𑁬. 𑀤𑀼𑀓𑁆𑀔𑀯𑀕𑁆𑀕𑁄

𑁧. 𑀧𑀭𑀺𑀯𑀻𑀫𑀁𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀼𑀁, 𑀦𑀺𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀳𑁂𑀢𑀼𑀜𑁆𑀘 𑀧𑀭𑀺𑀢𑀼𑀮𑁂𑀦𑁆𑀢𑁄. 𑀓𑀼𑀢𑁄 𑀧𑀦𑁂𑀢𑀦𑁆𑀢𑀺? ‘‘𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸’’𑀢𑀺 𑀯𑀘𑀦𑀢𑁄. 𑀦 𑀳𑀺 𑀲𑀩𑁆𑀩𑀤𑀼𑀓𑁆𑀔𑀧𑀭𑀺𑀯𑀻𑀫𑀁𑀲𑀁 𑀯𑀺𑀦𑀸 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑁄 𑀲𑀫𑁆𑀪𑀯𑀢𑀺. 𑀓𑀲𑁆𑀫𑀸𑀢𑀺𑀆𑀤𑀺𑀦𑀸 𑀚𑀭𑀸𑀫𑀭𑀡𑀲𑁆𑀲𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀚𑀸𑀢𑀺𑀆𑀤𑀻𑀦𑀫𑁆𑀧𑀺 𑀧𑀯𑀢𑁆𑀢𑀺 𑀤𑀼𑀓𑁆𑀔𑀪𑀸𑀯𑀺𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀚𑀭𑀸𑀫𑀭𑀡𑁂 𑀕𑀳𑀺𑀢𑁂 𑀲𑀢𑀺 𑀚𑀸𑀢𑀺𑀧𑀺 𑀕𑀳𑀺𑀢𑀸 𑀳𑁄𑀢𑀺, 𑀢𑀲𑁆𑀲𑀸 𑀅𑀪𑀸𑀯𑁂 𑀚𑀭𑀸𑀫𑀭𑀡𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀏𑀲 𑀦𑀬𑁄 𑀪𑀯𑀸𑀤𑀻𑀲𑀼𑀧𑀺. 𑀏𑀯𑀁 𑀬𑀸𑀯 𑀚𑀸𑀢𑀺𑀥𑀫𑁆𑀫𑁄 𑀚𑀭𑀸𑀫𑀭𑀡𑁂 𑀕𑀳𑀺𑀢𑁂 𑀕𑀳𑀺𑀢𑁄𑀯 𑀳𑁄𑀢𑀺, 𑀚𑀭𑀸𑀫𑀭𑀡𑀧𑀤𑁂𑀲𑁂𑀦 𑀢𑀩𑁆𑀩𑀺𑀓𑀸𑀭𑀯𑀦𑁆𑀢𑁄 𑀲𑀩𑁆𑀩𑁂 𑀢𑁂𑀪𑀽𑀫𑀓𑀸 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀢𑀺 𑀏𑀯𑀫𑁆𑀧𑀺 𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀤𑀼𑀓𑁆𑀔𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀕𑀳𑀺𑀢𑁂 𑀲𑀩𑁆𑀩𑀤𑀼𑀓𑁆𑀔𑀲𑁆𑀲 𑀕𑀳𑀺𑀢𑀢𑁆𑀢𑀸’’𑀢𑀺. 𑀅𑀦𑁂𑀓𑀯𑀺𑀥𑀦𑁆𑀢𑀺 𑀩𑀳𑀼𑀯𑀺𑀥𑀁 𑀩𑀳𑀼𑀓𑁄𑀝𑁆𑀞𑀸𑀲𑀁. ‘‘𑀅𑀦𑁂𑀓’’𑀦𑁆𑀢𑀺 𑀯𑀸 𑀧𑀸𑀞𑁄. 𑀅𑀦𑁂𑀓𑀦𑁆𑀢𑀺 𑀩𑀳𑀼𑀮𑀯𑀘𑀦𑀁. 𑀯𑀺𑀥𑀦𑁆𑀢𑀺 𑀔𑀡𑁆𑀟𑀺𑀘𑁆𑀘𑀧𑀸𑀮𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀭𑀻𑀢𑀓𑁄𑀝𑁆𑀞𑀸𑀲𑀁. 𑀦𑀸𑀦𑀧𑁆𑀧𑀓𑀸𑀭𑀓𑀦𑁆𑀢𑀺 𑀢𑀢𑁄 𑀏𑀯 𑀦𑀸𑀦𑀧𑁆𑀧𑀓𑀸𑀭𑀁. 𑀦𑁆𑀳𑀢𑁆𑀯𑀸 𑀞𑀺𑀢𑀁 𑀧𑀼𑀭𑀺𑀲𑀁 𑀯𑀺𑀬𑀸𑀢𑀺 𑀩𑀸𑀮𑀸𑀦𑀁 𑀅𑀢𑁆𑀢𑀪𑀸𑀯𑀲𑁆𑀲 𑀲𑀼𑀪𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑀸𑀳.

‘‘𑀲𑀸𑀭𑀼𑀧𑁆𑀧𑀪𑀸𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀲𑀩𑁆𑀩𑀣𑀸 𑀲𑀸𑀭𑀼𑀧𑁆𑀧𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀧𑀭𑀺𑀲𑀼𑀤𑁆𑀥𑀢𑀸𑀬𑀸’’𑀢𑀺. 𑀦 𑀳𑀺 𑀢𑀲𑁆𑀲𑁂𑀲𑀸 𑀅𑀲𑀗𑁆𑀔𑀢𑀢𑀸𑀤𑀺𑀪𑀸𑀯𑁂𑀦 𑀲𑀤𑀺𑀲𑀸. 𑀧𑀝𑀺𑀧𑀦𑁆𑀦𑁄𑀢𑀺 𑀧𑀝𑀺𑀫𑀼𑀔𑁄 𑀅𑀪𑀺𑀲𑀗𑁆𑀔𑀸𑀭𑀫𑀼𑀔𑁄 𑀳𑀼𑀢𑁆𑀯𑀸 𑀧𑀦𑁆𑀦𑁄 𑀅𑀥𑀺𑀕𑀢𑁄. 𑀅𑀦𑀼𑀕𑀢𑀦𑁆𑀢𑀺 𑀅𑀦𑀼𑀘𑁆𑀙𑀯𑀺𑀓𑀪𑀸𑀯𑁂𑀦 𑀕𑀢𑀁, 𑀬𑀣𑀸 𑀘 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀫𑁄 𑀳𑁄𑀢𑀺, 𑀏𑀯𑀁 𑀢𑀤𑀦𑀼𑀭𑀽𑀧𑀪𑀸𑀯𑁂𑀦 𑀕𑀢𑀁. 𑀏𑀢𑁆𑀣 𑀘 𑀧𑀸𑀴𑀺𑀬𑀁 ‘‘𑀧𑀚𑀸𑀦𑀸𑀢𑀻’’𑀢𑀺 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀧𑀚𑀸𑀦𑀦𑀸 𑀯𑀼𑀢𑁆𑀢𑀸, ‘‘𑀢𑀣𑀸 𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀻’’𑀢𑀺 𑀦𑀺𑀬𑀢𑀯𑀲𑁂𑀦. ‘‘𑀅𑀧𑀭𑀪𑀸𑀕𑀯𑀲𑁂𑀦𑀸’’𑀢𑀺 𑀅𑀧𑀭𑁂. 𑀓𑁂𑀘𑀺 𑀧𑀦 ‘‘𑀬𑀣𑀸 𑀧𑀝𑀺𑀧𑀦𑁆𑀦𑀲𑁆𑀲 𑀚𑀭𑀸𑀫𑀭𑀡𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀧𑀝𑀺𑀧𑀦𑁆𑀦𑁄’’𑀢𑀺 𑀯𑀤𑀦𑁆𑀢𑀺. 𑀧𑀤𑀯𑀻𑀫𑀁𑀲𑀦𑀸 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀦 𑀫𑀕𑁆𑀕𑀓𑁆𑀔𑀡𑀯𑀲𑁂𑀦. 𑀲𑀗𑁆𑀔𑀸𑀭𑀦𑀺𑀭𑁄𑀥𑀸𑀬𑀸𑀢𑀺 𑀏𑀢𑁆𑀣 𑀦𑀬𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀗𑁆𑀔𑀸𑀭𑀕𑁆𑀕𑀳𑀡𑀁, 𑀅𑀣 𑀔𑁄 𑀲𑀗𑁆𑀔𑀢𑀲𑀗𑁆𑀔𑀸𑀭𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑀢𑁆𑀣𑀸𑀬𑀸’’𑀢𑀺. 𑀢𑁂𑀦𑀸𑀳 ‘‘𑀏𑀢𑁆𑀢𑀸𑀯𑀢𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀤𑁂𑀲𑀦𑀸 𑀓𑀣𑀺𑀢𑀸’’𑀢𑀺.

‘‘𑀧𑀘𑁆𑀘𑀢𑁆𑀢𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻’’𑀢𑀺𑀆𑀤𑀺𑀦𑀸 𑀅𑀭𑀳𑀢𑁆𑀢𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀁, ‘‘𑀲𑁄 𑀲𑀼𑀔𑀜𑁆𑀘 𑀯𑁂𑀤𑀦𑀁 𑀯𑁂𑀤𑀬𑀢𑀻’’𑀢𑀺𑀆𑀤𑀺𑀦𑀸 𑀲𑀢𑀢𑀯𑀺𑀳𑀸𑀭𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀸 𑀲𑀩𑁆𑀩𑀣𑀸𑀯 𑀯𑀝𑁆𑀝𑀤𑁂𑀲𑀦𑀸𑀢𑁄 𑀦𑀺𑀯𑀢𑁆𑀢𑁂𑀢𑀩𑁆𑀩𑀸 𑀲𑀺𑀬𑀸. 𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 𑀏𑀯𑀫𑀸𑀤𑀺𑀓𑀁 𑀇𑀤𑀁 𑀯𑀝𑁆𑀝𑀯𑀺𑀯𑀝𑁆𑀝𑀓𑀣𑀦𑀁 𑀧𑀼𑀦 𑀕𑀡𑁆𑀳𑀸𑀢𑀺. 𑀧𑀼𑀕𑁆𑀕𑀮𑀲𑀤𑁆𑀤𑁄 𑀇𑀢𑀭𑀸𑀲𑀁 𑀤𑁆𑀯𑀺𑀦𑁆𑀦𑀁 𑀧𑀓𑀢𑀻𑀦𑀁 𑀯𑀸𑀘𑀓𑁄𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀕𑀳𑀡𑁂 𑀧𑀞𑀫𑀧𑀓𑀢𑀺𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀭𑀺𑀲𑀧𑀼𑀕𑁆𑀕𑀮𑁄’’𑀢𑀺 𑀅𑀯𑁄𑀘𑀸𑀢𑀺 𑀆𑀳 ‘‘𑀧𑀼𑀭𑀺𑀲𑁄𑀬𑁂𑀯 𑀧𑀼𑀕𑁆𑀕𑀮𑁄’’𑀢𑀺. 𑀉𑀪𑀬𑁂𑀦𑀸𑀢𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀕𑁆𑀕𑀳𑀡𑁂𑀦. 𑀲𑀫𑁆𑀫𑀼𑀢𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀸𑀬 𑀓𑀣𑀸 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀓𑀣𑀸. 𑀧𑀭𑀫𑀢𑁆𑀣𑀲𑁆𑀲 𑀓𑀣𑀸 𑀤𑁂𑀲𑀦𑀸 𑀧𑀭𑀫𑀢𑁆𑀣𑀓𑀣𑀸. 𑀢𑀢𑁆𑀣𑀸𑀢𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀓𑀣𑀸𑀲𑀼, 𑀦 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑁂𑀲𑀼. 𑀢𑁂𑀦𑀸𑀳 ‘‘𑀏𑀯𑀁 𑀧𑀯𑀢𑁆𑀢𑀸 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀭𑀺𑀤𑀁 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀸𑀦𑀁 𑀮𑀓𑁆𑀔𑀡𑀁 𑁋 𑀬𑀲𑁆𑀫𑀺𑀁 𑀪𑀺𑀦𑁆𑀦𑁂 𑀩𑀼𑀤𑁆𑀥𑀺𑀬𑀸 𑀯𑀸 𑀅𑀯𑀬𑀯𑀯𑀺𑀦𑀺𑀩𑁆𑀪𑁄𑀕𑁂 𑀓𑀢𑁂 𑀦 𑀢𑀁𑀲𑀫𑀜𑁆𑀜𑀸, 𑀲𑀸 𑀖𑀝𑀧𑀝𑀸𑀤𑀺𑀧𑁆𑀧𑀪𑁂𑀤𑀸 𑀲𑀫𑁆𑀫𑀼𑀢𑀺, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀧𑀭𑀫𑀢𑁆𑀣𑁄. 𑀦 𑀳𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑁂 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺. 𑀢𑀢𑁆𑀣 𑀭𑀽𑀧𑀸𑀤𑀺𑀥𑀫𑁆𑀫𑀁 𑀲𑀫𑀽𑀳𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀉𑀧𑀸𑀤𑀸𑀬 ‘‘𑀲𑀢𑁆𑀢𑁄’’𑀢𑀺𑀆𑀤𑀺 𑀯𑁄𑀳𑀸𑀭𑁄𑀢𑀺 𑀆𑀳 ‘‘𑀲𑀢𑁆𑀢𑁄 𑀦𑀭𑁄…𑀧𑁂… 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫𑀸’’𑀢𑀺. 𑀬𑀲𑁆𑀫𑀸 𑀭𑀽𑀧𑀸𑀤𑀬𑁄 𑀧𑀭𑀫𑀢𑁆𑀣𑀥𑀫𑁆𑀫𑀸 ‘‘𑀔𑀦𑁆𑀥𑀸 𑀥𑀸𑀢𑀼𑀬𑁄’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀦𑁆𑀢𑀺, 𑀦 𑀯𑁄𑀳𑀸𑀭𑀫𑀢𑁆𑀢𑀁, 𑀢𑀲𑁆𑀫𑀸 ‘‘𑀔𑀦𑁆𑀥𑀸…𑀧𑁂… 𑀧𑀭𑀫𑀢𑁆𑀣𑀓𑀣𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀔𑀦𑁆𑀥𑀓𑀣𑀸𑀧𑀺 𑀲𑀫𑁆𑀫𑀼𑀢𑀺𑀓𑀣𑀸𑀯, 𑀲𑀫𑁆𑀫𑀼𑀢𑀺 𑀳𑀺 𑀲𑀗𑁆𑀓𑁂𑀢𑁄 𑀔𑀦𑁆𑀥𑀝𑁆𑀞𑁄 𑀭𑀸𑀲𑀝𑁆𑀞𑁄 𑀯𑀸 𑀓𑁄𑀝𑁆𑀞𑀸𑀲𑀝𑁆𑀞𑁄 𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀔𑀦𑁆𑀥𑀲𑀫𑀜𑁆𑀜𑀸 𑀨𑀲𑁆𑀲𑀸𑀤𑀻𑀲𑀼 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀯𑀺𑀬 𑀧𑀭𑀫𑀢𑁆𑀣𑀲𑀦𑁆𑀦𑀺𑀲𑁆𑀲𑀬𑀸 𑀢𑀲𑁆𑀲 𑀆𑀲𑀦𑁆𑀦𑀢𑀭𑀸 𑀧𑀼𑀕𑁆𑀕𑀮𑀲𑀫𑀜𑁆𑀜𑀸𑀤𑀬𑁄 𑀯𑀺𑀬 𑀦 𑀤𑀽𑀭𑁂𑀢𑀺 𑀧𑀭𑀫𑀢𑁆𑀣𑀲𑀗𑁆𑀕𑀳𑀢𑀸 𑀯𑀼𑀢𑁆𑀢𑀸. 𑀔𑀦𑁆𑀥𑀲𑀻𑀲𑁂𑀦 𑀯𑀸 𑀢𑀤𑀼𑀧𑀸𑀤𑀸𑀦𑀸 𑀲𑀪𑀸𑀯𑀥𑀫𑁆𑀫𑀸 𑀏𑀯 𑀕𑀳𑀺𑀢𑀸. 𑀦𑀦𑀼 𑀘 𑀲𑀩𑁆𑀩𑁂𑀧𑀺 𑀲𑀪𑀸𑀯𑀥𑀫𑁆𑀫𑀸 𑀲𑀫𑁆𑀫𑀼𑀢𑀺𑀫𑀼𑀔𑁂𑀦𑁂𑀯 𑀤𑁂𑀲𑀦𑀁 𑀆𑀭𑁄𑀳𑀦𑁆𑀢𑀺, 𑀦 𑀲𑀫𑁆𑀫𑀼𑀔𑁂𑀦𑀸𑀢𑀺 𑀲𑀩𑁆𑀩𑀸𑀧𑀺 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸𑀯 𑀲𑀺𑀬𑀸𑀢𑀺? 𑀦𑀬𑀺𑀤𑀫𑁂𑀯𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀤𑁂𑀲𑀦𑀸𑀯𑀺𑀪𑀸𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀦 𑀘 𑀲𑀤𑁆𑀤𑁄 𑀓𑁂𑀦𑀘𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀯𑀺𑀦𑀸 𑀅𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺. 𑀢𑁂𑀦𑀸𑀳 ‘‘𑀧𑀭𑀫𑀢𑁆𑀣𑀁 𑀓𑀣𑁂𑀦𑁆𑀢𑀸𑀧𑀺 𑀲𑀫𑁆𑀫𑀼𑀢𑀺𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀓𑀣𑁂𑀦𑁆𑀢𑀻’’𑀢𑀺. 𑀲𑀘𑁆𑀘𑀫𑁂𑀯 𑀅𑀯𑀺𑀧𑀭𑀻𑀢𑀫𑁂𑀯 𑀓𑀣𑁂𑀦𑁆𑀢𑀺.

𑀲𑀫𑁆𑀫𑀼𑀢𑀻𑀢𑀺 𑀲𑀫𑀜𑁆𑀜𑀸. 𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄𑀢𑀺 𑀧𑀭𑀫𑀢𑁆𑀣𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑁄. 𑀢𑀁 𑀧𑀭𑀫𑀢𑁆𑀣𑀁, 𑀲𑀫𑁆𑀫𑀼𑀢𑀺 𑀧𑀦 𑀮𑁄𑀓𑀲𑁆𑀲 𑀲𑀗𑁆𑀓𑁂𑀢𑀫𑀢𑁆𑀢𑀲𑀺𑀤𑁆𑀥𑀸. 𑀬𑀤𑀺 𑀏𑀯𑀁 𑀓𑀣𑀁 𑀲𑀫𑁆𑀫𑀼𑀢𑀺𑀓𑀣𑀸𑀬 𑀲𑀘𑁆𑀘𑀢𑀸𑀢𑀺 𑀆𑀳 ‘‘𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡’’𑀦𑁆𑀢𑀺 𑀮𑁄𑀓𑀲𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀢𑁄. 𑀮𑁄𑀓𑀲𑀫𑀜𑁆𑀜𑀸𑀬 𑀳𑀺 𑀅𑀪𑀺𑀦𑀺𑀯𑁂𑀲𑀦𑀁 𑀯𑀺𑀦𑀸 𑀧𑀜𑁆𑀜𑀸𑀧𑀦𑀸 𑀏𑀓𑀘𑁆𑀘𑀲𑁆𑀲 𑀲𑀼𑀢𑀲𑁆𑀲 𑀲𑀸𑀯𑀦𑀸 𑀯𑀺𑀬, 𑀦 𑀫𑀼𑀲𑀸 𑀅𑀦𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄 𑀢𑀲𑁆𑀲𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬𑀸’’𑀢𑀺. 𑀥𑀫𑁆𑀫𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁. 𑀪𑀽𑀢𑀮𑀓𑁆𑀔𑀡𑀁 𑀪𑀸𑀯𑀲𑁆𑀲 𑀮𑀓𑁆𑀔𑀡𑀁 𑀤𑀻𑀧𑁂𑀦𑁆𑀢𑀻𑀢𑀺 𑀓𑀢𑁆𑀯𑀸.

𑀢𑁂𑀭𑀲𑀘𑁂𑀢𑀦𑀸𑀪𑁂𑀤𑀦𑁆𑀢𑀺 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀧𑀜𑁆𑀘𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀲𑁆𑀲 𑀧𑀼𑀦𑀦𑀢𑁄 𑀧𑀼𑀚𑁆𑀚𑀪𑀯𑀨𑀮𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁. 𑀓𑀫𑁆𑀫𑀧𑀼𑀜𑁆𑀜𑁂𑀦𑀸𑀢𑀺 𑀓𑀫𑁆𑀫𑀪𑀽𑀢𑁂𑀦. 𑀯𑀺𑀧𑀸𑀓𑀧𑀼𑀜𑁆𑀜𑁂𑀦𑀸𑀢𑀺 𑀯𑀺𑀧𑀸𑀓𑀲𑀗𑁆𑀔𑀸𑀢𑁂𑀦. 𑀧𑀼𑀜𑁆𑀜𑀨𑀮𑀫𑁆𑀧𑀺 𑀳𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀧𑀼𑀜𑁆𑀜’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. ‘‘𑀅𑀧𑀼𑀜𑁆𑀜𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀇𑀤𑀁 ‘‘𑀧𑀼𑀜𑁆𑀜𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀦 𑀉𑀤𑁆𑀥𑀢𑀁. 𑀅𑀧𑀼𑀜𑁆𑀜𑀨𑀮𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀅𑀧𑀼𑀜𑁆𑀜’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀔𑀸𑀭𑀦𑁆𑀢𑀺 𑀲𑀗𑁆𑀔𑀸𑀭𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀅𑀯𑀺𑀚𑁆𑀚𑀸𑀕𑀢𑁄𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀔𑀸𑀭𑀲𑁆𑀲 𑀧𑀘𑁆𑀘𑀬𑁄 𑀕𑀳𑀺𑀢𑁄, ‘‘𑀧𑀼𑀜𑁆𑀜𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀺𑀜𑁆𑀘 𑀕𑀳𑀺𑀢𑁂 𑀦𑀸𑀫𑀭𑀽𑀧𑀸𑀤𑀺 𑀲𑀩𑁆𑀩𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀤𑁆𑀯𑀸𑀤𑀲𑀧𑀤𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑁄 𑀕𑀳𑀺𑀢𑁄𑀯 𑀳𑁄𑀢𑀻’’𑀢𑀺.

𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦. 𑀢𑀲𑁆𑀲𑀸 𑀳𑀺 𑀉𑀧𑁆𑀧𑀸𑀤𑀸 𑀲𑀩𑁆𑀩𑀲𑁄 𑀅𑀯𑀺𑀚𑁆𑀚𑀸 𑀧𑀳𑀻𑀦𑀸 𑀳𑁄𑀢𑀺. 𑀧𑀞𑀫𑀫𑁂𑀯𑀸𑀢𑀺 𑀇𑀤𑀁 𑀅𑀯𑀺𑀚𑁆𑀚𑀸𑀧𑀳𑀸𑀦𑀯𑀺𑀚𑁆𑀚𑀼𑀧𑁆𑀧𑀸𑀤𑀸𑀦𑀁 𑀲𑀫𑀸𑀦𑀓𑀸𑀮𑀢𑀸𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺. 𑀧𑀤𑀻𑀧𑀼𑀚𑁆𑀚𑀮𑁂𑀦𑀸𑀢𑀺 𑀧𑀤𑀻𑀧𑀼𑀚𑁆𑀚𑀮𑀦𑀳𑁂𑀢𑀼𑀦𑀸 𑀲𑀳𑁂𑀯. 𑀯𑀺𑀚𑁆𑀚𑀼𑀧𑁆𑀧𑀸𑀤𑀸𑀢𑀺 𑀯𑀺𑀚𑁆𑀚𑀼𑀧𑁆𑀧𑀸𑀤𑀳𑁂𑀢𑀼, 𑀏𑀯𑀁 𑀲𑀢𑀻𑀧𑀺 𑀲𑀫𑀓𑀸𑀮𑀢𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀕𑀡𑁆𑀳𑀸𑀢𑀻𑀢𑀺 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀦 𑀕𑀡𑁆𑀳𑀸𑀢𑀺. 𑀦 𑀢𑀡𑁆𑀳𑀸𑀬𑀢𑀺 𑀦 𑀪𑀸𑀬𑀢𑀺 𑀢𑀡𑁆𑀳𑀸𑀯𑀼𑀢𑁆𑀢𑀺𑀦𑁄 𑀅𑀪𑀸𑀯𑀸, 𑀢𑀢𑁄 𑀏𑀯 𑀪𑀬𑀯𑀢𑁆𑀣𑀼𑀦𑁄 𑀘 𑀅𑀪𑀸𑀯𑀸.

𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀕𑀺𑀮𑀺𑀢𑁆𑀯𑀸 𑀯𑀺𑀬 𑀅𑀜𑁆𑀜𑀲𑁆𑀲 𑀅𑀯𑀺𑀲𑀬𑀁 𑀯𑀺𑀬 𑀓𑀭𑀡𑁂𑀦 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸. 𑀲𑀸𑀫𑀺𑀲𑀲𑀼𑀔𑀲𑁆𑀲 𑀅𑀦𑁂𑀓𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀪𑀸𑀯𑀢𑁄, 𑀲𑀼𑀔𑀸𑀪𑀺𑀦𑀦𑁆𑀤𑀲𑁆𑀲 𑀤𑀼𑀓𑁆𑀔𑀳𑁂𑀢𑀼𑀪𑀸𑀯𑀢𑁄 𑀘 𑀲𑀼𑀔𑀁 𑀅𑀪𑀺𑀦𑀦𑁆𑀤𑀦𑁆𑀢𑁄𑀬𑁂𑀯 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑀼𑀔𑀁 𑀇𑀘𑁆𑀙𑀦𑁆𑀢𑁄 𑀥𑀽𑀫𑀤𑀼𑀓𑁆𑀔𑀸𑀦𑀼𑀜𑁆𑀜𑀸𑀢𑁄 𑀯𑀺𑀬. 𑀤𑀼𑀓𑁆𑀔𑀁 𑀧𑀢𑁆𑀯𑀸 𑀲𑀼𑀔𑀁 𑀧𑀢𑁆𑀣𑀦𑀢𑁄𑀢𑀺 𑀏𑀢𑁆𑀣 𑀤𑀼𑀩𑁆𑀩𑀮𑀕𑀳𑀡𑀺𑀓𑀸𑀤𑀬𑁄 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀬𑀸𑀯 𑀲𑀸𑀬𑀦𑁆𑀳𑀲𑀫𑀬𑀸𑀧𑀺 𑀅𑀪𑀼𑀢𑁆𑀯𑀸 𑀲𑀸𑀬𑀫𑀸𑀲𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀚𑀺𑀖𑀘𑁆𑀙𑀸𑀤𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀪𑀼𑀜𑁆𑀚𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺. 𑀲𑀼𑀔𑀲𑁆𑀲 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑁄 𑀲𑀼𑀔𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀓𑁂𑀘𑀺 𑀧𑀦 𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑀢𑁄 𑀯𑀺𑀧𑀭𑀺𑀡𑀸𑀫𑀲𑀼𑀔𑀢𑁄 𑀢𑀁 𑀲𑀼𑀔𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀦, 𑀦 𑀳𑀺 𑀢𑀸𑀤𑀺𑀲𑀁 𑀲𑀼𑀔𑀦𑀺𑀫𑀺𑀢𑁆𑀢𑀁 𑀓𑁄𑀘𑀺 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀤𑀺𑀝𑁆𑀞𑁄, 𑀤𑀼𑀓𑁆𑀔𑀳𑁂𑀢𑀼𑀁 𑀧𑀦 𑀲𑀸𑀫𑀺𑀲𑀁 𑀲𑀼𑀔𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀤𑀺𑀝𑁆𑀞𑁄. 𑀤𑀼𑀓𑁆𑀔𑀳𑁂𑀢𑀼𑀁 𑀲𑀸𑀫𑀺𑀲𑀁 𑀲𑀼𑀔𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀅𑀢𑁆𑀣𑀢𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀓𑀸𑀬𑁄𑀢𑀺 𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑁄, 𑀲𑁄 𑀧𑀭𑀺𑀬𑀦𑁆𑀢𑁄 𑀅𑀯𑀲𑀸𑀦𑀁 𑀏𑀢𑀲𑁆𑀲𑀸𑀢𑀺 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁. 𑀢𑁂𑀦𑀸𑀳 ‘‘𑀬𑀸𑀯 𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑁄 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀯𑀢𑁆𑀢’’𑀦𑁆𑀢𑀺. 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀢𑁄 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀏𑀯 𑀲𑀺𑀤𑁆𑀥𑀫𑀢𑁆𑀣𑀁 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸 𑀧𑀞𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀫𑁂𑀯 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀲𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀬𑀸𑀯 𑀢𑁂𑀢𑁆𑀢𑀺𑀁𑀲𑀯𑀲𑁆𑀲𑀸𑀧𑀺 𑀧𑀞𑀫𑀯𑀬𑁄. 𑀧𑀡𑁆𑀡𑀸𑀲𑀯𑀲𑁆𑀲𑀓𑀸𑀮𑁂𑀢𑀺 𑀧𑀞𑀫𑀯𑀬𑀢𑁄 𑀬𑀸𑀯 𑀧𑀜𑁆𑀜𑀸𑀲𑀯𑀲𑁆𑀲𑀓𑀸𑀮𑀸, 𑀢𑀸𑀯 𑀞𑀺𑀢𑀸 𑀳𑁄𑀢𑀻𑀢𑀺 𑀯𑀼𑀟𑁆𑀠𑀺𑀳𑀸𑀦𑀺𑀬𑁄 𑀅𑀦𑀼𑀧𑀕𑀦𑁆𑀢𑁆𑀯𑀸 𑀲𑀭𑀽𑀧𑁂𑀦𑁂𑀯 𑀞𑀺𑀢𑀸 𑀳𑁄𑀢𑀺. 𑀫𑀦𑁆𑀤𑀸𑀢𑀺 𑀫𑀼𑀤𑀼𑀓𑀸 𑀅𑀢𑀺𑀔𑀺𑀡𑀸. 𑀢𑀤𑀸𑀢𑀺 𑀅𑀲𑀻𑀢𑀺𑀦𑀯𑀼𑀢𑀺𑀯𑀲𑁆𑀲𑀓𑀸𑀮𑁂. 𑀢𑀣𑀸 𑀘𑀺𑀭𑀧𑀭𑀺𑀯𑀺𑀢𑀓𑁆𑀓𑁂𑀧𑀺. 𑀪𑀕𑁆𑀕𑀸 𑀦𑀺𑀢𑁆𑀢𑁂𑀚𑀸 𑀪𑀕𑁆𑀕𑀯𑀺𑀪𑀕𑁆𑀕𑀸 𑀤𑀼𑀩𑁆𑀩𑀮𑀸. 𑀳𑀤𑀬𑀓𑁄𑀝𑀺𑀁𑀬𑁂𑀯𑀸𑀢𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀽𑀲𑀼 𑀅𑀯𑀢𑁆𑀢𑁂𑀢𑁆𑀯𑀸 𑀢𑁂𑀲𑀁 𑀔𑀻𑀡𑀢𑁆𑀢𑀸 𑀓𑁄𑀝𑀺𑀪𑀽𑀢𑀁 𑀳𑀤𑀬𑀯𑀢𑁆𑀣𑀼𑀁𑀬𑁂𑀯. 𑀬𑀸𑀯 𑀏𑀲𑀸 𑀯𑁂𑀤𑀦𑀸 𑀯𑀢𑁆𑀢𑀢𑀺.

𑀯𑀸𑀧𑀺𑀬𑀸𑀢𑀺 𑀫𑀳𑀸𑀢𑀴𑀸𑀓𑁂𑀦. 𑀧𑀜𑁆𑀘𑀉𑀤𑀓𑀫𑀕𑁆𑀕𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀜𑁆𑀘𑀳𑀺 𑀉𑀤𑀓𑀲𑁆𑀲 𑀧𑀯𑀺𑀲𑀦𑀦𑀺𑀓𑁆𑀔𑀫𑀦𑀫𑀕𑁆𑀕𑁂𑀳𑀺 𑀬𑀼𑀢𑁆𑀢𑀁. 𑀢𑀢𑁄 𑀢𑀢𑁄 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀲𑀩𑁆𑀩𑀲𑁄 𑀧𑀼𑀡𑁆𑀡𑀢𑁆𑀢𑀸.

𑀧𑀞𑀫𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀇𑀫𑀁 𑀯𑁂𑀤𑀦𑀁 𑀲𑀦𑁆𑀥𑀸𑀬𑀸𑀢𑀺 𑀇𑀫𑀁 𑀬𑀣𑀸𑀯𑀼𑀢𑁆𑀢𑀁 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀁 𑀲𑀦𑁆𑀥𑀸𑀬.

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀯𑀺𑀦𑀸𑀲𑀢𑁄. ‘‘𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸’’𑀢𑀺 𑀧𑀸𑀴𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀉𑀤𑁆𑀥𑀦𑁆𑀢𑀺 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄. 𑀧𑀭𑀮𑁄𑀓𑀯𑀲𑁂𑀦 𑀅𑀕𑀦𑁆𑀢𑁆𑀯𑀸. 𑀯𑁂𑀤𑀦𑀸𑀦𑀁 𑀲𑀻𑀢𑀺𑀪𑀸𑀯𑁄 𑀦𑀸𑀫 𑀲𑀗𑁆𑀔𑀸𑀭𑀤𑀭𑀣𑀧𑀭𑀺𑀴𑀸𑀳𑀪𑀸𑀯𑁄, 𑀲𑁄 𑀧𑀦𑀸𑀬𑀁 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀧𑀯𑀢𑁆𑀢𑀺…𑀧𑁂… 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀥𑀸𑀢𑀼𑀲𑀭𑀻𑀭𑀸𑀦𑀻𑀢𑀺 𑀅𑀝𑁆𑀞𑀺𑀓𑀗𑁆𑀓𑀮𑀲𑀗𑁆𑀔𑀸𑀢𑀥𑀸𑀢𑀼𑀲𑀭𑀻𑀭𑀸𑀦𑀺. 𑀲𑀭𑀻𑀭𑁂𑀓𑀤𑁂𑀲𑁂 𑀳𑀺 𑀲𑀭𑀻𑀭𑀲𑀫𑀜𑁆𑀜𑀸.

𑀓𑀼𑀫𑁆𑀪𑀓𑀸𑀭𑀧𑀸𑀓𑀸𑀢𑀺 𑀓𑀼𑀫𑁆𑀪𑀓𑀸𑀭𑀧𑀸𑀓𑀢𑁄. 𑀏𑀢𑁆𑀣 𑀧𑀘𑁆𑀘𑀢𑀻𑀢𑀺 𑀧𑀸𑀓𑁄, 𑀧𑀘𑀦𑀝𑁆𑀞𑀸𑀦𑀁. 𑀢𑀤𑁂𑀯 𑀧𑀸𑀘𑀦𑀯𑀲𑁂𑀦 𑀆𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀯𑀸𑀲𑁄, 𑀢𑀲𑁆𑀫𑀸 𑀓𑀼𑀫𑁆𑀪𑀓𑀸𑀭𑀸𑀯𑀸𑀲𑀢𑁄. 𑀅𑀯𑀺𑀕𑀢𑀯𑀽𑀧𑀲𑀫𑀁 𑀲𑀗𑁆𑀔𑀭𑀺𑀢𑀁 𑀓𑀼𑀫𑁆𑀪𑀁 𑀉𑀤𑁆𑀥𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑁄 𑀙𑀸𑀭𑀺𑀓𑀸𑀬 𑀲𑀢𑀺 𑀧𑀺𑀥𑀸𑀦𑀯𑀲𑁂𑀦 𑀞𑀧𑁂𑀢𑀺. 𑀢𑀣𑀸 𑀞𑀧𑀦𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀺𑀲𑁆𑀲𑁂𑀬𑁆𑀬𑀸’’𑀢𑀺. 𑀓𑀼𑀫𑁆𑀪𑀲𑁆𑀲 𑀧𑀤𑁂𑀲𑀪𑀽𑀢𑀢𑀸𑀬 𑀆𑀩𑀤𑁆𑀥𑀸 𑀅𑀯𑀬𑀯𑀸 ‘‘𑀓𑀼𑀫𑁆𑀪𑀓𑀧𑀸𑀮𑀸𑀦𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀦 𑀙𑀺𑀦𑁆𑀦𑀪𑀺𑀦𑁆𑀦𑀸𑀦𑀺. 𑀅𑀯𑀬𑀯𑀫𑀼𑀔𑁂𑀦 𑀳𑀺 𑀲𑀫𑀼𑀤𑀸𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀓𑀧𑀸𑀮𑀲𑀫𑀼𑀤𑀸𑀬𑁄 𑀳𑀺 𑀖𑀝𑁄. 𑀢𑁂𑀦𑀸𑀳 ‘‘𑀫𑀼𑀔𑀯𑀝𑁆𑀝𑀺𑀬𑀸 𑀏𑀓𑀩𑀤𑁆𑀥𑀸𑀦𑀻’’𑀢𑀺. 𑀅𑀯𑀲𑀺𑀲𑁆𑀲𑁂𑀬𑁆𑀬𑀼𑀦𑁆𑀢𑀺 𑀯𑀡𑁆𑀡𑀯𑀺𑀲𑁂𑀲𑀉𑀡𑁆𑀳𑀪𑀸𑀯𑀸𑀧𑀕𑀢𑀸 𑀖𑀝𑀓𑀸𑀭𑀸𑀦𑁂𑀯 𑀢𑀺𑀝𑁆𑀞𑁂𑀬𑁆𑀬𑀼𑀦𑁆𑀢𑀺. 𑀆𑀤𑀺𑀢𑁆𑀢…𑀧𑁂… 𑀢𑀬𑁄 𑀪𑀯𑀸 𑀤𑀝𑁆𑀞𑀩𑁆𑀩𑀸 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀪𑀸𑀯𑀢𑁄. 𑀬𑀣𑀸 𑀓𑀼𑀫𑁆𑀪𑀓𑀸𑀭𑁄 𑀓𑀼𑀫𑁆𑀪𑀓𑀸𑀭𑀸𑀯𑀸𑀲𑀁 𑀆𑀤𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀏𑀯𑀁 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄𑀧𑁂𑀲 𑀪𑀯𑀢𑁆𑀢𑀬𑀁 𑀭𑀸𑀕𑀸𑀤𑀻𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀼𑀫𑁆𑀪𑀓𑀸𑀭𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄’’𑀢𑀺. 𑀦𑀻𑀳𑀭𑀡𑀤𑀡𑁆𑀟𑀓𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀪𑀯𑀢𑁆𑀢𑀬𑀧𑀸𑀓𑀢𑁄 𑀦𑀻𑀳𑀭𑀡𑀢𑁄. 𑀲𑀫𑁄 𑀪𑀽𑀫𑀺𑀪𑀸𑀕𑁄 𑀯𑀺𑀬 𑀦𑀺𑀩𑁆𑀩𑀸𑀦𑀢𑀮𑀁 𑀲𑀩𑁆𑀩𑀯𑀺𑀲𑀫𑀸 𑀦𑀺𑀯𑀢𑁆𑀢𑀦𑀢𑁄.

‘‘𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀢𑁄, 𑀯𑀬𑁄𑀯𑀼𑀤𑁆𑀥𑀢𑁆𑀣𑀗𑁆𑀕𑀫𑀢𑁄, 𑀆𑀳𑀸𑀭𑀫𑀬𑀢𑁄, 𑀉𑀢𑀼𑀫𑀬𑀢𑁄, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁄, 𑀓𑀫𑁆𑀫𑀚𑀢𑁄, 𑀥𑀫𑁆𑀫𑀢𑀸𑀭𑀽𑀧𑀢𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁦𑁬) 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀲𑀫𑁆𑀫𑀲𑀦𑁆𑀢𑁄 𑀭𑀽𑀧𑀲𑀢𑁆𑀢𑀓𑀁 𑀯𑀺𑀧𑀲𑁆𑀲𑀢𑀺 𑀦𑀸𑀫. ‘‘𑀓𑀮𑀸𑀧𑀢𑁄, 𑀬𑀫𑀓𑀢𑁄, 𑀔𑀡𑀺𑀓𑀢𑁄, 𑀧𑀝𑀺𑀧𑀸𑀝𑀺𑀢𑁄, 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀢𑁄, 𑀫𑀸𑀦𑀲𑀫𑀼𑀕𑁆𑀖𑀸𑀝𑀢𑁄, 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁧𑁭) 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀲𑀫𑁆𑀫𑀲𑀦𑁆𑀢𑁄 𑀅𑀭𑀽𑀧𑀲𑀢𑁆𑀢𑀓𑀁 𑀯𑀺𑀧𑀲𑁆𑀲𑀢𑀺 𑀦𑀸𑀫, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀁 𑀇𑀫𑀁 𑀭𑀽𑀧𑀲𑀢𑁆𑀢𑀓𑀁 𑀅𑀭𑀽𑀧𑀲𑀢𑁆𑀢𑀓𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑀲𑁆𑀲. 𑀬𑀤𑀺𑀧𑀺 𑀅𑀭𑀳𑀢𑁄 𑀅𑀢𑁆𑀢𑀪𑀸𑀯𑁄 𑀲𑀩𑁆𑀩𑀪𑀯𑁂𑀳𑀺𑀧𑀺 𑀉𑀤𑁆𑀥𑀝𑁄, 𑀬𑀸𑀯 𑀧𑀦 𑀅𑀦𑀼𑀧𑀸𑀤𑀺𑀲𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀢𑀲𑁆𑀫𑀺𑀫𑁆𑀧𑀺 𑀲𑀼𑀕𑀢𑀺𑀪𑀯𑁂 𑀞𑀺𑀢𑁄𑀬𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀩𑁆𑀪𑀢𑀻𑀢𑀺 ‘‘𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀅𑀢𑁆𑀢𑀪𑀸𑀯𑀁 𑀉𑀤𑁆𑀥𑀭𑀺𑀢𑁆𑀯𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀔𑀻𑀡𑀸𑀲𑀯𑁄 𑀧𑀦𑀸’’𑀢𑀺𑀆𑀤𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀯𑀝𑁆𑀝𑀯𑀽𑀧𑀲𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀦 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀲𑀉𑀧𑀸𑀤𑀺𑀲𑁂𑀲𑀸𑀬 𑀧𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑁂𑀯. 𑀅𑀪𑀺𑀲𑀗𑁆𑀔𑀸𑀭𑀳𑁂𑀢𑀼𑀢𑁄 𑀳𑁂𑀢𑁆𑀣 𑀧𑀭𑀺𑀴𑀸𑀳𑀯𑀽𑀧𑀲𑀫𑀲𑁆𑀲 𑀉𑀧𑀲𑀫𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀉𑀡𑁆𑀳𑀓𑀼𑀫𑁆𑀪𑀦𑀺𑀩𑁆𑀩𑀸𑀦𑀦𑀺𑀤𑀲𑁆𑀲𑀦𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀸𑀦𑀻𑀢𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀓𑀮𑀸𑀧𑁂 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀇𑀤𑀁 𑀧𑀦 𑀯𑀘𑀦𑀁. 𑀅𑀦𑀼𑀬𑁄𑀕𑀸𑀭𑁄𑀧𑀦𑀢𑁆𑀣𑀦𑁆𑀢𑀺 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 𑀔𑀻𑀡𑀸𑀲𑀯𑁄 𑀅𑀧𑀺 𑀦𑀼 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀢𑀺 𑀧𑀜𑁆𑀳𑀁 𑀓𑀸𑀢𑀼𑀁. 𑀅𑀣 𑀯𑀸 𑀅𑀦𑀼𑀬𑁄𑀕𑀸𑀭𑁄𑀧𑀦𑀢𑁆𑀣𑀦𑁆𑀢𑀺 ‘‘𑀅𑀧𑀺 𑀦𑀼 𑀔𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀅𑀪𑀺𑀲𑀗𑁆𑀔𑀭𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀬𑁄𑀕𑀁 𑀆𑀭𑁄𑀧𑁂𑀢𑀼𑀁 𑀯𑀼𑀢𑁆𑀢𑀁, 𑀦 𑀢𑀸𑀯 𑀬𑀣𑀸𑀭𑀤𑁆𑀥𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂 𑀲𑀺𑀤𑁆𑀥𑁂 𑀢𑀲𑁆𑀫𑀺𑀁 𑀪𑀯𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀺𑀬𑀸 𑀲𑀫𑁆𑀪𑀯𑁄, 𑀦𑀸𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀜𑁆𑀜𑀸𑀡𑀁 𑀧𑀜𑁆𑀜𑀸𑀬𑁂𑀣𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺. 𑀲𑀩𑁆𑀩𑀲𑁄 𑀲𑀗𑁆𑀔𑀸𑀭𑁂𑀲𑀼 𑀅𑀲𑀦𑁆𑀢𑁂𑀲𑀼 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀅𑀧𑀺 𑀦𑀼 𑀔𑁄 𑀧𑀜𑁆𑀜𑀸𑀬𑁂𑀬𑁆𑀬. 𑀢𑀲𑁆𑀫𑀺𑀜𑁆𑀳𑀺 𑀅𑀧𑀜𑁆𑀜𑀸𑀬𑀫𑀸𑀦𑁂 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀣𑁂𑀭𑀸𑀦𑀦𑁆𑀢𑀺 ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀮𑀧𑀺𑀢𑀢𑁆𑀣𑁂𑀭𑀸𑀦𑀁. 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀢𑀺 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀁𑀲𑀦𑁆𑀤𑀦𑀢𑁄. 𑀅𑀧𑁆𑀧𑀜𑁆𑀜𑀸𑀡𑀦𑁆𑀢𑀺 𑀅𑀧𑁆𑀧𑀜𑁆𑀜𑀸𑀬𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀜𑁆𑀜𑀸𑀡𑁂 𑀅𑀲𑀢𑀺 𑀦𑀸𑀫𑀭𑀽𑀧𑀲𑁆𑀲 𑀅𑀧𑁆𑀧𑀜𑁆𑀜𑀸𑀡𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀦𑁆𑀢𑀺 𑀲𑀤𑁆𑀤𑀳𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀲𑀦𑁆𑀦𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀁. 𑀅𑀥𑀺𑀫𑁄𑀓𑁆𑀔𑀦𑁆𑀢𑀺 𑀦𑀺𑀘𑁆𑀙𑀬𑀸𑀓𑀸𑀭𑀯𑀺𑀫𑁄𑀓𑁆𑀔𑀁 𑀲𑀤𑁆𑀥𑀸𑀯𑀺𑀫𑁄𑀓𑁆𑀔𑀜𑁆𑀘. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘‘𑀲𑀤𑁆𑀤𑀳𑀣 𑀫𑁂𑀢𑀁, 𑀪𑀺𑀓𑁆𑀔𑀯𑁂’’𑀢𑀺. 𑀲𑀤𑁆𑀥𑀸𑀲𑀳𑀺𑀢𑀜𑁆𑀳𑀺 𑀦𑀺𑀘𑁆𑀙𑀬𑀸𑀓𑀸𑀭𑀯𑀺𑀫𑁄𑀓𑁆𑀔𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀦𑁆𑀦𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀅𑀥𑀺𑀫𑁄𑀓𑁆𑀔’’𑀦𑁆𑀢𑀺. 𑀅𑀦𑁆𑀢𑁄𑀢𑀺 𑀧𑀭𑀺𑀬𑀦𑁆𑀢𑁄. 𑀧𑀭𑀺𑀢𑁄 𑀙𑀺𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀧𑀭𑀺𑀘𑁆𑀙𑁂𑀤𑁄.

𑀧𑀭𑀺𑀯𑀻𑀫𑀁𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀧𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀆𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀲𑀁𑀯𑀢𑁆𑀢𑀦𑀢𑁄 𑀉𑀧𑀸𑀤𑀸𑀦𑀸𑀦𑀁 𑀳𑀺𑀢𑀸𑀦𑀺 𑀉𑀧𑀸𑀤𑀸𑀦𑀺𑀬𑀸𑀦𑀺, 𑀢𑁂𑀲𑀼 𑀉𑀧𑀸𑀤𑀸𑀦𑀺𑀬𑁂𑀲𑀼. 𑀢𑁂𑀦𑀸𑀳 ‘‘𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀧𑀘𑁆𑀘𑀬𑁂𑀲𑀽’’𑀢𑀺. 𑀅𑀲𑁆𑀲𑀸𑀤𑀁 𑀅𑀦𑀼𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀅𑀲𑀸𑀤𑁂𑀢𑀩𑁆𑀩𑀁 𑀫𑀺𑀘𑁆𑀙𑀸𑀜𑀸𑀡𑁂𑀦 𑀅𑀦𑀼𑀧𑀲𑁆𑀲𑀢𑁄. 𑀢𑀤𑀸𑀳𑀸𑀭𑁄𑀢𑀺 𑀲𑁄𑀴𑀲 𑀯𑀸 𑀯𑀻𑀲𑀁 𑀢𑀺𑀁𑀲𑀁 𑀘𑀢𑁆𑀢𑀸𑀮𑀻𑀲𑀁 𑀧𑀜𑁆𑀜𑀸𑀲𑀁 𑀯𑀸 𑀆𑀳𑀸𑀭𑁄 𑀧𑀘𑁆𑀘𑀬𑁄 𑀏𑀢𑀲𑁆𑀲𑀸𑀢𑀺 𑀢𑀤𑀸𑀳𑀸𑀭𑁄. 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀢𑀬𑁄 𑀪𑀯𑀸 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀪𑀸𑀯𑀢𑁄 𑀏𑀢𑀤𑁂𑀯 𑀪𑀯𑀢𑁆𑀢𑀬𑀁. 𑀅𑀕𑁆𑀕𑀺…𑀧𑁂… 𑀧𑀼𑀣𑀼𑀚𑁆𑀚𑀦𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑀲𑀤𑀺𑀲𑀲𑁆𑀲 𑀪𑀯𑀢𑁆𑀢𑀬𑀲𑁆𑀲 𑀧𑀭𑀺𑀩𑀦𑁆𑀥𑀦𑀢𑁄.

𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀲𑁆𑀲. 𑀢𑁂𑀦𑀸𑀳 ‘‘𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀽’’𑀢𑀺. 𑀥𑀫𑁆𑀫𑀧𑀸𑀲𑀸𑀤𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀧𑀸𑀲𑀸𑀤𑀁. 𑀲𑁄 𑀳𑀺 𑀅𑀘𑁆𑀘𑀼𑀕𑁆𑀕𑀢𑀝𑁆𑀞𑁂𑀦 ‘‘𑀧𑀸𑀲𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀢𑀺𑀧𑀝𑁆𑀞𑀸𑀦𑀫𑀳𑀸𑀯𑀻𑀣𑀺𑀬𑀁 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀸𑀬𑀸𑀢𑀺.

𑀉𑀧𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀲𑀁𑀬𑁄𑀚𑀦𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁫𑁩-𑁫𑁪. 𑀫𑀳𑀦𑁆𑀢𑀯𑀝𑁆𑀝𑀧𑁆𑀧𑀩𑀦𑁆𑀥𑀑𑀧𑀫𑁆𑀫𑀪𑀸𑀯𑁂𑀦 𑀢𑁂𑀮𑀧𑀤𑀻𑀧𑀲𑁆𑀲 𑀆𑀳𑀢𑀢𑁆𑀢𑀸 ‘‘𑀫𑀳𑀦𑁆𑀢𑀜𑁆𑀘 𑀯𑀝𑁆𑀝𑀺𑀓𑀧𑀸𑀮𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀉𑀧𑀸𑀤𑀸𑀦𑀺𑀬𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀢𑀣𑀸 𑀯𑀺𑀦𑁂𑀢𑀩𑁆𑀩𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀳𑀺 𑀇𑀫𑁂𑀲𑀁 𑀲𑀼𑀢𑁆𑀢𑀸𑀦𑀁 𑀏𑀯𑀁 𑀯𑀘𑀦𑀁 𑀏𑀯𑀁 𑀤𑁂𑀲𑀦𑀸. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺.

𑀲𑀁𑀬𑁄𑀚𑀦𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀫𑀳𑀸𑀭𑀼𑀓𑁆𑀔𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁫𑁫-𑁫𑁬. 𑀑𑀚𑀁 𑀅𑀪𑀺𑀳𑀭𑀦𑁆𑀢𑀻𑀢𑀺 𑀭𑀲𑀳𑀭𑀡𑀺𑀬𑁄 𑀯𑀺𑀬 𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑁂 𑀭𑀼𑀓𑁆𑀔𑀫𑀽𑀮𑀸𑀦𑀺 𑀭𑀼𑀓𑁆𑀔𑀲𑁆𑀲 𑀧𑀣𑀯𑀻𑀆𑀧𑁄𑀭𑀲𑁂 𑀉𑀧𑀭𑀺 𑀆𑀭𑁄𑀧𑁂𑀦𑁆𑀢𑀺. 𑀢𑁂𑀲𑀁 𑀢𑀣𑀸 𑀆𑀭𑁄𑀧𑀦𑀁 ‘‘𑀑𑀚𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀺. 𑀳𑀢𑁆𑀣𑀲𑀢𑀼𑀩𑁆𑀩𑁂𑀥𑀫𑀲𑁆𑀲𑀸𑀢𑀺 𑀳𑀢𑁆𑀣𑀲𑀢𑀼𑀩𑁆𑀩𑁂𑀥𑁄, 𑀳𑀢𑁆𑀣𑀲𑀢𑀁 𑀉𑀩𑁆𑀩𑀺𑀤𑁆𑀥𑀲𑁆𑀲𑀧𑀺. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀯𑀝𑁆𑀝𑀓𑀣𑀸𑀬𑀁. 𑀓𑀫𑁆𑀫𑀸𑀭𑁄𑀳𑀦𑀦𑁆𑀢𑀺 𑀓𑀫𑁆𑀫𑀧𑀘𑁆𑀘𑀬𑁄.

