬𑁂 𑀢𑀲𑁆𑀲 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀧𑀯𑀢𑁆𑀢𑀺, 𑀏𑀯𑀁 𑀲𑀦𑁆𑀢𑀲𑁆𑀲 𑀧𑀯𑀢𑁆𑀢𑀦𑀓𑁆𑀔𑀡𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀺𑀁 𑀔𑀡𑁂 𑀧𑀘𑁆𑀘𑀬𑁄 𑀅𑀢𑁆𑀢𑀦𑁄 𑀨𑀮𑀼𑀧𑁆𑀧𑀸𑀤𑀦𑀁 𑀧𑀢𑀺 𑀩𑁆𑀬𑀸𑀯𑀝𑁄 𑀦𑀸𑀫 𑀳𑁄𑀢𑀺, 𑀇𑀫𑀲𑁆𑀫𑀺𑀁 𑀔𑀡𑁂 𑀬𑁂 𑀥𑀫𑁆𑀫𑀸 𑀭𑀽𑀧𑀸𑀤𑀬𑁄 𑀉𑀧𑀮𑀩𑁆𑀪𑀦𑁆𑀢𑀺 𑀢𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀘 𑀅𑀦𑀼𑀧𑀮𑀩𑁆𑀪𑀫𑀸𑀦𑀸, 𑀢𑁂𑀲𑀁 𑀢𑀢𑁄 𑀉𑀧𑁆𑀧𑀢𑁆𑀢𑀺 𑀦𑀺𑀤𑁆𑀥𑀸𑀭𑀻𑀬𑀢𑀺, 𑀏𑀯𑀁 𑀚𑀸𑀢𑀺𑀬𑀸𑀧𑀺 𑀲𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸 𑀢𑀁𑀔𑀡𑀽𑀧𑀮𑀤𑁆𑀥𑀢𑁄𑀢𑀺. 𑀬𑀤𑀺 𑀏𑀯𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀚𑀸𑀢𑀺𑀬𑀸 𑀓𑀼𑀢𑁄𑀘𑀺 𑀉𑀧𑁆𑀧𑀢𑁆𑀢𑀺 𑀲𑀺𑀤𑁆𑀥𑀺, 𑀅𑀣 𑀓𑀲𑁆𑀫𑀸 ‘‘𑀏𑀓𑁂𑀦 𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀚𑀸𑀬𑀫𑀸𑀦𑀥𑀫𑁆𑀫𑀸𑀦𑀁 𑀯𑀺𑀓𑀸𑀭𑀪𑀸𑀯𑁂𑀦 𑀉𑀧𑀮𑀤𑁆𑀥𑀩𑁆𑀩𑀢𑁆𑀢𑀸. 𑀬𑀤𑀺 𑀦𑀺𑀧𑁆𑀨𑀦𑁆𑀦𑀥𑀫𑁆𑀫𑀸 𑀯𑀺𑀬 𑀚𑀸𑀢𑀺 𑀉𑀧𑀮𑀩𑁆𑀪𑁂𑀬𑁆𑀬, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀢𑀲𑁆𑀲𑀸 𑀓𑀼𑀢𑁄𑀘𑀺 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀦 𑀘𑁂𑀯𑀁 𑀉𑀧𑀮𑀩𑁆𑀪𑀢𑀺, 𑀅𑀣 𑀔𑁄 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀯𑀺𑀓𑀸𑀭𑀪𑀸𑀯𑁂𑀦 𑀉𑀧𑀮𑀩𑁆𑀪𑀢𑀺. 𑀢𑀲𑁆𑀫𑀸 ‘‘𑀏𑀓𑁂𑀦 𑀧𑀭𑀺𑀬𑀸𑀬𑁂𑀦𑁂𑀢𑁆𑀣 𑀅𑀦𑀺𑀘𑁆𑀘𑀸𑀢𑀺𑀆𑀤𑀻𑀦𑀺 𑀬𑀼𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀧𑀦 𑀚𑀭𑀸𑀫𑀭𑀡𑁂, 𑀚𑀦𑀓𑀧𑁆𑀧𑀘𑁆𑀘𑀬𑀸𑀦𑀁 𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁂 𑀢𑀲𑁆𑀲 𑀅𑀮𑀩𑁆𑀪𑀦𑀢𑁄. 𑀢𑁂𑀦𑁂𑀯 ‘‘𑀏𑀢𑁆𑀣 𑀘 𑀅𑀦𑀺𑀘𑁆𑀘𑀦𑁆𑀢𑀺…𑀧𑁂… 𑀅𑀦𑀺𑀘𑁆𑀘𑀁 𑀦𑀸𑀫 𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁.