𑁯. 𑀑𑀧𑀫𑁆𑀫𑀲𑀁𑀬𑀼𑀢𑁆𑀢𑀁

𑁧. 𑀓𑀽𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀓𑀽𑀝𑀁 𑀕𑀘𑁆𑀙𑀦𑁆𑀢𑀻𑀢𑀺 𑀓𑀽𑀝𑀘𑁆𑀙𑀺𑀤𑁆𑀤𑀲𑁆𑀲 𑀅𑀦𑀼𑀧𑀯𑀺𑀲𑀦𑀯𑀲𑁂𑀦 𑀓𑀽𑀝𑀁 𑀕𑀘𑁆𑀙𑀦𑁆𑀢𑀺. 𑀬𑀸 𑀘 𑀕𑁄𑀧𑀸𑀦𑀲𑀺𑀬𑁄 𑀕𑁄𑀧𑀸𑀦𑀲𑀦𑁆𑀢𑀭𑀕𑀢𑀸, 𑀢𑀸𑀧𑀺 𑀓𑀽𑀝𑀁 𑀆𑀳𑀘𑁆𑀘 𑀞𑀸𑀦𑁂𑀦 𑀓𑀽𑀝𑀗𑁆𑀕𑀫𑀸. 𑀤𑀼𑀯𑀺𑀥𑀸𑀧𑀺 𑀓𑀽𑀝𑁂 𑀲𑀫𑁄𑀲𑀭𑀡𑀸. 𑀓𑀽𑀝𑀲𑁆𑀲 𑀲𑀫𑀼𑀕𑁆𑀖𑀸𑀢𑁂𑀦 𑀯𑀺𑀦𑀸𑀲𑁂𑀦 𑀪𑀺𑀚𑁆𑀚𑀦𑁂𑀦. 𑀅𑀯𑀺𑀚𑁆𑀚𑀸𑀬 𑀲𑀫𑀼𑀕𑁆𑀖𑀸𑀢𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀬 𑀅𑀘𑁆𑀘𑀦𑁆𑀢𑀫𑁂𑀯 𑀅𑀧𑁆𑀧𑀯𑀢𑁆𑀢𑀺𑀬𑀸. 𑀢𑁂𑀦 𑀘 𑀫𑁄𑀓𑁆𑀔𑀥𑀫𑁆𑀫𑀸𑀥𑀺𑀕𑀫𑁂𑀦 𑀢𑀤𑀦𑀼𑀭𑀽𑀧𑀥𑀫𑁆𑀫𑀸𑀥𑀺𑀕𑀫𑁄 𑀤𑀲𑁆𑀲𑀺𑀢𑁄. 𑀅𑀧𑁆𑀧𑀫𑀢𑁆𑀢𑀸𑀢𑀺 𑀧𑀦 𑀇𑀫𑀺𑀦𑀸 𑀢𑀲𑁆𑀲 𑀉𑀧𑀸𑀬𑁄 𑀤𑀲𑁆𑀲𑀺𑀢𑁄.

𑀓𑀽𑀝𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀔𑀲𑀺𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁪. 𑀏𑀯𑀁 𑀅𑀧𑁆𑀧𑀓𑀸 𑀬𑀣𑀸 𑀦𑀔𑀲𑀺𑀔𑀸𑀬 𑀆𑀭𑁄𑀧𑀺𑀢𑀧𑀁𑀲𑀼, 𑀲𑀼𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀲𑁆𑀲 𑀓𑀫𑁆𑀫𑀲𑁆𑀲 𑀅𑀧𑁆𑀧𑀓𑀢𑁆𑀢𑀸 𑀏𑀯𑀁 𑀤𑁂𑀯𑁂𑀲𑀼𑀧𑀻𑀢𑀺 𑀳𑀻𑀦𑀽𑀤𑀸𑀳𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑁆𑀧𑀢𑀭𑀸 𑀳𑀺 𑀲𑀢𑁆𑀢𑀸 𑀬𑁂 𑀤𑁂𑀯𑁂𑀲𑀼 𑀚𑀸𑀬𑀦𑁆𑀢𑀺, 𑀢𑀜𑁆𑀘 𑀔𑁄 𑀓𑀸𑀫𑀤𑁂𑀯𑁂𑀲𑀼. 𑀇𑀢𑀭𑁂𑀲𑀼 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀦𑀔𑀲𑀺𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁫. 𑀯𑀺𑀥𑀁𑀲𑀬𑀦𑁆𑀢𑀺 𑀯𑀺𑀳𑁂𑀞𑀬𑀦𑁆𑀢𑀺. 𑀯𑀟𑁆𑀠𑀺𑀢𑀸𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀢𑀺 𑀪𑀸𑀯𑀦𑀸𑀬 𑀩𑀳𑀼𑀮𑀻𑀓𑀭𑀡𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺𑀢𑀸 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸𑀢𑀺 𑀬𑀣𑀸 𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁 𑀙𑁂𑀓𑁂𑀦 𑀲𑀸𑀭𑀣𑀺𑀦𑀸 𑀅𑀥𑀺𑀝𑁆𑀞𑀺𑀢𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀬𑀸 𑀕𑀫𑀺𑀢𑀸. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦. 𑀯𑀢𑁆𑀣𑀼 𑀯𑀺𑀬 𑀓𑀢𑀸 𑀲𑀩𑁆𑀩𑀲𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑁄𑀥𑀦𑁂𑀦 𑀲𑀼𑀯𑀺𑀲𑁄𑀥𑀺𑀢𑀫𑀭𑀺𑀬𑀸𑀤𑀁 𑀯𑀺𑀬 𑀓𑀢𑀸. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀅𑀯𑀺𑀓𑀫𑁆𑀧𑀦𑁂𑀬𑁆𑀬𑀢𑀸𑀬 𑀞𑀧𑀺𑀢𑀸. 𑀲𑀫𑀦𑁆𑀢𑀢𑁄 𑀘𑀺𑀢𑀸𑀢𑀺 𑀲𑀩𑁆𑀩𑀪𑀸𑀕𑁂𑀦 𑀪𑀸𑀯𑀦𑀽𑀧𑀘𑀬𑀁 𑀕𑀫𑀺𑀢𑀸. 𑀢𑁂𑀦𑀸𑀳 ‘‘𑀲𑀼𑀯𑀟𑁆𑀠𑀺𑀢𑀸’’𑀢𑀺. 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀲𑀫𑁆𑀧𑀸𑀤𑀺𑀢𑀸.

𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀑𑀓𑁆𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁬. 𑀫𑀳𑀸𑀫𑀼𑀔𑀉𑀓𑁆𑀔𑀮𑀻𑀦𑀦𑁆𑀢𑀺 𑀫𑀳𑀸𑀫𑀼𑀔𑀸𑀦𑀁 𑀫𑀳𑀦𑁆𑀢𑀓𑁄𑀴𑀼𑀫𑁆𑀩𑀸𑀦𑀁 𑀲𑀢𑀁. 𑀧𑀡𑀻𑀢𑀪𑁄𑀚𑀦𑀪𑀭𑀺𑀢𑀸𑀦𑀦𑁆𑀢𑀺 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀸𑀤𑀻𑀳𑀺 𑀉𑀧𑀦𑀻𑀢𑀧𑀡𑀻𑀢𑀪𑁄𑀚𑀦𑁂𑀳𑀺 𑀧𑀭𑀺𑀧𑀼𑀡𑁆𑀡𑀸𑀦𑀁. 𑀢𑀲𑁆𑀲𑀸𑀢𑀺 𑀧𑀸𑀞𑀲𑁆𑀲. 𑀕𑁄𑀤𑀼𑀳𑀦𑀫𑀢𑁆𑀢𑀦𑁆𑀢𑀺 𑀕𑁄𑀤𑁄𑀳𑀦𑀯𑁂𑀮𑀸𑀫𑀢𑁆𑀢𑀁. 𑀢𑀁 𑀧𑀦 𑀓𑀺𑀢𑁆𑀢𑀓𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀕𑀸𑀯𑀺𑀬𑀸’’𑀢𑀺𑀆𑀤𑀺. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀦𑁆𑀢𑀺 𑀅𑀦𑁄𑀥𑀺𑀲𑁄𑀫𑁂𑀢𑁆𑀢𑀸𑀪𑀸𑀯𑀦𑀫𑀸𑀳 𑁋 𑀫𑁂𑀢𑁆𑀢𑀘𑀺𑀢𑁆𑀢𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀪𑀸𑀯𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁆𑀧𑀺 𑀢𑀢𑁄 𑀬𑀣𑀸𑀯𑀼𑀢𑁆𑀢𑀤𑀸𑀦𑀢𑁄 𑀫𑀳𑀧𑁆𑀨𑀮𑀢𑀭𑀦𑁆𑀢𑀺.

𑀑𑀓𑁆𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁭. 𑀅𑀕𑁆𑀕𑁂 𑀧𑀳𑀭𑀺𑀢𑁆𑀯𑀸𑀢𑀺 𑀢𑀺𑀡𑁆𑀳𑀨𑀮𑀲𑀢𑁆𑀢𑀺𑀬𑀸 𑀅𑀕𑁆𑀕𑁂 𑀳𑀢𑁆𑀣𑁂𑀦 𑀯𑀸 𑀫𑀼𑀝𑁆𑀞𑀺𑀦𑀸 𑀯𑀸 𑀧𑀳𑀸𑀭𑀁 𑀤𑀢𑁆𑀯𑀸. 𑀓𑀧𑁆𑀧𑀸𑀲𑀯𑀝𑁆𑀝𑀺𑀁 𑀯𑀺𑀬𑀸𑀢𑀺 𑀧𑀳𑀢𑀓𑀧𑁆𑀧𑀸𑀲𑀧𑀺𑀡𑁆𑀟𑀁 𑀯𑀺𑀬. 𑀦𑀺𑀬𑁆𑀬𑀸𑀲𑀯𑀝𑁆𑀝𑀺𑀁 𑀯𑀺𑀬𑀸𑀢𑀺 𑀨𑀮𑀲𑀡𑁆𑀞𑀸𑀦𑀁 𑀦𑀺𑀬𑁆𑀬𑀸𑀲𑀧𑀺𑀡𑁆𑀟𑀁 𑀯𑀺𑀬. 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀓𑀮𑀺𑀓𑀸𑀤𑀺𑀪𑀸𑀯𑁂𑀦 𑀯𑀻𑀲𑀢𑀺𑀁𑀲𑀧𑀺𑀡𑁆𑀟𑀸𑀦𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸. 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄 𑀧𑀺𑀡𑁆𑀟𑀁 𑀓𑀭𑁄𑀦𑁆𑀢𑁄. 𑀧𑀝𑀺𑀮𑁂𑀡𑁂𑀢𑀻𑀢𑀺 𑀧𑀝𑀺𑀮𑀻𑀦𑀬𑀢𑀺 𑀦𑀸𑀫𑁂𑀢𑀺. 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄 𑀢𑁂 𑀤𑁆𑀯𑁂𑀧𑀺 𑀥𑀸𑀭𑀸 𑀏𑀓𑀢𑁄 𑀲𑀫𑁆𑀨𑀼𑀲𑀸𑀧𑁂𑀦𑁆𑀢𑁄. 𑀧𑀝𑀺𑀓𑁄𑀝𑁆𑀝𑁂𑀢𑀻𑀢𑀺 𑀧𑀝𑀺𑀧𑀳𑀭𑀢𑀺. 𑀢𑀢𑁆𑀣 𑀔𑀡𑁆𑀟𑀁 𑀯𑀺𑀬 𑀦𑀺𑀬𑁆𑀬𑀸𑀲𑁄. 𑀓𑀧𑁆𑀧𑀸𑀲𑀯𑀝𑁆𑀝𑀦𑀓𑀭𑀡𑀻𑀬𑀦𑁆𑀢𑀺 𑀯𑀺𑀳𑀢𑀲𑁆𑀲 𑀓𑀧𑁆𑀧𑀸𑀲𑀲𑁆𑀲 𑀧𑀝𑀺𑀲𑀁𑀳𑀭𑀡𑀯𑀲𑁂𑀦 𑀩𑀦𑁆𑀥𑀦𑀤𑀡𑁆𑀟𑀁. 𑀧𑀯𑀢𑁆𑀢𑁂𑀦𑁆𑀢𑁄𑀢𑀺 𑀓𑀧𑁆𑀧𑀸𑀲𑀲𑁆𑀲 𑀲𑀁𑀯𑁂𑀮𑁆𑀮𑀦𑀯𑀲𑁂𑀦 𑀧𑀯𑀢𑁆𑀢𑁂𑀦𑁆𑀢𑁄.

𑀲𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀥𑀦𑀼𑀕𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁮. 𑀤𑀴𑁆𑀳𑀥𑀦𑀼𑀦𑁄𑀢𑀺 𑀣𑀺𑀭𑀢𑀭𑀥𑀦𑀼𑀦𑁄. 𑀇𑀤𑀸𑀦𑀺 𑀢𑀲𑁆𑀲 𑀣𑀺𑀭𑀢𑀭𑀪𑀸𑀯𑀁 𑀧𑀭𑀺𑀘𑁆𑀙𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀴𑁆𑀳𑀥𑀦𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀦𑁆𑀢𑀺 𑀧𑀮𑀸𑀦𑀁 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀲𑀸𑀢𑀺 𑀥𑀦𑀼𑀦𑁄. 𑀆𑀭𑁄𑀧𑀺𑀢𑀲𑁆𑀲𑀸𑀢𑀺 𑀚𑀺𑀬𑀁 𑀆𑀭𑁄𑀧𑀺𑀢𑀲𑁆𑀲. 𑀚𑀺𑀬𑀸𑀩𑀤𑁆𑀥𑁄𑀢𑀺 𑀚𑀺𑀬𑀸𑀬 𑀩𑀤𑁆𑀥𑁄. 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺, 𑀏𑀢𑀁 ‘‘𑀤𑁆𑀯𑀺𑀲𑀳𑀲𑁆𑀲𑀣𑀸𑀫’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀳𑀲𑀻𑀲𑀸𑀤𑀻𑀦𑀦𑁆𑀢𑀺 𑀓𑀸𑀴𑀮𑁄𑀳𑀢𑀫𑁆𑀩𑀮𑁄𑀳𑀲𑀻𑀲𑀸𑀤𑀻𑀦𑀁. 𑀪𑀸𑀭𑁄𑀢𑀺 𑀧𑀼𑀭𑀺𑀲𑀪𑀸𑀭𑁄, 𑀲𑁄 𑀧𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀏𑀤𑀺𑀲𑀁 𑀢𑀲𑁆𑀲 𑀩𑀮𑀁 𑀤𑀝𑁆𑀞𑀩𑁆𑀩𑀁. 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑀸 𑀥𑀦𑀼𑀯𑁂𑀤𑀲𑀺𑀓𑁆𑀔𑀸𑀯𑀲𑁂𑀦. 𑀘𑀺𑀡𑁆𑀡𑀯𑀲𑀻𑀪𑀸𑀯𑀸 𑀮𑀓𑁆𑀔𑁂𑀲𑀼 𑀅𑀯𑀺𑀭𑀚𑁆𑀛𑀦𑀲𑀭𑀓𑁆𑀔𑁂𑀧𑀯𑀲𑁂𑀦. 𑀓𑀢𑀁 𑀭𑀸𑀚𑀓𑀼𑀮𑀸𑀤𑀻𑀲𑀼 𑀉𑀧𑀕𑀦𑁆𑀢𑁆𑀯𑀸 𑀅𑀲𑀦𑀁 𑀲𑀭𑀓𑁆𑀔𑁂𑀧𑁄 𑀏𑀢𑁂𑀳𑀻𑀢𑀺 𑀓𑀢𑀽𑀧𑀲𑀦𑀸𑀢𑀺 𑀆𑀳 ‘‘𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑀸’’𑀢𑀺.

‘‘𑀩𑁄𑀥𑀺𑀲𑀢𑁆𑀢𑁄 𑀘𑀢𑁆𑀢𑀸𑀭𑀺 𑀓𑀡𑁆𑀟𑀸𑀦𑀺 𑀆𑀳𑀭𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀅𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀯𑀺𑀲𑁆𑀲𑀸𑀫𑀸𑀢𑀺 𑀥𑀸𑀯𑀺𑀲𑁆𑀲𑀸𑀫. 𑀅𑀕𑁆𑀕𑀺 𑀉𑀝𑁆𑀞𑀳𑀻𑀢𑀺 𑀲𑀻𑀖𑀧𑀢𑀦𑀲𑀦𑁆𑀢𑀸𑀧𑁂𑀦 𑀘 𑀲𑀽𑀭𑀺𑀬𑀭𑀲𑁆𑀫𑀺𑀲𑀦𑁆𑀢𑀸𑀧𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀘 𑀉𑀲𑀼𑀫𑀸 𑀉𑀝𑁆𑀞𑀳𑀺. 𑀧𑀓𑁆𑀔𑀧𑀜𑁆𑀚𑀭𑁂𑀦𑀸𑀢𑀺 𑀧𑀓𑁆𑀔𑀚𑀸𑀮𑀦𑁆𑀢𑀭𑁂𑀦.

𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 ‘‘𑀦𑀺𑀧𑁆𑀧𑀬𑁄𑀚𑀦𑀫𑀺𑀤𑀁 𑀚𑀯𑀦’’𑀦𑁆𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸. 𑀧𑀢𑁆𑀢𑀓𑀝𑀸𑀳𑁂𑀦 𑀑𑀢𑁆𑀣𑀝𑀧𑀢𑁆𑀢𑁄 𑀯𑀺𑀬𑀸𑀢𑀺 𑀧𑀺𑀳𑀺𑀢𑀧𑀢𑁆𑀢𑁄 𑀯𑀺𑀬 𑀅𑀳𑁄𑀲𑀺, 𑀯𑁂𑀕𑀲𑀸 𑀧𑀢𑀦𑁂𑀦 𑀦𑀕𑀭𑀲𑁆𑀲 𑀉𑀧𑀭𑀺 𑀆𑀓𑀸𑀲𑀲𑁆𑀲 𑀦𑀺𑀭𑀺𑀓𑁆𑀔𑀡𑀁 𑀅𑀳𑁄𑀲𑀺. 𑀲𑀜𑁆𑀘𑀸𑀭𑀺𑀢𑀢𑁆𑀢𑀸 𑀅𑀦𑁂𑀓𑀳𑀁𑀲𑀲𑀳𑀲𑁆𑀲𑀲𑀤𑀺𑀲𑁄 𑀧𑀜𑁆𑀜𑀸𑀬𑀺 𑀲𑁂𑀬𑁆𑀬𑀣𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀦𑀼𑀕𑁆𑀕𑀳𑀓𑀸𑀮𑁂 𑀲𑀭𑀓𑀽𑀝𑀸𑀤𑀺𑀤𑀲𑁆𑀲𑀦𑁂.

𑀤𑀼𑀓𑁆𑀓𑀭𑀦𑁆𑀢𑀺 𑀢𑀲𑁆𑀲 𑀅𑀤𑀲𑁆𑀲𑀦𑀁 𑀲𑀦𑁆𑀥𑀸𑀬𑀸𑀳, 𑀦 𑀅𑀢𑁆𑀢𑀦𑁄 𑀧𑀢𑀦𑀁. 𑀲𑀽𑀭𑀺𑀬𑀫𑀡𑁆𑀟𑀮𑀜𑁆𑀳𑀺 𑀅𑀢𑀺𑀲𑀻𑀖𑁂𑀦 𑀚𑀯𑁂𑀦 𑀕𑀘𑁆𑀙𑀦𑁆𑀢𑀫𑁆𑀧𑀺 𑀧𑀜𑁆𑀜𑀸𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀢𑀁 𑀅𑀢𑁆𑀢𑀦𑁄 𑀯𑀺𑀧𑀼𑀮𑀢𑀸𑀬 𑀧𑀪𑀲𑁆𑀲𑀭𑀢𑀸𑀬 𑀘 𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀲𑁆𑀲 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀺, 𑀚𑀯𑀦𑀳𑀁𑀲𑁄 𑀧𑀦 𑀢𑀸𑀤𑀺𑀲𑁂𑀦 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑁂𑀦 𑀕𑀘𑁆𑀙𑀦𑁆𑀢𑁄 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦 𑀲𑀓𑁆𑀓𑀸 𑀢𑀬𑀸 𑀧𑀲𑁆𑀲𑀺𑀢𑀼’’𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀅𑀓𑁆𑀔𑀡𑀯𑁂𑀥𑀺𑀦𑁄. 𑀕𑀦𑁆𑀢𑁆𑀯𑀸 𑀕𑀳𑀺𑀢𑁂 𑀲𑁄𑀢𑀼𑀁 𑀖𑀡𑁆𑀟𑀁 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀲𑀬𑀁 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄. 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀺𑀫𑀼𑀔𑀁 𑀕𑀢𑀓𑀡𑁆𑀟𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀞𑀫𑀓𑀡𑁆𑀟𑁂𑀦𑁂𑀯 𑀲𑀤𑁆𑀥𑀺𑀁 𑀉𑀧𑁆𑀧𑀢𑀺𑀢𑁆𑀯𑀸’’𑀢𑀺. 𑀢𑁂 𑀘𑀢𑁆𑀢𑀸𑀭𑀺 𑀓𑀡𑁆𑀟𑀸𑀦𑀺 𑀏𑀓𑀓𑁆𑀔𑀡𑁂𑀬𑁂𑀯 𑀔𑀺𑀧𑀺𑀁𑀲𑀼.

𑀆𑀬𑀼𑀁 𑀲𑀗𑁆𑀔𑀭𑁄𑀢𑀺 𑀏𑀢𑁂𑀦𑀸𑀢𑀺 𑀆𑀬𑀼𑀲𑀗𑁆𑀔𑀸𑀭𑁄. 𑀬𑀣𑀸 𑀳𑀺 𑀓𑀫𑁆𑀫𑀚𑀭𑀽𑀧𑀸𑀦𑀁 𑀧𑀯𑀢𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀸, 𑀏𑀯𑀁 𑀅𑀢𑁆𑀢𑀪𑀸𑀯𑀲𑁆𑀲 𑀧𑀯𑀢𑁆𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀸𑀢𑀺. 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀧𑀦 𑀧𑀸𑀴𑀺𑀬𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀅𑀦𑁂𑀓𑀲𑀢𑀲𑀗𑁆𑀔𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀮𑀩𑁆𑀪𑀦𑀢𑁄. 𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀢𑁄 𑀬𑀣𑀸𑀯𑀼𑀢𑁆𑀢𑀤𑁂𑀯𑀢𑀸𑀦𑀁 𑀚𑀯𑀢𑁄 𑀲𑀻𑀖𑀢𑀭𑀁 𑀔𑀻𑀬𑀢𑀺 𑀇𑀢𑁆𑀢𑀭𑀔𑀡𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄’’𑀢𑀺. (𑀫𑀳𑀸𑀦𑀺. 𑁧𑁦);

𑀪𑁂𑀤𑁄𑀢𑀺 𑀪𑀗𑁆𑀕𑁄. 𑀦 𑀲𑀓𑁆𑀓𑀸 𑀧𑀜𑁆𑀜𑀸𑀧𑁂𑀢𑀼𑀁 𑀢𑀢𑁄𑀧𑀺 𑀅𑀢𑀺𑀯𑀺𑀬 𑀇𑀢𑁆𑀢𑀭𑀔𑀡𑀢𑁆𑀢𑀸.

𑀥𑀦𑀼𑀕𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀆𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁯. 𑀅𑀜𑁆𑀜𑁂 𑀭𑀸𑀚𑀸𑀦𑁄 𑀘 𑀪𑀸𑀕𑀁 𑀕𑀡𑁆𑀳𑀦𑁆𑀢𑀸 𑀇𑀫𑁂 𑀯𑀺𑀬 𑀤𑀲𑀪𑀸𑀕𑀁 𑀕𑀡𑁆𑀳𑀦𑁆𑀢𑀻𑀢𑀺 𑀢𑁂𑀲𑀫𑀬𑀁 𑀅𑀦𑀼𑀕𑀢𑀺 𑀧𑀜𑁆𑀜𑀸𑀬𑀢𑀺. 𑀫𑀳𑀸𑀚𑀦𑀲𑁆𑀲 𑀆𑀦𑀬𑀦𑀢𑁄 𑀆𑀦𑀓𑁄𑀢𑀺 𑀆𑀳 ‘‘𑀏𑀯𑀁𑀮𑀤𑁆𑀥𑀦𑀸𑀫𑁄’’𑀢𑀺. 𑀇𑀤𑀸𑀦𑀺 𑀢𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀆𑀕𑀫𑀦𑀸𑀦𑀼𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀺𑀫𑀯𑀦𑁆𑀢𑁂 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀓𑀭𑁂𑀡𑀼𑀦𑁆𑀢𑀺 𑀓𑀭𑁂𑀡𑀼𑀓𑀁, 𑀳𑀢𑁆𑀣𑀺𑀦𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀓𑁆𑀓𑀭𑀺𑀁𑀲𑀽𑀢𑀺 𑀅𑀦𑀢𑁆𑀣𑀧𑀭𑀺𑀳𑀭𑀡𑀯𑀲𑁂𑀦 𑀧𑀲𑀢𑁆𑀣𑀽𑀧𑀳𑀸𑀭𑀯𑀲𑁂𑀦 𑀘 𑀧𑀽𑀚𑁂𑀲𑀼𑀁. 𑀑𑀢𑀭𑀻𑀢𑀺 𑀓𑀼𑀴𑀻𑀭𑀤𑀳𑀁 𑀧𑀸𑀯𑀺𑀲𑀺. 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀞𑀧𑀦𑀯𑀲𑁂𑀦 𑀅𑀧𑀓𑁆𑀓𑀫𑀺𑀢𑁆𑀯𑀸 𑀧𑀢𑀺.

𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀦𑁆𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀙𑀺𑀤𑁆𑀤𑁂 𑀲𑀼𑀯𑀡𑁆𑀡𑀫𑀬𑀁, 𑀓𑀺𑀲𑁆𑀫𑀺𑀜𑁆𑀘𑀺 𑀭𑀚𑀢𑀫𑀬𑀁, 𑀓𑀺𑀲𑁆𑀫𑀺𑀜𑁆𑀘𑀺 𑀨𑀮𑀺𑀓𑀫𑀬𑀁 𑀆𑀡𑀺𑀁 𑀖𑀝𑀬𑀺𑀁𑀲𑀼 𑀩𑀦𑁆𑀥𑀺𑀁𑀲𑀼. 𑀧𑀼𑀩𑁆𑀩𑁂 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀲𑁆𑀲 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 𑀧𑀫𑀸𑀡𑁄 𑀏𑀢𑀲𑁆𑀲𑀸𑀢𑀺 𑀤𑁆𑀯𑀸𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑁄, 𑀲𑀤𑁆𑀤𑁄. 𑀅𑀣𑀲𑁆𑀲 𑀅𑀦𑁂𑀓𑀲𑀢𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀅𑀦𑁆𑀢𑁄𑀲𑀸𑀮𑀸𑀬𑀫𑁆𑀧𑀺 𑀤𑀼𑀓𑁆𑀔𑁂𑀦 𑀲𑀼𑀬𑁆𑀬𑀺𑀢𑁆𑀣 𑀆𑀡𑀺𑀲𑀗𑁆𑀖𑀸𑀝𑀫𑀢𑁆𑀢𑀢𑁆𑀢𑀸.

𑀕𑀫𑁆𑀪𑀻𑀭𑀸𑀢𑀺 𑀅𑀕𑀸𑀥𑀸 𑀤𑀼𑀓𑁆𑀔𑁄𑀕𑀸𑀴𑁆𑀳𑀸. 𑀲𑀮𑁆𑀮𑀲𑀼𑀢𑁆𑀢𑀜𑁆𑀳𑀺 ‘‘𑀅𑀦𑀺𑀫𑀺𑀢𑁆𑀢𑀫𑀦𑀜𑁆𑀜𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀁, 𑀦 𑀅𑀢𑁆𑀣𑀕𑀫𑁆𑀪𑀻𑀭𑀁. 𑀢𑀣𑀸 𑀳𑀺 𑀢𑀢𑁆𑀣 𑀢𑀸 𑀢𑀸 𑀕𑀸𑀣𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀢𑀺𑀝𑁆𑀞𑀦𑁆𑀢𑀺, 𑀤𑀼𑀯𑀺𑀜𑁆𑀜𑁂𑀬𑁆𑀬𑀁 𑀜𑀸𑀡𑁂𑀦 𑀤𑀼𑀓𑁆𑀔𑁄𑀕𑀸𑀳𑀦𑁆𑀢𑀺 𑀓𑀢𑁆𑀯𑀸 ‘‘𑀕𑀫𑁆𑀪𑀻𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑀸𑀧𑀭𑀫𑁆𑀧𑁂𑀢𑁆𑀣 𑀓𑀸𑀲𑀜𑁆𑀘𑀺 𑀕𑀸𑀣𑀸𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑁄𑀕𑀸𑀳𑀫𑁂𑀯, 𑀢𑀲𑁆𑀫𑀸 𑀢𑀁 𑀧𑀸𑀴𑀺𑀯𑀲𑁂𑀦 ‘‘𑀕𑀫𑁆𑀪𑀻𑀭’’𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀸 𑀲𑀮𑁆𑀮𑀲𑀼𑀢𑁆𑀢𑀲𑀤𑀺𑀲𑀸’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 ‘‘𑀅𑀢𑁆𑀣𑀯𑀲𑁂𑀦 𑀕𑀫𑁆𑀪𑀻𑀭𑀸’’𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀲𑁂𑀦 𑀕𑀫𑁆𑀪𑀻𑀭𑀢𑀸 𑀧𑀸𑀓𑀝𑀸𑀬𑁂𑀯. 𑀮𑁄𑀓𑀁 𑀉𑀢𑁆𑀢𑀭𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑁄, 𑀦𑀯𑀯𑀺𑀥𑀅𑀧𑁆𑀧𑀫𑀸𑀡𑀥𑀫𑁆𑀫𑁄, 𑀲𑁄 𑀅𑀢𑁆𑀣𑀪𑀽𑀢𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀮𑁄𑀓𑀼𑀢𑁆𑀢𑀭𑀸. 𑀢𑁂𑀦𑀸𑀳 ‘‘𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀤𑀻𑀧𑀓𑀸’’𑀢𑀺. 𑀲𑀢𑁆𑀢𑀲𑀼𑀜𑁆𑀜𑀢𑀥𑀫𑁆𑀫𑀫𑀢𑁆𑀢𑀫𑁂𑀯𑀸𑀢𑀺 𑀲𑀢𑁆𑀢𑁂𑀦 𑀅𑀢𑁆𑀢𑀦𑀸 𑀲𑀼𑀜𑁆𑀜𑀢𑀁 𑀓𑁂𑀯𑀮𑀁 𑀥𑀫𑁆𑀫𑀫𑀢𑁆𑀢𑀫𑁂𑀯. 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀦𑁆𑀢𑀺 𑀘 𑀮𑀺𑀗𑁆𑀕𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀕𑁆𑀕𑀳𑁂𑀢𑀩𑁆𑀩𑁂 𑀘 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁂 𑀘𑀸’’𑀢𑀺. 𑀓𑀯𑀺𑀢𑀸𑀢𑀺 𑀓𑀯𑀺𑀦𑁄 𑀓𑀫𑁆𑀫𑀁 𑀓𑀯𑀺𑀓𑀢𑀸. 𑀬𑀲𑁆𑀲 𑀧𑀦 𑀬𑀁 𑀓𑀫𑁆𑀫𑀁, 𑀢𑀁 𑀢𑁂𑀦 𑀓𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀯𑀺𑀢𑀸𑀢𑀺 𑀓𑀯𑀻𑀳𑀺 𑀓𑀢𑀸’’𑀢𑀺. 𑀇𑀢𑀭𑀁 ‘‘𑀓𑀸𑀯𑁂𑀬𑁆𑀬𑀸’’𑀢𑀺 𑀧𑀤𑀁, 𑀓𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀓𑀩𑁆𑀩’’𑀦𑁆𑀢𑀺 𑀘 𑀓𑀯𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀘𑀺𑀢𑁆𑀢𑀓𑁆𑀔𑀭𑀸𑀢𑀺 𑀯𑀺𑀘𑀺𑀢𑁆𑀭𑀸𑀓𑀸𑀭𑀅𑀓𑁆𑀔𑀭𑀸. 𑀲𑀸𑀲𑀦𑀢𑁄 𑀩𑀳𑀺𑀪𑀽𑀢𑀸𑀢𑀺 𑀦 𑀲𑀸𑀲𑀦𑀸𑀯𑀘𑀭𑀸. 𑀢𑁂𑀲𑀁 𑀲𑀸𑀯𑀓𑁂𑀳𑀻𑀢𑀺 ‘‘𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸’’𑀢𑀺 𑀅𑀧𑀜𑁆𑀜𑀸𑀢𑀸𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀸𑀯𑀓𑁂𑀳𑀺. 𑀅𑀦𑀼𑀕𑁆𑀕𑀬𑁆𑀳𑀫𑀸𑀦𑀸𑀢𑀺 𑀦 𑀉𑀕𑁆𑀕𑀬𑁆𑀳𑀫𑀸𑀦𑀸 𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸𑀤𑀺𑀯𑀲𑁂𑀦 𑀅𑀦𑀼𑀕𑁆𑀕𑀬𑁆𑀳𑀫𑀸𑀦𑀸. 𑀅𑀦𑁆𑀢𑀭𑀥𑀸𑀬𑀦𑁆𑀢𑀺 𑀅𑀤𑀲𑁆𑀲𑀦𑀁 𑀕𑀘𑁆𑀙𑀦𑁆𑀢𑀺.

