𑁧𑁦. 𑀪𑀺𑀓𑁆𑀔𑀼𑀲𑀁𑀬𑀼𑀢𑁆𑀢𑀁

𑁧. 𑀓𑁄𑀮𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀲𑀸𑀯𑀓𑀸𑀦𑀁 𑀆𑀮𑀸𑀧𑁄𑀢𑀺 𑀲𑀸𑀯𑀓𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀉𑀤𑁆𑀤𑀺𑀲𑁆𑀲 𑀆𑀮𑀸𑀧𑁄. 𑀩𑀼𑀤𑁆𑀥𑁂𑀳𑀺 𑀲𑀤𑀺𑀲𑀸 𑀫𑀸 𑀳𑁄𑀫𑀸𑀢𑀺 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀲𑀫𑀼𑀤𑀸𑀘𑀸𑀭𑀁 𑀅𑀓𑀣𑁂𑀦𑁆𑀢𑁂𑀳𑀺 𑀲𑀸𑀯𑀓𑁂𑀳𑀺, ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺 𑀆𑀮𑀧𑀺𑀢𑀸 𑀪𑀺𑀓𑁆𑀔𑀽, ‘‘𑀆𑀯𑀼𑀲𑁄’’𑀢𑀺 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀺, 𑀦, ‘‘𑀪𑀦𑁆𑀢𑁂’’𑀢𑀺. 𑀤𑀼𑀢𑀺𑀬𑀚𑁆𑀛𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀢𑁂𑀲𑀁 𑀦𑀺𑀭𑁄𑀥𑁂𑀦𑁂𑀯 𑀢𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑁂𑀢𑀩𑁆𑀩𑀢𑁄. 𑀬𑁂𑀲𑀁 𑀦𑀺𑀭𑁄𑀥𑀸𑀢𑀺 𑀬𑁂𑀲𑀁 𑀯𑀘𑀻𑀲𑀗𑁆𑀕𑀸𑀭𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀦𑀺𑀭𑀼𑀚𑁆𑀛𑀦𑁂𑀦 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀪𑀸𑀯𑁂𑀦 𑀲𑀤𑁆𑀤𑀸𑀬𑀢𑀦𑀁 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀢𑀺 𑀓𑀸𑀭𑀡𑀲𑁆𑀲 𑀤𑀽𑀭𑀢𑁄 𑀧𑀲𑁆𑀲𑀫𑁆𑀪𑀺𑀢𑀢𑁆𑀢𑀸. 𑀅𑀭𑀺𑀬𑁄𑀢𑀺 𑀦𑀺𑀤𑁆𑀤𑁄𑀲𑁄. 𑀧𑀭𑀺𑀲𑀼𑀤𑁆𑀥𑁄 𑀢𑀼𑀡𑁆𑀳𑀻𑀪𑀸𑀯𑁄, 𑀦 𑀢𑀺𑀢𑁆𑀣𑀺𑀬𑀸𑀦𑀁 𑀫𑀽𑀕𑀩𑁆𑀩𑀢𑀕𑁆𑀕𑀳𑀡𑀁 𑀯𑀺𑀬 𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀆𑀭𑀫𑁆𑀫𑀡𑀪𑀽𑀢𑁂𑀦 𑀯𑀺𑀢𑀓𑁆𑀓𑁂𑀦 𑀲𑀳 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀯𑀺𑀢𑀓𑁆𑀓𑀲𑀳𑀕𑀢𑀸𑀢𑀺 𑀆𑀳 ‘‘𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀸’’𑀢𑀺. 𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀢𑀸 𑀘 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀲𑀼𑀔𑀼𑀫𑀆𑀭𑀫𑁆𑀫𑀡𑀕𑁆𑀕𑀳𑀡𑀯𑀲𑁂𑀦 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 ‘‘𑀦 𑀲𑀦𑁆𑀢𑀢𑁄 𑀉𑀧𑀝𑁆𑀞𑀳𑀺𑀁𑀲𑀽’’𑀢𑀺. 𑀦 𑀧𑀕𑀼𑀡𑀁 𑀲𑀫𑁆𑀫𑀤𑁂𑀯 𑀯𑀲𑀻𑀪𑀸𑀯𑀲𑁆𑀲 𑀅𑀦𑀸𑀧𑀸𑀤𑀺𑀢𑀢𑁆𑀢𑀸. 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀧𑀻𑀢𑀺 𑀢𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀸𑀬 𑀧𑀯𑀢𑁆𑀢𑀺𑀬𑀫𑀸𑀦𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀧𑀺 𑀳𑀸𑀦𑀪𑀸𑀕𑀺𑀬𑀸𑀯 𑀅𑀳𑁂𑀲𑀼𑀁, 𑀦 𑀯𑀺𑀲𑁂𑀲𑀪𑀸𑀕𑀺𑀬𑀸. 𑀲𑀫𑁆𑀫𑀸 𑀞𑀧𑁂𑀳𑀻𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀁 𑀧𑀳𑀸𑀬 𑀲𑀫𑁆𑀫𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀞𑀧𑁂𑀳𑀺. 𑀏𑀓𑀕𑁆𑀕𑀁 𑀓𑀭𑁄𑀳𑀻𑀢𑀺 𑀢𑁂𑀦𑁂𑀯 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑁂𑀦 𑀅𑀯𑀺𑀳𑀢𑀫𑀸𑀦𑀲𑀢𑀸𑀬 𑀘𑀺𑀢𑁆𑀢𑀲𑀫𑀸𑀥𑀸𑀦𑀯𑀲𑁂𑀦 𑀏𑀓𑀕𑁆𑀕𑀁 𑀓𑀭𑁄𑀳𑀺. 𑀆𑀭𑁄𑀧𑁂𑀳𑀻𑀢𑀺 𑀈𑀲𑀓𑀫𑁆𑀧𑀺 𑀩𑀳𑀼𑀫𑁆𑀧𑀺 𑀅𑀧𑀢𑀺𑀢𑀁 𑀓𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂 𑀆𑀭𑁄𑀧𑁂𑀳𑀺. 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑀪𑀽𑀫𑀺𑀬𑀸 𑀧𑀸𑀭𑀺𑀧𑀽𑀭𑀺𑀬𑀸 𑀆𑀬𑀲𑁆𑀫𑀸 𑀫𑀳𑀸𑀪𑀺𑀜𑁆𑀜𑁄, 𑀦 𑀬𑀣𑀸 𑀢𑀣𑀸𑀢𑀺 𑀆𑀳 ‘‘𑀫𑀳𑀸𑀪𑀺𑀜𑁆𑀜𑀢𑀦𑁆𑀢𑀺 𑀙𑀴𑀪𑀺𑀜𑁆𑀜𑀢’’𑀦𑁆𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 ‘‘𑀅𑀣 𑀔𑁄 𑀫𑀁, 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀉𑀧𑀸𑀬𑁂𑀦. 𑀯𑀟𑁆𑀠𑁂𑀢𑁆𑀯𑀸𑀢𑀺 𑀉𑀢𑁆𑀢𑀭𑀺 𑀉𑀢𑁆𑀢𑀭𑀺 𑀯𑀺𑀲𑁂𑀲𑀪𑀸𑀕𑀺𑀬𑀪𑀸𑀯𑀸𑀧𑀸𑀤𑀦𑁂𑀦 𑀲𑀫𑀸𑀥𑀺𑀁 𑀧𑀜𑁆𑀜𑀜𑁆𑀘 𑀩𑁆𑀭𑀽𑀳𑁂𑀢𑁆𑀯𑀸 𑀩𑁆𑀭𑀽𑀳𑁂𑀢𑁆𑀯𑀸.

𑀓𑁄𑀮𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀧𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁬. 𑀅𑀢𑀺𑀉𑀴𑀸𑀭𑀫𑁆𑀧𑀺 𑀲𑀢𑁆𑀢𑀁 𑀯𑀸 𑀲𑀗𑁆𑀔𑀸𑀭𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀩𑁆𑀩𑀢𑁆𑀣𑀫𑁂𑀯 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑀲𑁆𑀲 𑀲𑀼𑀧𑁆𑀧𑀳𑀻𑀦𑀢𑁆𑀢𑀸. 𑀚𑀸𑀦𑀦𑀢𑁆𑀣𑀁 𑀧𑀼𑀘𑁆𑀙𑀢𑀺 𑀲𑀢𑁆𑀣𑀼𑀕𑀼𑀡𑀸𑀦𑀁 𑀅𑀢𑀺𑀯𑀺𑀬 𑀉𑀴𑀸𑀭𑀢𑀫𑀪𑀸𑀯𑀢𑁄.

𑀉𑀧𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀖𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁭. 𑀧𑀭𑀺𑀯𑁂𑀡𑀕𑁆𑀕𑁂𑀦𑀸𑀢𑀺 𑀧𑀭𑀺𑀯𑁂𑀡𑀪𑀸𑀕𑁂𑀦. 𑀓𑁂𑀘𑀺 ‘‘𑀏𑀓𑀯𑀺𑀳𑀸𑀭𑁂𑀢𑀺 𑀏𑀓𑀘𑁆𑀙𑀦𑁆𑀦𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂’’𑀢𑀺 𑀯𑀤𑀦𑁆𑀢𑀺. 𑀢𑁂𑀢𑀺 𑀢𑁂 𑀤𑁆𑀯𑁂𑀧𑀺 𑀣𑁂𑀭𑀸. 𑀧𑀸𑀝𑀺𑀬𑁂𑀓𑁆𑀓𑁂𑀲𑀼 𑀞𑀸𑀦𑁂𑀲𑀽𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀸𑀦𑁂𑀲𑀼. 𑀦𑀺𑀲𑀻𑀤𑀦𑁆𑀢𑀻𑀢𑀺 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀦𑁆𑀢𑀺. 𑀑𑀴𑀸𑀭𑀺𑀓𑁄 𑀦𑀸𑀫 𑀚𑀸𑀢𑁄 𑀧𑀭𑀺𑀢𑁆𑀢𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸 𑀢𑀲𑁆𑀲. 𑀢𑁂𑀢𑀺 𑀣𑁂𑀭𑁄 𑀪𑀕𑀯𑀸 𑀘.

𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑁄𑀢𑀺 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀲𑀫𑁆𑀧𑀼𑀡𑁆𑀡𑀯𑀻𑀭𑀺𑀬𑁄. 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄𑀢𑀺 𑀈𑀲𑀓𑀫𑁆𑀧𑀺 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀻𑀭𑀺𑀬𑁄. 𑀉𑀧𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑀲𑁆𑀲𑁂𑀯𑀸𑀢𑀺 𑀲𑀫𑀻𑀧𑁂 𑀞𑀧𑀦𑀫𑀢𑁆𑀢𑀲𑁆𑀲𑁂𑀯.

𑀘𑀢𑀼𑀪𑀽𑀫𑀓𑀥𑀫𑁆𑀫𑁂𑀲𑀼 𑀮𑀩𑁆𑀪𑀫𑀸𑀦𑀢𑁆𑀢𑀸 𑀧𑀜𑁆𑀜𑀸𑀬 ‘‘𑀘𑀢𑀼𑀪𑀽𑀫𑀓𑀥𑀫𑁆𑀫𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀮𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀫𑀸𑀥𑀺 𑀏𑀯 𑀲𑀫𑀸𑀥𑀺𑀮𑀓𑁆𑀔𑀡𑀁. 𑀏𑀯𑀁 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀫𑀜𑁆𑀜𑀲𑁆𑀲𑀸𑀢𑀺 𑀅𑀜𑁆𑀜𑀲𑁆𑀲 𑀅𑀜𑁆𑀜𑀲𑁆𑀲 𑀦𑀸𑀦𑀸𑀮𑀓𑁆𑀔𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀲𑁆𑀲𑀸𑀢𑀺 𑀇𑀢𑀭𑀲𑁆𑀲. 𑀥𑀼𑀭𑀦𑁆𑀢𑀺 𑀯𑀳𑀺𑀢𑀩𑁆𑀩𑀪𑀸𑀭𑀁. 𑀤𑁆𑀯𑀻𑀲𑀼𑀧𑀺 𑀏𑀢𑁂𑀲𑀽𑀢𑀺 𑀲𑀫𑀸𑀥𑀺𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄.