𑀧𑀼𑀦 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀯𑀺𑀯𑀝𑁆𑀝𑀓𑀣𑀸𑀬𑀁. 𑀯𑀝𑁆𑀝𑀤𑀼𑀓𑁆𑀔𑀁 𑀦𑀸𑀲𑁂𑀢𑀼𑀓𑀸𑀫𑀲𑁆𑀲 𑀤𑀴𑁆𑀳𑀁 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀓𑀼𑀤𑁆𑀤𑀸𑀮𑁄 𑀯𑀺𑀬𑀸’’𑀢𑀺 𑀆𑀳. 𑀢𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑀜𑀸𑀡𑀁 𑀲𑀫𑀸𑀥𑀺𑀧𑀘𑁆𑀙𑀺𑀬𑀸 𑀞𑀺𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑀜𑀸𑀡𑀁. 𑀭𑀼𑀓𑁆𑀔𑀘𑁆𑀙𑁂𑀤𑀦𑀨𑀭𑀲𑀼 𑀯𑀺𑀬𑀸𑀢𑀺 𑀏𑀯𑀁𑀪𑀽𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀏𑀓𑀦𑁆𑀢𑀢𑁄 𑀯𑀝𑁆𑀝𑀘𑁆𑀙𑁂𑀤𑀸𑀬 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀭𑀼𑀓𑁆𑀔𑀲𑁆𑀲…𑀧𑁂… 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀧𑀜𑁆𑀜𑀸’’𑀢𑀺. 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁. 𑀢𑀁 𑀘𑀢𑀼𑀩𑁆𑀩𑀺𑀥𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑀻𑀲𑀢𑀺 𑀧𑀣𑀯𑀻𑀓𑁄𑀝𑁆𑀞𑀸𑀲𑀸, 𑀤𑁆𑀯𑀸𑀤𑀲 𑀆𑀧𑁄𑀓𑁄𑀝𑁆𑀞𑀸𑀲𑀸, 𑀘𑀢𑁆𑀢𑀸𑀭𑁄 𑀢𑁂𑀚𑁄𑀓𑁄𑀝𑁆𑀞𑀸𑀲𑀸, 𑀙 𑀯𑀸𑀬𑁄𑀓𑁄𑀝𑁆𑀞𑀸𑀲𑀸𑀢𑀺 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀸𑀬 𑀓𑁄𑀝𑁆𑀞𑀸𑀲𑁂𑀲𑀼. 𑀯𑀺𑀜𑁆𑀜𑀸𑀡𑀲𑁆𑀲 𑀘𑀸𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀧𑀓𑀸𑀭𑀢𑁆𑀣𑁄 𑀘. 𑀢𑁂𑀦 𑀪𑀽𑀢𑀭𑀽𑀧𑀸𑀦𑀺 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀢𑁆𑀢𑀲𑀼 𑀲𑀧𑁆𑀧𑀸𑀬𑁂𑀲𑀼 𑀬𑀲𑁆𑀲 𑀅𑀮𑀪𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀦 𑀉𑀧𑀝𑁆𑀞𑀸𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀜𑁆𑀜𑀢𑀭𑀁 𑀲𑀧𑁆𑀧𑀸𑀬’’𑀦𑁆𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀭𑀼𑀓𑁆𑀔𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀭𑀼𑀡𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭-𑁫𑁯. 𑀧𑀮𑀺𑀫𑀚𑁆𑀚𑁂𑀬𑁆𑀬𑀸𑀢𑀺 𑀅𑀮𑁆𑀮𑀓𑀭𑀡𑀯𑀲𑁂𑀦 𑀧𑀭𑀺𑀢𑁄 𑀧𑀸𑀴𑀺𑀁 𑀩𑀦𑁆𑀥𑁂𑀬𑁆𑀬. 𑀢𑀣𑀸 𑀓𑀭𑁄𑀦𑁆𑀢𑁄 𑀬𑀲𑁆𑀫𑀸 𑀘 𑀢𑀢𑁆𑀣 𑀢𑀺𑀡𑀕𑀘𑁆𑀙𑀸𑀤𑀻𑀦𑀁 𑀫𑀽𑀮𑀲𑀦𑁆𑀢𑀸𑀦𑀕𑁆𑀕𑀳𑀡𑁂𑀦 𑀢𑀁 𑀞𑀸𑀦𑀁 𑀲𑁄𑀥𑁂𑀢𑀺 𑀦𑀸𑀫, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑁄𑀥𑁂𑀬𑁆𑀬𑀸’’𑀢𑀺. 𑀧𑀁𑀲𑀼𑀦𑁆𑀢𑀺 𑀅𑀲𑁆𑀲 𑀧𑀯𑀟𑁆𑀠𑀓𑀸𑀭𑀓𑀁, 𑀆𑀕𑀦𑁆𑀢𑀼𑀓𑀁 𑀧𑀁𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀤𑀤𑁂𑀬𑁆𑀬𑀸𑀢𑀺 𑀧𑀓𑁆𑀔𑀺𑀧𑁂𑀬𑁆𑀬. 𑀢𑁂𑀦𑀸𑀳 ‘‘𑀣𑀤𑁆𑀥’’𑀦𑁆𑀢𑀺𑀆𑀤𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀭𑀼𑀓𑁆𑀔𑀁 𑀦𑀸𑀲𑁂𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀬𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦. 𑀅𑀝𑁆𑀞𑀫𑀦𑀯𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀢𑀭𑀼𑀡𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀩𑀳𑀼𑀯𑀘𑀦𑀯𑀲𑁂𑀦𑀸𑀢𑀺 𑀓𑀼𑀭𑀽 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀯𑀲𑁂𑀦 ‘‘𑀓𑀼𑀭𑀽’’𑀢𑀺 𑀏𑀯𑀁 𑀩𑀳𑀼𑀯𑀘𑀦𑀯𑀲𑁂𑀦. 𑀬𑀢𑁆𑀣 𑀪𑀕𑀯𑀢𑁄 𑀯𑀲𑀦𑁄𑀓𑀸𑀲𑀪𑀽𑀢𑁄 𑀓𑁄𑀘𑀺 𑀯𑀺𑀳𑀸𑀭𑁄 𑀦 𑀳𑁄𑀢𑀺, 𑀢𑀢𑁆𑀣 𑀓𑁂𑀯𑀮𑀁 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀁 𑀦𑀺𑀤𑀸𑀦𑀓𑀣𑀸𑀬 𑀧𑀓𑀢𑀺 𑀬𑀣𑀸 ‘‘𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀤𑁂𑀯𑀤𑀳𑀁 𑀦𑀸𑀫 𑀲𑀓𑁆𑀬𑀸𑀦𑀁 𑀦𑀺𑀕𑀫𑁄’’𑀢𑀺. ‘‘𑀆𑀬𑀲𑁆𑀫𑀸’’𑀢𑀺 𑀯𑀸 ‘‘𑀤𑁂𑀯𑀸𑀦𑀁 𑀧𑀺𑀬𑁄’’𑀢𑀺 𑀯𑀸 𑀪𑀯𑀦𑁆𑀢𑀺 𑀯𑀸 𑀧𑀺𑀬𑀲𑀫𑀼𑀤𑀸𑀳𑀸𑀭𑁄 𑀏𑀲𑁄𑀢𑀺 𑀆𑀳 ‘‘𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢’’𑀦𑁆𑀢𑀺. 𑀢𑀬𑀺𑀤𑀁 𑀧𑀺𑀬𑀯𑀘𑀦𑀁 𑀕𑀸𑀭𑀯𑀯𑀲𑁂𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑀭𑀼𑀯𑀘𑀦𑀫𑁂𑀢’’𑀦𑁆𑀢𑀺. 𑀅𑀢𑀺𑀤𑀽𑀭𑀁 𑀅𑀘𑁆𑀘𑀸𑀲𑀦𑁆𑀦𑀁 𑀅𑀢𑀺𑀲𑀫𑁆𑀫𑀼𑀔𑀸 𑀅𑀢𑀺𑀧𑀘𑁆𑀙𑀢𑁄 𑀉𑀧𑀭𑀺𑀯𑀸𑀢𑁄 𑀉𑀦𑁆𑀦𑀢𑀧𑁆𑀧𑀤𑁂𑀲𑁄𑀢𑀺 𑀇𑀫𑁂 𑀙 𑀦𑀺𑀲𑀚𑁆𑀚𑀤𑁄𑀲𑀸. 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀯𑀲𑁂𑀦 𑀙𑀩𑁆𑀩𑀡𑁆𑀡𑀸𑀦𑀁.

𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬𑀸𑀢𑀺 𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀯𑀲𑁂𑀦 𑀓𑀼𑀮𑀸𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀸𑀬. 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀪𑀺𑀓𑁆𑀔𑀸𑀧𑀝𑀺𑀕𑁆𑀕𑀡𑁆𑀳𑀦𑁂𑀦 𑀢𑁂𑀲𑀁 𑀅𑀪𑀺𑀯𑀸𑀤𑀦𑀸𑀤𑀺𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀘 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑁆𑀲 𑀚𑀦𑀦𑁂𑀦. 𑀧𑀝𑀺𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀧𑀼𑀦 𑀲𑀫𑁆𑀫𑀚𑁆𑀚𑀺𑀢𑁆𑀯𑀸. 𑀉𑀪𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀦𑁆𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑁂𑀤𑀦𑀁, 𑀚𑀭𑀸𑀫𑀭𑀡𑀢𑁄 𑀧𑀝𑁆𑀞𑀸𑀬 𑀘 𑀯𑁂𑀤𑀦𑀁 𑀧𑀸𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑀫𑀸𑀳. 𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀘𑀢𑀼𑀭𑀸𑀓𑀸𑀭𑀼𑀧𑀲𑀁𑀳𑀺𑀢𑁂 𑀢𑀬𑁄 𑀯𑀸𑀭𑁂. 𑀢𑁂𑀦 𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀁 𑀲𑀫𑁆𑀫𑀲𑀦𑀫𑀸𑀳. 𑀅𑀫𑁆𑀳𑀸𑀓𑀁 𑀪𑀕𑀯𑀢𑀸 𑀕𑀫𑁆𑀪𑀻𑀭𑀪𑀸𑀯𑁂𑀦𑁂𑀯 𑀓𑀣𑀺𑀢𑀢𑁆𑀢𑀸 𑀲𑁂𑀲𑀩𑀼𑀤𑁆𑀥𑁂𑀳𑀺𑀧𑀺 𑀏𑀯𑀫𑁂𑀯 𑀓𑀣𑀺𑀢𑁄𑀢𑀺 𑀥𑀫𑁆𑀫𑀦𑁆𑀯𑀬𑁂 𑀞𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀩𑀼𑀤𑁆𑀥𑁂𑀳𑀺…𑀧𑁂… 𑀓𑀣𑀺𑀢𑁄’’𑀢𑀺.

𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀢𑀺 𑀅𑀧𑀭𑀺𑀫𑀸𑀡𑀢𑁆𑀣𑁂 ‘‘𑀬𑀸𑀯𑀜𑁆𑀘𑀺𑀤𑀁 𑀢𑁂𑀦 𑀪𑀕𑀯𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁩) 𑀯𑀺𑀬. 𑀅𑀢𑀺𑀭𑁂𑀓𑀪𑀸𑀯𑀚𑁄𑀢𑀦𑁄 𑀳𑀺 𑀬𑀁 𑀬𑀸𑀯-𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀅𑀢𑀺𑀕𑀫𑁆𑀪𑀻𑀭𑁄𑀢𑀺 𑀅𑀢𑁆𑀣𑁄’’𑀢𑀺. 𑀅𑀯𑀪𑀸𑀲𑀢𑀺 𑀔𑀸𑀬𑀢𑀺 𑀉𑀧𑀝𑁆𑀞𑀸𑀢𑀺 𑀜𑀸𑀡𑀲𑁆𑀲. 𑀢𑀣𑀸 𑀉𑀧𑀝𑁆𑀞𑀸𑀦𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀏𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀏𑀓𑀦𑁆𑀢𑀕𑀫𑁆𑀪𑀻𑀭𑁄𑀯, 𑀅𑀣 𑀓𑀲𑁆𑀫𑀸 𑀕𑀫𑁆𑀪𑀻𑀭𑀸𑀯𑀪𑀸𑀲𑀢𑀸 𑀚𑁄𑀢𑀺𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀏𑀓𑀦𑁆𑀢𑀕𑀫𑁆𑀪𑀻𑀭𑀢𑀸𑀤𑀲𑁆𑀲𑀦𑀢𑁆𑀣𑀫𑁂𑀯 𑀧𑀦𑀲𑁆𑀲 𑀕𑀫𑁆𑀪𑀻𑀭𑀸𑀯𑀪𑀸𑀲𑀕𑁆𑀕𑀳𑀡𑀁, 𑀢𑀲𑁆𑀫𑀸 𑀅𑀜𑁆𑀜𑀢𑁆𑀣 𑀮𑀩𑁆𑀪𑀫𑀸𑀦𑀁 𑀘𑀸𑀢𑀼𑀓𑁄𑀝𑀺𑀓𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀦𑀺𑀤𑀲𑁆𑀲𑁂𑀢𑁆𑀯𑀸 𑀢𑀫𑁂𑀯𑀲𑁆𑀲 𑀏𑀓𑀦𑁆𑀢𑀕𑀫𑁆𑀪𑀻𑀭𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀓𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑀁 𑀦𑀢𑁆𑀣𑀻𑀢𑀺 𑀅𑀕𑀫𑁆𑀪𑀻𑀭𑁄 𑀅𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸𑀢𑀺 𑀏𑀢𑀁 𑀤𑁆𑀯𑀬𑀁 𑀦𑀢𑁆𑀣𑀺. 𑀢𑁂𑀦 𑀬𑀣𑀸𑀤𑀲𑁆𑀲𑀺𑀢𑁂 𑀘𑀸𑀢𑀼𑀓𑁄𑀝𑀺𑀓𑁂 𑀧𑀘𑁆𑀙𑀺𑀫𑀸 𑀏𑀓𑀓𑁄𑀝𑀺 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺.