𑀆𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀮𑀺𑀗𑁆𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁦. 𑀓𑀮𑀺𑀗𑁆𑀕𑀭𑀁 𑀯𑀼𑀘𑁆𑀘𑀢𑀺 𑀔𑀼𑀤𑁆𑀤𑀓𑀤𑀸𑀭𑀼𑀔𑀡𑁆𑀟𑀁, 𑀢𑀁 𑀉𑀧𑀥𑀸𑀦𑀁 𑀏𑀢𑁂𑀲𑀦𑁆𑀢𑀺 𑀓𑀮𑀺𑀗𑁆𑀕𑀭𑀽𑀧𑀥𑀸𑀦𑀸. 𑀮𑀺𑀘𑁆𑀙𑀯𑀻 𑀧𑀦 𑀔𑀤𑀺𑀭𑀤𑀡𑁆𑀟𑀁 𑀉𑀧𑀥𑀸𑀦𑀁 𑀓𑀢𑁆𑀯𑀸 𑀢𑀤𑀸 𑀯𑀺𑀳𑀭𑀺𑀁𑀲𑀼. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀔𑀤𑀺𑀭𑀖𑀝𑀺𑀓𑀸𑀲𑀽’’𑀢𑀺𑀆𑀤𑀺. 𑀧𑀓𑀢𑀺𑀯𑀺𑀚𑁆𑀚𑀼𑀲𑀜𑁆𑀜𑀺𑀢𑁄 𑀦𑀢𑁆𑀣𑀺 𑀏𑀢𑁂𑀲𑀁 𑀔𑀡𑁄 𑀯𑀺𑀚𑁆𑀛𑀦𑁂𑀢𑀺 𑀅𑀓𑁆𑀔𑀡𑀯𑁂𑀥𑀺𑀦𑁄 𑀢𑀢𑁄 𑀲𑀻𑀖𑀢𑀭𑀁 𑀯𑀺𑀚𑁆𑀛𑀦𑀢𑁄. ‘‘𑀅𑀓𑁆𑀔𑀡’’𑀦𑁆𑀢𑀺 𑀯𑀺𑀚𑁆𑀚𑀼 𑀯𑀼𑀘𑁆𑀘𑀢𑀺 𑀇𑀢𑁆𑀢𑀭𑀔𑀡𑀢𑁆𑀢𑀸. 𑀅𑀓𑁆𑀔𑀡𑁄𑀪𑀸𑀲𑁂𑀦 𑀮𑀓𑁆𑀔𑀡𑀯𑁂𑀥𑀓𑀸 𑀅𑀓𑁆𑀔𑀡𑀯𑁂𑀥𑀺𑀦𑁄. 𑀅𑀦𑁂𑀓𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀯𑀺𑀚𑁆𑀛𑀦𑁂𑀦 𑀯𑀸𑀮𑀯𑁂𑀥𑀺𑀦𑁄. 𑀯𑀸𑀮𑁂𑀓𑀤𑁂𑀲𑁄 𑀳𑀺 𑀇𑀥 ‘‘𑀯𑀸𑀮𑁄’’𑀢𑀺 𑀕𑀳𑀺𑀢𑁄.

𑀩𑀳𑀼𑀤𑁂𑀯 𑀤𑀺𑀯𑀲𑀪𑀸𑀕𑀁 𑀧𑀥𑀸𑀦𑀸𑀦𑀼𑀬𑁄𑀕𑀢𑁄 𑀉𑀧𑁆𑀧𑀦𑁆𑀦𑀤𑀭𑀣𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀦𑁆𑀳𑀸𑀬𑀺𑀢𑁆𑀯𑀸. 𑀢𑁂 𑀲𑀦𑁆𑀥𑀸𑀬𑀸𑀢𑀺 𑀢𑁂 𑀢𑀣𑀸𑀭𑀽𑀧𑁂 𑀧𑀥𑀸𑀦𑀓𑀫𑁆𑀫𑀺𑀓𑀪𑀺𑀓𑁆𑀔𑀽 𑀲𑀦𑁆𑀥𑀸𑀬. 𑀇𑀤𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀅𑀢𑁆𑀣𑀚𑀸𑀢𑀁 𑀯𑀼𑀢𑁆𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁. 𑀅𑀬𑀫𑁆𑀧𑀺 𑀤𑀻𑀧𑁄𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑀸𑀳. 𑀧𑀥𑀸𑀦𑀸𑀦𑀼𑀬𑀼𑀜𑁆𑀚𑀦𑀯𑁂𑀮𑀸𑀬 𑀦𑀺𑀯𑁂𑀤𑀦𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀏𑀓𑀚𑁆𑀛𑀁 𑀧𑀳𑀢𑀖𑀡𑁆𑀟𑀺𑀦𑀺𑀕𑁆𑀖𑁄𑀲𑁂𑀦𑁂𑀯 𑀏𑀓𑀖𑀡𑁆𑀟𑀺𑀦𑀺𑀕𑁆𑀖𑁄𑀲𑁄, 𑀢𑀢𑁆𑀣 𑀢𑀢𑁆𑀣 𑀧𑀡𑁆𑀡𑀲𑀸𑀮𑀸𑀤𑀻𑀲𑀼 𑀯𑀲𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀏𑀓𑀧𑀥𑀸𑀦𑀪𑀽𑀢𑁄. 𑀦𑀸𑀦𑀸𑀫𑀼𑀔𑁄𑀢𑀺 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀬𑀁 𑀏𑀓𑁄 𑀯𑀺𑀳𑀸𑀭𑁄, 𑀧𑀺𑀮𑀺𑀘𑁆𑀙𑀺𑀓𑁄𑀴𑀺𑀦𑀕𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁. 𑀉𑀪𑀬𑀢𑁆𑀣 𑀧𑀯𑀢𑁆𑀢𑀖𑀡𑁆𑀟𑀺𑀲𑀤𑁆𑀤𑀸 𑀅𑀦𑁆𑀢𑀭𑀸𑀧𑀯𑀢𑁆𑀢𑀖𑀡𑁆𑀟𑀺𑀲𑀤𑁆𑀤𑁂𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀑𑀲𑀭𑀦𑁆𑀢𑀺. 𑀓𑀮𑁆𑀬𑀸𑀡𑀺𑀬𑀁 𑀧𑀯𑀢𑁆𑀢𑀖𑀡𑁆𑀟𑀺𑀲𑀤𑁆𑀤𑁄 𑀢𑀣𑀸 𑀦𑀸𑀕𑀤𑀻𑀧𑁂.

