𑁫-𑁬. 𑀫𑀳𑀸𑀭𑀼𑀓𑁆𑀔𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁫𑁫-𑁫𑁬. 𑀑𑀚𑀁 𑀅𑀪𑀺𑀳𑀭𑀦𑁆𑀢𑀻𑀢𑀺 𑀭𑀲𑀳𑀭𑀡𑀺𑀬𑁄 𑀯𑀺𑀬 𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑁂 𑀭𑀼𑀓𑁆𑀔𑀫𑀽𑀮𑀸𑀦𑀺 𑀭𑀼𑀓𑁆𑀔𑀲𑁆𑀲 𑀧𑀣𑀯𑀻𑀆𑀧𑁄𑀭𑀲𑁂 𑀉𑀧𑀭𑀺 𑀆𑀭𑁄𑀧𑁂𑀦𑁆𑀢𑀺. 𑀢𑁂𑀲𑀁 𑀢𑀣𑀸 𑀆𑀭𑁄𑀧𑀦𑀁 ‘‘𑀑𑀚𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀺. 𑀳𑀢𑁆𑀣𑀲𑀢𑀼𑀩𑁆𑀩𑁂𑀥𑀫𑀲𑁆𑀲𑀸𑀢𑀺 𑀳𑀢𑁆𑀣𑀲𑀢𑀼𑀩𑁆𑀩𑁂𑀥𑁄, 𑀳𑀢𑁆𑀣𑀲𑀢𑀁 𑀉𑀩𑁆𑀩𑀺𑀤𑁆𑀥𑀲𑁆𑀲𑀧𑀺. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀯𑀝𑁆𑀝𑀓𑀣𑀸𑀬𑀁. 𑀓𑀫𑁆𑀫𑀸𑀭𑁄𑀳𑀦𑀦𑁆𑀢𑀺 𑀓𑀫𑁆𑀫𑀧𑀘𑁆𑀘𑀬𑁄.

𑀧𑀼𑀦 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀯𑀺𑀯𑀝𑁆𑀝𑀓𑀣𑀸𑀬𑀁. 𑀯𑀝𑁆𑀝𑀤𑀼𑀓𑁆𑀔𑀁 𑀦𑀸𑀲𑁂𑀢𑀼𑀓𑀸𑀫𑀲𑁆𑀲 𑀤𑀴𑁆𑀳𑀁 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀓𑀼𑀤𑁆𑀤𑀸𑀮𑁄 𑀯𑀺𑀬𑀸’’𑀢𑀺 𑀆𑀳. 𑀢𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑀜𑀸𑀡𑀁 𑀲𑀫𑀸𑀥𑀺𑀧𑀘𑁆𑀙𑀺𑀬𑀸 𑀞𑀺𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑀜𑀸𑀡𑀁. 𑀭𑀼𑀓𑁆𑀔𑀘𑁆𑀙𑁂𑀤𑀦𑀨𑀭𑀲𑀼 𑀯𑀺𑀬𑀸𑀢𑀺 𑀏𑀯𑀁𑀪𑀽𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀏𑀓𑀦𑁆𑀢𑀢𑁄 𑀯𑀝𑁆𑀝𑀘𑁆𑀙𑁂𑀤𑀸𑀬 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀭𑀼𑀓𑁆𑀔𑀲𑁆𑀲…𑀧𑁂… 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀧𑀜𑁆𑀜𑀸’’𑀢𑀺. 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁. 𑀢𑀁 𑀘𑀢𑀼𑀩𑁆𑀩𑀺𑀥𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑀻𑀲𑀢𑀺 𑀧𑀣𑀯𑀻𑀓𑁄𑀝𑁆𑀞𑀸𑀲𑀸, 𑀤𑁆𑀯𑀸𑀤𑀲 𑀆𑀧𑁄𑀓𑁄𑀝𑁆𑀞𑀸𑀲𑀸, 𑀘𑀢𑁆𑀢𑀸𑀭𑁄 𑀢𑁂𑀚𑁄𑀓𑁄𑀝𑁆𑀞𑀸𑀲𑀸, 𑀙 𑀯𑀸𑀬𑁄𑀓𑁄𑀝𑁆𑀞𑀸𑀲𑀸𑀢𑀺 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀸𑀬 𑀓𑁄𑀝𑁆𑀞𑀸𑀲𑁂𑀲𑀼. 𑀯𑀺𑀜𑁆𑀜𑀸𑀡𑀲𑁆𑀲 𑀘𑀸𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀧𑀓𑀸𑀭𑀢𑁆𑀣𑁄 𑀘. 𑀢𑁂𑀦 𑀪𑀽𑀢𑀭𑀽𑀧𑀸𑀦𑀺 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀢𑁆𑀢𑀲𑀼 𑀲𑀧𑁆𑀧𑀸𑀬𑁂𑀲𑀼 𑀬𑀲𑁆𑀲 𑀅𑀮𑀪𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀦 𑀉𑀧𑀝𑁆𑀞𑀸𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀜𑁆𑀜𑀢𑀭𑀁 𑀲𑀧𑁆𑀧𑀸𑀬’’𑀦𑁆𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀭𑀼𑀓𑁆𑀔𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.