𑀖𑀝𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁮. 𑀅𑀪𑀺𑀘𑁂𑀢𑀲𑀺 𑀦𑀺𑀲𑁆𑀲𑀺𑀢𑀸 𑀆𑀪𑀺𑀘𑁂𑀢𑀲𑀺𑀓𑀸. 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑁂𑀦 𑀅𑀪𑀺𑀯𑀺𑀲𑀺𑀝𑁆𑀞𑀁 𑀘𑀺𑀢𑁆𑀢𑀁 𑀅𑀪𑀺𑀘𑀺𑀢𑁆𑀢𑀁. 𑀬𑀲𑁆𑀫𑀸 𑀛𑀸𑀦𑀸𑀦𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 ‘‘𑀦𑀺𑀲𑁆𑀲𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀬𑀣𑀺𑀘𑁆𑀙𑀺𑀢𑀮𑀸𑀪𑀻. 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀬𑀣𑀸𑀓𑀢𑁂𑀦 𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀦. 𑀯𑀺𑀧𑀼𑀮𑀮𑀸𑀪𑀻𑀢𑀺 𑀅𑀧𑁆𑀧𑀫𑀸𑀡𑀮𑀸𑀪𑀻. ‘‘𑀓𑀲𑀺𑀭’’𑀦𑁆𑀢𑀺 𑀳𑀺 𑀧𑀭𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀓𑀲𑀺𑀭𑀁 𑀅𑀧𑁆𑀧𑀫𑀸𑀡𑀁. 𑀢𑁂𑀦𑀸𑀳 ‘‘𑀧𑀕𑀼𑀡𑀚𑁆𑀛𑀸𑀦𑁄𑀢𑀺 𑀅𑀢𑁆𑀣𑁄’’𑀢𑀺. 𑀲𑀺𑀣𑀺𑀮𑀫𑀸𑀭𑀩𑁆𑀪𑀸𑀢𑀺 𑀲𑀺𑀣𑀺𑀮𑀁 𑀯𑀻𑀭𑀺𑀬𑀸𑀭𑀫𑁆𑀪𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀺𑀣𑀺𑀮𑀁 𑀯𑀻𑀭𑀺𑀬𑀁 𑀧𑀯𑀢𑁆𑀢𑁂𑀢𑁆𑀯𑀸’’𑀢𑀺.

𑀦𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀚𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁯. 𑀅𑀜𑁆𑀜𑀸𑀦𑀺 𑀭𑀽𑀧𑀸𑀦𑀻𑀢𑀺 𑀧𑀭𑁂𑀲𑀁 𑀭𑀽𑀧𑀸𑀦𑀺. 𑀅𑀢𑀺𑀓𑁆𑀓𑀦𑁆𑀢𑀭𑀽𑀧𑁄𑀢𑀺 𑀅𑀢𑁆𑀢𑀦𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀭𑀽𑀧𑀲𑁄𑀪𑀸𑀬 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀭𑀽𑀧𑁄, 𑀲𑀼𑀘𑀺𑀭𑀫𑁆𑀧𑀺 𑀯𑁂𑀮𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀢𑀼𑀝𑁆𑀞𑀺𑀆𑀯𑀳𑁄. 𑀤𑀲𑁆𑀲𑀦𑀲𑁆𑀲 𑀘𑀓𑁆𑀔𑀼𑀲𑁆𑀲 𑀳𑀺𑀢𑁄𑀢𑀺 𑀤𑀲𑁆𑀲𑀦𑀻𑀬𑁄. 𑀧𑀲𑀸𑀤𑀁 𑀆𑀯𑀳𑀢𑀻𑀢𑀺 𑀧𑀸𑀲𑀸𑀤𑀺𑀓𑁄. 𑀙𑀯𑀺𑀯𑀡𑁆𑀡𑀲𑀼𑀦𑁆𑀤𑀭𑀢𑀸𑀬𑀸𑀢𑀺 𑀙𑀯𑀺𑀯𑀡𑁆𑀡𑀲𑁆𑀲 𑀘𑁂𑀯 𑀲𑀭𑀻𑀭𑀲𑀡𑁆𑀞𑀸𑀦𑀲𑁆𑀲 𑀘 𑀲𑁄𑀪𑀦𑀪𑀸𑀯𑁂𑀦.

𑀲𑀼𑀚𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁦. 𑀯𑀺𑀭𑀽𑀧𑀲𑀭𑀻𑀭𑀯𑀡𑁆𑀡𑀦𑁆𑀢𑀺 𑀅𑀲𑀼𑀦𑁆𑀤𑀭𑀙𑀯𑀺𑀯𑀡𑁆𑀡𑀜𑁆𑀘𑁂𑀯 𑀅𑀲𑀼𑀦𑁆𑀤𑀭𑀲𑀡𑁆𑀞𑀸𑀦𑀜𑁆𑀘. 𑀧𑀫𑀸𑀡𑀯𑀲𑁂𑀦𑀸𑀢𑀺 𑀲𑀭𑀻𑀭𑀧𑁆𑀧𑀫𑀸𑀡𑀯𑀲𑁂𑀦. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀦𑁆𑀢𑀺 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁. 𑀫𑀳𑀸𑀲𑀸𑀭𑀚𑁆𑀚𑀦𑁆𑀢𑀺 𑀫𑀳𑀦𑁆𑀢𑁄 𑀫𑀗𑁆𑀓𑀼𑀪𑀸𑀯𑁄.

𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀚𑀸𑀦𑀦𑀓𑀦𑀺𑀬𑀸𑀫𑁂𑀦 𑀲𑀢𑁆𑀣𑀼𑀦𑁄 𑀓𑀸𑀬𑀕𑀼𑀡𑁂 𑀘 𑀘𑀸𑀭𑀺𑀢𑁆𑀢𑀕𑀼𑀡𑁂 𑀘 𑀆𑀯𑀚𑁆𑀚𑁂𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸.

𑀬𑁄𑀚𑀦𑀸𑀯𑀝𑁆𑀝𑀦𑁆𑀢𑀺 𑀬𑁄𑀚𑀦𑀧𑀭𑀺𑀓𑁆𑀔𑁂𑀧𑀁.