𑀓𑀮𑀺𑀗𑁆𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁧. 𑀅𑀢𑀺𑀓𑁆𑀓𑀦𑁆𑀢𑀯𑁂𑀮𑀦𑁆𑀢𑀺 𑀪𑀢𑁆𑀢𑀸𑀦𑀼𑀫𑁄𑀤𑀦𑀉𑀧𑀦𑀺𑀲𑀺𑀦𑁆𑀦𑀓𑀣𑀸𑀯𑁂𑀮𑀢𑁄 𑀅𑀢𑀺𑀓𑁆𑀓𑀦𑁆𑀢𑀯𑁂𑀮𑀁. 𑀅𑀲𑀫𑁆𑀪𑀺𑀦𑁆𑀦𑁂𑀦𑀸𑀢𑀺 𑀲𑀭𑀲𑀫𑁆𑀧𑀢𑁆𑀢𑀺𑀢𑁄 𑀅𑀲𑀫𑁆𑀪𑀺𑀦𑁆𑀦𑁂𑀦, 𑀲𑀭𑀲𑁆𑀲 𑀉𑀘𑁆𑀘𑀸𑀭𑀡𑀲𑀫𑁆𑀧𑀢𑁆𑀢𑀺𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀲𑀼𑀤𑁆𑀥𑀸𑀲𑀬𑀢𑀸𑀬 𑀦𑁂𑀯 𑀕𑀼𑀡𑀯𑀡𑁆𑀡𑀸𑀬 𑀦 𑀜𑀸𑀡𑀩𑀮𑀸𑀬 𑀳𑁄𑀢𑀺. 𑀢𑀦𑁆𑀢𑀺 𑀢𑀁 𑀢𑀣𑀸 𑀧𑀘𑁆𑀘𑀬𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑀁, 𑀢𑀁 𑀢𑀣𑀸 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀦𑀁.

𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀩𑀺𑀴𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁨. 𑀖𑀭𑀸𑀦𑀁 𑀲𑀦𑁆𑀥𑀻𑀢𑀺 𑀖𑀭𑁂𑀦 𑀖𑀭𑀲𑁆𑀲 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁. 𑀲𑀳 𑀫𑀮𑁂𑀦 𑀯𑀢𑁆𑀢𑀢𑀻𑀢𑀺 𑀲𑀫𑀮𑀁. 𑀕𑁂𑀳𑀢𑁄 𑀕𑀸𑀫𑀢𑁄 𑀘 𑀦𑀺𑀓𑁆𑀔𑀫𑀦𑀘𑀦𑁆𑀤𑀦𑀺𑀓𑀝𑁆𑀞𑀸𑀦𑀁. 𑀲𑀗𑁆𑀓𑀸𑀭𑀝𑁆𑀞𑀸𑀦𑀦𑁆𑀢𑀺 𑀲𑀗𑁆𑀓𑀸𑀭𑀓𑀽𑀝𑀁. 𑀓𑁂𑀘𑀺 ‘‘𑀲𑀦𑁆𑀥𑀺𑀲𑀗𑁆𑀓𑀸𑀭𑀓𑀽𑀝𑀝𑁆𑀞𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀆𑀧𑀦𑁆𑀦𑀆𑀧𑀢𑁆𑀢𑀺𑀢𑁄, 𑀦 𑀓𑀺𑀮𑁂𑀲𑀢𑁄 𑀯𑀼𑀝𑁆𑀞𑀸𑀦𑀁, 𑀲𑀼𑀤𑁆𑀥𑀦𑁆𑀢𑁂 𑀅𑀥𑀺𑀝𑁆𑀞𑀸𑀦𑀁. 𑀢𑀁 𑀧𑀦 𑀬𑀣𑀸𑀆𑀧𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 ‘‘𑀤𑁂𑀲𑀦𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀤𑁂𑀲𑀦𑀸 𑀧𑀜𑁆𑀜𑀸𑀬𑀢𑀻’’𑀢𑀺.

𑀩𑀺𑀴𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁩. 𑀏𑀢𑁆𑀢𑀓𑀫𑁆𑀧𑀻𑀢𑀺 𑀇𑀫𑀺𑀦𑀸 𑀚𑀭𑀲𑀺𑀗𑁆𑀕𑀸𑀮𑁂𑀦 𑀮𑀤𑁆𑀥𑀩𑁆𑀩𑀁 𑀘𑀺𑀢𑁆𑀢𑀲𑁆𑀲𑀸𑀤𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀲𑁆𑀲𑀢𑀺 𑀲𑀓𑀮𑀫𑁂𑀯 𑀓𑀧𑁆𑀧𑀁 𑀲𑀩𑁆𑀩𑀲𑁄 𑀅𑀯𑀻𑀘𑀺𑀚𑀸𑀮𑀸𑀳𑀺 𑀦𑀺𑀭𑀦𑁆𑀢𑀭𑀁 𑀛𑀸𑀬𑀫𑀸𑀦𑀢𑀸𑀬 𑀦𑀺𑀘𑁆𑀘𑀤𑀼𑀓𑁆𑀔𑀸𑀢𑀼𑀭𑀪𑀸𑀯𑀢𑁄.

𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑀼𑀢𑀺𑀬𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀓𑀢𑀚𑀸𑀦𑀦𑀦𑁆𑀢𑀺 𑀓𑀢𑀽𑀧𑀓𑀸𑀭𑀚𑀸𑀦𑀦𑀁. 𑀓𑀢𑀯𑁂𑀤𑀺𑀢𑀸𑀢𑀺 𑀢𑀲𑁆𑀲𑁂𑀯 𑀧𑀭𑁂𑀲𑀁 𑀧𑀸𑀓𑀝𑀓𑀭𑀡𑀯𑀲𑁂𑀦 𑀚𑀸𑀦𑀦𑀫𑁂𑀯. 𑀆𑀘𑀸𑀭𑀫𑁂𑀯𑀸𑀢𑀺 𑀓𑀢𑀸𑀧𑀭𑀸𑀥𑀫𑁂𑀯.

𑀤𑀼𑀢𑀺𑀬𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀑𑀧𑀫𑁆𑀫𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.