𑀬𑁂𑀳𑀺 𑀕𑀫𑁆𑀪𑀻𑀭𑀪𑀸𑀯𑁂𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 ‘‘𑀕𑀫𑁆𑀪𑀻𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑁄 ‘‘𑀪𑀯𑀕𑁆𑀕𑀕𑁆𑀕𑀳𑀡𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀪𑀯𑀕𑁆𑀕𑀕𑁆𑀕𑀳𑀡𑀢𑁆𑀣𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸 𑀤𑀽𑀭𑀪𑀸𑀯𑀢𑁄, 𑀏𑀯𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀢𑁆𑀣𑁄 𑀧𑀓𑀢𑀺𑀜𑀸𑀡𑁂𑀦 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸. 𑀬𑀣𑀸 𑀲𑀺𑀦𑁂𑀭𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀺𑀜𑁆𑀚𑀁 𑀧𑀩𑁆𑀩𑀢𑀭𑀲𑀁 𑀧𑀸𑀓𑀢𑀺𑀓𑀧𑀼𑀭𑀺𑀲𑁂𑀦 𑀦𑀻𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀕𑀢𑁂 𑀥𑀫𑁆𑀫𑀢𑁆𑀣𑀸𑀤𑀺𑀓𑁂 𑀧𑀓𑀢𑀺𑀜𑀸𑀡𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀪𑀚𑁆𑀚 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸. 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑀢𑀺𑀧𑀼𑀭𑀺𑀲𑀲𑁆𑀲 𑀩𑀸𑀳𑀼𑀤𑁆𑀯𑀬𑀯𑀲𑁂𑀦 𑀧𑀸𑀭𑀁 𑀢𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀏𑀯𑀁 𑀯𑁂𑀧𑀼𑀮𑁆𑀮𑀝𑁆𑀞𑁂𑀦 𑀫𑀳𑀸𑀲𑀫𑀼𑀤𑁆𑀤𑀲𑀤𑀺𑀲𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀓𑀢𑀺𑀜𑀸𑀡𑁂𑀦 𑀤𑁂𑀲𑀦𑀸𑀯𑀲𑁂𑀦 𑀧𑀭𑀺𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀬𑀣𑀸 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀸𑀓𑀢𑀺𑀓𑀧𑀼𑀭𑀺𑀲𑀲𑁆𑀲 𑀧𑀣𑀯𑁄𑀚𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀇𑀢𑁆𑀣𑀁 𑀅𑀯𑀺𑀚𑁆𑀚𑀸𑀤𑀬𑁄 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀪𑀸𑀯𑁄 𑀧𑀸𑀓𑀢𑀺𑀓𑀜𑀸𑀡𑁂𑀦 𑀦𑀻𑀳𑀭𑀺𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀘𑀢𑀼𑀩𑁆𑀩𑀺𑀥𑀕𑀫𑁆𑀪𑀻𑀭𑀢𑀸𑀯𑀲𑁂𑀦 𑀘𑀢𑀲𑁆𑀲𑁄 𑀉𑀧𑀫𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀸𑀓𑀢𑀺𑀓𑀜𑀸𑀡𑀯𑀲𑁂𑀦 𑀘𑀸𑀬𑀫𑀢𑁆𑀣𑀬𑁄𑀚𑀦𑀸 𑀓𑀢𑀸 𑀤𑀺𑀝𑁆𑀞𑀲𑀘𑁆𑀘𑀸𑀦𑀁 𑀢𑀢𑁆𑀣 𑀧𑀝𑀺𑀯𑁂𑀥𑀲𑀩𑁆𑀪𑀸𑀯𑀢𑁄, 𑀢𑀣𑀸𑀧𑀺 𑀬𑀲𑁆𑀫𑀸 𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀢𑀢𑁆𑀣 𑀲𑀧𑁆𑀧𑀤𑁂𑀲𑀫𑁂𑀯 𑀜𑀸𑀡𑀁, 𑀩𑀼𑀤𑁆𑀥𑀸𑀦𑀁𑀬𑁂𑀯 𑀦𑀺𑀧𑁆𑀧𑀤𑁂𑀲𑀁. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀯𑀺𑀲𑀬𑀁 𑀧𑀜𑁆𑀳’’𑀦𑁆𑀢𑀺.

𑀫𑀸𑀢𑀺 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑁄. 𑀲𑁆𑀯𑀸𑀬𑀁 ‘‘𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀻’’𑀢𑀺 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀫𑀸 𑀪𑀡𑀻𑀢𑀺 𑀅𑀢𑁆𑀣𑁄’’𑀢𑀺. 𑀉𑀲𑁆𑀲𑀸𑀤𑁂𑀦𑁆𑀢𑁄𑀢𑀺 𑀧𑀜𑁆𑀜𑀸𑀯𑀲𑁂𑀦 𑀉𑀓𑁆𑀓𑀁𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀲𑀸𑀤𑁂𑀦𑁆𑀢𑁄𑀢𑀺 𑀦𑀺𑀩𑁆𑀪𑀘𑁆𑀙𑀦𑁆𑀢𑁄, 𑀦𑀺𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀫𑀳𑀸𑀧𑀜𑁆𑀜𑀪𑀸𑀯𑁂𑀦.

𑀢𑀢𑁆𑀣𑀸𑀢𑀺 𑀣𑁂𑀭𑀲𑁆𑀲 𑀲𑀢𑀺𑀧𑀺 𑀉𑀢𑁆𑀢𑀸𑀦𑀪𑀸𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀅𑀜𑁆𑀜𑁂𑀲𑀁 𑀕𑀫𑁆𑀪𑀻𑀭𑀪𑀸𑀯𑁂. 𑀲𑀼𑀪𑁄𑀚𑀦𑀭𑀲𑀧𑀼𑀝𑁆𑀞𑀲𑁆𑀲𑀸𑀢𑀺 𑀲𑀼𑀦𑁆𑀤𑀭𑁂𑀦 𑀪𑁄𑀚𑀦𑀭𑀲𑁂𑀦 𑀧𑁄𑀲𑀺𑀢𑀲𑁆𑀲. 𑀓𑀢𑀬𑁄𑀕𑀲𑁆𑀲𑀸𑀢𑀺 𑀦𑀺𑀩𑁆𑀩𑀼𑀤𑁆𑀥𑀧𑀬𑁄𑀕𑁂 𑀓𑀢𑀧𑀭𑀺𑀘𑀬𑀲𑁆𑀲. 𑀫𑀮𑁆𑀮𑀧𑀸𑀲𑀸𑀡𑀦𑁆𑀢𑀺 𑀫𑀮𑁆𑀮𑁂𑀳𑀺 𑀫𑀳𑀸𑀩𑀮𑁂𑀳𑁂𑀯 𑀔𑀺𑀧𑀺𑀢𑀩𑁆𑀩𑀧𑀸𑀲𑀸𑀡𑀁. 𑀓𑀼𑀳𑀺𑀁 𑀇𑀫𑀲𑁆𑀲 𑀪𑀸𑀭𑀺𑀬𑀝𑁆𑀞𑀸𑀦𑀦𑁆𑀢𑀺 𑀓𑀲𑁆𑀫𑀺𑀁 𑀧𑀲𑁆𑀲𑁂 𑀇𑀫𑀲𑁆𑀲 𑀧𑀸𑀲𑀸𑀡𑀲𑁆𑀲 𑀕𑀭𑀼𑀢𑀭𑀧𑀤𑁂𑀲𑁄𑀢𑀺 𑀢𑀲𑁆𑀲 𑀲𑀮𑁆𑀮𑀳𑀼𑀓𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀯𑀤𑀢𑀺.

𑀢𑀺𑀫𑀺𑀭𑀧𑀺𑀗𑁆𑀕𑀮𑁂𑀦𑁂𑀯 𑀤𑀻𑀧𑁂𑀦𑁆𑀢𑀺 𑀢𑀲𑁆𑀲 𑀫𑀳𑀸𑀯𑀺𑀧𑁆𑀨𑀸𑀭𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺. 𑀧𑀓𑁆𑀓𑀼𑀣𑀢𑀻𑀢𑀺 𑀧𑀓𑁆𑀓𑀼𑀣𑀦𑁆𑀢𑀁 𑀯𑀺𑀬 𑀧𑀭𑀺𑀯𑀢𑁆𑀢𑀢𑀺 𑀧𑀭𑀺𑀢𑁄 𑀯𑀢𑁆𑀢𑀢𑀺. 𑀮𑀓𑁆𑀔𑀡𑀯𑀘𑀦𑀜𑁆𑀳𑁂𑀢𑀁. 𑀧𑀺𑀝𑁆𑀞𑀺𑀬𑀁 𑀲𑀓𑀮𑀺𑀓𑀅𑀝𑁆𑀞𑀺𑀓𑀸 𑀧𑀺𑀝𑁆𑀞𑀺𑀧𑀢𑁆𑀢𑀁. 𑀓𑀸𑀬𑀽𑀧𑀧𑀦𑁆𑀦𑀲𑁆𑀲𑀸𑀢𑀺 𑀫𑀳𑀢𑀸 𑀓𑀸𑀬𑁂𑀦 𑀉𑀧𑁂𑀢𑀲𑁆𑀲, 𑀫𑀳𑀸𑀓𑀸𑀬𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀺𑀜𑁆𑀙 𑀯𑀝𑁆𑀝𑀻𑀢𑀺 𑀧𑀺𑀜𑁆𑀙 𑀓𑀮𑀸𑀧𑁄. 𑀲𑀼𑀧𑀡𑁆𑀡𑀯𑀸𑀢𑀦𑁆𑀢𑀺 𑀦𑀸𑀕𑀕𑁆𑀕𑀳𑀡𑀸𑀤𑀻𑀲𑀼 𑀧𑀓𑁆𑀔𑀧𑀧𑁆𑀨𑁄𑀝𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀸𑀢𑀁.

‘‘𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀉𑀤𑁆𑀤𑀺𑀝𑁆𑀞𑀓𑀸𑀭𑀡𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀯𑀭𑀺𑀢𑀼𑀁 ‘‘𑀇𑀢𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑁄𑀢𑀺 𑀇𑀢𑁄 𑀪𑀤𑁆𑀤𑀓𑀧𑁆𑀧𑀢𑁄. 𑀲𑀢𑀲𑀳𑀲𑁆𑀲𑀺𑀫𑁂𑀢𑀺 𑀲𑀢𑀲𑀳𑀲𑁆𑀲𑀫𑁂. 𑀳𑀁𑀲𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺 𑀚𑀸𑀢𑀦𑀕𑀭𑀁. 𑀥𑀼𑀭𑀧𑀢𑁆𑀢𑀸𑀦𑀻𑀢𑀺 𑀩𑀸𑀳𑀺𑀭𑀧𑀢𑁆𑀢𑀸𑀦𑀺, 𑀬𑀸𑀦𑀺 𑀤𑀻𑀖𑀢𑀫𑀸𑀦𑀺.

𑀓𑀦𑀺𑀝𑁆𑀞𑀪𑀸𑀢𑀸𑀢𑀺 𑀯𑁂𑀫𑀸𑀢𑀺𑀓𑀪𑀸𑀢𑀸 𑀓𑀦𑀺𑀝𑁆𑀞𑁄 𑀬𑀣𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀦𑀦𑁆𑀤𑀢𑁆𑀣𑁂𑀭𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀳𑁄𑀤𑀭𑀸 𑀪𑀸𑀢𑀭𑁄 𑀦𑀸𑀫 𑀦 𑀳𑁄𑀦𑁆𑀢𑀺. 𑀢𑀢𑁆𑀣 𑀚𑁂𑀝𑁆𑀞𑀸 𑀢𑀸𑀯 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀓𑀦𑀺𑀝𑁆𑀞𑀸𑀦𑀁 𑀧𑀦 𑀅𑀲𑀫𑁆𑀪𑀯𑁄 𑀏𑀯. 𑀪𑁄𑀕𑀦𑁆𑀢𑀺 𑀯𑀺𑀪𑀯𑀁. 𑀉𑀧𑀲𑀦𑁆𑀢𑁄𑀢𑀺 𑀘𑁄𑀭𑀚𑀦𑀺𑀢𑀲𑀗𑁆𑀔𑁄𑀪𑀯𑀽𑀧𑀲𑀫𑁂𑀦 𑀉𑀧𑀲𑀦𑁆𑀢𑁄 𑀚𑀦𑀧𑀤𑁄.

𑀤𑁆𑀯𑁂 𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀲𑀸𑀝𑀓𑀤𑁆𑀯𑀬𑀫𑁂𑀯 𑀅𑀢𑁆𑀢𑀦𑁄 𑀓𑀸𑀬𑀧𑀭𑀺𑀳𑀸𑀭𑀺𑀬𑀁 𑀓𑀢𑁆𑀯𑀸, 𑀇𑀢𑀭𑀁 𑀲𑀩𑁆𑀩𑀲𑀫𑁆𑀪𑀸𑀭𑀁 𑀅𑀢𑁆𑀢𑀦𑀸 𑀫𑁄𑀘𑁂𑀢𑁆𑀯𑀸.

𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀦𑁆𑀢𑀺 𑀅𑀦𑁆𑀢𑁄𑀧𑀓𑁆𑀔𑀺𑀢𑁆𑀢𑀉𑀡𑁆𑀳𑀪𑁄𑀚𑀦𑀢𑁆𑀢𑀸 𑀧𑀢𑁆𑀢𑀲𑁆𑀲 𑀅𑀧𑀭𑀸𑀧𑀭𑀁 𑀳𑀢𑁆𑀣𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀲𑀼𑀔𑁂𑀦 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀁. 𑀉𑀢𑁆𑀢𑀭𑀺𑀲𑀸𑀝𑀓𑀦𑁆𑀢𑀺 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀬𑀁 𑀲𑀸𑀝𑀓𑀁. 𑀏𑀢𑀸𑀦𑀺 𑀧𑀸𑀓𑀝𑀝𑁆𑀞𑀸𑀦𑀸𑀦𑀻𑀢𑀺 𑀏𑀢𑀸𑀦𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀧𑀸𑀓𑀝𑀸𑀦𑀺 𑀩𑀼𑀤𑁆𑀥𑁂 𑀩𑀼𑀤𑁆𑀥𑀲𑀸𑀯𑀓𑁂 𑀘 𑀉𑀤𑁆𑀤𑀺𑀲𑁆𑀲 𑀣𑁂𑀭𑀲𑁆𑀲 𑀧𑀼𑀜𑁆𑀜𑀓𑀭𑀡𑀝𑁆𑀞𑀸𑀦𑀸𑀦𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀦 𑀩𑁄𑀥𑀺𑀲𑀢𑁆𑀢𑀜𑁆𑀘 𑀉𑀤𑁆𑀤𑀺𑀲𑁆𑀲 𑀣𑁂𑀭𑀲𑁆𑀲 𑀧𑀼𑀜𑁆𑀜𑀓𑀭𑀡𑀝𑁆𑀞𑀸𑀦𑀸𑀦𑀺 𑀩𑀳𑀽𑀦𑀺𑀬𑁂𑀯.

𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸𑀢𑀺 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂𑀬𑁂𑀯 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸.

𑀉𑀕𑁆𑀕𑀳𑀦𑀁 𑀧𑀸𑀴𑀺𑀬𑀸 𑀉𑀕𑁆𑀕𑀡𑁆𑀳𑀦𑀁, 𑀲𑀯𑀦𑀁 𑀅𑀢𑁆𑀣𑀲𑀯𑀦𑀁, 𑀧𑀭𑀺𑀧𑀼𑀘𑁆𑀙𑀦𑀁 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀦𑀁, 𑀥𑀸𑀭𑀡𑀁 𑀧𑀸𑀴𑀺𑀬𑀸 𑀧𑀸𑀴𑀺𑀅𑀢𑁆𑀣𑀲𑁆𑀲 𑀘 𑀘𑀺𑀢𑁆𑀢𑁂 𑀞𑀧𑀦𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀇𑀥 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀲𑀩𑁆𑀩𑀲𑁆𑀲𑀧𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀯𑀲𑁂𑀦𑀸𑀢𑀺𑀧𑀺 𑀯𑀝𑁆𑀝𑀢𑀺. 𑀲𑁄𑀢𑀸𑀧𑀦𑁆𑀦𑀸𑀦𑀜𑁆𑀘…𑀧𑁂… 𑀉𑀧𑀝𑁆𑀞𑀸𑀢𑀺 𑀢𑀢𑁆𑀣 𑀲𑀫𑁆𑀫𑁄𑀳𑀯𑀺𑀕𑀫𑁂𑀦 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀲𑁂𑀦 𑀉𑀧𑀝𑁆𑀞𑀸𑀦𑀢𑁄. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑀳 𑀧𑀘𑁆𑀘𑀬𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚 𑀅𑀯𑀩𑁄𑀥𑁄. 𑀘𑀢𑀽𑀳𑀻𑀢𑀺 𑀥𑀫𑁆𑀫𑀕𑀫𑁆𑀪𑀻𑀭𑀸𑀤𑀻𑀳𑀺 𑀘𑀢𑀽𑀳𑀺 𑀕𑀫𑁆𑀪𑀻𑀭𑀢𑀸𑀳𑀺 𑀲𑀩𑁆𑀩𑀸𑀧𑀺 𑀕𑀫𑁆𑀪𑀻𑀭𑀢𑀸.

𑀲𑀸𑀯𑀓𑁂𑀳𑀺 𑀤𑁂𑀲𑀺𑀢𑀸 𑀤𑁂𑀲𑀦𑀸𑀧𑀺 𑀧𑀦 𑀲𑀢𑁆𑀣𑀼 𑀏𑀯 𑀤𑁂𑀲𑀦𑀸𑀢𑀺 𑀆𑀳 ‘‘𑀫𑀬𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸’’𑀢𑀺. ‘‘𑀲𑁂𑀓𑁆𑀔𑁂𑀦 𑀦𑀸𑀫 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀧𑀝𑀺𑀯𑀺𑀤𑁆𑀥𑀁 𑀦 𑀳𑁄𑀢𑀻’’𑀢𑀺 𑀦 𑀢𑀲𑁆𑀲 𑀕𑀫𑁆𑀪𑀻𑀭𑀢𑀸𑀢𑀺 𑀢𑀲𑁆𑀲 𑀕𑀫𑁆𑀪𑀻𑀭𑀲𑁆𑀲 𑀉𑀧𑀸𑀤𑀸𑀦𑀲𑁆𑀲 𑀕𑀫𑁆𑀪𑀻𑀭𑀢𑀸 𑀯𑀺𑀬 𑀲𑀼𑀝𑁆𑀞𑀼 𑀤𑀺𑀝𑁆𑀞𑀸 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀆𑀳 ‘‘𑀇𑀤𑀁 𑀦𑀺𑀩𑁆𑀩𑀸𑀦𑀫𑁂𑀯 𑀕𑀫𑁆𑀪𑀻𑀭𑀁, 𑀧𑀘𑁆𑀘𑀬𑀸𑀓𑀸𑀭𑁄 𑀧𑀦 𑀉𑀢𑁆𑀢𑀸𑀦𑀓𑁄 𑀚𑀸𑀢𑁄’’𑀢𑀺. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀲𑀩𑁆𑀩𑁂𑀧𑀺 𑀅𑀲𑁂𑀓𑁆𑀔𑀸 𑀲𑀩𑁆𑀩𑀲𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀦𑀺𑀧𑁆𑀧𑀤𑁂𑀲𑀢𑁆𑀢𑀸, 𑀧𑀘𑁆𑀘𑀬𑀸𑀓𑀸𑀭𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀬𑁂𑀯 𑀅𑀦𑀯𑀲𑁂𑀲𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀦 𑀇𑀢𑀭𑁂. 𑀢𑀲𑁆𑀫𑀸 𑀧𑀘𑁆𑀘𑀬𑀯𑀲𑁂𑀦 ‘‘𑀇𑀤𑀁 𑀅𑀧𑀭𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁 𑀣𑁂𑀭𑀁 𑀅𑀧𑀲𑀸𑀤𑁂𑀦𑁆𑀢𑁂𑀦. 𑀢𑀫𑁂𑀯 𑀳𑀺𑀲𑁆𑀲 𑀅𑀦𑀯𑀲𑁂𑀲𑀢𑁄 𑀧𑀝𑀺𑀯𑁂𑀥𑀸𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀣 𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀢𑀺𑀧𑀺 𑀥𑀫𑁆𑀫𑀢𑁄 𑀪𑁂𑀤𑁂 𑀲𑀁𑀬𑁄𑀚𑀦𑀢𑁆𑀣𑀅𑀦𑀼𑀲𑀬𑀢𑁆𑀣𑀯𑀲𑁂𑀦 𑀧𑀦 𑀢𑁂𑀲𑀁 𑀮𑀩𑁆𑀪𑀫𑀸𑀦𑀪𑁂𑀤𑀁 𑀕𑀳𑁂𑀢𑁆𑀯𑀸 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁄 𑀳𑀺 𑀢𑁂𑀲𑀁 𑀩𑀦𑁆𑀥𑀦𑀢𑁆𑀣𑁄, 𑀅𑀜𑁆𑀜𑁄 𑀣𑀸𑀫𑀕𑀫𑀦𑀝𑁆𑀞𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀇𑀢𑀺 𑀇𑀫𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀢𑀣𑀸𑀭𑀽𑀧𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀁 𑀅𑀪𑀸𑀯𑀬𑀢𑁄𑀯 𑀅𑀦𑀼𑀢𑁆𑀢𑀸𑀦𑀫𑁂𑀯 𑀥𑀫𑁆𑀫𑀁 𑀉𑀢𑁆𑀢𑀸𑀦𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀢𑁆𑀢𑀸𑀭𑀺 𑀅𑀝𑁆𑀞 𑀲𑁄𑀴𑀲 𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻𑀢𑀺 𑀇𑀤𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀦𑁆𑀢𑀸𑀦𑁂 𑀩𑁄𑀥𑀺𑀧𑀭𑀺𑀧𑀸𑀘𑀓𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀫𑀚𑁆𑀛𑀺𑀫𑀫𑀼𑀤𑀼𑀪𑀸𑀯𑀲𑀺𑀤𑁆𑀥𑀓𑀸𑀮𑀯𑀺𑀲𑁂𑀲𑀤𑀲𑁆𑀲𑀦𑀁, 𑀢𑀜𑁆𑀘 𑀔𑁄 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀤𑀦𑁆𑀢𑀺. 𑀏𑀢𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀩𑀼𑀤𑁆𑀥𑀲𑀸𑀯𑀓𑀅𑀕𑁆𑀕𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑁂𑀳𑀺. 𑀧𑀘𑁆𑀘𑀦𑀻𑀓𑀦𑁆𑀢𑀺 𑀧𑀝𑀺𑀓𑁆𑀓𑀽𑀮𑀁 𑀯𑀺𑀭𑀼𑀤𑁆𑀥𑀁. 𑀲𑀩𑁆𑀩𑀣𑀸 𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸𑀥𑀺𑀕𑀫𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀬𑀸𑀓𑀸𑀭𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲𑁂𑀯𑀸’’𑀢𑀺. 𑀦𑀯𑀳𑀺 𑀆𑀓𑀸𑀭𑁂𑀳𑀻𑀢𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀦𑀯𑀳𑀺 𑀧𑀘𑁆𑀘𑀬𑀸𑀓𑀸𑀭𑁂𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁪𑁫) 𑁋