‘‘𑀓𑀸𑀬𑀲𑁆𑀫𑀻’’𑀢𑀺 𑀕𑀸𑀣𑀸𑀲𑀼𑀔𑀢𑁆𑀣𑀁 𑀦𑀺𑀭𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀬𑀲𑁆𑀫𑀺’’𑀦𑁆𑀢𑀺. 𑀅𑀓𑀸𑀭𑀡𑀁 𑀓𑀸𑀬𑀧𑁆𑀧𑀫𑀸𑀡𑀦𑁆𑀢𑀺 𑀲𑀭𑀻𑀭𑀧𑁆𑀧𑀫𑀸𑀡𑀁 𑀦𑀸𑀫 𑀅𑀧𑁆𑀧𑀫𑀸𑀡𑀁, 𑀲𑀻𑀮𑀸𑀤𑀺𑀕𑀼𑀡𑀸𑀯 𑀧𑀫𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀲𑀸𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁧. 𑀧𑀼𑀭𑀲𑁆𑀲 𑀏𑀲𑀸𑀢𑀺 𑀧𑁄𑀭𑀻, 𑀘𑀸𑀢𑀼𑀭𑀺𑀬𑀬𑀼𑀢𑁆𑀢𑀢𑀸. 𑀢𑁂𑀦𑀸𑀳 ‘‘𑀧𑀼𑀭𑀯𑀸𑀲𑀻𑀦’’𑀦𑁆𑀢𑀺𑀆𑀤𑀺. 𑀲𑀸 𑀧𑀦 𑀤𑀼𑀢𑀯𑀺𑀮𑀫𑁆𑀩𑀺𑀢𑀔𑀮𑀺𑀢𑀯𑀲𑁂𑀦 𑀅𑀧𑁆𑀧𑀲𑀦𑁆𑀦𑀮𑀽𑀔𑀢𑀸𑀤𑀺𑀤𑁄𑀲𑀭𑀳𑀺𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀭…𑀧𑁂… 𑀯𑀸𑀘𑀸𑀬𑀸’’𑀢𑀺. 𑀅𑀲𑀦𑁆𑀤𑀺𑀤𑁆𑀥𑀸𑀬𑀸𑀢𑀺 𑀫𑀼𑀢𑁆𑀢𑀯𑀸𑀘𑀸𑀬. 𑀢𑁂𑀦𑀸𑀳 ‘‘𑀅𑀧𑀮𑀺𑀩𑀼𑀤𑁆𑀥𑀸𑀬𑀸’’𑀢𑀺𑀆𑀤𑀺. 𑀦 𑀏𑀮𑀁 𑀤𑁄𑀲𑀁 𑀕𑀮𑁂𑀢𑀻𑀢𑀺 𑀅𑀦𑁂𑀮𑀕𑀮𑀸, 𑀅𑀯𑀺𑀭𑀼𑀚𑁆𑀛𑀦𑀯𑀸𑀘𑀸. 𑀢𑁂𑀦𑀸𑀳 ‘‘𑀦𑀺𑀤𑁆𑀤𑁄𑀲𑀸𑀬𑀸’’𑀢𑀺. 𑀘𑀢𑀼𑀲𑀘𑁆𑀘𑀲𑁆𑀲 𑀧𑀓𑀸𑀲𑀓𑀸, 𑀦 𑀓𑀤𑀸𑀘𑀺 𑀲𑀘𑁆𑀘𑀯𑀺𑀫𑀼𑀢𑁆𑀢𑀸𑀢𑀺 𑀆𑀳 ‘‘𑀘𑀢𑀼𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸𑀬𑀸’’𑀢𑀺. 𑀢𑀸 𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀭𑀺𑀘𑁆𑀙𑀺𑀚𑁆𑀚 𑀆𑀧𑀸𑀤𑁂𑀦𑁆𑀢𑀺 𑀧𑀝𑀺𑀧𑀸𑀤𑁂𑀦𑁆𑀢𑀺 𑀧𑀯𑀢𑁆𑀢𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀸𑀬𑀸’’𑀢𑀺. 𑀥𑀚𑁄 𑀦𑀸𑀫 𑀲𑀩𑁆𑀩𑀥𑀫𑁆𑀫𑁂𑀳𑀺 𑀲𑀫𑀼𑀲𑁆𑀲𑀺𑀢𑀝𑁆𑀞𑁂𑀦.

𑀯𑀺𑀲𑀸𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑁆𑀡𑀦𑀸

𑁨𑁪𑁨. 𑀆𑀭𑀜𑁆𑀜𑀺𑀓𑁄𑀢𑀺𑀆𑀤𑀻𑀲𑀼 𑀅𑀭𑀜𑁆𑀜𑀓𑀣𑀸𑀲𑀻𑀲𑁂𑀦 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀥𑀼𑀢𑀗𑁆𑀕𑀸𑀦𑀁, 𑀧𑀺𑀡𑁆𑀟𑀧𑀸𑀢𑀓𑀣𑀸𑀲𑀻𑀲𑁂𑀦 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁, 𑀧𑀁𑀲𑀼𑀓𑀽𑀮𑀺𑀓𑀲𑀻𑀲𑁂𑀦 𑀘𑀻𑀯𑀭𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁, 𑀢𑀕𑁆𑀕𑀳𑀡𑁂𑀦𑁂𑀯 𑀯𑀻𑀭𑀺𑀬𑀦𑀺𑀲𑁆𑀲𑀺𑀢𑀥𑀼𑀢𑀗𑁆𑀕𑀲𑁆𑀲 𑀘 𑀲𑀫𑀸𑀤𑀸𑀬 𑀯𑀢𑁆𑀢𑀦𑀁 𑀤𑀻𑀧𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀕𑀢𑁂𑀦 𑀪𑀕𑀯𑀢𑀸 𑀅𑀧𑀭𑀪𑀸𑀕𑁂 𑀓𑀣𑀺𑀢𑀁.

𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁩. 𑀪𑀡𑁆𑀟𑀓𑀦𑁆𑀢𑀺 𑀧𑀢𑁆𑀢𑀘𑀻𑀯𑀭𑀁. 𑀦𑀺𑀲𑀻𑀤𑀺𑀬𑁂𑀯 𑀯𑀢𑁆𑀢𑀲𑁆𑀲 𑀅𑀲𑀺𑀓𑁆𑀔𑀺𑀢𑀢𑁆𑀢𑀸. 𑀢𑀼𑀚𑁆𑀚𑀦𑀢𑁆𑀣𑁂𑀦 𑀯𑀸𑀘𑀸 𑀏𑀯 𑀲𑀢𑁆𑀢𑀺𑀬𑁄𑀢𑀺 𑀆𑀳 ‘‘𑀯𑀸𑀘𑀸𑀲𑀢𑁆𑀢𑀻𑀳𑀻’’𑀢𑀺.

𑀯𑀸𑀘𑀸𑀬 𑀲𑀦𑁆𑀦𑀺𑀢𑁄𑀤𑀓𑁂𑀦𑀸𑀢𑀺 𑀯𑀘𑀦𑀲𑀗𑁆𑀔𑀸𑀢𑁂𑀦 𑀲𑀫𑀦𑁆𑀢𑀢𑁄 𑀦𑀺𑀘𑁆𑀘𑀁 𑀓𑀢𑁆𑀯𑀸 𑀉𑀧𑀢𑀼𑀤𑀦𑀢𑁄 𑀲𑀦𑁆𑀦𑀺𑀢𑀼𑀤𑀓𑁂𑀦. 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀲𑁄 𑀦𑀺𑀤𑁆𑀤𑁂𑀲𑁄. 𑀢𑁂𑀦𑀸𑀳 ‘‘𑀯𑀘𑀦𑀧𑀢𑁄𑀤𑁂𑀦𑀸’’𑀢𑀺.

𑀉𑀘𑁆𑀘𑀓𑀼𑀮𑁂 𑀚𑀸𑀢𑀺 𑀏𑀢𑀲𑁆𑀲𑀸𑀢𑀺 𑀚𑀸𑀢𑀺𑀫𑀸, 𑀩𑁆𑀭𑀳𑁆𑀫𑀚𑀸𑀢𑀺𑀓𑁄 𑀇𑀲𑀺. 𑀫𑀸𑀢𑀗𑁆𑀕𑁄𑀢𑀺 𑀘𑀡𑁆𑀟𑀸𑀮𑁄. 𑀢𑀢𑁆𑀣𑀸𑀢𑀺 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁. 𑀑𑀓𑀸𑀲𑀁 𑀬𑀸𑀘𑀺 𑀓𑀼𑀫𑁆𑀪𑀓𑀸𑀭𑀁. 𑀫𑀳𑀦𑁆𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀧𑀞𑀫𑀢𑀭𑀁 𑀧𑀯𑀺𑀝𑁆𑀞𑁄 𑀧𑀩𑁆𑀩𑀚𑀺𑀢𑁄’’𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀲𑀸𑀬𑁂𑀯 𑀲𑀸𑀮𑀸𑀬 𑀤𑁆𑀯𑀸𑀭𑀁 𑀦𑀺𑀲𑁆𑀲𑀸𑀬 𑀤𑁆𑀯𑀸𑀭𑀲𑀫𑀻𑀧𑁂. 𑀫𑁂𑀢𑀺 𑀫𑀬𑀸. 𑀔𑀫 𑀫𑀬𑁆𑀳𑀦𑁆𑀢𑀺 𑀫𑀬𑁆𑀳𑀁 𑀅𑀧𑀭𑀸𑀥𑀁 𑀔𑀫𑀲𑁆𑀲𑀼. 𑀢𑁂𑀢𑀺 𑀢𑀬𑀸. 𑀧𑀼𑀦 𑀢𑁂𑀢𑀺 𑀢𑀯. 𑀕𑀡𑁆𑀳𑀺 𑀉𑀕𑁆𑀕𑀦𑁆𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀦𑀸𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀅𑀤𑀸𑀲𑀻’’𑀢𑀺. 𑀧𑀩𑀼𑀚𑁆𑀛𑀺𑀁𑀲𑀽𑀢𑀺 𑀦𑀺𑀤𑁆𑀤𑀸𑀬 𑀧𑀩𑀼𑀚𑁆𑀛𑀺𑀁𑀲𑀼 𑀧𑀓𑀢𑀺𑀬𑀸 𑀧𑀩𑀼𑀚𑁆𑀛𑀦𑀯𑁂𑀮𑀸𑀬 𑀉𑀧𑀕𑀢𑀢𑁆𑀢𑀸.

𑀙𑀯𑁄𑀢𑀺 𑀦𑀺𑀳𑀻𑀦𑁄. 𑀅𑀦𑀦𑁆𑀢𑀫𑀸𑀬𑁄𑀢𑀺 𑀯𑀺𑀯𑀺𑀥𑀫𑀸𑀬𑁄 𑀫𑀸𑀬𑀸𑀯𑀻.