‘‘𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀘 𑀧𑀯𑀢𑁆𑀢𑀝𑁆𑀞𑀺𑀢𑀺 𑀘 𑀦𑀺𑀫𑀺𑀢𑁆𑀢𑀝𑁆𑀞𑀺𑀢𑀺 𑀘 𑀆𑀬𑀽𑀳𑀦𑀝𑁆𑀞𑀺𑀢𑀺 𑀘 𑀲𑀁𑀬𑁄𑀕𑀝𑁆𑀞𑀺𑀢𑀺 𑀘 𑀧𑀮𑀺𑀩𑁄𑀥𑀝𑁆𑀞𑀺𑀢𑀺 𑀘 𑀲𑀫𑀼𑀤𑀬𑀝𑁆𑀞𑀺𑀢𑀺 𑀘 𑀳𑁂𑀢𑀼𑀝𑁆𑀞𑀺𑀢𑀺 𑀘 𑀧𑀘𑁆𑀘𑀬𑀝𑁆𑀞𑀺𑀢𑀺 𑀘, 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀦𑀯𑀳𑀸𑀓𑀸𑀭𑁂𑀳𑀻𑀢𑀺 𑀦𑀯𑀳𑀺 𑀧𑀘𑁆𑀘𑀬𑀪𑀸𑀯𑀽𑀧𑀕𑀫𑀦𑁂𑀳𑀺 𑀆𑀓𑀸𑀭𑁂𑀳𑀺. 𑀉𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀉𑀧𑁆𑀧𑀸𑀤𑁄, 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑁄. 𑀲𑀢𑀺 𑀘 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀲𑀗𑁆𑀔𑀸𑀭𑀸 𑀧𑀯𑀢𑁆𑀢𑀦𑁆𑀢𑀺 𑀘 𑀦𑀺𑀫𑀺𑀬𑀦𑁆𑀢𑀺 𑀘. 𑀬𑀣𑀸 𑀘 𑀪𑀯𑀸𑀤𑀻𑀲𑀼 𑀔𑀺𑀧𑀦𑁆𑀢𑀺, 𑀏𑀯𑀁 𑀢𑁂𑀲𑀁 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀆𑀬𑀽𑀳𑀦𑁆𑀢𑀺 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀖𑀝𑁂𑀦𑁆𑀢𑀺 𑀲𑀁𑀬𑀼𑀚𑁆𑀚𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑁂𑀦. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀬𑀁 𑀉𑀧𑁆𑀧𑀦𑁆𑀦𑀸, 𑀢𑀁 𑀧𑀮𑀺𑀩𑀼𑀦𑁆𑀥𑀦𑁆𑀢𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀉𑀤𑀬𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀳𑀺𑀦𑁄𑀢𑀺 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀪𑀸𑀯𑀁 𑀉𑀧𑀕𑀘𑁆𑀙𑀢𑀺. 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀁 𑀲𑀗𑁆𑀔𑀸𑀭𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀪𑀸𑀯𑀽𑀧𑀕𑀫𑀦𑀯𑀺𑀲𑁂𑀲𑀸 𑀉𑀧𑁆𑀧𑀸𑀤𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀉𑀧𑁆𑀧𑀸𑀤𑀝𑁆𑀞𑀺𑀢𑀻𑀢𑀺 𑀘 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀞𑀺𑀢𑀺, 𑀓𑀸𑀭𑀡𑀁. 𑀉𑀧𑁆𑀧𑀸𑀤𑁄 𑀏𑀯 𑀞𑀺𑀢𑀺 𑀉𑀧𑁆𑀧𑀸𑀤𑀞𑀺𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀇𑀤𑀜𑁆𑀘 𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑀁 𑀬𑀣𑀸 𑀧𑀼𑀭𑀺𑀫𑁂𑀳𑀺 𑀫𑀳𑀸𑀩𑁄𑀥𑀺𑀫𑀽𑀮𑁂 𑀧𑀯𑀢𑁆𑀢𑀺𑀢𑀁, 𑀢𑀣𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑀸𑀧𑀺 𑀧𑀯𑀢𑁆𑀢𑀺𑀢𑀦𑁆𑀢𑀺 𑀅𑀘𑁆𑀙𑀭𑀺𑀬𑀯𑁂𑀕𑀸𑀪𑀺𑀳𑀢𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀫𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀏𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀜𑁆𑀜𑀺𑀢𑀲𑁆𑀲 𑀥𑀫𑁆𑀫𑀲𑁆𑀲. 𑀲𑁄 𑀧𑀦 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀳𑁂𑀢𑀼𑀧𑁆𑀧𑀪𑀯𑀸𑀦𑀁 𑀳𑁂𑀢𑀼. 𑀢𑁂𑀦𑀸𑀳 ‘‘𑀏𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲𑀸’’𑀢𑀺. 𑀚𑀸𑀢𑀺𑀆𑀤𑀻𑀦𑀁 𑀚𑀭𑀸𑀫𑀭𑀡𑀧𑀘𑁆𑀘𑀬𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀢𑀲𑁆𑀲 𑀘 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀦 𑀧𑀞𑀫𑀸𑀪𑀺𑀦𑀺𑀯𑁂𑀲𑀫𑀢𑁆𑀢𑁂𑀦 𑀳𑁄𑀢𑀺, 𑀅𑀣 𑀔𑁄 𑀢𑀢𑁆𑀣 𑀅𑀧𑀭𑀸𑀧𑀭𑀁 𑀜𑀸𑀡𑀼𑀧𑁆𑀧𑀢𑁆𑀢𑀺𑀲𑀜𑁆𑀜𑀺𑀢𑁂𑀦 𑀅𑀦𑀼 𑀅𑀦𑀼 𑀩𑀼𑀚𑁆𑀛𑀦𑁂𑀦. 𑀢𑀤𑀼𑀪𑀬𑀪𑀸𑀯𑀁 𑀧𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀜𑀸𑀢𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀦𑀦𑀼𑀩𑀼𑀚𑁆𑀛𑀦𑀸’’𑀢𑀺 𑀆𑀳. 𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀧𑀚𑀳𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀧𑀝𑀺𑀯𑀺𑀚𑁆𑀛𑀢𑀺 𑀏𑀯 𑀦𑀸𑀫 𑀳𑁄𑀢𑀺 𑀧𑀝𑀺𑀧𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑁂𑀦 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀢𑁆𑀢𑀺𑀢𑁄, 𑀢𑀤𑀥𑀺𑀝𑁆𑀞𑀸𑀦𑀪𑀽𑀢𑀸 𑀘 𑀢𑀻𑀭𑀡𑀧𑀭𑀺𑀜𑁆𑀜𑀸 𑀅𑀭𑀺𑀬𑀫𑀕𑁆𑀕𑁄 𑀘 𑀧𑀭𑀺𑀜𑁆𑀜𑀸𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀢𑀻𑀭𑀡𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀲𑀗𑁆𑀕𑀳𑁄 𑀘𑀸𑀢𑀺 𑀢𑀤𑀼𑀪𑀬𑀧𑀝𑀺𑀯𑁂𑀥𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀻𑀭𑀡𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀸’’𑀢𑀺 𑀆𑀳. 𑀢𑀦𑁆𑀢𑀁 𑀯𑀼𑀘𑁆𑀘𑀢𑀺 𑀧𑀝𑀯𑀻𑀦𑀦𑀢𑁆𑀣𑀁 𑀢𑀦𑁆𑀢𑀯𑀸𑀬𑁂𑀢𑀺 𑀢𑀦𑁆𑀢𑀁 𑀆𑀯𑀜𑁆𑀙𑀺𑀢𑁆𑀯𑀸 𑀧𑀲𑀸𑀭𑀺𑀢𑀲𑀼𑀢𑁆𑀢𑀯𑀝𑁆𑀝𑀺𑀢𑀁 𑀦𑀻𑀬𑀢𑀻𑀢𑀺 𑀓𑀢𑁆𑀯𑀸, 𑀢𑀁 𑀧𑀦 𑀢𑀦𑁆𑀢𑀸𑀓𑀼𑀮𑀢𑀸𑀬 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀆𑀓𑀼𑀮𑀫𑁂𑀯 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀢𑀦𑁆𑀢𑀁 𑀯𑀺𑀬 𑀆𑀓𑀼𑀮𑀚𑀸𑀢𑀸’’𑀢𑀺. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀸𑀦𑁂𑀢𑀼𑀦𑁆𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀫𑀁 𑀓𑀢𑁆𑀯𑀸 𑀆𑀦𑁂𑀢𑀼𑀁, 𑀅𑀯𑀺𑀲𑀫𑀁 𑀉𑀚𑀼𑀁 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀫𑁂𑀯 𑀯𑀸 𑀆𑀓𑀼𑀮𑀁 𑀢𑀦𑁆𑀢𑀸𑀓𑀼𑀮𑀁, 𑀢𑀦𑁆𑀢𑀸𑀓𑀼𑀮𑀁 𑀯𑀺𑀬 𑀚𑀸𑀢𑀸 𑀪𑀽𑀢𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸. 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀅𑀦𑁆𑀢𑀤𑁆𑀯𑀬𑀧𑀓𑁆𑀔𑀦𑁆𑀤𑁂𑀦 𑀧𑀘𑁆𑀘𑀬𑀸𑀓𑀸𑀭𑁂 𑀔𑀮𑀺𑀢𑁆𑀯𑀸 𑀆𑀓𑀼𑀮𑀩𑁆𑀬𑀸𑀓𑀼𑀮𑀸 𑀳𑁄𑀦𑁆𑀢𑀺, 𑀢𑁂𑀦𑁂𑀯 𑀅𑀦𑁆𑀢𑀤𑁆𑀯𑀬𑀧𑀓𑁆𑀔𑀦𑁆𑀤𑁂𑀦 𑀢𑀁𑀢𑀁𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦 𑀧𑀭𑀺𑀩𑁆𑀪𑀫𑀦𑁆𑀢𑀸 𑀉𑀚𑀼𑀓𑀁 𑀥𑀫𑁆𑀫𑀝𑁆𑀞𑀺𑀢𑀺𑀢𑀦𑁆𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀚𑀸𑀦𑀦𑁆𑀢𑀺. 𑀢𑁂𑀦𑀸𑀳 ‘‘𑀦 𑀲𑀓𑁆𑀓𑁄𑀦𑁆𑀢𑀺 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼’’𑀦𑁆𑀢𑀺. 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑁂𑀢𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀫𑀳𑀸𑀩𑁄𑀥𑀺𑀲𑀢𑁆𑀢𑁂. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦, 𑀧𑀭𑁄𑀧𑀤𑁂𑀲𑁂𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣 𑀕𑀼𑀴𑀓𑀚𑀸𑀢𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀚𑀸𑀢𑀕𑀼𑀴𑀓𑀁 𑀧𑀺𑀡𑁆𑀟𑀺𑀲𑀼𑀢𑁆𑀢𑀁. 𑀢𑀢𑁄 𑀏𑀯 𑀕𑀡𑁆𑀞𑀺𑀩𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀬𑁂𑀲𑀼 𑀧𑀓𑁆𑀔𑀮𑀺𑀢𑁆𑀯𑀸𑀢𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀸𑀤𑀺𑀲𑀪𑀸𑀯𑁂𑀲𑀼 𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀸𑀤𑀺𑀪𑀸𑀯𑀯𑀲𑁂𑀦 𑀧𑀓𑁆𑀔𑀮𑀺𑀢𑁆𑀯𑀸. 𑀧𑀘𑁆𑀘𑀬𑁂 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀢𑀲𑁆𑀲𑁂𑀯 𑀦𑀺𑀘𑁆𑀘𑀸𑀤𑀺𑀕𑀸𑀳𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀦𑀢𑁄 𑀧𑀘𑁆𑀘𑀬𑀥𑀫𑁆𑀫𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀯𑀲𑁂𑀦 𑀕𑀡𑁆𑀞𑀺𑀓𑀚𑀸𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀤𑁆𑀯𑀸𑀲𑀝𑁆𑀞𑀺…𑀧𑁂… 𑀕𑀡𑁆𑀞𑀺𑀩𑀤𑁆𑀥𑀸’’𑀢𑀺.

𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀆𑀤𑀺 𑀤𑀺𑀝𑁆𑀞𑀺𑀬𑁄 𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸, 𑀯𑀺𑀦𑀦𑀢𑁄 𑀓𑀼𑀮𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀲𑁆𑀲 𑀢𑀦𑁆𑀢𑀯𑀸𑀬𑀲𑁆𑀲 𑀕𑀡𑁆𑀞𑀺𑀓𑀁 𑀦𑀸𑀫 𑀆𑀓𑀼𑀮𑀪𑀸𑀯𑁂𑀦 𑀅𑀕𑁆𑀕𑀢𑁄 𑀯𑀸 𑀫𑀽𑀮𑀢𑁄 𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀬𑀯𑀁 𑀔𑀮𑀺𑀢𑀩𑀦𑁆𑀥𑀲𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀼𑀮𑀸𑀕𑀡𑁆𑀞𑀺𑀓𑀁 𑀯𑀼𑀘𑁆𑀘𑀢𑀺 𑀧𑁂𑀲𑀓𑀸𑀭𑀓𑀜𑁆𑀚𑀺𑀬𑀲𑀼𑀢𑁆𑀢’’𑀦𑁆𑀢𑀺. 𑀲𑀓𑀼𑀡𑀺𑀓𑀸𑀢𑀺 𑀯𑀝𑁆𑀝𑀘𑀸𑀝𑀓𑀲𑀓𑀼𑀡𑀺𑀓𑀸. 𑀲𑀸 𑀳𑀺 𑀭𑀼𑀓𑁆𑀔𑀲𑀸𑀔𑀸𑀲𑀼 𑀑𑀮𑀫𑁆𑀩𑀦𑀓𑀼𑀮𑀸𑀯𑀓𑀸 𑀳𑁄𑀢𑀺. 𑀢𑀜𑁆𑀳𑀺 𑀲𑀸 𑀓𑀼𑀮𑀸𑀯𑀓𑀁 𑀢𑀢𑁄 𑀢𑀢𑁄 𑀢𑀺𑀡𑀳𑀻𑀭𑀸𑀤𑀺𑀓𑁂 𑀆𑀦𑁂𑀢𑁆𑀯𑀸 𑀢𑀣𑀸 𑀢𑀣𑀸 𑀯𑀺𑀦𑀦𑁆𑀥𑀢𑀺, 𑀬𑀣𑀸 𑀢𑁂𑀲𑀁 𑀧𑁂𑀲𑀓𑀸𑀭𑀓𑀜𑁆𑀚𑀺𑀬𑀲𑀼𑀢𑁆𑀢𑀁 𑀯𑀺𑀬 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁, 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀯𑀺𑀯𑁂𑀘𑁂𑀢𑀼𑀁 𑀯𑀸 𑀦 𑀲𑀓𑁆𑀓𑀸. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀢𑀤𑀼𑀪𑀬𑀫𑁆𑀧𑀻𑀢𑀺 𑀓𑀼𑀮𑀸𑀕𑀡𑁆𑀞𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀓𑀜𑁆𑀚𑀺𑀬𑀲𑀼𑀢𑁆𑀢𑀁 𑀓𑀼𑀮𑀸𑀯𑀓𑀜𑁆𑀘. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀏𑀯𑀫𑁂𑀯 𑀲𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀓𑀸𑀫𑀁 𑀫𑀼𑀜𑁆𑀚𑀧𑀩𑁆𑀩𑀚𑀢𑀺𑀡𑀸𑀦𑀺 𑀬𑀣𑀸𑀚𑀸𑀢𑀸𑀦𑀺𑀧𑀺 𑀤𑀻𑀖𑀪𑀸𑀯𑁂𑀦 𑀧𑀢𑀺𑀢𑁆𑀯𑀸 𑀅𑀭𑀜𑁆𑀜𑀝𑁆𑀞𑀸𑀦𑁂 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀆𑀓𑀼𑀮𑀸𑀦𑀺 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀦𑀺 𑀧𑀦 𑀢𑀣𑀸 𑀤𑀼𑀩𑁆𑀩𑀺𑀯𑁂𑀘𑀺𑀬𑀸𑀦𑀺 𑀬𑀣𑀸 𑀭𑀚𑁆𑀚𑀼𑀪𑀽𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀧𑀸𑀬𑁄𑀢𑀺 𑀅𑀬𑁂𑀦 𑀲𑀼𑀔𑁂𑀦, 𑀲𑀼𑀔𑀳𑁂𑀢𑀼𑀦𑀸 𑀯𑀸 𑀯𑀺𑀭𑀳𑀺𑀢𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺𑀪𑀸𑀯𑀢𑁄𑀢𑀺 𑀅𑀧𑀸𑀬𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀲𑀼𑀔𑀲𑀫𑀼𑀲𑁆𑀲𑀬𑀢𑁄𑀢𑀺 ‘‘𑀅𑀩𑁆𑀪𑀼𑀤𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸’’𑀢𑀺 𑀯𑀺𑀭𑀽𑀧𑀁 𑀦𑀺𑀧𑀢𑀺𑀢𑀢𑁆𑀢𑀸 𑀬𑀣𑀸 𑀢𑁂𑀦𑀢𑁆𑀢𑀪𑀸𑀯𑁂𑀦 𑀲𑀼𑀔𑀲𑀫𑀼𑀲𑁆𑀲𑀬𑁄 𑀦 𑀳𑁄𑀢𑀺, 𑀏𑀯𑀁 𑀦𑀺𑀧𑀢𑀺𑀢𑀢𑁆𑀢𑀸. 𑀇𑀢𑀭𑁄𑀢𑀺 𑀲𑀁𑀲𑀸𑀭𑁄 𑀦𑀦𑀼 ‘‘𑀅𑀧𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄𑀧𑀺 𑀲𑀁𑀲𑀸𑀭𑁄 𑀏𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀦𑀺𑀭𑀬𑀸𑀤𑀻𑀦𑀁 𑀧𑀦 𑀅𑀥𑀺𑀫𑀢𑁆𑀢𑀤𑀼𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀧𑀸𑀬𑀸𑀤𑀺𑀕𑁆𑀕𑀳𑀡𑀁 𑀕𑁄𑀩𑀮𑀺𑀩𑀤𑁆𑀤𑀜𑀸𑀬𑁂𑀦 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀻𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑁂𑀦 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺. 𑀅𑀩𑁆𑀪𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸𑀢𑀺 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀫𑀸𑀦𑀸.

𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 ‘‘𑀅𑀧𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀅𑀧𑀸𑀬𑀤𑀼𑀓𑁆𑀔𑀜𑁆𑀘𑁂𑀯 𑀯𑀝𑁆𑀝𑀤𑀼𑀓𑁆𑀔𑀜𑁆𑀘. 𑀫𑀳𑀸𑀲𑀫𑀼𑀤𑁆𑀤𑁂 𑀯𑀸𑀢𑀓𑁆𑀔𑀺𑀢𑁆𑀢𑀸 𑀦𑀸𑀯𑀸 𑀯𑀺𑀬𑀸𑀢𑀺 𑀇𑀤𑀁 𑀧𑀭𑀺𑀩𑁆𑀪𑀫𑀦𑀝𑁆𑀞𑀸𑀦𑀲𑁆𑀲 𑀫𑀳𑀦𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀧𑀭𑀺𑀩𑁆𑀪𑀫𑀦𑀲𑁆𑀲 𑀅𑀦𑀯𑀢𑁆𑀢𑀺𑀢𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑁆𑀔𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.