𑀲𑁄𑀢𑀺 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄. ‘‘𑀲𑀢𑁆𑀢𑀥𑀸 𑀪𑀺𑀚𑁆𑀚𑀻’’𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀢𑁂𑀦 𑀢𑀸𑀧𑀲𑁂𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀦𑀲𑀫𑀺𑀤𑁆𑀥𑀸𑀳𑀺 𑀦𑀸𑀦𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀧𑀭𑀺𑀧𑀽𑀭𑀺𑀢𑀸𑀳𑀺 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀤𑀻𑀳𑀺 𑀲𑀼𑀲𑀗𑁆𑀔𑀢𑀲𑀦𑁆𑀢𑀸𑀦𑁂 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑁂 𑀫𑀳𑀸𑀲𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑁂 𑀅𑀭𑀺𑀬𑀽𑀧𑀯𑀸𑀤𑀓𑀫𑁆𑀫𑀁 𑀅𑀪𑀺𑀲𑀧𑀲𑀗𑁆𑀔𑀸𑀢𑀁 𑀨𑀭𑀼𑀲𑀯𑀘𑀦𑀁 𑀧𑀯𑀢𑁆𑀢𑀺𑀢𑀁, 𑀢𑀁 𑀫𑀳𑀸𑀲𑀢𑁆𑀢𑀲𑁆𑀲 𑀔𑁂𑀢𑁆𑀢𑀯𑀺𑀲𑁂𑀲𑀪𑀸𑀯𑀢𑁄 𑀢𑀲𑁆𑀲 𑀘 𑀅𑀚𑁆𑀛𑀸𑀲𑀬𑀨𑀭𑀼𑀲𑀢𑀸𑀬 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑀼𑀢𑁆𑀯𑀸 𑀲𑀘𑁂 𑀲𑁄 𑀫𑀳𑀸𑀲𑀢𑁆𑀢𑀁 𑀦 𑀔𑀫𑀸𑀧𑁂𑀢𑀺, 𑀢𑀁 𑀓𑀓𑁆𑀔𑀴𑀁 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀚𑀸𑀢𑀁, 𑀔𑀫𑀸𑀧𑀺𑀢𑁂 𑀧𑀦 𑀫𑀳𑀸𑀲𑀢𑁆𑀢𑁂 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀥𑀫𑁆𑀫𑀢𑀁 𑀆𑀧𑀚𑁆𑀚𑀢𑀺 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑀢𑁄. 𑀅𑀬𑀜𑁆𑀳𑀺 𑀅𑀭𑀺𑀬𑀽𑀧𑀯𑀸𑀤𑀧𑀸𑀧𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲 𑀘 𑀥𑀫𑁆𑀫𑀢𑀸. 𑀬𑀁 𑀢𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀽𑀭𑀺𑀬𑀼𑀕𑁆𑀕𑀫𑀦𑀦𑀺𑀯𑀸𑀭𑀡𑀁 𑀓𑀢𑀁, 𑀅𑀬𑀁 𑀩𑁄𑀥𑀺𑀲𑀢𑁆𑀢𑁂𑀦 𑀤𑀺𑀝𑁆𑀞𑁄 𑀉𑀧𑀸𑀬𑁄. 𑀢𑁂𑀦 𑀳𑀺 𑀉𑀩𑁆𑀩𑀸𑀴𑁆𑀳𑀸 𑀫𑀦𑀼𑀲𑁆𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀸𑀧𑀲𑀁 𑀆𑀦𑁂𑀢𑁆𑀯𑀸 𑀔𑀫𑀸𑀧𑁂𑀲𑀼𑀁. 𑀲𑁄𑀧𑀺 𑀘 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑁂 𑀚𑀸𑀦𑀺𑀢𑁆𑀯𑀸 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺. 𑀬𑀁 𑀧𑀦𑀲𑁆𑀲 𑀫𑀢𑁆𑀣𑀓𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀲𑁆𑀲 𑀞𑀧𑀦𑀁 𑀢𑀲𑁆𑀲 𑀲𑀢𑁆𑀢𑀥𑀸 𑀨𑀸𑀮𑀦𑀁 𑀓𑀢𑀁, 𑀢𑀁 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁. 𑀅𑀜𑁆𑀜𑀣𑀸 𑀳𑀺 𑀇𑀫𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀯𑀢𑁆𑀢𑀦𑁆𑀢𑀺, 𑀦 𑀧𑀦 𑀘𑀺𑀢𑁆𑀢𑀫𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀦𑁆𑀢𑀻𑀢𑀺 𑀫𑀳𑀸𑀲𑀢𑁆𑀢𑀫𑁆𑀧𑀺 𑀢𑁂𑀦 𑀲𑀤𑀺𑀲𑀁 𑀓𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀢𑀤𑀲𑁆𑀲 𑀦𑁂𑀲𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸𑀢𑀺. 𑀧𑀢𑀺𑀭𑀽𑀧𑀦𑁆𑀢𑀺 𑀬𑀼𑀢𑁆𑀢𑀁.

𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀣𑁂𑀭𑀦𑀸𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁪. 𑀅𑀢𑀻𑀢𑁂 𑀔𑀦𑁆𑀥𑀧𑀜𑁆𑀘𑀓𑁂𑀢𑀺 𑀅𑀢𑀻𑀢𑁂 𑀅𑀢𑁆𑀢𑀪𑀸𑀯𑁂. 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦𑀸𑀢𑀺 𑀙𑀦𑁆𑀤𑀭𑀸𑀕𑀲𑁆𑀲 𑀅𑀘𑁆𑀘𑀦𑁆𑀢𑀫𑁂𑀯 𑀚𑀳𑀦𑁂𑀦. 𑀧𑀳𑀻𑀦𑀁 𑀦𑀸𑀫 𑀳𑁄𑀢𑀺 𑀅𑀦𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄. 𑀧𑀝𑀺𑀦𑀺𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀺 𑀲𑀩𑁆𑀩𑀲𑁄 𑀙𑀟𑁆𑀟𑀺𑀢𑀢𑁆𑀢𑀸. 𑀢𑀬𑁄 𑀪𑀯𑁂𑀢𑀺 𑀇𑀫𑀺𑀦𑀸 𑀉𑀧𑀸𑀤𑀺𑀡𑁆𑀡𑀓𑀥𑀫𑁆𑀫𑀸𑀦𑀁𑀬𑁂𑀯 𑀕𑀳𑀡𑀁. 𑀲𑀩𑁆𑀩𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀘𑀸𑀢𑀺 𑀇𑀫𑀺𑀦𑀸 𑀉𑀧𑀸𑀤𑀺𑀡𑁆𑀡𑀸𑀦𑀫𑁆𑀧𑀺 𑀅𑀦𑀼𑀧𑀸𑀤𑀺𑀡𑁆𑀡𑀸𑀦𑀫𑁆𑀧𑀺 𑀤𑁆𑀯𑀺𑀥𑀸 𑀧𑀯𑀢𑁆𑀢𑀮𑁄𑀓𑀺𑀬𑀥𑀫𑁆𑀫𑀸𑀦𑀁 𑀕𑀳𑀡𑀁 𑀅𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀞𑀺𑀢𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦. 𑀢𑁂𑀲𑁆𑀯𑁂𑀯𑀸𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀏𑀯. 𑀅𑀦𑀼𑀧𑀮𑀺𑀢𑁆𑀢𑀁 𑀅𑀫𑀣𑀺𑀢𑀁 𑀅𑀲𑀁𑀓𑀺𑀮𑀺𑀝𑁆𑀞𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀸𑀪𑀸𑀯𑀢𑁄. 𑀢𑀤𑁂𑀯 𑀲𑀩𑁆𑀩𑀦𑁆𑀢𑀺 𑀳𑁂𑀝𑁆𑀞𑀸 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀇𑀥 𑀲𑀩𑁆𑀩𑀕𑁆𑀕𑀳𑀡𑁂𑀦 𑀕𑀳𑀺𑀢𑀁 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀚𑀳𑀺𑀢𑁆𑀯𑀸𑀢𑀺 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦. 𑀢𑀡𑁆𑀳𑀸 𑀔𑀻𑀬𑀢𑀺 𑀏𑀢𑁆𑀣𑀸𑀢𑀺 𑀢𑀡𑁆𑀳𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀢𑁆𑀢𑀁. 𑀢𑀫𑀳𑀦𑁆𑀢𑀺 𑀢𑀁 𑀉𑀢𑁆𑀢𑀫𑀧𑀼𑀕𑁆𑀕𑀮𑀁 𑀏𑀓𑀯𑀺𑀳𑀸𑀭𑀺𑀁 𑀩𑁆𑀭𑀽𑀫𑀺 𑀢𑀡𑁆𑀳𑀸𑀤𑀼𑀢𑀺𑀬𑀲𑁆𑀲 𑀅𑀪𑀸𑀯𑀢𑁄. 𑀏𑀢𑁆𑀣 𑀘 𑀧𑀭𑀺𑀜𑁆𑀜𑀸𑀧𑀳𑀸𑀦𑀸𑀪𑀺𑀲𑀫𑀬𑀓𑀣𑀦𑁂𑀦 𑀇𑀢𑀭𑀫𑁆𑀧𑀺 𑀅𑀪𑀺𑀲𑀫𑀬𑀁 𑀅𑀢𑁆𑀣𑀢𑁄 𑀓𑀣𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀣𑁂𑀭𑀦𑀸𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀫𑀳𑀸𑀓𑀧𑁆𑀧𑀺𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁫. 𑀫𑀳𑀸𑀓𑀧𑁆𑀧𑀺𑀦𑁄𑀢𑀺 𑀧𑀽𑀚𑀸𑀯𑀘𑀦𑀫𑁂𑀢𑀁 𑀬𑀣𑀸 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺. 𑀢𑀣𑀸𑀭𑀽𑀧𑀦𑁆𑀢𑀺 ‘‘𑀩𑀼𑀤𑁆𑀥𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀓𑀁 𑀕𑀼𑀡𑀯𑀺𑀲𑁂𑀲𑀯𑀦𑁆𑀢𑀧𑀝𑀺𑀩𑀤𑁆𑀥𑀁. 𑀲𑀸𑀲𑀦𑀦𑁆𑀢𑀺 𑀤𑁂𑀲𑀦𑁆𑀢𑀭𑀢𑁄 𑀆𑀕𑀢𑀯𑀘𑀦𑀁. 𑀚𑀗𑁆𑀖𑀯𑀸𑀡𑀺𑀚𑀸𑀢𑀺 𑀚𑀗𑁆𑀖𑀘𑀸𑀭𑀺𑀦𑁄 𑀯𑀸𑀡𑀺𑀚𑀸. 𑀓𑀺𑀜𑁆𑀘𑀺 𑀲𑀸𑀲𑀦𑀦𑁆𑀢𑀺 𑀅𑀧𑀼𑀩𑁆𑀩𑀧𑀯𑀢𑁆𑀢𑀺𑀤𑀻𑀧𑀓𑀁 𑀓𑀺𑀜𑁆𑀘𑀺 𑀯𑀘𑀦𑀦𑁆𑀢𑀺 𑀧𑀼𑀘𑁆𑀙𑀺. 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺 𑀬𑀣𑀸 𑀢𑀁 𑀲𑀼𑀘𑀺𑀭𑀁 𑀓𑀢𑀸𑀪𑀺𑀦𑀻𑀳𑀸𑀭𑀢𑀸𑀬 𑀧𑀭𑀺𑀧𑀓𑁆𑀓𑀜𑀸𑀡𑀲𑁆𑀲. 𑀅𑀧𑀭𑀺𑀫𑀸𑀡𑀁 𑀕𑀼𑀡𑀲𑁆𑀲 𑀅𑀧𑀭𑀺𑀫𑀸𑀡𑀢𑁄 𑀲𑀩𑁆𑀩𑀜𑁆𑀜𑀼𑀕𑀼𑀡𑀧𑀭𑀺𑀤𑀻𑀧𑀦𑀢𑁄, 𑀲𑁂𑀲𑀭𑀢𑀦𑀤𑁆𑀯𑀬𑁂 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀻𑀧𑀦𑀢𑁄 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑀤𑀻𑀧𑀦𑀢𑁄𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀤𑀼𑀓𑁆𑀔𑀢𑁄 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀘 𑀅𑀧𑀢𑀦𑁆𑀢𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀲𑀼𑀧𑀭𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄𑀢𑀺 𑀲𑀗𑁆𑀖𑁄𑀢𑀺. 𑀭𑀢𑀦𑀢𑁆𑀣𑁄 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀲𑀤𑀺𑀲𑁄 𑀏𑀯𑀸𑀢𑀺.

𑀦𑀯𑀲𑀢𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀤𑁂𑀯𑀻. 𑀢𑀼𑀫𑁆𑀳𑁂𑀢𑀺 𑀭𑀸𑀚𑀺𑀦𑀺𑀁 𑀕𑀸𑀭𑀯𑁂𑀦 𑀩𑀳𑀼𑀯𑀘𑀦𑁂𑀦 𑀯𑀤𑀢𑀺. 𑀭𑀸𑀕𑁄𑀢𑀺 𑀅𑀦𑀼𑀕𑀘𑁆𑀙𑀦𑁆𑀢𑀭𑀸𑀕𑁄.

𑀚𑀦𑀺𑀢𑁂𑀢𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁂. 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀧𑀚𑀸𑀢𑀢𑁆𑀢𑀸 𑀧𑀚𑀸𑀢𑀺 𑀧𑀚𑀸𑀲𑀤𑁆𑀤𑁄 𑀚𑀦𑀺𑀢𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 𑁋 ‘‘𑀚𑀦𑀺𑀢𑁂, 𑀧𑀚𑀸𑀬𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀝𑁆𑀞𑀳𑀺 𑀯𑀺𑀚𑁆𑀚𑀸𑀳𑀻𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁨𑁭𑁮) 𑀆𑀕𑀢𑀦𑀬𑁂𑀦. 𑀢𑀢𑁆𑀣 𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀦𑁄𑀫𑀬𑀺𑀤𑁆𑀥𑀻𑀳𑀺 𑀲𑀳 𑀙 𑀅𑀪𑀺𑀜𑁆𑀜𑀸 ‘‘𑀅𑀝𑁆𑀞 𑀯𑀺𑀚𑁆𑀚𑀸’’𑀢𑀺 𑀆𑀕𑀢𑀸. 𑀢𑀧𑀢𑀺 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑁂𑀦 𑀯𑀺𑀚𑁆𑀚𑁄𑀢𑀢𑀺, 𑀢𑀁 𑀲𑀽𑀭𑀺𑀬𑀲𑁆𑀲 𑀯𑀺𑀭𑁄𑀘𑀦𑀦𑁆𑀢𑀺 𑀆𑀳 𑁋 ‘‘𑀢𑀧𑀢𑀻𑀢𑀺 𑀯𑀺𑀭𑁄𑀘𑀢𑀻’’𑀢𑀺. 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀢𑀺 𑀆𑀳 𑁋 ‘‘𑀤𑀼𑀯𑀺𑀥𑁂𑀦 𑀛𑀸𑀦𑁂𑀦 𑀛𑀸𑀬𑀫𑀸𑀦𑁄’’𑀢𑀺. 𑀲𑀩𑁆𑀩𑀫𑀗𑁆𑀕𑀮𑀕𑀸𑀣𑀸𑀢𑀺 𑀲𑀩𑁆𑀩𑀫𑀗𑁆𑀕𑀮𑀸𑀯𑀺𑀭𑁄𑀥𑀻 𑀕𑀸𑀣𑀸𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀫𑀗𑁆𑀕𑀮𑀁 𑀪𑀕𑀯𑀸 𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀲𑀗𑁆𑀖𑁄 𑀘 𑀫𑀗𑁆𑀕𑀮𑀁;

𑀲𑀩𑁆𑀩𑁂𑀲𑀫𑁆𑀧𑀺 𑀘 𑀲𑀢𑁆𑀢𑀸𑀦𑀁, 𑀲 𑀧𑀼𑀜𑁆𑀜𑀯𑀺𑀢𑀫𑀗𑁆𑀕𑀮’’𑀦𑁆𑀢𑀺.

𑀧𑀽𑀚𑀁 𑀓𑀸𑀭𑁂𑀢𑁆𑀯𑀸 𑀏𑀓𑀁 𑀅𑀕𑀸𑀭𑀺𑀓𑀥𑀫𑁆𑀫𑀓𑀣𑀺𑀓𑀁 𑀉𑀧𑀸𑀲𑀓𑀁 𑀆𑀳. 𑀏𑀢𑁆𑀣 𑀘 ‘‘𑀛𑀸𑀬𑀻 𑀢𑀧𑀢𑀻’’𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀸𑀦𑀁 𑀕𑀳𑀺𑀢𑀢𑁆𑀢𑀸 𑀥𑀫𑁆𑀫𑀭𑀢𑀦𑀁 𑀕𑀳𑀺𑀢𑀫𑁂𑀯. ‘‘𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀇𑀫𑀺𑀦𑀸 𑀲𑀗𑁆𑀖𑀭𑀢𑀦𑀁 𑀕𑀳𑀺𑀢𑀫𑁂𑀯. 𑀩𑀼𑀤𑁆𑀥𑀭𑀢𑀦𑀁 𑀧𑀦 𑀲𑀭𑀽𑀧𑁂𑀦𑁂𑀯 𑀕𑀳𑀺𑀢𑀦𑁆𑀢𑀺.

𑀫𑀳𑀸𑀓𑀧𑁆𑀧𑀺𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀲𑀳𑀸𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁬. 𑀲𑀫𑁆𑀫𑀸 𑀲𑀁𑀲𑀦𑁆𑀤𑀦𑀯𑀲𑁂𑀦 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀫𑁂𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺. 𑀲𑀫𑁆𑀫𑀸 𑀘𑀺𑀭𑀭𑀢𑁆𑀢𑀁 𑀘𑀺𑀭𑀓𑀸𑀮𑀁 𑀲𑀫𑁂𑀢𑀺 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀘𑀺𑀭𑀭𑀢𑁆𑀢𑀁𑀲𑀫𑁂𑀢𑀺𑀓𑀸. 𑀢𑁂𑀦𑀸𑀳 ‘‘𑀤𑀻𑀖𑀭𑀢𑁆𑀢’’𑀦𑁆𑀢𑀺𑀆𑀤𑀺. 𑀇𑀤𑀸𑀦𑀺 𑀇𑀫𑁂𑀲𑀦𑁆𑀢𑀺 𑀏𑀢𑀭𑀳𑀺 𑀏𑀢𑁂𑀲𑀁. 𑀅𑀬𑀁 𑀲𑀸𑀲𑀦𑀥𑀫𑁆𑀫𑁄 𑀅𑀚𑁆𑀛𑀸𑀲𑀬𑀢𑁄 𑀧𑀬𑁄𑀕𑀢𑁄 𑀘 𑀲𑀫𑁆𑀫𑀸 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀢𑀲𑁆𑀫𑀸 𑀫𑀚𑁆𑀛𑁂 𑀪𑀺𑀦𑁆𑀦𑀁 𑀯𑀺𑀬 𑀲𑀫𑀫𑁂𑀯 𑀦 𑀯𑀺𑀲𑀤𑀺𑀲𑀁. 𑀓𑀺𑀜𑁆𑀘 𑀢𑀢𑁄 𑀏𑀯 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀯𑁂𑀤𑀺𑀢𑀥𑀫𑁆𑀫𑀯𑀺𑀦𑀬𑁂 𑀏𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀥𑀫𑁆𑀫𑁄 𑀲𑁄𑀪𑀢𑀺 𑀯𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂𑀢𑀺 𑀅𑀭𑀺𑀬𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀫𑁆𑀫𑀤𑁂𑀯 𑀧𑀓𑀸𑀲𑀺𑀢𑁂 𑀅𑀭𑀺𑀬𑀥𑀫𑁆𑀫𑁂. 𑀲𑀫𑁆𑀫𑀤𑁂𑀯 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀦𑀬𑀸𑀦𑀁 𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀦𑀻𑀢𑀸 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑁂𑀦.

𑀲𑀳𑀸𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀪𑀺𑀓𑁆𑀔𑀼𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬 𑀦𑀺𑀤𑀸𑀦𑀯𑀕𑁆𑀕𑀯𑀡𑁆𑀡𑀦𑀸.